སྟོན་པ་ཤཱཀྱའི་དབང་པོའི་མཛད་པ་བརྒྱ་པའི་བྲིས་ཡིག་རྗེ་བཙུན་ཀུན་སྙིང་གིས་མཛད་པ།
སྟོན་པ་ཤཱཀྱའི་དབང་པོའི་མཛད་པ་བརྒྱ་པའི་བྲིས་ཡིག་རྗེ་བཙུན་ཀུན་སྙིང་གིས་མཛད་པ་བཞུགས།
ཨོཾ་སྭཱ་སྟི། སྟོན་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་འཛམ་བུའི་གླིང་འདིར་སྐྱེ་བའི་ཆོ་འཕྲུལ་བསྟན་པ་ནས་བརྩམས་ཏེ། གདུལ་བྱ་མཆོག་དམན་ཐམས་ཅད་ལ་ཐུན་མོང་དུ་སྣང་བའི་མཛད་པ་རྣམ་ཐར་རགས་རིམ་གྲགས་ཆེ་ཆེ་འདྲྀ་ཚུལ་ནི། དང་པོར་ནམ་མཁའ་ལ་དགའ་ལྡན་ལྷའི་གནས་མཚོན་བྱེད་སྤྲིན་གྱི་དབུས་ན་རིན་པོ་ཆེའི་རིས་བསྐོར་བའི་ཡུལ་ལྗོངས་མེ་ཏོག་དང༌། མཚོ་རྫིང་དང༌། ནགས་ཚལ་དང༌། ཁང་བཟང་མང་པོ་ཡོད་པ་ཚོ་གསུམ། ས་གཞི་གཅིག་ལ་འབྲེལ་བའམ། མ་འབྲེལ་བ་དགའ་ལྡན་གྱི་བཀོད་པ་ཚར་གསུམ། སྟབས་གང་བདེ་བ་ཞིག་འབྲི། བཀོད་པ་རྒྱས་ཤོས་ཤིག་ཏུ། དམ་པ་ཏོག་དཀར་འཁོར་ལྷ་ཐམས་ཅད་ལ་ཆོས་གསུང་པའི་ཚུལ་ཞིག་འབྲི། གཅིག་ཏུ་དམ་པ་ཏོག་དཀར་དེ་དུང་དཀར་འབུད་པ་དང༌། ལྷ་མང་པོ་རོལ་མོ་སྣ་ཚོགས་བྱེད་པ་དང༌། ལྷ་གཉིས་ཀྱི་ཞུ་བ་བྱེད་པའི་ཚུལ་བྱ། ཡང་གནས་གཅིག་ཤོས་དེར། དམ་པ་ཏོག་དཀར་གྱི་བྱམས་པ་ལ་དབུ་བརྒྱན་པྲོག་ཞུ་བསྐོན་པའི་ཚུལ་བྱེད། ས་གཞི་ལ་གྲོང་ཁྱེར་རྒྱལ་པོའི་ཁབ་ཏུ། རྒྱལ་པོ་པད་མ་ཆེན་པོ་དང་
མཉན་ཡོད་དུ་རྒྱལ་པོ་རྩིབས་ཀྱི་རིང་འཕུར་དང༌། འཕགས་རྒྱལ་དུ་རྒྱལ་པོ་མུ་ཁྱུད་མཐའ་ཡས་དང༌། ཀཽ་ཤམྦི་རུ་རྒྱལ་པོ་དམག་བརྒྱ་པ་དང༌། གྲོང་ཁྱེར་སེར་སྐྱར་རྒྱལ་པོ་ཟས་གཙང་མ་བཙུན་མོའི་མཆོག་གཉིས་དང་བཅས་པ། གྲོང་ཁྱེར་ལྷས་བསྟན་དུ་རྒྱལ་པོ་ལེགས་པར་རབ་སད་རྣམས་བཞུགས་པའི་བཀོད་པ་བྱ་སྟེ། ཁང་བཟང་ཕོ་བྲང་དྲུག་པོ་དེ་དག་ལྔ་པོ་ནི། བར་མཚམས་ཆེ་བ་དང་བཅས་འབྲི་ཞིང༌། སེར་སྐྱ་ལྷས་བསྟན་གཉིས་ཀྱི་བར་ན་ཆུ་ཡོད་པ་ཅུང་ཟད་ཐག་ཉེ་བ་ཞིག་ཡོད་པ་བྱ། དེ་རྣམས་སྤྱིར་གང་བདེ་བ་དེ་ལ་འབྲི་ནའང༌། ངོམ་ཆེ་ས་ཞིག་ཏུ་སེར་སྐྱ་ཡོད་པ་བྱེད། བར་སྣང་ལ་ལྷ་ཕྲན་མང་པོ་ཕན་ཚུན་དུ་འགྲོ་བ་དང་གཏམ་སྨྲ་བའི་ཚུལ་འབྲི་ཞིང༌། རྒྱལ་པོ་པད་མ་ཆེན་པོའི་ཕོ་བྲང་དང་ཉེ་བའི་ནགས་ཚལ་གཅིག་ཏུ། རང་སངས་རྒྱས་མང་དུ་ཚོགས་པ་དང༌། ནམ་མཁའ་ལ་འཕགས་ཏེ་ལུས་ལས་འོད་སྣ་ཚོགས་འཕྲོ་བ་གཅིག་དང༌། ལུས་ལས་སྤྲིན་སྤྲོས་ཤིང་གློག་དང་ཆར་འབབ་པ་ཞིག་དང༌། མེ་འཕྲོ་བ་གཅིག་འབྲི། གྲོང་ཁྱེར་དེ་རྣམས་ཀྱི་ཉེ་འཁོར་སོ་སོ་ན། སྤྱིར་བཀོད་པ་གང་ལེགས་དང། རྩའི་སྤྱིལ་པོ་དང༌། ལོ་མའི་
སྤྱིལ་པོ་དང༌། ཕུག་པ་སོགས་ན་མུ་སྟེགས་སྟོན་པ་དྲུག་གསུམ་བཅོ་བརྒྱད་རྣམས་འབྲིའོ། །དེ་དག་ལས་རང་སངས་རྒྱས་ལ། དེང་སང་གཙུག་ཏོར་འབྲི་བའི་སྲོལ་འདུག་ཀྱང་འབྲི་མི་དགོས། སྨིན་མཚམས་སུ་མཛོད་པུ་ནར་མོ་ཞིག་བྱ་སྟེ་མི་ནོར་བའི་ཕྱིར་ཡིན། བཤད་ཚོད་མེད། སྐུ་ཆས་རབ་བྱུང་སྤྱི་དང་འདྲ་བ་ལ། ཆོས་གོས་ལ་གྲ་མི་དགོས་ཤིང། ལྷུང་བཟེད་ནག་པོའི་ཚབ་ཏུ། ཀུ་བའམ་སློང་ཕོར་གྱི་རྣམ་པ་ཐོགས་པ། འགའ་ཞིག་ཆུ་ཤིང་གི་འཁར་བ་བསྣམས་པ་སོགས་ཀྱང་རུང། འཁར་གསིལ་དང། ཆོས་གོས་གྲ་དྲུག་དང། ལྷུང་བཟེད་དང་པོ་ཏི་སོགས་མི་བྱེད་པའི་རྒྱུ་མཚན། སངས་རྒྱས་ཀྱི་བསྟན་པ་མེད་པའི་སྐབས་སུ་རང་རྒྱལ་འབྱུང་བ་ཡིན་པས་སོ། །སྟོན་པ་དྲུག་གསུམ་བཅོ་བརྒྱད་ལ། རྫོགས་བྱེད་ལ་སོགས་པ་རྟོག་གེ་པ་དྲུག་པོའི་རིམ་ཅན་དུ། དང་པོ་སྐྲ་བྲེགས་ཤིང་གོས་ཙག་བཙོས་ཀྱི་སྨད་གཡོགས་ཆུང་ངུ་གྱོན་པ། གཉིས་པ་རལ་བ་ཁམས་སེར་བཅིངས་ཤིང༌། རྒྱ་གར་པའི་འདོམ་དཀྲིས་གྲུ་གསུམ་ཡོད་པ། །ལྷག་མ་གོས་སྤངས་ཞིང་རྣ་བརྒྱན་ཆུང་ངུ་ཡོད་པ། ལུས་ལ་ཐལ་བས་བྱུགས་པ། གསུམ་པ་ནི་སྐྲ་བྲེགས་ཤིང༌། དབྱུག་གུ་རྩེ་གཅིག་པ་དང༌། སྤྱི་བླུགས་ཡོད་པ། རི་དྭགས་ཀྱི་པགས་པས་སྨད་དཀྲིས་པ། བཞི་པ་ནི་སྐྲ་བྲེགས་ཤིང༌། འཁོར་ལོ་ལྟ་བུའི་བེམ་པོ་ནག་པོ་གྱོན་པ། ལྔ་པ་ཡང་དེ་དང་འདྲ་བ་ལས། རལ་པ་ནག་པོ་ཅན་གོས་དཀར་པོ་གྱོན་པ། དྲུག་པ་ནི་གཅེར་བུ་འདོམ་དཀྲིས་ཀྱང་མེད་པ། སྐྲ་རྣམས་བཏོགས་པས་ཟད་ཟད་པོར་གྱུར་པ། དཀྱིལ་ཀྲུངས་མཉམ་བཞག་བྱས་པ། བྲམ་ཟེ་རྒྱུས་རྒྱལ་
ལ་སོགས་པ་དྲུག་ཀར་མཚུངས་པར་བྲམ་ཟེའི་ཆ་བྱད་ཡིན་པས། ཕྲག་པ་གཡས་སྟོན་པའི་ཚངས་སྐུད་དཀར་པོ་མདུད་པ་གསུམ་དང་བཅས་པ། རི་དྭགས་ཀྱི་པགས་པའམ། རས་དཀར་པོའམ་དམར་པོས་འདོམ་གང་ཙམ་དུ་རིང་བ་སྨད་དཀྲིས་སུ་བྱས་པ། རྒྱ་གར་བའི་ལུགས་ཀྱི་གོན་ལུགས་དང་མཐུན་པ། དབྱུག་གུ་རྩེ་གསུམ་དང་རིལ་བ་སྤྱི་བླུགས་དང་པོ་ཏི་སོགས་འཆང་བ། དཔྲལ་པ་ཙན་དན་གྱི་ཐིག་ལེ་གྱེན་དུ་བགྲེང་བ་གསུམ་མམ། གཅིག་གི་འཕྲེང་ལ་གསུམ་བསྒྲིགས་སམ། སྐེད་ཉག་གསེར་བྲེ་དངུལ་བྲེ་དབྱིབས་འདྲ་རུང་ཡོད་པ་སོགས་སོ་སོར་ཇི་ལྟར་འོས་པ་འབྲི། ཐམས་ཅད་ཁ་སྤུ་རིང་བ་དང༌། སྐྲ་གཞན་བྲེགས་ཤིང་གཙུག་ཕུད་སྤྱི་བོར་བཅིངས་པའམ། རལ་པ་མ་ཡིན་པར་བཤད། མགོ་ཐོར་ཅོག་སྤྱི་གཙུག་ཏུ་ཡོད་པ་བྱ། རྒན་གཞོན་ལ་སོགས་པ་དམིགས་གསལ་གྱི་ཁྱད་ཡོད་ན་མ་གཏོགས་བྲམ་ཟེ་འབྲི་དགོས་ཕལ་ཆེར་ལ་ཆ་ལུགས་འདི་བཞིན་དུ་བྱེད། བྲམ་ཟེ་ཡིན་ཟེར་ནས་བོད་པའི་རྟོགས་ལྡན་རྒད་པོའི་འདྲ་བ་ཁོ་ན་མི་འབྲིའོ། རིང་ཕུར་ལ་སོགས་པ་སྙོམས་འཇུག་པ་དྲུག་པོ་ནི། རལ་པ་བཅིངས་ཤིང་འཛིངས་པ་ལེབ་ལེབ་པ། ཁ་སྤུ་དང་སེན་མོ་རིང་པོ། འདོམས་དཀྲིས་གྲུ་གསུམ་དང༌། རི་དྭགས་ཀྱི་པགས་པ་དང། ཤིང་ལོའི་གོས་ཅི་རིགས་པ་ཡོད་པ། བྱ་མ་བུམ་ར་འཁྲིས་སུ་བཞག་པ། མཉམ་བཞག་གི་ཕྱག་རྒྱ་བྱས་པ་འབྲི། སྟོན་པ་དྲུག་གསུམ་བཅོ་བརྒྱད་དེ་རྣམས་ལ། འཁོར་རེ་གཉིས་སམ་ཅུང་ཟད་རེ་བྱེད། དེ་དག་དགའ་ལྡན་དུ་སྐྱེ་བ་མངོན་པར་འབྱུང་བའོ། ༧ །
རྒྱལ་པོ་ཟས་གཙང་མའི་ཕོ་བྲང་མ་མོ་དེ་དང་ཉེ་བའི་ཁང་བཟང་གཅིག་ཏུ། ལྷ་མོ་སྒྱུ་འཕྲུལ་ཆེན་མོ་མནལ་མཛད་པའི་ཚུལ་དང༌། ཁང་བཟང་གི་སྟེང་གི་ནམ་མཁའ་ནས། གླང་པོ་ཆེ་དཀར་པོ་མཆེ་བ་དྲུག་པ་འབབ་བའི་ཚུལ་དང༌། གཞན་ཡང་ཁང་བཟང་དེའི་ནམ་མཁའ་ལ་མཇའ་འོད་ཟླུམ་པོ་འདྲ་བ་བཞིའི་ནང་དུ། ཡུམ་གྱི་རྨི་ལྟས་བཞི་པོ་ཧལ་ཚོན་ལྟ་བུ་ལ་ཕྲ་མོ་རེ་བྲི་བར་བྱ་སྟེ། གཅིག་ཏུ་གླང་པོ་རང་གི་ལུས་ལ་ཞུགས་པ། གཅིག་ཏུ་ཡུམ་ཉིད་ནམ་མཁའ་ལ་འཕུར་བ། གཅིག་ཏུ་ཡུམ་ཉིད་བྲག་རི་ལ་འཛེགས་པས་རྩེ་མོར་ཕྱིན་པ། གཅིག་ཏུ་སྐྱེ་བོ་མང་པོ་ཡུམ་ཉིད་ལ་ཕྱག་འཚལ་བ་འབྲིའོ། །དགའ་ལྡན་ནས་འཕོ་བའི་སྐོར་རོ། །༼ཀ༽ ཡང་དེ་དག་དང་ཉེ་བའི་ཁང་བཟང་གཅིག་ཏུ། ཡུམ་གྱི་སྐུའི་ལྟོ་བ་ན། བྱང་ཆུབ་སེམས་དཔའ་ལྷུམས་སུ་ཞུགས་པ་ནི། ལྷའི་སྐུ་འདྲ་བ་འོད་ཟེར་འཕྲོ་བས་བརྒྱན་པ་དང༌། ཡུམ་གྱི་སྐུ་གཡས་གཡོན་དུ་ལྷའི་བསྲུང་མ་བཞི། རལ་གྲི་དང༌། མདུང་དང༌། མདུང་ཐུང་དང༌། མདའ་བོ་ཆེ་རྣམས་འཛིན་པ་ཡོད་པ། འཁོར་གཡོག་མང་པོ་མཆོད་པ་སྣ་ཚོགས་པའི་རྣམ་པ་འབྲིའོ། །དེ་ནས་རྒྱལ་པོས་བཙོན་རྣམས་བཏང་བ་དང། ཀུན་ཏུ་རྒྱུ་མིག་དམར་ཞེས་བྱ་བ། ད་ལྟའི་སཱ་བྱ་ཤིའི་ཆ་ལུགས་འདྲ་བ་ཅིག་གིས། རྒྱ་མཚོ་བཞིའི་ཆུ་ཡུམ་ལ་འདྲེན་པའི་རྣམ་པ་རྣམས་འདྲིའོ། །རྒྱལ་པོ་ཟས་གཙང་མ་ཡང་དེ་གཉིས་ན་ཉེ་བ་ན་བཞུགས་པ་རེ་བྱ། ཁང་བཟང་དེ་དང་མ་འབྲེལ་བར་བར་སྟོང་ཡོད་ཙམ་དུ་གཞན་ཞིག་ཏུ། ལུམ་བུའི་ཚལ་དེ་སྐྱེད་མོས་ཚལ་ཤིང་སྣ་ཚོགས་ཡོད་པ་
གཅིག་བྱ། དེ་ན་འཁོར་མང་པོས་སྐོར་ནས། རང་ཡུམ་ཉིད་ཁྱོགས་བྱམས་ཁྲི་ལ་གཡོག་མ་འགའ་རེ་དང་བཅས་པ་ལུམྦི་ནའི་ཚལ་དུ་འབྱོན་པའི་ཚུལ་དང༌། ཚལ་དེར་སྐུ་བལྟམས་པའི་བཀོད་པ་སྦྱི་དང་འདྲ་བ་ལས། ནམ་མཁའ་ནས་ཆུ་རྒྱུན་གཉིས་དབུའི་སྟེང་དུ་འབབ་པ་དང༌། ལྷ་རྣམས་ཀྱི་གདུགས་དང་རྔ་ཡབ་ལ་སོགས་པ་མཆོད་པ་སྣ་ཚོགས་པ་འབུལ་ཞིང༌། ཚལ་དེའི་ཕྱི་ནང་ཐམས་ཅད་འོད་ཀྱི་ཁྱབ་པ་མཚོན་བྱེད་དུ། ཕྱི་ནས་འོད་ཀྱི་དཀྱིལ་འཁོར་ཟླུམ་པོས་སྐོར་བ་འབྲི། དེ་དང་ཉེ་བའི་ཕྱོགས་རྣམས་སུ། རྒོད་མ་རྟེའུ་འབྲེང་པ་མང་པོ་དང༌། གླང་ཆེན་མོ་ཕྲུག་གུ་འབྲེང་བ། བུད་མེད་ཁྱེའུ་དང་བུ་མོ་ཐོགས་པ་དང༌། ས་འོག་ནས་རིན་པོ་ཆེའི་གཏེར་ཁ་བྱེ་བ་རྣམས་ལྔ་བརྒྱ་མཚོན་བྱེད། ལྔ་ཙམ་རེ་འབྲི། ཁང་བཟང་གཞན་གཅིག་ཏུ་རྒྱལ་པོ་ཟས་གཙང་མ་ལ་རྒྱལ་ཕྲན་མང་པོས་ཕྱག་འབུལ་ཞིང་འབུལ་བ་བྱེད་པ། ཡང་ཁང་བཟང་གཅིག་ན་འཁོར་མང་པོ་ཅན་ཡབ་ཀྱིས་པང་ན། བྱང་ཆུབ་སེམས་པ་ཁྱེའུའི་གཟུགས་ཀྱི་བཞུགས་པ་ལ། མདུན་དུ་བྲམ་ཟེ་མང་པོ་འབྲི། དེ་ནས་ལམ་དུ་ཤིང་རྟའི་སྟེང་དུ་རྒྱལ་པོ་བཞུགས་པ་ལ་འཁོར་མང་པོས་སྐོར་བ་དང༌། ཁྱོགས་བྱམས་ཁྲི་སྐྱེ་བོ་མང་པོས་བཏེགས་པའི་དབུས་ན་བྱང་ཆུབ་སེམས་དཔའ་མ་མ་རྣམས་དང་བཅས་བཞུགས་པ་ལ། ལྷ་ཁང་ཞིག་ན་གནོད་སྦྱིན་ལུས་ལ་ཁྲ་གྱོན་པ་ཞིག་འོང་ནས་བྱང་ཆུབ་སེམས་དཔའ་ལ་ཕྱག་འབུལ་བ། དེ་ནས་གྲོང་ཁྱེར་སེར་སྐྱའི་བཀོད་པ་གཞན་ཞིག་གི་ཁང་བཟང་དུ། ཡབ་ཀྱི་སྐུ་པང་དུ་བཞུགས་པ་ལ། མདུན་དུ་དྲང་སྲོང་ཁ་དོག་
མི་ཤ་ཁ་ནག་པོ། རལ་པ་སེར་སྐྱ་འཛིངས་ཤིང་ཁ་སྤུ་ནག་པོ་ཅན། ཚངས་སྐུད་དང་དབྱུག་གུ་སྤྱི་བླུགས་ཡོད་པ། རྒན་པའི་ཆ་བྱད་ཅན་ཞིག་གི་བྱང་ཆུབ་སེམས་དཔའ་ལ་ལྟ་ཞིང༌། ལག་པ་གཡས་ཅུང་ཟད་སྒྲེང་བ་དང༌། ཕྱོགས་གཞན་ཞིག་ཏུ་དྲང་སྲོང་དེ་རྒྱལ་པོའི་དྲུང་དུ་མཆིལ་མ་འདོན་པའི་ཚུལ་བྱ་བ་དང༌། ཕོ་བྲང་དེའི་ཕྱི་རོལ་ན་དྲང་སྲོང་དེ་ཚུར་ཡོང་དུས་ཀྱུས་མ་ཡོང་བ་དང༌། ཕར་འགྲོ་དུས་ནི་སྒོའི་ཕྱི་ནས་དར་རས་སོགས་སྐྱང་བའི་སྟེང༌། དེ་དང་ཉེ་བའི་བྲག་ཕུག་གཅིག་ཏུ་དེ་ཉིད་བསམ་གཏན་ལ་གནས་པའི་ཚུལ་དང༌། དེའི་མདུན་དུ་དྲང་སྲོང་གཞོན་ནུ་གཅིག་འབྲི། དེ་དག་ནི་ལྷུམས་སུ་ཞུགས་པ་དང་བལྟམས་པའི་སྐོར་རོ།། ༼ཁ༽ དེ་ནས་མ་མ་བརྒྱས་སྐོར་བའི་བྱང་ཆུབ་སེམས་དཔའ་བྱིས་པའི་ཚུལ་གྱི་གསེར་གྱི་གཞོང་པ་ཤིན་ཏུ་ཆེ་བ་འབྲས་ཀྱིས་བཀང་བ། ཕྱོགས་གཅིག་ནས་གླང་པོ་ཆེ་མང་པོ་ལ་བཏགས་ལ། བྱང་ཆུབ་སེམས་དཔའ་ཁྱེའུའི་ཕྱག་མཛུབ་གཅིག་གིས། གཞོང་པ་ནས་འཐེན་པས། གླང་པོ་ཆེ་རྣམས་ཀྱང་འདྲེད་སྟབས་སུ་ཚུར་དྲུད་པ། འབྲས་ཆེན་ནས་གསོལ་བའི་རྣམ་པ་ཡང་འབྲི་སྟེ། ཕྱག་གཡོན་པས་སྣོད་ནས་འཐེན་ཚུལ་དང། གཡས་པས་གསོལ་བའི་རྣམ་པ་བྱས་ན་ལེགས། དེ་ནས་ཅུང་ཟད་སྐུ་ཆེར་སྐྱེས་པའི་རྣམ་པ་ལ། ཡི་གེའི་སློབ་དཔོན་གྱི་དྲུང་དུ་ཡི་གེ་སློབ་པ་དང༌། རྩིས་ཀྱི་སློབ་དཔོན་གྱི་དྲུང་དུ་རྩིས་སློབ་པ་དང༌། ཞང་པོ་བཟང་ལེན་ལ་རྟ་དང་གླང་པོ་ཆེའི་སྒྱུ་རྩལ་སློབ་པ་དང༌། མདའ་སོགས་མཚོན་ཆའི་འཕྲུལ་གྱི་སློབ་དཔོན་ལ་དེ་དག་སློབ་ཚུལ་ཅུང་ཟད་
རེ་དང༌། ལྷས་སྦྱིན་གྱི་གླང་པོ་ཆེ་བསད་པ་དང༌། དགའ་བོས་འཇུག་མ་ནས་བོར་བ་དང༌། བྱང་ཆུབ་སེམས་དཔས་ཕྱག་གི་རིང་དུ་འཕང་པ་རྣམས་སྤྱི་དང་འདྲ། འདི་ལ་ཞབས་ཀྱི་མཐེ་པོས་འཕང་པ་ཐེག་ཆེན་གྱི་ལུགས་ཡིན། སྔཽན་འབྱུང་ལུགས་དང༌། འདུལ་བ་སོགས་ནས་ཕྱག་གི་འཕང་པ་གསལ་བར་བཤད། ཤིང་མང་པོ་རལ་གྲིས་བཅད་པ། གཞན་རྣམས་ཀྱིས་བཅད་པ་ཚོ་བཅད་མ་ཐག་འགྱེལ། བྱང་ཆུབ་སེམས་དཔས་དེ་བཅད་ཀྱང་རིང་དུ་མ་འགྱེལ་བ་དང༌། རླུང་པོ་བྱུང་ནས་འགྱེལ་བ་འབྲི། དེ་ནས་མདའ་ཚ་བས་འདྲེན་པའི་བཀོད་པ་སྤྱི་དང་འདྲ། སྤྱིར་སྒྱུ་རྩལ་ལྔ་བརྒྱའི་བར་དུ་འགྲན་པ་ཡིན་ཀྱང༌། སྔོན་འབྱུང་དང་འདུལ་བ་ལས་ལོ་རྒྱུས་ལྷག་མ་གསུངས་པ་མེད་པས་སྐབས་འདིར་དེ་ཙམ་གྱིས་ཆོག །སྒྱུ་རྩལ་མཁས་པར་བསྟན་པའི་སྐོར་རོ། །༼ག༽ བྱང་ཆུབ་སེམས་དཔའ་ཤིང་རྟར་ཞུགས་ནས་གྲོང་ཁྱེར་གྱི་ཕྱི་རོལ་ནས་ནང་དུ་འབྱོན་པ་དང༌། བྲམ་ཟེ་མང་པོ་ཕྱིར་འགྲོ་བཞིན་པས་ལུང་བསྟན་བྱེད་པ་དང༌། ཁྱམས་ཡངས་པ་ཞིག་ཏུ་ཤཱཀྱའི་བུ་མོ་སྣ་ཚོགས་པ་ལ། དངོས་པོའི་ཁྱད་པར་རེ་རེ་སྦྱིན་ཞིང༌། གྲགས་འཛིན་མ་སྐུའི་མདུན་དུ་གུས་པས་འདུག་པ་ལ་སོར་གདུབ་གནང་བ་དང༌། ཡང་ཁང་བཟང་གཞན་ཞིག་ཏུ་གྲགས་འཛིན་མ་འཁོར་བཅས་ཁབ་ཏུ་བཞེས་པའི་དགའ་སྟོན་གྱི་བཀོད་པ་དང༌། ཡང་ཕྱོགས་གཞན་ཞིག་ཏུ། ཤིང་སྡོང་ཆེན་པོ་ཞིག་འགྱེལ་བས། རྒྱུག་ཆུ་བཀག་སྟེ། གྲོང་ཁྱེར་ཕྱོགས་གཅིག་ལ་ཆུ་ཉེན་ཡོད་པ་དང༌། ཤིང་དེ་ལ་སྐྱེ་བོ་མང་པོས་འཐེན་པའི་ཚུལ་དང༌། དེའི་ཕྱོགས་གཅིག་ནས་
སྦྲུལ་ནག་པོ་ཞིག་བྱུང་བ། གཞོན་ནུ་མཛེས་པ་ཐོད་བཅིངས་པ་ཞིག་གི་རལ་གྲིས་སྐེད་པ་ནས་བཅད་པ་དང༌། ལྷས་བྱིན་གྱི་ངང་པ་ལ་མདའ་འཕངས་ནས་ས་ལ་ལྷུང་བ། བྱང་ཆུབ་སེམས་དཔས་གསོས་པ་དང༌། བྱང་ཆུབ་སེམས་དཔས་ཤིང་སྡོང་དེ་ཕྱག་ཡ་གཅིག་གིས་ནམ་མཁའ་ལ་འཕེན་པ་དང༌། ཤིང་སྡོང་དེ་དུམ་བུ་གཉིས་སུ་སོང་ནས་ཆུ་འགྲམ་གཡས་གཡོན་དུ་ལྷུང་པ་དང༌། ཡང་ཁང་བཟང་ཞིག་གི་སྟེང་ནས། ས་མཚོ་མས་བྱང་ཆུབ་སེམས་དཔའ་ལ་ལྟ་ཞིང། རྐང་པ་ཡ་གཅིག་གི་མཐེ་བོའི་ཤུགས་ཀྱི་ཐོག་གི་མཐིལ་བརྡོལ་བ་དང༌། ཤིང་རྟའི་སྟེང་ནས་བྱང་ཆུབ་སེམས་དཔས་ཀྱང༌། ས་མཚོ་མ་ལ་གཟིགས་ཤིང༌། ཕྱག་ན་ལྕགས་ཀྱི་མདའ་དུམ་བུར་སོང་བ་དང༌། ཁང་བཟང་མཆོག་ཏུ་ས་མཚོ་འཁོར་བཅས་ཁབ་ཏུ་བཞེས་པ་དང༌། ཡང་ཕྱོགས་ཇི་ལྟར་འོས་པ་ཞིག་ཏུ། ཁང་བཟང་གཅིག་དང་ཉེ་བ་ནས། བྱང་ཆུབ་སེམས་དཔའ་ཤིང་རྟ་ལ་ཞུགས་ནས་འབྱོན་པ་དང༌། ཁང་བཟང་གི་སྐར་ཁུང་ནས་རི་དྭགས་སྐྱེས་མ་ལ་ལྟ་ཞིང་འདུག་པ་ལ། བྱང་ཆུབ་སེམས་དཔའ་མུ་ཏིག་འཕྲེང་བ་འཕངས་པ། དེའི་མགུལ་དུ་མཁྲིལ་བ་དང༌། ཁང་བཟང་མཆོག་ཏུ་རི་དྭགས་སྐྱེས་འཁོར་བཅས་ཁབ་ཏུ་བཞེས་པའི་བཀོད་པ་དང༌། བཙུན་མོའི་འཁོར་ཚོགས་བསྟན་པའི་སྐོར་རོ། །༼ང་༽ དེ་དག་ཕྱོགས་གང་ཡང་རུང་བར་ཕོ་བྲང་གི་སྒོ་བཞི་ནས། རྒས་པ་དང། ན་བ་དང། ཤི་བ་དང། རབ་ཏུ་བྱུང་བའི་ཚུལ་རྣམས་སྤྱི་དང་འདྲ། ཞིང་ལས་བྱེད་པའི་སར་ཕེབས་ནས་ཞིང་པ་རྣམས་དང༌། གླང་སོགས་བཏང་སྟེ་ཅི་
བདེ་བར་བཏང་བ་དང༌། ནང་གི་ལས་སྣ་ཚོགས་པ་བྱེད་པ་རྣམས་ཀྱི་སར་ཕེབས་ཏེ། དེ་དག་ཀྱང་བཏང་བ་དང༌། ཤིང་འཛམ་བུའི་རྩ་བར་ཏིང་ངེ་འཛིན་ལ་བཞུགས་ཏེ། གྲིབ་མས་སྐུ་ལུས་མ་བཏང་བ་ལ་ཡབ་ཀྱི་ཕྱག་མཛད་པ་དང༌། དེ་ནས་སེར་སྐྱའི་ཕྱི་རོལ་འོབས་དང་ལྕགས་རི་བདུན་བདུན་གྱི་སྐོར་ཞིང༌། ལྕགས་ཀྱི་སྒོ་འཕར་དྲིལ་བུ་ཆེན་པོ་ཅན་མི་ལྔ་བརྒྱས་འབྱེད་གཅོད་བྱེད་པ་མཚོན་བྱེད་དང༌། སྐས་ཆེན་པོ་མི་ལྔ་བརྒྱས་འཛུགས་ཤིང་བསྡུ་བ་མཚོན་བྱེད་དང༌། ལྕགས་རིའི་བར་བར་ཐམས་ཅད་དམག་མིའི་བསྲུང་ཞིང༌། ཕོ་བྲང་སྙིང་པོའི་ཕྱོགས་བཞི་ནས། རྒྱལ་པོ་སྐུ་མཆེད་བཞིས་མེལ་ཚེ་མཛད་པ་དང༌། བྱང་ཆུབ་སེམས་དཔའ་ཉིད་དང༌། ཕོ་བྲང་གི་ཁང་བཟང་གཅིག་ཏུ་བུད་མེད་མང་པོས་རོལ་མོ་དང་མཆོད་པ་སྣ་ཚོགས་འབུལ་བ་དང༌། མ་འགགས་པ་ཞེས་བྱ་བ་རྒྱལ་པོ་དང་ཆ་བྱད་འདྲ་རུང་ཞིག་གི་ལྟ་ཉུལ་བྱེད་ཅིང་སྐོར་བ་དང༌། ཁང་བཟང་གཅིག་ཏུ་བྱང་ཆུབ་སེམས་དཔའ་མནལ་བའི་ཚུལ་དང༌། འཁོར་གྱི་བུད་མེད་ཐམས་ཅད་གཉིད་ཀྱི་ནོན་པས་ཆ་བྱད་བཀོད་པ་མི་སྡུག་པའི་རྣམ་པར་གྱུར་པ་དང༌། ཁང་བཟང་གི་ནང་ལ་ཟླུམ་སྐོར་ལྔའི་ནང་དུ་བྱང་ཆུབ་སེམས་དཔའི་མནལ་ལྟས་ལྔ་འབྲི་སྟེ། རི་རབ་དབུས་སྔས་སུ་བཅུག ས་གཞི་གདན་དུ་གཏིང༌། ཕྱག་གཡོན་ནུབ་ཕྱོགས་ཀྱི་རྒྱ་མཚོ་ལ་བཅུག གཡས་ཤར་ཕྱོགས་ཀྱི་རྒྱ་མཚོ་ལ་བཅུག ཞབས་གཉིས་ལྷོ་ཕྱོགས་ཀྱི་རྒྱ་མཚོ་ལ་བཅུག་པ་དང༌། གཅིག་ཏུ་ལྟེ་བ་ནས་རྩྭ་སྔོན་པོ་སྐྱེས་པ་ནམ་མཁའི་དབྱིངས་སུ་འཕགས་པ་དང༌། གཅིག་ཏུ་བྱ་ལུས་
དཀར་ལ་མགོ་བོ་ནག་པ་མང་པོས་ཞབས་ལ་གཏུགས་པ་དང༌། གཅིག་ཏུ་བྱ་སྤུ་མདོག་སྣ་ཚོགས་པ་ཕྱོགས་ཕྱོགས་ནས་འདུས་པ་སྐུ་མདུན་དུ་རིགས་གཅིག་ཏུ་སོང་བ་དང༌། གཅིག་ཏུ་མི་གཙང་བའི་ཕུང་པོའི་སྟེང་ཞབས་འཆག་པ་མཛད་ཀྱང༌། མི་གཙང་བས་མ་གོས་པའོ། །གྲགས་འཛིན་མ་ཡང༌། བྱང་ཆུབ་སེམས་དཔའི་དྲུང་དུ་ཉལ་བའི་བཀོད་པ་འབྲི་ཞིང༌། རྨིས་ལྟས་བརྒྱད་བཤད་ཀྱང་འབྲི་མི་དགོས། དེས་ནས་ཕྱོགས་གཅིག་ཏུ་ལྕགས་རིའི་བར་གྱི་དམག་མི་སོགས་ཐམས་ཅད་གཉིད་དུ་སོང་ཞིང༌། ལྕགས་རིའི་ནང་རྡོ་ཆལ་འདྲ་བ་ཞིག་ན། ཆིབས་པ་བསྔགས་ལྡན་ལ་ཕྱག་གི་བཞམས་པ་དང༌། རྟ་རྫི་བདུན་པས་སྒ་སྒྲོན་པའི་གྲབས་འབྲི། ཁང་བཟང་གི་རྩེ་མོའི་ཕྱོགས་གཅིག་ན། རྒྱལ་པོ་ཟས་གཙང་མནལ་དུ་སོང་བ་ལ། བྱང་ཆུབ་སེམས་དཔས་བསྐོར་བ་མཛད་ཅིང་ཐལ་མོ་སྦྱར་བ་དང༌། མ་འགགས་པས་རྒྱལ་པོའི་ན་བཟའ་ནས་འཐེན་ཞིང་མནལ་བསོད་ཚུལ་བྱེད་པ་དང༌། དེ་ནས་ཆིབས་ལ་ཆིབས་ནམ་མཁའི་ངོས་ནས་གཤེགས་པ་སོགས་སྤྱི་དང་འདྲ་བ་ལས། རྟའི་རྐང་པ་བཞི་འདེགས་བྱེད། རྒྱལ་ཆེན་བཞིས་མི་བྱེད་པར་ལྷའི་གྱད་བཞི་ཡིན་ལ། སྐུའི་མདུན་ནས་ཚངས་པ་བརྒྱ་བྱིན་གཉིས་འགྲོ་ཞིང༌། ལྷ་གཞན་མང་པོས་མཆོད་པ་འབུལ་བ་འབྲི་དགོས། རྟ་བསྔགས་ལྡན་ལ་རྒྱན་བཀལ་བ་དང༌། རྟ་རྫི་བདུན་པ་དང་བཅས་པ་རྣམས་ཕྱིར་ཀློག་པ་དང་ཡུལ་དུ་སླེབ་པ་ཡང་འབྲི། རྟ་བསྔགས་ལྡན་ལ་དད་པ་གསེར་ལྡན་ཟེར་ནས་དུང་པ་རེ་གཏོང་ཡང་ཁ་སྐད་ཙམ་ཡིན་གྱི་ཁུངས་མེད། རྒྱ་གར་གྱི་རི་མོ་ཁུང་
མ་དཀར་པོར་ཡོང་བས་དེ་བཞིན་བྱ། དེ་ནས་རི་དྭགས་རྔོན་པའི་གཟུགས་ཅན་ཞིག་གིས་ངུར་སྨིག་གི་གོས་ཕུལ་བ་དང༌། མཆོད་རྟེན་གྱི་དྲུང་དུ་ཉིད་ཀྱི་དབུ་སྐྲ་ཉིད་ཀྱིས་བཅད་པ་དང༌། གཙུག་ཕུད་ལྷས་ཁྱེར་བ་སོགས་སྤྱི་དང་འདྲ། གསེར་གྱི་ལོ་མ་ཅན་གྱི་ནགས་ཚལ་ཞིག་ན་དྲང་སྲོང་མང་པོ་འདུག་པ་དང༌། དེ་ཤིང་འཕགས་པའི་ནགས་ཚལ་དུ་སོང་བ་ལ། དྲང་སྲོང་རྣམས་མི་དགའ་བ་དང༌། དེའི་དྲུང་དུ་བྱང་ཆུབ་སེམས་དཔའ་བྱོན་ཏེ་བཞུགས་པ་རྣམས་འབྲི་སྟེ་ངེས་པར་འབྱུང་བའི་སྐོར་རོ། །༼ཅ༽ དེ་ནས་གྲོང་ཁྱེར་རྒྱལ་པོའི་ཁབ་ཀྱི་ཁང་བཟང་གི་རྩེ་མོ་ནས། རྒྱལ་པོ་གཟུགས་ཅན་སྙིང་པོས་ལྟ་བ་དང༌། ལམ་སྲང་ན་བྱང་ཆུབ་སེམས་དཔའ་ཤིང་ལོ་ཙེམས་པའི་ལྷུང་བཟེད་བསྣམས་ཏེ་བསོད་སྙོམས་མཛད་པ་དང༌། བྱང་ཆུབ་སེམས་དཔའ་ཤིང་དྲུང་དུ་བཞུགས་པའི་དྲུང་དུ། རྒྱལ་པོ་འཁོར་བཅས་བྱོན་ཏེ་ཞུ་བ་མཛད་པ་འབྲི། དེ་དང་ཉེ་བའི་ནགས་གཅིག་ཏུ། དྲང་སྲོང་ལ་ལ་རྐང་པ་ཡ་གཅིག་འབྲེང་བ་དང༌། ལ་ལ་མེ་ལྔ་གདུང་བ་དང༌། ལ་ལ་ཆུ་ལ་ཞུགས་བ་དང༌། ལ་ལ་དུ་བ་འཐུང་བ་ལ་སོགས་པ་དང༌། བྱང་ཆུབ་སེམས་དཔའ་ཡང་དཀའ་ཐུབ་དེ་གཉིས་ལྡབས་སུ་མཛད་པ་འབྲི། དེ་ནས་ཡང་ནགས་གཞན་ཞིག་ཏུ། ལོ་མའི་སྐྱལ་པོ་ན། དྲང་སྲོང་རིང་འཕུར་ཡོད་པ་འཁོར་བཅས་ཀྱི་དྲུང་དུ་བྱོན་པ་དང༌། ཡང་ལྷག་སྤྱོད་ཀྱི་དྲུང་དུ་བྱོན་པ་ཡང་དེ་ཁོ་ན་འདྲ་བ་དང༌། འདིའི་རིང་ཕུར་དང་ལྷག་སྤྱོད་ནི། གོང་གི་སྟོན་པ་དྲུག་གསུམ་བཅོ་བརྒྱད་ཀྱི་སྙོམས་འཇུག་པ་དྲུག་གི་ནང་ཚན་ཡིན། དེ་ནས་ནགས་
གཅིག་ཏུ། འཁོར་ལྔ་དྲུང་ན་ཡོད་ཅིང༌། གཞན་མི་མང་པོ་ཞིག་ལྡོག་འགྲོ་བ་འབྲི། དེ་ནས་ཆུ་ཀླུང་ནེ་རཉྫ་ནའི་འགྲམ་མཐའ་ནགས་ཀྱི་སྐོར་བའི་ནེའུ་གསིང་གི་དབུས་ཤིང་དྲུང་གཅིག་ཏུ་དཀའ་ཐུབ་མཛད་པའི་རྣམ་པ་འབྲི་སྟེ། སྤྱི་ཁྱབ་དང་འདྲ། དཀའ་བ་རྣམ་པ་དྲུག་སྤྱོད་པའི་རིམ་པ་མང་པོ་ཡོད་ཀྱང༌། དེ་ཙམ་གྱི་ཆོག་པ་འདུགཕྱུག་རྫིས་སྙན་ལ་ཤིང་འཛུགས་པ་དང༌། ལྷ་གསུམ་གྱི་གཏམ་རྗེས་སུ་སྒྲོག་པ་སོགས་ཀྱང་འབྲི། དེ་ནས་ཕྱོགས་གཅིག་ཏུ་ཁྲུས་མཛད་ཅིང༌། མི་རོ་ལ་དབུ་སྔས་མཛད་དེ་གཟིམས་པ་འབྲི་སྟེ་དཀའ་བ་སྤྱོད་པའི་སྐོར་རོ། །༼ཆ༽ དེ་ནས་ཕྱོགས་གཅིག་ཏུ་ཁྲུས་མཛད་པ་དང༌། འཁོར་ལྔ་ཀུན་ཏུ་རྒྱུའི་ཆ་བྱད་གཞན་དུ་འགྲོ་བ་དང༌། འབྲས་ཆན་གསོལ་བའི་ཚུལ་བྱ། དེ་ནས་བུ་མོ་དགའ་མོ་དང༌། དགའ་སྟོབས་མས་འོ་ཐུག་ཕུལ་བ་དང༌། གསེར་སྣོད་ཆུ་བོ་ནེ་རཉྫ་ནར་བོར་བ་དང༌། དེ་ཀླུས་ཁྱེར་བ་དང༌། བརྒྱ་བྱིན་བྱ་ཁྱུང་དུ་སྤྲུལ་ནས་དེ་ཕྲོགས་ཏེ་ལྷ་ཡུལ་དུ་ཁྱེར་བ་དང༌། བྲག་དེའུ་མེ་ཏོག་གིས་བརྒྱན་པ་ལ་བཞུགས་པས། བྲག་ཉིལ་བ་དང༌། ལྷས་བསྐུལ་ཏེ་དེ་ནས་ཕར་གཤེགས་པ་ལ། ཆུ་ནང་ནས་ཀླུའི་རྒྱལ་པོ་དུས་ཅན་ཞེས་བྱས་བསྟོད་པ་དང༌། རྩྭ་འཚོང་བཀྲ་ཤིས་འཁོར་བཅས་ཀྱི་རྩྭ་ཕུལ་བ་དང༌། བྱང་ཆུབ་སྙིང་པོར་གཤེགས་པའི་སྐོར་རོ། །༼ཇ༽ བྱང་ཆུབ་ཀྱི་ཤིང་གི་དྲུང་དུ་རྩ་བཏང་བའི་སྟེང་དུ་བཞུགས་པ་མཉམ་བཞག་མཛད་པ་ལ། བདུད་ཀྱི་སྤྲུལ་པའི་ཕོ་ཉ་བདུན་འོང་བ་དང༌། ཡང་དེ་དང་ཉེ་བར། བདུད་འདུལ་གྱི་བཀོད་པ་སྤྱི་དང་འདྲ་བ་འབྲི་བ་ལས། རིན་
པོ་ཆེའི་བཞུགས་ཁྲི་མི་དགོས། ཡང་བྱང་ཆུབ་ཤིང་གཅིག་གི་རྩ་བ་ན། བཞུགས་ཚུལ་མཉམ་བཞག་མཛད་པ་ལ། ཤིང་གི་ཡལ་ག་ཆེ་ལ་དཀར་བ་ལོ་མ་རྣམས་ལྷ་མང་པོས་འཛིན་པ་འབྲི། །མངོན་བྱུང་དང། འདུལ་བའི་ལུགས་ལ། སླུ་བྲིད་སྟོན་པའི་བདུད་ཀྱི་བུ་མོ་གསུམ་ཁོ་ན་འབྲི་སྟེ། བདུད་བཏུལ་པའི་སྐོར་རོ། །༼ཉ༽ བདུད་འདུལ་བ་དང་སངས་རྒྱས་པ་གཉིས་དུས་མཚན་མོ་གཅིག་ཁོ་ན་ལ་ཡིན་ཀྱང༌། མཛད་པའི་ཁྱད་པར་ཤིན་ཏུ་ཆེ་བའི་ཕྱིར། བྱང་ཆུབ་བརྙེས་པ་ལོགས་སུ་འབྲི་མི་དགོས་ཏེ། བྱང་ཆུབ་ཤིང་དྲུང་དུ་རྩའི་གདན་ལ་མཉམ་བཞག་མཛད་པ། སྐུ་ལས་འོད་ཟེར་དཔག་ཏུ་མེད་པ་འཕྲོ་བ། སྐུའི་གཡས་གཡོན་གཉིས་ནས་ཚངས་རིས་ཀྱི་ལྷ་རེ་རེའི་བསྟོད་པ་བྱེད་པ་འབྲི། དེ་ནས་རྒྱལ་ཆེན་བཞིས་རྡོའི་ལྷུང་བཟེད་ཕུལ་བ་དང༌། ཚོང་དཔོན་ག་གོན་དང་བཟང་པོ་ལ་ལྷས་ལུང་བསྟན་ནས་བསོད་སྙོམས་ཕུལ་ཞིང༌། སངས་རྒྱས་ཀྱི་ཆོས་གསུང་པ་དང༌། ཡང་བརྒྱ་བྱིན་གྱི་ཨ་རུ་ར་ཕུལ་བ་དང༌། ཕྱོགས་གཅིག་ན་བདུད་ཀྱི་ཐལ་མོ་སྦྱར་བ་འབྲི། དེ་ནས་ཆུའི་ནང་ཀླུ་བཏང་བཟུང་གི་ཕོ་བྲང་དུ་བྱོན་ཞིང༌། སྦྲུལ་གྱི་གདེང་ཀ་བྱས་པ་དང༌། ཀླུ་དེ་རྣམས་ལ་ཆོས་གསུང་པ་དང༌། ཡང་བྱང་ཆུབ་ཤིང་གི་རྩ་བར་རྩའི་གདན་ལ་མཉམ་བཞག་མཛད་པ་སྟེ། དེ་དག་ཀྱང་སྤྱི་དང་འདྲ། མངོན་པར་བྱང་ཆུབ་པའི་སྐོར་རོ། །༼ཏ༽ དེ་ནས་ཚངས་པས་འཁོར་ལོ་འབུལ་གྱི་ཆོས་གསུང་པར་བསྐུལ་བ་དང། ཝ་ར་ནཱ་སིའི་ཕྱོགས་ལ་ཕེབས་པའི་ལམ་དུ། འཚོ་བ་པ་ཀུན་ཏུ་གཅིག་
དང་མཇལ་བ་དང༌། གྲུ་མཁན་གྱི་གྲུ་མ་བཏང་བ་ལ། ནམ་མཁའ་ལ་གཤེགས་པ་སོགས་སྤྱི་དང་འདྲ། དེ་ནས་ཝ་ར་ནཱ་སིའི་ཕྱོགས་ལ་དྲང་སྲོང་ལྷུང་བ་རི་དྭགས་ཀྱི་ནགས་ཏེ། རི་ཆུང་ལ་ནགས་ཡོད་པ་ཞིག་ཏུ། འཁོར་ལྔ་སྡེ་ཀུན་ཏུ་རྒྱུའི་ཆ་བྱད་ཅན་རྣམས་ཀྱི་སངས་རྒྱས་རྒྱང་རིང་པོ་ནས་འབྱོན་པ་ལྟ་ཞིང། ཕན་ཚུན་དུ་གཏམ་སྨྲ་བའི་ཚུལ་དང༌། འཁྲིས་སུ་བྱོན་པ་ན། གཅིག་གི་གདན་གདིང༌། གཅིག་གི་ཞུ་བ་ཞུ། གཅིག་གི་ཞབས་བཀྲུ། གཅིག་གིས་བསུ་བ་བྱེད། གཅིག་གིས་ཕྱག་འཚལ་ཞིང༌། ན་བཟའ་འཁུར་བའི་ཚུལ་བྱེད། དེ་ནས་ཕྱོགས་གཅིག་ཏུ་ཕ་བོང་འདྲ་བ་ཞིག་གི་སྟེང་དུ་སྟོན་པ་བཞུགས་ཤིང༌། ལྔ་སྡེ་དགེ་སློང་གི་རྣམ་པ་ཅན་གྱི་ཆོས་ཉན་པའི་ཚུལ་དང༌། གཡས་གཡོན་དང་ནམ་མཁའ་ནས་ལྷ་ཆོས་ཉན་པའི་ཚུལ་མང་དུ་བྱ། ཡང་ཕྱོགས་གཅིག་ཏུ། སྟོན་པའི་དྲུང་དུ་དགེ་སློང་གསུམ་འདུག་ཅིང༌། དགེ་སློང་གཉིས་ཀྱི་གྲོང་ཁྱེར་ནས་བསོད་སྙོམས་ལེན་པའི་ཚུལ་དང༌། ཡང་དེ་དང་ཉེ་བ་ན། ཁྱིམ་གཅིག་ན་གྲགས་པ་བུད་མེད་ཀྱི་འཁོར་གྱི་སྐོར་བ་དང༌། ཁྱིམ་གཅིག་ཕྱོགས་གཅིག་ཏུ་བུད་མེད་རྣམས་གཉིད་དུ་སོང་བ། གྲགས་པ་སྒོ་ཕྱེ་སྟེ་འགྲོ། གྲགས་པའི་ཕ་སྒྲོན་མེ་ཐོགས་ཏེ་འཚོལ་བ་དང༌། ཆུ་འགྲམ་ཞིག་ཏུ་ལྷམ་བཞག ཆུའི་ཕར་ཕྱོགས་ན་སངས་རྒྱས་ཀྱི་དྲུང་དུ་གྲགས་པ་ཆོས་ཉན་པ་དང༌། དེ་དང་ཉེ་བར་གྲགས་པའི་ཕ་ལངས་ནས་འདུག་པའི་ཚུལ་འབྲི། ཡང་ཕྱོགས་གཅིག་ན་ཉེ་བའི་ལྔ་སྡེ་སྟེ། དགེ་སློང་ལྔ་སངས་རྒྱས་ལ་ཆོས་ཉན་པའི་ཚུལ་དང༌། དེ་རྣམས་
ཀྱི་ཉེ་དུ་མང་པོ་ཚུར་ཡོང་བའི་རྣམ་པ་འབྲི། ཡང་སྐྱེད་མོས་ཚལ་གཅིག་ཏུ། མི་མང་པོ་བུད་མེད་རོལ་མོ་ཐོགས་པ་མང་པོ་དང་ལྷན་ཅིག་ཏུ་འདུག་པ་ལས། རོལ་མོ་ཐོགས་པའི་བུད་མེད་གཅིག་བྲོས་ཤིང་མི་གཅིག་འཚོལ་དུ་འགྲོ་བ་སངས་རྒྱས་དང་མཇལ་བ་དང༌། ཕྱོགས་གཅིག་ཏུ་ཀར་པ་སའི་ཚལ་མཚོན་བྱེད་ནགས་ཚལ་གཅིག་ཏུ། བཟང་སྡེ་དྲུག་བཅུ་རབ་ཏུ་བྱུང་བ་ལ། སངས་རྒྱས་ཀྱི་ཆོས་གསུང་པའི་ཚུལ་དང་བུ་མོ་དགའ་མོ་དང་དགའ་སྟོབས་མ་ལ་ཆོས་གསུང་པའི་ཚུལ་དང༌། ཡང་ཕྱོགས་གཅིག་ཏུ། བུད་མེད་རྒྱན་གོས་ཕུན་སུམ་འཚོགས་པ་རྒན་གཞོན་གཉིས་ལ་ཆོས་སྟོན་པ་དང༌། བྲམ་ཟེ་ལྷ་ཞེས་བྱ་བ་དང༌། དེའི་ཆུང་མས་བསོད་སྙོམས་འབུལ་བ་དང༌། དེ་གཉིས་ལ་ཆོས་གསུང་པ་དང༌། བྲམ་ཟེས་ས་སྟོང་གཅིག་ནས་བརྒྱན་མང་པོ་རྙེད་པ་དང༌། ཆུང་མས་གསེར་གྱི་བུམ་པ་རྙེད་པའི་ཚུལ་འབྲི་སྟེ། ཝ་ར་ནཱ་སིར་ཆོས་འཁོར་བསྐོར་བའི་སྐོར་རོ། །༼ཐ༽ དེ་ནས་དྲང་སྲོང་སྟེང་རྒྱས་འོད་སྲུང་གི་ནགས་སུ་གཤེགས་ཤིང༌། དྲང་སྲོང་གི་བསུ་བ་བྱས་ཤིང་གདན་ལ་བཞུགས་པ་དང༌། མེ་ཁང་གཅིག་ཏུ་ཀླུས་མེ་སྦར་ཞིང་དུ་བ་འཐུལ་བ་དང༌། སྟོན་པའི་སྐུ་ལས་མེ་དང་དུ་བ་དེ་ལས་ཀྱང་ཆེར་སྤྲོས་ཏེ། ཀླུ་དེའི་མཐའ་རྣམས་མེས་འཁོར་བ་དང༌། ཀླུ་དེས་ཞབས་ལ་ཕྱག་འཚལ་བ་འབྲི། འདི་ལ་སྔཽན་གྱི་ཁ་ཆེ་དང་བལ་བོའི་རི་མོ་ཁུངས་མ་ལས། ཀླུ་དེ་ལྷའི་ལུས་ཅན་མདོག་སྔཽན་པོ་སྦྲུལ་མགོའི་གདེང་ཀ་ཡོད་པ། རལ་གྲི་འཛིན་པའི་རྣམ་པ་ཡོད་པ་མཐོང༌། ཕྱོགས་གཅིག་ཏུ་དྲང་སྲོང་འོད་སྲུང་གི་སྤྱན་དྲངས་ཤིང༌། སྟོན་པས་ལྷུང་བཟེད་ཀྱི་ནང་དུ་ཀླུ་དེ་
བཅུག་ནས་བསྣམས་པའི་ཚུལ་དང༌། ཕྱོགས་གཅིག་ཏུ་དྲང་སྲོང་མང་པོས་མེ་སྦོར་མ་ཐུབ་པ་དང༌། སྟོན་པས་རང་སྦར་དུ་བྱུང་བ་དང༌། བྲམ་ཟེ་རྣམས་ཀྱིས་མེ་བསད་ཀྱང་མ་ཤི་བ་དང༌། སྟོན་པས་རང་ཞིར་མཛད་པ་དང༌། སྟེང་རྒྱས་འོད་སྲུང་ལའང་དེ་ལྟ་བུ་དང༌། བཅོམ་ལྡན་འདས་ཀྱི་དྲུང་དུ་རྒྱལ་ཆེན་བཞི་ལུས་མེ་འོད་འབར་བ་དང་བཅས་ཆོས་ཉན་པ་དང༌། ཡང་བརྒྱ་བྱིན་ཡང་དེ་ལྟར་ཆོས་ཉན་པ་དང༌། ཚངས་པ་ཡང་དེ་དང་འདྲ་བར་ཉན་པ་སྟེ། དེ་གསུམ་ཀར་ལ་ཡང་འོད་བསྲུང་རྩྭ་སྤྱིལ་གྱི་སྒོ་དྲུང་ནས་ལྟ་བ་དང༌། ཡང་ཕྱོགས་གཅིག་ཏུ་འོད་སྲུང་ལ་སྐྱེ་བོ་མང་པོ་ཕྱག་བྱེད་ཅིང༌། ཡོ་བྱད་མང་པོ་འབུལ་བར་འདུས་པ་དང༌། དྲང་སྲོང་རང་ཡང་སྦྱིན་བསྲེག་དང་མཆོད་པ་བྱེད། སངས་རྒྱས་ཕྱོགས་གཞན་ཞིག་ལ་ཐེགས་འགྲོ་བ་དང༌། ཡང་ཕྱོགས་གཅིག་ཏུ་དྲང་སྲོང་གཅིག་པུ་ཟས་ནོར་མང་པོས་སྐོར་པའི་སར། སངས་རྒྱས་ཚུར་བྱོན་པ་དང༌། དྲང་སྲོང་འོད་སྲུང་ལ་སངས་རྒྱས་ཀྱི་ལྷུང་བཟེད་ཀྱི་ནང་ནས་ཤིང་འབྲས་ཆེན་པོ་གནང་བ་དང༌། ཆུང་ངུ་གནང་བ་དང༌། མ་སྨོས་པའི་ལོ་ཐོག་གི་འབྲས་སྐྱོས་མར་གནང་བའི་ཚུལ་དང༌། དེ་བཞིན་དུ་ལྷའི་བདུད་རྩི་གནང་བ་སྟེ་བཞི་པོ་དེ་ལ་རེ་རེ་ཞིང་དྲང་སྲོང་རང་གིས་ཀྱང་སངས་རྒྱས་ལ་བསོད་སྙོམས་འབུལ་བ་དང༌། ཆུ་མིག་རྡོལ་བ་ལ་ཁྲུས་མཛད་པ་དང༌། ཤིང་གི་ཡལ་ག་རང་དུད་དུ་བྱུང་བ་ལ། ཕྱག་འཇུས་ཏེ་བཞེངས་པ་དང༌། རྡོ་ལེབ་ཆེན་པོའི་སྟེང་དུ་སྐུ་འཁྲུ་བ་དང༌། རྡོ་ལེབ་ཆེན་པོའི་སྟེང་དུ་སྐུ་ཆོས་བརྐྱངས་ཏེ་སྐེམ་པ་དང༌། སྟོན་པ་ཆུའི་སྟེང་དུ་ཞབས་འཆག་མཛད་ཅིང༌། དྲང་སྲོང་འོད་སྲུང་སྡོང་གྲུ་ཆུང་ངུ་གཅིག་གི་ནང་དུ་བཞུགས་ཏེ་འོང་པ་
དང༌། ཆུ་འགྲམ་དུ་སྟོན་པ་དང་འོད་བསྲུང་གསུང་གླེང་མཛད་པ་དང༌། དྲང་སྲོང་རྣམས་འདུས་པ་ལ་འོད་སྲུང་ཉིད་གཏམ་སྨྲ་ཚུལ་དང༌། དེ་དག་འཁོར་བཅས་ཀྱི་རལ་པ་བྲེགས་པ་རྣམས་དང༌། ཕྲགས་གདན་དང༌། དབྱུག་གུ་ལ་སོགས་པ་ཐམས་ཅད་ཆུ་ལ་བོར་བ་དང༌། དེ་རྣམས་ཀྱི་རབ་ཏུ་བྱུང་བའི་ཆས་སུ་སྒྱུར་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་དང༌། དྲང་སྲོང་གི་ཆས་ཆུས་ཁྱེར་བ། ག་ཡ་འོད་བསྲུང་དང༌། ཆུ་ཀླུང་འོད་བསྲུང་འཁོར་བཅས་ཀྱི་མཐོང་བ་དང༌། དེ་གཉིས་སྟེང་རྒྱས་འོད་བསྲུང་འཚོལ་དུ་འོང་བ་དང༌། ཁོ་རང་རྣམས་ཀྱི་ཆས་ཀྱང་སྔར་བཞིན་ཆུ་ལ་བོར་ཏེ་རབ་ཏུ་བྱུང་བ་དང༌། རི་ག་ཡའི་རྩེ་མོ་ལ། སྟོན་པ་ཉིད་བཞུགས་ཤིང་རལ་པ་ཅན་སྟོང་རབ་ཏུ་བྱུང་བ་རྣམས་ལ་ཆོས་སྟོན་པ། དེའི་ནམ་མཁའ་ལ་སངས་རྒྱས་ཉིད་གཤེགས་པ་དང༌། བཞུགས་པ་དང༌། འོད་ཟེར་རབ་ཏུ་འགྱེད་པ་དང༌། སྟོད་ནས་མེ་འབར་ཞིང་སྨད་ནས་ཆུ་འབབ་པ་སོགས་ཀྱི་བཀོད་པ་དང༌། རིའི་རྩ་བ་ན་རྒྱལ་པོའི་ཕོ་ཉ་མདུང་ཐུང་ཐོགས་པ་རི་ལ་ལྟ་བ་ཞིག་འབྲི། ཡང་རྒྱལ་པོའི་ཁབ་ཀྱི་གྲོང་ཁྱེར་ཕོ་བྲང་དང་བཅས་པ། ཕོ་བྲང་གི་རྩེ་ནས་རྒྱལ་པོ་གཟུགས་ཅན་སྙིང་པོ་བློན་པོའི་ཚོགས་ཀྱི་སྐོར་བ་ལ་ཕོ་ཉ་གཅིག་གི་ཞུ་བ་ཞུ་ཞིང༌། ཕོ་ཉ་གཅིག་འཕྲིན་པར་གཏོང་པའི་ཚུལ་དང་རིའི་རྩེ་མོ་ན་སངས་རྒྱས་འཁོར་དང་བཅས་པ་བཞུགས་པའི་དྲུང་དུ་ཕོ་ཉ་སླེབ་སྟེ། ཞུ་བ་ཞུ་བའི་ཚུལ། སངས་རྒྱས་འཁོར་བཅས་ལམ་དུ་ཕེབས་པའི་ཚུལ། རྒྱལ་པོ་ཕོ་བྲང་ནས་ཕྱིར་བྱོན་པའི་གྲོང་ཁྱེར་གྱི་སྲང་ཁ་རུ། ཤིང་རྟ་ལ་བཞུགས་པའི་
འཁོར་ལོ་ས་ལ་བྱིང་བ་དང༌། བཙོན་མང་པོ་བཏང་བའི་ཚུལ་དང༌། ཡང་རྒྱལ་པོའི་དབུ་རྒྱན་སྒོའི་ཡ་ཐེམ་ལ་ཐེགས་པ་དང༌། ཡུལ་གཞན་ན་ལས་ཀ་ལ་ཡོད་པའི་མི་རྣམས་ཚུར་བསྡུད་པ་དང༌། དེ་ནས་རྒྱལ་པོ་འཁོར་བཅས་ལམ་དུ་ཞུགས་པ་དང༌། གླང་པོ་ཆེ་དང༌། རྟ་དང༌། ཤིང་རྟ་དང༌། རྐང་ཐང་དང༌། བྲམ་ཟེ་དང་ཁྱིམ་བདག་དུ་མ་ཡང་འབྲི། ཤ་པའི་ཚལ་ལམ་ཏང་བྲང་གི་ཚལ་ཞེས་པ་སྐྱེད་མོས་ཚལ་འདྲ་བ་ཁང་བཟང་ཆེད་པའི་ནགས་མཐོང་ཞིག་ཏུ་དབུས་སུ་སངས་རྒྱས་ཉིད་བཞུགས། གཡས་སུ་སྟེང་རྒྱས་འོད་བསྲུང་དགེ་སློང་དབུ་སྐྲ་དཀར་པོ་ཅན། གཡོན་ནམ་མདུན་དུ་རྒྱལ་པོས་ཕྱག་འཚལ་བ། ཡང་ལོགས་གཅིག་ན་རྒྱལ་པོ་ཐལ་མོ་སྦྱར་ཏེ་བཞུགས་པ། སངས་རྒྱས་ཀྱི་སྐུའི་གཡས་གཡོན་རྒྱབ་ཕྱོགས་རྣམས་སུ་དགེ་སློང་མང་པོ་དང༌། མདུན་ཕྱོགས་ཤེས་ཆེ་བས་མཐའ་སྐོར་དུ་ཁྲོམ་འཚོགས་པ་དང༌། གཡས་གཡོན་གྱི་སྟེང་གི་ནམ་མཁའ་ལ། འོད་བསྲུང་དགེ་སློང་སྒྲེས་པོ་དེ་ཁ་འདྲ་བ་བཞི། མེ་འབར་བ་དང༌། ཆུ་འབབ་པ་དང༌། འོད་འཕྲོ་བ་དང༌། ནམ་མཁའ་ལ་འཆག་པའི་ཚུལ་བྱེད་པ་རེ་རེ། བཅོམ་ལྡན་འདས་ཀྱི་སྐུའི་གཡས་ཟུར་འོག་གི་ཕྱོགས་ནས་དེས་ཕྱག་འཚལ་བ་འབྲི། ཡང་རྒྱལ་པོའི་ཕོ་བྲང་སྔ་མ་དང་འདྲ་རུང་ལ། བཅོམ་ལྡན་འདས་འཁོར་བཅས་གྲོང་ཁྱེར་གྱི་ནང་དུ་ཕེབས་པ་དང༌། ཕོ་བྲང་ནང་གི་བཞུགས་ཁྲི་ལ་བཞུགས་ཤིང༌། རྒྱལ་པོས་བསོད་སྙོམས་དང་མཆོད་པ་སྣ་ཚོགས་འབུལ་བ་དང༌། ཡང་ཕྱོགས་གཞན་ཞིག་ཏུ། འོད་མའི་ཚལ་གྱི་གཙུག་ལག་ཁང་འབྲི་དགོས་ཏེ། དེ་ཡང་དབུས་སུ་
གཙུག་ལག་ཁང་ཆེན་པོ། མཐའ་ཁང་བཟང་ཆུང་ངུ་མང་པོ་དང༌། ཁང་མིག་གིས་སྐོར་བ། ཁང་བཟང་གི་གཡས་གཡོན་དང༌། མཐའ་སྐོར་དུ་ཤིང་ལྗོན་པས་མཛེས་པ། ཕྱིའི་མཐའ་ར་བས་སྐོར་བ། དབུས་ཀྱི་གཙུག་ལག་ཁང་ཆེན་པོར་དེ་བཞིན་གཤེགས་པ་མཉམ་བཞག་མཛད་པ་དང༌། ཁང་བཟང་གཞན་དང༌། ཁང་མིག་རྣམས་ན་དགེ་སློང་མང་པོ་དག་བཞུགས་པའི་བཀོད་པ་འབྲི། ཡང་འོད་མའི་ཚལ་དེ་དང་འདྲ་རུང་མདོར་བསྡུས་པ་ཞིག་ལ། སངས་རྒྱས་དགེ་འདུན་གྱིས་འཁོར་གྱི་སྐོར་བ། ཆོས་འཆད་པ་ཞིག་བྱ། གཡོན་གྱི་ཕྱོགས་ནས་བྲམ་ཟེ་ཀུན་ཏུ་རྒྱུ་གཉིས། གཅིག་ནི་སངས་རྒྱས་ལ་ཕྱག་འཚལ་བ་དང༌། གཅིག་འཁོར་གྱི་ཉན་ཐོས་གཅིག་ལ་ཕྱག་འཚལ་བ་དང༌། དེ་གཉིས་ཀྱི་རྗེས་ནས་བྲམ་ཟེ་མང་པོ་ཡོང་བ། སྐུའི་གཡས་ཕྱོགས་སུ་དེ་གཉིས་དང༌། གཞན་བྲམ་ཟེ་དེ་ཐམས་ཅད་རབ་ཏུ་བྱུང་བར་གྱུར་པ། ལག་ན་ལྷུང་བཟེད་དང་བྱ་མ་བུམ་ཐོགས་པ་འབྲི། གཙུག་ལག་ཁང་དེ་ནས་འགྱང་ཙམ་དུ་གྲོང་ཁྱེར་གྱི་བཀོད་པ་ཞིག་འབྲི་ཞིང༌། དེའི་བྱང་ལམ་དུ་དགྲ་བཅོམ་པ་གཅིག་གིས་བྲམ་ཟེ་གཅིག་ལ་ཆོས་སྟོན་པ་དང༌། ཡང་ཕྱོགས་གཞན་ཅིག་ཏུ་བྲམ་ཟེ་ཅིག་ལ་བྲམ་ཟེ་གཅིག་གི་ཆོས་སྟོན་པ་དང༌། གྲོང་ཁྱེར་གྱི་གསེབ་ཏུ་བྲམ་ཟེ་གཉིས་འཁོར་དང་བཅས་པ་འགྲོ་བ་དང༌། ནགས་ཤིག་ཏུ་དེ་གཉིས་ནམ་མཁའ་ལ་ལྟ་བ་དང༌། ཡང་དགེ་སློང་མང་པོ་དང༌། སྐྱེ་བོ་མང་པོ་གཏམ་སྨྲ་བ་འབྲི་སྟེ།མཆོག་ཟུང་གཉིས་རབ་ཏུ་བྱུངབའི་བཀོད་པ་ཡིན་ནོ། །༼ད༽ ཡང་ཕྱོགས་
གཅིག་ཏུ་ཝ་ར་ནཱ་སི་མཚོན་བྱེད་གྲོང་ཁྱེར་ཅུང་ཟད་དང༌། རི་ཆུང་ངུ་ནགས་ཚལ་ཅན་ལ། སངས་རྒྱས་འཁོར་བཅས་བཞུགས་པ། དྲང་སྲོང་དར་བབ་ཞིག་རིའི་རྩ་བ་ནས་འོང་ཞིང༌། སྟོན་པའི་སྐུ་གཞོགས་སུ་དགེ་སློང་དུ་གྱུར་པ་དང༌། གྲོང་ཁྱེར་ཅིག་གི་གསེབ་ན་བྲམ་ཟེའི་ཁྱེའུ་ཞིག་ལག་པས་གཡས་ན་ཤིང་གི་གླག་བུ་ལ་ཡི་གེ་བྲིས་པ་དང༌། གཡོན་ན་ཅུང་ཟད་གྱེན་དུ་བཏེག་པ། མཐའ་སྐྱེ་བོ་མང་པོས་སྐོར་བ་དང༌། དེ་དང་དྲང་སྲོང་དེ་གཏམ་སྨྲ་བ་འབྲིའོ། །ཡང་གྲོང་ཁྱེར་རི་དེ་ག་འདྲ་རུང་སངས་རྒྱས་འཁོར་བཅས་སྔར་བཞིན་བཞུགས་པ་ལ། སྐུའི་གཡས་ཕྱོགས་ནས་འཁོར་ལོས་བསྒྱུར་བའི་རྒྱལ་པོ་ཡོང་བ་འདྲ་བ་ལ། འཁོར་ཚོགས་མང་པོ་ལྟ་བའི་ཚུལ་འབྲི། ཕྱོགས་གཞན་ཅུང་ཟད་ཐག་རིང་གྲོང་ཁྱེར་གྱི་རྣམ་པ་ཅན་གཅིག་ནས། སྦྲུལ་གྱི་མཇུག་མ་ཐོན་པ་ལ་མགོ་བོས་ཝ་ར་ན་སི་མཚོན་བྱེད་སངས་རྒྱས་བཞུགས་པའི་རི་འགྲམ་གྱི་གྲོང་ཁྱེར་དེར་སླེབ་པ། སྦྲུལ་དེའི་མགོ་ལ་ཤིང་སྡོང་བདུན་སྐྱེས་ཤིང༌། བྱ་དང་སྦྲང་བུ་ལ་སོགས་པ་འཁོར་བའི་རྣམ་པ་དང༌། སྦྲུལ་དེའི་སྐང་པའི་ཐད་ཙམ་ན་གནོད་སྦྱིན་ལག་ན་རྡོ་རྗེ་འབྲི་སྟེ། ངོ་བོ་བཅོམ་ལྡན་འདས་གསང་བདག་ཡིན་ཡང༌། གསང་སྔགས་ཀྱི་སྒྲུབ་ཐབས་ནས་བཤད་པའི་མཚན་ཉིད་མཐའ་དག་ཚང་བ་རང་ཡང་མི་དགོས་ཏེ། སྐུ་མདོག་སྔོ་སང་ཁྲོ་བོའི་ཆ་བྱད་ལ། སྦྲུལ་དང་དར་སྔོན་པོ་དང༌། སྟག་ལྤགས་ལ་སོགས་པའི་རྒྱན་དང་ན་བཟའ་སྣ་ཚོགས་ཅན། མཉམ་པའི་སྟབས་ཀྱིས་བཞེངས་པ། ཕྱག་གཡོན་པས་སྐྱབས་སྦྱིན་དང༌། གཡས་པས་རྡོ་རྗེ་ཐུགས་ཁར་འཛིན་པ་བྱ། བཅོམ་ལྡན་འདས་ཀྱི་སྐུ་དྲུང་དུ། ཀླུ་ཞིག་ཆོས་ཉན་པའང་འབྲི་སྟེ། ཀ་ཏྱ་ཡ་ནའི་སྡེ་ཚན་ནོ། །
༼ན༽ ཡང་བཀོད་པ་གཅིག་ལ། བར་རི་ནགས་ཀྱི་ཆོད་པའི་ལུང་ཚོ་གསུམ་བྱ། ཚུར་ཕྱོགས་དེར་ནགས་ཀྱི་དབུས་རི་ཆུང་ཞིག་ལ། སངས་རྒྱས་བཞུགས་པའི་གཡས་གཡོན་གཉིས་ནས་རི་དྭགས་མང་པོ་དང༌། མདུན་དུ་དགེ་སློང་གཅིག་ཡོད་པ་ལ་བཀའ་སྩོལ་བའི་ཚུལ་དང༌། ཕྱོགས་གཅིག་ཏུ་དགེ་སློང་མང་པོ་སངས་རྒྱས་ལ་ཕྱག་འཚལ་བ་དང༌། དགེ་སློང་གཙོ་འཁོར་དེ་རྣམས་ཕར་ཕྱོགས་ལ་འགྲོ་བའི་ཚུལ་བྱ། ཡུལ་ལྗོངས་བར་མ་དེ་ན། ཁང་པ་གཅིག་ན་བྲམ་ཟེ་གཅིག བུད་མེད་གཅིག བུ་མོ་མཆོག་གཅིག་རྣམས་འདུག་པ་སྒོའི་ཕྱི་ནས་གར་མཁན་རྣམས་གར་བྱེད་པ། གར་མཁན་གཅིག་ལག་ཏུ་ཐུམ་པོ་ཞིག་ཐོག་ནས་བྲམ་ཟེ་དེ་ལ་གཏམ་སྨྲ་བ་དང༌། ཡང་ཁང་པ་དེ་ཁ་འདྲ་བ་ལ། ཁང་སྟེང་ན་བུད་མེད་དེ་ལ་ལག་པ་ལ་འགྲམ་པ་གཏད་ཅིང་ལྟ་བ་དང༌། མདུན་དུ་བུད་མེད་གཏམ་སྨྲ་བ་དང༌། ཕྱོགས་གཅིག་ནས་འདྲེག་མཁན་མོས་སྐྲ་འདྲེག་པ་དང༌། ཚུར་ཕྱོགས་ནས་དགྲ་བཅོམ་པ་དཔོན་སློབ་དེ་རྣམས་ལམ་ནས་ཡོང་བ་དང༌། བུད་མེད་དེས་གར་མཁན་ལ་སྐྲའི་ཆུན་པོ་ཞིག་སྤྲོད་པ་དང། གར་མཁན་དེ་ལ་སྣོད་གཅིག་ཏུ་དོད་རྩ་མང་པོ་བཅུག་ནས་སྟེར་བ་དང༌། ཁང་པ་དེའི་རྒྱབ་ན། དུར་ཁྲོད་དུ་མི་རོ་བསྲེག་པ་དང༌། ཕྱོགས་ཡངས་ས་ཞིག་ཏུ། དགེ་སློང་དགེ་འདུན་དང་བཅས་པ་ལ་བུད་མེད་དེས་གདུགས་ཚོད་གསོལ་བའི་རྣམ་པ་འབྲི།ཡུལ་ཕར་ཕྱོགས་དེ་རུ་གྲོང་ཁྱེར་ཕོ་བྲང་དང་བཅས་པའི་གྲོང་གི་སྒོའི་ཐེམ་པ་ལ། དགྲ་བཅོམ་པ་དེ་ཞབས་བཞག་ཅིང༌། དགེ་སློང་རྣམས་ཀྱང་རྗེས་ལ་འོང་བ། ནམ་མཁའ་ནས་ལྷས་མེ་ཏོག་གི་ཆར་འབེབ་ཅིང༌། འབྱུང་པོ་མང་པོ་
ཐག་རིང་དུ་བྲོས་པ་དང༌། དེ་ལ་གྲོང་ཁྱེར་གྱི་སྒོའི་སྟེང་ནས་མི་གཅིག་གི་ལྟ་ཞིང༌། མི་དེ་རྒྱལ་པོའི་དྲུང་དུ་ཞུ་བ་འབུལ་བ་དང༌། ཕྱི་ཁྱམས་སུ་དགེ་སློང་རྣམས་ལ་མཆོད་སྟོན་གསོལ་བ་དང༌། ཡང་ཁང་བཟང་གཉིས་བྱས་པའི་གཅིག་ཏུ་དགེ་སློང་དང༌། གཅིག་ཏུ་མུ་སྟེགས་ཅན་རྣམས་ལ་ཆོས་སྟོན་གསོལ། སྒོ་སོ་སོ་ནས་དེ་གཉིས་ནི་སོ་སོར་གྱེས་འགྲོ་བ་ལ། མི་རེས་དྲི་བ་རེ་བྱེད་ཚུལ་དང༌། ཡང་ཕྱོགས་གཅིག་ན་གླང་པོ་ཆེའི་ར་བ་རེ་རེར། དགེ་སློང་དང་མུ་སྟེགས་ཅན་ལ་ཁ་ཟས་ངན་པ་རེ་འདྲེན་པ་དང༌། ཡང་སོ་སོར་གྱེས་འགྲོ་བ་ལ་གཏམ་འདྲི་བའི་མི་དང༌། གྲོང་ཁྱེར་ཕོ་བྲང་དེ་ཁ་འདྲ་བའི་དབུས་ཀྱི་ཁང་བཟང་གཅིག་ཏུ། དགེ་སློང་འཁོར་བཅས་ལ་གདུགས་ཚོད་འབུལ་ཞིང༌། རྒྱལ་པོ་ཡང་ཐལ་མོ་སྦྱར་ནས་འདུག་པ་དང༌། གྲོང་ཁྱེར་གྱི་སྒོ་ནས། བུ་མོ་མཆོག་རས་ཀྱི་གོས་གཡོགས་པ་དང༌། འཁོར་དང་བཅས་པ་འཇུག་པ་དང༌། འབྱུང་པོ་མང་པོ་ཐག་རིང་དུ་འབྲོས་པ་དང༌། དེ་ལ་མི་རྣམས་ལྟ་བ་དང༌། ཁང་བཟང་གཅིག་ན། རྒྱལ་པོ་དང་བཙུན་མོ་གཉིས་དང༌། གཞོན་ནུ་གཅིག་དང༌། བྲམ་ཟེ་དང་བློན་པོ་གཅིག་རྣམས་ཡོད་ཅིང༌། ཕྱི་རོལ་གྱིས་ཁྱམས་ཞིག་ན། གླང་པོ་ཆེ་དང༌། གླང་མོ་དང༌། རྔ་མོང་དང། རྟ་མཆོག་དང༌། མི་བ་དན་རིང་པོ་ཐོགས་པ་གཅིག་རྣམས་འབྲི། ཕྱི་རོལ་ཀྱི་ས་ཕྱོགས་ཡངས་པ་ཞིག་ཏུ་དགྲ་བཅོམ་པ་དེས། སྐྱེ་བོ་མང་པོ་ལ་ཆོས་འཆད་པ་དང༌། ཡང་ཁང་བཟང་གཅིག་ཏུ་རྒྱལ་པོ་མནལ་ལོག་པ་དང༌། ནམ་མཁའ་ལ་འོད་ཁྱིམ་ཟླུམ་པོ་བརྒྱད་ཀྱི་ནང་ན། ཙནྡན་དཀར་པོས་ལུས་བྱུགས་པའི་མི་དང༌། དམར་པོས་ལུས་ལ་གཏོར་
བའི་མི་དང༌། རི་གཅིག་དང༌། ངང་པ་གཉིས་དང༌། མིའི་མཆན་ཁུང་གཉིས་ནས་སྦྲུལ་འཆང་བ་དང༌། མི་གཅིག་གི་མགོ་ལ་མེ་འབར་བ་དང༌། མིའི་རྐང་པ་ལ་ཉ་གཉིས་འཁྲིལ་བ་དང༌། བྱ་གོང་མ་བསྲེག་གཅིག་དང་བཅས་པ་བརྒྱད་པོ་དེ་རྣམས་ཧལ་ཚོན་ཏེ། རི་མོ་ཕྲ་མོས་འབྲིའོ། །ཡང་ཁང་བཟང་དེའི་ཕྱོགས་གཅིག་ན། དགྲ་བཅོམ་པ་ལ་རྒྱལ་པོས་ཞུ་བ་བྱེད་པ་དང༌། ཁྱམས་ཡངས་པ་གཅིག་ཏུ་རྒྱལ་བོ་ལ་བེའུ་རས་དང༌། ལ་དམར་རིན་པོ་ཆེ་དང༌། གླང་ཆེན་གཅིག རྟ་གཉིས། གསེར་དང་རིན་པོ་ཆེ་སྤེལ་བའི་འཕྲེང་བ། རལ་གྲི་གཉིས། ནོར་བུའི་ལྷམ་ཆ་རྣམས་འབུལ་མཁན་བྱུང་བའི་བཀོད་པ་འབྲི། ཡང་ཕྱོགས་ཡངས་པ་གཅིག་ཏུ། དགྲ་བཅོམ་པ་ལ་བེའུ་རས་དང༌། བུད་མེད་གཅིག་ལ་གསེར་འཕྲེང༌། གཅིག་ལ་ལ་དམར། བྲམ་ཟེ་ལ་རྟ། གཞོན་ནུ་ལ་ལྷམ། བློན་པོ་ལ་རལ་གྲི་རྣམས་བྱུང་བ་དང༌། ཕྱོགས་གཅིག་ཏུ་དགྲ་བཅོམ་པ་ལ་རྒྱལ་པོས་ཐལ་མོ་སྦྱར་ཞིང་ཞུ་བ་འབུལ་བ་དང༌། ཡང་གཙུག་ལག་ཁང་གཅིག་ན་དགྲ་བཅོམ་པ་དེ་ཡུལ་ལྗོངས་ཐོག་མའི་ཕྱོགས་ལ་གདོང་གཏད་ཅིང་ཐལ་མོ་སྦྱར་ནས་ཞུ་བ་འབུལ་ཚུལ་དང༌། དེ་ཡུལ་དེའི་ཕྱོགས་གཅིག་ཏུ། གཙུག་ལག་ཁང་གཅིག་ནས་སངས་རྒྱས་ཀྱི་དེ་ལ་བཀའ་སྩོལ་བའི་ཚུལ་འབྲི། སྔར་གྱི་རྒྱལ་བོའི་ཕོ་བྲང་གི་འཁྲིས་དེར། དགྲ་བཅོམ་པ་དགེ་འདུན་དང་བཅས་པ་ལ། འབྲུ་དང་ན་བཟའ་དང༌། སྣོད་སྤྱད་དང༌། ནོར་དང་ཡོ་བྱད་སྣ་ཚོགས་པ་དག་དང༌། རྟ་དང་བ་གླང་ལ་སོགས་པས་འབུལ་སྣོད་དཔག་ཏུ་མེད་པས་མཐའ་སྐོར་ཞིང་འབུལ་
བའི་ཚུལ་དང༌། རྒྱལ་པོ་ཡང་ཐལ་མོ་སྦྱར་ཞིང་སྨོན་ལམ་འདེབས་པ་འབྲི་སྟེ། འཕགས་པ་ཀ་ཏྱ་ཡ་ན་མངགས་ཏེ། གྲོང་ཁྱེར་འཕགས་རྒྱལ་དུ་རྒྱལ་པོ་རབ་སྣང་ལ་སོགས་པ་སྐྱེ་བོ་ཐམས་ཅད་དགེ་བ་ལ་འགོད་པར་མཛད་པའི་སྐབས་ཀྱི་ལེ་ཚན་ནོ། །༼པ༽ ཡང་ཁྱིམ་ཡངས་པ་གཅིག་ཏུ་སངས་རྒྱས་ལ་ཁྱིམ་བདག་མོ་གཉིས་ཀྱི་བསོད་སྙོམ་འབུལ་བ་དང༌། ཡང་དེའི་སྒོ་དྲུང་ཕྱི་ནང་གང་བདེ་བ་ཞིག་ན། སྟོན་པས་ཁྱིམ་བདག་མོ་དེ་ལ་ལུང་བསྟན་མཛད་པའི་ཚུལ་བྱ། ཡང་ཁྱིམ་དེའི་ཕྱི་རོལ་ཕྱོགས་གཅིག་ཏུ་གཅེར་བུ་པ་དང་ཁྱིམ་བདག་དེ་གྲོས་བྱེད་པ་དང༌། ཁྱིམ་བདག་མོ་སྦྲུམ་མ་དེའི་དཀུ་མཉེ་བ་དང༌། དེ་ཤི་སྟེ་ཕུང་པོ་འདོན་པའི་བཀོད་པ་དང༌། དུར་ཁྲོད་གཅིག་ཏུ་སྐྱེ་བོ་མང་པོ་ཚོགས་པའི་དབུས་སུ། དེའི་ཕུང་པོ་བསྲེགས་པས། ལྟོ་གས་པའི་དཀྱིལ་ནས། པདྨའི་སྡོང་པོ་དང་པདྨ་ཁ་ཕྱེ་བའི་དབུས་ན་ཁྱེའུ་ཡོད་པ་དང༌། སངས་རྒྱས་ཀྱི་བཀའ་སྩལ་ནས་རྒྱལ་བུ་མཚོ་བྱེད་གཞོན་ནུ་དེ་ལེན་པར་རྩོམ་པ་དང༌། སྔར་གྱི་ཁྱིམ་བདག་དེ་གཅེར་བུ་པའི་གདོང་དུ་ལྟ་བ་འབྲི། དེ་དང་ཉེ་བར་གཞལ་མེད་ཁང་གཅིག་ཏུ། གཞོན་ནུ་ཞིག་ལྷ་མོ་མང་པོ་དང༌། ལྷའི་འབྱོར་པ་ལྟ་བུ་དང་ལྡན་པ་འབྲི་སྟེ། མེ་སྐྱེས་ལུང་བསྟན་པའི་སྐབས་སོ། །༼ཕ༽ ཡང་བཀོད་པ་གཅིག་ལ། རི་གཅིག་གི་དྲུང་ན། དུར་ཁྲོད་ཞིག་ཡོད་པ་ན་སངས་རྒྱས་བཞུགས་པའི་བཀོད་པ་དང༌། དེའི་དྲུང་ན་ཁྱིམ་བདག་ཅིག་ཆོས་ཉན་པའི་ཚུལ་བྱ་ཞིང༌། དེ་དང་མི་རིང་བའི་གྲོང་ཁྱེར་གཅིག་གི་ཁང་བཟང་ན། སྐྱེ་བོ་མང་པོ་ཟས་གཡོ་བའི་ལས་བྱེད་པ་དང༌། ཁྱིམ་བདག་གཉིས་གྲོས་བྱེད་
པའི་རྣམ་པ་འབྲི། ཕྱི་ཁྱམས་ཀྱི་སྒོའི་ནང་ན་ཁྱིམ་བདག་དེ་འགྲོ་བཞིན་པ་ལ། བར་སྣང་ནས་ལྷའི་རྣམ་པ་ཞིག་གིས་གཏམ་སྨྲ་བ་དང༌། ཁྱིམ་བདག་དེ་དང་ཉན་ཐོས་ཞིག་སྡེབས་ནས་སངས་རྒྱས་ཀྱི་དྲུང་ན་བཀོད་པ་ཕྱི་མ་རྣམས་ཀྱི་ས་ལ་ཕར་འགྲོ་བའི་ཚུལ་ཞིག་བྱ། སྔར་གྱི་ཁང་བཟང་མི་མང་པོ་ལས་བྱེད་པ་དེ་དང་འབྲེལ་བའི་ཁང་པ་གཞན་ཞིག་ཏུ། སངས་རྒྱས་འཁོར་བཅས་ལ་ཁྱིམ་བདག་གཅིག་གིས་མཆོད་པ་འབུལ་བའི་རྣམ་པ་བྱེད། དེ་རྣམས་དང་མ་འབྲེལ་བར་ཐེག་ཡོད་པའི་ཕྱོགས་གཞན་གཅིག་ཏུ། ཁང་བཟང་གཅིག་གི་སྒོ་དྲུང་ན། མུ་སྟེགས་པ་ཆ་བྱད་སྣ་ཚོགས་པ་མང་པོ་འདུས་པ་དང༌། དེ་ལ་ཁྱིམ་བདག་དེས་གཏམ་སྨྲ་བ་དང༌། མཐའ་ཤིང་གིས་སྐོར་བའི་ས་ཕྱོགས་གཅིག་གསེར་གྱི་སྦྲམ་བུར་བརྡལ་ཞིང༌། མི་མང་པོས་གསེར་གྱི་ཁུར་པོ་ས་ཆ་དེར་སྐྱེལ་བའི་རྣམ་པ་དང༌། ཁྱིམ་བདག་དང་རྒྱལ་པོའི་བུ་གཉིས་གཏམ་སྨྲ་བའི་རྣམ་པ་བྱེད། ཡང་མི་གཟི་བརྗིད་ཆེ་བ་བཞིའི་རྩ་ན། ཁྱིམ་བདག་རྒྱལ་པོའི་བུ་དང་བརྩོད་པའི་ཚུལ་དང༌། རྒྱལ་པོ་ཞིག་གི་དྲུང་དུ་ཡང་ཁྱིམ་བདག་དང་མུ་སྟེགས་རྣམས། ཕན་ཚུན་དུ་གཏམ་སྨྲ་བའི་ཚུལ་བྱེད། དེ་ནས་ཕྱོགས་གཞན་གཅིག་ཏུ་སྐྱེ་བོ་མང་པོ་འདུས་པ་ལ། ཕྱོགས་གཅིག་ཏུ་འཕགས་པ་ཤཱ་རིའི་བུ་ཁྲི་ལ་འདུག་པ་དང༌། དེའི་ཕྱོགས་ནས་རླུང་ལངས་པ། གླང་པོ་ཆེ་བྱ་ཁྱུང་རྣམས་ཡོད་པ། ཕྱོགས་གཅིག་ན་མུན་སྟེགས་འགའ་རེ་འདུག་པ། དེའི་ཕྱོགས་ལ་ཤིང་སྡོང་དང་པད་ཚལ་མཚོ་སྦྲུལ་རྣམས་ཡོད་པ། ཤིང་སྡོང་གཅིག་རླུང་བུས་དུམ་བུར་བཅག་པ་རྩ་བ་ནས་བཏོན་པ་དང༌། པདྨའི་རྫིང་བུ་གླང་པོ་
ཆེ་ཆེན་པོ་ཞིག་གི་དཀྲུགས་ཤིང༌། པདྨ་ཟོས་པ་དང༌། སྦྲུལ་མགོ་བདུན་པ་ཆེན་པོ་ཞིག་འོང་བ་ལ། བྱ་ཁྱུང་མང་པོས་སྦྲུལ་གྱི་མགོ་ནས་ཟ་བ་དང༌། རོ་ལང་ཞིག་བྱུང་བ་ལ། ཤ་རིའི་བུས་ཕུར་བུའི་བཏབ་པ་དང༌། རོ་ལང་གི་མུ་སྟེགས་ཅན་གཅིག་བརྡས་པ་དང༌། མུ་སྟེགས་དེ་ཤཱ་རིའི་བུ་ལ་ཕྱག་འཚལ་ཞིང༌། ཤཱ་རིའི་བུས་རོ་ལངས་ཀྱི་ཕུར་བ་བཏོན་པ་དང༌། ཡང་ཕྱོགས་གཅིག་ན་མཐའ་ཤིང་སྡོང་གིས་སྐོར་བའི་དབུས་དེར། སྐྱེ་བོ་མང་པོ་གཙུག་ལག་ཁང་བརྩིག་པ་དང༌། དེ་ཁའི་ཕྱོགས་ཀྱི་ཟུར་ལ་ལ་ན། ཐིག་སྣ་གཅིག་ཤཱ་རིའི་བུས་བཟུང༌། གཅིག་ཁྱིམ་བདག་གཅིག་གིས་བཟུང་ནས་ཐིག་འདེབས་པའི་ཚུལ་དང༌། དེ་ཁའི་ཐད་ཀྱི་ནམ་མཁའི་ཐད་མཐོན་པོར་གསེར་གྱི་ཁང་བཟང་གཅིག་དང༌། རིན་པོ་ཆེ་སྣ་བདུན་གྱི་ཁང་བཟང་གཅིག་འབྲི། ཁང་བཟང་དེ་གཉིས་དང་འོག་གི་གཙུག་ལག་ཁང་བརྩིག་པའི་སྟེང་དེར། གསེར་རིས་ལྟ་བུ་རི་མོ་ཞིག་གི་སྦྲེལ། གཙུག་ལག་ཁང་བརྩིག་པ་དེ་དང་ཉེ་བའི་ཤིང་དྲུང་གཅིག་ན། ཤཱ་རིའི་བུ་ཞབས་འཆག་བྱེད་པ། གྱད་ལྕགས་ཀྱི་དབྱུག་པ་ཐོགས་པས། མུ་སྟེགས་མང་པོ་འདེད་པ་དང༌། ཤཱ་རིའི་བུ་ཁྲི་ལ་བཞུགས་ནས་མུ་སྟེགས་མང་པོ་ལ་ཆོས་སྟོན་པ་དང༌། རབ་ཏུ་བྱུང་བ་འབྲི་སྟེ། ཕྱོགས་གཅིག་ལ་མུ་སྟེགས་ཀྱི་ཆ་ལུགས་དང༌། ཕྱོགས་གཅིག་ལ་རབ་བྱུང་གི་ཆས་ཡོད་པ་རྣམས་འབྲི་བ་ལེགས། གཙུག་ལག་ཁང་དེའི་སྒོ་ཁང་གི་ཐད་ན། རྒྱལ་པོའི་བུས་བཀོད་པ་བྱེད་ཅིང༌། སྒོ་ཁང་བརྩིག་པ་འབྲི། བཀོད་པ་འདི་ཚོ་དང་སྔར་གྱི་དུར་ཁྲོད་ཡོད་པ་དེའི་བར་སྟོང་ལ། སངས་རྒྱས་འཁོར་བཅས་ལམ་དུ་བཞུགས་ནས་
འབྱོན་པ། ལམ་གྱི་ས་སྟོངས་སུ་འཁོར་བཅས་བཞུགས་ཤིང༌། སྐྱེ་བོ་མང་པོས་མཆོད་པ་སྣ་ཚོགས་བྱེད་པའི་བཀོད་པ་འབྲི། སྔར་གྱི་གཙུག་ལག་ཁང་བརྩིག་བཞིན་པའི་བཀོད་པ་དེ་དང་ཉེ་བར། མཉན་ཡོད་ཀྱི་གྲོང་ཁྱེར་ཆེན་པོའི་དབུས་ན་རྒྱལ་པོ་ཕོ་བྲང་དང་བཅས་པ་ཡོད་པ་ལ། དེ་དང་ཉེ་བ་ན་སངས་རྒྱས་འཁོར་བཅས་འབྱོན་ཞིང༌། ས་མཐིལ་ལ་སྐྱེ་བོ་མང་པོ་འདུས་པ་དང༌། སྟེང་གི་ནམ་མཁའ་ནས་ལྷ་རྣམས་ཀྱི་མེ་ཏོག་གི་ཆར་མང་པོ་འབེབས་པ་དང༌། སྔར་བརྩིག་བཞིན་པའི་གཙུག་ལག་ཁང་དེ་གྲུབ་པའི་ཚུལ་དུ་བྱས་པ། དེ་དང་ཉེ་བའི་ཕྱོགས་གཞན་ཞིག་ཏུ། ཁང་བཟང་ཆེན་པོ་ཁང་བཟང་བཅུ་དྲུག་གིས་སྐོར་བ། དེའི་མཐའ་ཁང་མིག་དྲུག་ཅུས་སྐོར་བ་མཚོན་བྱེད་དང༌། ཕྱི་ལྕགས་རིས་སྐོར་བ། ལྕགས་རིའི་ཕྱི་ནང་ཐམས་ཅད་ཤིང་སྣ་ཚོགས་པས་བཏིབས་པ། འདི་ནི་རྒྱལ་བུ་རྒྱལ་བྱེད་ཀྱི་ཚལ་ཡིན་ཏེ། དེའི་ནང་དུ་སངས་རྒྱས་འཁོར་དུ་མས་སྐོར་བ་ལ། ཁྱིམ་བདག་མགོན་མེད་ཟས་སྦྱིན་གྱི་གསེར་གྱི་རིལ་བ་སྤྱི་བླུགས་ནས་ཆབ་འབུལ་བའི་སྟེང་ཀ་བྱེད་པ། གཙུག་ལག་ཁང་གི་ཕྱི་རོལ་གཅིག་ཏུ་ཉན་ཐོས་གཅིག་གི་ལྷུང་བཟེད་ཆེན་པོ་གཅིག་བཟེད། ཁྱིམ་བདག་སྤྱི་བླུགས་ཆེན་པོ་གཅིག་ཐོགས་ནས། ལྷུང་བཟེད་དེར་ཆུ་ལྡུགས་པ་དང༌། གཙུག་ལག་ཁང་གི་ནང་གི་སངས་རྒྱས་འཁོར་བཅས་ལ་མཆོད་པའི་ཡོ་བྱད་མང་བོ་ཡོད་པ་ཞིག་འབྲི། ཡང་རྒྱལ་བུ་རྒྱལ་བྱེད་ཀྱི་ཚལ་དེ་འདྲ་རུང་ལ། སངས་རྒྱས་དགེ་འདུན་དང་བཅས་པའི་སྐུའི་མདུན་དུ། རྒྱལ་པོ་གསལ་རྒྱལ་འཁོར་མང་པོ་
དང་བཅས་ཏེ་ཐལ་མོ་སྦྱར་ནས་ཆོས་ཉན་པ་འབྲི། དེ་དག་ནི་རྒྱལ་བུ་རྒྱལ་བྱེད་ཀྱི་ཚལ་བཞེངས་ཤིང༌། རྒྱལ་པོ་གསལ་རྒྱལ་དད་པ་ལ་བཀོད་པའི་སྡེ་ཚན་ནོ། །༼བ༽ དེ་ནས་རྒྱལ་པོའི་ཕོ་བྲང་ཞིག་ནས་ཕོ་ཉ་བ་ཞིག་མངགས་ཏེ། ཕོ་བྲང་གཞན་ཞིག་ཏུ་འགྲོ་བའི་བཀོད་པ་དང༌། ཕོ་བྲང་ཕར་ཕྱོགས་དེ་ན་རྒྱལ་པོ་ཟས་གཙང་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་པའི་ཚུལ་ལ། དེའི་མདུན་ན་འདོན་གྱི་བུ་འཆར་ཀ བློན་པོའི་རྣམ་པ་མི་ཤ་ཁ་ནག་པོ་ཞིག་གི་རྒྱལ་པོ་ལ་ཞུ་བ་བྱེད་པའི་ཚུལ་བྱ། ཕོ་བྲང་ཚུར་ཕྱོགས་དེ་དང་ཉེ་བ་ན། ཁང་བཟང་སྔ་མ་འདྲ་བ་ལ་མདོར་བསྡུས་པ་གཅིག་ཏུ། སངས་རྒྱས་བཞུགས་པའི་སྐུ་མདུན་ནས་འཆར་ཀ་དེས་ཞུ་ཡིག་གི་སྒྲོམ་བུ་འབུལ་བ་ལ། ཡང་དེ་ཁའི་ཕྱོགས་གཅིག་ཏུ་སངས་རྒྱས་ཁྲི་ལ་བཞུགས་པ། སྐུ་མདུན་ན་འདུག་པས་བཀའ་ཉན་པ་དང༌། ཡང་དེ་དང་འབྲེལ་བའི་ཕྱོགས་གཅིག་ཏུ་འཕགས་པ་ཤཱ་རིའི་བུའི་མདུན་དུ་འཆར་ཀ་རབ་ཏུ་བྱུང་བ་དང༌། འཆར་ཀ་བཅོམ་ལྡན་འདས་ཀྱི་དྲུང་ནས་ཕར་འགྲོ་བ་རྣམས་འབྲི། ཕོ་བྲང་ཕར་ཕྱོགས་དེ་དང་ཉེ་བར་ཁང་བཟང་གཞན་ཞིག་ཏུ། རྒྱལ་པོ་ཟས་གཙང་གི་མདུན་ན། འཆར་ཀ་རབ་ཏུ་བྱུང་སྟེ་གཏམ་སྨྲ་བ་དང༌། རྒྱལ་བུ་རྒྱལ་བྱེད་ཚལ་གྱི་བཀོད་པའི་རས་བྲིས་སྟོན་པ། སྒོའི་ཕྱི་ན་འཆར་ཀ་གནས་པ་མི་གཞན་ཞིག་ལ་ལོན་སྤྲོད་པའི་ཚུལ་འབྲི། དེ་དང་ཉེ་བའི་སྐྱེད་མོས་ཚལ་ཞིག་གི་དབུས་སུ་གཙུག་ལག་ཁང་བཞེངས་བཞིན་པའི་བཀོད་པ་དང༌། ཡང་ཕྱོགས་གཞན་གཅིག་ནས་སངས་རྒྱས་འཁོར་བཅས་ལམ་ལ་གཤེགས་པ་དང༌། ཆུ་འགྲམ་ཞིག་ཏུ་དགེ་སློང་
རྣམས་ཁྲུས་བྱེད་པ་དང༌། སེར་སྐྱའི་གྲོང་ཁྱེར་ཕོ་བྲང་དང་བཅས་པ་དང༌། དེའི་མདུན་ནས་ཚུར་ལ་ཤིང་རྟ་དང༌། ཤིང་རྟ་འདྲེན་བྱེད་ཀྱི་རྟ་དང༌། ཤིང་རྟ་ལ་བཙུགས་པའི་དར་པོ་ཆེ་དང༌། བ་དན་དང༌། ཤིང་རྟའི་ནང་ན་ཡོད་པའི་མི་རྣམས་ཀྱི་གོས་ལྷམ་ཐོད་རྔ་ཡབ་ལ་སོགས་པའི་ཡོ་བྱད་ཐམས་ཅད་ཁ་དོག་མཚུངས་པ་སྟེ། ཐམས་ཅད་དཀར་པོ་དང༌། ཐམས་ཅད་སྔོན་པོ་དང༌། ཐམས་ཅད་དམར་པོ་དང༌། ཐམས་ཅད་སེར་པོ་དང༌། ཐམས་ཅད་ཁྲ་བོ་ལ་སོགས་པ་དང༌། གཞན་ཡང་བསུ་བའི་བཀོད་པ་རྒྱ་ཆེན་པོ་འབྲི་ཞིང༌། ཚུར་ཕྱོགས་ནས་སངས་རྒྱས་ཏ་ལ་བདུན་སྲིད་ཀྱི་ནམ་མཁའ་ནས་འབྱོན་ཞིང༌། སྤྲུལ་པ་མང་པོ་འགྱེད་པ་སོགས་རྫུ་འཕྲུལ་གྱི་བཀོད་པ་སྤྱི་དང་འདྲ་བ་དང༌། འཁོར་རྣམས་ཏ་ལ་དྲུག་སྲིད་ཀྱི་ནམ་མཁའ་ལ་འབྱོན་པ་སོགས་མཚོན་བྱེད་བྱ། ཕོ་བྲང་དེ་དང་ཉེ་བ་ན། ནྱ་གྲོ་དྷའི་ཀུན་དགའ་ར་བ། རྒྱལ་བུ་རྒྱལ་བྱེད་ཀྱི་ཚལ་དེ་འདྲ་རུང་གི་སྒོ་དྲུང་ན། སྐྱེ་བོའི་ཚོགས་མང་པོ་དང༌། སངས་རྒྱས་འཁོར་དང་བཅས་པ་ཕེབས་པ་ལ། རྒྱལ་པོས་ཕྱག་འཚལ་བ་དང༌། ཀུན་དགའ་ར་བ་དེའི་ནང་དུ་སངས་རྒྱས་ལ་འཁོར་མང་པོས་སྐོར་ཞིང་རྒྱལ་པོ་ལ་སོགས་པ་ཆོས་ཉན་པའི་ཚུལ་བྱ། དེའི་སྒོ་དྲུང་དུ་མི་བརྒྱན་དང་ལྡན་པ་གཅིག་ལ་སྐྱེ་བོ་མང་པོས་སྨད་ཅིང་སྡིགས་པའི་ཚུལ་འབྲི། དེ་དང་ཉེ་བ་ན་སྐྱེད་མོས་ཚལ་གཉིས་སུ་སངས་རྒྱས་ལ་རྒྱལ་པོའི་རྣམ་པ་རེ་རེ་གཙོ་བོར་གྱུར་པའི་འཁོར་མང་པོ་ཆོས་ཉན་པ་དང༌། སྒོ་དྲུང་དུ་མི་རྒྱན་ལྡན་གཅིག་ལ། མི་མང་པོས་སྨོད་པའི་སྔ་མ་དང་འདྲ་བ་འབྲི། དེ་ནས་ཁང་བཟང་གཅིག་ན་རྒྱལ་པོ་ཟས་གཙང་ཡོད་
པའི་མདུན་དུ། དགྲ་བཅོམ་པ་གཅིག་གདན་མཐོ་བ་ལ་བཞུགས་པ་དང༌། སྟེང་གི་ནམ་མཁའ་དགྲ་བཅོམ་པ་དེ་ཁའི་སྐུ་ལས་སྤྲུལ་པའི་དགེ་སློང་ནམ་མཁའ་ལ་འཆག་པ་དང༌། གཟིམས་པ་དང༌། འོད་ཟེར་འགྱེད་པ་དང༌། སྨད་ནས་མེ་འབར་ཞིང༌། སྟོད་ནས་ཆུ་འབྲུམ་པ་ལ་སོགས་པ་འབྲི། ནྱ་གྲོ་དྷའི་ཀུན་དགའ་ར་བ་སྔ་མ་དང་འདྲ་བ་ལས། ལྕགས་རི་སོགས་ཐམས་ཅད་ཤེལ་ལྟར་ཕྱི་གསལ་ནང་གསལ་དུ་ཡོད་པ། དབུས་སུ་སངས་རྒྱས་ལ་བརྒྱ་བྱིན་ལ་སོགས་པ་ལྷ་འབའ་ཞིག་གིས་སྐོར་བ་དང༌། སྒོ་བཞི་ན་རྒྱལ་ཆེན་བཞི་འཁོར་མང་པོ་དང་བཅས་པས་བསྲུང་བ། དགྲ་བཅོམ་པ་དེས་རྒྱལ་པོ་ཟས་གཙང་ཁྲིད་ནས། སྒོ་དྲུང་དུ་སླེབ་ཅིང༌། ཡུལ་འཁོར་བསྲུང་དང་གཏམ་སྨྲ་བ་དང༌། ཡང་ཁང་བཟང་གཅིག་ཏུ་བཅོམ་ལྡན་འདས་ཀྱི་དྲུང་དུ། རྒྱལ་པོ་ཟས་གཙང་ཆོས་ཉན་པའི་བཀོད་པ་འབྲི། དེ་ནས་ཁང་བཟང་གཞན་གཅིག་ཏུ་བཅོམ་ལྡན་འདས་ལ་རྒྱལ་པོ་ཟས་གཙང་འཁོར་བཅས་ཀྱིས་བསོད་སྙོམས་འབུལ་བའི་རྣམ་པ་དང༌། ཁང་བཟང་གཞན་གཅིག་ཏུ་བཅོམ་ལྡན་འདས་འཁོར་བཅས་ལ། བཙུན་མོའི་ཚོགས་ཀྱི་མཆོད་པ་འབུལ་བ་དང༌། ཡང་ཁང་བཟང་གཞན་གཅིག་ཏུ། རྒྱལ་པོ་ཟས་གཙང་དང༌། མཆེད་གསུམ་དང༌། སྐྱེ་བོ་མང་པོ་འདུས་པ་དང༌། རྒྱལ་པོའི་རྣམ་པ་ཞིག་གི་ཡི་གེ་བྲིས་པ་ལ་རྒྱལ་རིགས་ཐམས་ཅད་ཀྱི་ཉན་པའི་ཚུལ་དང༌། ཁང་བཟང་ཆུང་ངུ་གཅིག་ན་རྒྱལ་རིགས་གཉིས། གཏམ་སྨྲ་ཞིང༌། མལ་སྟན་ལ་སྙེས་པའི་ཚུལ་དང༌། ཤཱཀྱ་རྣམས་གླང་པོ་ཆེ་ལ་ཞོན། གདུགས་དང་རྔ་ཡབ་སོགས་དང༌། གོས་རྒྱན་གཟབ་
པར་བྱས་པ་དང༌། ཁ་གཅིག་ཤིང་རྟར་བཞུགས་པ་དང༌། ཁ་གཅིག་ཁྱོགས་བྱམས་ཁྲི་ལ་བཏེག་ནས་འགྲོ་བ་སོགས་རྣམ་གྲངས་མང་བ་དང༌། གཡས་གཡོན་ནས་སྐྱེ་བོ་མང་པོ་ལྟ་བ་དང༌། ཕྱོགས་གཅིག་ནས་སའི་སྟེང་དུ་གདན་ཁྲི་ལ་རྒྱལ་པོ་ཟས་གཙང་བཞུགས། འཁོར་ཁ་རེ་དང༌། བྲམ་ཟེ་བཞི་ལྔ་ཙམ། ཤཱཀྱ་རྣམས་ལ་ལྟ་བ་འབྲི། ཤཱཀྱ་དེ་རྣམས་ཀྱི་ནང་ནས་རྗེས་ན་ཁ་གཅིག་ལས། གཅིག་གི་གཙུག་གི་ནོར་བུ་དམར་པོ་ཁྲས་ཁྱེར་བ་དང༌། གཅིག་གིས་མུ་ཏིག་གི་དོ་ཤལ་ས་ལ་ལྷུང་བ་དང༌། གཅིག་གི་འཁྲིས་སུ་བོང་བུ་སྐད་འདོན་པ་འབྲི། ཕར་ཕྱོགས་སུ་ནྱ་གྲོ་དྷའི་ཀུན་དགའ་ར་བ་སྔར་གྱི་དེ་ཁ་འདྲ་རུང་ཞིག་བྱས་ནས། ཕྱི་འཁྱམས་སུ་རས་བཏིང་པའི་སྟེང་དུ། དེ་རྣམས་ཀྱི་རྒྱན་ཐམས་ཅད་སྤུད་པ་དང༌། འདྲེག་མཁན་གྱི་སྐྲ་འདྲེག་པ་དང༌། གཙུག་ལག་ཁང་གི་ཕྱི་རོལ་དུ་ཁྲུས་བྱེད་པ་དང༌། གཙུག་ལག་ཁང་གི་ཁང་བཟང་གི་ནང་ཞིག་ཏུ། སངས་རྒྱས་དགེ་འདུན་དང་བཅས་པའི་དབུས་སུ་དེ་རྣམས་རབ་ཏུ་བྱུང་བའི་བཀོད་པ་འབྲི། དགེ་འདུན་གྱི་ནང་གི་དགེ་སློང་གཅིགསྔར་གྱི་འདྲེག་མཁན་དེ་རབ་ཏུ་བྱུང་བའི་རྣམ་པ་ལ། ཤཱཀྱ་གསར་དུ་རབ་ཏུ་བྱུང་བ་ཞིག་གིས་ཞབས་ལ་མགོ་བོས་འདུད་པ་འབྲི། གཞན་རྣམས་ཤ་མདོག་དཀར་བ་ལ། འདྲེག་མཁན་དེ་སྐུ་ཤ་སྔོ་སངས་སུ་བྲིས་ན་ལེགས་པར་གོ་སྟེ། རབ་ཏུ་བྱུང་བའི་གནས་སྐབས་ན་འཕགས་པ་ཉེ་བ་འཁོར་ཡིན་ནོ། །དེ་དག་ནི་ཡབ་སྲས་མཇལ་བའི་སྡེ་ཚན་ནོ། །༼མ༽ ཡང་ནྱ་གྲོ་དྷའི་ཀུན་དགའ་ར་བ་ན། སངས་རྒྱས་ཀྱི་སྐུའི་བཀོད་པ་ལྔ་བརྒྱ་བསྟན་པ་མཚོན་བྱེད་ལ། ཆུ་སོགས་ཇི་ལྟར་རིགས་པ་ཁང་བཟང་གཅིག་ན་
བཞུགས་པ་དང༌། ཁང་བཟང་གཞན་གཅིག་ནས་བཙུན་མོ་གྲགས་འཛིན་མས་ཟས་མཆོག་གིས་གང་བའི་སྣོད་སྒྲ་གཅན་འཛིན་བྱིས་པའི་རྣམ་པ་ཅན་གྱི་ལག་ཏུ་གཏོད་པ་དང༌། སངས་རྒྱས་མང་པོ་བཞུགས་པ་དེ་རྣམས་ཀྱི་ནང་གི་སངས་རྒྱས་གཅིག་ལ་སྒྲ་གཅན་འཛིན་གྱི་ཟས་མཆོག་འབུལ་བའི་ཚུལ་འབྲི། ཡང་ཁང་བཟང་གཞན་ཞིག་ཏུ། བཅོམ་ལྡན་འདས་དགེ་འདུན་གྱིས་འཁོར་གྱིས་བསྐོར་བའི་དབུས་ན་བཞུགས་པ་ལ། བུད་མེད་ཀྱི་ཚོགས་མང་པོས་ཆོས་ཉན་པ་དང༌། ནམ་མཁའ་ལ་སངས་རྒྱས་མང་པོ་འཕུར་བ་དང༌། འོད་ཟེར་སྣ་ཚོགས་པ་འཕྲོ་བ་དང༌། ཕྱག་ཏུ་རི་བོ་བསྣམས་པ་དང༌། ཟླ་བ་ཉི་མ་ལ་ཕྱག་གིས་རེག་པ་དང༌། སྐུའི་བ་སྤུའི་ཁུང་བུ་ནས་བྱ་ཁྱུང་དང་ཀླུ་དང༌། གླང་པོ་དང༌། སེང་གེ་ལ་སོགས་པ་སྣ་ཚོགས་པ་སྤྲོ་བ་དང༌། སངས་རྒྱས་གཅིག་གི་སྐུ་ལས། སངས་རྒྱས་དཀར་པོ། དམར་པོ། ལྗང་ཁུ་སོགས་སྤྲོ་བ་དང༌། ཡང་སྐུ་ལས། ལྷ་དང༌། ལྷ་མོ་དང༌། བྲམ་ཟེ་དང༌། དགེ་སློང་སོགས་སྤྲོ་བ་དང། དེ་བཞིན་དུ་སྟོད་ནས་མེ་འབར་ཞིང༌། སྨད་ནས་ཆུ་འབབ། སྨད་ནས་མེ་འབར་ཞིང༌། སྟོད་ནས་ཆུ་འབབ་པ་ལ་སོགས་ཆོ་འཕྲུལ་སྣ་ཚོགས་སྟོན་པ་ཞིག་འབྲི། ཡང་ཁང་བཟང་གཅིག་གི་ནང་དུ། བཅོམ་ལྡན་འདས་འཁོར་དགེ་འདུན་དང་བཅས་པ་བཞུགས་ཤིང༌། བུད་མེད་མཆོག་གཅིག་གིས་ཟས་མཆོག་བཅོམ་ལྡན་འདས་ལ་ཕུལ་བ་དང༌། ཁང་བཟང་དེའི་ཕྱོགས་གཅིག་གི་རྩེ་མོ་ནས་བུད་མེད་དེ་ཉིད་འཕྱོངས་པ་སངས་རྒྱས་ཀྱི་སྤྲུལ་པས་གནོད་པ་མེད་པར་སླང་སྟེ་ས་ལ་བཞག་པ་དང༌། དེའི་ཉེ་སྐོར་གྱི་ཕྱི་རོལ་ས་མཐོ་བ་ཞིག་ཏུ་སངས་རྒྱས་བཞུགས་གནས། བུད་མེད་
མཆོག་དེ་ལ་ཆོས་སྟོན་པ། བུད་མེད་དེ་ད་ལྟ་རབ་ཏུ་བྱུང་བའི་གཟུགས་མེད་ཀྱང་དགྲ་བཅོམ་པ་ཐོབ་ཅིང༌། རྫུ་འཕྲུལ་མངོན་པར་སྒྲུབ་པ་མཚོན་བྱེད་དུ། ལུས་ལས་འོད་ཟེར་སྣ་ཚོགས་པ་འཕྲོ་བ་ཞིག་འབྲི། ཡང་ཕྱོགས་གཞན་ཞིག་ཏུ། སངས་རྒྱས་ཁང་བཟང་གི་མདོའི་ཕྱི་ཁྱམས་འདྲ་བ་ཞིག་ཏུ་བཞགས་པ་ལ། ཁང་བཟང་དེའི་སྒོ་ཐམས་ཅད་ཕྱེ་ཞིང༌། ཁྱིམ་གྱི་ཕུག་ནས་བྱིས་པ་ཞིག་སངས་རྒྱས་མཐོང་བས་དགའ་ཞིང་རྒྱུགས་ཏེ་འོང་བ་དང་བཅོམ་ལྡན་འདས་ཀྱི་སྐུའི་དྲུང་དུ་ཕྱིན་པ་དེས། ཐལ་མོ་སྦྱར་ཞིང་ཆོས་ཉན་པའི་ཚུལ་དང༌། སྒོ་ནང་ནས་སངས་རྒྱས་ཕར་ཕེབས་པའི་རྗེས་སུ་བྱིས་པ་འགྲོ་བ་དང༌། སྒོའི་ཕྱི་རོལ་དུ་ཕ་མ་དང་ཉེ་དུ་རྣམས་ཀྱིས་བྱིས་པ་དེ་སྐོར་བ་ལ། དེ་ངུ་བའི་ཚུལ་དང༌། དེ་རྣམས་ལ་སངས་རྒྱས་ཀྱི་བཀའ་སྩོལ་བའི་ཚུལ་དང༌། བྱིས་པ་དེ་གླང་པོ་ཆེའི་སྟེང་དུ་བསྐྱོན། འཁོར་གཡོག་འགའ་རེ་ཡང་གླང་པོ་ཆེ་ལ་ཞོན་པ་དང༌། གདུགས་དང་རྒྱལ་མཚན་བ་དན་རོལ་མོ་སྣ་ཚོགས་བྱེད་པ་སོགས་འཁོར་མང་པོ་བསྐོར་བ་དང༌། གླང་པོ་ཆེ་དེས་མེ་ཏོག་ཨུཏྤལའི་སྡོང་བུ་སྣ་ཞགས་ཀྱི་ས་ནས་བཏོན་ཏེ་ཟ་བའི་ཚུལ་དང༌། དེའི་ཉེ་སྐོར་ནས་སྐྱེ་བོ་མང་པོ་ལྟ་བ་དང༌། ཡབ་རྒྱལ་པོ་བདུད་རྩི་ཟས་དེ་ཉིད་ཀྱང་ལྟ་བ་དང༌། བྲམ་ཟེ་ལུང་བསྟན་བྱེད་པའི་རྣམ་པ་འབྲི། དེའི་ཕར་ཕྱོགས་སུ་གཙུག་ལག་ཁང་གི་ནང་དུ། སངས་རྒྱས་བཞུགས་པའི་དྲུང་དུ། བྱིས་པ་དེ་རབ་ཏུ་བྱུང་བའི་རྣམ་པ་འབྲི་སྟེ། དེ་ནི་འཕགས་པ་ཀུན་དགའ་བོ། མུ་ཏིག་འཁྲི་ཤིང་ངམ། མུ་ཏིག་ཅན་གྱི་ལོ་རྒྱུས་ཀྱི་རྩ་བ་དེ་སྐབས་འདིར་འབྲེལ་ཆེ་སྟེ། ཁང་བཟང་ཆུང་ངུ་ཞིག་གི་སྒོ་ནས། ཤཱཀྱ་
མིང་ཆེན་རྒྱལ་ཕྲན་གྱི་ཆ་བྱད་ཅན་གྱིས་འཇུག་པ་དང༌། ཁང་པའི་ནང་དུ་མིང་ཆེན་ཐལ་མོ་སྦྱར་སྟེ། དེ་རང་གི་མདུན་ས་ཕྱོགས་དམའ་བ་ན། རང་གི་བུད་མེད་ཁྱད་འཕགས་འདུག་པ་ལ་གཏམ་སྨྲ་བའི་ཚུལ་བྱ། བུད་མེད་དེ་རྒྱན་ཅི་རིགས་ཁྱིམ་དུ་འཇོག་པ་དང༌། སྐྱེ་རྒུའི་བདག་མོ་བུད་མེད་གཟི་བརྗིད་ཆེ་བ་ལ། འཁོར་ཤཱཀྱ་མོ་ཐམས་ཅད་ཀྱིས་བསྐོར་ཏེ་འགྲོ་བ་དང༌། དེ་རྣམས་བཅོམ་ལྡན་འདས་ལ་ཆོས་ཉན་པ་དང༌། དེ་དག་གི་ནང་ནས་གཅིག་རང་གི་མུ་ཏིག་གི་དོ་ཤལ་ལ་ལྟ་ཞིང་འདུག་པ་དང༌། མིང་ཆེན་གྱི་ཆུང་མས་གཡོག་མོ་ཞིག་རང་གི་ཁྱིམ་དུ་རྫངས་པས་འགྲོ་བའི་ཚུལ་དང༌། ལག་ཏུ་གྲོ་གའི་གླེག་བུ་ཡི་གེ་ཅན་ཐོགས་པ་དང༌། ལམ་དུ་བ་གྲུས་མ་ཞིག་གིས་བརྡུང་སྟེ་ཤི་བའི་ཚུལ་འབྲི། དགའ་བོ་རབ་ཏུ་བྱུང་བའི་ཚུལ་ཡང་འདི་དང་འགྲེལ་བར་བྲིས་ན་ལེགས་ཏེ། ཁང་བཟང་གི་སྒོ་དྲུང་དུ་སངས་རྒྱས་བསོད་སྙོམས་ལ་ཕེབས་པ་དང༌། ཁང་བཟང་གི་ནང་ནས་དགའ་བོ་རྒྱལ་པོའི་ཆ་བྱད་ཟས་མཆོག་ཐོགས་པ་དང༌། དེའི་བཙུན་མོ་པུན་ད་རི་ཀས། གོས་ས་ལ་གཏིང་བའི་སྟེང་དུ་ཆུའི་རི་མོ་ཟླུམ་པོ་འབྲི་བའི་ཚུལ་བྱ། ཁྱིམ་གྱི་ཕྱི་ནས་སངས་རྒྱས་ཀྱི་སྐུའི་རྗེས་སུ་དགའ་བོ་ལྷུང་བཟེད་ཟས་མཆོག་གིས་བཀང་སྟེ་འགྲོ་བ་དང༌། གཙུག་ལག་ཁང་གི་ནང་སངས་རྒྱས་ཀྱི་སྐུ་དྲུང་དུ་དགའ་བོ་རབ་ཏུ་བྱུང་བའི་ཆས་བསྐོན་ཞིང་སྐྲ་བྲེགས་པའི་ཚུལ་བྱ། ཕྱོགས་གཅིག་ནས་དེ་རབ་ཏུ་བྱུང་བའི་ཆ་ལུགས་སུ་སྒྱུར་ཟིན་ནས། ཕྱག་དར་བྱེད་པའི་ཚུལ་དང༌། གཙུག་ལག་ཁང་དེའི་གཡས་གཡོན་གང་རུང་གི་ཕྱོགས་གཅིག་ཏུ། ཤིང་གི་ཡལ་ག་དུད་པའི་ཕག་ན་དེ་ཡོད་པ་ལ། སངས་རྒྱས་ཀྱང་དེར་བྱོན་པ་དང༌། སངས་རྒྱས་
ཀྱི་ཆོས་གོས་ཀྱི་གྲྭ་ལ་དེ་འཇུས་ནས་ནམ་མཁའ་ལ་གཤེགས་པ་དང༌། རི་ནགས་ཚལ་ཡོད་པ། ཤིང་གཅིག་ལ་སྤྲེའུ་མོ་ཞར་མ་ཡོད་པ་ཞིག་འབྲི། དེ་དང་ཉེ་བ་ན་སྟོན་པ་དང་དགའ་བོ་གཉིས་གསུང་གླེང་མཛད་པ་དང༌། ཡང་སྟོན་པའི་ཆོས་གོས་ཀྱི་གྲྭ་ལ་འཇུས་ཏེ། སྟོན་པ་ནམ་མཁའ་ལ་གཤེགས་པ་དང༌། རི་རབ་ཀྱི་རྩེ་མོ་མཚོན་བྱེད་རིན་པོ་ཆེའི་རིའི་རྩེ་མོ་ན་སྟོན་པ་ཟུར་གཅིག་ན་བཞུགས་ཤིང༌། ཁང་བཟང་བཞི་ལྔ་ཞིག་བྲིས་པའི་གཞན་རྣམས་ན། ལྷ་ཕོ་མོ་གཉིས་ཆགས་རེ་དང༌། གཅིག་ན་ལྷ་མོ་འབའ་ཞིག་དང་ཁྲི་སྟོང་པ་ཞིག་འབྲི། དེ་དག་རེ་རེའི་སྒོ་དྲུང་ན་དགའ་བོ་རེ་རེ་འབྲི་ཞིང༌། སྟོན་པའི་དྲུང་དུ་དགའ་བོ་ཞུ་བ་བྱེད་ཚུལ་བྱ། ཡང་ཕྱོགས་གཅིག་ཏུ་དམྱལ་བའི་ལྕགས་བསྲེགས་ཀྱིས་གཞི་མེ་འབར་བ་དང༌། དེའི་ཟུར་གཅིག་ཏུ་བཅོམ་ལྡན་འདས་བཞུགས་ཤིང༌། དགའ་བོས་ཞུ་བ་བྱེད་ཚུལ་དང༌། ཕྱོགས་གཞན་ནས་ཕར་ལ་གཤིན་རྗེའི་མི་རྣམས་ཀྱི་ཟངས་ཆེན་པོར་དམྱལ་བའི་སེམས་ཅན་མང་པོ་འཚོད་པ་དང༌། སྡུག་བསྔལ་གཞན་ཡང་མི་འདྲ་བའི་རྣམ་པ་གཉིས་གསུམ་བྲིས་ལ། གཅིག་ན་ཟངས་སྣོད་ཟངས་ཞུན་གྱིས་གང་བ་བཀོལ་བཞིན་པ་སེམས་ཅན་མེད་པ་ཞིག་འབྲི། དེ་དག་རེ་རེའི་རྩ་ན་དགའ་བོ་རེ་རེ་འབྲི། ཡང་གཙུག་ལག་ཁང་གཅིག་ན། དགའ་བོ་ཏིང་ངེ་འཛིན་ལ་མཉམ་པར་བཞག་ཅིང༌། ལུས་ལས་འོད་འཕྲོ་བ་འབྲི། དམྱལ་བའི་བཀོད་པ་སྟོན་པ་དང༌། དགྲ་བཅོམ་ཐོབ་པའི་ཚུལ་འདི་གཉིས་སྟོན་པ་སེར་སྐྱར་བཞུགས་པའི་དུས་སྐབས་མིན་ཡང༌། ལོ་རྒྱུས་སྔ་མའི་ཞབས་སུ་འབྲེལ་ཆེ་བས་བཀོད་པ་ཡང་འདིར་འབྲིའོ། །གཅུང་དགའ་བོ་འདི་ནི་གཙུག་ཏོར་
དང་མཛོད་སྤུ་ན་མ་གཏོགས་པའི་མཚན་སུམ་ཅུ་དང་ལྡན་པར་བཤད་ལ། པགས་པ་གསེར་མདོག་འདྲ་རུང༌། མི་གཞན་པས་ལུས་ཚད་ཀྱང་ཅུང་ཟད་ཆེ་བར་འབྲི། མིང་ཆེན་གྱི་གཡོག་མོ་སྐྱེ་མ་ཤི་བ་དང༌། དགའ་བོ་རབ་ཏུ་བྱུང་བ་འདི་ཡབ་སྲས་མཇལ་བའི་རྗེས་ཐོབ་རང་མིན་པ་འདྲ་ཡང༌། ལོ་མང་མ་འདས་པ་མི་རིང་བའི་དུས་སུ་བྱུང་བར་མངོན། དེ་ལྟར་སྟོན་པ་ཕྱོགས་མཐོ་སར་བཞུགས་པ་ཞིག་ལ་སྐྱེ་རྒུའི་བདག་མོ་ལ་སོགས་པ། བུད་མེད་གོས་དཀར་པོ་གྱོན་པ་མང་པོ་ཐལ་མོ་སྦྱར་བ་དང༌། ཡང་བཅོམ་ལྡན་འདས་དགེ་འདུན་དང་བཅས་པ་ལམ་གཅིག་ན་གཤེགས་པའི་ཕྱི་ནས་བུད་མེད་དེ་དག་སྐྲ་བྲེགས་ཤིང་གོས་ཚེམ་བུ་ཅན་གྱོན་ཏེ་འགྲོ་བ་དང༌། ཡུལ་ན་དེ་ཁའི་གྲོང་ཁྱེར་མཚོན་བྱེད་གཅིག་གི་ནང་དུ། སྟོན་པའི་སྐུ་མདུན་དུ་དེ་དག་ཐལ་མོ་སྦྱར་ཏེ་འདུག་པ་དང༌། སྟོན་པའི་དྲུང་དུ་དགེ་སློང་གཅིག་གིས་ཞུ་བའི་ཚུལ་དང༌། གཙུག་ལག་ཁང་གི་སྒོ་དྲུང་ན། དགེ་སློང་དེ་ལ་བུད་མེད་དེ་རྣམས་ཀྱིས་ཞུ་བ་བྱེད་པའི་ཚུལ་བྱ། དེ་ནས་ཡང་ཕྱོགས་གཅིག་ན་གཙུག་ལག་ཁང་གི་དབུས་ན་སྟོན་པ་བཞུགས་པ་ལ། དེ་དག་དགེ་སློང་མར་གྱུར་ནས་ཆོས་ཉན་པའི་ཚུལ་བྱ། བུད་མེད་རབ་ཏུ་བྱུང་བའི་སྐབས་འདི་ཡང༌། ཡབ་སྲས་མཇལ་བའི་རྗེས་ལོ་མང་མ་སོང་བ་ཞིག་གི་ཕྱིས་ཡིན་པ་འདུག་ནའང༌། བཀོད་པ་འབྲི་བའི་སྐབས་གྲོང་ཁྱེར་སེར་སྐྱའི་ཕྱོགས་དང་འབྲེལ་བའི་ཕྱིར་དང༌། འདི་ཙམ་གྱི་བྲིས་སྐུ་ལོགས་པ་ཡོངས་རྫོགས་སུ་མི་ལོངས་པའི་ཕྱིར། སྔར་གྱི་དེ་ཚོའི་སྡེབས་ལ་བྲིས་ན་ལེགས་སོ། །གྲོང་ཁྱེར་སེར་སྐྱར་འགྲོ་དོན་མཛད་པ་དང་འགྲེལ་པའི་སྡེ་ཚན་ནོ། །༼ཙ༽ ཡང་རྒྱལ་བུ་
རྒྱལ་བྱེད་ཀྱི་ཚལ་དུ། ཉེ་སྡེ་དགེ་སློང་སྟོན་པའི་སྐུ་མདུན་ན་ཡོད་ཅིང༌། ཤཱཀྱ་ལྔ་བརྒྱ་རབ་ཏུ་བྱུང་བ་ལ་ཆོས་གསུང་བ་འབྲི། ཡང་དགེ་སློང་མང་པོ་མཉམ་བཞག་བྱས་པ་ལུས་ལས་འོད་འཕྲོ་བ་འབྲི། ཡང་རྒྱ་མཚོའི་དབུས་ན་གཟིངས་བཏང་བ་ཞིག་ལ། ཚོང་དཔོན་གཅིག་དང༌། ཚོང་པ་མང་པོ་གྲུ་ནང་དུ་གཏམ་མང་པོ་སྨྲ་བ་ཞིག་དང་གྲུ་རིན་པོ་ཆེས་གང་བ་ཚུར་འཁོར་བ་དང༌། ཁྱིམ་རིན་པོ་ཆེ་སོགས་ནོར་སྣ་ཚོགས་ཀྱི་གང་བ་ན། ཁྱིམ་བདག་གཅིག་དང་ཚོང་དཔོན་དེ་གཏམ་སྨྲ་བའི་ཚུལ་དང༌། ཚོང་དཔོན་དེ་གཅིག་པུ་རང་ཉིད་ལམ་དུ་ཞུགས་པའི་ཚུལ་དང༌། ཁང་བཟང་གཅིག་གི་སྒོ་དྲུང་དུ་སླེབ་པ་དང་ཁང་བཟང་དེ་དང༌། སྔར་གྱི་དེའི་བར་ལ་རི་སོགས་ཀྱིས་ཆོད་པ་ཞིག་འབྲི། ཁང་བཟང་དེའི་ནང་དུ། ཚོང་དཔོན་དེ་དང་ཁྱིམ་བདག་གཟི་བརྗིད་ཅན་ཞིག་གཏམ་སྨྲ་བ་འབྲི། དེ་དང་ཉེ་བ་ན། གཙུག་ལག་ཁང་ཞིག་གི་ནང་དུ། སངས་རྒྱས་འཁོར་བཅས་བཞུགས་པ་དང༌། དེ་གཉིས་གཙུག་ལག་ཁང་གི་ཕྱོགས་སུ་འགྲོ་བ་དང༌། སངས་རྒྱས་ཀྱི་སྐུའི་དྲུང་དུ། ཚོང་དཔོན་དེ་རབ་ཏུ་བྱུང་བའི་རྣམ་པར་གྱུར་པ་དང༌། དེ་ཡུལ་གཞན་ལ་འགྲོ་ཚུལ། གྲོང་ཁྱེར་ཆུང་ངུ་གཅིག་གི་ཉེ་འཁོར་དབེན་པ་གཅིག་ཏུ་མཉམ་བཞག་བྱེད་པ་འབྲི། ཡང་ཕྱོགས་གཞན་ཞིག་ཏུ། ཕར་ཕྱོགས་ཐག་རིང་བ་ཞིག་ལ། རྒྱ་མཚོ་ཆེན་པོ་ལ་གཟིངས་ཕར་འགྲོ་བ་དང་རྒྱ་མཚོའི་ཕར་ཕྱོགས་གླིང་ཕྲན་ན་ཚོང་པ་མང་པོ་ཙན་དན་གྱིས་ཤིང་གཅོད་པ་དང༌། གྲུ་ཚུར་ལམ་ཙནྡན་ས་མཆོག་གིས་བཀང་སྟེ་འོང་པ་ལ། རླུང་ནག་པོ་ལངས་ཏེ་རྒྱ་མཚོའི་འཁྲུགས་པ་གྲུ་ནང་གི་མི་རྣམས་ཐལ་མོ་
སྦྱར་བ་དང༌། གྲུའི་དབུས་སུ་དགེ་སློང་དེ་དཀྱིལ་མོ་ཀྲུང་བཅས་ཏེ་བཞུགས་པ་དང། རླུང་ཕྱིར་ལོག་རྒྱ་མཚོའི་འཁྲུགས་པ་ཞི་བ་འབྲི། གྲུའི་ཟུར་ནས་དགེ་སློང་དེ་དང༌། ཆུའི་སྟེང་ནས་གནོད་སྦྱིན་སྲིན་ལུས་ཅན་ཞིག་གཏམ་སྨྲ་བ་འབྲི། དེ་ནས་གྲུ་ཆུ་འགྲམ་དུ་སླེབ་པ་དང༌། དེ་དང་ཉེ་བ་ཞིག་ཏུ་ཙནྡན་གྱི་ཤིང་རྣམས་ལས་གཙུག་ལག་ཁང་བཞེངས་པའི་བཀོད་པ་དང༌། དགེ་སློང་དེ་དང་ཁྱིམ་བདག་གཅིག་གི་ཁར་ལྟ་བྱེད་པའི་ཚུལ་བྱ། དེ་ཁའི་ཁྲིས་སུ་ཤིང་གི་ཁང་བཟང་དེ་ཡང་རགས་པ་གྲུབ་པའི་རྣམ་པ་དང༌། དགེ་སློང་དེ་དང་ཁྱིམ་བདག་དེའི་པུས་མོ་བཙུགས་ཤིང་ཐལ་མོ་སྦྱར་ལ། མདུན་དུ་སྤོས་དང་མེ་ཏོག་དང་གསེར་སྣོད་ཆུས་བཀང་བ་མང་པོ་བཞག དེ་གཉིས་ལ་སྐྱེ་བོ་མང་པོས་ལྟ་བའི་ཚུལ་བྱ། མཆོད་པ་དེ་རྣམས་འཁྲིས་དེར་སྔར་གྱི་བཀོད་པ་དེ་ཁས་ནམ་མཁའ་ལ་འཕགས་པ་དང༌། ནམ་མཁའ་མཐོ་ས་ནས་མེ་ཏོག་རང་ལས་གྲུབ་པའི་ཁང་བཟང་གི་རྣམ་པ་དང༌། བདུག་སྤོས་ནི་སྤྲིན་གྱི་རྣམ་པ་དང༌། ཆུ་ནི་བཻཌུརྻའི་རྣམ་པར་སོང༌། ཚུར་ངོས་ནས་གཙུག་ལག་ཁང་གི་ནང་ན་སངས་རྒྱས་འཁོར་བཅས་བཞུགས་པའི་སྐུ་མདུན་དུ་མེ་ཏོག་གི་ཁང་བཟང་སོགས་མཆོད་པ་དེ་དག་འབབ་པ་དང༌། དེའི་ཉེ་སྐོར་ཡུལ་གྲོང་ཕྲ་མོ་རྣམས་སུ་དགེ་སློང་མང་པོ་ཡོད་པ་རྣམས་ཀུན་དགའ་བོས་ཚུལ་ཤིང་ཐོགས་ནས་བསྡུ་བའི་ཚུལ་དང༌། དེ་ནས་སངས་རྒྱས་འཁོར་བཅས་ཙནྡན་གྱི་ཁང་བཟང་ཕྱོགས་བཏད་དེ་ནམ་མཁའ་ལ་འབྱོན་པའི་ཚུལ་དང༌། ཡུལ་ཕྱོགས་གཅིག་ཏུ་བུད་མེད་རྒྱན་སྤངས་པ་མང་པོ་ནམ་མཁའ་ལ་ལྟ་སྟེ་ཐལ་མོ་སྦྱར་བ་དང༌།
སྟོན་པ་འཁོར་བཅས་ས་གཞི་ལ་ཕབ་སྟེ། མཐའ་གཅིག་ཏུ་བཞུགས་ནས་བུད་མེད་དེ་དག་ལ་ཆོས་སྟོན་པ་དང༌། དབུ་སྐྲ་དང་ཕྱག་སེན་གནང་ནས་བ་གུ་ལིའི་གྲོང་ཁྱེར་ས་ཞེས་བྱ་བའི་མཆོད་རྟེན་བརྩིགས་པ་ཡང་འབྲི། ཡང་ཡུལ་གཞན་ཞིག་ཏུ། ས་སྐྱ་བོ་དང་ནག་པོར་སོང་བ་དང༌། ཤིང་སྐམ་པ་སོགས་ཡིད་དུ་མི་འོང་བ་ཞིག་དང༌། དེ་དང་འབྲེལ་བ་ནེའུ་གསིང་དང༌། ཤིང་དང་ཆུ་སོགས་ཡོད་པ་དྲང་སྲོང་དུ་མ་གནས་པ་ཡིད་དུ་འོང་བ་ཞིག་འབྲི། དེའི་མཐའ་ཞིག་ཏུ་སངས་རྒྱས་ཀྱི་དྲང་སྲོང་དེ་རྣམས་ལ་ཆོས་སྟོན་པ་དང༌། དེ་རྣམས་རབ་བྱུང་དུ་སྐད་ཅིག་གིས་གྱུར་པ་དང༌། ཡང་སངས་རྒྱས་དང་ལྷན་ཅིག་ཏུ་ནམ་མཁའ་ལ་འཕུར་ཞིང་གཤེགས་པ་དང༌། ཕར་ངོས་ན་གྲོང་ཁྱེར་སློབ་མ་ཅན་དུ་དབུས་ན་ཕོ་བྲང་སྒོ་བཅོ་བརྒྱད་པ། ལྕགས་སྒོ་བཅུ་བདུན་ན་རྒྱལ་པོའི་བུ་རེ་རེ༌། གཅིག་ན་རྒྱལ་པོ་ཡོད་པ། དེ་རྣམས་སྤོས་ཕོར་འཛིན་ཞིང༌། སྐྱེ་བོ་གཞན་རྣམས་ཀྱང་མཆོད་པ་སྣ་ཚོགས་འབུལ་ཞིང་ལྟ་བ། རྒྱལ་པོའི་དྲུང་ན། ཁྱིམ་བདག་གསུམ་དགེ་སློང་གཅིག་གིས། རྒྱལ་པོ་ལ་བཤད་པ་བྱེད་པའི་ཚུལ། ཡང་རྒྱལ་པོའི་དྲུང་དུ་ས་ལ་མ་བབས་ཙམ་བར་སྣང་ལ་ཡོང་བའི་ཚུལ་གྱི་དགེ་སློང་འགའ་རེ་དང༌། ཡང་སངས་རྒྱས་ཀྱི་ཐུགས་ཀ་ནས་གསེར་གྱི་འོད་ཟེར་སྤྲོས་པ། གྲོང་ཁྱེར་དེའི་སྟེང་གི་ནམ་མཁའ་ལ་འོད་ཟེར་ལྟ་བུས་ཁྱབ་པ། དགེ་སློང་བར་སྣང་ལ་ཡོད་པ་དེ་ཚོའི་ཕར་ཕྱོགས་ནས་ཀྱང་ཅུང་ཟད་མཐོ་བར་ནམ་མཁའ་ནས་ཚུར་ལ་སེང་གེ་དང༌། སྟག་དང༌། གླང་པོ་ཆེ་དང༌། རྟ་དང༌།
སྦྲུལ་དང༌། བ་ལང་དང༌། བྱ་ཁྱུང་སོགས་ལ་ཆིབས་པའི་དགྲ་བཅོམ་པ་དང༌། ཤིང་རྟར་ཞུགས་པ་དང༌། ཁང་བཟང་དུ་ཞུགས་པ་དང༌། ལུས་ལས་སྤྲིན་འཕྲོ་བ་དང༌། གློག་འགྱུ་བ་དང༌། འགའ་ཞིག་སའི་དཀྱིལ་ནས་བཏོལ་ཏེ་འོང་བ་སོགས་འབྲི། དེའི་ཕར་ཕྱོགས་ན་སངས་རྒྱས་ལ་ལྷ་ཀླུ་སོགས་ཐམས་ཅད་ཀྱིས་མཆོད་པ་བྱེད་པ་དང༌། གསེར་གྱི་འོད་ཀྱང་དེའི་ཐུགས་ཀ་ནས་བྱུང་བའོ། །ཡང་གྲོང་ཁྱེར་དེ་ཁ་འདྲ་རུང་བའི་དབུས་སུ་སངས་རྒྱས་བྱོན་པ་ལ་རྒྱལ་པོ་སོགས་ཕྱག་འཚལ་བ་དང༌། ཁང་བཟང་དུ་སངས་རྒྱས་བཞུགས་པ་ལ་རྒྱལ་པོ་ཐམས་ཅད་ཀྱི་མཆོད་པ་འབུལ་བ་དང༌། དེ་དང་ཉེ་བ་ན་ཙནྡན་གྱི་ཁང་བཟང་དབུས་སུ་སངས་རྒྱས་བཞུགས། ཁང་བཟང་དེའི་ཕྱི་ནང་ཐམས་ཅད་འཁོར་སྣ་ཚོགས་པས་སྐོར་ཏེ་ཆོས་ཉན་པ་དང༌། ཁང་བཟང་དེ་ཡང་ཤེལ་ལྟར་ཕྱི་གསལ་ནང་གསལ་དུ་སོང་བའི་བཀོད་པ་འབྲི། དེའི་ཕར་ཕྱོགས་རྒྱ་མཚོའི་འགྲམ་དུ་ཀླུའི་གཙོ་བོ་གཉིས་སོགས་ཀླུ་མང་པོ་ལ་སངས་རྒྱས་ཆོས་གསུང་པ་དང༌། མཚོ་ནང་ན་ཀླུ་གཉིས་པོ་དེ་ལུས་ལས་སྤྲིན་སྤྲུལ་ཏེ། ཆུ་རྒྱུན་འདྲ་བའི་ཆར་པ་མང་པོ་འབེབས་པ་དང༌། དེ་དག་གི་ཆུ་རྒྱུན་རྣམས་གཅིག་ཏུ་འདྲེས་པའི་རྒྱུན་ཆུ་འགྲམ་དུ་བྱུང་བ་ལ། དགེ་སློང་ཞིག་གིས་དེ་ནས་ལྷུང་བཟེད་དུ་ཆུ་བླང་སྟེ་བཅོམ་ལྡན་འདས་ལ་འབུལ་བ་དང༌། གཞན་མཆོད་པ་མང་པོ་དང་བཅས་པ་འབྲི། དེ་ནས་བཅོམ་ལྡན་འདས་དང༌། དགྲ་བཅོམ་པ་གཅིག་ནམ་མཁའ་ལ་གཤེགས་པ་འབྲི། བར་མཚམས་དེ་ནམ་མཁའ་སྔོ་སངས་ཀྱི་བཅད་པའི་ཕ་རོལ་
ན། ཡུལ་ཕྱོགས་ཕུན་སུམ་ཚོགས་པ་གཅིག་དང༌། བར་བར་ན་གླིང་བཞི་རི་རབ་ཀྱི་རྣམ་པ་ཆུང་ངུ་མང་པོ་སྒྲིགས་པའི་རི་རབ་རེ་རེའི་རྩེ་མོ་ན་དགྲ་བཅོམ་པ་རེ་རེ་ཡོད་པ། ཕར་ཕྱོགས་ཀྱི་ཞིང་ཁམས་དེ་ན། དགྲ་བཅོམ་པ་དེའི་ཕྱོགས་སུ་བུ་མོ་གཞོན་ནུ་ཞིག་རྒྱུགས་ཏེ་འགྲོ་བ་དང༌། སངས་རྒྱས་གྱི་བུ་མོ་དེ་ལ་ཆོས་སྟོན་པ་དང༌། སྐྱེ་བོ་མང་པོ་འདུས་པ་འབྲི་སྟེ། གྲོང་ཁྱེར་གློག་མ་ཅན་དུ་གཤེགས་པ་དང༌། འོད་ཟེར་ཅན་གྱི་ཞིང་ཁམས་སུ་བྱོན་པའི་སྡེ་ཚན་ནོ། །༼ཚ༽ ཡང་ནགས་ཀྱི་དབུས་ཞིག་ན་སྟོན་པ་བཞུགས་པ་ལ། སྐྱེ་བོ་མང་པོ་མཆོད་པ་བྱེད་པ་འབྲི། ཡང་དེ་ཉིད་ཀྱི་འཁྲིས་སུ་སྟོན་པའི་སྐུའི་མཐའ་སྐོར་དུ་བྲམ་ཟེ་མང་པོས་སྐོར་བ་དང༌། སྐུ་མདུན་གྱི་འོག་ཕྱོགས་ཅུང་ཟད་རིང་བ་ན། བྲམ་ཟེ་གཞོན་ནུ་ཞིག་ལྷམ་ཡུ་བཅད་གྱོན་ཞིང་ལག་པ་སྒྲེང་སྟེ་གཞན་དུ་འགྲོ་བའི་ཚུལ་བྱ། ཡང་བྲམ་ཟེའི་ཁྱེའུ་དེ་ཁ་འདྲ་བ་ཞིག་བྲིས་པའི་འཁྲིས་སུ་ཕྱག་ན་རྡོ་རྗེ་བཞུགས་ཏེ། རྡོ་རྗེ་མེ་འབར་བས་དེ་ལ་སྡིགས་པའི་ཚུལ་དང༌། སྟོན་པའི་སྐུ་མདུན་ན་བྲམ་ཟེ་དེ་ཉིད་ཐལ་མོ་སྦྱར་བའི་ཚུལ་དང༌། དེ་དང་ཉེ་བའི་ནགས་མཐོང་དེ་ཁ་འདྲ་བ་ཞིག་ཏུ། སྟོན་པ་དགེ་འདུན་དང་བཅས་པ་ལ། བྲམ་ཟེ་རྒན་པོ་ཞིག་གི་ཟས་མཆོག་འབུལ་བ་དང་སྐོར་བ་བྱེད་པ། ནགས་གསེབ་སྣ་ཚོགས་ན་གནས་པའི་དགེ་སློང་རྣམས་དགེ་སློང་གཅིག་གིས་བརྡུང་བའི་ཚུལ་དང༌། ཡང་དེའི་ཕྱོགས་གཅིག་ན། བཅོམ་ལྡན་འདས་ཀྱིས་བྲམ་ཟེ་རྒན་པོ་དེ་ལ་ཆོས་སྟོན་པའི་ཚུལ་དང༌། བཀོད་པ་དེའི་ཕར་ཕྱོགས་བར་ཐག་ཅུང་ཟད་ཡོད་པ་ཞིག་ན། ཁང་པ་རྒྱ་ཆེན་པོ་ཡོད་པའི་ཕྱོགས་གཅིག་
ཏུ། བྲམ་ཟེ་རྒན་པོ་དེའི་མདུན་དུ་སྔར་གྱི་བྲམ་ཟེ་ཁྱེའུ་དེ་འདུག་ཏེ་གཏམ་སྨྲ་བ་དང༌། ཁང་པའི་ཕྱོགས་གཞན་ཞིག་ཏུ། བྲམ་ཟེ་རྒན་པོ་དེས་ལྷམ་ཡུ་བཅད་ལག་ཏུ་ཐོགས་ཏེ། བྲམ་ཟེ་གཞོན་ནུ་ལ་རྡེག་པའི་ཚུལ་བྱ། ཁང་པ་དང་ནགས་ཀྱི་བར་དེར། ཕྱོགས་གཅིག་ནས་བྲམ་ཟེ་མང་པོ་ཕར་འགྲོ་བ་དང༌། ཚུར་ཡོང་བའི་བཀོད་པ་གཉིས་ཀ་བྱེད་ཅིང༌། ཕྱོགས་གཅིག་ནས་བྲམ་ཟེ་རྒན་པོ་དེས། ཤིང་རྟར་ཞུགས་ཤིང་འཁོར་བཅས་སངས་རྒྱས་བཞུགས་པའི་ཕྱོགས་ལ་འགྲོ་བའི་བཀོད་པ་བྱ་སྟེ། ཡུལ་འདོད་པ་མཐུན་པར་བྲམ་ཟེ་པདྨའི་སྙིང་པོ་འཁོར་བཅས་བརྟུལ་བའི་བཀོད་པའོ། །༼ཛ༽ དེ་ནས་ཡང་བཀོད་པ་གཞན་ནི། རི་རབ་ལ་སྦྲུལ་གཉིས་འཁྲིལ་ཏེ་གཅིག་གི་དབུགས་འབྱིན་པ་དང༌། བྱ་དང་རི་དྭགས་མང་པོ་ལྷུང་བ་དང༌། སྦྲུལ་གཅིག་གིས་ཟ་བའི་བཀོད་པ་བྱ། ཡང་ཕྱོགས་གཅིག་ན། སྦྲུལ་ཆེན་པོ་གཉིས་འཁྲིལ་ཏེ་ཉལ་བའི་སྟེང་དུ་དགྲ་བཅོམ་པ་ཞབས་འཆག་བྱེད་པ་དང༌། སྦྲུལ་ཀྱི་ཁོག་པའི་ནང་དུ་དགྲ་བཅོམ་པས་རྒྱུག་པ་ཕྱི་གསལ་ནང་གསལ་དང༌། སྦྲུལ་གྱི་སྣ་ནས་ཆོ་འཕྲུལ་དང་བཅས་ཏེ་འཐོན་པ་དང༌། སྦྲུལ་ཆེན་པོ་དེ་གཉིས་ཤིན་ཏུ་ཆེ་བའི་སྦྲུལ་གྱིས་མནན་པ་འབྲི། ཡང་ཕྱོགས་གཅིག་ན་བྲམ་ཟེ་གཉིས་འབྲོས་ཤིང༌། དགེ་སློང་གཉིས་གཏམ་སྨྲ་བའི་ཚུལ་བྱ། དེ་ནས་དགེ་སློང་གཅིག་ལ་ཀླུ་གཉིས་ཆོས་ཉན་པ་དང༌། ཡང་སྟོན་པའི་སྐུ་མདུན་ན་ཀླུའི་རྒྱལ་པོ་དཀར་པོ་གཉིས་ཀླུ་མང་པོ་དང་བཅས་པ། ཆོས་ཉན་ཞིང་མཆོད་པ་འབུལ་བ་དང༌། མེ་ཏོག་གི་ཆར་ཆེན་པོ་འབབ་པའི་བཀོད་པ་འབྲི། ཁང་བཟང་གཅིག་ན་སྟོན་པའི་སྐུ་མདུན་
ན་ལྷའི་བུ་གཉིས་དང༌། ཕར་ཕྱོགས་ཀྱི་ནམ་མཁའ་ནས་ཁང་བཟང་གི་ནང་ན་ལྷ་རེ་ཡོད་པ། གཉིས་ཚུར་འོང་བའི་ཚུལ་དང༌། ཡང་ཁང་བཟང་གཞན་གཅིག་ན། སྟོན་པའི་སྐུ་མདུན་དུ་ཁྱིམ་བདག་གཉིས་འབྲི། དེ་གཉིས་ཀ་ལ་ཡང་མཆོད་པའི་བཀོད་པ་དུ་མ་ཡོད་པ་བྱ། ཁང་བཟང་ཕྱི་ནང་གི་ཁྱིམ་དང་བཅས་པ་ཞིག་ཏུ། བཅོམ་ལྡན་འདས་ཀྱི་སྐུ་མདུན་ན་ཁྱིམ་བདག་གཉིས་འདུག་པ་དང༌། རྒྱལ་པོ་ཞིག་བཅོམ་ལྡན་འདས་ལ་ཕྱག་འཚལ་བ་ཡང་འབྲི། གཙུག་ལག་ཁང་གི་སྒོ་ཕྱོགས་གཅིག་ན། རིན་པོ་ཆེའི་ལྕགས་རི་རིམ་པ་གཉིས་རིང་པོར་འཐེན་པ་དང༌། དེ་དག་གི་སྟེང་ན་སྦྲུལ་མགོ་ཡོད་པའི་མི་མཚོན་ཆ་ཐོགས་པ་ཡང་འབྲི། སྒོ་གཞན་གཅིག་གི་ཕྱི་ནས་རྒྱལ་པོ་འཁོར་བཅས་འགྲོ་བའི་རྣམ་པ་དང༌། སྒོའི་གཡས་གཡོན་དུ་གོ་ཆ་གྱོན་པ་རལ་གྲི་ཐོགས་པ་འགའ་རེ་ཡང་འབྲི། དེའི་ཕར་ལོགས་ཕོ་བྲང་གི་རྣམ་པ་ཡོད་ཙམ་གྱི་ཁྱམས་དང་བཅས་པ་ཞིག་ཏུ། རྒྱལ་པོ་བཙུན་མོ་བློན་པོ་འཁོར་གཡོག་དང་བཅས་པ་ཡོད་པ་ལ། སྟེང་གི་ནམ་མཁའ་ལ་སྤྲིན་ནག་འཇིགས་སུ་རུང་བ་ཡོད་པ་དང༌། སྤྲིན་གསེབ་ནས་གློག་དང་མཚོན་ཆ་ཉུག་ཉུག་ཡོད་པ། བར་སྣང་དེར་མེ་ཏོག་གི་ཆར་འབབ་པའི་རྣམ་པར་སོང་བ། དེ་དང་སངས་རྒྱས་བཞུགས་པའི་བར་དེའི་ཕྱོགས་གཅིག་ན། དགེ་སློང་མཉམ་བཞག་བྱས་པ་ཞིག་འབྲི། ཡང་ཕྱི་རོལ་གྱི་ས་གཞི་ལ། སངས་རྒྱས་བཞུགས་པའི་སྐུ་མདུན་ན་རྒྱལ་པོ་འཁོར་བཅས་ཡོད་པ་དང༌། མི་མང་པོ་མཐུ་བ་མེ་ཏོག་གིས་བཀང་ཞིང༌། མེ་ཏོག་དེ་རྣམས་ས་ལ་སྐྱུར་བ་ན། རལ་གྲི་དང་གྲི་སྒྱོག་
དང༌། དགྲ་སྟ་དང། མདའ་བོ་ཆེ་དང༌། མཚོན་རྩེ་གཅིག་པ་ལ་སོགས་པའི་མཚོན་ཆ་སྣ་ཚོགས་སུ་གྱུར་ནས་ས་ལ་འབབས་པ་འབྲི། ཡང་ཁང་བཟང་གཅིག་ཏུ་རྒྱལ་པོས་དགེ་སློང་ཞིག་ལ་མཆོད་པ་འབྲི། ཀླུ་དགའ་བོ་དང་ཉེར་དགའ་བརྟུལ་བའི་སྐོར་རོ། །༼ཝ༽ ཡང་ནགས་གསེབ་གཅིག་ན་མི་གྱད་ཀྱི་རྣམ་པ་མདའ་གཞུ་བཀང་བ་ལྔ་བརྒྱ་ལྔ་བརྒྱས་གང་བའི་དོང་པ་གཉིས་ཕྲག་པར་ཐོགས་པ། ཚོང་པ་མང་པོ་དང་ལྷན་ཅིག་ཏུ་འགྲོ་བ་འབྲི། ཆོམ་རྐུན་མང་པོ་ས་ལ་འགྱེལ་ཤིང་ཤི་བ་དང༌། མདའ་རྣམས་ས་དང་ཤིང་ལ་ཕྱེད་ཙམ་ཐིམ་པའི་རྣམ་པ་དང༌། ཆོམ་རྐུན་མང་པོ་འབྲོས་པའི་ཚུལ་བྱ། ནགས་མཐོང་ཞིག་ཏུ་ཁང་བཟང་དེའི་ནང་ན་གྱད་དེ་འཁོར་བུད་མེད་མང་པོས་སྐོར་བ་དང༌། ཕྱི་རོལ་ན་གྲོང་ཁྱེར་དང་ཚོང་འདུས་ཀྱང་ཡོད་པའི་རྣམ་པ་བྱ། ཡང་ཕྱོགས་གཅིག་ཏུ་གྱད་དེས་མཆོག་ཟུང་ལ་སོགས་པ་དགེ་སློང་འགའ་རེ་ལ་བསོད་སྙོམས་གསོལ་ཞིང་མཆོད་པ་འབུལ་བའི་བཀོད་པ་དང༌། ལྷ་ཁང་གཅིག་གི་ནང་ན་མཆོད་སྡོང་རྡིང་བཙུགས་པ་འདྲ་བའི་སྟེང་ན། རྡོ་པད་གཟུགས་ཀྱི་སྟེང་དུ་རིན་པོ་ཆེའི་ཏོག་ཡོད་པ་འདྲ་བ་དང༌། བུད་མེད་རྒྱན་གྱིས་བརྒྱན་པ་འཁོར་མཆོད་པ་ཐོགས་པ་དང་བཅས་པ་ལྷ་ཁང་དེ་ལ་མཆོད་ཅིང་བསྐོར་བ་བྱེད་པའི་ཚུལ་བྱེད། རྫིང་ཡོད་ཅིང་མཐའ་རྭ་བས་བསྐོར་བ་གཅིག་གི་འགྲམ་དུ། གྱད་དེ་སྐྲ་འཁྲུ་བའི་ཚུལ། གཤེད་མ་མཚོན་ཆ་ཐོགས་པ་མང་པོ་མཐའ་སྐོར་བ། དེའི་ཉེ་སྐོར་དུ་རླུང་ནག་གི་གསེབ་ནས་མདོག་ནག་ཅིང་མཆེ་བ་གཙིགས་པ། གོ་མཚོན་ཐོགས་པའི་རྣམ་པ་འབྲི། འཁྲིས་དེ་དང་ནགས་མཐོང༌། དེ་དང་གྲོང་ཁྱེར་སྔ་མ་
བཞིན་ལ། དེའི་ཕར་ཚད་ཀྱི་ནམ་མཁའ་ལ། རྣམ་ཐོས་སྲས་བེ་ཅོན་དང་ནེའུ་ལེ་ཐོགས་པ་འཁོར་གནོད་སྦྱིན་མང་པོས་སྐོར་བའི་དྲུང་དུ་གནོད་སྦྱིན་ནག་པོ་གོ་མཚོན་ཅན་དེ། རྣམ་ཐོས་སྲས་ཀྱི་བཀའ་ལུང་ཉན་པའི་ཚུལ་བྱ། གྲོང་ཁྱེར་དེ་ནས་ཕུང་པོ་འདོན་པ་དང༌། དུར་ཁྲོད་དུ་བསྐྱེལ་བའི་རྣམ་པ་གཉིས་གསུམ་འབྲི། སྐྱེ་བོ་ཚོགས་པ་ལ་བྲམ་ཟེ་མང་པོས་ལུང་བསྟན་བྱེད་ཚུལ་དང༌། ཤིང་རྟ་དང་བཅས་པའི་མི་མང་པོ་འབྲོས་བརྩམས་པ་ལ། སྲིན་པོ་འཇིགས་སུ་རུང་བས་ལམ་བཀག་པ་དང༌། ཕྱོགས་གཅིག་ཏུ་གནོད་སྦྱིན་གྱི་ལྷ་ཁང་ཤ་ཁྲག་མང་པོས་ལང་ལོང་དུ་གང་བ་གཅིག་གི་ཕྱི་རོལ་ནས། བ་ལང་དྲུག་གི་དྲངས་བའི་ཤིང་རྟ། གཏོར་མ་དང་བཟའ་བཅའ་སྣ་ཚོགས་ཀྱི་གང་བ། མི་གཅིག་ཞགས་པས་བཅིངས་པ་ཡང་དེར་བཞག་པ་དང༌། མཐའ་སྐོར་དུ་གླུ་གར་རོལ་མོ་བྱེད་པ་འབྲི། ཡང་དེ་དང་ཉེ་བ་ཞིག་ཏུ་ཁང་པ་གཅིག་ན་སྐྱེས་པ་གཅིག་དང༌། བུད་མེད་བུ་ཆུང་ཐོགས་པ་གཏམ་སྨྲ་བ་འབྲི། ཁང་སྟེང་ནས་བུད་མེད་དེས་མཆོད་པ་མང་པོ་བཤམས་ནས་ཐལ་མོ་སྦྱར་བ་འབྲི། དེའི་ཕར་ལོགས་གཅིག་ཏུ་གནོད་སྦྱིན་གྱི་གནས་སྔར་གྱི་དེ་ཁ་འདྲ་བ་ལ་ནང་གི་ཕྱོགས་གཅིག་ན་སངས་རྒྱས་བཞུགས་པ། སྒོ་ན་སྔར་གྱི་གནོད་སྦྱིན་ནག་པོ་དེས་གཏམ་སྨྲ་བའི་ཚུལ་ལ་སངས་རྒྱས་ཕྱི་ནས་འབྱོན་པ་དང༌། སྒོ་གཞན་གཅིག་ནས་སངས་རྒྱས་ནང་དུ་འབྱོན་པ་དང༌། ཕྱི་རོལ་ཕྱོགས་གཅིག་ནས་ཤིན་ཏུ་མི་སྡུག་ཅིང་མཆེ་བ་བཙིགས་པ། ཞལ་རས་ལ་ཁ་དོག་མ་ངེས་པ། ཕྱག་མང་པོ་ན་མཚོན་ཆ་སྣ་ཚོགས་དང༌། ཞབས་མང་པོ་ཅན། མེ་རླུང་འཚུབ་པའི་དབུས་ན་
ཡོད་པ་ཞིག་གི་མདུན་དུ། གནོད་སྦྱིན་ནག་པོ་དེ་བརྒྱལ་ཞིང་འགྱེལ་བ་ཞིག་འབྲི། འདི་ལུང་རྣམ་འབྱེད་ཀྱི་དཔེ་ལ་ལན་མེད་པ་ནི་ཆད་པ་སྟེ། དཔེ་དག་པ་རྣམས་དང༌། སྐབས་གཞན་གྱི་ལོ་རྒྱུས་ལ་ཡོད་དོ། །སྔར་གྱི་ལྷ་ཁང་དེ་འདྲ་བའི་ནང་ན། སངས་རྒྱས་ཀྱི་དྲུང་དུ་གནོད་སྦྱིན་དེ་ཆོས་ཉན་པའི་ཚུལ་དང༌། ཤིང་རྟ་སོགས་ཀྱི་བཀོད་པ་ཡང་སྔར་གྱི་དེ་ཁ་འདྲ་རུང་ལ། མི་བཅིངས་པའི་ཚབ་ཏུ་བུ་ཆུང་གཅིག་བཞག་པ། ལྷ་ཁང་དེ་ཁའི་ནང་གི་ཕྱོགས་གཅིག་ཏུ། བུ་ཆུང་དེ་གནོད་སྦྱིན་དེས་བླངས་ཏེ། སངས་རྒྱས་ཀྱི་ཕྱག་ཏུ་ཕུལ་བ་དང༌། ལྷ་ཁང་གི་ཕྱི་རོལ་དུ་སངས་རྒྱས་ཀྱི་དེའི་ཕ་མ་ཁྱིམ་བདག་ཕོ་མོའི་རྣམ་པ་ཅན་ལ། ཁྱེའུ་དེ་གཏོད་པའི་ཚུལ་འབྲི། གནོད་སྦྱིན་འབྲོག་གནས་བརྟུལ་བའི་སྐོར་རོ། །༼ཞ༽ དེ་ཡན་ཆད་ནི་སྔར་གྱི་ཀླུ་གཉིས་བརྟུལ་བ་སོགས་ཀྱི་དུས་དེ་དང་ཉེ་བ་ཡིན་ནོ། །ཡང་བཀོད་པ་དེ་དག་དང་ཉེ་བར་ནགས་མཐོང་གི་གྲོང་ཁྱེར་སྔ་མ་དང་འདྲ་བའི་སྒོ་དྲུང་དུ། བུད་མེད་གཞོན་ནུ་ཞིག་ཤིང་རྟར་ཞུགས་ནས་འཁོར་བཅས་ནང་དུ་འགྲོ་བ་དང༌། ཁྱིམ་བདག་གཞོན་ནུ་ཞིག་ཤིང་རྟར་ཞུགས་ཤིང་འཁོར་བཅས་ཕྱི་ལ་འགྲོ་བའི་ཤིང་རྟའི་གཉའ་ཤིང་སྣེ་ཐུག་པ་དང༌། གྲོང་ཁྱེར་ནང་གི་ཁང་བཟང་གཅིག་བུད་མེད་དེས་ཁྱིམ་བདག་དེ་ལ་མཆོད་པ་དང༌། ཁྱིམ་དེའི་ཕྱི་རོལ་ཕར་ཕྱོགས་གཅིག་ཏུ་སངས་རྒྱས་ལ་ཁྱིམ་བདག་དེས་ཆོས་ཉན་པ་དང༌། གཙུག་ལག་ཁང་ལྕགས་རི་ཉེ་སྐོར་དང་བཅས་པ་ཞིག་ཏུ་སྟོན་པ་འཁོར་བཅས་བཞུགས་པ་ལ་ཕྱི་རོལ་ནས་སྐྱེ་བོ་མང་པོ་བསྐོར་བ་བྱེད་པ་དང༌། ནང་དུ་མཆོད་པ་འབུལ་བའི་རྣམ་པ་འབྲི། ཡང་ཕྱོགས་གཅིག་ན་
ཁྱིམ་བདག་དེ་དུས་ལས་འདས་པ་དང༌། གནས་གཙང་མའི་ལྷ་མཚོན་བྱེད་ལྷ་གསེར་གྱི་མདོག་ཅན་ན་བཟའ་རབ་བྱུང་འདྲ་རུང་ལ་ཐོར་ཚུགས་དང་རྒྱན་གྱིས་བརྒྱན་པ། འོད་ཟེར་འབར་བས་ཡུལ་ཕྱོགས་ཁྱབ་པར་བྱེད་པ། རི་ལ་ཐོགས་པ་མེད་པ་ཡོང་བ་གཅིག་དང༌། ལྷ་དེ་བཅོམ་ལྡན་འདས་ཀྱི་དྲུང་དུ་ཆོས་ཉན་པ་འབྲི། དེའི་ཕར་ཕྱོགས་ཡུལ་ལྗོངས་གཅིག་ཏུ། ཁྱིམ་བདག་དར་བབ་གཅིག་དང༌། རྒྱལ་པོ་གཅིག་དང༌། རྒྱལ་པོ་བློན་པོ་ཚོང་དཔོན་སོགས་ཀྱི་གཟུགས་བྲིས་པའི་ཐང་ཀ་ལག་ཏུ་ཐོགས་པའི་མི་མང་པོ་དང༌། བུད་མེད་གཞོན་ནུ་ཞིག་ཕྱོགས་གཞན་ཞིག་ལ་མེ་ཏོག་འདོར་བའི་རྣམ་པ་དང༌། དེ་དག་ལ་སྐྱེ་བོ་མང་པོ་འདུས་ཤིང་ལྟ་བའི་ཚུལ་འབྲི། དེ་དག་ནི་འབྲོག་གནས་སུ་དབྱར་གནས་པ་མཛད་ཅིང་ལག་རྒྱུད་བདེན་པ་ལ་བཀོད་པའི་བཀོད་པ་ཡིན་ཏེ། མཛད་པ་འདི་གནོད་སྦྱིན་འབྲོག་གནས་བརྟུལ་བའི་རྗེས་ལ། ལོ་མང་པོ་ཞིག་འདས་པའི་སྐབས་སུ་ཡིན་ཀྱང། སྔར་གྱི་དེ་དང་འབྲེལ་བས་སྡེབས་གཅིག་ལ་འབྲིའོ། །༼ཟ༽ ཡང་ཡུལ་ལྗོངས་གཉིས་ལ། བར་དུ་རི་ནགས་སོགས་ས་སྟོང་ཅུང་ཟད་ཡོད་པར་བྱ། ཕར་ཕྱོགས་དེ་ན་རྒྱལ་པོའི་ཕོ་བྲང་ན་གོ་ཆ་གཅིག་སྡོགས་ནས་སྒྲོམ་བུར་འཇུག་ཚུལ་དང༌། ཡང་ཁང་བཟང་ཕྱོགས་གཅིག་ཏུ་རྒྱལ་པོ་དང་ཚོང་པ་རྣམས་གཏམ་སྨྲ་བ་དང༌། ཡང་ཕྱོགས་གཅིག་རྒྱལ་པོའི་དྲུང་དུ་ཚོང་དཔོན་འགའ་རེ་ལ། རྒྱལ་པོའི་འཕྲིན་གྱི་ཡི་གེ་དང་སྒྲོམ་བུ་གཏོང་བ་འབྲི། ཡུལ་ལྗོངས་ཚུར་ཕྱོགས་དེ་ན་ཕོ་བྲང་གཅིག་ཏུ་རྒྱལ་པོ་ལ་ཚོང་པས་དེ་རྣམས་འབུལ་བ་དང༌། དེའི་ཁང་བཟང་གི་ཕྱོགས་གཅིག་ཏུ་རྒྱལ་པོ་བློན་པོའི་ཚོགས་དང་བཅས་པ་གོ་ཆ་དེ་ལ་ལྟ་བ་དང༌། ཕྱོགས་གཅིག་ཏུ་རྒྱལ་པོ་བློ་རྟེན་མ་མཉེས་ཏེ། ལག་པ་འགྲམ་པ་ལ་གཏད་དེ་དོན་བསམ་པའི་ཚུལ་གྱི་མདུན་དུ་སྐྱེ་བོ་
འགའ་རེས་ཞུ་བ་བྱེད་པའི་ཚུལ་དང༌། ཕྱི་རོལ་ཁང་བཟང་གཞན་ཞིག་ཏུ། སངས་རྒྱས་ཀྱི་དྲུང་དུ་རྒྱལ་པོས་ཞུ་བ་བྱེད་པའི་ཚུལ་དང༌། ཕྱོགས་གཅིག་ཏུ་སངས་རྒྱས་བཞེངས་པ་དང༌། རས་གཞི་སྐྱང་བ་ལ་སངས་རྒྱས་ཀྱི་འོད་ཟེར་སྤྲོས་ཤིང༌། རས་གཞིའི་སྟེང་དུ་འོད་ཀྱི་གཟུགས་བརྙན་སངས་རྒྱས་ཀྱི་སྐུ་འདྲ་བ་བྱུང་བ་ལ། རི་མོ་བས་ཚོན་འགྱེད་ཅིང༌། སྐུའི་སྟེང་འོག་གཉིས་སུ་ཡིག་མཁན་གྱི་ཡི་གེ་འབྲི་བའི་ཚུལ་བྱ། འདི་སྐབས་སུ་ལུང་རྣམ་འབྱེད་ལས་སྐུའི་གྲིབ་མ་བཏང་ཞེས་འབྱུང་བ་ནི། རྒྱ་གར་གྱི་སྐད་དུ་ཚཱ་ཡ་ཞེས་པ། བོད་ཀྱི་སྐད་དུ་གྲིབ་མ་དང་གཟུགས་བརྙན་གཉིས་ཀ་ལ་འཇུག་སྟེ། མེ་ལོང་ནང་དུ་གཟུགས་བརྙན་ཤར་བ་ལ་ཡང་ཚཱ་ཡ་ཞེས། རྒྱ་གར་བ་ཐམས་ཅད་ལ་གྲགས་པ་ཡིན་པས། གཟུགས་བརྙན་གྱི་གྲིབ་མ་ཡིན་གྱི་ཉི་འོད་ལྟ་བུ་སྒྲིབས་པས་གྲིབ་མ་ལྟ་བུ་མ་ཡིན་ཏེ། བོད་སྐད་ལ་གྲིབ་མ་གྲགས་པ་འདི་ཡིན་ན། ཞལ་སྤྱན་ལ་སོགས་པའི་རྣམ་པ་མི་དོད་པའི་ཕྱིར་རོ། །འདྲ་ལོང་པ་དཀའ་བས་སོ། །ཡང་ཁང་བཟང་དེ་དག་དང་ཉེ་བ་གཅིག་ན། རྒྱལ་པོའི་མདུན་ན་ཐང་སྐུ་གསེར་གྱི་དོང་བུར་བཅུག་པའི་ཚུལ་དང༌། དངུལ་སྣོད་གསེར་སྣོད་རས་ཀྱི་གཡོགས་པ་སོགས་ཀྱང་བརྡེག་པ་དང༌། ཕྱི་རོལ་དུ་ཡི་གེ་དང་བྲིས་སྐུ་དེ་ཚོང་དཔོན་ལ་གཏད་པ་དང༌། གཉིས་པོའི་བར་ལམ་གྱི་ས་ལ་གླང་པོ་ཆེའི་རྒྱབ་ཏུ་བྲིས་སྐུ་དེ་བསྐལ། གདུགས་ལ་སོགས་པའི་མཆོད་པས་སྐོར། དེ་དང་ལྷན་ཅིག་ཏུ་ཚོང་པ་མང་པོ་འགྲོ་བ་འབྲི། སྔར་གྱི་ཡུལ་ལྗོངས་ཕར་ཕྱོགས་དེའི་གྲོང་ཁྱེར་སྔ་མ་དེ་དང་འབྲེལ་བའི། སྟོད་སྨད་གང་རུང་དུ། གྲོང་ཁྱེར་ཕོ་བྲང་ཕྱི་རོལ་གྱི་ས་སྟོང་སོགས་ཡོད་པར་བྱས་ཏེ། ཕོ་བྲང་ནང་དུ་རྒྱལ་པོ་ལ་ཕོ་ཉས་
ཡི་གེ་གཏད་པ། ཕྱོགས་གཅིག་ཏུ་བློན་པོ་རྣམས་དང་གཏམ་སྨྲ་བ་དང༌། ལམ་སྲང་ཕྱག་དར་བྱེད་པ་དང༌། ཁང་ཐོག་ཐམས་ཅད་དུ་རྒྱལ་མཚན་བ་དན་བསྒྲེང་བ་དང༌། སྤོས་དང་མེ་ཏོག་སྣ་ཚོགས་པའི་མཆོད་པ་དང༌། ས་གཞི་ལ་རས་ཁྲ་བཏིངས་བ་སོགས་དང༌། ས་སྟེང་དེར་བྲིས་སྐུ་ཤིང་རིང་པོའི་རྩེ་མོ་ལ་བཏགས་ཏེ་ཞལ་ཕྱེ། རྒྱལ་པོ་ལ་སོགས་པ་སྐྱེ་བོ་མང་པོ་བསུ་བའི་བཀོད་པ་དང༌། གཡས་གཡོན་ནས་ཕྱག་འཚལ་བ་དང༌། མཆོད་པ་འབུལ་མཁན་མང་པོ། སྟེང་གི་ནམ་མཁའ་ལ་ལྷ་རྣམས་མེ་ཏོག་གི་ཆར་འབབ་པ་འབྲི། ཕོ་བྲང་ནང་གི་ཁང་བཟང་གཅིག་ཏུ་བྲིས་སྐུ་བཀྲམ་ཞིང་མཆོད་པ་འབུལ་བ་ལ། རྒྱལ་པོ་ཉིད་ལྟ་བ་དང༌། རྒྱལ་པོའི་ལུས་ལས་འོད་ཟེར་ཅུང་ཟད་འཕྲོ་བ་འབྲི། ཡང་ཡུལ་ཕྱོགས་དེ་ཉིད་ཀ་ཡིན་ཀྱང༌། སྤུང་བྲིས་ནས་བཀོད་པ་འཛིངས་པར་འགྱུར་བས། ཡུལ་ལྗོངས་སྔར་གྱི་གཉིས་པོ་འདྲ་རུང་ལ། ཡུལ་ཚུར་ཕྱོགས་དེ་ན། རྒྱལ་པོའི་ཕོ་བྲང་གཉིས་ན་རྒྱལ་པོ་ལ་འཕྲིན་ཡིག་སྐྱེས་དང་བཅས་པ་འབུལ་བའི་ཚུལ་དང༌། གཙུག་ལག་ཁང་གཉིས་ན་སངས་རྒྱས་རེ་རེ་ལ་རྒྱལ་པོས་ཞུ་བ་འབུལ་བ་རེ་རེ་དང༌། དེ་གཉིས་ཀྱི་ཕྱོགས་གཞན་རེ་རེ་ན། སངས་རྒྱས་ཀྱི་དགེ་སློང་གཟི་བརྗིད་ཆེ་བ་འཁོར་བཅས་ལ་བཀའ་སྩོལ་བ་དང༌། དགེ་སློང་མ་གཟི་བརྗིད་ཆེ་བ་ལ་བཀའ་སྩོལ་བའི་ཚུལ་རེ་རེ་འབྲི། གྲོང་ཁྱེར་གྱི་རྣམ་པ་གཉིས་ཡོད་པའི་གཅིག་ཏུ། དགེ་སློང་མང་པོ་བསོད་སྙོམས་བྱེད་པ་དང༌། ཅིག་ཤོས་སུ་དགེ་སློང་མང་པོ་བསོད་སྙོམས་བྱེད་པ་དང༌། ཡུལ་ཕར་ཕྱོགས་དེར་ཕྱོགས་གཅིག་ཏུ་དགེ་སློང་མང་པོ་འབྱོན་པ་ལ་རྒྱལ་པོས་བསུ་བ་བྱེད་པ་དང༌། ཁང་བཟང་དུ་དགེ་སློང་གཅིག་ཁྲི་ལ་བཞུགས།གཞན་མང་པོས་སྐོར་བ་ལ་རྒྱལ་པོས་མཆོད་པ་བྱེད་པ་དང༌། ཕྱི་རོལ་དུ་ཁྲི་ལ་དགྲ་
བཅོམ་པ་བཞུགས་པ་ལ། རྒྱལ་པོ་ལ་སོགས་པ་སྐྱེ་བོ་ཐམས་ཅད་ཆོས་ཉན་པ་དང༌། ཡང་ཕྱོགས་གཅིག་ཏུ་བཀོད་པ་དེ་ཁ་འདྲ་རུང་ལ། དགེ་སློང་མའི་ཚོགས་འབྱིན་པ་དང༌། ཁང་བཟང་དུ་བཙུན་མོའི་ཚོགས་ཀྱིས་མཆོད་པ་དང༌། ཁང་བཟང་དེའི་ཕྱི་ཁྱམས་སུ་དགེ་སློང་མས་བཙུན་མོའི་ཚོགས་ལ་ཆོས་སྟོན་པ་འབྲི། ཡང་ཟུར་གཅིག་ཏུ་དགྲ་བཅོམཔ་ལ་ཁྱིམ་བདག་ཆོས་ཉན་པ་དང༌། དེ་གཉིས་རབ་ཏུ་བྱུང་བ་དང༌། དེ་གཉིས་ནམ་མཁའ་ལ་འཕུར་ཏེ་རྫུ་འཕྲུལ་སྟོན་པ་ལ། སྐྱེ་བོ་མང་པོ་ལྟ་ཞིང་ཕྱག་བྱེད་པ་དང༌། མཆོད་རྟེན་ཆོས་འཁོར་བཞི་རེ་ཡོད་པ་གཉིས་ལ་མི་རྣམས་མཆོད་པ་བྱེད་པ་འབྲི། ཡང་ཁང་བཟང་གཅིག་ན་རྒྱལ་པོ་པི་ཝཾ་བརྡུངས་ཞིང༌། མདུན་དུ་བུད་མེད་གར་བྱེད་པ་དང༌། ཡང་དེ་དང་འབྲེལ་བའི་ཁང་བཟང་གཅིག་ན་རྒྱལ་པོ་མནལ་བའི་སྔས་མགོ་ནས་ལྷས་ལུང་སྟོན་པ་དང༌། རྒྱལ་པོས་གསལ་རྒྱལ་སྲིད་ལ་བསྐོས་ཤིང༌། བློན་པོ་གཉིས་ཀྱང་བསྐོས་པ་དང༌། འཁོར་ཉུང་ཤས་དང་བཅས་ཏེ་ཡུལ་ལྗོངས་ཚུར་ཕྱོགས་གྱི་ལམ་དུ་ཆས། ཡུལ་ལྗོངས་ཚུར་ཕྱོགས་དེའི་ཟུར་ན། སྟོན་པ་འཁོར་བཅས་ཀྱི་སྤྱན་སྔར་རྒྱལ་པོ་དེ་འོང་ཞིང་རབ་ཏུ་བྱུང་བའི་བཀོད་པ་དང༌། དེའི་ཉེ་སྐོར་གཅིག་ཏུ་རྒྱལ་པོ་དེ་སྐྱེད་མོས་ཚལ་ན་སྡད་པ་དང༌། རྒྱལ་པོ་གཉིས་པོ་ཕོ་བྲང་ནང་ན་ཡོད་པ་དང༌། ཕྱི་སྒོ་ནས་བསུ་བ་དང་བཅས་ཏེ། དེ་སྤྱན་དྲངས་ཏེ་ཕོ་བྲང་གི་ནང་དུ་འགྲོ་བའི་བཀོད་པ་འབྲི། དེ་དག་ནི་རྒྱལ་པོ་ཨུ་ཏྲ་ཡ་ཎ་བྲིས་སྐུས་བརྟུལ་ཞིང༌། གྲོང་ཁྱེར་སྒྲ་སྒྲོགས་སུ་བསྟན་པ་དར་བའི་སྡེ་ཚན་ནོ། །༼འ༽ འདིའི་ལོ་རྒྱུས་ལྷག་མ་ངོ་མཚར་ཅན་ཡོད་ཀྱང༌། སྟོན་པ་ཉིད་ཀྱི་རྣམ་ཐར་ལ་མེད་ཀྱང་ཆོག་པ་དང༌། བཀོད་པ་མི་མཛེས་པའི་ཕྱིར་རེ་ཞིག་བཞག་གོ །ཡང་ནགས་གསེབ་གཅིག་ན་སྟོན་པ་རབ་བྱུང་དང༌།
ཁྱིམ་པ་དང་ཚོང་པ་དང་སློང་མོ་བ་སོགས་སྣ་ཚོགས་དང་ལྷན་ཅིག་གཤེགས་པ། མདུན་དུ་བྱིས་པ་གཉིས་ལས་གཅིག་གི་རྔ་སྐེད་ཉག་འདྲ་བ་གཞན་གཅིག་དང་མདའ་གཞུ་ཐོགས་པ། བཅོམ་ལྡན་འདས་ཀྱི་ཞལ་རས་སུ་ལྟ་བ་དང༌། ཞལ་ལས་འོད་ཟེར་བྱུང་སྟེ། སྟེང་འོག་གཉིས་སུ་སོང༌། སླར་མགྲིན་པར་ཐིམ། སྐུ་གཞོགས་ནས་དགེ་སློང་གཅིག་གིས་ཞུ་བ་ཞུ། དེ་ནས་ནགས་མཐོང་གཅིག་ཏུ་སྟོན་པ་འཁོར་བཅས་ཤིང་དྲུང་སོ་སོ་ན་བཞུགས་པ་དང༌། ཤིང་སྐམ་པོ་གཅིག་གི་རྩ་བར་མེ་བཏང་ཞིང༌། ཁོང་སྟོང་གི་ནང་ནས་སྦྲུལ་འཕྱང་བ་དང༌། རི་དེའི་ཕར་ཕྱོགས་ན་འཁོར་རྣམས་སྟོན་པའི་རྗེས་ལ་ཡོང་བ། རྒྱང་རིང་པོ་ནས་སེང་གེ་ཚུར་རྔམ་ཞིང་ཚུར་རྒྱུག་པ་དང༌། ཕྱག་སོར་ལས་སེང་གེ་ལྔ་སྤྲུལ་ཏེ། སེང་གེ་བརྡས་ཤིང༌། ཕར་ཕྱོགས་ཀྱི་མཐའ་མེས་འཁོར་བ་དང༌། ཡང་བཅོམ་ལྡན་འདས་ཀྱི་སྐུ་མདུན་དུ་སེང་གེ་དེས་ཆོས་ཉན་པའི་ཚུལ་དང༌། ཡང་དེའི་ཕྱོགས་སུ་སངས་རྒྱས་བཞུགས་པའི་དྲུང་དུ་ལྷ་ཞིག་ཆོས་ཉན་པ་འབྲི། བྱིས་པ་གཉིས་ལུང་བསྟན་ཞིང་སེང་གེ་རལ་པ་ཅན་བརྟུལ་བའི་སྡེ་ཚན་ནོ། །༼ཡ༽ བར་འདིར་སོག་མ་མེད་ཀྱི་དང་པོའི་ལོ་རྒྱུས་སྦྱོར་རྒྱུ་ཡིན་ཡང་འདིར་མ་བྲིས་སོ། །ཡང་གྲོང་ཁྱེར་གཅིག་གིས་འགྲམ་ན་ཆུ་ཆེན་པོ་གཅིག་འབབ་པ་ལ། ཉ་པ་མང་པོས་དོལ་ཆེན་པོ་གཉིས་བཏབ་པ་ལ། སྡེ་ཚན་གཅིག་གིས་སྲོག་ཆགས་མང་པོ་ཟིན། དེས་མི་རྣམས་སྡེ་གཅིག་གི་འོག་ཏུ་འཆད་པར་འགྱུར་བའི་ཆུ་སྲིན་ཉའི་རིགས་ཅན་མགོ་མང་པོ་དེ་ཟིན། དེས་མི་རྣམས་ཆུ་ནང་དུ་འདྲེན་གྲབས་ལ། མི་གཞན་མང་པོ་ཡང་རྒྱུག་ཅིང་འཐེན་པའི་ཚུལ་དང༌། ཉ་ཆུ་སྲིན་དེ་བསྐམ་ལ་ཐོན་པ་དང༌། དེ་ལུས་པོ་ཉ་ལ་མགོ་བོ་བཅོ་བརྒྱད་
ཡོད་དེ། གླང་པོ་ཆེ་དང༌། རྟ་དང༌། རྔ་མོང་དང༌། བོང་བུ་དང༌། གླང་དང༌། སྤྲེའུ་དང༌། སེང་གེ་དང༌། སྟག་དང༌། དོམ་དང༌། དྲེད་དང༌། གུང་དང༌། བྱི་ལ་དང༌། ར་དང༌། ལུག་དང༌། རི་དྭགས་དང༌། མ་ཧེ་དང༌། ཕག་དང༌། ཁྱིའི་མགོ་བོ་རྣམས་སོ། །བསྐམ་ལ་བཏོན་ཟིན་པ་དེའི་མཐའ་ལ་སྐྱེ་བོ་མང་པོ་དང༌། མུ་སྟེགས་སྟོན་པ་དྲུག་ལ་སོགས་པ་ཡང་ཡོད་ཅིང༌། གཙུག་ལག་ཁང་གཅིག་ནས་སངས་རྒྱས་འཁོར་བཅས་ཚུར་འབྱོན་པ་དང༌། ཡང་ཕྱོགས་གཅིག་ཏུ་སྟོན་པ་བྱོན་ཏེ། སྟོན་པས་ཉ་པ་རྣམས་ལ་བཀའ་སྩལ་ཞིང༌། ཆུ་སྲིན་དེ་མ་གཏོགས་སྲོག་ཆགས་གཞན་ཐམས་ཅད་ཉ་པ་དེས་ཆུ་ལ་གཏོང་པ་དང༌། སྟོན་པས་ཆུ་སྲིན་ཉ་དེ་ལ་དྲི་བ་མཛད་པ་དང༌། དགེ་སློང་གཅིག་གི་ལངས་ཏེ་ཞུ་བ་འབུལ་ཞིང༌། གཞན་འཁོར་ཚོགས་མང་པོ་ལ་ཆོས་གསུང་བ། ཡང་ཕྱོགས་གཅིག་ཏུ་ཉ་པ་ལྔ་བརྒྱ་པོ་དེ་དག་ཚུར་ཤོག་གི་སྙེན་པར་རྫོགས་པར་མཛད་པ་དང༌། ཡང་ནགས་ཚལ་གཅིག་ཏུ་ལྗོན་ཤིང་སོ་སོའི་སར་བཅོམ་ལྡན་འདས་འཁོར་བཅས་བཞུགས་པ་དང༌། དགེ་སློང་མང་པོས་ནོར་མང་པོ་རྙེད་ནས་ཚུར་འོང་བ་དང༌། ཡང་ཕུག་པ་དང༌། ཤིང་དྲུང་མང་པོར་དགེ་སློང་མང་པོ་མཉམ་བཞག་བྱེད་པ་དང༌། ལུས་ལས་འོད་མང་པོ་འཕྲོས་ཞིང༌། རྫུ་འཕྲུལ་མང་པོ་སྟོན་པའི་དགེ་སློང་མང་པོ་ཡང་འབྲི། ཉ་པ་རྣམས་རབ་ཏུ་བྱུང་བའི་འཁྲིས་དེར་ལྷ་གཅིག་ལ་སངས་རྒྱས་ཆོས་གསུང་པ་འབྲི། ཉ་པ་ལྔ་བརྒྱ་བརྟུལ་ཞིང་དགྲ་བཅོམ་པ་ལ་བཀོད་པའི་སྐོར་རོ། །
༼ར༽ ཁྱིམ་གཅིག་ན་བྲམ་ཟེ་གསེར་བརྒྱན་ཁྲི་ལ་འདུག་པ་དང༌། ཁང་བཟང་གི་ཕྱོགས་གཅིག་ན། བྲམ་ཟེ་བཟང་པོ་གོས་རྒྱན་བཟང་པོ་ཞིག་གི་མདུན་ན། བྲམ་ཟེ་གཞན་འགའ་རེ་ལངས་ཏེ་གཏམ་སྨྲ་བ་དང༌། ཁྱིམ་གྱི་སྒོ་བཞི་ནས་གསེར་ལས་བྱས་
པའི་ལྷ་མོའི་གཟུགས་བརྙན་འདྲ་བ་རེ་ཐོགས་ཏེ་ཕྱོགས་བཞིར་འགྲོ་བའི་ཚུལ་དང༌། ཡང་ཡུལ་གཞན་གཅིག་ན། བུད་མེད་གསེར་གྱིས་མདོག་ཅན་གཅིག་གི་དྲུང་དུ་གསེར་གྱི་སྐུ་གཟུགས་དེ་བཞག་པ་དང༌། ཁང་བཟང་གཅིག་ན་བྲམ་ཟེ་གཙོ་བོ་གཅིག་གི་དྲུང་དུ། བྲམ་ཟེ་འགའ་རེ་ལངས་ཏེ་ཤིས་པ་བརྗོད་པའི་ཚུལ་བྱ། བུད་མེད་གསེར་མདོག་དེ་ཤིང་རྟར་བཞུགས་འཁོར་མང་པོ་དང་བཅས་ཏེ་ཚུར་འོང་བ་དང༌། ཁང་བཟང་གཅིག་ཏུ། བུད་མེད་གསེར་མདོག་དེ་གདན་ལ་འདུག་ཅིང༌། བྲམ་ཟེའི་ཁྱེའུ་དེ་ཆགས་པའི་ཚུལ་དང༌། ཡང་ཁང་བཟང་གཞན་ཞིག་བྱས་ཏེ། རབ་བྱུང་དང་བྲམ་ཟེ་དང༌། དབུལ་འཕོངས་མང་པོ་ལ་ཁྱིམ་གྱི་ནོར་ཐམས་ཅད་སྦྱིན་པར་གཏོང་ཚུལ། བྲམ་ཟེ་དེ་སྟོན་པ་དྲུག་པོ་རེ་རེའི་དྲུང་དུ་དྲི་བ་རེ་བྱེད་པའི་ཚུལ། བུད་མེད་གསེར་མདོག་དེ་གཅེར་བུ་པ་སློབ་དཔོན་འགའ་རེའི་དྲུང་དུ། སྐྲ་བྲེགས་ཤིང་ཐལ་མོ་སྦྱར་བའི་ཚུལ་དང༌། མཐར་བྲམ་ཟེ་དེ་གྲོང་ཁྱེར་གཅིག་གི་འགྲམ་བུ་མང་པོའི་མཆོད་རྟེན་ཞེས་བྱ་བ། མཆོད་རྟེན་གཅིག་གི་འགྲམ་དུ། སྟོན་པའི་སྤྱན་སྔར་རབ་བྱུང་དུ་གྱུར་ཏེ་ཐལ་མོ་སྦྱར་བས་འདུག་པ་དང༌། ཡང་ཕྱོགས་གཅིག་ཏུ་བྲམ་ཟེ་དགེ་སློང་དུ་གྱུར་པ་དེ་མཉམ་བཞག་ལ་བཞུགས་ཤིང་ལུས་ལས་འོད་ཟེར་འཕྲོ་བ་དང༌། ཡང་སྟོན་པ་ན་བཟའ་ཕྱགས་དར་ཁྲོད་རྡོ་ཚོས་མ་གསོལ་བ་དང༌། དགྲ་བཅོམ་པ་རྣམ་སྦྱར་ཤིན་ཏུ་དམར་བ་གསོལ་པ་བཞེངས་ཏེ་གཏམ་མཛད་པའི་ཚུལ་དང༌། སྣམ་སྦྱར་གཏད་པའི་སྟེང་དུ་སྟོན་པ་བཞུགས་པ་དང༌། དགེ་སློང་དེས་སྣམ་སྦྱར་དམར་པོ་བཅོམ་ལྡན་འདས་ལ་ཕུལ་ཞིང༌། སྟོན་པའི་རྡོ་ཚོས་མ་དེ་ལ་གནང་བ་དང༌། དེ་ཚོས་གོས་རྡོ་ཚོས་དེ་གྱོན་ནས་ནགས་ཚལ་ན་འདུག་པ་དང༌། ཡང་དེ་རྡོ་ཚོས་མ་དེ་གསོལ། དབུ་སྐྲ་དང་ཁ་སྤུ་ཅུང་ཟད་རིང་བར་བྱས་
ནས། སྟོན་པ་ཆོས་གསུངས་པ་འཁོར་གྱིས་བསྐོར་བའི་མཐའ་ནས་ཕྱག་འཚལ་བ་དང༌། ཡང་དེ་ཁ་དང་འདྲ་བ་ལ། སྟོན་པས་དེ་ལ་བསྟན་པ་བྱེད་གནང་བ་སྟེ། བཞུགས་གདན་གཅིག་ལ་གྲལ་སྒྲིགས་ཀྱི་ཚུལ་དུ་འདུག་པ་དང༌། ཡང་དེ་འཁོར་གྱི་ནང་དུ་ཞུགས་ནས་ཆོས་ཉན་པ་འབྲི། ཡང་དེ་དང་ཉེ་བའི་ཕྱོགས་གཅིག་ན། སྔར་གྱི་བུད་མེད་གསེར་གྱི་མདོག་ཅན་དེ། དགེ་སློང་མར་གྱུར་ནས་སྟོན་པ་ལ་ཆོས་ཉན་པ་སྟེ། དེ་དག་ནི་འོད་བསྲུང་ཆེན་པོ་བདེན་པ་ལ་བཀོད་པ་སོགས་ཀྱི་སྐོར་རོ། །༼ལ༽ ཡང་སྟོན་པ་ནགས་ཚལ་གཅིག་ན་བཞུགས་པ་ལ། ཤིང་གི་སྟེང་ན་སྤྲེའུ་ཤིང་ལོའི་འདོམ་དཀྲིས་འཁྲིལ་ཤིང་གི་ཡལ་གས་སྡོམས་ཐག་བྱས་པ་ཞིག་ཡོད་པ་དང༌། ཡང་ཤིང་གི་རྩ་བར་དེ་བབས་ནས། སྟོན་པའི་ལྷུང་བཟེད་ལེན་པའི་གྲབས་བྱེད་པ་ལ། དགེ་སློང་གཅིག་གིས་དེ་ལྡོགས་པ་དང༌། ཡང་ལྷུང་བཟེད་བླང་ནས་ཤིང་གི་རྩེ་མོར་སོང་སྟེ། ལྷུང་བཟེད་དུ་སྦྲང་རྩི་བླུགས་པ་དང༌། ཡང་སྟོན་པའི་སྐུ་གཞན་ཞིག་བྲིས་པའི་སྐུ་མདུན་དུ་འབུལ་ཚུལ་བྱས་ཀྱང༌། སྟོན་པ་མཉམ་བཞག་མཛད་ནས་མི་བཞེས་པ་དང༌། ཡང་སྤྲེའུ་དེས་ལྷུང་བཟེད་སྦྲང་རྩིས་གང་བ་འཁྱེར་ནས་ས་སྟོང་གཅིག་ཏུ། སྦྲང་བུའི་རོ་རྣམས་ཕྱིར་སེལ་བ་དང༌། ཆུ་མིག་གཅིག་གི་འགྲམ་དུ་རུང་ཆུ་བླུགས་པ་དང༌། ཡང་སྟོན་པ་ལ་ཕུལ་ཞིང་སྟོན་པས་བཞེས་པ་དང༌། སྤྲེའུ་དེ་དགའ་ནས་གར་བྱེད་པ་འབྲི། དེ་དང་ཉེ་བར་ཕྱི་འགྲོས་སུ་ཕྱིན་པས་ཁྲོན་པ་ལ་ཤོར་བ་དང༌། ནམ་མཁའི་དབྱིངས་ན་ལྷའི་གཞལ་མེད་ཁང་གི་ནང་དུ་ལྷར་སྐྱེས་པ་དང༌། ཡང་ལྷ་དེ་སྟོན་པའི་དྲུང་དུ་འོངས་ནས་མཆོད་པ་འབུལ་ཞིང་ཆོས་ཉན་པ་འབྲི་སྟེ། ཡུལ་ཡངས་པ་ཅན་དུ་སྤྲེའུས་སྦྲང་རྩི་ཕུལ་བའི་བཀོད་པའོ། །གཞན་ལོ་རྒྱུས་དེ་ཁ་དང་འདྲ་བ་
ལ། ལྷར་སྐྱེས་པའི་ཚབ་ཏུ་བྲམ་ཟེ་ལས་དྲུག་ལ་བརྩོན་པའི་བུར་སྐྱེས་ཏེ། བཙས་མ་ཐག་ཏུ་སྦྲང་རྩིའི་ཆར་འབབས་པ་དང༌། མཐར་རབ་ཏུ་བྱུང་ནས་དགྲ་བཅོམ་པ་ཐོབ་པའི་བར་གྱི་ལོ་རྒྱུས་ཀྱང་ཡོད་དོ། །༼ཤ༽ ཡང་བྲག་ཕུག་དང༌། རྩྭ་སྤྱིལ་དང༌། ལོ་མའི་སྤྱིལ་པོ་དང༌། ནགས་གསེབས་དང༌། ཤིང་གི་དྲུང་དང༌། སྤྱིལ་པོ་སོགས་དབེན་པའི་གནས་མི་འདྲ་བ་དྲུག་ཏུ། གོང་དུ་བཤད་པའི་རྟོག་གེ་བ་དྲུག་སྟེ། མུ་སྟེགས་སྟོན་པ་དྲུག་ཏུ་གྲགས་པ་རེ་རེ་ཡོད་པའི་དེ་དག་རེ་རེའི་མདུན་དུ་ཡང༌། མེ་འབར་བ་དང༌། འོད་འབྱིན་པ། ཆར་པ་སོགས་རྫུ་འཕྲུལ་སྟོན་མཁན་ལྔ་ཙམ་རེ་ཡོད་པ་འབྲི། ༡ དེ་ནས་སྐྱེད་མོས་ཚལ་འདྲ་བ་ཞིག་ཏུ་སྟོན་པ་དྲུག་ཀར་ཚོགས་པ་ཞིག་འབྲི། ༢ རྒྱལ་པོའི་ཕོ་བྲང་ཞིག་གི་ནང་དུ། རྒྱལ་པོའི་དྲུང་དུ་སྟོན་པ་དྲུག་ཚོགས་པ་དང༌། ཕྱི་ལ་འགྲོ་བ་འབྲི། ༣ གཙུག་ལག་ཁང་ཞིག་ན་སངས་རྒྱས་བཞུགས་ཤིང༌། རྒྱལ་པོ་ཡང་གླང་བོ་ཞོན་ནས། སངས་རྒྱས་མཇལ་དུ་འགྲོ་བའི་ལམ་དུ། སྟོན་པ་དྲུག་གི་རྒྱལ་པོ་ལ། གཏམ་སྨྲ་བ་དང༌། ༤ ཡང་དེ་ནས་ཕྱོགས་གཞན་དུ་སངས་རྒྱས་འཁོར་བཅས་ཕར་ཕྱོགས་ལ་ཐེགས་པའི་རྗེས་ནས་སྟོན་པ་དྲུག་འཁོར་མང་ཡང་འབྲི། ༥ དེ་ནས་ཡང་ཕོ་བྲང་གཞན་ཞིག་དང༌། སངས་རྒྱས་བཞུགས་པའི་གཙུག་ལག་ཁང་གི་ནང་དུ་སངས་རྒྱས་བཞུགས་པ་དང༌། རྒྱལ་པོ་གཞན་ཞིག་སངས་རྒྱས་མཇལ་དུ་འགྲོ་བའི་ལམ་དུ་སྟོན་པ་དྲུག་ལངས་བ་དང༌། སངས་རྒྱས་ལ་རྒྱལ་པོ་དེས་ཞུ་བ་བྱེད་པ་དང༌། ཡང་རྒྱལ་པོ་དེ་ཕྱིར་བྱུང་ནས། སྟོན་པ་དྲུག་ས་ལ་བསྡད་པ་ལ་གཏམ་སྨྲ་བ་དང༌། སྟོན་པ་དྲུག་དང་མུ་སྟེགས་པ་མང་པོ་གྲོང་ཁྱེར་ཆུང་ཆུང་སྣ་ཚོགས་སུ་བཀྲམ་སྟེ་འགྲོ་བ་དང༌། མཚོ་གཅིག་གི་ནང་ནས་དྲང་
སྲོང་གཅིག་འདུག་པ་དེས། སྟོན་པ་དྲུག་ལ་གཏམ་སྨྲ་བ་དང༌། སྟོན་པ་དྲུག་པོ་མ་དགའ་ཞིང་ཁྲོས་ནས་འགྲོ་བའི་ཚུལ་དང༌། རི་དང་ནགས་ཚལ་ཡོད་པ་ཞིག་ན་དྲང་སྲོང་མང་པོ་ཡོད་པའི་སར། སྟོན་པ་དྲུག་དགའ་བའི་ཚུལ་རྣམས་མཐའ་ལ་འབྲི་ཞིང༌། ༧ དབུས་ཀྱི་ཕྱོགས་སུ་གྲོང་ཁྱེར་ཐོ་རེ་བ་འགའ་རེ་དང༌། ཁང་བཟང་གཅིག་གི་རྩེ་ནས་བུད་མེད་གྱི་མེ་ཏོག་འཕྲེང་བ་འཕངས་པ། རྒྱལ་པོའི་བུའི་རྣམ་པ་འདྲ་བ་སྔོ་སང་ཞིག་གི་ལུས་ལ་ཕོག་པ་དང༌། གྲོང་གསེབ་དེར་དེའི་རྐང་ལག་རྣམས་རྒྱལ་པོའི་གཤེད་མས་བཅད་ཅིང་གཉེན་གྱི་མཐའ་བསྐོར་ནས་འཇུས་ཏེ་འདུག་པ། སྟོན་པ་དྲུག་པོ་དེའི་འཁྲིས་ནས་ཕར་གདོང་ས་ལ་བབ་སྟེ་འགྲོ་བ་དང༌། དེའི་འཁྲིས་དེ་ཁར་དགེ་སློང་གཅིག་གི་དེ་ལ་བདེན་སྟོབས་བརྗོད་པས། ཡན་ལག་བཅད་པ་རྣམས་སླར་འགྲིག་པ་དང༌། ༨ དེ་རྣམས་ཀྱི་མཐའ་བསྐོར་ཅི་རིགས་པར་སྟོན་པའི་ཆོ་འཕྲུལ་ཁང་པ་རྩིག་མཁན་དང༌། མི་གཞན་འགའ་རེས་མུ་སྟེགས་དྲུག་པོ་ཡང་ཆོ་འཕྲུལ་ཁང་བ་རྩིག་པའི་ཚུལ་འབྲི་ཡང་ཕར་ཕྱོགས་སུ། ༩ སངས་རྒྱས་གཙུག་ལག་ཁང་དུ་བཞུགས་པའི་སྐུ་མདུན་དུ་བྲམ་ཟེ་ཞིག་སྤོས་ཕོར་ཐོགས་ཏེ་སྤྱན་འདྲེན་ཞུ་བའི་ཚུལ་དང༌། ཡང་ཕྱོགས་གཅིག་ཏུ་སྟོན་པའི་ཆོ་འཕྲུལ་ཁང་བཟང་རྒྱ་ཆེན་པོ་ཞིག་གི་སྒོ་དྲུང་དུ་རྒྱལ་པོ་ལ་སོགས་པ་སྐྱེ་བོའི་ཚོགས་རྣམས་འདུས་པ་དང༌། སངས་རྒྱས་ནམ་མཁའ་ལ་འཕུར་ཞིང་འབྱོན་པ་དང༌། སྒོ་དྲུང་དུ་རྒྱལ་པོས་ཕྱག་འཚལ་བ་དང༌། ཆོ་འཕྲུལ་ཁང་པ་དེའི་དབུས་ན་སངས་རྒྱས་བཞུགས་ཤིང༌། སྒོ་གཅིག་ནས་མེ་འབར་བ་དང༌། དྲང་སྲོང་མང་པོ་ནམ་མཁའ་ལ་འཕུར་ཞིང་འོངས་པ་དང༌། སངས་རྒྱས་ཀྱི་སྐུ་མདུན་དུ་ཆོས་ཉན་པ་དང༌། དགེ་བསྙེན་གྱི་རྣམ་པ་ཞིག་གི་ཤིང་སྡོང་ལོ་འབྲས་རྒྱས་པ་བྱ་སྣ་ཚོགས་ཀྱི་ཁེངས་པ་ཞིག་ཁང་
བཟང་དེའི་གཡོན་དུ་འཛུགས་པ་དང༌། ཁྱིམ་བདག་གཅིག་གི་རིན་པོ་ཆེའི་འབྲས་བུ་ཅན་གྱི་ལྗོན་ཤིང་གོས་རྒྱན་དུ་མ་ཡལ་ཁ་ལས་འབྱུང་བ་ཞིག་གཡས་ཕྱོགས་སུ་འཛུགས་པ་དང༌། ཆོ་འཕྲུལ་ཁང་པ་དེའི་ཕྱི་ནང་གི་ཟུར་ཀུན་ནས། མི་ཁ་དོག་མ་ངེས་པ། དཀར་པོ། སེར་པོ། དམར་བོ། སྔོན་པོ་སོགས་འཇའ་འོད་དང་འབྲེལ་བ་ཅི་རིགས་ཅི་རིགས་འབྱུང་བ་འབྲིའོ། །སངས་རྒྱས་བཞེངས་པ་སྒོའི་ཐེམ་པ་ལ་ཞབས་ཀྱི་མནན་པ་ཞིག་ཀྱང་འབྲི། སངས་རྒྱས་ཀྱི་ཆོ་འཕྲུལ་ཁང་པ་དེ་དང་ཉེ་བ་ན། ༡༠ མུ་སྟེགས་ཀྱི་ཆོ་འཕྲུལ་ཁང་པ་ཆུང་བ་དྲུག་གི་ནང་ན། སྟོན་པ་དྲུག་པོ་རེ་རེ་དང༌། ཕྱི་ནང་ན་དེ་རྣམས་ཀྱི་འཁོར་དང༌། ཡོན་བདག་ཅི་རིགས་པ་འབྲི། ༡༡ ཡང་ཆོ་འཕྲུལ་ཁང་པ་སྔ་མ་དང་འདྲ་བ་ལས། ཁང་བཟང་ཕྱི་རོལ་རྡོ་ཆལ་འདྲ་བ་ཡངས་པ་ཞིག་ཏུ་པདྨའི་སྡོང་པོ་ཤིན་ཏུ་རྒྱས་པའི་རྩེ་མོ་ལ་སྟོན་པ་སངས་རྒྱས་ཉིད་བཞུགས་པ། ཕྱག་ས་གནོན་མཉམ་བཞག་བྱེད། གཞན་ཡལ་ག་རྣམས་ལས་གྱེས་པའི་པདྨ་དམར་པོ་ལ། སངས་རྒྱས་བཞུགས་ཚུལ་སྣ་ཚོགས་པ་དག་འབྲི། སྟེང་གི་ནམ་མཁའ་ལ་བཞེངས་པ་དང༌། བཞུགས་པ་དང༌། མནལ་བ་དང༌། འཆགས་པའི་ཚུལ་སྟོན་པ་དང༌། ཀློག་འགྱུ་བ་དང། སྤྲིན་འཕྲོ་པ་དང༌། འོད་འགྱེད་པ་དང༌། མེ་འབར་ཞིང་ཆུ་འཁྲུགས་བའི་རྫུ་འཕྲུལ་གྱི་བཀོད་པ་དང༌། སངས་རྒྱས་ཀྱི་སྐུའི་མཐའ་སྐོར་ཐམས་ཅད་དུ་རྒྱལ་པོ་ལ་སོགས་པ། སྐྱེ་བོ་དཔག་ཏུ་མེད་པས་ཡོངས་སྐོར་ཞིང༌། དེ་དག་གི་ཕྱི་མཐའ་མ། རྟ། གླང་པོ། རྔ་མོང༌། རྨ་བྱ་ལ་སོགས་པ་དང་ནམ་མཁའ་ལ་རྒྱུ་བའི་དུད་འགྲོ་མང་པོ་དང༌། ནམ་མཁའ་ལ་ལྷ་མང་པོས། མེ་ཏོག་དང༌། རིན་པོ་ཆེ་དང༌། གོས་ཀྱི་ཆར་འབེབས་པ། གཞན་ཡང་གནོད་སྦྱིན་དང་མི་མ་ཡིན། སྲིན་པོ་དང་ཀླུ་ལ་སོགས་
པ་མང་པོ་འཁོད་ཅིང་ཆོ་འཕྲུལ་ལ་ལྟ་བ་འབྲི། པད་སྡོང་གི་གཡས་གཡོན་དུ་དགྲ་བཅོམ་པ་རྣམས་དེ་ལ་ལྟ་བ་དང༌། སྐུ་མདུན་ཕྱོགས་ན་རྒྱལ་པོ་གསལ་རྒྱལ་ལངས་ཏེ་ཐལ་མོ་སྦྱར་བ་འབྲི། པད་སྡོང་དེ་རིན་པོ་ཆེའི་རང་བཞིན་ལས་གྲུབ་པ་དང༌། གཙོ་བོའི་པདྨ་གསེར་གྱིས་རང་བཞིན་ཡིན་པ་བཤད། ཁང་བཟང་དེས་ཕྱོགས་གཅིག་ཏུ་སངས་རྒྱས་ཀྱི་སྐུའི་གཡས་ནས་དགྲ་བཅོམ་པ་གཅིག་དང༌། གཡོན་ནས་དགེ་བསྙེན་མ་གཅིག་གི་ཞུ་བ་ཞུ་ཚུལ་བྱེད། ཡང་དེ་དང་འབྲེལ་བའི་ཁང་བཟང་གཅིག་ཏུ་བཅོམ་ལྡན་འདས་ཀྱི་སྐུ་མདུན་ན་དགེ་སློང་བྱ་མ་བུམ་ཐོགས་པ་མང་པོ་སྤུང་བྲིས་སུ་བྲིས། ༡༢ དེའི་ཕྱི་རོལ་ཏུ་རྒྱལ་པོས་སྟོན་པ་དྲུག་ལ་གཏམ་སྨྲ་བའི་ཚུལ་དང༌། སྟོན་པ་དྲུག་པོ་གཅིག་གིས་གཅིག་ལ་གྲུ་སུག་བྱེད་པའི་ཚུལ་དང༌། ཡང་སྟོན་པ་དྲུག་གནས་པའི་སྟེང༌། ནམ་མཁའི་དབྱིངས་ན་ལག་ན་རྡོ་རྗེ་རྡོ་རྗེ་འབར་བ་ཐོགས་པའི་འགྲམ་ནས། ཆར་རླུང་དྲག་པོ་མི་ཟད་པ་བྱུང་བས་དེ་རྣམས་བྲོས་འགྲོ་ཚུལ་དང༌། དེ་དག་ལས་ཐག་རིང་རྣམས་ཀྱི་མཐའ་རྣམས་སུ། གཅིག་བྲག་ཕུག་ཏུ་བཞུགས་པ་དང༌། གཅིག་རྩྭ་འཐུག་པོའི་གསེབ་དང༌། གཅིག་ནགས་དང༌། གཅིག་མགྲོན་ཁང་དང༌། གཅིག་ལྷ་ཁང་དུ་གབ་ནས་བསྡད་པ་དང༌། རྫོགས་བྱེད་ལམ་དུ་འགྲོ་བ་ལ། མི་ངན་ངོན་གཅིག་གིས་སྡིགས་ཤིང་སྨོད་པའི་ཚུལ་དང༌། ཡང་དེའི་ཕྱོགས་གཅིག་ཏུ་བུམ་པ་བྱེ་མས་གང་བ་མགུལ་དུ་བཏགས་ཏེ། རྫིང་བུའི་ནང་དུ་འཕྱོངས་ཏེ་ཤི་བའི་བཀོད་པ་དང༌། ཆར་རླུང་བྱུང་ས་དེའི་འཁྲིས་སུ། མུ་སྟེགས་ཀྱི་ཆ་བྱད་འགའ་རེ་ཚོགས་ཤིང་གྲོས་བྱེད་པ་དང༌། ལམ་དུ་ཞུགས་ཤིང༌། བུད་མེད་གཅིག་ལ་གཏམ་འདྲི་བ་དང༌། རྫོགས་བྱེད་ཤི་བ་ལ་ལྟ་བ་དང། དེ་དང་ཉེ་བའི་ཆུ་ལ་བུམ་པ་མགུལ་དུ་
བཏགས་ཏེ་འཕྱོང་སྟེ་ཤི་བ་འགའ་རེ་བྲིས། དེ་རྣམས་མཐའ་ལ་བྲིས་ཞིང༌། དབུས་ཡངས་ས་ཞིག་ཏུ། བཞུགས་ཁྲི་མཐོན་པོ་ལ་སངས་རྒྱས་བཞུགས་ཤིང༌། འཁོར་དགེ་སློང་སོགས་འཁོར་རྣམ་བཞི་དང༌། སྐྱེས་པ་བུད་མེད་ལྷ་ཀླུ་སྡེ་བརྒྱད་སོགས་མང་པོ་དང༌། མུ་སྟེགས་ཅན་ཡང་མང་པོ་འདུས་པ་ལ། ཆོས་གསུང་བའི་ཚུལ་བྱ། དེ་དག་ནི་ཆོ་འཕྲུལ་ཆེན་པོ་བསྟན་པའི་སྡེ་ཚན་ནོ། །༼ས༽ ཆོ་འཕྲུལ་ཉི་མ་གཅིག་པ་འདི་ནི། འདུལ་བ་སོགས་ནས་བཤད་པ་ཐེག་པ་ཐུན་མོང་གི་ལུགས་ཡིན་ལ། ཆོ་འཕྲུལ་ཉི་མ་བཅོ་ལྔ་པ་ནི། ཐེག་པ་ཆེན་པོའི་ལུགས་ཡིན་ཏེ། ལུགས་འདི་གཉིས་ཀྱང་བསྲེ་བར་མི་བྱའོ། །དེའི་ཕྱིར་མདོ་སྡེ་མཛངས་བླུན་ཡང་ཐེག་ཆེན་ཡིན་གྱི། ཉན་ཐོས་ཀྱི་མདོ་མིན་ནོ། །དེ་བཞིན་དུ་དྲན་པ་ཉེར་བཞག་མདོ་ཡང་ཐེག་ཆེན་ཁོ་ན་ཡིན་པས། བཤེས་གཉེན་ཆེན་པོར་གྲགས་པ་རྣམས་གསུང་ཅ་བཅོལ་མི་འབྱོན་པར་ཞུའོ། །ཡང་གཙུག་ལག་ཁང་དབུས་མ་ཞིག་ན་སངས་རྒྱས་མཉམ་བཞག་ལ་བཞུགས་པ་དང༌། གཞན་གནས་ཁང་སོ་སོ་ན་དགེ་སློང་སོ་སོ་དག་ལ་མཆོད་པ་དང་ཡོ་བྱད་ཀྱི་ཁྱད་པར་མང་པོ་དང༌། ཕྱི་ནང་དུ་སྐྱེ་བོ་འདུ་འཚོགས་བྱེད་པའི་འབྲིའོ། །ཡང་གནས་དེ་ཁ་འདྲ་བ་གཅིག་ཏུ་དགྲ་བཅོམ་པ་ཞིག་བཞུགས་ཁྲི་ལ་འདུགའཁོར་མང་པོ་ཆོས་ཉན་པའི་ཚུལ་འབྲི། དེ་ནི་ཆོ་འཕྲུལ་བསྟན་པས་དགེ་སློང་རྣམས་ཡོ་བྱད་འཕེལ་བ་དང༌། དེས་ཆོས་སྤྱོད་འགྲིབས་པས་རྙེད་བཀུར་གྱི་རྒྱུན་གཅོད་པར་བཞེད་ནས་ལྷ་ཡུལ་དུ་གཤེགས་པ། གཉེན་ཡོད་དུ་མཽ་འགལ་གྱིས་དབྱར་གནས་མཛད་པའི་ཚུལ་ལོ། །སྔ་མ་དེའི་འཁྲིས་སུ་དགྲ་བཅོམ་པ་ས་སྟེགས་མཐོ་བ་གཅིག་ལ་བཞུགས་པ་ལ། རབ་བྱུང་དང་སྐྱེ་བོ་མང་པོ་ཞུ་
བ་བྱེད་པ་འབྲི། དེ་དང་ཉེ་བ་ན་རི་རབ་ཀྱི་བཀོད་པ་རྗེས་མཐུན་པ་བྱས་ཏེ། རིའི་རྩེ་མོ་རྒྱ་ཆེ་བ་ཞིག་བྱེད། དེའི་ཕྱོགས་གཅིག་ན་ལྷའི་གྲོང་ཁྱེར་གྱི་ཕྱོགས་ས་མཚོན་བྱེད་དང༌། ཕྱོགས་གཅིག་ན་སྐྱེད་མོས་ཚལ་གྱི་དབུས་ན། ཤིང་སྡོང་ཤིན་ཏུ་ཆེ་བ་གཅིག་ཡོད་པ། དེས་རྩ་བ་ན་བྲག་ལེབ་མོ་དཀར་པོ་ཤིན་ཏུ་ཆེ་བའི་དབུས་ན། སངས་རྒྱས་དགེ་འདུན་དང་བཅས་པ་དང༌། སྟོན་པའི་སྐུ་མདུན་དུ་ལྷ་མོ་རྒྱན་གྱིས་བརྒྱན་པ་ཞིག་དང༌། མཐའ་སྐོར་དུ་ལྷ་མང་པོ་ཆོས་ཉན་པའི་བཀོད་པ་བྱ། དེའི་འཁྲིས་སུ་ཡང་བཀོད་པ་དེ་ཁ་འདྲ་བ་ཞིག་ལ། བཅོམ་ལྡན་འདས་ཀྱི་སྤྱན་སྔར་དགྲ་བཅོམ་པ་ཞིག་གི་ཞུ་བ་འབུལ་བའི་ཚུལ་བྱ། དེ་ནས་ཡང་སྟེང་གི་ནམ་མཁའ་ལ་ལྷ་གནས་གཞན་རྣམས་འབྲི་སྟེ། གོ་སྐབས་ཡངས་ཞིང་འབྲི་སྟབས་བདེ་ན། འདོད་ལྷ་རིགས་གཞན་བཞི་དང༌། གཟུགས་ཁམས་གནས་རིགས་བཅུ་བདུན་དུ་སངས་རྒྱས་འབྱོན་པའི་བཀོད་པ་འབྲི་དགོས་པ་ཡིན་ཀྱང༌། སྟེང་འོག་ཏུ་དེ་ཙམ་ཤོངས་དཀའ་བར་འདུག་པས། ནམ་མཁའ་ལ་འདོད་ལྷ་གོང་མའི་གནས་མཚོན་བྱེད་ས་གཞི་རི་ནགས། མེ་ཏོག་རྫིང་བུ་གཞལ་མེད་ཁང་ཁ་དོག་སྣ་ཚོགས་པ། ལྷ་ཕོ་མོ་མང་པོ་དང་བཅས་པའི་ཡུལ་ཕྱོགས་གཅིག་སྤྲིན་གསེབ་ཏུ་འབྲི་སྟེ། གནས་དེ་རང་གི་སྟེང་ལ་ཡང་སྤྲིན་ཁ་དོག་སྣ་ལྔ་དང༌། ནོར་བུ་དང་མེ་ཏོག་གི་རོལ་དཔྱད་ཀྱི་ཆར་འབབ་པའི་ཚུལ་དང༌། ལྷ་ཕོ་མོ་མང་པོའི་དབུས་ན་སངས་རྒྱས་ཆོས་གསུང་པའི་ཚུལ་དང༌། ཡང་དེ་དག་གི་སྟེང་གི་ནམ་མཁའ་ལ། ས་གཞི་མཐའ་རིས་བསྐོར་བ་འདྲ་བ། དབུས་སུ་གཞལ་ཡས་ཁང་དང་བཅས་པ་ཐམས་ཅད་ཁ་དོག་དཀར་པོ་ཉག་གཅིགཤིང་དང་སྤྲིན་དང་བྱ་དང་མཚོ་ལ་སོགས་པ་མེད་པ། ལྷ་
ཐམས་ཅད་ཁ་དོག་སེར་པོ། གོས་དཀར་པོ་ཤ་དག་ཡོད་པ། ལྷ་ཕོ་འབའ་ཞིག་ཡིན་ལ། དེ་ལྟ་བུར་སངས་རྒྱས་ཆོས་གསུང་པ་ནི། གཟུགས་ཁམས་ཕལ་པའི་གནས་རྣམས་མཚོན་བྱེད་དང༌། ཡང་དེའི་སྟེང་གི་ནམ་མཁའ་ལ་ས་གཞི་རི་སོགས་མེད་པའི་གཞལ་མེད་ཁང་དཀར་པོ་ཡངས་པ་ཞིག་ན། སངས་རྒྱས་ལ་འཁོར་ལྷ་ཁ་དོག་སེར་པོ། །ན་བཟའ་དྲ་སོགས་མེད་པ་མ་གཏོགས་རབ་འབྱུང་འདྲ་རུང་ལས། ཐོར་གཙུག་དང་རྒྱན་གྱིས་བརྒྱན་པས་བསྐོར་ཏེ་ཆོས་ཉན་པ་ནི། གནས་གཙང་མ་མཚོན་བྱེད་དོ། །རི་རབ་དེའམ་གཞན་ཞིག་བྲིས་ནས། དེའི་རྩེ་ནས་མར་སྐས་ཀྱི་རྣམ་པ་བྱེད་པའམ། ཡང་དེ་འབྲི་སྟབས་མི་བདེ་ན་ནམ་མཁའི་དབྱིངས་ལྷ་གནས་གཞན་གཅིག་ནས་སྐས་གཙུགས་པ་བྱས་ཀྱང་ཡོད། ནགས་མཐོང་ཞིག་ན་རབ་བྱུང་དང༌། ཁྱིམ་པའི་སྐྱེ་བོ་ཤིན་ཏུ་མང་བ་འདུས་པ་གཅིག་གི་དབུས་སུ་སྐས་བཤམས་གཙུགས་པ་དགོས་ཏེ། སྐས་དབུས་མ་སྔོན་པོ། །གཡས་སེར་བ། གཡོན་པ་དཀར་བ། སྐས་དབུས་མའི་དཀྱིལ་ཙམ་ན་སངས་རྒྱས་དང༌། སྐས་གཡས་པ་ན་སྟོན་པའི་མདུན་ཙམ་དུ་ཚངས་པ་རྔ་ཡབ་དཀར་པོ་འཛིན་པ། སྐས་གཡོན་པ་སྟོན་པའི་སྐུ་རྒྱབ་ཙམ་དུ། བརྒྱ་བྱིན་མིག་སྟོང་དང་ལྡན་པ་གདུག་དཀར་པོ་གསེར་གྱི་ཡུ་བ་ཅན་འཛིན་པ། གཡས་གཡོན་སྟེང་རྣམས་ནས་ལྷ་དཔག་ཏུ་མེད་པས་མཆོད་པ་དང༌། སྐས་ཀྱི་ཕྱེད་སྨད་ཙམ་ན། སྟོན་པ་ནམ་མཁའ་ལ་འབྱོན་པ་གཅིག་ཀྱང་འབྲི། ཡང་ནགས་མཐོང་དེ་ཁ་འདྲ་བ་ཞིག་ཏུ་སངས་རྒྱས་འཁོར་མང་པོ་ལ་ཆོས་སྟོན་པ་དང༌། ལྷ་མང་པོས་ནམ་མཁའ་ནས་མཆོད་པ་དང༌། ཕྱོགས་གཅིག་ནས་ཚུར་འཁོར་ལོས་སྒྱུར་བའི་རྒྱལ་པོ་འཁོར་བཅས་ཡོང་བའི་ཚུལ་དང༌། ཕྱོགས་
གཅིག་ཤོས་དེ་ན། ཤིང་དྲུང་གཅིག་ན་དགེ་སློང་གཅིག་དང༌། གཅིག་མཉམ་བཞག་བྱེད་པ། བཅོམ་ལྡན་འདས་ཀྱི་སྐུའི་དྲུང་ན་དགེ་སློང་ཁ་དོག་མི་ཤ་མ་ཡིན་པའི་སྔོ་སང་རང་བཏང་པ་ཞིག་ཕྱག་འབུལ་བ་རྣམས་འབྲི་སྟེ། ལྷ་ལས་བབས་པའི་སྐོར་རོ། །༼ཧ༽ ཡང་སྟོན་པ་འཁོར་བཅས་ལམ་དུ་གཤེགས་པ་དང༌། སྐུ་མདུན་ཀྱི་ཐད་ལ། ལྗོན་ཤིང་གསར་པ་མང་པོ་དང༌། ཆུ་དང་རྫིང་བུ་ཡིད་དུ་འོང་བ་མེ་ཏོག་ཅན་མང་པོ་དང༌། ཁང་བཟང་སྟོང་པ་འགའ་རེ་ཡོད་པ་འབྲི་ཞིང༌། གཡས་གཡོན་འགའ་རེ་ན་ཤིང་བཅད་པ་དང༌། ཁང་པ་བཤིག་པ་དང༌། རྫིང་ལ་འགའ་ཞིག་གི་དུག་འདེབས་པའི་བཀོད་པ་འབྲི། དེའི་ཕ་རོལ་གྲོང་ཁྱེར་ཆེན་པོ་ལྕགས་རི་སྐོར་བ། གྲོང་ཁྱེར་གྱི་སྲང་ཁ་དང་འབྲེལ་བའི་རྡོ་ཆལ་འདྲ་བ་ཞིག་ན། མུ་སྟེགས་མང་པོས་སྐྱེ་བོ་མང་པོ་ལ་གཏམ་སྨྲ་བ་དང༌། གྲོང་ཁྱེར་དེའི་ལྕགས་རི་སྒོ་སྡམས་ཤིང༌། ལྕགས་རིའི་ཕྱོགས་གཅིག་ནས་མར་སྐས་བཙུགས་པ་ལ། བུད་མེད་སྒྲོན་མེ་ཆེན་པོ་ཐོགས་པ་ཞིག་འབབ་པ་དང༌། གྲོང་ཁྱེར་གྱི་ཕྱི་རོལ་ཀྱི་གནས་ཞིག་ན། སངས་རྒྱས་འཁོར་བཅས་བཞུགས་པའི་དྲུང་དུ། བུད་མེད་དེ་ཆོས་ཉན་པ་དང༌། གྲོང་ཁྱེར་དེའི་ནང་ཁང་བཟང་གཅིག་ན། ཁྱིམ་བདག་གཅིག་དང༌། གཞན་སྐྱེ་བོ་འདུས་པ་ལ། བུད་མེད་དེས་ཁས་ལེན་སྤོང་པའི་ཚུལ། ཡང་གྲོང་ཁྱེར་དེ་ཁ་ཡིན་ཀྱང༌། བཀོད་པ་ལོགས་པ་བྱ་སྟེ། གྲོང་ཁྱེར་དུ་ཁྱིམ་བདག་གཅིག་གིས་སྲང་ཁའི་བཞི་མདོར། གསེར་དོང་ཙེ་མང་པོ་སྤུང་ཤིང༌། ལྕགས་རིའི་སྐས་དེ་ལ་འབབ་པ་དང༌། ཕྱི་རོལ་ཏུ་སྟོན་པའི་སྐུ་དྲུང་དུ་ཆོས་ཉན་པ་དང༌། གྲོང་ཁྱེར་གྱི་ནང་གི་ཁང་བཟང་ཞིག་གི་སྒོ་རུ་གསེར་གྱི་ཕུང་པོ་དང༌། ནོར་བུའི་ཕུང་པོ་སྤུངས་ཤིང༌། སྐྱེ་བོ་མང་པོ་འདུས་པ་དང༌། གྲོང་
ཁྱེར་གྱི་སྒོ་ནས་ཕར་མི་མང་པོ་འགྲོ་ཞིང༌། ལྕགས་རིའི་ཕྱོགས་གཅིག་ན། ཕྱག་ན་རྡོ་རྗེས་རྡོ་རྗེ་གདེང་བའི་ཚུལ་དང༌། དེའི་ཐད་ཀྱི་ལྕགས་རི་འགྱེལ་བའི་ཐད་ནས་མི་མང་པོ་འགྲོ་བ། དེའི་ཕར་ཕྱོགས་ན་བཞུགས་ཁྲི་ལ་སངས་རྒྱས་བཞུགས་པའི་སྐུའི་མཐའ་བསྐོར་ཐམས་ཅད་སྐྱེ་བོ་སྣ་ཚོགས་པས་བསྐོར་ཞིང་ཆོས་ཉན་པའི་བཀོད་པ་དང༌། སྟེང་ནས་ལྷ་རྣམས་ཀྱིས་མཆོད་པ་དང༌། སངས་རྒྱས་འཁོར་བཅས་ཀྱིས་གནས་དེ་འོད་ཟེར་གྱི་ཁྱབ་པའི་ཚུལ་འབྲི། དེའི་ཕ་རོལ་ཁང་བཟང་ཞིག་ཏུ་ཁྱིམ་བདག་དར་མ་ཡོལ་བ་ཞིགམཛོད་གཅིག་གི་དྲ་མིག་ནས་ལྟ་བ། མཛོད་དེ་ནོར་གྱི་ཁེངས་པ། བུད་མེད་གཅིག་སྣོད་གཅིག་ཏུ་འབྲས་འཚོད་ཅིང༌། སྣོད་གཞན་མང་པོ་འབྲས་ཀྱི་གང་བ་དང༌། གཞོན་ནུ་གཅིག་སྐེད་པ་ནས་སྣོད་གཅིག་གི་ནང་ནས་གསེར་དངུལ་མང་པོ་གཞན་ལ་གཏོང་བའི་ཚུལ་དང༌། བུད་མེད་གཞོན་ནུ་ཞིག་གིས་སྣོད་གཅིག་ཏུ་དྲི་བཟང་ལྡུགས་པར་བྱེད་ཅིང༌། སྣོད་གཞན་མང་པོ་ཞིག་དྲི་བཟང་གིས་གང་བ་དང༌། ཁྱིམ་གྱི་ཕྱི་རོལ་ཏུ་གཡོག་པོའི་གཟུགས་ཞིག་ཞིང་གཅིག་རྨོས་པས་ཞིང་མང་པོར་རྨོས་པར་གྱུར་པ་དང༌། ཁྱིམ་གྱི་སྒོ་ནང་ན་གཡོག་མོའི་གཟུགས་ཞིག་ཏུན་ཤིང་ཐོགས་ནས་འབྲས་སྦྲུ་བ། གཡས་གཡོན་དུ་སྣོད་མང་པོ་འབྲས་ཀྱིས་གང་པ་རྣམས་འབྲི་སྟེ། གྲོང་ཁྱེར་བཟང་བྱེད་དུ་གཤེགས་པའི་སྡེ་ཚན་ནོ། །༼ཨ༽ བར་འདིར་ཁྱིམ་བདག་མགོན་མེད་ཟས་སྦྱིན་གྱི་སྟོན་པའི་སྐུ་གཟུགས་བྱ་བར་ཞུས་པ་དེ་ཡང༌། ཁྱིམ་བདག་གཅིག་གི་ཁྱིམ་དུ་གཅེར་བུ་པ་མང་པོ་ལ་ཁ་ཟས་གཡོས་པའི་འགྲམ་ནས་མི་གཅིག་གི་བཞད་གད་བྱེད་པའི་རྣམ་པ་དང༌། ཁྱིམ་གྱི་ཕྱི་སྒོའི་ནང་དུ་འབྲས་ཀྱི་ཁུ་བ་ལ་གཅེར་བུ་པ་འགྲེད་ཅིང༌། རྡོག་པའི་ཤུགས་ཀྱིས་ཐེན་པ་བུད་པ་འབྲི། ཕྱི་རོལ་ས་སྟོང་གཅིག་ཏུ།
གཅེར་བུ་བ་དེ་མགོ་ལ་རྨ་དཀྲིས་བྱེད་ཅིང༌། ཁྱིམ་བདག་ཅིག་དང་གཏམ་སྨྲ་བ་དང༌། ཡང་ཁང་པ་གཅིག་གི་ནང་ན་མི་མང་པོ་ཟས་སྣ་ཚོགས་སྦྱོར་ཞིང༌། དེ་རྣམས་ལ་དུག་འདེབས་པ་དང༌། སྒོ་ཁང་དུ་དོང་བྱས་པར། ཕྱོགས་གཅིག་ནས་མེ་ལྡུགས། ཕྱོགས་གཅིག་ནས་རྩའི་ཐོག་འགེབས། དེའི་སྟེང་དུ་ས་རབ་རིམ་མཐོར་བ་དང༌། དེའི་ཕར་ཕྱོགས་བར་སྟོང་ཅུང་ཟད་ཡོད་པར་བྱས་ནས། གཙུག་ལག་ཁང་ཁང་བཟང་དུ་མ་ཡོད་པའི་ཁང་བཟང་གཅིག་ཏུ། སངས་རྒྱས་ལ་ཁྱིམ་བདག་གཅིག་གིས་ཞུ་བ་འབུལ་བ་དང༌། ཁང་བཟང་གཅིག་ནས་སངས་རྒྱས་བཞེངས་ཤིང་འབྱོན་པ་ལ། ལྷ་འགའ་ཞིག་གིས་ལྡོག་པའི་ཚུལ་དང། གཙུག་ལག་ཁང་དང་སྔར་གྱི་དེའི་བར་ལ། གྲོང་ཁྱེར་གྱི་རྣམ་པ་ཅུང་ཟད་བྱས་པའི་འགྲམ་ནས། སངས་རྒྱས་ཕེབས་པ་ལ་ཡང༌། ལྷ་ཞིག་གིས་ལྡོག་པའི་ཚུལ་དང༌། མེ་དང་དུག་སྦྱོར་སོགས་ཡོད་པའི་ཁྱིམ་དེ་ཁའི་འཁྲིས་སུ། ཁྱིམ་དེའི་ཁོ་ན་འདྲ་བ་ཡངས་པ་ཞིག་བྱས་ནས། དེའི་སྒོ་དྲུང་མ་སླེབ་ཙམ་ན། སངས་རྒྱས་ཐོག་མར་ཕེབས་ཤིང༌། དགེ་སློང་རྣམས་ཕྱི་ནས་འབྱོན་པའི་ཚུལ་བྱ། སྐུ་མདུན་དུ་ཡང་ལྷ་ཞིག་གིས་ལྡོག་ཚུལ་བྱེད། ཁྱིམ་དེའི་སྒོ་ཁང་ཡང་པར་པདྨའི་མཚོ། དང་བ་དང་མེ་ཏོག་སྣ་ཚོགས་ཀྱི་གང་བ། སངས་རྒྱས་ཀྱིས་པདྨ་དེ་དག་གི་སྟེང་དུ་ཞབས་བཞག་སྟེ་འབྱོན་པའི་ཚུལ་དང༌། ཁང་བཟང་གི་རྩེ་ནས། གཅེར་བུ་པ་གཅིག་དང༌། ཁྱིམ་བདག་གཅིག་ལྟ་བ་དང༌། ཁང་པ་དེའི་སྒོ་གཞན་ཞིག་ནས་གཅེར་བུ་པ་དེ་འབྲོས་པ་དང༌། ཁང་བཟང་དེའི་དབུས་ན་སངས་རྒྱས་འཁོར་བཅས་བཞུགས་པ་དང༌། ཁྱིམ་བདག་ཕོ་མོ་གཉིས་གཡོག་དང་བཅས་པས། གདུགས་ཚོད་གསོལ་བ་ལས་སྣོད་སྔ་མའི་ནང་ན་ཁ་ཟས་
ནག་པོར་ཡོད་པ། ལྷུང་བཟེད་ཀྱི་ནང་དུ། བླུགས་པའི་ཚེ་ཁ་དོག་དཀར་པོར་སོང་བ་འབྲི། ཁང་པ་དེའི་ཕྱི་རོལ་ས་ཕྱོགས་ཡངས་པ་ཞིག་ཏུ། འཁོར་མང་པོ་ལ་ཆོས་གསུང་པ་དང༌། མེ་ཏོག་གི་ཆར་འབབ་པ་སོགས་འབྲི་སྟེ། ཁྱིམ་བདག་དཔལ་སྦེད་ལ་སོགས་པ་བརྟུལ་བའི་སྡེ་ཚན་ནོ། །༼ཀི༽ ཡང་རི་དང་ནགས་ཚལ་དང་ནེ་གསེང་ཡོད་པ་ཞིག་ན། ལྷ་མོ་འདྲ་རུང་མདོག་དམར་བ་བཞིན་ཞི་མ་ཁྲོ་མཆེ་བ་ཅུང་ཟད་གཙིགས་པ་ལ། འཁོར་བྱིས་པ་རྒན་གཞོན་གྱི་རིམ་པ་སྣ་ཆོགས་པ། སྲིན་པོའི་ཕྲུག་གུ་འདྲ་བ་རྒྱན་མང་པོས་བརྒྱན་པ། ལ་ལ་མིའི་བྱིས་པ་བཟུང་སྟེ་ཟ་བའི་རྣམ་པ་འབྲི། གྲོང་ཁྱེར་གཅིག་ནས་བུད་མེད་བུ་ཐོགས་པ་མང་པོ་བྲོས་ཏེ་འགྲོ་བའི་ཚུལ་ལ། སྲིན་པོའི་གཟུགས་ཀྱི་འགགས་པའི་རྣམ་པ་དང། འགའ་ཞིག་ཐག་རིང་པོར་བྲོས་ཐུབ་པའི་རྣམ་པའང་འབྲི། ཕྱོགས་གཅིག་ཏུ་སྐྱེ་བོ་མང་པོ་བཅོམ་ལྡན་འདས་ལ་ཞུ་བ་ཞུ་བའི་རྣམ་པ་འབྲི། དེ་ནས་མི་མ་ཡིན་གྱི་ཁང་པ་ཤ་ཁྲག་རུས་པ་ཐོད་པ་ཐོ་རེ་བ་གཅིག་གི་སྒོ་རྩར། སངས་རྒྱས་བཞུགས་ཤིང་སྐུའི་དྲུང་དུ། བྱིས་པ་གསེར་མདོག་གཅིག་ལ་ལྷུང་བཟེད་འགེབས་གྲབས་མཛད་པ་འབྲི། སྔར་གྱི་ལྷ་མོ་འདྲ་བའི་གནོད་སྦྱིན་མོ་དམར་མོ་དེ་ཁ་ཡིན་པ་ལ། རིངས་པར་རྒྱུགས་པའི་ཚུལ། སྐྲ་འཛིངས་པའི་རྣམ་པས་གྲོང་ཁྱེར་གྱི་སྲང་ཁ་ལ་བུ་འཚོལ་དུ་འགྲོ་བའི་རྣམ་པ་དང༌། རི་ནག་པོ་དགུ་དང༌། གངས་ཅན་སོགས་ལ་པུས་མོ་བཙུགས་ཏེ་འགྲོ་བ་དང༌། ཙོག་པོར་འདུག་པའི་ཚུལ་གྱི་སྡོད་པ་དང༌། སླར་ཡང་རྒྱུགས་པ་དང༌། ཚ་དམྱལ་གྱི་གནས་ལྕགས་བསྲེགས་དང༌། མེ་དང༌། དམྱལ་བའི་སེམས་ཅན་སྡུག་བསྔལ་མྱོང་བའི་རྣམ་པ་ཡོད་པ་གཅིག་གི་སར་ཡང་འཚོལ་བ་དང༌། གྲང་
དམྱལ་གྱི་གནས་མཚོན་བྱེད་གངས་རི་དང༌། ས་གཞི་དཀར་པོ་སེམས་ཅན་ལུས་ཚལ་པར་གས་པ་ཡོད་པ་གཅིག་ཏུ་ཡང་དེའི་ཚོལ་བ་རྒྱུགས་པ། རི་རབ་སྟེང་འོག་ཏུ་བང་རིམ་དང་བཅས་པ་རྩེ་མོ་ཚང་བ། མཚོ་ནང་ནས་སྐྱེས་པ་ལོགས་ལ་ཕྱང་ཙམ་ཕག་ནས་འཐོན་པ་ཞིག་འབྲི། དེའི་བང་རིམ་དང་རྩེ་མོ་རྣམས་སུ་དེ་རྒྱུགས་པ་དང༌། རི་རབ་གྱི་རྩེ་མོའི་ཕྱོགས་གཅིག་ན་ལྷ་དང་གནོད་སྦྱིན་ཁྲོ་བོ་འགའ་ཞིག་གི་དེ་བཟུང་ཞིང་ཕྱིར་སློག་པ་དང༌། རི་རབ་ཀྱི་བང་རིམ་གྱི་ཕྱོགས་གཅིག་ན། རྣམ་ཐོས་སྲས་བཞུགས་པའི་དྲུང་དུ་གནོད་སྦྱིན་མོ་དེ་ཞུ་བ་བྱེད་པ་དང༌། ཚུར་དེ་དགའ་བའི་ཚུལ་གྱི་ལོག་ཡོང་བ་དང༌། ཡང་གནོད་སྦྱིན་མི་མ་ཡིན་གྱི་ཁང་པ་ཤ་ཁྲག་ཐོ་རེ་བ་སྔ་མ་དེ་དང་འདྲ་བའི་དྲུང་ན། སངས་རྒྱས་བཞུགས་པའི་དྲུང་དུ། དེ་ཐལ་མོ་སྦྱར་ཏེ་ཆོས་ཉན་པ་དང༌། སྐུའི་གཡས་སུ་ལྷུང་བཟེད་ཁ་སྦུབ་པ་དང༌། གཡོན་དུ་ཁྱེའུ་གསེར་མདོག་དེ་ཉིད་ཡོད་པ་འབྲིའོ། །བསྡུ་ན་དེ་ཙམ་གྱིས་ཆོག་ལ། དེ་ལས་ཅུང་ཟད་རྒྱས་པར་བྱེད་ན། ཐོག་མའི་སྐབས་དེའི་བཀོད་པ་ལ། གྲོང་ཁྱེར་གྱི་སྟེང་དུ། གདུགས། རྒྱལ་མཚན། དར་མང་པོ་ཕྱར། ས་གཞི་ལ་མེ་ཏོག་དོར། སྤོས་མང་པོ་བཏང༌། ལྷ་རྟེན་མང་པོ་ཡོད་པའི་སར། གཏོར་མ་དང་མཆོད་པ་སྣ་ཚོགས་བཤམས་པ་དང༌། སྐྱེ་བོ་མང་པོ་ཚོགས་པ་ལ་ནམ་མཁའ་ནས་ལྷ་གཅིག་གིས་གཏམ་སྨྲ་བ་དང༌། གཞུག་ཏུ་ཡང་གྲོང་ཁྱེར་ཆེན་པོར་མི་རྣམས་དགའ་སྟོན་བྱེད་པའི་རྣམ་པ་འབྲི་སྟེ། གནོད་སྦྱིན་མོ་ཕྲོག་མ་བརྟུལ་བའི་སྡེ་ཚན་ནོ། །༼ཁི༽ ཡང་བཀོད་པ་གཅིག་ལ་ཡུལ་ལྗོངས་གཉིས་འབྲི་ཞིང༌། དེ་གཉིས་ཀྱི་བར་རི་དང་ནགས་ཚལ་དང༌། ཡུལ་ཕྲ་མོ་མང་པོས་བར་ཆོད་པ། ཡུལ་ལྗོངས་ཕར་ཕྱོགས་དེ་ཅུང་ཟད་ཆུང་བར་བྱ་སྟེ། གྲོང་ཁྱེར་གྱི་དབུས་ན་
ཕོ་བྲང་ཆེ་བ་ཞིག་བྱ། དེའི་དབུས་སུ་རྒྱལ་པོ་ཆེན་པོ་གཅིག་ལ་རྒྱལ་ཕྲན་མང་པོ་འདུད་པ་དང༌། བློན་པོ་དང་དམག་མི་སོགས་འཁོར་ཚོགས་མང་པོས་སྐོར་བ། ཡང་དེ་དང་ཉེ་བའི་ཕྱོགས་གཅིག་ཏུ། ཁང་བཟང་གི་མདུན་གྱི་ཁྱམས་ཡངས་པའི་དབུས་སུ་རྒྱལ་པོ་ཆེན་པོ་དེ་དང༌། དེའི་གཡས་གཡོན་དུ་བློན་པོ་འགའ་རེ་དང༌། མདུན་ནས་ཚོང་པ་འགའ་རེའི་སྐྱེས་འབུལ་བ་དང༌། གཏམ་བྱ་བའི་ཚུལ་བྱ། དེ་དང་འདབས་འབྱོར་བའི་ཁང་བཟང་ཞིག་རྒྱལ་པོས་ཕོ་ཉ་དྲུག་ཙམ་ལ་བཀའ་གནང་ཞིང༌། བཀའ་ཡིག་གི་སྒྲོམ་བུ་གཏོད་པ་དང༌། ཡང་ཡུལ་དེའི་ཕྱོགས་གཅིག་ནས། རྒྱལ་པོ་དེའི་དཔུང་ཚོགས་ཡན་ལག་བཞི་དང༌། འཁོར་གོས་རྒྱན་བཟང་པོ་ཅན་མང་པོས་བསྐོར་ནས། ཡུལ་ལྗོངས་ཚུར་ཕྱོགས་དེར་ཡོང་བའི་ཚུལ་དང༌། ཡང་ཡུལ་ལྗོངས་གཉིས་པའི་བར་མཚམས་དེ་ལ་ཕོ་ཉ་བ་རྣམས་ཕར་འགྲོ་དང་ཚུར་ཡོང་བའི་བཀོད་པ་བྱ། ཡུལ་ལྗོངས་ཚུར་ཕྱོགས་དེ་ལ། མཐའ་སྐོར་དུ་གྲོང་ཁྱེར་ཕོ་བྲང་དང་བཅས་པ་དྲུག་འབྲི། དེ་རེ་རེ་བཞིན་རྒྱལ་པོ་རེའི་མདུན་དུ། ཕོ་ཉ་རེ་རེའི་སྒྲོམ་བུ་གཏོད་པ་རེ་འབྲི། ཡུལ་ལྗོངས་དེའི་དབུས་ཀྱི་ཆ་ལ། གུང་དུ་གཙུག་ལག་ཁང་གཅིག་ན། བཅོམ་ལྡན་འདས་ཀྱི་སྐུའི་མཐའ་སྐོར་དུ། དགེ་སློང་གཟི་བརྗིད་ཆེ་བ་གཅིག་དང༌། གཞན་དགེ་སློང་མང་པོ་དང༌། མཐའ་ལ་སྐྱེ་བོ་སྣ་ཚོགས་པ་འབྲི། དེའི་གཡས་ཁང་བཟང་ཆེན་པོ་གཅིག་གི་མདུན། རྒྱལ་སྲིད་སྣ་བདུན་དང་བཅས་པ། ཕྱག་གཡོན་དུ་གཞུ་འཛིན་ཞིང༌། མདའ་ལྔ་ནམ་མཁའ་ལ་འགྲོ་བའི་མི་དེའུ་རྩེ་ལ་པདྨ་རེ། པདྨའི་ལྟེ་བ་ལ་རྒྱལ་པོ་རེ་རེ། དེ་རེ་རེ་ལས་འོད་ཟེར་སྟེང་འོག་ཐམས་ཅད་དུ་འགྲོ་བའི་ཚུལ་བྱ། དེའི་སྐུ་མདུན་དུ་སྔར་གྱི་ཡུལ་ལྗོངས་ཕར་
ཕྱོགས་ཀྱི་རྒྱལ་པོ་དེ་ལ་བློན་པོས་གཞུ་གཏོད་པའི་ཚུལ་དང༌། རྒྱལ་པོ་དེའི་གཞུ་འཐེན་ཀྱང༌། འཐེན་མ་ཐུབ་པ་དང༌། དེ་འཁོར་དང་བཅས་པས་རྒྱལ་པོ་དེ་ལ་ཕྱག་འབུལ་བའི་ཚུལ་འབྲི། དབུས་ཀྱི་གཙུག་ལག་ཁང་དེའི་གཡོན་གྱི་ཕྱོགས་སུ་ཁང་བཟང་གཅིག་གི་ནང་དུ། སངས་རྒྱས་འཁོར་དང་བཅས་བཞུགས་པ་ལ། རྒྱལ་པོ་གཅིག་གིས་ཞུ་བ་འབུལ་བའི་ཚུལ་འབྲིའོ། །དེ་དག་ནི་རྒྱལ་པོ་ཀ་པི་ན་འཁོར་བཅས་བརྟུལ་བའི་སྐོར་རོ། །༼གི༽ ཡང་ཡུལ་ཕྱོགས་གཉིས་ཤིག་བྱ་སྟེ། ཡུལ་ཕར་ཕྱོགས་དེ་ན། ཁང་བཟང་གཅིག་ཏུ་རྒྱལ་པོ་གཅིག་གིས་ཁྱིམ་བདག་གཅིག་ལ་བཀའ་སྩོལ་བ་དང༌། ཡང་ཁྱིམ་བདག་དེས་ཁྱིམ་གཅིག་གི་རྩར་འདོད་ཡོན་སྣ་ཚོགས་བཤམས། སྐྱེ་བོ་མང་པོ་ལ་སྦྱིན་པ་གཏོང་བའི་བཀོད་པ་བྱེད། དེའི་དྲུང་དུ་བྲམ་ཟེ་དྲང་སྲོང་མང་པོ་ཡོད་པ་ལ། ཟས་ནོར་མང་པོ་སྟེར་བ་ཞིག་འབྲི། ལོགས་གཅིག་ན་བྲམ་ཟེ་དྲང་སྲོང་དེ་རྣམས། ཡུལ་གཞན་ནས་དེར་འོང་བའི་བཀོད་པ་འབྲི། དགོས་པ་ལ་ཐོག་མར། ཐག་རིང་གཅིག་ནས་འོང་པ་ལ། ཉེ་སྐོར་གཞན་ན་ཆུ་མེད་པ་ལ། ཤིང་སྡོང་གཅིག་གི་ཕྱོགས་གཅིག་ནས་བྲམ་ཟེ་དྲང་སྲོང་རྣམས་ཀྱི་སྣོད་སོ་སོ་ནས་ཆུ་འཛེད་ཅིང༌། ཤིང་གི་རྩེ་མོ་ནས་གཟུགས་མེད་པའི་ལག་པ་ལག་གདུབ་ཅན་ཞིག་བརྐྱང་སྟེ་བུམ་པ་བཟུང་ནས་སྣོད་དེ་རྣམས་སུ་བླུགས་པའི་ཚུལ་དང༌། ཕྱོགས་གཅིག་ནས་དེ་དག་གིས་ཤིང་ལ་གཏམ་སྨྲ་བའི་ཚུལ་བྱ། དེ་ནས་རི་གཅིག་རྒྱབ་པའི་ཡུལ་ཞིག་ཏུ། ཤིང་གི་གཡས་གཡོན་གཉིས་ནས་དྲང་སྲོང་རྣམས་གཏམ་སྨྲ་བའི་ཚུལ་བྱ། རིའི་ཕག་ཞིག་ན་མཚོ་ཆུ་བྱ་དང་མེ་ཏོག་གིས་གང་བ། འགྲམ་ན་ཟས་སྣ་ཚོགས་ཀྱིས་གང་བའི་སྣོད་བཞག་པ། དྲང་སྲོང་ལ་ལ་དེ་ཕྱོགས་ལ་རྒྱུག་ཅིང༌། ལ་ལ་དེར་སླེབ་ནས། མཚོ་ནས་
འཐུང་བ་དང་ཁ་ཟས་ཟ་བའི་ཚུལ་འབྲི། དེ་དང་སྔར་གྱི་སྦྱིན་གཏོང་གི་ཁང་པའི་བར་དུ་ཡང་རི་གཅིག་གིས་ཆོད་པ་འབྲི། སྦྱིན་གཏོང་ཁང་པའི་རྒྱབ་ཏུ། སྔར་གྱི་ཁྱིམ་བདག་དེ་དང་དྲང་སྲོང་དེ་རྣམས་གཏམ་སྨྲ་བ་དང༌། ཁང་བཟང་གཅིག་ཏུ་ཁྱིམ་བདག་གཅིག་རྒྱལ་པོ་ལ་ཞུ་བ་བྱེད་པ་དང༌། ཁྱིམ་བདག་དེ་དང་དྲང་སྲོང་རྣམས་སྡེབས་ཏེ། ཡུལ་ཕྱོགས་ཚུར་དེར་འོང་བའི་བཀོད་པ་དང༌། ཡུལ་ཚུར་ཕྱོགས་དེ་ན། ཁང་བཟང་ཆེན་པོའི་ཕྱི་ཁྱམས་ཀྱི་སྒོ་དྲུང་ན། ཁྱིམ་བདག་དང་དྲང་སྲོང་དེ་རྣམས་ཚོགས་པ་དང༌། ཁང་བཟང་གི་ནང་ཁྱིམ་བདག་དེ་དང༌། ཁྱིམ་བདག་གཟི་བརྗིད་ཅན་ཞིག་སྟན་གཅིག་ལ་སྒྲིགས། དྲང་སྲོང་དེ་རྣམས་ཀྱང་མདུན་ན་འདུག་པ་དང༌། ཁང་བཟང་དེའི་ཕྱི་རོལ་ཕྱོགས་གཅིག་ན་ཕར། ཁྱིམ་བདག་གཟི་བརྗིད་ཆེ་བ་དེས། ཁྱིམ་བདག་དང་དྲང་སྲོང་རྣམས་ཁྲིད་ཅིང་འགྲོ་བ་དང༌། དེའི་ཡང་ཚུར་ཕྱོགས་ནས་སངས་རྒྱས་འཁོར་མང་པོས་བསྐོར་ཏེ། ཆོས་གསུངས་པ་དང༌། དེ་རྣམས་ཀྱང་ཕྱག་འཚལ་ཞིང་ཆོས་ཉན་པ་རྣམས་འབྲི། ཡང་ཕྱོགས་གཅིག་ཏུ་སངས་རྒྱས་ཀྱི་དྲུང་དུ། དྲང་སྲོང་དེ་རྣམས་རབ་ཏུ་བྱུང་སྟེ་དགྲ་བཅོམ་པ་ཐོབ་པའི་བར་དུ་འབྲི། ཡང་གཙུག་ལག་ཁང་གཅིག་གི་ནང་དུ་བཅོམ་ལྡན་འདས་ལ་ཞུ་བ་ཞུ་ཞིང༌། སྒོའི་ཕྱི་ནས་ཁྱིམ་བདག་དེ་ཡུལ་ཕར་ཕྱོགས་སུ་འགྲོ་བའི་ཚུལ་འབྲི། བསྐུལ་བྱེད་ཞེས་བྱ་བའི་དགྲ་བཅོམ་པ་ཞིག་དང༌། ལྷན་ཅིག་དུ་བར་ལམ་དེ་ནས་འགྲོ་བ་དང༌། ཡུལ་ལྗོངས་ཕར་ཕྱོགས་དེར་དེ་གཉིས་ཀྱི་ཁ་ལྟ་བྱེད་ཅིང་སྐྱེད་མོས་ཚལ་ཞིག་གི་དབུས་སུ་གཙུག་ལག་ཁང་རྩིག་པ་དང༌། ཡུལ་ཚུར་ཕྱོགས་དེར་སངས་རྒྱས་འཁོར་བཅས་ཀྱི་དྲུང་དུ་ཕོ་ཉ་ཞིག་སླེབ་པ་དང༌། སངས་རྒྱས་འཁོར་བཅས་ཡུལ་ཕར་ཕྱོགས་དེར་གཤེགས་པའི་ཚུལ་
དང༌། བར་ལམ་དེ་ན་མཆོད་པ་མང་པོ་དང་བཅས་བཞུགས་པ་དང༌། ཡུལ་ལྗོངས་ཕར་ཕྱོགས་དེའི་དོམ་ཆེ་ས་ཞིག་ཏུ། གཙུག་ལག་ཁང་རྒྱ་ཆེ་བར་བྱས་ཏེ། དེའི་ཕྱི་ནས་སངས་རྒྱས་འཁོར་བཅས་འབྱོན་པ་ལ་སྐྱེ་བོ་མང་པོས་བསུ་བ་དང༌། མཆོད་པ་དང༌། ལྟ་བ་དང༌། གཙུག་ལག་ཁང་གི་ཁང་བཟང་གི་ནང་ན། སངས་རྒྱས་འཁོར་བཅས་བཞུགས་པས་མཆོད་པ་འབུལ་བ་དང༌། དེ་གཉིས་ཆར་གྱི་སྟེང་གི་ནམ་མཁའ་ནས། ལྷ་རྣམས་ཀྱི་མེ་ཏོག་གི་ཆར་འབེབས་པ་འབྲི། ཡང་རྒྱལ་པོའི་ཕོ་བྲང་ཕྱི་ཁྱམས་རྡོ་ཆལ་འདྲ་བ་ཞིག་ན། སངས་རྒྱས་འཁོར་བཅས་ལ། རྒྱལ་པོ་འཁོར་བཅས་ཀྱི་མཆོད་པ་དང༌། ཆོས་ཉན་པ་འབྲི། ཡང་ཁང་བཟང་གཞན་ཞིག་གི་ཕྱོགས་གཅིག་ཏུ། རྒྱལ་པོའི་བཙུན་མོ་འཁོར་བཅས་ཁྲི་དང་གདན་ཞིག་ལ་འདུག་ཅིང༌། གཡོག་མོ་རྒུར་མོ་ཞིག་ལངས་ཏེ་ཚིག་བརྗོད་པའི་ཚུལ་དང༌། ཡང་དེ་ཁའི་ཕྱོགས་གཞན་གཅིག་ཏུ། གཡོག་མོ་དེ་ཁྲི་ལ་བཞགབཙུན་མོ་འཁོར་བཅས་ཆོས་ཉན་ཞིང་ལུས་ལ་འོད་འཕྲོ་བའི་རྣམ་པ་བྱ། ཡང་ཁང་བཟང་དེ་འདྲ་བ་ལ། གློ་དཀར་ཤིན་ཏུ་མང་བ་གཏོད་པ་ནས། བཙུན་མོ་འཁོར་བཅས་ལྟ་ཞིང༌། ཕྱི་རོལ་ཀྱི་ས་གཞི་ལ། སངས་རྒྱས་འཁོར་བཅས་ཕེབས་པའི་བཀོད་པ་འབྲི། དེ་དག་དང་འབྲེལ་བའི་ཡུལ་ལྗོངས་ལོགས་པ་ཆུང་ངུ་ཞིག་ན། སངས་རྒྱས་འཁོར་བཅས་གྲོང་ཁྱེར་དུ་གཤེགས་པ་ཞིག་དང༌། གྲོང་ཁྱེར་དེ་དང་ཉེ་བའི་ནགས་ན། སངས་རྒྱས་ཕར་འབྱོན་པ་དང་དེའི་རྗེས་བར་ཐག་ཡོད་པ་གཅིག་ན། བྲམ་ཟེ་གཅིག་དང༌། བུད་མེད་གཅིག་དང༌། བུ་མོ་ལང་ཚོ་ལ་བབ་པ་གཅིག་རྣམས་འགྲོ་བའི་བཀོད་པ་བྱ། ནགས་དེ་བརྒལ་བའི་ནགས་མཐོང་གཅིག་ན། སངས་རྒྱས་བཞུགས་པའི་ཕྱོགས་གཅིག་
ཏུ། དེ་རྣམས་སླེབ་པ་དང༌། ཉེ་སྐོར་ཕྱོགས་གཅིག་ན་བུད་མེད་ལུས་སྦོམ་པ། སྐྲ་བརྫེས་པ། མིག་ཞུམ་བུའི་མིག་ལྟ་བུ་འཇིགས་པའི་ལུས་སུ་གྱུར་པ་ཞིག་འབྲི། དེ་ནས་ཕར་ཕྱོགས་ཡུལ་ལྗོངས་སྔ་མ་དེར། སྐྱེད་མོས་ཚལ་གཅིག་ན་བྲམ་ཟེ་གཅིག་དང་བུད་མེད་གཞོན་ནུ་གཅིག་འདུག་པ་ལ་མི་མང་པོས་སྐོར་བ་དང༌། རྒྱལ་པོའི་ཕོ་བྲང་གི་ཁང་བཟང་གཉིས་ན། རྒྱལ་པོ་བཙུན་མོ་ཆེ་ཆུང་གཉིས་དང་བཅས་པ་ཟས་ཀྱི་བཀོད་པ་མང་པོ་ཡོད་པ་རེ་འབྲི། ཁང་བཟང་གཅིག་གི་འོག་ཁང་ན། མི་གོས་ངན་པ་གྱོན་པ། ཁྱིམ་བྱ་ཐོགས་པ་ཞིག་དང༌། གཅིག་གི་འོག་ཏུ་བཙུན་མོ་ཆུང་བ། བྱའི་ཤ་ཐོགས་པ་ཞིག་འབྲི། ཡང་འཁོར་སའི་ཁྱམས་ཞིག་ན། བཙུན་མོ་ཆེ་བ་འཁོར་བཅས་འདུག་པ་ལ། རྒྱལ་པོས་རྒྱང་ནས་མདའ་གཞུ་འགེངས་པ་དང༌། མདའ་གཅིག་བར་ལམ་དུ་ལྷུང་བ་དང༌། གཅིག་ཚུར་ལོག་ནས་རྒྱལ་པོ་རང་གི་དྲུང་དུ་ལྷུང་བ་དང༌། ཡང་ཁང་པ་དེ་ཁར་བཙུན་མོ་དེ་ཁྲི་ལ་འདུག་པ་ལ། རྒྱལ་པཽས་ཐལ་མོ་སྦྱར་ཞིང་བཟོད་པ་གསོལ་བའི་ཚུལ་འབྲི། ཡང་ཁང་བཟང་གཞན་ཞིག་ཏུ་བཙུན་མོ་དེ་རྣམས་འཁོར་བཅས་ལ། ཡོ་བྱད་མང་པོའི་མཆོད་པ་དང༌། དེ་རྣམས་ཀྱི་སངས་རྒྱས་ཀྱི་བཀའ་ཀློག་པ་དང༌། ཡི་གེ་འབྲི་བའི་བཀོད་པ་བྱ། འདིར་དེ་ཙམ་ཞིག་འབྲི་སྟེ། ཡུལ་ཀོ་ཤམྦྷིར་གཤེགས་ཤིང། ཁྱིམ་བདག་གདེངས་ཅན་གྱི་ཀུན་དགའ་ར་བ་ཕུལ་བ་དང༌། རྒྱལ་པོ་ཤར་པ་ལ་སོགས་པ་ཡུལ་དེའི་སྐྱེ་བོ་རྣམས་དགེ་བ་ལ་བཀོད་པའི་སྐབས་སོ། །༼ངི༽ ཡང་ཡུལ་གཅིག་ཏུ་རྒྱལ་པོའི་རྣམ་པ་གཅིག་གི་མདུན་ན། རིན་པོ་ཆེའི་ཁྲི་ལ། གཞོན་ནུ་མཛེས་པ་རིན་པོ་ཆེའི་དབུ་རྒྱན་ཅན། ལྷག་མ་རྒྱན་ཅུང་ཟད་ཙམ་དང༌། གོས་དཀར་པོ་ཅན། ལག་ན་པར་བུ་འཛིན་པ་གཅིག་ལ། མི་མང་པོས་ཕྱག་
འཚལ་ཞིང་འབུལ་བ་བྱེད་པ་འབྲི། ཡང་གཞོན་ནུ་དེ་ཁ་སྐྱེད་མོས་ཚལ་འདྲ་བ་རྭ་བས་བསྐོར་བ་གཅིག་ན། སློབ་མ་གོས་དཀར་པོ་གྱོན་པ། གཙུག་ཕུད་མ་གཏོགས་སྐྲ་བྲེགས་པ། རྣ་རྒྱན་མ་གཏོགས་རྒྱན་སྤངས་པ་མང་པོ་ཞིག་ལ་བཤད་པ་བྱེད་པའི་ཚུལ་བྱ་ཞིང༌། དེ་རྣམས་ལ་ལ་པོ་ཏི་དང༌། ལ་ལ་པར་བུ་དང༌། ལ་ལ་གཟེབ་མ་འཁྲིས་སུ་བཞག་པ་འབྲི། ཡང་ཕྱོགས་གཅིག་ན་བཅོམ་ལྡན་འདས་ཀྱི་དྲུང་ན་གཞོན་ནུ་དེ་འདུག་པ་འབྲི། བཅོམ་ལྡན་འདས་ནམ་མཁའ་ལ་གཤེགས་པའི་སྐུ་ཆོས་ཀྱི་གྲལ་འཇུས་ཏེ་འགྲོ་བ་དང༌། རི་ནགས་ཚལ་དང་སྨན་དུ་མས་གང་བ་གཅིག་གི་རྩེ་མོར་རྡོ་ལེབ་གཅིག་ལ་སངས་རྒྱས་བཞུགས་པ། གཞོན་ནུ་ནགས་ཚལ་དང༌། སྨན་ལྗོངས་ནས་སྨན་མཐུ་བའི་ཚུལ་དང༌། ཡང་རིའི་ཕྱོགས་གཅིག་ཏུ་སྨན་རྣམས་བཅོམ་ལྡན་འདས་ཀྱི་སྐུ་མདུན་དུ་སྤུང༌། སྟོན་པ་ལ་ཆོས་ཉན་པའི་ཚུལ་དང༌། ཡང་སྟོན་པའི་ཆོས་གོས་ཀྱི་གྲ་ལ་འཇུས་པ་ལ་ཚུར་འབྱོན་པའི་བཀོད་པ་དང༌། སྐྱེད་མོས་ཚལ་གྱི་དབུས་ན་གཙུག་ལག་ཁང་ཡོད་པ་གཅིག་ན་སངས་རྒྱས་ལ་བསོད་སྙོམས་འབུལ་ཞིང་གཞོན་ནུ་དེ་ཉིད་ཆོས་ཉན་པ་འབྲི། འཚོ་བྱེད་གཞོན་ནུ་པོས་འཕགས་པའི་གནས་ལ་བཀོད་པའི་སྐོར་རོ། །༼ཅི༽ ཡང་ཡུལ་ལྗོངས་གཅིག་ན། ཁང་བཟང་ཕྱི་རིམ་ནང་རིམ་མང་པོ་ཡོད་པ་གཅིག་ན། ལྷ་མོའི་གཟུགས་ཅན་ཤིན་ཏུ་མང་པོས་ཁྱབ་པ། དབུས་ཀྱི་ཁང་བཟང་ན་ལྷ་མོ་གཅིག་དང༌། རྒྱལ་པོ་གཅིག་རྣམས་གནས་པ། ཁང་བཟང་དང་ཤིང་སོགས་ཐམས་ཅད་ནས་འོད་འབྱུང་བ་གཅིག་དང༌། ཡང་དེ་དང་ཉེ་བར་ཁང་པ་དེ་ཁ་འདྲ་བ་འོད་མེད་པ། མི་ཕལ་པ་ལང་ལོང་སྣ་ཚོགས་ཀྱིས་གང་བ། ཁང་བཟང་ན་རྒྱལ་པོ་གཅིག་ཡོད་པ། གཞན་ཕོ་བྲང་
རྣམ་པ་གཅིག་ན། འོད་འཕྲོ་བ་དང༌། ལྷ་མོ་དང་ནོར་བུས་གང་བ། ཁང་བཟང་ན་སྔར་གྱི་ཁྱིམ་བདག་དེ་དང༌། ལྷ་མོ་ཞིག་འབྲིའོ། །ཕོ་བྲང་གི་རྣམ་པ་འདྲ་བ་དེའི་ཕྱི་རོལ་ན། ཡང་ཁང་པ་གཞན་གཅིག་ན། འོད་དང་ནོར་བུ་ལྷ་མོ་སོགས་སྔར་བཞིན་ལ། ཕྱི་ལ་དམག་མི་ཐོ་རེ་བ་ཡོད་པ། རྒྱ་ཕིབས་ཀྱི་བྱ་འདབས་[གོ་ཆ་གོན་པའི་མི་འགའ་རེ་རྒྱབ་གཞུང་ཀམ་པའི་ཚད་ཙམ་བྱ་འདབས།]ལ་འཕྱར་བ་དང༌། རྨོག་གྱོན་པའི་མགོ་བྱ་འདབས་འཕྱར་ཞིང་ལུས་ཀྱང་འཕྲུལ་དུ་འདུག་པ་གཅིག་དང༌། ཡང་ཁྱིམ་བདག་དེའི་ཁྱིམ་གྱི་ཡོ་བྱད་ཐམས་ཅད་རབ་བྱུང་དང༌། བྲམ་ཟེ་དང༌། ཕོངས་པ་རྣམས་ལ་སྟེར་བའི་ཚུལ་དང༌། སངས་རྒྱས་ཀྱི་དྲུང་དུ་འགྲོ་བ་དང༌། སྤྱན་སྔར་རབ་ཏུ་བྱུང་ཞིང་ལུས་ལས་འོད་འཕྲོ་བ་འབྲི་སྟེ་མེ་སྐྱེས་རབ་ཏུ་བྱུང་ཞིང་དགྲ་བཅོམ་པ་ཐོབ་པའི་སྐོར་རོ། །༼ཆི༽ ཡང་ཕྱོགས་གཅིག་ན་མཚོ་ཁ་ཞིང་ཆེ་བས་ཆོད་པའི་ཕར་ཕྱོགས་གླིང་གི་རྣམ་པ་ཞིག་ཏུ་ཁང་བཟང་དང༌། ཕོ་བྲང་དང༌། རྩྭ་ཤིང་ལོ་མའི་ཁྱིམ་དང་བཅས་པ་འབྲི། ཕོ་བྲང་དེའི་སྐར་ཁུང་ནས་བུ་མོ་ཞིག་གི་ཉན་པ་དང༌། གྲོང་ཁྱེར་གྱི་གསེབ་ན། ཚོང་པ་མང་པོའི་གསེབ་ནས་ཚོང་པ་འགའ་ཞིག་ཁ་སྟོན་བྱེད་པ། ཕྱིའི་ཕྱོགས་གཅིག་ཏུ་བུ་མོ་མཆོག་དེ་འཁོར་དང་བཅས་པ། ཚོང་པ་དེ་རྣམས་ལ་གཏམ་འབྲི་བ། ཡང་ཕྱོགས་གཅིག་ཏུ་དེས་དེ་རྣམས་ལ་ཡི་གེ་སྐྱེས་བཅས་གཏོད་པ་འབྲི། ཡང་གླིང་དེ་ཁར་དེ་དང་མ་འདྲེས་ཙམ་བྱས་ནས། ཚོང་པ་མང་པོས་སངས་རྒྱས་ཀྱི་བྲིས་སྐུ་ཕྱེ་བ་ཤིང་རིང་པོ་ལ་བཏགས་པ། བུ་མོ་དང་རྒྱལ་པོ་དང༌། སྐྱེ་བོ་མང་པོས་མཆོད་པ་བྱེད་ཅིང༌། སྟེང་གི་ནམ་མཁའ་ནས་ལྷས་མཆོད་པ་བྱེད་ཅིང་མེ་ཏོག་གི་ཆར་འབབས་པ། ཁང་བཟང་གཅིག་ཏུ་བྲིས་སྐུ་དེ་བཀྲམས་པའི་མདུན་ན།
ལུས་སྲང་ཐལ་མོ་སྦྱར་ལུས་ལས་འོད་འཕྲོ་བ་འབྲི། ཡང་ཕྱི་རོལ་ཕྱོགས་གཅིག་ན། བུ་མོ་དེ་འཁོར་བཅས་ཀྱི་མུ་ཏིག་མང་པོ་སྣོད་དུ་རྡེག་པ་དང༌། ཡིག་སྣོད་ཚོང་པ་ལ་གཏོད་པ་འབྲི། བར་གྱི་རྒྱ་མཚོ་ལ་ཚོང་པ་རྣམས་གཟིངས་ལ་ཞུགས་ཏེ་ཕར་འགྲོ་བ་དང༌། ཚུར་ཡོང་བ་གཉིས་ཀར་འབྲི། ཚུར་ཕྱོགས་དེར་ཆུ་འགྲམ་ནས། ཐང་དང་རི་དང་ནགས་ལ་སོགས་པས་ཚུར་ཕྱོགས་ཀྱི་ཡུལ་ལྗོངས་ན། གཙུག་ལག་ཁང་གཅིག་ཏུ་སངས་རྒྱས་ལ། ཚོང་པས་ཡི་གེ་འབུལ་བའི་ཚུལ་དང༌། ཡང་གཙུག་ལག་ཁང་གཞན་གཅིག་གི་མདུན་ན། སངས་རྒྱས་ཀྱི་སྐུ་མདུན་དུ་རས་གཞི་རྒྱངས་པ་ལ་བྲིས་པ་ཞིག་གིས་སངས་རྒྱས་ལ་འདྲ་ལེན་བྱེད་ཚུལ་དང༌། ཡང་ཕྱོགས་གཅིག་ཏུ་སངས་རྒྱས་ཀྱི་སྐུ་ལས་འོད་ཟེར་འཕྲོས་རས་གཞི་དེ་ལ་ཕོག་སྐུའི་རྣམ་པ་གཟུགས་བརྙན་དུ་ཤར་བ་ལ། ཚོན་འགྱེད་པ་དང༌། ཡིག་མཁན་གྱི་ཐང་ཀ་དེའི་སྟོད་སྨད་དུ་ཡི་གེ་འབྲི་ཚུལ་དང༌། བྲིས་སྐུ་སྣོད་དུ་བཅུག་དེ། ཚོང་པ་རྣམས་ལ་སངས་རྒྱས་ཀྱིས་གཏོད་པར་མཛད་པ་དང༌། ཡང་ཕྱོགས་གཅིག་ཏུ་གཙུག་ལག་ཁང་གི་ནང་ན་སངས་རྒྱས་དགེ་འདུན་དང་བཅས་པའི་མདུན་དུ། ཚོང་པ་རྣམས་ཀྱི་ཡི་གེ་དང་སྒྲོམ་བུ་འབུལ་བ་དང། སྒྲོམ་བུ་ཁ་ཕྱེ་ནས་མུ་ཏིག་ཚོ་གསུམ་དུ་བགོས་པ་འབྲི། ཡུལ་ལྗོངས་ཕར་ཕྱོགས་གླིང་དེར། ཆུ་དང་ཐང་ལ་མུ་ཏིག་འཛིན་པའི་ཉ་ཕྱིས་དང༌། རིན་པོ་ཆེ་དུ་མ་དང༌། ནགས་ཚལ་ལ་གླང་པོ་ཆེས་ཁྱབ་པ། ཁྱིམ་གྱི་བུད་མེད་རྣམས་བུད་མེད་ཀྱི་མཆོག་འབའ་ཞིག་འབྲིའོ། །དེ་ནི་རྒྱལ་པོའི་བུ་མོ་མུ་ཏིག་ཅན་བདེན་པ་ལ་བཀོད་པ་སྟེ། ལོ་རྒྱུས་སྔ་མའི་འཕྲོས་སོ། །༼ཇི༽ ཡང་བཀོད་པ་གཞན་ཞིག་ལ། ཡུལ་ལྗོངས་ཕན་ཚུན་གཉིས་བྱས་ཤིང༌། བར་དེ་ན་རི་དང་ནགས་ཚལ་དང༌། ཡུལ་ལྗོངས་ཆུང་ངུ་
འགའ་རེ་བྱ། ཡུལ་ལྗོངས་ཚུར་ཕྱོགས་དེ་ན་ཁང་བཟང་གཅིག་ན་བཅོམ་ལྡན་འདས་འཁོར་ཉན་ཐོས་ཀྱི་དགེ་འདུན་དང་བཅས་སྟེ་བཞུགས་པ་དང༌། ཡང་ཁྱིམ་བདག་ཕོ་མོ་གཟི་བརྗིད་ཆེ་བའི་མདུན་ན། བུ་མོ་མཆོག་འཁོར་འགའ་རེ་དང་བཅས་པ་འབྲི། ཁྱིམ་དེ་ཁའི་སྒོ་དྲུང་ན། གཅེར་བུ་པའི་ཆ་བྱད་གཞོན་ནུ་གཅིག་དང༌། གཞན་སློང་བ་པོ་འགའ་རེ་ཁང་བཟང་ལ་ལྟ་བ་འབྲི། ཡང་ཁྱིམ་གྱི་སྒོ་གཅིག་ནས། གཅེར་བུ་པའི་གཟུགས་ཅན་དེ་ལ་བུད་མེད་མཆོག་དེས་ཕྱེ་སྣོད་གང་སྟེར་བ་དང༌། དེས་ཀྱང་སྙུག་ཐགས་ཀྱི་སྣོད་གཅིག་ཏུ་འཛེད་པ་འབྲི། བུ་མོ་དེས་དེ་ལ་སྨོད་པའི་ཚུལ་ཡང་འབྲི། ཡང་དེ་དང་ཉེ་བ་གཅིག་ན། བཅོམ་ལྡན་འདས་ལ་ཁྱིམ་བདག་གཅིག་གིས་ཞུ་བ་ཞུ་བ་དང༌། ཕྱོགས་གཅིག་ནས་བུ་མོ་དེ་ཤིང་རྟར་བཞུགས་ནས་ཡུལ་ཕར་ཕྱོགས་དེ་ལ་གཏད་ནས་འགྲོ་ཚུལ་དང༌། ཡང་ཕྱོགས་གཅིག་ཏུ་གཙུག་ལག་ཁང་གི་ཕྱི་ཁྱམས་ན་སངས་རྒྱས་འཁོར་བཅས་བཞུགས་པའི་སྟེང་གི་ནམ་མཁའ་ལ་མེ་ཏོག་གི་ཁང་བཟང་དང༌། བདུག་སྤོས་ཀྱི་སྤྲིན་དང༌། ཆུ་ནོར་བུ་འབར་བའི་དབྱིབས་ཅན་ཡོད་པ་དང༌། དགེ་སློང་གཅིག་ལངས་པ་ལ་བཅོམ་ལྡན་འདས་ཀྱི་བཀའ་སྩོལ་བ་དང༌། ཡུལ་ཆུང་ཕྲ་མོ་མང་པོ་ན། དགེ་སློང་མང་པོ་ཡོད་པའི་སར། དགེ་སློང་རེ་རེས་ཚུལ་ཤིང་འགྲེམས་པའི་ཚུལ་དང༌། ཡང་ཡུལ་ལྗོངས་གཉིས་པོའི་བར་གྱི་ཡུལ་ཆུང་ངུ་དེ་རྣམས་སུ་སངས་རྒྱས་རེ་རེ་སྐྱེ་བོ་མང་པོ་ལ་ཆོས་སྟོན་པ་དང༌། ཡུལ་ཆུང་ཕྲ་མོ་མང་པོ་ན། དགེ་སློང་མང་པོ་ཡོད་པ་དེ་སར་ལྗོངས་ཕར་ཕྱོགས་དེ་ན། སྔར་གྱི་བུ་མོ་འཁོར་བཅས་ཚུར་ཡོང་བ་དང༌། གྲོང་གི་ཁང་བཟང་དུ་ཁྱིམ་བདག་གི་བུ་ཁྱུ་མཆོག་ཅེས་བྱ་བས། དེ་བག་མར་སློང་བའི་བཀོད་པ་དང༌། ཡང་ཁྱིམ་དེའི་ཕྱོགས་གཅིག་ན་སྒྱུག་མོས་མནའ་མ་དེ་ལ་གཏམ་སྨྲ་བ་དང༌། འཁོར་སའི་
ཁྱམས་ཡངས་པ་ཞིག་ཏུ། གཅེར་བུ་པ་མང་པོ་འདུས་པ་ཞིག་ལ། སྒྱུག་མོ་དེ་དང་ཁྱིམ་བདག་དེ་མཆོད་པ་བྱེད་ཅིང༌། བུ་མོ་དེ་གདོང་ཕྱིར་ཕྱོགས་དེ་འདུག་པ་དང༌། ཡང་ཁྱིམ་དེའི་ཕྱོགས་གཅིག་ན། བུ་མོ་དེས་དེ་གཉིས་ལ་གཏམ་སྨྲ་བ་དང༌། ཁང་སྟེང་ན་མཆོད་པ་བཤམས་ཤིང༌། བུ་མོ་དེས་ཡུལ་ལྗོངས་ཚུར་ཕྱོགས་དེ་ལ་གདོང་ཕྱོགས་དེ་ཐལ་མོ་སྦྱར་བ་དང༌། མཆོད་པ་ནམ་མཁའ་ལ་འཕགས་པ་ལ་སྐྱེ་བོ་མང་པོ་ལྟ་བ་སྟེ། བཀོད་པ་དེ་རྣམས་ཡུལ་ལྗོངས་དེ་ཁའི་འོག་ཕྱོགས་སུ་ཡོང་བར་བྱ་ཞིང༌། དེའི་སྟོད་ཀྱི་ཕྱོགས་དོམ་ཆེ་སར། ཕར་ཕྱོགས་དང་ཉེ་བ་ཤས་ཆེ་བའི་ནམ་མཁའ་ལ། སངས་རྒྱས་འཁོར་བཅས་འབྱོན་པ་དང༌། ཚུར་ཕྱོགས་ས་མཐིལ་ལ། གྲོང་ཁྱེར་ཕོ་བྲང་སོགས་འབྲི་སྟེ། དེ་ཡང་གྲོང་ཁྱེར་དུ་སླེབ་ལ་ཁད་ཀྱི་ནམ་མཁའ་ལ། ཤིང་རྟའི་སྟེང་ན་དགེ་སློང་གཅིག་གློག་འགྱུ་བ་དང༌། ཆར་འབེབས་པ། དེའི་རྒྱབ་ཕྱོགས་ཀྱི་གཡས་གཡོན་སྟེང་འོག་ངེས་མེད་ལ། ཤིང་དང་བྱ་དང་མེ་ཏོག་གི་རྒྱན་པའི་བྲག་རིའི་རྩེ་མོ་ལ། དགེ་སློང་ཡོད་པ་གཅིག་དང༌། སེང་གེས་དྲངས་པའི་ཤིང་རྟ་ལ་དགེ་སློང་གནས་པ་ཞིག་དང༌། གླང་པོ་ཆེ་ཐལ་ཀར་མཆེ་བ་དྲུག་པ་ལ་ཆིབས་པའི་དགེ་སློང་དང༌། གསེར་གྱི་པདྨ་བཻ་ཌུརྻའི་སྡོང་བུ་དངུལ་གྱི་གེ་སར་ཅན་ལ་གནས་པའི་དགེ་སློང་དང༌། བྱ་ཁྱུང་གིས་དྲངས་པའི་ཤིང་རྟ་ལ་གནས་པའི་དགེ་སློང་དང༌། སྤྱོད་ལམ་ཤིན་ཏུ་ཞི་བས་ནམ་མཁའ་ལ་འབྱོན་པའི་དགེ་སློང་ཞིག་དང༌། གསེར་གྱི་ཏ་ལའི་ནགས་ན་གནས་པའི་དགེ་སློང་ཞིག་དང༌། བཻ་ཌུརྻ་ལས་གྲུབ་པའི་ཁང་བཟང་ན་གནས་པའི་དགེ་སློང་ཞིག་དང༌། གླང་དཀར་པོས་ཤིང་རྟ་ལ་གནས་པའི་དགེ་སློང་ཞིག་དང༌། ངང་པས་དྲངས་པའི་ཤིང་རྟ་ལ་གནས་པའི་དགེ་སློང་ཞིག་དང༌། ནགས་ཚལ་ན་འཆག་ཅིང་འོང་པའི་དགེ་སློང་
ཞིག་དང༌། རྒྱལ་སྲིད་སྣ་བདུན། དཔུང་ཡན་ལག་བཞི། བུ་སྟོང་དང་བཅས་པའི་འཁོར་ལོས་སྒྱུར་བའི་རྒྱལ་པོ་ཞིག་འོང་བའི་རྣམ་པ་དང༌། ལ་ལ་མེ་འབར་བ། ལ་ལ་ཆར་འབེབས་པ། ལ་ལ་འོད་འགྱེད་པ། ལ་ལ་གདན་གྱི་ཟུར་བཞི་ནས་ལྷའམ་གནོད་སྦྱིན་གྱིས་འདེགས་པ། ལ་ལ་དཀྱིལ་ཀྲུང་གི་གནས་པ་སོགས་ཐམས་ཅད་ཀྱང་ནམ་མཁའི་མཐོང་ནས་འོང་བ། དེ་ཐམས་ཅད་ཀྱི་རྗེས་མཐོ་སར། ཡང་དག་པར་རྫོགས་པའི་སངས་རྒྱས། སྐུའི་རྒྱབ་ནས་ཕྱག་ན་རྡོ་རྗེ། གཡས་ན་བརྒྱ་བྱིན། གཡོན་ན་ཚངས་པ། སྟེང་ན་གནས་གཙང་མའི་ལྷ། འོག་ནས་འདོད་ཁམས་ཀྱི་ལྷ་རྣམས་ཀྱིས་མཆོད་པ་སྣ་ཚོགས་འབུལ་ཞིང༌། སྐུ་མདུན་ནས་ཟུར་ཕུད་ལྔ་པ་སོགས་དྲི་ཟ་རྣམས་ཀྱི་རོལ་མོ་བརྡུང་པ། སྐུའི་གསེར་གྱི་འོད་ཟེར་གྱིས་ནམ་མཁའ་ཁྱབ་པ་འབྲི། མཉན་ཡོད་ནས་བྱོན་ནས་དེའི་བར་དུ་མི་དང་མི་མིན་གྱི་སྲོག་ཆགས་བདུན་ཁྲི་བདུན་སྟོང་བདེན་པ་ལ་བཀོད་དོ། །དེ་ནས་གྲོང་ཁྱེར་དང་ཉེ་བའི་ས་སྒང་མཐོ་བ་ན། ཁྱིམ་བདག་དང་དགེ་སློང་སོགས་སྐྱེ་བོ་མང་པོ་ལ། བུ་མོ་དེས་དེ་དག་སྟོན་པའི་ཚུལ་དང༌། ཚུར་ཕྱོགས་དེའི་ས་གཞི་ལ། སངས་རྒྱས་འཁོར་བཅས་ཕེབས་ཤིང༌། སྐྱེ་བོ་དཔག་ཏུ་མེད་པས་མཆོད་པ་དང༌། སྒོ་བཅོ་བརྒྱད་ནས། སྟོན་པ་སྐུའི་བཀོད་པ་རེ་རེ་འཇུག་ཅིང༌། དབུས་ཀྱི་ཁང་བཟང་གཅིག་ན། བཅོམ་ལྡན་འདས་འཁོར་བཅས་ལ་གདུགས་ཚོད་གསོལ་ཞིང༌། མཆོད་པ་དཔག་ཏུ་མེད་པ་གཏིབས་པ་དང༌། གཅིག་ན་ཁང་བཟང་ཤེལ་ལས་གྲུབ་པ། ཕྱི་ནང་ཐམས་ཅད་འཁོར་གྱིས་གང་བ་ལ་ཆོས་སྟོན་པ། སྟེང་གི་ནམ་མཁའ་ནས་མེ་ཏོག་གི་ཆར་འབེབ་ཅིང༌། ལྷ་དང་མི་མ་ཡིན་དུ་མས་མཆོད་ཅིང་ཆོས་ཉན་པ་འབྲི། དེ་ནི་གྲོང་ཁྱེར་བུ་རམ་ཤིང་འཕེལ་དུ་བྱོན་ཞིང༌། མ་ག་དྷ་བཟང་མོ་ལ་
སོགས་པ་སྐྱེ་བོ་དཔག་ཏུ་མེད་པ་བདེན་པ་ལ་བཀོད་པའི་ལེ་ཚན་ནོ། །༼ཉི༽ ཡང་ཡུལ་ཡངས་པ་ཅན་མཚོན་བྱེད་ཀྱི་གྲོང་ཁྱེར་གཅིག་དང༌། དེ་དང་ཉེ་བའི་གཙུག་ལག་ཁང་གཅིག་ཏུ། སངས་རྒྱས་མཉམ་བཞག་ལ་བཞུགས། གཙུག་ལག་ཁང་དང༌། རྩྭའི་སྤྱིལ་པོ་སོགས་གནས་མལ་སྣ་ཚོགས་པ་ན་དགེ་སློང་དག་འཁོད་པ་དང༌། དགེ་སློང་ནམ་མཁའ་ནས་འབྱོན་པ་མང་པོས། ལྷུང་བཟེད་ཤིང་ཏོག་གིས་བཀང་ནས་དགེ་སློང་གཞན་ལ་སྟེར་བ་དང༌། འབྲས་ལ་སོགས་པ་འབྲུ་མང་པོས་བཀང་ནས་སྟེར་བ་དང༌། ཁ་ཟས་ཀྱི་ཁྱད་པར་བླངས་ནས་སྟེར་བ་དང༌། ས་ལ་འདུག་ནས་རང་ཉིད་ཀྱང་ལོངས་སྤྱོད་པ་སོགས་འབྲི། དེ་ནས་ཡང་ས་སྟོང་གཅིག་ཏུ། སངས་རྒྱས་ཀྱི་སྐུ་མདུན་ན། དགེ་སློང་རྟགས་མཚན་ཡོད་པ་གཅིག་ཞུ་བ་ཞུ་བའི་ཚུལ་བྱ་སྟེ། དེ་ལྷས་སྦྱིན་ནོ། །རྟགས་མཚན་ནི་ཁ་དོག་དབྱིབས་གཞན་དང་མི་འདྲ་བའམ། གོས་ལ་སོགས་པའི་རྟགས་མཚན་ནོ། །དེའི་དགོས་པ་འདི་རྣམས་གྲངས་དུ་མ་འབྲི་དགོས་པས། མ་ནོར་བར་གོ་བའི་ཆེད་དོ། །ཡང་དགེ་སློང་གཞན་མང་པོ་སོ་སོར་འདུག་པའི་རྩ་ན་ཡང་ལྷས་སྦྱིན་དེ་ཞུ་བ་ཞུ་བའི་ཚུལ་བྱ། གྲོང་ཁྱེར་གཞན་གཅིག་ཏུ་ལྷས་སྦྱིན་དེ་དགྲ་བཅོམ་པ་གཅིག་གི་ཞབས་ལ་གཏུགས་པ་ཡང་འབྲི། སྤྱིལ་པོ་གཅིག་ན་ལྷས་སྦྱིན་དེ་མཉམ་བཞག་བྱས་པ་ཡང་འབྲི། ཡུལ་དེ་དང་བར་དུ་ཆུ་བོ་གངྒ་གིས་ཆོད་པའི་ཡུལ་གཞན་ཞིག་ཏུ། རྒྱལ་པོའི་ཕོ་བྲང་སྒོ་འགའ་རེ་ཡོད་པ་ཞིག་གིས་སྒོ་གཅིག་ནས་གླང་པོ་ཆེ་དཀར་པོ་ནང་དུ་འོང་བ་དང༌། གཅིག་ནས་ཕྱིར་འགྲོ་བ་དང༌། གཅིག་ནས་རྟ་རྒྱན་གྱིས་བརྒྱན་པ་ཡོང་ཞིང༌། གཅིག་ཤོས་ནས་ཕྱིར་འགྲོ་བ་དང༌། དགེ་སློང་སྣམ་སྦྱར་གོན་པ་དང༌། ཁྱེའུ་དང་བུ་མོ་དང༌། རྨ་བྱ་ལ་སོགས་པ་གཞན་ཡང་གཟུགས་སྣ་ཚོགས་དང༌། དེ་ལ་ཁང་བཟང་གི་ནང་ནས། རྒྱལ་པོ་མ་སྐྱེས་དགྲ་དེ།
རྒྱལ་པོ་དར་བབ་གཅིག་གི་རྣམ་པས་ལྟ་བ་དང༌། ཡང་ཁང་བཟང་གཅིག་ཏུ་བྱིས་པ་ལོ་བདུན་བརྒྱད་འགྲོ་བའི་རྣམ་པ། གསེར་གྱི་མདོག་ཅན་རྒྱན་གྱིས་བརྒྱན་པ་ཞིག་རྒྱལ་པོའི་པང་དུ་འགྲོ་ལྡོག་བྱེད་པ་དང༌། ཡང་ཕྱོགས་གཅིག་ན་སྤྱིལ་པོའི་གནས་ཁང་ན་ལྷས་སྦྱིན་ལ་འཁོར་དགེ་སློང་མང་པོ་ཡོད་པ་དང༌། རྒྱལ་པོ་ཤིང་རྟ་ལ་ཞུགས། འཁོར་ཕྲུ་བ་ཟས་ཀྱིས་གང་བ་མང་པོ་དག་ཐོགས་པས་བསྐོར་བ་སྟེ། ལྷས་སྦྱིན་གྱི་ཕྱོགས་སུ་འགྲོ་བ་དང༌། ལྷས་སྦྱིན་འཁོར་བཅས་ཕྱོགས་ཡངས་པ་ཞིག་ཏུ་གྲལ་སྒྲིགས་ཏེ་ཁ་ཟས་ལ་ལོངས་སྤྱོད་པ་དང༌། དེ་དག་ལས་གཞན་པའི་ཕྱོགས་གཅིག་གི་རེ་ཞིག་གི་རྩེ་ན། དགྲ་བཅོམ་པ་གཅིག་གི་མདུན་ན། ལྷ་སེར་པོ་གོས་དཀར་གྱོན་པ་ཞིག་གིས་གཏམ་སྨྲ་བ་དང༌། སྔར་གྱི་རྒྱལ་པོའི་ཕོ་བྲང་དང་ཉེ་བ་ཞིག་ན། གཙུག་ལག་ཁང་ཕྱི་ར་བ་གཅིག་གི་ནང་ཁང་བཟང་ལོགས་གཅིག་ན། སངས་རྒྱས་ལ་དགྲ་བཅོམ་པ་གཅིག་གིས་ཞུ་བ་བྱེད་པ་དང༌། ཁང་བཟང་གཞན་ཞིག་ཏུ། སྟོན་པའི་དྲུང་ན་ལྷས་སྦྱིན་ཞུ་གསོལ་བྱེད་ཅིང༌། སྒོ་དྲུང་དེ་ནས་དེ་ཁྲོས་ཏེ། མགོ་བཅོགས་ཤིང་འགྲོ་བའི་རྣམ་པ་བྱ། དེ་ནས་སྟོན་པས་དགེ་སློང་གཅིག་ལ་བཀའ་སྩལ་བའི་ཚུལ་དང༌། དགེ་སློང་སྟོན་པ་ལ་རྔ་ཡབ་གཡོབ་པའི་ཚུལ་དང༌། དེ་དང་ཉེ་བར་དགེ་འདུན་རྣམས་ཕྱོགས་གཅིག་ཏུ་ཚོགས་པ་དང༌། ཕྱོགས་གཅིག་ཏུ་ལྷས་སྦྱིན་ལ་དགེ་སློང་གཅིག་གིས་གཏམ་སྨྲ་བ་དང༌། དགེ་སློང་ཞིག་ལ་དགེ་སློང་གཞན་ཞིག་གཏམ་སྨྲ་བ་དང༌། དེ་ནས་ཡང་ཕྱོགས་གཞན་ཞིག་ཏུ། ཕོ་བྲང་གཅིག་མས་རྒྱལ་པོ་བགྲེས་ཉམས་ཡོད་པ། ཤིང་རྟར་ཞུགས་པ་འཁོར་བཅས་སྣོད་མང་པོ་ཁ་ཟས་ཀྱིས་བཀང་པ་ཐོགས་པ་དང་བཅས་པ་ལ། ཕོ་བྲང་དེ་ཉིད་ཀྱི་ཕྱོགས་གཞན་གཅིག་ནས་རྒྱལ་པོ་དར་བབ་དེས། རྡོ་རྗེ་རྩེ་གཅིག་པར་གྲགས་པའི་མདུང་ཕྱེད་པ་འཕངས་པས། སྣོད་རྣམས་
ཆག་སྟེ། ཁ་ཟས་བོ་བ་དང༌། ཕྱོགས་གཞན་ས་ཁུལ་ཐག་རིང་ཙམ་ཞིག་ཏུ་ཁང་པ་ཁྱད་པར་ཅན་གྱི་སྟེང་ནས། གཞོན་ནུ་རྒྱན་གྱིས་བརྒྱན་པ་ནམ་མཁའ་ལ་ཐལ་མོ་སྦྱར་བ་དང༌། ཉི་མའི་དཀྱིལ་འཁོར་གྱི་དཀྱིལ་ནས་དགྲ་བཅོམ་པ་ཞིག་བྱུང་སྟེ། ཁང་སྟེང་དུ་བབས་པ་དང༌། ཕྱོགས་གཅིག་ཏུ་དེ་ལ་ཆོས་སྟོན་པའི་བཀོད་པ་དང༌། དགྲ་བཅོམ་པ་དེས་རྫུ་འཕྲུལ་གྱིས་ཁ་ཟས་ཀྱི་སྣོད་ཆེན་པོ་བླངས་ཏེ་ནམ་མཁའ་ལ་འགྲོ་བའི་ཚུལ་དང༌། བཀོད་པ་སྔ་མ་དེའི་སྡེབས་ལ། གཙུག་ལག་ཁང་གི་ནང་དུ་སངས་རྒྱས་འཁོར་བཅས་བཞུགས་པའི་སྐུ་མདུན་དུ། དགྲ་བཅོམ་པ་དེས་ཁ་ཟས་དེ་འབུལ་བའི་ཚུལ་བྱ། ཡང་བཀོད་པ་གཞན་ལ་ཡུལ་ཕྱོགས་རིམ་པ་གཉིས་བྱས་ཏེ། བར་དུ་ཆུ་ཕྲན་ཆུང་ངུས་ཆོད་པར་བྱ། ཚུར་ཕྱོགས་དེ་ན་གཙུག་ལག་ཁང་ན་སངས་རྒྱས་མཉམ་པར་བཞག་པ་དང༌། དགེ་སློང་རྫུ་འཕྲུལ་ཅན་རྣམས་ཀྱིས་ཤིང་འབྲས་དང༌། འབྲུ་དང་ཟས་བླང་ནས་དགེ་སློང་གཞན་ལ་སྟེར་བ་སྔ་མ་དང་འདྲ་བ་འབྲི། དེའི་འཁྲིས་ཕྱོགས་གཅིག་ན། ལྷ་སྦྱིན་འཁོར་བཞི་དང་བཅས་པས་དགེ་སློང་མང་པོ་ལ་ཁ་ཟས་དང་ཆོས་གོས་སྟེར་བ་ཡང་འབྲི། དེ་ནས་དགེ་སློང་མང་པོ་ལྷས་སྦྱིན་གྱིས་ཁྲིད་ནས་འགྲོ་བ་དང༌། ཆུའི་ཕ་རོལ་ཀྱི་ཡུལ་དེའི་སྣེ་ཟིན་པའི་ནགས་ཀྱི་གུང་ཞིག་ཏུ་དགེ་སློང་དེ་རྣམས་ཀྱིས་མཐའ་བསྐོར་ཏེ་འདུག །ལྷས་སྦྱིན་དབུས་སུ་འདུག་ནས་གཏམ་སྨྲ། དགེ་སློང་གཅིག་ཚུལ་ཤིང་འགྲེམས་པའི་ཚུལ་བྱ། ཡང་དེ་འཁོར་བཅས་ཕར་སོང་སྟེ་གནས་གཅིག་ཏུ་འདུག་པ་ལ། རྒྱལ་པོས་ཤིང་རྟ་མང་པོ་བཟའ་བཅས་བཀང་སྟེ་སྐྱེལ་བ་དང༌། ཡང་ས་ཕྱོགས་ཡངས་པ་ཞིག་ཏུ། ལྷས་སྦྱིན་ཆོས་སྟོན་པའི་ཚུལ་བྱེད་པ། གཡས་གཡོན་དུ་དགེ་སློང་གཉིས་བཞག་པ་ལ་གྲུ་སུག་བྱེད་པ་དང༌། རྒྱང་རིང་པོ་ནས་མཆོག་ཟུང་གཅིག་
འབྱོན་པའི་ཚུལ་བྱ། ཡང་ལྷས་སྦྱིན་གྱི་གཡས་གཡོན་ནས་དགེ་སློང་གཉིས་འབྲོས་པ་དང༌། མཆོག་ཟུང་གཅིག་གཡས་གཡོན་དུ་འགྲེང་སྟེ་བཞུགས་པའི་བཀོད་པ་གཅིག ཡང་ལྷས་སྦྱིན་ཆོས་གོས་སྔས་སུ་བཅུག་ནས་གཉིད་ལོག་པ་ཁ་གདེངས་ཏེ་ཉལ་པ་དང༌། མཽ་འགལ་གྱི་བུས་ནམ་མཁའ་ལ་རྫུ་འཕྲུལ་སྣ་ཚོགས་སྟོན་པ་དང༌། ཤཱ་རིའི་བུས་འཁོར་རྣམས་ལ་ཆོས་སྟོན་པ་དང༌། དགེ་སློང་གཅིག་གིས་ལྷས་སྦྱིན་གཉིད་ལོག་པ་མཛུབ་མོས་སྟོན་པ་དང༌། དེ་ནས་མཆོག་ཟུང་གཅིག་གིས་དགེ་སློང་དག་ཁྲིད་དེ་བྱོན། ལྷས་སྦྱིན་གཉིད་ཀྱི་ནོན་པ། དགེ་སློང་གཅིག་གི་གཉིད་གསོད་ཚུལ་བྱས་ཀྱང་མ་སད་པ་དང༌། དེའི་འཁྲིས་ན་རྗེས་ལ་གཉིད་སད་ནས་ཕྱིར་སྙེགས་སྤྲོད་པའི་ཚུལ་ལ། མདུན་དུ་གྲོག་པོ་ཆེན་པོས་ལམ་ཆོད་དེ་མཐར་ནས། ཚུར་ལྡོག་ནས་ཁོང་རང་གི་གྲོགས་དགེ་སློང་གཅིག་ལ་ཁུ་ཚུར་བསྣུན་པའི་ཚུལ་དང༌། དེ་ནས་ཆུ་བརྒལ་བའི་ཡུལ་ཚུར་ཕྱོགས་དེར་མཆོག་ཟུང་དགེ་སློང་དེ་དག་ལམ་ནས་ཡོད་པའི་ཚུལ་དང༌། སྟོན་པའི་དྲུང་དུ་དེ་རྣམས་ཐམས་ཅད་ཆོས་ཉན་པ། ཚོགས་པའི་མཐའ་སྐོར་དུ་འོད་ཟེར་གྱིས་བསྐོར་པ་འབྲི། དེ་དག་ནི་དགེ་འདུན་གྱི་དབྱེན་བྱུང་ཞིང་མཆོག་ཟུང་གཅིག་གིས་བསྡུམ་པའི་སྐབས་སོ། །༼ཏི༽ དེ་ནས་ཁང་པ་ཞིག་གི་ནང་ན་རྒྱལ་པོ་བགྲེས་ཉམས་ཅུང་ཟད་ཡོད་པ་ཅིགལུས་རིད་ཅིང་སྐེམས་པ་བཙོན་དུ་ཞུགས་པའི་རྣམ་པ་དང༌། དེའི་མདུན་ན་དགེ་སློང་གཅིག་ཆོས་སྟོན་པའི་ཚུལ་དང༌། དེའི་ཕར་ཕྱོགས་རིའི་ངོས་ལ་སངས་རྒྱས་ཞབས་འཆག་པའི་ཚུལ་དང༌། སྐུ་ལས་འོད་ཟེར་འཕྲོས་པ། བཙོན་ཁང་དེའི་དཀར་ཁུང་ཆུང་ངུ་གཅིག་དང༌། བརྩིག་པ་གས་པའི་སེར་ཁ་ནས་ཞུགས་ཏེ། བཙོན་ཁང་གི་ནང་འོད་ཟེར་གྱིས་ཁྱབ་པ་དང༌། ཡང་
བཙོན་ཁང་དེའི་ཕྱོགས་གཅིག་ནས་སྐྱེ་བོ་མང་པོ་འཛུགས་པ་དང༌། ཁང་པ་དེའི་ཕྱོགས་གཅིག་ཏུ། རྒྱལ་པོ་དེ་ཡང་འདས་པ་དང༌། དེའི་ཐད་ཀྱི་ནམ་མཁའ་ལ་གཞལ་མེད་ཁང་གཅིག་ན། རྒྱལ་པོ་རྣམ་ཐོས་སྲས་ཀྱི་པང་ན་ལྷའི་བུ་གསེར་མདོག་གཅིག་ཡོད་པ། དེ་དང་བཙོན་ཁང་དེའི་བར་གསེར་རིས་ཀྱིས་སྦྲེལ། ཡང་ཕྱོགས་གཅིག་ཏུ་བཅོམ་ལྡན་འདས་ཀྱི་སྐུ་མདུན་དུ། ལྷའི་བུ་གསེར་མདོག་དེས་མཆོད་པ་མང་པོ་བྱེད་པ་འབྲི། དེ་ནི་གཟུགས་ཅན་སྙིང་པོ་རྣམ་ཐོས་བུའི་གནས་སུ་སྐྱེས་པའི་བཀོད་པ་སྟེ་གཞན་དང་འབྲེལ་བ་མ་སྐྱེས་དགྲ་སྡིག་པའི་གྲོགས་པོས་བཟུང་བའི་ལོ་རྒྱུས་མང་དུ་ཡོད་དེ། བཀོད་པ་མི་མཛེས་པས་རེ་ཞིག་བཞག་གོ །དེ་ནས་སྟོན་པའི་སྐུ་མདུན་ན་གར་མཁན་འགའ་ཞིག་གིས་གར་སྒྱུར་བ་དང༌། སངས་རྒྱས་ཀྱི་ཞལ་ལས་འོད་ཟེར་སྤྲོས་ཏེ། སྟེང་འོག་གཉིས་ལ་མཐའ་མེད་དུ་སོང་པ་དང༌། འོད་ཟེར་གྱི་སྣེ་གཅིག་སྐུའི་མགྲིན་པར་ཐིམ་པའི་བཀོད་པ་འབྲི། དེ་ན་ཕྱི་རྒྱ་གཅིག་གི་ཁང་པ་མི་འདྲ་བ་གསུམ་ན། རྒྱལ་པོ་མ་སྐྱེས་དགྲ་དར་བབ་དེ་དང༌། ལྷས་སྦྱིན་གྲོས་བྱེད་པའི་ཚུལ་རེ་རེ་འབྲི། ཡང་ཡུལ་ལྗོངས་གྲོང་ཐོ་རེ་བའི་རྣམ་པའི་ཕྱོགས་གཅིག་ན། མི་གཅིག་གི་གསེར་བཞུ་བ་དང༌། འགའ་ཞིག་གི་ལྷས་སྦྱིན་གྱི་ལུས་ལ་གསེར་བྱུག་པ་དང༌། དེའི་འཁྲིས་སུ་ལྷས་སྦྱིན་ལུས་གཅེར་བུ་གསེར་གྱི་མདོག་སྲབ་སྲེབ་ཏུ་སོང་བ་གཅིག་འབྲི། ཡང་ཕྱོགས་གཅིག་ཏུ་ལྷས་སྦྱིན་རྩིག་པའི་ཚུར་ཕྱོགས་ན་ཡོད་པ། རྩིག་པའི་བུ་གར་རྐང་པ་གཉིས་བཅུག་ནས་རྐང་པ་ཕར་ཕྱོགས་སུ་ཐོན་པ། དེ་ལ་ལྕགས་མགར་འགའ་ཞིག་གིས་ལྕགས་སྲེགས་ཀྱི་འཁོར་ལོའི་པར་ཐོག་ནས། ལྷས་སྦྱིན་ཀྱི་རྐང་མཐིལ་ལ་སྦྱོར་བ་དང༌། དེ་བཞིན་དུ་ལག་མཐིལ་ལ་ཡང་བྱེད་པ་འབྲི། ཡང་ཕྱོགས་གཅིག་ཏུ་གྲོང་ཁྱེར་གྱི་གཡས་ཕྱོགས་ཀྱི་ལམ་
དུ། མི་མང་པོ་མཚོན་ཆ་ཐོགས་པ་དང༌། གཡོན་ཕྱོགས་ཀྱི་ལམ་བཞི་མདོ་ན་ཡང་དེ་ལྟ་བུ་དང༌། གཞན་ཡང་ལམ་གྱི་བཞི་མདོ་དག་མི་མཚོན་ཆ་ཐོགས་པ་འགའ་རེ་འགའ་རེ་ཡོད་པ་དང༌། སའི་སྒང་ངམ་རི་ཆུང་པོ་དོ་གཅིག་གི་རྩེ་ན། ལྷས་སྦྱིན་རང་ཡང་རལ་གྲི་དང་ཕུབ་ཐོགས་ནས་གནས་པ། སྒྱོགས་འཆའ་བ་ལྟ་བ་རི་གཅིག་གི་རྩེ་མོ་ན། སྒྱོགས་འཆའ་བའི་ཚུལ་དང༌། རི་དེའི་རི་འགྲམ་ན་གྱད་འདྲ་རུང་ཞིག་འཁོར་བཅས་ལ། ལྷས་སྦྱིན་གྱིས་མུ་ཏིག་གི་དོ་ཤལ་སོགས་སྟེར་བ་དང༌། རི་དེའི་ཕར་ཕྱོགས་བྲག་གཡངས་སུ་ཡོད་པ། དེ་ལ་སྐས་བཙུགས་ནས་མི་མང་དུ་འབབ་པ་དང༌། སྒྱོགས་བཤམས་པའི་རྩེ་ནས། གྱད་ལྟ་བུ་དེ་དང་མི་གཞན་ཞིག་གཏམ་སྨྲ་བ་ཡང་འབྲི། རི་དེའི་ཕར་ཕྱོགས་རི་བོ་ནགས་ཚལ་གྱིས་བརྒྱན་པ་ཞིག་ལ་སངས་རྒྱས་ཞབས་འཆག་པའི་ཚུལ་འབྲི། ཡང་དེའི་སྟེང་འོག་ཉེ་སྐོར་གང་འོས་སུ། རི་དེ་གཉིས་ཀ་སྔར་དང་འདྲ་བ་ལ། གཡང་ས་ལ་བཙུགས་པའི་སྐྲས་ཀ་དེ་མེད་པ། རིའི་སྟེང་ལ་ལྷས་སྦྱིན་འཛེགས་པ་དང༌། རིའི་རྩེ་མོ་ལྷས་སྦྱིན་ཉིད་ཀྱིས་སྒྱོགས་ཐག་འཐེན་ནས། སྒྱོགས་འཕེན་ཚུལ་དང༌། སྒྱོགས་རྡོ་ཤིན་ཏུ་ཆེ་བ་བར་སྣང་ལ་བྱུང་བས། གནོད་སྦྱིན་ལག་ན་རྡོ་རྗེས། སྒྱོགས་རྡོ་དེ་ཕྱེད་མར་བཏང་བ་དང༌། གནོད་སྦྱིན་གྱད་གྱི་གཟུགས་འདྲ་བ་ཞིགསྒྱོགས་རྡོ་དེའི་དུམ་བུ་ཆེ་བ་གཅིག་དང་ཐུག་ནས་ས་ལ་ལྷུང་བ་དང༌། ཕར་ཕྱོགས་ཀྱི་རི་དེའི་སྐེད་པ་ན། སྟོན་པས་གྱད་འདྲ་བའི་མི་དེ་སོགས་མི་མང་པོ་ལ་ཆོས་གསུང་ཞིང་འཁོར་བཅས་འོད་ཟེར་འཕྲོ་བ། རིའི་རྩེ་མོའི་ཕུག་ཞིག་ན། སངས་རྒྱས་བཞུགས་པའི་ཞབས་ཀྱི་མཐེ་བོང་ལ། རྡོའི་དུམ་བུ་ཕྲ་མོ་ཞིག་ཕོག་སྟེ་སྐུ་མཚལ་བྱུང་བའི་རྣམ་པ་དང༌། རིའི་སྐེད་ནས་ཕར་གྱད་འདྲ་བ་དེ་སོགས་མི་རྣམས་མགྱོགས་པར་བྲོས་པའི་རྣམ་པ་འབྲི།
ཡང་རི་བོ་ནགས་ཚལ་དང་ལྡན་པ་དེ་ཁ་འདྲ་བ་ཞིག་གི་ངོས་ལ། སྟོན་པ་འཁོར་ཅི་རིགས་དང་ལྡན་པ། ཞབས་ཀྱི་མཐེ་བོང་ལས། སྐུ་མཚལ་གྱི་རྒྱུན་ཕྲ་མོ་འབབ་པ། ཞལ་ལས་གསེར་གྱི་འོད་ཟེར་སྤྲོས་པ། སྟེང་འོག་ཏུ་སོང་ཞིང༌། འོད་ཟེར་གྱི་རྩེ་མོ་མགྲིན་པར་འདུ་བ། དེ་འདྲ་ཚར་གསུམ་ཡོད་པ་ལས། གཅིག་གི་སྐུ་མདུན་ན་ཚོང་དཔོན་གྱིས་ཙན་དན་ས་མཆོག་འབུལ་བ་དང༌། གཅིག་གི་སྐུ་མདུན་ན་བུད་མེད་གཅིག་གི་རང་གི་འོ་མ་སྣོད་ཆུང་གཅིག་ཏུ་འབུལ་བ་དང༌། གཅིག་ལ་སྨན་པ་འདྲ་བ་གཉིས་ལས། གཅིག་གིས་སྨན་འདེབས་པ་དང༌། གཅིག་གིས་སྔགས་འདེབས་པའི་ཚུལ་བྱ། ཡང་དེ་ཁ་འདྲ་བ་གཞན་གཅིག་ལ། ཞལ་ལས་འོད་ཟེར་སྤྲོ་བ་མི་དགོས། སྐུ་མདུན་ན་དགེ་སློང་དར་ཡོལ་གཅིག་ཐལ་མོ་སྦྱར་ཏེ་བཞུགས་པ་དང༌། སྐུ་མཚལ་གྱི་རྒྱུན་ཆད་པ་འབྲི། ཡང་ཕྱོགས་གཅིག་ན། ཤིང་དྲུང་གཅིག་ན་ལྷས་སྦྱིན་མཉམ་བཞག་བྱེད་པ་ལྟར་རྫུ་བ་དང༌། སྐྱེ་བོ་མཚོན་ཆ་ཐོགས་པ་འགའ་རེ་ཡོང་ཞིང༌། དེ་མཐོང་ནས་ལྡོག་འགྲོ་བ་དང༌། བཀོད་པ་དེ་དག་ཐམས་ཅད་ཀྱི་བར་ན། དགེ་སློང་གཉིས་གཉིས་གསུམ་གསུམ་ཚོགས་ནས་གཏམ་བྱེད་པའི་ཚུལ་མང་དུ་འབྲི། དེ་ནས་ཡང་ཕྱོགས་གཅིག་ན། རྒྱལ་པོའི་ཕོ་བྲང་གི་ནང་ན་རྒྱལ་པོ་དང་ལྷས་སྦྱིན་གྲོས་བྱེད་པ་དང༌། གྲོང་ཁྱེར་གྱི་གསེབ་ན་རྒྱལ་པོའི་ནང་འཁོར་ཐོད་བཅིངས་ཤིག མཚོན་ཆ་བཏགས་པ། བ་དན་རིང་པོ་ཐོགས་པས་མི་རྣམས་ལ་དྲིལ་སྒྲོག་པའི་ཚུལ་དང༌། ར་བ་གཅིག་ན་གླང་པོ་ཆེ་མང་པོའི་དབུས་ན། གླང་པོ་ཆེ་ཆེས་ཆེ་བ་ཡོད་པ། རྒྱལ་པོའི་ནང་འཁོར་དེས་གླང་རྫི་ལ་གཏམ་སྨྲ་བའི་ཚུལ་དང༌། ཁྱིམ་བདག་གཅིག་གིས་ཁང་པ་ཡངས་པོ་ཞིག་གི་ཕྱོགས་གཅིག་ན་ཁ་ཟས་མང་པོ་སྦྱོར་ཚུལ་དང༌། གཙུག་ལག་ཁང་སངས་རྒྱས་དང་དགེ་སློང་མང་པོས་གང་བའི་ཕྱོགས་གཅིག་ན།
སངས་རྒྱས་ལ་ཁྱིམ་བདག་གཅིག་གིས་ཞུ་བ་ཞུ། ཕྱོགས་གཅིག་ན་སངས་རྒྱས་ཀྱི་མདུན་དུ་ཁྱིམ་བདག་དེ་མཆི་མ་འབྱིན་པའི་ཚུལ་བྱ། སྔར་གྱི་ཕོ་བྲང་དེའི་ཐོག་ཁ་ནས། རྒྱལ་པོ་དང་ལྷས་སྦྱིན་གཉིས་ལྟ་བའི་ཚུལ་དང༌། གཙུག་ལག་ཁང་དང༌། ཁྱིམ་བདག་གི་ཁང་པའི་བར་ས་སྟོང་ཡངས་སར་བཞག་ལ། སངས་རྒྱས་ཕེབས་པ་ལ་ཕྱོགས་གཅིག་ནས་གླང་པོ་ཆེ་དེ་སྦད་ཅིང༌། དེ་ཡང་ཁྲོས་ནས་རྒྱུགས་པའི་ཚུལ་དང༌། བཅོམ་ལྡན་འདས་ཀྱི་དྲུང་ན་དགེ་སློང་གཅིག་འདུག་ཅིང༌། གཞན་རྣམས་ཕན་ཚུན་དུ་བྲོས་པ་དང༌། ཡང་སངས་རྒྱས་ཀྱི་ཕྱག་གཡས་པའི་ཕྱག་སོར་ལྔ་བརྐྱངས་བ་ལས། སེང་གེ་རལ་པ་ཅན་ལྔ་བྱུང་ནས། གླང་པོ་ཆེ་ཕར་བདས་ཤིང་ཕར་ཕྱོགས་གཡང་ས་དང་མེས་འཁོར་ཏེ་འདུག་པ་དང༌། ཡང་གླང་པོ་ཆེ་དེ་ཚུར་ལྡོག་ནས་སངས་རྒྱས་ལ་སྣས་ཕྱག་འཚལ་བ་དང༌། སངས་རྒྱས་ཀྱིས་གླང་པོ་ལ་ཕྱག་གིས་བྱུགས་པ་མཛད་པ་དང༌། ཁྱིམ་བདག་གི་ཁྱིམ་དེའི་ཕྱོགས་གཅིག་གི་ནང་ནས་སངས་རྒྱས་འཁོར་བཅས་བཞུགས་ཤིང༌། མཆོད་སྟོན་གསོལ། སྒོ་དྲུང་ན་གླང་པོ་ཆེ་དེ་འདུག དེ་ཕྱོགས་ཀྱི་ཁང་པ་ཡང་ཤེལ་ལྟར་དྭངས་པར་སོང༌། སངས་རྒྱས་གཙུག་ལག་ཁང་ལ་གཤེགས་ཤུལ་དུ་གླང་པོ་ཆེ་དེ་ཡང་འགྲོ་བ་དང༌། ཡང་གླང་པོ་ཆེ་དེ་དབང་མེད་དུ་བཀུག་ནས་རྭ་བར་བཅུག་པ་དང༌། རྭ་ཁའི་ནང་དུ་སྣ་ཞགས་ཁོ་རང་གི་རྡོག་པས་མནན་ཏེ་ཤི་བ་དང༌། གཙུག་ལག་ཁང་གི་ཁྱམས་ན། སྟོན་པའི་དྲུང་དུ་ལྷ་ཞིག་ཆོས་ཉན་པ་འབྲི་སྟེ། གླང་ཆེན་སྨྱོན་པ་བརྟུལ་བ་སྟེ། དེ་དག་དགེ་འདུན་གྱི་དབྱེན་གྱི་རྗེས་སུ་འབྲང་བ། ལྷས་སྦྱིན་རྒྱལ་པོ་དང་བཅས་པས་བཀུར་སྟི་མ་ཡིན་པ་བགྱིས་ཀྱང༌། དེ་བཞིན་གཤེགས་པ་མངོན་པར་མཐོ་བར་གྱུར་པའི་སྡེ་ཚན་ནོ། །༼ཐི༽ དེ་ནས་སངས་
རྒྱས་མཉན་ཡོད་དུ་གཤེགས་པའི་ཚུལ་དང༌། མཉན་ཡོད་དུ་རྒྱལ་པོ་སོགས་ལ་ཆོས་སྟོན་པའི་ཚུལ། ཡང་ཡུལ་ཨུ་དུམ་ཞེས་བྱ་བ་མཚོན་བྱེད་ཀྱི་གྲོང་ཁྱེར་ཞིག་ཏུ་བྱོན་ནས་ཆོས་གསུང་པ་དེ་དང༌། རི་ནགས་ཀྱི་བར་ཆོད་པའི་ནགས་མཐོང་ཞིག་གི་མཚོ་འགྲམ་ཞིག་ན། རིན་པོ་ཆེའི་ཕུང་པོའི་སྟེང་དུ་བཞུགས་ཁྲི་འཆའ་བའི་ལྷ་མང་པོ་དང༌། ཕར་ཕྱོགས་ནགས་གསེབ་ཀྱི་སྤྱིལ་པོ་གཅིག་ན་དྲང་སྲོང་གཅིག་ཡོད་པའི་དྲུང་ན། གནོད་སྦྱིན་གོ་མཚོན་ཐོགས་པ་གཅིག་ཀྱང་འདུག་པ་དང༌། ཡང་སངས་རྒྱས་འཁོར་ཉུང་ངུ་དང་བཅས་ཏེ་གྲོང་ཁྱེར་དེ་ལ་བསོད་སྙོམས་ལ་ཕེབས་པའི་བཀོད་པ་དང༌། སངས་རྒྱས་འཁོར་བཅས་མཚོ་འགྲམ་གྱི་ནགས་གཅིག་ན་ཏིང་ངེ་འཛིན་ལ་བཞུགས་པ་དང༌། བཞུགས་ཁྲི་སྔ་མ་འདྲ་བའི་སྟེང་དུ་སྟོན་པ་བཞུགས་པ་ལ། ཡུལ་འཁོར་སྲུང་དྲི་ཟའི་འཁོར་གྱིས་བསྐོར་བས་ནོར་བུ་སྣ་ཚོགས་ཐོགས་པ་དང༌། འཕགས་སྐྱེས་པོ་གྲུལ་བུམ་གྱི་ཚོགས་ཀྱིས་སྐོར་བས་མུ་ཏིག་གི་ཐུ་བ་བཀང་བ་དང༌། མིག་མི་བཟང་ཀླུའི་ཚོགས་ཀྱིས་སྐོར་བས་མེ་ཏོག་སྣ་ཚོགས་དང༌། རྣམ་ཐོས་སྲས་གནོད་སྦྱིན་གྱི་ཚོགས་ཀྱིས་སྐོར་བས་གསེར་སྣ་ཚོགས་ཀྱི་མཆོད་པ་དང༌། སྟོན་པའི་དྲུང་དུ་དེ་རྣམས་འཁོར་བཅས་ཐལ་མོ་སྦྱར་ཏེ་ཆོས་ཉན་པ་དང༌། དེའི་མཐའ་ན་དྲང་སྲོང་དེ་ཡང་ཆོས་ཉན་པ་འབྲི། ཡང་བཅོམ་ལྡན་འདས་ཀྱི་སྐུ་མདུན་ན་རྒྱལ་ཆེན་བཞི་ཡོད་པ་དང༌། དེའི་མཐའ་གཡས་ན་དགྲ་བཅོམ་པ་ཅུང་ཟད་བགྲེས་པ་ཞིག་དང་གཡོན་དུ་དར་བབ་ཞིག་འབྲི། ཡང་དེ་དང་རིས་ཆོད་ཅིང་ཉེ་བའི་ནགས་མཐོང་གྲོང་ཐོ་རེ་བ་ན། གནས་གཅིག་ཏུ་དྲང་སྲོང་སྔ་མ་དེའི་དྲུང་ན་དྲང་སྲོང་གཞན་ཞིག་ཡོད་པ་བྲམ་ཟེའི་ཁྱེའུ་འདྲ་བ་གཞན་མང་པོ་ཁ་ཟས་གཡོ་བའི་བྱ་བ་བྱེད་པ། ཡང་ཕྱོགས་གཅིག་ཏུ་སངས་རྒྱས་འཁོར་བཅས་ལ། དྲང་སྲོང་དེ་
གཉིས་ཀྱིས་མཆོད་སྟོན་གསོལ་བ། ཡང་ཕྱོགས་གཅིག་ཏུ་དྲང་སྲོང་གཉིས་པོ་འཁོར་བཅས་ཆོས་ཉན་པ། ཕྱོགས་གཅིག་ཏུ་དེ་དག་ཐམས་ཅད་དགེ་སློང་དུ་གྱུར་པ་འབྲི། དེ་ནས་ཡུལ་འབབ་ཆུ་བཟང་པོ་ཞེས་བྱ་བ་མཚོན་བྱེད། གྲོང་ཁྱེར་གཅིག་གི་སྟོད་ན་ཨ་མྲའི་ཚལ་གདུགས་ལྟ་བུ་ཞེས་བྱ་བའི་གཙུག་ལག་ཁང་དུ་སྟོན་པས་དགེ་སློང་གསུམ་ལ་བཀའ་གནང་བ། ཁང་བཟང་གསུམ་ན་དགྲ་བཅོམ་པ་གསུམ་ལ་གཅིག་ལ་འཁོར་མང་བ་དང༌། གཞན་གཉིས་ལ་ཅུང་ཟད་ཉུང་བའི་འཁོར་དགེ་སློང་གི་ཚོགས་ཀྱིས་སྐོར་བ་འབྲི། རྒྱལ་ཆེན་བཞི་བདེན་པ་ལ་བཀོད་ཅིང༌། དྲང་སྲོང་ཀེ་ནའི་བུ་དང། དྲང་སྲོང་རི་བོ་འཁོར་བཅས་བདེན་པ་ལ་བཀོད་པའི་སྡེ་ཚན་ནོ། །༼དི༽ ཡང་ཡུལ་གཅིག་ན། བྲམ་ཟེ་གཅིག་སློབ་མ་གཙོ་བོ་གཅིག་སོགས་སློབ་མ་མང་པོ་ལ་རིག་བྱེད་སློབ་པའི་ཚུལ་དང༌། བྲམ་ཟེ་གཙོ་བོ་དེ་ཡུལ་གཞན་དུ་འགྲོ་བའི་ཚུལ་དང༌། ཡང་སྔར་གྱི་ཁྱིམ་དེ་འདྲ་བ་ན། བུད་མེད་གཅིག་དང༌། བྲམ་ཟེའི་ཁྱེའུ་ཞིག་གཏམ་སྨྲ་བ་དང༌། ཁྱིམ་དེའི་ཕྱོགས་གཅིག་ན། བུད་མེད་ཁྲི་ལ་ཉལ་བ་གོས་ཧྲུལ་བ་གྱོན་པ། སྐྲ་འཛིངས་པ་ཞིག་ལ་བྲམ་ཟེའི་གཙོ་བོ་དེ་གཏམ་སྨྲ་བ་དང༌། ཁྱིམ་གྱི་ཕྱི་རོལ་ཕྱོགས་གཅིག་ན། བྲམ་ཟེའི་གཙོ་བོ་དེ་མདུན་ན་རལ་གྲི་གཅིག་ས་ལ་བཙུགས། སློབ་མའི་གཙོ་བོ་དེ་ལ་ཆོས་སྟོན་པའི་ཚུལ་བྱ། དེ་ནས་བྲམ་ཟེའི་སློབ་མ་དེ། ཤིན་ཏུ་སྟོབས་དང་ལྡན་པ་འཇིགས་སུ་རུང་བའི་རྣམ་པར་སོང་ནས་ཕྱོགས་གཞན་གཅིག་ན། ལག་ན་རལ་གྲི་ཐོགས་པ། སོར་མོའི་འཕྲེང་བ་མགོ་ལ་ཐོགས་པ། གཡས་གཡོན་དུ་སོར་མོ་བཅད་པའི་མི་མང་པོ་ཤི་ནས་འགྱེལ་བ། བྱ་དང་གཅན་གཟན་སྣ་ཚོགས་དང་བཅས་པས་དུར་ཁྲོད་ལྟར་གྱུར་པ་དང༌། ཡང་ཕྱོགས་གཞན་གཅིག་ཏུ། དེ་རྔམ་ཞིང་རལ་གྲི་ཐོགས་ནས་རྒྱུགས། ཕར་ཕྱོགས་ཐག་རིང་བ་ན། བུད་མེད་ཅུང་
ཟད་རྒན་པ་ཁ་ཟས་ཐོགས་པ་གཅིག་དང༌། དེའི་བར་ན་སངས་རྒྱས་ཕར་གཤེགས་ཤིང་ཕྱི་ལྟས་མཛད་པ་ཞིག་འབྲི། ཡང་ཕྱོགས་གཅིག་ཏུ། ས་སྟེགས་གཅིག་ན་སངས་རྒྱས་བཞུགས་སྟེ། དེ་ལ་ཆོས་གསུང་པའི་རྣམ་པ་དང༌། གཙུག་ལག་ཁང་གཅིག་ན། སངས་རྒྱས་འཁོར་མང་པོ་ལ་ཆོས་གསུང་པའི་དབུས་ན། དེ་ཡང་ཐལ་མོ་སྦྱར་ཏེ་འདུག་པ་དང༌། ཡང་ཕྱི་རོལ་ས་ཕྱོགས་ཡངས་པ་གཅིག་ཏུ། སངས་རྒྱས་ཉིད་སོར་མོའི་འཕྲེང་པ་ཅན་སོགས་སྐྱེ་བོ་མང་པོ་མང་པོ་ལ་ཆོས་གསུང་པ། སོར་འཕྲེང་དེ་ལ་མེ་རིས་སྐོར་བ། ཕར་ལོག་ནས་རྒྱལ་པོ་དཔུང་ཡན་ལག་བཞིས་སྐོར་ཏེ་ཡོང་བ་དང༌། འཁོར་དེའི་མཐའ་རྒྱལ་པོ་ཡང་གླང་པོ་ཆེ་ལས་བབས་པའི་ཚུལ་དང༌། འཁོར་ཚོགས་དེའི་དབུས་སུ་རྒྱལ་པོ་ཐལ་མོ་སྦྱར་ཏེ་བཞུགས་པ་འབྲི། སོར་མོའི་འཕྲེང་བ་བརྟུལ་བའི་སྐོར་རོ། །༼ནི༽ ཡང་བཀོད་པ་ཞིག་ལ། མཐའ་རི་དང་ནགས་ཚལ་གྱིས་སྐོར་བ། ཡུལ་ལྗོངས་ཆེན་པོ་མི་མེད་པ། ཀླུ་དང་གནོད་སྦྱིན་མིའམ་ཅི་སོགས་གནས་པ་གཅིག་གི་ལུང་ཟུར་གཅིག་ན། གྲུམ་མཚོ་གྲུ་བཞི་པ་གཅིག་གི་དབུས་ན་པད་སྡོང་སྐྱེས་པ། དབུས་ན་སངས་རྒྱས་གཞན་ཡལ་གའི་པདྨ་རྣམས་ལ། ཉན་ཐོས་རེ་རེ་ཡོད་པ་ལས། སྐུའི་འཁྲིས་ཀྱི་གཡས་གཡོན་མཐོ་སའི་པདྨ་གཉིས་སྟོང་པར་ཡོད་པ། མཚོ་འགྲམ་ནས་དགེ་སློང་ཞིག་ཕྱོགས་གཞན་ལ་འགྲོ་ཚུལ། ཡང་མཚོ་པད་སྡོང་དེ་ཁ་རང་འདྲ་བ་ལ། སྐུའི་གཡས་ཀྱི་པད་སྡོང་མཐོ་ས་དེ་ལ་ཉན་ཐོས་གཅིག་བཞུགས་ཤིང༌། གཡོན་གྱི་དེ་ལ་མེད་པ། གཡོན་ཕྱོགས་ཀྱི་ནམ་མཁའ་ལ། ཉན་ཐོས་གཅིག་ཕ་ཚད་ནས་འབྱོན་པ། ཡུལ་ལྗོངས་དེ་ཉིད་ཀྱི་དབུས་སོགས་ངོམ་ཆེ་ས་ན། གཡས་ན་གསེར་གྱི་བྲག་རི་བྲག་ཕུག་ཅན་ལ། རི་ཆུང་འགའ་རེས་སྐོར་བ།
གཡོན་ན་ནགས་ཀྱི་དཀྱིལ་ན་ཤིང་སྡོང་ཤིན་ཏུ་ཆེ་བ་ཞིག་ཡོད་པ་དེའི་འཁྲིས་ན་རྫིང་ཟླུམ་པོ་ཆེ་བ་གཅིག་ལ། རྫིང་ཆུང་འགའ་རེས་སྐོར་བ། དེ་ན་གླང་པོ་ཆེ་མཆེ་བ་དྲུག་པ་ཞིག་ཉལ་བ། དབུས་ན་མཚོ་གྲུ་བཞི་ཆེན་པོ། ཆུ་བྱ་དང་ཉ་སྲོག་ཆགས་དུ་མ་དང༌། ནོར་བུ་དུ་མས་གང་བ། ཕྱོགས་བཞི་ནས་ཆུ་འབབ་པ་མཚོན་བྱེད། རྒྱབ་མ་གཏོགས་ཕྱོགས་གསུམ་གྱི་ཕ་ཚད་ནས། བྲག་གི་ཁུང་བུ་ནས་ཆུ་རེ་འབབ་པ། མཚོའི་དབུས་སུ་པད་སྡོང་དབུས་ཀྱི་པདྨ་གསེར་མདོག་ལན་སངས་རྒྱས་ཆོས་འཆད་མཛད་པ། ཡལ་གའི་མེ་ཏོག་མང་པོ་ལ་ཉན་ཐོས་རེ་རེ་བཞུགས་པ། པད་སྡོང་གི་འོག་ཆུའི་སྟེང་ན། ཀླུ་དཀར་པོ་གསུམ་པད་སྡོང་གི་ཡལ་ག་འདེགས་པའི་ཚུལ་གྱིས་བཞུགས་པ། སྐུ་རྒྱབ་ཀྱི་ཕྱོགས་མཚོ་འགྲམ་ནས། ཤིང་སྡོང་ཤིན་ཏུ་ཆེ་བ་སྐྱེས་པ། རྩེ་མོ་དབུའི་གཙུག་ཏོར་ལས་ཀྱང་ཡར་ཐལ་བ། ཡལ་ག་ལོ་འདབས་འབྲས་བུ་ཤིན་ཏུ་རྒྱས་པ་ཞིག་འབྲི། དེ་དང་རི་མང་པོས་ཆོད་པའི་ཕར་ཕྱོགས་ཡུལ་གཅིག་ཏུ། ས་མཐིལ་ལ་གྲོང་མང་པོ་ཡོད་པའི་རི། རྩ་བ་ནགས་དང་རྩེ་མོ་གཡའ་ལྟ་བུ་གཅིག་ན། ཕྱོགས་གཅིག་ན་ཉན་ཐོས་གཅིག་སྣམ་སྦྱར་འཚེམ་པའི་ཚུལ་གྱིས་མདུན་ན་ཉན་ཐོས་གཅིག་བཞེངས་པ། དེ་ཁའི་འཁྲིས་ན། དེ་གཉིས་ཀར་གྱི་སོར་མོ་ལྔ་ཆར་གྱིས་ཚེམ་བུ་བྱེད་པ། ཡང་དེ་ཁའི་འཁྲིས་སུ། རི་དེ་ཁ་དང་འདྲ་བའི་བྲག་རྩེ་གཅིག་ལ། སྐེ་རགས་ཀྱི་སྣེ་བཏགས་པ། སྐེ་རགས་ཀྱི་སྣེ་ཕྱོགས་གཅིག་གིས་སྣམ་སྦྱར་བཅིངས་ཏེ། དགེ་སློང་གཅིག་གིས་ནམ་མཁའ་ལ་འདྲེན་པ་དང༌། རི་དེ་ཡང་གཡོ་བའི་རྣམ་པ་འབྲི། དེ་ཁའི་འཁྲིས་དེར་རི་རབ་ལྷ་གནས་དང་བཅས་པ་ཡོ་བ་ཞིག་ལ། སྔ་མ་ལྟར་སྐེ་རགས་ཀྱི་སྣེ་བཏགས་ཤིང༌། སྣམ་
སྦྱར་དེ་དག་དགེ་སློང་གིས་ཐོགས་ནས་ནམ་མཁའ་ལ་འདྲེན་པ་ཞིག་འབྲི། ཚེམ་བུ་འཚེམས་པའི་རི་དེ་ཉིད་ལ། དགེ་སློང་ཞིག་གནས་ཤིང༌། དགེ་སློང་གཅིག་ཤོས་ནམ་མཁའ་ལ་གནས་པས་སྣམ་སྦྱར་ཐོགས། སྐེ་རགས་ཐག་གུ་ལྟ་བུ་ཤིན་ཏུ་ཕྲ་བ་དེ། ཡུལ་ལྗོངས་སྔ་མའི་ཟུར་ན་བྲིས་ཡོད་པའི་སངས་རྒྱས་ཀྱི་སྐུའི་གཡས་གཡོན་གྱི་པདྨ་ལ་ཉན་ཐོས་མེད་པའི་པད་སྡོང་དེ་ལ་བཏགས་པས་གཡོ་འགུལ་མ་བྱུང་བ་འབྲི། ལས་ཀྱི་རྒྱུ་བ་ལུང་བསྟན་པའི་སྐབས་ཀྱི་སྡེ་ཚན་ནོ། །༼པི༽ དེ་ནས་ཡུལ་ལྗོངས་ཚོ་གཉིས་བྲིས་པའི། ཚུར་ཕྱོགས་ན་སངས་རྒྱས་འཁོར་མང་པོ་ལ་ཆོས་གསུང་པ་དང༌། ཕར་ཕྱོགས་དེའི་ཕྱོགས་གཅིག་ན། རྒྱལ་པོའི་ཕོ་བྲང་གྲོང་ཁྱེར་གྱི་སྐེད་པ་ཞིག་དང༌། ཕོ་བྲང་དེ་ན་རྒྱལ་མོ་ཁྲི་ལ་གནས་པ་དང༌། ཁྲི་གཞན་ཞིག་ལ་རྒྱལ་པོ་དར་བན་ཞིག་ཡོད་སེམས་ཁོང་དུ་ཆུད་པ་དང༌། ཕྱི་རོལ་ཀྱི་གྲོང་ཁྱེར་ཁང་པ་སོ་སོའི་ནང་ན་མི་འགའ་ཞིག་ན་བའི་རྣམ་པ་དང༌། ཕུང་པོ་ཁྱོགས་ལ་བཏེགས་ནས་དུར་ཁྲོད་དུ་སྐྱེལ་པ་དང༌། གྲོང་ཁྱེར་གྱི་མཐའ་རྣམས་དམག་གི་ཕྲུ་མས་སྐོར་བ་དང༌། ཆུ་རྣམས་བསྐམས་པ་དང༌། མཚེའུ་ལ་དུག་འདེབས་པའི་རྣམ་པ་དང༌། སྤྲིན་གསེབ་ན་སྦྲུལ་གདུག་པ་སོགས་གནས་པས་སེར་བ་འབེབས་པ་དང༌། ལྕེ་འབབ་པ་རྩྭ་ཤིང་གསེབ་ཏུ་སྦྲུལ་གྱིས་གང་བ་འབྲི། ཕོ་བྲང་དེའི་ཕྱོགས་གཅིག་ན་རྒྱལ་པོས་ཕོ་ཉ་ཞིག་མངགས་པ་དང༌། ཡུལ་ལྗོངས་ཚུར་ཕྱོགས་དེར་གཙུག་ལག་ཁང་གཅིག་ཏུ་སངས་རྒྱས་ཀྱི་དྲུང་ན་ཕོ་ཉ་དེ་ཞུ་བ་བྱེད་པའི་ཚུལ་དང༌། ཡང་དེའི་ཕྱོགས་གཅིག་ན། ཁྱམས་ཡངས་པ་ཞིག་ཏུ། རྒྱལ་པོ་དང་སྐྱེ་བོ་མང་པོས་སངས་རྒྱས་ལ་གདུགས་ཚོད་གསོལ་བ་དང༌། ཡུལ་ལྗོངས་ཚོ་གཉིས་པོ་དེའི་བར་ནས་སངས་རྒྱས་ཕར་གཤེགས་པ་དང༌། ལྗོངས་ཕར་ཕྱོགས་དེར། གྲོང་ཁྱེར་གཅིག་
གི་འགྲམ་ནས་སངས་རྒྱས་འཁོར་བཅས་འབྱོན་པ་དང༌། སྐུ་མདུན་ནས་རྒྱལ་པོ་སོགས་ཀྱིས་བསུ་ཞིང༌། སྐྱེ་བོ་མང་པོས་མཆོད་པ་དང་སྟེང་ནས་ལྷ་རྣམས་ཀྱིས་མཆོད་ཅིང་མེ་ཏོག་གི་ཆར་འབེབས་པ། གཞན་ཡང་མཐའ་རྣམས་ནས་ཆར་འབབ་པས། ཆུ་གསར་པ་རྒྱུག་ཅིང་རྫིང་བུ་ཁེངས་པ་དང༌། མཐའི་དམག་རྣམས་ཕྱོགས་ཕྱོགས་སུ་གྱེས་འགྲོ་བའི་རྣམ་པ་དང༌། དེ་ནས་སངས་རྒྱས་འཁོར་བཅས་གཙུག་ལག་ཁང་གཅིག་ལ་འབྱོན་པ་དང༌། གཙུག་ལག་ཁང་གི་ནང་ན་བཞུགས་པ་སོགས་འབྲི། ཡང་ཕོ་བྲང་གཅིག་གི་བ་གམ་གྱི་འོག་ན། རྒྱལ་པོ་དང༌། བཙུན་མོ་དང༌། སྲས་དང༌། བླཽན་པོ་དྲུག་གིས་གྲོས་བྱེད་པའི་ཚུལ་དང༌། དེའི་འགྲམ་ན་རིན་པོ་ཆེའི་དབུ་རྒྱན་ཅན་གོས་དཀར་པོ་གྱོན་པ། ལངས་ཏེ་འདུག་པ་འབྲི། ཕོ་བྲང་དེའི་སྒོ་དྲུང་ནས་གླང་པོ་ཆེ་གཅིག་གི་གཉའ་བར་གོས་དཀར་པོ་ཅན་དེ་ཞོན་ཞིང༌། ལྕགས་ཀྱུས་ཁ་བསྒྱུར། གླང་པོ་ཆེའི་རྒྱབ་ཏུ། རྒྱལ་པོ་དང་གདུགས་དང་རྔ་ཡབ་འཛིན་པ་སོགས་འཁོད། གཡས་གཡོན་དུ་གླང་མོ་སོགས་མང་པོ་ལ། བུད་མེད་དཔལ་འབར་ཐོགས་པ་འགའ་རེ་དང༌། གཞན་ཡང་ཡོ་བྱད་ཐོགས་པ་དག་ཞོན་ནས་འགྲོ་བའི་བཀོད་པ་བྱ། ཕར་ཕྱོགས་ན་གཙུག་ལག་ཁང་གཅིག་ཡོད་པའི་ཕྱི་རོལ་གྱི་ནེ་གསིང་རྣམས་སུ། གླང་པོ་དང༌། གླང་མོ་དེ་དག་གཏོད་ནས་བཞག སྒོ་ནས་རྒྱལ་པོ་དང༌། གོས་དཀར་པོ་གྱོན་པ་དེ་འགྲོ་བ་དང༌། གཙུག་ལག་ཁང་གི་ཁང་མིག་རྣམས་ན་དགེ་སློང་རྣམས་བསམ་གཏན་བྱེད་པ་དང༌། དབུས་ཀྱི་ཁང་བཟང་ན་བཅོམ་ལྡན་འདས་ཀྱི་སྐུ་མདུན་ན། རྒྱལ་པོ་དེ་ཐལ་མོ་སྦྱར་ཞིང༌། སྟོན་པས་ཆོས་གསུང་པའི་རྣམ་པ་དང༌། གོས་དཀར་པོ་གྱོན་པ་དེ་སྒོ་དྲུང་ན་འདུག་པ་འབྲི། ཡང་ལོགས་གཅིག་ཏུ་རྒྱལ་པོ་ཕོ་བྲང་གི་ཕྱི་ཁྱམས་ན། བཅོམ་ལྡན་འདས་འཁོར་བཅས་ལ་གདུགས་ཚོད་གསོལ་ཞིང༌།
ཆོས་ཉན་པ་དང། སངས་རྒྱས་ལམ་དུ་འབྱོན་པ་མཐོང་བ་ལ། རྒྱལ་པོ་ཁང་བཟང་གི་རྩེ་ནས་འཕྱོངས། སྤྲུལ་པའི་སངས་རྒྱས་གཅིག་གིས་བར་སྣང་ནས་བླངས་ཏེ་ས་ལ་འཇོག་པ་དང༌། ཡང་རྒྱལ་པོ་གླང་པོ་ཆེའི་སྟེང་ན་ཡོད་པས་སངས་རྒྱས་རྒྱང་ནས་མཐོང་བ་ན། གླང་པོ་ཆེའི་སྟེང་ནས་འཕྱོངས་པ་དང༌། སྤྲུལ་པའི་སངས་རྒྱས་ཀྱིས་བར་སྣང་ནས་བཟུང་ནས་ས་ལ་འཇོག་པ་དང༌། དེའི་རྗེས་སུ་ལྷས་སྦྱིན་བྱ་བ་མ་ཡིན་པས་ཉམ་ཐག་པའི་གཏམ་བརྒྱུད་མང་པོ་ཞིག་ཡོད་ཀྱང༌། ཐམས་ཅད་འབྲི་མི་ལངས་ལ། ལྷས་སྦྱིན་ཤིང་དྲུང་གཅིག་ན་འདུག་པའི་དྲུང་ན། འོད་སྲུང་རྫོགས་བྱེད་ཀྱི་རྫའི་རིལ་བ་སྤྱི་བླུགས་བཅག་པ་དང༌། སངས་རྒྱས་བཞུགས་པའི་གཙུག་ལག་ཁང་ཞིག་གི་ཕྱི་ན་ལྷས་སྦྱིན་སྨན་མར་ཟ་ཞིང༌། ཐུག་པའི་སྣོད་འཁྲིས་སུ་བཞག་པ་དང༌། ནང་དུ་ཞུགས་པའི་སྟོན་པའི་སྐུ་གཞོགས་སུ་ཡང༌། སྨན་མར་གྱིས་གང་པའི་སྣོད་ཡོད་པ་དང༌། ཕྱི་རོལ་ཕྱོགས་གཅིག་ན་ལྷས་སྦྱིན་ན་ཞིང་འདྲེ་ལྡོག་བྱེད་པ་དང༌། དགེ་སློང་འགའ་རེས་འཛིན་ཞིང༌། ལ་ལས་ལྟ་བ་དང༌། ཁང་བཟང་གཅིག་ན་སྟོན་པ་བཞུགས་པའི་ཕྱག་བརྐྱང་བ། ཤིང་སྡོང་ལ་སོགས་པ་གཞན་གྱི་ཕག་ནས་སོང་སྟེ། ན་བ་དེའི་མགོ་བོར་ཕྱག་བཞག་པ་དང༌། ནད་དྲག་སྟེ་ལངས་ནས་བཞད་གད་སྨྲ་བའི་ཚུལ་དང༌། ཡང་སྟོན་པའི་ཞབས་ལ་ཕྱག་འཚལ་ཞིང་བཟོད་པ་གསོལ་བའི་ཚུལ་ལ། སྟོན་པའི་ཞབས་ཤེལ་དུ་བྱིན་གྱིས་བརླབས། ལྷས་སྦྱིན་གྱི་སེན་མོ་ཆག་ཅིང༌། སེན་མོའི་སྲུབས་སུ་བཅུག་པའི་རེག་དུག་ས་ལ་ལྷུང་བ་དང༌། བཅོམ་ལྡན་འདས་ཀྱི་དྲུང་ན་དགེ་སློང་ཞིག་ཡོད་པ་ལ་སྟོན་པས་བཀའ་སྩོལ་བའི་ཚུལ་དང༌། དེས་ཀྱང་ལྷས་སྦྱིན་བསྐྱོར་པའི་ཚུལ་དང༌། སངས་རྒྱས་བཞུགས་པའི་རྒྱང་མ་ནས། ལྷས་སྦྱིན་འགྲོ་བའི་རྐང་པའི་འོག་སའི་གསེབ་ནས་མེ་ལྷག་ལྷག་བྱུང་བ་དང༌། སགས་
ཤིང་མེ་དཔུང་འབར་བའི་ནང་དུ་ལྷས་སྦྱིན་མགོ་རྡོག་ཙམ་མ་གཏོགས་ཤོར། ལག་པ་ཐལ་མོ་སྤྱི་བོར་སྦྱར། ས་སྟེང་ནས་ཀུན་དགའ་བོས་གདམས་པ་བྱེད་པའི་ཚུལ་བྱ། དེ་ནས་བཀོད་པའི་བར་མཚམས་བཅད་དེ། འོག་གི་ཕྱོགས་གཅིག་ཏུ་དམྱལ་གྱི་གནས་ལྕགས་སྲེགས་ཀྱི་ས་གཞི་སྐོར་བ་གཅིག་ན། ལྕགས་ཀྱི་ཁང་པ་མེ་འབར་བའི་དབུས་སུ་སྐྱེས་བུ་གཅིག་ལུས་ལ་མེ་འབར་ཞིང༌། གན་རྐྱལ་དུ་འདུག་པ་ལ། ལྕགས་བྲག་ཆེན་པོ་ནམ་མཁའ་ནས་འབབ་པས་འཚེར་བ་དང༌། ལྕགས་ཀྱི་གླང་པོ་ཆེ་མེ་འབར་བས་སྐྱེས་བུ་གཅིག་རྫི་བ་དང༌། ལྕགས་ཀྱི་སོག་ལེ་འབར་བས་སྐྱེས་བུ་གཅིག་གཅོད་པ་དང༌། ལྕགས་ཀྱི་ཐོ་བ་མེ་འབར་བས། སྐྱེས་བུ་གཅིག་གི་མགོ་ཕྱེ་མར་བྱེད་པ་དང༌། ཕྱོགས་དེ་ནས་མཚོན་ཆའི་བུ་ཡུག་འབབ་པ་དག་འབྲི་སྟེ། ལྷས་སྦྱིན་སྡུག་བསྔལ་མྱོང་ཚུལ་ལོ། །ཡང་ཕྱོགས་གཅིག་ན་སྐྱེས་བུ་གཅིག་གི་ལྕེ་ཤིན་ཏུ་ཆེ་བ་ཕྱི་རོལ་ཏུ་བཀྲམས་ཏེ། ལྕགས་ཀྱི་གླང་རྨིག་པ་མེ་འབར་བ་དང་བཅས་ཏེ་གཤོལ་ལྕགས་མེ་འབར་བས་རྨོད་པར་བྱེད་པའི་རྣམ་པ་ཚོ་གཉིས་འབྲི། ཕྱོགས་གཅིག་ན་ནམ་མཁའ་ནས་ཆར་བབས་པ་མེའི་དུག་ཀྱིས་བསྐམ་པའི་ཚུལ་དང༌། ཕྱོགས་གཅིག་ན་མཆུ་དང༌། དེའི་དྲུང་ན་དགེ་སློང་གཉིས་འབྲིའོ། །དེ་དག་ནི་སྟོན་པ་དང་ཆོས་ལ་སྡིག་བསགས་པས། སྡུག་བསྔལ་མྱོང་ཚུལ་ལྷས་སྦྱིན་ལ་དཔེར་མཚོན་པའི་བཀོད་པའོ། །༼ཕི༽ ཡང་བཀོད་པ་གཞན་ལ། ཡུལ་ཚོ་གཉིས་བར་ན་གང་གཱ་མཚོན་བྱེད་ཆུ་ཆེན་པོས་ཆོད་པ་ཞིག་འབྲི། བྱང་མ་དེའི་ཕྱོགས་གཅིག་གྲོང་ཁྱེར་གཅིག་ན། སྐྱེ་བོ་མང་པོ་ན་བའི་ཚུལ་དང༌། ནད་བདག་འབྱུང་པོ་དང་མ་མོ་ནམ་མཁའ་ལ་འགྲོ་བའི་ཚུལ་དང༌། བྲམ་ཟེ་གཅིག་ལ་ནམ་མཁའ་ནས་ལྷས་ལུང་སྟོན་པ་དང༌། བྲམ་ཟེས་
སྐྱེ་བོ་སྣ་ཚོགས་པ་མཇལ་དུ་འོང་བ་དང་བྲམ་ཟེ་གཅིག་གཅིག་གིས་མཆོད་པ་འབུལ་བ་དང༌། གྲོང་ཁྱེར་དེའི་ཕྱི་རོལ་ཕྱོགས་གཅིག་ན། ལྷ་མང་པོ་ས་ལ་འབྲེས་རྒྱག་པ་གཟིགས་པ་དང༌། གྲོང་ཁྱེར་དེའི་དབུས་ན་སངས་རྒྱས་བཞུགས་པ་དང༌། ནམ་མཁའ་ལ་འཕགས་ནས་ཆུ་འགྲམ་དུ་གཤེགས་པ་དང༌། ཆུ་བོའི་འགྲམ་དེ་ན་སངས་རྒྱས་ལ་གདུགས་འཛིན་པ་མང་པོ་དང༌། ཡུལ་ཚུར་ཕྱོགས་ཀྱི་ཆུ་འགྲམ་ན་ཡང་སྟོན་པའི་དབུ་གཙུག་ཏུ་གདུགས་འཛིན་པ་མང་པོ་དང༌། ཆུའི་སྟེང་ན་ཀླུ་གདུགས་འཛིན་པ་མང་པོ་དང༌། ནམ་མཁའ་ལ་རྒྱལ་ཆེན་བཞི་སོགས་ལྷ་རྣམས་གདུགས་འཛིན་པ་དང༌། དེ་ལས་ཀྱང་མཐོ་བའི་ནམ་མཁའ་ལ་བརྒྱ་བྱིན་འཁོར་བཅས་གདུགས་འཛིན་པ་དང༌། ཆུ་དེ་ལ་གྲུ་གཟིང་གཉིས་བྱས་ཏེ། དེ་གཉིས་ལ་དགེ་སློང་རྣམས་འགྲོ་བ་དང༌། ཆུའི་དཀྱིལ་ནས་སྦྲུལ་མང་པོ་སྦྲུལ་མགོའི་གདེངས་ཁ་བྱས་པ་གཅིག་ལ་གཅིག་རེག་པའི་གདེང་ཁའི་ཟམ་པ་བྱས་པའི་སྟེང་ནས་བཅོམ་ལྡན་འདས་དང་དགེ་སློང་གཅིག་འབྱོན་པ་འབྲི། ཡུལ་ཚུར་ཕྱོགས་ཀྱི་ཆུ་འགྲམ་དེར་གདུགས་ཡོད་པའི་ཡས་མར་གང་རིགས་གཅིག་ཏུ། སྟོན་པ་བཞུགས་གདན་མེད་པ་ས་གནོན་མཛད་པ་ཞིག་འབྲི། ཡང་ཆུ་འགྲམ་དེ་ནས་རྒྱལ་པོ་སྨྲ་ཆེན་འཛིན་པ་ཞེས་བྱ་བས་གསེར་གྱི་མཆོད་སྡོང་གྲུ་བཞི་ཤིན་ཏུ་རིང་བ་བཟོ་ཁྱད་ཅན་དང༌། དེ་ལ་དགེ་སློང་གཞན་རྣམས་ལྟ་ཞིང༌། གཅིག་རྒྱབ་བསྟན་ནས་ཆོས་གོས་འཚེམས་པ་འབྲི། ས་སྟོང་དེ་ཁར་བཅོམ་ལྡན་འདས་ཀྱི་སྐུ་དྲུང་དུ། དགེ་སློང་རྣམས་ཆོས་ཉན་པ་ཞིག་ཀྱང་བྱའོ། །རྒྱལ་པོ་མ་སྐྱེས་དགྲ་དད་པ་ལ་བཀོད་པའི་སྡེ་ཚན་ནོ། །༼བི༽ དེ་ནས་ཡུལ་ལྗོངས་ཚུར་ཕྱོགས་དེར། ཡུལ་སྒྲ་གཅན་མཚོན་བྱེད་གྲོང་ཁྱེར་ཆུང་ངུ་ཞིག་ཏུ། སྟོན་པ་བཞུགས་ཞིང་འཁོར་རྣམས་ལ་ཆོས་
སྟོན་པའི་སར། ནམ་མཁའ་ནས་ནེ་ཙོ་ཞིག་འཕུར་སྟེ་འོང་པས། སྐུ་མདུན་དུ་འདུག་སྟེ། སྤྱན་འདྲེན་པའི་ཞུ་བ་འབུལ་བ་དང༌། ནེ་ཙོ་ཕར་ལྡོག་པ་ན་འོལ་བས་བསད་དེ། ལྷར་སྐྱེས་སྟོན་པ་ལ་ཆོས་ཉན་པས་བདེན་པ་མཐོང་བ་དང༌། སྤོང་བྱེད་ཀྱི་གྲོང་ཁྱེར་མཚོན་པའི་གྲོང་ཁྱེར་གཅིག་གི་ལྟག་ན་ཨ་མྲའི་ཚལ་མཚོན་བྱེད་ཀྱི་གཙུག་ལག་ཁང་ན་སྟོན་པ་འཁོར་བཅས་བཞུགས་ཤིང༌། ལམ་བར་དེ་ནས་བུད་མེད་བཟང་མོ་རྟ་པ་ཞིག་འཁོར་རྟ་པ་བུད་མེད་མང་པོས་བསྐོར་ཏེ་སངས་རྒྱས་མཇལ་བར་འགྲོ་བ་དང༌། སྟོན་པའི་སྐུ་མདུན་དུ་ཞུ་བ་ཞུ་བ་དང༌། དེ་ནས་ཕྱོགས་གཅིག་ནས། ཡབ་སྲས་མཇལ་བའི་སྐབས་སུ་འབྱུང་བ་ལྟར། ཤིང་རྟ་མི་དང་བཅས་པ། སྔོ་སེར་དཀར་ལྗང་དམར་བ་འཁོར་དུ་མ་དང་བཅས་ཏེ་སྟོན་པ་མཇལ་དུ་ཡོང་བ་འབྲི། ཡང་ཕྱོགས་གཅིག་ན་བྲམ་ཟེ་གཅིག་ལ། ལི་ཙ་བྱི་མང་པོས་གོས་རེ་རེ་སྟེར་བ་དང༌། གོས་དེ་རྣམས་བཅོམ་ལྡན་འདས་ལ་ཕུལ་བ་དང༌། ལི་ཙ་བྱི་ཤིང་རྟ་ནས་བབས་པ་དེ་རྣམས་ལ་སྟོན་པས་ཆོས་གསུང་པ་དང༌། གྲོང་ཁྱེར་སྤོང་བྱེད་ཀྱི་སྒོ་བཞི་པོའི་སྒོ་ཐེམ་ལ་དགྲ་བཅོམ་པ་རེ་རེས་ཞབས་བཞག་སྟེ་གཟུངས་མདོ་འདོན་པ་དང་ནད་གཏོང་པའི་འབྱུང་པོ་ཐམས་ཅད་རྒྱང་རིང་དུ་བྲོས་པ་དང༌། ཁྱིམ་ཡངས་པ་གཉིས་སུ་སངས་རྒྱས་འཁོར་བཅས་ལ། སྔར་གྱི་བུད་མེད་བཟང་པོ་དེས། གདུགས་ཚོད་གསོལ་པ་དང༌། ཅིག་ཤོས་སུ་ལི་ཙ་བྱི་དེ་རྣམས་ཀྱི་གདུགས་ཚོད་གསོལ་བ་འབྲི། གྲོང་ཁྱེར་དེའི་རྒྱབ་ན། འོད་མ་ཅན་གྱི་གྲོང་མཚོན་བྱེད་ཀྱི་གྲོང་ཆུང་ངུ་གཅིག་གི་ལྟག་ན། ཤིང་ཤ་པའི་ནགས་ཚལ་གྱི་དབུས་ན་སྟོན་པ་ཅུང་ཟད་སྐུ་བསྙུང་བའི་ཚུལ་མཛད་པ་དང༌། དགེ་སློང་མང་པོ་ཡུལ་ཐོར་བུ་པ་སོ་སོ་ན་བསམ་གཏན་བྱེད་པ་འབྲི། དེ་ནས་ཡུལ་ལུས་འཕགས་ཀྱི་གྲོང་ཁྱེར་མི་ཐི་ལར་གཤེགས་ཤིང༌། སྐྱེས་པའི་
རབས་གསུང་པའི་བཀོད་པ་དང༌། ས་ལ་ཞེས་བྱ་བ་བྲམ་ཟེ་ཁོ་ནའི་གྲོང་གཅིག་ཏུ། བསོད་སྙོམས་འབུལ་བ་མེད་པར་ལྷུང་བཟེད་སྟོང་པ་གྱུར་པ་དང༌། བདུད་སྡིག་ཅན་མིའི་གཟུགས་དང་གཏམ་གསུང་ཞིང༌། བདུད་དེ་རླུང་འཚུབ་ལྟ་བུར་བྱས་ཏེ་ཡལ་བ་དང༌། ཡུལ་སྡིག་པ་ཅན་དུ་གཤེགས་ཏེ། གྱད་མང་པོས། ཕ་བོང་ཤིན་ཏུ་ཆེ་བ་ཞིག་མེས་བསྲེགས་པ་དང༌། ལྕགས་ཀྱི་བརྐོ་ཞིང་གསིལ་བ་དང༌། ཐག་པས་འཐེན་པ་དང༌། གཟུ་བྱེད་པ་སོགས་ཡོད་པ་ལྟར། སྟོན་པ་བྱོན་པ་དང༌། སྟོན་པའི་ཞབས་ཀྱི་མཐེ་བོང་གིས་མཁའ་དབྱིངས་མཐོན་པོར་འཕངས་པ་དང༌། དེ་ལ་མི་མང་པོ་ལྟ་ཞིང་འཇིགས་པའི་ཚུལ་བྱེད་པ་དང༌། དེ་བྱེ་མར་སོང་བྱེ་མའི་ཕུང་པོ་བྱུང་བ་དང༌། སླར་ཡང་ལམ་གྱི་ལོགས་གཞན་ཞིག་ཏུ། ཕ་བོང་སྔར་བཞིན་དུ་འབྱོར་བ་དང༌། དེ་ལ་མིའི་ལག་པའི་ཤུལ་ཡོད་པར་སྟོན་པར་མཛད་པ་དང༌། གྱད་དེ་རྣམས་འདུས་པ་ལ་ཆོས་གསུང་པ་རྣམས་འབྲི། བར་དེར་ཡུལ་སོ་སོར་བྱོན་པའི་རྣམ་གྲངས་མང་པོ་ཡོད་ཀྱང་འབྲིར་མ་ལང༌། ཤིང་སྡོང་ཤིན་ཏུ་ཆེ་བ་ཡོད་པའི་གྲོང་གཅིག་ཏུ། སྟོན་པ་ལ་བུད་མེད་གཅིག་གིས་བསོད་སྙོམས་འབུལ་ཞིང་ཆོས་སྟོན་ལ་འོད་ཟེར་སྟེང་འོག་གཉིས་སུ་སོང་ནས་གཙུག་ཏོར་དུ་ནུབ་པ་དང༌། ཁང་པའི་ཕྱི་རོལ་དུ་བྲམ་ཟེ་ལ་ཆོས་སྟོན་པ་རྣམས་འབྲི། དེ་ནས་གི་བ་ལི་ཞེས་བྱ་བའི་ནགས་ཁྲོད་དུ། ལོ་མའི་སྤྱིལ་པོར་སྟོན་པ་བཞུགས་པ་དང༌། སྟོན་པས་དགེ་སློང་གཅིག་ལ་བཀའ་སྩོལ་བ་དང༌། ནགས་གཅིག་ན་བྲམ་ཟེ་མང་པོ་གནས་པའི་སར། དགེ་སློང་དེ་སྦྲུལ་གྱིས་གདེངས་ཀ་བདུན་དུ་བྱས་ཏེ་གནས་པ་དང༌། བྲམ་ཟེའི་དྲང་སྲོང་དེ་རྣམས་བཅོམ་ལྡན་འདས་ཀྱི་དྲུང་དུ་ཆོས་ཉན་པ་དང༌། དེ་ནས་ཀུ་རུའི་ཡུལ་གྱི་ནགས་ཚལ་ན་བཞུགས་པ་དང༌། སྐྱེ་བོ་མང་པོ་འདུས་ཏེ་ཆོས་སྟོན་པ་དང༌། དེའི་
ཕྱོགས་གཅིག་ན་དགེ་སློང་གཅིག་གིས་རྒྱལ་པོ་ལ་ཆོས་སྟོན་པ་དང༌། དེ་ནས་གྲོང་ཁྱེར་གླང་པོ་ཅན་དུ་བྲམ་ཟེ་གཅིག་གིས་སྟོན་པ་ལ་བསྟོད་པ་འབུལ་ཏེ། འོད་ཟེར་སྟེང་འོག་ཏུ་སྤྲོས་ཏེ་གཙུག་ཏོར་ནུབ་པ་དང༌། ཡང་བཅོམ་ལྡན་འདས་འཁོར་བཅས་ཆོས་གསུང་པ་ལ་བྲམ་ཟེ་གཅིག་རི་ཆུང་གཅིག་གི་རྩེ་ནས་ལྟ་བ་དང༌། སྟོན་པས་བྲམ་ཟེ་ལ་བཀའ་བཀོད་མཛད་པའི་ཚུལ་དང༌། བྲམ་ཟེས་ཁྱིམ་གྱི་ཕྱོགས་གཅིག་ཏུ་སྦྱིན་སྲེག་གི་ཐབ་ཁ་བཤིག་པའི་འོག་གི་ས་འབྲུ་བ་དང༌། དེ་ནས་ཙན་དན་ས་མཆོག་གི་མཆོད་སྡོང་ཐོན་པ་དང༌། མཆོད་སྡོང་དེ་དང་སྟོན་པའི་སྐུ་ཚད་མཉམ་པར་བྱུང་བ་དང༌། མཆོད་སྡོང་དེ་ལ་དུས་སྟོན་ཆེན་པོ་བྱེད་པ་འབྲི། ཡང་བཅོམ་ལྡན་འདས་བྲམ་ཟེའི་གྲོང་ལ་གཤེགས་པའི་ཚུལ་དང༌། ཕར་ཕྱོགས་གྲོང་ཁྱེར་གཅིག་ན། སྐྱེ་བོ་དུ་མ་འདུས་པ་ལ། མུ་སྟེགས་ཅན་རྣམས་གཏམ་སྨྲ་བ་དང༌། དེ་རྣམས་དམག་ཆས་སྟེ་ཚུར་འོང་བ་ལ། རྒྱལ་རིགས་རྒན་པོ་གཅིག་གིས་གཏམ་སྨྲ་བ་དང༌། བར་གྱི་ནགས་གསེབ་གཅིག་ན་དམག་རྣམས་བསྡད་པ་ལ། རྒན་པོ་དེས་མེ་བཏང་ཞིང༌། དེ་རྣམས་ཀྱིས་མེ་བསད་ཀྱང་མ་གསོད་པ་དང༌། སྟོན་པ་ཕེབས་པའི་ཕྱོགས་ནས་མེ་ཞི་བ་དང༌། དམག་མི་རྣམས་གོ་ཕུད་དེ་སྟོན་པ་ལ་ཆོས་ཉན་པ་དང༌། བྲམ་ཟེའི་གྲོང་དུ་ཕེབས་ནས་སྐྱེ་བོ་རྣམས་ཀྱིས་མཆོད་པ་དང༌། ནག་པོ་གྲོང་དུ་སངས་རྒྱས་བཞིའི་གཏན། སྟན་གཅིག་གཙུག་ལག་ཁང་དུ་བཞུགས་པ་དང༌། གནོད་སྦྱིན་གྱི་གནས་གཅིག་ཏུ་བཅོམ་ལྡན་འདས་ཀྱི་སྐུའི་དྲུང་ན་གནོད་སྦྱིན་མང་པོས་སྐོར་བ་ལ། གནོད་སྦྱིན་གླང་ཆེན་སྟོབས་ཞེས་བྱ་བ་གཅིག་ཚུར་ཡོང་བ་དང༌། གཙུག་ལག་ཁང་ལྔ་བརྒྱ་མཚོན་བྱེད་ཀྱི་གཙུག་ལག་ཁང་མང་པོར། འཁོར་དགེ་སློང་མང་པོ་ལ་རྒུན་འབྲུམ་སོགས་ཤིང་འབྲས་འབུལ་བ་སྟེ།
དེ་དག་ནི་ཡངས་པ་ཅན་རྣམས་འཇིགས་པ་ལས་སྐྱབས་པ་ལ་སོགས་པའི་སྡེ་ཚན་ནོ། །༼མི༽ གཙུག་ལག་ཁང་དེའི་ནང་དུ་སངས་རྒྱས་ཡང་དག་འཇོག་ལ་བཞུགས་པ་དང༌། བཅོམ་ལྡན་འདས་དང་ཕྱག་ན་རྡོ་རྗེ་ལྷན་ཅིག་ཏུ་ནམ་མཁའ་ལ་གཤེགས་པ་དང༌། ནགས་ཚལ་སྔོན་པོ་ཡོད་པ་གཟིགས་ཤིང༌། ཡུལ་གཅིག་ན་གནོད་སྦྱིན་གདུག་པ་ཅན་གྱི་སྐྱེ་བོ་མང་པོ་ལ་གནོད་པ་བྱེད་པ་ལས། མི་རྣམས་ཀྱིས་བཅོམ་ལྡན་འདས་ལ་ཆོས་ཉན་ཞིང་གསོལ་བ་འདེབས་པའི་འགྲམ་ན་གནོད་སྦྱིན་དེ་ཡང་འདུག་པ་དང༌། ཡང་གནོད་སྦྱིན་དེ་ལ་དགོས་སུ་ཆོས་གསུང་པ་དང༌། གཙུག་ལག་ཁང་རྩིག་པ་དང༌། དེ་ཁ་འདྲ་བ་གཞན་ཡང་གཉིས་འབྲི། ཡང་ནགས་ཚལ་དང་འབབ་ཆུ་དུ་མ་ཡོད་པ་ཞིག་ན་སངས་རྒྱས་བཞུགས་པ་དང་སྟེང་ནས་མཚོན་ཆའི་ཆར་ཕབ་པ་མེ་ཏོག་གི་ཚལ་དུ་གྱུར་པ་དང༌། ཀླུས་དུ་བ་བཏང་བ་ལས། ཆེས་ཆེ་བ་སངས་རྒྱས་ཀྱི་སྤྲུལ་པ་དང༌། དེས་མེ་སྦར་བ་ལས་ཆེས་ཆེ་བ་སངས་རྒྱས་ཀྱིས་སྤྲུལ་པ་དང༌། ཕྱག་ན་རྡོ་རྗེས་བྲག་རིའི་རྩེ་མོ་ལ་རྡོ་རྗེ་འཕངས་པས། རི་ཉིལ་ཞིང༌། ཀླུའི་གནས་རྣམས་ནོན་པ་དང༌། ཡང་ཀླུ་རྣམས་འབྲོས་པར་རྩོམ་པ་ལས། མཐའ་མེས་འཁོར་བ་དང༌། དེ་ནས་བཅོམ་ལྡན་འདས་ཀྱི་དྲུང་དུ་ཀླུ་སོག་མ་མེད་དེ། ཆུང་མ་དང༌། བུ་དང་མནའ་མ་དང་འཁོར་དང་བཅས་ཏེ་སྐྱབས་འགྲོ་དང༌། བསླབས་པ་ཞུ་བའི་ཚུལ་བྱ། དེའི་ལག་གཅིག་ན། ཕྱག་ན་རྡོ་རྗེས། རྡོ་རྗེ་གསོར་བས་གར་མཛད་པ་འབྲི། ཡང་བཅོམ་ལྡན་འདས་དང་ཕྱག་ན་རྡོ་རྗེ་ལྷན་ཅིག་ནམ་མཁའ་ལ་གཤེགས་ཤིང༌། མཚལ་སྔོན་པོ་མཚོ་དང་བཅས་གཟིགས་པ་དང་མཚོ་གཅིག་ན་ཀླུའི་ཕོ་བྲང་གཉིས་ཡོད་པ་དང༌། བཅོམ་ལྡན་འདས་མཚོ་ནང་དུ་བྱོན་པ་ལ་ཀླུ་དེ་གཉིས་ཆོས་ཉན་པ། ཀླུའི་ཕོ་བྲང་གི་
རྒྱབ་ཕྱོགས་ན་མཚོ་ལ་སངས་རྒྱས་ཀྱི་སྐུའི་གཟུགས་བརྙན་ཤར་བ་ལ། ཀླུ་དེ་གཉིས་ལྟ་བ་དང༌། ཡང་སངས་རྒྱས་དང་ཕྱག་ན་རྡོ་རྗེ་ནམ་མཁའ་ལ་གཤེགས་ཏེ། རི་གཅིག་རྒལ་བའི་ཕ་རོལ་ན། ཡུལ་ལྗོངས་ཆུང་ངུ་ཞིག་འབྲི། ཡུལ་དེའི་ཟུར་གཅིག་ན་གནོད་སྦྱིན་མོ་སྲིན་མོ་འདྲ་བ་ཞིག་གིས་བྱིས་པ་མང་པོ་ཟ་བའི་ཚུལ་ལ། གཡས་ཕྱོགས་སུ་མདུང་ཞགས་པ་གཅིག་འབྲི། ཡུལ་དེའི་འདབས་ན་སངས་རྒྱས་ལ་བྲམ་ཟེ་དང་ཁྱིམ་བདག་མང་པོས་མཆོད་པ་བྱེད་ཅིང་ཆོས་ཉན་པ་དང༌། ཡང་ཕྱོགས་གཅིག་ན་སངས་རྒྱས་འཁོར་བཅས་ལ་གདུགས་ཚོད་གསོལ་ཞིང༌། ཡང་ཕྱོགས་གཅིག་ན་བྲམ་ཟེ་དང་ཁྱིམ་བདག་འབའ་ཞིག་གི་གསེར་གྱི་རིལ་བ་སྤྱི་བླུགས་ཐོགས་ནས་སངས་རྒྱས་ལ་ཞུ་བའི་ཚུལ་དང༌། དེ་དག་གི་འགྲམ་ན་གནོད་སྦྱིན་མོ་སྲིན་མོའི་ལུས་ཅན་དེ་ཡང་ཆོས་ཉན་པའི་ཚུལ་བྱ། ལོགས་གཅིག་ན་བཅོམ་ལྡན་འདས་ཀྱིས་གནོད་སྦྱིན་མོ་དེ་ཁོ་ན་ལ་ཆོས་སྟོན་པ་དང༌། མི་རྣམས་ཀྱི་གཙུག་ལག་ཁང་རྩིག་པའི་ཚུལ་བྱ། གཞན་ཡང་ཡུལ་ལྗོངས་གཅིག་ན། སྲིན་པོ་སྲིན་མོ་མང་པོ་ལ་ཆོས་སྟོན་པ་དང༌། ཡང་གཅིག་ན་ཀླུ་རྣམས་འདུས་པ་ལ་ཆོས་སྟོན་པ་དང༌། ཡང་གཅིག་ན་ལྷ་སྣ་ཚོགས་འདུས་པ་དང༌། ཡང་གཅིག་ན་གནོད་སྦྱིན་སྣ་ཚོགས་འདུས་པ་དང༌། ཡང་གཅིག་ན་མིའམ་ཅི་སྣ་ཚོགས་འདུས་པ་དང༌། ཡང་གཅིག་ན་འབྱུང་པོ་གཟུགས་སྣ་ཚོགས་འདུས་པ་དང༌། ཡང་གཅིག་ན་ནམ་མཁའ་ལྡིང་སོགས་བྱ་སྣ་ཚོགས་འདུས་པ་དང༌། ཡང་གཅིག་ན་ལྷ་མ་ཡིན་དང་ལྷ་མིན་གྱི་བུད་མེད་སྣ་ཚོགས་ལ་ཆོས་གསུང་པ་སྟེ། སྐབས་དེར་མི་མ་ཡིན་གྱི་གཙོ་བོ་མཐུ་ཆེ་བ། རྫུ་འཕྲུལ་ཆེ་བ་འབུམ་ཕྲག་བདུན་ཅུ་དོན་བདུན་བརྟུལ་བ་མཚོན་བྱེད་དོ། །དེ་དག་ལས་འབྱུང་པོ་གཟུགས་སྣ་ཚོགས་བཅོས་པ་ནི། འདི་ལྟ་བུ་དག་ཡིན་ཏེ། སེང་གེ་ལ་སོགས་པ་མགོ་བརྙན་སྣ་ཚོགས་
དང༌། མགོ་མི་ལ་ལུས་དུད་འགྲོ་སོགས་སུ་འདུག་པ་དང༌། ལུས་གཅིག་ལ་མགོ་མང་པོ་དང༌། མགོ་གཅིག་ལ་ལུས་མང་པོ་དང༌། ལུས་མགོ་མེད་དང༌། མགོ་ལུས་བྲལ་བ་དང༌། ལག་མང་དང༌། ལུས་ཕྱེད་པ་དང༌། ཕྲག་མིག་དང༌། མིག་མང་དང༌། རྐང་མང་དང༌། རྐང་གཅིག་དང༌། རྐང་མེད་དང༌། ཁ་མང་པོ་དང༌། རྐང་ལག་ལ་སོགས་པ་ཡན་ལག་སྲོག་ཆགས་སྣ་ཚོགས་པའི་རྣམ་པ་གཞན་དང་གཞན་དུ་འདུག་པ་རྣམས་སོ། །དེ་ནས་ནམ་མཁའ་ལ་ཕྱག་ན་རྡོ་རྗེ་དང་ལྷན་ཅིག་ཚུར་བྱོན་པ་དང༌། གཙུག་ལག་ཁང་གཅིག་གི་ནང་དུ་བཅོམ་ལྡན་འདས་མཉམ་བཞག་མཛད་ཅིང༌། སྒོ་དྲུང་ན་དགེ་སློང་གཅིག་ཡོད་པ་དང༌། ཕྱི་ཁྱམས་ན་དགེ་སློང་མང་པོ་བཞུགས་པ་འབྲི་སྟེ། འདི་ནི་ཐུན་གཅིག་ལ། མི་དང་མི་མ་ཡིན་པའི་འགྲོ་བ་དཔག་ཏུ་མེད་པ་ཡང་དག་པའི་ལམ་ལ་བཀོད་པ་སྟེ། བྱང་ཕྱོགས་ཀྱི་རྒྱུད་དུ་གཤེགས་པའི་སྡེ་ཚན་ནོ། །༼ཙི༽ དེ་ནས་གཙུག་ལག་ཁང་དེའི་འགྲམ་ནས་སངས་རྒྱས་དགེ་སློང་གཅིག་དང་གཤེགས་པ་དང་གྲོང་ཁྱེར་ཆུང་ངུ་གཉིས་རིམ་གྱི་བརྒྱུད་ནས། རི་གཅིག་ན་ནགས་ཚལ་སྔོན་པོ་ཡོད་པ། གཅིག་སྟོན་པར་མཛད་པ་དང༌། གྲོང་ཁྱེར་གཅིག་གི་འདབས་སུ་བྱོན་པ་ལ། སྔོན་པོར་གྱུར་ཞེས་བྱ་བའི་བྲམ་ཟེ་གཅིག་གིས་བསྟོད་པ་འབུལ་བ་དང༌། བྲམ་ཟེ་དེ་ལ་ཆོས་སྟོན་ཞིང་འོད་འཕྲོ་བ་དང༌། བྲམ་ཟེ་མང་པོ་གྲོས་བྱེད་པ་དང༌། ཡང་དེ་རྣམས་བྲམ་ཟེ་ལ་སྨོད་པ་དང༌། སངས་རྒྱས་གྲོང་ཁྱེར་དུ་ཕེབས་ལ་ཁད་པ་ལས། གྲོང་ཁྱེར་གྱི་སྒོ་དྲུང་ན་ལྷ་མོ་གཅིག་ལུས་གཅེར་བུར་ཕྱུང་ནས་འདུག་པ་དང༌། གྲོང་ཁྱེར་གྱི་གཡོན་ཕྱོགས་ས་སྟོང་གཅིག་ལ་འབྱོན་པ་དང༌། རི་ཆུང་གཅིག་གི་ཕུག་ན་བཞུགས་པ་དང༌། རིའི་རྒྱབ་ཀྱི་ནགས་ནང་ན། བྱིས་པ་བོང་བུ་ལ་ཞོན་པ་དང༌། བོང་བུས་བྱིས་
པ་ཟ་བ་དང༌། རི་དེའི་འགྲམ་ཚུར་ཕྱོགས་ན། སངས་རྒྱས་ལ་འཁོར་མང་པོས་བསྐོར་ཞིང་མཆོད་པ་འབུལ་བ་ལ། དེའི་འགྲམ་ན་གནོད་སྦྱིན་ཏེ། འབྱུང་པོ་བོང་བུའི་མགོ་ཅན་ཞིག་ལ། གཞན་ཡང་གནོད་སྦྱིན་ཉིས་སྟོང་ལྔ་བརྒྱ་མཚོན་བྱེད་ཀྱི་གནོད་སྦྱིན་མང་པོ་ཐལ་མོ་སྦྱར་བ་འདྲི། དེ་ནས་མི་རྣམས་ཀྱི་ཕྱོགས་གཅིག་ཏུ་གཙུག་ལག་ཁང་ལྔ་བརྒྱ་བཞེངས་པ་དང༌། ཕྱོགས་གཞན་གཅིག་ཏུ་ཉིས་སྟོང་ལྔ་བརྒྱ་བཞེངས་པ་མཚོན་བྱེད་གཙུག་ལག་ཁང་ཆུང་ངུ་མང་པོ་བཞེངས་པ་ཚོ་གཉིས། དེ་ནས་ཡུལ་ལྗོངས་གཞན་ཞིག་ན། ཞིང་པ་མང་པོ་ཞིང་རྨོད་པའི་ཕར་འགྲམ་ན་སངས་རྒྱས་འབྱོན་པ་དང༌། དེའི་ཕྱོགས་གཅིག་ས་སྟོང་གཅིག་ལ་སངས་རྒྱས་བཞུགས་ཤིང༌། ཞིང་པ་རྣམས་འདུས་པ་ལ། སངས་རྒྱས་ཆོས་སྟོན་པ་དང༌། ཕྱོགས་གཅིག་ན་གླང་ཐམས་ཅད་གཉའ་ཤིང་ཆུ་ཐག་བཅད་དེ། བཅོམ་ལྡན་འདས་ཀྱི་མཐའ་སྐོར་དུ་འཁོད་པ་དང༌། ནགས་གཅིག་ན་བཅོམ་ལྡན་འདས་བཞུགས་པའི་དྲུང་དུ་བྲམ་ཟེ་དཔོན་སློབ་མང་པོ་ཞིག་ཆོས་ཉན་པ་དང༌། ཉེ་སྐོར་དེ་ན་རྟ་དཀར་པོས་དྲངས་པའི་ཤིང་རྟ་དག་ཡོད་པ། དེ་ནས་བྲན་མོ་རྒན་མོ་ཞིག་ཁྲོན་པ་ནས་ཆུ་འདྲེན་པ་དང༌། ཀུན་དགའ་བོས་ལྷུང་བཟེད་དུ་ཆུ་སློང་བ་དང༌། ཟུར་གཅིག་ཏུ་བུད་མེད་མཆོག་དང༌། རྒན་མོ་དེ་སྟོན་པ་ལ་ཆོས་ཉན་པ་དང༌། བྲམ་ཟེ་གཅིག་གི་ཟླུམ་ར་ཆུའི་གང་བ་དང༌། དེ་སྟོན་པ་ལ་ཆོས་ཉན་ཞིང་དགེ་སློང་དུ་གྱུར་པ་སྟེ། བཅོམ་བརླག་དང་ཨོ་ཏ་ལ་སོགས་སུ་བྱོན་པའི་བཀོད་པའོ། །༼ཚི༽ དེ་ནས་ཡུལ་ལྗོངས་གཅིག་ན་ནེམ་པ་ལ་སོགས་པའི་ཤིང་གི་ནགས་ཚལ་གཅིག་ན། སངས་རྒྱས་འཁོར་བཅས་བཞུགས་པའི་དྲུང་དུ་རྒྱལ་པོ་འཁོར་བཅས་ཀྱང་ཐལ་མོ་སྦྱར་བ། དེའི་ལམ་ཕྱོགས་ལམ་གནས། རྒྱལ་པོ་འཁོར་བཅས་ཚུར་
ཡོང་བ་དང༌། ཕར་འགྲོ་བ་གཉིས་ཆར་གྱིས། ཕོ་བྲང་གི་ནང་དུ་རྒྱལ་པོས་བློན་པོ་རྣམས་ལ་བཀའ་སྒོ་བ་དང༌། ཁང་པའི་ཕྱི་ཁྱམས་ན་ཁ་ཟས་མང་པོ་བཤམ་པ་དང༌། ཕྱོགས་གཅིག་གི་ཁང་བཟང་ན་རྒྱལ་པོ་གཉིད་ལོག་པ་དང༌། དེའི་ནམ་མཁའ་ལ་འོད་སྐོར་གཅིག་གི་ནང་ན། གྲོང་ཁྱེར་གྱི་མཐའ་རྒྱལ་པོ་རང་གི་རྒྱུ་མས་དཀྲིས་པ་གཅིག་གི་ཧལ་མཚན་གྱིས་ཕྲ་མོར་འབྲི། དེ་ནས་ཁང་བཟང་གི་ཕྱོགས་གཅིག་ཏུ། རྒྱལ་པོ་དང་བྲམ་ཟེ་ཞིག་གཏམ་སྨྲ་བ་དང༌། ཁང་བཟང་གི་ནང་ཞིག་ན་རྒྱལ་པོ་གཅིག་པོར་འདུག་པ་དང༌། ཕོ་བྲང་གི་ཕྱི་རོལ་དུ་མི་མང་པོ་བསགས་པ་ན། བློན་པོས་བཀའ་སྒོ་བ་དང༌། གྲོང་ཁྱེར་ཆེ་ཆུང་མང་པོའི་སྲང་ཁ་ན། དགེ་སློང་གཉིས་ཏེ་བརྡའ་སྤྲོད་པའི་ཚུལ་དང༌། ཕོ་བྲང་དེའི་སྒོ་ནས་དགེ་སློང་གཉིས་བརྡའ་སྤྲོད་པའི་ཚུལ་འབྲི། ཕྱོགས་གཅིག་ན་ཚོང་པ་རྟ་ཁལ་མང་པོ་ཅན་ཡོང་པ་དང༌། ཚོང་པ་དེ་རྣམས་ཁལ་སྤོག་ནས་འདུག་པའི་སར། ཚོང་དཔོན་དང་དགེ་སློང་གཅིག་གཏམ་སྨྲ་བའི་ཚུལ་དང༌། རི་ནགས་ཚལ་ཅན་གཅིག་གི་འགྲམ་ན། དགེ་སློང་གཅིག་གིས་དགེ་སློང་རྣམས་ལ་ཚུལ་ཤིང་འགྲེམ་པ་དང༌། སྟོན་པའི་དྲུང་དུ་དགེ་སློང་གཉིས་ཞུ་བ་བྱེད་པ་དང༌། དེ་གཉིས་ཕྱོགས་གཞན་གཅིག་ལ་འགྲོ་ཚུལ་དང༌། རི་དེའི་སྐེད་པ་ཙམ་ན་སངས་རྒྱས་འཁོར་བཅས་བཞུགས་པ་ལ་ཚོང་དཔོན་དེ་འོང་ནས། སོ་སོ་ནས་ཕྱག་འབུལ་བའི་ཚུལ་བྱ། ཕྱོགས་གཅིག་ཏུ་བུ་མོ་གཅིག་གིས་ནས་བརྡུང་ཞིང༌། དགེ་སློང་ཞིག་ས་སྟེང་མཐོ་བ་གཅིག་ན་བཞུགས་ནས་དེ་ཚོ་ལ་ཆོས་འཆད་པའི་རྣམ་པ་དང༌། རིའི་རྩ་བ་ན་རྟ་ལྔ་བརྒྱ་མཚོན་བྱེད་རྟ་མང་པོ་ཡང་བཅོམ་ལྡན་འདས་ལ་ལྟ་ཞིང་སྐད་འབྱིན་པའི་ཚུལ་དང༌། དེ་དང་ཉེ་བའི་ཕྱོགས་གཅིག་ན་བུ་མོ་ལྔ་བརྒྱ་མཚོན་བྱེད་བུ་མོ་མང་པོ་ཡང་ཐལ་མོ་སྦྱར་ཞིང་སྨོན་ལམ་
འདེབས་ཚུལ་བྱེད། ཡང་སྔར་གྱི་ཕོ་བྲང་དེའི་འཁྲིས་སུ། ཁང་བཟང་དེ་འདྲ་རུང་གི་སྒོ་ཐ་དད་ན་ཕྱོགས་ཀྱི་ཕོ་ཉ་པ་མང་པོ་ཡོད་པ་དང༌། སྒོ་བསྲུང་གཅིག་ལ་གནས་བརྟན་གཅིག་གི་གཏམ་སྨྲ་བ་དང༌། སྒོ་ནང་མ་གཅིག་ལ་སྒོ་བསྲུང་གིས་འཁྲིད་དེ། དགེ་སློང་དེ་འགྲོ་བ་དང༌། རྒྱལ་པོའི་དྲུང་ན་ཡང་ཡང་དགེ་སློང་ཡོད་པ་འབྲི། སྔར་གྱི་རི་དེའི་འཁྲིས་སུ་རི་དེ་ཀ་འདྲ་བ་ཞིག་ལ་ཕྱོགས་གཅིག་ན་སངས་རྒྱས་ཀྱི་དྲུང་ན། དགེ་སློང་གཅིག་མཆིལ་མ་འབྱིན་པའི་ཚུལ། སྟོན་པའི་ཕྱག་གཡོན་དུ་ལྷུང་བཟེད་བསྣམས། གཡས་ཀྱི་ནས་འབྲུ་གཅིག་དགེ་སློང་དེ་ལ་གནང་བའི་ཚུལ་བྱ། སྔར་གྱི་དགེ་སློང་ཕར་ཕྱོགས་གཉིས་པོ་ཚུར་འོང་པ་དང༌། རི་དེའི་ཕྱོགས་གཅིག་ན་རྒྱལ་པོ་འཁོར་བཅས་སྟོན་པ་ལ་ཕྱག་འཚལ་བའི་ཚུལ་བྱེད། ཕོ་བྲང་སྟཻང་མ་དེའི་ཕྱོགས་གཅིག་ན། སངས་རྒྱས་འཁོར་བཅས་ལ། རྒྱལ་པོ་དེས་བསོད་སྙོམས་འབུལ་བ་དང༌། བཅོམ་ལྡན་འདས་འཁོར་བཅས་ཡུལ་གཞན་ལ་གཤེགས་པའི་ཚུལ་འབྲི། རི་སྟེང་མ་དེའི་ཕྱོགས་གཅིག་ལ། དགེ་སློང་རྣམས་ཀྱི་ལོ་མའི་སྤྱིལ་པོ་དང༌། རྩའི་སྤྱིལ་པོ་དང༌། རང་ཤོང་ཁང་བུ་དག་བཤིག་པར་བརྩམས་པ་ལས། སྟོན་པས་བཟློག་པ་དང༌། བཀོད་པ་དེ་དག་དང་རི་ནགས་ཀྱི་ཆོད་པའི་ཡུལ་ལྗོངས་ཆུང་ངུ་གཅིག་ན། རི་རྩེ་གསུམ་པ་གཅིག་ལ་དགེ་སློང་གཉིས་བཞུགས་ཤིང༌། བརྒྱ་བྱིན་གྱི་བདུད་རྩི་འདྲེན་པ་འབྲི། དེ་དང་ཕྱོགས་མི་གཅིག་པ་ལྗོངས་སྔ་མ་དེ་དང་རི་ནགས་ཀྱི་ཆོད་པའི་ཡུལ་ལྗོངས་གཅིག་ན་ཕར་ཤིང་རྟ་འབྲས་ཀྱི་བཀང་བ་དང༌། མི་མང་པོ་འགྲོ་བའི་མདུན་ནས། དགེ་སློང་གི་གཟུགས་ཅན་གཅིག་གི་བཟློག་པ་དང༌། ཡང་ཤིང་རྟ་སོང་བ་ལ། ཆར་པ་དང༌། འོབས་ཆེན་པོའི་རྒྱུན་ལ་མ་ཐར་བ་རྣམས་འབྲི་སྟེ། གྲོང་ཁྱེར་སྒྲ་མཐར་དབྱར་གནས་པའི་བསྐོར་རོ་སྐོར་རོ། །༼ཛི༽
ཡང་བཀོད་པ་གཅིག་ལ། ཆུ་འགྲམ་གཅིག་ལ་སྟོན་པ་འཁོར་བཅས་གཤེགས་ཤིང༌། ཆུས་ཤིང་སྡོང་ཆེན་པོ་ཁྱེར་བ་གཅིག་དང༌། ཆུ་འགྲམ་ན་སྟོན་པ་འཁོར་མང་པོ་ཆོས་གསུང་པའི་འཁྲིས་ན། གནག་རྫི་རྒན་པོ་གཅིག་ཆོས་ཉན་ཞིང་འཁར་བ་ས་ལ་བཙུགས་པ། སྦལ་བ་ཞིག་གི་སྟེང་དུ་ཁེལ་བ་དང༌། སྦལ་བ་ལྷར་སྐྱེས་ནས་བཅོམ་ལྡན་འདས་ལ་ཆོས་ཉན་པ་དང༌། དེ་དང་ཉེ་བའི་རི་སུལ་མང་པོ་གཅིག་ན་ཕར་རྒན་པོ་དེ་སོང་བས་ཕྱུགས་རྫི་ལ་སོགས་པའི་མི་མང་པོ་འབྲོས་པ་དང༌། གྲོང་གཅིག་གི་མི་རྣམས་གོ་ཆ་གྱོན་པ་དང༌། རྒན་པོས་གནག་ཕྱུགས་རྣམས་བདག་པོ་སོ་སོ་ལ་གཏོད་པའི་ཚུལ་དང༌། ཚུར་ལམ་རྒན་པ་དེ་ཕྱུགས་རྫི་མང་པོས་སྐོར་ནས་སྟོན་པའི་དྲུང་དུ་སླེབ་ལ་ཁད་པ། སྟོན་པས་ཆོས་གསུང་པ་དང༌། རབ་ཏུ་བྱུང་བ་དང༌། འོད་འཕྲོ་བ་འབྲིའོ། །དེ་ནས་ཆུ་བོ་ཆེན་པོ་གངྒའི་སྟེང་ལ་བཅོམ་ལྡན་འདས་རེས་གྲུ་དང་རེས་ཆུ་ལ་ཞབས་བཞག་གིན་ཕེབས་པས་ངང་པ་མང་པོ་བསྐོར་བ་བྱེད་པ་དང༌། ཉ་མང་པོ་བསྐོར་བ་བྱེད་པ་དང༌། རུས་སྦལ་མང་པོ་བསྐོར་བ་བྱེད་པ་དང༌། སྟོན་པས་ཀྱང་ཆོས་གསུང་པའི་རྣམ་པ་དང༌། གངྒའི་ཚུར་འགྲམ་དུ་ཕེབས་པ་ན། དེ་རྣམས་ལྷར་སྐྱེས་པ་སྟོན་པ་ལ་ཆོས་ཉན་པའི་ཚུལ་དང༌། ཡང་ཕྱོགས་གཅིག་ན་ཡི་དྭགས་ལུས་ཀེང་རུས་ལྟ་བུ་ལྟོ་བ་ཆེ་ཞིང་གདོང་དང་ལུས་སྐྲས་གཡོགས་བ། ཁ་ཁབ་མིག་ཙམ། མདོག་ནག་ཕྲ་ཐོར་རེ་བ་མང་པོ་ལ་བཅོམ་ལྡན་འདས་ཀྱི་ཆུ་བོ་སྟོན་པར་མཛད་པ་དང༌། དེ་རྣམས་ཁ་ཆེན་པོར་སོང་བ་ལ། དགེ་སློང་གཅིག་གི་ཆུ་བླུད་པ་དང༌། དེ་དག་ཤི་ནས་ལྷར་སྐྱེས་པ་ལ་ཆོས་སྟོན་པས་བདེན་པ་མཐོང་བ་འབྲི། ཡི་དྭགས་ཁ་ཁབ་མིག་ཙམ་ནི་རྒྱ་གར་གྱི་རི་མོ་ཁུངས་མ་ལས། སྦྲང་བུའི་མཆུ་ལྟར་རིང་བའི་རྩེ་ན།
ཁའི་བུག་ག་ཡོད་པའི་རྣམ་པ་བྲིས་འདུག་གོ །དེ་ནས་ཇི་སྐད་དུ། གཞོན་ནུ་སྐྱེ་དང་གླང་ཆེན་སྐྲ། །དཔུང་རྒྱན་ལྡན་དང་ནོར་བུ་ཅན། །ས་ལ་སྟོབས་དང་ས་ལའི་སྟོབས། །གསེར་བྲེ་དང་ནི་གནས་བཅས་དང༌། །ཐུག་པ་དང་ནི་མཉན་ཡོད་དང༌། །མ་དྲོས་གྲོང་ཁྱེར་སིནྡུ་དང༌། །ཡངས་པ་ཅན་ནི་ཐ་མ་ཡིན། །ཞེས་ཡུལ་མང་པོར་བྱོན་པར་བཤད་པ་ལས་འདི་ཙམ་ཞིག་འབྲི་སྟེ། བྲམ་ཟེ་དབུལ་པོ་ཞིག་ཞིང་རྨོ་བའི་སར། བུ་མོ་ཞིག་གི་ཐུག་པ་བསྐྱེལ་བ་དང༌། དེ་དང་ཉེ་བའི་ལམ་ན་སངས་རྒྱས་འབྱོན་པ་དང༌། བྲམ་ཟེས་ཐུག་པ་སངས་རྒྱས་ལ་ཕུལ་བ་དང༌། ཐུག་པ་དེ་ཁྲོན་པ་རྙིང་པ་གཅིག་ཏུ་བླུག་པས་ཁྲོན་པ་ཁེངས་པ་དང༌། ཐུག་པ་དེ་སངས་རྒྱས་འཁོར་བཅས་ཀྱིས་གསོལ་ཡང་ཉུང་དུ་མ་སོང་ཞིང༌། ཁྲོན་པ་ནས་རླང་པ་འཐུལ་བ་དང༌། སངས་རྒྱས་ཀྱི་བྲམ་ཟེ་ལ་ཆོས་སྟོན་པ་དང༌། ཁོའི་ཞིང་གི་ནས་སོགས་ལོ་ཐོག་ཐམས་ཅད་གསེར་འབའ་ཞིག་ཏུ་སྐྱེས་པ་དང༌། སྟོན་ཐོག་རྒྱལ་པོ་དང་བགོ་བཤ་བྱས་པས། རྒྱལ་པོའི་དེ་རྣམས་འབྲུར་སོང༌། བྲམ་ཟེ་དེ་རྣམས་གསེར་དུ་འདུག་པའི་རྣམ་པ་འབྲི། ཡང་ཐོན་མཁན་གཅིག་གི་ལྕགས་ཏེ་རྒྱང་རིང་པོ་ནས་ཕྱག་འཚལ་བ་དང༌། དེ་དག་ཉེ་བར་སྟོན་པ་བཞུགས་ཤིང་ས་འོག་ནས། ལྷ་དང་ཀླུ་རྣམས་ཀྱི་རིན་པོ་ཆེའི་སྒྲོམ་བུའི་སྣོད་བྱུང་བ་དང༌། དེ་ཁ་ཕྱེ་བའི་ནང་ནས་སངས་རྒྱས་འོད་སྲུང་གི་རིང་སྲེལ་མ་ཉམས་པ་ཐོན་པ་ལ། སྐྱེ་བོ་མང་པོ་ཕྱག་མཆོད་བྱེད་ཅིང་ལྟ་བ་དང༌། ཡང་དེ་ས་འོག་ཏུ་ནུབ་པ་དང༌། ཕྱོགས་གཅིག་ནས་རྒྱལ་པོ་འཁོར་བཅས་འོང་པ་དང་ལྡོག་པ་གཉིས་འབྲི་སྟེ། ལྷོ་ཕྱོགས་ལྔ་ལེན་ཀྱི་གངྒའི་ཚུགས་གཤེགས་པ་ལ་སོགས་པའི་སྡེ་ཚན་ནོ། །༼ཝི༽ དེ་ནས་ཁྱིམ་ཁང་བཟང་ཅན་གཅིག་ན་ཁྱིམ་བདག་གཅིག་གིས་སངས་རྒྱས་འཁོར་བཅས་ལ་གདུགས་ཚོད་གསོལ་
ཞིང༌། ཕྱི་སྒོ་ནས་སྤྲང་པོ་མང་པོ་འཇུག་ཚད་པ་ལ། སྒོ་སྲུང་བས་བསྲུང་བ་དང༌། སྤྲང་པོ་གཅིག་སྤྲང་པོ་གཞན་རྣམས་གྱི་སྐྲོད་པ་དང༌། དེ་ཕྱགས་དར་གྱི་ཕུང་པོའི་གསེབ་ན་མགོ་ལ་རྨ་བྱུང་ནས་འདུག་པ་དང༌།སྟོན་པ་དང་ཉན་ཐོས་གཅིག་དེའི་འཁྲིས་སུ་གཤེགས་ནས། དེ་ལ་ཁ་ཟས་སྩོལ་བ་དང༌། སྤྲང་པོ་སྟོན་པའི་ཕྱི་བཞིན་དུ་འགྲོ་བ་དང༌། གཙུག་ལག་ཁང་དུ་སྟོན་པའི་དེ་ལ་བཀའ་སྩོལ་བ་དང༌། དེ་དོང་ཙེ་གཉིས་ཐོགས་ནས་མེ་ཏོག་གི་ར་བའི་སྒོ་དྲུང་ན་འདུགས་པ་ལ། མི་གཅིག་གིས་གཏམ་སྨྲ་བ་དང། དོང་ཙེ་དེ་ལ་གཏད་དེ་མེ་ཏོག་ཨུཏྤལ་མང་པོ་བླངས་ཏེ། གཙུག་ལག་ཁང་དུ་འགྲོ་བ་དང༌། སངས་རྒྱས་དང་དགེ་འདུན་རྣམས་ལ་དེས་ཨུཏྤལ་རེ་རེ་འབུལ་བ་དང༌། དེ་ནས་སྤྲང་པོ་དེ་སངས་རྒྱས་ལ་ཆོས་ཉན་པ་དང༌། རབ་ཏུ་བྱུང་བ་དང༌། ཕྱོགས་གཅིག་ཏུ་མཉམ་བཞག་བྱེད་ཅིང་ལུས་ལས་འོད་འཕྲོ་བ་འབྲི། སྟོན་པ་འཁོར་བཅས་ཡུལ་གཞན་དུ་གཤེགས་པ་དང༌། ཡུལ་ལྗོངས་དེར་རྒྱལ་པོའི་ཕོ་བྲང་ཞིག་ཏུ་མཆོད་སྟོན་གསོལ་བ་དང༌། རི་བོ་ནགས་ཚལ་ཅན་ལ་སངས་རྒྱས་འཁོར་བཅས་བཞུགས་པ་དང་ཕྱི་ར་བས་སྐོར་བའི་རྡོ་ཆལ་ཡངས་པ་ཞིག་ཏུ། ཕྱོགས་གཅིག་ན་སངས་རྒྱས་འཁོར་བཅས་ལ་མཆོད་སྟོན་གསོལ་བ་དང༌། ཕྱོགས་གཅིག་ཏུ་བྲམ་ཟེ་དང་ཁྱིམ་བདག་མང་པོས་སངས་རྒྱས་ལ་ཞུ་བ་འབུལ་བ་དང༌། དེའི་ཕྱི་རོལ་གྱི་ས་ལ། སྟོན་པས་དགེ་སློང་གཅིག་ལ་བཀའ་བསྒོ་བ་དང༌། ནགས་གསེབ་གཅིག་ལ་དགེ་སློང་འགྲོ་ཞིང་མཚོ་གཅིག་གི་འགྲམ་དུ་ཟས་ཟ་བ་དང༌། ལྷུང་བཟེད་འཁྲུད་པ་དང༌། ཕྱོགས་གཅིག་ན་སྐྱིལ་ཀྲུང་བཅས་ནས་འདུག་པ་ལ། མཚོན་ཆའི་ཆར་འབབ་པ་མེ་ཏོག་གི་ཆར་པར་སོང༌། དུ་བ་འཐུལ་བ་དང་མེ་འབར་བ་འབྲི། ཕྱོགས་གཅིག་ཏུ་ཀླུ་ལ་དགེ་སློང་དེས་ཆོས་གསུང་པ་འབྲི། དེ་དག་ནི་ཀླུ་ཨར་མྲ་ཆུ་ངོགས་པ་བརྟུལ་
བའི་བཀོད་པ་སྟེ། ཆུ་སྲིན་བྱིས་པ་གསོད་ཀྱྀ་རི་ལ་བཞུགས་པ་ལ་སོགས་པའི་སྡེ་ཚན་ནོ། །༼ཞི༽ དེ་ནས་ཁྱིམ་ཁང་བཟང་ཅན་ཞིག་གི་ནང་ན། སངས་རྒྱས་འཁོར་བཅས་ལ་ཁྱིམ་བདག་ཅིག་གིས་གདུགས་ཚོད་གསོལ་བ་དང༌། སྒོ་དྲུང་དུ་འོད་སྲུང་ཆེན་པོ་ཕྱགས་དར་ཁྲོད་གྱོན་པ་སྒོ་བས་མ་བཏང་བ་དང། འགྲམ་གཅིག་ཏུ་མུ་ལྟོ་མ་མཛེ་མོ་ཞིག་གིས་འབྲས་ཁུ་འོད་སྲུང་ལ་ཕུལ་བ་དང༌། ཕྱོགས་གཅིག་ཏུ་འབྲས་ཁུ་འོད་སྲུང་ལ་ཕུལ་བ་དེ་གསོལ་བ་དང༌། དེ་དགའ་ལྡན་གྱི་རིགས་ཀྱི་ལྷར་སྐྱེས་ནས་སྟོན་པ་ལ་ཆོས་ཉན་པ་དང༌། འོད་སྲུང་ལ་རྒྱལ་པོ་གསལ་རྒྱལ་གྱི་ཕོ་བྲང་དུ་བསོད་སྙོམས་གསོལ་བ་དང༌། ཡང་གཙུག་ལག་ཁང་དུ་སངས་རྒྱས་དགེ་འདུན་དང་བཅས་པ་ལ། རྒྱལ་པོས་མཆོད་པ་དཔག་ཏུ་མེད་པས་མཆོད་དེ། ན་བཟའ་གསེར་གྱི་མདོག་ཅན་ཕུལ་བ་དང༌། ཟས་ཀྱི་ལྷག་མ་ས་ལ་བོ་བ་རྣམས་མུལ་ལྟོ་བ་རྣམས་ཀྱིས་ཁྱེར་བ་དང༌། རྒྱལ་པོ་བཅོམ་ལྡན་འདས་ཀྱི་སྐུ་མདུན་ན་འདུག་ཅིང༌། མུལ་ལྟོ་བ་གཅིག་སྒོ་ཁང་ན་འདུག་པ་དང༌། ཡང་དེ་ཁ་དང་འདྲ་བ་གཅིག་ལ། རྒྱལ་པོ་ཕྱོགས་གཞན་དུ་འབྱོན་ཞིང༌། སྒོ་སྲུང་གི་མུལ་ལྟོ་བ་རྣམས་སྤྲོད་པ་དང༌། ཡང་གཙུག་ལག་ཁང་གི་ནང་ན་སངས་རྒྱས་ལ་རྒྱལ་པོ་ཞུ་བ་མཛད་པ་དང༌། དེ་མ་ཡིན་པའི་གཙུག་ལག་ཁང་གཅིག་ཏུ་སངས་རྒྱས་དགེ་འདུན་དང་བཅས་པ་ལ། བཟའ་བཏུང་དང༌། ན་བཟའ་དང༌། སྨན་དང༌། མར་མེ་དང༌། འབྲུ་མར་གྱི་བུམ་པ་ལ་སོགས་པ་མང་པོ་ཞིག་འབུལ་བ་དང༌། སྤྲང་མོས་གྱོ་མོག་ཏུ་མར་མེ་སྤར་ཏེ། ཁྱམས་སུ་བཞག་ནས་སྨོན་ལམ་འདེབས་པ་དང༌། ཕྱོགས་གཞན་གཅིག་ན་མར་མེ་གཞན་རྣམས་ཤི གྱོ་མོག་གི་མར་མེ་དེ་ཆེས་འབར་ཞིང་འོད་ཟེར་འཕྲོ་བ། སྟོན་པའི་ཞལ་ལས་འོད་འཕྲོས་དོན་གཉིས་བྱས།
གཙུག་ཏོར་དུ་ཐིམ་པ་དང༌། དགེ་སློང་གཅིག་གི་ཆོས་གོས་ཀྱི་དྲས་གཡོབ་པ་ལ། སངས་རྒྱས་ཀྱིས་བཟློག་པར་མཛད་ཅིང༌། ཤཱཀྱ་ཐུབ་པ་ཞེས་བྱ་བའི་སངས་རྒྱས་སུ་འགྱུར་བར་ལུང་སྟོན་པ་དང༌། ཡང་གཙུག་ལག་ཁང་གཅིག་ཏུ། སྟོན་པའི་དྲུང་ན་རྒྱལ་པོ་གསལ་རྒྱལ་ཐལ་མོ་སྦྱར་ཏེ་འདུག་པ་རྣམས་འབྲི་སྟེ། འགའ་ཞིག་བྱང་ཆུབ་མཆོག་ཏུ་ལུང་བསྟན་པའི་སྐབས་སོ། །༼ཟི༽ དེ་ནས་གྲོང་བརྡལ་མེ་ཙུ་རུ་དི་མཚོན་པའི་གྲོང་དང༌། གཙུག་ལག་ཁང་ན་སྟོན་པ་ཆོས་གསུང་པ་དང༌། དེའི་ཁང་བཟང་ན་སྟོན་པས་རྒྱལ་པོ་གསལ་རྒྱལ་ལ་ཆོས་གསུང་པ་དང༌། སྒོ་དྲུང་ནས་བྲམ་ཟེ་གཅིག་ཤིང་རྟར་བཞུགས་རལ་གྲི་དང༌། རྔ་ཡབ་ཅོད་པན་ཐོགས་ཏེ་འགྲོ་བ་དང༌། ཤིང་དྲུང་བསྐམ་སེ་བ་གཅིག་ན། སྟོན་པ་བཞུགས། རྒྱལ་པོ་དར་བབ་གཅིག་ཕྱག་འཚལ་བ་དང༌། དམག་ཚུར་ཡོང་བ་དང་ཕར་ལྡོག་པ་དང༌། གྲོང་ཁྱེར་གཅིག་ཏུ་སྟོན་པས་སྐྱེས་པ་བུད་མེད་མང་པོ་ལ་ཆོས་གསུང་པ་དང༌། འོད་འཕྲོ་བ་འབྲི། ཤཱཀྱ་ལྷག་མ་རྣམས་བདེན་པ་ལ་བཀོད་པའི་སྐབས་སོ། །༼འི༽ ཡང་རྒྱལ་པོའི་ཕོ་བྲང་དང་བཅས་པ་ན། ཕོ་བྲང་ནང་ན་རྒྱལ་པོས་བྲམ་ཟེ་ལ་གསུང་འབྱོན་པ་དང༌། གྲོང་ཁྱེར་གྱི་ཕྱི་རོལ་བྱ་རྒོད་ཕུང་པོའི་རི་ལ། སྟོན་པ་དགེ་འདུན་རྣམས་ལ་ཆོས་སྟོན་པའི་སྐུ་མདུན་དུ། བྲམ་ཟེ་དེ་ཡང་ཞུ་བ་ཞུ་བའི་ཚུལ་བྱ། དེ་ནས་སྟོན་པ་འཁོར་བཅས་ལམ་ལ་ཕེབས་པའི་ཚུལ་དང༌། གངྒའི་ལྷོ་ཕྱོགས་ཀྱི་གྲོང་ཁྱེར་གཅིག་གི་དབུས་སུ་བཞུགས་ཤིང་བྲམ་ཟེ་དེས་མཆོད་སྟོན་གསོལ་བ་དང༌། གྲོང་ཁྱེར་དེའི་ནུབ་སྒོ་ནས་བྱོན། བྱང་ཕྱོགས་སུ་འཁྱོགས། གངྒའི་ཚུར་འགྲམ་ནས་མི་སྣང་བར་མཛད་པ་དང༌། གཞན་སྐྱེ་བོ་སྣ་ཚོགས་པ་ནི། སྡོད་གྲུ་དང༌། ཤིང་ལེབ་
དང༌། ར་སྐྱལ་སོགས་ལ་འཇུས་ཏེ་གངྒ་ལ་འགྲོ་བ་ཏེ། ཚུར་འགྲམ་ནས་མི་སྣང་བ་སོགས་ཀྱི་རིགས་འདི་ལ། རྣམ་པ་གསལ་བ་ཞིག་འབྲི་དཀའ་བར་འདུག་ཀྱང༌། འདི་ལྟར་བྱ་སྟེ། ཚུར་འགྲམ་ཏུ་སྐུ་གསལ་པོ་གཅིག་དང་འཇའ་འོད་བན་བུན་གྱི་དཀྱིལ་ན་རིབ་སེ་བ་ཞིག་འབྲི། ཕར་ལོགས་སུ་ཡང་འོད་ཀྱི་དཀྱིལ་ན་རིབ་སེ་ཞིག་དང༌། དེ་དྲུང་ན་སྐུ་གསལ་བ་འོད་འཕྲོ་བ་ཞིག་འབྲི། གངྒའི་བྱང་ངོས་ཡངས་པ་ཅན་མཚོན་པའི་གྲོང་ཁྱེར་གྱི་ནང་ན། ཁང་པ་ཆེན་པོ་གཅིག་ལ་ཁང་བཟང་དུ་མ་ཡོད་ཅིང་སྒོ་བཞི་པ། གྲོང་ཁྱེར་དེའི་ལྟག་ན་གཙུག་ལག་ཁང་ཡོད་པ་ན། སངས་རྒྱས་འཁོར་བཅས་བཞུགས་ཤིང༌། ཁྱིམ་བདག་གཅིག་དང་ལི་ཙ་བྱི་མང་པོ། དེ་བཞིན་གཤེགས་པ་ལ་བཀའ་མཆིད་འབུལ་བའི་ཚུལ་དང༌། གྲོང་ཁྱེར་གྱི་དབུས་ཀྱི་ཁང་པ་ཆེན་པོ་དེའི་ནང་གི་ཕྱོགས་བཞིའི་ཁང་བཟང་བཞི་ཀར་ན། སངས་རྒྱས་འཁོར་བཅས་ལ་མཆོད་སྟོན་གསོལ་བ། ཤར་མ་ན་ཁྱིམ་བདག་ཅུང་ཟད་རྒན་ཉམས་ཡོད་པ་ཞིག ལྷོ་མ་ན་ཁྱིམ་བདག་མོ་གཅིག ནུབ་མ་ན་གཞོན་ནུ་གཅིག བྱང་མ་ན་བུ་མོ་གཅིག་རྣམས་ཐལ་མོ་སྦྱར་བའི་ཚུལ་འབྲི། ཕྱོགས་བཞིའི་སྒོ་ནང་ནས་དགེ་སློང་རེ་རེ་ལྟ་བའི་ཚུལ་དང༌། སྒོ་བཞིའི་ཕྱི་ན་ལི་ཙ་བྱི་འགའ་རེ་འགའ་རེ་འདུས་ཏེ་གཏམ་སྨྲ་བ་འབྲི། སྒོ་ནང་ཕྱོགས་བཞི་ཆར་ན་ཕྱི་ཁྱམས་རེ་ཡོད་པ་ལ་གཡོག་ཕོ་མོ་ལས་ཀྱི་མཐའ་སྣ་ཚོགས་བྱེད་པ་དག་འབྲིའོ། །དེ་ནས་ཡུལ་ལྗོངས་དེའི་ཕྱོགས་སྦ་དང༌། སྙུག་མའི་ནགས་མང་པོ་ཡོད་པའི་གྲོང་ཁྱེར་ཆུང་ངུ་གཅིག་གིས་འགྲམ་གྱི་སྐྱེད་མོས་ཚལ་ན། སྟོན་པ་ཉིད་བཞུགས་ཤིང༌། གློ་རྟེན་ལ་ཅུང་ཟད་སྙེས་པའི་ཚུལ་གྱིས་བཞུགས་པ་དང༌། སྐུ་མདུན་དུ་དགེ་སློང་གཅིག་ཞུ་བ་ཞུ་བ་དང༌། གྲོང་ཆུང་སྣ་ཚོགས་
དང༌། ཕུག་དང༌། ཤིང་དྲུང་རྩ་སྤྱིལ་སོགས་ཡུལ་ལྗོངས་དེའི་གནས་མ་ངེས་པ་རྣམས་ན་དགེ་སློང་མང་པོ་དག་འཁོད་པའི་ཚུལ་འབྲིའོ། །དེ་དག་དང་ཉེ་བའི་མཚོ་འགྲམ་ཞིག་ན་གཙུག་ལག་ཁང་ཞིག་ཡོད་པ་ན། བཅོམ་ལྡན་འདས་བཞུགས་པ་དང༌། སྔར་གྱི་གྲོང་ཁྱེར་ཆེ་བ་དེ་ཕྱོགས་སུ་བསོད་སྙོམས་ལ་འབྱོན་པ་དང༌། ཙ་ས་ལའི་མཆོད་རྟེན་གྱི་འཁྲིས་ཤིང་དྲུང་གཅིག་ཏུ་བཞུགས་པ་ནས། ཀུན་དགའ་བོ་ལ་བཀའ་སྩོལ་བ་དང༌། ཀུན་དགའ་བོ་ཅང་མི་ཞུ་བ་དང༌། དེ་ནས་ཡང་ཤིང་དྲུང་གཅིག་ན་བཅོམ་ལྡན་འདས་བཞུགས། ཤིང་དྲུང་གཞན་གཅིག་ན་ཀུན་དགའ་བོ་འདུག་པ་དང༌། བཅོམ་ལྡན་འདས་ཀྱི་དྲུང་ན་བདུད་སྡིག་ཅན་ཐལ་མོ་སྦྱར་བའི་ཚུལ་གྱི་འདུག་པ་དང༌། ས་གཡོ་བའི་ལྟས་ཆུ་འཁྲུགས་པ་དང༌། རི་འགུལ་དང༌། ཁང་པ་འཁྱོགས་པ་སོགས་འབྲིའོ། །ཡང་དེའི་ཕྱོགས་གཅིག་ཏུ་དགེ་སློང་གཅིག་གིས་དགེ་སློང་ཐམས་ཅད་བསྡུས་ཤིང༌། སྟོན་པའི་དྲུང་དུ་འདུས་ནས་ཆོས་ཉན་པ་དང༌། དེ་ནས་ཕར་ལམ་ལ་གཤེགས་ཤིང༌། ཡངས་པ་ཅན་ལ་ཕྱི་ལྟས་ཀྱི་གཟིགས་པའི་ཚུལ་འབྲི་སྟེ། རྒྱལ་བོའི་ཁབ་དང་ཡངས་པ་ཅན་གྱི་གདུལ་བྱ་མཐར་ཕྱིན་པའི་སྡེ་ཚན་ནོ། །༼ཡི༽ དེ་ནས་རུ་རྟའི་གྲོང་དང༌། དུམ་བུའི་གྲོང་དང༌། ཨ་མྲའི་གྲོང་དང༌། ཛམ་བུའི་གྲོང་དང༌། རྫི་གྲོང་དང༌། ཤུར་པའི་གྲོང་དང༌། ལོངས་སྤྱོད་ཀྱི་གྲོང་དང༌། གྲོང་ཆུང་བརྒྱད་པོ་རྣམས་སུ་གཤེགས་ནས། ཤིང་ཤ་པའི་ཚལ་ན་བཞུགས། དེར་ཡང་ས་གཡོས་སྐར་མདའ་ལྷུང༌། ཕྱོགས་དམར་ཞིང་འབར་བར་གྱུར། བར་སྣང་ནས་ལྷ་རྣམས་རྔ་བརྡུང་བ། དེ་ནས་གྱད་ཡུལ་སྡིག་པ་ཅན་གཤེགས་པ་སྟེ། སྟོན་པ་འཁོར་བཅས་ལམ་ལ་ཕེབས་ཚུལ་དང༌། ཛ་ལུ་དཀའི་
ཚལ་ཞེས་བྱ་བ་སྐྱེད་མོས་ཚལ་འདྲ་བ་གཅིག་ན་བཞུགས་པ་དང༌། གྱད་དང་སྐྱེ་བོ་མང་པོ་འོང་ཞིང༌། སྟོན་པའི་སྤྱན་སྔར་ཆོས་ཉན་པ་དང༌། དེའི་མཐའ་ཅིག་ཏུ་མགར་བའི་བུ་བཙུན་པ་ཞུ་བ་འབུལ་བ་དང༌། དེ་ནས་ཡང་ཕྱོགས་གཅིག་ཏུ་བཙུན་དའི་ཁང་པའི་ཁྱམས་སུ། བཅོམ་ལྡན་འདས་འཁོར་བཅས་ལ་ལྕགས་གཞོང་གི་སྣོད་ནས། འབྲས་ཅན་བཟང་པོ་ཞུ་བ་དང༌། ཡང་སྟོན་པ་འཁོར་བཅས་ཡུལ་གཞན་ལ་གཤེགས་ཏེ། ཆུ་ཞིག་བརྒལ་བ་དང༌། མི་རིང་བར་གཟིམས་པའི་ཚུལ་དང༌། ཀུན་དགའ་བོས་གསོལ་ལྷུང་དུ་ཆུ་བོ་དེ་ནས་ཆུ་ལེན་པའི་ཚུལ་དང༌། ཤིང་རྟ་མང་པོ་ཆུའི་ཕར་ལོགས་སུ་འགྲོ་བ་དང༌། ཆུ་དེའི་ཞབས་འཁྲུད་པ་དང༌། ཡང་ལམ་དུ་བཞུགས་པ་ལ། གྱད་གཡོག་མང་པོ་དང་བཅས་པ་ཅིག་མཇལ་བ་དང༌། སྟོན་པས་དེ་ལ་སྟོན་པ་དང༌། དེ་རས་གསེར་མདོག་ཟུང་གི་ན་བཟའ་འབུལ་ཞིང༌། སྐུ་ལ་གསོལ་བ་དང༌། དེ་ནས་སྟོན་པའི་སྐུ་ཤིན་ཏུ་ཁ་དོག་གསལ་བ་མཚོན་བྱེད་དུ་འོད་ཟེར་དཔག་ཏུ་མེད་པ་འཕྲོ་བ་ལ་དགེ་སླཽང་རྣམས་གྱི་ཐེ་ཚོམ་ཞུ་བ་དང༌། དེ་ནས་ཆུ་བོ་གཅིག་གི་ནང་དུ་བཞུགས་ཏེ། སྐུ་ཁྲུས་མཛད་པ་དང༌། ཆུ་འགྲམ་དུ་ན་བཟའ་གཅིག་པས་བཞུགས་པ་དང༌། བཙུན་དའི་ཐེ་ཚོམ་གཅོད་པ་དང༌། ཆུ་བོ་དེའི་བར་འགྲམ་གྱི་ཕྱོགས་གཅིག་ཏུ་གཟིམས་པའི་ཚུལ་ལས། དྲུང་དུ་ཀུན་དགའ་བོ་བཞེངས་པ་དང༌། དེ་ནས་ཡང་ཕར་བྱོན་ཏེ་ཡུལ་ལྗོངས་གཅིག་གི་སྨད་ན་གྱད་ཀྱི་གྲོང་ཁྱེར་ཡོད་པ། སྟོད་ན་སྐྱེད་ཚལ་འདྲ་བ་ལྗོན་ཤིང་སྣ་ཚོགས་ཀྱིས་བརྒྱན་པའི་མཐའ་གཉིས་ན། ས་ལའི་སྡོང་པོ་ཤིན་ཏུ་ཆེ་བ་ཡོད་པ། དེའི་དབུས་སུ་གཟིམས་ཁྲི་དབུ་སྔས་དང་བཅས་པ་བཤམས་ཤིང༌། ཚལ་དེར་ཕེབས་པ་དང༌། ཁྲི་ལ་གཟིམས་པའི་ཚུལ་དང༌། གྲོང་ཁྱེར་དེའི་ཕྱོགས་གཅིག་ན། གྱད་མང་པོ་འཚོགས་
པ་ལ་དགེ་སློང་གཅིག་གིས་གཏམ་སྨྲ་བ་དང༌། གྱད་བུད་མེད་འཁོར་དང་བཅས་པ་ཡར་ཡོང་བ་དང༌། ཚལ་དེའི་ཕྱོགས་གཅིག་ཏུ་དེ་དག་ལ་ཆོས་གསུང་པ་དང༌། ཚུལ་གྱི་ཕྱི་རོལ་ཏུ་ཀུན་དགའ་བོས་གྱད་རྣམས་ལ་བསླབས་པའི་གནས་འབོགས་པ་དང༌། དེ་རྣམས་གྲོང་ཁྱེར་དུ་ལྡོག་སྟེ་འགྲོ་བ་དང༌། ཡང་སཱ་ལ་ཟུང་གི་ཚལ་སྔ་མ་བཞིན་ཚར་གཅིག་བྲིས། སྟོན་པ་གློ་རྟེན་ལ་སྙེས་པའི་ཚུལ་གྱི་ས་ལ་བཞུགས་ཤིང༌། སྐུ་མདུན་ན་དགེ་སློང་ལུས་ལས་འོད་ཆེར་འཕྲོ་བ་ཞིག་འདུག་པ་དང༌། དེ་ལངས་ཏེ་ཕྱི་ལ་འགྲོ་བ་དང༌། ཀུན་དགའ་བོ་བཞུགས་ཁྲིའི་རྐང་ལ་འཇུས་ཏེ། སྤྱན་ཆབ་འབྱིན་པའི་ཚུལ་དང༌། དེའི་གཡོན་ཟུར་ཕྱོགས་ཐག་རིང་བ་ཞིག་གི་ནམ་མཁའ་ལ། སྤྲིན་གྱི་སྒྲིབས་པའི་གསེབ་ནས། རི་རབ་ཀྱི་རྩེ་སུམ་ཅུ་རྩ་གསུམ་གྱི་གྲོང་ཁྱེར་མཚོན་བྱེད་ལ། གཞལ་མེད་ཁང་ཞིག་ན་དྲི་ཟ་པི་ཝཾ་བརྡུང་བ་ཞིག་དང༌། སྒོ་དྲུང་ན་ཡང་དེ་འདྲ་བའི་བཻ་ཌུརྻའི་པི་ཝཾ་བརྡུང་བ་ཞིག་བྱ། དེ་དང་དྲི་ཟའི་སྒོ་སྲུང་གཏམ་སྨྲ་བ་དང༌། ཁང་བཟང་ནང་གི་དྲི་ཟ་དེ་ལ་ཡང༌། སྒོ་སྲུང་དེས་གཏམ་སྨྲ་བ་འབྲི། དེ་ནས་དྲི་ཟའི་རྣམ་པ་དེ་གཉིས་ཁང་བཟང་གི་ཕྱི་རོལ་དུ། པི་ཝཾ་གི་རྒྱུད་ཡོངས་རྫོགས་ཡོད་པར་བརྡུང་བ་དང༌། རྒྱུད་ཕྱེད་ཙམ་བཅད་སྙམ་བྱས་ཏེ་བརྡུང་བ་དང༌། གཅིག་རྒྱུད་ཐམས་ཅད་བཅད་ནས་འཁྲིས་སུ་བཞགགཅིག་གི་རྒྱུད་བཅད་ཀྱང་ཕྱག་ཏུ་ཐོགས་ནས་གླུ་ལེན་པའི་ཚུལ་འབྲི། དེའི་ཕྱོགས་གཅིག་ན་སྟོན་པས་དྲི་ཟ་དེ་ལ་ཆོས་སྟོན་པའི་རྣམ་པ་ཞ། སཱ་ལ་ཟུང་གི་ཚལ་དང་དེའི་བར་གསར་རིས་ཕྲ་མོ་ཞིག་གི་སྦྲེལ་ལོ། །སཱ་ལ་ཟུང་གིས་ཚལ་སྟེང་མ་དེའི་སྒོ་དྲུང་ན། ཀུན་ཏུ་རྒྱུ་རྒས་འཁོག་པ་ཞིག་དང༌། དགེ་སློང་ཞིག་གཏམ་འདྲི་བ་དང༌། ཚལ་དེའི་ནང་ཕྱོགས་གཞན་ཞིག་ན། སྟོན་པས་ཀུན་ཏུ་རྒྱུ་དེ་ལ་ཆོས་གསུང་པ་དང༌། དེའི་
ལུས་ལས་འོད་འཕྲོ་ཞིང༌། དེ་དགེ་སློང་དུ་གྱུར། ཚལ་གྱི་ཕྱི་རོལ་དུ་དེ་མཉམ་བཞག་བཅས་ཏེ་མྱ་ངན་ལས་འདས་པ། མུ་སྟེགས་ཅན་རྣམས་ཀྱི་མུ་སྟེགས་པའི་གཟུགས་སུ་མཐོང་བའི་བཀོད་པ་གཅིག གཞན་རྣམས་ཀྱི་དགེ་སློང་གི་གཟུགས་སུ་མཐོང་བའི་བཀོད་པ་གཅིག མུ་སྟེགས་རྣམས་ཀྱི་ཁྱོགས་བཏེགས་ཀྱང་མ་ཐེགས། རྫིང་བུའི་དབུས་སུ་རྡོ་རྟེགས་ལ་བཞག་ནས་ཞུགས་ལ་འབུལ་རྒྱུའི་རྫིང་གི་ཆུ་ལ་བྱིང་ཞིང༌། ཆུའི་སྲོག་ཆགས་ཀྱིས་སྨུགས་པས་ཆུ་འགྲམ་ནས་དོན་ཅིང་བྲོས་པ་དང༌། དགེ་སློང་རྣམས་ཀྱིས་ཁྱོགས་ཀྱང་ཐེག ཆུ་ལ་བྱིང་ཞིང་སྲོག་ཆགས་ཀྱིས་གནོད་པ་མེད་པ། མུ་སྟེགས་ཀྱི་མེ་སྤར་བས་མ་འབར། དགེ་སློང་རྣམས་ཀྱིས་སྤར་བས་འབར་བ་ལ་སྐྱེ་བོ་མང་པོ་ལྟ་བ་འབྲི། ཡང་སཱ་ལ་ཟུང་གི་ཚལ་གསུམ་པ་ཞིག་ཀྱང་བྱས་ཏེ། གཟིམས་ཁྲིས་སྟེང་དུ་གཟིམས་པ་དང༌། སྐུའི་མཐའ་དགེ་སློང་རྣམས་ཀྱིས་སྐོར་བ་ལ། གཟིམས་པའི་ངང་ནས་ཆོས་གསུང་པ་དང༌། ནམ་མཁའ་ལ་བཞུགས་ནས། སྐུ་སྟོད་ཀྱི་ན་བཟའ་གསོལ་ནས་དགེ་སློང་རྣམས་ལ་སྟོན་པ་འོད་ཟེར་དཔག་ཏུ་མེད་པ་འཕྲོ་བ། དེའི་མཐའི་གཡས་གཡོན་རྒྱབ་སྟེང་ཕྱོགས་རྣམས་ལྷའི་ཁྲོམ་ཆེན་པོ་གོ་མ་ཚམས་མེད་པ་དང༌། མདུན་གྱི་ཕྱོགས་ཚལ་གྱི་ཕྱི་ན་མིའི་འགྲོ་བ་འཁོར་རྣམ་པ་བཞི། སྐྱེས་པ་བུད་མེད་སོགས་གནས་པ་དང༌། བྱ་དང་གཅན་གཟན་དང་རི་དྭགས་དང༌། རྟ་གླང་ལ་སོགས་སྲོག་ཆགས་དུ་མ་ཡོད་པའང་འབྲི། མཆོད་པའི་བཀོད་པ་སྣ་ཚོགས་པ་ཐོགས་པ་དང༌། ནམ་མཁའ་ནས་མེ་ཏོག་གི་ཆར་ཤས་ཆེ་བ་དང༌། གོས་དང་རིན་པོ་ཆེ་དང༌། གཞན་ཡང་མཆོད་པའི་ཡོ་བྱད་ཀྱི་ཆར་པ་ཡང་ཐོ་རེ་བ་འབྲི། དེ་ནས་དེའི་ཕྱི་རོལ་གྱི་ཕྱོགས་གཅིག་ནས། ལྕགས་ཀྱི་སྒྲོམ་བུ་དཀྱུས་རིང་པོ་ཁ་གཅོད་ཅན་ཁ་
གཅོད་ཀྱི་སྟེང་དུ་གཟོ་ཁྱད་ཀྱི་ཁེབས་དང་ལྡན་པ། གྱད་ཀྱི་བཏེགས་པ་ལ་ཐེགས་པ་དང༌། མཆོད་པ་མང་པོ་འབུལ་བ་དང༌། སླར་བཏེགས་པས་ཐེགས་པའི་ཚུལ་དང༌། སྒྲོམ་གྱད་བརྒྱད་ཀྱི་བཏེགས་ནས། མཐའ་སྐོར་དུ་མཆོད་པ་བྱེད་མཁན་མང་པོས་སྐོར། རས་བལ་གྱི་ཁུར་ཐོགས་པ་མང་པོ་དང༌། རས་ཁ་དོག་སྣ་ཚོགས་མང་པོ་དང༌། གསེར་གྱི་བུམ་པ་ཐོགས་པ་སོགས་ཀྱིས་སྐོར་ནས་འགྲོ་བའི་ཚུལ་དང༌། གྲོང་ཁྱེར་གཅིག་གི་ནུབ་སྒོ་ནས་འཛུགས་པའི་ཚུལ་དང༌། དབུས་ནས་འགྲོ་བའི་ཚུལ་དང༌། ཤར་སྒོ་ནས་འཐོན་པའི་ཚུལ་དང༌། ཆུ་བོ་གཅིག་བརྒལ་འགྲོ་བའི་ཚུལ་དང༌། ཆུའི་ཕ་རོལ་མཆོད་རྟེན་གྱི་འགྲམ་དུ་བཞུགས་སུ་གསོལ། ལམ་དེ་དག་ཐམས་ཅད་དུ་མེ་ཏོག་དང༌། སྤོས་དང་ན་བཟའི་ཆར་འབབ་པ་དང༌། ནམ་མཁའ་ནས་ལྷ་རྣམས་རོལ་མོ་བརྡུང་བའི་བཀོད་པ་བྱ། དེར་ཤིང་གི་ཕུང་པོའི་སྟེང་དུ་ལྕགས་ཀྱི་སྒྲོམ་བུ་བཞག་སྟེ། མི་རྣམས་ཀྱིས་མེ་སྤར་བའི་ཚུལ་བྱས་པ་ལས། མེ་མ་འབར་བའི་རྣམ་པ་འབྲི། དེའི་དྲུང་དུ་དགེ་སློང་ཞིག་གིས་གྱད་ལ་སོགས་པའི་མི་རྣམས་ལ་གཏམ་སྨྲ་བ་དང༌། དེ་རྣམས་མཆོད་པ་བྱེད་པ། ཡང་དེ་ཁའི་ཁྲིས་སུ་དགེ་སློང་འོད་སྲུང་ཆེན་པོ་དགེ་སློང་མང་པོའི་འཁོར་གྱི་སྐོར་ནས་ཡོང་བ་དང༌། ལྕགས་ཀྱི་སྒྲོམ་བུ་ཁ་ཕྱེ་ནས་གདུང་ལ་ལྟ་བ་དང༌། རས་ཟུང་ལྔ་བརྒྱ་མཚོན་བྱེད་འབུལ་བ་དང༌། ཡང་ཁ་བཀབ་སྟེ་སྒྲོམ་བུ་དེ་ཙནྡན་གྱི་ཕུང་པཽའི་སྟེང་དུ་བཞགམེ་རང་འབར་དུ་བྱུང་བའི་ཚུལ་བྱ། དེ་ནས་ཡང་དེ་དང་ཉེ་བར་གསེར་གྱི་བུམ་པས་འོ་མ་བླུག་ཏེ་མེ་བསད་པ་དང༌། སོལ་བའི་དབུས་ནས་མེ་ཏོག་གི་སྡོང་པོ་ཆེན་པོ་ཞིག་སྐྱེས་པ་དང༌། གདུང་སྒྲོམ་སླར་ཁ་ཕྱེ་བས་ཚེམས་ཆེ་བ་བཞི་རིང་བསྲེལ་གྱི་ཕུང་པོ་དང༌། ཆོས་གོས་གཉིས་ཁ་དོག་མ་ཉམས་ཤིང་མ་ཚིག་པར་འདུག་པ་དང༌། ཕྱོགས་གཅིག་ཏུ་རིང་བསྲེས་དེ་དག་གསེར་གྱི་བུམ་པར་བཅུག་སྟེ། ཁྲི་
ཆེན་པོ་ལ་བཞག་སྟེ་མཆོད་པ་འབུལ་བ་དང༌། དེ་དག་ལས་ཞུགས་ལ་ཞེན་པ་དང༌། གདུང་སྒྲོམ་ཁ་ཕྱེ་བ་དང༌། གསེར་གྱི་བུམ་པར་རིང་བསྲེལ་བཅུག་པའི་གནས་སྐབས་དེ་དག་ལས། དགེ་སློང་དང་སྐྱེ་བོ་དང་ལྷ་མང་པོ་མཐའ་སྐོར་བའི་ཚུལ་བྱ། དེ་དག་ནི་མྱ་ངན་ལས་འདས་པ་ཉེ་བར་བསྟན་པའི་སྡེ་ཚན་ནོ། །༼རི༽ དེ་ནས་ཡང་བཀོད་པ་གཞན་ཡུལ་ལྗོངས་གཉིས་ཡོད་པ་ཞིག་བྱ་སྟེ། ཚུར་ཕྱོགས་དེའི་དབུས་ན་གྲོང་ཁྱེར་དང༌། ཆུ་རླུང་དང༌། ཕར་ཕྱོགས་ན་མཆོད་རྟེན་དང༌། གསེར་གྱི་བུམ་པ་འོད་འཕྲོ་བ་ལ། སྐྱེ་བོ་མང་པོ་མཆོད་པ་བྱེད་པ་འབྲི། གྲོང་ཁྱེར་གྱི་ནང་ན་གྱད་གོ་མཚོན་ཐོགས་པ་དང༌། བུད་མེད་རྒན་གཞོན་རྣམས་ཀྱང་མདའ་གཞུ་དང་རལ་གྲི་ཐོགས་པ་སོགས་འབྲི། རྟ་དང་གླང་པོ་དང་ཤིང་རྟ་བཤམས་པ་དང༌། གྲོང་ཁྱེར་གྱི་ཕྱི་རོལ་དང༌། ཡུལ་ལྗོངས་ཕྲ་མོ་མི་འདྲ་ཙམ་བདུན་དང༌། དམག་ཚོ་ཚན་བདུན་ཡོད་པ་ལ། གཉིས་ཀྱི་མགོ་མི་བྲམ་ཟེ་ཡིན་ལ། གཞན་དམག་དཔོན་རྒྱལ་རིགས་ཀྱི་རྣམ་པ་འབྲིའོ། །དེ་རྣམས་རེ་རེའི་དྲུང་དུ། བྲམ་ཟེ་འཁོར་དང་བཅས་པ་གཅིག་རིམ་གྱི་སོང་ནས་སོ་སོར་གཏམ་སྨྲ་བའི་ཚུལ་དང༌། སྔར་གྱི་བུམ་པ་མཆོད་པ་དང་བཅས་པའི་ཉེ་སྐོར་དེར། བྲམ་ཟེ་གཉིས་གྱད་གཉིས། རྒྱལ་རིགས་བཞི་རྣམས་མཐའ་ནས་སྐོར་བ་དང༌། དབུས་སུ་གསེར་གྱི་བུམ་པ་ཁ་ཕྱེ་ནས། བྲམ་ཟེ་དེས་དེ་དག་ཆ་བརྒྱད་དུ་བགོ་བ་དང་དེ་དག་སོ་སོའི་ལག་ཏུ་གསེར་གྱི་བུམ་པ་སྐུ་གདུང་གི་གང་བ་རེ་རེ་གཏོད་པ་དང༌། བྲམ་ཟེ་གཅིག་གི་གདུང་སོལ་རྣམས་འཁྱེར་བ་དང། བྲམ་ཟེ་རྒན་པ་དེ་ཉིད་ཀྱིས་ལྕགས་ཀྱི་སྒྲོམ་བུ་འཁྱེར་བ་དང། གྲོང་ཁྱེར་གྱི་དབུས་སུ་གྱད་དེ་རྣམས་གྱིས་མཆོད་རྟེན་བྱེད་པ་དང༌། དམག་ཚོ་བདུན་པོ་དེ་དག་ཀྱང༌། སྐུ་གདུང་གི་བུམ་པ་གླང་པོ་
ཆེ་ལ་བཀལ་ཏེ་མཆོད་པ་དང་བཅས་ནས་གྱེས་འགྲོ་བའི་ཚུལ་དང༌། རྒྱལ་པོའི་ཚུལ་ཅན་གཉིས་ཀྱིས་ཚེམས་མཆེ་བ་རེ་ཐོགས་ཏེ་འགྲོ་བ་དང༌།ཚེམས་མཆེ་བ་གཅིག་ལྷའི་དབང་པོ་བརྒྱ་བྱིན་གྱི་ཐོགས་ནས་ནམ་མཁའ་ལ་འགྲོ་བ། དེ་ནས་ར་སོགས་ཀྱི་ཆོད་པའི་ཡུལ་ལྗོངས་གཅིག་ཏུ། དམག་ཚོ་གཅིག་རྣམས་ཆུ་བོ་གཅིག་གི་འགྲམ་དུ་ཁྲུ་མ་བཏབ་ཏེ་གནས་པ་ལས། སྐུ་གདུང་གི་བུམ་པ་དང་ཚེམས་མཆེ་བ་གཅིག་ཀླུས་ཁྱེར་ཏེ། ཀླུ་རྣམས་ཆུ་ལ་སོང་བའི་བཀོད་པ་དང༌། ཡུལ་ལྗོངས་གཉིས་ཡོད་པའི་ཕར་ཕྱོགས་དེར། གྲོང་ཁྱེར་རྒྱལ་པོའི་ཕོ་བྲང་དང་བཅས་པའི་འཁྲིས་ན་སྐྱེད་མོས་ཚལ་གཅིག་དང༌། སྐྱེད་མོས་ཚལ་དེར་བྲམ་ཟེ་གཅིག་གི་བཀོད་པ་བྱས་ནས། རི་མོ་མཁན་གྱི་རི་མོ་འབྲི་བའི་ཚུལ་དེ་ཡང་སྐུ་བལྟམས་པ་དང༌། བདུད་བརྟུལ་བ་དང༌། ཆོས་འཁོར་བསྐོར་བ་དང༌། ཆོ་འཕྲུལ་དང༌། ལྷ་བབས་དང༌། མྱང་འདས་ཀྱི་བར་དུ་བྲིས་པ་མཚོན་བྱེད་གཉིས་རི་མོ་ཕྲ་མོས་ཧལ་ཚོན་དུ་བྲི། གཞོང་པ་མར་ཁུས་བཀང་བ་བདུན་དང་ཙནྡན་གྱི་ལྡེ་གུས་བཀང་བ་གཅིག་བཤམས། དེར་རྒྱལ་པོ་མ་སྐྱེས་དགྲ་ཡང་བྱོན་ཞིང༌། བྲམ་ཟེ་དེས་རི་མོ་ལ་རྟེན་བཤད་བྱེད་པའི་ཚུལ་བྱ། དེ་ནས་རྒྱལ་པོ་དེ་འགྱེལ་བ་དང༌། མར་ཁུའི་ནང་དུ་ལུས་བཅུག་པ་དང༌། ཙནྡན་གྱི་ལྡེ་གུའི་ནང་དུ་བཅུག་པས་སོས་པའི་ཚུལ་འབྲི། དེའི་ཕྱི་རོལ་ཏུ་གླང་པོ་ཆེ་ལ་ཆིབས་པས་ཀྱང་ལྷུང་བའི་ཚུལ་བྱ། དེ་ནས་ཕྱོགས་གཞན་ཞིག་ཏུ། དཔུང་ཡན་ལག་བཞི་མདུན་དུ་བཤམས། རྒྱལ་པོ་ཉིད་ཁྲི་ལ་འདུགམདུན་དུ་བྲམ་ཟེ་ཡོད་པ་ལ་བཀའ་གནང་བའི་ཚུལ་བྱ། ཡུལ་དེ་ཁའི་ཕྱོགས་གཅིག་གི་རི་ལ། འོད་སྲུང་ཆེན་པོ་མཉམ་བཞག་བྱེད་པ་དང༌། སའི་མཐིལ་ལ་འོད་སྲུང་འཁོར་དགེ་སློང་མང་པོས་སྐོར་ནས། ཡུལ་ལྗོངས་ཚུར་ཕྱོགས་ལ་
ཆས་པའི་རྣམ་པ་དང༌། ཡུལ་ལྗོངས་གཉིས་པོའི་བར་དེ་དག་ཏུ་འོད་སྲུང་འཁོར་བཅས་ལ། རས་ཟུང་འབུལ་བ་མང་པོ་བྱུང་བའི་བཀོད་པ་དང༌། རྒན་ཞུགས་གཅིག་ཚུར་ཡོང་བའི་རྣམ་པ་ཡང་བྱ། འདི་ལ་རྒྱུས་སྡེ་ཚན་གོང་མ་དང་འབྲེལ་བ་ཡིན་ཡང་ཡུལ་ལྗོངས་ཀྱི་བཀོད་པ་ཕྱི་མ་དང་འབྲེལ་བར་བྱ་དགོས་པ་ཡིན། དེ་དག་ནི་སྐུ་གདུང་ཆ་བརྒྱད་དུ་བགོས་པའི་བསྐོར་རོ། །༼ལི༽ ཡང་བཀོད་པ་གཞན་ནི། གྱད་གྱི་གྲོང་ན་འོད་སྲུང་ཆེན་པོའི་འཁོར་རྣམ་པ་བཞི་ལ་ཆོས་སྟོན་པའི་ཚུལ་དང༌། ནམ་མཁའ་ནས་ལྷ་རྣམས་འཕྱ་སྨོད་བྱེད་པའི་ཚུལ་དང༌། འོད་སྲུང་ཆེན་པོས་དགེ་སློང་གཞན་ཞིག་ལ་བཀའ་སྩལ་ཏེ། དེས་ཀྱང་དགེ་སློང་ཚོགས་པ་ལ་ཁྲིམས་སུ་བཅའ་བ་སྨྲ་བ་དང༌། འོད་སྲུང་ལམ་གཞན་གཅིག་ལ་བྱོན། དགེ་སློང་དེས་གཙོ་མཛད་པའི་དགེ་སློང་གཞན་རྣམས་ལམ་གཅིག་ཤོས་དེ་ལ་ཡོང་བའི་ཚུལ་བྱ། ཡུལ་ལྗོངས་ཕར་ཕྱོགས་དེར་རྒྱལ་པོའི་ཕོ་བྲང་དང་ཉེ་བར་འོད་སྲུང་འབྱོན་པ་དང༌། རྒྱལ་པོས་ཕོ་བྲང་གི་རྩེ་ནས་མཐོང་བས་སངས་རྒྱས་དྲན་ཏེ་འཕྱོངས་པ་དང༌། འོད་སྲུང་གི་སྤྲུལ་པས་བར་སྣང་ལ་བཟུང་སྟེ་ས་ལ་བཞག་པ་དང༌། ཕོ་བྲང་གི་ནང་དུ་འོད་སྲུང་ཁྲི་ལ་བཞུགས་པའི་དྲུང་དུ་རྒྱལ་པོ་འདུག་པ་དང་ཕོ་བྲང་དེའི་གཡས་ཕྱོགས་སུ་བྱ་རྒོད་ཕུང་པོའི་རི་དང༌། དུར་ཁྲོད་བསིལ་བའི་ཚལ་གྱི་བར་ནྱ་གྲོ་རྡའི་ཕུག་ཅེས་བྱ་བ། ཕུག་པ་ཆེན་པོ་གཅིག་དང༌། མཐའ་སྐོར་དུ་ཕུག་ཆུང་མང་པོ་ཡོད་པ། དགེ་སློང་རྣམས་དེར་འོངས་པའི་ཚུལ་དང༌། ཕུག་པ་ཆེན་པོའི་ནང་དུ་འོད་སྲུང་ཆེན་པོ་ལ་དགྲ་བཅོམ་པ་རྣམས་ཀྱིས་སྐོར་བ། ཕུག་ཆུང་རྩ་སྤྱིལ། ལོ་སྤྱིལ་སོགས་ན་དགེ་སློང་སྣ་ཚོགས་པ་ཡོ་བྱད་དང་ལྡན་པ་དང༌། ཡོ་བྱད་སྦྱོར་མི་སོགས་ཀྱང་འབྲི། ཕྱོགས་ཡངས་པ་གཅིག་ཏུ་འོད་སྲུང་དགེ་འདུན་དང་བཅས་པ།
དགེ་སློང་ཆེན་པོ་གཅིག་ལ་འོད་སྲུང་གི་གཏམ་སྨྲ་ཞིང་ཚུལ་ཤིང་གཏོད་པ། དགེ་སློང་དེ་ས་སྒང་གཞི་གཅིག་གི་ཕྱོགས་བཞིར་བལྟ་ཞིང༌། མཆིལ་མ་འབྱིན་པ་དང༌། དེ་ལ་འོད་སྲུང་གི་གཏམ་སྨྲ་བ་དང༌།ཕུག་དེ་ཁ་འདྲ་བ་གསུམ་གྱི་བཀོད་པ་འབྲི་སྟེ། གཅིག་ཏུ་ཁྲིའི་སྟེང་ན་སྣམ་སྦྱར་མང་པོ་བརྩེགས་པ་ལ། ཀུན་དགའ་བོ་བཞུགས་ཤིང༌། དགྲ་བཅོམ་པ་རྣམས་ཀྱིས་མཐའ་བསྐོར་ཏེ་ཆོས་ཉན་པ་དང༌། ནམ་མཁའ་ནས་ལྷ་དང་མཐའ་བསྐོར་ནས་འབྱུང་པོ་རྣམས་ཀྱི་མཆོད་པ་འབུལ་བའི་བཀོད་པ་བྱ། གཉིས་པ་དེར་གཞན་སྔ་མ་དང་འདྲ་བ་ལས། ཉེ་བ་འཁོར་གཙོ་བོར་བྱེད། གསུམ་པ་དེར་གཞན་སྔར་དང་འདྲ་བ་ལས། འོད་སྲུང་གཙོ་བོར་བྱེད། དེ་རྣམས་ཡུལ་བཀོད་སྔ་མ་དེ་ལ་ཡོད་པར་བྱེད་ཅིང༌། དེ་དག་ལས་གཞན་ཕྱོགས་ཆུ་དང་རི་སོགས་མང་པོས་ཆོད་པ། ཡུལ་ཆུང་ཞིག་གི་ནགས་ཀྱི་དབུས་ན་ཁང་བཟང་ཡོད་པ་ཞིག་ན། དགེ་སློང་གཅིག་མཉམ་བཞག་མཛད་པའི་མདུན་ན། དགེ་སློང་གཅིག་ལངས་ཏེ་གཏམ་སྨྲ་བ་འབྲི། དེའི་སྟེང་གི་ནམ་མཁའ་ལ་མེ་དཔུང་བཞི་འབར་པའི་ཕྱོགས་བཞི་ནས་ཆུ་རྒྱུན་བཞི་འབབ་པ་གཅིག་ན། ཡུལ་གྲོང་གཅིག་ན་སྐྱེས་མོས་ཚལ་གཅིག་ཏུ་དགེ་སློང་གཅིག་མཉམ་བཞག་མཛད་པ་ལ། སློབ་མས་མདུན་ནས་གདམས་ངག་སྨྲ་བ་དང༌། དེ་དང་ཕུག་ཀྱི་ས་ཕྱོགས་ཀྱི་བར་དེར། དགེ་སློང་དཔོན་སློབ་གཉིས་ཕར་འབྱོན་པ་དང༌། ཚུར་ལྡོག་པ་གཉིས་ཀ་འབྲི་སྟེ། དེ་དག་ནི་འོད་སྲུང་གིས་མཛད་པ་བཀའ་བསྡུ་དང་པོའི་སྐོར་རོ། །༼ཤི༽ དེ་ནས་བསྟན་པའི་གཏད་རབས་ཕྱི་མ་རྣམས་ལ། འཕགས་པ་ཀུན་དགའ་བོས་མཛད་པ་མཚོན་བྱེད། འཕགས་པ་ཉིད་རིན་པོ་ཆེའི་ཁྲི་ལ་བཞུགས་ནས། འཁོར་རྣམ་བཞིའི་ཚོགས་དང༌། ལྷ་ཀླུ་གནོད་སྦྱིན་སོགས་འདུས་པ་
ལ་ཆོས་སྟོན་པ་འབྲི། ཤ་ནའི་གོས་ཅན་གྱིས་མཛད་པ་མཚོན་ཡང་དེ་ཁ་དང་འདྲ་བ་ཞིག་འབྲི། ཉེར་སྦས་ཀྱི་མཛད་པ་རྣམས་ཀྱི་ནང་ནས། འདི་འབྲི་བར་བྱ་སྟེ། རི་ནགས་ཚལ་གྱིས་བརྒྱན་པ། ཕུག་པ་དང་གཙུག་ལག་ཁང་ཡོད་པ་གཅིག་བྱ། དེར་དགྲ་བཅོམ་པ་དེས། རབ་བྱུང་དང་སྐྱེ་བོ་མང་པོ་ལ་ཆོས་སྟོན་པ་དང༌། ས་མཐིལ་དུ་ཡུལ་གྲོང་ངོ་བོ་གཅིག་ཡིན་ཀྱང་བཀོད་པ་སོ་སོར་འབྲི་དགོས་ཏེ། ཆུང་ངུ་དྲུག་ཙམ་བྱ་སྟེ། དང་པོ་འབྲུའི་ཆར། གཉིས་པ་གོས་ཀྱི་ཆར། གསུམ་པ་དངུལ། བཞི་པ་གསེར། ལྔ་པ་ནོར་བུ། དྲུག་པར་འདོད་ཡོན་སྣ་ཚོགས་པའི་ཆར་འབབ་ཅིང༌། མི་མང་པོ་ཡང་རི་ནས་བབས་ཏེ་གྲཽང་དེ་དང་དེ་དག་ཏུ་འགྲོ་བ་འབྲི། གྲོང་བདུན་པོ་ནི། གྲོང་ཁྱེར་ཆེ་བར་བྱས་ཏེ། དེའི་དབུས་ཀྱི་ཕྱོགས་གཅིག་ན་གར་མཁན་ཕོ་མོ་མང་པོ་ལ་སྐྱེ་བོ་མང་པོ་ཐམས་ཅད་ལྟ་བ་དང་ཕྱོགས་གཅིག་ན་དེ་དག་གི་མགོ་དང་མགྲིན་པ་ལ་དགེ་སློང་དེ་དག་གཅིག་གིས་མེ་ཏོག་གི་འཕྲེང་བ་འདོགས་པ་དང༌། ཕྱོགས་གཅིག་ན་གར་མཁན་དེ་རྣམས་ཀྱི་མགོ་དང་མགྲིན་པ་ཡ་ཁྱི་རོ་རུལ་བ། མི་རོ་རུལ་བ་བཏགས་ཤིང༌། ལུས་ཀྱང་རྒས་འཁོགས་སུ་བྲིས་ལ། སྐྱེ་བོ་ཐམས་ཅད་སྣ་བཀག་ཅིང་གདོང་ཕྱིར་ཕྱོགས་པས་འདུག་པ་དང༌། ཕྱོགས་གཅིག་ན་གར་མཁན་ཚུལ་ཅན་བདུད་དེ་རྣམས་དགྲ་བཅོམ་པ་དེ་ལ་ཕྱག་འཚལ་བ་དང༌། ལོགས་གཅིག་ན། དགྲ་བཅོམ་པ་ལས་དམའ་བ་ཙམ་ན་སངས་རྒྱས་བཞེངས་སྐུ་འདྲ་བ་ལ། དགྲ་བཅོམ་པ་ཐལ་མོ་སྦྱར་བ་ལྷའི་གཟུགས་འགྱེལ་བ་དང༌། རླུང་འཚུབ་སྣ་ལྔར་ཡལ་བ་རྣམས་འབྲི། གྲོང་ཁྱེར་གྱི་ཕྱི་རོལ་དུ། ཁྲི་མཐོན་པོ་ལ་དགྲ་བཅོམ་པ་དེ་བཞུགས་ཤིང༌། འཁོར་དཔག་ཏུ་མེད་པས་བསྐོར་བ་ལ་ཆོས་སྟོན་པ། འོད་ཟེར་གྱི་ཕྱོགས་ཐམས་ཅད་ཁྱབ་པ་དང༌། ཡང་རི་དང་ཕུག་སོགས་སྔ་མ་དེ་ཁ་འདྲ་བ་ཞིག་ལ། ཕུག་པ་དེ་ཤིང་བུ་ཕྲ་མོས་ཕལ་ཆེར་
ཁེངས་པ་དང༌། གཙུག་ལག་ཁང་གི་ནང་དུ་དགྲ་བཅོམ་པས་སློབ་མ་དགེ་སློང་མང་པོ་ལ་ཆོས་སྟོན་པ་འབྲི། དེ་དག་ནི་ཉེར་སྦས་ཀྱིས་བདུད་བརྟུལ་ཞིང་ས་སྟེང་དགྲ་བཅོམ་པས་ཁྱབ་པར་མཛད་པའི་སྐོར་ཡིན་ནོ། །དྷི་དྷི་ཀ་ར་དང༌། ནག་པོ་དང༌། ལེགས་མཐོང་རྣམས་ཀྱི་མཛད་པ་ཡང༌། ཀུན་དགའ་བོའི་སྐབས་ཀྱི་དེ་ཁ་དང་འདྲ་བ་དེ་འབྲི།ད་ནི་བྲིས་སྐུའི་གཙོ་བོ་ལ། བཅོམ་ལྡན་འདས་འཁོར་ཕུན་སུམ་ཚོགས་པ་དང་བཅས་པ་འབྲི་ཚུལ་ནི། དབུས་སུ་སྟོན་པ་ཉིད་ཁྲི་རྒྱབ་ཡོལ་སོགས་བཀོད་པ་ལྷུན་ཆགས་ཤིང༌། སྐུ་ཚད་ཆེ་ལ་འཚམ་པ། རྒྱབ་ཡོལ་རྒྱན་སྣ་དྲུག་སོགས་ཇི་ལྟར་མཛེས་པ་དང༌། སྲོག་ཆགས་བཞུགས་གདན་ནི། སྲོག་ཆགས་རིན་ཆེན་པདྨ་ཉི་ཟླ་དར་གྱི་བློ་སྟན་ཞེས་གདན་དྲུག་བརྩེགས་སུ་བྱེད་པ་ལེགས་ཤིང༌། སྲོག་ཆགས་ནི་སེང་གེ་ཁོ་ནའམ། གླང་སེང་སྤེལ། རིན་ཆེན་ནི་རིན་པོ་ཆེའི་ཁྲི། པདྨ་ཉི་ཟླ་གོ་བར་ཟད། དར་གྱི་བློ་སྟན་ནི། ཟབ་ཆེན་གྱི་ཕྱི་གཡོགས་བྱས་པའི། འབོལ་གདན་ལྟ་བུ་སྟན་ནང་ཚད་ཅན་ནོ། །སྐུའི་གཡས་གཡོན་གྱི་རིམ་པ་དང་པོ་ལ། བྱང་ཆུབ་སེམས་དཔའ་རྣམས་འབྲི་སྟེ། སྐུའི་གཡས་སུ་འཇམ་དབྱངས་དང༌། སྤྱན་རས་གཟིགས། གཡོན་དུ་ཀུན་ཏུ་བཟང་པོ་དང༌། ཕྱག་རྡོར་ཞི་བའོ། །དེ་ལ་ཀུན་བཟང་སྐུ་མདོག་དམར་པོ། བུམ་པ་དང་པདྨ་དམར་པོ་ཉི་མས་མཚན་པ་འཛིན་པའོ། །འདི་རྣམས་ཀྱི་དབུའི་ཐོར་གཙུག་རྩེ་དང༌། སྟོན་པའི་སྐུ་དཔུང་མཉམ་པ་ཙམ་རིམ་པ་གཉིས་པ་ལ། ཉན་ཐོས་ཆེན་པོ་བཞི་འབྲི་སྟེ། མཆོག་ཟུང༌། ཀུན་དགའ་བོ། །འོད་སྲུང་སྟེ་བཞིའོ། །ཡང་ན་སྒྲ་གཅན་འཛིན། འོད་སྲུང། ཀ་ཏའི་བུ། ཉེ་བ་འཁོར། དེ་རྣམས་ཕྱག་ཐལ་མོ་སྦྱར་བའི་རྣམ་པ་བྱང་སེམས་ཉན་ཐོས་དེ་དག་བཞེངས་པ་བཞུགས་པ་ཇི་ལྟར་འོས་ཤིང་འཚམ་
པས་ཆོག །རིམ་པ་གསུམ་པ་བཞུགས་ཁྲིའི་འོག་ཐད་ལ་ཡོང་པས། མདུན་གྱི་དབུས་སུ་རྒྱལ་པོ་དང༌། བཙུན་མོ་འདུད་པའི་རྣམ་པ་དང༌། གཡས་སུ་ཚངས་པ་སེར་པོ་ཤ་ཉམས་རྒྱས་པ། གདོང་བཞི་རལ་པའི་ཐོར་གཙུག་ཅན། ཕྱག་འོག་མ་གཉིས་ན་རིལ་བ་སྤྱི་བླུགས་དང༌། དབྱུ་གུ་འཛིན་པ། རི་དྭགས་ཀྱི་པགས་པའི་སྟོད་གཡོགས་སྨད་གཡོགས་ཅན། ཚངས་སྐུད་དང་ལྡན་པ། དེའི་རྒྱབ་ཏུ་ཁྱབ་འཇུག་སྔོན་པོ། ཕྱག་འོག་མ་གཉིས་འཁོར་ལོ་དང༌། བེ་ཅོན་དཀར་བོ་འཛིན་པ། ཞི་བ་རྒྱན་ཐམས་ཅད་ཀྱི་བརྒྱན་པ། གཡོན་ཕྱོགས་ཀྱི་དང་པོ་བརྒྱ་བྱིན་སེར་པོ་དཔྲལ་པ་མིག་གཅིག་ཕྲེད་ལ་ཡོད་པ། ཕྱག་འོག་མ་གཉིས་ན་འཇིག་རྟེན་པའི་རྡོ་རྗེ་དགུ་པ་དང༌། རིན་པོ་ཆེ་འཛིན་པ་ཞི་བ་དར་དང་རིན་པོ་ཆེས་བརྒྱན་པ། དེའི་རྒྱབ་ཏུ་དབང་ཕྱུག་དམར་པོ་ཡིད་ཙམ་ཁྲོ་བ། རལ་པའི་ཐོར་གཙུག་ལ་ཟླ་བས་བརྒྱན་པ། ཕྱག་འོག་མ་གཉིས་ཀྱི་ཌ་མ་རུ་དང་རྩེ་གསུམ་འཛིན་པ། སྟག་ལྤགས་ཀྱི་ཤམ་ཐབས་དང་སྦྲུལ་གྱི་དོ་ཤལ་ཅན་མགུལ་རྒྱན་གྱི་དབུས་ན་ཐོད་སྐམ་ཡོད་པ། རྒྱན་ལྷག་མ་རིན་པོ་ཆེ་སྟེ། དེ་ལྟར་ལྷ་བཞི་ཆར་ཡང༌། ཕྱག་དང་པོ་གཉིས་ཐལ་མོ་སྦྱར་བ། ཡོན་བདག་ལ་སོགས་པ་འབྲི་ན་དེའི་ཇི་ལྟར་འོས་པ་འབྲི། གོ་སྐབས་ཡངས་ན་འཁོར་ཕྲ་མོའི་རིགས། སེམས་དཔའ་སེམས་མ། དགེ་སློང༌། དགེ་སློང་མ། སྐྱེས་པ། བུད་མེད། ཀླུ་དང་གནོད་སྦྱིན་ལ་སོགས་པ་ཇི་ལྟར་འོས་པ་འབྲི་ཞིང༌། བར་སྣང་ལ་གསེར་གྱི་མེ་ཏོག་གི་ཆར་དང༌། ངང་པ། ངུར་བ། རྨ་བྱ། ཁྲུང་ཁྲུང་ལ་སོགས་རིན་པོ་ཆེའི་ཕྲེང་བ་དང༌། མེ་ཏོག་གི་ཕྲེང་བ་དང༌། འབྲས་བུའི་སྙེ་མ་མཆུས་འཛིན་པ། གཡས་གཡོན་དུ་ཆ་ཡོད་པ་འབྲི། སྟེང་གི་ནམ་མཁའ་མཐོ་ས་ལ། སྤྲིན་གསེབ་ནས་ལྷ་
དང་ལྷ་མོ་མང་པོས་མཆོད་རྫས་སྣ་ཚོགས་ཐོགས་པའོ། །གང་ལྟར་ཡང་ལྷུན་ཞིང་བརྗིད་ཆགས་པ། མཐོང་བ་ཙམ་གྱི་དད་པ་འདྲེན་པ་འབྲི་བར་བྱའོ།། །།དེ་ལྟར་ན་སྟོན་པའི་རྣམ་ཐར་བྲིས་ཡིག་འདི་ནི། ས་ལ་སྤྱོད་པའི་དབང་ཕྱུག་ཕུན་ཚོགས་རྣམ་པར་རྒྱལ་བའི་གསུང་གི་བསྐུལ་ནས། ཀུན་དགའ་སྙིང་པོས་ཕོ་བྲང་ཆེན་པོར་ངེས་པར་བརྗོད་པའོ། ༈ །སྭ་སྟི། མཉམ་མེད་བུ་རམ་ཤིང་པའི་རྣམ་ཐར་མཆོག །འགྲོ་ཀུན་རབ་དགའི་ས་ལ་འགོད་པའི་ཆེད། །སྙིང་པོའི་དོན་མཐོང་བློ་གྲོས་ཡངས་པ་ཡིས། །རྒྱ་མཚོ་ཆེ་བས་ཆུ་རླུང་འབབས་པ་བཞིན། །མི་ཟད་པར་དུ་སྒྲུབ་པའི་དགེ་བའི་མཐུས། །ནམ་མཁའི་མཐར་ཐུག་སེམས་ཅན་ཐམས་ཅད་ཀུན། །ཤཱཀྱའི་རྒྱལ་པོའི་མཛད་པའི་ཚུལ་རྣམས་དང༌། །རིང་པོར་མི་ཐོགས་དེ་འདྲ་ཁོ་ནར་ཤོག། །།སརྦ་མངྒ་ལཾ། །
ཤོག་སྟོང།