ཚེ་སྒྲུབ་མཆོག་གྱུར།
ཨོཾ་སྭཱ་སྟི། འཇིག་རྟེན་མགོན་ལ་རབ་བཏུད་ནས། །ནད་དང་སྡུག་བསྔལ་ཞི་བྱེད་ཕྱིར། །རྨི་ལམ་ངན་པའང་བཟློག་གྱུར་ལ། །ཚེ་སྒྲུབ་མཆོག་གྱུར་བཤད་པར་བྱ། །སྐྱབས་སེམས་སྟོང་ཉིད་སྒོམ་པ་སྔོན་དུ་
འགྲོ་བས། རང་གི་མདུན་དུ་སྐད་ཅིག་གིས་སྤྱན་རས་གཟིགས་སྐུ་མདོག་དཀར་པོ་ན་བཟའ་སྔོན་པོ་གསོལ་བ། གཡས་སྐྱབས་སྦྱིན་དང་གཡོན་པདྨ་དཀར་པོ་འཛིན་པ། ཚངས་པར་སྤྱོད་པའི་ཆ་ལུགས་ཅན། རལ་པའི་ཐོར་ཚུགས་དང་ལྡན་པ། ཐུགས་ཀར་ཟླ་བ་ལ་སྔགས་ཀྱི་འཕྲེང་བ་གསལ་བཏབ་ཏེ། མོས་གུས་ཀྱི་གདུང་བ་ཆེན་པོས། ཨོཾ་ཨ་རོ་ལིཀ །ཅེས་ལན་གཅིག་བརྗོད་ལ། ཨ་རོ་ལིཀ་ཅེས་པ་ཉིད་བརྒྱ་རྩ་བཟླའོ། །དེ་ལྟ་བུའི་ཚུལ་གྱིས་སྔགས་ཨོཾ་ཅན་གཅིག་གིས་འགོ་དྲངས་ནས། གཞན་བརྒྱ་བརྒྱ་བཟླ་བ་ཉིད་ཅི་ནུས་སུ་བྱའོ། །མཐར་བདག་གི་སྡིག་སྒྲིབ་སྦྱོང་བ་དང༌། བར་ཆད་ཞི་བར་གསོལ་བ་དྲག་ཏུ་བཏབ་པས་འོད་དུ་ཞུ་ནས་རང་ལ་ཐིམ། རྣམ་སྨིན་གྱི་ལུས་སྦྱངས་ཏེ་འོད་ཀྱི་རང་བཞིན་གྱི་ལྷ་སྐུར་གྱུར། དེ་ཡང་མི་དམིགས་པར་སྦྱངས་ཏེ་ཅུང་ཟད་མཉམ་པར་བཞགདགེ་བ་བསྔོ། རྨི་ལམ་དུ་དགེ་སློང་ཆོས་གོས་སྔོན་པོ་གྱོན་པས་ལུང་སྟོན་པ་སོགས་འབྱུང་ངོ༌། །འདི་ལ་བཟླས་ལུང་ཙམ་མཛད་པའི་ལུགས་ཀྱང་ཡོད་མོད་ཀྱི། རྗེས་གནང་ལྟར་བྱེད་ན། སྒྲུབ་ཐབས་བརྒྱ་རྩ་དང་འདྲའོ། །ཀུན༵་ལ་མིང་ཡང་མ་གྲགས་པ། །མན་ངག་ཤིན་ཏུ་དག༵འ་བའི་ཏོག །ཛི་ཏཱ་རི་དང་བ་རི་བའི། ཐུགས་དམ་སྙིང༵་པོ༵་མཆོག་གྱུར་ལགས། །རྡོ་རྗེ་གདན་པའི་ཐུགས་དམ་ལྷ་དྲུག་ལས། རྨི་ལམ་ངན་པ་བཟློག་པ་སྤྱན་རས་གཟིགས་ཡི་གེ་ཕྱེད་དང་བཞི་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །