སྒྲུབ་ཐབས་རིན་ཆེན་འབྱུང་གནས་ལས་ཤཱཀྱ་རཀྵི་ཏ་ལས་བརྒྱུད་པའི་སྒྲུབ་ཐབས་བཤད་པའི་སྐབས་ཏེ་བཅུ་དྲུག་པ།
དཔའ་བོ་བདུན་གྱི་སྒྲུབ་ཐབས།
ཨོཾ་སྭཱ་སྟི། འདྲེན་པ་སངས་རྒྱས་རྣམས་སངས་རྒྱས། །དཔའ་བོ་བདུན་ལ་རབ་བཏུད་ནས། །གང་དེའི་སྒྲུབ་ཐབས་རྨད་བྱུང་བ། །ཤིན་ཏུ་རྙེད་དཀའ་བཀོད་པར་བྱ། །སེམས་བསྐྱེད་ཚད་མེད་བཞི་དང་བཅས་པ་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་གཞལ་མེད་ཁང་གི་དབུས་སུ། རིན་པོ་ཆེ་དང་པད་ཟླའི་གདན་དགུ་ལ་ཧཱུཾ་རེ་རེ་ཡོངས་སུ་གྱུར་པ་ལས། དབུས་སུ་རང་ཉིད་རྒྱལ་བ་ཤཱཀྱ་ཐུབ་པ་ཆོས་འཆད་ཀྱི་ཕྱག་རྒྱ་མཛད་པ། ཤར་དུ་རྣམ་གཟིགས་ས་གནོན་དང་མཉམ་བཞག་མཛད་པ། བྱང་ཤར་དུ་གཙུག་ཏོར་ཅན་མཆོག་སྦྱིན་མཉམ་བཞགཤར་ལྷོར་ཐམས་ཅད་སྐྱོབ་སྐྱབས་སྦྱིན་མཉམ་བཞགནུབ་ཏུ་འཁོར་བ་འཇིག་ཏིང་ངེ་འཛིན་གྱི་ཕྱག་རྒྱ་མཛད་པ། ལྷོ་ནུབ་ཏུ་གསེར་ཐུབ་ཆོས་འཆད་མཉམ་བཞགནུབ་བྱང་དུ་འོད་སྲུངས་གཡས་མཆོད་སྦྱིན་དང་གཡོན་ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟ་བུ་འཛིན་པ། ཐམས་ཅད་ཀྱང་གསེར་མདོག་མཚན་དཔེས་སྤྲས་པ། ན་བཟའ་ཆོས་གོས་རྣམ་གསུམ་གསོལ་ཞིང༌། རྡོ་རྗེའི་སྐྱིལ་ཀྲུང་གི་རང་རང་གི་བྱང་ཆུབ་ཤིང་དྲུང་དུ་བཞུགས་པ། ལྷོ་རུ་ཁྲོ་བོ་ཆེན་པོ་སྔོན་པོ་མཆན་ཁུང་རལ་གྲི་དང་ཞགས་
པ་བཅུག་ཅིང་ཐལ་མོ་སྦྱར་བ། ཁྲོ་བོའི་ཆ་བྱད་རྫོགས་པའོ། །བྱང་དུ་ཕྱག་ན་རྡོ་རྗེ་ཞི་བ་ལྗང་ཁུ་གཡས་རྡོ་རྗེ་ཐུགས་ཀར་གཏོད་ཅིང༌། གཡོན་གདན་ལ་བརྟེན་པ་རོལ་པས་བཞུགས་པ། དར་དང་རིན་པོ་ཆེས་བརྒྱན་པའོ། །སྒོ་བཞིར་རྒྱལ་པོ་ཆེན་པོ་བཞི་དང་བཅས་པ་གསལ་བཏབ། གཙོ་བོའི་ཐུགས་ཀ་ནས་འོད་འཕྲོས། ཡེ་ཤེས་སེམས་དཔའ་འཁོར་དང་བཅས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཨརྒྷཾ་ནས། ཤཔྟའི་བར་གྱིས་མཆོད། མགོན་པོ་ཐུགས་རྗེ་ཆེ་ལྡན་པ། །སོགས་ཀྱིས་བསྟོད། དཀར་གཏོར་ཞིག་སྔགས་དྲུག་གིས་བྱིན་གྱིས་བརླབས། དཀར་ཕྱོགས་ཀྱི་ལྷ་རྣམས་ཡིད་ཀྱིས་བཀུག་སྟེ། ཨ་ཀཱ་རོ་ལན་བཅུ་གཅིག་གིས་བསྔོས། སངས་རྒྱས་རྣམ་གཟིགས་མྱ་ངན་འཚང་ལ་གནས། །རྒྱལ་བ་གཙུག་ཏོར་པདྨ་དཀར་པོའི་དྲུང༌། །ཐམས་ཅད་སྐྱོབ་པ་སཱ་ལའི་དྲུང་ན་གནས། །བྲམ་ཟེ་འཁོར་བ་འཇིག་ནི་ཤིརྴའི་དྲུང༌། །སངས་རྒྱས་གསེར་ཐུབ་ཨུ་དུམ་བ་རའི་དྲུང༌། །འོད་སྲུངས་ནྱ་གྲོ་ད་ཡི་དྲུང་ན་གནས། །ཤཱཀྱ་ཐུབ་མཆོག་ཨ་ཤཱདྠ་དྲུང་དུ། །ཕྱིན་ནས་བྱང་ཆུབ་ཐོབ་གྱུར་གཽ་ཏ་མ། །སངས་རྒྱས་རྫུ་འཕྲུལ་ཆེན་པོ་དེ་དག་ལ། །མངོན་པར་དད་པའི་ལྷ་གང་འཁོད་པ་དག །ལྷ་རྣམས་དེ་དག་ཡིད་དགའ་མགུ་གྱུར་ནས། །རྟག་ཏུ་དགེ་ཞིང་ཞི་བར་འགྱུར་བར་མཛོད། །ཅེས་བརྗོད་ལ། གཏོར་མ་དོར། གཙྪ་གཙྪ་སྭ་བྷཱ་ཝ་ནཾ། ཞེས་མགྲོན་རྣམས་གཤེགས།
ན་མཿསརྦ་ཏ་ཐཱ་ག་ཏ་ཧྲི་ད་ཡ། ཨ་ནུ་ག་ཏེ། ཨོཾ་ཀུ་རུཾ་གི་ནི་སྭཱཧཱ། དེ་བཞིན་གཤེགས་པ་བདུན་གྱི་སྤྱིའི་སྔགས་དང༌། སངས་རྒྱས་བདུན་པའི་གཟུངས་ལས་འབྱུང་བ་ལྟར་སོ་སོའི་གཟུངས་ཀྱང་ནུས་ན་བཟླའོ། །ཐུན་འཇོག་པའི་ཚེ། དཀྱིལ་འཁོར་གྱི་འཁོར་ལོ་རང་ལ་བསྡུ། རང་ཡང་སྙིང་གའི་ས་བོན་ལ་བསྟིམ་ལ་ཅུང་ཟད་མཉམ་པར་བཞག །དགེ་བ་བསྔོ། ཐུན་མཚམས་སུ་ལྷའི་སྣང་བ་དང་མ་བྲལ་བ་དང༌། བཅོམ་ལྡན་འདས་ཤཱཀྱ་ཐུབ་པའི་མཚན་བརྒྱ་རྩ་བརྒྱད་པ་དང༌། སངས་རྒྱས་བདུན་པའི་གཟུངས་ཀློག་པའམ། འདོན་པ་ཅི་ནུས་སུ་བྱ་ཞིང༌། དེ་བཞིན་གཤེགས་པ་བདུན་གྱི་སྐུ་གཟུགས་ལ་ཕྱག་མཆོད་རྒྱ་ཆེར་བྱ། འདིའི་རིགས་གཏད་བྱ་ཚུལ་ནི། བསྒོམ་བྱ་དང་མཐུན་པའི་དཀྱིལ་འཁོར་རས་བྲིས་རྡུལ་ཚོན་སོགས་འགྲུབ་ན་རབ། མིན་ན་རྒྱ་གར་པའི་ལུགས་ཀྱི་མཎྜལ་མེ་ཏོག་གསར་བའི་ཚོམ་བུ་ཅན་བཤམ། བུམ་པ་གཙང་མ་བུམ་རྫས་ཀྱིས་གང་བ་གཉིས་བཤམ། མཆོད་གཏོད་ཡང་མང་དུ་བཞག་གོ །བདག་བསྐྱེད་སྔོན་དུ་འགྲོ་བས་མདུན་བསྐྱེད་བཟླས་པ་ལ་ཐུག་གི་བར་ཡང་བདག་བསྐྱེད་ཀྱི་རིགས་འགྲེ། བུམ་པ་གཅིག་གི་སྟེང་དུ་དེ་བཞིན་གཤེགས་པ་བདུན། རྒྱལ་ཆེན་བཞི་དང་བཅས་པ་བསྐྱེད་ཅིག་ཤོས་སུ་ཁྲོ་བོ་ཆེན་པོ་དང་གསང་བའི་བདག་པོར་བསྐྱེད། འདི་ལ་ཨོཾ་བི་ཀྲྀ་ཏ་དཾཥྟེ། ཨ་མོ་གྷ་ས་མ་ཡེ། ཨ་བྷི་ཥིཉྩ་མཾ། སརྦ་བིདྱ་ཨ་མོ་གྷ། ཨ་བི་ཥེ་ཀཻ ཧཱུཾ་མི་ལི་མི་ལི་སྭཱཧཱ། ཞེས་
བཟླའོ། །དེ་དག་གི་སྐུ་ལས་བྱུང་བའི་བདུད་རྩིས་བུམ་པ་གང་བར་མོས། ལྷ་རྣམས་མཆོད་བསྟོད་གཤེགས་གསོལ་བྱ། སློབ་མས་མཎྜལ་བྱས་ཏེ། སློབ་དཔོན་གྱིས་བདག་ལ་རིག་སྔགས་དམ་པ་སྩལ་དུ་གསོལ། ཞེས་ལན་གསུམ་གསོལ་བ་བཏབ། ཡན་ལག་བདུན་པ་དང་སྐྱབས་འགྲོ་སེམས་བསྐྱེད་གང་ཡང་རུང་བ་ཞིག་བྱ། སྔགས་ཀྱི་ཆེ་བ་མང་དུ་བརྗོད། བགེགས་རྣམས་ལ་གཏོར་མ་བྱིན་ཏེ་ཕྱིར་བསྐྲད། མདུན་གྱི་དཀྱིལ་འཁོར་གྱི་རྣམ་པ་སྒོམ་དུ་བཅུགདང་པོར་ཁྲོ་བོ་ཆེན་པོའི་སྔགས་ཀྱིས་དབང་བསྐུར། དེས་བཀྲུ་བྱབས་བསྲུང་གསུམ་བྱ། དེ་ནས་གཞལ་ཡས་ཁང་གི་ཤར་སྒོའི་ནང་དུ་འདུག་པར་མོས་སུ་བཅུག་ལ། སྙིང་པོའི་མཐར་ཨ་བྷི་ཥིཉྩ་བཏགས་ལ། བུམ་པ་གཙོ་བོ་དེས་དབང་བསྐུར་ཞིང༌། སྤྲོ་ན་སོ་སོའི་མཚན་སྔགས་ཀྱིས་ཀྱང་དབང་བསྐུར་རོ། །དེ་ནས་གོང་གི་མངོན་རྟོགས་བཞིན་བསྒོམ་ལུང་ཕོག་ལ་སྔགས་ཀྱི་བཟླས་ལུང་ཀྱང་སྦྱིན་ནོ། །རྗེས་སྤྱི་དང་འདྲ། དེ་ལ་མཚན་སྔགས་ནི། ཨོཾ་ན་མོ་བི་པ་ཤྱེ་ཏ་ཐཱ་ག་ཏཱ་ཡ་སྭཱཧཱ། ཨོཾ་ན་མཿཤི་ཁི་ནི་ཏ་ཐཱ་ག་ཏཱ་ཡ་སྭཱཧཱ། ཨོཾ་ན་མོ་བི་ཤྭ་བྷུ་ཛེ་ཏ་ཐཱ་ག་ཏཱ་ཡ་སྭཱཧཱ། ཨོཾ་ན་མཿཀྲ་ཀུ་ཏ་ཚནྟེ་ཏ་ཐཱ་ག་ཏཱ་ཡ་སྭཱཧཱ། ཨོཾ་ན་མོ་ན་ཀ་ན་ཀ་མུ་ན་ཡེ་ཏ་ཐཱ་ག་ཏཱ་ཡ་སྭཱཧཱ། ཨོཾ་ན་མཿཀ་ཤྱ་པ་ཏ་ཐཱ་ག་ཏཱ་ཡ་སྭཱཧཱ། ཨོཾ་ན་མཿཤཱཀྱ་མུ་ན་ཡེ་ཏ་ཐཱ་ག་ཏཱ་ཡ་སྭཱཧཱ། ཞེས་པ་རྣམས་ཡིན་ནོ། ཏདྱ་ཐ། ཨོཾ་མུ་ནི་མུ་ནེ་མཧཱ་མུ་ན་ཡེ་སྭཱཧཱ། ཞེས་པའང་བཟླའོ། །སངས་རྒྱས་ཀུན༵་ལས་དཔའ་བོའི་སྐུ། །ཆོས་འདུལ་གཅིག་ཏུ་རབ་དག༵འ་
བ། །རྣམ་བདུན་སྒྲུབ་ཐབས་རྨད་བྱུང་འདི། །ཉམས་ལེན་སྙིང༵་པོ༵ར་བྱེད་ནའོ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵ་ཏའི་མན་ངག་སངས་རྒྱས་དཔའ་བོ་བདུན་གྱིས་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
འོད་དཔག་མེད་ཀྱི་སྒྲུབ་ཐབས།
ཨོཾ་སྭཱ་སྟི། གསུང་གི་རྡོ་རྗེའི་ངོ་བོ་ཉིད། །བདེ་བ་ཅན་གྱི་ཞིང་སྦྱངས་ཏེ། །འོད་དཔག་མེད་པར་སངས་རྒྱས་པ། །དེ་ལ་བཏུད་ནས་སྒྲུབ་ཐབས་བཤད། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏས་སྟོང་པར་སྦྱངས། རང་གི་སྙིང་གར་ཧྲཱིཿཡིག་དམར་པོ་ཡོངས་སུ་གྱུར་པ་ལས། རང་ཉིད་རྒྱལ་བ་འོད་དཔག་མེད་སྐུ་མདོག་དམར་པོ་ཕྱག་གཉིས་མཉམ་བཞག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ན་བཟའ་ཆོས་གོས་རྣམ་གསུམ་གསོལ་བ། ཚངས་པར་སྤྱོད་པའི་ཆ་ལུགས་ཅན། མཚན་དང་དཔེ་བྱད་ཡོངས་སུ་རྫོགས་པའོ། །ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀར་ཧྲཱིཿཡིག་གི་མཐར་སྔགས་འཕྲེང་དམིགས་ལ། ཨོཾ་ཨ་མྲྀ་ཏ་པྲ་བྷེ་ཨ་མྲྀ་ཏ་ཧཱུཾ། ཞེས་ཅི་ནུས་བཟླ། འཇུག་ཏུ་དགེ་བ་བསྔོ། ཐུན་མཚམས་སྐུ་གཟུགས་ཀྱི་དྲུང་དུ་མཆོད་བསྟོད། བདེ་བ་ཅན་གྱི་ཞིང་བཀོད་ཀྱི་མདོ་དང་བཟང་པོ་སྤྱོད་པ་འདོན། འདི་ལ་གཏོར་ཆོག་མི་དགོས། སློབ་མ་ལའང་བཟླས་ལུང་ཙམ་གྱིས་འགྲུབ། སློབ་དཔོན་གྱིས་བདག་ལ་རིགས་སྔགས་དམ་པ་སྩལ་དུ་གསོལ། ཞེས་པ་གསོལ་བ་ལན་གསུམ་
དུ་གདབ་དགོས་ཏེ། སློབ་དཔོན་གྱི་རྗེས་ཟློས་བྱས་པས་ཆོག་གོ །དེ་ཡང་སེམས་བསྐྱེད་གསལ་བཏབ་ལ། ཤཱུ་ནྱ་ཏཱ་ནས། ཐུགས་ཀར་ཧཱུཾ་ཞེས་པའི་བར་མངོན་རྟོགས་བཞིན་ཕོགགསུང་གི་རྗེས་གནང་གི་ལུང་བཞིན་རྗེས་སུ་བཟླས་པའི་ལུང་སྟེར་བ་ཡིན་ནོ། །དབང་མ་ཐོབ་པ་ལ་བཟླས་ལུང་སྦྱིན་ཡང་དོན་མེད་པས་རྒྱུད་སྡེ་བཞི་གང་རུང་གི་དབང་བསྐུར་ཐོབ་པ་ཞིག་ལ་སྦྱིན་ནོ། །སངས་རྒྱས་ཀུན༵་ལས་ཆེས་དག༵འ་བར། །ཞིང་མཆོག་བླ་ན་མེད་སྒྲུབ་པས། །རྒྱལ་བ་མཆོག་ལ་སྙིང༵་ནས་དད། །སྒྲུབ་ཐབས་འདུས་ཤིང་གསལ་པོ༵ར་བཀོད། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ་ཤཱཀྱ་རཀྵི་ཏའི་མན་ངག་འོད་དཔག་ཏུ་མེད་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
རྒྱལ་ཚབ་མི་ཕམ་མགོན་པོའི་སྒྲུབ་ཐབས།
ཨོཾ་སྭཱ་སྟི། རྒྱལ་ཚབ་མི་ཕམ་མགོན་པོ་ལ། །བཏུད་ནས་དེ་ཡི་སྒྲུབ་ཐབས་ནི། །ཤིན་ཏུ་ཟབ་ཅིང་འཁྱེར་བདེ་བ། །འཕགས་ཡུལ་བླ་མའི་གསུང་བཞིན་བྲི། །ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། རང་གི་སྙིང་གར་མཻཾ་དམར་སེར་ཡོངས་སུ་གྱུར་པ་ལས། རང་ཉིད་རྗེ་བཙུན་བྱམས་པར་གྱུར། ཨོཾ་མཻ་ཏྲི་ཡ་ཏྲི། དེ་ཡང་སྐུ་མདོག་དམར་སེར་ཞལ་གཅིག་ཕྱག་གཉིས་བཤད་པའི་ཕྱག་རྒྱ་མཛད་པ། གཡོན་པས་ཀླུ་ཤིང་གི་ཡལ་ག་མེ་ཏོག་དང་བཅས་པ་སྙན་གྱི་ཐད་ཀར་ཁ་ཕྱེ་བ་དང་བཅས་པ་འཛིན་པ། ཚངས་པར་སྤྱོད་པའི་ཆ་ལུགས་ཅན། དར་གྱི་སྨད་དཀྲིས་དང་རི་དྭགས་ཀྱི་པགས་པས་ནུ་མ་གཡོན་པ་བཀབ་པ། རལ་པའི་ཐོར་ཚུགས་ཀྱི་ངོས་ལ་བྱང་ཆུབ་ཆེན་
པོའི་མཆོད་རྟེན་ཅན་མཚན་དཔེ་ཡོངས་སུ་རྫོགས་པ། ཁྲོ་བོ་གཞན་ཀྱིས་མི་ཐུབ་པ་དང་བཅས་པའོ། །ཞབས་ཀྱི་བཞུགས་ཚུལ་རང་གང་མོས་པ་བྱ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཨོཾ་མཻ་ཏྲི་དྲྀ་ཌྷ་ཙིཏྟ་ཏིཥྛ་ཧོ། ཞེས་ལན་གསུམ་གྱིས་བརྟན་པར་བྱིན་གྱིས་བརླབས། སྙིང་གར་ཟླ་བ་ལ་སྔགས་འཕྲེང་བཀོད་ལ། ཨོཾ་ཨ་ཛི་ཏཉྫ་ཡ། སརྦ་སཏྭ་ས་མཱ་ཡ་མ་ནུ་ག་ཏ་སྭཱཧཱ། ཞེས་ཅི་ནུས་སུ་བཟླའོ། །ཐུན་འཇོག་པའི་ཚེ། སྟོང་པ་ཉིད་དུ་བསྡུས་ནས། སླར་ལྷ་སྐུར་ལྡང༌། དགེ་བ་བསྔོ། ཐུན་འཚམས་སུ་མཆོད་བསྟོད་སྤྱི་མཐུན་གང་འགྲུབ་དང༌། བྱམས་པའི་མཚན་བརྒྱ་དང་དམ་བཅས་པའི་གཟུངས་རྣམས་འདོན་ནོ། །འདི་ལ་གཏོར་བསྔོ་མི་དགོས། འདི་བཟླས་ལུང་བླངས་པ་ཁོ་ནས་ཆོགདེ་ཡང་ལྷའི་མངོན་རྟོགས་སློབ་མ་ལ་ཕོག་ལ། སྔགས་ཉིད་བཟླས་ལུང་སྤྱི་དང་མཐུན་པར་སྦྱིན་ནོ། །དེ་ལའང་དབང་བསྐུར་བ་ཐོབ་པ་དགོས་སོ། །སངས་རྒྱས་ཀུན༵་དངོས་སངས་རྒྱས་སྲས། །རབ་དག༵འ་ལ་སོགས་ས་བཅུའི་བདག །གསུང་རབ་སྙིང༵་པོ༵འི་དོན་སྟོན་པ། །གང་འདིའི་སྒྲུབ་ཐབས་རྨད་བྱུང་སྤེལ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་བྱམས་པའི་སྒྲུབ་ཐབས་ཀྱི་ལེ་ཚན་ནོ།། །།
ཀུན་ཏུ་བཟང་པོའི་སྒྲུབ་ཐབས།
ཨོཾ་སྭཱ་སྟི། དུས་གསུམ་རྒྱལ་བ་སྲས་བཅས་ཀྱི། །སྨོན་ལམ་རྒྱ་མཚོ་ལས་འཁྲུངས་པ། །མཆོད་པའི་སྤྲིན་ལ་དབང་བསྒྱུར་བའི། །ཀུན་ཏུ་བཟང་པོར་གུས་པའི་འདུད། །སེམས་བསྐྱེད་དང་ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པད་ཟླ་ལ་རང་སེམས་སྟྭཾ་ཡིག་ཡོངས་སུ་གྱུར་པ་ལས་ཀུན་ཏུ་བཟང་པོ་སྐུ་མདོག་དམར་པོ། གཡས་གང་བའི་བུམ་པ་ཐུགས་ཀར་གཏོད་ཅིང༌། གཡོན་ཉི་མ་དང་པདྨ་དཀར་པོ་བསྣམས་པ། ཁྲོ་བོ་ཊཱཀྐི་རཱ་ཛ་དང་བཅས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་ཤིང༌། རྒྱལ་བ་རིགས་ལྔའི་དབུ་རྒྱན་ཅན། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀར་ཟླ་བ་ལ་སྔགས་འཕྲེང་བཀོད་དེ། ཨོཾ་སྭཾ་ཧྲིཿཀ་ཡ་སྭཱཧཱ། ཞེས་ཅི་ནུས་བཟླ། འཇུག་ཏུ་སྐུ་སྟོང་པར་སྦྱངས། དགེ་བ་བྱང་ཆུབ་ཏུ་བསྔོ། ཐུན་མཚམས་སུ་ཀུན་དུ་བཟང་པོའི་མཚན་བརྒྱ་རྩ་བརྒྱད་པ་ལ་སོགས་པ་ཅི་ནུས་སུ་འདོན་ཞིང༌། ཕལ་པོ་ཆེ་དང་གསེར་འོད་དམ་པ་ལ་སོགས་པ་བཀླག་པར་བྱའོ། །གཞན་ཡང་སྐུ་གཟུགས་ལ་མཆོད་བསྟོད་དང་སྨོན་ལམ་མང་དུ་འདེབས། འདིའི་བཟླས་ལུང་འབོགས་པ་ནི། འོད་དཔག་མེད་ཀྱི་སྒྲུབ་ཐབས་སུ་བཤད་པ་དང་འདྲའོ། །ཀུན༵་ཏུ་བཟང་པོ་གྲགས་ཆེ་ཡང༌། །མཁས་རྣམས་དག༵འ་བའི་སྒྲུབ་ཐབས་ནི། །སྔོན་ཆད་བོད་ཀྱི་ཕྱོགས་ན་མེད། །དེ་ཕྱིར་སྙིང༵་ལ་དམ་པོ༵ར་བཟུང༌། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འཕགས་པ་ཀུན་ཏུ་བཟང་པོའི་སྒྲུབ་ཐབས་ཀྱི་ལེ་ཚན་ནོ།། །།
ནམ་མཁའི་སྙིང་པོའི་སྒྲུབ་ཐབས།
ཨོཾ་སྭཱ་སྟི། རྒྱལ་སྲས་ཐུགས་རྗེའི་དབང་ཕྱུག་ནི། །ནམ་མཁའི་སྙིང་པོ་ལ་བཏུད་ནས། །ནང་མཚོན་མུ་གེའི་འཇིགས་པ་དག །ཞི་ཕྱིར་ལྷག་པའི་ལྷ་དེ་བསྒྲུབ། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། རང་གི་སྙིང་གར་ཁཾ་ཡིག་ཡོངས་སུ་གྱུར་པ་ལས། རང་ཉིད་ནམ་མཁའི་སྙིང་པོ་སྐུ་མདོག་སྔོན་པོ་ན་བཟའ་སྔོན་པོ་ཅན། ཕྱག་གཉིས་ཐུགས་ཀར་ཆོས་འཆད་ཀྱི་ཕྱག་རྒྱ་མཛད་པའི་གཡོན་པས་པདྨའི་རྩ་བ་འཛིན་པ། སྙན་གྱི་ཐད་ཀར་ཁ་བྱེ་བའི་སྟེང་ན་རལ་གྲི་སྔོ་སངས་ཅན། ནམ་མཁའི་རང་བཞིན་གྱི་ཁང་བཟང་འོད་ཟེར་སྔོན་པོ་འབར་བའི་དབུས་ན། ཁྲོ་བོ་དབྱུག་སྔོན་སོགས་འཁོར་རིག་འཛིན་མཚོན་ཆ་ཐོགས་པ་མང་པོ་དང༌། རང་གི་སྤྲུལ་པ་ཁ་དོག་སྣ་ཚོགས་ཅན་མང་པོས་བསྐོར་བ། སྤྱན་གྱི་འོད་ཀྱིས་ནམ་མཁའ་ཐམས་ཅད་འོད་དང་དྲི་ཞིམ་པོས་ཁྱབ་པར་མཛད་པ། དར་དང་རིན་པོ་ཆེས་བརྒྱན་པ་ནས། ཐུགས་ཀར་ཧཱུཾ་གི་བར་ཀུན་ཏུ་བཟང་པོའི་སྐབས་དང་འདྲ། ཨོཾ་སྭཱ་སྟི་ཀ་མ་ལཱཀྵི། བི་པུ་ལ། སཾ་བྷ་ཝ། དྷརྨ་དྷཱ་ཏུ། གོ་ཙ་རེ་སྭཱཧཱ། ཞེས་ཅི་ནུས་སུ་བཟླའོ། །རྗེས་ཀྱི་བྱ་བ་དང༌། ཐུན་མཚམས་ཀྱང་ཀུན་ཏུ་བཟང་པོའི་སྐབས་དང་འདྲ་བ་ལས། ནམ་མཁའི་སྙིང་པོའི་མཚན་བརྒྱ་རྩ་ཀློག་པ་ཉིད་ཁྱད་པར་རོ། །འདིའི་བཟླས་ལུང་འབོགས་ཚུལ་ནི། འོད་དཔག་མེད་ཀྱི་སྒྲུབ་ཐབས་སུ་བཤད་པ་དང་འདྲའོ། །ཉེས་ལྟུང་
ཀུན༵་ནས་དག་མཛད་པའི། །ཡི་དམ་འདི་འདྲ་མཆོག་ཏུ་དག༵འ། །མཚན་བརྒྱའི་མན་ངག་སྙིང༵་པོ༵་ནི། །ཟུར་དུ་བཀོལ་བ་འདི་ཙམ་ཡིན། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འཕགས་པ་ནམ་མཁའི་སྙིང་པོའི་སྒྲུབ་ཐབས་ཀྱི་ལེན་ཚན་ནོ།། །།དར་རྒྱས་འཕེལ། །
ས་སྙིང་སྒྲུབ་ཐབས།
ཨོཾ་སྭཱ་སྟི། གང་ཞིག་དྲན་པ་ཙམ་གྱིས་ནི། །ལྷ་མིན་འཇོམས་ཤིང་འབྱོར་བ་རྒྱས། །ཆོས་ལྡན་རྒྱལ་སྲིད་བརྟན་འགྱུར་བའི། །ས་སྙིང་སྒྲུབ་ཐབས་བཤད་པར་བྱ། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། པད་ཟླ་ལ་རང་སེམས་ཀྵིཾ་ཡིག་ཡོངས་སུ་གྱུར་པ་ལས། རང་ཉིད་སའི་སྙིང་པོ་སེར་པོ་སྟོད་གཡོགས་སེར་པོ་ཅན། ཞི་བ་སྤྱན་རྩ་དམར་བ། མེ་ཏོག་སྔོན་པོའི་ཕྲེང་བའི་ཐོད་ཅན། ཕྱག་གཡས་ཤིང་ཏོག་དང་གཡོན་པདྨའི་སྟེང་ན་ནོར་བུ་དང་བཅས་པ་འཛིན་པ། འོད་ཟེར་ལྗང་ཁུ་འཕྲོ་བ་རྡོ་རྗེ་ས་འོག་ལ་སོགས་པ་འཁོར་གྱིས་བསྐོར་བ། གཞལ་ཡས་ཁང་སེར་པོ་རིན་པོ་ཆེའི་བྲག་རི་དང་གངས་རིས་བསྐོར་བ། དར་དང་རིན་པོ་ཆེའི་བརྒྱན་པ་སོགས་མངོན་རྟོགས་ལྷག་མ་ཀུན་དུ་བཟང་པོའི་སྐབས་དང་འདྲ། ཨོཾ་སུཾ་བྷ་ནི་སུཾ་བྷ། ཧ་ར་ཙ་ར། མཧཱ་པ་ཤ མཱ་རུ་ཏ། ཨ་མོ་གྷ་བཛྲ་སནྟ་སྭཱཧཱ། ཞེས་བཟླ། རྗེས་དང་ཐུན་མཚམས་ཀྱང་ཀུན་བཟང་གི་སྐབས་དང་འདྲ་བ་ལས། སའི་སྙིང་པོའི་མཚན་བརྒྱ་ཉིད་ཀློག་པ་ཁྱད་པར་རོ། །འདིའི་བཟླས་ལུང་འབོགས་ཚུལ་ཡང༌། འོད་དཔག་མེད་ཀྱི་སྐབས་སུ་བཤད་པ་དང་འདྲའོ། །ས་སྟེང་
ཀུན༵་དུ་རྙེད་དཀའ་བའི། །སྒྲུབ་ཐབས་ཐོས་པ་དག༵འ་ཆེས་ནས། །སྙིང༵་ནས་དད་པ་སྐྱེས་གྱུར་ཏེ། །མདོར་བསྡུས་ཙམ་ཞིག་གསལ་པོ༵ར་བཀོད། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འཕགས་པ་སའི་སྙིང་པོའི་སྒྲུབ་ཐབས་ཀྱི་ལེ་ཚན་ནོ།། །།
སྒྲིབ་པ་ཐམས་ཅད་རྣམ་སེལ་གྱི་སྒྲུབ་ཐབས།
ཨོཾ་སྭཱ་སྟི། སྡིག་སྒྲིབ་ཐམས་ཅད་ཞི་བ་དང༌། །རྡོ་རྗེའི་ཚེ་འགྲུབ་ཕྱིར་བཟློག་ཆེ། །སྒྲིབ་པ་ཐམས་ཅད་རྣམ་སེལ་གྱིས། །རིག་སྔགས་ལགས་པས་དེ་ཕྱིར་བསྒྲུབ། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པད་ཟླའི་གདན་ལ་རང་སེམས་སྐཾ་ལས་རང་ཉིད་སྒྲིབ་པ་རྣམ་སེལ་སྐུ་མདོག་དཀར་པོ། གཡས་བུམ་པ་བདུད་རྩིས་གང་བ་འཛིན་ཞིང༌། གཡོན་པདྨ་དཀར་པོའི་སྡོང་བུ་འཛིན་པ་སྙན་གྱི་ཐད་ཀར་ཁ་བྱེ་བའི་སྟེང་དུ། ཟླ་བ་ཉ་གང་བ་ར་རི་མེད་ཅིང་འོད་ཟེར་འཕྲོ་བ། ཕྱིར་བཟློག་ཆེན་པོ་གཙུག་གཏོར་འཁོར་ལོས་བསྒྱུར་བ་སོགས་རིག་པའི་ཁྲོ་བོ་མང་པོས་ཞབས་ལ་བཏུད་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ནས། ཐུགས་ཀར་ཧཱུཾ་གི་བར་ཀུན་ཏུ་བཟང་པོའི་སྐབས་བཞིན་ནོ། །ཨོཾ་ཨ་མྲྀ་ཏ་བིནྡྷུ་ཛཱ་ཝཱ། མ་ཧཱ་སུ་ཁ་སྭཱཧཱ། ཞེས་ཅི་ནུས་སུ་བཟླ། རྗེས་དང་ཐུན་མཚམས་ཀུན་བཟང་གི་སྐབས་དང་འདྲ་བ་ལས། སྒྲིབ་པ་རྣམ་སེལ་གྱི་མཚན་བརྒྱ་ཀློག་པ་ཉིད་ཁྱད་པར་རོ། །འདིའི་བཟླས་ལུང་འབོགས་ཚུལ་ཡང༌། འོད་དཔག་མེད་ཀྱི་སྐབས་སུ་བཤད་པ་འདྲའོ། །བོད་ཡུལ་ཀུན༵་དུ་འདི་ཡིས་ནི། །སྒྲུབ་ཐབས་ཡོད་པར་
མ་མཐོང་ནས། །བླ་མའི་དྲུང་དུ་དག༵འ་བས་ཞུས། །གསུང་ཐོ་སྙིང༵་པོ༵་ཙམ་ཞིག་བཀོད། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འཕགས་པ་སྒྲིབ་པ་རྣམ་སེལ་གྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སྤྱན་རས་གཟིགས་ཀྱི་སྒྲུབ་ཐབས་མདོར་བསྡུས།
ཨོཾ་སྭཱ་སྟི། གང་ཞིག་བསམ་པ་ཙམ་གྱིས་ནི། །འཇིགས་པ་བརྒྱད་ལས་ངེས་སྐྱོབ་པ། །སྤྱན་རས་གཟིགས་དབང་ལ་བཏུད་ནས། །དེ་ཡི་སྒྲུབ་ཐབས་མདོར་བསྡུས་བཤད། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། པཾ་ལས་བདུད་རྩིའི་རྒྱ་མཚོའི་དབུས་སུ། པད་ཟླ་ལ་རང་སེམས་ཨ་དཀར་པོ་ཡོངས་སུ་གྱུར་པ་ལས། རང་ཉིད་འཕགས་པ་སྤྱན་རས་གཟིགས་དཀར་པོ་འོད་དཔག་མེད་ཀྱིས་དབུ་རྒྱན་ཅན། ཞལ་གཅིག་ཕྱག་བརྒྱད་ཀྱི་གཡས་བཞི་ན། སེང་གེ་གླང་ཆེན་དུག་སྦྲུལ་གཟའ། གཡོན་བཞི་ན། མེ་ཆུ་ལྕགས་སྒྲོག་མི་རྣམས་འཛིན་པ། ཞབས་གཡོན་བརྐྱང་བའི་གར་སྟབས་ཅན། དར་དང་རིན་པོ་ཆེས་བརྒྱན་པ། མདུན་དུ་ཏཱཾ་ལས་སྒྲོལ་མ་སེར་མོ་ཕྱག་གཉིས་ཐལ་མོ་སྦྱར་བས་ནོར་བུ་འཛིན་པས་གཙོ་བོ་ལ་འདུད་པའོ། །ཨོཾ་ཨ་ཝ་ལོ་ཀི་ཏེ་པདྨེ་ནི། ཝ་རཱཾ་གི་ཎི། ཏུ་རུ་ཏུ་རུ་ཧཱུཾ་སྭཱཧཱ། ཞེས་པ་དང༌། ཨོཾ་མ་ཎི་ཧཱ་རེ་ཧཱུཾ། ཞེས་པ་ཡང་ཅི་འགྲུབ་ཏུ་བཟླའོ། །ཐུན་འཇོག་ཁར་སྒྲོལ་མ་རང་གི་སྙིང་གར་ཐིམ། ཕྱག་གཉིས་པའི་ང་རྒྱལ་གྱིས་ཐུན་མཚམས་ལ་འཇུག གཙང་སྦྲ་དང་ལྡན་པའི་སྒོ་ནས། བྲིས་སྐུ་དང་མཆོད་རྟེན་ལ་ཕྱག་མཆོད་གང་འགྲུབ་བྱའོ། །འདིའི་བཟླས་ལུང་འབོགས་ཚུལ་ཡང་འོད་
དཔག་མེད་ཀྱི་སྐབས་དང་འདྲའོ། །ཀུན༵་ལས་ངོ་མཚར་རྨད་བྱུང་སྐུ། །འཇིགས་བརྒྱད་སྐྱོབ་པ་རབ་དག༵འི་གནས། །རྒྱུད་ཀྱི་སྙིང༵་པོ༵་ཡིན་ནོ་ཞེས། །བླ་མའི་གསུང་ལས་གསལ་བར་ཐོས། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་སྤྱན་རས་གཟིགས་འཇིགས་པ་བརྒྱད་སྐྱོབ་ཀྱི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སྣ་ཚོགས་དབང་པོའི་སྒྲུབ་ཐབས།
ཨོཾ་སྭཱ་སྟི། གང་ལ་གང་འདུལ་སྣ་ཚོགས་སྐུ། །དོན་ཡོན་ཞགས་པ་ལ་བཏུད་ནས། །སྣ་ཚོགས་དབང་པོའི་སྒྲུབ་ཐབས་ནི། །ཤིན་ཏུ་མདོར་བསྡུས་བྲི་བར་བྱ། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་རླུང་མེ་ཆུ་ས་རི་རབ་པདྨ་ཟླ་བ་ཉི་མ་བརྩེགས་པ་ལས་སྒྲ་གཅན་འགྱེལ་བའི་སྟེང་དུ། རང་སེམས་ཧྲཱིཿལས་རང་ཉིད་དོན་ཡོད་ཞགས་པ་སྣ་ཚོགས་དབང་པོ་སྐུ་མདོག་དཀར་པོ། ཞལ་བཅུ་གཅིག་རྩ་ཞལ་ཞི་བ་དཀར་པོ་སྤྱན་གསུམ་པ་རལ་པའི་ཐོར་ཚུགས་ཅན། གཡས་སུ་ལྷ་ཞི་བ་དང༌། གཤིན་རྗེ་གནོད་སྦྱིན། དྲག་པོ་ཆེན་པོ། ཟླ་བ་རྣམས་ཀྱི་ཞལ་བརྩེགས་པ་དང༌། གཡོན་དུ་ཁྱབ་འཇུགཆུ་ལྷ། གདོང་དྲུག་ཁྲོས་པ། དྲག་པོ། ཉི་མའི་ཞལ་རྣམས་བརྩེགས་པའོ། །ཀུན་གྱི་སྟེང་གི་དབུས་སུ་འོད་དཔག་མེད་མཆོག་སྦྱིན་མཛད་པ། གཡས་སུ་རླུང་ལྷ་དང༌། གཡོན་དུ་མེ་ལྷ་ལུས་ཕྱེད་ཕྱེད་སྣང་བ། ཕྱག་སུམ་ཅུ་རྩ་གཉིས་ཀྱི་དང་པོ་གཉིས་ནོར་བུ་དང་པདྨ་འཛིན་པ། གཞན་རྣམས་ཀྱིས་
བརྒྱ་བྱིན་གྱི་རྡོ་རྗེ་ལ་སོགས་པ་ལྷ་རྣམས་ཀྱི་མཚོན་ཆ་སྣ་ཚོགས་པ་འཛིན་པའོ། །ཞབས་བརྒྱད་ཀྱི་འོག་ཏུ་ཀླུ་དང་ལྷ་མིན་དང་སྲིན་པོའི་ཚོགས་རྣམས་མནན་པ། དར་དང་པགས་པའི་གོས་དང༌། རིན་པོ་ཆེ་དང༌། སྤྲུལ་དང༌། མེ་ཏོག་ལ་སོགས་པ་ན་བཟའ་དང་རྒྱན་ཐམས་ཅད་ཀྱིས་བརྒྱན་པ། མེ་དཔུང་དང་འོད་ཟེར་སྣ་ཚོགས་འཕྲོ་བའོ། །ཐུགས་ཀར་ཟླ་བ་ལ་ཞགས་པ་དམར་པོའི་སྟེང་དུ་ཧྲཱིཿམཐའ་མར་སྔགས་ཀྱིས་བསྐོར་བ། ཨོཾ་ཨ་མོ་གྷ་པཱ་ཤ ཀྲོ་དྷ་ཨ་ཀརྵ་ཡ། པྲ་པེ་ཤ མཧཱ་པ་ཤུ་པ་ཏི། ཡ་མ། ཝཱ་རུ་ཎ། ཀུ་བེ་ར། པྲ་ཧྨ། བེ་ཥ་དྷ་ར། ཨ་མོ་གྷ་ཧྲཱིཿད་ཡ། པདྨ་ཀུ་ལ་ས་མཱ་ཡ། ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་སྭཱཧཱ། ཞེས་པའི་སྙིང་པོ་ཉིད་ཅི་ནུས་སུ་བཟླ་ཞིང༌། དོན་ཡོད་ཞགས་པའི་གཟུངས་རིང་ཀྱང་འདོན་ནོ། །རང་ལུས་ཆ་གཉིས་སུ་གྱུར་པ་ལས་གཡས་ཀྱི་ཆ་ནི་སྣ་ཚོགས་དབང་པོའི་སྐུ་དང༌། གཡོན་གྱི་ཆ་ལྷ་མོ་གོས་དཀར་མོ་རང་དང་མཚུངས་པ་ལས་ལྷ་མོའི་རྣམ་པ་ཅན། ཕྱག་ན་པདྨ་འབའ་ཞིག་འཛིན་པའི་སྐུར་གྱུར། ཨོཾ་པདྨེ་པཎྜ་ར་ཝཱ་སི་ནི་ཀུཎྜ་ཀུཎྜ་སྭཱཧཱ། ཞེས་པ་ཅི་རིགས་པ་བཟླའོ། །ཐུན་མཚམས་ཀྱི་བྱ་བ་དང༌། ལུང་འབོགས་ཚུལ་ནི། འོད་དཔག་མེད་ཀྱི་སྒྲུབ་ཐབས་དང་འདྲའོ། །མོས་པ་སྣ་ཚོགས་ཀུན༵་འདུད་ཅིང༌། །མུ་སྟེགས་འདུལ་བ་རབ་དག༵འི་གནས། །སྤྱན་གཟིགས་སྒྲུབ་ཐབས་སྙིང༵་པོ༵་འདི། །ཤིན་ཏུ་ཡ་མཚན་ཆེ་ཕྱིར་བཀོད། །པཎྜི་ཏ་
གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འཕགས་པ་སྤྱན་རས་གཟིགས་སྣ་ཚོགས་དབང་པོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
སྤྱན་རས་གཟིགས་ཀྱི་སྒྲུབ་ཐབས།
ཨོཾ་སྭཱ་སྟི། སྤྱན་རས་གཟིགས་དབང་འོད་དཔག་མེད། །བླ་མར་བཅས་ལ་གུས་བཏུད་ནས། །པདྨའི་ཕྱག་ཏུ་མཚན་གསོལ་བ། །སྤྱན་རས་གཟིགས་ཀྱི་སྒྲུབ་ཐབས་བཤད། །སྐྱབས་སེམས་ཚད་མེད་བཞི་སྔོན་དུ་བཏང་སྟེ། ཤཱུ་ནྱ་ཏཱས་སྟོང་པ་ཉིད་དུ་སྦྱངས། སྟོང་པའི་ངང་ལས་སྣོད་བཅུད་ཐམས་ཅད་རང་བཞིན་ཡེ་ཤེས་ཀྱི་དཀྱིལ་འཁོར་དུ་གྱུར། ཨོཾ་པྲ་ཀྲྀ་ཏེ་པ་རི་ཤུདྡྷ་སརྦ་དྷརྨ་པྲ་ཀྲྀ་ཏེ་པ་རི་ཤུདྡྷོ྅ཧཾ། སྣོད་ཀྱི་འཇིག་རྟེན་གཞལ་ཡས་ཁང་གི་དབུས་སུ། བཅུད་ཀྱི་སེམས་ཅན་ཐམས་ཅད་ཀྱི་ལུས་གཅིག་ཏུ་འདྲེས་པ་ཟླ་བའི་དཀྱིལ་འཁོར་སེམས་གཅིག་ཏུ་འདུས་པ་ནོར་བུས་མཚན་པའི་པདྨ་དཀར་པོ་དག་གཅིག་ཏུ་འདུས་པ་དེའི་ལྟེ་བ་ལ་ཧྲཱིཿས་མཚན་པ། དེ་རྣམས་ལས་འོད་ཟེར་འཕྲོས། སངས་རྒྱས་ཐམས་ཅད་རྒྱལ་བ་འོད་དཔག་ཏུ་མེད་པའི་རྣམ་པར་སྤྱན་དྲངས། ཟླ་བ་ལ་པདྨ་ཧྲཱིཿདང་བཅས་པ་ལ་ཐིམ། ཐམས་ཅད་གཅིག་ཏུ་འདྲེས་པ་ཡོངས་སུ་གྱུར་བ་ལས། རང་ཉིད་འཕགས་པ་སྤྱན་རས་གཟིགས་དབང་ཕྱུགཞལ་བཅུ་གཅིག་ཕྱག་སྟོང་དང་ལྡན་པ། སྐུ་ལུས་སྟོན་ཀའི་ཟླ་བ་ལྟར་དཀར་ཞིང་མགྲིན་པ་སྔོ་བ། རྩ་ཞལ་དཀར་པོའི་སྟེང་དུ་འཚོག་མ་དང་རྣ་ལྟག་གཡས་གཡོན་གྱི་ཕྱོགས་ལ་ཞི་བའི་
ཞལ་དྲུག་སྔོ་སེར་དཀར་དམར་ལྗང་བ་དང་རྒྱ་ཚོས་ཀྱི་ཁ་དོག་ཅན། དེའི་ནང་རིམ་ལ་ཁྲོ་བོའི་ཞལ་གསུམ་སྟེ། ནག་པོ་དམར་ནག་སྔོ་སྐྱའོ། །རལ་པའི་ཐོར་ཚུགས་ཀྱི་རྩེ་མོར་སངས་རྒྱས་འོད་དཔག་ཏུ་མེད་པའི་ཞལ་ཚངས་པར་སྤྱོད་པའི་ཆ་ལུགས་ཅན་དམར་པོའོ། །དབུ་བཅུ་གཅིག་པོ་ཐམས་ཅད་ཀྱིང་མགུལ་པ་དང་བཅས་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་པ་རྣམས་ཀྱིས་བགྲང་འཕྲེང་མདའ་འཁོར་ལོ་རལ་གྲི་རྩེ་གསུམ། གཡོན་པ་རྣམས་ཀྱིས་གསེར་གྱི་པདྨ་གཞུ་སྤྱི་བླུགས་པོ་ཏི་ཁ་ཊྭཱཾ་ག་རྣམས་འཛིན་པ། ཕྱག་ལྷག་མ་དགུ་བརྒྱ་དང་བརྒྱད་ཅུ་གྱ་བརྒྱད་མཆོག་སྦྱིན་གྱི་མཐིལ་ནས་བདུད་རྩིའི་ཆུ་རྒྱུན་འབབ་པ། ཕྱག་གི་མཐིལ་ན་སྤྱན་རེ་རེ་དང་བཅས་པ། ཞབས་རྡོ་རྗེའི་སྐྱིལ་ཀྲུང་ངམ་མཉམ་པའི་སྟབས་ཀྱིས་བཞེངས་པ། དར་དང་རིན་པོ་ཆེའི་རྒྱན་གྱིས་བརྒྱན་པ། གཡོན་ཕྱོགས་སུ་ལྷ་མོ་སྒྲོལ་མ་དཀར་མོ་ཅུང་ཟད་དམར་བའི་མདངས་ཅན། ཕྱག་གཡས་པས་གཙོ་བོ་ལ་འཁྱུད་ཅིང༌། གཡོན་པས་ཨུཏྤལ་སྔོན་པོ་མཛེས་པ། སྟེང་གི་ནམ་མཁའ་ལ་དེ་བཞིན་གཤེགས་པ་རིགས་ལྔ་བདུད་རྩིའི་བུམ་པ་བསྣམས་པའི་ཆུ་རྒྱུན་གྱིས་རྟག་ཏུ་དབང་བསྐུར་བའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། མིག་ཏུ་ཀྵིཾ། རྣ་བར་ཛྲིཾ། སྣ་ལ་ཁཾ། ལྕེ་ལ་གཾ དཔྲལ་བར་སྐཾ། ལྟེ་བར་སཾ། ཨརྒྷཾ་ནས་ཤཔྟའི་བར་གྱིས་མཆོད། ཨོཾ་ཨ་མྲྀ་ཏ་ཨུ་པ་ཏ་ཡ་མི། འཁོར་འདས་ཐམས་ཅད་
ཀྱི་བཅུད་ཀྱི་བདུད་རྩི་གསོལ། ཨོཾ་བོ་དྷི་ཙིཏྟ་ཨ་ནུ་རཱ་ག་ཡ་མི། རྗེས་ཆགས་ཀྱི་བདེ་བས་རྒྱུད་གང༌། ལྟེ་བར་པདྨ་དམར་པོ་ལ་ཨཱཿ སྙིང་གར་སྔོན་པོ་ལ་ཧཱུཾ། སྤྱི་བོར་དཀར་པོ་ལ་ཨོཾ་མགོ་ཐུར་བསྟན། སྲོག་རྩོལ་བསྡམས་ཏེ་འབར་ཛག་ཅི་ནུས་སུ་བསྒོམ་མོ། །དེ་ནས་བཟླས་པ་ནི། ཨོཾ་པདྨ་ཧསྟ། ས་ཧ་སྲ་བཛྲ་བྷུ་ཛ་ནེསྟྲ་ནཱི་ལ་ཀཎྵ། ལོ་ཀེ་ཤྭ་རཱ་ཡ་ཧཱུཾ་ཧཱུཾ་ཕཊ། ཨོཾ་པདྨ་ཏཱ་རེ་ཧཱུཾ། ཞེས་ཅི་ནུས་སུ་བཟླ་ཞིང་མཐར་དམིགས་མེད་དུ་མཉམ་པར་བཞགདགེ་བ་བསྔོ། ཐུན་མཚམས་སུ་སྣང་གྲག་ཐམས་ཅད་ལྷ་སྔགས་སུ་ཤེས་པར་བྱ། མཆོད་བསྟོད་ཡན་ལག་བདུན་པ་སོགས་ཅི་རིགས་པར་སྤྱད། འདི་ལ་དབང་བསྐུར་ཐོབ་པ་ལ་སྒྲུབ་ཐབས་བཤད་ནས་སྔགས་ཀྱི་བཟླས་ལུང་སྦྱིན་པ་ཉིད་ཀྱིས་ཆོག་གོ །འདི་ནི་སྤྱན་རས་གཟིགས་ཀྱིས་གྲུབ་ཐོབ་ཆེན་པོ་ཀ་མ་ལ་ག་མའི་སྒྲུབ་ཐབས་ཀྱི་ལུགས་ཡིན་ནོ། །ཀུན༵་དག༵འི་ཡུལ་མཆོག་ལི་ཡུལ་ནས། །དགེ་བསྙེན་པདྨས་སྤྱན་དྲངས་པའི། །རྒྱུད་ལས་སྙིང༵་པོ༵་ཙམ་བསྡུས་པའི། །སྒྲུབ་ཐབས་ངོ་མཚར་ཨེ་མ་ཧོ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ་ལི་ཡུལ་ནས་གདན་དྲངས་པར་གྲགས་པ། ཞལ་བཅུ་གཅིག་པ་པདྨའི་ཕྱག་གི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །སུ་ཁ་དེ་བས་ཞལ་གཟིགས་པའི། །
སྒྲུབ་ཐབས་བཞིན་དུ་བསྒོམ་པར་བྱ།
ཨོཾ་སྭཱ་སྟི། ཡི་གེ་དྲུག་པའི་བདག་ཉིད་ཅན། །བདེ་ལྡན་ཇོ་བོར་མཚན་གསོལ་པ། །སུ་ཁ་དེ་བས་ཞལ་གཟིགས་པའི། །སྒྲུབ་ཐབས་བཞིན་དུ་བསྒོམ་པར་བྱ། །སྐྱབས་འགྲོ་སེམས་བསྐྱེད་ཚད་མེད་བཞི་རྣམས་སྔོན་དུ་བཏང་ནས། ཤཱུ་ནྱ་ཏཱས་
སྟོང་པར་སྦྱངས། སྟོང་པའི་ངང་ལས་པདྨ་དཀར་པོ་དང་ཟླ་བའི་གདན་ལ་པདྨ་དཀར་པོའི་སྡོང་བུ་ཡི་གེ་དྲུག་པའི་སྔགས་ཀྱིས་མཚན་པ་ཡོངས་སུ་གྱུར་པ་ལས། རང་ཉིད་འཕགས་པ་སྤྱན་རས་གཟིགས་ཇོ་བོ་སུ་ཁ་ཝ་ཏི་སྐུ་མདོག་དཀར་པོ་ཞལ་གཅིག་ཕྱག་དྲུག་པ། གཡས་ཀྱི་དང་པོ་བ་དན་རྩེ་གསུམ་པའི་ཕྱག་རྒྱ། གཉིས་པ་ན་བགྲང་འཕྲེང༌། གསུམ་པ་ན་ནོར་བུ་དང་བཅས་པའི་མཆོག་སྦྱིན། གཡོན་དང་པོ་པདྨ་དཀར་པོའི་སྡོང་བུ་ནོར་བུས་མཚན་པ། གཉིས་པ་ན་དབྱུག་གུ་རྩེ་གསུམ། ཐ་མ་ན་སྤྱི་བླུགས་འཛིན་པ། ཞབས་རོལ་པའི་སྟབས་ཀྱིས་བཞུགས་ཤིང༌། དར་དང་རིན་པོ་ཆེས་བརྒྱན་པ། རལ་པའི་ཅོད་པན་ཅན། གཡོན་ཕྱོགས་སུ་རང་སྣང་གི་ཡུམ་ཨུཏྤལ་འཛིན་པས་འཁྱུད་པ། རྒྱལ་བ་འོད་དཔག་ཏུ་མེད་པས་དབུ་བརྒྱན་པའོ། །མིག་ཏུ་ཨོཾ་དཀར་པོ། རྣ་བར་མ་སྔོན་པོ། སྣར་ཎི་སེར་པོ། ལྕེ་ལ་པད་དམར་པོ། དཔྲལ་བར་མེ་ལྗང་ཁུ། ལྟེ་བར་ཧཱུཾ་སྔོ་སྐྱ། སྤྱི་བོར་ཨོཾ། མགྲིན་པ་ཨཱཿ ཐུགས་ཀར་ཧཱུཾ། ཡེ་ཤེས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཨོཾ་མ་ཎི་པདྨེ་ཧཱུཾ། ཞེས་ཅི་འགྲུབ་ཏུ་བཟླའོ། །འཇུག་ཏུ་ཆོས་ཐམས་ཅད་སྒྱུ་མ་ལྟ་བུར་ཤེས་པའི་སྒོ་ནས་དགེ་བ་བསྔོ། ཐུན་མཚམས་སུ་ལྷའི་སྣང་བ་དང་མ་བྲལ་བར་བྱ། ཇོ་བོ་བདེ་ལྡན་དམར་པོ་བསྒོམ་པར་འདོད་ན། ཕྱག་གཡོན་གྱི་དང་པོ་པདྨ་དཀར་པོའི་སྟེང་དུ་གླེགས་བམ་དང་བཅས་པ་འཛིན་པ། སྐུ་མདོག་དམར་པོ་ཐུགས་ཀར་སྦས་པའི་ཡུམ་སྒྲོལ་མ་ཨུཏྤལ་
དམར་པོ་འཛིན་ཞིང་ཁ་འབྱེད་པ། དེའི་ཐུགས་ཀར་ས་བོན་སྔགས་འཕྲེང་དང་བཅས་པ་བསྒོམ་པ་དང༌། བཟླས་པའི་ཚེ། ཡུམ་ལ། ཨོཾ་པདྨ་ཏཱ་རེ་ཧཱུཾ། ཞེས་བཟླ་བ་ནི། འདི་དང་མཚུངས་པ་ལྷ་བཅུ་གསུམ་མའི་སྒྲུབ་ཐབས་མཧཱ་ཛ་ནས་མཛད་པ་ཞིག་སྔར་འགྱུར་ཡང་བཀའ་མེད་ལ། འདི་ནི་དབང་ཐོབ་པ་ཞིག་ལ་སྒྲུབ་ཐབས་བཤད་ནས། སྔགས་ཀྱི་བཟླས་ལུང་སྦྱིན་པ་ཙམ་གྱིས་ཆོག་གོ །ཚོང་དཔོན་རིགས་ལས་གྲུབ་བརྙེས་པ། །ཀུན༵་དག༵འ་གྲགས་ལྡན་དེ་ཡི་གཞུང༌། །སྙིང༵་པོ༵ར་བསྡུས་པའི་ཉམས་ལེན་ནི། །འདི་ལྟར་ལགས་པས་གཅེས་པར་བཟུང༌། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། སྤྱན་རས་གཟིགས་སུ་ཁ་ཝ་ཏིའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དོན་ཡོད་ལྕགས་ཀྱུ་སྒྲུབ་པའི་ཐབས།
ཨོཾ་སྭཱ་སྟི། སྤྱན་རས་གཟིགས་དབང་ལ་བཏུད་ནས། །དོན་ཡོད་ལྕགས་ཀྱུ་སྒྲུབ་པའི་ཐབས། །མདོ་ཙམ་བླ་མའི་གསུང་བཞིན་དུ། །གཞན་ལ་ཕན་ཕྱིར་བྲི་བར་བྱ། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་རང་སེམས་ཧྲཱིཿཡིག་དམར་པོ་ཡོངས་སུ་གྱུར་པ་ལས། རང་ཉིད་དོན་ཡོད་ལྕགས་ཀྱུ་སྐྱ་རེངས་གསར་པའི་མདོག་ཅན། རལ་པའི་ཐོར་ཚུགས་དང་ལྡན་པ། རྒྱན་སྤངས་པ། སྤྱན་གསུམ་འོད་དཔག་མེད་ཀྱི་དབུ་རྒྱན་ཅན། རྒྱ་ནག་གི་བླ་གོས་དང༌། རི་དྭགས་ཀྱི་པགས་པའི་སྨད་གཡོགས་ཅན་མཉམ་པར་བཞེངས་པ། ཕྱག་བརྒྱད་ཀྱི་གཡས་བཞི་ན་ལྕགས་ཀྱུ་དང༌། གཡོན་བཞི་ན་ཞགས་པ་
བསྣམས་པའོ། །སྙིང་གར་ཟླ་བ་ལ་སྔགས་འཕྲེང་བཀོད་དེ། ཨོཾ་ཨངྐུ་ཤ་ཨ་མོ་གྷ་ཨ་ཁརྵ་ཡ་ཧཱུཾ། ཞེས་ཅི་འགྲུབ་ཏུ་བཟླའོ། །ཐུན་མཚམས་སུ་འཕགས་པ་སྤྱན་རས་གཟིགས་ཀྱི་སྐུ་བརྙན་ལ་མཆོད་ཅིང་བསྟོད་པ་དང༌། མདོ་སྡེ་ཀློག་པ་ལ་ནན་དུ་བྱའོ། །འདིའི་ལུང་འབོགས་ཚུལ་ནི། འོད་དཔག་མེད་ཀྱི་སྐབས་དང་འདྲ་བ་ཡིན་ནོ། །ཀུན༵་དུ་སྤྱན་རས་གཟིགས་ཀྱི་ཐུགས། །རབ་དག༵ས་སྐུལ་བར་བྱེད་པའི་ལྷ། །དོན་ཡོད་ལྕགས་ཀྱུའི་སྔགས་རྒྱུད་ནི། །མཐའ་ཡས་གསུངས་པའི་སྙིང༵་པོ༵་འདིའོ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་དོན་ཡོད་ལྕགས་ཀྱུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
དོན་ཡོད་མཆོད་པ་སྒྲུབ་པའི་ཐབས།
ཨོཾ་སྭཱ་སྟི། སྤྱན་རས་གཟིགས་དབང་ལ་བཏུད་ནས། །དོན་ཡོད་མཆོད་པ་སྒྲུབ་པའི་ཐབས། །མདོ་ཙམ་བླ་མའི་གསུང་བཞིན་དུ། །གཞན་ལ་ཕན་ཕྱིར་བྲི་བར་བྱ། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པད་ཟླ་ལ་ཧྲཱིཿཡིག་ལས། རང་ཉིད་འཕགས་པ་དོན་ཡོད་མཆོད་པའི་ནོར་བུ་ཞེས་བྱ་བ། སྐུ་མདོག་དཀར་པོ་ཡིད་ཙམ་ཁྲོ་ཞིང་སྤྱན་གསུམ་པ། ཕྱག་གཡས་གཉིས་ན་རལ་གྲི་དང་ཏྲི་ཤུ་ལ། གཡོན་གཉིས་ན་ཞགས་པ་དང་པདྨ་འཛིན་པ། རལ་པའི་ཅོད་པན་ལ་འོད་དཔག་མེད་ཀྱིས་བརྒྱན་པ། ཆུའི་དབུས་སུ་པདྨའི་སྡོང་པོ་ལ་གནས་པ། གཡས་གཡོན་ན་ཀླུ་དགའ་བོ་ཉེར་དགའ་དཀར་པོ་པུས་མོ་བཙུགས་ཤིང༌། ཐལ་མོ་སྦྱར་བའོ། །ཨོཾ་
ཨ་མོ་གྷ་པཱུ་ཛ་མ་ཎི། པདྨ་བཛྲེ་ཏ་ཐཱ་ག་ཏཱ། བི་ལོ་ཀི་ཏེ། ས་མནྟ་པྲ་ས་ར་ཧཱུཾ། ཞེས་ཅི་ནུས་སུ་བཟླའོ། །ཐུན་མཚམས་སུ་བྲིས་སྐུ་ལ་ཕྱག་མཆོད་ཅི་འགྲུབ་བྱ། བསྙེན་པ་འབྲུ་འབུམ་དུ་སོང་ནས། བདག་དང་བྲིས་སྐུ་གཉིས་ཀ་ལྷར་བསྐྱེད་ལ། མཆོད་བསྟོད་ཡན་ལག་བདུན་པ་དང་བཟླས་པ་འབུམ་ཙམ་བྱའོ། །ཕྱིས་དེ་ལ་མཆོད་ཅིང་གསོལ་བ་བཏབ་པ་ཙམ་གྱིས་ཀླུ་ནད་གསོ་བ་དང༌། ཆར་འབེབས་པ་དང༌། ལོངས་སྤྱོད་སྒྲུབ་པ་ཐམས་ཅད་ཐོགས་པ་མེད་པ་ཡིན་ནོ། །འདིའི་ལུང་འབོགས་ཚུལ་ནི། འོད་དཔག་མེད་ཀྱི་སྐབས་དང་འདྲའོ། །རྒྱུད་ལས་གསལ་བར་གསུངས་ན་ཡང༌། །ཀུན༵་གྱིས་མཚན་ཡང་མ་ཐོས་པ། །བདག་གིས་ཐོབ་འདི་ཡིད་དག༵འི་གནས། །ཉམས་ལེན་སྙིང༵་པོ༵་མདོ་ཙམ་ཡིན། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འཕགས་པ་དོན་ཡོད་མཆོད་པ་ནོར་བུའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཕྱག་རྡོར་ལྷན་ཅིག་སྐྱེས་པའི་སྒྲུབ་ཐབས།
ཨོཾ་སྭཱ་སྟི། རྡོ་རྗེ་སེམས་དཔའ་ཐུགས་ཀྱི་བདག །ཐུགས་ཀྱི་རྡོ་རྗེ་ཐུགས་ཀྱི་གཙོ། །ཐུགས་གྱི་དབང་ཕྱུག་གསང་བའི་རྒྱལ། །རྡོ་རྗེ་འཛིན་པའི་ཞབས་ལ་འདུད། །སྐྱབས་སེམས་ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། རང་གི་སྙིང་གར་ཧཱུཾ་ཡིག་རྡོ་རྗེ་དང་བཅས་པའི་འོད་ཀྱི་འཕྲོ་འདུ་ལས། རང་ཉིད་གསང་བའི་བདག་པོ་ཞི་བ་ཕྱག་གཉིས་པ། སྐུ་མདོག་དཀར་པོ་གཡས་རྡོ་རྗེ་ཐུགས་ཀར་གཏོད་ཅིང༌། གཡོན་དྲིལ་བུ་དཀུར་བརྟེན་པ། ཡིད་ཙམ་ཁྲོ་བའི་ཉམས་ཅན། དར་དང་རིན་པོ་ཆེའི་
རྒྱན་པ། རྡོ་རྗེའི་སྐྱིལ་ཀྲུང་གིས་པད་ཟླ་ལ་བཞུགས་པ། ཡུམ་མཱ་མ་ཀཱི་དཀར་ལ་སྔོ་བའི་མདངས་ཅན། གྲི་གུག་དང་ཐོད་པ་འཛིན་པས་སྐུའི་གཡོན་ཕྱོགས་ནས་འཁྱུད་པ། ཨོཾ་སརྦ་མཧཱ་བཛྲ་ཨ་གྲ་ཝ་རཾ་ཧཱུཾ། ཨོཾ་ཀི་རི་ཀི་རི་མཱ་མ་ཀཱི་ཧཱུཾ། ཞེས་ཅུང་ཟད་བཟླས། ཡབ་ཡུམ་སྙོམས་པར་ཞུགས་པས་བྱང་ཆུབ་སེམས་ཀྱི་ཕུང་པོར་གྱུར། ཕྱོགས་བཅུའི་སངས་རྒྱས་རྣམས་ཀྱིས། ས་མ་ཡ་སྟྭཾ་ཞེས་བསྐུལ་བས། དེ་ཉིད་ཧཱུཾ་དུ་གྱུར། དེ་ལས་རང་ཉིད་གསང་བའི་བདག་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་ཤིན་ཏུ་ཁྲོས་པ། གཡས་རྡོ་རྗེ་འབར་བ་འཕྱར་ཞིང་གཡོན་ཞགས་པ་འཛིན་པའི་སྡིགས་མཛུབ་ཀྱིས་ཡུམ་ལ་འཁྱུད་པ། ཞབས་གཡས་བསྐུམ་གཡོན་བརྐྱང་པས་ཉི་མའི་དཀྱིལ་འཁོར་ལ་གནས་པ། ཉི་མའི་འོག་ཏུ་དབང་ཕྱུག་ཆེན་པོ་དང༌། ཨུ་མ་དང༌། ནོར་བདག་དང༌། ཀླུ་དང༌། ལྷ་མ་ཡིན་ལ་སོགས་པ་དྲེགས་པ་ཐམས་ཅད་ཁ་བུབ་ཏུ་མནན་པ། གདུག་པའི་སྦྲུལ་ཞལ་དུ་གསོལ་ཞིང་སྟག་ལྤགས་དང་སྦྲུལ་རྒྱན་དང་མི་མགོའི་དོ་ཤལ་ཅན། ཁྲོ་བོའི་རྒྱན་ཆ་ལུགས་ཡོངས་སུ་རྫོགས་པའོ། །ཡུམ་རིག་འཛིན་མ་སྔོན་མོ་ཅུང་ཟད་ཞི་ཞིང་སྒེག་པ། སྐྲ་གྲོལ་བ། རྡོ་རྗེ་དང་ཐོད་ཁྲག་འཛིན་པས་ཡབ་ལ་འཁྱུད་པ། གཅེར་བུ་སྦྲུལ་གྱིས་བརྒྱན་པ། གཉིས་ཀའང་མེ་དཔུང་འབར་བའི་དབུས་ན་བཞུགས་ཤིང༌། མི་བསྐྱོད་པའི་
དབུ་རྒྱན་ཅན། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རི་རབ་ཀྱི་རྩེ་མོར་བྱོན་པར་གྱུར། སྙིང་གར་སྔགས་འཕྲེང་བཀོད་ལ། ཨོཾ་བཛྲ་ཙཎྜ་སརྦ་དུཥྟཾ་ཏ་ཀ་ཧ་ན་ད་ཧ་པ་ཙ་ཧཱུཾ་ཕཊ། ཨོཾ་ཀུ་ལཱནྡྷ་རི་བནྡྷ་བནྡྷ་ཧཱུཾ་ཕཊ། ཅེས་ཁ་སྦྱོར་གྱི་བཟླས་པ་ཅི་ནུས་སུ་བཟླའོ། ཁ་ཟས་ཀྱི་ཕུད་ཡི་གེ་འབྲུ་གསུམ་གྱིས་གཏོར་མར་བྱིན་གྱིས་བརླབས་ལ། སྙིང་པོའི་མཐར། ཨི་དཾ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཞེས་བཏགས་པས་འབུལ། །འདིའི་བྱིན་རླབས་བྱེད་པར་འདོད་ན། མཎྜལ་གྲུ་གསུམ་ནག་པོ་ཞིག་བྱ། དེར་མཉྫིའི་སྟེང་དུ་ཐོད་པ་དམ་རྫས་ཀྱིས་བཀང་བའི་ནང་དུ་ལྕགས་ཀྱི་རྡོ་རྗེ་ཞིག་བཞགཤ་ཆང་གིས་བརྒྱན་པའི་གཏོར་མ་དང་མཆོད་པས་བསྐོར། ཐམས་ཅད་ཨ་མྲྀ་ཏས་བསངས། མཆོད་པ་རྣམས་སྤྱི་དང་མཐུན་པར་བྱིན་གྱིས་བརླབས། བདག་མདུན་དབྱེར་མེད་ཀྱི་ཚུལ་དུ་བཟླས་པའི་བར་ཚར་གྱིས་བསྒོམ། ཐུགས་ཀ་ནས་ལས་ཀྱི་རྡོ་རྗེ་ཞིག་ཆད་དེ། མཆོད་པ་འབུལ་བར་བསམས་ལ། ཨརྒྷཾ་ནས། ཤཔྟའི་བར་གྱི་སྔགས་དང་ཕྱག་རྒྱས་མཆོད། གཏོར་མའང་གོང་བཞིན་བྱིན་གྱིས་བརླབས་ནས་འབུལ། སྟོབས་པོ་ཆེ་ལ་དྲག་ཤུལ་ཆེ། །རིགས་སྔགས་འཆང་བ་བདེ་བ་པོ། །གདུལ་དཀའ་མ་ལུས་འདུལ་མཛད་པའི། །རྡོ་རྗེ་འཛིན་ལ་ཕྱག་འཚལ་ལོ། །ཞེས་བསྟོད། དེ་ནས་སློབ་མས། ཨོཾ་ཧེ་བཛྲ་ཨཱ་ཙཪྱ་མ་མ་ཨ་ཏིཥྛནྟུ་ཀུ་རུ་ཧཱུཾ། ཞེས་ལན་གསུམ་གྱིས་གསོལ་བ་བཏབ། ཡན་ལག་བདུན་པ་བྱ། སློབ་དཔོན་གསང་
བའི་བདག་པོ་དངོས་སུ་བསྒོམ་དུ་གཞུགསློབ་དཔོན་གྱི་ཐུགས་ཀ་ནས་འོད་ཟེར་འཕྲོས། སངས་རྒྱས་ཐམས་ཅད་གསང་བདག་ཡབ་ཡུམ་གྱི་སྐུའི་རྣམ་པར་སྤྱན་དྲངས། སློབ་མ་ལ་བསྟིམ། དེ་བཞིན་དུ་ཡིག་འབྲུ་དང་ཕྱག་མཚན་གྱི་རྣམ་པར་ཡང་སྤྱན་དྲངས་ཏེ་བསྟིམ། དེ་གསུམ་ལ་རོལ་མོའི་སྒྲ་རེ་བྱ། སློབ་མ་ཞི་བ་ཡབ་ཡུམ་དུ་སྒོམ་དུ་བཅུག་ལ་དེའི་སྔགས་ཀྱི་བཟླས་ལུང་སྦྱིན། ཁྲོ་བོ་ཡབ་ཡུམ་དུའང་སྒོམ་དུ་བཅུག་ལ་དེའི་སྔགས་ཀྱི་བཟླས་ལུང་སྦྱིན། གཏོར་མ་ནས་ཁམ་གཅིག་སྦྱིན་ལ་འབྲུ་གསུམ་བརྗོད། བུམ་དབང་ངོ༌། །སྙིང་པོའི་མཐར་འབྲུ་གསུམ་བཏགས་པས་ཐོད་པའི་ནང་གི་དམ་རྫས་སྦྱིན། གསང་དབང་ངོ༌། །རྡོ་རྗེ་སྙིང་གར་གཏད་ལ། བདེ་སྟོང་གི་ཡེ་ཤེས་སྒྲིབ་གཉིས་འཇོམས་བྱེད་དུ་ངོ་སྤྲད། ཤེར་དབང་ངོ༌། །མདུན་བསྐྱེད་ཀྱི་ལྷ་ཚོགས་སློབ་མ་ལ་བསྟིམ། མི་རྟོག་པ་སྒོམ་དུ་གཞུག་སྟེ་དབང་བཞི་པའོ། །རྗེས་ཀྱི་བྱ་བ་སྤྱི་དང་འདྲ། །སངས་རྒྱས་ཀུན༵་གྱི་ཐུགས་རྡོ་རྗེ། །ལྷན་ཅིག་སྐྱེས་དག༵འི་རང་བཞིན་དངོས། ཁྲོ་རྒྱལ་འདི་ལ་སྙིང༵་ནས་དང༌། །སྒྲུབ་ཐབས་འདི་ཡང་གསལ་པོར་བཀོད། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། འགྲོ་ལྡིང་གི་རྡོ་རྗེ་འཛིན་པ་ཆེན་པོ་དེ་ཝ་སཾ་བྷ་ཝའི་མན་ངག་ཕྱག་རྡོར་ལྷན་ཅིག་སྐྱེས་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ལྷ་མོ་གོས་དཀར་མོའི་སྒྲུབ་ཐབས།
ཨོཾ་སྭཱ་སྟི། རིག་སྔགས་ཀུན་གྱི་རྒྱལ་མོ་ནི། །མཐའ་དག་བགེགས་ཀྱི་གཤེད་མ་མཆོག །བཟོད་དཀའ་གཟི་བརྗིད་ཆེན་པོ་འཆང༌། །མཱ་མ་ཀཱི་ལ་རབ་ཏུ་འདུད། །སེམས་བསྐྱེད་དང་ཚད་མེད་བཞི་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། རྡོ་རྗེ་ལྷ་མོ་མཱ་མ་ཀཱི་སྐུ་མདོག་ཨིནྡྲ་ནཱི་ལ་ལྟར་སྔོ་བ། ཕྱག་གཡས་པས་ཡེ་ཤེས་ཀྱི་རྡོ་རྗེ་སྔོན་པོ་རྩེ་ལྔ་པ་མེ་ལྕེའི་ཟེར་འཕྲོ་བ་འཕྱར་བའི་ཚུལ་འཛིན་པ། གཡོན་པས་ཐུགས་ཀར་ཨུཏྤལ་སྔོན་པོའི་ཞགས་པ་དང་བཅས་པའི་སྡིགས་མཛུབ་མཛད་པ། སྡེ་བརྒྱད་ཀྱི་གཙོ་བོ་དྲེགས་པ་ཅན་ཐམས་ཅད་ཁ་བུབ་ཏུ་བསྒྱེལ་བའི་སྟེང་དུ། པདྨ་ཉི་ཟླའི་གདན་ལ་གཡོན་བརྐྱང་གི་སྟབས་ཀྱིས་བཞུགས་པ། དར་སྔོན་པོའི་སྟོད་གཡོགས་དང༌། སྟག་ལྤགས་ཀྱི་སྨད་དཀྲིས་ཅན། སྦྲུལ་དང་རིན་པོ་ཆེ་དང་མེ་ཏོག་གིས་བརྒྱན་པ། བཅུ་དྲུག་ལོན་པའི་ལང་ཚོ་ཅན། སྤྱན་གསུམ་དང་ལྡན་ཞིང་མཆེ་བའི་མྱུ་གུ་གཙིགས་པ། ཁྲོ་ཆགས་འདྲེས་པའི་ཉམས་ཅན། དབུ་སྐྲ་ཕྱེད་ལྟག་པར་བཅིངས་ཤིང་ཕྱེད་གྲོལ་བ། སངས་རྒྱས་མི་བསྐྱོད་པས་དབུ་ལ་བརྒྱན་ཞིང༌། ཚ་ཟེར་འཁྲུགས་པའི་དབུས་ན་བཞུགས་པའོ། །ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀར་རིན་པོ་ཆེ་ལྗང་ཁུ་ཆ་དགུ་པ་དང༌། ལྟེ་བར་པདྨ་འདབ་བརྒྱད། མགྲིན་པར་ཉི་མའི་གདན་དགུ། དེ་རྣམས་ལ་
རིགས་ལྔ་ཡུམ་བཞིའི་ཕྱག་མཚན་དང་སྐུ་དང་ས་བོན་རྣམས་འགོད། ལྟེ་འོག་སོར་བཞིའི་གནས་སུ་ཐོད་པ་ལ་གནས་པའི་རྡོ་རྗེའི་ལྟེ་བར་ས་བོན་སྔགས་འཕྲེང་དང་བཅས་པ་བཀོད་ལ། ཨོཾ་ཀུ་ལཱནྡྷ་རཱི་བནྡྷ་བནྡྷ་ཧཱུཾ་ཕཊ། ཅེས་པ་དང༌། ཨོཾ་ཤངྐ་རི་ཤནྟི་ཀ་རི། གྷུཊྚ་གྷུཊྚ། གྷུཊྚེ་ནི་གྷུཊྚེ་ནི། གྷ་གྷ་གྷཱ་ཏ་ཡ་གྷཱ་ཏ་ཡ་ཧཱུཾ་ཕཊ་སྭཱཧཱ། ཞེས་ཅི་འགྲུབ་ཏུ་བཟླ། སྔགས་ཀྱི་འོད་ཟེར་གོང་ནས་གོང་དུ་སྤྲོས་ཏེ་སྤྱི་བོ་ནས་ཐོན་པ་དང༌། ཡང་རིམ་པ་དེ་ཉིད་གོ་བཟློག་སྟེ་ཚུར་བསྡུ་བ་དང༌། ཡང་གསང་བའི་ལམ་ནས་སྤྲོ་ཞིང་བསྡུ་བ་ཅི་ནུས་སུ་བྱ། མཐར་ཕྱག་རྡོར་ལྷན་སྐྱེས་ཀྱི་མངོན་རྟོགས་བཞིན་གཏོར་མ་ཕུལ་ལ་མི་དམིགས་པར་བཞག་གོ །འདིའི་བྱིན་རླབས་བྱེད་ཚུལ་ནི། ཕྱག་རྡོར་ལྷན་སྐྱེས་ཀྱི་བྱིན་རླབས་བྱེད་ཚུལ་ཉིད་འདོན་པ་སྤོས་པས་རུང་ངོ༌། །བགེགས་འཇོམས་ཀུན༵་ལས་འདི་མཆོག་ཅེས། །རྒྱུད་ལས་དག༵འ་བར་བསྔགས་ན་ཡང༌། །ཕྱོགས་འདིར་ཤིན་ཏུ་དཀོན་པའི་ཕྱིར། །སྙིང༵་པོ༵་འདི་ཡང་འབད་པས་ཞུས། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། འགྲོ་ལྡིང་གི་རྡོ་རྗེའི་སློབ་དཔོན་ཆེན་པོ། དེ་ཝ་སཾ་བྷ་ཝའི་མན་ངགརྡོ་རྗེ་ལྷ་མོ་མཱ་མ་ཀཱིའི་སྒྲུབ་ཐབས་ཀྱི་ལེ་ཚན་ནོ།། །།
རིག་སྔགས་འདི་ཡིས་འགྲུབ་བོ་ཞེས། །རྒྱུད་སྡེ་ཀུན་ལས་གསལ་བར་གསུངས།
ཨོཾ་སྭཱ་སྟི། དབང་དུ་བྱེད་དང་ནད་ཞི་དང༌། །བློ་དང་ཏིང་འཛིན་ནོར་སྒྲུབ་པ། །རིག་སྔགས་འདི་ཡིས་འགྲུབ་བོ་ཞེས། །རྒྱུད་སྡེ་ཀུན་ལས་གསལ་བར་གསུངས། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་རང་གི་
སྙིང་གར་གནས་པའི་པཾ་ཡིག་གི་འོད་ཀྱིས་སྣང་བ་ཐམས་ཅད་དཀྱིལ་འཁོར་གྱི་འཁོར་ལོར་བསྒྱུར། སླར་འདུས་ཏེ་ཐིམ་པ་ཡོངས་སུ་གྱུར་པ་ལས་རང་ཉིད་ལྷ་མོ་གོས་དཀར་མོ་ཆེན་མོ་སྐུ་མདོག་དམར་མོ། ཕྱག་གཡོན་པ་པདྨའི་ཁུ་ཚུར་གྱིས་པདྨ་དམར་པོའི་སྡོང་བུ་བརླ་གཡོན་པའི་སྟེང་དུ་འཛིན་ཞིང༌། གཡས་པས་དེ་ཉིད་ཐུགས་ཀར་ཁ་ཕྱེ་ནས་ལྟེ་བར་གནས་པའི་ནོར་བུ་དམར་པོ་ལ་གཟིགས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་ཤིང༌། སྟོད་གཡོགས་དཀར་པོ་སོགས་དང་དར་དང་རིན་པོ་ཆེས་བརྒྱན་པ། རིག་སྔགས་ཀྱི་འཁོར་ལོས་བསྒྱུར་བ་ཆེན་མོའི་ཆ་བྱད་རྫོགས་པའོ། །ཐུགས་ཀ་ནས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གནས་གསུམ་དུ་ཨོཾ་ཨཱཿཧཱུཾ། སྙིང་གར་པདྨ་དམར་པོ་ཁ་སྦྱོར་གྱི་དབུས་སུ་ཟླ་བ་ལ་ས་བོན་སྔགས་འཕྲེང་དང་བཅས་པ་གསལ་བཏབ་སྟེ། ཨོཾ་ཀ་ཊེ། བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ་སྭཱཧཱ། ཞེས་ཅི་ནུས་སུ་བཟླའོ། །འདིའི་བཟླས་ལུང་འབོགས་ཚུལ་ཡང་འོད་དཔག་མེད་ཀྱི་སྐབས་དང་འདྲའོ། །ལྷ་འདི་དཀྱིལ་འཁོར་ཀུན༵་ལ་ཡོད། །ལོགས་སུ་རབ་དག༵འི་སྒྲུབ་ཐབས་མེད། །དེ་ཕྱིར་འཕགས་ཡུལ་མཁས་པ་ལ། །ཆེད་ཀྱིས་ཞུས་པའི་སྙིང༵་པོ༵འོ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་ལྷ་མོ་གོས་དཀར་མོའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཉི་མའི་བུ་ལས་རྒྱལ་བའི་ཐབས།
ཨོཾ་སྭཱ་སྟི། གང་ལ་འཆི་མེད་ཚེ་སྒྲུབ་ཅིང༌། །སྡིག་འཕྲོག་རྒྱལ་བའི་བྱིན་རླབས་འཇུག །ཉི་མའི་བུ་ལས་རྒྱལ་བའི་ཐབས། །མདོར་བསྡུས་ཙམ་ཞིག་བྲི་བར་བྱ། །བྱང་ཆུབ་ཏུ་སེམས་བསྐྱེད། རང་གི་མདུན་དུ་བཅོམ་ལྡན་འདས་ཤཱཀྱ་ཐུབ་པ་ས་གནོན་མཉམ་བཞག་གི་ཕྱག་རྒྱ་མཛད་ཅིང་སེང་གེ་ལ་བཞུགས་པ། ཨརྒྷཾ་ལ་སོགས་པས་མཆོད། གྲགས་ཆེན་སྙན་གྲགས་ཆེན་པོ་བ། །ཐུབ་ཆེན་དཔའ་བོ་ཆེན་པོ་བ། །སྲིད་པའི་མྱ་ངན་བསྒལ་བ་པོ། །ཉོན་མོངས་བརྒལ་ལ་ཕྱག་འཚལ་འདུད། །བདག་ལ་འཆི་མེད་ཚེའི་དངོས་གྲུབ་སྩལ་དུ་གསོལ། ཞེས་གསོལ་བ་དྲག་ཏུ་བཏབ་པས། བཅོམ་ལྡན་འདས་ཀྱི་དབུའི་གཙུག་ཏོར་ལས་སྔགས་འཕྲེང་དང་བྷྲུཾ་ཡིག་བརྒྱ་རྩ་བརྒྱད་བྱུང་སྟེ། དེ་རྣམས་ཡོངས་སུ་གྱུར་པ་ལས་བཅོམ་ལྡན་འདས་མ་དཀར་མོ་གཡས་སྣ་ཚོགས་རྡོ་རྗེ་དང༌། གཡོན་ལྷུང་བཟེད་བདུད་རྩིའི་གང་བ་འཛིན་པ། རྒྱན་ཐམས་ཅད་ཀྱིས་བརྒྱན་པར་གྱུར། རང་གི་སྤྱི་བོའི་ཐད་དུ་བཞུགས། བདུད་རྩིའི་རྒྱུན་སྤྱི་བོ་ནས་བླུག་པར་བསམ་ལ། རྣམ་རྒྱལ་གཟུངས་རིང་ཉི་ཤུ་རྩ་གཅིག་བཟླས། བཅོམ་ལྡན་འདས་མ་བྷྲུཾ་ཡིག་ཏུ་གྱུར། བྷྲུཾ་བརྒྱ་རྩ་བརྒྱད་བཟླས་པས། རང་ཉིད་གཙུག་ཏོར་རྣམ་པར་རྒྱལ་མར་གྱུར། རང་གི་སྙིང་གར་རྒྱལ་བ་འོད་དཔག་ཏུ་མེད་པ། དེའི་ཐུགས་ཀར་སྣ་ཚོགས་རྡོ་རྗེའི་ལྟེ་བ་ལ་བྷྲུཾ། མཐའ་སྐོར་དུ་སྔགས་ཀྱིས་བསྐོར་བར་བསམས་ལ། ཨོཾ་ཨ་མྲྀ་ཏེ་ཨ་མྲྀ་ཏོཏ་བྷ་ཝེ། ཨ་
མྲྀ་ཏ་བི་ཀྲཱནྟེ། ཨ་མྲྀ་ཏ་ག་ཏེ། ཨ་མྲྀ་ཏ་ག་མི་ནི། ཨ་མྲྀ་ཏ་ཨཱ་ཡུར་ད་ཏེ། ག་ག་ན་ཀྲཱིཏྟི་ཀ་རེ། སརྦ་ཀླེ་ཤ་ཀྵ་ཡཾ་ཀཱ་རི་ཡེ་སྭཱཧཱ། ཞེས་པའི་གཟུངས་ཐུང་འདི་ཉིད་ཅི་ནུས་སུ་བཟླའོ། །གཟུངས་རིང་ལ་མོས་ན་སྟོང་ཕྲག་བརྒྱད། གཟུངས་ཐུང་ལ་མོས་ན་འབུམ་ཕྲག་བཞི་བཟླས་པས། བསྙེན་པའོ། །ཐུན་གྱི་མཐར། མདུན་གྱི་བཅོམ་ལྡན་འདས་ལ་མཆོད་བསྟོད་གསོལ་བཏབ་གོང་བཞིན་བྱས་ནས། རང་གི་སྙིང་གར་ཐིམ། འཇུག་ཏུ་དགེ་བ་བྱང་ཆུབ་ཏུ་བསྔོ། འདིའི་ལུང་འབོགས་པ་ལ། ཐུབ་དབང་གི་བྲིས་སྐུའི་དྲུང་དུ། དཔོན་སློབ་གཉིས་ཀར་གྱིས་ཕྱག་མཆོད་རྒྱས་པར་བྱ། སློབ་དཔོན་གྱིས་གོང་དུ་བཤད་པའི་བསྒོས་བཟླས་དེ་ཚར་གཅིག་བྱས་ནས། སློབ་མས་མཎྜལ་ཕུལ། འོད་དཔག་མེད་ཀྱི་སྒྲུབ་ཐབས་ལྟར་གསོལ་བ་བཏབ། གོང་དུ་བཤད་པ་ལྟར་གྱི་མངོན་རྟོགས་སྒོམ་ཚུལ་ཚར་གཅིག་བཤད་ནས། གཟུངས་རིང་ཐུང་གཉིས་ལ་བཟླས་ལུང་སྤྱི་དང་མཐུན་པར་སྦྱིན་པ་ཉིད་ཡིན་ནོ། །རྣམ་རྒྱལ་སྒྲུབ་ཐབས་སྔོན་བྱུང་བ། །ཀུན༵་དང་ཐུན་མོང་མ་ཡིན་པའི། །ངོ་མཚར་དག༵འ་བསྐྱེད་ཆོས་མང་ཅན། །སྙིང༵་པོ༵་འདི་འདྲའང་བདག་གིས་ཐོབ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏས་མན་ངག་གཙུག་ཏོར་རྣམ་རྒྱལ་ཕྱག་གཉིས་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཙུནྡའི་རིག་སྔགས་ལ་ཕྱག་འཚལ།
ཨོཾ་སྭཱ་སྟི། བར་ཆད་ཞི་ཞིང་ཡེ་ཤེས་འབེབས། །བསྲུང་ཞིང་ལྷ་སོགས་དབང་དུ་བྱེད། །སངས་རྒྱས་བསྟན་པ་རྒྱས་མཛད་པ། །ཙུནྡའི་རིག་སྔགས་ལ་ཕྱག་འཚལ། །སེམས་བསྐྱེད་སྔོན་
དུ་འགྲོ་བས། ཤཱུ་ནྱ་ཏཱས་སྟོང་པས་སྦྱངས། སྟོང་པའི་ངང་ལས་པད་ཟླ་ལ་རང་སེམས་ཙུཾ་ཡིག་དཀར་པོ་ལས། ལྷ་མོ་ཙུནྡ་དཀར་མོ་འོད་ཟེར་དམར་པོ་འབར་བ། དབུ་ལ་རྒྱལ་བ་རིགས་ལྔ་བཞུགས་པ། དཀར་སྔོ་སེར་བའི་ཞལ་གསུམ། ཕྱག་དང་པོ་གཉིས་ཐུགས་ཀར་རང་གི་རྩ་བའི་ཕྱག་རྒྱ་འཆིང་བ། ལྷག་མ་ཉི་ཤུ་རྩ་བཞི་ཡི། །གཡས་རྣམས་སྐྱབས་སྦྱིན་རལ་གྲི་འཕྲེང༌། །བི་ཛ་པུ་ར་མདའ་དགྲ་སྟ། །ག་ད་ཐོ་བ་ལྕགས་ཀྱུ་དང༌། །རྡོ་རྗེ་བ་དན་བགྲང་ཕྲེང་འཛིན། །གཡོན་རྣམས་རྒྱལ་མཚན་པདྨ་དང༌། །སྤྱི་བླུགས་ཞགས་པ་གཞུ་ཤཀྟི། །འཁོར་ལོ་རལ་གྲི་སྡིགས་མཛུབ་བུམ། །འཕང་མདུང་ཤེར་ཕྱིན་པོ་ཏི་འཛིན། །ཞབས་གཉིས་སེམས་དཔའི་སྐྱིལ་ཀྲུང་གིས་བཞུགས་པ་ཡིད་ཙམ་ཁྲོ་ཞིང་ཐོར་ཚུགས་ཅན། དར་དང་རིན་པོ་ཆེའི་རྒྱན་གྱིས་བརྒྱན་པའོ། །ཕྱོགས་བཞི་དང་སྟེང་འོག་དང༌། རང་གི་བ་སྤུའི་བུ་ག་རྣམས་ལ་སངས་རྒྱས་བྱེ་བ་བྱེ་བ་བཞུགས་ཤིང༌། དེ་རྣམས་ལ་མཆོད་ཅིང་དེ་རྣམས་ཀྱིས་བསྟོད་པ། ཐུགས་ཀར་ཟླ་བ་ལ་ཙམ། དེ་ལས་འོད་ཟེར་འཕྲོས་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། སྙིང་གའི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བ་དང་འདབ་མ་བརྒྱད་ལ་སྔགས་ཡི་གེ་དགུ་བཀོད་དེ། དེ་དག་ལས་བྱུང་བའི་འོད་ཀྱི་གོང་བུ་དགུའི་ནང་དུ་རིགས་
ལྔ་ཡུམ་བཞི་བཞུགས་པར་གྱུར། དེ་རྣམས་ཀྱི་འོད་ཀྱིས་འཇིག་རྟེན་སྐྱོང་བ་བརྒྱད་དང༌། ཚངས་པ་དང༌། སའི་ལྷ་མོ་རྣམས་ཀྱི་སྡིག་སྒྲིབ་སྦྱངས་བར་བསམ། ཨོཾ་ཙ་ལེ་ཙ་ལེ་ཙུནྡེ་སྭཱཧཱ། ཞེས་ལན་དགུ་བཟླས་སོ། །དེ་ནས་བཟླས་པ་ནི། ན་མཿས་མནྟ་བུདྡྷཱ་ནཱཾ། སམྱཀྶཾ་བུདྡྷཱ་ཀོ་ཊཱི་ནཾ། ཏདྱ་ཐཱ། ཨོཾ་ཙ་ལེ་ཙུ་ལེ་ཙུནྡེ་སྭཱཧཱ། ཞེས་པ་ཉིད་གང་འགྲུབ་ཏུ་བཟླའོ། །ཐུན་མཚམས་སུ་སྐུ་གཟུགས་ལ་མཆོད་བསྟོད་དང་མདོ་འདོན། མཎྜལ་མཆོད་ཆོག་བྱེད་ན། བདག་བསྐྱེད་ལ་དཔགས་ན་སྤྱིའི་རིགས་འགྲེ་ཞིང༌། གཏོར་ཆོག་གཅིག་ཏུ་དགོས་པ་མ་ཡིན་ཀྱང༌། སྤྲོ་ན་གསང་འདུས་ཡེ་ཤེས་ཞབས་ལུགས་ལྟར་བྱིན་གྱིས་བརླབས་ནས། སྙིང་པོའི་མཐར་ཨ་ཀཱ་རོ་བཏགས་པས་འབུལ། སློབ་མ་རྗེས་འཛིན་ནི། བཟླས་ལུང་བྱེད་པ་སྟེ་འོད་དཔག་མེད་ཀྱི་སྐབས་དང་འདྲའོ། །རྩ་བའི་ཕྱག་རྒྱ་ནི་མཛུབ་མོ་གཉིས་གུང་མོའི་ཚིགས་བར་པ་ལ་བཙུགས། མཐེ་བོང་གཉིས་ཀྱི་རྩེ་མོ་མཛུབ་མོའི་རྩ་བ་ལ་བཞག་པའི་ཐལ་མོ་སྦྱར་བའོ། །སངས་རྒྱས་ཀུན༵་གྱིས་བསྟོད་གྱུར་པ། །རབ་དག༵འ་ལྷ་མོ་མཐུ་ལྡན་འདིའི། །སྙིང༵་པོ༵་བཟླས་པས་པཱ་ལ་བདུན། །ཆོས་སྐྱོང་རྒྱལ་པོར་གྱུར་ཞེས་ཐོས། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་ལྷ་མོ་ཙུནྡའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཁྲོ་བོ་གཞན་གྱིས་མི་ཐུབ་པའི་སྒྲུབ་ཐབས།
ཨོཾ་སྭཱ་སྟི། མི་ཕམ་མགོན་པོའི་རྣམ་འཕྲུལ་ལས། །དེ་ཡི་རྗེས་འབྲང་ཁྲོ་རྒྱལ་ནི། །ཤེས་རབ་མཐར་བྱེད་རྣམ་སྤྲུལ་པ། །བགེགས་ཀུན་འཇོམས་ལ་ཕྱག་འཚལ་ལོ། །སེམས་
བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་པད་ཉི་ལ་རང་སེམས་ཧཱུཾ་སེར་པོ་ལས། ཁྲོ་རྒྱལ་གཞན་གྱིས་མི་ཐུབ་པ་སྐུ་མདོག་གསེར་མདོགགཡས་རྡོ་རྗེས་མཚན་པའི་བེ་ཅོན་དཀར་པོ་འཕྱར་ཞིང༌། གཡོན་ཞགས་པ་དང་བཅས་པའི་སྡིགས་མཛུབ་ཐུགས་ཀར་གཏོད་ཚུལ་གྱིས་ཡུམ་ལ་འཁྱུད་པ། ཞབས་གཡས་བསྐུམ་གཡོན་བསྐྱང་བས་སྲིན་པོ་ཕོ་མོ་མནན་པ། སྟག་ལྤགས་དང་སྦྲུལ་དང་མགོ་འཕྲེང་གི་རྒྱན་ཅན། དེའི་པང་དུ་ཨོཾ་ལས་གཞན་གྱིས་མི་ཐུབ་མ་སྐུ་མདོག་སེར་མོ་གཡས་ཐལ་མོ་སྦྱར་ཞིང༌། གཡོན་ཞགས་པ་འཛིན་པའི་སྡིགས་མཛུབ་ཀྱིས་ཡབ་ལ་འཁྱུད་པ། གཅེར་བུ་རིན་པོ་ཆེའི་རྒྱན་དང་ལྡན་པ། ཞབས་གཡོན་བསྐུམ་པས་ཡབ་ལ་འཁྱུད་ཅིང༌། གཡས་བརྐྱང་བས་ཚོགས་བདག་མནན་པའོ། །གཉིས་ཀར་ཡང་རྣམ་སྣང་གི་དབུ་རྒྱན་ཅན་མེ་དཔུང་འབར་བའི་སྐུ་ཅན་གྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ལག་གཡས་ཐལ་མོ་སྦྱར། གཡོན་སྡིགས་མཛུབ་བྱས་ལ་ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ལྷེང་སྣ་དང༌། སོག་ཕྲག་དང༌། རྩིབས་ལོགས་གཡས་གཡོན་དང༌། སྟ་ཟུར་གཡས་གཡོན་དང༌། སྤྱི་གཙུག་དང་ལྟེ་བ་རྣམས་སུ་རྣམ་གཟིགས་ལ་སོགས་པའི་དེ་བཞིན་གཤེགས་པ་བདུན་དང༌། བྱམས་པ་ལ་སོགས་པ་བཞུགས་པར་བསམ། ཁྱོགས་ཀྱི་བཟླས་པའི་དམིགས་པ་གསལ་བཏབ་
ལ། ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲ་ཎི་ཨོཾ་ཧཱུཾ་ཛི་ན་རི་ཊིཊྚ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཞེས་ཡབ་ཀྱི་སྔགས་དང༌། ཨོཾ་ཨོཾ་ཨ་པ་ར་ཛི་ཏཱེ་དྷི་ཀ་སྭཱཧཱ། ཡུམ་གྱི་སྔགས་སོ། གཏོར་ཆོག་ཙུནྡའི་སྒྲུབ་ཐབས་ཀྱི་རིགས་འགྲེ། ལུང་འབོགས་ཚུལ་ཡང་འདྲའོ། ཁྲོ་བཅུ་ཀུན༵་གྱི་ཞོར་ཙམ་ལས། ལོགས་སུ་སྒྲུབ་ཐབས་སྔར་མེད་པ། །དག༵འ་བས་བླ་མ་ལ་ཞུས་ཏེ། སྙིང༵་པོ༵་ཙམ་འདི་རྙེད་པ་ལགས། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་ཁྲོ་བོ་གཞན་གྱིས་མི་ཐུབ་པའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
རྟ་མགྲིན་དཀར་པོའི་སྒྲུབ་ཐབས།
ཨོཾ་སྭཱ་སྟི། གསུང་མཆོག་བདེ་སྟོང་ལྷ་ཡི་སྐུ། །ཡེ་ཤེས་ཧ་ཡ་གྲྀ་བ་ལ། །བཏུད་ནས་དེ་ཡི་སྒྲུབ་ཐབས་ནི། །ཤིན་ཏུ་ཟབ་པའི་མན་ངག་བཤད། །སྙིང་རྗེ་ཆེན་པོ་དུང་བ་ཞིག་བསྒོམ། རང་སེམས་ཧྲཱིཿདཀར་པོ་ཡོངས་སུ་གྱུར་པ་ལས། རང་ཉིད་རྟ་མཆོག་རོལ་པ་སྐུ་མདོག་དཀར་ལ་དམར་བའི་མདངས་ཅན། ཕྱག་གཡས་པདྨས་མཚན་པའི་དབྱུག་པ་འཕྱར་བ། གཡོན་པདྨའི་ཞགས་པ་འཛིན་པས་ཡུམ་ལ་འཁྱུད་པ། པད་ཉིའི་སྟེང་དུ་གཡོན་བརྐྱང་གི་སྟབས་ཀྱིས་བགེགས་ཐམས་ཅད་གནོན་པ། དབུའི་སྟེང་དུ་རྟ་མགོ་སྔོན་པོ་ཅན་ཁྲོ་བོའི་རྒྱན་དང་ཆ་ལུགས་ཡོངས་སུ་རྫོགས་པའོ། །ཡུམ་རལ་གཅིག་མ་སྔོན་མོ་གྲི་གུག་དང་ཐོད་པ་འཛིན་པས་འཁྱུད་པ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ལྟེ་བར་ཏྲཾ། གསང་གནས་སུ་ཨ། ནོར་བུ་གཞལ་མེད་
ཁང་གི་ནང་དུ་ཧྲཱིཿལས་རྟ་མགྲིན་རང་དང་མཚུངས་པ་ལས་སྐུ་མདོག་ལྗང་ཁུ་ཡུམ་གྱི་པདྨའི་སྣ་རྩེར་རྡོ་རྗེ་སྡེར་མོ་སྔོ་སྐྱ་ཕག་གདོང་ཅན་ཌཱ་མ་རུ་དང་ཐོད་པ་འཛིན་པ་རྗེས་ཆགས་སྙོམས་འཇུག་གི་བདེ་བས་མཆོད་པར་བསམ། རྡོ་རྗེ་ཤུགས་ཀྱི་ཕྱག་རྒྱ་ཟློག་སྟེ་རྩེ་མོ་བསྟན་ལ་སྙིང་པོས་དམ་ལ་བཞག །ཨོཾ་བཛྲ་ཁུ་ར་ཝི་ཀྲི་ཏཱ་ན་ན་ཧཱུཾ་ཕཊ། ཨོཾ་ཨེ་ཧྱེ་ཧི་བྷ་ག་ཝ་ཏཱི་ཡཀྵི་ཎཱི་ཡེ། ཨེ་ཀ་ཛ་ཊཱི་ཎེ། རཀྟ་ས་ཧི་ཏེ། དེ་ཝི་བིགྷྣཱན་པྲ་ཤ་མ་ཎི་སྭཱཧཱ། ཕྱིའི་ཡབ་ཡུམ་གཉིས་ཀྱི་སྔགས་སོ། །གསང་བའི་ལྷ་ལ་དམིགས་ནས། ཨོཾ་ཨ་མྲྀ་ཏ་བྷ་ཝོཏྦྷ་ཝ་སེ་སྭཱཧཱ། ཨོཾ་ཨེ་ཧྱེ་ཧི། བཛྲ་ན་ཁཱི། བཛྲ་མུ་ཁཱི། ཧ་ན་ཧ་ན། ཧ་ན་ཧ་ན། པ་ཙ་པ་ཙ། རངྒ་རངྒ། ཨ་ཝ་ཨ་ཝ། ཨཱ་བི་ཤ་ཨཱ་བི་ཤ ཧ་ཡ་གྲྀ་ཝ་པ་ཡ་ཏི་སྭཱཧཱ། ཞེས་བཟླས། དབྱུག་པ་སྦྲུལ་གྱིས་དཀྲིས་པ་ལ། །ཉི་ཟླ་རླུང་གི་འགྲོ་འོད་ཅན། །ཉི་ཟླ་མཆོད་ཅིང་ཉི་ཟླ་བཏུད། །འདི་ནི་རྫོགས་པ་མཆོག་ཡིན་ནོ། །འདི་ཟབ་མོའི་སྒྲུབ་ཐབས་ཀྱི་ལུགས་ཡིན་པས་ཕྱིའི་མཆོད་གཏོར་མེད། ལྷའི་ང་རྒྱལ་ལ་གནས་པས། འདོད་ཡོན་ལྔ་ལ་རོལ་པའི་མཆོད་པ་དང༌། འབྲུ་གསུམ་གྱིས་བྱིན་གྱིས་བརླབས་ནས་ཁ་ཟས་བཟའ་བའི་གཏོར་མ་དང༌། དངོས་སམ་ཡིད་ལས་བྱུང་བ་རྗེས་ཆགས་ཀྱི་ཚོགས་ཀྱི་འཁོར་ལོ་རྣམས་སོ། །འདིའི་ཏིང་ངེ་འཛིན་གྱི་དབང་བསྐུར་བྱེད་པར་འདོད་ན། མདུན་དུ་ཐོད་པ་ཆང་གིས་བཀང་བ་དང་དབྱུག་པ་དང་ཞགས་པ་རྣམས་བཞག བདག་དང་
དེ་རྣམས་རོ་གཅིག་ཏུ་བསྒོམས་ཏེ། གོང་བཞིན་མངོན་རྟོགས་བསྒོམས་ནས་བཟླས་པ་ཅི་ནུས་བྱའོ། །དེ་ནས་སློབ་མས། ཨོཾ་ཧེ་བཛྲ་ཨཱ་ཙཪྱ་མ་མ་ཨ་ཏི་ཥྛནྟུ་ཀུ་རུ་ཧཱུཾ། ཞེས་ལན་གསུམ་གྱིས་གསོལ་བ་བཏབ། གུར་ནས་འབྱུང་བ་བཞིན་ཡན་ལག་བདུན་པ་བྱ། སློབ་མའི་བློ་ངོར་སློབ་དཔོན་མངོན་རྟོགས་ལྟར་བསྒོམ་དུ་བཅུགདེ་ལས་སྐུ་གཉིས་པ་ཞིག་ཆད་ནས་སློབ་མ་ལ་བསྟིམ་པས། སློབ་མ་རྟ་མགྲིན་དུ་གྱུར་པའང་མངོན་རྟོགས་བཞིན། བར་དེར་བཟླས་ལུང་སྤྱི་དང་མཐུན་པར་ཕོགཡབ་ཀྱི་སྔགས་ཀྱིས་ལན་གསུམ་བྱིན་གྱིས་བརླབས་པའི་དབྱུག་པ་ལག་པ་གཡས་སུ་སྦྱིན། རལ་གཅིག་མའི་སྔགས་ཀྱིས་བྱིན་གྱིས་བརླབས་པའི་ཞགས་པ་གཡོན་དུ་སྦྱིན། དབྱུག་པས་ཁམས་གསུམ་འདུལ་བ་དང༌། ཞགས་པས་ཁམས་གསུམ་དབང་དུ་བྱེད་པའི་དམིགས་པ་བསྒོམ་དུ་གཞུགབུམ་དབང་ངོ༌། །ཡབ་ཀྱི་སྔགས་གསང་བ་བརྗོད་ཅིང༌། ཐོད་པ་ནས་མྱོས་བྱེད་ཅུང་ཟད་སྦྱིན། ཉམས་མྱོང་བརྗོད་དུ་མེད་པ་ངོ་སྤྲད་དེ་གསང་དབང༌། རྡོ་རྗེ་སྡེར་མོའི་སྔགས་བརྗོད་ཅིང་ཐོད་པའི་ཆང་རིམ་གྱིས་བཏུང་དུ་གཞུགཉམས་མྱོང་ཤེས་རབ་ཡེ་ཤེས་ཀྱི་དབང་དུ་ངོ་སྤྲད། པི་ཝཾ་ངཾ་གླིང་བུའམ་དྲིལ་བུའི་སྒྲ་གྲག་སྟོད་དབང་བཞི་པར་ངོ་སྤྲད་དེ། དེ་ནས་ཡོན་འབུལ། ཚོགས་ལ་ལོངས་སྤྱོད་དོ། །འདི་ལ་རྗེས་ཀྱི་ཆོ་གའི་བྱ་བ་ནི་མེད་དོ། །སྒྲུབ་ཐབས་ཀུན༵་ལས་ལྷག་པ་ཡི། །མཆོག་གྲུབ་རྟ་མགྲིན་ཆེས་དགའ༵་བས། །སྙིང༵་པོ༵འི་ཡེ་ཤེས་འཆར་བ་འདི། །མཆོག་ཏུ་གསང་བ་བླ་མེད་ཡིན། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་རྟ་མགྲིན་དཀར་པོའི་སྒྲུབ་ཐབས་ཀྱི་ལེ་ཚན་ནོ།། །།
མི་གཡོ་མགོན་པོའི་སྒྲུབ་ཐབས།
ཨོཾ་སྭཱ་སྟི། རྣམ་པར་འདྲེན་པ་ཐམས་ཅད་ཀྱིས། །བཀའ་བཞིན་སྒྲུབ་པ་མི་གཡོ་མགོན། ཁྲོ་བོའི་དབང་པོར་རབ་བཏུད་ནས། །དེ་ཡི་སྒྲུབ་ཐབས་མདོ་ཙམ་བཤད། །སེམས་བསྐྱེད་སྔོན་དུ་འགྲོ་བས། ཆོས་ཐམས་ཅད་སྟོང་པ་ཉིད་དུ་སྦྱངས། སྭ་བྷཱ་ཝས་སྔགས་བརྗོད། རང་གི་སྙིང་གར་ཧཱུཾ་དེ་ལས་འོད་འཕྲོས། ལུས་ཐམས་ཅད་གང་འོད་ཀྱི་གོང་བུར་གྱུར། དེ་ལས་རང་ཉིད་ཁྲོ་རྒྱལ་མི་གཡོ་བ་སྐུ་མདོག་དམར་པོ་ཕྱག་དང་པོ་གཉིས་རལ་གྲི་དང་ཞགས་པ། བར་པ་གཉིས་ལྕགས་ཀྱུ་དང་ཐོད་པ། ཐ་མ་གཉིས་དབྱུག་པ་དང་སྡིགས་མཛུབ། ཞབས་མདུན་མ་གཉིས་གཡས་བསྐུམ་གཡོན་བརྐྱང་བས་བདུད་དང་དགའ་མ་མནན་པ། རྒྱབ་མ་གཉིས་གར་སྟབས་ཀྱིས་ཚངས་པ། ཁྱབ་འཇུགདབང་ཕྱུག་རྣམས་མནན་པ། ཡུམ་གཏུམ་མོ་དགའ་བྱེད་མ། ཌཱ་མ་རུ་དང་མེ་ཏོག་གི་འཕྲེང་བ་འཛིན་པས་འཁྱུད་པ། ཐགས་བཟང་རིས་དང༌། ཀླུ་ཞབས་འོག་ཏུ་མནན་པ། ཡབ་ཡུམ་གཉིས་ཀར་ཁྲོ་བོ་དང་ཁྲོ་མོའི་ཆ་ལུགས་ཡོངས་སུ་རྫོགས་པའོ། །རང་གི་སྤྱི་བོར་རྣམ་སྣང༌། མགྲིན་པར་འོད་དཔག་མེད། སྙིང་གར་མི་བསྐྱོད་པ། ལྟེ་བར་རིན་ཆེན་ཏོགགསང་བར་དོན་གྲུབ། དེ་རྣམས་ལས་མི་གཡོ་བ་རིགས་ལྔ་དཔག་ཏུ་མེད་པ་སྤྲོས་ཏེ། དགྲ་བགེགས་
ཐམས་ཅད་ཚར་བཅད། ཡུམ་གྱི་སྤྱི་བོར་སྤྱན་མ། མགྲིན་པར་གོས་དཀར་མོ། སྙིང་གར་མཱ་མ་ཀཱི ལྟེ་བ་རིན་ཆེན་གློག་མ། གསང་བར་སྒྲོལ་མ། དེ་རྣམས་ལས་གཏུམ་མོ་དགའ་བྱེད་མ་རིགས་ལྔ་དཔག་ཏུ་མེད་པ་སྤྲོས་ཏེ། སྐྱེ་འགྲོ་ཐམས་ཅད་དབང་དུ་བསྡུས་པར་བསམས་ལ། ཨོཾ་ཀ་ནི་དྷུ་ནི་ཧཱུཾ་ཕཊ། ཞེས་པ་ཉིད་གཙོ་བོར་བཟླ་ཞིང༌། ཨོཾ་ཨ་མོ་གྷ་ཙཎྜ་མཧཱ་རོ་ཥ་ཎ་ཡ་ཕཊ་ཡ་ཧཱུཾ་ཏྲ་ས་ཡ་ཧཱུཾ། ཏྲ་ཊ་རཾ་མཾ་ཞེས་ཡབ་དང༌། ཨོཾ་བཛྲ་ཙཎྜི་ཧ་ཧ་མ་ར་མ་ར། ཨ་ཀཱརྵ་ཨ་ཀཱརྵ་ཡ་ཧཱུཾ་ཕཊ། ཅེས་ཡུམ་གྱི་འཕྲེང་སྔགས་ཀྱང་ཅི་རིགས་པར་བཟླའོ། །མཇུག་ཏུ་དགེ་བ་བསྔོ། གཏོར་མ་འབྲུ་གསུམ་ལན་བདུན་གྱིས་བྱིན་གྱིས་བརླབས། ཡབ་ཀྱི་རྩ་སྔགས་ཀྱིས་སྤྱན་དྲངས་ཏེ། ཨ་ཀཱ་རོའི་སྔགས་ཀྱིས་འབུལ། འདིའི་བྱིན་རླབས་ནི། ཕྱག་རྡོར་ལྷན་སྐྱེས་ཀྱི་སྐབས་དང་ཕལ་ཆེར་འདྲ་བ་ལས། ཆོས་འབྱུང་དམར་པོར་བྲིས། རྡོ་རྗེའི་ཚབ་ཏུ་རལ་གྲི་བཞགལྷ་བསྒོམས་སྔགས་བཟླས་ཀྱི་ལུང་གི་སྐབས་མངོན་རྟོགས་བཞིན་དུ་ལྷའི་རྣལ་འབྱོར་ཕོག་ལ་བཟླས་ལུང་སྤྱི་དང་མཐུན་པར་སྦྱིན། ཤེར་དབང་གི་སྐབས་རལ་གྲི་སྙིང་གར་བཞགབསྟོད་པའི་སྐབས་མི་གཡོ་བའི་བསྟོད་པ་གང་རུང་ཞིག་གིས་བསྟོད། འདིའི་བསྟོད་པ་ལོགས་སུ་ཡོད་པས་ཤེས་ན་དེ་ཡང་འདོན། ལྷག་མ་འདོན་པ་སྤོས་པས་འགྲུབ་བོ། །ངོ་མཚར་དངོས་གྲུབ་སྣང་བརྙན་ཅན། །ས་ཀུན༵་སྐྱོང་བས་བསྒྲུབས་པ་ན། །ཕུན་ཚོགས་དཔལ་ལ་དག༵འ་མགུར་སྤྱད། །དབང་
བསྒྱུར་ལྷ་ཡི་སྙིང༵་པོ༵་ལགས། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་མི་གཡོ་བ་དམར་པོའི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །
ལྷ་མོ་འོད་ཟེར་ཅན་མའི་སྒྲུབ་ཐབས།
ཨོཾ་སྭཱ་སྟི། མ་ལུས་བགེགས་རྣམས་འདུལ་མཛད་པར། །སངས་རྒྱས་ཀུན་གྱིས་བྱིན་རླབས་ཤིང༌། །ཉི་ཟླའི་འོད་དང་རྟག་རོལ་བ། །ལྷ་མོ་འོད་ཟེར་ཅན་ལ་འདུད། །སེམས་བསྐྱེད་དང་སྟོང་ཉིད་སྔོན་དུ་འགྲོ་བས། རང་སེམས་མཾ་ཡིག་ཡོངས་སུ་གྱུར་པ་ལས་རང་ཉིད་འོད་ཟེར་ཅན་མ་ལི་ཁྲིའི་མདོག་ཅན། ཞལ་གསུམ་ཕྱག་དྲུག་གི་གཡས་རྣམས་ཀྱིས་རྡོ་རྗེ་ཁབ་སྐུད་སྦྱར་བ། མདའ། གཡོན་རྣམས་ཀྱིས་ཞགས་པ་དང་བཅས་པའི་སྡིགས་མཛུབ། ཨ་ཤྭ་ཀ་གཞུ་རྣམས་འཛིན་པ། གཡས་བསྐུམ་གཡོན་བརྐྱང༌། དར་དང་རིན་པོ་ཆེ་དང་མེ་ཏོག་གིས་བརྒྱན་པ། ཉི་མའི་རྒྱབ་ཡོལ་ཅན་རྒྱལ་བ་རིགས་ལྔ་དབུ་ལ་བཞུགས་པ། རྟ་བདུན་གྱིས་དྲངས་པའི་ཤིང་རྟ་ལ་གནས་པ། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ སྙིང་གའི་འོད་ཟེར་གྱིས་རྡོ་རྗེའི་ས་གཞི་དང་ཕག་གི་རྭ་བ་དང༌། མདའ་གཞུའི་གུར་ཁབ་སྐུད་དང་ཞགས་པའི་དྲ་བ། ཕྱི་རོལ་དུ་མྱ་ངན་མེད་པའི་ཤིང་གིས་བསྐོར་བར་གྱུར། ཨོཾ་མཱ་རཱི་ཙྱཻ་དེ་ཝ་ཏ་ཡེ་སྭཱཧཱ། ཞེས་ཅི་འགྲུབ་ཏུ་བཟླའོ། །ཉི་མ་དང་ཟླ་བ་འཆར་ནུབ་ཀྱི་ཚེ། མཆོད་པ་ལ་བརྩོན་པར་བྱ། གཏོར་མ་མི་དགོས། སློབ་མ་ལ་བཟླས་ལུང་བྱེད་ཚུལ་
འོད་དཔག་མེད་ཀྱི་སྐབས་དང་འདྲའོ། །རྒྱུད་ཀུན༵་བདག་པོ་སྒྱུ་དྲ་ལས། །ལེགས་གསུང་སྒྲུབ་ཐབས་དག༵འ་བའི་ཕུལ། །མགྱོགས་འགྲོའི་ཤིང་རྟ་དང་བཅས་པའི། །མངོན་རྟོགས་སྙིང༵་པོ༵་ངོ་མཚར་རྨད། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་འོད་ཟེར་ཅན་མ་རྟ་ལྗང་ཅན་གྱི་སྒྲུབ་ཐབས་ཀྱི་ལེ་ཚན་ནོ། །དར་རྒྱས་འཕེལ། །
རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས།
རྒྱལ་མཚན་རྩེ་མོའི་དཔུང་རྒྱན་གྱི་སྒྲུབ་ཐབས་སོ། །ཨོཾ་སྭཱ་སྟི། ལྷ་མིན་གཡུལ་ལས་རྒྱལ་བ་དང༌། །བགེགས་རྣམས་མཐའ་དག་ཉམས་བྱེད་པའི། །རྒྱལ་མཚན་རྩེ་མོའི་དཔུང་རྒྱན་གྱི། །རིག་སྔགས་སྒྲུབ་ཐབས་བདག་གིས་བཤད། །སེམས་བསྐྱེད་སྔོན་དུ་འགྲོ་བས། ཤཱུ་ནྱ་ཏཱས་སྟོང་པར་སྦྱངས། རང་གི་སྙིང་གར་དྷྭཾ་ཡིག་གི་འོད་ཟེར་གྱིས་རང་ཉིད་རྒྱལ་མཚན་རྩེ་མོའི་དཔུང་རྒྱན་རྡོ་རྗེ་རོ་ལངས་མར་གྱུར་པ་ནི་མཐིང་ནག་དྲག་མོ། ཞལ་བཞི་མཐིང་ཁ། ཕྱག་བརྒྱད་གཡས་རྣམས་རལ་གྲི། གཏུན་ཤིང༌། འཁོར་ལོ། མདའ། གཡོན་ན་རྩེ་གསུམ། ཞགས་པ། གཞུ། སྡིགས་མཛུབ། ཞབས་བཞིས་བདུད་བཞི་མནན་པ། མི་བསྐྱོད་པའི་དབུ་རྒྱན་ཅན། ཁྲོ་མོའི་ཆ་ལུགས་དང་རྒྱན་དང་ན་བཟའ་ཡོངས་སུ་རྫོགས་པའོ། །དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ན་མོ་བྷ་ག་ཝ་ཏེ། དྷྭ་ཛ་ཨ་གྲ་ཀེ་ཡཱུ་རེ། པ་ར་སྱཻ་ནྱ། བིདྷྭ་ནྶ་ནཱ་ཀྭ་སྭ་སཻ་ནྱ་བ་རི་
ལ་ནི། ཨུ་མུ་ཀཱ་མུ་ཁི་ཁ་ཁ་ཁཱ་ཧི་ཁཱ་ཧི། པ་ར་མ་སཻ་ནྱ་མ། ཨ་ནནྡ་བྷུ་ཛེ། ཨ་ནནྡ་མུ་ཁེ། པྲ་ཧ་ར་པྲ་ཧ་ར་ཧཱུཾ་ཕཊ་ཕཊ་སྭཱཧཱ། ཞེས་བཟླ་ཞིང་བ་སྤུའི་ཁུང་བུ་རྣམས་ནས་འོད་ཟེར་འཕྲོས། དེ་བཞིན་གཤེགས་པ་ཐམས་ཅད་མཉེས་པར་བྱས་ཤིང༌། མིང་པོ་གསུམ་གྱིས་དམག་ཚོགས་བསྐུལ་ཏེ། གདུག་པ་ཅན་ཚར་བཅད་པར་བསམ། མཆོད་པ་དང་གཏོར་མ་སྤྱི་དང་མཐུན། བཟླས་ལུང་འབོགས་ཚུལ་ཡང་འོད་དཔག་མེད་ཀྱི་སྐབས་བཞིན་ནོ། །དགྲ་འཇོམས་གཡུལ་ལས་རྒྱལ་བའི་ལྷ། ཀུན༵་གྱི་མཆོག་གྱུར་རབ་དག༵འ་འདི། །རྒྱུད་ལས་གསུངས་པའི་སྙིང༵་པོ༵་ཞེས། །ཟབ་མོར་ངེས་ནས་དོན་གཉེར་བྱས། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་རྒྱ་མཚན་རྩེ་མོའི་དཔུང་བརྒྱན་གྱི་སྒྲུབ་ཐབས་ཀྱི་ལེ་ཚན་ནོ།། །།མངྒ་ལཾ། །
གཏུམ་མོ་རོ་ལངས་མའི་སྒྲུབ་ཐབས།
ཨོཾ་སྭཱ་སྟི། བདེ་གཤེགས་མཐའ་དག་སྐྱེད་བྱེད་ཡུམ། །ཡེ་ཤེས་དབང་ཕྱུག་མ་ལས་སྤྲུལ། །གཏུམ་མོ་རོ་ལངས་མ་ཞེས་གྲགས། །དེ་ལ་བཏུད་ནས་སྒྲུབ་ཐབས་བཤད། །རྒྱུད་ཀྱི་དངོས་བསྟན་ལས་གསུངས་པའི་དུད་གསོལ་མ་ནི། འདི་ཁོ་ན་ཡིན་ཅེས་གསུངས་ཏེ། བདག་བསྐྱེད་གཙོ་བོར་བྱས་ཏེ་སྒྲུབས་ཀྱང་རུང༌། མདུན་བསྐྱེད་ཁོ་ནས་བསྒྲུབས་ཀྱང་རུང་བ་ལས། འདིར་ཕྱི་མ་བཤད་ན་ཡི་དམ་གྱི་བདག་བསྐྱེད་གང་ཡང་རུང་བ་སྔོན་དུ་འགྲོ་བས། སྟོང་པའི་ངང་ལས་རང་གི་མདུན་དུ་པད་ཉི་དང་མི་རོའི་གདན་ལ། ཨོཾ་མ་ཐ་མ་ཐ་དུཥྟ་ཧཱུཾ་ཕཊ། ཞེས་པ་ཡོངས་སུ་གྱུར་པ་ལས་རོ་ལངས་མ་ནག་མོ་སྐྲ་དམར་སེར་གཡོན་ངོས་
སུ་འཁྱིལ་བ། ཕྱག་དང་པོ་གཉིས་རལ་གྲི་དང་ཐོད་ཁྲགའོག་མ་གཉིས་ཀྱིས་རྡོ་རྗེ་རྩེ་གཅིག་པ་དང་ཁ་ཊྭཱཾ་ག་འཛིན་པ། སྤྱན་གསུམ་མཆེ་གཙིགས་སྦྲུལ་དང་མི་མགོས་བརྒྱན་པ། སྟག་ལྤགས་ཀྱི་ཤམ་ཐབས་དང༌། གླང་ལྤགས་ཀྱི་སྟོད་གཡོགས་གསོལ་བ། དུར་ཁྲོད་ཆེན་པོའི་གནས་མེ་རླུང་འཚུབ་མའི་དབུས་སུ་མ་མོ་འབུམ་སྡེས་བསྐོར་བ། སྐུའི་གཡས་གཡོན་ན་གདུག་པའི་སྦྲུལ་གྱི་ཕོ་ཉ་འགྱེད་པའོ། །རང་གི་སྙིང་ག་ནས་འོད་ཟེར་འཕྲོས། དུར་ཁྲོད་ཀྱི་གནས་ཐམས་ཅད་ནས་རོ་ལངས་མ་བཛྲ་ས་མཱ་ཛཿ ཛཿཧཱུཾ་བཾ་ཧོཿ གཉིས་སུ་མེད་པར་ཐིམ། ཨོཾ་བྷི་ཙམྦ་ཏ་ཧཱུཾ་ཕཊ་སྭཱཧཱ། ཞེས་པ་རེ་རེས་མགོར་ཏེ། ཨརྒྷཾ་ནས་ནཻ་ཝི་ཏྱའི་བར་གྱིས་མཆོད། དེའི་མགོ་བོར་ཨོཾ། མིག་ཏུ་ཧཱུཾ། རྣ་བར་ཧྲི། སྣ་ལ་ཧ། ལྕེ་ལ་ཧྲ། སྙིང་གར་ཧྲིཿ ཞེས་པ་རྣམས་ཀྱིས་རྒྱས་བཏབ། རྡོ་རྗེ་བསྡམས་པ་ལས་གྲུ་མོ་བརྐྱང་བའི་ཕྱག་རྒྱས་གནས་ལྔར་རེག་པར་བསམ། ཕྱག་རྒྱ་དེ་ཉིད་ཀྱིས་དབང་བསྐུར་བར་མོས་ལ། ཨོཾ་ཕུཾ་ཕེཾ་ཕཊ་ཧཱུཾ་སྭཱཧཱ། རྡོ་རྗེ་རྩེ་ལྔ་པས་དབུ་བརྒྱན་པར་གྱུར། མཆོད་གཏོར་སྤྱི་དང་མཐུན་པར་བྱིན་གྱིས་བརླབས་ནས། གོང་བཞིན་མཆོད་ཡོན་ནས་རོལ་མོའི་བར་གྱིས་མཆོད་པ་ཕུལ། རྐང་པ་གཡས་བརྐྱང་གི་སྟབས་བཅའ། ལག་པ་གཡས་བརྐྱང་གིས་སེ་གོལ་གཏོག །གཡོན་སྡིགས་མཛུབ་བྱ་བ་ནི་ལྷ་མོའི་དམ་རྒྱ་སྟེ། ཨོཾ་ཙཎྜི་བེ་ཏ་མི་ས་མཱ་ཡ་སྟྭཾ། ཞེས་
ལན་བདུན་གྱིས་དམ་ཚིག་ལ་གནས་པར་བྱ། དེ་ནས་བཟླས་པ་ནི། ཨོཾ་ཧྲཱིཿཧ་ན་ཧ་ན་སརྦ་ཤ་ཏྲཱུཾན་མ་ཐ་མ་ཐ་བནྡྷ་བནྡྷ་ཧཱུཾ། ཨ་མུ་ཀ་སངྒ་ཏ་ཡ། སངྒ་ཏ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཕུཿཕུཿ ཞེས་ཅི་ནུས་སུ་བཟླས། མཐར་ཨོཾ་ཨ་ཀཱརྵ་ཡ། ཨ་ཀཱརྵ་ཡ། མཧཱ་པཱུ་ཛ་བྷཀྵ་བྷཀྵ། ཧཱུཾ་ཧཱུཾ་ཧཱུཾ་སྭཱཧཱ། ཞེས་པ་བདུན་ནམ་ཉེར་གཅིག་གིས་གཏོར་མ་ཕུལ། འདོད་དོན་གསོལ་བ་བཏབ། ཨོཾ་མུཿ ཞེས་ཡེ་ཤེས་པ་གཤེགས། དམ་ཚིག་པ་རང་ལ་བསྡུ། ཚུལ་དེའི་བཟླས་པ་འབུམ་ཕྲག་བརྒྱད་སོང་བ་ན། རའི་པགས་པ་ལ་བྲིས་སྐུ་བྱས་ཏེ། དེའི་མདུན་དུ་ར་ནག་པོའི་ཤས་བརྒྱན་པའི་གཏོར་མ་དང༌། ཁྲག་གི་ཨརྒྷཾ་སོགས་མཆོད་པ་བཤམས། མདུན་བསྐྱེད་ཀྱི་སྔོན་དུ་ལག་པ་གཡོན་སྙིང་གར་སྡིགས་མཛུབ། གཡས་ཁུ་ཚུར་སྐེད་པར་སྦྱར་ལ། ཧཱུཾ་ཧཱུཾ་ཧཱུཾ་ཞེས་བགེགས་བསྐྲད། གཞན་གོང་དང་འདྲ། ཚུལ་དེས་སྔགས་འབུམ་ཕྲག་བཞི་བཟླ། དེ་ནས་ར་ནག་དང་བྱ་ནག་གི་ཤ་ཁྲག་གིས་སྦྱིན་སྲེག་བྱ། སྲེག་བླུགས་ཀྱི་ཆོ་ག་སྤྱི་དང་འདྲ་བ་ལས། གོང་གི་གཏོར་མའི་སྔགས་ཀྱིས་ཤ་བསྲེགས་པ་ལ་གྲངས་འཛིན་པ་ཡིན། སྦྱིན་སྲེག་སྟོང་ཕྲག་བཞིའོ། །དེ་ཙམ་གྱིས་ཀྱང་ལས་ཕྲ་མོ་འགྲུབ་ཅིང༌། ཚུལ་དེས་འབུམ་ཕྲག་བཞི་བཅུ་བཟླས་ན། རྦོད་གཏོང་ལས་ཐོགས་པ་མེད་པར་འགྲུབ་པར་ཐེ་ཚོམ་མེད་དོ། །འདི་ལ་རྗེས་གནང་གི་བྱ་བ་ནི་མི་མཛད། སློབ་དཔོན་གྱིས་མཆོད་གཏོར་བཟླས་པ། སློབ་མའི་དོན་དུ་གསོལ་བ་གདབ་པ་རྣམས་བྱས་ལ། འདིའི་བསྙེན་སྒྲུབ་ལས་གསུམ་གྱི་ལས་སྦྱོར་རྣམས་སློབ་མ་ལ་ཚར་གཅིག་བཤད། དེ་
ཕྱིན་ཆད་ལྷ་མོ་རོ་ལངས་སྒོམས་ཤིགསྔགས་ཚར་གཅིག་བཏོན་ཏེ་འདི་ཟློས་ཤིག །བསྙེན་པ་གྱིས་ཤིགསྒྲུབ་པ་གྱིས་ཤིགལས་ལ་སྦྱོར་བ་གྱིས་ཤིག གདུག་པ་ཅན་རྣམས་ཚར་ཆོད་ཅིགཅེས་བཀའི་གནང་བ་སྦྱིན། དེ་ཙམ་གྱིས་དོན་སྒྲུབ་པ་ཡིན་ནོ། །འདིའི་ལས་སྦྱོར་ཡང་དགྲ་བགེགས་འགུགས་འདྲེན་བྱས་སོ། །ལིངྒ་མེ་ལ་བསྲེག་པ་དང༌། གཙོ་བོར་སྦྱིན་སྲེག་གི་ལས་སྦྱོར་ལ་བརྟེན་ནས་རྦོད་གཏོང་སྒྲུབ་པ་ཡིན་ནོ། །ཀུན༵་ལས་ཡིད་ཆེས་རབ་དག༵འ་ཡི། །སྒྲུབ་ཐབས་རྒྱུད་ལས་གསུངས་པ་བཞིན། །མན་ངག་མཆོག་གི་སྙིང༵་པོ༵་ཅན། །མདོ་ཙམ་འདི་ཡང་ངོ་མཚར་རྨད། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་ལྷ་མོ་རོ་ལངས་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
འཕྲོག་མ་ཞེས་བྱ་བ་གནོད་སྦྱིན་མོ་ཡི་སྒྲུབ་ཐབས།
ཨོཾ་སྭཱ་སྟི། ཐུབ་པ་ཤཱཀྱ་སེང་གེ་དང༌། །གསང་བདག་རྡོ་རྗེ་འཆང་བ་ལ། །བཏུད་ནས་འཕྲོག་མ་ཞེས་བྱ་བ། །གནོད་སྦྱིན་མོ་ཡི་སྒྲུབ་ཐབས་བཤད། །ཆང་བུ་དང་ཤིང་ཐོག་སྣ་ཚོགས་པས་བརྒྱན་པའི་གཏོར་མ་དང་མཆོད་པ་སྣ་ཚོགས་པ་བཤམས་ལ། ནམ་མཁའ་མཛོད་ཀྱི་སྔགས་རྒྱ་དང༌། ཁ་འབར་མའི་སྔགས་རྒྱ་དང༌། ཡི་གེ་འབྲུ་གསུམ་གྱིས་མཆོད་གཏོར་རྣམས་བྱིན་གྱིས་བརླབས། ཙནྡན་གྱི་མཎྜལ་མེ་ཏོག་སྣ་ཚོགས་བཀྲམ་པ་ཞིག་མདུན་དུ་བཞགརང་གི་སྙིང་ག་ནས་འོད་ཟེར་འཕྲོས། རི་རབ་ཀྱི་བྱང་ཕྱོགས་ནས་གནོད་སྦྱིན་མོ་འཕྲོག་མ་བུ་ལྔ་བརྒྱ་དང་བཅས་པ་ཨོཾ་བཛྲ་ས་མཱ་ཛཿ ཞེས་སྤྱན་དྲངས་ཏེ་མཎྜལ་གྱི་སྟེང་དུ་བཞུགས་
པར་གྱུར་པ་ནི་སྐུ་མདོག་དམར་སེར་གཡས་ལྕགས་ཀྱུ། གཡོན་ཞགས་པ་དང་བཅས་པའི་ནེའུ་འཛིན་པ། མཛེས་ཤིང་སྒེག་པ་རྒྱན་ཐམས་ཅད་ཀྱིས་བརྒྱན་པ། བུ་ལྔ་བརྒྱས་བསྐོར་བ། ཐམས་ཅད་ཀྱང་སེར་སྐྱ་བེ་ཅོན་དང་ཆང་བུས་གང་བའི་སྣོད་འཛིན་པའོ། །རང་གི་སྙིང་ག་ནས་ཁྲོ་བོ་གཤིན་རྗེ་གཤེད་བེ་ཅོན་དང་ཞགས་པ་ཐོགས་པ་སྤྲོས། འཕྲོག་མའི་སྤྱི་བོར་བཞུགས། དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཨརྒྷཾ་ནས་ཤཔྟའི་བར་གྱིས་མཆོད། སྔགས་ཀྱི་མཐར་ཁ་ཁ་ཧཱུཾ་ཞེས་བཏགས་པ་ལན་བདུན་གྱིས་གཏོར་མ་ཕུལ། བཟླས་པའི་དམིགས་པ་གསལ་བཏབ་ལ། ཨོཾ་ཧ་རཱི་ཏྱཻ་མཧཱ་ཡཀྵི་ཎཱི་ཡེ་ཧ་ར་ཧ་ར་སརྦ་ཡཀྵི་ཎི་པྲ་བེ་ཤ་ནི་སྭཱཧཱ། ཞེས་ཅི་ནུས་བཟླས། མཐར་མཆོད་བསྟོད་བྱས་ལ། བཛྲ་མུཿ གཤེགས་སུ་གསོལ། བསྙེན་པའི་གྲངས་ནི་འབྲུ་འབུམ་མོ། །ནོར་སྒྲུབ་ཀྱི་ཚེ། གནོད་སྦྱིན་མོ་བརྒྱད་ཕོ་དགུ་དང་བཅས་ཏེ་སྒྲུབ་པ་བྱེད་པ་ཡིན། འདིའི་ལུང་སྦྱིན་པ་ནི། གོང་བཞིན་གྱི་མཆོད་བསྟོད་བཟླས་པ་དང་བཅས་པ་སྔོན་དུ་སོང་ནས། འདིའི་སྒྲུབ་ཐབས་སློབ་མ་ལ་བཤད། སྔགས་ལ་རྗེས་ཟློས་ལན་གསུམ་བྱེད་པ་ཉིད་ཡིན་ནོ། །འདི་བསྟན་པ་སྲུང་བའི་ཆོས་སྐྱོང་མ་ཆེན་མོ་ཡིན་གསུང་ངོ༌། །ཀུན༵་ལས་འཕགས་པའི་མཐུ་སྟོབས་ཅན། །དག༵འ་བྱེད་མ་ཞེས་རབ་གྲགས་པའི། །སྒྲུབ་ཐབས་སྙིང༵་པོ༵་ཙམ་འདི་ནི། །རྒྱ་གར་མཁས་པའི་ཞལ་ལུང་ཡིན། །པཎྜི་ཏ་པུརྞ་བཛྲ་གསུང་ལས་བྱུང་བ། གནོད་སྦྱིན་མོ་འཕྲོག་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །
ཚོགས་ཀྱི་བདག་པོ་སྒྲུབ་པའི་ཐབས།
ཨོཾ་སྭཱ་སྟི། དཔལ་ལྡན་བདེ་ཆེན་མགོན་པོ་ལ། །བཏུད་ནས་ཚོགས་ཀྱི་བདག་པོ་ནི། །གསེར་གྱི་མདོག་ཅན་སྒྲུབ་པའི་ཐབས། །ཤིན་ཏུ་རྙེད་དཀའ་ཅུང་ཟད་བཤད། །ཡི་དམ་ཁྲོ་བོའི་བདག་བསྐྱེད་ཞིག་སྔོན་དུ་འགྲོ་བས། མདུན་དུ་ཚོགས་བདག་གི་བྲིས་སྐུ་ལ་དམིགས་ཏེ་བསངས་སྦྱངས། སྟོང་པའི་ངང་ལས་པདྨ་ཟླ་བ་བྱི་བ་རྣམས་ཀྱི་གདན་ལ་ཡི་གེ་གཿན་ལས་ཚོགས་ཀྱི་བདག་པོ་གླང་པོའི་གདོང་ཅན་སེར་པོ་གཡས་གཉིས་ན་ཏྲི་ཤུ་ལ་དང་དགྲ་སྟ། གཡོན་གཉིས་ན་ནོར་བུས་གང་བའི་སྣོད་དང་ལ་ཕུག་འཛིན་པ། ལྟོ་བ་འཕྱང་ཞིང་རོལ་སྟབས་ཀྱིས་བཞུགས་པ། རྒྱན་ཐམས་ཅད་ཀྱིས་བརྒྱན་ཞིང༌། མདུན་དུ་ལ་དུ་ལ་སོགས་པ་ཁ་ཟས་སྣ་ཚོགས་ཀྱིས་གང་བའི་སྣོད་ལ་གཟིགས་པ། རང་གི་སྙིང་ག་ནས་འོད་ཟེར་འཕྲོས། ཚོགས་ཀྱི་བདག་པོ་སྤྱན་དྲངས་པར་བསམས་ལ། ཨོཾ་གཿན་པ་ཏི་བཛྲ་ས་མཱ་ཛཿ ཨ་མྲྀ་ཏས་བགེགས་བསྐྲད། ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ། ཡི་དམ་ཀྱི་སྔགས་ཀྱི་མཐར། གཿན་པ་ཏི་ས་མ་ཡ་སྟྭཾ། ཞེས་སྤྱི་བོར་རྡོ་རྗེ་བཞག་ཅིང་དབང་བསྐུར། མཆོད་པ་སྤྱི་དང་མཐུན་པར་བྱིན་གྱིས་བརླབས་ཏེ་འབུལ། བཟླས་པའི་དམིགས་པ་གསལ་བཏབ་ལ། ཨོཾ་ཏྲཾ་ཋ་ཋ་ཋ་ཧཱུཾ་ཛ་སྭཱཧཱ། །ཞེས་ཅི་ནུས་སུ་བཟླ། མེ་ཏོག་གི་ཕྲེང་བ་དང༌། ལ་དུ་ལ་ཕུག་ཤ་ཆང་རྣམས་དང་
བཅས་པའི་གཏོར་མ་བསངས་སྦྱངས། འབྲུ་གསུམ་གྱིས་བྱིན་གྱིས་བརླབས། ཨ་ཀཱ་རོ་བདུན་གྱིས་ཕུལ། འདོད་དོན་གསོལ་བ་བཏབ། ཡི་གེ་བརྒྱ་པ་ལན་གསུམ་གྱིས་མཐར། བཛྲ་མུཿ ཞེས་པས་ཡེ་ཤེས་པ་གཤེགས་པའམ། བྲིས་སྐུ་ཡོད་ན་ཡིག་བརྒྱའི་མཐར་བརྟན་བཞུགས་བྱ། དུས་བཟང་པོ་རྣམས་སུ་གཏོར་ཆོག་གི་གཞུག་ལ་སྣོད་གཙང་མ་ཆུས་བཀང་བ་འབྲུ་གསུམ་གྱིས་བྱིན་གྱིས་བརླབས། ལ་དུའི་རིལ་བུ་འབྲུ་གསུམ་བརྗོད་ཅིང་ཆུ་ནང་དུ་དོར་བས་ཅི་ནུས་འབུལ། འདི་ལའང་སློབ་མ་རྗེས་སུ་འཛིན་པ་ནི། སློབ་དཔོན་གྱིས་མཆོད་བསྟོད་བཟླས་པ། གསོལ་བཏབ་སྔོན་དུ་འགྲོ་བས། སྒྲུབ་ཐབས་བཤད་ནས་བཀའ་གནང་སྦྱིན་པ་ཙམ་ཉིད་དོ། །སྔོན་ཆད་བོད་ཀྱི་ཡུལ་ཀུན་ན། ཚོགས་བདག་སེར་པོའི་སྒྲུབ་ཐབས་མེད། །དེ་ཕྱིར་དག༵འ་བས་འདི་ཞུས་ནས། །སྙིང༵་པོ༵་ཙམ་རེ་བསྒྲུབ་པར་བྱ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏའི་མན་ངག་ཚོགས་བདག་སེར་པོའི་སྒྲུབ་ཐབས་ཀྱི་ལེ་ཚན་ནོ།། །།དགེའོ། །སྒྲུབ་ཐབས་རིན་ཆེན་འབྱུང་གནས་ལས། ཤཱཀྱ་རཀྵི་ཏ་ལས་བརྒྱུད་པའི་སྒྲུབ་ཐབས་བཤད་པའི་སྐབས་ཏེ་བཅུ་དྲུག་པའོ།། །།