རྨི་ལམ་སྒྲོལ་མའི་སྒྲུབ་ཐབས།
ཨོཾ་སྭཱ་སྟི། གང་ཞིག་བསྒྲུབས་བའི་རྨི་ལམ་དུ། །ཞལ་སྟོན་ལུང་སྟོན་ཐོབ་འགྱུར་བའི། །སྒྲུབ་ཐབས་ཟླ་བའི་བཤེས་གཉེན་གྱི། །གཞུང་བཞིན་ཅུང་ཟད་བཤད་པར་བྱ། །སུ་ག་ཏ་ཤྲཱི་ལས་བརྒྱུད་པའི་མན་ངག་འདི་ལ་གཙང་སྦྲ་དང་ལྡན་པས། སྐྱབས་སེམས་ཡན་ལག་བདུན་པ་སྤྱི་དང་མཐུན་པར་བྱ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་སརྦ་བིགྷྭཱ་ཏཱ་ཊ་ཧ། སརྦ་པ་པཾ་ཧཱུཾ་ཕཊ་སྭཱཧཱ། ཞེས་དྲག་ཏུ་བཟླས་པས་བགེགས་བསལ། ནམ་མཁའ་སྔོན་པོའི་དབུས་སུ་པཾ་ལས་པད་དཀར་དང་ཟླ་བ་ལ་ཏཱཾ་ལས་རང་ཉིད་སྒྲོལ་མ་སྐུ་མདོག་དཀར་མོ། ཞག་གཅིག་ཕྱག་གཉིས་གཡས་མཆོག་སྦྱིན་དང༌། གཡོན་ཨུཏྤལ་
སྔོན་པོ་འཛིན་པ་ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པའི་སྟབས་ཅན། དར་མཐིང་ཀའི་སྟོད་གཡོགས་དང༌། མུ་ཏིག་གི་རྒྱན་ཅན་དོན་ཡོད་གྲུབ་པས་དབུ་བརྒྱན་པ། ཁྱད་པར་གཞན་སྒྲོལ་མ་སྤྱི་དང་མཚུངས་པའོ། །ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། མདུན་དུ་མཎྜལ་མཆོད་པ་དང་བཅས་པ་བཤམས་ལ། མཎྜལ་གྱི་དབུས་སུ་སྒྲོལ་མ་སྐད་ཅིག་གིས་བཞུགས་པར་མོས་ལ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་སྭཔྣ་ཏཱ་རེ་སྭཱཧཱ། འབུམ་ཕྲག་ཉི་ཤུ་རྩ་བཞིའི་བསྙེན་པའོ། །ཐུན་འཇོག་ཁར་དགེ་བ་བསྔོ། ལས་སྦྱོར་ནི། གཞོན་ནུ་མའི་སྟོན་མོ་སྔོན་དུ་སོང་ནས། དཀར་གསུམ་མངར་གསུམ་གྱི་ཞལ་ཟས། གུ་གུལ་མར་མེ་རྣམས་མང་དུ་བཤམས་ལ། མཎྜལ་མཆོད་པ་གསོལ་བཏབ་དང་བཅས་པ་རྒྱས་པར་བྱས་ནས། ཨོཾ་སྭཔྣ་ཏཱ་ར། སྭཔྣ་ཨ་ཝ་ལོ་ཀི་ནི། ཏྲཻ་ལོ་ཀྱ་ནི། དརྴ་ནི། ཏྲཻ་ལོ་ཀྱ་གིར་ཛ་ནི། བྷུ་ཏཾ་བྷ་ཝཾ། བྷ་ཝི་ཤཾ ཤུ་བྷ་ཤུ་བྷཾ་ཏཾ་མཾ། ས་དྱ་ཀ་ཏ་ཡ་སྭཱཧཱ། ཞེས་བརྒྱ་རྩ་བཟླས་པས་གསལ་སྣང་སྟོན་པར་འགྱུར་རོ། །འདི་ལ་རྗེས་གནང་སོགས་ནི་མི་དགོས་སྒོམ་ལུང་ཙམ་གྱིས་ཆོག་པ་ཡིན་ནོ། ཁྲོ་ཕུའི་མན་ངག་ཀུན༵་ཏུ་དག༵འ། །རྒྱ་གཞུང་སྙིང༵་པོ༵འི་ཡིད་བརྟན་བཅས། །མངོན་ཤེས་འདོད་པས་འདི་སྒྲུབ་བྱ། །ལྷ་འདྲེ་སྒྲུབ་རྣམས་ཤིན་ཏུ་སྨད། །རྨི་ལམ་སྒྲོལ་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །