ཆེད་དུ་བརྗོད་པའི་གླུའི་ཕྲེང་བ་ཁོག་དབུབ་དང་བཅས་པ་ཨུཏྤལའི་དོ་ཤལ།
ཆེད་དུ་བརྗོད་པའི་གླུའི་ཕྲེང་བ་ཁོག་དབུབ་དང་བཅས་པ་ཨུཏྤལའི་དོ་ཤལ་ལགས།
ན་མོ་མ་ཧཱ་གུ་རུ་རཏྣ་སརྦ་སིདྡྷི་ཕ་ལ་ཧཱུྃ། སྲིད་ཞི་མ་ལུས་པའི་ཁྱབ་བདག་དཀྱིལ་འཁོར་ཀུན་གཙོ་རྒྱལ་བའི་སྤྱི་གཟུགས་མཆོག་གི་དཔལ་ལྡན་བླ་མ་དམ་པའི་ཞབས་ཀྱི་པདྨོ་ལྷར་བཅས་འགྲོ་བའི་གཙུག་རྒྱན་ཉིད་ལ་རྣམ་ཀུན་ཏུ་ཕྱག་འཚལ་ཞིང་སྐྱབས་སུ་མཆིའོ། བྱིན་གྱིས་བརླབ་པར་མཛད་དུ་གསོལ། དེ་ཡང་ཐེག་པའི་ཡང་སྙིང་གསང་སྔགས་རྡོ་རྗེ་ཐེག་པའི་ཟབ་དོན་ཡེ་ཤེས་ཀྱི་འཁོར་ལོ་ཉམས་སུ་ལེན་པའི་རྣལ་འབྱོར་དམ་པ་རྣམས་ཀྱིས་རང་བྱུང་ཡེ་ཤེས་དོན་གྱི་དབྱིངས་ལས་ཉམས་རྟོགས་ཡེ་ཤེས་ཀྱི་ཆུ་འཛིན་འཁྲིག་ཅིང་ཤུགས་འབྱུང་རྡོ་རྗེའི་གླུ་དབྱངས་འབྲུག་ལྟར་
ལྡིར་བས་ཟབ་མོ་ཆོས་ཀྱི་བདུད་རྩིའི་ཆར་ཕབས་ནས་ཉམས་མྱོང་ལྷན་སྐྱེས་བདེ་ཆེན་གྱི་པད་ཚལ་རྒྱས་པར་བྱེད་པའི་མགུར་དབྱངས་ཀྱི་རིམ་པ་ལ། མགུར་གྱི་ངོ་བོ། ངེས་ཚིག དབྱེ་བ། དགོས་ཆེད། ཕན་ཡོན་དང་ལྔའི་སྒོ་ནས་གཏན་ལ་འབེབས་པར་བྱེད་དེ། དེ་ལ་ངོ་བོ་ནི། དོན་དམ་སྤྲོས་བྲལ་ཆོས་ཉིད་ཀློང་ནས་འགག་མེད་རང་གསལ་ཉམས་མྱོང་གི་མེ་ཏོག་འཁྲུངས་ཏེ། བདེ་སྟོང་ཡེ་ཤེས་ཀྱི་དྲི་བསུང་ཕྱོགས་བཅུར་འཕྲོ་ཞིང༌། རྩ་འདབས་འཁོར་ལོ་ལྔ་དང་ཁྱད་པར་མགྲིན་པ་རོ་འདུས་ཀྱི་འཁོར་ལོའི་ལྷུན་གྲུབ་རྩ་བའི་ཡི་གེ་རྣམས་རང་བྱུང་ཡེ་ཤེས་ཀྱི་རླུང་གིས་བསྐུལ་བ་
ལ་བརྟེན་ནས་གྲགས་སྟོང་འཛིན་མེད་ཀྱི་སྒྲ་དབྱངས་སུ་གྲགས་པ་ཞིག་ཡིན་ལ། ངེས་ཚིག་ནི། གཞན་གྱི་རྣ་བར་སྙན་ཅིང་རང་ཉིད་ཉམས་རྟོགས་སྤོར་བྱེད་ཀྱི་དབྱངས་སུ་མགུར་གྱི་བུམ་པ་ནས་བྱུང་ཕྱིར་མགུར་ཞེས་མིང་དུ་གྲགས་པ་ཡིན་ཞིང༌། དབྱེ་ན། རང་གཞན་གྱི་བློ་ཁ་ཆོས་ལ་བསྒྱུར་བ་སྐྱོ་ཤས་ངེས་འབྱུང་གི་དབྱངས་དང༌། ཐུགས་རྗེ་བྱིན་རླབས་གནད་ནས་བསྐུལ་བྱེད་གསོལ་འདེབས་གདུང་དབྱངས་ཀྱི་མགུར་དང༌། ཉམས་རྟོགས་ཡེ་ཤེས་གོང་འཕེལ་དུ་བྱེད་པ་གསལ་འདེབས་ཉམས་ཀྱི་དབྱངས་དང༌། ཉམས་ལེན་ཟབ་མོ་ལམ་དུ་ཁྱེར་ཕྱིར་བོགས་འདོན་སླབ་བྱ་སྙིང་གཏམ་གྱི་མགུར་དང༌། བར་ཆད་སེལ་ཞིང་ལེགས་ཚོགས་སྤེལ་བ་རྟེན་འབྲེལ་བཀྲ་ཤིས་སྨོན་ལམ་གྱི་དབྱངས་དང་ལྔར་འདུས་ལ། དགོས་ཆེད་ནི། ལེ་ལོ་ཅན་ཆོས་ལ་བསྐུལ་བ་དང༌། དད་པ་ཅན་དག་སྣང་འཆར། བརྩོན་འགྲུས་ཅན་ལེགས་ལམ་འཛུད། ཉམས་མྱོང་ཅན་ངེས་ཤེས་སྐྱེ། སྐྱོན་མཚང་
ཅན་འགྱོད་པ་བསྐྱེད། རང་ཉིད་ཉམས་རྟོགས་འཕེལ། གཞན་དག་གི་དང་བ་འདྲེན་པ་ལ་སོགས་པའི་དགོས་ཆེད་བསམ་གྱིས་མི་ཁྱབ། ཕན་ཡོན་ནི། རང་གཞན་གྱི་དགེ་ཚོགས་འཕེལ། ཡུལ་གོང་མ་རྣམས་ལ་མཆོད་པའི་མཆོག་ཏུ་འགྱུར། མ་མཁའ་འགྲོ་རྣམས་མཉེས་ཤིང་ཚིམ། སྐྱེ་འགྲོ་ཕ་མའི་རང་བཞིན་གྱི་ཚོགས་ལའང་ཆོས་ཀྱི་སྦྱིན་པ་བླ་མེད་དུ་འགྱུར། རང་གཞན་ཐམས་ཅད་ཀྱི་རྒྱུད་ལ་བདེ་སྟོང་གི་ཡེ་ཤེས་རྩོལ་མེད་དུ་འཆར་བར་བྱེད་པའི་ཐབས་ཟབ་བླ་ན་མེད་པ་ཡིན་ཞིང༌། ཉན་ཐོས་ཀྱི་ཐེག་པའི་སྐབས་སུ་ནི་གླུ་དང་བྲོ་གར་ལ་སོགས་སྤོང་བར་གསུངས་ཀྱང༌། འདི་ལ་ཡང༌། འཇིག་རྟེན་གྱི་གླུ་གར་སྤོང་བར་གསུངས་པ་ཡིན་གྱི། ཆོས་ཀྱི་ནི་སྤང་བར་མ་གསུངས་ཏེ། འདུལ་བ་ལུང་ལས། ཆོས་ཀྱི་གླུ་འདི་མ་ཤེས་པར། དབེན་པའི་གནས་སུ་བསླབ་པར་བྱ། ཞེས་གསུངས་སོ། གསང་སྔགས་རྡོ་རྗེ་ཐེག་པའི་ལམ་ཟབ་རྨད་དུ་བྱུང་བ་ཉམས་སུ་
ལེན་པའི་རྣལ་འབྱོར་ལ་ནི་ཅིར་སྣང་དག་པ་རབ་འབྱམས་གང་ཤར་ཡེ་ཤེས་ཀྱི་རྣམ་རོལ་སྤོང་ལེན་དགག་བསྒྲུབ་དང་བྲལ་ཞིང་སྒོ་གསུམ་སྐུ་གསུང་ཐུགས་ཀྱི་རང་བཞིན་རང་བྱུང་རང་བབས་རང་རིག་གི་ངང་དུ་སྒོམ་མེད་ཡེངས་མེད་གནས་ལུགས་ཁྱབ་གདལ་གྱི་ཀློང་ནས་རྡོ་རྗེ་གླུའི་དཀོར་མཛོད་ཟབ་དོན་ཚིག་གི་ཕྲེང་བ་ཤུགས་འབྱུང་རྣམས་ཀྱི་རོལ་གར་མགུར་དབྱངས་རྣ་བའི་བདུད་རྩི་ལ་དབང་བ་ནི་འོད་གསལ་རྡོ་རྗེ་སྙིང་པོའི་རྣལ་འབྱོར་པ་ཁོ་ནའི་ཁྱད་ཆོས་ཡིན་པས། དེས་ན་ཡུལ་གོང་མར་གྱུར་པ་སྐྱབས་གནས་རྩ་རྒྱུད་བླ་མའི་ཚོགས་ཀྱིས་སྟེང་གི་ནམ་མཁར་ཐུགས་རྗེ་བྱིན་རླབས་ཀྱིས་སྤྲིན་བསྟིབས། དཔའ་བོ་མཁའ་འགྲོ་ཆོས་སྐྱོང་གི་ཚོགས་ཀྱི་བར་སྣང་གང་ཞིང་མཐུ་སྟོབས་རྫུ་འཕྲུལ་གྱི་གློག་སྟོང་འཁྱུག དམ་ཚིག་མཐུན་པའི་མཆེད་ལྕམ་གྱི་ཚོགས་ཀྱི་ས་གཞི་གང་བས་ཉམས་རྟོགས་མོས་གུས་ཀྱི་མཚོ་ཆེན་བརྡོལ་བའི་གནས་འདིར། རྣལ་འབྱོར་
རྣམས་ཀྱིས་གླུ་དབྱངས་ཀྱི་མཆོད་པ་ཕུལ་བ་ལ་ཐུགས་རྗེ་བརྩེ་བའི་དགོངས་པས་གཟིགས་ཤིང་མ་བཅོས་སྤྲོས་མེད་བདེ་ཆེན་ཡེ་ཤེས་ཆེན་པོའི་ངང་ནས་གསན་འཚལ། ༈ །ན་མོཿགུ་རུ་བྷྱཿ དཔལ་རྒྱལ་བ་ཀུན་ལས་ལྷག་པའི་རྗེ། །སྐྱབས་མེད་དྲན་ཆོག་བདག་གི་ཕ། །དུས་དེ་རིང་སྙིང་ལ་ལྷངས་ཀྱི་དྲན། །ཁྱེད་ཐུགས་རྗེས་བཟུང་དང་རྗེ་བཙུན་པ། ལུས་དལ་འབྱོར་རིན་ཆེན་ཐོབ་ན་ཡང༌། །ཕ་འདྲེན་མཆོག་ཁྱེད་དང་མ་ཕྲད་ན། །བདག་དལ་འབྱོར་དོན་མེད་དེའུ་སོང་བྱས། །ལས་ཅི་བྱེད་ཀུན་བྱིས་པའི་རྩེད་མོ་འདྲ། །རྗེ་ཁྱེད་ཀྱི་ཐུགས་རྗེའི་བཀའ་དྲིན་ལས། །གཞི་འཆུགས་མེད་རྒྱལ་བསྟན་སྒོ་རུ་བཅུག །ལམ་བླ་མེད་སྨིན་གྲོལ་གྱི་བང་མཛོད་ཕོགས། །དོན་དབྱེར་མེད་རང་རིག་ལ་ཕྱག་འཛུབ་གཙུག །བདག་འདི་ཕྱིའི་བདེ་སྐྱིད་ལ་གཙན་ས་ཟིན། །གནད་མ་ནོར་ཟབ་ཁྲིད་ཀྱི་གདམས་
ངག་གི །གཞི་མ་བཅོས་ཀ་དག་གི་གནས་ལུགས་རྟོགས། །འཕྲལ་ཀུན་རྫོབ་འཁྲུལ་སྣང་གི་འཆར་སྒོ་ཀུན། །དོན་རང་རིག་རང་གསལ་གྱི་རོལ་པ་ལས། །ཐབས་དགག་སྒྲུབ་སྤོང་བསྒྱུར་ལ་རག་མ་ལུས། །གནད་གང་ཤར་རང་གྲོལ་གདམས་ངག་ཤེས། །བདག་དེ་ཕྱིར་གཏན་དོན་གྱི་མདུན་མ་འགྲུབ། །ཡར་སངས་རྒྱས་ཞིང་ཁམས་ཀྱི་བདེ་སྐྱིད་དང༌། །མར་འཁོར་བ་སྡུག་བསྔལ་གྱི་སྣང་ཚུལ་ཀུན། དོན་རང་རིག་སྤྲོས་བྲལ་གྱི་འཆར་སྒོ་ལ། །རྟོགས་མ་རྟོགས་ཁྱད་པར་གྱིས་ཕྱེས་པ་ཙམ། །དོན་དེ་ཕྱིར་ཕ་ཁྱེད་བཀའ་དྲིན་ལ། །ཚེ་བསྐལ་པའི་བར་དུ་འཁོར་ཐབས་མེད། །ལུས་ལོངས་སྤྱོད་གཏན་གྱི་འདུན་མ་ཀུན། །བློ་ལྟོས་མེད་མཆོད་པའི་མཎྜལ་དུ། །དུས་འདི་བཟུང་གཏན་དུ་འབུལ་ལགས་ན། །བདག་ཁམས་གསུམ་སེམས་ཅན་གྱི་ཚོགས་རྣམས་ཀུན། །རྗེ་ཁྱེད་ཀྱིས་གཡེལ་མེད་དུ་གཟིགས་ནས་ཀྱང༌། །ལམ་འགྱུར་
མེད་བྱང་ཆུབ་ལ་འགོད་དུ་གསོལ། བླ་མའི་བཀའ་དྲིན་དྲན་པའི་གླུའོ། ༈ །ཨེ་མ། ཕྱི་རོལ་སྣང་སྲིད་ཀྱི་དངོས་པོ་ལ་ཕར་བལྟས་པས། །སྣང་བ་ཀུན་རྨི་ལམ་སྒྱུ་མ་དང་འདྲ། །སྣ་ཚོགས་ཀུན་སྣང་ཡང་སྙིང་པོས་དབེན། །ཅིར་སྣང་ཀུན་རང་སེམས་ཀྱི་རོལ་པ་ཉིད། །འགགས་མེད་དུ་འཆར་བ་འདི་རང་རེ་སྤྲོ། ཨ་ལ་ལ། རང་བྱུང་ཡེ་ཤེས་རྟོགས་པའི་ངོ་མཚར་ལ། ཨ་ལ་ལ། མ་བཅོས་ཆོས་སྐུ་མཇལ་བའི་ཡ་མཚན་ལ། །ནང་གི་སེམས་ཉིད་ཀྱི་ངོ་བོ་ལ་ཚུར་བལྟས་པས། །རང་བཞིན་དུ་གསལ་ལ་ངོ་བོས་སྟོང༌། །ཡོད་མེད་དང་ཡིན་མིན་མཐའ་ལས་འདས། །རྟག་ཆད་ཀྱི་མཚན་མ་ཡེ་ནས་བྲལ། །སྐྱེ་མེད་དུ་གནས་པ་འདི་དང་རེ་སྤྲོ། ཨ་ལ་ལ། སྟོང་གསལ་འཛིན་མེད་རྟོགས་པའི་ངོ་མཚར་ལ། ཨ་ལ་ལ། སྐྱེ་མེད་རང་རིག་མཐོང་བའི་ཡ་མཚན་
ལ། །རྣམ་རྟོག་འགྱུ་དྲན་གྱི་རང་ངོ་ལ་ཅེར་བལྟས་པས། དྲན་རྟོག་ཀུན་ཆུ་དང་རྦ་རླབས་འདྲ། །རང་ཉིད་ལས་བྱུང་ཞིང་རང་སར་ཐིམ། །ངོ་ཤེས་ཙམ་ཉིད་ནས་རང་གྲོལ་བ། །སྤང་གཉེན་དང་བྲལ་བ་འདི་དག་རེ་སྤྲོ། ཨ་ལ་ལ། ཤར་གྲོལ་དུས་མཉམ་རྟོགས་པའི་ངོ་མཚར་ལ། ཨ་ལ་ལ། གང་ཤར་རང་གྲོལ་ཤེས་པའི་ཡ་མཚན་ལ། །མཚན་ལྡན་གྱི་བླ་མའི་ཐུགས་རྗེ་དང༌། །བདག་ཉིད་ཀྱི་དད་པའི་གདུང་ཤུགས་ཀྱི། །ཉམས་རྟོགས་ཀུན་དབྱར་གྱི་རྩི་ཐོག་བཞིན། །འཕེལ་རྒྱས་སུ་འགྱུར་བར་བྱིན་གྱིས་རློབས། ནང་སེམས་དབྱེར་མེད་ལ་སྤྲོ་བའི་གླུ། །རང་སེམས་ཀྱི་སངས་རྒྱས་འཇལ་བ་འདི། །མཚན་ལྡན་གྱི་བླ་མའི་བཀའ་དྲིན་ལགས། །དྲིན་ལན་དུ་ཅིར་སྣང་ཆོས་སྐུ་རུ། །ལྷུན་འགྲུབ་ཏུ་རྟོགས་པའི་མཎྜལ་འབུལ། །འགྲོ་དྲུག་གི་སེམས་ཅན་མཐའ་དག་ཀུན། །དྲིན་ཅན་གྱི་ཕ་མའི་རང་བཞིན་ཉིད། །དྲིན་ལན་དུ་ཐར་པའི་
ས་བོན་འདེབས། །ཕན་འདོགས་ཀྱི་མཆོག་དེ་ཅིས་ཀྱང་བྱེད། །སྐྱིད་འདོད་ཀྱི་ང་བདག་འགོང་པོ་འདི། །ཐར་ལམ་གྱི་གེགས་སུ་ལྷག་པར་ཆེ། །གེགས་སེལ་དུ་གང་བྱུང་ལམ་ཁྱེར་བས། །ཅིར་ཤར་ལ་སྒོམ་གྱི་གྲོགས་སུ་བྱེད། །བཟང་ངན་གྱི་རྟོག་ཚོགས་བསམ་ཡས་ལ། །དགག་སྒྲུབ་ཀྱི་བཅོས་མས་ཅི་ཞིག་བྱེད། །བར་ཆད་ཀྱི་རྩ་བ་གཅེས་འཛིན་ཡིན། །གཅེས་འཛིན་ནི་གདོས་བཅས་ལུས་ཀྱིས་ལན། །སྒྱུ་ལུས་འདི་ལྷ་འདྲེའི་ཚོགས་ལ་སྦྱིན། །བར་ཆད་ཀྱི་ཡུལ་གྱིས་དབེན་པ་ཞིག་བྱ། །སངས་རྒྱས་ཞེས་ཐོབ་དང་མ་ཐོབ་ཀྱི། །རེ་དོགས་འདི་འཁོར་བའི་གཏིང་རྡོ་ལགས། །མ་ཐོབ་ཀྱང་ཐོབ་འདོད་ཅིའི་ཕྱིར་བྱེད། །གཏན་འདུན་ཀུན་བླ་མའི་ཐུགས་རྗེ་ལས། །གང་ལ་ཡང་དགག་སྒྲུབ་
མི་བྱའོ། །གདམས་པ་ངེས་ཤེས་བསྐྱེད་པའི་གླུའོ། ༈ །ཀྱེ་མ། སྔོན་ཚེ་རབས་མཐའ་མེད་ད་ལྟའི་བར། །བྱས་པ་ཀུན་རྨི་ལམ་སྒྱུ་མ་འདྲ། །རྨི་ལམ་སྙིང་པོས་དབེན་ཆོས་ལ་འབུངས། །དོན་དེ་ཕྱིར་དམ་པའི་ཆོས་ལ་འབོད། དུས་དོ་ནུབ་ཙམ་དུའང་མི་འཆི་བའི། །གདེང་བློ་གཏད་རྡུལ་ཙམ་འདུག་གམ་སོམས། །ནམ་འཆི་ཆ་མེད་ཡིན་ཆོས་ལ་འབུངས། །ཚེ་མི་རྟག་སོམས་ལ་ཆོས་ལ་འབོད། །སྟོང་འཁོར་ལོས་བསྒྱུར་བའི་མངའ་ཐང་ཡང༌། །རང་འཆི་བའི་ཚེ་ན་གཅིག་པུར་འགྲོ། །འཇིག་རྟེན་མིག་འཕྲུལ་འདྲའོ་ཆོས་ལ་འབུངས། །ཀུན་འདོར་བར་ངེས་སོ་ཆོས་ལ་འབོད། །ནོར་རྣམ་ཐོས་བུ་ཡི་ལོངས་སྤྱོད་ཀྱང༌། །དཔེ་སྦྲང་མས་བསགས་པའི་སྦྲང་རྩི་འདྲ། །འཆི་དུས་ཁྱེར་དབང་མེད་དོ་ཆོས་ལ་འབུངས། །རྡུལ་ཙམ་ཡང་མི་ཕན་ཆོས་ལ་འབོད། །རྗེ་མཚན་ལྡན་བླ་མ་བརྟེན་བྱས་ནས། །ཆོས་ཟབ་རྒུའི་
སྙིང་པོ་མ་བླངས་ན། །ཅིས་ཀྱང་ཕན་པར་དཀའ་ཆོས་ལ་འབུངས། །ཚེ་ཕྱི་མ་སོམས་ལ་ཆོས་ལ་འབོད། །འཕྲལ་ལྟར་སྣང་རྣམ་རིག་བཀྲ་ན་ཡང༌། །སེམས་རིག་པའི་རང་མཚང་མ་རྟོགས་ན། །ཤེས་ལོས་ཕན་པ་མེད་དོ་ཆོས་ལ་འབུངས། །དོན་སྙིང་པོར་དྲིལ་ཅིག་སྐན་ལྡན་ཀུན། །ཆོས་ལ་བསྐུལ་བའི་གླུའོ། ༈ །ན་མོ་གུ་རུ། དག་སྣང་མོས་གུས་གཏིང་ནས་མ་བསྐྱེད་ན། །ཚིག་གིས་གསོལ་བ་བཏབ་ཀྱང་དགོས་རྒྱུ་ཆུང༌། །གདུང་ཤུགས་གུས་པ་ལྡན་པའི་རྣལ་འབྱོར་གྱིས། །ཅི་སྨྲས་གསོལ་འདེབས་དབྱངས་སུ་འགྱུར་བ་ལགས། །ཞེན་ལོག་ངེས་འབྱུང་སྙིང་ནས་མ་སྐྱེས་ན། །བྱ་བ་བཏང་ལོས་ཆོས་བརྒྱད་མགོ་མི་སྙོམ། །ཅིས་ཀྱང་དགོས་མེད་སེམས་ལ་ཤར་བ་ན། །སྣང་སྲིད་ཐམས་ཅད་རང་གི་མངའ་འབངས་ཉིད། །དོན་གྱི་སྙིང་པོ་རང་སེམས་མ་རྟོགས་ན། །ཐོས་པ་ཆེ་ཡང་ཚིག་གི་སྦུན་པ་ཙམ། །གཅིག་ཤེས་ཀུན་
གྲོལ་གནད་གསང་རིག་པའི་ཚེ། །རི་རྒྱལ་རྩེ་ནས་གླིང་བཞི་མཐོང་བ་འདྲ། །ཕུ་ཐག་སྒྲོ་འདོགས་སེམས་ལ་མ་ཆོད་ན། །བཤད་པའི་ཚིག་གིས་གནས་ལུགས་རྟོགས་པ་མིན། །སྒོམ་བྱུང་ཤེས་རབ་ནང་ནས་ཤར་བའི་ཚེ། །ཁ་བཤད་མཁན་རྣམས་ནེ་ཙོའི་འདོན་པ་འདྲ། །རྩེ་གཅིག་སྙིང་རུས་ཆོས་ལ་མ་བྱས་ན། །བྱས་ལོའི་ཆོས་ཀྱི་སངས་རྒྱས་འགྲུབ་པར་དཀའ། །ཚེ་དང་སྒྲུབ་པ་མཉམ་པའི་སྒོམ་ཆེན་ལ། །སངས་རྒྱས་གོ་འཕང་ལག་པའི་མཐིལ་ན་མཆིས། །རང་ཉིད་མི་བསྒོམ་གཞན་དོན་ལྟར་སྣང་འདི། །གཙུག་ལག་ཁང་གི་དཀོར་གཉེར་དམུས་ལོང་འདྲ། །སྒོམ་ཉམས་མཐར་ཕྱིན་དྲོད་རྟགས་ཐོབ་པའི་ཚེ། །རང་གཞན་དོན་ཀུན་ལྷུན་གྱིས་འགྲུབ་པ་ལགས། གང་ཤར་རང་བབས་ཀྱི་གླུའོ། ༈ །མི་ང་ཡི་བླ་མ་རྒྱལ་དབང་པདྨ། །དཀྱིལ་འཁོར་ཀུན་གཙོ་འཇའ་ཚོན་སྙིང་པོ། །དྲན་ཆོག་རྒྱལ་པོ་གཞན་ཕན་རྡོ་རྗེ། །དེང་འདིར་གསོལ་བ་འདེབས་སོ་ཐུགས་རྗེ་ཡིས་
གཟིགས་དང༌། །ཡ་གི་མཐོ་ལ་ཡངས་པ་དགུང་སྔོན་གྱི་མཐོན་པོ། །སྣང་བྱེད་གསལ་ལ་འཚེར་བ་ཁྲི་གདུགས་ཀྱི་ཉི་ཟླ། །འོད་ཟེར་ཕྱོགས་བཅུར་འགྱེད་པས་གླིང་བཞིའི་མུན་སེལ། །འདི་ཡང་འགྲོ་བ་ཀུན་གྱི་བསོད་ནམས་ཀྱི་མཐུ་ལགས། །སེམས་ཉིད་གདོད་ནས་དག་པ་སྟོང་ཆེན་གྱི་ཀ་དག །དྭངས་གསལ་སྒྲིབ་གཡོགས་མེད་པ་ལྷུན་གྲུབ་ཀྱི་འོད་གསལ། །རིག་རྩལ་འགགས་མེདདུ་འཆར་བ་ཀུན་ཁྱབ་ཀྱི་རོལ་པ། །འདི་ཡང་སྐུ་གསུམ་དབྱེར་མེད་རང་ཆས་སུ་བཞུགས་ལགས། །རིས་མེད་ཡོངས་ལ་ཁྱབ་པ་མཁའ་དབྱིངས་ཀྱི་དཀྱིལ་འཁོར། །གཡུ་འབྲུག་ལྡིར་དབྱངས་སྒྲོག་པའི་ཆུ་འཛིན་གྱི་ཀློང་ལས། །བདུད་རྩིའི་ཆར་ཟིལ་འཕྲེང་བ་ཡང་ཡང་དུ་བབས་པས། །ལོ་འབྲས་འབྲུ་དྲུག་སྨིན་པ་སྐྱེ་འགྲོ་ཡི་དཔལ་ལགས། །དྲིན་ཅན་བླ་མའི་ཐུགས་རྗེ་ཕྱོགས་རིས་དང་བྲལ་ཡང༌། །གདུང་བས་གསོལ་འདེབས་ལ་བརྩེ་ཆེན་གྱིས་གཟིགས་
པས། སྨིན་གྲོལ་བདུད་རྩིའི་ཆར་རྒྱུན་འབད་མེད་དུ་འབེབས་ཚེ། །ཉམས་རྟོགས་མྱུ་གུ་འཁྲུངས་པ་བཀའ་དྲིན་གྱི་མཆོག་ལགས། །དཔལ་ལྡན་རྒྱལ་བའི་སྤྱི་གཟུགས་མཚན་ལྡན་གྱི་བླ་མ། །མོས་པས་གསོལ་བ་འདེབས་པའི་བུ་འབངས་ལ་གཟིགས་ནས། །འདི་བཟུང་བྱང་ཆུབ་བར་དུ་འབྲལ་མེད་ཀྱི་ཐུགས་རྗེས། །རྟག་ཏུ་གཡེལ་མེད་སྐྱོབ་ཅིང་བྱིན་གྱིས་རང་རློབས་ཤིག དཔེ་དོན་གྱི་གླུའོ། ༈ །དུས་གསུམ་རྒྱལ་བ་ཀུན་དང༌། །དབྱེར་མེད་རིགས་ཀྱི་བདག་པོ། །དྲིན་ཅན་རྗེ་བཙུན་མཆོག་ལ། །གུས་པས་སྤྱི་བོས་འདུད་དོ། །ཕ་ཁྱོད་དྲིན་ཅན་གྱིས་བསྐྱངས་པའི། །བུ་ངའི་ཉམས་ཀྱི་བདེ་གཞས། །ཆོས་ཀྱི་གླུ་དབྱངས་ཅོར་ཅོར། །
དགྱེས་པའི་མཆོད་པར་འབུལ་ལགས། །དེ་རིང་ཉམས་ཀྱི་འཆར་སྒོ། །བདེ་ཆེན་རང་སེམས་ལྟད་མོ། །སྣ་ཚོགས་མཐོང་བས་དགའ་བ། །སྐྱིད་པའི་བྲོ་བརྡུང་ལྡིར་ཡང༌། །ཨ་ཧོ་རིག་པའི་ཁྱེ་ཆུང༌། །རྩོད་ལྡན་བསྟན་ཞབས་སྐྱེས་ཀྱང༌། །ལམ་ཟབ་འཇུག་སྒོ་མ་ནོར། །བསམ་ཞིང་རང་སེམས་དགའ་བོ། །བསྟན་པའི་རྣམ་གྲངས་མང་ཀྱང༌། །རྩོད་མེད་སྙིང་པོའི་དོན་ལ། །ཡང་དག་ཐོས་བསམ་བསྒོམ་པས། །རང་དྲིན་རང་ལ་ཆེ་བྱུང༌། །ང་བཟང་བླ་མ་མང་ཡང༌། །རྒྱལ་བས་བྱིན་རླབས་ལུང་བསྟན། །སངས་རྒྱས་དངོས་དང་མཇལ་འདུག །འདིས་ཀྱང་བློ་སེམས་བདེའོ། །རིགས་རུས་བཟང་པོར་རློམ་པའི། །རང་གཞན་གཉིས་ཕུང་བསྒྲུབ་མཁན། །བླ་མའི་ཟོལ་དང་མ་ཕྲད། །འདིས་ཀྱང་སྣང་བ་སྐྱིད་འདུག །ཐོས་བསམ་བྱས་ཡུས་ཆེན་པོས། །མཁས་གྲངས་ལོ་འདོད་མ་བྱས། །གཏན་དོན་སྙིང་པོར་དྲིལ་ཤེས། །འདུན་མའི་རྩ་
བ་ལེགས་བྱུང༌། །མི་ཚེ་རྨི་ལམ་ཙམ་འདིར། །ཐ་སྙད་ཚིག་སྐམ་མ་བསླབ། །སྒྲུབ་ལ་ཚེ་མཇུག་དྲིལ་བས། །སྐྱིད་པའི་ཉི་མ་ཤར་བྱུང༌། །འཁོར་བའི་ཁྱིམ་ཐབས་སྤང་ཤིང༌། །ཟང་ཟིང་ནོར་ཕྱིར་མ་འབྲངས། །བྱ་བཏང་ཆོས་པའི་ཁྱུ་རུ། །ཞུགས་པས་བསམ་པ་འགྲུབ་བྱུང༌། །དཀོར་ནག་ལོག་འཚོའི་ཆེད་དུ། །མི་ཚེ་གྲོང་འཁྱམས་མ་བྱས། །དབེན་གནས་རི་ཁྲོད་བསྙེགས་པས། །བར་ཆད་བདུད་དང་བྲལ་སོང༌། །དྲིན་ཅན་བླ་མ་མ་གཏོགས། མི་ཆེན་ངོ་སྲུང་མ་བྱས། །མི་ཆོས་ཁྱུ་ནས་དོན་པས། །རང་དབང་རང་གིས་ཐོབ་འདུག །ལྷ་དང་བླ་མ་མཉེས་ཕྱིར། །དམ་ཚིག་ངོས་ལྐོག་མེད་པས། །མི་གཞན་སུ་མ་མགུ་ཡང༌། །འགྱོད་སེམས་སྐད་ཅིག་མེད་དོ། །སྡེ་རིས་ཕྱོགས་འཛིན་མེད་པས། །སྐྱབས་གནས་དཀོན་མཆོག་བླ་མ། །རྒྱབ་རྟེན་མཁའ་འགྲོ་ཆོས་སྲུང༌། །འབྲལ་མེད་ངེས་ཤེས་རྙེད་བྱུང༌། །ཁ་བཤད་ལོ་མས་དབེན་ཡང༌། གཞན་དོན་འབྲས་
བུ་ལྡན་པས། །མི་ཚེ་སྟོང་ཟད་མ་བྱས། །ཅིས་ཀྱང་བློ་གྲོས་ལེགས་འདུག །བླ་མ་སངས་རྒྱས་དྲིན་གྱིས། །མུན་སྒོམ་འཐོམ་པོར་མ་ལུས། །རང་རིག་ཆོས་སྐུར་མཇལ་བས། །བྱང་ཆུབ་ལམ་སྣ་ཟིན་འདུག །ཞེན་འཛིན་འཇུར་མདུད་དམ་པོས། །རང་སེམས་རང་གི་མ་བཅིངས། །གང་ཤར་རང་གྲོལ་གནད་ཤེས། །བསམ་བཞིན་སྣང་བ་བདེ་འདུག །མི་ཚེའི་ལྷག་མ་གང་བྱུང༌། །དམ་པའི་ཆོས་ལས་གཞན་མིན། །འཇིག་རྟེན་བྱ་བ་སྤོང་ཞིང༌། །ཚེ་དང་སྒྲུབ་པ་མཉམ་ཤོག །གྲོས་ལེགས་འདུན་མ་ཤེས་པའི། །ཉམས་དབྱངས་ཆོས་ཀྱི་བྲོ་བརྡུང༌། །མཁའ་འགྲོ་དགྱེས་པའི་རོལ་མོར། །འབུལ་གྱི་བཀྲ་ཤིས་སྩོལ་ཅིག །འདི་ཡན་ཆད་ཉམས་གནས་ཆེན་ཆུ་བོ་གཡས་འཁྱིལ་གྱི་བླ་བྲང་ནོར་བུ་བརྩེགས་པའི་ཡང་དབེན་གྱི་མཚམས་དུ་སྨྲས་པའོ། ༈ །ན་མོ་གུ་རུ། རང་སེམས་རང་ངོ་ཤེས་པ་བླ་མ་ཡི་རྣལ་འབྱོར། །ཡེངས་མེད་དྲན་པས་སྐྱོང་བ་གསོལ་འདེབས་ཀྱི་དམ་པ།
།བླ་མ་ཕྱི་ན་མི་བཞུགས་རང་རིག་དང་དབྱེར་མེད། །བླ་མའི་རྣལ་འབྱོར་བསྒོམ་ན་དེ་ལྟར་དུ་མཛོད་ཅིག །གསལ་སྟོང་ཟུང་འཇུག་རྟོགས་པ་ཡི་དམ་གྱི་སྙེན་སྒྲུབ། །བསྐྱེད་རྫོགས་གཉིས་མེད་ཤེས་པ་སྒོམ་སྒྲུབ་ཀྱི་མཆོག་གྱུར། །ཡི་དམ་ཕྱི་ན་མི་བཞུགས་རང་རིག་དང་དབྱེར་མེད། །མཆོག་མཐུན་དངོས་གྲུབ་བསྒྲུབ་ན་དེ་ལྟར་དུ་མཛོད་ཅིག །རིག་རྩལ་འགག་མེད་འཆར་བ་མཁའ་འགྲོ་ཡི་རང་བཞིན། །དགག་སྒྲུབ་རེ་དོགས་བྲལ་བ་ཕྲིན་ལས་ཀྱི་སྙིང་པོ། །མཁའ་འགྲོ་ཕྱི་ན་མི་བཞུགས་རང་རིག་དང་དབྱེར་མེད། །ལས་བཞི་ཐོགས་མེད་བསྒྲུབ་ན་དེ་ལྟར་དུ་མཛོད་ཅིག །གནས་ཆེན་དཔལ་རིའི་གངས་འདབས་རྒོད་ཚང་གི་ཡང་དབེན། །དཔའ་བོ་ཌཱཀྐི་འདུ་བའི་ཚོགས་ཁང་དུ་བླངས་པའི། །ཉམས་མྱོང་གདམས་པའི་གླུ་འདི་རང་སེམས་ཀྱི་དགའ་སྟོན། །བྱིན་རླབས་བཀའ་དྲིན་ཆར་ཆེན་དགའ་སྟོན་དུ་ཕོབ་ཅིག། ༈ ཨེ་མ། དལ་འབྱོར་གྱི་མི་ལུས་འདི་སངས་རྒྱས་བསྒྲུབ་པའི་རྟེན་
མཚན་ལྡན་གྱི་བླ་མ་ནི་ཐར་པའི་ལམ་མཁན་གྱི་རབ། །གདམས་ངག་གི་བདུད་རྩི་འདི་ཡིད་བཞིན་ནོར་བུ་བས་ལྷག །ཕུན་སུམ་ཚོགས་དུས་འདིར་གཏན་འདུན་འགྲུབ་པ་ཅིག་མཛད་པར་ཞུ། །འཆི་བདག་གི་བདུད་པོ་འདི་དོག་ཁའི་གྲིབ་སོ་ལྟར་འོང༌། །བར་དོའི་འཕྲང་རིང་དེར་འགྱོད་ཀྱང་འཆི་བ་ལ་ཐུག །འཁོར་བའི་སྡུག་བསྔལ་ལ་བསམ་ན་ཆོས་མིན་ཕན་པ་མེད། །རང་དབང་ཡོད་དུས་འདིར་མི་འགྱོད་གྲབ་ཆུད་ཅིག་མཛད་པར་ཞུ། །བསླབ་ཤེས་ཀྱི་ཡོན་ཏན་ལ་མཐའ་རྒྱ་ཆོད་པ་ནི་དཀའ། །ཤེས་ཀྱང་རང་རྒྱུད་ཀྱི་ཐོག་ཏུ་ཁེལ་བ་ནི་དཀོན། །གཉིད་དང་རྣམ་གཡེང་གིས་མི་ཚེ་ཟད་ལུགས་ལ་བསམ་ནས། །དབེན་གནས་རི་ཁྲོད་དུ་ཚེ་མཇུག་དྲིལ་བ་གཅིག་མཛད་པར་ཞུ། །ལས་སྒྲིབ་བག་ཆགས་འདི་ཐོག་མེད་ནས་ངན་གོམས་ཆེ། །རྣམ་རྟོག་འཁྲུལ་འཁོར་འདི་ཤུགས་དྲག་གི་འགྱུར་ལྡོག་མང༌། །ཡེངས་མེད་དྲན་རིག་གི་བྱ་ར་
དང་མ་བྲལ་བའི་ངང༌། །མཉམ་རྗེས་དབྱེར་མེད་ཀྱི་ཀློང་དུ་གྱུར་པ་གཅིག་མཛད་པར་ཞུ། །བླ་མ་མཆེད་གྲོགས་ལ་མོས་གུས་དག་སྣང་གིས་བསྟེན། །ཕ་མ་སེམས་ཅན་ལ་སྙིང་རྗེ་བྱང་སེམས་ཀྱིས་སྐྱོངས། གསལ་སྟོང་ཟུང་འཇུག་གི་ཉམས་ལེན་ཡེངས་མེད་དུ་འབོད། །སྙིང་གཏམ་གདམས་ངག་འདི་ཐུགས་ལ་གཞག་པ་ཞིག་མཛད་པར་ཞུ། ༈ །ན་མཿཤྲཱི་གུ་ར་ཝེ། བླ་མ་ཡིད་བཞིན་གྱི་ནོར་བུ་དུས་གསུམ་གྱི་སངས་རྒྱས། །གང་གི་ཐུགས་རྗེ་ཡི་དྲིན་ལས་རང་སེམས་ཀྱི་གནས་ལུགས། །མི་རྟོག་རང་རིག་གི་ཡེ་ཤེས་དོན་དམ་གྱི་མཆོད་པ། །དཔལ་ལྡན་བླ་མའི་ཐུགས་ལ་བརྟན་བཞུགས་སུ་གསོལ་ལོ། །འགག་མེད་རང་བཞིན་གྱི་འོད་གསལ་སྣང་སྟོང་དུ་འཆར་བའི། །ཞལ་ཕྱག་མཚན་མ་ལས་འདས་པའི་སྒྱུ་འཕྲུལ་གྱི་ལྷ་སྐུ། །ཡང་དག་དོན་མཆོག་གི་སྐྱེད་རིམ་སྤྲོ་བསྡུ་དང་བྲལ་འདི། །དཔལ་ལྡན་བླ་མའི་གསུང་ལ་བརྟན་བཞུགས་སུ་འབུལ་ལོ། །སྣ་ཚོགས་སྣང་ཡུལ་དུ་གྱུར་
པའི་ཚོགས་དྲུག་གི་ལོངས་སྤྱོད། །གང་ཤར་ཞེན་འཛིན་གྱིས་བསླད་མིན་རིག་རྩལ་གྱི་རྣམ་རོལ། །དགག་སྒྲུབ་སྤོང་ལེན་དང་བྲལ་བའི་རང་གྲོལ་གྱི་མཎྜལ། །དཔལ་ལྡན་བླ་མའི་སྐུ་ལ་བརྟན་བཞུགས་སུ་འབུལ་ལོ། །འཇིག་རྟེན་སྒྱུ་མའི་འཁྲུལ་འཁོར་རྨི་ལམ་གྱི་རྒྱལ་སྲིད། །བདེན་འཛིན་ཨ་འཐས་ཀྱི་བག་ཆགས་གཞི་མེད་དུ་གྲོལ་ནས། །དབེན་གནས་རི་ཁྲོད་ཀྱི་ཕྱོགས་སུ་བྱ་བཏང་གི་བརྟུལ་ཞུགས། །གཏན་འདུན་བྱང་ཆུབ་ཀྱི་གོ་འཕང་དངོས་གྲུབ་ཏུ་སྩོལ་དང༌། །སྐུ་དྲིན་འཁོར་མེད་ཀྱི་རྗེ་བཙུན་སངས་རྒྱས་ཀྱི་སྤྱི་གཟུགས། །བདག་སོགས་མཁའ་མཉམ་གྱི་གདུལ་བྱར་བརྩེ་ཆེན་གྱིས་གཟིགས་པས། །བསྐལ་བརྒྱར་ཞབས་པད་ཀྱི་ནོར་བུ་གཡོ་མེད་དུ་བརྟན་ཞིང༌། །དམ་ཆོས་དགེ་ལེགས་ཀྱི་ཆར་ཆེན་རྒྱུན་ལྡན་དུ་ཕོབས་ཤིག ༈ ན་མོ་གུ་རུ། རྗེ་འགྲོ་བ་འདྲེན་པའི་ཐུགས་རྗེ་ཅན། །སྐྱབས་སངས་རྒྱས་ཀུན་དངོས་ལྷ་ཡི་ལྷ། །ཕ་དྲན་
ཆོག་རྒྱལ་པོ་བླ་མ་ཡི། །ཞབས་རྩིབས་སྟོང་འབར་བ་སྤྱི་བོར་བཀོད། །ལུས་ལོངས་སྤྱོད་སྣང་སྲིད་སྣོད་བཅུད་དང༌། །ཉམས་རྟོགས་པའི་མཎྜལ་འབུལ་ལགས་ན། །ཕ་མཁྱེན་བརྩེའི་གཏེར་མཛོད་སྒོ་ཕྱེས་ལ། །བུ་སྙིང་རྗེའི་ཡུལ་གྱུར་བསྐྱབ་ཏུ་གསོལ། །རྗེ་བླ་མའི་རྣམ་འཕྲུལ་གར་གྱི་རོལ། །ལྷ་ཡི་དམ་དཔའ་བོ་མཁའ་འགྲོ་ཚོགས། །རྩལ་མཐུ་སྟོབས་མངའ་བདག་དམ་ཅན་རྣམས། །དེང་རྣལ་འབྱོར་བྱང་ཆུབ་གདོང་གྲོགས་ཞུ། །ཁྱེད་འདིར་ཚོགས་དད་ལྡན་ལྷ་མི་ཀུན། །ཡིད་རྣམ་ཤེས་དབང་པོ་བག་ཕབ་ནས། །སྙན་མ་ཡེངས་ངོ་མཚར་གླུ་ལ་གསོན། །དོན་མ་ནོར་དགོངས་པའི་རྒྱ་མཚོར་བསྟིམ། །དེ་ཡན་ཆད་རྟེན་འབྲེལ་བྱིན་རླབས་གླུ། །ད་སྐབས་དོན་གླུ་ཡི་སྙིང་པོ་ནི། །ཡོངས་གླིང་བཞིའི་མཆོག་གྱུར་འཛམ་བུའི་གླིང༌། །ཆོས་སངས་རྒྱས་བསྟན་པ་དར་བའི་ས། །དགོས་རྒྱལ་བས་ལུང་བསྟན་སྔགས་ཀྱི་ཞིང༌། །ལྗོངས་བྱང་ཕྱོགས་ཁ་བ་ཅན་གྱི་ཤར། །གོང་
ཚང་ཚིང་ནགས་ཁྲོད་ལྷོ་མོན་མཚམས། །ཆུ་རབ་འཇིགས་རྦ་ཀློང་འཁྲུག་པའི་ངོགས། །ཡུལ་ཀུན་ལས་མཐར་ཐུག་སྦས་པའི་ཞིང༌། །རྗེ་རྒྱལ་མཆོག་པདྨས་བྱིན་རླབས་པས། །མཆོག་ཚེ་འདིར་ཐོབ་པའི་གནས་མཆོག་ན། །གངས་ཟུར་གསུམ་དགུང་ལ་མངོན་འཕགས་ཤིང༌། །རི་ཀུན་ལས་མཐོ་ལྷུན་བརྗིད་ཆགས་པར། །ལྷ་རང་བྱུང་གཟིགས་སྣང་མཐའ་ཡས་ཤིང༌། །མ་མཁའ་འགྲོ་སྤྲིན་ལྟར་འཐིབ་པ་དེར། །གནས་རྒྱལ་ལ་དཔལ་རི་མི་ཟེར་རོ། །གནམ་བཻ་ཌཱུར་འཁོར་ལོ་འབར་བ་ལས། །ཆར་མུ་ཏིག་འཕྲེང་བ་ཆལ་མ་ཆིལ། །བར་འཇའ་འོད་གུར་ཁྱིམ་རྟགས་བརྒྱད་རིས། །དུས་རྒྱུན་ལྡན་མཆོད་སྤྲིན་ཐིབས་སེ་ཐིབས། །གངས་རབ་དཀར་ཤེལ་གྱི་མཆོད་རྟེན་ཆེ། །དཔལ་འཁོར་ལོ་སྡོམ་པའི་སྐུ་རུ་བཞུགས། །ཆུ་གསེར་ལྡན་གཡས་ནས་འཁྱིལ་བ་ཡིས། །མཆོག་ཐུན་མོང་དངོས་གྲུབ་རྒྱུན་མི་ཆད། །ཤིན་ལྗོན་པ་མྱ་
ངན་མེད་པའི་ཚོགས། །ལྷ་ལྷ་མོའི་གར་སྟབས་ཕྱག་རྒྱ་བསྒྱུར། །རྩི་མེ་ཏོག་སྣ་ཚོགས་རབ་བཀྲ་བས། །ཡིད་འཕྲོག་པའི་མཆོད་རྫས་ཐང་མར་བརྡལ། །བྱ་རི་དྭགས་སྙན་པའི་གླུ་གར་གྱིས། །སྒྲ་རོལ་མོའི་བྱེ་བྲག་རྨད་དུ་བྱུང༌། །རི་ཐབས་ཤེས་ཕྱག་རྒྱ་བསྣོལ་བའི་དབུས། །ཡུལ་གྲོང་བརྡལ་སྐྱིད་པའི་མཚོ་མོ་བརྡོལ། །འབྲས་འབྲུ་དྲུག་དུས་སུ་སྨིན་པའི་བཅུད། །གསེར་གཞོང་མར་ཁུས་བཀང་བ་བཞིན། །ཕྱུགས་འབྲི་གཡག་དགའ་བའི་རོལ་རྩེད་འཕྱོ། །ནོར་འདོད་དགུའི་གཏེར་ཁ་ངང་གིས་ཕྱེས། །ས་དེ་ལས་སྙིང་པོར་གྱུར་པ་ཡི། །ཞིང་ངོ་མཚར་པདྨོ་བཀོད་པའི་འཁྱམས། །རྗེ་རྒྱལ་བ་རིག་འཛིན་མཚར་དངར་བས། །ལམ་བླ་མེད་བྱང་ཆུབ་བརྙེས་པའི་ས། །གནས་ཡང་དབེན་དཔལ་གྱི་རྒོད་ཚང་ཕུག །ཉམས་མི་རྟོག་རང་ཤུགས་འཁྲུངས་པའི་ས། །བྲག་རིན་ཆེན་བ་གམ་བརྩེགས་པའི་སྤོར། །བློ་བདེ་བའི་རྣལ་འབྱོར་ཉམས་དབྱངས་ཚེར། །ལྷ་མ་སྲིན་
མངོན་སུམ་འདུ་བ་ཡིས། །སྒོམ་ཡེངས་མེད་དྲན་རིག་སྐུལ་མ་བྱེད། །མ་ཌཱཀྐིའི་ཚོགས་འཁོར་དགའ་སྟོན་གྱི། །ཆོས་རྩེ་གཅིག་བསྒྲུབ་ལ་དངོས་སྒྲུབ་སྟེར། །མིའི་རྒྱུ་འགྲུལ་ངང་གིས་དབེན་པ་ཡིས། །ཚེ་འདི་སྣང་གཡེང་བའི་དགྲ་དང་བྲལ། དོན་སྙིང་པོ་དམ་ཆོས་ལྷུར་ལེན་ན། །གེགས་བར་ཆད་གཏན་བྲལ་དགོས་འདོད་འབྱུང༌། །གནས་གཞན་ལས་རྨད་བྱུང་ཁྱད་པར་ཅན། །འདིར་སློབ་རྣམས་སྔོན་བསགས་ལས་འཕྲོ་བཟང༌། །བློ་ཆོས་ལ་གཏོད་པའི་སྐལ་ལྡན་ཀུན། །ཡིད་བསམ་དོན་འགྲུབ་པོ་ཨ་ལ་ལ། །དེ་ཡན་ཆད་གནས་ཆེན་ངོ་མཚར་གླུ། །དུས་གཉན་པོ་ཚེས་བཅུའི་དགའ་སྟོན་ལགས། །ད་སྙིང་གཏམ་དོན་གྱི་གདམས་ངག་བཤད། །སྔོན་འཁོར་བ་ཐོག་མེད་ད་ལྟའི་བར། །ལས་ཉོན་མོངས་འཁྲུལ་འབྱམས་འཁོར་བར་འཁྱམས། །ད་གཏན་དོན་གཅིག་བསྒྲུབ་ལ་ཤིན་ཏུ་རན། །དེ་རན་པར་མ་ཟད་ཕྱིས་པ་ཙམ། །ཚེ་སྤྲིན་བར་གྱི་ཉི་ཤུར་ཡུད་
ཙམ་འདིར། །གཉིད་རྣམ་གཡེང་ལྟོ་གོས་ཀྱི་རྩོལ་སྒྲུབ་དང༌། །ལས་དོན་མེད་ལ་མི་ཚེ་འདས་པ་འདི། །སྔར་ཕན་ཆད་སོང་བ་ཆུད་ཟོས་ཡིན། །ད་རང་དོན་ཡང་དག་བསྒྲུབ་པར་འཚལ། །ཚེ་ངེས་མེད་ནམ་མཁའི་ན་བུན་ཡལ། །ལུས་མི་རྟག་འབྱུང་འདུས་ཁང་རུལ་འགྱེལ། །སེམས་བར་དོའི་འཕྲང་ལ་འགྲིམ་དུས་སུ། །གདེང་བློ་གཏད་ཅི་ཞིག་གང་ལ་བྱེད། །དུས་ད་ལྟ་རང་དབང་ཡོད་དུས་འདིར། །ལམ་ཡར་མར་སོ་མཚམས་མི་བྱེད་ན། །སེམས་རྣམ་རིག་བཀྲ་ཡང་དབང་པོ་ཚང༌། །གོས་ངུར་སྨྲིག་གྱོན་པའི་དགོས་ཆེད་ཅི། །ཆོས་སྙིང་པོའི་བསྟན་དང་མཇལ་དུས་སུ། །ཞག་ལོ་ཟླ་གཡེང་བའི་དབང་དུ་བཏང༌། །ནམ་ཤི་དུས་ཁ་ཆེམས་འཇོག་པ་ཀུན། །དོན་འགྲུབ་པར་གདའ་འམ་ཤེས་ལྡན་རྣམས། །ཕྱི་ལྟར་སྣང་མཛེས་མཛེས་འདྲ་བའི་ཆོས། །དེ་ཤེས་ཤེས་མང་ཡང་དགོས་དུས་བསླུ། །གནད་ཟབ་མོ་ཚེ་གཅིག་བྱང་ཆུབ་ལམ། །ཐབས་བླ་མའི་གདམས་ངག་བསྒོམ་པར་འཚལ། །
སེམས་མ་བཅོས་རང་བྱུང་ཡེ་ཤེས་དོན། །གནད་སྒོམ་ཡེངས་ལས་འདས་གསལ་སྟོང་ཟུང༌། །གཤིས་དབྱེར་མེད་རྩལ་མདངས་གང་ཤར་ཀུན། དོན་ཆོས་སྐུར་ལམ་ཁྱེར་གནད་དུ་ཆེ། །ཚིག་བརྒྱད་ཁྲི་བཞི་སྟོང་ཆོས་ཀྱི་སྒོ། །འགག་བླ་མའི་གདམས་ངག་ཚིག་གསུམ་འདུས། །ཐབས་སྟོང་ཉིད་སྙིང་རྗེ་ཟུང་འཇུག་གི །འབྲས་རང་གཞན་དོན་མཆོག་འགྲུབ་པར་མཛོད། །དེ་ཡན་ཆད་གདམས་ངག་ཟབ་མོའི་གླུ། །གནས་འདིར་ཚོགས་མི་དང་མི་མ་ཡིན། ལྷ་ག་གནས་བདག་ཞིང་སྐྱོང་མཁའ་འགྲོའི་ཚོགས། །ཆོས་གླུ་རུ་བླངས་འདིས་གྲོལ་བར་སྨོན། །སླར་འདིར་བཞུགས་ཆོས་མཛད་སྐྱེས་བུ་སོགས། །ཡོངས་རྒྱལ་བའི་བསྟན་དང་བསྟན་འཛིན་ཀུན། །མཆོག་མཐུན་མོང་དོན་གཉིས་མཐར་ཕྱིན་ཞིང༌། །ཡུལ་སྐྱེ་འགྲོ་བེད་ལེགས་ཀུན་འབྱུང་ཤོག །གླུ་ངོ་མཚར་ཚིག་དོན་ཟབ་མོའི་འཕྲེང༌། །མ་མཁའ་འགྲོ་མཉེས་པའི་རོལ་མོ་དང༌། །ཁྱེད་འདིར་
བཞུགས་སྐལ་ལྡན་མཉེས་ཕྱིར་བླངས། །དུས་རྟག་ཏུ་བཀྲ་ཤིས་ཆོས་འཕེལ་ཤོག། ཅེས་པ་འདི་དང་ལེ་ཚན་གོང་འོག་རྣམས་ནི། གནས་ཆེན་དཔལ་རི་གངས་ཀྱི་འདབས་ཞོལ་རྒོད་ཚང་དཔལ་གྱི་ཡང་དབེན་དུ་ཕྱི་ནང་གི་དཔའ་བོ་དང་རྣལ་འབྱོར་མའི་འདུ་བ་ཆེར་སྤྱོད་པའི་དུས་སུ་བླངས་པའི་སྐོར་རོ། ༈ །ཨེ་མ། གཞི་ཁྱབ་གདལ་སྟོང་ཉིད་ཕྱོགས་རིས་བྲལ། །ཆོས་འདུས་མ་བྱས་པ་རང་གི་ཀློང༌། །གཤིས་ཡེ་གྲོལ་ཆེན་པོའི་གནས་ལུགས་ལས། །བློ་བཟོ་བཅོས་མེད་པར་ཕྱམ་མེ་འདི། །རྗེ་ཆོས་ཀྱི་སྐུ་ལ་མཆོད་པར་འབུལ། །གདངས་འགགས་མེད་རང་གསལ་རིག་པའི་སྒོ། །ལམ་སྐྱེད་རྫོགས་དབྱེར་མེད་ཡེ་ཤེས་སྐུ། །དབྱིབས་ཁ་དོག་མཚན་མའི་སྤྲོས་དང་བྲལ། །དོན་རང་རིག་རང་གསལ་ཧྲིག་གེ་འདི། །རྗེ་ལོངས་སྤྱོད་རྫོགས་སྐུར་མཆོད་པ་འབུལ། །རྩལ་མ་འགགས་རོལ་མོའི་ཆོ་འཕྲུལ་དུ། །ཡུལ་སྣང་བ་སྣ་ཚོགས་ཅིར་ཤར་བ། །ཀུན་རིག་རྩལ་ཆོས་ཉིད་ཀློང་གྲོལ་བས། །ཡིད་ཞེན་འཛིན་མེད་པར་ཁྲོལ་ལེ་འདི། །རྗེ་སྤྲུལ་པའི་སྐུ་ལ་
མཆོད་པར་འབུལ། །ཆོས་ལྟ་སྒོམ་སྤྱོད་འབྲས་ཀྱི་ཐ་སྙད་ཀུན། །སེམས་རང་བབས་གནས་ལུགས་སུ་རོ་གཅིག་ཐིམ། །ཉམས་བདེ་གསལ་མི་རྟོག་གི་དཀྱིལ་འཁོར་དུ། །རྗེ་དོན་དམ་བླ་མ་དང་འདུ་འབྲལ་མེད། །མཆོག་སྲིད་ཞི་གཏན་སྒྲོལ་གྱི་དངོས་གྲུབ་ཞུའོ། ༈ །ཨེ་མ་ཧོཿ ངོ་མཚར་འདོད་འབྱུང་གི་དབང་རྒྱལ། །སྲིད་ཞིའི་གདུང་སེལ་གྱི་ནོར་བུ། །སྐྱབས་གནས་བླ་མེད་ཀྱི་ཞབས་པད། །འབྲལ་མེད་གཙུག་རྒྱན་དུ་མཆོད་ནས། །དུས་བཟང་དགེ་ལེགས་ཀྱི་ཁྲི་གདུགས། །དངོས་གྲུབ་ཚོགས་འཁོར་གྱི་མཆོད་གྲལ། །རྟེན་འབྲེལ་སྨོན་ལམ་གྱིས་འཛོམ་དུས། །དགའ་སྟོན་ཆོས་དབྱངས་འདི་བླངས་སོ། ཡ་གི་གུང་སྔོན་གྱི་དབྱིངས་ནས། །ལྷ་དབང་ཀླུ་རྒྱལ་གྱི་མཐུ་སྟོབས། །སྦྲང་ཆར་ཟིམ་བུའི་རྒྱུན་བབས་ཚེ། །འབྲུ་དྲུག་འཕེལ་བ་འདི་ཡ་མཚན། །རྔ་ཡབ་དཔལ་རི་ཡི་ཞིང་ཁམས། །པད་འབྱུང་བྱིན་རླབས་ཀྱི་ཕྲིན་ལས། །སྐལ་ལྡན་གདུལ་བྱ་རྣམས་སྨིན་མཛད། །
རང་ཅག་རྗེས་འཇུག་གི་དཔལ་ལགས། །མ་གི་ཟབ་ཡངས་ཀྱི་རྒྱ་མཚོར། །དགོས་འདོད་ཀུན་འབྱུང་གི་ནོར་བུ། །དེད་དཔོན་བརྩོན་ལྡན་གྱིས་བླངས་ནས། །སྐྱེ་འགྲོའི་དབུལ་སེལ་འདི་ངོ་མཚར། །གསུང་རབ་ཟབ་མཛོད་ཀྱི་སྙིང་ཁུ། །མཚན་ལྡན་བླ་མ་ཡི་དྲིན་ལས། །འཆུགས་མེད་ལམ་བཟང་ལ་ཚུད་འདི། །བསམ་ན་བཀའ་དྲིན་དུ་ཆེ་འདུག །འཇིག་རྟེན་ཆོས་བརྒྱད་ཀྱི་འདམ་ལས། །རྒྱང་བྲོས་བྱ་བཏང་གི་བརྟུལ་ཤུགས། །དབེན་གནས་རི་ཁྲོད་ཕྱོགས་བསྙེགས་པས། །གཏན་གྱི་མདུན་གྲོས་ལེགས་བྱུང༌། །ནམ་ཡང་དོན་མེད་ཀྱི་ལས་ལ། །མ་ཞེན་གྲུབ་ཐོབ་ཀྱི་རྗེས་ཟིན། །དོན་གཉིས་འབད་མེད་དུ་འགྲུབ་པའི། །བཀྲ་ཤིས་གོང་འཕེལ་དུ་སྩོལ་ཞིག། ༈ རྗེ་བླ་མ་སངས་རྒྱས་དངོས་དང་མཇལ། །སྐྱབས་རེ་ས་མ་ནོར་བློ་རེ་བདེ། །གནས་གར་འདུག་རྒྱལ་བའི་ཞིང་ཁམས་ཉིད། །ཡུལ་བདག་བཟུང་མ་དགོས་བློ་རེ་བདེ། །ལས་ཅི་བྱེད་བླ་མའི་ཞབས་ཏོག་བསྒྲུབ། །ཚེ་སྟོང་ཟད་མ་གྱུར་བློ་རེ་བདེ། །
ལམ་ཟབ་མོ་ཐེག་པའི་ཡང་རྩེར་ཞུགས། །ཆོས་གཞན་ལ་མི་སྨོན་བློ་རེ་བདེ། །གཏན་འདུན་མ་དམ་པའི་ཆོས་ལ་དྲིལ། །ཡིད་འགྱོད་མེད་ཁོང་ཆུད་བློ་རེ་བདེ། །བློ་བདེ་བ་ལྔ་ཡི་གྲེ་ཆུང་གི །དབྱངས་མཆོད་པར་འབུལ་ལོ་དངོས་གྲུབ་སྩོལ། ༈ །གཞི་གདོད་ནས་དག་པའི་ཡེ་ཤེས་ལ། །འཕྲལ་འཁྲུལ་རྟོག་གི་དྲི་མས་མ་བསླད་པར། །ལྟ་བ་མིང་དུ་བཏགས་མོད་རིག་པའི་གཤིས། །ཆོས་སྐུའི་ངོ་བོ་ཉིད་དུ་བླ་མས་གསུངས། །ལམ་ཟབ་རྒུའི་གནད་ཀུན་གཅིག་པའི་དོན། །སེམས་གང་ཤར་བཟོ་མེད་སྐྱོང་བ་ལ། །སྒོམ་པའི་མིང་དུ་བཏགས་ཀྱང་དམིགས་གཏད་བྲལ། །བཅོས་མའི་འཇུར་མདུད་འཁྲོལ་ན་དེ་ཉིད་རང༌། །ལས་འདུ་བྱེད་སྤྱོད་ལམ་ཀུན་ཏུ་ཡང༌། །བློ་ཨ་འཐས་ཀྱི་ཞེན་འཛིན་མ་ཞུགས་ན། །སྤྱོད་པའི་མིང་དུ་བཏགས་ནའང་སྒྱུ་མའི་འཕྲུལ། །བྱ་བྱེད་ལས་གསུམ་རིག་པའི་རོལ་པ་ཉིད། །ཆོས་ལྟ་སྒོམ་སྤྱོད་གསུམ་རོ་གཅིག་པའི། །
དོན་མངོན་གྱུར་འབྲས་བུ་བརྗོད་པ་གང༌། །ཐོབ་ཤོར་རེ་དོགས་མཚན་མས་བཅིངས་མིན་པའི། །ཡང་དག་དོན་གྱི་སངས་རྒྱས་འགྲུབ་བྱིན་རློབས། ཅེས་རང་གི་གཅུང་པོ་སུ་དྷརྨ་ཏིའི་ངོར་བླངས་པ་དགེའོ། །ན་མོ་གུ་རུ། མཐའ་བྲལ་ཀ་དག་གི་ནམ་མཁའ་ལ། །འགགས་མེད་གསལ་རིག་སྤྲིན་ཆེན་འཁྲིགས། །སྨོན་ལམ་ཐུགས་རྗེའི་གློག་སྟོང་འཁྱུག །བདེན་ཚིག་གི་འབྲུག་སྒྲ་ལྡིར་བ་ལས། །ཕན་བདེའི་ཆར་ཆེན་དབབ་ཏུ་གསོལ། །ཕྱོགས་བྲལ་ལྟ་བའི་ནམ་མཁའ་ལ། ཡེངས་མེད་སྒོམ་པའི་སྤྲིན་ཆེན་འཁྲིགས། །འཛིན་མེད་སྤྱོད་པའི་གློག་སྟོང་འཁྱུགས། །རང་གྲོལ་གྱི་འབྲུག་སྒྲ་ལྡིར་བ་ལས། །ཉམས་རྟོགས་ཀྱི་ཆར་ཆེན་དབབ་ཏུ་གསོལ། །སྐྱེ་འགྲོ་བསོད་ནམས་ཀྱི་ཞིང་ས་རུ། །སྐྱབས་གནས་བྱིན་རླབས་ཆར་ཆེན་ཕབ། །དངོས་གྲུབ་དགེ་ལེགས་ཀྱི་མྱུ་གུ་འཁྲུངས། །སྨིན་གྲོལ་བྱང་ཆུབ་ཀྱི་འབྲས་བུ་སྨིན། །སྐུ་གསུམ་ལྷུན་གྲུབ་ཏུ་འབྱུང་བར་ཤོག། ཅེས་བྱིན་
རླབས་ཆར་འབེབས་ཀྱི་གླུ་འདི་ཉིད། ཡུལ་ཁམས་རྣམས་སུ་ཐན་པ་ཆེན་པོ་བྱུང་བའི་ཚེ་ཆར་དབབ་པའི་སླད་དུ་བླངས་པས་དངོས་གྲུབ་ཡ་མཚན་གྱི་རྟགས་མངོན་པར་གསལ་བར་གྱུར་པའོ། ༈ །རྗེ་ཁམས་གསུམ་ཡོངས་ན་ཟླ་བྲལ་བ། །ངོ་མཚར་པདྨའི་ལྷུམས་ཉིད་ལས། །རང་བྱུང་སྤྲུལ་པས་འགྲོ་བ་འདུལ། །མཚོ་སྐྱེས་རྡོ་རྗེའི་ཞབས་པད་ལ། །བུ་མོས་གུས་གདུང་བས་རབ་བཏུད་ཅིང༌། །ལན་བརྒྱར་ཕྱག་འཚལ་གསོལ་འདེབས་ཀྱིས། །དམིགས་མེད་བརྩེ་ཆེན་ཐུགས་རྗེ་ཡིས། །རྟག་པར་གཟིགས་ཤིང་བྱིན་གྱིས་རློབས། །ཁྱེད་སྐལ་ལྡན་སྐྱེས་མཆོག་རྣལ་འབྱོར་པ། །ཆོས་སྙིང་པོའི་དོན་ལ་བརྩོན་མཛད་པའི། །ཤཱཀྱའི་མཚན་ཅན་རིགས་ཀྱི་བུ། །སྙན་ལེགས་པར་གསོན་དང་ཨེ་མ་ཧོ། །སྤྱིར་འདུས་བྱས་སྒྱུ་མའི་རང་མཚང་དང༌། །དགོས་བསྐལ་པ་སྙིགས་མའི་རྣམ་འགྱུར་སོགས། །ཚུལ་ཅི་ལ་བསམ་ཞིང་བལྟས་ན་ཡང༌། །ཡིད་སྐྱོ་ནས་སྙིང་རླུང་ཁོང་ནས་ལྡང༌། །ཆོས་འདུལ་
འཛིན་དགེ་སྦྱོང་ལ་ཕར་བལྟས་ཚེ། །འཕྲལ་ཚུལ་འཆོས་ངོས་ལྐོག་གི་ན་བུན་ཐིབས། །ནང་གསང་སྔགས་པ་ལ་ཕར་བལྟས་ན། །ལྟ་སྤྱོད་ཡ་བྲལ་གྱི་རྦ་ཀློང་འཁྲུག །སྒོམ་རྣལ་འབྱོར་སྤྱོད་ལ་བལྟས་ན་ཡང༌། །ཆོས་དང་གང་ཟག་སོ་སོར་འཐོར། །གཞན་འདྲེན་བྱེད་ཀྱི་བླ་གཟུགས་ལ་བལྟས་པའི་ཚེ། །རང་ལས་ཉོན་འཁྲུལ་པའི་བརྩོན་རར་ཆུད། །ལར་རང་གཞན་སུ་ལ་དཔྱད་གྱུར་ཀྱང༌། །ཚིག་ཁ་བཤད་ལོ་མ་རྒྱ་ཆེ་ཞིང༌། །ཐོས་བསམ་དང་སྒོམ་སྒྲུབ་གཞན་དོན་སོགས། །བྱས་བྱས་དང་ཡོང་ཡོང་གི་མིག་འཕྲུལ་གྱིས། །དགོས་ངེས་ཀྱི་མདོ་དོན་རླུང་ལ་བསྐུར། །མི་ཚེ་རྨི་ལམ་གྱི་ཡུན་སྲིད་འདི། །ལྟོ་གོས་རྣམ་གཡེང་ལ་ཟད་བྱས་ནས། །དཀོར་སྡིག་ཉེས་ལྟུང་གི་འཁུར་ཆེན་གྱིས། །བར་དོའི་འཕྲང་རིང་ལ་འོ་བརྒྱལ་མཆིས། །འཇིག་རྟེན་ཆགས་སྡང་གི་གྲོང་ཁྱེར་དབུས། །འདི་སྣང་ཆོས་བརྒྱད་ཀྱི་འཁྲུལ་ཆེན་ལ། །བསྟན་པ་དང་འགྲོ་བའི་དོན་
ཡིན་ལོ། །རང་ཕུང་གཞན་ཕུང་གི་འདུན་གྲོས་མཁན། །ཟང་ཟིང་བརྙེད་འཚོལ་གྱི་ཟོག་པོ་ལ། །བླ་མའམ་བཙུན་པར་བཏགས་པ་འདི། །སྐྱུག་ལོག་ཞིག་སྙིང་གི་དཀྱིལ་ནས་སྐྱེས། ༈ །ཀྱེ་མའོ། བློ་ཆོས་ལ་གཏོད་ངེས་ཀྱི་སྐལ་ལྡན་རྣམས། །དུས་དིང་སང་གི་གནས་ཚུལ་འདི་སོམ་ལ། །ཕྲལ་འདིར་སྣང་གི་འདུན་མས་མ་གཡེངས་པར། །སྙིང་ཐག་པར་ལྷ་ཆོས་ཞིག་མཛོད་དང་བུ། །ཆོས་ཟབ་ཟབ་དང་ཡིན་ཡིན་གྱི་གྲངས་མང་ཞིང༌། །སྤྲོས་བཅས་ཀྱི་རྣམ་དཔྱོད་གཞིགས་ཆེ་ཡང༌། །རང་སེམས་ཀྱི་གནད་དོན་མི་ཤེས་ན། །མཚོ་འགྲམ་དུ་སྐོམ་གྲིར་ཤི་དང་མཚུངས། །ཆོས་ཕྱག་རྫོགས་སོགས་སྒོམ་རིམ་རྒྱ་ཆེ་ཞིང༌། །སྔོན་འགྲོ་དང་དངོས་གཞི་སྣ་ཚོགས་ཀྱང༌། །དགོས་དོན་དུ་རང་རིག་གཉུག་མའི་དོན། །རྗེན་པ་རུ་མཐོང་བ་ཁོ་ན་ལགས། །ཆོས་ལྟ་བ་ཟེར་བའི་སྒྲ་བོ་ཆེ། །མཐའ་
དང་བྲལ་སོགས་ལུང་རིགས་ཀྱིས། །གཞིགས་རྩོད་སྣ་ཚོགས་མང་བྱེད་ཀྱང༌། །རང་སེམས་གཏན་ལ་ཕེབས་པ་དཀོན། །མཐའ་ཡོད་ན་ཡོད་ཆུག་མེད་ན་མེད། །ཚིག་སྐམ་པོའི་ལྟ་བས་དགོས་རྒྱུ་ཆུང༌། །རང་རིག་རང་ངོ་ཤེས་པ་ལ། །ལྟ་བ་མཐོ་དམན་གྱི་གཉེར་ཁར་ཟད། །ཆོས་སྒོམ་པ་ཟེར་བའི་སྒྲ་བོ་ཆེ། །སྒོམ་ལ་སྒོམ་བརྟན་དང་མི་བརྟན་སོགས། །ཞེན་འཛིན་གྱི་བརྒྱ་མདུད་དམ་པོ་ཡིས། །རྣལ་འབྱོར་པ་རང་ཉིད་རང་གིས་བཅིངས། །བློས་བསྒོམ་རྒྱུ་ཅིག་ཡོད་ན་འཛིན་པ་ཡོད། །འཛིན་པས་འཁྲུལ་པ་ལུག་རྒྱུད་སྤེལ། །སྒོམ་མེད་དོ་སྙམ་ཡང་མི་དགོས་ཀྱི། །རྣམ་རྟོག་ཁོ་སྒོམ་དུ་ཡེ་ནས་མེད། །འགྱུ་བ་བཀག་ན་ཡེ་ཤེས་འགགས། །གནས་པ་བསྒྲུབ་ན་བཅོས་མ་ཉིད། །གདོད་ནས་དག་པའི་སེམས་ཉིད་ལ། །གནས་འགྱུ་ལ་འདམ་ཁ་ཅིའི་ཕྱིར་བྱེད། །མ་བཅོས་པར་བརློམ་ཡང་བཅོས་མའི་སྒོམ། །སྡུག་ཙིར་དུ་སྐྱོང་
བའི་སྒོམ་ཆེན་ལ། །སྲོག་རླུང་རིན་གྱི་ཉོ་བ་ལས། །ཉམས་རྟོགས་འཕེལ་བའི་རེ་ཐག་ཆོད། །སེམས་རང་བབས་སུ་གནས་ཀྱང་སྒོམ་གྱི་ངང༌། །སྣ་ཚོགས་སུ་འགྱུར་ཡང་རིག་རྩལ་རོལ། །ཅི་ལྟར་ཤར་ཡང་གནས་ལུགས་ཀྱི་ངང༌། །དགག་སྒྲུབ་ཀྱི་ལྷན་པ་འདེབས་དོན་མེད། །གང་སྣང་ཅིར་ཤར་རང་རིག་གིས། །ངོ་ཤེས་ཙམ་དུ་བྱེད་པ་ལ། །དྲན་པ་ཞེས་མིང་དུ་བཏགས་པ་ཙམ། །ཨ་འཐས་ཀྱི་འཇུར་དྲན་འདིར་མི་དགོས། །ཞི་ལྷག་དང་མཉམ་བཞག་རྗེས་ཐོབ་དང༌། །བསྐྱེད་རྫོགས་དང་མཚན་བཅས་མཚན་མེད་སོགས། །ཐ་སྙད་ཀྱི་མིང་ཚོགས་མཐའ་ཡས་ཀྱང༌། །རིག་ཐོག་ཏུ་འདུས་པ་ཤེས་པར་གཅེས། །ཆོས་སྤྱོད་པ་ཟེར་བའི་སྒྲ་བོ་ཆེ། སྤྱད་རྒྱུ་དང་སྤྱོད་མཁན་གྱི་མཚན་མས་དབེན། །རང་རིག་ཡེངས་འཁྲུལ་མེད་པའི་ངང༌། །ཅི་བྱེད་ཆོས་ཉིད་སྤྱོད་པ་ལགས། །ཐ་མལ་དུ་ཡེངས་དང་ཨ་འཐས་འཁྲུལ། །
འདི་ཁོ་ནས་ཕྲལ་ཡུན་གྱི་འདུན་མ་འཆུགས། །ཡེངས་འཁྲུལ་མེད་ན་སྡིག་སྒྲིབ་དང༌། །ཉེས་ལྟུང་གང་ལ་བརྟེན་ནས་འབྱུང༌། །གང་ཤར་ཆོས་ཉིད་རྣམ་རོལ་དང༌། །དགག་སྒྲུབ་མཚན་མས་སྤྱོད་དོན་མེད། །མ་བཅོས་ལྷུག་པའི་སྤྱོད་པ་ལས། །བརྟུལ་ཞུགས་སྨྱོན་སྤྱོད་ཀྱང་ཅིའི་ཕྱིར་བྱེད། །ཆོས་འབྲས་བུ་ཟེར་བའི་སྒྲ་བོ་ཆེ། །ཐོབ་མ་ཐོབ་རེ་དོགས་བྱས་བྱས་པས། །སྒྱུ་མའི་འཁྲུལ་གྱིས་སྒོམ་ཆེན་བསླུས། །ཐོབ་ཤོར་གྱི་རེ་དོགས་དགོས་པ་མེད། །གདོད་མའི་མགོན་པོ་མན་ཆད་ནས། །འཇག་མིག་སྲིན་བུ་ཡན་ཆད་ལ། །ཆོས་སྐུ་ལ་ཆེ་ཆུང་མ་མཆིས་ཚེ། །འཁོར་འདས་ཀུན་སེམས་ཉིད་གཅིག་པུའི་འཕྲུལ། །མ་གི་མནར་མེད་དམྱལ་ཁམས་ནས། །ཡ་གི་སངས་རྒྱས་ཞིང་ཁམས་མན། །ཐུན་མོང་གདུལ་བྱའི་སྣང་ཚུལ་ཙམ། །མདང་རྨི་ལམ་བཟང་ངན་དང་ཁྱད་པར་ཅི། །རྨི་ལམ་ཀྱང་རང་སྣང་འཁྲུལ་སྒོ་ལས། །བདེན་པའི་དོན་དུ་སུ་ཞིག་
མཐོང༌། །ཐམས་ཅད་རང་རིག་འགགས་མེད་ཀྱི། །རོལ་རྩལ་དུ་ཐག་ཆོད་གཅིག་པུས་ཆོག། ཨེ་མ། མང་དུ་བརྗོད་པས་ཅི་ཞིག་བྱ། །རང་རིག་བླ་མ་ཆོས་སྐུ་དང༌། །འབྲལ་མེད་ངེས་ཤེས་མ་རྙེད་ན། །མཚོན་བྱེད་བླ་མ་འདུས་བྱས་ཉིད། །འདུས་བྱས་ཆོས་ལ་བློ་གཏད་བྲལ། །འདི་དང་ཕྱི་མ་བར་དོ་ཞེས། །ཐ་དད་བདེ་སྡུག་འཛིན་པ་སེམས། །སེམས་ལ་སྐྱེ་འཆི་བདེ་སྡུག་མེད། །སྐྱེ་མེད་ཀློང་ནས་འགག་མེད་འཕྱོ། ང་དང་ཁྱོད་དང་གདམས་ངག་གསུམ། །རང་རིག་ཡེ་ཤེས་དབྱིངས་སུ་གཅིག །གཅིག་དང་དུ་མའི་ཐ་སྙད་ཀྱང༌། །མིང་ཚིག་ཙམ་དུ་བཏགས་པར་ཟད། །སྐྱེ་བ་འདི་དང་ཚེ་རབས་མཐའ་དག་ཏུ། །འབྲལ་མེད་རང་སེམས་བླ་མར་ཤེས་པའི་བུ། །འཕོ་འགྱུར་གཞོམ་གཞིག་བྲལ་བ་ཆོས་སྐུའི་ངང༌། །བདག་དང་འགྲོ་ཀུན་རོ་གཅིག་ཨེ་མ་ཧོ། །ཞེས་ལྟ་སྒོམ་སྤྱོད་འབྲས་ཀྱི་གླུ་རིང་འདི་ཉིད། དད་ལྡན་གྱི་རྣལ་འབྱོར་ཤཱཀྱ་བསྟན་འཛིན་པས་རིང་མོའི་ས་ནས་བསྐུལ་
བའི་ངོར། རྒོད་ཕུག་མྱ་ངན་མེད་པའི་ནགས་ཁྲོད་ནས་ཡི་གེར་བྲིས་ནས་བསྤྲིངས་པ་མངྒ་ལམ། ༈ །སྟོང་གསུམ་ཞིང་ཁམས་འདོད་ཡོན་གྱི་རྒྱ་མཚོར། སྣོད་བཅུད་བཀོད་མཛེས་འདབ་རྒྱས་ཀྱི་པདྨོ། །དངོས་འབྱོར་མཆོད་སྤྲིན་མཎྜལ་དུ་འབུལ་གྱི། །དག་སྣང་རབ་འབྱམས་དངོས་གྲུབ་འདྲ་སྩོལ་དང༌། །དལ་འབྱོར་རིན་ཆེན་དཔག་བསམ་གྱི་སྡོང་པོ། །ཕུང་ཁམས་སྐྱེ་མཆེད་ལོ་འབྲས་ཀྱི་ཕྱུག་འདི། །རང་སྣང་རྣམ་དག་མཎྜལ་དུ་འབུལ་གྱི། །ཡིད་བཞིན་འདོད་འབྱུང་དངོས་གྲུབ་འདྲ་སྩོལ་དང༌། །མཐའ་བྲལ་རང་སེམས་བློ་འདས་ཀྱི་ནམ་མཁར། །གང་ཤར་འཛིན་མེད་གཟའ་སྐར་དུ་བཀྲ་བ། །ཉམས་རྟོགས་མཐུན་རྐྱེན་མཎྜལ་དུ་འབུལ་གྱི། ཚེ་གཅིག་སངས་རྒྱས་དངོས་གྲུབ་འདྲ་སྩོལ་ཅིག། ཅེས་པ་འདི། བདེ་གཤེགས་ཚེའི་ཕུག་ཏུ་བླངས་སོ། ༈ །མུན་སེལ་ཉི་མ་དགུང་སྔོན་ལ་ཤར་བས། །གེ་སར་བཞད་པའི་པད་ཚལ་རྣམས་རྒྱས་ཤིང༌། །རྐང་དྲུག་བུང་བའི་བསམ་དོན་དུ་འགྲུབ་བྱུང༌། །འགྲིབ་མེད་གསལ་མཛོད་ཁྲི་གདུགས་ཀྱི་ཉི་མ།
།ལྷོ་སྤྲིན་ཀློང་ནས་སྦྲང་ཆར་དེ་བབས་པས། །རྩི་ཤིང་ལོ་འདབ་འབྲུ་དྲུག་རྣམས་འཁྲུངས་ཤིང༌། །རྨ་བྱ་གཞོན་ནུའི་དགའ་སྟོན་དུ་འཕེལ་བྱུང༌། །ཆར་རྒྱུན་ཕོབས་དང་ཆུ་འཛིན་གྱི་སྔོན་མོ། །མཚན་ལྡན་བླ་མའི་སྐུ་དྲིན་གྱིས་སྐྱངས་པས། །བསྟན་འགྲོའི་དོན་བཟང་རླབས་ཆེན་རྣམས་འགྲུབ་ཅིང༌། །དད་ལྡན་བུ་ལ་བཀའ་དྲིན་དུ་ཆེ་བྱུང༌། །ཐུགས་རྗེས་གཟིགས་ཤིག་རྗེ་བཙུན་གྱི་བླ་མ། །བྱིན་གྱིས་རློབས་དང་ཐར་ལམ་ལ་འགོད་མཛོད། །ཅེས་པ་ཡང་རྒོད་ཕུག་བྱ་སྐྱིབས་ཀྱི་ཡང་དབེན་དུའོ། ༈ །རྗེ་བླ་མའི་ཐུགས་རྗེ་ཞྭ་ལ་ཞུགས། །ཞྭ་བྱིན་རླབས་ཅན་དགོངས་འདུས་གཙུག་ཞྭ་འདི། །ཕ་སངས་རྒྱས་གཉིས་པ་པདྨ་འབྱུང༌། །བོད་གངས་ཅན་དུ་བྱོན་པའི་དབུ་ཞྭ་ཡིན། །ཞྭ་བཟོ་ཚུལ་གྱི་ལོ་རྒྱུས་བརྗོད་པ་ན། །རང་སེམས་རྣམ་དག་གི་འཇམ་ཕྲུག་དང༌། །དད་པ་འགྱུར་མེད་ཀྱི་ཕྱིང་དཀར་གཉིས། བླ་མ་མཚན་ལྡན་
གྱི་བཟོ་བོ་ཡིས། །དབང་བཞི་ཡོངས་རྫོགས་ཀྱི་ཚོས་ཁ་བསྒྱུར། །གདམས་ངག་ཟབ་གནད་ཀྱི་བཟོ་དྲས་བྱས། །བསྐྱེད་རྫོགས་ཟུང་འཇུག་གི་ཕྱི་ནང་སྦྱར། །ལྟ་བ་ཡས་ཕུབ་ཀྱི་ཞྭ་ཐོད་དང༌། །སྤྱོད་པ་མས་འཛེགས་ཀྱིས་འདབ་ཞོལ་སྦྲེལ། །རང་རིག་གཅེར་མཐོང་གི་མདུན་སྒོ་གཏོད། །སྡོམ་པ་དམ་ཚིག་གི་མུ་འདྲིལ་བཏང༌། །སྐུ་གསུམ་མངོན་གྱུར་གྱི་ཞྭ་མོ་བཟོས། །འདི་གོན་པས་གཏན་གྱི་འདུན་མ་འགྲུབ། །ཞྭ་རྩེ་མོ་མཐོ་ཞིང་རྣོ་བ་འདི། །གཞི་ལྟ་བའི་ཡང་རྩེ་རྟོགས་པའི་བརྡ། །ཞྭ་སྐེད་པ་ཟླུམ་ལ་ལྷུན་ཆགས་པས། །ལམ་སྒོམ་པའི་རི་རྒྱལ་བརྟན་པའི་བརྡ། །ཞྭ་རྒྱབ་ཞོལ་འཁོར་མར་འདུག་པ་ནི། །ཚུལ་སྤྱོད་པ་བླང་དོར་བྲལ་བའི་བརྡ། །ཞྭ་མདུན་སྒོ་གསལ་བར་བྱེད་པ་ནི། །ཆོས་འབྲས་བུའི་རང་ཞལ་མཐོང་བའི་བརྡ། །ཞྭ་གྱོན་པས་དང་བ་འདྲེན་པ་ནི། །གཞན་དོན་རྩོལ་
མེད་འབྱུང་བའི་བརྡ། །རྗེ་བླ་མས་བྱིན་གྱིས་རློབ་པའི་ཞྭ། །མ་མཁའ་འགྲོས་དངོས་གྲུབ་སྩོལ་བའི་ཞྭ། །ལྷ་ཆོས་སྐྱོང་བྲན་དུ་འཁོལ་བའི་ཞྭ། །ཞྭ་ཡིད་བཞིན་ནོར་བུ་འདོད་དགུ་འབྱུང༌། །ཞྭ་ཆེ་བའི་ཡོན་ཏན་ངོ་མཚར་གླུ། །ཁྱེད་འདིར་བཞུགས་སྙན་དུ་ཕུལ་བ་ལགས། བཀྲ་ཤིས་བདེ་ལེགས་ཀྱི་རྟེན་འབྲེལ་ཞུ། །བྱིན་རླབས་ཞྭའི་གླུ་འདི་ཡང་རང་གི་གཅུང་པོའི་ངོར་བླངས་པ། ༈ །དགུང་ཁྲི་གདུགས་འཆར་བ་ཤར་གྱི་ཕྱོགས། ཡུལ་མ་ཀི་ཀོང་རོང་ཟད་པའི་མཐའ། །འཇའ་ན་བུན་འཁྲིགས་པའི་གོ་མཚམས་ནས། །གངས་མཐོ་ལ་བརྗིད་ཆགས་ལྷུན་སྡུག་པ། །གནས་དཔལ་རིའི་གངས་ཆེན་མཐོང་བའི་མཐུས། །ཕ་བླ་མ་སངས་རྒྱས་སྙིང་ནས་དྲན། །དེ་དྲན་པས་གདུང་བའི་གླུ་དབྱངས་འདི། །རྗེ་བླ་མའི་སྙན་ལ་གསན་ལགས་བསམ། །བདག་སྙོམ་ལས་ཅན་གྱི་སྤྲང་པོ་ལ། །ཐུགས་སྙིང་རྗེའི་གཟིགས་པ་མ་
གཡེལ་བར། །གནས་ངན་སོང་འཁོར་བའི་སྡུག་བསྔལ་ལས། །དུས་གཏན་དུ་སྐྱོབས་ཤིག་བླ་མ་མཁྱེན། ༈ །འདབ་སྟོང་རྒྱས་པ་པདྨའི་ཚལ་དུ། །རྐང་དྲུག་ལྡན་པའི་བུང་བས་སླེབས་ཚེ། །བཅུད་ལྡན་སྙིང་པོ་གངས་རིའི་ཟིལ་མངར། །རྒྱུན་ལྡན་འཐུངས་བའི་རྟེན་འབྲེལ་ལགས་སོ། །གཏིང་ཟབ་ཡངས་པའི་རྒྱ་མཚོའི་ཀློང་ན། །ལྷ་བྱ་ངང་པ་གཞོན་ནུ་སླེབ་ཚེ། །དགའ་བདེའི་རོལ་རྩེད་རྣམ་འགྱུར་མང་པོས། །ཉམས་དགའ་སྐྱོང་བའི་རྟེན་འབྲེལ་ལགས་སོ། །བཀྲ་ཤིས་བྱིན་ཆགས་ཕུན་ཚོགས་གནས་འདིར། །ལས་འཕྲོ་འཛོམ་པའི་འདིར་ཚོགས་སྐལ་ལྡན། །ཚེ་རིང་ནད་མེད་དམ་ཆོས་འཕེལ་བས། །ཡང་ཡང་འཛོམ་པའི་རྟེན་འབྲེལ་ལགས་སོ། ༈ །གནམ་གཡུ་ཡི་འཁོར་ལོ་འབར་བ་དང༌། །རྒྱན་རིན་ཆེན་ཉི་ཟླའི་ཕྲ་ཚོམ་གཉིས། །བཀོད་མཛེས་པས་གླིང་བཞིའི་མུན་པ་སེལ། །དེ་འགྲོ་བའི་བསོད་ནམས་རྟེན་འབྲེལ་ཡིན། །འཁོར་ལོ་ལ་སྤྲིན་
གྱིས་མ་གཡོགས་ཤིང༌། །ཉི་ཟླ་གཉིས་གཟའ་དང་བྲལ་བ་ཡིས། །གླིང་བཞིའི་མུན་སེལ་རྟེན་འབྲེལ་དེ། །ཡང་ཡང་དུ་འཛོམ་པའི་སྨོན་ལམ་ཞུ། ༈ །ས་འདབ་བརྒྱད་པདྨོའི་གེ་སར་ལ། །ཡུལ་གླིང་བཞི་རི་རབ་ཟེའུ་འབྲུ་བཀྲ། །ཅི་འདོད་པའི་ལོངས་སྤྱོད་ཕུན་སུམ་ཚོགས། །དེ་འཇིག་རྟེན་སྤྱི་མཐུན་རྟེན་འབྲེལ་ཡིན། །ས་པདྨ་མི་ཤིགས་བརྟན་པ་དང༌། །ཡུལ་སྐྱེ་འགྲོ་འཕོ་འཆུགས་མེད་པ་རུ། །དུས་རྟག་ཏུ་བདེ་སྐྱིད་རྟེན་འབྲེལ་དུ། །ཡང་ཡང་འཛོམ་པའི་སྨོན་ལམ་ཞུ། ༈ །ཁྱེད་འདིར་བཞུགས་དད་ལྡན་ཕོ་མོ་དང༌། །བདག་རྒྱལ་ཁམས་སྤྲང་པོ་བྱ་བཏང་གཉིས། །འདིར་འཛོམ་པས་དགའ་བདེའི་ལོངས་སྤྱོད་འཕེལ། །འདི་སྔོན་ནས་སྨོན་ལམ་འབྲེལ་པ་ཡིན། །འདིར་བཞུགས་རྣམས་སྐུ་ཁམས་བཟང་བ་དང༌། །རྣལ་འབྱོར་པ་ཉམས་རྟོགས་གོང་འཕེལ་ཞིང༌། །ཅི་བསམ་པའི་དོན་ཀུན་མྱུར་འགྲུབ་ནས། །ཡང་ཡང་དུ་འཛོམ་པའི་སྨོན་ལམ་ཞུ། །ཞེས་པ་རྣམས་ཀྱང་གཞན་
བསྐུལ་གྱི་ངོར་སྨྲས་པ་དགེའོ། ༈ །རབ་མཛེས་མཚན་དཔེའི་ཟླ་ཞལ་དེ་འབར་བས། །དད་བརྒྱའི་ཀུ་མུད་གེ་སར་དུ་རྒྱས་ཤིང༌། ལག་སོར་པདྨོ་འཛུམ་པ་དང་བསྡོངས་ནས། །བླ་མའི་སྐུ་ལ་བརྟན་བཞུགས་སུ་འབུལ་ལོ། །དམ་ཆོས་འབྲུག་སྒྲ་ལྡིར་དབྱངས་སུ་ཐོས་པས། །གུས་ལྡན་རྨ་བྱ་གཞོན་ནུ་ང་ཚིམས་ཤིང༌། །ཉམས་མྱོང་གར་བསྒྱུར་རྣམ་རོལ་དང་བསྡོངས་ནས། །བླ་མའི་གསུང་ལ་བརྟན་བཞུགས་སུ་འབུལ་ལོ། །དགོངས་ཀློང་རྣམ་དག་མཁའ་དབྱིངས་ཀྱི་དཀྱིལ་འཁོར། །ཐུགས་རྗེའི་ཉི་འོད་ཁྱབ་གདལ་དུ་ཤར་ཞིང༌། །རང་རིག་ཡེ་ཤེས་རང་གསལ་དུ་བསྡོངས་ནས། །བླ་མའི་ཐུགས་ལ་བརྟན་བཞུགས་སུ་འབུལ་ལོ། །བླ་མའི་སྐུ་གསུང་ཐུགས་ལ་བརྟན་བཞུགས་སུ་འབུལ་ལོ། ༈ །སེམས་ཉིད་འདུས་མ་བྱས་དང་པོའི་སངས་རྒྱས་དང༌། །རྗེ་བཀའ་དྲིན་ཅན་མཚུངས་མེད་བླ་མའི་ཞབས། །བདག་མོས་གུས་ཅན་གདུང་བས་གསོལ་འདེབས་ན། །ཁྱེད་ཐུགས་རྗེ་ཅན་བརྩེ་བས་གཟིགས་སུ་གསོལ། །
གནས་ངོ་མཚར་ཅན་ཕྱོགས་མེད་ཀྱི་རྒྱལ་ཁམས་ན། །བློ་གུ་ཡངས་ཅན་གཏད་མེད་ཀྱི་སྤྲང་པོ་འཕྱོ། །ལས་རྣམ་གཡེང་ཅན་འཇིག་རྟེན་གྱི་བྱ་བ་ལ། །ཡིད་སྐྱོ་ཤས་ཅན་ཞེན་ལོག་གི་བློ་རྒོད་ལངས། །རྗེ་བྱིན་རླབས་ཅན་སྒྲུབ་རྒྱུད་ཀྱི་རྣམ་ཐར་དེ། །ཚེ་ངེས་མེད་ཅན་བྱ་བཏང་གིས་འགྲུབ་པར་སྨོན། །ཚེ་གཅིག་སངས་རྒྱས་འགྲུབ་ན་དགའ་བ་ལ། །མཁའ་མཉམ་ཀྱི་འགྲོ་བ་སྒྲོལ་ན་སྐྱིད་པ་ལ། །བླ་མ་སངས་རྒྱས་སུ་མཐོང་བའི་མོས་གུས་དང་གཅིག །འགྲོ་ཀུན་ཕ་མར་ཤེས་པའི་བྱམས་སེམས་དང་གཉིས། །མཆེད་ལྕམ་ལྷ་རུ་ཤར་བའི་དག་སྣང་དང་གསུམ། །དེ་གསུམ་སེམས་ལ་འཆར་རམ་འདིར་བཞུགས་ཀྱི་སྐལ་ལྡན་རྣམས། །འཁོར་བ་སྒྱུ་མར་ཤེས་པའི་ངེས་འབྱུང་དང་གཅིག །ཅིས་ཀྱང་དགོས་མེད་མཐོང་བའི་ཞེན་ལོག་དང་གཉིས། །ནམ་འཆི་ཆ་མེད་དྲན་པའི་སྐྱོ་ཤས་དང་གསུམ། དེ་གསུམ་སྙིང་ལ་སྐྱེས་སམ་འདིར་
བཞུགས་ཀྱི་སྐལ་ལྡན་རྣམས། །རྒྱུ་འབྲས་བསླུ་མེད་ཤེས་པའི་ངེས་ཤེས་དང་གཅིག །མི་ཚེ་ཆོས་ལ་དྲིལ་བའི་འདུན་གྲོས་དང་གཉིས། །ཤི་དུས་འགྱོད་མེད་བྱེད་པའི་རྟོག་གཏད་དང་གསུམ། །དེ་གསུམ་གྲབས་སུ་ཚུད་དམ་འདིར་བཞུགས་ཀྱི་སྐལ་ལྡན་རྣམས། །ཆོས་ཀུན་སེམས་སུ་ཤེས་པའི་ཐག་ཆོད་དང་གཅིག །སེམས་ཉིད་ཆོས་སྐུར་རྟོགས་པའི་གདེང་ཚད་དང་གཉིས། །སྟོང་ཉིད་སྙིང་རྗེ་ཟུང་འཇུག་ཉམས་ལེན་དང་གསུམ། །དེ་གསུམ་རྒྱུད་ལ་ཁེལ་ལམ་འདི་བཞུགས་ཀྱི་སྐལ་ལྡན་རྣམས། །དྲི་བ་གླུ་རུ་བླངས་འདི་ཉམས་ལེན་གྱི་གསལ་འདེབས་ལགས་སོ། ༈ །སྐྱབས་གནས་ཀྱི་སྙིང་པོ་བླ་མར་ཤེས། །དེ་ཤེས་པས་གང་བྱུང་ཐུགས་རྗེར་གོ །ད་སྐྱིད་སྡུག་གི་སྣང་བ་ཅི་བྱུང་ཡང༌། །སྐྱབས་རེ་ལྟོས་གཞན་དུ་ང་མི་འཚོལ། །སྲིད་གསུམ་གྱི་འབྱོར་པ་སྒྱུ་མར་ཤེས། །དེ་ཤེས་པ་ཅི་ཀྱང་དགོས་མེད་གོ །ད་ལྟོ་གོས་ཀྱི་དབུལ་ཕོངས་ཅི་བྱུང་ཀྱང༌། །ནོར་ཟང་ཟིང་
གི་རྗེས་ཕྱིར་ང་མི་འབྲེང༌། །འདྲེ་གདོན་ཀུན་རང་སྣང་འཁྲུལ་པར་ཤེས། །དེ་ཤེས་པས་འཁྲུལ་སྣང་སྟོག་པར་གོ། ད་འཇིགས་སྐྲག་ཆོ་འཕྲུལ་ཅི་བྱུང་ཡང༌། །ཐབས་འདྲེ་བརྡུང་བསྲུང་འཁོར་ང་མི་བསྒོམ། །གང་ཤར་ཀུན་སེམས་ཀྱི་རོལ་པར་ཤེས། །དེ་ཤེས་པས་བཅོས་མིན་ཉམས་ལེན་གོ །ད་འགྱུ་གནས་འཕྲོ་འདུ་ཅི་བྱུང་ཡང༌། །སྒོམ་བཟང་འདོད་དགག་སྒྲུབ་ང་མི་བྱེད། །གང་བྱུང་གིས་ཆོག་པའི་ཉམས་ལེན་གནད། །གནད་ཟབ་མོ་བླ་མའི་དྲིན་ལས་བརྙེད། །དྲིན་ལན་དུ་སྒྲུབ་པའི་མཆོད་པ་འབུལ། །དངོས་གྲུབ་ཏུ་སྐུ་གསུམ་མངོན་གྱུར་ཞུའོ། །དཔལ་དེ་རིང་བཀྲ་ཤིས་དུས་བཟང་འདིར། །གནས་ལོངས་སྤྱོད་འཛོམ་པས་སྐྱིད་པ་ལ། །ཕ་བླ་མའི་བྱིན་རླབས་སྤྲིན་ལྟར་བསྟིབས། །ཉམས་རྟོགས་པ་གོང་འཕེལ་སྐྱིད་པ་ལ། །ལྷ་ཡི་དམ་དངོས་གྲུབ་ཆར་ལྟར་འབེབས། །ཡིད་ཅི་བསམ་འགྲུབ་པས་སྐྱིད་པ་ལ།
།མ་མཁའ་འགྲོའི་ཕྲིན་ལས་གློག་ལྟར་འཁྱུག །རྐྱེན་བར་ཆད་མེད་པས་སྐྱིད་པ་ལ། །ལས་སྨོན་ལམ་འབྲེལ་པས་འདིར་ཚོགས་རྣམས། །ཐུགས་ཆོས་སུ་མཐུན་པས་སྐྱིད་པ་ལ། །དབྱངས་སྐྱིད་པ་རྣམ་ལྔའི་མཆོད་པ་འདི། །ཞལ་འདིར་བཞུགས་རྣམས་ཀྱི་དགའ་སྟོན་མཛོད། འདི་རྣམས་ཀྱང་གཅུང་པོས་བསྐུལ་བའི་ངོར་བླངས་པའོ། ན་མོ་མཧཱ་གུ་རུ་པདྨ་ཀ་རཱ་ཡེ། དཔལ་དུས་གསུམ་གྱི་སངས་རྒྱས་མ་ལུས་ཀུན། །གཞི་མཉམ་ཉིད་ཀྱི་ཆོས་དབྱིངས་ཐིག་ལེ་ཆེར། །དོན་རོ་གཅིག་ཏུ་འདུས་པའི་སྤྱི་གཟུགས་ལ། །རྗེ་པད་འབྱུང་ཞེས་སྙན་པར་གྲགས་པའི་མཚན། །ཞིང་འཇིག་རྟེན་གྱི་ཁམས་ཀུན་ཡོངས་ཁྱབ་པ། །ངེད་སྙིགས་དུས་ཀྱི་གདུལ་བྱ་རྨུ་རྒོད་ལ། །གཟུགས་ཐ་མལ་གྱི་མི་ཡི་གསོབ་ཞུགས་ཀྱང༌། །ཐུགས་མཁྱེན་བརྩེ་ནུས་པའི་ཕྲིན་ལས་ནི། །རྗེ་རྒྱལ་བ་ཀུན་དང་རྣམ་དབྱེར་མེད། །ཕ་དྲིན་ཅན་གྱི་རྩ་བའི་བླ་མ་ཉིད། །གནས་བདེ་ཆེན་གྱི་འཁོར་
ལོའི་ཡང་ཐོག་ཏུ། །སྐུ་འཇའ་འོད་ཀྱི་མདངས་ལྡན་མཚན་དཔེ་བཀྲ། །གསུང་དམ་ཆོས་ཀྱི་སྒོ་བརྒྱ་ཐེག་ཆེན་བཅུད། །ཐུགས་ཟབ་གསལ་གྱི་ཡེ་ཤེས་མཁའ་ལྟར་ཁྱབ། །རྗེ་བྱིན་རླབས་ཀྱི་གཏེར་མཛོད་དམ་པ་དེ། །བདག་བློ་དམན་གྱི་སྐྱབས་མགོན་དཔུང་གཉེན་མཆོག །ཡིད་དད་གུས་ཀྱི་གདུང་ཤུགས་མཚོ་ནང་དུ། །སྐུ་མཚན་དཔེའི་ཟླ་སྣང་སྒྱུ་འཕྲུལ་ཤར། །བློ་ལོག་རྟོག་གི་རྦ་རླབས་མི་འཁྲུག་ཅིང༌། །ཕྲལ་མཉམ་འགྲོགས་ཀྱི་འཁྲེགས་དར་མ་ཆགས་པར། །ཡིད་རབ་དྭངས་མཚོ་ཆེན་རྙོག་བྲལ་ནའང༌། །རྗེ་དྲིན་ཅན་གྱི་རྣམ་ཐར་གསལ་ལམ་ལམ། །དེ་དྲན་པས་དངོས་འཛིན་གྱི་རི་མོ་ཡལ། །སེམས་བཟོ་མེད་ཀྱི་ཁོང་ཡུས་གཏིང་ནས་ལངས། །ལག་སོར་བཅུའི་ཡལ་འདབས་སྙིང་ཁར་ཟུམ། །ངག་གསོལ་འདེབས་ཀྱི་ང་རོ་འབྲུག་ལྟར་བསྒྲག །བུ་དད་གུས་ཀྱི་ཉམས་འགྱུར་ངང་ཚུལ་ནི། །ཕ་མཁྱེན་ལྡན་གྱི་
གཟིགས་པས་དགོངས་ལགས་སམ། །ཁྱེད་སྒྲིབ་བྲལ་གྱི་ཡེ་ཤེས་སྤྱན་ཡངས་པོས། །ཆོས་དངོས་ཀུན་གྱི་མཚན་ཉིད་གསལ་པོ་རུ། །དུས་རྒྱུན་ཆད་མེད་པར་གཟིགས་ལགས་ན། །བདག་ཉམས་ཐག་གི་གདུལ་བྱ་ཅིས་མི་གཟིགས། །ལུས་ལོངས་སྤྱོད་དང་གཏན་འདུན་གྱི་དངོས་པོ་ཀུན། །བློ་ལྟོས་མེད་དུ་མཆོད་པའི་མཎྜལ་འབུལ། །དུས་འདི་ཉིད་ནས་མཐར་ཐུག་བྱང་ཆུབ་བར། །ཕ་རྗེ་བཙུན་གྱི་གདུལ་བྱར་གྱུར་ནས་ཀྱང༌། །ཆོས་ངེས་དོན་ལ་མངའ་དབང་འབྱོར་བ་དང༌། །ལམ་མྱུར་ཟབ་ཀྱི་ཤིང་རྟའི་སྲོལ་ཞུགས་ལ། །གེགས་ཆོས་མིན་གྱི་བར་ཆད་གཏན་བྲལ་ཞིང༌། །ཆོས་སྣང་བཞི་ཡི་ས་ལམ་མཐར་ཕྱིན་ཏེ། །དཔལ་ཀུན་བཟང་གི་རྒྱལ་ས་ཟིན་ནུས་པའི། །དབང་དངོས་གྲུབ་ཀྱི་ཆུ་བོ་དབབ་ཏུ་གསོལ། །ལུས་སྒྱུ་འཕྲུལ་གྱི་ལྷ་སྐུར་གདོད་ནས་དག །ངག་ཤུགས་འབྱུང་གི་རང་སྒྲ་རྡོ་རྗེའི་སྔགས། །ཡིད་བྱུང་ཚོར་གྱི་རྟོག་པ་ཆོས་ཉིད་རྩལ། །ཡེ་གདོད་མ་ནས་ལྷུན་གྲུབ་ཡིན་མོད་ཀྱང༌། །ལས་བག་ཆགས་
ཀྱི་རང་སྒྲིབ་རང་ལ་འཐུམ། །སྔོན་ཐོག་མེད་ནས་ད་བར་འཁྲུལ་ཡུན་རིང༌། །འདི་རང་གྲོལ་དུ་འགྱུར་བར་བྱིན་གྱིས་རློབས། ༈ །ཀྱེ་མའོ། སྣང་གྲགས་ཀུན་གཟོད་ནས་དག་པ་ཡི། །རང་ངོ་ལ་འཕོ་འགྱུར་མ་མཆིས་ཀྱང༌། །ལྟར་སྣང་གི་ཆོ་འཕྲུལ་རྨི་ལམ་ལས། །ཆེས་ཆེར་དུ་ཟར་ཟིར་རྨི་ལམ་བཞིན། །འཕོ་འཆུགས་དང་གཡོ་འཁྲུགས་དྲག་པོར་འཚུབས། །ས་ཆུ་དང་མེ་རླུང་ནམ་མཁའ་སོགས། །འབྱུང་ཁམས་ཀྱི་ཆག་འཇིག་གོ་ལོག་མང༌། །སྐྱེ་འགྲོ་རྣམས་སྡུག་བསྔལ་འཚུབ་འགྱུར་གྱིས། །སྤྱོད་འགྲོས་ཀུན་ངན་དགུ་སྡུག་བཅུ་བྱེད། །ཆོས་པ་རུ་རློམས་པའི་དྲེད་པོ་ཡིས། །ས་སྟེང་ཀུན་དོག་པོར་ཁེངས་ན་ཡང༌། །རྒྱལ་གསུང་བཞིན་མཐུན་པའི་ཆོས་པ་ནི། །ཨུ་དུམ་གྱི་མེ་ཏོག་ལས་ཀྱང་དཀོན། །བླ་གཟུགས་རྣམས་ཆོས་བརྒྱད་རྟ་བང་འགྲན། །མགྱོགས་དར་ནི་ཕོ་ཟོ་གང་མཐོས་ཐོབ། །དཀོར་ནག་གི་རྙེད་འཚོལ་སུ་རེམས་ལ། །འགྲོ་
དོན་དང་ཕྲིན་ལས་མིང་དུ་འདོགས། །དོན་འབྲས་ནི་རང་གཞན་གཉིས་ཕུང་བསྒྲུབ། །དགེ་སྦྱོང་རྣམས་ཤ་ཆང་གི་བཅུད་ལེན་འབད། །དམ་སྡོམ་ཀུན་ཁྱི་ལ་རྡོ་འཕེན་ལྟར། །ཡང་ཡང་དུ་ལེན་ཞིང་ནན་གྱིས་འཕངས། །བུད་མེད་དང་ཟས་ནོར་གྱི་རྩོལ་སྒྲུབ་འདི། །ལྷ་ཆོས་ཞིག་ཡིན་ན་ཅི་མ་རུང༌། །གཤིན་གསོན་གྱི་སྐྱབས་ཡུལ་བྱས་བྱས་ཀྱང༌། །རང་ཉིད་ཀྱི་རེ་གནས་གང་ལ་བྱེད། །རྒྱལ་བསྟན་ལ་ཞུགས་ནས་རྒྱལ་བསྟན་ཉིད། །བསྣུབ་ཐབས་ལ་ནན་ལྟར་བརྩོན་ལུགས་འདི། །མི་མངོན་གྱི་དབྱིངས་ནས་རྒྱལ་ཀུན་དང༌། །དཀོན་མཆོག་རྣམས་ཐུགས་ཀྱི་བཟོད་ལགས་སམ། །རྣམ་འདྲེན་ཀུན་ཟོལ་ཟོག་གིས་རྙེད་འཚོལ་འབད། །དགེ་འདུན་རྣམས་སྡེ་འཁྲུག་གི་ཐལ་ཁ་རྒྱག །སྒོམ་ཆེན་རྣམས་གྲོང་ཆོག་བསྙེན་པ་སྐྱེལ། །ཡོན་བདག་རྣམས་ཟོག་མཁན་ལ་དད་གུས་ཆེ། །དགེ་རྩ་རུ་སྲོག་གཅོད་ཀྱི་མཆོད་སྦྱིན་དར། །ཆོས་འཇིག་རྟེན་ཚུལ་ལུགས་འདི་འདྲའི་མཐུས། །
གྲིབ་ལྷོངས་དེ་དཀར་ཕྱོགས་ལྷ་ལ་ཕོག །ནད་ཡམས་དང་སད་སེར་མུ་གེས་མནར། །འཐབ་འཁྲུག་དང་ངན་སྤྱོད་ཀྱི་རླུང་དམར་འཚུབས། །ལོ་རེ་དང་ཟླ་ཞག་སོང་བཞིན་དུ། །ངན་ལྟས་ཀྱི་རྦ་ཀློང་ཆེས་ཆེར་གཡོ། །འདི་སྐྱ་སེར་གྱི་སྤྱོད་ཚུལ་རྒྱུ་འབྲས་ཉིད། །བསླུ་མེད་དུ་མངོན་སུམ་སྨིན་ལགས་པས། །བློ་རྣམ་རིག་བཀྲ་ལྡན་གྱི་གང་ཟག་རྣམས། །ཡིད་སྐྱོ་ཤས་ཀྱི་སྣང་བ་ཞིག་མི་འཁྲུངས་སམ། ༈ །ཕ་ཐུགས་རྗེའི་གཏེར་ཆེན་གྱི་བླ་མ་རྣམས། །ངེད་སྙིགས་དུས་ཀྱི་སེམས་ཅན་ལ་གཟིགས་རེ་རན། །ཡུལ་སྣོད་བཅུད་ཀྱི་འགྱུར་འཁྲུག་ཞི་བར་མཛོད། །མ་འགྲོ་ཀུན་གྱི་བློ་ཁ་དགེ་ལ་བསྒྱུར། །ཆོས་གྲུབ་མཐའི་ཆགས་སྡང་དབྱིངས་སུ་སྙོམ། །ལས་ཆོས་མིན་གྱི་ངན་སྤྱོད་རྒྱུན་ཐག་ཆོད། །མགོན་ཐུབ་བསྟན་གྱི་ས་གཞི་སྙོམས་པར་གདལ། །ཆོས་སྒྲུབ་རྒྱུད་ཀྱི་ལོ་འབྲས་སྨིན་པར་མཛོད། །རྗེ་པད་འབྱུང་གི་
ཐུགས་རྗེ་སྟོབས་སྐྱེད་ནས། །བདག་སེམས་ཅན་གྱི་ལས་ཉོན་རྒྱུ་འབྲས་ཀུན། །དོན་དགེ་ལེགས་ཀྱི་ཆོས་དབྱིངས་ནམ་མཁའ་ཆེར། །རོ་མཉམ་པ་ཉིད་དུ་གྲོལ་བར་མཛོད། ༈ །མཐའ་ཡས་ཞིང་གི་རབ་འབྱམས་རྒྱལ་བའི་ཚོགས། །སྲས་འཁོར་སྤྲུལ་པར་བཅས་པའི་མཁྱེན་བརྩེའི་སྟོབས། །གཅིག་བསྡུས་པདྨ་ཐོད་ཕྲེང་ཐུགས་རྗེའི་བདག །རྩ་བའི་བླ་མའི་ངོ་བོར་བློ་ཐག་ཆོད། །དེ་ཉིད་དྲན་དང་བསྒོམ་དང་འབོད་པའི་མཐུས། །ཕྲལ་ཡུན་འདོད་དོན་ཀུན་འགྲུབ་བར་ཆད་ཞི། །ཚེ་གཅིག་ཐར་ལམ་བྱང་ཆུབ་སྙིང་པོ་ལ། །བདག་གཞན་འགྲོ་བ་མཐའ་དག་རེག་གྱུར་ཅིག །ཅེས་བོད་ཀྱི་མཐར་ཐུག་བོད་ཆེན་པོའི་ཡུལ་གྱི་ནང་ཚན་སྤུ་བོའི་རྒྱལ་ཁམས་ལ་དབང་བསྒྱུར་བ། མངོན་མཐོ་ངེས་ལེགས་ཀྱི་འབྱོར་པ་རྒྱ་མཚོས་ཡོངས་སུ་གང་བའི་ས་སྐྱོང་མིའི་བདག་པོ་དབང་དྲག་སྲུང་ཞེས་མཚན་གྱི་སྒྲ་དབྱངས་གྲགས་པ་ཁུ་དབོན་གཉིས་ཀྱི་བཞེད་པ་སྐོང་བའི་སླད་ཁོ་ནར། ཡི་གེའི་ལམ་དུ་སྤེལ་བ་གངྒ་ལཾ་བྷ་ཝནྟུ། ༈ །ངོ་མཚར་གནས་ཀྱི་
བཀོད་པ་བརྗོད་པ་སྐྱོ་བ་སངས་བྱེད་རྡོ་རྗེའི་གླུ་ཚངས་པའི་དབྱངས་ཀྱི་དགའ་སྟོན་ཞེས་བྱ་བ། དྲིན་ཅན་བླ་མའི་ཞབས་ལ་གུས་པས་ཕྱག་འཚལ་ལོ། དེ་ཡང་བདག་འདྲ་དུས་མཐའི་བན་ཆུང་སྣ་ཚོགས་རང་གྲོལ་འཇིག་རྟེན་འཁྲུལ་པའི་ཡོ་ལང་ལ་ཞེན་པ་ལོག་སྟེ། དཔལ་རི་རྒོད་ཚང་ཕུག་པར་མི་ལོ་བཅུ་དགུ་དང་ཟླ་བ་བདུན་དུ་དབེན་པ་བསྟན་ཞིང་དགེ་སྦྱོར་ལ་བརྩོན་པའི་སྐབས། རེ་ཞིག་རང་ལོ་ལྔ་བཅུ་རྩ་ལྔ་པའི་དབྱར་ཟླ་གསུམ་ལ་བབས་པའི་ཚེ། དཔལ་རི་གངས་ཀྱི་མགུལ། བྱང་ཆུབ་ཀྱི་སྙིང་པོ་མངོན་པར་མཐོ་བའི་རྩེ་མོར་གསང་སྤྱོད་རོ་སྙོམས་ལ་ཕྱིན་ཏེ། ཟླ་བ་གསུམ་དང་ཞག་ཉེར་གཅིག་གི་བར་དུ་བསྡད་ཅིང༌། གནས་དེའི་ས་དམིགས་ཤིན་ཏུ་མཐོ་ཞིང་གཉན་པ་ཞིག་ཏུ་རིན་པོ་ཆེའི་བུམ་པར་དར་ཟབ་སྨན་འབྲུ་རིན་ཆེན་སྣ་ཚོགས་དང༌། ས་སྣ་རྡོ་སྣ་བྱིན་རླབས་དམ་རྫས་ཁྱད་པར་ཅན་དང་བཅས་པས་བཀང་བའི་དཀྱིལ་དུ། སྤྱིར་འཇིག་རྟེན་གྱི་ཁམས། དགོས་བོད་ཡུལ་གངས་ཅན། ཁྱད་པར་ཀོང་ལུང་རལ་གསུམ་གྱི་སེམས་ཅན་ལ་བདེ་སྐྱིད་འབྱུང་ཞིང་སངས་རྒྱས་ཀྱི་བསྟན་པ་དར་བའི་སྨོན་ལམ་རྒྱ་ཆེར་བྲིས་པའི་ཤོག་དྲིལ་བཅུག་ནས་རབ་ཏུ་གནས་ཏེ་བུམ་གཏེར་
དུ་སྦས། ཀ་ཤི་ཀའི་རས་ལ་བཅོམ་ལྡན་འདས་ཀྱིས་ཡངས་པའི་གྲོང་ཁྱེར་དུ་འཇུག་མདོར་གསུངས་པའི་བདེ་ཆིག་སྨོན་ལམ་ཡོངས་རྫོགས་སུ་བྲིས་པ་ལ་གོས་ཆེན་དར་ཟབ་ཁ་དོག་འབྱུང་ཁམས་དང་མཐུན་པའི་དར་ལྕེས་བརྒྱན་པ་བཙུགས། ཙནྡན་དང་ཨ་ཀ་རུ་སོགས་ཤིང་སྣའི་བསངས་བསུར་གྱི་ཁྲོད་དུ་ཡང་བྱིན་རླབས་དམ་རྫས་བཏབ་པའི་དུ་བས་བར་སྣང་བཀང་ཞིང༌། ཕྱོགས་ཐམས་ཅད་དུ་མེ་ཏོག་འཐོར་ནས་ཤིས་བརྗོད་སྨོན་ལམ་གྱི་རིགས་རྒྱ་ཆེན་པོར་བྱས། གཞན་ཡང༌། དུས་བཟང་ཐམས་ཅད་ལ་ཚོགས་གཏོར་གྱི་མཆོད་པ་ཅི་འབྱོར་བཤམས་ཏེ་བསྟན་པ་དང་སེམས་ཅན་གྱི་དོན་ཁོ་ནའི་གསོལ་འདེབས་སྨོན་ལམ་སོགས་ལ་འབད་ཅིང་གནས་པའི་བར་སྐབས་ཤིག་ཏུ་གནས་དེ་ཉིད་ཀྱི་ཆགས་ཚུལ་ཞིང་བཀོད་ཀྱི་གླུ་འདིར་བཞིན་གྱིས་ཤིག་ཅེས། རང་གི་གཅུང་པོས་བསྐུལ་བའི་ངོར་བླངས་པ་ནི། ༈ ན་མ་པདྨ་ཀ་རཱ་ཡ། སྐྱབས་གསུམ་གྱི་རྒྱལ་བ་དཀོན་མཆོག་ཀུན། །རང་བྱུང་གི་པདྨའི་རྒྱལ་པོ་རུ། །གསང་གསུམ་གྱི་དཀྱིལ་འཁོར་ཡོངས་རྫོགས་པར། །སྐྱབས་སུ་མཆི་སྙིང་ནས་གསོལ་བ་འདེབས། །དེ་ཉིད་ཀྱི་གདུལ་ཞིང་ཀོང་
ཡུལ་མཐིལ། །མཐར་ཐུག་ཏུ་ཟད་པའི་ས་མཚམས་སུ། །གནས་རྒྱ་ལ་ཟེར་བའི་སྒྲ་བོ་ཆེ། །རྩེ་རྡུམ་གྱི་གངས་ཆེན་མ་ལགས་སམ། །རི་མཐོ་མཐོ་དང་གཉན་གཉན་མང་ལགས་ཀྱང༌། །ཕྱོགས་གང་ནས་བལྟས་ཀྱང་སྒྲིབ་མེད་དུ། །རི་ཀུན་གྱི་ཡང་རྩེར་འོད་ལྷག་གེ །གསལ་བར་དུ་མཐོང་བ་དཔལ་རིའི་གངས། །ལྷ་བདེ་མཆོག་འཁོར་ལོའི་དཀྱིལ་འཁོར་དུ། །རྗེ་པདྨས་བྱིན་གྱིས་བརླབས་པར་མཛད། །གནས་དེ་མགུལ་ལོངས་སྤྱོད་འཁོར་ལོ་རུ། །ས་བྱང་ཆུབ་ཡང་རྩེའི་སྒྲུབ་གནས་འདི། །དབྱིབས་པདྨ་ཁ་བྱེའི་ཟེའུ་འབྲུའི་ཚུལ། །ཡིད་རབ་དྭངས་སྤྲོ་བ་འཕེལ་བའི་གནས། །ཤར་ཁྲི་གདུགས་འཆར་བའི་སྒོ་མོ་རུ། །འཛོམ་གངས་དཀར་མཁའ་འགྲོའི་ར་བ་ཡོད། །འབྲས་སཱ་ལུ་སྐྱེ་ཞིང་རས་འཐགས་གྱོན། །མོན་འཇང་ཡུལ་ཞེས་བྱའི་རྒྱབ་རི་ཡིན། །ལྷོ་མ་ལ་ཡ་རི་གནམ་ལྕགས་འབར། །ལྷ་དམ་ཅན་གནས་
པའི་ཕོ་བྲང་སྟེ། །སྐྱེ་བོ་རྣམས་དྲི་ལྷ་རྩེ་རྣོན་ཟེར། །གནས་པདྨ་བཀོད་པའི་ཕུ་རི་ཡིན། །ནུབ་མ་མ་མཐིང་གི་མཚོ་མོ་ནི། །མ་མཚོ་སྨན་རྒྱལ་མོའི་བསྟི་གནས་ཏེ། །ཀོང་ལུང་པའི་བདེ་སྐྱིད་ལོངས་སྤྱོད་ཀྱི། ས་གནད་དང་རྟེན་ ༼གུ་རུ་རིན་པོ་ཆེས་གཏེར་ཁ་མང་པོར་ལུང་བསྟན་ནོ། མཆན།༽ འབྲེལ་འདི་ན་ཡོད། །བྱང་གངས་རིའི་གནས་ཆེན་ཡོངས་གྲགས་དང༌། །ཡན་ལག་བརྒྱད་ལྡན་གྱི་བདུད་རྩིའི་ཆུ། །ངོ་མཚར་དུ་མའི་གཟིགས་སྣང་ཚོགས། །བྱིན་རླབས་ཀྱི་དཔལ་དུ་འབར་བ་ཡོད། །དབུས་བྱང་ཆུབ་ཀྱི་སྙིང་པོའི་ཡང་རྩེ་འདིར། །འདོད་ཡོན་གྱི་མཆོད་པ་ཕུན་སུམ་ཚོགས། །སྔོ་སྨན་སྣ་ཚོགས་ཀྱི་མེ་ཏོག་གི །སྐྱེད་ཚལ་ཡིད་འོང་གི་སྤང་གཤོངས་དང༌། །ཤུག་པ་བལ་དཀར་གྱི་དྲི་བཟང་གི །བདུག་སྤོས་བསུང་ཞིམ་གྱི་དྭངས་རེ་སྤྲོ། །ནམ་ལངས་དང་ཉི་ཤར་དུས་མཉམ་པས། །མུན་སེལ་ནང་གསལ་དུ་ལྷུན་གྱི་གྲུབ། །བདུད་རྩིའི་ཆུ་
མིག་གིས་དྲི་ཆབ་ཀྱིས། །ཉོན་མོངས་ཚ་གདུང་གི་གནོད་པ་བྲལ། །རུག་པ་ཆུ་རུག་རྨེ་མོ་སོགས། །རབ་བྱུང་ཞལ་ཟས་ཀྱི་འཚོ་བ་ཡོད། །བྱ་ཚེ་རིང་གདངས་བྱའི་གླུ་དབྱངས་ཀྱི། །སྒྲ་སྙན་པོས་ཡིད་སྣང་འགྱུར་བར་བྱེད། །ལར་མགོ་ནག་མི་ཡི་རྒྱུ་འཕྲུལ་མེད། །འཇིག་རྟེན་རྣམ་གཡེང་གི་དགྲ་དང་བྲལ། །སྤྲིན་ན་བུན་གྱི་བླ་བྲེས་རྟག་ཏུ་ཕུབས། །སེམས་གཡེང་བའི་བར་ཆད་དེ་ཡིས་སེལ། །འཇའ་ལྔ་ལྡན་གྱི་དྲྭ་བ་རིས་སུ་བྲིས། །གནས་བཟང་བའི་ངེས་ཤེས་དེ་ཡིས་བསྐྱེད། །ཆར་ཁ་བ་རྒྱུན་མི་ཆད་འབབས་པས། །སྒོམ་ཡེངས་མེད་ཀྱི་སྐུ་མཚམས་ངང་གིས་དམ། །གངས་ཉིལ་བའི་འུར་སྒྲ་འབྲུག་ལྟར་སྒྲོག །ཆོས་ཉིད་ཀྱི་རང་སྒྲ་ངོ་ཡང་སྤྲོད། །བྲག་གཡང་རི་མཐོ་གཟར་འཇིགས་ཚུལ་གྱིས། །ཚེ་མི་རྟག་ངེས་འབྱུང་བསྐུལ་མར་བྱེད། །བྱ་རི་དྭགས་བག་ཡངས་སྤྱོད་ཚུལ་གྱིས། །བྱམས་སྙིང་རྗེ་ཤུགས་འབྱུང་
རྒྱུན་ཆད་མེད། །མ་མཁའ་འགྲོའི་དངོས་གྲུབ་ཚོགས་འཁོར་གྱིས། །རྨི་ལམ་ཀུན་དགའ་བདེའི་རོལ་པར་འཆར། །གནས་འདི་འདྲའི་ཡ་མཚན་བཀོད་པ་རྣམས། །ཚེ་བློས་ཐོང་གི་ཆོས་པའི་དཔལ་དུ་ཆེ། །བདག་མི་རྒན་ནམ་འཆི་ཆ་མེད་ལ། །རྐང་འགྲོ་དད་ཁ་ལ་མིན་ལགས་ཀྱང༌། རྗེ་རྒྱལ་བས་བསྔགས་པའི་རི་ཁྲོད་འདིར། །ལམ་བགྲོད་པར་དཀའ་ཡང་སྙིང་རུས་བསྐྱེད། །གནས་ཡ་མཚན་ལ་བསམ་སྟེ་བརྩོན་པས་བགྲོད། །སྐྱབས་བླ་མ་དཀོན་མཆོག་ལ་གསོལ་བ་བཏབ། །མ་སེམས་ཅན་བདེ་བའི་རྟེན་འབྲེལ་བསྒྲིགས། །ཆོས་སྙིང་པོ་དོན་གྱི་ཡང་བཅུད་བླངས། །སེམས་རང་རིག་གི་རང་འགྲོས་དཀྱུས་ཐོག་བཅད། །རྐྱེན་གང་བྱུང་ལ་གཏད་མེད་ཀྱི་འབུར་འཇོམས་བྱས། །ཕྱི་ལྷ་འདྲེ་ཡང་རང་སེམས་ཀྱི་རྒྱན་དུ་འཁྱེར། །བློ་སྐྱིད་སྡུག་ཀུན་ཆུ་ཡི་རི་མོར་བལྟས། །ལར་ཐམས་ཅད་ཆོས་ཉིད་རོལ་པར་བསྟིམ། །བདག་རོ་སྙོམས་ཀྱི་དོན་འབྲས་འགྲུབ་ནས་བྱུང༌།
།ཁྱེད་ཕྱི་རབས་རྗེས་འཇུག་གི་ཆོས་པ་རྣམས། །ཁ་བྱི་ཁུང་ཙམ་འདི་གསོ་བ་ལ། །མི་ཚེ་གྲོང་འཁྱམས་སུ་མ་བྱེད་པར། །གནས་དབེན་ཁྲོད་སྒྲུབ་རྒྱུད་ཀྱི་གདན་ས་མཆོག །འདི་ལྟ་བུར་ཁ་ལོ་ཡར་བསྒྱུར་དང༌། །གཏན་འདུན་གྱི་གྲོས་འགོ་ལེགས་ནས་འོང༌། །དོན་མེད་ཀྱི་བྱ་བྱེད་མ་མང་བར། །རང་སེམས་ཀྱི་གཉེར་ཁ་གྱིས་ཤིག་དང༌། །བྱང་ཆུབ་ཀྱི་ལམ་བཟང་བགྲོད་པར་འགྱུར། །དེ་སྐད་དུ་སྨྲ་བའི་གནས་མཆོག་ནི། །ཤར་ཕྱོགས་ཀྱི་དཔལ་རི་གངས་ཁྲོད་འདབས། །བྱང་ཆུབ་ཀྱི་སྙིང་པོའི་ཡང་དབེན་དུ། །གཅུང་ནོར་བཟང་ཆོས་ཀྱི་དབང་པོ་དང༌། །མ་མཁའ་འགྲོ་མཉེས་པའི་རོལ་མོར་ཕུལ། །མཁའ་ཁྱབ་ཀྱི་འགྲོ་ལ་ཕན་བདེའི་རྒྱུར། །འདི་ཉིད་ཀྱིས་ཡོངས་སུ་འགྲུབ་པར་ཤོག །སྒྲུབ་གནས་ཞིང་བཀོད་ཀྱི་གླུ། །ན་མོ་པདྨ་ཀ་རཱ་ཡ། དལ་འབྱོར་མི་ལུས་ཕུན་ཚོགས་ཐོབ་དུས་འདིར། །དཔལ་མགོན་བླ་མ་ཡིད་བཞིན་ནོར་བུ་ལ། །
ཅི་མཛད་ལེགས་མཐོང་གང་གསུངས་བཀའ་བསྒྲུབ་པས། །མཉེས་པ་མཐར་ཕྱིན་བྱེད་པ་བྱང་ཆུབ་ལམ། ༡ །ནམ་འཆི་ཆ་མེད་རྨི་ལམ་སྣང་བ་ཙམ། །མི་ཚེ་སྐད་ཅིག་རེ་ལ་ཐུང་དུ་འགྲོ། །རྒས་ཁའི་རྒྱགས་གྲབས་བྱས་ཀྱང་སྡོད་ངེས་མེད། །འཆི་ཁའི་ལམ་སྣ་འཚོལ་བ་བྱང་ཆུབ་ལམ། ༢ །འགྲོ་ཀུན་ཕ་མར་གྱུར་ལ་ཁྱད་པར་མེད། །དགྲ་གཉེན་ཆགས་སྡང་བྱེད་པ་འཁྲུལ་པའི་ལས། །དེ་བས་བྱམས་དང་སྙིང་རྗེ་བྱང་སེམས་དང༌། །དག་སྣ་ཕྱོགས་མེད་སྦྱོང་བ་བྱང་ཆུབ་ལམ། ༣ །རྒྱུ་འབྲས་བསླུ་མེད་དགེ་སྡིག་འབྲས་བུ་སྨིན། །འཁོར་བའི་ཁམས་སུ་གར་སྐྱེས་བདེ་བ་མེད། །སྤང་བླང་ཚུལ་བཞིན་སྒྲུབ་དུས་ང་རེས་ཙམ། །སྡིག་སྤོང་དགེ་ལ་འབད་པ་བྱང་ཆུབ་ལམ། ༤ །ཆོས་རྣམས་ཀུན་གྱི་རྩ་བ་རང་སེམས་འདི། །རང་རིག་དྲན་པས་རྟག་ཏུ་མ་བསྐྱངས་ན། །ཨ་འཐས་ལུག་རྒྱུད་འཁྲུལ་པས་གཏན་ཕུང་རྒྱུ། །མ་ཡེངས་རང་འཚོ་བཟུང་བ་བྱང་ཆུབ་ལམ། །
བྱང་ཆུབ་ལམ་གྱི་རྩ་བའི་ཉམས་ལེན་གནད། །ཟབ་མོ་སྣ་ལྔར་དྲིལ་བའི་གླུ་ཆུང་འདི། །ཨུ་དུམ་ཝ་ར་ལྟ་བུ་རྙེད་དཀའི་ཆོས། །བླ་མའི་ཞལ་གདམས་ལགས་ཀྱི་ཐུགས་དགྱེས་མཛོད། །གླུ་འདི་བྱང་ཆུབ་ལམ་ལྔའི་གླུ། །ཚིག་འདི་སྙིང་གཏམ་ཟབ་མོའི་ཚིག །དོན་འདི་ཉམས་ལེན་གནད་ཀྱི་དོན། །འདི་ཡིས་གཞན་ལ་ཕན་པར་ཤོག ཅེས་པ་འདི་ཡང་བྱང་ཆུབ་ཡང་རྩེའི་དབེན་གནས་སུ། རང་གི་གཅུང་པོ་ན་རེ། སྔོན་གྱི་དཔལ་ལྡན་མཁའ་སྤྱོད་པ་སོགས་ཀྱི་བྱང་ཆུབ་ལམ་གྱི་གླུ་ཆེ་ཆུང་སྣ་ཚོགས་གདའ་བས། འོ་སྐོལ་གྱིས་ཀྱང་བྱང་ཆུབ་ཀྱི་གནས་འདིར་བྱང་ཆུབ་ཀྱི་གླུ་ཞིག་གྱིས་དང་ཟེར་བའི་ངོར་བླངས་པ་དགེའོ། ༈ །ཕ་བླ་མ་སངས་རྒྱས་ཀུན་དངོས་འདི། །དཔེ་ཡིད་བཞིན་ནོར་བུ་བསམ་འཕེལ་འདྲ། །ཅི་བསམ་དགོས་འདོད་འབྱུང་བའི་མཚན་ལ། །སྙིང་ཐག་པའི་མོས་གུས་བསྐྱེད་རེ་རན། ༡ །ལུས་སྒྱུ་མའི་ ཁང་རུལ་གཡར 
་པོ་འདི། །དཔེ་གཡང་སའི་སྡོང་གོག་རྙིང་པ་འདྲ། །
ནམ་ཡང་འགྱེལ་བར་འགྱུར་ངེས་ཐག་ཆོད་ལ། །སེམས་མི་རྟག་རང་རྒྱུད་བསྐུལ་རེ་རན། ༢ །སྟོང་འཁོར་ལོས་བསྒྱུར་བའི་མངའ་ཐང་ཡང༌། །དཔེ་མིག་འཕྲུལ་མཁན་གྱི་རྩེད་མོ་འདྲ། །སྙིང་པོ་ཅི་ཡང་མེད་པའི་ནོར་རྫས་འདྲ། །བློ་ཞེན་འཛིན་སྲེད་པ་སྤང་རེ་རན། ༣ །ཆོས་བརྒྱད་ཁྲི་བཞི་སྟོང་མང་པོ་ཀུན། །དཔེ་བཅུད་ལྡན་འོ་མའི་རྒྱ་མཚོ་འདྲ། །ཡང་བཅུད་ངེས་དོན་མར་གྱི་སྙིང་པོ་ལ། །གནད་ཉམས་ལེན་རྒྱུད་ལ་སྦྱོར་རེ་རན། ༤ །དབྱངས་ངེས་འབྱུང་བསྐུལ་བའི་གླུ་ཆུང་འདི། །དཔེ་གཅོང་ནད་སེལ་བའི་སྨན་མཆོག་འདྲ། །སྙོམས་ལས་ལེ་ལོའི་ནད་ཀྱི་གཉེན་པོ་ཡིན། །དོན་ལེགས་པར་སོམས་ལ་ཉམས་བཞེས་ཞུའོ། །༥ ༈ ཨ་ཧོ། མཚན་ལྡན་བླ་མ་དང་གཅིག གདམས་ངག་ཟབ་མོ་དང་གཉིས། རང་སེམས་རྗེན་པ་དང་གསུམ། འདི་གསུམ་འཛོམ་དུས་ཉམས་ལེན་མི་བྱེད་ན་འཁྲུལ་ཚབས་ཆེའོ། །
བསམ་བློ་ལེགས་པར་ཐོང༌། དལ་འབྱོར་མི་ལུས་དང་གཅིག སངས་རྒྱས་བསྟན་པ་དང་གཉིས། །རང་དབང་རང་ཐོབ་དང་གསུམ། འདི་གསུམ་འཛོམ་དུས་དམ་ཆོས་མ་ནུས་ན་ཕུང་ཚབས་ཆེའོ། །ཕྲལ་ཕུགས་ལེགས་པར་བསམ་མོ། །མི་རྟག་འཆི་བ་དང་གཅིག བར་དོའི་འཇིག་སྐྲག་དང་གཉིས། ངན་འགྲོའི་སྡུག་བསྔལ་དང་གསུམ། འདི་གསུམ་བྱུང་དུས་གྲབས་ཆུད་མ་བྱས་ན་འགྱོད་ཚབས་ཆེའོ། །རྡོག་གཏད་ལེགས་པར་མཛོད། ཅེས་པ་འདི་ཡང༌། རང་གི་གཅུང་པོ་དང༌། སྨིན་གྲོལ་སྙིང་པོ་གཉིས་ཀྱི་བསྐུལ་ངོར་སྨྲས་པའོ། ༈ །རྒྱལ་དབང་པདྨ་འབྱུང་གནས་ལ་གསོལ་བ་འདེབས་སོ། །དལ་འབྱོར་མི་ལུས་ཡིད་བཞིན་གྱི་ནོར་བུ་འདུག་གོ །འཇིག་རྟེན་གཡེང་བས་དལ་འབྱོར་འདྀ་སྟོང་ཟད་དུ་འདུག་གོ །བློ་རྒྱུད་ཆོས་དང་འདྲེས་ངེས་སུ་བྱིན་གྱིས་རང་རློབས་ཤིག །མཚུངས་མེད་བསྟན་འཛིན་རྡོ་རྗེ་ལ་གསོལ་བ་འདེབས་སོ། །མི་ཚེ་འདི་ཀུན་རྨི་ལམ་གྱི་སྣང་
བ་ཙམ་འདུག་གོ །འཆི་བ་ནམ་མཁའི་ཐོག་ཆེན་ལས་མྱུར་བ་རུ་འོང་ངོ། །སྒོ་གསུམ་ཆོས་ཀྱིས་འདའ་བ་རུ་བྱིན་གྱིས་རང་རློབས་ཤིག །མཆོག་སྤྲུལ་བཟང་པོ་རྡོ་རྗེ་ལ་གསོལ་བ་འདེབས་སོ། །འཁོར་བའི་རང་བཞིན་སྡུག་བསྔལ་གྱི་བཙོན་ར་རུ་འདུག་གོ །ཆོས་མེད་སེར་གཟུགས་རང་གིས་རང་བསྲུང་མཁན་དུ་གདའ་འོ། །རང་རྒྱུད་གཏིང་ནས་འཐུལ་བ་རུ་བྱིན་གྱིས་རང་རློབས་ཤིག །རིག་འཛིན་ཆོས་ཉིད་ཀློང་གྲོལ་ལ་གསོལ་བ་འདེབས་སོ། །སེམས་ཅན་ཐམས་ཅད་ཕ་མའི་རང་བཞིན་དུ་འདུག་གོ །དགྲ་གཉེན་ཆགས་སྡང་འཁྲུལ་པའི་ཡོ་ལངས་སུ་འདུག་གོ །འཇིག་རྟེན་ཞེན་པ་གཏན་ཟད་དུ་ཕྱིན་གྱིས་རང་རློབས་ཤིག །དྲིན་ཆན་སྣ་ཚོགས་རང་གྲོལ་ལ་གསོལ་བ་འདེབས་སོགས། །སངས་རྒྱས་ཐོད་བླ་མའི་རྣམ་སྤྲུལ་དུ་འདུག་གོ །བླ་མའི་ཐུགས་དང་རང་རིག་འདི་དབྱེར་མེད་དུ་འདུག་གོ །རང་རིག་ཆོས་སྐུ་རང་གྲོལ་དུ་བྱིན་གྱིས་རང་རློབས་ཤིག །རྩེ་གཅིག་དད་པས་གདུང་དབྱངས་ཀྱིས་གསོལ་
བ་འདེབས་སོ། །བདག་སོགས་མཁའ་མཉམ་སེམས་ཅན་ལ་ཐུགས་རྗེ་ཡིས་གཟིགས་ཤིག །ཚེ་གཅིག་སངས་རྒྱས་འགྲུབ་པ་ཡི་དངོས་གྲུབ་ཏུ་སྩོལ་ཞིག །སྲིད་གསུམ་བདེ་ལ་འགོད་པ་ཡི་ནུས་ལྡན་དུ་ཤོག་ཅིག། གཅུང་པོ་ནོར་བཟང་པས། སྔོན་རྒྱལ་བ་རྒོད་ཚང་པ་དེ་ཉིད་ཀྱི་སྣང་བ་བདེན་མེད་ཟང་ཐལ་གྱི་གྲུབ་རྟགས་མཛད་དུས་ཀྱི་གསུང་མགུར་དང་འདྲ་བ་ཞིག་དགོས་ཟེར་བའི་ངོར་བླངས་པ་དགེའོ། ༈ །ན་མོ་གུ་རུ། དོན་གནས་ལུགས་ཀྱི་ཆ་ནས་སྤྲོས་པས་དབེན། །རྩལ་འགག་མེད་ཀྱི་རོལ་པ་ཅིར་ཡང་འཆར། །གནད་ཡིན་ལུགས་ཀྱི་འགག་དོན་སེམས་སུ་གཅིག །སེམས་རང་ངོ་རང་རིག་གི་བླ་མར་འདུད། །ཁྱེད་དད་ཅན་གྱི་སྐལ་ལྡན་བཀྲ་ཤིས་མཚན། །སྔོན་སྨོན་ལམ་གྱི་འབྲེལ་པ་བཟང་པོའི་མཐུས། །བདག་ཀུན་སྤངས་ཀྱི་རྗེས་འགྲོ་རྒན་པོ་ལ། །ཆོས་རྡོ་རྗེའི་གླུ་རུ་སྨྲོས་ཤིག་ཅེས། །གང་བཞེད་པའི་དོན་སྐོང་འདི་ལྟར་འབུལ། །ལུས་
དལ་འབྱོར་འདི་དབུལ་པོས་གཏེར་བརྙེད་ལྟར། །དུས་ད་རེས་ཐོབ་པའི་དགའ་ཚོར་ལ། །འདི་སྟོང་ཟད་དོན་མེད་དུ་མ་སོང་བར། །གཏན་འདུན་མ་ཞིག་དགེ་བས་བསྒྲུབ་པར་ཞུ། །རྒྱུ་འབྱུང་བཞི་འདུས་པའི་གཟུགས་ཕུང་འདི། །རྐྱེན་འཆི་བདག་གི་ཐོག་ཆེན་ནམ་ཀྱང་ཕོག །ཚེ་ངེས་མེད་ལ་བློ་ན་མ་རིང་བར། །ལམ་འཆུགས་མེད་ཅིག་འཚོལ་ལ་རེམ་པར་ཞུ། །གནས་འཁོར་བ་གང་སྐྱེས་བདེ་བ་མེད། །ལས་རྒྱུ་འབྲས་ཀྱི་ནམ་ཡང་བསླུ་མི་སྲིད། །དགེ་མི་དགེའི་སྤང་བླང་ཞིབ་མོ་ལ། །དུས་ད་རེས་འབད་པ་ནན་ཏན་ཞུ། །སྐྱབས་མི་བསླུ་ངེས་པ་དཀོན་མཆོག་གསུམ། །ཚེ་འདི་ཕྱི་བར་གསུམ་རྩེ་གཅིག་པའི། །ཡིད་དད་གུས་ཟོལ་མེད་བློས་འགེལ་ཞིང༌། །ལས་སྐྱིད་སྡུག་གང་གི་ཐག་ཆོད་ཞུ། །རྗེ་དུས་གསུམ་སངས་རྒྱས་གྱི་རྣམ་གྲངས་ཀུན། །ཞིང་གདུལ་བྱ་ཐ་དད་ཀྱི་སྣང་ངོ་ཙམ། །རང་དད་མོས་གང་ཐོབ་ཀྱི་བླ་མ་དེ། །སྐྱབས་རྒྱལ་བ་ཀུན་དངོས་སུ་
ཡིད་ཆེས་ཞུ། །ཆོས་གྲུབ་མཐའ་སྣ་ཚོགས་ཀྱི་ང་བཟང་ཀུན། །ཡུལ་སྐལ་བ་ཐ་དད་ཀྱི་རང་སྣང་ཙམ། །དོན་ཞེ་ཕུགས་བྱང་ཆུབ་ཉིད་བསྒྲུབ་ལ་མཐུན། །སེམས་དག་སྣང་ཕྱོགས་མེད་དུ་སྦྱོང་བར་ཞུ། །འཕྲལ་འདི་སྣང་བསོད་ནམས་ཀྱི་སྟོབས་འབྱོར་དང༌། །ནོར་ལོངས་སྤྱོད་གྲོགས་འཁོར་དང་བདེ་སྐྱིད་ཀུན། །ལས་མངོན་ཐོ་དགེ་འབྲས་སུ་ཤེས་བྱ་ལ། །ཚོགས་རྣམ་གཉིས་གོང་འཕེལ་དུ་སོག་པར་ཞུ། །འབངས་མངའ་རིས་ཆབ་སྲིད་ཀྱི་སྐྱོང་བྲན་དང༌། །སྲིད་འཇིག་རྟེན་འདུན་ཐབས་ཀྱི་བྱ་བྱེད་རྣམས། །བློ་གཟུར་གནས་དྲང་ཚུགས་ཀྱི་གཞུང་བསྲང་སྟེ། །ཀུན་ཡིད་ཆེས་ངེས་འདྲོངས་སུ་མཛད་པར་ཞུ། །ཚེ་འདི་ལས་ཕྱི་མ་བསམ་གལ་ཆེ། །འཕྲལ་སྐྱིད་པོས་ཕུགས་དོན་འགྲུབ་པར་དཀའ། །ཚེ་གཏན་གྱི་འདུན་མ་སྒྲུབ་དུས་འདིར། །ནམ་ཤི་ཡང་འགྱོད་མེད་འགྲུབ་མཛད་ཞུ། །ཀྱེ་མ། བསྐལ་དུས་ཀྱི་སྙིགས་མའི་མཐའ་ལ་ཐུག །རྒྱལ་
བསྟན་ཡང་ནུབ་ཁའི་ཉི་མ་ཙམ། །སེམས་ཅན་གྱི་བསོད་ནམས་ཐུར་ལ་བྲི། །དམ་ཆོས་ལ་འབད་རན་མཁྱེན་པར་མཛོད། །རྐྱེན་ངན་ནི་བུ་ཡུག་ལས་ཀྱང་འཚུབ། །ཚེ་སྲོག་ནི་རླུང་སེབ་མར་མེ་འདྲ། །ངན་སོང་ལས་སྐྱོབས་ནུས་དམ་ཆོས་ལས། །ཐབས་གཞན་ན་མ་མཆིས་དགོངས་པར་མཛོད། །ཆོས་བྱེད་རློམ་མང་ཀྱང་བྱེད་ངེས་དཀོན། །ཆོས་སྣ་ཁ་མང་པོས་འགྲུབ་པར་དཀའ། །ཡིད་གང་ལ་མོས་པ་གཅིག་ཐོག་དྲིལ། །དོན་སྙིང་པོ་དེ་ཀས་འགྲུབ་པ་ལགས། །གྲོས་སྙིང་གཏམ་གླུ་རུ་བླངས་པ་འདིས། །ཁྱེད་བཞེད་དོན་ཆོས་བཞིན་འགྲུབ་པ་དང༌། །ཚིག་མཐོང་ཐོས་དྲན་པའི་སྐྱེ་རྒུ་ཀུན། །ཡིད་དམ་ཆོས་ལ་འགྱུར་ནས་སྨིན་གྲོལ་ཤོག། ཅེས་པ་འདི་ནི། དད་སྟོབས་འབྱོར་པས་མི་དམན་པའི་སྐལ་ལྡན་མངྒ་ལའི་མཚན་ཅན་གྱིས་བསྐུལ་ངོར་བཀོད་པ་ཤུ་བྷམ། ༈ །ན་མོ་གུ་རུ། སངས་རྒྱས་ཀྱི་ཞིང་ཁམས་རབ་འབྱམས་ཀུན། །རྣམ་འགྱུར་གྱི་སྤྲུལ་པ་རྒྱ་མཚོ་ཡིས། །རིས་མེད་
དུ་འགྲོ་བའི་དོན་མཛད་པའི། །ཁྱབ་བདག་གི་བླ་མ་སྤྱི་བོས་མཆོད། །ཁྱེད་དྷྱཱ་ན་གརྦྷ་སྙིང་གཏམ་གྱི། །གླུ་སེམས་ལ་ཕན་པ་ལོངས་ཤིག་སྐད། །བདག་རང་གྲོལ་རྒན་པོས་ཤུགས་འབྱུང་གླུ། །འདི་ཡིད་ལ་ཞོག་དང་བསམ་གཏན་པ། །དལ་འབྱོར་འདི་དབྱར་ཁའི་མེ་ཏོག་འདྲ། །ཡུན་རིང་པོ་མི་སྡོད་མྱུར་དུ་རྒས། །ཁྱེད་རྒས་ཁ་ཤི་ཁའི་འདུན་མ་ཡི། །བསམ་བློ་དེ་དམ་པའི་ཆོས་ལ་ཐོངས། །ཚེ་སྲོག་འདི་རླུང་ནང་མར་མེ་བཞིན། །ངེས་མེད་དུ་ནམ་འཆི་ལྷུས་མི་ཐིངས། །མཐར་ནམ་ཀྱང་འཆི་བར་ཐག་ཆོད་ལ། །འགྱོད་མེད་ཀྱི་གྲབས་ཆུད་མྱུར་དུ་རེམས། །ལྟོ་གོས་འདི་དབུལ་པོའི་ནོར་རྫས་ལྟར། །གཅིག་ཡོད་པས་མི་ཆོག་གཅིག་ཀྱང་དགོས། །འཚོལ་སྒྲུབ་ཀྱི་ངང་ལ་མི་ཚེ་འདས། །ཆོག་ཤེས་ཀྱི་ཁོ་ཐག་སེམས་ལ་ཆོད། །དོན་མེད་ཀྱི་འཇིག་རྟེན་སྣང་ཤས་དེ། །པད་ཚལ་དུ་སླེབ་པའི་བྱིས་པ་བཞིན།
།འདི་ཡག་དང་འདི་བྱེད་ངང་ལ་ཟད། །བློ་ཁ་དེ་ནང་དུ་ཁུག་ལ་ཤོག །དགོས་མེད་ཀྱི་སྨྲ་བརྗོད་ཆགས་སྡང་རྒྱུ། །ངག་སྒྲིབ་དེ་ཞར་དང་ཞོར་ལ་གསོག །ཁ་ཏོན་དང་བཟླས་བརྗོད་བྱེད་ལ་འཆོར། །ངག་འཁྱལ་འདི་ཉེས་པའི་འབྱུང་ཁུངས་ལགས། །རྒྱུ་འབྲས་དང་དམ་སྡོམ་རྩ་བ་དེ། །རང་སེམས་ལ་གཡོ་ཟོལ་མེད་པ་དགོས། །ཚུལ་ཆོས་དང་ངོ་ལྐོག་མཁན་པོ་དེ། །བཙན་དུག་ལ་ལྐོག་ཟས་བྱེད་པ་འདྲ། །རྣམ་གཡེང་དང་གཉིད་དང་སྙོམ་ལས་གསུམ། །སྐོམ་སྐལ་དུ་ཚྭ་ཆུ་འཐུང་བ་འདྲ། །ངན་གོམས་དང་ལང་ལ་མ་ཤོར་བར། །རང་ཁྲིམས་ཤིག་རང་གིས་བསྡོམས་དགོས་སོ། །རྣམ་རྟོག་འདི་བཀག་པས་མི་ཁེགས་ཀྱང༌། །རྗེས་འབྲེང་དང་རང་དགར་བཏང་བ་ན། །སེམས་འཁྲུལ་གྱི་རྟ་རྒོད་གཡང་ལ་འཆོར། །དྲན་ཤེས་ཀྱི་བག་ཡོད་བསྟེན་པར་མཛོད། །སངས་རྒྱས་ཀྱང་བླ་མའི་རྣམ་འཕྲུལ་ཙམ། །བྱིན་རླབས་ནི་དད་
པའི་རང་གཟུགས་ཡིན། །མོས་གུས་ཀྱི་གདུང་ཤུགས་ཆེ་ཆུང་ལ། །ཐུགས་རྗེ་ཡང་དེ་དང་མཐུན་པར་འཇུག །ཅི་མཛད་ལེགས་མཐོང་ཞིག་མ་བྱུང་ན། །རང་བློ་ལ་མཐུན་དང་མི་མཐུན་གྱི། །དད་གུས་དེ་དད་པའི་ཁོང་རུལ་ཡིན། །བྱིན་རླབས་ཀྱང་ནམ་གཞུག་ཆར་པ་འདྲ། །དག་སྣང་ནི་མུན་པའི་སྒྲོན་མེ་ཡིན། །རང་རྒྱུད་ཀྱི་སྣང་བ་མ་དག་ན། །ལོག་རྟོག་གི་མུན་པ་སངས་དུས་མེད། །རང་སྐྱོན་དེ་རང་གིས་བརྟག་ནས་སྤང༌། །དུས་ངན་གྱི་སེམས་ཅན་དུག་ལྔ་རགས། །ཆོས་བྱེད་བྱེད་མང་ལ་འགྲུབ་མཁན་ཉུང༌། །རང་སེམས་ཀྱི་མཛུབ་མོ་སྣ་ཙེར་ཁུགས། །རང་དྲིན་དེ་རང་ལ་ཆེ་བར་མཛོད། །སྙིང་གཏམ་དེ་སེམས་ལ་མ་བཅངས་ན། །ཚིག་ཁ་བཤད་བྲོ་པའི་གླུ་དབྱངས་འདྲ། །དོན་ཡིད་ལ་བསམ་ཞིང་རྒྱུད་ལ་སྦྱོར། །གླུ་གདམས་ངག་ཡིན་ནོ་བསམ་གཏན་པ། ༈ །ཨ་ཧོ། འཇིག་རྟེན་བྱ་བ་
བློ་ཡི་ཐོངས་པ་དང་གཅིག །གཉིས་འཛིན་ཐེ་ཚོམ་རྦད་ཀྱི་ཆོད་པ་དང་གཉིས། །འདི་ཕྱིའི་བློ་གཏད་བླ་མར་འཁེལ་བ་དང་གསུམ། །འདི་གསུམ་ནུས་ན་གཏན་འདུན་འགྲུབ་པོ་ལེགས་པར་བསམ་མནོ་ཐོང༌། །དག་སྣང་མོས་གུས་སྙིང་རྗེ་བསྐྱེད་པ་དང་གཅིག །ཞེན་ལོག་དགོས་མེད་འཆི་བ་དྲན་པ་དང་གཉིས། །སྒོ་གསུམ་དགེ་སྦྱོར་བརྩོན་འགྲུས་ཆེ་བ་དང་གསུམ། །འདི་གསུམ་འབད་ན་ཐར་ལམ་བསྙེད་དོ་སྙིང་རུས་རྒྱུན་དུ་མཛོད། །རྣམ་རྟོག་ངན་ལང་འཁྲུལ་རྒྱུན་གཅོད་པ་དང་གཅིག །སྒོམ་མེད་ཡེངས་མེད་རང་བབ་སྐྱོང་བ་དང་གཉིས། །གང་ཤར་སེམས་ཀྱི་རོལ་པར་ཤེས་པ་དང་གསུམ། །འདི་གསུམ་ཤེས་ན་སངས་རྒྱས་འགྲུབ་པོ་སེམས་ལ་མ་བརྗེད་འཚལ། །ཞེས་པ་འདི་ནི་བསམ་གཏན་སྙིང་པོའི་ངོར། འགོ་དགུ་དུར་ཁྲོད་དུའོ། །དགེའོ། །