ཉི་མའི་བུ་ལས་རྒྱལ་བའི་ཐབས།
ཨོཾ་སྭཱ་སྟི། གང་ལ་འཆི་མེད་ཚེ་སྒྲུབ་ཅིང༌། །སྡིག་འཕྲོག་རྒྱལ་བའི་བྱིན་རླབས་འཇུག །ཉི་མའི་བུ་ལས་རྒྱལ་བའི་ཐབས། །མདོར་བསྡུས་ཙམ་ཞིག་བྲི་བར་བྱ། །བྱང་ཆུབ་ཏུ་སེམས་བསྐྱེད། རང་གི་མདུན་དུ་བཅོམ་ལྡན་འདས་ཤཱཀྱ་ཐུབ་པ་ས་གནོན་མཉམ་བཞག་གི་ཕྱག་རྒྱ་མཛད་ཅིང་སེང་གེ་ལ་བཞུགས་པ། ཨརྒྷཾ་ལ་སོགས་པས་མཆོད། གྲགས་ཆེན་སྙན་གྲགས་ཆེན་པོ་བ། །ཐུབ་ཆེན་དཔའ་བོ་ཆེན་པོ་བ། །སྲིད་པའི་མྱ་ངན་བསྒལ་བ་པོ། །ཉོན་མོངས་བརྒལ་ལ་ཕྱག་འཚལ་འདུད། །བདག་ལ་འཆི་མེད་ཚེའི་དངོས་གྲུབ་སྩལ་དུ་གསོལ། ཞེས་གསོལ་བ་དྲག་ཏུ་བཏབ་པས། བཅོམ་ལྡན་འདས་ཀྱི་དབུའི་གཙུག་ཏོར་ལས་སྔགས་འཕྲེང་དང་བྷྲུཾ་ཡིག་བརྒྱ་རྩ་བརྒྱད་བྱུང་སྟེ། དེ་རྣམས་ཡོངས་སུ་གྱུར་པ་ལས་བཅོམ་ལྡན་འདས་མ་དཀར་མོ་གཡས་སྣ་ཚོགས་རྡོ་རྗེ་དང༌། གཡོན་ལྷུང་བཟེད་བདུད་རྩིའི་གང་བ་འཛིན་པ། རྒྱན་ཐམས་ཅད་ཀྱིས་བརྒྱན་པར་གྱུར། རང་གི་སྤྱི་བོའི་ཐད་དུ་བཞུགས། བདུད་རྩིའི་རྒྱུན་སྤྱི་བོ་ནས་བླུག་པར་བསམ་ལ། རྣམ་རྒྱལ་གཟུངས་རིང་ཉི་ཤུ་རྩ་གཅིག་བཟླས། བཅོམ་ལྡན་འདས་མ་བྷྲུཾ་ཡིག་ཏུ་གྱུར། བྷྲུཾ་བརྒྱ་རྩ་བརྒྱད་བཟླས་པས། རང་ཉིད་གཙུག་ཏོར་རྣམ་པར་རྒྱལ་མར་གྱུར། རང་གི་སྙིང་གར་རྒྱལ་བ་འོད་དཔག་ཏུ་མེད་པ། དེའི་ཐུགས་ཀར་སྣ་ཚོགས་རྡོ་རྗེའི་ལྟེ་བ་ལ་བྷྲུཾ། མཐའ་སྐོར་དུ་སྔགས་ཀྱིས་བསྐོར་བར་བསམས་ལ། ཨོཾ་ཨ་མྲྀ་ཏེ་ཨ་མྲྀ་ཏོཏ་བྷ་ཝེ། ཨ་
མྲྀ་ཏ་བི་ཀྲཱནྟེ། ཨ་མྲྀ་ཏ་ག་ཏེ། ཨ་མྲྀ་ཏ་ག་མི་ནི། ཨ་མྲྀ་ཏ་ཨཱ་ཡུར་ད་ཏེ། ག་ག་ན་ཀྲཱིཏྟི་ཀ་རེ། སརྦ་ཀླེ་ཤ་ཀྵ་ཡཾ་ཀཱ་རི་ཡེ་སྭཱཧཱ། ཞེས་པའི་གཟུངས་ཐུང་འདི་ཉིད་ཅི་ནུས་སུ་བཟླའོ། །གཟུངས་རིང་ལ་མོས་ན་སྟོང་ཕྲག་བརྒྱད། གཟུངས་ཐུང་ལ་མོས་ན་འབུམ་ཕྲག་བཞི་བཟླས་པས། བསྙེན་པའོ། །ཐུན་གྱི་མཐར། མདུན་གྱི་བཅོམ་ལྡན་འདས་ལ་མཆོད་བསྟོད་གསོལ་བཏབ་གོང་བཞིན་བྱས་ནས། རང་གི་སྙིང་གར་ཐིམ། འཇུག་ཏུ་དགེ་བ་བྱང་ཆུབ་ཏུ་བསྔོ། འདིའི་ལུང་འབོགས་པ་ལ། ཐུབ་དབང་གི་བྲིས་སྐུའི་དྲུང་དུ། དཔོན་སློབ་གཉིས་ཀར་གྱིས་ཕྱག་མཆོད་རྒྱས་པར་བྱ། སློབ་དཔོན་གྱིས་གོང་དུ་བཤད་པའི་བསྒོས་བཟླས་དེ་ཚར་གཅིག་བྱས་ནས། སློབ་མས་མཎྜལ་ཕུལ། འོད་དཔག་མེད་ཀྱི་སྒྲུབ་ཐབས་ལྟར་གསོལ་བ་བཏབ། གོང་དུ་བཤད་པ་ལྟར་གྱི་མངོན་རྟོགས་སྒོམ་ཚུལ་ཚར་གཅིག་བཤད་ནས། གཟུངས་རིང་ཐུང་གཉིས་ལ་བཟླས་ལུང་སྤྱི་དང་མཐུན་པར་སྦྱིན་པ་ཉིད་ཡིན་ནོ། །རྣམ་རྒྱལ་སྒྲུབ་ཐབས་སྔོན་བྱུང་བ། །ཀུན༵་དང་ཐུན་མོང་མ་ཡིན་པའི། །ངོ་མཚར་དག༵འ་བསྐྱེད་ཆོས་མང་ཅན། །སྙིང༵་པོ༵་འདི་འདྲའང་བདག་གིས་ཐོབ། །པཎྜི་ཏ་གང་བའི་རྡོ་རྗེའི་གསུང་ལས་བྱུང་བ། ཤཱཀྱ་རཀྵི་ཏས་མན་ངག་གཙུག་ཏོར་རྣམ་རྒྱལ་ཕྱག་གཉིས་མའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །