དམ་ཅན་ཆོས་ཀྱི་རྒྱལ་པོ་ལས་ཀྱི་གཤིན་རྗེའི་མན་ངག
དམ་ཅན་ཆོས་ཀྱི་རྒྱལ་པོ་ལས་ཀྱི་གཤིན་རྗེའི་མན་ངག་གསང་བ་ལས་ཀྱང་ཆེས་གསང་བ་བཞུགས་སོ། ཆོས་རྒྱལ་མན་ངག་ཆེན་མོ་དགེའོ། །
བཅོམ་ལྡན་འདས་དཔལ་རྡོ་རྗེ་འཇིགས་མཛད་ཆེན་པོ་ཡ་མནྟ་ཀ་ལ་ཕྱག་འཚལ་ལོ། །གཤིན་རྗེ་ཆོས་ཀྱི་རྒྱལ་པོའི་རྟོག་པ་དང༌། དེའི་མན་ངག་རྭ་བའི་བླ་མ་གོང་མ་རྣམས་ཀྱི་ཕྱག་ལེན་ལྟར་བཤད་པར་བྱའོ། །དེ་ལ་དང་པོར་རྒྱུན་གྱིས་གཏོར་ཆོག་ནི། གཏོར་མ་གྲུ་གསུམ་ཤ་ཁྲག་གིས་བརྒྱན་པ་མཆོད་པ་དང་བཅས་པ་བཤམས། དཔལ་རྡོ་རྗེ་འཇིགས་མཛད་ལ་སོགས་པ་ཁྲོ་བོའི་རྒྱལ་པོ་གཤིན་རྗེ་གཤེད་གང་ཡང་རུང་བའི་བདག་སྐྱེད་སྔོན་དུ་འགྲོ་བས་མཆོད་པ་དང་གཏོར་མ་ཡི་དམ་ལྟར་བྱིན་གྱིས་རླབས། རྟེན་ཡོད་ན་ཨམྲྀ་ཏས་བསངས། རྟེན་ཡོད་མེད་གང་ཡིན་རུང་སྭ་བྷཱ་ཝས་སྦྱངས། སྟོང་པའི་ངང་ལས་ཧཱུཾ་ལས་བསྲུང་བའི་འཁོར་ལོ་དང༌། དུར་ཁྲོད་ཆེན་པོའི་དབུས་རང་གི་མདུན་དུ་པད་ཉི་ལ་གནས་པའི་མ་ཧེ་ནག་པོ་དྲེགས་ཤིང་ཁྲོས་པ་ལུས་ཉམས་རྩལ་དང་ལྡན་པ་རྭ་བརྡར་ཞིང་རྨིག་པ་རྡེབ་པ། དགྲ་བགེགས་བྱད་མ་ཐམས་ཅད་བརྫིས་ཤིང་གསོད་པར་བྱེད་པ་ཤིན་ཏུ་འཇིགས་པའོ། །དེའི་སྟེང་དུ་རང་གི་ཐུགས་ཀ་ནས་ཧཱུཾ་གཅིག་
སྤྲོས་ཏེ། ཧཱུཾ་དེ་ལས་ཐོད་སྐམ་གྱིས་མཚན་པའི་དབྱུག་ཏོའམ་བེ་ཅོན་ཧཱུཾ་གིས་མཚན་པ། དེ་ལས་འོད་འཕྲོས་འཕགས་ཚོགས་མཆོད། སེམས་ཅན་གྱི་དོན་བྱས་དགྲ་བགེགས་གདུག་པ་ཅན་ཐམས་ཅད་ཚར་བཅད། འཁོར་འདས་ཀྱི་ནུས་མཐུ་རྣམས་བསྡུས། ས་བོན་ཕྱག་མཚན་ལ་ཐིམ་པ་ཡོངས་སུ་གྱུར་པ་ལས། ལས་ཀྱི་གཤིན་རྗེ་སྐུ་མདོག་མུན་པ་ལྟར་གནག་པ། ཤིན་ཏུ་ཆེས་ཁྲོས་འཁྲུགས་རྔམ་པ། ཞལ་གཅིག་ཕྱག་གཉིས་དམར་ལ་ཟླུམ་པའི་སྤྱན་གསུམ་པ། དབུ་སྐྲ་རལ་པ་ཁམས་སེར་གྱེན་དུ་བརྫེས་ཤིང་ཕྱོགས་ཀུན་ཏུ་གཡེངས་པ། རབ་ཁྲཽས་མ་ཧེའི་གདོང་མཆེ་བ་བཞི་གཙིགས་པ། ཡང་ན་སྲིན་པོའི་ཞལ་རས། ཕྱག་གཡས་ཐོད་སྐམ་གྱིས་མཚན་པའི་དབྱུག་ཏོ་ནམ་མཁའ་ལ་འཕྱར་བ། གཡོན་དུས་ཀྱི་ཞགས་པ་ནག་པོ་དང་བཅས་པའི་སྡིགས་མཛུབ་གནོད་བྱེད་ལ་བསྡིགས་པར་མཛད་པ། སྐུ་སྦོམ་ཞིང་ཐུང་བ་གཅེར་བུ་ལིང་ག་གྱེན་དུ་སྒྲེང་བ། ཞབས་གཡས་བསྐུམས་
གཡོན་བརྐྱངས་པས་མ་ཧེ་ལ་གནས་པ། ཐོད་སྐམ་གྱི་དབུ་རྒྱན་ཐོད་རློན་གྱི་དོ་ཤལ། རུས་པའི་རྒྱན་གྱིས་བརྒྱན་པ། དེའི་གཡོན་དུ་ཧྲིཿ ལས་མདུང་རྩེ་གསུམ་པ་ཧྲཱིཿས་མཚན་པ། དེ་ལས་འོད་འཕྲོས་ལས་གསུམ་མཛད་འདུས་པ་ཡོངས་སུ་གྱུར་པ་ལས། སྲིན་མོ་ཆེན་མོ་ཙ་མུ་ཎྜཱི་དུས་མཐའི་སྤྲིན་དང་མཚུངས་པའི་མདོག་ཅན་ནུ་མ་རྒྱས་པ། ཕྱག་གཡས་ཏྲི་ཤུ་ལ་འཕྱར་ཞིང༌། གཡོན་ཐོད་པ་སྙིང་ཁྲག་གིས་གང་བ་འཛིན་པ། ཞབས་གཡོན་སྐུམ་གཡས་བརྐྱངས་པའི་སྟབས་ཀྱིས་བཞུགས་པ་གླང་པོ་ཆེའི་ཀོ་རློན་གྱོན་པ་རྒྱན་དང་ཆ་བྱད་ལས་ཀྱི་གཤིན་རྗེ་དང་མཚུངས་ཤིང༌། ཡབ་ཡུམ་གཉིས་ཀ་མེ་རླུང་འཚུབ་མའི་དབུས་ན་བཞུགས་པའོ། །གཉིས་ཀའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། རང་གི་སྙིང་ཁ་ནས་འོད་ཟེར་འཕྲོས། འཛམ་གླིང་དབུས་ཀྱི་ཕྱོགས་མཚོ་མ་དྲོས་པའི་ས་འོག་དཔག་ཚད་ལྔ་བརྒྱ་ནས། དམ་ཅན་གཤིན་རྗེ་ཆོས་ཀྱི་རྒྱལ་པོ་དང༌། སྲིན་མོ་ཆེན་མོ་ཙ་མུཎྜི་འཁོར་དང་བཅས་པ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དབང་གི་ལྷ་གཤིན་རྗེ་གཤེད་རྒྱལ་བ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿ པུཥྤེ་ནས་ཤཔྟའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བསྩལ་ཏུ་གསོལ། ཨོཾ་བཛྲཱི་བྷ་ཝ་ཨབྷི་ཥིཉྩ་ཧཱུཾ། ཞེས་གསུངས་ཤིང་བུམ་པའི་ཆུས་དབང་བསྐུར། སྐུ་ལུས་
གང༌། ཉེས་སྐྱོན་དག །ཡབ་ཡུམ་གཉིས་ཀར་གྱི་སྤྱི་བོར་རྡོ་རྗེ་ནག་པོ་རྩེ་ལྔ་པས་དབུ་བརྒྱན། དབྱུག་པའི་ཕྱག་རྒྱ་དང་ཡི་གེ་བཅུ་གཅིག་པ་ལན་གསུམ་གྱི་མཐར་ས་མཱ་ཡ་སྟྭཾ་ཞེས་དམ་ལ་བཞག །ཨོཾ་ཀཱ་ལ་རཱུ་པ་ས་པཱ་རི་ཝ་ར་བྷྱཿ ཨརྒྷཾ་ནས་ཤཔྟའི་བར་གྱིས་མཆོད་དོ། །ཨོཾ་ཀཱ་ལ་རཱུ་པ་ཧཱུཾ་ཕཊ། ཡི་དམ་ཆོས་སྐྱོང་གཉིས་ཀའི་སྔགས་ཀྱང་ཡིན། ཆོས་རྒྱལ་ཉིད་མཆོག་ཏུ་ཉེ་བར་བྱེད་པའི་ཉེ་བའི་སྙིང་པོའོ། །ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཕཊ། ཡི་གེ་བཅུ་གཅིག་པ་སྟེ་བྱིན་གྱིས་རློབས་པའི་སྔགས་སོ། །ཨོཾ་ཀཱ་ལ་རཱུ་པ་བྷི་མ་ཡཀྵ་ཧཱུཾ། མཧཱ་རོ་ཥ་ཎ་ཡ་མ་རཱ་ཛ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་ནི་བསྙེན་པའི་སྔགས་ཏེ་སྙིང་པོའོ། །ཨོཾ་ཀཱ་ལ་རཱུ་པ་བྷི་མ་ཡཀྵ་ཧཱུཾ་མཧཱ་རོ་ཥ་ཎ་ར་སིདྡྷི་ཡོ་སརྦ་བྷུ་ཏ་ཨ་དྷི་པ་ཏ་ཡེ་ཡ་མ་རཱ་ཛ་ཧཱུཾ་ཧཱུཾ་ཕཊ་ཕཊ་སྭཱཧཱ། ཉེ་བའི་བསྙེན་པའི་སྔགས་ཏེ་རྩ་སྔགས་སོ། །ཨོཾ་ཀཱ་ལ་རཱུ་པ་ཡ་སརྦ་ཤ་ཏྲུན་དུཥྟ་ཏྲཱ་ས་ཡ་ཏྲཱ་ས་ཡ། ཨ་གདྡྷྱ་ཨ་གདྡྷྱ་ཤོ་ཥ་ཡ་ཤོ་ཥ་ཡ་ཧ་ན་ཧ་ན། ད་ཧ་ད་ཧ། པ་ཙ་པ་ཙ། བནྡྷ་བནྡྷ། ཙུརྞ་ཙུརྞ། ཙཀྵ་བཛྲེ་ཎ་གྷོ་ར་པ་དྲཱ་ཡ་ཀྵེ་ཏྲ་པཱ་ལཱའ་ཡེ། ཙྪིན་ད་ཙྪིན་ད། བྷིན་ད་བྷིན་ད། ཐཱཾ་ཀཾ་བཛྲ་ནཱ་ད་རུ་དྷི་ར་ཨརྒྷཾ྄་པཱ་ཡ་ཡ་བཱ་ར་ཡ་བཛྲ་ཡ་ནཱ་ཤ་ཡ་སྟམ་བྷ་ཡ་ཧཱུཾ་ཕཊ། ཡབ་ཀྱི་འཕྲེང་སྔགས་ཏེ་གཤིན་རྗེ་བྱེ་བ་ཐེར་འབུམ་གྱི་སྔགས་སོ། །ཧྲིཿཙ་མུནྚི་ཡེ་སརྦ་ཤ་ཏྲུན་དུཥྟན་དྷུ་ན་དྷུ་ན་བནྡྷ་བནྡྷ་
མ་ཐ་མ་ཐ། པྲ་མ་ཐ་པྲ་མ་ཐ། ཧཱུཾ་ཛཱ་ལ་ཛྭ་ར་ཛྭ་རེ་ཎ་བྱེ་དྷི་རོ་ག་ཎཾ་ཉི་ག་ན་ཤི་བཾ་ཡཾ་ཧཾ་རཾ་རི་ཚུས་ཡ་ཨ་བེ་ཤ་ཡ་ཛི་བཾ་ཧྲི་ད་ཡ། ཚིནྡྷ་ཚིནྡྷ། བཱའ་དྱ་པ་ཤི་གྷྲཾ་མཱ་ར་ཡ། ན་ཤ་ཡ་ཧཱུཾ་ཕཊ། ལྷ་མོ་ཙ་མུཎྜཱིའི་འཕྲེང་བའི་སྔགས་ཏེ་མ་མོ་བྱེ་བ་ཐེར་འབུམ་གྱི་སྤྱི་སྔགས་སོ། །འཕྲེང་སྔགས་འདི་གཉིས་ལ་སྔགས་བཏུ་མེད་ཅིང༌། སྐབས་འགར་ལེགས་སྦྱར་རང་དུའང་མ་ངེས་པས། འདོན་ཚུལ་མི་འདྲ་བ་འགའ་རེ་འདུག་ཀྱང༌། དག་ཐེར་བྱས་ནས་ཁུངས་ཆེ་བའི་ཕྱོགས་ནས་བྲིས་པའོ།།ཨོཾ་ཧྲིཿཙ་མུནྚཱི་ཡེ་ཧཱུཾ་ཕཊ་སྭཱཧཱ། ཞེས་པ་ནི་ཡུམ་ཙ་མུཎྜིའི་སྙིང་པོ་སྟེ་ཡབ་ཀྱི་ཉེ་སྙིང་དང་སྙིང་པོ་དང་རྩ་སྔགས་ཐམས་ཅད་ཀྱི་ཟླ་སྡེབ་ལ་འདི་ཁོ་ན་སྤེལ་ཏེ་སྦྱར་རོ། །འདིར་ཙ་མུནྚཱི་ཅེས་པའི་གཞུག་ཏུ་བཾ་ཧཱུྃ་ཕཊ་དང༌། ཙཾ་ཧཱུཾ་ཕཊ་སྦྱོར་བའང་ཡོད་དོ། །རྒྱུ་མཚན་ལ་བརྟགས་ན་གཉིས་ཀ་མི་འགལ་ཀྱང༌། དཔེ་རྙིང་བ་རང་ཚོ་ན་མི་འདུག་ཅིང༌། མགོ་ན་ཧྲཱིཿཡོད་ཕྱིན་ས་བོན་གཉིས་སྦྲགས་དགོས་ཀྱང་མི་དགོས་པ་འདྲའོ། །དེ་དག་ཐམས་ཅད་བློ་ལ་བྱང་བར་བྱས་ནས་སྐབས་འདིར་ཐམས་ཅད་ཚར་གཅིག་བརྗོད་དེ། འཕྲེང་སྔགས་མ་གཏོགས་གང་ཡང་རུང་བ་གཅིག་བརྒྱ་རྩ་སོགས་ཅུང་ཟད་བཟླས། ཨོཾ་ཨཱཿཧཱུཾ་ཞེས་བྱིན་གྱིས་རླབས། གཏོར་མ་བདུད་རྩིའི་རྒྱ་མཚོ་ཆེན་པོར་སླར་ཡང་གསལ་བཏབ། ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ། ཨི་དཾ་
བ་ལིང་གྲྀཧྞ་གྲྀཧྞ་ཁ་ཁ་ཁཱ་ཧི་ཁཱ་ཧི། ཞེས་ལན་བདུན་ལས་མི་ཉུང་བས་ཡབ་ལ་ཕུལ། ཨོཾ་ཧྲིཿཙ་མུནྚི་ཡེ་ཨི་དཾ་བ་ལིང་སོགས་གོང་བཞིན་སྦྱར་བ་ལན་གསུམ་མམ་ལྔས་ཡུམ་ལ་ཕུལ། ཨོཾ་ཀཱ་ལ་རཱུ་པ་ཙ་མུནྚི་ཡེ་ཞེས་པ་མགོ་བོར་སྦྱར་ནས་ཨརྒྷཾ་ནས་ཤཔྟའི་བར་གྱི་མཆོད། འཆི་བ་ཡི་དྭགས་རྒྱལ་པོ་ནི། །མ་དྲོས་མཚོ་ཡི་འབྲི་དཀྱིལ་ན། །རི་ནག་དགུ་ཡི་ཕ་མཐའ་སྟེ། །སྤོས་ངད་རི་ཡི་བར་དག་ན། །མཆུ་དང་ཞིང་དུ་ཆ་མཉམ་མཚོ། །དེ་འོག་དཔག་ཚད་ལྔ་བརྒྱའི་འོག །འཆི་བདག་ཡི་དྭགས་རྒྱལ་པོ་བཞུགས། །འགྲོ་བ་ཀུན་གྱི་ལུས་ཀྱི་བདུད། །ལུས་དང་གྲིབ་མའི་ཚུལ་བཞིན་དུ། །འགྲོ་བ་ཀུན་ལ་གནས་པ་སྟེ། །ཕུང་པོ་ཉིང་མཚམས་སྦྱོར་བ་པོ། །འཇིགས་པ་ཁྱོད་ཀྱི་གཟུགས་མཐོང་ཞིང༌། །གཤིན་རྗེ་ཁྱོད་ཀྱི་དྲི་ངད་ལྡང༌།། རྩེ་ན་འགྲོ་བའི་སྲོག་གི་བདུད། །ལྟག་པའི་ཕྱོགས་ན་གནས་པ་སྟེ། གཙིགས་པ་ཅན་ལ་ཕྱག་འཚལ་ལོ། །སྲིན་པོའི་ལྕམ་མོ་གཤིན་རྗེའི་ཡུམ། །དུས་མཚན་སྲོག་གི་བདག་མོ་སྟེ། །རྒྱ་མཚོ་ཆེན་པོ་བདུན་ལ་གནས། །ཙ་མུནྚི་ལའང་ཕྱག་འཚལ་ལོ། །མཆོད་སྦྱིན་གཏོར་མ་འདི་བཞེས་ལ། །སོགས་འཕྲིན་ལས་གཞོལ། ཕུན་སུམ་ཚོགས་པ་མངའ་བ་སོགས་ཤིས་པ་བརྗོད། སེམས་ཅན་ཐམས་ཅད་བདེ་གྱུར་ཅིག། སོགས་སྨོན་ལམ་བཏབ་
ཡིག་བརྒྱ་དང་བཟོད་གསོལ་བྱ། རྟེན་ཡོད་ན་ཆོས་སྐྱོང་ཕོ་མོ་གཉིས་ལ་བརྟན་ཞུགས་བྱེད་ཅིང༌། ཁྱེད་ཀྱི་སེམས་ཅན་དོན་ཀུན་སོགས་གཏོར་འགྲོན་རྣམས་གཤེགས། རྟེན་མེད་ན་ཆོས་སྐྱོང་ཉིད་ཀྱི་ཡེ་ཤེས་པ་ཡང་གཤེགས་ཤིང༌། དམ་ཚིག་པ་རང་གི་ལྟེ་བར་ཐིམ་པའོ། །སྨོན་ལམ་དང་བཀྲ་ཤིས་གོང་གི་དེ་ཀས་ཆོ་ག་མོད། སྤྲོ་ན་འདིར་ཡང་བྱེད་པ་མི་འགལ་ལོ། །གལ་ཏེ་དྲག་པོའི་ལས་ལ་དགའ་བའམ། དེ་ཉིད་ཀྱི་སྒྲུབ་པ་དང༌། ལས་སྦྱོར་ཡིན་ན། གཞན་གོང་དང་དུ་འདྲ་བ་ལས། གཏོར་མ་ཤ་ཁྲག་གི་རྒྱ་མཚོར་མོས་ཏེ། གཏོར་སྔགས་སྔ་མས་ཕུལ་བའི་དེ་མ་ཐག་ཏུ། །སྒྲུབ་བྱ་དགྲ་བགེགས་བྱད་མ་རྣམས་བཀུག་སྟེ་གཏོར་མ་ལ་ཐིམ། ཨོཾ་ཀཱ་ལ་རཱུ་པ་སརྦ་བིགྷྣ་ན་ཤ་ཏྲུན་མཱ་ར་ཡེ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་ཧཱུཾ་ཕཊ། ཨོཾ་ཙ་མུནྚི་སརྦ་བིགྷྣན་སོགས་དེ་བཞིན་དུ་སྦྱར་བས་ཕུལ། མཆོད་སྦྱིན་གཏོར་མ་སོགས་གོང་བཞིན་འདོད་དོན་གསོལ་བའི་མཐར། འཆི་བདག་ནག་པོ་ལྷོ་ཕྱོགས་ཀྱི། །ཞེས་སོགས་གཙོ་བོ་ཡབ་ཡུམ་གྱི་བསྐུལ་བ་དང༌། དུག་མཚོ་ནག་པོ་རྦ་ཀློང་འཁྱིལ་བ་ནས། །རོ་ལངས་རྔམ་པ་དགུ་ཡི་ཁྲི་སྟེང་ནས། །བཞེངས་ཤིག་བཞེངས་ཤིག་མཁའ་འགྲོ་མ་ཙ་མུནྚཱི། །བཞེངས་ནས་འགལ་བྱེད་ཐལ་བ་རྡུལ་དུ་རློག །འཇམ་དཔལ་ཤིན་རྗེ་གཤེད་ཀྱིས་བཀའ་བྱུང་གི །སྲིན་མོ་ཆེན་མོའི་འཕྲིན་ལས་དུས་ལ་བབ། །ཆོས་
ཀྱི་རྒྱལ་པོའི་དམག་སྣ་ཁྱོད་ཀྱིས་དྲོངས། །ཟུང་ཞིག་ཆིངས་ཤིག་བསད་པའི་འཕྲིན་ལས་མཛོད། །བསྐྲད་དང་དབྱེ་དང་རེངས་པའི་འཕྲིན་ལས་མཛོད། །ཕུར་བུས་བཏབ་དང་མནན་པའི་ལས་མཛོད་ཅིག །དགྲ་བགེགས་ཤ་ལ་ཟོ་ཞིག་ཁྲག་ལ་འཐུང༌། །མིང་གི་ལྷག་མ་ཙམ་ཡང་མེད་པར་མཛོད། །ཅེས་ལས་མཁན་གྱི་ཚུལ་དུ་ཡུམ་བསྐུལ་ལོ། །རྩ་སྔགས་ཀྱི་ཉེས་སྐྱོན་དང༌། ཨུ་ནི་ཤ་ལ་སེང་གེ་ཏེ། གསོད་བྱེད་མཐར་ཐུག་པའོ། །ཞེས་པའང་ཞལ་རྒྱུན་ནོ། །དེ་ལྟར་ན་གཏོར་ཆོག་གི་རིམ་པ་སྟེ་དང་པོའོ། །ད་ནི་འདིའི་བསྙེན་སྒྲུབ་ལས་སྦྱོར་གྱི་རིམ་པ་ལ་བརྟེན་ནས། འགལ་བྱེད་ཐམས་ཅད་ཆོམ་ལ་འབེབས་པའི་ཐབས་བཤད་པར་བྱའོ། །དེ་ལ་དང་པོར་མཁོ་བའི་ཡོ་བྱད་བསགས་པ་ནི། རོ་རས་སམ་དཔའ་བོས་རིན་གྱིས་ཉོས་པའི་རས་ལ། སྔགས་བཟླས་པའི་ཆུས་བཀྲུས། བགེགས་བསྐྲད་བསྲུང་བ་བྱ། ཉེ་སྙིང་ཅུང་ཟད་བཟླའོ། །རས་འདུལ་གྱི་དུས་གྲི་ཁྲག་དང་མངལ་ཁྲག་དང་དུག་སྣ་རྣམས་ཅུང་ཟད་བྱུག །སྐུ་འབྲི་སར་དྲི་བཟང་གིས་ཡ་དང་བྷྱོཿའམ་ཧཱུཾ་དང་ཧྲིཿགང་རུང་འབྲི། ཉེ་སྙིང་བཟླས་པས་བྱིན་གྱིས་བརླབས། སྐྱ་བྲིས་ཀྱི་སྐབས་རོ་སོལ་གྱིས་ཅུང་ཟད་བྲི་བར་འདོད་དེ། མཐའ་གཅིག་ཏུ་དགོས་པའང་མིན། སྐུ་གཟུགས་ཁྲུ་ཚད་ཙམ་བྱེད་པར་གསུངས་པ་མཚོན་བྱེད་ཡིན། དེ་བས་ཆུང་བ་དང་ཆེ་བའང་མི་རུང་བ་མིན་ནོ། །སྐབས་འདིར་ཆོས་རྒྱལ་ཡབ་ཡུམ་སྦགས་ཏེ་སྒྲུབ་
པའི་དབང་དུ་བྱས་ན། ཡབ་ཡུམ་གཉིས་ཀར་གྱི་བྲིས་སྐུ་དགོས་པས། དེ་ལ་གཤིན་རྗེ་ཕོ་མོ་ལྕམ་སྲིང་ལྟར་བསྒྲུབས་ན་བྲིས་སྐུ་སོ་སོར་བྱས་ཀྱང་རུང༌། གཅིག་ལ་བྲིས་ཀྱང་རུང་མོད་ཀྱི། ཡབ་མངོན་རྟོགས་ལྟར་དང༌། ཙ་མུནྚི་ཡབ་ཀྱི་གདན་ལ་མི་བཞུགས་པར། གཡས་གཡོན་འོག་གསུམ་གང་རིགས་སུ་གདན་ཟུར་ས་ལ་འབྲི། ཞབས་གཡོན་བརྐྱང་དུ་བྱེད། ཁ་ཅིག་སྲོག་ཆགས་ཀྱི་གདན་མེད་པ་དང༌། གཞན་དག་མ་ཧེའི་གདན་བྱེད་པར་ཡང་འདོད་མོད། ཙ་མུནྚི་ནི་རོ་ལངས་ཀྱི་གདན་ལ་གནས་པ་ཉིད་ཡིན་ནོ། །འོན་ཀྱང་འདིར་ཡབ་ཡུམ་དུ་སྒྲུབ་པ་ཉིད་བསྔགས་པར་བཞེད་པས། དེའི་ཚེ་ཡབ་ཀྱི་གདན་མ་ཧེ་ལ་ཡབ་ཡུམ་གཉིས་རྩར་བཞུགས་ཏེ། ཡུམ་གྱི་ཞབས་ཀྱང་གཡས་བརྐྱང་ངོ༌། །དངོས་སུ་མཉམ་སྦྱོར་དུ་འབྲི་བ་དང་སྒོམ་པ་དག་མེད་ཀྱང༌། ཞབས་སྟབས་དེ་ལྟར་བྱེད་པ་དེ་ནི་དོན་གྱིས་མཉམ་སྦྱོར་མཚོན་ནོ། །འདིར་བླ་མའི་ཞལ་ནས། གཙུག་ལག་ཁང་དང་དགེ་འདུན་གྱི་སྡེའི་སྲུང་མ་བསྟན་པ་སྐྱོང་བའི་བསྐོར་བདག་ཏུ་བསྒྲུབས་ན་ཞིང་སྐྱོང་གི་ཚུལ་དུ་བསྒྲུབ་དགོས་ཏེ། འདི་ཉིད་ཀྱི་འཕྲེང་བའི་སྔགས་ལས་ཀྱང་ཀྵེ་ཏྲ་པཱ་ལ་ཞེས་གསུངས་མོད་གསུངས། ཞིང་སྐྱོང་བརྒྱད་ཀྱི་གཤིན་རྗེ་གཤེད་དེ་གདོང་བརྙན་ཅན་དུ་བཤད་པས། ལས་གཤིན་མ་ཧེའི་ཞལ་ཅན་དུ་མཛད་པ་འདི་མན་ངག་ཡིན། འཁོར་ལོ་ལ་སོགས་པའི་སྒོ་ནས་མངོན་སྤྱོད་ལ་སོགས་པའི་ལས་ཚོགས་ཙམ་སྒྲུབ་པ་ལ་ནི་མ་ཧེའི་ཞལ་མཐའ་གཅིག་ཏུ་དགོས་པ་མིན་ཏེ། རྟོག་
བདུན་གྱི་གཟུགས་བརྙན་སྦྱོར་བའི་སྐབས་ཁྲོ་ཞལ་དུ་བཤད། དེ་སྐབས་ཀྱི་མན་ངག་ལས་ཀྱང་ཁྲོ་ཞལ་དུ་འབྱུང་བ་དང་འདྲ། རྟོག་པ་འདི་ཉིད་ནས་ནི་གསལ་ཁ་རང་མེད་ཀྱང༌། གཉིས་ཀར་རུང་བའི་འཐེན་ཕྱོགས་ཡོད་དེ། ཁོ་བོ་ཅག་གི་བླ་མ་བརྒྱུད་པ་མ་གཏོགས་མཁས་མཁས་མོ་སུས་ཀྱང་མ་གོ་བར་འདུག་གོ །དཀོར་བདག་ལ་ཞིང་སྐྱོང་དུ་བསྒྲུབ་དགོས་པའི་རྒྱུ་མཚན་ཅི་སྙམ་ན། ཞིང་སྐྱོང་ཞེས་པའི་མིང་གིས་ཀྱང་དེར་གོ་དགོས་ཤིང༌། སངས་རྒྱས་བསྟན་པའི་དཀོར་བདག་ཆེ་ཤོས་དེ་མགོན་པོ་ཡིན། མགོན་པོ་ཐམས་ཅད་ཞིང་སྐྱོང་ཡིན། འདིར་ཡང་གཤིན་རྗེ་མགོན་པོ་ནག་པོ་ཆེན་པོའི་ལུགས་སུ་སྒྲུབ་པ་ཡིན་ནོ། །སྤྱིར་ཞིང་སྐྱོང་ལ་མགོན་པོས་མ་ཁྱབ། མགོན་པོ་ལ་ཞིང་སྐྱོང་གིས་ཁྱབ་པས་ཞིང་སྐྱོང་དུ་སྒྲུབ་ཚད་ལ་གདོང་བརྙན་དགོས་པར་ཏ་ག་ལ་ངེས་ཀྱང༌། དཀྱིལ་འཁོར་ཆེན་པོའི་དགོད་པ་ལ། དུར་ཁྲོད་ཀྱི་ཞིང་སྐྱོང་དེ་ལྟར་ཡོད་པ་དེ། འདིར་དེ་ལྟར་བྱེད་པའི་སྒྲུབ་བྱེད་དུ་སྦྱོར་བ་ནི་བླ་མ་དམ་པའི་མན་ངག་ཡིན་ནོ། །གཞན་དག་ཡི་དམ་ཆོས་སྐྱོང་ཞལ་རས་མཐུན་པའི་ཆེད་ཡིན་ཅེས་ཟེར་ཏེ་ཅལ་ཅོལ་ལོ། །ལིང་ག་གྱེན་སྒྲེང་དུ་མཛད་པ་ནི། སྒྲུབ་ཚུལ་གཞན་ལ་མི་དགོས་ཀྱང༌། གཤིན་རྗེ་དེ་ཉིད་ལས་མཁན་ལྷ་མགོན་དང་དབྱེར་མེད་པར་ངོ་བོ་གཅིག་ཏུ་སྒྲུབ་པའི་ལུགས་ཡིན། དགོས་པ་ནི། འདི་ལ་མན་ངག་གི་གནད་
ཅུང་ཟད་ཅིག་ཡོད་པ་དེ་བསྣན་ན། སྒྲུབ་ཐབས་གཅིག་གིས་ལྷ་གཉིས་ཀར་འགྲུབ་པས་ལག་ལེན་འཁྱེར་བདེ་བ་དང༌། དེའི་སྟེང་དུ་ཡང་མན་ངག་ཅུང་ཟད་དང་བཅས་ན་སྒྲུབ་པོ་ཉིད་ཀྱི་སྲུང་མར་སྒྲུབ་པའི་སྐབས། ཞོར་ལ་དབང་སྡུད་ལ་སྔགས་པ་ཡིན་ཅེས་ངེད་ཀྱི་བླ་མ་གསུང་ངོ༌། །འདི་ཡང་གཞན་ཚོས་མ་གོ །སྐུ་གཅེར་བུར་འདོད་ཕྱིན་དབང་པོ་འཆང་བ་དང༌། སྦས་པ་མི་རུང་བས་འདི་འདོད་དགོས་མོད་གཞུང་འདི་ལས་གཅེར་བུར་གསུངས་པ་ཡང་མེད། གཅེར་བུ་བཀག་པའང་མེད་པས། རྟགས་མངོན་པར་མི་བྱེད་ན་སྟག་ལྤགས་ཀྱིས་སྨད་དཀྲིས་སོ། །རྟོག་པ་ལས་རྒྱན་མེད་རུས་པའི་འཕྲེང་བ་ཅན་ཅེས་གསུངས་པ་ལ། ཁ་ཅིག་ཐོད་སྐམ་གྱི་དོ་ཤལ་ལས་རྒྱན་གཞན་མེད་ཟེར་བ་དང༌། རྒྱན་གཏན་མེད་དུ་འདོད་པ་སོགས་ཡོད་ཀྱང༌། འདིར་རྒྱན་མེད་པའི་དོན་ནི། རིན་པོ་ཆེ་དང་མེ་ཏོག་སོགས་སྒེག་མཛེས་ཀྱི་རྒྱན་མེད་པའི་དོན་ནོ། །དེ་ཡང་དྲག་ལས་ཀྱི་དབང་དུ་བྱེད་ནས་གསུངས་པ་སྟེ། གཞན་ཞི་བ་ལ་རྒྱན་མེད་པ་དང་རིན་པོ་ཆེའི་རྒྱན་ཕྲ་མོ། རྒྱས་པ་ལ་རིན་པོ་ཆེའི་རྒྱན་མང་པོ། དབང་ལ་མེ་ཏོག་སོགས་དང༌། དེ་དག་ལ་ཅི་རིགས་པར་དར་གྱི་ན་བཟའ་ཡང་མི་འགལ་ལོ། །རུས་འཕྲེང་ཞེས་པས་མགོ་འཕྲེང་དང་རུས་རྒྱན་དངོས་སུ་གསུངས། སྟག་ལྤགས་དང་སྦྲུལ་ལ་སོགས་པ་ཡང་བཀག་པ་ནི་མ་ཡིན་ནོ། །ཡུམ་ལ་བ་གླང་གི་ལྤགས་པ་དང་གོས་ནག་སོགས་མན་ངག་གི་
ཡི་གེ་རྣམས་ལས་སྣ་ཚོགས་བྱུང་ཀྱང༌། རྭ་ཕྱི་མའི་ཡི་གེ་ན་གླང་ལྤགས་སུ་བཞེད་ཅིང༌། རྟོག་པ་ལས་གསུས་ཆེན་ཅེས་གསུངས་པ་ལྷ་མོ་སྐུ་གཟུགས་ཀྱི་མཚན་ཉིད་ལ་མི་སྦྱོར་བར། དུད་འགྲོའི་མཚན་ཉིད་ལ་སྦྱར་ཏེ་གླང་པོ་ཆེར་འདོད་པའོ། །དེའི་ཚེ་སྨད་གཡོགས་མ་ཡིན་སྟོད་གཡོགས་ཡིན་མོད། སྨད་གཅེར་བུའམ་སྟག་ལྤགས་ཅན་ཇི་ལྟར་བྱེད་ཡབ་ལ་ཇི་ལྟར་བྲིས་པ་དང་མཐུན་པར་བྱའོ། །སྤྱན་གསུམ་མཆེ་གཙིགས་སྐྲ་གྱེན་བརྫེས་སོགས་ཡབ་དང་མཐུན་ནོ། །བཅུ་གསུམ་མའི་ལུགས་ལ་ཡུམ་དབུ་སྐྲ་གྲོལ་བ་དང་ན་བཟའ་བ་གླང་གི་ལྤགས་པ་ཅན་ཡིན་ཀྱང༌། དེ་འདིར་བསྲེ་མི་དགོས་སོ། །ཡི་གེ་ལ་ལ་ནས་སྐུ་སྦོམ་ཐུང་དང་གསུས་པ་རྒྱས་པར་བཤད་པ་ལ་བསམས་ནས། ཧ་ཅང་སྦོམ་ཐུང་ཐལ་བ་དང༌། གྲོད་འཇོལ་ཆེ་གྲགས་པ་མི་ལེགས་ཤིང༌། ཁ་ཅིག་གཤིན་རྗེ་ཡིན་པས་ཤིན་ཏུ་སྐེམ་པ་བྱེད་ཟེར་བ་ལ་ཡང་རྒྱུ་མཚན་མེད་པས། ཡབ་ཡུམ་གཉིས་ཀར་ཞལ་ཚད་བརྒྱད་པའམ་བདུན་པ་གང་རུང་དུ་བྲི་བར་བྱ་ཞིང༌། ཡུམ་ལ་ལྷ་མོའི་མཚན་ཉིད་ཀྱི་ཕྱིར་ཁ་སྤུ་མི་འབྲི་སྟེ་འདིར་མ་ཟད་མགོ་བརྙན་མེད་པ་ཀུན་ལ་དེ་ལྟར་གོ་བར་བྱའོ། །བྲིས་སྐུ་དེ་ལ་ཡབ་ཡུམ་གཉིས་མ་གཏོགས་བླ་མ་ཡི་དམ་ཆོས་སྐྱོང་གཞན་སོགས། ལྷ་མགྲོན་གང་ཡང་མི་འབྲི། དུར་ཁྲོད་པ་རྣམས་མ་
གཏོགས་འཁོར་ཡང་མི་དགོས་སོ། །སྐྱ་བཟོ་གྲུབ། མཚོན་མ་བཏབ་པའི་བར་དེར། ཐུགས་ཀར་ཡི་གེ་བདུན་པ། མགྲིན་པར་བསྙེན་སྔགས་སྤྱི་བོར་ཉེ་བསྙེན་ལྟེ་བ་མན་ཆད་ཀྱི་ཆ་ལ་འཕྲེང་བའི་སྔགས་བྲི། ཡུམ་གྱི་གནས་གསུམ་ཆར་དུ་སྙིང་པོ་དང་ལྟེ་བ་མན་ཆད་ལ་འཕྲེང་བའི་སྔགས་བྲིའོ། །སྐབས་དེར་ཡང་སྦྱར་བ་དང་ཁྲུས་གསོལ་དང༌། སྔགས་དེ་རྣམས་ཉིད་མང་དུ་བཟླས་པས་བྱིན་གྱིས་བརླབས། དེ་ནས་མཚོན་བཀྱེ་ཞིང་སྤྱན་དབྱེ་ཡན་གྲུབ་པ་ན། ཞག་དེ་ཉིད་ལ་རབ་གནས་བྱ་སྟེ། སྔོན་འགྲོ་གཏོར་མ་དང༌། གནས་ཡོ་བྱིན་རླབས་དང༌། ཡི་དམ་གྱི་བདག་བསྐྱེད་བུམ་བསྐྱེད་སྔོན་དུ་བཏང༌། བགེགས་སྦྱང་བ་དང་བྱུར་བསལ་བ་དང༌། ཁྲུས་གསོལ་རྣམས་ནན་ཏན་དུ་བྱས། དེ་ནས་མཆོད་གཏོར་དང་དམ་རྫས་རྣམས་རྒྱ་ཆེར་བཤམས། འདོན་ཆ་གཏོར་ཆོག་དང་འདྲ་བ་ལས། རང་གི་སྙིང་ཁ་ནས་ཧཱུཾ་སྤྲོ་བ་མི་དགོས། མདུན་བསྐྱེད་གཞན་དང་འདྲ་བར་ས་བོན་ལས་བསྐྱེད། སྐྱེད་མ་ཐག་ཏུ་ཡི་གེ་བཅུ་གཅིག་པ་བདུན་སོགས་ཇི་ལྟར་འོས་པ་འདོན། ཡེ་ཤེས་པ་སྤྱན་འདྲེན་ལན་བདུན་སོགས་ཚར་གང་མང་བྱེད། སྔ་མ་དེ་ལ་ཕྱིར་འབྲང་གི་བགེགས་སྐྲོད་དགོས། དབང་བསྐུར་རྒྱས་བཏབ་ཚར་མ་ཐག་ཏུ། ཡི་གེ་བཅུ་གཅིག་པ་བཟླས་པས་བྱིན་གྱིས་བརླབས་པར་གསུངས་པ་ལས། ཡི་གེ་སྔ་མ་རྣམས་ལ་བརྒྱ་རྩ་བརྒྱད་
བཟླས་ནས་མེ་ཏོག་གཏོར་གསུང་བ་ཡོད་ཀྱང༌། ལག་ལེན་ལ་མེ་ཏོག་དམར་ནག་གམ་དཀར་དམར་གཉིས་བྱ། དཀར་པོའམ་ནག་པོ་ལ་ཡི་གེ་བདུན་པ་སྟོང་ཕྲག་གཅིག་བཟླས། དམར་པོ་ལ་ཡུམ་གྱི་སྙིང་པོ་ལྔ་བརྒྱ་བཟླས། དེ་ནས་མེ་ཏོག་གཉིས་བསྲེས། ཡེ་དྷར་ལན་ཉི་ཤུ་རྩ་གཅིག་བཟླས། ཨོཾ་ཀཱ་ལ་རཱུ་པ་ཡ་མ་རཱ་ཛ་ཡ་ཧཱུཾ་ཕཊ། ཅེས་པའི་ཡི་གེ་བཅུ་གཉིས་པ་དང༌། ཨོཾ་ཧྲཱིཿཙ་མུནྚི་ཏྲ་ག་རཀྵ་ཧཱུཾ་ཕཊ། ཅེས་པ་གཉིས་སྦྲེལ་ནས་བརྒྱ་རྩ་བརྒྱད་བཟླས་ཏེ་མེ་ཏོག་འཐོར། དེ་ནས་རྗེས་བརྟན་ཞུགས་ཀྱི་བར་འདྲ། ཇི་ལྟར་འོས་པར་ཚོགས་འཁོར་མཚོན་པ་ཞིག་མེད་ཀ་མེད་ཡིན། དེ་ནས་ཕྱོགས་སྐྱོང་གི་གཏོར་མ་དང་འབྱུང་པོ་སྤྱི་གཏོར་བཏང་ནས་མགྲོན་རྣམས་གཤེགས་གསོལ་དང་སྨོན་ལམ་དང་བཀྲ་ཤིས་བྱའོ། །དེ་ཙམ་གྱིས་རབ་ཏུ་གནས་པར་འགྱུར་ལ། དང་པོ་འབྲི་བ་ནས་བརྩམས་ཏེ་རབ་གནས་མ་གྲུབ་ཀྱི་བར་ལ། རང་དང་ལྷ་བྲིས་པ་དང༌། ཆོས་འདི་ཞུས་པའི་རྩ་བའི་བླ་མ་ཉིད་དམ་རབ་གནས་བྱེད་མཁན་མ་གཏོགས་ཤིན་ཏུ་གསང་བ་གལ་ཆེའོ། །དེ་ནས་ཀྱང་དམ་ཚིག་དང་མི་ལྡན་པས་མ་མཐོང་བ་དགོས་ཤིང༌། ཕལ་ཆེར་ལ་གསང་བ་རང་ལེགས་སོ། །འདི་དམ་ཚིག་བྲིས་སྐུའི་ཚུལ་ཡིན། བྱིན་རླབས་ཆེ་ཞིང་འཕྲིན་ལས་དང་རྟགས་མཚན་ཤིན་ཏུ་མྱུར་བའི་གནད་ཡིན་ལ། དེ་མིན་བྲིས་སྐུ་དཀྱུས་མ་རབ་
གནས་ཅན་གྱིས་ཀྱང༌། དམིགས་རྟེན་སྒྲུབ་རྟེན་རུང་ཙམ་ནི་ཡིན་ནོ། །བྲིས་སྐུ་འབྲི་ཚུལ་གྱི་རིམ་པ་སྟེ་གཉིས་པའོ། །༈ ད་ནི་འཁོར་ལོ་འབྲི་ཚུལ་བཤད་པར་བྱ་སྟེ། བྲི་གཞི་ནི་ཞིང་ཆེན་ལ་བཀབ་པའི་རས་སམ་དར་རམ་སོ་རས་སོགས་འབྱོར་ན་རབ། དེ་མིན་ཤོག་བུ་ལ་གྲི་ཁྲག་དང༌། དུག་གིས་ཅུང་ཟད་བྱུགས། བྱ་རོག་གི་ཁྲག་དང༌། རོ་སོལ་དང༌། བོང་བུའི་ཆུ་དུག་ཁྲག་རྣམས་ཅུང་ཟད་བསྲེས་པའི་སྣ་ཚ་དང༌། བྱ་རོག་གི་གཤོག་རུའམ་མི་རྐང་གི་སྙུ་གུ་བྱེད་པར་བཤད་པ། དེ་ལ་དངོས་སུ་འགྲུབ་ན་རབ། མ་འགྲུབ་ན་རྐང་གི་སྦུབས་སུ་སྙུ་གུ་བཅུག་པའམ། སྙུ་གུ་ལ་རུས་པ་དེ་དག་བཅིངས་པས་ཀྱང་རུང༌། ཞེས་བླ་མ་གསུངས། དེ་ནས་འཁོར་ལོ་དངོས་ནི། ཟླུམ་སྐོར་གསུམ་བྱེད་དགོས་པ་ལས། ཐོག་མ་ཚངས་ཟུར་སྐམ་ཐིག་བཞི་བཏབ། ལྟེ་བ་བཙལ་ནས་ཇི་ལྟར་འོས་པར་སྐོར་བ་ལས། གལ་ཏེ་སོར་ལྔ་བསྐོར་ཡོད་ན། སོར་གསུམ་པའི་མཚམས་སུ་གཅིག་བསྐོར། དབུས་ཀྱི་གཡས་གཡོན་དུ་སོར་གཅིག་གིས་མཚམས་སུ་གཅིག་བསྐོར། དེ་རྣམས་ཀྱི་ཕྱི་ནང་གང་ཡང་རུང་བར་ཡི་གེ་ཤོང་ཙམ་གྱི་མུ་ཁྱུད་རེ་ཡང་བསྐོར། དབུས་ཀྱི་ལྟེ་བར་ཡི་གེ་འབྲི་ཚུལ་ནི། དགྲ་མང་པོའམ་དམིགས་བསལ་མེད་པའི་གནོད་བྱེད་སྤྱི་ལ་བྱེད་ན་རིམ་པ་ལྟར་སརྦ་ཤ་ཏྲུན་རྒྱལ་གྲོང་པ་རྣམས་ནི་བཱ།
ར་ཡ་ཟེར་བ་ལྟ་བུ་དང༌། རྡོ་རྗེ་གདན་པ་རྣམས་ཀྱྀ་སརྦ་ཤ་ཏྲུན་ནི་བཱ་ར་ཡ་ཞེས་པ་ལྟ་བུ་འབྲི་སྟེ། དེས་གཞན་ལའང་རིགས་འགྲེ་ཤེས་དགོས། དམིགས་བསལ་རེ་རེ་ལ་བྱེད་ནས་སརྦ་ཞེས་པ་མི་འབྲི་སྟེ། ཤ་ཏྲུན་ཙན་སྐྱབས་ནི་བཱ་ར་ཡ་ཞེས་པ་ལྟ་བུ་འབྲི། དེས་གཞན་ལའང་རིགས་འགྲེ། དེའི་མཐའ་ཕཊ་གྱི་སྐོར་བའམ་ཕཊ་གཉིས་ཀྱི་བར་དུ་བཅུག །དབུས་སུ་ཡ་གཅིག་འབྲི་བའང་ཡོད། ལྟེ་བའི་མུ་འཁྱུད་ལ་ཨོཾ་ཀཱ་ལ་རཱུ་པ་དགྲ་བོ་ཆེ་གེ་མོ་མཱ་ར་ཡ་ནཱ་ཤ་ཡ་སྟཾ་བྷ་ཡ་བྷ་སྨི་ཀུ་རུ་ཧཱུཾ་ཕཊ། ཅེས་པ་བྲི་སྟེ། རེ་མིག་བརྒྱད་པ་ནང་མ་ལ་ཡབ་ཀྱི་འཕྲེང་སྔགས་ཀྱི་ཕྱེད་སྔ་མ་འགོད་དགོས་པ་ལས་ཁ་ཅིག་སྤེལ་ཚིག་མི་དགོས་ཟེར། རྭ་ཤར་བ་དང་རྒྱ་སྟོང་སོགས་བར་སྐབས་ཀྱི་མང་པོ་ཞིག་རེ་རེ་བཞིན་དགྲ་བོ་མ་ར་ཡ་ཕཊ་ཅེས་པ་འབྲི་གསུངས། དེ་ཡང་འགལ་བ་ཆེར་མེད་ཅུང་མི་བདེ། འདིར་རྭ་འབུམ་སོགས་ནས་བརྒྱུད་པའི་མན་ངག་ནི་ཚིག་ལན་གཉིས་གཉིས་ཡོད་པ་རྣམས་ལ་བར་དུ་མིང་ཙམ་སྤེལ་བ་སྟེ། དཔེར་ན་ཏྲཱ་ས་ཡ་ཆེ་གེ་མོ་ཏྲཱ་ས་ཡ་ཞེས་པ་ལྟ་བུའོ། །ལན་གཉིས་མ་ཟློས་པ་རྣམས་ལ་མིང་ཐོག་མར་སྤེལ་ཏེ། ཆེ་གེ་མོ་རུ་འདིར་ཨརྒྷཾ་བ་ཞེས་པ་ལྟ་བུ་སྟེ། ཡབ་ཡུམ་གཉིས་ཀར་གྱི་འཁོར་ལོའི་རེ་མིག་ཕྱི་བརྒྱད་ནང་བརྒྱད་ཀྱི་ཡི་གེ་འགོད་ཚུལ་ཀུན་ལ་དེ་ལྟར་ངེས་པར་བྱའོ། །རང་ལུགས་ལག་
ལེན་འདི་ལ་བྱེད་དེ། དེ་ཡང་དབུས་ཀྱི་ཡིག་མགོ་ཕྱོགས་དེ་ཤར། གཡོན་ལྷོ། སྨད་ཕྱོགས་ནུབ། གཡས་ཕྱོགས་བྱང་དུ་བྱས་པའི་ཤར་དུ་ཏྲ་ས་ཡ་ཏྲ་ས་ཡ། ཤར་ལྷོར་ཨ་ཀདྷྱ་ཨ་ཀདྷྱ། ལྷོར་ཤོ་ཥ་ཡ་ཤོ་ཥ་ཡ། ལྷོ་ནུབ་ཏུ་ཧ་ན་ཧ་ན། ནུབ་ཏུ་ད་ཧ་ད་ཧ། ནུབ་བྱང་དུ་པ་ཙ་པ་ཙ། བྱང་དུ་བནྡྷ་བནྡྷ། བྱང་ཤར་དུ་ཙུརྞ་ཙུརྞ་ཞེས་པ་རྣམས་ལ་དབུས་སུ་མིང་སྤེལ་ལོ། །མུ་ཁྱུད་བར་བ་ལ་སྙིང་པོ་ཡི་གེ་ཉི་ཤུ་རྩ་ལྔ་པ་ལ་སྤེལ་ཚིག་ནང་གི་དང་འདྲ་བ་འབྲི། ཕྱིའི་རེ་མིག་བརྒྱད་ལ། ཤར་དུ་ཆེ་གེ་མོ་ཙཀྵ་བཛྲེ་ཎ་གྷོ་ར་པ་དྲ་ཡ། ཤར་ལྷོར་ཆེ་གེ་མོ་ཀྵེ་ཏྲ་པཱ་ལཱ་ཡ། ལྷོར་ཚིནྡྷ་ཆེ་གེ་མོ་ཚིནྡྷ། ལྷོ་ནུབ་ཏུ་བྷིནྡྷ་ཆེ་གེ་མོ་བྷིནྡྷ། ནུབ་ཏུ་ཆེ་ག་མོ་ཐཱ་ཀཾ་བཛྲི་བཱ་དང༌། ནུབ་བྱང་དུ་ཆེ་གེ་མོ་ཏུ་དྷི་ར་ཨརྒྷ྄ཾ་པཱ། བྱང་དུ་ཆེ་གེ་མོ་ཡ་མཱ་ར་ཡ། བྱང་ཤར་དུ་ཆེ་གེ་མོ་བཛྲ་ཡ་ནཱ་ཤ་ཡ་སྟཾ་བྷ་ཡ་ཧཱུཾ་ཕཊ་ཅེས་པ་འབྲི། མུ་ཁྱུད་ཕྱི་མ་ལ་རྩ་སྔགས་ཀྱི་འཇུག་ཏུ་སྤེལ་ཚིག་སྔ་མ་བཞིན་བྱ། དེའི་ཕྱི་རོལ་དུ་འཁོར་ལོ་དེ་ཉིད་ལས་གཤིན་རྗེའི་ལྟོ་བར་ཆུད་པ་འབྲི། དབུས་ཀྱི་ཡིག་མགོ་ཕྱོགས་ལ་སྐུ་སྟོད་ཡོང་བ་བྱེད། གདན་པད་ཉི་དང་མ་ཧེ་མི་དགོས། རོ་གང་ན་ཙམ་བྱ་གསུངས། གདན་མི་བྱེད་པའི་སྲོལ་ཡང་འདུག་གོ །ཡུམ་གྱི་འཁོར་ལོ་ཡང་སྐོར་ཐིག་དྲུག་དང་ལྟེ་བའི་ཡི་གེ་ཡང་གཞན་ཡབ་དང་འདྲ། དབུས་སུ་ཧྲའམ་བྷྱོཿ
འབྲི་བའང་ཡོད། རེ་མིག་ནང་མ་བརྒྱད་ཀྱི་ཤར་དུ་དྷུ་ན་ཆེ་གེ་མོ་དྷུ་ན། ཤར་ལྷོར་བནྡྷ་ཆེ་གེ་མོ་བནྡྷ། ལྷོར་མ་ཐ་ཆེ་གེ་མོ་མ་ཐ། ལྷོ་ནུབ་ཏུ་པྲ་མ་ཐ་ཆེ་གེ་མོ་པྲ་མ་ཐ། ནུབ་ཏུ་ཆེ་གེ་མོ་ཧཱུཾ་ཛྭ་ལ། ནུབ་བྱང་དུ་ཛྭ་ར་ཆེ་གེ་མོ་ཛྭ་རེ་ཎ། བྱང་དུ་ཆེ་གེ་མོ་བྱེ་དྷི། བྱང་ཤར་དུ་ཆེ་གེ་མོ་རོ་ག་ཎཾ། རིམ་པ་ཕྱི་མའི་ཤར་དུ་ཆེ་གེ་མོ་ཉིད་གདན་ཤི་བཾ། ཤར་ལྷོར་ཆེ་གེ་མོ་ཡཾ་ཧཾ་རི་ཚུས་ཡ། ལྷོར་ཆེ་གེ་མོ་ཨ་བེ་ཤ་ཡ། ལྷོ་ནུབ་ཏུ་ཆེ་གེ་མོ་ཛི་བཾ་ཧྲི་ད་ཡ། ནུབ་ཏུ་ཚིནྡྷ་ཆེ་གེ་མོ་ཚིནྡྷ། ནུབ་བྱང་དུ་ཆེ་གེ་མོ་བཱ་དྱ་པ། བྱང་དུ་ཆེ་གེ་མོ་ཤི་གྷྲིཾ་མཱ་ར་ཡ། བྱང་ཤར་དུ་ཆེ་གེ་མོ་ན་ཤ་ཡ་ཧཱུཾ་ཕཊ། འདིའི་མུ་ཁྱུད་གསུམ་ག་ལ་ཨོཾ་ཧྲིཿཙ་མུཎྜི་དགྲ་བོ་ཆེ་གེ་མོ་མཱ་ར་ཡ་ནཱ་ཤ་ཡ་སྟཾ་བྷ་ཡ་བྷ་སྨི་ཀུ་རུ་ཧཱུཾ་ཕཊ། ཅེས་པ་ཁོ་ན་འབྲིའོ། །འཁོར་ལོ་དེ་ལྷ་མོ་ཙ་མུནྚིའི་ལྟོ་བར་ཆུད་པ་འབྲི། དེ་ཡང་གོང་བཞིན་རོ་གདན་ཙམ་མམ་གདན་སྤང་པའོ། །ཡབ་ཡུམ་གྱི་འཁོར་ལོའི་མུ་ཁྱུད་དང་རེ་མིག་བཅུ་དྲུག་པོའི་ཡི་གེ་རྣམས་དྲག་པོའི་ལས་ལ་མགོ་ནང་བསྟན་བྱེད་པ་ལ་རྩོད་པ་མེད། ཞི་རྒྱས་དབང་གསུམ་སྒྲུབ་ན་མགོ་ཕྱི་བལྟ་བྱེད་ཅེས་འགའ་ཞིག་བཞེད་མོད། གཤིན་རྗེ་གཤེད་ཀྱི་འཁོར་ལོ་ལ་དེ་བཞིན་ཡིན་ཀྱང༌། འདི་ལས་ཀྱི་གཤིན་རྗེའི་
འཁོར་ལོ་ཡིན་པའི་ཕྱིར་ལས་ཐམས་ཅད་ལ་ཡིག་མགོ་རྣམས་ནང་བསྟན་ཁོ་ན་བྱེད་ཅེས་བདག་ཅག་གི་བླ་མ་གསུང་ངོ༌། །འོན་ཀྱང་འཁོར་ལོ་འདི་ལ་བརྟེན་ནས་ལས་གསུམ་པོ་དེ་དག་སྒྲུབ་པ་མེད་བསམ་ན། མ་ཡིན་ཏེ་དངོས་བསྟན་གྱི་འཁོར་ལོ་འདི་ཁོ་ན་ལ་ཡང༌། ཞི་བའི་ནང་ཚན་བསྲུང་བཟློག་གཉིས་དངོས་སུ་ཡོད། རྒྱས་པ་དང་དབང་གི་ལས་བྱེད་པས་དངོས་སུ་ཅུང་ཟད་དཀོན་ཀྱང་དེ་དག་གི་བར་ཆད་བསྲུང་བ་དང་བཟློག་པ་ལ་ངེས་པར་འཇུག་པ་ཡིན་ནོ། །བསད་ལས་ཀྱི་སྤེལ་ཚིག་ནི་གོང་བཞིན་ཡིན་ལ། དབྱེ་བསྐྲད་རྨོང་རེངས་ཀུན་ལའང་མཱ་ར་ཡ་ཞེས་པའི་ཚབ་ཏུ་དེ་དང་དེའི་སྤེལ་ཚིག་འཇུག་པ་ཡིན་ནོ། །དེའི་ཚེ་བྲིས་གཞི་སྣག་ཚ་ལ་སོགས་པ་ཡང་བསྒྱུར་དགོས་ཏེ་སྤྱི་དང་འདྲའོ། །དངོས་བསྟན་འདི་མིན་པར་མན་ངག་གིས་ལྡེ་བསྒྱུར་བའི་ལས་གསུམ་གྱི་འཁོར་ལོ་ནི་འཆད་པར་འགྱུར་རོ། །ཡང་བླ་མ་སྐྱོ་བ་རྣམས་ཀྱི་བཞེད་པ་ནི། ཟླུམ་སྐོར་རིམ་པ་གཉིས་ལ་མུ་ཁྱུད་རེ་རེ་བྱེད། དེ་ནས་ཐིག་བཞི་སྣོལ་མར་བཏབ་པས། ནང་མ་ལེ་ཚེ་དགུ་དང་ཕྱི་མ་ལ་བརྒྱད་ཡོད་པ་དེ་ཐིག་ལྷག་པོ་རེ་རེ་བཏབ་པས་དཀྱིལ་འཁོར་གྱི་གདུང་ཐིག་འདྲ་བ་ཡི་གེ་ཤོང་བ་རེ་བྱེད། ལྟེ་བ་གྲུ་བཞི་ལ་མ་མ་ཤ་ཏྲུན་ཆེ་གེ་མོ་ཞེས་པ་འདྲི་དེའི་མཐའ་ཕྱོགས་བཞིའི་གདུང་ལ་མ་མ་ཤ་ཏྲུན་མཱ་ར་ཡ་ཞེས་པ་ཁོ་ན་འབྲི་ཏྲ་ས་ཡ་ལ་སོགས་པ་སྔགས་ཚན་
བརྒྱད་པོ་ཡང་གཡོན་སྐོར་གྱིས་འབྲི་སྟེ་ཕྱི་མ་ལའང་དེས་རིགས་འདྲེ། མུ་ཁྱུད་གཉིས་ཀ་ལའང་ཡི་གེ་འགོད་ཚུལ་ཀ་གདུང་དང་འདྲ། ཡུམ་གྱི་འཁོར་ལོ་ལ་རེ་མིག་ནང་མ་བརྒྱད་ལ་ཨ་མུ་ཀ་སྱ་ཧཱུཾ་ན་སོགས་སྔགས་ཚན་བརྒྱད་པོ་ཡོངས་རྫོགས་ཚར་རེ་རེ་འབྲི། ཕྱི་མ་བརྒྱད་ལ་ཉི་གདན་སོགས་སྔགས་ཚན་བརྒྱད་པོ་ཡོངས་རྫོགས་ཚར་རེར་འབྲི་བར་འདོད་དོ། །ཡང་སྐྱོ་བ་ཁ་ཅིག་ནི་ཡབ་ཡུམ་གཉིས་ཀར་ལ་རེ་མིག་ནང་མ་བརྒྱད་པོ་དཀྱུས་དང་འདྲ་བ་ལ་ཁྱད་པར་ནི་གཡོན་བསྐོར་ཡིན། ཕྱི་མ་བརྒྱད་ཡབ་ཡུམ་མཚུངས་པར་ཙཀྵ་སོགས་དང་ཉི་མ་སོགས་ཡོངས་རྫོགས་འབྲི་བའི་ལུགས་ཀྱང་འདུག་གོ །དབུས་ཀྱི་ཡི་གེ་མགོ་ཡབ་ཀྱི་གཡོན་དང་ཡུམ་གྱི་གཡས་ལ་སྟོན་ནོ། །དེ་དག་ནི་ཕྱིའི་ཡིག་རིགས་དང་དཔེ་རིགས་སྣ་ཚོགས་མཐོང་ན། ཐེ་ཚོམ་ཟ་བ་བཟློག་པའི་ཕྱིར་དང་ལུགས་སོ་སོ་གོ་བའི་ཕྱིར་བཀོད་པ་ཡིན་གྱི་ལག་ལེན་དུ་གདབ་བྱ་ནི་དཀྱུས་ཁོ་ནའོ། །དེ་ལྟར་འཁོར་ལོ་བྲིས་མ་ཐག་རབ་གནས་བྱ་སྟེ། སྔོན་འགྲོ་གཏོར་མ། གནས་ཡོ་བྱིན་གྱིས་བརླབས། བདག་བསྐྱེད་བུམ་སྒྲུབ་དང་བཅས་པ་སྔོན་དུ་འགྲོ་བས། འཁོར་ལོ་ལ་སྦྱང་བ་དང་བགེགས་བསྐྲད་དྲག་ཏུ་བྱ། ཕྱིར་བསལ་བ་སོགས་མི་དགོས། ལས་བུམ་གྱིས་ཁྲུས་གསོལ་བྱ། འཁོར་ལོ་བསངས་སྦྱངས། སྟོང་པའི་ངང་ལས་ཧཱུཾ་ཡིག་ལས་བྱུང་
པའི་བསྲུང་འཁོར་གྱི་དབུས་སུ་བྷྲུཾ་ཡིག་ནག་པོ་ལས་ཇི་ལྟར་བྲིས་པ་དང་མཐུན་པའི་ལྕགས་ཁང་སྒོ་མེད་ཁང་མིག་བཅུ་བདུན་པ། དུག་དང་མེ་དང་མཚོན་ཆ་འཕར་རྒྱུག་བྱེད་པས་གང་བའོ། །དེའི་ལྟེ་བའི་ཡིག་འབྲུ་ལས་གཤིན་ཡབ་ཡུམ་དུ་བསྐྱེད། གཞན་སྔགས་ཀྱི་ཡིག་འབྲུ་རྣམས་རེ་རེ་བཞིན་ཡ་ལས་བྱུང་བའི་གཤིན་རྗེ་དང༌། བྷྱོཿའམ་མ་ལས་བྱུང་བའི་གཤིན་རྗེ་མོ་རྣམས་ཆ་ལུགས་མ་ངེས་པའམ། ཡང་ན་ལས་གཤིན་ཡབ་ཡུམ་ཉིད་དང་འདྲ་བ་རེ་བསྐྱེད། གནས་གསུམ་བྱིན་གྱིས་བརླབས། སྙིང་གར་ས་བོན་ཡ་དང་བྷྱོཿརེ་བསྐྱེད། དེ་དག་དུས་གཅིག་ཏུ་གསལ་ཐེབས་པ་དཀའ་བས་རེ་རེ་བཞིན་རིམ་པས་གསལ་འདེབས་ཀྱི། བྲིས་གཞིའི་སྐུ་འདྲ་གཉིས་ཀྱང་ས་བོན་ལས་མི་བསྐྱེད་སྙིང་པོ་ལན་བདུན་བདུན་གྱིས་ཆོས་རྒྱལ་ཡབ་ཡུམ་དུ་བསྐྱེད། གནས་གསུམ་བྱིན་རླབས་བྱ། སྤྲོ་ན་མིག་ཏུ་ཀྵིཾ་སོགས་ཀྱང་འགོད། དེ་ནས་ཡེ་ཤེས་པ་ཆོས་རྒྱལ་ཡབ་ཡུམ་ཕྱི་ནང་གཉིས་དང༌། གཤིན་རྗེ་བྱེ་བ་ཐེར་འབུམ་དང་མ་མོ་བྱེ་བ་ཐེར་འབུམ་སྤྱན་དྲངས་ཏེ་བསྟིམ་པ་རྣམས་དམིགས་པ་ཤུགས་ཆེ་ལ་དྲག་པས་ལན་མང་དུ་བསྒོམ། བུམ་ཆུས་གཏོར་ཞིང་དབང་བསྐུར། དབང་རྟགས་རྡོ་རྗེ་ནག་པོ་རྩེ་ལྔ་འབའ་ཞིག་ཡིན། སྐབས་འདིར་དམ་རྫས་ཀྱི་གཏོར་མ་བྱིན་གྱིས་བརླབས་ལ་ཕུལ། མཆོད་བསྟོད་དང་ལས་བཅོལ་རྒྱས་པར་བྱས། ལྷ་རྣམས་ཞུ་བ་ལས།
ཡིག་འབྲུར་གྱུར་ཅེས་ཞལ་བསྒྱུར། བྲིས་གཞིའི་ལྷ་བསྒྱུར་མི་དགོས། སུ་པྲ་ཏིཥྛཱ་དང་ཡེ་དྷར་དང་ཉེ་སྙིང་པོའི་རྩ་སྔགས་རྣམས་བརྒྱ་རྩ་སོགས་གང་མང་དང༌། འཁོར་ལོ་གཉིས་ཀྱི་སྔགས་ཀྱང་ཉི་ཤུ་རྩ་གཅིག་ཙམ་བཟླས་ཏེ། ཕྱོགས་བཅུའི་འཇིག་རྟེན་ཐམས་ཅད་ནས་འཇིག་རྟེན་འཇིག་རྟེན་འདས་པའི་བྱིན་རླབས་ཐམས་ཅད་གཤིན་རྗེ་ཡབ་ཡུམ་གྱི་རྩ་སྔགས་ཀྱི་རྣམ་པར་སྤྱན་དྲངས་ནས་འཁོར་ལོའི་སྔགས་ལ་ཡང་ཡང་བསྟིམ། མེ་ཏོག་ནག་པོ་ཡང་ཡང་འཐོར་རོ། །མེ་ཏོག་ཀྱང་སྔོན་བྲིས་སྐུ་བཞིན་བསྒྲུབས་ན་ལེགས་པར་མངོན་མཚམས་འདིར་མཆོད་བསྟོད་བརྟན་བྱེད་ཡིག་བརྒྱ་དང་སྨོན་ལམ་བཀྲ་ཤིས་རེ་བྱ། དེ་ནས་བསྒྲུབ་བྱའི་མིང་ཡིག་རྣམས་བྲིས་ལ་བསྒྲུབ་བྱ་དངོས་སུ་བསྐྱེད། བདེན་བདར་དང་དགུག་གཞུག་དྲུག་ཅུ་རྩ་བཞིའི་གཏོར་ཆོག་ཆེན་མོ་བཞིན་ལན་མང་དུ་བྱ། ཧྲཱིཿཥྟིཿའམ་ཡ་མ་རཱ་ཛའི་མཐར། གཤིན་རྗེ་ཡབ་ཡུམ་གྱི་སྙིང་པོ་བཏགས་ལ་དགྲ་བོ་འདི་ཞེས་བྱ་བ་ཨ་ཀརྵ་ཡ་ཛཿཛཿཞེས་བཏགས་པ་དྲུག་ཅུ་ཙམ་དང༌། དགྲ་བོ་འདི་ཞེས་བྱ་བ་འགོ་བའི་ལྷ་དང་བི་དྷྱེ་ཤཱ་ཡ་ཧཱུཾ་ཕཊ་ཅེས་པ་དྲུག་ཅུ་ཙམ་བནྡྷ་བནྡྷ་དང་སྟམ་བྷ་ཡ་ཞེས་བཏགས་པའང་དྲུག་ཅུ་ཙམ་བཟླས་ཞགས་པས་བཅིངས། རྡོ་རྗེ་རྒྱ་གྲམ་གྱིས་མནན་བཙོན་སྲུང་རྣམས་ཀྱིས་བསྐོར་བར་བསམ། སླར་ཡང་གཏོར་མ་དང་མཆོད་པ་ཕུལ་ནས་རེ་ཞིག་འཇོག་པའམ་ཡང་ན་དེ་མ་ཐག་ལྟེབ་རྩིས་
བྱས་ཀྱང་རུང་ངོ༌། །དེའི་ཚུལ་ནི་འོག་ཏུ་འཆད་དོ། །གཤིན་རྗེ་ཕོ་མོའམ་བཤན་པ་ཕོ་མོའི་འཁོར་ལོ་འབྲི་ཚུལ་གྱི་རིམ་པ་སྟེ་གསུམ་པའོ། །ད་ནི་བསྙེན་སྒྲུབ་ལས་གསུམ་གྱི་རིམ་པ་རྣམས་བཤད་པར་བྱའོ། །དེ་ལ་དང་པོར་བསྙེན་པ་ལ་དབྱེ་ན་རྩ་བའི་བསྙེན་པ་དང༌། ཉེ་བའི་བསྙེན་པ་གཉིས་ཡོད། དང་པོ་ནི་བསྙེན་པ་རང་དང་བསྙེན་པ་ཙམ་པོ་དང་བསྙེན་པ་ཆུང་ངུ་དང་བསྙེན་རྐྱང་དང་རྩ་བའི་བསྙེན་པ་དང་གཞིའི་བསྙེན་པ་རྣམས་དོན་གཅིག་མིང་གི་རྣམ་གྲངས་སོ། །དེ་ཡང་དམ་ཚིག་བྲིས་སྐུ་སྔར་ཡོད་ན་ལེགས། ངེས་པར་དགོས་པ་ནི་མིན། དེར་མ་ཟད་བྲིས་འབུར་དཀྱུས་མ་ཙམ་གྱི་རྟེན་བཤམས་ཐུབ་ན་ནི་ལེགས། མེད་ཀྱང་ཆོག་སྟེ། གནས་དབེན་པར་མཆོད་གཏོར་བཤམ། གཏོར་མ་འཛིན་གཏོར་དུ་བྱ། སྔོན་འགྲོ་གཏོར་མ་ནས་བརྩམ་རྗེས་ཆོག་གི་མཐར་ཐུག་པར་གཏོར་ཆོག་ཏུ་བཤད་པའི་སྐབས་བཞིན་ཡིན་པ་ལས། རྟེན་གཞན་མེད་ཀྱང་འཛིན་གཏོར་ཉིད་རྟེན་ཡིན་པས་བསྙེན་པ་མ་གྲོལ་བར་མདུན་བསྐྱེད་ཡབ་ཡུམ་གཤེགས་གསོལ་མི་བྱེད། འཁོར་དང་མགྲོན་རྣམས་གཤེགས། ཐུན་ཕྱི་མ་རྣམས་ལ་ཡང་ལྷ་སྐུ་སྔ་མ་འོད་གསལ་དུ་བཅུག་ནས་སླར་བསྐྱེད་པ་ཡིན་པས་འདོན་པ་བསྒྱུར་བ་མི་དགོས་སོ། །གང་ལྟར་ཡང་ཉེ་སྙིང་ཡི་གེ་བདུན་པ་ལ་འབྲུ་འབུམ་བྱེད། བསྙེན་རྫོགས་དངོས་སྙིང་པོ་ལ་འབུམ་ཕྲག་གསུམ་བཟླ་བར་བཤད་དོ། །ཉེ་བསྙེན་གྱི་སྔགས་སམ་རྩ་སྔགས་གྲངས་བསྙེན་དུ་བྱེད་ན་
འབུམ་ཕྲག་གཅིག་བཟླ། བསྙེན་པ་ཆུང་ངུའི་སྐབས་རྩ་སྔགས་དང་འཕྲེང་བའི་སྔགས་ལ་གྲངས་བསྙེན་མ་བསྐྱལ་ཀྱང་རུང་བས་ཐུན་གྱི་མཇུག་ཏུ་ཅུང་ཟད་རེ་ཀ་བཟླས་པས་ཁྱབ་བོ། །ཡི་དམ་གྱི་སྔགས་སྤྱིར་གྲངས་མེད་ཚད་མེད་དུ་བཟླ་དགོས་ཤིང་ཁྱད་པར་དུ་ཡང་བྱེ་བ་གཅིག་ནས་ལྔའི་བར་བཟླ་བར་གསུངས་པ་སྒྲིབ་སྦྱོང་དང་ཚོགས་གསོག་དང་དངོས་གྲུབ་དང་ལས་ཚོགས་མཐའ་དག་གི་རྒྱུ་ཡིན་ནོ། །བཀའ་སྲུང་འཇིག་རྟེན་འདས་པ་འདི་ཀུན་ཡང་དེ་དང་ཕྱོགས་མཚུངས་ཙམ་སྤྱིར་ཡིན་མོད་ཀྱང་ཚུལ་སྟོན་དབང་གིས་དེ་ཙམ་དུ་བཟླ་བ་དགོས་པ་ཆུང་ཞིང༌། འཁུ་ལྡོག་མང་པོས་མཐའ་མེད་དུ་བཟླ་མི་དགོས་ལ། བསྙེན་པའི་སྐབས་འདིར་སྔར་གྱི་དེ་ཙམ་ལ་རྟགས་མེད་ན་ཉིས་འགྱུར་རམ་གསུམ་འགྱུར་རམ་བཞི་འགྱུར་གྱི་བར་དུ་བཟླས་ཞིང་རྟགས་ཀྱང་འབྱུང་བར་འགྱུར་རོ། །ཡི་དམ་གྱི་སྔགས་ནི་དུས་རྟག་ཏུ་ཅི་ནུས་སུ་བཟླ་དགོས་པ་ཡིན་པས་དེ་གཉིས་ཅུང་ཟད་མི་འདྲའོ། །ཡི་དམ་གྱི་བསྙེན་པ་སྔོན་དུ་མ་སོང་ན་འདིའི་བསྙེན་པ་བྱར་མི་རུང༌། ཡི་དམ་ནི་ཐོབ་ཐང་གི་གཤིན་རྗེ་གཤེད་གང་ལ་བརྟེན་ཀྱང་མཆོག་ཡིན་མོད། སྤྱིར་ཁྲོ་བོའི་རྒྱལ་པོ་གཞན་ལ་བརྟེན་ཀྱང་མི་རུང་བ་ནི་མ་ཡིན་ནོ། །མངོན་སྤྱོད་ཀྱི་ལས་མཐའ་བྱས་པ་དང༌། གཞན་ལ་འདི་ཉིད་ཀྱི་དབང་རྗེས་གནང་བྱས་པ་དང༌། སྔར་མ་ཐོབ་པའི་མི་ལ་འདིའི་སྒྲུབ་ཐབས་ལག་ལེན་བསྟན་པ་སོགས་ཀྱིས་བྱིན་
རླབས་ཀྱི་བཀྲག་མདངས་ཅི་རིགས་པ་རེ་ཡལ་འགྲོ་བས། སླར་བསྙེན་པ་ཁ་གསོ་ཅུང་ཟད་རེ་བྱེད་དགོས་སོ། །དེ་ལྟར་རྩ་བའི་བསྙེན་པ་སོང་ནས་ལས་གཤིན་དགོས་ཀྱིའམ་ཡི་དམ་དང་སྦྲགས་པའི་སྦྱིན་སྲེག་ལྔ་སྟོང་ངམ་ཁྲི་ཙམ་འབུལ། དེ་བས་མང་བ་རང་མི་དགོས། གཏོར་ཆེན་གཅིག་དང་གཏོར་ཆུང་མང་དུ་བཤམས་ནས་གཏོར་མ་བརྒྱ་ཚར་སྟོང་ཚར་སོགས་འབུལ་ལོ། །སྤྱིར་འདི་ཉིད་ཆོས་སྐྱོང་གི་གཙོ་བོར་བྱེད་ན་བསྙེན་པ་དང་ཉེ་བསྙེན་སྐབས་སྐབས་སུ་བསྐྱར་གྱིན་བྱས་ན་ཤིན་ཏུ་ལེགས་སོ། །དེ་ནས་དུས་སྐབས་གཞན་ལ་ཉེ་བསྙེན་བྱེད་ན་དམ་ཚིག་བྲིས་སྐུ་འགྲུབ་པར་བྱས་ནས་བླ་མ་དཀོན་མཆོག་མཆོད་ཅིང༌། ནང་གཏོར་ཕུལ་ནས་གསོལ་བ་བཏབ། ཡིག་བརྒྱ་བཤགས་པ་སོགས་བྱ། ཡུལ་ལྷ་བཞི་བདག་ལ་གཏོར་མ་བཏང༌། བགེགས་བསྐྲད་ཅིང་ཐོ་བཙིགས། དེའི་སྟེང་དུ་སྲུང་བའི་དོན་དུ་ལས་ཀྱི་གཤིན་རྗེ་རལ་གྲི་ཐོགས་པ་བཞུགས་པར་གྱུར། སྔགས་མང་དུ་བཟླས། མེ་ཏོག་གཏོར་གུ་གུལ་བདུག །འདིར་བརྒྱུད་པ་གོང་མ་ནུས་པ་བརྙེས་པ་རྣམས་ཀྱི་མྱོང་གྲུབ་ཞལ་གདམས་ལ། སྤྱིར་ཡང་བོད་ཡུལ་འདིར་བསྙེན་སྒྲུབ་བྱེད་པ་ལ་རྒྱལ་བསེན་ཐེའུ་རང་དང་བཅས་པ་ལ་ཀླུའི་རྒྱབ་སྐྱོར་བ་འདི་ཀ་བར་ཆད་ཆེ་ཞིང༌། དགོས་སུ་ལས་གཤིན་ནག་པོ་བསྒྲུབས་པ་ལས་པེ་དཀར་གྱི་འཁོར་རྣམས་ཀྱི་བར་ཆད་གཏོང་བས། དེ་
དག་ལ་དམིགས་ནས་བགེགས་གཏོར་གླུད་སོགས་རྒྱ་ཆེར་ཙམ་བཏང་ངོ༌། ཁོ་རའི་སྒེར་གྱི་གཏོར་ཆོག་བྱས་ནས་འབྲེལ་ཆུང་ནས་བར་ཆད་གཏོང་དུ་འགྲོ་བས་མི་བྱ། ཁོ་ལ་དམིགས་ནས་སིལ་གཏོར་བགེགས་གཏོར་སྤྱིའི་ཆོ་ག་རང་བྱེད། བགེགས་གཏོར་བསྐྱར་གྱིན་བཏང་ན་ཁོ་ཡང་བསྐྱར་ནས་ལོག་ཡོང་བས་ཡང་ཡང་མི་བྱེད། ལན་ཅིག་པོ་དེ་སྔགས་གྲངས་མང་ལ་དམིགས་པ་གང་གསལ་བྱེད། སྐྲོད་པའི་ཚེ་ཡང་སྔགས་དང་དམིགས་པ་དྲག་ལ་ཡུན་རིང་བས་མཚམས་གཅོད་དགོས་སོ། །དེ་རྗེས་མཚམས་བསྡམས་སྒྲུབ་ཁང་གི་ནང་དུ་བྲིས་སྐུ་ལྷོ་ལ་ཞལ་གཟིགས་པའི་མདུན་དུ་རངཉིད་ཁ་བྱང་བསྟན་ནམ། ཡང་དེ་གོ་ལྡོག་ན་ཡང་བཟང༌། རང་དང་བྲིས་སྐུ་གདོང་ཐད་ཡོང་བ་གཅིག་བྱེད་དགོས། གོ་སྐབས་མི་བདེ་ན་ཁ་བལྟ་ཕྱོགས་ལ་ཁྱད་ཙམ་མེད། རྟགས་ཀྱི་གཏོར་མ་ཁ་ཟས་བཟང་ཚད་ལས་བྱས་ཤིང་དམ་རྫས་ཀྱིས་བརྒྱན་པ་རུལ་མི་འགྲོ་བ་ཅིག་ཐོད་པའམ་ལྕགས་སྣོད་དུ་བཤམས། དར་ནག་གམ་རས་ནག་གི་བཀབ་བོ། །དེའི་དྲུང་དུ་མཆོད་ཡོན་རཀྟ་ལག་བུར་དང་ཚ་བ་གསུམ་དང་ཚ་སྣ་བཏབ་པ་ཞིག་ཀྱང་བཤམས་ཏེ་ཁ་གཅོད་དོ། །བྲིས་སྐུའི་མདུན་དུ་འཛིན་གཏོར་ཤ་ཁྲག་གིས་བརྒྱན་པ་དང་མཆོད་པ་བཤམས་ཐུན་གཏོར་རེ་ཡང་བྱ་སྟེ་ཐུན་ཐམས་ཅད་ལ་འགྲུབ་ན་རབ། དེ་ཙམ་མ་ལྕོགས་
ན་སྲོད་ཐུན་ལ་ཕུལ་ཀྱང་རུང་མོད། སྐྱ་རེངས་ཤར་བའི་དུས་སུ་ཕུལ་ན་བཟང་བ་ཡིན་ནོ། །སྐབས་འདིར་བཟླས་པ་ནི་རྩ་སྔགས་ཉིད་ཉེ་བསྙེན་གྱི་སྔགས་སུ་གསུངས་པའི་ཕྱིར་གཙོ་བོར་དེ་བཟླ་དགོས་ལ། སྔགས་ཐུང་གཞན་གཉིས་ཇི་ལྟར་རིགས་པ་བཟླ། ཡུམ་གྱི་སྔགས་ནི་རྩ་སྔགས་ཇི་ཙམ་སོང་བ་དེའི་ཕྱེད་ཙམ་བཟླ་བ་ཡིན་ནོ། །སྤྱིར་འཕྲེང་སྔགས་ལ་བསྙེན་པ་མ་སོང་ཡང་འཁོར་ལོ་སྒྲུབ་ཏུ་མི་རུང་བ་མ་ཡིན་མོད། །བསྙེན་པ་སོང་ན་ལས་མྱུར་བ་ལ་ཤིན་ཏུ་གལ་ཆེ་བ་གཅིག་ཀྱང་ཡོད་དོ། །དེ་ལྟར་ན་རབ་ཏུ་འཕྲེང་སྔགས་གཉིས་པོ་འབུམ་ཕྲག་གཅིག །འབྲིང་དུ་ཁྲི་ཕྲག་བཞི། མ་མཐའ་ལ་ཁྲི་ཙམ་གྱིས་ཀྱང་རུང་ངོ༌། །གཏོར་ཆོག་དཀྱུས་མ་དེ་སོང་བའི་སྐབས་རྟགས་ཀྱི་གཏོར་མའི་ཁེབས་བསལ། ཁ་གསོས། ནང་མཆོད་ཀྱིས་བྲན། བྱིན་རླབས་རྒྱས་པ་བྱ། རྟགས་བྱུང་ན་འབུལ་ལོ་ཞེས་བྱས་ནས་དེ་མ་ཐག་ཁེབས་བཀབ། ཡི་དམ་གྱི་སྙིང་པོ་དང་རཀྟའི་སྔགས་ཀྱི་བསྲུང་བ་བྱ། རཀྟའི་ཨརྒྷཾ་ལ་ཡང་དེ་དང་འདྲ། རྟགས་ནི་དང་པོར་མི་ནག་པོ་དང་རྒྱལ་པོ་དམག་དཔོན་དཔའ་བོའི་རིགས་དང་གོ་མཚོན་ཅན་དང་ཀླ་ཀློ་དང་བནྡྷི་ནག་པོ་དང༌། ཚོམ་པོ་དང་ཤན་པ་སོགས་ཡབ་ཀྱི་ཆོ་འཕྲུལ་ལ་འོང༌། མ་སྲིང་དང་བུད་མེད་དང༌། མཚོ་ཆེན་པོ་དང་ཆུ་བོ་རྒྱུག་པ་དང༌། ཁྲག་མཚོ་སོགས་ཡུམ་
གྱི་ཆོ་འཕྲུལ་ཡིན། མུན་ནག་དང་མི་དང་རླུང་འཚུབ་སོགས་གཉིས་ཀའི་ཆོ་འཕྲུལ་ལ་འོང༌། མཛེ་སྦྲང་དང་ཧྲུལ་པོ་ཧྲུལ་མོ་སོགས་སེལ་གྱི་ལྟས་ཡིན་པས་ཡིག་བརྒྱ་དང་བཤགས་པ་བྱ། རད་རོད་ཅན་དང་ན་བའི་རྣམ་པ་འདུག་ན་གྲིབ་ཀྱི་ཕོག་པ་ཡིན་པས་ཁྲུས་གསོལ་སོགས་བྱེད། འབག་སེང་དང་མེ་ཆེན་དང་རྒྱལ་པོ་སྒྲ་དང་ཐོག་འཚིག་པ་དང༌། ས་འགུལ་བ་དང༌། སྒོ་སྲོག་པ་དང༌། བྱ་གདུག་པ་ཅན་དང་གཅན་གཟན་སོགས་ནི་རྟགས་དང་བར་ཆད་གཉིས་ཀ་ལ་འོང་བས། རྗེས་ཤེས་ལ་བརྟགས་ན་ཤེས་དགོས། སྤྱིར་བསྲུང་བཟློག་དྲག་ཏུ་བྱས་པས་རྟགས་ཡིན་ན་གོང་འཕེལ་ལ་འགྲོ། བར་ཆད་ཡིན་ན་སངས་འགྲོ། མཐར་རྟགས་རབ་བྲིས་སྐུ་བཞད་པ་དང༌། དངོས་སུ་མཐོང་བ་ཡིན་ཀྱང་དེང་སང་ཕལ་ཆེ་བ་ལ་འབྱུང་བ་དཀོན། གོང་གི་དེ་རྣམས་རང་ལ་འདུད་པ་དང༌། ཤིན་ཏུ་དགའ་བའི་རྣམ་འགྱུར་བྱེད་པ་དང༌། མ་ཧེ་ལ་བཞོན་ནས་རྒྱུག་པ་སོགས་ཡིན་པར་གྲགས། རྨི་ལམ་དུ་ཞལ་མཐོང་གི་རྣམ་པ་རབ་རིབ་འབྱུང་བ་ཡང་སྲིད། ཞུ་བ་ཅན་ཕྱག་འཚལ་བ་དང༌། མ་སྲིང་གཟུགས་དང༌། ཆས་གོས་ཕུན་སུམ་ཚོགས་པའམ་བུད་མེད་ནག་མོ་ཕྱག་འཚལ་བ་བྱུང་ན་ངེས་པ་ཅན་དུ་བྱེད། སྔགས་ཀྱི་རྟགས་གཏོར་དང་རཀྟ་མཆོད་ཡོན་དུ་ཕུལ་ནས་ཡི་དམ་གྱི་སྔགས་དྲག་ཏུ་བཟླ་བ་དང༌། མནའ་བཀག་དམ་ལ་བཞག །ལས་སྦྱོར་
དྲག་ཏུ་བྱའོ། །གཏང་རག་རྒྱ་ཆེན་པོ་ཚོགས་འཁོར་བྱེད་པ་ཡང་གལ་ཆེ། དེ་ནས་རྗེས་བསྡུས་ཏེ། དེ་མ་ཐག་གམ་དུས་གཞན་དུའང་རུང་སྟེ་དྲག་ལས་ཀྱི་སྒྲུབ་པ་ལ་འཇུག་གོ །བསྙེན་པ་དང་ཉེ་བསྙེན་ཇི་ལྟར་སྒྲུབ་པའི་རིམ་པ་སྟེ་བཞི་པའོ། །ད་ནི་སྒྲུབ་པ་ལ་འཇུག་པ་བཤད་པར་བྱའོ། །དེ་ཡང་ཡེ་ཤེས་ལྷའི་སྒྲུབ་པ་མ་ཡིན། དྲག་པོ་མངོན་སྤྱོད་བསད་ལས་ཀྱི་སྒྲུབ་པའོ། །སྐབས་འདིར་བསྒྲུབ་བྱ་དེའི་བརྟེན་སྐྱོབ་ཀྱི་ལྷ་རྣམས་ཀྱིས་བར་ཆད་འཆད་རྩོམ་ཉེན་ཆེ། དེ་ལས་གཞན་པའི་ལྷ་འདྲེས་དཀྱུས་མའི་བར་ཆད་འབྱུང་ཉེན་ཆུང་ངོ༌། །ཉེ་བསྙེན་གྱི་སྐབས་བཞིན་སྔོན་འགྲོ་དགེ་བའི་དཔུང་རྣམས་བྱ། རྒྱལ་འགོང་ལ་བགེགས་གཏོར་གཏོང་བའི་དོད་དུ་བསྒྲུབ་བྱའི་གསང་སྡེ་རྣམས་བགེགས་གཏོར་སྦྱིན། བགེགས་བསྐྲད་དྲག་ཏུ་གཟིར་ཞིང་དེ་མ་ཐག་བསྲུང་འཁོར་སྒོམ་པ་གལ་ཆེ། ཉི་ཕྱེད་ཡན་ལ་ཡིག་བརྒྱ་བཟླ་བ་དང༌། དེ་མན་ཆད་མངོན་རྟོགས་སྒོམ་སྟེ། ཡི་དམ་གྱི་སྔགས་དྲག་ཏུ་བཟླ། དེ་ལྟ་བུ་ཞག་གསུམ་སོགས་ཇི་ལྟར་འོས་པའི་རིགས་ལ་སྔར་མ་བསགས་ན་རྫས་རྣམས་བསགས་ཤིང་འཁྲུལ་འཁོར་སྐབས་འདིར་ངེས་པར་འབྲིའོ། །དེ་ཡང་འཁོར་ལོའི་རྒྱུ་རྣམས་ལ་སྦྱང་བ་བྱ། ཁྲུས་ཆུས་གཏོར། མཆོད་རྫས་ལ་སོགས་པ་རྫས་ཀྱི་རིགས་གཞན་རྣམས་ལའང་དེ་བཞིན་དུ་བྱེད། རྫས་ཀྱི་གཙོ་བོ་ཐོད་པ་མཚན་ངན་ལ། ཡི་གེ་མང་པོ་ན་དུམ་བུ་གཅིག་གམ་
གཉིས་པ་ལ་ཟེར་བ་འདུག་ཀྱང༌། གཞུང་ཡི་གེ་མ་དག་པ་བཀླགས་པས་ཕྱིས་གསལ་བྱེད། བྱས་པ་ཀུན་ཀྱང་མ་དག་གོ །དེས་ན་དཔེ་རྙིང་འགའ་ལས་དུམ་བུ་དྲུག་གམ་བརྒྱད་པ་ལས་ཞེས་འབྱུང་བ་ལྟར་བྱ་སྟེ། དུམ་བུ་བརྒྱད་དྲུག་གཉིས་རང་བཞིན་གྱིས་མཚན་ངན་ཡིན་ཅིང་གཅིག་པ་དང་གཉིས་པ་མཚན་ངན་ཉུང་བས་སོ། །ཐོད་པ་དེའི་འབྲེག་མཚམས་ཅུང་ཟད་མཐོ་བ་དཔྲལ་བ་དང༌། ལྟག་ཁུང་གི་ཁ་ལ་ཐིག་བཏབ་སྟེ་གྲས་བདར་ལེགས་པར་བྱས། ཆུ་དྲོན་གྱིས་མི་འཁྲུར། མ་ཐོད་རྙན་གྱི་ཕྱོགས་ལ་གཤིན་རྗེའི་དབུ་ཕྱག་གི་རྣམ་པ་རང་གྲུབ་ཡོད་པ་སྟེ། གོང་འཁོར་ལོ་འབྲི་བའི་རྫས་ཀྱིས་སྐྱ་རིས་གསལ་བཏབ། ཚོན་རྩི་རྣམས་ལ་དུག་བསྲེག་ལ་གཤིན་རྗེ་ཉིད་ཀྱི་སྔགས་མང་དུ་བཟླས་ཏེ་ཚོན་རྔམ་འཇིགས་ཀྱི་རྣམ་པ་ཡོང་བར་བྱ། དེ་ལ་པྲ་ཚིལ་མནན་ནོ། །འགྲུབ་ན་པྲ་ཚིལ་མ་མནན་གོང་དུ་སྐུ་དེའི་སྤྱི་བོར་ཉེ་སྙིང་དང༌། མཐའ་སྐོར་དུ་རྩ་སྔགས། ཞལ་དང་ཕྱག་ལ་ཨོཾ་ཀཱ་ལ་རཱུ་པ་ཤ་ནན་ན་མ་རྦད་རུ་ལུ་རུ་ལུ་བྷྱོ་ཛཿརུ་ལུ་ཚལ་པ་ཡ་ནི་ཏོ་ཤ་རུ་ནི་ནན་མཱ་ར་ཡ་ནན་ཨོཾ་ཞེས་པས་བྲི། གལ་ཏེ་ཞལ་དབྱེ་འདི་མ་འབྱོར་ན་ཐོད་པ་མཚན་ངན་ཕོ་ཐོད་མོ་ཐོད་ཁ་སྦྱོར་དུ་བྱུང་ནའང་ནུས་པ་ཆེ་བར་འོང་ཞིང་ཕོ་ཐོད་ཁ་སྦྱོར་དང༌། མོ་ཐོད་ཁ་སྦྱོར་ཡང་རུང་ཙམ་ཡིན་ནོ། །ཞལ་དབྱེ་ཡོད་པའི་དབང་དུ་བྱས་ཏེ་ཀ་པཱ་ལའི་རྒྱ་སྲུབ་མ་རྣམས་ལ་རྫས་སྔ་མ་ལྟར་གྱིས་སྙིང་
པོ་དང་རྩ་སྔགས་དང་ཡུམ་གྱི་སྙིང་པོ་རྣམས་དྲག་པོའི་སྤེལ་ཚིག་ཅན་འདྲ། ཡ་ཐོད་མ་ཐོད་གཉིས་ཀར་གྱིས་དབུས་སུ་དུག་ཁྲག་གི་ཡ་ཆེན་པོ་རེ་འབྲི། ཡ་མ་རྭ་ཛ་སྤེལ་ཚིག་ཅན་གྱི་མཐའ་སྐོར་ལ་འབྲི་ཞེས་གསུང་སྒྲོས་ལས་འབྱུང་སྟེ། སྔགས་འདི་ཡི་དམ་གྱི་སྔགས་སུ་བྱེད་པ་དང༌། འཇིག་རྟེན་གཤིན་རྗེའི་སྔགས་སུ་བྱེད་པ་གཉིས་ལས་འདིར་ཕྱི་མ་ལྟར་ཡིན་ནོ། །བསད་ལས་ལ་སྤེལ་ཚིག་དགོས་པ་ཐམས་ཅད་དུ་བཤད་ཚོད་ཐོབ་ཐང་མཱ་ར་ཡ་ཞེས་པ་ཁོ་ནས་ཆོག་ཀྱང༌། ད་ལྟར་ལག་ལེན་དུ་དེ་ཙམ་གྱིས་རྣོན་པོ་མི་ཡོད་པས་ཏྲིག་ནན་ཨེ་ཧུར་ཐུམ་ཛཿམཱ་ར་ཡ་ཧཱུཾ་ཕཊ་ཆེས་འབྲི་བ་ལས་མྱུར་བའི་མན་ངག་ཡིན། མཐུ་མཁན་འགའ་ཞིག་བྲིང་ཤག་ཅེས་སོགས་ཀྱི་མཐའ་རྟེན་འཛུག་པའང་འདུག །ནུས་པ་ཡོང་འཕྲོ་ཡིན་ཟེར་རོ། །འོན་ཀྱང་དེ་ནི་རྦད་སྔགས་དང་འབྲེལ་གྱི། འཁོར་ལོ་དང་འབྲེལ་བ་མ་ཡིན་ནོ། །ཞེས་བདག་གི་བླ་མ་གསུང་ངོ༌། །འཁོར་ལོ་ཤིན་ཏུ་རྣོ་བར་འདོད་ན་མཇུག་ཏུ་ལྷ་སྲིན་གང་ལ་གཏོད་པར་འདོད་པའི་ལྷ་འདྲེ་དེ་སྡེ་བརྒྱད་གང་ཡིན་བརྟགས་ནས་དེའི་སྲོག་སྙིང་སྤེལ་ཚིག་དང་བཅས་པས་སྐོར། ཡ་མ་རཱ་ཛ་ཨཛྙཱ་པ་ཡ་ཏི་རྦད་ཅེས་པ་བར་བར་དུ་སྤེལ་བ་ལག་ལེན་མན་ངག་ཡིན། དེ་ནས་ཤོག་བུ་ལ་རྫས་སྔགས་བཞིན་གྱིས་དགྲ་བོའི་ལིང་ག་སྤྱི་དང་མཐུན་པ་ལ། སྙིང་གར་མིང་གི་མཐར་ཡབ་ཀྱི་ཉེ་སྙིང་དང༌། ཡུམ་སྔགས་ཀྱི་མཐར་སྤེལ་ཚིག་ཅན་གྱིས་བསྐོར། ཕྱིའི་མཐའ་སྐོར་དུ་སྙིང་པོ་དང་རྩ་
སྔགས་དང་ཡུམ་སྔགས་སྤེལ་ཚིག་ཅན་གྱིས་བསྐོར་བར་བྱ། འཁོར་ལོ་དངོས་གཞིའི་མིང་ཡིག་བསྒྲུབ་བྱའི་ཟག་རྫས་ཀྱིས་བྱུག་པ་བྱུང་ཀྱང་ལེགས། མ་བྱུང་ཀྱང་ཆོ་ག་ལིང་ག་འདི་ལ་ཟག་རྫས་ལྔ་པོ་གང་རུང་གཅིག་མེད་ཁ་མེད་དགོས། དེས་དང་པོར་མི་འཁྱམ། བར་དུ་བླ་འཁོར། མཐར་བླ་མི་འབྲོས་པའི་དགོས་པའོ། །དེ་ལ་འབྲུབ་ཁང་དུ་དགུག་གཞུག་དྲག་པོ་ལན་མང་དུ་བྱས། ཡབ་ཡུབ་གྱི་སྔགས་གཉིས་ལ་དགུག་གཞུག་གི་སྔགས་བཏགས་པ་ཡང་ལན་མང་དུ་བྱས་ནས། འཁོར་ལོའི་གཤམ་གྱི་ཕྱོགས་སུ་མགོ་བསྟན་ཏེ་འཁོར་ལོ་གཉིས་ཀྱི་བར་དུ་བཅུག །ལིང་གའི་སྙིང་ཁ་ན་ཡོད་པའི་སྔགས་དང་འཁོར་ལོ་གཉིས་ཀྱང་ལྟོ་བར་སྦྱོར་བར་བྱ། ལག་པ་བདེ་བས་ཡི་གེ་ཕྲ་ཞིང་འཁོར་ལོ་ཆུང་ན་མ་བལྟབས་པ་དམ་རྩིས་སྦྱར་ཏེ་ཁ་སྦྱོར་འགྲིགས་སོར་བཞག་པས་ལེགས་བལྟའི་ཚིགས་དགོས་པ་བྱུང་ན་བྲང་ཐུམ་ཟེར་བའི་བལྟེབ་ཚིགས་དེ་བྱེད། དེ་ཡང་ཡབ་གཙོར་ཆེ་བས་ཕྱི་ནང་གི་བལྟབ་ལུགས་མ་ནོར་བ་ཡབ་འཁོར་ལ་བྱས་པས་མདུན་བལྟེབ་ཡིན། ཡུམ་འཁོར་ལ་ཕྱི་ཀློག་དང་རྒྱབ་བསྟན་ཤུགས་ལ་འོང༌། འཁོར་ལོའི་རྒྱབ་སྟེང་དང༌། སུག་བཞི་འོག་ཏུ་ཡོང་བའི་རྩིས་ཀྱི་སྟེང་འོག་མི་འཁྲུལ་བའི་རྟགས་བཏབ་ནས་དྲག་པོའི་དཀྲིས་སྤྱི་དང་མཐུན་པར་བྱ། ཡང་བལྟེབ་ཚིགས་མ་བྱས་ཀྱང་དཀྲིས་ནི་དགོས། མོ་འཁོར་འོག་དང་ཕོ་འཁོར་སྟེང་དུ་བྱ། དེ་རྗེས་ལག་ལེན་ལུགས་གཅིག་ལ་
ཐོད་པ་རྫས་ངན་ས་བསོབ་ཀྱི་འོལ་སྤྱི་བཀང་བའི་སྟེང་དུ་འཁོར་ལོ་བཞག་ལྟེ་བའི་ཡིག་མགོ་དཔྲལ་བའི་ཕྱོགས་སུ་བསྟན། འཁོར་ལོ་ལ་རྒྱུ་མངའ་མི་རུས་སམ་མི་ལྤགས་ཀྱི་སྲད་བུ་བཏགས། དཔྲལ་བའི་ཕྱོགས་ནས་བཏོན། འཁོར་ལོའི་སྟེང་དུ་ཡང་རྫས་ཐན་ཐུན་འགྲེམས། ཡང་ལག་ལེན་ལུགས་གཞན་ལ་འཁོར་ལོ་བལྟེབ་ཚིགས་བྱས་པ་དེ་ལིང་གའི་སྙིང་གར་གཞུག །ལིང་གའི་རྒྱུ་ཡང་དགྲ་བོ་ཟག་རྫས་བསྲེས་ཏེ་འཇིམ་པའམ་བག་ཟན་ལ་བྱེད། དེ་ཡང་དང་པོ་ལིང་ག་ཁོག་སྟོང་བཅོས་ལ་སྐམ། དེར་འཁོར་ལོ་བཅུག་སྟེ་ཁ་སྒྲིབ་བོ། །དེའི་སྙིང་ཁའམ་ལྟེ་བའི་ཐད་དུ་ཨག་ཚེ་ཁུང་ཡོང་བ་བྱ། དེ་ལ་མཐུན་ལམ་བཏོད་ནས་ཐུན་འདེབས་པའི་ལུགས་ཀྱང་ཡོད། དེ་གཉིས་གང་ལྟར་ཡང་དེ་ནས་མ་ཐོད་གཤིན་རྗེའི་གཟུགས་ཀྱི་སྟེང་ནས་བཀབ་ཐོད་པའི་ཕྱི་ནས་རོ་སྐྲ་དང་རྒྱུ་མ་སྲད་བུ་སྔོ་ནག་གིས་རྒྱ་གྲམ་རིས་སུ་ཐོད་པ་ཕྱེད་མཐོང་ཙམ་དུ་བསྡམ། བདེན་སྟོབས་དང་དྲག་སྔགས་མང་དུ་བརྗོད། ཤ་ཆེན་དང་གུ་གུལ་གྱིས་བདུགས། ཡུངས་ཀར་ཡུངས་ནག་བསྲེས་ལ་བསྲུང་བ་བྱས་ཏེ་བཞག་གོ །སྒྲུབ་པའི་དུས་ཁ་ལྟ་ཕྱོགས་ལ་སྤྱིར་གཤིན་རྗེ་ལྷོ་ཕྱོགས་ན་གནས་པས་ལྷོ་ལ་ལྟ་ཟེར་དེ། ཁ་ཅིག་སྤྱིར་བཏང་བ་དེ་ལྟར་ཡིན་ཡང་རྟོག་པ་འདིའི་ལུགས་ཀྱི་བྱད་དུ་ལྟ་དགོས་ཟེར། གཞན་དག་འདི་ལྷོ་ཕྱོགས་ཁོ་ནའི་གཤིན་རྗེ་མ་ཡིན། དབུས་ཀྱི་གཤིན་རྗེ་ཡིན་པས་ལྟ་ཕྱོགས་ལ་ངེས་པ་མེད། དགྲ་གང་ཡོད་
ཀྱི་ཕྱོགས་ལ་ལྟ་ཟེར། འོན་ཀྱང་འདི་ལྟར་གོ་བར་བྱ་སྟེ། དྲག་ལས་སྤྱིའི་ཆོ་ག་ལ་དགོས་པར་ལྷོར་བལྟས་ཀྱང་རུང༌། དམིགས་པ་གསལ་བའི་ཕྱིར་དགྲ་ཕྱོགས་ལ་བལྟས་ཀྱང་ཆོག་པ་ཡིན་ཅིང༌། ཁ་ལྟ་ཕྱོགས་འདི་དག་སྒྲུབ་པ་པོ་གཙོ་ཆེའམ། མདུན་སྐྱེད་གཙོ་ཆེ་ཞེ་ན། གཞན་དག་སྣ་ཚོགས་འཆད་ཀྱང་རང་ལུགས་སྒྲུབ་པ་པོ་གཙོ་ཆེའོ། །དེས་ན་སྔར་བཞིན་བྲིས་སྐུ་ཡོད་ན་དཀྱིལ་འཁོར་ལ་སོགས་པ་མི་དགོས། བྲིས་སྐུ་མེད་ན་གྲུ་གསུམ་མཐིང་ནག་ཕྱག་མཚན་བཀོད་པའི་དཀྱིལ་འཁོར་འབྲི། རང་དང་བྲིས་སྐུའི་བར་དུ་འབྲུབ་ཁུང་བློས་བསླངས་ཁྲུ་གང་ལས་མི་ཆུང་བ་ཞིག་བྱ། བྲིས་སྐུའི་མདུན་དུ་གཏོར་མ་ཤ་ཁྲག་སྙིང་ལ་སོགས་པས་བརྒྱན་པ་དང་དྲག་པོའི་མཆོད་རྫས་སྤྱི་མཐུན་ལས་མི་རྟ་ཁྱི་གསུམ་གྱི་ཤ་ཁྲག་དང་ར་ནག་ཉ་སྦྲུལ་རྣམས་ཀྱི་ཤ་དང་སྦྱར་བའི་མཆོད་པ་དང༌། ཚིལ་ཆེན་གྲི་ཁྲག་ཉ་སྐམ་ར་ནག་གི་དབང་པོ་ལྔ་རྣམས་སྲེས་པའི་གུ་གུལ་གྱི་བདུག་སྤོས་རྣམས་དགོས། སྐམ་ཐུན་རློན་ཐུན་སྤྱི་དང་མཐུན་པར་བཤམས་ཤིང་སྒྲུབ་ལུགས་ཀྱང་འདྲ། སྔགས་ནི་རྩ་སྔགས་ཀྱི་མཐར་ཀཱ་ལ་རཱུ་པ་ཀྵཾ་མ་དུག་ཙ་ཙ་ཚལ་པ་རྦད་རྦད་མ་དུག་ཀྵཾ་ཡ་ལ་ཀྵཾ་ཞེས་པའོ། །ཆོ་གའི་རིམ་པ་ནི་མཆོད་བསྟོད་ཀྱི་བར་གོང་དང་འདྲ་བ་ལས། བཟླས་པའི་མགོ་མཇུག་གཉིས་ཅར་དུ་གཏོར་བསྔོ་རེ་བྱེད། འགྲུབ་ན་གཏོར་ཆུང་ལ་སོགས་རེ་བྱ། དེ་མ་
ལྕོགས་ན་གཏོར་མ་ཆེ་བ་ཁ་གསོས་པས་ཀྱང་ཆོག །འཁོར་ལོ་གཉིས་དང་ཡ་ཐོད་མ་ཐོད་གཤིན་རྗེ་ཡབ་ཡུམ་དང་འབྲུབ་ཁུག་ལྕགས་ཁང་དུ་སྒོམ། ཞེས་འདོད་པ་དང༌། ཐོད་པ་རིལ་པོ་ལྕགས་ཁང་དུ་འདོད་པ་གཉིས་ཡོད་མོད། ཅུང་ཟད་མི་བདེ་བས་ཞལ་དབྱེ་ཡིན་ན་འབྲུབ་ཁུང་དུ་ཡ་ཐོད་གཤིན་རྗེའི་ཕོ་བྲང་ཞལ་དབྱེ་དང་འཁོར་ལོ་གཤིན་རྗེ་ཡབ་ཡུམ་དུ་བསྐྱེད། ཡ་ཐོད་ཁ་སྦྱོར་ཡིན་ན་འབྲུབ་ཁུང་དུ་ཐོད་པ་དང་བཅས་པ་གཞལ་ཡས་ཁང་དུ་བསྐྱེད་ཀྱང་ཆོག །ཡང་ན་འབྲུབ་ཁུང་གཞལ་ཡས་ཁང་དང་ཐོད་པ་གཉིས་འཁོར་ལོ་དངབཅས་པ་ཡོངས་རྫོགས་ཡབ་ཡུམ་དུ་བསྐྱེད་ཀྱང་རུང་བ་ཡིན་ནོ། །སྐྱེད་ཆོག་མདུན་སྐྱེད་མ་དང་མཉམ་དུ་བྱས་པས་ཡོང༌། ལིང་ག་དང་མིང་ཡིག་བསྒྲུབ་བྱ་དངོས་སུ་མོས་དགོས། གཏོར་ཆོག་དང་བཟླས་པའི་བར་དུ་ལིང་ག་ལ་དམིགས་ནས་དགུག་གཞུག་མང་དུ་བྱ། ཡབ་ཀྱི་ཉེ་སྙིང་གི་མཐར་དགྲ་བོ་ཆེ་གེ་མོ་ཨཀྵ་ཡ་ཛཿཛཿབླ་སྲོག་ཐམས་ཅད་ནཱྀ་ཛ་ཛ་ཞེས་བཏགས་པ་བརྒྱ་ཉི་ཤུ་ཙམ་དང༌། སྙིང་པོ་དང་རྩ་སྔགས་གང་རུང་གཅིག་ལ་སྔགས་དེ་བཏགས་པ་དྲུག་ཅུ་ཙམ་དང༌། ཅིག་ཤོས་ལ་སྟོང་ཕྲག་སོགས་གང་མང་དུ་ཡུམ་གྱི་སྙིང་པོ་ལའང་དེ་དང་མཚུངས། མཇུག་ཏུ་འཕྲེང་སྔགས་ལ་སྤེལ་ཚིག་སྦྱར་བ་ཉེར་གཅིག་ཙམ་བཟླ། དེ་ནས་ཡང་གཏོར་བསྔོ་བྱས་ཏེ། མཇུག་ཏུ་རྗེས་ཆོག་རྣམས་བྱ་བ་ཡིན་ཀྱང་ལས་སྦྱོར་མ་ཚར་བར་དུ་འཁོར་དང་གཏོར་མགྲོན་ཚོ་ཡང་དབང་པོའི་ཚུལ་དུ་བཞུགས་པ་ཡིན་
གྱི་གཤེགས་གསོལ་མི་བྱེད་དེ། དེ་ལྟར་ན་ཐུན་གསུམ་མམ་བཞི་ལ་སོགས་པ་བྱ། དེ་འདྲ་ཞག་གསུམ་མམ་བདུན་གྱི་བར་བྱས་པས་ཁུགས་པའི་རྟགས་འབྱུང་སྟེ་སྤྱི་དང་འདྲ། དེ་ནས་ཀྱང་མི་འབྲོས་པར་བྱ་བའི་ཕྱིར་དགུག་གཞུག་བཅིངས་མཉེས་མང་དུ་བྱེད་པ་གལ་ཆེ་སྟེ་ཞག་གཅིག་གཉིས་གསུམ་གང་རུང་བྱའོ། །དེ་ནས་བཟུང་ཐུན་མཚམས་སུ་ཨག་རྩེ་ཁུང་སྔགས་ཀྱི་ཤོག་རིལ་གྱིས་བཀག །དེ་ཚུན་ལ་ཐུན་བསྒྲུབ་པར་བྱ་ཡི་བརྡེག་མི་དགོས། འདི་ནས་བཟུང་རྡེག་གོ །སྦྲགས་སྒྲུབ་ཀྱི་སྐབས་འདིར་ཡབ་ཡུམ་ཀྱི་སྔགས་བཟླ་མཁན་སོ་སོས་བྱེད་པར་བཤད་པ། ཅིག་ཡོད་ཀྱང་སྒྲུབ་པ་པོ་གཅིག་ཉིད་ཀྱིས་སྔགས་གཉིས་ཀ་བཟླ་བ་ཀ་ད་ལྟའི་ལག་ལེན་ལ་བདེ་བར་འོང༌། མི་མང་པོས་བསྒྲུབས་ན་ཡང་ཐམས་ཅད་ཀྱིས་གཉིས་ཀས་བཟླ་བ་ལ་བརྩོན་པར་བྱའོ། །ཆོ་གའི་རིམ་པ་གཞན་འདྲ་བ་ལས་སྔ་གཏོར་སོང་བའི་རྗེས་ལ་དགུག་གཞུག་ཚར་གསུམ་བྱས་ནས་ཐོད་པའི་དཔྲལ་བའི་ཁུང་མཚམས་ནས་བཏོན་པའི་སྲད་བུ་དེ་ལ་དྲག་པོའི་གཟུངས་ཐག་བཏགས་ཏེ་བཟུང༌། མང་པོས་བསྒྲུབས་ནའང་གཟུངས་ཐག་མི་གཅིག་པ་རེ་རེ་དགོས་སོ། །བསད་སྔགས་དང་བཅས་པའི་སྔགས་ཐམས་ཅད་ཚར་གཅིག་བརྗོད། དེ་ནས་མདུན་བསྐྱེད་དཀྱིལ་འཁོར་གྱི་ལྷ་ཚོགས་ལས་ཕོ་ཉ་དཔག་ཏུ་མེད་པ་སྤྲོས། འཁོར་ལོའི་གཤིན་རྗེ་ཡབ་ཡུམ་ཞལ་སྤྲོད་དུ་ཡོད་
པའི་ཞབས་གཉིས་ཀྱི་བར་མཚམས་སུ་སྒྲུབ་བྱ་དེ་སྤྱི་བོ་ཚུགས་སམ། གན་རྐྱལ་དུ་འདུག་པ་ལ་བསད་ལས་མཛད་པར་བསམས་ཏེ་ཉེ་སྙིང་དང་ཡུམ་གྱི་སྙིང་པོ་བརྒྱ་རྩ་རེའི་མཐར་བསད་སྔགས་བཏགས། སྙིང་པོ་དང་རྩ་སྔགས་གཉིས་སོ། །གང་རུང་གཅིག་ལ་བསད་སྔགས་བཏགས་པ་འཕྲེང་སྐོར་ཙམ་དང༌། ཅིག་ཤོས་ལ་ཡུམ་གྱི་སྔགས་བཏགས། དེ་ལ་བསད་སྔགས་བཏགས་པ་སྟོང་ཕྲག་སོགས་ཇི་ལྟར་འོས་པར་བཟླ། བསད་སྔགས་ནི་ནཱ་ཤ་ཡ་སྟཾ་བྷ་ཡ་མཱ་ར་ཡ་ཧཱུཾ་ཕཊ་ཅེས་པ་དང་འཁོར་ལོ་ལ་འབྲི་བའི་ཏྲིག་ནན་སོགས་ཀྱང་ཡིན། འཕྲེང་བའི་སྔགས་ལ་དུཥྟན་ཞེས་པའི་གནས་སུ་བསྒྲུབ་བྱའི་མིང་འཇུག་པ་མ་གཏོགས་བསད་སྔགས་ལ་སོགས་པ་མི་དགོས་ཏེ་རང་ཤུགས་ཀྱིས་ཡོད་པའི་ཕྱིར་རོ། །འཕྲེང་བའི་སྔགས་བཟླ་བའི་ཚུལ་ལ་ཉིན་པར་ཡབ་ཀྱི་སྔགས་གཙོ་བོར་བཟླ་སྟེ། ཉིན་ཕྱེད་ཡན་ལ་ཨོཾ་ཀཱ་ལ་རཱུ་པ་ཡ་ཤ་ཏྲུན་ཆེ་གེ་མོ་ཏྲཱ་ས་ཡ་ནས་ཙུ་རྞ་ཙུ་རྞ་ཧུཾ་ཕཊ་ཅེས་པ་དང༌། དགོངས་ཕྱོགས་ཨོཾ་ཀཱ་ལ་རཱུ་པ་ཡ་ཤ་ཏྲུན་ཆེ་གེ་མོ་ཙཀྵ་བཛྲེ་ཎ་ཞེས་པ་ནས། སྟཾ་བྷ་ཡ་ཧཱུཾ་ཕཊ་ཅེས་པ་བཟླ། གཤིན་རྗེའི་ཕོ་ཉ་གཙོ་བོར་གྱུར་པའི་དམག་ཚོགས་ཀྱིས་དགྲ་བོ་བསད་བཅད་ཀྱི་ལས་བྱེད་པར་བསམ། མཐར་ཡུམ་གྱི་འཕྲེང་སྔགས་བདུན་ཙམ་རེ་བཟླའོ། །སྲོད་ཐུན་གྱི་སྐབས་ཧྲིཿཙ་མུནྚཱིུ་ཡེ་ཤ་ཏྲུན་ཆེ་གེ་མོ་དྷུ་ན་དྷུ་ན་ནས་བྱ་དྷི་རོ་ག་ཎཾ་ཕཊ། ཅེས་པ་བཟླ། ཐོ་རངས་ཧྲིཿཙ་མུནྚཱི་ཤ་ཏྲུན་ཆེ་གེ་མོ་
ཉེ་ག་ན་ཤཾ་བཾ་ཅེས་པ་ནས། ན་ཤ་ཡ་ཧཱུཾ་ཕཊ་ཀྱི་བར་བཟླ། མཇུག་ཏུ་ཡབ་ཀྱི་འཕྲེང་སྔགས་བདུན་ཙམ་རེ་ཡང་བཟླའོ། །གཤིན་རྗེ་མོ་གཙོ་བོར་གྱུར་པས་དགྲ་བོ་བསད་བཅད་ཀྱི་ལས་མཛད་པར་བསམ། ཉེ་སྙིང་གི་སྐབས་སུ་ཐུན་མི་འདེབས། སྔགས་གཞན་རྣམས་ཀྱི་སྐབས་སུ་འབྲུབ་ཁུང་གི་ཕྱི་ལ་མ་བོ་བར་ཐོད་པ་ལ་ཐུན་བརྡེགས་ཏེ། ཕོ་སྔགས་ལ་སྐམ་ཐུན་དང་མོ་སྔགས་ལ་རློན་ཐུན་སྔགས་དེ་དང་དེ་ལ་ཐུན་སྒྲུབ་ཀྱི་སྔགས་དང་ཧ་ལ་ཧ་ལ་བྷྱོཿདང་ཏྲག་རཀྵ་བྷྱོཿབཏགས་པས་བརྡེག་གོ །སྐབས་དེ་དག་ཅི་རིགས་པར་གུ་གུལ་གྱིས་བདུག་ཅིང་ལྷ་དབྱེ་བའི་དམིགས་པ་བྱ་ཡི། གཞན་ལྷ་དབྱེ་མི་དགོས་པར་གྲགས། ཅི་སྟེ་བྱེད་ན་གཤིན་རྗེ་གཤེད་ཀྱི་འཁྲུལ་འཁོར་ཆེན་མོ་དང་འདྲ་བར་བྱའོ། །འདིར་ཆོ་གའི་ཡན་ལག་ལ་མེད་ཁ་མེད་མིན་ཀྱང་ཉིན་ཕྱཻད་ཀྱི་ཐུན་ལ་དྲག་པོའི་སྦྱིན་སྲེག་རེ་འབུལ་ཐུབ་ནའང་ལེགས་སོ། །དེ་ལྟར་བསྒྲུབས་པས་ཞག་བདུན་ནམ་ཟླ་ཕྱེད་ཉེར་གཅིག་ཚུན་ལ་བསད་རྟགས་ངེས་པར་འོང་ངོ༌། །བསད་རྟགས་ནི་སྤྱི་དང་འདྲ་བ་ལས། མི་ནག་ཕོ་མོས་དགྲ་བསད་པ་དང་གློ་སྙིང་མཆིན་པ་སྟེར་མཁན་བྱུང་ཞིང་ཟོས་པ་རྨི་ན་ངེས་ཅན་དུ་བྱེད་དོ། །ད་ནི་འདི་དཔྱད་དེ་བཅའ་གཞིའི་སྐབས་སུ་རྒྱ་སྟོན་གྱིས་བཞེད་པས། ཞལ་དབྱེ་མ་ཐོད་འོག་ཏུ་བྱས། ཡ་ཐོད་ཀྱིས་སྟེང་ནས་འགེབ་པར་བཞེད་པ་ནི། ཞལ་དབྱེའི་སྐབས་བྲིས་ལང་ལ་ཐུན་ཐེབས་པ་
གཅིག་དགོས་པ་ལ། ཨག་ཙེ་ཁུང་ཁ་འོག་ཏུ་བསྟན་ན་དེ་མི་རུང་བ་དང༌། ཞལ་དབྱེ་སྤྱིའི་ལུགས་དང་ཡང་འགལ་བས་དེ་མི་ལེགས་སོ། །འབྲི་ཁུང་དཔལ་འཛིན་སྦྲགས་སྒྲུབ་ཀྱི་སྐབས་འདིར་རབ་ཏུ་མ་ཐོད་ཕོ་མོ་གཉིས། འབྲིང་དུ་མ་ཐོད་གང་རྙེད་གཉིས་ཁ་སྦྱོར་བྱེད། ཐ་མ་ཀ་པཱ་ལ་ཁ་སྦྱོར་ཡིན། ཡབ་རྐྱང་དུ་སྒྲུབ་པ་ཁོ་ན་ལ་ཡ་ཐོད་མ་ཐོད་ཁ་སྦྱོར་བྱེད། སྦྲགས་སྒྲུབ་ལ་དེ་མི་བྱེད་པར་འདོད་དོ། །དེ་མི་འཐད་དེ་སྤྱིར་ཐོད་པ་ཁ་སྦྱོར་རྐྱང་སྒྲུབ་སྦྲགས་སྒྲུབ་ཐབས་ཐམས་ཅད་ལ་རུང་མོད་ཀྱང་མ་ཐོད་ཁ་སྦྱོར་བྱེད་པ་འདི་ཞལ་དབྱེ་སྤྱིའི་ལག་ལེན་དང་འགལ་ཞིང༌། རྟོག་པ་ལས་ཐོད་པའི་ནང་དུ་འཇུག་པར་བཤད་པ་ལ་ཀ་པཱ་ལ་མེད་ན་མ་ཐོད་ཁོ་ན་ལ་ཐོད་པའི་ཐ་སྙད་མི་འཇུག་པའི་ཕྱིར་དང༌། སྦྲགས་སྒྲུབ་ཀྱི་སྐབས་གོང་གི་ཐོད་པར་བཅུག་པར་བྱ་ཞེས་རྐྱང་སྒྲུབ་ཀྱི་སྐབས་ལ་ཁ་འཕངས་མཛད་སྐབས་དེར་རྒྱ་སྲུབ་ལ་ཡི་གེ་འབྲི་བ་དང་བནྡྷ་སྲོ་བར་བཤད་ན་མ་ཐོད་ལ་དེ་གཉིས་ཀ་མི་རུང་བའི་ཕྱིར་རོ། །ཐོད་ངན་ཀྱི་ནུས་པ་ནི་གཙོ་བོར་ཀ་པཱ་ལ་ལ་ཡོད་པ་ཡིན་པས། དེ་བོར་ན་ཐོད་ངན་འབད་པས་བཙལ་བ་དོན་མེད་དུ་འགྲོ་ལགས། དེ་བཞིན་དུ་དཔལ་འཛིན་ནི་འཕྲེང་བའི་སྔགས་བཟླས་ན་ལས་འགྱང་བ་མྱོང་བས་གྲུབ་གསུངས་ན་ཡང་ཁོང་རང་གི་དེ་ལ་བསྙེན་པ་མ་མཛད་པའམ། སྔགས་མ་དག་པ་ལས་བྱུང་བ་ཡིན་གྱི། འཁོར་ལོའི་སྔགས་བཟླས་པས་ལས་འགྱངས་པ་མིན་ནོ། །སྔགས་ཐུང་རྣམས་ལ་བསྙེན་པ་སོང༌། འཕྲེང་
སྔགས་ལ་མ་སོང་ན་འཁོར་ལོ་ལ་བཀོད་པའི་སྔགས་རྣམས་ཆེད་གཏད་བཟླ་བ་མི་རུང་ཡང་བསྙེན་པ་སོང་ན་འཁོར་ལོའི་སྔགས་བཟླས་པ་ཉིད་ཆེས་མྱུར་རོ། །རྩ་སྔགས་གཉིས་པོའི་ཡང་ཕྱེད་སྔ་མས་དྲེགས་པ་ལས་ལ་བསྡུ། ཕྱེད་ཕྱི་མས་གཏོར་ཞིང་ལས་ལ་འགྱེད་པའོ། །དེ་ལྟར་སྒྲུབ་པ་ལག་ཏུ་བླང་བའི་རིམ་པ་སྟེ་ལྔ་པའོ། །ད་ནི་ལས་ལ་སྦྱོར་བ་བཤད་པར་བྱ་སྟེ། གསང་རྟགས་བྱུང་བ་ནས་ལས་ལ་སྦྱོར་ཏེ། སྔར་གྱི་སྒྲུབ་པའི་འཕྲོས་དེ་ལ་ཀ་བྱེད་དགོས་ཀྱི། བར་མཚམས་ཆོད་ན་མི་རུང་ངོ༌། །སྐབས་དེར་བཞེང་པའམ་སྔ་ནས་ཡོད་ཀྱང་རུང་སྟེ་གྲོག་མཁར་ལ་སོགས་པ་བདུན་གྱིས་ས་དང་རོ་སོལ་དང་དུག་ཁྲག་སྣ་ཚོགས་བསྲེས་པའི་ས་ལ་གཤིན་རྗེའི་གཟུགས་རྒྱུན་དུ་ཇི་ལྟར་སྒོམ་པ་དང་མཐུན་པ་གཅིག་བྱ། གཟུགས་འདི་ལ་ཡབ་རྐྱང་དང་སྦྲགས་སྒྲུབ་ལ་ཁྱད་མེད། གཤིན་རྗེ་ཕོ་ཁོ་ནས་ཆོག །དེ་ཡང་ཕོ་གཙོ་བོ་ཡིན་པའི་གནད་ཀྱིས་ཀྱང་ཡིན། འཁོར་ལོ་ལ་བགོ་བཤའ་དང་ཐོད་པ་ལ་བགོ་བཤའ་བྱར་མི་རུང་བ་དང༌། ཡུམ་གྱི་སྐུར་བཞེངས་ཀྱང་ནང་བཞུགས་འཇུག་རྒྱུ་མེད་པའི་རྒྱུ་མཚན་གྱིས་སོ། །སྐུ་དེ་གསར་དུ་བཞེངས་པ་ཡིན་ན་སྐབས་འདིར་བྲིས་སྐུ་དང་མཐུན་པར་རབ་གནས་བྱའོ། །དེ་ནས་སྐུ་དེའི་ལྟོ་བར་སྔར་གྱི་ཐོད་པ་ཁ་སྦྱོར་གཞུག །སྐུའི་རྒྱབ་ཏུ་ཐུན་ཁུང་ལ་ཐུན་ལམ་བཏོད། ཐོད་པ་ཉིད་ལ་འབབ་པར་བྱ། དེ་ཡང་ཨག་ཙེ་ཁུང་གི་ནང་ངམ་སྤྱི་བོའི་སྟེང་གང་རུང་ལ་ཡོང་བ་བྱེད། དམར་
གཏོར་ཆེན་པོ་གཅིག་བཤམ། བསང་གཏོར་ཡིན་ཡང་ལས་མ་གྲོལ་བར་འཛིན་གཏོར་དང་འདྲ། ཆོ་གའི་རིམ་པ་སྔར་དང་མཐུན། ཐུན་བརྡེག་པའི་ཚེ་རང་ཉིད་ཡི་དམ་གྱི་ང་རྒྱལ་བརྟན་པོས་སྐུ་གཟུགས་ཀྱི་རྒྱབ་ཏུ་འོངས་ནས་ལྕགས་ཐུར་སོགས་ཀྱིས་བླངས་ནས་ཐུན་ཁུང་དུ་བསྡིག་པར་བྱའོ། །ཡང་ན་རྙིང་མ་བ་འགའ་ལག་ཀོ་གྱོན་ནས་རྡེག་པ་ལྟར་བྱས་ཀྱང་རུང་ངོ༌། །ཐུན་མཚམས་སུ་གཏོར་མ་རྒྱས་པར་བཤམས། བྱིན་རླབས་ཀྱི་རྗེས་ལ་དགྲ་བགེགས་དགུག་གཞུག་བྱ། འདེབས་ཁ་དང་བསྒྲལ་ཆོག་དམིགས་པ་དང་ངག་ཏུ་བྱ། དངོས་སུ་ཕུར་བུ་འདེབས་པ་སོགས་མི་དགོས། དེ་ནས་གཏོར་འབུལ་དང་བཅོལ་གཏད་དྲག་པོ་བྱ། འཛིན་གཏོར་རྒུལ་བསྐྱོད་མི་བཏང་བར། ཐུན་གཏོར་གསར་པ་དེ་ཟོར་དུ་འཕེན་པར་བྱའོ། །དམིགས་པ་ནི་རང་ཉིད་ཡི་དམ་རི་རབ་ཙམ་གྱི་མདུན་དུ་གཟུགས་བརྙན་དེ་སྲིད་པ་ཐམས་ཅད་ཁོང་དུ་ཆུད་པའི་གཤིན་རྗེ་དངོས་ཡི་དམ་གྱི་སྐུའི་ཕྱེད་ཙམ་དུ་སླེབ་པ་འཇིག་རྟེན་གྱི་ཁམས་སམ་འཛམ་བུའི་གླིང་ལྟོ་བར་ཆུད་པ་ཞིག་བསྒོམ། འབྲུབ་ཁུང་ནམ་མཁའི་ཁམས་སུ་མོས། གཤིན་རྗེ་དེའི་ལྟོ་བར་ཀ་པཱ་ལ་གཤིན་རྗེའི་གྲོང་ཁྱེར་གྱི་ནང་དུ། ཞལ་དབྱེ་ཡོད་ན་དེ་དང་འཁོར་ལོ་གཤིན་རྗེ་ཡབ་ཡུམ་ཉིད་དུ་མོས་པའི་ཞབས་འོག་ཏུ་ལིང་ག་དེ་བསྒྲུབ་བྱར་མོས། དེ་ཞབས་འོག་ཏུ་མནན་པས་བུ་དགུ་ནས་ཁྲག་འཛག་ཅིང་ལུས་ཤིག་པ་དང་གཅིག །མཚོན་ཆ་དང་དབྱུག་པ་བརྒྱབ་པས་
ཞིག་པ་དང་གཉིས། འཁོར་ལོ་ཕོ་ཉ་ཕོ་མོ་འཇིགས་སུ་རུང་བ་རྣམས་དང་བྱ་དང་གཅན་གཟན་སྣ་ཚོགས་ཀྱིས་བསད་ཅིང་ཟོས་པ་དང་གསུམ། གཤིན་རྗེ་ཡབ་ཡུམ་ཉིད་ཀྱིས་ཆོམ་ཆོམ་དུ་གསོལ་བ་དང་བཞི། སྲིད་གསུམ་ཁྱབ་པའི་གཤིན་རྗེའི་སྐུའི་ནང་ནས་ཕོ་ཉ་དྲག་གཏུམ་ནང་དུ་སྤྲོས། འཁོར་ལོའི་ཕྱོགས་བཅུ་ནས་བསྐོར་ཏེ་བསད་ལས་མཛད་པ་དང་ལྔ། དུག་དང་ཁྲག་ཕབ་པས་ཞིག་ཅིང་རུལ་བར་བྱས་པ་དང་དྲུག །ཕྱོགས་བཅུ་ནས་མ་འབར་བས་ཐལ་བར་བྱས་པ་དང་བདུན་ཏེ། དེ་རྣམས་རིམ་ཅན་རིམ་ཅན་དུ་བསྐྱར་གྱིན་ཡང་ཡང་བསྒོམ། སྔགས་ཀྱི་ཤམ་བུ་ཞལ་ཤེས་ནི། ནྲི་མཱ་ར་ཡ་ནྲྀ་མ་ར་དུ་ཡ་མ་སྙིང་ཡ་མ་ཁྲག་ཚལ་པ་བམ་རིམ་དུམ་བུ་དུམ་བུ་རྦད། ཅེས་པ་སྔར་གྱི་བསད་སྔགས་ཐམས་ཅད་ཀྱི་འཇུག་ཏུ་གདགས། དྲི་ཅན་སོགས་མི་དགོས། ཉིན་རེ་བཞིན་ནམ་ཐུན་བཞིར་ཕྱི་གཏོར་གྲོལ་མཚམས་ལིང་ཆུང་རེ་བསྒྲལ་ཏེ་གཏོར་མ་དང་སྦྱིན་སྲེག་བཏབ། དེ་ལྟར་ཞག་གཅིག་གམ་གསུམ་མམ་ལྔའམ་བདུན་དུ་བྱ། དེ་ལས་ལྷག་པ་ནམ་ཡང་མི་དགོས། ཉེར་དགུ་ལྟ་བུས་དུས་རྩུབ་མོའམ། མིག་མར་དར་བ་སོགས་གཟའ་སྐར་རྩུབ་པོ་གང་རུང་ལ་རྦད་ནས་བཟང་བར་གྲགས་ཤིང༌། ཡང་གཅིག་ཏུ་གཟའི་ཚེས་གཙོ་མི་ཆེ། རང་ཉིད་དམིགས་པ་གསལ་ཞེས་ཞེ་སྡང་སྐྱེ་བའི་དུས་དེར་ལས་ལ་
སྦྱར་བས་ཆོག་གོ །གང་ལྟར་ཡང་ཉི་ཕྱེད་དང་ནམ་ཕྱེད་ལ་དུར་ཁྲོད་དམ། འདྲེའི་གནས་སུ་སོང་ལ་གཏོར་མ་གསུམ་བཤམ། དང་པོ་སྡེ་བརྒྱད་སྤྱི་ལ་བསྔོས་ཏེ་དཔང་གཟུགས་ཤགས་གདབ་ལས་ལ་བསྐུལ། གཏོར་མ་གཉིས་པ་ནི་གང་ལ་གཏོད་པའི་གནས་བདག་ལྷ་འདྲེ་དེ་ལ་བསྔོས་ཏེ། ངས་ཁྱོད་ལ་འདི་གཏད་པ་ཡིན་པས་ཐལ་བར་བརླག་པར་གྱིས། གཏད་དོ་མ་བཏང་ཤོར་ཏེ་བྱ། བེ་ཅོན་གྱི་ཕྱག་རྒྱས་ས་གཞི་དྲལ་བར་བསམ་ཏེ་ས་བརྐོས། སོར་བཞི་བཅུ་རྩ་བརྒྱད་ལས་གཏིང་ཐུང་བ་མི་རུང༌། དེ་བས་ཀྱང་རིང་པ་བཟང༌། དེར་རྡོའམ་ཤིང་ལེབ་ཀྱི་ཁང་སྒྲོམ་བྱ། དེར་གཤིན་རྗེའི་གཟུགས་དེ་ཁ་སྦུབ་ཏེ་བཞག་ནས་དགྲ་བོའི་ཡུལ་ཁམས་ལ་གབ་སྟེ་འདུག་པར་མོས། དེ་ནས་གཏོར་མའི་དུམ་བུ་གཅིག་བཅུག །རཀྟས་གཏོར། སྟེང་ནས་རྡོའམ་ཤིང་གིས་ཁ་བཀབ། ས་རླན་ཡོད་ན་མི་ལེགས་པས་ས་སྐམ་པར་བྱ། ཁ་ཅིག་དོང་གྲུ་གསུམ་དུ་བྱེད་ཅིང་རོ་ཡམ་ལ་རྡོ་རྒྱ་གྲམ་བྲིས་པས་སྟེང་ནས་འགེབས་པར་འདོད་པའང་ཡོད་མོད། ཁོ་བོ་ཅག་གི་བླ་མ་རྣམས་འཁོར་ལོ་གཟུགས་བརྙན་གྱི་སྦྱཽར་བ་ཅན་ལ་རྒྱ་གྲམ་བྲིས་པའི་རྡོས་འགེབས་པ་མི་བཞེད། དོང་གྲུ་གསུམ་ཡང་སྤྲོས་པ་ཙམ་ཡིན་གསུང་ངོ༌། །རྒྱ་གྲམ་དང་རི་རབ་གྱིས་མནན་པ་ནི། མནན་གཏད་སྤྱིའི་རིགས་འགྲེས་ཤོར་བ་ཡིན། ཡང་ན་
གཟུགས་བརྙན་ཁ་བུབ་མི་བྱེད་པར་དགྲ་ཕྱོགས་སུ་ཞལ་བསྟན་ཏེ་བཞག་ཀྱང་ཆོག །ཁ་བུབ་མཐའ་གཅིག་ཏུ་མི་དགོས་པ་ནི་རྟོག་བདུན་དེ་དང་ཅུང་མི་འདྲ་བ་དང་རྒྱུ་མཚན་གཞན་ཞིག་ཀྱང་སྣང་ངོ༌། །དེ་རྗེས་གཏོར་མ་གསུམ་པ་དེ་གཤིན་རྗེ་ལ་ཕུལ་ལ་དམོད་བཅོལ་དྲག་ཏུ་བྱའོ། །དེ་ནས་སོལ་བ་ཡོད་ན་སྤུངས། གང་ལྟར་ཡང་སས་བསྒྲིབས་ཏེ་མི་མངོན་པར་བྱའོ། །དེ་ནས་དེའི་སྟེང་དུ་ཡི་དམ་གྱི་ང་རྒྱལ་བརྟན་པོས་དྲག་པོའི་བྲོ་རྡུང་ས་ཆུ་མེ་རླུང་ནམ་མཁའི་མཚམས་གཅོད་རྣམས་བྱས། ལམ་དུ་བསྲུང་འཁོར་བསྒོམ། སྒྲུབ་ཁང་དུ་སླེབས་ནས་མདུན་བསྐྱེད་ལ་མཆོད་པ་དང༌། ཚོགས་འཁོར་རྒྱས་བསྡུས་གང་རུང་ཞིག་བྱ། དེ་ཙམ་གྱིས་ལས་འགྲུབ་ཀྱང་ལས་ཀྱི་མཐའ་གཙང་བའི་ཕྱིར་དྲག་པོའི་སྦྱིན་སྲེག་ཇི་ལྟར་འོས་པ་བྱའོ། །ཐུན་རྫས་འཐོར་བ་དང་གཏོར་མ་གསོས་པའི་མཐེབ་ཀྱུ་སོགས་ཀྱང་བསྲེག་སྐུལ་དྲག་པོ་བྱས་ཏེ་དྲག་པོའི་ལས་ཀྱི་གཏོར་མ་དེ་ཡང་ཟོར་དུ་འཕང༌། མཆོད་བསྟོད་སོགས་རྗེས་ཆོག་རྒྱས་པར་བྱ། དེ་དག་གི་བྱ་བ་མཐའ་དག་ཟིན་པའི་རྗེས་སུ། དེ་མ་ཐག་པའམ་ཉི་མ་གཅིག་གཉིས་སོང་ནས་འབྲུབ་ཁུང་གི་ཤུལ་ལམ་ཇི་ལྟར་འོས་པར་ཡི་དམ་མམ་ཆོས་རྒྱལ་ལྕམ་དྲལ་ལ་ཞི་བའི་སྦྱིན་སྲེག་གི་མཆོད་པས་མཉེས་པར་བྱའོ། །དྲུག་ཅུ་རྩ་བཞི་སོགས་གཏོར་མ་ཡང་རྒྱ་ཆེར་བཏང༌། དེས་ནི་ལས་ཀྱི་མཐའ་
ཤིན་ཏུ་བཀྲ་ཤིས་པར་འགྱུར་རོ། །ཕྱི་རྟགས་མ་རྫོགས་བར་དུ་བསྐུལ་བ་ཡང་སྤྱི་དང་འདྲའོ། །དེ་ལྟར་ན་འདི་ཉིད་ཀྱི་རྟོག་པ་ལས་འཁོར་ལོའི་མཐའ་མ་གཟུགས་བརྙན་ལ་སྦྱོར་བ་ཁོ་ན་གསུངས་པ་བཞིན་འདིར་ཡང་དེ་ལྟར་བཤད་ཟིན་ལ། རྭ་ལུགས་ཀྱི་ཡིག་རྙིང་གྲགས་ཆེ་བ་འདི་དང་རྒྱ་སྟོན་དང་བོད་ཀྱི་དཔལ་འཛིན་སོགས་དེ་ལྟར་ཞག་གསུམ་བྱས་ནས་ཀྱང་ཆེས་མ་དག་པར་སྟོན་ནས་གའུ་བསྲེ་བར་འདོད་ཅིང༌། གཉོས་སྐྱོ་ཞང་གསུམ་གྱི་ཡིག་སྣ་ཐོར་བུ་རྣམས་ལ་ཡང་དེ་དང་མཐུན་པར་ཟུར་ཙམ་སྣང་ངོ༌། །འོན་ཀྱང་གཟུགས་བརྙན་གྱི་སྦྱོར་བས་རྟགས་མ་བྱུང་ན་ཐོད་པ་ཁ་སྦྱོར་ཞལ་དབྱེའི་གའུ་གཟུགས་བརྙན་གྱི་ཁོག་ནས་བཏོན་ཏེ་བསྲེག་པར་འདོད་པ་དང༌། རྒྱ་སྟོན་ན་རེ། ཐོད་པ་དང་གཟུགས་བརྙན་གཉིས་ཀར་མེས་གདུང་གསུང་སྤོགས་ཆོག་ཏུ་དགོངས་པ་དང༌། དེ་དག་ཕལ་ཆེར་རྟགས་མ་བྱུང་ན་མེས་གདུང་དང༌། དེ་ནས་རྟགས་བྱུང་བ་ན་ལྡེར་བཟོའི་ཁོག་པར་བཅུག་སྟེ་སྦེད་པར་འདོད་པ་སོགས་ནི་མི་ལེགས་སོ། །དེས་ནི་རྟོག་པ་འདིར་མ་གསུང་ཀྱང་རྟོག་བདུན་གྱི་ཆོ་གས་རིགས་བསྒྲེས་ན། ཡང་ན་གའུ་མེ་ལ་སྲོས་པས་ཚ་སྒྲུབ་བྱེད། ཡང་ན་གའུ་རང་སྦེད་པའི་མནན་པ་བྱེད། ཡང་ན་གཟུགས་བརྙན་གྱི་སྦྱོར་བས་རྦོད་གཏོང་འཛུགས་པའོ། །རྒྱུད་ཀྱི་རྒྱལ་པོ་རྟོག་བདུན་གྱི་དགོངས་པའང་དེ་ཁོ་ན་ཡིན། འཁོར་ལོ་གཅིག་
ལ་ཐམས་ཅད་སྤུངས་ན་ཨ་པ་ཙ་ཨོབ་ལང་རོ་གཅིག་ལ་བསྲེག་རྒྱུ་དང་སྦེད་རྒྱུའི་དཔེར་འགྲོའོ། །དེའི་དབང་དུ་བྱས་ནས་གལ་ཏེ་གའུ་སྲོ་བར་འདོད་ན་འདི་ལྟ་སྟེ། འཁོར་ལོ་རང་ཡུན་རིང་དུ་བསྒྲུབས་ཀྱང་རྟགས་མ་བྱུང་ན་འབྲུབ་ཁུང་གི་ནང་དུ་རོ་རྡོའི་སྒྱེད་པུ་གསུམ་འཛོམ་མམ། མི་བསད་པའི་གྲི་ལྕགས་ཀྱི་སྒྱེད་བུའི་སྟེང་དུ་ཐོད་པ་ཁ་སྦྱོར་གྱི་གའུ་བཞག །དེ་དག་མ་འབྱོར་ན་དུག་ཤིང་ངམ་ཚེར་མ་ཅན་གྱི་ཤིང་གི་ཡུ་བ་བཏགས་ཏེ་ཟུང་བས་ཀྱང་རུང༌། འབྲུབ་ཁུང་དུ་མི་རོ་སྲེག་པའི་འགལ་དུམ་དང་དུག་ཤིང་དང་འབྲས་སམ་ཛུ་ཚེའི་ཕུར་མ་དང༌། སེང་ལྡེང་སོགས་ལ་མེ་སྤར་ཏེ་མེ་བདག་གམ་མེ་ལྕེ་ལ་ཅུང་ཟད་སྲོ་ཞིང་བསད་སྔགས་དྲག་ཏུ་བཟླ་བ་དང༌། མེས་བསྲེགས་པའི་དམིགས་པ་གཙོ་བོར་བསྒོམ། ནམ་ཕྱེད་ཉི་ཕྱེད་ལ་དེ་ལྟ་བུ་ཡུད་རེ་བྱས་པས་དེས་རྟགས་ཐམས་ཅད་འབྱུང་བ་ཡིན་ནོ། །དགྲ་ལ་ནུས་པ་བྱུང་ན་འཁོར་ལོ་བཏོན་ཏེ་ལས་མཐའ་བསྡུ་བར་བྱའོ། །ཡང་ན་འཁོར་ལོ་དེ་བསྒྲུབས་པས་ནང་རྟགས་བྱུང་ཡང་ཕྱི་རྟགས་འགྱངས་ན། སླར་ཡང་མཆོད་གཏོར་སྦྱིན་སྲེག་སོགས་དང་བཅས་ཞག་གསུམ་ཙམ་དྲག་ཏུ་བསྐུལ་ནས་གའུ་ཉིད་མནན་གཏད་དུ་བྱེད། ཡང་ན་གཟུགས་བརྙན་གྱི་སྦྱཽར་བ་གོང་བཞིན་བྱའོ། །གའུ་སྲོ་བ་དང་གའུ་མནན་གཏད་ཀྱི་མན་ངག་གི་གཤིན་རྗེ་གཤེད་ཀྱི་
སྐབས་དང་འདྲའོ། །དེས་ན་རང་ལུགས་ལ་ཚ་སྒྲུབ་དང་གཟུགས་བརྙན་གྱི་སྦྱོར་བ་གཉིས་ཀ་འཁོར་ལོ་གཅིག་ཁོ་ན་ལ་བྱེད་དུ་མི་རུང་ཞིང་ལས་སྦྱོར་སྒྲུབ་ཐེངས་གཅིག་ལ་གཉིས་ཀར་མི་དགོས་མོད། ཅི་སྟེ་ནུས་པ་ཆེ་ལ་རེ་ནས་བྱེད་འདོད་ན་འཁོར་ལོ་གཉིས་དང་འབྲུབ་ཁུང་གཉིས་བྱས་ཏེ་བསྒྲུབས་ན་རུང་ངོ༌། །དེས་མཚོན་ཏེ་འཁོར་ལོ་གསུམ་གྱིས་ལས་གསུམ་བྱས་ཀྱང་རུང་མོད་ཀྱི། འཁོར་ལོ་གཉིས་གསུམ་དུས་གཅིག་ཏུ་སྒྲུབ་པ་འདི་འདྲའི་རིགས་བསྙེན་སོང་མང་པོར་ཕྱོགས་གཅིག་ཏུ་སྒྲུབ་པའི་རིགས་ལ་རུང་གི་གཅིག་གི་སྒྲུབ་པའི་རིགས་ལ་ནུས་པ་ཆུང་ངོ༌། །དེས་ན་ནུས་པ་ཆེ་ན་སྤོགས་ཆོག་མི་དགོས། སྤོགས་ཆོག་དགོས་རིགས་ཀྱིའང་ནང་སེལ་དབྱེ་ན་གསུམ་སྟེ། གྲུབ་བཀའ་ན་གཟུགས་བརྙན་སྦྱཽར་བ་དགོས། འབྲིང་ལ་གའུ་མནན་པར་སྦ། འགྲུབ་སླ་ན་གའུ་སྲོ་བར་བཤད་པ་ཡི་དམ་གྱི་ལས་ཚོགས་སྐབས་བྱེད་པ་བཞིན་དུ་འདིར་ཡང་རིག་པར་བྱ་ལ། དེང་སང་གོ་རྒྱ་ཙམ་ཡིན་གྱི། རྟོག་པ་ཉིད་ལས་དངོས་སུ་གསལ་བར་གསུངས་པའི་ཕྱིར་ད་ལྟ་ལག་ལེན་དུ་འདེབས་རྒྱུ་ནི། གཟུགས་བརྙན་གྱི་སྦྱོར་བ་ཉིད་དོ། །ད་ནི་ལྷག་མ་ལས་གསུམ་ཟུར་ཙམ་སྨོས་ན། འཁོར་ལོའི་སྐབས་གཤིན་རྗེ་ཡབ་ཡུམ་གྱི་འཁོར་ལོ་ལ། ནང་ཀ་གདུང་གི་ཐིག་མི་བྱེད་པར། ཐིག་རྐྱང་གིས་ཆོག །དེའི་ཕྱིར་དེའི་སྔགས་ཀྱང་མི་དགོས། རྩིབ་ལ་གཤིན་རྗེ་ཕོ་མོའི་འཕྲེང་སྔགས་མི་འགོད་པས་ནང་མ་བརྒྱད་ལ་ཡ་མ་མེ་ད་ཀྵེ་སྤེལ་ཚིག་དང་བཅས་པ་ཁོ་ན་འགོད། དེ་ཡང་ཇི་ལྟ་བུ་སྙམ་ན་རང་རང་སོ་སོའི་དབུས་སུ་ཡ་ཤར་དུ་བསྟན་པའི་དབང་དུ་
བྱས་ནས། ཤར་ནས་གཡས་སྐོར་གྱིས་མ་མེ་ད་ཀྵ་འགོད། དེའི་མཐར་ཆེ་གེ་མོ་ཤན་ཏིང་ཀུ་རུ་སྭཱཧཱ། ཞེས་པ་ལྟ་བུའོ། །ཕྱི་མ་བརྒྱད་ལ་ཡ་ཀཱ་ལ་རཱུ་པ་ཞེས་པ་གོང་དང་འདྲ་བར་བྲིས་པ་ལ་སྤེལ་ཚིག་གིས་བསྐོར། ཡུམ་གྱི་འཁོར་ལོ་ལ་ཡང་ནང་མ་བརྒྱད་ལ། དབུས་སུ་མ་མ་ཤར་ནས་གཡས་སྐོར་གྱི་ཏྲ་ཀ་ར་ཀ་ཤ་མུ་ཏྲ་ཞེས་པའི་མུ་ཏྲ་གཅིག་ཏུ་བྱས་པ་དང༌། ཕྱི་མ་བརྒྱད་ལ་ཧྲིཿཙ་མུནྚཱི་ཡེའམ། ཙམ་ཙ་མུནྚཱི་ཡེ་སྤེལ་ཚིག་ཅན་འདྲི། ཞི་བ་ལ་ཡབ་ཡུམ་སྐུ་མདོག་དཀར་པོ་གཡོན་པས་བུམ་པ་བསྣམས་པ། རྒྱས་པ་ལ་སེར་པོ་གཡོན་པས་ནོར་བུས་གང་བའི་ཀ་པཱ་ལ་འཛིན་པ། ཞི་རྒྱས་ལ་ལྷ་ཞལ་གཙོ་བོར་བྱེད། རིན་པོ་ཆེའི་རྒྱན་དང་དར་གྱི་ན་བཟའ་ཅན་ནོ། །དབང་ལ་དམར་པོ་ཡབ་ཀྱི་ཕྱག་གཡོན་ན་ལྕགས་ཀྱུའོ། །ལྷ་ཞལ་དང་མ་ཧེའི་ཞལ་འདམ་ཁ་ཡིན། རྒྱན་ཞི་རྒྱས་དང་འདྲ། ཡུམ་མདའ་གཞུ་འགེངས་པར་བྱ། གཉིས་ཀའང་བདག་ཅེར་བུའོ། །དབྱུག་པ་དང་རྩེ་གསུམ་ཡང་ཁ་དོག་དང་མཚན་མ་ལས་དང་མཐུན་པར་བྱའོ། །ལྷག་མ་འཁོར་ལོ་སྒྲུབ་ཚུལ་དཔལ་གཤིན་རྗེ་གཤེད་ཀྱི་འཁོར་ལོ་སྤྱི་དང་འདྲའོ། །བསྐྲད་དབྱེ་མནན་པ་རྣམས་ཁ་བསྒྱུར་ལུགས་ཙམ་ཤེས་ན་སྤྱི་ཁོག་བསད་ལས་དང་འདྲ། རྟོག་པའི་དངོས་བསྟན་ལ་བསད་ལས་ཁོ་ན་གསུངས་ཀྱང༌། ལས་གཞན་རྣམས་ལ་འདོན་པ་སྤོ་ལུགས་
དེ་ལྟར་ཤེས་དགོས་སོ། །དེ་ལྟར་ན་ལས་སྦྱོར་གྱི་རིམ་པ་གསལ་བར་བཤད་པ་སྟེ་དྲུག་པའོ། །ད་ནི་ཉེ་བར་མཁོ་ཞིང་དགོས་ངེས་ཤེས་པའི་ལག་ལེན་འགའ་ཞིག་བཤད་པར་བྱ་སྟེ། དེ་ལ་ལྕམ་དྲལ་འདིའི་བཀའ་གཏད་ཐུན་མོང་མ་ཡིན་པ་དེ་བྱེད་ན། མཎྜལ་ནག་པོ་གྲུ་གསུམ་ཚོམ་བུ་གཉིས་པ་ཞིག་བྱ། ཡབ་ཀྱི་གཏོར་མ་ལ་ཤས་མང་དུ་བརྒྱན། ཏིལ་ནག་ནས་ནག་སོགས་འབྲུ་ནག་པོའི་རིགས་དང༌། སྲོག་ཆགས་ནག་པོའི་ཤ་དང༌། ཆང་མང་ཙམ་བླུག །རཀྟ་ཅུང་ཟད་བྲན། དར་རམ་རས་ནག་པོས་བརྒྱན། ཡུམ་གྱི་གཏོར་མ་ལ་རཀྟ་མང་དུ་བྲན་ཏེ། སྣོད་དུ་འཁྱིལ་བས་མཐའ་འཁོར་བར་བྱ། མྱོས་བྱེད་ཅུང་ཟད་ཙམ་གྱིས་ཆོག །ཉ་ཤས་བརྒྱན་པ་ལྷག་པོ་ཡིན། སྒོག་བཙོང་ལ་ཕུག་ཤིང་འབྲས་སོགས་ཡོད་ན་གཉིས་ཀ་ལ་འདེབས། མེ་ལོང་བཞི་བྱས། གཅིག་ལ་སྙིང་པོ། གཅིག་ལ་ཉེ་སྙིང༌། གཅིག་ལ་རྩ་སྔགས། གཅིག་ལ་ཡུམ་གྱི་སྙིང་པོ་རྣམས་ཁྲག་དང་དྲི་བཟང་བསྲེས་པས་བྲིས། བདག་བསྐྱེད་ཡི་དམ་དང༌། ཡི་དམ་གྱི་བུམ་བསྒྲུབ་བྱ། མདུན་སྐྱེད་གཤིན་རྗེ་སྒྲུབ་ཚུལ་སྤྱི་དང་འདྲ། ཀུན་མཁྱེན་ཡེ་ཤེས་སོགས་གསོལ་བཏབ་དང་གུར་ནས་འབྱུང་བའི་རྒྱུན་བཤགས་བྱེད། སློབ་མ་གཤིན་རྗེ་ཡབ་ཡུམ་དུ་བསྐྱེད། མེ་ལོང་གི་རྩ་སྔགས་བཀྲུས་ཏེ་སྤྱི་བོ་ནས་བླུགས། འཐུང་ངུ་གཞུག །ཡེ་ཤེས་པ་བསྟིམ། སྐུའི་ཨཛྙཱ་ཡིན།
སྙིང་པོ་བཀྲུས་ནས་མགྲིན་པར་གཏོར་ཞིང་འཐུང་དུ་གཞུགསྔགས་རྣམས་སྤྱན་དྲངས་ཏེ་བསྟིམ། གསུང་གི་ཨཛྙཱ་ཡིན། ཉེ་སྙིང་བཟླས་ཤིང་སྙིང་ཁར་གཏོར་འཐུང་དུ་གཞུག །ཕྱག་མཚན་བསྟིམ། ཐུགས་ཀྱི་ཨཛྙཱ་ཡིན། ཡབ་ཀྱི་གཏོར་དབང་བསྐུར་ཏེ། བཀའ་བགོའི་མཐར་ཡབ་ཀྱི་འཕྲེང་སྔགས་དྲག་ཏུ་བཟླས། སློབ་མ་ལ་བསྟིམ། ཡེ་ཤེས་རྡོ་རྗེའི་ཨཛྙཱ་ཡིན། དེ་ནས་ཡང་སློབ་མ་ཡུམ་དུ་བསྐྱེད་དེ་གཞན་སྔར་དང་འདྲ་བ་ལས། སྔགས་གཅིག་ལས་མེད་པས་མེ་ལོང་གཅིག་པུ་དེ་ཉིད་བཀྲུས་པའི་ཁུ་བ་ལས་གསུམ་མཐོར་ཞིང་གཏོར་བ་ཡིན། གཏོར་དབང་གི་སྐབས་སུ་སློབ་དཔོན་གྱིས་ཡུམ་གྱི་འཕྲེང་སྔགས་དྲག་ཏུ་བཟླ། དེ་ནས་སྐད་ཅིག་གིས་ཡབ་ཡུམ་མཉམ་པར་སྦྱཽར་བའི་སྐུར་བསྒོམ་དུ་བཅུག་ལ། བཟླས་ལུང་སྦྱིན་ཏེ་ཉེ་སྙིང་ལ་ལན་ཉེར་གཅིག །སྙིང་པོ་དང་ཡུམ་གྱི་སྔགས་ལན་བདུན་བདུན་རྩ་སྔགས་ལ་ལན་གསུམ། འཕྲེང་སྔགས་གཉིས་པོ་ལན་རེ་རྗེས་ཟློས་བྱེད། དེ་ནས་སློབ་མའི་སྤྱི་བོར་བླ་མ་ཡི་དམ་སྒོམ་དུ་བཅུག །དེ་ཐིམ་པས་ཡི་དམ་དུ་གྱུར། གནས་གསུམ་དང་སྐྱཻ་མཆེད་བྱིན་གྱིས་བརླབས། ཡེ་ཤེས་ཕབ། བུམ་ཆུས་དབང་བསྐུར་རྒྱས་བཏབ། སྙིང་ཁར་ཡི་དམ་གྱི་སྔགས་དང༌། ལྟེ་བར་བྷྱོཿགསལ་བཏབ། གཏོར་མ་
ལག་ཏུ་གཏད་ནས་བཀའ་བསྒོ་བྱ། ཡབ་ཡུམ་ལྟེ་བར་ཐིམ། གཏོར་མ་གཉིས་ནས་ཅུང་ཟད་རེ་སྦྱྀན་ནོ། །འདི་ཤིན་ཏུ་བཀའ་དོག།འདི་ལ་ཚོགས་འཁོར་མེད་ཀ་མེད་ཡིན། གཞན་སྤྱི་དང་འདྲའོ། ༈ ཆོས་རྒྱལ་འདི་མཐུ་ལས་ཚོགས་ཙམ་མ་ཡིན་པར་གཙུག་ལག་ཁང་གི་དཀོར་སྲུང་དང༌། དགེ་འདུན་གྱི་སྡེ་སྐྱོང་བའི་ཆོས་སྐྱོང་ཆེན་པོར་བསྒྲུབས་ན། དབེན་པའི་གནས་སུ་རྟེན་བཅའ་སྟེ། ས་བཟང་པོ་རིན་པོ་ཆེ་དང་བསྲེས་པ་ལ། སྟེགས་བུ་གྲུ་བཞི་དབུས་སུ་ཆོས་འབྱུང་གྲུ་གསུམ་དཔངས་སུ་མཐོ་གང་བ། སྟེགས་བུ་དང་བཅས་པར་བཞེངས། ཕྱི་ནང་ཐམས་ཅད་གྲི་ཁྲག་རང་བྱུང་དུག་དང་བཅས་པས་བྱུགས། སྟེགས་བུ་ལ་འོག་ཐོག་བྱ། དེར་དྲག་པོའིའཁོར་ལོ་བཅའ་གྲི་སྙིང་བཅའ་ཐབས་སྤྱི་དང་འདྲ་བ་ལ་རྩ་དབུས་མར་འཁོར་ལོ་འཇུག་ཏུ་དེ་བྲི་གཞི་དར་ལ་འཁོར་ལོ་རྩིབས་དྲུག །ལྟེ་བར་ཨོཾ། རྩིབས་དྲུག་ལ་ཡི་གེ་ལྷག་མ་དྲུག །ཨོཾ་གྱི་གཡས་གཡོན་དུ་ཡ་རེ་མགོ་བོ་ཕྱིར་བསྟན་བྲི། ལྟེ་བའི་མུ་ཁྱུད་ལ་འདོད་དོན་འདྲི། མུ་ཁྱུད་ནང་མ་ལ་ཙ་མུནྚིའི་སྙིང་པོ་དང༌། ཕྱི་མ་ལ་རབ་གནས་ཀྱི་སྙིང་པོ་རྣམས་སེར་རྐྱང་ངམ། སེར་པོ་བསྲེས་པའི་སྣག་ཚས་བྲི། ཡང་ན་མཚལ་གྱི་བྲིས་ཀྱང་རུང་ངོ༌། །འདི་རྟེན་ཡིན་པས་ཡིག་མགོ་ཕྱིར་བསྟན་རང་བྱེད། དབུས་ཀྱི་ཡིག་མགོ་ལ་ནུབ་བཅོལ་དགོས་
གསུང༌། དེ་གཞོགས་གཡོན་ནས་སྒྲིམ་ཏེ། མགོ་མཇུག་མ་ནོར་བར་གཞུག །དེ་ལྕགས་ཀྱི་གའུར་བཅུག་ལ་གྲུ་གསུམ་གྱི་ནང་དུ་གཞུག །གྲུ་གསུམ་དེར་ཕྱག་མཚན་དབྱུག་ཏོ་དང༌། གྲི་གུག་དང༌། རལ་གྲི་དང་མདུང་ཐུང་རྣམས་ལ་ཡབ་ཀྱི་སྙིང་པོ་རྩ་སྔགས་གང་རུང་བྲིས་པ་དང་རྩེ་གསུམ་ལ་ཡུམ་གྱི་སྙིང་པོ་བྲིས་པ་དང་ཞགས་པ་དང༌། ཐོད་པ་སོགས་ལ་ཡི་གེ་མེད་པའང་གཞུག །སྟེང་ནས་ལྕགས་སམ་གཡམ་པའི་ཁ་གཅོད་ཀྱིས་བཅད། དེ་ནི་ཆོས་སྐྱོང་སྤྱི་དང་མཐུན་པར་གསང་བའི་རྟེན་ཡིན། གྲུ་གསུམ་གྱི་ཕྱི་ངོས་ལ་ཉེ་སྙིང་རྩ་སྔགས། སྙིང་པོ་གཉིས་སོགས་ཀྱི་མཐར། ཆོས་རྒྱུད་འདིའམ་གཙུག་ལག་ཁང་འདི་ཡི་བསྟན་པ་སྐྱོངས་ཤིག །ཅེས་པ་བྲིའོ། །ཡང་ཆོས་བྱུང་དེ་ཉིད་ཀྱི་རྒྱབ་ཕྱོགས་སུ་བཞགས་པའམ། གཞན་དུ་ཡང་རུང་སྟེ། ཡབ་ཀྱི་མདུང་ནག་པོ་བ་དན་དང་དར་ནག་ཅན་ལ། གཞན་གྲི་སྙིང་གི་འཁོར་ལོ་དེ་དང་འདྲ་བ་ལས། མུ་ཁྱུད་ནང་མ་ལ་ཡབ་རང་གི་རྩ་སྔགས་འབྲི། དེ་བཞིན་དུ་མ་ཧེ་ནག་པོ་སྙིང་དགོས་ཀྱང་མ་རྙེད་ན་གཡག་ནག་གི་སྙིང་གི་རྩ་སྦུགས་སུ་འཁོར་ལོ་དེ་ཀ་འདྲ་བ་བཅུག་པ་མགུལ་དུ་བཏགས། ཡུམ་གྱི་རྟེན་རྩེ་གསུམ་དམར་པོ་ལ་དར་དམར་གང་ཡོད་ཀྱང་འདྲ། འཁོར་ལོ་རྩིབས་བཅུ་པའི་ལྟེ་བར་བྷྱོཿའི་གཡས་གཡོན་དུ་མ་གཉིས། ལྟེ་བའི་མུ་ཁྱུད་ལ་འདོད་གསོལ། རྩིབས་བཅུ་ལ།
སྙིང་པོ་འབྲུ་བཅུ། མུ་ཁྱུད་ནང་མ་ལ་བརྟན་ཞུགས་དང༌། བར་པ་ལ་དབྱངས་བཅུ་དྲུག་དང༌། ཕྱི་མ་ལ་ཡེདྷར་མས་བསྐོར་བ་བྲི། ཡིག་མགོ་ཕྱིར་བསྟན་དང་དབུས་ཀྱི་ཡི་གེ་ལ་ནུབ་བཅོལ། ཁྱི་མོ་ནག་མོའི་སྙྀང་གི་རྩ་སྦུགས་སུ་འཁོར་ལོ་དེ་ཀ་འདྲ་བ་བཅུག་པ་མགུལ་དུ་བཏགས། ཡང་ན་ཕྱག་མཚན་གཉིས་ཀྱི་ཚབ་མདའ་དར་ལ་བྱ་སྟེ། སྙིང་གཉིས་པོ་མདའ་དར་གྱི་མགུལ་དུ་བཏགས་ཀྱང་རུང་ངོ༌། །ཧ་ལ་ནག་པོ་དང་གྲི་ཐོད་ཅད་ལའང་འདིའི་རིགས་འདྲེ། དེ་བཞིན་དུ་ས་ཁམས་པ་ལ་རིན་པོ་ཆེ་བརྡར་བ་ལ། གྲི་ཁྲག་བསྲེས་ཏེ་མ་ཧེ་བྱས་པའི་ཁོག་པར། འཁོར་ལོ་དེ་དང༌། མི་ཤ་དང༌། དངུལ་རྡོག་དང༌། ཤེལ་དང༌། རྡོ་ཕ་བང་ལ་ཡ་དྲུག་བྲིས་པ་གཞུག །རྒྱུ་དེ་ལས་རོ་ལངས་སུག་བཞི་བཙུགས་པའི་གཟུགས་ཀྱི་ཁོག་ཏུ་ཡུམ་གྱི་འཁོར་ལོ་དང༌། ཉ་ཤ་དང༌། གསེར་དང་བྱུ་རུའམ། མི་རུས་ལ་བྷྱོཿབྲིས་པ་གཞུག།མདུང་དར་གཉིས་དང་སྲོག་ཆགས་གཉིས་ཀྱི་རྒྱབ་ལ། ཁྱེད་འདི་ལ་རྟེན་ཆོས་ལ་བསྟན་པ་སྲུངས་ཤིག་ཅེས་པ་འབྲི། དེ་དག་ནི་ཕྱིའི་རྟེན་ནོ། །ཡང་རྟག་གཏོར་ནི། གཏོར་མ་ཆེ་ཆུང་གཉིས་སྤྱི་དང་མཐུན་པར་བྱས་པ་ལས། གཏོར་མ་ལ་ཁོང་སྟོང་བཅོས་པའི་ནང་དུ། འོག་ཏུ་བྲིས་པའི་ལིང་ཆུང་ཕོ་མོ་རེ་སོ་སོར་བྱ། དེའི་སྟེང་དུ་སྟག་གི་ཤ །སྦྲུལ་ཤ །ཤ་ཆེན་ར་ནག་གི་ཤ་ཚིལ། འབྲུ་ནག་བྲ་བོ་སོགས་དང༌།
བཅས་པའི་སྟེང་དུ་འཁོར་ལོ་སོ་སོ་གཞུག །དེའི་སྟེང་དུ་འབྲུ་སྣ་ནོར་སྣ་དར་སྣ་བཞག །སྒོ་བཀག །གཞན་རྟག་གཏོར་བཤམ་ཚུལ་སྤྱི་དང་འདྲ། དེ་ནི་ནང་གི་རྟེན་ནོ། །རྩ་བའི་རྟེན་བྲིས་སྐུ་དང་འབུར་སྐུ་ཡང་བཤམ་དགོས། བྲིས་སྐུ་དེ་ཡང་ཡབ་སྟག་ལྤགས་ཀྱི་སྨད་དཀྲིས་དང༌། མི་ལྤགས་ཀྱི་སྟོད་གཡོགས། ཡུམ་གོས་ཟུ་ནག་པོ་དང་གླང་ལྤགས་གསོལ་བའམ། ཡང་ན་ཡབ་ཀྱང་དར་ནག་ཅི་རིགས་གསོལ་བ་དང༌། རིན་པོ་ཆེའི་རྒྱན་ཅུང་ཟད་ཡོད་པ་བྱས་ན་སྡེ་དེ་ལ་བཀྲ་ཤིས་པ་ཡིན་གསུངས། མཚོན་ཆ་དང་གོ་ཆ་དང་མཆོད་རྫས་སྣ་ཚོགས་པ་བཞག་གོ །དེ་དག་གི་རབ་གནས་ནི་རེ་རེ་བཞིན་བྱ་སྟེ། དམ་ཚིག་བྲིས་སྐུའི་རབ་གནས་ཀྱི་རིགས་འདྲེ་ལ། རབ་གནས་ཀྱི་ཆོ་ག་གཞན་ནས་ཀྱང་ཅུང་ཟད་ཁ་བསྐང་ངོ༌། །ཡང་སྙིང་པོའི་འཁོར་ལོ་ཞེས་བྱ་བ་ལྟེ་བ་ཟླུམ་པོ་སོར་གཉིས་ལྷག་ཙམ་བསྐོར། དེར་ཧཱུཾ་གཅིག་འབྲི། ལྟེ་བའི་མུ་ཁྱུད་ལ་འདོད་གསོལ་གྱིས་བསྐོར། དེ་ནས་སོར་གསུམ་ཙམ་བསྐོར་བའི་བར་ལ། རེ་མིག་ཕྲ་མོ་བཅོ་བརྒྱད་བྱ། ཐམས་ཅད་ལ་ཕུགས་སུ་ཨོཾ་རེ། དེའི་ཕྱི་རུ་ཀ་ནས་ཛའི་བར་གྱི་ཡི་གེ་བཅོ་བརྒྱད་པོ་རེ་རེ་འབྲི། དེའི་ཕྱི་ལ་ཧཱུཾ་ཧཱུཾ་ཕཊ་ཕཊ་སྭཧཱ། རྣམས་བརྩེགས་ཏེ་འབྲི། ཐམས་ཅད་ཀྱི་མཐའི་མུ་ཁྱུད་ལ་འདོད་གསོལ་བྲི། མཐའ་མེ་རིས་སྐོར། རྩ་སྔགས་ཀྱི་འཁོར་ལོ་ནི། བསྐོར་ཐིག་བྱེད་ཚུལ་སྙིང་པོའི་དེ་དང་འདྲ་བ་
ལས། རེ་མིག་གམ་རྩིབས་སུམ་ཅུ་སོ་གཉིས་བྱ། ཐམས་ཅད་ཀྱི་ཕུགས་སུ་ཨོཾ་རེ་རེ། དེའི་ཕྱི་རུ་ཡ་ནས་ཛའི་བར་རྩ་སྔགས་ཡི་གེ་སོ་གཉིས། དེ་ཕྱིར་ཧཱུཾ་ཧཱུཾ་ཕཊ་ཕཊ་སྭཱཧཱ། སྔར་བཞིན་བྲི། འཁོར་ལོ་འདི་རྣམས་ཀྱི་ཡི་གེ་ཐམས་ཅད་མགོ་ནང་ལྟ་ཡིན། ལྟེ་བའི་ཡིག་མགོ་ལ་ཤར་འཆོལ་ལོ། །འཁོར་ལོ་འདི་གཉིས་ཀྱིས་ལས་ཐམས་ཅད་འགྲུབ་པ་ཡིན་ཀྱང༌། སྐབས་འདི་རྩ་སྔགས་ཀྱི་འཁོར་ལོ་དར་སེར་པོ་ལ་གསེར་རམ་དངུལ་གྱིས་བྲི། རབ་གནས་བྱ། རྒྱ་མཚོ་རླབས་ཟེར་བའི་ལྟེ་བའི་ལུགས་དེ་བྱས། རྫ་བུམ་ཆེ་བ་གསར་བའི་ནང་དུ་འབྲུ་སྣ་གོས་སྣ་སྤྲུངས་པའི་སྟེང་དུ། སྟེང་འོག་མདུན་རྒྱབ་མ་ནོར་བར་བཞག །སྟེང་དུ་སྨན་སྣ་དང་ནོར་སྣ་སྣ་ཚོགས་ཀྱིས་བཀང་སྟེ། དར་གྱིས་ཁ་བཀབ་ནས་སྔར་གྱི་ཕྱི་རྟེན་རྣམས་དང་ལྷན་ཅིག་ཏུ་བཞགསྒེར་མཆོད་བྱུང་ན་རབ། མ་བྱུང་ན་ཐུན་མོང་གི་མཆོད་པ་མ་ཆགས་པར་བྱ། དུས་དུས་སུ་འོ་མ་དང་ཞོ་གཏོར་རོ། །འདིས་དགོན་གནས་དེར་ལོངས་སྤྱོད་ལ་བར་ཆད་མི་འབྱུང་ཞིང༌། འབྱོར་པ་འཕེལ་བའི་རྟེན་འབྲེལ་ཁྱད་པར་ཅན་ཡིན་ནོ། །གཤིན་རྗེའི་འཁོར་ཡི་དྭགས་ཀྱིས་ནོར་ལ་བར་ཆད་བྱེད་ན་གདམས་པ་འདི་དགོས་སོ། །དེ་བཞིན་དུ་སྙྀང་པོའི་འཁོར་ལོ་གྲོ་ག་ལ་ཟངས་སམ་མཚལ་གྱིས་བྲིས། རབ་གནས་བྱས་ལ་བདེ་བ་ལུགས་སྔ་མ་དང་འདྲ། སྨད་འཚོང་མའི་ཐོད་པ་ཁ་སྦྱོར་རམ་ཟངས་ཀྱི་གའུ་མར་དང་སྦྲང་རྩིས་གང་བའི་ནང་དུ་བཅུག །
དེ་ཡང་ཆང་སྣོད་རྙིང་པར་བཅུག་ཏེ་ཁ་རས་དམར་པོས་བཀབ། མཆོད་པ་སྤྱི་དང་དུས་དུས་སུ་མྱོས་བྱེད་ཀྱིས་གཏོར་རོ། །འདིས་ནང་འཁྲུག་སོགས་མི་འབྱུང་ཞིང་གནས་གཞི་དེ་ལ་སྐྱེ་བོ་རྣམས་གུས་པའི་རྟེན་འབྲེལ་དུ་འགྱུར་རོ། །ཆོས་རྒྱལ་ལྷ་མགོན་གཅིག་ཏུ་སྒྲུབ་པའི་ཐབས་ནི་རང་གི་སྙིང་ཁ་ནས་སྤྲོས་པའི་ཧཱུཾ་ལ་བྱང་ཤར་ནས་ཧཱུཾ་དང་ལྷོ་ནས་ཡ་བསྟིམ། ཡེ་ཤེས་པའི་སྐབས་སུ་གཉིས་ཀར་སྤྱན་འདྲེན། ཐུགས་ཀར་ཧཱུཾ་གི་མཐའ་སྐོར་དུ་ཀཱ་ལ་རཱུ་པ་དེ་ཥ་ར་ར་སྒོམ་ནས་སྔགས་ཀྱང་དེ་ཁ་བཟླ། ལིང་གའི་ནང་དུ་ཡཾ་ཨཱུ་ར་ཨཱུ་ར་བྷུ་ར་བྷུ་ར་ཧཱུཾ་བརྩེགས་པ་བསྒོམ་པའོ། །ཡང་སྡེ་བརྒྱད་ཐམས་ཅད་གཤིན་རྗེའི་འཁོར་ཡིན། འགོང་པོ་དང་ཐེ་རང་གྲི་མོ་སོགས་ཀྱིས་ཆོས་གྲྭ་དང་དགེ་འདུན་ལ་བར་དུ་གཅོད། མི་སྙན་པ་སྒྲོག །ཚེ་དང་ལོངས་སྤྱོད་དང་སྲི་ལ་བརྐུ་བས་གདམས་ངག་གཞན་ནས་འབྱུང་བའི་བསེ་རགས་འགོང་པོ་གནོན་པ་དང༌། མི་ལ་བསེ་རགས་གནོན་པ་དང༌། བྱ་མགོ་ཅན་དང༌། བསེ་གདོང་ཅན་དང༌། བྲེལ་འཕོངས་དང༌། ཤེས་པ་དཀར་པོ་དང༌། མགོ་གསུམ་གནོན་པ་སོགས། དེ་དག་གང་བྱས་ཀྱང་གོ་ཆོད་ཅིང་ཕན་པར་འོང༌། འདི་ཉིད་ཀྱི་རང་ལུགས་ནི། དང་པོར་ཕྱོགས་མཚམས་བརྒྱད་ལ་བགེགས་གཏོར་མང་དུ་བཏང༌། ཁྱད་པར་དུ་རྒྱལ་སྲིད་དང་ཐེ་རངས་འགོང་པོ་ས་བདག་ཀླུ་གཉན་དང་བཅས་པ་ལ། ཆེད་དུ་དམིགས་པའི་བགེགས་གཏོར་ཡས་གླུད་སོགས་མང་དུ་གཏོང་ཞིང༌། ཐོག་མ་ནས་ཉི་མ་གསུམ་
མམ་ལྔ་ལ་སོགས་པར་གཏོང་ངོ༌། །དེ་ནས་མ་འོངས་ཤིག་བྱ། དེ་ཙམ་གྱིས་བསྐྲོད་ཐུབ་པའི་ལྟས་བྱུང་ན། དེ་མ་ཐག་ཕྱོགས་མཚམས་རྣམས་སུ་ཐོ་ཙུགས་ལྷར་བསྐྱེད། གཏོར་མ་ཕུལ། རབ་གནས་བྱ། འདོད་དོན་གསོལ་བ་བཏབ་པ་ཙམ་གྱིས་འགྲུབ་བོ། །ད་དུང་ངེས་ཅན་དུ་བསྐྲད་དགོས་ན་གྲོ་ག་དང་ཤོག་ཤོག་གང་རྙེད་ལ། དྲི་ཙ་པ་ལ་ཐག་རིང་དུ་ཆོས་ཆོས་སེན་དྷར་ཡམ་ཡམ་ཆོས་ཆོས་དྲི་ལིང་ཆོས་ཆོས་དྲིའུ་དྲིའུ་ཆོས་ཆོས་ཧམ་ཤམ་དྲི་ཆོས་ཆོས་ན་ག་ཕུ་ག་ག་ས་ག་ན་ག་གཞན་དུ་ཆོས་ཆོས་ཞེས་པ་མང་དུ་བྲིས་ལ་རྟ་ཐོད་སྐམ་པར་གཅུག །སྤྲེའུ་དང་བྱ་དང་སྦྲུལ་དང༌། ཇོ་བོ་ཞྭ་ཐེབ་ཅན་རྟ་བཞོན་དང༌། བོང་བཞོན་དང༌། སྤྱང་ཀུ་ལ་སོགས་པའི་གཟུགས་བརྙན་དང༌། ནོར་སྣ་ཟས་སྣ་གོས་སྣ་འབྲུ་སྣ་ཚོགས་དང༌། མི་ཁའི་ཟས་གསུམ་དང་བཅས་པའི་གཏོར་མ་རྣམས་བགེགས་ལ་བསྔོས། བདེན་པ་བདར། འདི་ན་སྡོད་པའི་གནས་མེད་ག་གེ་མོ་ན་གེ་མོ་ན་སྐྱིད་དོ་བྱས། ལྷ་ཁང་གནས་གཞི་གོག་པོའམ། གྲོང་ཁྱེར་ཆེན་པོའི་འདབས་སུ་བསྐྱལ། དེ་མ་ཐག་ཐོ་བརྩེགས། བསྲུང་འཁོར་དྲག་ཏུ་བསྒོམ་པ་སོགས་བྱས་པས་འགྲུབ་བོ། །ཤིན་ཏུ་རང་འཚུབ་ན་མནན་པ་བྱ་སྟེ། དེ་ཡང་བསྙེན་པ་ཁ་གསོས། བཤན་པ་ཕོ་མོའི་འཁོར་ལོ་གོང་བཞིན་ལས། བགེགས་ལ་ཁ་སྦོས། འཁོར་ལོ་ཁ་སྦྱོར་གྱི་ནང་དུ། བགེགས་ལིང་མང་པོའི་བཅུག །རབ་གནས་དགུག་གཞུག་ལྟབ་
རྩིས་དཀྲིས་སོགས་བརྒྱབ། འབྲུབ་ཁུང་དུ་བཅུག་ནས། ཞག་གསུམ་མམ་བདུན་སོགས་བསྒྲུབས་ཤིང༌། དགུག་གཞུག་བཅིངས་མཉེས་དང༌། སྟེང་དུ་མཆོད་རྟེན་གྱིས་མནན་ཅིང་དྲག་ཏུ་སྒྲུབ། དེ་ནས་ཁྱི་ནག་པོའི་ཐོད་པའི་ནང་དུ་བཅུག །ལམ་རྒྱ་གྲམ་དུ་མནན་པ་སྤྱི་དང་མཐུན་པར་མནན་པས་རུང་ངོ༌། །ཡང་ན་སྙིང་པོ་དང་རྩ་སྔགས་ཀྱི་འཁོར་ལོ་ཁ་སྦྱོར་དང་ཡུམ་བརྒྱད་གྱི་སྲོག་འཁོར་རྣམས་ཀྱི་ནང་དུ། བགེགས་ལིང་བཅུག་ཏེ་མནན་ཀྱང་རུང་ངོ༌། །ཡུམ་གྱི་སྲོག་འཁོར་དང་འདྲ་རུང་ལ། དབུས་སུ་ཧཱུཾ་དང་ཡབ་ཀྱི་ཉེ་སྙིང་འབྲི། ཕྱིའི་རྩིབས་བརྒྱད་ལ་མ་བྷྱོཿབརྒྱད་འབྲི། ཁ་སྦྱོར་བར་དུ་མོ་འདྲེའི་ལིང་ག་བཅུག །ལིང་ག་གྲོ་ག་དང༌། འཁོར་ལོ་ཟངས་གླེགས་ལ་བྲིས་ནས། སྔར་གྱི་སྙིང་པོའི་དེ་དང༌། བཅའ་གཞི་འདྲ་བ་ལ། སྟེང་དུ་མཆོད་རྟེན་གྱིས་མནན་ཏེ་བཞག་ན་སྡེ་དེ་ལ་བུད་མེད་ཀྱི་གནོད་པ་དང༌། མི་བགེགས་མི་འབྱུང་ངོ༌། །ཤིན་ཏུ་མཁོ་བའི་མན་ངག་གལ་ཆེན་འགའ་ཞིག་གི་སྐབས་ཏེ་བདུན་པའོ། །ད་ནི་གཞན་ཡང་འདི་ལྟར་རིག་པར་བྱ་སྟཻ། ལས་གཤིན་གྱི་རྟོག་པ་འདིར་དངོས་བསྟན་ཚིག་དོན་ལ་ཕོ་རྐྱང་དུ་སྒྲུབ་པ་དང། ཕོ་མོ་སྦྲགས་ཏེ་སྒྲུབ་པ་གཉིས་གསལ་བར་བསྟན། གཉིས་ཀྱི་ནང་ནས་གཙོ་བོ་སྦྲགས་སྒྲུབ་ཡིན། ཕོ་རྐྱང་དུ་གྲུབ་པ་ཡང་དངོས་སུ་གསུངས་པས། མོ་རྐྱང་དུ་སྒྲུབ་པའང་ཞོར་ལ་འཕངས་སོ། །ཕོ་རྐྱང་དང་མོ་རྐྱང་དུ་སྒྲུབ་པ་རྣམས་ཕ་རོལ་པོ་ལས་ཤུགས་ཆུང་
བ་དང་སྲུང་བཟློག་ངན་ན་རྣོ་མྱུར་ཆེ་བར་ཡོང་ཡང་ཚན་ཁ་ཆུང་ཞིང་འཁུ་དོག་མང་བར་གྲགས། སྦྲགས་སྒྲུབ་བྱིན་ཆེ་བཀྲ་ཤིས་སྟོབས་ཆེ་ཤིང་རྣོ་བར་ཡང་ཡོངས་གསུངས་ནས། ལག་ལེན་སྦྲགས་སྒྲུབ་ལ་བྱེད། ཡང་ཕོ་རྐྱང་མོ་རྐྱང་ལ་མཐུ་ཙམ་འོང༌། ཡང་བསྟན་སྲུང་ཆོས་བདག་ཏུ་བྱེད་ན། ཡབ་ཡུམ་དུ་སྒྲུབ་པའམ་ལྕམ་དྲལ་དུ་སྒྲུབ་པར་ངེས་པར་དགོས། འཁོར་མང་དུ་བྱེད་ནའང་རྣོ་ཞིང་བཟང་བར་བཞེད་དོ། །འདིར་ཁོ་བོ་ཅག་གི་ཐུན་མོང་མ་ཡིན་པའི་བླ་མ་རྣམས་འདི་སྐད་གསུངས་ཏེ། སྤྱིར་གཤིན་རྗེ་ལ་ཕྱོགས་མཚམས་བརྒྱད་དང་འབྲེལ་བའི་བརྒྱད་དམ། དེའི་སྟེང་དུ་དབུས་བསྣན་པས་དགུ། ཡང་ན་དབུས་ལ་སྟེང་འོག་གཉིས་སུ་ཕྱེ་བས་བཅུ་ཡང་ཡོད། ཡ་བ་ཏི་ལ་སོགས་པ་ཕྱོགས་མཚམས་ཀྱི་གཤིན་རྗེ་བརྒྱད། ཡུམ་དང་བཅས་པ་ཀུན་ལ་གྲགས་མོད་ཀྱང་གཞན་གྱི་འཁོར་དུ་སྦྱར་བ་མ་གཏོགས། སོ་སོའི་སྒྲུབ་ཐབས་ཁ་གསལ་ཅན་གྲགས་ཆེ་བ་ཆེར་མེད། དེ་དག་དང་དོན་གཅིག་པ་ལ་མིང་གཞན་གྱིས་བསྟན་པ་ནི། དཔེར་བརྗོད་ན་ཁྲག་མདོག་ལྕམ་དྲལ་ལྟ་བུ་ཤར་ཕྱཽགས་ཀྱྀ་གཤིན་རྗེ་ཡིན། མ་རུ་རྩེ་བཞི་སྐོར་ལྟ་བུ་ཤར་ལྷོའི་གཤིན་རྗེ་དང༌། ར་ཧུ་ལ་ལྟ་བུ་ལྷོ་ནུབ་ཀྱི་གཤིན་རྗེ་ཡིན་ཡང་གསུང༌། རེས་འགའ་ལས་གཤིན་ཧ་ལ་ནག་པོ་ལྟ་བུ་ཡང་ལྷོ་ནུབ་ཀྱི་གཤིན་རྗེའི་རིགས་སུ་འགྱུར་གསུང༌། རྣམ་སྲས་གཤིན་རྗེར་སྒྲུབ་པ་ལྟ་བུར་བྱང་ཕྱོགས་ཀྱི་གཤིན་རྗེ་ཡིན། ཏེ་ལོའི་རྟོག་པ་ནས་འབྱུང་བའི་ལྷ་མགོན་
ལྟ་བུ་བྱང་ཤར་གྱི་གཤིན་རྗེ་ཡིན། དབུས་ཀྱི་གཤིན་རྗེ་ནི་དུར་ཁྲོད་ནག་པོ་ནས་བཤད་པ་ནག་པོ་རོ་འཛིན་གྱི་ལུགས། མགོན་པོ་བཅུ་བདུན་མ་ལྟ་བུ་ཡིན་ཅིང༌། སྟེང་འོག་གཉིས་སུ་ཕྱེ་ན་དེ་ཉིད་སྟེང་གི་ཡིན་པར་འགྱུར། ནུབ་དང་འོག་གི་གཤིན་རྗེ་ནི་ན་ག་རཀྵ་ལྟ་བུ་ཡིན། རྟོག་པ་འདི་དང་ལས་གཤིན་བཅུ་གསུམ་མ་ལ་སོགས་པ་ལས་གཤིན་དངོས་འདི་ལྷོ་ཕྱོགས་ཀྱི་ཡིན། ནུབ་བྱང་གི་གསལ་ཁ་ཅན་རང་མ་རྙཻད་ཀྱང༌། མོན་པ་ཀེ་ཏ་ལྟ་བུ་ཡིན་པ་འདྲའོ་གསུང༌། མན་ངག་རིག་པའི་གསུང་ཡིན་ཏེ་དོན་ལའང་གནས་པར་མངོན། རྟོག་པ་འདིར་མཚོ་མ་དྲོས་པའི་ཐད་དུ་གནས་པར་བཤད་པས། བྱང་ཕྱོགས་ཀྱི་མ་ཡིན་ནམ་ཞེ་ན་མ་ཡིན་ཏེ། ཕྱཽགས་མཚམས་ཀྱི་གཤིན་རྗེ་བརྒྱད་པོ་ཡང་ཕྱོགས་སྐྱོང་བརྒྱད་དང་འབྲེལ་བ་ཡིན། ཕྱོགས་སྐྱོང་གི་གནས་ཀྱི་དབང་དུ་བྱས་ན། རི་རབ་ཀྱི་རྩེ་མོ་དབུས་སུ་བཞག །རི་རབ་དང་བར་མ་ཆད་པའི་ཕྱོགས་མཚམས་བརྒྱད་གནས་ནང་མ་ཡིན། གླྀང་བཞིའི་ཐད་ཀྱི་ཕྱོགས་མཚམས་བརྒྱད་གནས་བར་པ་ཡིན། དེས་ན་མཚོ་མ་དྲོས་པ་འཛམ་གླྀང་གི་དབུས་ལ་རྟེན་པ་ཡིན། ལྷོ་ཕྱོགས་ཀྱི་གླིང་ཡིན་པའི་ཕྱྀར་ལྷོའི་གཤིན་རྗེའི་གནས་སུ་འགྱུར། འདི་སྐབས་ཀྱི་གཤིན་རྗེའི་གནས་མཚམས་ཀྱི་ཚོ་ཟུར་ཐིག་གི་སྟེང་དུ་དགོས་པས་གླིང་ཕྲན་ལ་མ་ཡིན་རྒྱ་མཚོ་ཡིན་ནོ། །གནས་ཕྱི་མ་བརྒྱད་ཀྱི་ཕྱི་ནི་ལྕགས་རིའི་ནང་མཚམས་ལ་རྩི་བ་ཡིན་ཏེ། ལྷོ་ཕྱོགས་
དཔག་ཚད་བརྒྱད་ཁྲིའི་ཕ་རོལ་ཟེར་བའང་དེ་ལ་བསམ་པའོ། །དབུས་ཀྱི་གཤིན་རྗེའི་གནས་ནི་རི་རབ་ཀྱི་ཁོང་སེང་ས་འོག་གོ །ཡང་སྟེང་འོག་གཉིས་སུ་དབྱེ་ན། རི་རབ་ཀྱི་རྩེ་མོ་དང་སྨད་གཞི་ལའང་ངོས་འཛིན་ནོ། །རྣམ་གྲངས་དུ་མ་བྱས་ན་དེ་ལྟར་ཡིན་ཡང༌། གཙོ་བོ་གཅིག་ལ་བསྡུ་ན་གཤིན་རྗེའི་ལྡོག་པ་ནས་ལྷོ་ཕྱོགས་ཀྱི་གཤིན་རྗེ་རང་གཙོ་བོ་ཡིན་པས་ཐམས་ཅད་དེ་ལ་འདུས། དྲེགས་པ་སྤྱི་ལྡོག་ནས་བྱས་ན་དབུས་ཀྱི་དེ་གཙོ་བོ་ཡིན་མོད། སྤྱིར་དྲག་སྔགས་ཀྱི་དྲེགས་པ་ཕོ་རྒྱུད་ཐམས་ཅད་གཤིན་རྗེ་དང་སྲིན་པོ་ལ་འདུས། མོ་རྒྱུད་ཐམས་ཅད་མ་མོ་དང་མཁའ་འགྲོ་ལ་འདུས། མགོན་པོ་ནག་པོའི་ཆོས་སྐོར་རྣམས་ཀྱང་ཤས་ཆེར་སྲིན་པོ་དང་འབྲེལ་བ་དང། དབང་ཕྱུག་དང་འབྲེལ་བ་དང༌། དྲེགས་པ་སྤྱི་དང་འབྲེལ་བ་ཡང་མང་པོ་ཡོད་དོ། །སྤྱིར་དེ་ལྟར་ཡིན་ཡང་ཉམས་ལེན་གྱི་སྐབས་སུ། གང་དང་གང་གི་སྒྲུབ་ཐབས་སུ་ཞུགས་པ་དེ་དང་དེ་ཉིད་སྐབས་དེར་གཙོ་བོ་བྱེད་དགོས་པ་ཡིན་པས། གཙོ་འཁོར་ལ་ཕྱོགས་གཅིག་པའི་ཨ་འཐས་བྱར་མི་རུང༌། ལྷ་དཔོན་རེས་གཡོག་རེས་ཞེས་གྲོང་པའི་ཁ་ན་རྒྱུ་བ་དེ་ཡང་ཕྱོགས་གཅིག་ནས་འཐད་དུ་རུང་ངོ༌། །དེ་དག་ལས་འདིར་ལག་ལེན་གྱི་མཐིལ་དུ་འདེབས་རྒྱུ་སྦྲགས་སྒྲུབ་ཀྱི་སྐོར་རྣམས་བཤད་ཟིན་ཏོ། །རྐྱང་སྒྲུབ་ཏུ་བྱེད་ན་མི་འདྲ་བའི་ཁྱད་པར་ནི། ཉེ་བའི་བསྙེན་པ་ནས་བརྩམ་དེ་མི་འདྲ་བ་ཅུང་ཟད་ཡོད། རྩ་བའི་
བསྙེན་པ་ནི་སྦྲགས་སྒྲུབ་ཁོ་ནས་མཆོག་ཅིང་འདི་ཁོ་ནས་ལེགས་ཀྱི། རྐྱང་སྒྲུབ་ཀྱི་རྩ་བསྙེན་མི་ལེགས་སོ། །དེ་ཕྱིན་ཆད་ལ་ཕོ་རྐྱང་དུ་བསྒྲུབས་ན་བྲིས་སྐུ་ཡང་ཡབ་རྐྱང་འབྲི། ལྷ་བསྐྱེད་པ་དང༌། བཟླས་པ་དང། གཏོར་མ་ཡང་ཡུམ་གྱི་སྐོར་རྣམས་བོར་བ་ཀ་ཡིན། སྒྲུབ་པའི་སྐབས་སུ་ཞལ་དབྱེ་ཡོད་ན་ཡ་ཐོད་ཉིད་ལ་ཡབ་ཀྱི་འཁོར་ལོ་འགྲི་བའམ། འཁཽར་ལོ་ལོགས་སུ་བྲིས་ཟིན་པ་དེ་ཐོད་པ་ལ་སྦྱོར་བ་གང་རུང་བྱ། ཐོད་པའི་ནང་རྫས་ངན་ཟབ་ཟོབ་ཀྱིས་བགེགས་པ་དེ་མི་དགོས། ཐོད་པའི་ནང་ཇི་ལྟར་འོས་པར་བྲིས་ལིང་ངམ། དེ་སྙིང་ཁར་བཅུག་པའི་ཉ་བོའི་གཟུགས་དེ་ཤིང་བཀག་གི་སྟེང་དུ་གན་རྐྱལ་དུ་གནས་པ་དམ་རྩིས་སྦྱར་དེ་ཡོ་འགུལ་མེད་པར་བཞག །དེའི་སྟེང་ནས་མ་ཐོད་གཤིན་རྗེའི་གཟུགས་ཀྱིས་འགེབས་པ་ཡིན། འདི་ལ་ངེས་པར་ཨག་རྩེ་ཁུང་ལ་ཁུན་ལམ་བཏོད་དགོས་སོ། །ཐོད་པ་ཁ་སྦྱོར་ཡིན་ན་ཐོད་པ་སྟེང་མ་ལ་ཡང་འཁོར་ལོ་འབྲི་བའམ་སྦྱོར་དེ། དེའི་ཚེ་འོག་མ་དང་ཁ་སྦྱོར་དུ་དོན་གྱིས་སོང༌། སྔགས་ཀྱང་གཅིག་པས་དང་པོར་འབྲི་ལུགས་གཅིག་བྱས་ན། འདིར་གཡས་གཡོན་འཇོལ་འགྲོ་བས་འོག་གཡས་སྐོར་དང༌། སྟེང་མ་གཡོན་སྐོར་དུ་འབྲིའོ། ཁ་ཅིག་ཐོད་པ་ཁ་སྦྱོར་ལ་སྟེང་མའི་ཚངས་བུག་ཏུ་ཐུན་ལམ་བཏོད་པའི་སྲོལ་ཡང་འདུག་སྟེ། འདི་ནི་འཁོར་ལོ་ལ་གནོད་པས་ཤིན་ཏུ་མི་རུང་ལ། སྤྱིར་ཡང་ཐོད་པ་ཉམས་པར་འགྱུར་བས་ཅུང་དེ་མི་ལེགས་པར་མངོན་ནོ། །དེ་
མན་ཆད་སྒྲུབ་པ་དང་ལས་སྦྱོར་གྱི་སྐབས་རྣམས་སུ། ཡུམ་གྱི་སྐོར་རྣམས་བོར་བ་ཁོ་ནའོ། །དེ་བཞིན་དུ་ཡུམ་རྐྱང་སྒྲུབ་ན་ཡང༌། བྲིས་སྐུ་ཡང་ཡུམ་ཁོ་ན་བཞེངས། སྒྲུབ་པའི་སྐབས་ཞལ་དབྱེ་བྱེད་ན། ཡ་ཐོད་ལ་ཡུམ་གྱི་འཁོར་ལོ་ཁོ་ན་བྲིས། མ་ཐོད་སྐན་གྱི་ཕྱོགས་ལ་གཤིན་རྗེའི་སྐུ་རང་བྱུང་ནི་གསལ་འདེབས་རྒྱུ་དེ་གཤིན་རྗེ་མོའི་རྣམ་པར་བྱ། སྔགས་ནི་དཔྲལ་བར་ཉེ་སྙིང་དང༌། མ་མ་རཀྵ་ཡཀྵ་ཧཱུཾ་ཛ་ཧཱུཾ། ཡ་མ་རཱ་ཛ་ཎྲྀ་ཛ་ཛ་ཞེས་པ་ཞལ་གྱི་ཐད་ལ་བྲི། མ་མ་རུ་ལུ་མ་ཧེ་བྷྱོཿ ཆེ་གེ་མོ་མཱ་ར་ཡ་ཧཱུཾ་ཕཊ། ཅེས་མཐའ་ལ་བྲི་བ་ནི་ཁྱད་པར་ཡིན། ཐོད་པ་ཁ་སྦྱཽར་ཡིན་ནའང༌། འཁོར་ལོ་འབྲི་བའམ་ཁ་སྦྱོར་ཏེ། འཁོར་ལོ་འོག་མ་ལ་གཡོན་སྐོར་དང༌། སྟེང་མ་ལ་གཡས་སྐོར་རོ། །ལས་སྦྱཽར་གྱི་སྐབས་ལྡེར་བཟོ་ཡང་ཙ་མུཎྜི་ཉིད་བཞེངས། གཞན་ཆོ་ག་ལྷག་མ་ཡབ་ཀྱི་བསྐོར་བོར་བ་ཁོ་ན་ཡིན། རྐྱང་སྒྲུབ་འདི་གཉིས་ལ་ཉིན་མཚན་གྱི་སྔགས་ཀྱང་ཕོ་མོ་སོ་སོ་རྐྱང་བ་ལས་འོས་མེད་ཀྱང༌། ཕྱེད་མར་བཅད་ནས་བཟླ་བ་དེ་མི་དགོས། འཕྲེང་སྔགས་ཉེ་བསྙེན་གྱི་སྐབས་བཞིན་བཟླའོ། །དེའི་རྒྱུ་མཚན་བསྡུ་བ་དང༌། འགྱེད་པའི་ལས་དེ་ཕོས་མོ་བསྐུལ་བ་དང༌། མོས་ཕོ་བསྐུལ་བ་ལ་དགོས་ཀྱི་གཞན་ལ་མ་ཡིན་པས་སོ། །དེ་བཞིན་དུ་འཁོར་ལོ་ཡང་རྐྱང་སྒྲུབ་ལ་འཁོར་ལོ་གཅིག་ལས་མེད་པ་ཞལ་དབྱེ་ལྟ་བུ་ལ་དེར་ཟད། ཐོད་པ་ཁ་སྦྱོར་རེ་བྱེད་པའི་ཚེ་གཡས་
སྐོར་གཡོན་སྐོར་སོ་སོར་དགོས་པའི་རྒྱུ་མཚན། འཁོར་ལོ་གཉིས་པོ་སྔགས་ཀྱི་ངོ་བོ་གཅིག །དམིགས་པས་ཀྱང་ལྷ་གཅིག་ཏུ་མོས་དགོས་ལ། རེ་མིག་སོ་སོའི་སྔགས་སྟེང་འོག་ཏུ་འགྲིག་པ་ཞིག་དགོས། དེ་མིན་སྔགས་འཁྲུགས་པ་ལས་ཇི་བཞིན་མི་འགྲུབ་ན། དཔེར་ན་ལག་ངར་གཡས་པའི་ཤ་ལྤགས་ཀྱྀ་ནང་དུ་གཡོན་པའི་རུས་པ་བཅུག་ན་ཚིགས་མཚམས་མི་འགྲིག་པ་བཞིན་ནོ། །སྔགས་སྒྲུབ་ཀྱི་འཁོར་ལོ་ཁ་སྦྱཽར་ལ་ནི་དེ་དང་མི་འདྲ་སྟེ་སྔགས་གཉིས་པོ་ཡེ་མི་གཅིག་པས་འདྲ་བ་སྒྲིག་རྒྱུ་མེད་པ་དང༌། གནོད་སྦྱྀན་འཁོར་ལོ་ལ་ལྷ་ཚོགས་ཡབ་ཡུམ་སྒྲིག་རྒྱུ་ཡོད་པ་ལྟ་བུ་འདི་ལ་མེད་པ་དང༌། དམིགས་པས་ཀྱང་ལྷ་ཡབ་ཡུམ་སོ་སོར་སྒོམ་ཞིང་འཁོར་ལོ་ཡང་སོ་སོར་རང་རྐང་པ་ཡིན་གྱིས་གཅིག་ཏུ་བསྡུ་རྒྱུ་མིན་པའི་ཕྱིར་རོ། །ཕོ་རྐྱང་ལ་འོག་མ་གཡོན་སྐོར་ཁ་གྱེན་བསྟན་དང༌། སྟེང་མ་གཡས་སྐོར་དུ་བྲིས་པ་ཁ་སྦུབ་ཏེ་སྦྱར་བས་གཡས་སྐོར་དུ་ཁ་སྦྱོར་འབྱུང། ཐབས་རྐྱང་པ་མཚོན་པ་ཡིན། མོ་རྐྱང་ལ་འོག་མ་གཡོན་སྐོར་དུ་བྲིས་པ་ཁ་གྱེན་བསྟན་ལ། སྟེང་མ་གཡས་སྐོར་དུ་བྲིས་པ་ཁ་སྦུབ་པས་གཡོན་སྐོར་ཁ་སྦྱོར་དུའང་ཤེས་རབ་རྐྱང་པ་མཚོན། སྦྲགས་སྒྲུབ་ཀྱི་སྐབས་གཉིས་ཀ་གཡས་སྐོར་དུ་འབྲི། དེ་ལ་འཁོར་ལོ་ལྟབ་ཚིགས་མ་བྱས་ན་རྣམ་སྤྱི་གསལ་ཏེ། མོ་འཁོར་གཡས་སྐོར་འོག་ནས་ཁ་གྱེན་བསྟན་དེ་ཤེས་རབ་ལ་ཐབས་ཀྱི་ཞད་ཡོད་པ་དང༌། འཕོ་འཁོར་གཡས་སྐོར་
དུ་བྲིས་པ་ཁ་སྦུབ་པས་གཡོན་སྐོར་དུ་སོང་བ་དེ། ཐབས་ལ་ཤེས་རབ་ཀྱི་ཞད་ཡོད་པ་མཚོན་ཅིང༌། གཡས་སྐོར་གཡོན་སྐོར་ཁ་སྦྱོར་དུ་འབྱུང་བ་ནི། མཚན་ཉིད་ཐ་དད་པ་གཉིས་བྱ་བ་གཅིག་ལ་འཇུག་པའི་ཕྱིར་རོ། །རྐྱང་སྒྲུབ་སྐབས་ཐོད་པ་ལ་འབྲི་བར་རྟོག་པ་ལས་གསུངས་པས་ཐོབ་ཐང་ཡིན་གྱི། གཞན་འཁོར་ལོ་འབྲི་ཚུལ་སྦྲགས་སྒྲུབ་བཞིན་བྱས་ཀྱང་ལས་འགྲུབ་ཀྱིན་ཡོད་པས་འགལ་བ་ཡོད་པ་མ་ཡིན་ནོ། །དེ་དག་ཀྱང་རྙེད་ཅིང་འགྲུབ་ན་ཐོད་པ་བམ་རིལ་ཡོངས་རྫོགས་ཡོད་པ་དང༌། གཤིན་རྗེའི་སྐུ་རང་འབྱུང་དུ་ཡོད་པའི་རྟེན་འབྲེལ་གྱིས་ཞལ་དབྱེ་ཉིད་ནུས་པ་ཆེ་བར་གྲགས་སོ། །འདིར་ཡབ་རྐྱང་དང་ཡུམ་རྐྱང་དང་ཡབ་ཡུམ་མམ་ལྕམ་དྲལ་སྦྲགས་ཏེ་སྒྲུབ་པ་འདིས་མཚོན་ཏེ། མངོན་རྟོགས་ཀྱི་སྐབས་དམིགས་གསལ་གྱི་འཁོར་བསྐྱེད་པའི་ལྷག་ཆོས་མ་གཏོགས། བཅུ་གསུམ་མའམ་བཅུ་བདུན་མ་སོགས་ལའང་ཆོ་གའི་རིམ་པ་འདི་ཁོ་ན་སྦྱར་བས་རུང་ངོ༌། །དེ་བཞིན་དུ་ཧ་ལ་ནག་པོ་ཕོ་རྐྱང་ངམ་ལྕམ་དྲལ་དུ་བྱེད་ནའང༌། ཉེ་སྙིང་སྤོས་ན་འདི་ཁོ་ནས་འགྲུབ། ཡང་ལག་ལེན་ཁྲིགས་བཀོད་སོགས་ནས་བཤད་ཅིང༌། མན་ངག་ལས་འབྱུང་བ་ལས་གཤིན་གྲི་གུག་དང་ཐོད་པ་བསྣམས་པ་གཙོ་རྐྱང༌། རེ་མ་ཏི་དང་ལྕམ་དྲལ་དུ་བྱ་སྟེ་ཉེ་སྙིང་ཡང༌། ཨོཾ་ཤྲཱི་མཧཱ་ཀཱ་ལ་རུ་པ་ཤ་ཧཱུཾ་ཕཊ་ཅེས་བསྒྱུར། གཞན་ཆོ་ག་འདི་ཉིད་ཀྱིས་ལས་སྒྲུབ་བོ། །གྱི་ལྗང་བའི་མགོན་པོ་གཤིན་རྗེ་ལྟར་གྲུབ་པ་ཡང་འདི་ལ་འཁོར་མང་དུ་བྱས་པ་ཀ་ཡིན། དེ་དག་ལ་སོགས་པ་རྣམ་པ་དུ་མར་འགྱུར་བར་ཤེས་པར་བྱའོ། །
ཡང་འདིར་རྟོག་པ་འདི་ལ་དངོས་སུ་མ་བརྟེན་མོད། ཞལ་གདམས་མན་ངག་གཞན་བསྟན་པ་ནི། ཕྱི་རོལ་མུ་ཁྱུད་གསུམ་བསྐོར་བ་ལ་རྡོ་རྗེའི་འཕྲེང་བ་དང་མེ་རི་འབྲི། དེའི་ནང་དུ་མཚོན་ཆ་འཁོར་ལོ་རྩིབས་བརྒྱད་པ་ལ་ལྟེ་བ་སྐོར་མི་དགོས། རྩིབས་ཀྱི་རྩེ་མོ་རྣཽ་ཟུལ་བ་མི་བྱེད་པར། ཡི་གེ་ཆའི་འཕོང་བཞིན་དུ་ཆ་ཤས་གཉིས་པ་གཅིག་འབྲི་བའི་སྲོལ་འདུག །རྒྱུ་མཚན་གཅིག་ཀྱང་འཆད་ལ། མན་ངག་ཡི་གེ་རྙིང་པ་རྣམས་ན་ནི་གསལ་ཁ་མེད། རྩིབས་བརྒྱད་ལ་དམུ་བྱད་མ་ཆེ་གེ་རང་ཉིད་ལ་ལོག་ཤོག །དེ་བཞིན་དུ་རྒྱལ་པོ། གཤིན་རྗེ། གྱིང་འདྲིལ། དྲི་འདྲིལ། བདུད། མ་མོ་བཙན་ཅེས་པ་རྣམས་ལ། གནོད་བྱེད་དམ་བྱད་མ་ཆེ་གེ་མོ་རང་ཉིད་ལ་ལོག་ཤོག །ཅེས་པ་ཤར་ནས་གོ་རིམ་ཇི་ལྟ་བ་བཞིན་དུ་གཡོན་སྐོར་ཡིག་མགོ་ཕྱིར་བསྟན་དུ་འབྲི། དེ་བཞིན་དུ་ཤར་དང་ཤར་ལྷོའི་མཚམས་ཀྱི་རྩིབས་བར་ལ་རྨུ་འཁུ་སྟཾ་ཤ་ཏྲུན་ཤ་ཏྲུན་སྟཾ་བྷ་ཡ་ནན་ལཾ། དེ་བཞིན་དུ་རྩིབས་བར་རྣམས་ལ་གཡོན་སྐོར་གྱིས་རྒྱལ་པོ་རྒྱལ་ཏེ་རྒྱུ་དང༌། གཤིན་རྗེ་དང༌། ཡུལ་ལྷ་དང༌། གྱིང་འདྲིལ་དྲི་འདྲིལ་དང༌། བདུད་དང༌། མ་མོ་དང༌། བཙན་དང༌། ཅང་ཏེའུ་ཞེས་པ་རྣམས་ལ། འཁུ་སྟཾ་ཤ་ཏྲུན་ཤ་ཏྲུན། སྟཾ་བྷ་ཡ་ནན་ལཾ། ཞེས་བཏགས་པ་ཡིག་མགོ་ནང་བསྟན་དུ་འབྲི། འཁོར་ལོའི་དཀྱིལ་དུ་བསྒྲུབ་བྱ་བྲང་འཇོག་བྱེད་པ། རྐང་པ་བསྐུམ་ཞིང་སྒྲོག་གིས་བསྡམས་པ་ཞིག་འབྲི། བར་ལྷུ་གཡས་
དང་སྟོད་དང་བར་ལྷུ་གཡོན་རྣམས་ལ། ཀུན་དྲུག་ཐུམ་རི་ལི་ལི་ཞེས་པ་ཚར་གཉིས་ལུས་པོ་མ་ལ་སྔགས་དེའི་རྗེས་སུ་བནྡྷེ་པ་ཤ་ཡ་བནྡྷེ་པ་ཤ་ཡ་ཞེས་པ་འབྲི། དཔྲལ་བ་ཐུམ་རིལ་ལི་ལི་ཡིག་མགོ་ཐུར་བསྟན་འབྲི། གཟུགས་བརྙན་དེའི་མདུན་ཕྱོགས་ལ་ཧ་ཧ་ཤ་ཏྲུན་ཤ་ཏྲུན། ཆེ་གེ་མོ་ནན་འཁུ་སྟམ་ཞེས་པ་འབྲི། གཡོན་ལ་ཤ་ཏྲུན་ཤ་ཏྲུན་སྟཾ་བྷ་ཡ་མཱ་ར་ཡ་ཛ། གཡས་ལ་ལམ་བྱང་ཁ་བྱེད་པ་ཕུར་ཁ་འཕེན་པ་ལ་སོགས་པ་རྣམས་ལམ། དམིགས་གསལ་ངོ་ཤེས་ན་སྙིང་ཁ་མིང་རུས་འབྲི། འཁོར་ལོ་འདི་གཤིན་རྗེ་ཕོ་མོའི་འཁོར་ལོའི་བར་དུ་བཅུག །གཤིན་རྗེའི་འཁོར་ལོ་དངོས་ལའང་སྤེལ་ཚིག་ཁ་བསྒྱུར་དེ་བྲི། ཞལ་དབྱེའི་ནང་དུ་བཅུག་ཀྱང་རུང་མོད་ཀྱི། འདི་ཁ་ལོགས་སུ་བསྒྲུབས་ན་ཐོད་པ་ཁ་སྦྱོར་རམ། ཐོད་ངན་གཅིག་པུའམ། རྫའི་རུས་སྦལ་གྱི་ནང་དུ་བཅུག་ཀྱང་རུང་ངོ༌། །བཅའ་གཞིའི་སྐབས་སུ་ཁྱད་པར་དེ་དག་ཡིན། དམིགས་པ་ནི་འཁོར་ལོའི་ལྟཻ་བར་རང་ཉིད་ཡི་དམ་གྱི་མདུན་ནམ། ཕྱོགས་བཞིར་གཤིན་རྗེ་ཡབ་ཡུམ་རྩིབས་བརྒྱད་ལ་ཡ་བརྒྱད་བྷྱོཿབརྒྱད་ལས་གཤིན་རྗེ་ཕོ་མོ་བརྒྱད་བསྐྱེད། གྲི་གུག་ཐོད་ཁྲག་འཛིན་པ་ཁོ་ན་བསྒོམ། དེ་ཡང་བསྲུང་བ་གཙོ་བོར་བྱེད་ན་ལྗང་ནགབཟློག་པ་ལ་དུད་ཁ། བསད་པ་ལ་ནག་པོའོ། །སྒྲུབ་ལུགས་གཞན་ཐམས་ཅད་གོང་དང་འདྲ། བསྲུང་བཟློག་བསད་གསུམ་གྱི་དམིགས་པ་ནི། ཨུཥྟི་ཥའི་མན་ངག་གི་རིགས་འདྲེས་སོ། །ལིང་གའི་འཁོར་ལོ་དེ་ལྟ་བུ་
ནི། བཅོམ་ལྡན་འདས་གཤིན་རྗེས་གཤེད་ཀྱི་འཁོར་ལོ་ལ་ཁ་སྦོས་ཀྱང་བྱད་བཟློག་ཕུན་སུམ་ཚོགས་པར་འགྱུར་རོ། །༈ བཅོམ་ལྡན་འདས་ཡ་མན་ཏ་ཀ་ལ་ཕྱག་འཚལ་ལོ། །ཤིན་ཏུ་གསང་བའི་མན་ངག་རླུང་གིས་ཀྱང་ཐོས་སུ་མི་རུང་ངོ༌། །འདི་ཁོ་ནའོ། །འདི་ཙམ་ཁོ་ནའོ། །གསང་བར་བྱའོ་སྦ་བར་བྱའོ། །དཔེ་མིག་གིས་མཐོང་དུ་ག་ལ་རུང༌། ཡོང་སྐད་ཀྱང་སྨྲ་བར་མི་བྱའོ། །རྟ་སྔོན་པོའི་ཐོད་པ་གྲས་མེད་ཅིག་དགོས། དཔའ་བོ་གྲིར་བསད་པ་དང༌། ཕུང་ཤུལ་གྱི་ས་བླང༌། ས་སྟེགས་བྱས་ལ་འབྲུབ་ཁུང་དུ་གྲུ་གསུམ་མཐིང་ནག་བཅོས། གྲི་ཁྲག་དང་བཙན་དུག་བསྲེས་པས་བྱུག །ཁ་ཁྱེར་ལ་རྩག་དམར་པོས་བསྐོར། རྩག་ལ་མི་རྟ་ར་གསུམ་གྱི་སྙིང་གི་དུམ་བུ་གང་རྙཻད་དེ་འཛུགས། དང་པོར་ཡི་དམ་དང༌། དེ་རྗེས་གཤིན་རྗེའི་བསྙེན་སྒྲུབ་སྔོན་དུ་སོང་བའི་རྣལ་འབྱོར་པས། འཁོར་ལོའི་ལྟེ་བ་ལ་ཉེ་སྙིང་ཡི་གེ་བདུན་པའམ། ཡང་ན་བརྒྱད་པ་སྤེལ་ཚིག་ཅན་འབྲི། དབུས་སུ་ཡ་བཞིའི་ནང་དུ་ཆེ་གེ་མ་ར་ཡ་ལྟེ་བའི་མུ་ཁྱུད་ལ་བསྙེན་སྔགས་ཀྱི་མིང་ཅན་རྦད་པ་དེ་འབྲི། རྩིབས་བརྒྱད་ལ་ཆོས་རྒྱལ་གྱི་འཕྲེང་སྔགས་གོང་བཞིན་འབྲི། མུ་ཁྱུད་ལ་བསད་སྔགས་འབྲིའོ། །དེ་འདྲ་ཁ་སྦྱོར་གྱི་ནང་དུ་བྲིས་ལིང་བཅུག །འཁོར་ལོ་དེ་ཡང་ཟག་རྫས་བསྲེས་པའི་ཉ་བོའི་ཁོག་ཏུ་བཅུག །དེ་རྟ་ཐོད་དུ་བཅུག་ལ་འབྲུབ་ཁུང་དུ་བཞག་གོ །འཁོར་ལོ་དེ་འདྲ་བ་ཚིག་ཁྱེར་གཞན་ཞིག་ཀྱང་བརྐྱངས་ཏེ། དེ་འདྲའི་སྟེང་དུ་ལིང་ག་གཅིག་བཞག་དགོས་ཏེ་
འབྲུབ་ཁུང་དེ་ཁའི་ནང་ངམ་གཞན་དུ་བྲིས་ལིང་ངམ། ཟན་ལིང་ཞིག་ཀྱང་དགོས། མ་ཧེ་ནག་པོའི་ཐོད་པ་དགོས་པ་བཤད་ཀྱང་མ་རྙཻད་ན། གཡག་རོག་གམ་ར་རོག་གི་ཐོད་པར་བཱ་ཛི་ཁ་ཚར་ཀུ་ཏ་ཏེ་ནག་པོ་གསུམ་གྱི་ཤོ་ནི་ཏ་དང༌། མ་ཧུ་ར་སེར་དཀར་གཉིས། ར་དུག་སྤྱད་དུག་ཏེ་རྫས་སྣ་བདུན། བསད་པའི་གྲི་མཚོན་གྱི་ལྕགས་ཕྱེ་སོགས་དང་བསྲེས་པའི་ཐུན་བཞག་སྔགས་ནི་ཉེ་སྙིང་ངམ། སྙིང་པོའམ། རྩ་སྔགས་བརྒྱ་ཙམ་སོང་བའི་མཐར་འདི་འདོགས་ཏེ། བཞི་པའི་དང་པོ་མེ་ལ་གནས་པ་ནོར་བུ་མིག་གསུམ་གྱིས་བརྒྱན་པ་དང༌། མཐར་གནས་གསུམ་པ་མགོ་ལ་མིག་གསུམ་གློད་ནས་དང་པོའི་ལྔ་པ་སྦྱར་བ་ནི་སྔགས་ཅན་ཟེར། དར་སྔོན་ང་རོ་ཅན་དང༌། དང་པོའི་དང་པོ་ནི་དུང་ཞེས་བྱའོ། །དེ་ནས་ཐུན་རཀྵ་ཡ་ཡང་དུང་གི་རྗེས་ལ། དུ་ནི་རཀྵ་ཛ་མ་ནི་ཛ་ཐུར་ཁ་ལ་རྦད། དུ་ར་ཡཀྵ་དགྲ་བོའི་སྙིང་ལ་ཡ། ཞེས་དྲག་ཏུ་བཟླས། བསྙེན་སྔགས་ཟེར་ཡང་རྦད་སྔགས་ཡིན། རྦད་རྟགས་འཕྲལ་དུ་སྲོག་ལ་ཐུམ་རིལ། ལཾ་ལཾ་ལཾ་ཐུམ་རིལ་རྦད། ཁྲག་ཐིབས་ཁཾ་ཁཾ་ཁཾ་རྦད། ཙ་ལ་བྲེང་ཤག་རཾ་རཾ་རཾ་རྦད་ཙི་ཏ་དུན་སྨུགས་ཡཾ་ཡཾ་ཡཾ་རྦད། ལིང་ཤག་སྲོག་ལ་བྲེང༌། རྣི་ཧུར་ཐུམ་ཏྲི་པིང་ཤཾ་ཀ་ཐུན་རཀྵ་ཡ་ཏྲི་པིང་ཤཾ་ཀ་དུ་ནི་རཀྵ་ཛཿ མ་ནི་ཛཿ་སོགས་རྦད་སྔགས་ཐུཾ་ཐུཾ་རྦད། ཅེས་པ་བཏགས་ཤིང་བཟླ། གུང་གཉིས་དང་སྲོད་ཐོ་རངས་ཏེ་དུས་བཞི་ལ། འཁོར་ལོ་རྒྱངས་པ་དང༌། འཁོར་ལོ་མ་དེ་དང༌། ལིང་ག་ལ་ཐུན་བརྡེག་ཅིང་
ཕུར་བཏབ་ཀྱི་དམིགས་པ་རྣམ་འགྱུར་བྱའོ། །བསད་རྟགས་བྱུང་ན་སྐབས་འདིར་འཁོར་ལོ་སྦའོ། །ནང་རྟགས་ནི་ཞག་གསུམ་ནས་བཅུ་གཉིས་བར་དུ་འོང༌། དེ་རྗེས་ཕྱི་རྟགས་ཟླ་བ་གསུམ་ཚུན་ལ་ངེས་པར་འོང་བར་བཤད། དེ་ལྟ་ན་ཡང་ཞག་བཅུ་གཉིས་ཀྱི་བར་དུ་ནང་རྟགས་མ་བྱུང་ན། དང་པོའི་ཡི་གེ་བཞིའི་རྗེས་སུ། ཁ་ཐུན་རཀྵ་ཡ་ལམ་བཞི་དགྲ་བོའི་སྲོག་ལ་ཧུར་ཐུམ་རྦད། ཁམ་བཞི་དགྲ་བོའི་སྲོག་ལ་ཐིམ་ལོང་རྦད། རཾ་བཞི་དགྲ་བོའི་རྩ་ལ་འབྲིང་ཤག་རྦད། ཡཾ་བཞི་དགྲ་བོའི་ཙི་ཏ་དུན་སྨུགས་རྦད། རྣི་ཧུར་ཐུཾ་ཐུཾ་ཐུཾ་ལིང་ཤག་སྲོག་ལ་བྲེང་བྲེང་རྦད་ཅེས་ཐུན་དང་ཕུར་པ་བརྡེག་གོ །དེ་བསད་རྟགས་འབྱུང་བར་ཐེ་ཚོམ་མེད། རྟགས་བྱུང་ན་ལིང་ག་འབུལ་ཏེ། དུང་གི་རྗེས་སུ་དུ་ནི་ཡཀྵ་རྣི། དགྲ་བོ་རྩ་ལ་རྦད། མ་ཎི་ཛ་དུར་དགྲ་བོའི་སྲོག་ཁ་ལ་རྦད། དུ་ར་ཡཀྵ་དགྲ་བོའི་སྙིང་ལ་ཡ། ཞེས་མི་བསད་པའི་གྲི་ལ་མང་དུ་བཟླས་ཏེ་ལིང་ག་བསྒྲལ། ཅུང་ཟད་གཅིག་གཏོར་མ་ལ་ཕུལ། ཅུང་ཟད་གཅིག་རྟ་ཐོད་ནང་དུ་བཅུག །གཞན་རྣམས་སྦྱིན་སྲེག་བྱ། འཁོར་ལོ་རྟ་ཐོད་དང་བཅས་པ་ཆུ་མིག་མགོ་དགུ་པའི་དྲུང་དུ་སྦས་ཀྱང་རུང༌། བྲག་ལ་ཆུ་འཐབ་ཀྱི་འཁོར་དུག་གཏད་ཀྱང་རུང་ཏེ་ཕྱི་རྟགས་འཕྲལ་དུ་འོང༌། ཕྱི་རྟགས་བྱུང་མ་ཐག་ཏུ་རྟ་སྔོན་གྱི་ཧི་ཡ་གཏང་རག་ཏུ་འབུལ་ལོ། །འདིའི་ལུགས་ཀྱི་སྒྲུབ་པ་ལས་སྦྱོར་བྱེད་ཚུལ་ཡང་སྤྱི་ཁོག་གོང་དང་འདྲའོ། །ཡང་ན་ལིང་ག་ཉིད་འབྲུབ་ཁང་དུ་བཅུག་སྟེ་བསྒྲུབས་ནས། མཐར་སྦ་བའི་ཚེ་རྟ་ཐོད་དུ་བཅུག་ཀྱང༌།
རུང་ཞེས་གསུང་བ་ལག་ལེན་བདེའོ། །འདི་དངོས་སུ་ཧ་ལ་ནག་པོའི་ལས་ཚོགས་རང་ཡིན། ཆོས་རྒྱལ་ལྕམ་དྲལ་ལམ་འཁོར་མང་སོགས་སྒྲུབ་ཐབས་མ་ལ་སྦྱོར་བའི་ཕྱག་སྲོལ་ཡང་ཡོད་པར་སྣང་ཞིང༌། རྣོ་ཁྱད་ནུས་པ་ཆེན་པོ་བྱུང་བའི་མྱོང་གྲུབ་ཅན་ཡིན་པར་འདུག །རང་ཉིད་བསྙེན་སྔགས་གང་ལ་གཙོ་བོར་བྱས་པ་དེས་མགོ་དྲངས། གཤིན་རྗེའི་སྔགས་ཐེམས་འབྲུ་ལྔ་པོ་བསྣན་ནས། རྦད་གསང་སྤོགས་ཆོག་ལིང་སྒྲོལ་གྱི་སྔགས་བཞིན་ནམ་དགོས་སུ་བཟླ་བ་མན་ངག་ཡིན་ནོ། །ཆོས་རྒྱལ་གྱི་མཐུ་ལ་རྣོན་ཁྱད་བྱེད་ན་འདི་མི་དགོས་ཁ་མེད་ཡིན། བཅོམ་ལྡན་འདས་ཡ་མན་ཏ་ཀའི་འཁོར་ལོ་སྒྲུབ་པ་ལ་ཡང༌། ལས་སྦྱཽར་འདི་བཏགས་པ་དེ་བསྒྲུབས་ན། ཤིན་ཏུ་རྣོ་བ་ཡིན་གསུང་ངོ༌། །ལག་ལེན་གྱི་གནད་ཕྲ་མོ་རྣམས་བླ་མའི་ཞལ་ལས་རྟོགས་དགོས་སོ་སྨྲས་པ། མཐུ་ཆེན་སྔ་མས་ཡིག་ཆུང་འཁྲུགས་ཅན་མཛད། །དཀར་ཆག་མེད་པས་ཕལ་གྱིས་རྩད་མ་ཆོད། །བོད་ཀྱི་དཔལ་འཛིན་ནས་གཟུང་ལས་གཤིན་ལ། །ཡིད་དགའ་བྱེད་མཁན་ཀུན་གྱི་འདི་མ་སྙེད། །ཡུ་བུ་ཟབ་མོའི་གདམས་ངག་ཐོབ། །ལག་ཏུ་ལེན་ན་ལེན་ལུགས་ཤེས། །མན་ངག་མེད་པའི་རྦད་དགོག་ལ། །འགྲམ་ཆུ་ལྡང་དགོས་མི་བདོག་གོ །ཡང་བྷ་ག་ཝན་བཛྲ་བྷཻ་ར་བ་ལ་ཕྱག་འཚལ་ལོ། །འདི་ཤིན་ཏུ་གསང་བར་བྱའོ། །དམ་ཚིག་མེད་པ་དང༌། དམ་སྲིད་ལ་བསྟན་ན་ཤིན་ཏུ་ཕུང་བར་འགྱུར་རོ། །ཆོས་རྒྱུད་མི་གཅིག་པ་དང༌། ལྟ་བ་
གཞན་འཛིན་པ་རྣམས་ཀྱིས་མཐོང་བ་དང༌། ཐོས་པ་དང༌། བཟླས་སྒོམ་བྱས་ན་ལྷ་སྔགས་འདི་ཁོ་ན། ངན་པ་དེ་དག་ལ་དུག་ཏུ་གྱུར་ཅིག །ནད་དུ་གྱུར་ཅིགམཚོན་ཆའི་ཆར་དུ་གྱུར་ཅིག །སློབ་མ་དམ་ཉམས་རྣམས་ལ་རང་གཤེད་དུ་འབབ་པར་གྱུར་ཅིག །འདིར་ལས་ཀྱི་གཤིན་རྗེ་ཧ་ལ་དམར་པོའི་སྒྲུབ་ཐབས་ཀྱི་མན་ངག་ནི་འདི་ཡིན་ཏེ། འདི་ལ་སྐུ་མདོག་གི་ཁྱད་པར་མ་གཏོགས་བསྙེན་པ་ནག་པོ་དང་འདྲ། སྒྲུབ་པའི་སྔགས་ལ་ཡང༌། དམར་གཏོར་ཤ་ཁྲག་ཅན་དེ་དམ་རྫས་སུ་བཞག །ཡི་གེ་བརྒྱ་པ་བརྒྱ་ཉི་ཤུ་ཙམ་རེས་མགོ་དྲངས་ནས། ཨོཾ་དུང་གི་རྗེས་ལ་དུ་དྲི་ཟ་ཡག་ཀ་ཥ་རྦད། སུ་ཆེ་མ་ཁ་དྷར་རུ་རུ་བྲ་བྲ་དུམ་དུམ་ཤིག་ཤིག་མཱ་ར་ཡ་རྣལ་མ་རྣལ་ཏེ་གསོད་ལ་རྔམ། བཤོ་ལ་མེར་མེར་སྲིས་སྲིས་ལ་ཆུམ་ཐུ་བི་ཐུ་བི་ལྕགས་ཀྱི་དགྲ་རྦད་ན་ལིང་ཡ་ཡ་རྒྱོབ་རྒྱོབ་མགོ་ལ་ཡ། སྙིང་ལ་ཡ། རྩ་ལ་ཡ་ཞེས་བཟླ་བ་ཡིན། གཏོར་མ་ལྷག་པོར་ཟན་གྱི་རའི་གཟུགས་ལ། དགུག་གཞུག་བྱས་ཏེ་བསྒྲལ་ནས་འབུལ། འཁོར་ལོའི་སྐབས་ནག་པོའི་བསྙེན་སྔགས་བསད་སྔགས་ཀྱི་ཚ་བ་ལ་སྔགས་འདི་ཁོ་ན་འབྲི། འདི་ལ་བསྙེན་པ་དང་བསད་པ་དང་སྤོགས་ཆོག་གི་དབྱེ་བ་མེད། གཅིག་པོ་དེ་ལ་ཀུན་ཚང༌། གཞན་ཐམས་ཅད་ཧ་ལ་ནག་པོས་རིགས་འདྲེ། སྲོག་བསྒྲུབ་ཡོད་ན་འཁོར་ལོ་མེད་ཀྱང་ཆོག་སྟེ་འདིར་མ་བཤད་དོ། །
ཡང་རྭ་ལུགས་པའི་ཡིག་ཆུང་རྙིང་པ་གཅིག་ན། དྲག་སྔགས་ཧུར་ཐུམ་སྲོག་ལེན་དམར་པོ་ཞེས་མིང་བཏགས་ཏེ། འབྲུབ་ཁུང་གི་སྟེང་དུ་ལྷ་ངའི་ནང་དུ་ཐལ་ཆེན་གྱིས་གྲུ་གསུམ་བྲིས། དེའི་ནང་དུ་སྔར་བཤད་པ་ལྟར་གྱི་ལིང་ག་བཅུགརང་གི་གཡས་སུ་ཡི་དམ་གྱི་མཆོད་གཏོར་དང༌། གཡོན་དུ་ལས་ཀྱི་གཤིན་རྗེའི་མཆོད་གཏོར་སྙིང་སྣ་དང༌། ཤ་ཁྲག་དང་དར་ནག་གིས་བརྒྱན་པ་ཡང་བཤམས། གོང་དུ་བཤད་པ་ལྟར་གྱི་གཤིན་རྗེ་ཡབ་ཀྱི་འཁོར་ལོ་དང༌། དེའི་འོག་ཏུ་ལྡིངས་གཅིག་ལ་བྲིས་ལིང་ཞིག་སྔགས་གྱི་ཉ་བོའི་སྟེང་ཐད་རང་དུ། ཕུར་བཞི་ལ་རྒྱངས་ཏེ་ཡོང་བར་བྱ། ཡུངས་དཀར་དང༌། དུག་རིགས་ཀྱི་ཕྱེ་མ་དང་ཟི་ར་དཀར་ནག་གི་ཐུན་བཤམས། བདག་མདུན་སྔོན་དུ་འགྲོ་བས་ཡི་དམ་གྱི་གཏོར་མ་ཕུལ། ལིང་ག་ལ་དགུག་གཞུག་དོས་དྲག་ལ། ཡུན་རིང་བར་བྱས་ཏེ་གཡམ་པས་ཁ་བཀབ། ཐུན་ལ་ཐུན་ཐག་བཏགས་ཏེ། ཡི་དམ་གྱི་རྩ་སྔགས་དང༌། ཀཱ་ལ་རཱུ་པ་ཞེས་པའི་སྔགས་རིང་བ་སྦྲེལ་བ་ལ། ཧཱུཾ་སེ་ཀཱ་ལེ་ཀུ་ལེ་ཕཊ། ཀུ་ཏེ་མེ་པ་ཅེར་མ་ན་ཕཊ་ཡ། བྷ་སྨི་ཀུ་ཤ་ན་རྦད་ཕཊ། ཨོཾ་ཤྲཱི་མཉྫུ་ཡ་མ་རཱ་ཛ་ཐུམ་སྲོག་ཐུམ་རྦལ་མི། རྦལ་ཏེ་གསོད་ལ་རྔམ་སྲོག་ཆོད་མཱ་ར་ཡ། ཐོད་པ་གཟུགས་ཕུང་མཱ་ར་ཡ། ཐོད་པ་ཏ་ཀྲེ་ནི་ཐོད་པ་དགྲ་བོ་འཁོར་བཅས་མཱ་ར་ཡ། ཐོད་པ་ཧུར་ཐུམ་ཏྲ་མ་ཡ་ར་ཙ་བདུན་ཏེ་བདུན་ཏེ་ཁ་ལ་རྦད་ཡ། སྙིང་ཁ་ལ་
ཟོ། ཙི་ཏ་དམར་པོ་ཁྲཾ་ཁྲུཾ་ཁ་ལ་ཧབ་ཧུབ་སོད་ཡ་ཡ། ཞེས་བཏགས་པ་བརྒྱ་ཕྲག་རེ་བཟླ། ཐུན་བཞིའམ་གསུམ་མམ། ནམ་ཕྱེད་ཉི་ཕྱེད་ཐུན་གཉིས་བྱས་ཀྱང་རུང༌། དེ་ལྟར་ཞག་བདུན་སོང་ནས་གཞན་སྔགས་བཞིན་ལས། ཡི་དམ་གྱི་སྔགས་བརྒྱ་ཙམ་རེ་བཟླས་པའི་རྗེས་སུ། དྲག་སྔགས་འདི་ཁོ་ན་ལན་བདུན་གྱི་བར་དུ་བཟླ་ཞིང་ཐུན་གྱིས་བྲབ་བོ། །ཡང་སྔར་བཞིན་ལིང་ག་ཁ་བཅད་དོ། །ཉི་ཕྱེད་དང་ནམ་ཕྱེད་དང་ཐོ་རངས་ཀྱི་ཐུན་གསུམ་བྱ། ཟླ་བ་ཕྱེད་ཀྱིས་འགྲུབ་པར་བཤད། སྒྲུབ་པ་དང་ལས་སྦྱོར་སྤྱི་བོ་ཁོག་དཀྱུས་དང་འདྲ། འདིའི་དཔེ་རྙིང་མ་ལས་ནི་དམར་པོ་ཁྲག་མདོག་གི་ལས་ཚོགས་ཡིན་ཟེར་བ་ཡོད་དེ། དེ་ལ་སྦྱར་ཡང་མི་འགལ་མོད་སྔགས་ཀཱ་ལ་རཱུ་པ་ཡིན་པས། ཡ་མ་མཐིང་ཁ་ཉིད་ཀྱི་ལས་ཚོགས་ཡིན། ཤན་པ་རེག་གཅོད་ཟེར་རོ། །འདིའི་ཡིག་ཆུང་རྙིང་པ་དེ་རྗེ་བཙུན་རྡོ་རྗེ་གྲགས་པའི་གསུང་ཡིན་ཟེར་བ་ཡོད་ཀྱང༌། གསུང་དངོས་མིན། དེ་ལས་བྱུང་བའི་མན་ངག་རྭ་ཤེས་རབ་རྒྱལ་མཚན་གྱིས་གསུང་ཡིན་པར་བསམ་མོ། །འདི་ཧ་ལ་ནག་པོ་དང་འབྲེལ་བར་མངོན་ཡང༌། རྩ་བའི་སྒྲུབ་ཐབས་ལ་ཀ་སྦྱོར་རྒྱུ་ཡིན་གསུང་ངོ༌། །འདི་ལ་རྒྱ་སྟོན་གྱིས་ཐུགས་རྩིས་སུ་མཛད་འདུག་པས་འདིར་ཡང་བཀོད་པའོ། །ཡང་ཆོས་རྒྱལ་ཁྲག་མདོག་ལྕམ་དྲལ་དང༌། མ་རུ་རྩེ་བཞི་སྐོར་གྱི་ལས་ཚོགས་ནི། འདིར་བྲི་མི་ལང་ཡིག་རྙིང་དུ་
བལྟ་བར་བྱའོ། །གཏོར་ཆོག་དང་གཏོར་བཟློག་བྱེད་ཚུལ་ནི་གཞན་དུ་བཤད་ཟིན་ཏོ། །དེ་དག་ནི་དཀྱུས་ཀྱི་མན་ངག་མ་ཡིན་ཀྱང་དཀྱུས་ལ་ཤིན་ཏུ་ཕན་འདོགས་པའི་མན་ངག་གོ །འཕྲོས་དོན་གྱི་སྐབས་ཏེ་བརྒྱད་པའོ། །དེ་ལྟར་དོན་ལག་ལེན་མངོན་རྟོགས་ཀྱི་ཚུལ་དང་རྒྱས་པར་བཤད་ཟིན་པས། ད་ནི་ཆོས་ཀྱི་རྒྱལ་པོའི་དྲག་པོའི་ཚིག་དོན་ཉིད་ཅུང་ཟད་བཤད་པར་བྱའོ། །འདི་མན་ངག་ཤིན་ཏུ་གསལ་བར་བྱས་པའི་གཞུང་ཉིད་ཀྱི་ཕྱིར་སྔོན་ཕལ་ཆེར་ལ་གསང་བ་ཞིག་ཡིན་པར་སྣང་བས་དཔེ་རྙིང་རྣམས་ལ་རྒྱ་སྐད་བོད་སྐད་ཀྱིས་མཚན་སྨོས་པ་དང་འགྱུར་གྱི་ཕྱག་མེད་དོ། །གཞུང་དངོས་ལ་མཆོད་པར་བརྗོད་པ་དང༌། ཆོ་ག་དངོས་དང༌། ཐུན་མོང་མ་ཡིན་པའི་དམ་ཚིག་བསྟན་པ་སྟེ་གསུམ་ལས། དང་པོ་ནི། འཆི་བ་ཡི་དྭགས་རྒྱལ་པོ་ནི། །འཆི་བདག་བདུད་ཅེས་བྱ་བ་སྟེ། །ཞེས་པ་ནས་གཙིགས་པ་ཅན་ལ་ཕྱག་འཚལ་ལོ་ཞེས་པའི་བར་ཏེ། འཆི་བ་སོགས་ཚིག་རྐང་གསུམ་གྱིས་ལྷ་འདི་ཉིད་ངོས་བཟུང་ཞིང་མཚན་བསྟན་ཏེ་ངོ་བོ་ནི་ཀུན་གྱི་གསོད་བྱཻད་དེ་མཚན་ནི་འཆི་བདག་གོ །དེ་ཡང་སེམས་ཅན་དེ་རྣམས་ཉིད་ཀྱིས་ལས་ལས་འགྲུབ་པའོ། །ལུས་དང་སོགས་རྐང་པ་གཉིས་ཀྱིས་དེའི་ཁྱད་ཆོས་ནི་འགྲོ་བ་ཀུན་ལ་གནས་པར་བསྟན། ཕུང་པོ་སོགས་གཅིག་གིས་བྱེད་ལས་བསྟན་ཏེ། ཡང་དཔེ་འགའ་ཞིག་ལ་ལུས་ཀྱི་བདུད་ཅེས་ཡོད་པ་ལྟར་ན་ལུས་སྔ་མ་འཇོམས་པའི་དོན་ནོ། །ཕུང་པོ་ཉིད་འཚམས་སྦྱོར་ཅེས་པས་ལས་དགེ་སྡིག་དང་མཐུན་པར་
འགྲོ་བ་དྲུག་ཏུ་སྐྱེར་འཇུག་པའོ། །དེ་ཞུགས་པའི་རྟགས་ནི་འཇིགས་པ་དེའི་སོགས་ཏེ་ཕྱོགས་ཀུན་ནག་པོར་སྣང་བ་དང་དྲི་ངད་མི་ཟད་པ་འབྱུང་བའོ། །དེས་ན་ཞེས་སོགས་གཉིས་ནི་འགྲོ་བ་རྣམས་ཀྱི་ལྟག་པའི་མདུན་སྒོ་གཤིན་རྗེའི་གནས་ཡིན་ཅེས་པ་སྟེ། འཆི་བའི་ཚེ་གནད་འབྲལ་བའི་ཐ་མ་དེ་ལ་ཐུག་པའོ། །གཙིགས་པ་ཅན་ནི་མཆེ་བ་གཙིགས་པ་སྟེ་འཇིགས་པའི་གཟུགས་སོ། །གཞུང་གཉིས་པ་ཆོ་ག་དངོས་ལ་ཆོས་རྒྱལ་རྐྱང་པ་སྒྲུབ་པ་དང༌། ཡབ་ཡུམ་སྦྲགས་ཏེ་སྒྲུབ་པའོ། །དང་པོ་ནི། དེ་ལ་འཆི་བདག་སྐྱེས་བུའི་གཟུགས་ཞེས་པ་ནས། རང་གི་བདུད་ཀྱི་དབང་དུ་འགྱུར་ཞེས་པའི་བར་ཏེ། འདིར་རྩ་བའི་བསྙེན་པ་དང་ཉེ་བསྙེན་གྱི་གཞུང་འདྲེས་མར་གསུངས་སོ། །དེ་ལ་གསུམ་སྟེ། བསྙེན་པ་དང༌། སྒྲུབ་པ་དང༌། ལས་ལ་སྦྱོར་བའོ། །དང་པོ་ནི། བཟླས་བརྗོད་བཅས་པའི་ཚུལ་དག་གིས། །ཞེས་ཉེ་བསྙེན་གྱི་དུས་སུ་བཤད་པ་ཡིན་ཀྱང༌། ཚིག་ཟུར་ལ་རྩ་བའི་བསྙེན་པ་བྱུང་སྟེ་ཉེ་བསྙེན་གྱི་བཟླས་བརྗོད་དེ་ཡང་སྔོན་རྩ་བསྙེན་གྱི་བཟླས་བརྗོད་བྱས་ཟིན་པ་དེ་ལྟ་བུའི་ཚུལ་ཅེས་འབྱུང་བས་སོ། །ཐོག་མ་མཐའ་དང་ཡང་དག་ལྡན། །བཅུ་བཞིས་ཕྱེ་བ་བསྙེན་པ་ཡིན། །ཅེས་པས་རྩ་བསྙེན་གྱི་སྔགས་དང༌། མངོན་དུ་གྱུར་ནས་བ་གླང་བྱིན། །ཅེས་པས་རྩ་བསྙེན་གྱི་གཏོར་ཆོག་བསྟན་པ་ཡིན། གཞན་དུ་ན་བྲིས་སྐུ་ལ་བརྟེན་པའི་ཉེ་བསྙེན་གྱི་གཏོར་འབུལ་ཁོ་ན་ཀ་ཡིན་ན། གྲུབ་ཏེ་མངོན་དུ་
གྱུར་པ་ན། ཤ་ཆེན་གཏོར་མ་ཆེན་པོ་སྦྱྀན། །ཅེས་གསུངས་པ་དང་ཟློས་པར་འགྱུར་པའི་ཕྱིར་རོ། །སྔགས་ཀྱི་གཞི་འགོད་པ་དང་གཏོར་སྔགས་ནི་རྩ་བསྙེན་གཉིས་ཀ་ལ་འཇུག་གོ །ལྷག་མ་རྣམས་ཉེར་སྒྲུབ་ཀྱི་གཞུང་ཡིན་ནོ། །དེ་ལྟར་ན་འདིར་བྲིས་སྐུ་འབྲི་ཚུལ། བྲིས་སྐུའི་རབ་གནས། བསྙེན་པའི་ཚུལ་ཏེ་གསུམ་ལས། དང་པོ་ནི། དེ་ལ་འཆི་བདག་སྐྱེས་བུའི་གཟུགས། །ཞེས་པ་ནས། མ་ཧེ་དག་ལ་གནས་པ་བྲི། །ཞེས་པའི་བར་ཏེ། ཁྲུ་གང་ཞེས་པ་སྐུ་གཟུགས་ཀྱི་ཚད་དང༌། ཡི་དྭགས་གོས་ནི་རོ་རས་ཀྱི་མིང་ངོ༌། །འདིར་རལ་པ་གྱེན་བརྫེས་དང༌། མཆེ་བ་གཙིགས་པ་ཞེས་པ་ལས་གཞན་ཞལ་བཞིན་གྱི་མཚན་ཉིད་གང་ཡང་མ་གསུངས་པས། ཁྲོ་ཞལ་དང་མ་ཧེའི་ཞལ་གཉིས་ཀ་ཡང་འདིའི་ཁོངས་སུ་འདུས་སོ། །གཤིན་རྗེའི་དབྱུག་པ་ནི་དབྱུག་པ་ནག་པོ་མི་མགོས་བརྒྱན་པའམ། བཾ་དབྱུག་ཡིན་པ་ལས། འདིར་སྔ་མ་སྟེ་མི་མགོ་ཡང་སྐམ་པོའོ། །དེ་ཡང་ཡེ་ཤེས་ཀྱིས་ལྷ་ཉིད་ཀྱི་ཕྱིར་རྡོ་རྗེས་མཚན་པར་བྱ་ལ། ཞགས་པ་ཡང་གཤིན་རྗེའི་ཞགས་པ་ནག་པོ་སྟེ་རྒྱུ་ཞགས་དང༌། སྦྲུལ་ཞགས་སོགས་བློ་ལ་མཚོན་ཚད་འབྲི་བར་མི་བྱ་ཞིང་རྡོ་རྗེས་མཚན་པ་ནི་དགོས་སོ། །མ་ཧེ་དག་ལ་ཞེས་པའི་གཉིས་ཚིག་གིས་མ་ཧེ་ཕོ་མོ་གཉིས་སུ་བྱེད་པའང་མི་འགལ་ལ། འོན་ཀྱང་གཅིག་ལའང་སྐབས་འགར་དམིགས་གསལ་དུ་གཉིས་ཚིག་འཇུག་ཅིང་མན་ངག་གི་རྒྱུན་ཐམས་ཅད་ལ་གཅིག་ཉིད་དོ། །རྒྱ་སྟོན་གྱི་ཡིན་པར་བྱེད་པའི་མཆན་བུ་ན་དག་ཅེས་པས་ཡབ་ཡུམ་གཉིས་ཀར་མ་ཧེ་
གཅིག་ལ་བཞུགས་པ་ཟུར་གྱིས་བསྟན་ཟེར། དེ་ལྟར་ན་མ་ཧེར་གནས་པ་དག་འབྲིའོ། །ཞེས་འདོན་དགོས། གཉིས་པ་རབ་གནས་ནི། དེ་ནས་རྣལ་འབྱོར་ཆེན་པོ་ཡིས། ཞེས་པ་ནས་ཡི་གེ་བཅུ་གཅིག་པའི་སྔགས་རྫོགས་ཀྱི་བར་རོ། །དཔེ་མང་པོ་ལས། ཞི་གནས་བྱ་ཞེས་འབྱུང་བ་ནི། བདག་བསྐྱེད་ལ་སེམས་གནས་པའི་དོན་དུ་འཆད་པ་ཡོད་ཀྱང་དཔེ་འགའ་ལས་རབ་གནས་བྱ་ཞེས་འབྱུང་བ་དག་གོ །ཡང་ན་ཏིང་འཛིན་རྣམ་གསུམ་ཞེས་པའི་ཏིང་ངེ་འཛིན་གྱི་སྐད་དོད་ས་མཱ་དྷྀ་ལ་མགྱོགས་ཆོས་བྱས། ཡི་གེ་མ་དག་པར་དྷ་ཏ་ཏུ་ནོར་ན་ཡང་ནས་ཏི་རྣམ་གསུམ་ཟེར་བ་ལ་གོ་བ་མེད་དོ། །དོན་ནི་ཡང་ན་ཞེས་པ་སྔ་མ་ལས་འདམ་ཁའི་ཁྱད་པར་སྟོན་པའི་ཕྱིར་སྔ་མ་མདུན་དུ་གནས་ལ་ཞེས་པས་མདུན་དུ་གནས་པའི་བྲིས་སྐུ་སྐད་ཅིག་གིས་བསྐྱེད་པ་ལ་རབ་གནས་བྱ་བར་གསུངས་ནས། འདིར་དེ་ལས་གཞན་ཡང་ན་ཏིང་འཛིན་གསུམ་ལས་བསྐྱེད་ཅེས་པ་སྟེ། ཏིང་ངེ་འཛིན་གསུམ་ནི་རྭ་བ་རྣམས་ས་བོན་དང༌། ཕྱག་མཚན་དང་ལྷ་སྐུའི་རིམ་པས་བསྐྱེད་པའོ་གསུང༌། དེའི་ནང་གི་ས་བོན་གང་ཞེ་ན་ཧཱུཾ་ལས་ནག་པོ་ཆེན་པོ་སྟེ། ཞེས་གཤིན་རྗཻ་འདི་མགོན་པོའི་ངོ་བོར་བསྒྲུབས་ན་ཧཱུཾ་ལས་བསྐྱེད། གཤིན་རྗེ་འབའ་ཞིག་ཏུ་བྱེད་ན་ཡ་ལས་བསྐྱེད་པའོ། །ཞེས་ཀྱང་འདོད་མོད་ཧཱུཾ་ལས་བསྐྱེད་པ་ནི་ཡེ་ཤེས་པའི་དོན་ཡང་ཡིན་ནོ། །གཉོས་འགར་ཕྱོགས་ཀྱི་ཡིག་ཆུང་གཅིག་ན། ཏིང་འཛིན་གསུམ་ནི་
དམ་ཚིག་པ་བསྐྱེད་པ། ཡེ་ཤེས་པ་བསྟིམ་པ། དབང་བསྐུར་བའོ། །ཞེས་ཀྱང་འཆད་པ་འདི་དངོས་འདོམས་ཆེ། དེ་ལྟར་ན་དེའི་དམ་ཚིག་པ་བསྐྱེད་པ་ནི་ཧཱུཾ་ལས་ཞེས་སྦྱོར་རོ། །ཡི་གེ་བཅུ་གཅིག་པ་བརྗོད་པ་ནི་ཡང་ན་སྙིང་པོའི་སྔགས་ལ་བསྐྱེད་ཀྱང་ཆོག་པའི་དོན་ཡིན་ཟེར་ཡང་རབ་གནས་ཀྱི་སྔགས་ཀྱི་མངའ་དབུལ་ཡང་ཞོར་ལ་བསྟན་ནོ། །བྲིས་སྐུ་དང་རབ་གནས་གཉིས་ཐོག་མར་སྟོན་པ་ནི་བསྙེན་སྒྲུབ་ལས་གསུམ་ཆར་གྱི་སྐབས་སུ་དགོས་པའི་ལྷའི་རྣམ་པ་དང་བསྐྱེད་ཆོག་ཐོག་མར་ཤེས་པའི་ཕྱིར་རོ། །གསུམ་པ་ལ། ཉེ་བསྙེན་གྱི་གནས་དང༌། བཟླས་པ་དང༌། རྟགས་དང༌། བསྙེན་པ་གཉིས་ཀྱི་ཐུན་མོང་གི་བྱ་བའོ། །དང་པོ་ནི། དུར་ཁྲོད་སོགས། གཉིས་པ་ནི་བཟླས་བརྗོད་སོགས། གསུམ་པ་ནི་ཧ་ཧ་སོགས། བཞི་པ་ལ་རྩ་བའི་བསྙེན་པའི་གཏོར་མ། སྔགས་ཀྱི་གཞི། བསྙེན་པ་གཉིས་ཀྱི་སྔགས་ཀྱི་ཁྱད་པར། ཉེ་བསྙེན་གྱི་གཏོར་མ། གཏོར་མའི་རྒྱུ་གཏོར་སྔགས། ཚོགས་ཀྱི་མཆོད་པ་རྣམས་སོ། །དང་པོ་ནི་སྔོན་དུ་སོགས་ཏེ། བསྙེན་པའི་རྟགས་བྱུང་ནས་ཞེས་པའི་དོན་ནོ། །གཉིས་པ་ནི་དེ་ལ་བསྙེན་པའི་ཞེས་པ་ནས་ཕཊ་ཕཊ་སྭཱཧཱའི་བར་རོ། །དཔེ་རིང་འགའ་ལས་བྷ་སྨཱི་ཨ་ཀྲོ་ཏ་ཧཱུཾ་ཟེར་བའང་འདུག་སྟེ་དཀྱུས་ཉིད་དག་གོ །གསུམ་པ་ནི་ཐོག་མ་སོགས་ཏེ་འདི་ལ་སྦ་ལུགས་རྙིང་པ་རྣམས་སྔགས་ཀྱི་ཐོག་མའི་སྡེ་པ་དང་ཐ་མའི་སྡེ་པའི་ཡི་གེ་ཡོད་པ་ལ་དབུས་ནས་ཡི་གེ་བཅུ་
བཞིའི་ཕྱུང་བ་ནི་རྩ་བའི་བསྙེན་པའི་སྔགས་ཡིན་ལ། བཅུ་བཞི་པོ་དེ་ཡང་གང་ཞེ་ན་ན་ར་སི་དྷ་ཡེ་སརྦ་བྷུ་ཏ་ཨ་དྷི་པ་ཏ་ཡེ། ཞེས་པ་ཡིན་པར་བཞེད་དོ། །རྒྱ་སྟོན་ནི་མཧཱ་རོ་ཥ་ཎ་ན་ར་སི་དྷ་ཡེ་སརྦ་བྷུ་ཏ་ཞེས་བཅུ་བཞི་སྟོན་པར་བཞེད་དོ། །བོད་ཀྱི་དཔལ་འཛིན་ནི་ཐོག་མར་དང་ཐ་མ་སྡོམ་པའི་ཡི་གེ་བཅུ་བཞིའི་གུད་དུ་ཕྱུང་བ་ཉིད་ཡིན་ཅེས་པ་དང༌། དེ་ཡང་བསྙེན་སྔགས་ཡིན་མི་གསུང་བར་སྙིང་པོ་ཡིན་ཟེར། བར་གྱི་ཡི་གེ་རྣམས་མ་སྟོན་པའི་ཡོངས་རྫོགས་དེ་ཡང་ཉེ་བསྙེན་གྱི་སྔགས་ཡིན་མི་ཟེར་བ་ཉེ་སྙིང་ཡིན་ཅེས་འཆད་དོ། །འདིར་ལུགས་དང་པོ་བཟང་ངོ༌། །ལུགས་བར་པ་ཡང་ཅུང་མི་ལེགས་ཏེ། སརྦ་བྷུ་ཏ་འབྱུངཔོ་ཐམས་ཅད་ཨ་དྷི་པ་ཏ་ཡེ་མངའ་བདག་སྟེ་འབྱུང་པོའི་བདག་པོའི་དོན་ཡིན་པ་ལ། སརྦ་བྷུ་ཏ་ཞེས་པ་བཞག་ན་ཨ་དྷི་པ་ཏི་ཡོད་ཀྱང་སུས་བདག་པོ་ཡིན་མ་བྱུང་བས་དོན་མི་སྟོན་ནོ། །ཕྱི་མ་ཡང་མི་འཐད་དེ། ཡི་གེ་བཅུ་བཞིའི་གསུངས་པ་ལ་བཅོ་ལྔ་བྱུང་བས་མ་འགྲིག་ནས། ཨོཾ་སྤྱི་འགྲོ་ཡིན་པས་བཅུ་བཞིའི་ནང་ལ་མི་ཐེ་ཡང་བསྣན་ཅེས་ཟོལ་འཇོག་གི་སྐྱོན་སྤོང་བྱེད་དགོས་བྱུང་བའི་ཕྱིར་དང༌། ཨོཾ་སྤྱི་འགྲོ་ཡིན་ན་ཧཱུཾ་ཡང་སྤྱི་འགྲོ་མ་ཡིན་པའི་རྒྱུ་མཚན་མེད་པའི་ཕྱིར་དང་ཧཱུཾ་ཧཱུཾ་ཕཊ་ཕཊ་སྭཱཧཱ་ཞེས་པ་དཔེ་མང་པོ་ལ་ཡོད་པ་ལྟར་ན་འགྲིག་ཀྱང༌། འགའ་ཞིག་ཏུ་ཧཱུཾ་གཉིས་ཕཊ་གཅིག་དང༌། འགའ་ཞིག་ཏུ་ཧཱུཾ་གཅིག་ཕཊ་གཅིག་ཀྱང་འདུག་པ་དེ་དག་ཀྱང་ཅིག་ཏུ་དགག་པར་དཀའ་ན། དེ་དག་ལ་མི་འགྲིག་པ་དང་ཐོག་
མཐའ་བསྡུ་བའི་ཚུལ་འདི་ལྟར་ཡིན་ན་གོང་གི་ཡི་གེ་བཅུ་གཅིག་པ་གཤིན་རྗེའི་གདོང་གི་སྔགས་སུ་གྲགས་པ་དེ་དང་ཧཱུཾ་ཕཊ་ལྷག་པོ་དེ་རང་སྭཱཧཱ་བསྣན་པའི་ཁྱད་ཙམ་ལས་མི་འདུག་པས་སྔོན་དུ་གསལ་བར་བརྗོད་ཕྱིན་འདིར་གབ་པའི་ཚུལ་གྱིས་བསྟན་དགོས་མི་འདུག་པའི་ཕྱིར་རོ། །འདི་ལ་རྭ་བ་རྣམས། ཐོག་མ་མཐའ་དང་ཡང་དག་ལྡན། །བཅུ་བཞི་ཕྱེ་བ་བསྙེན་པ་ཡིན། །རིམ་པ་བཞིན་དུ་མ་ཕྱེ་བ། །ཉེ་བའི་བསྙེན་པ་ཡིན་པར་ཤེས་ཞེས་འདོན་མོད། སྐྱོ་བ་རྣམས། ཐོག་མཐའ་ཡང་དག་ལྡན་པ་ལ།། བཅུ་བཞི་ཕྲལ་བ་བསྙེན་པ་ཡིན་ཅེས་འདོན་པ་དངོས་གོ་བ་གསལ་བ་བྱུང་སྟེ། གང་ལྟར་ནའང་ཐོག་མ་དང་ཐ་མའི་ཡིག་འབྲུར་ལྡན་ཏེ་ཡོད་པ་ལ། དབུས་ནས་ཡི་གེ་བཅུ་བཞི་པའི་བར་འཕྲལ་ཞིང་མེད་པར་བྱས་པ་ནི། བསྙེན་པ་ཉེ་བསྙེན་གཉིས་ཀྱི་ཟླས་ཕྱེ་བའི་བསྙེན་པ་སྟེ། རྩ་བསྙེན་གྱི་སྔགས་ཡིན་ཅེས་པ་གཞུང་དོན་ལ་བཞུགས་ཀྱི། ཐོག་མཐའི་བཅུ་གཉིས་པོ་བར་གྱི་ཡི་གེ་བཅུ་དགུ་ལས་ལོགས་སུ་བཀར་བ་ཡིན་ཅེས་པའི་དོན་མ་ཡིན་ནོ། །དེ་འདྲ་ཡིན་ན་ཐོག་མཐའི་བཅུ་བཞིའི་ལོགས་སུ་བྱས་པ་བསྙེན་པ་ཡིན་ཅེས་པ་མཐར་གྱི་ཐོག་མཐའ་དང་ལྡན་ཞེས་གསུང་བར་མི་འགྱུར་ཏེ། ཐོག་མཐའ་དང་ལྡན་ཅེས་པས་བཅུ་བཞི་དང་མི་ལྡན་པར་སྟོན་པའི་ཕྱིར་དང༌། ཕྱེ་བ་དང་བྲལ་ཞེས་པ་ལོགས་སུ་བཀར་བའི་མིང་ཡིན། དེ་ཡང་བར་བཞག་པ་ལ་ཟེར། དཀྱུས་ལ་རྒྱུན་དུ་འདོན་རྒྱུ་དེ་ཚུར་བླངས་པ་ཡིན་གྱི། ཕར་བཀར་བ་ག་ལ་ཡིན། དེས་ན་
དཔལ་འཛིན་ལྟར་ན། བཅུ་དགུ་ཕྱེ་བ་སྙིང་པོ་ཡིན་ཟེར་དགོས་སོ། །དེའི་ཕྱིར་མི་ལེགས་སོ། །གཞན་ཡང་བསྙེན་པ་དང་ཉེ་བསྙེན་ཅེས་པ་སྙིང་པོ་དང་ཉེ་སྙིང་ཞེས་པར་བཅོས་པ་ནི་ཧ་ཅང་མི་རིགས་པའི་དབང་ཆེ་ཐལ་ཆེས་པའོ། །བཞི་པ་ནི་གྲུབ་སྟེ་སོགས་ཏེ་ཉེ་བསྙེན་གྱི་རྟགས་བྱུང་ན་སྔགས་གྲུབ་པའི་ལྟས་ཡིན་པས་སོ། །ལྔ་པ་ནི་ཤ་ཆེན་སོགས་སོ། །དྲུག་པ་ནི་བསྙེན་སྒྲུབ་ལས་གསུམ་ཐམས་ཅད་ཀྱི་ཐུན་མོང་བ་སྟེ། ཨོཾ་ཀ་ལ་སོགས་གཏོར་སྔགས་ཉིད་དོ། །བདུན་པ་ནི་ཚོགས་ལ་སོགས་ཞེས་པ་སྟེ་ཉེར་བསྒྲུབ་ཐོན་པའི་གཏང་རག་གོ །གཉིས་པ་སྒྲུབ་པ་ནི། དེ་ལྟར་གྲུབ་ནས་ལས་བྱས་ཏེ། །ཞེས་པ་ནས་བྷན་དྷ་དེ་ནི་བསྡམ་པར་བྱ༌། །ཞེས་པའི་བར་རོ། །དེ་ལ་དབྱེ་ན་ཐོད་པའི་མཚན་ཉིད། ཞལ་དབྱེ་བཞེངས་ཚུལ་འཁོར་ལོ་འབྲི་བ། འཁོར་ལོའི་བཅའ་ཐབས་རྣམས་སོ། །དང་པོ་ནི་དེ་ལྟར་སོགས་ཚིག་རྐང་གསུམ་མོ། །མཚན་ངན་ཞེས་པ་དང་བཟང་པོ་ཞེས་པ་འགལ་ལོ་སྙམ་ན། མི་འགལ་ཏེ། དེ་ཉིད་ལ་ལྟོས་པའི་བཟང་པོ་ནི་ནུས་པ་ཆེའོ། །དཔེ་ཕལ་ཆེར་ན་དུམ་བུ་གཅིག་གམ་གཉིས་པ་ལ། ཞེས་འབྱུང་ཞིང༌། ཕྱིས་ཀྱི་གསལ་བྱེད་རྣམས་ཀྱིས་ཀྱང་དེ་ལ་འབྲུ་བསྣན་མོད། ཡི་གེ་མ་དག་པ་རྒྱ་འབྱམས་ཡིན་ནོ། །སྔོན་གྱི་དཔེ་རྙིང་དག་པ་ན། དུམ་བུ་དྲུག་གམ་བརྒྱད་པ་ལ། །ཞེས་པ་ཡོད་དོ། །གཉིས་པ་ནི་དཔྲལ་བའི་ངོས་ནས་སོགས་ཚིགས་
རྐང་དྲུག་གོ །བཻ་བ་སཱ་ཏ་ན་ཉི་མའི་བུ་སྟེ་ལས་ཀྱི་གཤིན་རྗེ་ཉིད་ཀྱི་མིང་ངོ༌། །རྟོག་པ་འདི་ཉིད་ཀྱི་དངོས་བསྟན་ལྟར་ན་རོ་རས་ལ་གཤིན་རྗེའི་སྐུ་བྲིས་ནས་མ་ཐོད་རྐན་གྱི་ཕྱོགས་ལ་ཀླན་པས་ཆོག་པར་གསུངས། ཐོད་པ་དངོས་ལ་གསལ་འདེབས་པའི་ཚེ་རུས་གཟུགས་ལ་ལྟོ་བ་ཡན་ལས་མི་གསལ་ཡང་ཀླད་ཁུང་གི་རྒྱབ་ལྟག་པའི་ཕྱོགས་སུ་སྐུ་སྨད་ཞབས་དང་བཅས་པ་ཡང་མཚོན་བྱེད་ཙམ་བྲི། རས་ལ་འབྲི་ན་སྐུ་ཡོངས་རྫོགས་ཆ་ཚད་ལྡན་པར་བྲིས་ནས། ཀླད་ཁུང་གི་མདུན་རྐན་གྱི་ཕྱཽགས་ཁོ་ན་ལ་སྦྱར་བས་ཆོག །སྔོན་བཞི་ཞེན་ཅེས་པ་ནི་སྐུ་མདོག་ཕྱག་མཚན་བྲིས་སྐུའི་སྐབས་ལ་ཁ་འཕངས་པ་ཡིན། དེར་ཞབས་སྟབས་མི་གསལ་བས་འདིར་ཞབས་གཉིས་བསྒྲད་པའི་རུས་སྦལ་གྱི་སྟབས་བྲི། བརྐྱང་བསྐུམ་ནི་མི་ལེགས་སོ། །དངོས་བསྟན་དེ་ལྟར་ཡིན་ཀྱང་དོན་ཤུགས་ལ་རུས་ཚུགས་ཉིད་ལ་གསལ་འདེབས་པ་ཡང་བསྟན་ཏེ། འདི་རྣོ་བ་ཡང་གྲགས་སོ། །དེ་ལྟར་ན་ཞལ་རས་ལྷག་པར་ཆེ་ཞིང་སྐུ་ལུས་ཆུང་ཕྱག་ཀྱང་ཧ་ཅང་མི་གསལ་བས་ཕྱག་ཡོང་བའི་ས་དེར་ཕྱག་མཚན་བྱེད་ཙམ་ཕྱག་མཚན་དང་བཅས་པའམ། སྤར་བ་གདེངས་པ་གང་ལྟར་བྱས་ཀྱང་འདྲའོ། །རུས་ཚུགས་ལ་མ་ཧེའི་ཞལ་གྱི་རྣམ་པ་མི་འབྱུང་བས། འདིས་ལས་གཤིན་ཁྲོ་ཞལ་ཡང་བསྟན་པ་ཡིན་ནོ། །གསུམ་པ་ནི་སྤྱི་བོའི་ངོས་ཀྱི་སོགས་ཏེ་སྟཾ་བྷ་ཡ་ཧཱུཾ་ཕཊ་ཀྱི་བར་རོ། །སྙུ་གུ་དང་སྣག་ཚ་ནི་གཤིན་རྗེའི་
གཟུགས་ཀྱི་སྐབས་སུ་བཤད་མ་ཐག་པ་དེ་ཉིད་ཀྱིས་བྱ། རྩིབས་བརྒྱད་ཅེས་པ་རེ་མིག་ཉིད་རྩིབས་ཡིན་གྱི་རྩེ་མོ་ཅན་གྱི་རྩིབས་མི་དགོས་སོ། །སྔགས་འགོད་ཚུལ་ནི་གོང་དུ་བཤད་པ་ལྟར་གྱི་མན་ངག་ལས་གཞན་དུ་མེད་ལ། དཔེ་མང་པོ་ན་ཏྲོ་ས་ཡ་ཞེས་པ་ནི་མ་དག་སྟེ། གལ་ཏེ་ཏྲོ་ཡིན་ན་ཏྲོ་ཡ་ཞེས་ཟེར་དགོས་ཀྱང་ཕལ་ཆེར་དུ། ཏྲ་ས་ཡ་འབྱུང་བ་ལ་ལག་ལེན་མཛད། ཙཀྵ་བཛྲེ་ཎ་ཞེས་པ་ལ་འགའ་ཞིག་ཏུ་ཙནྚ་བཛྲེ་ཎ་དང༌། ལ་ལར་ཙ་ཀྲེ་བཛྲེ་ན་དང༌། ལ་ལར་ཙཀྲ་ནས་བཛྲེ་ན་ཟེར་བ་ཡོད་ནའང་དཀྱུས་བཞིན་བྱ། དཔེ་འགའ་ཞིག་ཏུ་གྷོ་བྷི་ཏྲ་པ་ཡ་བྷི་ཏྲ་པ་ཡ་ཟེར་བ་འདུག་པ་ལྟར་ན་བི་དྲ་བཱ་ཡ་ཟེར་རྒྱུར་འདུགལ་ལ་ན་བི་ཏྲ་པ་ཏྲ་ཡོད་དེ་ལྟར་ན་གཟའ་སྔགས་ཡིན་མོད་ཀྱི་འོན་ཀྱང་དཀྱུས་ཉིད་འཐད་པར་བྱ། ཨརྒྷཾ་པཱ་ཞེས་པ་ལ་དཔེ་ལ་ལར། ཨ་ཀརྵ་ཡ་ལན་གསུམ་གཉིས་སུ་བྱས་པའང་ཡོད། དེ་འདྲ་མདོག་ཁ་བ་གཅིག་བྱུང་ཀྱང་གོང་གི་རུ་དྷི་ར་དང་སྦྲེལ་རྒྱུར་འདུག་པས། རུ་བི་དྷི་ར་ཨརྒྷ་པཱ་བྱས་ན་ཁྲག་གི་མཆོད་ཡོད་གསོལ་ཞིག་ཅེས་པའོ། །གཞན་དེ་ཁྲག་ཁུག་གཅིག་ཟེར་བར་འགྲོ་ཡང༌། འདི་ཁྲག་དགུག་པའི་ལས་ཚོགས་མ་ཡིན་པས་མི་འབྲེལ་ལོ། །བཛྲ་ཡེ་བཛྲ་ཡེ་ཞེས་དཔེ་མང་པོ་ལ་འདུག་པ་ཡང༌། ཅུང་ཟད་མ་དག་པར་མངོན་ཏེ། དཔེ་གཞན་མང་པོ་ལ་ཡོད་པ་ལྟར་ལག་ལེན་གྱི་རྒྱུན་ལ་བཛྲ་ཡ་ཞེས་པ་མཛད་ཀྱིན་འདུག །བདག་གི་འཆར་སྒོ་ལྟར་ན་བྷཉྫ་ཡ་ཡིན་ནམ་སེམས་ཏེ་འོན་ཀྱང་
བཅོས་མི་ནུས་སོ། །བཞི་པ་ནི་བར་དུ་ཞེས་སོགས་ཏེ་དགྲའི་མིང་འབྲི་བ་ནི། འཁོར་ལོ་གཉིས་ཡོད་ན་བར་གྱི་ལིང་ག་ལའོ། །འཁོར་ལོ་གཅིག་ལས་མེད་ཅིང༌། ཀླད་ཁུང་ནས་ཐུན་བརྡེག་ན་ལིང་ག་གན་རྐྱལ་དང་དེ་མིན་ཁ་སྦུབ་བོ། །གསུམ་པ་ལས་སྦྱོར་ནི། རོ་ཤིང་ཞེས་པ་ནས་དབང་དུ་འགྱུར་ཞེས་པའི་བར་ཏེ། བནྡྷ་སྲོ་བ། གཟུགས་བརྙན་སྦྱོར་བ། མནན་པར་བྱེད་པ། དེས་ལས་འགྲུབ་པར་བསྟན་པ་སྟེ་བཞི་ལས། དང་པོ་ནི། རོ་ཤིང་སོགས་རྐང་པ་གཉིས་ཏེ། འདི་ལ་དཔེ་ཕལ་ཆེར་ན། ཞག་གསུམ་བར་དུ་བྱས་ནས་ཀྱང༌། །ཞེས་འབྱུང་བས་སྔོན་ལ་ཚ་སྒྲུབ་བྱས། དེའི་རྒྱུན་ལ་གཤིན་རྗེས་གཟུགས་ཀྱི་ཁོག་པར་འཇུག་པ་དང༌། ཡང་སྐབས་སྐབས་སུ་ཁོག་པ་ནས་བཏོན་ཏེ་ཚ་སྒྲུབ་བྱེད་པའི་ལག་ལེན་རྣམས་བྱུང་ངོ༌། །ཕྱི་མ་ཤིན་ཏུ་མི་ལེགས་ལ། སྔ་མ་ཡང་གཞུང་གི་དགོངས་པ་མ་ཡིན་ཚུལ་གོང་དུ་བཤད་ཟིན། དེ་ལྟར་བྱས་ན་ནུས་པ་འབྱུང་སྲིད་མོད། གཞུང་དོན་མིན་ཡང་སླར་གཟུགས་བརྙན་གྱི་ཁོག་པ་འཇུག་ཕྱིན། ཚ་གྲུབ་བྱེད་རང་བྱེད་འདོད་ན་མེ་ལ་མི་སྲོ་བར་རྫས་ཀྱི་བྱུག་པའམ་ཕྱེ་མའི་ཚ་སྒྲུབ་བྱས་ནས་ལེགས་སོ། །དེས་ན་གཞུང་དཔེ་རྙིང་དག་པ་འགའ་རེ་ན། དེ་ལྟར་ཞག་གསུམ་བྱས་ཀྱང་འགྲུབ། །ཅེས་འབྱུང་བ་ལྟར་ཏེ། ཡང་ན་ཚ་གྲུབ་བྱས་པས་ཀྱང་འགྲུབ། ཡང་ན་གཟུགས་བརྙན་སྦྱོར་བས་འགྲུབ་ཅེས་པའི་དོན་ཡང་ཡིན་ནོ། །འདི་དག་དང་ཕྱོགས་མཚུངས་པར་དཔལ་རྟོག་པ་བདུན་པ་ལས། ཇི་སྐད་དུ། ཐོད་པ་གཉིས་ཀྱི་དབུས་སུ་འཁོར་
ལོ་བཅུག་སྟེ། སྒྱེད་བུ་གསུམ་གྱི་སྟེང་དུ་བཞག་ལ། དུར་ཁྲཽད་ཀྱི་འགལ་བས་མེ་རབ་ཏུ་སྦར་ཏེ། རྐང་པ་གཡོན་པས་མནན་ལ་ཡི་གེ་བཅུ་པོའི་སྔགས་བཟླས་སོ། །དེས་སྐད་ཅིག་ཙམ་གྱིས་ཐེ་ཚོམ་མེད་པར་འཆིའོ། །ཞེས་གསུངས་ཏེ་ཐེ་ཚོམ་མེད་པར་དགྲ་འཆིའོ། །ཞེས་སྤོགས་ཆོག་གཞན་མི་དགོས་པར་གསུངས་ཏེ། འདི་ཉིད་མཐའི་སྤོགས་ཆོག་ཡིན་པའི་ཕྱིར་རོ། །ཚ་གྲུབ་འདིས་ཐེ་ཚོམ་མེད་པར་ཤི་བའི་རྗེས་སུ་སླར་ཡང་གཟུགས་བརྙན་སྦྱོར་བའི་སྤོགས་ཆོག་གི་ཅི་ཞིག་བྱ། གཉིས་པ་ལ་གཟུགས་བརྙན་དངོས་ནི། ལས་ཀྱི་འཆི་བདག་སོགས་རྐང་པ་གཉིས་ཀྱིས་སོ། །རྒྱུ་ནི་གྲོག་མཁར་བདུན་དང་སོགས་རྐང་པ་གསུམ་མོ། །འདིར་གྲོག་མཁར་བདུན་ཅེས་པ་རྟོག་པ་བདུན་པ་རྣམས་ལ་གྲགས་ཆེ་བའི་དབང་དུ་བྱས་ནས་དོན་འགྱུར་གྱི་ཚུལ་གྱིས་ཕྱིས་བཅོས་པར་འདུག །རྙིང་པ་མ་བཅོས་པ་རྣམས་ན། བདུན་པོར་ས་དང་སྣང་མཛད་དང༌། །ཞེས་འབྱུང་བ་ཉིད་གདོད་མའོ། །དེ་ཡང་བོར་བ་ཞེས་པ་ཕུང་བྱེད་ཀྱིས་ཞེས་པའི་དོན་ཡིན་དེ་འདྲ་བདུན་ནོ། །སྣང་མཛད་ཅེས་པ་ལ་ཁ་ཅིག་རྣམ་སྣང་གི་ལྡེར་བཟོ་ཞིག་པའི་ས་ལ་ངོས་འཛིན་པ་ཤིན་ཏུ་འཁྲུལ་ཏེ། དེང་སང་ཕྱིས་འབྱུང་གི་སྔགས་པ་དག་མཆོད་རྟེན་ནག་པོའི་ས་ཟེར་ཀྱིན་རྒྱུག་པ་དང་ཕྱོགས་འདྲ་སྟེ་མི་འཐད་དེ། འདི་རིགས་བྱེད་རང་བྱེད་ན་འཇིག་རྟེན་པའི་ལྡེར་བཟོའི་རོ་ཐོད་ལ་བྱེད་དགོས་ཀྱང་འདིར་དེ་ཡང་དོན་མིན་ནོ། །དེ་ལ་རྣམ་སྣང་ནི་དྲི་ཆེན་གྱི་བརྡ་ཡིན།
ལག་ལེན་མན་ངག་ལ་ནི་མི་ལུད་འཁྱམས་པོ་དང་ཁྱི་ལུད་དང༌། བོང་བུ་དང་རྔ་མོང་གི་སྦངས་རྣམས་སོ། །ལྡེར་བཟོ་དཀྱུས་མ་བྱེད་ན་དེ་དག་བསྲེ་བ་ཡིན། ས་འོག་ཏུ་སྦེད་པ་ལ་རྫས་བསྐུ་བར་བྱས་ན་བཟང་བས་དེའི་ལུགས་ལྟར་ན་རྒྱུ་བསྲེས་ན་སོ་བཏང་བའི་ཚེ་ནུས་པ་ཡལ་འགྲོ་བས། ཐོག་མར་རྫས་ལ་གཟུགས་བརྙན་བཅོས་སོ་བཏང་རྗེས། ཁོག་ནང་དུ་རྫས་དེ་དག་ལན་མང་དུ་བྱུགས་ཤིང་སྐམ་ནས་མཐུག་པོ་ཡོང་བ་བྱེད་དོ། །གཟུགས་བརྙན་སྒྲུབ་ཚུལ་ནི། དེ་ཡི་སྙིང་ཁར་སོགས་ཚིག་གཉིས་ཏེ། སྐབས་འདིར་འཁོར་ལོ་ལ་བྲིས་སྔགས་བཟླས་ཏེ་ཞེས་འབྱུང་བས་བོད་ཀྱི་དཔལ་འཛིན་འཕྲེང་སྔགས་བཟླས་ན་ལས་འགྱངས་འགྲོ་བར་འདོད་པ་རྗེན་རྒྱག་ཏུ་བཀག་པ་ཡིན་ནོ། །གསུམ་པ་མནན་པ་ནི་མར་ཚེས་སོགས་རྐང་པ་གཉིས་ཏེ་གཟུགས་བརྙན་སྦྱོར་བའི་འཕྲོས་ཀྱང་ཡིན། གའུ་རང་ཉིད་མནན་གཏད་དུ་བྱེད་པའང་བསྟན་ནོ། །བཞི་པ་ལས་འགྲུབ་པར་བསྟན་པ་ནི། དེ་ལྟར་སོགས་རྐང་པ་གསུམ་སྟེ། རང་གི་བདུད་ཅེས་པ་ནི་བསྒྲུབ་བྱ་ཁོང་རང་གི་ལུས་དང་གྲིབ་མ་བཞིན་དུ་འགྲོགས་པའི་གཤིན་རྗེའི་དབང་དུ་འགྱུར་བ་སྟེ། དེའི་མོད་ལ་འཆི་བའོ། །དེ་ཡན་ཆད་ཀྱིས་ཡབ་རྐྱང་དུ་སྒྲུབ་པ་གསལ་བར་བཤད་དེ། འདིའི་རིག་པ་ཡུམ་ལ་བསྒྲེས་པས་ཡུམ་རྐྱང་དུ་སྒྲུབ་པའང་ཤུགས་ལ་བསྟན་ནོ། །གཉིས་པ་ཡབ་ཡུམ་སྦྲགས་ཏེ་སྒྲུབ་པ་ལ། གནས་དང་ལྷ་ངོས་བཟུང་བ་དེ་ཡུམ་གྱི་སྐུའི་རྣམ་འགྱུར་བཤད་པ། འཁོར་ལོ་འབྲི་བའི་ཚུལ། འཁོར་ལོའི་བཅའ་ཐབས། འཁོར་ལོ་སྒྲུབ་
པའི་ཚུལ། མནན་པས་འགྲུབ་པར་བསྟན་པ་རྣམས་སོ། །དང་པོ་ནི་འཆི་བ་ཡི་དྭགས་རྒྱལ་པོ་ནི། །ཞེས་པ་ནས་ཙ་མུནྚི་ཞེས་པའི་བར་རོ། །དེ་ལ་གནས་ནི་རི་ནག་པོ་དགུའི་ཕ་མཐའ་ནི་ཕ་རོལ་ཏེ་བྱང་ཕྱོགས་ཡིན་པ་དང༌། སྤོས་ངད་ལྡན་པའི་རི་བོའི་ཚུ་རོལ་ཏེ་ལྷོ་ཕྱོགས་ཀྱང་ཡིན་པའོ། །རི་དགུ་དང་སྤོས་ངད་ལྡན་གྱི་རིའི་བར་དེ་ན་མཚོ་མ་དྲོས་པ་ཡོད་དེ། དེ་ཡང་མ་དྲོས་མཚོ་ཡི་འདྲེ་དཀྱིལ་ན་ཞེས་པ་དཔེ་ཕལ་ཆེར་ན་འདུག །འདྲེ་མིག་ན་ཞེས་པ་ལ་ལ་ན་འདུག་ཀྱང་དོན་གཅིག་སྟེ། བོད་ཀྱི་ཡུལ་ཕྱོགས་འགའ་ཞིག་གི་སྐད་རྙིང་པ་ལ། མཚོ་རྫིང་གང་དང་གང་གིས་ཆུ་སྐྱེ་ཁུང་གི་ཆུ་མིག་ལ་འདྲེ་མིག་ཟེར་རོ། །གནས་དེ་ན་ལྷ་མོ་ཙ་མུནྚི་གནས་ལ། དེའི་འོག་དཔག་ཚད་ལྔ་བརྒྱ་ན་གཤིན་རྗེའི་རྒྱལ་པོ་བཞུགས་ཏེ་དེ་དག་ནི་ཕྱིའི་གནས་ཡིན་ལ། ནང་གི་གནས་ནི་འགྲོ་བ་མི་སོགས་རྣམས་ཀྱི་ལྟག་པའི་མདུན་སྒོ་ལ་གནས་པས་རུས་ཚིགས་ལ་གཤིན་རྗེའི་ཞལ་རང་གྲུབ་འབྱུང་བའང་དེའི་རྟེན་འབྲེལ་གྱི་གནད་ཀ་ཡིན་པ། ཡབ་གཙོ་ཆེ་བར་འཆད་ཀྱང་ཡབ་ཡུམ་གཉིས་ཀར་གྱི་གནས་སོ། །ལྷ་ནི་འཆི་བདག་ཡི་དྭགས་ཞེས་པས་ཡབ་དང་དེའི་ཡུམ་ནི་ཙནྚི་ཞེས་པས་བསྟན། ཙ་མུནྚཱི་དང་ཙ་རྩི་ཀཱ་ནི་དོན་གཅིག་མིང་གི་རྣམ་གྲངས་ཏེ་སྲིན་པོའི་དབང་པོ་བདེན་བྲལ་གྱི་སྲིང་མོའོ། །དེས་དོན་ཚན་དང་པོ་སོང་ངོ༌། །དེའི་རྗེས་སུ་སྐུ་གཟུགས་དང་འཁོར་ལོ་འབྲི་ཚུལ་དང༌། འཁོར་ལོའི་བཅའ་གཞི་རྣམས་འཁྲུག་ཅན་དུ་འབྱུང་ངོ༌། །ཇི་ལྟར་ཞེ་ན་འདི་རབས་
ཆད་ཅེས་སོགས་རྐང་པ་གཉིས་དང༌། མིའི་ཐོད་པ་སོགས་བར་གྱི་རྐང་པ་གསུམ་ནི། འོག་ཏུ་འཁོར་ལོ་གཉིས་ཀྱི་བར་དུ་ཡང་གང་ལ་བྱ་བའི་མིང་གཟུགས་གཞུག་ཅེས་པའི་རྗེས་ལ་སྦྲེལ་རྒྱུ་ཡིན་ནོ། །གཉིས་པ་ཡུམ་གྱི་སྐུའི་རྣམ་འགྱུར་འབྲི་ཚུལ་ནི། རོ་རས་ངག་ལ་གཟུགས་བྲི་བ། །ཞེས་པ་ནས་གཡོན་ཐོད་པ༌། ཞེས་པའི་བར་དུ་ཚིག་བདུན་ནོ། །འདིར་དངོས་སུ་ཞལ་དབྱེའི་ཨག་རྩའི་ཕྱོགས་སུ་སྦྱོར་རྒྱུའི་བྲིས་སྐུ་བསྟན་ཀྱང་ཤུགས་ལ་མདུན་བསྐྱེད་དང་དམ་ཚིག་གི་བྲིས་སྐུའི་ཐང་ག་དང༌། གང་གི་ལྟོ་བར་འཁོར་ལོ་འབྲི་རྒྱུའི་གཟུགས་དང་ལྟག་པའི་རུས་ཚིགས་ལ་གཤིན་རྗེ་མོའི་ཞལ་དབྱེ་ཚུལ་རྣམས་ཀྱང་ཐུན་མོང་དུ་བསྟན་པ་ཡིན་ནོ། །འདིར་ཞལ་དང་ཕྱག་ཞབས་སྔོན་བཞིན་བྲི། །ཞེས་པའི་སྔོན་གྱི་ཡབ་ཀྱི་སྐབས་ལ་ཟེར་བས་ཡབ་མ་ཧེའི་ཞལ་ཅན་ཡིན་པ་གཞིར་བཞག་ཏུ་བྱས་ནས། གཡུང་སྟོན་རྡོ་རྗེ་དཔལ་ནི་ཡུམ་ཡང་མ་ཧེའི་ཞལ་དུ་འདོད་ཅེས་དེ་འདྲའི་སྐུ་འབག་བཞེངས་པའི་བབ་ཆོལ་བྱས་སོ། །ཚིག་དེས་ནི་ཞལ་གཅིག་པ་དང་ཕྱག་ཞབས་ངག་གཉིས་པར་སྟོན་པ་ཀ་ཡིན། ཞལ་རས་ཀྱི་འཇིགས་ཚུལ་དང་མཆེ་གཙིགས་གོང་དུ་གསལ་ཡང་འདིར་མེད་པས་དེ་ལའང་ཁ་འཕངས་པ་ཡིན། འོན་ཀྱང་ཚིག་ཟུར་གྱི་ནུས་པ་ལ་འདི་ལྷ་ཞལ་ཡིན་པས་གོང་མ་ཡང་ལྷ་ཞལ་དུ་བསྟན་ཟེར་ན་མི་འགལ་མོད། ལར་མན་ངག་གི་རྗེས་སུ་འབྲང་གི་རྟོག་དཔྱོད་ཀྱི་རྗེས་སུ་མི་འབྲང་ངོ༌། །འདིར་མིག་གསུམ་ཁྲོ་གཉེར་ཅན་དུ་གསུངས་པས་ལྷ་ཞལ་དུ་གསལ། གོང་དུ་གསལ་ཁ་མེད་པས་བླ་མའི་
མན་ངག་ལ་ཞིང་སྐྱོང་མགོན་པོའི་དབང་དུ་བྱས་ནས། གདོང་བརྙན་དུ་མཛད་པར་མ་ཟད་རྟོག་པ་འདིའི་དགོངས་པ་ཡང་མ་ཧེའི་ཞལ་ལོ། །ཞེས་ཁོ་བོ་ཅག་གི་བླ་མ་རྣམས་གསུངས་ལ། གཉིས་ཀ་ལྟར་ཡང་མི་འགལ་ལོ་སྙམ་བདག་སེམས་སོ། །རྭ་བའི་ཡིག་རྙིང་ན། གསུས་ཆེན་དུད་འགྲོ་ཞེས་པ་གླང་པོར་འདོད། སྦ་པ་ཕྱི་མ་དང་གཞན་ཐམས་ཅད་གསུས་ཆེ་ཞེས་པ་ཡར་གཅོད་པར་མཐུན། དུད་འགྲོའི་གོས་ལ། རྒྱ་སྟོན་སྟག་ཤམ་དུ་བཞེད། གཞན་རྣམས་བ་གླང་གི་ལྤགས་པ་ཟེར་བ་ཡང་མི་འགལ་ལོ། །དེ་ལྟར་ན་ཡང་གཞུང་གི་དོན་ནི་གསུས་ཆེ་ཞེས་པ་ཡར་སྦྱོར་རྒྱུ་ཡིན་ཏེ། འོན་ཀྱང་སྤྱིར་ཁྲོ་མོ་སྤྱི་མཚུངས་ཀྱི་ལུས་སྦོམ་པའི་དོན་ཙམ་ཡིན་གྱི། འདི་ལ་དགོས་ཆོས་སུ་ལྟོ་བ་ཧ་ཅང་ཆེ་གྲགས་པ་དགོས་པ་མིན་ནོ། །ཕྱིས་ཀྱི་དཔེ་ཕལ་ཆེར་ལས་གསུས་ཆེ་དུད་འགྲོའི་གོས་གྱོན་ཅིང་ཞེས་འབྱུང་བ་ཅུང་ཟད་མ་དག །དཔེ་རྙིང་དག་པ་ན། དུར་ཁྲོད་གོས་གྱོན་མ་ཞེས་འབྱུང་བ་དག་པར་སྣང་བས་ལྤགས་གོས་ཐམས་ཅད་ཀྱང་དུར་ཁྲོད་ཀྱི་གོས་ཡིན་ལ་དེར་མ་ཟད་རོ་རས་ལ་སོགས་པ་ཡང་ངོ༌། །དེས་ན་འདིར་སྤྱི་ཙམ་བསྟན་པས་བྱེ་བྲག་སོ་སོ་ཡང་མི་འགལ་ཏེ་མན་ངག་མ་ནོར་བའི་རྗེས་སུ་འབྲང་བར་བྱའོ། །ད་ལྟའི་དཔེ་ཕལ་ཆེར་ན་གཡས་ན་ཏྲི་ཤུལ་ལ་གཡོན་པ་ཡང༌། མིའི་ཐོད་པ་དག་དང་སྦྱར་ཞེས་ཚིག་ཕྱྀ་མ་ཕྱག་མཚན་སྟོན་བྱེད་དུ་སྦྱོར་ཡང༌། ཡི་གེ་མ་དག་པ་སྟེ། དཔེ་རྙིང་ཁུངས་ལྡན་ན་གཡས་ན་ཏྲི་
ཤུལ་གཡོན་ཐོད་པ་ཞེས་འབྱུང༌། ཚིག་ཕྱི་མ་ནི་ལྷ་མོའི་སྐུ་རས་ལ་བྲིས་པ་དེ་ཞལ་དབྱེ་ལ་སྦྱོར་བའི་དོན་ཡིན་ནོ། །གཉིས་པ་འཁོར་ལོ་བྲི་ལ་བ་ནི། དེ་ལ་འཆི་བདག་འཁོར་ལོ་ནི། །ཞེས་པ་ནས། ནཱ་ཤ་ཡ་ཧཱུཾ་ཕཊ་ཀྱི་བར་ཏེ་སྔོན་བཞིན་དུ་ཞེས་པ་ནི་སྦྲགས་སྒྲུབ་ཀྱི་སྐབས་འདིར་ཡབ་ཡུམ་གྱི་འཁོར་ལོ་ཁ་སྦྱོར་དགོས་པས། ཡབ་ཀྱི་འཁོར་ལོ་སྔོན་བཞིན་འབྲི་ཞེས་པའོ། །འཆི་བདག་ཚུལ་དུ་འབྲི་ཞེས་པ་ནི་འཁོར་ལོ་དེ་ལྷ་མོའི་ལྟོ་བར་ཆུད་པར་འབྲི་བ་སྟེ་བྲིས་གཞིའི་ལྷ་གོང་དུ་མ་བཤད་པས། འདིའི་ཡབ་ཀྱི་འཁོར་ལོ་ལ་ཡང་ཁ་འགེངས་པའོ། །གཞན་རྣམས་གོ་སླའོ། །བཞི་པ་འཁོར་ལོ་བཅའ་ཐབས་ལ། སྣོད་ཀྱི་ཁྱད་པར། ལིང་ག་འཇུག་ཚུལ། འཁོར་ལོ་གཞུག་ཚུལ་ཏེ་གསུམ་ལས། དང་པོ་ལ་ཐོད་པ་ཁ་སྦྱོར་ནི། རབ་ཆད་སོགས་ཚིག་གཉིས་ནི་ཐོད་པའི་ནང་དུ་དུག་རག་གིས་ཡ་ཡིག་རེ་རེ་འབྲི་བ་དེ་བསྟན། མི་ཡི་ཐོད་པ་དག་དང་སྦྱར་ཅེས་པས་ཐོད་བཾ་གྱི་ཞལ་དབྱེ་བསྟན་ནོ། །གཉིས་པ་ནི་འཁོར་ལོ་གཉིས་ཀྱི་ཞེས་སོགས་ཚིག་གཉིས་ཏེ་བྲིས་ལིང་འཇུག་ཚུལ་ལོ། །གསུམ་པ་ནི་ཡབ་ཡུམ་འཁོར་ལོ་སོགས་ཚིག་ལྔ་སྟེ། འཁོར་ལོ་ཐོད་པར་གཞུག་པ་དང༌། རོ་སྐྲ་དང་མི་རྒྱུས་ཀྱིས་སྡོམ་པ་དང༌། རྒྱུ་མས་གཟུང་ཐག་བྱེད་པ་བསྟན། མི་རྒྱུས་ཞེས་པ་ལན་གཉིས་ལྡབ་པ་ནི། འཁོར་ལོ་དང་ཐོད་པ་གཉིས་ལ་སོ་སོར་གོ་བའོ། །མིའི་རྒྱུས་པས་སོགས་ཚིག་རྐང་གཉིས་ཀྱིས་འཁོར་ལོ་ཐོད་ཚལ་གྱི་བར་དུ་
བཅུག་སྟེ། ཕྱི་ནས་སྡོམ་པ་བསྟན་ཏོ། །ལྔ་པ་འཁོར་ལོ་གྲུབ་ཚུལ་ནི། སྔགས་དང་ཆོ་ག་གཉིས་ལས། དང་པོ་ནི། ཨོཾ་ཧྲིཿསོགས་སོ། །གཉིས་པ་ནི། བླ་མས་འཆི་བདག་སམ་བྱས་ཏེ་སོགས་ཚིག་ལྔ་དང༌། གཙོ་དང་གཟུངས་ཀྱི་གཟུང་ནས་ཀྱང༌། །ཞེས་སོགས་ཚིག་རྐང་བཞི་པ་ཡིན་ཏེ། དེ་ཡང་བླ་མ་ཞེས་པ་སྒྲུབ་པ་པོ་ཉིད་ཡབ་ཀྱི་སྔགས་རྣམས་བཟླ། བུད་མེད་ནུས་པ་འགྲུབ་པའི་གཟུང་མ་ཡོད་ན་དེས་གོས་སྔོན་པོ་གྱོན་ཏེ། ཡུམ་གྱི་སྔགས་འདོན་ཞེས་ཏེ་དེ་མེད་ན་ལས་མཁན་ཏེ་ལས་ཀྱི་རྡོ་རྗེ་དཔའ་བོས་ཀྱང་སྒྲུབ་ཏུ་རུང་ངོ་ཞེས་གསུངས་ནས། མུ་ཁྱུད་ཀྱི་འཕྲེང་སྔགས་གོང་དུ་བཤད་ཟིན་པས་འདིར་ཡུམ་གྱི་སྙིང་པོ་གསུངས་སོ། །གཟུང་ཐག་ནས་གཙོ་བོ་སྟེ་སྒྲུབ་པ་པོ་དང་གཟུངས་མ་གཉིས་ཀར་གྱིས་བཟུང་ཞིང་བཟླ་ཞེས་པ་ལ། མཎྜལ་ནི་དཀྱིལ་འཁོར་ཏེ་འབྲུབ་ཁུང་ངོ༌། །སྟེང་འོག་གི་འཁོར་ལོ་གཉིས་ལ་དམིགས་ནས་ཡབ་ཀྱི་སྔགས་སྒྲུབ་པོ་དང་ཡུམ་གྱི་སྔགས་གཟུང་མས་འབུམ་ཕྲག་གཅིག་བཟླས་ན་ལས་འགྲུབ་པར་འགྱུར་རོ། །ཞེས་པའོ། །དྲུག་པ་མནན་པས་འགྲུབ་པར་བསྟན་པ་ནི། དེ་ལྟར་བཟླས་པ་སོགས་ཤློ་ཀ་གཅིག་སྟེ། ལྷ་དང་ཀླུ་སོགས་སྡེ་བརྒྱད་མཐུ་ཆེན་རྣམས་ཀྱང་སྒྲོལ་བར་ནུས་ན་ཕྲ་མོ་མི་རྣམས་ལྟ་ཅི་སྨོས་ཞེས་པའོ། །རྩ་བའི་གསུམ་པ་ཐུན་མོང་མ་ཡིན་པའི་དམ་ཚིག་བསྟན་པ་ནི། དེ་ཡི་སྒྲུབ་པའི་ཞེས་པ་ནས། གཞན་མི་བསྟན་ཅེས་པའི་བར་ཤློ་ཀ་གཉིས་ཏེ། འདིར་ཐུན་མོང་མ་ཡིན་
པའི་དམ་ཚིག་གསུམ་སྟེ། བཅའ་གཞི་ཡོ་བྱད་བཀོད་པ་ཤིན་ཏུ་གསང་བ་དང༌། མ་རུང་པ་ལ་མངོན་སྤྱོད་ངེས་པར་བྱ་བ་དང༌། མན་ངག་ཤིན་ཏུ་གསང་བའོ། །དང་པོ་ནི་དེའི་སྒྲུབ་པའི་གནས་ཞེས་སོགས་ཏེ། གཞན་གྱིས་ཚོར་རིག་མེད་པ་དབེན་པར་བྱེད་དགོས་པའོ། །གཉིས་པ་ནི་བླ་མ་སོགས་ཚིག་རྐང་ལྔའོ། །འདི་ལ་དཔེ་འགའ་རེ་ལས། བླ་མ་ཕ་མ་མཆོད་པའི་གནས་ཞེས་པ་དང༌། གང་བྱུང་ཡང་ནི་དགྲལ་བར་བྱ། །ཞེས་པའི་བར་གྱི་ཚིག །དེ་ལ་གནོད་བྱེད་དགྲ་བོ་རྣམས། །ཞེས་པ་ཆད་པས་དོན་ཕྱིན་ཅི་ལོག་ཏུ་ཤིན་ཏུ་ཁྱམས་ཏེ། དགྲ་རུ་ལངས་ན་བླ་མ་དང་ཕ་མ་ལ་ཡང་མངོན་སྤྱོད་བྱེད་དགོས་ཟེར་བར་སོང༌། སྔོན་གྱི་བླུན་པོ་འགའ་ཞིག་དེ་ཀ་ཁས་བླངས་ནས་དགོས་ཆོས་ཐུན་མོང་མ་ཡིན་པ་ཡིན་ཟེར་ནས་ཆོས་ལོག་སྟོན་ནོ། །འབྲི་ཁུང་དཔལ་འཛིན་ཡང་དེ་འདྲ་དངོས་སུ་ག་ལ་ཡིན་ཏེ། ལ་དོར་བའི་ཚིག་ཡིན་པས་བླ་མ་ཕ་མ་སོགས་ཀྱང་སྒྲུབ་ཁང་དུ་མི་གཏོང་བའི་ཚིག་ཏུ་འཆད་དེ། དཔེ་མ་དག་པ་ཁོ་ན་ཀློགས་པའི་སྐྱོན་དེར་འདུག །ཡང་དཔེ་རྙིང་འགའ་ཞིག་ལས། བླ་མ་ཕ་མ་མཆོད་པ་ཡིན། །གང་བྱུང་ཡང་ནི་དགྲལ་བར་བྱ། །ཞེས་པ་འདུག་ཅིང་རྭ་ལུགས་ཀྱི་ཡིག་རྙིང་འགའ་ལས་དེ་ལྟར་ལ་འབྲུ་བསྣན་འདུགདེ་ནི་དོན་ལ་སྐྱོན་མེད་ཀྱང༌། གང་བྱུང་ཞེས་པའི་ཚིག་ལ་འབྲེལ་མཚམས་མ་བྱུང་ཞིང་ཤློ་ཀའི་རྐང་གྲངས་ཀྱང་མ་འགྲིག་གོ །དེས་ན་ལྷ་དང་བླ་མ་མཆོད་པའི་གནས། དེ་ལ་གནོད་བྱེད་དགྲ་བོ་རྣམས། །གང་བྱུང་ཡང་ནི་དགྲལ་
བར་བྱ། །ཞེས་འདོན་རྒྱུ་ཡིན། གཉོས་པ་དང་ཞང་པའི་དཔེ་རྙིང་དག་པ་རྣམས་ན་དེ་བཞིན་དུ་སྣང་ངོ༌། །མཆོད་པའི་གནས་ནི་དཀོན་མཆོག་གསུམ་གྱི་རྟེན་དང་ཆོས་ཀྱི་རྒྱུན་དང་དགེ་འདུན་ནོ། །སྤྱིར་བསྒྲལ་བའི་ཞིང་དུ་འགྲོ་བ་རྣམ་གྲངས་མང་ཡང༌། སྐབས་འདིར་བླ་མ་དཀོན་མཆོག་གི་སྐུ་དགྲ་སྒྲོལ་བ་ནི་དམ་ཚིག་དང་སྟེ་ནུས་པ་དང་ལྡན་པས་སོ། །གསུམ་པ་ནི་གསང་བ་བྱ་སྟེ་ཞེས་སོ། །གླེགས་བམ་གྱི་མཐར་དཔེ་རྙིང་ལ་ལ་ནི་འཆི་བདག་གི་སྒྲུབ་པ་རྫོགས་སོ་ཞེས་པ་ལས་མེད། བར་སྐབས་ནས་བཟུང་བའི་ཕྱིས་ཀྱིས་དཔེ་ཕལ་ཆེ་བ་ན། ལས་ཀྱི་གཤིན་རྗེ་ཆོས་ཀྱི་རྒྱལ་པོའི་སྒྲུབ་ཐབས་སློབ་དཔོན་ལ་ལི་ཏ་བཛྲ་གྱིས་མཛད་པ་རྫོགས་སོ་ཟེར་བ་ཡོད། དཔེ་རྙིང་བ་ལ་ལ་ན་དེ་དང་འདྲ་བ་ལས་ལ་ལི་ཏ་བཛྲ་གྱིས་ཕྱུང་ནས་ཟེར་བའང་འདུག །དཔེ་འགའ་ཞིག་ལས་བཅོམ་ལྡན་འདས་འཇམ་པའི་རྡོ་རྗེས་གསུངས་པ་རྫོགས་སོ་ཟེར་བའང་ཡོད། །ལ་ལི་ཏས་མཛད་ཟེར་བ་ཀུན་ལ་བལ་པོ་ཐུགས་རྗེ་ཆེན་པོ་རྭ་ལོས་བསྒྱུར་ཟེར་བ་འགྱུར་བྱང་དེ་ལ་བྲིས་འདུག་དེ་ཡང་གཞུང་འདི་ལ་ལི་ཏ་བཛྲ་གྱིས་བཀའ་རྩོམ་མ་ཡིན། གཤིན་རྗེ་གཤེད་དམ་ལས་གཤིན་ཉིད་ཀྱི་རྒྱུད་རྒྱས་པ་གཅིག་ནས་དུམ་བུ་ལ་སོགས་སུ་བཀོལ་བར་ཡང་གྲགས་ཤིང་དོན་ལའང་གནས་ཏེ་ངེས་སུ་འདུག །དེས་ན་བཅོམ་ལྡན་འདས་འཇམ་པའི་རྡོ་རྗེས་གསུངས་པ་རྫོགས་སོ་ཞེས་འབྱུང་བ་དེ་འཐད་པར་མངོན་ཅིང༌། ལ་ལི་ཏ་བཛྲ་གྱིས་ཕྱུངས་ནས་མཛད་པའོ། །ཞེས་པའང་མི་འགལ་ཏེ།
རྒྱུད་རྒྱས་པའི་ནང་ནས་སློབ་དཔོན་དེས་བཀོད་པ་ཡིན། ཅེས་པར་འགྲོ་བས་སོ། །འདི་ལ་ཚིག་རིགས་མི་གཅིག་པ་ཕྲན་བུ་ཡོད་པ་ནི། ཡི་གེ་པའི་བྱེད་པ་ཙམ་དུ་འདུག །འགྱུར་ནི་གཅིག་ཁོ་ནར་མངོན་ཅིང་དེ་ཡང་ངག་རྒྱུན་གཅིག་ལ་རོང་ཟོམ་གྱིས་བསྒྱུར་བ་ཡིན་ནོ། །ཞེས་ཟེར་བ་བདེན་པར་མངོན་ནོ། ཁ་ཅིག་སྔ་དར་ཕྱི་དར་གྱི་བར་ལ་འགྱུར་བ་ཡིན་ནམ་ཡང་ཟེར་རོ། །གང་ལྟར་ཡང་ཕྱི་དར་གྱི་ལོ་ཙཱ་བ་གཤིན་རྗེ་མཁན་པོ་ཀུན་གྱི་ཉན་བཤད་དང་ཕྱག་ལེན་དུ་མཛད་དོ། །ཕྱིས་ཐམས་ཅད་ན་ཆོས་རྒྱལ་གྱི་སྐོར་འདི་དར་རྒྱས་ཆེ་བར་འདུག་མོད། ལོ་ཙཱ་བ་གོ་རུབ་ཆོས་ཤེས་མཛད་པའི་དགྲ་ནག་གི་འཁོར་ལོའི་དོན་བཤད་པ་ནས། བཅུ་གསུམ་པ་མ་བྱུང་ཞིང་དེ་ལ་བརྒྱུད་པ་འདྲ་མིན་སྣ་ཚོགས་ནས་བཀའ་གཏད་ཀྱི་རིམ་པ་བྱུང་མོད་ཀྱང་གདམས་ངག་ཆེ་རྒྱུ་མི་འདུག །ཆོས་རྒྱལ་འདི་ལ་ཆོས་སྐྱོང་གི་གཙོ་བོར་བྱེད་མཁན་ཁྱབ་ཆེ་ཤོས་རང་དེ་དག་གི་ཕྱོགས་པ་ཡིན་ཀྱང་བླ་མ་དབུ་མ་པའི་ཉེ་རྒྱུད་དུ་བཞེངས་པ་ལས་རྟོག་པ་འདི་ལ་བརྟེན་པར་མི་སྣང༌། གཞན་ཡང་སོ་སོ་ལ་རིགས་མི་གཅིག་པ་མང་པོ་འདུག་ཀྱང་གདམས་ངག་ཆེ་ཆེ་མི་འདྲ་ཞིང༌། རྭ་ལུགས་སུ་རློམ་པ་ཕྱིས་འབྱུང་རྣམས་ཀྱང་དཔེ་བུམ་ན་ཡོད་པའི་ཆོས་རྒྱལ་གྱི་རྟོག་པ་དང་དེའི་གསལ་བྱེད་ཚོ་ལ་ལུང་རྒྱུན་ཙམ་མ་གཏོགས། འདིའི་ལག་ལེན་ཤེས་པ་དཀོན་པར་བྱུང༌། ཐ་ན་ཇི་ལྟར་ཡིན་གྱི་དཔྱད་པ་ཞུགས་པའང་ཆེར་མི་འདུག་པ་དང༌། གཞུང་འདི་ལ་བརྡ་འབྱོར་དཀའ་བའི་ཚིག་རིགས་ཅུང་ཟད་ཡོད་པ་རྣམས་ལ་སྔ་མ་ཚོས་ཀྱང་ཟོལ་བྱས་གདའ། དེང་སང་
ནི་གཞན་གྱིས་གོ་བ་མ་མཐོང་ཞིང་མ་ཐོས། སྔར་འདི་ལ་འགྲེལ་ཊཱིཀ་ཀྱང་མ་མཐོང་ལ་མན་ངག་གི་ཡི་གེ་གསལ་པོའང་མི་འདུག་གོ །འདིར་མན་ངག་ཞལ་རྒྱུན་དང་ཕྱག་ལེན་མཛུབ་ཁྲིད་ཐོབ་ཅིང་ཡིག་སྣ་སྣ་ཚོགས་ལ་དཔྱད་པའང་ཞུགས། དཔྱད་མཐར་དོགས་པའང་མཆོད་པ་ལས། རྭ་ལུགས་ཀྱི་ཡིག་རྙིང་རྭ་ཕྱི་མས་མཛད་པར་གྲགས་པ་ཉུང་ངུ་འདི་ནི་ཕྲན་ཚེགས་མ་གཏོགས་གཞན་ཤིན་ཏུ་དག་པར་མཐོང་ནས་གཙོ་བོར་དེ་ལ་གཞུང་ཤིང་བྱས་ཏེ། རྒྱལ་ཁམས་པ་ཏཱ་ར་ནཱ་ཐས་མན་ངག་མི་ཤེས་པ་རྣམས་ལ། ཕན་སེམས་ཀྱིས་འདི་སྦྱར་བའོ། །འདི་ཤིན་ཏུ་བཀའ་དམ་པར་བྱའོ།། །།གཅིག་ཞུས།། མང་ག་ལཾ།། རྗེ་བཙུན་པད་དཀར་འཆང་བའི་རྣམ་འཕྲུལ་མགོན། །སྨྲ་བའི་དབང་ཕྱུག་ཡོན་ཏན་བཟང་པོ་ཡིས། །སྤྱི་ལོ་ཅིག་སྟོང་དགུ་བརྒྱ་གོ་དྲུག་ལོ། །བསྟན་པ་སྤྱི་དང་ཁྱད་པར་ཇོ་ནང་བའི། །བཤད་སྒྲུབ་སླར་གསོའི་བྱ་བ་སྤེལ་བའི་ཆེད། །འཇམ་མགོན་ཏཱ་ར་ནཱ་ཐའི་གསུང་འབུམ་གྱི། །མི་ཟད་ཆོས་སྦྱིན་དཔལ་ལྡན་ཛམ་ཐང་གི། །གཙང་བའི་ཆོས་གྲྭ་སྐྲུན་པའི་དགེ་བ་ཡིས། །མ་གྱུར་འགྲོ་ལ་གནས་སྐབས་བདེ་བ་དང་། །མཐར་ཐུག་གཏན་བདེ་བླ་མེད་བྱང་ཆུབ་མཆོག །མྱུར་དུ་ཐོག་པའི་དཔུང་གཉེན་དམ་པ་རུ། །གཞི་དབྱིངས་མཆོག་གསུམ་མདམ་པས་ཤིས་པ་རྩོལ། །འདི་ཡང་བསོད་ནམས་དཔལ་གྱིས་བྲིས་པ་དགེའོ། །