བཅོམ་ལྡན་འདས་རྡོ་རྗེ་སེམས་དཔའི་སྒྲུབ་ཐབས་རང་བྱིན་རླབས་པའི་མན་ངག
བཅོམ་ལྡན་འདས་རྡོ་རྗེ་སེམས་དཔའི་སྒྲུབ་ཐབས་རང་བྱིན་རླབས་པའི་མན་ངག་བཞུགས།
རྒྱ་གར་སྐད་དུ། བྷ་ག་ཝཱན་བཛྲ་སཏྭ་ས་དྷ་ནི་སྭཱ་ཏིཥྛ་ནོ་པ་དེ་ཤ་ཀྲ་ནཱ་མཿ བོད་སྐད་དུ། བཅོམ་ལྡན་འདས་རྡོ་རྗེ་སེམས་དཔའི་སྒྲུབ་ཐབས་རང་བྱིན་རླབས་པའི་མན་ངག་རིམ་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྡོ་རྗེ་སྙེམས་མའི་ཐུགས་དགྱེས་པ། །དེ་ཉིད་ཆུ་འཁོར་ཤུགས་དྲག་འགྲོ་བ་ལ། །འཇུག་འགྱུར་འདི་ལ་སྙིང་ནས་རྨད་བྱུང་བ། །བླ་མའི་ཞལ་སྔའི་རིམ་པ་མདོ་ཙམ་བྲི། །ཡིད་དུ་འོང་བའི་ས་ཕྱོགས་སུ། །བདེ་བའི་སྟན་ལ་འདུག་ནས་ནི། །རང་བཞིན་ལྡན་པའི་ལས་ཀྱིས་ནི། །མཁས་པ་ཡིས་ནི་བསྒོམ་པར་བྱ། །སྙིང་ཁར་ཟླ་བ་དང་ཉི་མ། མཆོག་གི་ཡི་གེ་ལས་དང་པོའི་རྡོ་རྗེ་བསམ་ལ། ཧྲཱིཿལས་ལྐོག་མར་པདྨར་ཟླ་བ་ལ་ཧཱུཾ་ལས་བྱུང་བའི་རྡོ་རྗེ་ཨོཾ་དང་བཅས་པ། ལྕེའི་བདག་ཉིད་དུ་བསམ་མོ། །ཨ་སུཾ་ཀྵུཾ་ཡུཾ་ཧཱུཾ་ཨཱཿ སྃ དེ་ལས་ཟླ་བ་དང་ཉི་མ་གཡོན་དང་གཡས་ཀྱི་ལག་པ་ལ་ལྷ་མོ་དགུ་དང་རྣམ་པར་སྣང་མཛད་རྡོ་རྗེ་སེམས་དཔའ
འམ། ཡང་ན་རྡོ་རྗེ་དང་པདྨ་སྟེ་འདི་ལ་ཟླ་བའི་ལྷ་མོ་རྣམས་ཀྱྀ་སྐྱཻས་བུར་འགྱུར་ཏེ། འདིས་ནི་དང་པོར་ང་རྒྱལ་བྱའོ། །དེ་ནས་རྡོ་རྗེ་སེམས་དཔའ་རང་ཉིད་བསྐྱེད་ནས་ས་བོན་འགོད་པ་དང༌། སྐུ་དང་གསུང་དང་ཐུགས་བྱིན་གྱིས་བརླབ་པར་བྱའོ། །ཨོཾ་ཧཱུཾ་ཕཊ་བདག་བསྲུང་བ་སྟེ། སླར་ཡང་གནས་བསྲུང་བ་ནི། ཨོཾ་ཧཱུཾ་ཕཊ་སྭཱཧཱ། རྡོ་རྗེ་སེམས་དཔའི་ཕྱག་རྒྱ་ལས། དུད་པ་དྲི་གསུམ་བསྒྲེང་བར་ནི། སེམས་མ་རྡོ་རྗེ་མ་ཡིན་ཏེ། ཕྱོགས་བཅུ་བཅིངས་པར་བྱེད་པའི་མཆོག་ཕུར་བའི་ས་གཞི་དང༌། རྡོ་རྗེའི་རྭ་བ་གུར་རབ་ཏུ་འབར་བ་དག་བསམ་མོ། །ཨོཾ་ཧཱུཾ་ཨཾ་སྭཱཧཱ། རིགས་ལྔ་པོ་དག་དབུ་རྒྱན་དུ་བྱས་ལ། སྙིང་ཁ་དང༌། ལྟག་པ་དང༌། སྤྱི་བོ་དང༌། རྣ་ལྟག་ལ་དར་དཔྱངས་ཏེ། ཨོཾ་ཊུཾ། ཨོཾ་ཧཱུཾ་སྭཱཧཱ། ཨོཾ་བཛྲ་ཏུ་ཥྱ་ཧོ། དེ་བཞིན་གཤེགས་པ་རྣམས་སྤྱན་དྲངས་ཏེ་མཆོད་པ་དང༌། ཕྱག་འཚལ་བ་དང༌། སྐྱབས་སུ་འགྲོ་བ་ལ་སོགས་པ་ཆོ་ག་ཐམས་ཅད་བྱའོ། །
སྙིང་གའི་ཐུགས་ཀྱི་ཡི་གེའམ། ཀྵུཾ་ཡིག་འབར་བའི་འཕྲེང་བ་དང་མཉམ་པས་ལུས་བཀང་སྟེ། གཟུགས་ལ་སོགས་པ་ཐམས་ཅད་སྟོང་པར་བསམ་ནས། སྙིང་ཁར་ས་བོན་ལྷག་མ་སྐྲ་ཙམ་མི་སྣང་སྟེ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། དེ་ནས་སྨོན་ལམ་གྱི་དབང་གིས་ཁུ་ཚུར་དཀུར་བརྟེན་པས་སྙེམས་པ་ཅན། རྡོ་རྗེ་མ་ལ་སོགས་པས་ཡང་དག་པར་བསྐུལ་ཏེ། ཛཿབཞི་རྡོ་རྗེ་སེམས་དཔའ་བདག་ལ་ངེས་པར་འཇུག་པར་འགྲུབ་པར་མཛོད། ཧ་བཞི་ཧཱུཾ་གི་ཡི་གེ་སྒྲོག་པའི་དམ་ཚིག་ལས་བྱུང་བ་བདག་གི་མགོན། བ་བཞི་རྡོ་རྗེ་གསང་བར་གསང་བ་ལས་ནི་བྱུང་བའི་སྐུ་འཛིན་པ། ཨ་བཞི་ཨ་ཧོ་ཤིན་ཏུ་མཉེས་པའི་རྡོ་རྗེ་ཨཱ་ལི་གཅིག་ཏུ་ཐིམ་པའི་ཧཱུཾ། ཀོ་ཀཱི་ལའི་སྒྲ་ལྟར་སྙན་པའི་ཧཱུཾ་གི་གླུ་དང་བཅས་པ་དེ་རྣམས་སླར་ཡང་ནམ་མཁར་སྒྲ་ཙམ་ལ་ཐིམ་པར་བྱའོ། །དེ་ནས་ཆོས་ཀྱི་འབྱུང་གནས་སུ་རླུང་སྟེ། རླུང་གི་ནམ་མཁའ་ལྟར་དག་པ། སེམས་ཉིད་རླུང་བཞིན་ནམ་མཁར་བརྗོད། ཨཱ་ལི་ཀཱ་ལིའི་སྦྱོར་བས་ཟླ་བ་དང༌། ཉི་མ་དམར་པོ་དང༌། སྟེང་དུ་ཨཱ་ལིའི་ས་བོན་ཁམས་གསུམ་དུ་འོད་ཟེར་སྤྲོ་བ་དང༌། བསྡུ་བ་དང༌། དེ་ནི་དང་པོའི་རྡོ་རྗེའི་རྡོ་རྗེ་ཉིད་དུ་བྱའོ། ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོ྅ཧཾ། བདེ་བར་གཤེགས་པ་རྣམས་འབྱིན་ཅིང་སྡུད་པའི་སྦྱོར་བ་ལས་ཚད་སྐྱོབ་དཀར་པོ་དང་བཅས་པའི་ས་བོན་དང་མཚན་མ་ལས་ནི་རྡོ་རྗེ་སེམས་དཔའ་སེང་གེའི་གདན་ལ་སྟེ། རླུང་དང་
མེ་དང་རྒྱ་མཚོ་ས་དང་མཚོ་དང་གླིང་དང་རི་རབ་ཀྱི་རྩེ་མོར་གཞལ་མེད་ཁང་པ། གསེར་གྱི་ཁང་བརྩེགས་ཁ་དོག་ལྔ་པ། རིན་ཆེན་བདུན་གྱི་རང་བཞིན་དུ་བལྟས་ལ་དེར་བསམ་པར་བྱ་སྟེ། དུང་དང་ཀུན་ད་ཟླ་བའི་མདོག །འདོད་ཆགས་ཀྱིས་ནི་ཅུང་ཟད་དམར། །དབུ་རྒྱན་སངས་རྒྱས་ལྔ་ཡི་དངོས། །སེམས་དཔའི་སྐྱིལ་མོ་ཀྲུང་གིས་བཞུགས། །སྒེག་དང་དགའ་བའི་ཉམས་དང་ལྡན། །རྒྱན་རྣམས་ཀུན་གྱིས་རྣམ་པར་སྤྲས། །རྡོ་རྗེ་སྙེམས་མ་དང་སྦྱོར་བ། །རྡོ་རྗེ་ཅུང་ཟད་གཡས་བརྐྱང་རོལ། །དྲིལ་བུ་ལྟ་ཟུར་ལ་རབ་འཁྱུད། །པདྨ་རྡོ་རྗེ་སྦྱོར་བྱས་ནས། །ཕྱག་རྒྱ་བཅིངས་པ་མཆོག་ཏུ་བརྩོན། ཁ་ཊྭཱཾ་ཀ་པཱ་ལ་འཛིན་པའམ། །ཡང་ན་ཐབས་དང་འདྲ་བ་སྟེ། །ཕྱག་གཉིས་རྡོ་རྗེའི་མགུལ་པར་སྦྱོར། །ཐབས་ཀྱི་རྡོ་རྗེ་སྙིང་ཁར་གསོར། །གཡོན་པས་དྲིལ་བུ་སྙེམས་པ་སྟེ། །དྲིལ་བུ་ལྟ་ཟུར་རྒྱབ་ཏུ་གསོལ། །ནམ་མཁའི་དབྱིངས་ཀུན་གང་བར་ནི། །སངས་རྒྱས་སྤྲིན་ནི་དཔག་ཡས་སྤྲོས། །ཧཱུཾ་དང་རྡོ་རྗེ་སྙིང་ཁར་བཞག །ཨོཾ་ཡོ་ག་ཤུདྡྷ་སརྦ་དྷརྨ་ཡོ་ག་ཤུདྡྷོ྅ཧཾ། ལྷ་མོ་བརྒྱད་དང༌། སྐུ་དང་གསུང་དང་ཐུགས་རྡོ་རྗེ་འགོད་པ་ནི། སྔགས་དང་ཕྱག་རྒྱས་བྱའོ། །ཡེ་ཤེས་འཁོར་ལོ་བཀུག་སྟེ་མཆོད་ནས་དགུག་པ་ལ་སོགས་པ་དང༌། ཨོཾ་ཏིཥྛི་སན་ཧཱུཾ་སྭཱཧཱ། ཕྱག་རྒྱ་བཞི་པོ་དག་བྱས་ལ། རྒྱལ་བ་རྣམས་ཀྱི་ཨོཾ། ཨཱཿཡུཾ། ཕེཾ། ཕཊ་ཧཱུཾ་སྭཱཧཱ། ཞེས་ཡལ་ག་དང་བཅས་
པའི་ཆུས་དབང་ལ་བསྐུར་ལ། ཨོཾ་ཨཱཿཧཱུཾ་སྭཱཧཱ། ཞེས་སྤྱི་བོར་རྡོ་རྗེ་རྩེ་གསུམ་པ་གཏུགས་ལ། རིགས་ལྔ་དང་རྡོ་རྗེས་སླར་ཡང་དབང་བསྐུར་ཏེ། སྔོན་དུ་བརྗོད་པའི་ཅོད་པན་དང་གོ་ཆས་དབང་བསྐུར་རོ། །སྒེག་མོ་མ་ལ་སོགས་པ་དང༌། མཆོད་པ་དང༌། གཏོར་མ་དང༌། བསྟོད་པ་དང༌། བཟའ་བའི་དམ་ཚིག་བྱས་ལ། དམ་ཚིག་གསུམ་བཟུང་བར་བྱས་ནས་དེ་ཡང་འོད་གསལ་དུ་བཅུག་སྟེ༌། དྲི་ཟའི་ཧཱུཾ་དང་སྐུ་ཡོངས་སུ་རྫོགས་པའི་ཟུང་འཇུག་ཏུ་སྒོམ་པ་དང༌། ཡང་ན་གལ་ཏེ་རྡོ་རྗེ་དང་པདྨ་ཧཱུཾ་དང་ཨཱཿལས་དང་པོའི་རྡོ་རྗེ་དང་པདྨ་ཨོཾ་ཧཱུཾ་ཕཊ་དང་བཅས་པ། དབྱིག་པ་རྡོ་རྗེ་འཇམ་པའི་མགོན། །འོག་དཔག་ཤེས་རབ་ཀྱི་ནི་གཞི། །རྡོ་རྗེ་དྲིལ་བུ་རབ་སྦྱོར་བས། །མཆོག་གི་གོ་འཕང་བསྒྲུབ་པར་བྱ། །དེ་ནས་ཐིག་ལེའི་རྣལ་འབྱོར་བསྒོམ། །རྡོ་རྗེ་གསང་བའི་མཚན་ནས་ནི། །གཉིས་ཀ་འཁྱུད་ནས་བཟླས་པ་བྱ། །དབུས་སུ་ཨཱ་ལིའི་ས་བོན་ནི། །རྟག་པ་མཆོག་ཏུ་ཕྲ་བ་ཉིད། །ཕྱག་འཚལ་སྲེག་པ་མཐར་བཞག་ནས། །བདེ་བའི་སེམས་ཀྱིས་བསྒྲུབ་པར་བྱ། །དེ་ནས་བཟླས་པར་བྱ་སྟེ། ཨོཾ་ཧཱུཾ་སྭཱཧཱ། ཨོཾ་ཨཱཿསྭཱཧཱ། ཨོཾ་བཛྲ་སཏྭ་ཧཱུཾ། སྙིང་ཁར་ཟླ་བ་ལ་བསམ་ནས་བཟླས་པ་བྱ་སྟེ། ཕྱི་ནས་འོད་གསལ་དུ་བཅུག་ནས་ལྡང་སྟེ། ཡི་གེ་བརྒྱ་པ་དང་དག་པ་གསུམ་དྲན་ནས་སྨོན་ལམ་གདབ་པར་བྱའོ། །འདིར་རྣལ་འབྱོར་ནམ་མཁའི་ཕྱག་རྒྱ་གང་ཡིན་པ་ནི།
རྡོ་རྗེ་སེམས་དཔར་འགྱུར་ལ། ཡེ་ཤེས་དབང་ཕྱུག་མར་ནི་སེམས་མ་རྡོ་རྗེའོ། །གཞན་བསམ་པར་མི་བྱ་སྟེ། །ལྷ་དང་སྔགས་ནི་རྟག་ཏུ་བསམ། །གཏོར་མ་དང་ནི་ལ་སོགས་ལ། །ངན་པ་བསམ་པར་བྱ་བ་མིན། །དེ་ལྟར་ལས་དང་པོའི་རིམ་པ་སྟེ། དེ་ནས་གཞན་ཡང་སྨྲས་པ། འདི་ལ་ནི་ཡིད་ཀྱིས་རྟག་ཏུ་བསམ་པ་ལས། སྔགས་དང་ཕྱག་རྒྱ་དང་བྲལ་བར་མི་བྱའོ། །སྔར་བརྗོད་པ་དེ་ཉིད་ལས། འདིར་རྡོར་སེམས་རང་ཉིད་བལྟས་ལ། ཧཱུཾ་གིས་སྟོང་པར་འཇུག་པ་ནི་སྙིང་ཁ་རུའོ། །འདིར་ནི་རང་བཞིན་གྱིས་དག་པ། བདེ་བ་དང༌། བསིལ་བ་དང༌། མི་གདུང་བ་དང༌། སྟོང་པ་ཆེན་པོ། ཐམས་ཅད་སྟོང་པ། གཟུང་འཛིན་དང་བྲལ་བ། ཤེས་པ་ལས་འདས་པ་མེད་པ་མ་ཡིན་པ། བེམ་པོ་ལྟ་བུ། ཡོངས་སུ་སྤངས་པ། གཅིག་དང་དུ་མ་བྲལ་བ། ཆོས་ཐམས་ཅད་རང་བཞིན་དང་བྲལ་བ། དེ་ཉིད་བསྒོམ་པར་བྱའོ། །དེ་ལས་རླུང་བཞི་པོ་འབྱུང་བའི་བདག་པོའི་རང་བཞིན་རྣམས་ནམ་མཁའ་ལས་བྱུང་བ། ལྟ་བུར་ཤིན་ཏུ་ཕྲ་བ་ལྡང་སྟེ་ཛཿཞེས་དང་པོར་བསྐུལ་ཏེ། ནཱ་ད་ནག་པོ་དང༌། ཉི་མ་དང་ཟླ་བ་ལྟ་བུའི་སེམས་བདེ་བའི་རང་བཞིན། ཁོ་ན་ལས་རྡོ་རྗེའི་དག་པ་དེ་ཉིད་རྣལ་འབྱོར་གྱི་དག་པར་བྱ་སྟེ། རྡོ་རྗེ་སེམས་དཔའ་རང་སྣང་གི་རིག་པ་ཆེན་མོ་དང་གཉིས་ཀ་བསྒོམས་ནས་ཡེ་ཤེས་ཀྱི་སྐུའི་ང་རྒྱལ་དུ་བྱའོ། །འདི་ནི་མཚན་དང་དཔེ་བྱད་དང་ལྡན་པར་ཡུད་ཙམ་གྱིས་ཡན་ལག་ཐམས་ཅད་ཡོངས་སུ་རྫོགས་
པར་སྐད་ཅིག་གིས་བསྐྱེད་དེ། ཟླ་བ་དང་རྡོ་རྗེ་ལ་སོགས་པ་ནི་འདིར་འགོག་སྟེ། དེ་ཅི་དགོས་པ་མེད་དམ་ཞེ་ན། དེ་ནི་དབངཔོ་དམན་པ་དག་གིས་ཡིན་ཏེ། མཆོད་རྟེན་ལས་ནི་མི་བྱ་ཞིང༌། །གླེགས་བམ་ཀློག་པར་མི་བྱའོ། །ལག་པས་ཕྱག་རྒྱ་མི་བཅིངས་ཤིང༌། །སྔགས་ཀྱི་ཡེ་གེ་བཟླ་མི་བྱ། །ཞེས་གསུངས་སོ། །སྲིད་པ་བར་མའི་ཇི་ལྟ་བ་དེ་བཞིན་དུ་ཁམས་ཕྲ་བ། བཅད་དུ་མེད་པ། ཆུ་གཙང་གི་ནང་དུ་ཟླ་བའི་གཟུགས་བརྙན་ལྟར་སྣང་གིས། ཡིད་ཀྱི་རྟོག་པ་གོམས་པ་ལས་ནི་མི་འགྱུར་རོ། །དེ་ཡང་ཡི་གེ་ཧཱུཾ་གིས་ནཱ་དས། རགས་པའི་ཁམས་ལ་ལྷ་མོ་སྒྱུ་འཕྲུལ་ཆེན་མོའི་ལྷུམས་སུ་འཇུག་པ་ལྟ་བུ་སྟེ། དེ་ནི་སྐྱེ་བ་ལྟར་སྣང་ཡང་སྐྱེ་བ་ནི་མ་ཡིན་ལ། ཇི་ལྟར་མིག་འཕྲུལ་མཁན་གྱིས་མེད་པའང་སྤྲུལ་པ་སྟེ་དེ་ལྟར་ཡང་མ་ཡིན་ཏེ། རགས་པའི་ཁམས་ལ་ནི་འཇུག་པར་བྱེད་དོ། །འོན་ཀྱང་དེ་ནི་འགྲོ་བ་ལ་སྣང་བ་ཉིད་ཡིན་གྱིས། དེ་བཞིན་གཤེགས་པ་ལ་ནི་རྣམ་པར་རྟོག་པ་ཡང་མི་མངའ་ལ་སྣང་བ་ཡང་མེད་དོ། །འགའ་ཞིག་གཟུགས་སྒྱུར་བར་བྱེད་པ་དེ་ལྟར་མ་ཡིན་ཏེ། འདི་ནི་སྐྱེ་བ་བསམ་གྱིས་མི་ཁྱབ་པ་ཞེས་བྱའོ། །ཡེ་ཤེས་ཀྱི་སྣང་བའི་རྣམ་པར་འཕྲུལ་པའོ། །དེ་ལྟར་རྣལ་འབྱོར་བ་དག་གིས་ཡང༌། བདེ་བ་དམ་པ་སྤྲོས་པ་དང་བྲལ་བ་ཡང་ཡིན་ལ། དེ་ཉིད་དཀྱིལ་འཁོར་ལ་སོགས་བཀོད་པ་མཐའ་ཡས་པ་དང༌། འདོད་པ་དག་ཏུ་སྣང་བ་དང༌། དེ་ཡང་ཤེས་པ་དང་ཤེས་བྱ་བ་ནམ་དུ་ཡང་ཐ་མི་དད་པའི་ཏིང་ངེ་འཛིན་འདི་ནི་རགས་པའི་
ཁམས་ལ་གནས་པ་དང་འཇུག་མོད་ཀྱིས། དེ་ལྟར་སྣང་བ་ནི་མེད་ལ། འོན་ཀྱང་དེ་དག་གི་རང་བཞིན་དང༌། ཇི་ཙམ་དུ་ཆོས་སུ་གྱུར་པ་དེ་ཙམ་དུ་ཇི་ལྟ་བ་དང་ཇི་སྙེད་པ་ཐམས་ཅད་དུས་གཅིག་ལ་ཤེས་པ་སྟེ། འདི་ཡང་བསམ་གྱིས་མི་ཁྱབ་པ་ཁོ་ན་ཞེས་བྱའོ། །རིམ་པ་འདིས་སོ་སོའི་སྐྱེ་བོ་དང༌། སྲིད་པ་བར་མ་དང༌། རྨི་ལམ་གྱི་ལུས་དང༌། ཐོག་མ་མེད་པ་ནས་བརྒྱུད་དེ་འོང་བ། ཀུན་གཞིའི་རྣམ་པར་ཤེས་པ་རླུང་དང་བཅས་པ་རྣམས་ཡང་དང་ཡང་དུ་ཁམས་རགས་པ་ལ་འཇུག་སྟེ། དེ་ནི་བྱིས་པ་དག་གིས་མི་ཤེས་པས་འཁོར་བ་ཞེས་བྱ་ལ། གང་རིམ་པ་དེ་ཉིད་ཤེས་པ་ནི་རྣལ་འབྱོར་ཆེན་པོ་སྟེ་མྱ་ངན་ལས་འདས་པའོ། །དེ་ལྟར་སློབ་དཔོན་གྱི་ཞལ་སྔའི་ཡང་རིམ་པ་འདི་ཡིན་ཏེ། ཐམས་ཅད་དུ་རྡོ་རྗེ་སེམས་དཔའ་རང་སྣང་གི་རིག་སར་བཅས་དེ་ནི་ཟླ་བ་དང་རྡོ་རྗེ་འོད་ཟེར་འཕྲོ་བ། སྤྲོ་བ་དང་བསྡུ་བས་མངལ་དུ་འཇུག་པའི་བྱ་བ་དེ་ནི། ཕྱིས་ནས་ལྷག་པར་བལྟས་པས་སྤྲུལ་པའི་སྐུར་བསྒྱུར་ཏེ། ཁ་དོག་གསེར་བཙོ་མ་ལྟར་འབར་བ། སེར་པོ་དང༌། དཀར་པོ་དང༌། དམར་པོའི་ཞལ་འདོད་ཆགས་དང་ཁྲོ་བོ་འདྲེས་པ། མདའ་དང་རྡོ་རྗེ་རྒྱུ་མ་དང༌། གཞུ་དང༌། མིའི་ཐོད་པ་དང༌། རྡོ་རྗེ་དྲིལ་བུ་བསྣམས་པ། སྐྱིལ་ཀྲུང་རོལ་པས་སོ་སོའི་ཁྲི་ལ་བཞུགས་པ། ཡེ་ཤེས་དབངཕྱུག་མ་ཞལ་གཅིག་ཕྱག་གཉིས་མ་ཁ་ཊྭཱཾ་ག་དང་བདུད་རྩིས་གང་བའི་མགོ་ཐོད་ཅན་དར་གྱི་
སྨད་གཡོགས་གྲོལ་བ། རུས་པའི་རྒྱན་དང་ལྡན་པ། འདོད་ཆགས་ཆེན་པོའི་རང་བཞིན་སྙོམས་པར་འཇུག་པའོ། །ཡང་ན་སྤྲུལ་པའི་སྐུ་ནི་རྣམ་པར་སྣང་མཛད། དམན་པའི་རིམ་པ་ལས་བྱུང་བའི་དྲག་པོ་ཨིནྡྲ་ནཱི་ལ་ལྟ་བུ། བཤད་མ་ཐག་པའི་མཚན་ཉིད་དུ་ཤེས་པར་བྱ་སྟེ། དེ་ཡིས་སྐད་ཅིག་གིས་འཁོར་གྱིས་དཀྱིལ་འཁོར་སྤྲོའོ། །དེའི་དུས་ན་རྡོ་རྗེ་སེམས་ནི་ཡེ་ཤེས་དཔར་འཇུག་གོ །ཨོཾ་ཧཱུཾ་ཧ་སྭཱཧཱ། ཞེས་བཟླས་པ་བྱའོ། །རྡོ་རྗེ་སེམས་དཔའ་སྒྲུབ་པའི་ཐབས། གཞན་ཡང་འདི་ཡིན་ཏེ། མངོན་པར་བྱང་ཆུབ་ནི་རང་བཞིན་ཡིན་ལ། རྣམ་པར་ཤེས་པ་རླུང་དང་བཅས་པ་ནི་རྡོ་རྗེ་ཡིན་ནོ། །ནག་པོའི་ཞལ་སྔ་ནས་གསུངས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། ཨོཾ་བཛྲ་ཤུདྡྷོ་སརྦ་དྷརྨ་བཛྲ་ཤུདྡྷོ྅་ཧཾ། དེའི་ངང་ལས་སྐད་ཅིག་གིས། དབྱར་གྱི་ནམ་མཁའ་ལ་དབང་པོའི་གཞུ་ལྟར་རྡོ་རྗེ་སེམས་དཔའ་གསེར་ལྟར་དཀར་བ་འདོད་ཆགས་ཆེན་པོའི་དམར་བ་དང་ཅུང་ཟད་འདྲེས་པས། ཡིད་ཙམ་གཙིགས་པས་ཞལ་མ་མཆུའི་སྒྲོས་གནོན་ཅིང་འཇིགས་པ་ཕྱག་གཉིས་ཀྱི་དང་པོས་རྡོ་རྗེ་ཐུགས་ཀར་གཏོད་ཅིང༌། དྲིལ་བུ་སྙེམས་པ་དང་བཅས་པས་དཀུར་བསྟེན་པ། རལ་པའི་ཐོར་ཚུགས་མཐོན་ཀའི་རྩེ་མོ་རྡོ་རྗེ་ཅན། རིན་པོ་ཆེའི་རྒྱན་དང༌། མཛེས་པའི་ན་བཟའ་གསོལ་བ་མཚན་དང་དཔེ་བྱད་རྫོགས་པ། རྡོ་རྗེ་སྐྱིལ་ཀྲུང་གིས་སེང་གེའི་གདན་ལ། རིག་མ་ཆེན་མོ་འདྲེས་མའི་ཁ་དོག་སྔར་བརྗོད་པ་ལྟ་བུ་དང༌།
སྙོམས་པར་འཇུག་པའི་ཁ་དོག་རོལ་བ་ཆེན་པོ་འོད་ཟེར་དཔག་ཚད་སྟོང་དུ་ཁྱབ་པ་རྣལ་འབྱོར་ནམ་མཁའ་བདེ་བ་ཆེན་པོའི་མགོན་པོ་བརྫུས་ཏེ་སྐྱེ་བའི་སེམས་ཅན་སྐྱེ་ཚུལ་གྱིས་སྒོ་ནས་བདེ་བ་ཆེན་པོ་བསྒོམས་ཤིང་བྱིན་གྱིས་བརླབ་བོ། །མཆོག་གི་རྣལ་འབྱོར་འདིས་ལ་བྱིན་གྱིས་བརླབས་པའི་ཡི་གེ་དགོད་པ་དང༌། ཡེ་ཤེས་པ་སྤྱན་འདྲེན་པ་དང༌། རྒྱས་གདབ་པ་ནི་མེད་དེ། རང་བཞིན་གྱིས་གྲུབ་པའི་ཕྱིར་རོ། །སྙིང་གར་པདྨ་ལ་ཧཱུཾ་དང་ལྷ་མོའི་ཡི་གེ་བལྟས་ཏེ་དངོས་པོ་རྣམས་འོད་ཟེར་ཆེན་པོས་བསྲེགས་ཏེ། མགོ་བོ་དང་རྐང་པའི་མཐིལ་ལུས་ཐམས་ཅད་སྙིང་ཁར་བསྡུས་པས་ཁམས་རགས་པ་དག་ཐིམ་པ་ཡིན་ནོ། །ཡི་གེ་རྣམས་ཐིམ་པས་ནི་ཕྲ་བ་ཡང་འཇོམས་ཏེ། ཐམས་ཅད་སྟོང་པར་བསྐལ་བའི་བར་དུ་སྒོམ་མོ། །དེ་ནས་ལངས་པ་ན་སྔ་མ་ལྟར་བལྟས་ནས་བསྔགས་བཟླའོ། །ལྟེ་བར་ཨཱའོ། །སྙིང་ཁར་ནི་ཧཱུཾ་གཅིག་པུའམ་གལ་ཏེ་ཕྱག་དག་ཕྱག་རྒྱས་འཁྱུད་པ་ལ་མོས་ན་ཡང༌། དེ་ནི་དེ་ལྟར་བསྐྱེད་ནས་སོ། །སྟོང་པ་ཉིད་ལ་ཡང་དག་པར་རང་བཞིན་མེད་པ་དང༌། སྣང་བ་ཡང་མེད་པའི་ཚུལ་གྱིས་སློབ་མ་རྣམས་དང༌། བླ་ན་མེད་པ་དང༌། མངོན་པར་བྱང་ཆུབ་པ་རྣམས་ནི་སྟོང་པ་ཉིད་ལ་འཇུག་སྟེ། རྡོ་རྗེ་སེམས་དཔའ་ནི་མཐོང་བའི་ལམ་ལས་སྐྱེས་པ། རིག་མ་དང་བཅས་པའི་ཁམས་ཕྲ་བ་དང༌། དེ་ཡང་འོད་གསལ་དུ་བསྒོམས་པས། ས་བཅུ་པའི་སྒྲིབ་པ་ཕྲ་མོའང་བཀྲུས་ནས་ས་
བཅུ་གཅིག་པ་ཕུང་པོ་རྣམས་ཟག་མེད་དུ་གནས་འགྱུར་བའི་ཆོས་ཀྱི་སྐུར་སངས་རྒྱས་ནས། ཡན་ལག་བསྒོམ་པ་ནི་གཟུགས་ཀྱི་སྐུར་བསྐྱེད་པའོ། །རོལ་པ་མོ་དང་ཏིལླི་པ། །ལྭ་བའི་ཞབས་དང་དཔལ་མོ་དང༌། །གཱ་ཡི་ཞབས་ཀྱང་བཞེད་པ་སྟེ། །རཱ་ཧུ་དང་འཕགས་པའི་ཞབས། །སིང་ག་ལ་པའི་ཞལ་སྔ་དང༌། །དེ་བཞིན་བུང་བའི་པདྨས་བཤད། །བརྟུལ་ཞུགས་ཞལ་སྔ་ནས་ཀྱིས་ནི། །རིམ་པ་བཞིན་ཡང་བཤད་པར་བྱ། །གཉིས་མེད་སྦྱོར་བ་འདི་ཉིད་ནི། །རྡོ་རྗེ་དྲིལ་བུས་ཕྱག་རྒྱས་དག །སོ་སོར་བཟུང་བའི་དེ་ཁོ་ན། །བདག་ཉིད་དེ་ཉིད་རྡོ་རྗེ་སྟེ། །དྲིལ་བུ་ཆོས་ཀྱི་གཟུང་མའོ། ཁ་སྦྱོར་སྦྱོར་བ་ཕྱག་རྒྱ་སྟེ། །དེ་ལ་ཐབས་ནི་ཐིམ་པར་འགྱུར། །དེ་ཡང་དེ་བཞིན་འདི་ཡིན་ཏེ། །བདེན་གཉིས་སྦྱོར་བའི་སྒྲ་དེ་ཉིད། །སྐྱེས་པ་དངོས་པོ་སྙིང་རྗེ་ནི། །རྡོ་རྗེ་བུད་མེད་དྲིལ་བུ་སྟེ། །སྟོང་པ་དང་ནི་ཆོས་ཉིད་དོ། །ཕྱག་རྒྱ་མཉམ་པར་སྦྱོར་བ་ཡིས། །བདག་ཉིད་མང་པོ་མཛེས་བྱས་པས། །སྒྱུ་མ་རྡོ་རྗེར་བཤད་པ་སྟེ། །ཀུན་རྫོབ་དོན་དམ་ཐིམ་པའོ། །བདག་ཉིད་ལས་གཞན་རྡོ་རྗེ་མེད། །ཆོས་རྣམས་སྟོང་པའི་རང་བཞིན་ནི། །ལྷ་མོ་ཞེས་སུ་རྣམ་པར་བཤད། །བདེ་དང་དག་པའི་སེམས་དང་ནི། །ལུས་ནི་བུད་མེད་སྦྱོར་བཅས་དང༌། །བདེན་གཉིས་ཁ་སྦྱར་སྦྱོར་བའི་དོན། །ཡང་ན་རང་གི་རིག་མ་བརྟགས། །དེ་ནི་ཐིམ་པ་ཞེས་སུ་གསུང༌། །འབའ་ཞིག་གཟུང་བར་མི་བྱ་སྟེ། །ཕྱག་རྒྱ་ཟུང་དུ་འཇུག་པ་ཡིན། །ཆོས་
རྣམས་དག་པ་སྤྲོ་མེད་པ། །རྡོ་རྗེ་ཡུལ་དང་ཡུལ་ཅན་སྟོང༌། །ལྷ་དང་ཡེ་ཤེས་སྙིང་པོ་བརྗོད། །བཅོས་མའི་ཟུང་འཇུག་རྡོ་རྗེས་སྤྲོས། །རྡོ་རྗེས་ཡེ་ཤེས་དགུག་པར་བྱ། །རྡོ་རྗེ་མར་མེའི་ཡེ་ཤེས་དང༌། །སྣང་བ་རྒྱས་པར་གྱུར་པ་དང༌། །གཉིས་མེད་ལམ་གྱི་རྡོ་རྗེ་ལྔ། །གསང་བ་ཀུན་ད་ཡེ་ཤེས་དང༌། །ལྟེ་བ་བྷ་ག་སྟོང་པ་དང༌། །ཡེ་ཤེས་དམ་ཚིག་གསུམ་དུ་རིག །འབྱུང་བ་ཕུང་པོ་ཡེ་ཤེས་སུ། །རྣམ་དག་ཤེས་རབ་དང་ནི་ཐབས། །རྩེ་དགུ་པ་ཡི་དེ་ཁོ་ནའོ། །ནམ་མཁའ་དབྱིངས་ཀྱི་མཐས་གཏུགས་པར། །སྟོང་ཉིད་ཡེ་ཤེས་དབྱུག་གུའི་སྒྲ། །ཁམས་གསུམ་ཕྱི་རོལ་ཕྱིན་མའི་གཟུགས། །ཕྱག་རྒྱའི་བྷ་ག་མི་སྣང་བ། །དྲིལ་བུ་སྟོང་པའི་ལྕེ་དང་ལྡན། །ལྟེ་བ་གདོང་སོགས་མཉམ་པར་སྦྱོར། ཁ་སྦྱོར་གསུམ་དུ་རྡོ་རྗེའི་སྐུ། །དྲིལ་བུ་སྟོང་པ་ལྷན་སྐྱེས་ནི། །རྡོ་རྗེ་དང་པོར་གསུངས་པ་ཡིན། །ཕྱག་རྒྱ་གཅིག་པ་ཉིད་དུ་རིག །ཨཱ་ལི་ལྟེ་བ་ཉིད་ཡིན་ཏེ། །ཟུར་བརྒྱད་པ་ནི་ནོར་བུ་ཡིན། །དེ་དབུས་ཀུན་ད་རྡོ་རྗེའོ། །དྲིལ་བུ་ཤེས་རབ་མའི་བྷ་ག །དབྱུག་གུ་ཟེའུ་འབྲུ་རྩ་བརྒྱད་ནི། །དབུས་སུ་མཁའ་འགྲོ་གདོང་གི་སྤྲས། །ཀླུ་ཡི་སྒོ་རྣམས་དབྱེ་བ་ནི། །མཐེ་བོང་མཐའ་ལྟག་གིས་བླང་ཏེ། །ཕྱོགས་བརྒྱད་སྐྲོད་ཅིང་དཀྲོལ་བར་བྱ། །རོ་འཛིན་རོ་འཛིན་བཅིངས་སྙོམས་འཇུག །ཀཱ་ལི་ཨཱ་ལི་སྦྱོར་ཕྱག་རྒྱ། །ཡེ་ཤེས་འཁོར་བ་གཅོད་པར་བྱེད། །མི་ཕྱེད་དབྱེར་མེད་རྡོ་རྗེ་གསུམ། །རྡོ་རྗེ་དྲིལ་བུ་སྒྲ་རྣམ་དག །ཡེ་
ཤེས་སྐུ་དང་སྟོང་པའི་སྒྲ། །རིམ་པ་དང་པོ་ལྷག་མོས་ཅན། །རྫོགས་པ་ཡི་ཡང་སེམས་ཙམ་སྟེ། །དང་པོའི་ལས་ནི་ཐབས་དཔའ་བོ། །རྣམ་པ་དང་བཅས་སྟོང་ཡེ་ཤེས། །ལྷ་མོ་ཕྱག་རྒྱ་སྙོམས་འཇུག་ཡིན། །ཐབས་དང་ཤེས་རབ་མཉམ་པའམ། །རང་གི་ཕྲ་མོ་བཅུག་ནས་ཀྱང༌། །བུད་མེད་དག་ལ་འདོད་སྤྱོད་པ། །རྡོ་རྗེ་སེམས་དཔའ་མཆོད་བྱེད་ཡིན། །འབྱུང་བ་དབང་པོ་ཡུལ་འཆིང་བ། །རྡོ་རྗེ་ཐལ་མོའི་དོན་དུ་བརྗོད། །སྦྱིན་པ་དེ་བཞིན་ཚུལ་ཁྲིམས་དང། །བཟོད་པ་གསུམ་ནི་བསྲུང་བ་སྟེ། །བདུད་བཞི་ཉོན་མོངས་དགྲ་འཇོམས་ཡིན། །སེམས་ཀྱི་དཀྱིལ་འཁོར་ཚུལ་ཁྲིམས་བྱུག །བཟོད་པའི་མེ་ཏོག་མཉམ་ཉིད་སྤོས། །འོད་གསལ་མར་མེ་འདི་ལ་ཡོད། །རྣམ་པར་དག་པའི་རིམ་པར་ཕྱེ་བའོ། །ད་ནི་བསྒྲུབ་པའི་ཐབས་བརྗོད་པར་བྱ་སྟེ། བདེ་བའི་སྟན་ལ་འདུག་ནས་སུ། །དང་པོར་རེ་ཞིག་རྣལ་འབྱོར་པས། །རྡོ་རྗེ་ཐལ་མོ་དམ་བཅིངས་ལ། །སེམས་ཅན་ཀུན་ལ་རྗེས་བརྩེ་བས། དེ་ནས་སྙིང་ཁའི་ཧཱུྃ་གིས་བོས་པའི་དཀྱིལ་འཁོར་ལ་ཕྱག་འཚལ་བ་དང༌། མཆོད་པ་དང༌། སྐྱབས་སུ་འགྲོ་བ་དང། སེམས་བསྐྱེད་པ། བསྔོ་བ་དག་བྱས་ལ། ཧཱུཾ་གིས་འབར་བའི་རྗེས་སུ་བཞུགས་པ་བསྒོམ་མོ། །ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱ་སྭ་བྷཱ་བཱ་ཤུདྡྷོ྅ཧཾ། གཟུང་བ་དང་འཛིན་པ་ལས་གྲོལ་ཞིང༌། དངོས་པོ་ཐམས་ཅད་མཉམ་པར་བལྟ། མིག་གི་རྣམ་ཤེས་དང༌། མིག་དང་གཟུགས་ལ་སོགས་པ་བརྟེན་པ་
དང་འབྲེལ་བ། རང་བཞིན་དང་འབྲལ་བ། གཅིག་དང་དུ་མ་དང་བྲལ་བ། གང་ལས་སྐྱེ་བ་མེད་པ། རང་བཞིན་མཁས་པས་བསྒོམ་པར་བྱ། རྡོ་རྗེ་རྭ་བ་དང་དྲྭ་བ་དང༌། གུར་དང་ཕུར་བའི་ས་གཞི། སྐད་ཅིག་གིས་རྣམ་པར་དག་པ་དང་བཅས་པའི་དེ་ཁོ་ན་ཉིད་བསམ་པར་བྱའོ། །དེའི་དབུས་སུ་རླུང་དང་མེ་དང་ཆུ་དང་དབང་ཆེན་གྱི་སྟེང་དུ། རི་རབ་ལ་ཕོ་བྲང་ཁང་བརྩེགས་ཡངས་པ་མཚན་ཉིད་ཐམས་ཅད་ཡོངས་སུ་རྫོགས་པར། སེང་གེའི་གདན་ལ། ཧཱུཾ་ལས་དང་པོའི་རྡོ་རྗེ་ལྷ་ཉི་ཤུ་རྩ་བརྒྱད་པ་སྐད་ཅིག་གིས་བལྟས་ནས། དེའི་ལྟེ་བ་ལ་རྡོ་རྗེ་སེམས་དཔའ་རིག་མར་བཅས་པའི་སྙིང་ཁར་ཧཱུཾ་ཟླ་བ་ལ་གནས་པ་འོད་ཟེར་འབར་བ་སྣ་ཚོགས་པ། ཨོཾ་བཛྲ་ཤུདྡྷོ་སརྦ་དྷརྨཱ་བཛྲ་ཤུདྡྷོ྅ཧཾ། དེ་ལས་བདག་ཉིད་རྡོ་རྗེ་སེམས་དཔའ་ཕྱག་གཉིས་པ་སྔོན་དུ་བཤད་པའི་རྣམ་པ་སྟེ། འོན་ཀྱང་ཐབས་གཅིག་ཏུ་བསྒོམ་པར་བྱའོ། །ཞབས་ནི་སེམས་དཔའི་སྐྱིལ་ཀྲུང་སངས་རྒྱས་ཀྱི་སྤྲིན་སྤྲོ་བ། དེ་བཞིན་གཤེགས་པ་ལྔས་དབུ་ལ་སྤྲས་པ། ཨོཾ་ཡོ་ག་ཤུདྡྷཿསརྦ་དྷརྨ་ཡོ་ག་ཤུདྡྷོ྅་ཧཾ། དེའི་སྤྱི་བོ་དང་མིག་དང་སྣ་དང་ལྕེ་ཆུང་དང་མགྲིན་པ་དང། དཔུང་པ་དང་སྙིང་ག་དང་ལྟེ་བ་རྣམས་སུ་ཀྵུཾ་ཀྵུཾ་ཧཱུཾ་ཧཱུཾ་ཡུཾ་ཡུཾ་སུཾ་ དེ་ནས་མི་ཤིགས་པའི་ཧཱུཾ་གིས་ཡི་གེ་སྙིང་ཁའི་ཆུ་ཤིང་གི་མེ་ཏོག་ལྟ་བུ་ལ་བསྒོམས་ནས། ཨོཾ་ཨཱཿཧཱུཾ་གིས་སྔགས་སམ། ཐོག་མ་མེད་པའི་སྔགས་ཀྱི་དེ་ཉིད་ཤེས་པས་བཟླ་
བར་བྱའོ། །སྟོང་པའི་ངང་ལས་ཟླ་བ་ལ་ཆོ་ག་དེ་ཉིད་ཀྱི་རྡོ་རྗེ་སེམ་དཔའ་ལ། སྟོང་པ་རྣམ་པ་དང་བཅས་པའི་དེ་ཉིད་མི་མོའི་ཕྱག་རྒྱ་དག་ལ་ཡོངས་སུ་བཅུག་ནས། དམན་པར་མོས་པ་དང་སྣང་བ་འདི་ཡོངས་སུ་བརྟུལ་ནས་སོ། །འོན་ཀྱང་ཁྱད་པར་ནི། ལྷ་ཉི་ཤུ་གསུམ་པའི་བདག་ཉིད། དྲིལ་བུ་ཨཱཿལས་བྱུང་བ་ཡང་བུད་མེད་ཀྱི་རྟགས་དང་ཆ་ལུགས་སུ་བྱའོ། །ཨཱ་ལི་ཀཱ་ལི་ལས་བྱུང་བའི་ས་བོན་ཨོཾ་ཨཾ་ཨཱཿསྭཱཧཱ། ཞེས་རླུང་དང་དབྱེ་བ་དང་བྱེ་བྲག་མེད་པ་ཉིད་དུ་ཡོང་ཡེ་བཟླས་པ་བྱའོ། །གལ་ཏེ་རྡོ་རྗེ་དང་དྲིལ་བུ་ས་བོན་དང་བཅས་པ་ཁོ་ནས་ཀྱང་འདི་སྐྱེད་པའང་རུང་མོད་ཀྱི། དེ་ལ་ཡང་ལྷ་ཐམས་ཅད་ཀྱི་ལྷག་པར་མོས་པ་བརྟན་པ་བྱའོ། །འདི་ནི་ཁྲུ་གང་ཙམ་གྱིས་བར་ཆོད་པར་གནས་པར་འདོད་ཆགས་ཀྱི་སེམས་ཀྱི་སྟོབས་ཀྱི་ནི། བཙོ་མ་གསེར་གྱི་འོད་དང་མཉམ། །སེམས་ཅན་བསྒྲལ་ཕྱིར་ཀུན་ཏུ་འཁྱུད། །ནུ་མ་རྩེ་ཞིང་ཞལ་གཉིས་འཇིག །རྡོ་རྗེའམ་སོར་མོའི་རྩེ་མོར་ནི། །བདུད་རྩི་ཡི་གེ་ཧཱུཾ་བསམ་མོ། །ལྷ་མོའི་བྷ་གའི་གཡོན་ཕྱོགས་སུ། །བརྟན་པའི་རྩེ་མོར་ཨ་བཟུང་ངོ༌། །ལྕེ་ཡི་བྱ་བ་དེ་བཞིན་དུ། །བཅོ་བརྒྱད་གནས་ཀྱི་བདུད་རྩི་ནི། །འདི་ཡི་རབ་སྦྱོར་སིད་ཀྱི་སྒྲ། །བདུད་རྩི་ཆུ་ནི་འཛག་པར་འགྱུར། ཁ་སྦྱོར་འདོད་པ་ལྔ་ལ་སྤྱད། །གཟུགས་མཆོག་སྒྲ་སྙན་དང་པོ་ལྔ། །ནང་གི་འབྱུང་བ་ལྔ་བདག་ཉིད། །འདི་ལས་ས་ནི་རྣམས་འབྱུང་སྟེ། །སངས་རྒྱས་མུ་སྟེགས་ཀྱི་མི་ཤེས། །འདོད་པའི་ཀ་ར་ན་བཅིངས་ནས། །རླུང་ནི་འཕྲད་པས་གསུམ་ཐིམ་པ། །ཚངས་པའི་བདུད་རྩི་འཛག་པར་
བྱེད། །སྟེང་འོག་རང་དང་གཞན་ལ་ཡང༌། །རྩ་དང་རླུང་དང་ཟླ་ཉི་སྦྱོར། །དགའ་བ་མཆོག་དགའ་དེ་བཞིན་དུ། །དགའ་བྲལ་ལྷན་སྐྱེས་ཞེས་བྱ་བ། །དེ་ལ་མཆོག་གི་དགའ་བ་ལྡན། །སྐྱེས་དང་མཉམ་པའི་དགའ་བྲལ་གྱི་དབུས་སུ་ལྷན་ཅིག་སྐྱེས་པ་མར་མེ་ལྟ་བུ་མཚོན་པར་བྱེད་དོ། །དེ་ལྟར་སྟེང་འོག་གི་རིམ་པ་གཉིས་ཀྱི་དགའ་བ་བཞི་དང༌། ཡང་ན་བསམ་གཏན་གྱི་རང་དང་འདོད་མ་འོད་གསལ་དུ་བཅུག་སྟེ་མངོན་པར་བྱང་ཆུབ་པ་བསྒྲུབ་པར་བྱའོ། །དེ་ལས་ལྡང་བ་ན་བསམ་གཏན་གྱི་སྔ་མ་ལྟར་ལྡང་སྟེ། དེ་ལྟར་ན་བདེ་བ་ཆེན་པོའི་རྡོ་རྗེ་སྒྲུབ་པ་སྟེ། ཡང་ན་ཤིན་ཏུ་སྤྲོས་པ་མེད་པ་ནང་གི་བདག་ཉིད་བསྒོམ་པར་བྱའོ། །བར་དུ་གོ་ཆ་དགོད་པ་དང༌། དམིགས་པ་མེད་པའི་སྨོན་ལམ་དག་བྱའོ། །འདིར་རྩ་བའི་མདོར། ལས་ཀྱི་ཚོགས་ཀྱི་བུད་མེད་དང༌། པདྨ་ཅན་ལ་སོགས་པ་དངོས་གྲུབ་ཀྱི་དོན་ཅན་བཤད་པའི་མདོར་འབྱུང་བ་རྣམས་དང༌། ཕྱོགས་བཞིར་སེམས་ཅན་སྒྲོལ་བའི་བསྟན་བཅོས་དང༌། གོ་བཟློག་གི་སྦྱོར་བ་དང༌། མཆོད་པའི་རྐང་སྟབས་བཅོ་བརྒྱད་དང༌། ཚུལ་གྱི་བྱེ་བྲག་ཐམས་ཅད་ཤེས་པར་བྱ་སྟེ། གསང་བའི་རྡོ་རྗེ་དང་བྲལ་ནས། །དྲིལ་བུས་ཇི་ལྟར་འགྲུབ་པར་གྱུར། །རྡོ་རྗེའང་དྲིལ་བུ་དང་བྲལ་ན། །རྡོ་རྗེས་འགྲུབ་པའང་རིང་བར་འགྱུར། །རྡོ་རྗེ་དྲིལ་བུ་ཕྱག་རྒྱ་དག །དམིགས་ན་ཕ་རོལ་སྒྲོལ་བར་འགྱུར། །དེས་ནི་རྡོ་རྗེ་
དྲིལ་བུ་དག །མཉམ་པ་དེ་ཉིད་བསལ་བར་བྱེད། །འདོད་ལ་དགའ་བ་མ་ཡིན་ཞིང༌། །ལོངས་སྤྱོད་ཕྱིར་ནི་བསྟན་མི་བྱ། །སེམས་ཅན་དོན་བྱའི་ཕྱིར་དུ་ནི། །རབ་ཏུ་འབད་པས་དེ་ཉིད་དམིགས། །མི་བཟད་འཁོར་བའི་འཇིགས་པ་ནི། །ཆགས་པས་སྲིད་པར་ལྟུང་བར་འགྱུར། །ཆགས་པས་སྲིད་པར་ལྷུང་བ་དང༌། །ཞེན་པས་འཁོར་བར་འཇུག་པར་བྱེད། །རྨོངས་པའི་བདག་ཉིད་རིང་དུ་སྤངས། །འདོད་ཆགས་སྤངས་པའི་ལུས་ཀྱིས་ནི། །རྒྱུན་དུ་བརྟུལ་ཞུགས་ཡང་བཟུང་ངོ༌། །དབེན་པར་ཤིན་ཏུ་མཉམ་བཞག་པས། །དངོས་པོ་ཐམས་ཅད་མདོར་བསྡུས་པའོ། །དང་པོར་སེམས་བརྟན་མི་བརྟན་ཞེས་བྱ་བ་ལས་བརྟན་ན་སྤྱོད་པ་བྱའོ། །མཚན་མོ་ནི་བཞི་མདོ་ལ་སོགས་པར་སྤྱད་ནས་ཉིན་པར་ཤིན་ཏུ་གསང་ངོ༌། །དེ་ཡང་བརྟན་པར་ཤེས་ཤིང་ནུས་ན་བླ་མ་ལ་ཕྱག་བྱས་ཏེ། འཇིགས་པ་མེད་པ་དཔའ་བོ་སེང་གེ་བཞིན་དུ་རྒྱུ་སྟེ། དེ་ཁོ་ན་ཉིད་ཀྱིས་སེམས་དག་པར་བྱས་ལ་འདོད་པ་ལྔ་ལ་སྤྱོད་ཅིང་སྒྲིབ་པ་ལྔའི་གོ་སྐབས་སྐད་ཅིག་ཀྱང་སྤངས་ཏེ། གཟུང་བ་དང། འཛིན་པ་དང༌། བཟང་བ་དང། ངན་པའི་རྣམ་རྟོག་མཐའ་དག་སྤངས་པ་དང༌། ཡོངས་སུ་གཟུང་བ་ནི་ནམ་ཡང་མི་འདོད་པར་མཚན་མོ་ཤིན་ཏུ་འཇིགས་པའི་དུར་ཁྲོད་དུ་རྒྱུའོ། །དབྱུག་པ་དང་ལྷུང་བཟེད་གོས་དམར་པོ་དག་གིས་བས་མཐའི་འབྲོག་དགོན་པ་དག་གྲོང་དག་ཏུ་ཡང་བསོད་སྙོམས་བྱའོ། །འདི་ལྟར་སྨྱོན་པའི་སྤྱོད་པ་བྱ་སྟེ། རིག་མ་དང་ལྷན་ཅིག་སྤྱོད་པའམ། ཡང་ན་ནང་གི་བདག་ཉིད་ཡེ་ཤེས་ཀྱི་ཕྱག་རྒྱ་མོ་
སྒྲུབ་བོ། །ཉོན་མོངས་སྡིག་པའི་སྤྱོད་པས་ནི། གྲུབ་པ་ནམ་ཡང་ཡོད་མ་ཡིན། །རྙིང་བའི་གོས་སོགས་བསྒྲུབ་པར་བྱ། །མི་ལྤགས་རས་ནི་རྙིང་པ་བགོས། །དབྱུག་པ་ཐོད་པ་ལག་ན་ཐོགས། །སྲོག་ཆགས་ཡན་ལག་ལས་བྱུང་གྱོན། །སྣོད་ཆེན་པོ་སྟེ་འོད་གསལ་བ། །གཟུང་བ་འཛིན་པ་དབང་པོར་བཟུང༌། །ཇི་ལྟར་བཤད་པའི་བརྡ་རྣམས་དང༌། །ཚོགས་ཀྱི་འདུ་བ་ཁྱད་པར་དུའོ། །ཡུལ་ནི་ཉི་ཤུ་རྩ་བཞི་པོ། །དུར་ཁྲོད་ཆེན་པོར་ཞིང་སྐྱོང་བ། །རྡོ་རྗེ་མ་མོ་དག་དང་སྤྱོད། །དེ་ལྟར་བྱས་ན་མགོན་པོ་མཉེས། །ལྷ་མོ་ཀླུ་མོ་མི་མོ་དང༌། །མཁའ་འགྲོ་མ་དང་གནོད་སྦྱིན་མོ། །རྡོ་རྗེ་མ་དང་རྒྱལ་དབང་མོ། །དྲག་མོ་རོ་ལངས་མ་ཉིད་དང༌། །ཀམྦོ་ཛ་དང་སྟག་མོ་དང༌། །པུཀྐཱ་སི་ལ་སོགས་པ་དག །རང་རང་ཆོ་གའི་ལས་ཀྱིས་ནི། །བསྒྲུབས་ནས་འདོད་པ་ཆེན་པོ་བྱ། །བདག་པོ་ཡེ་ཤེས་རྒྱ་མཚོ་ནི། །ཟླ་བ་དྲུག་གིས་འགྲུབ་པར་འགྱུར། །དཔལ་ལྡན་རྡོ་རྗེ་སེམས་སྒྲུབ་ཐབས། །ཀླུ་དབང་གིས་ནི་བདེ་བ་བྱེད། །ཆུ་ཤིང་ཡེ་ཤེས་ཅན་དུ་བརྗོད། །སྨིག་པ་རླུང་རྣམས་འཕྲོག་བྱེད་མའོ། །དཔལ་ལྡན་རྡོ་རྗེ་སེམས་དཔའ་མཐོང་ཞིང་སྦས་པ་རྗེ་བཙུན་ནག་པོའི་ཞལ་སྔའི་རིམ་པས། རང་བྱིན་གྱིས་བརླབས་པའི་མན་ངག་གི་རིམ་པ་གཉིས་གསལ་བར་མཛད་པ་རེ་ཞིག་རྫོགས་སོ།། །།གདན་བཞི་རིན་ཆེན་འབྱུང་གནས་ལས། །བློ་ལྡན་རིན་ཆེན་རྙེད་པ་ནི། །བརྟུལ་ཞུགས་ཞལ་སྔའི་རིམ་པ་སྟེ། །ཀུ་
སཱ་ལ་ཡིས་བཤད་པ་ཡིན། །འདི་ནི་ཡི་གེ་མེད་པ་སྟེ། །ནགས་ཚལ་དག་ཏུ་སྨྲ་བར་བྱ། །ཤིན་ཏུ་གསང་ཞིང་གསང་བར་གསང༌། །གཅིག་པུར་སྐལ་ལྡན་ཉིད་ལ་འོས། །བདག་བྱིན་རློབས་པའི་རིམ་པ་ཡིས། །མན་ངག་བཤད་ལས་གང་ཐོབ་པའི། །ངག་གི་འོད་ཟེར་དགེ་བ་ཡིས། །འགྲོ་བའི་རབ་རིབ་མུན་སེལ་ཤོག །རང་བྱིན་གྱིས་བརླབས་པའི་མན་ངག་ཅེས་བྱ་བ། བཅོམ་ལྡན་འདས་རྡོ་རྗེ་སེམས་དཔའི་སྒྲུབ་ཐབས། སློབ་དཔོན་བརྟུལ་ཞུགས་སྤྱོད་པ་ནག་པོའི་ཞབས་ཀྱི་རིམ་པ་སློབ་དཔོན་ཀུ་སཱ་ལས་མཛད་པའོ། །སློབ་དཔོན་ཆེན་པོ་སངས་རྒྱས་སྦས་པའི་ཞལ་སྔ་ནས་དང༌། རྨོངས་པ་ཀུན་དགའ་སྙིང་པོ་ཏཱ་ར་ནཱ་ཐས་གཡར་ཁྲལ་དུ་བསྒྱུར་བའོ། །བཀྲ་ཤིས་དགེ་ལེགས་འཕེལ།།