བརྒྱ་བཞིའི་ཆོ་ག་ཇོ་ནང་ལུགས།
བརྒྱ་བཞིའི་ཆོ་ག་ཇོ་ནང་ལུགས་ཞེས་བྱ་བའི་དབུ་ཕྱོགས་བཞུགས་སོ།
འདིར་བརྒྱ་བཞིའི་ཆོ་ག་སྟོན་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །སྟོན་པ་བདེ་བར་གཤེགས་པ་ཡིས། །བསྟན་པའི་དམ་ཆོས་རིན་ཆེན་འདི། །ནམ་ཞིག་ནུབ་ལ་ཉེ་བའི་དུས། །སྔགས་པ་ནང་དབྱེན་བྱེད་པ་འབྱུང༌། །སྔགས་པའི་ནང་དགྲས་བསྟན་པ་དཀྲུག །དེ་ནི་བསྒྲལ་བའི་ཞིང་ཡིན་པ། །ཐུབ་པའི་བདེན་པའི་དགྲ་བཟློག་ཕྱིར། །བན་བོན་ལོག་ལྟ་དམ་ལོག་རྣམས། །བདུད་བཞི་ཤེར་སྙིང་བཟློག་པར་གྱིས །རབ་ཏུ་སྔགས་ལ་སྤྱོད་པར་བྱ། །ཨོཾ་སྭཱ་སྟི། དཀོན་མཆོག་གསུམ་ལ་ཕྱག་འཚལ་ལོ། །བརྒྱ་བཞིའི་གཏོར་མ་གཏོང་བར་འདོད་པ་འདི་ལ་གསུམ་སྟེ། སྔོན་འགྲོ་དངོས་གཞི་རྗེས་ཀྱི་བྱ་བའོ། །དང་པོ་ལ་གཉིས། དཀྱིལ་འཁོར་འབྲི་བ་དང༌། བརྒྱ་བཞིའི་རྫས་བསགས་པའོ། །དང་པོ་ནི། ས་ཕྱོགས་གཙང་མར་མཎྜལ་པདྨ་འདབ་བརྒྱད་ཀྱི་ནང་དུ་ཐུབ་པའི་ཕྱག་གཡས་པ་གན་རྐྱལ་གྱི་ཕྱག་རྒྱ་ཕྱག་
མགོ་ཡོངས་རྫོགས་ཕྱག་དར་གྱི་ཕྱེད་ཙམ་བཅས་པ་བྲི། ཕྱག་མཐིལ་དུའང་པདྨ་འདབ་བརྒྱད་ཀྱི་ལྟེ་བར་ཐུབ་པའི་སྐུ་གཟུགས་བཤམས། དེའི་མཐར་ཉེར་སྤྱོད་ཀྱིས་བསྐོར། གཉིས་པ་རྫས་བསགས་པ་ནི། སཱཙྪ་རབ་གནས་བྱས་པ་བརྒྱ། རྩི་མར་གྱི་མར་མེ་བརྒྱ། འབྲུ་ཟན་གྱི་གཏོར་མ་བརྒྱ། འབྲས་ཟན་གྱི་ངར་མི་བརྒྱ་སོགས་ཕྱག་མཐིལ་དུ་ཕྱོགས་བཞིར་བཀོད། གཞན་ཡང་མཆོད་པའི་བྱེ་བྲག་ཇི་འབྱོར་དང༌། མཆོད་པ་ཉེར་སྤྱོད། གླུད་རྫོངས་དང་བཅས་པ་ཐམས་ཅད་ཚོགས་པར་བྱའོ། །གཉིས་པ་དངོས་གཞི་ལ་བདག་ཉིད་ལྷར་གསལ་བ། སྔོན་གྱི་འབྱུང་ཁུངས། སྤྱན་དྲངས་པ། བཞུགས་སུ་གསོལ་བ། བརྒྱ་བཞི་མཆོད་པ། མཆོད་པ་གཞན་འབུལ་བ། བསྟོད་པ། འཕྲིན་ལས་བཅོལ་བ་སྟེ་བརྒྱད་དོ། །དང་པོ་ནི། ཐོག་མར་མཆོད་པ་བྱིན་རླབས་བྱ། ནམ་མཁའ་དང་མཉམ་པའི་སེམས་
ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ ལན་བདུན་བརྗོད། སངས་རྒྱས་ཆོས་དང་ཚོགས་ཀྱི༴ སོགས། སེམས་ཅན་ཐམས་ཅད་བདེ་བ་དང་སོགས་བྱའོ། །རང་ཉིད་སྐད་ཅིག་གིས་ཐུབ་པར་གསལ་བའི་སྙིང་གར་ཨཱཿལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་གསེར་མདོག་ཅན། དེ་ལས་འོད་འཕྲོས། མདུན་གྱི་ནམ་མཁར་ཐུབ་པ་ཆེན་པོ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་བཛྲ་ས་མཱ་ཛཿ ཨོཾ་ཤཱཀྱ་མུ་ནི་ས་པཱ་རི་ཝ་ར་ཨརྒྷཾ་པྲ་ཏིཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ། ནས་ཤཔྟ་ཨཱཿཧཱུཾ། གི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །ནས། སངས་རྒྱས་འགྲུབ་པར་ཤོག །གི་བར་ལན་གསུམ། ཨོཾ་སྭ་བྷཱ་ཝས། སྟོང་པར་སྦྱངས། སྟོང་པའི་ངང་ལས་རིན་པོ་ཆེའི་ཁྲིའི་ཕྱོགས་བཞིར་བདུད་བཞི། མཚམས་བཞིར་སེངྒེ་བཞིས་བཏེགས་པའི་སྟེང་དུ་པདྨ་དང་ཟླ་བའི་དཀྱིལ་འཁོར་ལ་ཧཱུཾ་ལས་རྡོ་རྗེ་སེར་པོ་ཧཱུཾ་གིས་མཚན་པ་ཡོངས་སུ་གྱུར་པ་ལས། བདག་ཉིད་ཐུབ་པ་ཆེན་པོ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ། གཡས་ས་གནོན། གཡོན་ཏིང་ངེ་འཛིན་གྱི་ཕྱག་རྒྱ་ཅན། ཞབས་རྡོ་རྗེ་སྐྱིལ་ཀྲུང་གིས་བཞུགས་ཤིང༌། ན་བཟའ་ཆོས་གོས་ངུར་སྨྲིག་གསོལ་བ། དབུའི་གཙུག་ཏོར་དངབཅས་པ། ཚངས་པར་སྤྱོད་པའི་ཆ་ལུགས་ཅན། དེའི་དཔྲལ་བར་ཨོཾ། མགྲིན་
པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཐུབ་པ་ཆེན་པོའི་རྣམ་པར་བཛྲ་ས་མཱ་ཛཿ [སྤྲོ་ན་མ་ལུས་སེམས་ཅན་སོགས། བཅོམ་ལྡན་བསྐལ་བ་སོགས།༼ཆ༽]ཨོཾ་བཛྲ་ཨཾ་ཀུ་ཤ་ཛཿ ནས་ཨོཾ་བཛྲ་ཨ་བེ་ཤ་ཡ་ཨ། གཉིས་སུ་མེད་པར་ཐིམ། དེ་དག་གི་ཕྱག་རྒྱ་སྤྱི་འགྲོས་ལྟར་མཛད་དེ། ཡང་སྙིང་གིས་ཧཱུཾ་ལས་འོད་འཕྲོས། དེ་བཞིན་གཤེགས་པ་རིགས་ལྔ་འཁོར་དང་བཅས་པ་བཛྲ་ས་མཱ་ཛ། ཁྱེད་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ། །ཞེས་གསོལ་བ་བཏབས་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུཾ། ཞེས་གསུང་ཞིང་དབང་བསྐུར་བས་མི་བསྐྱོད་པས་དབུ་བརྒྱན། ན་མོ་རཏྣ་ཏྲ་ཡ་ཡཱ། ན་མོ་ཤཱཀྱ་མུ་ནི་ཡེ་ཏ་ཐཱ་ག་ཏ་ཡ། ཨར་ཧཱ་ཏེ་སམྱག་སཾ་བུདྡྷ་ཡ། ཏཱདྱ་ཐཱ། ཨོཾ་མུ་ནི་མཧཱ་མུ་ནི་ཤཱཀྱ་མུ་ནི་ཡེ་སྭཱཧཱ། ཨོཾ་ཨཱཿབཛྲ་ཧཱུཾ་སྭཱཧཱ། ཞེས་བཟླས་ཅི་ནུས་བྱ། ༈ སྐབས་འདིར་ཟབ་མདོ་ཅི་ནུས་བཟླས་པར་བྱ། [མདུན་བསྐྱེད་ནི་བརྒྱ་བཞིའི་དཀྱིལ་འཁོར་དབུས་ཀྱི་ཐུབ་སྐུ་ལ་དམིགས་ཏེ། མདུན་གྱི་ནམ་མཁར་དེ་བཞིན་དེ་གཤེགས་པ་སོགས། ཟབ་མདོ་ཅི་ནུས་བྱ། བཟློག་པ་མི་རྒྱབ། མཆོད་བསྟོད། མཆན] གོང་བཞིན་ཨརྒྷཾ་སོགས་ཀྱིས་མཆོད། ཐབས་མཁས་ཐུགས་རྗེས་སོགས་ཀྱིས་བསྟོད།གཉིས་པ་ནི། དེ་ནས་རོལ་མོ་དབྱངས་དང་བཅས་པའི། མདོས་འདོན་པ། ཀྱེ་སུམ་ཅུ་རྩ་གསུམ་ལྷ་ཡི་ཡུལ་གྱི་དབུས། ཁང་བཟང་རྣམ་པར་རྒྱལ་བའི་ཕོ་བྲང་ནས། །རིན་ཆེན་ཁྲི་ལ་ལྷ་དབང་བརྒྱ་བྱིན་ནི། །དགའ་མགུར་
འདོད་ཡོན་དག་ལ་སྤྱོད་པའི་ཚེ། །སྔོན་གྱི་ལས་དང་འཕྲལ་རྐྱེན་གྱིས་བསྐུལ་ཏེ། །གློ་བུར་བདུད་བཞིའི་ཐབས་ཀྱིས་ནོན་པ་གྱུར། །བདེ་མེད་སྡུག་བསྔལ་དྲག་པོས་གཟིར་བ་ལ། །བཅོམ་ལྡན་ཤཱཀྱའི་གཙོ་ལ་སྐྱབས་སོང་བས། །དེ་ཚེ་བཅོམ་ལྡན་ཤཱཀྱ་ཐུབ་པ་ཡིས། འགྲོ་བ་ཀུན་ལ་ཕན་ཕྱིར་ཏིང་འཛིན་གྱིས། །སྤྲུལ་པའི་དཀྱིལ་འཁོར་ཆེན་པོ་ལེགས་བཤམས་ནས། །མཆོད་སྦྱིན་ཕྱག་རྒྱས་མཐུན་པའི་རྫས་བསགས་ནས། །སྐྱེ་མཆེད་མུ་བཞིའི་གནས་ནས་བདུད་བཞི་རྣམས། །ཐུགས་རྗེས་ལྕགས་ཀྱུས་བཀུག་ནས་ཕྱག་སོར་བཞིར། །བཀོད་ནས་བདུད་བཞིར་མཆོད་སྦྱིན་བྱིན་པ་ཡིས། །བརྒྱ་བྱིན་ནད་དང་སྡུག་བསྔལ་ཀུན་ལས་ཐར། །ལན་གསུམ། མཐར་གསུམ་པ་ནི། ཨ་མྲྀ་ཏས་སངས། སྭ་བྷ་ཝས་སྦྱངས། དཀྱིལ་འཁོར་སྟོང་པ་ཉིད་དུ་འགྱུར། སྟོང་པའི་ངང་ལས་པདྨ་འདབ་མ་བརྒྱད་པ་ལྟེ་བར་གེ་སར་དང་བཅས་པའི་སྟེང་མཆོད་སྦྱིན་གྱི་ཕྱག་རྒྱ་ཕྱག་གཡས་པ་གན་རྐྱལ་དུ་གནས་པར་གྱུར། རང་གི་ཐུགས་ཀ་ནས་འོད་ཟེར་འཕྲོས་སྐྱེ་མཆེད་མུ་བཞིའི་གནས་ནས་བདུད་བཞི་འཁོར་དང་བཅས་པ་སྤྱན་དྲངས། ཀྱཻ། ནམ་མཁའ་མཐའ་ཡས་ལྷ་ཡི་ཕོ་བྲང་ནས། །མི་གནས་མྱང་འདས་ཐོབ་ལ་བར་དུ་གཅོད། །ཕུང་པོའི་བདུད་ཚོགས་འཁོར་དང་བཅས་པ་རྣམས། །གནས་འདིར་སྤྱན་འདྲེན་མཆོད་ཕྱིར་གཤེགས་སུ་གསོལ། །རྣམ་ཤེས་མཐའ་ཡས་ལྷ་ཡི་ཕོ་བྲང་ནས། །གནས་ལུགས་མངོན་གསུམ་མཐོང་ལ་བར་དུ་གཅོད། །
ཉོན་མོངས་བདུད་ཚོགས་འཁོར་དང་བཅས་པ་རྣམས། །གནས་འདིར་སྤྱན་འདྲེན་མཆོད་ཕྱིར་གཤེགས་སུ་གསོལ། །ཅི་ཡང་མེད་པའི་ལྷ་ཡི་ཕོ་བྲང་ནས། །འདོད་པའི་ལོངས་སྤྱོད་ཐོབ་ལ་བར་དུ་གཅོད། །ལྷ་བུའི་བདུད་ཚོགས་འཁོར་དང་བཅས་པ་རྣམས། །གནས་འདིར་སྤྱན་འདྲེན་མཆོད་ཕྱིར་གཤེགས་སུ་གསོལ། །འདུ་ཤེས་མེད་མིན་ལྷ་ཡི་ཕོ་བྲང་ནས། །ཚེ་སྲོག་མཐའ་རུ་ཕྱིན་ལ་བར་དུ་གཅོད། །འཆི་བདག་བདུད་ཚོགས་འཁོར་དང་བཅས་པ་རྣམས། །གནས་འདིར་སྤྱན་འདྲེན་མཆོད་ཕྱིར་གཤེགས་སུ་གསོལ། །བཞི་པ་བཞུགས་སུ་གསོལ་བ་ནས། ཀྱཻ་ཕུང་པོའི་བདུད་ནི་དཀར་པོ་འཁོར་ལོ་འཛིན། །ཉོན་མོངས་བདུད་ནི་སེར་པོ་ནོར་བུ་འཛིན། །ལྷའི་བུ་བདུད་ནི་དམར་པོ་པདྨ་འཛིན། །འཆི་བདག་བདུད་ནི་ནག་པོ་རལ་གྲི་འཛིན། །རང་རང་འཁོར་གྱི་ཚོགས་ཀྱི་ཡོངས་སུ་བསྐོར། །ཕྱག་སོར་བཞི་ཡི་རྩེ་མོར་བཞུགས་སུ་གསོལ། །རྒྱས་པར་ན་འགུགས་འདྲེན་སོགས་ཡིག་རྙིང་ན་གསལ།ལྔ་པ་བརྒྱ་བཞིའི་མཆོད་པ་ནི། རྫས་རྣམས་སྔགས་དྲུག་ཕྱག་དྲུག་གི་བྱིན་རླབས་ནི། ཆོས་ཉིད་རྣམ་དག་གི་ཕྱག་རྒྱ་ཐལ་མོ་ཁོང་སྟོང་སྙིང་གར་སྦྱར། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭཱ་བྷཱ་ཝ་ཤུདྡྷོ྅ཧཾ། ལན་གསུམ། ཞེས་པས། མ་དག་པ་རྣམས་སྦྱངས་ནས་སྟོང་པ་ཉིད་དུ་བསམ། ནམ་མཁའ་མཛོད་ཀྱི་ཕྱག་རྒྱ་ཐལ་མོ་སྦྱོར་བ་ལས་ཚིག་བར་པ་གསུམ་བཅག་པ་དཔྲལ་བ་རུ་བྱ། ན་མཿསརྦ་ཏ་ཐཱ་ག་ཏ་བྷྱོཿབི་ཤྭ་མུ་ཁེ་བྷྱཿསརྦ་ཐད་ཁཾ་ཨུཏྒ་ཏེ་སྥ་ར་ཎ་ཨེ་མཾ་ག་གཱ་ན་ཁཾ་སྭཱཧཱ། ལན་གསུམ། ཞེས་པས། མགྲོན་སོ་སོའི་མོས་པ་དང་མཐུན་པའི་ཡོ་བྱད་རྣམས་ནམ་མཁའི་ཁམས་ཐམས་ཅད་ཁྱད་པར་བསམ། བདུད་རྩི་འཁྱིལ་བའི་ཕྱག་རྒྱ་ཐལ་མོ་ཕྱིར་བསྐྱེད། མཐེ་བོང་བསྣོལ་བའི་ཐད་དུ་བྱ། ཨོཾ་བཛྲ་ཨམྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ལན་གསུམ། ཞེས་པས།
སྡུག་བསྔལ་མཐའ་དག་ཞི་བར་བྱེད་པའི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ། རྒྱ་ཆེན་ཤུགས་ལྡན་འོད་ཀྱི་ཕྱག་རྒྱ། གཡོན་ཁུ་ཚུར་སྟེང་དུ་བཞག་ལ། གཡས་པའི་ཁུ་ཚུར་སྡིགས་མཛུབ་གཏོར་མ་ལ་གཏད་དེ། ན་མཱཿསརྦ་ཏ་ཐཱ་ག་ཏ་ཨཱ་ཝ་ལོ་ཀེ་ཏེ་ཨོཾ་སམྦྷ་ར་སམྦྷ་ར་ཧཱུཾ། ལན་གསུམ། ཞེས་པས། འཕགས་པ་རྣམས་ཀྱི་སྤྱན་སྔར་མཆོད་པའི་སྤྲིན་མཐའ་ཡས་པ་དང༌། སེམས་ཅན་རྣམས་ཀྱི་སྤྱོད་ཡུལ་དུ་འདོད་པའི་ལོངས་སྤྱོད་ཟད་མི་ཤེས་པ་འབྱུང་བར་བསམ། ཡེ་ཤེས་སྐར་མདའི་ཕྱག་རྒྱ། གཡོན་སྙིང་གར་སྣོད་འདེགས་ཚུལ་དང༌། གཡས་སྐྱབས་སྦྱིན་གྱིས་ཕྱག་རྒྱ་བཅའ། ཨོཾ་ཛྙཱ་ན་ཨ་ཝཱ་ལོ་ཀི་ཏེ། ན་མ་སནྟ་སྥ་ར་ཎ་རསྨྀ་བྷ་ཝ་ས་མཱ་ཡ་མཧཱ་མ་ཎི་དུ་རུ་དུ་རུ་ཧྲཱི་ད་ཡ་ཛྭ་ལ་ནི་ཧཱུཾ། ལན་གསུམ་ཞེས་པས། ལུས་ཞིང་གི་རྡུལ་ཕྲ་རབ་དང་མཉམ་པ་འཕགས་པ་རྣམས་ལ་ཕུལ་བས་མཉེས་ཤིང༌། སེམས་ཅན་རྣམས་ཀྱང་རང་རང་གི་འདོད་ཡོན་ལ་རྩོད་པ་མེད་ཅིང་མཐུན་པའི་བསམ་པ་དང་ལྡན་པར་བསམ། དབང་བསྒྱུར་འཁོར་ལོའི་ཕྱག་རྒྱ་ནི། སེར་མོ་ནང་དུ་བསྣོལ་བ་སྤྱི་བོར་བཞག་པ་དང༌། ན་མཿས་མནྟ་བུདྡྷ་ནཾ་གྲ་ཧེ་ཤྭ་རི་པྲ་བྷཉྫ་ན་མཧཱ་སཱ་མ་ཡེ་སྭཱ་ཧཱ། ཞེས་པས། མགྲོན་ཐམས་ཅད་ཀྱང་དམ་ཚིག་ལ་གནས་ཤིང་ཕན་པ་དང་བདེ་བའི་འཕྲིན་ལས་འབའ་ཞིག་སྒྲུབ་པར་བསམ་ཞིང༌། ཕྱག་རྒྱ་རྣམས་ཕྱོགས་བཞིར་བསྟན་ཞིང་སྔགས་རྣམས་ལན་གསུམ་གསུམ་བརྗོད། [སྤྲོ་ན། བདག་གི་བསམ་པའི་ ༼ཆ༽] བསངས་
སྦྱངས། འབྲུ་གསུམ་བརྗོད། ནམ་མཁའ་མཛོད་ཀྱི་སྔགས་ལན་བདུན་ལ་སོགས་པར་བྱའོ། །ཀྱཻ་རིན་ཆེན་སྣ་ལྔའི་རྡུལ་ཚོན་ལས་གྲུབ་པའི། །རྒྱལ་བའི་སྐུ་གསུང་ཐུགས་ཀྱི་ངོ་བོ་ཉིད། །བསོད་ནམས་ཞིང་གི་མཆོག་གྱུར་ཆོས་སྐུའི་རྟེན། །རི་རབ་ཚར་དུ་དངར་བའི་མཆོད་རྟེན་བརྒྱ། །ཕུང་པོའི་བདུད་ཚོགས་འཁོར་དང་བཅས་ལ་འབུལ། །མེ་ལོང་ཡེ་ཤེས་རྣམ་དག་ཆོས་ཀྱི་སྐུ། །བཅོམ་ལྡན་མི་བསྐྱོད་རྡོ་རྗེ་སྐུ་ཐོབ་ནས། །འགྲོ་ཀུན་ཕུང་པོའི་བདུད་ལས་ཐར་གྱུར་ཅིག །[ཅེས་འདོན་མི་བཞི་ཡོད་ན་ཉེར་ལྔའམ་གང་འོས་མཐར། དེ་ནས་གོང་གི་བྱིན་རླབས་སྔགས་ཕྱག་སོགས་འོག་མ་གསུམ་ལ་རེ་རེ་བཞིན་སྦྱར། ༼ཆ༽] ཀྱཻ་སྟོང་གསུམ་ཚར་དུ་དངར་བའི་སྣོད་ནང་དུ། །འབྲི་མར་རྩི་མར་རྒྱ་མཚོ་འཁྱིལ་བའི་དབུས། །རི་རབ་ལྟ་བུའི་མར་མེའི་སྡོང་བུ་ལ། །ཉི་ཟླ་ལྟ་བུའི་འོད་འབར་སྣང་གསལ་བརྒྱ། །ཉོན་མོངས་བདུད་ཚོགས་འཁོར་དངབཅས་ལ་འབུལ། །མཉམ་ཉིད་ཡེ་ཤེས་རྣམ་དག་ཆོས་ཀྱི་སྐུ། །བཅོམ་ལྡན་རིན་ཆེན་འབྱུང་ལྡན་སྐུ་ཐོབ་ནས། །འགྲོ་ཀུན་ཉོན་མོངས་བདུད་ལས་ཐར་གྱུར་ཅིག །[འདོན་རྡུང་གོང་བཞིན་སྦྱར། ༼ཆ༽] ཀྱཻ་རབ་ཡངས་ནམ་མཁའ་ལྟ་བུའི་སྣོད་ནང་དུ། །འཆི་མེད་བདུད་རྩིའི་བཏུང་བ་མཚོ་ལྟར་འཁྱིལ། །བཟའ་དང་བཅའ་བ་རི་རབ་ལྟ་བུར་སྤུངས། །བཀོད་མཛེས་ཤ་ཁྲག་བརྒྱན་པའི་གཏོར་མ་བརྒྱ། །ལྷའི་བུའི་བདུད་ཚོགས་འཁོར་དང་བཅས་ལ་འབུལ། །སོར་རྟོག་ཡེ་ཤེས་རྣམ་དག་ཆོས་
ཀྱི་སྐུ། །བཅོམ་ལྡན་འོད་དཔག་ཏུ་མེད་ཀྱི་སྐུ་ཐོབ་ནས། འགྲོ་ཀུན་ལྷ་བུའི་བདུད་ལས་ཐར་གྱུར་ཅིག། [འདོན་རྡུང་གོང་བཞིན་གྲངས་བསོགས། མཆན།] ཀྱཻ་འབྲུ་ཟན་རིན་ཆེན་རྣམ་པ་ལྔ་ལས་བྱུང༌། །གཟུགས་མཛེས་དབྱངས་སྙན་ཡིད་དང་དབང་པོ་གསལ། །མཛེས་པ་གཅིག་ཏུ་བསྡུས་པ་ནོར་མང་ལྡན། །ཡོན་ཏན་བརྒྱ་ཕྲག་ལྡན་པའི་ངར་གླུད་བརྒྱ།། འཆི་བདག་བདུད་ཚོགས་འཁོར་དང་བཅས་ལ་འབུལ། །བྱ་གྲུབ་ཡེ་ཤེས་རྣམ་དག་ཆོས་ཀྱི་སྐུ། །བཅོམ་ལྡན་དོན་ཡོད་གྲུབ་པའི་སྐུ་ཐོབ་ནས། འགྲོ་ཀུན་འཆི་བདག་བདུད་ལས་ཐར་གྱུར་ཅིག །[བརྒྱ་ཕྲག་གི་གྲངས་སོང་མཐར།] རང་བཞིན་རྣམ་དག་ངང་དུ་རོ་གཅིག་ཀྱང༌། །སྒྱུ་མ་ལྟ་བུའི་བདུད་བཞིའི་དམག་ཚོགས་ལ། །མིག་འཕྲུལ་ལྟ་བུའི་བརྒྱ་བཞིའི་མཆོད་པ་འདི། །བྲག་ཆ་ལྟ་བུའི་དབྱངས་ཀྱིས་མཆོད་པར་བགྱི། །སྤྲུལ་པ་ལྟ་བུའི་མཆོད་པ་འདི་བཞེས་ལ། །ཆོས་དབྱིངས་ཡེ་ཤེས་རྣམ་དག་ཆོས་ཀྱི་སྐུ། །བཅོམ་ལྡན་རྣམ་པར་སྣང་མཛད་སྐུ་ཐོབ་ནས། །འགྲོ་ཀུན་བདུད་བཞིའི་དགྲ་ལས་རྒྱལ་གྱུར་ཅིག །དྲུག་པ་མཆོད་པ་གཞན་འབུལ་བ་ནི། མཆོད་པ་རྣམས་བསངས་སྦྱངས་འབྲུ་གསུམ་གྱིས་བྱིན་གྱིས་རླབས་ལ། ཀྱཻ་རྒྱ་མཚོ་ལྟ་བུར་འཁྱིལ་བའི་མཆོད་ཡོན་དང༌། །སྐུ་ལུས་དྭངས་གསལ་འབར་བའི་ཞབས་བསིལ་དང༌། །ལྟ་ན་ཤིན་ཏུ་སྡུག་པའི་མེ་ཏོག་ཚོགས། །དུད་སྤྲིན་ནམ་མཁའ་གང་བའི་བདུག་སྤོས་དང༌། །རབ་འབར་ཚར་དུ་དངར་བའི་
མར་མེ་དང༌། ཅིག་ཅར་དྲི་བཟང་འགྱེད་པའི་དྲི་ཆབ་དང༌། །རོ་ནུས་ཕུན་སུམ་ཚོགས་པའི་ཞལ་ཟས་དང༌། །སྒྲ་སྙན་རོལ་མོའི་བྱེ་བྲག་སྣ་ཚོགས་རྣམས། །བདུད་བཞི་འཁོར་དང་བཅས་པའི་ཚོགས་ལ་འབུལ། །འགྲོ་ཀུན་བདུད་བཞིའི་བར་ཆད་ཞི་གྱུར་ཅིག །མིག་གི་དགའ་སྟོན་སྤུངས་པའི་གཟུགས་མཆོག་དང༌། །བརྗོད་བྲལ་རྣ་བར་སྙན་པའི་སྒྲ་སྙན་དང༌། །དྲི་བསུང་ཕྱོགས་བཅུར་འཕྲོ་བའི་དྲི་མཆོག་དང༌། ཁ་དོག་རོ་མཆོག་ལྡན་པའི་ཞལ་ཟས་དང༌། །རེག་འཇམ་བདེ་བ་བསྐྱེད་པའི་གོས་མཆོག་སོགས། །འདོད་ཡོན་ལྔ་ཡི་མཆོད་པ་སྣ་ཚོགས་རྣམས། །བདུད་བཞི་འཁོར་དང་བཅས་པའི་ཚོགས་ལ་འབུལ། །འགྲོ་ཀུན་བདུད་བཞིས་བར་ཆད་ཞི་གྱུར་ཅིག །འཁོར་ལོ་ནོར་བུ་བཙུན་མོ་བློན་པོ་དང༌། །གླང་པོ་རྟ་མཆོག་དམག་དཔོན་རིན་ཆེན་བདུན། །རྒྱལ་སྲིད་རིན་ཆེན་སྣ་བདུན་མཆོད་པ་རྣམས། །བདུད་བཞི་འཁོར་དང་བཅས་པའི་ཚོགས་ལ་འབུལ། །འགྲོ་ཀུན་བདུད་བཞིའི་བར་ཆད་ཞི་གྱུར་ཅིག །འཁོར་ལོ་གདུགས་དང་རྒྱལ་མཚན་དུང་དཀར་དང༌། །གསེར་ཉ་དཔལ་བེ་བུམ་པ་པདྨ་དཀར། །ནམ་མཁའ་གང་བའི་བཀྲ་ཤིས་རྟགས་བརྒྱད་རྣམས། །བདུད་བཞི་འཁོར་དང་བཅས་པའི་ཚོགས་ལ་འབུལ། །འགྲོ་ཀུན་བདུད་བཞིས་བར་ཆད་ཞི་གྱུར་ཅིག །ཅེས་བརྗོད། དེ་ནས་ཤ་ཁྲག་བརྒྱན་པའི་གཏོར་མ་[འདི་ལ་དམར་གཏོར་བཞི་བཅའི་སྲོལ་ཡོད། ༼ཆ༽] ཡོད་ན་བསངས་སྦྱངས། འབྲུ་
གསུམ་གྱིས་བྱིན་གྱིས་རླབས། སམྦྷ་རས་བསྔགས་ལ་ཕུད་ཀྱིས་མཆོད་དེ། བཀོད་མཛེས་རི་རབ་ལྟ་བུའི་གཏོར་མ་འདི། །ཤ་དང་ཁྲག་གིས་བརྒྱན་ཅིང་བྱིན་རླབས་ཏེ། །བདུད་བཞི་འཁོར་དང་བཅས་པའི་ཚོགས་ལ་འབུལ། །བཞེས་ལ་ཕྱི་ནང་འགལ་རྐྱེན་ཞི་བར་མཛོད། །བདུན་པ་བསྟོད་པ་ནི། ཀྱཻ་ནམ་མཁའ་མཐའ་ཡས་སྐྱེ་མཆེད་ལ་གནས་ཤིང༌། །འགྲོ་བ་ཀུན་གྱི་གཟུགས་ཀྱི་ཕུང་པོ་ལ། །དབང་བསྒྱུར་སྟོབས་ལྡན་ཕུང་པོའི་བདུད་ཚོགས་ལ། །ཕྱག་འཚལ་མཆོད་ཅིང་གུས་པས་བསྟོད་པར་བགྱི། །རྣམ་ཤེས་མཐའ་ཡས་སྐྱེ་མཆེད་ལ་གནས་ཤིང༌། །འགྲོ་བ་ཀུན་གྱི་ཚོར་བའི་ཕུང་པོ་ལ། །དབང་བསྒྱུར་སྟོབས་ལྡན་ཉོན་མོངས་བདུད་ཚོགས་ལ། །ཕྱག་འཚལ༴ །ཅི་ཡང་མེད་པ་སྐྱེ་མཆེད་ལ་གནས་པ། །འགྲོ་བ་ཀུན་གྱི་འདུ་ཤེས་ཕུང་པོ་ལ། །དབང་བསྒྱུར་སྟོབས་ལྡན་ལྟ་བའི་བདུད་ཚོགས་ལ། །ཕྱག་འཚལ༴ །ཡོད་མིན་མེད་མིན་སྐྱེ་མཆེད་ལ་གནས་ཤིང༌། །འགྲོ་བ་ཀུན་གྱི་འདུ་བྱེད་ཕུང་པོ་ལ། །དབང་བསྒྱུར་སྟོབས་ལྡན་འཆི་བདག་བདུད་ཚོགས་ལ། །ཕྱག་འཚལ་མཆོད་ཅིང་གུས་པས་བསྟོད་པར་བགྱི། །བདུད་བཞིའི་འཁོར་དུ་གཏོགས་པའི་ཚོགས་རྣམས་ལ། །མཆོད་སྦྱིན་གཏོར་མ་རྒྱ་ཆེན་འདི་འབུལ་བས། །གནོད་ཅིང་གདུག་པའི་འཚེ་བ་ཀུན་ཞི་ནས། །འགྲོ་ཀུན་བདུད་བཞིའི་དགྲ་ལས་རྒྱལ་གྱུར་ཅིག །བརྒྱད་པ་འཕྲིན་ལས་བཅོལ་བ་ནི། ཀྱཻ་བཅོམ་ལྡན་ཤཱཀྱ་ཐུབ་པའི་བྱིན་རླབས་
དང༌། །རྟེན་འབྲེལ་བསླུ་བ་མེད་པའི་བདེན་པ་དང༌། །མཆོད་སྦྱིན་རྣམ་པར་དག་པའི་མཐུ་སྟོབས་ཀྱིས། །འགྲོ་ལ་བདུད་བཞིའི་བར་ཆད་ཞི་གྱུར་ཅིག །བདུད་བཞིའི་དམག་ཚོགས་འཁོར་དང་བཅས་པ་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས་ནས། བྱ་བྱེད་ངན་པ་མེད་པར་མཛོད། །ལོ་ཀེགས་ཟླ་ཀེག་ཞགས་ཀེག་དང༌། །ཟ་ཀེག་ཆགས་ཆེ་ཉམ་ང་དང༌། །བདུད་བཞིའི་དམག་ཚོགས་དགྲ་ལ་བསྒྱུར། །གཟུགས་སྒྲ་དྲི་རོ་རེག་བྱ་ལྡན་པའི་རྫས། །དབང་པོ་དྲུག་ལ་རྨད་བྱུང་བདེ་ཆེན་བསྐྱེད། །འདོད་དགུ་ལྡན་པའི་ཚོགས་ཀྱི་མཆོད་པ་འདི། །བདུད་བཞིའི་དམག་ཚོགས་འཁོར་བཅས་རྣམས་ལ་འབུལ། །ལུས་སེམས་ཏིང་འཛིན་ཟས་ཀྱིས་ཚིམས་གྱུར་ནས། །ཟག་མེད་ཏིང་འཛིན་ཟས་ལ་སྤྱོད་གྱུར་ཅིག །གསུམ་པ་རྗེས་ཀྱི་བྱ་བ་ལ་གཉིས། གླུད་བཏང་བ་དང་མཇུག་ཆོག་གོ །དང་པོ་ནི། འབྲས་ཟན་ནམ། བག་ཕྱེ་ལ་གླུད་སྐྱེ་མཆེད་དོད་པ༌། གླུད་རྫོང་རིན་པོ་ཆེ་དང༌། འབྲུ་སྣ་དང༌། ཟས་སྣ་གོས་སྣ། ཆང་ཕུད་གསེར་སྐྱེམས་སོགས་འདུ་བྱས་ལ། ཆབ་རྫས་ཀྱིས་བྲན་ལ། བསངས་སྦྱངས། བྱིན་གྱིས་བརླབས། སམྦྷ་རས་བསྔོས་ལ། ཀྱཻ་རིན་ཆེན་མཛེས་པའི་ངར་གླུད་རྒྱན་ལྡན་འདི། །འབྲུ་ཟན་རིན་ཆེན་ལྔ་ཡི་སྙིང་པོ་ཅན། །ཕུང་ཁམས་སྐྱེ་མཆེད་དབང་པོའི་ཡོན་ཏན་ལྡན། །སྣ་ཚོགས་རྒྱན་གྱིས་ངར་གླུད་འདི། །སྔགས་དང་ཏིང་འཛིན་ཕྱག་རྒྱའི་ཚོགས་རྣམས་ཀྱིས། །ནམ་
མཁའི་ཁམས་ཀུན་གང་བར་བྱིན་རླབས་ནས། །བདག་ཅག་དཔོན་སློབ་སྦྱིན་བདག་འཁོར་བཅས་ཀྱི། །གླུད་དུ་བདུད་བཞིའི་དམག་ཚོགས་རྣམས་ལ་འབུལ། །ནོར་ལྡན་མཛེས་པའི་ངར་གླུད་འདི་བཞེས་ཤིག །མཚར་དང་མཛེས་ལྡན་ངར་གླུད་འདིས་བཞེས་ཤིག །ལྟ་ན་སྡུག་པའི་ངར་གླུད་འདི་བཞེས་ཤིག །ཡོན་ཏན་བརྒྱ་ཕྲག་ལྡན་པ་འདི་བཞེས་ཤིག །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །འགལ་རྐྱེན་བར་ཆད་ཐམས་ཅད་ཞི་བར་མཛོད། །ཀྱཻ་རིན་ཆེན་མཛེས་པའི་ངར་གླུད་རྒྱན་ལྡན་འདི། །རྣམ་ཐོས་སྲས་ལ་འགྲན་ཞིང་ནོར་མང་ལྡན། །སྐབས་གསུམ་དབང་པོའི་ཕུན་ཚོགས་ལས་འཁྲུངས་ཤིང༌། །ནག་པོའི་སྡེ་ལས་རྒྱལ་བར་བྱེད་པ་འདི། །རིག་འཛིན་གསང་སྔགས་འཛིན་པ་བདག་ཅག་དང༌། །རྒྱུ་སྦྱོར་ཡོན་གྱི་བདག་པོའི་གླུད་དུ་འབུལ། །མི་ལས་གླུད་དགའ་མཛེས་པའི་གླུད་བཞེས་ལ། །བདུད་བཞིའི་དམག་ཚོགས་སྡང་བའི་དགྲ་ལ་བསྒྱུར། །བཟུང་བ་ཡོད་ན་ད་ལྟ་ཉིད་དུ་ཐོངས། །བཅིང་བ་ཡོད་ན་ད་ལྟ་ཉིད་དུ་ཁྲོལ། །བདུད་ཀྱི་ཁྲམ་ལ་བཏབ་ན་ཁྲམ་ཁ་ཕྱེས། །བཙན་གྱི་ཤྭ་རྡོ་བཀྱེ་ན་ཤྭ་རྡོ་ཕྱུང༌། །ཀླུ་ཡིས་བྱད་དུ་བཅུག་ན་བྱད་ཐག་ཆོད། །རྒྱལ་པོས་སྨྱོ་འབོག་གཏོང་བ་དགྲ་ལ་བསྒྱུར། །ཐེས་རང་སྲིས་ལ་རྐུ་བ་དགྲ་ལ་བསྒྱུར། །མ་མོའི་དལ་ཡམས་ཐམས་ཅད་དགྲ་ལ་བསྒྱུར། །བགེགས་རིགས་སྟོང་ཕྲག་བརྒྱད་ཅུ༴ གདོན་རིགས་གསུམ་
བརྒྱ་དྲུག་ཅུ༴ །ནད་རིགས་བཞི་བརྒྱ་རྩ་བཞི༴ །དུས་མིན་འཆི་བ་བཅོ་བརྒྱད༴ །ལོ་དང་ཟླ་བའི་བགེགས་རྣམས་དགྲ་ལ༴ །ཞག་དང་ཟ་མའི་བགེགས་རྣམས༴ །རྨི་ལམ་ངན་པ་ཐམས་ཅད༴ །བདུད་ཀྱི་དམག་ཚོགས་ཐམས་ཅད༴ །འབྱུང་པོའི་དལ་ཡམ་ཐམས་ཅད་དགྲ་ལ་བསྒྱུར། །བྱད་ཁ་རྦོད་གཏོང་ཐམས་ཅད་དགྲ་ལ་བསྒྱུར། །ཞེས་བརྗོད་ཅིང༌། གླུད་རྣམས་ཕྱོགས་བཞིར་བསྐྱལ་ལོ། །[དེ་ཡང་ཕུང་བདུད་དཀར་པོ་བྱ་མགོ་ཅན་ལན་ཆགས་འབྲུ་སྣ་བཅས་ཤར་དུ་བསྐྱལ། ཉོན་བདུད་སེར་པོ་རྟ་མགོ་ཅན་མར་མེ་རྒྱ་བཅས་ལྷོར། ལྷ་བདུད་དམར་པོ་ཁྱི་མགོ་ཅན་དམར་གཏོར་བརྒྱ་བཅས་ནུབ། འཆི་བདུད་ནག་པོ་སྦྲུལ་མགོ་ཅན་དར་མི་བརྒྱ་བཅས་བྱང་དུ། གླུད་དང་མི་ལོ་བདུད་སྟེང་དུ་བསྐྱལ་བ་བཅུག་ཚེ། འོག་གི་རྒྱབ་ཆོག་དམར་གཏོར་བྱིན་གྱིས་རླབས། མཛོད་སྔགས་ལན་བདུན་གྱིས་བསྔོས་ནས། བྷྱོཿདམར་གྱི་གཏོར་མ༴ ནས་ངང་དུ་བྷྱོཿབར་བརྗོད། མཆན།]གཉིས་པ་མཇུག་ཆོག་ནི། བདག་བསྐྱེད་ཀྱི་ལྷ་ལ་མཆོད་བསྟོད་རྒྱས་བསྡུས་གང་རུང་བྱ། ཡིག་བརྒྱ། བཟོད་གསོལ། ས་ཚྭ་སོགས་རྟེན་ལ་བརྟན་ཞུགས་བྱ། སརྦ་བྷུ་ཏ་གཙྪ༴ །ཞེས་བརྗོད་ལ། བདུད་བཞི་འཁོར་བཅས་སྐྱེ་མཆེད་མུ་བཞིའི་གནས་སུ་གཤེགས། བསྔོ་བ་སྨོན་ལམ་བཀྲ་ཤིས་རྣམས་བྱའོ། །ཡང་རྐྱེན་བཟློག་གལ་ཆེ་བ་ཡིན་ན། །གོང་གི་རྒྱབ་ཆོག་ཏུ་འདི་བྱ་སྟེ། དང་པོ་བཅའ་བཤམས་ནི། གཏོར་མ་ཟུར་གསུམ་ལ་གཡག་རོག་ཁྱུ་བའམ། དེ་མ་རྙེད་ན་གླང་ནག་ཁྱུ་བའི་ཁྲག་བྱུག །པུག་ཤུད་ཀྱི་སྒྲོ་བཙུག །གཡའ་ཚལ་གྱི་སྟེང་དུ་བཞག་ལ། བདག་གི་རྣལ་འབྱོར་སྔོན་དུ་སོང་བས། གོང་བཞིན་སྔགས་དྲུག་ཕྱག་དྲུག་གི་བྱིན་གྱིས་བརླབས།
བསངས་སྦྱངས་འབྲུ་གསུམ་གྱིས་བྱིན་རླབས། ནམ་མཁའ་མཛོད་ཀྱི་སྔགས་རྒྱ་སོགས་ཀྱིས་བསྔོས་ནས། བྷྱོཿ དམར་གྱི་གཏོར་མ་བརྗིད་ལྡན་འདིས། །ལྟས་ངན་བརྒྱད་ཅུ་རྩ་བཞི་བཟློག །ཡས་ཀྱི་གནས་ལ་ཕར་བལྟས་པ། །ཉི་ཟླ་ཤི་བའི་ལྟས་ངན་མཐོང༌། །ལྷ་ཆེན་ཁྲོས་པའི་ཐན་ཡིན་པས། །དམར་གཏོར་འདི་ཡིས་བཟློག་གྱུར་ཅིག །བར་སྣང་མཁའ་ལ་ཕར་བལྟས་པས། །བྱ་རྒོད་སྡེར་མོས་འཛིང་བ་མཐོང༌། །སྲོག་བདག་རྒྱལ་པོའི་ཐན་ཡིན་པས། །དམར་གཏོར་འདི་ཡིས་བཟློག་གྱུར་ཅིག །ནགས་ལ་འབྲོང་རྒོད་རྭ་འཛིང་མཐོང༌། །བདུད་ཀྱིས་གཡོས་པའི་ལྟས་ངན་ཡིན། །དམར་གཏོར༴ །སྤང་ལ་ཤ་བ་རྭ་འཛིང་མཐོང༌། །གཉན་ཆེན་ཁྲོས་པའི་ལྟས་ངན་ཡིན། །དམར་གཏོར༴ །གཡའ་ལ་རྣ་བ་རྭ་འཛིང་མཐོང༌། །གཟའ་རྒོད་ཁྲོས་པའི་ལྟས་ངན་ཡིན༌། །དམར་གཏོར༴ །བྲག་ལ་གོང་ལྷག་སྡེར་འཛིང་མཐོང༌། །སྨན་མོ་ཁྲོས་པའི༴ །དམར་གཏོར༴ །རི་རྩེ་འུག་པ་སྡེར་འཛིང་མཐོང༌། །གཟའ་བདུད་ཁྲོས་པའི༴ །དམར་གཏོར༴ །ནགས་ལ་དོམ་དྲེད་སྡེར་འཛིང་མཐོང༌། །མ་བདུད་ཁྲོས་པའི༴ །དམར་གཏོར༴ །བྲག་དམར་གཡག་རྒོད་རྭ་འཛིང་མཐོང༌། །བདུད་ནག་བཏང་བའི༴ །དམར་གཏོར༴ །ནམ་ལངས་དམར་མལ་མཐོང་བ་དེ། །དལ་བདག་ཁྲོས་པའི༴ །དམར་གཏོར༴ །སྦྲུལ་ནག་ལམ་དུ་འཁྱིལ་བ་དེ། །ཀླུ་བདུད་ཁྲོས་པའི༴
དམར་གཏོར༴ །རི་དྭགས་གྲོང་དུ་བྱུང་བ་དེ། །ཡུལ་འདྲེས་གནོད་པའི༴ །དམར་གཏོར༴ །བྱ་རྒོད་ཁྱིམ་དུ་བྱུང་བ་དེ། །རྒྱལ་འགོང་བདུད་དུ་འབབ་པའི༴ །དམར་གཏོར༴ །ཕོ་རོག་སྡེར་འཛིང་སྒྲོག་སྐད་འདོན། །ཡ་བདུད་སྲོག་ལ་གནོད་པའི་ལྟས་ངན་ཡིན། །དམར་གཏོར༴ །ཤིང་ཆེན་རླུང་གི་བཅག་པ་དེ། །སྐྱེ་རྒྱུད་ཆད་པའི༴ །དམར་གཏོར༴ །མོ་དང་རྨི་ལམ་ངན་པ་དེ། །དལ་རིམ་འོང་བའི༴ །དམར་གཏོར༴ །བུད་མེད་ཁྲག་རལ་བྱེད་པ་དེ། །རབས་ཆད་ཡོངས་བའི༴ །དམར་གཏོར༴ །ཤ་བ་གྲོང་ཡུལ་འགྲིམས་པ་དེ། །གཅེར་བུ་སྤུན་དགུའི་གནོད་པའི༴ །དམར་གཏོར༴ །སྦྲུལ་དང་སྦལ་ལྗོང་རྨི་བ་དེ། །གཉན་ནད་ཆར་དུ་འབབ་པའི་ལྟས༴ དམར་གཏོར༴ །མུན་པ་ནག་པོ་འཛུམ་པ་རྨི། །ནད་རིམས་རྣམ་བཞི་ཡོང་བའི་ལྟས་ངན་ཡིན། །དམར་གཏོར༴ ཞིང་ལ་བྲ་བ་བྱུང་བ་དེ། །ལོ་ཐན་འོང་བའི༴ །དམར་གཏོར༴ །མི་ལ་ཤ་རོ་སྐྱེས་པ་དེ༴ །གནམ་ཐིལ་འོང་བའི༴ དམར༴ ཕྱུགས་ལ་རིགས་མིན་སྐྱེས་པ་དེ། །ནོར་ཀོང་འོང་བའི་ལྟས༴ །དམར་གཏོར༴ །ལུག་ཁྱུར་འཕར་སྤྱང་ཞུགས་པ་དེ། །གཟའ་རྒོད་ཁྲོས་པའི༴ །དམར་གཏོར་འདི་ཡིས་བཟློག་གྱུར་ཅིག །ཁང་ཁྱིམ་གདུང་མ་ཆགས་པ་དེ། །མགོན་པོ་ཁྲོས་པའི༴ །དམར་གཏོར༴ །ཀྲུང་ཀྲུང་ནང་དུ་འབེབ་པ་དེ། །
ཏྲི་མོ་ནོར་ལ་གནོད་པའི༴ །དམར་གཏོར༴ ཁྲ་དང་བྱ་རྒོད་འཐབ་པ་མཐོང༌། །མཐུ་ཁ་ཟུག་པའི༴ །དམར་གཏོར༴ ཁྱི་དང་སྤྱང་ཀི་འཐབ་པ་དེ། །ཕུར་ཁ་ཟུག་པའི༴ །དམར་གཏོར༴ །མུན་པ་ནག་པོ་གཡོས་པ་དེ། །བདུད་ཀྱི་བར་ཆད་ཡོང་བའི་ལྟས། །དམར་གཏོར༴ །འཚུབ་མ་ཆེན་པོས་འཁྱེར་བ་དེ། །གྲི་ཁ་དར་བའི༴ །དམར་གཏོར༴ བྱ་ནག་སྤྲིན་ལྟར་འཐིབས་པ་དེ། །ལྷ་འདྲེས་སྲོག་ལ་བརྔོ་བའི༴ །དམར་གཏོར༴ །སྲོད་ལ་རྟ་ཕོ་འཚེར་བ་དེ། །རྒྱལ་པོའི་གནོད་པའི༴ །དམར་གཏོར༴ །འོག་རྟ་སྒ་འགྲོས་བྱེད་པ་དེ། །མི་ཁ་བདུད་ཀྱིས་ཁྱེར་བའི༴ །དམར་གཏོར༴ །ཐོ་རངས་སྒོ་ཁྱི་ངུ་བ་དེ། །འགོང་པོ་སྲིད་ལ་ཞུགས་པའི༴ །དམར་གཏོར༴ ཕ་གུ་ཁུ་མཚན་བུ་ཆུང་ནང་འཛིང་དེ། །ཕོ་ལྷ་ཁྲོས་པའི་ལྟས་ངན་ཡིན༴ །དམར་གཏོར༴ །ཕུགས་སུ་བུ་ཚངས་བྱས་པ་དེ། །ཡུལ་བུད་འོང་བའི༴ །དམར་གཏོར༴ ཁྱིམ་ལ་པུ་ཤུད་ཚང་བྱས་ཏེ། །སང་ཕོད་ཀོང་ཁ་འོང་པའི༴ །དམར་གཏོར༴ །མི་ནག་འཇིགས་སུ་རྨི་བ་དེ། །མགོན་པོ་ནག་པོའི་ཆོ་འཕྲུལ་ཡིན། །དམར་གཏོར༴ །ཆུ་ཆེན་འཁྲུགས་པ་རྨི་བ་དེ། །ས་བདག་ནག་པོས་ལྟས་ཡིན་པས། །དམར་གཏོར༴ །སྲིན་བྱ་ཀུ་ཀུ་ནམ་གོང་འཚེར། །འདྲེ་མོ་བཏང་བའི༴ །དམར་གཏོར༴ །ཕུགས་སུ་མེ་ཆེ་ཤོར་བ་དེ།
ཁ་མཆུ་འོང་བའི༴ །དམར་གཏོར༴ །རྟ་དྲི་རྟ་སྒྲོག་བཅད་པ་དེ། །དགྲ་སྲི་ལངས་པའི༴ །དམར་གཏོར༴ ཁྱི་ཡི་སྒོ་ཕུག་འདྲད་པ་དེ། །གྲི་རྒོད་འགྱེད་པའི༴ །དམར་གཏོར༴ །དྲག་པོ་དམར་གྱི་གཏོར་མ་འདིས། །མི་སྡུག་ལྟས་ངན་བརྒྱད་ཅུ་རྩ་བཞི་བཟློག །ཡས་ཀྱི་བདུད་གཡོས་ཐམས་ཅད་བཟློག་གྱུར་ཅིག །མས་ཀྱི་སྲི་ཁ་ལངས་པ་ཐམས་ཅད་བཟློག །ཕ་ཚན་དགྲ་རུ་ལངས་པ་ཐམས་ཅད་བཟློག །ལྷ་འདྲེའི་དམག་དཔུང་ལངས་པ་ཐམས་ཅད་བཟློག །སྡེ་བརྒྱད་དལ་ཁ་འདྲེན་པ་ཐམས་ཅད་བཟློག །དུས་མིན་འཆི་བའི་བཀའ་བབ་ཐམས་ཅད༴ སྒྲ་སྐད་ངན་པ་ཐོས་པ་ཐམས་ཅད༴ །མོ་དང་བཀྲ་མི་ཤིས་པ་ཐམས་ཅད༴ །ཐུམ་ཐུམ་རྨི་ལམ་ངན་པ་ཐམས་ཅད༴ །ས་འོག་མི་ཆུང་མཐོང་བ་ཐམས་ཅད༴ །ཟ་ཁ་ཚོང་ཁ་ལོག་པ་ཐམས་ཅད༴ །བྱིས་པའི་གདོན་ཆེན་བཅོ་ལྔ་བཟློག་གྱུར་ཅིག །མ་བུའི་བྱུར་འདྲེ་བརྒྱད་ཅུ་བཟློག་གྱུར་ཅིག །སྔགས་བོན་ཕུར་ཁ་ཟུག་པ༴ །སྔ་དགྲ་ལས་ལ་དར་པ་བཟློག་གྱུར་ཅིག །ཕྱི་དགྲ་ཡིད་ལས་སེམས་པ༴ །མཐོང་བའི་དུག་ལངས་ངན་པ༴ །ཐོས་པ་དགྲ་ཡི་ལྟས་ངན་ལ་སོགས་པ། །དྲག་པོ་དམར་གྱི་གཏོར་མས་བཟློག་གྱུར་ཅིག །བལ་ནག་གཡང་བཞི་འདི་ཡིས་བཟློག་གྱུར་ཅིག །ཐན་བྱ་པུ་ཤུད་སྒྲོ་ཡིས་སྣ་དྲོངས་ལ། །དགྲ་བགེགས་མི་མཐུན་ཡུལ་དུ་ད་སོངས་ཤིག །བྷྱོཿབྷྱོཿབྷྱོཿ
བྷྱོཿ སྟོང་པ་མི་དམིགས་ངང་དུ་བྷྱོཿ ཞེས་རོལ་ཆེན་དྲག་པོའི་སྒྲ་དང་བཅས་ལ་དགྲ་ཡུལ་དུ་དམིགས་ཏེ་ཕྱིར་བསྐྱལ་ལོ། །སློབ་དཔོན་པདྨས་མཛད་པའི་བདུད་བཞི་བརྒྱ་བཞིས་བཟློག་པའི་ཆོ་ག་བསྡུས་པ་རྫོགས་སོ།། །།འདི་ནི་རྗེ་བཙུན་ཐམས་ཅད་མཁྱེན་པ་འཁོར་ལོའི་མགོན་པོ་འཇམ་མགོན་བླ་མ་ཏཱ་ར་ནཱ་ཐས་ཞུས་དག་གནང་བ་ཡིན་པས་བྱིན་རླབས་ཀྱི་གཟི་བྱིན་དང་ལྡན་ཞིང་གདོན་བགེགས་བར་ཆད་ཐམས་ཅད་ངེས་པར་བཟློག་པར་འགྱུར་རོ།། །།སརྦ་མངྒ་ལམ།། ཤུ་བྷཾ།། ༈ དམར་གཏོར་བཞི་ཡོད་ན་ཕྱོགས་བཞིར་ཟོར་དུ་འཕང༌། དེ་ནས་ཕྱོགས་བཞིར་མདོ་བཟློག་བཞི་བརྒྱབ། དགྲ་བགེགས་གནོད་བྱེད་ཐམས་ཅད་ཟབ་མོ་སྟོང་པ་ཉིད་ནས་གྱུར་ཅིག །ཅེས་བརྗོད། །དེ་ནས་གོང་གི་མཇུག་ཆོག་བདག་མདུན་གཉིས་ལ་དམིགས་ཏེ། ཨོཾ་ཤཱཀྱ་མུ་ནི་ས་པཱ་རི་ཝ་ར་ཨརྒྷཾ༴ སོགས་དང༌། ཁམས་གསུམ་པ་ཡི་འགྲོ་ཀུན༴ སོགས་ཀྱིས་མཆོད་བསྟོད་བྱ། ཡི་གེ་བརྒྱ་བཟོད་གསོལ། སཱཙྪ་དང་ཐུབ་པའི་སྐུ་གཟུགས་སོགས་ལ་བརྟན་བཞུགས་བྱ། སརྦ་བྷུ་ཏ། སོགས་ཀྱི་ཁྲིའི་ཕྱོགས་བཞིའི་བདུད་བཞི་གཤེགས་ལ། བསྔོ་སྨོན། བཀྲ་ཤིས་རྣམས་བྱས་པས་ལེགས་པར་གྲུབ་པ་ཡིན་ནོ། །གོང་འོག་གི་མཆན་བུ་འདི་རྣམས་རངབཟོ་མིན། རྔ་བའི་སེ་དགོན་པའི་བླ་མ་དམ་པ་གསང་མཐའ་སོགས་ཀྱི་ཕྱག་ལེན་ཞལ་རྒྱུན་ལྟར་ཡིན་ནོ། །དགེ་ལེགས་འཕེལ།། །།