རིག་འཛིན་ཆེན་པོ་འཇའ་ཚོན་སྙིང་པོའི་སྐུ་ཚེ་མཇུག་གི་རྣམ་ཐར་མདོར་བསྡུས་ངོ་མཚར་སྣང་བྱེད།
རིག་འཛིན་ཆེན་པོ་འཇའ་ཚོན་སྙིང་པོའི་སྐུ་ཚེ་མཇུག་གི་རྣམ་ཐར་མདོར་བསྡུས་ངོ་མཚར་སྣང་བྱེད་ཅེས་བྱ་བ་བཞུགས་སོ།།
རྒྱལ་ཀུན་ཐུགས་རྗེ་ཡེ་ཤེས་དབྱིངས་སུ་དབྱེར་མེད་པའི། །རྨད་བྱུང་ཕྲིན་ལས་རྒྱ་མཚོའི་ཕྲིན་ལས་ལེགས་འོངས་ཤིང་། །སྲིད་པའི་གདུང་བསེལ་ཕན་བདེའི་ལོ་ཏོག་བསྐྱེད་པའི་ཆར། །ཡོངས་སུ་འབེབས་མཁས་དཔལ་ལྡན་བླ་མའི་ཞབས་བཏུད་དེ། །གང་དེའི་རྣམ་ཐར་བཻཌཱུར་དཀར་པོའི་བུམ་བཟང་ལས། །ལེགས་བྱུང་ཟབ་རྒྱས་དམ་ཆོས་བདུད་རྩིའི་དགའ་སྟོན་མཆོག །དེ་ལས་མཐའ་མའི་མཛད་ཚུལ་མདོ་ཙམ་འདིར་གླེང་བས། །དད་མོས་གདུང་བའི་ཤུགས་ལྡན་གང་དག་གཉན་པར་གྱིས།། ༈ །།དེ་ལ་སྤྱིར་རྒྱལ་བ་སྲས་བཅས་ཐུགས་རྗེའི་བདག་ཉིད་སྐུ་དང་མཚན་དང་མཛད་པའི་སྒྱུ་འཕྲུལ་ཞིང་ཁམས་ཀྱི་བཀོད་པ་
གཞལ་མེད་བརྗོད་ལས་འདས་པ་གང་ཇི་སྲིད་དེ་སྲིད་པའི་གདུལ་བྱ་འདུལ་བྱེད་ཀྱི་རོལ་པའི་རྣམ་འགྱུར་མཐའ་ཡས་པའི་ཚུལ་ནི་སོ་སྐྱེའི་གང་ཟག་གི་བློའི་ར་བ་ལས་འདས་མོད་ཀྱི། དོན་དམ་པའི་མཐར་ཐུག་ནི་དེ་དག་མ་ལུས་མི་ལུས་ལུས་མེད་པར་རིགས་བདག་རྡོ་རྗེའི་སློབ་དཔོན་གྱི་ངོ་བོ་ཉིད་ཁོ་ནར་ཡོངས་བཟླུམ་ཉག་གཅིག་ཐིག་ལེ་ཆེན་པོར་རོ་གཅིག་པ་ནི་ཆོས་ཉིད་དེ། དེ་བས་ན་མཚུངས་པ་མེད་པའི་རྣམ་འདྲེན་རྒྱལ་བའི་སྤྱི་གཟུགས་མཆོག །དེའི་མཚན་དང་རྣམ་ཐར་གྱི་ཆ་ཤས་ཅུང་ཟད་ཙམ་ཞིག་ཐོས་དང་མཐོང་དང་དྲན་པས་ཀྱང་འཇིགས་རུང་གི་སྲིད་མཚོ་ལས་
སྒྲོལ་ཞིང་བྱང་ཆེན་གྱི་ཐེམ་སྐས་བཟང་པོར་ཟིན་པར་འགྱུར་བའི་དོན་དང་ལྡན་ཕྱིར་ཁོ་ན་ལ་གཅིག་ཏུ་བསམས་ཏེ་སྙིགས་མ་ལྔ་བདོ་དར་བའི་ཡང་མཐའི་སྐྱེ་འགྲོ་སྡུག་བསྔལ་གྱིས་ཉམས་ཐག་པ་རྣམས་ཀྱི་སྐྱབས་མགོན་དཔུང་གཉེན་དམ་པར་གྱུར་པའི་རྗེ་བཙུན་དཔལ་ལྡན་འཁོར་ལོའི་མགོན་པོ་ཐུགས་རྗེ་མཁྱེན་བརྩེ་ནུས་སྟོབས་ཀྱི་དབང་ཕྱུག་མཚུངས་བྲལ་འཇའ་ཚོན་སྙིང་པོའམ། ཨོ་རྒྱན་ལས་འཕྲོ་གླིང་པ་ཞེས་སྙན་པར་གྲགས་པའི་བ་དན་སྲིད་རྩེར་གཡོ་བ་གང་གི་རྣམ་པར་ཐར་པའི་གཏམ་གྱི་དགའ་སྟོན་ལས། སྤྱིར་ཡོངས་སུ་གྲགས་པ་ཐུན་མོང་གི་གདུལ་བྱའི་སྣང་ངོར་བསྟུན་པ་ཕྱིའི་རྣམ་ཐར་དང་། བྱེ་བྲག་སྐལ་ལྡན་དད་ཅན་སོ་སོའི་བསམ་པ་དང་རེ་བ་ཡིད་བཞིན་དུ་སྐོང་བར་མཛད་པའི་ཞལ་གདམས་གསུང་མགུར་གྱི་རིམ་པ་སོགས་ནང་གི་རྣམ་ཐར་དང་། ཁྱད་པར་སྐལ་བ་རབ་མཆོག་དམ་ཚིག་དང་ལྡན་པའི་སྐྱེས་བུ་རྣམས་ཀྱི་མོས་པའི་རྟེན་དང་བྱིན་རླབས་ཀྱི་འདོད་པ་འཇོ་བའི་ནོར་བར་
གསང་བ་ཡང་གསང་གི་རྣམ་ཐར་གྱི་རིམ་པ་རྣམ་ཞིབ་རྒྱས་སུ་རྗེ་དེ་ཉིད་དངོས་ཀྱི་མཛད་ཅིང་གླེགས་བམ་གྱིས་ཀྱང་རྒྱ་མཚོའི་གོས་ཅན་ཁྱབ་པར་གྱུར་མོད་ཀྱི། སྐབས་འདིར་ནི། དེ་ལས་ཁྱད་པར་དུ་སྐུ་ཚེའི་མཇུག་མཐར་རེ་ཤིག་ཞིང་འདིའི་མཛད་པ་རྫོགས་པའི་ཚུལ་གྱིས་ཡོངས་སུ་མྱ་ངན་ལས་འདས་པའི་བཀོད་པའི་སྒྱུ་འཕྲུལ་ཇི་ལྟར་བསྟན་པའི་ཚུལ་གྱི་རྣམ་པར་ཐར་པ་རག་རིམ་ཙམ་ཞིག་བརྗོད་པར་བྱ་སྟེ། དེ་ལ་སྤྱིར་ཡང་སངས་རྒྱས་རྣམས་དང་གྲུབ་པ་མཆོག་གི་ས་ལ་བཞུགས་པའི་སྐྱེས་ཆེན་དག་ལ་སྐྱེ་འཆིའི་འཇིགས་པའམ་འདུས་བྱས་ཀྱི་ཆོ་འཕྲུལ་མཐའ་དག་གི་འཁྲུལ་འཁོར་ལས་འདས་ཤིང་འཕོ་འགྱུར་གཞོམ་གཞིག་གི་མཚན་ཉིད་དུ་ནམ་ཡང་མི་འགྱུར་བའི་རྒྱུ་རྐྱེན་མ་མཆིས་མོད་ཀྱང་། ཐ་མལ་འཁྲུལ་པའི་སྐྱེ་བོ་རྣམས་མ་རིག་པའི་མུན་པར་ནི་འཐུམས། ལོག་ཏོག་གི་གདོན་གྱིས་ནི་བརླབས་སོ། །ལས་ཉོན་གྱི་གཅོང་གིས་ནི་ཟིན། བག་ཆགས་
ངན་གོམས་ཀྱི་དུག་གིས་ནི་མྱོས་པའི་དབང་གིས། རྣམ་གྲོལ་བྱང་ཆུབ་ཀྱི་ཉེ་རྒྱུའི་སྤྱོད་པ་དང་བསོད་ནམས་མངོན་པར་འདུ་བྱ་བའི་ལས་ལམ་གྱི་ཕྱོགས་སུ་ནི་སྐད་ཅིག་ཙམ་ཡང་འདུན་པའི་བློ་མེད་པར། ཀུན་རྫོབ་ཀྱི་འཁྲུལ་འཛིན་ལས་ངན་འཁོར་བའི་རྒྱུ་འབྲས་འབའ་ཞིག་གི་བྱ་སྤྱོད་ལ་ཆོས་ཆེར་ཞེན་པས་ཨ་འཐས་ཏེ། ལྟོ་གོས་ཟང་ཟིང་ཁེ་གྲགས་ལོ་འདོད་དགྲ་གཉེན་ཆགས་སྡང་སོགས་རྨི་ལམ་ལས་ཀྱང་ཆེས་རྨི་ལམ་དུ་གྱུར་པ་འདི་དག་ལ་བདེན་འཛིན་གྱི་འཁྲུལ་ཞེན་དྲག་པོས་འདི་མི་བདེན་ན་ཅི་བདེན་སྙམ་པ་ལྟ་བུའི་རྟག་འཛིན་གྱི་གོང་བུ་རྡོ་རྗེ་ཕ་ལམ་འབུམ་ཕྲག་གིས་ཀྱང་གཞོམ་པའི་གོ་སྐབས་མེད་པའི་ཡིད་ཅན་གྱི་གདུལ་བྱ་རྨོངས་པ་རྣམས་དེ་ལས་བློ་བཟློག་ཅིང་འདུས་བྱས་ཀྱང་རང་ཚུལ་ཇི་ལྟ་བར་བསྟན་པའི་ངེས་འབྱུང་གི་སེམས་དང་རྣམ་དཀར་གྱི་བག་ཆགས་བསྐྱེད་ནས་ཐར་པ་དམ་པའི་ཕྱོགས་སུ་དཀྲི་བར་མཛད་པའི་སླད་དུ་མྱ་ངན་ལས་འདའ་ཚུལ་སྟོན་པར་
མཛད་པ་ནི་ཐབས་ལ་མཁས་པའི་ཕྲིན་ལས་ཀྱི་བྱེ་བྲག་སྟེ། དུས་གསུམ་གྱི་སངས་རྒྱས་ཐམས་ཅད་ཀྱིས་ཀྱང་མཐར་འདི་ཁོ་ནའི་རྣམ་པར་ཐར་པ་བསྟན་པ་འབའ་ཞིག་གོ། །དེའི་ཕྱིར་ན། བདག་ཅག་གི་འདྲེན་པ་དམ་པ་འདི་ཉིད་ཀྱང་སྐུ་གཞོན་ནུའི་དུས་ཉིད་ནས་ཐུགས་ངེས་འབྱུང་སྐྱོ་ཤས་ཀྱི་སྐྱོ་ཤས་ཀྱི་རླབས་དྲག་པོ་དང་ལྡན་པས་བསྒྲུབ་ལ་བརྩོན་པའི་གོ་ཆ་དང་། མཚན་བཅས་མཚན་མེད་ཀྱི་ཐུགས་དམ་སྒྲིག་ཆགས་རྣམས་ཀྱི་མཛད་ཚུལ་ནི་ཕལ་པ་དག་གི་བློར་ཤོང་བ་ཡང་བཀའ་བར་སྣང་ལ། གསུང་མགུར་དང་ཞལ་གདམས་ཀྱི་རིགས་ཀྱང་ངེས་འབྱུང་དང་མི་རྟག་དྲན་བསྐུལ་ལོང་མེད་ཆོས་ལ་བསྐུལ་བའི་རིགས་ཁོ་ན་བཀའ་སྩོལ་བར་མཛད་པ་དང་། བཀའ་འབངས་ཀྱི་ཆ་ཤས་སུ་གཏོགས་པ་བདག་སོགས་ལའང་ནམ་མཇལ་རེས་ཀྱི་སྐབས་ཐམས་ཅད་ལ་བཀའ་ཕེབས་ཀྱི་སྒོ་མཐའ་དག་ཀྱང་ཞིང་འདིར་ཡུན་རིང་མི་བཞུགས་པའི་གསུང་སྒྲོས་འབའ་ཞིག་དང་། སྐུ་ཚེའི་རྟེན་འབྲེལ་
དང་སྐུ་རིམ་གྱི་རིགས་ཕྱག་ཕྱི་བསྒྲུབ་དགོས་པའི་བཀའ་སྩལ་རྣམས་བགྱིས་པ་དང་བརྟན་བཞུགས་སོགས་ཕུལ་བའི་སྐབས་རྣམས་སུ་ཡང་བདག་ཅག་གི་བསམ་པ་རྫོགས་ཐབས་ཙམ་དོན་དུ་ཐུགས་ངང་ཐུང་བའི་རྣམ་པ་ཁོ་ནར་སྣང་བ་དང་། སྐུ་ཚེའི་ཚད་ཀྱང་གཏེར་ཡིག་ལས་གསུངས་པ་ལྟར་ན་དགུང་ལོ་བརྒྱད་བཅུར་བཞུགས་པ་ན་བསྟན་འགྲོར་ཕན་བདེའི་ཕྲིན་ལས་ཀྱི་རླབས་ཀྱང་འདི་ལས་བླ་ལྷགས་སུ་ལུང་བསྟན་ནའང་། རྩོད་ལྡན་གྱི་སྐྱེ་འགྲོ་སྤྱི་དང་ཁྱད་པར་གདུལ་བྱའི་བུ་འབངས་རྣམས་སྐལ་བ་དམན་པ་གྱུར་པ་དང་། ཟབ་གཏེར་ཡོངས་སུ་རྫོགས་པ་ཡང་བཞེས་པའི་རྟེན་འབྲེལ་མ་ཤར་ཞིང་ཡང་དགོས་སུ་གཏེར་སྟོན་འོད་ལུས་བསྒྲུབ་པའི་ཆོས་སྐོར་ཆོས་ཟབ་པ་ཞིག་ཡོད་པ་གདན་དྲངས་པའི་རྟེན་འབྲེལ་འགྲིག་ན་སྐུ་ཚེ་དང་རྗེས་འཇུག་གི་བསྟན་པའི་རྒྱུན་སོགས་གང་ས་ནས་གལ་ཆེ་བ་ཡོད་པར་སྣང་རུང་། དམ་སེལ་གྱི་གྲིབ་འབའ་ཞིག་ལ་བརྟེན་ནས་གཏེར་ཁ་དེ་ཡང་བཞེས་པ་
མ་ཤར་བ་དང་བཅས་ཏེ། མདོར་ན་བསྟན་འགྲོའི་སྐུ་བསོད་ཀྱིས་མ་འགྲུབ་པའི་ཚུལ་ནི་དུ་མ་ཞིག་བྱུང་བའི་མཐུས། ལུང་བསྟན་ལྟར་གྱི་ལོ་གྲངས་སུ་བཞུགས་པར་ནི་མ་གྱུར་ཞིང་དེ་ཡང་མྱ་ངན་ལས་མ་འདས་པའི་སྔ་གོང་གི་ལོ་འགའ་ན་སྐུ་ལ་སྐྱ་བབས་ཀྱི་བསྙུན་བཞིའི་རྣམ་པ་ཕྲན་བུ་སྣང་བ། ཅིར་སྣང་སྒྱུ་མའི་རོལ་པར་གཟིགས་པའི་དབང་གིས་ནད་དང་ནད་འཛིན་གྱི་རྟོག་པ་རོ་མཉམ་བཅོས་བྲལ་གཉུག་མའི་ངང་དུ་བཞུགས་པ་ལས། སྨན་དཔྱད་འཕྲོད་གཅེས་ཀྱི་རིགས་གང་ཡང་ཆེད་དུ་མི་མཛད་པར་གདའ་བ་ལ། ཞབས་ཕྱིར་འཁོད་པ་རྣམས་དང་བདག་སོགས་ཀྱི་ཡིད་ལ་མ་བཟོད་ཚེ། རྗེ་ཉིད་གསོ་བ་རིག་པའི་གནས་མཐའ་དག་གི་བདག་པོར་གྱུར་པས། བསྙུན་གྱི་རྣམ་པ་འདི་དག་ལ་འཕྲོད་བསྟེན་གྱི་གསོལ་སྨན་སོགས་སྐབས་སུ་གང་བབས་མཛད་དགོས་ཚུལ་ཞུས་པ་ན། ཞལ་ནས། དེ་དག་གི་གནས་ལ་ང་རང་རྒྱུས་
ཞིབ་ཀྱང་། སྤྱིར་འདུས་བྱས་ཀྱི་ཆོས་ཉིད་དང་། དགོས་སུ་རང་རང་གི་བཀོད་ཚད་རག་ལས་པ་མ་གཏོགས། འདོད་པ་ཆེ་ཚད་ཀྱི་ཐོག་དུ་བབས་པ་མིན། ཁྱད་པར་བདག་གི་ལུས་ལོངས་སྤྱོད་ཐམས་ཅད་བླ་མ་དཀོན་མཆོག་ལ་ཕུལ་བ་ཡིན་ཚེ། ཁོང་རྣམས་ཀྱིས་མི་མཁྱེན། མི་གཟིགས་པ་ཞིག་མི་འོང་བས་ཅི་བྱེད་དེ་ཀ་མཁྱེན་པ་མ་གཏོགས་གཞན་བྱེད་རྒྱུ་མེད། ཅེས་སོགས་འབའ་ཞིག་བཀའ་སྩལ་ཚེ་ཅི་ལྟར་ཞུར་མ་འཚལ་བ་དང་། དེ་ནས་རིམ་བཞིན་དགུང་ལོ་དྲུག་ཅུ་ལ་ཉེ་བར་ཕེབས་སྐབས་ཚོར་ཕྱི་ནང་བར་གསུམ་གྱི་བསྐལ་པའི་འཕོ་འགྱུར་དྲག་སྤྱོད་ཆེས་ཆེར་གྱུར་པའི་རྐྱེན་གྱིས་ཐུགས་ངེས་འབྱུང་འབའ་ཞིག་གིས་བསྐྱོད་པའི་རྣམ་འགྱུར་གོང་འཕེལ་དུ་བསྟན་ཏེ། འདི་ལྟ་བུ་ཡང་རྗེ་དེ་ཉིད་ལྟ་བུ་ལ་འཁོར་འདས་དུས་གསུམ་ཕྱི་ནང་གཞན་གསུམ་སོགས་ཐམས་ཅད་གདོད་ནས་རང་དག་མཉམ་ཉིད་ཆེན་པོར་ལ་བཟློས་པས་བདེ་སྡུག་དང་བཟང་ངན་དུ་འཛིན་པའི་འཁྲུལ་རྟོག་གི་སྣང་བ་ག་ལ་སྲིད་ཀྱང་
དུས་མཐའི་འགྲོ་བ་རྟག་འཛིན་ལ་ཧ་ཅང་ཞེན་པ་རྣམས་ལ་གདམས་ངག་རྣམ་ཐར་གྱི་སྒོ་ནས་བསྟན་པར་གོར་མ་ཆགས་ལ། སྐབས་དེ་དག་ཏུ། བདག་སོགས་ལ་ཡང་བཀའི་གླེགས་བུ་སྩལ་བ་སྔ་ཕྱི་ཐམས་ཅད་དུ་ཞལ་ཆེམས་ཀྱི་རྣམ་པ་ཁོ་ནར་ཕེབས་ཏེ། ངེད་རང་རྣམས་སངས་རྒྱས་ཀྱི་བསྟན་པའི་དོན་ལ་མིང་བཏགས་ནས་དཀོར་ནག་ལོག་འཚོ་ལ་སྤྱོད་ཅིང་བླ་མའི་གཟུགས་བཟུང་ནས་བཅོས་མིན་དང་ཚེ་འདི་ཁོ་ནའི་བྱ་བ་ལ་མི་ཚེ་བསྐྱེལ་བ་འདི་ཤིན་ཏུ་ཡ་ང་ཞིང་འགྱོད་པའི་ལས་ཤ་སྟག་ཏུ་སྣང་བས། ཁྱེད་རང་ཀྱང་མི་མེད་ཀྱི་རི་ཁྲོད་དེ་ལྟ་བུར་སྡོད་པ་ལ་རྗེས་སུ་ཡི་རངས་ཤིང་། ད་དུང་དེ་ལས་མ་གཡོས་པ་གལ་ཆེ། སྒྲུབ་རྒྱུད་གོང་མའི་རྣམ་ཐར་མཛད་སྲོལ་ཡང་འདི་ཀ་ཡིན། ཁོ་བོ་ཡང་ད་ནི་མྱུར་དུ་མི་རྟག་པའི་རང་བཞིན་དུ་འགྱུར་བ་བསམས་ནས། ཟང་ཟིང་ཐམས་ཅད་ཀྱང་ཡུལ་གོང་མ་ལ་མཆོད། བར་མ་ལ་འཕུལ།
འོག་མ་སྦྱིན་ནས། གང་ལ་ཡང་ཆགས་རྒྱུ་མེད་པར་རྡོ་ཐོག་ནས་བྱ་ཕུར་བ་ལྟ་བུ་ཞིག་བྱེད་པ་ཡིན། ཞེས་སོགས་ཀྱི་བཀའ་ཤོག་གནང་ཞིང་། ཕྱག་རྫས་རྣམས་སོ་སོར་གང་ལ་གང་འོས་ཀྱི་བགོ་ཤ་བྱས་ནས་དགོན་སྡེ་ཐ་དད་པ་ཐམས་ཅད་རང་བླ་མ་སློབ་དཔོན་མཆོག་དམན་བར་མ་མཐའ་དག་ལ་སྐུ་འགྱེད་མང་བསྐོལ་མཆོད་སྦྱིན་བསམ་གྱིས་མི་ཁྱབ་པ་རིས་མེད་དུ་མཛད། དེ་ནས་བཟུང་སྟེ་སྐུ་མཚམས་ཐུགས་དམ་འབའ་ཞིག་ལ་བཞུགས་ཤིང་། རིམ་གྱིས་དགུང་ལོ་རེ་གཉིས་པའི་ཐོག་ཏུ་ཕེབས་ཚེ། སྐུའི་བསྙུན་ཡང་ཆབ་གཞི་མ་བབས་པའི་མཐུས་བཞེངས་བཞུད་སོགས་མི་ཐུབ་པར་འོ་བརྒྱལ་བའི་ཚུལ་ལྟར་གྱུར་ཚེ་སྐུ་འཁོར་ཞབས་ཕྱི་བ་ཐམས་ཅད་ཡིད་མི་བདེ་ཞིང་སེམས་ལ་བཟོད་ཐབས་མ་མཆིས་པའི་དུས་ནའང་། རྗེ་ཉིད་ནི་ཐུགས་དམ་གྱི་ངང་ཁོ་ནས་དུས་འདའ་བ་མ་གཏོགས་སྙུང་ཟུག་གི་སྣང་བ་སྐད་ཅིག་ཀྱང་མི་མངའ་བར་སྐུ་སྐྱིལ་
ཀྲུང་དང་ལྟ་སྟངས་ལ་བཞུགས་པ་ལས་གཞན་མི་མཛད། དེ་སྐབས་སུ་ཞལ་སློབ་ཀྱི་གཙོ་བོར་གྱུར་པ་བླ་མ་སྐུ་སྐྱེའི་དྲུང་བགྲེས་གཞོན་གཉིས་ཀྱིས་སྐུ་དྲུང་དུ་མཆོད་པའི་མཎྜལ་ཕུལ་ཞིང་གདུང་ཤུགས་ཀྱིས་གསོལ་བ་བཏབ་སྟེ། རྗེ་ཉིད་ལྟ་བུ་སྐྱེ་འཆི་ལ་རང་དབང་ཐོབ་པ་ལགས་ཚེ། སྤྱིར་མཁའ་ཁྱབ་ཀྱི་འགྲོ་བ། དགོས་སུ་བདག་ཅག་ལྟོས་བཅས་ཀྱི་གྲྭ་སློབ་རྣམས་ལ་རྩེར་གཟིགས་ཀྱི་ཞབས་པད་བརྟན་པ་ཞིག་དང་། ཅིས་ཀྱང་ཞིང་གཞན་གྱི་གདུལ་བྱ་ལ་དགོངས་པ་དེའི་ཚེ། སྐུའི་རྣམ་འཕྲུལ་ཕྱོགས་གང་དུ་ཇི་ལྟ་བུར་འབྱོན། གསོལ་བ་གང་དུ་འདེབས། ཅེས་ནན་དུ་ཞུས་ཚེ། འདུལ་བྱས་ཀྱི་ཆོས་ཉིད་དང་ཁྱད་པར་སྐུ་དངོས་ཀྱི་འདུལ་བྱ་རྫོགས་པས་བཞུགས་པར་ནི་ཞལ་གྱི་མ་བཞེས་ཤིང་། སྐུ་སྐྱེ་བའི་རིགས་ཀྱང་མི་འབྱུང་སྟེ། དིང་སང་གི་དུས་ངན་འདི་འདྲར་སྐྱེ་བ་བླངས་ཀྱང་བསྟན་འགྲོ་ལ་ཕན་ངེས་སུ་འགྱུར་བ་དཀའ་
ཞིང་། དུས་སྙིགས་མའི་སྐུ་སྐྱེ་ལ་དགོས་པ་མི་འདུག །དེ་བས་ཁྱེད་རང་རྣམས་དམ་པའི་ཆོས་ལ་ཧུར་ཐག་གྱིས་ཤིག །ཆོས་ཚུལ་བཞིན་སུས་བྱེད་པ་དེ་ཁོ་བོ་འདུ་འབྲལ་མེད་པ་ཡིན་ནོ། །ཞེས་སོགས་ཀྱི་ཞལ་གདམས་དང་། སྐུ་སྐྱེ་རིན་པོ་ཆེ་སྐུ་ཆེ་བསྒྲེས་པ་ནི་སྔར་ནས་གཏེར་ཆོས་ཡོངས་རྫོགས་ཐོབ་ཀྱང་། སྐུ་གཞོན་པའི་དྲུང་གི་འགའ་ཞིག་མ་རྫོགས་པ་རྣམས་དེ་སྐབས་སུ་གསན་ཡིག་སོགས་ཀྱི་བཀའ་གཏད་བྱིན་རླབས་ཡང་དག་པ་མཛད། གཞན་ཡང་སྐུ་ཉིད་ཀྱི་དབོན་པོ་སོགས་དང་རྩ་བའི་ཡོན་བདག་གལ་ཆེན་རྣམས་ལའང་མཇལ་ཁ་དང་ཞལ་གདམས་ཞིབ་རྒྱས་མཐར་ཐུག་པའི་བསླབ་སྟོན་གྱིས་རྗེས་སུ་བཟུང་ཞིང་སོ་སོའི་ཡིད་ཀྱི་རེ་བ་རྫོགས་པར་མཛད་ལ། གྲྭ་སློབ་ཀྱི་རིགས་ཕྱི་ནང་དྲག་ཞན་བར་མ་ཐམས་ཅད་ལ་ཡང་ཆོས་དང་མཐུན་པའི་ཞལ་བཀོས་གནང་ཆ་གང་ལ་གང་འོས་པ་དེ་དང་རྗེས་སུ་མཐུན་པའི་བཀའ་དྲིན་གྱིས་ཁྱད་པར་མཛད་
དོ། །སྤྱིར་རྗེ་འདི་ཉིད་སྐུ་ཚེའི་སྟོད་ཀྱི་སྐབས་རྣམས་སུ་ནི་བདག་ཅག་ལ་ཡང་རྒྱུན་ལྡན་དུ་བཀའི་ཕེབས་སྒོར་ཁོ་བོ་ཤི་བའི་ཤུལ་དུ་བང་རིའི་གདན་ས་འདི་ཁྱོད་ཀྱིས་སྐྱོང་དགོས་ཅེས་ཡང་ཡང་སྩལ་བ་ལ་བདག་ལྟ་བུ་སྤྱིར་ཡང་ལུགས་གཉིས་ཀ་ནས་ཤེས་སྒོ་རབ་ཏུ་ཞན་པའི་དབང་གིས་མི་མང་གི་མགོ་འདོན་ནུས་པའི་རིགས་མིན་པ་དང་། ཁྱད་པར་ནམ་འཆི་ངེས་མེད་ཀྱི་ཚེ་མཇུག་འདི་བྱ་བཏང་རི་ཁྲོད་འགྲིམ་པའི་འདུན་པ་མ་གཏོགས། སྡེ་དགོན་འཛིན་སྐྱོང་གི་བྱ་བྱེད་ལ་ཁོ་ཐག་གཏིང་ནས་ཆོད་པ་ལགས་ཚེ་བཀའ་མི་གནང་བར་ནན་གྱིས་ཞུས་རུང་། དེ་འདྲའི་དཀའ་ལས་བྱེད་དགོས་པ་མི་ཡོང་། དབྱར་ཆོས་དགུན་ཆོས་ཙམ་འཆད་པ་དང་བསྟན་པའི་ཕྱི་རྒྱ་འཚོ་བ་ཙམ་ཞིག་ཅིས་ཀྱང་བྱེད་དགོས། རང་གི་ཤུལ་འདི་གདན་ས་ཆེ་བའི་རིགས་རྣམས་ནས་བདག་རྐྱེན་ཞུས་ན་ལས་སླ་ཞིང་
འཇིག་རྟེན་ངོས་ནས་ཤོགས་ཆེ་བ་ཞིག་བྱས་ཆོག་འདུག་ཀྱང་། དེ་བས་སྙོམས་ཆུང་ཆོས་མཐུན་ཞིག་དགའ་བ་དང་། ཁྱད་པར་གསང་སྔགས་རྙིང་མའི་ཆོས་རྒྱུད་ཅིག་རང་མེད་ཐབས་མི་འདུག་བསམ་པ་ཡིན། ཞེས་སོགས་སྔ་ཕྱི་བཀའ་ནན་དུ་སྩལ་བ་ཞིག་མཛད་ཀྱང་། ཕྱིས་སོར་སྐུ་ཚེའི་མཇུག་དང་བདག་ཀྱང་རི་ཁྲོད་འགྲིམ་པ་ཕྱིན་ཆད་ནས་བཀའ་ཤོག་ཐམས་ཅད་དུ། ངས་སྔར་ཁྱོད་ལ་དེ་སྐད་བྱས་པ་ཡིན་ཀྱང་ད་ནི་དམ་པའི་ཆོས་ཤ་སྟག་ཅིག་མ་བྱུང་ན་གདན་སའི་མིང་གིས་དགོས་པ་ཡང་མི་འདུག་པ་དང་། སྐལ་དུས་ཀྱི་བབས་ཚུལ་སོགས་གང་ལ་བལྟས་རུང་། ངས་ཁྱོད་ལ་ཆོས་ཀྱི་བར་ཆད་བྱས་པའི་དགོས་པ་མེད་ཚེ། ཁྱེད་རང་བཀའ་རྒྱུད་གོང་མའི་རྣམ་ཐར་རྗེས་སུ་འབྲེང་བ་དེ་དག་ལེགས་འདུག་གསུང་བའི་ཕེབས་སྒོ་ཤ་སྟག་གནང་བྱུང་བ་དང་། དེ་བཞིན་དུ་དབོན་པོའི་དྲུང་དང་ཞབས་ཕྱི་བའི་རིགས་རྣམས་ལ་ཞལ་ཆེམས་
ཀྱི་སྐབས་སུ་ཡང་། སྤྱིར་གྱི་བསྐལ་པའི་བབས་ཚུལ། དགོས་སུ་བང་རི་ཉིད་ཀྱི་བསྟན་པའི་བབས་ཀྱི་གནས་ཚུལ་ལུང་བསྟན་སོགས་བཀའ་སྩལ་ཞིང་། ཁོ་བོའི་ཤུལ་དུ་སུ་དང་སུ་སྡོད་ཐམས་ཅད་དམ་པའི་ཆོས་དང་སྒྲུབ་པ་ལ་གཙོ་བོར་བཏོན་པ་མ་གཏོགས། ལྟར་སྣང་གི་དགོངས་རྫོགས་རྟེན་བཞེངས། གདན་ས་སོགས་སུ་མིང་བཏགས་པའི་གཡེང་བ་ཆེར་བྱེད་མི་དགོས། ཅེས་སོགས་གྲུབ་ཐོབ་གོང་མ་རྣམས་ཀྱི་ཞལ་ཆེམ་ཇི་ལྟར་གནང་བར་མཛད། དེ་ནས་ཞག་འགའ་ཞིག་ན་སྐུ་ཐིམ་རྒྱུའི་གོང་ཙམ་དུ་བདག་ལ་ཤོག་གསུང་བའི་བཀའ་ཐམ་དང་བང་ཆེན་གནང་བྱུང་རུང་། རང་ཉིད་གཟུགས་པོས་མ་ཕེར་ཞིང་ས་ཐག་རིང་བ་སོགས་དང་གང་སྤྱི་ནས་ཞལ་གྱི་དཀྱིལ་འཁོར་མཐོང་ཐུབ་པ་ཞིག་གི་རྟེན་འབྲེལ་མ་ཤར་ཚེ་འགྲོ་བར་མ་ནུས་ལ། དེ་ནས་ཐུགས་དམ་ཏིང་འཛིན་འཁོར་ཡུག་ཏུ་བཞུགས་བཞིན་པའི་ངང་ནས་
མེ་ཕོ་ཁྱི་ལོ་ཟླ་བ་བཅུ་གཅིག་པའི་ཚེས་བཅུ་གཉིས་ཀྱི་ནམ་གུང་གི་ཁར། གཟུགས་སྐུའི་སྣང་བརྙན་ཆོས་ཀྱི་མི་འགྱུར་བདེ་བ་ཆེན་པོ་ཟག་མེད་ཡེ་ཤེས་ཀྱི་ཕྱག་རྒྱ་ཆེན་པོའི་ཀློང་དུ་ཐིམ་པའི་ཚུལ་བསྟན་ཏོ།། ༈ །།ཀྱེ་མ་ཀྱི་ཧུད་འགྲོ་བའི་མགོན་པོ་ཁྱོད། །སྲིད་པའི་འཆིང་གྲོལ་སྐྱེ་འཆིའི་མཚན་བྲལ་བཞིན། །བདག་སོགས་སྙིགས་མཐའི་འགྲོ་བ་སྐྱབས་མེད་རྣམས། །བོར་ནས་ལྷ་ཡི་ལྷ་ཁྱོད་གང་དུ་གཤེགས། །འགྲིབ་མེད་མུན་སེལ་རྒྱལ་པོ་རྟ་བདུན་ཅན། །ཁྱེད་ལ་ཉེ་རིང་འཛིན་རྟོག་མ་མཆིས་ན། །ལས་ཉོན་སྒྲིབ་ཚོགས་སྟུག་པོའི་མུན་ནང་དུ། །འཁྱམས་པའི་སྐྱེ་བོ་བདག་སོགས་ཅི་སླད་འདོར། །མཐུ་སྟོབས་ཟླ་མེད་རྟ་ལྗང་རོལ་པའི་ཁྲིད། །མཁྱེན་བརྩེའི་གཟི་འོད་ལྷ་ལམ་འགེངས་པའི་ཟེར། །ངལ་མེད་ཐུགས་རྗེས་སྲིད་མཐའ་ཇི་སྲིད་བར། །གདུལ་བྱའི་ལམ་བཟང་སྣང་བར་མཛད་དུ་གསོལ།། ༈ །།དེ་ལྟར་རྣམ་འདྲེན་
རྒྱལ་བའི་ཕོ་ཉ་དེ། །ཞི་བའི་དབྱིངས་སུ་རེ་ཞིག་ཐིམ་གྱུར་པ། །དེ་ཚེ་ས་ཆེན་རྒྱ་མཚོར་བཅས་གཡོ་ཞིང་། །ལྷ་བཅས་སྐྱེ་དགུ་གདུང་བའི་ཅ་ཅོ་སྒྲོག །མཁའ་ལ་ག་བུར་དྲི་ལྡན་ཀུནྡའི་ཆར། །ཆེས་ཆེར་བབས་པས་ས་ཀུན་མན་ཤེལ་གྱི། །ཐང་མར་བརྡལ་བས་པོ་ཊ་ལའི་ཞིང་དུ། །མངོན་སུམ་བྱས་པས་མྱ་ངན་ཚ་བདུང་བསལ། ཁ་དོག་སྣ་ཚོགས་བཀྲ་བ་དབང་པོའི་གཞུ། །བླ་བྲེས་འཕན་གདུགས་བཀྲ་ཤིས་ལྷ་རྫས་ཀྱིས། །ནམ་མཁའ་མཐའ་དབུས་བར་མེད་སྟིབས་པ་ནི། །བརྒྱ་བྱིན་ལྷ་ཡི་འབྱོར་པའང་སྐྱེངས་པར་བྱས། །ལྷོ་ཕྱོགས་དྲི་གཞོན་དལ་བུས་རྒྱུ་བ་ཡིས། །ཙན་ལྡན་ནགས་ཚལ་ལེགས་བསྐྱོད་དྲི་བསུངས་ནི། །མཆོག་ཏུ་ཞིམ་པོའི་བདུག་པས་ཉིན་དང་མཚན། །རྒྱལ་མཆོག་དེ་ལ་གུས་པས་མཆོད་པར་གྱུར། །གདན་སའི་ཉེར་དྲུང་ཀླུ་ཕུག་ཆུ་མིག་ནི། །བློ་བུར་ཆེར་རྒྱས་བསིལ་ལྡན་ཁྲུས་ཆབ་
ཀྱིས། །རླབས་འཕྲེང་མུ་ཏིག་ཆུན་པོའི་མེ་ཏོག་བཅས། །དམ་པའི་གདུང་ལ་རིངས་པར་མཆོད་ཚུལ་བསྟན། །སྤྲུལ་པའི་གཟུགས་བརྙན་འདབ་སྐྱེས་དབང་པོའི་ཚོགས། །མཐའ་དག་གཟིམ་ཁང་རྩེ་མོའི་ཉེ་སྐོར་དུ། །མྱུར་དུས་མགྲིན་པའི་རྫ་རྔ་བརྡུང་བརྩོན་པས། །གསོལ་འདེབས་རོལ་མོའི་མཆོད་པས་ལྷན་ཅིག་སྒྲོག །བསིལ་ལྡན་དགུན་རའི་སྐབས་སུ་སོན་གྱུར་ཀྱང་། །ས་གཞི་དྲོ་འཇམ་བདེ་བས་ཀུན་ཏུ་ཁྱབ། །བདུན་ཕྲག་མཚམས་ཀུན་མཁའ་ལས་མེ་ཏོག་ཆར། ཁ་བ་ལྟ་བུར་བབས་པས་ས་གཞི་བརྒྱན། །སྣ་ཚོགས་ཡ་མཚན་ལྟས་ཀྱི་བྱེ་བྲག་གིས། །སྲིད་རྩེའི་བར་དུ་མངོན་པར་སྣང་བྱས་མཐུས། །རྒྱལ་བ་གང་དེ་མྱ་ངན་འདའ་ཚུལ་དུ། །ཀུན་གྱིས་རྟོགས་ནས་མཆོད་དང་གསོལ་འདེབས་གྱུར། །དེ་ལྟར་ཡང་རྗེ་དེའི་ཞལ་ཆེམ་དུ། ཁོ་བོ་ཤི་བའི་ཚུལ་དེ་ཁྱེད་རྣམས་ཀྱིས་ཇི་ཙམ་ཡུན་རིང་བར་གསང་ཐུབ་ན་རྟེན་འབྲེལ་གྱི་དགོས་
པ་ཆེ་བར་ཡོད་པས་རབ་ལོ་བདུན། འབྲིང་ཟླ་བ་བདུན། ཐ་མར་ཞག་བདུན་དུ་རྩིས་ཀྱང་གསང་བ་གལ་ཆེའོ་གསུངས་ནའང་། འཇའ་འོད་སོགས་ལྟས་ཀྱི་ཁྱད་པར་གྱིས་ཡུན་རིང་བ་ཞིག་གསང་ཐབས་མ་རྙེད་པར་ཞག་བདུན་དུ་གསངས་ཤིང་། དེ་ནས་གྲྭ་བུ་སློབ་ཐམས་ཅད་ཀྱིས་སོ་སོར་ཅི་འབྱོར་བའི་མཆོད་པ་དང་གསོལ་འདེབས་སྨོན་ལམ་གྱི་རྒྱུན་བཟུང་ཞིང་། སྐུ་གདུང་རིན་པོ་ཆེ་ལ་ཟླ་བ་ཕྱེད་གསུམ་གྱི་བར་དུ་མཆོད་པའི་སྤྲིན་སྤྲོས། དབུས་གཙང་དྭགས་ཀོང་ལྷོ་བྱང་མཐའ་དག་གི་དགོན་སྡེ་ཆེ་ཆུང་འབྲིང་གསུམ་མ་ལུས་པར་མང་བསྐོལ་རྣམས་གཞག་སོགས་དང་། ཁྱད་པར་སྐྱེས་ཆེན་དམ་པ་རྣམས་ཀྱི་ཐོག་དྲངས་པའི་བླ་མ་དགེ་བའི་བཤེས་གཉེན་ཐམས་ཅད་ཀྱི་དྲུང་དུ་སྨོན་ལམ་རྟེན་གྱི་འབུལ་མཆོད་གྱ་ནོམས་པ་བཀྲམས་པ་ཡང་བདུན་བཞག་རྣམས་ཀྱི་ནང་ཚུད་ལ་ཕལ་མོ་ཆེ་གྲུབ་ཅིང་། དེ་ནས་དབོ་ཟླ་བའི་ཚེས་བརྒྱད་ཀྱི་དུས་དགེ་
བ་ཐུབ་པའི་དབང་པོ་སྐུ་བལྟམས་པའི་དུས་ཆེན་གྱི་ཉིན་མོར་སྐུ་གདུང་རིན་པོ་ཆེ་པུར་ཁང་དུ་སྤྱན་དྲངས་ཏེ། ཙན་ལྡན་དཀར་དམར་དང་ཨ་ག་རུའི་ཚོགས་འབའ་ཞིག་གིས་ཞུགས་ལ་བཞོན་ཏེ། བླ་མ་སྐུ་སྐྱེ་རྣམ་གཉིས་སོགས་ཞལ་སློབ་རག་བསྡུས་ཀྱིས་སྦྱིན་བསྲེག་གི་མཆོད་འབུལ་རྒྱས་པ་དང་དེ་སྐབས་ཀྱང་བདག་ལ་ཤོག་གསུང་བའི་འབོད་མི་ཡང་ཡང་བྱུང་ཀྱང་འགྲོ་བའི་རྟེན་འབྲེལ་མ་ཤར་ཚེ། ཞུགས་འབུལ་གྱི་དུས་ཚེས་སྤྲད་ནས་བདག་གིས་མཚམས་ཁང་ན་ཅི་འབྱོར་གྱི་མཆོད་པ་བཤམས་ཤིང་སྦྱིན་སྲེག་མཆོད་འབུལ་སྨོན་ལམ་སོགས་ཅི་ནུས་ཀྱིས་ཞབས་ཏོག་ཕུལ་བའི་ཁུས་བྱས་པ་དང་། སྐུ་གདུང་གི་དྲུང་དུ་དེའི་ཉིན་ཉེ་སྐོར་གྱི་གྲྭ་སློབ་ཡོན་བདག་ཕོ་མོ་དད་ཅན་ཐམས་ཅད་ཚོགས་ནས་ཕྱག་མཆོད་བགྱིས་ཚེ། ལྷོ་ནུབ་ནས་འཇའི་གུར་དང་དྲ་བར་འབྲེལ་བ་དབྱིབས་དང་ཁ་དོག་སྣ་ཚོགས་པ་པུར་ཁང་གི་ཐོག་ཏུ་ཟུག་ཅིང་འཁྱིལ་བ་དང་། སོ་སོའི་སྐལ་བ་དང་
མཐུན་པའི་མཐོང་སྣང་ཡ་མཚན་པ་ནི་བརྗོད་ཀྱིས་མི་ལངས་ལ། དབུ་ཐོད་ཚལ་བུ་ཡར་བ་ཞིག་ནི་ཐམས་ཅད་ཀྱིས་ཚོར་བས་གང་དུ་བཙལ་ཀྱང་མ་རྙེད་པས་ཡེ་ཤེས་ཀྱི་མཁའ་འགྲོས་གདན་དྲངས་པར་ཡིན་ངེས་གླེང་ཞིང་། གཞན་ཐུགས་དང་རིང་སྲེལ་ངོ་མཚར་ཅན་མང་དུ་བྱོན་པ་རྟེན་གྱི་ནང་དུ་བཞུགས་སུ་གསོལ། གདུང་རུས་དང་གདུང་ཐལ་རྣམས་ཆུ་བོར་གཤེགས་པ་དང་འགའ་ཞིག་རི་བོའི་རྩེར་སྐྱོལ་གསུང་བའི་ཞལ་ཆེམས་ཇི་ལྟ་བར་བསྒྲུབས་པའི་ཚེ། ཆུ་བོ་བཙན་ཐབས་སུ་སྐྱེ་བ་དང་། གདུང་ཐལ་སོགས་ཟླ་བ་ཙམ་གྱི་བར་དུ་ཆུ་ལ་གཤེགས་པ་དེ་ཀར་སྡོད་པ་བྱུང་སྣང་ལ། གདུང་རུས་ཕྲན་བུ་དད་རྟེན་དུ་བྱས་པ་དག་ཕྱིས་ནས་རང་བྱོན་དང་རིང་སྲེལ་སོགས་འཁྲུངས་པ་ཡང་མང་དུ་བྱུང་བར་གྲགས་སླད་དུ་དགོངས་རྫོགས་ཀྱི་སྐུ་འདྲ་རིན་པོ་ཆེ་གསེར་ཟངས་ལས་གྲུབ་པའི་ཧཱུྃ་ནག་མེ་འབར་གྱི་སྐུ་གཙོ་འཁོར་
རྣམས་བཟོ་བཀོད་སོགས་ཕུལ་དུ་བྱུང་བ་བཞེངས་སུ་གསོལ་ནས། རྗེ་དེ་ཉིད་ཀྱི་བྱིན་རླབས་རྟེན་མཐའ་དག་གིས་གཙོ་བྱས་པའི་གཞན་ཡང་རིང་སྲེལ་རྣམ་པ་གསུམ་གྱིས་བྱུར་པོར་བཀང་ཞིང་བྱིན་རླབས་ཀྱི་གཟི་འོད་རབ་ཏུ་འབར་བ་ཡང་གདན་ས་ཉིད་བཀྲ་ཤིས་ཤིང་བྱིན་ཆགས་པའི་རྟེན་དུ་བཞུགས་སོ། །དེ་ལྟར་རྒྱལ་བའི་རྒྱལ་མཆོག་ལས་འཕྲོ་གླིང་། །འཇའ་ཚོན་སྙིང་པོ་ཧཱུྃ་ནག་མེ་འབར་སོགས། །རྣམ་གྲངས་དུ་མའི་མཚན་གྱིས་ཞིང་ཀུན་ཏུ། །རབ་འབྱམས་དཀྱིལ་འཁོར་བདག་པོར་བཞུགས་པ་གང་། །གངས་ཅན་ཁྲོད་འདིར་སྙིགས་མཐའི་འགྲོ་སྒྲོན་དུ། །བྱོན་བཞུགས་རྫུ་འཕྲུལ་བཀོད་པའི་རྣམ་པར་ཐར། །ངོ་མཚར་དཔག་ཡས་ཆུ་གཏེར་ཆེན་པོ་ལས། །ཆ་ཤས་རྩྭ་རྩེའི་ཟིལ་ཐིགས་ཙམ་ཞིག་འདིར། །བཀོད་གང་རྗེས་འཇུག་ཡིད་ཆེས་སྐྱེད་བྱེད་དང་། །དད་ལྡན་བུ་འབངས་བཀའ་དྲིན་དྲིན་ཕྱིར་དང་། །མཐོང་ཐོས་ཙམ་ཡང་རྣམ་གྲོལ་
རྒྱུར་འགྱུར་དང་། །རྣམ་ཐར་ཆེན་མོའི་ཞལ་གསོ་བྱ་སླད་དུ། །རྗེ་དེའི་ཆོས་ལས་འཁྲུངས་པའི་སྐྱེས་མཆོག་ཆེ། །སྔོན་སྦྱངས་གོམས་པས་ཐོས་བསམ་སྒོམ་འབྱོར་ཅན། །ཨོ་རྒྱན་རིན་ཆེན་བསྟན་འཛིན་དཔལ་བཟང་པོས། །བསྐུལ་ངོར་སྣ་ཚོགས་རང་གྲོལ་གྱིས་བཀོད་པའི། །རྣམ་དཀར་དགེ་བ་འདིས་མཚོན་ཚེ་རབས་ཀྱི། །འདུས་བྱས་འདུས་མ་བྱས་པའི་དགེ་བ་ཀུན། །མ་ལུས་གཅིག་བསྡོམས་སྐྱབས་མཆོག་རྒྱལ་བ་དེའི། །ཐུགས་དགོངས་ཟག་མེད་དབྱིངས་སུ་རྫོགས་ཕྱིར་བསྔོ།། ༈ །།གང་ཞིག་རྒྱལ་བའི་རྣམ་པར་ཐར་པ་ངོ་མཚར་འདོད་སྦྱིན་གཏེར་གྱི་རྫིང་། །གུས་ལྡན་སྐྱེ་དགུའི་རེ་བ་སྐོངས་དང་སྲིད་པའི་ཚ་གདུང་རབ་ཞི་བྱེད། །མངོན་མཐོའི་མྱུ་གུ་ཡིད་གཞུངས་མཉེན་ལྕུགས་རྩེ་མོར་ངེས་ལེགས་གེ་སར་བཞད། །བློ་ལྡན་ངང་མོ་གཞོན་ནུའི་ཚོགས་ཡིད་ཀུན་དགའི་བདེ་སྡེར་དཔལ་ཡོན་
མིན། །བདག་འདྲ་སྦྱང་འབྲས་རྣམ་དཔྱོད་མི་ལྡན་ཀུན་ནས་རྨོངས་པའི་རང་བཞིན་གྱིས། །བླུན་གཏམ་སྨྲས་ལ་མཁས་རྣམས་མགུ་བ་མི་སྐྱེ་མོད་ཀྱང་རྒྱལ་བ་དེའི། །མཛད་པའི་ལོ་རྒྱུས་དྲང་པོར་བརྗོད་ལ་ཉེས་ལྟུང་མི་འབྱུང་དགེ་བ་འཕེལ། །དེས་ན་བརྗོད་བྱའི་ཚིག་ལ་མ་བསྙད་དོན་ལ་བསོམ་ལ་གུས་བསྐྱེད་འཚལ། །ནྱ་གྲོའི་ས་བོན་ཆུང་ཡང་འབྲས་བུ་ནི། །རྒྱ་ཆེར་འཕེལ་བཞིན་བདག་སོགས་ལྷག་བསམ་གྱིས། །འདི་བྲིས་དགེ་མཐུས་རྒྱལ་བ་མ་ལུས་ཀྱི། །བཀའ་ཡི་སྡུ་བ་པོར་གྱུར་འགྲོ་ཕན་ཤོག །མཐའ་ཡས་རྒྱལ་བའི་ཞིང་ཁམས་རྡུལ་སྙེད་ཀྱི། །བཀྲ་ཤིས་དགེ་ལེགས་འབྱོར་པ་ཇི་སྙེད་པ། །དེ་མཚུངས་འདི་ནས་འཁོར་མཐའ་གཏུག་གི་བར། །རྒྱལ་བསྟན་བདེ་འབྱོར་ཀུན་ཁྱབ་བཀྲ་ཤིས་ཤོག །ཅེས་ཆུ་སྦྲུལ་ནག་པ་ཟླ་བའི་ཚེས་ཀྱི་དཀར་ཕྱོགས་རྣམ་པར་འཕེལ་བའི་དུས་དགེ་བར། ཀོང་ཡུལ་མཐར་
ཐུག་པའི་ཤར་ཕྱོགས། གནས་ཆེན་དཔལ་རི་གངས་ཀྱི་སྐེད་ངོག རྒོད་ཕུག་བྲག་གི་བྱ་སྐྱིབས་ཀྱི་དབེན་གནས་སུ། སྣ་ཚོགས་རང་གྲོལ་གྱིས་གུས་པའི་ཡིད་ཀྱི་ཟླ་མདངས་མངོན་པར་གསལ་བའི་སྒོ་ནས་ཡི་གེར་བཀོད་པའི་དགེ་བས། མཁའ་མཉམ་འགྲོ་ཀུན་རྗེ་བཙུན་བླ་མ་མཆོག་གི་གོ་འཕངས་ལ་འཁོད་པར་གྱུར་ཅིག །ཤུ་བྷམ་མསྟུ་སརྦ་ཛ་ག་ཏཱཾ། དགེའོ། །བཀྲ་ཤིས། གཅིག་ཞུས།