སྲོག་ཆགས་ཀྱི་བསྟན་བཅོས་ངོ་མཚར་སྒྱུ་མའི་རོལ་རྩེད་ཡིད་འོང་པདྨ་དཀར་པོ་ཞེས་བྱ་བ་བྱིས་པ་དགའ་བར་བྱེད་པ།
སྲོག་ཆགས་ཀྱི་བསྟན་བཅོས་ངོ་མཚར་སྒྱུ་མའི་རོལ་རྩེད་ཡིད་འོང་པདྨ་དཀར་པོ་ཞེས་བྱ་བ་བྱིས་པ་དགའ་བར་བྱེད་པ་བཞུགས་སོ། །
སྲོག་ཆགས་ཀྱི་བསྟན་བཅོས་ངོ་མཚར་སྒྱུ་མའི་རོལ་རྩེད་ཡིད་འོང་པདྨ་དཀར་པོ་ཞེས་བྱ་བ། ཐམས་ཅད་མཁྱེན་པ་ལ་ཕྱག་འཚལ་ལོ། །གང་གིས་མཚན་ཙམ་དྲན་པས་ཀྱང་ནི་སྲིད་དང་ངན་འགྲོའི་འཇིགས་པ་ཀུན་སྐྱོབས་ཤིང་། ཡིད་བཞིན་ནོར་ལྟར་དགོས་འདོད་རེ་བ་མ་ལུས་སྐོངས་མཛད་རྗེ་བཙུན་ཐུགས་རྗེ་ཅན། །དཔལ་མགོན་བླ་མ་ཞེས་གྲགས་སྙན་པའི་རྔ་སྒྲ་སྲིད་པ་གསུམ་ན་ཆེར་གྲགས་པ། །གང་དེའི་ཞབས་ཀྱི་པདྨོ་དྲི་མེད་ཉིད་ལ་རྟག་ཏུ་གུས་པས་བཏུད་བྱའོ།། ༈ །།སྲིད་པའི་ངང་ཚུལ་རྨི་ལམ་སྒྱུ་མ་འདི། །ཨ་འཐད་རྟག་པར་འཛིན་པའི་བློ་ཅན་ལ་
དཔེ་ཡི་སྒོ་ནས་མི་རྟག་འགྱུར་བའི་ཚུལ། །ཅུང་ཟད་བཤད་ཀྱི་གུས་པས་ཉན་པར་བྱོས། །དེ་ཡང་འདི་སྐད་ཐོས་ཏེ། སྔོན་འདས་པའི་དུས་ན། ཡུལ་བདེ་བ་བཀོད་པ་ཞེས་བྱ་བ་མཛེས་ཤིང་ཉམས་དགའ་བ། ཁོད་སྙོམས་ལག་མཐིལ་ལྟར་འཇམ་ཞིང་འདོད་ཡོན་གྱི་འབྱོར་པ་དུ་མས་ཉེ་བར་སྤྲས་པའི་ཡུལ་ཞིག་ན། ནགས་ཚལ་ཆེན་པོ་བཀྲ་ཤིས་མཛེས་ལྡན་ཞེས་བྱ་བ། ཤིང་ལྗོན་པ་རབ་ཏུ་མང་པོ་དག་གིས་ནི་བསྐོར། ནེའུ་སིང་སྔོན་པོ་རྨ་བྱའི་མགྲིན་པ་ལྟ་བུ་ཡིད་དུ་འོང་བས་ནི་ཀུན་ཏུ་ཁེབས།
གཙང་ཞིང་བསིལ་བའི་ཆུ་མིག་དག་ནི་ལྷུང་ལྷུང་གི་སྒྲ་འབྱིན་ཅིང་གཡས་སྐོར་དུ་འབབ་པ། མདོར་ན་དགེ་སྦྱོང་བསམ་གཏན་པ་དག་གི་བསྟི་གནས་ཀྱི་མཆོག་དམ་པར་གྱུར་པ་ཅིག་ཏུ། བྱ་དང་རི་དྭགས་ཀྱི་ཚོགས་དཔག་ཏུ་མེད་པ་གནས་པ་རྣམས་ཀྱི་ནང་ནས། བྱའི་རྒྱལ་པོ་ཁུ་ཡུག་གཡུའི་གོས་ཅན་ཞེས་བྱ་བ། །རང་བཞིན་གྱི་ངང་ཚུལ་བཟང་ཞིང་སྙིང་རྗེ་ཆེ་བ། ཞི་ཞིང་དུལ་ལ་གཏོང་ཕོད་ཆེ་བ། ཚུལ་ཁྲིམས་ལ་རྟག་ཏུ་གནས་ཤིང་བཟོད་སྲན་ཆེ་བ། ཆོས་ཕྱོགས་ཀྱི་བྱ་བ་ལ་ཉིན་མཚན་གཡེལ་མེད་དུ་རྩོན་ཞིང་ཡང་དག་པའི་བསམ་གཏན་ལ་རྩེ་གཅིག་ཏུ་གཞོལ་བའི་མཐུས། ཤེས་རབ་ཀྱི་སྟོབས་ཕུན་སུམ་ཚོགས་པ་དང་ལྡན་པའི་དགེ་བའི་བཤེས་གཉེན་དམ་པ་དེ་ཉིད་ལ། རང་གི་རིགས་མཐུན་གྱི་འཁོར་འདབ་ཆགས་ཀྱི་ཚོགས་དཔག་ཏུ་མེད་པས་ཡོངས་སུ་བསྐོར་ནས། རང་རང་སྐད་ཀྱིས་ཆོས་ཟབ་མོ་ཉེ་བར་སྟོན་ཞིང་གནས་སོ། །ཡང་དེ་དག་
དང་མི་རིང་བའི་ས་ཕྱོགས་ཞིག་ན། ཕུག་རོན་སྨུག་ཆུང་དགའ་བྱེད་ཅེས་བྱ་བ་དང་། དེའི་ཆུང་མ་ཉེར་དགའ་ཞེས་བྱ་བ་གཉིས་ཤིག་ཀྱང་ལྷན་ཅིག་ཏུ་གནས་སོ། །ཡང་ས་ཕྱོགས་གཞན་ཞིག་ན་རྨ་བྱ་མེ་ཏོག་རབ་མཛེས་ཞེས་བྱ་བ་ཅིག་ཀྱང་ཡོད་དེ། རྨ་བྱས་ནི་བྱའི་རྒྱལ་པོ་ལས་དགེ་བསྙེན་གྱི་སྡོམ་པ་དང་ཡང་དག་པའི་ཆོས་ནོད་ཏེ། འདུས་བྱས་མི་རྟག་པའི་རང་བཞིན་ཡིད་ལ་བསམ་ཞིང་། ཀྱེ་མའོ། །འདུས་བྱས་རྨི་ལམ་སྒྱུ་མའི་རང་བཞིན་ཉིད། །བློ་གཏད་ཐུབ་པ་ནམ་ཡང་ངས་མ་མཐོང་། །སང་དང་འཇིག་རྟེན་ཕྱི་མ་གང་མགྱོགས་གམ། ནམ་འཆི་ངེས་པ་མེད་འདི་ཡ་རེ་ང་། །ཤི་དུས་གཉན་དང་ལོངས་སྤྱོད་ཡུལ་རྣམས་ཀུན། །འཛོམ་ཡང་རང་ཉིད་ཁྱེར་རྒྱུ་གཏན་མེད་པར། །དམ་པའི་སྐྱབས་ནི་ཆོས་ལས་གཞན་མེད་ན། །བདག་ནི་ཞི་བ་བསྒྲུབ་ལ་ནན་ཏན་བྱ། །འཇིག་རྟེན་ཕྱི་མ་དྲན་པའི་སེམས་ཡོད་ན། །མྱུར་དུ་
ལོང་མེད་ཆོས་ལ་འབུང་བ་འཐད། །ཅེས་ངག་ཏུའང་བརྗོད་ཅིང་ཡིད་ལ་རྟག་ཏུ་བསམ་བཞིན་པས་ཆོས་ལས་གཡེལ་བ་མེད་པར་གནས་སོ།། ༈ །།འདིར་སྨྲས་པ། སྲིད་པའི་ལོངས་སྤྱོད་རྨི་ལམ་སྒྱུ་མ་འདི། །མི་བརྟན་འཇིག་པར་འགྱུར་བ་ཐག་ཆོད་ལ། །ད་དུང་རྟག་པར་ཞེན་པ་འཆིང་བའི་རྒྱུ། །མི་རྟག་འཆི་བ་བསོམ་དང་གྲོག་པོ་དག །ཕུག་རོན་བཟའ་མི་གཉིས་ནི་འདུས་བྱས་མི་རྟག་པའི་རང་བཞིན་སྐད་ཅིག་ཀྱང་ཡིད་ལ་མི་བསམ་པར། ནོར་རྫས་ལོངས་སྤྱོད་ཡོད་ན་སུ་ལའང་རེ་དགོས་པ་མི་ཡོང་། གནམ་རྡིབ་ཀྱང་མགོ་ཀྱེ་རེ་ཡོང་སྙམ་པ་མ་གཏོགས། མྱུར་དུ་ཤི་བས་སླེབ་ཡོང་། ཤི་ན་སྡིག་པའི་རྣམ་སྨིན་གྱིས་ངན་སོང་དུ་ལྷུང་ཡོང་སྙམ་པའི་མདུན་པ་ནི་སྤུ་ཙམ་ཡང་མེད་པར་ནོར་རྫས་དང་ལོངས་སྤྱོད་འཚོལ་བའི་འཐབས་ཁོ་ན་ལ་བརྩོན་ཞིང་། ཕུག་རོན་དགའ་བྱེད་ཀྱིས་ནི་རང་ལས་མཐོ་བ་རྣམས་ཀྱི་
ནོར་རྫས་ལ་ལྐོག་ཏུ་བརྐུ་གང་ཐུབ་ཀྱི་བསམ་པ་དང་། རང་ལས་དམན་པ་རྣམས་ལ་ནི། ཁྲེལ་མེད་ཀྱི་ཤོ་གམ་དང་། འཕྲོག་ཅིང་བཅོམ་པའི་ལས་འབའ་ཞིག་བྱེད། ཆུང་མ་ཉེར་དགའ་མོས་ནི་རྩ་བ་དང་ལྡུམ་བུ་འབྲས་བུ་སོགས་དང་། ནས་དང་འབྲས་ལ་སོགས་པའི་སྙེ་མ་དང་། ཐ་ན་འབུ་སྲིན་ཤི་བའི་ཁོག་པ་ཡན་ཆད་ཀྱང་བསྡུས་ནས་གསོགས་འཇོག་བྱེད། མདོར་ན་ནོར་རྫས་ལ་སྙིང་པོ་མེད་ཅིང་རང་གིས་བསགས་པ་གཞན་གྱིས་སྤྱད་དེ་རང་ཉིད་འཆི་དུས་ཕན་པ་མེད་པ་ནི་མ་གོ་བས་གཡོ་རྒྱུ་དང་གསོགས་འཇོག་ཁོ་ན་ལ་བརྩོན་ཏེ་གནས་སོ། །དེ་ནས་དུས་རེ་ཞིག་ན། ཕུག་རོན་དགའ་བྱེད་ཚེའི་དུས་ལ་བབ་པ་དང་ལས་ཀྱི་རྣམ་པར་སྨིན་པའི་འབྲས་བུ་ཡོངས་སུ་སྨིན་པ་ལ་ཐུགས་ཏེ། ཆུང་མ་ཉེར་དགའ་མོ་ཡུལ་ལྗོང་དག་ཏུ་འབྲས་ཐུ་བ་ལ་སོང་བའི་ཤུལ་དུ་ཁོ་ཁྱིམ་དུ་གནས་
པ་ལས། ཐ་ཁོབ་ཀྱི་གྲོང་ཁྱེར་ཞིག་གི་ནང་ནས་བ་ལང་གི་རྫི་བོ་དག་གིས། ནགས་ཚལ་མེས་བསྲེག་པས་ཕུག་རོན་དགའ་བྱེད་ཀྱང་འབྲོས་པའི་སྐབས་མེད་པར་ཚིག་ཅིང་། ཁྱིམ་དུ་ཡོད་པའི་ནས་དང་འབྲས་སོགས་ནོར་རྫས་མཐའ་དག་ཁྱིམ་དང་བཅས་པ་རྗེས་མེད་དུ་ཚིག་གོ། །དེའི་ཚེ་ཆུང་མ་ཉེར་དགའ་མོས་ཡུལ་ལྗོང་ནས་འབྲས་ཀྱི་སྙེ་མ་ཉུང་ཤས་ཅིག་ཁྱེར་ཏེ་འོང་པ་ལས། ལམ་དུ་བྱིས་པ་དག་གིས་མདའ་འཕངས་པ་མོ་ལ་ཕོག་སྟེ་ཤིན་ཏུ་ཉམས་ཉེས་པར་གྱུར་ཅིང་དཀའ་བ་དུ་མས་མནར་བཞིན་རང་གི་ཁྱིམ་དུ་འོངས་པ་ལས། ཁྱིམ་ནོར་རྫས་གྲོགས་དང་བཅས་པ་མེས་ཚིག་པ་མཐོང་ནས། ཡུན་ཅིག་སྡུག་བསྔལ་གྱིས་དྲན་མེད་དུ་བརྒྱལ་ལོ། །དེ་ནས་ཕྱི་དྲོའི་དུས་སུ་རླུང་སེར་བུ་ལྡང་བས་བརྒྱལ་སངས་ཙ་ན་འདི་སྙམ་དུ་བསམ་མོ། །ཀྱེ་མ་ཀྱེ་ཧུད། འདུས་བྱས་འདི་མི་རྟག་པའི་རང་བཞིན་དུ་སྣང་
བཞིན་པ་འདི་ཉིད་བསམ་ནས་སྡུག་བསྔལ་གྱིས་རང་བཞིན་དུ་འདུག་པ། ཚེ་ད་ལྟ་ཕན་ཆོད་དཀའ་ལས་ཀྱི་རྩོལ་སྒྲུབ་བྱས་པའི་ནོར་རྫས་ཐམས་ཅད་ནང་མ་གཅིག་ཐལ་བ་སྤར་གང་དུ་རེད་པའི་ཚུལ་འདི་བསམ་ན། དཀའ་ལས་དཔག་མེད་ཀྱི་འབད་པ་དེ་བྱས་པ་དོན་མེད་དུ་སོང་འདུག་ཅི་རང་བྱེད་ན། ཨ་ཙ་མ། ཚེ་གང་གཏན་དུ་འགྲོགས་པའི་གྲོགས་མཆོག་ཀྱང་རུས་ཕྱེ་སྤར་གང་དུ་སོང་བའི་ཚུལ་འདི་བསམ་ན། འབྱུང་བཞི་འདུས་པའི་སྒྱུ་ལུས་འདིས་ཀྱང་རྟག་པ་ཞིག་མི་ཡོང་བ་འདྲ་ན། བདག་གི་གྲོགས་དེའི་ལུས་ཀྱི་དཔའ་རྩལ་ནི་གཅན་གཟན་གྱི་རྒྱལ་པོ་སེང་གེ་ལྟ་བུ་ལ་ཡང་འཇིགས་དགོས་པ་མེད་ན། འཇིགས་པ་དེ་ལྟར་བྱུང་དུས་ཅི་ཡང་བྱེད་དུ་མེད་པར་ཤི་དགོས་པ་འདི་ནི་ཅི་རང་ཡིན་ན། སྨྲ་བའི་གྲེ་ལྕོ་ནི་བདེ། སེམས་ཀྱི་སྤྱང་རིག་ནི་གཞན་ལས་ལྷག་ཏེ། ས་དང་རྡོ་
དང་ཤིང་ལ་ཡང་ཐབས་ཀྱིས་བསླུ་ཐུབ་པ་ལྟ་བུ་གཅིག་ཡོད་པ། ཉམས་ཉེས་ལྟ་བུ་བྱུང་དུས་བདེན་གཏམ་ཚིག་གསུམ་ཡང་སྨྲ་བའི་དབང་མེད་པར་འཆི་བདག་གི་ཁ་རུ་ཚུད་དགོས་པ་འདི་ལ་བསམ་ན། ཆོས་མིན་པ་གང་གིས་ཀྱང་སྐྱབས་མེད་པར་འདུག་པ་ལ། བདག་ཅག་གཉིས་ཆོས་བརྩོན་པར་མ་དྲན་པ་ཅི་རང་ཡིན་ནམ། ཞེ་རེ་འགྱོད་ན། བསམ་བཞིན་འགྱོད་པ་བརྡས་ཀྱིས་མི་སླེབ་པར་འགྱུར་ཞིང་། སྡུག་བསྔལ་གྱི་འཁུར་ཆེན་པོས་ནོན་བཞིན་དུ་ཤིའོ། །དེ་ནས་ཕུག་རོན་དགའ་བྱེད་ནི་གསད་བཅད་འཕྲོག་བཅོམ་གྱི་རྣམ་པར་སྨིན་པས་སེམས་ཅན་དམྱལ་བ་ཆེན་པོ་མནར་མེད་པའི་གནས་སུ་སྐྱེས་ཏེ། སྡུག་བསྔལ་ཤིན་ཏུ་ཆེ་བ་བཟོད་གླག་མེད་པ་ལ་སྤྱོད་ཅིང་གནས་སོ། །ཕུག་རོན་གྱི་ཆུང་མ་ཉེར་དགའོ་མོ་ནི་སེར་སྣའི་ཀུན་ནས་བླངས་པའི་ལས་ཀྱི་རྣམ་པར་སྨིན་པས་ཡི་དྭགས་ཀྱི་འཇིག་རྟེན་དུ་སྐྱེས་ཏེ། བཀྲེས་སྐོམ་གྱི་སྡུག་བསྔལ་དཔག་ཏུ་མེད་པ་མྱོང་བར་གྱུར་ཏོ།།
༈ །།འདིར་སྨྲས་པ། སྒྱུ་མའི་ནོར་ལ་སྙིང་པོ་མེད་པའི་ཚུལ། །སེར་སྣས་བསགས་པའི་རང་ནོར་གཞན་གྱིས་སྤྱོད། །སྦྲང་མས་བསགས་པའི་སྦྲང་རྩི་ཇི་བཞིན་དུ། །སྙིང་པོ་མེད་ཚུལ་བསོམ་ཞིག་རིགས་ཀྱི་བུ། །དེའི་ཚེ་རྨ་བྱ་མེ་ཏོག་རབ་མཛེས་ནི་འདུས་བྱས་མི་རྟག་པའི་ངང་ཚུལ་རྟོགས་ཤིང་། ཚེ་ལ་ངེས་པ་མེད་པ་རྩྭ་ཁའི་ཟིལ་པ་ལྟ་བུ། ནོར་རྫས་སྙིང་པོ་མེད་པའི་སྒྱུ་མའི་ལོངས་སྤྱོད་ལ་ཞེན་ཆགས་སྤངས་ཏེ། ལུས་ངག་ཡིད་གསུམ་སྙོམ་ལས་སུ་མ་ལུས་པར་དགེ་བའི་ཕྱོགས་ལ་བརྩོན་པའི་མཐུས། མཐོ་རིས་ཀྱི་གོ་འཕངས་བླ་ན་མེད་པ་ཐོབ་པོ་ཞེས་གྲག་གོ།། ༈ །།འདུས་བྱས་རྟག་པར་ཞེན་པ་དང་མི་རྟག་པར་གོ་བའི་རབ་ཏུ་འབྱེད་པ་སྟེ། བསྟན་བཅོས་པདྨ་དཀར་པོའི་འདབ་མ་དང་པོའོ། །དེ་ལྟར་འདུས་བྱས་མི་རྟག་པའི་ཚུལ་རྟོག་པར་བྱས་
ནས། །འཁོར་བའི་རང་བཞིན་ནི་སྡུག་བསྔལ་ཁོ་ནའི་རྒྱུ། །སྡུག་བསྔལ་མཐའ་དག་གི་བརྟེན། སྡུག་བསྔལ་མཐའ་དག་གི་འབྱུང་ཁུངས་ཏེ། འདི་ལས་མྱུར་དུ་ཐར་པའི་ཐབས་ལ་འབད་དགོས་པའི་ཚུལ་ཡང་འདི་ལྟ་སྟེ། །སྔོན་འདས་པའི་དུས་ན། །ཡུལ་བྱང་ཕྱོགས་ཁ་བ་ཅན་གྱི་ལྗོངས། །སྐྱིད་པའི་འབྱུང་གནས་བོད་ཅེས་བྱ་བའི་ཡུལ་དུ། །ཚལ་ཆེན་པདྨའི་གླིང་། མེ་ཏོག་ཡིད་དུ་འོང་བ་སྣ་ཚོགས་ཀྱིས་མངོན་པར་བཀྲ་བའི་གནས་མཆོག་ལྷ་ལྡན་ལྗོངས་ཞེས་བྱ་བ་ན། རྐང་དྲུག་བུང་བའི་རིགས་དཔག་ཏུ་མེད་པ་གནས་པ་རྣམས་ཀྱིས་ནང་ནས། ནོར་བདག་སྦྲང་སེར་འོད་ལྡན་ཞེས་བྱ་བ་གཟུགས་མཛེས་ཤིང་དཔའ་རྩལ་ཆེ་བ། ནོར་སྦྲང་རྩིའི་བང་མཛོད་ཉི་ཤུ་ཙམ་ལ་དབང་ཞིང་། རྐང་དྲུག་ཀུན་གྱི་གཙོ་བོ་ལྟ་བུ་ཅིག་དང་། ཆུང་མ་གཡུ་སྦྲང་ཡིད་འོང་རྒྱན་ཞེས་བྱ་བ་ཀུན་གྱི་ཡིད་དུ་འོང་ཞིང་ལྟ་ན་སྡུག་པ་ཡོན་ཏན་དུ་མ་དང་ལྡན་པ་ཞིག་ཀྱང་ཡོད་དེ། དེ་གཉིས་ལ་བུ་སྦྲང་ཆུང་འོད་
མཛེས་དམ་པ་ཞེས་བྱ་བ་མཚན་བཟང་པོ་དུ་མས་བརྒྱན་ཞིང་ཆོས་ལ་ཤིན་ཏུ་མོས་པ་གཅིག་ཡོད་དོ། །དེ་ནས་སྦྲང་མ་བཟའ་མི་གཉིས་ཀྱང་བུ་དེ་ལ་ཤིན་ཏུ་གཅེས་ཤིང་བརྩེ་བར་བསྐྱངས་པ་ལས། དུས་རེ་ཞིག་ན་སྦྲང་ཆུང་འོད་མཛེས་དམ་པ་དེས་བསམ་པ་ལ། ག་རེ། འཁོར་བ་འདི་ནི་སྙིང་པོ་མེད་ཅིང་སྡུག་བསྔལ་འབའ་ཞིག་གིས་མནར་བ་འདི་ལས་ད་རེས་ཐར་པའི་ཐབས་ལ་མ་འབད་ན། གཏན་དུ་འཁོར་བར་འཁྱམས་ཞིང་སྡུག་བསྔལ་གྱི་འདམ་དུ་ཆུད་ཐག་ཆོད་པས། ཅིས་ཀྱང་འཁོར་བ་འདི་སྤངས་ནས་དམ་པའི་ཆོས་ཅིག་རང་བྱ་དགོས་བསམ་སྟེ། ཕ་མ་གཉིས་ལ་ངག་སྙན་ཞིང་བརྡའ་འཇམ་པོས་འདི་སྐད་ཅེས་སྨྲས་པར་གྱུར་ཏེ། ཀྱེ་མ་དྲིན་ཅན་གྱི་ཕ་མ་ལུས་སྲོག་སྐྱེད་མཛད་གཉིས། ཐུགས་བརྩེ་བ་ཆེན་པོས་དར་གཅིག་གསན་པར་ཞུ། །ང་འཁོས་མེད་སྙོམ་ཆུང་སྦྲང་སྤྲུག་བདག་འདྲ་ཡིས། །
དོན་ཞུ་བ་ཚིག་གསུམ་ཕུལ་འབྲས་འདི་ལྟར་ལགས། །ཡོངས་འདུས་བྱས་ཆོས་ཀུན་མདང་གི་རྨི་ལམ་འདྲ། །འདི་བློ་གཏད་ཐུབ་པ་གང་ཡང་མི་འདུག་ཅིང་། །ཕྱི་སྣོད་བཅུད་མི་རྟག་སྒྱུ་མའི་མིག་འཕྲུལ་འདྲ། །འདི་མྱུར་དུ་མི་རྟག་འཇིག་པར་ཐག་ཆོད་ཡིན། །ནང་འབྱུང་བཞིས་བསྐྱེད་པའི་སྒྱུ་ལུས་གོག་པོ་འདི། །འདི་གཅེས་སྤྲས་བྱས་ཀྱང་མྱུར་དུ་འདོར་བར་ངེས། །ཚེ་སྐལ་པར་ཐུབ་ཀྱང་ཐ་མ་འཆི་འགྱུར་ཞིང་། །སྲོག་རྩྭ་ཁའི་ཟིལ་འདྲ་ནམ་ཡལ་ཆ་མེད་ཡིན། །གཉེན་གཉེན་དུ་འབྲེལ་པ་ཁའི་གྲོག་པོ་སྟེ། །སྡུག་དཀའ་ལས་བྱུང་དུས་ཕན་གྲོགས་ཤིན་ཏུ་དཀོན། །ལར་ཚོང་འདུས་མགྲོན་འདྲའི་གཉེན་དང་འཁོར་གཡོག་འདི། །འདི་ད་ལྟ་སྤངས་ན་ཆགས་སྡང་བྲལ་བའི་རྒྱུ། །ནོར་རྣམ་ཐོས་བུ་ལ་འགྲན་པ་ཡོད་གྱུར་ཀྱང་། །དེ་རང་གིས་བསགས་པ་ནམ་ཞིག་གཞན་གྱིས་སྤྱོད། །སེམས་ཆོག་ཤེས་ལྡན་པ་ནོར་བུའི་བང་མཛོད་ཡིན། །
ནམ་དགོས་དུས་མེད་པ་ནོར་འདིས་ཅི་རང་བྱེད། །ལར་འཁོར་བའི་བརྩོན་ར་སྡུག་བསྔལ་འདམ་འདི་ལས། །ང་ཞེན་པ་ལོག་པས་སྙིང་ནས་ཆོས་རང་དྲན། །ཚེ་ཕྱི་མའི་དོན་དུ་དམ་པའི་ཆོས་ཅིག་བྱེད། །འདི་ཡབ་ཡུམ་གཉིས་ཀྱིས་བདག་ལ་བཀའ་གནང་ཞུ། །ཅེས་སྨྲས་པས། ཕ་མ་གཉིས་སྐྲག་སྟེ། ཨ་ཙ་མ། བདག་ཅག་གཉིས་ཀྱི་བློ་གཏད་ཀྱི་གནས་སུ་གྱུར་པ་འདི་ཅིག་པུ་ལ། འདི་ཉིད་ཆོས་ལ་འགྲོ་ན་ངེད་ཅག་གཉིས་ཇི་ལྟར་བྱེད། ད་འདི་ལ་བཤོལ་ཐབས་གང་དྲག་པ་བྱེད་དགོས་བསམ་སྟེ། དང་པོ་ཕས་འདི་སྐད་ཅེས་སྨྲས་སོ། །ཀྱེ་མ་སྙིང་གི་བུ་གཅིག་བདག་ལ་ཚུར་ཉོན་དང་། །འདུས་བྱས་རྟག་པ་མེད་ཀྱང་ལྷག་སུ་ཇི་ལྟར་བྱེད། །ནམ་འཆི་ངེས་པ་མེད་ཅེས་འབྲོས་སུ་ག་ལ་འགྲོ། །འཆི་བདག་བདུད་པོ་འོང་ཞེས་ཐབས་གཞན་ག་ལ་ཡོད། །འཆི་དུས་ཁྱེར་དབང་མེད་ཀྱང་ནོར་རྫས་
ཅི་ནས་དགོས། །རྟག་ཏུ་འགྲོགས་དབང་མེད་ཀྱང་འཕྲལ་དུ་གཉེན་ཀྱང་དགོས། །བུ་ཁྱོད་ཆོས་ལ་བསམ་ན་ཁྱིམ་དུ་བྱས་ཆོག་མོད། །རྒན་རྒོན་གཉིས་ཀྱི་བློ་གཏད་ཁྱོད་ལས་གཞན་མེད་ན། །ཁྱེད་ཀྱིས་ངེད་ཅག་བོར་བར་སེམས་ཀྱིས་ཕོད་དམ་བསོམ། །ཕ་མ་སྡུགས་སུ་བཅུག་པའི་ཆོས་ཀྱི་ཅི་ཞིག་བྱེད། །བདག་ཅག་བསམ་པ་རྫོགས་ཕྱིར་ཁྱིམ་དུ་ཅི་བདེར་སྡོད། །ཅེས་སྨྲས་པ། ཡང་མས་སྨྲས་པ། བུ་བུ། ཤ་ལས་ཆད་ཅིང་ལུས་ལས་སྐྱེས་པའི་བུ། །དྲིན་ཅན་ཕ་མའི་བརྩེ་བའི་ངག་ལ་ཉོན། །སྔོན་གྱི་རྒྱལ་སྲས་བྱང་སེམས་ཐམས་ཅད་ཀྱིས། །ཕ་མའི་དོན་དུ་ལུས་སྲོག་གཏོང་ཕོད་ན། །བུ་གཅིག་ཁྱོད་ཀྱིས་ཕ་མའི་བཀའ་བཅགས་ནས། །དམ་པའི་ལྷ་ཆོས་གང་དུ་འཚོལ་དུ་འགྲོ། །མི་དགེ་སྡིག་སྤངས་དགེ་བའི་ལས་བསྒྲུབ་པ། །དེ་ལས་གཞན་པའི་ལྷ་ཆོས་མ་མཆིས་ན། །ཕ་མའི་བཀའ་བཅག་ཡིད་བཅད་སྡིག་བསགས་
ནས། །དམ་ཆོས་གཞན་དག་ཁྱེད་ཀྱི་གང་དུ་འཚོལ། །གཉེན་དང་ཁང་ཁྱིམ་ནོར་རྫས་ཡོད་པ་འདི། །སྐྱིད་དུ་མ་ཚོར་དེ་དག་བསྐྱུར་བྱས་ནས། །དེ་ལས་སླར་ཡང་སྐྱིད་པའི་ལྷ་ཆོས་ནི། །གང་དུ་ཕྱིན་ཀྱང་ཁྱེད་ཀྱིས་ཨེ་རྙེད་ལྟོས། །བརྩེ་བས་བྲིད་ན་གང་ཆེན་སྨྱོན་པ་ཡང་། །དུལ་བར་འགྱུར་ཞིང་གང་བསྒོ་བྱེད་པས་ན། །དྲིན་གྱིས་བསྐྱངས་པའི་ཕ་མས་སྨྲས་པ་ལ། །ཅི་ཕྱིར་བུ་ཁྱེད་ཉན་པར་མི་རིགས་སམ། །བདེན་པར་སྨྲས་ན་གཟུགས་མེད་ལྷ་འདྲེ་ཡང་། །གདོང་གྲོགས་བགྱིད་ཅིང་ཅི་སྨྲས་ཉན་བྱེད་ན། །བྱམས་ཤིང་བརྩེ་བས་ཕན་པའི་གྲོས་འདེབས་ལ། །ཉན་པར་མི་བྱེད་ཁྱོད་ནི་རུང་ངམ་ཅི། །ཉམས་ཐག་མིག་ནས་མཆི་མ་ཆར་འབེབས་ཤིང་། །སྨྲེ་ངག་གདུང་བས་ང་རོ་སྒྲོག་བྱེད་ལ། །སྡང་བའི་དགྲ་ཡང་སྙིང་རྗེ་སྐྱེ་སྲིད་ན། །ཕ་མས་མྱ་ངན་འོ་དོད་འབོད་པ་ལ། །བུ་གཅིག་ཁྱོད་ཀྱིས་
སྙིང་ཡང་མི་རྗེའམ། །ཆོས་ཀྱི་རྩ་བ་སྦྱིན་པའི་ཕ་རོལ་ཕྱིན། །ནོར་རྫས་སྤངས་པས་སྦྱིན་པ་ཇི་ལྟར་བྱེད། །ཆོས་དང་དགེ་སྦྱོར་རང་གིས་མ་བྱས་ན། །གནས་གཞན་ཕྱིན་པས་ཆོས་སུ་ཇི་ལྟར་འགྱུར། །དྲིན་ཅན་ཕ་མའི་ངག་ལ་མ་ཉན་པའི། །ཆོས་དེས་ཁྱེད་ལ་ཇི་ལྟར་འགྱུར་བར་བསོམ།། ༈ །།ཞེས་སོགས་ཐབས་དུ་མའི་སྒོ་ནས་བཤོལ་བཏབ་ཀྱང་མ་ཉན་པར་ཆོས་ལ་འགྲོ་བར་བརྩམས་པ་ན། དེར་ཕ་མ་གཉིས་ཀྱི་ཐབས་གཞན་གང་ཡང་མ་རྙེད་པར། སྦྲང་ཆུང་ཁོ་རང་གི་སྙིང་གི་གྲོགས་དམ་པར་གྱུར་པ་སྦྲང་ཆུང་ཡིད་འཛིན་ཞེས་བྱ་བ་ཞིག་ཡོད་པ་དེ་བོས་ནས། ཁོ་ལ་ཤོལ་འདེབས་ཀྱི་གྲོས་བཏབ་པར་བཅོལ་བས། དེར་ཁོས་གྲོས་འདེབས་ཀྱི་ཚིགས་སུ་བཅད་པ་འདི་དག་སྨྲས་སོ། །ཨེ་མ་སྙིང་གི་གྲོག་པོ་བདག་ལ་གསོན་མཛོད་དང་། །ཚེ་སྔོན་བསོད་ནམས་བསགས་པའི་འབྲས་བུའི་མཐུས། །ད་དུས་འབྱོར་ལྡན་རིགས་སུ་
སྐྱེས་གྱུར་ཅིང་། །བསོད་ནམས་མངའ་ཐང་རྒྱས་པའི་དུས་འདི་རུ། །འདི་དག་བསྐྱུར་ནས་གང་དུ་ཅི་བྱེད་འགྲོ། །བྱམས་པའི་ཕ་མ་བརྩེ་བའི་གྲོག་པོ་དང་། །འབྲེལ་བའི་གཉེན་དང་བསགས་པའི་ནོར་རྫས་དང་། །བརྩིགས་པའི་ཁང་ཁྱིམ་ཡུལ་དང་བང་མཛོད་སོགས། །འདི་དག་ཐམས་ཅད་ཁྱེད་ཀྱིས་འདོར་ཕོད་དམ། །བདག་ཅག་རྣམས་ཀྱི་བརྩེ་བས་ཡིད་ཀྱི་ནི། །བཤོལ་འདེབས་བགྱིད་ལ་ཁྱོད་ཉིད་མི་ཉན་ན། །ཀུན་ཀྱང་ཡིད་ཆད་སྡུག་བསྔལ་གྱུར་པ་འདི། །ཁྱོད་ལའང་སྡིག་པའི་འཁུར་པོར་མི་འགྱུར་རམ། །ཅིས་ཀྱང་གྲོགས་ཁྱོད་བདག་གིས་ངག་ལ་ཉོན། །ཞེས་སྨྲས་པས། སྦྲང་ཆུང་འོད་མཛེས་དམ་པས་གྲོགས་པོ་ཡིད་འཛིན་ལ་འདི་སྐད་ཅེས་སྨྲས་སོ། །སྙིང་གྲོག་ཡིད་འཛིན་ཁྱོད་བདག་ལ་ཚུར་གསོན་དང་། །སྔོན་བསགས་ལས་འབྲེལ་གྱིས་ཚེ་འདིར་འཛོམ་གྱུར་ཅིང་། །སེམས་ཡིད་རབ་མཐུན་གྱི་གྲོག་མཆོག་ཁྱེད་ཀྱིས་ནི། །ཤ་ཚ་སྙིང་གཏམ་གྱིས་
གྲོས་འདེབས་བགྱིས་ལེགས་ཀྱང་། །བདག་གི་བསམ་པ་དང་མི་མཐུན་འགལ་བར་གྱུར། །འཁོར་བའི་རང་བཞིན་འདི་སྒྱུ་མར་མ་ཤེས་ན། །རྟགས་འཛིན་ཞེན་ཆགས་འདིས་རང་ཉིད་འཆིང་བའི་རྒྱུ། །དབྱར་དགུན་སྟོན་དཔྱིད་ཀྱི་དུས་བཞིའི་འགྱུར་ལྡོག་དང་། །གཉེན་བཤེས་འཛའ་རོག་ཀུན་འཆི་བ་མཐོང་བཞིན་དུ། །རང་ཉིད་འཆི་བ་འདི་ཡིད་ལ་མི་བསམ་པར། །གཞན་དག་ཤི་བ་ལ་མྱ་ངན་བྱེད་པ་བླུན། །མཛའ་རོག་ཉེ་དུ་ལ་ཞེན་ཆགས་བྱས་བྱས་ནས། །བར་དོའི་འཕྲང་རིང་ལ་རང་ཉིད་གཅིག་པུར་འགྲོ། །སྐྱིད་དུས་ཟ་རོག་དེ་སུ་ཡིས་བྱས་ཀྱང་ཆོག །དགོས་དུས་ཕན་མེད་དེ་ད་ལྟ་སྤངས་ན་ལེགས། །བསགས་པའི་ནོར་རྫས་འདི་སྒྱུ་མའི་རྣམ་འཕྲུལ་འདྲ། །དགྲ་འབོད་གཡབ་མོ་སྟེ་རང་སྲོག་བསྐྱེལ་བའི་རྒྱུ། །འཚོལ་འཚོལ་བསགས་བསགས་ཀྱང་ནམ་ཞིག་གཞན་གྱིས་ཁྱེར། །ཉེས་ཀུན་འབྱུང་ཁུངས་འདི་ང་ནི་དགོས་པ་མེད། །དཀའ་ལས་
སྡུག་རུས་ཀྱིས་བརྩིགས་པའི་ཁང་ཁྱིམ་འདི། །འཆི་དུས་དབང་མེད་དུ་ཅིས་ཀྱང་འབོར་དགོས་ན། །ད་ལྟ་ཞེན་ཆགས་ཀྱི་གཅེས་སྤྲས་བྱེད་དོན་ཆུང་། །དེ་ཕྱིར་
ཁང་གོག་འདི་ང་ནི་རིང་དུ་སྤོང་། །ཤ་ཁྲག་འབྱུང་འདུས་ཀྱི་སྒྱུ་ལུས་གཡར 
་པོ་འདི། །མཛེས་འདོད་བྱི་དོར་དང་གོས་བརྒྱན་བཟབ་བཟབ་ཀྱང་། །ཤི་དུས་དབང་དུ་འདོར་བར་ཐག་ཆོད་ལ། །ཟས་གོས་དོན་ཕྱིར་དུ་སྡིག་པ་བྱེད་ཀུན་བླུན། །ལར་ཡང་འཁོར་བ་འདི་སྡུག་བསྔལ་འབའ་ཞིག་ལ། །བདག་ནི་ཞེན་ལོག་དང་སྐྱོ་བ་གཏིང་ནས་སྐྱེས། །དམ་པའི་ལྷ་ཆོས་ལ་བཤོལ་འདེབས་མི་འཚལ་ཞིང་། །འདི་ཕྱིར་ཕན་ངེས་ཀྱི་ཆོས་འདི་ཁྱོད་ཀྱང་མཛོད། །ཅེས་ཞིབ་པར་སྨྲས་ཤིང་སྦྲང་རྩིའི་ལོངས་སྤྱོད་མང་དུ་སྦྱིན་ནས་བཤོལ་མ་ཐེབས་སོ། །དེ་ནས་འོད་མཛེས་དམ་པའི་ཕ་མ་གཉིས་ཀྱང་བུ་ལ་སེམས་འཕྲེང་ཞིང་རབ་ཏུ་འཕང་ཀྱང་། གཞན་ཐབས་ཀྱིས་དབེན་པར་
གྱུར་ནས་ཆོས་ལ་གཏོང་བར་ཁས་བླངས་ཏེ། བུ་འོད་མཛེས་དམ་པ་ཤར་ཕྱོགས་ཀོང་རོང་ཤིང་ལོའི་སྐྱིད་ཚལ། གུ་རུ་པདྨའི་བྱིན་གྱིས་བརླབ་པའི་ས་ཕྱོགས་སུ་འགྲོ་བར་འཆས་ཏེ། ཚེས་བརྒྱད་རྒྱལ་ཕུར་འཛོམ་པའི་འགྲུབ་སྦྱོར་གྱི་ཉི་མ་ལ་བབ་པའི་ཚེ། སྦྲང་ཆུང་འོད་མཛེས་དམ་པ་ཆོས་ལ་འགྲོ་བའི་སྐྱེལ་ཐུང་དུ། ཕ་མ་གཉིས་ཀྱི་ཐོག་དྲངས་པའི་ཉེ་འབྲེལ་མཛའ་རོག་དཔག་ཏུ་མེད་པ་རྣམས་ཀྱིས་ཉིན་ལམ་ཕྱེད་དང་གཉིས་ཀྱི་བར་དུ་སྐྱེལ་ཐུང་བྱས་ཤིང་། སོ་སོ་ནས་སྦྲང་རྩི་སོགས་ལོངས་སྤྱོད་དཔག་ཏུ་མེད་པའི་བརྫོང་བ་བྱས་པ་ཀུན་ཀྱང་འོད་མཛེས་དམ་པས་སླར་ཐམས་ཅད་ལ་བགོས་ནས་བྱིན་ཞིང་། ཕན་ཚུན་བརྩེ་བའི་སླབ་བྱ་མང་དུ་བྱས་ཏེ་སོ་སོར་གྱེས་སོ། །དེ་ནས་འོད་མཛེས་དམ་པས་ཀོང་ཡུལ་སྨད་ཀྱི་ཆ། བདེ་ཆེན་བསིལ་བའི་ཡང་ཚོལ་ཞེས་བྱ་བའི་གནས་སུ་ཕྱིན་ཏེ། ཉིན་མཚན་གཡེལ་བ་མེད་པ་ཏིང་ངེ་འཛིན་ལ་བརྩོན་པས།
ཐར་པའི་གོ་འཕང་དམ་པ་ཐོབ་པར་གྱུར་ཅེས་གྲག་གོ། །འཁོར་བའི་རང་བཞིན་སྡུག་བསྔལ་གྱི་མེ་འོབ་འདི་ལས་ཐར་པའི་ཐབས་ལ་འབད་དགོས་པའི་ཚུལ་དང་། གཉེན་དང་ཉེ་འབྲེལ་ཕ་མ་ཀུན་གྱིས་ཆོས་ཀྱི་བར་ཆད་བཤོལ་འདེབས་བྱེད་པ་ལ་མི་ཉན་པར་ཆགས་ཞེན་གྱི་འཁྲི་བར་བཅོད་དགོས་ཚུལ་གྱི་རབ་ཏུ་འབྱེད་པ་སྟེ། བསྟན་བཅོས་པདྨ་དཀར་པོའི་འདབ་མ་གཉིས་པའོ། །དེ་ལྟར་འཁོར་བ་སྡུག་བསྔལ་གྱི་མེ་འོབ་ཆེན་པོ་ལ་ཐར་བར་བྱས་ནས། ཡང་དག་པའི་ལམ་དུ་འཁྲིད་པར་བྱེད་པའི་དེད་དཔོན་དམ་པ་ནི་དགེ་བའི་བཤེས་གཉེན་ཁོ་ན་ལ་བསྟན་དགོས་པའི་ཚུལ་ཡང་འདི་ལྟ་སྟེ། སྔོན་འདས་པའི་དུས་ན་ཡུལ་གངས་རི་རྒྱལ་པོ་སྤོས་ངད་ལྡན་ཞེས་བྱ་བ་ན། གཅན་གཟན་གྱི་ཚོགས་དཔག་ཏུ་མེད་པར་གནས་ཤིང་། དེ་དག་གི་གཙོ་བོ་ནི་སེང་གེའི་རྒྱལ་པོ་བྱམས་
པའི་སྙིང་རྗེ་ཞེས་བྱ་བ་དགེ་བའི་བཤེས་གཉེན་གྱི་མཚན་ཉིད་མཐའ་དག་དང་ལྡན་ཞིང་། ཡོན་ཏན་དུ་མས་ཉེ་བར་བརྒྱན་པ་ཞིག་གིས་རང་གི་རིགས་མཐུན་གྱི་སྐྱེ་འགྲོ་རྣམས་ལ་ཟབ་པ་དང་རྒྱ་ཆེ་བའི་ཆོས་ཀྱི་དགའ་སྟོན་འགྱེད་ཅིང་གནས་སོ། །ཡང་དེའི་ཚེ་ཡུལ་མཆོག་ཏུ་གྱུར་པ་མདོ་ཁམས་སྨད་ཀྱི་ཆ། གླིང་གེ་སར་ཆེན་པོའི་ཡུལ་ཞེས་བྱ་བ་ན་གངས་རིའི་རྒྱལ་པོ་འོད་འབར་ཞེས་བྱ་བ་ཞིག་ཏུ། སེང་གེ་སྤྲིན་གྱི་ཤུགས་ཅན་ཞེས་པ་དད་པ་སྙིང་རྗེ་ཆེ་བ་ཉིན་མཚན་གཡེལ་མེད་དུ་ཆོས་ཁོ་ན་དོན་དུ་གཉེར་བ་གཅིག་ཡོད་པ་དེ། སྤྱིར་གྱི་བསྐལ་དུས་སྙིགས་མའི་བྱེད་སྤྱོད་ལ་སྐྱོ་ཞིང་། ཁྱད་པར་ཆོས་མེད་ཆོས་སུ་བརྫུ་བའི་ཚུལ་ཆོས་གཡོ་རྒྱུ་མཁན་གྱིས་སེར་གཟུགས་དག་ལ་སྐྱོ་བ་གཏིང་ནས་སྐྱེས་ཏེ། ཀྱེ་མ་དིང་སང་སྙིགས་མའི་དུས། །སྟོན་པ་སྒྲོན་མེ་ནུབ་གྱུར་ཅིང་། །དེས་གསུངས་ཆོས་ཀྱང་ནུབ་པར་ཉེ། །དགེ་འདུན་རྣམས་དང་ཆོས་པ་ལ། །
བཀུར་སྟི་རིམ་གྲོ་མི་བྱེད་པར། །ཟོག་པོ་བསླུ་བྲིད་མཁན་རྣམས་ལ། །བསྟོད་ཅིང་བཀུར་བའི་གནས་སུ་བྱེད། །ངུར་སྨྲིག་འཛིན་པ་ཐམས་ཅད་ཀྱང་། །འདུ་འཇིའི་ལོངས་སྤྱོད་དག་གིས་གཡེང་། །སྡོམ་པ་མི་འཛིན་ཀུན་སློང་འཛིན། །ཚུལ་ཁྲིམས་མི་འཛིན་ཚུལ་ཆོས་འཛིན། །ཏིང་འཛིན་མི་བསྒོམ་བསམ་ངན་བསྒོམ། །དམ་ཆོས་མི་བྱེད་གཡོ་རྒྱུ་བྱེད། །ཀྱེ་མ་འདི་འདྲའི་ཆོས་གཟུགས་མང་། །གཞན་ཡང་བླ་མའི་གཟུགས་བརྙན་འགའ། །དགེ་བའི་ཆོས་རྣམས་རིང་དུ་སྤོང་། །གསང་སྔགས་བཀའ་ལ་རས་ཆོད་བྱེད། །ལུང་མེད་བརྫུན་གྱིས་མི་མགོ་བསྐོར། །བདུད་ཀྱིས་བྱིན་གྱི་བརླབས་པ་ཡི། །བསླུ་བྲིད་མཁན་གྱི་བླ་མ་དང་། །གཞན་ཡང་དམ་མེད་སྔགས་པ་དང་། །ཕྱི་ཞི་ནང་བརྩུ་དགེ་བཤེས་དང་། །བླུན་པོ་ཟོག་པོའི་སྒོམ་ཆེན་དང་། །ལྟ་དམན་སྤྱོད་རྩིངས་རྟོག་ལྡན་དང་། །ངན་སེམས་ཅན་གྱི་ཡོན་བདག་སོགས། །ཀྱེ་
མ་འདི་འདྲའི་དུས་ཚོད་ན། །ཡང་དག་དགེ་བའི་བཤེས་གཉེན་ནི། །ཉིན་མོའི་སྐར་མ་ལས་ཀྱང་དཀོན། །སྣང་སྲིད་རྨི་ལམ་སྒྱུ་མ་འདྲ། །ཚེ་སྲོག་རྩྭ་ཁའི་ཟིལ་པ་འདྲ། །བདག་ནི་སྲོག་ལ་བབ་གྱུར་ཀྱང་། །དགེ་བའི་བཤེས་གཉེན་འཚོལ་དུ་འགྲོ། །ཅེས། ཕྱོགས་ཐམས་ཅད་དུ་ཡང་དག་པའི་ལམ་ལ་འགོད་ནུས་པའི་དགེ་བའི་བཤེས་གཉེན་ནི་གང་ན་གནས་ཞེས་འདྲི་ཞིང་འཚོལ་དུ་སོང་བ་ལས། རེ་ཞིག་ཅིག་ན། གངས་རིའི་རྒྱལ་པོ་སྤོས་ངད་ལྡན་ན་སེང་གེའི་དེད་དཔོན་བྱམས་པའི་སྙིང་པོ་ཞེས་བྱ་བ། ཡང་དག་པའི་ཆོས་སྟོན་པའི་བཤེས་གཉེན་དམ་པ་ཞིག་བཞུགས་ཅེས་ཐོས་སོ། །དེ་ཐོས་པས་བཀྲེས་པས་ཟས་བརྙེད་པ་ལྟ་བུའམ། རྟ་མོ་རྟེའུ་སྟོར་བ་སླར་བརྙེད་པ་ལྟ་བུའི་ཡིད་ལ་དགའ་བ་དཔག་ཏུ་མེད་པ་ཐོབ་ནས། གངས་རིའི་རྒྱལ་པོ་སྤོས་ངད་ལྡན་གྱི་ཕྱོགས་སུ་ཉིན་མཚན་མེད་པར་ཚ་གྲངས་ངལ་དུབ་ཀྱི་དཀའ་བ་དཔག་མེད་ཁྱད་དུ་བསད་ནས་རིངས་རིངས་པར་སོང་ངོ་། །དེ་ལྟར་ཕྱིན་ནས་ཀྱང་
དཔག་ཚད་འགའ་ཞིག་བགྲོད་པའི་ས་ན། ཤིང་ལྗོན་པ་ཡིད་དུ་འོངས་པ་ཅིག་གི་སྟེང་ན་བྱ་ཁུ་བྱུག་གཅིག་སྐད་འབྱིན་ཅིང་འདུག་པ་མཐོང་ནས་སྨྲས་པ། རབ་མཛེས་ལྗོན་པའི་སྟེང་ན་བདེར་གནས་པའི། །བྱ་རྒྱལ་གཡུ་ཡི་མདོག་ཅན་སྐད་སྙན་པ། །དམ་པ་ཁྱོད་ནི་ཕྱོགས་དེར་བཞུགས་པ་ལེགས། །སྲིད་པའི་ཆུ་བོ་སྒྲོལ་མཛད་ཐུགས་རྗེ་ཅན། །བྱང་ཆུབ་སེམས་དཔའ་བྱམས་པའི་སྙིང་པོ་ཞེས། །སྐྱེ་མཆོག་དེ་འདྲ་ཁྱེད་ཀྱི་མ་མཐོང་ངམ། །ཅེས་སྨྲས་ཏེ་ཡུན་ཞིག་ན་ཁུ་བྱུག་དེ་ཉིད་འཕུར་ཏེ་རི་བོ་ཆེན་པོ་ཞིག་གི་རྒྱབ་ཏུ་སོང་བ་ནས་སེང་གེས་བསམ་པར་ཨེ་མ། འདི་ལྟ་བུའི་ངང་ཚུལ་ནི་མི་རྟག་པའི་རང་བཞིན་དུ་འདུག་པ། ལུས་ཀྱི་ལྗོན་ཤིང་ལ་སེམས་ཀྱི་ཁུ་བྱུག་གནས་ཤིང་། ངག་གི་སྒྲ་དུ་མ་བསྒྲགས་ཀྱང་། ཡུད་ཙམ་གཅིག་ལ་ལུས་སེམས་སོ་སོར་གྱེས་ཤིང་། རི་བོ་ཆེན་པོའི་རྒྱབ་ཏུ་སོང་བ་དང་འདྲ་བ་འཇིག་རྟེན་ཕ་རོལ་ཏུ་འགྲོ་བར་ཐག་ཆོད་པས་
འདི་ལྟ་བུ་ཡང་བདག་ལ་ཆོས་ཀྱི་བསྐུལ་འདེབས་སུ་འདུག་སྙམ་པའི་འདུན་པ་ཤར་རོ། །དེ་ནས་ཡང་རིང་ཞིག་ན་སོང་སོང་བ་ལས། རེ་ཞིག་གཅིག་ན་མེ་ཏོག་ཨུཏྤ་ལའི་ཕུང་པོ་ཞིག་ལ་བུང་བ་གཅིག་རྩི་བཅུད་འཐུང་ཞིང་འཁོར་བ་མཐོང་ནས་སྨྲས་པ། ཨནྡྷ་རྙིལ་གྱི་མདོག་འདྲའི་ཨུཏྤ་ལའི། །ཕུང་པོའི་སྟེང་གི་བུང་བ་ཁྱོད་ཉོན་དང་། །ཚེ་ལ་ལོངས་མེད་ནམ་འཆི་མི་ཤེས་ཤིང་། །འཆི་དུས་ཆོས་མིན་ཅིས་ཀྱང་མི་ཕན་པས། །བདག་ནི་དགེ་བའི་བཤེས་གཉེན་འཚོལ་དུ་འགྲོ། །ཁྱོད་ཀྱང་ཆོས་ལ་བརྩོན་པ་མི་འཐད་དམ། །ཅེས་སྨྲས་ཤིང་། འདི་ལྟ་བུའི་ཚུལ་ཡང་བདག་ལ་བསྐུལ་མར་འདུག་སྟེ། ནོར་རྫས་ལོངས་སྤྱོད་རྩོལ་སྒྲུབ་དུ་མས་བསགས་ཀྱང་མཐར་གཞན་གྱིས་འཁྱེར་བ། དེས་སྦྲང་མའི་སྦྲང་རྩི་དང་འདྲ་བའི་བརྡར་གོའོ། །ཡང་སོང་སོང་བ་ལས། རེ་ཞིག་ན་རྫིང་བུ་ཡིད་དུ་འོང་ཞིང་མེ་ཏོག་སྣ་ཚོགས་ཀྱིས་མཛེས་པར་བརྒྱན་པ་ཞིག་ན་བྱ་ངང་
པ་གཉིས་ཞིག་རྫིང་བུའི་ནང་དུ་བརྩེ་ཞིང་ཕན་ཚུན་དུ་འགྲོ་བ་ལས། ཡུན་རིང་མོ་ཞིག་ན་ཕྱི་རོལ་དུ་བྱུང་སྟེ། ནེའུ་སིང་མཛེས་པའི་དཀྱིལ་ན་དལ་དལ་ལྟར་འདུག་པ་མཐོང་སྟེ་སྨྲས་པ།། ༈ །།གནམ་སྔོན་ཞུ་བ་འཁྱིལ་འདྲའི་རྫིང་བུའི་ནང་། ཡིད་འོང་པདྨས་བཀྲ་བ་དེ་དག་ནི། །ཁྱེད་ཅག་ངང་པས་བརྟེན་པ་ལེགས་མོད་ཀྱང་། འཆི་བདག་བྱུང་དུས་དམ་ཆོས་མ་རྟོགས་པ། །མེ་ཏོག་རྫིང་བུ་ལེགས་ཀྱང་དགོས་རྒྱུ་ཆུང་། །ཞེས་སྨྲས་ཤིང་། ཚུལ་འདི་ཡང་རྨོངས་པའི་འགྲོ་བ་རྣམས་འཁོར་བའི་རྒྱ་མཚོ་དང་འདོད་ཡོན་གྱི་མེ་ཏོག་ལ་ཆགས་ཏེ། ཡང་ནས་ཡང་དུ་འཁོར་བའི་གནས་སུ་འཁྱམས་པ་ལས། གང་དེ་དག་ལ་མ་ཆགས་ཤིང་བོར་བར་བྱས་ན་ཐར་ལམ་བདེ་བའི་སྐམ་པར་སྡུག་བསྔལ་དུ་མས་དུབ་པའི་སེམས་ཉིད་ངལ་གསོ་ཞིང་། དོན་མེད་འཇིག་རྟེན་གྱི་བྱ་བས་ལུས་ངག་ཡིད་གསུམ་བྲེལ་བ་ཐམས་ཅད་སྤངས་སྟེ། ཞི་བདེ་ཆོས་ཉིད་ཀྱི་ངང་དུ་དལ་
བར་འགྱུར་བའི་བརྡར་གོའོ། །དེ་ནས་དཔག་ཚད་འགའ་ཞིག་ཕྱིན་པ་དང་། གངས་རིའི་རྒྱལ་པོ་སྤོས་ངད་ལྡན་ག་ལ་བ་དེར་སླེབས་སོ། །དེར་གནས་པའི་སྲོག་ཆགས་ཐམས་ཅད་ཀྱང་སེང་གེའི་རྒྱལ་པོ་དགེ་བའི་བཤེས་གཉེན་ལ་བརྟེན་པའི་སྟོབས་ཀྱིས་སེམས་ལས་སུ་རུང་ཞིང་ཁ་ན་མ་ཐོ་བ་དང་ཉོན་མོངས་པའི་སེམས་མེད་ཅིང་ཕན་ཚུན་གཅིག་ལ་གཅིག་བྱམས་ཤིང་ཆོས་དང་མཐུན་པར་གནས་སོ། །སེང་གེའི་སྤྲིན་གྱི་ཤུགས་འཆང་གིས་ཀྱང་བྱང་ཆུབ་སེམས་དཔའ་ལ་དམ་པའི་ཆོས་མཉན་ཞིང་ཆོས་ལ་བརྩོན་པའི་མཐུས། མཐོ་རིས་མིའི་ལུས་དལ་འབྱོར་ཆོས་ལྡན་གྱི་སྐྱེ་བ་ཡོངས་སུ་བཟུང་བར་གྱུར་ཞེས་གྲག་གོ། །དེ་ལྟར་ཆོས་ཀྱི་རྩ་བ་དགེ་བའི་བཤེས་གཉེན་ལ་རག་ལས་པས། བློ་ལྡན་རྣམས་ཀྱིས་ལུས་དང་སྲོག་ལ་མ་ལྟོས་པར་བཤེས་གཉེན་དམ་པ་བཙལ་ཞིང་། བརྙེད་ནས་ཀྱང་འགྱུར་ལྡོག་མེད་པའི་དད་པ་དང་ལྡན་པས་ཅི་གསུངས་ཚད་མར་འཛིན་པས་བཀའ་བསྒྲུབ་ཅིང་། མོས་གུས་
དང་ཞབས་གཏོགས་ཀྱིས་མཉེས་པར་བྱས་ན་ཐར་པའི་ལམ་སྣ་ཟིན་པར་ཐེ་ཚོམ་མེད་དོ་ཞེས་འདོམ་པའི་དོན་ཏོ། །དགེ་བའི་བཤེས་གཉེན་བསྟེན་པའི་རབ་ཏུ་འབྱེད་པ་སྟེ། བསྟན་བཅོས་པདྨ་དཀར་པོ་འདབ་མ་གསུམ་པའོ། །དེ་ལྟར་དགེ་བའི་བཤེས་གཉེན་དམ་པ་ལེགས་པར་བསྟན་ཞིང་། སྡིག་པའི་གྲོགས་པོ་དག་རིང་དུ་སྤང་དགོས་ཏེ། དེ་ཡང་སྡིག་གྲོགས་བསྟེན་པའི་ཉེས་པ་ནི་དཔག་ཏུ་མེད་པའི་ཚུལ་མདོ་རྒྱུད་དུ་མ་ནས་གསུངས་ཤིང་། གཞན་ཡང་འདི་ལྟར་ཐོས་ཏེ། སྔོན་གྱི་དུས་སུ་རི་དགས་རྣམས་མདུན་མ་བྱས་ཏེ། བདག་ཅག་རྣམས་ལ་དཔོན་ཅིག་མེད་ན་ཁྲིམས་མེད། ཁྲིམས་མེད་ན་གཅིག་ལ་གཅིག་མི་ཉན་ཞིང་ཆེ་ཆུང་དང་དྲག་ཞན་གྱི་རིམ་པ་མེད་པར་ཕྲག་དོག་ཆགས་སྡང་འགྲན་སེམས་ཀྱིས་ཀུན་ནས་བླངས་པས་འཆམ་པའི་དུས་མི་ཡོང་བས། དཔོན་གཅིག་ཅི་ནས་ཀྱང་དགོས། དེས་ན་རིགས་སུ་བཟང་། བློ་གྲོས་སུ་ཆེ་
སྟོབས་དང་དཔའ་རྩལ་སུ་ཆེ་ཟེར་བ་ལས། རང་རང་གི་ཡོན་ཏན་བརྗོད་ཅིང་དཔོན་ང་རང་ཨེ་ཐོབས་བསམ་པའི་ལྐོག་ཏུ་གཅིག་ལས་གཅིག་རེ་བ་དང་ང་རྒྱལ་ཆེ་སྟེ། ཤ་ཝ་ན་རེ། ཀྭ་ཡེ་ཚེ་སྔོན་བསོད་ནམས་བསགས་པའི་འབྲས་བུ་ལས། །གཟུགས་བཟང་སྐྱེས་ལེགས་དཔའ་རྩལ་གཞན་ལས་ཆེ། །དུང་གི་རྭ་བཅུ་ཕ་རོལ་ཕྱིན་བཅུར་ལྡན། །ཡོན་ཏན་ཀུན་ཚངས་དཔོན་དུ་ང་ཉིད་འོས། །ཟེར་རོ། །གླ་བ་ན་རེ། ཉོན་མོངས་གདུང་སེལ་སྨན་མཆོག་ལུས་ལ་འཆང་། །བློ་གྲོས་ཆེ་ཞིང་གཟུགས་མཛེས་ཡང་རྩལ་ལྡན། །ཀུན་གྱི་དཔོན་པོར་འོས་པ་ང་ཡིན་མོད། །དོན་མེད་རྭ་ཅོ་རིང་བས་ཅི་ཞིག་བྱ། །ཟེར་རོ། །རི་བོང་ན་རེ། ཀྱེ་མ་རི་དགས་གྲོགས་ཀུན་གསན་མཛོད་དང་། །རྒྱལ་པོར་མིང་བཏགས་སྡིག་ལ་སྤྱོད་གྱུར་ན། །འབངས་རྣམས་བདེ་བའི་གོ་སྐབས་མི་འབྱུང་ཞིང་། །དགེ་ལ་གཞོལ་བ་རི་བོང་བདག་ཅག་ཙམ། །གཟུགས་ཁོག་ཆེ་བས་དཔོན་
དུ་འོས་གྱུར་ན། །བྲག་རི་འདི་ཡང་རྒྱལ་པོར་འོས་སམ་ཅི། །དེ་ཕྱིར་དཔོན་དུ་བདག་ཉིད་མི་འོས་སམ། །ཟེར་རོ་གཞན་ཡང་རྣ་བ་དང་། བསེ་དང་། འབྲོང་དང་། རྐྱང་དང་། དགོ་བ་དང་། གཉན་དང་། སྐྱིན་དང་། རྩོད་དང་། ཐ་ན་ཕྱི་བ་དང་བྲ་བ་ཡན་ཆད་ཀྱང་རང་རང་གི་ཡོན་ཏན་བརྗོད་ཅིང་དཔོན་ཐོབ་ཏུ་རེ་བ་ལ་ཁ་མ་འཆམ་པས། ཉིན་ཞག་མང་པོའི་བར་དུ་དཔོན་བཀོད་རྒྱུ་མ་བྱུང་བའི་ཚེ། ཐམས་ཅད་རྒྱ་གར་དུ་རི་དྭགས་ཀྲིཥྞ་སཱ་རའི་དྲུང་དུ་ཞལ་ལྕེ་འདྲི་བར་ཁ་འཆམ་སྟེ། ཤ་ཝ་གདན་འདྲེན་དུ་མངག་ནས་གདན་དྲངས་པས་ཀྲིཥྞ་སཱ་རའི་འདི་སྐད་གསུངས་སོ། །ཨེ་མ། །སྔོན་ཚེ་མི་ཡི་རྒྱལ་པོ་མང་པོས་བཀུར་བ་སྔ། །དགེ་སེམས་ཆེ་ཞིང་ཁོག་ཡང་ཤེས་རྒྱུད་དུལ་བ་སོགས། །ཡོན་ཏན་དུ་མ་ལྡན་ཏེ་ཀུན་གྱིས་དཔོན་འཁུར་བས། །མང་པོས་བཀུར་བའི་རྒྱལ་པོ་ཞེས་གྲགས་དེ་ནས་བྱུང་། །ང་རྒྱལ་རང་མཐོང་ཆེ་ཞིང་རང་གི་ཡོན་ཏན་
བརྗོད། །དེ་དག་ཐམས་ཅད་དཔོན་གྱིས་འོས་སུ་གྱུར་མ་ཡིན། །བྱང་ཆུབ་སེམས་དཔའི་རྣམ་འཕྲུལ་སྤྲེའུ་འདི་ཉིད་ནི། །རང་འདོད་ཆུང་ཞིང་ཤེས་རབ་སྙིང་རྗེ་བྱང་སེམས་ལྡན། །བོད་འདིར་མི་རྣམས་སྤེལ་བའི་ཕ་ཡང་འདི་ཡིན་པས། །སྐྱོན་མེད་ཡོན་ཏན་ཀུན་ཚང་འགྲོ་བ་ཡོངས་ལ་དཀོན། །དེ་ཕྱིར་ཁྱེད་ཅག་དཔོན་དུ་སྤྲེའུ་འདི་ཉིད་འོས། །ཅེས་སྨྲས་པས། ཀུན་བཞད་གད་དིར་རི་བྱུང་ཞིང་། །འོན་ཀྱང་སྤྲེའུ་རི་དྭགས་ཀྱི་རྒྱལ་པོར་བཀོད་ནས་ཀུན་གྱིས་དཔོན་དུ་འཁུར་རོ། སྤྲེའུས་ཀྱང་ཆོས་དང་མཐུན་པའི་ཁྲིམས་ཀྱིས་འཚོ་བར་བྱས་ཤིང་ཆོས་བཞིན་དུ་བསྐྱངས་སོ། །དེའི་སྐབས་ཤིག་ཏུ། གཅན་གཟན་ཝ་ཞེས་བྱ་བ་རང་བཞིན་གྱི་རྒྱུད་མ་རུང་ཞིང་སྡིག་ལ་དགའ་བ། གཡོ་སྒྱུ་དང་བསླུ་བྲིད་བག་མེད་པའི་བསམ་པས་ཉེ་བར་འཚོ་བ་ཞིག་ཕྱོགས་དེར་འོངས་སོ། །འོངས་ནས་ཀྱང་དེས་དེ་དག་ལ་སྨྲས་པ། ཀྭ་ཡེ། འཇིག་རྟེན་ན་རྒྱལ་པོར་འོས་སུ་
གྱུར་པ་ནི་ཡོན་ཏན་ཕུན་སུམ་ཚོགས་པ་དང་ལྡན་དགོས་པ་ཡིན་ན། ཁྱེད་ཅག་རི་དྭགས་འདི་ཙམ་གྱིས་དབུས་ནས་གང་ཡོན་ཏན་མེད་ཅིང་གཟུགས་མི་སྡུག་པ། ཤེས་པ་འཚུབ་ཅིང་འདུག་མི་ཟུག་པ་འདི་འདྲ་བའི་འོག་ཏུ་འདུག་ཅིང་རྒྱལ་པོར་འཁུར་བ་ནི་ཁྱེད་ཅག་ཤིན་ཏུ་བླུན་ནོ། །ཞེས་སྨྲས་པ་ལས། རི་དྭགས་རྣམས་ཀྱི་ནང་ནས་ཉོན་མོངས་ཀྱི་དྲ་བར་ཚུད་ཅིང་མ་རིག་པའི་ཐིབ་པོས་ནོན་པའི་བློ་ཆུང་འགའ་ཞིག་གི་བསམ་པ་ལ། ག་རེ། ཁོས་ཟེར་བ་བཞིན་བདེན་པར་འདུག་སྙམ་ནས་སླར་སྨྲས་པ། ཨེ་མ། སྐྱེས་བུ་ཆེན་པོ་ཁྱེད་ཀྱིས་གསུངས་པ་བཞིན་ཇི་ལྟ་བ་སྟེ། འོན་ཀྱང་བདག་ཅག་གི་ནང་ན་གཞན་རྒྱལ་པོའི་འོས་སུ་གྱུར་པ་དག་མ་མཆིས་སོ། །ཅེས་སྨྲས་ཚེ། ཡང་ཝས་སྨྲས་པ། ཀྱེ། འཇིག་རྟེན་ན་དཔོན་པོའི་འོས་སུ་གྱུར་པ་ནི་བདག་ལྟ་བུ་དེ། གཟུགས་མཛེས་པས་ཀུན་གྱི་ཡིད་དུ་འོང་བ། སྐད་
སྙན་པ་སིལ་སྙན་གྱི་སྒྲ་ལྟ་བུ། བློ་ཁོག་ཆེ་ཞིང་ངང་རྒྱུད་རིང་བས་ཀུན་དང་མཐུན་པ་སོགས་ཏེ། ལར་ངའི་ཡོན་ཏན་བརྗོད་ན་དཔག་ཏུ་མེད་དོ། །ཨེ་མ། ང་གངས་དཀར་གྱི་སྟོད་དུ་སྡོད་ཙ་ན། །སེང་ལྕམ་དཀར་མོའི་སྤྱོད་དང་མཚུངས། །ཉམ་ང་མེད་པའི་དཔའ་བོ་ཡིན། །ང་ནགས་མའི་ཁྲོད་དུ་སྡོད་ཙ་ན། །རྒྱ་སྟག་ཁྲ་བོའང་བྲན་དུ་འཁོལ། །ཟིལ་གྱིས་གནོན་པའི་དཔའ་བོ་ཡིན། །ང་ཡ་གི་སྤང་རིའི་ངོས་ལ་ཕྱིན་ཙ་ན། །ལྕེ་སྤྱང་དམར་མོས་ཞེ་ས་འབུལ། །ཀུན་སེམས་འཛིན་པའི་དཔའ་བོ་ཡིན། །ང་མ་གི་ནགས་མའི་རོང་དུ་ཕྱིན་ཙ་ན། །དོམ་ནག་སྙིང་དཀར་ལྷ་ཕྱག་འཚལ། །སྟོབས་དང་ལྡན་པའི་དཔའ་བོ་ཡིན། །ང་མི་རྣམས་ཀུན་གྱི་སྒོ་ནོར་ཡིན། །ལྷ་རྣམས་ཀུན་གྱི་རྟ་མཆོག་ཡིན། །ཀླུ་རྣམས་ཀུན་གྱི་འདོད་འཇོའི་བ། །ང་དེ་ཕྱིར་ཡོན་ཏན་བརྗོད་ལས་འདས། །ཁྱེད་རི་དྭགས་ཀྱི་དཔོན་དུ་ང་ཉིད་འོས། །ཅེས་
སྨྲས་པས་རི་དྭགས་བློ་ཆུང་ཁ་གཅིག་བདེན་པར་བཟུང་ནས་ཁོའི་རྗེས་སུ་འབྲང་སྟེ་སོང་ངོ་། །དེ་ནས་རེ་ཞིག་ཅིག་ན་ཁོའི་ལས་ཀྱི་རྣམ་པར་སྨིན་པ་དང་། ཚེ་འདིར་བསླུ་བྲིད་མ་རུང་པའི་བསམ་པས་ཁ་འཇམ་ཞེ་ནག་གི་ལས་ཁོ་ན་སྤྱད་པའི་རྣམ་སྨིན་གྱི་འབྲས་བུ་ཉེ་བར་སྨིན་ཏེ། ཡུལ་ཞིག་ཏུ་བཟའ་འཚོལ་དུ་སོང་བ་ལ། རྔོན་པས་གལ་རྙི་གཙུག་པར་ཁོ་ཟིན་ཏེ་བསད་དོ། །ཤི་ནས་ཀྱང་དུད་འགྲོའི་སྐྱེ་གནས་དེ་ཉིད་ལས་སླར་སེམས་ཅན་དམྱལ་བ་ཆེན་པོ་མནར་མེད་པའི་གནས་སུ་སྐྱེས་སོ། །ཁོའི་རྗེས་སུ་ཞུགས་པའི་རི་དྭགས་དེ་རྣམས་ཀྱང་སྡིག་གྲོག་བསྟེན་པའི་ཉེས་དམིགས་ཀྱི་དབང་གིས་སོ་སོ་ནས་རྐྱེན་ངན་སྣ་ཚོགས་པས་རིམ་གྱིས་ཤི་ནས་དམྱལ་གནས་སུ་ལྷུང་བར་གྱུར་ཏེ། སྤྲེའུའི་རྒྱལ་པོ་ལ་བརྟེན་པ་རྣམས་ནི་གནས་སྐབས་དང་མཐར་ཐུག་ཏུ་བདེ་བའི་དཔལ་ལ་ཉེ་བར་སྤྱོད་དོ། །ཞེས་གྲག་གོ། དེ་ལྟ་
བས་ན་ངན་སྤྱོད་གཡོ་རྒྱུ་མཁན་གྱི་ངག་ལ་ཉན་པར་མི་བྱ་ཞིང་། ནམ་དུའང་སྡིག་པའི་གྲོག་པོ་སྤང་བར་བྱ་དགོས་སོ་ཞེས་མཚོན་པར་བྱེད་པའི་རབ་ཏུ་འབྱེད་པ་སྟེ། བསྟན་བཅོས་པདྨ་དཀར་པོའི་འདབ་མ་བཞི་པའོ། །ད་ནི་ཞར་ལ་དེ་དག་གི་བརྩོད་པ་སྤོང་བ་ནི། །དེ་ཡང་ལོག་ལྟ་ཅན་གྱི་སྐྱེ་བོ་འགའ་ཞིག་གིས། །ཚུལ་འདི་ནི་མི་རིགས་ཏེ། མི་ཁོམ་པའི་གནས་བརྒྱད་ལ་དམྱལ་བ་ཡི་དྭགས་དུད་འགྲོ་གསུམ་ཚང་ཞིང་། དེ་དག་ལ་ཆོས་ཀྱི་སྣོད་དང་སྤྱོད་ཡུལ་དུ་མ་གྱུར་པའི་ཕྱིར། དུད་འགྲོ་གཅིག་གིས་གཅིག་ལ་ཆོས་སྟོན་པ་དང་ཉན་པ་སོགས་ནི་མི་རིགས་ཤིང་། སྨྲ་མི་ཤེས་པ་རྣམས་ཀྱིས་སྨྲས་པའི་ཚུལ་དང་། འདི་ལྟ་བུ་མ་བྱས་པ་ལ་བྱས་ཞེས་ཟེར་བ་ནི་བརྫུན་རླབས་ཅན་དུ་འགྱུར་རོ་ཞེ་ན་དེ་ལྟར་མི་འགྱུར་ཏེ། ཅིའི་ཕྱིར་ན། སངས་རྒྱས་ཀྱིས་གདུལ་བྱ་དྲང་བའི་ཕྱིར་དུ་གསུངས་པ་ལ་དྲངས་དོན་ཞེས་ཟེར་ཞིང་
དྲང་དོན་གྱི་ཆོས་ལ་ལས་རྒྱུ་འབྲས་དང་ངན་སོང་གི་སྡུག་བསྔལ་སོགས་དཔག་ཏུ་མེད་པ་གསུངས་པ། འོ་ན་ས་བརྐོས་ཀྱང་དངོས་སུ་དམྱལ་བ་མཐོང་རྒྱུ་མི་སྣང་བས་སངས་རྒྱས་ཀྱིས་བརྫུན་བྱས་སོ། །ཟེར་དགོས་པར་འགྱུར་ཏེ། འགྲོ་བ་རྣམས་ཆོས་ལ་བཀོད་ཕྱིར་གསུངས་མོད་ཅིང་། བདག་ཀྱང་དེ་ལྟ་བུའི་རྗེས་སུ་འབྲང་སྟེ་འདི་ལྟར་བྲིས་པ་ལ་འགལ་བ་མེད་དམ་སྙམ་མོ། །འོ་ན་དུད་འགྲོ་སྨྲ་མི་ཤེས་པ་རྣམས་ཀྱིས་ཆོས་སོགས་སྨྲས་ཚུལ་འདི་ནི་མི་མཚུངས་པའི་བརྫུན་དུ་འདུག་ཅེ་ན། སྔོན་འཕགས་པ་སྤྱན་རས་གཟིགས་ཀྱིས་བུང་བའི་གཟུགས་སུ་སྤྲུལ་ནས་ཝ་ར་་སིར་གཅང་ལྕིའི་འཁྲིད་ཀྱི་འབུ་སྲིན་རྣམས་ལ་ཆོས་བསྟན་ཚུལ་དང་། དེ་བཞིན་གཤེགས་པ་ཉིད་བྱང་ཆུབ་ཀྱི་སྤྱད་པ་སྤྱོད་ཚེ་རི་དྭགས་རུ་རུ་དང་ངང་པ་དང་རི་བོང་གི་སྐྱེས་རབས་སོགས་དཔག་ཏུ་མེད་པ་མདོ་སྡེ་དུ་མ་ནས་གསུངས་པ་དེ་དག་གཟིགས་འཚལ། ཞར་ལ་བརྩོད་པ་
སྤོང་བའི་རབ་ཏུ་འབྱེད་པ་སྟེ། །བསྟན་བཅོས་པདྨ་དཀར་པོའི་འདབ་མ་ལྔ་པ་སྟེ། །རེ་ཞིག་རྫོགས་སོ། །དེ་ལྟར་དཔེ་ཡི་འཕྲེང་བའི་ལེགས་བཤད་འདི། །རྟག་འཛིན་ཞེན་པས་བཅིངས་རྣམས་གདུལ་ཕྱིར་དང་། །བྱིས་པའི་སྐྱེ་བོ་ངོ་མཚར་བསྐྱེད་ཕྱིར་དུ། །ཅུང་ཟད་ཙམ་ཞིག་བདག་གི་འདིར་བྲིས་སོ། །གང་འདི་བདག་ནི་མཁས་དང་ཤེས་འདོད་མ་ཡིན་ཏེ། །སྐྱེ་བོ་མཆོག་དམན་ལ་ལར་ཕན་པའང་སྲིད་སྙམ་སྟེ། །རྒྱལ་དབང་པདྨ་སྙིང་ནས་གསོལ་བ་ལེགས་བཏབ་ནས། །ཚུལ་འདི་གྲུབ་པར་བགྱིས་པའི་དགེ་བ་གང་དེ་དང་། །བྱིན་རླབས་རྩལ་གྱིས་འགྲོ་ཀུན་སྲིད་མཚོ་ལས་སྒྲོལ་ཤོག །གང་གི་དགེ་དེའི་འོད་དཀར་གྱིས། །འགྲོ་ཀུན་ཡིད་ཀྱི་མུན་པ་ཀུན། །རབ་གསལ་བློ་གྲོས་ནོར་རྙེད་ནས། །ཆོས་ཉིད་སྤྲོས་དང་བྲལ་ཐོབ་ཤོག །སྲོག་ཆགས་ཀྱི་བསྟན་བཅོས་ངོ་མཚར་སྒྱུ་མའི་རོལ་རྩེད་ཡིད་འོངས་པདྨ་དཀར་པོའི་འདབ་མ་ལྔ་པ་ཞེས་བྱ་བ་རྫོགས་སོ། །མངྒ་ལཾ།