གཞན་བསྐུལ་གྱི་ངོར་བྲིས་པའི་སྨོན་ལམ་གྱི་སྐོར་རྣམས་ཕྱོགས་གཅིག་ཏུ་བསྡེབས་པ་ནོར་བུའི་མཛོད་ཁང་།
གཞན་བསྐུལ་གྱི་ངོར་བྲིས་པའི་སྨོན་ལམ་གྱི་སྐོར་རྣམས་ཕྱོགས་གཅིག་ཏུ་བསྡེབས་པ་ནོར་བུའི་མཛོད་ཁང་བཞུགས་སོ།
མ་ལུས་འགྲོ་ལ་མ་ལྟར་བརྩེ་བ་ཅན། །ཐར་མེད་སེམས་ཅན་ཐར་པའི་ལམ་ལ་འགོད། །སྐྱབས་ཀྱི་དམ་པ་སྐྱབས་མཆོག་སྤྱན་རས་གཟིགས། །ཐུགས་རྗེའི་བདག་པོས་ཐུགས་ཀྱི་བརྩེར་དགོངས་ལ། །དུས་མཐར་སྐྱེས་པའི་དུས་ངན་སེམས་ཅན་རྣམས། །དམ་པའི་ཆོས་ལ་དམ་པར་མི་འཛིན་པར། །ལོག་པའི་ལས་སྤྱོད་ལོག་པའི་ལམ་ཞུགས་པའི། །མ་རིག་འགྲོ་ལ་མ་གཡེལ་ཐུགས་རྗེས་གཟུང་། །བདེ་ཆེན་ཞིང་དུ་བདེ་ལ་བཀོད་དུ་གསོལ། དེ་ཡང་བདག་ལྟ་བུ་ནི་ཐོས་བསམ་བསྒོམ་པའི་ཡོན་ཏན་གྱིས་དབེན་ཅིང་། མདོ་རྒྱུད་བསྟན་བཅོས་ཀྱི་དགོངས་དོན་ཕྱོགས་ཙམ་ཡང་མ་འགྲོལ་བའི་རྨོང་
པ་བློ་དམན་བདག་འདྲས་འཆད་རྩོད་རྩོམ་གསུམ་བགྱིས་པའི་ནུས་པ་འདི་ཆ་ཙམ་ཡང་ག་ལ་མཆིས་ཤིང་། ཁྱད་པར་དུ་ཡང་བདེ་ལེགས་ཀྱི་སྨོན་ལམ་འགྲུབ་པ་ལ་ངག་གི་བདེན་ཚིག་གྲུབ་པ་ཞིག་མེད་པར་སྨོན་ལམ་བྱེད་པའི་གང་ཟག་གི་སྐལ་བར་ལྡན་པ་དཀའ་མོད་ཀྱི། འོན་ཀྱང་ལྷག་བསམ་དག་པས་ཀུན་ནས་བླངས་ན་ཇི་ལྟར་སྨོན་བཞིན་འགྲུབ་པར་ཡང་གསུངས་སྟེ།། ༈ །།ཇི་སྐད་དུ། རང་འདོད་ཞེན་ངན་སྤང་ནས་ནི། ལྷག་བསམ་དགེ་བས་གཞན་དོན་དུ། །སྨོན་ལམ་གང་དང་གང་བཏབས་པ། །དེ་འབད་པའི་དགོས་མྱུར་འགྲུབ་འགྱུར། ཅེས་གསུངས་པའི་ཕྱིར་དང་། ཁྱད་པར་རང་ལ་མོས་འདུན་དུ་བྱེད་པའི་སྐྱེས་བུ་དག་གིས་ནན་གྱིས་བསྐུལ་བའི་ངོ་མ་ཆོག་པར་གང་དྲན་ཅི་འཐོན་དུ་སྨྲས་པའི་ཚིག་རྣམས་ཡི་གེར་བཀོད་རུང་གཞན་དོན་དུ་འགྱུར་བར་དཀའ་
མོད་སྟེ། འོན་ཀྱང་གལ་ཏེ་སྙིགས་མའི་དུས་ཀྱི་གང་ཟག་རང་དང་འདྲ་བའི་བློ་དམན་རེ་ཞིག་ལ་ཕན་པའང་སྲིད་སྙམ་ནས། ཡུལ་དུས་སོ་སོར་སྨྲས་རྣམས་རིམ་པ་བཞིན་དུ་བྲི་བར་བྱའོ། །དུས་གསུམ་རྒྱལ་བ་སྲས་དང་སློབ་མར་བཅས། །རྩ་གསུམ་ལྷ་དང་རིག་འཛིན་གྲུབ་པའི་ཚོགས། །ཆོས་སྲུང་རྒྱ་མཚོ་དཀར་ཕྱོགས་སྐྱོངས་རྣམས་ཀྱིས། །རྣམ་དག་སྨོན་ལམ་འགྲུབ་པར་བྱིན་གྱིས་རློབས། །མཐའ་ཡས་འགྲོ་བའི་ཕན་བདེའི་རྒྱུད་གཅིག་པུ། །དགེ་ལེགས་ཡོན་ཏན་མཐའ་དག་འབྱུང་བའི་གཞི། །རྒྱལ་བའི་བསྟན་པ་རིན་ཆེན་དྲི་མེད་ཉིད། །ཕྱོགས་དུས་ཀུན་དུ་དར་ཞིང་རྒྱས་གྱུར་ཅིག །ཇི་སྙེད་སེམས་ཅན་ཁམས་རྣམས་མ་ལུས་པར། །དེ་སྙེད་རྒྱལ་བའི་བསྟན་པས་ཡོངས་ཁྱབ་ཅིང་། །རང་གི་བློ་དང་མོས་ཁམས་ཇི་བཞིན་པའི། །ཟབ་རྒྱས་ཆོས་ལ་འགྲོ་ཀུན་སྤྱོད་གྱུར་ཅིག །ཐེག་པའི་མཐར་ཐུག་བླ་མེད་ཡང་དག་དོན། །ལྟ་བའི་ཡང་རྩེ་རྨད་བྱུང་རྫོགས་པ་ཆེ། །བསྟན་པའི་སྙིང་པོ་འོད་གསལ་རྡོ་རྗེའི་ཐེག །དར་ཞིང་རྒྱས་ལ་ཡུན་རིང་གནས་
གྱུར་ཅིག །བསླབ་གསུམ་རྣམ་དག་ཡོན་ཏན་མཛོད་འཛིན་པའི། །བསྟན་འཛིན་སྐྱེས་བུས་ས་ཆེན་ཡོངས་ཁྱབ་ཅིང་། །ཐོས་བསམ་བསྒོམ་པའི་ཉི་ཟླ་འབུམ་ཤར་བས། །བསྟན་པའི་སྒྲོན་མེ་ཕྱོགས་ཀུན་གསལ་གྱུར་ཅིག །སྣང་གྲགས་ལྷ་སྔགས་སྣོད་བཅུད་རྒྱལ་བའི་ཞིང་། །དེ་ཉིད་རིག་པའི་ཀློང་དུ་རོ་གཅིག་པའི། །སྟོང་གསལ་དབྱེར་མེད་ཀུན་བཟང་དགོངས་པའི་ཀློང་། །ཀ་དག་དབྱིངས་སུ་འགྲོ་ཀུན་གྲོལ་གྱུར་ཅིག །དཀོན་མཆོག་བདེན་པའི་བྱིན་རླབས་རྨད་བྱུང་དང་། །བདག་གི་ལྷག་བསམ་རྣམ་དག་བདེན་པའི་མཐུས། །སྨོན་ལམ་ཐམས་ཅད་བགེགས་མེད་འགྲུབ་པ་དང་། །རྒྱལ་བསྟན་ཡུན་རིང་གནས་པའི་བཀྲ་ཤིས་ཤོག །ཅེས་པ་འདི་ནི། སྤོ་བོ་ཡི་ཀོའི་ས་ཕྱོགས་སུ་བསྒྲུབ་པའི་རྒྱལ་མཚན་འཛིན་པའི་ཆོས་ཀྱི་རྗེ་ཨོ་རྒྱན་བསྟན་འཛིན་གྱི་བཀས། བསྟན་པ་རྒྱས་བྱེད་ཀྱི་སྨོན་ལམ་ཞིག་དགོས་ཞེས་གསུངས་པ་ལ་བརྟེན་ནས། བདག་ཀརྨཱ་རིག་འཛིན་རྣམ་པར་རྒྱལ་བས། སྨིན་གྲོལ་སྐྱེད་རྫོགས་གླིང་ནས་ཕུལ་བའོ། །
ཤཱཀྱའི་དགེ་སློང་དགེ་འདུན་ཉི་མ་གྲོགས་བཅས་ཀུན། །མི་མཐུན་ཉེར་འཚེ་འགལ་རྐྱེན་བར་ཆད་ཀུན་ཞི་ཞིང་། །ཆོས་དང་མཐུན་པའི་འདོད་དོན་མ་ལུས་འགྲུབ་གྱུར་ནས། །མྱུར་དུ་རྫོགས་པའི་བྱང་ཆུབ་དམ་པ་ཐོབ་པར་ཤོག །ཅེས་པའི་ཤོ་ལོ་ཀ་འདི་ནི། མདོ་ཁམས་ཚ་བ་གང་ནས། །དགེ་ལྡན་པའི་དགེ་སློང་འགའ་ཞིག་གིས་བསྐུལ་ངོར་བྲིས་པའོ། །སྐྱབས་གནས་དཀོན་མཆོག་གསུམ་དངོས་བླ་མ་དང་། །དེ་ཉིད་ལྷག་པའི་ལྷར་བཞེངས་ཡི་དམ་ལྷ། །ཕྲིན་ལས་སྒྲུབ་མཛད་མཁའ་འགྲོ་ཆོས་སྐྱོང་ཚོགས། །ཕྱོགས་དུས་རྒྱལ་བ་མ་ལུས་དགོངས་སུ་གསོལ། །བདག་གིས་ཐོག་མཐའ་མེད་ནས་ད་ལྟའི་བར། །དགེ་བའི་ལས་བསགས་པ་ཅི་མཆིས་པ། །དེ་དག་རྣམས་ཀྱི་མཐུ་དང་ནུས་པ་ཡིས། །བདེན་ཚིག་སྨོན་ལམ་འདི་དག་འགྲུབ་གྱུར་ཅིག །དེང་ནས་བཟུང་སྟེ་ཚེ་རབས་ཐམས་ཅད་དུ། །དལ་འབྱོར་མིར་སྐྱེས་ཆོས་ལྡན་དབང་པོ་ཚང་། །བསྟན་པའི་སྒོར་ཞུགས་བླ་མས་རྗེས་སུ་བཟུང་། །རྡོ་རྗེ་ཐེག་པའི་
ཟབ་དོན་བསྒོམ་པར་ཤོག །ཚུལ་མིན་ཁེ་གྲགས་ལོ་འདོད་ཀུན་སྤོང་ཞིང་། །རྩེ་གཅིག་བསྒྲུབ་པའི་སྙིང་པོ་ལྷུར་བླངས་ཏེ། །རང་དོན་ཀ་དག་ཟད་སར་འཁྱོལ་བྱས་ནས། །གཞན་དོན་ཕྲིན་ལས་རླབས་ཆེན་འགྲུབ་པར་ཤོག །རྗེ་བཙུན་བླ་མ་དམ་པ་ཁྱེད་དང་ནི། །སྐྱེ་དང་ཚེ་རབས་ཀུན་ཏུ་མི་འབྲལ་ཞིང་། །དམ་ཚིག་ཉེས་ལྟུང་དྲི་མས་མ་གོས་པར། །ཐུགས་རྗེ་བྱིན་རླབས་རྒྱུད་ལ་འཇུག་པར་ཤོག །གཞན་ཡང་ཚེ་འདིར་ལུས་ངག་ཡིད་གསུམ་ལ། །ནད་གདོན་ཉེར་འཚེ་བར་ཆད་ཀུན་ཞི་ཞིང་། །བསམ་དོན་ཆོས་ལྡན་ཡིད་བཞིན་འགྲུབ་གྱུར་ནས། །མྱུར་དུ་གདོད་མའི་ས་དེར་ཕྱིན་པར་ཤོག །ཞེས་པ་འདི་ནི་རང་གི་ཉེ་གནས་བསྟན་འཛིན་དར་རྒྱས་ཀྱི་བསྐུལ་ངོར་བཀོད་པའོ། །ཕྱོགས་བཅུ་དུས་གསུམ་རྒྱལ་བ་སྲས་བཅས་དང་། །སྐྱབས་གནས་ཀུན་འདུས་རྩ་བའི་བླ་མ་ཡིས། །བྱིན་རླབས་མཐུ་སྟོབས་ནུས་པའི་དཔུང་བསྐྱེད་ནས། །དད་ལྡན་མོས་པའི་
བུ་ལ་ཐུགས་རྗེས་གཟིགས། །དུས་འདི་ནས་བཟུང་ཚེ་རབས་ཐམས་ཅད་དུ། །མི་ཁོམ་གནས་སྤང་ཆོས་ལྡན་ཡུལ་དུ་སྐྱེས། །དམ་པའི་རྗེས་བཟུང་ཟབ་མོའི་ཆོས་ལ་སྤྱོད། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཚེ་རིང་ནད་མེད་ལོངས་སྤྱོད་ཕུན་སུམ་ཚོགས། །འགལ་རྐྱེན་ཀུན་ཞི་བསམ་དོན་ཆོས་བཞིན་འགྲུབ། །མྱུར་དུ་རྫོགས་པའི་སངས་རྒྱས་ཐོབ་ནས་ཀྱང་། །མཁའ་མཉམ་འགྲོ་ཀུན་འདྲེན་པའི་དཔལ་གྱུར་ཅིག །ཅེས་པ་འདི་ནི། ཀོང་ཡུལ་ཤིང་ལོའི་ཚལ་གྱི་སྨད་གུ་རུ་རིན་པོ་ཆེ་ནས་བདུད་སྲིན་མ་རུངས་པ་བཏུལ་བའི་ས་ཕྱོགས་ཐིལ་ཞེས་བྱ་བ་ནས། དད་འབྱོར་ལྡན་པའི་སྦྱིན་བདག་ནཱ་ཐའི་མིང་ཅན་ལ་སྦྱིན་པའོ། །ཕྱོགས་དུས་རྒྱལ་བ་སྲས་བཅས་མ་ལུས་དང་། །སྐྱབས་ཀུན་གཅིག་བསྡུས་པདྨ་ཐོད་འཕྲེང་རྩལ། །བདག་སོགས་འགྲོ་ལ་ཐུགས་རྗེས་བརྩེར་དགོངས་ནས། །བསམ་པའི་དོན་ཀུན་འབད་མེད་འགྲུབ་པ་དང་། །ཆོས་དང་བཀྲ་ཤིས་བདེ་ལེགས་རབ་འཕེལ་ཞིང་། །མྱུར་དུ་རྫོགས་པའི་སངས་རྒྱས་ཐོབ་གྱུར་ཅིག །ཅེས་པ་ནི་
ཆོས་ཀྱི་རྗེ་པདྨ་བློ་གྲོས་ཀྱི་གྲྭ་པ་འགའ་ཞིག་གིས་བསྐུལ་ངོར་མཚམས་མལ་ནས་སོ། དུས་གསུམ་རྒྱལ་བ་སྲས་བཅས་ཐུགས་རྗེ་དང་། །དགོངས་བརྡའ་སྙན་རྒྱུད་བླ་མའི་བྱིན་རླབས་ཀྱིས། །ཀུན་བཟང་རིག་འཛིན་བསམ་དོན་ཆོས་བཞིན་འགྲུབ། །ལུས་ངག་ཡིད་གསུམ་སྨིན་ཅིང་གྲོལ་གྱུར་ཅིག །ཞི་ཁྲོ་རབས་འབྱམས་རྣམས་ཀྱི་ཐུགས་རྗེ་དང་། །ཡི་དམ་ལྷ་ཚོགས་རྣམས་ཀྱི་བྱིན་རླབས་ཀྱིས། །མཆོག་དང་མཐུན་མོངས་དངོས་གྲུབ་ཀུན་འགྲུབ་ཅིང་། །དགོས་འདོད་མ་ལུས་ཡིད་བཞིན་འབྱུང་གྱུར་ཅིག །མ་ཚོགས་མཁའ་འགྲོ་རྣམས་ཀྱི་ཐུགས་རྗེ་དང་། །བསྟན་བསྲུང་ཆོས་སྐྱོང་རྣམས་ཀྱི་བྱིན་རླབས་ཀྱིས། །འགལ་རྐྱེན་བར་ཆད་མ་ལུས་ཀུན་ཞི་ཞིང་། །ཚེ་བསོད་དཔལ་འབྱོར་ལོངས་སྤྱོད་རྒྱས་གྱུར་ཅིག །རྩ་གསུམ་ལྷ་ཚོགས་བདེན་པའི་བྱིན་རླབས་དང་། །བསླུ་མེད་རྟེན་འབྲེལ་ཟབ་མོའི་ནུས་མཐུ་དང་། །བདག་གི་ལྷག་བསམ་དག་པའི་བདེན་སྟོབས་ཀྱིས། །སྨོན་ལམ་གང་བཏབ་དེང་འདིར་འགྲུབ་
པར་ཤོག །ཅེས་གནས་ཆེན་གྱི་སྒྲུབ་གྲྭ་ནས། དད་ལྡན་ཀུན་བཟང་རིག་འཛིན་ལའོ།། ༈ །།ཆོས་དབྱིངས་རབ་འབྱམས་ཀློང་ཡངས་ཞིང་ཁམས་ནས། །དུས་གསུམ་རྒྱལ་དང་ཉན་ཐོས་རང་རྒྱལ་ཚོགས། །ཡི་དམ་ཞི་ཁྲོ་རབ་འབྱམས་རྒྱ་མཚོར་བཅས། །སྨོན་ལམ་བདེན་ཚིག་འགྲུབ་པའི་དཔང་མཛོད་ཅིག །འཁོར་བའི་རྒྱ་མཚོ་སྡུག་བསྔལ་རྦ་རླབས་ཅན། །ཡང་ཡང་འཁོར་ཞིང་རྟག་ཏུ་མནར་བ་ལས། །ཐར་གླིང་བདེ་ཆེན་ཞིང་དུ་བདེར་ཕྱིན་ནས། །འགྲོ་ཀུན་འདྲེན་པའི་དཔལ་དུ་བདག་གྱུར་ཅིག །དེང་ནས་བཟུང་སྟེ་ཚེ་རབས་ཐམས་ཅད་དུ། །དལ་འབྱོར་ལུས་ཐོབ་དམ་པའི་ཆོས་དང་མཇལ། །དགེ་བའི་བཤེས་གཉེན་དམ་པས་རྗེས་སུ་བཟུང་། །ཟབ་མོའི་གདམས་པ་ཉམས་སུ་ལེན་པར་ཤོག །ལུས་ངག་ཡིད་གསུམ་ཆོས་དང་མཐུན་པ་ཡི། །བསམ་པའི་དོན་ཀུན་འབད་མེད་འགྲུབ་པ་དང་། །འགལ་རྐྱེན་ཉེར་འཚེ་མ་ལུས་ཀུན་ཞི་ནས། །མྱུར་དུ་བྱང་ཆུབ་མཆོག་ལ་རེག་པར་ཤོག །གནས་སྐབས་ཚེ་
འདིར་ནད་གདོན་བར་ཆོད་སོགས། །མི་མཐུན་གནོད་པ་ཐམས་ཅད་རབ་ཞི་ཞིང་། །མངའ་ཐང་ཆོས་སྲིད་དཔལ་འབྱོར་ལོངས་སྤྱོད་རྣམས། །ཡར་ཟླ་ལྟར་འཕེལ་བདེ་ལེགས་ཀུན་འབྱུང་ཤོག །དུས་གསུམ་རྒྱལ་བ་ཀུན་གྱི་ཐུགས་རྗེ་དང་། །ཡི་དམ་ཆོས་སྐྱོང་རྣམས་ཀྱི་ནུས་མཐུ་ཡིས། །བསམ་དོན་ཀུན་འགྲུབ་འདོད་དགུ་ཕུན་ཚོགས་པའི། །བཀྲ་ཤིས་རབ་འབྱམས་ཕྱོགས་མཐར་ཁྱབ་གྱུར་ཅིག །ཅེས་པ་འདི་ནི། གནོད་མཛེས་མཁར་གྱི་ཡུལ་ལྗོངས་ཀྱི་བདག་མོ་བཀྲ་ཤིས་དབང་མོས་བསྐུལ་ངོར་བྲིས་པའོ། །ཕྱོགས་དུས་རྒྱལ་དང་དེ་སྲས་ཉན་ཐོས་ཚོགས། །དགོངས་བརྡའ་སྙན་རྒྱུད་བླ་མའི་ཚོགས་རྣམས་དང་། །མཁའ་འགྲོ་ཆོས་སྐྱོང་དམ་ཅན་སྲུང་མར་བཅས། །བདེན་ཚིག་སྨོན་ལམ་འགྲུབ་པའི་དཔང་མཛོད་ཅིག །དེང་ནས་བཟུང་སྟེ་བྱང་ཆུབ་མ་ཐོབ་བར། །དལ་འབྱོར་ལུས་ཐོབ་སངས་རྒྱས་ཀུན་དང་མཇལ། །དམ་པས་རྗེས་བཟུང་ཟབ་དོན་ཉམས་སུ་བླངས། །རང་གཞན་དོན་གཉིས་འགྲུབ་པར་བྱིན་གྱིས་རློབས།
། གནས་སྐབས་ཚེ་འདིར་ལུས་ངག་ཡིད་གསུམ་ལ། །མི་མཐུན་ཉེར་འཚེ་འགལ་རྐྱེན་ཀུན་ཞི་ནས། །ཡིད་ལ་བསམ་པའི་དོན་ཀུན་ཆོས་བཞིན་འགྲུབ། །མྱུར་དུ་རྫོགས་པའི་བྱང་ཆུབ་མཆོག་ཐོབ་ཤོག །ཞེས་པ་ནི་འཚོ་མཛད་ཀརྨ་འགྲོ་ཕན་ལའོ། །སྟོང་ཉིད་མཁའ་ལ་ཐུགས་རྗེའི་འོད་སྟོང་འཕྲོ། །ཚེ་འདིའི་སྣང་བ་རྨི་ལམ་སྒྱུ་མར་རིག །བྱམས་དང་སྙིང་རྗེས་འགྲོ་ལ་བརྩེ་བ་ཅན། །དྲིན་ཅན་རྩ་བའི་བླ་མར་གསོལ་བ་འདེབས། །སྙིགས་དུས་འགྲོ་བའི་དོན་ལ་བརྩེར་དགོངས་ནས། །སྔ་འགྱུར་སྙིང་པོའི་བསྟན་པ་སྤེལ་སླད་དུ། །བསྐལ་བརྒྱའི་བར་དུ་ཞབས་པད་བརྟན་པ་དང་། །ཆོས་འཁོར་རྒྱུན་མི་འཆད་པར་བསྐོར་དུ་གསོལ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་དང་མཁའ་མཉམ་འགྲོ་བ་མ་ལུས་པ། །སྲིད་པའི་འཆིང་བ་དམ་ལས་རབ་ཐར་ནས། །ཁྱོད་དང་དབྱེར་མེད་རྫོགས་སངས་རྒྱས་པར་ཤོག །བསླུ་མེད་
ཀྱི་རྒྱལ་བ་དཀོན་མཆོག་གསུམ། །འགྲོ་ཀུན་གྱི་སྐྱབས་གནས་པདྨ་འབྱུང་། །མཁའ་འགྲོ་དང་ཆོས་སྐྱོང་དམ་ཅན་ཚོགས། །བདག་སྨོན་ལམ་འགྲུབ་པའི་དཔང་མཛོད་ཅིག །སྐལ་ལྡན་གྱི་སྐྱེས་མཆོག་དམ་པ་འདི། །དུས་མཐར་ཐུག་བྱང་ཆུབ་མ་ཐོབ་བར། །སྐྱེ་བ་དང་ཚེ་རབས་ཐམས་ཅད་དུ། །རྗེ་པདྨས་བྱིན་གྱིས་རློབས་པར་ཤོག །ལུས་གསལ་སྟོང་སྐྱེད་རིམ་ངང་གནས་ཤིང་། །དེ་སྣང་སྟོང་ཆུ་ཟླ་ལྟ་བུར་རྟོགས། །གདོས་བཅས་ཤ་ཁྲག་གི་ཕུང་པོ་ཉིད། །འོད་གསལ་མཇའ་ལུས་སུ་འགྲུབ་པར་ཤོག །ངག་རྡོ་རྗེའི་བཟླས་པ་ཆུ་བོའི་རྒྱུན། །དུས་རྟག་ཏུ་གཡེལ་མེད་བཟླས་བྱས་ཤིང་། །དེ་གྲགས་སྟོང་དབྱེར་མེད་བྲག་ཆ་ལྟར། །བརྗོད་མེད་ཀྱི་ངང་དུ་གྲོལ་བར་ཤོག །ཡིད་འཁྲུལ་རྟོག་གི་འབྱུང་ཁུངས་སེམས་ཉིད་འདི། །བག་ཆགས་ཀྱི་རྗེས་སུ་མི་འབྲེང་བར། །བདེ་སྡུག་གི་སྣང་བ་རང་སར་དག །དབྱིངས་རིག་དབྱེར་མེད་ཀྱི་དོན་རྟོག་ཤོག །
སྐལ་ལྡན་གྱི་སྐྱེས་མཆོག་འདི་ཉིད་ནི། །བར་ཆད་ཀྱི་རྐྱེན་གྱིས་མ་ཁྱེར་ཞིང་། །འགྲོ་དོན་དང་གདུལ་བྱའི་སྒོ་བྱེ་ནས། །སེམས་ཅན་ལ་ཕན་པ་མང་འགྲུབ་ཤོག །རིག་འཛིན་གྱི་སྐྱེས་མཆོག་དམ་པ་འདི། །སྐུ་ཚེ་དང་ཕྲིན་ལས་མཐར་ཕྱིན་ཞིང་། །གནས་སྐབས་སུ་འགྲོ་དོན་ལྷུན་གྲུབ་ནས། །མཐར་ཐུག་ཏུ་མངོན་སངས་རྒྱས་པར་ཤོག །དུས་གསུམ་རྒྱལ་བ་སྲས་བཅས་ཐམས་ཅད་དང་། །བླ་མ་ཡི་དམ་མཁའ་འགྲོ་ཆོས་སྐྱོང་ཚོགས། །སྐལ་ལྡན་འདི་ཡི་ལུས་ངག་ཡིད་གསུམ་ལ། །སྐུ་གསུང་ཐུགས་ཀྱི་བྱིན་གྱིས་རླབས་ནས་ཀྱང་། །འགལ་རྐྱེན་ཀུན་ཞི་མཐུན་རྐྱེན་ཕུན་སུམ་ཚོགས། །སྙེན་སྒྲུབ་མཐར་ཕྱིན་ཕྲིན་ལས་རྣམ་བཞི་འགྲུབ། །སྐྱེད་རྫོགས་བརྟན་ཐོབ་སྤངས་རྟོགས་མངོན་དུ་གྱུར། །གདོད་མའི་ཀློང་དུ་གཏན་སྲིད་ཟིན་པར་ཤོག །སླར་ཡང་གང་འདུལ་ཐུགས་རྗེའི་འོད་ཟེར་གྱིས། །འགྲོ་བློའི་མུན་སེལ་རེ་འདོད་ཡིད་བཞིན་སྐོངས། །ལྷུན་གྲུབ་རྒྱུན་མི་འཆད་པའི་ཕྲིན་ལས་མཆོག །འབད་མེད་
ནམ་མཁའི་མཐའ་མཉམ་འབྱུང་བར་ཤོག །རྗེ་དུས་གསུམ་རྒྱལ་བ་ཀུན་གྱི་དཔལ། །མགོན་མཁའ་འགྲོའི་དབང་ཕྱུག་པདྨ་འབྱུང་། །ཁྱེད་ཐུགས་རྗེ་ནུས་པའི་དཔུང་བསྐྱེད་ལ། །རྒྱུད་བྱིན་གྱིས་རློབས་པར་མཛད་དུ་གསོལ། །སྐལ་ལྡན་གྱི་སྐྱེས་མཆོག་མ་ཎིའི་མཚན། །བསམ་བཞིན་དུ་སྲིད་པ་ཉེར་བཞེས་ནས། །རྣམ་དཀར་གྱི་མཛད་པ་རྒྱ་ཆེན་པོ། །ཡར་ཟླ་ལྟར་འཕེལ་ཞིང་རྒྱས་པར་ཤོག །གཞི་ཀ་དག་རང་གསལ་སྐྱེ་མེད་ཀྱི། །དོན་འགྱུར་མེད་བརྩན་ས་རབ་ཟིན་ནས། །ལམ་སྐྱེད་རྫོགས་ཟུང་འཇུག་མངོན་གྱུར་ཏེ། །དབྱིངས་གདོད་མའི་གཏན་སྲིད་ཟིན་པར་ཤོག །བཀའ་རྒྱུད་བླ་མའི་ཐུགས་རྗེ་ནུས་མཐུ་དང་། །ཡི་དམ་ལྷ་ཚོགས་ཞི་ཁྲོའི་རབ་འབྱམས་ཀྱིས། །སྐྱེས་མཆོག་དམ་པ་འགྲོ་དོན་ལྷུན་གྲུབ་ནི། །སྐུ་ཚེ་བརྟན་ཞིང་ཕྲིན་ལས་རྒྱས་གྱུར་ཅིག །དུས་གསུམ་རྒྱལ་བ་སྲས་བཅས་ཉན་རང་དང་། །རིག་འཛིན་གྲུབ་མཆོག་སྐྱེས་ཆེན་ཐམས་ཅད་ཀྱིས།
།འགྲོ་བའི་དོན་དུ་སྨོན་ལམ་གང་བཏབ་པ། །དེ་དག་ཐམས་ཅད་བདག་གིས་འགྲུབ་གྱུར་ཅིག །རང་རིག་སྟོང་གསལ་མཁའ་དབྱིངས་སུ། །ལྷག་བསམ་རབ་དཀར་སྤྲིན་ཕུང་སྟིབས། །སྨོན་ལམ་རྣམ་དག་ཆར་རྒྱུན་གྱིས། །དོན་གཉིས་འབྲས་བུ་སྨིན་བྱེད་ཞིག །དགོས་བཞེས་བཀའ་ཡིས་བསྐུལ་བའི་ངོར། །བྱ་བཏང་སྤྲང་པོ་རྒྱལ་ཁམས་པས། །སྨིན་གྲོལ་སྐྱེད་རྫོགས་གླིང་དུ་བྲིས། །དགེ་བས་འགྲོ་ལ་ཕན་འགྲུབ་ཤོག །ཅེས་ལེ་མཚན་གོང་འོག་འདི་དག་རྣམས་ནི། བླ་མ་ཟླ་བ་ཆོས་གྲགས་ཀྱི་སྐྱེ་མཐའ་རྒྱལ་སྲས་འགྲོ་དོན་ལྷུན་གྲུབ། ཅེས་པའམ། མཚན་གཞན་དུ་བླ་མ་ཚེ་རིང་ནོར་བུ་ཞེས་པའི་ཐུགས་བཞེད་སྐོངས་ཕྱིར་སྔ་ཕྱི་སོ་སོར་བྲིས་པ་དག་འདིར་ཁྲིགས་ཆགས་སུ་བཀོད་པའོ། །སྐལ་བཟང་སངས་རྒྱས་རྣམས་ཀྱི་ཐུགས་རྗེ་དང་། །དུས་གསུམ་རྒྱལ་བ་དགོངས་རྒྱུད་བྱིན་རླབས་ཀྱི། །འགྲོ་བའི་བླ་མ་འཇའ་ཚོན་སྙིང་པོ་ནི། །སྐུ་ཚེ་བརྟན་ཞིང་ཕྲིན་ལས་རྒྱས་གྱུར་ཅིག །བཀའ་གཏེར་རྒྱུད་པའི་བླ་མའི་ཐུགས་རྗེ་དང་། །གྲུབ་མཆོག་རིག་འཛིན་བརྡའ་རྒྱུད་བྱིན་རླབས་ཀྱིས། །འགྲོ་བའི་བླ་མ་
སྐུ་ཚེ༴ །གང་ཟག་སྙན་རྒྱུད་བླ་མའི་ཐུགས་རྗེ་དང་། །མཁའ་འགྲོ་ཆོས་སྐྱོངས་བྱིན་རླབས་ནུས་མཐུ་ཡིས། །འགྲོ་བའི་བླ་མ༴ སྐུ་ཚེ༴ དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འགྲོ་བའི་མགོན་པོ་འཇའ་ཚོན་སྙིང་པོ་ཉིད། །བསྐལ་བརྒྱའི་བར་དུ་ཞབས་པད་བརྟན་པ་རུ། །མཁའ་མཉམ་འགྲོ་བའི་དོན་དུ་བཞུགས་སུ་གསོལ། །ཞེས་གཏེར་སྟོན་རིག་འཛིན་ཆེན་པོ་དེ་ཉིད་ལ་གུས་པས་ཕུལ་བའོ། །ཆོས་དབྱིངས་མཁའ་ཁྱབ་རབ་འབྱམས་ཞིང་ཁམས་ནས། །བྱིན་རླབས་མཐུ་ལྡན་བདེ་བཤེགས་རྒྱལ་བའི་ཚོགས། །འགྲོ་བའི་གཙུག་རྒྱན་པད་འབྱུང་ལ་སོགས་ཀྱིས། །ཐུགས་རྗེའི་ཤུགས་བསྐྱེད་འཆི་མེད་དངོས་གྲུབ་སྩོལ། །ཐེག་པའི་ཡང་བཅུད་སྔ་འགྱུར་སྙིང་པོའི་དོན། །ཡང་དག་འཛིན་པས་དོན་གཉིས་ལྷུན་གྲུབ་པ། །བསྟན་པའི་གསལ་བྱེད་པདྨ་བློ་གྲོས་མཆོག །མི་འགྱུར་བསྐལ་བརྒྱའི་བར་དུ་ཞབས་བརྟན་གསོལ། །
གསུང་རབ་རྒྱ་མཚོའི་ཕ་མཐར་ལེགས་སོན་ཅིང་། །སྨིན་གྲོལ་འདོད་འབྱུང་གཏེར་གྱི་དགའ་སྟོན་གྱིས། །དད་ལྡན་གདུལ་བྱའི་རེ་འདོད་སྐོངས་བའི་ཕྱིར། །མི་འགྱུར་བསྐལ་བརྒྱའི་བར་དུ་ཞབས་བརྟན་གསོལ། །སྟོང་ཉིད་ཁྱབ་གདལ་སྤྲོས་བྲལ་མཁའ་དབྱིངས་སུ། །འགགས་མེད་ཐུགས་རྗེའི་ཉི་འོད་ཕྱོགས་བཅུར་འགྱེད། །འགྲོ་བློའི་མུན་སེལ་བསྟན་པའི་སྒྲོན་མེ་རུ། །མི་འགྱུར་བསྐལ་པ༴ །དེ་ཕྱིར་གསོལ་བ་བཏབས་པའི་བདེན་སྟོབས་དང་། །ཕྱོགས་དུས་རྒྱལ་བའི་ཐུགས་རྗེའི་ནུས་མཐུ་ཡིས། །པདྨའི་རྒྱལ་ཚབས་པདྨ་བློ་གྲོས་ཉིད། །སྐུ་ཚེ་བརྟན་ཞིང་ཕྲིན་ལས་རྒྱས་པར་ཤོག །ཅེས་པ་འདི། མདོ་ཁམས་ཀྱི་ཕྱོགས་སུ་བསྟན་པའི་སྒྲོན་མེ་སྤར་བར་མཛད་པའི་ཆོས་ཀྱི་རྗེ་པདྨ་བློ་གྲོས་ཀྱི་སྐུ་ཚེ་བསྟན་བཞུགས་སུ། སློབ་དཔོན་རིན་པོ་ཆེ་དམ་ཆོས་པས་ཐུགས་བསམ་རྣམ་དག་གིས་བསྐུལ་བར་མཛད་པ་ལ་བརྟེན་ནས་སྨིན་གྲོལ་སྐྱེད་རྫོགས་གླིང་དུ་བཀོད་པའོ། །ཕྱོགས་དུས་རྒྱལ་བ་རབ་འབྱམས་སྲས་བཅས་དང་། །རྩ་བརྒྱུད་བླ་མ་ཡི་
དམ་མཁའ་འགྲོར་བཅས། །ཆོས་སྲུངས་སྟོབས་ལྡན་བདེན་པ་གྲུབ་རྣམས་ཀྱིས། །སྨོན་ལམ་འགྲུབ་པར་བྱིན་གྱིས་བརླབས་ཏུ་གསོལ། །ཐེག་ཀུན་ཡང་རྩེ་བླ་མེད་སྙིང་པོའི་བཅུད། །ཆོས་ཀུན་མཐར་ཐུག་འོད་གསལ་རྫོགས་པ་ཆེའོ། །དོན་བཟང་ལེགས་པར་སྟོན་མཛད་ཆོས་ཀྱི་རྗེ། །དཔལ་ལྡན་བླ་མ་སྐུ་ཚེ་བརྟན་གྱུར་ཅིག བསྟན་པའི་ཡང་སྙིང་སྔ་འགྱུར་ཐེག་ཆོས་འདི། །ཏོག་གེའི་གྲུབ་མཐས་བརྙས་པའི་དུས་ངན་འདིར། །ཡང་ཟབ་ཨ་ཏིའི་བསྟན་པ་སྤེལ་སླད་དུ། །མི་འགྱུར་རྡོ་རྗེའི་གདན་ལ་བཞུགས་གྱུར་ཅིག རྒྱལ་ཀུན་གཅིག་བསྡུས་པདྨ་ཐོད་ཕྲེང་གི། །གསུང་གི་གསང་བ་ཟབ་མོའི་ཐུགས་བཅུད་རྣམས། །དད་ལྡན་འགྲོ་ལ་རིས་མེད་རྩལ་བའི་ཕྱིར། །བསྐལ་བརྒྱའི་བར་དུ་ཞབས་པད་བརྟན་གྱུར་ཅིག །དེ་ལྟར་གསོལ་བ་བཏབས་པའི་བདེན་སྟོབས་ཀྱིས། །ཁྱེད་ཞབས་བསྟན་ཞིང་ཆོས་ཀྱི་ཕྲིན་ལས་རྒྱས།
། བདག་དང་མ་རྒན་ཁམས་གསུམ་འགྲོ་བ་ཀུན། །ཀ་དག་དབྱིངས་སུ་ཁྱེད་དང་དབྱེར་མེད་ཤོག །ཞེས་པ་ནི། སྔ་འགྱུར་འོད་གསལ་སྙིང་པོའི་བསྟན་པ་སྤེལ་བར་མཛད་པའི་ཆོས་ཀྱི་རྗེ་འོད་གསལ་ནམ་མཁའ་འབྲུག་སྒྲའི་ཞབས་དྲུང་དུ་ཕུལ་བའོ། །ཕྱོགས་བཅུ་དུས་གསུམ་རྒྱལ་བ་ཐམས་ཅད་ཀྱི། །མཁྱེན་བརྩེ་ནུས་པའི་མཐུ་སྟོབས་དཔུངས་བསྐྱེད་ནས། །བདག་སོགས་རྣམས་ལ་བྱིན་གྱིས་རླབས་ནས་ཀྱང་། །སྨོན་ལམ་གེགས་མེད་འགྲུབ་པར་མཛད་དུ་གསོལ། །བདག་གིས་འཁོར་འདས་དུས་གསུམ་བསགས་པའི་དགེ། །བྱས་དང་བྱེད་འགྱུར་རྗེས་སུ་ཡི་རངས་སོགས། །རྣམ་དཀར་དགེ་ཚོགས་ཇི་སྙེད་བསྐྲུན་པའི་མཐུས། །བསྟན་དང་འགྲོ་ལ་ཕན་པ་མང་འགྲུབ་ཤོག །གནས་སྐབས་ཚེ་འདིར་ལུས་ངག་ཡིད་གསུམ་ལ། །ནད་གདོན་འགལ་རྐྱེན་བར་ཆད་རབ་ཞི་ཞིང་། །བསམ་དོན་འབད་མེད་ཆོས་བཞིན་འགྲུབ་པ་དང་། །འདོད་དགུའི་དཔལ་འབྱོར་ཕུན་སུམ་ཚོགས་པར་ཤོག །སྐྱེ་བ་སྐྱེ་བ་གཞན་རྣམས་ཐམས་ཅད་དུ།
། རིན་ཆེན་རིན་ཆེན་ལས་ལྷག་དལ་འབྱོར་ཐོབ། །སངས་རྒྱས་སངས་རྒྱས་སྲས་བཅས་རྗེས་བཟུང་སྟེ། །ཆོས་དང་ཆོས་ཀྱི་དཔལ་ལ་སྤྱོད་པར་ཤོག །འཁོར་བར་གནས་ཀྱང་འཁོར་བར་མ་གོས་ཤིང་། །སྲིད་པར་སྤྱོད་ཀྱང་སྲིད་པའི་འཆིང་གྲོལ་ཏེ། །ལྷག་བསམ་དག་པས་ལྷག་པར་གཞན་དོན་སྤྱོད། །འགྲོ་བ་སྒྲོལ་མཛད་འགྲོ་བའི་མགོན་དུ་ཤོག །ཤེས་བྱའི་གནས་ཀུན་ཀུན་ལ་རབ་མཁས་ཤིང་། །ཏིང་འཛིན་མཆོག་བསྒྲུབ་བསྒྲུབ་ལ་རྟག་ཏུ་བརྩོན། །བདུད་ལས་རབ་རྒྱལ་རྒྱལ་བའི་བསྟན་པ་འཛིན། །སྐུ་བཞིའི་བདག་ཉིད་ཉིད་དུ་བསྒྲུབ་གྱུར་ཅིག །ཅེས་པ་འདི་ནི། མི་དབང་ཀརྨ་བསྟན་སྲུང་ལའོ། །ཕྱོགས་བཅུའི་དུས་བཞིའི་རྒྱལ་བ་སྲས་དང་བཅས་པ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བདག་ནི་འདི་ནས་ཚེ་རབས་ཐམས་ཅད་དུ། །དལ་འབྱོར་དམ་པ་སྐྱོན་མེད་ཐོབ་པ་
དང་། །དགེ་བའི་བཤེས་ཀྱི་རྗེས་སུ་འཛིན་པ་དང་། །རྡོ་རྗེ་ཐེག་པའི་ཆོས་ལ་སྤྱོད་ནས་ཀྱང་། །ཚེ་གཅིག་སངས་རྒྱས་བསྒྲུབ་ལ་བརྩོན་པར་ཤོག །འཇིག་རྟེན་ཆོས་བརྒྱད་འཁྲུལ་ཕྱིར་མི་འབྲང་ཤིང་། །སྡིག་པའི་གྲོགས་དང་གཏན་དུ་བྲལ་བ་དང་། །དད་དང་བརྩོན་འགྲུས་ཤེས་རབ་ཕུལ་བྱུང་བས། །ཆོས་ཀྱི་གནད་དོན་ཚུལ་བཞིན་རྟོགས་པར་ཤོག །ཐོས་པ་རྒྱ་མཚོ་ངོམ་པ་མེད་པ་དང་། །བསམ་པ་དགེ་བས་ལས་མིན་སྤོང་བ་དང་། །བསྒོམ་པའི་ཉམས་རྟོགས་རྩལ་གསུམ་རྫོགས་པ་ཡིས། །གཞན་ལའང་གདམས་པ་རྒྱ་ཆེན་སྟོན་པར་ཤོག །འགྲོ་བའི་མགོན་གྱུར་མཚན་ལྡན་བླ་མ་ལ། །མཉེས་པ་གསུམ་གྱི་ཞབས་གཏོགས་མཐར་ཕྱིན་ཏེ། །དམ་ཚིག་ཉེས་ལྟུང་དྲི་མས་མ་གོས་ཤིང་། །འབྲལ་མེད་བྱིན་རླབས་རྒྱུད་ལ་འཇུག་པར་ཤོག །རང་དོན་བཙན་ས་ལེགས་པར་ཟིན་ནས་ཀྱང་། །ལུས་སྲོག་ལྟོས་མེད་ངལ་བ་ཁྱད་སད་དེ། །ཆོས་
དང་ཟང་ཟིང་མི་འཇིགས་སྦྱིན་པ་ཡིས། །འགྲོ་དྲུག་ཕ་མ་བདེ་ལ་འགོད་པར་ཤོག །སེམས་ཅན་སྡུག་བསྔལ་རྒྱ་མཚོ་མ་ཟད་བར། །བདག་གི་མཛད་ཕྲིན་རྒྱ་མཚོ་དཔག་མེད་ཀྱིས། །འགྲོ་ལ་ཕན་པ་རྒྱ་མཚོ་འབྱུང་བ་ཡི། །རྣམ་དག་སྨོན་ལམ་རྒྱ་མཚོ་འགྲུབ་གྱུར་ཅིག །ཕྱོགས་བཅུ་མཐའ་ཡས་ཞིང་ཁམས་ཀུན་བཞུགས་པའི། །རྒྱལ་བ་མཐའ་ཡས་སྲས་བཅས་ཀུན་གྱིས་ནི། །སྨོན་ལམ་མཐའ་ཡས་གང་དག་ཅི་མཆིས་པའི། །དགེ་བས་མཐའ་ཡས་འགྲོ་བ་ཀུན་གྲོལ་ཤོག །ཅེས་པ་འདི་ནི། ཨོ་རྒྱན་སྦྱིན་པ་ལའོ། །བདེན་པའི་དོན་སྟོན་རྒྱལ་བ་སྲས་བཅས་དང་། །བདེན་གཉིས་ཟུང་འཇུག་ལུང་རྟོགས་དམ་པའི་ཆོས། །བདེན་འཛིན་འཁྲུལ་སྣང་ཆོས་སྐུར་གྲོལ་མཛད་པ། །བདེན་ཚིག་གྲུབ་རྣམས་བདག་ལ་དགོངས་སུ་གསོལ། །བདག་ནི་དེང་ནས་ཚེ་རབས་ཐམས་ཅད་དུ། །དལ་འབྱོར་ཕུན་ཚོགས་
རྡོ་རྗེའི་ཐེག་དང་མཇལ། །དགེ་བའི་བཤེས་གཉེན་དམ་པས་རབ་ཟིན་ནས། །འཁྲུལ་མེད་ལམ་ལ་ཡང་དག་འཇུག་པར་ཤོག །བསླུ་བྱེད་འཇིག་རྟེན་སྒྱུ་མའི་མིག་འཕྲུལ་ལ། །དུག་ཅན་ཟས་ལྟར་རིང་ནས་རྒྱབ་ཕྱོགས་ཏེ། །ཟབ་དོན་སྙིང་པོའི་དོན་མཆོག་སྤྱོད་པ་ལ། །བཀྲེས་པས་ཟས་མཐོང་བཞིན་དུ་འཇུག་པར་ཤོག །མེ་འདག་ལྟ་བུའི་ལོག་འཚོའི་དཀོར་ཟས་དང་། །བདག་འཛིན་སྐྱེད་བྱེད་ཉན་གྲགས་འདུ་འཛི་དང་། །དགེ་སྦྱོར་རླག་བྱེད་འཇིག་རྟེན་ཆོས་བརྒྱད་ཀུན། །རྒྱང་དུ་བསྲིང་ནས་ཐར་པ་བསྒྲུབ་པར་ཤོག །འགའ་ཞིག་བདག་ལ་གནོད་པའི་སེམས་ཀྱིས་སུ། །ཁྲོ་ཞིང་དམོད་དང་བརྡེག་འཚོགས་གསོད་ཀྱང་རུང་། །སྡང་སེམས་ཁྲོ་འཁྲུག་འཁོན་འཛིན་རབ་སྤངས་ཏེ། །གནོད་ལེན་བྱང་སེམས་ཆོས་ཀྱིས་འཇལ་བར་ཤོག །ཚེ་འདི་དོན་དུ་གཉེར་བ་ལས་བྱུང་བའི། །བདེ་བའི་མཚོ་བརྡོལ་སྐྱིད་པའི་ཉི་
ཤར་ཀྱང་། །དགོས་མེད་ཞེན་ལོག་གཏིང་ནས་སྐྱེས་པ་ཡིས། །ཆོས་ཕྱིར་དཀའ་སྤྱད་རི་ཁྲོད་འགྲིམ་པར་ཤོག །དབེན་པའི་གནས་སུ་འདུ་འཛི་ཀུན་སྤངས་ཏེ། །རང་སེམས་དཔང་གཙུག་དཀོན་མཆོག་མི་འཁྲེལ་བའི། །ཡེངས་མེད་དགེ་སྦྱོར་ཉིན་མཚན་དུས་འདའ་ཞིང་། །རང་རྒྱུད་དམ་པའི་ཆོས་ཀྱིས་ཐུལ་བར་ཤོག །གལ་ཏེ་རྣམ་རྟོག་འཁྲུལ་ཕྱིར་འབྲེང་གྱུར་ཀྱང་། །སྐད་ཅིག་དེ་ལ་དྲན་རིག་རྩིས་ཟིན་ཏེ། །སྒོམ་མེད་ཡེངས་མེད་བརྗོད་བྲལ་གནས་ལུགས་དོན། །རང་ཤར་རང་གྲོལ་ཀ་དག་མངོན་གྱུར་ཤོག །རང་བབས་གནས་ཚེ་སྤྲོས་བྲལ་ཆོས་ཀྱི་སྐུ། །འགགས་མེད་རང་མདངས་ལྷུན་གྲུབ་ལོངས་སྤྱོད་རྫོགས། །སྣ་ཚོགས་འཕྲོ་ཡང་ཤར་གྲོལ་སྤྲུལ་སྐུའི་ངང་། །ཅིར་ཤར་སྐུ་གསུམ་དབྱེར་མེད་རྟོགས་པར་ཤོག །ངོ་བོ་སྟོང་པ་རྫོགས་རིམ་མཚན་མ་བྲལ། །རང་བཞིན་གསལ་བ་སྐྱེད་རིམ་ཡི་དམ་ལྷ། །ཟུང་འཇུག་དབྱེར་མེད་
བཟང་ངན་བླང་དོར་བྲལ། །ཆོས་ཉིད་རོལ་པའི་དཀྱིལ་འཁོར་ལྷུན་གྲུབ་ཤོག །མཉམ་བཞག་རྗེས་ཐོབ་སྤངས་བླངས་ལས་འདས་ཀྱང་། །འགགས་མེད་རྩལ་སྣང་འཕྲོ་འདུའི་རོལ་པ་ཀུན། །དག་སྣང་མོས་གུས་སྙིང་རྗེར་རང་ཤར་ནས། །རང་གཞན་དོན་ཀུན་འབད་མེད་འབྱུང་བར་ཤོག །གལ་ཏེ་བར་དོའི་སྣང་བ་འཆར་གྱུར་ཀྱང་། །ཁྲེག་ཆོད་ཐོད་རྒལ་ཟབ་གནད་སྙིང་པོ་ཀུན། །གཅིག་ཅར་དྲན་པས་རང་སྣང་ངོ་ཤེས་ཏེ། །ཡིན་ལུགས་ཇི་བཞིན་རྟོགས་ནས་གྲོལ་བར་ཤོག །བདག་ཉིད་མཐོང་ཐོས་རེག་པའི་འགྲོ་བ་ཀུན། །བདག་འཛིན་འཆིང་བའི་ཞགས་པ་རབ་གྲོལ་ཏེ། །བདག་མེད་ཡང་དག་གནས་ལུགས་རྟོགས་ནས་ཀྱང་། །བདག་གཞན་དབྱེར་མེད་ཆོས་སྐུར་གྲོལ་བར་ཤོག །སངས་རྒྱས་ཞིང་ཁམས་རྒྱ་མཚོ་མཐའ་ཡས་པར། །སངས་རྒྱས་རྣམ་འཕྲུལ་རྒྱ་མཚོ་དཔག་མེད་ལྟར། །སངས་རྒྱས་མཛད་པ་རྒྱ་མཚོ་བདག་འགྲུབ་ཤོག །བྱང་ཆུབ་སེམས་ཀྱིས་འགྲོ་བ་སྒྲོལ་མཛད་པའི། །བྱང་སེམས་རྣམས་ཀྱིས་འགྲོ་
ལ་བརྩེར་དགོངས་ཏེ། །བྱང་ཆུབ་སྤྱོད་པ་ཚད་མེད་སྤྱད་པ་བཞིན། །བྱང་སེམས་སྤྱོད་ལ་བདག་ཀྱང་འཇུག་པར་ཤོག །ནམ་མཁས་གར་ཁྱབ་ནམ་མཁའ་གནས་ཀྱི་བར། །འཁོར་བ་ཡང་ཡང་འཁོར་བའི་འགྲོ་བ་རྣམས། །བླ་མེད་གོ་འཕངས་བླ་ན་མེད་པ་རུ། །འདྲེན་པའི་དེད་དཔོན་འདྲེན་མཆོག་བདག་གྱུར་ཅིག །ཅེས། རྣལ་འབྱོར་པ་ཆོས་འཕེལ་བཟང་པོ་ལའོ། །ཕྱོགས་བཅུ་དུས་གསུམ་རྒྱལ་བ་མ་ལུས་པས། །ཐུགས་རྗེ་ནུས་པའི་དཔུང་ཆེན་རབ་བསྐྱོད་ནས། །བདག་གི་སྨོན་ལམ་འདི་དག་འགྲུབ་པ་ཡི། །རེ་འདོད་ཡིད་བཞིན་སྐོང་བར་མཛད་དུ་གསོལ། །དེང་ནས་བཟུང་སྟེ་སྐྱེ་བ་ཐམས་ཅད་དུ། །མི་ཁོམ་གནས་སྤངས་དལ་འབྱོར་རིན་ཆེན་ཐོབ། །དགེ་བའི་བཤེས་གཉེན་མཆོག་གིས་རྗེས་བཟུང་སྟེ། །སྨིན་གྲོལ་ཟབ་མོའི་དོན་ལ་སྤྱོད་པར་ཤོག །ཐོས་པས་ཆོས་ཀུན་སྒྲོ་འདོགས་ལེགས་ཆོད་ཅིང་། །བསམ་པས་
མ་ནོར་དོན་ལ་འཇུག་པ་དང་། །བསྒོམ་པའི་ཉམས་རྟོགས་འབྲས་བུ་སྨིན་པ་ཡིས། །རང་དོན་བཙན་ས་ལེགས་པར་ཟིན་པར་ཤོག །ཇི་སྲིད་སེམས་ཅན་རྒྱ་མཚོ་གནས་ཀྱི་བར། །དེ་སྲིད་རྣམ་འཕྲུལ་རྒྱ་མཚོ་འགྱེད་ནུས་ཤིང་། །སངས་རྒྱས་ཕྲིན་ལས་རྒྱ་མཚོ་བདག་འགྲུབ་པས། །མཐའ་ཡས་འགྲོ་ཕན་རྒྱ་མཚོ་མཐར་ཕྱིན་ཤོག །གནས་སྐབས་མཐར་ཐུག་འགལ་རྐྱེན་ཀུན་ཞི་ཞིང་། །མཐུན་རྐྱེན་ཀུན་དང་མི་འབྲལ་ཆོས་སྤྱད་དེ། །རང་གཞན་དོན་ཀུན་ལྷུན་གྱིས་གྲུབ་པ་ཡི། །གོ་འཕངས་མཆོག་ལ་མྱུར་དུ་རེག་པར་ཤོག །ཅེས་པ་འདི་ནི། ཆོས་ཀྱི་རྒྱལ་པོ་རིམ་པར་བྱོན་པའི་གདུང་རིགས་ལས་འཁྲུངས་ཤིང་ལུགས་གཉིས་ཀྱི་དཔལ་འབྱོར་ལྡན་པའི་ལྷའི་བཙུན་མ་ཀརྨ་ཚེ་རིང་བཟང་མོའི་བཀས་བསྐུལ་བའི་ངོར། མཁས་གྲུབ་ཡེ་བཟང་རྩེ་པ་སོགས་སྐྱེས་ཆེན་མང་པོའི་བཞུགས་གནས་སུ་གྱུར་པ། དཔལ་རྩེས་ཐང་གི་ཆོས་གྲྭ་ཆེན་པོའི་ཡང་དབེན་བསམ་གཏན་གླིང་དུ་བྲིས་པའོ། །ཕྱོགས་བཅུ་དུས་གསུམ་
རྒྱལ་བ་མ་ལུས་པས། །སྙིགས་དུས་འགྲོ་བ་འདྲེན་པར་བསྔགས་པའི་མཆོག །སྔ་འགྱུར་བསྟན་པའི་སྒྲོན་མེ་འཇིག་རྟེན་མིག །གཞན་ཕན་རྡོ་རྗེ་བསྐལ་བརྒྱར་ཞབས་བརྟན་གསོལ། །ཐ་སྙད་ཤེས་བྱའི་གནས་ནས་ཉེར་བཟུང་སྟེ། །སངས་རྒྱས་ལག་བཅངས་ཟབ་དོན་མཐར་ཐུག་བར། །ཆོས་ཀྱི་འབྱུང་གནས་ཁྱེད་ལས་གཞན་མེད་ན། །དེ་སླད་བསྟན་འགྲོའི་དོན་དགོངས་ཞབས་བརྟན་གསོལ། །དཀོན་མཆོག་བདེན་པའི་བྱིན་རླབས་རྨད་བྱུང་དང་། །རྩ་གསུམ་ལྷ་ཚོགས་ཐུགས་རྗེའི་ནུས་སྟོབས་ཀྱིས། །འདྲེན་མཆོག་དཔལ་མགོན་རྩ་བའི་བླ་མ་ཉིད། །སྐུ་ཚེ་བརྟན་ཞིང་འཕྲིན་ལས་རྒྱས་པ་ཡི། །གསོལ་བཏབ་དོན་ལྡན་འགྲུབ་པར་མཛད་དུ་གསོལ། ཅེས་པ་འདི་ནི། བདག་ཅག་གི་འདྲེན་པ་མཚུངས་བྲལ་སྐད་གཉིས་སྨྲ་བའི་དབང་ཕྱུག་ངག་དབང་གཞན་ཕན་རྡོ་རྗེའི་དྲུང་དུ་ཕུལ་བའོ། ཨོཾ་སྭ་སྟི་སིདྡྷཾ། རྒྱལ་གསུང་
རབ་འབྱམས་ཆོས་ཀྱི་ཆུ་གཏེར་ལས། །ལེགས་བྱུང་ཐེག་པའི་བང་རིམ་མངོན་མཐོའི་རྩེར། །ཡང་གསང་རྫོགས་ཆེན་རྣམ་རྒྱལ་ཁང་བཟང་ལ། །དབང་བསྒྱུར་དཔལ་ལྡན་བླ་མ་ཞབས་བརྟན་གསོལ། །སྣ་ཚོགས་གཞུང་ལུགས་དུ་མའི་ཆུ་བོ་ཀུན། །མ་ལུས་གཅིག་ཏུ་གཞོལ་ཆུ་གཏེར་མཆོག །ཟབ་ཡངས་གཏིང་མཐའ་བྲལ་བའི་ཀློང་ཆེན་པོ། །རྫོགས་ཆེན་བསྟན་པའི་མངའ་བདག་ཞབས་བརྟན་གསོལ། །དུས་རིང་འབད་པ་དྲག་པོས་བསླབ་སྦྱངས་པའི། །མཁས་པར་གྲགས་པ་ཟླ་བྲལ་མཆོག་རྣམས་ཀྱང་། །ཁྱེད་གསུང་ཟབ་མོའི་ཆོས་སྒྲས་སྤོབས་བྲལ་མཛད། །སྨྲ་བའི་ཉི་མ་བསྐལ་བརྒྱར་ཞབས་བརྟན་གསོལ། །འཇིག་རྟེན་ཆོས་བརྒྱད་རྙེད་དང་གྲགས་འདོད་ཀྱི། །དྲི་མ་རྡུལ་ཆ་ཙམ་གྱིས་མ་གོས་ཤིང་། །ཟབ་དོན་སྦྲང་རྩི་འཛིན་པའི་ཨུ་དུམ་ཝར། །དད་ལྡན་རྐང་དྲུག་ཚིམ་མཛད་ཞབས་བརྟན་གསོལ། །སྙིགས་
དུས་མུན་གླིང་འཁྱམས་པའི་འགྲོ་རྣམས་ལ། །བཤེས་གཉེན་རྒྱུ་སྐར་གཞན་གྱིས་སྣང་བྱེད་པའི། །ནུས་བྲལ་དེ་སླད་རྫོགས་ཆེན་འོད་སྟོང་ཅན། །ཁྱོད་ནི་འགྲོ་བློའི་མུན་བསེལ་བསྐལ་བརྒྱར་བཞུགས། །སྔ་འགྱུར་འོད་གསལ་སྙིང་པོའི་ཉི་མ་འདི། །ལོག་རྟོག་གྲུབ་མཐའ་ངན་པས་སྒྲིབས་ཉེ་ཤིང་། །མ་རྒན་འགྲོ་འདི་ལོག་ལམ་འཁྱམས་པ་ལ། །མགོན་མཛད་དམ་པ་ཁྱེད་ཞབས་རབ་བརྟན་གསོལ། །རྩ་རྒྱུད་བླ་མ་རྒྱལ་བ་རྒྱ་མཚོའི་ཚོགས། །གཅིག་བསྡུས་རྒྱལ་དབང་པདྨ་ཚེ་ཡི་བདག །བསླུ་མེད་ཆོས་སྲུངས་སྟོབས་ལྡན་ཚོགས་བཅས་ཀྱིས། །སྨོན་ལམ་བཏབ་འདི་འགྲུབ་པར་བྱིན་གྱིས་རློབས། །ཅེས་པ་འདི་ཡང་། ཆོས་རྗེ་རྫོགས་ཆེན་པ་ནམ་མཁའ་འབྲུག་སྒྲའི་བརྟན་བཞུགས་སུ། རྗེ་དེ་ཉིད་ཀྱི་གྲ་སློབ་རྣམས་ཀྱིས་བསྐུལ་ངོར་ཕུལ་བའོ། །རྣམ་པ་ཀུན་ཏུ་འགྲོ་ལ་ཕན་བཞེད་པའི། །རྒྱལ་བ་སྤྱན་རས་གཟིགས་སོགས་འཕགས་མཆོག་དང་། །བླ་མ་
སངས་རྒྱས་དཀོན་མཆོག་དཀྱིལ་འཁོར་ལྷ། །རྣམ་འདྲེན་མཆོག་རྣམས་བདག་ལ་དགོངས་སུ་གསོལ། །བདག་གིས་ཐོག་མཐའ་མེད་ནས་ད་ལྟའི་བར། །བྱས་དང་བྱེད་འགྱུར་བྱེད་ལ་ཡི་རངས་པའི། །དགེ་ཚོགས་ཅི་མཆིས་མཁའ་མཉམ་འགྲོ་ཀུན་ལ། །ལྷག་བསམ་དག་པས་ཡོངས་སུ་བསྔོ་བར་བགྱི། །འཁོར་བ་རྒྱ་མཚོ་ཇི་སྲིད་གནས་ཀྱི་བར། །བདག་གི་རྣམ་འཕྲུལ་བཀོད་པ་མཐའ་ཡས་པས། །ཕན་པ་མཆོག་དང་བདེ་བ་བླ་མེད་པའི། །བྱང་ཆུབ་ལམ་ལ་འགོད་པའི་ནུས་ལྡན་ཤོག །དལ་འབྱོར་རིན་ཆེན་ཐོབ་དཀའ་རྙེད་བཞིན་དུ། །རང་གིས་རང་བསླུད་སྟོང་ཟད་མི་བྱེད་པར། །འཁོར་བའི་གདོས་ཐག་ཆོད་པའི་བློ་ལྡན་ཞིང་། །མ་ནོར་གཏན་སྲིད་ཟིན་ལ་འབད་པར་ཤོག །རྙེད་བཀུར་གྲགས་པ་དོན་གཉེར་བླ་མ་དང་། །འཕྲད་ཚད་སྡིག་ལ་སྦྱོར་བའི་གྲོགས་ངན་དང་། །སྤྱོད་ཚད་ཡོན་ཏན་འགྲིབ་པའི་དཀོར་ཟས་སོགས། །ལམ་གྱི་འགལ་རྐྱེན་རྣམས་དང་
མི་འཕྲད་ཤོག །འབྲེལ་ཚད་དོན་དང་ལྡན་པའི་བཤེས་གཉེན་དང་། །འགྲོགས་བཞིན་ཡོན་ཏན་འགོ་བའི་གྲོགས་མཆོག་དང་། །དགེ་སྦྱོར་གོང་དུ་འཕེལ་བའི་མཐུན་རྐྱེན་ཏེ། །ཐམས་ཅད་རྩོལ་མེད་ཤུགས་ལས་འབྱུང་བར་ཤོག །སྙིང་པོ་མེད་ཅིང་ལས་ངན་གསོགས་བྱེད་པའི། །ལྟར་སྣང་མཛེས་པས་བསླུ་བྱེད་འཁོར་བའི་ཆོས། །རྙེད་བཀུར་གྲགས་སོགས་འཇིག་རྟེན་ཆོས་བརྒྱད་ཀྱི། །དྲི་མ་རྡུལ་ཆ་ཙམ་ཡང་བྲལ་བར་ཤོག །དཀར་གསལ་གངས་རིའི་ངོག་དང་གཡའ་རིའི་མགུལ། །ལྷུང་ལྷུང་སྙན་པར་སྒྲོག་པའི་ཆུ་ཀླུང་འགྲམ། །རབ་མཛེས་སྤང་རིའི་རྩེ་དང་ནགས་ཀྱི་ཁྲོད། །མི་མེད་དབེན་པའི་རི་ཁྲོད་འགྲིམ་པར་ཤོག །ཅོང་ཅོང་བྱ་ཚོགས་སྙན་པའི་གླུ་ལེན་ཅིང་། །ལྷུག་ལྷུག་རྩེད་འཇོ་བདེ་བའི་རི་དྭགས་བཅས། །ཟིར་ཟིར་བུང་བ་ལྡིང་བའི་རི་ཁྲོད་དུ། །གཅིག་པུར་བསམ་གཏན་བསྒོམ་ལ་སྤྲོ་བར་ཤོག །ཤེས་ཤེས་རྣམ་
གྲངས་མང་པོའི་བློ་སྣ་དང་། །བྱས་བྱས་དོན་འགོ་མེད་པའི་སྡུག་ཡུས་དང་། །ཐོབ་ཐོབ་རྒྱུད་ལ་མ་འཁེལ་ང་རྒྱལ་སོགས། །སྤངས་ནས་ཚེ་འདི་སྒྲུབ་པ་མཉམ་པར་ཤོག །རང་ཉིད་མཐོ་རིས་བདེ་བ་འདོད་པའམ། །གཅིག་པུ་ཞི་བའི་བྱང་ཆུབ་གཉེར་བའི་བློ། །མ་ཡིན་གཞན་དོན་ཁོ་ནའི་ཆེད་ཉིད་དུ། །བླ་མེད་བྱང་ཆུབ་བསྒྲུབ་ལ་བརྩོན་པར་ཤོག །ཁྲེག་ཆོད་གཞི་ཐོག་གཏན་ལ་ཕེབས་པ་དང་། །ཐོད་རྒལ་སྐུ་དང་ཞིང་ཁམས་བཅུད་དུ་སྨིན། །གདེངས་གཉིས་སྡོད་པ་གསུམ་དང་ཐོས་པ་གསུམ། །མ་ལུས་མངོན་གྱུར་ཆོས་སྐུར་གྲོལ་བར་ཤོག །རྟོགས་མེད་ཆོས་སྐུའི་ངང་ལས་མ་གཡོས་བཞིན། །རྩལ་མདངས་གཟུགས་སྐུ་གཉིས་སོགས་རྣམ་རོལ་འཕྲུལ། །དུ་མས་འགྲོ་བ་མ་ལུས་སྒྲོལ་བ་ཡི། །ཕྲིན་ལས་རྒྱལ་བ་ཀུན་ལས་ལྷག་པར་ཤོག །ཞེས་པ་ནི། གཙང་གི་ལྷ་བཙུན་འཕྲིན་ལས་གསང་སྔགས་འཛིན་པས་བསྐུལ་ངོར་བྲིས་པའོ། སྭ་སྟི་སིདྡྷི། ཕྱོགས་དུས་རྒྱལ་བའི་སྨོན་
ལམ་མཐུ་སྟོབས་དང་། །འཁོར་འདས་ལམ་གསུམ་དགེ་བའི་འབྲས་གང་གི། །བདེན་མཐུས་སྐྱེ་བ་འདི་དང་སྐྱེ་གཞན་དུ། །རང་བཞིན་དོན་གཉིས་བསྒྲུབ་ལ་བརྩོན་པར་ཤོག །ཕར་ཕྱིན་དྲུག་དང་ཆོས་སྤྱོད་རྣམ་པ་བཅུ། །དགེ་བ་བཅུ་དང་ཐུན་མོངས་དགེ་ཚོགས་དག །རང་དོན་གཅིག་པུའི་བློ་སྤངས་གཞན་གྱི་དོན། །དམིགས་ནས་བརྩོན་པས་ཐར་པ་བསྒྲུབ་པར་ཤོག །གསང་བའི་ཡང་གསང་རྡོ་རྗེ་ཐེག་པའི་ལམ། །དབང་གིས་རྒྱུད་སྨིན་གྲོལ་བྱེད་བསྐྱེད་དང་རྫོགས། །ཉམས་སུ་བླངས་ནས་ཚེ་གཅིག་འོད་ཀྱི་སྐུ། །མངོན་དུ་གྱུར་ནས་གཞན་ཕན་དཔག་ཡས་ཤོག །དུས་གསུམ་རྒྱལ་བའི་མཛད་ཕྲིན་དཔག་མེད་དང་། །རྒྱལ་སྲས་བྱང་སེམས་འགྲོ་ཕན་ནུས་སྟོབས་དང་། །གྲུབ་མཆོག་རྣམས་ཀྱི་ཉམས་རྟོགས་མཐར་ཕྱིན་རྩལ། །ཡོན་ཏན་མ་ལུས་བདག་གིས་དེང་འགྲུབ་ཤོག །ཆོས་དབྱིངས་ནམ་མཁའ་ཇི་སྲིད་གནས་ཞིང་ཀུན། །ཕྲིན་ལས་ནམ་
མཁའ་ཁྱབ་པའི་རྣམ་འཕྲུལ་གྱིས། །རིས་དྲུག་ནམ་མཁའ་མཉམ་པའི་འགྲོ་བ་རྣམས། །སྐྱེ་མེད་ནམ་མཁའ་ལྟ་བུར་གྲོལ་བར་ཤོག །ཅེས་པ་ནི། བླ་མ་བརྩོན་འགྲུས་ལའོ། །རྩ་རྒྱུད་བླ་མ་རྒྱལ་བ་སྲས་བཅས་ཀྱི། །ཐུགས་རྗེ་ནུས་པའི་རྩལ་ཆེན་རྨད་བྱུང་བས། །ཡིད་ཀྱི་རེ་བ་ཡོངས་སུ་འགྲུབ་པ་དང་། །མཁའ་མཉམ་འགྲོ་བ་འདྲེན་པའི་ནུས་སྟོབས་མཆོག །རྒྱལ་ཀུན་མཛད་ཕྲིན་མཐུ་རྩལ་མཉམ་པར་ཤོག །ཅེས་དགེ་སློང་ལེགས་པ་ལའོ། སྭ་སྟི། ཕྱོགས་བཅུའི་ཞིང་གི་རྒྱལ་བ་སྲས་བཅས་དང་། །རྩ་རྒྱུད་བླ་མ་ཡི་དམ་ཆོས་སྲུང་ཚོགས། །ལྷ་དང་དྲང་སྲོང་བདེན་པ་འགྲུབ་ཀུན་གྱིས། །བདག་གིས་སྨོན་ལམ་འགྲུབ་པར་མཛད་དུ་གསོལ། །བདག་དང་མཁའ་མཉམ་འགྲོ་བ་མ་ལུས་པས། །བྱས་དང་བྱེད་འགྱུར་དགེ་ཚོགས་ཅི་མཆིས་ཀུན། །བླ་མེད་བྱང་ཆུབ་དམ་པ་འགྲུབ་པའི་རྒྱུར། །གེགས་མེད་ཁོ་ནར་མྱུར་དུ་འགྱུར་བར་ཤོག །སྐྱེ་བ་ཀུན་ཏུ་རྒྱལ་བའི་བསྟན་པ་ལ། །ཐོས་
བསམ་སྒོམ་པ་ཡང་དག་ལྷུར་ལེན་ཅིང་། །ཡིད་བཞིན་རིན་ཆེན་ལྟ་བུའི་དགེ་བའི་བཤེས། །རྙེད་ནས་རྗེས་སུ་འཛིན་པ་ཉིད་གྱུར་ཅིག །ཐོས་ཀྱང་དྲེགས་པས་བཅིངས་བ་མ་ཡིན་ཞིང་། །ཤེས་ཀྱང་རློམ་སེམས་དུག་གིས་མ་སླད་དང་། །བསྒོམས་ཀྱང་ཞན་འཛིན་སྦུན་པས་མ་གཡོགས་པར། །གང་བྱེད་ཆོས་སུ་ཡང་དག་འགྱུར་བར་ཤོག །ཟང་ཟིང་ནོར་དང་འཇིག་རྟེན་ཆོས་བརྒྱད་དང་། །མི་དགེའི་བཤེས་གཉེན་སྡིག་གྲོགས་ལ་སོགས་པ། །ལོག་ལམ་ཕྱོགས་སུ་སྐད་ཅིག་མི་འཇུག་པར། །མ་ནོར་ལམ་བཞུགས་མཐུན་རྐྱེན་ཕུན་ཚོགས་ཤོག །དབེན་པའི་གནས་སུ་བསྒྲུབ་ལ་བརྩོན་བྱས་ཤིང་། །སྣང་བཞི་སྒྲོན་དྲུག་ཉམས་ལེན་མཐར་ཕྱིན་ཏེ། །རང་དོན་མངོན་གྱུར་གཞན་དོན་དཔག་ཡས་གྱིས། །འགྲོ་བའི་རེ་སྐོང་རྒྱལ་པོར་འགྱུར་བར་ཤོག ཁམས་གསུམ་འཁོར་བའི་རྒྱ་མཚོ་མ་སྟོངས་བར། །བདག་ནི་གང་
འདུལ་སྤྲུལ་པར་ཡོངས་གྱུར་ནས། །རྒྱལ་ཀུན་ཕྲིན་ལས་ཉིད་དང་མཉམ་པ་ཡི། །བསྟན་དང་འགྲོ་ལ་ཕན་པ་མཆོག་འགྲུབ་ཤོག །སངས་རྒྱས་བསྟན་པ་ཡུན་རིང་གནས་པར་ཤོག །བསྟན་འཛིན་སྐྱེས་བུ་གཞན་དོན་འགྲུབ་པར་ཤོག །འགྲོ་ཀུན་བདེ་ཞིང་ཆོས་ལ་སྤྱོད་པར་ཤོག །སྨོན་ལམ་བཏབ་པ་མཐའ་དག་འགྲུབ་པར་ཤོག །ཅེས་པ་ནི། རྣལ་འབྱོར་པ་ལྷུན་གྲུབ་གདལ་ཁྱབ་ལའོ། །དུས་གསུམ་རྒྱལ་བའི་མཁྱེན་བརྩེ་ཆུ་གཏེར་ལས། །ངོ་མཚར་རྨད་བྱུང་མཚན་དཔེའི་ནོར་བུ་མཆོག །གདུལ་བྱའི་རེ་སྐོངས་དམ་ཆོས་འདོད་འབྱུང་དབང་། །མཆོག་གི་སྤྲུལ་སྐུ་ཞབས་པད་བརྟན་བཞུགས་གསོལ། །སྙིགས་དུས་གདུལ་བྱའི་དོན་དུ་རིམ་བྱོན་པའི། །སྐྱེས་ཆེན་ནོར་བུའི་འཕྲེང་བ་དཀྲིག་པའི་དབུས། །མཁྱེན་རབ་ཐུགས་རྗེའི་གཟི་མདངས་ཆེར་གསལ་བ། །རྒྱལ་སྲས་མཐུ་བོ་བསྐལ་བརྒྱར་ཞབས་བརྟན་གསོལ། །སྨིན་གྲོལ་གདམས་པའི་ཆུ་གཏེར་
རྒྱ་ཆེ་ཞིང་། །ཟབ་དགུའི་མན་ངག་རིན་ཆེན་གྱིས་གང་བ། །གདུལ་བྱའི་རེ་བ་སྐོངས་མཁས་ཐུགས་རྗེའི་གཏེར། །ནམ་མཁའ་ཇི་སྲིད་གནས་པར་བརྟན་བཞུགས་གསོལ། །བདག་ཀྱང་སྐྱེ་བ་འདི་ནས་ཚེ་རབས་ཀུན། །ཁྱེད་ཀྱི་ཕྲིན་ལས་བསྒྲུབ་པའི་གྲོགས་ཉིད་དུ། །གྱུར་ཞིང་མཁའ་མཉམ་འགྲོ་བའི་ཚོགས་རྣམས་ཀྱི། །དེད་དཔོན་དམ་པར་གྱུར་ནས་འགྲོ་འདྲེན་ཤོག །ཅེས་པ་འདི་ནི། གྲ་དར་རྒྱས་ཆོས་སྡིངས་ཀྱི་སྤྲུལ་པའི་སྐུ་མཆོག་དམ་པའི་དྲུང་དུ་བརྟན་བཞུགས་སུ་ཕུལ་བའོ། །ཕྱོགས་བཅུ་དུས་གསུམ་རྒྱལ་བའི་ཐུགས་རྗེ་ཀུན། །གཅིག་ཏུ་བསྡུས་པ་རྡོ་རྗེའི་སློབ་དཔོན་མཆོག །དྲིན་ཅན་བླ་མ་རྒྱལ་བའི་བསྟན་སྲོག་འཛིན། །བསྐལ་བརྒྱའི་བར་དུ་ཞབས་པད་བརྟན་བཞུགས་གསོལ། །སྙིགས་དུས་ལོངས་སྤྱོད་སྐྱེ་འགྲོ་འདུལ་དཀའ་བས། །མཆོག་སྤྲུལ་མཚན་དཔེས་བརྒྱན་པའི་སྐུ་ཉིད་ཀྱང་། །མ་དག་སྐྱེ་བས་མཐོང་བའི་སྐལ་མེད་ཕྱིར། །དེ་སླད་གང་འདུལ་དེར་སྟོན་ཁྱེད་བཞུགས་གསོལ། །
རྩ་རྒྱུད་བླ་མ་རྒྱལ་བའི་དཀྱིལ་འཁོར་ཚོགས། །སྲུངས་མར་བཅས་པའི་བདེན་སྟོབས་ཐུགས་རྗེའི་མཐུས། །རྒྱལ་བའི་རྒྱལ་ཚབས་བསྟན་འཛིན་གྲགས་པའི་ཞབས། །ཆོས་འཁོར་རྒྱུན་མི་ཆད་མཛད་བརྟན་བཞུགས་གསོལ། ཅེས་པ་ནི། གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་རིགས་དང་ཆོས་ཀྱི་རིང་ལུགས་དྲི་མ་མེད་པ་འཛིན་པར་མཛད་པ་ལྷོ་བྲག་གནས་གཞི་ཆོས་ཀྱི་རྗེ་ལ་བརྟན་བཞུགས་སུ་འབུལ་བ་འདི་ཉིད། རྗེ་དེ་ཉིད་དང་གདུང་རུས་གཅིག་པ་དགེ་སློང་བསྟན་འཛིན་རྒྱ་མཚོས་བསྐུལ་བ་ལྟར་བཀོད་པའོ། །བདེན་པ་གྲུབ་པའི་རྒྱལ་བ་སྲས་བཅས་ཀུན། །བདག་གིས་སྨོན་ལམ་འགྲུབ་པར་མཛད་དུ་གསོལ། །བདག་ཉིད་སྐྱེ་བ་འདི་ནས་ཚེ་རབས་ཀུན། །དལ་འབྱོར་མཆོག་ཐོབ་ཐེག་ཆེན་བསྟན་དང་མཇལ། །མཚན་ལྡན་བཤེས་གཉེན་དམ་པས་རྗེས་བཟུང་ནས། །སྨིན་གྲོལ་གདམས་པས་རང་རྒྱུད་སྨིན་པར་ཤོག །མི་མཐུན་ཉེར་འཚེ་ཀུན་ཞི་མཐུན་རྐྱེན་ཚངས། །དངོས་གྲུབ་མཆོག་བརྙེས་ཕྲིན་ལས་རྣམ་བཞི་འགྲུབ། །གང་འདུལ་རྣམ་སྤྲུལ་རྒྱ་མཚོ་
འགྱེད་ནུས་པའི། །ཕྲིན་ལས་རྒྱལ་བ་ཀུན་མཚུངས་འགྲུབ་གྱུར་ཅིག །ཅེས་པ་ནི། དགེ་སློང་ཚེ་དབང་ལའོ། ཨོཾ་སྭ་སྟི་སིདྡྷི། བླ་མེད་སྟོན་པ་དཀོན་མཆོག་རྣམ་གསུམ་དང་། །དཀྱིལ་འཁོར་ཀུན་གཙོ་རྒྱལ་མཆོག་པདྨ་འབྱུང་། །ཡི་དམ་མཁའ་འགྲོ་ཆོས་སྲུང་རྒྱ་མཚོའི་མཐུས། །བདག་གིས་སྨོན་ལམ་ཅི་བཏབ་འགྲུབ་པར་ཤོག །དེང་ནས་བཟུང་སྟེ་གནས་སྐབས་ཐམས་ཅད་དུ། །བླ་མེད་སྙིང་པོ་བྱང་ཆུབ་བསྒྲུབ་པ་ལ། །མི་མཐུན་འགལ་རྐྱེན་མ་ལུས་ཞི་བ་དང་། །ཆོས་དང་མཐུན་པའི་དཔལ་འབྱོར་འཕེལ་བར་ཤོག །སྐྱེ་བ་ཀུན་ཏུ་ཐེག་ཆེན་དམ་ཆོས་དང་། །རྟག་ཏུ་འབྲལ་མེད་མཚན་ལྡན་བཤེས་གཉེན་གྱིས། །རྗེས་སུ་བཟུང་ནས་ཟབ་ལམ་རྡོ་རྗེའི་ཐེག །ལམ་མཆོག་མངོན་དུ་གྱུར་ནས་མཐར་ཕྱིན་ཤོག །སྣང་ཞིང་སྟོང་ལ་སྟོང་བཞིན་གསལ་བའི་དོན། །ཡེ་ཤེས་སྒྱུ་མ་ལྟ་བུའི་སྐུར་བཞེངས་ནས། །སྤྲུལ་པ་སྣ་ཚོགས་འཇིག་རྟེན་ཁམས་ཀུན་ཏུ། །གང་འདུལ་
ཕྲིན་ལས་རླབས་ཆེན་སྤྱོད་པར་ཤོག །སྐྱེ་བ་ཀུན་གྱི་རྣམ་དཀར་དགེ་བའི་ཚོགས། །མཐའ་དག་གཅིག་བསྡུས་འགྲོ་བའི་ཕན་བདེའི་རྒྱུན། །དྲི་མེད་ཉིད་གྱུར་འགྲོ་ཀུན་བྱང་ཆུབ་མཆོག །མྱུར་དུ་ཐོབ་པའི་འདྲེན་མཆོག་ཉིད་གྱུར་ཅིག །སྡུག་བསྔལ་འཁོར་བའི་རྒྱ་མཚོ་མ་སྟོངས་པར། །བདག་གི་རྣམ་འཕྲུལ་དཔག་མེད་མཐུ་ལྡན་གྱིས། །ངོ་མཚར་མཛད་ཕྲིན་རྒྱལ་ཀུན་གཅིག་བསྡུས་པའི། །མཐུ་སྟོབས་ནུས་ལྡན་འཁོར་བ་དོང་སྤྲུག་ཤོག །ཅེས་པ་ནི། བསམ་གཏན་གླིང་ནས་རིག་པ་འཛིན་པ་པདྨའི་མཚན་ཅན་གྱིས་བསྐུལ་ངོར་བཀོད་པའོ། ཁམས་གསུམ་འགྲོ་བ་ཀུན་གྱི་སྐྱབས་གཅིག་པུ། །དུས་གསུམ་རྒྱལ་བ་ཐམས་ཅད་འདུས་པའི་སྐུ། །མཁྱེན་བརྩེའི་དབང་ཕྱུག་རྗེ་བཙུན་ཆོས་ཀྱི་རྗེ། །བསྐལ་བརྒྱའི་བར་དུ་ཞབས་པད་བརྟན་གྱུར་ཅིག །སྣ་ཚོགས་ཆོས་སྒོ་བརྒྱ་ཕྲག་གིས་ཕྱུག་ཅིང་། །ཐེག་དགུའི་ཁང་བཟང་ཟབ་གནད་བཀོད་པའི་
འཕྲུལ། །ངོ་མཚར་དབང་བསྒྱུར་རྒྱལ་བའི་ཕྲིན་ལས་པ། །ཆོས་ཀྱི་རྒྱལ་ཁྱོད་ཞབས་པད་རྟན་གྱུར་ཅིག །འཇིག་རྟེན་ལས་འདས་གསུམ་བརྩེའི་པད་ཚལ་དུ། །སྨིན་དབང་གྲོལ་ཁྲིད་རིན་ཆེན་དོ་ཤལ་ཅན། །དད་ལྡན་ཡིད་འཕྲོག་མཚན་དཔེའི་དཔལ་འབར་བའི། །འཆི་མེད་དབང་པོ་ཞབས་པད་བརྟན་གྱུར་ཅིག ཁམས་གསུམ་སེམས་ཅན་དུག་ལྔའི་གཅོང་ནད་ཀྱིས། །རྟག་པར་གདུང་བའི་ཉོན་མོངས་ཟུག་རྔུ་ཅན། །ཀུན་ལ་ཐེག་པའི་བྱེ་བྲག་སྨན་ཚོགས་ཀྱིས། །ཕན་མཛད་སྨན་རྒྱལ་ཁྱེད་ཞབས་བརྟན་གྱུར་ཅིག །འཁོར་བའི་སྡུག་བསྔལ་ཉམས་ཐག་རྦ་ཀློང་ཆེས། །རབ་བསྐྱོད་ངན་སོང་སྲིན་མོའི་གླིང་འཁྱམས་པའི། །འགྲོ་རྣམས་བདེ་བའི་སྐམ་སར་སྒྲོལ་མཁས་པ། །ཐར་པའི་དེད་དཔོན་ཞབས་པད་བརྟན་གྱུར་ཅིག །ད་དུས་རྩོད་ལྡན་སྙིགས་མའི་ཐ་མ་འདིར། །མགོན་པོ་ཁྱེད་ལས་རེ་
ས་གཞན་མེད་ན། །བདག་སོགས་གདུལ་བྱའི་མགོན་སྐྱབས་དཔུང་གཉེན་དུ། །མི་འགྱུར་རྡོ་རྗེའི་གདན་ལ་བཞུགས་སུ་གསོལ། །དུས་འདི་ནས་བཟུང་ཕྱི་མའི་མཐར་ཐུག་བར། །གུས་པས་ཕྱག་འཚལ་ལུས་སྲོག་མཆོད་པར་འབུལ། །སྡིག་ཀུན་མཐོལ་བཤགས་དགེ་ཚོགས་རྗེས་ཡི་རངས། །མཛད་བཟང་ཕྲིན་ལས་ནམ་མཁའ་མཉམ་པ་རུ། །བསྐལ་བརྒྱར་ཞབས་པད་བརྟན་པར་བཞུགས་ནས་ཀྱང་། །ཚད་མེད་བྱམས་ཆེན་ཐུགས་རྗེའི་འོད་ཟེར་གྱིས། །བསྟན་པའི་མི་མཐུན་ཕྱོགས་མུན་རབ་གསལ་ཞིང་། །ཆོས་ཀྱི་སྣང་བ་རྒྱ་ཆེན་ཁྱབ་མཛད་གསོལ། །རྒྱལ་བའི་སྤྱི་གཟུགས་དཔལ་ལྡན་བླ་མ་ལ། །ཞབས་པད་བསྟན་པར་གསོལ་བ་བཏབས་པའི་དགེས། །ཕྱོགས་བཅུའི་ཞིང་གི་བདེ་གཤེགས་རྒྱ་མཚོ་ལ། །ཆོས་འཁོར་བསྐོར་བའི་ནུས་ལྡན་བདག་གྱུར་ཅིག སྐྱེ་བ་ཀུན་ཏུ་དཔལ་ལྡན་བླ་མ་ལ། །མཉེས་པ་གསུམ་གྱིས་ཞབས་
གཏོགས་བསྒྲུབ་བྱེད་ཅིང་། །ཁྱེད་ཀྱི་ཕྲིན་ལས་ནུས་སྟོབས་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྲུབ་པར་ཤོག །ཅེས་པ་འདི་ནི། དགེ་སློང་ཆོས་བསྟན་འཛིན་གྱིས་བསྐུལ་ངོར་བཀོད་པའོ། །བཀའ་རྒྱུད་བླ་མ་ཡི་དམ་ལྷ་ཚོགས་དང་། །དཔའ་བོ་མཁའ་འགྲོ་རིག་འཛིན་ཆོས་སྐྱོང་དང་། །དམ་ཅན་རྒྱ་མཚོ་བསྲུང་མའི་ཚོགས་རྣམས་ཀྱིས། །རྣམ་དག་སྨོན་ལམ་འགྲུབ་པའི་དཔང་མཛོད་ཅིག །དེང་ནས་བཟུང་སྟེ་བྱང་ཆུབ་མ་ཐོབ་བར། །ཆོས་མིན་བསམ་པ་རྒྱུད་ལ་མི་སྐྱེ་ཞིང་། །ཉོན་མོངས་ངན་བློའི་རྗེས་སུ་མི་འབྲེང་བར། །ཡང་དག་སྙིང་པོའི་དོན་མཆོག་སྤྱོད་པར་ཤོག །རྗེ་བཙུན་བླ་མ་དམ་པ་ཉིད་དང་ནི། །སྐྱེ་དང་ཚེ་རབས་ཀུན་ཏུ་མི་འབྲལ་ཞིང་། །རྣམ་པར་དཔག་པར་དཀའ་བའི་མཛད་སྤྱོད་ལ། །མ་དད་ལོག་པར་རྟོག་པ་ཀུན་བྲལ་ཤོག །འཁོར་བའི་བྱ་བཞག་ཆུ་བོའི་རྦ་རླབས་ལྟར། །ཟིན་མེད་ལས་འདི་རིང་དུ་སྤངས་བྱས་
ནས། །སྣང་བཞིན་སྟོང་ལ་སྟོང་ཞིང་གསལ་བ་ཉིད། །བྱར་མེད་ལྷུག་པའི་དོན་ལ་གནས་པར་ཤོག །དམ་པའི་དོན་དེ་ལེགས་པར་མངོན་གྱུར་ནས། །སྐྱེ་འགག་གཉིས་མེད་ངང་ལ་གནས་བྱས་ཤིང་། །རང་གཞན་དོན་གཉིས་ལྷུན་གྱིས་གྲུབ་པ་དང་། །ཆོས་ཉིད་འཕོ་འགྱུར་མེད་པའི་དོན་རྟོགས་ཤོག །ཅེས་པ་ནི། སྙིང་པོའི་དོན་ལ་རྩེ་གཅིག་ཏུ་མོས་པ་དད་ལྡན་ཨོ་རྒྱན་མིང་ཅན་ལའོ། །ཕྱོགས་བཅུ་རབ་འབྱམས་རྒྱལ་བའི་ཞིང་ཀུན་གྱིས། །བླ་མ་སངས་རྒྱས་ཡི་དམ་དཀྱིལ་འཁོར་ལ། །ཆོས་སྲུང་དམ་ཅན་དཀར་ཕྱོགས་སྐྱོངས་རྣམས་ཀྱིས། །དབང་བསྐུར་བྱིན་རློབས་སྨོན་ལམ་འགྲུབ་པར་མཛོད། །སྐྱེ་བར་ལྷ་དང་བླ་མས་རྗེས་བཟུང་ཞིང་། །ཐོས་བསམ་མཐར་ཕྱིན་བསྒྲུབ་ལ་བརྩོན་བྱས་ཏེ། །རང་དོན་ཆོས་སྐུ་མངོན་གྱུར་གཞན་དོན་དུ། །རྣམ་འཕྲུལ་དུ་མས་འགྲོ་བ་འདྲེན་པར་ཤོག །ཅེས་པ་འདི་ཀརྨ་བཟང་ལྡན་ལའོ། །བླ་མེད་འདྲེན་པ་རྒྱལ་བ་དཀོན་མཆོག་ཚོགས། །སྐྱབས་གནས་འཕགས་ཚོགས་བདེན་པའི་
བྱིན་རླབས་ཀྱིས། །བདག་གི་ལྷག་བསམ་དགེ་བའི་སྨོན་ལམ་ཀུན། །གེགས་མེད་ཁོ་ན་ཉིད་དུ་འགྲུབ་གྱུར་རིག །སྐྱེ་བ་དལ་འབྱོར་ཆོས་ལྡན་ལེགས་ཐོབ་ཅིང་། །དྲི་མེད་རྒྱལ་བསྟན་མཆོག་ལ་རབ་ཞུགས་ནས། །གཏན་འདུན་བྱང་ཆུབ་བསྒྲུབ་ལ་འགལ་རྐྱེན་བྲལ། །རྫོགས་པའི་སངས་རྒྱས་བདེ་བླག་ཐོབ་པར་ཤོག ལྷག་བསམ་དག་པས་གཞན་དོན་མཐར་ཕྱིན་ཅིང་། །སྐུ་གཉིས་མངོན་གྱུར་རང་དོན་གདེངས་ཐོབ་པས། །སྲིད་ཞིར་མི་གནས་ཐམས་ཅད་མཁྱེན་པའི་སར། །ཚེ་གཅིག་ཉིད་ལ་ཕྱིན་པར་མཛད་དུ་གསོལ། །ཅེས་པ་ནི་ཀརྨ་བསྟན་བསྲུང་ལའོ། །ཕྱོགས་དུས་རྒྱལ་བ་རྒྱ་མཚོའི་དཀྱིལ་འཁོར་གྱི། །གཙོ་མཆོག་དཔལ་ལྡན་བླ་མ་ལྷག་པའི་ལྷ། །མ་ལུས་བརྩེ་བའི་དགོངས་པས་ཉེར་གཟུང་སྟེ། །བདག་གིས་སྨོན་ལམ་གང་བཏབ་འགྲུབ་པར་མཛོད། །ཁམས་གསུམ་འགྲོ་བ་རྒྱ་ཆེན་དོན་སླད་དུ། །སྣ་ཚོགས་ཐབས་
འཕྲུལ་དཔག་མེད་བསམ་ཡས་ཀྱིས། །ཕན་བདེའི་སྤྲིན་ཆེན་ཐུགས་རྗེའི་ཆར་འབེབས་པའི། །ཕྲིན་ལས་ནམ་མཁའ་མཉམ་པ་བདག་འགྲུབ་ཤོག །སངས་རྒྱས་བྱང་སེམས་བདེན་པའི་ཐུགས་རྗེ་དང་། །དྲང་སྲོང་རིག་འཛིན་རྣམས་ཀྱི་མཐུ་ནུས་སོགས། །མཐའ་དག་འགྲོ་ཕན་སླད་དུ་བདག་སྨོན་པ། །ཡོངས་འགྲུབ་གེགས་མེད་ཁོ་ནར་འབྱུང་གྱུར་རིག །ཅེས་པ་ནི་ཀརྨ་རིགས་ལྡན་ལའོ། །ཕྱོགས་བཅུ་དུས་གསུམ་རྒྱལ་བ་རབ་འབྱམས་དང་། །བླ་མ་ཡི་དམ་མཁའ་འགྲོ་ཆོས་སྐྱོང་སོགས། །སྐྱབས་གནས་རྣམས་ཀྱི་ཐུགས་རྗེ་ནུས་མཐུ་ཡིས། །སྨོན་ལམ་ཅི་བཏབ་གེགས་མེད་འགྲུབ་པར་ཤོག །དེང་ནས་བཟུང་སྟེ་ཚེ་རབས་ཐམས་ཅད་དུ། །དལ་འབྱོར་མཆོག་ཐོབ་ཐེག་ཆེན་བསྟན་དང་མཇལ། །ཐོས་བསམ་མཐར་ཕྱིན་བསྒྲུབ་འབྲས་གདེང་ཐོབ་ཅིང་། །རང་གཞན་དོན་གཉིས་འབད་མེད་འགྲུབ་པར་ཤོག །འཁོར་བའི་རྒྱ་མཚོ་མ་སྟོངས་དེ་སྲིད་དུ། །བདག་གི་ལྷག་བསམ་
རབ་དགེའི་སྨོན་ལམ་མཐུ། །འདིས་མཚོན་ཕྱོགས་དུས་རྒྱལ་བའི་ཕྲིན་ལས་རྣམས། །མྱུར་དུ་འགྲུབ་པའི་སྨོན་ལམ་རྟག་གྲུབ་ཤོག །ཅེས་ཚེ་རིང་བསམ་གྲུབ་ལའོ། །དཔལ་ལྡན་བླ་མ་ཕྱོགས་བཅུའི་སངས་རྒྱས་རྣམས། །གཅིག་བསྡུས་ཡི་དམ་དཔལ་ཆེན་རྟ་མགྲིན་རྒྱལ། བསྙེན་ཅིང་བསྒྲུབས་པའི་བྱིན་རླབས་རྨད་པོ་ཆེ། །ཚེ་གཅིག་རྫོགས་པའི་བྱང་ཆུབ་ཐོབ་པར་ཤོག །སྐྱེ་བ་འདི་དང་སྐྱེ་གཞན་ཐམས་ཅད་ཀྱིས། །ཐོས་བསམ་སྒོམ་དང་ཆོས་སྤྱོད་བཅུ་ལ་སོགས། །དགེ་ཀུན་ཕ་མ་མཁའ་མཉམ་སེམས་ཅན་རྣམས། །ཐར་ལམ་སྒྲོད་པ་ཁོ་ནའི་དོན་ཕྱིར་བསྔོ། །ནམ་མཁའ་ཇི་སྲིད་གནས་པར་དེ་སྲིད་དུ། །བདག་གིས་རྣམ་སྤྲུལ་གང་འདུལ་འགྱེད་ནུས་ཤིང་། །འགྲོ་ལ་ཕན་བདེ་རྒྱ་ཆེན་སྩོལ་བ་ཡི། །ཕྲིན་ལས་སངས་རྒྱས་ཀུན་དང་མཉམ་པར་ཤོག །ཅེས་ཀརྨ་བརྒྱ་བྱིན་ལའོ། །དེ་ལྟར་འདི་དག་རྣམ་ནི་དཔལ་རྣམ་ཐོས་ཀྱི་རི་བོའི་ཕོ་བྲང་དུ་བཀོད་པའོ། །མཐའ་ཡས་ཞིང་ཁམས་
རྒྱ་མཚོར་རབ་བཞུགས་པའི། །བླ་མ་རྒྱལ་བ་སྲས་བཅས་འཕགས་པའི་ཚོགས། །སྨོན་ལམ་ཐུགས་རྗེའི་སྤྲིན་ལས་ལེགས་འོངས་པའི། །བདེ་ལེགས་བཀྲ་ཤིས་ཆར་ཆེན་དབབ་ཏུ་གསོལ། །ཕྱོགས་བཅུ་རབ་འབྱམས་སྣ་ཚོགས་གདུལ་བྱའི་ཁམས། །བགྲང་ཡས་དེ་སྙེད་ཟབ་རྒྱས་ཆོས་ཀྱི་སྒོ། །ཀུན་གྱི་ཡང་སྙིང་རྨད་བྱུང་རྡོ་རྗེའི་ཐེག །དྲི་མེད་བསྟན་པ་ཡང་དག་རྒྱས་པར་ཤོག །བསྟན་རྩ་སྡེ་སྣོད་གསུམ་གྱི་གསེར་གཞི་བརྟན། །ཐེག་བརྒྱད་བང་རིམ་མངོན་མཐོའི་ལྷུན་པོ་བརྗིད། །རིམ་གཉིས་འོད་གསལ་སྙིང་པོ་ཉི་ཟླ་གསལ། །ཡང་བཅུ་རྫོགས་ཆེན་ཁང་བཟང་དབང་བསྒྱུར་ཤོག །མཐའ་དད་མོས་ཁམས་དང་མཐུན་གྲུབ་པའི་མཐའ། །སྣ་ཚོགས་འགྲོ་བའི་དཔལ་དུ་རབ་འབར་བའི། །གྲངས་མེད་ཆོས་སྒོའི་སྐར་ཚོགས་རྣམ་བཀྲ་བ། །མ་ལུས་ནུབ་མེད་རྟག་པར་གསལ་གྱུར་ཅིག །ལྷར་བཅས་མཆོད་ཡུལ་དཀོན་མཆོག་འདུས་པའི་སྡེ། །རབ་འཕེལ་མི་ཕྱེད་མཐུན་
ཅིང་ཆོས་སྤྱོད་བཅུ། །རིམ་གཉིས་ཐོས་བསམ་བསྒོམ་པས་དུས་འདའ་ཞིང་། །བཞེད་དོན་མ་ལུས་གེགས་མེད་མྱུར་འགྲུབ་ཤོག །མཐུ་ལྡན་དཀར་པའི་ལྷ་རྣམས་ཀྱིས་མཆོད་ཅིང་། །ལོག་ལྟའི་སྡེ་ཚོགས་ཡང་དག་བསྟན་ལ་དད། །འགྲོ་ཀུན་མཆོད་འོས་བསྟེན་པའི་མཐུ་འབྲས་ཀྱིས། །འཇིག་རྟེན་བདེ་བའི་དཔལ་ལ་ཉེར་སྤྱོད་ཤོག །སྲིད་པ་ཇི་སྲིད་གནས་པར་རྒྱལ་བའི་བསྟན། །འགྲིབ་བྲལ་ཡང་དག་གསལ་བས་འགྲོ་བ་ཀུན། །བྱང་ཆེན་བླ་མེད་མ་འཁོད་དེ་སྲིད་དུ། །མི་འཇིགས་ཆོས་ཀྱི་ཆབ་སྲིད་བརྟན་གྱུར་རིག །ཅེས་པ། བསྟན་པ་རྒྱས་བྱེད་ཀྱི་སྨོན་ལམ་འདི། །དབོན་པོ་ཀརྨ་ཀུན་ཁྱབ་ཀྱི་བསྐུལ་ངོར་སྨན་མོ་དགོན་གྱི་ཡང་དབེན་དུ་བཀོད་པའོ། ཨོཾ་མངྒ་ལཾ་སརྦ་སིདྡྷི་ཧཱུྃ། བླ་མ་དཀོན་མཆོག་ཡི་དམ་དཀྱིལ་འཁོར་ལྷ། །མཐུ་སྟོབས་གཏེར་མཛོད་ཆོས་སྲུང་རྒྱ་མཚོའི་ཚོགས། །དཀར་ཕྱོགས་སྐྱོང་བ་ཀུན་གྱིས་བདེ་ལེགས་དཔལ། །གནས་
ཚོགས་གཉིས་མངོན་མཐོའི་མཐུ་ལས་ལེགས་གྲུབ་ཅིང་། འདོད་དགུའི་དགེ་འབྲས་དུ་མས་ཡོང་གཏམས་པའི། །དགེ་ལེགས་ཡོངས་འདུའི་དཔལ་འབྱོར་ཇི་སྙེད་པ། གནས་འདིར་ཡང་འབྱུང་བའི༴ །དུག་གསུམ་རྒྱུ་འབྲས་ནད་ཀྱི་ཟུག་རྔུ་དང་། འཁྲུལ་རྟོག་བདེན་ཞེན་འཐས་པའི་གདོན་བགེགས་སོགས། བརྟན་གཡོའི་མི་མཐུན་རྐྱེན་རིགས་སྣ་ཚོགས་ཀུན། །ཡོངས་སུ་ཞི་བ་ཆེན་པོའི་བཀྲ་ཤིས་སྩོལ། འདིར་ཡོངས་སུ་གྲུབ་པའི་བཀྲ་ཤིས་སྩོལ། །དུས་གསུམ་བདེ་དགེ་འབྱུང་བའི་ལོངས་སྤྱོད་ཆར། །གཏན་འདུན་བྱང་ཆུབ་བསྒྲུབས་པའི་མཐུན་ཕྱོགས་རྐྱེན། །སྲིད་དང་སྲིད་མིན་ཡོངས་ཀྱི་བསོད་ནམས་གཏེར། །མ་ལུས་གོང་འཕེལ་མཆོག་གི་བཀྲ་ཤིས་སྩོལ། །གྲུབ་པ་མཆོག་བརྙེས་རིག་འཛིན་མཚར་དངར་བས། །མཆོག་གསང་ངེས་པ་རྙེས་པའི་གནས་མཆོག་འདིར། །ཉེ་བར་བརྟེན་རྣམས་འགལ་རྐྱེན་ལས་གྲོལ་ཞིང་། །ཆོས་དང་བཀྲ་ཤིས་བདེ་ལེགས་འཕེལ་བར་ཤོག །ཅེས་པ་འདི་ཡང་བཀྲ་ཤིས་སྨན་མོའི་ཡང་དབེན་དུའོ། །ཤེས་བྱ་ཀུན་མཁྱེན་ཡེ་ཤེས་མཆོག་མངའ་བའི། །བཅོམ་ལྡན་ལྷ་ཡི་ལྷ་དང་དེ་སྲས་ཚོགས། །བླ་མ་དཀྱིལ་འཁོར་ལྷ་དང་ཆོས་སྲུངས་བཅས། །བྱིན་རླབས་ཐུགས་རྗེའི་ཆར་གྱིས་དགེ་ལེགས་སྩོལ། །འགྲོ་ཁམས་མོས་པ་རྒྱ་མཚོའི་ཞིང་ས་རུ། །ཐེག་དགུ་བརྒྱད་ཁྲི་བཞི་སྟོང་དམ་ཆོས་ཆར། །རྟག་པར་རྩོལ་མཛད་ཕན་བདེའི་
། འབྱུང་གནས་མཆོག །བསྟན་པ་རྒྱ་ཆེར་འཕེལ་བའི་བཀྲ་ཤིས་སྩོལ། །ཡིད་བཞིན་འདོད་འབྱུང་གྲུབ་མཐའ་རྒྱ་མཚོའི་དབུས། །ཐེག་བརྒྱད་ཁྲི་འཕངས་མངོན་མཐོའི་ལྷུན་པོ་བརྗིད། །ཡང་ཟབ་སྙིང་པོའི་རྣམ་རྒྱལ་ཁང་བཟང་དཔལ། །རབ་འབར་མི་འགྱུར་བརྟན་པའི་དཔལ་འབྱོར་སྩོལ། །གྲངས་མེད་ཤེས་བྱའི་རྒྱུ་སྐར་རྣམ་བཀྲ་ཞིང་། །མདོ་སྔགས་ཉི་ཟླ་ཟུང་གི་སྣང་བྱེད་ཀྱིས། །གདུལ་བྱའི་མཁའ་ལ་རིམ་གཉིས་འོད་འབར་བ། །འགྲིབ་མེད་རྟག་པར་གསལ་བའི་ངོ་མཚར་སྩོལ། །རྣམ་འདྲེན་དགེ་ལེགས་འབྱུང་གནས་དཔག་བསམ་ཤིང་། །བསྐལ་བརྒྱར་མྱ་ངན་བྲལ་ཀྱང་མྱ་ངན་ལས། །འདའ་ཚུལ་སྟོན་སྤངས་སྲིད་ཞིའི་གདུང་སེལ་དང་། །གདུལ་བྱའི་བྱ་ཚོགས་སྐྱོང་བའི་བཀའ་དྲིན་སྩོལ། །འཁོར་བའི་ཆུ་གཏེར་ཆེ་ལས་རབ་བརྒལ་ནས། །
ཐར་པ་དམ་པའི་གླིང་དུ་བགྲོད་བཞེད་པས། །བསྟན་པའི་གྲུར་ཞུགས་འཕགས་མཆོག་འདུས་པའི་སྡེ། །མི་ཕྱེད་ཀུན་དུ་མཐུན་པའི་རྟེན་འབྲེལ་སྩོལ། །འགྲོ་བའི་མཆོད་སྡོང་བསྟན་མཆོག་རིན་པོ་ཆེ། །གུས་ལྡན་ལྷ་བཅས་སྐྱེ་དགུས་རྟག་བརྟེན་ཞིང་། །སྲིད་པ་ཇི་སྲིད་གནས་པར་སྐྱེ་འཕྲོ་ཡིས། །གཙུག་རྒྱན་འགྲན་ཟླ་བྲལ་བའི་ལེགས་ཚོགས་སྩོལ། །ལྷག་བསམ་དགེ་བའི་བདེན་པའི་མཐུས། །རྒྱལ་བསྟན་ཕྱོགས་བཅུར་དར་ཞིང་རྒྱས་པ་དང་། །བསྟན་འཛིན་སྐྱེས་བུས་ས་ཆེན་ཡོངས་ཁྱབ་ཅིང་། །ཆོས་དང་དཔལ་འབྱོར་གོང་འཕེལ་བཀྲ་ཤིས་ཤོག །ཅེས་པ་འདི་ནི། ཕྲིན་ལས་དོན་གྲུབ་ཀྱིས་བསྐུལ་བ་ལྟར། སྨིན་གྲོལ་སྐྱེད་རྫོགས་གླིང་གི་འདུས་པ་རྣམས་ཀྱིས་ཞལ་འདོན་དུ་མཛད་ཕྱིར་བཀོད་པའོ། ན་མོ་གུ་རུ་བུདྡྷ་སརྦ་མངྒ་ལཾ་སིདྡྷི་ཕ་ལ་ཧཱུྃ། རིན་ཆེན་གསེར་གྱི་ལྷུན་པོ་ཇི་བཞིན་བསོད་ནམས་དཔལ་གྱི་སྐུ་མཆོག་ནི། །ལྷ་དང་མི་དང་ལྷ་མ་ཡིན་སོགས་སྲིད་གསུམ་འགྲོ་
བའི་གཙུག་རྒྱན་དུ། མཚན་དཔེའི་མེ་ཏོག་ཐུགས་རྗེའི་གཟི་འབར་སྟོན་པ་མཉམ་མེད་ཤཱཀྱའི་དབང་། །ཆོས་དང་དགེ་འདུན་སྤྲུལ་པར་བཅས་པའི་ཞབས་པད་སྤྱི་བོས་རྟག་ཏུ་མཆོད། །འཇིག་རྟེན་དགེ་བར་སྐྱོང་བའི་མཐུ་ལྡན་ཚངས་པ་དང་། །བརྒྱ་བྱིན་ལ་སོགས་རྒྱལ་བའི་བཀའ་སྡོད་དཀར་ཕྱོགས་ཀྱི། །མཐུ་དཔུང་ལྡན་པའི་ལྷ་དང་དྲང་སྲོང་སྲུང་མའི་ཚོགས། །མ་ལུས་དེང་འདིར་བདེན་པ་གྲུབ་པའི་དཔང་མཛོད་ཅིག །དུས་གསུམ་གཤེགས་པའི་རྒྱལ་དང་རྒྱལ་བའི་སྲས། །འཕགས་པ་བྱང་སེམས་ཉན་ཐོས་རང་རྒྱལ་དང་། སོ་སྐྱེ་ལྷག་བསམ་ནོར་ལྡན་མཐའ་དག་གི། །དགེ་ཀུན་རྣམ་མཁྱེན་བསྔོ་རྒྱུར་ལྷུན་གྱི་གྲུབ། །དེ་བཞིན་བདག་དང་མཁའ་མཉམ་འགྲོ་རྣམས་ཀྱིས། །བྱས་དང་བྱེད་གྱུར་ཡི་རང་ལ་སོགས་པའི། །རྣམ་དཀར་དགེ་བའི་ས་བོན་ཇི་སྙེད་ཀུན། །ཡོངས་བཟླུམས་རྫོགས་པའི་བྱང་ཆུབ་ཉིད་དུ་བསྔོ། །ཐོག་མེད་དུས་ནས་ད་ལྟའི་བར་དག་ཏུ། །དཔག་མེད་
དྲིན་ལྡན་རིས་དྲུག་ཕ་མའི་ཚོགས། །མཐའ་དག་སྡུག་བསྔལ་རྒྱུ་འབྲས་ཀྱིས་གཟིར་བ། །འདི་ལས་མྱུར་ཐར་གཏན་བདེ་ཐོབ་པར་ཤོག །བདག་སོགས་སྐྱེ་བ་འདི་ནས་ཚེ་རབས་ཀུན། །མི་ཁོམ་བརྒྱད་པོ་དག་ཏུ་མ་གྱུར་པའི། །དལ་འབྱོར་རིན་ཆེན་གྲུ་བོ་ལ་བརྟེན་ནས། །དམ་ཆོས་ཡིད་བཞིན་མཆོག་ལ་སྤྱོད་པར་ཤོག །གང་དུ་སྐྱེས་ཀྱང་ཐེག་ཆེན་ཆོས་དང་འཕྲད། །སངས་རྒྱས་དངོས་མཚུངས་དགེ་བའི་བཤེས་དང་མཇལ། །ཐོས་བསམ་བསྒོམ་པ་མཐར་ཕྱིན་གྲུབ་མཆོག་བརྙེད། །བླ་ན་མེད་པའི་གོ་འཕངས་མངོན་གྱུར་ཤོག །ཡིད་ལ་བསམ་པའི་དོན་ཀུན་ཐོག་མེད་འགྲུབ། །ལྷ་དང་བླ་མ་མཁའ་འགྲོས་རྗེས་སུ་བཟུང་། །དམ་ཚིག་སྡོམ་ལ་ཉེས་ལྟུང་དྲི་མ་མེད། །རིམ་གཉིས་རྣལ་འབྱོར་བསྟན་པ་ཐོབ་པར་ཤོག །རྒྱ་ཆེན་ཆོས་ལ་རྨོངས་པ་མེད་པ་ཡིས། །འགྲོ་ལ་དགེ་ལེགས་ཆོས་ཆར་འབེབས་པ་དང་། །རང་དོན་ཡིད་བྱེད་དྲི་མས་མ་གོས་པར།
།གཞན་ཕན་ནམ་མཁའ་མཉམ་པ་འགྲུབ་པར་ཤོག །གདུལ་བྱའི་མོས་ཁམས་བསམ་ཡས་ཇི་སྙེད་ལ། །གང་འདུལ་སྤྲུལ་པ་རྒྱ་མཚོ་འགྱེད་ནུས་ཤིང་། །ཕན་བདེའི་ཆར་གྱིས་འགྲོ་བའི་ཞིང་ས་རུ། །བྱང་ཆུབ་དགེ་ལེགས་མྱུ་གུ་བསྐྱེད་པར་ཤོག །དག་སྣང་མོས་གུས་ཕྱོགས་མེད་འབྱོངས་པ་ཡིས། །རིས་མེད་བརྟན་ལ་བྱ་བ་བྱེད་པ་དང་། །རྣམ་མང་སྐྱེ་དགུའི་མོས་སྐལ་དང་མཚུངས་པའི། །དམ་ཆོས་ཟབ་མོའི་དགའ་སྟོན་འགྱེད་པར་ཤོག །བགྲང་པས་འཇིག་རྟེན་ཕྱོགས་བཅུ་མ་ལུས་པར། །རྒྱལ་སྲས་དེ་སྲས་སྤྲུལ་པས་ཡོངས་ཁྱབ་ཅིང་། །ཆོས་བསྟན་མུན་སེལ་ཡེ་ཤེས་སྒྲོན་མེ་གསལ། །འགྲོ་བའི་མ་རིག་མུན་པ་རབ་བསེལ་ཤོག །འབྱུང་པོ་ཤ་ཟ་མི་མ་ཡིན་ལ་སོགས། །གཞན་ལ་འཚེ་བའི་སེམས་ལྡན་ཐམས་ཅད་ཀྱང་། །ཞི་ཞིང་བྱམས་དང་དགེ་བའི་བསམ་པ་ཡིས། །རང་གཞན་དགེ་ལེགས་ལམ་ལ་
གནས་པར་ཤོག །ནད་དང་རིམས་དང་རྩྭ་སད་སེར་བ་དང་། །ཕྱུགས་ཀྱི་ནད་དང་འཐབ་འཁྲུག་རྩོད་པའི་རིགས། །ཕ་རོལ་མཐའ་ཡི་དམག་དཔུང་ལ་སོགས་པ། །ཉེ་བར་འཚེ་ཀུན་གཏན་དུ་མི་འབྱུང་ཤོག །ལོ་ཟླ་ཞག་དུས་གཟའ་ཚེས་སྐར་མ་དང་། །འབྱུང་བའི་འཕྲོད་སྦྱོར་ས་བདག་ལྡན་འབྲས་ངན། །རྨི་ལམ་མཚན་ལྟས་ངན་པ་ལ་སོགས་པ། །བཀྲ་མི་ཤིས་པ་ཐམས་ཅད་ཞི་བར་ཤོག །ཆར་ཆུ་དུས་འབེབས་ལོ་ཕྱུགས་རྟག་ཏུ་ལེགས། །ཚེ་རིང་འབྱོར་པ་འཕེལ་དང་མི་ནོར་རྒྱས། །འཇིག་རྟེན་ཡིད་ལ་སྨོན་དགུ་ཇི་སྙེད་དང་། །བསྟན་དང་དམ་ཆོས་དར་ཞིང་རྒྱས་པར་ཤོག །བསྟན་འཛིན་སྐྱེས་བུ་སྐུ་ཚེ་ཕྲིན་ལས་འཕེལ། །དགེ་འདུན་སྡེ་དར་མི་ཕྱེད་མཐུན་པ་དང་། །ཐོས་བསམ་བསྒོམ་བསྒྲུབ་ཆོས་སྤྱོད་མངའ་ཐང་རྒྱས། །བསྟན་པའི་རྒྱལ་མཚན་ཕྱོགས་བཅུར་གསལ་བར་ཤོག །སྐྱེ་འགྲོ་མ་ལུས་ཕན་ཚུན་རྟག་ཏུ་མཐུན། །
ཡིད་ལ་འདོད་དགུ་འགྲུབ་ཅིང་བསྟན་ལ་དད། །དམ་ཆོས་དགེ་བ་བསྒྲུབ་བརྩོན་བར་ཆད་མེད། །བྱང་ཆུབ་ལམ་ལ་ཀུན་ཀྱང་ཞུགས་པར་ཤོག །བླ་མ་རྒྱལ་བ་སྲས་བཅས་ཐུགས་རྗེ་དང་། །དཀར་ཕྱོགས་ཆོས་སྲུངས་རྒྱ་མཚོའི་མཐུ་རྩལ་དང་། །བདག་གི་ལྷག་བསམ་རྣམ་དག་བདེན་སྟོབས་ཀྱིས། །སྨོན་ལམ་གང་བཏབ་ཐོགས་མེད་འགྲུབ་པར་ཤོག །ཚེ་འདིར་ཡིད་ལ་ཅི་བསམ་འགྲུབ་པར་ཤོག །འཆི་ཁར་གནད་བཅོད་སྡུག་བསྔལ་མེད་པར་ཤོག །བར་དོ་འཁྲུལ་སྣང་འཇིགས་སྐྲག་བྲལ་བར་ཤོག །རང་རིག་འོད་གསལ་རང་ངོ་ཤེས་པར་ཤོག །སྐྱེ་མེད་ཆོས་སྐུ་མངོན་དུ་འགྱུར་བར་ཤོག །འགགས་མེད་གཟུགས་སྐུས་འགྲོ་བ་འདུལ་བར་ཤོག །ཐོགས་མེད་སྤྲུལ་སྐུས་གདུལ་བྱ་འདྲེན་པར་ཤོག །སྐུ་གསུམ་དབྱེར་མེད་འགྲོ་དོན་བྱེད་པར་ཤོག །བྱིན་རླབས་ཆར་འབེབས་བླ་མའི་བཀྲ་ཤིས་ཤོག །དངོས་གྲུབ་ཀུན་སྩོལ་ཡི་དམ་བཀྲ་ཤིས་ཤོག །བར་ཆད་
སེལ་མཛད་མཁའ་འགྲོའི་བཀྲ་ཤིས་ཤོག །བསྟན་སྲུང་ཆོས་སྐྱོངས་སྲུང་མའི་བཀྲ་ཤིས་ཤོག །ཕྱོགས་དུས་ཀུན་དུ་བཀྲ་ཤིས་བདེ་ལེགས་ཤོག །ཅེས་པ་འདི་ནོར་འཛིན་དབང་པོ་ས་བདག་གིས་བསྐུལ་ངོར་བཀོད་པའོ། །དཀོན་མཆོག་གསུམ་དང་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་བྱིན་རླབས་བདེན་མཐུ་ཡིས། །བཀའ་འགྱུར་རིན་པོ་ཆེ་བཞེངས་པའི་སྐབས་ཀྱི་མཇུག་རྒྱན་དགོས་ཅེས། བདག་གི་བསམ་པ་ཆོས་མཐུན་འགྲུབ་པ་དང་། །འགལ་རྐྱེན་བར་ཆད་ཞི་བར་མཛད་དུ་གསོལ། །འདི་ནས་བཟུང་སྟེ་བྱང་ཆུབ་མ་ཐོབ་པར། །ཆོས་མིན་བསམ་པ་རྒྱུད་ལ་མི་སྐྱེ་ཞིང་། །ལྷན་སྐྱེས་མ་རིག་མུན་པས་མི་སྒྲིབ་པར། །རང་རིག་གདོད་མའི་གནས་ལུགས་མངོན་གྱུར་ཤོག །ཕྱི་རོལ་བཟུང་བའི་ཡུལ་ཕྱིར་མི་འབྲེང་ཞིང་། །ནང་གི་འཛིན་པའི་སེམས་ཀྱིས་འཆིང་བྲལ་བས། །ཅིར་སྣང་ཁྱབ་གདལ་ཡེ་ཤེས་དཀྱིལ་འཁོར་ཆེར། །རང་གྲོལ་ལྷན་སྐྱེས་ཡེ་ཤེས་རྟོགས་པར་ཤོག །བསྒོམ་དུ་མེད་པའི་རང་
བྱུང་རིག་པའི་དོན། །ཡེངས་སུ་མེད་པའི་དྲན་པ་བཅོས་མིན་ཉིད། །ལྷུན་གྲུབ་རང་གསལ་དོན་གྱི་འོད་སྐུ་དང་། །དབྱེར་མེད་གདོད་མའི་མགོན་པོ་མཆོག་འགྲུབ་ཤོག །ཅེས་རྫོགས་ཆེན་ཡང་ཏི་ནག་པོ་དང་མཐུན་པའི་སྨོན་ལམ་ཞིག་དགོས་ཞེས། ཤཱཀྱ་དཔལ་འབྱོར་གྱིས་བསྐུལ་ངོར་བཀོད་པའོ། །སྲིད་གསུམ་ལྷ་མིའི་མཆོད་པའི་གནས་གཅིག་པུ། །སྟོན་པ་དམ་པའི་ཆོས་དང་འཕགས་པའི་ཚོགས། །མ་ལུས་འགྲོ་བའི་བླ་མ་སྲས་བཅས་ཀྱིས། །བདག་དང་མཁའ་མཉམ་འགྲོ་ཀུན་རྗེས་བཟུང་གསོལ། །བདག་གིས་འཁོར་འདས་དུས་གསུམ་བསགས་པའི་དགེ། །མཐའ་དག་ནམ་མཁའ་མཉམ་པའི་སེམས་ཅན་རྣམས། །བླ་མེད་བྱང་ཆུབ་རྒྱུ་རུ་ཡོངས་བསྔོ་བའི། །འབྲས་བུ་ཕན་བདེ་དཔག་མེད་འགྲུབ་པར་ཤོག །བདག་ཀྱང་འདི་བཟུང་སྐྱེ་བ་ཐམས་ཅད་དུ། །ཡོན་ཏན་བདུན་ལྡན་དཔལ་འབྱོར་རིན་ཆེན་དང་། །ཡིད་བཞིན་ནོར་འདྲའི་མཚན་ལྡན་བླ་མ་དང་། །དམ་ཆོས་འདོད་དགུའི་འབྱོར་བཅས་
ལྷུན་གྲུབ་ཤོག །སྡིག་སྤོང་དགེ་བ་བསྒྲུབ་ལ་བརྩོན་པ་དང་། །ཐོས་བསམ་སྒོམ་པའི་ཡོན་ཏན་མངོན་གྱུར་ཅིང་། །རང་གཞན་དོན་གཉིས་གེགས་མེད་ལྷུན་གྲུབ་པས། །རྣམ་མཁྱེན་རྫོགས་པའི་སངས་རྒྱས་མྱུར་ཐོབ་ཤོག །བདེ་གཤེགས་རྒྱལ་བའི་ཐུགས་རྗེའི་ནུས་མཐུ་དང་། །ཆོས་སྲུངས་དཀར་ཕྱོགས་སྐྱོང་བའི་སྟོབས་རྩལ་མཐུས། །བདག་གིས་རྣམ་དཀར་ལྷག་བསམ་བདེན་ཚིག་སོགས། །གཅིག་བསྡུས་སྨོན་ལམ་ཅི་བཏབ་འགྲུབ་གྱུར་ཅིག །ཅེས་པ་ནི་ཀརྨ་དགེ་བ་ལའོ། །རྒྱལ་ཀུན་ཡེ་ཤེས་དབྱིངས་སུ་རོ་གཅིག་པའི། །ཐུགས་རྗེ་རྨད་དུ་བྱུང་བའི་གོང་བུ་མཆོག །རབ་འབྱམས་གདུལ་བྱའི་དཔལ་དུ་ཆེར་འབར་བ། །བསྟན་པའི་ཉི་མ་འགྲོ་བློའི་མུན་སེལ་ཉིད། །ཟབ་ཡངས་ཐུགས་རྗེ་བྲི་གང་ལས་འདས་ཀྱང་། །སྙིགས་དུས་ལས་ཉོན་གྱིས་གདུང་འགྲོ་མང་འདིའི། །སྐྱབས་མཛད་ཁྱེད་ལས་གཞན་མེད་དེ་སླད་དུ། །བསྐལ་བརྒྱར་མི་འགྱུར་རྡོ་རྗེ་གདན་བཞུགས་ཤིང་། །མཆོག་གསང་ངེས་པ་དོན་གྱི་ཆོས་
འཁོར་ཆེར། །རྒྱུན་ཆད་མེད་པའི་ངོ་མཚར་ཕྲིན་ལས་ནི། །སྲིད་པ་ཇི་སྲིད་གནས་པར་ཡོངས་སྩོལ་བར། །གསོལ་བ་བཏབ་པ་དོན་ལྡན་འགྲུབ་གྱུར་ཅིག །ཅེས་པ་ནི། །མཚུངས་བྲལ་རིག་འཛིན་ཆེན་པོ་འཇའ་ཚོན་སྙིང་པོའི་དྲུང་དུ་བརྟན་བཞུགས་སུ་ཕུལ་བའོ། །བླ་མ་དང་ལྷག་པའི་ལྷ་མཆོག་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། ཨེ་མ། བདག་དང་མཁའ་མཉམ་མར་གྱུར་འགྲོ་བ་རྣམས། །འདི་ནས་བཟུང་སྟེ་བླ་མེད་བྱང་ཆུབ་བར། །ངན་སོང་གསུམ་དུ་ནམ་ཡང་མི་སྐྱེ་ཞིང་། །མཐོ་རིས་ཡོན་ཏན་བདུན་ལྡན་ཐོབ་པར་ཤོག །དལ་འབྱོར་བཅོ་བརྒྱད་ཚང་བའི་ལུས་ཐོབ་ནས། །མཚན་ཉིད་ཀུན་ལྡན་བླ་མ་རྙེད་པ་དང་། །དམ་ཚིག་ཉམས་ཆགས་དྲི་མས་མ་གོས་པར། །མཉེས་པ་གསུམ་གྱི་ཞབས་གཏོགས་བསྒྲུབ་པར་ཤོག །ཐེག་ཆེན་དམ་པའི་ཆོས་དང་མཇལ་བ་དང་། །
ཐོས་བསམ་སྒོམ་ལ་སྐྱོ་ངལ་མེད་པ་དང་། །བསྒྲུབ་ལ་རབ་བརྩོན་ཉམས་རྟོགས་མཐར་ཕྱིན་ནས། །རང་དོན་ཆོས་སྐུ་མངོན་དུ་འགྱུར་བར་ཤོག །དམ་ཆོས་སྒྲུབ་ལ་བར་ཆད་མེད་པ་དང་། །ལྷ་དང་བླ་མས་བྱིན་གྱིས་རློབས་པ་དང་། །མཁའ་འགྲོ་ཆོས་སྐྱོང་བུ་ལྟར་སྐྱོང་བ་ཡིས། །རྣམ་བཞིའི་ཕྲིན་ལས་རྩོལ་མེད་འགྲུབ་པར་ཤོག །གནས་སྐབས་མཐར་ཐུག་འགལ་རྐྱེན་མེད་པ་དང་། །ཆོས་མཐུན་འདོད་དགུ་ལྷུན་གྱི་གྲུབ་པ་དང་། །རླབས་ཆེན་གཞན་དོན་འབད་མེད་འབྱུང་བ་ཡི། །འགྲོ་འདུལ་སྤྲུལ་པ་མཐའ་ཡས་འགྱེད་པར་ཤོག །གདོད་ནས་དག་པ་ཆེན་པོ་གཞི་ཡི་དབྱིངས། །རིམ་གཉིས་བདེ་སྟོང་གསལ་རིག་ལམ་གྱི་མཆོག །ཟུང་འཇུག་ཡེ་ཤེས་ལྷུན་གྲུབ་འབྲས་བུ་ཆེར། །འཁྲུལ་བྲལ་འགྱུར་མེད་གཏན་སྲིད་ཟིན་པར་ཤོག །རིག་སྟོང་སྤྲོས་པ་བྲལ་བ་ཕྱག་རྒྱ་ཆེ། །འོད་གསལ་མངོན་སུམ་ཡེ་ཤེས་རྫོགས་
ཆེན་གནད། །དབྱེར་མེད་ཡེངས་འཛིན་ཞེན་བྲལ་སྙིང་པོའི་དོན། །མ་ནོར་མངོན་གྱུར་ཚེ་གཅིག་སངས་རྒྱས་ཤོག །ཚེ་འདིའི་སྣང་བས་གཡེང་བ་ཡོང་བ་དང་། །བར་དོ་རང་སྣང་འཁྲུལ་པས་མ་སླད་ཅིང་། །ནམ་ཡང་གདམས་པའི་གནད་དང་མི་འབྲལ་བར། །སྐུ་གསུམ་གོ་འཕངས་ཡང་དག་ཐོབ་པར་ཤོག །བླ་མའི་བྱིན་རླབས་རྒྱུད་ལ་འཇུག་པར་ཤོག །རང་དོན་ཚེ་གཅིག་སངས་རྒྱས་འགྲུབ་པར་ཤོག །གཞན་དོན་འཁོར་བ་དོང་ནས་སྤྲུག་པར་ཤོག །རྒྱལ་ཀུན་ཕྲིན་ལས་བདག་གི་འགྲུབ་པར་ཤོག །སྨོན་ལམ་བཏབ་པ་མཐའ་དག་འགྲུབ་པར་ཤོག །ཅེས་པའི་སྨོན་ལམ་འདི་ནི། ཆོས་དབྱིངས་དཔལ་མོ་དང་བྱང་ཆུབ་མཚོ་མོ་གྲོགས་མཆེད་གཉིས་ཀྱི་བསྐུལ་ངོར་བྲིས་པའོ། ཨོཾ་སྭ་སྟི། བླ་མ་རྒྱལ་བ་ཀུན་བདག་ཉིད། །ཐུགས་རྗེའི་སྤྲུལ་འཁོར་བཅས་པ་ཡིས། །བདག་དང་མཁའ་ཁྱབ་འགྲོ་ཀུན་ལ། །རྗེས་གཟུང་བྱིན་གྱིས་བརླབ་ཏུ་གསོལ། །འདི་ནས་བྱང་ཆུབ་མ་ཐོབ་བར། །དལ་འབྱོར་རིན་ཆེན་ཕུན་ཚོགས་
ཐོབ། །བླ་མ་རྗེ་དང་ཡེ་འབྲལ་ཞིང་། །རྡོ་རྗེ་ཐེག་ལ་སྤྱོད་པར་ཤོག །དམ་ཆོས་ཚུལ་བཞིན་སྤྱད་ནས་ཀྱང་། །ལོག་པའི་ལམ་དུ་མི་འཇུག་ཅིང་། །ཆོས་མཐུན་འདོད་དགུ་ཕུན་ཚོགས་ནས། །རྩེ་གཅིག་བསྒྲུབ་ལ་བརྩོན་པར་ཤོག །སྒྲུབ་པའི་བར་ཆད་འགལ་རྐྱེན་རིགས། །ཅུང་ཟད་ཙམ་ཡང་མི་འབྱུང་ཞིང་། །ཉམས་རྟོགས་ཡོན་ཏན་མཐར་ཕྱིན་ཏེ། །མཆོག་མཐུན་དངོས་གྲུབ་ཐོབ་པར་ཤོག །ལམ་རྟགས་བཟང་ངན་འཆར་སྒོ་ལ། །ཞེན་འཛིན་རྟོག་པས་མ་སླད་ཅིང་། །ཡེངས་འཁྲུལ་བཅོས་མའི་དྲི་བྲལ་བའི། །གནས་ལུགས་ཆོས་སྐུ་མངོན་གྱུར་ཤོག །རང་དོན་ཆོས་ཉིད་མཐར་ཕྱིན་ནས། །གཞན་དོན་གཟུགས་སྐུའི་རོལ་གར་གྱིས། །གང་འདུལ་སྤྲུལ་སྐུའི་ཕྲིན་ལས་ཆོག །སྲིད་པ་ཇི་སྲིད་ཁྱབ་མཛད་ཤོག །ཅེས་པ་འདི་ཡང་བྱང་ཆུབ་མཚོ་མོ་ལའོ། །སྐྱབས་གནས་བསླུ་མེད་དཀོན་མཆོག་རྣམ་གསུམ་དང་། །བླ་མ་རྒྱལ་
བ་སྲས་བཅས་བདེན་མཐུ་ཡིས། །བདག་སོགས་སྐྱེ་བ་འདི་ནས་ཚེ་རབས་ཀུན། །དལ་འབྱོར་དམ་ཆོས་ལྡན་པའི་ལུས་ཐོབ་ཤོག །ཐེག་ཆེན་བསྟན་པ་དར་བའི་ཡུལ་དུ་སྐྱེས། །མཐོ་རིས་ཡོན་ཏན་བདུན་གྱི་དཔལ་འབྱོར་ལྡན། །སངས་རྒྱས་དངོས་མཚུངས་བླ་མས་རྗེས་སུ་བཟུང་། །ལོག་པའི་སྤྱོད་སྤོངས་དགེ་བ་བསྒྲུབ་བརྩོན་ཅིང་། །དམ་ཆོས་དྲི་མ་མེད་ལ་མོས་འཇུག་ཤོག །དོན་མེད་འཁྲུལ་པའི་ལས་ལ་མི་འབྱམས་པར། །ཐར་པ་བྱང་ཆུབ་བསྒྲུབ་ལ་མྱུར་གཞོལ་ཤོག །སྡུག་བསྔལ་འཁོར་བའི་ཀློང་དུ་མི་འཁྱམས་ཤིང་། །གཏན་བདེ་ངེས་ལེགས་ལམ་ལ་གོམས་ཐོབ་ཤོག །མ་ནོར་ཟབ་མོའི་གདམས་པ་ཉམས་བླངས་ཏེ། །ཚེ་གཅིག་རྣམ་མཁྱེན་སངས་རྒྱས་འགྲུབ་པར་ཤོག །སྤྲུལ་པ་རྒྱ་མཚོ་གང་འདུལ་ཕྲིན་ལས་ཀྱིས། །མཁའ་མཉམ་འགྲོ་ལ་ཐུགས་རྗེས་འདྲེན་པར་ཤོག །རྒྱལ་བ་སྲས་བཅས་ཀུན་གྱིས་
ལེགས་གསུངས་པའི། །སྨོན་ལམ་མཐའ་དག་བདག་གི་འགྲུབ་པར་ཤོག །ཅེས་པ་འདི་ནི་ཀུན་དགའ་ལྷ་དབང་ལའོ། །ཨེ་མ། བསླུ་བ་མེད་པའི་སྐྱབས་གནས་དཀོན་མཆོག་ཚོགས། །མ་ལུས་ཅིག་བསྡུས་བླ་མ་རིགས་ཀྱི་བདག །བྱིན་རླབས་ཐུགས་རྗེ་ནུས་རྩལ་རྨད་བྱུང་བས། །བདག་གི་སྨོན་ལམ་གེགས་མེད་འགྲུབ་པར་མཛོད། ༡ །སྐྱེ་བ་གྲངས་མེད་ད་ལྟ་ཡན་ཆོད་ཀྱི། །དྲི་མེད་རྣམ་དཀར་དགེ་ཚོགས་མཐའ་དག་དང་། །རིམ་གཉིས་ཟབ་གསལ་དོན་མཆོག་གང་བསྒོམ་པའི། །འབྲས་བུ་ཇི་སྙེད་ཡོད་པའི་མཐུ་བྱིན་དང་། ༢ །ཚེ་འདིར་རྣམ་འདྲེན་མཆོག་གི་སྐུ་དྲིན་གྱིས། །རང་བྱུང་ཡེ་ཤེས་རང་ཞལ་བལྟ་བ་དང་། །ཐེག་པའི་རྩེ་རྒྱལ་རྫོགས་པ་ཆེན་པོའི་དོན། །མ་ནོར་མངོན་སུམ་གནད་ལ་གང་སྤྱོད་པའི། ༣ །ཉམས་ལེན་བགྱིས་དང་བགྱིད་འགྱུར་ཀུན་ཏུ་ཡང་། །ཆོས་བརྒྱད་ཚེ་འདིའི་སྒྲོག་གིས་དམ་ཅིང་ཞིང་། །ཞེན་འཛིན་ལྷ་བུའི་
བདུད་ཀྱིས་མ་སླད་པར། །སྐུ་གསུམ་དོན་གྱི་ཞིང་ཁམས་མཐོང་བར་ཤོག ༤ །མ་དག་འཁྲུལ་པའི་སྒྱུ་མས་མ་བསླུད་ཤིང་། །ལོག་རྟོགས་མཚན་འཛིན་སྒྱུ་ལུས་གཟུགས་ཕུང་འདི། །ཡང་དག་འོད་གསལ་སྒྱུ་མ་འཇའ་སྐུར་གྲོལ། །ཡེ་ཤེས་སྒྱུ་མའི་འཕྲུལ་གྱི་འགྲོ་གྲོལ་ཤོག ༥ །གལ་ཏེ་ཚེ་འདིར་འོད་ལུས་མ་འགྲུབ་པར། །རྣམ་སྨིན་གདོས་བཅས་འདོར་བ་དེ་ཡི་ཚེ། །འབྱུང་ལྔའི་ཕུང་པོ་ཆགས་གནས་འཇིག་པའི་ཚུལ། །གནད་དོན་ཤེས་པས་མི་འཚོར་བྲོད་འགྱུར་ཤོག ༦ །ལས་རླུང་ལོག་པས་འཁོར་ལྔའི་མདུད་པ་འཇིག །མཉམ་གནས་འཆུག་པས་དྲོད་ཉམས་ཟས་མི་ལེན། །སྲོག་འཛིན་ལོག་པས་ཤེས་པ་མི་གསལ་དང་། །ཐུར་བསེལ་འཆུགས་པས་རྩ་ཆུ་མི་སྡོལ་ཆོར། ༧ །གྱེན་རྒྱུ་འཆུགས་པས་ཁ་ཟས་ནང་མི་འཕུལ། །ཁྱབ་བྱེད་འཆུགས་པས་
ཡན་ལག་ལས་མི་རུང་། །དབུགས་ཐུགས་རྩ་བརྟུལ་མལ་མཐར་ཉལ་བའི་ཚེ། །འདི་ནང་ཆགས་སྡང་སྲེད་ཞེན་མི་འབྱུང་ཤོག ༨ །ལྡེ་འཁོར་འཇིགས་པས་ས་ཁམས་ཆུར་ཐིམ་དུས། །ཕྱི་རྟགས་ལུས་ལྕི་ནང་རྟག་ཤེས་པ་བྱིང་། །གསང་རྟགས་འོད་གསལ་སྨིག་རྒྱུ་འཆར་བའི་ཚེ། །སྙིང་གར་བླ་མ་ཆོས་སྐུར་སེམས་ཟིན་ཤོག ༩ སྙིང་གའི་འཁོར་འཇིག་ཆུ་ཁམས་མེར་ཐིམ་དུས། །ཕྱི་རུ་ཁ་སྣ་སྐམ་ཞིང་ནང་རྟགས་སུ། །ཤེས་པ་རབ་འཚུབས་གསང་རྟག་དུ་བ་འཆར། །ལྟེ་བར་བླ་མ་བསྒོམ་ལས་མ་ཡེངས་ཤོག ༡༠ །མགྲིན་པའི་འཁོར་འཇིག་མེ་ཁམས་རླུང་ཐིམ་ཚེ། །ཕྱི་རུ་དྲོད་འཆོར་ནང་དུ་ཤེས་པ་འཁྲུལ། །མི་ངོ་མི་ཤེས་གསང་རྟགས་མེ་ཁྱེར་འཆར། །བླ་མ་དཔྲལ་བར་བསྒོམ་ཞིང་མི་འཁྲུལ་ཤོག ༡༡ །གསང་གནས་འཁོར་འཇིག་རླུང་ཁམས་རྣམ་ཤེས་ཐིམ། །ཕྱི་རྟགས་དབུགས་བརྩེར་ནང་རྟགས་མཐོང་སྣང་
མང་། །གསང་རྟགས་སྒྲོན་མེ་ལྟ་བུའི་འོད་གསལ་འཆར། །གསང་གནས་བླ་མ་ལོངས་སྐུར་ངོ་ཤེས་ཤོག ༡༢ །དབང་པོ་ལྔ་འགགས་རྣམ་ཤེས་ནམ་མཁར་ཐིམ། །སྲོག་རྩར་ཁྲག་འདུས་སྙིང་ཕོག་ཕྱི་དབུགས་ཆད། །དཀར་དམར་ཁམས་ཀྱི་གནས་འཕོས་དབུ་མར་བརྒྱུད། །དཀར་ལམ་དམར་ལམ་ཤར་བ་ངོས་ཟིན་ཤོག ༡༣ །བྱང་སེམས་གཉིས་ཕྲད་བར་དུ་རྣམ་ཤེས་འཐུམ། །ནག་ལམ་འཆར་ཞིང་རང་བཞིན་བྱད་ཅུ་འགགས། །ནམ་མཁའ་འོད་གསལ་ལ་ཐིམ་སྤྲིན་མེད་མཁའ། །ཇི་བཞིན་འོད་གསལ་ཆོས་སྐུར་གྲོལ་བར་ཤོག ༡༤ །གལ་ཏེ་ངང་དེར་གྲོལ་བར་མ་ནུས་ཀྱང་། །ནང་དབུགས་ཆད་ཚེ་རིགས་པ་སྐར་མདའ་ལྟར། །ཚངས་པའི་ལམ་བརྒྱུད་བླ་མའི་ཐུགས་ཀར་ཐིམ། །མྱུར་ལམ་འཕོ་བས་མཁའ་སྤྱོད་བསྒྲོད་པར་ཤོག ༡༥ ཅི་སྟེ་ཆོས་ཉིད་བར་དོ་མཐོང་ན་ཡང་། །འོད་གསལ་ཟུང་འཇུག་ལ་ཐིམ་སྒྲ་འོད་ཟེར། །ཞི་དང་
ཁྲོ་ཚོགས་འཇིག་རྟེན་ཁམས་གང་ཞིང་། །སྣང་སྲིད་འོད་སྐུར་འཆར་བ་ངོ་ཤེས་ཤོག ༡༦ །རིགས་ལྔ་འཁོར་བཅས་ཚོམ་བུའི་དཀྱིལ་འཁོར་དང་། །རང་ལུས་འོད་དུ་སྣང་བའི་ཐུགས་ཀའི་བར། །ཟེར་ཐག་འབྲེལ་ཤར་རང་བཞིན་བསམ་གཏན་གནས། །འཇུག་པ་ཤེས་པའི་གནད་ཀྱིས་གྲོལ་བར་ཤོག ༡༧ །ཡེ་ཤེས་བཞི་སྦྱོར་འོད་ལམ་ཤར་བ་ན། །ངོ་ཤེས་གདེང་ཐོབ་བཙན་ས་ཟིན་པ་དང་། །ལྷུན་གྲུབ་རིན་ཆེན་སྣང་བ་འཆར་གྱུར་ཀྱང་། །མངོན་ཤེས་དྲུག་དང་རྗེས་དྲན་དྲུག་ལ་སོགས། ༡༨ །ཆོས་རྣམས་ཀུན་ལས་རང་བྱན་ལེགས་ཚུད་ཅིང་། །འཆར་ལུགས་བརྒྱད་སོགས་གནད་དོན་ཁོང་ཆུད་དེ། །མ་དག་འཁོར་བའི་སྒོ་ལ་མི་འཇུག་པར། །དག་པ་ཡེ་ཤེས་སྒོ་ལ་གདེང་ཐོབ་ཤོག ༡༩ །ཅེས་ཀྱང་བག་ཆགས་འཁྲུལ་དབང་སོང་ཚེ་ཡང་། །སྲིད་པ་བར་དོར་ཉིད་མཚམས་མི་སྦྱོར་བར། །རྔ་ཡབ་པདྨ་འོད་ཀྱི་ཞིང་ཁམས་སུ། །པདྨའི་སྦུབས་ལས་སྐྱེས་ཤིང་ཆོས་ཉན་ཤོག ༢༠ །
རིགས་ལྔ་ལ་སོགས་ཕྱོགས་བཅུའི་སངས་རྒྱས་ཀུན། །གཅིག་བསྡུས་ཁྱབ་བདག་རྒྱལ་དབང་པདྨ་ཡིས། །དབང་བསྐུར་ལུང་བསྟན་དབུགས་དབྱུང་བཟེང་བསྟོད་དེ། །མངོན་པར་སངས་རྒྱས་སྤྲུལ་པ་འགྱེད་ནུས་ཤོག ༢༡ །ནམ་མཁའ་ཇི་སྲིད་གནས་པར་འགྲོ་བའི་དོན། །དཔག་མེད་ལྷུན་གྱི་གྲུབ་པ་འབྱུང་བ་རུ། །སྨོན་ལམ་བཏབས་པ་འདི་ཞིན་ལེགས་འགྲུབ་པར། །སྲས་བཅས་རྒྱལ་བ་རྣམས་ཀྱིས་མཛད་དུ་གསོལ། ༢༢ ཅེས་བར་དོ་ཐམས་ཅད་ཀྱི་སྨོན་ལམ་མདོར་བསྡུས་ཏེ་ཉམས་ལེན་གྱི་རྩ་ཚིག་ལྟ་བུར་བཀོད་པ་འདི་ཡང་སྐལ་ལྡན་ཚུལ་ཁྲིམས་བཟང་པོས་བསྐུལ་ནས་བྲིས་པ་ལགས་ཤིང་། འདི་ནི་ཀུན་ལ་སྤྱིར་ཡང་གལ་ཆེ་ལ་ཁྱད་པར་ཡང་ཉམས་ཁྲིད་དང་བར་དོའི་གདམས་པ་ཞུ་མྱོང་བའི་གང་ཟག་རྣམས་སྨོན་ལམ་འདི་རྒྱུན་དུ་ཡིད་ལ་འགྲིས་ཤིང་ངེས་པར་བྱས་ན། འཆི་ཁར་ངོ་སྤྲོད་གསལ་འདེབས་གཞན་ལ་རེ་མི་དགོས་པ་ཡོད་པས་ཅེས་ཀྱང་ནན་ཏན་དུ་མཛད་ཚལ། ཨོཾ་སྭ་སྟི་སིདྡྷཾ།
མཐའ་ཡས་ཐུགས་རྗེ་མངའ་བའི་བཅོམ་ལྡན་འདས། །སྲས་བཅས་རྒྱལ་བའི་ཁྱབ་བདག་བླ་མ་རྗེ། །རྣམ་འཕྲུལ་ཡི་དམ་མཁའ་འགྲོ་ཆོས་སྲུངས་ཚོགས། །མ་ལུས་ཉམས་ཐག་འགྲོ་བ་སྐྱབས་ཏུ་གསོལ། །ཐོག་མེད་དུས་ནས་ངན་གོམས་འཁྲུལ་རྟོག་གིས། །རབ་བསྐྱོད་མི་བཟད་འཁོར་བའི་མཚོ་ཆེན་འདིར། །སྡུག་བསྔལ་རྣམ་པ་མང་པོས་རྟག་གཟིར་བའི། །འགྲོ་ཀུན་ཐར་པའི་ལམ་ལ་འཇུག་གྱུར་ཅིག །བསྟན་རྩ་སྡེ་སྣོད་གསུམ་གྱི་གསེར་བཞི་བརྟན། །ཐེག་ཆེན་བྱང་ཆུབ་སེམས་ཀྱི་ལྷུན་པོ་བརྗིད། །བླ་མེད་རིམ་གཉིས་ཉི་ཟླ་འོད་གསལ་འབར། །རྣམ་གྲོལ་བྱང་ཆུབ་གླིང་ལ་དབང་འབྱོར་ཤོག །གསུང་རབ་རིན་ཆེན་གླིང་དུ་བདེ་བླག་བགྲོད། །རྣམ་འདྲེན་དེད་དཔོན་དམ་པ་གཙུག་ཏུ་བསྟེན། །འདོད་འབྱུང་ཡིད་བཞིན་ཆོས་ལ་རང་དབང་བསྒྱུར། །དོན་གཉིས་འབྲས་བུའི་མཆོག་འགྲུབ་གེགས་མེད་ཤོག །གདོད་ནས་
དག་པ་ཆོས་སྐུའི་གཏན་སྲིད་ཟིན། །འགག་མེད་གསལ་གདངས་ལོངས་སྐུའི་ཞིང་ཁམས་རྒྱས། །རྣམ་རོལ་སྤྲུལ་སྐུའི་རྩལ་གྱིས་འགྲོ་བ་འདྲེན། །ཟུང་འཇུག་འདུས་མ་བྱས་དབྱིངས་གྲོལ་བར་ཤོག །ཅེས་པ་ནི། དགེ་སློང་ཀརྨ་ཡོངས་དག་ལའོ། །སྐྱབས་གནས་དཀོན་མཆོག་མ་ལུས་བླ་མའི་སྐུར། །གཅིག་བསྡུས་མོས་གུས་གདུང་ཤུགས་དྲག་པོ་ཡིས། །གསོལ་བ་འདེབས་སོ་ཐུགས་རྗེས་མྱུར་གཟིགས་ནས། །འཇིགས་བར་དོའི་འཕྲང་ལས་སྐྱབས་ཏུ་གསོལ། །འདུས་བྱས་མི་རྟག་རང་ཚུལ་མངོན་སུམ་བསྟན། །སྐྱེས་པའི་མཐའ་དེ་འཆི་བར་ཐག་ཆོད་ཅིང་། །གདོས་བྱས་སྒྱུ་མའི་ལུས་ཀྱི་རྟག་མི་ཐུབ། །བརྩེ་བའི་སྤྱན་གྱིས་གཟིགས་ཤིག་བླ་མ་རྗེ། །ཚེ་ཡི་ཚད་རྫོགས་འབྱུང་བཞིའི་ནུས་པ་ཉམས། །སྨན་གྱི་མི་ཕན་ཟས་སྐོམ་དང་ཁ་འགྲིབ། །ལུས་སེམས་འབྲལ་བའི་དུས་ལ་བབས་པ་ན། །ཚེ་འདི་ཆགས་ཞེན་བྲལ་བར་བྱིན་གྱིས་རློབས།
། ནམ་ཀྱང་མི་སྡོད་ཤི་བར་ཐག་ཆོད་ལ། །ད་རུང་གསོན་དུ་རེ་བའི་འདོད་བློ་ཡིས། །རང་མགོ་རང་གི་བསྐོར་ན་འཕུང་ཚབས་ཆེ། །འཆི་བ་ལམ་དུ་ལྷོངས་པར་བྱིན་གྱིས་རློབས། །ལས་རླུང་འཁྲུག་པའི་སྟོབས་ཀྱི་རང་ལུས་འདིའི། །སྤྱི་མགྲིན་སྙིང་ཁ་ལྟེ་བ་གསང་གནས་ཀྱི། །འཁོར་ལོ་ལྔ་ཡི་རྩ་མདུད་འཇིག་པའི་མཐུས། །གནད་གཅོད་ཟུག་ངུ་རང་སར་ཞི་བར་ཤོག །འཕོ་བའི་མེ་ཉམས་རླུང་འཆུགས་ཟས་མི་ལེན། །སྲོག་འཛིན་རླུང་འཆུགས་ཤེས་པ་མི་གསལ་དང་། །ཐུར་སེལ་རླུང་འཆུགས་དྲི་མ་ཆེ་ཆུང་འཆོར། །རླུང་ནུས་ཉམས་པའི་རྟགས་སུ་ངོ་ཤེས་ཤོག །གྱེན་རྒྱུའི་རླུང་འཆུགས་ཟས་སྐོམ་མིད་མི་ཐུབ། །གཏམ་གྱི་སྨྲ་བརྗོད་དཀའ་ཞིང་དབུགས་སྣ་ཐུང་། །ཁྱབ་བྱེད་རླུང་གི་ནུས་ཟད་འགུལ་སྐྱོད་དཀའ། །དེ་ཚེ་འཆི་བར་ཐག་ཆོད་འགྱོད་མེད་ཤོག །གདོས་བཅས་ལུས་འདི་དང་པོ་འབྱུང་བཞིས་བསྐྱེད། །མཐར་ཡང་
འབྱུང་བཞི་གཅིག་ལ་གཅིག་ཐིམ་འཆི། །ཕྱི་ནང་གསང་བའི་རྟགས་སྣང་འཆར་བ་རྣམས། །ངོ་ཤེས་བླ་མ་ཡིད་ལ་དྲན་པར་ཤོག །ས་ཁམས་ཆུར་ཐིམ་ལུས་ཀྱི་ནུས་སྟོབས་ཟད། །ནང་གི་རྟགས་སུ་ཤེས་པ་བྱིང་ཞིང་རྨོངས། །གསང་རྟག་མཐོང་སྣང་མིག་རྒྱུ་ལྟ་བུ་འཆར། །དེར་ཡང་བླ་མ་དྲན་ལས་མ་ཡེངས་ཤོག །ཆུ་ཁམས་མེ་ལ་ཐིམ་པས་ཁ་སྣའི་ཆུ། །ཅུང་ཞིག་ཐོན་ཏེ་སྐོམས་ཤིང་སྨྲ་བརྗོད་འགགས། །ཤེས་པ་འཚུབ་ཅིང་གསང་རྟགས་དུ་བ་ལྟར། །བན་བུན་ལང་ལོང་འཆར་བ་ངོ་ཤེས་ཤོག །མེ་ཁམས་རླུང་ལ་ཐིམ་པས་ལུས་དྲོད་ཆད། །ནང་རྟགས་མི་ངོ་མི་ཤེས་དབང་པོ་འཁྲུལ། །གསང་རྟགས་སྲིན་བུ་མི་ཁྱེར་ལྟ་བུའི་སེམས། །རེས་གསལ་རེས་མི་གསལ་འགྱུར་ངོ་ཤེས་ཤོག །རླུང་ཁམས་རྣམ་ཤེས་ལ་ཐིམ་ཕྱི་དབུགས་ཆད། །ནང་རྟག་འཁྲུལ་པའི་མཐོང་སྣང་སྣ་ཚོགས་འཆར། །གསང་རྟགས་སྒྲོན་མེ་འབར་ལྟར་རིག་
པ་གསལ། །དེ་དུས་ཟབ་ལམ་འཕོ་བ་དྲན་པར་ཤོག །རྣམ་ཤེས་ནམ་མཁའི་ཁམས་ཐིམ་ཚོགས་དྲུག་འགགས། །སྤྱི་བོའི་དཀར་ཆ་ཐུར་དུ་བབས་པ་དང་། །ལྟེ་བའི་དམར་ཆ་གྱེན་དུ་ལྡོག་པའི་བར། །རྣམ་པར་ཤེས་པ་འཐུམ་པ་ངོ་ཤེས་ཤོག ཁམས་གཉིས་གྱེན་འཐུར་འཕོས་པའི་རྒྱུ་རྐྱེན་གྱིས། །རང་སྣང་དཀར་ལམ་དམར་ལམ་ནག་ཐོམ་འཆར། །དུག་གསུམ་རང་བཞིན་རྟོགས་པ་བརྒྱད་ཅུ་འགགས། །སྣང་མཆེད་ཐོབ་པའི་འོད་དུ་ངོ་ཤེས་ཤོག །དཀར་དམར་རླུང་སེམས་དབུ་མར་གནས་པའི་མཐུས། །གདོད་ནས་དག་པའི་བདེར་གཤེགས་སྙིང་པོ་ཉིད། །ལྷད་མེད་གཞི་ཡི་འོད་གསལ་ཆོས་ཀྱི་སྐུ། །རང་ལ་མངོན་སུམ་འཆར་བ་ངོ་ཤེས་ཤོག །དེ་ཉིད་སྒོམ་གྱིས་སྟོབས་ཞན་མ་གྲོལ་ན། །ནང་དབུགས་ཆད་ནས་ཆོས་ཉིད་བར་དོ་ཤར། །ལུས་སེམས་བྲལ་ནས་སྒྲ་འོད་ཟེར་གསུམ་གྱིས། །སྟོང་ཁམས་ཁྱབ་པ་རང་སྣང་ཡིན་ཤེས་ཤོག །འཇའ་འོད་ཐིག་ཕྲན་འོད་ལམ་དང་། །ཞི་དང་ཁྲོ་བའི་ལྷ་ཚོགས་ཅི་
ཤར་ཀུན། །ཆོས་ཉིད་རང་སྒྲར་བཅས་ལ་མི་སྐྲག་པར། །རང་རིག་ཆོས་ཉིད་ཡེ་ཤེས་ངོ་ཤེས་ཤོག །གལ་ཏེ་ལས་ཉོན་སྒྲིབ་པས་མ་གྲོལ་ན། །སྲིད་པ་བར་དོའི་འཇིགས་པའི་སྒྲ་བཞི་དང་། །མ་ངེས་རྟགས་དྲུག་ཡ་ངའི་གཡང་གསུམ་སོགས། །ཐམས་ཅད་བདེན་མེད་སྒྱུ་མར་ཤེས་པར་ཤོག །ཤི་བར་ངོ་ཤེས་བླ་མ་སྙིང་ནས་དྲན། །དེས་གསུངས་གདམས་པའི་གནད་ལ་ངེས་པ་བརྙེད། །མ་དག་འཁོར་བའི་མངལ་སྒོ་མི་འཚོལ་བར། །པདྨ་འོད་ཀྱི་ཞིང་དུ་འཕོ་བར་ཤོག །མདོར་ན་དུས་དང་རྣམ་པ་དེ་ཀུན་ཏུ། །ཅི་དྲག་བློ་སྣ་མང་པོས་འཕུང་འགྱུར་བས། །རྩ་བའི་བླ་མ་ཨོ་རྒྱན་དབྱེར་མེད་ལ། །སྐད་ཅིག་ཙམ་ཡང་མ་ཡེངས་བློ་གཏད་ཤོག །བླ་མའི་ཐུགས་དང་རང་སེམས་དབྱེར་མེད་འདྲེས། །རང་རིག་ཆོས་སྐུའི་གཏན་སྲིད་ཟིན་ནས་ཀྱང་། །སྨོན་ལམ་ཐུགས་རྗེའི་སྤྲུལ་པས་མཁའ་
མཉམ་གྱི། །སེམས་ཅན་བྱང་ཆུབ་མཆོག་ལ་འགོད་པར་ཤོག །ཅེས་འཆི་ཁ་བར་དོའི་གདམས་ངག་ངག་འདོན་འདི་ནི་དབོན་པོ་རྟ་མགྲིན་རྡོ་རྗེ་དང་སྨིན་གྲོལ་སྙིང་པོ་སོགས་ཀྱི་ངོར་བཀོད་པ་ཡིན་ལ། འདི་ཡང་རྒྱུན་དུ་བློ་ལ་འཇགས་པ་ཅིག་མེད་ན། ཤི་ཁར་གདམས་ངག་དེས་ལ་ལུས་ཏེ། རང་ལ་ཕན་པ་མི་འབྱུང་བས། དེ་ཕྱིར་རྒྱུན་འཁྱེར་དུ་བྱ་ཕྱིར་གསོལ་འདེབས་སྨོན་ལམ་གྱི་ཚུལ་དུ་བྱས་པ་ཡིན་ལ། འདི་ཉིད་ཚིག་ངུར་བསྡོམས་པའི་བཤིས་ཀྱིས་གོ་དཀའ་ན་སྤྱིར་ཐོས་གྲོལ་ཆེན་མོའི་བར་དོ་གསལ་འདེབས་དང་ཁྱད་པར་ཁོ་བོས་བྱས་པའི་བར་དོའི་སྤྱི་དོན་དྲན་པའི་མེ་ལོང་དུ་གསལ་བར་བཀོད་པ་གཟིགས་འཚལ། ཞེས་བྱ་བྲལ་སྣ་ཚོགས་རང་གྲོལ་གྱིས་དཔལ་རིའི་རྒོད་ཕུག་མྱ་ངན་མེད་པའི་ནགས་ཁྲོད་དུ་བྲིས་པའོ།། ༈ །།རྒྱལ་ཀུན་ཡེ་ཤེས་ཐུགས་རྗེ་ཅིག་བཟླུམ་པ། །པད་འབྱུང་འཛམ་གླིང་གྲགས་དང་རཏྣའི་ཞབས། །འཇའ་ཚོན་བཟང་པོ་རྡོ་རྗེ་ལེགས་གྲུབ་བསྩལ། །སྐྱབས་གནས་བླ་མེད་ཐུགས་རྗེ་ནུས་མཐུ་ཡིས། །འདི་གཟུང་སྐྱེ་བའི་
ལུག་བརྒྱུད་ཇི་སྙེད་པར། །ཆོས་ཀུན་སྙིང་པོ་ཕྱག་རྒྱ་ཆེན་པོ་དང་། །དམ་ཆོས་འདུལ་བའི་ཀུན་སྤྱོད་ཟུང་འཇུག་ཉིད། །རང་བློའི་མཐའ་རྒོད་འདུལ་སྦྱོང་ཐོག་ཏུ་འཁེལ། །ལྟ་སྤྱོད་རྣམ་དག་འབྲེལ་བས་རྟན་སྲོག་ཟིན། །སྨོན་ལམ་བྱང་སེམས་ནུས་པས་འགྲོ་དོན་འགྲུབ། །དྲི་མེད་རྒྱལ་སྲས་སྤྱོད་པ་བརླབས་ཆེན་ལ། །རང་གཞན་བདེ་བླག་འཁོད་པ་ཉིད་གྱུར་ཅིག །ཅེས་རིག་འཛིན་ཆོས་ཉིད་ཀློང་གྲོལ་གྱིས་ཐུགས་བཞེད་བསྐོང་ཕྱིར། བྱ་བྲལ་སྣ་ཚོགས་རང་གྲོལ་གྱིས་རྒོད་ཕུག་ནས་ཕུལ་བ་མངྒ་ལཾ། ན་མོ། སྐྱབས་གནས་དཀོན་མཆོག་ཐུགས་རྗེའི་བདག་ཉིད་རྣམས། །བརྩེ་བ་ཆེན་པོས་བདག་ལ་དགོངས་སུ་གསོལ། །བདག་གི་ལྷག་བསམ་དག་པའི་སྨོན་ལམ་འདི། །གེགས་མེད་ཁོ་ནར་འགྲུབ་པར་བྱིན་གྱིས་རློབས། །འཁོར་བ་ སྔོ་སྨོན་གྱི་རྒྱུ་ངོས་བཟུང་བ། ཐོག་མ་ ཐོག་མར་དགོངས་གསོལ་ མེད་ནས་
ད་ལྟའི་བར། །སླད་མར་བྱང་ཆུབ་སྙིང་པོར་མཆིས་ཀྱི་རིང་། །འདུས་བྱས་འདུས་མ་བྱས་པའི་དགེ་རྩ་ཀུན། །གཅིག་བསྡོམས་སྨོན་ལམ་འགྲུབ་པའི་རྒྱུར་བསྔོའོ། །དེང་ནས་བཟུངས་ཏེ་ཚེ་རབས་ནམ་དུ་ཡང་། ཕུན་ཚོགས་དལ་ སྔར་བསགས་ ད་ལྟ་བསག་པ་ ཕྱི་གསོག་འགྱུར་ཐམས་ཅད་ འབྱོར་ཐོབ་པས་དོན་ལྡན་བསྒྲུབ། ལམ་རིམ་ལས་དང་པོར་སྐྱེས་བུ་ཆུང་ངུའི་སྐབས་ཀྱི་སྨོན་ལམ། དལ་འབྱོར་རྙེད་དཀའ་བསམ། འདུས་བྱས་མི་རྟག་གོ་བས་ངེས་འབྱུང་སྐྱེས། །དམ་ཆོས་ཕྱི་བཤོལ་མེད་པར་བརྩོན་པར་ཤོག །འཁོར་བའི་རང་འཚང་རིག་པས་ཞེན་པ་ལྡོག །ཚེ་མི་རྟག་པ་བསམ་པ་ རྒྱུ་འབྲས་རྟེན་ ཆོས་ལ་བསྐུལ་བ་ འབྲེལ་ཤེས་པས་བླང་དོར་བརྩོན། འཁོར་བའི་སྡུག་བསྔལ་བསམ་པ། །འགྲོ་ཀུན་ཕ་མར་ཤེས་ནས་ཆགས་ ལས་འབྲས་བསམ་ སྡང་བྲལ། སེམས་རྒྱུད་དམ་པའི་ བློ་ཁ་ནང་ལ་བསྒྱུར། ཆོས་ལ་འགྲོ་བར་ཤོག །ཚུལ་ཁྲིམས་ བསླབ་པ་གསུམ་གྱི་དོན་བསྒྲུབ་པ་
བསླབ་པས་ཉེས་ལྟུང་རྩད་ནས་འབྱིན། །ཏིང་འཛིན་བསླབ་པས་སྒོ་གསུམ་གཡེང་བ་སྤོངས། །ཤེས་རབ་བསླབ་པས་བློ་ཡི་མུན་པ་སངས། །སྐྱེས་བུ་ཆུང་ངུའི་ལམ་རིམ་ཀུན་རྫོགས་ཤོག །ཐེག་དམན་རང་ཞིའི་འདོད་བདེར་མ་ཆགས་པར། །སྨོན་སེམས་དགེ་ལེགས་གྲུ་ཆེན་ལ་ཞུགས་ནས། །འཇུག་སེམས་ཕ་རོལ་ཕྱིན་བཅུའི་སྐྱ་བ་ཡིས། ཐེག་ཆེན་དུ་ཞུགས་པ་ འགྲོ་ཀུན་སྲིད་མཚོ་ སྨོན་འཇུག་གཉིས་གཞི་བཟུང་ སྒྲོལ་བའི་སྟོབས་ལྡན་ཤོག །རང་དོན་ཆེད་གཉེར་བྱིས་པའི་བློ་མེད་པར། །གཞན་དོན་རླབས་ཆེན་སྤྱོད་པའི་སྙིང་སྟོབས་ཀྱིས། གཞན་དོན་དམ་བཅའ་བ། འགྲོ་བའི་སྡུག་བསྔལ་སེལ་ལ་བསྐལ་མང་། བདག་པས་གཞན་གཅེས་ཀྱི་བསམ་པ་ཁ་ཞེ་མེད་པས། གཞན་གྱི་སྡིག་སྡུག་ཚུར་བླང་ཞིང་། རང་གི་བདེ་དགེ་གཞན་ལ་སྦྱིན་པ་སོགས་ལ་སློབ་པ། ཚོགས། །ནམ་ཡང་སྐྱོ་ངལ་མེད་པར་བརྩོན་འགྲུས་ཤོག །སེམས་ཅན་དོན་
དུ་རྒྱལ་སྲས་སྤྱོད་ཞུགས་ལ། །ཕ་རོལ་གཞན་གྱི་འཚེ་ཞིང་ལོག་སྒྲུབ་སོགས། །ཀུན་ཡང་བྱང་ཆུབ་སེམས་ཀྱི་གསལ་འདེབས་སུ། ཕར་ཕྱིན་བཅུ་ བསྡུ་བའི་དངོས་པོ་བཞི་ ཆོས་སྤྱོད་བཅུ་སོགས་ཀྱི་སྒོ་ནས་ གྱུར་ནས་གནོད་ལན་ཕན་བདེས་མཇལ་བར་ཤོག །གོང་དུ་སྨིས་པའི་བདག་གཞན་བརྗེ་བའི་དོན་བཞིན་དུ་སྔགས་ལམ་ཞུགས་པ་ ཆེ་བ་ལུས་སྲོག་ལོངས་སྤྱོད་ལ་གནོད་པ་དང་། ཆུང་བ་ལོག་ལྟ་གཤེ་སྐུར་འདེབས་པ་སོགས་གང་བྱུང་ཀྱང་། སྐྱེས་བུ་འབྲིང་ལམ་ཆོག་པར་མི་འཛིན་པར། ཟབ་མྱུར་བདེ་བས་ཡིད་སྐྱོབས་རྡོ་རྗེའི་ཐེག །སྐྱོན་བྲལ་ཡོན་ཏན་ཀུན་རྫོགས་བླ་མ་དང་། ལྷན་ཅིག་བརྙེད་ནས་གུས་པས། ལམ་ ཟབ་ ལམ་མྱུར་བ་ ལམ་གེགས་མེད་པ་ བསྟེན་པར་ཤོག །སྔགས་ཀྱི་བླ་མའི་མཚན་ཉིད། བླ་མ་དང་ཆོས་གཉིས་ཀ །བུམ་དབང་ཟབ་མོས་སྣོད་བཅུད་ཞིང་ཁམས་འབྱོང་། །གསང་དབང་རྩ་ཐིག་རླུང་གསུམ་ལས་རུང་སྨིན། མཉེས་པ་གསུམ་གྱིས། ཤེས་རབ་ཡེ་ཤེས་ལྷན་སྐྱེས་ ཚོགས་དྲུག་ཐམས་ཅད་ གཞལ་ཡས་ལྷའི་དཀྱིལ་འཁོར་ རང་ཞལ་མཐོང་། །ཚིག་གི་དབང་
ཐོབ་དོན་གྱིས་རྒྱུད་གྲོལ་ཤོག ཁ་དོག་དབྱིབས་ལ་ལྷར་ཞེན་མ་ཡིན་པར། །ཕུང་ཁམས་བཟོད་ནས་དཀྱིལ་འཁོར་རྒྱ་མཚོ་རུ། །ཚིག་ལ་བརྟེན་ནས་དོན་རྟོགས། ལྷུན་གྲུབ་མཆོག་གི་ སྐྱེད་རིམ་སྒོམ་ཚུལ་ སྐྱེད་རིམ་མངོན་གྱུར་ཅིང་། །ལྷ་སྔགས་ཡེ་ཤེས་རོལ་རྩལ་དབང་ཐོབ་ཤོག །མཚན་བཅས་དོན་མེད་ཨ་འཐས་ཞེན་བྲལ་ཞིང་། །མཚན་མེད་སྟོང་འཛིན་ཆད་མཐར་མི་ལྷུང་བར། །ཟུང་འཇུག་ལམ་གྱི་ཡང་སྙིང་ཇི་བཞིན་པ། རྫོགས་རིམ་སྒོམ་ཚུལ་ ཉམས་ལེན་མ་ནོར་གནད་དུ་བསྣུན་བྱེད་ཤོག །གནས་ལུགས་རྗེན་པར་རྟོགས་པས་ཕྱག་རྒྱ་ཆེ། །ཆོས་ཀུན་སེམས་ལ་རྫོགས་པས་རྫོགས་ཆེན་དང་། །མཐའ་ཀུན་རིག་ངོར་བྲལ་ ཁྱད་པར་གྱི་གདམས་པ་ཐ་དད་པའི་རྣམ་གྲངས་ལས། ཐ་མལ་ཤེས་པ། སེམས་ཉིད་ཀུན་ཏུ་བཟང་པོ། ཕྱིར་དབུ་མའི་དོན། །རྟག་ཆད་ཐམས་ཅད་བློས་སྒྲོ་བཏགས་པ་སྟེ། རག་པའི་ངོ་ལ་མེད་
སྒྲིབས་བྲལ་རང་སེམས་རིག་སྟེ་གྲོལ་བར་ཤོག །ལམ་འབྲས་སྙིང་པོ་བཞི་ལ་གདེངས་ཆེན་ཐོབ། །ཞི་བྱེད་ཟབ་མོ་སྡུག་བསྔལ་སེམས་སུ་ཤེས། །གཅོད་ཡུལ་དྲག་པོས་ངར་འཛིན་འདྲེ་ཆེན་ཐུལ། །ས་སྐྱ་པའི་བློ་སྦྱོང་མཐར་ཐུག་རང་རྒྱུད། ཕ་དམ་པའི་ འཐུལ་བར་ཤོག །སོར་བསམ་ ལབ་སྒྲོན་གྱི་ གཉིས་ཀྱིས་ ཀུན་རྟོག་རྦ་རླབས་ཞི། །སྲོག་རྩོལ་ནུས་པས་ཟག་མེད་བདེ་ཆེན་མྱོང་། །རྗེས་ཏིང་མཐར་ཕྱིན་ དུས་འཁོར་སྦྱོར་དྲུག སྐུ་གསུམ་རྒྱལ་པ་ཟིན། ཡན་ལག་དྲུག་དོན་བཀའ་གདམས་ཀྱི་མངོན་དུ་འགྱུར་བར་ཤོག །གཏུམ་མོ་ ན་རོ་དང་ནི་གུའི་ཆོས་དྲུག་ སྒྱུ་ལུས་ཉིན་སྣང་འཁྲུལ་རྟོག་ཆོད། །རྨི་ལམ་འོད་གསལ་མཚན་མོའི་ཉིང་འཁྲུལ་སངས། །བར་དོ་འཕོ་བས་དུས་མཐའ་འཇིགས་ཆེན་གྲོལ། །ཟབ་ལམ་ཆོས་དྲུག་དོན་འབྲས་འགྲུབ་པར་ཤོག །རྣམ་རྟོག་ངོ་ཤེས་ཉོན་མོངས་གནད་ཀྱིས་ཟིན། །ན་ཚ་ འབྲུག་པའི་རོ་སྙོམས་
ལམ་ལྷོངས་ལྷ་འདྲེ་རྫུན་འཚོང་རིག །སྡུག་བསྔལ་རྩ་བྲལ་འཆི་བ་ཉམས་འོག་ཆུད། །རོ་སྙོམས་དྲུག་ལ་གདེངས་ཆེན་ཐོབ་པར་ཤོག །ཆོས་རྣམས་ཐམས་ཅད་རང་སེམས་འདུལ་བའི་ཐབས། །སེམས་ཉིད་སྐུ་གསུམ་ཡེ་ནས་འདུ་འབྲལ་མེད། །མ་རྟོག་འཁྲུལ་པའི་འཁོར་ལོས་རང་མགོ་འཁོར། དེ་ཐམས་ཅད་ཀྱི་འགག་བསྡུ་བ་ །རང་སེམས་སྐུ་གསུམ་རང་བཞིན་ཀློང་གྲོལ་ཤོག །ལམ་ལྔ་ས་བཅུའི་རྒྱུན་མཐའི་རིང་བསྐོར་གྱིས། །གྲངས་མེད་བསྐལ་བར་བསག་སྦྱངས་མ་ལྟོས་པའི། །སྐད་ཅིག་ཉིད་ལ་རྫོགས་འཚང་རྒྱ་ནུས་པའི། །ཐུན་མོང་ཐེག་པ་ལྟར་ །སྣོད་བཅུད་རྐྱེན་གསུམ་འབད་མེད་ཚོགས་པར་ཤོག །གཞི་ཡི་བར་ཆད་ལྷན་ སྐྱེས་ གསང་སྔགས་བླ་མེད། དད་པ་དམ་ཚིག་སྙིང་རུས་སོགས། མ་རིག་པ། ལམ་གྱི་བར་ཆད་ཕྱི་ནང་གསང་བའི་ གདམས་པ་ཟབ་མོ་ མཚན་ལྡན་བླ་མ་ གཞི་ལ་འཁྲུལ་པ་མེད་ཀྱང་། གེགས་ རྣམ་རྟོག་ལས་བྱུང་བའི་ འབྲས་བུའི་བར་ཆད། རང་ངོ་མ་རིག་པ་ ན་ཚ་སོགས། སྤྲུལ་དང་གྲོགས་སོགས་ངན་པའི་
བདག་ལྟའི་འཛིན་ཕྲ་སོགས། །བྱང་ཆུབ་བར་ཆད་རྩད་ནས་ཆོད་པར་ཤོག །དུས་མིན་འགྲོ་དོན་གཟུགས་བརྙན་སླུ་བྱེད་ཀྱིས། རང་གཞན་ ཤེས་སྒྲིབ་སོགས་ གཉིས་ཕུང་འདུན་མ་མི་བྱེད་ སངས་རྒྱ་བ་ལ་བགེགས་སུ་གྱུར་པ་ཐམས་ཅད་ པར། །རང་མ་སྨིན་པ་ རྙེད་འཚོལ་སོགས་ དུས་བབས། བླ་མ་ སློབ་མ་ རྩོལ་བྲལ་རླབས་ཆེན་འགྲོ་བའི་དོན། །ནམ་མཁའ་མཐའ་མཉམ་རྒྱུན་མི་ཆད་འགྲུབ་ཤོག །ཕྱོགས་བཅུའི་རྒྱལ་ རང་དོན་མཁྱེར་ནས་ དང་རྒྱལ་ འབད་རྩོལ་མེད་པར་ ཕྱོགས་རེས་དང་ཁོལ་བུ་མ་ཡིན་པར། ནམ་མཁའ་གར་ཁྱབ་ཀྱི་སེམས་ཅན་གང་ལ་གང་འདུལ། སྲས་མ་ལུས་ཀྱིས། །སེམས་ཅན་དོན་དུ་སྨོན་ལམ་ཅི་བཏབས་དང་། །དེ་འགྲུབ་གཞན་ཕན་རྒྱ་ཆེན་གང་མཛད་པ། ཐམས་ཅད་གཅིག་བསྡོམས་བདག་གིས་འགྲུབ་གྱུར་ རང་ཅག་སོ་སྐྱེའི་བློས་མི་ཆུད་པའི་དགེ་ཚོགས་བསགས་ཅིང་སྔོ་སྨོན་མཛད་པ་དེ་ཐམས་ཅད་དང་མཚུངས་པའི་འགྲོ་དོན་འགྲུབ་པར་སྨོན་པའོ། ཅིག །དེ་ལྟར་ཆོས་ཐམས་ཅད་ཀྱི་ལམ་གྱི་རིམ་པའི་གནད་དོན་འགག་བསྡུས་སྨོན་
ལམ་གྱི་བརྗོད་བྱར་བགྱིས་ཏེ་ཉམས་ལེན་གྱི་གསལ་འདེབས་དྲན་བསྐུལ་དུ་འགྱུར་བ་འདི་ཉིད། ལེགས་བྱས་རྒྱ་མཚོ་ལྷུན་གྱིས་གྲུབ་པའི་དཔལ་མངོན་པར་རྒྱས་པའི་གཟི་འོད་ཀྱིས་བཀྲ་བ་སྐྱེས་ཆེན་ཀརྨ་མི་ཕམ་མགོན་པོའི་བཞེད་པ་ཡོངས་སུ་བསྐང་བའི་སླད་ཁོ་ནར་ཀུན་སྤངས་པའི་སྤྱོད་ལ་མངོན་པར་དགའ་བ་ཀརྨ་རིག་འཛིན་རྣམ་པར་རྒྱལ་བས་ཕུལ་བ་སིདྡྷར་སྡཾ།།།།། བསྐལ་བཟང་འདྲེན་པ་སྟོང་གི་གསེར་རིའི་དབུས། །ཐུགས་རྗེའི་མཐུ་སྟོབས་མངོན་འཕགས་ལྷུན་པའི་དབང་། །ཟས་གཙང་སྲས་ཀྱིས་རྒྱལ་ཚབ་ཐུ་བོ་རུ། །དབང་བསྐུར་ཟླ་འོད་གཞོན་ནུར་གྱུར་པ་ཉིད། །ལྔ་བདོའི་རྣམ་འགྱུར་དར་བའི་བསིལ་ལྡན་ཡུལ། །གང་འདིར་བསྟན་གཉིས་སྒྲོན་མ་སྦར་བའི་མགོན། །ལྷ་ལམ་ཁྱབ་པའི་དབུས་ན་སྒྲུན་བྲལ་ཉི། །འཛམ་གླིང་གྲགས་པའི་འོད་ཟེར་ཚར་ངར་གདུང་། །དྲི་མེད་སྒྲུབ་བརྒྱུད་བསྟན་སྲོགས་འཛིན་པའི་དཔལ། །ཆོས་ཉིད་ཇི་བཞིན་གཟིགས་པ་མངོན་གྱུར་གྱིས། །ཆོས་ཅན་ཇི་སྙེད་མེ་
ཤེས་ཀློང་གྲོལ་བའི། །འདྲེན་པ་མཆོག་ཁྱེད་བསྐལ་བརྒྱར་ཞབས་བརྟན་གསོལ། །རྒྱལ་དགོངས་གདོད་ནས་ཡོངས་དག་འགྱུར་མེད་གཤིས། །འཁོར་འདས་དུས་གསུམ་རོ་མཉམ་ཆེན་པོ་རུ། །འཚོ་ཞིང་གཞེས་ལས་ནམ་ཡང་མ་གཡོས་བཞིན། །གདུལ་བྱའི་སྣང་ངོར་དེ་བཞིན་བཞུགས་གསོལ་འདེབས། །མི་ཟད་ཐུགས་རྗེའི་གཏེར་མངའ་རྒྱལ་བའི་ཚོགས། །འཆི་མེད་རིག་འཛིན་གྲུབ་དབང་སྤྲུལ་འཁོར་བཅས། །བྱིན་རླབས་མཐུ་དང་ཆོས་ཉིད་བདེན་སྟོབས་ཀྱིས། །གསོལ་བ་བཏབ་པ་དོན་ལྡན་འགྲུབ་གྱུར་རིག །ཞེས་རྒྱལ་བའི་བསྟན་འཛིན་མཆོག་གི་སྐྱེས་ཆེན་རིག་པ་འཛིན་པ་ཆོས་དབྱིངས་ཀློང་གྲོལ་དཔལ་བཟང་པོའི་ཞབས་པད་བརྟན་པར་གསོལ་བ་གདབ་པ་འདི་ཉིད། སྣ་ཚོགས་རང་གྲོལ་གྱི་མིང་འཛིན་པའི་བྱ་བྲལ་བས། ལྷག་བསམ་རྣམ་པར་དཀར་བས་ཀུན་ནས་བླངས་ཏེ་ཕུལ་བ་དགེ་ལེགས་གོང་འཕེལ་དུ་གྱུར་རིག །རྒྱལ་ཀུན་ཐུགས་རྗེའི་ཟློས་གར་སྒྱུ་འཕྲུལ་ལས། །བུདྡྷ་ཛྙཱ་ན་རིག་འཛིན་ཨཱ་ནན་ཏན་
བསྟན་པ་བསྲུང་མཛད་བསོད་ནམས་ཆོས་འཕེལ་མཚན། །སྐྱེས་ཆེན་ཕྲེང་བར་བརྒྱུད་པའི་མདོ་འཛིན་དུ། །དཔལ་ལྡན་དྭགས་བརྒྱུད་བསྟན་པའི་སྒྲོན་མེ་རུ། །སངས་རྒྱས་དངོས་བྱོན་རཏྣ་བཛྲ་ཉིད། །གདུལ་བྱའི་དད་ཚོར་མཁྱེན་བརྩེའི་ཟླ་སྣང་གི། །མཚན་དཔེར་བསྟན་མཛད་སྤྲུལ་པའི་སྐྱེས་མཆོག་གང་། །གསང་གསུམ་མི་ཟད་རྒྱན་འཁོར་གཡོ་མེད་བསྟན། །ཐོས་བསམ་སྒོམ་པའི་སྣང་བ་འགྲིབ་མེད་གསལ། །ཕན་བདེའི་ཕྲིན་ལས་འོད་བརྒྱས་ཡོངས་ཁྱབ་པར། །རྒྱལ་བ་སྲས་བཅས་རྣམས་ཀྱི་དགེ་ལེགས་སྩོལ། །འདི་ནི་དྭགས་ལྷ་སྒམ་པོར་ཞབས་དྲུང་མཐུ་སྟོབས་བསྟན་འཛིན་དབང་པོའི་སྡེར་ཕུལ་བའི་བརྟན་བཞུགས་ཆོས་དབྱིངས་འོད་གསལ་རྩེ་ནས་སོ། །བསླུ་མེད་སྐྱབས་གནས་དཀོན་མཆོག་ཀུན་འདུས་པ། །བླ་མ་མཆོག་གི་ཐུགས་རྗེས་གཟིགས་མཛོད་ལ། །རྣམ་དཀར་ཡིད་ཀྱི་སྨོན་ལམ་གང་བཏབ་པ། །གེགས་
མེད་མྱུར་དུ་འགྲུབ་པར་བྱིན་གྱིས་རློབས། །དེང་ནས་བཟུང་སྟེ་རྣམ་མཁྱེན་མ་ཐོབ་བར། །བླ་མ་མཆོག་གི་གདུལ་བྱར་འགྱུར་བར་ཤོག །མཚན་ཉིད་ཀུན་ལྡན་བླ་མ་སངས་རྒྱས་ལ། ཁ་ཞེ་མེད་པའི་མོས་གུས་བརྟན་པར་ཤོག །ལུས་དང་ལོངས་སྤྱོད་གཏན་གྱི་འདུན་མར་བཅས། །ལྟོས་མེད་བླ་མའི་དོན་དུ་སྟོང་ནུས་ཤོག །ཅི་མཛད་ལེགས་མཐོང་ཅི་གསུངས་ཚད་འཛིན། །དག་སྣང་ཟོལ་མེད་རྒྱུད་ལ་སྐྱེ་བར་ཤོག །འགལ་འཁྲུལ་ཉེས་ལྟུང་སྤུ་ཙམ་མི་གསོག་པར། །ཅི་བྱེད་བླ་མ་མཉེས་པ་ཉིད་འགྱུར་ཤོག །གདམ་ངག་ཟབ་མོ་གསུང་གི་བདུད་རྩི་ལ། །རྒྱུན་ཆད་མེད་པར་འཐུང་བའི་སྐལ་ལྡན་ཤོག །ཐོས་བསམ་སྒོམ་པའི་ཤེས་རབ་དྲི་མེད་ཀྱིས། །གང་གསུངས་ཆོས་ཀྱི་དགོངས་པ་ལོན་པར་ཤོག ཁ་ཚིག་གོ་ཡུལ་ཙམ་ལ་མི་འཇོག་པར། །གདམས་ངག་རྩེ་གཅིག་ཉམས་སུ་ལོན་པར་ཤོག །ཉམས་རྟོགས་
ཡོན་ཏན་ལམ་རྟགས་ཚུལ་བཞིན་ཤར། །ས་ལམ་སྤངས་རྟོགས་མཐའ་རུ་ཕྱིན་པར་ཤོག །ནམ་ཡང་སྡིག་པའི་གྲོགས་ཀྱིས་མ་བསླུས་ཤིང་། །ཆོས་མཐུན་གྲགས་དང་མཐུན་རྐྱེན་འཛོམ་པར་ཤོག །འཇིག་རྟེན་རྣམ་གཡེང་གྲོང་ལ་མི་ཆགས་པར། །རྒྱལ་བས་བསྔགས་པས་རི་ཁྲོད་འགྲིམ་པར་ཤོག །དཀོར་ནག་ལོག་འཚོ་སྡིག་ཟས་ཤ་ཆང་ལ། །སྲེད་ཞེན་མེད་སོགས་དཀའ་ཐུབ་འཚོ་ནུས་ཤོག །ཆོས་བརྒྱད་ཚེ་འདིའི་བྱ་བྱེད་མི་སྒྲུབས་པར། །བྱ་བྲལ་དམན་ས་འཛིན་པས་དུས་འདའ་ཤོག །ཕུང་བྱེད་སྒྱུ་མའི་ནོར་རྫས་མི་གསོག་པར། །དགོས་མེད་ཞེན་ལོག་སྙིང་ནས་སྐྱེ་བར་ཤོག །སྐྱིད་འདོད་ལོངས་སྤྱོད་འདུ་འཛི་མི་བྱེད་པར། །གྲུབ་ཐོབ་བརྒྱུད་པའི་རྣམ་ཐར་འཁྱོངས་པར་ཤོག །དལ་འབྱོར་སྟོང་ཟད་གཡེང་བས་མི་འཁྱེར་བར། །ངེས་འབྱུང་མི་རྟག་འཆི་བ་དྲན་པར་ཤོག །ཉོན་མོངས་བག་ཆགས་ན་
རོང་མི་ལྡང་བར། །ཚུལ་ཁྲིམས་གཙང་མས་རང་རྒྱུད་དག་པར་ཤོག །བློ་ཆུང་དམན་པའི་ཞི་བདེ་མི་སྒྲུབས་པར། །དགེ་འདུན་མཁའ་ཁྱབ་འགྲོ་ལ་ཕན་ནུས་ཤོག །ཆོས་མིན་བསམ་སྤྱོད་སྐད་ཅིག་མི་བྱེད་པར། །སྒོ་གསུམ་ཆོས་ཀྱིས་ཉིན་མཚན་འདའ་བར་ཤོག །བླ་མ་མཆེད་གྲོགས་ཕ་མ་སེམས་ཅན་ལ། །དག་སྣང་ཕྱོགས་མེད་ཞབས་གཏོགས་འགྲུབ་པར་ཤོག །སྣོད་བཅུད་ཐམས་ཅད་གཟོད་ནས་དཀྱིལ་འཁོར་ལྷ། །ཡིན་ཚུལ་ཤེས་པས་དག་པ་རབ་འབྱམས་ཤོག །ཕུང་ཁམས་སྐྱེ་མཆེད་སྒོ་གསུམ་ཡེ་ཤེས་ཀྱི། །རྡོ་རྗེ་མི་ཟད་རྒྱན་གྱི་འཁོར་ལོར་ཤོག །ཚོགས་དྲུག་ཡུལ་སྣང་འཆར་སྒོ་མ་ལུས་ཀུན། །ཆོས་ཉིད་རྣམ་རོལ་ཆེན་པོར་གྲོལ་བར་ཤོག །ན་ཚ་རྐྱེན་ངན་ཟུག་རྔུ་ཅི་བྱུང་ཀྱང་། །བདེ་ཆེན་རང་རིག་ཀློང་དུ་གྲོལ་བར་ཤོག །དགྲ་གདོན་གནོད་བྱེད་རྣམ་འགྱུར་གང་ལ་ཡང་། །ཉམ་ང་བྲལ་ཞིང་བྱང་ཆུབ་སེམས་འབྱོང་ཤོག །
མེ་ཆུ་གཡང་སོགས་འབྱུང་བའི་འཇིགས་པ་ལ། །བདེན་མེད་རྨི་ལམ་སྒྱུ་མར་ཤེས་པར་ཤོག །གཞན་གྱིས་ཚིག་རྩུབ་ངན་སྨྲས་ཅི་བྱས་ཀྱང་། །འཛིན་མེད་བྲག་ཆའི་སྒྲ་ལྟར་རྟོགས་པར་ཤོག །རྙེད་དང་བཀུར་བསྟི་འདོད་ཡོན་ཚོགས་རྣམས་ལའང་། །ཆགས་མེད་ཞེན་བྲལ་རེ་འདོད་སྤོང་བར་ཤོག །གང་དུ་གནས་ཀྱང་དམ་པའི་ཆོས་མ་གཏོགས། །འཇིག་རྟེན་འཁྲུལ་པའི་བྱ་བ་མི་བྱེད་ཤོག །སུ་དང་འགྲོགས་ཀྱང་དག་སྣང་འབྱོངས་གྱུར་ནས། །འཐབ་འཁྲུག་འཁོན་རྩོད་ལས་ངན་མི་གསོག་ཤོག །སྒོ་གསུམ་སྐྱེད་རྫོགས་དོན་ལས་མི་གཡེལ་བའི། །རྟག་པར་དྲན་དང་ཤེས་བཞིན་ལྡན་པར་ཤོག །ཉིན་སྣང་འཁྲུལ་མེད་དྲན་རིག་རྒྱུན་ཆགས་ཀྱིས། །གཉིད་དང་རྨི་ལམ་འཁྲུལ་ཕྱིར་མི་འབྲེང་ཤོག །ཚེ་འདི་ཆོས་ཀྱི་འདའ་བའི་ནུས་སྟོབས་ཀྱིས། །འཆི་ཁར་འགྱོད་འཚེར་
ཡ་ང་མེད་པར་ཤོག །མཚམས་སྦྱོར་ངན་པའི་རྐྱེན་དབང་མི་འགྲོ་བར། །གདམས་པ་དྲན་ཞིང་གནད་གཅོད་མེད་པར་ཤོག །སྒྲ་འོད་ཟེར་དང་འཇིགས་སྐྲག་ཅི་ཤར་ཡང་། །རང་མདངས་ཡིན་པའི་གནད་དོན་རྟོགས་པར་ཤོག །བར་དོར་བླ་མའི་གདམས་ངག་དྲན་ནས་ཀྱང་། །ལམ་ལོག་འཁྲུལ་ཕྱིར་མི་འབྲང་གྲོལ་བར་ཤོག །རང་དོན་འགྱུར་མེད་ཆོས་སྐུའི་གཏན་སྲིད་ཟིན། །གཞན་དོན་གཟུགས་སྐུའི་རྣམ་འཕྲུལ་འགྱེད་པར་ཤོག །གང་འདུལ་སྤྲུལ་པ་ནམ་མཁའ་གར་ཁྱབ་ཏུ། །འགྲོ་ལ་ཕན་བདེའི་ཆར་རྒྱུན་འབེབས་པར་ཤོག །བདག་གིས་སྨོན་ལམ་འདི་ལྟར་གང་བཏབ་རྣམས། །མྱུར་འགྲུབ་མཁའ་མཉམ་འགྲོ་ཀུན་བྱང་ཆུབ་ཤོག །ཅེས་པ་འདི་ནི། སྨིན་གྲོལ་སྙིང་པོ་ལའོ། །རྒྱལ་བ་མ་ལུས་ཆོས་སྐུའི་ངང་ཉིད་དུ། །རོ་མཉམ་རིགས་འདུས་བླ་མ་གཅིག་པུའི་སྐུར། །གཟོད་མ་ཉིད་ནས་ལྷུན་གྱི་གྲུབ་པ་རུ། །ཡིན་
ལུགས་ཇི་བཞིན་རྟོགས་པས་གསོལ་བ་འདེབས། །གཉིས་འཛིན་འཁྲུལ་པ་ཡངས་པར་བྱིན་གྱིས་རླབས། །ངར་འཛིན་འགོང་པོའི་བར་ཆད་མི་འབྱུང་ཞིང་། །ལོ་འདོད་ཆོས་བརྒྱད་གདོན་གྱིས་མི་སྐྱོད་པར། །རང་རིག་ཆོས་སྐུའི་རྒྱལ་ས་ཟིན་པར་ཤོག །འདི་ནས་བཟུང་སྟེ་བླ་མེད་བྱང་ཆུབ་ལ། །མ་འཁོད་དེ་སྲིད་འཇིག་རྟེན་འཁོར་བའི་བློ། །རྡུལ་ཆ་ཕྲ་མོ་ཙམ་གྱིས་མ་གོས་པར། །རིན་ཆེན་བྱང་ཆུབ་སེམས་མཆོག་འབྱོངས་པར་ཤོག །ཆགས་སྡང་འཁྲུལ་པའི་རང་གཟུགས་དགྲ་གཉེན་ཞེས། །ལོག་རྟོག་སྒྱུ་མའི་མངོན་ཞེན་རྨི་ལམ་ལ། །བདེན་ཞེན་བྱིས་པའི་རྣམ་ཐར་མི་སྟོན་པར། །འགྲོ་ཀུན་ཕ་མར་ཤེས་པས་ཕན་སྒྲུབ་ཤོག །རང་སྐྱོན་རི་བོ་ཙམ་ཡང་མ་མཐོང་བཞིན། །གཞན་སྐྱོན་ཕྲ་མོའང་མཐོང་བའི་མིག་རྣོན་པོས། །དག་སྣང་
མཐོང་ཚུལ་གོ་ལོག་བྱེད་པར། །སྣོད་བཅུད་རྒྱལ་བའི་ཞིང་དུ་རང་ཤར་ཤོག །རང་ལ་ཚིག་ངན་ཟུར་ཙམ་མི་བཟོད་ཀྱང་། །གཞན་དག་ཁྱད་གསོད་གནོད་འཚེ་སྒྲུབས་པ་ལ། །ཉམས་ང་སྤུ་ཙམ་མེད་པའི་སྙིང་ཁམས་གི། །བློ་གདེངས་རྒྱུད་ལ་འབྱུང་བ་མེད་པར་ཤོག །བླ་མ་སངས་རྒྱས་ཉིད་དུ་མ་མཐོང་བས། །རང་ལ་མཉེས་དང་མི་མཉེས་ཚད་བཟུང་མཁན། །བློ་རིངས་མར་ཁོག་སྣུམ་གྱིས་མི་ཐུལ་ལྟར། །དེ་འདྲའི་དྲི་མ་ནམ་ཡང་མི་འབྱུང་ཤོག །དམ་ཆོས་ཟབ་དགུའི་རྒྱ་མཚོ་བཏུངས་གྱུར་ཀྱང་། །ཆོས་དང་རང་རྒྱུད་ཐ་དད་ཡ་བྲལ་བས། །འཆི་ཁར་གདམས་ངག་དེས་ལ་མ་ལུས་པར། །ཐོས་དོན་རྒྱུད་ལ་འབྱོར་བས་སྨིན་གྲོལ་ཤོག །རང་སེམས་ཆོས་ཀྱི་མ་ཐུལ་ཐ་མལ་དུ། །དུག་ལྔའི་རྦ་ཀློང་དྲག་པོར་འཁྲུག་ན་ཡང་། །གཞན་ལ་ཆོས་བཤད་དབང་བསྐུར་བྱེད་རློམས་ཀྱིས། །རང་གཞན་
བེམ་སྦྲེལ་གཡང་ལ་མི་མཆོང་ཤོག །བླ་མའི་བྱིན་རླབས་སློབ་མའི་མོས་གུས་དང་། ཁམས་དང་བསམ་པ་རྒྱུད་ཚོད་ཤེས་པ་སོགས། །རྡུལ་ཙམ་མེད་བཞིན་འགྲོ་དོན་མིང་བཏགས་པའི། །ཟང་ཟིང་སྡུད་པའི་གཡེང་བ་མི་བྱེད་ཤོག །དབེན་པར་སྒྲུབ་ལ་འབད་པའི་བློ་ཡོད་ཀྱང་། །མཁའ་ཁྱབ་འགྲོ་ཕན་སླད་དུ་རྫོགས་བྱང་དོན། །མི་གཉེར་ཚེ་འདིའི་འདོད་པ་སྣ་ཚོགས་ཕྱིར། །ལས་མཐའ་ཕན་གནོད་སྒྲུབ་པར་མི་བྱེད་ཤོག །གལ་ཏེ་ཕྱོགས་མེད་རྒྱལ་ཁམས་འཕྱོ་ན་ཡང་། །བདག་འཛིན་ཁོང་སྐྲན་རྩད་ནས་མ་ཞིག་པར། །ཕྱི་རོལ་ཐོ་ཆོ་བཅོས་མའི་བརྟུལ་ཞུགས་ཀྱིས། །སྡོམ་གསུམ་ས་ལ་བསྐུར་བར་མི་བྱེད་ཤོག །རང་ལུས་ཚེར་མས་ཟུག་པའང་མི་བཟོདབཞིན། ཁ་ལྟ་སྟོང་པའི་རྦད་ཁམ་འབྲུག་ལྡིར་བས། །ཆོས་དང་བླ་མའི་ཞབས་འདྲེན་མི་བྱེད་པར། །བག་ཡོད་རྒྱུ་འབྲས་
རྟེན་འབྲེལ་ལམ་ལྷོངས་ཤོག །སྐྱིད་སྡུག་གང་བྱུང་བླ་མ་དཀོན་མཆོག་གི། །ཐུགས་རྗེར་མ་ཤེས་རྐྱེན་ངན་ཅུང་ཟད་ལའང་། །ཁྱི་རྒན་ལག་པ་ཆག་པའི་འོ་དོད་ལྟར། །མི་འབོད་སྡུག་བསྔལ་རོ་སྙོམས་ནུས་པར་ཤོག །ཕན་བྱེད་ལྷ་དང་གནོད་བྱེད་འདྲེ་ཞེས་པ། །ཀུན་རྫོབ་འཁྲུལ་པའི་ངོ་ལ་སྣང་མོད་ཀྱང་། །རང་རིག་ཆོས་ཉིད་དབྱིངས་ལ་བདེན་དངོས་མེད། །སྒོམ་ཆེན་འཁྲུལ་རྗེས་འབྲེང་བར་མི་བྱེད་ཤོག །གསང་སྔགས་ཉེ་ལམ་ཆོས་ཀུན་སྙིང་པོའི་སྙིང་། །བུམ་དབང་ཐོབ་པས་སྣོད་བཅུད་དཀྱིལ་འཁོར་ཤར། །གསང་དབང་འབྱུང་འཇུག་གནས་བརྗོད་མཐའ་དག་སྔགས། །ཤེར་དབང་རྟོག་ཚོགས་ལྷན་སྐྱེས་བདེར་གྲོལ་ཤོག །ཐེག་པའི་རྩེ་རྒྱལ་རྫོགས་པ་ཆེན་པོའི་ལམ། །ཚིག་དབང་རིན་ཆེན་རིག་པའི་རྩལ་དབང་དོན། །བསྒོམ་དུ་མེད་ལ་ཡེངས་པ་སྐད་ཅིག་བྲལ། །བཟོ་མེད་ལྷུག་པའི་བསམ་གཏན་གདེངས་ཐོབ་ཤོག །ཆོས་ཉིད་མངོན་སུམ་རང་ཞལ་
རྗེན་པར་མཐོང་། །ཉམས་སྣང་གོང་འཕེལ་ས་བཅུ་ལམ་ལྔ་བགྲོད། །རིག་པ་ཚད་ཕེབས་ལོངས་སྐུའི་ཞིང་ཁམས་ཟིན། །ཆོས་ཅན་ཆོས་ཉིད་ཀློང་དུ་ཟད་པར་ཤོག །དེ་མཐུས་འཁྲུལ་པའི་ཡུལ་དང་ཡུལ་ཅན་གྱི། །སྤྲོས་པའི་མཚན་གཞི་དངོས་པོར་མི་གནས་ཀྱང་། །སྨོན་ལམ་ཐུགས་རྗེ་མཐུན་པའི་རྟེན་འབྲེལ་གྱིས། །གཞན་དོན་ནམ་མཁའི་མཁའ་མཉམ་འབྱུང་བར་ཤོག །དྲིན་ཅན་བླ་མ་དཀོན་མཆོག་ཐུགས་རྗེའི་མཐུ། །ཡི་དམ་མཁའ་འགྲོ་ཆོས་སྲུང་ནུས་པའི་སྟོབས། །དོན་དམ་ཆོས་ཉིད་བདེན་པའི་བྱིན་རླབས་ཀྱིས། །བདག་གི་སྨོན་ལམ་འདི་བཞིན་འགྲུབ་པར་ཤོག །ཞེས་པ་འདི་ནི། རྣལ་འབྱོར་པ་ཨཱ་ཡུ་སྡུ་ཏྲ་ཞེས་ཉེ་བར་བསྐུལ་ངོར་བཀོད་པ་དགེའོ། ཨོཾ་སྭ་སྟི། མཐའ་ཡས་ཞིང་ཁམས་རྒྱ་མཚོའི་སངས་རྒྱས་དང་། །ལེགས་གསུངས་བདེན་གཉིས་ཟུང་འཇུག་དམ་པའི་ཆོས། །དེ་འཛིན་འཕགས་པའི་དགེ་འདུན་ཚོགས་བཅས་ཀྱི། །ཆོས་ཉིད་
བདེན་པས་དེང་འདིར་བདེ་ལེགས་སྩོལ། །བཀའ་རྒྱུད་བླ་མ་རྒྱལ་བ་དཀྱིལ་འཁོར་ལྷ། །དཔའ་བོ་མཁའ་འགྲོ་ཆོས་སྲུང་མཐུ་སྟོབས་བདག །དཀར་སྐྱོང་གཞི་བདག་ལྷ་ཀླུར་བཅས་ཀུན་གྱིས། །བྱིན་རླབས་དངོས་གྲུབ་ཕྲིན་ལས་ཆར་རྒྱུན་ཕོབ། །ཕྱོགས་བཅུ་ནམ་མཁའ་གར་ཁྱབ་འཇིག་རྟེན་ཀུན། །བདེ་དགེ་བཀྲ་ཤིས་འབྱོར་པས་གང་བར་ཤོག །མི་དགེ་ཉེར་འཚེའི་མཚན་མ་ཇི་སྙེད་དག །གང་དུ་ནམ་ཡང་འབྱུང་བ་མེད་པར་ཤོག །རྒྱལ་བསྟན་དྲི་མེད་མདོ་སྔགས་ལུང་རྟོགས་ཀྱི། །ཉི་ཟླ་གདུལ་བྱའི་ཡིད་མཁར་གསལ་བར་ཤོག །བསྟན་འགྲོའི་སྒྲོན་མ་སྐྱེས་ཆེན་དམ་པ་རྣམས། །སྐུ་ཚེ་ཕྲིན་ལས་ཆོས་འབྱོར་འཕེལ་བར་ཤོག །བཤད་སྒྲུབ་བསྟན་པ་འཛིན་པའི་འདུས་སྡེ་ཀུན། །ཐུགས་མཐུན་ཐོས་བསམ་སྒོམ་པས་དུས་འདའ་ཤོག །མ་རུངས་བདུད་ཀྱི་སྤྲུལ་པའི་མཐུ་སྟོབས་ཀུན། །དཀོན་མཆོག་བདེན་པའི་སྟོབས་ཀྱིས་ཐུལ་བར་ཤོག །འབྱུང་པོའི་ཁ་རླངས་ནད་ཡམས་འཁྲུག་རྩོད་
དང་། །སད་སེར་ཕྱུགས་ནད་མུ་གེ་ཀུན་ཞི་ཤོག །འབྱུང་བ་གཡོ་འཁྲུག་གནོད་འཚེ་མི་འབྱུང་ཞིང་། །སྐྱེ་འགྲོ་བདེ་སྐྱིད་དམ་ཆོས་སྤྱོད་པར་ཤོག །རྒྱལ་བས་ལུང་བསྟན་དཔལ་གྱི་ཤཱནྟིའི་གནས། །བསྟན་པའི་རྒྱལ་མཚན་མི་ནུབ་རྟག་བརྟན་ཤོག །འགྲོ་བའི་གཙུག་རྒྱན་མཆོག་གི་སྤྲུལ་པའི་སྐུ། །ཞབས་པད་བསྐལ་བརྒྱའི་བར་དུ་བརྟན་པར་ཤོག །དེ་ཡི་བཀའ་བཞིན་བསྒྲུབ་པའི་སློབ་འབངས་རྣམས། །དམ་ཚིག་གཙང་ཞིང་ཆོས་སྤྱོད་གོང་འཕེལ་ཤོག །སྦྱིན་བདག་རྣམས་ཀྱང་བསྟན་ལ་གུས་བྱེད་ཅིང་། །བར་ཆད་མེད་པར་བསམ་དོན་འགྲུབ་པར་ཤོག །བདག་སོགས་སྐྱེ་བ་འདི་ནས་ཚེ་རབས་ཀུན། །བསྟན་འགྲོའི་ཕན་བདེ་སྩོལ་བའི་ནོར་བུར་ཤོག །རང་དོན་ཞི་བདེ་ལོག་འཚོ་མི་སྒྲུབ་པར། །རྒྱལ་བའི་ཕྲིན་ལས་རླབས་ཆེན་སྤྱོད་པར་ཤོག །ལྷག་བསམ་དག་པས་
སྨོན་ལམ་འདི་བཏབས་མཐུས། །འགྲོ་ཀུན་བླ་མེད་རྫོགས་བྱང་ཐོབ་པར་ཤོག །མངྒ་ལཾ། འདི་ནི་གུ་རུ་རིན་པོ་ཆེའི་ལུང་བསྟན་བཞིན་བོད་ཁམས་བདེ་བའི་རྟེན་འབྲེལ་དུ་གདར་གྱི་རི་བོར་དར་ཕན་ལ་བདེན་ཚིག་སྨོན་ལམ་དུ་བསྟར་བའོ། འདི་དང་མཚུངས་པ་གནས་ཆེན་དཔལ་གྱི་ཙཱ་རི་ཏྲའི་ས་གནས་ཀྱི་སྙིང་པོ་རྣམས་སུ་ཡང་བདེན་སྟོབས་ཀྱི་དར་འཕན་དང་མཚོ་མཆོད་ཀྱི་ནང་དུ་ཤིན་ཏུ་མང་བར་བྲིས་ཀྱང་བཤུ་བར་མ་ནུས་སོ། །རབ་འབྱམས་དཀྱིལ་འཁོར་རྒྱ་མཚོའི་རིགས་ཀྱི་བདག །མཉམ་མེད་བླ་མ་མཆོག་གི་ཞབས་པད་ལ། །འདི་བཟུང་མཐར་ཐུག་བྱང་ཆུབ་སྙིང་པོའི་བར། །སྐྱབས་སུ་སྙིང་ནས་མཆི་ཞིང་གསོལ་བ་འདེབས། །དམིགས་མེད་ཐུགས་རྗེའི་སྤྱན་གྱིས་རྟག་གཟིགས་ནས། །སྐྱེ་བ་འདི་བཟུང་ཚེ་རབས་ཐམས་ཅད་དུ། །མཐོ་རིས་ཡོན་ཏན་བདུན་གྱིས་ལེགས་བརྒྱན་པའི། །རྟེན་བཟང་ཐོབ་ནས་བསྟན་ལ་འཇུག་པ་དང་། །བླ་མ་མཚན་ལྡན་གདམ་ངག་བདུད་རྩིའི་བཅུད། །བདག་གི་བསྐལ་བའི་བསོད་ནམས་ལེགས་འཛོམ་སྟེ། །
ཉམས་ལེན་བརྩོན་པའི་མཐུ་དང་བྱིན་རླབས་སྟོབས། །རྨད་བྱུང་ཚེ་གཅིག་སངས་རྒྱས་འགྲུབ་གྱུར་ཅིག །སྐུ་གསུམ་གོ་འཕངས་མཆོག་མཐར་ཕྱིན་ནས་ཀྱང་། །བསམ་ཡས་ཕྲིན་ལས་རྒྱ་མཚོའི་ཟློས་གར་གྱིས། །མཁའ་ཁྱབ་འགྲོ་ལ་གང་འདུལ་འདོད་སྟེར་འཕྲུལ། །འཁོར་བའི་མཐའ་མཉམ་ཉིད་དུ་འབྱུང་བར་ཤོག །བླ་མ་རྒྱལ་བ་རྒྱ་མཚོ་སྤྲུལ་འཁོར་བཅས། །ཐུགས་རྗེའི་ནུས་པས་བདག་གི་སྨོན་ལམ་ཀུན། །གེགས་མེད་མྱུར་འགྲུབ་བར་ཆད་ཀུན་ཞི་ཞིང་། །ཆོས་དང་བཀྲ་ཤིས་དགེ་ལེགས་འཕེལ་བར་ཤོག །གསོལ་དཔོན་རིན་བཟང་པ། །སྐནྡ་རཏྣ་བྷ་དྲའི་མཚན་འཆང་བས། །བཀའ་སྩོལ་དགོངས་བཞེད་བསྐང་ཕྱིར་འདི་ཕུལ་བར། །ཁྱེད་ཐུགས་དགྱེས་ནུས་བདག་འདྲས་མི་ཤེས་ཀྱང་། །རབ་དཀར་ལྷག་བསམ་རྟེན་འབྲེལ་བཟང་བར་འཁུམས། །གང་ཁྱེད་མཚུངས་བྲལ་རྒྱལ་མཆོག་དེ་ལྟ་བུའི། །ཞབས་པད་སྤྱི་བོར་བསྟེན་པའི་སྐལ་བཟང་དེ། །སྟོང་གསུམ་ནོར་བུས་བཀང་ཐོབ་དོ་ཟླ་
མིན། །ཅི་མཛད་ལེགས་མཐོང་ཅི་གསུངས་བཀའ་བསྒྲུབ་པས། །དམ་ཚིག་གཙང་མ་རང་སེམས་དཔང་གཟུགས་གིས། །མི་ཚེ་ལེགས་པར་འཁྱོལ་བའི་ཞབས་གཏོགས་མཛོད། །ཁྱེད་ཀྱི་གཏན་འདུན་དེ་ཀས་འགྲུབ་པ་ལགས། །དེ་ལས་གཞན་པའི་འཕྲལ་ཕུགས་འདི་དང་འདིའི། །བརྟག་གསལ་ལུང་བསྟན་འབུལ་རྒྱུ་བདག་ལ་མེད། །དུས་གསུམ་སྒྲིབ་མེད་མཁྱེན་གཟིགས་དེར་བཞག་ནས། །བས་མཐའི་རྨོངས་རྒན་བདག་འདྲར་ཅི་ཞིག་འདྲི། ཞེས་བྱིན་རླབས་དམ་རྫས་བདུད་རྩི་སྨན་གྲུབ་ཁུང་བཙུན་ཐུམ་བུ་ལ་རྒྱ་ཞུས་ཕུལ་བ་ལ་རྩིས་བཞེས་ཞུ་ཞིང་། ཁ་ཐག་གནང་བ་འདི་པ་དར་ཅོག་ཏུ་བགྱིས་ཡོད་པ་ཡང་། དབྱིངས་བཞུགས་འཚལ། ཟླ་༡༡ཚེས་༡༥དགེ་བར། མཐའ་འཁོབས་ཀྱི་མཚམས་མལ་ནས་ཕུལ་བ་དགེ། །འཁོར་འདས་ལམ་གསུམ་དགེ་བའི་ཚོགས། །བདག་གིས་བསགས་དང་གསོག་འགྱུར་བའི། །དུག་མེད་བསྔོ་བའི་རྒྱུར་གྱུར་ཀུན། །སེམས་ཅན་སངས་རྒྱས་ཐོབ་རྒྱུར་བསྔོ། །སྐྱོན་བྲལ་ཡོན་ཏན་མཆོག་མངའ་བའི། །བླ་མ་ཡིད་བཞིན་ནོར་བུ་ཉིད། །འདི་བཟུང་བྱང་ཆུབ་མ་ཐོབ་བར། །
འབྲལ་མེད་གཙུག་ཏུ་བསྟེན་པར་ཤོག །བརྒྱད་ཁྲི་བཞི་སྟོང་ཆོས་ཀུན་གྱི། །སྙིང་པོའི་ཡང་ཞུན་ཕྱག་རྒྱ་ཆེ། །ཐབས་ཤེས་ཟུང་འཇུག་ཉམས་ལེན་ལ། །བརྩོན་པས་འབྲས་བུ་མངོན་གྱུར་ཤོག །རྟེན་འབྲེལ་རྒྱུ་འབྲས་དམ་ཚིག་སྡོམ། །ཉེས་མེད་ཕུན་ཚོགས་མཐར་ཕྱིན་ཞིང་། །ཆོས་ཕྱིར་དཀའ་བཟོད་རྒྱུད་སྨིན་གྲོལ། །ས་ལམ་ཡོན་ཏན་ཡོངས་རྫོགས་ཤོག །ལོག་ལམ་བདུད་ཀྱིས་མི་བསྐྱོད་ཅིང་། །བླ་མའི་བྱིན་གྱིས་རྟག་རློབས་པའི། །སྐལ་པ་བཟང་པོར་བདག་གྱུར་ནས། །འགྲོ་བའི་དོན་རྣམས་འགྲུབ་པར་ཤོག །ཅེས་པའི་སྨོན་ལམ་འདི་ཡང་ཡེ་ཤེས་རབ་གསལ་ལའོ། །གང་ལ་བརྟེན་ན་ཐུགས་རྗེ་མཆོག་མངའ་བའི། །སྐྱབས་གནས་དཀོན་མཆོག་ཀུན་འདུས་བླ་མ་རྗེ། །སྤྲུལ་དང་ཡང་སྤྲུལ་བཅས་པའི་བདེན་སྟོབས་ཀྱིས། །སྨོན་ལམ་གེགས་མེད་འགྲུབ་པར་མཛད་དུ་གསོལ། །
དེང་བཟུང་སྐྱེ་བའི་ཕྲེང་བ་ཇི་སྙེད་པར། །མཐོ་རིས་ཡོན་ཏན་བདུན་ལྡན་དལ་འབྱོར་ལུས། །བསླབ་གསུམ་རིན་ཆེན་རྒྱན་དང་རིམ་གཉིས་ཀྱི། །གཙུག་རྒྱན་མངོན་པར་མཐོ་བས་འབྱོར་གྱུར་ཅིག །མང་ཐོས་ཁེངས་སེམས་བྲལ་བས་དུས་ལྡན་དང་། །ལེགས་བསམ་དྲི་མ་མེད་པའི་བློ་གྲོས་ལྡན། །དོན་སྒོམས་རྒྱུད་ལ་འབྱོར་བའི་ཉམས་རྟོགས་བཅས། །ཤེས་རབ་གསུམ་གྱིས་ཆོས་མིག་ཐོབ་གྱུར་ཅིག །ཞེན་མེད་ལོག་འཚོ་བྲལ་བའི་འབྱོར་པས་ཕྱུག །གཏོང་ལ་ཡང་དག་གོམས་པས་ཚོགས་ཆེན་རྫོགས། །རང་འདོད་མངོན་རློམ་སྤངས་པའི་གཞན་ཕན་གྱིས། །སེམས་དཔའ་མཆོག་གི་རྣམ་ཐར་འགྲུབ་གྱུར་ཅིག །སྐྱབས་ཀུན་ངོ་བོ་གཅིག་འདུས་བླ་མ་ལ། ཁ་ཞེ་ཐ་དད་མིན་པའི་མོས་གུས་ཀྱིས། །ལུས་སྲོག་ལོངས་སྤྱོད་ལྟོས་མེད་ཞབས་ཏོགས་དང་། །སྒྲུབ་པས་མཉེས་པ་མཐའ་རུ་ཕྱིན་གྱུར་ཅིག །
དམ་པའི་ཆོས་དང་འགལ་བའི་བར་ཆད་ཚོགས། །ཡུལ་དུས་གནས་སྐབས་གང་དུའང་མི་འབྱུང་ཞིང་། །རྣམ་དཀར་དགེ་བའི་མཐུན་རྐྱེན་ཇི་སྙེད་ཀུན། །སྲིད་ཞིའི་ཁྱོན་མཉམ་འབད་མེད་འབྱུང་གྱུར་ཅིག །བདག་སོགས་མཁའ་མཉམ་འགྲོ་བ་བྱང་ཆུབ་ལམ། །མ་འཁོད་དེ་སྲིད་རྗེ་བཙུན་བླ་མ་ཡི། །སྐུ་གསུང་ཐུགས་ཀྱི་སྒྱུ་འཕྲུལ་རྨད་བྱུང་གི། །ཐུགས་རྗེའི་ཟློས་གར་རྒྱུན་ཆད་མེད་གྱུར་ཅིག །ནམ་མཁའི་མཐའ་ཁྱབ་འགྲོ་བའི་ཁམས་རྒྱ་མཚོ། །མ་ཟད་དེ་སྲིད་བདག་གི་ལྷག་བསམ་གྱི། །སྨོན་ལམ་ནུས་པའི་ཕྲིན་ལས་མི་ཟད་པས། །སེམས་ཅན་ཐམས་ཅད་སངས་རྒྱས་སར་འགོད་ཤོག །དུས་གསུམ་བདེར་གཤེགས་བླ་མ་ཡི་དམ་ལྷ། །མཁའ་འགྲོ་ཆོས་སྲུང་བྱིན་རླབས་ནུས་མཐུ་དང་། །ཆོས་ཉིད་དོན་དམ་བདེན་པའི་སྟོབས་ཆེན་པོས། །སྨོན་ལམ་ཐོག་པ་མེད་འགྲུབ་བཀྲ་ཤིས་ཤོག །ཅེས་པ་འདི་ནི། རིགས་རུས་འབྱོར་པའི་དཔལ་གྱི་མངོན་པར་མཐོ་བ་ལས་ཀྱང་དམ་པའི་ཆོས་ལ་མི་ཕྱེད་པའི་དད་པ་དང་མི་མཉམ་
པའི་བརྩོན་པ་ཅན། ཡང་དག་པའི་ཡོན་ཏན་ངེས་པར་ལེགས་པའི་དཔལ་གྱིས་ཕྱུག་པར་གྱུར་པ། ཤར་སྤུ་བོ་ཀ་ནམ་ནས་སྐུ་མདུན་དབོན་མོའི་དྲུང་གི་བཀའ་བསྐུལ་བ་བཞིན། ཆོས་དབྱིངས་འོད་གསལ་རྩེ་མོའི་སྒོམ་ཁང་དུ་བྲིས་ཏེ་ཕུལ་བ་ཨི་ཐཱི། རྒྱལ་ཀུན་ཡེ་ཤེས་ཐུགས་རྗེ་གཅིག་བཟླུམ་པ། །པད་འབྱུང་འཛམ་གླིང་གྲགས་དང་རཏྣའི་ཞབས། །འཇའ་ཚོན་བཟང་པོ་རྡོ་རྗེ་ལེགས་གྲུབ་རྩལ། །སྐྱབས་གནས་བསླུ་མེད་ཐུགས་རྗེ་ནུས་མཐུ་ཡིས། །འདི་བཟུང་སྐྱེ་བའི་ལུས་རྒྱུད་ཇི་སྙེད་པར། །ཆོས་ཀུན་སྙིང་པོ་ཕྱག་རྒྱ་ཆེན་པོ་དང་། །དམ་ཆོས་འདུལ་བའི་ཀུན་སྤྱོད་ཟུང་འཇུག་ཉིད། །རང་བློའི་ཐ་རྒོད་འདུལ་སྦྱོང་ཐོག་ཏུ་འཁེལ། །ལྟ་སྤྱོད་རྣམ་དག་འབྲེལ་བས་བསྟན་སྲོག་ཟིན། །སྨོན་ལམ་བྱང་སེམས་ནུས་པས་འགྲོ་དོན་འགྲུབ། །དྲི་མེད་རྒྱལ་སྲས་སྤྱོད་པ་རླབས་ཆེན་ལ། །རང་གཞན་བདེ་བླག་འཁོད་པ་ཉིད་གྱུར་ཅིག །ཅེས་པ་འདི་ནི། རྒྱལ་སྲས་རིག་པ་འཛིན་པ་ཆེན་
པོ་ཆོས་དབྱིངས་ཀློང་གྲོལ་གྱི་བཞེད་པ་ལྟར་བྲིས་པའོ། །པྲ་ཎི་དྷཱ་ན་སིདྡྷནྟུ། །གདོད་མའི་གཞི་ལ་འཁོར་འདས་ལམ་གསུམ་གྱི། །དམིགས་མཚན་བྲལ་ཡང་ཀུན་བརྟག་འཁྲུལ་བློ་ཡི། །སྣང་ངོར་ལམ་གྱི་ཆོས་ཚུལ་ཇི་སྙེད་པའི། །སྨོན་ལམ་བཏབ་འདི་དོན་དུ་འགྱུར་བར་ཤོག །རྡོ་རྗེ་ཐེག་པའི་ལམ་ཟབ་སྙིང་པོ་ཀུན། །སྒོ་གསུམ་རྡོ་རྗེ་གསུམ་དུ་ཉེར་གནས་པ། །མངོན་དུ་འགྱུར་བྱེད་ཐབས་མང་རྒྱ་ཆེ་བའི། །གནད་དོན་མ་ནོར་ལམ་དུ་ལྷོངས་པར་ཤོག ཁམས་དྲུག་ལྡན་པའི་དལ་འབྱོར་རིན་ཆེན་ལུས། །རྩ་གསུམ་འཁོར་ལོ་བཞི་ཡི་རྟེན་གནས་ལ། །རླུང་དང་ཐིག་ལེའི་འདུ་འགོད་སྤྲོ་བསྡུ་ཡིས། །རྣམ་སྨིན་མ་དག་ཕུང་པོ་དག་བྱེད་ཤོག །བརྡ་ཡི་གཏུམ་མོ་ཨ་ཤད་རབ་འབར་བ། །དོན་གྱི་གཏུམ་མོ་བདེ་གསལ་མི་རྟོག་པ། །རྟགས་ཀྱི་གཏུམ་མོ་ཤེར་ཕྱིན་རྣལ་འབྱོར་མ། །དབྱེར་མེད་ལས་
ཉོན་བག་ཆགས་བསྲེག་ནུས་ཤོག །འཁོར་འདས་མཐའ་དག་སྒྱུ་མའི་རོལ་པ་ལ། །རྟག་བརྟན་བདེན་པར་བཟུང་བའི་ཞེན་བློ་འདིས། །ཐོག་མེད་ད་བར་འཁྲུལ་པའི་རྒྱུ་རྐྱེན་བྱས། །ད་ནས་ཅིར་སྣང་སྒྱུ་མར་ཤར་གྲོལ་ཤོག །འབྱུང་བ་ལས་གྲུབ་སྣོད་ཀྱི་འཇིག་རྟེན་དང་། ཁམས་ལྔས་བསྐྱེད་པའི་བཅུད་ཀྱི་སྐྱེ་འགྲོ་སོགས། །བདག་གཞན་མ་དག་སྒྱུ་མའི་དངོས་འཛིན་ཀུན། །དག་པ་ཡེ་ཤེས་སྒྱུ་མར་རང་གྲོལ་ཤོག །ཚོགས་དྲུག་སྒྱུ་མའི་ཆོ་འཕྲུལ་སྣ་ཚོགས་ལ། །ཆགས་སྡང་སྤོང་ལེན་བྱིས་པའི་རྩེད་མོ་ལྟར། །མི་བདེན་བདེན་པར་འཛིན་འདི་ཞིག་ནས་ཀྱང་། །མ་དག་སྒྱུ་ལུས་འཆིང་བ་ཀུན་གྲོལ་ཤོག །གཟུགས་སྣང་ལྷ་དང་གྲག་པའི་སྒྲ་རྣམས་སྔགས། །དྲན་རྟོག་ཡེ་ཤེས་འཁོར་ལོར་ལྷུན་གྲུབ་པས། །དངོས་དང་དངོས་མིན་མཐའ་ལས་ཡོངས་གྲོལ་བའི། །དག་པའི་སྒྱུ་ལུས་བརྟན་པ་ཐོབ་པར་ཤོག །ལོངས་སྤྱོད་འཁོར་ལོར་ལས་རླུང་ཆོ་འཕྲུལ་
གྱི། །འཁྲུལ་འཁོར་ཅིར་ཡང་ཤར་ལ་རྨི་ལམ་ཞེས། །ཉིང་འཁྲུལ་དེ་ལ་བཟང་ངན་རྟགས་བཟུང་བའི། །ཅོལ་ཆུང་བྱིས་པའི་རྣམ་ཐར་མི་སྟོན་ཤོག །མི་ཚེའི་ཕྱེད་ནི་གཏི་མུག་གཉིད་དབང་འགྲོ། །དེ་ལ་གདམས་པའི་གནད་མེད་འཁྲུལ་འབྱམས་ངང་། །དལ་འབྱོར་སྟོང་ཟད་བཏང་བའི་བློ་དྲེད་པོ། །ད་ནས་གདམས་པའི་གནད་ལ་འཇུག་བྱེད་ཤོག །རྨི་ལམ་རྨི་ལམ་དུ་ཤེས་བཟུང་གནད་དང་། །ཡི་དམ་ལྷར་སྤྲུལ་གཅིག་ལས་མང་པོར་བསྒྱུར། །ཞིང་ཁམས་བགྲོད་དང་གདུལ་བྱའི་དོན་བྱེད་སོགས། །སྤྲུལ་བསྒྱུར་སྦྱོང་སྤེལ་རང་དབང་ཐོབ་པར་ཤོག །གཉིད་ཀྱི་རྨི་ལམ་དབྱིངས་སུ་ནུབ་པ་དང་། །རྨི་ལམ་ཆེན་པོ་འདི་སྣང་འཁྲུལ་པ་ཞི། །དུས་མཐའི་རྨི་ལམ་བར་དོའི་འཁྲུལ་རྒྱུན་ཆད། །རྨི་ལམ་རྣམ་གསུམ་འཁྲུལ་པ་རྩད་ཆོད་ཤོག །གདོད་ནས་དག་པའི་གནས་ལུགས་འོད་
གསལ་ཆེ། །འཇག་མིག་སྲིན་བུ་ཡན་གྱི་འགྲོ་ཀུན་ལ། །ཁྱབ་ཀྱང་རང་ངོ་མ་ཤེས་ལྷན་སྐྱེས་ཀྱི། །མི་ཤེས་དྲི་མ་དབྱིངས་སུ་ཞི་བར་ཤོག །གཞི་ཡི་འོད་གསལ་མངོན་དུ་བྱས་པའི་ཕྱིར། །ལམ་གྱི་འོད་གསལ་སྒྲུབ་པའི་ཐབས་གདན་ལ། །རབ་བརྩོན་འབྲས་བུའི་འོད་གསལ་ཆོས་ཀྱི་སྐུ། །རང་ལ་བཞུགས་པའི་རང་ཞལ་མཐོང་བར་ཤོག །ཉམས་ཀྱི་འོད་གསལ་ཕྲ་རག་འཆར་སྒོ་ལ། །ཞེན་རློམ་ཁེངས་སེམས་ཆོག་པར་འཛིན་སྤོང་ཞིང་། །རྟོགས་པ་དོན་གྱི་འོད་གསལ་དྲི་བྲལ་ཉིད། །རང་གསལ་རང་རིག་ཆེན་པོར་གདེངས་ཐོབ་ཤོག །རྟགས་ཀྱི་འོད་གསལ་སྣང་བཞི་མཐར་ཕྱིན་ནས། །བརྡ་ཡི་འོད་གསལ་དག་པ་རབ་འབྱམས་ཤར། །དོན་གྱི་འོད་གསལ་འཆར་ནུབ་སྤྲོས་དང་བྲལ། །ཟུང་འཇུག་ཆེན་པོའི་ཀློང་དུ་གྲོལ་བར་ཤོག །ཐོག་མའི་གཞི་ནས་མཐར་ཐུག་བྱང་ཆུབ་བར། །
འཁོར་འདས་བར་དོར་མ་གྱུར་འགའ་མེད་ཀྱང་། །བར་མ་དོ་ཞེས་ངན་པར་བཟུང་བའི་བློ། །ལོག་པར་རྟོག་པའི་མདུད་བརྒྱ་གཏན་གྲོལ་ཤོག །སྐྱེ་ཤི་བར་དོར་རྟག་འཛིན་ཞེན་པ་ཆོད། །རྨི་ལམ་བར་དོར་ཉིང་འཁྲུལ་མགོ་འཁོར་སངས། །འཆི་ཁ་བར་དོར་གནད་གཅོད་ཟུག་རྔུ་བྲལ། །ཆོས་ཉིད་འོད་གསལ་གཞི་ལ་གྲོལ་བར་ཤོག །གོམས་སྟོབས་ཆུང་བས་དུས་དེར་མ་གྲོལ་ཀྱང་། །རང་སྣང་སྒྲ་འོད་ཟེར་ལ་མི་སྐྲག་པར། །ཞི་ཁྲོའི་ལྷ་དང་དེ་ཡང་རང་རིག་གི། །རང་རྩལ་ཡེ་ཤེས་ཡིན་པར་རྟོགས་གྲོལ་ཤོག །གལ་ཏེ་བག་ཆགས་ཚན་ཆེ་ཤུགས་དྲག་པས། །སྲིད་པ་ལས་ཀྱི་བར་དོ་འཆར་བ་ན། །མ་ངེས་རྟགས་དྲུག་དགྲ་བཞི་གཡང་ས་གསུམ། །ཀུན་གྲོལ་སྐྱེ་འཇུག་རང་དབང་ཐོབ་པར་ཤོག །གང་ཞིག་ཚེ་འདིར་གཡེང་བའི་དབང་སོང་ནས། །ཟབ་དོན་ཉམས་ལེན་ནུས་སྟོབས་དང་
བྲལ་ན། །སྡིག་ཅན་སང་ལམ་བརྩན་ཐབས་བགྲོད་ནུས་པའི། །ཟབ་ལམ་འཕོ་བའི་རྟེན་འབྲེལ་འཛོམ་པར་ཤོག །འཕོ་བྱ་འཕོ་བྱེད་བྲལ་བ་ཆོས་སྐུའི་ལམ། །སྐྱེད་རིམ་ལྷ་སྐུར་གྲོལ་བ་ལོངས་སྐུའི་གནད། །ཡུལ་དང་ཡུལ་ཅན་སྤྲད་པ་སྤྲུལ་སྐུའི་ཐབས། །གང་ལ་གོམས་པའི་ཉམས་ལེན་དོན་འགྲུབ་ཤོག །མཚན་ལྡན་བླ་མ་དད་ཅན་སློབ་མ་གཉིས། །དམ་ཚིག་སེལ་མེད་མོས་གུས་མཚམས་སྦྱར་ཏེ། །བྱིན་རླབས་བླ་མའི་འཕོ་བ་ལ་སོགས་པས། །འཆུགས་མེད་མཁའ་སྤྱོད་གནས་སུ་འཕོ་ནུས་ཤོག །རང་བཞིན་སྤྲུལ་སྐུའི་ཞིང་ཁམས་རིགས་ལྔའམ། །བདེ་ཅན་དགའ་ལྡན་པདྨ་འོད་ལ་སོགས། །དག་པའི་ཞིང་དུ་ས་ལམ་མཐར་ཕྱིན་ཏེ། །སྤྲུལ་པས་འགྲོ་བ་འདྲེན་ལ་མངའ་བརྙེས་ཤོག །དེ་ལྟར་སྨོན་ལམ་བཏབས་པའི་དགེ་འབྲས་མཐུས། །ཚོགས་རྫོགས་སྒྲིབ་བྱང་དབང་བཞིས་རྒྱུད་སྨིན་ཅིང་། །
རིམ་གཉིས་ལམ་བཟང་གྲོལ་བ་མཐར་ཕྱིན་ཏེ། །སྐུ་གཉིས་གོ་འཕངས་ཐོབ་ནས་འགྲོ་གྲོལ་ཤོག ཅེས་གསང་སྔགས་ཀྱི་མྱུར་ལམ་ཕལ་མོ་ཆེ་རྣམས་ཀྱི་གནད་གསང་སྙིང་པོ་ནི་གསར་མའི་ཆོས་དྲུག་གམ། སྙིང་མའི་བར་དོ་ཁྲིད་དྲུག་ཏུ་མ་འདུས་པ་ཆེར་མེད་པས་དེ་དང་མཐུན་པའི་སྨོན་ལམ་ཉམས་ལེན་གྱི་རྩ་ཚིག་ལྟ་བུར་འགྱུར་བའི་གནད་འདུས་ཤིག་དགོས་ཞེས་ཡོན་ཏན་དབང་ཕྱུག་གི་རིང་ནས་བསྐུལ་རུང་། དོན་འདི་དག་ནི་ཆོས་ཐམས་ཅད་ཀྱི་སྒྲོམ་དང་བྱིངས་ཆེ་ས་ཡིན་པའི་གནད་ཀྱི། ཚིག་ཉུང་ངུར་བསྡུས་ཚེ་གང་ཟག་ཕལ་གྱིས་གོ་བར་དཀའ་བ་ཙམ་གྱུར་ནའང་། བསྐལ་བ་རབ་ཀྱི་སྣོད་ལྡན་དག་ལ་སྒྲོགས་འཁྲོལ་བྱེད་དང་། ཐུན་མོང་བ་དག་ལ་སྨོན་ལ་བདེན་ཚིག་ཏུ་འགྱུར་བའི་དགེ་བ་ལ་དམིགས་ནས་བཀོད་པ་དགེའོ། །རབ་འབྱམས་རྒྱལ་བའི་ཐུགས་རྗེའི་ཟློས་གར་ནི། །ཆོས་དབྱིངས་ཡངས་པའི་འཁོར་ཡུག་ཀུན་འགེངས་པའི། །རྣམ་འདྲེན་སྤྲུལ་པའི་སྒྱུ་འཕྲུལ་ཇི་སྙེད་དབུས། །ངེས་གསང་ཨ་ཏིའི་སྙིང་པོ་རྡོ་རྗེའི་དབྱངས། །མངོན་པར་
སྒྲོག་ལ་གདོང་ལྔའི་སྒྲ་གཞོམ་མཁན། །ཆོས་བརྒྱད་འཁོར་ལོའི་སྲོག་ཤིང་རྨེག་མེད་དུ། །གཏོང་ལ་བསྒྲུན་བྲལ་དཔའ་བོ་གཅིག་པུ་ཉིད། །སྐལ་བཟང་དད་པ་རྒྱ་མཚོའི་མགོན་བཞུགས་གསོལ། །སྣ་ཚོགས་འཁྲུལ་པའི་འདུ་འགོད་འབུམ་ཕྲག་གིས། །རང་གཞན་གཏན་འདུན་ཧྲུལ་པོར་བྱེད་པ་ལ། །འགྲོ་དོན་ཞེས་པའི་མཚན་སྙན་གསེར་སྒྲོག་གི། །མ་བཅིངས་ངེས་དོན་སྒྲོན་མར་ཞབས་བརྟན་གསོལ། །དབུ་བ་རྡོལ་འདྲའི་ཟང་ཟིང་སྒྱུ་མའི་ནོར། །འཚོལ་སྒྲུབ་གསོག་འཇོག་འགྱེད་པར་བུས་པའི་གར། །གང་ལ་གདུལ་བྱའི་མིང་གི་གཡོ་ཐབས་བརྒྱའི། །ཕྲིན་ལས་བརྫུས་མའི་མ་སྒྲིབས་ཞབས་བརྟན་གསོལ། །རོ་འཛིན་གློག་ལྟར་གཡོ་བསྐྱོད་ངལ་སྤངས་ཀྱང་། །གནས་ལུགས་ཡེ་ཤེས་རྟོགས་ལ་མི་ཉེ་བར། །འདབ་ཆགས་སྨྲ་མཁན་ཇི་ལྟའི་འཆད་ཉན་གྱི། །ཁུར་པོས་མི་བསྙེལ་སྒྲུབ་བརྩོན་
བརྟན་བཞུགས་གསོལ། །སྙིགས་མཐའི་འགྲོ་བ་ཆོས་ཀྱིས་འདུལ་སླད་དང་། །དེ་ཡང་སྤྲོས་པའི་འཁོར་ལོས་མ་ཡིན་ཕྱིར། །མགོན་ཁྱོད་གོང་མའི་རྣམ་ཐར་རྗེས་འགྲོ་བའི། །སྒྲུབ་རྒྱུད་ཕྲིན་ལས་སྐྱོང་ཞིང་ཞབས་བརྟན་གསོལ། །ཆོས་ཀུན་སྙིང་པོའི་གནས་ལུགས་ཨ་ཏིའི་གཤིས། །བཅོས་མིན་གདོད་མའི་ཀུན་བཟང་ཁྱེད་ཐུགས་དང་། །དབྱེར་མེད་འགྱུར་བ་བྲལ་བའི་ཐུགས་རྗེའི་རྩལ། །ཕྱོགས་མཐར་འགྱེད་པའི་ཕྲིན་ལས་གོང་འཕེལ་ཤོག །ཅེས་པའི་བརྟན་བཞུགས་འདི་ནི། འཁྲུལ་ཞིག་ལྷ་བཙུན་ཆེན་པོའི་སྤྲུལ་པའི་སྐུའི་དྲུང་དུ་ཕུལ་བའོ། །སྐྱབས་གནས་དཀོན་མཆོག་ཐུགས་རྗེ་ནུས་སྟོབས་ཀུན། །གཅིག་བསྡུས་རིགས་བདག་བླ་མ་རྗེ་བཙུན་མཆོག །རང་སེམས་སྤྲོས་མེད་རང་ངོ་སྤྲོད་མཛད་དེར། །ཕྱག་འཚལ་སྐྱབས་མཆི་སྨིན་གྲོལ་དངོས་གྲུབ་ཞུ། །འཁོར་འདས་ཀུན་གྱི་རྩ་བ་སེམས་ཉིད་འདི། །གདོད་ནས་ཡོངས་དག་སྤྲོས་བྲལ་
ཆོས་ཀྱི་སྐུར། །ལྷུན་གྱིས་གྲུབ་ཀྱང་རང་ལས་རང་བསྒྲིབས་པའི། །མ་རིག་ལྷན་སྐྱེས་དྲི་མ་དག་པར་ཤོག །འཁྲུལ་པ་གཞི་ལ་མེད་ཀྱང་བློ་བུར་དུ། །མེད་བཞིན་སྣང་བར་མཐོང་བའི་ར་རི་ཡིས། །ཐོག་མེད་ད་བར་འཁོར་བར་འཆིང་བ་འདི། །སྦྲུལ་མདུད་ལྟ་བུར་རང་སར་གྲོལ་བར་ཤོག །བདག་དང་བདག་གིར་འཛིན་པའི་དངོས་པོ་ནི། །རྡུལ་ཕྲན་ཙམ་ཡང་སེམས་ལ་མ་གྲུབ་ཀྱང་། །ཆོས་དང་གང་ཟག་བདག་ཏུ་བཟུང་ཞིང་འཛིན། །བདག་མེད་ཚིག་ཙམ་མ་ཡིན་རྟོགས་པར་ཤོག །ཆོས་ལུགས་གྲུབ་མཐའ་ང་བཟང་ཞེན་ཕྱོགས་ལ། །ཡེ་ནས་གོམས་བཞིན་གྲོགས་ཀྱིས་ཆགས་སྡང་སློབ། །ཀུན་སློང་སྲིན་དུ་འདྲིལ་བའི་རྩོད་གཞི་ཡིས། །རང་དང་གཞན་རྒྱུད་བསྲེག་པར་མི་བྱེད་ཤོག །འགྲོ་བའི་ཁམས་རྒྱུད་ཐ་དད་མང་པོ་ལ། །དགོངས་ནས་རྒྱལ་བས་ཆོས་སྒོ་མང་བསྟན་ཡང་། །མཐར་ཐུག་གདོད་
མའི་གནས་ལུགས་རྟོགས་ཐབས་སུ། །གཅིག་པའི་ཆོས་ཀྱི་སྙིང་པོ་ལོན་པར་ཤོག །ལྟ་བའི་བཞེད་སྲོལ་རྣམ་གྲངས་མཐའ་ཡས་ཀྱང་། །རང་རིག་རྗེན་པའི་རང་ངོ་མ་མཐོང་ན། །ཚིག་དང་ཁས་ལེན་ལྟ་བ་ཅི་བཟང་ཡང་། །གྲོལ་མིན་ལྟ་དོན་རྒྱུད་ལ་འཆར་བར་ཤོག །སྒོམ་པར་བཏགས་ཀྱང་སྒོམ་རྒྱུའི་དངོས་པོས་དབེན། །སྒོམ་མཁན་རང་ངོ་རིག་ན་སྒོམ་པའི་མཆོག །བསྒོམ་དང་མི་བསྒོམ་རེས་འཇོག་མ་ཡིན་པར། །སྒོམ་མེད་ཡེངས་བྲལ་མངོན་དུ་འགྱུར་བར་ཤོག །ཞི་བར་གནས་ལ་བཟང་པོ་འཛིན་བློ་དང་། །ཡེངས་སུ་དོགས་པའི་དྲན་པ་བཅོས་མ་ཡིས། །སེམས་ཀྱིས་སེམས་ཉིད་བཙོན་དུ་མི་འཆིང་བར། །གང་ཤར་རང་ངོ་རིག་ལ་གོམས་ཐོབ་ཤོག །བདེ་གསལ་མི་རྟོག་ཉམས་ལ་དགའ་བྲོད་དང་། །འགྱུར་རྟོག་སྐྱོན་དུ་བཟུང་ནས་སྤོང་འདོད་ཀྱི། །དགག་སྒྲུབ་གཉིས་འཛིན་ལྷན་པ་མི་
འདེབས་པར། །ཇི་ལྟར་འཆར་བ་སྒོམ་དུ་འཁྱེར་ནུས་ཤོག །དབེན་པར་རྐྱེན་མེད་བདེ་བར་གནས་པའི་ཚེ། །བཟང་བཟང་འདྲ་བའི་སྒོམ་ཉམས་ཟོ་བདེ་པོ། །ཡུལ་རྐྱེན་དྲག་པོར་ཕྲད་ན་རང་འཚང་སྟོན། །དེ་ལྟའི་སྒོམ་གྱིས་བསླུ་བར་མི་འགྱུར་ཤོག །གནས་པར་སྣང་བ་སེམས་ཀྱི་འདུག་ཚུལ་དང་། །འཕྲོ་བར་སྣང་ཡང་འགག་མེད་རོལ་རྩལ་ཏེ། །གང་ལའང་དགག་སྒྲུབ་བཅོས་བསྒྱུར་མི་བྱེད་པར། །རང་བབས་ལྷུག་པ་རིག་ཐོག་རང་གྲོལ་ཤོག །གོ་བ་ཉམས་མྱོང་རྟོགས་པའི་བྱེ་བྲག་སོགས། །དབང་རིམ་བརྩོན་འགྲུས་དང་མཐུན་འཆར་ཚུལ་ལ། །ར་གན་གསེར་དུ་འཛིན་བློས་མི་འཆིང་བར། །ཡིན་ལུགས་གནད་དོན་ཇི་བཞིན་རྟོགས་པར་ཤོག །ངར་འཛིན་མདུད་པ་ནང་ནས་མ་གྲོལ་བར། །ཐོ་ཅོ་སྨྱོན་སྤྱོད་བཅོས་མའི་བརྟུལ་ཞུགས་ཀྱིས། །སྡོམ་གསུམ་རླུང་ལ་བསྐུར་བའི་འཁྲུལ་ཞིག་ཏུ། །མི་བྱེད་ལྟ་སྤྱོད་ཕྱི་ནང་
མཐུན་པར་ཤོག །ཚིག་ཟུར་མཐོ་དམན་ཙམ་ཡང་མི་ཐེག་བཞིན། །རོ་སྙོམས་གསོབ་ཏུ་ཞུགས་པའི་སྒྱུ་འཕྲུལ་གྱིས། །སྒྲུབ་བརྒྱུད་བསྟན་པའི་ཞབས་འདྲེན་མི་བྱེད་པར། །སྟོང་ཉིད་རྒྱུ་འབྲས་ཟུང་འཇུག་ཤེས་པར་ཤོག །རྩ་རླུང་ཁམས་སེམས་དངས་ཆའི་ཡོན་ཏན་ཙམ། །མངོན་ཤེས་རྫུ་འཕྲུལ་ཕྲ་མོའི་ལམ་རྟགས་ལ། །རང་གཞན་གཉིས་ཀས་གྲུབ་ཐོབ་མཚན་གསོལ་ཏེ། །ལྷ་བུའི་བདུད་ཀྱི་མངའ་ཐང་མི་བསྐྱེད་ཤོག །སྐུ་གསུམ་འབྲས་བུ་གཞི་ལ་ཡེ་རྫོགས་ཀྱི། །ཡོན་ཏན་བྲི་གང་མེད་པར་མ་རྟོགས་པས། །ས་ལམ་ཉམས་རྟོགས་རེ་བས་མི་བསྒུགས་ཤིང་། །འབྲས་བུ་གཞན་ནས་འཚོལ་བར་མི་བྱེད་ཤོག །སེམས་སྐྱེད་སྨོན་ལམ་ཚོགས་གཉིས་མཚམས་སྦྱོར་དང་། །རིམ་གཉིས་མངོན་གྱུར་ནུས་སྟོབས་བྱིན་རླབས་མཐུས། །རིས་མེད་རླབས་ཆེན་འགྲོ་དོན་ཤུགས་འབྱུང་མས། །ལྟར་སྣང་རྙེད་ཚོལ་འགྲོ་
དོན་མི་སྒྲུབ་ཤོག །དེ་ལྟར་གནས་སྐབས་འདོད་དོན་མ་ཡིན་པའི། །མཐར་ཐུག་ཡང་དག་དོན་གྱི་སྨོན་ཚིག་འདི། །ཇི་ལྟར་བཏབས་བཞིན་གེགས་མེད་མྱུར་འགྲུབ་པར། །སྐྱབས་མཆོག་བླ་མ་རྣམས་ཀྱིས་མཛད་དུ་གསོལ། །ཞེས་པ་འདི་ནི། །བུ་དོང་ཐམས་ཅད་མཁྱེན་པའི་ཐུགས་རྗེའི་འོད་ཟེར་གྱིས་བློའི་པདྨོ་ཁ་ཕྱེས་པའི་སྟོན་སྒོམ་ངེས་དོན་ཆོས་རྒྱལ་གྱི་བཞེད་དངས་ལྟར་བྲིས་པའོ། །སངས་རྒྱས་ཐམས་ཅད་དོན་ལ་ངོ་བོ་གཅིག །གནས་སྐབས་གདུལ་བྱའི་སྣང་ངོར་ཐ་དད་ཚུལ། །ཀུན་ཀྱང་ཡེ་ཤེས་འཁོར་ལོར་རོ་གཅིག་པའི། །སྤྱི་གཟུགས་གངས་ཅན་མགོན་པོ་སྤྱན་རས་གཟིགས། །ཐུགས་རྗེ་ཐབས་མཁས་འགྲོ་ལ་རྟག་ཏུ་བརྩེ། ཁམས་གསུམ་རིས་དྲུག་ཀུན་གྱི་སྐྱབས་གཅིག་པུ། །མཚན་ཙམ་དྲན་པས་ལས་ཉོན་སྡིག་སྒྲིབ་སྦྱོང་། །གསོལ་བ་བཏབ་པས་ཡིད་ལ་འདོད་དགུ་སྩོལ། །ལྷ་དང་བླ་མ་དབྱེར་མེད་ཐུགས་རྗེའི་བདག །ཁྱེད་སྐུ་དྲན་ཅིང་མོས་པས་བསྒོམས་པ་དང་། །གསུང་
མཆོག་ཡིག་དྲུག་རྡོ་རྗེའི་བཟླས་པ་ཡིས། །ཁྱོད་ཐུགས་འོད་གསལ་ཆོས་སྐུ་མངོན་འགྱུར་ཤོག །ནམ་མཁས་གར་ཁྱབ་འགྲོ་བ་རིས་དྲུག་ཀུན། །ཐོག་མ་མེད་ནས་བདག་གི་ཕ་དང་མ། །དྲིན་ལན་མ་འཁོར་ཆགས་སྡང་གནོད་འཚེ་བསྒྲུབས། །ད་ནས་དྲིན་ལན་ཆོས་ཀྱིས་འཁོར་བྱེད་ཤོག །འདི་ནས་བཟུང་སྟེ་ཚེ་རབས་ནམ་དུ་ཡང་། །འཕགས་མཆོག་སྤྱན་རས་གཟིགས་ཀྱིས་རྗེས་བཟུང་སྟེ། །བྱམས་དང་སྙིང་རྗེ་ཕྱོགས་རིས་མེད་པ་ཡིས། །སེམས་ཅན་ཐམས་ཅད་བདེ་ལ་འགོད་པར་ཤོག །གཟུངས་སྔགས་རྒྱལ་པོ་ཡི་གེ་དྲུག་པ་འདི། །སངས་རྒྱས་ཀུན་གྱིས་ཐུགས་སྲོག་སྙིང་པོ་སྟེ། །བསྙེན་ཅིང་བསྒྲུབ་པའི་བྱིན་རླབས་རྨད་བྱུང་བས། །བར་ཆད་ཀུན་ཞི་དངོས་གྲུབ་མཆོག་ཤོག །འཕགས་མཆོག་ཁྱེད་ཀྱི་ཕྲིན་ལས་ནུས་སྟོབས་དང་། །མཚུངས་པའི་ཡོན་ཏན་མ་ལུས་བདག་འགྲུབ་ནས། །གང་ལ་གང་འདུལ་
ཕན་བདེའི་ཕྲིན་ལས་ཀྱིས། །འཁོར་བ་སྡུག་བསྔལ་རྒྱ་མཚོ་སྐེམ་བྱེད་ཤོག །ལྷག་བསམ་རྣམ་དག་བྱང་ཆུབ་སེམས་ཀྱི་རྒྱུན། །ནམ་ཡང་ཉམས་པ་མེད་པའི་འགྲོ་བའི་དོན། །རྒྱལ་བ་སྲས་བཅས་ཀུན་གྱིས་མཛད་པ་དང་། །རྗེས་སུ་མཐུན་པའི་སྤྱོད་པ་བདག་འགྲུབ་ཤོག །མདོར་ན་བདག་དང་ཕ་མ་མཁའ་མཉམ་གྱི། །འགྲོ་ཀུན་ཐུགས་རྗེ་ཆེན་པོ་མྱུར་འགྲུབ་ནས། །བླ་མེད་རྫོགས་པའི་བྱང་ཆུབ་ཆེན་པོ་ཡི། །གོ་འཕང་ཚེ་འདི་ཉིད་ལ་ཐོབ་གྱུར་ཅིག །ཅེས་པ་འདི་ནི། དད་ལྡན་ཀརྨ་ཚེ་རིང་ལའོ། སྭ་སྟི་པྲ་ཛ་བྷྱཿ གང་ཞིག་རྒྱལ་བའི་ཐུགས་རྗེ་ནི། །བསམ་མི་ཁྱབ་པའི་ཟློས་གར་ལས། །སྣ་ཚོགས་ཚུལ་གྱི་སྣ་ཚོགས་པའི། །གདུལ་བྱ་འདུལ་མཛད་ལ་ཕྱག་འཚལ། །བསྐལ་བཟང་འདྲེན་པ་སྟོང་དག་གི། །ཞབས་འབྲིང་བརྒྱ་བྱིན་ལྷ་ཡི་དབང་། །མོས་པས་རིན་ཆེན་གཡས་འཁྱིལ་དུ། །རྒྱལ་ལ་ཕུལ་ཞིང་བྱིན་གྱིས་བརླབས། །
གང་གི་ཐུགས་རྗེ་རྨད་བྱུང་གི། །རྟེན་འབྲེལ་ནུས་སྟོབས་མཐུ་ཆེན་པོས། །ཆོས་ཀྱི་དུང་ཆེན་བླ་མེད་སྒྲས། །བསྟན་པའི་རྒྱལ་མཚན་ཉིད་གྱུར་ཅིག །ཕྱོགས་བཅུ་མཐའ་ཡས་ཞིང་ཀུན་ཏུ། །ཆོས་དུང་རྡོ་རྗེའི་དབྱངས་ཆེན་པོས། །ཡོངས་ཁྱབ་མཆོད་པའི་ཕུལ་དང་རབ། །བསྟོད་དབྱངས་རྒྱུན་མི་ཆད་དུ་ཤོག །གཞོམ་མེད་རྡོ་རྗེའི་དབྱངས་ཆེན་འདིས། །མ་རུངས་བདུད་ཚོགས་ཚར་གཅོད་ཅིང་། །ཚོགས་མཆོག་དགེ་འདུན་འདུས་པའི་སྡེ། །ཐོས་བསམ་སྒོམ་བསྟན་རབ་རྒྱས་ཤོག །ཆོས་དུང་དབྱངས་སྒྲ་ཐོས་པའི་འགྲོ། ཁམས་གསུམ་ས་ཀུན་སྡིག་སྡུག་དང་། །ངན་འགྲོའི་རྒྱུ་རྐྱེན་རྒྱུན་ཆོད་པའི། །ཕྲིན་ལས་མཆོག་ཏུ་འགྱུར་བར་ཤོག །རྒྱལ་དང་རྒྱལ་སྲས་ཐུགས་རྗེ་དང་། །འཕགས་མཆོག་འདུས་སྡེའི་བྱིན་རླབས་ཀྱིས། །ཕྱོགས་དུས་ཀུན་དུ་བསྟན་འགྲོའི་དོན། །དགེ་ལེགས་ཡོངས་
ཁྱབ་བཀྲ་ཤིས་ཤོག །ཅེས་པ་འདི་ནི། །སྨིན་གྲོལ་བསྐྱེད་རྫོགས་གླིང་གི་ཚོགས་དུང་ལ་རིན་ཆེན་གྱི་གཤོག་པ་ཕུལ་བའི་སྐབས་སུ་དར་གྱི་ཅོད་པན་ལ་སྨོན་ལམ་འདི་ཉིད་བྲིས་ཏེ་ཕུལ་བའོ།། ༈ །།ཨོཾ་སརྦ་མངྒ་ལ་སྭསྟི་ཧཱུྃ། །ཕྱོགས་བཅུ་རབ་འབྱམས་རྒྱ་མཚོའི་ཞིང་ཀུན་ན། །མཁྱེན་བརྩེ་ནུས་པ་རྒྱ་མཚོའི་གཏེར་མངའ་བའི། །སངས་རྒྱས་སྲས་འཁོར་རྒྱ་མཚོའི་སྤྲིན་ཕུང་གི། །ཐུགས་རྗེ་བྱིན་རླབས་རྒྱ་མཚོའི་ཆར་ཆེན་ཕོབ། །རྩ་གསུམ་རྒྱལ་བའི་དཀྱིལ་འཁོར་མ་ལུས་ཀྱི། །གསང་གསུམ་མི་ཟད་རྒྱན་གྱི་འཁོར་ལོའི་མཛོད། །མཐའ་དག་རྫུ་འཕྲུལ་བཀོད་པའི་སྐུ་གཅིག་ཏུ། །ལེགས་སྤྲུལ་མཚོ་སྐྱེས་རྡོ་རྗེའི་བྱིན་རླབས་ཤིག །བསླུ་མེད་སྐྱབས་ཀྱི་དམ་པ་དཀོན་མཆོག་དང་། །གང་གི་སྤྲུལ་པའི་སྒྱུ་འཕྲུལ་ཡི་དམ་ལྷ། །ཕྲིན་ལས་དྲག་རྩལ་དབང་བསྒྱུར་བསྟན་སྲུང་གི། །ཆོས་སྐྱོང་ཚོགས་ཀྱིས་མཆོག་མཐུན་དངོས་གྲུབ་སྩོལ། །རིས་མེད་ཕྱོགས་བཅུའི་འཇིག་རྟེན་
ཁམས་ཀུན་དང་། །གྲངས་མེད་འགྲོ་བའི་སྤྱོད་ཡུལ་དུས་གསུམ་དུ། །མི་དགེ་ཉེར་འཚེའི་མཚན་མས་དབེན་པ་དང་། །རྟག་ཏུ་བདེ་དགེ་འབྱོར་པས་འཚོ་གྱུར་ཅིག །རྒྱལ་བའི་རྒྱལ་མཆོག་ཤཱཀྱའི་དབང་པོ་ཡི། བསྟན་པ་མདོ་སྔགས་ཉི་ཟླ་ཟུང་གཅིག་འདི། །ནམ་ཡང་འགྲིབ་མེད་ཐོས་བསམ་སྒོམ་པའི་རྒྱུན། །གྲུབ་མཐའ་ཕྱོགས་ལྷུང་བྲལ་བར་འཕེལ་གྱུར་ཅིག །ཐེག་པའི་ཡང་རྩེ་བསྟན་པ་ཀུན་གྱི་བཅུད། །འོད་གསལ་རྡོ་རྗེ་སྙིང་པོའི་བསྟན་མཆོག་གང་། །འཛིན་སྐྱོང་སྤེལ་མཛད་རྣམ་འདྲེན་འདུས་སྡེར་བཅས། །འབྲལ་མེད་སྨིན་གྲོལ་དགའ་སྟོན་སྤྱོད་གྱུར་ཅིག །མ་རུང་ལོག་པར་འདྲེན་པའི་བར་ཆད་བགེགས། །ཆོས་མིན་འཇིག་རྟེན་ཆོས་བརྒྱད་ཆགས་སྡང་གིས། །ཉེར་བསྐྱེད་ལོག་པའི་སྤྱོད་ངན་བསྟན་པའི་སོལ། །མཐའ་དག་ནམ་ཡང་འབྱུང་བ་མེད་གྱུར་ཅིག །རྣམ་
འདྲེན་མཆོག་རྣམས་སྐུ་ཚེ་ཕྲིན་ལས་འཕེལ། །དགེ་འདུན་མཐུན་རྒྱས་བསླབ་གསུམ་དྲི་མེད་སྤྱོད། །སྦྱིན་པའི་བདག་རྣམས་ཡིད་ལ་གང་བསམ་འགྲུབ། །ཐམས་ཅད་བྱང་ཆུབ་སྙིང་པོར་གྲོལ་གྱུར་ཅིག །རྩ་གསུམ་རྒྱལ་བའི་དཀྱིལ་འཁོར་ཐུགས་རྗེ་དང་། །བདག་སོགས་འཁོར་འདས་ལམ་གསུམ་དགེ་ཚོགས་མཐུས། །སྨོན་ལམ་དགེ་ལེགས་རྒྱ་མཚོའི་བཀྲ་ཤིས་ཆར། །སྲིད་ཞི་འཁོར་འདས་ཡོངས་ལ་ཁྱབ་གྱུར་ཅིག །ཅེས་པའི་སྨོན་ལམ་འདི་ཉིད་བླ་མ་རིག་འཛིན་ཡེ་ཤེས་པས་ལྷག་བསམ་གྱི་ཉེ་བར་བསྐུལ་བ་བཞིན། གནས་ཆེན་མགོ་དགུའི་ཡང་དབེན་ཀུན་སྣང་དང་བའི་སྒོམ་ཁང་གསེར་གྱི་རྒྱལ་མཚན་མངོན་པར་མཐོ་བའི་མཚམས་ཁང་དུ་ཡི་གེར་སྤེལ་བ་དགེའོ། །མཁྱེན་དང་བརྩེ་དང་ནུས་པར་ལྡན་པ་ཡི། །དཀོན་མཆོག་རྒྱལ་བ་སྲས་བཅས་བླ་མའི་ཚོགས། །ཡི་དམ་མཁའ་འགྲོ་ཆོས་སྲུང་གཏེར་བདག་རྣམས། །བདག་གི་སྨོན་ལམ་འགྲུབ་པར་བྱིན་གྱིས་རླབས། །སྐྱེ་བ་འདི་བཟུང་མཐར་ཐུག་བྱང་ཆུབ་བར། །མི་
ཁོམ་མི་སྐྱེ་དལ་འབྱོར་ཕུན་ཚོགས་ཐོབ། །དབང་པོ་ཚང་ཞིང་དམ་ཆོས་སྤྱོད་པའི་རིགས། །སྐལ་པ་བཟང་པོའི་ལུས་སུ་སྐྱེ་བར་ཤོག །མཐོ་རིས་ཡོན་ཏན་བདུན་གྱིས་རྒྱན་བཞིན་དུ། །འཁོར་བར་མི་ཆགས་ངེས་འབྱུང་བསམ་པས་བསྐུལ། །རྒྱལ་བསྟན་དྲི་མ་མེད་པའི་སྒོར་ཞུགས་ནས། །ཐར་པ་དམ་པའི་ས་བོན་ཐེབས་བྱེད་ཤོག །བསྟན་པའི་གཞི་མ་སོ་ཐར་རིགས་བདུན་གྱི། །སྡོམ་པས་ལེགས་བསྡམས་ཉེས་ལྟུང་དྲི་མ་བྲལ། །མི་རྟག་སྡུག་བསྔལ་ཀུན་འབྱུང་ལམ་འགོག་གིས། །བདེན་བཞིའི་སྤོང་ལེན་མ་ནོར་མངོན་གྱུར་ཤོག །ཉན་རང་དམན་པའི་ལམ་གྱིས་མི་འཆིང་བར། །ཐེག་ཆེན་རྒྱལ་སྲས་ལམ་བཟང་ལ་ཞུགས་པས། །ཕ་རོལ་ཕྱིན་བཅུ་སྨོན་འཇུག་དོན་དམ་གྱི། །བྱང་ཆུབ་སེམས་དོན་རླབས་ཆེན་འགྲུབ་བྱེད་ཤོག །མཚན་ཉིད་རྒྱུ་ཡི་ཐེག་པའི་ལམ་རིང་ལ། །གྲངས་མེད་གསུམ་དུ་ངལ་བ་མི་དགོས་པར། །
རྡོ་རྗེའི་ཐེག་པ་འབྲས་བུའི་ཉེ་ལམ་ལ། །ཐེ་ཚོམ་མི་འཇུག་འགལ་རྐྱེན་མི་འབྱུང་ཤོག །དག་པ་མཐའ་བཞི་ཀྲྀ་ཡས་རྒྱུད་སྦྱངས་ཤིང་། །ལྟ་སྤྱོད་ཟུང་འབྲེལ་ཨུ་པས་གཉམས་འཛིན་གྲོལ། །མངོན་བྱང་ལྔ་ལྡན་ཡོ་གའི་ས་ལམ་རྫོགས། །གསང་སྔགས་ཕྱི་རྒྱུད་ནུས་པ་མཐར་ཕྱིན་ཤོག །མ་ཧཱ་ཡོ་གས་སྐྱེད་རིམ་ལུས་ལྷར་འགྲུབ། །ཨ་ནུ་ཡོ་གས་རྫོགས་རིམ་ཟབ་ལམ་སྨིན། །ཨ་ཏི་རྫོགས་ཆེན་ཆོས་སྐུའི་རང་ཞལ་མཐོང་། །ཡོ་ག་གསུམ་གྱིས་ཚེ་གཅིག་སངས་རྒྱས་ཤོག །ཁྲེག་ཆོད་འཁོར་འདས་ཕྱག་རྒྱ་ཆེན་པོར་གྲོལ། །ཐོད་རྒལ་སྐུ་དང་ཞིང་ཁམས་ཆད་ལ་ཕེབས། །གཅོད་ཡུལ་དངོས་པོར་འཛིན་ཞེན་རྩད་ནས་ཆོད། །ལམ་འབྲས་ཟག་མེད་འོད་སྐུར་གྲོལ་བར་ཤོག །གཏུམ་མོའི་རྩལ་རྫོགས་སྒྱུ་ལུས་ཚད་དུ་འབྱོངས། །རྨི་ལམ་དབྱིངས་ཐིམ་འོད་གསལ་མངོན་དུ་གྱུར། །བར་དོ་ངོས་
ཟིན་འཕོ་བས་ལམ་མཆོག་བགྲོད། །ཟབ་ལམ་ཆོས་དྲུག་རྒྱུད་ལ་འཁེལ་བར་ཤོག །སོར་སྡུད་བསམ་གཏན་སྤྲུལ་སྐུའི་ས་བོན་ཐེབས། །སྲོག་དང་རྩོལ་བས་ལོངས་སྐུའི་ཡོན་ཏན་འགྲུབ། །རྗེས་དྲན་ཏིང་འཛིན་ཆོས་སྐུ་མཐར་ཕྱིན་པས། །སྦྱོར་བ་ཡན་ལག་དྲུག་གིས་རྒྱུད་གྲོལ་ཤོག །རྣམ་རྟོག་ངོས་ཟིན་ཉོན་མོང་ལམ་དུ་ལྷོངས། །ན་ཚ་གྲོགས་ཤར་འཇིགས་སྐྲག་རང་འཚང་རིག །སྡུག་བསྔལ་དབྱིངས་ཐིམ་འཆི་བ་ཆོས་སྐུར་གྲོལ། །རོ་སྙོམས་དྲུག་ལ་བརྟན་པ་ཐོབ་པར་ཤོག །མདོར་ན་རྒྱལ་གསུང་ཆོས་སྒོ་རབ་འབྱམས་ཀྱི། །དོན་ཀུན་ལེགས་གྲུབ་ས་ལམ་ཡོན་ཏན་རྫོགས། །རང་དོན་འགྱུར་མེད་བཙན་ས་ཟིན་ནས་ཀྱང་། །གཞན་དོན་ནམ་མཁའ་མཉམ་པ་འགྲུབ་གྱུར་ཅིག །ཅེས་བྱང་ཆུབ་ལམ་རིམ་མདོ་སྔགས་ཐམས་ཅད་ཚང་བའི་སྨོན་ལམ་ངག་འདོན་དུ་བགྱིད་ཆོག་པ་དགོས་ཞེས། དབོན་པོ་བསྟན་པའི་མིང་ཅན་གྱིས་བསྐུལ་ངོར་བྲིས་པའོ། །བསྐལ་བཟང་
རྒྱལ་བ་སྲས་བཅས་ལས། །སྙིང་སྟོབས་བརྩོན་འགྲུས་ཕུལ་བྱུང་བ། །ཤཀྱ་སེང་གེ་ཤཱཀྱའི་གཙོ། །བཀྲ་ཤིས་བྱིན་རླབས་ཆར་ཆེན་ཕོབ། །ཤེས་རབ་མཆོག་ལྡན་ཤཱ་རིའི་བུ། །རྒྱལ་སྲས་སྒྲ་གཅན་ཟིན་བཟང་པོ། །བྲམ་ཟེ་ཆེན་པོ་རཱ་ཧུ་ལ། །བཀྲ་ཤིས་བྱིན་རླབས་ཆར་ཆེན་ཕོབ། །མགོན་པོ་ཀླུ་སྒྲུབ་ལེགས་ལྡན་འབྱེད། །དཔལ་སྦས་ཡེ་ཤེས་སྙིང་པོ་དང་། །གངས་ཅན་བསྟན་རྩ་ཞི་བ་འཚོ། །བཀྲ་ཤིས་བྱིན་རླབས་ཆར་ཆེན་ཕོབ། །སྦ་བཙུན་རཏྣ་གཡོ་དམར་གཙང་། །བླ་ཆེན་གྲུམ་སྟོན་ཀླུ་མེས་སོགས། །དབུས་གཙང་མི་བཅུ་སྨད་འདུལ་རྒྱུད། །བཀྲ་ཤིས་བྱིན་རླབས་ཆར་ཆེན་ཕོབ། །སྒྲ་གཅན་ཟིན་སླེབ་ཟག་ཟད་སྡེ། །ཆོས་སྡེ་དྷརྨ་པཱ་ལའི་ཞབས། །པྲཛྙཱ་པཱ་ལ་སྟོད་འདུལ་རྒྱུད། །བཀྲ་ཤིས་བྱིན་རླབས་ཆར་ཆེན་ཕོབ། །ཀླུ་སྒྲུབ་ཡོན་བློ་རིན་ཆེན་བཤེས། །ཆོས་བཟང་གུ་ཎ་སཱ་ག་ར། །ཆོས་ཀྱི་འཕྲེང་བ་ཞི་
འབྱུང་སྦས། །བཀྲ་ཤིས་བྱིན་རླབས་ཆར་ཆེན་ཕོབ། །པཎ་ཆེན་ཤཱཀྱ་ཤྲི་བྷ་དྲ། །བྱང་རྡོར་རྣམ་གཉིས་དབང་ཕྱུག་གྲགས། །གཞོན་ནུ་བྱང་ཆུབ་ཡོན་རྒྱལ་བ། །བཀྲ་ཤིས་བྱིན་རླབས་ཆར་ཆེན་ཕོབ། །ཡོན་ཏན་བློ་གྲོས་སེང་གེ་དཔལ། །རབ་འབྱོར་སེང་གེ་ཆོས་གྲུབ་སེང་། །དབྱངས་ཅན་བཟང་པོ་དཀོན་མཆོག་འབངས། །བཀྲ་ཤིས་བྱིན་རླབས་ཆར་ཆེན་ཕོབ། །དབང་ཕྱུག་རྡོ་རྗེ་དགའ་བའི་དབྱངས། །རང་གྲོལ་རྗེ་སོགས་འདུལ་སྡོམ་གྱི། །བླ་རྒྱུད་རིན་ཆེན་ཚར་དངར་བས། །བཀྲ་ཤིས་བྱིན་རླབས་ཆར་ཆེན་ཕོབ། །བསྟན་པའི་གཞི་མ་སོ་སོ་ཐར། །བསླབ་གསུམ་ཡིད་བཞིན་ནོར་བུ་ཡིས། །རང་གཞན་དགོས་འདོད་ཀུན་འབྱུང་བའི། །བཀྲ་ཤིས་བྱིན་རླབས་ཆར་ཆེན་ཕོབ། །འདུལ་སྡོམ་དྲི་མེད་ཉི་འོད་ཀྱིས། །བསྟན་པའི་པད་ཚལ་ཆེར་རྒྱས་ཤིང་། །འདུལ་
བྱའི་རྐང་དྲུག་ཚིམ་བྱེད་པའི། །བཀྲ་ཤིས་ཕྱོགས་མཐར་ཁྱབ་རྒྱས་ཤོག །ཅེས། སོ་ཐར་གྱི་སྡོམ་པའི་མཁན་རྒྱུད་སྔ་ཕྱི་བར་གསུམ་ལ་བརྟེན་པའི་ཤིས་པ་བརྗོད་པ་འདི་ལྟ་བུ་ཞིག་གྱིས་ཤིག་ཅེས། མཉམ་མེད་མཆོག་གི་སྤྲུལ་པའི་སྐུ་བཟང་པོའི་མཚན་ཅན་གང་གི་བཀའ་བརྩལ་སྤྱི་བོར་བླངས་ནས་ཡིག་ལམ་དུ་བཀོད་པར་བགྱིས་པ་དགེ་ལེགས་འཕེལ། ཆོས་དབྱིངས་གདོད་མའི་ཀློང་ལས་ཐུགས་རྗེའི་སྐུ། །ཀུན་བཟང་སྣང་མཐའ་རྡོར་འཆང་རྡོ་རྗེ་སེམས། །སྤྱན་རས་གཟིགས་དབང་ལ་སོགས་ལྷ་ཡི་ལྷ། །རྒྱལ་བ་དགོངས་རྒྱུད་བླ་མའི་བཀྲ་ཤིས་ཤོག །ཆོས་སྐུའི་རང་མདངས་གསལ་སྟོང་སྒྱུ་མའི་སྐུའི། །དགའ་རབ་འཇམ་དཔལ་ཤྲཱི་སིང་བི་མ་ལ། །པདྨ་འབྱུང་གནས་ལ་སོགས་སྤྲུལ་པའི་སྐུ། །རིག་འཛིན་བརྡ་རྒྱུད་བླ་མའི་བཀྲ་ཤིས་ཤོག །ལྷ་ལྕམ་མཚོ་རྒྱལ་རྗེ་འབངས་ཉེར་ལྔ་དང་། །གཏེར་སྟོན་སྤྲུལ་པའི་སྐྱེས་མཆོག་རིམ་བརྒྱུད་པ། །གསར་རྙིང་བཤད་སྒྲུབ་བསྟན་
པ་འཛིན་མཛད་པའི། །གང་ཟག་སྙན་རྒྱུད་བླ་མའི་བཀྲ་ཤིས་ཤོག །བྱམས་ཆེན་ངང་ལས་སྙིང་རྗེས་ཁྲོ་ཚུལ་གྱིས། །གང་འདུལ་ཕྲིན་ལས་རོལ་གར་སྟོན་པའི་ལྷ། །དབང་དྲག་འབར་བ་ལ་སོགས་དཀྱིལ་འཁོར་གྱི། །ལྷ་ཚོགས་ཡི་དམ་རྒྱ་མཚོའི་བཀྲ་ཤིས་ཤོག །དོན་དམ་དབྱིངས་ལ་སྤྲོས་མཚན་མི་དམིགས་ཀྱང་། །ཡེ་ཤེས་སྒྱུ་འཕྲུལ་རྣམ་འགྱུར་སྣ་ཚོགས་སྟོན། །སེང་གདོང་མ་སོགས་མཁའ་འགྲོ་རྒྱ་མཚོ་དང་། །ཆོས་སྐྱོང་དམ་ཅན་སྲུང་མའི་བཀྲ་ཤིས་ཤོག །སྐྱབས་གསུམ་བླ་མ་ཡི་དམ་མཁའ་འགྲོ་དང་། །ཆོས་སྐྱོང་དཀར་ཕྱོགས་གཞི་བདག་ཐམས་ཅད་ཀྱི། །ཐུགས་རྗེ་བྱིན་རླབས་དངོས་གྲུབ་བཀྲ་ཤིས་ཆར། །ཕྱོགས་དུས་ཀུན་དུ་རྒྱུན་ཆད་མེད་འབབ་ཤོག །ཅེས་པ་འདི་ཡང་རྒྱ་བོད་མཚམས་ནས་ཤར་ཕྱོགས་ལ་མོ་རྩེའི་བླ་མས་བསྐུལ་བ་བཞིན་བཀོད་པ་དགེ་ལེགས་འཕེལ་བར་གྱུར་ཅིག །དགེའོ། གཅིག་ཞུས་ཁུལ།