ཁྲོ་བོ་བགེགས་མཐར་བྱེད་ཀྱི་སྒྲུབ་ཐབས།
ཁྲོ་བོ་བགེགས་མཐར་བྱེད་ཀྱི་སྒྲུབ་ཐབས་ནི། པད་ཉི་ལ་ཧཱུཾ་ལས་རང་ཉིད་ཁྲོ་རྒྱལ་བགེགས་དགྲ་སྔོ་སངས། ཕྱག་གཡས་རྡོ་རྗེ་འཕྱར་ཞིང་གཡོན་ཞགས་པ་དང་བཅས་པའི་སྡིགས་མཛུབ་མཛད་པ། གཡོན་བརྐྱང་གི་སྟབས་ཀྱིས་བཞུགས་པའོ། །རིགས་བདག་ནི་མི་བསྐྱོད་པ། སྔགས་ནི། ཨོཾ་ཨཱཿབིགྷྣཱན་ཏ་ཀྲིཏ་ཧཱུཾ་ཧཱུཾ་ཕཊ། རལ་གཅིག་མའི་སྒྲུབ་ཐབས་ནི། པད་ཉིའི་སྟེང་དུ་ཊཱཾ་ལས་ཐོད་པའི་ནང་དུ་མི་རོའི་གདན་ལ།
ཧཱུཾ་ལས་རང་ཉིད་བཅོམ་ལྡན་འདས་མ་རལ་གཅིག་མ་སྔོ་ནག་ཆེར་ཁྲོས་པ། ཕྱག་བཞིའི་དང་པོ་གཉིས་གྲི་གུག་དང་ཐོད་ཁྲག །འོག་མ་གཉིས་རལ་གྲི་དང་ཨུཏྤལ་འཛིན་པ། ནུ་འབུར་སྟེང་དུ་ལངས་པ། གཡོན་བརྐྱང་གི་སྟབས་ཀྱིས་བཞུགས་ཤིང༌། ཁྲོ་མོའི་ཆ་བྱད་རྫོགས་པའི་སྟེང་དུ། གཡེར་ཁ་དང་མེ་ཏོག་གི་འཕྲེང་བས་བརྒྱན་པ། རིགས་བདག་ནི་མི་བསྐྱོད་པའོ། །སྔགས་ནི། ཨོཾ་ཧྲཱིཾ་ཧྲཱིཾ་ཧཱུཾ་ཕཊ། འོག་ནས་གསུངས་པའི་རྒྱ་ནག་རིམ་པའི་སྒྲོལ་མའི་སྒྲུབ་ཐབས་ཀྱང༌། གཞན་ནི་བཤད་མ་ཐག་པ་དེ་ཁོ་ན་བཞིན་ཡིན་ལ། ཁ་ཅིག་སྔགས་ལ། ཨོཾ་མེད་པས་རྗེས་གནང་ཐ་དད་དུ་དགོས་ཟེར་བ་དང༌། ལ་ལ་དག་ཨོཾ་ཡོད་མེད་འདམ་ཁ་ཡིན་པས། སྒྲུབ་ཐབས་དེ་གཉིས་ལ་རྗེས་གནང་གཅིག་གིས་ཆོག་པར་འདོད་པའང་ཡོད་པ། ཇི་ལྟར་རིགས་པར་བྱའོ། །བསྟོད་པ་ནི། གང་གི་རང་བཞིན་ཁྲོ་དང་རྣམ་བྲལ་ཡང༌། །ཞེས་པ་དེ་ཉིད་ཀྱིས་ཆོག་སྟེ། ཁྲོ་མོ་གཞན་རྣམས་ལ་ཡང་འདྲའོ།། །།