སྒྲུབ་ཐབས་རིན་ཆེན་འབྱུང་གནས་ལས་དཀྱིལ་འཁོར་གྱི་གཙོ་བོ་རྣམས་ཀྱི་སྒྲུབ་ཐབས་བཤད་པའི་སྐབས་ཏེ་བཞི་པ།
གསང་བ་འདུས་པ་ལས་འབྱུང་བ་འཇམ་པའི་རྡོ་རྗེའི་སྒྲུབ་ཐབས།
ཨོཾ་སྭཱ་སྟི། འཇམ་པའི་རྡོ་རྗེ་ལ་འདུད་དེ། །དཔལ་ལྡན་འདུས་པའི་རྗེས་འབྲང་བ། །ཉུང་ངུར་མོས་པ་རྣམས་ཀྱི་ངོར། །སྒྲུབ་ཐབས་རིམ་པ་མདོ་ཙམ་བྲི། །སྐྱབས་སེམས་སྔོན་དུ་སོང་ནས། རང་གི་སྙིང་གའི་མཾ་ལས་འོད་ཟེར་འཕྲོས། བླ་མ་དང་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་སྤྱན་དྲངས། ན་མོ་གུ་རུ་མཎྜ་ལེ་བྷྱཿ ཞེས་ཕྱག་བྱ། ཨརྒྷཾ་སོགས་ཀྱིས་མཆོད། དཀོན་མཆོག་གསུམ་ལ་བདག་སྐྱབས་སོགས་ཤླཽ་ཀ་གཅིག་གིས་རྒྱུན་བཤགས་བྱ། རྣམ་ཐར་སྒོ་གསུམ་དྲན་བཞིན་པས། ཤཱུ་ནྱ་ཏའི་སྔགས་བརྗོད། ནམ་མཁར་ཨོཾ་ཨཱཿཧཱུཾ་ཧོཿ དམར་པོ་གཉིས་ཀྱི་མཐའ་བརྟེན་པ་བར་དོའི་རྣམ་ཤེས་སོ། །འོག་ཏུ་རྡོ་རྗེའི་རྭ་གུར་གྱི་དབུས་སུ། སྣ་ཚོགས་ཆུ་སྐྱེས་ལ་གནས་པའི་སྣ་ཚོགས་
རྡོ་རྗེའི་ལྟེ་བར་གཞལ་ཡས་ཁང༌། དེའི་ནང་དུ་པད་ཟླའི་གདན་ལ་སྐད་ཅིག་གིས་རྡོ་རྗེ་སེམས་དཔའ་དཀར་པོ་དཀར་ནག་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་ཀྱིས་རྡོ་རྗེ་དང༌། རལ་གྲི། གཡོན་གཉིས་ཀྱིས་པདྨ་དང་འཁོར་ལོ་འཛིན་པའོ། །འདི་ནི་ཤིན་ཏུ་བསྡུས་པ་ལ་དགའ་བའི་དབང་དུ་བྱས་ཀྱི། ཤེས་ཤིང་སྤྲོ་ན་ལུགས་འདིའི་མངོན་བྱང་ལྔ་བསྐྱེད་ཉིད་བསྒོམས་ན་ངེས་པར་ལེགས་པ་ཡིན་ནོ། །ཡབ་ཡུམ་རྗེས་སུ་ཆགས་པ་སྙོམས་པར་ཞུགས་པས། ནམ་མཁའི་ཡི་གེ་ལྔ་པོ་ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད། ཡུམ་གྱི་མཁར་བབས། ཡི་གེ་ལྔའི་འོད་ཟེར་གྱིས་ཡབ་ཡུམ་བྱང་ཆུབ་ཀྱི་སེམས་ཀྱི་ངོ་བོར་ཞུ། ཐིག་ལེ་ལས་ལྷ་མོ་བཞི་སྤྲོས། སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བ་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆི་ཞེ་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །རྡོ་རྗེའི་སྐུ་ཁྱོད་བཀའི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རྗེས་སུ་ཕན་འདོད་པ། །མགོན་པོ་གལ་ཏེ་དེ་རིང་བདག་ནི་གསོན་པར་མཆི་ཞེ་ན། །འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། ཁྱོད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ༴ རབ་དགའི་
སྤྱོད་པ་ཀུན་ཏུ་བཟང་པོས་བདག་ལ༴ ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་པ། །མགོན་པོ༴ ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཅེས་བསྐུལ་ནས་ཐིམ་པ་ལས། ཐིག་ལེ་དེ་ཉིད་མཾ་ལས་རལ་གྲི་མཾ་གྱིས་མཚན་པར་གྱུར། དེ་ལས་དཀྱིལ་འཁོར་སྤྲོས། སེམས་ཅན་གྱི་དོན་བྱས། །སངས་རྒྱས་ཐམས་ཅད་ཚུར་འདུས། ཐིམ་པ་ཡོངས་སུ་གྱུར་པ་ལས། རང་ཉིད་འཇམ་པའི་རྡོ་རྗེ་ཞལ་གསུམ་ཕྱག་དྲུག་པ། རྩ་ཞལ་དང་སྐུ་ལུས་གུར་གུམ་གཞོན་ནུ་ལྟར་དམར་སེར། གཡས་སྔོ། གཡོན་དཀར་བའི་ཞལ། ཕྱག་དང་པོ་གཉིས་རང་སྣང་གི་ཡུམ་ལ་འཁྱུད་པ། ལྷག་མ་གཡས་གཉིས་རལ་གྲི་དང་མདའ། གཡོན་གཉིས་ཨུཏྤལ་སྔོན་པོའི་སྡོང་བུ་དང༌། གཞུ་འཛིན་པ། པད་ཟླའི་གདན་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། རལ་པའི་ཟུར་ཕུད་ལྔ་དང་ལྡན་ཞིང༌། ཉི་མའི་འོད་ཟེར་འཕྲོ་བ། དར་དང་རིན་པོ་ཆེས་སྤྲས་པའོ། །ཡུམ་ཡང་ཡབ་དང་མཚུངས་པ་ལས། ལྷ་མོའི་ཆ་བྱད་རྫོགས་ཤིང༌། པདྨའི་སྐྱིལ་ཀྲུང་གིས་འཁྱུད་པ། ཟླ་འོད་འཕྲོ་བའོ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། མིག་ཏུ་ཀྵ་ལས་ས་སྙིང༌། རྣ་བར་ཛྲིཾ་ལས་ཕྱག་རྡོར། སྣར་ཁཾ་ལས་ནམ་སྙིང༌། ལྕེར་གཾ་ལས་སྤྱན་རས་གཟིགས། དཔྲལ་བར་སྐཾ་ལས་སྒྲིབ་སེལ། ལྟེ་བར་སཾ་ལས་ཀུན་བཟང༌། དཔྲལ་བར་ཨོཾ་ལས་སྐུ་རྡོ་རྗེ། མགྲིན་པར་ཨཱཿལས་གསུང་རྡོ་རྗེ། སྙིང་གར་ཧཱུཾ་
ལས་ཐུགས་རྡོ་རྗེ། དེ་རྣམས་ལས་འོད་འཕྲོས། སངས་རྒྱས་ཐམས་ཅད་སྐུ་གསུང་ཐུགས་རྡོ་རྗེའི་རྣམ་པར་སྤྱན་དྲངས། གནས་གསུམ་གྱི་རྡོ་རྗེ་གསུམ་ལ་ཐིམ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ༴ ཝཀ༴ ཨོཾ༴ ཙིཏྟ༴ ཧཾ། རང་གི་སྙིང་གར་རང་དང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་རལ་གྲིའི་ཡུ་བར་མཾ་གྱིས་མཚན་པ་ནི་ཏིང་ངེ་འཛིན་སེམས་དཔའོ། །དེའི་འོད་ཟེར་གྱིས་དབང་གི་ལྷ་སྤྱན་དྲངས། བྱང་ཆུབ་རྡོ་རྗེ་སངས་རྒྱས་ལ། །སོགས་ཀྱིས་གསོལ་བ་བཏབ། དབང་བསྐུར་རྡོ་རྗེ་ཆེན་པོ་ནི། སོགས་ཀྱིས་དབང་བསྐུར། མི་བསྐྱོད་པས་དབུ་བརྒྱན། དམིགས་པ་གསལ་ན་སྐྱེ་མཆེད་དང་སྐུ་གསུང་ཐུགས་ཀྱི་ལྷ་རྣམས་ལའང་རང་རང་གི་རིགས་བདག་གིས་དབུ་བརྒྱན་པར་མོས། ཡུམ་གྱི་སྤྱི་བོར་ཨོཾ་དཀར་པོ། སྙིང་གར་ཧཱུཾ་སྔོན་པོ། ལྟེ་བར་སྭཱ་སེར་པོ། གསང་བ་ཨཱཿདམར་པོ། བརླ་གཉིས་ལ་ཧ་ལྗང་ཁུ་རྣམས་དེ་བཞིན་གཤེགས་པ་ལྔའི་ངོ་བོ་གྱུར། དེ་རྣམས་ཀྱི་འོད་ཟེར་གྱིས་ཡུམ་གྱི་སྐུ་གང༌། ཧཱུཾ་ལས་བྱུང་བའི་རྡོ་རྗེ་དང༌། ཨ་ལས་བྱུང་བའི་པདྨ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཨཱཏྨ་ཀོ྅ཧཾ། ཞེས་རྗེས་སུ་ཆགས་པས་སྙོམས་པར་ཞུགས། ཡང་སངས་རྒྱས་ཐམས་ཅད་འདོད་པའི་ཡོན་ཏན་དང་བཅས་པ་ཡབ་ཀྱི་སྐུ་ལ་བཅུག མཁའ་ནང་དུ་སྤྲོས་པ་ལྷ་མོ་བཅུར་གྱུར། ཕྱིར་སྤྲོས་ནས་བདག་ཉིད་ལ་མཆོད་པར་གྱུར། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། མཆོག་སྦྱིན་རྡོ་རྗེ་མཆོད་ཁྱོད་འདུད། །སོགས་འདུད་ཉི་ཤུ་རྩ་གཅིག་གིས་བསྟོད། ནང་མཆོད། ཨོཾ་
ཨཱ་བིགྷ་ནནྟཱ་ཀྲྀ་ཧཱུཾ་གིས་བསངས། སྭ་བྷཱ་ཝས་སྦྱངས། ཨ་ལས་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ། བི་ར་མ་མུ་ཤུ་ལས་བདུད་རྩི་ལྔ། གོ་ཀུ་ད་ཧ་ན་ལས་ཤ་ལྔ་རྣམས་བྷྲུཾ་ཨཾ་ཛྲིཾ་ཁཾ་ཧཱུཾ་གིས་མཚན་པ། སྦྱངས་རྟོགས་སྦར་བས་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་སླར་ཡང་འབྲུ་གསུམ་གྱིས་མྱངས་ཏེ། ཕྱི་ནང་གི་ལྷ་རྣམས་མཉེས་པར་བསམ། དེ་ནས་བཟླས་པའི་དམིགས་པ་གསལ་བཏབ་ལ། ཨོཾ་ཨཱ་མཾ་ཧཱུཾ་ཞེས་ཅི་ནུས་སུ་བཟླས། མཐར་ལྷ་སྐུ་འོད་གསལ་དུ་བསྡུས་ཏེ་ཅུང་ཟད་མཉམ་པར་གཞག དེ་ལས་ཕྱག་གཉིས་པའི་སྐུར་ལངས། གནས་གསུམ་དང་སྐྱེ་མཆེད་བྱིན་གྱིས་བརླབ་པ་དྲན་ཙམ་བྱས་ཏེ། དགེ་བ་བསྔོ། གཏོར་མ་འབུལ་བར་འདོད་ན། ནང་མཆོད་ལྟར་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། འཇམ་པའི་རྡོ་རྗེ་འཁོར་དང་བཅས་པ་བཛྲ་ས་མཱ་ཛཿ ཨརྒྷཾ་གྱིས་མཆོད་ཡོན་ཕུལ། ཨོཾ་ཨཱཿམཉྫུ་བཛྲ་པཉྩ་ཨ་མྲྀ་ཏ་ཧཱུཾ་ཞེས་ལན་ལྔའམ་བདུན་གྱིས་ཕུལ། ཨ་ཀཱ་རོ་ལན་གསུམ་གྱིས་ཕྱོགས་སྐྱོང་སོགས་ལ་ཕུལ་བར་མོས། ཉེར་སྤྱོད་ལྔས་མཆོད། གོང་བཞིན་བསྟོད། འདོད་དོན་གསོལ་བ་གདབ་པ་སོགས་སྤྱི་དང་འདྲ། སྒྲུབ་པའི་ཐབས་འདི་ལག་ལེན་གྱི་ཁྱད་མ་གཏོགས། སྒྲུབ་ཐབས་རྒྱ་མཚོའི་ཀུན་ལས་བཏུས་པའི་ནང་ན་བཞུགས་པ་ཉིད་ཡིན་ལ། དེའི་ཕྱིར་རྗེས་གནང་ཡང་དེ་ཉིད་ཁོ་ནས་ཆོག་གོ །འོན་ཀྱང་གལ་ཆེ་ཞིང་ཉེ་བར་མཁོ་བའི་ཕྱིར་དང༌། སྒྲུབ་ཐབས་རྒྱ་མཚོའི་ལག་ལེན་དུ་གྲགས་པའི་བོད་ཀྱི་ཡིག་ཆ་རྣམས་ན། སྐུའི་རྣམ་པ་དང༌། སྙིང་པོའི་སྔགས་ཀྱི་ཁྱད་པར་ཙམ་བཀོད་པ་མ་གཏོགས། མངོན་རྟོགས་ཀྱི་ཆིངས་རྒྱ་གཞུང་དང་མཐུན་པར་སྦྱར་བ་མེད་པས། འདིར་རང་གཞུང་དང་མཐུན་པར་
བཀོད་པ་ཡིན་ནོ། །ཀུན༵་ཏུ་བཟང་མོ་ལས་བཏུས་པའི། །རབ་དག༵འ་སྒྲུབ་ཐབས་བཞིན་དུ་བཀོད། །འདིར་ནི་སྙིང༵་པོ༵་ཙམ་བསྡུས་ཀྱི། །རྒྱས་པར་སྤྲོ་ན་གཞན་དུ་ལྟོས། །གསང་བ་འདུས་པ་ལས་འབྱུང་བ་འཇམ་པའི་རྡོ་རྗེའི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །
གསང་བ་འདུས་པ་ལྷན་ཅིག་སྐྱེས་པའི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་བདེ་ཆེན་མགོན་པོ་ལ། །གུས་པས་བཏུད་ནས་དེའི་སྒྲུབ་ཐབས། །སྒེག་པའི་རྡོ་རྗེའི་གཞུང་བཞིན་དུ། །མདོ་ཙམ་བདག་གིས་བཤད་པར་བྱ། །སྐྱབས་སེམས་བསོད་ནམས་ཚོགས་བསོག་སོགས་སྤྱི་དང་མཐུན། བསྲུང་འཁོར་ཆོས་འབྱུང༌། པད་ཉི། སྣ་ཚོགས་རྡོ་རྗེ་གཞལ་ཡས་ཁང་དང་བཅས་པའི་དབུས་སུ་དབྱངས་བཅུ་དྲུག་ཉིས་འགྱུར་ལས་ཟླ་བ། གསལ་བྱེད་སོ་བཞི་ཉིས་འགྱུར། དབྱངས་བཅུ་གཉིས་དང་བཅས་པ་ལས་ཉི་མ། དབུས་སུ་ཧཱུཾ་ཡིག་དང་བཅས་པའི་འཕྲོ་འདུ་གཅིག་ཏུ་གྱུར་པ་ལས་རྡོ་རྗེ་འཆང་ཆེན་པོ་མཐིང་ག །ནག་དཀར་དམར་བའི་ཞལ་གསུམ། དང་པོ་གཉིས་རྡོ་རྗེ་དང་དྲིལ་བུ་འཛིན་པའི་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་རང་དང་འདྲ་བ་ལ་འཁྱུད་པ། ལྷག་མ་གཡས་གཉིས་འཁོར་ལོ་དང་པདྨ། གཡོན་གཉིས་རིན་པོ་ཆེ་དང་རལ་གྲི་འཛིན་པ། རྡོ་རྗེ་སྐྱིལ་ཀྲུང་ཅན། དར་དང་རིན་པོ་ཆེས་བརྒྱན་པ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དབང་གི་ལྷ་རྣམས་ཀྱིས། ཨོཾ་ཨཱཿཧཱུཾ་ཞེས་གསུངས་ཤིང༌། དབང་བསྐུར་རྡོ་རྗེ་ཆེན་པོ་ནས། དབུ་བརྒྱན། རྗེས་སུ་ཆགས་པ་བྱང་ཆུབ་ཀྱི་སེམས་སུ་ཞུ་བར་
གྱུར་པ་རང་བཞིན་གྱི་གནས་ན་བཞུགས་པའི་ལྷ་མོ་སྤྱན་མ་ལ་སོགས་པ་རྣམས་ཀྱིས་སེམས་ཅན་ཁམས་ན་གནས་ཀྱི་དབང་ཕྱུག ཞེས་སོགས་ཤླཽ་ཀ་བཞིའམ། ཨོཾ་མཧཱ་སུ་ཁཾ་བཛྲ་སཏྭ་ཛཿཧཱུཾ་བཾ་ཧོཿ སུ་ར་ཏ་སྟྭཾ་དྲྀ་ཤྱ་ཧོཿ ཞེས་བསྐུལ་བས། སྔོན་བཞིན་དུ་བཞུགས་པར་གྱུར། སྙིང་གར་ཟླ་བ་ལ་ཧཱུཾ། མགྲིན་པར་པདྨ་ལ་ཨཱཿ སྤྱི་བོར་འཁོར་ལོ་ལ་ཨོཾ་རྣམས་ཐུགས་གསུང་སྐུ་རྡོ་རྗེའི་རང་བཞིན། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རྡོ་རྗེ་གསུམ་གྱི་རང་བཞིན་དུ་སྤྱན་དྲངས། གནས་གསུམ་དུ་ཐིམ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་བཞིན་དུ་ཝཀ་ཀཱ་ཡ་ཞེས་འདོན་པ་སྤོ། ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་གསུང་སྐུར་མཛད་གསོལ། །ཞེས་བསྐུལ། རྗེས་ཆགས་ཀྱི་བདེ་བ་བསྒོམ་ཞིང༌། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཟླས་པའི་དམིགས་པ་གསལ་བཏབ་ལ། ཨོཾ་ཨཱཿབཛྲ་དྷྲིཀ་ཧཱུཾ་ཧཱུཾ་སྭཱཧཱ། ཞེས་པ་གཙོ་བོར་བཟླ་ཞིང༌། དེའི་བཅུ་ཆ། ཨོཾ་ཨཱཿབཛྲ་དྷ་ཏྭཱི་ཤྭ་རི་ཧཱུཾ་སྭཱཧཱ། ཞེས་པ་བཟླའོ། །ཐུན་གྱི་མཐར། སྣོད་བཅུད་ཐམས་ཅད་འོད་གསལ་དུ་བསྡུས་ནས། མཉམ་པར་བཞག །གཏོར་མའང་བླ་མེད་སྤྱི་དང་མཐུན་པར་བྱིན་གྱིས་བརླབས་ནས་སྙིང་པོའི་མཐར་འབྲུ་གསུམ་བཏགས་པས་འབུལ་ལོ། །འདིའི་སློབ་མ་རྗེས་འཛིན་ནི། རྗེས་གནང་སྤྱི་དང་འདྲ་བ་ཁོ་ན་ཡིན་ནོ། །ཀུན༵་ནས་རྙེད་དཀའ་ཆེས་ཐོབ་པ། །དག༵འ་ཆེན་གསང་བ་འདུས་པའི་ལམ། །བསྐྱེད་རིམ་སྙིང༵་པོ༵འི་སྒྲུབ་ཐབས་
འདི། །ཉེར་མཁོར་མཐོང་ནས་གསལ་བར་བྲིས། །འདི་འཕགས་སྐོར་དང་མཐུན་ཤས་ཆེ་ཡང༌། སྒེག་པའི་རྡོ་རྗེའི་ལུགས་ཡིན་པར་ཤེས་པར་བྱའོ། །གསང་བ་འདུས་པ་ལྷན་ཅིག་སྐྱེས་པའི་སྒྲུབ་ཐབས་ཀྱི་ལེ་ཚན་ནོ། །
མཧཱ་མཱ་ཡ་གཙོ་རྐྱང་གི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་བདེ་ཆེན་མགོན་པོ་ལ། །རྟག་ཏུ་གུས་པའི་ཡིད་ཀྱིས་འདུད། །སྒྱུ་འཕྲུལ་ཆེན་པོའི་རིམ་ལས་འོངས། །དྲན་པ་གཅིག་པ་བཤད་པར་བྱ། །གྲུབ་པའི་སློབ་དཔོན་བྱ་ད་ལིས་མཛད་པའི་མཧཱ་མཱ་ཡའི་སྒྲུབ་ཐབས་དྲན་པ་གཅིག་པ་སྒོམ་པར་འདོད་ན། རང་གི་སྙིང་གའི་ཧྲཱིཿའི་འོད་ཀྱིས། བླ་མ་དང་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་ཕེཾ། ཞེས་སྤྱན་དྲངས། ཡིད་ཀྱི་སྤྲུལ་པའི་ཕྱི་ནང་གསང་བའི་མཆོད་པས་མཆོད་པར་གྱུར། དཀོན་མཆོག་གསུམ་ལ་བདག་སྐྱབས་མཆི། །སོགས་ཡན་ལག་བདུན་པ་ཚར་གསུམ་བྱ། ཤཱུ་ནྱ་ཏའི་སྔགས་དོན་བསམ། ཧཱུཾ་ཡིག་ལས་རང་གི་མདུན་དུ་སྣོད་ཀྱི་འཇིག་རྟེན་རྣམ་པར་དག་པ་པདྨ་དང༌། ཟླ་བ་དམར་སྐྱའི་གདན་ལ། ཧྲཱིཿལས་དཔལ་སྒྱུ་འཕྲུལ་ཆེན་མོ་སྐུ་མདོག་སྔོན་མོ་ཞལ་བཞི་སྔོ་སེར་དམར་ལྗང་བ། ཕྱག་དང་པོ་གཉིས་ཀྱིས་ཐོད་པ་དང༌། ཁ་ཊྭཱཾ་ག་འཛིན་པས་ཡུམ་ལ་འཁྱུད་པ། འོག་མ་གཉིས་ཀྱིས་མདའ་གཞུ་འཕྱར་བ། ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་ཀྱིས་བཞུགས་པ། མི་ལྤགས་ཀྱི་སྟོད་གཡོགས་འཕྱར་བ། ཡུམ་སངས་རྒྱས་མཁའ་འགྲོ་མ་དམར་མོ་རང་མཚུངས་དང་མཉམ་པར་སྦྱོར་བ། ཐོད་སྐམ་ཀྱི་དབུ་རྒྱན། མགོ་ཕྲེང་ཕྱག་རྒྱ་ལྔའི་རྒྱན་དང་བཅས་པ། དེ་ལ་ཡིད་ཀྱིས་
མཆོད་པ་ཕུལ། དེ་ཉིད་རང་གི་སྙིང་ནང་དུ་ཐིམ་པས། རང་ཉིད་ཧེ་རུ་ཀའི་སྐུ་སྔ་མ་བཞིན་དུ་གྱུར་པ་ལ། སྤྲོ་ན་གོ་ཆའི་ཡི་གེ་རྣམས་དགོད་དེ། མགྲིན་པར་ཨཱཿ རྣ་བ་གཉིས་ལ་ཨ། མིག་ལ་ཨོཾ་རྣམས་དམར་པོ། སྣ་ལ་ཁ་དཀར་པོ། དཔྲལ་བར་ཙི་སེར་པོ། སྙིང་གར་ར་དམར་པོའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཨོཾ་ཨཱཿཧྲཱིཿཧཱུཾ། ཨོཾ་ཨཱཿཨཾ་ཧཱུཾ། ཞེས་བཟླས་པ་ཅི་ནུས་བྱའོ། །རྫོགས་པའི་རིམ་པ་ཡང་ཅི་ནུས་སུ་བསྒོམ་སྟེ་བདེ་ཆེན་མྱུར་སྒྲུབ་ཏུ་བཤད་ཟིན་ཏོ། །གཏོར་མ་འབྲུ་གསུམ་གྱིས་བྱིན་གྱིས་བརླབས་ནས། ཡེ་ཤེས་པ་སྐད་ཅིག་གིས་མདུན་དུ་བྱོན་པ་ལ། ཨོཾ་ཨ་གུ་ཧྱ་ཨཱ་བྷ་ཀྵ་བྷཀྵཻ་ཧཱུཾ། ཞེས་ལན་བདུན་གྱིས་ཕུལ། དེ་རང་ལ་བསྟིམ། བྱིན་རླབས་ནི། ཆོས་འབྱུང་དམར་པོ། གྲུ་གསུམ་གྱི་དབུས་སུ། ཐིག་ལེ་དཀར་པོ་ཡོད་པ་ཞིག་བྲི། མཆོད་པ་དང་གཏོར་མ་བཤམས། མངོན་རྟོགས་བསྒོམས་ནས་གཏོར་མ་གོང་བཞིན་འབུལ། མཆོད་པའང་འབྲུ་གསུམ་གྱིས་བྱིན་གྱིས་བརླབས་ནས། ཡིད་ཀྱིས་འབུལ། སློབ་མས་མཎྜལ་བྱས་ནས། མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆང་རབ་ཏུ་གསོལ་མཛད་པའི། །ཧེ་རུ་ཀ་དཔལ་ཕྱག་འཚལ་བསྟོད། །བདག་ལ་བྱིན་གྱིས་བརླབ་ཏུ་གསོལ། ཞེས་ལན་གསུམ་གསོལ་བ་བཏབ། སྒྲུབ་ཐབས་ཀྱི་དམིགས་པ་ཕོག་ནས། སྔགས་བཟླར་བཅུག །བུམ་དབང་ངོ༌། ཞེས་བརྡ་སྤྲད། སྙིང་གར་ཉི་ཟླ་ཁ་སྦྱོར་རྒྱ་སྲན་ཙམ་པའི་དབུས་སུ། ཐིག་ལེ་ཡུངས་འབྲུ་ཙམ་ལ་སེམས་གཏོད་དུ་གཞུག །བརྗོད་བྲལ་གྱི་ཉམས་མྱོང་ངོ་སྤྲད་ལ་གསང་དབང་ངོ༌། །ཞེས་བརྗོད། ལྟེ་བའི་ཨ་
ཡིག་འབར་བའི། སྤྱི་བོའི་ཧཾ་ཞུ་བར་དམིགས་ལ་རླུང་བཟུང་དུ་བཅུག ཐུར་སེལ་བསྡམས་པས་བདེ་སྟོང་གི་ཉམས་སྐྱེས་པར་བསམ། ཤེས་དབང་ངོ༌། །ཆོས་འབྱུང་ནི་དབྱིངས་སྤྲོས་བྲལ། ཐིག་ལེ་ནི་རིག་པ་བདེ་བ་ཆེན་པོའི་བརྡའོ་ཞེས་དབང་བཞི་པའོ། །འདི་ལ་རྗེས་ཆོག་མི་དགོས། རབ་ཟབ་མཧཱ་མཱ་ཡའི་གཞུང༌། །ཀུན༵་གྱི་ཟབ་དོན་དག༵འ་བས་ཞུས། ཡང་སྙིང༵་ལེན་ཚུལ་འདི་འདྲ་བ། །གཞན་ལ་ཡོད་མེད་གསལ་པོ༵ར་སྨྲོས། །མཧཱ་མཱ་ཡ་གཙོ་རྐྱང་གི་སྒྲུབ་ཐབས་ཀྱི་ལེ་ཚན་ནོ།། །།
འཁོར་ལོ་བདེ་མཆོག་ལྷན་སྐྱེས་ཀྱི་སྒྲུབ་ཐབས།
འཁོར་ལོ་བདེ་མཆོག་ལྷན་སྐྱེས་ཀྱི་སྒྲུབ་ཐབས། ན་མོ་བཛྲ་དྷ་རཱ་ཡ། གང་ཞིག་ཚུལ་འདིར་འཇུག་བྱེད་པ། །དེ་ལ་ལྷན་སྐྱེས་བདེ་ཆེན་པོ། །ཅི་ཡང་འབར་བར་འགྱུར་བས་ཏེ། །དེ་ཕྱིར་ལྷན་སྐྱེས་སྒྲུབ་ཐབས་སོ། །འདིར་བདེ་མཆོག་ལྷན་སྐྱེས་སྒོམ་པར་འདོད་པས། སྐྱབས་སེམས་ཚད་མེད་སྔོན་དུ་འགྲོ་བར་བྱ། ཤཱུ་ནྱ་ཏས་སྟོང་པར་སྦྱངས། སྟོང་པའི་ངང་ལས་པད་ཉིའི་སྟེང་དུ་རང་སེམས་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། རང་ཉིད་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་གཅིག་ཕྱག་གཉིས་སྤྱན་གསུམ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཡོན་བསྐུམས་པས་འཇིགས་བྱེད་དང༌། གཡས་བརྐྱང་བས་དུས་མཚན་མ་མནན་པ། རལ་པའི་ཐོར་ཚུགས་དང༌། ཡིད་བཞིན་གྱི་ནོར་བུ་དང༌། ཟླ་བ་ཕྱེད་པ་དང༌། སྣ་ཚོགས་རྡོ་རྗེས་བརྒྱན་པ། ཕྱག་རྒྱ་དྲུག་དང༌། མགོ་འགྲེང་དང༌། སྟག་ལྤགས་ཀྱི་ཤམ་ཐབས་ཅན། གར་གྱི་ཉམས་དགུ་དང་ལྡན་པ། ཡུམ་རྡོ་རྗེ་ཕག་མོ་དམར་མོ། གྲི་གུག་དང་ཐོད་པ་འཛིན་པ། སྐྲ་གྲོལ་ཞིང་ཕྱག་རྒྱ་ལྔ་དང༌།
ཐོད་པ་སྐམ་པོའི་འཕྲེང་བ་ཅན། ཞབས་གཡོན་བརྐྱང་བའི་སྟབས་ཅན་གྱི་ཡབ་ལ་འཁྱུད་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཡབ་ལ་མི་བསྐྱོད་པ་དང༌། ཡུམ་ལ་རྣམ་པར་སྣང་མཛད་ཀྱི་དབུ་རྒྱན་ཅན། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་གི་འོད་ཀྱིས་སངས་རྒྱས་ཐམས་ཅད་བདེ་མཆོག་ཡབ་ཡུམ་གྱི་རྣམ་པར་ཕཻཾ། ཞེས་སྤྱན་དྲངས། ཛཿཧཱུཾ་བཾ་ཧོཿ ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅ཧཾ། བཟླས་པས་དམིགས་པ་གསལ་བཏབ་ལ། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཅེས་བཟླའོ། །གལ་ཏེ་ཤིན་ཏུ་བསྡུས་པ་ཉམས་སུ་ལེན་པར་འདོད་ན། སྐད་ཅིག་གིས་བསྐྱེད་ཅིང་གནས་གསུམ་བྱིན་རླབས་མན་ཆད་མི་དགོས་ལ། བཟླས་པའི་མཐར་རྗེས་གཞིག་གི་རིམ་པས་འོད་གསལ་དུ་བསྡུའོ། །ཐུན་མཚམས་སུ་དགེ་བའི་རྩ་བ་བྱང་ཆུབ་དུ་བསྔོ། གཏོར་མ་སུམ་བྷས་བསངས། སྭ་བྷཱ་ཝས་སྦྱངས། ཨ་ལས་ཀ་པཱ་ལའི་ནང་དུ་འབྲུ་གསུམ་ཞུ་བ་ལས་བྱུང་བའི་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབས། ཡེ་ཤེས་ཀྱི་འཁོར་ལོ་ཕཻཾ། ཞེས་མདུན་གྱི་ནམ་མཁར་སྤྱན་དྲངས། ཨོཾ་ཨ་རལླི་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ། དྲྀ་ཤྱ་ཧོཿ ཨོཾ་ཨཱཿཧཱུཾ། ཞེས་ལན་གསུམ་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང༌། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །མཆོད་སྦྱིན་གཏོར་མ་འདི་བཞེས་སོགས་འདོད་དོན་གསོལ་བ་གདབ། ཧེ་རུ་ཀའི་ཡིག་བརྒྱ་ལན་
གསུམ་བརྗོད། མ་འབྱོར་བ་དང་སོགས་ཀྱི་མཐར། བཛྲ་མུཿ ཞེས་གཤེགས་སུ་གསོལ་བའམ། ཡོ་ག་ཤུདྡྷོའི་སྔགས་ཀྱིས་རང་ཉིད་ལ་བསྟིམ་པ་གང་རུང་བྱས། སྨོན་ལམ་དང་བཀྲ་ཤིས་ཅི་རིགས་པར་བརྗོད་དོ། །འདིའི་བྱིན་བརླབ་ནི། ཚེས་བཅུ་ལ་མཎྜལ་པདྨ་འདབ་བཞི་ཉི་གདན་ལ་ཚོམ་བུ་སྔོན་པོ་ཅན། མདུན་དུ་མཆོད་གཏོར་བཟང་བ་དང་བཅས་པ། སློབ་དཔོན་གྱི་མདུན་དུ་བུམ་པ་བཅའ། ཚོགས་འཁོར་སོགས་དགོས་པའི་ཡོ་བྱད་ཐམས་ཅད་ཚང་བར་བྱས། མཁའ་འགྲོ་སྤྱི་གཏོར་གྱི་སྔོན་འགྲོ་གཏོར་མ་བཏང༌། གནས་ཡོ་བྱིན་རླབས་བྱ། བདག་བསྐྱེད་བཟླས་པའི་བར་གོང་བཞིན་བསྒོམས་ནས། མདུན་བསྐྱེད་དང་བུམ་པ་བསངས་སྦྱངས། སྟོང་པའི་ངང་ལས་མཎྜལ་གྱི་དབུས་དང་བུམ་པའི་ནང་དུ། པད་ཉིའི་སྟེང་དུ་ཧཱུཾ་ལས་རྡོ་རྗེ་ཞེས་པ་ནས། བཟླས་པའི་བར་བདག་བསྐྱེད་བཞིན་གཉིས་ཀར་ལ་དམིགས་ནས་བཟླས་པ་ཅི་འགྲུབ་བྱ། གོང་བཞིན་གཏོར་མ་ཕུལ། འཇིག་རྟེན་པ་ལ་མཁའ་འགྲོ་སྤྱི་གཏོར་གྱི་གཏོར་མ་བཏང༌། བར་འདིར་ལྷག་གཏོར་ལ་ཐུག་གི་བར་ཚོགས་མཆོད་རྣམས་རྒྱས་པར་བྱ། ཚོགས་མཆོད་ཡེ་མ་གྲུབ་ན་ཡིད་ཀྱིས་ཀྱང་རུང༌། སློབ་མས་མཎྜལ་ཕུལ། ཀུན་མཁྱེན་ཡེ་ཤེས་སོགས་ཀྱིས་གསོལ་བཏབ་དང༌། དཀོན་མཆོག་གསུམ་ལ་སོགས་རྒྱུན་བཤགས་བྱ། མདུན་བསྐྱེད་དང་སློབ་དཔོན་དབྱེར་མ་མཆིས་པ་འཁོར་ལོ་བདེ་མཆོག་ནས། དབུ་རྒྱན་གྱིས་བར་བདག་བསྐྱེད་བཞིན་གསལ་འདེབས་སུ་འཇུག །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་བདག་ལ་དགོངས་སུ་གསོལ། །ལུས་ཀྱི་དྲི་མ་སྦྱང་བ་དང༌། །དེ་ཉིད་བདེ་ཆེན་བདག་ལ་སྩོལ། །ཞེས་རྗེས་ཟློས་ལན་གསུམ་གྱིས་གསོལ་བ་བཏབ། དེ་ནས་སློབ་དཔོན་གྱི་
གནས་གསུམ་དང༌། སློབ་མའི་གནས་གསུམ་དུ་ཡི་གེ་འབྲུ་གསུམ་སྒོམ་དུ་བཅུག་ལ། བླ་མའི་དཔྲལ་བའི་ཨོཾ་ལས་སངས་རྒྱས་ཐམས་ཅད་ཀྱི་སྐུའི་ངོ་བོ་ཨོཾ་དཀར་པོ་དཔག་ཏུ་མེད་པར་བྱུང༌། སློབ་མའི་དཔྲལ་བའི་ཨོཾ་ལ་ཐིམ་པས། བུམ་དབང་ཐོབ། ལུས་ཀྱི་དྲི་མ་དག་པར་མོས་ཤིག ཅེས་བརྗོད་ལ། བུམ་པ་སྤྱི་བོར་བཞག བུམ་ཆུ་ཀུ་ཤས་དཔྲལ་བར་གཏོར་རོ། །ཨོཾ་ལས་བྱུང་བའི་བདུད་རྩིའི་རྒྱུན་གྱི་མགྲིན་པ་ཡན་ཆད་གང་བར་མོས། སངས་རྒྱས་ཀུན་གྱི་རང་བཞིན་གསུང་ཞེས་དང༌། ངག་གི་དྲི་མ་སྦྱངས་བ་དང་ཞེས་འདོན་པ་སྤོས་ལ་གསོལ་བ་བཏབ། སློབ་དཔོན་གྱི་མགྲིན་པའི་ཨཱཿལས། ཨཱཿསྤྲོས་ཏེ། སློབ་མའི་མགྲིན་པའི་ཨཱཿལ་བསྟིམ། གསང་དབང་ཐོབ། ངག་གི་དྲི་མ་དག །བུམ་ཆུ་མགྲིན་པར་གཏོར། སྙིང་ཁ་ཡན་ཆད་གང་བར་མོས། དེ་བཞིན་དུ། རང་བཞིན་ཐུགས་དང་ཡིད་ཀྱིས་དྲི་མ་ཞེས་འདོད་པ་སྤོས། སློབ་དཔོན་གྱི་ཐུགས་ཀའི་ཧཱུཾ་ལས་ཧཱུཾ་སྤྲོས་ཏེ། སློབ་མའི་སྙིང་གའི་ཧཱུཾ་ལ་བསྟིམ། ཤེར་དབང༌། ཡིད་ཀྱི་དྲི་མ་དག བུམ་ཆུ་སྙིང་གར་གཏོར། ལྟེ་བ་ཡན་ཆད་གང་བར་མོས། སངས་རྒྱས་ཀུན་གྱི་སྐུ་གསུང་ཐུགས་ཞེས་དང༌། སྒོ་གསུམ་དྲི་མ་ཞེས་འདོད་པ་སྤོས་ལ་གསོལ་བཏབ། སློབ་དཔོན་གྱི་ཡི་གེ་འབྲུ་གསུམ་ལས། འབྲུ་གསུམ་ཆར་བྱུང༌། སློབ་མའི་གནས་གསུམ་དུ་ཐིམ། དབང་བཞི་པ་ཐོབ། སྒོ་གསུམ་གྱི་དྲི་མ་བག་ཆགས་དང་བཅས་པ་དག །བུམ་ཆུ་གནས་གསུམ་ཆར་དུ་གཏོར་ལ་འཐུང་དུ་གཞུག རྐང་མཐིལ་ཡན་ཆད་གང་བར་མོས། མངོན་རྟོགས་ཀྱི་དམིགས་པ་ཕོག
སྔགས་ཀྱི་བཟླས་ལུང་སྤྱི་དང་མཐུན་པར་སྦྱིན་ནོ། །རྗེས་གཙོ་བོས་ཇི་ལྟར་སོགས་དང༌། མཎྜལ་དང༌། དེང་ནས་བརྩམས་ཏེ་སོགས་སློབ་མའི་རྗེས་ཀྱི་བྱ་བ་དང༌། མཆོད་པ་ཁ་གསོས། བྱིན་གྱིས་བརླབས། མཆོད་བསྟོད། དངོས་གྲུབ་བླངས། ཡིག་བརྒྱ། བཟོད་གསོལ། གཤེགས་གསོལ། སྨོན་ལམ་བཀྲ་ཤིས་རྣམས་ཏེ་རྗེས་ཀྱི་བྱ་བ་ཡང་སྤྱི་དང་འདྲ་བ་ཡིན་ནོ། །ཡི་དམ་ཀུན༵་ལས་ཆེས་ལྷག་པའི། །སྒྲུབ་ཐབས་ལྷན་སྐྱེས་དག༵འ་བསྐྱེད་པ། །སྔོན་བྱོན་རྣམས་ཀྱིས་རྒྱས་བཤད་མོད། །འདིར་ནི་ངག་འདོན་སྙིང༵་པོ༵ར་བཀོལ། །འདིའི་ཉམས་ལེན་བསྡུས་པ་སྐད་ཅིག་གིས་བསྐྱེད་པ་ནི། དྲིལ་བུ་གཞུང་ཆུང་དང༌། ཨ་བྷྱ་ཀ་ར་སོགས་ཀྱིས་དགོངས་པ་ཡིན་ལ། ཡན་ལག་བཞི་བསྐྱེད་ནི་དགའ་རབ་རྡོ་རྗེའི་ལུགས་ཡིན་གསུང་ཞིང༌། སློབ་དཔོན་གཞན་མང་པོ་ཞིག་གི་གཞུང་ལ་ཡང་འདི་བཞིན་དུ་སྣང་ངོ༌། །ཞེས་པ་འཁོར་ལོ་བདེ་མཆོག་ལྷན་སྐྱེས་ཀྱི་སྒྲུབ་ཐབས་བསྟན་པའི་ལེ་ཚན་ནོ།། །།
དཔལ་འཁོར་ལོ་བདེ་མཆོག་དང་འབྲེལ་བའི་གོ་ཆའི་དཔའ་བོ་དྲུག་གི་བྱིན་རླབས་ཀྱི་ཆོ་ག
ཨོཾ་སྭཱ་སྟི། ཧེ་རུ་ཀ་དཔལ་ལ་བཏུད་ནས། །ཆོ་གའི་དཔའ་བོ་དྲུག་པོ་ཡི། །བྱིན་རླབས་བྱེད་ཚུལ་སྙིང་པོ་ཙམ། །བརྩེ་བའི་སེམས་ཀྱིས་བྲི་བར་བྱ། །མཎྜལ་པདྨ་འདབ་ལྔ་ལ། ལྷའི་སྐུ་མདོག་དང་མཐུན་པའི་ཚོམ་བུ་བཀོད། མཉྫིའི་སྟེང་དུ། ཐོད་པ་ནང་མཆོད་དང་བཅས་པ་བཤམ། མཐའ་མཆོད་གཏོར་གྱིས་བསྐོར་བར་བདེ་མཆོག་བཞིན་སྔོན་འགྲོ་གཏོར་མ་བཏང༌། གནས་དང་ཡོ་བྱད་བྱིན་གྱིས་བརླབས། ལཱུ་ནག་ལྟ་བུ་བདེ་མཆོག་གི་མངོན་རྟོགས་མཚན་ཉིད་ཚང་བ་ཞིག་རྫོགས་པར་བསྒོམ། མདུན་བསྐྱེད་སུམ་བྷས་བསངས། སྭ་བྷཱ་ཝས་སྦྱངས། ཐོད་པ་དང་མཎྜལ་གྱི་གནས་སུ་སྟོང་པའི་ངང་ལས། ཧཱུཾ་ལས་བྱུང་བའི་བསྲུང་
འཁོར་གྱི་དབུས་སུ། པཾ་ལས་པདྨ་འདབ་ལྔ་ལྟེ་བ་ལ། ཨོཾ་ཧ་ལས་རྡོ་རྗེ་སེམས་དཔའ་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ལྷག་མ་གཡོན་གཉིས་ཀྱིས་ཐོད་པ་བདུད་རྩིས་གང་བ་དང་ཁ་ཊྭཱཾ་ག གཡས་གཉིས་ཀྱིས་ཅང་ཏེའུ་དང་ཚངས་པའི་མགོ་བོ་འཛིན་པ། མི་ལྤགས་ཀྱི་སྟོད་གཡོགས་ཅན་ཟླ་བ་ལ་གནས་པ། མདུན་ནས་བརྩམས་ཏེ་འདབ་མ་རྣམས་ལ་གཡོན་བསྐོར་གྱིས། ན་མ་ཧི་ལས་རྣམ་པར་སྣང་མཛད་སེར་པོ། འཁོར་ལོ་འཛིན་པ། སྭཱཧཱ་ཧུ་ལས་པདྨ་གར་དབང་དམར་པོ་པདྨ། བཽ་ཥཊ་ཧེ་ལས་དཔལ་ཧེ་རུ་ཀ་ནག་པོ་རྡོ་རྗེ། ཧཱུཾ་ཧཱུཾ་ཧོ་ལས་རྡོ་རྗེ་ཉི་མ་དམར་སེར་རིན་པོ་ཆེ། ཕཊ་ཧཾ་ལས་རྟ་མཆོག་ལྗང་ཁུ་རལ་གྲི་འཛིན་པ། དེ་རྣམས་ཕྱག་དང་པོ་གཉིས་ཀྱིས་རང་རྟགས་དང༌། དྲིལ་བུ་ཐུགས་ཀར་བསྣོལ་བ། འོག་མ་གཉིས་ཀྱིས་གཡས་ཌ་མ་རུ་དང༌། གཡོན་ཐོད་པ་དང་ཁ་ཊྭཱཾ་ག་འཛིན་པ། ཉི་མའི་གདན་ལ་གནས་པ། གཙོ་འཁོར་ཐམས་ཅད་ཀྱང་གཡས་བརྐྱང་གི་སྟབས་ཀྱིས་ཡི་དྭགས་ཀྱི་གདན་ལ་བཞུགས་ཤིང༌། སྟག་ལྤགས་དང༌། རལ་པའི་ཐོར་ཚུགས་དང༌། ཕྱག་དྲུག་སོགས་དཔལ་ཧེ་རུ་ཀ་ཉིད་དང་མཚུངས་པའོ། །གནས་གསུམ་བྱིན་གྱིས་བརླབས། ཕཻཾ། ཞེས་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ཡོ་ག་ཤུདྡྷོས་ང་རྒྱལ་བཟུང༌། དབང་བསྐུར་རྒྱས་བཏབ་མི་དགོས། ཕྱི་མཆོད། ནང་མཆོད། གསང་མཆོད། ཡིད་མཆོད་རྣམས་ཕུལ། རྡོ་རྗེ་སེམས་དཔའ་ཧེ་
རུ་ཀ །སྣང་མཛད་རྡོ་རྗེ་ཉི་མ་དང༌། །གར་དབང་རྡོ་རྗེ་རྟ་རྒྱལ་པོ། །རིགས་དྲུག་འཁོར་ལོས་བསྒྱུར་བ་ནི། །ཀུན་ཏུ་བསྲུང་དང་བྱིན་རླབས་དང༌། །རྒྱལ་བ་སྲས་དང་བཅས་རྣམས་ཀྱི། །སྐུ་ལ་ཞུགས་ནས་ཕྲིན་ལས་མཛད། །གོ་ཆའི་ལྷ་ཚོགས་རྣམས་ལ་འདུད། །ཅེས་པས་བསྟོད། ཨོཾ་ཧ། ན་མ་ཧི། སྭཱཧཱ་ཧུ། བཽ་ཥཊ་ཧེ། ཧཱུཾ་ཧཱུཾ་ཧོ། ཕཊ་ཧཾ། ཞེས་ཅི་ནུས་བྱ། གཏོར་མ་མངོན་རྟོགས་ལྟར་བྱིན་གྱིས་བརླབས། ཕཻཾ་ནས་དྲྀ་ཤྱ་ཧོཿལ་གོ་ཆའི་སྔགས་བཏགས་ནས་འབུལ། གོང་བཞིན་མཆོད་བསྟོད་དང༌། སྲིད་དང་ཞི་བ་མཉམ་དང་སོགས་ཀྱིས་འདོད་དོན་གསོལ་བ་བཏབ། ཁ་ཁ་སོགས་ཀྱིས་མཁའ་འགྲོ་སྤྱི་ལ་འབུལ་ཚུལ་སྤྱི་དང་འདྲ། དེ་ནས་སློབ་མས་མཎྜལ་ཕུལ། གང་གི་དྲིན་གྱིས་སོགས་དང༌། སངས་རྒྱས་ཀུན་གྱི་སོགས་དང༌། དོན་དམ་སྨྲ་བའི་སོགས་ཀྱིས་གསོལ་བ་བཏབ། རྒྱུན་བཤགས། རིགས་ལྔའི་སྡོམ་བཟུང༌། དམ་ཚིག་ཉེར་གཉིས་བཟུང་བ་རྣམས་བྱ། སློབ་དཔོན་དང་མདུན་བསྐྱེད་ལ་མོས་གུས་དུང་བྱས་པས་སྐུ་ལས་བདུད་རྩིའི་རྒྱུན་བྱུང་སྟེ། ལུས་ཐམས་ཅད་བཀྲུས་པའི་དམིགས་པ་ལན་གསུམ་འབོགས། སློབ་མ་བདེ་མཆོག་ཏུ་སྐད་ཅིག་གིས་བསྐྱེད་པའི་ལུས་ལ་གོ་ཆའི་ལྷ་རྣམས་བཀོད། སངས་རྒྱས་ཐམས་ཅད་གོ་ཆའི་ལྷའི་རྣམ་པར་བསྟིམ་པ་དང༌། སྔགས་འབྲུའི་རྣམ་པ་བསྟིམ་པ་དང༌། ཕྱག་མཚན་བསྟིམ་པ་རྣམས་ལ་སྤོས་དང་རོལ་མོ་རེ་རེ་མཛད། མཎྜལ་གནས་རྣམས་སུ་རེག་པས། མདུན་བསྐྱེད་ཀྱི་ལྷ་ཚོགས་དེ་དང་དེ་སློབ་མའི་གནས་རྣམས་སུ་ཐིམ་པར་མོས། བདུད་རྩིས་ཀྱང་གནས་རྣམས་སུ་ཐིག་ལེ་བྱེད་ཅིང༌། ལུས་ཐམས་
ཅད་ལ་གཏོར། ཅུང་ཟད་འཐུང་དུ་བཅུག་པས་ཀྱང་དེ་བཞིན་དུ་བསྒོམ། དེ་ནས་སྔགས་ཀྱི་བཟླས་ལུང་སྦྱིན། དེང་ཕྱིན་ཆན་ལྷའི་སྐུ་ལ་གོ་ཆ་བཀོད་པ་དང༌། གོ་ཆའི་ལྷ་རེ་རེ་བསྒོམ་པ་དང༌། དཔའ་བོ་དྲུག་གི་དཀྱིལ་འཁོར་བསྒོམ་ཡང་རུང་སྟེ། གོ་ཆའི་ལས་ཚོགས་རྣམས་སྒྲུབ་པ་ལ་ནུས་མཐུ་དང་ལྡན་པར་བྱས་པ་ཡིན་ནོ། །ཞེས་རྟོགས་པ་བསྐྱེད། རྗེས་ཀྱི་བྱ་བ་ནི་སྤྱི་དང་འདྲའོ། །ཀུན༵་ཏུ་རྙེད་དཀའ་རབ་དག༵འི་ཆོས། །སོ་སོའི་སྒྲུབ་ཐབས་ཉམས་ལེན་ལ། །ཉེར་མཁོ་བྱིན་རླབས་ཆོ་ག་ཡི། །སྙིང༵་པོ༵་མདོ་ཙམ་སྤེལ་བ་ཡིན། །དཔལ་འཁོར་ལོ་བདེ་མཆོག་དང་འབྲེལ་བའི་གོ་ཆའི་དཔའ་བོ་དྲུག་གི་བྱིན་རླབས་ཀྱི་ཆོ་གའི་ལེ་ཚན་ནོ།། །།ཞུས་དག །
གོ་ཆའི་རྣལ་འབྱོར་མ་དྲུག་གི་བྱིན་རླབས་བྱ་ཚུལ་གྱི་ཆོ་ག
ཨོཾ་སྭཱ་སྟི། རྣལ་འབྱོར་མ་དཔལ་ལ་བཏུད་ནས། །གོ་ཆའི་རྣལ་འབྱོར་མ་དྲུག་གི །བྱིན་རླབས་བྱ་ཚུལ་རབ་གསལ་བ། །མདོ་ཙམ་བདག་གིས་བཤད་པར་བྱ། །དེ་ལ་གོ་ཆའི་དཔའ་བོ་དྲུག་པོའི་བྱིན་རླབས་ཀྱི་ཆོ་ག་བྱ་ཚུལ་བཤད་མ་ཐག་པ་དེ་ཉིད་བློ་ཡུལ་དུ་ངེས་པར་བྱས་ནས། མི་འདྲ་བའི་ཁྱད་པར་ཅུང་ཟད་ཙམ་གྱི་ངེས་པར་བྱ་སྟེ། པདྨའི་ལྟེ་བར་ཨོཾ་བཾ་ལས་རྡོ་རྗེ་ཕག་མོ་དམར་མོ་དམར་སྔོ་ལྗང་བའི་ཞལ་གསུམ་ཕྱག་དྲུག་གི་གཡས་གསུམ་གྱིས་གྲི་གུག་ཚངས་མགོ ལྕགས་ཀྱུ། གཡོན་གསུམ་གྱིས་ཐོད་པ། ཁ་ཊྭཱཾ། ཞགས་པ་བསྣམས་པ། མདུན་ནས་བརྩམས་ཏེ་འདབ་མ་རྣམས་ལ་གཡས་བསྐོར་གྱི་རིམ་པས། ཧཾ་ཡོཾ་ལས་གཤིན་རྗེ་མ་སྔོན་མོ། ཧྲིཾ་མོཾ་ལས་རྨོངས་བྱེད་མ་དཀར་མོ། ཧྲིཾ་ཧྲིཾ་ལས་བསྐྱོད་བྱེད་མ་སེར་མོ། ཧཱུཾ་ཧཱུཾ་ལས་སྐྲག་བྱེད་མ་ལྗང་ཁུ། ཕཊ་ཕཊ་ལས་ཙཎྜི་ཀཱ་གདུང་
ཁ། རྨོངས་བྱེད་མ་ཟླ་བ་དང་གཞན་རྣམས་ཉི་མའི་དཀྱིལ་འཁོར་ལ་གནས་པ། དེ་རྣམས་ཞལ་གཅིག་ཕྱག་བཞི་གཡས་གཉིས་གྲི་གུག་དང་ཌ་མ་རུ། གཡོན་གཉིས་ཐོད་པ་དང་ཁ་ཊྭཱཾ་འཛིན་པ། གཙོ་འཁོར་ཐམས་ཅད་ཀྱང་ཡི་དྭགས་ཀྱི་གདན་ལ་གཡས་བརྐྱང་གི་སྟབས་ཀྱིས་བཞུགས་ཤིང༌། མི་མགོ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། ཁྱད་པར་གཞན་རྣམས་བཅོམ་ལྡན་འདས་མ་དང་མཚུངས་པའོ། །སྔགས་ནི། ཨོཾ་བཾ། ཧཾ་ཡོཾ། ཧྲིཾ་མོཾ། ཧྲིཾ་ཧྲིཾ། ཧཱུཾ་ཧཱུཾ། ཕཊ་ཕཊ། བསྟོད་པ་ནི། རིགས་དྲུག་གི་ནི་རྣལ་འབྱོར་མ། །བར་ཆད་བསྲུང་བའི་ལས་མཛད་ཅིང་། །འཕྲིན་ལས་རྣམ་བཞི་ཐོགས་མེད་པས། །དབང་བསྒྱུར་ཁྱོད་ལ་ཕྱག་འཚལ་ལོ། །ཞེས་པའོ། །གཏོར་སྔགས་དང༌། བྱིན་རླབས་ཀྱི་གོ་ཆའི་སྐབས་ནི་ལྷ་དང༌། སྔགས་བརྗེས་པ་མ་གཏོགས་དཔའ་བོ་དྲུག་གི་སྐབས་དང་ཁྱད་པར་མེད་དོ། །ཤིན་ཏུ་དཀོན་ཞིང་རྣམ་ཀུན༵་ཏུ། །དག༵འ་བར་བསྔགས་པའི་སྒྲུབ་ཐབས་ནི། །རབ་གསལ་གོ་བདེའི་རིམ་པས་ཏེ། །སྙིང༵་པོ༵་ཙམ་དུ་གསལ་བར་བྱས། །གོ་ཆའི་དཔའ་བོ་དྲུག་གི་བྱིན་རླབས་ཀྱི་ཆོ་གའི་ལེ་ཚན་ནོ།། །།
བྱང་ཆུབ་སྒྲུབ་ལམ་བདེ་མཆོག་གི་སྒྲུབ་ཐབས།
ཨོཾ་སྭཱ་སྟི། ཧེ་རུ་ཀ་དཔལ་འགྲོ་བའི་མགོན། །བླ་མ་རྗེ་ལ་གུས་བཏུད་ནས། །བྱང་ཆུབ་སྒྲུབ་ལམ་བདེ་མཆོག་གི །སྒྲུབ་ཐབས་ཤིན་ཏུ་གསལ་བར་བྲི། །སྐྱབས་འགྲོ་སེམས་བསྐྱེད་ཚད་མེད་བཞི་རྣམས་སྔོན་དུ་བཏང་ནས། སྟོང་པ་ཉིད་ལ་ཅུང་ཟད་མཉམ་པར་བཞག ཤྲཱི་ཧེ་རུ་ཀོ྅ཧཾ། ཤྲཱི་ནི་གཉིས་མེད་ཡེ་ཤེས་ཏེ། ཧེ་ནི་རྒྱུ་སོགས་སྟོང་པ་ཉིད། རུ་ནི་ཚོགས་དང་བྲལ་བ་སྟེ། ཀ་ནི་གང་དུ་མི་གནས་པའོ། །བདག་ཉིད་ལྷན་ཅིག་སྐྱེས་
པའི་དཔལ་ཧེ་རུ་ཀ་སྐུ་མདོག་སྟོན་ཀའི་ཟླ་བ་ལྟར་དཀར་བ། ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་ཡུམ་ལ་འཁྱུད་པ། ཞབས་གཡོན་བསྐུམས་པས་འཇིགས་བྱེད་ནག་པོ་དང༌། གཡས་བརྐྱང་བའི་དུས་མཚན་མ་དམར་མོ་མནན་པ། སྤྱན་གསུམ་དང་ལྡན་ཞིང་མཆེ་བ་གཙིགས་པ། རལ་པའི་ཐོར་ཚུགས་ཀྱི་རྩེ་མོར་ཡིད་བཞིན་གྱི་ནོར་བུ་དང༌། ངོས་ལ་སྣ་ཚོགས་རྡོ་རྗེས་བརྒྱན་པ། དེ་ལ་འཁྱུད་པའི་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། སྐྲ་གྲོལ་བ། ཐོད་སྐམ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། ཕྱག་རྒྱ་ལྔ་དང་ལྡན་པ། གཡས་གྲི་གུག་དང༌། གཡོན་ཐོད་པ་ཁྲག་གིས་གང་བ་འཛིན་ཞིང༌། ཞབས་གཡས་བསྐུམ་གཡོན་བརྐྱང་བའི་ཡབ་ལ་འཁྱུད་པ། གཉིས་ཀའང་ཁྲོ་སྒེག་ལང་ཚོ་ལ་བབ་ཅིང༌། བདེ་བ་རྒྱས་པའི་སྐུ་སྣང་སྟོང་སྒྱུ་མ་ལྟ་བུ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །འཁོར་འདས་སྣོད་བཅུད་ཐམས་ཅད་ཀྱང་རང་དང་འདྲ་བར་བལྟས་ལ། ཅུང་ཟད་མཉམ་པར་བཞག བཟླས་པའི་དམིགས་པ་གསལ་བཏབ་ལ། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཅེས་ཅི་ནུས་སུ་བཟླའོ། །མཐར་ལཱུ་ཡི་པའི་རྣལ་འབྱོར་ཆེན་པོའི་འོད་གསལ་ལྡང་འཇུག་ལ་བསླབ་པར་བྱའོ། །གཏོར་མ་སུམ་བྷས་བསངས། སྭ་བྷཱས་སྦྱངས། ཨོཾ་ཨཱཿཧཱུཾ་ཧ་ཧོ་ཧྲཱིཿས་བྱིན་གྱིས་བརླབས། ཕཻཾ་ཞེས་གཏོར་མགྲོན་ཐམས་ཅད་སྤྱན་དྲངས། བཛྲ་ཨ་རལླི་ཧོཿ ས་མ་ཡ་སྟྭཾ། དྲྀ་ཤྱ་ཧོཿ ཞེས་ལན་བདུན་གྱིས་འཇིག་རྟེན་འདས་པའི་ལྷ་ལ་འབུལ།
ཨརྒྷཾ་ནས་ཤཔྟའི་བར་གྱིས་མཆོད། ཧེ་རུ་ཀ་དཔལ་དཔའ་བོ་ཆེ། །རྣམ་དག་རྡོ་རྗེ་དབང་ཕྱུག་དང༌། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་ལ་འདུད་དོ། །ཅེས་བསྟོད། ཨོཾ་ཁ་ཁ་སོགས་མཁའ་འགྲོ་སྤྱི་གཏོར་འབུལ་བ་སྤྱི་དང་འདྲ་ཞིང༌། རྗེས་ཀྱི་བྱ་བ་རྣམས་ཀྱང་ངོ༌། །འདི་ཉིད་ཀྱི་རྫོགས་པའི་རིམ་པ་ཡང་ཅི་ནུས་སུ་བསྒོམ་མོ། །དེ་ལྟར་བསྐྱེད་རིམ་ཉམས་སུ་ལེན་ཚུལ་འདི་ནི། དཔྱལ་ཨ་མོ་གྷའི་ཁྲིད་ཡིག་དང༌། མཁན་ཆེན་བྱང་ཆུབ་པའི་ཡིག་སྣ་དང༌། གཡག་སྡེ་ལོཙྪ་བ་དང༌། མཁན་ཆེན་རྡོ་རྗེ་པ་ནས་བརྒྱུད་པ་ཐོག་སྟོན་ཤེས་རབ་རྡོ་རྗེས་བྱས་པ་ཐམས་ཅད་དོན་གྱི་ཆ་ལ་ཞུས་དག་ཟེར་བ་ལྟར་ཡོད་པས། ཡིད་ཆེས་སྐྱེས་ནས་ལུགས་རྙིང་པ་ལྟར་བཀོད་དོ། །གང་དག་འདི་ལ་ཤཱུནྱའི་སྔགས་ཀྱིས་སྟོང་པར་སྦྱངས་ནས། བསྲུང་འཁོར་གྱི་དབུས་སུ་ཧེ་རུ་ཀའི་སྔགས་དོན་དྲན་པས། ལྷ་སེམས་དཔའ་གསུམ་བརྩེགས་སུ་བསྐྱེད་པ་ནི་འདི་ཉིད་ཀྱི་མན་ངག་ཁུངས་མ་གང་ན་ཡང་མེད་ཅིང༌། རང་གིས་ཀྱང་སྔགས་ཀྱི་བསྐྱེད་ཚུལ་མེད་ཅིང༌། ཡེ་ཤེས་ཀྱི་བསྐྱེད་ཚུལ་ཡིན་ནོ་ཞེས་བརྗོད་པ་དང་ཡང་འགལ་སྟེ། ཡེ་ཤེས་ཀྱི་བསྐྱེད་ཚུལ་ཡིན་ན། ལུས་དབེན་དང༌། སྒྱུ་ལུས་དང༌། ཟུང་འཇུག་གསུམ་གྱི་བསྐྱེད་ཚུལ་ལས་མ་འདས་པས་སོ། །བཟླས་བྱའི་སྔགས་ཀྱང་ཡིག་བདུན་བོར་ནས། འཁོར་ལོ་བསྒྱུར་དྲུག་གི་ནང་གི་རྡོ་རྗེ་སེམས་དཔའི་སྔགས་བཟླ་བ་ནི། མན་ངག་རྙིང་པ་སུན་བྱུང་ནས་ཆོས་ལ་དབང་ཟ་བར་བྱེད་པ་སྟེ། སྤྱིར་བདེ་མཆོག་སྐུ་མདོག་དཀར་པོ་ཡིན་པ་ཙམ་ལ་དེ་བཞིན་འབྱུང་དུ་རུང་ཡང༌། ཁ་ཆེ་པཎ་ཆེན་གྱི་མན་ངག་འདིའི་དབང་དུ་བྱས་ནས། འདི་ཉིད་ལཱུ་ཡི་པའི་མན་ངག་ཡིན་པར་རང་ཉིད་ཁས་ལེན་བཞིན་དུ་
ལཱུ་ཡི་པའི་སྒྲུབ་ཐབས་ན་གཏན་མེད་པའི་སྔགས་འདི་བཟློས་པའི་ཕྱིར་རོ། །དེས་ན་འདི་ནི་ལྭ་ཝ་པ་དང་བི་བྷཱུ་ཏི་དང༌། པྲཛྙཱ་རཀྵི་ཏ་རྣམས་ཀྱིས་བཤད་པ་ལྟར་གྱི་རྣལ་འབྱོར་ཆེན་པོའི་སྐབས་སུ་འབྱུང་བའི་ཡེ་ཤེས་སེམས་དཔའ་དེ་ཉིད་ལོགས་སུ་ཕྱུང་བའི་སྒྲུབ་ཐབས་ཡིན་པར་མན་ངག་རིག་པ་དག་གསུང་ཞིང༌། དོན་ལ་ཡང་གནས་སོ། །དེའི་ཕྱིར་སེམས་དཔའ་སུམ་བརྩེགས་བྱེད་པ་དང༌། སྣོད་བཅུད་འོད་གསལ་དུ་བསྡུ་ལུགས་སྤྱི་འགྲོ་ཙམ་དུ་སྦྱོར་པ་ཡང་མི་ལེགས་ཤིང༌། བི་བྷཱུ་ཏི་དང༌། པྲཛྙཱ་རཀྵི་ཏའི་ལུགས་དང་ཡང་མི་མཐུན་ནོ་ཞེས་པ་ཅལ་ཅོལ་ཙམ་མོ། །འདིའི་རྫོགས་རིམ་གྱི་རྣམ་གཞག་ཀྱང་བི་བྷཱུ་ཏིས་མཛད་པའི་འགྲེལ་པ་ཁྱད་པར་གསལ་བྱེད་ཀྱི་བཤད་པའི་རྣམ་གྲངས་རྟིང་མ་དང་ཤིན་ཏུ་མཐུན་པར་ཡོད་ལ། ཨ་བྷ་ཡཱ་ཀཱ་རས་བཤད་པའི་ཁ་བསྐང་བ་ཡིན་ནོ་ཞེས་ཟེར་ན་ཡང༌། སློབ་དཔོན་དེས་མཛད་པ་ལ། འདི་དང་འབྲེལ་བའི་བསྟན་བཅོས་ཡེ་མེད་པའི་ཕྱིར་རོ། །འཁོར་ལོ་བསྒྱུར་དྲུག་གི་དཀྱིལ་འཁོར་གྱི་གཙོ་བོ་ཙམ་ལ་བསམ་པ་སྲིད་ན་ཡང༌། ཤིན་ཏུ་མི་འདྲ་བ་ཆེ་བའི་ཕྱིར་ཕྱོགས་སུ་འགྲོ་བ་ཙམ་ཡང་མ་ཡིན་ནོ། །ཞེས་པ་དེ་ཙམ་ཞིག་ལུགས་སྔ་ཕྱི་གཉིས་ཀྱི་ཁྱད་པར་ཤེས་ཤིང་སྒྲུབ་ཐབས་གསར་པའི་རང་མཚང་གོ་བའི་ཕྱིར་མགོ་སྨོས་ཙམ་དུ་ཟད་ཀྱི། མང་དུ་སྨྲས་པས་ཅི་ཞིག་བྱ། འདིའི་བྱིན་རླབས་བྱེད་པར་འདོད་པས། མཎྜལ་པདྨ་འདབ་བརྒྱད་ཚོམ་བུ་དཀར་པོ་ཅན་མཐའ་མཆོད་གཏོར་གྱིས་བསྐོར། སྔོན་འགྲོ་གཏོར་མ་བཏང༌། མཆོད་པ་བྱིན་རླབས་བདེ་མཆོག་སྤྱི་དང་མཐུན་པར་བྱ། གོང་བཞིན་བདག་བསྐྱེད་སོང་བ་ན། མདུན་བསྐྱེད་ཀྱང་བདག་བསྐྱེད་བཞིན་དུ་བསྐྱེད་ལ། ཨརྒྷཾ་ནས་
ཤཔྟའི་བར་གྱིས་ཕྱི་མཆོད་དང༌། འབྲུ་གསུམ་གྱིས་ནང་མཆོད་དང༌། གསང་བའི་མཆོད་པ་ཡིད་ཀྱིས་ཕུལ་ནས་བསྟོད་པ་རྒྱས་བསྡུས་གང་རུང་བྱ། གཏོར་མ་ཕུལ། བཟླས་པ་ཅི་འགྲུབ་བྱ། སློབ་མ་ལ་བྱེད་པ་ལྟར་ཏིང་ངེ་འཛིན་གྱི་དབང་བཞི་བླང༌། སློབ་མས་མཎྜལ་ཕུལ། གང་གི་དྲིན་གྱིས་སོགས་དང༌། སངས་རྒྱས་ཀུན་གྱི་སོགས་དང༌། དོན་དམ་སྨྲ་བའི་སེངྒེ་སོགས་ཀྱིས་གསོལ་བ་བཏབ། འགྲོ་རྣམས་བསྒྲལ་འདོད་བསམ་པ་ཡི། །སོགས་སྐྱབས་འགྲོ་སེམས་བསྐྱེད་བྱ། རྒྱུན་བཤགས་དང་རིགས་ལྔའི་སྡོམ་བཟུང་རྣམས་སོང་བ་ན། དམ་ཚིག་ཉེར་གཉིས་བཟུང་བ་ཡི་གེ་སྔ་མ་རྣམས་ན་མེད་པས་མ་བྱས་ཀྱང་ཆོག་ལ། བྱས་ཀྱང་འགལ་བ་མེད་པར་མངོན། དེ་ནས་སློབ་དཔོན་དང་མདུན་བསྐྱེད་དབྱེར་མ་མཆིས་པ་མངོན་རྟོགས་བཞིན་བསྐྱེད། དེའི་ཐུགས་ཀ་ནས་འོད་འཕྲོས། སློབ་མའི་ལུས་ལ་ཕོག་པས་སྡིག་སྒྲིབ་མཐའ་དག་སྦྱངས་ནས་སྔར་བཞིན་བསྐྱེད་པ་ལ་ཡེ་ཤེས་པ་བསྟིམ། རོལ་མོའི་སྒྲ་བྱ། སློབ་དཔོན་དང་སློབ་མ་གཉིས་ཀའི་གནས་གསུམ་དུ་ཡི་གེ་འབྲུ་གསུམ་གསལ་བཏབ་ལ། སློབ་དཔོན་གྱི་དཔྲལ་བའི་ཨོཾ་ལས་འོད་ཟེར་འཕྲོས། སངས་རྒྱས་ཐམས་ཅད་ཀྱི་སྐུའི་བྱིན་རླབས་མ་ལུས་པ་ཐམས་ཅད་ཨོཾ་དཀར་པོའི་རྣམ་པར་སྤྱན་དྲངས། སློབ་དཔོན་གྱི་དཔྲལ་བའི་ཨོཾ་ལ་ཐིམ། ཡང་སློབ་དཔོན་གྱི་དཔྲལ་བ་ནས་སྐུའི་བྱིན་རླབས་མ་ལུས་པ་ཐམས་ཅད་ཨོཾ་དཀར་པོ་དཔག་ཏུ་མེད་པའི་རྣམ་པར་བྱོན། སློབ་མའི་དཔྲལ་བའི་ཨོཾ་ལ་ཐིམ། རོལ་མོའི་བྱ་སྟེ། བུམ་དབང་ངོ༌། །དེ་བཞིན་དུ་
མགྲིན་པའི་ཨཱཿལས་གསང་དབང༌། ཐུགས་ཀའི་ཧཱུཾ་ལས་ཤེར་དབང༌། གསུམ་ཀ་ལས་དབང་བཞི་པ་ཐོབ་པར་བསམ་སྟེ། གོང་མས་རིགས་འགྲེ། རྗེས་ཀྱི་བྱ་བ་སྤྱི་དང་འདྲའོ། །རབ་ཟབ་རྫོགས་རིམ་དང་འབྲེལ་བའི། །མན་ངག་མཁས་ཀུན༵་དག༵འ་བའི་ཕུལ། །སྙིང༵་པོ༵་ལྷན་སྐྱེས་སྒྲུབ་ཐབས་འདི། །ཟབ་ཅིང་ཡིད་ཆེས་གནས་ཀྱི་མཆོག །བདེ་མཆོག་དཀར་པོའི་སྒྲུབ་ཐབས་ཀྱི་ལེ་ཚན་ནོ།། །།བདེ་མཆོག་དཀར་པོའི་ཚེ་སྒྲུབ་ཀྱི་ལེན་ཚན།
བདེ་མཆོག་དཀར་པོའི་ཚེ་སྒྲུབ།
ཨོཾ་སྭཱ་སྟི། བདེ་ཆེན་ཧེ་རུ་ཀ་དཔལ་ནི། །སྟོང་ཉིད་རྣལ་འབྱོར་མ་དང་སྦྱོར། །དེ་ལ་གུས་པས་བཏུད་བྱས་ནས། །ཚེ་སྒྲུབ་ཅུང་ཟད་བཤད་པར་བྱ། །འདི་ལ་སྒྲུབ་ཐབས་ཀྱི་ཁྱད་པར་ནི། བྱང་ཆུབ་སྒྲུབ་ལམ་ཉིད་དང་འདྲ་བ་ལས། རང་ཉིད་རུས་པའི་རྒྱན་དྲུག་དང༌། སྟག་ལྤགས་ཀྱིས་བརྒྱན་པ་དང༌། ཡུམ་ལ་ཐོད་སྐམ་གྱི་དོ་ཤལ་བྱེད། བཟླས་པའི་སྐབས་ཚེ་སྒྲུབ་ཀྱི་དམིགས་པ་དང་བཅས། ཨོཾ་ཧྲིཿཧ་ཧ་ཧཱུཾ་ཧཱུཾ་ཕཊ་མ་མ་ཨཱ་ཡུར་པུཥྟིཾ་ཀུ་རུ་ཨོཾ། ཞེས་ཅི་ནུས་སུ་བཟླའོ། །འདི་ལ་ཡིག་རྙིང་འགའ་ན་ཞབས་སྐྱིལ་ཀྲུང་གིས་བཞུགས་པར་བྱས་པའང་ཡོད་པས་གང་མོས་སུ་བྱའོ། །དེ་ནས་རླུང་བུམ་ཅན་བཟུང༌། རང་ཡབ་རྐྱང་དུ་གསལ་བའི་ཐུགས་ཀ་ནས་ལྷ་མོ་ལྔ་ཐོད་པ་ཐོགས་པ་སྤྲོས། ཁམས་གསུམ་གྱི་བཅུད་རྣམས་ཐོད་པར་བསྡུས་ཏེ། རང་གི་སྣ་བུག་གཡོན་ནས་བླུགས་པས་ལུས་གང༌། ལྷ་མོ་རྣམས་གཅིག་ཏུ་འདྲེས་རང་ལ་འཁྱུད་སྦྱོར་གྱིས་ཞུགས་པར་བསམ། ཡང་སྤྱི་བོར་ཁ་ཊྭཱཾ་ག་དཀར་པོ་ཧཱུཾ་གིས་མཚན་པ་མགོ་ཐུར་བསྟན། དེའི་འོད་ཀྱིས་འཁོར་འདས་ཀྱི་བཅུད་བསྡུས། ཁ་ཊྭཱཾ་ག་ནས་བརྒྱུད་སྤྱི་བོ་ནས་
ཞུགས། འཁོར་ལོ་བཞིར་དགའ་བཞི་ཉམས་སུ་མྱོང༌། ལུས་ཐམས་ཅད་བདུད་རྩི་རླན་དྲོད་ཅན་གྱྀས་གང་བར་བསམ། འདིའི་བྱིན་རླབས་ནི། མཎྜལ་གྱི་སྟེང་དུ་བུམ་ཐོད་བརྩེགས་པ་བཤམས། སྡོམ་བཟུང་ཡན་ཆད་བདེ་མཆོག་དཀར་པོ་བྱང་ཆུབ་སྒྲུབ་པ་དང་འདྲ། དངོས་གཞི་སློབ་མ་ལྷར་བསྐྱེད། བཟླས་ལུང་སྦྱིན། ལྷ་དབང་བསྐུར་བའི་དམིགས་པ་སྤྱི་དང་འདྲ་བའི་སྒོ་ནས་བུམ་པའི་ཆུས་དབང་བསྐུར་བུམ་དབང་ངོ༌། །ཐོད་པ་ལ་བརྟེན་ནས་ཚེ་བསྲིང་བའི་དམིགས་པ་ཕོག ནང་མཆོད་སྦྱིན། གསང་དབང་ངོ༌། ཁ་ཊྭཱཾ་ག་ལ་བརྟེན་པའི་དམིགས་པ་ཕོག ཤེར་དབང་ངོ༌། །གནས་ལུགས་ཀྱི་ལྟ་བ་སྐྱོང་དུ་བཅུག་སྟེ། དབང་བཞི་པའོ་ཞེས་བརྡ་སྤྲད། རྗེས་སྤྱི་དང་འདྲའོ། །ཚེ་སྒྲུབ་ཀུན༵་ནས་ཟབ་པའི་ཕུལ། །རྒྱུད་དོན་ཡིད་ཆེས་ཆེས་དག༵འ་བ། །མི་ལུས་སྙིང་པོ་ལེན་འདོད་ན། །འདིའམ་འདི་འདྲའི་རིགས་སྒོམས་ཤིག །བདེ་མཆོག་དཀར་པོའི་ཚེ་སྒྲུབ་ཀྱི་ལེན་ཚན་ནོ།། །།
འཇིག་རྟེན་དབང་ཕྱུག་ཡི་གེ་བདུན་པར་གྲགས་པའི་སྒྲུབ་ཐབས།
ཨོཾ་སྭཱ་སྟི། དཔའ་བོ་བདེ་མཆོག་ཧེ་རུ་ཀ །སྤྱན་རས་གཟིགས་དང་གཉིས་མེད་པ། །དེ་ལ་བཏུད་ནས་སྒྲུབ་ཐབས་ནི། །མདོ་ཙམ་བདག་གིས་བྲི་བར་བྱ། །བསོད་ནམས་ཚོགས་བསོག་སྤྱི་དང་མཐུན། ཤཱུ་ནྱ་ཏའི་སྔགས་དོན་བསམ། ཡཾ་རཾ་བཾ་ལཾ་སུཾ་ལས་འབྱུང་བཞི་རི་རབ་དང་བཅས་པའི་རྩེ་མོར་ཧཱུཾ་ལས་བསྲུང་བའི་འཁོར་ལོར་གྱུར། ཨོཾ་མེ་དྷི་ནི་སོགས་སྔགས་དྲུག་བདེ་མཆོག་བཞིན་བརྗོད། དབུས་སུ་འཁོར་ལོ་རྩིབས་དྲུག་པ་ལྟེ་བར་པད་ཉིའི་གདན་ལ། ཨཱ་ལི་ལས་ཟླ་བ་དཀར་པོ། ཀཱ་ལི་ལས་ཟླ་བ་དམར་པོ། དེའི་དབུས་
སུ་ཧཱུཾ། འོད་ཟེར་འཕྲོ་འདུ་ལས་རང་ཉིད་དཔལ་ཆེན་སྤྱན་གཟིགས་སྐུ་མདོག་མཐིང་ཀ་ནག་དཀར་དམར་བའི་ཞལ་གསུམ། ཕྱག་དང་པོ་གཉིས་ཀྱིས་རྡོར་དྲིལ་འཛིན་པས་ཡུམ་སྒེག་མོ་དམར་མོ་མདའ་གཞུ་འཛིན་པ་ལ་འཁྱུད་པ། གཉིས་པ་གཉིས་ཀྱིས་མི་ལྤགས་སྟོད་གཡོགས་སུ་འཕྱར་བ། ཐ་མ་གཉིས་ཌ་མ་རུ་དང་ཐོད་ཁྲག་འཛིན་ཞིང༌། མཆན་ཁུང་ན་ཁ་ཊྭཱཾ་ག །རུས་དུམ་གྱི་དོ་ཤལ་དང༌། མེ་ཏོག་དང་རིན་པོ་ཆེས་ཀྱང་བརྒྱན་པ། ཞབས་གཡོན་བསྐུམས་པས་དབང་ཕྱུག་དང༌། གཡས་བརྐྱང་བས་དཀར་མོ་མནན་པ། དབུ་སྐྲ་དམར་སེར་འཁྱིལ་བ་ལ་ཨུ་དུམ་བ་རའི་མེ་ཏོག་ཅན། ཧེ་རུ་ཀའི་ཆ་བྱད་རྫོགས་པའོ། །རྩིབས་དྲུག་ལ་མདུན་ནས་གཡོན་བསྐོར་གྱིས། ཕཊ་ཧཱུཾ་ཧ་ཧ་ཧྲཱིཿཨོཾ་ལས་ཧེ་རུ་ཀ་མ་སྔོན་མོ། འཇིགས་མ་སེར་མོ། དྲག་མོ་དམར་མོ། དབང་བྱེད་མ་ལྗང་ཁུ། རྣམ་ལྟས་མ་དུད་ཁ། རྡོ་རྗེ་མཁའ་འགྲོ་མ་དཀར་མོ། ཐམས་ཅད་ཞལ་གཅིག་ཕྱག་བཞི་ཌ་མ་རུ་དང་དྲིལ་བུ་མི་ལྤགས་བསྣམས་པ། ཉི་མ་དང་རོ་གདན་ལ་བཞུགས་ཤིང༌། རྣམ་པ་གཙོ་བོ་དང་མཚུངས་པའོ། །ཡེ་ཤེས་པ་བསྲེས། ལཾ་མཾ་པཾ་ཏཾ་ཁཾ་ཁམས་ལྔ་ཡུམ་ལྔར་གྱུར། ཨོཾ་ཨཾ་ཧྲཱིཿཧོ་ཧཱུཾ་ཕུང་པོ་ལྔ་རིགས་ལྔར་གྱུར། བྷྲུཾ་ཧཱུཾ་ཨཾ་ཁཾ་ཧཾ་ཧཾ། སྐྱེ་མཆེད་དྲུག་ལ་གནས་པ་སེམས་དཔའ་དྲུག་གི་བདག་ཉིད་དུ་གྱུར། ཡབ་ཀྱི་གནས་རྣམས་སུ། ཨོཾ་ཧ། ན་མ་ཧི། སྭཱཧཱ་ཧཱུཾ། བཽ་ཥ་ཊྭ་ཧེ། ཧཱུཾ་ཧཱུཾ་ཧོ། ཕཊ་ཧཾ། ཡུམ་གྱི་གནས་རྣམས་སུ།
ཨོཾ་བཾ། ཧཾ་ཡོཾ། ཧྲིཾ་མོཾ། ཧྲིཾ་ཧྲིཾ། ཧཱུཾ་ཧཱུཾ། ཕཊ་ཕཊ། གནས་གསུམ་དུ། ཨོཾ་ཨཱཿཧཱུཾ། དབང་གི་ལྷ་རྣམས་ཀྱིས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ་ཞེས་དབང་བསྐུར། གཙོ་འཁོར་ཐམས་ཅད་ལ་རྡོ་རྗེ་སེམས་དཔས་དབུ་བརྒྱན། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། ཅེས་ཅི་ནུས་སུ་བཟླའོ། །ཐུན་གྱི་མཐར། དཀྱིལ་འཁོར་རང་ལ་བསྡུས། རང་ཉིད་ཀྱང་ནམ་མཁའ་ལ་འཇའ་ཡལ་བ་བཞིན་དུ་གྱུར། དབྱིངས་དང་མཉམ་པར་བཞག །གཏོར་ཆོག་ནི། གཏོར་མ་བསངས་སྦྱངས། འབྲུ་གསུམ་གྱིས་བྱིན་གྱིས་བརླབས་ནས། ཡེ་ཤེས་པ་དང་འཇིག་རྟེན་པ་ལྷན་ཅིག་ཏུ་འབུལ་བའི་ལུགས་ཡིན་པས། མཁའ་འགྲོ་སྤྱི་གཏོར་ཁོ་ནས་ཆོག་གོ །འདིའི་བྱིན་རླབས་བྱེད་ཚུལ་ནི། མཎྜལ་ལ་འཁོར་ལོ་སེར་པོ་རྩིབས་དྲུག་ལྟེ་བ་ཉི་གདན་དུ་བྱ། རྩིབས་རྣམས་ལའང་ཉི་གདན་ཆུང་ངུ་རེ་འགོད། གདན་དེ་རྣམས་ཀྱི་སྟེང་དུ་ལྷ་རྣམས་ཀྱི་ཁ་དོག་དང་མཐུན་པའི་རྡུལ་ཚོན་གྱི་ཚོམ་བུ་དང༌། འཁོར་ལོའི་ཕྱི་རོལ། པད་རྭ། རྡོ་རྭ། མེ་རིས་བསྐོར། ནང་དུ་གཏོར་མ་གཉིས་དང་མཆོད་པ་བཟང་དུ་བཤམས། ཡོལ་བས་མཚམས་བཅད། སྔོན་འགྲོ་གཏོར་མ་བགེགས་གཏོར་གྱི་ཚུལ་དུ་བཏང༌། གནས་ཡོ་བྱིན་རླབས་སྤྱི་དང་མཐུན། སྐྱབས་འགྲོ་སེམས་བསྐྱེད་སྔོན་དུ་སོང་ནས། མདུན་བསྐྱེད་ཀྱི་དཀྱིལ་འཁོར་བསངས་སྦྱངས། དེའི་དབུས་སུ་རང་ཉིད་འདུག་པར་བསམས་ལ། གོང་བཞིན་བཟླས་པ་ཡན་ཆད་མངོན་རྟོགས་རྫོགས་པར་བསྒོམ། གཏོར་མ་དང་པོ་དེ་བསྔོས་ལ་གཙང་སར་བཏང༌། སློབ་མས་མཎྜལ་ཕུལ། མིག་དར༌། མེ་ཏོག དགའ་ཆེན་ཁྱོད་སོགས་གསོལ་བཏབ། རྒྱུན་བཤགས། རིགས་ལྔའི་སྡོམ་བཟུང༌། ཟླ་བ་རྡོ་རྗེའི་སེམས་
བསྐྱེད་མནའ་ཆུ་བླུད་པ་རྣམས་བྱ། མདུན་བསྐྱེད་ཀྱི་ཐུགས་ཀ་ནས་ལྷ་ཚོགས་དཔག་ཏུ་མེད་པ་འཕྲོས་ནས། སློབ་མ་ལ་བསྟིམ། ཡིག་བདུན་གྱི་མཐར་ཨ་བེ་ཤ་ཡ་བཏགས་པ་མང་དུ་བཟླ། ཧེ་རུ་ཀ་དཔལ་དེང་ཁྱོད་ཀྱི་སོགས་ཀྱིས་གདོང་གཡོགས་བཀྲོལ། ཨོཾ་པྲ་ཏཱིཙྪ་བཛྲ་ཧོས་གཙོ་བོ་ལ་མེ་ཏོག་གཏོར། མདུན་བསྐྱེད་ལྷ་ངོ་བསྟན། དངོས་གཞིའི་དོན་དུ་མཎྜལ་ཕུལ། སློབ་མ་མངོན་རྟོགས་བཞིན་གཙོ་བོར་བསྐྱེད། ཡེ་ཤེས་པ་བསྟིམ། མངོན་རྟོགས་བཞིན་དབང་བསྐུར། རིགས་བདག་གི་རྒྱས་འདེབས་བུམ་དབང༌། ཡི་གེ་བདུན་པས་ནང་མཆོད་སྦྱིན། གསང་དབང༌། ལྟེ་བའི་གཏུམ་མོ་འབར་ཏེ་སྤྱི་བོའི་ཧཾ་ཡིག་ཞུ་བའི་དགའ་བ་བཞིའི་དོན་ལ་ངོ་སྤྲད། ཤེར་དབང༌། སེམས་ཕྱག་རྒྱ་ཆེན་པོར་ངོ་སྤྲད་པ་དབང་བཞི་པ། དེ་ནས་བཟླས་ལུང་སྦྱིན། སློབ་མ་དང་མདུན་བསྐྱེད་ཀྱི་རྗེས་ནི་སྤྱི་དང་འདྲ་བ་ལས། མཆོད་བསྟོད་སོང་བའི་རྗེས་སུ་གཏོར་མ་གཉིས་པ་དེ་བསྔོ་བ་ཡིན་ནོ། །ཀུན༵་ནས་ཟབ་པ་མི་ཏྲའི་གསུང༌། །ལོ་ཙྪ་བ་ལ་རྗེས་གནང་ཚེ། །མཆོག་ཏུ་དག༵འ་བས་ཡི་གེར་བཀོད། །དེའི་སྙིང༵་པོ༵་འདི་ཙམ་ལགས། འཇིག་རྟེན་དབང་ཕྱུག་ཡི་གེ་བདུན་པར་གྲགས་པའི་སྒྲུབ་ཐབས་ཀྱི་ལེ་ཚན་ནོ། །དར་རྒྱས་འཕེལ།། །།
དཔལ་ཀྱཻ་རྡོ་རྗེའི་སྙིང་པོའི་ཧེ་རུ་ཀ་ལྷན་སྐྱེས་ཀྱི་སྒྲུབ་པའི་ཐབས།
དཔལ་ཀྱཻ་རྡོ་རྗེའི་སྙིང་པོའི་ཧེ་རུ་ཀ་ལྷན་སྐྱེས་ཀྱི་སྒྲུབ་པའི་ཐབས། ན་མོ་བཛྲ་དྷ་རཱ་ཡ། དཔལ་ལྡན་རྡོ་རྗེ་སྙིང་རྗེའི་སྟོབས། །གདུལ་དཀའ་འདུལ་མཛད་ལ་བཏུད་དེ། །ཤིན་ཏུ་གུས་ཤིང་བརྩོན་ལྡན་ལ། །སྒྲུབ་ཐབས་མདོར་བསྡུས་བཤད་པར་བྱ། དགྱེས་པའི་རྡོ་རྗེ་ལྷན་སྐྱེས་སྒོམ་པར་འདོད་པས། སྐྱབས་འགྲོ་སེམས་བསྐྱེད་སྔོན་དུ་བཏང་སྟེ། ཚད་མེད་བཞི་སྤྱི་དང་མཐུན་པར་བསྒོམ། ཤཱུ་ནྱ་ནས་སྟོང་བར་སྦྱངས། སྟོང་པའི་
ངང་ལས་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་སྣ་ཚོགས་རྡོ་རྗེ་ལྟེ་བ་ལ་ཧཱུཾ་གིས་མཚན་པ་ལས་འོད་འཕྲོས། བསྲུང་བའི་འཁོར་ལོར་གྱུར། ཨོཾ་རཀྵ་རཀྵ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། རང་གི་སྙིང་ནང་དུ་ཉི་མའི་སྟེང་དུ་ཟླ་བ། དེ་གཉིས་ཀྱི་བར་དུ་སྣ་ཚོགས་རྡོ་རྗེ་ཧཱུཾ་གིས་མཚན་པ། དེ་ལས་འོད་འཕྲོས་ལུས་ཐམས་ཅད་གང༌། སྡིག་སྒྲིབ་ཐམས་ཅད་དག །རང་ཉིད་ཧེ་རུ་ཀའི་སྐུར་གྱུར་པ་ནི། སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་དམར་བ་མི་བསྐྱོད་པས་སྤྱི་བོ་མཚན་པ། ཧཱུཾ་གིས་སྒྲས་འཇིགས་པའང་འཇིགས་པར་མཛད་པ། སྐྲ་སེར་གྱེན་དུ་བརྫེས་པ། ཕྱག་གཡས་རྡོ་རྗེ་རྩེ་དགུ་པ་འཕྱར་བ། གཡོན་ཐོད་ཁྲག་ཐུགས་ཀའི་ཐད་དུ་འཛིན་པ། མཆན་ཁུང་དུ་ཁ་ཊྭཱཾ་ག་དཀར་པོ། ཐོད་སྐམ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་ཅན། ཕྱག་རྒྱ་ལྔ་དང་ཐལ་པས་བརྒྱན་པ། གཡོན་བརྐྱང་བའི་སྐྱིལ་ཀྲུང་ཕྱེད་པའི་གར་སྟབས་སམ། གཡས་བརྐྱང་གི་སྟབས་ཀྱིས་པད་ཉི་དབུགས་བྲལ་དང་བཅས་པའི་གདན་ལ་བཞུགས་པ། ཡུམ་རྡོ་རྗེ་བདག་མེད་མ་སྔོན་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། གཉིས་ཀའང་ཡེ་ཤེས་ཀྱི་མེ་འབར་བའི་ཀློང་ན་བཞུགས་པའོ། །གལ་ཏེ་ཡབ་རྐྱང་དུ་བྱེད་ན་སྟག་ལྤགས་ཀྱི་ཤམ་ཐབས་ཅན་དུ་བྱའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། དེ་ནས་ལྷའི་
སྐུ་ལ་ཡུན་རིང་དུ་སེམས་འཛིན། སྤྲོ་ན་འཁོར་ལོའི་བཟླས་དམིགས་གསལ་བཏབ་ལ། ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཞེས་ཅི་ནུས་བཟླ། གལ་ཏེ་རྫོགས་པའི་རིམ་པ་སྒོམ་པར་འདོད་ན། སྙིང་གར་མར་མེ་མཐེ་བོང་ཙམ་གྱི་རྩེ་ལ་འོད་ཟེར་ཕྲ་མོ་རྟ་རྔ་ཙམ་སོར་གཉིས་ཀྱི་ཚད་དུ་འབར་བའི་རྩེ་ལ་ནོར་བུ་ལྗང་ཁུ་གྲུ་གསུམ་སྲན་མ་ཙམ་ལ་སེམས་གཏད། ཉིན་མོ་དེ་ཀླད་རྒྱའི་སྟེང་དུ་བསྒོམ། བྱིང་ན་སྤྱི་བོའི་སྟེང་དང༌། རྒོད་ན་ལྟེ་བར་བསྒོམ། ཐུན་མཚམས་ལ་འཇུག་པའི་ཚེ། ལྷ་སྐུ་འོད་གསལ་དུ་བསྡུས་ཏེ། སླར་ཡང་ལྷ་སྐུར་ལངས་ལ། དགེ་བ་བསྔོ། གཏོར་མ་ཨ་མྲྀ་ཏས་བསངས། སྭ་བྷཱ་ཝས་སྦྱངས། ཨོཾ་ཨཱཿཧཱུཾ་ཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། བཅོམ་ལྡན་འདས་དཔལ་ཀྱཻ་རྡོ་རྗེ་ལ་སངས་རྒྱས་དང་བྱང་ཆུབ་སེམས་དཔའ་མཁའ་འགྲོ་ཆོས་སྐྱོང་སྲུང་མ། ཕྱོགས་སྐྱོང་བའི་ཚོགས་དང་བཅས་པ་ཐམས་ཅད་ཀྱིས་བསྐོར་བ་བཛྲ་ས་མཱ་ཛཿ ཨོཾ་ཨ་ཀཱ་རོ་མུ་ཁཾ་སོགས་ལན་བདུན་གྱིས་གཏོར་མ་ཕུལ། ཨརྒྷཾ་ནས་ཤཔྟའི་བར་གྱིས་མཆོད། མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་འཕྲེང་བས་བརྒྱན། །ཤ་ཆེན་རབ་ཏུ་གསོལ་མཛད་པའི། །ཧེ་རུ་ཀ་དཔལ་ཕྱག་འཚལ་བསྟོད། །མཆོད་སྦྱིན་གཏོར་མ་འདི་བཞེས་ལ། །ཞེས་སོགས་ཀྱིས་འདོད་དོན་གསོལ་བ་བཏབ། ཡིག་བརྒྱ་བཟོད་གསོལ། གཤེགས་སུ་གསོལ་བ་སོགས་གཞན་རྣམས་དང་མཐུན་པར་བྱ། རྣལ་འབྱོར་གཞན་རྣམས་ཀྱང་སྤྱི་དང་མཐུན་པ་ཡིན་པས་རིག་འཛིན་པ་རྣམས་ཀྱིས་རྟོགས་པར་བྱའོ། །འདིའི་བྱིན་རླབས་ཀྱི་ཆོ་ག་ནི། མཎྜལ་པདྨ་
འདབ་བཞི་ལྟེ་བར་ཉི་གདན་ཚོམ་བུ་དང་བཅས་པ། མཐའ་མཆོད་གཏོར་གྱིས་བསྐོར། ནང་མཆོད་ཞིག་ཀྱང་བཤམས་ལ། མཁའ་འགྲོ་སྤྱི་གཏོར་རམ། ཀྱཻ་རྡོར་གྱི་མངོན་རྟོགས་ལྟར་སྔོན་འགྲོ་གཏོར་མ་བཏང༌། མཆོད་པ་བྱིན་རླབས་བྱ། བདག་བསྐྱེད་བཟླས་པའི་བར་དུ་སོང་ནས། མདུན་བསྐྱེད་བསངས་སྦྱངས། བདག་བསྐྱེད་བཞིན་བསྐྱེད་ལ། ཡེ་ཤེས་པ་བསྟིམ་པའི་བར་བྱ། གཏོར་མ་གོང་བཞིན་འབུལ་བ་ལས། བཅོམ་ལྡན་འདས་དཔལ་ཀྱཻ་རྡོ་རྗེ་ལ། ཞེས་པའི་ཚིག་བོར། འདོད་དོན་གསོལ་བཏབ་ཀྱི་བར། བཟླས་པ་ཅི་ནུས་བྱ། དེ་ནས་མཆོད་བསྟོད་བྱས་ལ། ཀ་པཱ་ལའི་བདུད་རྩི་ལ་དམིགས་ནས་བཟླས་པ་ཅི་ནུས་ཞིག་བྱའོ། །མཐར་འབྲུ་གསུམ་ལན་ཉེར་གཅིག་ཙམ་བརྗོད། བདུད་རྩིར་མོས་པ་ཙམ་ལས་དམིགས་པ་གཞན་མི་དགོས། སློབ་མས་མཎྜལ་ཕུལ། ཀུན་མཁྱེན་ཡེ་ཤེས་སོགས་ཤླཽ་ཀ་གཉིས་དང༌། རྒྱུན་བཤགས་དང༌། རིགས་ལྔའི་སྡོམ་བཟུང་སྤྱི་དང་མཐུན། ཡེ་ཤེས་འཕོ་བ་སྐུའི་རྗེས་གནང་སྤྱི་དང་འདྲ་བ་ཞིག་བྱས་ལ། སློབ་དཔོན་ཀྱཻ་རྡོ་རྗེར་གསལ་བས། སངས་རྒྱས་རྣམས་ནི་ཐམས་ཅད་ཀྱིས། །ཞེས་སོགས་བརྗོད་ཅིང༌། ནང་མཆོག་ཐོད་པ་སྤྱི་བོར་བཞག བདུད་རྩི་སྲིན་ལག་གིས་གཏོར་བས། ལུས་གང་བས་བུམ་དབང་ཐོབ་པར་མོས་སུ་གཞུག །རྡོ་རྗེ་ཆེ་དང་དྲིལ་བུ་ཆེ། སོགས་བརྗོད། བདུད་རྩི་བྱིན་ལ་ཇི་ལྟར་བཟླས་པའི་སོགས་བརྗོད་པ་གསང་དབང༌། སློབ་དཔོན་གྱི་ཐུགས་ཀ་ནས་རྡོ་རྗེ་བདག་མེད་མ་སྤྲོས་ཏེ། སློབ་མའི་ལུས་ལ་འཁྱུད་པས་བདེ་སྟོང་སྐྱེས་པར་མོས་སུ་འཇུག དགའ་
སྟེར་གནས་དེར་སོགས་བརྗོད། ཤེས་རབ་ཡེ་ཤེས་སོ། །སྟོང་ཉིད་ལ་མཉམ་པར་འཇོག་ཏུ་བཅུག་ལ། ཡེ་ཤེས་འདི་ནི་སོགས་བརྗོད་དེ་དབང་བཞི་པའོ། །དེ་ནས་བཟླས་ལུང་སྦྱིན། དབང་གི་མཐའ་བརྟེན་རྣམས་ཐོབ་པར་མོས། རྗེས་ཀྱི་བྱ་བ་རྣམས་སྤྱི་དང་འདྲའོ། །ཀུན༵་ཏུ་ཟབ་ཅིང་ཚིག་ཉུང་བ། །རྣལ་འབྱོར་ཅན་རྣམས་དག༵འ་བའི་གནས། །སྤྲོས་པ་ཀུན་སྤངས་སྙིང༵་པོ༵འི་དོན། །སྒྲུབ་ཐབས་འདི་ནི་ངོ་མཚར་རྨད། །ཅེས་པ་དཔལ་ཀྱཻ་རྡོ་རྗེའི་སྙིང་པོའི་ཧེ་རུ་ཀ་ལྷན་སྐྱེས་ཀྱི་སྒྲུབ་པའི་ཐབས་བསྟན་པའི་ལེ་ཚན་ནོ།། །།
དུས་འཁོར་ལྷན་སྐྱེས་ཀྱི་སྒྲུབ་ཐབས།
དུས་འཁོར་ལྷན་སྐྱེས་ཀྱི་སྒྲུབ་ཐབས། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །ན་མཿཤྲཱི་ཀཱ་ལ་ཙཀྲཱ་ཡ། གང་འདིར་གཉིས་མེད་ཡེ་ཤེས་ཀྱི། །རིགས་བརྒྱ་རྣམ་དག་དམ་པའི་དངོས། །རྒྱལ་བ་དྲུག་འདུས་རྡོ་རྗེ་སེམས། །དུས་ཀྱི་འཁོར་ལོ་ལ་འདུད་དོ། །འདིར་དུས་འཁོར་ལྷན་སྐྱེས་སྒོམ་པར་འདོད་པས། སྐྱབས་སེམས་ཚད་མེད་བཞི་སྔོན་དུ་འགྲོ་བར་བྱ། ཤཱུ་ནྱ་ཏས་སྟོང་པར་སྦྱངས། སྟོང་པའི་ངང་ལས་རང་སྐད་ཅིག་གིས་དུར་འཁོར་ལྷན་སྐྱེས་སུ་གྱུར་པ་ནི། རླུང་མེ་ཆུ་དང་ས་ཡི་དཀྱིལ་འཁོར་ལྷུན་པོ་པདྨ་དང༌། །ཟླ་ཉི་དུས་མེའི་སྟེང་དུ་དབང་ཕྱུག་དང་ནི་བདུད་ཀྱི་མགོར། །ཞབས་ནི་སྲིད་པའི་ཡུམ་གྱི་ཞབས་དང་ལྷན་ཅིག་བཀོད་གྱུར་པ། །ལྷའི་དབང་པོས་བཏུད་པའི་གཙོ་ལ་སྤྱི་བོས་ཕྱག་འཚལ་ལོ། །སྐུ་མདོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཡོན་པ་དཀར་པོ་བསྐུམས་པས་དབང་ཕྱུག་དཀར་པོ་དང༌།
གཡས་པ་དམར་པོ་བརྐྱང་བའི་འདོད་ལྷ་དམར་པོའི་སྙིང་གར་མནན་པ། རལ་པའི་ཐོར་ཚུགས་དང༌། ཡིད་བཞིན་གྱི་ནོར་བུ་དང༌། ཟླ་བ་ཕྱེད་པས་དབུ་ལ་བརྒྱན་པ། །རྡོ་རྗེའི་རྒྱན་དང་སྟག་གི་པགས་པའི་ཤམ་ཐབས་ཅན། མཐེ་བོང་སེར་པོ། མཛུབ་མོ་དཀར་པོ། གུང་མོ་དམར་པོ། སྲིན་ལག་ནག་པོ། མཐེ་ཆུང་ལྗང་ཁུ། ཕྱག་སོར་རྣམས་ཀྱི་ཚིགས་ཀྱི་ཕྲེང་བ་དང་པོ་ནག་པོ། གཉིས་པ་དམར་པོ། གསུམ་པ་དཀར་པོའོ། །རྡོ་རྗེ་སེམས་དཔས་དབུ་བརྒྱན་ཞིང༌། མེ་རི་ཁ་དོག་སྣ་ལྔ་པའི་དབུས་ན་བཞུགས་པའོ། །དེ་ལ་འཁྱུད་པའི་སྣ་ཚོགས་ཡུམ་སྐུ་མདོག་སེར་མོ་ཞལ་གཅིག་ཕྱག་གཉིས་སྤྱན་གསུམ་མ། གྲི་གུག་དང་ཐོད་པ་འཛིན་པས་ཡབ་ལ་འཁྱུད་པ། ཞབས་གཡས་བསྐུམ་གཡོན་བརྐྱང་བས་ཡབ་དང་སྦྱོར་བ། གཅེར་བུ་ཕྱག་རྒྱ་ལྔས་བརྒྱན་ཞིང༌། དབུ་སྐྲ་ཕྱེད་གྲོལ་བའོ། །གཉིས་ཀའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ལྟེ་བར་ཧོཿསེར་པོ། གཙུག་གཏོར་དུ་ཧཾ་ལྗང་ཁུ། གསང་བར་ཀྵ་སྔོན་པོ་རྣམས་སུ་གྱུར། ཨོཾཨཱཿཧཱུཾ་ཧོ་ཧཾ་ཀྵཿ ཞེས་པའོ། །སྙིང་གར་རྣམ་བཅུ་དབང་ལྡན་བརྩེགས་པར་བསམས་ནས། ཨོཾ་སྭཱཧཱ། ཞེས་པ་ཅི་ནུས་བཟླ། ཐུན་མཚམས་སུ་དགེ་བ་བསྔོ། འདི་ལ་གཏོར་བསྔོ་སོགས་མེད་ཀྱང་རུང་ལ། སྤྲོ་ན། ཨོཾ་ཨཱཿཧཱུཾ་ཧྲཱ་ཕཊ་ཀྱིས་བསངས། སྭ་བྷཱ་ཝས་སྦྱངས། ཨོཾ་ཨཱཿཧཱུཾ་ཧོཿཞེས་བྱིན་གྱིས་བརླབས། སངས་རྒྱས་ཡབ་ཡུམ་སྲས་དང་བཅས་པ་གཡོག་འཁོར་དང༌། །གྲོགས་བཅས་གཉེན་རྣམས་དག་གིས་བསྐོར་བའི་
ཚོགས་པ་ནི། །ལྷ་དང་ལྷ་མོ་དག་གིས་མཉེས་པར་བྱེད་རྣམས་དང༌། །མཆོག་གི་རྡོ་རྗེ་སེམས་དཔའ་དག་ནི་གཤེགས་སུ་གསོལ། །ཞེས་མདུན་དུ་སྤྱན་དྲངས། སྙིང་པོར་མཐར་ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་ཕུལ། ཨརྒྷཾ་ནས་ཤཔྟའི་བར་གྱིས་མཆོད་ལ། སྟོང་ཉིད་སྙིང་རྗེའི་བདག་ཉིད་ཅན། །སྲིད་གསུམ་སྐྱེ་འཇིགས་མེད་པའི་དངོས། །ཤེས་དང་ཤེས་བྱ་གཅིག་པའི་སྐུ། །དཔལ་ལྡན་དུས་འཁོར་ལ་ཕྱག་འཚལ། །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་གསོལ་བ་བཏབ། རྗེས་སྤྱི་དང་མཐུན། གཏོར་མ་རྒྱས་པ་ལ་དགའ་ན། སྒྲུབ་ཐབས་ཆེན་མོ་རྣམས་སུ་ཤེས་པར་བྱའོ། །འདིར་རྗེས་གནང་སྤྱི་དང་འདྲ་ལ། ཐུགས་ཀྱི་རྗེས་གནང་ཕྱག་མཚན་བསྟིམ་པ་ཉིད་ཡིན་ནོ། །སྒྲུབ་ཐབས་ཀུན༵་ལས་ཆེས་བསྡུས་པ། །བློ་དམན་དག༵འ་བ་བསྐྱེད་པའི་གཞི། །བསྐྱེད་རིམ་སྙིང༵་པོ༵་ཉུང་ངུའི་ངག །འདི་ཡང་འགྲོ་ལ་ཕན་ཕྱིར་བརྩམས། །དུས་འཁོར་ལྷན་སྐྱེས་ཀྱི་སྒྲུབ་ཐབས་བསྟན་པའི་ལེ་ཚན་ནོ།། །།
ཁྲོ་བོའི་དབང་པོ་རྡོ་རྗེ་ཤུགས་ཀྱི་སྒྲུབ་ཐབས།
ཨོཾ་སྭཱ་སྟི། དུས་གསུམ་ཁྲོ་རྒྱལ་ཧེ་རུ་ཀ །ཀུན་འདུས་ཁྲོ་བོའི་དབང་པོ་ནི། །འཇིགས་བྱེད་སྣ་ཚོགས་གཟུགས་འཆང་བ། །དུས་འཁོར་ཁྲོས་པ་ལ་ཕྱག་འཚལ། །འདི་ལ་རྒྱས་པར་ན་དཔལ་དུས་ཀྱི་འཁོར་ལོའི་དཀྱིལ་འཁོར་ཡོངས་རྫོགས་ཀྱི་བསྲུང་འཁོར་གྱི་སྐབས་བཞིན་བསྒོམ་པ་ཡིན་མོད་ཀྱི། འདིར་བླ་མའི་མན་ངག་གིས་མདོ་ཙམ་དུ་བྱ་བ་ནི། སྐྱབས་སེམས་སྔོན་དུ་འགྲོ་བས། སྟོང་པའི་ངང་ལས་རྡོ་རྗེ་རྭ་བའི་དབུས་ན། ཨོཾ་པཾ་བི་ཤྭ་བཛྲ་པདྨཾ་ཀུ་རུ་ཀུ་རུ་སྭཱཧཱ། དེའི་ལྟེ་བར་ཉི་མའི་གདན། ཨོཾ་ར་བཛྲ་སཱུཪྱ་བཛྲ་སཱུཪྱ་ཨ་ས་ནཾ་ཀུ་རུ་
ཀུ་རུ་སྭཱཧཱ། དེའི་སྟེང་དུ་ཧཱུཾ་ལས་རྡོ་རྗེ་ནག་པོ་རྩེ་ལྔ་པ་ཡོངས་སུ་གྱུར་པ་ལས། བདག་ཉིད་ཁྲོ་བོའི་དབང་པོ་རྡོ་རྗེ་ཤུགས་སྐུ་མདོག་དུས་མཐའི་སྤྲིན་དང་མཚུངས་པ་ཞལ་བཞི་པ། ཕྲག་པ་དྲུག་པ། དཔུང་པ་བཅུ་གཉིས་པ། ཕྱག་ཉི་ཤུ་རྩ་དྲུག་པ། གཡས་དང་གཡོན་དང་དབུས་ཀྱི་མགྲིན་པ་དམར་པོ་དང་དཀར་པོ་དང་ནག་པོའི་མདོག་ཅན། མདུན་ཞལ་ནག་པོ། གཡས་ཞལ་དམར་པོ། གཡོན་ཞལ་དཀར་པོ། རྒྱབ་ཞལ་སེར་པོ། ཞལ་རེ་རེ་ཞིང་སྤྱན་དམར་པོ་གསུམ་གསུམ་དང་ལྡན་ཞིང༌། དབུ་སྐྲ་དམར་སེར་གྱེན་དུ་བརྫཻས་པ། གཡས་དང་གཡོན་གྱི་ཕྲག་པ་དང་པོ་ནག་པོ། གཉིས་པ་དམར་པོ། གསུམ་པ་དཀར་པོ། དཔུང་པ་གཉིས་ནག་པོ། གཉིས་དམར་པོ། གཉིས་དཀར་པོ། ཕྱག་ངར་བཞི་ནག་པོ། བཞི་དམར་པོ། བཞི་དཀར་པོ། དེ་རྣམས་རེ་རེ་ལ་ཡང་མཐེ་བོང་སེར་པོ། མཛུབ་མོ་དཀར་པོ། གུང་མོ་དམར་པོ། སྲིན་ལག་ནག་པོ། མཐེའུ་ཆུང་ལྗང་ཁུའོ། །དེ་རྣམས་རེ་རེ་ལ་ཡང་ཚིགས་ཀྱི་ཕྲེང་བ་དང་པོ་ནག་པོ། གཉིས་པ་དམར་པོ། གསུམ་པ་དཀར་པོ། དེ་ལྟ་བུའི་གཡས་ཀྱི་ཕྱག་བཅུ་གཉིས་རྣམས་ན། ཁྲོ་བོའི་རྡོ་རྗེ། རལ་གྲི། རྩེ་གསུམ། གྲི་ཁུག །མདའ། རྡོ་རྗེ་ལྕགས་ཀྱུ། ཌ་མ་རུ། ཐོ་བ། འཁོར་ལོ། མདུང༌། དབྱུག་པ་དགྲ་སྟཾ་རྣམས་འཛིན་པ། གཡོན་གྱི་ཕྱག་བཅུ་གཉིས་རྣམས་ན། རྡོ་རྗེའི་དྲིལ་བུ། ཕུབ། ཁ་ཊྭཱཾ་ག ཁྲག་གིས་གང་བའི་ཐོད་པ། གཞུ། ཞགས་པ། རིན་པོ་ཆེ། པདྨ། དུང༌། མེ་ལོང༌། རྡོ་རྗེའི་
ལྕགས་སྒྲོག ཚངས་པའི་མགོ་བོ་གདོང་བཞི་པ་འཛིན་པ། ལྷག་པའི་ཕྱག་གཉིས་གཡས་པ་ནག་པོ་དང༌། གཡོན་པ་སེར་པོའི་སྡིགས་མཛུབ་དང་བཅས་ཏེ་གླང་པོ་ཆེའི་པགས་པ་སྟོད་གཡོགས་སུ་གྱོན་པ། བདུད་ཀྱི་མགོ་བོ་དང་ཁྲག་གིས་གང་བའི་ཐོད་པ་བསྣམས་པ། ཞབས་གཡོན་བསྐུམས། གཡས་བརྐྱང་པའི་སྟབས་ཀྱིས་བདུད་དང་ཉོན་མོངས་པ་དང༌། ཡི་དྭགས་ཀྱི་རྒྱལ་པོ་རྣམས་ཀྱི་སྙིང་གར་མནན་པ། ཀླུའི་དབང་པོ་རྒྱལ་བ་རལ་བའི་ཅོད་པན་ལ་བཅིངས་ཤིང༌། རྣམ་པར་རྒྱལ་བ་དར་དཔྱངས་ལ་བཅིངས་ཏེ་གནས་པ། སྟོབས་ཀྱི་རྒྱུ་དང་པདྨ་རྣ་རྒྱན་ལ་གནས་པ། ནོར་རྒྱས་དང་དུང་སྐྱོང་ཕྱག་གདུབ་ལ་གནས་པ། མཐའ་ཡས་དང་རིགས་ལྡན་འོག་པག་དང་མགུལ་རྒྱན་ལ་གནས་པ། འཇོག་པོ་དང་པདྨ་ཆེན་པོ་ཞབས་གདུབ་ལ་གནས་པ། ཕྲག་པར་བདུད་རིགས་བརྒྱའི་མགོ་བོའི་ཕྲེང་བ་འཆང་བ། སྤྱི་བོར་ཐོད་པ་ལྔའི་ཕྲེང་བས་བརྒྱན་པ། མེ་དཔུང་འབར་བའི་དབུས་ན་བཞུགས་པའོ། །ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ། དེ་ལས་འོད་ཟེར་འཕྲོས་པས། རང་དང་འདྲ་བའི་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿཧི། དཔྲལ་བར་ཨོཾ། མགྲིན་པ་ཨཱཿ ཐུགས་ཀར་ཧཱུཾ། ལྟེ་བར་ཧོཿ གསང་བར་ཧཾ། གཙུག་གཏོར་དུ་ཀྵཿ དེ་ནས་སྤྲོ་ཞིང་ནུས་ན། བྱིས་པ་འཇུག་པའི་དབང་བདུན་སྔགས་དབང་དུ་བླང་ཞིང༌། རྒྱན་བཀོད་རྣམས་ཀྱང་རྒྱས་པར་བྱ། བསྡུ་ན། ཨོཾ་ཨ་ཨི་རྀ་ཨུ་ལྀ་པཉྩ་དྷཱ་ཏུ་བི་ཤྭ་དྷ་ནི་སྭཱཧཱ། ཞེས་དབང་གི་ལྷ་རྣམས་ཀྱིས་དབང་
བསྐུར། མི་བསྐྱོད་པས་དབུ་བརྒྱན་པར་གྱུར། ཨོཾ་བཛྲ་གནྡྷཾ་པྲ་ཏཱིཙྪ་ན་མ། ཞེས་པ་ལ་སོགས་པས་མཆོད། རྡོ་རྗེ་འཇིགས་བྱེད་འཇིགས་པར་བྱེད། །དཔའ་བོ་གདུལ་དཀའ་འདུལ་བ་པོ། །དུས་ཀྱི་འཁོར་ལོ་ཐོད་པ་ཅན། ཁམས་གསུམ་རྣམ་རྒྱལ་ལ་ཕྱག་འཚལ། །རྗེ་བོ་སྣ་ཚོགས་རྡོ་རྗེ་འཛིན། ཁྲོ་བོའི་དབང་པོ་ཀུན་གྱི་གཙོ། །དུས་མཐའི་སྤྲིན་མཚུངས་ཧེ་རུ་ཀ །རྡོ་རྗེ་ཤུགས་ལ་ཕྱག་འཚལ་ལོ། །དེ་ནས་རྐང་པ་བཅུ་དྲུག་པ་དང༌། རྐང་པ་བདུན་ཅུ་རྩ་གཉིས་པའི་རིགས་སྔགས་ཅི་ནུས་སུ་བཟླ་ཞིང་དེ་དག་མི་ཤེས་པའམ། མི་ནུས་ན། ཨོཾ་ཨཱཿཧཱུཾ་ཧོཿཧཾ་ཀྵཿབཛྲ་བེ་ག་ཧཱུཾ་ཧཱུཾ་ཕཊ། ཅེས་པ་ཅི་ནུས་སུ་བཟླ། ཨོཾ་ཧཱུཾ་ཀྲོ་དྷ་ཨིན་དྲོ྅ཧཾ། ཀྲོ་དྷ་ནཾ། ཨ་ཛྙཱ་དཱ་ཡ་ཀ་སྭཱཧཱ། ཞེས་པའང་ཁྲོ་བོ་རྣམས་བསྐུལ་བའི་དོན་དུ་བཟླ་ཞིང༌། ཨོཾ་ཨ་ར་ར་ར་ར། ལ་ལ་ལ་ལ། བཛྲ་ཨ་བེ་ཤ་ཡ་ཧཱུཾ་ཞེས་པའང་ཡེ་ཤེས་དབབ་པའི་དོན་དུ་བཟླའོ། །བཟླ་ཚུལ་གཞན་ཡང༌། ཨོཾ་ཧྭེ་ཕཊ། ཅེས་འབུམ་གྱིས་བསྣུན་པ་དང༌། ཨོཾ་ཧཱུཾ།འབུམ་གྱིས་དབབ་པ་དང༌། ཨོཾ་ཏྭཻ་བཽ་ཥཊ། འབུམ་གྱིས་བསྲེག་པ་དང༌། ཨོཾ་ན་མཿ འབུམ་གྱིས་བསླང་བ་དང༌། ཨོཾ་སྭཱཧཱ། འབུམ་གྱིས་རྒྱས་པ་དང༌། ཨོཾ་བེཾ་ཝ་ཕཊ། འབུམ་གྱིས་མཉེས་པར་བྱ་བ་རྣམས་ཐུགས་ཀྱི་བཟླས་པ་དང༌། ཨོཾ་བཛྲ་བེ་ག་སྭཱཧཱ། འབུམ་ཕྲག་བཅུ་གསུང་གི་བཟླས་པ་དང༌། གོང་དུ་བཤད་པའི་སྙིང་པོ་བྱེ་བ་སྐུའི་བཟླས་པའོ། །རྫོགས་པའི་རིམ་པ་ཡང་ཅི་རིགས་པར་སྒོམ་ཞིང༌། ཐུན་མཚམས་སུ་ཡང་ལྷའི་ང་རྒྱལ་ལ་གནས་པར་བྱའོ། །འདིའི་རྗེས་གནང་བྱ་བར་འདོད་པས། མཎྜལ་པདྨ་ལྗང་ཁུའི་ལྟེ་བར་ཉི་ཟླ་སྒྲ་གཅན་མཚོན་བྱེད་ཀྱི་གདན་དམར་དཀར་ནག་གསུམ་བརྩེགས་པ་ལ།
ཚོམ་བུ་ལྗང་ཁུ་གཅིག་བཀོད། མཆོད་པ་བཅུ་གཉིས་པོ་འཕྲེང་ལ་བསྒྲིགས་པའམ། ཕྱོགས་ཕྱོགས་སུ་འགོད་ན། སྟེང་གི་གཉིས་ཤར་དང༌། འོག་གི་གཉིས་ནུབ་ཀྱི་གྲལ་ལ་འགོད། དེ་ལ་ཤར་དུ་དྲི་ཆབ་དང་མེ་ཏོག ལྷོ་རུ་སྤོས་དང་མར་མེ། བྱང་དུ་ཞལ་ཟས་དང་ཤིང་ཏོག ནུབ་ཏུ་སྒེག་མོ་དང་བཞད་མ་མཚོན་པའི་ན་བཟའ་དང་མེ་ལོང༌། སྟེང་གི་སྒྲ་མའི་ཏིང་ཤགས་སོགས་རོལ་མོ་གང་རུང་དང༌། གར་མའི་རྡོར་དྲིལ་ལྟ་བུ། འོག་གི་འདོད་མའི་ཆོས་འབྱུང་དང༌། གླུ་མ་མཚོན་བྱེད་ཀྱི་པི་ཝཾ་རྣམས་བཤམས། དབུས་སུ་གཏོར་མ་ཟླུམ་གཏོར་དབལ་ཅན་འགོད། འབུལ་གཏོར་གཙོ་འཁོར་བདུན་པའི་ཟུར་དྲུག་པ་བཤམས། སྒྲུབ་པ་པོའི་མདུན་དུ་ནང་མཆོད། རྡོར་དྲིལ་ཅང་ཏེའུ་སོགས་ཚང་བར་བྱས་ལ། ནང་མཆོད་ཨོཾ་ཨཱཿཧཱུཾ་ཧོཿ ཞེས་བྱིན་གྱིས་བརླབས། མཆོད་པ་རྣམས་ཨོཾ་ཨཱཿཧཱུཾ་ཧྲ་ཕཊ་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཤེལ་གྱི་སྣོད་སོར་བཅུ་གཉིས་པ་རྣམས་ཀྱི་ནང་དུ། ཨོཾ་ཨཱཿཧཱུཾ་ཧོཿརྣམས་ལས་བྱུང་བའི་ཆུ་དང་མཆོད་ཡོན་དང༌། དྲི་དང་མེ་ཏོག་ལ་སོགས་པའི་མཆོད་རྫས་རྣམས་དང༌། ཨིནྡྲ་ནཱི་ལ་ལ་སོགས་པའི་རྣམ་པ་མང་པོའི་རིན་པོ་ཆེ་དང༌། ནང་གི་དམ་ཚིག་དང༌། དམ་ཚིག་རྣམ་པ་བཞིའི་རྫས་ལ་སོགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་མཆོད་པའི་སྤྲིན་རབ་འབྱམས་ཀྱི་ངོ་བོར་གྱུར། ཨོཾ་བཛྲ་གནྡྷཾ་པྲ་ཏཱིཙྪ་ན་མཿ ཨོཾ་བཛྲ་པུཥྤཾ་པྲ་ཏིཙྪ་ན་མཿ དེ་བཞིན་དུ། དྷཱུ་པཾ། དཱི་པཾ། ནཻ་ཝི་ཏྱཾ། ཨཀྵ་ཏྱཾ། ལཱ་སྱཾ། ཧ་སྱཾ། ཝཏྱཾ། ནིརྟྱཾ། གིརྟྱཾ། ཨོཾ་བཛྲ་ཀཱ་མཾ་པྲ་ཏཱིཙྪ་ན་མཿ རོལ་མོ་བྱིན་འབེབས་སྤྱི་དང་མཐུན་པས་བྱིན་དབབ། མདུན་བསྐྱེད་བསངས་
སྦྱངས། སྟོང་པའི་ངང་ལས་ནས། མཆོད་བསྟོད་ཀྱྀ་བར་བདག་བསྐྱེད་ཉིད་འདོན་པ་སྤོས་པས་ཆོག་པ་ལས། གཙོ་བོ་བསྐྱེད་ཟིན་པའི་མཚམས། ཧ་ཧཱ། ཡི་ཡཱི། །ཝཱུ་ཝཱུ་ལླྀ་ལླཱྀ་རྣམས་ལས་བྱུང་བའི་ཁྲོ་བོ་བཅུ་དང༌། ང་ངཱའ༌།ཉི་ཉཱི། མུ་མཱུ། ནླྀ་ནླཱྀ་རྣམས་ལས་བྱུང་བའི་ཟད་པར་བཅུ་དང༌། གྷ་གྷཱ། ཛྷྀ་ཛྷཱྀ། ཌྷྲཱྀ་ཌྷཱྀ། བྷུ་བྷཱུ། རྣམས་ལས་བྱུང་བའི་ཕྱོགས་སྐྱོང་བཅུ་དང་ག་གཱ། ཛི་ཛཱི། །བུ་བཱུ། རྣམས་ལས་བྱུང་བའི་གཟའ་བཅུ་དང༌། ཁ་ཁཱ། ཚི་ཚཱི། །ཕུ་ཕཱུ། ་རྣམས་ལས་བྱུང་བའི་ཀླུ་བཅུ་དང༌། ཀ་ཀཱ། ཙི་ཙཱི། །པུ་པཱུ། རྣམས་ལས་བྱུང་བའི་འབྱུང་པོ་བཅུ་རྣམས་ཀྱང་འཁོད་པར་གྱུར། ཅེས་དང༌། ཡེ་ཤེས་སྤྱན་འདྲེན་གྱི་སྐབས། ཁྲོ་བོའི་དབང་པོ་རྡོ་རྗེ་ཤུགས་སྡེ་དྲུག་བསྲུང་མ་དྲུག་ཅུའི་ཚོགས་དང་བཅས་པ་བཛྲ་ས་མཱ་ཛཿ ཞེས་དང༌། བསྟོད་པའི་མཐར། ཁྲོ་བོ་བཅུ་དང་ཟད་པར་བཅུ། །ཕྱོགས་སྐྱོང་བཅུ་དང་གཟའ་མཆོག་བཅུ། །ཀླུ་རྒྱལ་བཅུ་དང་འབྱུང་པོ་བཅུ། །སྲུང་མ་དྲུག་ཅུའི་ཚོགས་ལ་འདུད། །ཅེས་བསྟོད། དེ་ནས་གཏོར་མ་འབུལ་བ་ནི། གཏོར་མ་བསངས་སྦྱངས། སྔགས་ཚན་བཞིའི་བྱིན་གྱིས་བརླབ་པ་རྒྱས་པའམ། མི་ཤེས་པའམ། མི་ལྕོགས་ན། ཨོཾ་ཕྲེཾ་བཛྲ་ཌཱ་ཀི་ནཱི་བཛྲ་དྷ་ཏྭཱི་ཤྭ་རཱི་ག་ག་ན་སྭ་བྷཱ་ཝ་སརྦ་དྲ་བྱ་བི་ཤྭ་དྷ་ནི་སརྦ་དྲ་བྱ་ཎི་བི་ཤྭ་དྷ་ཡ་ཧཱུཾ་ཕྲེཾ་ཕཊ། ཞེས་ལན་གསུམ་གྱིས་བྱིན་གྱིས་བརླབས། ཨོཾ་ཨཱཿཧཱུཾ་ཧོཿ ཞེས་ལན་མང་དུ་བརྗོད། སངས་རྒྱས་ཡབ་ཡུམ་སྲས་དང་
བཅས་པ་གཡོག་འཁོར་དང༌། གྲོགས་བཅས་གཉེན་རྣམས་དག་གིས་བསྐོར་བའི་ཚོགས་པ་ནི། །ལྷ་དང་ལྷ་མོ་དག་གིས་མཉེས་པར་བྱེད་རྣམས་དང༌། །མཆོག་གི་རྡོ་རྗེ་སེམས་དཔའ་དག་ནི་གཤེགས་སུ་གསོལ། །ཞེས་སྤྱན་དྲངས། ཨོཾ་ཨཱཿཧཱུཾ་ཧོཿ བཛྲ་བྷཻ་ར་ཝ་ཡ་བྷིས་ཀ་ར་ཡ། ཨོཾ་ཨཱཿཧཱུཾ་ཧོཿ ཨུཥྞི་ཥ། སུམྦྷ་ནི་སུམྦྷ། བིགྷནཱནྟ་ཀ་ནཱི་ལ་དནྜ་པྲཛྙཱནྟ་ཀ ཊཱཀྐི་རཱ་ཛ་ཡ་པདྨཱནྟ་ཀ ཨ་ཙ་ལ་ཡ་མཱནྟ་ཀ མཧཱ་བཱ་ལེ་བྷྱཿ ཞེས་རྡོ་རྗེ་རྩེ་ལྔའི་ཕྱག་རྒྱ་བསྟན། ཨོཾ་ཨཱཿཧཱུཾ་ཧོཿ ཨཱ་ཀ་ཤ བཱ་ཡུ། ཏེ་ཛ། ཨུ་ད་ཀ པྲི་ཐི་བི། ས་དྷི་ཏེ་བྷྱཿ ཞེས་གྲི་གུག་གི་ཕྱག་རྒྱ་དང༌། ཨོཾ་ཨཱཿཧཱུཾ་ཧོཿ པྲཧྨ། བིཥྞུ་ནི་རི་ཏྱ། ཝཱ་ཡུ། ཡཱ་མ། ཨགྣི། ས་མུ་དྲ། ཨཱི་ཤྭ་ར། ཨིནྡྲ། ཡཀྵེ་བྷྱཿ ཞེས་རལ་གྲིའི་ཕྱག་རྒྱ་དང༌། ཨོཾ་ཨཱཿཧཱུཾ་ཧོཿ རཱ་ཧུ་ཀཱ་ལཱགྣི། ཙནྡྲ། སུཪྱ། བུདྷ་མངྒ་ལ། ཤུ་ཀྲ་པྲཱྀ་ཧས་པ་ཏི། ཀེ་ཏུ་ཤ་ནི་བྷྱཿ ཞེས་རིན་པོ་ཆེའི་ཕྱག་རྒྱ་དང༌། ཨོཾ་ཨཱཿཧཱུཾ་ཧོཿ ཛ་ཡ་བི་ཛ་ཡ། པདྨ་ཀརྐོ་ཊ། བ་སུ་ཀི ཤངྐ་པ་ལ། ཀུ་ལེ་ཀ་ཨཱ་ནནྡ། ཏཀྵ་ཀ་མཧཱ་པདྨེ་བྷྱཿ ཞེས་པདྨའི་ཕྱག་རྒྱ་དང༌། ཨོཾ་ཨཱཿཧཱུཾ་ཧོཿ བེ་ཏ་ཊ། བི་ཀྲྀ་ཏ་མུ་ཁ། ཤཱ་ཀཱ་ཀ སུ་ཀཱ་ར། གྲྀ་དྷ། བྱ་གྷྲ། ཨཱུ་ལུ་ཀ ཛཾ་བུ་ག །ག་རུ་ཌ་མུ་ཁེ་བྷྱཿ ཞེས་འཁོར་ལོའི་ཕྱག་རྒྱ་རྣམས་ཀྱི་སོ་སོར་སྤྱན་དྲངས་ཤིང་བཞུགས་སུ་གསོལ་ལ། རེ་རེའི་མཐའ་འམ་བསྡུ་ན། ཨི་དཾ་བཱ་ལིང༌། གནྡྷཾ། པུཥྤཾ། དཱི་པཾ། ཨཀྵ་ཏཾ། དྷ་དཱ་མ་ཧེ། ཏེ་ཛ་ཨཱ་ག་ཏྱ་ས་པ་རི་ཝཱ་ར་ཤྲཱ་གྷྲཾ་ཨི་དཾ་བ་ལིང་གྲྀཧྣནྟུ། ཁ་དནྟུ། པི་ཝནྟུ། ཛཿཧཱུཾ་བཾ་ཧོཿ སཾ་ཏྲིབྟ། སརྦ་སཏྭ་ནཾ། ཤནྟིཾ། པུཥྟིཾ་རཀྵཾ་ཨ་ཝ་ར་ཎ། གུཔྟིཾ་ཀུརྺནྟུ་ཧཱུཾ་
ཧཱུཾ་ཕཊ། བཛྲ་དྷ་ར་ཨཛྙཱ་པ་ཡ་ཏི་སྭཱཧཱ། ཞེས་ཐུན་མོང་དུ་ལན་གསུམ་ཕུལ། སྤྲོ་ན། མཁའ་འགྲོ་མ་རྣམས་དང༌། ཡུལ་བདག་གྲོང་བདག་རྣམས་ལའང་སྦྱིན། འདི་ནི་མཆོད་གཏོར་ལྷན་ཅིག་ཏུ་འབུལ་བའི་ཚུལ་ཡིན་པས། གཏོར་མའི་རྗེས་ལ་མཆོད་པ་བཅུ་གཉིས་འབུལ་བ་མེད་ཀྱང་ཆོག དེང་སང་གི་ལག་ལེན་ལྟར་ན། མཆོད་པ་བཅུ་གཉིས་ཕུལ། ཨོཾ་ཨཱཿཧཱུཾ་ཧོཿ བཛྲ་བྷཻ་ར་ཝ། ཧ་ཡ་ར་ཝ་ལ། ང་ཉ་ཎ་མ་ན། གྷ་ཛྷ་ཌྷ་བྷ་དྷ། ག་ཛ་ཌ་བ་ད། ཁ་ཚ་ཋ་ཕ་ཐ། ཀ་ཙ་ཊ་པ་ཏ། ཨོཾ་ཨཱཿཧཱུཾ་ཧོཿ ཞེས་ནང་མཆོད་ཕུལ། བསྟོད་པ་རྒྱས་བསྡུས་གང་རུང་གིས་བསྟོད། འདོད་དོན་གསོལ་བ་བཏབ། མདུན་བསྐྱེད་ལ་དམིགས་ནས་བཟླས་པ་ཅུང་ཟད་བྱ། དེ་ནས་སློབ་མས་མཎྜལ་ཕུལ། མི་བཟད་འཁོར་བས་འཇིགས་པ་དག་ནི་དེ་རིང་ཉིད་ནས་རྒྱལ་བ་རྣམས་ལ་སྐྱབས་སུ་ལྷག་པར་མཆི། ཁྱོད་ཀྱིས་ཞབས་ཀྱི་ཆུ་སྐྱེས་ངེས་པར་སྲིད་པའི་འཇིགས་འཕྲོག་དག་ལ་ལུས་ངག་སེམས་ནི་དག་པས་སོ། །ཞེས་ལན་གསུམ། སྲིད་འགྲོ་ཉམ་ངར་བྱིས་པའི་བློ་ཡིས་ནི། ཤིན་ཏུ་མི་བཟད་སྡིག་པ་གང་བགྱིས་པ། །སྟོབས་བཅུ་མངའ་བའི་སྤྱན་སྔར་མཆིས་ནས་ནི། །སྡིག་པ་དེ་ཀུན་སོ་སོར་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་རྣམས་དང་འཕགས་པའི་ཚོགས་ཀྱིས་རྣམ་མང་དགེ་བ་གང་མཛད་པ། །དེ་དག་མཐའ་དག་ལ་ནི་སྡིག་པ་རྣམ་བྲལ་བྱང་ཆུབ་སྤྱོད་ལ་རྗེས་སུ་གནས་པའི་རྗེས་ཡི་རང༌། །སངས་རྒྱས་དང་ཆོས་དང་དགེ་འདུན་སྲིད་པའི་འཇིགས་འཕྲོག་ལ་ཡང་བྱང་ཆུབ་བར་དུ་བདག་ནི་སྐྱབས་སུ་མཆི། དག་
པ་གསུམ་གྱིས་བདག་གི་དངོས་འབུལ་ཆོས་ཀྱི་འཁོར་ལོ་བསྐོར་ཞིང་མྱ་ངན་མི་འདའ་བཞུགས་སུ་གསོལ། རྫོགས་སངས་རྒྱས་སུ་བདག་གྱུར་ཅིག་ཅེས་འདིར་ནི་སྨོན་ལམ་སེམས་ཅན་དོན་གྱི་སླད་དུ་བདག་བགྱིད་དོ། །ཞེས་ལན་གསུམ་གྱིས་རྒྱུན་བཤགས་བྱ། འདོད་པའི་རྡོ་རྗེ་ལ་ནི་རྡོ་རྗེ་དྲིལ་བུ་ཕྱག་རྒྱ་བླ་མ་དག་ཀྱང་སྤྱི་བོས་བཟུང་བར་བགྱི། །རིན་ཆེན་ལ་ནི་སྦྱིན་པ་སྦྱིན་གྱི་འཁོར་ལོ་འདི་ལ་རྒྱལ་བ་མཆོག་གི་དམ་ཚིག་བསྐྱང་བར་བགྱི། རལ་གྲི་ལ་ནི་མཆོད་པ་བགྱི་སྟེ་གསལ་བར་ཆུ་སྐྱེས་རིགས་ལ་སྡོམ་པ་དག་ནི་བསྐྱང་བར་བགྱི། །སེམས་ཅན་རྣམས་ནི་ཐར་པའི་སླད་དུ་རྒྱལ་བ་བསྐྱེད་མཛད་རིགས་ལ་བྱང་ཆུབ་བདག་གིས་བསྐྱེད་པར་བགྱི། །ཞེས་ལན་གསུམ་གྱིས་རིགས་དྲུག་གི་སྡོམ་པ་བཟུང༌། འབྲུ་གསུམ་གྱིས་སློབ་མ་ལ་བདུད་རྩི་སྦྱིན། གནས་དྲུག་བྱིན་གྱིས་བརླབས། སློབ་དཔོན་དང་མདུན་བསྐྱེད་རྡོ་རྗེ་ཤུགས་གཙོ་རྐྱང་དེ། སྡེ་དྲུག་སྲུང་མ་དྲུག་ཅུའི་ཚོགས་དང་བཅས་པར་མོས་སུ་བཅུག སློབ་དཔོན་གྱི་ཐུགས་ཀའི་འོད་ཀྱིས་སློབ་མའི་ལུས་སྦྱངས། སྒྲུབ་ཐབས་བཞིན་སློབ་མ་གཙོ་བོར་བསྐྱེད་དེ། ཡེ་ཤེས་པ་སྤྱན་དྲངས། གནས་བཞི་བྱིན་རླབས། དབང་བསྐུར་བསྡུས་པ་རྣམས་ཀྱང་སྒྲུབ་ཐབས་བཞིན་བྱ། སློབ་དཔོན་དང་མདུན་བསྐྱེད་དབྱེར་མ་མཆིས་པའི་དཔྲལ་བ་ནས། ཀླུ་བཅུ་དང༌། འབྱུང་པོ་བཅུ་དཔག་ཏུ་མེད་པ་སྤྲོས་ནས་སློབ་མའི་དཔྲལ་བར་ཐིམ། རོལ་མོའི་སྒྲ་བྱ། སྐུའི་རྗེས་གནང་ངོ༌། །མགྲིན་པ་ནས་ཕྱོགས་སྐྱོང་དང་གཟའ་བཅུ་སྤྲོས་ཏེ། སློབ་མའི་མགྲིན་པར་ཐིམ། གསུང་གི་རྗེས་གནང་ངོ༌། །ཐུགས་ཀ་ནས་ཟད་པར་བཅུ་དང་ཁྲོ་བོ་བཅུ་
སྤྲོས་ཏེ་སྙིང་གར་བསྟིམ། ཐུགས་ཀྱི་རྗེས་གནང་ངོ༌། །ལྟེ་བ་ནས། ཁྲོ་བོ་རྡོ་རྗེ་ཤུགས་ཉིད་དཔག་ཏུ་མེད་པ་སྤྲོས་ཏེ། ལྟེ་བར་ཐིམ། ཡེ་ཤེས་ཀྱི་རྗེས་གནང་ངོ༌། །དེ་ནས་འཕྲིན་ལས་གཏོར་མའི་བཀའ་བསྒོ་སྤྱི་དང་འདྲ་བར་བྱ། རྗེས་གཙོ་བོས་ཇི་ལྟར་སོགས་དང༌། གཏང་རག་གི་མཎྜལ་དང༌། དེང་ནས་བརྩམས་ཏེ་བདག་བྲན་དུ་སོགས་ཡོན་ཕུལ། དགེ་བ་བསྔོ། མདུན་བསྐྱེད་ཀྱི་མཆོད་པ་ཁ་གསོས། གོང་བཞིན་མཆོད་པ་བྱིན་གྱིས་བརླབས་ནས་ཕུལ། བསྟོད་པ་བྱ། དངོས་གྲུབ་སྩོལ་བར་གསོལ་བ་བཏབ། ཡིག་བརྒྱ། བཟོད་གསོལ། གཏོར་མགྲོན་རྣམས་གཤེགས་སུ་གསོལ། གསང་བར་ཧཾ་ཡིག་ལ་ཁྲོ་བོའི་འཁོར་ལོ་རྣམས་གཤེགས་སུ་གསོལ། གཙུག་ཏོར་དུ་ཨཾ་ཡིག་ལ་ཟད་པར་འཁོར་ལོ་རྣམས་གཤེགས་སུ་གསོལ། དཔྲལ་བར་ཨི་ཡིག་ལ་ཕྱོགས་སྐྱོང་གི་འཁོར་ལོ་རྣམས་གཤེགས་སུ་གསོལ། མགྲིན་པར་རྀ་ཡིག་ལ་གཟའི་འཁོར་ལོ་རྣམས་གཤེགས་སུ་གསོལ། སྙིང་གར་ཨཱུ་ཡིག་ལ་ཀླུའི་འཁོར་ལོ་རྣམས་གཤེགས་སུ་གསོལ། ལྟེ་བར་ལྀ་ཡིག་ལ་འབྱུང་པོའི་འཁོར་ལོ་རྣམས་གཤེགས་སུ་གསོལ། འཇུག་ཏུ་སྨོན་ལམ་དང་བཀྲ་ཤིས་ཅི་འགྲུབ་བྱའོ། །རབ་ཟབ་སྒྲུབ་ཐབས་འདི་བཤད་བདག །ཀུན༵་ལ་ཕན་ཕྱིར་དག༵འ་བས་ཏེ། །སྙིང༵་ནས་ཆོས་བརྒྱད་ཁུར་གྱིས་མིན། །དྲང་པོ༵ར་བརྗོད་ལ་རང་ཡང་མགུ། ཁྲོ་བོའི་དབང་པོ་རྡོ་རྗེ་ཤུགས་ཀྱི་སྒྲུབ་ཐབས་ཀྱི་ལེ་ཚནནོ།། །།དགེའོ། །
གཤེད་དམར་ལྷན་སྐྱེས་ཀྱི་སྒྲུབ་ཐབས།
ཨོཾ་སྭཱ་སྟི། གང་འདིར་བདུད་བཞི་ལས་རྒྱལ་བར། །འདོད་དེས་དྲག་ཤུལ་བླ་ན་མེད། །ཤིན་ཏུ་མཆོག་གྱུར་གཤིན་རྗེ་གཤེད། །སྒོམ་པའི་ཚུལ་ལ་འབད་པར་བྱོས། །འདིར་གཤེད་དམར་ལྷན་སྐྱེས་སྒོམ་པར་འདོད་པས། སྐྱབས་སེམས་སྔོན་དུ་འགྲོ་བས། སྙིང་གར་ཨ་ལས་ཉི་མའི་སྟེང་དུ་ཧཱུཾ་ལས་དབྱུག་པ་ཧཱུཾ་གིས་མཚན་པའི་འོད་ཀྱིས། བླ་མ་དང་གཤིན་རྗེ་གཤེད་དམར་པོ་མདུན་གྱི་ནམ་མཁར་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། གུར་ནས་འབྱུང་བའི་ཡན་ལག་བདུན་པ་བྱ། ཚད་མེད་བཞི་སྤྱི་དང་མཐུན་པར་བསྒོམ། ཤཱུནྱ་ཏས་སྟོང་པར་སྦྱངས། སྟོང་པའི་ངང་ལས་སྐད་ཅིག་གིས་བསྲུང་འཁོར་གཞལ་ཡས་ཁང་དང་བཅས་པའི་དབུས་སུ། པཾ་ལས་པདྨའི་ལྟེ་བར་ཉི་མ། དེའི་སྟེང་དུ་ཧཱུཾ་ལས་དབྱུག་པ་ཧཱུཾ་གིས་མཚན་པ། དེ་ལས་འོད་འཕྲོས་འདུས་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་གཤིན་རྗེ་གཤེད་དམར་པོ་ཉི་མ་བྱེ་བའི་གཟི་ཅན། མཆེ་བ་རྣོན་པོ་གཙིགས་ཞིང་བཞད་པ་ཕྱག་གཡས་པས་རྡོ་རྗེ་དབྱུག་པ་དཀར་པོ་མི་མགོ་རློན་པས་མཚན་པ་འཕྱར་བས་འཇིག་རྟེན་གསུམ་འདུལ་བ། གཡོན་བདུད་བཞིའི་ཁྲག་གིས་གང་བའི་ཐོད་པ་འཛིན་པས་ཡུམ་ལ་འཁྱུད་པ། ཞབས་གཡས་བསྐུམ་གཡོན་བརྐྱང་བས་མ་ཧེའི་སྟེང་དུ་ལས་ཀྱི་གཤིན་རྗེ་བསྒྱེལ་ནས་བརྫིས་པ། སྟག་ལྤགས་ཀྱི་ཤམ་ཐབས། ཐོད་སྐམ་གྱི་དབུ་རྒྱན། མགོ་རློན་གྱི་དོ་ཤལ། ཀླུ་བརྒྱད་ཀྱི་རྒྱན་དང་བཅས་པ། སྤྱན་གསུམ་སྐྲ་སེར་གྱེན་དུ་འབར་བ། རང་མཚུངས་ཀྱི་ཡུམ་རྡོ་རྗེ་རོ་ལངས་མ། ཐོད་སྐམ་གྱི་འཕྲེང་བ་ཅན་གྱིས་འབྱུང་བ། བདུད་དང་གཤིན་རྗེ་མཐའ་དག་རླག་པར་མཛད་
ཅིང༌། སྐུ་ལ་འབར་བའི་ཕྲེང་བའི་འཁྲུགས་པའོ། །སྙིང་གར་པད་ཉི་ལ་ཧཱུཾ་ལས་དབྱུག་པ་དཀར་པོ་ཧཱུཾ་གིས་མཚན་པ། ཧཱུཾ་ལས་ཡབ་ཀྱི་རྡོ་རྗེ། ཨ་ལས་ཡུམ་གྱི་པདྨ། ཡབ་ཡུམ་སྙོམས་པར་ཞུགས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ལྷ་མོའི་ལྟེ་བའི་འོག་ཏུ་པདྨ་དམར་པོའི་ལྟེ་བར་ཧྲཱིཿདམར་པོ། སྤྱི་བོར་ཧཾ་ལས་བྱུང་བའི་རེ་ག་དམར་པོ་འབབ་བཞིན་པར་གྱུར། རང་གི་སྙིང་གའི་འོད་ཀྱིས་གཤིན་རྗེ་གཤེད་རིགས་ལྔ་བཛྲ་ས་མཱ་ཛཿ ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ། ཞེས་གསོལ་བ་བཏབ་པས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར་ཏེ་རྡོ་རྗེ་སེམས་དཔའི་དབུ་བརྒྱན། ཛཿཧཱུཾ་བཾ་ཧོཿ ཞེས་རང་ལ་གཉིས་སུ་མེད་པར་ཐིམ། ཨརྒྷཾ་ནས་ཤཔྟའི་བར་གྱིས་མཆོད། ནང་མཆོད་གཏོར་མ་ལྟར་བྱིན་གྱིས་བརླབས་ལ། སྙིང་པོ་མཐར་འབྲུ་གསུམ་གྱིས་ཕུལ། སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་གཙོ་ལ་ཕྱག་འཚལ་བསྟོད། །དེ་ནས་ཡིད་ཀྱིས་སྟོང་པར་བསྡུས་ལ། སླར་ཡང་ལྷ་སྐུར་ལངས་ལ། ཨོཾ་ཧྲཱིཥྟཱི་བི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་ཅི་ནུས་བཟླས། འཇུག་དགེ་བའི་རྩ་བ་བྱང་ཆུབ་ཏུ་བསྔོ། གཏོར་མ་ཡང་ཨ་མྲྀ་ཏས་བསངས། སྭ་བྷཱ་ཝས་སྦྱངས། ཡཾ་ལས་རླུང༌། རཾ་ལས་མེ། ཧཱུཾ་ལས་ཐོད་པའི་ནང་དུ། ཨོཾ་ཨཱཿཧཱུཾ། ཞུ་བ་ལས་བྱུང་བའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ ཞེས་
ལན་གསུམ་གྱིས་བྱིན་གྱིས་བརླབས། ཕྱོགས་སྐྱོང་བ་ལ་སོགས་པའི་གཏོར་མ་རྒྱས་པར་སྦྱིན་པར་འདོད་ན། མངོན་རྟོགས་རྒྱས་པར་ཤེས་པར་བྱ་ལ། འདིར་ནི་གཙོ་རྐྱང་ལ་འབུལ་བའམ། བསྡུས་པའི་དབང་དུ་བྱས་ནས། རང་གི་སྙིང་གའི་འོད་ཟེར་གྱིས་བཅོམ་ལྡན་འདས་གཤིན་རྗེ་གཤེད་འཁོར་བཅས་བཛྲ་ས་མཱ་ཛཿ ཨོཾ་ཧྲཱིཿཥྟཱི་བི་ཀྲི་ཏཱ་ན་ན་རཀྟ་ཡ་མཱ་རི་ཨི་དཾ་བ་ལིཾ་གྲྀཧྣ་གྲྀཧྣ་མ་མ་བིགྷྣཱན་ཧ་ར་ཧ་ར་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པའམ། ཧྲཱིཿཥྟཱིའི་མཐར་ཨ་ཀཱ་རོ་བཏགས་པ་ལན་བདུན་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། གོང་བཞིན་བསྟོད་ལ། མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་གསོལ་བ་བཏབ། ཡིག་བརྒྱ། བཟོད་གསོལ། གཤེགས་སུ་གསོལ་བ་རྣམས་སྤྱི་དང་མཐུན། ལྷན་སྐྱེས་ཀྱི་སྒྲུབ་ཐབས་ཅུང་ཟད་རྒྱས་པར་སྒོམ་པར་འདོད་ན། སྔར་སྦྱར་ཟིན་པའི་སྒྲུབ་ཐབས་སུ་ཤེས་པར་བྱའོ། །འདིའི་བྱིན་རླབས་ནི་མདུན་དུ་མཎྜལ་ཚོམ་བུ་གཅིག་པ་དང༌། མཆོད་པ་རྒྱས་བསྡུས་གང་རུང་ཞིག་བཤམས། བདག་མདུན་དབྱེར་མེད་དུ་མངོན་རྟོགས་སྒོམ། ཆོས་སྐྱོང་སོ་སོ་དང་མཁའ་འགྲོ་སྤྱི་གཏོར་གཅིག་འབུལ། བུམ་པ་གཅིག་བཅས་པ། ཧྲཱིཿཥྟཱི་མང་དུ་བཟླ། སྒོམ་རྒྱུ་ནི་མེད། མདུན་བསྐྱེད་རང་ལ། གཏོར་མ་འབུལ་མི་དགོས། སློབ་མ་རྣམས་ལ་ཆོས་བཤད། མཎྜལ། ཀུན་མཁྱེན་ཡེ་ཤེས་སོགས་གསོལ་བཏབ་རྒྱུན་བཤགས་རིགས་ལྔའི་སྡོམ་བཟུང་བྱ། སློབ་དཔོན་གྱི་ཐུགས་ཀ་ནས་འོད་འཕྲོས། སློབ་མ་རྣམས་ཞལ་དུ་བཅུག ཡུམ་གྱི་མཁའ་ནང་དུ་སློབ་མ་གཤེད་མར་ཡབ་ཡུམ་དུ་བསྐྱེད། སངས་རྒྱས་རྣམས་སྤྱན་དྲངས་ནས་དབང་བསྐུར། མཁའ་ནང་ནས་ཕྱིར་
སྤྲོས་པ་ལ་སྐུའི་རྗེས་གནང་བཞིན་ཡེ་ཤེས་པ་བསྟིམ་རོལ་མོ་བྱ། བཅོམ་ལྡན་དེ་བཞིན་གཤེགས་པ་ཀུན། །སོགས་གསོལ་བ་བཏབ། སངས་རྒྱས་རྣམས་ནི་སོགས་ཀྱིས་བུམ་པས་དབང་བསྐུར། མི་བསྐྱོད་པས་དབུ་བརྒྱན་ཏེ་བུམ་དབང་ངོ༌། །ནང་མཆོད་བྱིན་རླབས་བསྡུས་པ་ཅིག་བྱ། གཤིན་རྗེ་གཤེད་ཡབ་ཡུམ་དེའི་སྟེང་དུ་གསལ་བཏབ། བྱང་སེམས་སུ་ཞུ་ནས་བདུད་རྩི་དང་འདྲེས། ཧྲཱིཿཥྟཱི་འབྲུ་གསུམ་དང་བཅས་བཟླས་ཀྱིན་སློབ་མ་ལ་སྦྱིན་ཏེ། གསང་དབང་ངོ༌། །ཡང་སློབ་མ་ལྷ་སྐུ་གསལ་དྭངས་བདུད་རྩིའི་རོ་མྱོང་བ་བརྗོད་བྲལ་ལ་ཅུང་ཟད་མཉམ་པར་བཞག ཤེས་རབ་ཡེ་ཤེས་སོ། །སྤྲོས་མེད་ལྟར་སེམས་འཛིན་མེད་དུ་བཞག་ཏུ་བཅུག སྐྱེ་མེད་དུ་ངོ་སྤྲད། དབང་བཞི་པའོ། །བཟླས་ལུང་དམ་བཅའ་བའི་ལུང༌། བཅོམ་ལྡན་བདག་ལ་སྩལ་ལགས་ཀྱི། །སོགས་བྱིན་གྱིས་བརླབས་པའི་ལུང་བྱ། སངས་རྒྱས་ཀུན་གྱི་རལ་གྲི་ཆེ། །སོགས་རལ་གྲིའི་རྗེས་གནང༌། ཨེ་མ་ཧོ་བསོད་པ་འདི་ནི་བཟང༌། སོགས་ཀྱིས་གྲི་གུག་དང་ཐོད་པ་སྦྱིན། མངོན་སྤྱོད་ཀྱི་རྗེས་གནང་ངོ༌། །སློབ་མ་གཤེད་དམར་དུ་བསྒོམ་པའི་ལག་ཏུ་དབྱུག་པ་དང་ཐོ་བ་གཏད། གཤིན་རྗེ་གཤེད་པོའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །རྡོ་རྗེ་དབྱུག་པ་ཀ་པཱ་ལ། །དཔའ་བོས་ཡང་དག་བཟུང་བར་བགྱི། །ཞེས་པས་གཏད། མདུན་བསྐྱེད་སློབ་མ་ལ་ཐིམ་པར་མོས། སུ་པྲ་ཏིཥྛ་སོགས་རོལ་ཆེན་བྱ། མཆོད་པ་དང་བཀྲ་ཤིས་ཅི་འགྲུབ་བྱ། མཎྜལ་ཕུལ། རྗེས་ཆོག་སྤྱི་དང་འདྲའོ། །གཤེད་སྐོར་ཀུན༵་ལས་ཟབ་པའི་ཕུལ། །ལྷན་སྐྱེས་སྒྲུབ་ཐབས་ཆེས་དག༵འ་བ། །གཞུང་དང་མན་ངག་ལ་བརྟན་ནས། །རང་གིས་སྦྱར་བའི་སྙིང༵་པོ༵འོ། །ཞེས་པ་གཤེད་དམར་ལྷན་སྐྱེས་ཀྱི་སྒྲུབ་ཐབས་བསྟན་པའི་ལེ་ཚན་ནོ། །
རྡོ་རྗེ་འཇིགས་བྱེད་བསྡུས་པའི་སྒྲུབ་ཐབས།
ན་མོ་གུ་རུ། བསྡུས་པའི་སྒྲུབ་ཐབས་འདི་ཞུགས་ན། །དྲག་ཤུལ་སྤྱོད་པ་མཐའ་དག་ནི། །སྐད་ཅིག་གཅིག་གིས་འགྲུབ་འགྱུར་ཞེས། །དུས་གཞན་ཞིག་ན་བླ་མ་གསུང༌། །སཾ་བུ་ཊི་ནས་བཤད་པའི་འཇིགས་བྱེད་བསྡུས་པ་སྒོམ་པར་འདོད་པས། སྐྱབས་སེམས་ཚད་མེད་བཞི་རྣམས་སྔོན་དུ་བཏང་ནས། ཤཱུ་ནྱ་ཏས་སྟོང་པར་སྦྱངས། སྟོང་པའི་ངང་ལས་སྐད་ཅིག་ཙམ་གྱིས་བསྲུང་འཁོར་དུར་ཁྲོད་དང་བཅས་པའི་དབུས་སུ། པད་ཉི་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། བདག་ཉིད་རྡོ་རྗེ་འཇིགས་བྱེད་དུས་མཐའི་སྤྲིན་ལྟར་ནག་པ། ཞལ་བཞི་ཕྱག་བརྒྱད་ཞབས་བཞི་པ། རྩ་བའི་ཞལ་མ་ཧེའི་གདོང་མཐིང་ནག གཡས་དཀར་གཡོན་དམར། སྟེང་ཞལ་འཇམ་པའི་དབྱངས་ཀྱི་ཞལ་སེར་པོའོ། །ཕྱག་གཡས་པ་རྣམས་ཀྱིས་རྡོ་རྗེས་མཚན་པའི་གཏུན་ཤིང་དང༌། རལ་གྲི་དང༌། འཁོར་ལོ་དང༌། ཅང་ཏེའུ་འཛིན་པ། གཡོན་པ་རྣམས་ཀྱིས་ཁ་ཊྭཱཾ་ག་དང༌། ཐོད་པ་དང༌། མདའ་གཞུ་དང༌། ཞགས་པ་བསྣམས་པ། ཞབས་བཞི་གཡོན་བརྐྱང་དང་གར་སྟབས་ཀྱིས་བདུད་བཞི་མནན་པ། ཐོད་སྐམ་གྱི་དབུ་རྒྱན་དང༌། མགོ་བོའི་ཕྲེང་བ་དང༌། རུས་པའི་རྒྱན་དྲུག་ལ་སོགས་པ་རྒྱན་རྣམས་རྫོགས་པ། ལིང་ག་གྱེན་དུ་བསྒྲེང་བ། སྤྲུལ་པའི་ཕོ་ཉ་དཔག་ཏུ་མེད་པ་འགྱེད་པ། མེ་
དཔུང་འབར་བའི་དབུས་ན་བཞུགས་པའོ། །མིག་ཏུ་ཀྵིཾ། རྣ་བར་ཛྲིཾ། སྣ་ལ་ཁཾ། ལྕེ་ལ་གཾ དཔྲལ་བར་སྐཾ། ལྟེ་བར་སཾ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རྡོ་རྗེ་འཇིགས་བྱེད་མདུན་གྱི་ནམ་མཁར་སྤྱན་དྲངས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་རང་ལ་དབང་བསྐུར། ཛཿཧཱུཾ་བཾ་ཧོཿ རང་ལ་གཉིས་སུ་མེད་པར་ཐིམ། རང་གི་མདུན་དུ་རཾ་ལས་རྡོ་རྗེ་སྲིན་པོ་རལ་གྲི་དང་ཐོད་པ་འཛིན་པ་ཁྱིའི་གདོང་ཅན། དེའི་གཡས་སུ་ཡ་ལས་གཤིན་རྗེ་ནག་པོ་བེ་ཅོན་ཐོགས་པ། གཡོན་དུ་མ་ལས་དུས་མཚན་མ་ནག་མོ་རྩེ་གསུམ་འཛིན་པ་རྣམས་བཀའ་ཉན་གྱི་ཚུལ་དུ་བསྒོམ་ལ། ཨརྒྷཾ་ནས་ཤཔྟའི་བར་གྱིས་མཆོད། ནང་མཆོད་བྱིན་གྱིས་བརླབས་ཏེ། སྙིང་པོའི་མཐར་འབྲུ་གསུམ་བཏགས་ལ་མྱང༌། ཧཱུཾ། དུར་ཁྲོད་རྒྱན་གྱིས་སོགས་ཀྱིས་བསྟོད། སྙིང་གར་རྒྱུའི་འཇམ་དཔལ་དང༌། ཏིང་འཛིན་སེམས་དཔའ་བསྒོམ། བཟླས་པའི་དམིགས་པ་གསལ་བཏབ་ནས། ཡི་གེ་བཅུ་པ་གཙོ་བོ་གྱུར་པའི་སྔགས་གསུམ་ཀའང་བཟླའོ། ཁྱད་པར་ཨོཾ་བཛྲ་རཀྵ་ས་བྷཀྵ་ས། ཨི་ཏི་ཕཊ། ཅེས་པ་དང༌། ཨོཾ་ཀཱ་ལ་རཱུ་པ་ཧཱུཾ་ཕཊ། བྷྱོཿཁཱ་ལ་རཱ་ཏྲི་བྷྱོཿ ཞེས་པ་རྣམས་ཀྱང་ཅི་འགྲུབ་བཟླ། གཙོ་བོའི་སྔགས་ཧྲཱིཿཥྟཱིའི་ཡི་གེ་བཅུ་བཞི་པ་བཟླ་བར་ཡང་རྒྱུད་ནས་གསུངས་སོ། །འཁོར་མ་གཤིན་གཉིས་བསྒོམ་པ་ནི། རྒྱུད་ན་མི་གསལ་ཡང་བླ་མའི་མན་ངག་ཡིན་ནོ། །རྒྱུད་ཀྱི་དངོས་བསྟན་ལྟར་ན། འཁོར་རྡོ་རྗེ་སྲིན་པོ་གཅིག་པུའོ། །འཇུག་ཏུ་དགེ་བའི་རྩ་བ་བྱང་ཆུབ་ཏུ་བསྔོ། གཏོར་མའི་ཆོ་ག་ནི་གཤེད་དམར་
ལྷན་སྐྱེས་ཀྱི་སྒྲུབ་ཐབས་བཞིན་ཏེ། འཁོར་རྣམས་ལ་རང་སྔགས་ཀྱིས་དབུལ་བར་བྱའོ། །འདིའི་བྱིན་རླབས་ཀྱི་ཆོ་ག་ནི། སྟེགས་བུ་ཡངས་པ་ལ་རྡུལ་ཚོན་ནག་པོ་ཆོས་འབྱུང་མཐིང་ག་བྲི་ཞིང༌། མེ་རིས་བསྐོར། ཕྱི་རོལ་ཟླུམ་སྐོར་ཡང་རྡོ་རྭ་དང་མེ་རིས་བསྐོར་ཞིང༌། གྲུ་བཅད་ཁ་དོག་དམར་པོས་བྱ། དབུས་སུ་ཉི་གདན་ལ་ཚོམ་བུ་ནག་པོ་ལྔ་དགོད། སྟེང་དུ་མཉྫི་ལྔ་ཚོམ་ལ། དབུས་སུ་ཐོད་པ་དམ་རྫས་དང་བཅས་པའི་དཀྱིལ་དུ་འཁྲུལ་འཁོར་དང༌། རལ་གྲི་གཙུགས། ཕྱོགས་བཞིར་དམར་གཏོར་རེ་འགོད། མདུན་དུ་འབུལ་གཏོར་གཉིས། ཕྱི་མཆོད་ནང་མཆོད། ཁྲག་གི་ཨརྒྷཾ་དང༌། ཤ་ཆེན་གྱི་བདུག་སྤོས། ཤ་རུས་ཀྱི་ཞལ་ཟས་རྣམས་ཁྱད་པར་དུ་བཤམས། སྔོན་འགྲོ་གཏོར་མ་དང་གནས་ཡོ་བྱིན་རླབས་སྔོན་དུ་འགྲོ་བས། བདག་བསྐྱེད་ལྷ་བཞི་གོང་བཞིན་བྱས་ལ། བཟླས་པ་ཅི་འགྲུབ་ཞིག་བྱའོ། །མདུན་བསྐྱེད་བསངས་སྦྱངས། ཚོམ་བུ་དང་དམ་རྫས་རྣམས་གཉིས་སུ་མེད་པར་དམིགས་ལ། གོང་བཞིན་གཙོ་བོ་བསྐྱེད་པའི་རྗེས་སུ། རང་གི་མདུན་དུ་ནས། རྩེ་གསུམ་འཛིན་པ། རྒྱབ་ཏུ་ཧཱུཾ་ལས་ནག་པོ་ཆེན་པོ་སྲིན་པོའི་གཟུགས་ཅན། གཡས་གྲི་གུག་དང༌། གཡོན་ཐོད་ཁྲག་འཛིན་པ། ཞེས་བསྐྱེད། མིག་ཏུ་ཀྵིཾ་ནས། ཛཿཧཱུཾ་བཾ་ཧོཿའི་བར་གོང་དང་འདྲ་བ་ལས། འཁོར་དང་བཅས་པ་སྤྱན་འདྲེན་པ་དང༌། གཙོ་འཁོར་ཐམས་ཅད་ལ་མི་བསྐྱོད་པས་དབུ་བརྒྱན་པ་ནི་ཁྱད་པར་རོ། །ཕྱི་མཆོད་ནང་མཆོད་བསྟོད་པ་རྣམས་བྱས་ལ། བཟླས་པ་ཅུང་ཟད་བྱ། ཡི་དམ་གྱི་གཏོར་མ་ཕུལ་ལ། དེའི་ལྷག་མ་རྡོ་རྗེ་སྲིན་པོ་སོགས་འཁོར་གསུམ་ལ་རང་སྔགས་ཀྱི་མཐར་ཨ་ཀཱ་རོ་བཏགས་པས་ཕུལ།
གཏོར་མ་གཉིས་པ། ཨོཾ་མཧཱ་ཀཱ་ལ་རཱུ་པ་ཤ་ཧཱུཾ་ཕཊ། ཅེས་པ་ལ། ཤཱ་ས་ན་བཏགས་ལ། ནག་པོ་ཆེན་པོ་ལ་འབུལ་ཞིང༌། དེའི་ལྷག་ཕྱོགས་སྐྱོང་བཅུ་ལ་འབུལ། ཐམས་ཅད་ལ་སྤྱི་མཐུན་དུ། མཆོད་བསྟོད་འདོད་དོན་གསོལ་བ་བཏབ། རྫའི་བུམ་པ་ཞིག་ཁྲག་དང་ཆང་བསྲེས་པའི་སྤོས་ཆུས་བཀང༌། ནག་པོར་བྱུག ཁ་རྒྱན་མི་དགོས། ཐོད་པ་ཆང་གིས་བཀང་བའི་ཁ་བཅད། དེའི་དབུས་སུ་ལྷ་ལྔ་པོ་སྐད་ཅིག་གིས་གསལ་བཏབ་ནས་སྔགས་བརྒྱ་བརྒྱ་བཟླའོ། །ཀ་པཱ་ལའི་མྱོས་བྱེད་སོ་སོའི་སྔགས་ཀྱི་མཐར། འབྲུ་གསུམ་བཏགས་པས་ཕུལ། རྡོ་རྗེ་ཕྲེང་བ་ཞིག་ལ་གཙོ་བོའི་སྔགས་ལན་བརྒྱ་བཟླ་ཞིང༌། ཧཱུཾ་ལས་བྱུང་བ་རྒྱལ་བ་མི་བསྐྱོད་པའི་བདག་ཉིད་དུ་མོས། ཨོཾ་ཨཱཿབཛྲ་དྷྲིཀ་ཧཱུཾ་སྭཱཧཱ། ཞེས་པའང་བརྒྱ་བརྒྱ་བཟླའོ། །དེ་ནས་སློབ་མ་རྣམས་ལ་བགེགས་སྦྱང་བ་དང༌། སྡིག་པ་སྦྱང་བ་དང༌། ཁྲུས་རྣམས་སྔོན་དུ་སོང་ནས། སེམས་བསྐྱེད་གསལ་བཏབ་ནས་ཆོས་བཤད་བྱ། སློབ་མས་མཎྜལ་ཕུལ། དགའ་ཆེན་ཁྱོད་བདག་སོགས་ཀྱིས་གསོལ་བ་བཏབ། འདི་ནི་ཁྱོད་ཀྱི་དམྱལ་བའི་ཆུ་སོགས་ཀྱིས་དམ་ལ་བཞག དཀྱིལ་ཆོག་ལས་འབྱུང་བ་ལྟར་ཡེ་ཤེས་དབབ་པ་བྱ། ལྷ་ངོ་བསྟན། ཨེ་མ་ཧོ་སངས་རྒྱས་སློབ་དཔོན་ཆེ། །ཨེ་མ་ཧོ་ཆོས་དང་ཚོགས་ཀྱི་མཆོག །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །ཞེས་ལན་གསུམ། དེ་ནས་སློབ་མ་གཙོ་བོར་བསྐྱེད། སྙིང་གར་གཙོ་བོ་དང༌། ལྟེ་བར་འཇིག་རྟེན་པ་བཞི་བསྒོམ། རེ་རེ་བཞིན་བཟླས་ལུང་ཕོག རེ་རེ་བཞིན་སྔགས་བཟླས་པའི་བུམ་པའི་ཆུས་དབང་ལན་ལྔ་བསྐུར། གཙོ་བོའི་དམ་རྫས་དང༌། འཁོར་
རྣམས་ཀྱི་གཏོར་དབང་ཡང་རིམ་པ་བཞིན་དུ་བྱ། རྡོ་རྗེ་འཕྲེང་བ་ལ་མེ་ཏོག་སྣ་ཚོགས་བཅིངས་ཏེ། སློབ་མའི་མགོ་བོར་དབང་བསྐུར་ཏེ། ཨུ་དུམ་ཝ་ར་མནྡ་ར། །ཞེས་སོགས་བརྗོད། ཐོད་པའི་དབུས་ཀྱི་རལ་གྲི་ལག་ཏུ་གཏད་ལ། སངས་རྒྱས་ཀུན་གྱི་རལ་གྲི་ཆེ། །སོགས་རྡོར་དྲིལ་གཏད་ལ། ཤེས་རབ་ཐབས་ཀྱི་རང་བཞིན་བདག །སོགས། བདུད་རྩི་ལྔའི་རང་བཞིན་དུ་བྱིན་གྱིས་བརླབས་པའི་ནང་མཆོད་སྦྱིན་ལ། བཏུང་བ་རིན་ཆེན་སོགས་བརྗོད། གཤིན་རྗེའི་འཁོར་ལོ་ལག་ཏུ་གཏད་ལ། ཨེ་མ་ཧོ་གསོད་པ་འདི་ནི་བཟང༌། །སོགས་བརྗོད་དོ། །སློབ་མའི་རྗེས་ཀྱི་བྱ་བ་སྤྱི་དང་འདྲ་ཞིང༌། ཚོགས་འཁོར་གྱི་ཆོ་གས་ཚོགས་བཏང༌། དཀྱིལ་འཁོར་གྱི་རྗེས་ཀྱི་བྱ་བའང་གཞན་གྱིས་འགྲེའོ། །ཀུན༵་ལ་ཡོངས་སུ་མ་གྲགས་ཀྱང༌། །རྒྱུད་དོན་ཤེས་པ་རྣམས་དག༵འ་བ། །མཁས་པའི་སྙིང༵་ལ་ཞེན་པ་ལྟར། །གསལ་པོ༵ར་བཀོད་པ་འདི་ཉིད་དོ། །རྡོ་རྗེ་འཇིགས་བྱེད་བསྡུས་པའི་སྒྲུབ་ཐབས་བསྟན་པའི་ལེ་ཚན་ནོ། །སྒྲུབ་ཐབས་རིན་ཆེན་འབྱུང་གནས་ལས་དཀྱིལ་འཁོར་གྱི་གཙོ་བོ་རྣམས་ཀྱི་སྒྲུབ་ཐབས་བཤད་པའི་སྐབས་ཏེ་བཞི་པའོ།། །།མངྒ་ལཾ། །