ཀླུ་བསང་བསྡུས་པ།
ཀླུ་བསང་བསྡུས་པ་བཞུགས། ཀླུ་བསང་བྱ་བ་ལ་ཀླུ་རྫས་ཀླུ་སྨན་ཀླུ་ཤིང་སྣ་ཚོགས་པ་བསྲེགས་ལ། ཨོཾ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་སྣོད་ཀྱི་ནང་དུ་བསང་རྫས་ཟག་པ་མེད་པ་བདུད་རྩིའི་རྒྱ་མཚོ་ཆེན་པོར་གྱུར། འབྲུ་གསུམ་ལན་གསུམ། སྔགས་དྲུག་ཕྱག་དྲུག་གིས་བྱིན་གྱིས་རླབས་ལ་འདི་སྐད་དོ། །ཀྱཻ་དབུས་ཀྱི་དབུས་རྒྱལ་ཆུ་ལྷ་ནི། །སྦྲུལ་མགོ་བདུན་གྱི་གདེངས་ཀས་མཛེས། །ཕྱག་གཉིས་ཐལ་སྦྱར་འཛུམ་བག་ཅན། །ལྷ་ལུས་རིན་ཆེན་རྒྱན་གྱིས་སྤྲས། །སྐུ་སྨད་སྦྲུལ་མཇུག་འཁྱིལ་བ་ནི། །དེ་རིང་གནས་འདིར་སྤྱན་འདྲེན་ནོ། །འཁོར་དང་བཅས་པ་གཤེགས་སུ་གསོལ། །བདུད་རྩི་བསང་གི་མཆོད་པ་འབུལ། །དཀར་གསུམ་མངར་གསུམ་མཆོད་པ་འབུལ། །ཀླུ་རྫས་སྣ་ཚོགས༴ །མཆོད་པ་འབུལ་བའི་ཡོན་ཏན་གྱིས། །བདག་དང་རྒྱུ་སྦྱོར་ཡོན་བདག་ལ། །ཀླུ་ཡི་གཡང་དང་དངོས་གྲུབ་ནས། །མི་དང་ནོར་འཕེལ་བཀྲ་ཤིས་དང༌། །ལོངས་སྤྱོད་ཕུན་སུམ་ཚོགས་པ་དང༌། །ནད་མེད་དཔལ་འབྱོར་རྒྱས་པར་ཤོག །ཀྱཻ་ཤར་དུ་མཐའ་ཡས་ལྷོ་རུ་པདྨ་དང༌། །ནུབ་ཏུ་འཇོགས་པོ་བྱང་དུ་ནོར་རྒྱས་དང༌། །ཤར་ལྷོར་དུང་སྐྱོང་ལྷོ་ནུབ་ཀརྐོ་ཊ། །ནུབ་བྱང་རིགས་ལྡན་བྱང་ཤར་པདྨ་རྣམས། །དེ་རིང་གནས་འདིར་སྤྱན་འདྲེན་ནོ། །འཁོར་དང་བཅས་པ་གཤེགས་སུ་གསོལ། །བདུད་རྩི་བསང་གི་མཆོད་པ་འབུལ། །ཀྱཻ་རྗེ་རིགས་
དང་ནི་བྲམ་ཟེའི་རིགས། །དམངས་རིགས་གདོལ་བའི་རིགས་རྣམས་དང༌། ཁྱད་པར་ཡུལ་ཕྱོགས་འདིར་གནས་པའི། །ཀླུ་གཉན་ས་བདག་འཁོར་བཅས་དང༌། །གཉན་གཏོར་ཀླུ་དང་སྡེ་བརྒྱད་སོགས། །འཁོར་དང་བཅས་པ་ཐམས་ཅད་བསང༌། །གནས་དང་ཕོ་བྲང་བཤིག་པ་དང༌། །འཁོར་དང་ལོངས་སྤྱོད་བརླག་པ་དང༌། །ས་གཉན་རྡོ་གཉན་ཤིང་གཉན་དང༌། །ཆུ་གཉན་ཆུ་མིག་བསྲུབས་པ་དང༌། །མི་གཙང་དྲི་མས་ཕོག་པ་སོགས། །ཉེས་པའི་སྐྱོན་གྱིས་ཁྱེད་རྣམས་ལ། །ནད་དང་གནོད་པ་ཅི་མཆིས་པ། །མཆོད་པའི་རྫས་ཀྱི་གསོས་གྱུར་ཅིག །བདུད་རྩི་བསང་གིས་དག་གྱུར་ཅིག །དག་པའི་དང་དུ་གནས་གྱུར་ཅིག །དགའ་བདེའི་སེམས་དང་ལྡན་གྱུར་ཅིག །རྣལ་འབྱོར་བདག་དང་ཡོན་བདག་ལ། །ཀླུ་ཡིས་གཡང་དང་དངོས་གྲུབ་ནས། །མི་དང་ནོར་འཕེལ་བཀྲ་ཤིས་དང༌། །ལོངས་སྤྱོད་ཕུན་སུམ་ཚོགས་པ་དང༌། །ནད་མེད་དཔལ་འབྱོར་རྒྱས་པར་ཤོག །ཀླུ་གཉན་ས་བདག་འཁོར་བཅས་ཀྱིས། །ནད་དང་གདུག་རྩུབ་མ་བཏང་ཞིག །མི་ལ་ན་ཚ་མ་བཏང་ཞིག །ནོར་ལ་གོད་ཁ་མ་བཏང་ཞིག །ཞིང་ལས་སད་སེར་མ་བཏང་ཞིག །རྣལ་འབྱོར་བདག་དང་ཡོན་བདག་ལ། །རིག་འཛིན་ཚེ་དང་སྟོབས་ལྡན་མཐུ། །དབང་ཐང་བུ་དང་མཛོད་ལྡན་ནོར། །གྲགས་པ་སྙན་དང་ཁ་དོག་གོས། །རྐང་འགྲོ་ནོར་དང་སྐྱིད་སྤྱོད་ཟས། །ད་ལྟ་
ཉིད་དུ་སྩལ་དུ་གསོལ། །བཅོལ་པའི་འཕྲིན་ལས་འགྲུབ་པར་མཛོད། །ཀླུ་བསང་ཉེ་བར་བསྡུས་པ་འདི་ཡང་ཏཱ་ར་ནཱ་ཐས་སྨྲས་པའོ།། །།མངྒ་ལཾ།། བཀྲ་ཤིས།། ཨོཾ་སྭཱ་སྟི། བྷ་ག་ཝ་ཏི་ཨཱརྱ་ཏ་རེ། བདག་ཏཱ་ར་ནཱ་ཐས་ཕྱག་འཚལ་ལོ། །འཕགས་མའི་ཐུགས་དང་ཅི་འགལ་བ། །ཉེས་བྱས་གང་ཡིན་བཤགས་པར་བགྱི། །ཉེས་པ་གང་ཞིག་ལེགས་པ་དང༌། །དེ་སྦྱོང་ཐབས་དང་ལུང་བསྟན་གསོལ། །བུ་ནི་ལམ་གོལ་བྱུང་སྲིད་ན། །མ་ཡིས་ཅི་ཕྱིར་ལམ་མི་སྟོན། །ཤུུ་བྷཾ། ༈ ཨོཾ་སྭཱ་སྟི། བཅོམ་ལྡན་འདས་མ་འཕགས་མ་སྒྲོལ་མ་ལ། །བདག་ཀུན་དགའ་སྙིང་པོ་ཕྱག་འཚལ་ལོ། །བདག་གིས་སེམས་ཅན་ཐམས་ཅད་ཀྱི། །སྡུག་བསྔལ་མ་ལུས་སེལ་བར་ཤོག །གལ་ཏེ་བུ་ལ་ནུས་མེད་ན། །ཡུམ་གཅིག་གཏོང་གྲོགས་ཅིས་མི་མཛད། །གདུང་བས་ལྷང་ལྷང་ཞུ་ཞིང་འབོད། །ཡེ་ཤེས་སྤྱན་གྱི་མི་གཟིགས་སམ། །ཤུུ་བྷཾ།། ༈ ཨཱརྱ་ཏཱ་རེ། ཀྱཻ་སེམས་ཅན་ཐམས་ཅད་སྡུག་བསྔལ་ཡ་ཆ་མ་ཆ་འདི་འདྲ་རང་འཁུར་དགོས་པ་འདྲ། ཁྱོད་ཀྱི་ཅི་ཡི་མི་སྐྱོབ་ལགས། ཨ་རེ། ཀྱཻ། སྒྲོལ་མ་ཀྱཻ་སྒྲོལ་མཛད་མ། ཙནྡྲ་གོ་མི་བཞིན། བདག་ཀྱང་སྐྱོབ་པར་ཞུ། ཧེ་ཧེ། ༈ ཏཱ་རེ་ཏཱ་རེ་ཏཱ་རེ། པུར་རྒྱལ་བོད་ཀྱི་མི་རྣམས་སྡུག་བསྔལ་འདི་འདྲས་ནོན། །སངས་རྒྱས་བསྟན་པ་ནུབ་པ་
འདི་ལ་ཁྱོད་ཀྱིས་སྐྱོབ། ཁྱོད་མིན་སུ་ལ་རམ་ཟླ་སྒྲོན། །གཟིགས་ཤིག་གཟིགས་ཤིག་གཟིགས་ཤིག ༈ ཕཊ། མ་ཡི་བུ་ལ་ཁྲོ་བ་ཅི། །ཉེས་པ་ཐམས་ཅད་སྙིང་ནས་བཤགས། །ལར་ནས་ཐམས་ཅད་བདེན་པས་སྟོང༌། །ཕཊ། ༈ ཨོཾ་ཏིཥྛ། ཇོ་མོ་མངོན་པར་མཐོ་བའི་ཡུལ། །དམན་པའི་གནས་ལས་དྲངས་དུ་གསོལ། དི་པཾ་ཀ་ར་ཤྲཱི་ཛྙཱ་ན་དང༌། ཤཱཀྱ་ཤྲི་བྷ་དྲ་བཞིན། །བདག་གི་ཅོ་ཏོ་ནས་ཟུངས་ཤིག །ཏཱ་རེ་མཁྱེན། ༈ ཧེ་བྷ་ཊི། བྷཱ་ཊི། བྷ་ཊི། རྣལ་འབྱོར་མ་ཅན་གྱི་དབང་ཕྱུག་མས། །མ་མ་ཨ་ཡུར་ཙི་རཾ་ཛཱི་ར། ཁྱེད་ལས་སྐྱབས་གཞན་མ་མཆིས་སོ། །ཡོ་གི་ཤཱ་རི། ༈ ཧེ་དེ་བཱི། ལྷ་མོ་མི་མཐུན་ཕྱོགས་ཀུན་འཇོམས། །རེ་ས་གཞན་ན་མ་མཆིས་སོ། །མངྒ་ལཾ།། ༈ དཔལ་ལྡན་མི་འཇིགས་ཕྱག་རྒྱ་དེ། །བདག་གི་སྤྱི་བོར་རྟག་ཏུ་ཞོག །བྱིན་གྱིས་རློབས་ཤིག་ཨེ་མ་ཧོ། ༈ བྷོ་བྷ་ག་ཝ་ཏཱི། ཡེ་ཤེས་གཟི་འོད་རྒྱས་པ་ཡི། །དངོས་གྲུབ་དེ་འདྲ་བདག་ལ་སྩོལ། ཧ་ཧ་ཧ་ཧ། ༈ ཨཾ་ཨཾ་ཨཾ། ཤེས་རབ་མཚོན་ཆས་སྒྲིབ་གཉིས་འཇོམས། །བདག་ཅག་མ་རིག་ད་སོལ་ཅིག །སེམས་ཅན་ཉོན་མོངས་རྒྱ་མཚོར་བྱིང༌། །འདི་འདྲ་འཇིགས་པ་ཀུན་ལས་སྐྱོབ། །ཨ་ལ་ལ་ཏེ་ལས་ལ་བཞེངས། །བཀྲ་ཤིས། ༈ རིག་འཛིན་འཁོར་ལོ་བསྒྱུར་བ་མོ། ཁྱེད་ཀྱི་བདག་ཅག་རིག་འཛིན་གྱི། །འཁོར་ལོ་
བསྒྱུར་བའི་གནས་ལ་ཞོག །ཁམས་གསུམ་དབང་ཕྱུག་གོ་འཕང་འཁོད། །ཀལྱཎ། ༈ ཏཱཾ་ཁཾ། བདག་ཀྱང་དམ་ཚིག་རྡོ་རྗེ་བསྒྲུབས། །འཕགས་མའི་སྐུ་དང་མཉམ་པར་ཤོག །དཀྱིལ་འཁོར་འཁོར་ལོ་ཀུན་འདུས་པའི། །དབང་ཕྱུག་མ་དང་བདག་པོར་གྱུར། །སམྦནྣ་ཀུ་རུ། འདི་རྗེ་བཙུན་འཕགས་མ་སྒྲོམ་མར་ཟླར་བོས་པ་ཞེས་བྱ་བ་ཡིན། རྗེ་བཙུན་ཏཱ་ར་ནཱ་ཐའི་གསུང་ཐོར་བུའོ།། །།མངྒ་ལཾ།། བཀྲ་ཤིས།། ༈ འདིར་འབད་དགེ་འདིས་ལུས་འདི་བོར་མ་ཐག །གཡུ་ལོ་བཀོད་པར་འཕགས་མའི་དགྱེས་ཞལ་དྲུང༌། །ཐུགས་སྲས་གདུལ་ཞིང་མཆོག་ཏུ་ལེགས་གྱུར་ཏེ། །སྐྱེ་སྲིད་དེ་ལ་ལམ་མཐར་ཕྱིན་གྱུར་ཅིག །ཅེས་པའང་མ་ཏིས་སྨྲས་སོ།། །།