སྒྲུབ་ཐབས་རིན་ཆེན་འབྱུང་གནས་ལས་མི་གཡོ་བའི་སྒྲུབ་ཐབས་བཤད་པའི་སྐབས་ཏེ་བཅུ་པ།
ཁྲོ་བོའི་རྒྱལ་པོ་འཕགས་པ་མི་གཡོ་བའི་སྒྲུབས་ཐབས།
ཨོཾ་སྭཱ་སྟི། ན་མོ་བཛྲ་དྷཱ་རཱ་ཡ། ད་ནི་ཁྲོ་བོའི་རྒྱལ་པོ་འཕགས་པ་མི་གཡོ་བའི་སྒྲུབས་ཐབས་ཉམས་སུ་ལེན་བར་འདོད་པས། འདིར་འཆད་པར་འདོད་པའི་སྒྲུབ་ཐབས་རྣམས་ལ་ནན་ཏན་ཏུ་སྒྲུབ་པར་བྱ་སྟེ། གང་ལ་གང་མོས་པ་དེ་དང་དེ་ཡིས་བྱའོ། །དཔལ་ལྡན་འགྲོ་ཀུན་སྒྲོལ་བའི་མགོན། །བླ་མ་མཆོག་དང་མི་གཡོ་བ། །དབྱེར་མེད་དེ་ལ་གུས་བཏུད་ནས། །སྒྲུབ་ཐབས་རིམ་པ་རྣམས་བཤད་བྱ། །དང་པོར་མི་གཡོ་སྔོན་པོ་པུས་བཙུགས་བསྒོམ་པར་འདོད་པ་ལ་དེའི་སྒྲུབ་ཐབས་བཤད་པར་བྱའོ། །སྐྱབས་འགྲོ་སེམས་བསྐྱེད་སྔོན་དུ་བཏང༌། ཆོས་ཐམས་ཅད་སྟོང་པ་ཉིད་དུ་བསྒོམས་ལ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ལུས་འོད་ཀྱི་ཕུང་པོ་རང་གི་སྙིང་གའི་ནང་དུ་པཾ་ལས་པདྨ། རཾ་ལས་ཉི་མའི་སྟེང་དུ་ཧཱུཾ་སྔོན་པོ་འོད་འབར་བ། དེ་ལས་འོད་ཟེར་འཕྲོས། ལུས་གང་ཞིང་སྡིག་སྒྲིབ་ཐམས་ཅད་སྦྱངས། ཕྱིར་འཕྲོས། སེམས་ཅན་གྱི་དོན་བྱས། སླར་འདུས་པ་ལས་རང་ཉིད་གཏུམ་པོ་ཆེན་པོའི་སྐུར་གྱུར་པ་ནི། སྐུ་མདོག་ཟར་མའི་མེ་ཏོག་ལྟར་སྔོ་བའམ། དུས་མཐའི་སྤྲིན་ལྟར་གནག་པ། ཞལ་གཅིག་ཕྱག་གཉིས་གཡས་ཡེ་ཤེས་ཀྱི་རལ་གྲི་ནམ་མཁའ་ལ་འཕྱར་བ། གཡོན་རྡོ་རྗེ་ཞགས་པ་སྡིགས་མཛུབ་ལ་ལན་གཉིས་སུ་དཀྲིས་ཤིང་ཐུགས་ཀར་གཏོད་པ་ཞབས་གཡོན་གྱི་པུས་མོ་དང༌། གཡས་ཀྱི་མཐིལ་སྣ་ཚོགས་པདྨ་དང་ཉི་མའི་གདན་ལ་བཞེངས་སྟབས་ཀྱི་ཚུལ་དུ་བཞུགས་པ། དམར་ལ་ཟླུམ་པའི་སྤྱན་གསུམ་གྱི་
གཡས་པ་སྟེང་དུ་གཟིགས་པ། ལྷའི་བུའི་བདུད་ཚར་གཅོད་ཅིང༌། གཡོན་པ་འོག་ཏུ་གཟིགས་པས་ལྷ་མིན་དང་ཀླུའི་གདོན་འདུལ་བ་དང༌། དབུས་ཐད་ཀར་གཟིགས་པས་ས་སྟེང་གི་བགེགས་ཐམས་ཅད་འཇོམས་པ། ཆེར་འཁྲུགས་ཤིང་ཁྲོས་པས་ཁྲོ་གཉེར་བསྡུས་ཤིང༌། ཡ་སོས་མ་མཆུ་མནན་པས་མཆེ་བ་རྣམ་པར་གཙིགས་པ། དབུ་སྐྲ་སེར་པོ་ཐོར་ཚུགས་སུ་བཅིངས་ཤིང་ཟུར་ཕུད་ལྔ་དང་ལྡན་པ། སངས་རྒྱས་མི་བསྐྱོད་པས་དབུ་ལ་བརྒྱན་པ་དར་སྣ་ཚོགས་པའི་ཤམ་ཐབས་དང༌། རིན་པོ་ཆེའི་རྒྱན་དང༌། སྦྲུལ་དཀར་པོ་སེ་རལ་ཁར་བྱས་པ། ཤིན་ཏུ་འཇིགས་པའི་སྐུ་ཅན་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །འདི་ལ་དབུ་སྐྲ་ནག་པོ་བྱས་ཀྱང་རུང་ཞིང༌། བྱེ་བྲག་ཏུ་ཀླུའི་གདོན་འདུལ་བར་འདོད་ན། པུས་མོ་གཡས་བཙུགས་སྟག་ལྤགས་ཀྱི་ཤམ་ཐབས་ཅན། ཐོད་སྐམ་གྱི་དབུ་རྒྱན་དང༌། ཀླུ་ཆེན་པོ་བརྒྱད་ཀྱིས་བརྒྱན་པ་བྱེད་ཅེས་གསུང༌། དེ་ནས་རང་གི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ་ཚོན་གང་བ། དེའི་ཐུགས་ཀར་ཏིང་ངེ་འཛིན་སེམས་དཔའ་པད་ཉི་ལ་གནས་པའི་ཧཱུཾ་ནས་འབྲུ་ཙམ། སྤྲོ་ན་གནས་གསུམ་བྱིན་རླབས་དང༌། ཡེ་ཤེས་སེམས་དཔའ་སྤྱན་འདྲེན་པ་དང༌། དབང་བསྐུར་རྒྱས་བཏབ་རྣམས་ཀྱང་བྱ་ལ། བསྡུ་ན་ལྷའི་རྣལ་འབྱོར་གྱི་བྱ་བ་ནི། དེ་ཉིད་ཀྱིས་འགྲུབ་པ་ཡིན་ནོ། །ཏིང་ངེ་འཛིན་སེམས་དཔའི་མཐར་སྔགས་ཀྱིས་བསྐོར་བ། དེའི་འོད་ཀྱིས་བདག་གི་སྡིག་སྒྲིབ་སྦྱངས། གདོན་བགེགས་ཐམས་ཅད་ཚར་བཅད། སངས་རྒྱས་ཐམས་ཅད་ཀྱི་ཐུགས་རྒྱུད་བསྐུལ་ཏེ། བྱིན་
རླབས་འོད་ཟེར་གྱི་རྣམ་པས་བདག་ལ་ཐིམ། ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ། ཅེས་ཇི་སྲིད་མི་སྐྱོའི་བར་དུ་བཟླའོ། །འབུམ་ཕྲག་བརྒྱད་ཅུ་བཟླས་པས་ལས་ཐམས་ཅད་འགྲུབ་པར་འགྱུར་ཞིང༌། བྱང་ཆུབ་སྒྲུབ་པ་ལ་ནི་ཚད་མེད་དོ། །རྗེས་དགེ་བའི་རྩ་བ་བྱང་ཆུབ་ཏུ་བསྔོའོ། །གཏོར་མ་དཀར་གཏོར་ལེགས་པར་བཤམས་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད། དེའི་ནང་དུ་ཨ་ལས་ལྷའི་བདུད་རྩིས་གང་བ། དེའི་དབུས་སུ་ཧཱུཾ་ཡེ་ཤེས་ཀྱི་བདུད་རྩིའི་རང་བཞིན་དུ་གྱུར། ཨོཾ་ཨཱཿཧཱུཾ་ཞེས་བརྗོད་པས་བྱིན་གྱིས་བརླབས། སྙིང་གའི་ཧཱུཾ་གི་འོད་ཟེར་གྱིས་རང་བཞིན་གྱི་གནས་ནས། བཅོམ་ལྡན་འདས་མི་གཡོ་བ་ལ་སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་ཀྱིས་བསྐོར་བ་བཛྲ་ས་མཱ་ཛཿ ཞེས་སྤྱན་དྲངས། སྙིང་པོའི་མཐར། ཨཱརྻ་ཨ་ཙ་ལ་ས་པ་རི་ཝཱ་ར་ཨི་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་བཏགས་པ་ལན་བདུན་གྱིས་ཕུལ། བཛྲ་པུཥྤེ་ནས་ནཻ་ཝི་ཏེའི་བར་གྱིས་མཆོད། ཀྱེ་ཀྱེ་མཐའ་གཉིས་རྣམ་པར་མ་གཡོས་ཀྱང༌། །སྤྲུལ་པའི་གཟུགས་ཀྱི་འགྲོ་དོན་དཔག་མེད་མཛད། །འཇིགས་བྱེད་ཆེན་པོ་འགྲོ་བ་ཀུན་སྒྲོལ་ཞིང༌། །སྲིད་པ་གསུམ་ན་དགྱེས་པའི་གར་མཛད་པ། །སྲིད་པའི་ཆུ་བོ་སྐེམས་ཤིང་བདུད་རྣམས་འཇོམས། །སྲིད་པའི་རླུང་གིས་མི་གཡོ་ཐུགས་རྗེའི་མགོན། །རབ་བརྗིད་མི་གཡོ་མགོན་ལ་ཕྱག་འཚལ་བསྟོད། །བཅོམ་ལྡན་འདས་མི་གཡོ་བ་འཁོར་དང་བཅས་པ་རྣམས་ཀྱིས་བདག་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། ཡི་གེ་བརྒྱ་བས་ལྷག་ཆད་ཁ་བསྐང༌།
མ་འབྱོར་བ་དང་སོགས་ཀྱིས་བཟོད་པར་གསོལ། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །སོགས་ཀྱིས་མཐར། བཛྲ་མུཿ གཤེགས་སུ་གསོལ། འདིའི་རྗེས་གནང་ནི། མཎྜལ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཉི་མ་ལ་ཚོམ་བུ་སྔོན་པོ་ཞིག་བཀོད། མ་འགྲུབ་ན་མཎྜལ་ལ་འབྲུའི་ཚོམ་བུ་བཀོད་ཀྱང་རུང༌། དཀར་གཏོར་ཆ་གཉིས་དང༌། མཆོད་པ་སྤྱི་དང་མཐུན་པར་བཤམ། བདག་བསྐྱེད་བཟླས་པ་དང་བཅས་པ་སྔོན་དུ་འགྲོ་བས། མདུན་བསྐྱེད་ཀྱང་སྟོང་པར་སྦྱངས་བ་ནས་བརྩམས་ཏེ། བཟླས་པའི་བར་དུ་བྱས་ནས། གཏོར་མ་བྱིན་གྱིས་བརླབས་ཏེ་འབུལ་བ་ནས། འདོད་དོན་གསོལ་བཏབ་ཀྱི་བར་དུ་བྱས། དཀར་གཏོར་གཉིས་ཕྱོགས་སྐྱོང་དང་གཞི་བདག་ལ་བསྔོ། རྗེས་གནང་དངོས་ནི། ཁྲུས་བྱ་ཆོས་བཤད་མཎྜལ་འབུལ། །དུས་གསུམ་ཞེས་སོགས་གསོལ་བ་བཏབ། །གུར་ནས་འབྱུང་བའི་རྒྱུན་བཤགས་བྱ། །དངོས་གཞི་རྗེས་གནང་གཞི་འགོད་དང༌། །ལུང་གསུམ་སྦྱིན་པ་དེ་རྗེས་སུ། །ཕྱག་མཚན་བསྟིམ་པར་མཛད་པ་ཡིན། །དམ་ཚིག་ཁས་བླངས་མཎྜལ་དང༌། །དེང་ནས་ཞེས་སོགས་ཡོན་འབུལ་ལོ། །རྗེས་ཆོག་མཆོད་པ་ཁ་གསོས་ནས། །མཆོད་བསྟོད་དངོས་གྲུབ་བླང་བ་དང༌། །ཡིག་བརྒྱ་བཟོད་གསོལ་གཤེགས་གསོལ་དང༌། །སྨོན་ལམ་གདབ་ཅིང་བཀྲ་ཤིས་བྱ། །ཞེས་པའི་སྡོམ་ཚིག་བློ་ལ་ངེས་པར་བྱ་སྟེ། ཕྱག་མཚན་བསྟིམ་པ་ཙམ་མ་གཏོགས་ལག་ལེན་སྒྲུབ་ཐབས་བརྒྱ་རྩ་བཞིན་ཡིན་ནོ། །འདིའི་ཁྱད་པརགྱི་བྱིན་རླབས་ཆུ་སྲུང་བྱེད་ཐབས་ནི། ཐོ་རངས་སྐར་ཁོངས་གཉིས་གསུམ་ཙམ་ལ་བུམ་པ་གཙང་མར་ཆུའི་གཏིང་ནས་ཆུ་བླངས་ཏེ་ནམ་མཁའ་མ་མཐོང་བར་བྱ། སྔར་གྱི་རྗེས་གནང་དང་འབྲེལ་བར་བྱེད་ན། ཤིན་ཏུ་ལེགས། ཐོག་མཐའ་གང་དུ་བྱས་ཀྱང་ཆོག ལོགས་སུ་བྱེད་ན་
མཎྜལ་ཕུལ། དུས་གསུམ་སངས་རྒྱས་སོགས་ཀྱིས་གསོལ་བ་བཏབ། བླ་མའི་ལག་པ་གཡས་ཀྱིས་བུམ་པའི་ཁ་བཅད། ན་མཿཙཎྜ་མཧཱ་རོ་ཥ་ཎཱ་ཡ། ཨོཾ་ཙཎྜ་མཧཱ་རོ་ཥ་ཎ། ཀྵཾ་ཏྲཾ། ཏྲཱ་ས་ཡ། ཏྲཱ་ས་ཡ། སཾ་ཏྲཱ་ཡ་སཾ་ཏྲཱ་ཡ། ཧཱུཾ་ཧཱུཾ་ཧཱུཾ༌། ཕཊ་ཕཊ་ཕཊ་སྭཱཧཱ། ཞེས་བརྒྱ་རྩ་བཟླའོ། །བླ་མ་མི་གཡོ་བར་སྒོམ་དུ་གཞུགསློབ་མས་མེ་ཏོག་བཟུང་ལ། ཐལ་མོ་སྦྱར། སྔགས་དེའི་རྗེས་ཟློས་ལན་གསུམ་བྱ། བླ་མས་ལན་བདུན་བཟླས་ལ། སློབ་མའི་ལག་པ་གཡས་པར་བླུག་ལ་འཐུང་དུ་གཞུགརྗེས་ཟློས་དང་འཐུང་ཐེངས་ལན་གསུམ་བྱས་ལ། བཅོམ་ལྡན་བདག་གིས་བཟུང་ལགས་ཀྱི་ནས། འཇུག་པར་གྱུར་ཅིག་གི་བར་བྱིན་གྱིས་བརླབས་པའི་ལུང་སྤྱི་དང་མཐུན་པར་བྱས་ནས་གཏང་རག་གི་ཡོན་འབུལ་བ་སོགས་བྱའོ། །དེ་ཐོབ་ནས་རང་གིས་ཆུ་སྲུང་ཉམས་སུ་ལེན་ན། ཆུ་ལ་སྔགས་བརྒྱ་རྩ་བཟླས། དེ་ཁྲུས་བྱ། ལག་པ་གཡས་པར་ཆུ་བླུག་ལ་གཡོན་པས་དེའི་རྒྱབ་ནས་མཉེ། སྔགས་ལན་གསུམ་བཟླས་ནས་འཐུང༌། དེ་འདྲ་ལན་གསུམ་བྱའོ། །ཀུན༵་ནས་ཟབ་ཅིང་རྙེད་དཀའ་བ། །རབ་དག༵འ་ཁྲོ་བོ་གཏུམ་པོ་ཡི། །སྒྲུབ་ཐབས་སྙིང༵་པོ༵་བསྡུས་པ་འདི། །བདུད་བཞིའི་གཡུལ་ལས་རྒྱལ་ཕྱིར་ཡིན། །ཅེས་པ་ནི་རྡོ་རྗེ་གདན་པའི་ཐུགས་དམ་ལྷ་དྲུག་ལས་ནང་གི་བར་ཆད་སེལ་བ་མི་གཡོ་བ་སྔོན་པོ་ཕྱག་གཉིས་པ་པུས་བཙུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱལ་འཕེལ། །
ཨ་ཏིའི་ལུགས་ཀྱི་གཏུམ་པོའི་སྒྲུབ་ཐབས།
ཨ་ཏིའི་ལུགས་ཀྱི་གཏུམ་པོའི་སྒྲུབ་ཐབས་སོ། །ན་མོ་གུ་རུ། མཐའ་དག་འགྲོ་བ་སྒྲོལ་བའི་སླད། །མི་གཡོ་མགོན་ལ་རབ་བཏུད་ནས། །གཏུམ་པོའི་སྒྲུབ་ཐབས་བླ་མེད་པ། །མདོ་ཙམ་བདག་གིས་བྲི་བར་བྱ། །
མི་གཡོ་སྔོན་པོ་བཀའ་གདམས་ལུགས་བསྒོམ་པར་འདོད་པས། རང་གི་སྙིང་གའི་ཧཱུཾ་ལས་འོད་འཕྲོས། ལུས་ཐམས་ཅད་གསལ་ཞིང་དག་པར་བྱས། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འོད་ཟེར་དེས་སངས་རྒྱས་ཐམས་ཅད་སྤྱན་དྲངས། པུཥྤེ་སོགས་ཀྱིས་མཆོད། ཨོཾ་སརྦ་བི་ཤྭ་པཱུ་ཛ་མེ་གྷ་ས་མུ་དྲ་ཨཱཿཧཱུཾ་སྭཱཧཱ། རྡོ་རྗེ་གུར་རམ་བཟང་སྤྱོད་ནས་འབྱུང་བ་ལྟར་ཡན་ལག་བདུན་པ་དང༌། སྐྱབས་འགྲོ་སེམས་བསྐྱེད་ཚད་མེད་བཞི་རྣམས་བསྒོམ། སྭ་བྷཱ་ཝ་དང༌། ཤཱུ་ནྱ་ཏས་སྟོང་བར་སྦྱངས། སྟོང་པའི་ངང་ལས་པཾ་རཾ་ལས་པད་ཉིའི་གདན་ལ་རང་སེམས་ཧཱུཾ་ལས་རྡོ་རྗེའི་ལྟེ་བར་ཉི་མ་ལ་ཧཱུཾ་གིས་མཚན་པ། ཨོཾ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ལས་རང་ཉིད་ཁྲོ་བོ་རྒྱལ་པོ་མི་གཡོ་བ་སྐུ་མདོག་མཐིང་ནག་ཞལ་གཅིག་ཕྱག་གཉིས་དམར་ལ་ཟླུམ་པའི་སྤྱན་གཉིས་སྟེང་འོག་ཏུ་ཡོན་པོར་གཟིགས་པ། ཕྱག་གཡས་ཡེ་ཤེས་ཀྱི་རལ་གྲི་མེ་འབར་བ་ནམ་མཁར་འཕྱར་བ། གཡོན་རྡོ་རྗེ་ཞགས་པ་དང་བཅས་པའི་སྡིགས་མཛུབ་ཐུགས་ཀར་གཏོད་པ། ཞབས་གཡས་བསྐུམ་གཡོན་བརྐྱང་བས་ཚོགས་བདག་གླང་སྣ་དང་དབང་ཕྱུག་ཆེན་པོ་ལ་སོགས་པའི་གདོན་བགེགས་ཐམས་ཅད་བརྫེས་པ། སྨ་ར་དང་སྨིན་མ་དང་དབུ་སྐྲ་དམར་སེར་གྱེན་དུ་བརྫེས་པ། ཡ་སོས་མ་མཆུ་མནན་ཞིང༌། མཆེ་བ་རྣོན་པོ་གཙིགས་པ། སྟག་ལྤགས་ཀྱི་ཤམ་ཐབས་དང་རིན་པོ་ཆེ་དང་སྦྲུལ་གྱིས་བརྒྱན་པ། སྤྲུལ་པའི་ཁྲོ་བོ་ནམ་མཁའ་གང་བ་འཕྲོ་བ། མེ་དཔུང་འབར་བའི་
དབུས་ན་བཞུགས་པའོ། །ཐུགས་ཀར་རཾ་ལས་ཉི་མ་ལ་ཧཱུཾ་འོད་འབར་བ། དེའི་འོད་ཀྱིས་ཡེ་ཤེས་པ་སྤྱན་དྲངས། སྤྲོ་ན་གོང་ལྟར་མཆོད། ཛཿཧཱུཾ་བཾ་ཧོཿ ཡང་འོད་ཀྱིས་དབང་ལྷ་སྤྱན་དྲངས། ཨོཾ་ཨ་བྷི་ཥིཉྩ་ཏུ་མཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས། དབང་བསྐུར། སྐུ་གང༌། དྲི་མ་དགཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན། གནས་གསུམ་བྱིན་གྱིས་བརླབས། སྙིང་གའི་ས་བོན་གྱི་མཐར་ཡི་གེ་བཅུ་པས་བསྐོར་བར་བསྒོམས་ལ། ཕོ་ཉ་སྤྲོ་བ་དང་མེ་སྦར་བའི་དམིགས་པ་དང་བཅས་ཏེ། ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ། ཅེས་ཅི་ནུས་སུ་བཟླའོ། །འཇུག་ཏུ་མི་དམིགས་བསྡུས་ལ། ཡིག་བརྒྱ་བཟླ། དགེ་བའི་རྩ་བ་བྱང་ཆུབ་དུ་བསྔོ། ཨོཾ་ཨཱཿཧཱུཾ་མུཿ ཞེས་ཡེ་ཤེས་པ་གཤེགས། གཏོར་མ་འབུལ་བར་འདོད་ན། དཀར་གཏོར་སྣོད་ཆུ་གཙང་གིས་བཀང་བ་བཤམས་ལ། ཨོཾ་ཨཱཿབིགྷྣཱན་ཏ་ཀྲྀ་ཏ་ཧཱུཾ་གིས་བསངས། ཨོཾ་གྱི་སྒྲ་དང་འོད་ཀྱིས་གཏོར་མ་སྣོད་དང་བཅས་པ་སྟོང་བར་སྦྱངས། ཨཱཿརིན་པོ་ཆེའི་སྣོད་ཟབ་ཅིང་རྒྱ་ཆེ་བ་བདུད་རྩི་དཀར་པོས་གང་བ། ཧཱུཾ་སངས་རྒྱས་ཐམས་ཅད་ཀྱི་ཐུགས་ཀ་ནས་བཀུག་སྟེ་ཐིམ་པས། གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ལན་གསུམ། རང་གི་སྙིང་ག་ནས་འོད་ཟེར་འཕྲོས། ཡི་དམ་སངས་རྒྱས་བྱང་སེམས་བླ་མ་ཆོས་སྐྱོང་སེམས་ཅན་ཐམས་ཅད་ཁྲོ་བོ་མི་གཡོ་བའི་རྣམ་པར་བཛྲ་ས་མཱ་ཛཿ ཞེས་སྤྱན་དྲངས། སྙིང་པོར་མཐར་བཱ་ལིང་ཏ་ཁ་ཁ་ཁཱ་ཧི་ཁཱ་ཧི་སྭཱཧཱ། ཞེས་པ་ལན་བདུན་གྱིས་ཡི་དམ་དང༌། ཨ་ཀཱ་རོ་ལན་བདུན་གྱིས་གཞན་རྣམས་ལ་ཕུལ།
ཨརྒྷཾ་ནས་ཤཔྟའི་བར་གྱིས་མཆོད། ཆོས་དབྱིངས་རང་བཞིན་ཨིནྡྲ་ནཱི་ལའི་མདོག །ཞལ་གཅིག་ཕྱག་གཉིས་ཞབས་ཟུང་བརྗིད་པའི་སྐུ། །ཡེ་ཤེས་རལ་གྲི་རྡོ་རྗེ་ཞགས་པ་བསྣམས། ཁྲོ་རྒྱལ་མི་གཡོ་མགོན་ལ་ཕྱག་འཚལ་བསྟོད། །ཅེས་བརྗོད། འདོད་པའི་དོན་ལ་གསོལ་བ་བཏབ་ལ། ཨོཾ་མུཿཞེས་པས་གཤེགས་སུ་གསོལ། ཐུན་མཚམས་སུ་ཡང་ལྷའི་སྣང་བ་དང་མ་བྲལ་བར་བྱའོ། །འདིའི་རྗེས་གནང་ནི། ཐུན་མོང་བ་བཀའ་གདམས་ལྷ་བཞི་གཞན་རྣམས་ཀྱི་བཟླས་ལུང་འབོགས་ཚུལ་དེ་ཉིད་འདོད་པ་སྤོས་པས་ཆོག་པ་ཡིན་ཞིང༌། ཁྱད་པར་ཅན་ནི། མཎྜལ་གྲུབ་བཞི། གྲུ་བཅད་སྔོན་པོ་ལ་དབུས་སུ་སྣ་ཚོགས་པདྨ་འདབ་མ་བརྒྱད་པ་དང་བཅས་པ། ལྟེ་བ་ཉི་གདན་ལ་ཚོམ་བུ་སྔོན་པོ། མེ་ཏོག་སྔོན་པོ་སིལ་མར་དགྲམ། མཆོད་གཏོར་རྒྱ་ཆེར་བཤམས། བདག་བསྐྱེད་སྔོན་དུ་འགྲོ་བས་མཆོད་པ་སྤྱི་དང་མཐུན་པར་བྱིན་གྱིས་བརླབས། བདག་བསྐྱེད་ཀྱི་འདོད་པ་སྤོས་ལ་མདུན་བསྐྱེད་བསྒོམ། མཆོད་པ་ཅི་ནུས་བྱ། གཞི་བདག་གཏོར་མ་དང་བགེགས་གཏོར་བཏང༌། སློབ་མས་མཎྜལ་ཕུལ། བཟང་སྤྱོད་ཀྱི་ཡན་ལག་བདུན་པ་ཚར་གསུམ་བྱ། སྐྱབས་འགྲོ་སེམས་བསྐྱེད་རྒྱས་པ་འབོགས་པའམ། བསྡུ་ན། སངས་རྒྱས་ཆོས་དང་མ་བྱ། བདག་བསྐྱེད་ལྟར་མངོན་རྟོགས་ཕོགལྷ་སྐུ་སྣང་སྟོང་ལ་མཉམ་པར་འཇོག་ཏུ་འཇུགསྔགས་ཀྱི་བཟླས་ལུང་ཕོགསློབ་དཔོན་གྱི་བགྲང་འཕྲེང་མགོ་ཐོག་ཏུ་བཞག་ལ། སྙིང་པོ་བརྒྱ་རྩ་བརྒྱད་བཟླ། མན་ངག་ལྟར་མི་དམིགས་ཀྱི་སྤྲོ་བསྡུའི་དམིགས་པ་ཕོགཆོས་ཐམས་ཅད་སྒྱུ་མ་ལྟར་སྒོམ་དུ་བཅུགཨོཾ་ཙཎྜ་མཧཱ་རོ་ཥ་ཎ་ཧཱུཾ་ཞེས་བརྗོད། མི་དམིགས་པར་བཞག་ལ་ཕཊ་ཅེས་བརྗོད་དུ་བཅུག འདིར་རྗེས་ཀྱི་
བྱ་བ་སྤྱི་དང་འདྲ་བ་ལས། མཆོད་པ་གསང་པ་རྒྱ་ཆེར་བཤམས་ནས་བྱིན་གྱིས་བརླབས། དཔོན་སློབ་ལྷན་ཅིག་ཏུ་འབུལ། ཡན་ལག་བདུན་པ་ལན་གསུམ་ཡང་བྱ། དཀར་གསུམ་གྱི་ཙ་རུའི་སྟོན་མོ་བྱའོ། ཁྲོ་རྒྱལ་ཀུན༵་འདུས་རབ་དག༵འི་ཏོག །བདུད་སྡེའི་སྙིང༵་ལ་འཇིགས་སྐྱེད་པ། །ཟབ་མོའི་སྒྲུབ་ཐབས་གསོང་པོ༵ར་སྨྲས། །དགེ་དེས་གཏུམ་པོའི་གནས་ཐོབ་ཤོག །ཨ་ཏི་ཤའི་ཞལ་གྱི་གདམས་པ་ཁྲོ་བོ་གཏུམ་པོའི་སྒྲུབ་ཐབས་ཀྱི་ལེ་ཚན་ནོ།། །།ཞུས་དང༌། དར་རྒྱས་འཕེལ། །
དཔལ་ལྡན་རྡོ་རྗེ་གཏུམ་པོའི་སྒྲུབ་ཐབས།
ཨོཾ་སྭཱ་སྟི། དཔལ་ལྡན་རྡོ་རྗེ་གཏུམ་པོ་ནི། །བློ་འཕེལ་དཀར་པོའི་ཚུལ་འཛིན་པ། དེ་ལ་བཏུད་ནས་དེ་སྒྲུབ་ཐབས། །མདོར་བསྡུས་ཙམ་ཞིག་བྲི་བར་བྱ། །བཅོམ་ལྡན་འདས་གཏུམ་པོ་དཀར་པོས་སྒྲུབ་པ་ལ། འཇུག་པ་དང་སྦྱོར་བ་གཉིས་ལས། དང་པོ་ནི། སྒྲུབ་པ་པོས་ཚད་མེད་བཞི་སྤྱི་དང་མཐུན་པར་བསྒོམ། འགྲོ་རྣམས་བསྒྲལ་འདོད་སོགས་སྐྱབས་སེམས་ལན་གསུམ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དཀར་པོ། ཨ་ལས་ཟླ་བ་རཾ་ལས་ཉི་མ་རྣམས་བརྩེགས་པའི་སྟེང་དུ། རང་གི་རྣམ་ཤེས་ཧཱུཾ་དཀར་པོ་ལས་འོད་འཕྲོས། མི་ཤེས་པའི་མུན་པ་བསལ། སངས་རྒྱས་བྱང་སེམས་ཐམས་ཅད་ཀྱི་བྱིན་རླབས་བསྡུས། སླར་འདུས་པ་ལས་རང་ཉིད་གཏུམ་པོ་དཀར་པོ་སྐུ་མདོག་གངས་ལ་ཉི་མ་ཤར་བ་ལྟར་དཀར་བ། ཞལ་གཅིག་ཕྱག་གཉིས་པ། ཞབས་གཡོན་པའི་པུས་མོའི་ལྷ་ང་དང༌། གཡས་པའི་མཐིལ་ཉི་མའི་གདན་ལ་བརྟེན་པ། ཕྱག་གཡས་ཡེ་ཤེས་ཀྱི་མེ་རབ་ཏུ་འབར་བའི་རལ་གྲི་འཕྱར་བ། གཡོན་སྡིགས་མཛུབ་ཐུགས་ཀར་མཛད་དེ། རྡོ་རྗེ་ཞགས་པ་ལན་
གཉིས་སུ་དཀྲིས་པའི་སྣེ་གཉིས་ཕྲག་གོང་དུ་ལྡིང་བ། དམར་ལ་ཟླུམ་པའི་སྤྱན་གསུམ་སྟེང་འོག་བར་དུ་གཟིགས་ཤིང་བགྲད་པ། མཆེ་བ་མ་མཆུའི་སྟེང་དུ་གཙིགས་པ། དབུ་སྐྲ་སྨ་ར་སྨིན་མ་དམར་སེར་གྱེན་དུ་འབར་བ། རིན་པོ་ཆེའི་རྒྱན་སྣ་ཚོགས་ཀྱིས་མཛེས་པ། སྦྲུལ་གྱི་སྐེ་རགས་བཅིངས་པ། དར་གྱི་ཤམ་ཐབས་ཀྱིས་སྐུ་སྨད་མཛེས་པར་བྱས་ཤིང༌། སྤྱི་བོར་མི་བསྐྱོད་པ་དཀར་པོ་བཞུགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། མདུན་དུ་གྲུ་གང་ཙམ་ལ་པད་ཉིའི་སྟེང་དུ་རང་འདྲ་བའི་བཅོམ་ལྡན་འདས་བསྐྱེད། སྤྲོ་ན་གཉིས་ཀ་ལ་ཡེ་ཤེས་དགུག་གཞུག་དབང་བསྐུར་རྒྱས་བཏབ་ཀྱང་བྱའོ། །གཉིས་པ་ནི། སྙིང་གར་ཉི་དཀྱིལ་སྟེང་དུ་འཁོར་ལོ་དཀར་པོ་རྩིབས་བཅུ་པ། ལྟེ་བ་མུ་ཁྱུད་དང་བཅས་པ་གཡས་བསྐོར་དུ་འཁོར་བ། དེའི་ལྟེ་བར་ཧཱུཾ། རྩིབས་བཅུ་ལ། ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ་བསམས་ཏེ། སྲོག་རྩོལ་ནས་གྲངས་བསྙེན་པ་ཅི་རིགས་བྱའོ། །ཕྱི་བཟླས་སོ། །ནང་བཟླས་ནི། བདག་གི་སྙིང་གར་ཧཱུཾ་ཡི་གེ་བཅུ་པོ་ཞལ་ནས་ཐོན་མདུན་བསྐྱེད་ཀྱི་ཞལ་དུ་ཞུགས། ཐུགས་ཀར་འཁོར་ལོ་བཞིན་དུ་བསམ། སླར་མདུན་གྱི་ལྷའི་ལྟེ་བ་ནས་ཐོན། བདག་གི་ལྟེ་བར་ཞུགས། སྙིང་གའི་འཁོར་ལོ་ལ་ཐིམ་པར་བསམས། སྲོག་རྩོལ་བསྡམས་ལ་བཟླའོ། །ཨོཾ་ཨཱརྻ་ཨ་ཙ་ལ་ཨརྒྷཾ་སོགས་ཀྱིས་མཆོད། བསྟོད་པ་ནི། རབ་མཛེས་གངས་ཀྱི་བུ་མོ་ཉི་གཞོན་གྱིས། །འཁྱུད་པའི་སྐུ་བརྙན་འཛུམ་ཁྲོ་བརྗིད་པའི་གར། །པདྨ་གཞོན་ནུ་ཉིན་བྱེད་ལྟ་བུའི་སྟེང༌། ཁྱོད་ཞབས་པུས་བཙུགས་ལྕིད་ཀྱིས་འགྱིང་
ཞིང་བརྫིས། །རབ་ཟླུམ་སྤྱན་གསུམ་སྟེང་འོག་བར་གཡོ་ཞིང༌། །མཆེ་གཙིགས་མ་མཆུའི་སྟེང་ན་རྗེས་རྩེན་པ། །རལ་གྲིས་འདེབས་ཤིང་ཞགས་པས་འཆིང་བའི་ཚུལ། །བདུད་བཞིའི་དགྲ་དཔུང་མ་ལུས་འཇོམས་པར་མཛད། །རབ་བཀྲའི་སྟག་ལྤགས་དར་གྱིས་དཀྲིས་པའི་གོས། །སྨད་གཡོགས་སྦྲུལ་ལྗང་སྐེད་ཆིངས་བརྟེན་པའི་ཚུལ། །རང་འོད་ལས་བྱུང་མེ་འོད་འཁྱིལ་བའི་ཀློང༌། །གཡས་བསྐུམ་ཞབས་མཐིལ་འཁོར་ལོས་མནན་པའི་སྟབས། །རབ་གུས་ལུས་ཀྱི་བ་སྤུའི་བླ་གོས་གཡོ། །ངག་ཚིག་སྨྲ་བའི་སྙན་ངག་དབྱངས་སུ་འཚེར། །ཡིད་གཉིས་མ་མཆིས་སྙིང་ནས་སྐྱབས་མཆིས་པས། །དེང་ནས་བྱང་ཆུབ་བར་དུ་བརྩེ་བས་སྐྱོངས༌། །རབ་བརྗིད་ཡིད་འཕྲོག་ལྷ་ཁྱོད་བདག་བསྒྲུབ་ན། །སྟོང་ཉིད་བློ་དང་རྗེས་འབྲེལ་སྙིང་རྗེ་དང༌། །འཆད་རྩོད་རྩོམ་པའི་སྤོབས་པ་དགེ་བ་ཅན། ཁྱེད་ཀྱིས་མཐུ་ལས་གེགས་མེད་མངོན་གྱུར་ཤོག །མདུན་གྱི་ལྷ་རྟེན་ནམ་རང་གི་སྙིང་གར་ཐིམ། དགེ་བ་བསྔོ། གཏོར་ཆོག་ནི་མི་གཡོ་བ་སྔོན་པོ་པུས་བཙུགས་ཀྱི་སྐབས་དང་འདྲའོ། །འདིའི་རྗེས་གནང་བྱེད་པར་འདོད་པས། ཐུན་མོང་བ་ནི་རྗེས་གནང་སྤྱི་དང་འདྲ་བ་ལས། གསུང་ལ་སྔགས་འཁོར་བསྟིམས་པ་དང༌། ཐུགས་ལ་ཕྱག་མཚན་དཀར་པོ་བསྟིམ་པ་ཉིད་ཡིན་ཞིང༌། ཐུན་མོང་མ་ཡིན་པ་ཟབ་མོའི་ལུགས་ནི། མཎྜལ་པདྨ་འདབ་བརྒྱད་དཀར་པོ་ཞིག་བྲི། དེའི་དབུས་སུ་ལུགས་སྐུའམ། ཙ་ཀ་ལི་བཞུགས་སུ་བཅུགགཡས་སུ་མེ་ཏོག་དཀར་པོ། གཡོན་དུ་དྲི་བཟང་གི་ཆུ་སྣོད་བཞགམཐའ་མཆོད་གཏོར་གཙང་མས་བསྐོར། མཆོད་པ་སྤྱི་དང་མཐུན་པར་བྱིན་གྱིས་བརླབས། ཚད་མེད་བཞི་ནས།
སྙིང་གར་ཐིམ་གྱི་བར་བདག་བསྐྱེད་གོང་བཞིན། མདུན་བསྐྱེད་བསངས་སྦྱངས། སྟོང་པའི་ངང་ལས་སྐུ་གཟུགས། མེ་ཏོག་དྲི་བཟང་གསུམ་ཀའི་གནས་སུ་པཾ་གསུམ་ལས། པདྨ་དཀར་པོ་གསུམ་ཨ་གསུམ་ལས་ཟླ་བ་གསུམ། རཾ་གསུམ་ལས་ཉི་མ་གསུམ་རྣམས་སོ་སོར་བརྩེགས་པའི་སྟེང་དུ་ཧཱུཾ་དཀར་པོ་རེ་རེ། དེ་རྣམས་ཡོངས་སུ་གྱུར་པ་ལས་སྐུ་ཡོངས་སུ་རྫོགས་པ་གསུམ་དུ་གྱུར་པ་ནི། གཏུམ་པོ་དཀར་པོ་ཞེས་པ་ནས། ཐུགས་ཀར་ཧཱུཾ་གིས་བར་གོང་བཞིན། རང་གི་སྙིང་ག་ནས་འོད་ཟེར་འཕྲོས། སངས་རྒྱས་སྲས་དང་བཅས་པ་ཐམས་ཅད་ཡེ་ཤེས་སེམས་དཔའི་རྣམ་པར་བཛྲ་ས་མཱ་ཛཿ ཛཿཧཱུཾ་བཾ་ཧོཿ དབང་གི་ལྷ་རྣམས་ཀྱིས། ཨོཾ་བཛྲི་བྷ་ཝ་ཨ་བྷི་ཥིཉྩ་ཧཱུཾ། ཞེས་དབང་བསྐུར། སྐུ་གང་དྲི་མ་དགཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན། རྟེན་གསུམ་པོ་ལ་དམིགས་ནས་སྔགས་བརྒྱ་རྩ་རེ་རེ་བཟླའོ། །མེ་ཏོག་དང་དྲི་བཟང་གི་གནས་སུ་བཞུགས་པའི་མི་གཡོ་བ་འོད་དུ་ཞུ་སྟེ། ཤེས་རབ་སྤེལ་བའི་རྫས་ཁྱད་པར་ཅན་དུ་གྱུར། ཨོཾ་ཨཱཿཧཱུཾ། ལན་མང་དུ་བརྗོད། གསུམ་ཀ་ལ་དམིགས་ནས་ཡི་གེ་བརྒྱ་པ་ཚར་རེས་བརྟན་པར་བྱ། བར་འདིར་གཏོར་མ་འབུལ། བདག་བསྐྱེད་ལྟར་མཆོད་བསྟོད་བྱ། སློབ་མས་མཎྜལ་ཕུལ། རྡོ་རྗེ་འཛིན་པ་སོགས་ཀྱིས་གསོལ་བཏབ་དང༌། རྒྱུན་བཤགས་སྤྱི་དང་མཐུན། སྐུའི་རྗེས་གནང་སྤྱི་དང་མཐུན་པར་གྲུབ་པའི་རྗེས་སུ་སྐུ་གཟུགས་སྤྱི་བོར་བཞག་པའི་རྗེས་སུ་སྙིང་པོ་བརྒྱ་རྩ་བཟླ། མདུན་བསྐྱེད་ཡེ་ཤེས་པའི་ཚུལ་དུ་ཐིམ་པར་མོས། བཟླས་ལུང་སྤྱི་དང་མཐུན་པར་བྱིན་པ་ལས། སློབ་དཔོན་གྱི་འཕྲེང་བ་སློབ་མའི་མགུལ་དང་ལག་ཏུ་གཏོད་པ་
ཕྱག་ལེན་ཡིན། དམ་བཅའ་བའི་ལུང་དང་བྱིན་གྱིས་བརླབས་པའི་ལུང་མི་དགོས། དེ་ནས་མེ་ཏོག་དཀར་པོ་སྤྱི་བོར་བཞག་ནས་སྙིང་པོ་བརྒྱ་རྩ་བཟླ། སློབ་དཔོན་གྱི་མཐེབ་སྲིན་གྱིས་དྲི་བཟང་གི་ཆུ་དེ་སློབ་མའི་སྤྱི་བོ་ནས་བརྩམས་ཏེ་ལུས་ཐམས་ཅད་ལ་ཅུང་ཟད་འཐོར་བཞིན་དུ་སྙིང་པོ་བརྒྱ་རྩ་བཟླས་པའི་མཐར་དྲི་བཟང་གི་ཆུ་མ་ལུས་པར་འཐུང་དུ་གཞུགབདུད་རྩི་བདེ་བ་ཆེན་པོས་ལུས་ཐམས་ཅད་ལ་ཁྱབ་པ་ལ་ཤེས་པ་གཏད་ནས་མཉམ་པར་འཇོགའདི་ཐུགས་ཀྱི་རྗེས་གནང་ཡིན། རྗེས་ཀྱི་བྱ་བ་སྤྱི་དང་འདྲ། །བདུན་ཀུན༵་འཇོམས་པའི་ལྷ་མཆོག་ནི། །དག༵འ་བ་རྒྱས་བྱེད་ལྷག་པའི་ལྷ། ཁྱོད་ཉིད་བརྟེན་པའི་མཁས་མཆོག་རྣམས། །སྙིང༵་པོ༵འི་དོན་ལ་ཤིན་ཏུ་མཁས། །མི་གཡོ་བ་དཀར་པོའི་སྒྲུབ་ཐབས་ཀྱི་ལེ་ཚན་ནོ།། །།
མི་གཡོ་ཕྱག་བཞི་པའི་སྒྲུབ་ཐབས།
ན་མོ་གུ་རུ། འཇིག་རྟེན་གསུམ་རྒྱལ་དཔའ་བོ་ནི། །གར་དགུའི་ཉམས་ཀྱི་བཞད་ཅིང་རོལ། །སྲིད་ཞིའི་རླུང་གིས་མ་གཡོས་པ། །དེ་ལ་བཏུད་ནས་སྒྲུབ་ཐབས་བཤད། །འདིར་མི་གཡོ་བ་ཕྱག་བཞི་པའི་མངོན་རྟོགས་བསྒོམ་པར་འདོད་པས། སྐྱབས་འགྲོ་དང་ཚད་མེད་བཞི་སེམས་བསྐྱེད་རྣམས་བསྒོམས་ལ། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས། པཾ་ལས་པདྨ་དང༌། རཾ་ལས་ཉི་མ་ལ་གནས་པའི་ཧཱུཾ་ལས་སྣ་ཚོགས་རྡོ་རྗེའི་ལྟེ་བར་ཧཱུཾ། དེ་ལས་འོད་འཕྲོས། རྡོ་རྗེའི་ས་གཞིར་གྱུར། ཕྱི་རོལ་རལ་གྲིའི་རྭ་བ་མེ་དཔུང་འབར་བ་དང་བཅས་པའི་བསྲུང་འཁོར། དེའི་ནང་དུ་པད་ཉི་དང་བདུད་བཞི་མཉམ་པར་འགྱེལ་བའི་གདན་ལ་ཧཱུཾ་ལས་རལ་གྲི་ཧཱུཾ་གིས་མཚན་པ་ལས་འོད་འཕྲོས། གདུག་པ་ཅན་རྣམས་བཏུལ། སླར་འདུས་པ་ལས་བདག་ཉིད་རྗེ་བཙུན་མ་མི་གཡོ་བ་མཐིང་
ཁ་ཞལ་བཞི་ཀར་ནག་པ། ཞབས་བཞི་བརྐྱང་བསྐུམ་སྣ་ཚོགས་པས་བདུད་བཞི་མནན་པའམ། གཡས་བརྐྱང་དུ་བྱ། ཕྱག་གཡས་པ་གཉིས་ཀྱིས་རལ་གྲི་འདེབས་ཚུལ་དང༌། རྡོ་རྗེ་གསོར་བ་གཡོན་གཉིས་ཀྱིས་ཞགས་པ་དང་བཅས་པའི་སྡིགས་མཛུབ་ཐུགས་ཀར་གཏོད་པ་དང༌། ཁྲག་གིས་གང་བའི་ཐོད་པ་འཛིན་པ། སྤྱན་གསུམ་དང་ལྡན་ཞིང༌། སྐྲ་སེར་པོ་གྱེན་ཏུ་བརྫེས་པ། མཆེ་བ་རྣོན་པོ་གཙིགས་ཤིང༌། སྟག་ལྤགས་ཀྱི་ཤམ་ཐབས་དང༌། མི་ལྤགས་ཀྱི་སྟོད་གཡོགས་ཅན་སྦྲུལ་དང༌། རིན་པོ་ཆེ་དང༌། རུས་པས་བརྒྱན་པ། ཁྲོ་བོ་སྤྲུལ་པའི་སྤྲིན་སྤྲོ་བ། མེ་རི་འབར་བའི་བསྐོར་བའོ། །གནས་གསུམ་བྱིན་རླབས་དང༌། ཡེ་ཤེས་སྤྱན་འདྲེན་དང༌། དབང་བསྐུར་རྣམས་སྤྱི་དང་འདྲ། དབུ་རྒྱན་མི་བསྐྱོད་པའོ། །བཀོད་པའི་བཟླས་དམིགས་གསལ་བཏབ་ལ། ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲ་ཎཾ་ཨོཾ་ཨ་ཙ་ལ་ཀ་ན་ཀ་ན་ཙཎྜ་མཧཱ་རོ་ཥ་ཎ་སྥོ་ཊ་ཡ་ཧཱུཾ། ཏྲཾ་མཾ་ཏཾ་བསྙེན་པའི་སྔགས་སོ། །ཨོཾ་ཙཎྜ་མཧཱ་རོ་ཥ་ཎ་མ་མ་ཤ་ཏྲུན་ཨ་མུ་ཀ་སྱ་ཤི་རཾ། ཀཱི་ལ་ཡ་ཧཱུཾ་ཕཊ། ཨ་ཏི་མུ་ཀ་སྟྭཾ་བྷཱ་ཡ་ཧྲི་དཾ་ཀཱི་ལ་ཡ་ཧཱུཾ་ཕཊ། ལས་ལ་སྦྱར་བའི་སྔགས་སོ། །རྗེས་ལྷ་སྐུ་སྟོང་པར་བསྡུས་ཏེ། སླར་ཡང་ལྷའི་ང་རྒྱལ་ལ་གནས་པས་དགེ་བ་བསྔོ། གཏོར་མ་ནང་མཆོད་ཀྱིས་བྲན་ལ། ཨ་མྲྀ་ཏས་བསངས། སྭ་བྷཱ་ཝས་སྦྱངས། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུཾ་ཞུ་བ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ རང་གི་སྙིང་ག་ནས་འོད་ཟེར་འཕྲོས། མི་གཡོ་མགོན་པོ་འཁོར་དང་བཅས་པ་བཛྲ་ས་མཱ་ཛཿ ཨོཾ་ཨ་ཙ་ལ་ཏེ་ཛ་བཛྲ་
པུཥྤེ། དྷུ་པེ། དཱི་པཾ། གནྡྷེ། ནཻ་ཝེ་ཏེ་ས་པ་རི་ཝཱ་རེ་བྷྱཿ ཛཿཧཱུཾ་བཾ་ཧོཿ སཾ་ཏྲིཔྟ་སརྦ་ས་ཏ་ནཱན་ཨི་མཾ་བཱ་ལིང་གྲྀཧྞ་གྲྀཧྞ་ཁ་ཁ་ཁཱ་ཧི་ཁཱ་ཧི། བྷཀྵ་བྷཀྵ་ཧཱུཾ་ཕཊ། ཅེས་ལན་གསུམ་གྱིས་འབུལ། མཆོད་བསྟོད་སོགས་རྗེས་ཀྱི་བྱ་བ་སྤྱི་དང་མཐུན། འདིའི་རྗེས་གནང་ནི་སྤྱི་དང་འདྲ་བ་ལས། འགྲུབ་ན་མཎྜལ་ཆོས་འབྱུང་མཐིང་ཁ་དབུས་སུ་རལ་གྲིས་མཚན་པ་ཞིག་འབྲི། ཐུགས་ཀྱི་རྗེས་གནང་གི་སྐབས། སངས་རྒྱས་རྣམས་ནི་ཐམས་ཅད་ཀྱི། །ཡེ་ཤེས་འབར་བའི་རལ་གྲི་འདི། །བཟུང་ཞིག་གདུག་པ་ཀུན་ཆོམས་ལ། །སྲིད་པ་གསུམ་ལས་རྒྱལ་བར་མཛོད། །ཅེས་ལག་ཏུ་གཏད། མདུན་བསྐྱེད་ལ་མོས་གུས་བྱས་པས་ཐིམ་པར་མོས་སུ་འཇུག་པ་ནི་ཁྱད་པར་རོ། །ཟབ་མོ་ཀུན༵་གྱི་ཕུལ་དུ་གྱུར། །ཐོས་པས་དག༵འ་བ་རབ་འཕེལ་བ། །བསྒོམས་ན་དངོས་གྲུབ་རྣམ་གཉིས་ཀྱི། །སྙིང༵་པོ༵་མངོན་དུ་འགྱུར་འདི་མཚར། །ཞེས་པ་ནི་མི་གཡོ་བ་ཕྱག་བཞི་པའི་སྒྲུབ་ཐབས་ཀྱི་ལེ་ཚན་ནོ།། །།
མི་གཡོ་བ་ཞབས་བཞི་པའི་སྒྲུབ་ཐབས།
མི་གཡོ་བ་ཞབས་བཞི་པའི་སྒྲུབ་ཐབས་སོ། །ན་མོ་གུ་རུ། དགྲ་བགེགས་འཇོམས་མཛད་དཔའ་བོ་ཆེ། །འཇིགས་བྱེད་མི་གཡོ་ལ་བཏུད་ནས། །དུད་ཁ་ཕྱག་གཉིས་ཞབས་བཞི་པའི། །སྒྲུབ་ཐབས་མདོ་ཙམ་བྲི་བར་བྱ། །འདི་ལ་སྐྱབས་སེམས་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དང༌། རཾ་ལས་ཉི་མའི་སྟེང་དུ་ཧཱུཾ་མཐིང་ནག་ལས་འཕགས་པ་མི་གཡོ་བ་སྐུ་མདོག་དུད་ཁ་ནག་པོ་ཞལ་གཅིག་ཕྱག་གཉིས་གཡས་རལ་གྲི་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ། སྤྱན་གསུམ་མཆེ་བཙིགས། སྐྲ་དང་ཁ་སྤུ་སེར་པོ་གྱེན་དུ་བརྫཻས་པ། ཞབས་དང་པོས་
བསྒྲུབ་བྱའི་ཁ། གཉིས་པས་སྙིང་ག །གསུམ་པས་པུས་བཙུགས་ཀྱི་ལྟེ་བ། བཞི་པ་ཕྱིར་བརྐྱང་བར་རྐང་པ་མནན་པ། སྟག་ལྤགས་ཀྱི་ཤམ་ཐབས་དང་སྦྲུལ་གྱིས་བརྒྱན་པ། མི་མགོའི་དབུ་རྒྱན་དང་དོ་ཤལ་ཅན། རྒྱལ་བ་མི་བསྐྱོད་པས་དབུ་ལ་བརྒྱན་པ། མེ་དཔུང་འབར་བའི་དབུས་ན་བཞུགས་པའོ། །སྙིང་གར་ཉི་མའི་སྟེང་དུ་ཧཱུཾ་མཐིང་ནག་ལ་སྙིང་པོས་བསྐོར་བ། མེའི་རྗེ་ངར་གྱི་ཕུར་བུ་སོར་བཞི་པ་རྒྱ་མདུད་ལ་ཧཱུཾ་བྲིས་པ་ལག་ཏུ་ཐོགས། ཕུར་བུ་སྟོང་པའི་ངང་ལས་རང་དང་འདྲ་བར་བསྐྱེད། གཉིས་ཀའི་ཐུགས་ཀའི་ཧཱུཾ་ལས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་ཀ་དང་གཉིས་སུ་མེད་པར་ཐིམ། ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ། ཞེས་མདུན་བསྐྱེད་ཀྱི་སྔགས་ལས་དངོས་གྲུབ་ཞུ་བའི་ཚུལ་གྱིས་གང་ནུས་བཟླས། ཐུན་འཇོག་པའི་ཚེ་ཕུར་བུའི་ལྷ་ལ་གསོལ་བ་བཏབ་པས། དེའི་ཐུགས་ཀའི་སྔགས་འཕྲེང༌། རང་གི་སྙིང་གའི་སྔགས་འཕྲེང་ལ་ཐིམ། ཕུར་པའི་ལྷ་ལ་གཏོར་མ་འབུལ་ཏེ། དེའི་ཆོ་ག་ནི་གོང་དུ་མི་གཡོ་བ་སྔོན་པོ་པུས་བཙུགས་ཀྱི་སྒྲུབ་ཐབས་སུ་བཤད་ཟིན་པ་ཉིད་དོ། །འོན་ཀྱང་ཁྱད་པར་ནི། གཏོར་མ་དམར་གཏོར་གྲུ་གསུམ་དུ་བྱ། ཨོཾ་ལས་བྱུང་བའི་གཏོར་སྣོད་ཐོད་པ་དཀར་པོ་ཞེས་འདོན་པ་སྤོ། མཐར་བཛྲ་མུཿ ཞེས་ཡེ་ཤེས་པ་གཤེགས། དམ་ཚིག་པ་ཛཿཧཱུཾ་བཾ་ཧོཿ ཞེས་རང་ལ་ཐིམ། ཕུར་པ་མགུལ་ཁུག་ཏུ་བཅུག་གོ །དགེ་བའི་རྩ་བ་བྱང་ཆུབ་ཏུ་བསྔོ། བསྙེན་ཚད་འབུམ་ཕྲག་བཅུ་གཉིས་སོ། །འདིའི་ལུང་འབོགས་པ་ནི། རྗེས་གནང་སྤྱི་དང་འདྲ་བ་ལས། སྐུའི་རྗེས་གནང་གི་མཐར་བྲིས་འབུར་གྱི་སྐུ་སྤྱི་བོར་གཏུགས། གསུང་གི་མཐར་ཕུར་བུར་མགྲིན་པར་གཏུགས། ཐུགས་
ཀྱི་མཐར་རལ་གྲི་སྙིང་གར་གཏུགས། བརྟན་བྱེད་ཐོད་པ་རྒུན་ཆང་གིས་གང་བ་ལས་འཐུང་དུ་གཞུགདེ་བཞི་རེ་རེ་ལ་སྔགས་གསུམ་གསུམ་བཟླའོ། །སྙིང་རྗེས་ཀུན༵་ཏུ་རབ་འཁྲོས་པ། །དག༵འ་བའི་ཐུགས་རྗེས་བདུད་བཞི་འཇོམས། །སྙིང༵་ནས་མགོན་པོ༵་ཁྱོད་བརྟེན་ན། །དངོས་གྲུབ་བཟང་པོ་ཅི་ཡང་ཐོབ། །མི་གཡོ་བ་ཞབས་བཞི་པའི་སྒྲུབ་ཐབས་ཀྱི་ལེ་ཚན་ནོ། །པདྨ་བཛྲ། ཁ་ཆེ་དགེ་སློང་ཡ་མ་རི་ཞལ་གཟིགས། དགེ་ཚུལ་[སྡང་མིག་གིས་མི་འཆི་ནུས་པ། ]མི་གཡོ་ཞལ་གཟིགས། དྷརྨ་ཤཱི་[མངའ་རིས་པ་]ལ། ནུ་བོ་དྷརྨ་དཱི་བྱ། དགེ་བྱས་གཙོ་བོ། ཨ་སྐྱབས། དཀར་བ་རྣམ་གསུམ། ཡར་བསྒོམ། རྒྱལ་ཚ་ལུང་མང་པོ། ཡོན་ཏན་ཁྲི། སེང་གེ་རྒྱལ། [སེང་གེ་བཟང་པོ། ]འདི་དཔའ་བོ་ཆིག་སྒྲུབ་ལས་བྱུང་གསུང༌།། །།
མི་གཡོ་སྤྲེའུ་བརྒྱད་མར་གྲགས་པའི་སྒྲུབ་ཐབས།
མི་གཡོ་སྤྲེའུ་བརྒྱད་མར་གྲགས་པའི་སྒྲུབ་ཐབས་སོ། །ན་མོ་གུ་རུ་ཝེ། དཔལ་ལྡན་ཡེ་ཤེས་མེ་ལྕེ་ཡིས། །མ་རིག་མུན་པ་དྲུངས་འབྱིན་ཞིང༌། །བདུད་ཚོགས་མ་ལུས་བསྲེགས་པ་པོ། །གཏུམ་པོ་ཆེ་ལ་སྤྱི་བོས་འདུད། །གང་དེའི་སྒྲུབ་ཐབས་རྨད་བྱུང་བ། །མཐའ་དག་སྲིད་པའི་ནད་སེལ་ཞིང༌། །རི་ལུ་ལ་སོགས་གྲུབ་སྩོལ་བ། །དེ་འདྲ་གང་ཡིན་འདིར་བཤད་བྱ། །འདིར་མི་གཡོ་སྤྲེའུ་བརྒྱད་མར་གྲགས་པ། གསང་བ་འདུས་པའི་རྒྱུད་ཀྱི་མན་ངག་ལས་འབྱུང་བ་གཏུམ་པོ་ཞལ་གསུམ་ཕྱག་དྲུག་པའི་སྒྲུབ་ཐབས་བསྒོམ་པར་འདོད་པས། སྐྱབས་འགྲོ་བྱམས་སྙིང་རྗེ་སེམས་བསྐྱེད་དང་འབྲེལ་བ་སྔོན་དུ་འགྲོ་བས། ཤཱུ་ནྱ་ཏས་སྟོང་པར་སྦྱངས། སྟོང་པའི་ངང་ལས་པཾ་ལས་སྣ་ཚོགས་པདྨ་ཤིང་རྟའི་འཕང་ལོ་ཙམ་དེའི་སྟེང་དུ་རཾ་ལས་ཉི་མ་ལ་གནས་པའི་རང་སེམས་ཨོཾ་ཨ་ཙ་ལ་ཞེས་པ་ནས། ཚིནྡྷ་ཧཱུཾ་ཞེས་པའི་
སྔགས་འཕྲེང་ཡོངས་སུ་གྱུར་པ་ལས། རལ་གྲི་སྔགས་འཕྲེང་གི་མཚན་པ། དེ་ལས་འོད་འཕྲོས། རང་བཞིན་གྱི་གནས་ནས་མི་གཡོ་བ་སྤྱན་དྲངས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་མི་གཡོ་སྐུ་མདོག་ནག །དབུ་གསུམ་ཕྱག་དྲུག་ཞབས་གཉིས་པ། །གཡས་དམར་གཡོན་དཀར་དབུས་མཐིང་ཞལ། །གཡས་གསུམ་རྡོ་རྗེ་རལ་གྲི་དང༌། །འཁོར་ལོ་བསྣམས་ཤིང་གཡོན་དང་པོ། །ཐུགས་ཀར་ཁྲོ་བོའི་སྡིགས་མཛུབ་ཅན། །ལྷག་མ་དགྲ་སྟྭ་ཞགས་པ་བསྣམས། །གཡས་བསྐུམ་གཡོན་བརྐྱང་གོམ་སྟབས་ཀྱིས། །ནད་བརྒྱད་རང་བཞིན་སྤྲེའུ་བརྒྱད་གནོན། །སྟག་ལྤགས་ན་བཟའ་སྦྲུལ་རྒྱན་དང༌། །མི་མགོའི་དབུ་རྒྱན་དོ་ཤལ་ཅན། །སྤྱན་གསུམ་མཆེ་གཙིགས་མེ་དཔུང་བཞུགས། །སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། ཐུགས་ཀར་ཉི་མ་ལ་ཧཱུཾ་སྔོན་པོ། ཧཱུཾ་དེའི་སྟེང་དུ་པཾ་ལས་པདྨ་དང༌། རཾ་ལས་ཉི་མའི་སྟེང་དུ་ཧཱུཾ་ལས་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ། རཾ་ལས་བྱུང་བའི་ཉི་མ་ལ་གནས་པའི་ཧཱུཾ་ལས་བྱུང་བའི་རལ་གྲི་ཧཱུཾ་གིས་མཚན་པ། ཡེ་ཤེས་སྤྱན་འདྲེན་དང་དབང་བསྐུར་སྤྱི་དང་མཐུན་པར་སྦྱར་ཡང་རུང་སྟེ། སྤྱི་བོ་དཔྲལ་བར་ལྟག་པ་སྣ་ལྟག་གཡས་གཡོན་རྣམས་སུ་རྡོ་རྗེ་ནག་པོ་རྩེ་ལྔ་པ་རེ་རེས་བརྒྱན་པ་སྟེ་རིགས་བདག་གི་རྒྱན་ནོ། །ཏིང་ངེ་འཛིན་སེམས་དཔའི་མཐར་ཡིག་འབྲུ་བསྐོར་བར་བསམས་ལ། ཨོཾ་ཨ་ཙ་ལ་ཀ་ཎ་སརྦ་རོ་གཱ་ན། བྷིནྡྷ་བྷིནྡྷ། ཚིནྡྷ་ཚིནྡྷ་ཧཱུཾ་ཞེས་བཟླས་པས། ཡིག་འབྲུ་ལས་རལ་གྲི་འཕྲོས། བཤང་ལམ་ནས་
ཐོན། སྤྲེའུ་བརྒྱད་གཟིར་བ་དང༌། གཞན་ཡང་གདུག་པ་ཅན་ཐམས་ཅད་ཚར་བཅད། གསང་བ་ནས་ཞུགས་སྟེ་སྙིང་གར་ཐིམ་པར་བསམ། ཐུན་འཇོག་ཁར་ལྷ་སྐུ་སྟོང་པ་ཉིད་དུ་བསྡུས་ལ་ཅུང་ཟད་མཉམ་པར་བཞགསླར་ཡང་དབང་བསྐུར་གསལ་བཏབ་ལ་དགེ་བ་བསྔོ། གཏོར་མ་བསངས་སྦྱངས། ཨ་ལས་ཐོད་པའི་ནང་དུ་ཨ་ལས་ཟླ་བ། དེའི་སྟེང་དུ་ཧཱུཾ་ལས་རྡོ་རྗེ་གདེངས་པ་རྒྱ་གྲམ་གྱི་ལྟེ་བ་ལ་ཧཱུཾ་གིས་མཚན་པ། དེ་ལས་འོད་འཕྲོས། སྣོད་བཅུད་ཀྱི་བདུད་རྩི་ཐམས་ཅད་ལྷ་མོ་བདུད་རྩིའི་བུམ་པ་ཅན་གྱི་རྣམ་པར་སྤྱན་དྲངས་ཏེ་བསྟིམ། ཟླ་བ་དང་རྡོ་རྗེ་རྒྱ་གྲམ་ཡང་འོད་དུ་ཞུ། བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ་ཧ་ཧོ་ཧྲཱིཿ གཏོར་མགྲོན་སྤྱན་དྲངས་པ་མན་ཆད་མི་གཡོ་པུས་བཙུགས་ཀྱི་སྐབས་དང་འདྲ། བསྙེན་པའི་ཚད་ནི་འབྲུ་འབུམ་མོ། །རང་གཞན་གྱི་གནད་གདོན་ཞི་བ་ལ་ལྷག་པར་བསྔགས་པ་ཡིན་ཞིང༌། རིལ་བུ་དང་རྨི་ལམ་བརྟག་པའི་ལས་ཚོགས་རྣམས་ཀྱང་ཇི་སྐད་བཤད་པ་བཞིན་བསྒྲུབ་པར་བྱའོ། །འདིའི་རྗེས་གནང་ནི་སྤྱི་དང་འདྲའོ། །ནད་ཀུན༵་འཇོམས་པའི་དཔའ་བོ་སྟེ། །ཡིད་ལ་དག༵འ་བདེ་བསྐྱེད་པའི་གནས། །ཤིན་ཏུ་གསང་བ་སྙིང༵་པོ༵འི་དོན། །སྒྲུབ་ཐབས་མདོ་ཙམ་རྣམ་པར་སྤེལ། །ཞེས་པ་ནི་མི་གཡོ་སྤྲེའུ་བརྒྱད་མར་གྲགས་པའི་མངོན་རྟོགས་ཀྱི་ལེ་ཚན་ནོ།། །།སྒྲུབ་ཐབས་རིན་ཆེན་འབྱུང་གནས་ལས། མི་གཡོ་བའི་སྒྲུབ་ཐབས་བཤད་པའི་སྐབས་ཏེ་བཅུ་པའོ། །ཛེ་ཏཱ་རི། རྡོ་རྗེ་གདན་པ་ཆེ་ཆུང༌། བ་རི་བ། གོང་མ་ལྔ། ལོ་མཆོགདཔལ་ལྡན་སེང་གེ ཆོས་རྗེ་བླ་མ། །