སྒྲུབ་ཐབས་རིན་ཆེན་འབྱུང་གནས་ལས་ཚེ་སྒྲུབ་ཀྱི་ལྷའི་སྒྲུབ་ཐབས་བཤད་པའི་སྐབས་ཏེ་བཅུ་གཅིག་པ།
ཚེ་དཔག་མེད་ཀྱི་སྒྲུབ་ཐབས།
ཨོཾ་སྭཱ་སྟི། གང་གི་མཚན་ཙམ་ཐོས་པས་ཀྱང༌། །འཆི་མེད་གནས་ལ་ཉེར་སྦྱོར་བ། །ཚེ་དཔག་མེད་ལ་གུས་བཏུད་ནས། །གང་དེའི་སྒྲུབ་ཐབས་རྨད་བྱུང་བྲི། །སྐྱབས་སེམས་སྔོན་དུ་འགྲོ་བས། ཁ་ཤར་དུ་ཕྱོགས་ཏེ་རང་ཡི་དམ་གང་ཡང་རུང་བའི་ང་རྒྱལ་ལ་གནས་པས་རང་གི་མདུན་གྱི་ནམ་མཁར་བཅོམ་ལྡན་འདས་རྒྱལ་བ་ཚེ་དཔག་མེད་སྐུ་མདོག་དམར་སེར་རབ་ཏུ་བྱུང་བའི་ཆ་ལུགས་ཅན། ན་བཟའ་ཆོས་གོས་ངུར་སྨྲིག་རྣམ་གསུམ་གསོལ་བ། པད་ཟླ་ལ་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། ཕྱག་གཉིས་མཉམ་བཞག་གི་ཕྱག་རྒྱས་འཆི་མེད་ཡེ་ཤེས་ཀྱི་བདུད་རྩིས་གང་བའི་ལྷུང་བཟེད་བསྣམས་པ། མཚན་དཔེ་ཡོངས་སུ་རྫོགས་པའི་སྐུར་གྱུར། དཀོན་མཆོག་གསུམ་ལ་བདག་སྐྱབས་མཆི་སོགས་ཚར་གཅིགཨོཾ་བཛྲ་ཨཱ་ཡུ་ཥེ་ས་ར་ཧ་ཀ་ར་རེ་ཤ་ར་རེ་ཧཱུཾ་ཕཊ། ཞེས་ཉེར་ཅིག་བཟླས་ལ། ཐལ་མོ་སྦྱར་ཏེ། བཅོམ་ལྡན་འདས་ཚེ་དཔག་ཏུ་མེད་པས་བདག་ཚེ་དང་ཡེ་ཤེས་དཔག་ཏུ་མེད་པར་བྱིན་གྱིས་བརླབ་ཏུ་གསོལ། ལན་གསུམ། རླུང་ཕྱིར་གསལ་བས་ལྷུང་བཟེད་ཁོལ། ནང་དུ་བརྔུབས་པའི་ཚེ་བདུད་རྩི་ལུད་པ་རྣམས་སྣ་སྒོ་ནས་ཞུགས་ཏེ་ལུས་ཐམས་ཅད་དང༌། ཁྱད་པར་སྙིང་གའི་རྩ་སྦུབས་གང་བར་བསམས་ཏེ། མཆིལ་མ་རེ་མིད་པ་ལན་བདུན་བྱ། དེ་ནས། ཨོཾ་ཨ་མ་ར་ཎི་ཛཱི་བཱནྟཱི་ཡེ་སྭཱཧཱ། ཞེས་པ་ཅི་ནུས་དང༌། ཚེ་གཟུངས་ཨོཾ་གཉིས་མ་ཉེར་གཅིག་ཙམ་བཟླས་པས། ཚེ་དཔག་མེད་འོད་དུ་ཞུ། སྤྱི་བོ་ནས་ཞུགས་པས་ལུས་ཐམས་ཅད་གང་བར་གྱུར། དགེ་བ་བསྔོ། འདིའི་བསྙེན་པ་བྱ་བར་འདོད་ན། ར་བ་བཞི་པོ་གང་རུང་གི་ཡར་ཚེས་གཟའ་སྐར་བཟང་བའི་ཐོ་རངས་ཤིག་ནས་འགོ་བརྩམས། ཁྲུས་བྱས། ཁ་ཤར་ཕྱོགས་སུ་བལྟས་ལ་བཟླའོ། །རྒྱུན་གྱི་ཉམས་
ལེན་ལ་ཐོ་རངས་སྙིང་པོ་བརྒྱ་རྩ་རེ་བྱ། འཆི་ལྟས་བྱུང་ན་སྟོང་རྩ་རེ་བཟླས་པས་ཀྱང་དུས་མིན་གྱི་འཆི་བ་བཟློག་གོ་ཞེས་བཤད་དོ། །འདིའི་སློབ་མ་རྗེས་འཛིན་ལ་སྒོམ་ལུང་ཙམ་འབོགས་པའི་སྲོལ་ཡོད་པ་ནི་སྤྱི་དང་མཐུན། བུམ་ཆོག་བྱེད་ན། མཎྜལ་པདྨ་འདབ་བརྒྱད་ཚོམ་བུ་དང་བཅས་པའི་དབུས་སུ། བུམ་པ་སྤྱི་དང་མཐུན་པར་བཀོད། གུ་གུལ་གྱིས་བདུག་ལ་བགེགས་གཏོར་བཏང༌། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བྷྲཱུཾ་ལས་བུམ་པ་བཾ་ལས་བྱུང་བའི་བདུད་རྩིས་གང་བའི་སྟེང་དུ། ཚེ་དཔག་མེད་སྔར་ལྟར་བསྐྱེད། བཟླས་པ་ཅི་ནུས་བྱས་པའི་མཐར་མཆོད་བསྟོད་བྱ། གསོལ་བ་བཏབ་ཅིང་དངོས་གྲུབ་བླངས་ལ། ལྷ་འོད་དུ་ཞུ་ནས་བདུད་རྩིར་གྱུར། སློབ་མ་རྣམས་ཀྱིས་མཎྜལ་ཕུལ་ལ། ཀུན་མཁྱེན་ཡེ་ཤེས་ཕུང་པོ་ཅན་སོགས་ཀྱིས་གསོལ་བཏབ་དང༌། གུར་ནས་འབྱུང་བའི་རྒྱུན་བཤགས་བྱ། སློབ་མ་ཐ་མལ་གྱི་ང་རྒྱལ་ལ། མདུན་བསྐྱེད་དང་སློབ་དཔོན་དབྱེར་མེད་པ་ཚེ་དཔག་མེད་ཀྱི་ང་རྒྱལ་ལ་དམིགས་པ་ལས་བྱིན་རླབས་ལེན་པ་སོགས་དམིགས་པ་སྒྲུབ་ཐབས་དང་འདྲ་བར་ཕོགཁྱད་པར་ནི་འདིར་ཡན་ལག་བདུན་པ་མི་དགོས། རླུང་བརྔུབས་པའི་ཚེ་བུམ་ཆུ་རེ་སྦྱིན། བཟླས་པ་དཔོན་སློབ་གཉིས་ཀར་ལྷན་དུ་བྱེད། ཚེ་དཔག་མེད་སྤྱི་བོར་ཐིམ་པའི་སྐབས་སྤྱི་བོར་བུམ་པ་འཇོག་ཅིང༌། བུམ་ཆུ་གཏོར་བ་རྣམས་ལག་ལེན་ཡིན། སློབ་མ་དང་མདུན་བསྐྱེད་ཀྱི་རྗེས་ཀྱི་བྱ་བ་དང་སྤྱི་དང་འདྲའོ། །གྲུབ་པའི་རྒྱལ་མོ་གསུང་ཀུན༵་ནས། །རས་ཆུང་སྙན་དུ་དག༵འ་བས་བརྒྱུད། །བུར་སྒོམ་ཞལ་གདམས་སྟག་ལུང་པའི། །སྙིང༵་གི་གདམས་པ་གསལ་པོ༵ར་བྲིས། །རས་ཆུང་པའི་ལུགས་ཚེ་དཔག་མེད་སྤྲུལ་སྐུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཚེ་དཔག་མེད་རྡོ་རྗེ་གདན་པའི་མན་ངག
ཨོཾ་སྭཱ་སྟི། རྒྱལ་བ་ཀུན་ལས་ཆེས་ལྷག་པའི། །ཐུགས་རྗེས་འགྲོ་བའི་སྡུག་བསྔལ་སེལ། །ཚེ་དཔག་མེད་ལ་གུས་བཏུད་ནས། །རྡོ་རྗེ་གདན་པའི་མན་ངག་བྲི། །སྐྱབས་སེམས་ཚད་མེད་བཞི་སྔོན་དུ་བཏང་ནས། སྭ་བྷཱ་ཝས་སྟོང་པར་སྦྱངས། པད་ཟླའི་གདན་ལ་རང་སེམས་བྷྲཱུཾ་ལས་རྒྱལ་བ་ཚེ་དཔག་མེད་སྐུ་མདོག་དམར་པོ། ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱ་མཛད་པའི་སྟེང་ན་འཆི་མེད་ཡེ་ཤེས་ཀྱི་བདུད་རྩིས་གང་བའི་བུམ་པ་འཛིན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་གྱིས་བརྒྱན་པའོ། །གནས་གསུམ་བྱིན་རླབས། ཡེ་ཤེས་སྤྱན་དྲངས། དབང་བསྐུར་རྒྱས་བཏབ་རྣམ་པར་སྣང་མཛད་ཀྱིས་དབུ་བརྒྱན། ཨོཾ་པུཎྱེ་པུཎྱེ་མཧཱ་པུཎྱེ་ཨ་པ་རི་མི་ཏ་པུཎྱེ། ཨ་པ་རི་མི་ཏ་པུཎྱེ། ཛྙཱ་ན་སཾ་བྷ་རོ་བྷ་ཙི་ཏེ་ཀ་རི་ཎ་ཡེ་སྭཱཧཱ། ཞེས་ཅི་ནུས་སུ་བཟླས། མདུན་བསྐྱེད། གཏོར་ཆོག་རྗེས་གནང་རྣམས་ནི། སྒྲུབ་ཐབས་བརྒྱ་རྩའི་ཆོ་ག་ཉིད་སྦྱོར་བ་ཡིན་ལ། བུམ་ཆོག་བྱེད་ན། བུམ་པ་སྒྲུབ་ཚུལ་སྤྱི་དང་འདྲ་ཞིང༌། བུམ་པ་གཉིས་འཆའ། གཅིག་ཏུ་རྒྱལ་བ་ཚེ་དཔག་མེད་དང༌། གཉིས་པར་རྡོ་རྗེ་གནོད་སྦྱིན་གཡས་རྡོ་རྗེ་མཆེ་བ་འཕྱར་ཞིང་གཡོན་སྡིགས་མཛུབ་ཐུགས་ཀར་མཛད་པ། གཡོན་བརྐྱང་གིས་བཞུགས་པ་ཞིག་བསྐྱེད། དེ་ལ་སྔགས་ཀྱང་ཨོཾ་བཛྲ་ཡཀྵ་ཀྲོ་དྷ་ཁཱ་ད་ཁཱ་ད་ཧཱུཾ་ཕཊ། ཅེས་བཟླ། སློབ་མའམ། ནད་པ་ལ་བུམ་མཆོག་གི་བྱིན་རླབས་བྱེད་ན། ཐོག་མར་བགེགས་སྦྱངས་པ་དང༌། སྡིག་པ་སྦྱང་བ་བྱ། དེ་ནས་རྡོ་རྗེ་གནོད་སྦྱིན་བསྐྱེད་པའི་བུམ་པ་དེས་བཀྲུས་ཤིང་བྱབས་སྲུང་ཀྱང་བྱ། དེ་ནས་བཀྲ་ཤིས་བརྗོད་ཅིང༌། སླར་བུམ་པ་གཉིས་པ་དེས་དབང་བསྐུར་ཞིང༌། ལྷ་དབང་བསྐུར་བའི་དམིགས་པ་ལྟར་བསྒོམ་དུ་བཅུག སྦྱིན་པའི་སྟོབས་
ཀྱི་སངས་རྒྱས་ཡང་དག་འཕགས། །སོགས་ཤོ་ལོ་ཀ་རེ་རེའི་མཐར། སྙིང་པོ་རེ་བརྗོད་ཅིང་དབང་བསྐུར། རྒྱལ་སྲིད་སྣ་བདུན་དང༌། བཀྲ་ཤིས་རྫས་བརྒྱད་སོགས་ཀྱིས་ཤེས་པ་བརྗོད། རྗེས་གནང་དང་སྤྲགས་ཏེ་བྱེད་ན། རྒྱུན་བཤགས་སོང་མཚམས་སུ་འདི་རྣམས་བྱེད་པ་ཡིན། འདི་ལ་ཡར་ཀླུངས་པ་སེང་གེ་རྒྱལ་མཚན་གྱིས་སློབ་རྒྱུད་འགའ་རེའི་ཡི་གེ་ན། ཚེ་དབང་ལྷ་གཅིག་བུམ་གཅིག་གི་དམིགས་པ་ཕལ་ཆེར་དཀྲུགས་ཏེ་འདི་ལ་སྦྱར་ཡོད་ནའང༌། བསྲེ་བསླད་ཁོ་ན་ཡིན་ནོ། །སྒྲུབ་ཐབས་འདིའི་ཁུངས་ནི་ངན་སོང་སྦྱོད་རྒྱུད་ཡིན་ཞེས་བླ་མས་གསུང༌། བརྒྱུད་པ་འདིའི་མོས་ཞེན་ཅན། །ཀུན༵་ལའང་རྒྱ་ཆེར་མ་གྲགས་མོད། །འཕགས་པས་མཛད་པའི་སྒྲུབ་ཐབས་ནི། །རབ་དག༵འ་སྙིང༵་པོ༵འི་རྗེས་སུ་འབྲང༌། །ཚེ་དཔག་མེད་བ་རི་ལུགས་ཀྱི་སྒྲུབ་ཐབས་ཀྱི་ལེ་ཚན་ནོ།། །།
རྒྱལ་བ་ཚེ་འཛིན་དབང་པོའི་སྒྲུབ་ཐབས།
ཨོཾ་སྭཱ་སྟི། སངས་རྒྱས་ཀུན་གྱི་རྗེས་ཆགས་དངོས། །རྒྱལ་བ་ཚེ་འཛིན་དབང་པོའི་སྐུར། །སྟོན་མཛད་དེ་ལ་རབ་དང་བས། །ཕྱག་འཚལ་ནས་ནི་སྒྲུབ་ཐབས་བཤད། །སྐྱབས་སེམས་སྔོན་དུ་སོང་ནས། སྭ་བྷཱ་ཝས་སྟོང་པར་སྦྱངས། པཾ་ལས་པདྨ་ཨ་ལས་ཟླ་བ་དེའི་སྟེང་དུ་ཨོཾ་གྱི་འཕྲོ་འདུ་ལས། རང་ཉིད་རྒྱལ་བ་ཚེ་དཔག་མེད་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཞི་བའི་སྤྱན་གསུམ་དང་ལྡན་པ། ཕྱག་གཡས་དང་པོ་རྡོ་རྗེ་དཀར་པོ། གཡོན་དང་པོ་ཤེལ་གྱི་འཕྲེང་བ། འོག་མ་གཉིས་ཡུམ་ལ་འཁྱུད་ཚུལ་གྱི་མཉམ་བཞག་གི་ཕྱག་རྒྱའི་སྟེང་ན་ཤེལ་གྱི་བུམ་པ་བདུད་རྩི་དཀར་པོས་གང་བ་འཛིན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཡུམ་པདྨ་ཀུན་དྷ་ལི་དམར་མོ་ཕྱག་དང་པོ་གཉིས་ཀྱིས་བྱི་རུའི་བགྲང་ཕྲེང་དང་དྲིལ་བུ་འཛིན་པ།
འོག་མ་གཉིས་ཀྱིས་ཡབ་ལ་འཁྱུད་པས་པདྨ་རཱ་གའི་བུམ་པ་བདུད་རྩི་དམར་པོས་གང་བ་འཛིན་པ། པདྨའི་སྐྱིལ་ཀྲུང་གིས་བཞུགས་པ། གཉིས་ཀའང་དར་དང་རིན་པོ་ཆེའི་རྒྱན་གྱིས་བརྒྱན་པའི་སྤྱི་བོར་རྣམ་སྣང༌། མགྲིན་པར་སྣང་མཐའ། སྙིང་གར་མི་བསྐྱོད་པ། ལྟེ་བར་རིན་འབྱུང༌། གསང་བར་དོན་གྲུབ་རྣམས་རང་སྣང་གི་ཡུམ་དང་བཅས་པར་གྱུར། མི་བསྐྱོད་པའི་ཐུགས་ཀར་ཉི་ཟླ་ཁ་སྦྱོར་གྱི་དབུས་སུ་ཨོཾ། ཀླད་སྐོར་གྱི་དབུས་སུ་ཐིག་ལེ་དཀར་ལ་འཚེར་བ། ཉི་ཟླ་ཨཱ་ལི་ཀཱ་ལིའི་སྐུད་པས་བཅིངས་པ། བ་སྤུའི་སྒོ་ཐམས་ཅད་རྟ་མགྲིན་ཕྱག་གཉིས་པའི་གོ་ཆས་གཏམས་པ། ཡེ་ཤེས་པ་བསྟིམ་པ་དང་དབང་བསྐུར་རྒྱས་བཏབ་སྤྱི་དང་འདྲ་བ་ལས། འོད་དཔག་མེད་ཀྱིས་དབུ་བརྒྱན། དེ་ནས་བཟླས་དམིགས་གསལ་བཏབ་ལ། ཚེ་གཟུངས་ཨོཾ་གཉིས་མ་གང་ནུས་བཟླའོ། །རྗེས་མི་དམིགས་པར་བསམས་ལ་དགེ་བ་བྱང་ཆུབ་ཏུ་བསྔོ། གཏོར་མ་བསངས་སྦྱངས། ཨ་ལས་བྱུང་བའི་ཀ་པཱ་ལ་བཅུད་དང་བཅས་པ་མེ་རླུང་གི་སྦྱོར་བས་སྦྱངས། ཡེ་ཤེས་ཀྱི་བདུད་རྩི་སྤྱན་དྲངས་ལ་བསྟིམ། ཨོཾ་ཨཱཿཧཱུཾ་ཞེས་བྱིན་གྱིས་བརླབས། རང་གི་མདུན་དུ་རྒྱལ་བ་ཚེ་དཔག་མེད་འཁོར་དང་བཅས་པ་བཛྲ་ས་མཱ་ཛཿ ཨ་ཀཱ་རོ་ལན་བདུན་གྱིས་ཕུལ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་བཅོམ་ལྡན་མགོན་པོ་ཡེ་ཤེས་ཚེ་ཡི་བདག །རྒྱལ་བ་ཀུན་གྱིས་རྟག་ཏུ་དགོངས་གྱུར་པའི། །འཕགས་པའི་ཚོགས་ཀྱིས་སྐྱེ་ཤི་གཅོད་པའོ། །སྐྱེ་དགུ་རྣམས་ཀྱི་སྐྱབས་གྱུར་བཅོམ་ལྡན་འདས། །དད་པས་བདག་ནི་རྟག་ཏུ་བསྟོད་ཕྱག་འཚལ། །ཞེས་བསྟོད།
བགེགས་དང་འཆི་ལས་རྣམ་གྲོལ་བའི། །འཆི་མེད་བདུད་རྩིའི་རྒྱ་མཚོ་དེ། །མཁའ་མཉམ་རྣམས་དང་ལྷན་ཅིག་ཏུ། །མྱུར་དུ་ཐོབ་པར་མཛད་དུ་གསོལ། ཞཻས་གསོལ་བ་བཏབ། ཡིག་བརྒྱས་ཁ་བསྐང༌། བཛྲ་མུཿ གཤེགས་སུ་གསོལ། འདིའི་བྱིན་རླབས་ཀྱི་ཆོ་ག་ནི། མཎྜལ་དཀྱིལ་འཁོར་ཡོངས་རྫོགས་ཀྱི་རྣམ་པ་ཅན་ནམ། མ་འགྲུབ་ན་པདྨ་འདབ་བརྒྱད་ཞིག་བྲི། དེར་བུམ་པ་སྤྱི་དང་མཐུན་པར་བཤམ། མཐའ་མཆོད་གཏོར་གྱིས་བསྐོར། བདག་བསྐྱེད་སྔོན་དུ་འགྲོ་བས་བསངས་སྦྱངས། བུམ་པ་སྤྱི་དང་མཐུན་པར་བསྐྱེད། བུམ་པའི་ནང་དུ་ལྷ་བསྐྱེད་པ་ནི། བདག་བསྐྱེད་ཀྱི་འདོན་པ་སྤོས་པས་འགྲུབ་ཅིང༌། མཐར་མཆོད་བསྟོད་གཏོར་མ་ཕུལ་ལ། འདོད་དོན་གསོལ་བ་བཏབ། ཡིག་བརྒྱ་ལན་གསུམ་གྱིས་མཆོད་ཡོན་ཕུལ་བས་ཞུ་བར་མོས། སློབ་མ་རྣམས་ཁྲུས་བྱས། མཎྜལ་ཕུལ། གུར་ནས་འབྱུང་བའི་རྒྱུན་བཤགས་ལན་གསུམ། བྱང་ཆུབ་རྡོ་རྗེ་ལ་སོགས་གསོལ་གདབ་ལན་གསུམ། དངོས་གཞི་དམིགས་པ་འདི་བཞིན་དུ་མཛོད། ཁྱེད་རང་རྣམས་ཀྱི་སྤྱི་བོ་ནས་གསང་གནས་ཀྱི་བར་དུ་རྩ་ཨ་ཝ་དྷཱུ་ཏཱི་དཀར་ལ་དམར་བའི་མདངས་ཆགས་པ་ཞིག་ཡོད་པར་མོས་ལ། བུམ་པ་འདི་ཉིད་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པར་གྱུར་པ། ཁྱེད་རང་རྣམས་ཀྱི་སྤྱི་བོར་བྱོན་པར་སྒོམས་ཤིག་ཅེས་བརྗོད་ལ་བུམ་པ་སྤྱི་བོར་བཞགཡབ་ཡུམ་སྙོམས་པ་ཞུགས་པའི་བྱང་ཆུབ་ཀྱི་སེམས་འཆི་མེད་ཡེ་ཤེས་ཀྱི་བདུད་རྩིའི་ངོ་བོར་གྱུར་པ། སྤྱི་གཙུག་ཚངས་པའི་བུ་ག་ནས་ཞུགས། སྨིན་མཚམས་ཡན་ཆད་གང༌། བུམ་དབང་ཐོབ། མགྲིན་པ་ཡན་ཆད་གང༌། གསང་དབང་ཐོབ། སྙིང་ག་ཡན་ཆད་གང་ཤེས་རབ་ཡེ་ཤེས་ཀྱི་དབང་
ཐོབ། ལུས་ཐམས་ཅད་གང་དབང་བཞི་པ་ཐོབ། ལུས་ངག་ཡིད་གསུམ་དྲི་མ་བག་ཆགས་དང་བཅས་དག་པར་མོས་མཛོད། ཅེས་བརྗོད་དེ་བུམ་ཆུ་སྦྱིན། དེ་ནས་མངོན་རྟོགས་ཀྱི་དམིགས་པ་ཚང་བར་འབོགས། དབང་བསྐུར་གྱི་སྐབས་བུམ་ཆུ་སྤྱི་བོར་གཏོར། བཟླས་ལུང་སྤྱི་དང་མཐུན་པར་སྦྱིན། སྤྲོས་པ་ལ་དགའ་བས་ཚེ་རིལ་ཚེ་ཆང་སྟེར་བའི་ལུགས་ཀྱང་གདའ། ཡིག་རྙིང་ན་མེད་པས་མ་བྱས་ཀྱང་ཆོག་གོ །སློབ་མའི་རྗེས་ཀྱི་བྱ་བ་དང༌། དཀྱིལ་འཁོར་གྱི་རྗེས་ཀྱི་བྱ་བ་སྤྱི་དང་འདྲའོ། །འདི་ཡང་ལོ་རོ་རས་ཆུང་པའི། །གདམས་པ་ཟབ་མོར་ཀུན༵་དུ་གྲགས། །རི་བོ་ཆེ་བའི་ཡིག་ཚོགས་ལས། །རབ་དག༵འི་སྙིང༵་པོ༵་བྱུང་བ་ཡིན། །ཚེ་དཔག་མེད་དཀར་པོ་ཕྱག་བཞི་པའི་སྒྲུབ་ཐབས་ཀྱི་ལེ་ཚན་ནོ།། །།
འཆི་མེད་ཡེ་ཤེས་ཀྱི་དངོས་གྲུབ་འབྱུང་བའི་སྒྲུབ་ཐབས།
ཨོཾ་སྭཱ་སྟི། གང་ལས་འཆི་མེད་ཡེ་ཤེས་ཀྱི། །དངོས་གྲུབ་འབྱུང་བའི་སྒྲུབ་ཐབས་ནི། །རབ་ཟབ་འདིར་ནི་བྲི་བར་བྱ། །སྐལ་ལྡན་རྣམས་ཀྱིས་བླང་བར་བྱོས། །སྐྱབས་སེམས་ཚད་མེད་བཞི་སྔོན་དུ་བཏང་ནས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བྷྲཱུཾ་ལས་བྱུང་བའི་སེང་ཁྲེའི་སྟེང་དུ་པཾ་ལས་སྣ་ཚོགས་པདྨ་དང་ཨ་ལས་ཟླ་བ་ལ་གནས་པའི་རང་སེམས་འཆི་མེད་སྲོག་གི་ངོ་བོ་ཨ་དཀར་པོ། དེའི་འོད་ཀྱི་འཕྲོ་འདུས་ལས་རང་ཉིད་བཅོམ་ལྡན་འདས་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་ཟླ་བ་ཆུ་ཤེལ་ལྟར་དཀར་བ། ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱ་མཛད་པའི་སྟེང་ན་འཆི་མེད་ཡེ་ཤེས་ཀྱི་བདུད་རྩི་གང་བའི་བུམ་པ་འཛིན་པ། དབུ་སྐྲ་རལ་པའི་ཐོར་ཚུགས་ཅན་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ལྷ་རྫས་ཀྱི་ན་བཟའ་དང༌།
རིན་པོ་ཆེའི་རྒྱན་ཅན། མཚན་དཔེས་སྤྲས་ཤིང་འོད་འབར་བའོ། །ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨ་དཀར་པོ། དེ་ལས་འོད་ཟེར་འཕྲོས། སྟེང་ཕྱོགས་འཇིག་རྟེན་གྱི་ཁམས་ཡོན་ཏན་དཔག་ཏུ་མེད་པ་ནས། རྒྱལ་བ་ཚེ་དཔག་མེད་འཁོར་དང་བཅས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། བཟླས་པའི་དམིགས་པ་གསལ་བཏབ་ལ། ཨོཾ་ན་མོ་བྷ་ག་ཝ་ཏེ། ཨ་པ་ར་མི་ཏ་ཨཱ་ཡུརྫྙཱ་ན། སུ་བི་ནིཤྩི་ཏ་ཏེ་ཛོ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཎྱེ་པུཎྱེ་མཧཱ་པུཎྱེ། ཨ་པ་ར་མི་ཏ་པུཎྱེ་ཛྙཱ་ན་སཾ་བྷ་རོ་པ་ཙི་ཏེ། ཨོཾ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུངྒ་ཏེ་སྭ་བྷཱ་ཝ་བི་ཤུདྡྷེ་མཧཱ་ན་ཡ་པ་རི་ཝཱ་ར་ཡེ་སྭཱཧཱ། ཞེས་ཅི་ནུས་སུ་བཟླ། མཐར་ཨོཾ་སརྦ་ཏ་ཐཱ་ག་ཏཱ་ཨ་པ་ར་མི་ཏ་ཨཱ་ཡུར་ཛྙཱ་ན་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཞེས་སོགས་ཆུ་གཉིས་སྔོན་དུ་འགྲོ་བའི་ཉེར་སྤྱོད་ལྔ་རོལ་མོ་དང་བཅས་པས་མཆོད། བཅོམ་ལྡན་དེ་བཞིན་གཤེགས་པ་དགྲ་བཅོམ་པ། །ཡང་དག་རྫོགས་པའི་སངས་རྒྱས་སྐུ་ཚེ་དང༌། །ཡེ་ཤེས་དཔག་ཡས་ཤིན་ཏུ་རྣམ་ངེས་པ། །གཟི་བརྗིད་རྒྱལ་པོ་ཁྱོད་ལ་ཕྱག་འཚལ་ལོ། །བཅོམ་ལྡན་འདས་བདག་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ལ། མི་རྟོག་པའི་ངང་དུ་མཉམ་པར་བཞགཐུན་འཚམས་སུ་སྐད་ཅིག་གིས་ལྷར་བསྐྱེད་ལ་གནས་གསུམ་བྱིན་གྱིས་བརླབས་ནས་དགེ་བ་བསྔོའོ། །འདིའི་རྗེས་གནང་གི་བྱ་བ་ནི། སྒྲུབ་ཐབས་བརྒྱ་རྩ་དང་འདྲ་བ་ལས། མཎྜལ་པདྨ་འདབ་བརྒྱད་དཀར་པོ་འབྲི། རྡུལ་ཚོན་དཀར་པོའི་ཚོམ་བུ་བཀོད། གཏོར་བསྔོའི་སྐབས་ནམ་མཁའ་
མཛོད་ཀྱི་སྔགས་རྒྱས་བྱིན་གྱིས་བརླབས། གཟུངས་རིང་གི་མཐར་ཨ་ཀཱ་རོ་བཏགས་པས་འབུལ། རྗེས་གནང་དངོས་ཀྱི་སྐབས། རྗེས་གནང་གི་གཞི་འགོད་པ་ལ། སྐུའི་རྗེས་གནང་དང༌། ལུང་གསུམ་ལ་གསུང་གི་རྗེས་གནང་དང༌། བྱིན་གྱིས་བརླབས་པ་ལ་ཐུགས་ཀྱི་རྗེས་གནང་གི་མིང་འདོགས་བསྒྱུར་བ་ཙམ་མཛད་དོ། །འདིའི་བདག་བསྐྱེད་ཀྱི་ཡེ་ཤེས་པ་གཤེགས་པ་དང༌། རྒྱལ་ཆེན་བཞིའི་གཏོར་བསྔོ་སོགས་བྱེད་པ་ནི། རང་འདོད་ཀྱི་གྲུབ་མཐའི་རྒྱས་བཀབ་ཙམ་ཡིན་གྱི། དེའི་རང་ལུགས་མ་ཡིན་ནོ། །མི་ཏྲའི་གདམས་པ་ཀུན༵་གྲགས་པ། །རབ་བྱུང་དག༵འ་བའི་སྒྲུབ་ཐབས་འདི། །སྙིང༵་ནས་ཉམས་སུ་ལེན་འདོད་ན། །རང་ལུགས་དྲང་པོ༵ར་སྒོམ་པར་བྱོས། །ཚེ་དཔག་མེད་དཀར་བོའི་སྒྲུབ་ཐབས་ཀྱི་ལེ་ཚན་ནོ།། །།
སྡིག་སྒྲིབ་མཐའ་དག་སྦྱོང་མཛད་གཙུག་ཏོར་རྣམ་རྒྱལ།
ཨོཾ་སྭཱ་སྟི། གང་གི་མཚན་ཙམ་ཐོས་པས་ཀྱང༌། །དུས་མིན་འཆི་བ་ཉེར་ཞི་ཞིང༌། །སྡིག་སྒྲིབ་མཐའ་དག་སྦྱོང་མཛད་པའི། །གཙུག་ཏོར་རྣམ་རྒྱལ་ལ་ཕྱག་འཚལ། །སྐྱབས་སེམས་སྔོན་དུ་འགྲོ་བས། སྤྲོ་ན་ཚོགས་ཞིང་སྤྱན་འདྲེན་དང༌། །ཡན་ལག་བདུན་པ་རྒྱས་པར་བྱ། མདོར་བསྡུ་ན་ཚད་མེད་བཞི་བསྒོམ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པའི་ངང་ལས་པཾ་ལས་པདྨ་དང༌། ཨ་ལས་ཟླ་བའི་སྟེང་དུ་བྷྲཱུཾ་ལས་རིན་པོ་ཆེ་ལས་གྲུབ་པའི་མཆོད་རྟེན་དུ་གྱུར་པ་ནི། རིན་པོ་ཆེའི་རང་བཞིན་སེང་ཁྲིའི་སྟེང་དུ་པདྨ། དེའི་སྟེང་དུ་ཁྲི་ཟླུམ་པོ་བང་རིམ་སུམ་བརྩེགས། དེའི་སྟེང་དུ་ཟླ་བ་ལ་གནས་པའི་བུམ་པ་ཟླུམ་པོ་ཡངས་ཤིང་རྒྱ་ཆེ་བ་སྒོ་དང་བཅས་པ། སྟེང་དུ་རིན་པོ་ཆེའི་བྲེ། གདུགས་བཅུ་གསུམ། ཆར་ཁེབས་ཏོག་དང་བཅས་པ། མེ་ཏོག་གི་ཕྲེང་བ་དང༌། དར་གྱི་ལྡ་ལྡི་སོགས་རྒྱན་ཐམས་ཅད་ཀྱིས་བརྒྱན་པའོ། །
དེའི་བུམ་པའི་ནང་དུ་པདྨ་དང་ཟླ་བའི་གདན་ལ་བྷྲཱུཾ་ལས་སྣ་ཚོགས་རྡོ་རྗེ་བྷྲཱུཾ་གྱིས་མཚན་པ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་མ་གཙུག་གཏོར་རྣམ་པར་རྒྱལ་མ་སྐུ་མདོག་དཀར་མོ་ཞལ་གསུམ་ཕྱག་བརྒྱད་མ། རྩ་ཞལ་དཀར་བ། གཡས་སེར་བ། གཡོན་སྔོ་ཞིང་ཡིད་ཙམ་ཁྲོ་བ། ཞལ་རེ་རེ་ཞིང་ཞི་བའི་སྤྱན་གསུམ་གསུམ་དང་ལྡན་པ་ཕྱག་གཡས་ཀྱི་དང་པོས་སྣ་ཚོགས་རྡོ་རྗེ་ཐུགས་ཀར་འཛིན་པ། གཉིས་པས་པདྨའི་སྟེང་དུ་འོད་དཔག་ཏུ་མེད་པ་བཞུགས་པ་བསྣམས་པ། གསུམ་པས་མདའ། བཞི་པས་མཆོག་སྦྱིན་གྱི་ཕྱག་རྒྱ་མཛད་པ། གཡོན་དང་པོས་ཞགས་པ་དང་བཅས་པའི་སྡིགས་མཛུབ། གཉིས་པས་གཞུ། གསུམ་པས་སྐྱབས་སྦྱིན་གྱི་ཕྱག་རྒྱ། བཞི་པས་ཏིང་ངེ་འཛིན་གྱི་ཕྱག་རྒྱ་མཛད་པའི་སྟེང་ན་བདུད་རྩིའི་བུམ་པ་དང་བཅས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའོ། །དེའི་གཡས་སུ་སྤྱན་རས་གཟིགས་དཀར་པོ། གཡས་རྔ་ཡབ་དང་གཡོན་པདྨ་དཀར་པོའི་སྡོང་བུ་འཛིན་པ། གཡོན་དུ་ཕྱག་ན་རྡོ་རྗེ་སྔོན་པོ་གཡས་རྔ་ཡབ་དང་གཡོན་རྡོ་རྗེ་སྔོན་པོ་འཛིན་པ། གཙོ་འཁོར་གསུམ་གྱི་ཕྱོགས་བཞིར་ཁྲོ་བོ་བཞི་གནས་པ་ནི། ཤར་དུ་མི་གཡོ་བ་གཡས་རལ་གྲི་འཕྱར་བ། ལྷོར་འདོད་པའི་རྒྱལ་པོ་གཡས་ལྕགས་ཀྱུ་འཕྱར་བ། ནུབ་ཏུ་དབྱུག་སྔོན་གཡས་དབྱུག་པ་འཕྱར་བ། བྱང་དུ་སྟོབས་པོ་ཆེ་གཡས་རྡོ་རྗེ་རྩེ་གསུམ་འཕྱར་བ། ཐམས་ཅད་ཀྱང་སྐུ་མདོག་མཐིང་ཁ་རབ་ཏུ་ཁྲོས་པ། ཕྱག་གཡོན་སྡིགས་མཛུབ་ཐུགས་ཀར་གཏོད་ཅིང༌། སྤྱན་
གསུམ་མཆེ་བ་གཙིགས་པ། དབུ་སྐྲ་ནག་པོ་ཐོར་ཚུགས་སུ་བྱས་པ། སྟག་ལྤགས་དང༌། སྦྲུལ་གྱི་རྒྱན་ཅན། མེ་དཔུང་འབར་བའི་དབུས་ན་གཡོན་བརྐྱང་གིས་བཞུགས་པའོ། །གཙོ་མོའི་སྟེང་གི་ནམ་མཁའ་ལ་གནས་གཙང་མའི་རིགས་ཀྱི་ལྷའི་བུ་གཉིས་བདུད་རྩིས་གང་བའི་བུམ་པ་ཐོགས་ནས། གཙོ་མོ་ལ་སྐུ་ཁྲུས་གསོལ་བ། དེ་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུཾ་སྔོན་པོ། དཔྲལ་བར་ཏྲཾ་སེར་པོ། ལྟེ་བར་ཧྲཱིཿདམར་པོ། བརླ་གཉིས་ལ་ཨཾ་ཨ་ལྗང་ཁུ། རང་གི་སྙིང་ག་ནས་འོད་ཟེར་འཕྲོས། རང་བཞིན་གྱི་གནས་ནས་བཅོམ་ལྡན་འདས་མ་གཙུག་གཏོར་རྣམ་པར་རྒྱལ་མ་འཁོར་དང་བཅས་པ། ཨོཾ་སརྦ་ཏ་ཐཱ་ག་ཏཱ་ཨུཥྞི་ཥ་བི་ཛ་ཡ་ས་པ་རི་ཝཱ་ར་བཛྲ་ས་མཱ་ཛཿ དེ་བཞིན་དུ་སྦྱར་ཏེ། ཨརྒྷཾ་ནས་ཤཔྟའི་བར་གྱིས་མཆོད། ཡང་འོད་ཟེར་འཕྲོས་པས་དབང་གི་ལྷ་དེ་བཞིན་གཤེགས་པ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་པྲ་ཏཱིཙྪ་སྭཱཧཱ་ནས། ཤཔྟ་ཨཱཿཧཱུཾ་གིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་ནས། ས་མ་ཡ་ཤྲཱི་ཧཱུཾ། ཞེས་གསུངས་ཤིང༌། བུམ་པའི་ཆུས་དབང་བསྐུར། སྐུ་ལུས་ཐམས་ཅད་གང༌། དྲི་མ་ཐམས་ཅད་དགཆུའི་ལྷག་མ་སྤྱི་བོར་ལུད་པ་ལས། གཙོ་མོ་ལ་རྣམ་པར་སྣང་མཛད། སྤྱན་རས་གཟིགས་ལ་འོད་དཔག་མེད། ཕྱག་ན་རྡོ་རྗེ་དང༌། ཁྲོ་བོ་བཞི་ལ་མི་བསྐྱོད་པ། ལྷའི་བུ་གཉིས་ལ་རིན་ཆེན་འབྱུང་ལྡན་གྱིས་དབུ་བརྒྱན། ཨོཾ་སརྦ་ཏ་ཐཱ་ག་ཏ་ཨུཥྞི་ཥ་བི་ཛ་ཡ་ས་པ་རི་ཝཱ་ར་བཛྲ་
ཨརྒྷཾ་པྲ་ཏཱིཙྪ་སྭཱཧཱ་ནས། བཛྲ་ཤཔྟ་ཨཱཿཧཱུཾ་གི་བར་གྱིས་མཆོད། དཔལ་ལྡན་ལྷ་མོ་སྟོན་ཀའི་ཟླ་བའི་མདོག །ཞལ་གསུམ་ཕྱག་བརྒྱད་རབ་མཛེས་ཞི་བའི་སྐུ། །ཡེ་ཤེས་དཔག་ཡས་ཚེ་ཡི་མཆོག་སྩོལ་མ། །རྣམ་པར་རྒྱལ་མའི་ཞབས་ལ་ཕྱག་འཚལ་བསྟོད། །སྙིང་གར་སྣ་ཚོགས་རྡོ་རྗེའི་ལྟེ་བ་ལ་བྷྲཱུཾ་ཡིག་བསྲུང་བྱ་སྔགས་འཕྲེང་དང་བཅས་པ་འཁོད་པར་གྱུར། ཨོཾ་ཧཱུཾ་ཏྲཾ་ཧྲི་ཨཾ་ཨཿ བདག་དང་བསྲུང་བྱ་ལ་རཀྵ་རཀྵ་ཀུ་རུ་སྭཱཧཱ། ཞེས་ཅུང་ཟད་བཟླས་ནས། གཙོ་བོར་གཟུངས་རིང་ཉིད་བཟླའོ། །བཟླས་པ་ཚར་ནས། བདག་བསྐྱེད་ཀྱི་ཡེ་ཤེས་པ་མདུན་གྱི་ནམ་མཁར་བཞུགས་པ་ལ་མཆོད་བསྟོད། ཡིག་བརྒྱ། འདོད་གསོལ། གཤེགས་གསོལ་རྣམས་བྱས་ནས། དགེ་བ་བསྔོས་ལ། ཐུན་མཚམས་ལ་འཇུག །གཏོར་མ་དཀར་གཏོར་ཞིགཨོཾ་བཛྲ་ཡཀྵ་ཧཱུཾ་གིས་བསངས། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྩ་ར་ཎ་ཧཱུཾ་ཕཊ་ཀྱིས་སྦྱངས། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭ་ཏ་གྱིས་བྱིན་གྱིས་བརླབས། རང་གི་སྙིང་ག་ནས་འོད་ཟེར་འཕྲོས། བཅོམ་ལྡན་འདས་མ་གཙུག་ཏོར་རྣམ་རྒྱལ་ལྷ་དགུའི་དཀྱིལ་འཁོར་སྤྱན་དྲངས། གཟུངས་རིང་ཚར་གཅིག་གི་མཐར། ཨུཥྞི་ཥ་བི་ཛ་ཡ་ས་པ་རི་ཝཱ་རེ་བྷྱཿ ཨོཾ་ཨ་ཀཱ་རོ་སོགས་ལན་བདུན་གྱིས་ཕུལ། གོང་བཞིན་མཆོད་བསྟོད་བྱ། མཆོད་སྦྱིན་གཏོར་མ་འདི་བཞེས་ལ་སོགས། འདོད་དོན་གསོལ་བ་བཏབ། ཡིག་བརྒྱ། བཟོད་གསོལ། གཤེགས་གསོལ། སྨོན་ལམ། བཀྲ་ཤིས་རྣམས་བྱའོ། །འདིའི་རྗེས་གནང་གི་བྱ་བ་ནི། སྒྲུབ་ཐབས་བརྒྱ་རྩ་དང་འདྲ་བ་ལས། མིང་འདོགས་ཀྱི་སྐུ་གསུང་ཐུགས་ཀྱི་རྗེས་གནང་གི་ཐ་སྙད་དང༌། སློབ་མ་འགའ་ཞིག་གི་དོན་དུ་འགྱུར་ན། བདག་མདུན་
གཉིས་ཀྱི་བར་དུ་བུམ་པ་སྒྲུབ་ཅིང་རྗེས་གནང་གི་ཐོག་མཐའ་གང་རུང་དུ་བཀྲུ་བྱབས་སྲུང་གསུམ་བྱེད་པ་ནི་ཁྱད་པར་རོ། །བུམ་པའི་ཆོ་ག་ནི་གཞན་དུ་འབྲི་བར་འགྱུར་རོ། །གཟུངས་འདིའི་སྒྲུབ་ཐབས་མང་ན་ཡང༌། །ཀུན༵་ལ་འདི་ཉིད་གྲགས་ཆེ་བས། །གཞན་ལ་ཕན་ཕྱིར་དག༵འ་བས་བྲིས། །འདུས་གསལ་སྙིང༵་པོ༵་ངོ་མཚར་རྨད། །རྣམ་རྒྱལ་ལྷ་དགུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཚེ་སྒྲུབ་ཀུན་གྱི་མཆོག་གྱུར།
ཨོཾ་སྭཱ་སྟི། ཧེ་རུ་ཀ་དཔལ་ལྷ་མོར་བཅས། །དེ་བཞིན་རྩ་རྒྱུད་བླ་མ་ལ། །མཆོག་ཏུ་གུས་པས་བཏུད་བྱས་ནས། །ཚེ་སྒྲུབ་ཀུན་གྱི་མཆོག་གྱུར་བཤད། །སྐྱབས་སེམས་ཚད་མེད་བཞིན་སྔོན་དུ་འགྲོ་བས། ཤཱུ་ནྱ་ཏས་སྟོང་པར་སྦྱངས། ཧཱུཾ་ལས་བྱུང་བའི་སྣ་ཚོགས་རྡོ་རྗེའི་ས་གཞི། རྭ་གུར་བླ་བྲེ་མདའ་དྲ་མེ་དཔུང་དང་བཅས་པའི་ནང་དུ་སྣ་ཚོགས་པདྨ་དང་ཟླ་བ་དཀར་པོ་འོད་ཟེར་དམར་པོ་འཕྲོ་བའི་གདན་ལ་རང་སེམས་ཧཱུཾ་དཀར་པོའི་འཕྲོ་འདུ་ལས་ཕྱིར་བཟློག་མ་ཆེན་མོ་འཆི་མེད་རྡོ་རྗེ་ལྷ་མོའི་སྐུར་གྱུར་པ་ནི། སྐུ་མདོག་དཀར་ཞིང་ན་བཟའ་དཀར་པོ་ཅན། ཞལ་བརྒྱད་རྩ་ཞལ་དཀར་པོ་ཁྲོ་ལ་འཛུམ་པའི་རྣམ་པ་ཅན། གཡས་སུ་སྔོ་དམར་སེར་བའི་ཞལ་གསུམ་དྲག་ཏུ་བཞད་པ། གཡོན་དུ་དམར་ལྗང་དུད་ཁ་ཆེར་ཁྲོས་པ། དེ་དྲུག་ཀའང་ཁྲོ་ཞལ། སྟེང་ཞལ་དཀར་པོ་ཞི་བ། ཞལ་ཐམས་ཅད་སྤྱན་གསུམ་པ། ཕྱག་དང་པོ་གཉིས་རྡོ་རྗེ་དྲིལ་བུ་ཐུགས་ཀར་བསྣོལ་བ། ལྷག་མ་རྣམས་ཀྱིས། ཞགས་པ་རལ་གྲི་དགྲ་སྟ་ལྕགས་ཀྱུ་དང༌། །མདའ་དང་ཐོ་བ་འཁོར་ལོ་གཡས་པ་ན། །སྡིགས་མཛུབ་བུམ་པ་མདུང་དང་ཐོད་པ་དང༌། །གཞུ་དང་ཁ་ཊྭཱཾ་སྐྱབས་སྦྱིན་གཡོན་པས་སོ། །པད་ཟླ་ལ་གཡས་བརྐྱང་གི་སྟབས་ཀྱིས་བདུད་དང་དབང་ཕྱུག་ལ་སོགས་པ་བགེགས་ཐམས་ཅད་མནན་པ། ཕྱག་རྒྱ་ལྔ་
དང༌། གཙུག་གི་ནོར་བུ་དང༌། ཐོད་སྐམ་དང་མགོ་འཕྲེང་དང༌། སྟག་ལྤགས་ལ་སོགས་པས་བརྒྱན་པ། མེ་དཔུང་འབར་བའི་དབུས་ན་བཞུགས་པ། ཐུགས་ཀར་ཟླ་བ་དམར་སྐྱ་ལ་ཧཱུཾ་དང༌། དེ་ལས་འོད་ཟེར་འཕྲོས་ཡེ་ཤེས་སེམས་དཔའ་དང་དབང་གི་ལྷ་བཛྲ་ས་མཱ་ཛཿ ཨརྒྷཾ་ནས་ཤཔྟའི་བར་གྱིས་མཆོད། ཛཿཧཱུཾ་བཾ་ཧོཿ ཡེ་ཤེས་པ་རང་ལ་ཐིམ། ཇི་ལྟར་བལྟམས་པ་ནས་ཤྲཱི་ཡེ་ཧཱུཾ། ཞེས་གསུངས་ཤིང་དབང་བསྐུར། མི་བསྐྱོད་པ་གཙོ་བོར་གྱུར་པའི་རིགས་ལྔ་ཡུམ་ཅན་གྱིས་དབུ་བརྒྱན། ཨོཾ་ཨ་མྲྀ་ཏ་སན་ཛ་ཝ་ནི། མཧཱ་ཨ་མྲྀ་ཏེ་ས་མུ་ཁེ་ཛི་ཝཾ། པྲ་བེ་ཤ་ཡ། པྲ་བེ་ཤ་ཡ། སརྦ་བཛྲ་པདྨ་ས་མ་ཡོ་གི་མ་ན་བོ་དྷི་ཙིཏྟ། པི་པ་ཐ་མུཏྟེ་ཧཱུཾ་ཧཱུཾ། ཨ་ཨ་ཨོཾ་ཨཱཿསྭཱཧཱ། ཞེས་ཅི་ནུས་སུ་བཟླ་ཞིང༌། ཁྲིའམ་འབུམ་ཕྲག་བཞི་བཟླས་ན་འཆི་བ་ངེས་པར་བཟློག་པ་སྟེ། ཨ་བྷི་དྷ་ན་ལས། འདི་ནི་ཁྲི་ཙམ་བཟླས་བྱས་ན། །འཆི་བ་ངེས་པར་འཚོ་བར་གྱུར། །དུས་མིན་འཆི་བ་ཞི་འགྱུར་ཞིང༌། །འཆི་བ་ལས་ནི་ངེས་པར་སློང༌། །ཞེས་གསུངས་སོ། འཇུག་ཏུ་ཨརྒྷཾ་ལ་སོགས་པས་མཆོད། ནང་མཆོད་བདེ་མཆོག་ལྟར་བྱིན་གྱིས་བརླབས་ནས་འབྲུ་གསུམ་གྱིས་མྱང༌། ཧེ་རུ་ཀའི་རིགས་བྱུང་བ། །རྡོ་རྗེ་གཙུག་གཏོར་ཆེན་མོ་ནི། །འཆི་བདག་བཟློག་མཛད་བདུད་རྩིའི་ཞལ། །ཕྱིར་བཟློག་ཆེན་མོ་ཁྱོད་ལ་འདུད། །ཅེས་བསྟོད། འདོད་དོན་གསོལ་བ་གདབ། ཡིག་བརྒྱ་བཟླས་ཏེ་ཕྱག་གཉིས་པའི་བར་དུ་བསྡུས་ལ། དགེ་བ་བསྔོ། གཏོར་མ་བདེ་མཆོག་ལྟར་བྱིན་གྱིས་བརླབས། མདུན་གྱི་ནམ་མཁར་སྲུང་འཁོར་ནས་དབུ་བརྒྱན་གྱིས་བར་གོང་བཞིན་བསྐྱེད་ལ། སྔགས་ཀྱི་མཐར་ཨི་དི་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི།
མ་མ་ཨཱ་ཡུར་སིདྡྷི་པྲ་ཡཙྪནྟུ་ཨོཾ་ཨཱཿཧཱུཾ་སྭཱཧཱ། ཞེས་ལན་གསུམ་གྱིས་ཕུལ། ལྷག་མ་མཁའ་འགྲོ་སྤྱི་གཏོར་གྱིས་བསྔོས། མཆོད་བསྟོད་འདོད་དོན་གསོལ་བཏབ་སོགས་སྤྱི་དང་འདྲའོ། །འདིའི་རྗེས་གནང་ནི་རྟེན་གཞི་ཆོས་འབྱུང་གི་ནང་དུ་པདྨ་དཀར་པོ་ལ་མེ་ཏོག་དཀར་པོའི་ཚོམ་བུ་བཀོད། བུམ་པ་བཅའ། རྗེས་གནང་སྒྲུབ་ཐབས་སྤྱི་དང་འདྲ། བུམ་པའི་ནང་དུ་སྔགས་ཀྱི་ཡིག་འབྲུས་གང་བར་མོས་ལ་བུམ་བཟླས་བྱ། རྗེས་གནང་དངོས་ནི། དོན་དམ་སྨྲ་བའི་སེང་གེ་སོགས་ཀྱིས་གསོལ་བ་བཏབ། རྒྱུན་བཤགས་དང་རིགས་ལྔའི་སྡོམ་བཟུང་བྱ། སྐུའི་རྗེས་གནང་སྤྱི་དང་འདྲ་བའི་རྗེས་སུ་བུམ་ཆུས་དབང་བསྐུར་ཞིང༌། མངོན་རྟོགས་ལྟར་དབང་བསྐུར་བའི་དམིགས་པའང་འབོགས། གསུང་གི་རྗེས་གནང་སྤྱི་དང་འདྲ། ཐུགས་ཀྱི་རྗེས་གནང་ལ། སྤྱི་བོར་ཧཾ་ནམ་མཁར་ཟླ་བ་ལ་གནས་པའི་ཁ་ཊྭཱཾ་གའི་དབྱུག་པའི་སྦོམ་སར་ཧཱུཾ། དེས་སངས་རྒྱས་ཐམས་ཅད་ཀྱི་བདུད་རྩི་བཀུག་སྟེ། ཁ་ཊྭཱཾ་ག་ནས་བརྒྱུད་ནས། སློབ་མའི་ལུས་གང་བའི་དམིགས་པ་འབོགས། གཞན་སྤྱི་དང་འདྲ། ཚེ་སྒྲུབ་ཀྱི་ཚེ་ཡང་སྔགས་ཀྱི་འཁོར་ལོ་སྙིང་གར་བསྒོམས་ན་ཤིན་ཏུ་ཟབ་པར་འགྱུར་མོད་ཀྱི་གསལ་ཐེབས་དཀའ་བའི་ཕྱིར་འདིར་མ་བཤད་དོ། །རྡོ་རྗེ་ལྷ་མོའི་སྒྲུབ་ཐབས་འདི། །སྔགས་འཆང་ཀུན༵་ལའང་ཆེས་དཀོན་ན། །གཞན་ལ་སྨོས་ཀྱང་ཅི་དགོས་པས། །ཐོས་ལ་དག༵འ་བས་སྙིང༵་པོ༵་ལོང༌། །བདེ་མཆོག་ལས། འབྱུང་བ་འཆི་མེད་རྡོ་རྗེ་ལྷ་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། སྒྲུབ་ཐབས་རིན་ཆེན་འབྱུང་གནས་ལས་ཚེ་སྒྲུབ་ཀྱི་ལྷའི་སྒྲུབ་ཐབས་བཤད་པའི་སྐབས་ཏེ་བཅུ་གཅིག་པའོ། །དགེའོ།། །།