ཆོས་རྗེ་མི་ཕམ་མགོན་པོས་དྲི་བ་སྔ་ཕྱི་ཐ་དད་མཛད་པའི་དྲི་ལན་ཐོར་བུའི་སྐོར་རྣམས་ཕྱོགས་གཅིག་ཏུ་བསྡེབས་པ།
ཆོས་རྗེ་མི་ཕམ་མགོན་པོས་དྲི་བ་སྔ་ཕྱི་ཐ་དད་མཛད་པའི་དྲི་ལན་ཐོར་བུའི་སྐོར་རྣམས་ཕྱོགས་གཅིག་ཏུ་བསྡེབས་པ་བཞུགས་སོ། །
ཨོཾ་སྭ་སྟི། ཤེས་བྱའི་ཆོས་རྣམས་ལ་གཟིིགས་པའི་སྤྱན་ཡངས་པའི་རྣམ་འདྲེན་མི་ཕམ་མགོན་པོས། ཆོས་ཀྱི་དྲི་བ་སྔ་ཕྱི་དུ་མར་མཛད་པའི་ནང་ཚན་ལས་རག་བསྡུས་ཡི་གེར་འཁོད་པའི་ནང་ནས། རེ་ཤིག་ཅིག་ཏུ་གསང་སྔགས་ཀྱི་བསྙེན་སྒྲུབ་གྲངས་ཚད་ཀྱི་དོན་སྐོར་ཞིབ་རྒྱས་ཕེབས་པའི་སྐབས་དོན་གྱི་ལན་དུ་ཕུལ་བ་ནི་
སྤྱིར་གསང་སྔགས་གསར་རྙིང་གི་རྒྱུད་དང་སྒྲུབ་ཐབས་ཕལ་མོ་ཆེར། ཡི་དམ་གང་ཡིན་དེ་ཉིད་ཀྱི་གཙོ་བོའི་བསྙེན་པ་འབུམ་ཕྲག་གཅིག་བཟླ་བའི་ཚེ་ན། འཁོར་གྱི་ལྷ་རེ་རེ་ལ་ཁྲི་ཁྲག་རེ་བཟླ་བར་གསུངས་པ་ནི་སྤྱིར་བཏང་དང་། དམིགས་བསལ་དུ་ནི། བསྐལ་པ་རྫོགས་ལྡན་གྱི་དུས་ན་གང་ཟག་རྣམས་བསོད་ནམས་ཆེ་ཞིང་སྒྲིབ་
པ་ཤས་ཆུང་བས་བསྙེན་གྲངས་འདི་ཀས་འགྲུབ་པར་གསུངས་མོད་ཀྱི། བསྐལ་པ་མར་འགྲིབ་རྣམས་ལ་རིམ་པས་བསོད་ནམས་ཆུང་ཞིང་སྒྲིབ་ཤས་ཆེ་བའི་དབང་གིས། བསྙེན་ཚད་ཀྱི་གྲངས་གོང་དུ་སྤར་དགོས་ཚུལ་ནི། སྡོམ་འབྱུང་གི་རྒྱུད་དུ། རྫོགས་ལྡན་ལ་ནི་བཟླ་བྱ་གཅིག །ཉེས་འགྱུར་གསུམ་ལྡན་ལ་ནི་བཟླ། གསུམ་འགྱུར་གཉིས་ལྡན་ལ་རབ་བརྗོད། །རྩོད་ལྡན་བཟླས་པ་བཞི་འགྱུར་རོ། །ཞེས་པ་ལྟར་དང་། དེ་ལ་ཡང་སྔགས་ཀྱི་འབྲུ་མང་བའི་རིགས་
དཔེར་ན་ཡིག་བརྒྱ་ལྟ་བུ་ལ་ནི་སྔགས་དེ་ཉིད་ལན་གྲངས་འབུམ་དུ་བཟླས་པ་ལྟ་བུས་འགྲུབ་ཀྱང་། སྔགས་འབྲུ་ཉུང་བའི་རིགས་ལྷ་རང་རང་གི་རྩ་སྔགས་སམ་ཉེ་སྙིང་ལྟ་བུ་ལ་ནི་འབྲུ་འབུམ་དུ་བཟླ་དགོས་པར་གསུངས་པ་ནི། སངས་རྒྱས་ཐོད་པའི་རྒྱུད་འཕྲེལ་དུ། རྫོགས་ལྡན་དུས་སུ་ཡི་གེ་འབུམ་བཟླས་ཏེ། གསུམ་ལྡན་དུས་སུ་སྔགས་པས་འབུམ་ཕྲག་གཉིས། །གཉིས་ལྡན་དུས་ན་འབུམ་ཕྲག་གསུམ་ཉིད་དང་། །བྱེ་བ་ཕྲག་གསུམ་འབུམ་
བཞི་རྩོད་དུས་སྦྱར། །ཞེས་སོགས་གསུངས་པ་དང་།། ༈ །ཁྱད་པར་རྙིང་ལུགས་རྣམས་ལས་ནི། །གྲངས་ཀྱི་ཚད། དུས་ཀྱི་ཚད་རྟགས་ཀྱི་ཚད་དང་གསུམ་དུ་གསུངས་ཏེ། རྒྱུད་པད་སྡོང་བརྩེགས་པར། འབྲུ་འབུམ་གྲངས་ཀྱི་བསྙེན་པ་སྟེ། །དུས་ཀྱི་ཚད་ནི་ལོ་གསུམ་ལ། །ཚད་ནི་རྟགས་རྫོགས་བར་དུ་བཟླས། །དེ་ལ་ངེས་མེད་ཤེས་པར་བྱ། །ཞེས་འགྲུབ་པའི་རྟགས་འབྱུང་མྱུར་ཁྱད་ནི་སྒྲིབ་པ་སྲབ་འཐུག་དང་ལས་འཕྲོ་བཟང་ངན་ཁྱད་ཀྱིས་ངེས་མེད་དུ་གསུངས་ལ། གཞན་ཡང་། །ཏིང་འཛིན་རྩེ་གཅིག་ཏུ་བྱེད་མི་བྱེད་ཀྱི་ཁྱད་པར་ཡང་། །གཤིན་རྗེ་གཤེད་ཀྱི་རྒྱུད་ལས། ཏིང་འཛིན་བསམ་གཏན་དག་དང་མི་ལྡན་ན། །གསང་སྔགས་བཟླས་ཀྱང་འགྲུབ་པར་མི་འགྱུར་ཏེ། །གསོ་དཔྱད་བཀླག་པས་ནད་ལ་མི་ཕན་ལྟར། དེ་བས་ཏིང་འཛིན་བསམ་གཏན་
འབད་པ་བཅེས། །ཅེས་གསུངས་མོད་ཅིང་།། ༈ །།སྨྲ་བ་བཅད་མ་བཅད་ཀྱི་ཁྱད་པར་ཡང་། སྨྲ་བཅད་མ་བྱས་པར་ལོ་བདུན་དུ་བཟླས་པ་བྱས་པ་ལས། སྨྲ་བཅད་དང་ལྡན་པས་ཞག་བདུན་བཟླས་པ་བྱས་པ་ཉིད་ཕན་ཡོན་དང་ནུས་པ་ཆེ་བར་གསུངས་སོ།། ༈ །།བཟླ་བྱའི་ངོ་བོ་ཉིད་ལ་དབྱེ་ན། སྤྱི་ཁྱབ་དུ་ནི། གསང་སྔགས། རིགས་སྔགས། གཟུངས་སྔགས་སོགས་ཀྱི་བཟླ་ཚུལ་ཐ་དད་དང་། གསང་སྔགས་ཉིད་ལའང་། ལུས་བཟླས། ངག་བཟླས། ཡིད་བཟླས་རྣམས་དང་།། ༈ །།ཁྱད་པར་བ་ནི། སྤྲོ་བསྡུའི་བཟླས་པ། རྡོ་རྗེའི་བཟླས་པ། འགོག་པའི་བཟླས་པ་སོགས་ཀྱི་བྱེ་བྲག་དང་། གཞན་ཡང་རྙིང་མའི་གཞུང་ལ་ལར་དབང་བཞིའི་དགོངས་པ་དང་མཐུན་པར། ཕྱི་རྩོལ་བཅས་ཚིག་འབྲུའི་སྔགས་དང་། ནང་ལྷུན་གྲུབ་
རང་བྱུང་གི་སྔགས་དང་། གསང་བ་སྐྱེ་མེད་རྡོ་རྗེའི་སྔགས་དང་། དེ་ཁོ་ན་ཉིད་སྤྲོས་བྲལ་བརྗོད་མེད་ཀྱི་སྔགས་སོགས་རྣམས་དབྱེ་ན་མཐའ་ཡས་མོད་ཀྱི། སྐབས་འདིའི་བརྗོད་དོན་གྱི་སྙིང་པོར། །ཡི་དམ་ལྷའི་བཟླས་གྲངས་ཀྱི་འབུམ་ཕྲག་མན་དང་། དུང་ཕྱུར་ཡན་ལ་ནི། ཐམས་ཅད་དགོངས་བཞེད་མཐུན་ཀྱང་། བྱེ་བ་དང་ས་ཡ་གཉིས་སྔ་རྟིང་འདྲེན་ལུགས་མི་མཐུན་པའི་ཚུལ་ལ་དྲི་བ་གནང་བ་ཤིན་ཏུ་ཐུགས་བདེན་པར་མཆིས་ཏེ། འདི་ལ་ཡང་སྤྱི་དང་ཁྱད་པར་གཉིས་ཀྱི། སྤྱིར་ནི། རྒྱལ་བའི་བཀའ་ཉིད་དཔང་པོར་བཞག་དགོས་ཚེ། རྒྱ་ཆེར་རོལ་པ་དང་ཕལ་ཆེན་སྡོང་པོ་བཀོད་པ་སོགས་གསུངས་པའི་གྲངས་ཀྱི་གནས་རྣམས་སྔོན་གྱི་ལོ་པཎ་དག་གིས་བྱེ་བྲག་རྟོགས་བྱེད་རྒྱས་འབྲིང་སོགས་སུ་བཀོད་པར་མཛད་པ་ལས་ནི། འབུམ་ཕྲག་བཅུ་ལ་ནི་ས་ཡ་ཞེས་བྱའོ། །
ས་ཡ་བཅུ་ལ་ནི་བྱེ་བ་ཞེས་བྱའོ། །བྱེ་བ་བཅུ་ལ་ནི་དུང་ཕྱུར་ཞེས་བྱའོ། །ཞེས་གསུངས་པ་དང་། །སྐར་རྩིས་ཀྱི་གཞུང་དག་ཏུའང་། །གཅིག་བཅུ་བརྒྱ་སྟོང་ཁྲི་འབུམ་དང་། །ས་ཡ་བྱེ་བ་དུང་ཕྱུར་ཏེ། །ཅེས་བགྲང་འདུག་པས་ན། སྤྱི་མཐུན་དུ་ནི་ས་ཡ་སྔོན་མ་བྱེད་པ་འདི་ཉིད་མང་བ་ལགས། ཡང་། བདག་སོགས་ནི་སློབ་དཔོན་ཆེན་པོ་པདྨ་འབྱུང་གནས་ཀྱི་གསུང་ལ་ནོར་འཁྲུལ་གཏན་ནས་མི་འབྱུང་བར་ཐག་ཆོད་ཀྱི་དཔང་པོར་བྱེད་པ་ཡིན་ཚེ། སློབ་དཔོན་གྱིས་བཀའ་བརྒྱད་རང་བྱུང་རང་ཤར་གྱི་སྔགས་ཀྱི་ཞལ་གདམས་སུ་འདི་ལྟར་གསུངས་ཏེ། དབུས་ཀྱི་གཙོ་མཆོག་སྙིང་པོ་ནི། །ས་ཡ་གཅིག་དང་དྲུག་འབུམ་བཟླ། །འབུམ་ཕྲག་བརྒྱད་དང་དྲུག་ཡིན་ནོ། །དཔལ་ཆེན་བརྒྱད་ལ་བྱེ་བ་རེ། །འབུམ་ཕྲག་བཅུ་རེའི་གྲངས་
ཡིན་ནོ། །འཁོར་གྱི་སྔགས་ལ་འབུམ་དུ་བཟླས། །ཞེས་སོགས་གསུངས་པ་འདིས་མཚོན་ཏེ་རྙིང་ལུགས་ཀྱི་བསྙེན་གྲངས་ཀུན་ལ་ནི། བྱེ་བ་སྔོན་ལ་བྱེད་པ་འདི་ཁོ་ནར་གསུངས་སྣང་བས། བདག་ནི་དེ་ལྟར་བྱེད་པ་ལགས།། ༈ །།ཡང་། བསྙེན་སྒྲུབ་ཀྱི་ཁ་སྐོངས་སུ་བསྙེན་ཚད་གང་བཟླས་ཀྱི་བཅུ་ཆའི་གྲངས་མཉམ་གྱི་སྦྱིན་སྲེག་བྱ་བར་གསུངས་པའི་སྐབས་དོན་ལས་བརྩམས་ཏེ། སྦྱིན་སྲེག་གི་སྐོར་གྱི་དྲི་བ་གནང་བའི་འགག་དོན་མདོར་བསྡུས་འབུལ་རྒྱུར། དེ་ཡང་། དཔུང་བཟང་གི་རྒྱུད་ལས། གསང་སྔགས་མ་བཟླས་མི་འགྲུབ་ཅིང་། སྦྱིན་སྲེག་མ་བྱས་འབྲས་མི་འབྱིན། བཟླས་བཟོད་འབུམ་ཕྲག་གཅིག་ལ་ནི། སྦྱིན་སྲེག་ཁྲི་ཚོར་བྱ་བ་ཡིན། ཞེས་པ་འདི་དང་མཚུངས་པར་རྒྱུད་སྡེ་གཞན་ནས་ཀྱང་གསུངས་པ་ལྟར།
བསྙེན་པ་ཁ་སྐོངས་གི་སྦྱིན་སྲེག་ཅེས་མཛད་པའི་ཕྱག་སྲོལ་ནི་གསར་མ་ལ་ལྷག་པར་དུ་གྲགས་ཤིང་དར་མོད་ལ། རྙིང་མ་ལ་ནི། དབང་སྒྲུབ་ཆེན་མོའི་དུས་རྣམས་སུ། སྔོན་འགྲོ་ལ་ས་ཆོག་དང་བར་ཆད་བསལ་ཕྱིར་ཞི་བའི་སྦྱིན་སྲེག སྒྲུབ་པ་དངོས་གཞིའི་འཇུག་ཏུ་དངོས་གྲུབ་ཞུ་ཕྱིར་རྒྱས་པའི་སྦྱིན་སྲེག དབང་བསྐུར་གྱི་སྐབས་སུ་ལྷ་དབང་དུ་བྱ་ཕྱིར་དབང་གི་སྦྱིན་སྲེག་མཐར་ཆོས་སྲུང་ལས་ལ་འགྱེད་ཕྱིར་དྲག་པོའི་སྦྱིན་སྲེག་བྱ་བའི་ཚུལ་དང་། གཞན་ཡང་། རྟེན་ལ་རབ་གནས་ཀྱི་སྐབས་སུ་ནི། ཐོག་མར་རྟེན་སྦྱང་བའི་སྐབས་སུ་ཞི་བ། དམ་ཚིག་ས་བསྐྱེད་ཅིང་བསྒྲུབ་པའི་ཚེ་རྒྱས་པ། ཡེ་ཤེས་པ་བསྟིམ་ཞིང་དབང་བསྐུར་རྒྱས་གདབ་ཀྱི་སྐབས་སུ་དབང་། ཆོས་སྐྱོངས་
གཉེར་གཏད་ཀྱི་ཚེ་དྲག་པོའི་སྦྱིན་བསྲེག་བྱ་ཚུལ་སོགས་ནི་གསར་རྙིང་དགོངས་པ་མཐུན་ནོ།། ༈ །།གོང་དུ་སྨོས་པའི་བསྙེན་པ་ཁ་སྐོངས་སུ་གྲགས་པ་དེ་ཡང་། འགའ་ཞིག་སྔགས་ཀྱི་གྲངས་ཚད་མ་ཚང་བར་སྦྱིན་སྲེག་སྔགས་གྲངས་ལ་བརྩི་མཁན་ཡོད་པར་ཐོས་ཀྱང་། དེ་ནི་མི་རུང་སྟེ། སྦྱིན་སྲེག་སྔགས་གྲངས་སུ་ནམ་ཡང་མི་ཐེ་མོད་ཀྱི། ཁ་སྐོང་ཞེས་བྱ་བའི་དོན་ནི། བསྙེན་སྒྲུབ་ཀྱི་སྐབས་སུ་སྔགས་ལ་ལྷག་ཆད་ནོར་འཁྲུལ་དང་། ཏིང་ངེ་འཛིན་ལ་ཐང་ལྷོད་དང་། གཏོར་མཆོད་སོགས་ཀྱིས་ཐུགས་དམ་མ་ཁེངས་པ་སོགས་འགལ་འཁྲུལ་ཉམས་ཆགས་ཀྱི་རིགས་ཐམས་ཅད་བསྐངས་ཞིང་གསོ་བའི་ཕྱིར་སྦྱིན་སྲེག་བྱ་བར་གསུངས་པ་ཡིན་ལ། རྙིང་ལུགས་ལ་ནི། ཁྱད་པར་དུ་བསྙེན་སྒྲུབ་ཀྱི་མཐར་འཕྲིས་ཁ་བསྒྱུར་ཞིང་
རྣོ་ལ་ངར་འདོགས་པའམ། མདའ་ལ་མདེའུ་བསྐྱོན་པ་ལྟར་ལས་གང་ཡིན་དམིགས་སུ་ཆུད་ནས་མྱུར་དུ་འགྲུབ་པའི་སླད་དུ་སྦྱིན་སྲེག་བྱ་བར་བཤད་དོ།། ༈ །།འོན་ཏེ་ཚུལ་འདི་ལྟ་བུ་ཁོ་ན་གཅིག་པུ་ལ་སྦྱིན་སྲེག་ཏུ་ངེས་པ་ནི་མ་ཡིན་ཏེ། སྤྲོས་བཅས་ཆོ་ག་དང་རྫས་སོགས་ལ་བརྟེན་པའི་ལས་རིམ་འདི་དག་ནི་ཕྱིའི་སྦྱིན་སྲེག་ཡིན་ལ། ཕུང་ཁམས་རྒྱལ་བའི་དཀྱིལ་འཁོར་ལ་བཟའ་བཏུང་བདུད་རྩིའི་སྲེག་རྫས་རྣམས་ཐབས་ཤེས་ལག་པའི་དགང་བླུག་གི་སྦྱོར་བས་གཏུམ་མོ་རང་བྱུང་གི་མེ་ཐབ་དུ་སྲེད་ཞེན་འཛིན་མེད་དུ་འབུལ་བ་ནི་ནང་གི་སྦྱིན་སྲེག་དང་། ཆོས་འབྱུང་ལྟེ་བའི་མེ་ཐབ་ལས་ཨ་ཐུང་རང་འབར་གྱི་མེ་ལྷ་བདེ་ཆེན་ཧཾ་ཡིག་གི་སྲེག་རྫས་ཀྱིས་མཆོད་པ་ནི་གསང་བའི་སྦྱིན་སྲེག་
དང་། ཁྱབ་གདལ་སྟོང་དབྱིངས་ཀྱི་ཐབ་ཁུང་དུ་རང་རིག་ཡེ་ཤེས་ཀྱི་མེ་ཆེན་འབར་བས་མཚན་འཛིན་འཁྲུལ་རྟོག་གི་བག་ཆགས་བསྲེག་པ་དེ་ནི་དེ་ཁོ་ན་ཉིད་ཡང་དག་དོན་གྱི་སྦྱིན་སྲེག་སྟེ། དེ་སོགས་སྦྱིན་སྲེག་གི་རིམ་པ་ཇི་སྙེད་ཅིག་གསུངས་ཕྱིར། ཀུན་རྫོབ་རྩོལ་བཅས་ཀྱི་སྦྱིན་སྲེག་གཅིག་བུ་ལ་ནི་མ་ལྟོས་མོད་ཀྱི།། ༈ །།འདི་སྐབས་ཀྱི་བརྗོད་བྱ་དངོས་དོན་ལ། ཉིད་ཀྱི་ཕེབས་སྒོར། ཕག་མོའི་སྦྱིན་སྲེག་ལ་ཆོས་འབྱུང་གི་དཀྱིལ་འཁོར་དུ་འཇིག་རྟེན་གྱི་མེ་ལྷ་བསྐྱོད་པའི་ཕྱག་བཞེས་མཛད་པ་འདིའི་དགོས་དོན་དང་། ཡང་། མཁའ་སྤྱོད་པའི་ཞལ་སློབ་ལྷ་རིན་ཆེན་དབང་རྒྱལ་གྱིས་མཛད་པའི་ཟིན་བྲིས་སོགས་སུ་ནི་འཇིག་རྟེན་མེ་ལྷ་མི་བསྐྱེད་པ་ཡང་སྣང་བའི་ཁྱད་དོན་སོགས་འདྲི་བར་མཛད་པའི་དོན་གྱི་ཆ་ལ། །ལྷ་པས་ ལྷ་གཟིགས་རིན་ཆེན་རྒྱལ་མཚན་ཡང་ཟེར།
མཛད་པའི་ཕག་མོའི་སྲེག་གཞུང་དེ་ཉིད་མཇལ་མ་མྱོང་ཡང་། སྤྱིར་སྦྱིན་སྲེག་གི་རྒྱུད་རྒྱས་བསྡུས་མང་ཞིག་རྒྱུད་འབུམ་གྱི་ཁྲོད་ན་བཞུགས་པ་རྣམས་དང་། དེ་དག་གི་དགོངས་དོན་རྒྱ་བོད་མཁས་གྲུབ་རྣམས་ཀྱིས་མཛད་པའི་སྲེག་གཞུང་རྒྱས་པ་ཐམས་ཅད་ལ་མེ་ལྷ་སྐྱེད་ཆོག་ཡོད་པ་འབའ་ཤིག་འབྱུང་ཞིང་། དེ་ཡང་ཐོག་མར་ཡི་དམ་གང་ཡིན་པའི་བདག་བསྐྱེད་ཀྱི་ལས་རིམ་ཐམས་ཅད་གྲུབ་པར་བྱས་རྗེས། ཐབ་ཏུ་མེ་སྤར་ནས་བསངས་སྦྱང་ཞིང་མེ་ཐབ་སྐྱེད་ནས་མེ་ལྷ་དམ་ཚིག་པ་སྐྱེད་པ་ལ་མཆོད་པ་དང་སྲེག་རྫས་ཕུལ་ཞིང་བསྟོད། སླར་མེ་ལྷ་ཡེ་ཤེས་པ་སྤྱན་དྲངས་བསྟིམ་ཞིང་དབང་བསྐུར་རྒྱས་གདབ་མཆོད་པ་དང་སྲེག་རྫས་འབུལ། བསྟོད་ཅིང་འདོད་གསོལ་འཕྲིན་ལས་གཞོལ་ལ། དེ་ནས་མེ་ལྷ་དེ་ཉིད་མེ་འབར་
བ་དང་གཉིས་སུ་མེད་པར་གྱུར་པའི་མེའི་དབུས་དེར་ཡི་དམ་དེ་ཉིད་ཀྱི་གཞལ་ཡས་དང་ལྷ་ཚོགས་བསྐྱེད་པའི་ལུགས་གཅིག །མེ་ལྷ་མདུན་གྱི་ནམ་མཁར་དཔང་པོའི་ཚུལ་དུ་བཞུགས་སུ་གསོལ་བའི་ལུགས་གཅིག །མེ་ལྷའི་ལྟོ་བ་ཡངས་ཤིང་རྒྱ་ཆེ་བར་གྱུར་བའི་ནང་དུ་དཀྱིལ་འཁོར་ལྷ་ཚོགས་བསྐྱེད་པའི་ལུགས་གཅིག མེ་ལྷ་ཕྱག་ཚང་བའམ་ལག་བདེ་བའི་ཚུལ་གྱི་དཀྱིལ་འཁོར་པ་ལ་མཆོད་པ་བསྟབ་མཁན་དུ་བྱེད་པའི་ལུགས་གཅིག་དང་བཅས་པའི་ཕྱག་བཞེས་མི་འདྲ་བ་སྣ་ཚོགས་མཆིས་ལ། དེས་ན། ཉིད་ཀྱིས་ཡེ་ཤེས་ལྷ་ལ་སྦྱིན་སྲེག་འབུལ་བ་ལ་འཇིག་རྟེན་མེ་ལྷ་སྔོན་དུ་ཅིས་ཀྱང་བསྐྱེད་དགོས་པ་འདི་གང་ཡིན་གསུངས་པ་ལ། འདིའི་དགོས་ཆེད་ནི། དཔེར་ན་མི་གང་ཞིག་གིས་རྒྱལ་པོ་ཆེན་པོའམ་བླ་མ་ལྟ་བུ་ཡུལ་གཉན་པོ་ཞིག་སྤྱན་
དྲངས་ནས་ཞབས་གཏོགས་དང་ཞུ་འབུལ་སོགས་བྱ་བར་འདོད་ཀྱང་རང་གི་ཁྱིམ་དང་ཡོ་བྱད་སོགས་ངན་པའི་དབང་གིས་སྤྱན་དྲངས་བར་རྔོ་བ་ཐོགས་པའི་ཚེ་ན། ཁྱིམ་གཞན་འབྱོར་བ་དང་བཀོད་པས་ཁྱད་པར་དུ་འཕགས་པ་གཅིག་ཏུ་ཡོང་ནས། དེའི་བདག་པོ་རྣམས་ཚིག་དང་ཟས་སྐོམ་སོགས་ཀྱིས་ཚིམས་པར་བྱས་ཏེ། ཁྱིམ་དེར་མཆོད་གསོལ་གྱི་བཀོད་པ་རྒྱ་ཆེར་བཤམས་པར་མགྲོན་དེ་དག་སྤྱན་དྲངས་ཤིང་མཆོད་པ་དང་། རང་གི་ཞུ་དོན་ཐམས་ཅད་ལེགས་པར་སྒྲུབ་པའི་གྲོགས་དན་རྣམས་ཁྱིམ་གྱི་བདག་པོ་དེ་དག་གིས་བྱས་པས། བདག་གིས་དོན་ཡང་བདེ་བླག་ཏུ་འགྲུབ་ཅིང་བདག་གིས་ཀྱང་ཁྱིམ་གྱི་བདག་པོ་རྣམས་བཏང་རག་གིས་ཚིམས་པར་བྱེད་པའི་དཔེ་དེ་བཞིན་དུ། ཕྱི་ནང་
སྣོད་བཅུད་ཀྱི་བྱེད་ལས་ཐམས་ཅད་ནི་འབྱུང་བ་ཆེན་པོ་རྣམས་ལས་རག་ལས་ཤིང་། ཁྱད་པར་དུ་མེའི་ནུས་སྟོབས་ནི་ལྷག་པར་ཆེ་ཞིང་མྱུར་ལ། དེའི་བདག་པོ་ནི་མེ་ལྷ་ཡིན་ཕྱིར་དེ་ཉིད་ལ་གྲོགས་དན་དུ་བཅོལ་ན་གང་འདོད་ཀྱི་དོན་འབྲས་ཐོགས་མེད་དུ་འགྲུབ་པར་བཤད་དེ། རྒྱུད་ལས། གང་གི་རྣལ་འབྱོར་གདེང་ལྡན་པས། །ལྷ་མཆོག་པ་ཡི་བྱེ་བྲག་དང་། །དེ་ལས་གཞན་པ་རྩོལ་བ་ན། །སྦྱིན་སྲེག་ཆོ་ག་དོན་དུ་གཉེར། །འདི་ནི་ཀུན་ལ་གཅེས་པ་སྟེ། །དེ་འབྲས་སྟོབས་ཆེན་ཁ་ལོ་བསྒྱུར། །ཞེས་དང་། མེས་ནི་འདོད་དོན་དངོས་གྲུབ་སྟེར། །རང་འོད་ལྷས་ནི་གྲོལ་བར་བརྩོན། འདི་ལྟར་སྦྱིན་སྲེག་གང་བྱེད་མཆོད། །སྐལ་བཟང་དངོས་གྲུབ་རབ་ཏུ་སྟེར། ཞེས་པ་ལྟར་ལགས། ཡང་། ལ་ལར་འཇིག་རྟེན་གྱི་མེ་ལྷ་མི་སྐྱེད་པར་ཐོག་མ་ཉིད་ནས་དཀྱིལ་འཁོར་
ལྷ་ལ་སྦྱིན་སྲེག་འབུལ་བ་ནི་སྤྲོས་པ་ཉེར་བསྡུའི་དབང་དུ་མཛད་པ་ཡིན་ཏེ། གང་ཟག་སྤྲོས་པ་ལ་མི་དགའ་བའི་རིགས་ལ་ལྷག་པར་བསྔགས་ཤིང་། དེ་ལྟ་བུས་མི་རུང་བའམ་མ་ཚང་བ་ནི་གཏན་ནས་མ་ལགས་ཏེ། གོང་དུ་སྨོས་པའི་དཔེ་ལྟར་ན། རང་གི་ཁྱིམ་དུ་རྒྱལ་པོ་སོགས་མགྲོན་ཆེན་སྤྱན་དྲངས་པའི་གནས་དང་ཡོ་བྱད་ཚུལ་བཞིན་འཛོམ་ན་གཞན་ལ་གཡར་བ་སོགས་ཀྱི་སྤྲོས་པ་མི་དགོས་པ་ལྟ་བུ་སྟེ། ཚུལ་འདི་ལ་ནི། སྒྲུབ་པ་པོས་རང་གི་བཟའ་བཏུང་གཡོ་སྐོལ་གང་བྱེད་ཀྱི་ཞར་ལ་མེ་ཐབ་ཏུ་ལྷ་ཚོགས་སྐད་ཅིག་དྲན་རྫོགས་སུ་བསྐྱེད་ནས་བཟའ་བཏུང་དེ་དག་གི་ཕུད་ཀྱིས་མཆོད་ཅིང་འདོད་དོན་གསོལ་བས་ཀྱང་ཚོགས་ཆེན་རྫོགས་པར་འགྱུར་བའི་སྦྱིན་སྲེག་རྒྱུན་ཁྱེར་མ་འདི་ལྟ་བུ་ཡང་
སྒྲུབ་རྒྱུད་ཚད་ལྡན་མང་པོའི་ཕྱག་བཞེས་ལགས་མོད་ཀྱི། འདི་ལྟར་གྱི་སྐབས་སུ་ནི་འཇིག་རྟེན་མེ་ལྷ་བསྐྱེད་པ་སོགས་ཀྱི་སྤྲོས་པ་མི་འཚལ་ལོ། གཞན་ཡང་། ཉིད་ཀྱིས། སྤྲོས་བཅས་ཀྱི་སྦྱིན་སྲེག་རྒྱས་པ་རྣམས་ལ་མཆོད་རྫས་དང་སྲེག་རྫས་ཀྱི་གྲངས་ཚད་དག་གི་ཕེབས་སྒོའི་ལན་དུ་འབུལ་བ་ནི། སྤྱིར་རྒྱུད་དང་མན་ངག་སོ་སོའི་སྐབས་དོན་མི་འདྲ་བའི་དབང་གིས། ལ་ལར་དཀྱིལ་འཁོར་གྱི་ལྷ་རེ་རེ་ལ་ཡཾ་ཤིང་ཁོ་ནའང་སྟོང་ཕྲག་རེ་རེ་སོགས་འབུལ་ཚུལ་དང་། དེ་དག་གི་སྐབས་རྣམས་སུ་ནི་མེ་ཐབ་ཀྱི་རྒྱ་ཁྱོན་ཉིད་ཀྱི་ཚད་ལའང་ཁྲུ་བཞི་པ་ནས་བཅུ་གཉིས་བར་དུ་བྱ་བར་གསུངས་པ་སོགས་མཆིས་མོད་ཀྱང་དེ་ཙམ་ནི་བྱེད་མཁན་ཡང་དཀོན་ལ། དིང་སང་གི་ཕྱག་བཞེས་ཕལ་མོ་ཆེར་ནི། མཆོད་རྫས་རྣམས་ནི་ཇི་ཙམ་མང་བར་འབྱོར་ན་ལེགས་མོད་ཀྱི། མ་འབྱོར་ཀྱང་ཚར་རེ་རེའི་
ཆོག་ཅིང་། སྲེག་རྫས་ནི་མེ་ལྷ་དང་དཀྱིལ་འཁོར་པ་ལ་ཐ་དད་དུ་འབུལ་ཕྱིར་ཚར་གཉིས་སུ་བཤམས་པ་ལས། མར་དང་འབྲུ་དང་དུརྦ་ཀུ་ཤ་སོགས་ནི་ཇི་ཙམ་འོས་པ་བཤམས་ནས་འབུལ་བའི་ཚེས་གྲངས་སུ་བཅད་པ་ཉིད་ཀྱིས་འགྲུབ་ལ། ཡམ་ཤིང་དང་གཏོར་མ་སོགས་ནི་བརྒྱ་ཕྲག་གམ་ཉེར་གཅིག་སོགས་ལས་མི་ཉུང་བར་བཤམས་དགོས་ཏེ། མེ་ལྷ་ལ་བདུན་ནམ་ཉེར་གཅིག་འབུལ་ན། དཀྱིལ་འཁོར་པ་ལ་ཉེར་གཅིག་གམ་བརྒྱ་རྩ་སོགས་འབུལ་ཞིང་། མཐར་བཏང་རག་གི་སྐབས་སུ་ཡང་མེ་ལྷར་བདུན་སོགས་དང་། དཀྱིལ་འཁོར་པར་ཉེར་གཅིག་སོགས་དགོས་པའི་ཕྱིར་རོ། །མདོར་ན་དེ་ལྟ་བུའི་ཆོ་ག་ཚར་གཅིག་གི་ནང་དུ་སྲེག་རྫས་རྣམས་སྔགས་དང་བཅས་པ་ལན་བརྒྱ་རྩ་རེ་ཕུལ་བ་དེས་སྦྱིན་སྲེག་བརྒྱ་རྩའི་གོ་ཆོད་པར་ནི་ལུགས་ཕལ་ཆེར་བཞེད་པ་མཐུན་པས་
དེ་ལྟ་བུ་མེ་ཐབ་གཅིག་གི་སྟེང་དུ་བུད་ཤིང་བསབ་ཅིང་། མཆོད་རྫས་སྲེག་རྫས་སོགས་ཀྱང་ཁ་གསོས་ནས་ཆོ་ག་ཚར་བཅུ་བྱས་ནས་སྦྱིན་སྲེག་སྟོང་རྩར་འགྱུར་བ་སོགས་ཇི་ཙམ་འདོད་པ་གོང་དུ་སྤར་རུང་ཞིང་། ཡང་། ཆོག་ཁོངས་གཅིག་པུ་དེས་སྦྱིན་སྲེག་ཚར་གཅིག་ཏུ་བརྩིས་ཏེ། སླར་ཚར་རེ་རེ་ལ་མེ་ཐབ་དང་མཆོད་རྫས་ཐམས་ཅད་གཞི་ནས་གསར་དུ་བྱས་པས་ཞག་དང་ཟླ་བ་སོགས་སྦྲེལ་ཏེ་བརྒྱ་ཚར་རམ་སྟོང་དང་ཁྲི་འབུམ་སོགས་འགྲུབ་ན་ལེགས་མོད་ཀྱང་དེ་ལྟར་བྱེད་མཁན་ཆེར་མ་ཐོས་ཤིང་། ཕལ་ཆེར་གོང་དུ་སྨོས་བ་བཞིན། ཆོག་ཁོངས་གཅིག་ལ་སྔགས་དང་སྲེག་རྫས་སྦྲོང་བའི་གྲངས་ཀྱིས་བརྒྱ་སྟོང་སོགས་ཀྱི་གོ་ཆོད་པ་སྟེ། དཔེར་ན་ཆུ་གཏོར་ཚར་གཅིག་གི་ཁོངས་སུ་རིལ་བུ་དང་སམ་བྷཱ་ར་བརྒྱ་རྩ་ཡོད་པ་ལ་གཏོར་མ་བརྒྱ་རྩ་ཞེས་གྲགས་པ་དང་། ཚོགས་
བརྒྱ་གྲངས་ཚང་བར་བཤམས་ནས་ཆོ་ག་དང་བྱིན་རླབས་ཚར་གཅིག་བྱས་པ་ལ་ཚོགས་བརྒྱར་གྲགས་པ་བཞིན་ནོ། །དེས་ན་བསྙེན་པ་ཁ་སྐོང་གི་སྦྱིན་སྲེག་ཁྲི་ཕྲག་སོགས་བྱ་ཐབས་ཀྱང་དེས་མཚོན་ནས། ཡམ་ཤིང་དང་གཏོར་མ་དང་སྔགས་རྣམས་ཁྲི་ཕྲག་ཚང་བར་བྱ་བ་དང་། སྲེག་རྫས་གཞན་རྣམས་ཀྱང་ཕུལ་བའི་གྲངས་དེ་ལྟར་བྱ་བ་མ་གཏོགས། ཆོ་ག་ཡོངས་རྫོགས་ཚར་ཁྲི་ཕྲག་སོགས་ནི་འགྲུབ་པར་མི་ནུས་སོ།། ༈ །།གཞན་ཡང་། རྙིང་ལུགས་ཀྱི་ཕྱག་བཞེས་ལ་ལར། སྦྱིན་སྲེག་ལས་བཞི་ཡོངས་རྫོགས་བརྒྱ་ཚར་བྱ་ཚུལ་འདི་ལྟར་ཡང་ཡོད་དེ། དབང་ངམ་སྒྲུབ་པའི་དཀྱིལ་འཁོར་གྱི་ཕྱོགས་བཞིའམ། གནས་གཞན་དུ་ཡང་རུང་བར། ཤར་དུ་ཞི་བའི་མེ་ཐབ་ཆེ་བ་གཅིག་ལ་ཐབ་ཆུང་ཉི་ཤུ་རྩ་བཞིས་ཟླུམ་
པོར་བསྐོར་བ་དང་། བྱང་དུ་རྒྱས་པའི་ཐབ་ཆུང་ཉེར་བཞིས་ཁྲུ་བཞིར་བསྐོར་བ་དང་། ནུབ་ཏུ་དབང་གི་ཐབ་ལ་ཐབ་ཆུང་ཉེར་བཞིས་ཟླ་གམ་དང་། ལྷོར་དྲག་པོའི་ཐབ་ལ་ཉེར་བཞིས་གྲུ་གསུམ་དུ་བསྐོར་ཞིང་། དབུས་སུ་རྡོ་རྗེ་སློབ་དཔོན་བཞུགས་པའི་གདན་གཤམ། མཆོད་རྫས་དང་སྲེག་རྫས་རྣམས་ཀྱང་ལས་བཞི་ཐུན་མོང་ལ་དགོས་པ་རྣམས་ལྷན་ཅིག་དང་། སོ་སོའི་ཁྱད་པར་བ་རྣམས། ཐ་དད་དུ་ཚང་ལ་མ་འདྲེས་པར་བཤམས་ལ། ཆོ་ག་ཡང་སྐྱབས་སེམས་ཡན་ལག་བདུན་སོགས་སྤྱི་འགྲོའི་ལས་རིམ་ཐམས་ཅད་ཚར་གཅིག་གིས་བཞི་ཀའི་གོ་ཆོད་པ་དང་། མི་འདྲ་བའི་ཁྱད་པར་རྣམས་ནི་ལས་བཞི་སོ་སོ་ལྟར་རིམ་ཅན་དུ་བྱ་བ་དང་། སྲེག་རྫས་སོགས་འབུལ་ཚུལ་ཡང་དེ་དང་མཚུངས་པར་མེ་ཐབ་རང་རང་ལ་རྫས་སྔགས་འདོད་གསོལ་རྣམས་སོ་སོར་བྱ་ཞིང་། མཐར། མཇུག་ཆོག་བསྔོ་
སྨོན་ཤིས་བརྗོད་སོགས་ཀྱི་ལས་རིམ་རྣམས་ཐུན་མོང་དུ་བྱས་པས། ཆོ་ག་ཚར་གཅིག་ལ་སྦྱིན་སྲེག་བརྒྱ་རྩ་འཕྲིན་ལས་བཞི་ཚང་བར་འགྱུར་བའི་ཕྱག་བཞེས་ཡོད་པ་འདི་ཉིད་ལ། གསར་མའི་མཁས་པ་འགའ་ཞིག་གིས་དགག་པ་མཛད་པར་གྲགས་ཀྱང་། ཚུལ་འདི་མི་རུང་བ་དེ་ལྟ་ན། གསང་སྔགས་ཀྱི་དཀྱིལ་འཁོར་ཆེན་པོ་གཅིག་གི་སྟེང་ནས་དབང་བཞི་རིམ་ཅན་དུ་བསྐུར་ཐབས་ཀྱང་མེད་པར་འགྱུར་བ་དང་། བསྐང་གསོ་ཚར་གཅིག་གི་ཁོངས་སུ་ཆོས་སྐྱོངས་ཐ་དད་པ་ལ་གཏོར་མཆོད་འབུལ་དུ་ཡང་མི་རུང་བར་ཐལ་བ་སོགས་ཀྱི་སྐྱོན་དུ་འགྱུར་བ་དང་། དཔེ་གཞན་ཡང་། གཙུག་ལག་ཁང་ལྟ་བུ་རབ་ཏུ་གནས་པའི་ཚེ། ཆོ་ག་སྦྱོར་དངོས་རྗེས་གསུམ་ཚང་བ་གཅིག་གི་ཁོང་ནས་རྟེན་ཐ་དད་སོ་སོའི་བསྐྱེད་བསྟིམ་ཇི་སྙེད་པ་ཐམས་ཅད་
འགྲུབ་པ་མ་གཏོགས། རྟེན་ཐ་དད་རེ་རེ་ལ་ཆོ་ག་ཚར་རེ་རེ་མི་དགོས་པ་ཞིན་སྟེ། གསང་སྔགས་ནི་ཐབས་ཟབ་པ་མྱུར་བ་གང་བ་རྒྱ་ཆེ་བ་སོགས་ཁྱད་ཆོས་ཀྱི་ནུས་པར་གདའ་ལགས།། ༈ །།འཕྲོས་དོན་གཞན་ཡང་། སྦྱིན་སྲེག་ལས་བཞིའི་སྐབས་འདིར། བཀའ་རྒྱུད་ཀྱི་ཕྱག་བཞེས་ལ་ལར། ཞི་བ་ལ་ཀུན་རིགས། རྒྱས་པ་ལ་བདེ་མཆོག །དབང་ལ་ཕག་མོ། དྲག་པོ་ལ་མགོན་པོ་ལ་སོགས་དཀྱིལ་འཁོར་ཐ་དད་པ་བསྐྱེད་པའི་ཕྱག་བཞེས་ཀྱང་མཛད་མོད་ཀྱི། རྙིང་མའི་བཀའ་བརྒྱད་དགོངས་འདུས་ཞི་ཁྲོ་ཡང་ཕུར་སྒྱུ་འཕྲུལ་སོགས་ཀྱི་དཀྱིལ་འཁོར་གང་ལ་ཡང་དེ་དང་དེའི་ལྷ་ཚོགས་དེ་དག་སྦྱིན་སྲེག་ལས་བཞི་པོ་གང་བྱེད་དང་མཐུན་པའི་སྐུ་མདོག་ཕྱག་མཚན་ཆ་ལུགས་བསྒྱུར་བ་མ་གཏོགས། ལས་བཞི་སོ་སོ་ལ་དཀྱིལ་ཆོག་ཐ་དད་བྱེད་པར་མ་གསུངས་ཀྱང་། གསར་རྙིང་
གཉིས་ཀ་དོན་གྱི་དགོངས་པ་ལ་ཁྱད་མ་མཆིས་ཏེ། ཇི་སྐད་དུ། ལྷ་རྣམས་ཐམས་ཅད་ཞི་བའམ། ཡང་ན་ཁྲོ་བོར་བསྒོམ་བྱ་སྟེ། སངས་རྒྱས་གར་མཁན་བསམ་མི་ཁྱབ། །ཅེས་སོ། ངོ་བོ་ལ་དབྱེར་མེད་ཀྱང་གནས་སྐབས་གང་འདུལ་གྱི་རོལ་པ་སྣ་ཚོགས་སྟོན་པའི་ཕྱིར་རོ། །ཡང་གོང་ལྟར། ཉིད་ཀྱི་ཕེབས་རྒོར། ཕག་མོའི་ཆོས་འབྱུང་དཀྱིལ་འཁོར་གྱི་སྟེང་དུ་འཇིག་རྟེན་མེ་ལྷ་བསྐྱེད་པ་འདི་ལ་ཐེ་ཚོམ་བྱུང་གསུངས་པ། དེ་ཡང་ཆོས་འབྱུང་སོགས་དཀྱིལ་འཁོར་བྲིས་པ་དེ་དག་ནི་དཀྱིལ་ཆོག་གང་བྱེད་དེ་ཀའི་ལས་ཀྱི་དཀྱིལ་འཁོར་ཡིན་མོད་ཀྱི། མེ་ལྷ་གོང་དུ་བརྗོད་པ་བཞིན། མེ་དང་དབྱེར་མེད་དུ་བསྐྱེད་པའམ། དཔང་པོའི་ཚུལ་དུའམ། ལྟེ་བར་དཀྱིལ་འཁོར་དེ་དག་བསྐྱེད་པ་མ་གཏོགས། དཀྱིལ་འཁོར་དེའི་དབུས་སུ་མེ་ལྷ་
བསྒོམ་རྒྱུ་མ་ཡིན་ཚེ། འགལ་བ་མེད་ཅིང་ཐེ་ཚོམ་གྱི་གནས་མི་འཚལ་ལགས།། ༈ །།ཡང་ཉིད་ཀྱིས། སྦྱིན་སྲེག་སོགས་མེའི་མཆོད་སྦྱིན་ལ་མེ་ལྷ་ངེས་པར་བསྐྱེད་དགོས་ན། འབྱུང་བ་གཞན་རྣམས་ལ་ཡང་མཚུངས་པར། སཱ་ཚ་ལྟ་བུའི་སྐབས་སུ་དང་པོར་ས་བདག་ཐེ་སེ་སོགས་བསྐྱེད་དགོས་པར་མི་འགྱུར་རམ། གསུངས་པའི་དྲི་བ་འདི་ཡང་ཉམས་མཚར་ཞིང་བློ་གསལ་དག་ལ་དོགས་གཅོད་ཆེན་པོའི་རྒྱུར་འགྱུར་བ་ཞིག་སྣང་བས། ལན་དུ་ཕུལ་བ་ནི། སྤྱིར་ཁམས་གསུམ་སྣོད་བཅུད་ཀྱི་ཆགས་གནས་འཇིགས་སྟོངས་ཐམས་ཅད་འབྱུང་བ་བཞིའི་ལྔའི་ནུས་སྟོབས་ཁོ་ན་ཡིན་ཕྱིར་དང་། བྱེ་བྲག་ཏུ་ཡང་འཁོར་འདས་གཉིས་ཀའི་བྱེད་ལས་ཕལ་ཆེར་ཡང་འབྱུང་བ་འདི་དག་ལ་བརྟེན་པ་ཤས་ཆེ་བས་ན། རྒྱལ་བ་ཐབས་མཁས་ཐུགས་རྗེ་ཆེ་བས་
འཕྲིན་ལས་ཀྱི་སྒོ་རབ་འབྱམས་མཐའ་ཡས་པ་དུ་མས་བསྟན་པ་སྟེ། འབྱུང་བ་ས་ལ་བརྟེན་ནས་གཙུག་ལག་དཀྱིལ་འཁོར་རྟེན་གསུམ་བཞེངས་པ་སོགས་བྱེད་པའི་ཐོག་མར་སའི་བདག་པོ་རྣམས་བསྐྱེད་ཅིང་མཆོད་ནས་བཀའ་བསྒོ་བྱ་བ་དང་། འབྱུང་བ་ཆུ་ལ་བརྟེན་ནས་ཆར་དབབ་པ་སོགས་ལ་ཆུ་བདག་བསྐྱེད་མཆོད་དང་། འབྱུང་བ་མེ་ལ་བརྟེན་པའི་སྦྱིན་སྲེག་ལ་མེ་ལྷ་བསྐྱེད་པ་དང་། འབྱུང་བ་རླུང་ལ་བརྟེན་ནས་འཁོར་ལོ་བསྐོར་བ་སོགས་ལ་རླུང་ལྷ་སྐྱེད་ཆོག་སོགས་ནི་ཤིན་ཏུ་ཡང་དགོས་ཕྱིར་ཕྱག་ལེན་དུ་ཐམས་ཅད་ཀྱིས་མཛད་བཞིན་པ་དང་། ཁྱད་པར་དུ། སའི་ཆོ་གའི་སྐབས་སུ་ས་བདག་ཐེ་སེ་བསྐྱེད་པར་ནི་མ་གསུངས་ཏེ། ཐེ་སེ་སོགས་ལོ་དང་ཟླ་བའི་ས་བདག་རྣམས་ནི་རྒྱ་ནག་གཙུག་ལག་གི་གཞུང་ལྟར་ཡིན་
མོད་ཀྱི། འདིར་གསུང་རབ་སྤྱི་གཞུང་ནས་ནི་ཕྱོགས་བཅུའི་འཇིག་རྟེན་སྐྱོངས་བ་རྣམས་གཙོ་ཡང་ཆེ་ལ་སྟོན་པའི་བསྟན་པ་སྐྱོངས་བར་དམ་བཅས་པ་ཡིན་ཕྱིར། དེས་ན་ས་ཆོག་གི་སྐབས་རྣམས་སུ་སའི་ལྷ་མོ་བསྐྱེད་ཅིང་མཆོད་བསྟོད་དང་བཀའ་སྒོ་དམ་བཞག་བྱ་བའི་ལས་རིམ་རྒྱས་བསྡུས་སྣ་ཚོགས་པ་འབྱུང་མོད་ལ། དེ་དག་སྐབས་ཚོར། སྐྱོབ་པ་ཤཱཀྱ་སེང་གེ་ཡི། །སྤྱོད་པ་ཚུལ་དང་ཁྱད་པར་ལས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཞེས་སོགས་ཀྱིས། སྔོན་ཤཱཀྱའི་དབང་པོ་མངོན་པར་འཚང་རྒྱ་བ་ལ་བདུད་ཀྱི་ཐོ་འཚམས་ཤིང་རྩོད་པའི་ཚེ། ཐུབ་པས་ཕྱག་ཡས་ས་ལ་བརྡབ་པ་ཙམ་གྱིས་སའི་ལྷ་མོ་མཐོན་ཏེ་དཔང་པོར་བྱས་ནས་བདུད་ཕམ་ཞིང་སངས་རྒྱས་པའི་ཚུལ་གྱི་རྗེས་སུ་འབྲང་སྟེ། སའི་ལྷ་མོ་ལྷག་གནས་ཀྱི་
ཆོ་ག་ནི་གསར་རྙིང་གི་དཀྱིལ་ཆོག་ཀུན་ལ་མཆིས་པ་དང་། དེ་སྐབས་ས་ལྷའི་འཁོར་དུ་ཐེ་སེ་སོགས་ལོ་ཟླ་ཞག་དུས་ཀྱི་ས་བདག་ཐམས་ཅད་ཚང་བ་ལ་མཆོད་སྦྱིན་དང་བཀའ་སྒོ་བྱ་ཚུལ་སོགས་ཞིབ་པར་ཞར་ལ་འབྱུང་བ་ལགས།། ༈ །།སཱ་ཚའི་སྐབས་སུ་ནི་ས་དེ་ཉིད་ལ་རྒྱུ་བྱིན་རླབས་ཀྱི་ལས་རིམ་མ་གཏོགས་ས་བདག་བསྐྱེད་མོད་ཀྱི་འོན་ཏེ་སཱ་ཚའི་རྒྱུ་ནི་ས་གཅིག་པུར་མ་ཟད། ཆུ་མེ་རླུང་། ནམ་མཁའ་དང་བཅས་པ་ལ་འདེབས་པའི་ཐབས་ཀྱི་རིམ་པ་ཞིབ་རྒྱས་སུ་སྐུ་གདུང་འབར་བ་མཆོད་རྟེན་གྱི་རྒྱུད་དང་། སཱ་ཚའི་ལས་གཞུང་རྣམས་ལས་འབྱུང་བ་བཞིན་ནོ། །དེས་ན་གོང་དུ་སྨོས་པ་བཞིན། འབྱུང་བ་གང་དང་གང་གི་ལས་བསྒྲུབ་པ་ན་དེ་ཉིད་ཀྱི་བདག་པོ་རྣམས་ལ་མཆོད་གསོལ་དང་
འཕྲིན་ལས་གྲོགས་དན་བཅོལ་བའི་ལས་རིམ་དེ་བཞིན་འབྱུང་ཕྱིར། སྦྱིན་སྲེག་ལ་མེ་ལྷ་བསྐྱེད་པའི་དགོས་པ་དང་རྒྱུ་མཚན་ནི་དེ་ལྟར་གདའ་ལགས། ཡང་། གསང་སྔགས་ནང་པ་ལྟར་ན་འབྱུང་བ་ཆེན་པོ་ལྔ་ནི་དབྱིངས་ཀྱི་ཡུམ་ཆེན་ལྔར་གདོད་ནས་ལྷུན་གྱིས་གྲུབ་པ་སྟེ། བསྲ་ཞིང་འདེགས་པའི་དོན་བྱེད་ནུས་པའི་འབྱུང་བ་སར་སྣང་བ་མཐའ་དག་ནི་ཡུམ་ཆེན་མོ་སངས་རྒྱས་སྤྱན་མའི་རང་བཞིན་དང་། རླན་ཅིང་བཤེར་བའི་ཆུ་ཐམས་ཅད་མ་མཱ་ཀིའི་རང་བཞིན། ཚ་ཞིང་བསྲེག་པའི་མེ་ཐམས་ཅད་དགོས་དཀར་མོ། ཡང་ཞིང་གཡོ་བའི་རླུང་ཐམས་ཅད་དམ་ཚིག་སྒྲོལ་མ། སྟོང་ཞིང་གོ་འབྱེད་པའི་ནམ་མཁའ་ཐམས་ཅད་དབྱིངས་ཀྱི་དབང་ཕྱུག་མའི་རང་བཞིན་དུ་ཡེ་ནས་ཡིན་ལ་ཡིན་པར་རྟོགས་པའི་ངེས་ཤེས་དང་ལྡན་པས། འབྱུང་བ་རྣམས་ལ་མ་དག་མཚན་འཛིན་གྱི་ལོག་རྟོག་སྤོང་བ་ཡང་
དམ་ཚིག་གི་རྩ་བ་ཡིན་པར་གསུངས་ཤིང་། ཕྱིའི་འབྱུང་བ་ལྔ་ལྟར་ནང་ལུས་ཀྱི་ཤ་ཁྲག་དྲོད་དབུགས་སེམས་དང་ལྔ་པོ་ཡང་དེ་བཞིན་དུ་ཤེས་པར་བྱ་བ་ཉིད་དོ།། ༈ །།དོན་དམ་པ་མཐར་ཐུག་གི་ངོར་ནི་འབྱུང་ལྔ། ཁམས་ལྔ། དུག་ལྔ། ཡེ་ཤེས་ལྔ། ཕུང་པོ་ལྔ། རིགས་ལྔ། སྐུ་ལྔ་སོགས་མདོར་ན་འཁོར་བ་དང་མྱང་འདས་ཀྱི་བསྡུས་པའི་ཆོས་སོ་ཅོག་མ་ལུས་པ་སེམས་ཉིད་ཀུན་ཏུ་བཟང་པོའི་རིག་རྩལ་འབའ་ཤིག་ལས་གཞན་པ་ནི་རྡུལ་ཙམ་མ་མཆིས་ཤིང་། བསྐྱེད་དང་བསྡུ་བ་སོགས་ཀྱི་སྤྲོས་མཚན་ལས་འདས་པ་ཉིད་ནི་ཡང་དག་པའི་གནས་ལུགས་སམ་བབ་ཚུལ་ལམ་ཡིན་ལུགས་ཇི་བཞིན་པ་སྟེ། ཆོས་ཐམས་ཅད་ཀྱི་མདོ་དོན་བླ་ན་མེད་པ་ལགས་སོ། །ཡང་། སྦྱིན་སྲེག་དང་རབ་ཏུ་གནས་
པ་སོགས་ཀྱི་སྐབས་རྣམས་སུ་གསུངས་པའི་ཙཱ་རུའི་བཟའ་བ་ཞེས་པའི་ངོ་བོ་དང་ངེས་ཚིག་སོགས་ཀྱི་དྲི་བ་གནང་བའི་ལན་དོན་ཕུལ་བ་ནི།། ༈ །།འདིའི་ངོ་བོ་ནི་དགའ་སྟོན་གྱི་ལོངས་སྤྱོད་ལྟ་བུ་ཡིན་ལ། མིང་གི་ངེས་ཚིག་ནི། ཙཱ་རུ་ཞེས་པ་སྤྱད་བྱའམ་བཟའ་བྱ་ཞེས་པ་སྟེ་བཟའ་རྒྱུ་ལ་འཇུག་པ་དང་། དབྱེ་ན། ཚོགས་འཁོར་གྱི་བྱེ་བྲག་དུ་གཏོགས་པ་དང་། མི་གཏོགས་པ་གཉིས་ཡོད་དེ། ཚོགས་འཁོར་དུ་མ་གཏོགས་པའི་ཚུལ་བརྗོད་ན། དེ་ཡང་། ཚོགས་འཁོར་གྱི་ཚུལ་རྣམ་གྲངས་དབྱེ་ལུགས་བཞེད་པ་ཐ་དད་དེ། དཔལ་ནཱ་རོ་པའི་བཞེད་ཀྱི་དབྱེ་བ་དགུ་རུ་གསུངས་ཏེ། དེ་ལ། ཚོགས་ཀྱི་གཙོ་བོ་གསུམ་ལྡན་རྡོ་རྗེ་འཛིན་པ་མཚན་ཉིད་ཚང་ཞིང་། ཚོགས་ཀྱི་འདུས་པའང་རྣལ་འབྱོར་ཕོ་མོ་ཐབས་ཤེས་ཆ་མཉམ་དཀྱིལ་འཁོར་ལྷ་གྲངས་དང་མཚུངས་པ། ལག་
ལེན་གྱི་ཚུལ་ཡང་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་ཐམས་ཅད་གཉིས་མེད་ཡེ་ཤེས་ཆེན་པོར་འབུལ་ཤེས་པ་དང་བཅས་པའི་མཚན་ཉིད་ཐམས་ཅད་དང་ལྡན་ན་ཚོགས་ཀྱི་འཁོར་ལོ་ཞེས་བརྗོད་པ་དང་། ༡ གཞན་རྣམས་གོང་ལྟར་འཛོམ་ཡང་དེ་ཁོ་ན་ཉིད་ཀྱི་ཏིང་ངེ་འཛིན་ནི་མི་ལྡན་ན་ཚོགས་ཀྱི་འཁོར་ལོའི་མིང་མི་ཐོབ་པས་ཚོགས་ཀྱི་མཆོད་པ་ཅེས་བྱ་བ་དང་། ༢ མདུན་སྐྱེད་ཀྱི་དཀྱིལ་འཁོར་ལ་ཚོགས་མཆོད་ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད་ཅིང་བདག་ཉིད་ཚོགས་ལ་མི་སྤྱོད་པ་ནི་མཎྜལ་གྱི་མཆོད་པ་ཅེས་བྱ་བ་དང་། ༣ ནུས་ལྡན་གྱི་རྣལ་འབྱོར་ཕོ་འབའ་ཞིག་ཚོགས་ནས་བྱེད་ན་དཔའ་བོའི་སྟོན་མོ་ཞེས་བྱ་བ་དང་། ༤ རྣལ་འབྱོར་མོ་འབའ་ཤིག་གིས་བྱེད་ན་དཔའ་མོའི་སྟོན་མོ་དང་། ༥ རྣལ་འབྱོར་ཕོ་མོ་དམ་ལྡན་དུ་མ་གྲངས་
དང་གོ་རིམ་ངེས་མེད་དུ་འཚོགས་ནས་ལྷའི་རྣལ་འབྱོར་དང་ཆོ་གའི་བྱེ་བྲག་ཀྱང་སྣ་ཚོགས་པ་རང་རང་གི་ལུགས་བཞིན་བྱེད་པ་ལ་དགའ་སྟོན་ཆེན་པོ་ཅེས་བརྗོད་པ་དང་། ༦ ཚོགས་ཀྱི་ཆོ་གས་བྱིན་རླབས་ཚུལ་བཞིན་གྲུབ་པའི་བཟའ་བཏུང་དེ་དག་གནས་གཞན་དུ་ཁྱེར་ནས་ལྷའི་ཏིང་ངེ་འཛིན་དང་ཟས་ཀྱི་རྣལ་འབྱོར་ཚུལ་ལྡན་དུ་ལོངས་སྤྱོད་པ་ལ་ཙཱ་རུའི་སྟོན་མེ་ཞེས་བྱ་བ་དང་། ༧ གྲོང་པའི་ཆོས་ཀྱི་མ་གོས་པའི་བུ་མོ་གཞོན་ནུ་མ་དཀྱིལ་ཆོག་གང་བྱེད་ཀྱི་ལྷ་གྲངས་དང་མཉམ་པ་ལ་བཟའ་བཏུང་འདོད་ཡོན་གྱིས་མཆོད་པ་ནི་གཞོན་ནུ་མའི་མཆོད་པ་དང་། ༨ མཁའ་སྤྱོད་དང་ས་སྤྱོད་དང་ས་སྟེང་ན་སྤྱོད་པ་མ་སོགས་ཕྱི་ནང་གི་ཡུལ་ཉེར་བཞི་སོགས་ཀྱི་རྣལ་འབྱོར་མ་རྣམས་མཆོད་པའི་ཚུལ་ཕྱག་རྡོར་སྟོད་འགྲེལ་སོགས་ལས་གསུངས་པ་ཇི་ལྟ་བར་བསྒྲུབ་པ་ནི་རིག་ལྡན་མའི་
མཆོད་པ་སྟེ། ༩ དེ་ལྟར་ཚོགས་འཁོར་གྱི་དབྱེ་ཚུལ་དགུའོ། ཡང་། དཔལ་ཆེན་བིར་ཝ་པའི་བཞེད་ཀྱི་རྣམ་གྲངས་བདུན་དུ་གསུངས་སྟེ། རྣལ་འབྱོར་ཕོ་མོ་ཐབས་ཤེས་ཆ་མཉམ་དུ་འཚོགས་ནས་གཞུང་བཞིན་སྤྱོད་པ་ནི་ཚོགས་ཀྱི་འཁོར་ལོ། ༡ ཡབ་འབའ་ཤིག་འདུས་པ་ནི་དཔའ་བོའི་སྟོན་མོ། ༢ ཡུམ་འབའ་ཤིག་ནི་དཔའ་མོའི་སྟོན་མོ་ནམ། ༣ དབང་བསྐུར་རབ་གནས་སྦྱིན་སྲེག་སོགས་ཀྱི་དུས་སུ་བྱེད་པ་ནི་ཙཱ་རུའི་སྟོན་མོ། ༤ རྣལ་འབྱོར་རྣམས་རང་རང་སོ་སོའི་ལྷའི་རྣལ་འབྱོར་ཐ་དད་དུ་བསྒྲུབ་པ་ནི་འཛའ་བ་འདུ་བའི་སྟོན་མོ། ༥ འཇིག་རྟེན་གྱི་ཁམས་སུ་ནད་མུག་འཁྲུག་རྩོད་འབྱུང་པོ་དང་འབྱུང་བའི་འཚེ་བ་སོགས་ཞི་བའི་སླད་དུ་སངས་རྒྱས་ཀྱི་ཐུགས་རྗེ་བསྐུལ་ཕྱིར་དཀྱིལ་འཁོར་གང་བྱེད་ཀྱི་ལྷ་ཚོགས་རྣམས་གར་མཁན་ནམ་ལས་བྱེད་ཕྱག་ཚང་བ་ལྟ་བུར་
སྒྲུབ་པས་སེམས་ཅན་གྱི་ཉེར་འཚེ་བསེལ་བ་ནི་སངས་རྒྱས་གར་གྱི་མཆོད་པ། ༦ འཇིག་རྟེན་ལས་འདས་པའི་མཁའ་འགྲོ་རྣམས་དཀྱིལ་འཁོར་དུ་མཆོད་ཅིང་། འཇིག་རྟེན་མི་མོའི་ཚུལ་གྱི་གཞོན་ནུ་མ་ལྷ་གྲངས་དང་མཉམ་པ་རྣམས་དཀྱིལ་འཁོར་གྱི་ཁང་པའི་ཕྱི་རོལ་ཏུ་མཆོད་པ་ནི་རིགས་ལྡན་མའི་མཆོད་པ་སྟེ། ༧ དེ་ལྟར་ཚོགས་ཀྱི་དབྱེ་བ་བདུན་དུ་བཞེད་དོ།། ༈ །།མདོར་ན་དེ་ལྟ་བུའི་སྐབས་རྣམས་སུ་ཚོགས་ཀྱི་ཡོ་བྱད་ཀྱང་རྒྱ་གར་དུ་ནི་གསེར་སྲང་བཅོ་བརྒྱད་ཀྱི་དངོས་པོ་ཡན་ཆད་མ་གཏོགས་དེ་ལས་དམན་པའི་ཡོ་བྱད་ལ་ཚོགས་འཁོར་མི་རུང་བར་བཤད་ཕྱིར་འབྱོར་བ་གྱ་ནོམ་པ་དང་ཚོགས་ཀྱི་གཙོ་བོ་དང་འདུས་པའི་རྣལ་འབྱོར་ལས་ཀྱི་རྡོ་རྗེ་རྣམས་ཀྱང་མཚན་ཉིད་ཚང་ཞིང་དམ་ཚིག་ལ་དྲི་མ་མེད་དང་། དུས་དང་གནས་དང་ཆོ་གའི་ཕྱག་བཞེས་རྣམས་ཀྱང་རྒྱུད་སྡེ་ གསེར་ཞོ་བརྒྱ་དང་བཞི་བཅུ་ཞེ་བཞི་
སོ་སོ་ལས་ཇི་ལྟར་གསུངས་པ་བཞིན་མ་གཏོགས། ཅུང་ཟད་ཙམ་གྱི་ནོར་འཁྲུལ་ལྷག་ཆད་གཟུ་ལུམ་རས་ཆོད་དུ་གྱུར་ནའང་རྩ་བའི་ལྟུང་བ་ཕོག་ཅིང་ལྷ་དང་མཁའ་འགྲོ་མི་མཉེས་པའི་བཀའ་ཆད་འཕྲལ་དུ་འབྱུང་ཞིང་། བྱུང་ཚུལ་གྱི་ལོ་རྒྱུས་ཀྱང་མང་ལ། དེས་ན་འདི་དག་གི་ཚུལ་རྒྱས་པར་ནི་རྒྱུད་འགྲེལ་ཆེན་པོ་རྣམས་དང་ཚོགས་ཀྱི་རྣམ་བཤད་དག་ལས་འབྱུང་མོད་ཀྱི། དིང་སང་བོད་འདིར་བསྟན་པའི་གཟུགས་བརྙན་དང་། གསང་སྔགས་འཆལ་བར་གྱུར་བའི་དབང་གིས་ཚུལ་འདི་དག་བཤད་པའི་དགོས་པ་ཡང་དག་ལ་མཆིས་ཤིང་། དེ་བས་ན་འདི་སྐབས་ཀྱི་བརྗོད་བྱའི་དངོས་དོན་སྙིང་པོར། ཙཱ་རུ་ཚོགས་འཁོར་གྱི་རྣམ་གྲངས་སུ་གཏོགས་པའི་འཆད་ཚུལ་ནི་གོང་གི་ལུགས་གཉིས་པོ་དེ་ལྟར་ལགས་པ་དང་།
ཡང་། ཙཱ་རུ་ཚོགས་འཁོར་ལ་མི་ཐེ་བའི་ལུགས་ལྟར་ན། གསང་སྔགས་འོག་མ་བྱ་སྤྱོད་རྣལ་འབྱོར་སོགས་ཀྱི་སྒོ་ནས་རབ་ཏུ་གནས་པའི་ཚེ་ན་ནི། འདི་ལ་ཙཱ་རུའི་སྟོན་མོ་ཞེས་པ་ལས། ཚོགས་འཁོར་གྱི་མིང་ཡང་མི་བརྗོད་དེ། རྒྱུད་སྡེ་དེ་དག་ཏུ་ཚོགས་འཁོར་མ་གསུངས་ཤིང་ཚོགས་འཁོར་ནི་བླ་མེད་ཁོ་ནའི་ཁྱད་ཆོས་ཡིན་པའི་ཕྱིར་རོ། །ཡོ་བྱད་ཀྱང་། རྒྱུད་སྡེ་འོག་མའི་ཙཱ་རུའི་སྐབས་འདིར་དཀར་གསུམ་མངར་གསུམ་གཙོ་བོར་གྱུར་པའི་ཟས་སྣ་བཟང་པོ་གཙང་མ་ཅི་འབྱོར་མ་གཏོགས་ཤ་ཆང་སྒོག་གཙོང་སོགས་མི་བཤམས་པ་དང་། བྱིན་རླབས་ཀྱང་འབྲུ་གསུམ་དང་ནམ་མཁའ་མཛོད་སྔགས་སོགས་ཀྱིས་བྱིན་གྱིས་རླབས་པ་མ་གཏོགས། བླ་མེད་ལུགས་ཀྱི་ཚོགས་བྱིན་རླབས་མི་བྱ་བར་གསུངས་སོ། །དེ་ཅིའི་ཕྱིར་ཞེ་ན། རྒྱུད་སྡེ་འོག་མའི་སྐབས་འདིར་ཤ་ཆང་སོགས་ལྟ་
ཅི་སྨོས་ཏེ། སྒོག་ཙོང་གི་རིགས་བཅུ་གསུམ་སོགས་དེ་དག་ལ་ཡང་རྒྱ་གར་གྱི་བྲམ་ཟེ་རྣམས་ནི་ཀེའུ་དང་ཀུན་དོང་ཞེས་དྲི་ཙམ་ལའང་རྒྱང་རིང་ནས་འཛེམ་པར་བྱེད་པ་དང་། རབ་ཏུ་བྱུང་བ་རྣམས་ལ་ཡང་བཅོམ་ལྡན་འདས་ཀྱི་འདུལ་བ་ནས་བཀག་ཅིང་། གལ་ཏེ་དགེ་སློང་གང་ཞིག་ནད་ཀྱིས་ཉེན་པ་ལ་སྨན་པས་གཙོང་ཀེའུའམ་སྒོག་པ་ཀུན་དོང་སོགས་བཟའ་བར་གདམས་པ་ན། མཁན་སློབ་དང་དགེ་འདུན་ལ་གནང་བ་ཞུས་ནས་ས་ཕྱོགས་དབེན་པར་སོང་ཏེ་ཇི་སྲིད་ན་དེ་མ་སོས་ཀྱི་བར་དུ་ཟ་ཞིང་། ནམ་སོས་ཀྱང་ཞག་བདུན་སོགས་དེ་དག་གི་དྲི་མ་ལེགས་པར་མ་སངས་ཀྱི་བར་དུ་གཙུག་ལག་ཁང་དང་དགེ་འདུན་གྱི་ནང་དུ་འཇུག་པར་མི་བྱའོ། །དྲི་མ་ལེགས་པར་སངས་ཚེ་ཁ་ལག་དང་ཡོ་བྱད་རྣམས་བཀྲུས་ནས་དལ་བུས་དགེ་འདུན་གྱི་ནང་དུ་འཇུག་གོ། །ཞེས་གསུངས་སོ། །དེ་བཞིན་
དུ་བྱ་སྤྱོད་རྣལ་འབྱོར་གྱི་ལྷ་ལ་མཆོད་པའི་རྫས་རྣམས་ཀྱང་ཤ་ཆང་སྒོག་གཙོང་སོགས་ཀྱི་དྲི་དང་མ་འདྲེས་པར་བྱ་བར་གསུངས་པའོ།། ༈ །།སྔགས་བླ་མེད་ཀྱི་སྐབས་སུ་ནི་དེ་དག་ལས་ཆེས་རྩོགས་པར་གྲགས་པའི་བདུད་རྩི་ལྔ་དང་ཤ་ལྔ་ལ་སོགས་ཀྱང་ཁྱད་པར་དུ་འཕགས་པའི་རྫས་ཀྱི་གཙོ་བོར་སྒྲུབ་དགོས་པ་དང་། དེ་དག་སྤྱོད་པའི་གང་ཟག་ཀྱང་གཙང་དམེ་དང་བཟང་ངན་སོགས་ཐ་མལ་གྱི་འཛིན་རྟོགས་ལས་གྲོལ་ནས་ཆོས་དབྱིངས་མཉམ་པ་ཉིད་ལ་བློ་ངེས་པའི་སྒོ་ནས་ཚོགས་ཀྱི་འཁོར་ལོ་སྒྲུབ་དགོས་པའི་ཕྱིར་དང་།། ༈ །།ལོངས་སྤྱད་པའི་ཚུལ་ཡང་མི་འདྲ་སྟེ། ཙཱ་རུའི་བཟའ་བ་ནི་རབ་གནས་ཀྱི་དགའ་སྟོན་ལ་གང་འདུས་ཀྱི་སྐྱེ་བོ་མཐའ་དག་ལ་ཚིམ་པར་འགྱེད་དགོས་ཤིང་། ཚོགས་ཀྱི་བཟའ་བཏུང་ནི་འཁོར་ལོའི་འདུ་བར་གང་ཚོགས་པའི་རྣལ་འབྱོར་
ཕོ་མོ་དེ་དག་གི་བཟའ་བའི་རྣལ་འབྱོར་གྱི་སྒོ་ནས་དེ་འཕྲལ་དུ་རོལ་ཞིང་ལྷག་མ་གང་བྱུང་ལྷག་གཏོར་ལ་གཏོང་བ་མ་གཏོགས། དམ་མེད་དང་སྐྱེ་བོ་ཕལ་པ་ལ་ཏིལ་འབྲུ་ཙམ་ཡང་སྤྱོད་པར་མི་དབང་བའི་ཕྱིར་རོ། །དེ་ལྟར་ཡིན་མོད་ཀྱི། དིང་སང་བོད་ཡུལ་འདིར་ནི་གསང་སྔགས་ཀྱི་དབང་ལ་ཁྲོམ་དབང་བྱེད་ཅིང་། དེ་དག་དང་ལྷན་ཅིག་ཚོགས་འཁོར་བྱེད་པ་དང་། སྔགས་ཀྱི་ཆོག་ཞུང་ཕྲ་མོ་རེའི་སྔགས་འདོན་ཙམ་ཞིག་ཤེས་ཚད་ཀྱིས། ཟན་བཤོས་མར་བྱུག་རེ་དང་ཤ་ཆང་ཅུང་ཟད་རེ་ལ་ཚོགས་འཁོར་བྱེད་པར་རློམ་པ་དང་། སོ་ཐར་གྱི་དགེ་སྦྱོང་ཤ་ཆང་སྤོང་མ་ནུས་པ་ཐམས་ཅད་ཀྱི་ཚོགས་འཁོར་ལ་སྙད་བཏགས་ནས་ཅི་དགར་ཟ་འཐུང་བྱེད་པའི་ལུགས་སྲོལ་འདི་འདྲ་དར་བ་ལ། བསྟན་པའི་བདག་པོ་མཁས་གྲུབ་ཆེན་
པོ་ཀུན་ཚུལ་འདི་བཏང་སྙོམས་སུ་འཇོག་བར་མཛད་ན། མི་རྒན་བདག་འདྲ་གཅིག་པུས་ཇི་ཙམ་བཤད་རུང་གཞན་དག་རྣམ་བའི་བ་སྤུ་འགུལ་བ་ཙམ་ཡང་མི་ནུས་ལ། གལ་ཏེ་འགའ་ཞིག་གིས་ནི་འདི་སྙམ་དུ། ཅི་ཁྱོད་གཞན་མི་ཟེར་བ་མང་པོ་ཁྱོད་ཀྱིས་ཟེར་བ་འདི་ཅི་ཞིག་སྙམ་པའི་ཁོང་ཁྲོ་དང་ལོག་ལྟ་སྐྱེ་བའི་རྒྱུར་ཟད་མོད།། ༈ །།ཆོས་ནས་ཇི་སྐད་གསུངས་པ་བཞིན་བྱེད་པའི་དབང་དུ་བགྱི་ན་ནི། སྔགས་བླ་མེད་ཁོ་ནའི་ལུགས་ཀྱི་རབ་གནས། སྦྱིན་སྲེག༴ དབང་བསྐུར་སོགས་ཀྱི་སྐབས་སུ་ཙཱ་རུའི་བཟའ་བཏུང་གི་རིགས་སུ་གྱུར་ཚད་ཇི་ཙམ་འབྱོར་པ་དང་། གཞན་ཡང་གཟུགས་སྒྲ་དྲི་རོ་རེག་བྱར་གྱུར་པའི་འདོད་ཡོན་མཐའ་དག་རི་ལྟར་སྤུངས་ནས། ཕྱི་ནང་གསང་བ་དེ་ཁོ་ན་ཉིད་ཀྱི་འདོད་ཡོན་ཕུན་ཚོགས་སུ་བྱིན་གྱིས་རླབས་སྟེ་འབུལ་ཞིང་། རྣལ་འབྱོར་ཕོ་མོ་
རྣམས་ཀྱིས་ཀྱང་དབང་བཞི་སོ་སོའི་བཟའ་བའི་དམ་ཚིག་གི་སྐབས་ལྟར་རོལ་བར་བྱ་ལ། ཡང་། མདོ་ལུགས་སམ་གསང་སྔགས་འོག་མའི་སྐབས་ཀྱི་ཙཱ་རུ་ནི་གོང་དུ་སྨོས་པ་བཞིན་གྱི་བཤམ་ཚུལ་ཡང་གཙང་མའི་ཡོ་བྱད་འབའ་ཤིག་དང་། སྤྱོད་ཚུལ་ཡང་ལྷ་ལ་ཕུལ་བའི་ཕམ་ཕབས་དངོས་གྲུབ་ཀྱི་ཚུལ་དུ་མོས་པས་སྤྱད་ཅིང་། གཞན་དག་ལ་ཡང་ཁྱབ་གང་ཆེར་སྦྱིན་པ་དང་། ཚུལ་འདི་ལ་ནི། འབྲས་དང་སྦྲང་རྩི་འོ་མ་རྣམས་རྒྱས་པའི་སྦྱིན་སྲེག་གི་མེ་རོ་ལ་བསྐོལ་བའི་འོ་ཐུག་དེས་ཙཱ་རུའི་བཟའ་བ་རྣམས་ཀྱི་གཙོ་བོར་བྱ་བར་བཤད་དེ། དེའི་དགོས་པ་ནི། བཅོམ་ལྡན་འདས་ཉིད་ལོ་དྲུག་བཀའ་བ་སྤྱད་པའི་མཐར། བསྐལ་བཟང་གི་སངས་རྒྱས་ཐམས་ཅད་ལ་འཚང་རྒྱ་ཁར་བསོད་སྙོམས་འབུལ་བར་སྨོན་ལམ་བཏབས་པའི་བུ་མོ་
དགའ་མ་དང་དགའ་སྟོབས་མ་གཉིས་ཀྱི་མ་ཧེ་ལྔ་བརྒྱའི་འོ་མ་ཉིད་རྒྱུད་དུ་བྱས་ཏེ་འབྲས་སཱ་ལི་སྦྲང་རྩི་དང་སྦྱར་བའི་འོ་ཐུག་གསེར་གྱི་སྣོད་བཀང་སྟེ་ཕུལ་བའི་སྤྲིས་མ་ལ་བཀྲ་ཤིས་པའི་རྟགས་ཀྱི་རི་མོ་ཤར་བ་གསོལ་བས་སྐུ་གསེར་གྱི་གཏན་པ་འཕྱིས་པའི་མདངས་ལྟར་གྱུར་ཅིང་བྱང་ཆུབ་ཀྱི་སྙིང་པོར་གཤེགས་ནས་མངོན་པར་སངས་རྒྱ་བར་མཛད་ཚུལ་དེ་ཉིད་ཀྱི་རྗེས་སུ་འབྲང་བའི་ལེགས་ཚོགས་ཀྱི་རྟེན་འབྲེལ་བསྒྲིག་པ་ཡིན་པར་གསུངས་སོ། །མདོར་ན་ཙཱ་རུའི་བཟའ་བའི་ཁྱད་དོན་ནི་དེ་ལྟར་གང་གདའ་ལགས། ཡང་ཉིད་ཀྱིས། གཤིན་པོ་རྗེས་འཛིན་གྱི་ཆོ་ག་ལ། མིང་ཡང་ལྷོ་སྒོ་ཆོ་གར་གྲགས་ཤིང་དཀྱིལ་འཁོར་གྱི་ལྷོ་སྒོ་ཁོ་ནར་བྱེད་པའི་རྒྱུ་མཚན་གྱི་དྲི་བ་གནང་བའི་ཆ་ལ་ནི།། ༈ །།སྤྱིར་རྒྱལ་བའི་ཐུགས་རྗེ་ལ་ཕྱོགས་རིས་མེད་ཅིང་ཡེ་ཤེས་
ཀྱི་དཀྱིལ་འཁོར་རྒྱ་ཆད་ཕྱོགས་ལྷུང་མེད་ཕྱིར། ལྷོ་སྒོ་ལས་གཞན་པའི་སྒོར་ཚེ་འདས་འདྲེན་མི་ནུས་པ་ནི་ག་ལ་མཆིས་ཀྱང་། འདིའི་དོན་ནི་རྒྱལ་བས་འཇིག་རྟེན་དང་སྒོ་བསྟུན་ནས་གསུངས་པར་གདའ་སྟེ། དེ་ཡང་འཕགས་པའི་ཡུལ་གྱི་གྲོང་ཁྱེར་ཆེན་པོ་ཀུན་ལ་ཕྱོགས་བཞི་ཀར་སྒོ་ཆེན་དང་བརྒྱ་སྲང་སོ་སོར་ཡོད་ཀྱང་། ལྷོ་སྒོ་ནི་གཤིན་པོའི་བྱ་བྱེད་དང་རོ་བསྐྱེལ་བ་སོགས་མ་གཏོགས་རྒྱུ་འགྲུལ་གཞན་མི་བྱེད་ལ། དེའི་རྒྱུན་ཀྱང་། ལྷོ་ཕྱོགས་གཤིན་རྗེ་གནས་པའི་དབང་གིས་གཤིན་དོན་ལས་གཞན་པའི་ལས་གང་ཡང་མི་ཤེས་པར་བརྩི་བའི་ཡུལ་ལུགས་ཡོད་པས། དེ་དང་རྗེས་སུ་བསྟུན་ནས་ཚེ་འདས་ཀྱི་སྦྱང་བ་སོགས་དཀྱིལ་འཁོར་གྱི་ལྷོ་ཕྱོགས་སུ་མཛད་ལ། དཀྱིལ་འཁོར་དག་སྦྱོར་གྱི་སྐབས་འགའ་རེར་སྒོ་བཞི་
ཚད་མེད་བཞི་དང་སྦྱོར་བས་ལྷོ་ཕྱོགས་ནི་སྙིང་རྗེ་ཆེན་པོའི་སྒོ་ཡིན་ཕྱིར་ཚེ་འདས་སྙིང་རྗེས་དྲང་བའི་མཚོན་བྱེད་ཀྱང་ཡིན་པ་དང་། གཞན་ཡང་རྙིང་མའི་དཀྱིལ་འཁོར་མང་པོར་ཡང་ལྷོའི་སྒོ་བ་ནི་ཁྲོ་བོ་གཤིན་རྗེའི་གཤེད་པོ་བཞུགས་པ་ཤས་ཆེར་འབྱུང་བ་དེ་ཡང་གོང་མ་དང་མཐུན་པའི་དོན་དུ་སྣང་བས། དེས་ན་ལྷོ་སྒོ་ཆོ་གའི་དགོས་ཆེད་གཏན་ཚིགས་ནི་དེ་ཙམ་དུ་ཟད། མཐར་ཚེ་འདས་ལ་དབང་བསྐུར་སོགས་ཀྱི་དུས་སུ་ནི་དཀྱིལ་འཁོར་གྱི་ཤར་སྒོར་དབང་བསྟེགས་པདྨ་བརྒྱད་ཀྱི་ཁར་ཚེ་འདས་བཞག་སྟེ། རིམ་གྱིས་དཀྱིལ་འཁོར་དུ་བཅུག་ཚུལ་སོགས་འབྱུང་བ་ཉིད་དོ།། ༈ །།གཞན་ཡང་། སྦྱིན་སྲེག་རྣམས་སུ་ཡང་རྒྱས་པའི་སྲེག་ཐབ་ནི་དངོས་གྲུབ་འབྱུང་ཕྱིར་བྱང་ཕྱོགས་ནོར་བདག་གི་ཕྱོགས་སུ་བྱ་ལ། དྲག་པོའི་མེ་ཐབ་ནི་གདུག་པ་ཅན་རྣམས་སྒྲོལ་ཕྱིར་ལྷོ་ཕྱོགས་
གཤེན་རྗེའི་གནས་སུ་བྱ་བར་གསུངས་པ་སོགས་དང་གུང་མཐུན་པར་སྣང་ངོ་། ཡང་། བདག་གིས་བྱས་པའི་བར་དོའི་སྤྱི་དོན་དུ། སྐྱེ་འགྲོ་ཕལ་པ་རྣམས་ལ་བར་དོ་དང་པོའི་གཞིའི་འོད་གསལ་འཆར་བའི་ཡུན་ཚད་ཀྱི་འཕྲོས་ལས་བརྩམས་ཏེ།། ༈ །།ཉིད་ཀྱིས། མདོ་སྡེ་སྟག་སྣའི་ལུང་འདྲེན་དང་བཅས་ནས་བྱ་རྫོགས་ཀྱི་སྐད་ཅིག་གི་དྲི་བ་གནང་བ་ལ། སྤྱིར། མངོན་པའི་སྡེ་སྣོད་ལས་གསུངས་པའི། གཟུགས་མཐའ། མིང་མཐའ། དུས་མཐའ་དང་གསུམ་གྱི་ནང་ཚན་དུས་མཐའི་སྐད་ཅིག་ལའང་ཕྲ་རག་གཉིས་ལས། སེ་གོལ་གཅིག་གི་ཡུན་ཚད་དེ་ཉིད་ཆ་དྲུག་ཅུ་རྩ་བཞིར་བགོས་པའི་ཆ་གཅིག་ལ། ཕྲ་བའི་སྐད་ཅིག་ཅེས་བྱ་ཞིང་། ཕྲ་བའི་སྐད་ཅིག་དེ་བརྒྱ་ཉི་ཤུར་བསྡོམས་པའི་ཡུན་ལ་ནི། རག་པའི་སྐད་ཅིག་ཟེར་དེ་དྲུག་ཅུ་ལ་ཐང་
གཅིག །དེ་སུམ་ཅུ་ལ་ཡུད་ཙམ། ཡུད་ཙམ་སུམ་ཅུས་ཉིན་ཞག་གཅིག་ཏུ་གསུངས་མོད་ཀྱི། འདི་སྐབས་ཀྱི་བྱ་བ་རྫོགས་པའི་སྐད་ཅིག་ལ་བརྩི་ལུགས་མི་འདྲ་བ་དུ་མ་ཞིག་སྣང་བ་ལས། སྟག་སྣ་ལས་གསུངས་པ་དེ་ཉིད་ནི་འཇིག་རྟེན་ཕལ་གྱིས་གོ་བར་སླ་བ་ལྟ་བུ་ལ་དགོངས་པར་སྣང་ཞིང་། དེ་དང་རིགས་མཐུན་པར། སྐྱེས་བུ་སྟོབས་ལྡན་ཞིག་གིས་མདའ་གཞུ་མེར་གྱི་བཀང་སྟེ་ཤར་གྱི་འཕེན་པའི་ཡུན་ཚད་ལ་དཔེར་མཛད་པ་དང་། མི་ཞིག་གི་ཟན་ཁམ་གཅིག་བལྡད་པའི་ཡུན་ལ་ཆ་འཇོག་པ་དང་། ཡི་གེ་དྲུག་མ་ཚར་གསུམ་མམ་ལྔའི་ཡུན་ལ་བརྩི་བ་སོགས་མི་མཐུན་པ་མང་པོ་གདའ་ནའང་སྒྲུབ་རྒྱུད་རིན་པོ་ཆེའི་ཕྱག་བཞེས་ཁོ་ན་ལ་དཔང་པོར་འཇོག་ན། སྐྱེས་བུ་ནད་མེད་དར་ལ་བབས་ཅིང་རླུང་རང་སོར་
གནས་པའི་དབུགས་འབྱུང་འཇུག་གནས་གསུམ་བསྡོམས་པའི་ཁུག་པ་གཅིག་པུ་དེའི་ཡུན་ལ་བརྩི་བ་དང་། ཡང་ན།། ༈ །།ཡང་ན། ཆོས་སྤྱི་གཞུང་གི་ལུགས་ཀྱིས། གང་ཟག་རྣམས་འཆི་བའི་དུས་སུ་ཞག་ཕྱེད་དང་བཞིའི་བར་དུ་རྣམ་ཤེས་བརྒྱལ་བའི་ཚུལ་གྱིས་ཕུང་པོ་ལ་གནས་པར་འདོད་ཅིང་། ཕྱེད་དང་བཞི་པོ་འདས་འཚམས་དེར་ཁྲུས་ཆོག་དབང་བསྐུར་སོགས་ངེས་པར་བྱེད་པའི་ལུགས་འདི་ངེས་རྟགས་ཡིན་མིན་གྱི་དྲི་བ་ཞིབ་རྒྱས་གནང་བའི་ལན་དུ་ཅི་ཞུ་ན།། ༈ །།གཞུང་སྤྱི་ཙམ་དུ་དེ་ལྟར་གྲགས་ཅིང་། དིང་སང་ཕལ་ཆེར་ཕུང་པོ་ཞག་ཕྱེད་དང་བཞིའི་རིགས་ལ་ངེས་པར་འཇོག་པའི་སྲོལ་དུ་མོད་ཀྱང་། དེ་ལྟ་བུའི་ཚད་ཅན་ཞིག་ཐམས་ཅད་རང་ལ་ཡོང་བ་གཏན་ནས་མ་ལགས་ཏེ། གང་ཟག་མཆོག་རབ་རྣམས་ནི་ ལག་པའི་ཐལ་མོས་སྐྱིལ་ཀྲུང་ལ་མགྱོགས་བུལ་རན་པར་ལན་གཅིག་བསྐོར་ནས་སེ་གོལ་གཅིག་བརྡབས་པའི་བར་གྱི་ཡུན་ཚད་དེ་ལ་བྱ་རྫོགས་ཀྱི་སྐད་ཅིག་ཏུ་བཞེད་པ་ལགས།
དབུགས་ཆད་པ་དང་གྲོལ་བ་དུས་མཉམ་ཡར་གྱི་ཟང་ཐལ་དང་། ཡང་རྩ་བའི་དམ་ཚིག་ཉམས་པ་སོགས་སྡིག་པ་ཚན་པོ་ཆེ་རྣམས་ནི་ཕྱི་དབུགས་མ་ཆད་གོང་ནས་གཤེད་མ་དང་དམྱལ་བའི་སྣང་བ་འཆར་ཞིང་མར་གྱི་ཟང་ཐལ་བ་དེ་དག་ལ་ནི་སྨོས་ཅི་དགོས་ཀྱི། གཞན་ཕལ་པ་སྤྱི་ལ་ནི། འབྱུང་བ་ཐིམ་རིམ་རྣམས་རྫོགས་ནས་རླུང་ཁམས་སེམས་གསུམ་སྙིང་ཁར་འཛོམ་ཞིང་དབུ་མར་ཆུད་པའི་ནུས་པས་རང་བཞིན་ལྷན་སྐྱེས་ཀྱི་འོད་གསལ་འཆར་བ་དེ་ནི་བྱ་རྫོགས་ཀྱི་སྐད་ཅིག་ཙམ་ལས་ལྷག་པ་ནི་ནམ་ཀྱང་མི་གནས། དེ་ལ་ནི་ཉམས་ལེན་མེད་པའི་ཡོད་ཀྱང་གོམས་ཤུགས་ཞན་པས་གྲོལ་བར་མ་ནུས་ཚེ། དེ་འཕྲལ་དུ་ལུས་ཀྱི་ཁྲག་སོགས་རྩར་འདུས་པའི་ཐིགས་པ་སྙིང་ལ་ཕོག་པའི་རྐྱེན་གྱིས་རྣམ་ཤེས་ནག་འཐོམ་
དྲན་མེད་དུ་ཡུད་ཙམ་རྒྱལ་ཞིང་། ཡུན་རིང་ཚད་ལ་ཞག་གཅིག་ཙམ་དུ་བརྒྱལ་ནས། དེ་ལས་སད་པ་དང་། རྫོགས་ཆེན་ལྟར་ན་སྒྲ་འོད་ཟེར་གསུམ་སོགས་ཆོས་ཉིད་ཀྱི་བར་དོ་རྣམས་བསམ་གཏན་གྱི་ཞག་ལྔར་འཆར་བར་གསུངས་ཀྱང་། ད་ལྟ་བསམ་གཏན་མེད་ན་དེ་དུས་བསམ་གཏན་གྱི་ཞག་ཀྱང་ག་ལ་འོང་ཞིང་སྐད་ཅིག་ཙམ་ལས་མི་འཆར་ཚེ་གྲོལ་བར་ཅི་ལ་ནུས། དེ་ཀའི་མདོ་ལ་སྲིད་པ་བར་དོ་འཆར་བ་སྟེ། མདོར་ན་རྣམ་པར་ཤེས་པ་བརྒྱལ་བའི་ཡུན་ཞག་གཅིག་ལས་རིང་བ་ནི་སུ་ལའང་མི་འབྱུང་ཞིང་། བརྒྱལ་སངས་པ་དང་ལུས་སེམས་བྲལ་བ་དུས་མཉམ་པས་ན་ཕུང་པོ་ཞག་ཕྱེད་བཞི་བར་དུ་བཞག་དགོས་པ་མི་འབྱུང་བ་དང་། རྣམ་ཤེས་འཐོན་རྗེས་ནི་རང་གི་རོ་ལ་ཡང་ཡིད་དུ་མི་འོང་ཞིང་འཇིགས་པའི་སྣང་བ་
འཆར་བ་དག་ཀྱང་འབྱུང་བར་བཤད་དོ། །འོན་ཀྱང་གང་ཟག་འགའ་ཞིག་ཐུགས་དམ་ལ་བཞུགས་པའམ། ལ་ལ་ཞིག་རྣམ་ཤེས་བརྒྱལ་ཏེ་སྡོད་པའི་ཡུན་ཅུང་ཟད་རིང་བའང་ཡོད་སྲིད་ན། དེའི་བར་ལ་ནི་ཕུང་པོ་ལ་ཐུག་རག་འགུལ་སོགས་མེད་པ་དང་། སྒྲ་སྐད་དྲག་པོ་སོགས་མི་བྱ་བ་ནི་ནན་ལྟར་གལ་ཆེ་བ་དང་། མདོར་ན་རྣམ་ཤེས་ཐོན་མ་ཐོན་གྱི་ཚད་ནི་ཁམས་དཀར་དམར་སྟེང་འོག་གིས་སྒོར་ཐོན་མ་ཐོན་ལ་བརྟག་པར་གསུངས་ཤིང་། དེ་བཞིན་དུ། རོ་ལ་མདངས་ཡལ་བ་དྲོད་ཆད་པ། གཤིན་དྲི་མནམ་པ་སོགས། རྣམ་ཤེས་ཐོན་པའི་རྟགས་མང་དུ་འབྱུང་བ་དག་ཀྱང་མྱོང་བ་ཅན་གྱིས་གསལ་མོད་ཅིང་། རྣམ་ཤེས་མ་ཐོན་རིང་འཕོ་བ་དང་གསལ་འདེབས། རྣམ་ཤེས་ནམ་ཐོན་ཚེ་ཁྲུས་ཆོག་དབང་བསྐུར་སོགས་ཀྱི་སྐབས་ཐོབ་སྦྱོར་
བ་མ་གཏོགས། ཞག་ཕྱེད་དང་བཞི་ཁོ་ནའི་ངེས་རྟགས་ཞིག་ཐམས་ཅད་ལ་དགོས་པ་ནི་མ་ལགས་སོ།། ༈ །།གཞན་ཡང་འདི་སྐབས་འཕྲོས་ཞོར་དུ། ཚེ་འདས་ཀྱི་བདུན་ཚིག་ཀྱང་ཞག་མཚམས་འཛིན་ཚུལ་མི་མཐུན་པ་སྣ་ཚོགས་གདའ་བས། དེའི་ངོས་འཛིན་ལུགས་ཀྱང་འདི་ལྟ་སྟེ། སྤྱིར་ཡང་ཉིན་ཞག་ཕྲུག་རེ་ལ་ཆུ་ཚོད་དྲུག་ཅུ་ངེས་པར་ཚང་དགོས་མོད་ཀྱི། དིང་སང་ལ་ལ་ནི། དཔེར་ན་ཚེ་འདས་དེ་ཉིད་ཚེས་གཅིག་ལྟ་བུའི་ནུབ་མོ་ཤི་བ་ཡིན་ནའང་། ཚེས་གཉིས་ཀྱི་ཞོག་པ་ནས་ཞག་གཅིག་སོང་བརྩི་བའི་སྲོལ་འདུག་པ། དེ་ལ་ནི་ཆུ་ཚོད་དྲུག་ཅུ་ཚང་ཐབས་མི་འབྱུང་ཞིང་། བདུན་ཚིག་ཀུན་དྲིལ་གྱི་ཞག་ཞེ་དགུ་ཡང་འགྲོ་ཐབས་མི་འབྱུང་བས། དེས་ན། ཚེས་གཅིག་ལྟ་བུའི་ཉིན་མཚན་སྔ་
ཕྱི་ཇི་ཙམ་ལ་ཤི་བ་དེའི་སང་ཉིན་སྔ་ཕྱི་དེ་ཀའི་ཐོག་ཏུ་ནམ་སླེབ་ཚེ་ཞག་གཅིག་སོང་བར་བརྩི་དགོས་ཤིང་། དེའི་ཕྱིར་ཚེས་གཅིག་གི་ཉིན་གུང་ལ་ཤི་བ་ཡིན་ན། ཚེས་གཉིས་ཀྱི་ཉིན་གུང་ལ་སླེབ་ཚེ་ཞག་གཅིག་ཚང་། གསུམ་གྱི་ཉིན་གུང་ནས་ཞག་གཉིས། དེ་བཞིན་དུ་རིམ་པར་རྩིས་པའི་ཚེས་བརྒྱད་ཀྱི་ཉིན་གུང་ལ་བདུན་ཚིག་དང་པོ་ཡིན་ཕྱིར། དེ་སྐབས་སུ་གཤིན་པོ་དེ་ལ་འཆི་བའི་སྡུག་བསྔལ་གྱི་ཚོར་བ་དང་འཇིགས་སྐྲག་ཚད་མེད་འབྱུང་བས། དེ་ལས་སྐྱབས་ཕྱིར་དགེ་བའི་རིགས་ཅི་ཙམ་བྱེད་པ་ཐམས་ཅད་དེའི་ཉིན་གུང་ཡན་ལ་གྲུབ་པར་བྱ་དགོས་པ་དང་། སླར་དེའི་སང་གི་ཉིན་གུང་ལ་སླེབ་ཚེ་བདུན་ཚིགས་གཉིས་པའི་ཞག་གཅིག་འདས་པར་བརྩི་བ་སྟེ། དེས་མཚོན་ནས། ཚེས་གྲངས་གང་ལ་ཤི་བའི་སྔ་ཕྱི་དེ་ཀའི་སང་ཉིན་ཞག་
གཅིག་བརྩི་ཚུལ་རིགས་འགྲེ་དགོས་པ་ལགས་ཤིང་། བདུན་ཚིག་སོ་སོར་དགེ་བ་གང་བྱེད་ཐམས་ཅད་དུས་ཚོད་དེའི་སྔོན་དུ་གྲུབ་དགོས་ཚུལ་ཡང་གོང་བཞིན་ནོ།། ༈ །།གཞན་ཡང་། ཉིད་ཀྱི་ཕེབས་སྒོར། གསུངས་རབས་རྣམས་ལ་སངས་རྒྱ་བ་དང་ཚང་རྒྱ་བ་སོ་སོར་འདུག་པ་འདི་གཉིས་འདས་མ་འོངས་ཀྱི་ཁྱད་པར་གྱི་སྒྲ་ཡིན་ནམ་གསུངས་པ་ལ། འདིའི་ངེས་ཚིག་ནི། སྤྱིར་སམ་སྐྲྀ་ཏའི་སྐད་ལ་བུདྡྷ་ཞེས་པ་བོད་སྐད་དུ་བསྒྱུར་ཚུལ་ལ། སྒྲ་ཐད་ཀར་བསྒྱུར་ན། ཁོང་དུ་ཆུད་པ་ལ་འཇུག་པར་བཤད་ཅིང་། རྣམ་གྲངས་ལྟར་བསྒྱུར་ན་ནི། སངས་པ་དང་རྒྱས་པ་གཉིས་ཀ་ལ་སོ་སོར་འཇུག་པ་ཡིན་ཀྱང་། ལོ་པཎ་རྣམས་ཀྱི་གཅིག་ཏུ་བསྡོམས་ཏེ། མ་རིག་སངས་པ་དང་། ཡེ་ཤེས་རྒྱས་པའི་དོན་གྱི་ཕྱིར་སངས་རྒྱས་ཞེས་སུ་
བསྒྱུར་བ་ཡིན་པ་དང་། དེ་ཙམ་ལ་ནི་འདས་མ་འོང་གི་བྱེ་བྲག་མེད་ནའང་། སྐབས་འདོན་བྱེད་ཕྱིར་དུ། སུམ་རྟག་གི་ལུགས་ལ་ཕོ་ནི་འདས་དང་གཞན་བསྒྲུབ་ཕྱིར། ཞེས་པ་ལྟར། ས་ཡིག་ནི་འཇུག་པའི་ཡི་གེ་བཅུ་ལས་ཕོ་ཡིག་གི་སྡེ་ཚན་དང་། དྲག་ཞན་བར་མ་གསུམ་ལས་ཀྱང་སྒྲ་དྲག་པོའི་ཡི་གེ་ཡིན་ཕྱིར། དེས་ན། སངས་རྒྱས་ཞེས། འདས་པ་ལ་འཇུག་པ་ཤས་ཆེ་བ་སྟེ། དཔེར་ན། ཚེ་ལོ་བརྒྱ་པའི་དུས་དེར་དེ་བཞིན་གཤེགས་པ་ཤཱཀྱའི་དབང་པོ་སངས་རྒྱས་པར་གྱུར་ཏོ། །ཅེས་པ་ལྟ་བུའོ། །ཡང་། མ་ནིང་གཉིས་ཀ་ད་ལྟར་ཆེད། ཅེས་པས། མ་ནིང་གི་ཡི་གེ་ཚ་ལ་སོགས་པ་ནི་ད་ལྟར་བ་ལ་འཇུག་པ་དང་། མོ་ནི་བདག་དང་མ་འོངས་ཕྱིར། ཞེས་པས། འ་ནི་མོའི་ཡི་གེ་ཡིན་ཕྱིར་མ་འོངས་པ་ལ་འཇུག་སྟེ། དཔེར་ན་
ཕྱི་མའི་ཚེ་ཡར་འཕེལ་གྱི་བརྒྱད་ཁྲི་པ་ལ་དེ་བཞིན་གཤེགས་པ་བྱམས་པ་འཚང་རྒྱ་བར་གྱུར་རོ་ཞེས་པ་ལྟ་བུ་སྟེ། སངས་དང་འཚང་གི་ཁྱད་དང་། རྒྱས་དང་རྒྱའི་ཁྱད་ཀྱིས་འདས་མ་འོངས་ཕྱེ་བ་ལགས། ཡང་། མངོན་པར་རྫོགས་པའི་སངས་རྒྱས་དང་། ཡང་དག་པར་རྫོགས་པའི་སངས་རྒྱས་གཉིས་ལ་ཁྱད་པར་ཡོད་མེད་དྲི་བ་གནང་བ་འདི་ལ། སྤྱི་ཙམ་དུ་ནི་ཐུན་མོང་གི་སྒྲར་འགྱུར་བས་ཁྱད་པར་མ་མཆིས་པའི་དབང་དུ་བྱེད་མོད།། ༈ །།བྱེ་བྲག་ཕྱེ་བའི་དབང་དུ་བགྱིས་ན་ནི། བཅོམ་ལྡན་འདས་ཤཱཀྱ་ཐུབ་པ་ཉིད་ལ་དཔེར་མཚོན་ན། ཐོག་དམན་པ་རྣམས་ནི། རྒྱལ་བུ་དོན་གྲུབ་གང་ཟག་རང་རྒྱུད་པ་ཞིག་རབ་ཏུ་བྱུང་ཞིང་ལོ་དྲུག་དཀའ་བ་སྤྱད་པའི་མཐར་རྡོ་རྗེའི་གདན་ལ་སངས་རྒྱས་པར་འདོད་པ་ཙམ་དུ་
ཟད་མོད་ཀྱང་། ཐེག་ཆེན་པའི་ལུགས་ནི། སྔོན་བསྐལ་པ་དཔག་མེད་ཀྱི་གོང་ནས་དེ་བཞིན་གཤེགས་པ་དབང་པོའི་ཏོག་ལ་སོགས་པར་སངས་རྒྱས་པ་དེ་ཉིད་ཡང་དག་པར་རྫོགས་པའི་སངས་རྒྱས་ཡིན་ཀྱང་། སླར་ཞིང་འདིའི་ཐུན་མོང་གི་གདུལ་བྱ་འདུལ་ཕྱིར་ཤཱཀྱའི་རིགས་སུ་འཁྲུངས་ཤིང་མཛད་པ་སྣ་ཚོགས་བསྟན་ནས་སངས་རྒྱ་བའི་ཚུལ་མཛད་པ་འདི་ཉིད་མངོན་པར་རྫོགས་པར་སངས་རྒྱས་ཡིན་པར་འདོད་པ་དང་། དེ་ལ་ཡང་། སྔགས་ལྟར་ན་ཐོག་མ་མེད་པའི་སྔོན་རོལ་ནས་ཆོས་སྐུར་སངས་རྒྱས་ཞིང་། འོག་མིན་དུ་ལོངས་སྐུའི་གྱིས་ཆོས་འཁོར་རྒྱུན་ཆད་མེད་པར་བསྐོར་བའི་ངེས་པ་ལྔ་ལྡན་ནམ་ཁ་སྦྱོར་ཡན་ལག་བདུན་ལྡན་དེ་ཉིད་དོན་དམ་པའི་སངས་རྒྱས་སམ། ཡང་དག་པར་རྫོགས་པའི་སངས་རྒྱས་ཡིན་ལ། མི་འཇེད་ཞིང་འདིར་ཐུན་མོང་གདུལ་བྱའི་སྣང་ངོར་སངས་རྒྱས་པ་ཉིད་ནི་མངོན་
པར་རྫོགས་པའི་སངས་རྒྱས་སམ། སྤྲུལ་པའི་སངས་རྒྱས་ཡིན་པ་དང་། ཡང་། གཞུང་ལ་ལར་ཆུ་ཀླུང་ནེ་རཉྫ་རར་དཀའ་བ་སྤྱོད་ཚེ། སྐུའི་སྣང་བརྙན་དེར་བཞགས་ནས་ཐུགས་འོག་མིན་དུ་དྲུག་པ་རྡོ་རྗེ་འཆང་ཆེན་པོ་ལས་བདེ་བ་ཆེན་པོ་དོན་ཀྱི་དབང་ནོས་ཏེ་ཡང་དག་རྫོགས་པར་སངས་རྒྱས་ནས། སླར་དཀའ་སྤྱད་ཀྱི་ཚུལ་ལས་བཞེངས་ཏེ་བྱང་ཆུབ་ཀྱི་སྙིང་པོར་མངོན་པར་སངས་རྒྱ་ཚུལ་བསྟན་པ་སོགས་མདོ་རྒྱུད་མཐའ་དག་ནས་རྒྱ་ཆེར་གསུངས་ནའང་། དོན་དམ་པར་ནི། སངས་རྒྱས་ཐམས་ཅད་ཆོས་ཀྱི་སྐུ་གདོད་མའི་མགོན་པོ་མཉམ་པ་ཉིད་ཐིག་ལེ་ཆེན་པོར་ཡེ་སངས་རྒྱས་པ་ཉིད་ཡང་དག་པའི་སངས་རྒྱས་ཡིན་ལ། ཞིང་ཁམས་སྣ་ཚོགས་པར་སངས་རྒྱས་ཀྱི་མཚན་དང་མཛད་པའི་སྒྱུ་འཕྲུལ་སྣ་ཚོགས་པ་འདི་དག་ནི་མངོན་རྫོགས་ཀྱི་སངས་རྒྱས་
སུ་འགྱུར་བ་སྟེ། དེ་དང་མཚུངས་པར་ཉམས་ལེན་མངོན་གྱུར་གྱི་རྣལ་འབྱོར་རྣམས་འཇའ་ལུས་རྡོ་རྗེའི་སྐུ་ཐོབ་པའམ། ཡང་ན་འཆི་བ་འོད་གསལ་ཆོས་ཀྱི་སྐུར་གྲོལ་བ་ནི་ཡང་དག་རྫོགས་པའི་སངས་རྒྱས་ཡིན་ཞིང་། སླར་སེམས་ཅན་གྱི་དོན་དུ་མཆོག་གི་སྤྲུལ་པ། སྐུའི་མཛད་པ་སྟོན་པ་ན་མངོན་པར་རྫོགས་པའི་སངས་རྒྱས་སུ་འགྱུར་ཚུལ་གོང་བཞིན་སྟེ། མདོར་ན་ཚུལ་འདི་དག་གི་དབྱེ་བསྡུ་ཇི་ལྟ་བར་ནི་ཤིན་ཏུ་རྒྱ་ཆེ་བའི་ཕྱིར་བདག་འདྲ་སྤྱོད་ཡུལ་དུ་མ་གྱུར་ལ། གཞུང་འགྲེལ་ཆེན་པོ་རྣམས་སུ་ཞིབ་པར་འབྱུང་ཕྱིར་འདིར་བརྗོད་དགོས་པར་ཡང་མ་གྱུར་མོད་ཀྱི། རང་ཉིད་ཀྱིས་ཇི་ལྟར་གོ་ཚུལ་མདོ་ཙམ་ཕུལ་བ་ལགས།། ༈ །།དམ་པའི་ཆོས་འདུལ་བ་ནས་གསུངས་པའི་ཆོས་གོས་རྣམ་གསུམ་ལ་སོགས་པའི་སྐབས་དོན་གྱི་གླེང་མོ་གནང་བའི་ལན་རག་བསྡུས་གོང་དུ་
མེ་ཏོག་ཆུན་འཕྱང་གི་སྐབས་སུ་ཕུལ་བ་ལྟར་ལས། སླར་ཡང་དེ་དག་གི་རྒྱུའི་དབྱེ་བ་དང་རུང་མི་རུང་གི་སྐབས་དོན་ཞིབ་ཆའི་བསྐྱར་ཆགས་མཛད་པའི་ལན་དུ་ཕུལ་བ་ནི། དེ་ཡང་ཆོས་གོས་རྣམས་ཀྱི་རྒྱུ་ནི། འདུལ་བ་མེ་ཏོག་འཕྲེང་རྒྱུད་ལས། བལ་གོས་ཤ་ན་ཉི་འོག་དང་། །རས་གོས་དང་ནི་ཟར་མ་དང་། །ཀོ་ཏམ་པ་དང་རཱུ་ཀུ་ལ། །ཆོས་གོས་རྒྱུ་ནི་རྣམ་པ་བདུན། ཞེས་པ་ལྟར། འདུལ་བའི་ལས་ཆོག་ཉིད་ལས་ཀྱང་དེ་ཁོ་ན་བཞིན་གསུངས་མོད་ཀྱི། འདི་སྐབས་སུ། ཉིད་ཀྱིས། བལ་གོས་མ་གཏོགས་པའི་རྒྱུ་གཞན་དེ་དག་བོད་ཡུལ་ན་ཡོད་མེད་དང་། རས་གོས་ཀྱང་མོན་རས་ལ་རུང་མི་རུང་དང་། འཕྲོས་སུ། སྔོན་བཅོམ་ལྡན་འདས་ཉིད་བྲན་མོ་གྲུབ་མ་ཞེས་བྱ་བའི་རོ་ལ་དཀྲིས་པའི་གོས་རས་དུར་ཁྲོད་ནས་བླངས་
ཏེ་བཀྲུས་ཤིང་ཁ་བསྒྱུར་ནས་ཕྱག་དར་ཁྲོད་པའི་སྣམ་སྦྱར་མཛད་ཚུལ་ལོ་རྒྱུས་ལྟར་ན། གསོ་རས་ཀྱང་རྒྱུར་རུང་བར་འགྱུར་ཚེ། གསོ་རས་དངོས་དང་རས་གཞན་མཚུངས་མི་མཚུངས་དང་། ཡང་། སྔར་དུས་ཀྱི་ཆོས་གོས་རྙིང་པ་འགའ་ཞིག་གཙུག་བལ་ལས་གྲུབ་པ་ཡིན་ཞེས་ཡ་མཚན་ཆེར་ཆེར་བྱེད་པ་སྣང་བས། གཙུག་བལ་དེ་གང་འདྲ་ཞིག་ལ་ཟེར་བ་ཡིན་པ་དང་། ཡང་། མི་རུང་བའི་རྒྱུའི་སྡེ་ཚན་ལ་རྔ་ཐེར་ཞེས་པ་གང་ཡིན་པ་སོགས་འདྲི་བར་མཛད་པའི་ཆ་ལ། དེ་ཡང་། སྤྱིར་བོད་འདིར་བལ་གོས་ལས་གཞན་པའི་རྒྱུ་དེ་དག་མ་མཆིས་མོད་ཀྱང་། རྒྱ་གར་དང་བལ་པོ་སོགས་ནས་བྱུང་བའི་རས་ཀྱི་རིགས་རྣམས་དང་། མོན་རས་ལའང་ལོས་རུང་ཞིང་། ལུང་ནས་གསུངས་པའི་རས་ཀྱི་མིང་དེ་རྣམས་ཕལ་ཆེར་རྒྱ་གར་གྱི་
ཡུལ་བྱེ་བྲག་ཐ་དད་པའི་མིང་རྣམས་དེ་དག་གིས་རས་ལ་བཏགས་པར་སྣང་བས། དེས་ན། ཉི་འོག་ཞེས་པ་ནི་ཤར་ཕྱོགས་ལ་འཇུག་ཚེ། ཤར་རྒྱ་ནག་ནས་འབྱུང་བའི་རས་རྣམས་ཀྱང་རུང་བ་དང་། གསོ་རས་ཞེས་པ་ནི། འོ་སྐོལ་བོད་འདིར་ཐག་པ་སོགས་བྱེད་པའི་གསོ་མ་འདི་ཉིད་རྒྱ་བལ་སོགས་སུ་ནི་བཀལ་ཐགས་གང་ཡང་རུང་བའི་རྒྱུ་འདི་ལས་འཇམ་པ་ཞིག་ཡོད་པར་སྣང་ལ། རྒྱ་ནག་ཏུ་ཡང་གོས་ཆེན་གྱི་རྒྱུར་བསྲེ་བའི་སྲོལ་དང་། འཇང་ཡུལ་དུའང་གསོ་མ་འདི་ཉིད་མེ་ཐལ་གྱི་སྐྱོ་མའི་ཁྲོད་དུ་བཙོས་ཤིང་བརྡུངས་ནས་དཀར་འབེལ་གྱི་སོང་བ་དེ་ལ་བཀལ་འཐགས་བྱས་ནས་གསོ་སྐུད་དང་གསོ་རས་སོགས་འབྱུང་བའི་འདི་དག་ཀྱང་ཆོས་གོས་ཀྱི་རྒྱུར་རུང་བ་ཉིད་དོ། །ཡང་། མི་རུང་བའི་རྒྱུའི་ཁྲོད་ཀྱི་རྔ་ཐེར་ཞེས་པ་
དེ་ནི་རྔ་མོང་གི་སྤུ་ལས་བཟོས་པའི་ཐེར་མ་དེ་འདྲ་མི་རུང་བར་བཤད་ལ།། ༈ །།གཙུག་བལ་དུ་གྲགས་པ་དེ་ནི། ཡིག་ཆའི་ལོ་རྒྱུས་ཁུངས་མ་བཞིན་དུ་ཆེར་མ་མཐོང་ཡང་དིང་སང་ངག་སྒྲོས་རྣམས་ལས་ནི། བྱང་ཕྱོགས་ཀྱི་ཡུལ་གྲུ་ཞིག་ཏུ་ལས་དབང་གི་ས་ལས་སྐྱེས་པའི་ལུག་ཞིག་འབྱུང་བ་དེའི་རུས་པའི་ཝ་གདོང་ཕལ་སྐད་དུ་འགྲངས་སམ་ལྟོག་ཏུ་འབོད་པ་འདི་ཉིད། ས་ལ་བཏབ་པ་ལས་སྐྱེས་པའི་ལུག་གུ་ཉིན་རེའི་ཚེ་ལས་མི་ཐུབ་ཅིང་། ལྟེ་བ་ས་ལ་འབྲེལ་བ་དེ་ཤི་བའི་རུས་པ་འགྲངས་སམ། ལྟོག་དེ་ས་ལ་གར་གཙུག་སར་སྔར་བཞིན་ལུག་གུ་སྐྱེ་བ་དེ་ལ་གཙུག་ལུག་ཅེས་གྲགས་པ་སྟེ། དེ་འདྲའི་བལ་ལ་གཙུག་བལ་དུ་འབོད་པར་ཐོས་སོ། །སྤྱིར། ཆོས་གོས་རྣམ་གསུམ་བལ་གོས་ལ་བཟོ་བའི་ཚེ་ཡང་། ཐེར་
མ་མ་གཏོགས་སྤུ་ཅན་གྱི་རིགས་ནི་ལར་ནས་མ་གནང་སྟེ། སྤུ་ཅན་རྣམ་པར་སྤངས་ནས་ནི། །བརྟུལ་ཞུགས་ཅན་གྱིས་ནང་ཤུན་བྱ། །ཞེས། ཆོས་གོས་ཀྱི་ནང་དུ་རྔུལ་གཟན་འབྲལ་མེད་བྱ་བར་གསུངས་པ་དང་། གཞན་ཡང་། དགེ་སྦྱོང་གི་གོས་ཀྱི་རྒྱུར་མི་རུང་བའི་སྡེ་ཚན་ལ། དཔག་བསམ་གྱི་ཤིང་ལས་བྱུང་བའི་གོས་དང་། ཁ་དོག་ཁྲ་བོའི་རིགས་དང་། སླེབ་མོ་ལྟ་བུ་ དབྱིབས་མུ་སྟེགས་བྱེད་དང་ཁྱིམ་པའི་གོས་འདྲ་བ་དག་དང་། ཕུ་དུང་སོགས་དང་། ཁ་ཚར་རམ་ཕུད་ཚར་ཅན་ཞེས་རས་ལ་སོགས་པའི་མཐའི་ཕྲུམ་ཕྲུམ་ལྟ་བུ་ཡོད་པ་ནི་མི་རུང་བར་གསུངས་སོ།། ༈ །།འདིའི་ཞར་ལ། ཉིད་ཀྱིས། སྦྱང་ཡོན་བཅུ་གཉིས་ཀྱི་ནང་ཚན་འཕྱིང་པ་བ་ཞེས་པའི་འཕྱིང་པ་དེ་ཉིད་ད་ལྟའི་འབྲོག་པ་སོགས་ཀྱིས་བཅགས་པའི་བལ་འཕྱིང་འདི་དང་གཅིག་མི་གཅིག་དྲི་
བར་མཛད་པའི་འཕྱིང་པ་འདི་མ་ཡིན་ཏེ། ད་ལྟའི་བལ་འཕྱིང་འདི་ལ་ནི་གསུང་རབ་སྐད་དུ་ལ་བ་ཞེས་བྱ་སྟེ། བཀའ་བཞི་བརྒྱུད་པའི་ལོ་རྒྱུས་སུ། གྲུབ་ཐོབ་ལ་བ་པ་ཞེས་ལོ་བཅུ་གཉིས་གཉིད་འོད་གསལ་ཐུན་གཅིག་གིས་འདའ་བར་མཛད་པ་དེ་ལ། ཨིནྡྲ་བུདྷིའི་བཙུན་མོ་ལྔ་བརྒྱའི་ཐ་ཆུང་གཅིག་མ་གཏོགས་ཐམས་ཅད་མུ་སྟེགས་ཀྱི་མཁའ་འགྲོ་མར་ཡོད་པ་རྣམས་ཀྱིས་སློབ་དཔོན་དེ་ལ་བར་ཆད་བྱེད་པར་བརྩམས་ཚེ། སློབ་དཔོན་གྱིས་ཁོང་ཐམས་ཅད་ལུག་ཏུ་བྱིན་གྱིས་རླབས་ཏེ་བལ་བྲེག་ནས་ལ་བར་བཅགས་པ། སྐུ་ལ་གསོལ་བས་ལ་བ་པར་མཚན་དུ་ཐོགས་པའི་ལོ་རྒྱུས་སོགས་འབྱུང་མོད་ཀྱི།། ༈ །།འདུལ་བའི་སྦྱང་ཡོན་བཅུ་གཉིས་ཀྱི་འཕྱིང་པ་དེ་ནི། གོས་སྤུ་ཅན་སོགས་དྲོ་འཇམ་ལ་ཞེན་པ་སྤོང་བའི་ཕྱིར། སྤུ་བཤད་བརྡབ་སོགས་མ་བྱས་པར་འཆགས་སུ་བཅགས་
པའི་ཐེར་མ་སྤུ་མེད་དེ་ལ་འཕྱིང་པའི་མིང་དུ་མཛད་པར་གདའ་ལགས། ཡང་། ཁ་དོག་གི་སྐབས་སུ། སྤང་བྱའི་ཚོས་ཆེན་བརྒྱད་ཀྱི་ནང་ཚན་ལས། ལེ་བརྒན་རྩི། རྨ་ཤིང་རྩི། མཐིང་ཤུན་དང་གསུམ་པོ་གང་ལ་འཇུག་པ་དང་། རུང་བའི་ཚོན་གསུམ་པོའི་རྒྱུ་སོགས་དྲི་བ་མཛད་པ་ལས། དེ་ཡང་། ལེ་བརྒན་རྩི་ཞེས་པ་འདི་ལ་གསོ་རིག་གི་གཞུང་ལ་ལར་གུར་གུམ་གྱི་མིང་གི་རྣམ་གྲངས་ཡིན་པར་བཤད་ཀྱང་། འདུལ་བའི་སྐབས་འདིར་ནི་འདི་གཉིས་ཐ་དད་དུ་བགྲངས་པའི་ཕྱིར་དང་། སྤྱིར་ཡང་གུར་ཀུམ་གྱི་མདོག་ནི་དམར་སེར་དང་། ལེ་བརྒན་ནི་དམར་ཆེན་ཡིན་ཚེ་མི་གཅིག་མོད་ཀྱི། འོན་ཀྱང་བོད་འདིར་ཡོད་པ་ཞིག་ནི་མིན་རུང་། རྒྱ་གར་རྒྱ་ནག་རྣམས་སུ་གོས་དར་དམར་པོ་འཚོད་པའི་རྒྱུའི་མེ་ཏོག་ཞིག་ཡིན་པར་
གྲགས་ལ། དེ་བཞིན་དུ། རྨ་ཤིང་ཞེས་པ་ཡང་། གསོ་བའི་ཡིག་ཆ་དག་ཏུ། དིང་སང་ཕལ་སྐད་ལ་ཅོ་ག་མགོ་སྨན་ཞེས་ཟེར་བ་དེ་ཉིད་བོད་འདི་ས་ངན་པའི་གཤིས་ཀྱི་འདི་ཙམ་ལས་མ་ཡིན་པ་མ་གཏོགས། རྒྱ་གར་དུ་ནི་འདིའི་མེ་ཏོག་ཤིན་ཏུ་ཆེ་བ་ཡོད་ལ། ཁུ་བ་ཡང་བེཌཱུརྱའི་མདོག་ལྟ་བུ་དར་སོགས་ཀྱི་ཆོས་ཉན་པར་ཡོད་པར་བཤད་པ་དང་། མཐིང་ཤུན་ཞེས་པ་ནི་ད་ལྟ་ཚོན་ལ་འགྲོ་བའི་མཐིང་བཟང་ཉིད་ཡིན་ཏེ། མདོར་ན་འདི་གསུམ་དང་། རྒྱ་སྐྱེག །མཚལ ལི་ཁྲི་དང་སིནྔྷུ་ར་གཅིག་པ་དང་། གུར་ཀུམ། བཙོད་དང་བརྒྱད་པོ་འདི་ཁ་དོག་ཧ་ཅང་ལེགས་ཆེས་པས། ཚོས་ཆེན་བརྒྱད་ཅེས་སྤང་བྱར་གསུངས་ལ། ཡང་། རུང་བའི་ཚོན་གསུམ་གྱི་ནང་ནས་སྔོན་པོ་ནི་བོད་དུ་རབ་བྱུང་གིས་གྱོན་པའི་ ལི་ཁྲིའི་རྒྱ་གར་སྐད་ལ་སིནྔྷུ་ར་ཟེར་བའོ།
སྲོལ་མེད་ཚེ་བརྗོད་དགོས་པར་མ་གྱུར་མོད་ཀྱི། གལ་ཏེ་དགོས་པར་གྱུར་ནའང་། མཐིང་སོགས་ནི་མ་གནང་ཚེ་རམ་ཚོས་ལྟ་བུ་ལས་འོས་ཀྱང་མ་མཆིས་པ་དང་། དམར་པོ་ནི་བཙག་ཁ་ཁོ་ན་ཡིན་ཕྱིར། རྒྱ་གར་གྱི་དྷོ་ཚོས་མ་ཞེས་པ་ཞིག་ཡོང་སྣང་བ་ཁ་དོག་དམར་པོ་དང་བཤིབས་ཚེ་སེར་ཉམས་ཆེ་ཞིང་སེར་པོ་དང་བཤིབས་ན་དམར་ཁ་ཡོད་པ། རང་མདོག་དངོས་ནི་བཙག་ཤིན་ཏུ་དངས་པའི་མདོག་ཅན་ཞིག་འདུག་པ་འདི་ལྟ་བུར་དགོས་རྒྱུར་གདའ་ཞིང་། འོ་སྐོལ་བོད་འདིར་བཙོད་ལ་འཛེམ་པའི་སྲོལ་མེད་པའི་ཁར། ཧ་ཅང་ཚོས་པར་བཙོས་ནས་རྨུག་པོར་གྱུར་པ་དེ་ལ་ལེགས་པར་འདོད་ཅིང་བླ་མ་དང་མཁན་སློབ་སོགས་ཀྱིས་གྱོན་པར་བྱེད་མོད་ཀྱི། འདུལ་བའི་གཞུང་ལ་བརྙས་པ་ཆེན་པོར་གྱུར་བ་ནི་ལྟ་
ཅི་སྨོས།། ༈ །།ངུར་སྨྲིག་རྩི་ནི་ཆུ་རྩའམ། སྨན་གཞུང་དུ་ཆུ་མ་རྩི་དང་ཟབ་རླག་ཅན་དུ་གྲགས་པ་འདི་ཉིད་ཁོ་ན་སྟེ། མདོར་ན། རྒྱ་གར་དུ་ནི་རུང་བའི་ཚོན་གསུམ་པོ་འདི་ལ་འཇིག་རྟེན་པ་རྣམས་ཁ་དོག་ངན་པར་བརྩི་ཞིང་འདོར་བས། དེ་ཁོ་ན་རབ་བྱུང་རྣམས་ལ་རྒྱགས་པ་དང་དྲེག་པ་སྤོང་ཕྱིར་སྟོན་པས་ཆེད་དུ་གནང་བར་མཛད་མོད་ཀྱང་། དིང་སང་ནི་རྒྱགས་པ་དང་དྲེགས་པ་ཁོ་ན་ནན་གྱིས་སྒྲུབ་པ་འདི་འདྲའི་སྐབས་སུ་འདུལ་བའི་གཞུང་གིས་ཅི་ཞིག་བྱ་སྟེ་ཚིག་གི་ལམ་ཙམ་དུ་ཟད་དོ།། ༈ །།དེ་ལྟ་མོད་ཀྱི་སྐུ་ཉིད་ཀྱིས་དྲིས་པའི་ལན་དུ་སྣམ་སྦྱར་དང་བླ་གོས་ཀྱི་ཆེ་ཆུང་གི་ཚད་ནི་སྔར་མེ་ཏོག་ཆུན་འཕྱང་དུ་ཕུལ་བ་ལྟར་དང་། སྣམ་ཕྲན་གྱི་གྲངས་རྒྱས་འབྲིང་བསྡུས་གསུམ་པོ་དེ་ལ་གླེགས་བུ་ཡང་འདུལ་བའི་གཞུང་སྤྱི་དང་ལས་ཆོག་སོགས་ལས་ཕྱེད་དང་
གསུམ་པར་མདོར་བསྟན་ཞིང་། ནང་བསེས་ཀྱི་ཞིབ་ཆར་ནི། མདོ་རྩ་བ་ལས། དང་པོ་གསུམ་ལ་ནི་དེ་དག་གི་གླེགས་བུ་ཕྱེད་དང་གསུམ་པ་ཉིད་དོ། །གཉིས་པ་ལ་ནི་གླེགས་བུ་ཕྱེད་དང་བཞི་པ་ཉིད་དོ། །གསུམ་པ་ལ་ནི་གླེགས་བུ་ཕྱེད་དང་ལྔ་པ་ཉིད་དོ། །ཅེས་གསུངས་པ་ལྟར་དང་། གཞན་ཡང་། མེ་ཏོག་འཕྲེང་རྒྱུད་ལས། གདིང་བ་ལ་ནི་དྲི་མི་དགོས། སྣམ་སྦྱར་ངེས་པར་དྲས་ཏེ་བཅངས། ཞེས་གདིང་བ་མ་གཏོགས་གཞན་སྣམ་སྦྱར་སོགས་ནི་ངེས་པར་དྲས་དྲུབ་ཏུ་བྱ་བར་གསུངས་ལ།། ༈ །ཁྱད་པར་དུ་ཉིད་ཀྱི་ཕེབས་སྒོ་ལྟར། དིང་སང་གི་གདིང་བ་ཆེན་པོ་བཞི་ལྟེབས་སུ་བྱ་རྒྱུ་འདི་དག་ནི་རང་བཟོ་འབའ་ཤིག་ཏུ་ཟད་དེ། གདིང་བའི་ཚད་དངོས་ནི། རྣམ་ཕྲན་དགུ་པ་དང་། བཅུ་གཅིག་པ་དང་། བཅུ་གསུམ་པ་དང་། བཅོ་ལྔ་པ། བཅུ་བདུན་པ། བཅུ་དགུ་པ། ཉེར་གཅིག་པ། ཉེར་གསུམ་པ། ཉེར་ལྔ་པ།
སོ་ཐར་གྱི་མདོ་ཉིད་ལས། དགེ་སློང་དག །གདིང་བ་བྱེད་དུ་གཞུག་ན་ཚད་བཞིན་དུ་བྱེད་དུ་ཆུག་ཅིག །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། །ཞེང་མཐོ་ཕྱེད་དང་དོ་འོ། མི་ཆོག་ན་སྲིད་དུ་མཐོ་གང་གིས་བསྲིངས་ཤིག །དེ་ལས་ལྷག་པར་བྱེད་དུ་བཅུག་ནས་བཅངས་ན་ལྟུང་བྱེད་དོ། །ཅེས་དང་། མདོ་རྩ་བ་ལས་ཀྱང་། འདིའི་ཚད་ནི་སྲིད་དུ་ཁྲུ་གསུམ་མོ། མི་ཆོག་ན་ཁྲུ་ཕྱེད་དང་དོ་མན་ཆད་བཀྱེད་དོ། །འདིའི་ཞེང་དུ་ནི་ཁྲུ་དོ་དང་སོར་དྲུག་གོ། །གསུམ་ཆའི་དང་པོར་གླེགས་བུ་བྱའོ། །ཞེས་གསུངས་པས་ན། ཆེ་ཆུང་གི་ཚད་དེ་ལྟ་བུ་ལ། མཐའ་འཇགས་ནི་ཆོས་གོས་གསུམ་གྱི་འཇགས་ཀྱི་ཚད་དང་མཐུན་ཞིང་། འདི་ལ་སྣམ་ཕྲན་མི་དགོས་ཚེ་གླེགས་བུའི་དིང་སང་ཟམ་པར་ཕལ་པའི་ཁྲུ་གསུམ་ཡིན་ནོ། ཁྲུ་དང་པོར་དྲུག ཁྲུ་ཕྱེད་དང་དོ་
གྲགས་པ་འདི་ཉིད་དཀྱུས་རིགས་གི་འཕྲོད་དུ་གླན་པ་སྟེ། དེ་ཡང་ད་ལྟ་ནི་དཀྱིལ་དུ་གློན་མཁན་མང་ཡང་། གཞུང་ལས། སུམ་ཆའི་དང་པོར་གླེགས་བུ་བྱའོ་ཞེས་གསུངས་པ་ལྟར་དཀྱུས་ཀྱི་སུམ་ཆ་ཙམ་དུ་གླེགས་བུ་ཆེ་ཆུང་སོར་བཞི་ཙམ་གྱི་ཚད་དུ་བྱའོ། ལར་ཡང་གདིང་བའི་སྐབས་འདིར། མདོ་རྩ་བ་ལས། དགེ་སློང་གི་གདིང་བ་གསར་པ་བྱེད་ན་གསར་པ་ཁ་དོག་མི་སྡུག་པར་བྱ་བའི་ཕྱིར། གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བས་གླན་པར་བྱའོ། །གལ་ཏེ་དགེ་སློང་གི་གདིང་བ་གསར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་། འཁོར་བས་མི་གློན་པར་གདིང་བ་གསར་པ་སྤྱོད་ན་སྤང་བའི་ལྟུང་བྱེད་དོ། །ཅེས་གསུངས་མོད་ཀྱང་། དེ་འདྲ་ཕྱག་ལེན་
དུ་འདེབས་མཁན་ནི་དིང་སང་མཐོང་ཐོས་ཀྱང་མ་བྱུང་ལ། ཁ་དོག་མི་སྡུག་པར་བྱེད་མཁན་དང་ལྟ་ཞོག་ཁ་དོག་ལྷག་པར་ལྟ་ན་སྡུག་པ་བྱེད་མཁན་ཤ་སྟག་གདའ་མོད་ལགས།། ༈ །།གཞན་ཡང་འཕྲོས་དོན་ལ། སྣམ་སྦྱར་གྱོན་པར་བྱ་བའི་དུས་ཀྱི་ཁྱད་པར་ནི། མེ་ཏོག་འཕྲེང་རྒྱུད་དུ། སྣམ་སྦྱར་དགེ་འདུན་འདུས་པ་དང་། །ཟས་དང་མཆོད་རྟེན་ཕྱག་བྱ་དང་། །གྲོགས་སོགས་འཇུག་ཚེ་བགོ་བྱ་ཡི། །ཞེས་པས། དེ་ལྟ་བུའི་སྐབས་རྣམས་སུ་མ་གཏོགས་ནམ་ཡིན་གོན་པར་མ་གསུངས་ཏེ། གཏོར་བུ་ཞེས་བྱ་བ་སྣམ་སྦྱར་གྱི་ཤུབས་དེར་བཅུག་སྟེ་སྒྲིབ་པ་མི་གསོག་པའི་སར་འཇོག་དགོས་ཚེ་དེ་བཀལ་བའི་གདང་སོགས་བྱ་ཚུལ་ཀྱང་མདོ་རྩ་བ་ལས་གསུངས་ལ།། ༈ །།བླ་གོས་ནི་ཁྲུས་དང་བཤང་བཅི་འདོར་བའི་དུས་དང་སྐྲ་བྲེག་པ་སོགས་མ་གཏོགས་རྒྱུན་པར་འབྲལ་
མེད་དུ་བགོ་དགོས་པ་དང་། མཐང་གོས་ཀྱང་དེ་བཞིན་དུ་ཉིན་མཚན་ཀུན་ཏུ་བགོ་བར་གསུངས་སྟེ། འཕགས་ཡུལ་གྱི་རབ་བྱུང་རྣམས་ནུབ་མོ་གོས་ཚག་མི་ཤིག་ཏེ། ཇོ་བོ་རྗེའི་གསུང་ལས། ཁྱེད་བོད་ཀྱི་བཙུན་པ་རྣམས་མཚན་མོ་གཅེར་བུར་བུ་ཆུང་ཉལ་བ་བཞིན་བྱེད་པར་སྣང་། རྒྱ་གར་དུ་འདི་འདྲ་མི་བྱེད། ཅེས་གསུངས་སོ། །དེས་ན་ད་ལྟའི་ཤམ་ཐབས་ཕལ་པ་འདི་ནི་ཉིན་མོ་མཐང་གོས་ཀྱི་ནང་དུ་གྱོན་རྒྱུ་སྟེ། མཐང་གོས་ལ་རྔུལ་གྱི་དྲི་མས་ཆུས་ཟོས་སུ་མི་འགྱུར་ཕྱིར་ཡིན་པས། ཆེ་ཆུང་གི་ཚད་ཀྱང་མཐང་གོས་ཉིད་དང་མཚུངས་པར་བྱ་བར་གསུངས་ལ།། ༈ །།ཤམ་ཐབས་ཀྱི་གཟན་ཞེས་མཚན་མོ་མཐང་གོས་ཀྱི་ནང་དུ་གྱོན་རྒྱུར་གསུངས་པ་ནི་དིང་སང་གི་སྨད་གཡོགས་འདི་ཉིད་
དོ།། ༈ །།རྔུལ་གཟན་ནི་ཉིན་མོ་བླ་གོས་ཀྱི་ནང་དུ་གྱོན་རྒྱུ་དང་། དེའི་གཟན་ནི་མཚན་མོ་བླ་གོས་ཀྱི་ནང་དུ་གྱོན་པར་གསུངས་ཕྱིར་ཆེ་ཆུང་བླ་གོས་ཉིད་དང་ཚད་མཉམ་པ་དང་། ཡང་། རྔུལ་གཟན་ཆུང་ངུ་ཞེས་བྱ་བ་ནི། འཕྲེང་རྒྱུད་ལས། རྔུལ་གྱིས་འཇིགས་པའི་སྣམ་སྦྱར་ལ། །རྔུལ་གཟན་སྦྱར་བས་སྤྱད་བྱ་སྟེ། །ཞེང་དུ་ཁྲུ་གང་སྲིད་དུ་ཁྲུ། །ཕྱེད་དང་དེ་ལས་ལྷག་མི་བྱ། །ཞེས། རྔུལ་ཚན་ཆེ་བའི་མི་རིགས་དག་མས་མཆན་ཁུང་གི་རྔུལ་གྱིས་སྣམ་སྦྱར་ཆུད་ཟོས་སུ་མི་འགྱུར་ཕྱིར་གནང་བའོ།། ༈ །།གདོང་འཕྱིས་ནི་ཁྲུ་གང་གྲུ་བཞི་པ་སྟེ་གདོང་པའི་རྔུལ་འཕྱི་བར་བྱ་རྒྱུ་དང་།། ༈ །།རྣག་གཟན་ཞེས། དགེ་སློང་གང་ཞིག་ལུས་ལ་ཤུ་བ་རྣག་ཁྲག་གི་ནད་ཅན་དག་ཆོས་གོས་རྣམས་མི་རུང་བར་འགྱུར་བ་ལས་
བསྐྱབ་ཕྱིར་དང་།། ༈ །།གཡན་པ་དགབ་པ་ནི། ཆུ་སེར་དང་གཉན་ནད་བསྡོངས་གཡན་པའི་ནད་ཅེས་བྱ་བ་དེ་ལྟ་བུ་ཡོད་པའི་རིགས་ཅན་རྣམས་ཀྱི་ཤ་ལ་སྦྱར་བའི་གོས་སུ་གནང་བ་སྟེ། འདིའི་ཚད་ནི་ནད་ཀྱི་ཡུལ་དང་བསྟུན་པའོ། སྲིད་དུ་ཁྲུ་དྲུག །ཞེང་ལ་ཁྲུ་གསུམ་པར་བྱ་བ་དང་།། ༈ །།སྐྲ་བཟེད་ཅེས། སྐྲ་བྲེག་པའི་སྐབས་སུ་སྟོད་གཅེར་བུ་ལས་བསྐྱབ་ཕྱིར། སྲིད་དུ་ཁྲུ་གསུམ། ཞེང་ལ་ཁྲུ་ཕྱེད་དོ་བ་དང་།། ༈ །།རས་ཆེན་ནི། དབྱར་གྱི་ཆར་སྐྱོབས་ཏེ། སྲིད་ཁྲུ་དགུ། ཞེགས་ཁྲུ་གསུམ་པར་གསུངས་པ་དེ་རྣམས་ལ་འཁོ་བའི་ཡོ་བྱད་བཅུ་གསུམ་ཞེས་བརྗོད་པའོ།། ༈ །།ལྷུང་བཟེད་ནི། རྒྱུར་རུང་བ་ལྕགས་དང་རྫ་གཉིས་མ་གཏོགས། ཤིང་སོགས་གཞན་ལ་མི་རུང་ཞིང་། ཆེ་ཆུང་གི་ཚད་རབ་འབྲིང་ཐ་གསུམ་གྱི་ཆེ་ཚད་ནི། ཡུལ་མ་
ག་དྷའི་བྲེའུ་ཆུང་དོའི་འབྲས་བཙོས་པའི་ཆན་ཚོད་མ་དང་བཅས་པ་བླུགས་པའི་ཁ་མཚམས་མཐེབ་གང་གིས་མ་ཁེངས་པ་དང་། ལྟུང་བཟེད་ཆུང་ཚད་ནི། མ་ག་དྷའི་བྲེའུ་ཆུང་གང་གིས་འབྲས་ཆན་ཚོད་མར་བཅས་པ་བླུགས་པས་མཐེབ་གང་གིས་མ་ཁེངས་པ་ཡིན་ལ། ལྟུང་བཟེད་འབྲིང་ཚད་ནི། དེ་གཉིས་ཀྱི་བར་ཚད་ཡིན། བྲེའུ་ཆུང་ཕྱེད་དང་དོའི་ཆན་དང་ཚོད་མས་འཐེབ་གང་མ་ཁེངས་པ་ཉིད་དོ། །མ་ག་དྷའི་བྲེའུ་ཆུང་གང་ལ་བོད་ཀྱི་ཕུལ་དོ་དང་ཁྱོར་བ་གང་ཡོད་པར་གསུངས་སོ། །མཁར་སིལ་ནི་རྒྱུ་སྟོད་སྨད་གཉིས་ལྕགས་དང་སྐེད་པ་ཤིང་ལས་བྱས་པ། རྭ་གཉིས་པ་དང་བཞི་པ་གང་རུང་སྟེ། ཚད་ནི་རྭ་ལ་མཐོ་གང་སོར་བཞི། དེ་མན་ཆད་ནི་ལུས་ཚད་དང་ དེའི་སྤགས་མའི་ཚུལ་གྱི་ ཁྱེར་བ་བདུན་ལ་ཕུལ་གང་ཡིན་ནོ། རྩེ་མོའི་མཆོད་རྟེན་ལ་
མཉམ་པ་བྱ་ཞིང་།། ༈ །།མཚོན་བྱེད་ནི། ངན་སོང་གསུམ་གྱི་སྡུག་བསྔལ་དྲན་ཞིང་བསླབ་པ་གསུམ་རྒྱུད་ལ་བསྟེན་པ་མཚོན་ཕྱིར་སྟོད་སྨད་རིམ་པ་གསུམ་དང་། བསླབ་གསུམ་ཟུང་དུ་འབྲེལ་ཕྱིར་སྦྲེལ་ཐག་ཅན། འཕགས་ལམ་ཡན་ལག་བརྒྱད་མཚོན་པས་ཡུ་བ་བརྒྱད་གཞོགས་སུ་བྱས་པ། རྒྱ་མདུད་ནི་ངན་འགྲོའི་སྐྱེ་སྒོ་འགེགས་པའི་བརྡ་དང་། འཁོར་ལོ་གསུམ་དང་ལྕགས་ཀྱུ་ནི་ཆོས་འཁོར་རིམ་པ་གསུམ་དང་སེམས་ཅན་ཐར་ལམ་དུ་འདྲེན་བྱེད། རྭ་གཉིས་པ་ནི་བདེན་པ་གཉིས། བཞི་པ་བདེན་བཞི་མཚོན་ལ། སིལ་སྙན་གྲོལ་བའི་ཨ་ལོང་བཅུ་གཉིས་ནི་གསུང་རབ་ཡན་ལག་བཅུ་གཉིས། སྟེང་གི་མཆོད་རྟེན་ནི་སྤྲུལ་པ་སྐུ་དང་། ནང་མ་ནི་ལོངས་སྐུ། བར་སྟོང་ཆོས་སྐུ་མཚོན་པ་སྟེ། དེ་ལྟ་བུའི་མཚན་ཉིད་དང་ལྡན་པ་འཆང་བར་གསུངས་སོ། །
ཡང་། རབ་ཏུ་བྱུང་བ་ནི་གཞན་ལ་གནོད་པ་སྤོང་བ་ཉིད་ཁྱད་པར་དུ་གལ་ཆེ་བས་ན། ཆུའི་སྲོག་ཆགས་ལ་མི་གནོད་པའི་སླད་དུ་ཆུ་འཚགས་བཅང་བ་ནི་ལྷག་པར་གལ་ཆེ་བར་གསུངས་ཤིང་། ཆུ་འཚགས་མེད་ན་སྲོག་ཆགས་མང་པོར་འཆི་བར་མངོན་སུམ་ཚད་མས་གྲུབ་མོད་ཀྱི། དིང་སང་ནི་དེ་ལྟར་འཐོགས་མཁན་དཀོན་པར་གདའོ། །གཞན་ཡང་། རབ་ཏུ་བྱུང་བ་རྣམས་ལ་ཐེག་དམན་གྱི་འདུལ་བའི་གཞུང་རྣམས་སུ། རྣམ་གསུམ་དག་པའི་ཤ་ནི་བཟར་རུང་བར་བཞེད་དེ། རྣམ་གསུམ་གང་ཞེ་ན། ཤ་ཟ་བའི་ཆེད་ཁོ་ནར་བསྔོས་ཏེ་བསད་པ་མཐོང་བ་དང་། ཐོས་པ་དང་། དེ་ལྟར་ཡིན་དུ་དོགས་པ་དང་གསུམ་གྱི་སྐྱོན་མེད་ངེས་པའི་ཤི་ཤ་བཟར་རུང་བར་བཤད་པ་དང་། དེ་ལྟར་ཡིན་ཀྱང་ནང་བསེས་ཀྱི་ཞིབ་ཆར་ནི། མིའི་ཤ་དང་། གླང་ཆེན་དང་། རྟ་བོང་། སྤྲེའུ། ཁྱི་དང་
གཅན་གཟན་གྱི་ཤ་སོགས་མདོར་ན་སྐྱེ་བ་ཡ་རབ་རྣམས་ཀྱི་མི་ཟ་བའི་རིགས་ཐམས་ཅད་དང་། གཅན་གཟན་གྱི་གོད་ཟ་འཕྲོར་མ་དང་བཅས་པ་ནི་བཟར་མི་རུང་བར་གསུངས་མོད་ཀྱི། ཐེག་ཆེན་གྱི་འདུལ་བའི་སྡེ་སྣོད་རྣམས་ལས་ནི་ཤའི་རིགས་མཐའ་དག་ནམ་དུ་ཡང་དགེ་སྦྱོང་གིས་ཟ་བར་མ་གནང་སྟེ། ལང་ཀར་གཤེགས་པའི་མདོ་ལས། བློ་གྲོས་ཆེན་པོ། ངས་ཤའི་ཟས་ནི་སུ་ལའང་མ་གནང་མི་གནང་གནང་བར་མི་འགྱུར་རོ། །རབ་ཏུ་བྱུང་བ་རྣམས་ལ་ཤ་ཟའི་ཟས་ནི་མི་རུང་བར་ངས་བཤད་དོ། །ཡང་འཁྲུལ་དང་ནི་གཉེན་བཤེས་དང་། །ཁུ་ཆུ་ཁྲག་ལས་བྱུང་བའི་ཕྱིར། །འབྱུང་པོ་རྣམས་ཀྱང་ངང་འགྱུར་ན། །རྣལ་འབྱོར་ཅན་གྱི་ཤ་མི་ཟ། །ཤ་རྣམས་དང་ནི་སྒོག་གཙོང་དང་། ཆང་དག་རྣམ་པ་སྣ་ཚོགས་དང་། །ཀེའུ་སྒོག་
སྐྱ་དེ་བཞིན་སྟེ། །རྣལ་འབྱོར་ཅན་གྱི་རྟགས་རུ་ཡང་། །ཞེས་པ་དང་། གཞན་ཡང་། །གླང་པོའི་རྩལ་དང་སྤྲིན་ཆེན་དང་། །མྱ་ངན་འདས་དང་སོར་འཕྲེང་ཅན། །ལང་ཀར་གཤེགས་པའི་མདོ་ལས་ཀྱང་། །ངས་ནི་ཤ་དག་རྣམ་པར་སྨད། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་ཐམས་ཅད་སྨད་པ་ལ། །ངོ་མི་ཚ་བར་ཟ་བ་ནི། །རྟག་ཏུ་སྨྱོན་པར་སྐྱེ་བར་འགྱུར། །ཞེས་སོགས་དང་། མྱང་འདས་ཀྱི་མདོར། རིགས་ཀྱི་བུ་དེང་ཕྱིན་ཆད་དུ་ངའི་ཉན་ཐོས་རྣམས་ཤ་ཟར་མི་རུང་ངོ་། །གང་གི་ཐུབ་པའི་ཚིག་འདས་ཏེ། །བསམ་པ་ངན་པས་ཤ་བཟའ་བཞིན། །ཤཱཀྱའི་བསྟན་ལ་བརྟུལ་ཞུགས་བླངས། །ཤིན་ཏུ་མི་ཟད་དམྱལ་བར་ནི། །སྡིག་པའི་ལས་ཅན་དེ་དག་འགྲོ། །ཞེས་སོགས་རྒྱ་ཆེར་གསུངས་ནའང་། དིང་སང་ནི་རབ་བྱུང་རྣམས་ཤ་ཟ་བ་ལས་ཀྱང་བསྔོས་ཤ་འབའ་ཤིག་དང་དུ་ལེན་པར་བྱེད་པ་འདི་ལྟ་བུ་
ལ་ནི་བདག་འདྲས་ཅི་ཞིག་སྨྲ། ཡང་། ཇི་སྐད་དུ། ཕུང་ཁྲོལ་ཀུན་གྱི་རྩ་བ་ཡི། །ཆང་གི་བཏུང་བ་རྟག་ཏུ་སྤང་། །ཞེས་གསུངས་པ་ལྟར། བསྙེན་གནས་ཡན་ཆོད་ཀྱི་སྡོམ་པའི་རྣམ་གྲངས་ཐམས་ཅད་ལ་ཆང་གི་བཏུང་བའི་རིགས་གྱུར་མཐའ་དག་བཀག་ཚུལ་ནི། སྡོམ་པ་ལེན་ཆོག་རྣམས་སུ་ཇི་སྐད་དུ། འབྲུའི་ཆང་དང་། ཞེས་པ་ཆང་དངོས་ཉིད་དང་། བཙོས་པའི་ཆང་དང་ཞེས། སྦྲང་ཆང་། བུར་ཆང་། རྒུན་ཆང་། ཨ་རག །ཟན་ཆང་སོགས་དང་། མྱོས་པར་འགྱུར་བ་བག་མེད་པའི་གནས་དང་། ཞེས། ཕབ་བཏབ་པ་ལས་བྱུང་བའི་ནུས་པས་མྱོས་ཐུབ་པའི་བཟའ་བཏུང་མཐའ་དག་མི་རུང་བར་གསུངས་པ་སྟེ། མདོ་ལས་དགྲ་བཅོམ་པ་ལེགས་འོང་གི་གླིང་བཞིར། གང་ཞིག་ཆང་གི་བཏུང་བ་རྩྭའི་རྩེ་མོ་གང་ཡན་ཆད་འཐུང་བར་བྱེད་ ནས་འབྲས། གྲོ་སོགས་ཀྱི་ དིང་སང་གི་ཐ་མར་ཁ་སོགས་
པ་དེ་ནི་ངའི་ཉན་ཐོས་མ་ཡིན་ལ། །ང་ནི་དེའི་སྟོན་པ་མ་ཡིན་ནོ། །ཞེས་པའི་བཀའ་ཡི་འགག་བསྡུས་ནའང་ཉམ་ང་སྤུ་ཙམ་མེད་པར་ཆང་མི་སྤོང་བ་དང་། གལ་ཏེ་སྤོང་བར་ཁས་འཆེས་བ་དག་ཀྱང་ཞེ་ནས་བློས་མི་ཐོངས་པས། ལྕགས་པོའམ། བསྐོལ་མ་སོགས་སུ་མིང་བཏགས་ཅིང་རང་གི་རང་ཉིད་བསླུ་ཐབས་མི་དྲན་དགུ་དྲན་མང་པོས་སྡོམ་པ་འཇིག་པར་བྱེད་པ་ཞིག་འོ་སྐོལ་བོད་ཡུལ་འདིར་དར་མོད་ལ།། ༈ །།འོན་ཏེ་གསང་སྔགས་ཀྱི་དམ་རྫས་དང་ཚོགས་འཁོར་གྱི་མིང་འདོགས་ན་ནི་དེ་ཉིད་ཀྱི་ཁྱད་ཆོས་རིམ་གཉིས་ཀྱི་ཏིང་ངེ་འཛིན་དང་ལྡན་པ་ཞིག་མེད་དུ་མི་རུང་ཚེ་དེ་ལྟ་བུ་ཡང་དཀོན་པས་ན། མདོ་སྔགས་གཉིས་ཀ་མ་ཡིན་པ་དེ་ནི་སངས་རྒྱས་ཀྱི་བསྟན་པའི་ནང་དུ་ཅི་ཞིག་གིས་ཆུད་པར་འགྱུར་ཏེ། ཡ་ང་བའི་ལས་ཁོ་ནར་ཟད་དོ། །
༈ །།ལར་ཡང་། ཚོགས་ཀྱི་འཁོར་ལོ་གཞུང་དང་མཐུན་པ་དངོས་ཤིག་བྱེད་པའི་དབང་དུ་བགྱི་ན། ཚོགས་ཀྱི་གཙོ་བོ་དང་དེར་འདུ་བར་འོས་པའི་རྣལ་འབྱོར་ཕོ་མོ་ལྷའི་གྲངས་དང་མཉམ་པའམ་ཇི་ཙམ་ཚོགས་པ་དེ་དག་ཐམས་ཅད་ཏིང་ངེ་འཛིན་གྱི་ནུས་ལྡན་ཤ་སྟག་མ་གཏོགས་གང་ཟག་ཐ་མལ་པའི་རིགས་མི་ཚུད་ཅིང་། ཚོགས་ཀྱི་ཡོ་བྱད་རྒྱ་གར་དུ་ནི་གསེར་སྲང་བཅོ་བརྒྱད་ཀྱི་དངོས་པོ་ཡན་ཆད་མ་གཏོགས་དེ་མན་གྱི་དངོས་པོ་དམན་པས་ཚོགས་འཁོར་མི་རུང་བར་བྱེད་ལ། གནས་ཀྱང་རབ་ཏུ་ཡུལ་ཉེར་བཞི་སོགས་དཔའ་བོ་མཁའ་འགྲོ་འདུ་བའི་ས་དང་། དེ་ལྟར་མ་འཛོམ་ཡང་སྐྱེ་བོས་དབེན་པའི་དགོན་པ་དང་། དུར་ཁྲོད་ལ་སོགས་པར་ཚོགས་ཀྱི་ཁང་པ་ཆེན་པོ་སྒོ་རིམ་པ་གསུམ་དང་ལྡན་པར་བྱ་དགོས་ཚུལ་དང་། དུས་བཟང་པོ་ཡར་
མར་གྱི་ཚེས་བཅུ་ལ་སོགས་པ་དེའི་མཚན་ཐོག་ཐག་ཏུ་དཀྱིལ་འཁོར་གང་བྱེད་དེ་ཉིད་ཀྱི་ཆོ་ག་དང་བསྙེན་སྒྲུབ་ཚོགས་ལས་རྡོ་རྗེའི་གླུ་གར་གྱི་མཐར་ཐུག་པ་དང་། ལྷག་མའི་ཆོ་ག་ཡན་གྲུབ་པར་བྱས་ནས། ནམ་ལངས་པ་ན་ལས་ཀྱི་རྗེས་མི་མངོན་པར་བྱ་དགོས་པ་དང་། ཚོགས་ཀྱི་བཟའ་བཏུང་སོགས་རང་རང་གི་སྐལ་བ་ཇི་ཙམ་ཐོབ་པ་ཐམས་ཅད་ཀྱང་དེ་ཉིད་དུ་ཟས་ཀྱི་རྣལ་འབྱོར་དང་ལྡན་པས་ལོངས་སྤྱོད་ཚར་བར་བྱ་བ་མ་གཏོགས། གསོག་འཇོག་དང་ལྷག་མ་གཞན་དུ་འཁྱེར་བ་སོགས་མི་རུང་བ་དང་། ཚོགས་ཀྱི་གྲལ་དུ་བཟི་བ་དང་ཀུ་ཅོ་རྩོད་པ་སོགས་དང་། བཟའ་བཏུང་བཟང་ངན་གྱི་སྤང་བླངས་ཞེན་འཛིན་གཙང་དམེའི་རྟོགས་པ་སོགས་ཐ་མལ་པའི་སྤྱོད་པ་ཅུང་ཟད་ཙམ་དང་འདྲེས་ནའང་མཁའ་འགྲོ་དང་ཞིང་སྐྱོང་གི་ཚོགས་ཀྱི་བཀའ་ཆད་འབྱུང་ཚུལ་སོགས་རྒྱུད་འགྲེལ་དང་
སྒྲུབ་གཞུང་ཆེན་མོ་དག་ལས་རྒྱས་པར་གསུངས་བ་དེ་དག་ཇི་ལྟ་བ་ནི་དིང་སང་འོ་སྐོལ་རྣམས་ཀྱི་སྤྱོད་ཡུལ་དུ་མ་གྱུར་མོད་ལ། ད་ལྟའི་ཆོ་ག་དང་དབང་བསྐུར་སོགས་ཀྱི་སྐབས་སུ་བརྡ་མཚོན་ཙམ་བྱེད་པ་འདི་དག་ནི་ཚོགས་ཀྱི་མཆོད་པ་ཞེས་བྱ་བ་ལས་ཚོགས་འཁོར་དངོས་ཀྱི་མིང་མི་ཐོབ་ཏེ། དཀྱིལ་འཁོར་གྱི་ལྷ་ལ་མཆོད་ཅིང་སྒྲུབ་པ་པོ་རྣམས་ཀྱང་དངོས་གྲུབ་ཀྱི་རྫས་ཙམ་དུ་རོལ་བ་ཡིན་ཕྱིར། རྒྱུན་དུ་སྤྱོད་པའི་ཟས་ཀྱི་རྣལ་འབྱོར་དག་དང་ཆ་མཚུངས་མོད་ཀྱི། དེའི་ཚོགས་ཆང་སོགས་ཀྱང་དམ་ཚིག་གི་རྫས་སུ་མྱང་བ་ཙམ་མ་གཏོགས་བག་མེད་དུ་བཏུང་ཆོག་པར་ནི་གང་ནས་ཀྱང་མ་གསུངས་སོ།། ༈ །།གཞན་ཡང་གསང་སྔགས་པས་ཆང་གི་བཏུང་བའི་རྣལ་འབྱོར་ཇི་ལྟར་བྱ་ཚུལ་ནི། བརྟག་གཉིས་ཀྱི་རྒྱུད་ལས་
སྐྱེས་པའི་ཐོད་པ་ཆ་གཅིག་པ། །བཏུང་བ་བཟང་པོས་ཡོང་བཀང་སྟེ། །ཞེས་མང་ཉུང་གི་ཚད་དང་། བྱིན་རླབས་བྱ་ཚུལ་ཡང་། སྡོམ་འབྱུང་ལས་གསུངས་པ་ནི། །ཨོཾ་ཨཱཿཧཱུྃ་ཞེས་བྱ་སྔགས་ཀྱིས། །རྟགས་ཏུ་བྱིན་གྱིས་རློབས་པར་བྱ། །ཧ་ཧོ་ཧྲཱིཿཞེས་བྱ་སྔགས་ཀྱིས། །སྦྱང་བ་དང་ནི་རྟོགས་པ་སྟེ། །ཡི་གེ་ཧས་ནི་ཁ་དོག་འཕྲོག །ཧོ་ཡིས་དྲི་ནི་གཞོམ་པར་བྱེད། །ཡི་གེ་ཧྲཱིཿཡི་ནུས་པ་བཅོམ། །བདུད་རྩིའི་རྣམ་པས་བསྟེན་པར་བྱ། །ཞེས་གསུངས་པ་དང་།། ༈ །།ཡང་། བྱིན་རླབས་མ་བྱས་པར་འཐུང་བའི་ཉེས་པ་ནི། རྒྱུད་དེ་ཉིད་ལས། ཧ་གསུམ་ལ་སོགས་དང་བྲལ་བར། །ཅི་སྟེ་དམ་ཚིག་ཅན་གྱི་འཐུང་། །དེ་ནི་དུག་འགྱུར་ཐེ་ཚོམ་མེད། །སྔགས་ཀྱི་དངོས་གྲུབ་མི་འབྱུང་ངོ་། །ཞེས་དང་། །སུ་ཞིག་ཆང་གི་མྱོས་གྱུར་པ། །དེ་ལ་གེགས་ དུམ་བུ་གཅིག་པ་
ནི་མང་པོ་འབྱུང་། །སྔགས་པ་ཆང་གིས་མྱོས་འགྱུར་གང་། །ངུ་འབོད་གནས་སུ་འཚོད་པར་འགྱུར། །ཞེས་སོགས་གསུངས་སྟེ། དེ་བས་ན་ཐོད་པའི་བདུད་རྩི་ལ་ལག་མཆོད་སོགས་བྱིན་རླབས་ཚུལ་བཞིན་བྱས་པ་དངོས་གྲུབ་དང་དམ་ཚིག་གི་རྫས་སུ་བསྟེན་ཚུལ་ཙམ་མ་གཏོགས་པ། ཆང་ཕལ་པ་བག་མེད་དུ་ནི་དགེ་སྦྱོང་མིན་ཀྱང་སྔགས་པས་ཀྱང་བཏུང་དུ་རུང་བར་ནི་བཀའ་གསར་རྙིང་གང་ནས་ཀྱང་མ་གསུངས་ཤིང་། ལར་ཡང་། གསང་སྔགས་པ་ཡིན་ཕྱིན་ཆད་ཆང་ཙམ་དུ་མ་ཟད་བཟའ་བཏུང་སོགས་ཉེ་བར་དཔྱད་མཐའ་དག་ལ་འདུ་ཤེས་གསུམ་དང་མི་ལྡན་པར་ཐ་མལ་དུ་ལོངས་སྤྱད་ན་རྩ་ལྟུང་དུ་འགྱུར་ཕྱིར། དེས་ན་བདག་ཉིད་ལྷར་འདུ་ཤེས་པ། ལོངས་སྤྱད་བྱའི་དངོས་པོ་རྣམས་བདུད་རྩིར་
འདུ་ཤེས་པ། ལོངས་སྤྱོད་པ་ནི་མཆོད་པར་འདུ་ཤེས་པ་དང་གསུམ་པོ་ནི་དུས་རྟགས་ཏུ་མེད་ཐབས་མ་མཆིས་སོ།། ༈ །།གང་ཞིག་སྒྲུབ་པ་པོ་དེ་ཉིད་སྐྱེད་རྫོགས་ཀྱི་ནུས་པ་མངོན་དུ་གྱུར་ཏེ། བོག་འདོན་དུ་ཀུན་བཟང་གི་སྤྱོད་པ་དང་། གསང་སྤྱོད་རིགས་སྤྱོད་སོགས་མཐར་ཕྱིན་ནས་ཕྱོགས་ལས་རྣམ་རྒྱལ་གྱི་སྤྱོད་པ་དུས་ལ་བབས་པའི་སྐབས་སུ་ནི། དུག་ལས་རྒྱལ་བ་སོགས་རྐྱེན་གང་གིས་ཀྱང་བརྫི་བར་མི་ནུས་པ་དེ་ལྟ་བུ་དག་ལ་ནི། ཆང་གིས་ཀྱང་མྱོས་པ་སོགས་སྐྱོན་གྱི་གནས་སྐབས་ཀུན་ལས་གྲོལ་བའི་ཕྱིར། དཔེར་ན། ཏིལླི་པས་ཆང་འཚོང་ལྔ་བརྒྱའི་ཆང་ཐམས་ཅད་དུས་གཅིག་ཏུ་གསོལ་བའི་ལོ་རྒྱུས་དང་། བིར་ཝ་པ་དང་སློབ་དཔོན་པདྨ་གཉིས་ཀའི་རྣམ་ཐར་ལས་ཀྱང་། ཆང་འཚོང་ལྔ་བརྒྱའི་ཆང་ཐམས་ཅད་ཉོས་ཏེ་བཞེས་ནས། ཆང་རིན་ལ་ཉི་མ་སྟེལ་བར་
བཅུག་པས་ཞག་བདུན་གྱི་བར་དུ་ཉི་མ་བརྩོན་དུ་བཟུང་ཚུལ་དེ་ལྟ་བུ་ནུས་པའི་རྣལ་འབྱོར་རྣམས་མ་གཏོགས། གཞན་གསང་སྔགས་པས་ཀྱང་ཆང་བཏུང་དུ་མི་རུང་ན་འདུལ་བ་འཛིན་པས་ནི་ག་ལ་རུང་སྟེ། དེས་ན་དིང་སང་འོ་སྐོལ་བོད་ཡུལ་གྱི་ཆོས་པ་རྣམས་སྤྱོད་ཚུལ་འདི་འདྲས་གོ་ཆོད་པ་ནི་ཅི་ཞིག་ཡིན་སྙམ་དུ་རང་ཉིད་འབའ་ཞིག་ཡིད་མི་བདེ་བའི་སྡུག་གྱོང་མ་གཏོགས་པ་གཞན་ནི་མཆོག་དམན་སུ་ཡང་ཡ་ང་བག་ཚ་མཛད་མཁན་མ་མཆིས་མོད་ཅེས། འཕྲོས་དོན་དུ་གསོལ་བ་ལགས།། ༈ །།ཡང་ཉིད་ཀྱིས། གྲུབ་མཐའི་ཁྱད་པར་ལ་བརྟེན་པའི་ཞྭ་ཁ་དོག་སོགས་ཐ་དད་པའི་རྒྱུ་མཚན་གྱི་འཕྲོས་པ་གནང་བའི་སྐབས་དོན་ཕུལ་བ་ནི།། ༈ །།སྤྱིར་ཐུབ་དབང་ཉིད་ཞལ་བཞུགས་པའི་
དུས་སུ་ནི་ཞྭའི་གསུང་སྒྲོས་སོགས་ཀྱང་ཆེར་མི་འབྱུང་ལ། ལར་ཡང་སྤྲུལ་པ་སྐུའི་ཆ་བྱད་ཐམས་ཅད་ལ་དབུ་རེག་ཞབས་རྗེན་ཁོ་ནས་ཁྱད་ཆོས་སུ་གྱུར་མོད་ཀྱི། སླད་དུ་འདུལ་བའི་བསྟན་བཅོས་མདོ་རྩ་སོགས་ལས་ཞྭའི་ཚིག་སྒྲོས་ཙམ་འདུག་རུང་དབྱིབས་ཁ་དོག་གི་གསལ་ཁ་མི་སྣང་ཚེ། པཎིྜ་ཏ་སྤྱི་མཐུན་གྱི་པཎ་ཞུ་དེ་ཉིད་ཡིན་པར་སེམས་ཤིང་། རྒྱན་དྲུག་མཆོག་གཉིས་སོགས་འཕགས་ཡུལ་གྱི་བསྟན་འཛིན་ཆེན་པོ་ཐམས་ཅད་ཀྱང་པཎ་ཞུ་གསོལ་བ་ཤས་ཆེར་གདའ་བ་དང་། ཁ་དོག་ཀྱང་རབ་བྱུང་ལ་རུང་བའི་ཚོན་གསུམ་ལས་གཞན་ནི་མ་གནང་ཚེ་དམར་སེར་གཉིས་དང་། དམར་པོ་ཉིད་ཀྱང་བཙོས་ཚོད་ནི་མི་རུང་བའི་ཚོས་ཆེན་དུ་གསུངས་ཕྱིར། བཙག་ཁ་ལས་འོས་མ་མཆིས་ཏེ་ངུར་སྨྲིག་ཉིད་དུ་གྲུབ་
མོད།། ༈ །།རྙིང་ལུགས་ལ་ནི། གུ་རུ་རིན་པོ་ཆེ་ཉིད་ཀུན་དགའ་བོ་ལ་རབ་བྱུང་མཛད་པའི་ཚུལ་བསྟན་ཚེ་དབུ་སྐྲ་བསིལ་བས་དབུའི་གཙུག་ཏོར་གསལ་བར་བྱུང་བ་ལ་སྐྱེ་བོ་ཕལ་གྱི་བློར་མི་ཤོང་བའི་སྒྲིབ་པ་གསོག་པ་སྤོང་ཕྱིར་གཙུག་ཏོར་ལ་ངུར་སྨྲིག་གི་ཚལ་བུས་དཀྲིས་པ་ལ་གཙུག་ཤ་རིན་ཆེན་གཙུག་ཏོར་དུ་གྲགས་སོ། ཅེས། གུ་རུའི་རྣམ་ཐར་འགའ་ཞིག་ཏུ་འབྱུང་བ་དང་། གུ་རུ་ཉིད་སྤྱིར་སྤྲུལ་པའི་རྣམ་འགྱུར་མ་ངེས་ཤིང་ཁྱད་པར་སྔགས་ཆས་གཙོ་བོར་མཛད་པ་རྣམས་ལ་ནི་མཐའ་གཅིག་ཏུ་ངེས་པ་མ་མཆིས་ནའང་། པདྨ་སམྦྷའི་ཆ་བྱད་མཛད་པའི་སྐུ་ཚབ་ཆོས་དབང་གི་གཏེར་མའི་དཀར་ཆགས་སུ། དབུ་ཞྭ་གསེར་གྱི་ཕྱེ་མས་བྱུགས། །བསྟན་པ་གསེར་དང་འདྲ་བའི་རྟགས། །
ཅེས། དབུ་ཞྭ་གསེར་མདོག་ཏུ་སྣང་བ་དང་། དེ་བཞིན། སྔར་གྱི་བལ་རིས་རྙིང་པའི་པདྨ་སམྦྷ་ཝ། བོ་དྷི་སྭ་ཏྭ། གཞན་ཡང་། ལོ་པཎ་གྱི་སྐུ་ཕལ་ཆེར་ལ་ཡང་དབུ་ཞྭ་སེར་པོའི་ངུར་སྨྲིག་ཤས་ཆེ་བ་དང་། ཇོ་བོ་རྗེའི་སྐུ་ཡང་རྙིང་པ་མ་འཆུགས་པ་ཐམས་ཅད་ལ་ངེས་པར་དབུ་ཞྭ་སེར་པོར་འབྱུང་ཕྱིར། དེའི་ཤུགས་ཀྱིས་བཀའ་གདམས་ཀྱི་དགེ་བའི་བཤེས་གཉེན་ཐམས་ཅད་དབུ་ཞྭ་སེར་པོ་མཛད་ཅིང་། ཁྱད་པར་དགེ་བའི་བཤེས་གཉེན་ཆེན་པོ་པུ་ཏོ་བ་དེ་ཉིད་ནི་འདུལ་བའི་བཞེད་གཞུང་ཇི་ལྟ་བར། སྐུ་ཤམ་སོགས་ན་བཟའ་མཐའ་དག་ཆུ་རྩ་འབའ་ཞིག་གི་མདོག་ལས་གཞན་མི་མཛད་པར་གྲགས་སོ།། ༈ །།གཞན་ཡང་། སྔོན་གླང་དར་གྱི་བོད་ཡུལ་དབུས་ཀྱི་བསྟན་པ་བསྣུབས་རྗེས། དབུས་གཙང་གི་མི་བཅུའམ་དྲུག་ཏུ་གྲགས་པ་དེ་རྣམས་མདོ་ཁམས་སུ་བྱོན་
ནས་སྡོམ་པ་དང་སློབ་གཉེར་སོགས་མཐར་ཕྱིན་གྲུབ་པས་ཡར་ལ་ཕེབས་ཚུལ་གྱི་ལོ་རྒྱུས་དག་ཏུ་བླ་ཆེན་དགོངས་པ་རབ་གསལ་གྱི་མཁན་བུ་གྲུམ་ཡེ་ཤེས་རྒྱལ་མཚན་ཞེས་རྗེ་ཀརྨ་པ་ན་རིམ་གྱི་སྐྱེ་རྒྱུད་སྔ་མར་གྱུར་བ་དེས། དབུས་གཙང་མི་བཅུའི་གཙོ་བོར་གྱུར་བ་ཀླུ་མེས་ལ། དབུ་ཞྭ་བོན་པོའི་འབོས་ཞུ་ལ་ས་གསེར་གྱིས་མདོག་བསྒྱུར་བ་བཞེས་འཕྲོ་ཞིག་གནང་སྟེ། འདི་གྱོན་ལ་ང་མ་བརྗེད་པར་གྱིས་ཤིག་དང་། དབུས་གཙང་དུ་སངས་རྒྱས་ཀྱི་བསྟན་པ་ཚུགས་པར་འགྱུར་རོ། །ཞེས་ལུང་བསྟན་པ་བཞིན་བྱུང་ཞིང་། འདུལ་གྲ་བ་ཕལ་ཆེར་ཀྱང་ཞྭ་དེ་ལས་དགྱེས་པའི་ལོ་རྒྱུས་སོགས་འབྱུང་ཕྱིར། དེས་ན་ཤཱཀྱའི་བསྟན་པ་འདིར་ཞྭའི་ཁ་དོག་སེར་པོ་ལ་སྐྱོན་མེད་ཅིང་
ཁུངས་ཆེ་བ་ཡིན་པར་གདའ་ནའང་། ཕྱིས་སུ་རྗེ་གཙོང་ཁ་པ་ཆེན་པོ་བྱོན་པ་ནས་བཟུངས་ཏེ། གྲུབ་མཐའི་རྩོད་གཞི་འགའི་རྐྱེན་ལ་བརྟེན་པའི་ཞྭའི་ཁ་དོག་ལའང་ཕྱོགས་འཛིན་གྱི་སྲོལ་འདི་ལྟ་བུ་བྱུང་མོད་ལ། རྗེ་གཙོང་ཁ་པ་ནི་ཆོས་རྒྱུད་རྩ་བ་རང་བཀའ་གདམས་པ་ཡིན་ཚེ་དབུ་ཞྭ་སེར་པོར་མཛད་པའི་རྒྱུ་མཚན་ནི་དེ་ཡིན་པར་གདའ་ཡང་། བསྟན་པའི་ཆགས་སྒོ་འགའ་ཞིག་གི་རྐྱེན་གྱིས། གྲུབ་མཐའ་གཞན་མ་ཕལ་ཆེར་ཞྭ་སེར་པོར་མི་མཛད་པ་དང་། དེའི་མཐུས་སྐུ་འདྲ་ལ་ཡང་མཁན་སློབ་གཉིས་དང་ཇོ་བོ་རྗེ་སོགས་ལོ་པཎ་གྱི་རིགས་ཐམས་ཅད་ལ་དབུ་ཞྭ་དམར་པོར་བཟོ་བ་དར་མོད། འོན་ཀྱང་། པཎ་ཆེན་ཤཱཀྱ་ཤྲཱི་གྱི་དབུ་ཞྭ་གངས་ཞུར་གྲགས་པ་དེ་ཡང་སེར་པོ་ཁོ་ན་ཡིན་ལ། དིང་སང་ཡང་། གྲ་དང་རྩེད་ཐང་སོགས་སུ་བཟོས་པའི་ཞྭ་སེར་
རམ་གྲྭ་ཞྭར་གྲགས་པ་འདི་ནི་ཆོས་རྒྱུད་ཕལ་ཆེར་གྱི་དགེ་འདུན་རྣམས་ཀྱིས་བཞེས་ཤིང་། གཙང་ཞྭར་གྲགས་པའི་སེར་པོ་དེ་ཡང་དར་ཆ་ཆེ་བར་སྣང་མོད་ཀྱི། ལར་ཡང་། བསྐལ་དུས་ཀྱི་དབང་གིས་གང་ཟག་རྣམས་ཆོས་ཀྱི་སེམས་རྒྱུད་མ་འཐུལ་བའི་སྐྱོན་གྱིས་ཞྭའི་ཁ་དོག་ཙམ་ལའང་ཀུན་སློང་དང་བརྩོད་གཞིར་བྱེད་པ་འདི་འདྲ་ནི་བྱིས་པའི་རྣམ་ཐར་དུ་ཟད་དོ།། ༈ །།གསང་སྔགས་རྙིང་མ་རྣམས་ལ་ནི་སློབ་དཔོན་རིན་པོ་ཆེ་ཉིད་ཀྱིས་གཏེར་ཆོས་སྔ་ཕྱི་མང་པོར། ཞྭའི་ཁ་དོག་རྒྱུ་དང་བཟོ་དབྱིབས་ཀྱི་ཆག་ཚད་དག་སྦྱོར་སྐྱོན་ཡོན་དགོས་ཆེད་སོགས་ཀྱི་གདམས་པ་ཞིབ་རྒྱས་སུ་སྩལ་བ་ཡོད་ནའང་། རྙིང་མ་བར་རློམ་པའི་གང་ཟག་ཕལ་ཆེར་རང་གཞུང་ནས་གསུངས་པའི་ཞྭ་དེ་མི་ལེགས་མི་མཛེས་པར་མཐོང་ནས་འདོར་
ཞིང་། གཞན་ལུགས་ཀྱི་ཞྭ་དང་གོས་ཆས་ལ་འགྲན་རྒྱུ་ཞིག་རྙེད་ན་མ་རྙེད་བྱེད་པར་སྣང་ལ། གུ་རུའི་གསུང་རྣམས་སུ་ནི། ཞྭ་ལ་རིགས་གསུམ་སྟེ། ཕྱི་སྣང་སྲིད་ཟིལ་གྱིས་གནོན་པའི་པཎ་ཞུ། ནང་བྱིན་རླབས་ཡེ་ཤེས་འབེབས་པའི་འདབས་ལྡན་རིགས་ལྔ། གསང་བ་རྒྱུན་ཁྱེར་རིགས་བདག་མཚོན་ཕྱིར་ཅུག་ཞྭ་དང་གསུམ་དུ་གསུངས་པ་དང་། གོས་ཀྱང་། ཕྱི་ཐུན་མོང་ཐེག་པ་སྡེ་སྣོད་གསུམ་དང་མཐུན་པ་ཆོས་གོས་རྣམ་པ་གསུམ། ནང་ཁྱད་པར་ཐེག་པ་གསང་སྔགས་ཕྱི་བ་དང་མཐུན་པ་གཙང་མའི་གོས་གསུམ། གསང་བ་ཟབ་མོ་བླ་མེད་ཐེག་པ་དང་མཐུན་པ་བྱིན་རླབས་ཀྱི་གོས་བརྒྱད་རྣམས་གསུངས་ཏེ། དེ་ལ་ཕྱི་འདུལ་བའི་ཆོས་གོས་གསུམ་ནི་སྤྱི་ལྟར་ཡིན་ལ། ནང་གི་གཙང་མའི་གོས་གསུམ་ནི་དགེ་བསྙེན་དཀར་
པའི་ཆ་ལུགས་སྟེ། སྟོད་གོས་སྨད་གོས་སྐེ་རག་དང་གསུམ། གསང་བའི་སྔགས་ཆས་བརྒྱད་ནི། སྐུའི་སྟོད་གཡོགས་ སྟོད་འགག་ གསུང་གི་ཆོས་གོས་མེ་ལོང་མ་ ཐུགས་ཀྱི་སྐ་ནན་ རྟགས་རྒྱ་ཡང་ཟེར། ཡོན་ཏན་གྱི་སྐེད་འཆིང་ སྐེ་རག་ འཕྲིན་ལས་གར་གྱི་ཕུང་དུང་ ལུང་མ་ ཕྱི་ལྟར་དབང་གི་བེར་ དིང་སང་གི་འདི་ཉིད་ ནང་ལྟར་ལྷའི་སྨད་ཤམ་ ད་ལྟའི་སྨད་ཤམ་ཉིད་ཡིན་ཀྱང་ སྡུད་དང་གཡས་གཡོན་ཐམས་ཅད་ནས་བཞི་བཞི་བཅུ་དྲུག་དགོས་པའི་དག་སྦྱོར་ཡོད་དོ། གསང་བར་རཏྣའི་གསང་། རྒྱ་གར་གྲུབ་ཐོབ་རྣམས་ཀྱི་ཨང་རག་དེའོ། ཁེབས་དང་བརྒྱད་ཀྱི་ཁ་དོག་དབྱིབས་ཚད་སོགས་ཞིབ་པར་བསྟན་ཞིང་། གསུམ་ལྡན་རྡོ་རྗེ་འཛིན་པ་རྣམས་རྟགས་དང་ཆ་ལུགས་དེ་ལྟ་བུ་བྱ་བར་གསུངས་ནའང་། ཆོས་རྒྱུད་གཞན་རྣམས་ཀྱིས་ནི་རྙིང་མའི་ཆོས་ལ་ཚད་མར་མི་འཛིན་ཚེ་སྨོས་ཅི་འཚལ་ལ། རྙིང་
ལུགས་པ་རྣམས་ནི་རང་གི་ཆོས་ལ་རང་ཉིད་ཀྱི་ཆ་རྒྱུས་མེད་པ་མང་བས་ན། དིང་སང་འདི་དག་གི་སྒྲ་ཡང་མ་གྲགས་མོད།། ༈ །།གཞན་ཡང་། ཨུ་རྒྱན་རིན་པོ་ཆེ་ཉིད་ཀྱི་སྐུ་བཞེངས་པ་དག་གི་དབུ་ཞྭའི་དབྱིབས་ཀྱང་ལྷ་བཟོ་བ་རང་རང་སོ་སོའི་ཡིད་ལ་གང་འདྲན་དང་། ལ་ལ་ནི་སྨན་ཐང་མཁྱེན་རྩེ་སོ་སོའི་ལག་རྒྱུན་ཡིན་པ་སྐད་ཀྱི། མི་འདྲ་བ་སྣ་ཚོགས་ཤིག་བཟོས་ཡོང་གི་འདུག་ནའང་། གུ་རུ་རིན་པོ་ཆེ་ཉིད་ཀྱི་དབུ་ཞྭ་ནི་རིགས་གསུམ་གཉིས་སུ་འདུས་ཏེ། དྷ་ན་ཀོ་ཥའི་མཚོ་གླིང་དུ་མཁའ་འགྲོའི་ཚོགས་དཔོན་དུ་མངའ་གསོལ་བའི་དུས་སུ་དཔའ་བོ་མཁའ་འགྲོ་རྣམས་ཀྱི་ཕུལ་བའི་དབུ་ཞྭ་པདྨ་ཁ་འབུས་མར་གྲགས་པ་དེ་ཤེའུའི་མཉེན་ཞུར་ཡང་གྲགས་སྟེ། སྙན་གྱི་ཐད་ནས་འདབས་མ་ཡར་སླེབ་པའི་ཚུལ་ཅན་མདུན་གྱི་པད་འདབ་ གཏེར་གཞུང་འགའ་ཞིག་ཏུ་ནི་ཤེའུའི་མཉེན་
ཞུ་ནི་འདི་ཉིད་ཡིན་ལ། པདྨ་ཁ་འབུས་ནི་ཕྱོགས་བཞི་གར་པད་འདབ་ཆེ་ཆུང་འདྲ་བ་རེས་བསྐོར་བར་གསུངས་སོ། མེད་པ་འདི་ཉིད་ལུགས་གཅིག་ཡིན་ཏེ། བོད་ཡུལ་དུ་བྱོན་པའི་སྐབས་སུ་ཡང་དབུ་ཞྭ་འདི་ཁོ་ན་སྟེ། ཉིད་འཇའ་ལུས་རྡོ་རྗེའི་སྐུ་ལ་གྲང་དྲོའི་འཛིན་པ་དང་བྲལ་ཡང་གདུལ་བྱའི་སྣང་ངོར་བོད་ཡུལ་ས་གྲང་བ་དང་བསྟུན་པའི་ཚུལ་གྱི་དབུ་ཞྭ་འདི་ཡི་ཕྱི་ཟབ་ཆེན་ལ་ནང་ཤེའུའི་ལྤགས་པ་ལས་བཟོས་པ་གསོལ་བས་ཤེའུའི་གཉེན་ཞུ་ཞེས་གྲགས་པ་སྟེ། མཆིང་ཕུ་བྲེ་གུ་གེའུར་གོངས་འདུས་གསུངས་ཚེ་ཡང་འདི་ཉིད་བཞེད་པས་ད་ལྟ་ཡང་དགོངས་འདུས་ཅུག་ཞར་གྲགས་སོ། །ཡང་། ཟ་ཧོར་རྒྱལ་པོས་གསོན་བསྲེག་བྱས་པའི་བཤགས་པ་ལ་ཕུལ་བའི་དབུ་ཞྭ་པདྨ་མཐོང་གྲོལ་ལམ། འདབ་ལྡན་རིགས་ལྔར་གྲགས་པ་སྟེ། གཡས་གཡོན་གཉིས་སུ་པད་
འདབ་ཕྱེད་ཚལ་རེ་ཁྱུང་རུའི་རྣམ་པ་ཅན། རྒྱབ་མདུན་གཉིས་ཀར་པད་འདབ་རེ་རེ་ཡོད་པ་འདི་ལ་དིང་སང་ཕལ་པ་ཀུན་ཨུ་རྒྱན་པད་ཞྭ་ཞེས་ཟེར་མོད། དེས་ན་དབུ་ཞྭ་འདི་གཉིས་གང་རུང་དགོས་ཚུལ་གུ་རུ་ཉིད་ཀྱི་སྒྲུབ་ཐབས་དང་མངོན་རྟོགས་རྣམས་སུ་ཐ་དད་ཡོངས་འདུག་པ་ལྟར་རང་སྐབས་ཀྱི་གཞུང་དང་མཐུན་པ་དགོས་པར་སྣང་ཡང་། བློ་བཟོད་དང་རིག་དཔྱོད་འབའ་ཞིག་དར་བ། འདི་འདྲ་ནི་བྱིན་རླབས་དང་རྟེན་འབྲེལ་གྱི་གནད་ལ་གནོད་པར་གོའོ། །དེ་ལྟར་སྐུ་ཉིད་ཀྱི་འདུལ་བ་དང་བསྟན་པ་སྤྱིའི་ཞྭའི་དྲི་བ་མཛད་པའི་ལན་ལ་འདི་དག་བརྗོད་དགོས་མོད་ཀྱང་། རྙིང་མ་བ་དང་ཕྱི་རབས་ཀྱི་གང་ཟག་ལ་ལ་ཙམ་ཞིག་ལ་ཕན་དུ་རེ་བས་སྐབས་འདིར་འཕྲོས་དོན་དུ་བགྱིས་པ་ལགས། ཡང་ཉིད་ཀྱིས་སྐབས་དོན་ཐོར་བུའི་ཕེབས་སྒོར། རྒྱུ་
འབྲས་གོ་མ་གོའི་ཁྱད་ཀྱིས་སྡིག་པའི་རྣམ་སྨིན་ལྕི་ཡང་གི་ཁྱད་པར་ཡོད་མེད་ཀྱི་དྲི་བ་གནང་བའི་ཆ་ལ་ནི།། ༈ །།སྤྱིར་དུད་འགྲོའི་རིགས་ཁྲ་དང་སྤྱང་གུ་ལྟ་བུ་སོགས་ལ་ནི་དགེ་སྡིག་གི་བག་ཆགས་མེད་པར་ལྟ་ཅི་སྨོས་ཀྱི། མིའི་འགྲོ་བ་རྣམས་ནི་དལ་འབྱོར་ཚང་བའི་ལུས་ཤིག་ཡིན་ཕྱིན་ཆད་ལ། རྒྱུ་འབྲས་ཀྱི་གནས་ཕྲ་ཞིབ་རྣམས་མ་ཤེས་ཀྱང་རག་པའི་དབང་དུ་སྲོག་གཅོད་པ་སོགས་ལ་སྡིག་པ་ཡིན་པར་མི་ཤེས་མཁན་ནི་བྱིས་པ་བསམ་མེད་ཙམ་མ་གཏོགས་མི་འབྱུང་མོད་ཀྱང་། རྒྱུ་འབྲས་ཤེས་བཞིན་ཁྱད་དུ་གསོད་མཁན་རང་མང་བ་དང་། ཁྱད་དུ་གསད་པ་དེས་རྣམ་སྨིན་ཡང་ལྷག་པར་ཆེ་ཞིང་སྡིག་པ་བྱེད་པ་པོ་ཉིད་དང་། བྱེད་དུ་བཅུག་མཁན་དང་། བྱས་པ་ལ་ཡིད་རངས་དང་གསུམ་ནི་རྣམ་
སྨིན་ཁྱད་མེད་དུ་གསུངས་པ་དང་། དཔེར་ན་བསྔོས་ཤ་ལྟ་བུ་ལ་གསོད་པ་པོ་དང་ཟ་བ་པོ་གཉིས་སྡིག་པ་ཁྱད་མེད་ཡིན་པར་མདོ་ལས་གསུངས་མོད་ལ། སྤྱིར་ཡང་སྡིག་པ་སུ་གང་གི་བྱས་ནའང་། རྣམ་སྨིན་གྱི་འབྲས་བུ། རྒྱུ་མཐུན་གྱི་འབྲས་བུ། དབང་གི་འབྲས་བུ་དང་བཅས་པ་མཐའ་དག་མྱོང་དགོས་པར་ནི་འདྲ་མོད་ཀྱི། ཁྱད་པར་སྡོམ་ལྡན་ལྟ་བུས་བྱས་པའི་སྡིག་པ་ནི་ལྷག་པར་ལྕི་བ་སྟེ། རང་བཞིན་གྱི་མི་དགེ་བ་དང་། བཅོས་པའི་མི་དགེ་བ་གཉིས་ཀའི་ཉེས་ལྟུང་ཚང་བའི་ཕྱིར་དང་། སྡོམ་པ་གསུམ་པོ་ཡང་རིམ་པས་གོང་མ་ཉིད་བསྲུང་བའི་ཕན་ཡོན་དང་ཉམས་པའི་ཉེས་དམིགས་གཉིས་ཀ་ཆེ་རུ་འགྱུར་བ་དེ་ལྟར་ལགས་མོད་ཀྱི། སྐབས་དོན་དངོས་ལ། མི་ལུས་ཙམ་པོའམ་གཅན་ སྤོང་བར་ཁས་བླངས་དམ་བཅས་པ་བྱས་ནས་ཉམས་པ་ སོ་ཐར་བྱང་སེམས། སྔགས་སྡོམ་
གཟན་གྱི་རིགས་སོགས་དགེ་སྡིག་མི་གོ་བ་བདག་གིས་སྲོག་གཅོད་སོགས་བྱས་པ་དེ་ནི། སྤྱི་ཙམ་དུ་གཏི་མུག་དབང་གིས་བྱས་པ་ཡིན་ཕྱིར་རྣམ་སྨིན་ཅུང་ཟད་ཆུང་བར་བཤད་དེ། དུག་གསུམ་གྱི་ཀུན་ནས་བླངས་པའི་ནང་ནས་ཞེ་སྡང་གིས་བྱས་པ་ཉེས་པ་ཆེ། འདོད་ཆགས་ཀྱི་འབྲིང་། གཏི་མུག་གི་ཆུང་བར་བཤད་ལ། འོན་ཀྱང་རྒྱུ་འབྲས་མི་ཤེས་མཁན་དེ་དག་གིས་བྱས་པ་དེ་ལའང་གསུམ་དུ་འགྱུར་ཏེ། འཐབས་རྩོད་འཛིངས་པ་སོགས་ཀྱིས་བསད་པ་ནི་ཞེ་སྡང་གིས་ཡིན་ཕྱིར་ཉེས་པ་ཆེ་བ་དང་། ཤ་ཟ་བའི་ཆེད་དུ་བསད་པ་ལྟ་བུ་ནི་འདོད་ཆགས་ཀྱི་སྟེ་འབྲིང་དང་། རྩེད་མོ་ལྟ་བུའི་ཕྱིར་བསད་པ་སོགས་ནི་གཏི་མུག་གི་སྟེ་ཆུང་བ་རུ་འགྱུར་བ་ཉིད་དོ། །གཞན་ཡང་། སྲོག་གཅོད་གཅིག་པུར་མ་
ཟད་མི་དགེ་བ་ཐམས་ཅད་ལ། བསམ་པ་དང་། སྦྱོར་བ་དང་། མཐར་ཐུག་གསུམ་ག་ཚང་མ་ཚང་གི་གནད་ཀྱིས་ཉེས་པ་ཆེ་ཆུང་གི་ཁྱད་ཡོད་ཚུལ་ཡང་ཀུན་ལ་མཚུངས་ཕྱིར། དེ་དག་མ་ཚང་བ་དཔེར་ན་རྐང་ཞོར་ལག་ཞོར་སྲོག་ཆགས་ཤི་བ་སོགས་ལ་ཅུང་ཞིག་རྣམ་སྨིན་ཆུང་བར་འགྱུར་བ་སྟེ། མདོར་ན། དེ་ཙམ་གྱི་ཁྱད་མ་གཏོགས་གཞན་ནི་མི་དགེ་བ་བྱས་པ་ལ་རྣམ་སྨིན་མི་འབྱུང་བ་ཞིག་སུ་ལའང་མི་སྲིད་དོ། །དཔེར་ན་བཙན་དུག་ངོ་མི་ཤེས་མཁན་གྱི་ཟོས་པ་དང་། ཤེས་མཁན་གྱིས་ཟོས་པ་གཉིས་དུག་ནད་ལ་ཁྱད་མེད་འབྱུང་བ་ལྟར་ལགས། ཡང་། རྣམ་པར་སྨིན་པ་འབྱུང་ཚུལ་གྱི་སྐབས་འདི་ལ། འཕེན་བྱེད་ཀྱི་ལས་ཀྱི་དབང་དང་ཡུལ་དང་དུས་ཀྱི་ཁྱད་དང་། འགྱོད་པ་སྐྱེས་མ་སྐྱེས་ གསོད་སེམས་མེད་ཀྱང་ འགྱོད་སེམས་དེ་བཤགས་པའི་རྩ་བ་ཡིན་ཕྱིར་ ཀྱི་ནུས་པ་སོགས་
ཀྱི་མཐུ་ལས་རྣམ་སྨིན་ལྕི་ཡང་སྣ་ཚོགས་པར་འགྱུར་ཚུལ་གསུང་རབ་དག་ལས་རྒྱ་ཆེར་འབྱུང་མོད་ལ། དེ་བཞིན་དུ། དགེ་སྡིག་གི་འབྲས་བུ་སྨིན་མྱུར་མ་མྱུར་ཡང་། ལས་ཀྱི་རྐྱེན་ཚང་མ་ཚང་དང་རྩལ་རྫོགས་མ་རྫོགས། དུས་ལ་བབས་མ་བབས་སོགས་ཀྱི་དབྱེ་བའི་གནད་མ་ཤེས་ན། འགའ་ཞིག་ཚེ་འདིར་ལས་བཟང་པོ་ཤ་སྟག་བྱས་པའི་མཐར་ཉམ་ཐག་པར་གྱུར་བ་དག་ནི་ལས་ཀྱི་ལྷག་མ་རྣམས་མྱུར་དུ་ཟད་པའི་རྟགས་ཡིན་ལ། སྡིག་པོ་ཆེ་ལས་ངན་ཁོ་ན་བྱེད་པ་འགའ་ཞིག་བདེ་ཞིང་བསམ་པ་འགྲུབ་འགྲུབ་འདྲ་བར་འདུག་པ་དག་ནི་བསོད་ནམས་ཀྱི་ལྷག་མ་གང་ཡོད་མྱུར་དུ་རྫོགས་འདོད་པའི་རྟགས་ཡིན་ཏེ། འདི་ལྟ་བུའི་ཚུལ་མ་གོ་བ་དག་རྒྱུ་འབྲས་ལ་བདེན་པ་མི་འདུག་ཅེས་སྐུར་པ་འདེབས་སྲིད་དེ་
རྣམ་པར་སྨིན་པའི་རྒྱུ་ཚོགས་ཚང་མ་ཚང་དང་། དུས་ལ་བབས་མ་བབས་ལ་རག་པ་མ་གཏོགས། །རྒྱུ་འབྲས་མི་བདེན་པ་མ་ཡིན་ནོ། ཇི་སྐད་དུ། མདོ་སྡེ་ལས་བརྒྱ་པར། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་དང་། མཛོད་འགྲེལ་དུ། ལས་ནི་འཁོར་བར་ལྕི་གང་དང་། །ཉེ་བ་གང་དང་གོམ་གང་དང་། །སྔོན་ལས་གང་བྱས་དེ་ལས་ནི། །སྔ་མ་སྔ་མ་རྣམ་སྨིན་མྱུར། །ཞེས་གསུངས་སོ།། ༈ །།འདི་སྐབས་འཕྲོས་ཞུས་ཤིག་སྙན་དུ་གསོལ་ན། སྔོན་མཁན་སློབ་ཆོས་གསུམ་ཞལ་བཞུགས་སྐབས་སུ། སྡིག་བློན་ཏ་ར་ཀླུ་གོང་དབང་ཆེ་ཞིང་། བསྟན་པ་དང་ཆོས་ལ་བར་ཆད་དུ་མ་ཞིག་བྱས་པ་དེ་ཤི་བའི་ཚེ། བན་བོན་སོ་སོས་མཚན་བྱང་བཟུང་བ་ལས། བོན་པོས་
ཁོ་བོའི་སྲེག་གཤེད་དེ་མཚན་བྱང་ལ་བཀུག་པས། སྔོན་གྱི་བྱེད་ལུགས་ཐམས་ཅད་བཤད་བྱུང་བ་ལ་རྒྱལ་བློན་རྣམས་ཡིད་ཆེས་བྱས་པའི་ཚེ། སློབ་དཔོན་པདྨའི་ཞལ་ནས། དེ་ཁོ་མ་ཡིན་ཏེ། ཁོའི་གཤིན་འདྲེ་ཡིན། ཁོ་རང་ད་ལྟ་འཕན་ཡུལ་གྱི་ཐང་ཞིག་ཏུ་སྦུར་གོག་ཏུ་སྐྱེས་ནས་ཡོད་གསུངས་པས། རྒྱལ་བློན་རྣམས་ཡིད་མ་ཆེས་ནས་སྟོན་པར་ཞུས་ཏེ། ཡོན་མཆོད་རྣམས་འཕན་ཡུལ་གྱི་ས་ཕྱོགས་དེར་བྱོན་ནས། ལྕི་བ་ཞིག་ལ་སློབ་དཔོན་གྱིས་འདིའི་འོག་ཏུ་ཡོད་པས་མིང་ནས་བོས་དང་གསུངས་པ་ལྟར། སྦུར་ཚང་ལ་ཁ་གཏད་ནས། བློན་པོ་ཆེན་པོ་ཞེས་བོས་པས། སྦུར་བ་དེ་ཐོན་ནས་རྒྱལ་པོའི་སྐུ་ལ་འཛེག་ཏུ་བྱུང་བས་ཐམས་ཅད་ཡིད་ཆེས། སླར་འདི་ནས་གར་སྐྱེ་ཞུས་པས། སློབ་དཔོན་གྱི་ཞལ་
ནས། ཁོ་སྡིག་པ་ཤིན་ཏུ་ཆེ་བས་མནར་མེད་དུ་སྐྱེ་རྒྱུ་ཡིན་ཀྱང་ད་དུང་ཁ་མ་གང་བས། སྦུར་བ་འདི་ཤི་ནས་བྱང་ཐང་དུ་སྤྱང་གུ་གདུག་པ་ཅན་ཞིག་ཏུ་གྱུར་ཏེ་སེམས་ཅན་ཁྲི་ཁྲག་ཙམ་བསད་པས་དེས་ཁོའི་རྐྱེན་ཚང་ཏེ་མནར་མེད་དུ་སྐྱེ་བར་འགྱུར་རོ། །ཞེས་གསུངས་པའི་དཔེ་དེ་ལྟ་བུར་དགེ་སྡིག་གང་ཡང་རྩལ་རྫོགས་པའམ་རྐྱེན་ཚང་བར་ནམ་གྱུར་ཚེ་འབྲས་བུ་སྨིན་པར་འགྱུར་ཚུལ་འདི་ཡང་རྒྱུ་འབྲས་ཀྱི་གནད་ཆེ་ཤོས་ཅིག་ལགས་པས། དེས་ན་སྡིག་པ་ཕྲ་ཞིང་ཕྲ་བ་ལ་ཡང་འཛེམ་བག་དང་། དགེ་བ་ཕྲ་མོ་ཚུན་ཆད་བསག་ཅི་ཐུབ་བྱས་པས། རིང་པོར་མི་ཐོགས་པར་དགེ་བའི་རྐྱེན་ཚང་བས་འབྲས་བུ་རླབས་པོ་ཆེ་ལགས།། ༈ །།གཏན་པ་མེད་པའི་མཆོད་སྦྱིན་ཞེས་པ་གང་ལ་འཇུག་པའི་དྲི་བ་གནང་བའི་ལན་ལ་
དཔེ་དོན་གཉིས་ལས། དཔེའི་དབང་དུ་བགྱིས་ན། ཇི་ལྟར་ཁྱིམ་གྱི་སྒོ་བཅད་དེ་གཡག་ཤིང་ལ་སོགས་བཅུག་ནས་གཞན་འོངས་པ་མེད་པར་བྱེད་པ་དེ་ལ། སྒོ་གཏན་བཅུག་པ་ཅེས་ཟེར་བ་ཡིན་མོད་ཀྱི། རྒྱ་གར་དུ་རྒྱལ་པོ་སོགས་ཀྱིས་སྦྱིན་པ་རླབས་པོ་ཆེ་རྒྱུན་མི་འཆད་པས་སྐྱེ་དགུ་ཚིམ་པར་བྱེད་ཅིང་། སློང་བའི་སྐྱེ་བོ་ནམ་དང་ནམ་བྱུང་ཡང་སྒོ་མི་གཅོད་པར་བྱེད་པ་དེ་ལྟ་བུ་ལ་གཏན་པ་མེད་པའི་མཆོད་སྦྱིན་ཞེས་ཟེར་ཏེ། ཇི་སྐད་དུ། གཏོང་མ་གེམས་པར་ཁྱེད་ཀྱིས་ནི། །འཕོངས་ཞིང་སློང་བའི་སྐྱེ་བོ་ལ། །ཉིན་དང་དེ་བཞིན་མཚན་ཀུན་ཏུ། སྒོ་གཏན་མེད་པར་ཉིད་དུ་བྱས། །ཞེས་པ་སྟེ། དཔེ་དེ་དང་མཚུངས་པར་འདིར་ཡང་གཏན་པ་མེད་པའི་མཆོད་སྦྱིན་ཞེས་པའི་དོན་ནི་
སྤྱིར་གསང་སྔགས་ཀྱི་ཆོ་ག་དང་དབང་ལ་སོགས་པ་རྣམས་ཀྱི་སྐབས་སུ་ནི། དེ་དག་གི་སྣོད་ལྡན་གང་ཡིན་རྣམས་མ་གཏོགས། སྣོད་དང་སྐལ་བར་མི་རུང་བའི་རིགས་ཀྱི་གདོན་བགེགས་ལ་སོགས་ཕྱིར་བསྐྲད་ཅིང་སྲུང་བའི་འཁོར་ལོ་བསྒོམ་པ་སོགས་བྱེད་དགོས་མོད་ཀྱང་།། ༈ །།ཆུ་གཏོར་ལ་སོགས་ཀྱི་སྐབས་སུ་ནི་དེ་ལྟར་མི་བྱེད་ཅིང་སྲུང་འཁོར་སོགས་མི་སྒོམས་པར། མཐོ་སྲིད་རྩེ་ནས་དམའ་དམྱལ་ཁམས་ཡན་གྱི་སྐྱེ་འགྲོ་མཆོག་དམན་བར་མཐའ་དག་མགྲོན་བཞིར་བསྡུས་ནས་སྤྱན་དྲངས་ཤིང་མཆོད་སྦྱིན་བགྱི་བ་མ་གཏོགས། སྣོད་དུ་རུང་མི་རུང་དང་བཟང་ངན་དགྲ་གཉེན་ཕན་གནོད་སོགས་ཀྱི་དབྱེ་བ་འབྱེད་པའི་སྐབས་མ་ཡིན་ཚེ། འདི་ན་སྣོད་མིན་སེམས་ཅན་གང་ཡང་མེད། །ཅེས་གསུངས་པའི་མགྲོན་དེ་དག་ཐམས་ཅད་ལ་མཆོད་
སྦྱིན་གྱི་ལོངས་སྤྱོད་གང་ལ་གང་འདོད་དུ། རྒྱ་ནམ་མཁའི་ཁམས་དང་མཉམ་ཞིང་རྒྱུན་འཁོར་བ་མ་སྟོང་གི་བར་དུ་རིས་མེད་དུ་གཏོང་བ་དེ་ལྟ་བུ་ལ་གཏན་པ་མེད་པའི་མཆོད་སྦྱིན་ཞེས་བྱ་བ་ལགས།། ༈ །།ཡང་འདུལ་བའི་ཡོ་བྱད་ཁྱད་པར་བའི་བྱེ་བྲག སྲ་རྐྱང་ཞེས་པ་གང་ཡིན་པའི་དྲི་བ་གནང་བའི་ཆར། རྗེ་བྱམས་པ་གླིང་པ་ཆེན་པོས་དག་ཡིག་སྨྲ་བརྒྱན་སྲ་རྐྱང་ཞེས་པའི་མཆན་ཡིག་ཏུ། སྲ་རྐྱང་འདིང་བ་ཞེས་པ་ཆོས་གོས་ཤིག་སྟན་ལ་བཏིང་ནས་སྒྲུབ་པའི་ལས་ཤིག་བྱས་པས་ལྟུང་བ་མང་པོ་བག་ཡངས་སུ་འགྱུར་བ་ཡོད། ཅེས་གསུངས་པ་འདུག་ཅིང་། མདོ་རྩ་བ་ཉིད་ལས་ནི། ས་ལ་ཆོས་གོས་འདིང་བར་མི་བྱའོ། །དེའི་དོན་དུ་གཏན་ལ་བྱའོ། །ཤིང་ལས་བྱས་པའམ་
སྨྱུག་མ་ལས་བྱས་པ་གྲུ་བཞི་པ། བརྟོད་པའི་ཕྱིར་ཐིག་གུ་གཞུག་པའི་བུ་ག་བཏོད་པ་ནི་དེ་ཞེས་བྱའོ། །ཞེས་གསུངས་ཤིང་འདིར་དེ་ཞེས་བྱའོ་ཞེས་པའི་ཚིག་སྡུད་འདི་ནི། སྲ་རྐྱང་ཞེས་བྱའོ། །ཞེས་པའི་བརྡ་ཡིན་པར་སྣང་ཞིང་། མདོར་ན་སྲ་རྐྱང་འདིའི་དགོས་ཆེད་ནི། ཆོས་གོས་རྣམ་གསུམ་དྲས་དྲུབ་སུ་བྱ་བའི་སྐབས་ཀྱི་འོག་ཏུ་འདིང་རྒྱུ་དང་། དྲ་བའི་གཏན་པ་ཡིན་པར་བཤད་ཅིང་། དེ་ཡང་གཏན་པ་དེ་ཉིད་ཀྱི་རྒྱུ་ནི་གོང་དུ་སྨོས་པ་ལྟར། སྨྱུག་མའམ་ཤིང་ལས་བྱ་བར་གསུངས་པ་དང་། དེ་ལས་གཞན་འདི་རྒྱུ་དངོས་ནི་འདི་ལྟར་གསུངས་སྟེ། དབྱར་རྙེད་ཀྱི་གོས་ཀྱི་ སྲ་རྐྱང་དངོས་འདི་བོད་དུ་གཞན་ནམ་ཡང་མ་དར་ལ། སྔོན་དགེ་བའི་བཤེས་གཉེན། ཀོ་ཁྱིམ་པ་ཆེན་པོས་སྲ་རྐྱང་གི་ཕྱག་བཞེས་མཛད་པས། རྟེན་འབྲེལ་གྱི་མཚན་མ་མི་ཤིས་པ་བྱུང་བ་ལ་བསྟེན་ནས་ཕྱིས་སུས་ཀྱང་མ་མཛད་པར་གྲགས་སོ།
རྒྱུ་ལས་བྱུང་ཞིང་། དགེ་འདུན་སྤྱི་དབང་བའི་རུང་བ་ཚད་ལྡན་ཏེ། དེ་ཡང་སྤུ་ཅན་ཤད་བརྡབ་བྱས་པ་མ་ཡིན་པ། ཁ་ཡན་པོར་འཕྱང་བ་མ་ཡིན་པ། སྲིན་གྱིས་ཟོས་པ་མ་ཡིན་པ། མཐའ་དང་དཀྱིལ་ནས་ཟག་པ་མ་ཡིན་པ། རུང་བའི་མཚོན་གྱི་ཁ་བསྒྱུར་བ། བདག་པོ་སྔ་མས་ལོངས་མ་སྤྱད་པ། སྲབ་ཐུག་ཅན་དང་། ལྷན་རིགས་དང་། ལྷན་ཅན་དང་། ཆ་ག་ཅན་དང་། མཐའ་ཟགས་སྐུད་པས་དཀྲིས་པའི་ཟུང་ཅན་དང་། རྔ་ཐེར་སོགས་དང་། བདག་པོ་སྔ་མས་བྲལ་ལྟུང་སོགས་བྱུང་ནས་སྤངས་པའམ། བདག་པོ་སྔ་མ་དང་བྲལ་ཞིང་ཕྱི་མ་དང་ཕྲད་པའི་ཕྱག་དར་ཁྲོད་པ་མ་ཡིན་པ། བྲལ་ཕྲད་མ་ཡིན་པ་རྣམས་སོ། །ཞེས་གསུངས་པ་དེ་ལྟ་བུའི་མཚན་ཉིད་དང་ལྡན་པ་དགོས་
ཚུལ་དང་། སྲ་རྐྱང་འདིང་བའི་དུས་ཀྱང་། སྨིན་དྲུག་ནས་ནི་ཁྲ་ཡི་བར། །སྲ་རྐྱང་འདིང་བ་རྗེས་སུ་གནང་། །ཞེས། སྨིན་དྲུག་གི་ཡར་ངོའི་ཚེས་གཅིག་ནས། དབོའི་བར་ལས་གཞན་འདིང་མི་རུང་བ་དང་། འདིང་བ་བྱ་བའི་སྐབས་སུ་ཡང་། སྲ་རྐྱང་དེ་ཉིད་མེ་ཏོག་དང་བཅས་པ་འཐོགས་ཏེ་མཁན་སློབ་དང་དགེ་སློང་རྒན་རིམ་བཞིན་རེ་རེའི་དྲུང་དུ་འདུ་བཞིན་པས་ཆོས་གོས་བྱིན་རླབས་ཀྱི་ཚིག་ལ་ཁ་བསྒྱུར་ཏེ། སྲ་རྐྱང་འདིང་ངོ་། །ཞེས་ཞུས་ཤིང་། དེ་རྣམས་རེ་རེ་ཀྱང་ལེགས་པར་འདིང་ངོ། །ཞེས་གནང་བ་སྦྱིན་པར་བཤད་ལ། མི་འདིང་བའི་དུས་རྣམས་སུའང་རྡུལ་སོགས་སྤྲུགས་ཅིང་ཆུད་མི་འཛའ་བར་བྱ་བ་དང་། དེ་གྱོན་ནས་མི་གཙང་བའི་སྐྱབས་སུ་འཇུག་པ་ལ་སོགས་མ་གུས་པ་བྱར་མི་རུང་བ་དང་། བསྲུང་བ་པོ་མེད་པར་སྐྱ་རེང་འཆར་དུ་མི་འཇུག་པ་དང་། དེ་འཁྱེར་ནས་མཚམས་ཀྱི་ཕྱི་རོལ་
དུ་མི་འགྲོ་བ་སོགས། སྲ་རྐྱང་ལེགས་པར་གཅེས་སྤྲས་ཀྱིས་བརྐྱངས་ཚུལ་རྣམས་དང་། གདིང་བར་བྱེད་པའི་གང་ཟག་ནི། དབྱར་གནས་བྱེད་པའི་དགེ་སློང་སྡོམ་ལྡན་མ་གཏོགས་གཞན་གྱིས་མ་ཡིན་ནོ། །སྲ་རྐྱང་བཏིང་བའི་ཕན་ཡོན་ནམ་དགོས་ཆེད་དངོས་ནི། རང་དོན་དུ། འཆང་འབྲལ་འཇོག་གསུམ། ཡང་ཡང་ཟ་བ། འདུས་ཤིང་ཟ་བ། མ་སྨྲས་པ་གྲོང་དུ་འགྲོ་བ། གོས་སློང་བ། རྙེད་པ་ཐུན་མོང་དུ་གྱུར་བ་བྱིན་གྱིས་མ་རླབས་པའི་གོས་དུ་མ་འཆང་བ། སྣམ་སྦྱར་མེད་པར་ལྗོངས་རྒྱུ་བ་ལ་སོགས་པའི་ལྟུང་བ་མི་འབྱུང་བའི་ཕྱིར་དང་། གཞན་དོན་དུ། སྦྱིན་པ་པོའི་དངོས་པོ་བསོད་ནམས་སྤེལ་བའི་ཕྱིར་རོ། །ཞེས་གསུངས་ཚེ། གོང་དུ་རྨོས་པའི། བྱམས་གླིང་པས་གསུངས་པ། དེ་དག་གི་དོན་ཡང་འདི་རྣམས་ཡིན་པར་སྣང་ཞིང་། མདོར་ན། སྲ་རྐྱང་
གི་སྒྲ་དོན་ནི་དེ་ལྟར་བུར་གདའ་ལགས།། ༈ །།ཚུལ་ཤིང་བྲིམས་པའི་དོན་གང་ཡིན་འདྲི་བར་མཛད་པ་དེའི་དགོས་དོན་གྱི་གཙོ་བོ་ནི། དབྱར་གནས་སམ་དེ་ལས་གཞན་པའི་ཚེ་ཡང་དགེ་འདུན་གྱི་ཞལ་གྲངས་འདྲེན་དགོས་པའི་སྐབས་སུ། རཱ་ལུག་བགྲང་བ་ལྟར་ངོ་གྲངས་མཛུབ་ཚུགས་སུ་བྱས་ན་དཀོན་མཆོག་ལ་བརྙས་པར་འགྲོ་བ་དང་། དེ་བཞིན་དུ་མིང་རེ་རེ་ནས་རྗེན་ཕྱུང་གི་བགྲང་བ་སོགས་ཀྱང་མི་རུང་ཚེ། ཞལ་ཏ་པའམ་དགེ་བསྐོས་ཀྱིས་ཚུལ་ཤིང་བཀྱེས་ནས་སླར་བསྡུས་པ་དེ་ཉིད་གྲངས་བགྲང་དགོས་པར་གསུངས་ཤིང་། ཁྱད་པར་དབྱར་གནས་ཀྱི་ཚེ། གང་དུ་བྱ་བའི་གཙུག་ལག་ཁང་དེར་ཐོག་མར་གནས་ཀྱི་བྱི་དོར་དང་གདན་ཁྲི་བཤམས་བཀོད་སོགས་ཀྱི་མཐར། གསོལ་བ་བཞིའི་ལས་ཀྱིས་ཞུ་བ་ཞུ་ལན་སོགས་བྱས་ལ་དབྱར་གནས་ལ་ཆུད་མི་ཆུད་ཀྱི་དབྱེ་བསལ་བྱས་
པའི་དབྱར་གནས་མཛད་པོ་ཇི་ཙམ་བྱུང་བ་དེ་དག་ལས་ཐོག་མར་སྟོན་པའི་ཚུལ་ཤིང་གཅིག་བླངས་ནས། དེ་ནས་རིམ་བཞིན་དུ་ཚུལ་ཤིང་ལེན་ཞིང་། དགེ་ཚུལ་རྣམས་ཀྱི་ཚུལ་ཤིང་ནི་རང་རང་གི་མཁན་སློབ་རྣམས་ཀྱིས་བླངས་བ་ལས། ཁོ་རང་རྣམས་ཀྱིས་མི་ལེན་ཏེ། དགེ་སློང་དང་ཁྱད་འབྱེད་པའི་ཕྱིར་ཡིན་ནོ། །མཐར་གཙུག་ལག་དེ་ཉིད་དུ་གཉུག་མར་གནས་པའམ། ཕལ་སྐད་ལྟར་ན། རྒྱུན་པར་སྡོད་མཁན་གྱི་དགེ་སློང་ཡོད་ན་དེ་དག་གི་ཚུལ་ཤིང་ཡང་གནས་བརྟན་གྱིས་བླངས་ཏེ། གྲངས་ངེས་སུ་གྱུར་ཚེ་དགེ་བསྐོས་ཀྱི་དགེ་འདུན་རྣམས་ལ། དབྱར་འདི་ལ་གནས་འདི་ཞེས་བྱ་བར་དགེ་འདུན་གྱི་གྲངས་འདི་ལྟ་བུས་ཚུལ་ཤིང་བླངས་སོ། །ཅེས་ཞུ་ཤིང་། དབྱར་གནས་དེར་མི་བྱེད་པའི་དགེ་སློང་དག་གིས་ནི་ཚུལ་ཤིང་མི་ལེན་
པར་བྱ་བ་ཡིན་ནོ། །གཞན་ཡང་དགེ་འདུན་གྱི་གྲངས་ངེས་དགོས་པའི་དུས་ཐམས་ཅད་ལ་ཚུལ་ཤིང་བྲིམས་པ་ཡིན་ཏེ། དཔེར་ན། སྔོན་མ་གྷ་དྷ་བཟང་མོས་གྲོང་ཁྱེར་དུ་བུ་རམ་ཤིང་འཕེལ་དུ་སྟོན་པ་སྤྱན་དྲངས་པའི་སྐབས་སུ། སྟོན་པས་ཀུན་དགའ་བོ་ལ་བཀའ་སྩལ་ཏེ། ད་ནང་འོ་སྐོལ་རྣམས་འདི་ནས་དཔག་ཚད་ལྔ་བཅུ་འདས་པའི་ལྷོ་ཕྱོགས་སུ་ཁྱིམ་བདག་ཁྱབ་མཁན་འདུལ་བའི་སླད་དུ་འགྲོ་དགོས་པས། དགེ་སློང་རྫུ་འཕྲུལ་ཐོབ་པ་རྣམས་ལ་ཚུལ་ཤིང་བྲིམས་ཤིག །རྫུ་འཕྲུལ་མ་ཐོབ་པའི་དགེ་སློང་རྣམས་ནི་མགོན་མེད་ཟས་སྦྱིན་གྱི་གྲོང་དུ་བསོད་སྙོམས་ལེན་པར་དེངས་ཤིག །ཅེས་བཀའ་སྩལ་བ་བཞིན་དུ་ཀུན་དགའ་བོས་ཚུལ་ཤིང་བཀྱེས་པའི་ཚེ། སྦྱངས་པའི་ཡོན་ཏན་གྱི་མཐར་སོན་ཞིང་རྫུ་འཕྲུལ་མ་ཐོབ་པའི་དགེ་སློང་ཞིག་གིས་ཀྱང་
ཤིང་བླངས་པ་ལ། ཀུན་དགས་སྨྲས་པ། ཚེ་དང་ལྡན་པ་ཁྱེད་ཚུལ་ཤིང་མ་ལེན་ཅིག །དེང་དཔག་ཚད་ལྔ་བཅུར་རྫུ་འཕྲུལ་གྱིས་སྐད་ཅིག་ལ་བགྲོད་དགོས་པས། ཁྱེད་ཀྱི་ཡུལ་དུ་མ་གྱུར་ཏོ། །སྨྲས་པས། ཁོ་ན་རེ་ཅུང་ཟད་བཞུགས་ཤིག་དང་། བདག་གི་སྤང་བར་བྱ་བ་རྣམས་ནི་སྤངས། ཤེས་པར་བྱ་བ་ཐམས་ཅད་རྟོགས་ཟིན་གྱི། ད་ལྟ་ཉིད་དུ་རྫུ་འཕྲུལ་ཐོབ་པར་བྱའོ། །ཞེས། བསམ་གཏན་ལ་ཐུན་གཅིག་མཉམ་པར་བཞག་མ་ཐག །རྫུ་འཕྲུལ་གྲུབ་སྟེ་དགྲ་བཅོམ་པའི་འབྲས་བུ་མངོན་དུ་གྱུར་ཏོ། །དེ་ནས་དགེ་འདུན་རྣམས་ལས་ཐོག་མར་འཕགས་པ་ཀུན་ཤེས་ཀཽ་ཌི་ནྱ་ནི་རྟ་ཅང་ཤེས་སྤྲིན་གྱི་ཤུགས་ཅན་ལྔ་བརྒྱས་དྲངས་པའི་ཤིང་རྟ་ལ་བཞུགས་པའི་བསྟན་ནས་ནམ་མཁའ་ལ་བྱོན་ནོ། །ཞེས་སོགས་དགྲ་བཅོམ་རེ་རེ་བཞིན་ཡ་མཚན་
གྱི་རྫུ་འཕྲུལ་མི་འདྲ་བ་བསམ་གྱིས་མི་ཁྱབ་པའི་བཀོད་པ་ཐ་དད་ཀྱིས། ནམ་མཁའི་ལམ་ལས་གྲོང་ཁྱེར་བུ་རམ་ཤིང་འཕེལ་དུ་བྱོན་ནས། ཁྱིམ་བདག་ཕྱྭ་མཁན་གྱིས་ཐོག་དྲངས་པའི་ཡུལ་ཁམས་དེ་ཐམས་ཅད་བདེན་པ་ལ་བཀོད་ཅིང་། བཟང་མོ་ཡང་སྔོན་ནས་རྒྱལ་བའི་བསྟན་པ་ལ་བྱ་བ་བྱས་པའི་ཚུལ་གྱིས་ལོ་རྒྱུས་གསུངས་ནས་བསྔགས་འོས་སུ་མཛད་ཚུལ་ལྟར་རོ། །མདོར་ན། ཚུལ་ཤིང་གི་དགོས་ཆེད་ནི་འདི་ལྟ་བུ་གདའ་ལགས། ཆོས་གོས་སྣམ་སྦྱར་ལ་མུ་ཏིག་འཚེམ་བུ་འདི་ལྟ་བུ་ངེས་པར་དགོས་པ་ཡིན་མིན་གྱི་ཕེབས་སྒོའི་ཆར། འདི་ནི་འདུལ་བའི་དགོངས་པ་མ་ཡིན་པར་བཤད་ཅིང་། བོད་དུ་འདི་བཞིན་དར་བ་ནི་རྒྱ་ནག་གི་རྒྱལ་པོས་རྗེ་ན་རིམ་སོགས་ལ་མུ་ཏིག་གི་སྣམ་སྦྱར་ཕུལ་བ་ལ་དཔེར་བྱས་ནས་དར་བ་ཡིན་པར་ཐོས་ལ། རིགས་པས་དཔག་ནའང་འདི་ལྟ་བུ་
དགོས་པར་མི་སེམས་ཏེ། རྒྱན་དང་མཆོར་མཛེས་ཀྱི་རྒྱུར་འགྲོ་བར་སྣང་བའི་ཕྱིར་རོ། །འདུལ་བའི་ལས་ཆོག་རྣམས་ལས་ཀྱང་། སྣམ་སྦྱར་སོགས་དངོས་སུ་གྲུབ་པ་མེད་ན་དེ་དག་གི་རྒྱུ་བྱིན་རླབས་བྱ་ཚུལ་གྱི་ཚིག་ཏུ་ཡང་འདི་ལྟར་གསུངས་ཏེ། བདག་མིང་འདི་ཞེས་བགྱི་བའི་ཆོས་གོས་སྣམ་སྦྱར་དུ་བྱིན་གྱིས་རླབ་བོ། །འཚལ་ལ་བར་ཆད་མ་བྱུང་ན། སྣམ་ཕྲན་དགུ་པ་ལ་སོགས་པར་བགྱིས་ཏེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བར་ཆད་མ་བྱུང་ན་དཀྲུའོ། །བརྐྱང་ངོ་། །དྲའོ། །བསྡེབ་སོ། །གཟུང་གདབ་བོ། །དྲུབ་པོ། ཁ་བསྒྱུར་རོ། །ཞེས་གསུངས་པ་ལྟར་ན། དྲུབ་ཚར་ནས་ཚོས་ཁ་བསྒྱུར་བར་གསུངས་ཚེ། དེ་ལྟར་ན་མུ་ མི་འཁྲུག་པའི་ཕྱིར་ཧབ་སྐུད་སོགས་ཀྱི་ རྒྱུའི་དྲི་མ་རྣམས་ ཚད་གཞལ་བའི་ཕྱིར་ རྣམ་ཕྲན་གླེགས་བུ་སོགས་སོ་སོར་ དེ་དག་མ་བུ་རྣམས་ འཚེམ་བུས་ ཚོས་ཁ་
ཏིག་འཚེམ་བུ་བྱས་ཀྱང་ཁ་དོག་སོགས་མི་རུང་བར་འགྱུར་བས་ཀྱང་མུ་ཏིག་འཚེམ་བུ་མི་དགོས་པར་གོའོ།། ༈ །།ཡང་འཕྲོས་དོན་གཅིག་ཏུ། ཤེར་སྙིང་ལས་སྔོན་ལྷ་དབང་པོས་ཤེར་ཕྱིན་གྱི་དོན་བསྒོམ་བགྱིས་པའི་མཐུས། བདུད་བཟློག་ཚུལ་གསུངས་པ་དེ་དང་། ལུང་གཞན་དག་ལས། ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་པ་འདི་གཉིས་འགལ་འདུ་ལྟ་བུ་དང་། མདོར་ན། ལྷ་རྣམས་ལ་ཟབ་མོ་སྟོང་པ་ཉིད་རྟོགས་པའི་སྐལ་བ་ཡོད་མེད་ཀྱི་དྲི་བ་ཕེབས་པའི་ཆ་ལ། ལྷ་རྣམས་ལ་ངེས་དོན་གྱི་སྐལ་བ་ཡོད་པ་ནི་ཤིན་ཏུ་མང་སྟེ། ཚངས་པ་བརྒྱ་བྱིན་སོགས་ནི་བསྐལ་བཟང་གིས་སངས་རྒྱས་ཐམས་ཅད་ལ་ཆོས་འཁོར་བསྐུལ་བ་པོར་སྨོན་ལམ་བཏབ་པའི་བྱང་སེམས་ཡིན་མོད་ལ། དེར་མ་ཟད་
འོ་སྐོལ་གྱི་སྟོན་པ་ཝཱ་ར་ཎཱ་སེར་བཀའ་དང་པོ་བདེན་བཞི་གསུངས་ཚེ། ལྔ་སྡེ་བཟང་པོས་ཆོས་མིག་རྡུལ་བྲལ་ཐོབ་ཅིང་། ལྷ་བརྒྱད་ཁྲི་པོས་བདེན་པ་མཐོང་ཚུལ་གསུངས་པས་ན། བདེན་པ་མཐོང་བ་ཞེས་པ་ནི་སེམས་ངོ་མཐོང་བའི་མིང་ཡིན་པའི་ཕྱིར་དང་། གཞན་ཡང་། བཅོམ་ལྡན་འདས་ལ་ལྷའི་རིགས་ཀྱི་ངེས་དོན་ཞུས་པའི་མདོ་ཡང་ཤིན་ཏུ་མང་སྟེ། དཔེར་ན། ལྷའི་བུ་བློ་གྲོས་རབ་བརྟན་གྱི་ཞུས་པའི་མདོ་ལས། ལྷའི་བུ། ཡང་དག་པ་ཅེས་བྱ་བ་ནི་ནམ་མཁའོ། ནམ་མཁའ་ནི་འགྲིབ་པའམ་འཕེལ་བའམ། འབྱུང་བའི་འཇིགས་པས་འཇིགས་པར་མི་འགྱུར་བ་དེའི་ཕྱིར་ནམ་མཁའ་ཡང་དག་པའོ། །ཡང་དག་པ་ནི་སྟོང་པའོ། །ཡང་དག་པ་ནི་དེ་བཞིན་ཉིད་དོ། །ཡང་དག་པ་ནི་ཆོས་ཀྱི་དབྱིངས་སོ། །ཅེས་སོགས་དང་། འཕགས་པ་
གཟུངས་ཀྱི་མདོར། ལྷའི་བུ། ཆོས་ཐམས་ཅད་ནམ་མཁའ་དང་འདྲ་བར་ཅིས་མངོན་ཞེ་ན། ལྷའི་བུ། ཆོས་ཐམས་ཅད་སེམས་ཙམ་ཏེ། སེམས་ནི་གཟུགས་མེད་པ། བསྟན་དུ་མེད་པ། ཐོགས་པ་མེད་པ་སྟེ། སེམས་དེ་ནི་སེམས་ཀྱི་ཆོས་ཀྱིས་བཙལ་ཡང་མི་རྙེད་དོ། །གང་ཚེ་ཡོངས་སུ་འཚོལ་བའི་སེམས་དང་འཚོལ་བ་པོ་ཡང་མི་དམིགས་སོ། །དེ་མ་དམིགས་པས་ཆོས་ཐམས་ཅད་མི་དམིགས་པར་བལྟ་བར་བྱའོ། །ཞེས་སོགས། མདོ་སྡེ་རྣམས་ཀྱི་ཁྲོད་ནས་ལྷ་ལ་སྟོང་ཉིད་གསུངས་པ་ནི་མཐའ་ཡས་ལ། སྔགས་ལུགས་སུ་ཡང་། གཙང་རིས་ཀྱི་འོག་མིན་ནི་རྒྱུད་སྡེ་གསུངས་པའི་གནས་ཀྱི་གཙོ་བོ་ཡིན་པར་གསར་རྙིང་ཐམས་ཅད་མཐུན་ལ། ཁྱད་པར་རྙིང་ལུགས་ཀྱི་རྒྱུད་ལུང་མང་པོར་ནི། ཀུན་བཟང་རྡོ་རྗེ་འཆང་ཉིད་གསང་བའི་བདག་པོར་སྤྲུལ་ནས་རྒྱུད་སྡེ་རབ་འབྱམས་གསུངས་པའི་འཁོར་དུ། ལྷ་གྲགས་ལྡན་ཕྱོགས་
སྐྱོངས། གནོད་སྦྱིན་སྐར་མདའ་གདོང་། ཀླུ་རྒྱལ་འཇོག་པོ། །སྲིན་པོ་ལང་ཀ་མགྲིན་བཅུ་བློ་གྲོས་ཐབས་ལྡན། དགེ་བསྙེན་ལི་ཙཱ་ཝི་དྲི་མེད་གྲགས་པ་དང་ལྔ་པོ་སྔོན་སྟོན་པ་ཉིད་ཀྱིས་ཀྱང་སྨིན་པར་མཛད་ཅིང་། སླད་མར། གསང་བདག་གི་གསང་སྔགས་ཀྱི་སྒོ་ནས་བྱང་ཆུབ་ལ་བཀོད་དེ། དེ་དག་རང་རང་སོ་སོའི་རིས་མཐུན་གྱི་གདུལ་བྱ་ལྷའི་རིགས་འཛིན་ཚོམ་བུ་འབུམ་དང་། དེ་བཞིན་དུ་ཀླུ། གནོད་སྦྱིན། སྲིན་པོ། མིའི་རིགས་འཛིན་ཚོམ་བུ་འབུམ་སོགས་གྲོལ་བར་མཛད་པའི་ལོ་རྒྱུས་མཆིས་པ་དང་། འཕྲོས་དོན་གཞན་ཡང་། གསང་སྔགས་རྙིང་མའི་ལུགས་ལ། ཤཱཀྱའི་དབང་པོས་མི་རྣམས་ཀྱི་དོན་མཛད་པ་ལྟར། ལྷ་རྣམས་ལ་དབང་པོ་བརྒྱ་བྱིན། ལྷ་མིན་རྣམས་ལ་ཐག་བཟང་རིས། བྱོལ་སོང་རྣམས་ལ་སེང་གེའི་རྒྱལ་པོ་རབ་བརྟན། ཡི་དྭགས་
རྣམས་ལ་ཁ་འབར་དེ་ཝ། དམྱལ་བ་ལ་གཤིན་རྗེ་ཆོས་རྒྱལ་རྣམས་སུ་བསྟན་པ་འགྲོ་དོན་མཛད་པ་ལ་བཅོམ་ལྡན་ཐུབ་པ་དྲུག་ཞེས་བརྗོད་པ་འདི་ལ། འབྲི་གུང་དཔལ་འཛིན་གྱིས་རྙིང་མ་དགག་པའི་རྩོད་ཡིག་ཏུ། འོ་ན་ཐུབ་པ་གཞན་ལྔ་པོས། མཛད་པ་བཅུ་གཉིས་གང་དུ་བསྟན། །ཞེས་སོགས་ཟེར་བ་ནི་ཆོས་ཀྱི་གོ་རྒྱ་མ་ཁྲོལ་བའི་གཏམ་དུ་ཟད་དེ། མིའི་གདུལ་བྱ་ཐུན་མོང་བའི་ངོར་ཤཱཀྱ་ཐུབ་ཀྱིས་མཛད་པ་བཅུ་གཉིས་ཀྱི་ཚུལ་བསྟན་པ་མ་གཏོགས། སངས་རྒྱས་ཐམས་ཅད་མཛད་པ་མཐུན་པའི་ངེས་པ་མེད་དེ། རྒྱལ་བ་བྱམས་པས་བཀའ་བ་སྤྱོད་པའི་མཛད་པ་མི་སྟོན་པར། ཁྱིམ་ནས་མངོན་པར་བྱུང་མ་ཐག་ཏུ་འཚང་རྒྱ་བར་བསྟན་པར་འགྱུར་བ་ལྟ་བུ་དང་། གང་ཞིག་མཛད་པ་བཅུ་གཉིས་བསྟན་ཡང་དེས་མི་འཐུལ་བའི་གདུལ་བྱའང་མང་མོད་དེ། ཤཱཀྱ་ཐུབ་ཉིད་ཀྱིས་
ཀྱང་། བྱ་གསོད་པའི་རྔོན་པ་སྭ་ཏ་ཞེས་པ་སྐུ་དངོས་ཀྱི་འདུལ་བར་མ་གྱུར་བ་ལ། ཁོ་རང་འདྲ་བའི་རྔོན་པར་སྤྲུལ་ཏེ་ཐབས་ཀྱིས་བཏུལ་བའི་ལོ་རྒྱུས་བཞིན། ཐུབ་པ་གཞན་ལྔ་པོ་འདི་དག་ཀྱང་འགྲོ་བ་ཐ་དད་པ་དེ་རྣམས། རང་རང་དང་རིགས་མཐུན་པའི་གཙོ་བོར་སྤྲུལ་ནས་གང་འདུལ་གྱི་མཛད་འཕྲིན་སྟོན་པ་མ་གཏོགས། ཐམས་ཅད་ལ་མཛད་པ་བཅུ་གཉིས་ཁོ་ནས་འདུལ་བ་མ་ཡིན་པ་དང་། འོན་ཀྱང་ད་ལྟ་དཀྱིལ་འཁོར་གྱི་ལྷར་བཞུགས་པའི་ཚེ་ནི། ཐུབ་པ་དྲུག་ཀ་སྤྲུལ་པ་སྐུའི་ཆ་བྱད་མཐུན་པ་ལས་སྐུ་མདོག་དང་ཕྱག་མཚན་ཐ་དད་པར་བསྟན་པ་ནི་ཐུན་མོང་མིའི་གདུལ་བྱ་དང་བ་འདྲེན་བྱེད་ཀྱི་ཆེད་དུ་ཐབས་ལ་མཁས་པའི་མཛད་པའོ། །ཞེས། འཕྲོས་དོན་དུ་གསོལ་བ་ལགས་ཤིང་།། ༈ །།སྐབས་དོན་དངོས་ལ། གོང་གི་འཕྲོ་ལྟར་ལྷ་
རྣམས་ལ་ཟབ་མོ་སྟོང་ཉིད་རྟོགས་པའི་སྐལ་བ་ཡོད་མེད་ཀྱི། གོང་དུ་སྨོས་པའི་ལུང་དེའི་དགོངས་པ་ནི་དལ་འབྱོར་རྙེད་དཀའ་བཤད་པའི་སྐབས་དོན་ཡིན་ཚེ། ཇི་སྐད་དུ། བདེར་གཤེགས་ལམ་སྟོན་འགྲོ་བའི་འདྲེན་པར་འཆས་གྱུར་བ། སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པའི། ལམ་དེ་ལྷ་དང་ཀླུ་ཡིས་མི་རྙེད་ཅེས་སོགས་གསུངས་པའི་ཚིག་འདི་དག་ནི། སློབ་དཔོན་ཙནྡྲ་གོ་མིས་རང་གིས་སློབ་མ་རྒྱལ་པོའི་བུ་ཞིག་ཆོས་ལས་ཕྱིར་ལོག་སྟེ་སྡིག་པ་སྤྱོད་པ་ལ་དེ་ལས་བཟློག་པའི་སླད་དུ་སྤྲིང་ཡིག་ཏུ་མཛད་པའི་བསྟན་བཅོས་སློབ་སྤྲིང་ཞེས་གྲགས་པ། ཇོ་བོའི་ཆོས་ཆུང་བརྒྱད་ཅུའི་ནང་དུ་བཞུགས་པ་དེའི་ཚིག་ཡིན་པ་དང་། ཚེས་གཅིག་གི་བླ་ན་མེད་པའི་བྱང་ཆུབ་ཐོབ་པར་བྱེད་པའི་རྟེན་ནི་དལ་འབྱོར་
གྱི་མི་ལུས་ཁོ་ན་མ་གཏོགས། འགྲོ་བ་གཞན་གྱིས་དེ་ལྟ་བུ་ཐོབ་པར་མི་ནུས་པའི་གཏན་ཚིག་ཏུ་མཛད་པར་གདའ་ཞིང་། དེ་དང་མཚུངས་པར། སྤྱོད་འཇུག་བསྔོ་བའི་ལེ་འུར་ཡང་། ལྷ་ལས་ལྷག་པའི་ལུས་ཐོབ་ནས། ཞེས། འཁོར་ལོ་བསྒྱུར་བ་དང་སངས་རྒྱས་གཉིས་ཀ་མི་ལུས་རིན་པོ་ཆེ་ལས་གཞན་པའི་རྟེན་ལ་མི་འབྱུང་ཕྱིར། ལྷ་ལས་ལྷག་པ་ཅེས་པའི་མཐའ་ཚིག་ཏུ་མཛད་པར་མདའ་ལགས། ཡང་རེ་ཤིག་གི་ཚེ་ཉིད་ཀྱི་ཕེབས་སྒོར། ཐེག་པ་གསུམ་པོ་ལ་བསྙེན་རྫོགས་སོ་སོར་ཡོད་དམ་མེད། ཅེས་གསུངས་པའི་ཆར། སྤྱིར་བསྙེན་རྫོགས་ཀྱི་སྐད་དོད་དུ། ཨུ་པ་སམྶནྣ་ཞེས་བྱ་སྟེ། བོད་སྐད་དུ་ཨུ་པ་ནི་ཉེ་བ། སམྶནྣ་ནི་རྫོགས་པ་ཅེས་བྱ་བ་ཡིན་པས། བླ་ན་མེད་པ་རྫོགས་པའི་བྱང་ཆུབ་ལ་ཉེ་བར་བསྙེན་དོན་གྱི་
མིང་དང་ངེས་ཚིག་ཡིན་པར་གསུངས་ཕྱིར། སངས་རྒྱས་ཀྱི་བསྟན་པའི་རིམ་པ་གང་ལ་སྦྱར་ཡང་དོན་གྱིས་ནི་འབྱོར་མོད་ཀྱང་། གནས་སྐབས་ཡོངས་གྲགས་སུ་ནི་ཉན་ཐོས་རང་རྒྱལ་གྱི་སོ་ཐར་སྡེ་སྣོད་ལ་མ་གཏོགས། ཐེག་ཆེན་བྱང་སེམས་ཀྱི་སྡོམ་པ་སོགས་ལ་བསྙེན་རྫོགས་ཀྱི་ཐ་སྙད་ནི་མི་འབྱུང་མོད། །ཡང་། གང་ཟག་གི་དབང་དུ་བགྱིས་ན་ནི། ཉན་རང་རྣམས་ཐེག་དམན་གྱི་བསྙེན་རྫོགས་ཡིན་ཕྱིར་བསམ་པ་རྒྱ་ཆུང་བས། མི་དང་མི་མིན་གྱི་གནོད་པ་ལས་སྐྱབས་ཕྱིར་རམ། ངན་འགྲོའི་སྡུག་བསྔལ་ལ་འཇིགས་པའི་བསམ་པས་ཚུལ་ཁྲིམས་བསྲུང་བ་ནི་འཇིགས་སྐྱབས་ཀྱི་ཚུལ་ཁྲིམས་དང་། ལྷ་མིའི་བདེ་འབྲས་ཐོབ་ཕྱིར་བསྲུང་བ་ལེགས་སྨོན་གྱི་ཚུལ་ཁྲིམས་དེ། འདི་དག་གིས་ནི་བླ་མེད་བྱང་ཆུབ་ཐོབ་པའི་རྒྱུར་མི་འགྱུར་ཕྱིར། མ་དག་པའི་ཚུལ་ཁྲིམས་སམ། ལོགས་པའི་ཚུལ་ཁྲིམས་ཀྱི་གྲངས་སུ་
གཏོགས་ཏེ། སྔོན་འཕགས་པ་ཅུང་དགའ་བོའི་ལོ་རྒྱུས་ལྟ་བུ་ཡིན་ལ། དིང་སང་ཡང་རྙེད་གྲགས་བསྐུར་བསྟི་འདོད་ཕྱིར་རམ། ལྟོ་ཕྱིར་དང་གྲལ་ཕྱིར་བསྙེན་རྫོགས་བྱེད་པ་དག་ནི་བསྙེན་པར་རྫོགས་པ་ཚད་ལྡན་དུ་ག་ལ་འགྱུར་ཏེ། བསྙེན་རྫོགས་ཀྱི་ཟོལ་དང་དགེ་སློང་གི་གཟུགས་བརྙན་ཙམ་དུ་ཟད་མོད། ཡང་རང་ཉིད་གཅིག་པུ་བླ་མེད་བྱང་ཆུབ་ཐོབ་འདོད་ཀྱི་བསམ་པས་བསྙེན་པར་རྫོགས་པ་ཡང་ངེས་འབྱུང་གི་ཚུལ་ཁྲིམས་དངོས་ཡིན་ནའང་གཞན་དོན་གྱི་བསམ་པ་རྒྱ་ཆེན་དང་མི་ལྡན་པས་ན་ཐེག་དམན་གྱི་བསྙེན་རྫོགས་སུ་འགྱུར་རོ། །གང་ཞིག་མཁའ་མཉམ་གྱི་སེམས་ཅན་ཐམས་ཅད་བླ་མེད་བྱང་ཆུབ་ཀྱི་གོ་འཕངས་ལ་འགོད་ཕྱིར་སྡོམ་པའི་ཚུལ་ཁྲིམས་ཡང་དག་པར་བླངས་ཏེ་བསྲུང་བ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའམ། ཐེག་ཆེན་བྱང་སེམས་
ཀྱི་བསྙེན་རྫོགས་སུ་ཡང་དོན་གྱིས་འགྱུར་ལ། རྫོགས་པའི་བྱང་ཆུབ་ཀྱི་རྒྱུ་ཡོངས་སུ་འགྱུར་བ་དང་། འདིས་ནི་བྱང་སྡོམ་དང་སྔགས་སྡོམ་ཀུན་གྱི་རྟེན་གཞི་ཉིད་དུ་འགྱུར་བ་སྟེ། མདོར་ན་ཐེག་པ་གསུམ་གྱི་བསྙེན་རྫོགས་ཀྱི་ཁྱད་དོན་ནི་དེ་ལྟ་བུ་ལགས། ཡང་བསྙེན་རྫོགས་ལ། ཡེ་ཤེས་ཁོང་ཆུད་ཀྱི་དང་། ཚུར་ཤོག་གི་དང་། ད་ལྟར་གྱི་ཆོ་ག་དང་གསུམ་དུ་བཤད་པའི་དབྱེ་དོན་ཇི་ལྟར་ཡིན་གསུངས་པ་ནི།། ༈ །།འདི་སྐབས་ལ་དེ་གསུམ་པོར་མ་ཟད་རྣམ་གྲངས་བཅུ་ཡོད་དེ། གང་ཞེ་ན། སངས་རྒྱས་རྣམས་དང་རང་རྒྱལ་རྣམས་ནི་མཁན་སློབ་སོགས་གཞན་ལ་མ་བལྟོས་པར་བྱང་ཆུབ་སྔོན་དུ་མཛད་པས་ན། རང་བྱུང་གི་བསྙེན་རྫོགས་ཅེས་བྱ་བ་དང་། ༡ ལྔ་སྡེ་བཟང་པོ་ནི་སྔོན་ནས་སྨོན་ལམ་གྱི་སྟོབས་དང་སྟོན་པའི་བྱིན་རླབས་ཀྱི་མཐུས་སྐད་ཅིག་ཙམ་ལ་མཐོང་ལམ་མངོན་དུ་གྱུར་པས་ན། ཡེ་ཤེས་ཁོང་ཆུད་དམ་
ངེས་ཞུགས་ཀྱི་བསྙེན་རྫོགས་དང་། ༢ གྲགས་པ་སོགས་ཉེ་བའི་ལྔ་སྡེ་རྣམས་ལ་སྟོན་པས་ཚུར་ཤོག །ཁྱོད་ཀྱིས་ཚངས་པར་སྤྱད་པ་ལེགས་པར་སྤྱོད་ཅིག །ཅེས་གསུངས་པ་ཙམ་གྱི་སྡོམ་ལྡན་དུ་གྱུར་ཕྱིར། ཚུར་ཤོག་གི་བསྙེན་རྫོགས་དང་། ༣ འོད་སྲུངས་ཆེན་པོས་ཁྱོད་ནི་ཁོ་བོའི་སྟོན་པ་ཡིན་ལ། ཁོ་བོ་ནི་ཁྱོད་ཀྱི་ཉན་ཐོས་སོ། །ཅེས་པ་ཙམ་གྱི་སྡོམ་པ་རྒྱུད་ལ་སྐྱེས་པའི་ཕྱིར། ཁས་བླངས་ཀྱི་བསྙེན་རྫོགས་དང་། ༤ འཆར་དགའ་སོགས་བཟང་སྡེ་དྲུག་ཅུའི་ཚོགས་རྣམས་ནི་སྐྱབས་སུ་འགྲོ་བས་ཐོབ་པའི་བསྙེན་རྫོགས་དང་། ༥ སྐྱེ་དགུའི་བདག་མོ་སོགས་ལྔ་བརྒྱས་ལྕི་བའི་ཆོས་བརྒྱད་ཁས་བླངས་པའི་སྙེན་རྫོགས་དང་། ༦ འདིའི་ལྕི་ཆོས་བརྒྱད་གང་ཞེ་ན། དགེ་སློང་ཕའི་དགེ་འདུན་ལས་བསྙེན་རྫོགས་ལེན་པ། ཟླ་བ་ཕྱེད་ཕྱེད་བཞིན་དེའི་གདམ་ངག་ཞུ་བ། དགེ་སློང་ཕའི་དགེ་འདུན་ལ་དབྱར་
ཁས་ལེན་པ། ཕ་མ་གཉིས་ཀའི་དགེ་འདུན་ལས་དགག་དབྱེ་བྱེད་པ། ལྕི་ཆོས་ལས་འདས་ན་གཉིས་ཀའི་དགེ་འདུན་མགུ་བར་སྤྱོད་པ། དགེ་སློང་ལ་ཚུ་འཆལ་མི་གླེང་བ་ཅོ་འདྲི་སོགས་མ་གུས་པ་མི་བྱེད་པ། དགེ་སློང་གསར་བུ་ཚུན་ཆོད་ལ་གུས་ཕྱག་འཚལ་བ་དང་བརྒྱད་ཁས་ལེན་པའོ། །ཁྱིམ་བདག་ལེགས་བྱིན་ལ་དྲི་བ་མཛད་པས་བརྙེས་པའི་བསྙེན་རྫོགས་དང་། ༧ མཉན་ཡོད་ཀྱི་གྲོང་ན་དད་ལྡན་མཆོད་སྦྱིན་མ་བསྙེན་པར་རྫོགས་འདོད་ཀྱང་། ཕ་མས་སྟོན་པའི་དྲུང་དུ་མ་བཏང་བས་སྡུག་བསྔལ་བར་གྱུར་བ་ལ་ཐུགས་རྗེས་གཟིགས་ནས་དགེ་སློང་མ་ཨུརྤ་ལའི་མདོག་ལ་འཕྲིན་བརྒྱུད་པའི་སྒོ་ནས་བསྙེན་པར་རྫོགས་པ་སྟེ། ༨ དེ་ལྟར་བརྒྱད་པོ་དེ་ལ་སྔོན་ཆོག་བརྒྱད་དུ་གྲགས་པ་ནི། སྔོན་གྱི་གང་ཟག་དེ་དག་བསོད་ནམས་སྨིན་པ་ཤས་ཆེ་ཞིང་སྒྲིབ་པ་ཤས་ཆུང་བའི་མཐུ་དང་སྟོན་པ་ཉིད་ཀྱི་ཐུགས་རྗེའི་མཐུས་སྡོམ་པ་འབོག་པའི་
ཆོ་ག་ལ་མ་ལྟོས་པར་བསྙེན་རྫོགས་ཐོབ་པ་དེ་ལ་སྔོན་ཆོག་ཅེས་གྲགས་ལ། སླད་ཀྱི་གང་ཟག་ཕལ་མོ་ཆེ་ནི་སྨིན་པ་ཤས་ཆུང་ལ་སྒྲིབ་པ་ཤས་ཆེ་ཉོན་མོངས་པ་ཆེས་རག་པ་ལ་དགོངས་ནས། མཁན་སློབ་དགེ་འདུན་དང་བཅས་པའི་འདུས་པའི་དབུས་སུ་བསྙེན་པར་རྫོགས་དགོས་ཏེ། དགོས་པ་ནི་སྡོམ་པ་སྲུང་བའི་དཔང་པོའི་རྒྱུས་ཡོད་ལྟ་བུའི་ཚུལ་ཡིན་པ་དང་། དེ་དག་གི་གྲངས་ཀྱང་འཛོམ་ན་ནི་དགེ་སློང་གི་དགེ་འདུན་བརྒྱ་སྟོང་ཁྲི་འབུམ་ཇི་ཙམ་མང་བ་དང་། མཐར་ཡང་ཡུལ་དབུས་སུ་ནི་དགེ་འདུན་བཅུའི་གྲངས་ཚང་བ་དང་ཐ་ཁོབས་རྣམས་སུ་གཞན་མ་འཛོམ་ཀྱང་ལྔའི་གྲངས་ཚང་བའི་དབུས་སུ་ད་ལྟར་གྱི་ཆོ་གའི་སྒོ་ནས་བསྙེན་པར་རྫོགས་དགོས་ཤིང་། ད་ལྟར་གྱི་ཆོ་ག་ལ་མངོན་གྱུར་བཅུ་ཚང་
བ་དགོས་པའི་ཚུལ་ནི། འདུལ་བ་གཞུང་དམ་པ་ལས། སངས་རྒྱས་ཆོས་དང་དགེ་འདུན་དང་། །མཁན་པོ་སློབ་དཔོན་བསྙེན་རྫོགས་དང་། །ཡོ་བྱད་ཡོངས་སུ་དག་པ་དང་། །གསོལ་དང་ལས་ནི་མངོན་སུམ་མོ། །ཞེས་བཅུ་པོ་ཚང་བའི་སྒོ་ནས་བསྙེན་རྫོགས་ཀྱི་དངོས་པོར་བསྒྲུབ་ཚུལ་འདི་ནི་སྟོན་པ་ཉིད་ཀྱི་སྐུ་ཚེའི་སྨད་ནས་རིམ་གྱིས་དར་བ་ལགས།། ༈ །།བསླབ་པ་ཚིག་རྫོགས་ཅེས་བྱ་བའི་དགོས་དོན་གང་ཡིན་གསུངས་བ། འདི་ལ་དུས་དང་གང་ཟག་གཉིས་ལས། དུས་ཀྱི་དབང་དུ་ན། རབ་ཏུ་བྱུང་བའི་སྡོམ་པ་ཞུ་བ་པོ་དེ་ཉིད་ན་སོ་གཞོན་ནུ་ལ་ཆོས་སྒོར་ཞུགས་པ་ལྟ་བུའི་ཚེ་ན། ལོ་བདུན་མན་ཆད་ནི་བསམ་པ་མ་ཞུགས་པས། སྡོམ་པ་བསྲུང་བྱའི་གོ་རྟོགས་འཇགས་པ་ཡང་དཀའ་བས་ན། བདུན་ཡན་ཆད་ལ། དགེ་བསྙེན་དུ་སྒྲུབ་ཅིང་། བཅོ་ལྔ་ནས་
དགེ་ཚུལ་དང་། ཉི་ཤུ་ལོན་ཚེ་བསྙེན་རྫོགས་སུ་བྱེད་པ་ནི་ན་ཚོད་ཀྱི་དུས་དང་བསྟུན་པའི་སྡོམ་པ་རིམ་ནོད་དུ་འགྱུར་བ་ཡིན་མོད་ཀྱི། ཡང་། རྗེ་སྒམ་པོ་པས་བསླབ་པ་ཆིག་རྫོགས་སུ་མཛད་པ་ལྟར། ལོ་ཡང་ཉི་ཤུ་ཡན་ལ་སླེབ་ཅིང་སྤང་བླང་གི་གནས་ལ་གོ་རྟོགས་འཇགས་པ་ཞིག་ཡིན་ན་ཉིན་གཅིག་ལ་དགེ་བསྙེན་དགེ་ཚུལ་དགེ་སློང་གི་བསླབ་པ་གསུམ་ག་ལེན་པ་ན་ནི་སྟན་ཐོག་གཅིག་ཏུ་བསླབ་པ་ཆིག་རྫོགས་སུ་འགྱུར་བ་ཡིན་ནོ།། ༈ །།གང་ཟག་གི་དབང་དུ་ན་ཕྱག་བཞེས་ཀྱི་སྲོལ་ཐ་དད་ཡོད་དེ། ཇོ་གདན་ཚོགས་པ་ནས་བཀའ་རྒྱུད་རིན་པོ་ཆེ་ལ་བརྒྱུད་པའི་ཕྱག་བཞེས་ལྟར་ན། བསྙེན་པ་རྫོགས་པ་ཞུ་མཁན་བརྒྱ་སྟོང་སོགས་ ཇི་ཙམ་མང་བ་ཡོད་པའི་ཚེ་ནའང་ཕན་ཚུན་མ་རེག་པར་འདུག་པ 
་ལ། ལས་སློབ་ཀྱིས་སོ་སོའི་
བར་མཚམས་རས་ཡུག་གམ་ཐག་པ་ལྟ་བུས་བཅད་ནས། སྡོམ་པ་འབོག་ཆོག་ཚར་གཅིག་པུ་དེས་སློབ་མ་དེ་ཐམས་ཅད་དུས་གཅིག་ལ་བསླབ་པ་ཆིག་རྫོགས་སུ་འགྱུར་བར་བཞེད་པས། བསྙེན་རྫོགས་ཐག་དྲས་མར་གྲགས་པའི་ཕྱག་བཞེས་མཛད་ལ། ཡང་ས་དགེ་ལྡན་སོགས་ཕལ་ཆེར་གྱི་ཕྱག་སྲོལ་ལ་ནི། སློབ་མ་རེ་རེ་བཞིན་སྡོམ་པའི་ལས་ཆོག་ཚར་རེ་རེ་རྫོགས་པར་མ་བྱས་ན་མི་རུང་ཞིང་། རེ་རེ་ལ་ཆོ་ག་ཚར་རེ་རེ་ཡོངས་རྫོགས་སུ་བྱས་པ་དེ་ལ་བསླབ་པ་ཆིག་རྫོགས་ཅེས་བྱ་བ་ཡིན་པར་བཞེད་དོ། ཡང་ངག་སྒྲོས་ཤིག་ལ། མཐའ་འདུལ་ཡང་འདུལ་གྱི་བསྙེན་རྫོགས་ཅེས་པའི་རྒྱུན་ཡོད་པར་ཐོས་པས་ཇི་ལྟར་ཡིན་གསུང་བ། དེ་ལྟ་བུ་ཡོད་པ་ནི་བདག་གིས་མ་ཐོས་ལ། སྤྱིར་བོད་ཡུལ་འདིར་བསྟན་པ་སྔ་དར་གྱི་དུས་སུ་མཁན་པོ་ཞི་བ་
འཚོ་ནས་སད་མི་མི་བདུན་གྱིས་ཐོག་དྲངས་རབ་ཏུ་བྱུང་བའི་སྡེ་རྒྱ་ཆེར་བྱུང་བ་ཐམས་ཅད་ནི་གླང་དར་གྱི་བསྟན་པ་མིང་མེད་དུ་བཏང་བའི་དབང་གི་རྒྱུན་ཆད་ལ། དེ་དག་གི་ཁྲོད་ནས་མཁས་པ་གཡོ་སྨར་གཙང་གསུམ་པོ་མདོ་ཁམས་སུ་ཐར་བའི་བཀའ་དྲིན་ལས། བླ་ཆེན་དགོངས་པ་རབ་གསལ་ནས་བརྒྱུད་དེ་དབུས་གཙང་གི་མི་བཅུའམ་དྲུག་ཏུ་དྲག་པ་ལས་འཕེལ་བ་ལས་སྨད་འདུལ་དུ་གྲགས་པ་དང་། མངའ་རིས་སྟོད་དུ་ལྷ་བླ་མ་ཁུ་དབོན་གྱིས་པཎ་ཆེན་དྷརྨཱ་པཱ་ལ་སྤྱན་དྲངས་ཤིང་སློབ་མ་པཱ་ལ་རྣམ་གསུམ་སོགས་ལས་རིམ་པར་བརྒྱུད་པ་སྟོད་འདུལ་དང་། ཕྱིས་སུ་ཁ་ཆེ་པཎ་ཆེན་ཤཱཀྱ་ཤྲཱི་བྱོན་ནས་སློབ་མ་བྱང་རྡོར་གཉིས་ལས་བརྒྱུད་དེ་ཚོགས་སྡེ་བཞི་ནས་ཆོས་རྒྱུད་ཕལ་ཆེར་ལ་འཕེལ་བ་པཎ་ཆེན་སྡོམ་
རྒྱུན་དང་གསུམ་པོ་འདི་ཡོངས་གྲགས་དང་། དེ་དག་ལས་སྟོད་འདུལ་ནི་དིང་སང་རྒྱུན་ཆད་པ་ལྟར་གྱུར་ལ། སྨད་འདུལ་ཡང་མདོ་ཁམས་ཉིད་དུ་ཀ་ཐོག་སོགས་ལ་ནི་ད་ལྟའི་བར་དུ་རྒྱུན་མ་ཆད་མོད་ཀྱང་། བོད་ཡུལ་དབུས་འདིར་ནི་པཎ་ཆེན་སྡོམ་རྒྱུན་ཁོ་ན་དར་ཆ་ཆེ་བའི་ཚུལ་འདི་བཞིན་འཕྲོས་ཞུས་ལགས་ཤིང་། གོང་གི་མཐའ་འདུལ་ཡང་འདུལ་གྱི་བསྙེན་རྫོགས་ཅེས་པའི་སྒྲོས་དེ་གཞན་འོང་དོན་མ་མཆིས་ཏེ། སྔོན་དབུས་གཙང་མི་བཅུ་བྱོན་པའི་མཇུག་ཏུ། འ་ཞ་ཡེ་ཤེས་གཡུ་དྲུང་ཞེས་པས་མདོ་ཁམས་སུ་སྡོམ་པ་ཞུར་ཕྱིན་ནས། བླ་ཆེན་དགོངས་པ་རབ་གསལ་གྱི་སློབ་མ་ཀྲེ་བོ་མཆོག་གི་བླ་མ་ཞེས་པ་ལ་སྡོམ་པ་ཞུས་པས། ཁོང་གི་ཞལ་ནས། ངས་ཆུ་གཏོར་ཞིག་བཏང་ནས་དེ་རྗེས་ཁྱོད་ལ་སྡོམ་པ་
སྦྱིན་ནོ་ཞེས་ཞལ་གྱིས་བཞེད་ཏེ་ཆུ་གཏོར་མཛད་འཕྲོ་ལ་སྐུ་གཤེགས་པས། འ་ཞས་ཞལ་བཞེས་གནང་བ་དེ་ཀས་སྡོམ་པ་ཐོབ་པར་བཟུང་ནས་ཡར་ལོག་སྟེ། སྡོམ་རྒྱུན་ཆུ་གཏོར་མར་གྲགས་པའི་སློབ་རྒྱུད་འཕེལ་བ་དང་། ཡང་། འབྲེ་སྟོན་གཞོན་ནུ་ཚུལ་ཁྲིམས་ཀྱི་ཁམས་སུ་ཕྱིན་ནས་མཁན་པོ་ཡ་ཟི་བོན་སྟོན་ལ་སྡོམ་པ་གནང་བར་ཞུས་པས། དེ་ལྟར་བས་ཞེས་ཞལ་བཞེས་མཛད་འཕྲོར་སྐུ་ཐིམ་པས། འབྲེ་སྟེན་གྱི་དེ་ཀ་ལ་སྡོམ་པ་ཐོབ་པར་བསམ་ཏེ་སློབ་མ་བསྐྱངས་པས། དོར་བས་ཀྱི་སྡོམ་རྒྱུན་དུ་གྲགས་པ་བྱུང་བ་སྟེ། དེ་ལྟར་འ་འབྲེ་གཉིས་ཀྱི་སྡོམ་རྒྱུན་དེ་གཞན་མ་རྣམས་དང་མི་གཅིག་པས་དེ་འདྲ་ཞིག་ལ་བརྟེན་ནས་ངག་སྒྲོས་དེ་བྱུང་བ་ཡིན་ནམ་བསམ་པ་བླུན་ཚོད་ལགས།
གཞན་ཡང་ཉིད་ཀྱིས། དུས་གསུམ་གྱི་རྒྱལ་བ་སྲས་བཅས་མཐའ་དག་གིས་ཐུགས་བསྐྱེད་སྨོན་ལམ་མགྲིན་གཅིག་པར་འཁོར་བའི་རྒྱ་མཚོ་སྟོང་པའི་ཆེད་ཁོ་ན་མཛད་བཞིན་དུ་འཁོར་བ་སྟོངས་དུས་མ་མཆིས་པའི་རྒྱུ་མཚན་གང་ཡིན་པ་དང་། དེ་ལའང་དགེ་བའི་མཐུས་འཁོར་བ་སྟོངས་ཞིང་མི་དགེ་བས་འཁོར་བ་འཕེལ་བར་འགྱུར་བའི་རྒྱུ་མཚན་ལ་དཔག་ན། བསྐལ་པ་རྙིགས་མའི་འགྲོ་བ་རྣམས་ཀྱི་བྱེད་སྤྱོད་ཀྱི་མཐུ་ལས་འཁོར་བ་སྟོངས་པ་ལྟ་ཞོག་ཁ་བྲི་བ་ཙམ་ཡང་འོང་དོན་མེད་པ་འདི་ལྟ་ན་རྒྱལ་བ་རྣམས་ཀྱི་སྨོན་ལམ་ཐུགས་རྗེའི་ནུས་པ་ཡང་ཇི་ལྟར་ཡིན་པ་སོགས་ཀྱི་དྲི་བ་གནང་བའི་ཆ་ལ། དེ་ཡང་རྒྱལ་བ་རྣམས་ཀྱི་སྨོན་ལམ་དང་ཐུགས་རྗེའི་ནུས་སྟོབས་ནི་བསམ་གྱིས་མི་ཁྱབ་བརྗོད་ཀྱི་མི་ལང་མོད་ཅིང་། མཛད་པའི་འཕྲིན་ལས་ལས་
ཀྱང་བདག་གཞན་ཐ་དད་དུ་འཛིན་པའི་རྟོག་པའམ་བྱ་བྱེད་སྩོལ་རྟོག་གི་བློ་མི་མངའ་ཡང་། རྩོལ་མེད་ཐུགས་རྗེའི་ཤུགས་ཀྱིས་གཞན་ཕན་ནི་མི་འབྱུང་བའི་དུས་སྐད་ཅིག་ཙམ་ཡང་མ་མཆིས་ལ། གདུག་ཡུལ་ཀྱང་ཕྱོགས་དང་རིགས་སུ་ཆད་པ་ནི་སྐྲ་རྩེ་བརྒྱར་བཤགས་པའི་ཁྱོན་ཙམ་དུའང་མ་ལུས་ཤིང་། ནམ་མཁས་གར་ཁྱབ་ཐུགས་རྗེའི་ཕྲིན་ལས་ཀྱི་ཁྱབ་པ་ནི་སྐུ་གསུང་ཐུགས་ཡོན་ཏན་འཕྲིན་ལས་མི་ཟད་རྒྱན་འཁོར་གྱི་མཚན་ཉིད་ལགས་ནའང་། སེམས་ཅན་གྱི་ཁམས་ཀྱང་མཐའ་དང་གཏིང་མེད་ཅིང་ཟད་པའི་སྐབས་མེད་པ་ཉིད་དང་། སེམས་ཅན་གྱི་གར་ཁྱབ་ལས་དང་ཉོན་མོངས་པས་ཁྱབ་ལ། ལས་ཉོན་གྱི་གར་ཁྱབ་སྡུག་བསྔལ་གྱི་ཁྱབ་ཀྱང་། སྡུག་བསྔལ་ལ་སྡུག་བསྔལ་དུ་མ་ཤེས་པས་བདེ་བར་འཁྲུལ་ཏེ། བྱིས་པ་བཙན་དུག་གི་རོ་མངར་བ་ལ་ཆགས་ནས་རྐུ་ཞིང་ཟ་བར་
བྱེད་པ་དེ་ལྟ་བུ་སྟེ། སྡུག་བསྔལ་གྱི་རྒྱུ་མི་སྤོང་བར་ནན་གྱིས་མི་དགེ་བ་ལ་འབད་པའི་མཐུས། འབྲས་བུ་འཁོར་བ་ངན་སོང་གི་སྡུག་བསྔལ་མི་འབྱུང་ཐབས་མེད་དང་། དེ་དག་གི་བླངས་དོར་སྟོན་པའི་གདམས་པ་ཆོས་ཀྱི་སྒོ་ཇི་ཙམ་ཞིག་གསུངས་ཀྱང་སྐལ་མེད་ཀྱེ་བོ་དག་རྣ་བའི་བ་སྤུ་འགུལ་བ་ཙམ་ཡང་མི་ནུས་པར་ད་དུང་འཁོར་བར་འཁྱམས་ཐབས་འབའ་ཤིག་ལ་རེས་སམ་པ་འདི་ནི། རྒྱལ་བ་རྣམས་ཐུགས་རྗེ་ཆུང་བའི་འགྲོ་དོན་མི་མཛད་པ་མ་ཡིན་ཏེ། སེམས་ཅན་རྣམས་མ་རིག་འཁྲུལ་པའི་བག་ཆགས་ཚན་ཆེས་པས་ལན་པ་ཉིད་དེ། མངོན་རྟོགས་རྒྱན་ལས། ལྷའི་རྒྱལ་པོས་ཆར་ཕབ་ཀྱང་། །ས་བོན་མི་རུངས་མི་འཁྲུངས་ལྟར། །སངས་རྒྱས་རྣམས་ནི་བྱོན་གྱུར་ཀྱང་། །སྐལ་པ་མེད་པས་བཟང་མི་མྱོང་། །ཞེས་གསུངས་པས། ཉི་མའི་འོད་ལ་ཕྱོགས་རིས་མེད་ཀྱང་བྱང་ལྟའི་
ཕུག་པ་ལ་ཉི་མ་མི་འབྱུང་བ་དེ་ནི་ཉི་མའི་སྐྱོན་མ་ཡིན་ཏེ། བྲག་ཕུག་ཉིད་ཁ་ལྟ་ཕྱོགས་ཉེས་པའི་སྐྱོན་ཡིན་པ་ལྟ་བུའོ། །དེ་བས་ན་རྒྱལ་བ་རྣམས་ནི་མཁྱེན་པ་གཉིས་དང་ལྡན་པས་གདུལ་བྱའི་ཁམས་མཐའ་དག་མི་མཁྱེན་པ་མི་སྲིད། མཁྱེན་བཞིན་དུ་འགྲོ་བའི་དོན་མི་མཛད་པ་མི་སྲིད། མཛད་པ་དེ་ཡང་དོན་མེད་ཆུད་ཟོས་སུ་འགྱུར་མི་སྲིད་པ་ཡིན་ཏེ། གདུལ་བྱའི་སེམས་ཅན་དེ་དག་གི་སྐལ་པ་ཇི་ལྟ་བ་དེ་དང་མཐུན་པའི་དོན་རླབས་པོ་ཆེ་རྟག་ཏུ་མཛད་པ་ཡིན་མོད་ཀྱང་། འཁོར་བ་སྟོངས་པར་མི་འགྱུར་བ་ནི་འཁོར་བའི་རྒྱ་མཚོ་ལ་མཐའ་མེད་པའི་ཕྱིར་ཏེ། དཔེར་ན། སྔོན་འཕགས་པ་སྤྱན་རས་གཟིགས་ཀྱིས་འོད་དཔག་མེད་སོགས་སངས་རྒྱས་བརྒྱད་ཁྲི་བཞི་སྟོང་གི་སྤྱན་སྔར་སེམས་བསྐྱེད་ཅིང་དམ་བཅས་ཏེ། འཁོར་བ་མ་སྟོངས་
ཀྱི་བར་དུ་སེམས་ཅན་གྱི་དོན་བྱེད་པ་ལ་ངལ་བའམ་སྐྱོ་དུབ་ཀྱི་དབང་དུ་གཏོང་ན་བདག་གིས་མགོ་ཚལ་པ་བཅུ་དང་ལུས་དུམ་བུ་སྟོངས་འགས་པར་གྱུར་ཅིག ཅེས་དམ་བཅས་ནས། འཁོར་བ་དོང་ནས་ལན་གསུམ་སྤྲུག་ཀྱང་སེམས་ཅན་ཉུང་དུ་མ་སོང་བས་ཐུགས་མུག་སྟེ། སྤྱན་ཆབ་ཤོར་ཞིང་ཞི་བདེའི་བློ་ཅུང་ཞིག་སྐྱེས་པ་ན། དབུ་དང་། སྐུ་ལུས་ཚལ་པ་དེ་སྙེད་དུ་འཐོར་བ་འོད་དཔག་མེད་ཀྱི་བཅུ་གཅིག་ཞལ་ཕྱག་སྟོང་སྤྱན་སྟོང་དུ་བྱིན་གྱིས་བརླབས་པ་ལྟ་བུ་སྟེ། དེ་ཡང་སྤྱན་རས་གཟིགས་ཐུགས་རྗེ་ཆུང་བ་མ་ཡིན་མོད་ཀྱང་། འཁོར་བའི་སེམས་ཅན་མཐའ་མེད་པས་ལན་པ་ལགས། ཡང་། འོ་ན་འཁོར་བའི་ཁམས་ལ་ཟད་མཐའ་མེད་ན་སངས་རྒྱས་རྣམས་བྱོན་ཞིང་འཕྲིན་ལས་མཛད་པ་ཡང་དོན་ཆུང་ངམ་སྙམ་ན། དེ་ནི་མི་ཆུང་སྟེ། སྐལ་དམན་གྱི་འགྲོ་བ་ཚན་ཆེས་པས་ད་དུང་ལུས་པ་མ་
གཏོགས། ལས་ངན་ཟད་ཅིང་གདུལ་ཡུལ་དུ་གྱུར་པ་རྣམས་ནི་ཇི་ལྟར་སངས་རྒྱས་གཅིག་གི་འོད་ཟེར་སྤྲོ་སྡུའི་ཆོ་འཕྲུལ་རེ་རེས་ཀྱང་རིས་དྲུག་གི་འགྲོ་བ་མཐའ་ཡས་པ་བྱང་ཆུབ་ཆེན་པོ་ལ་སྐད་ཅིག་སྐད་ཅིག་གིས་འགོད་པར་མཛད་ན། ཕྲིན་ལས་གཞན་ལྟ་སྨོས་ཀྱང་ཅི་དགོས་ལ། དེ་ལྟ་བུ་ཕྱོགས་བཅུའི་ཞིང་གི་རྒྱལ་བ་སྲས་བཅས་ཀུན་གྱི་དུས་གསུམ་རྒྱུན་ཆད་མེད་པར་མཛད་པ་ཡིན་ཕྱིར། འཁོར་བ་ལས་ཐར་ནས་བྱང་ཆུབ་ཐོབ་པའི་རིགས་ཀྱང་ཉིན་གཅིག་གམ་ཆུ་ཚོད་གཅིག་ཙམ་གྱི་རིང་ལའང་ཅི་ཙམ་ཡོད་པར་བྱེད་དེ་རང་ཅག་སོ་སྐྱེའི་བློས་ཇི་ལྟར་གཞལ་བར་ནུས། དེ་མ་ཟད་སྔོན་གྱི་གྲུབ་ཐོབ་རེ་རེས་ཀྱང་རྫུ་འཕྲུལ་གྱི་མཐུས་ཉིན་གཅིག་ལ་འགྲོ་བ་གསུམ་སྟོང་སོགས་མཁའ་སྤྱོད་དུ་དྲངས་ཚུལ་དང་། གསོལ་འདེབས་
ལེའུ་བདུན་མ་ནས་འབྱུང་བ་ལྟར་རིག་འཛིན་རེ་རེས་ཀྱང་འཁོར་ཚོམ་བུ་འབུམ་དང་བཅས་པ་མངོན་སངས་རྒྱས་ཚུལ་བསམ་གྱིས་མི་ཁྱབ་ཚེ། རྒྱལ་བའི་ཕྲིན་ལས་ནི་ཚད་མ་མཆིས་སོ།། ༈ །།འོ་ན་དེ་ལྟ་བུ་ལས་སྒྲིབ་སྲབ་པ་དང་སྐལ་བ་དང་ལས་འཕྲོ་ལྷན་པ་རྣམས་ལ་ཐུགས་རྗེ་འཇུག་ཅིང་གྲོལ་བ་ཡིན་ན། སྒྲིབ་པ་འཐུག་ཅིང་སྐལ་མེད་རྣམས་ལ་ནམ་ཡང་ཐུགས་རྗེ་མི་འཇུག་ཅིང་ཐར་པའི་དུས་མེད་དམ། ཞེ་ན་དེ་ཡང་མ་ཡིན་ཏེ། རྒྱལ་བས་ཐུགས་རྗེ་གཟིགས་ཚུལ་ལ་ཁྱད་མེད་ཀྱང་སྐལ་མེད་རྣམས་སྒོ་ང་ལ་ལྕགས་ཀྱུས་མི་ཟིན་པ་ལྟར་ཐུགས་རྗེས་འཛིན་དཀའ་ན་ཡང་སངས་རྒྱས་ཀྱི་མཁྱེན་བརྩེ་ལ་ཆགས་ཐོགས་མེད་ཕྱིར་རིམ་གྱིས་ཐར་པའི་ས་བོན་ཐེབས་པའི་ཐབས་དང་རྟེན་འབྲེལ་གྱི་སྒོ་དུ་མས་འཁོར་བ་མཐའ་ཅན་དུ་མཛད་པ་ཡིན་ཏེ། དཔེར་ན། གང་དག་བསྟན་
པ་འདི་ལ་རབ་ཏུ་བྱུང་ཞིང་བསླབ་པ་བླངས་ནས་སླར་དེ་ལས་ཉམས་པར་གྱུར་པའི་ཕམ་ལྟུང་ཅན་རྣམས་ཀྱང་རེ་ཤིག་ལ་དམྱལ་བའི་སྡུག་བསྔལ་བཟོད་པར་དཀའ་བ་ཉམས་སུ་མྱོང་བར་འགྱུར་ནའང་། མཐར་སངས་རྒྱས་སྟོང་གི་བསྟན་པའི་མཇུག་ཏུ་དེ་བཞིན་གཤེགས་པ་མོས་པའི་བསྟན་པ་ལ་རབ་བྱུང་དང་དགྲ་བཅོམ་གྱི་འབྲས་བུ་ཐོབ་པར་གསུངས་པ་ལྟར་ལགས་པ་དང་། གཞན་ཡང་། རྒྱལ་བ་སྲས་བཅས་སྐྱེས་བུ་དམ་པ་རྣམས་ལ་བཟང་འབྲེལ་ཐོགས་པ་ལྟ་ཅི་སྨོས་ཏེ། ངན་འབྲེལ་གྱིས་ཀྱང་ཐར་པའི་ས་བོན་དུ་འགྱུར་བའི་ཐུགས་རྗེ་ནུས་པ་མངའ་བ་སྟེ། སྤྱོད་འཇུག་ལས། གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ་ཕྱག་འཚལ་ལོ། །ཞེས་པ་ལྟར། སྟོན་པ་ཉིད་བྱང་ཆུབ་སྤྱད་པ་སྤྱོད་ཚེ་དྲང་སྲོང་བཟོད་པར་སྨྲ་བའི་སྐྱེ་བ་བཞེས་སྐབས། ཉེས་པ་མེད་བཞིན་
དུ་མགོ་དང་ཡན་ལག་ཐམས་ཅད་རྒྱལ་པོ་ཚངས་བྱིན་གྱིས་བཅད་ཀྱང་ཁྲོ་བ་མེད་པར་སྙིང་རྗེས་སྨོན་ལམ་བཏབ་ཏེ། ད་ལྟ་ཁྱོད་ཀྱིས་བདག་གིས་རྣམ་སྨིན་གྱི་ལུས་དུམ་བུར་བཅད་པ་ལ་རྟེན་ནས། མ་འོངས་པའི་དུས་ན་ཁྱོད་ཀྱི་ཉོན་མོངས་པའི་འཆིང་བ་མཐའ་དག་བདག་གིས་གཅོད་པའི་གདུལ་བྱའི་ཐོག་མར་གྱུར་ཅིག་ཅེས་པའི་སྨོན་ལམ་གྱི་མཐུ་ལས་ཚངས་བྱིན་དེ་ཉིད་ཚེ་དང་ལྡན་པ་ཀུན་ཤེས་ཀཽ་ཌི་ཎྱར་གྱུར་ཏེ་སྟོན་པའི་འཁོར་དགྲ་བཅོམ་ཐམས་ཅད་ཀྱི་ཐོག་མར་གྱུར་ཚུལ་ལྟ་བུ་སྟེ། མདོར་ན་རྒྱལ་བའི་ཐུགས་རྗེ་ནི་དེ་ལྟ་བུར་འབྱུང་བ་ལགས། ངེས་པའི་དོན་དུ་ནི། འཁོར་བ་དང་མྱང་འདས་སངས་རྒྱས་དང་སེམས་ཅན། མཐོ་རིས་དང་ངན་སོང་། སྣོད་དང་བཅུད་ཀྱི་འཇིག་རྟེན་ལ་སོགས་མཐའ་དག་སེམས་ཀྱི་རང་སྣང་མ་གཏོགས་གཞན་གང་ཡང་མ་ཡིན་པར། གསང་བ་སྙིང་པོའི་རྒྱུད་ལས། ཨེ་མའོ་
བདེར་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱི་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིང་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོགས་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་པོར། །བཅིང་མེད་རྣམ་པར་གྲོལ་མེད་པ། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོས་པ་སྣ་ཚོགས་མཛད། །ཅེས་གསུངས་པ་ལྟར་ཡིན་མོད་ཅིང་། ཀུན་རྫོབ་ལྟར་གྱིས་འཇིག་རྟེན་གྱི་ཁམས་ཆགས། གནས། འཇིག སྟོངས་པ་ལ་སོགས་པའི་ཚུལ་དུ་སྣང་བ་དང་སྐལ་པ་འཕེལ་འགྲིབ་བདེ་སྡུག་སོགས་སུ་འཕོ་འགྱུར་བྱེད་པར་སྣང་བ་ཐམས་ཅད་འགྲོ་བ་སྤྱི་མཐུན་གྱི་སེམས་སྣང་ཁོ་ན་ཡིན་ཕྱིར། སེམས་ཅན་རྣམས་ཀྱི་དགེ་
སྤྱོད་གོང་འཕེལ་གྱི་མཐུ་ལས། ཚེ། གཟུགས། བསོད་ནམས། ལོངས་སྤྱོད་ཐམས་ཅད་ཡར་ལ་འཕེལ་བ་དང་། མི་དགེ་སྤྱད་པའི་མཐུ་འབྲས་ཀྱིས། དེ་ཐམས་ཅད་མར་ལ་འགྲིབ་ཅིང་ནད་ཚོན་མུ་གེའི་བསྐལ་པས་ཉམས་ཉེས་པར་འགྱུར་བ་སོགས་ནི་རྒྱུ་འབྲས་རྟེན་འབྲེལ་གྱི་རང་གཟུགས་ཉིད་དེ། དེའི་ཕྱིར་ད་ལྟ་ཡང་ཡུལ་ཁམས་རེ་རེའམ་གྲོང་ཁྱེར་རེ་རེ་ཙམ་གྱིས་ཀྱང་ཁྲིམས་སུ་བཅས་ཏེ་རི་རྒྱ་ཀླུངས་རྒྱ་སོགས་བསྡམ་ཞིང་། སྡིག་སྤང་དགེ་བ་བསྒྲུབ་ན་ཡུལ་དེའི་སྐྱེ་འགྲོ་ལ་བདེ་སྐྱིད་འབྱུང་བ་ནི་རྒྱུ་འབྲས་རྟེན་འབྲེལ་གྱི་ཆོས་ཉིད་དོ། །འབྲི་གུང་སྐྱོབས་པའི་གསུངས་ལས། བདུད་ཀྱི་འཕེལ་འགྲིབ་ད་ལྟའང་བྱ་རུང་ཡོད། ཅེས་དང་། ལེགས་པའི་ཕྱོགས་ལ་རྟེན་འབྲེལ་ཟབ་མོ་སྒྲིགས། ཕུན་སུམ་ཚོགས་པ་རང་གིས་བྱས་པས་ཆོག །ཅེས་པ་ལྟར་ཡིན་ནའང་། དིང་སང་གི་སྐྱ་སེར་མཐའ་དག་
རང་ཉིད་བྱེད་སྤྱོད་ངན་པ་མི་རུང་སྣ་དགུ་རྒྱུན་དུ་བྱེད་ཅིང་། དུས་ངན་པ་འདི་འདྲ་བ་ཞེས་ཟེར་ནས་སྐད་ངན་འདོན་ཀྱང་ལན་རྩ་རང་ལ་ཐུག་པ་ཡིན་མོད། གཞན་ཡང་དཔེར་ན། ཚེ་རིང་བར་འདོད་ན་སྲོག་གཅོད་སྤོང་ཞིང་ཚེ་ཐར་སྲོག་བསླུ་སོགས་ཀྱི་རྒྱུ་བསྒྲུབ་པའི་འབྲས་བུ་ཚེ་རིང་བར་འགྱུར་མོད་ཀྱང་། ད་ལྟ་ནི་ཚེ་ལ་ཕན་པའི་རིམ་འགྲོར་སེམས་ཅན་སྲོག་གླུད་གཏོང་བ་དང་། སྐུ་རིམ་བྱེད་ཟེར་ནས་སྲོག་གཅོད་མང་པོ་བྱས་པས་མཆོད་སྦྱིན་དང་དགེ་རྩ་སྒྲུབ་པར་རློམས་པ་འདི་དག་གི་སྙིང་ལ་ཅི་ཞིག་ཞུགས་སམ་མི་ཤེས་སོ། །གང་ཞིག་ཡུལ་ཁམས་ཤིན་ཏུ་སྡིག་སྤོང་དགེ་ལ་བརྩོན་ཞིང་བྱང་ཆུབ་ཀྱི་སེམས་དང་ལྡན་པའི་སྐྱེས་བུ་གཅིག་ཙམ་ཞིག་བཞུགས་ན་ཡང་དེའི་ལྷག་བསམ་གྱི་མཐུ་
བྱིན་ལས་ཡུལ་དེར་གནོད་འཚེ་ཐམས་ཅད་ཞི་ཞིང་བདེ་ལེགས་འབྱུང་བའི་ཚུལ་ནི་རྒྱལ་པོ་བྱམས་པའི་སྟོབས་ཀྱི་སྐྱེས་རབ་ལྟ་བུ་ལགས་ན། ཡུལ་དེར་གནས་པ་ཐམས་ཅད་སྡིག་སྤངས་དགེ་བ་སྒྲུབ་ན་ལྟ་སྨོས་ཀྱང་ཅི་དགོས་ཏེ། དེང་སང་གི་སྐྱེ་འགྲོའི་བསོད་ནམས་ཀྱིས་དེ་ལྟ་བུ་འགྲུབ་པ་དཀའ་བར་གདའ་ལགས། ཅེས་འཕྲོས་དོན་དུ་གསོལ་ནས།། ༈ །།གོང་གི་དངོས་ལན་འབུལ་རྒྱུར། འཁོར་བ་སྟོངས་པར་སྨོན་ལམ་བཏབ་པའི་འབྲས་བུ་གང་ཟག་སྒོས་ཚན་དུ་འཁོར་བ་ལས་གྲོལ་བ་ནི་མཐའ་ཡས་པ་བྱུང་དང་འབྱུང་འགྱུར་ལགས་མོད་ཀྱི། དེ་དག་རང་རང་གི་མ་རིག་ལས་ཉོན་འཁྲུལ་རྟོག་གི་འཛིན་པ་ཟད་པའི་རང་ངོ་ལ་འཁོར་བ་སྡུག་བསྔལ་གྱི་ཡུལ་དང་ཡུལ་ཅན་གཏན་སྟོངས་སུ་གྱུར་མོད་ཀྱང་། སེམས་ཅན་སྤྱི་མཚན་གྱི་ངོར་ནི་འཁོར་བ་སྟོངས་པར་འགྱུར་བར་མ་
གསུངས་ཏེ། སྔོན་སྟོན་པ་ཉིད་ལ་འཁོར་བ་ལ་ཐོག་མཐའ་ཡོད་དམ་ཞུས་པ་ན་ཅང་མི་གསུང་བའི་ཚུལ་གྱིས་འཁོར་བ་ལ་མཐའ་མེད་པར་བསྟན་ཏོ་ཅེས་མདོ་ལས་གསུངས་སོ། །ཡང་ཉིད་ཀྱིས། སྔོན་དགྲ་བཅོམ་པ་ཉེར་སྦས་ཀྱིས་ཤཱཀྱའི་བསྟན་པ་སྐྱོངས་སྐབས། བདུད་སྡིག་ཅན་གྱི་དགེ་འདུན་རྣམས་ལ་བར་ཆད་རྩོམ་པ་ན། འཕགས་པས་ཁྱི་རོ་རུལ་པ་མེ་ཏོག་གི་ཕྲེང་བར་སྤྲུལ་ནས་བདུད་ཀྱི་མགུལ་དུ་བཏགས་སྟེ། ཕྱིན་ཆད་བར་ཆད་རྩོམ་པའི་བསམ་པ་ནི་སྐྱེས་ན་མེ་ཏོག་འཕྲེང་བ་དེ་ཁྱི་རོ་ཉིད་དུ་འགྱུར་བར་བྱིན་གྱིས་བརླབས་པས་དེ་ཕྱིན་ཆད་བར་གཅོད་བརྩམས་མ་ནུས་པར་བཤད་ན། ད་ལྟ་ཆོས་པ་རྣམས་ལ་བདུད་ཀྱི་བར་ཆད་མང་བ་འདི་ཇི་ལྟར་ཡིན་གྱི་དྲི་བ་གནང་བ་ལ་དེའི་
ཚུལ་ནི་འདུལ་ལུང་སོགས་ནས་གསུངས་པ་ལྟར། དེ་དུས་ཀྱི་དགེ་འདུན་རྣམས་ལ་བདུད་ཀྱི་རྒྱལ་པོ་དགའ་རབ་དབང་ཕྱུག་གིས་རེས་འགའ་མེ་ཏོག་དང་རིན་ཆེན་སྣ་ཚོགས་ཀྱི་ཆར་ཕབས་ཏེ་དགེ་སློང་རྣམས་བསམ་གཏན་ལས་གཡེང་བར་བྱེད། རེས་འགའ་ནི། ལྷའི་བུ་མོ་མང་པོས་གླུ་གར་དང་རྩེ་འཇོ་སྣ་ཚོགས་བྱས་པས་ལོག་སྲེད་འཕེལ་བར་བྱེད་པ་ལ། འཕགས་པ་ཉེར་སྦས་ཀྱིས་མེ་ཏོག་དང་རིན་ཆེན་གྱི་ཆར་དེ་དག་སེལ་བ་དང་སྦུར་མ་སོགས་སུ་བྱ་ཤིང་། ལྷའི་བུ་མོ་དེ་དག་གིས་ལུས་ནང་ཐམས་ཅད་མི་གཙང་ལྗན་ལྗིན་གྱིས་གང་བ་ཕྱི་རོལ་ནས་སྒྲིབས་མེད་དུ་མཐོང་བར་བྱིན་གྱིས་བརླབས་ཏེ་དགེ་འདུན་རྣམས་ཞེན་པ་མི་སྐྱེ་བར་མཛད་པས། སླར་བདུད་ཀྱིས་འཕགས་པ་ཉིད་ལ་བར་ཆད་བྱ་བར་འདོད་དེ། མཆོད་པའི་ཟོལ་གྱི་
མེ་ཏོག་འཕྲེང་བ་ཞིག་འཕགས་པའི་དབུ་ལ་བཅིངས་པ་ལས། འཕགས་པས་དེ་ཁྱི་རོ་རུལ་པར་སྤྲུལ་ནས་བདུད་ཀྱི་མགུལ་དུ་བཏགས་པས། བདུད་ཤིན་དུ་སྐྱུག་བྲོ་ཞིང་སྡུག་བསྔལ་གྱིས་ནོན་ཏེ། རང་གི་སྟོབས་དང་རྫུ་འཕྲུལ་གྱི་མཐུས་དེ་འདོར་བར་མ་ནུས་པས་ཚངས་དང་བརྒྱ་བྱིན་ཁྱབ་འཇུག་དབང་ཕྱུག་སོགས་ལ་འདོར་བར་ཞུས་པས། སུས་ཀྱང་འདོར་མ་ནུས་པ་སླར་འཕགས་པ་ཉིད་ལ་ཞུས་པ་ན། འཕགས་པས་ཀྱང་ཇི་སྲིད་བར་ཆད་བྱ་བའི་བསམ་པ་མ་སྐྱེས་ན་དེ་ཉིད་མེ་ཏོག་མནྡ་རའི་འཕྲེང་བ་དྲི་བཟང་ཞིང་ཡིད་དུ་འོང་བ་དང་། ནམ་བར་ཆད་རྩོམས་པའི་བསམ་པ་བྱུང་མ་ཐག་ཁྱི་རོ་དྲི་ངད་ང་བ་ཉིད་དུ་འགྱུར་བར་བྱིན་གྱིས་བརླབས་པས། དེ་ཕྱིན་ཆོད་ནས་བར་ཆད་མ་ནུས་པ་དེ་ནི་
དེ་དུས་ཀྱི་སྐབས་ཁོ་ནར་ཡིན་པ་མ་གཏོགས་བསྐལ་པ་གཏན་དུ་མ་ཡིན་ཏེ། ནམ་གཞག་གཏན་དུ་བར་ཆད་མི་འབྱུང་བར་ནི་སངས་རྒྱས་ཉིད་ཀྱིས་ཀྱང་མཛད་ཚུལ་ལ་བསྟན་ན། དགྲ་བཅོམ་པ་ཙམ་གྱིས་མཛད་ག་ལ་ནུས་ཤིང་། སྤྱིར་སངས་རྒྱས་ཀྱི་བསྟན་པ་ལ་བར་དུ་གཅོད་པའི་བདུད་འབྱུང་བའི་རྒྱུ་ནི་ཐུབ་པ་ཉིད་ཀྱིས་བདུད་དང་མུ་སྟེགས་ལོག་འདྲེན་གྱི་སྡེ་ཚོགས་བཏུལ་བའི་སྐབས་སུ་ཁོང་རྣམས་ཀྱིས་སྨོན་ལམ་ལོག་པ་བཏབ་སྟེ། ད་ལྟ་བདག་ཅག་རྣམས་ཀྱིས་ཁྱེད་ཐུབ་པར་མ་གྱུར་པས། མ་འོངས་ལྔ་བརྒྱ་མཐའ་མའི་ཚེ་བདག་ཅག་རྣམས་ཀྱིས་ཁྱོད་ཀྱི་བསྟན་ལ་ཞུགས་མཁན་དུ་བྱས་ནས་བསྟན་པ་བསྣུབས་པར་ཤོག་ཅིག་ཅེས་སྨོན་ལམ་བཏབ་པའི་མཐུ་ལས། ད་ལྟ་ཆོས་པའི་གཟུགས་ཀྱིས་ཆོས་ཀྱི་བསྟན་པ་བཤིགས་པ་མང་པོ་འབྱུང་བའི་རྒྱུ་མཚན་ནི་དེ་ལྟར་
ཡིན་པ་དང་། དེ་ལྟར་བྱུང་ཚུལ་སྔོན་ཐུབ་པ་ཉིད་ཀྱི་ཀྱང་ལུང་བསྟན་ཏེ། འདི་ལྟ་སྟེ། མ་འོངས་སྙིགས་མའི་དུས་སུ་ངའི་བསྟན་པ་འདི་ཉིད་སེང་གེའི་ཁོག་པ་འབུས་གཡེང་བ་ལྟ་བུར་གྱུར་ཏེ། དཔེར་ན་གཅན་གཟན་རྒྱལ་པོ། སེང་གེའི་རོ་ལ་སྲོག་ཆགས་གཞན་གང་གིས་ཀྱང་བཤིག་ཅིང་ཟ་བར་མི་ནུས་ཀྱང་། ཁོག་པ་ཉིད་ནང་ནས་རུལ་མྱག་འབུས་གཡེང་སྟེ་ཞིག་པར་འགྱུར་རོ། དཔེ་དེ་བཞིན་དུ་དེ་བཞིན་གཤེགས་པ་དང་དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས། དེའི་བསྟན་ལ་གཞན་གྱིས་བར་དུ་གཅོད་ཅིང་གཞིག་པར་ནུས་པ་མ་ཡིན་ཀྱང་། བསྟན་པ་འཛིན་པའི་ཆ་བྱད་ཅན་གྱིས་བསྟན་པ་རྨེག་མེད་དུ་འཇིག་པར་འགྱུར་རོ། དེ་ཅི་ཞིག་སྙམ་ན། ངའི་བཀའ་ཚུལ་བཞིན་མི་སྤྱོད་པའི་ཉེས་སྐྱོན་ལས་སོ། །
ཞེས་སོགས་མདོ་སྡེ་མང་པོར་གསུངས་པ་ཉིད་དུས་ལ་བབས་པ་ལགས།། ༈ །།ཁྱད་པར་དུ་དམ་པའི་ཆོས་ཚུལ་བཞིན་བྱེད་པ་དག་ལ། བདུད་ཀྱི་བར་ཆད་ཀྱང་སྡང་བར་འབྱུང་ལ། ཆོས་ལ་མི་བརྩོན་པ་ལ་བར་ཆད་འོང་དོན་མེད་དེ། འཇམ་དཔལ་རྣམ་རོལ་གྱི་མདོ་ལས། ལྷའི་བུས་སྨྲས་པ། འཇམ་དཔལ། བྱང་ཆུབ་སེམས་དཔའ་རྣམས་ཀྱིས་བདུད་ནི་གངས་ལས་བྱུང་བ་རིགས་པར་བྱ། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ནི་བརྩོན་འགྲུས་ལས་འབྱུང་བ་རིག་པར་བྱ་སྟེ། དེ་ཅིའི་ཕྱིར་ཞེ་ན། མི་བརྩོན་ན་བདུད་ཀྱིས་ཅི་བྱ་སྟེ། དེ་ཉིད་བདུད་ཡིན་པའི་ཕྱིར་རོ། །ཞེས་གསུངས་ཤིང་།། ༈ །།བདུད་ཀྱི་རྣམ་གྲངས་ལ་དབྱེ་ན་བསམ་གྱིས་མི་ཁྱབ་ཀྱང་མདོར་བསྡུ་ན་སྤྱི་དང་བྱེ་བྲག་གཉིས་སུ་འདུ་སྟེ། དེ་ལས་སྤྱིའི་བདུད་བཞི་ནི། འཁོར་བའི་ས་བོན་བྱེད་པ་བདག་འཛིན་ མདོ་སྡེ་གདམ་ངག་འབོག་པའི་རྒྱལ་པོ་སོགས་
ཕུང་པོའི་བདུད། དུག་ལྔ་རང་གར་སྤྱོད་པ་འཇོལ་ཉོག་ཉོན་མོངས་ཀྱི་བདུད། ཐོས་བསམ་བསྒོམ་པ་མཐར་མི་ཕྱིན་པར་བྱེད་པ་ལོང་མེད་འཆི་བདག་གི་བདུད། བློ་ཁ་ཕྱིན་ལོག་ཏུ་བསྒྱུར་བ་བསླུ་བྱེད་ལྟ་བུའི་བདུད་དང་བཞི་ཡོད་པའི་ལྷའི་བུའི་བདུད་དེ་ཉིད་ཀྱི་ནང་ཚན་དུ། བདུད་ཀྱི་རྒྱལ་པོ་དགའ་རབ་དབང་ཕྱུག་གིས་ནི་བར་ཆད་ཐམས་ཅད་ཀྱི་རྩ་བའི་བྱེད་པོ་དང་། དེའི་བཙུན་མོ་པདྨའི་འཕྲེང་བ་ཅན་གྱིས་དུག་ལྔའི་མེ་ཏོག་གི་མདའ་ལྔ་འཕངས་ཏེ་ཆོས་པ་རྣམས་ཀྱི་རྒྱུད་མ་རུང་ཞིང་གཉེན་པོས་མི་ཟིན་པར་བྱེད། བློན་པོ་ཟློག་བྱེད། གཡེང་བྱེད། ཆགས་བྱེད། འཁྲུག་བྱེད་དང་བཞི་ཡོད་པའི་ཟློག་བྱེད་ཀྱི་ནི་ལྟ་བ་དང་གྲུབ་མཐའ་རྣམས་ལ་བར་དུ་གཅོད་དེ། སྒྲུབ་གྲ་རྣམས་བཤད་གྲར་བསྒྱུར། ཐེག་པ་གོང་མ་རྣམས་འོག་མར་གྱུར་ འོག་མ་རྣམས་ཐ་མལ་པར་གྱུར། ཐ་མལ་པ་རྣམས་ལོག་པར་
བསྒྱུར་ཞིང་བྱང་ཆུབ་ཀྱི་ལམ་ལས་ཕྱིར་ཟློག་པར་བྱེད་དོ། །གཡེང་བྱེད་ཀྱིས་ནི་འཇིག་རྟེན་གྱི་བྱ་བ་སྣ་ཚོགས་པར་སྤྲུལ་བས་ཆོས་པ་ཐམས་ཅད་གཡེང་ལ་སྦྱོར། ཆགས་བྱེད་ཀྱིས་ནི་འདོད་ཡོན་ཟས་ནོར་ལོངས་སྤྱོད་བསོད་ནམས་འདུ་འཛི་སོགས་སུ་སྤྲུལ་ནས་ཆོས་པ་རྣམས་ཀྱི་ཚུལ་ཁྲིམས་དང་ཏིང་ངེ་འཛིན་སོགས་ཉམས་པར་བྱེད། འཁྲུག་བྱེད་ཀྱིས་ནི་ལྟ་བ་དང་གྲུབ་མཐའ་ཆོས་ལུགས་སོགས་ཐ་དད་ལ་ཕྱོགས་ཞེན་ཆགས་སྡང་ཀུན་སློང་དྲག་པོས་བརྩོད། འཐབ་འཁྲུག །འཛིངས། གསོད་པ་ལ་སོགས་ཀྱིས་རང་གཞན་འཕྲལ་ཡུན་ཐམས་ཅད་ཕུང་ལ་སྦྱོར་བར་བྱེད་ཅིང་། དེ་དག་གི་ཕྱི་འཁོར་བགེགས་རིགས་སྟོང་ཕྲག་བརྒྱད་ཅུ་སོགས་ཀྱིས་གནས་སྐབས་ཀྱི་འགལ་རྐྱེན་དང་བར་ཆད་སྣ་ཚོགས་ཀྱི་སྒོ་ནས་དམ་ཆོས་སྒྲུབ་པ་ལ་བདུད་དུ་བྱེད་པའོ། །བྱེ་བྲག་གི་བདུད་ལ་ཡང་བཞི་སྟེ། སྤྱོད་པ་ཆོས་སྤྱོད་ལ་བར་དུ་གཅོད་
པའི་བདུད། སྒོམ་སྒྲུབ་ཏིང་འཛིན་ལ་བར་དུ་གཅོད་པའི་བདུད། ཉམས་རྟོགས་གོང་འཕེལ་ལ་བར་གཅོད་པའི་བདུད། ལྟ་བ་མཐའ་གྲོལ་བར་དུ་གཅོད་པའི་བདུད་དང་བཞི་པོ་དེ་དག་རེ་རེ་ལའང་ནང་ཚན་དྲུག་དྲུག་ཡོད་དེ། དང་པོ་སྤྱོད་པའི་བདུད་དྲུག་ནི། མི་དགེ་ངང་གི་འཕེལ་བ་སྡིག་གྲོགས་སློབ་དཔོན་གྱི་བདུད། འདོད་ཡོན་ཞེན་པ་ལ་སྦྱོར་བ་ཟས་ནོར་ལོངས་སྤྱོད་ཀྱི་བདུད། ང་རྒྱལ་ཕྱོགས་རིས་ལ་སྦྱོར་བ་ཞེན་ཆགས་དགོན་གནས་ཀྱི་བདུད། འཁྲུལ་སྣང་རྣམ་གཡེང་ལ་སྦྱོར་བ་བསླབ་ཤེས་ཡོན་ཏན་གྱི་བདུད། ཅི་བྱས་གོལ་སར་ལྷུང་བ་འདྲ་མིན་ནོར་འཁྲུལ་གྱི་བདུད། འཁོར་འདས་སོ་མཚམས་མི་ཕྱེད་པ་གཉིས་འཛིན་ཐེ་ཚོམ་གྱི་བདུད་དོ།། ༈ །།གཉིས་པ་བསྒོམ་པའི་བདུད་དྲུག་ནི། ཆོས་སྐུའི་རང་ཞལ་ལ་སྒྲིབ་པ་སེམས་འཛིན་ཞི་གནས་ལ་ཆགས་པའི་བདུད། ཡུལ་
རྐྱེན་ལ་འཕྲོ་རྒོད་ཡེངས་པ་རྣམ་རྟོགས་འཁྲུལ་པའི་བདུད། ཏིང་འཛིན་ལ་བོག་མེད་པ་བཏང་སྙོམས་ལུང་མ་བསྟན་གྱི་བདུད། མི་གཡོ་བའི་དོན་ལས་གོལ་བ་འོག་འབྱམས་རྐུན་བུའི་བདུད། ནུས་མཐུ་ཡུལ་ལ་ཤོར་བ་བྱིན་རླབས་རྙེད་འཚོལ་གྱི་བདུད། ཁམས་གསུམ་གྱི་བསམ་གཏན་ལས་མ་འཕགས་པ་མཐར་འཛིན་གོལ་བའི་བདུད་དོ། །གསུམ་པ་ཉམས་ཀྱི་བདུད་དྲུག་ནི། ང་རྒྱལ་རློམ་པས་བསྐྱེད་པ་འདྲ་མིན་ལུང་བསྟན་གྱི་བདུད། དགེ་སྦྱོར་གྱིས་རང་བརྒྱུད་བཅིངས་པ་ཉམས་མྱོང་མངོན་ཞེན་གྱི་བདུད། ཞེ་འདོད་ཕུགས་སུ་ཚུད་པ་སླུ་བྱེད་ཚུལ་ཆོས་ཀྱི་བདུད། ཕྲག་དོག་འགྲན་སེམས་ཞུགས་པ་ལུང་མེད་སྒྲོ་སྐུར་གྱི་བདུད། གསང་དོན་ཁ་ལ་གཡེལ་བ་དམ་མེད་འཆལ་པའི་བདུད། འཕེལ་མེད་ཨ་འཐས་ལ་ཞེན་པ་གནོད་མེད་སྡུག་འཚིར་གྱི་བདུད་དོ། །བཞི་པ་ལྟ་བའི་བདུད་དྲུག་ནི། དགོངས་པ་ལ་བར་དུ་གཅོད་པ་སྙིང་རྗེ་དགྲར་ལངས་ཀྱི་བདུད། སེམས་བསྐྱེས་ལ་བར་དུ་གཅོད་པ་སྟོང་པ་དགྲར་ལངས་ཀྱི་བདུད། ལོག་རྟོགས་འཁུ་འཕྲིག་སློང་བ་སྐྲག་བྱེད་གཟུགས་སྣང་གི་བདུད། རྟགས་ཆད་ཀྱི་གཡང་ལ་བསྐྱུར་བ་གྲུབ་མཐའ་མཐར་འཛིན་གྱི་བདུད་
གདེངས་མེད་ཁ་ལ་འབྱམས་པ་གོ་དྲེད་ཚིག་ཁྱེར་གྱི་བདུད། རང་རྒྱུད་དོན་ལ་མ་འབྱོར་བ་ཡིད་སྨོན་རེ་དོགས་ཀྱི་བདུད་དང་དྲུག་སྟེ། དེ་ལྟར་བདུད་ཀྱི་རྣམ་གྲངས་ལ་བསམ་གྱིས་མི་ཁྱབ་ཅིང་གྲངས་ཀྱིས་མི་ལང་བ་ཐམས་ཅད་ཀྱི་རྩ་བ་ནི་ངར་འཛིན་འགོང་པོ་གཅིག་བུ་ལ་འདུས་ཕྱིར། འདི་ཉིད་རྩད་ནས་བཅད། དྲུངས་ནས་ཕྱུངས། རྡུལ་དུ་བརླགས། དབྱིངས་སུ་ཞི་བའི་ཐབས་ལ་འབད་ན། བདུད་ཀྱི་རིགས་ཕྱི་ནང་གསང་བ་གང་ནས་ཀྱང་འབྱུང་བའི་ཁུངས་མེད་པ་ཉིད་དོ། །དེ་ལྟར་ཡང་། ནམ་མཁའ་མཛོད་ཀྱི་མདོ་ལས། དཔེར་ན་བུ་ག་གར་ཡོད་ནས་རླུང་འཇུག་པ་དེ་བཞིན་དུ། རྣལ་འབྱོར་པའི་སེམས་ལ་གང་དང་གང་ན་སྐྱོན་ཡོད་པ་དེ་དང་དེ་ནས་བདུད་འཇུག་ཅིང་གླགས་རྙེད་པ་ཡིན་ནོ། །དེ་བས་ན་བྱང་ཆུབ་སེམས་དཔའ་སེམས་ལ་ཉོན་མོང་པ་ལ་སོགས་ཀྱི་སྐྱོན་མེད་
པར་བྱའོ། །སེམས་ལ་སྐྱོན་མེད་པ་ནི་འདི་ཡིན་ཏེ་འདི་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཡོངས་སུ་རྟོགས་པར་བྱའོ། །ཞེས་གསུངས་པ་བཞིན་ནོ། སེམས་ཉིད་ཀྱི་རང་ངོ་རྗེན་པར་མཐོང་ཞིང་སྣང་སྲིད་འཁོར་འདས་ཐམས་ཅད་རང་སེམས་སུ་ཐག་ཆོད་གདེངས་ཐོབ་ན། བདུད་ཀྱི་བར་ཆད་ཅེས་པའི་མིང་ཡང་མི་གྲགས་པ་ལགས། ཡང་རེ་ཤིག་གི་དུས་ན། ཉིད་ཀྱི་ཕེབས་སྒོར། དྲུག་པ་རྡོ་རྗེ་འཆང་ཞེས་མཚན་དུ་བརྗོད་པའི་ངེས་ཚིག་དང་། དྲུག་པའི་སྒྲ་བཤད་གང་ཡིན་གསུང་བ་དང་། འདི་ཉིད་ཀྱི་ངོ་བོ་ཆོས་ཀྱི་སྐུ་སྤྲོས་མཚན་ལས་འདས་པའི་གནས་ལུགས་བདེར་གཤེགས་སྙིང་པོ་ཉིད་ཡིན་ན། སྐུ་མདོག་ཕྱག་མཚན་རྒྱན་ཆ་ལུགས་ཀྱི་རྣམ་པ་ཅན་དུ་ཡོད་པ་འདི་ཇི་ལྟར་ཡིན་གྱི་དྲི་བ་གནང་བ་ལ། ཚུལ་འདི་ལ་ལན་གྱིས་རིམ་པ་དཔྱིས་ཕྱིན་པ་ཞིག་བརྗོད་ན་ནི་མདོ་རྒྱུད་
ཀྱི་གཞུང་འབྲེལ་ཆེན་པོ་དག་གི་ཁོག་ཕུབ་ཏེ་རྒྱས་བཤད་དགོས་པའི་དོན་སྐོར་དུ་འདུག་རུང་། དེ་ལྟ་བུ་ནི་རྨོངས་པ་བདག་གིས་སྨྲ་བའི་ནུས་སྤོབ་མ་མཆིས་ཚེ། གནས་སྐབས་ཀྱི་ལན་དོན་འགག་བསྡུས་ཤིག་འབུལ་བའི་དབང་དུ་བགྱི་ན། དེ་ཡང་འཁོར་བ་དང་མྱང་འདས་གང་དུའང་མ་ཕྱེ་བའི་སྔོན་རོལ་ནས་ཆོས་ཐམས་ཅད་ཀྱི་གནས་ལུགས་ཡེ་ཇི་བཞིན་པའི་དབྱིངས་སུ་རང་བྱུང་རང་རིག་གི་སྟོན་པ་དཔལ་ཀུན་ཏུ་བཟང་པོ་ཉིད་འཁོར་འདས་མཉམ་པ་ཉིད་རང་ཤར་རང་གྲོལ་དུ་མངོན་པར་བྱང་ཆུབ་པ་ནས། ཡེ་ཐོག་དང་པོའི་སངས་རྒྱས་སམ། གདོད་མའི་མགོན་པོའམ། འཁོར་འདས་ཀུན་གྱི་སྤྱི་མེས་ཞེས་བྱ་ཞིང་། བློ་བུར་དུ་ཚོགས་བསགས་སྒྲིབ་སྦྱངས་པ་ལམ་རིམ་བགྲོད་བྱས་པའི་སངས་རྒྱས་མ་ཡིན་པར་ཡེ་གདོད་མ་ནས་འཁྲུལ་མ་མྱོང་བའི་ཆོས་སྐུ་དངོས་
མིན་ཕྱིར། རྒྱལ་བ་ཐམས་ཅད་ཀྱི་འབྱུང་གནས་སམ། སྤྲུལ་གཞི་འམ། བྱེད་པ་པོ་ལྟ་བུ་སྟེ། ཕྱོགས་བཅུ་དུས་བཞིའི་ཞིང་དང་སྟོན་འཁོར་མཛད་འཕྲིན་གདུལ་ཡུལ་སོགས་མདོར་ན་འཁོར་འདས་ཀྱི་ཆོས་སོ་ཅོག་མ་ལུས་པ་འདི་ཉིད་ཀྱི་ཁོངས་སུ་མ་འདུས་པ་ནི་རྡུལ་ཕྲ་རབ་ཙམ་ཡང་མེད་ལ། ཆོས་ཀྱི་དབྱིངས་ནམ་མཁའི་མཐའ་ཀླས་པའི་ཞིང་རབ་འབྱམས་ཚད་བཟུང་མེད་པར་སྐུ་དང་ཞིང་ཁམས་འདུ་འབྲལ་མེད་ཅིང་དུས་བཞི་འཕོ་འགྱུར་མེད་པར་བཞུགས་པ་དེ་ལ་འོད་གསལ་རྡོ་རྗེ་སྙིང་པོའི་ཞིང་ཁམས་ཞེས་བྱ་སྟེ། སྣང་སྲིད་འཁོར་འདས་ཐམས་ཅད་འདིའི་ནང་དུ་མ་ཆུད་པའི་གཏན་མ་མཆིས་སོ། །དེའི་དབང་གིས། བདེར་གཤེགས་སྙིང་པོ་འགྲོ་ཀུན་ཡོངས་ལ་ཁྱབ། །ཅེས་དང་། སྲིད་གསུམ་ཐམས་ཅད་སངས་རྒྱས་ཤིང་། །ཡེ་ནས་རྒྱལ་བའི་སྐུ་གསུང་ཐུགས། །ཅེས་སོགས་དང་། ཆོས་ཀྱི་དབྱིངས་ལ་བཟང་ངན་མེད་པ་ལ། །
བཟང་ངན་གཉིས་སུ་འཛིན་པ་ཡོངས་རེ་འཁྲུལ། །ཞེས་དང་། ཆོས་སྐུ་ཀུན་ལ་ཁྱབ་པ་ཀུན་ཏུ་བཟང་པོ་ཡིན། །ཞེས་པ་ལ་སོགས་ཏེ། མདོར་ན་སྣང་སྲིད་དག་པ་རབ་འབྱམས་ཟེར་བའི་རྒྱུ་མཚན་ཐམས་ཅད་འདིར་གོ་དགོས་པ་ལགས། དེའི་ངང་ནས་གདོད་མའི་གཞི་ལས་གཞི་སྣང་དུ་ཤར་བའི་འགྲོ་བ་རང་གི་རང་ངོ་མ་ཤེས་ཤིང་རང་སྣང་ལ་གཞན་དུ་བཟུང་བས་འཁྲུལ་པ་ལུ་གུ་རྒྱུད་དུ་འཕེལ་ནས་འཁོར་བའི་མཚན་ཉིད་མེད་བཞིན་སྣང་བའི་ཆོ་འཕྲུལ་རྨི་ལམ་གྱི་ཡུལ་སྣང་ལྟ་བུ་ལ་སྤྱོད་པའི་ཁམས་གསུམ་གྱི་འགྲོ་བ་རྣམས་ལ་དམིགས་མེད་ཐུགས་རྗེ་ཆེན་པོའི་རླབས་གཡོས་ནས་རང་སྣང་ལྷུན་གྲུབ་སྟུག་པོ་བཀོད་པ་ཚངས་པ་རྔ་སྒྲའི་ཞིང་ཁམས་ཞེས་བྱ་བ་སྤྲུལ་སྟེ། ཆོས་ཀྱི་སྐུ་ཀུན་ཏུ་བཟང་པོ་ཉིད་ཡེ་ཤེས་ལྔ་ལྡན་ལོངས་སྤྱོད་རྫོགས་སྐུ་རིགས་ལྔ་གང་ཆེན་མཚོ་དང་། རིགས་
དྲུག་པ་རྡོ་རྗེ་འཆང་ཆེན་པོའི་སྐུ་དང་ཞིང་ཁམས་ཀྱང་གྲངས་དང་ཚད་མེད་པ་ནམ་མཁའ་གར་ཁྱབ་ཏུ་སྤྲུལ་ཞིང་། དེ་དག་རེ་རེའི་བ་སྤུའི་ཁུང་བུ་གཅིག་གི་ཁྱོན་ལ་ཡང་གདུལ་བྱའི་ཞིང་དང་འདུལ་བྱེད་ཀྱི་སྟོན་པ་བསམ་གྱིས་མི་ཁྱབ་པ་དེ་དག་རེ་རེས་ཀྱང་སྐུ་གསུང་ཐུགས་ཡོན་ཏན་འཕྲིན་ལས་མི་ཟད་རྒྱན་འཁོར་གྱིས་འགྲོ་བའི་དོན་ནམ་མཁའ་ཇི་སྲིད་གནས་ཀྱི་བར་དུ་མཛད་ཚུལ་ནི་རང་ཅག་སོ་སོ་སྐྱེ་བོའི་བློས་ཅི་ཞིག་གཞལ་ཏེ་བསམ་བརྗོད་ཀྱི་ཡུལ་ལས་འདས་སོ། །ལོངས་སྤྱོད་རྫོགས་སྐུ་དེ་དག་གི་རང་རྩལ་ལས་འགྲོ་འདུལ་མཆོག་གི་སྤྲུལ་པ་སྐུའི་ཞིང་ཁམས་ཚངས་ཆེན་གྱི་བཀོད་པ་རྣམ་པར་སྤྲུལ་ཞིང་། དེའི་སྟོན་པ་ནི་ཐུན་མོང་ཐུན་མིན་གྱི་གདུལ་བྱའི་སྐལ་པ་ཇི་སྙེད་དུ་བསྟན་པར་མཛད་ལ། ཁྱད་པར་གཞི་དང་སྙིང་པོ་མེ་ཏོག་གི་རྒྱན་པའི་ཞིང་འདི་ཉིད་ཀྱི་རྣམ་སྣང་གང་ཆེན་མཚོའི་ཕྱག་མཚན་ལྷུང་བཟེད་
ཀྱི་ནང་གི་སྤོས་ཆུའི་རྒྱ་མཚོ་ལས་བྱུང་བའི་པདྨ་ཉི་ཤུ་རྩ་ལྔ་བརྩེགས་པའི་བཅུ་གསུམ་པ་མི་འཇེད་ཀྱི་ཞིང་འདི་ཅིག་པུར་ཡང་འདས་མ་འོང་གི་བསྐལ་པ་རྒྱ་མཚོ་མཐའ་ཡས་པར་འགྲོ་བའི་དོན་རྒྱུན་ཆད་མེད་པར་མཛོད། ད་ལྟའི་བསྐལ་པ་བཟང་པོའི་མིང་ཅན་འདི་ཉིད་ལའང་ཐུན་མོང་ལྟར་ན་སངས་རྒྱས་སྟོང་དང་། ཐུན་མོང་མ་ཡིན་པ་ལྟར་ན་གྲགས་ཆེན་གྱི་སྟོན་པ་བཅུ་གཉིས་སོགས་དང་། གཞན་ཡང་ཆོས་ཀྱི་རྣམ་གྲངས་སོ་སོའི་དཀྱིལ་འཁོར་གྱི་གཙོ་བོར་སྤྲུལ་པའི་སྐུའི་བཀོད་པ་རྒྱན་ཅན་རྒྱན་མེད་ཞི་བ་ཁྲོ་བོ་ཞི་མ་ཁྲོ་ལ་སོགས་པའི་རྣམ་འགྱུར་སྣ་ཚོགས་དང་། ཡང་། དེ་དག་མཐོང་བའི་སྐལ་མེད་རྣམས་ལ་ནི་རང་རང་གི་སྐལ་བ་དང་མཚམས་པའི་བཟོ་དང་སྐྱེ་དང་བྱང་ཆུབ་ཆེན་པོ་ནས། འབྱུང་བ་ལྔ་དང་བརྟན་གཡོས་
བསྡུས་པའི་རྣམ་པར་འཕྲུལ་པ་མཐའ་ཡས་པས་འགྲོ་བ་འདུལ་བར་མཛད་པ་མཐའ་དག་ནི་དཔལ་ཀུན་ཏུ་བཟང་པོའི་ཐུགས་རྗེའི་རྣམ་རོལ་ཁོ་ན་ཉིད་ལས་མ་འདས་སོ། །དེ་ནས་ཁྱད་པར་གྱི་སྐབས་དོན་འབུལ་རྒྱུར། དེ་ལྟར་སྟོན་པ་རྡོ་རྗེ་འཆང་དང་རིགས་ལྔའི་སངས་རྒྱས་སུ་བསྟན་པ་དེ་ཐམས་ཅད་ངེས་པའི་དོན་དུ་ནི་ཆོས་སྐུ་ཀུན་བཟང་ཉིད་ལས་ཐ་དད་པ་ནམ་ཡང་མ་ཡིན་ནའང་། གནས་སྐབས་ས་ལམ་རིམ་བགྲོད་ཀྱི་གང་ཟག་རྣམས་དྲངས་བའི་སླད་དུ། སོ་སྐྱེ་ཐ་མལ་པས་བྱང་ཆུབ་ཏུ་སེམས་བསྐྱེད་ནས་རིམ་གྱི་མངོན་པར་བྱང་ཆུབ་བརྙེས་པའི་ཚུལ་བསྟན་པར་མཛད་ཚུལ་ནི། རྒྱལ་བ་རིགས་ལྔ་སོ་སོའི་སྐྱེ་རྒྱུད་སོགས་ནི་པདྨ་བཀའི་ཐང་ཡིག་གི་ལེའུ་བཞི་པར་གསུངས་པ་བཞིན་དང་། རྡོ་རྗེ་འཆང་ཉིད་ཀྱང་སྔོན་བསྐལ་པ་དཔག་མེད་ཀྱི་གོང་རོལ་ཏུ་ཞིང་ཁམས་རང་བཞིན་
རྣམ་པར་བཀོད་པ་ཅེས་བྱ་བར་སངས་རྒྱས་མེ་ཏོག་མཛེས་པ་ཆེན་པོའི་དྲུང་དུ་གསེར་གྱི་རྡོ་རྗེ་ཕུལ་ནས་དང་པོར་བྱང་ཆུབ་ཏུ་ཐུགས་བསྐྱེད། དེ་ནས་སྐྱེ་བ་གཉིས་ན་བྱང་ཕྱོགས་རླུང་གིས་གཡོ་བ་བཀོད་པ་ཅེས་བྱ་བར་ཁྱིམ་བདག་ལེགས་སྦྱིན་གྱི་སྲས་ནོར་བུའི་འཕྲེང་བར་གྱུར་ཚེ་སངས་རྒྱས་འཁོར་ལོ་ལེགས་སྤྱོད་ཀྱི་སྤྱན་སྔར་ཆོས་ཀྱི་རྣམ་གྲངས་རྒྱ་ཆེར་ཐོས། དེ་ནས་ཕྱི་མའི་ཚེ་བདེ་བས་མྱོས་པའི་གླིང་ཞེས་བྱ་བར་ཁྱིམ་བདག་གློག་གི་འོད་ཀྱི་བུ་བྲམ་ཟེའི་ཁྱིའུ་ལེགས་བྱིན་དུ་གྱུར་ཏེ། དེ་བཞིན་གཤེགས་པ་དགེ་བའི་བློ་གྲོས་ལ་ལོ་ལྔར་ཆོས་མཉན་ནས་ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་པས་ལོ་བདུན་ཅུ་རྩ་ལྔ་ན་རིན་པོ་ཆེའི་ཕུང་པོ་རྣམ་པར་བཀོད་པའི་རི་བོར་མངོན་པར་རྫོགས་པ་སངས་རྒྱས་
པའི་ཚུལ་བསྟན་པར་མཛད་དེ། བསྐལ་ཆེན་གཅིག་གི་བར་དུ་ཆོས་སྐུའི་དགོངས་པ་ལས་གཡོ་བ་མེད་པར་བཞུགས་ནས། སླར་ཡང་གདུལ་བྱའི་དོན་དུ་ལྷུན་གྲུབ་ལོངས་སྤྱོད་རྫོགས་སྐུའི་བདག་ཉིད་དྲུག་པ་རྡོ་རྗེ་འཆང་ཆེན་པོ་མཚན་དཔེ་ཕྱི་ནང་གསང་གསུམ་གྱི་རྒྱན་པར་བྱོན་ཞིང་། ཐབས་ཤེས་དབྱེར་མེད་ཀྱི་རྟགས་སུ་རྡོ་རྗེ་དང་དྲིལ་བུའི་ཕྱག་རྒྱ་ཅན་དུ་སྣང་བ་ནི་སྔོན་ཚེ་སེམས་བསྐྱེད་ཀྱི་རྟེན་དུ་རྡོ་རྗེ་ཕུལ་བའི་རྟེན་འབྲེལ་གྱི་རྟགས་སུ་ཤར་བ་སྟེ། རང་སྣང་ལྷུན་གྲུབ་སྟུག་པོ་བཀོད་པའི་ཞིང་ཁམས་རྒྱ་ཆད་ཕྱོགས་ལྷུངས་མེད་པར་ཉིད་ལས་གཞན་དུ་མ་ཡིན་པའི་རྒྱལ་བ་རབ་འབྱམས་ཀྱི་འཁོར་ལ་བླ་མེད་ཐེག་པ་མཆོག་གི་བསྟན་པའི་སྙིང་པོ་རྒྱུད་སྡེ་རྒྱ་མཚོའི་ཆོས་འཁོར་ཚིག་གི་བརྗོད་རྩོལ་མ་ཡིན་པར་དོན་གྱི་དགོངས་པའི་ཏིང་ངེ་འཛིན་རང་གསལ་ལ་གཙོ་
འཁོར་ཐ་མི་དད་པས་མཉམ་རོལ་ཆེན་པོར་མཛད་པ་ནི་སྔོན་དང་ད་ལྟ་དང་ཕྱི་མའི་མུ་མཐར་ཐུག་གི་བར་དུ་རྒྱུན་ཆད་མེད་པར་བཞུགས་པ་སྟེ། དེ་ལྟར་འདི་ནི་དྲང་དོན་ཐབས་མཁས་ཐུགས་རྗེ་མཛད་པ་བསྟན་ཚུལ་ཡིན་པས། ད་ལྟ་རྡོ་རྗེ་འཆང་གི་སྐུ་གཟུགས་བཞེངས་པ་རྣམས་ཀྱང་ཚུལ་འདིའི་ཆ་བྱད་ཀྱི་སྐུ་བརྙན་ལགས། སྐབས་འདིར་འཕྲོས་ཞུས་གོང་གི་མཚན་དཔེ་ཕྱི་ནང་གསང་གསུམ་ལ་ཞེས་པ་འདི་ཐེག་པ་ཐུན་མོངས་པ་མ་གྲགས་ཕྱིར་ཅི་ཟེར་རམ་སྙམ་དུ་དགོངས་སྲིད་པས། འདིའི་དོན་ནི། །དེ་ཡང་ཕྱིའི་མཚན་དཔེ་རྣམས་སངས་རྒྱས་སྤྲུལ་པ་སྐུ། སྤྱིའི་ཡོན་ཏན་ཏེ། ཇི་སྐད་དུ། ཕྱག་ཞབས་འཁོར་ལོས་མཚན་དང་རུས་སྦལ་ཞབས། དེ་སོགས་མཚན་བཟང་པོ་སོ་གཉིས་དང་། ཐུབ་པའི་
སེན་མོ་ཟངས་མདོག་དང་། ཞེས་པ་ལ་སོགས་དཔེ་བྱད་བརྒྱད་ཅུ་རྣམས་ནི་ཡོངས་གྲགས་ལྟར་སྟེ། འཁོར་ལོ་བསྒྱུར་བའི་རྒྱལ་པོ་རྣམས་ལའང་ཡོད་ཕྱིར་འོ་སྐོལ་གྱི་སྟོན་པའི་མཆེད་པོ་ཅུང་དགའ་བོ་སོགས་ལའང་མཛོད་སྤུ་དང་གཙུག་ཏོར་མ་གཏོགས་མཚན་དཔེ་ཕལ་ཆེར་ཡོད་པར་གྲགས་ལ། འགྲོ་བ་ཕལ་པ་ལ་ཡང་དེ་དག་གི་ཆ་ཤས་ལ་ལ་ཙམ་ཡོད་པ་ཡང་འབྱུང་བས་ན། ཐུན་མོང་གི་མཚན་དཔེ་ཞེས་བྱ་མོད་ཀྱི། ལོངས་སྐུའི་ཁྱད་པར་གྱི་མཚན་དཔེ་ནི་ཕྱིའི་དེ་རྣམས་ཀྱི་སྟེང་དུ། ནགས་གི་ནི། འབྲས་བུ་དཔེ་བྲལ་གྱི་སེམས་དཔའ་བཅུ་དྲུག་ཡབ་ཡུམ་རྣམས་ཡིན་ཏེ། ཡབ་བཅུ་དྲུག་ཡུམ་བཅུ་དྲུག་རྣམ་སྣང་བསྡོམས་པ་ནི་ནང་གི་མཚན་བཟང་སོ་གཉིས། དེ་དག་གི་དབུ་རྒྱན་གྱི་ལྷ་རྒྱལ་བ་རིགས་ལྔ་ལྔ་ཡོད་པ་རྣམས་བསྡོམས་པ་ནི་ནང་གི་དཔེ་བྱད་བརྒྱད་ཅུ་ཡིན་
པས། དེ་ལྟར་ཡབ་ཡུམ་ལྷ་ཚོགས་དེ་ཐམས་ཅད་ལོངས་སྐུ་ཉིད་ཀྱི་རང་སྣང་གི་འཁོར་གྱི་ཚུལ་དུ་ཉི་མ་དང་འོད་ཟེར་བཞིན་དུ་འབྲལ་མེད་པར་བཞུགས་པ་ལ་ནང་གི་མཚན་དཔེར་བཤད་དོ། །གསང་བའི་ནི། དགའ་བ་བཞི་པོ་རེ་རེ་ལ་དགའ་བའི་དགའ་བ་སོགས་ཕྱེས་པའི་བཅུ་དྲུག་དང་། དེ་ཉིད་ཀྱང་ཐབས་ཀྱི་དགའ་བ་བཅུ་དྲུག་དང་ཤེས་རབ་ཀྱི་དགའ་བ་བཅུ་དྲུག་བསྡོམས་པ་ནི་གསང་བའི་མཚན་བཟང་པོ་གཉིས། དེ་རེ་རེ་ལ་ཡེ་ཤེས་རྣམ་པ་ལྔ་ལྔའི་ལོངས་སྤྱོད་དང་ལྡན་པའི་ཕྱིར་ན་གསང་བའི་དཔེ་བྱད་བརྒྱད་ཅུ་ཡིན་ཏེ། དེས་ན་ཕྱི་ནང་གསང་གསུམ་གྱི་མཚན་དཔེ་ཚང་བ་ནི་ལོངས་སྤྱོད་རྫོགས་སྐུའི་ཁྱད་ཆོས་ལགས། ངེས་ཚིག་གི་དབང་དུ་བགྱི་ན། དྲུག་པ་ཅེས་པའི་ཐ་སྙད་འདོགས་པའི་རྒྱུ་མཚན་ནི་
རིགས་ལྔ་ལ་རྡོ་རྗེའི་རིགས། རིན་པོ་ཆེའི་རིགས། པདྨའི་རིགས། ལས་ཀྱི་རིགས། དེ་བཞིན་གཤེགས་པའི་རིགས་དང་ལྔའི་ཁར། ཀུན་འདུས་ཀྱི་རིགས་དང་དྲུག ཡེ་ཤེས་ལ་ཆོས་དབྱིངས། མེ་ལོང་། མཉམ་ཉིད། སོར་རྟོག བྱ་གྲུབ་ཡེ་ཤེས་དང་ལྔའི་སྟེང་དུ། །མི་གནས་པའི་ཡེ་ཤེས་དང་དྲུག སྐུ་ནི་ཆོས་སྐུ། ལོངས་སྐུ། སྤྲུལ་སྐུ་མི་འགྱུར་རྡོ་རྗེའི་སྐུ། མངོན་པར་བྱང་ཆུབ་ཀྱི་སྐུ་དང་ལྔའི་ཁར། ཀུན་ཁྱབ་ཀྱི་སྐུ་འམ། ཁྱབ་བདག་གི་སྐུ་ཞེས་བྱ་བ་དང་དྲུག་གི་ངེས་པ་དང་སྦྱར་བས་ན་དྲུག་པ་ཅེས་བྱ་བའོ། །རྡོ་རྗེ་ཞེས་པ་ལ་དཔེ་དོན་རྟགས་སུམ་ལས། དཔེ་རྡོ་རྗེ་ནི་ཕ་ལམ་སྟེ། ཚུར་རྩིས་ཀྱང་མི་ཆོད་མི་ཤིག་ཅིང་ཕར་གང་ལ་ཡང་ཐོགས་པ་མེད་པ་ནི། ཐུགས་རྗེའི་ནུས་པ་དེ་ལྟ་བུ་མཚོན་ལ། དོན་རྡོ་རྗེ་ནི་ཆོས་ཉིད་འགྱུར་བ་མེད་པ་དང་། རྟགས་ཀྱི་རྡོ་རྗེ་ནི་རྩེ་གཅིག་པ་གསུམ་པ་ལྔ་པ་དགུ་པ་
སོགས་ནས་བརྒྱ་སྟོང་གི་བར་གྱི་མཚན་ཉིད་ལྡན་པའི་ཕྱག་མཚན་ཏེ། དེ་ལྟ་བུ་དཔེ་དོན་རྟགས་སུམ་གྱི་ཡོན་ཏན་མངའ་བའམ། དེའི་དོན་དང་མི་འབྲལ་བའི་ཕྱིར། འཆང་བའམ་འཛིན་པའི་སྐད་དོད་རྡ་ར་ཞེས་འབྱུང་བས་ན། བཛྲ་དྷ་ར། རྡོ་རྗེ་འཆང་ཞེས་མཚན་དུ་བརྗོད་པའོ། །མདོར་ན་དེ་ལྟར་རིགས་ཐམས་ཅད་ཀྱི་ཁྱབ་བདག་རྡོ་རྗེ་འཆང་ཆེན་པོ་དེ་ཉིད་ལ་མཚན་གྱི་རྣམ་གྲངས་སུ། ཆོས་ཀྱི་སྐུའི་གནས་སྐབས་སུ་ནི་ཀུན་ཏུ་བཟང་པོ་ཅེས་བྱ་ལ། མཚན་དཔེ་གཟུགས་སྐུའི་སྣང་བ་བསྟན་ཚེ་རྡོ་རྗེ་འཆང་ངམ་རིགས་ལྔའི་སངས་རྒྱས་དང་། འགྲོ་འདུལ་སྤྲུལ་པ་སྐུར་བསྟན་པའི་དུས་ན་ནི་ཤཱཀྱའི་དབང་པོ་སོགས་ཕྱོགས་བཅུའི་སངས་རྒྱས་ཐམས་ཅད་དང་། གསང་སྔགས་རྒྱུད་སྡེའི་དཀྱིལ་འཁོར་དུ་སྤྲུལ་བའི་སྐབས་སུ་ནི། འཁོར་ལོ་བསྡོམ་པ། དགྱེས་པ་རྡོ་རྗེ་གསང་བ་འདུས་པ། དུས་ཀྱི་འཁོར་ལོ་སོགས་
མཚན་དང་རྣམ་འགྱུར་མཐའ་ཡས་པར་བསྟན་མོད། ཞུ་བ་པོའི་སྡུད་པ་པོའི་རྣམ་པར་དགོས་ཆེད་ཀྱི་དབང་གིས་སྤྲུལ་པར་མཛད་པའི་ཚེ་ནི། རྡོ་རྗེ་སེམས་དཔའ། རྡོ་རྗེ་སྙིང་པོ། རྡོ་རྗེ་ཆོས། ལག་ན་རྡོ་རྗེ་ལ་སོགས་པ་མཚན་གྱི་རྣམ་གྲངས་དུ་མར་སྤྲུལ་པ་དང་། གཞན་ཡང་གདུལ་བྱའི་ཁམས་དབང་བསམ་པ་བློ་རྒྱུད་སྐལ་སྣོད་སྣ་ཚོགས་པ་སོ་སོ་ལ་གང་འདུལ་གྱི་གཟུགས་དང་མཚན་དང་འདུལ་ཐབས་ཀྱི་བཀོད་པ་བསམ་གྱིས་མི་ཁྱབ་པ་སྟོན་པར་མཛད་པ་ཡིན་ཕྱིར། འོ་སྐོལ་བག་ཆག་ཐུག་པོའི་སྒྲིབ་གཡོག་ཅན་དག་ལ་ནི། ཀུན་བཟང་ངམ་རྡོར་འཆང་། ཤཱཀྱ་ཐུབ་ཅེས་པ་ལ་སོགས་དེ་དག་གང་ཞིག་ཡིན་སྙམ་ན། རང་ཉིད་ལ་བྱང་ཆུབ་ཀྱི་ལམ་སྟོན་པའི་བླ་མ་དེ་ཉིད་ཁོ་ན་ཡིན་པར་ཤེས་དགོས་པ་དང་། དེ་ཉིད་ཀྱང་མཚོན་བྱེད་དཔེའི་བླ་མའམ། རྐྱེན་གྱི་བླ་མ་ཡིན་མོད་ཀྱི། རྒྱུའམ་ངོ་བོ་
དངོས་ནི་ད་ལྟའི་ཐ་མལ་གྱི་ཤེས་རིག་རྗེན་པ་བཟང་ངན་གྱི་བཅོས་སླད་མ་ཕོག་པ་འདི་ཉིད་མཚོན་བྱ་དོན་གྱི་བླ་མ་ཀུན་བཟང་རྡོ་རྗེ་འཆང་དངོས་གཞི་ཡིན་པ་དང་། ཡིན་ཀྱང་རང་ངོ་མ་ཤེས་པས་འཁྲུལ་བའི་གཞི་མེད་བཞིན་པར་འཁྲུལ་པའི་རྫུན་སྣང་ལ་སྤྱོད་པ་འདིས་གོ་ཆོད་པ་མ་གཏོགས། ཆོས་ཀྱི་སྐུ་དང་ཡེ་ནས་སྐད་ཅིག་ཀྱང་འབྲལ་མ་མྱོང་བ་ཡིན་ནོ། །ཚུལ་འདི་ལ་དགོངས་ནས་རྒྱལ་བ་ཡང་དགོན་པས། གསང་སྔགས་རང་གཞུང་རྡོ་རྗེའི་ཚིག་བདུན་ལས་ཀྱང་། ཆོས་ཐམས་ཅད་སྐུ་གསུང་ཐུགས་རྡོ་རྗེ་བདག་ཉིད་དུ་དབྱེར་མེད་ཅིང་འགྱུར་བ་མེད་པས་ན་རྡོ་རྗེ། དེ་ཇི་ལྟ་བར་རྟོགས་ཤིང་མངོན་དུ་གྱུར་པས་གཞི་ལམ་གྱི་ཉེས་སྒྲིབ་ཟད་དེ་ཡེ་ཤེས་ཆེན་པོའི་དངོས་གཞི་ལས་མི་འདའ་ཞིང་མི་འབྲལ་བ་ནི་འཛིན་པའམ་འཆང་
བ་སྟེ། རྡོ་རྗེ་འཛིན་པའི་གོ་འཕང་ཞེས་བྱའོ། །ཞེས་གསུངས་པ་ལྟར་རོ། །དེའི་ཞིང་ཁམས་ཀྱང་དྲང་དོན་གྱི་སྐབས་སུ་ནི། འོག་མིན་སྟུག་པོ་བཀོད་པའི་ཞིང་ཁམས་ཞེས་བྱ་བ་གཙང་རིས་ཀྱི་འོག་མིན་ནས་སྟེང་དུ་དཔག་ཚད་གྲངས་མེད་འདས་པའི་གོང་དུ་ཚུལ་གྱི་བཀོད་པ་དང་ཡོན་ཏན་སོགས་རྒྱ་ཆེར་གསུངས་མེད་ཀྱང་། ངེས་པའི་དོན་དུ་ནི་རང་རིག་པའི་ཡེ་ཤེས་རང་ངོ་ཤེས་པའི་ངོ་བོ་ནི་ཆོས་སྐུ་ཀུན་བཟང་རྡོ་རྗེ་འཆང་ཡིན་ལ། དེའི་རང་སྣང་ཡེ་ཤེས་ཀྱི་སྤྱོད་ཡུལ་ཐམས་ཅད་འོག་མིན་ཆོས་དབྱིངས་ཀྱི་ཕོ་བྲང་ཡིན་པས། དེའི་གནད་ཀྱིས་ད་ལྟ་ལམ་ཉམས་ལེན་གྱི་རིགས་ཐམས་ཅད་ལ་ཡང་འདིའི་གནད་དོན་ལ་གོམས་སུ་འཇུག་པ་ཡིན་ཏེ། དེ་ཡང་བསྐྱེད་རིམ་བསྒོམ་ན་ནི་སྣོད་གཞལ་ཡས་ཁང་དང་བཅུད་ལྷ་རུ་མོས་པ་དང་། ཞིང་སྦྱོང་བསྒོམ་ན་ཡང་རང་ཉིད་ཁང་ཁྱིམ་གནས་ཡུལ་ནས་
བཟུང་སྟེ་འཇིག་རྟེན་ཐམས་ཅད་དག་པའི་ཞིང་ཁམས་སུ་བསྒོམ་པ། རྨི་ལམ་སྦྱོང་ན་མགྲིན་པའི་རྩ་འཁོར་དང་། ཡིག་འབྲུ་རྣམས་ཞིང་ཁམས་སུ་བསྒོམ་ཚུལ་དང་། འོད་གསལ་སྦྱོང་ན་ཡང་སྙིང་གར་དེ་ནི་དང་། བར་དོ་སྦྱོང་ན་མཐོང་སྣང་གི་འཁྲུལ་ཡུལ་གང་བྱུང་ཐམས་ཅད་ཞིང་ཁམས་དག་སྣང་འབའ་ཞིག་ཏུ་བསྒོམ་ཐབས་སོགས། མདོར་ན་མ་དག་འཁྲུལ་པའི་ལས་སྣང་འདི་དག་པ་ཡེ་ཤེས་ཀྱི་སྣང་བར་བསྒྱུར་ཐབས་ཁོ་ན་ཡིན་ནོ། དེ་དག་ཀྱང་མ་ཡིན་པ་ལ་ཡིན་པར་བསྒོམས་པའི་ལོག་ཤེས་ནི་མ་ཡིན་ཏེ། ཡིན་པ་ལ་ཡིན་པར་མ་ཤེས་པའི་ལོག་འཁྲུལ་གྱི་བག་ཆགས་འདི་སྦྱོང་ཐབས་ལགས། སྤྱིར་ཡང་། འོ་སྐོལ་མི་འཇེད་ཀྱི་ཞིང་འདི་ནི་སྤྲུལ་པ་སྐུའི་ཞིང་ཁམས་ཚངས་ཆེན་གྱི་ནང་ཚན་ཡིན་པ་དང་། ཚངས་ཆེན་སྤྲུལ་སྐུའི་
ཞིང་ཐམས་ཅད་ནི་ལོངས་སྐུའི་ཞིང་ཚངས་པ་རྔ་སྒྲའི་ནང་ཚན་ཁོལ་བུ་ཡིན་ལ། ལོངས་སྐུའི་ཞིང་ཁམས་དེ་མཐའ་དག་ནི་ཆོས་ཀྱི་སྐུའི་ཞིང་ཁམས་འོད་གསལ་རྡོ་རྗེ་སྙིང་པོའི་ནང་ཚན་གྱི་བྱེ་བྲག་པ་ཡིན་པ་སྟེ། ཆོས་སྐུའི་ཞིང་དེའི་ཁོངས་སུ་མ་ཆུད་པ་ནི་བརྟན་གཡོ་འཁོར་འདས་གང་ཡང་ཡོད་པ་མ་ཡིན་པ་དང་། དེ་ལྟར་སྣོད་བཅུད་ཐམས་ཅད་ཀུན་ཏུ་བཟང་པོའི་རོལ་པར་མ་གྱུར་པ་ནི་རྡུལ་ཙམ་མ་མཆིས་པས་ན། སེམས་ཅན་ཐམས་ཅད་སངས་རྒྱས་ཉིད། །འོན་ཀྱང་བློ་བུར་དྲི་མས་སྒྲིབས། །ཅེས་སོགས་ཀྱི་ལུང་དང་། འཆད་པ་པོ་ང་ཆོས་ཀྱང་ང་། །སོགས་དང་། འཇིག་རྟེན་འཇིག་རྟེན་འདས་པ་ང་། །ཞེས་སོགས་ཀྱི་ལུང་དོན་ཐམས་ཅད་འདིར་འབབ་བོ།། ༈ །།འོན་ཏེ། དེ་ལྟར་ཡིན་ཀྱང་གནས་སྐབས་སུ་འགྲོ་བ་སོ་སོའི་བག་ཆགས་བཟང་ངན་གྱི་སྣང་བ་དབང་བ་བཙན་ཕྱིར། ཞིང་ཁམས་ལ་ལ་ན་བདེ་
ཞིང་སྐྱིད་པར་སྣང་བ་དང་། ཚེ་ལོ་ཡར་འཕེལ་དང་། འཁོར་ལོ་བསྒྱུར་རྒྱལ་དང་སངས་རྒྱས་བྱོན་པ་དང་། མཐོ་རིས་དང་ཐར་པའི་གོ་འཕངས་ལ་སྤྱོད་པར་སྣང་བ་དང་། ཞིང་ཁམས་ལ་ལར་རྒྱལ་བ་མྱ་ངན་ལས་འདའ་བ་དང་། བསྟན་པ་ནུབ་པ་དང་། རྒྱལ་པོ་དང་དགེ་སྦྱོང་ཆོས་བཞིན་མི་སྤྱོད་པ་དང་། བསྐལ་པ་མར་འགྲིབ་དང་། ནད་མུག་མཚོན་གྱི་བསྐལ་པས། སྐྱེ་འགྲོ་རྣམས་མྱ་ངན་དང་སྡུག་བསྔལ་གྱི་ཉམས་ཉེས་པར་གྱུར་བ་སོགས་སྣ་ཚོགས་པར་སྣང་ཞིང་། དེ་ཐམས་ཅད་ཀྱང་སོ་སོའི་རང་སྣང་ཡིན་པའི་གནད་ཀྱིས་ཞིང་ཁམས་གཅིག་ལ་ཡང་མཐོང་ལུགས་མི་འདྲ་བ་ཡོད་དེ། དཔེར་ན། མདོ་ལས་བྱང་ཆུབ་སེམས་དཔའ་ཚངས་པ་རལ་པ་ཅན་གྱིས་ཤཱ་རིའི་བུ་ལ། གནས་བརྟན་ཁྱོད་ཀྱིས་བཅོམ་ལྡན་འདས་ཤཱཀྱ་ཐུབ་པའི་ཞིང་འདིའི་མཚན་ཉིད་ཇི་ལྟ་བུར་མཐོང་ཞེས་
དྲིས་པས། ཤཱ་རིའི་བུས་བདག་གིས་ནི་ཤཱཀྱའི་ཞིང་ངམ་གྲོག་དང་གཅོང་རོང་དང་གཡང་ས་དང་ཚེར་མས་གང་ཞིང་མི་བདེ་བའི་རང་བཞིན་དུ་མཐོང་ངོ་། །ཞེས་སྨྲས་པས། དེ་ན་རེ། དེ་ལྟ་བུར་མཐོང་བ་དེ་ནི་མ་བཟང་སྟེ། གནས་བརྟན་ཁྱོད་ཀྱི་རྒྱུད་ལ་མཚན་འཛིན་གྱི་ངམ་གྲོག་དང་། མ་རིག་པའི་གཅོང་རོང་དང་། བདག་ཏུ་ལྟ་བའི་གཡང་ས་དང་། ཉོན་མོངས་པའི་ཚེར་མ་སོགས་ཀྱིས་གང་བའི་མཐུ་ཡིན་གྱི། བདག་གིས་ནི་ཞིང་འདི་རིན་ཆེན་སྣ་ཚོགས་ལས་གྲུབ་ཅིང་ཁོད་སྙོམས་ལག་མཐིལ་ལྟར་འཇམ་པ་ལ་སོགས་ཡོན་ཏན་གྱི་བཀོད་པ་ཚད་མེད་པས་བརྒྱན་པར་མཐོང་ལགས་སོ། །ཞེས་སོགས་སྨྲས་པའི་ལོ་རྒྱུས་ལྟ་བུ་སྟེ། མདོར་ན་ཆོས་ཉིད་ཀུན་ཏུ་བཟང་པོའི་ཐུགས་ཡེ་ཤེས་མཉམ་པ་ཆེན་པོས་སྲིད་ཞི་འཁོར་འདས་མཐའ་དག་ལ་ཁྱབ་ནི་ཁྱབ། ཁྱབ་ཀྱང་སེམས་ཅན་རྣམས་རང་གིས་རང་
སྒྲིབས་པ་ལྟ་བུས་རང་ངོ་མ་ཤེས་པར་ཁམས་གསུམ་འཁོར་བ་མཐའ་མེད་ཀྱི་འཁྲུལ་འཁོར་ལ་སྤྱོད། སྤྱོད་ཀྱང་ཆོས་སྐུ་གཞི་གནས་ཀྱི་ཡེ་ཤེས་ལ་འཕོ་འགྱུར་བྲི་གང་དུ་གྱུར་བ་ནི་ནམ་ཡང་མ་མཆིས་ཏེ། གང་ཞིག་དམྱལ་བ་མནར་མེད་པའི་སྡུག་བསྔལ་ཉམས་སུ་མྱོང་བདོ་བའི་ཤེས་ངོར་ཡང་བདེར་གཤེགས་སྙིང་པོའི་ཡེ་ཤེས་གྲྭ་མ་ཉམས་པར་ལམ་མེ་ཡོད་ཀྱང་། གནས་སྐབས་སུ་མི་དགེ་བ་སྤྱད་པའི་རྒྱུ་འབྲས་རྟེན་འབྲེལ་གྱི་རང་གཟུགས་སྡུག་བསྔལ་གྱི་ཚེར་སྣང་ཤར་བ་ཙམ་ཡིན་གྱིས། དོན་དུ་ཆོས་ཀྱི་སྐུ་ལས་གཞན་དུ་གཡོས་པ་ནི་སྤུ་ཙམ་མ་དམིགས་སོ། །དེས་ན་རང་ཉིད་མ་རིག་པའི་སྒྲིབ་གཡོགས་འཐུག་པོའི་དུས་སུ་ནི་མ་དག་འཁོར་བའི་ལས་སྣང་འབའ་ཤིག་ལས་གཞན་མི་སྣང་ལ། གདམ་ངག་ཉམས་ལེན་གྱི་མཐུ་སོགས་ལས་རིམ་གྱི་
སྒྲིབ་པ་ཇེ་སྲབ་ཏུ་གྱུར་པ་ན་ཡེ་ཤེས་ཀྱི་སྣང་བ་ཡང་ཇེ་གསལ་དང་། མཐར། སྒྲིབ་བྱེད་གཏན་ཟད་དུ་གྱུར་ཚེ་སྐུ་དང་ཡེ་ཤེས་དང་། ཞིང་ཁམས་ཀྱི་ཡོན་ཏན་ཐམས་ཅད་རང་ལ་རྫོགས་པ་དེ་ལ་སངས་རྒྱས་པ་ཅེས་པ་ཐ་སྙད་དུ་བརྗོད་པ་ཙམ་ལས། ཞིང་ཁམས་ཡིན་ཞེས་པའི་ཡུལ་ཐག་རིང་གཞན་ཞིག་ཏུ་འགྲོ་དགོས་པ་ལྟ་བུ་ནི་མ་ཡིན་ནོ། །འདི་དག་གི་སྐབས་སུ་གསང་སྔགས་གསར་མའི་ལུགས་ལ་ཆོས་སྐུ་རྡོ་རྗེ་འཆང་ཞེས་པ་ཁོ་ན་འབྱུང་ན། འདིར་ལོངས་སྐུའི་ཚུལ་དུ་བཤད་པ་མི་འཐད་དམ་སྙམ་ན། སྤྱིར་ནི་སྐུ་གསུམ་ངོ་བོ་ལ་ཐ་དད་མ་མཆིས་པ་དང་། ཁྱད་པར་འདི་སྐབས་རྣམས་སུ་ངོ་བོ་ཀུན་ཏུ་བཟང་པོ་སྲིད་ཞི་འཁོར་འདས་ཀུན་ལ་ཁྱབ་པ་དེ་ཉིད་གསང་མཆོག་བླ་ན་མེད་པའི་ཆོས་ཀྱི་འཁོར་ལོ་བསྐོར་ཕྱིར། རང་གདངས་འགག་མེད་ལོངས་སྤྱོད་རྫོགས་པ་མཚན་དཔེའི་
སྐུར་བསྟན་ནས་ཡེ་ཤེས་རང་སྣང་གི་འཁོར་དང་ཞིང་ཁམས་སོགས་ཕུན་སུམ་ཚོགས་པ་ལྔ་ལྡན་གྱི་དཀྱིལ་འཁོར་དུ་རང་ཤར་བ་ཉིད་ངོ་བོ་ཆོས་སྐུ་ལས་གཞན་དུ་མ་གཡོས་ཕྱིར། གསར་རྙིང་གཉིས་ཀྱི་དགོངས་བཞེད་འགའ་བ་ཡོད་པ་མ་ཡིན་ནོ། །དེའི་ཕྱིར་ཡེ་ཐོག་དང་པོར་དཔལ་ཀུན་ཏུ་བཟང་པོ་གཞི་ཐོག་ཏུ་བྱང་ཆུབ་ནས། རྩོལ་མེད་ཨ་ཏིའི་ཐེག་པ་རྒྱུད་སྡེ་འབུམ་ཕྲག་དྲུག་ཅུ་རྩ་བཞི་ལ་སོགས་པ་རྣམས་ནི་རང་མདངས་རིག་པའི་འཁོར་ཡེ་ཤེས་རྒྱ་མཚོའི་ཚོགས་ལ་བརྗོད་བྲལ་དགོངས་པའི་བྱིན་རླབས་ཀྱིས་བསྟན་པ་ལས། སླད་དུ་དཔལ་རྡོ་རྗེ་སེམས་དཔའ་ཉིད་ཀྱི་སྤྲུལ་པ་དགའ་རབ་རྡོ་རྗེ་སོགས་རིགས་འཛིན་གྱི་ཚོགས་ལ་བསྟན་ནས་མི་ཡུལ་དུ་རིམ་གྱིས་དར་ཚུལ་སོགས་ནི་རྙིང་མའི་རྒྱུད་ཀྱི་བྱུང་ཁུངས་ཡིན་ལ་
སླར་ཀུན་བཟང་ཉིད་རྡོ་རྗེ་འཆང་དུ་བཞེངས་ཏེ་ས་བཅུའི་བྱང་སེམས་དང་། ཡེ་ཤེས་དབྱིངས་ཀྱི་མཁའ་འགྲོ་ལ་སོགས་དག་པའི་འཁོར་ཚོགས་རྒྱ་མཚོ་ལ་རྒྱུད་སྡེ་རབ་འབྱམས་ཀྱི་ཆོས་འཁོར་དུས་གསུམ་རྒྱུན་ཆད་མེད་པར་བསྐོར་བ་དག་ཡེ་ཤེས་མཁའ་འགྲོ་རྣམས་ཀྱིས་མི་ཡུལ་དུ་གྲུབ་པའི་རིགས་འཛིན་རྣམས་ལ་སོ་སོར་བརྒྱུད་པ་ནི་གསར་མའི་རྒྱུད་ཀྱི་བྱུང་ཁུངས་ཏེ། དེས་ན་གསང་སྔགས་གསར་རྙིང་ཞེས་པའི་ཐ་སྙད་དུ་གྲགས་པའི་རྩ་བ་ཡང་འདིར་འདུ་ཤེས་པར་བྱ་ཞིང་། བྱེ་བྲག་ཏུ་ནི་རྒྱུད་སྡེ་སོ་སོ་ལ་རང་རང་གི་གླེང་གཞི་ལས་འབྱུང་བ་བཞིན་སྟོན་འཁོར་སྤྲུལ་ཚུལ་མི་འདྲ་བ་ནི་མཐའ་ཡས་པར་བྱུང་བ་དག་གང་འདུལ་ཐུགས་རྗེའི་རོལ་གར་ལགས། དེ་ལྟར་སྐུ་ཉིད་ཀྱིས་དྲུག་པ་རྡོ་རྗེ་འཆང་གི་མཚན་དོན་དྲིས་པ་གཅིག་པུ་ལ་འདི་ཙམ་གྱི་ཁ་ཐག་རིང་བ་བཤད་
ག་ལ་དགོས་ཀྱང་། ཕྱི་རབས་ཀྱི་གང་ཟག་རྒྱུད་གཞུང་ཆེ་བའི་རིགས་ལ་ལྟ་རྟོགས་མི་ནུས་པར་རེ་ཤིག་ཙམ་ལ་ཅུང་ཟད་ཕན་ནམ་བསམ་སྟེ་བྲིས་པ་ལགས་ནའང་། སྤྱིར་ནི་རང་ཉིད་ཐོས་བསམ་གྱི་དབེན་པའི་སྐྱོན་དང་། དགོས་ལམ་དུ། འཆད་ཚུལ་འདི་དག་ཕལ་ཆེར་རྙིང་མ་ལུགས་ཀྱི་སྒྲོས་ཤས་ཆེ་བའི་གཤིས་ཀྱིས། ཆོས་རྒྱུད་མི་གཅིག་པ་གཞན་མའི་ཐུགས་ལ་འབབ་པར་མ་གྱུར་ནའང་བཟོད་པར་མཛད་དུ་གསོལ། ཡང་ཉིད་ཀྱིས། སྐྱེད་རིམ་གྱི་རྣམ་པ་ཐམས་ཅད་དུ། དམ་ཡེ་གཉིས་ལ་བཟང་ངན་མེད་བཞིན་དུ་ངེས་པར་བསྲེ་དགོས་པའི་རྒྱུ་མཚན་གང་ཡིན་པ་དང་། དེ་ལ་ཡང་དབང་བསྐུར་རྒྱས་གདབ་རིགས་བདག་དང་བཅས་པ་ངེས་པ་ངེས་པར་དགོས་པ་འདི། གང་ཞིག་སྐྱེ་བོ་ཕལ་པའི་སློབ་མ་གསར་བུ་བ་ལྟ་བུ་དག་ལ་
གཤིས་རྒྱུད་མ་སྨིན་པ་སྨིན་པར་བྱ་བའི་ཐབས་སུ་དབང་བསྐུར་བར་གསུངས་པ་ཡིན་ན། འདིར་བསྐྱེད་བྱའི་བླ་མ་ཡི་དམ་ཆོས་སྐྱོངས་རྣམས་དབྱེར་མེད་ཀྱི་ངོ་བོ་ལ་གཤིས་རྒྱུད་སྨིན་མ་སྨིན་གྱི་བརྗོད་དོན་ནི་མ་མཆིས་ཚེ། འདི་དག་གི་དགོས་དོན་ཇི་ལྟ་བུ་ཡིན་ཞེས། ཕྱི་རབས་བདག་ལ་དགོངས་ནས་དྲི་བར་མཛད་པའི་ཆ་ལ། སྤྱིར་སྐྱེད་རིམ་ཐམས་ཅད་ལ་སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་དང་བཞིས་ཁོག་མ་ཕུབས་ན་སྐྱེད་རིམ་ཚད་ལྡན་དུ་མི་འགྱུར་ཕྱིར། དེས་ན། སྦྱང་གཞི་ནི་སྣོད་བཅུད་ཐམས་ཅད་གདོད་ནས་དཀྱིལ་འཁོར་དང་ལྷ་རུ་ལྷུན་གྱིས་གྲུབ་ནས་གནས་པ། སྦྱང་བྱ་ནི་དེ་ལྟ་བུ་ཡིན་ལ་ཡིན་པར་མ་ཤེས་པས་སྣོད་བཅུད་ཐ་མལ་དུ་འཛིན་པའི་འཁྲུལ་རྟོགས། སྦྱོང་བྱེད་ནི་སྨིན་བྱེད་ཀྱི་དབང་གིས་སྐབས་སུ་གནས་ལུགས་ཡིན་ཚུལ་ཐམས་ཅད་རང་ལ་
རང་ངོ་སྤྲད། ངོ་འཕྲོད་པར་བྱིན་གྱིས་བརླབས་ངོ་ཤེས་པའི་དོན་ལས་མི་འགྱུར་བར་རྒྱས་གདབ། ཕྱིན་ཆད་དེ་ལས་མི་འདའ་བའི་དམ་ཚིག་ཕོགས་པའི་མཐུས། གྲོལ་བྱེད་ལམ་གྱི་སྐབས་འདིར་ལུས་ངག་ཡིད་གསུམ་རྒྱལ་བའི་སྐུ་གསུང་ཐུགས་རྡོ་རྗེ་གསུམ་གྱི་ངོ་བོར་ལམ་དུ་འཁྱེར་བ་ཡིན་ལ། སྦྱངས་འབྲས་ནི་ཉམས་ལེན་དེ་ཉིད་མངོན་དུ་གྱུར་པས་སྒོ་གསུམ་གྱི་རང་བཞིན་མི་ཟད་རྒྱན་གྱི་འཁོར་ལོར་སྨིན་གྲོལ་མཐར་ཕྱིན་ནས་སྐུ་གསུམ་གྱི་ཡོན་ཏན་ལ་སྤྱོད་པའོ། །བྱེ་བྲག་ཏུ། སྔགས་ཀྱི་རྒྱུད་སྡེའི་རིམ་པ་ཐ་དད་ལ་དམ་ཚིག་ཡེ་ཤེས་བསྐྱེད་ཚུལ་ཡང་ཐ་དད་སྟེ། བྱ་རྒྱུད་བདག་དམ་ཚིག་པ་འབངས་དང་ལྷ་ཡེ་ཤེས་པ་རྗེའི་ཚུལ་དུ། མདུན་གྱི་ནམ་མཁའ་སོགས་སུ་སྤྱན་དྲངས་ནས་མཆོད་བསྟོད་སོགས་
ཇི་ལྟར་རྗེ་ལ་འབངས་ཀྱི་ཞུ་བ་གསོལ་བ་བཞིན་བྱེད་པའི་ཚུལ་དང་། སྤྱོད་རྒྱུད་དུ་དམ་ཡེ་གཉིས་པོ་འདྲ་མཉམ་དུས་ན་ནམ། གྲོགས་པོའི་ཚུལ་དུ་བསྒྲུབ་པ་དང་། རྣལ་འབྱོར་གྱི་རྒྱུད་དུ་བདག་དམ་ཚིག་པ་མངོན་བྱང་ལྔ་ལ་སོགས་པའི་སྒོ་ནས་བསྐྱེད་པ་ལ། ལྷ་ཡེ་ཤེས་སེམས་དཔའ་འོག་མིན་ནས་སྤྱན་དྲངས་ཤིང་ཕྱག་རྒྱ་ཚད་མེད་བཞི་ལྡན་གྱིས་དགུག །འཆིང་། བསྡོམ། དགྱེས་པར་བྱ་བ་དང་བཅས་པས་བསྟིམ་ཞིང་བསྲེ་ཚུལ་སོགས་ནི་གསང་སྔགས་སྤྱིའི་དགོངས་པ་ཉིད་ཡིན་མོད་ལ། དེ་ལས་ཁྱད་པར་དུ་གྱུར་པ་གསང་སྔགས་ནང་པ་བླ་མེད་ཀྱི་རྒྱུད་སྡེ་རྣམས་ལས་འགའ་ཞིག་ནི་དགོས་པ་སྐབས་དོན་གྱི་དབང་གིས་གོང་མ་དེ་དག་གིས་ལུགས་ལྟར་བྱ་བ་ཡང་འབྱུང་མོད་ཀྱི། གཞན་དུ་ན། སྣོད་བཅུད་ཡེ་ནས་རྒྱལ་བའི་དཀྱིལ་འཁོར་དུ་གདོད་ནས་ལྷུན་
གྱིས་གྲུབ་པར་ནི་བླ་མེད་སྤྱི་མཐུན་གྱི་དགོངས་པ་དང་། བྱེ་བྲག་ཏུ་ཕུང་པོ་ཁམས། སྐྱེ་མཆེད་རྩ་རླུང་ཁམས་སོ་སོའི་སྦྱང་གཞི་སྦྱོང་བྱེད་དམ། དག་རྒྱུ་དག་བྱེད་དག་འབྲས་སོགས་ཀྱི་སྦྱར་བཤད་མི་འདྲ་བ་ནི་རྒྱུད་སྡེ་ཐ་དད་ཀྱི་སྐབས་དོན་ཡིན་མོད་ནའང་། འདི་སྐབས་དོན་གྱི་སྙིང་པོ་ཧྲིལ་གྱི་དྲིལ་བ་ལ་ནི། བདག་གཞན་སྣོད་བཅུད་ཕུང་ཁམས་སྐྱེ་མཆེད་སྒོ་གསུམ་གྱིས་བསྡུས་པའི་དངོས་པོ་རྣམས་རང་ངོ་ཤེས་མ་ཤེས་ཇི་ལྟ་བུའི་ཚེ་ཡང་ཡེ་གདོད་མ་ཉིད་ནས་རྒྱལ་བའི་སྐུ་གསུང་ཐུགས་ལས་ནམ་ཡང་འདའ་བ་མེད་པས་དམ་ཚིག དེ་ལྟར་ཡིན་ཚུལ་ངོ་ཤེས་པ་ནི་སེམས་དཔའ་སྟེ། དམ་ཚིག་སེམས་དཔའ་ཞེས་པའི་མིང་དོན་ནི་དེར་འདུ་བ་དང་། དེ་ལྟར་གཟོད་ནས་ལྷུན་གྱིས་གྲུབ་པ་དེ་ཁོ་ན་ཉིད་ཀྱང་དོན་དམ་པར་ཡོད་མེད་
རྟག་ཆད་འགྲོ་འོངས་དངོས་དང་དངོས་མིན་སོགས་མཐའ་གང་དུ་མ་ལྷུང་། ཕྱོགས་རིས་གང་དུ་ཡང་མ་ཉེ། མཚན་མར་གང་དུའང་མ་གྲུབ་པའི་ཆོས་སྐུ་ཁྱབ་གདལ་གྱི་དགོངས་པའི་ངོ་བོ་ཡིན་པས་ན་ཡེ་ཤེས། དེའི་རང་བཞིན་ཇི་ལྟ་བར་རྟོགས་པ་ནི་སེམས་དཔའ་ཞེས་བྱ་སྟེ། དེའི་ཕྱིར་དམ་ཡེ་གཉིས་པོ་ཡང་ཚིག་ལ་ཐ་དད་ཀྱང་དོན་ལ་དབྱེར་མེད་འདུ་འབྲལ་མེད་པའི་ཚུལ་ནི་བླ་མེད་ངེས་གསང་སྙིང་པོའི་རྒྱུད་སྡེ་ཀུན་དགོངས་པའི་ཞེ་ཕུགས་གཅིག་ཏུ་གཞོལ་བའི་ཚུལ་འདི་ནི། བབས་ཀྱི་འཕྲོས་ཞུས་སུ་ཕུལ་བ་ལགས་ཤིང་། དེ་ལྟར་ཡིན་བཞིན་དུ་དམ་ཚིག་པ་བསྐྱེད་ཅིང་ཡེ་ཤེས་པ་དབྱིངས་ནས་སྤྱན་དྲངས་བ་དང་བསྟིམ་དང་བསྲེ་བའི་སྤྲོས་པ་འདིས་ཅི་བྱ་སྙམ་ན། འདིའི་དགོས་པ་ནི། སྔགས་ལམ་ལ་ཞུགས་པའི་གང་ཟག་ལས་དང་པོ་པ་རྣམས་ལ་གདོད་མའི་ཡིན་
ལུགས་ཇི་ལྟ་བ་ངོ་སྤྲད་ཀྱང་ལ་ལས་ནི་ངོ་མ་འཕྲོད། ལ་ལ་དག་ངོ་སྤྲད་པའི་མཐུས་དོན་སྤྱིའི་གོ་ཡུལ་ཙམ་བློ་མ་ཤར་ཡང་ཐོག་མེད་ཀྱི་བག་ཆགས་ཚན་ཆེས་བའི་དབང་གིས་ཡིན་ཚུལ་ངག་ནས་བརྗོད་རུང་ལ། སྣང་ཚུལ་ལམ་མཐོང་ཚུལ་ལོག་འཁྲུལ་འབའ་ཤིག་ལ་ཞེན་པ་ཨ་འཐས་ཀྱིས་དུས་འདའ་བས་ན། དེ་ལས་བཟློག་པའི་ཕྱིར་སྐུ་མདོག་ཕྱག་ཚན་རྒྱན་ཆས་སོགས་ཀྱི་རྣམ་པ་གསལ་བ། རྟགས་དང་དོན་གྱི་ཡིན་ལུགས་ཇི་ལྟ་བའི་རྣམ་བཞག་དྲན་པ། གསལ་རུང་མི་གསལ་རུང་ཐེ་ཚོམ་གྱི་ཁུ་འཁྲིག་མེད་པར་ལྷའི་ངོ་བོར་ང་རྒྱལ་བརྟན་པ་སྟེ། དེ་ལྟར་སྐྱེད་རིམ་གྱི་གཞུང་ཤིང་གསུམ་ལྡན་གྱི་སྒོ་ནས་དམ་ཚིག་པ་བསྐྱེད་པ་ནི་སྒོ་གསུམ་ཐ་མལ་ཨ་འཐས་ཀྱི་ཞེན་པ་ཞི་བར་བྱེད་པའི་ཐབས་ཀྱི་ཟབ་གནད་ཡིན་
ལ། བསྐྱེད་ཐབས་ཀྱི་རིམ་པ་བྱང་ཆུབ་ལྔ། ཆོ་ག་གསུམ། རྡོ་རྗེ་བཞི། སྐད་ཅིག་དྲན་རྫོགས་སོགས་ཀྱི་བྱ་ཚུལ་དང་། སྐྱེ་གནས་བཞིའི་བག་ཆགས་སྦྱོང་ཚུལ་སོགས་ནི་གཞུང་མན་ངག་སོ་སོའི་སྐབས་ནས་བྱུང་ཕྱིར་འདིར་ཡི་གེ་མང་པོས་དགོས་པ་མི་འབྱུང་ཕྱིར་མ་བརྗོད་ལགས།། ༈ །།གནས་གསུམ་བྱིན་རླབས་ཀྱི་དགོས་ཆེད་ནི། རྒྱལ་བའི་སྐུ་གསུང་ཐུགས་སུ་ཡེ་ནས་ཡིན་པའི་གསལ་འདེབས་བརྗེད་ཐོ་ལྟ་བུ་ཡིན་པར་གསུངས་སོ། །དེ་ནས་གནས་གསུམ་འབྲུ་གསུམ་གྱི་འོད་ཟེར་སྤྲོ་བསྡུའི་ཏིང་འཛིན་རྩལ་སྦྱོང་གི་མཐུ་ལས་རང་འདྲའི་ཡེ་ཤེས་པ་སྤྱན་དྲངས་བ་དང་བསྟིམ་པ་དང་གཉིས་མེད་དུ་འདྲེས་པའི་མོས་པ་ལམ་བྱེད་ཀྱི་དགོས་པ་ནི་ལས་དང་པོ་པ་རྣམས་ཀྱི་དག་སྣང་སྤེལ་བྱེད་དང་། དེ་འཕེལ་བའི་རྐྱེན་གྱིས་མོས་གུས་འབར་ཞིང་། མོས་གུས་
ལ་རྟེན་ནས་བྱིན་རླབས་འབྱུང་བའི་རྟེན་འབྲེལ་གྱི་སྒོ་ཡིན་ནོ། །རང་དང་ཐ་དད་མེད་པའི་ཡེ་ཤེས་ཡིན་ན་ཕྱི་རོལ་ནས་སྤྱན་འདྲེན་རྒྱུ་མེད་བཞིན་དྲངས་པ་དོན་མེད་ཅེ་ན། དོན་ཡོད་དེ། རང་ལས་རང་བྱུང་རང་རིག་གི་དོན་དེ་ནི་ཆོས་སྐུ་ཡིན། ཆོས་སྐུས་ནི་འཁོར་འདས་ཀུན་ལ་ཁྱབ་ཕྱིར་སྤྱན་དྲངས་བའི་ཡུལ་དང་དྲང་རྒྱུ་དྲང་མཁན་སོགས་མཐའ་དག་ཆོས་སྐུ་ཉིད་ཀྱི་རྣམ་རོལ་ལས་ནི་མ་འདས་ཀྱང་། རྩལ་མདངས་སྒྱུ་མའི་རོལ་པ་ཙམ་དུ་ཡེ་ཤེས་བསྟིམ་པའི་རྒྱུ་རྐྱེན་ལས། ཏིང་ངེ་འཛིན་གྱི་འཆར་སྒོའི་ཉམས་སྣང་བདེ་གསལ་མི་རྟོགས་སོགས་དང་ལྷན་སྐྱེས་ཀྱི་ཡེ་ཤེས་སོགས་ཅི་རིགས་འཆར་བར་འགྱུར་ཞིང་། དེ་ལ་བརྟེན་ནས་དམ་ཡེ་དབྱེར་མེད་ཀྱི་དོན་དངོས་ལ་གོམས་པ་མཐར་ཕྱིན་པར་བྱེད་པའི་དགོས་པ་ཡོད་པ་སྟེ། དེ་ལྟ་བུའི་
ཏིང་ངེ་འཛིན་ནི་དེ་ལ་སྨིན་བྱེད་དབང་གི་སྐབས་སུ་ནི་དབང་དོན་གྱི་ཡེ་ཤེས་ཟེར་ལ། འདི་སྐབས་སུ་ནི་དམ་ཚིག་པ་ལ་ཡེ་ཤེས་པ་ཞུགས་པའི་ཐ་སྙད་དུ་བརྗོད་པ་ཡིན་ཏེ། ཞུགས་ཡུལ་དང་ཞུགས་རྒྱུ་གཉིས་སུ་མེད་པའི་ཉམས་མྱོང་གི་བྱེ་བྲག་ལགས། གོང་དུ་སྨོས་པའི་དམ་ཡེ་དབྱེར་དེ་གཟོད་ནས་ཡོངས་གྲུབ་ཡིན་ཚུལ་དེ་ལ་སློབ་དཔོན་རིན་པོ་ཆེ་པདྨས་ཀྱང་གསང་སྔགས་ལམ་རིམ་ཆེན་མོར་འདི་ལྟར་གསུངས་ཏེ། ལུས་ངག་ཡིད་གསུམ་སྐུ་གསུང་ཐུགས་སུ་ཡེ་ནས་གནས་ཤིང་དེ་ལས་མི་འདའ་བས་ན་དམ་ཚིག །ལྷར་གསལ་ཞིང་ཐ་མལ་གྱི་ལོག་རྟོག་མེད་པས་ན་སེམས་དཔའ་སྟེ། དམ་ཚིག་སེམས་དཔའི་ངོ་བོ། དེ་ལྟར་གདོད་ནས་གནས་ཤིང་ཡེ་ནས་ཡོད་པ་ནི་ཡེ་ཤེས་གཉིས་འཛིན་གྱི་དྲི་མ་མེད་པ་ནི་སེམས་དཔའ་སྟེ། དམ་ཡེ་དབྱེར་གཉིས་དབྱེར་མེད་དོ། །དེ་ལྟར་ཡིན་ཚུལ་ངོ་ཤེས་ཤིང་གསལ་འདེབས་པ་ལ་རང་བཞིན་གྱི་གནས་
ནས་སྤྱན་འདྲེན་པ་ཅེས་བྱ་བའོ། །ཞེས་གསུངས་ལ། འདི་ཇི་ལྟ་བར་རི་ཆོས་ཡོན་ཏན་ཀུན་འབྱུང་གི་སྐྱེད་རིམ་སྐབས་ནས་བཤད་དོ། །དེ་ནས་འགག་དོན་ལ། བདག་གཞན་སྣང་སྲིད་སྣོད་བཅུད་ཐམས་ཅད་རང་བཞིན་ཆོས་སྐུའི་ངང་དུ། རོ་གཅིག་པའི་ཏིང་ངེ་འཛིན་རྩལ་སྦྱོང་གིས་ཆོས་སྐུ་ལ་ཆོས་སྐུ་བསྟིམ། ཡེ་ཤེས་ལ་ཡེ་ཤེས་གཞུག་ཆོས་ཉིད་རོལ་པ་ཡིན་ཕྱིར། ལས་དང་པའི་དག་སྣང་སྤེལ་བྱེད་དང་། མངོན་དུ་གྱུར་བ་རྣམས་རྩལ་འབྱོངས་བྱེད་ཀྱི་ཏིང་ངེ་འཛིན་སྨད་དུ་བྱུང་བ་ལགས། དེ་ནས་དབང་བསྐུར་རྒྱས་འདབ་ཀྱི་དགོས་དོན་ཡང་། ངོ་བོའི་ཆ་ནས་སྒོ་གསུམ་རྡོ་རྗེ་གསུམ་དུ་ཡེ་གྲུབ་ཆེན་པོ་ལ་ལ་སྨིན་པའི་སྐྱོན་ག་ལ་མཆིས་ཀྱང་། རྣམ་པའི་ཆ་ལ། ཡིན་ལ་ཡིན་པར་མ་ཤེས་པའི་རྟོག་སྒྲིབ་སྦྱང་དགོས་པར་བྱུང་ཚེ་
དམ་ཚིག་པ་སྐྱེད། ཡེ་ཤེས་པ་བསྟིམ། གཉིས་མེད་དུ་བསྲེས། དེ་ལས་མི་འདའ་བའི་ཕྱིར་དབང་བསྐུར་ཞིང་རྒྱས་གདབ་པས་འགྱུར་བ་མེད་པར་བྱེད་པ་ཡིན་ལ། དེ་ལ་ཡང་དབང་གི་ལྷ་ནི་རང་གི་ཕུང་པོ་ལྔ་གནས་སུ་དག་པའི་ངོ་བོ་རྒྱལ་བ་རིགས་ལྔ། དབང་གི་ངོ་བོ་ཡང་དུག་ལྔ་མ་སྤངས་གནས་སུ་དག་པ་ཡེ་ཤེས་ལྔའི་ངོ་བོ། བསྐུར་བའི་འབྲས་བུ་ཡང་སྐུ་ལྔ་ལྷུན་གྲུབ་ཀྱི་དོན་ལ་རང་དབང་རང་གིས་ཐོས་པ་ཉིད་ཡིན་ནོ། །རིགས་བདག་གི་རྒྱས་འདེབས་པའི་དགོས་པ་ནི། རང་བྱུང་ཡེ་ཤེས་རང་དབང་བསྒྱུར་བའི་དོན་དེ་ལས། སླར་མི་འདའ་ཞིང་མི་འཁྲུལ་པའི་དཔང་པོའི་ཚུལ་དུ་འབྲལ་མེད་བསྟན་པའི་དོན་ཏེ། རིགས་བདག་དེའི་རང་བཞིན་ནི་རང་རིག་ལ་རང་རིགས་ཀྱིས་རྒྱས་གདབ་པ་དང་། རིགས་མི་མཐུན་ལ་རིགས་མི་མཐུན་གྱི་རྒྱས་གདབ། རྒྱུ་ལ་འབྲས་བུའི་རྒྱས་གདབ་པ། འབྲས་བུ་
ལ་རྒྱུའི་རྒྱས་གདབ་པ་སོགས་ཀྱི་དབྱེ་བ་མཐའ་ཡས་པར་གསུངས་ནའང་། དོན་ལ་རིགས་ལྔའི་སངས་རྒྱས་སུ་མ་འདུས་པ་མེད་པས་ན། ལོངས་སྐུའི་ཆ་ལུགས་རྣམས་ལ་དབུ་རྒྱན་རིགས་ལྔའི་རྣམ་པར་བསྟན་ཞིང་། དེ་ལྔ་པོ་ཡང་རིགས་འདུས་ཁྱབ་བདག་ཀུན་བཟང་རྡོ་རྗེ་འཆང་རྩ་བའི་བླ་མ་ཉིད་ལ་འདུ་བས། དེ་ཉིད་སྤྱི་བོར་འབྲལ་མེད་བསྟེན་པ་དེ་ལ་རིགས་བདག་ཅེས་བྱ་བ་ཡིན་ཕྱིར། དཔེར་ན་སྤྱན་རས་གཟིགས་ལ་འོད་དཔག་མེད་ལྟ་བུ་རིགས་བདག་གི་སྐུ་དངོས་སུ་བསྟན་པ་དང་། ཡང་། བྱམས་པའི་སྤྱི་བོར་བྱང་ཆུབ་མཆོད་རྟེན་དང་། བྱང་སེམས་ཀུན་བཟང་གི་གཙུག་ཏུ་ནོར་བུ་རིན་པོ་ཆེ་འཆང་བ་ནི་རང་རང་གི་རིགས་བདག་ཤཱཀྱ་ཐུབ་པ་ཉིད་མཆོད་རྟེན་དང་ནོར་བུའི་ཚུལ་དུ་བསྟན་པ་ཡིན་པར་བཤད་ལ། ལྷ་ཁྲོ་བོའི་ཆ་བྱད་ལ་ལ་རིགས་བདག་རྡོ་རྗེ་འཆང་
མཚོན་ཕྱིར་ཐོར་ཚུགས་རྡོ་རྗེ་རྩེ་ལྔས་མཚན་པ་སོགས་ཀྱང་འབྱུང་མོད་ཀྱི། ཐམས་ཅད་ཀྱང་དོན་དུ་བླ་མའི་མཚོན་བྱེད་ཉིད་དང་། ཡང་། རིགས་ལྔ་པོ་དེ་དག་ཀྱང་རང་ཉིད་ལྷ་གང་བསྒོམ་པ་དེ་དང་མཐུན་པའི་རིགས་དེས་གཙོ་བོ་བྱས་པའི་རྒྱལ་བ་རིགས་ལྔས་དབུ་རྒྱན་པ་ཡིན་ཏེ། དཔེར་ན་སྤྱན་རས་གཟིགས་ལ་འོད་དཔག་མེད་ཀྱིས་གཙོ་བྱས་པའི་རིགས་ལྔ། དེའི་དུ་འཇམ་དཔལ་དབྱངས་ལ་རྣམ་སྣང་དང་། ཕྱག་རྡོར་ལ་མི་སྐྱོད་པ། ནོར་ལྷའི་རིགས་ལ་རིན་འབྱུང་། བདུད་རྩི་འཁྱིལ་བ་སོགས་ལ་དོན་གྲུབ་ཀྱི་གཙོ་བྱས་པ་ནི་རིགས་ལ་རིགས་ཀྱི་རྒྱས་གདབ་པར་འགྱུར་ལ། འཁོར་བཞི་པོ་ཡང་ཡོད་པས་རིགས་མི་མཐུན་གྱི་རྒྱས་གདབ་པ་དང་། རྒྱུ་ལ་འབྲས་བུ་དང་འབྲས་བུ་ལ་རྒྱུའི་རྒྱས་གདབ་པ་ཐམས་ཅད་ཞར་ལ་ཚང་བར་འགྱུར་བ་ཡིན་ནོ། །དེས་ན་དབང་བསྐུར་རྒྱས་
འདབ་ཀྱི་དགོས་དོན་ནི་དེ་ལྟར་ལགས་ཤིང་། གསང་སྔགས་གོང་མའི་སྐབས་ལ་ལ་ཞིག་ཏུ་ནི། ཡེ་ཤེས་བསྟིམ་པ་དང་དབང་བསྐུར་རྒྱས་གདབ་སོགས་མི་མཛད་པ་ཡང་འབྱུང་བ་ནི་ཡེ་རྫོགས་ལྷུན་གྲུབ་ཀྱི་དགོངས་པ་སོར་བཞག་ནས། སྤྲོས་པ་ཉེར་བསྡུས་སུ་མཛད་པར་གདའ་ལགས། གཞན་ཡང་ཉིད་ཀྱི་ཕེབས་ཆར། རབ་གནས་ཀྱི་སྐབས་རྣམས་སུ། ནུབ་དང་པོ་ལྟ་གོན་གྱི་རིམ་པར་རྟེན་རྣམས་དམ་ཚིག་པར་སྐྱེད་ནས་ཡེ་ཤེས་པ་སྤྱན་དྲངས་པའི་ཚིག་རྣམས་ཆོག་གཞུང་སོ་སོ་ལ་ལས་ཇི་ལྟར་འབྱུང་བ་བཞིན་གྱིས་སྤྱན་དྲངས་ཏེ་རྟེན་ལ་བསྟིམ་ནས་འབྲུ་གསུམ་གྱི་རྒྱས་གདབ་སོགས་དང་། གདན་འབུལ། བཞུགས་གསོལ་མཆོད་བསྟོད་གྱི་ལས་རིམ་ཐམས་ཅད་ཀྱང་རབ་གནས་ཀྱི་གཞུང་མདོ་སྔགས་གང་གི་ལུགས་སུ་བྱེད་པ་དེ་དང་མཐུན་
པར་གྲུབ་རྗེས། སླར། རྟེན་གྱི་ཡེ་ཤེས་པ་གཤེགས་གསོལ་བྱེད་ཅིང་བཛྲ་ཝཱསྟྲ་ཧཱུྃ་གི་སྔགས་དང་དར་སེར་པོས་རྟེན་དགབ་པ་ནི། རྒྱལ་བུ་རྒྱལ་སར་མ་བཏོན་པ་ལྟ་བུ་ཡིན་ཕྱིར་མཆོད་པ་ལ་མི་དབང་བ་ཡིན་ནོ། །ཞེས་པ་ཁོ་ནར་འབྱུང་བ་དང་། ཡང་། རྒྱལ་བའི་དབང་པོ་དགུ་པས་མཛད་པའི་རབ་གནས་ཀྱི་གཞུང་ལས་ནི། སྟ་གོན་གྱི་ཡེ་ཤེས་པ་མདུན་གྱི་ནམ་མཁར་སྤྱན་དྲངས་པ་ལ་མཆོད་བསྟོད་སོགས་བྱས་པའི་མཐར། ནང་པར་རྟེན་མཆོག་འདི་མ་འབྱོན་པར་མཛད་དུ་གསོལ་གྱིས་སྙན་གསན་ཕབས་ནས་གཤེགས་གསོལ་བྱ་བར་ཡང་གསུངས་སྣང་བ། མདོར་ན་འདི་སྐབས་ལ་ཐེ་ཚོམ་ཤིན་ཏུ་ཆེ་བ་ཞིག་བྱུང་སྟེ། སྟ་གོན་གྱི་ཡེ་ཤེས་པ་དེས་ཡེ་ཤེས་གོ་མ་མཆོད་པའམ། དེ་དང་དངོས་གཞིའི་ཡེ་ཤེས་པ་གཉིས་ལ་བཟང་ངན་གྱི་ཁྱད་ཡོད་པ་ལྟ་བུར་
སོང་བ་དང་། སྟ་གོན་གྱི་ཡེ་ཤེས་པ་དེ་ཡང་བསྟིམ་པ་ཙམ་དུ་མ་ཟད་གནས་གསུམ་འབྲུ་གསུམ་གྱི་རྒྱས་བཏབ་པ་དེ་ལས་མི་འགྱུར་བའི་དགོས་དོན་དུ་བཤད་ན། སླར་དེ་མ་ཐག་གཤེགས་གསོལ་བྱེད་པ་དང་། ཡང་ཡེ་ཤེས་པ་གཤེགས་ཀྱང་དམ་ཚིག་པ་དེས་མཆོད་པ་ལ་མི་དབང་བའི་རྒྱུ་མཚན་སོགས་ཏེ། འདི་སྐབས་ལ་དོགས་གནས་ཤིན་ཏུ་ཆེ་བར་བྱུང་བས། ཇི་ལྟ་བུ་ཡིན་གྱི་དྲི་བ་གནང་བ་ལ། ལན་དོན་དངོས་དང་འཕྲོས་དོན་གཉིས་ཀྱི་དང་པོ་ནི། སྤྱིར་རབ་གནས་བསྡུས་པའི་རིགས་ལ་ནི་སྟ་གོན་ཟུར་དུ་མི་འབྱུང་མོད་ཀྱང་། རྒྱས་པ་སྦྱོར་དངོས་རྗེས་གསུམ་རྩ་བ་དང་ཡན་ལག་ཚང་བའི་ཆོག་གཞུང་རྣམས་ཀྱི་ལུགས་ལྟར་བྱ་བའི་དབང་དུ་བགྱི་ན། སྔོན་འགྲོ་སྟ་གོན་གྱི་དགོས་ཆེད་རྒྱུ་མཚན་ནི། དེ་ཡང་། ལྷ་ལ་ཡེ་ཤེས་བཅུག་པ་ལ་
རབ་གནས། མི་ལ་ཡེ་ཤེས་བཅུག་པ་ལ་དབང་བསྐུར། ཚེ་འདས་ལ་ཡེ་ཤེས་བཅུག་པ་སྒྲིབ་སྦྱོངས། བདག་ཉིད་ལ་ཡེ་ཤེས་བཅུག་པ་ལ་བསྐྱེད་རིམ་ཞེས་བྱ་སྟེ། དེ་རྣམས་ཡུལ་གྱི་དབང་གིས་མིང་ཐ་དད་དུ་བཏགས་ཀྱང་དགོས་དོན་གཅིག་པ་ཡིན་ཕྱིར། ལྷ་ལ་ཡེ་ཤེས་བཅུག་པའི་སྐབས་འདི་ལ་ཡང་། རབ་ཏུ་གནས་པའི་མཁན་པོ་མཚན་ཉིད་དང་ལྡན་པ་ཏིང་ངེ་འཛིན་ལ་དབང་བསྒྱུར་བ་ཞིག་ཡིན་ན། སྟ་གོན་སོགས་སྤྲོས་བཅས་ཆོ་གའི་རིགས་མ་བྱས་ཀྱང་རུང་སྟེ། སྟོང་ཉིད་གདེངས་ལྡན་རྣལ་འབྱོར་པས། །གཟིགས་པ་ཙམ་གྱི་རབ་གནས་འགྲུབ། །ཅེས་གསུངས་ལ། དེ་ལས་གཞན་པས་ནི་ཆོ་གའི་རིམ་པ་ཇི་ལྟ་བར་དགོས་པ་དང་། དོན་དམ་པར་ནི་འཁོར་འདས་ཀུན་ལ་ཆོས་ཀྱི་སྐུས་རབ་ཏུ་གནས་གནས་པ། དམ་ཡེ་དབྱེར་མེད་དུ་བཞུགས་བཞུགས་པ་ཡིན་ནའང་། འདི་སྐབས་སུ་ཀུན་
རྫོབ་འགྲོ་བའི་མོས་བློ་དང་བསྟུན་ནས་ཚོགས་བསགས་སྒྲིབ་སྦྱང་གི་ཐབས་དང་རྟེན་འབྲེལ་སྒྲིག་པའི་སྐབས་ཡིན་ཕྱིར། དང་པོར་རྟེན་དེ་དག་བཞེངས་པའི་དུས་ནས་སྐུ་རྒྱུ་དང་གཟོ་བོ་དང་ལག་ཆ་བྱིན་རླབས་སོགས་ཀྱི་རྒྱུ་རྐྱེན་རྣམ་དག་ཏུ་སྒྲུབས། དེ་ནས་རབ་གནས་ལ་འཇུག་ཚེ་བདག་མདུན་བུམ་གསུམ་གྱི་ཆོ་གས་རབ་ཏུ་གནས་བྱེད་ཀྱི་མཁན་པོ་དང་ཡོ་བྱད་ནུས་ལྡན་དུ་སྒྲུབ། རབ་ཏུ་གནས་བྱའི་རྟེན་དེ་ཡང་རྒྱལ་བའི་སྐུ་གསུང་ཐུགས་རྟེན་ལ་བགེགས་དང་སྒྲིབ་པ་དང་འབགས་རྩོགས་ཀྱི་དྲི་མ་ག་ལ་འོངས་ཀྱང་། གནས་སྐབས་སུ་སྦྱིན་བདག་དང་གཟོ་བོའི་བསམ་སྦྱོར་གྱི་བྱེད་ལས་ལ་རྟེན་པའི་དྲི་མ་དང་བར་ཆད་གྱི་རྐྱེན་གེགས་མཐའ་དག་སྦྱོང་ཕྱིར། ཞི་དྲག་ཕྱེད་གསུམ་གྱི་སྦྱང་བ་དང་ཁྲུས་གསོལ་གྱི་ལས་རིམ་སོགས་ཀྱི་དམ་ཡེ་བསྐྱེད་བསྟིམ་
གྱི་ཡུལ་དུ་རུང་བར་སྒྲུབ། དེ་ནས་ལྷ་གང་ཡིན་གྱི་དམ་ཚིག་པ་བསྐྱེད་ཅིང་ཡེ་ཤེས་པ་བཅུག་པ་དང་། སྟ་གོན་དེ་ཉིད་མ་གྲུབ་ཀྱི་བར་དུ་དམ་ཡེ་མི་འབྲལ་བར་གནས་གསུམ་འབྲུ་གསུམ་གྱི་རྒྱས་བཏབ་པ་དེ་ལ་མཆོད་བསྟོད་སོགས་ཕུལ་བའི་བར་གྱི་ལས་རིམ་དེ་དག་ནི་དངོས་གཞིའི་ཡེ་ཤེས་པ་བཞུགས་པའི་སྣོད་དུ་སྒྲུབས་པའི་ཐབས་ཀྱི་ཡན་ལག་ཡིན་ལ། དེ་ནས་སླར་ཡེ་ཤེས་པ་དེ་དག་ལ་རེ་ཤིག་གཤེགས་ནས་ནང་པར་རྟེན་དམ་ཚིག་པ་ལ་ཡེ་ཤེས་ཀྱི་དབང་པོ་ལྔ་སོགས་དབྱེ་བའི་ཆོ་གས་ཡུལ་ཁྱད་པར་ཅན་དུ་སྒྲུབ་པ་དེ་ལ་སླར་འབྱོན་པའི་སྙན་གསན་དབབ་ཅིང་གསོལ་བ་བཏབ་ནས་གཤེགས་པའི་ཤུལ་གྱི་དམ་ཚིག་པ་དེ་ཉིད་རེ་ཤིག་ལ་རྟེན་རྙིང་པ་རྣམས་དང་ཁྱད་མེད་དུ་མ་གྱུར་བ་ནི། དཔེར་ན། རྒྱལ་བུ་ཡིན་ཀྱང་
རྒྱལ་སར་མ་བཏོན་པའམ། བྲམ་ཟེའི་བུ་རིགས་བྱེད་ཀྱི་ཡོན་ཏན་མ་རྫོགས་པ་དང་། སློབ་མ་ལ་དབང་གཞན་ཐོབ་ཀྱང་རྡོ་རྗེ་སློབ་དཔོན་གྱི་བཀའ་གཏད་ཡོངས་རྫོགས་མ་ཐོབ་བར་དུ་བླ་མ་བྱར་མི་རུང་བ་དང་། མཚུངས་ཕྱིར། མཆོད་པ་ལ་མི་དབང་བའི་ཐ་སྙད་དུ་བྱས་ཏེ། དེའི་རིང་ལ་བར་ཆད་མི་འཇུག་ཕྱིར་བཛྲ་རཀྵ་ཧཾ་གི་རྒྱས་གདབ་ཅིང་གཙུག་ཏོར་འཁོར་ལོ་བསྒྱུར་བའི་སྲུང་བའི་གུར་ཁང་མཚོན་བྱེད་དར་གསེར་མདོག་གིས་བཀབས་ནས་འཇོག་པ་སྟེ། དེ་ལྟར་འདི་ཡན་ཆད་ནི་གང་ཞིག་སློབ་མ་ལ་དབང་བསྐུར་བའི་དུས་སུ། ཐོག་མ་ནས་དཀྱིལ་འཁོར་དངོས་ལྟ་བ་དང་དབང་དངོས་བསྐུར་བའི་སྣོད་དང་སྐལ་པར་མ་གྱུར་བ་དེའི་རྒྱུད་འདུལ་སྦྱོང་གི་སྒོ་ནས་རིམ་གྱི་དཀྲི་དགོས་ཕྱིར། སྟ་གོན་གྱི་དཀྱིལ་འཁོར་སྒྲུབ་ཏེ་དེར་གཞུག་པའི་ལས་རིམ་
སློབ་མ་སྟ་གོན་གྱི་ཆོས་བཅོ་ལྔ་སོགས་ཀྱིས་གསང་སྔགས་སྣོད་ལྡན་དུ་བྱེད་པ་དང་ཆེས་མཚུངས་པའི་ཐབས་ཀྱི་འཇུག་སྒོ་ལགས། དེ་ནས་ནང་པར་བདག་མདུན་བུམ་གསུམ་གྱི་སྒྲུབ་མཆོད་ཁ་གསོ་ཞིང་། སླར་ཡང་རྟེན་དམ་ཚིག་པ་གསལ་བཏབ་ནས་ཁྲུས་གསོལ་སོགས་ནན་ཆགས་དང་། སྤྱན། སྙན། ཤངས། ཞལ་སོགས་སྐུའམ་དབང་པོ་ཐམས་ཅད་ཡེ་ཤེས་ཀྱི་དབང་པོར་མངའ་གསོལ་ཞིང་བྱིན་གྱིས་རླབས། དེ་ནས་ཡེ་ཤེས་པ་སྤྱན་དྲངས། བསྟིམ། དབང་བསྐུར་རྒྱས་གདབ་སོགས་དངོས་གཞི་རྣམས་བྱས་ལ། ཡོ་བྱད་མཐའ་དག་གི་མངའ་དབུལ་མཆོད་བསྟོད་རབ་གནས་ཤིས་བརྗོད་ཡན་ཆད་ཐམས་ཅད་གཞུང་བཞིན་ཚུལ་ལྡན་དུ་སྒྲུབ་པ་དེའི་ཚེ་ནི། འཁོར་ལོ་བསྒྱུར་བའི་རྒྱལ་བུ་རྒྱལ་སར་འཁོད་པའམ། སློབ་མ་ལ། རྡོ་རྗེ་སློབ་དཔོན་གྱི་གཏད་རྒྱ་རྫོགས་པ་ལྟར། ཀུན་གྱི་ཕྱག་མཆོད་
བྱ་བའི་ཡུལ་མཆོག་ཏུ་གྱུར་བ་ལགས། དེ་ལྟར་བཀའ་ཕེབས་པའི་དངོས་ལན་བདྷཱ་མཚོན་ཙམ་དུ་ཕུལ་ནས། གཉིས་པ་དེ་དག་གི་འཕྲོས་དོན་འགའ་ཞིག་སྙན་དུ་གསོལ་བ་ནི། དེ་ཡང་རྒྱལ་བའི་སྐུ་གསུང་ཐུགས་ཀྱི་རྟེན་རྣམས་ལ་རབ་ཏུ་གནས་པར་བྱེད་པ་ལ། ལེགས་སྦྱར་གྱི་སྐད་དུ། སུ་ཏྲ་ཏིཥྛ་ཞེས་པ་བོད་སྐད་དུ་བསྒྱུར་ན། ལེགས་པར་རབ་ཏུ་གནས་པ་ཅེས་བྱ་བ་སྟེ། འདི་ལ་རབ་ཏུ་གནས་རྒྱུའི་རྟེན་དེ་ཉིད་ཆག་ཚད་དང་མཚན་ཉིད་ཚང་བ། མཐོང་བ་ཙམ་གྱིས་དང་བ་འདྲེན་ནུས་པ་གཅིག་མེད་ན། བཟོ་བོ་མ་མཁས་ཤིང་བཟོ་མ་ལེགས་པས་ནི་སྒྲིབ་པ་གསོག་པའི་རྒྱུ་བྱེད་དེ། སྔོན་མཁས་གྲུབ་སྐྱེར་སྒང་པ་ཆེན་པོ་ལ་སྨན་བླའི་སྐུ་ཞིག་རབ་གནས་ཞུས་པའི་ཚེ། སྨན་བླའི་ཕྱག་
འདི་མ་ལེགས་པར་གདའ་གསུངས་པས། ཁོང་རང་གི་ཕྱག་ལ་སྐྲངས་ཕེལ་ཚབས་ཆེན་བྱུང་ནས་བསྙུང་བ་ན། སྤྱན་རས་གཟིགས་ལ། བདག་འདི་འདྲའི་ནད་ཀྱིས་མནར་བ་ཅིས་ལན། ཞུས་པས། ཁྱེད་ཀྱིས་སྨན་བླའི་ཕྱག་ལ་སྐུར་པ་བཏབ་པའི་རྣམ་སྨིན་ཡིན་ཏེ། ཁྱོད་སྒྲིབ་པ་སྲབ་པས་ཕྱི་མ་ངན་འགྲོར་སྐྱེ་མི་དགོས་པར་ད་ལྟའི་ནད་འདིས་སྦྱང་ཐུབ་པར་འགྱུར་རོ། །བཤགས་པ་ལ་སྨན་བླའི་སྐུ་ལེགས་པ་གཅིག་བཞེང་བར་གྱིས་ཤིག །ཅེས་གསུངས་པའི་ལོ་རྒྱུས་ལྟ་བུ་སྟེ། དེས་ན་སྐུ་མཚན་ཉིད་དང་ལྡན་པ་གལ་ཆེ་བ་དང་། སྐུ་རྒྱུ་ཡང་གང་བྱུང་བྱུང་ལ་མི་བྱ་སྟེ། ཕྱི་ནང་རྟེན་འབྲེལ་གྱི་གནད་གཅིག་པས། ཕྱི་འབྱུང་བའི་དངས་མ་ནི་རིན་པོ་ཆེ་སྣ་ལྔ་སོགས་ཡིན་ཕྱིར། དེ་དག་ལ་བྱིན་རླབས་འཆགས་པའི་རྒྱུའི་རྟེན་འབྲེལ་
གྱི་གནད་
ཡོད་པས་ན། གསེར་ལ་སོགས་པ་ཇི་ཙམ ་འབྱོར་འབྱོར་བཟང་བར་བྱ་དགོས་པ་དང་། རབ་གནས་ཀྱི་མཁན་པོ་ཡང་། ད་ལྟའི་ཡིག་ཆ་ཕལ་ཆེར་དུ་ནི་ཚུལ་ཁྲིམས་གཙང་ཞིང་ཆོ་གའི་ལག་ལེན་ལ་མཁས་པ་ཙམ་གྱི་མཚན་ཉིད་བཤད་མོད་ཀྱང་། དེས་མི་ཆོག་ཏེ། ཆོས་ཉིད་ཀྱི་དོན་རྟོགས་པས་སྣང་སེམས་བསྲེ་ཐུབ་པ་གཅིག་མེད་ན་རབ་གནས་མི་འགྲུབ་པར་གསུངས་ཏེ། དེ་ཡང་། ཐེག་དམན་ཉན་ཐོས་པ་རྣམས་ཀྱིས་ནི་ཕྱིའི་ཡུལ་འདི་རྡུལ་ཕྲན་ཆ་བཅས་ཨ་འཐས་སུ་འཛིན་ཞིང་། ནང་གི་ཉམས་ལེན་ནི་སེམས་ཀྱི་བྱུང་ཚོར་བཀག་པའི་ཞི་གནས་འགོག་པ་བསྒོམ་པ་སྟེ། དེ་ལྟ་བུས་ནི་ཚུལ་ཁྲིམས་གཙང་ཡང་ལྷ་ལ་རབ་གནས་འགྲུབ་པའི་ཐབས་མེད། ཐེག་པ་ཆེན་པོ་པ་ཡིན་ནའང་
དེའི་བཟང་ཤོས་ནི་དབུ་མ་ཡིན་ཚེ། དེས་ནི་ཕྱིའི་ཡུལ་ཐམས་ཅད་ཀུན་རྫོབ་འཁྲུལ་སྣང་དུ་ལྟ་ཞིང་། ནང་གི་སེམས་ནི་དངོས་མེད་སྟོངས་པར་ལྟ་བས་དེ་ལྟ་བུས་ཀྱང་རབ་གནས་བྱ་བའི་ཐབས་མེད། གསང་སྔགས་རྡོ་རྗེ་ཐེག་པ་ལ་ཞུགས་ཀྱང་སྐྱེད་རྫོགས་ཟུང་འཇུག་གི་དོན་ཇི་ལྟ་བར་མ་རྟོགས་ན། ཀུན་བརྟག་གི་སྐྱེད་རིམ་པ་ཙམ་གྱིས་ནི་སྣང་སེམས་དབྱེར་མེད་ཀྱི་གནད་མ་གོ་བས་རབ་གནས་མི་འགྲུབ་ལ། འགའ་ཞིག་སྟོང་པ་ཉིད་རྟོགས་པར་འདོད་ཀྱང་རྒྱུ་འབྲས་རྟེན་འབྲེལ་གྱི་གསང་མ་རིག་པར། ཐམས་ཅད་སྟོང་པའོ་སྙམ་པའི་ཆད་སྟོང་ཉི་ཚེ་བ་དེ་ལྟ་བུས་ཀྱང་རབ་གནས་ཅི་ཞིག་འགྲུབ་སྟེ། དེས་ན་རབ་ཏུ་གནས་པའི་མཁན་པོ་ཆོས་ཉིད་ཀྱི་བདེན་པ་མཐོང་བ་ཞིག་གལ་ཆེ་ཞིང་། དེ་དང་ལྡན་ན་ལྟར་སྣང་གི་དགེ་སྦྱོང་རྟགས་དང་ཆ་ལུགས་ཀྱི་སྡོམ་པ་ཙམ་
ལ་མ་ལྟོས་སྟེ། དཔེར་ན་ཆོས་རྒྱལ་སྲོང་བཙན་སྒམ་པོས་བོད་ཡུལ་གྱི་ས་གནད་ར་ས་འཁྲུལ་སྣང་གིས་ཐོག་དྲངས་པའི་མཐའ་འདུལ་ཡང་འདུལ་གྱི་ལྷ་ཁང་བརྒྱ་རྩ་བརྒྱད་ལ་རབ་ཏུ་གནས་པས་གཞན་ལས་བྱིན་རླབས་ཆེ་བ་ལྟ་བུའོ། །གང་ཟག་ཁྱད་འཕགས་དེ་ལྟ་བུ་དག་གིས་ནི་ཏིང་ངེ་འཛིན་གཏད་པ་ཙམ་གྱིས་ཡེ་ཤེས་པ་རང་བཞིན་གྱིས་འཇུག་པར་འགྱུར་ཕྱིར་སྤྲོས་བཅས་ཀྱི་ཆོ་ག་ལ་མ་རག་པའི་ཚུལ་ནི། སྔོན་ཐུབ་པ་ཉིད་ཀྱི་ཤཱཀྱ་མུ་ནི་སོགས་སྐུ་ཚབས་རྣམས་ལ་རབ་ཏུ་གནས་ཚུལ་དང་། གཞན་ཡང་། གྲུབ་ཐོབ་ཛཱ་ལནྡྷ་རས་པ་དགྱེས་རྡོར་གྱི་སྐུ་གཅིག་ལ། མཁལ་མ་གོ་ཡུ གོ་ལའི་རྡོག་པོ་ཞལ་དུ་མུར་འཕྲོ་ཞིག་ལྷ་དེའི་ཞལ་དུ་བཅུག་པ་ཙམ་གྱིས་ཡེ་ཤེས་ཞུགས་ཚུལ་དང་། ཕ་དམ་པས་བརྒྱད་སྟོང་གླེགས་བམ་
ཞིག་ལ་སྔས་གཏད་ནས་གཟིམས་པས་རབ་གནས་ཆགས་པ་དང་། སྤྱན་སྔ་ཚུལ་ཁྲིམས་འབར་གྱིས་གདུང་རྟེན་ཞིག་ལ་རབ་གནས་མཛད་པ་ལ་མེ་ཏོག་འཐོར་རྒྱུ་ཡང་མ་འཛོམ་པས། ཐལ་བ་སྤར་གང་ལ་རྟེན་འབྲེལ་སྙིང་པོ་ཚར་གསུམ་བཟླས་ནས་གཏོར་བས་བྱིན་རླབས་ཅན་ཞིག་ཏུ་བྱུང་ཚུལ་དང་། པཎ་ཆེན་འབུམ་ཕྲག་གསུམ་པ་ལ། འབུམ་གསེར་བྲིས་ཤིག་རབ་གནས་ཞུས་པས། བགེགས་ཆེན་པོ་འདུག་གསུངས་ནས་གླེགས་བམ་རྣམས་བརྩིགས་པའི་ཁར་ཉིད་བཞུགས་པས་ཡི་གེ་ཐམས་ཅད་གཅིག་ཀྱང་མེད་པར་ཡལ་ནས་སོང་། སླར་མེ་ཏོག་གཏོར་བས་སྔར་བས་ལེགས་ཤིང་བྱིན་རླབས་ཆེ་བར་བྱུང་བ་དང་། བི་མ་ལས་བསམ་ཡས་བུ་ཚལ་རྣམ་སྣང་སྐུ་ལ་ཕྱག་བཙལ་བས་ལྡེར་སྐུ་ས་ཕུང་དུ་གྱུར། སླར་དེ་ལ་ཕྱག་དབང་བསྐུར་བས་སྐུ་སྔར་ལས་ལེགས་པ་རྒྱ་གར་མའི་དབྱིབས་སུ་བྱོན་ཚུལ་
དང་། མཉམ་མེད་སྒམ་པོ་པ་ལ་སྐྱོ་སྒོམ་གྱི་རིགས་ལྔའི་ཐང་སྐུ་ལ་རབ་གནས་མྱུར་པོ་གཅིག་དགོས་ཞུས་པས། དགོངས་པ་གཏད་པ་ཙམ་གྱིས་ཉིད་ཀྱི་ཐུགས་ཀ་ནས་འོད་ཟེར་ཤར་གྱི་བྱུང་ནས་ཐང་སྐུ་ལ་ཟུག་པ་དང་དུས་མཉམ་དུ་མེ་ཏོག་གི་ཆར་ཐོར་གྱི་བབས་པ་དང་རབ་གནས་གྲུབ་པའི་ལོ་རྒྱུས་ལྟར། རབ་ཏུ་གནས་ནུས་པའི་མཁན་པོ་ཚད་ལྡན་དེ་ལྟ་བུ་ཞིག་མ་བྱུང་ན། གང་ཟག་ཐ་མལ་པའི་སློབ་དཔོན་ཞིག་གིས་ནི་ཆོ་ག་ལ་བརྒྱ་ཚར་དུ་བྱས་ཤིང་མེ་ཏོག་གི་རྟེན་ནུབ་པ་ཙམ་གཏོར་ཡང་ཡེ་ཤེས་ཞུགས་པ་དཀའ་མོད་དེ། ཡེ་ཤེས་དེ་གང་ལ་ཟེར་བ་སློབ་དཔོན་ཁོ་རང་ལ་ཆ་མེད་པའི་ཕྱིར་རོ། །དེ་ཡང་གུ་རུ་རིན་པོ་ཆེ་པདྨའི་གསུང་ལས་ནི། རབ་གནས་ཚུལ་བཞིན་བྱ་བ་ལ། རྒྱུ་རྐྱེན་ཐབས་ཀྱི་གནད་གསུམ་དང་། ཏིང་ངེ་འཛིན་དགོངས་པའི་གནད་གསུམ་ཚང་
དགོས་པར་བཞེད་དེ། རྒྱུ་རྐྱེན་ཐབས་གསུམ་ནི། རྟེན་གྱི་རྒྱུ་དང་རབ་གནས་བྱེད་པའི་ཡོ་བྱད་ཐམས་ཅད་རྐུ་འཕྲོག་བརྡུངས་བཅོམ་བསད་བཅད་སོགས་སྡིག་པས་སྒྲུབ་པ་མ་ཡིན་པ་དང་། རྐྱེན་བསམ་པའི་བྱེ་བྲག་ཀྱང་། སྦྱིན་བདག་གི་བློ་ཡུལ་དུ་ཆགས་སྡང་ཁེ་གྲགས་ལོ་འདོད་གཞན་ལ་འགྲན་སེམས་དང་གནོད་སེམས་སོགས་ཀྱི་ཀུན་སློང་དང་འདྲེས་པ་མ་ཡིན་པར། ཚོགས་གཉིས་སྤེལ་བའི་ལྷག་བསམ་གྱི་སྒོ་ནས་སྒྲུབ་ཅིང་གཏོང་ཕོད་ཅན་སྙིང་སྟོབས་བསྐྱེད། ལྷ་བཟོ་བ་མཉེས་པར་མ་བྱས་ན་གཟོ་བོ་དང་སྦྱིན་བདག་གི་བར་དུ་འཁོན་སེམས་ཞུགས་པས་ནི་རྟེན་ལ་རབ་གནས་མི་འཆགས་པའི་རྐྱེན་དུ་འགྱུར་བར་གསུངས་ཕྱིར། བཟོ་བོ་དང་རབ་གནས་མཁན་པོ་སོགས་ཐམས་ཅད་དགྱེས་ཤིང་རེ་འཁང་མེད་པར་བྱ་དགོས་དང་། བཟོ་བོས་ཀྱང་བསམ་པ་རྣམ་པར་མ་དག་ཅིང་གཟོ་རྒྱུ་ལ་གཡོ་ཁྲམ་དང་ཟ་ཡོན་ལ་ཆོག་
ཤེས་མེད་པར་བྱས་ན་རྟེན་དེ་དག་ལ་ཆགས་པའི་དཀོར་བདག་གི་འདྲེར་སྐྱེ་བར་བཤད་པས་ན་གཟོ་བོ་ཡང་བསམ་པ་དག་པ་གལ་ཆེ། རབ་གནས་ལེགས་པར་འགྲུབ་པའི་ཐབས་ཀྱི་བྱེ་བྲག་ཀྱང་། རྟེན་གྱི་སྐུ་རྒྱུའི་ནང་བཞུགས་ཀྱི་ཁྲོད་དུ་རྒྱ་བོད་ཀྱི་གནས་ཆེན་གཙུག་ལག་རྟེན་གསུམ་ཁྱད་པར་ཅན་རྣམས་ཀྱི་ས་རྡོ་ཆུ་ཤིང་སོགས་གང་འཛོམ་བཞུགས་ན་རབ་གནས་ངང་གིས་འཆགས་པར་འགྱུར་བ་དང་། རབ་གནས་བྱེད་པའི་དུས་ཚེས་གཟའ་སྐར་སོགས་ཀྱི་ཞིབ་ཆ་རྣམས་རབ་ཏུ་གནས་པའི་རྒྱུད་ལས་གསུངས་པའི་ལུང་ད་ལྟའི་ཆོག་ཞུང་རྣམས་སུ་དྲངས་པ་ལྟར་ལས། ཁྱད་པར་དུ་ནི། ཟླ་བ་གང་ཡང་རུང་བའི་ཚེས་གསུམ་གྱི་ཉི་མ་རྩེ་ཤར་དང་། བརྒྱད་ཀྱི་ཉིན་གུང་དང་། ཚེས་བཅུའི་དགོངས་ཁ་དང་གསུམ་ལ་ཉི་ཟླའི་འོད་རང་གི་གཞལ་ཡས་ཁང་ལ་ཕོག་པའི་དུས་ཡིན་པས། དེ་གསུམ་གང་རུང་ལ་
རབ་གནས་མེ་ཏོག་འཐོར་ན་རབ་གནས་ངེས་པར་འཆགས་པར་འགྱུར་བའི་དུས་གནད་ཡིན་པར་གསུངས་སོ། །གཞན་ཡང་། རབ་ཏུ་གནས་པ་འདི་བཀྲ་ཤིས་པའི་རྟེན་འབྲེལ་གྱི་ཆོ་ག་ཡིན་པའི་གཤིས་ཀྱིས། དེའི་དུས་སུ་དཔོན་སློབ་ཡོན་མཆོད་འཁོར་བཅས་ཐམས་ཅད་འཐབ་འཁྲུག་འཁོན་རྩོད་མྱ་ངན་སྡུག་བསྔལ་ཚིག་ངན་སོགས་སྤངས་ཏེ། གོས་རྒྱན་བཟའ་བཏུང་ལོངས་སྤྱོད་བཟང་པོ་བྱ་ཞིང་། ཁ་བརྡ་དང་ལ་ཉེ་གང་བཟང་དང་། གླུ་གར་རོལ་མོ་མགུར་དབྱངས་འཆམས་བྲོ་སོགས་བཀྲ་ཤིས་པའི་བྱ་བྱེད་དང་དགའ་ཞིང་སྤྲོ་བའི་བསམ་པ་དང་ལྡན་པ་ཡང་རབ་གནས་འགྲུབ་པའི་མཚམས་སྦྱོར་ཡིན་པར་གསུངས་སོ། །ཁྱད་པར་དཀྱིལ་འཁོར་དང་རྟེན་གྱི་སྤྱན་སྔར་མཆོད་པའི་ཡོ་བྱད་གྱ་ནོམས་པ་གཙང་ཞིང་དག་ལ་བཀོད་པས་ཁྱད་པར་དུ་འཕགས་པ་དང་། ཡི་དམ་མཁའ་འགྲོ་ཆོས་སྐྱོངས་གཙང་རིས་ཀྱི་དཔལ་མགོན་བདུན་ཅུ་ཡུལ་དེའི་དཀར་
ཕྱོགས་སྐྱོང་བའི་གཞི་བདག་སོགས་ལ་གཏོར་ཚོགས་རྒྱ་ཆེན་པོ་དང་། ལན་ཆགས་བགེགས་རིགས་རྣམས་ལ་ཡང་གླུད་དང་གཏོར་མ་སོགས་ཀྱི་ཚིམ་པར་བྱ་བ་ཡང་རབ་གནས་འགྲུབ་པའི་ཐབས་ཀྱི་ཡན་ལག་དང་། བར་ཆད་མི་འབྱུང་བའི་གནད་དུ་ཆེ་བ་ཡིན་ཞིང་། གལ་ཏེ་དེ་དག་གི་སྐབས་སུ་ལྷོངས་དང་བར་ཆད་ཀྱི་རྣམ་པ་ཆེ་ཆུང་ཅི་ལྟ་བུ་བྱུང་བའི་ཚེ་ནའང་། དེའི་རྐྱེན་ཁར་མི་བཏང་ཞིང་རབ་གནས་ཀྱི་འཕྲོ་མི་བཤོལ་བར་དཔའ་བའི་གདེངས་དང་བརྩོན་པའི་གོ་ཆ་བགོས་ཏེ་རབ་ཏུ་གནས་པ་མཐར་མཁྱེན་པར་བྱ་བ་ནི་གལ་པོ་ཆེའི་གནས་ཡིན་པར་གསུངས་སོ། །དེ་ལྟར་རྒྱུ་རྐྱེན་ཐབས་ཀྱི་གནས་འདི་དག་ནི་ཡོན་མཆོད་ཐུན་མོངས་ལ་གཅེས་པའི་གནད་དོན་ཡིན་མོད་ཀྱི། ཁྱད་པར་ཏུ་རབ་ཏུ་གནས་པའི་མཁན་པོ་ལ་མཆོག་ཏུ་གཅེས་པའི་ཏིང་ངེ་འཛིན་དགོངས་པའི་
གནད་གསུམ་ནི། ཀུན་ཁྱབ་ཆེན་པོ་གཞིའི་གནད་དང་། ཏིང་འཛིན་ཟུང་འཇུག་ལམ་གྱི་གནད་དང་། ལྷུན་གྲུབ་ཆེན་པོ་འབྲུའི་གནད་དང་གསུམ་པོ་གལ་ཆེ་སྟེ། དང་པོ་གཞིའི་གནད་ནི། རབ་གནས་ཡེ་ཤེས་བསྟིམ་པར་བྱེད་པའི་མཁན་པོའི་སློབ་དཔོན་དེས། སྣང་གྲགས་ཀྱི་ཆོས་ཐམས་ཅད་ཡེ་ནས་སྐུ་གསུམ་དབྱེར་མེད་དམ། སྐུ་གཉིས་ཟུང་འཇུག་ཆེན་པོར་གདོད་ནས་ལྷུན་གྱིས་གྲུབ་པའི་ཤེས་པ་གལ་ཆེ་ཞིང་། རབ་གནས་འགྲུབ་པའི་གཞི་མ་ནི་དེ་ཡིན་ཏེ། ཡེ་ནས་སྐུ་གསུམ་ཡིན་པ་ལ་ཡིན་པར་གསལ་འདེབས་ཅིང་ངེས་ཤེས་བསྐྱེད་པ་དེ་ལ་རབ་གནས་ཟེར་བ་ཡིན་གྱི། མིན་པ་ཅིག་ལ་ཡིན་པ་རུ་ཇི་ཙམ་སྒྲུབས་ཀྱང་དེར་མི་འགྲུབ་ཏེ། དཔེར་ན། གསེར་བཟང་པོ་ཞིག་ལ་བཙོ་བསྲེག་སྦྱང་འདུལ་བྱས་ན་གསེར་གྱི་དགོས་དོན་འགྲུབ་མོད་ཀྱི། གསེར་མ་ཡིན་པར་ར་གན་ནམ། མཁར་བ་ལྟ་བུ་ཞིག་
ལ་གསེར་འདུལ་གྱི་ལག་ལེན་ཇི་ལྟར་བྱས་ཀྱང་གསེར་དུ་མི་འགྲུབ་པ་ལྟ་བུ་སྟེ། རྟེན་དེ་དག་ཐམས་ཅད་ཡེ་གདོད་མ་ནས་སྐུ་གསུམ་ཡིན་ཚུལ་ཤེས་པའི་སྒོ་ནས། དབྱིངས་ཆོས་སྐུ་ལས་གདངས་གཟུགས་སྐུར་བཞེངས་ཏེ། གཟུགས་སྐུ་དམ་ཚིག་པ་ལ་ཆོས་སྐུ་ཡེ་ཤེས་པ་བསྟིམ་ཞིང་གཉིས་མེད་དུ་བསྲེ་བྱ་བསྲེ་བྱེད་རོ་གཅིག་པའི་ཏིང་ངེ་འཛིན་སྤྲུལ་བསྒྱུར་བྱ་བ་ཡིན་ལ། ཚུལ་འདི་ལྟར་མ་རྟོགས་པའི་སློབ་དཔོན་གྱི་གཟུགས་བརྙན་དེ་འདྲས་ཟངས་རག་འཇིམ་པ་རས་གཞི་ཤོག་བུ་སོགས་ལ་ཡེ་ཤེས་བསྟིམ་པའི་སྔགས་ཚིག་ཇི་ཙམ་བརྗོད་ཀྱང་ཡེ་ཤེས་འཇུག་པའི་སྐབས་མི་སྲིད་པས། དེས་ན་ཀུན་ཁྱབ་གཞིའི་གནད་དོན་རྟོགས་པ་གལ་ཆེའོ། །གཉིས་པ་ཏིང་འཛིན་ལམ་གྱི་གནད་ནི། ཆོས་ཐམས་ཅད་ངོ་བོ་ཅིར་ཡང་མ་གྲུབ་
ལ། རྣམ་པ་ཅིར་ཡང་འཆར་སྒོ་མ་འགགས་པའི་གནད་ཀྱིས། དགེ་སྡིག་སེམས་ཀྱི་བསྒྱུར་ཁ་དང་བཟང་ངན་བསམ་པའི་རང་གཟུགས་ཡིན་ཚེ། རྟེན་བཞེངས་ཤིང་རབ་ཏུ་གནས་པའི་བྱ་བྱེད་ཐམས་ཅད་མཁའ་ཁྱབ་ཀྱི་འགྲོ་རྣམས་བྱང་གྲོལ་ལ་འགོད་པའི་ཆེད་ཁོ་ནར་སེམས་སྐྱེད་ཀྱིས་གཞི་བཟུང་། དེའི་ངང་ནས་རྟེན་གྱི་ངོ་བོ་མི་གནས་མི་དམིགས་ཆོས་ཀྱི་སྐུའི་རང་མདངས་ལས་མཚན་རྫོགས་གཟུགས་སྐུའི་རྣམ་པར་བྱོན་པའི་ངེས་ཤེས་ཀྱི་སྒོ་ནས། རང་ཉིད་ལྷའི་ཐུགས་ཀའི་འོད་ཟེར་ཚད་མེད་རྣམ་བཞིའི་ལྷ་མོའི་ཆ་བྱད་གྲངས་མེད་པ་ཕྱག་ན་ཡེ་ཤེས་ཀྱི་འོད་ཟེར་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་ཚུལ་ཅན་འཛིན་པ་ཉི་ཟེར་གྱི་རྡུལ་ལྟར་འཕྲོས་པས། ཕྱོགས་བཅུ་རབ་འབྱམས་ནམ་མཁའི་མཐས་ཀླས་པའི་ཞིང་ན་རྒྱལ་བ་སྲས་བཅས་རྡུལ་སྙེད་དུ་བཞུགས་པ་ བྱམས་པ་ སྙིང་རྗེ་ དགའ་བ་ བཏང་སྙོམས་
རྣམས་ཀྱི་ཐུགས་ཡེ་ཤེས་ཆེན་པོའི་རྒྱུད་བསྐུལ་ཞིང་ཚད་མེད་རྣམ་བཞིས་འགྲོ་དོན་ལ་སྤྱན་དྲངས་པའི་མཐུས། ཡེ་ཤེས་ཀྱི་སྐུ་ཁ་བ་བུ་ཡུག་འཚུབ་པ་ལྟ་བུར་བྱོན་ནས་རྟེན་རྣམས་ལ་ཐིམ་པར་མོས་པའི་དད་གུས་གདུང་ཤུགས་དྲག་པོ་དང་། བསྟིམ་བྱ་བསྟིམ་བྱེད་སོགས་ཀྱི་ངོ་བོ་མ་བཅོས་ཕྱག་རྒྱ་ཆེན་པོ་གསལ་སྟོང་བློ་བྲལ་གྱི་རང་ངོ་གཉིས་པོ་གཅིག་དང་ཐ་དད་ཀྱི་འཛིན་བ་མེད་པའི་ངང་དུ། རླུང་ཁུག་པ་ཉི་ཤུ་རྩ་གཅིག་གམ། བཅུ་གསུམ་མམ། བདུན་གྱི་བར་དུ་མཉམ་པར་བཞག་ཅིང་། རྟེན་དུ་སྣང་བ་དང་རང་གི་རིག་པ་ཐ་མི་དད་པ་ཆོས་སྐུ་ཁྱབ་གདལ་ཆེན་པོར་གློད་པར་བྱའོ། རབ་ཏུ་གནས་པའི་དོན་ཐམས་ཅད་ཀྱི་སྙིང་པོ་དང་མཐར་ཐུག་དང་མཆོག་དང་རབ་དང་ཕུལ་དུ་གྱུར་བ་ནི་འདི་ཡིན་ནོ། །གདེངས་དང་ལྡན་པའི་རྣལ་འབྱོར་པས་ཚུལ་འདི་ལ་
ནན་ཏན་ཏུ་བགྱིས་གྲུབ་ན། ཆོ་གའི་རིམ་པ་བྱས་ཀྱང་ཆོག་ལ་མ་བྱས་ཀྱང་ཆོག་ཅིང་། མེ་ཏོག་འཐོར་ཡང་རུང་ལ་མ་འཐོར་ཡང་རུང་སྟེ། ཡང་དག་དོན་གྱི་རབ་གནས་ལེགས་པར་འགྲུབ་པའོ། །གསུམ་པ་ལྷུན་གྲུབ་ཆེན་པོ་འབྲུའི་གནད་ནི། དེ་ལྟ་བུའི་རྟེན་མཚན་ཉིད་དང་ལྡན་པ་ལ་རབ་གནས་མཚན་ཉིད་དང་ལྡན་པ་གྲུབ་ཕྱིན་ཆད་འགྲོ་དོན་མཚན་ལྡན་མི་འབྱུང་བའི་གནས་མེད་ཀྱང་རང་གཞན་གྱི་ཚོགས་གཉིས་འཕེལ་ཕྱིར་འགྲོ་དོན་ལྷུན་གྲུབ་ཀྱི་རྟེན་འབྲེལ་བྱ་སྟེ། རྗེས་ཆོག་གི་སྐབས་སུ་རྟེན་དམ་ཡེ་དབྱེར་མེད་རྒྱལ་བའི་སྐུ་གསུང་ཐུགས་ཡེ་ཤེས་རྡོ་རྗེའི་རང་བཞིན་དུ་བཞུགས་པ་དེ་ཉིད་གདུལ་བྱའི་སྣང་ངོར་སྐུ་གཟུགས། གླེགས་བམ། མཆོད་རྟེན། ཕྱག་མཚན་སོགས་གང་ཡིན་དེའི་རྣམ་པར་བསྒྱུར་བའི་ཏིང་ངེ་འཛིན་བྱས་ལ། དེ་ཉིད་ཀྱིས་ཀྱང་གདུལ་བྱའི་ཡུལ་དང་བསམ་པ་ཇི་ལྟ་བར་
གནས་སྐབས་དང་མཐར་ཐུག་གི་དགོས་འདོད་ཡིད་བཞིན་དུ་སྐོང་བའི་ཕྲིན་ལས་ཆེན་པོའི་རྒྱ་ནམ་མཁས་གར་ཁྱབ་པ་དང་། ཡུན་འཁོར་བ་མ་སྟོངས་ཀྱི་བར་དུ་རྒྱུན་འཆད་མེད་པར་མཛད་ཅིང་། རྟེན་དེ་དག་མཐོང་བ། ཐོས་པ། དྲན་པ། རེག་པ། དེའི་ཕྱོགས་སུ་སྒོ་གསུམ་གྱི་བྱ་བྱེད་འབྲེལ་བ་ཐོགས་ཚད། མཐའ་ན་དེའི་གྲིབ་མ་དང་རླུང་ཕྱོགས་ཕོག་པ་ཚུན་གྱི་སྐྱེ་འགྲོ་འབུ་སྲིན་ཡན་ཆོད་ཀུན་ལས་ངན་གྱི་སྒྲིབ་ཚོགས་བྱང་ཞིང་སྐུ་གཉིས་ཟུང་འཇུག་གི་གོ་འཕངས་འགྲུབ་ནུས་པའི་ཕྲིན་ལས་མཛད་པར་མངའ་གསོལ་བ་དང་སྨོན་ལམ་གདབ་པ་ཤིས་པ་བརྗོད་པ་རྣམས་ཀྱང་ཁ་ཙམ་ཚིག་ཙམ་ལྟར་སྣང་གི་བྱེད་ལོ་ཙམ་དུ་མ་ཡིན་པར། དད་གུས་གདུང་ཤུགས་ལྷག་བསམ་རླབས་ཆེན་གྱི་ངང་ནས་བྱ། དེ་ལྟར་བྱས་ན་འགྲུབ་པའི་གཏན་ཚིག་ཀྱང་
གདུལ་བྱའི་ཞིང་ཀུན་ནི་སྐུ་གསུམ་གྱི་རང་བཞིན། འདུལ་བྱེད་ཀྱི་རྟེན་དང་བྱིན་རླབས་དང་ཕྲིན་ལས་ཀྱང་སྐུ་གསུམ་གྱི་རྣམ་རོལ། དེ་ལྟ་བུར་མཛད་པར་གསོལ་འདེབས་སྨོན་ལམ་ཤིས་བརྗོད་བྱེད་པ་ཡང་སྐུ་གསུམ་གྱི་རྩལ་སྦྱོང་ཡིན་ཕྱིར། དེས་ན། རྒྱུ་དང་མཐུན་པའི་འབྲས་བུ་རྟེན་འབྲེལ་དང་མཐུན་པའི་བྱེད་ལས། ལམ་དང་མཐུན་པའི་འགྲོ་ལུགས། མོས་པ་དང་མཐུན་པའི་ཐུགས་རྗེ་འབྱུང་བ་ནི་ཆོས་ཉིད་ཀྱི་བདེན་པའི་སྟོབས་ཡིན་པས་ན། ལྷུན་གྲུབ་ཆེན་པོ་འབྲས་བུའི་གནད་ཅེས་བྱ་སྟེ། དེ་ལྟ་བུའི་གནད་རྣམ་པ་གསུམ་པོ་དང་ལྡན་པའི་སྒོ་ནས་རབ་ཏུ་གནས་པར་བྱ་བ་གཅེས་སོ། །སྤྱིར། རྟེན་ལ་རབ་ཏུ་གནས་པའི་ཆོ་གའི་གཞུང་དང་ཕྱག་བཞེས་ཀྱི་ལས་རིམ་རྒྱས་བསྡུས་འབྲིང་གསུམ་གྱི་ཡིག་ཆར་ནི་བཀའ་གསར་རྙིང་དང་ཆོས་རྒྱུད་སོ་སོ་ལ་བསམ་གྱིས་མི་ཁྱབ་པ་གཅིག་གདའ་ནའང་། དེ་
ཐམས་ཅད་དུ་རྗོད་བྱེད་ཚིག་གི་གཞུང་དང་བྱ་བྱེད་ལག་ལེན་གྱི་རིམ་པ་འབའ་ཤིག་སྟོན་པར་མཛད་པ་མ་གཏོགས། བརྗོད་བྱ་དོན་གྱི་སྙིང་པོ་གལ་ཆེ་བ་རྣམས་དགེ་བའི་བཤེས་གཉེན་གྱི་ཞལ་ལས་བླངས་དགོས་པར་དགོངས་ཏེ་ཡིག་ཆར་མ་འཁོད་པ་མང་བའི་རྒྱུས། དིང་སང་ནི། ཆོ་ག་འར་འུར་ཙམ་མམ་རྟེན་འབྲེལ་སྙིང་པོ་ཅུང་ཟད་བཟླས་པའི་མེ་ཏོག་གཏོར་བ་ཙམ་ཁོ་ན་ལ་རབ་གནས་སུ་ཆ་འཇོག་པ་ལས། རབ་ཏུ་གནས་མཁན་དང་གནས་ཚུལ་གྱི་དགོས་དོན་ཞིབ་ཏུ་དཔྱོད་པའི་གང་ཟག་དཀོན་པར་མཐོང་བས་ན་ཚུལ་འདི་ཙམ་ཞིག །སློབ་དཔོན་ཆེན་པོ་པདྨ་འབྱུང་གནས་ཀྱིས་མངའ་བདག་ཁྲི་སྲོང་ལ་གདམས་པའི། གནད་གསུམ་འདུས་པ་རབ་གནས་ཀྱི་མན་ངག་གི་དགོངས་དོན་ལྟར་བྲིས་པ་ལགས་ཤིང་། ཡང་། འདི་དག་ལས་ཞིབ་རྒྱས་སུ་འདོད་ན་རྒྱལ་བ་ཡང་
དགོན་པས་མཛད་པའི་རབ་གནས་ཀྱི་སྤྱི་དོན་ཆེན་མོ་སོགས་སུ་ལྟ་བར་བྱའོ། འོན་ཀྱང་ད་ལྟའི་དུས་འདི་འདྲར་ནི། རྒྱལ་བའི་རྟེན་གསུམ་བཞེངས་པར་བྱེད་པ་ལ་བཟོ་རིགས་མཁན་པོ་ཅི་འདྲ་བ་ཞིག་བསྟེན་ཀྱང་ཤ་ཆང་གི་ཡོ་ལང་ལ་མ་བརྟེན་པར་ནམ་མི་འགྲུབ་ལ། རབ་ཏུ་གནས་པའི་ཆོ་ག་བ་བླ་མ་སློབ་དཔོན་ཆེ་ཆུང་ཇི་ལྟ་བུ་གདན་འདྲེན་ན་ཡང་སེམས་ཅན་སྲོག་གཅོད་བྱས་པའི་ལོངས་སྤྱོད་ཀྱི་མཆོད་སྦྱིན་ཤ་སྟག་ལ་བརྟེན་དགོས་ཚེ། སྡིག་པས་བསྒྲུབ་པའི་བྱ་བྱེད་དེ་དག་ལ་མིང་བཟང་པོ་ཇི་ལྟ་བུར་བཏགས་ཀྱང་འབྲས་བུ་ནི་རང་གཞན་དང་དེ་ཕྱོགས་སུ་འབྲེལ་པ་འཇོག་ཚད་ཀྱི་འགྲོ་བ་ངན་སོང་ལས་གཞན་དུ་མི་འགྱུར་བ་ནི་རྒྱལ་བའི་བཀའ། བླ་མའི་མན་ངག །རང་གི་རིག་པ་དང་བཅས་པས་མངོན་སུམ་ཚད་གྲུབ་ཏུ་གྱུར་བ་འདི་ལགས་ཤིང་། རང་གི་དད་པས་ལྕོགས་པ་དང་ཕྱག་
མཆོད་ནུས་ན་ནི་རྟེན་གསུམ་གྱི་མ་ཕོངས་ཏེ། སྔོན་གྱི་ཆོས་རྒྱལ་བྱང་སེམས་དང་མཁས་གྲུབ་སྐྱེས་ཆེན་སོ་སོས་བཞེངས་ཤིང་རབ་ཏུ་གནས་པར་མཛད་པའི་གཙུག་ལག་རྟེན་གསུམ་འདི་ཙམ་ཞིག་ཡུལ་ཕྱོགས་ཀུན་ཏུ་བཞུགས་མོད་ཀྱང་། སྐྱེ་འགྲོ་རྣམས་རང་རྒྱུད་མ་རུངས་པས་དེ་དག་ལ་བཀུར་སྟི་ཞབས་གཏོགས་མི་བྱེད་ཀྱི་ཁར། གཙུག་ལག་ཁང་དང་བཙོན་ཁང་བྱེད་ཅིང་ལ་ལ་ན་ཕྱུགས་ལུགས་འཇུར། སྐུ་གསུང་ཐུགས་ཀྱི་རྟེན་ཐམས་ཅད་ཀྱང་ལ་ལ་ནི་བཤིག །ལ་ལ་ནི་བཙོངས་ནས་སྐུ་གླུད་ཟ། ལ་ལ་བུ་ལོན་གྱི་གཏའ་མ་དང་མནའ་སྐྱེལ་བའི་དཔང་པོ་བྱེད་ཅིང་། ཐ་ན་སཱཙྪ་ཐམས་ཅད་ཁྱི་ལ་བརྡེགས་པའི་ལག་ཆར་བྱེད་པའི་དུས་འདི་འདྲ་ལ། ཕྱི་ཀུན་རྫོབ་འདུས་བྱས་ཀྱི་རྟེན་བཞེངས་པ་བས་ཀྱང་། ནང་རང་རིག་
འདུས་མ་བྱས་ཡེ་ཤེས་ཀྱི་རྟེན་མཆོག་བཞེངས་པ་ལ་འབད་ན། སྡིག་དང་མི་འདྲེས་ཤིང་ཚོགས་ཆེན་འཕེལ་ལ་རང་གཞན་དོན་གཉིས་ཀྱི་རླབས་ཀྱང་འདི་ཆེ་བར་འགྱུར་བས་དེ་ལྟར་ཐུགས་ལ་དགོངས་འཚལ། ཞེས་རབ་གནས་ཀྱི་དྲིས་ལན་ལས་འཕྲོས་པའི་སྐབས་དོན་དུ་ཕུལ་བ་ལགས། འདིར་ཞར་ལ་བུམ་པའི་མཚན་ཉིད་སོགས་ཀྱི་དྲི་བ་འགའ་ཞིག་གནང་བའི་ལན་དུ་ཕུལ་བ་ནི། དེ་ཡང་བུམ་པ་ལ་གསུམ་སྟེ། དོན་ཆོས་ཉིད་ཀྱི་བུམ་པ་ནི་ཆོས་ཀྱི་དབྱིངས་དང་རིག་པའི་ཡེ་ཤེས་དབྱེར་མེད་པ། རྟགས་འདུས་བྱས་ཀྱི་བུམ་པ་ནི། ཕྱི་སྣོད་ཀྱི་འཇིག་རྟེན་དང་ནང་བཅུད་སྐྱེ་འགྲོའི་གཟུགས་ཕུང་སོགས་ཡིན་ལ། མཚོན་བྱེད་རྫས་ཀྱི་བུམ་པ་དངོས་ལ་ཡང་རྒྱུ་ནི་སྤྱིར་རིན་པོ་ཆེ་དང་། ཁྱད་པར་ལས་སོ་སོ་ལ་ཐ་དད་དང་མཐུན་པའི་རྒྱུ། ཚད་ནི། ཆེ་བ་ལ་ཆུ་ཁྱོར་བ་དྲུག་ཤོང་བ་
དང་། ཆུང་བ་ནི་ཁྱོར་བ་གསུམ་ཤོང་བ་ཡན་ཆད་ནི་སྤྱི་ཁྱབ་དང་། བྱེ་བྲག་ཏུ་ནི། དུས་འཁོར་ལྟར་ན། ལྟོ་བ་ཟླུམ་པོའི་འཁོར་ཡུག་ཏུ་སོར་བཅུ་དྲུག །མགྲིན་པའི་འཁོར་ཡུག་ལ་སོར་དྲུག ཁ་ཁྱེར་གྱི་ཞེང་ལ་སོར་བརྒྱད། དེའི་གསུམ་ཆ་ནི་དབུས་ཀྱི་བུག་པ། ཁ་ལས་ཕྱིར་འཕྱང་བའི་མཆུ་སོར་དོ་པ་དང་། བུམ་པའི་དཔང་ལ་སོར་ཉི་ཤུ་པ་བྱ་བར་བཤད་ལ། གཞན། ལས་ཁ་ཚར་སོ་སོ་ལ་དབྱིབ་ཚད་ཀྱང་སོ་སོར་བཤད་ཅིང་། དིང་སང་གི་བུམ་པ་ལ་ཡོད་པའི་མཆུ་འདི་ནི། གཞུང་རྣམས་ལས་མ་གསུངས་སོ། ཁ་དོག་ནི། རིན་པོ་ཆེའི་བུམ་པ་ཡིན་ན་ལེགས་པར་འཕྱིས་པའི་རང་མདོག་དང་། རྫ་ལ་སོགས་པ་ཡིན་ན་ས་དཀར་གྱི་བྱུགས་ཤིང་། ལྟོ་བའི་ལོག་ལ་རིགས་ལྔའི་ཕྱ་ཚན་གྱི་རི་མོ་བྲི། གྲངས་ནི། རབ་ཀྱི་ལྷ་གྲངས་དང་མཉམ་
པ། འབྲིང་དགུའམ་ལྔ། ཐ་མ་གཅིག་ལ་བསྡུ་ཞིང་ལས་བུམ་དང་བཅས་པ་དགོས་ལ། རྙིང་མའི་བཀའ་བརྒྱད་དགོངས་འདུས་སོགས་ལ་ནི་གཙོ་བོ་དགུ་ཡོད་པའི་ཕྱིར་བུམ་པ་དགུ་ངེས་པར་དགོས་པའོ། །མགུལ་འཆིངས་ནི་གཙོ་བོའི་སྐུ་མདོག་དང་མཐུན་པའམ་ཁ་དོག་ལྔ་པ། སྐུ་ལྔ་མཚོན་ཕྱིར་དུ་ཟེ་སྤྲོག་ལྔ་ལྡན་ཞེས་དར་མདུད་ཁུག་པ་ལྔ་ཡོད་པ་བྱ་བར་བཤད། གཟུངས་ཐག་ནི་དར་མཚོན་ལྔ་སྒྲིལ་འདོམ་པ་གསུམ་ལས་མི་ཐུང་བ་གཟུངས་ཀྱི་རྡོ་རྗེ་སོར་བཞི་པས་མཚན་པ་དང་། ཁ་རྒྱན་ནི། གདུལ་བྱའི་རེ་འདོད་ཡིད་བཞིན་དུ་སྐོང་བའི་རྟགས་སུ་དཔག་བསམ་ལོ་འདབ་རྒྱས་པ་མེ་ཏོག་འབྲས་བུར་ལྡན་པ་ལ་བྱ་བར་གསུངས་པ་ནི་སྤྱིར་བཏང་ཡིན་ལ། དམིགས་བསལ་ལྟར་ན། རྒྱུད་སྡེ་འོག་མ་རྣམས་ལ་ཙཱ་ཀུ་ཤའི་ཆུན་བུས་རྒྱན་པ་ནི་
རྒྱ་གར་དུ་བྲམ་ཟེ་སོགས་རིགས་བྱེད་ཀྱི་གཞུང་ལས་སྐུ་ཤ་འདི་ནི་དག་ཅིང་གཙང་མར་བྱེད་པའི་ནུས་པ་དང་ལྡན་པའི་རྫས་ཡིན་པས། འདིས་ཁ་རྒྱན་དུ་བྱས་པའི་བུམ་པས་སྡིག་སྒྲིབ་སོགས་འདག་པར་བཤད་པ་དང་སྒོ་སྟུན་པ་ཡིན་ལ། རྨ་བྱའི་མདོངས་ནི་གསང་སྔགས་བླ་མེད་ལ་བསྔགས་ཏེ། རྨ་བྱས་དུག་ཟོས་པས་ལུས་སྟོབས་བཀྲག་མདངས་འཕེལ་ཞིང་། སྐྱེ་འགྲོ་གཞན་གྱིས་དུག་བཟར་མི་བཏུབ་པ་བཞིན། བླ་མེད་ཀྱི་སྣོད་ལྡན་རྣམས་ཉོན་མོངས་ལམ་དུ་ལྷོངས་ནུས་ལ། ཐེག་པ་གཞན་གྱི་དེ་ལྟར་མ་ཡིན་པའི་བརྡ་རྟགས་སུ་བཤད་དོ། །གཟུངས་ཐག་གི་དགོས་ཆེད་ནི། བདག་མདུན་གཉིས་ཀྱི་ཐུགས་ཀའི་སྔགས་འཕྲེང་ལས་འོད་ཟེར་སྤྲོ་བསྡུ་བྱེད་པའི་རྒྱུན་ལམ་ཚུལ་ཡིན་ཞིང་། རྡོ་རྗེ་ནི་ཐུགས་ཀའི་ཏིང་ངེ་འཛིན་སེམས་དཔའ་ཐུགས་སྲོག་ས་བོན་
མཚོན་པ་སྟེ། མདོར་བསྡུ་ན། བུམ་པ་རྒྱན་ལྡན་ནི་སྐུའི་སྒྲུབ་རྟེན། གཟུངས་ཐག་གསུང་གི་རྟེན་རྡོ་རྗེ་ཐུགས་ཀྱི་རྟེན་ཡིན་པར་གསུངས་སོ། །སྒྲུབ་གཞུང་ལ་ལར། བུམ་པའི་ཁར་དུང་ཆོས་བཞག་པའི་དགོས་པ་ནི། དུང་ཆོས་དེར་ལས་བྱེད་ཀྱི་ལྷ་རྡོར་སེམས་སམ། རྣམ་འཇོམས། རྟ་མགྲིན། ཕྱག་རྡོར། བགེགས་མཐར་བྱེད་སོགས་གང་རིགས་དང་། ཕལ་ཆེར་དུ་ནི་བདུད་རྩི་འཁྱིལ་བ་བསྐྱེད་བཟླས་བྱས་པའི་ཆུ་དེ་བུམ་པ་རྣམས་སུ་ཅུང་ཟད་བླུག་པ་ཙམ་གྱིས། བུམ་ནང་གིས་ལྷ་རྣམས་ཀྱི་ཐུགས་དམ་གྱི་རྒྱུད་བསྐུལ་ཏེ། དཔེར་ན། ཆང་ལ་ཕབས་ཐེབས་པའམ། ཞོ་ལ་རྩབས་བླུགས་པ་དང་། རིན་ཆེན་བཞུ་སར་ཚ་ལ་བཏབས་པ་བཞིན། བུམ་ནང་གི་ལྷ་ཚོགས་འོད་དུ་ལྟེམ་གྱི་ཞུ་ཞིང་བུམ་ཆུ་དང་དབྱེར་མེད་དུ་གྱུར་ནས་ཕྲིན་ལས་ཐོགས་པ་མེད་པར་མཛད་པའི་རྐྱེན་དང་སྐུལ་བྱེད་དུ་འགྱུར་བའི་
དགོས་དོན་ཡིན་པར་གསར་རྙིང་ཐམས་ཅད་དགོངས་པ་མཐུན་ནོ། །གཞན་ཡང་བུམ་རྫས་ནི་གསང་སྔགས་སྤྱི་ལ་ལྔ་ཚན་ལྔ་དང་། བླ་མེད་གོང་མའི་སྐབས་འགའ་ཞིག་ཏུ་ཉེར་ལྔ་པོ་དེའི་སྟེང་དུ་ཤ་ལྔ་བདུད་རྩི་ལྔ་རྣམས་བསྣན་པའི་སོ་ལྔ་ཚང་དགོས་པ་ཡང་ཡོད་མོད་ཀྱི་དེ་དག་གི་ངོས་འཛིན་དང་སྦྱར་ཚུལ་སོགས་ནི་སྒྲུབ་ཐབས་སོ་སོ་ལས་འབྱུང་ཕྱིར་སྨོས་མ་དགོས་ལ། བྱུང་ཚུལ་དང་དགོས་ཆེད་ཕན་ཡོན་རྣམས་ནི་རྒྱུད་འབྲེལ་ཆེ་བའི་རིགས་དང་། དབང་དོན་རབ་དབྱེ་ཐེག་མཆོག་གསལ་བྱེད་སོགས་ལས་ཀྱང་འབྱུང་མོད་ཀྱི། འདིར་ནི་ཡི་གེས་འཇིག་ནས་མ་བཀོད་དོ། །ཡང་རེ་ཤིག་གི་ཚེ་ཉིད་ཀྱིས་གསུང་རབ་སྤྱི་ལ་འཇུག་པའི་དོན་གྱི་སྒོའི་བྱེ་བྲག །ཡི་གེ་དང་། མིང་དང་། ཚིག་དང་། ཚིག་བཅད་དང་། ལྷུག་པ་དང་། སྡེབ་སྦྱོར་དང་། ཤླཽ་ཀ་དང་། བམ་པོ་ལ་སོགས་
པའི་དབྱེ་ཚུལ་གྱི་དྲི་རྨེད་གནང་བ་ལ། སྤྱིར་འདི་དག་གི་ཞིབ་ཆའི་སྤྲོས་པ་མཐའ་དག་ནི་བསྟན་བཅོས་ཆེན་པོ་ཕལ་ཆེར་ལས་འབྱུང་ཕྱིར་བདག་འདྲས་འདིར་བརྗོད་མི་དགོས་མོད་ཀྱང་། བཀའ་མི་ཆོག་ཕྱིར་དྲན་ཐོ་ཙམ་ཞིག་འབུལ་བར་བྱ་སྟེ། དེ་ཡང་ཡི་གེ་འདུས་པས་མིང་དུ་གྲུབ་ཅིང་། མིང་ལས་ཚིག་བྱུང་། ཚིག་ལས་བཀའ་དང་བསྟན་བཅོས་སོགས་འབྱུང་བ་ཉིད་དང་། དེ་དག་ལ་ཚིག་རྐང་ཤོ་ལོ་ཀ །བམ་པོ་སོགས་སུ་འགྱུར་བས་ན། དང་པོ་ཡི་གེའི་ངོ་བོ་ནི། དཔང་ལོའི་གསུང་ལས། བརྗོད་འདོད་དབང་གིས་རླུང་གཡོས་ཤིང་། །དེ་ཡི་གནས་དང་བྱེད་པ་དང་། །རྩོལ་བ་སྐྱེད་དེ་དབུགས་དབྱུང་དང་། ལྷན་ཅིག་ཡི་གེའི་གདངས་རྣམས་སྐྱེད། །ཞེས་གསུངས་པ་ལྟར། ཡི་གེ་དངོས་ནི་ངག་ནས་བརྗོད་པ་ཉིད་ཡིན་ཀྱང་དེ་མཚོན་པར་བྱེད་པའི་དཔེའམ་བརྡ་ཙམ་
དུ་གཟུུགས་སུ་བྲིས་པ་འདི་ལ་ཡིག་གཟུགས་ཅེས་བྱ་བ་ཡིན་པར་བཤད་ལ། དེ་ཡང་དཔེར་ན་ཨ་ཅེས་པའམ། ཀ་ཅེས་པ་ལྟ་བུ་བརྗོད་པའི་ངག་དེ་ཉིད་ལ་ཡི་གེ་ཞེས་བྱ་བ་ལས། དེའི་རྩ་བ་ནི་དབྱངས་དང་གསལ་བྱེད་གཉིས་ཡིན་ཕྱིར་དེ་གཉིས་ངོས་འཛིན་དང་དབྱེ་བསྡུའི་ཚུལ་གྱི་ལུགས་མི་འདྲ་བ་དུ་མ་ཡོད་དེ། གསུང་རབ་སྤྱི་མཐུན་ཡོངས་གྲགས་ལྟར་ན། དབྱངས་ཡིག་ཨ་ནས་རྣམ་བཅད་བར་གྱི་བཅུ་དྲུག །གསལ་བྱེད་ཀ་ནས་ཀྵའི་བར་གྱི་སོ་བཞི་པོ་བསྡོམས་པའི་ལྔ་བཅུ་ལ་དབྱངས་གསལ་དུ་ཆ་འཇོག་མོད། བྱེ་བྲག་ཏུ་ནི། སྒྲ་པའི་ལུགས་ལྟར་ན་དབྱངས་ཡིག་བརྒྱ་དང་སུམ་ཅུ་སོ་གཉིས། གསལ་བྱེད་སྟོང་ཕྲག་བཞི་དང་སུམ་བརྒྱ་དང་ང་དྲུག འདི་ལ་ཡང་དབྱངས་དངོས་ནི་བཅུ་བཞི་ཡིན་ཀྱང་། ང་རོ་དང་རྣམ་བཅད་གཉིས་པོ་ཨ་ལ་སྦྱར་ནས་དབྱངས་ཀྱི་ཁྲོད་དུ་བསྡེབ་
པ་ཙམ་ཡིན་ནོ། ཡོད་པར་བཤད། ༡ དུས་འཁོར་ལྟར་ན། རྒྱལ་བའི་མཚན་པོ་སུམ་ཅུ་རྩ་གཉིས་མཚོན་ཕྱིར་དབྱངས་ཡིག་སོ་གཉིས་དང་། དཔེ་བྱད་བརྒྱད་བཅུ་མཚོན་པས་གསལ་བྱེད་རྐྱང་པ་བཞི་བཅུ་དང་། རྩེགས་མ་བཞི་བཅུ་བསྡོམས་པའི་བརྒྱད་བཅུར་གསུངས་ཤིང་། དེ་ཐམས་ཅད་བསྡུ་ན་ཐབས་ཤེས་ཨེ་ཝཾ་གཉིས་ལ་འདུས་ཚུལ་དང་བཅས་པས་བསྟན་པར་མཛད། ༢ པཎ་ཆེན་སྨྲྀ་ཏིས་མཛད་པའི་སྨྲ་སྒོ་མཚོན་ཆའི་ལུགས་ལ་ནི། གསལ་བྱེད་རྣམས་སྤྱི་ལྟར་ལས། དབྱངས་ཡིག་རྣམ་པ་བདུན་དུ་བཞེད། དེ་དག་གི་རྣམ་འགྱུར་གྱི་ཁྱད་པར་ཀྱང་། དྲང་པོ་མདའ་ལྟ་བུའི་ཡི་གེ་ཨ་དང་། བསྒྲེང་བ་བསེ་རུ་ལྟ་བུ་ཨེ་དང་། བཀུག་པ་གླང་སྣ་ལྟ་བུ་ཨི་དང་། བསྟོད་པ་གདུགས་ལྟ་བུ་ཨོ་དང་། སྨད་པ་རྐང་རྟེན་ལྟ་བུ་ཨུ་དང་། སྒྲིམས་པ་མེ་རི་ལྟ་བུ་རྀ་དང་། གློད་པ་ཆུ་རིས་ལྟ་བུ་ལྀ་དང་།
བདུན་དུ་བཤད་པ་སྡེབ་སྦྱོར་གྱི་བསྟན་བཅོས་རྣམས་ལས་གསུངས་པའི་ལུགས་ལྟར་ན། དབྱངས་ཡིག་ཉི་ཤུ་རྩ་གཉིས་དང་། གསལ་བྱེད་སུམ་ཅུ་སོ་བདུན་དུ་མཛད་ལ། ༣ ཐོན་མིས་མཛད་པའི་སུམ་རྟགས་ཀྱི་གཞུང་ལུགས་སུ་ནི་བོད་ཀྱི་ཡུལ་ཁོ་ན་ལ་དགོངས་ཕྱིར་བོད་སྐད་དང་མཐུན་པའི་གསལ་བྱེད་ཀ་ནས་ཨའི་བར་གྱི་སུམ་ཅུར་གཏན་ལ་ཕབ་ཅིང་། དབྱངས་ཀྱི་ཡི་གེའི་ཨ་ཉིད་ཐམས་ཅད་ཀྱི་སྲོག་དང་སྙིང་པོ་ཡིན་ཀྱང་གསལ་བྱེད་ཀྱི་གྲངས་སུ་བསྡེབས་ཏེ། དབྱངས་གཞན་རྣམས་བོད་སྐད་ལ་མི་འཁོད་ཕྱིར་བཞག་ནས། ཨི་ཨུ་ཨེ་ཨོ་བཞི་པོ་གསལ་བྱེད་གཞན་གྱི་སྲོག་ཏུ་ཞུགས་པ་ལས། གུ་གུ། ཞབས་ཀྱུ་དང་། འགྲེང་བུ་དང་། ན་རོ་ཞེས་མིང་དུ་བཏགས་པས། བོད་སྐད་ལ་ཆོས་སློབ་དུ་
རུང་བའི་སྐུ་དྲིན་འདི་ལྟར་མཛད་པ་སྟེ་མདོར་ན་ཡི་གེའི་ངོ་བོ་ནི་དེ་ལྟ་བུ་ཡིན་ལ། དབྱེ་བའི་རྣམ་གྲངས་ནི་སྤྱིར་བསམ་གྱིས་མི་ཁྱབ་ལ། མདོར་བསྡུ་ན་རྒྱ་ཆེར་རོལ་པའི་མདོ་ནས་གསུངས་པའི་ཡིག་རིགས་དྲུག་ཅུ་རྩ་བཞི་པོར་འདུས་ཤིང་། དེ་དག་གི་ནང་ནས་ཁྱད་པར་འཕགས་པའི་ལཱཉྪ་ན་ལྷའི་ཡི་གེ་དང་། ཝརྟཱུ་ལ་ཀླུའི་ཡི་གེ་དང་། ན་ག་ར་མིའི་ཡི་གེ་ང་གསུམ་པོ་གཙོ་བོ་ལྟ་བུ་ཡིན་པ་དང་། དེ་ལས་ཀྱང་ལྷ་ཀླུའི་ཡི་གེ་གཉིས་པོ་འདི་ནི་འཇིག་རྟེན་གྱི་ཁམས་འདིར་སངས་རྒྱས་དང་འཁོར་ལོས་བསྒྱུར་བ་གཉིས་ནམ་བྱོན་པའི་ཚེ་མ་གཏོགས་གཞན་དུ་མི་འབྱུང་ཞིང་། སངས་རྒྱས་ཀྱི་བསྟན་པ་ནུབ་པའི་ཚེ་འདི་དག་ཀྱང་ནུབ་པར་འགྱུར་ཕྱིར་བསྟན་པའི་བཙས་ཡིན་པས་ན་དེ་གཉིས་ལ་དཀྲིས་པའི་ཡི་གེ་ཞེས་མིང་དུ་གྲགས་པ་དང་། བོད་ཡུལ་དུ་ཡང་དང་པོར་ཐོན་མི་
ཉིད་ཀྱིས་ལཱཉྪ་ན་ལ་དཔེར་མཛད་ནས་བོད་ཡིག་དབུ་ཅན་དང་། ཝརྟཱུ་ལ་དཔེར་མཛད་ནས་བོད་ཡིག་འབྲུ་ཚ་སྟེ། འདི་གཉིས་མཛད་པ་ལ་བརྟེན་ནས་བོད་ཡུལ་འདིར་དབུ་ཅན་ལ་གཟབས་ཆེན་གཟབས་ཆུང་དང་། དབུ་མེད་ལ་འབྲུ་ཆེན་འབྲུ་ཆུང་། ལི་ལུགས་འདན་ལུགས་སོགས་ཡིག་རིགས་དུ་མར་འཕེལ་ཞིང་། སླད་ནས་ལོ་པཎ་རྣམས་ཀྱི་བཀའ་དྲིན་ལས་བཀྲ་ཤིས་པའི་ཡི་གེ་གཉིས་པོ་དང་གཞན་ཡང་འཕགས་པའི་ཡུལ་གྱི་ཡིག་རིགས་ཕལ་ཆེ་བ་བོད་འདིར་དར་བར་གྱུར་བ་ལགས། དེ་ལྟ་བུའི་ཡི་གེ་དང་། མིང་དང་། ཚིག་དང་གསུམ་པོ་འདི། སྒྲ་པ་རྣམས་ཀྱི་ལུགས་ལ་ནི་དཔེར་ན་ཨ་གཅིག་པུ་ལ་ཡང་མིང་ཚིག་ཡི་གེ་གསུམ་ག་ཚང་བར་བསྒྲུབ་ཏུ་ཡོད་མོད་ཀྱང་། གསུང་རབ་སྤྱིའི་ལུགས་ལ་ནི་དེ་གསུམ་ཐ་དད་པར་གསུངས་ཏེ་
དཔེར་ན། སངས་རྒྱས། ཆོས། དགེ་འདུན། ཞེས་པ་ལྟ་བུའམ། ལྷ། ཀླུ། མི་ཞེས་པའམ། རྒྱལ་པོ་བློན་པོ་ཅེས་པ་ལྟ་བུ་དངོས་པོ་གང་དང་གང་ཡིན་པ་དེའི་ངོ་བོ་ཙམ་བརྗོད་པ་ལ་མིང་ཅེས་བྱ་བ་ཡིན་ལ། མིང་དེ་ལའང་དབྱེ་ན་གཉིས་ཏེ། འདོད་རྒྱལ་གྱི་མིང་དང་རྗེས་གྲུབ་ཀྱི་མིང་ངམ། དངོས་མིང་དང་བཏགས་མིང་གཉིས་ཡོད་དེ། དང་པོ་འདོད་རྒྱལ་ལམ་དངོས་མིང་ནི། ངེས་ཚིག་བཤད་དུ་མེད་རུང་ཁོ་རང་གི་མིང་གདོད་ནས་དེར་ཐོགས་པ་སྟེ། དཔེར་ན། ས། ཆུ། མེ། རླུང་། ཞེས་པ་ལྟ་བུ་ཡིན་པས་མིང་དེ་དག་བརྗོད་པ་ཙམ་གྱིས་འབྱུང་བའི་དངོས་པོ་དེ་དང་དེ་དག་དྲན་པར་འགྱུར་ཕྱིར་མིང་ཡིན་ཀྱང་། སྒྲའི་ངེས་ཚིག་བཤད་དུ་མེད་ཕྱིར་འདོད་རྒྱལ་གྱི་མིང་ཞེས་བྱའོ། །གཉིས་པ་རྗེས་གྲུབ་བམ་བཏགས་པའི་མིང་ནི། དཔེར་ན། སའི་མིང་
ལ་འདེགས་བྱེད་དང་། ཆུ་ལ་དག་བྱེད་དང་། མེ་ལ་སྲེག་བྱེད་དང་། །རླུང་ལ་སྐྱོད་བྱེད་ཅེས་པ་ལྟ་བུ་སྟེ། དངོས་པོ་དེ་རྣམས་སོ་སོས་ལས་དེ་དང་དེ་དག་བྱེད་ནུས་པའི་ཕྱིར་མིང་དེ་ལྟར་བཏགས་པ་ཡིན་པས་སོ། །དེ་ལྟ་བུ་བཏགས་མིང་དེ་ལའང་ནང་བསེས་ཀྱི་དབྱེ་བ་བྱས་ན། རྒྱུ་ལ་འབྲས་མིང་བཏགས་པ། འབྲས་བུ་ལ་རྒྱུ་མིང་བཏགས་པ། རྟེན་ལ་བརྟེན་པའི་མིང་དང་བརྟེན་པ་ལ་རྟེན་གྱི་མིང་བཏགས་པ་སོགས་དང་། ཆ་ཤས་ལ་ཡོངས་རྫོགས་ཀྱི་མིང་དང་། ཡོངས་རྫོགས་ལ་ཆ་ཤས་མིང་བཏགས་པ་དང་། གྲོགས་ལ་གྲོགས་ཅན་གྱི་མིང་དང་མཚན་གཞི་ལ་མཚན་ཉིད་ཀྱི་མིང་བཏགས་པ་སོགས་མཐའ་ཡས་པ་མཆིས་པར་མངོན་པ་དང་སྒྲ་རིགས་ཀྱི་གཞུང་རྣམས་ལས་འབྱུང་ངོ་། །དེ་ལྟ་བུའི་མིང་གི་བྱེ་བྲག་དེ་ལས་ཁྱད་པར་བའི་དངོས་པོའམ་བྱེད་ལས་གསལ་
བར་སྟོན་པ་ནི་ཚིག་ཡིན་ཏེ། དཔེར་ན། སངས་རྒྱས་ཤཱཀ་ཐུབ། ཅེས་པའམ། ཆོས་དཀོན་མཆོག་རྩེགས་པ། ཅེས་པ་ལྟ་བུ་དངོས་པོ་དང་། བྱེད་ལས་སྟོན་པ་ནི་དཔེར་ན། ས་གཞི་ཁོད་སྙོམས་པ། ཆུ་ཐུར་དུ་འབབ་པ། མེ་ཡིས་བསྲེག །རླུང་གིས་བསྐྱོད། ཅེས་པ་སོགས་ལྟ་བུ་སྟེ་མིང་ལས་ཚིག་ཏུ་གྱུར་བའོ། །ཡི་གེ་ལ་དོན་གྱི་ངོ་བོ་སྟོན་ནུས་པ་དང་མི་ནུས་པ་གཉིས་ཀ་ཡོད་དེ། ཡིག་འབྲུ་གཅིག་གིས་དོན་སྟོན་ནུས་པའི་རིགས་ནི། བོད་སྐད་ཀྱི་དབང་དུ་བྱས་ན། ས། ཞེས་པའི་ཡི་གེ་གཅིག་པུ་དེས་འདེགས་བྱེད་ཀྱི་དོན་གོ་བར་ནུས་པ་དང་། ཁ། ཞེས་པ་ཙམ་གྱིས་གཏམ་སྨྲ་བའི་སྒོ་ཉིད་གོ་བ་དང་། ཉ། ཞེས་པ་ཙམ་གྱིས་ཆུ་ལ་གནས་པའི་སྲོག་ཆགས་དེ་ཉིད་གོ་ནུས་པ་སོགས་ལྟ་བུ་ཡིན་ནོ། །ཡང་། ཡིག་འབྲུ་རེ་རེས་དོན་སྟོན་མི་ནུས་པའི་
རིགས་ནི་རྒྱ་བོད་གཉིས་ཀའི་དབང་དུ་བྱ་ན། ཀ གྷ། ཀྵ། ཞེས་སོགས་ལྟ་བུ་ཡིན་ལ། ཡི་གེ་གཉིས་ཡན་ཆད་སྦྲེལ་བའི་མང་དུ་ཚོགས་པ་ལས་ནི་མིང་དང་ཚིག་ཏུ་འགྲུབ་པ་སྟེ། དཔེར་ན། ཨ་ཕ། ཨ་མ། ཞེས་སོགས་ཡི་གེ་ཉིས་འབྲེལ་དང་། བུམ་པ། གླང་པོ་ཆེ། རིན་པོ་ཆེའི་རི་བོ། ཞེས་པ་ལྟ་བུའོ། །ཚིག་དེ་ལ་ཡང་རྐང་པ་ཐ་དད་དུ་ཚིག་འབྲུ་གྲངས་ངེས་སུ་བཅད་པ་ནི་ཚིག་བཅད་དང་། རྐང་པར་མ་བཅད་པ་ལ་ལྷུག་པ་དང་། དེ་གཉིས་ཀ་ཚང་བ་ལ་སྤེལ་མ་ཞེས་བྱ་བ་དང་རྣམ་པ་གསུམ་དུ་བསྡུ་བ་ནི་བོད་སྐད་ཁོ་ནའི་དབང་དུ་བྱས་པ་སྟེ། རྒྱ་གར་དུ་ནི་དེ་དག་གི་སྟེང་དུ་རྒྱུན་ཆགས་སོགས་ཀྱང་ཡོད་པ་དང་། ཚིག་རྐང་ཉིད་ལའང་རྒྱ་གར་བའི་ལུགས་ལ་ལར་ཡིག་འབྲུའམ་ཚིག་རེ་རེ་ལ་རྐང་པར་བཅད་པ་ཡང་ཡོད་དེ། ཤྲཱི་མནཱ་དྷཱཿསུ། ཞེས་པ་ལྟ་བུ་དང་། དེ་
བཞིན་དུ་ཚིག་འབྲུ་གཉིས་རེ་དང་། གསུམ་རེ་དང་། བཞི་རེ་དང་། ལྔ་རེའི་བར་དུ་བཅད་པ་ལ་རྐང་པ་རེ་རེར་བྱ་ཚུལ་བཤད་པ་ཡོད་ནའང་། སྡེབ་སྦྱོར་རིན་ཆེན་འབྱུང་གནས་སོགས་གཞུང་ཆེན་རྣམས་ལས་ནི། ཚིག་རྐང་ཐུང་ཚད་ལ་ཚིག་འབྲུ་དྲུག་ལ་རྐང་པ་གཅིག་ཏུ་བཅད་པ་དང་། ཚིག་རྐང་རིང་ཚད་ལ་ཚིག་འབྲུ་ཉི་ཤུ་རྩ་དྲུག་ལ་རྐང་པ་གཅིག་ཏུ་བཅད་པར་བཤད་པ་ཡིན་ཀྱང་། བོད་སྐད་ལ་ནི་ཚིག་འབྲུ་བདུན་པ་ཚིག་རྐང་ཐུང་ཤོས་སུ་མཛད་པ་སྟེ། དཔེར་ན་མཚན་བརྗོད་དང་བྱམས་སྨོན་གྱི་ཚིག་རྐང་བཞིན་ནོ། །འབྲུ་བརྒྱད་ནི་སྒྲོལ་མ་དང་འབྲུ་དགུ་ལ་ནི་བཟང་སྤྱོད་སོགས་ལྟ་བུ་སྟེ། མདོར་ན་ཚིག་རྐང་རིང་ཐུང་གང་ལའང་དེ་ལྟ་བུ་གཅིག་ལ་ཚིག་རྐང་གཅིག་ཏུ་བརྗོད་པ་ཡིན་ཏེ། དཔེར་ན། སངས་རྒྱས་ཀུན་ལ་ཕྱག་འཚལ་ལོ། །ཞེས་པ་ལྟ་བུའོ། །དེས་ན་ཚིགས་སུ་བཅད་པ་ཅེས་
པ་ལ་ནི་བཞེད་ལུགས་ཐ་དད་ཡོད་དེ། ལུང་གི་ཚིགས་བཅད་དང་བསྟན་བཅོས་ཀྱི་ཚིགས་བཅད་གཉིས། ལུང་གི་ཚིགས་བཅད་ནི་ཚིག་རྐང་གཅིག་ལ་ཚིགས་བཅད་རེར་བཞེད་པ་དང་། དེ་བཞིན་དུ། ཚིག་རྐང་གཉིས་དང་། གསུམ་དང་། བཞི་དང་། ལྔ་དང་། དྲུག་ལ་ཚིགས་སུ་བཅད་པ་རེར་བཞེད་པ་ཡོད་ནའང་། ད་ལྟ་ཡོངས་གྲགས་ལ་ནི། བསྟན་བཅོས་ལུགས་ཀྱི་ཚིགས་བཅད་རྐང་པ་བཞི་བཞི་ལ་ཚིགས་སུ་བཅད་པ་རེ་རེར་བཞེད་པ་ཉིད་ཐམས་ཅད་མཐུན་པ་ལགས། ཚིག་བཅད་རྐང་བཞི་ཉིད་ལ་ཡང་སྡེབ་སྦྱོར་བའི་ལུགས་ལ་བྲྀཏྟ་ཅེས། ཤོ་ལོ་ཀ་ནི་ལེགས་སྦྱར་གྱི་སྐད་དེ། བོད་སྐད་དུ་ཚིགས་སུ་བཅད་པ་ཞེས་བྱ་བ་ཡིན་ནོ། །རྐང་པ་བཞི་ཀ་ཡི་གེ་གྲངས་མཉམ་དུ་ཡོད་པ་དང་། ཛ་ཏི་ཞེས་ཡིག་འབྲུའི་གྲངས་མི་མཉམ་ཀྱང་སྲོག་གི་དབྱངས་ཐུང་ངུ་དང་རིང་བ་དང་ཤིན་ཏུ་རིང་བ་སོགས་ཀྱི་
ཚད་མཉམ་དུ་བྱས་པའི་མཚན་ཉིད་དང་ལྡན་པའི་ཚིགས་བཅད་ཀྱི་དབྱེ་ཚུལ་ཡོད་མོད་ཀྱང་བོད་སྐད་ལ་མི་ཁོ་ཕྱིར་ཞིབ་ཏུ་མ་བརྗོད་ལ། ཞིབ་པར་འདོད་ན་སྡེབ་སྦྱོར་གཞུང་འབྲེལ་དུ་བལྟའོ། །སྙན་ངག་པའི་ལུགས་ལ་ནི། ཚིག་རྐང་བཞིའི་ཚིགས་སུ་བཅད་པ་དེ་ལ་ཡང་ནང་ཚན་དུ་དོན་སྟོན་ཚུལ་གྱི་ཁྱད་པར་ཐ་དད་ལ་མིང་ཡང་སོ་སོར་བརྗོད་དེ་གྲོལ་བའི་ཚིག་བཅད་དང་། རིགས་ཀྱི་ཚིག་བཅད་དང་། མཛོད་ཀྱི་ཚིག་བཅད། འདུས་པའི་ཚིག་བཅད་དང་བཞི་ཡོད་དེ། དེ་ཡང་ཚིག་བཅད་གཅིག་གི་བརྗོད་བྱའི་དོན་ཡང་ཁོ་ན་རྫོགས་པར་སྟོན་པ་ལ་གྲོལ་བའི་ཚིག་བཅད་ཀྱི་མིང་དུ་བརྗོད་པ་དང་། བརྗོད་བྱའི་དོན་གཅིག་ཉིད་ཚིགས་བཅད་མང་དུ་སྦྲེལ་བའི་འཇུག་ཏུ་ཚིག་གཅིག་གིས་བསྡུས་ནས་སྟོན་པ་ལ། རིགས་ཀྱི་ཚིགས་བཅད་དུ་བརྗོད་པ་དང་། ཚིགས་བཅད་ གྱུར་ཞེས་པའམ་ཡོད་ཅེས་པ་ལྟ་བུ།
གཅིག་གིས་བརྗོད་བྱའི་དོན་སྣ་ཚོགས་སྟོན་པ་ནི་མཛོད་ཀྱི་ཚིགས་བཅད་དང་། བརྗོད་བྱའི་དོན་གཅིག་ལ་ཚིག་བཅད་དུ་མ་དང་བྱ་ཚིག་ཀྱང་ཐ་དད་པ་མང་པོས་སྟོན་པ་ལ་འདུས་པའི་ཚིགས་བཅད་ཀྱི་མིང་དུ་བརྗོད་པ་སྟེ། དེ་ལྟར་ཚིག་བཅད་ཀྱི་མཚན་ཉིད་སྣ་ཚོགས་ཡོད་ཀྱང་། སྐབས་འདིའི་བཤད་བྱ་ནི། ཚིགས་རྐང་རིང་ཐུང་གང་ཡིན་ཀྱང་། ཚིག་རྐང་བཞི་ལ་ཚིགས་སུ་བཅད་པའམ་ཤོ་ལོ་ཀ་གཅིག་ཏུ་བརྗོད་པ་ལགས། ལྷུག་པ་ནི་ཚིག་རྐང་མ་བཅད་པའི་སིལ་བུ་ཉིད་ཡིན་ཏེ། མིང་གི་རྣམ་གྲངས་སོ། །རྐྱང་པ་ཅེས་ཀྱང་ཟེར་རོ། །སྡེབ་སྦྱོར་ནི། རྒྱུད་དང་བསྟན་བཅོས་ཆེན་པོ་ཐམས་ཅད་ལ། རྒྱ་གར་དུ་ལེགས་སྦྱར་གྱི་སྐད་ལ་ནི་མཚན་ཉིད་ཚང་བར་ཡོད་ཀྱང་། བོད་མཐའ་ཁོབ་ཀྱི་སྐད་དུ་བསྒྱུར་ཚེ་སྡེབ་སྦྱོར་ཐམས་ཅད་
ཞིག་ནས་མེད་པར་འགྱུར་བ་མ་གཏོགས། རྒྱ་གར་གྱི་ཚིག་བཅད་ལ་སྡེབ་སྦྱོར་མེད་མི་སྲིད་ཅིང་ཁྱད་པར་འཕགས་པ་ཡིན་ཕྱིར། སྡེབ་སྦྱོར་གྱི་གཞུང་ཡང་མི་འདྲ་བ་དུ་མ་ཞིག་ཡོད་པའི་ནང་ནས་ཁྱད་ཆོས་མང་པོ་དང་ལྡན་པ་སློབ་དཔོན་ཤནྟི་པས་མཛད་པའི་སྡེབ་སྦྱོར་རིན་ཆེན་འབྱུང་གནས་ཀྱི་ལུགས་འདི་བོད་དུ་དར་ཞིང་གྲགས་པ་ཆེ་བ་དང་འགྲེལ་བ་མཛད་པ་པོ་ཡང་སྔ་ཕྱི་འགའ་རེ་འབྱུང་ལ། ཕྱིས་སུ་རྗེ་མི་སྐྱོད་ཞབས་ཀྱིས་མཛད་པའི་འགྲེལ་པ་ཡང་མཆིས་མོད་ཀྱི། མདོར་ན། སྡེབ་སྦྱོར་གྱི་ངོ་བོ་ནི་ཚིགས་བཅད་ཚིག་བར་དྲུག་པ་ནས་ཉེར་དྲུག་པའི་བར་གྱི་རིང་ཐུང་གང་ཡིན་པ་དེའི་ཚིག་འབྲུ་གསུམ་རེ་ལ་སྡེ་ཚན་རེར་ཕྱེས་ནས་དེ་གསུམ་པོའི་ཡི་གེ་ལྕི་བ་དང་ཡང་བ་རྣམས་ངོས་བཟུང་སྟེ། ཡང་བ་གཉིས་ཀྱི་འགོར་ལྕི་བ་གཅིག་བཀོད་
པའམ། ཡང་བ་གཉིས་ཀྱི་དབུས་སུ་ལྕི་བ་རེ་ཡོད་པ་དང་། ཡང་བ་གཉིས་ཀྱི་མཐར་ལྕི་བ་རེས་མཚན་པ་སོགས་དང་། སྡོད་པའམ་ངལ་གསོ་བའི་ཚད་དང་། དེ་ལྟར་ཡི་གེ་ལྕི་ཡང་གི་སྤེལ་ལུགས་རིང་ཐུང་སོགས་མི་འདྲ་བ་ཐ་དད་པ་དེ་ལ་སྡེབ་སྦྱོར་གྱི་མིང་ཡང་སོ་སོར་ཡོད་དེ། དབྱངས་སྒྲོག་རབ་དགའ་རྗེས་བསྔགས་བྲྀ་ཧ་སྟི། འཕྲེང་ལྡན། གསུམ་སྔགས། ཞེས་སོགས་ཀྱི་རྣམ་གྲངས་བརྒྱ་ལྷག་ཡོད་པ་སྟེ། གཞུང་གང་ཡིན་དེ་ཉིད་ཀྱི་དབུ་ནས་ཞབས་ཀྱི་བར་དུ་སྡེབ་སྦྱོར་གང་བྱེད་པ་དེ་ཉིད་ཁོ་ན་ལས་གཞན་མི་བསྲེ་བས། དཔེར་ན། དུས་འཁོར་བསྡུས་རྒྱུད་ཤོ་ལོ་ཀ་སྟོང་དང་སུམ་ཅུ་ལྷག་པ་ཐམས་ཅད་མེ་ཏོག་ཕྲེང་འཛིན་གྱི་སྡེབ་སྦྱོར་འབའ་ཤིག་ཏུ་ཡོད་པར་གསུངས་ལ། མཚན་བརྗོད་མངོན་རྟོགས་རྒྱན་སོགས་ནི་ཁ་སྒོ་ཅེས་བྱ་
བའི་སྡེབ་སྦྱོར་ཡིན་པ་དང་། འདི་གཉིས་རྒྱ་སྐད་ལ་ཡི་གེ་བརྒྱད་མར་ཡོད་ཀྱང་བོད་སྐད་ལ་ཚེག་བར་བདུན་པར་བསྒྱུར་ཤིང་། སྒྲོལ་མའི་ཕྱག་འཚལ་ཡང་སྡེབ་སྦྱོར་འདི་དང་གཅིག་ཀྱང་བོད་སྐད་ལ་ཚེག་བར་བརྒྱད་པར་བསྒྱུར་བ་དང་། བཤེས་སྤྲིངས་ནི་དབང་པོ་རྡོ་རྗེ་ཞེས་པའི་སྡེབ་སྦྱོར་ཏེ་ཡི་གེ་བཅུ་གཅིག་པར་ཡོད་ཀྱང་བོད་སྐད་ལ་དགུ་མར་བསྒྱུར་བ་སོགས་ཡིན་ནོ། །འོན་ཀྱང་བོད་སྐད་ལ་ནི་ལྕི་ཡང་གི་མཚན་ཉིད་ཚུལ་ལྡན་མེད་ཚེ་སྡེབ་སྦྱོར་ཇི་ལྟ་བ་བྱ་ཐབས་མི་འབྱུང་ལ། བོད་ཀྱི་སྙན་ངག་མཁན་ལ་ལས་རྒྱ་གར་གྱི་སྐད་དང་འདྲ་མཚུངས་བསྒྲིགས་ནས་བོད་སྐད་ལ་སྡེབ་སྦྱོར་གྱི་དཔེར་བརྗོད་བྱས་པ་དག་ནི་བླུན་པོ་མགུ་བྱེད་ཙམ་ལས་ཚད་ལྡན་མི་འགྲུབ་པར་གསུངས་སོ། །སྤྱིར་ཤེས་བྱ་རིག་པའི་གནས་ལྔ་ནི། སྒྲ། ཚད་མ། བཟོ། གསོ་བ།
རང་རིག་པ་དང་ལྔ་པོ་ཡིན། མདོ་ལ་རིག་གནས་ཆུང་བ་ལྔ་ནི། སྙན་ངག །སྡེབ་སྦྱོར། མིང་གི་མངོན་བརྗོད། ཟློས་གར། རྩིས་དང་ལྔ་ལས། ཟློས་གར་དངོས་ནི་བོད་ཡུལ་དུ་མ་དར་ལ་གཞན་བཞི་པོའི་ཆ་ཤས་ཙམ་དར་བ་ཡིན་པར་གྲགས་སོ། །སྡེབ་སྦྱོར་གྱི་ཚིག་བཅད་ཡི་གེ་ཉེར་དྲུག་པ་ལས་མང་བ་ནས་བཟུངས་ཏེ་ཡིག་འབྲུ་བརྒྱ་ཕྲག་སོགས་ཀྱི་བར་དུ་སྦྲེལ་ལེགས་ཅིང་ཚིག་ཐར་ཐོར་དུ་མ་གྱུར་བར་སྡེབ་སྦྱོར་གང་ཡིན་གྱི་འགྲོས་མ་ཞིག་པའི་མཐར་བྱ་ཚིག་ཇི་ལྟར་རིགས་པས་དོན་གསལ་བར་བྱས་པ་ནི་རྒྱུན་ཆགས་ཅེས་བྱ་བའི་མཚན་ཉིད་དེ། འདི་ཡང་དོན་ལ་ཚིག་བཅད་རིང་པོའི་ཁོངས་སུ་གཏོགས་པར་བཞེད་པ་མང་ངོ་། མདོར་ན་སྡེབ་སྦྱོར་གྱི་རིགས་འདི་དག་ ཀླུ་སྒྲུབ་ཀྱིས་མཛད་པའི་ཐུབ་དབང་སྒྲོལ་མའི་བསྟོད་པ་སོགས་ལྟ་བུ།
ནི་ཡི་གེ་ལྕི་ཡང་དང་ངལ་གསོ་སོགས་ཀྱི་མཚན་ཉིད་དང་འགྲོས་མ་ཉམས་པ་ཚིག་རྐང་ཐམས་ཅད་ལ་ཚད་གཅིག་ཏུ་འབྱུང་བ་ལས། བརྗོད་བྱའི་དོན་ཐ་དད་མ་ལུས་ཇི་བཞིན་དུ་སྟོན་ནུས་པ། དེ་ཉིད་ཀྱང་ཤོ་ལོ་ཀ་འགའ་དང་འགའ་ཞིག་ཙམ་དུ་མ་ཡིན་པར་གླེགས་བམ་ཆེན་པོའི་དབུ་ཞབས་ཚང་མར་དེ་ལྟར་ཤ་སྟག་ཏུ་འབྱུང་བ་ནི་ངོ་མཚར་ཆེ་བར་སྣང་ངོ་། །སྐབས་དོན་སྙིང་པོར། དེ་ལྟར་ཚིགས་སུ་བཅད་པའམ་ཤོ་ལོ་ཀ་དེ་ལྟ་བུ་གསུམ་བརྒྱ་ལ་བམ་པོ་རེར་མཛད་པ་སྟེ། དཔེར་ན་ཡུམ་རྒྱས་པ་ལ་བམ་པོ་གསུམ་བརྒྱ་ཤོ་ལོ་ཀ་འབུམ་ཕྲག་གཅིག་ཡོད་ཕྱིར། རྒྱས་པ་འབུམ་དུ་མཚན་གྲགས་པ་དང་། ཡུམ་བར་མ་ཤླཽ་ཀ་སྟོང་ཕྲག་ཉེར་ལྔ། ཡུམ་བསྡུས་པ་ལ་སྟོང་ཕྲག་བརྒྱད་ཡོད་ཕྱིར་མཚན་ཡང་དེ་དང་མཐུན་པར་འབོད་པ་ཡིན་ལ། ཤེར་ཕྱིན་སྡུད་པ་
དང་རྡོར་གཅོད་གཉིས་ནི་བམ་པོ་རེ་རེའི་ཚད་དང་། ཤེར་ཕྱིན་སྙིང་པོ་ལ་བམ་པོ་གཅིག་གོ་ཞེས་གསུངས་མོད་ཀྱང་ཤོ་ལོ་ཀ་ཉེར་བརྒྱད་ལས་མེད་པས་བམ་ཚད་དངོས་མ་ལོངས་སོ། །དེས་ན་འདི་དག་གི་ཤླཽ་ཀ་ནི་ཚེག་བར་བདུན་པ། མཚན་བརྗོད་ཀྱི་ཚིག་རྐང་ལྟ་བུ་ལ་ཆ་བཞག་པའི་ཤླཽ་ཀ་ཡིན་ལ། ཚིག་ལྷུག་པ་གཞན་རྣམས་ལ་ཡང་དེ་དང་རིགས་བསྒྲེས་ནས་ཚེག་བར་བགྲངས་པ་དང་། བཞུགས་ཚན་ཆེ་བ་དག་ལ་ནི་ཤོག་གྲངས་ལ་རག་རྩིས་བྱས་པ་དང་། ལ་ལ་ནི་ཚིག་རྐང་རིང་བའི་ཚིག་བཅད་ཡིན་པའི་སྟབས་སོགས་ཀྱིས། བམ་ཚད་ཆེ་ཆུང་ངེས་མེད་སྣ་ཚོགས་འབྱུང་བའི་རྒྱུ་མཚན་ནི་དེ་ལྟར་ཡིན་པར་གསུངས་སོ། །ལེའུ་ལ་ནི་ལེགས་སྦྱར་གྱི་སྐད་དུ་སརྒ་ཞེས་བྱ་སྟེ། དེ་ལ་ནི་ཤླཽ་ཀའི་གྲངས་ཚད་སོགས་ཀྱི་ངེས་པ་མེད་པ། མིང་གཞན་
རིམ་པར་ཕྱེ་བ་དང་། རབ་ཏུ་བྱེད་པ་དང་། སྐབས་དང་། ཡལ་འདབ་དང་། རྣམ་པར་བཅད་པ་དང་། རིམ་རྐང་དང་། མཛོད་ཁང་དང་། སྡོམས་སུ་བསྡུས་པ་ཅེས་པ་ལ་སོགས་ལེའུའི་མིང་གི་བྱེ་བྲག་ནི་མཐའ་ཡས་པ་འབྱུང་ཞིང་། དགོས་དོན་ནི། བམ་པོར་བྱས་པ་ནི་ཆོས་ཚན་གང་ཡིན་པ་དེ་ཉིད་ཀྱི་ཚིག་དོན་ལ་ཆད་ལྷག་མི་འབྱུང་བའི་ཐབས་སམ། དཔེ་རྫིའམ། དཀར་ཆགས་ལྟ་བུ་ལ་དགོངས་ནས་བཀོད་པ་ཡིན་པར་གསུངས་ལ། ལེའུ་སོགས་གཞན་དེ་དག་གི་དགོས་པ་ནི་གཞུང་དེ་ཉིད་ལ་འཆད་ཉན་འཛིན་ཀློག་སོགས་གང་བྱེད་ཀྱང་ཧ་ཅང་འབྱམས་ཀླས་པའི་སྐྱོན་གྱི་ངལ་བར་མི་འགྱུར་བའི་ཕྱིར་དང་། གཞུང་དོན་དེ་དག་གི་སྐབས་སོ་སོ་ཐ་དད་ཀྱི་དབྱེ་མཚམས་སོགས་རྟོགས་པར་སླ་བ་ལ་དགོངས་པ་ཡིན་པར་བཞེད་པ་ལགས། ཁ་སིང་བཟང་སྤྱོད་སྨོན་ལམ་གྱི་འཕྲོས་དོན་ལས་ བཀའི་བསྡུ་བ་པོ་རྣམས་ཀྱི་
བརྩམས་ཏེ།། ༈ །།སྡིག་པ་དང་སྒྲིབ་པ་གཉིས་པོ་གཅིག་མི་གཅིག་དང་། མི་གཅིག་ན་དབྱེ་ཚུལ་གང་ཡིན་གསུངས་པ། འདི་ལ་སྤྱི་ཙམ་དུ་ནི། ཐར་པ་དང་ཐམས་ཅད་མཁྱེན་པ་ཐོབ་པའི་དོན་ལ་གེགས་དང་སྒྲིབ་བྱེད་དུ་གྱུར་པའི་ཕྱིར་ན་སྒྲིབ་པའམ་སྡིག་པ་མི་དགེ་བ་ཞེས་ངོ་བོ་གཅིག་པར་བཤད་ལ། སྒྲིབ་པ་དེ་ལ་དབྱེ་ན་ལྔ་སྟེ་ཉོན་མོངས་པའི་སྒྲིབ་པ། ལས་ཀྱི་སྒྲིབ་པ། རྣམ་པར་སྨིན་པའི་སྒྲིབ་པ། ཤེས་བྱའི་སྒྲིབ་པ། སྙོམས་འཇུག་གི་སྒྲིབ་པ་དང་ལྔ་ལས། དང་པོ་ཉོན་མོངས་པའི་སྒྲིབ་པ་ནི། རྩ་ཉོན་དྲུག །ཉེ་ཉོན་ཉི་ཤུ། དེ་དག་གི་ཡན་ལག་ནི་བསམ་གྱིས་མི་ཁྱབ་ཅིང་། དང་པོ་རྩ་བའི་ཉོན་མོངས་པ་དྲུག་ནི། འདོད་ཆག །ཞེ་སྡང་། གཏི་མུག །ང་རྒྱལ། ལྟ་བ་ངན་པ། ཐེ་ཚོམ་དང་དྲུག་གོ། །ཉེ་བའི་ཉོན་མོངས་པ་ཉི་ཤུ་
ནི། རྩ་བ་དུག་གསུམ་ཉིད་ལ་འདུ་ཡང་རྣམ་གྲངས་ཙམ་དུ། ཁྲོ་བ། འཁོན་འཛིན། འཆབ་པ། འཚིག་པ། ཕྲ་དོག །སེར་སྣ། གཡོ་སྒྱུ། རྒྱགས་པ། རྣམ་པར་འཚེ་བ། ངོ་ཚ་མེད་པ། ཁྲེལ་མེད་པ། མ་དད་པ། རྒོད་པ། རྨུགས་པ། བག་མེད། ལེ་ལོ། བརྗེད་ངས། རྣམ་གཡེང་། ཤེས་བཞིན་མ་ཡིན་པ་དང་ཉི་ཤུའོ། མདོར་ན་འདི་དག་ནི་སྒྲིབ་པ་ཐམས་ཅད་ཀྱི་རྩ་བའམ། སྡིག་པ་མི་དགེ་བ་མཐའ་དག་གི་རྒྱུ་ཡིན་ནོ། །གཉིས་པ་ལས་ཀྱི་སྒྲིབ་པ་ནི། གོང་གི་རྒྱུ་དེ་དག་ལ་བརྟེན་ནས་མི་རུང་བ་བྱེད་པ་རྣམས་ཡིན་ཏེ། མི་དགེ་བ་བཅུ་དང་། མཚམས་མེད་པ་ལྔ་དང་། དེ་དང་ཉེ་བ་ལྔ་ལ་སོགས་པ་རང་བཞིན་གྱི་མི་དགེ་བ་རྣམས་དང་། བསླབ་པ་གསུམ་དང་འགལ་བ་སོགས་བཅས་པའི་མི་དགེ་བ་ཐམས་ཅད་སྟེ། མདོར་ན་སྡིག་པ་མི་དགེ་བའི་ངོ་བོའམ། བྱེད་ལས་དངོས་ནི་འདི་དག་ཡིན་
ཕྱིར་ལས་ཀྱི་སྒྲིབ་པ་ཅེས་བྱའོ། །གསུམ་པ་རྣམ་པར་སྨིན་པའི་སྒྲིབ་པ་ནི། སྡིག་པའི་ལས་དེ་དག་བྱས་པའི་འབྲས་བུ་ངན་སོང་གསུམ་སོགས་མི་ཁོམས་པའི་གནས་བརྒྱད་རྣམས་སུ་སྐྱེས་ཏེ་ཆོས་ཀྱི་ལས་ལམ་ལ་སྒྲིབ་ཕྱིར་རྣམ་སྨིན་གྱི་སྒྲིབ་པ་ཅེས་བྱའོ། །བཞི་པ་ཤེས་བྱའི་སྒྲིབ་པ་ནི། གཟུང་འཛིན་དངོས་པོར་ཞེན་པས་ཆོས་ཉིད་གནས་ལུགས་ཀྱི་དོན་མཐོང་བའི་གེགས་དང་སྒྲིབ་བྱེད་དུ་འགྱུར་ཕྱིར་ཤེས་སྒྲིབ་ཅེས་བྱའོ། །ལྔ་པ་སྙོམས་འཇུག་གི་སྒྲིབ་པ་ནི། ཏིང་ངེ་འཛིན་བསྒོམ་པ་ལ་གེགས་དང་སྒྲིབ་བྱེད་དུ་གྱུར་བ་ལྔ་ཡིན་ཏེ། འདོད་པ་ལ་ཞེན་འདུན་དང་། གཉིད་དང་། བྱིང་རྨུག་དང་། རྒོད་པ་དང་། ཐེ་ཚོམ་སོམ་ཉིད་དང་ལྔ་པོ་འདིས་ཏིང་ངེ་འཛིན་ལམ་དུ་མི་འགྲོ་བའི་རྐྱེན་དང་སྒྲིབ་བྱེད་དུ་འགྱུར་ཕྱིར་སྙོམས་འཇུག་གི་སྒྲིབ་པ་ཅེས་བྱ་སྟེ། དེ་ལྟ་
བུའི་སྒྲིབ་པ་ལྔ་པོ་རྣམས་མདོར་བསྡུས་ན་ཉོན་སྒྲིབ་དང་ཤེས་སྒྲིབ་གཉིས་ལ་འདུ་བ་སྟེ། ལས་སྒྲིབ་དང་རྣམ་སྨིན་སྒྲིབ་པ་གཉིས་ནི་ཉོན་སྒྲིབ་ལས་བྱུང་བ་ཡིན་ལ། སྙོམས་འཇུག་སྒྲིབ་པ་ནི་ཤེས་སྒྲིབ་ཀྱི་ཆར་གཏོགས་པར་གསུངས་སོ། །དེ་ཕྱིར་སྡིག་སྒྲིབ་གཉིས་པོ་ངོ་བོ་འདྲ་ཡང་། རྣམ་པ་ལྟར་ན། རྒྱུ་དང་བྱེད་ལས་ཀྱི་དབྱེ་བའམ། བསམ་དང་སྦྱོར་བའི་ཁྱད་པར་རམ་བྱེད་པ་པོ་དང་བྱ་བའི་ཁྱད་འབྱེད་པ་ཙམ་ཉིད་དོ། །དེ་ཡང་ལས་དང་ཉོན་མོངས་རྣམ་སྨིན་གྱི་སྒྲིབ་པ་གསུམ་ནི་ཆོས་པ་དང་འཇིག་རྟེན་པ་ཀུན་ལ་འབྱུང་མོད་ཀྱི། ཤེས་སྒྲིབ་དང་སྙོམས་འཇུག་གི་སྒྲིབ་པ་གཉིས་ནི་ཆོས་པ་རྣམས་ལ་འབྱུང་བ་སྟེ། དོན་གྱི་སྙིང་པོར། ལས་ཀྱི་སྒྲིབ་པ་ནི་སྡིག་པ་དངོས་ཡིན་ལ། གཞན་འདི་དག་ལ་སྒྲིབ་པའི་མིང་དུ་བརྗོད་པ་ལགས་པ་དང་། སྒྲིབ་
པ་དེ་རྣམས་ཀྱི་གསལ་ཐབས་ཀྱང་། ལས་ཀྱི་སྒྲིབ་པ་ལ་ནི་སྤོང་སེམས་དང་གཉེན་པོ་དྲག་པོས་ཕག་སྣ་ལ་བཏུན་བུ་བརྟེག་པ་ལྟར་གདོང་ཟློག་ཁོ་ནས་སེལ་བ་ལ་འབད་དགོས་ཤིང་། རྣམ་སྨིན་གྱི་སྒྲིབ་པ་ལ་ནི་འགྱོད་ཚང་དང་སྡིག་སྦྱོངས་མཐོལ་བཤགས་ཀྱི་ལས་རིམ་ལ་སྒོ་གསུམ་གཅིག་དྲིལ་ཏུ་བྱ་བ་དང་། གཞན་གསུམ་པོ་ལ་ནི་སོ་སོའི་མཚན་ཉིད་དང་རང་བཞིན་ཤེས་པས་བསལ་ནུས་མེད་ཀྱང་གང་ཟག་གི་ཁྱད་པར་ལ་རག་ཕྱིར། རང་ཉིད་ཐེག་པ་ས་གསུམ་དང་མདོ་སྔགས་ལམ་གང་ལ་གོམས་པ་དེའི་མན་ངག་གིས་བསལ་ཐབས་ཉིད་ཟབ་པ་དང་། ཁྱད་པར་ཤེས་སྒྲིབ་ནི་གནས་ལུགས་ཀྱི་དོན་ཇི་ལྟ་བར་རྟོགས་པ་ཉིད་ཀྱི་སེལ་བ་ལས། འདུས་བྱས་ཀྱི་བསལ་ཐབས་གཞན་ལ་ལྟོས་པ་ནི་མ་ཡིན་
པས། རང་སྒྲིབ་རང་གིས་བསལ་བའི་གནད་དོན་ཁོང་དུ་ཆུད་དགོས་པ་ཉིད་དོ། །དེ་ལྟར་འཆད་ཚུལ་འདི་ནི་གསུང་རབ་སྤྱི་བབས་ལྟར་ཡིན་ལ། སོ་སོའི་སྒེར་དོན་གྱི་འཆད་ཚུལ་མི་འདྲ་བ་ནི་བསམ་གྱིས་མི་ཁྱབ་ཕྱིར་རང་རང་གི་སྐབས་དོན་ལས་ཤེས་པར་བྱ་དགོས་པ་ལགས། ཡང་མཚམས་མེད་པ་ལྔའི་ནང་ཚན་གྱི་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུངས་པ་ཅེས་པ་དང་། དགྲ་བཅོམ་པ་བསད་པ་སོགས་ཀྱི་ངོས་འཛིན་ཕྲོས་དོན་གནང་བའི་ཆ་ལ། སྤྱིར་མི་དགེ་བ་བཅུ་དང་མཚམས་མེད་པ་ལྔ་ལ་སོགས་ཀྱི་འཆད་ཚུལ་འདི་དག་ནི་ཐུན་མོང་ཐེག་པའི་དབང་དུ་མཛད་ཀྱི། གསང་སྔགས་ཀྱི་སྐབས་སུ་ནི་རང་གཞུང་གི་དམ་ཚིག་གི་ཕམ་ལྟུང་ཉེས་བྱས་སོགས་ཀྱི་ངོས་འཛིན་གཙོ་ཆེ་ནའང་། ད་ལམ་དྲི་བ་གནང་བའི་སྐབས་དོན། ལྷོ་བྲག་པས་མཛད་པའི་ཕག་མོ་རྣམ་
བཤད་ཆེན་མོའི་དམ་ཚིག་འཆད་པའི་སྐབས། རྩ་ལྟུང་བཅུ་བཞིའི་ས་བཅད་དང་པོ་ལ་མཚམས་མེད་ལྔ་ཀ་ཡང་དོན་གྱིས་ཚང་བར་འགྱུར་ཚུལ་གསུངས་པ་ནི་ཤིན་ཏུ་ཡང་ཡིན་ཏེ། རྡོ་རྗེའི་སློབ་དཔོན་ནི་སངས་རྒྱས་དངོས་དང་རང་ལ་སྐུ་དྲིན་གྱི་ཆ་ནས་ནི་སངས་རྒྱས་ལས་ཀྱང་ལྷག་པ་ཡིན་ཕྱིར། དེ་ཉིད་ལ་ངན་སེམས་ཀྱི་སྐུ་ལ་བསྡོས་ན། དེ་བཞིན་གཤེགས་པ་ལ་ཁྲག་ཕྱུངས་ལས་ཀྱང་ཉེས་པ་ལྕི་བར་གཞིར་བཅས་ཏེ། ཅིའི་ཕྱིར་ན། མདོ་ལས་སྔགས་ལྷག་པར་དུ་ཕན་ཡོན་དང་ཉེས་དམིགས་གཉིས་ཀ་ནུས་པ་ཆེ་བར་བཀའ་བསྟན་བཅོས་ཐམས་ཅད་ལས་གསུངས་པའི་ཕྱིར་རོ། །སྤྱིར་དེ་བཞིན་གཤེགས་པའི་སྐུ་མི་ཤིག་པ་མི་ཆོད་པ་བསྲ་བརྟན་པ་ཟག་མེད་གཞོམ་གཞིག་བྲལ་བ་རྡོ་རྗེ་ལྟ་བུའི་སྐུ་ལ་ཁྲག་དབྱུང་བར་ནུས་པ་མི་སྲིད་མོད་ཀྱང་། གདུལ་བྱ་ཐུན་མོང་བའི་
སྣང་ངོར་རྒྱུ་འབྲས་ཀྱི་བརྡ་སྟོན་ཕྱིར། སྔོན་སྟོན་པ་ཉིད་ལ་ལྷས་བྱིན་གྱིས་སྒྱོགས་འཕངས་པས་ཞབས་ཀྱི་མཐེའུ་ཆུང་ཅུང་ཟད་བསྣད་པའི་ཚུལ་དང་། སྒྱོགས་རྡོའི་ཟེ་མ་ཞིག་ཛམྦྷ་ལའི་མགོར་ཕོགས་པས། དེང་སང་ཡང་ཆུ་གཏོར་གྱི་སྐབས་སུ་ཨོཾ་ཛམྨུ་སྭཱ་ཧཱ། ཞེས་པས་རྨ་བཀྲུ་བ་ཡིན་པ་སོགས་དྲང་དོན་དུ་བསྟན་མོད་ཀྱི། མདོར་ན་འདི་ལྟ་བུ་ཡང་སངས་རྒྱས་ཉིད་འཇིགས་པ་དང་བྲལ་ནའང་། ངན་སེམས་བྱེད་པོ་དེ་ལ་མཚམས་མེད་ཀྱི་ལས་རྔམས་པོ་ཆེར་འགྱུར་བ་ཡིན་ཕྱིར། གསང་སྔགས་ཀྱི་བླ་མ་གྲུབ་ཐོབ་ལྟ་བུ་ལ་ནི་དཔེ་དེ་བཞིན་དང་། གྲུབ་པ་མ་ཐོབ་པ་ལྟ་བུ་ལ་ནི་དེ་བས་ཀྱང་གནོད་པ་ཆེར་འགྱུར་ཕྱིར་ལྟ་ཅི་སྨོད་ལ། འདི་སྐབས་ཀྱི་འཕྲོས་དོན་ལ་དེང་སང་གསོ་རིག་འཛིན་པའི་སྨན་པ་དག །བླ་མ་སྐྱེས་ཆེན་གྱི་སྙུན་གཞི་ལ་ཕན་པའི་གཏེར་ཁ་
སོགས་བྱེད་མི་ནུས་པ་སྐད་དང་། ལ་ལས་ལྕགས་ཀྱི་བཙག་བུ་ནི་མཚོན་ཆའི་རྣམ་པར་འགྲོ་བས་མི་རུང་སྟེ། ལི་བཙགས་ཀྱིས་གཏར་དགོས་པ་སྐད་སོགས་ཟེར་མོད་ཀྱང་། གོ་བ་ལ་ལར་མ་རྙེད་པའི་གཏམ་དུ་ཟད་དེ། སྐུའི་སྙུན་ལ་ཕན་པའི་གཏར་ཁ་དང་། ངན་སེམས་ཀྱི་ཁྲག་ཕྱུངས་པ་གཉིས་ནམ་ཡང་ག་ལ་མཚུངས། གལ་ཏེ་ཕན་སེམས་ཀྱི་མ་ཡིན་པའི་ཚེ་ན་ནི་ལག་ཆ་དང་ཐབས་ཅི་འདྲས་ཁྲག་ཕྱུངས་ཀྱང་ཉེས་པ་ཁྱད་པར་མི་འོངས་ཕྱིར། ལྕགས་དང་ལིའི་བཙང་བུ་ལའང་ཁྱད་པར་ཅི་ཞིག་འབྱུང་མོད་དེ། དགེ་སྡིག་ནི་བསམ་པ་བཟང་ངན་ཁོ་ནས་ཕྱེས་པ་ཉིད་དོ། །དགྲ་བཅོམ་པ་ཡང་ཐེག་པ་གསུམ་གར་ཐ་དད་དུ་འོང་ཐང་། གསུངས་པ་དེ་ལ་དོན་གྱི་དབང་དུ་བྱས་ན་ནི། རང་རྒྱུད་ཀྱི་ཉོན་མོངས་པའི་དགྲ་ཐམས་ཅད་རང་བྱུང་ཡེ་ཤེས་ཀྱིས་བཅོམ་པའི་
ངེས་ཚིག་འབྱུང་བས་ན། ཐེག་པ་ཀུན་རང་སྐབས་ཀྱི་དགྲ་བཅོམ་པའི་ཐ་སྙད་བརྗོད་དུ་ནི་རུང་མོད་ཀྱང་། སྤྱི་ཁྱབ་ཡོངས་གྲགས་ལ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་དང་། འཕགས་པ་ཉན་ཐོས་རང་རྒྱལ་གྱི་དགྲ་བཅོམ་པ་གཉིས་ཙམ་མ་གཏོགས། བྱང་སེམས་དང་རིག་པ་འཛིན་པའི་སྐབས་སོགས་སུ་དགྲ་བཅོམ་གྱི་མིང་ནི་མི་འབྱུང་བ་དང་། མཚམས་མེད་ཀྱི་སྐབས་དོན་འདིར་དགྲ་བཅོམ་པ་བསད་པ་ནི་ཉན་རང་གི་དགྲ་བཅོམ་ཉིད་ལ་ཆ་འཇོག་པ་སྟེ། དེ་ལ་ཡང་དགྲ་བཅོམ་པའི་འབྲས་བུ་སྔོན་དུ་གྱུར་ཕྱིན་ཆད་རྫུ་འཕྲུལ་ལ་དབང་ཐོབ་ཕྱིར། དེ་ལ་མཚོན་ཆ་འཕངས་པ་ཡང་མེ་ཏོག་གི་ཆར་དུ་འགྱུར་བ་སོགས་གསུངས་ཕྱིར་གཞན་གྱིས་གསོད་པར་མི་ནུས་མོད་ཀྱི། དེས་ན་མཚམས་མེད་ཀྱི་རྣམ་གྲངས་འདི་ཡང་བྱེད་པ་པོ་ལ་ཉེས་པའི་ཆ་ནས་རྩིས་པ་མ་གཏོགས་
ཡུལ་གྱི་ཆ་ནས་འཇོག་དཀའ་བ་དང་། སྔགས་ཀྱི་སྐབས་སུ་དབང་བཞི་རྫོགས་པ་དེ་ལ་དགྲ་བཅོམ་པར་བརྗོད་རུང་ངམ། གསུངས་པ། དེ་ལ་ནི་དགེ་སློང་རྡོ་རྗེ་འཛིན་པ་ཅེས་བྱའི། དགྲ་བཅོམ་པའི་ཐ་སྙད་བརྗོད་དུ་རུང་བར་ནི་མ་ངེས་ཏེ། དབང་བཞིའི་ནུས་པ་མཐར་མ་ཕྱིན་ཞིང་རྫུ་འཕྲུལ་སོགས་ལ་དབང་མ་ཐོབ་པའི་ཕྱིར་རོ། །གོང་གི་དམ་ཚིག་རྣམས་བཤད་དེར། དགྲ་བཅོམ་གྱི་མཚན་ཉིད་འཆད་ཚེ་མཚན་བརྗོད་ཀྱི་ལུང་། བྱ་བ་བྱས་པ་སྐམ་སར་གནས། ཅེས་དྲངས་འདུག་པའི་ངེས་ཚིག་གང་ཡིན་གསུང་བ། དེ་ནི་ཚོགས་གཉིས་བསགས་ཅིང་སྒྲིབ་གཉིས་སྦྱང་བའི་བྱ་བ་མཐའ་དག་བྱས་པའི་མཐུས། འཁོར་བའི་འདམ་རྫབ་ལས་ཐོན་ཏེ་ཐར་བའི་སྐམ་སར་ལེགས་པར་གནས་པ། ཅེས། མཚན་བརྗོད་ཀྱི་འགྲེལ་
པ་སློབ་དཔོན་རིན་པོ་ཆེ་པདྨས་མཛད་པ་ལས་གསུངས་སོ། །རྩ་ལྟུང་བཅུ་བཞི་པོའི་སྐབས་སུ། ཕམ་པ། ལྟུང་བ། སྦོམ་པོ། ཉེས་བྱས་རྣམས་ཀྱི་ཁྱད་པར་གང་ཡིན་པ་དང་། ཕམ་པ་དངོས་ཀྱི་ངོས་འཛིན་ལ་ནི། ཉོན་མོངས་ཀུན་བླངས་དོར་ཤེས་ལྡན། །ལུས་ངག་སྦྱོར་བརྟེན་བར་ཆད་དང་། །མ་འཁྲུལ་འགྱོད་མེད་ཚད་ལས་འདས། །ཅེས་པའི་སྦྱོར་བ་བདུན་པོ་ཚང་བ་ལ་ངོས་འཛིན་པར་གྲགས་ན། དེ་བདུན་པོ་གསལ་ཁ་དགོས་གསུང་བ་ལ། དེ་ཡང་། ཡུལ་རྡོ་རྗེའི་སློབ་དཔོན་སོགས་གང་ཡིན་དེ་ལ་སྙིང་ནས་ཁྲོ་བའི་ཞེ་སྡང་དང་ཕྲ་དོག་སོགས་ཉོན་མོངས་པ་དྲག་པོས་ཀུན་ནས་བླངས་པའི་བསམ་པ་མ་རུངས་པའི་ངོ་བོ་དེ་དང་གཅིག །ཡུལ་དེ་ལ་གང་ཟག་གཞན་དང་ནོར་བ་སོགས་མ་ཡིན་པར་དེ་ཉིད་དུ་ཤེས་བཞིན་པ་དང་གཉིས། དེ་ལ་གནོད་པའི་སྦྱོར་བ་དེ་ལུས་ངག་གི་ཐོག་ཏུ་དངོས་སུ་བཀལ་
བ་དང་གསུམ། བྱ་བ་དེས་ཡུལ་ཕ་རོལ་དེ་ལ་ཡང་བར་ཆད་དུ་གྱུར་བ་དང་བཞི། རང་ཉིད་གདོན་གྱིས་བརླམས་ཏེ་སྨྱོ་བའམ་འཁྲུལ་བ་སོགས་ཀྱིས་བྱས་པ་མ་ཡིན་པར་ཞེ་ཐག་པའི་གནོད་སེམས་དང་ལྔ། དེ་ལྟ་བུ་བྱས་གྲུབ་ནས་ཀྱང་འགྱོད་པ་མ་སྐྱེད་པར་ཡིད་ཚིམ་པ་དང་དྲུག །དེའི་མཐུས་བཤགས་པ་སོགས་མི་བྱེད་པར་ཐུན་ཚོད་ལས་འདས་པ་སྟེ། དེ་ལྟར་བདུན་པོ་ཚང་བ་ནི་རྩ་ལྟུང་དངོས་ཡིན་ནོ། ཐུན་ཚོད་ཅེས་པ་ལ་བཞེད་ཚུལ་མི་འདྲ་བ་མང་ནའང་སྐབས་འདིར་ནི། ཉིན་མོ་ལ་སྔ་དྲོ་ཉིན་གུང་ཕྱི་དྲོ་སྟེ་ཐུན་གསུམ། མཚན་མོ་ལ་སྲོད་ནམ་གུང་ཐོ་རངས་ཐུན་གསུམ་ཡིན་ཕྱིར། ཐུན་དེ་དག་རེ་རེ་གང་རུང་གཅིག་གི་ནང་དུ་ཉེས་པ་དེ་བྱས་ནས་ཐུན་དེ་ཀའི་ནང་དུ་མ་བཤགས་ན་ཐུན་ཚོད་ལས་འདས་པ་ཅེས་བྱའོ། །དུས་ཀྱི་ལྕི་
ཡང་ནི། བཤགས་པ་མ་བྱས་པར་ཉིན་ཞག་ཕྲུག་གཅིག་འདས་ན་དམ་ལས་འགལ་བ་ཅེས་བྱ་བ་དང་། ཟླ་བ་གཅིག་འདས་ན་དམ་ལས་ཉམས་པ་ཅེས་བྱ་ཞིང་། ལོ་གཅིག་སོང་ན་དམ་ལས་འདས་པ་ཅེས་པ་དང་། ལོ་གཉིས་ནས་ནི་དམ་ཚིག་རལ་བ་ཞེས་བྱ་བ་སྟེ། དེ་རྣམས་རིམ་པ་བཞིན་ཕྱི་མ་ཕྱི་མ་རབ་ཏུ་ལྕི་བར་གྱུར་ཡང་སྙིང་ཐག་པ་ནས་བཤགས་ན་དེ་ཚུན་ཆད་གསོར་རུང་ལ། ལོ་གསུམ་ཕན་ཆད་ནི་ནམ་ཡང་གསོར་མི་རུང་བར་གསུངས་ཤིང་། གསོ་ཐབས་ཀྱང་རིམ་པ་བཞིན་དུ། དམ་ལས་འགལ་བ་ལ་ཚོགས་འཁོར་ཆེན་པོ་བརྒྱ་རྩས་གསོ་ཞིང་། དམ་ལས་ཉམས་པ་ལ་རང་ལ་ཅི་ཡོད་ཀྱི་བདོག་པ་ཐམས་ཅད་ཕུལ་བས་གསོ་བ་དང་། དམ་ལས་འདས་ན་བུ་དང་ཆུང་མ་ནོར་གྱི་དབྱིག་མཐའ་དག་ཀྱང་ལྟོས་མེད་དུ་ཕུལ་ཏེ་གསོ་བ་དང་། དམ་རལ་བ་ལ་ནི་རང་གི་
སྲོག་ལ་བསྡོད་པ་ཉིད་ལས་གཞན་གྱིས་གསོ་མི་ཐུབ་པར་གསུངས་པ་སྟེ། དེ་ལྟར་འདི་ནི་སྤྱི་ཁྱབ་ཀྱི་དབང་དུ་བྱས་པ་སྟེ། བྱེ་བྲག་ནང་བསེས་སུ་ནི་ལྟུང་བ་གང་དང་གང་བྱུང་བ་དེ་ཉིད་བཤགས་ཅིང་གསོ་ཐབས་ཐ་དད་པའི་ཞིབ་ཆ་རྣམས་གཞུང་སོ་སོ་ལས་ཇི་ལྟར་གསུངས་པ་བཞིན་ནོ། །མདོར་ན་འདི་དག་གི་རྣམ་གྲངས་དབྱེ་ཚུལ་ནི་ཐེག་པ་འོག་མའི་སྡོམ་པ་དང་སྒོ་སྟུན་ནས་གསུངས་སྟེ། གོང་དུ་སྨོས་པའི་ས་བཅད་བདུན་པོ་ཐམས་ཅད་ཚང་བ་ལ་ཕམ་པ་ཅེས་མིང་དུ་བཏགས་ལ། དེ་ཉིད་ཐུན་ཚོད་ལས་མ་འདས་པར་བཤགས་པའི་ཚེ་ན་ནི་ལྟུང་བ་ཞེས་པའི་མིང་དང་། བསམ་སྦྱོར་དང་པོ་གསུམ་བྱས་ཀྱང་ལས་དེ་མ་གྲུབ་པ་ཙམ་ལ་སྦོམ་པོ་ཅེས་པའི་མིང་དང་། གཞན་རྣམས་མ་ཚང་བར་ལུས་ངག་གི་རྣམ་འགྱུར་ཙམ་རྩེད་མོའི་ཕྱིར་བྱས་པ་སོགས་ལ་
ནི་ཉེས་བྱས་ཀྱི་མིང་ཙམ་དུ་འགྱུར་བར་གསུངས་ནའང་། ཚུལ་འདི་ནི་རྩ་ལྟུང་དང་པོ་དང་གཉིས་པ་དང་བཅུ་བཞི་པ་ལྟ་བུའི་དབང་དུ་མཛད་པ་སྟེ། གཞན་ཐམས་ཅད་ལ་ལུས་ངག་གི་སྦྱོར་བ་ཚང་དགོས་པའི་ངེས་པ་ཡང་མ་མཆིས་ཏེ། རྩ་ལྟུང་དགུ་པ་སོགས་ནི་ཡིད་ཁོ་ན་ལས་འབྱུང་བའི་ཕྱིར། དེས་ན་ནང་བསེས་ཀྱི་དབྱེ་བ་ཕྲ་ཞིབ་རྣམས་ནི་འགྲེལ་པ་ལ་སོགས་ལས་ཤེས་དགོས་ལ་བློ་དང་ལྡན་པ་དག་གིས་ནི་རྩ་ཚིག་ཁོ་ནས་ཀྱང་རྟོགས་ནུས་པ་ཉིད་དོ། །དབང་བཞི་དང་འབྲེལ་བའི་བཟའ་བའི་དམ་ཚིག་གི་སྐབས་དོན་གྱི་དོགས་གཅོད་གནང་བའི་ཆ་ལ་ནི། ཉིད་ཀྱིས་གང་དགོས་པའི་དེ་ཀ་ལྟར་ལགས་ཏེ། དེ་ཡང་། བུམ་དབང་ལ་བཟའ་བཏུང་ཐམས་ཅད་ཤ་ལྔ་བདུད་རྩི་ལྔར་མོས་པའི་དགོས་པ་ནི། འཇིག་རྟེན་ཕལ་གྱི་སྣང་ངོར་ནི་འདི་དག་མི་གཙང་ཞིང་རྩོགས་པའི་མཐར་ཐུག་ཏུ་འཛིན་མོད་
ཀྱི། རྣལ་འབྱོར་པས་གཙང་རྩོགས་དང་ཞིམ་མངར་བཟང་ངན་ཐམས་ཅད་ཏིང་ངེ་འཛིན་མཉམ་ཉིད་ཆེན་པོར་རོ་མཉམ་ཕྱིར་ཡིན་ལ། གསང་དབང་དུ་ནི་ཤ་ལྔ་བདུད་རྩི་ལྔ་ཡིན་པ་ཙམ་དུ་མ་བཞག་པར་ཡེ་ཤེས་ཀྱི་བདུད་རྩིར་བྱིན་གྱིས་བརླབས་ནས་ལོངས་སྤྱད་པས་རང་ལུས་དྭངས་མའི་བདུད་རྩི་ཡར་འཕེལ་དུ་བྱ་ཕྱིར་དང་། དབང་གསུམ་པའི་ལམ་ལ་ཁྱད་པར་དུ་ཉམས་ལེན་པ་དག་གིས་ནི་ཚོགས་དྲུག་ཐམས་ཅད་ལ་ཡབ་ཡུམ་ཐབས་ཤེས་ཀྱི་བརྡ་དོན་ལམ་དུ་འཁྱེར་དགོས་ཕྱིར། བཟའ་བཏུང་རྣམས་ཀྱང་ཡ་རྐན་ཐབས་དང་མ་རྐན་ཤེས་རབ་སྙོམ་འཇུག་གི་རོལ་བ་མཛད་པས་ཟས་སྐོམ་གྱི་རོ་ཐམས་ཅད་བདེ་སྟོང་ལྷན་སྐྱེས་ཀྱི་ངོ་བོར་མྱོང་བར་འདུ་ཤེས་པར་བྱ་བ་དང་། དབང་བཞི་པའི་རྣལ་འབྱོར་ལ་ནི་འཁོར་འདས་ཅིར་སྣང་མཐའ་དག་ཆོས་ཉིད་ཁྱབ་གདལ་དུ་མ་གྱུར་བ་སྤུ་ཙམ་མ་
མཆིས་ཚེ། བཟའ་བཏུང་གི་དངོས་པོ་ལོངས་སྤྱོད་མཁན། ཅི་ལྟར་སྤྱད་པ་ཐམས་ཅད་ཀྱང་ཆོས་ཉིད་ཀྱི་ངང་ལས་མ་གཡོས་པར་ཐག་ཆོད་པས་ན། བདུད་རྩི་ཡིན་དང་མིན་པ་སོགས་ཀྱི་གཉིས་འཛིན་གང་གིས་ཀྱང་མ་བསླད་པར་རང་རིག་རང་བབས་ཡེངས་མེད་ཀྱི་ངང་ནས་ལོངས་སྤྱོད་པ་དེ་ལ་ཆོས་ཉིད་ལ་ཆོས་ཉིད་རོལ་བ་ཞེས་བྱ་བ་ལགས། རྙིང་ལུགས་རྫོགས་ཆེན་རྣམས་ནས་གསུངས་པའི་རང་བཞིན་ལྟ་བའི་དམ་ཚིག་བཞི་པའི་ངོས་འཛིན་གང་ཡིན་པའི་དྲི་དོན་ཕེབས་པའི་ཆ་ལ། འདི་དག་ལ་མིང་དམ་ཚིག་ཏུ་བཏགས་ཀྱང་ངོ་བོ་ནི་ཆོས་ཉིད་དེ་བཞིན་ཉིད་དངོས་པོའི་གནས་ལུགས་ཀྱི་མངོན་རྟོགས་དུ་གདའ་བས། སོ་སྐྱེ་ཕལ་པ་དང་བློ་དམན་རྟོག་གེ་བས་ཐོས་ན་བློར་མ་ཤོང་བས། སླར་ལོག་ལྟས་ཧྭ་ཤང་གི་གྲུབ་མཐའི་ཕྱོགས་སུ་འཕུལ་ཉེན་སྣང་བ་དང་། འདི་ཚུལ་རྒྱས་བཤད་ནི་བདག་འདྲའི་སྤྱོད་ཡུལ་དུ་མ་གྱུར་
མོད་ཚེ། སྙིང་པོར་བསྡུ་ན། མེད་པ། ཕྱལ་བ། གཅིག་པུ། ལྷུན་རྫོགས་དང་བཞི་ལས། དང་པོ་ནི། འཁོར་འདས་ཀྱི་ཆོས་ཐམས་ཅད་རང་གིས་ངོ་བོས་སྟོང་ཞིང་སྐྱེ་འགགས་གནས་གསུམ་གྱི་མཚན་མས་དབེན་པའི་ཡེ་སྟོང་མཐའ་བྲལ་ཆེན་པོ་དེ་ལ་ནི་དམ་ཚིག་བསྲུང་བྱའི་དངོས་པོ། །སྲུང་བྱེད་ཀྱི་གང་ཟག །ཇི་ལྟར་སྲུང་བའི་ཚུལ་ལ་སོགས་པ་མཐའ་དག་ཆོས་ཉིད་སྟོང་ཆེན་ལས་གཞན་པའི་དམིགས་མཚན་དུ་གྲུབ་པ་རྡུལ་ཙམ་ཡང་མ་མཆིས་པས་ན། མེད་པའི་དམ་ཚིག་ཅེས་བྱ། ༡ དེ་ལྟར་ངོ་བོའི་ཆ་ནས་དངོས་ཚན་དུ་གྲུབ་པ་མེད་ཀྱང་རྣམ་པའི་ཆ་ནས་མེད་བཞིན་སྣང་བའི་ཆོ་འཕྲུལ་རྨི་ལམ་ལྟར་སྣ་ཚོགས་སུ་འཆར་བ་འདིའི་ངོར་དམ་ཚིག་བསྲུང་མཚམས་ཇི་ལྟར་བྱ་ཞེ་ན། སྣང་ཡང་བདེན་མེད་རྨི་ལམ་ཆུ་ཟླའི་ཚུལ་དུ་སྣང་བཞིན་པ་དེ་ཀའི་གནད་ཀྱིས་
ལྟར་སྣང་གི་དམ་ཚིག་བླངས། བསྲུངས། ཉམས། བཤགས་པ་སོགས་མཐའ་དག་ཀྱང་འདུས་བྱས་དྲང་དོན་བྱིས་པ་འབྲིད་ཐབས་ཙམ་དུ་ཟད་ལ། བསྲུང་བའི་ཕན་ཡོན་དང་ཉམས་པའི་ཉེས་དམིགས་ཀྱི་མཐོང་ཆོས་ཐམས་ཅད་ཀྱང་ཀུན་རྟག་གི་མེ་ལོང་ལ་ཀུན་རྟག་གི་གཟུགས་བརྙན་ཤར་བའི་རྣམ་འགྱུར་ལས་མ་འདས་པའི་ཕྱིར་ན། གཟུངས་འཛིན་དངོས་པོའི་ཆོས་ཀྱིས་ཀུན་ནས་བླངས་པའི་བསྲུང་བྱ་སྲུང་བྱེད་བསྲུང་མཚམས་ཐམས་ཅད་རང་རིག་ཡེ་ཤེས་ཁྱབ་གདལ་ཕྱོགས་ལྷུང་མེད་པར་ཐག་ཆོད་ཅིང་གདེངས་རྙེད་པ་ལ། ཕྱལ་བའི་དམ་ཚིག་ཅེས་བྱ། ༢ དེ་ལྟ་བུའི་གདོད་མའི་གནས་ལུགས་སམ་རང་རིག་པའི་ཡེ་ཤེས་དམ་ཚིག་བསྲུང་བྱ་བསྲུང་བྱེད་ཀྱི་མཚན་མ་ལས་འདས་ཤིང་། ཉམས་རྒྱུ་ཉམས་རྐྱེན་ཉམས་པའི་རྣམ་སྨིན་སོགས་ཀྱི་དངོས་པོ་རིས་ཅན་དུ་མ་གྲུབ་ན་དམ་ཚིག་དེ་གང་ལ་ཟེར། གང་ཟག་གི་ཡིན་སྙམ་ན། དེ་ནི་ཕྱི་རོལ་ལམ། ནང་ངམ། བར་དང་སྟེང་འོག་སོགས་གང་དུ་ཡང་
མེད། གང་ལ་ཡང་མི་གནས། གར་ཡང་མ་སོང་སྟེ། ད་ལྟའི་ཐ་མལ་གྱི་ཤེས་པ་གཉུག་མ་མ་བཅོས་ལྷན་སྐྱེས་རིག་པ་རྗེན་པ་འདི་ཁོ་ན་སྟེ། འདི་ནི་དམ་ཚིག་ཀུན་གྱི་རྩ་བའི་སྙིང་པོའི་མཐར་ཐུག་ཡིན་ཕྱིར་ཇི་སྐད་དུ། དམ་ཚིག་གསལ་བཀྲ་ལས། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཞེས་སོགས། སྤྱོད་འཇུག་ལས་ཀྱང་། སེམས་བསྲུང་བརྟུལ་ཞུགས་མ་གཏོགས་པ། བརྟུལ་ཞུགས་མང་པོས་ཅི་ཞིག་བྱ། ཞེས་གསུངས་པ་ལྟ་བུ་འདི་ཉིད་ལ། གཅིག་བུའི་དམ་ཚིག་ཅེས་བྱ། ༣ དེ་ལྟར་ཡིན་པའི་གནད་དོན་རྟོགས་ཤིང་རིག་ནས་དུས་དང་རྣམ་པ་ཐམས་ཅད་དུ་འཁོར་འདས་ཀྱི་ཆོས་ལ་བདག་གཞན་བཟང་ངན་ཡོང་ལེན་བསྲུང་ཉམས་སོགས་ཀྱི་མཚན་འཛིན་དང་ཞེན་རྟོག་མང་པོས་རང་སེམས་རང་གི་གཡེང་། དཀྲུག །གཟིངས། བསླད། བཅིངས་པ་སོགས་ཀྱི་
རྩོལ་བས་མགོ་འཁོར་དུ་མི་གཞུག་པར། སེམས་ཉིད་སྐུ་གསུམ་ལྷུན་གྲུབ་ཡེ་ཤེས་ལྔ་དང་གསུམ་དང་གཉིས་སོགས་ཀྱི་ཡོན་ཏན་མཐའ་དག་གཟོད་ནས་རང་ཆས་སུ་གནས་ཤིང་རྫོགས་ལ། སྐྱོན་གྱིས་སེལ་དང་དྲི་མ་མཐའ་དག་ཡེ་བྲལ་དུ་གྱུར་ཤིང་། ས་ལམ་གྱི་ཡོན་ཏན་ཐམས་ཅད་གཞི་ལ་ལྷུན་རྫོགས་སུ་ཚང་ཕྱིར། རྩོལ་སྒྲུབ་མཚན་བཅས་ཀྱི་གཡེང་བ་ལ་མ་ལྟོས་པར། རང་བྱུང་རང་བབས་གཟོ་མེད་ལྷུག་པའི་ངང་དུ་བཞག་བྱ་འཇོག་བྱེད་ཀྱི་བློ་ལས་འདས་པར་མཉམ་པར་འཇོག་པ་ནི་ཆོས་ཀྱི་སྒོ་རབ་འབྱམས་མ་ལུས་པའི་ཉམས་ལེན་ལྷུན་གྱིས་གྲུབ་ཅིང་རྫོགས་ཕྱིར། ལྷུན་རྫོགས་ཀྱི་དམ་ཚིག་ཅེས་བྱ་བ་སྟེ། ༤ དེ་ལྟར་ན་རང་བཞིན་ལྟ་བའི་དམ་ཚིག་བཞི་པོའི་འགག་དོན་སྙིང་པོ་ནི་འདིར་འདུ་བ་ལགས་ཀྱི། རྒྱས་བཤད་དུ་དབྱེ་བར་སྤྲོ་ན་རྫོགས་པ་ཆེན་པོའི་རྒྱུད་ལུང་རྣམས་དང་། བསྟན་བཅོས་རིན་པོ་ཆེ་གནས་ལུགས་མཛོད་ཀྱི་རྩ་འབྲེལ་དག་ལ་བལྟ་བར་བྱའོ། ཡང་ཉིད་ཀྱིས། བུམ་པའི་སྐབས་དོན་གྱི་སྐོར་ལ་སླར་
ཡང་ཞིབ་ནན་གནང་བའི་ལན་དུ་ཕུལ་བ་སྤྱི་དང་ཁྱད་པར་གཉིས་ལས། དང་པོ་ནི། རྣམ་རྒྱལ་བུམ་པའི་ཁར་དུང་ཆོས་ཡོད་ན་ཁྲུས་སོགས་ལས་བྱེད་ཐམས་ཅད་རྣམ་རྒྱལ་ཉིད་ཀྱིས་བྱར་རུང་བ་ཡིན་ནམ། འོན་ཏེ་ལས་བུམ་ཡོད་ན་དུང་ཆོས་མི་དགོས་པ་འདྲ། གསུང་བའི་ཆ་ལ། སྤྱིར། དུང་ཆོས་ཀྱི་དགོས་པ་ནི་གོང་དུ་སྨོས་པ་ལྟར་ལས་ཀྱི་ལྷ་བསྐྱེད་སྟིམ་བྱས་པའི་ནུས་པས། དེའི་ཆུ་བུམ་པ་གང་ལ་བླུགས་པ། དེ་ཆན་ལ་ཕབས་ཀྱི་ཐེབས་པ་ལྟར་ལས་གང་ཡིན་མྱུར་དུ་འགྲུབ་པར་བྱེད་པ་ཡིན་ཕྱིར། རྣམ་རྒྱལ་གྱི་བུམ་ནང་དུ་བླུགས་པ་ཙམ་གྱིས་སློབ་མ་ལ་དབང་གི་ཡོན་ཏན་གྱི་ནུས་པ་བསྐྱེད་པར་འགྱུར་བ་སོགས་དང་། ལས་བུམ་དུ་བླུགས་པས་སྡིག་སྒྲིབ་དང་འབག་རྩོག་བཀྲུ་བའི་ནུས་པ་སྐྱེད་བྱེད་ལྟ་བུ་སོགས་མདོར་ན་རང་རང་གི་བྱེད་ལས་གང་ཡིན་དེ་ཀའི་ནུས་པ་བསྐྱེད་ཕྱིར་ཡིན་པས་ན། དུང་ཆོས་ཀྱི་ཆུ་བླུགས་པའི་མཐུས་ལས་བུམ་མི་དགོས་པའམ།
ལས་བུམ་ཡོད་ཚེ་དུང་ཆོས་མི་དགོས་པ་ཡང་མ་ལགས་ཤིང་། བུམ་པ་གཉིས་ཀ་ལ་དུང་ཆོས་རེ་དགོས་ངེས་ཀྱང་མ་ཡིན་ཏེ། དུང་ཆོས་གཅིག་གི་ཆུ་དེས་བུམ་པ་ཐ་དད་རང་རང་གི་དགོས་དོན་དང་མཐུན་པའི་ནུས་པ་བསྐྱེད་པ་མ་གཏོགས། ཐམས་ཅད་ལ་དུང་ཆོས་རོ་ཅིས་ཀྱང་དགོས་ན། བུམ་པ་ལྷ་གྲངས་དང་མཉམ་པའམ་དགུ་དང་ལྔ་སོགས་བཤམ་པ་དག་ལ་དུང་ཆོས་ཀྱི་མི་མང་མོད་ཅིང་། ལར་ཡང་དུང་ཆོས་དགོས་པར་རང་གཞུང་དེ་ཀ་ནས་བཤད་པ་དག་ལ་མ་གཏོགས་བུམ་སྒྲུབ་བྱེད་ཚད་ལ་དུང་ཆོས་ཅིས་ཀྱང་དགོས་པ་ནི་གཏན་མ་ཡིན་པ་དང་། ཁྱད་པར་ཕག་མོ་སོགས་ལ་དུང་ཆོས་དགོས་པར་མ་གསུངས་ཤིང་བཤམ་པ་མི་འབྱུང་མོད་ཀྱི། དེས་ན་རང་གཞུང་གང་ཡིན་ཁོ་ན་གཙོ་ཆེ་བ་ལགས། གཞན་ཡང་ཉིད་ཀྱི་ཕེབས་སྒོར་ལྟར་ཕག་མོ་སོགས་ལ་ལས་བུམ་གསལ་ཁ་མི་འབྱུང་བ་ནི་བསྙེན་སྒྲུབ་དཀྱུས་མ་ལ་མི་དགོས་པའི་དབང་དུ་མཛད་ཀྱི། སློབ་མ་སྨིན་བྱེད་ཀྱི་
སྐབས་ལྟ་བུ་ལ་ནི་དགོས་པ་ཤས་ཆེ་སྟེ། དེ་ཡང་བགེགས་དང་ལན་ཆགས་སྦྱོང་བ། ཉམས་ཆག་སྡིག་སྒྲིབ་བཀྲུ་བ། ཚོགས་བསགས་ཕྱིར་མཎྜལ་འབུལ་བ་རྣམས་ནི་སྔགས་ཀྱི་སྨིན་བྱེད་ཐམས་ཅད་ཀྱི་སྤྱི་འགྲོའི་སྟ་གོན་ཡིན་པའི་ཕྱིར་རོ། ཡང་ཀུན་རིགས་ཀྱི་སྐབས་སུ་ཡང་ལས་བུམ་གྱི་གསལ་ཁ་མ་བྱུང་གསུང་བ། དེའི་ཆོ་ག་དཀྱུས་མ་ལ་ལས་བུམ་མི་མཛད་པ་མང་བར་གདའ་ནའང་། གཤིན་གསོན་གང་རུང་ལ་དབུ་མར་ན་ནི་ལས་བུམ་ངེས་པར་དགོས་ཕྱིར། གཙོ་བུམ་དུ་གཙོ་བོ་རིགས་ལྔའམ་ཡང་ན་རྡོར་སེམས་བསྐྱེད་ཅིང་ལས་བུམ་དུ་རྡོ་རྗེ་གནོད་སྦྱིན་ནི། བསྐྱེད་བཟླས་བྱས་ནས་ཁྲུས་གསོལ་ཐམས་ཅད་ལས་བུམ་གྱིས་བྱ། དབང་བསྐུར་བའི་ཚེ་གཙོ་བུམ་གྱི་ཆུས་ཁྲུས་བྱ་ཞིང་འཐུང་དུ་གཞུག་པ་ལགས། ལར། ལས་ཀྱི་བུམ་པ་འདི་ནི་གསང་སྔགས་ཕྱི་ནང་གི་དཀྱིལ་འཁོར་ཕལ་མོ་ཆེར་མེད་མི་རུང་ཞིང་ཉེ་བར་འཁོ་བའི་ཡོ་བྱད་ཀྱི་བྱེ་བྲག་ཡིན་ཏེ། མཆོད་རྫས་
ཚོགས་གཏོར་གནས་ཁང་བདག་གཞན་ཐམས་ཅད་ལ་ལས་བུམ་གྱི་ཆུ་ཀུ་ཤའི་ཆུན་བུས་འཐོར་བ་ཙམ་གྱིས་སོ་སོའི་འབགས་རྩོགས་ཉེས་སྐྱོན་དྲི་མ་བགེགས་དང་བར་ཆད་སོགས་སེལ་བྱེད་ཡིན་པ་དང་། དབང་གཞུང་དང་དཀྱིལ་ཆོག་རྒྱས་པའི་རིགས་ལ་ལར་རྡོ་རྗེ་སློབ་དཔོན་གྱི་ལས་བུམ་དང་སློབ་མའི་ཁྲུས་བུམ་ཐ་དད་དུ་བཤམ་པར་གསུངས་པ་ཡང་འབྱུང་མོད་ཀྱི། དབང་གཞུང་དང་ཆོ་ག་བསྡུས་པ་ལ་ལའི་སྐབས་སུ་ལས་བུམ་སྐྱེད་ཆོག་ཟུར་དུ་མ་བསྟན་ཡང་སྤྱི་འགྲོ་ལྟར་གྱི་རྣམ་འཇོམ་བདུད་རྩི་འཁྱིལ་བ་བགེགས་མཐར་བྱེད་རྟ་མགྲིན་སོགས་མདོར་ན་དཀྱིལ་ཆོག་དེ་ཉིད་ཀྱི་རིགས་དང་མཐུན་པའི་ལས་ཀྱི་ལྷ་གང་འོས་བསྐྱེད་སྟིམ་མཆོད་བསྟོད་བཟླས་པ་བྱས་པའི་མཐར་ལྷ་འོད་དུ་ཞུ་བདུད་རྩིའི་ཆུར་མོས་པ་ནི་སྤྱི་ཁྱབ་ཀྱི་དགོངས་དོན་ལགས། ཁྱད་པར་གྱི་སྐབས་དོན་ཕེབས་ཆར། བདེ་མཆོག་དྲུག་ཅུ་པའི་དཀྱིལ་ཆོག་གི་ཕྱག་ལེན་དག་ཏུ། བུམ་པ་གཉིས་ཀ་ལ་
རྡོ་རྗེ་དུང་ཆོས་དང་བཅས་པ་བཀོད་ནས། གཙོ་བུམ་དུ་ལྷ་དྲུག་ཅུ་རྩ་གཉིས་ཡོངས་རྫོགས་སུ་བསྐྱེད་ཅིང་ལས་བུམ་དུ་ལྷ་ལྔ་བསྐྱེད་དེ། བཟླས་པའི་སྐབས་ལ་བབས་ཚེ་གཙོ་བུམ་ལ་ཡུམ་དང་སྒོ་མཚམས་མ་བརྒྱད་ཀྱི་ཉེ་སྙིང་དང་། ལས་བུམ་ལ་སུམྦྷ་ནི་བཟླ་བའི་ཕྱག་སྲོལ་སྣང་བའི་ལུགས་འདི་འགྲོ་མགོན་ཆོས་རྒྱལ་འཕགས་པས་བལ་ཡུལ་ཤིང་ཀུན་ཏུ་མཛད་པར་གྲགས་པ་འདི་ལ་ཐེ་ཚོམ་བྱུང་གསུང་བ་ཤིན་ཏུ་ཐུགས་མེད་དེ། འགྲོ་མགོན་འཕགས་པ་རིན་པོ་ཆེའི་རྣམ་ཐར་གང་མཐོང་རྣམས་སུ་ནི་བལ་ཡུལ་དུ་ཕེབས་ཚུལ་གྱི་སྒྲོས་མར་མི་ལ། ས་ལུགས་ཀྱི་ཕུར་པའི་སྐབས་ཀྱི་དྲག་པོ་སྒྲོལ་དབང་གི་རྒྱུན་ཆད་ནས་མ་རྙེད་པ་ལ། ཡེ་ཤེས་མཚོ་རྒྱལ་དངོས་ལ་ཐུགས་པའི་ཨ་ཙ་ར་ནུ་ཏུ་ཞེས་པ་ཚེའི་རིག་འཛིན་ནི་ཐོབ་པ་ཅིག་ཡོད་པར་གསན་ནས་རྩད་བཅད་པས། ཁོང་རྒྱ་གར་ནས་བལ་ཡུལ་དུ་རེག་འགའ་འབྱོན་གྱི་ཡོད་ཟེར་བ་བསྒུགས་
སུ་བཅུག་པས་རེ་ཤིག་བྱོན་ཚེ། འགྲོ་མགོན་ཉིད་སྐུ་དབྱིངས་ཆེས་པས་བལ་པོར་འབྱོན་པ་མ་ཤར་བས། གློ་བོ་ལོ་ཙཱ་བ་ཤེས་རབ་རིན་ཆེན་ཆེད་གཏད་དུ་བརྫངས་པ་དབང་རྒྱུན་དེ་ཉིད་ལོན་ཐུབ་པའི་ལོ་རྒྱུས་ཀྱང་ཡོད་ཚེ། དེས་ན་འཕགས་པ་བལ་ཡུལ་དུ་མཛད་པར་གྲགས་པ་དེ་ནི་མ་དག་པར་མངོན་ཏེ། དཀྱིལ་ཆོག་དེ་ནི་ཧོར་ཡུལ་གྱི་བྱེ་བྲག་ཤིང་ཁུན་མཁར་ཞེས་གྲགས་པ་དེར་མཛད་པར་སྣང་ལ། སྐབས་དོན་དངོས་བུམ་པ་གཉིས་ཀར་རྡོ་རྗེ་དུང་ཆོས་བཀོད་པ་ལ་ནི་འགལ་བ་མེད་མཆི་ཞིང་། ལས་བུམ་དུ་ཡང་ལྷ་ལྔ་བསྐྱེད་པ་དེ་ཡེ་ཤེས་ཀྱི་ལྷ་ཐམས་ཅད་ངོ་བོ་ལ་ཐ་དད་མེད་ཅིང་རྣམ་པ་གང་འདུལ་གྱི་རོལ་པ་ཅིར་ཡང་སྟོན་པ་ཡིན་ཕྱིར་སྐྱོན་དུ་ག་ལ་འགྱུར་ཀྱང་། བཟླས་པའི་ཚེ་ལྷ་གང་ཡིན་དེ་ཉིད་ཀྱི་རྩ་སྔགས་རྒྱས་བསྡུས་ཅི་རིགས་བཟླ་དགོས་ཀྱི་ལྷ་དང་སྔགས་རིགས་མི་མཐུན་དུ་བྱེད་པ་ནི་ཡང་མི་འཐད་ཕྱིར། གཙོ་བུམ་ལ་ལྷ་ཡོངས་
རྫོགས་ཀྱི་སྔགས་སམ་ཉེ་སྙིང་གང་རུང་དང་། ལས་བུམ་ལ་ལྷ་རང་གི་ཉེ་སྙིང་ལྟ་བུ་བཟླ་བར་འོས་ཀྱི། སུམྦྷ་ནི་བཟླ་ན་ལྷ་ཡང་ཁྲོ་བོ་གནོད་མཛེས་བསྐྱེད་དགོས་པར་འོས་པ་མ་མཆིས་ལགས། སྤྱིར་གསར་རྙིང་གི་དཀྱིལ་ཆོག་ཕལ་མོ་ཆེ་ལ་གཙོ་བུམ་དུ་ནི་དཀྱིལ་འཁོར་གང་ཡིན་དེ་ཀའི་ལྷ་ཡོངས་རྫོགས་སམ་གཙོ་བསྡུས་ཙམ་བསྐྱེད་ཅིང་། ལས་བུམ་ལ་ནི་ལས་བྱེད་ཀྱི་ལྷ་ཅི་རིགས་མ་གཏོགས་དཀྱིལ་འཁོར་གྱི་གཙོ་བོ་བསྐྱེད་པ་ཆེར་མི་སྲིད་དེ། འཇིག་རྟེན་ན་དཔོན་གཡོག་གི་བྱེད་ལས་ལྟ་བུ་དང་སྒོ་བསྟུན་པའི་ཕྱིར་རོ། ལར། བདག་མདུན་བུམ་གསུམ་པོ་ཡང་བསྒོམ་ཚུལ་སྣ་ཚོགས་འབྱུང་སྟེ། ལྷ་གཙོ་འཁོར་ཚང་མ་ཁྱད་མེད་གསུམ་གར་བསྒོམ་ཚུལ་སྣ་ཚོགས་འབྱུང་སྟེ། ལྷ་གཙོ་འཁོར་ཚང་མ་ཁྱད་མེད་གསུམ་གར་བསྒོམ་པ་དང་། བདག་བསྐྱེད་ལ་གཙོ་མཆོག་གཅིག་བུའམ་གཙོ་བསྡུས་དང་། མདུན་བསྐྱེད་ལ་ལྷ་ཡོངས་རྫོགས་དང་། བུམ་སྐྱེད་ལ་ཡང་བདག་བསྐྱེད་དང་ཆ་
འདྲ་བར་བསྒོམ་པའི་ལུགས་དང་། ཡང་དཀྱིལ་འཁོར་གསུམ་པོ་མི་འདྲ་བར་བསྐྱེད་ཚུལ་སོགས་ཇི་སྙེད་འབྱུང་མོད་ཀྱི། གཙོ་ཆེར་རང་གཞུང་དེ་ཀའི་རྒྱུད་ཉིད་དབང་བཙན་དགོས་པས་ན་རྒྱུད་ནས་གང་གསུངས་དང་། རྒྱུད་ཀྱི་དགོངས་དོན་ནི་སྒྲུབ་ཐབས་ཡིན་ཚེ། སྒྲུབས་གཞུང་ལྷད་མེད་ཁུངས་བཙུན་རྒྱ་གཞུང་ལྟ་བུར་དཔང་པོར་འཇོག་དགོས་ཀྱི། ཕྱི་རབས་སྙིགས་དུས་ཀྱི་གང་ཟག་སྤྱི་རྟོལ་ཅན་གྱི་ངག་རྒྱུན་དང་ལག་ལེན་ཙམ་ལ་ཡིད་གཏན་ཐུབ་པ་དཀའ་བ་དང་། སྐབས་འདིར་འཕྲོས་དོན་ལ། རྙིང་མ་བ་རྣམས་ལས་བྱང་ཡིན་ཟེར་བའི་བདག་བསྐྱེད་ཀྱི་གཞུང་རྐྱང་ཞིག་ཚར་རེ་བཏོན་པ་ལ་བདག་མདུན་བུམ་གསུམ་གའི་གོ་ཆོད་པར་འདོད་པ་ནི་རྩིངས་ཆོས་ཁོ་ནའོ། །ཞེས། རྗེ་མི་སྐྱོད་རྡོ་རྗེས་བཀའ་སྩལ་ནའང་། རྙིང་ལུགས་ལ་བཀའ་བརྒྱད་དགོངས་འདུས་ཞི་ཁྲོ་སྒྱུ་འཕྲུལ་སོགས་དཀྱིལ་ཆོག་རྒྱས་པ་རྣམས་སུ་ནི་བདག་མདུན་བུམ་གསུམ་ལྷན་ཐབས་དང་བཅས་པ་ཞིབ་རྒྱས་
སུའང་ཡོད་མོད་ཀྱི། གཞན་དཀྱིལ་འཁོར་བསྡུས་པའི་རིགས་སྤྲོས་མེད་བདག་དོན་དུ་བསྒྲུབ་པའི་སྐབས་དོན་སོགས་དང་ཁྱད་པར་ཨ་ནུ་ཨ་ཏི་སོགས་རྒྱུད་སྡེ་གོང་མའི་གོང་མ་དག་ཏུ་ནི། བདག་མདུན་བུམ་གསུམ་ཙམ་དུ་མ་ཟད་ནམ་མཁས་གར་ཁྱབ་ཆོས་དབྱིངས་རབ་འབྱམས་རྒྱལ་བའི་དཀྱིལ་འཁོར་ཉིད་དུ་ཡེ་རྫོགས་ལྷུན་གྲུབ་ཀྱི་དོན་གསལ་གདབ་པའི་ཕྱིར་ཕྲིན་ལས་ཀྱི་གཞུང་ངམ། ལས་ཀྱི་བྱང་བུ་ཞེས་བྱ་བ་དེའི་ཚིག་གསལ་པོ་ཁ་ཏོན་དུ་བརྗོད་ཅིང་དོན་ཟབ་མོ་ཡིད་ལ་བསམ་པར་བྱ་ཐབས་སུ་གུ་རུ་རིན་པོ་ཆེ་པདྨ་འབྱུང་གནས་ཀྱིས་ཆོས་བཀའ་ཐམས་ཅད་ལ་སོ་སོའི་ལས་བྱང་དུ་མིང་བཏགས་པར་མཛད་པ་དེས་བདག་མདུན་ཐམས་ཅད་དུས་མཉམ་དུ་བསྐྱེད་ཅིང་མཆོད་བསྟོད་སོགས་ཀྱང་ཆབ་གཅིག་ཏུ་བྱས་ནས་བཟླས་པའི་སྤྲོ་བསྡུ་བྱེད་པ་འདི་ནི་རྒྱུད་སྡེ་གོང་མའི་དགོངས་དོན་དུ་གང་ཟག་གཅིག་ཅར་བའི་ཉམས་ལན་དུ་འདུག་ཚུལ་འཕྲོས་ཞུས་ལགས་པ་དང་། ཁྱད་པར་གྱི་ཕེབས་དོན། གྲུབ་རྒྱལ་མ་བརྒྱུད་པའི་ཚེ་
དབང་གི་སྐབས་ཀྱི་ཕྱག་བཞེས་དག་ཏུ། མིང་ལ་ལྷ་གཅིག་བུམ་གཅིག་ཏུ་གྲགས་ཀྱང་ཕྱག་ལེན་ལ། རྣམ་རྒྱལ། ལས་བུམ། ཟན་བུམ་གསུམ་དུ་བཤམས་པ་དང་། དེ་ལ་བུམ་བསྐྱེད་ཀྱི་གསལ་ཁ་མ་བྱུང་བ་དང་། དབང་གི་སྐབས་སུ་ཡང་ཏིང་ངེ་འཛིན་གྱི་དབང་བཞི་སོགས་གང་སྤྱིར་ཐེ་ཚོམ་གྱི་གནས་མང་ཞིང་། ཕྱག་བཞེས་འདི་དག་ཁུངས་ཐུབ་ཡིན་མིན་གྱི་དྲི་བ་གནང་བའི་ཆར། སྤྱིར་མ་གཅིག་གྲུབ་པའི་རྒྱལ་མོ་ཉིད་ཀྱང་དིང་སང་རས་ཆུང་རྣམ་ཐར་སོགས་སུ་ནི་ཨུ་རྒྱན་གྱི་ཡུལ་དུ་པདྨའི་སྡོང་པོ་ལས་འཁྲུངས་ཚུལ་སྣང་མོད་ཀྱང་གདུལ་བྱ་སོ་སོའི་ངོར་གང་འདུལ་གྱི་མཛད་པ་ལ་རང་ཅག་སོ་སྐྱེའི་བློའི་ག་ལ་དཔོག་ཅིང་། རྙིང་ལུགས་ལྟར་ན། ཟ་ཧོར་རྒྱལ་པོ་གཙུག་ལག་འཛིན་གྱི་སྲས་མོ་ལྷ་ལྕམ་མནྡ་ར་བ་ཉིད་ཡིན་པའི་ལོ་རྒྱུས་དང་། གུ་རུ་པདྨ་འབྱུང་གནས་ཉིད་ར་ག་རཱ་ཏིའི་བྲག་ཕུག་ཏུ་ཚེའི་རིག་འཛིན་གྲུབ་པའི་ལས་རྒྱ་མཛད་པས། ཟླ་བ་གསུམ་ནས་ཚེ་དཔག་མེད་པ་དངོས་སུ་མཇལ་ཞིང་
དབང་བསྐུར་བས་ཡབ་ཡུམ་གཉིས་ཀ་འཆི་མེད་འཇའ་ལུས་རྡོ་རྗེའི་སྐུ་འགྲུབ་ཚུལ་དང་བཅས་པའི་ལོ་རྒྱུས་ལྟར་བཞེད་ཅིང་། འདི་སྐབས་ཀྱི་ངེས་དོན་ལ། གྲུབ་རྒྱལ་མས་རས་ཆུང་ལ་གནང་བའི་སྐབས་ཀྱི་ཚེ་དབང་དེ་ནི་ལྷ་སུམ་ཅུ་སོ་གསུམ་པའི་དཀྱིལ་འཁོར་ཞལ་ཕྱེས་ཏེ་དབང་རྒྱལ་འབྲིང་བསྡུས་གསུམ་དང་སྒྲུབ་ཐབས་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་ཆོས་སྐོར་ཡོངས་རྫོགས་གནང་བའི་ལོ་རྒྱུས་འདུག་མོད་ཀྱི། དིང་སང་གསར་མའི་ཆོས་རྒྱུད་ཕལ་མོ་ཆེ་ཐམས་ཅད་ཚེ་སྒྲུབ་གྲུབ་རྒྱལ་བ་ལྷ་གཅིག་བུམ་གཅིག་ཅེས་རླུང་ལྟར་གྲགས་པ་འདི་བཞིན་མཛད་ནའང་། ཕྱག་བཞེས་མི་འདྲ་བ་དུ་མའང་ཡོད་པར་ཐོས་ལ། གོང་དུ་སྨོས་པ་ལྟར་རས་ཆུང་ཉིད་ལ་དབང་རྒྱས་འབྲིང་བསྡུས་གསུམ་གནང་བས་ན་ལྷ་གཅིག་བུམ་གཅིག་འདི་ནི་བསྡུས་པ་ཉིད་ཡིན་པར་སེམས་ཤིང་། རྒྱས་པ་ལྷ་སོ་གསུམ་མར་ནི། བུམ་པ་རབ་ལྷ་གྲངས་དང་
མཉམ་པ། འབྲིང་གཙོ་བོ་ལྔ་ལ་རེ་རེ། ཐ་མ་གཙོ་བུམ་ཁོ་ནས་བསྐུར་ཚུལ་དང་བུམ་སྐྱེད་ཀྱང་སྣང་མོད། ད་ལྟའི་ཡོངས་གྲགས་འདི་ལ་ནི་ཕྱག་ལེན་གཞུང་བཞིན་བགྱི་བའི་དབང་དུ་བྱས་ན་རྣམ་རྒྱལ་གྱི་བུམ་པ་དགོས་པར་མ་བཤད་དེ། འབྲུ་གཙང་གི་ཕྱེ་ལ་སྤོས་དང་བུ་རམ་ཆང་སོགས་སྦྱར་བའི་ཚེ་ཟན་བུམ་པའི་དབྱིབས་ཅན་ཁ་རྒྱན་རྡོ་རྗེ་ནོར་བུ་ཉི་ཟླ་མེ་ཏོག་སོགས་ཀྱིས་མཛེས་པར་བཟོས་པའི་མཐའ་ཚེ་རིལ་གྱིས་བསྐོར་བ་ཁ་དོག་དམར་པོར་བྱས་ལ་ཚོམ་བུའི་དཀྱིལ་འཁོར་གྱི་དབུས་སུ་བཤམ་པའི་རྒྱབ་ཏུ་ཚེའི་རྟེན་མདའ་དར་དམར་པོ་མེ་ལོང་བཏགས་པ་གཟུགས། གཡོན་དུ་ཐོད་པ་མཚན་ལྡན་ཚེ་ཆང་གིས་བཀང་བ་བཞག །གཡས་སུ་ལས་བུམ་དང་། མཐའ་སྐོར་དུ་གཏོར་མཆོད་ལ་སོགས་སྤྱི་མཐུན་དུ་བཤམ་ལ། ཐོག་མར་བདག་སྐྱེད་ཀྱི་ལས་རིམ་ཚུལ་བཞིན་དང་བསྙེན་པ་ཇི་ཙམ་འབྱོར་བ་བཟླ་ཞིང་། དེ་ནས་མདུན་གྱི་ཚེ་གཏོར་ཚེ་ཆང་དང་བཅས་པ་ལ་ཡང་བདག་བསྐྱེད་
དང་མཚུངས་པར་བསྒོམས་ཤིང་སྤྱན་འདྲེན་མཆོད་བསྟོད་སོགས་ཀྱི་མཐར། འོད་ཟེར་སྤྲོ་བསྡུས་ཕྱི་ནང་གི་འབྱུང་བཅུད་ཚེ་བསོད་ཐུགས་རྗེ་ནུས་མཐུ་སོགས་བསྡུས་ནས་མདུན་གྱི་ལྷའི་ཕྱག་གི་བུམ་པར་བསྟིམ་ཞིང་། ཚེ་འཛབ་ཀྱང་འབྱུང་བ་རེ་རེ་ལ་བརྒྱ་སྟོང་ལས་མི་ཉུང་བ་བཟླས་ཏེ་སྒྲུབ། མཐར་ལྷ་འོད་དུ་ཞུ་བས་ཚེ་གཏོར་དང་ཚེ་ཆང་གི་རྣམ་པར་གྱུར་པར་དམིགས་ཤིང་། དེ་ནས་བདག་འཇུག་དབང་བསྐུར་སོགས་བྱས་གྲུབ་པའི་འཇུག་ཏུ་ཚེ་ཆང་དང་གཏོར་མའི་མཐའ་སྐོར་གྱི་ཚེ་རིལ་ཡང་དངོས་གྲུབ་ཏུ་སྦྱིན་པ་ཡིན་མོད་ཀྱང་། དིང་སང་མི་མང་ལ་ཁྲོམ་དབང་སོགས་བྱེད་པའི་སྲོལ་དར་བས་ཚེ་རིལ་དེ་ཀས་མ་ལྡང་ནས་ཟུར་དུ་མང་པོ་བཟོ་བར་སྣང་མོད། ལར་ཡང་འདི་ནི་གཏོར་མ་ལ་བརྟེན་པའི་དབང་ཡིན་ཕྱིར། སྤྱི་མཐུན་གྱི་ལས་བུམ་ཙམ་ལས་དབང་བུམ་གཞན་མི་དགོས་པ་དང་། སྤྱིར་གཏོར་མ་ལ་ཡང་ཤེས་པ་བཞི་ལྡན་དགོས་པས་ན། དབང་བསྐུར་གྱི་
དུས་སུ་གཏོར་མ་ལྟར་ཤེས་པ་དང་། ལྷ་ལ་འབུལ་རྒྱུའི་སྐབས་སུ་ནི་འདོད་ཡོན་གྱི་མཆོད་པར་ཤེས་པ་དང་། དངོས་གྲུབ་ལེན་པའི་སྐབས་སུ་ཡེ་ཤེས་ཀྱི་བདུད་རྩིར་ཤེས་པ་དང་། ཟོར་དུ་འཕང་བའི་སྐབས་སུ་ནི་ཕོ་ཉའི་དམག་དཔུང་དང་ནད་མཚོན་གྱི་ཐོག་ཆར་དུ་ཤེས་པ་སོགས་ཀྱི་སྐབས་དོན་རྟོགས་དགོས་ལ། དབང་གཏོར་གྱི་སྐབས་དག་ཏུ་གཏོར་མའི་དབྱིབས་ཀྱང་ལྷ་གང་ཡིན་དེ་ཉིད་མཚོན་པའི་བརྡ་རྟགས་སུ། ཚེ་དཔག་མེད་ལ་བུམ་གཟུགས། རྟ་མགྲིན་ལ་རྩེ་མོར་རྟ་མགོ། །ཕྱག་རྡོར་ལ་རྡོ་རྗེ། ནོར་ལྷའི་རིགས་ལ་ནོར་བུ། རྣམ་སྲས་ལ་རྒྱལ་མཚན། མགོན་པོ་ལ་གྲི་གུག་གིས་མཚན་པ་སོགས་བྱེད་པ་ཡང་གཏོར་མ་ལྷ་དེ་ཉིད་དུ་ཤེས་པར་བྱ་བའི་བརྡཱ་རྟགས་ལགས་མོད། འཕྲོས་དོན་གཞན་ཡང་། སྡོམ་གསུམ་རབ་དབྱེ་སོགས་སུ་རྙིང་མ་ལ་བཀའ་སྐྱོན་མཛད་པའི་ཞར་ལ་གཏོར་མས་དབང་བསྐུར་བྱེད་པ་ནི་རྒྱུད་སྡེའི་དགོངས་པ་མ་ཡིན་པར་གསུངས་གདའ་ནའང་། དྲང་པོར་ཞུ་ན། དབང་ཐམས་ཅད་ལྷ་སྔགས་
དང་ཏིང་ངེ་འཛིན་གྱི་ནུས་པ་ལ་རག་ལས་ཕྱིར། གནས་སྐབས་དམིགས་རྟེན་ཙམ་དུ་དབང་རྫས་གང་དང་ཅི་ལྟ་བུ་ཞིག་གིས་བསྐུར་ནའང་དེ་ཉིད་བསྐྱེད་བསྟིམ་རབ་གནས་སྒྲུབ་བསྙེན་བྱས་པའི་བྱིན་རླབས་ཡིན་པ་མ་གཏོགས། དབང་རྫས་དེ་ཁོ་རང་གི་བྱིན་རླབས་མ་ལགས་ཚེ་བུམ་པ་སོགས་ཀྱིས་བསྐུར་དུ་རུང་ལ་གཏོར་མས་བསྐུར་མི་རུང་བ་དེ་ལྟ་ན། ཟན་ལ་བྱིན་རླབས་མེད་ལ་ཟངས་རག་སོགས་ལ་བྱིན་རླབས་ཡོད་པར་འདོད་པར་ཐལ་བ་སོགས་བཞད་གད་ཀྱི་རྒྱུར་འགྱུར་རོ། །དེ་བས་ན་རྡོ་རྗེའི་སློབ་དཔོན་ཏིང་འཛིན་ནུས་པ་ལྡན་པ་དག་གིས་ནི་དབང་རྫས་ཅི་འདྲ་ཞིག་གིས་བསྐུར་ཡང་བྱིན་རླབས་འབྱུང་མོད་ཀྱང་། སློབ་དཔོན་ཕལ་པ་དག་གིས་ནི་གཞུང་ཉིད་ནས་ཇི་སྐད་བཤད་པ་བཞིན་མི་བྱེད་པར་སྤྲོས་པའི་བློ་བཟོ་བྱས་ན་ཉེས་ལྟུང་འབྱུང་ཕྱིར། སྐབས་འདིར་ཡང་གཏོར་མ་བུམ་གཟུགས་ཉིད་མ་གཏོགས་བུམ་པ་གཞན་གྱིས་བསྐུར་ན་རང་བཟོར་འགྱུར་རམ་སྙམ་པ་དང་། བཀའ་ཕེབས་ལྟར། ཏིང་ངེ་འཛིན་གྱི་དབང་བཞི་ཡང་རྗེ་
བཙུན་འབའ་ར་བས་མཛད་པའི་དབང་གཞུང་སོགས་ལས་གསུངས་པ་དེ་ནི་སློབ་མ་སྣོད་ལྡན་ཉམས་ལེན་པ་བདག་ལ་དགོངས་པར་གསལ་གྱི། དིང་སང་སྐྱེ་བོ་ཕལ་པ་གང་བྱུང་ལ་བསྐུར་བ་འདི་འདྲའི་སྐབས་སུ་ནི་སྐྱེད་རིམ་དམིགས་པ་བདུན་ལྡན་ཁོ་ནས་ཆོག་ཏེ་དབང་བཞི་ཡོངས་རྫོགས་བསྐུར་བའི་སྣོད་མ་ཡིན་པའི་ཕྱིར་རོ། གལ་ཏེ་དབང་བཞིའི་སྣོད་ལྡན་དག་ལ་བསྐུར་དགོས་ན། དབང་བཞིའི་གོ་དོན་ནི། ཚེ་གཏོར་གྱིས་བསྐུར་བ་དེ་དག་ནི་བུམ་དབང་། ཚེ་ཆང་སྦྱིན་པ་གསང་དབང་། ཚེ་རིལ་སྦྱིན་ཞིང་རོ་ཚོར་སྟོང་དུ་མྱོང་བ་ནི་ཤེར་དབང་། ལྷ་བསྟིམ་ཞིང་དབྱེར་མེད་རིག་སྟོང་དུ་ངོ་སྤྲོད་པ་དབང་བཞི་པའོ། །ཡང་འོ་ན་དེ་རྣམས་དབང་བཞི་ཡིན་ན་སྐྱེ་བོ་ཕལ་པ་ལ་དབང་བཞི་བསྐུར་བ་རུ་འགྱུར་མོད་སྙམ་ན་མ་ཡིན་ཏེ། དབང་ཞེས་བྱའི་སྙིང་པོའི་གནད་ནི་དབང་དོན་སེམས་ལ་ངོ་སྤྲོད་པ་ལ་ཟེར་བ་ཡིན་གྱི། མགོར་བཞག་པ་དང་ཁ་ལ་བྱིན་པ་ཁོ་ན་ལ་མི་ཟེར་ཕྱིར། སྐྱེ་བོ་ཕལ་པ་གནས་སྐབས་ཚེའི་བར་ཆད་
བསལ་བ་ཙམ་ལ་སྐྱེད་རིམ་དམིགས་པ་བདུན་ལྡན་གྱིས་བསྐུར་བ་དེ་ཉིད་དབང་བཞི་ཡོངས་རྫོགས་སུ་ནི་མི་འགྱུར་ལ། སློབ་མ་སྣོད་ལྡན་ལ། གོང་དུ་རྨེས་པའི་དབང་བཞིའི་བརྡ་དོན་དེ་དག་ངོ་སྤྲད་པས་དབང་བཞི་ཡོངས་རྫོགས་སུ་འགྲོ་བའི་ཁྱད་པར་ནི་དེ་ལྟ་བུ་ལགས། ཚེ་དབང་འདིའི་སྐབས་ཀྱི་ལས་བུམ་གྱི་ལྷ་ནི་རྟ་མགྲིན་ཐོད་དབྱུག་ཅན་ཉིད་སྐྱེད་བཟླས་བྱས་ན་ཆོས་བཀའ་མ་བུ་འབྲེལ་ཆགས་པར་འགྱུར་རམ་སྙམ་པ་རང་གི་བླུན་ཚོད་ལགས་པ་དང་། ལར་ནི་དིང་སང་གི་གང་ཟག་རྣམས་ཆོས་ལ་རང་བཟོ་དང་ཚོད་ཡོད་འབའ་ཞིག་བྱེད་པ་མང་སྟེ། རྙིང་མའི་ཆོས་བཀའ་སྤྱི་དང་ཁྱད་པར་ཚེ་དཔག་མེད་ཀྱི་དབང་ཆོག་ཀུན་ལ་སློབ་མ་ཕལ་པ་ཐུན་མོང་བའི་རིགས་རྣམས་ལ་ནི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་། སློབ་མ་ཁྱད་པར་བ་ཉམས་ལེན་གྱི་སྣོད་ལྡན་ལ་དབང་བཞི་ཡོངས་རྫོགས་སུ་བསྐུར་ཐབས་ཏེ། དེ་ལྟར་རིགས་གཉིས་མ་གཏོགས། གྲུབ་རྒྱལ་མའི་གཞུང་ལས་བྱུང་བ་
ལྟར་དམིགས་པ་བདུན་ལྡན་གྱི་བསྐུར་ཚུལ་མ་གསུངས་ཀྱང་། ད་ལྟ་རྙིང་མ་བ་ལ་ལས་འདིའི་འབྱུང་བ་བཅུད་བསྡུས་སོགས་འགེབས་པར་བྱེད་མཁན་འདུག་པ་ནི་རང་བཟོ་ཁོ་ནར་འགྱུར་མོད། མདོར་ན་གུ་རུ་རིན་པོ་ཆེའི་ལུང་བསྟན་ཐམས་ཅད་ལ། རྙིགས་དུས་ཀྱི་གང་ཟག་རྣམས་སྡོམ་དང་དམ་ཚིག་ཁྱད་དུ་གསོད་ཅིང་། ཆང་ཕོར་རེ་ལ་བལྟས་ནས་གསང་སྔགས་ཁྲོམ་བཤད་བྱེད། ནོར་རྫས་ཅུང་ཟད་རེའི་ཆེད་དུ་སྟོང་ལམ་གྱི་འགྲུལ་བུ་ལ་ཡང་དབང་བསྐུར། ཆོས་ཟབ་མོ་རང་གི་ཉམས་སུ་མི་ལེན་པར་ཏོག་གེའི་ཚིག་ལན་དང་ཆགས་གྲལ་གྱི་ཆོས་གཏམ་དང་ཟས་ནོར་འཚོལ་བའི་ཟོང་དུ་བྱེད་ཅིང་། དེ་ལ་བརྟེན་ནས་མཁའ་འགྲོ་དང་བཀའ་སྲུང་རྣམས་འཁྲུགས་པས་ཡུལ་ཁམས་སུ་བཀྲ་མི་ཤེས་པ་དང་། སློབ་དཔོན་སློབ་མ་ཐམས་ཅད་ཀྱང་རྡོ་རྗེའི་དམྱལ་བར་ཁྱུ་དེད་དུ་འགྲོ་བར་འགྱུར་རོ། །ཞེས་གསུངས་པ་ཐོག་ཏུ་བབས་པས། ཟས་ནོར་འཚོལ་བའི་ཟོང་རིན་ཆོས་དང་དབང་ལ་བྱེད་ཅིང་སྐྱེ་བོའི་གྲོང་དུ་དབང་སྦྱིན་སོགས་བྱས་ནས་ཟང་ཟིང་བསྡུ་བ་འདི་འདྲའི་
ཆོས་ལུགས་དར་ཆེས་པའི་སྐབས་འདིར་དབང་གི་ཕྱག་ལེན་ཇི་ལྟ་བར་བཤད་ཀྱང་དགེ་སྡིག་གང་དུ་འགྱུར་མི་ཤེས་པར་གདའ་ལགས་པ་དང་། གཞན་ཡང་། དྲང་གཏམ་བཤད་ཆེས་ན་རང་རང་གི་ཆོས་རྒྱུད་ཞེན་ཕྱོགས་ཀྱི་གཏམ་དུ་མཐོང་ནས་གཞན་གྱིས་ཐུགས་ལ་ཕོག་པའི་རྒྱུར་འགྲོ་བ་མ་གཏོགས་གནས་ཚུལ་ཇི་ལྟ་བར་བརྗོད་ན། རྙིང་མ་བར་ཁས་ཆེ་བའི་གང་ཟག་རྣམས་རྐྱག་རེ་ཆུང་བས་ལན་པ་མ་གཏོགས་ཆོས་ཀྱི་ངོས་ནས་སློབ་དཔོན་པདྨ་ལ་ནོར་འཁྲུལ་འོང་བ་ནི་མི་སྲིད་ལ། དེས་གསུངས་པའི་ཆོས་རྣམས་ཡེ་ཤེས་མཚོ་རྒྱལ་མི་བརྗེད་གཟུངས་ཐོབ་པས་གཏེར་ཡིག་ལ་བཀོད་ནས། སློབ་དཔོན་ཉིད་ཀྱིས་ཞུ་དག་རབ་གནས་སྨོན་ལམ་བཀའ་རྒྱ་མཛད་དེ་གཏེར་དུ་སྦས་པའི་ཚིག་དོན་ལྷད་མེད་ཡིན་ཕྱིར། ཕྱིས་བྱུང་གི་གང་ཟག་མཁས་རློམ་རྣམས་གཏེར་ཆོས་ལ་ས་ཆོས་རྡོ་ཆོས་ཟོག་ཆོོས་འདྲེ་ཆོས་སོགས་སྐུར་འདེབས་སྣ་ཚོགས་བྱེད་ཀྱང་། ལས་འཕྲོ་སྐལ་ལྡན་རྣམས་ལ་ནི་བྱིན་རླབས་
ཀྱི་རྟགས་ཚན་མི་བསླུ་ངེས་འདྲོངས་ཡིད་ཆེས་དཔང་པོར་ཡོད་ལ། གསར་མའི་ཆོས་རྣམས་རྒྱ་གར་ནས་པཎ་གྲུབ་ལོ་ཙཱ་རྩོད་མེད་རྣམས་ཀྱིས་གདན་དྲངས་ཤིང་བླ་རྒྱུད་གོང་མ་རྣམས་ཀྱི་ཉམས་བཞེས་གྲུབ་པ་བརྙེས་པའི་བྱིན་རླབས་ཀྱི་ངད་མ་ཡལ་བ་དེ་ཀ་ཉམས་སུ་བླངས་ཆོག་པ་ལ། ཕྱིས་སུ་སོང་བཞིན་དུ་བླ་མ་རེས་འཕྲི་བསྣན་དང་བཅོས་སླད་རེ་བྱེད་ཅིང་། རྒྱུད་པ་གོང་མ་གྲུབ་ཐོབ་དེ་རྣམས་ཀྱིས་མཛད་པ་དེ་ལ་མ་མགུ་བར་རང་གི་འདོད་བཅོས་བསྲེས་བསླད་སྣ་ཚོགས་བྱས་པས། ཕའི་ཆོས་ལ་བུའི་ཆོས་སུ་མ་སྟུབ་པར་ཚོང་ལུས་ཀྱི་འོ་མ་ལྟར་བསླད་པའི་སྐྱོན་གྱིས། མཁས་པར་རློམ་པ་མང་ཡང་གྲུབ་པ་ཐོབ་པ་ཉུང་དུ་འགྲོ་བའི་རྒྱུ་ནི་དེ་ཡིན་པར་གསུངས་སྣང་བས། དེས་ན་ཕྱི་རབས་ཀྱི་གསར་རྙིང་གི་གང་ཟག་སུ་དང་སུ་ཡིན་ཀྱང་། རང་རང་གི་ཟབ་ཆོས་གང་ཡིན་དེ་ལ་བཟོ་ལུམ་རས་ཆོད་སྤངས་ནས། གྲུབ་ཐོབ་བརྒྱུད་པའི་ཕྱག་བཞེས་ཀྱི་སྲོལ་མ་ཉམས་པའི་གཞུང་ལམ་ལ་ཞུགས་སྟེ་
རང་ཉིད་ཉམས་སུ་ལེན་པ་དང་། གཞན་ལ་སྟོན་པའི་ཚེ་ཡང་ཆོས་ལ་ཟས་ངོ་དང་ནོར་ངོའི་ཡང་ཟོང་མི་བྱེད་པར་རྒྱལ་བའི་བཀའ་དང་མཐུན་པར་མཛད་དུ་གསོལ། ཞེས་མི་རྒན་གྱིས་ལྷག་བསམ་དཀར་པོས་ཀུན་ནས་བླངས་ཏེ་གསོལ་བ་བཏབ་པ་ལགས། ཅེས་པ་ནི། བདེ་མཆོག་དང་ཚེ་སྒྲུབ་ཀྱི་ཕྱག་བཞེས་འཕྲོས་དོན་ལས་བརྩམས་ཏེ་གླེངས་པའོ།། ༈ །།སྔ་སོར་གྱི་འཕྲོས་དོན་ལས་བརྩམས་ཏེ་སླར་ཡང་དྲི་མལ་གྱི་ཕེབས་ཆར། གསང་སྔགས་གསར་རྙིང་ཞེས་པའི་དབྱེ་མཚམས་འདི་ལ། བོད་ཡུལ་ཁོ་ནར་མ་གཏོགས་རྒྱ་གར་དུ་ནི་གསར་རྙིང་གི་ཐ་སྙད་མ་གྲགས་པར་བཞེད་པ་ནི་དམ་པ་ཕལ་ཆེར་གསུང་མཐུན་པར་སྣང་མོད་ཀྱི། དེ་ལྟར་ན་རྙིང་མའི་སྟོན་པ་ཀུན་བཟང་ཡབ་ཡུམ་དང་། རིན་པོ་ཆེ་ཆེན་པོ་དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིངྷ་སོགས་ཀྱི་བླ་རྒྱུད་དང་། ཆོས་ཀྱང་ཐེག་པ་རིམ་དགུར་དབྱེ་ཚུལ། ཁྱད་པར་རྫོགས་པ་ཆེན་པོ་སོགས་ཀྱི་དགོངས་
བཞེད་དང་། གསར་མའི་སྟོན་པ་རྡོ་རྗེ་འཆང་ཆེན་ནས་བཀའ་བཞི་བརྒྱུད་པ་ལས་ཏེ་ལོ་ནཱ་རོ་མཻ་ཏྲི་སོགས་དང་། ཆོས་ཀྱང་ཐེག་པ་གསུམ་དང་རྒྱུད་སྡེ་བཞིར་བསྡུ་བ་སོགས་ཀྱི་བཞེད་ཚུལ་མི་འདྲ་བའི་ཁྱད་པར་འདི་བཞིན་འོང་མི་ཐང་ན། འདི་ལྟར་འབྱུང་བའི་རྒྱུ་མཚན་གང་ཞིག་ཡིན་དྲི་བ་གནང་བའི་ཆ་ལ། དེ་ཡང་གསར་མ་དང་རྙིང་མ་ཞེས་པའི་མིང་འདོགས་ཚུལ་འདི་ཁོ་ན་བོད་ཡུལ་དུ་གྲགས་མོད་ཀྱི་རང་གཞན་ཆོས་བརྒྱུད་ཅུང་ཟད་མི་འདྲ་བའི་ཁྱད་ནི་མཐའ་ཡས་པ་རྒྱ་གར་ཉིད་དུ་ཤིན་ཏུ་ཡོད་དེ། ཐུན་མོང་ཐེག་པར་ཡང་ཉན་ཐོས་སྡེ་པ་བཞི་ནས་རིམ་གྱིས་སྡེ་པ་བཅོ་བརྒྱད་དུ་དགྱེས་པ་དང་། ཉོས་ཉིད་ལ་མདོ་སྡེ་པ་དང་བྱེ་བྲག་སྨྲ་བ་གཉིས་དང་། བྱེ་བྲག་པ་དེ་ལ་ཡང་ཁ་ཆེ་བྱེ་སྨྲ་བ་དང་། ཉི་འོག་བྱེ་སྨྲ་བ་གཉིས་ལུགས་ཐད་དང་། ཐེག་ཆེན་པ་ཡང་། དབུ་མ་དང་སེམས་ཙམ་པ་གཉིས་ཀྱི། དབུ་མ་ལ་རང་རྒྱུད་པ་དང་ཐལ་འགྱུར་བ་གཉིས་དང་། སེམས་ཙམ་ལ་རྣམ་རྫུན་རྣམ་བདེན་གཉིས་སོགས་བསམ་གྱིས་མི་ཁྱབ་
པ་བཞིན་དུ། གསང་སྔགས་ལ་ཕྱི་ནང་ཕ་མ་གཉིས་མདོ་རྒྱུད་སོགས་རྣམ་གྲངས་དུ་མར་ཡོད་ཚུལ་ནི་གསར་རྙིང་མཐུན་མེད་ཀྱང་། ཐེག་པའི་རིམ་པ་ལ་འཆད་ཚུལ་མི་འདྲ་བ་ནི་མདོ་ཉིད་ནས་འབྱུང་སྟེ། ཇི་སྲིད་སེམས་འཇུག་ཡོད་ཀྱི་བར། །ཐེག་པའི་མཐའ་ལ་ཐུགས་པ་མེད། །ཅེས། གྲངས་མེད་དུ་གསུངས་པ་དང་། ཐེག་པ་གཅིག་སྟེ་ཐེག་པ་གསུམ་དུ་མེད། །དེ་དག་དྲངས་བའི་ཐབས་སུ་བསྟན་པ་ཡིན། །ཞེས་ཐེག་པ་གཅིག་ཏུ་བསྡུ་བ་སོགས་གསུངས་ཚུལ་མང་ཡང་། སྤྱི་ཁྱབ་ཏུ་ནི་ཐེག་པ་ཆེ་ཆུང་གཉིས་ལ་འདུ་བར་ནི་ཐམས་ཅད་དགོངས་པ་མཐུན་པ་དང་། རྒྱུད་སྡེ་ལ། གསར་རྙིང་གཉིས་ཀས་བྱ་སྤྱོད་རྣལ་འབྱོར་གསུམ་པོ་གསང་སྔགས་ཕྱི་པའམ་འོག་མར་བཞེད་ཚུལ་ནི་མཐུན་པ་ཉིད་ལས། ནང་པའི་གོང་མ་བླ་མེད་ཀྱི་སྐབས་ནས། ཕ་རྒྱུད། མ་རྒྱུད། གཉིས་མེད་རྒྱུད་དུ་དབྱེ་བ་གསུམ་པོ་སྤྱི་སྡོམས་སུ་བྱས་ཏེ། འོག་མ་གསུམ་གྱི་ཁར་རྣལ་འབྱོར་བླ་མེད་དང་བཅས་
པ་ལ་རྒྱུད་སྡེ་བཞི་ཞེས། གསར་མའི་བཞེད་ཚུལ་ཡིན་ལ། རྙིང་མ་ལྟར་ན། འོག་མ་གསུམ་པོའི་ཁར། སྐྱེད་པ་མ་ཧཱ་ཡོ་ག་རྫོགས་པ་ཨ་ནུ་ཡོ་ག །རྫོགས་ཆེན་ཨ་ཏི་ཡོ་ག་དང་གསུམ་པོ་ཕ་རྒྱུད་མ་རྒྱུད་གཉིས་མདོ་རྒྱུད་དང་གསུམ་གྱི་དོན་དང་མཚུངས་རུངས། ཡོ་ག་གསུམ་པོ་འདི་ལ་ཐེག་པའི་རིམ་པར་ཕྱེས་པའི་དབང་གིས། ཉན་རང་བྱང་སེམས་གསུམ། བྱ་སྤྱོད་རྣལ་འབྱོར་གསུམ། བླ་མེད་ཀྱི་ཡོ་ག་གསུམ་ཏེ་ཐེག་པ་དགུར་བྱུང་བ་ལགས་ཤིང་། འདི་སྐབས་ལ། རྗེ་བཙུན་ས་པཎ་གྱིས། ཨ་ཏི་ཡོ་གའི་ལྟ་བ་ནི། །ཡེ་ཤེས་ཡིན་གྱི་ཐེག་པ་མིན། །ཞེས་སོགས་གསུངས་པ་དང་། དེའི་འགྲེལ་པ་མཛད་པ་རྣམས་ཀྱིས་ཀྱང་། ཐེག་པ་ཅེས་པའི་སྒྲ་ནི་འོག་ནས་གོང་དུ་སྤོར་དུ་ཡོད་པའི་སྟེགས་སམ་ཞོན་པ་ལྟ་བུ་ལ་འཇུག་ལ་ཨ་ཏི་ཡོ་ག་ནི་ཐེག་པའི་ཆོས་ཐམས་ཅད་ཀྱི་རྩེ་རྒྱལ་ཡིན་པར་བཤད་ན་དེ་ལས་གོང་དུ་བགྲོད་ས་མེད་པ་ལ་ཐེག་པའི་མིང་སྦྱར་བ་ནི་རྙིང་
མ་བ་རྣམས་བརྡ་ལ་མ་བྱང་བའི་བླུན་རྟགས་དང་རང་བཟོ་ཡིན་པར་བཀའ་བཀྱོན་མཛད་ཅིང་། དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ་ཌ་དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །ཅེས་སོགས། མདོ་སྡུད་པའི་ལུང་འདྲེན་དང་བཅས་པ་མཛད་སྣང་རུང་། ཨ་ཏི་ཡོ་ག་ནི་ཡེ་ཤེས་ཀྱང་ལོས་ཡིན་ཏེ། ཐེག་པ་གཞན་ཐམས་ཅད་ཀྱང་སངས་རྒྱས་ཀྱི་མཁྱེན་པའི་ཡེ་ཤེས་ལས་བྱུང་བ་དང་། འདིར་གོང་དུ་སྤོར་རྒྱུ་ཡོད་མེད་ནི་ཐེག་པ་དེ་ཉམས་སུ་ལེན་པ་པོ་ལའང་རག་མོད་ལ། ཨ་ཏི་ལས་གོང་དུ་སྤོར་རྒྱུ་མེད་པ་མ་ཡིན་ཏེ། ཨ་ཏི་ནས་སྤྱི་ཏི། སྤྱི་ཏི་ནས་ཡང་ཏིར་སྤར་དུ་ཡོད་པ་དང་། ལར་ཡང་། ཨ་ཏི་ལ་ཐེག་པའི་མིང་སྦྱར་བ་འདི་རྙིང་མའི་གང་ཟག་བླུན་པོ་རྣམས་ཀྱིས་བྱས་པ་མ་ཡིན་ཏེ། ཀུན་བཟང་རྡོ་རྗེ་འཆང་གི་བཀའ་དྲི་མ་མེད་པའི་རྒྱུད་སྡེའི་དགོངས་པ་སོར་བཞག་ཡིན་ཕྱིར། སྡོམ་གསུམ་གཞུང་
འགྲེལ་གྱི་བཀའ་བཀྱོན་དེ་ཡང་རྡོ་རྗེ་འཆང་ལ་མཛད་དམ་ཅི། འདི་དོན་གྱི་ལུང་འདྲེན་བགྱིས་ན་རྫོགས་ཆེན་གྱི་རྒྱུད་ཐམས་ཅད་དང་ཁྱད་པར་དུ་ངེས་དོན་འདུས་པ་ཡེ་ཤེས་ནམ་མཁའ་མཉམ་པའི་རྒྱུད་ལེའུ་ཉིས་བརྒྱ་པ་དང་། སངས་རྒྱས་ཐམས་ཅད་ཀྱི་དགོངས་པ་ཆོས་སྐུ་གཅིག་ཏུ་བཀའ་བགྲོས་པའི་རྒྱུད་སོགས་ལས་རྒྱ་ཆེར་འབྱུང་མོད་ཀྱང་། མི་རྒན་ཡི་གེའི་ངལ་བ་ལ་འཇིགས་ནས་མ་བཀོད་པ་དང་། ལར་ཡང་སྐབས་འདིར་དགག་སྒྲུབ་ཀྱི་ཚིག་མང་པོ་བྱོན་དོན་མེད་ཚེ། མདོར་བསྡུ་ན། གསར་རྙིང་རྒྱུད་སྡེ་བཞི་དྲུག་གི་ཁྱད་དང་། ཐེག་པ་གསུམ་དང་དགུའི་ཁྱད་དོན་ནི་དེར་འདུ་བ་ལགས་ཤིང་། རྒྱུད་སྡེ་སོ་སོའི་སྟོན་འཁོར་ཡུལ་དུས་སྡུད་པ་པོ་དང་། མི་ཡུལ་དུ་དར་བའི་བླ་རྒྱུད་ཀྱི་ཁུངས་སོགས་བརྡ་མཚོན་ཙམ་ནི་སྔ་སོར་དྲུག་པ་རྡོ་རྗེ་འཆང་གི་ངེས་ཚིག་དྲིས་ལན་ཕུལ་བ་དེར་མཆིས་ཚེ་འདི་སྐབས་བསྐྱར་ལྡབས་སུ་བརྗོད་མ་དགོས་ལ། དར་ཚུལ་གྱི་དབང་དུ་ན། བཀའ་བཞི་རྒྱུད་པ་སོགས་མ་བྱོན་གྱི་གོང་དུ། རིན་པོ་ཆེ་དགའ་རབ་རྡོ་རྗེ་ནི་སྤྱིར་སངས་རྒྱས་
ཐམས་ཅད་དང་ཁྱད་པར་དཔལ་རྡོ་རྗེ་སེམས་དཔའ་ཉིད་ཀྱིས་མི་ཡུལ་དུ་རྫོགས་ཆེན་སོགས་སྤེལ་སླད་ཁོ་ནར་སྤྲུལ་ནས་བྱོན་ཏེ། ཆོས་ཐམས་ཅད་རང་བྱུང་མཁྱེན་པས་དགུང་ལོ་བརྒྱད་ནས་པཎྜི་ཏ་ལྔ་བརྒྱས་མ་ཐུབ་པས་པྲཛྙཱ། མཁྱེན་པའི་བདག་ཉིད་དམ། མཁྱེན་པའི་འབྱུང་གནས་བྷ་ཝར་མཚན་ཐོགས་ཤིང་། རྡོར་སེམས་དངོས་ལ་རྒྱུད་སྡེ་འབུམ་ཕྲག་དྲུག་ཅུའི་ཚིག་ལ་སྒྲོ་འདོགས་བཅད་ནས། སླར་དན་ཏིག་གི་རི་བོར་མི་ལོ་སུམ་ཅུ་སོ་གཉིས་ཏིང་ངེ་འཛིན་ལ་བཞུགས་པའི་མཐར་ཡེ་ཤེས་ཀྱི་མཁའ་འགྲོས་གྲོགས་བགྱིས་ཏེ་རྒྱུད་ལུང་མན་ངག་ཐམས་ཅད་ཡི་གེར་བཏབ། སློབ་མའི་གཙོ་བོ་འཇམ་དཔལ་བཤེས་གཉེན་སྔ་མ་ལ་ཆོས་རྣམས་བུམ་པ་གང་བྱོར་གནང་ནས་སྐུ་ཟག་མེད་འོད་ལུས་སུ་ཡལ་ཞིང་། འཇམ་དཔལ་བཤེས་གཉེན་དེ་ཉིད་ཀྱིས་ཀྱང་སློབ་མ་འཇམ་དཔལ་བཤེས་གཉེན་ཕྱི་མ་སོགས་མཁས་པའི་པཎ་ཆེན་ཉེར་ལྔ་ལ་གནང་བའི་ཁྲོད་ཀྱི་གཅིག་སློབ་དཔོན་ཀླུ་སྒྲུབ་ཡིན་ལ། ཀླུ་སྒྲུབ་ཀྱི་ཨཱརྱ་དེ་ཝ་ལ་གནང་བས་ཨཱརྱ་འཇའ་ལུས་འགྲུབ་
པ་ནི་རྫོགས་ཆེན་གྱི་ཉམས་ལེན་མཛད་པ་ལས་བྱུང་བ་ཡིན་པར་བཤད་དོ། །གཞན་ཡང་དེ་དུས་མཁས་པ་ཉེར་ལྔ་སོགས་ཀྱིས་ཀྱང་གསང་སྔགས་གསང་བའི་ཉམས་ལེན་དུ་མཛད་ནས་མཆོག་གི་དངོས་གྲུབ་བརྙེས་པ་མ་གཏོགས་འོ་སྐོལ་བོད་ཀྱི་ལྟར་ཆོས་ཟབ་མོ་ནོར་རྫས་འཚོལ་བའི་ཟོང་དུ་མི་མཛད་པའི་ཕྱིར། སྐལ་བ་དང་སྣོད་དང་དབང་པོ་ཡང་རབ་ཏུ་གྱུར་པ་རེ་གཉིས་ཙམ་ལས་མང་དུ་ཡང་མ་སྤེལ། སླར་ཕྱིས་སོར་གྱི་གང་ཟག་ལྟ་སྤྱོད་གོ་ལོག་ཏུ་སྤྱོད་ཅིང་ཚིག་གི་ཐ་སྙད་ལ་རྩོད་པ་དག་བྱུང་བའི་རྐྱེན་གྱིས། ཆོས་ཀྱི་རྣམ་གྲངས་དེ་དག་ཐམས་ཅད་རྡོ་རྗེ་གདན་ལ་གཏེར་དུ་སྦས་པས་རྒྱ་གར་བ་རྣམས་ལ་རྒྱུན་ཆད་དེ་རྗེས་བཀའ་བཞི་བརྒྱུད་པའི་ཟབ་ཆོས་སོགས་གསང་སྔགས་གསར་མ་ལ་གྲགས་པའི་གདམས་པ་རྣམས་དར་བས། གྲུབ་ཆེན་བརྒྱད་ཅུ་སོགས་གྲུབ་ཐོབ་བསམ་གྱིས་མི་ཁྱབ་པ་བྱོན་པ་ཡིན་ལ། བོད་ཡུལ་འདིར་བསྟན་པ་སྔ་དར་གྱི་དུས་སུ་ སྔ་འགྱུར་ལགས་ བཻ་རོ་དང་། ཕྱི་འགྱུར་བཅུ་གསུམ་སོགས་ བི་མ་ལ་ནས་བརྒྱུད་པའི་རྫོགས་ཆེན་བཀའ་
མའི་རྒྱུད་མན་ངག་རྣམས་འབྱུང་བ་དང་། གུ་རུ་རིན་པོ་ཆེས་སྣོད་ལྡན་འགའ་ཞིག་ལ་གསུངས་ཤིང་གཏེར་ཤོག་ལ་བཀོད་ནས་སྦས་པ་རྣམས་གཏེར་སྟོན་སོ་སོས་འཐོན་ནས་འཕེལ་བ་ཙམ་མ་གཏོགས་བསྟན་པ་ཕྱི་དར་གྱི་པཎ་གྲུབ་ལོ་ཙཱ་རྣམས་བྱོན་དུས་རྒྱ་གར་དུ་ཨ་ནུ་ཨ་ཏིའི་ཆོས་སྐོར་རྣམས་མེད་པའི་སྟབས་ཀྱིས། རྙིང་མའི་ཆོས་ལ་ཚད་མར་མི་འཛིན་པ་དང་། ཁྱད་པར་རྫོགས་པ་ཆེན་པོ་ལ་མུ་སྟེགས་པའི་ལུགས་སུ་བལྟ་བ་དང་། རྙིང་མའི་རྒྱུད་རྣམས་གསར་མ་རྒྱུད་འབུམ་གྱི་ཁྲོད་དུ་མི་འཇུག་པ་སོགས་ཀྱི་རྒྱུ་རྐྱེན་ནི་དེ་ལྟར་ཡིན་པར་སྣང་ལ། རྙིང་མའི་མ་ཧཱ་ཡོ་གའི་རྒྱུད་ཀྱི་ཁྲོད་དུ་ནི་བདེ་དགྱེས་དུས་གསང་གཤེད་སྐོར་ཐམས་ཅད་འབྱུང་ཞིང་། གུ་རུའི་གཏེར་ཆོས་རྣམས་ལ་རྒྱུད་དེ་དག་གི་ལུང་འདྲེན་ཡང་མཐའ་ཡས་པར་ཡོང་མོད། གསར་རྙིང་ཞེས་ཐ་དད་དུ་བཟུང་ནས་ཆགས་སྡང་ཀུན་སློང་ཆེས་ཆེར་བྱེད་པ་ནི་ཕྱིས་བོད་དུ་མང་དུ་བྱུང་བ་དག་ལ་དགོངས་ནས། མཁས་པ་རོང་
ཟོམ་ཆོས་བཟང་དང་། རོག་སྟོན་ཤེས་རབ་འོད་སོགས་ཀྱིས་རང་ཉིད་གསར་རྙིང་ཁྱད་མེད་ཀྱི་མཁྱེན་རྒྱ་མཆིས་རུང་། གསར་རྙིང་ཁྱད་འབྱེད་དང་། རྙིང་མའི་ཁྱད་འཕགས་བཅོ་ལྔ་སོགས་ཀྱི་བསྟན་བཅོས་མཛད་པ་ནི་ལོག་ལྟ་ཆགས་སྡང་ཆོས་སྤོང་གི་ལས་གསོག་པ་དག་ལ་དམིགས་པར་གདའ་མོད། རྒྱ་གར་གྱི་པཎྜི་ཏ་ཕྱིས་བོད་དུ་བྱོན་པ་དག་ཀྱང་སྔོན་ནས་བོད་ལ་དར་བའི་རྙིང་མའི་ཆོས་འདི་དག་ཕྱིས་རྒྱ་གར་དུ་མེད་པའི་གཤིས་ཀྱིས། དག་སྣང་མཛད་མཁན་ཆེར་མ་བྱུང་བར་སྣང་ལ། ཇོ་བོ་རྗེ་སོགས་ལ་ནི་དེ་དུས་ཞུ་བ་པོ་དང་བསྟན་པའི་བབས་ཡུལ་དབང་གིས་གསང་སྔགས་ཀྱི་རིགས་ཙམ་ཡང་སྦས་ཐབས་སུ་མཛད་དགོས་བྱུང་ཚེ་རྫོགས་ཆེན་སོགས་ལྟ་ཅི་སྨོས་ཀྱི། འོན་ཀྱང་། བཀའ་གདམས་གླེགས་བམ་རིན་པོ་ཆེའི་ཞུ་ལན་ནོར་བུའི་འཕྲེང་བའི་བར་དོའི་སྐབས་དེ་དག་ནི་རྫོགས་ཆེན་གྱི་ལུགས་འབའ་ཤིག་གསུངས་གདའ་ནའང་གསར་མའི་བཤེས་གཉེན་རྣམས་ནི་ཉམས་སྣང་མི་མཛད་པར་གདའ། ཕ་དམ་པ་དང་མི་ཏྲ་
ཛོ་གི་སོགས་གསར་རྙིང་གཉིས་ཀའི་མཁྱེན་པ་ཟླ་མེད་པ་ཡིན་རུང་བོད་དུ་བྱོན་དུས་དང་གདུལ་བྱའི་རྟེན་འབྲེལ་གྱི་རྙིང་མའི་མིང་མ་ཐོགས་པ་དང་། པཎ་ཆེན་ཤཱཀྱ་ཤྲཱི་ནས་བརྒྱུད་པའི་ཡང་དག་དང་། སྨྲྀ་ཏི་ཛྙ་ནའི་འཇམ་དཔལ་གཤེད་སྐོར། པཎ་ཆེན་ནགས་རིན་གྱི་ཚེ་འཁྲིད་སོགས་སློབ་དཔོན་པདྨ་དངོས་ལས་བརྒྱུད་པ་རྣམས་ཀྱང་གསར་མའི་མཁས་གྲུབ་དག་གིས་ཐུགས་རྩིས་ཆེར་མ་མཛད་པས་གྲགས་དང་འགྲོ་དོན་ཆུང་མོད། གཞན་ཡང་། བོད་ཀྱི་མཁས་གྲུབ་དགེ་བའི་བཤེས་གཉེན་ཕལ་མོ་ཆེས་ནི་རང་རང་གི་ཆོས་སོ་སོའི་ཞལ་བདག་མཛད་པ་ཤ་སྟག་ལས། རྙིང་མའི་ཕྱོགས་ལ་གསན་སྒོམ་དང་གཞན་དོན་གནང་མཁན་ཁ་ཐོར་ཙམ་ལས་མ་བྱུང་ཞིང་། མཛད་པའི་ཚེ་ནའང་། རང་བྱུང་རྡོ་རྗེས་རྫོགས་ཆེན་སྙིང་ཏིག་གི་འགྲོ་དོན་མཛད་པ་ལ་འབྲི་གུང་དཔལ་འཛིན་གྱིས་རང་བྱུང་བས་རྙིང་མ་བ་རྣམས་ཀྱི་ངོ་སྲུང་བྱས་སོ་ཞེས་སྐུར་པ་འདེབས་པ་ཡང་བྱུང་མོད་
ལ། དཔལ་ལྡན་ས་སྐྱ་པ་ཁོན་དཀོན་མཆོག་རྒྱལ་པོ་མན་ཆད་དང་། མཁས་གྲུབ་ཁྱུང་པོ། རྗེ་མི་ལ། གྲུབ་ཐོབ་གླིང་དང་རྒྱ་རས། རྗེ་དུས་མཁྱེན། དཔལ་ཕག་མོ་གྲུ་པ། འགྲོ་མགོན་རས་ཆེན། ཀུན་མཁྱེན་ཇོ་ནང་པ་སོགས་མཁས་གྲུབ་མང་པོ་ཞིག་དང་པོར་རྙིང་མའི་ཆོས་ལ་གསན་བསམ་མཛད་ནས་མཐར་འགྲོ་དོན་ཐམས་ཅད་གསར་མ་ཁོ་ནས་མཛད་པའི་བབས་ཡུལ་ལ་བརྟེན། ཆོས་ཀྱི་གོ་རྒྱ་མ་ཁྲོལ་བའི་གང་ཟག་རྣམས་ཀྱི་བསམ་ཡུལ་དུ། སྐྱེས་ཆེན་དེ་ལྟ་བུ་རྣམས་ཀྱང་རྙིང་ཆོས་བོར་ནས་གསར་ཆོས་མཛད་ལུགས་འདིས། ངེས་པར་རྙིང་མའི་ཆོས་དེ་དག་ནི་ཡང་དག་པའི་བཀའ་ཚད་མ་ཞིག་མིན་པར་ངེས་སོ་སྙམ་དུ་གྱུར་པ་དང་། སྔོན་ལྷ་བཙུན་ཞི་བ་འོད་ཀྱིས་སྔགས་ལོག་སུན་འབྱིན་མཛད་པས་སྣ་དྲངས། འགོས་ལོ་ལྷ་བཙས། བཅོམ་ལྡན་རལ་གྲི། ཀུན་མཁྱེན་བུ་སྟོན་སོགས་ཀྱིས་རྙིང་མའི་རྒྱུད་ཀྱི་ཁྲོད་དུ་ཆོས་ཡིན་མིན་གྱི་དཔྱད་པ་མང་པོ་ཞིག་གནང་
བ་དང་། ཁྱད་པར་དུ་ཉང་དབོན་ཀུན་དགའ་དང་འབྲི་གུང་དཔལ་འཛིན་སོགས་ཀྱིས་ནི་ཞེ་ཐག་པ་ནས་རྙིང་མ་ལ་སྡང་སེམས་ཀྱིས་བསྟན་བཅོས་མཛད་མོད་ཀྱང་བླུན་པོ་འགའ་ཞིག་ཙམ་ལས། དཔྱོད་ལྡན་རྣམས་ཀྱི་ཐུགས་གཡོ་བར་མ་ནུས་མོད་ཀྱི། ཕྱིས་སུ་རྗེ་མི་སྐྱོད་ཞབས་ཀྱི་དགོངས་པ་ཅན་གྱི་བཀའ་ཤོག་མཛད་པ་དེ་ཉིད་གསུང་བ་པོ་ནུས་པ་ཆེ་བའི་མཐུས། གང་ཟག་མཆོག་དམན་ཕལ་མོ་ཆེས་སྒྲ་ཇི་བཞིན་པའི་གསུང་དུ་བཟུང་སྟེ། རྙིང་མ་ལ་ཞེ་མེར་གྱི་གཏོང་ཐུབ་པ་བྱུང་ཞིང་། སླད་དུ་བསྟན་བཅོས་དྲང་པོའི་ས་བོན་མཛད་རུང་། གསུང་སྔ་མ་ཁོ་ན་བཙན་པའི་དབང་གིས་ཕྱི་མ་ལ་རྟོག་འཇུག་ཆེར་བྱེད་པ་མ་བྱུང་ཞིང་ཡིག་ཆ་ཁྱབ་ཆེ་བར་ཡང་མ་གྱུར་ཏོ།། ༈ །།དེ་ལྟ་བས་ན། རྒྱ་གར་དུ་ནི་ཆོས་ཀྱི་གཞུང་ལུགས་ཐ་དད་པའི་རྣམ་གྲངས་ཙམ་ལས་གསར་མ་དང་རྙིང་མ་ཞེས་པའི་མིང་དུ་
མི་འདོགས་ཀྱང་། བོད་དུ་གསར་རྙིང་གི་ཐ་སྙད་དུ་གྲགས་དགོས་པའི་རྒྱུ་མཚན་རང་ལའང་བཤད་ཚུལ་མི་མཐུན་པ་འགའ་བྱུང་སྟེ། ལ་ལ་བསྟན་པ་སྔ་དར་ཕྱི་དར་ཁོ་ན་ལ་གསར་རྙིང་གི་མཚམས་འཛིན་ཡང་། དེ་ནི་མི་འཐད་དེ། ཕྱིས་ཀྱི་གཏེར་ཆོས་ཐམས་ཅད་གསར་མར་བརྩི་དགོས་པར་ཐལ་བ་དང་།། ༈ །།ལ་ལས་ནི། ཀུན་བཟང་གི་གསུང་དང་རྡོ་རྗེ་འཆང་གིས་གསུང་ལ་མཚམས་འཛིན་ཀྱང་དེ་ཡང་མ་ཡིན་ཏེ། ཀུན་བཟང་རྡོ་རྗེ་འཆང་ངོ་བོ་དབྱེར་མ་མཆིས་ལ། རྒྱུད་སྡེ་ཡང་སྔར་ཀུན་བཟང་གིས་དགོངས་པ་བསྟན་པ་རྣམས་ཕྱིས་རྡོར་འཆང་གིས་ཚིག་ཏུ་གསུངས་པ་ཙམ་མ་གཏོགས་ངོ་བོ་གཅིག་པའི་ཕྱིར་དང་། འགའ་ཞིག་ལོ་པཎ་སྔ་ཕྱིའི་ཁྱད་ཁོ་ན་ལ་འདོད་ཀྱང་། དེ་ལྟར་ན། གོང་དུ་སྨོས་པའི་པཎ་ཆེན་ཤཱཀྱ་ཤྲཱི། སྨྲྀ་ཏི། ནགས་ཀྱི་རིན་ཆེན་སོགས་ཀྱི་ཟབ་ཆོས་དེ་དག་ཀྱང་རྙིང་མའི་ཆོས་མ་ཡིན་པར་འགྱུར་བ་དང་། ས་པཎ་དང་། རིག་རལ། འབྲི་གུང་ལོ་ཙཱ་སོགས་ཀྱིས་རྙིང་མའི་ཕུར་པ་དང་
སྒྱུ་འཕྲུལ་སོགས་ཀྱི་རྒྱུད་བསྒྱུར་བ་དེ་དག་ཀྱང་གསར་མའི་རྒྱུད་ཡིན་པར་ཐལ་བ་དང་།། ༈ །།ཡང་། ལ་ལ་ནི་ཐེག་པ་མཐོ་དམན་དུ་འདོད་ཀྱང་། དེ་ནི་མ་ཡིན་ཏེ། རྒྱལ་བའི་བཀའ་ཐེག་པ་གསུམ་དང་རྒྱུད་སྡེ་བཞི་སོགས་ཐམས་ཅད་གསར་རྙིང་གཉིས་ཀ་ལ་ཡོད་མཉམ་ཡིན་པའི་ཕྱིར།། ༈ །།ཡང་། ཐོས་ཆུང་ལ་ལས་བརྡ་སྐད་གསར་རྙིང་ཙམ་ཁོ་ན་ལ་མཚམས་འཛིན་མོད། དེ་ནི་ག་ལ་ཡིན་ཏེ། སྐད་གསར་བཅད་ཀྱིས་གཏན་ལ་ཕབས་པ་ནི་མངའ་བདག་ཁྲི་རལ་གྱི་དུས་སུ་ཡིན་ལ། མཛད་པ་པོ་ཡང་ལོ་ཙཱ་བ་སྐ་ཅོག་ཞང་གསུམ་རྣམས་ཡིན་ཕྱིར། སྐད་གསར་བཅད་ཡིན་ཚད་གསར་མའི་ཆོས་སུ་ག་ལ་འགྱུར། འགའ་ཞིག་གིས་གཏེར་མ་ཡོད་མེད་ཁོ་ན་མཚམས་འཛིན་ཞིང་རྙིང་མའི་གཏེར་ཆོས་ལ་སྐུར་པ་སྣ་ཚོགས་འདེབས་པར་བྱེད་ཀྱང་། དེ་ལྟ་ན། སྤྱིར་ཡང་རྒྱལ་བའི་བཀའ་ཐམས་ཅད་གཏེར་ནས་
བྱུང་བའི་ལོ་རྒྱུས་སྤྱི་དང་། བྱེ་བྲག་ཏུ་ཡང་། ཆོས་འཕགས་ཀྱི་ཤེར་ཕྱིན་གཏེར་མ། ཀླུ་སྒྲུབ་ཀྱི་མགོན་པོ་སྐོར། ཏེ་ལོ་ནཱ་རོའི་རླུང་སེམས་དབྱེར་མེད། མཻ་ཏྲི་པའི་བྱམ་ཆོས། ཕ་དམ་པའི་ཞི་བྱེད་ཆུ་རླུང་རོལ་པའི་རྒྱུད་བ་རི་ལོ་ཙཱའི་མཁའ་འགྲོ་སེང་གདོང་མ། ཇོ་བོ་རྗེའི་ལོ་རྒྱུས་བཀའ་བཀོལ་མ་མར་པའི་ཆོས་དྲུག་སྲས་མཁར་མ། རས་ཆུང་དང་རྒྱ་རས་ཀྱི་རོ་སྙོམས་སོགས་མང་པོ་ཞིག་ལ་ཡང་སྐུར་ཞུས་སུ་འགྱུར་ལ། རྙིང་མའི་ཆོས་ལའང་བཀའ་མ་ནི་བསམ་གྱིས་མི་ཁྱབ་པའི་ཕྱིར་རོ། །མདོར་བསྡུ་ན། གསར་རྙིང་ཞེས་པའི་ཐ་སྙད་འདི་ཅི་ལས་བྱུང་ཞེ་ན། མིང་ཙམ་བོད་དུ་གྲགས་རུང་ཆོས་རང་གི་དབྱེ་མཚམས་ནི་རྒྱ་གར་དུ་སྔོན་དགའ་རབ་འཇམ་དཔལ་སོགས་ལས་རྒྱུད་པ་དང་། ཕྱིས་བཀའ་བཞི་རྒྱུད་པ་ལས་བྱུང་བའི་ཁྱད་དང་། ཨ་ནུ་ཨ་ཏིའི་ཐེག་པའི་རྒྱུད་སྡེ་རྣམས་ཡོད་མེད་ཀྱི་ཁྱད་པར་དུ་གདའ་ལགས།། ༈ །།ཡང་འོ་ན། གསར་རྙིང་དཀྱིལ་འཁོར་
གྱི་ལྷ་ལ་གསར་མའི་བདེ་དགྱེས་སོགས་དང་རྙིང་མའི་ཆེ་མཆོག་ཡང་དག་སོགས་ངོ་བོ་གཅིག་པར་བཤད་ན། ཞལ་ཕྱག་རྣམ་འགྱུར་མཚན་དང་འཁོར་ཚོགས་བཟླས་སྔགས་སོགས་མི་འདྲ་བར་འབྱུང་བ་འདི་ཅི་ཞེ་ན། དེ་ནི་གདུལ་བྱ་ཐ་དད་པའི་སྣང་ཚུལ་ཙམ་དུ་རྒྱུད་སྡེ་སོ་སོའི་སྤྲུལ་བསྒྱུར་ཡིན་ཏེ། དཔེར་ན། གསར་མ་རང་གི་དགྱེས་རྡོར་གཅིག་པུ་ལ་ཡང་ཕྱག་བཅུ་དྲུག་པ། བརྒྱད་པ། དྲུག་པ། བཞི་པ། གཉིས་པ་སོགས་དང་། དེའི་གསང་སྔགས་ལའང་། ཨཥྚ་དང་། དེ་ཝ་པི་ཙུ་དང་། ཀི་ཊི་སོགས་དུ་མར་གསུངས་པ་བཞིན། རྙིང་མའི་ཆེ་མཆོག་ཧེ་རུ་ཀ་གཅིག་པུ་ལ་ཡང་དབུ་ཉེར་གཅིག་ཕྱག་བཞི་བཅུ་རྩ་གཉིས་པ་དང་དབུ་དགུ། ཕྱག་བཅོ་བརྒྱད་པ། དབུ་གསུམ་ཕྱག་དྲུག་པ། ཞལ་གཅིག་ཕྱག་གཉིས་པ་སོགས་ཡོད་པ་ལྟར་ལྷ་གཞན་ལའང་མཚུངས་པ་དང་། སྔགས་ལ་ཡང་རྩ་སྔགས་དང་སྙིང་པོ་དང་ཉེ་
བའི་སྙིང་པོ་སོགས་དང་། འཁོར་ཚོགས་ཀྱང་དཀྱིལ་འཁོར་རྒྱས་འབྲིང་བསྡུས་པ་དང་གཙོ་རྐྱང་སོགས་ཅི་རིགས་འབྱུང་ཚུལ་ནི་གསར་རྙིང་མཐུན་ནོ། །ཡང་། གསར་རྙིང་ཁྱད་མེད་ན་ནི་ཕྱག་རྫོགས་ཀྱང་སོ་སོར་འབྱེད་པའི་རྒྱུ་མཚན་ཇི་ལྟ་བུ་ཡིན་གྱི་དྲི་བ་གནང་བའི་ཆར།། ༈ །།འདི་སྐབས་ཕྱག་རྫོགས་ཁྱད་ཡོད་པར་གསུངས་པ་དང་མེད་པར་གསུངས་པ་གཉིས་སུ་མཆིས་ཏེ། དགོས་པ་སྐབས་དོན་ལ་དགོངས་པར་སྣང་ཞིང་། རང་རང་གི་ཁ་འཛིན་དང་ཆེ་བ་འདོན་ཕྱིར་གྱི་བཤད་ཚུལ་དག་ལ་ནི་ངེས་པ་མི་འབྱུང་མོད་ཀྱི། དངོས་དོན་ལ། ཁྱད་མེད་པར་བཤད་པའི་དབང་དུ་ན། རྫོགས་ཆེན་ལ་ཕྱི་ནང་གསང་གསུམ་གྱི་ཕྱི་སེམས་སྡེ་དང་ནང་ཀློང་སྡེ་སོགས་ཀྱི་སྐབས་དང་། གསང་བ་མན་ངག་སྡེ་དང་ཡང་གསང་བླ་ན་མེད་པའི་སྡེ་སྐོར་རྣམས་ཀྱི་ཁྲེག་ཆོད་བཞིའི་ཉམས་ལེན་གྱི་ལྟ་སྒོམ་ཐམས་ཅད་ཕྱག་རྫོགས་ཁྱད་མེད་དུ་བཞེད། དེའི་བོགས་འདོན་དང་ཐབས་ཀྱི་མྱུར་ལམ་དུ་གསར་མ་ལ་གཏུམ་མོ་སོགས་བདེ་སྟོང་ཕྱག་ཆེན་ནམ་ཆོས་དྲུག་སྐོར་
དང་། སྦྱོར་དྲུག་གི་སྲོག་རྩོལ་རྗེས་ཏིང་སོགས་ཀྱི་དོད་དུ། རྫོགས་ཆེན་གྱི་སྡེ་གོང་མ་རྣམས་སུ་འོད་གསལ་ཐོད་རྒལ་གྱི་སྐོར། དཀར་ཁྲིད། ནག་ཁྲིད། སེར་ཁྲིད། ཁྲ་ཁྲིད་སོགས་གསུངས་ཤིང་། འོད་གསལ་ཐོད་རྒལ་སྐོར་གྱི་གདམས་པ་འདི་དག་ལ་ཡང་དག་གསར་མ་བ་ལ་ལས་མུ་སྟེགས་ཉི་མ་བལྟ་བའི་ཆོས་ལུགས་ཞེས་སོགས་ཀྱི་བཀའ་བཀྱོན་མཐའ་ཡས་པར་མཛད་ནའང་། ཆོས་རང་རང་གི་རྒྱུད་ལུང་མན་ངག་གི་དགོངས་དོན་ཡིན་ཚེ། ཐུགས་ལ་མ་ཤོང་མཁན་རྣམས་རང་སྐྱོན་དུ་ཟད་མོད། ཡང་ཕྱག་རྫོགས་ཁྱད་པར་ཡོད་པར་བཤད་པའི་སྐབས་དོན་ལྟར་ན། གཞིའི་སྐབས་སུ་ཀུན་གཞི་དང་ཀ་དག་གི་ཁྱད་དང་། རྣམ་རྟོག་ཆོས་སྐུ་གཅིག་མི་གཅིག་དང་། སེམས་དང་རིག་པ་ཁྱད་འབྱེད་དང་། སྣང་སེམས་གཅིག་མི་གཅིག་དང་། དྲན་པ་སྒོམ་དུ་བྱེད་མི་བྱེད་སོགས་ཀྱི་དབྱེ་མོད་ཀྱང་། འདི་དག་གི་དབྱེ་བསྡུ་རག་བསྡུས་ཙམ་བདག་གིས་ཕྱག་རྫོགས་སྤྱི་དོན་གཉིས་སུ་བཀོད་ཡོད་ཕྱིར་
འདིར་མ་བྲིས་ལགས།། ༈ །།ཡང་ཉིད་ཀྱིས། རྙིང་མ་རང་ལའང་། ལྷ་ཐོ་ཐོ་རི་ལ་དམ་ཆོས་གཉན་པོ་གསང་བ་བབས་པ་ནས་བཟུངས། ཆོས་རྒྱལ་སྲོང་བཙན་དུས་ཀྱི་ལོ་པཎ་དང་ཆོས་ཀྱི་རྣམ་གྲངས་སོགས་དང་། དེ་རྗེས་ཀྱང་མཁན་པོ་ཞི་བ་འཚོ་ལ་སོགས་པ་དེ་ཙམ་བྱུང་སྣང་བ་ལ། རྙིང་མའི་ཆོས་ཀྱི་བརྒྱུད་ཁུངས་སློབ་དཔོན་པདྨ་ཁོ་ན་ལས་འདྲེན་དགོས་པའི་རྒྱུ་མཚན་གང་ཡིན། ཞེས་གསུངས་པའི་ཐད་ལ། སྤྱིར། རྙིང་མའི་ཆོས་ཀྱི་བརྒྱུད་ཁུངས་སློབ་དཔོན་ཉིད་ནས་འདྲེན་དགོས་མི་དགོས་ནི་གང་ཡང་ཡོད་དེ། གཏེར་ཆོས་ཕལ་ཆེར་ནི་སློབ་དཔོན་ནས་བརྒྱུད་པ་ཤས་ཆེ་ལ། འགའ་ཞིག་ནི་པཎ་ཆེན་བི་མ་ལས་སྦས་པ་དང་། གཞན་ཡང་། ནམ་མཁའ་སྙིང་པོ། བཻ་རོ་ཙ་ན། གནུབས་བན་སངས་རྒྱས་ཡེ་ཤེས། གཉགས་ཛྙཱ་ན་ཀུ་མ། ཆོས་རྒྱལ་དང་ལྷ་སྲས་སོགས་ཀྱིས་སྦས་པ་ཡང་མང་དུ་ཡོད་ཕྱིར། གཏེར་ཆོས་ཡིན་ཚད་སློབ་དཔོན་ཁོ་ནས་སྦས་པ་ནི་མིན་པས་བརྒྱུད་པ་ཡང་དེ་དང་མཐུན་པར་འདྲེན་དགོས་
ལ། བཀའ་མའི་ཆོས་ནི། ཆོས་རྒྱལ་སྲོང་བཙན་ནས་ཁྲི་སྲོང་ལྡེ་བཙན་ཡན་གྱི་དུས་སུ་བྱུང་བའི་ལོ་པཎ་གཞན་དང་ཁྲི་སྲོང་གི་དུས་ཉིད་ལའང་། བོ་དྷི་སཏྭ། བི་མ་ལ། ཤིནྟིང་གརྦྷ་སོགས་པཎ་ཆེན་བརྒྱ་རྩར་གྲགས་པ་དང་། སླད་ནས་ཀ་མ་ཤཱི་ལ། དཱ་ན་ཛི་ན་རྒྱ་གར་གྱི་པཎ་གྲུབ་ཐ་དད་དང་ལོ་ཙཱ་སོ་སོས་བསྒྱུར་བའི་ཆོས་རྣམས་རང་རང་ལས་བརྒྱུད་པ་འདྲེན་པ་མ་གཏོགས། ཐམས་ཅད་སློབ་དཔོན་པདྨ་གཅིག་པུ་ལས་རྒྱུད་པ་མ་ཡིན་པའི་ཚུལ་ནི་བཀའ་བསྟན་འགྱུར་རྒྱུད་མན་ངག་སོ་སོའི་ལོ་རྒྱུས་ལྟར་ལགས་མོད་ཀྱི། སློབ་དཔོན་ཉིད་སྤྱིར་ཕྱོགས་བཅུའི་སངས་རྒྱས་ཐམས་ཅད་དང་། ཁྱད་པར་དུ་ཤཱཀྱའི་དབང་པོས་བསྐལ་པ་རྩོད་ལྡན་སྙིགས་མ་རྨུ་རྒོད་གདུག་པ་ཅན་གྱི་གདུལ་བྱ་འདུལ་ཕྱིར་དུ་སྐུ་སྤྲུལ་ཞིང་། ཆོས་ངེས་དོན་གསང་སྔགས་ཀྱི་བདག་པོར་མངའ་གསོལ་བའི་མཐུས། རྒྱ་གར་ཤར་ལྷོ་ནུབ་བྱང་གི་ཡུལ་ཁམས་ཀུན་ཏུ་བསྟན་
འགྲོའི་དོན་མཛད་ཚུལ་ནི་སོ་སོ་སྐྱེ་བོའི་བློས་ག་ལ་དཔོག་ནའང་། དེ་ཐམས་ཅད་ལ་ཨོ་རྒྱན་པདྨ་ཞེས་པའི་མཚན་དང་ཆ་ལུགས་འདི་གཅིག་པུར་བསྟན་པ་མ་ཡིན་ཏེ། ད་ལྟ་རྣམ་ཐར་ཐང་ཡིག་ཁོ་ནའི་དབང་དུ་བྱས་ཀྱང་། གུ་རུ་མཚན་བརྒྱད། ཡང་སྤྲུལ་ཉེར་བཞི། འགྲོ་བ་དྲུག་གི་གནས་རིས་སོ་སོར་སྤྲུལ་པའི་གུ་རུ་དྲུག་སོགས་སྤྲུལ་ཚུལ་དང་། གཞན་ཡང་དགེ་སློང་སོཀྱ་དེ་ཝ། བྲམ་ཟེ་བདེ་མཆོག་སྙིང་པོ། དགེ་སློང་སིདྡྷི་ཕ་ལ། ཌོམྦི་ཧེ་རུ་ཀ །དགེ་སློང་དབང་པོའི་སྡེ། གདོལ་བ་ཀརྟི་ནག་པོ་སོགས་ཡུལ་དུས་དང་མཚམས་པའི་གང་འདུལ་གྱིས་སྤྲུལ་པའི་སྒྱུ་འཕྲུལ་སྣ་ཚོགས་བསྟན་པ་ཡིན་ཚེ། པདྨ་འབྱུང་གནས་ཁོ་ནར་ནི་མ་གྲགས་མོད། བོད་ཡུལ་འདིར། དྲང་དོན་དུ་ནི་བལ་ཡུལ་གྱི་བྱ་རྫི་ས་ལེའི་བུ་མོ་བདེ་བ་མཆོག་གི་བུ་གསུམ་གྱིས་མཆོད་རྟེན་བྱ་རུང་ཁ་ཤོར་བཞེངས་ཤིང་སྨོན་ལམ་བཏབས་པའི་མཐུས་མཁན་སློབ་ཆོས་གསུམ་དུ་སྐྱེ་བ་བཞེས་ཚུལ་སོགས། ཐ་མལ་པའི་སྣང་ངོ་དང་
བསྟུན་པའི་ལོ་རྒྱུས་གསུངས་མོད་ཀྱང་། ངེས་པའི་དོན་དུ། བདེ་བ་ཅན་དུ་འོད་དཔག་མེད་ལ་སྤྱན་རས་གཟིགས་ཀྱིས་གསོལ་བ་བཏབ་པའི་མཐུས། སྣང་མཐའི་ཐུགས་ལས་འོད་ཟེར་རྡོ་རྗེ་ཧྲཱིཿཡིག་གིས་མཚན་པའི་རྣམ་པར་དྷ་ན་ཀོ་ཥའི་མཚོ་གླིང་དུ་སྤྲོས་པས། པདྨའི་སྡོང་པོ་ལས་སྐུ་འཁྲུངས་ཏེ། སྤྱིར་འཇིག་རྟེན་གྱི་ཁམས་རབ་འབྱམས། སྒོས་སུ་ལྷོ་ཕྱོགས་འཛམ་བུའི་གླིང་། ཁྱད་པར་བྱང་ཕྱོགས་ཁ་བ་ཅན་གྱི་གདུལ་སྐལ་དུ་བྱོན་པའི་མཐུས། བོད་ཀྱི་ལྷ་འདྲེ་གདུག་པ་ཅན་ཐམས་ཅད་བཏུལ་ཞིང་ས་འདུལ་རབ་གནས་བྱིན་རླབས་མཛད་པ་དང་། རྒྱུད་ལུང་མན་ངག་གི་ཆོས་འཁོར་བསྐོར། རི་ཀླུང་ཐམས་ཅད་ཟབ་གཏེར་གྱིས་བཀང་། ས་ཡུལ་ཁབ་རྩེ་ཙམ་ཡང་མ་ལུས་པར་ཞབས་ཀྱི་བཅགས་ཤིང་བྱིན་གྱིས་རླབས་ཏེ་སྒྲུབ་གནས་དང་ཚོགས་བསགས་སྒྲིབ་སྦྱང་གི་རྟེན་དུ་མཛད། ཕྱིས་འབྱུང་གི་གདུལ་བྱ་ལ་བརྩེ་བར་དགོངས་པའི་ཞལ་གདམས་ལུང་བྱང་
མཐའ་ཡས་པས་བླངས་དོར་གནད་བསྟན་ཞིང་རྗེས་སུ་བཟུང་། མཐའ་ན་མཛད་འཕྲིན་གཞན་ཕར་ཞོག །བོད་ཁམས་བདེ་ཐབས་ཀྱི་རྟེན་འབྲེལ་དང་སའི་མེ་བཙའ་ཡུན་གྱི་བླ་གཏེར་སྦས་པ་གཅིག་པུའི་བཀའ་དྲིན་ལ་བསམ་ཀྱང་བོད་ཀྱི་སྐྱེ་འགྲོ་རྣམས་གུ་རུའི་སྐུ་དྲིན་འཁོར་ཐབས་མ་མཆིས་ནའང་། དེ་འདྲའི་རྒྱུ་མཚན་བསམ་མཁན་ནི་མ་བྱུང་མི་འབྱུང་འབྱུང་བར་དཀའ་སྟེ། ཆོས་ལུགས་སོ་སོ་ནས་ངེད་ཀྱི་བླ་མ་ལས་ཁམས་ཆེ་བ་མེད། བཟང་དགུ་དང་ལེགས་བྱས་དང་ཕན་བདེ་དང་དྲིན་ཆེན་ཐམས་ཅད་ངེད་ཀྱིས་བྱས་པ་ཡིན་སྙམ་པ་ལས། བློ་གཟུ་བོར་གནས་མཁན་ནི་ཉིན་སྐར་ལས་དཀོན་པར་ཟད་ཅིང་།། ༈ །།གཞན་ཡང་ཕྱིས་སུ་སློབ་དཔོན་ཉིད་བོད་འདིར་གདུལ་བྱ་དུས་དང་བསྟུན་པའི་སྐུར་བྱོན་ཚུལ་ནི། ཇོ་བོའི་རྣམ་ཐར་དུ། བསྟན་པ་སྔ་དར་གྱི་ལོ་རྒྱུས་གསུང་བའི་འཕྲོར། དེའི་དུས་སུ་བདག་ཀྱང་རིག་སྔགས་འཆང་བ་རྣལ་འབྱོར་གྱི་དབང་ཕྱུག་རྡོ་རྗེ་འཛིན་པ་ཆེན་པོ་ཞིག་ཏུ་བྱས་ནས་
གདུལ་བྱའི་དབང་གིས་བོད་ཡུལ་འདིར་ཡང་ལན་གཉིས་གསུམ་འོངས་ཤིང་སྤྲུལ་པ་ཡང་དེ་ལྟར་བགྱིད་དོ། །ཞེས་གསུངས་ལ། སློབ་དཔོན་ཉིད་ཀྱི་བཀའ་ལས་ཀྱང་། ཨ་ཏི་ཤ་དང་ཤཱཀྱ་ཤྲཱི་སོགས། །ང་ཡིས་སྤྲུལ་པ་པཎ་ཆེན་རིམ་པར་འབྱོན། །བོད་ཡུལ་ཆོས་ཀྱི་སྒྲོན་མེ་སྦོར་བར་བྱེད། །ཅེས་པཎ་ཆེན་དེ་དག་ཀྱང་གུ་རུ་རིན་པོ་ཆེ་ཉིད་ཡིན་པ་དང་། གཞན་ཡང་། ཨུ་རྒྱན་ང་ཉིད་རྡ་རའི་མིང་འཛིན་པས། བིར་ཝ་པ་ཡི་ཐུགས་བཅུད་བླངས་ནས་ནི། །ཤཱཀྱ་ཞང་སོགས་རིམ་པར་བརྒྱུད་ནས་ཀྱང་། །ལམ་འབྲས་ཆོས་ཀྱིས་སྐྱེ་འགྲོའི་མུན་པ་སེལ། །ཞེས་པཎ་ཆེན་ག་ཡ་རྡ་རར་སྤྲུལ་ནས་ས་ལུགས་ཀྱི་ལམ་འབྲས་སྤེལ་བ་དང་། ཨོ་རྒྱན་ང་ཉིད་གཉལ་མདའི་ལྷ་རྗེར་སྤྲུལ། །དྭགས་སྒམ་སྙིང་རྗེའི་དོན་སྒོམ་ཁྱུ་གཅིག་འབྱུང་། །སོགས་དང་། མདོ་སྔགས་མཐར་ཕྱིན་ཟླ་འོད་གཞོན་ནུ་ནི། །ཨུ་རྒྱན་ང་དང་དབྱེར་མེད་མཐོང་ཐོས་གྲོལ། །ཞེས། སྒམ་པོ་པ་དང་། ཞང་སྟོན་ཆོས་འབར་ འབྲོག་མི་ཤཱཀྱ་ཡེ་ཤེས།
ཕག་མོ་གྲུ་ཡི་མཐའ་རྩ་ན། །བཛྲ་རཱ་ཛ་ང་སྤྲུལ་འབྱུང་། །སོགས་ཀྱི་ཕག་གྲུ་དང་། བྱང་ཕྱོགས་འབྲི་ཞེས་བྱ་བ་ན། ང་ཉིད་དགེ་སློང་རིན་ཆེན་དཔལ་གསུམ་ཁྲི་དྲུག་སྟོང་ཚོགས་པ་སྐྱོངས། ཞེས། འབྲི་གུང་འཇིག་རྟེན་མགོན་པོ་དང་། །པདྨ་འབྱུང་གནས་སྐྱེ་མེད་ཞངས། །རླབས་ཆེན་སྤྱོད་པས་འགྲོ་བ་འདུལ། །ཞེས། འགྲོ་མགོན་ཞང་དང་། གནོད་སྦྱིན་གང་བ་བཟང་པོའི་ཞོལ། །ང་ཉིད་རྒྱ་ཡི་མིང་དུ་སྤྲུལ། །སྒྲུབ་རྒྱུད་བསྟན་པའི་སྲོག་ཤིང་འཛུག །ཅེས། གཙང་པ་རྒྱ་རས་དང་། ཀརྨ་པ་དཀོན་མཆོག་འབངས། པདྨ་འབྱུང་གནས་བདག་ཉིད་རྣམས། །སྣང་ཚུལ་ཙམ་དུ་ཐ་དད་ཀྱང་། །དོན་ལ་དབྱེར་མེད་ངོ་བོ་གཅིག ཞེས། ཞྭ་དམར་ནག་གཉིས་དང་། ཨོ་རྒྱན་ང་ཉིད་སྨན་པའི་གཟུགས་བཟུང་བ། ཁྱིམ་པའི་ཚུལ་འཛིན་ནཱ་ཐའི་མིང་ཅན་གྱི། །སེམས་ཅན་སྡུག་བསྔལ་ནད་ལས་སྐྱོབ་པར་བྱེད། ཅེས། གཡུ་ཐོག་མགོན་པོ་དང་། །ང་སྤྲུལ་བརྟུལ་ཞུགས་སྤྱོད་པ་ཐང་སྟོང་རྒྱལ། ཆུ་བོ་ཆེ་ལ་ལྕགས་ཀྱི་ཟམ་པ་
འཛུག །ཅེས། ལྕགས་ཟམ་ཆོས་རྗེ་སོགས། མདོར་ན་གསང་སྔགས་རྙིང་མའི་གཏེར་བཏོན་གྲུབ་ཐོབ་སོགས་ལ་ཆོས་རྒྱུད་གཞན་རྣམས་དག་པ་མི་སྟེར་ནའང་། གསར་མའི་སྐྱེས་ཆེན་སོ་སོར་སྤྲུལ་ནས་བོད་ཡུལ་གྱི་འགྲོ་དོན་མཛད་ཚུལ་ཡང་། བརྗོད་ཀྱི་ག་ལ་ལང་། དེ་ལྟ་བུ་དགེ་བའི་བཤེས་གཉེན་དུ་སྤྲུལ་པ་ལྟ་ཅི་སྨོས་ཏེ། མཐའ་ན། ནོར་གྱི་རྒྱལ་པོ་ཇི་ཆེ་མེར་རྒན་དུ་སྤྲུལ་ནས། ཚེའི་རིག་འཛིན་གྲུབ་པས་མཐའ་མིའི་ཁ་གནོན་དུ་ད་ལྟ་ཡང་བཞུགས་པའི་ལོ་རྒྱུས་དང་། གླིང་གེ་སར་རྒྱལ་པོར་སྤྲུལ་ནས་བདུད་འདུལ་བ་ལས་གཡེལ་མེད་དུ་མཛད་ཚུལ་སོགས་གདུལ་བྱ་ཕལ་པའི་སྣང་ངོར་ཡང་དེ་ལྟ་བུའི་ཚུལ་སྣ་ཚོགས་པས་འགྲོ་བ་སྤྱི་དང་ཁྱད་པར་བོད་ཀྱི་སེམས་ཅན་ལ་བརྩེ་བས་གཟིགས་ཚུལ་ནི་བསམ་ལས་འདས་མོད་ཀྱང་། རང་རང་ང་ཆེ་ང་འཇིགས་མ་གཏོགས་སློབ་དཔོན་འདི་ལྟ་བུའི་བཀའ་དྲིན་དང་ཡོན་ཏན་དྲན་མཁན་ནི་
བོད་ཀྱི་མི་ལ་དཀོན་ཏེ།། ༈ །།གུ་རུ་ཉིད་ཀྱི་ཞལ་ཆེམས་རིན་ཆེན་གསེར་འཕྲེང་ལས་ཀྱང་། པད་འབྱུང་བདག་གིས་བོད་ཀྱི་དོན་དུ་འོངས། །རྫུ་འཕྲུལ་བཀོད་པས་གདུག་པ་མུས་བཏུལ། །ལས་ཅན་མང་པོ་སྨིན་གྲོལ་ལམ་ལ་བཀོད། །གཏེར་ཆོས་ཟབ་མོས་བོད་ཁམས་གྲུབ་ཐོབ་བཀང་། །ལ་ཀླུང་རི་བྲག་ས་གཞི་རྟ་རྨིག་གང་། །ལུས་པ་མེད་པར་སྒྲུབ་གནས་བྱིན་གྱིས་རླབས། །བོད་ཁམས་ཡུན་དུ་བདེ་ཐབས་རྟེན་འབྲེལ་གྱིས། །སྤྲུལ་པ་རྒྱུན་ཆད་མེད་པས་འགྲོ་བ་བསྐྱངས། །བོད་ལ་དྲིན་ཆེར་བྱས་ཀྱང་དྲིན་མི་དྲིན། །ཞེས་དང་། མ་འོངས་དུས་ན་མ་རུངས་ལོག་ལྟ་ཅན། །བསམ་མེད་རིག་བཅོས་ཅན་གྱི་མཁས་རློམས་དང་། །རང་བསྟོད་གཞན་ལ་སྨོས་པའི་སྟོམ་ཆོལ་རྣམས། །པདྨ་ང་ཡི་བོད་དུ་ཡུན་མ་བསྡད། །ལ་ལས་ཟླ་གཅིག་ལ་ལས་ཟླ་བ་ཕྱེད། ཁ་ཅིག་ལ་ལས་བཅུ་ཡི་ཞག་གྲངས་ལ། །གསེར་གྱིས་རྫོང་བཏབས་ཨོ་རྒྱན་ལོག་ཅེས་ཟེར། །
དེ་ལྟར་མ་ལགས་བརྒྱ་དང་བཅུ་གཅིག་བཞུགས། བོད་ཡུལ་མཐའ་དབུས་ལུང་སུམ་འདོམ་གང་ཡང་། །ཨོ་རྒྱན་ང་ཡི་ཞབས་ཀྱི་མ་བཅགས་མེད། །བོད་ཁམས་ཐུགས་རྗེས་ཡུན་དུ་བསྐྱངས་མ་བསྐྱངས། །བསམ་ཤེས་ཡོད་ན་ཡིད་ཆེད་དེ་ལ་གྱིས། །སོགས་དང་། མ་འོངས་དུས་ན་བླུན་པོ་དྲེགས་ཅན་འགའ། །པདྨ་འབྱུང་གནས་ཆུང་བས་བོད་ཡུལ་འོང་། །པད་འབྱུང་ཆེ་བས་བོད་དུ་མ་བྱོན་སྨྲ། །ཆེ་ཆུང་མེད་དོ་ངོ་བོ་ང་རང་ཡིན། ལོག་ལྟ་ཅན་རྣམས་ཅི་སྨྲ་དབང་ཆེར་གྱིས། །དད་གུས་ཡོད་རྣམས་གསོལ་བ་རྒྱུན་དུ་ཐོབ། བྱིན་རླབས་འབྱུང་ངོ་བོད་འབངས་རྗེས་འཇུག་རྣམས། །སྤྲེལ་ལོ་སྤྲེལ་ཟླ་ཚེས་བཅུའི་ཉིན་ཞག་ལ། །ཨུ་རྒྱན་བདག་ཉིད་བོད་ཡུལ་ཐམས་ཅད་དུ། །ངེས་པར་འབྱོན་པ་ང་ཡི་མཐའ་ཚིག་ཡིན། །ཟླ་རེའི་ཚེས་བཅུ་བྱུང་ངོ་ལྕོག་ལ་ཡང་། །སྤྲུལ་པས་བོད་ཁམས་ཁྱབ་པར་མི་འབྱོན་རེ། །དམ་ཚིག་ཡིན་ནོ་པད་འབྱུང་བསླུ་
མི་སྲིད། །བདག་ལ་བློ་གཏོད་མོས་གུས་བྱེད་པ་རྣམས། །དེ་དུས་འཇིག་རྟེན་བྱ་བྲེལ་ཐམས་ཅད་དོར། །སྤོད་ལྡན་གཏོར་མ་རིན་ཆེན་འབར་བ་བཞེངས། །ཐོད་པ་ལྟག་སྤྲོད་རོལ་མོའི་སྒྲས་བསྐུལ་ཞིང་། །ཚིག་བདུན་གསོལ་འདེབས་གདུང་བའི་དབྱངས་ཀྱིས་བོས། །ཨུ་རྒྱན་བདག་ཉིད་རྔ་ཡབ་དཔལ་རི་ནས། །གཅེས་པའི་བུ་ངུས་མ་ཡིས་མི་བཟོད་བཞིན། །བྱིན་གྱིས་རློབས་འབྱོན་དམ་ཚིག་ན་ར་ཀན། །ཞེས་སོགས། ཞིབ་ནན་དུ་བཀའ་སྩལ་ཀྱང་འོ་སྐོལ་སེམས་ཅན་རྣམས་མ་རིག་པ་ཚན་ཆེས་པས། འཇིག་རྟེན་སྐྱེ་བོ་རྣམས་ནི་མ་གོ་མ་ཤེས་པ་ལྟ་ཅི་སྨོས་ཀྱི། ཆོས་པར་རློམ་པ་བདག་ཀྱང་པདྨ་འབྱུང་གནས་ཞེས་པའི་རྒྱ་གར་གྱི་པཎྜི་ཏ་དཀྱུས་མ་ཞིག་སྔ་ལོ་བྱུང་བར་སྣང་ངོ་སྙམ་པ་ཙམ་ལས་མོས་གུས་ཏིལ་འབྲུ་ཙམ་ཡང་མི་བྱེད་མོད། གུ་རུ་རིན་པོ་ཆེ་སངས་རྒྱས་ཐམས་ཅད་ཀྱི་ཐུགས་རྗེ་གཅིག་བསྡུས་ཡིན་པར་ནི། ལྷ་མོ་དྲི་མ་མེད་པའི་མདོ་ལས། ཕྱོགས་དུས་རྒྱལ་བ་མ་ལུས་པའི། །
ཕྲིན་ལས་གཅིག་ཏུ་བསྡུས་པ་ཡི། །ངོ་མཚར་མཆོག་བརྙེས་རྒྱལ་བའི་སྲས། །ཨོ་རྒྱན་གནྡྷོ་ནུབ་བྱང་འབྱུང་། །ཞེས་དང་། གསང་བ་བསམ་གྱིས་མི་ཁྱབ་པའི་མདོ་ལས། སྐལ་བཟང་མཛད་པ་རྨད་བྱུང་གི། །དུས་གསུམ་རྒྱལ་བའི་རྣམ་སྤྲུལ་ནི། །ངོ་མཚར་པདྨའི་སྙིང་པོ་ལས། །རིག་པ་འཛིན་པ་དེར་སྣང་ངོ་། །ཞེས་དང་། མཁའ་འགྲོ་གསང་བའི་རྒྱུད་ལས། །ང་ནི་བར་གྱི་བསྐལ་པ་ལ། ཧེ་རུ་ཀ་ཡི་གནས་བཅུའི་དབུས། །རིག་པ་འཛིན་པའི་སྐུར་གྱུར་ནས། །གསང་སྔགས་བསྟན་པའི་བདག་པོར་འགྱུར། །ཞེས་སོགས་རྒྱ་ཆེར་གསུངས་ཀྱང་འདི་ཙམ་གྱི་གོ་བར་ནུས་ལ། གུ་རུ་ཉིད་འཛམ་གླིང་འདིར་ཐུན་མོང་གི་གདུལ་བྱའི་སྣང་ངོར་འདི་ཙམ་ལས་གཞན་པའི་ཆེ་བའི་ཡོན་ཏན་སྟོན་པའི་སྐལ་སྣོད་དུ་མ་གྱུར་ནའང་། ལོངས་སྐུའི་ཞིང་རབ་འབྱམས་དང་ཕྱོགས་བཅུའི་སྤྲུལ་སྐུའི་ཞིང་སོ་སོར་སྐུ་དང་མཚན་གྱི་རྣམ་གྲངས་ཐ་དད་པས་འགྲོ་དོན་མཛད་ཚུལ་དང་། ད་ལྟ་ལྷོ་ནུབ་རྔ་
ཡབ་གླིང་དུ་སྲིན་པོའི་ཁ་གནོན་མཛད་ཚུལ་གྱི་ལོ་རྒྱུས་ས་བོན་ཙམ་ནི། བདག་གིས་ཡང་ཟབ་དཀོན་མཆོག་སྤྱི་འདུས་ཀྱི་དབང་གི་ལོ་རྒྱུས་སྐབས་སུ་བྲིས་ཡོད་པ་དང་།། ༈ །།སྐབས་འདི་དག་ནི་སྐུ་ཉིད་ཀྱིས་རྙིང་མའི་ཆོས་ཁུངས་སློབ་དཔོན་པདྨ་ཁོ་ན་ལས་འབྱུང་བའི་རྒྱུ་མཚན་གྱི་དྲི་བ་གནང་བའི་ལན་གྱི་འཕྲོས་ཞོར་དུ། ཆོས་ཀྱི་རྒྱུ་ནི་སློབ་དཔོན་ལས་བརྒྱུད་དགོས་མི་དགོས་གང་གི་ཚེ་ནའང་། བོད་ཁམས་འདིར་སྤྱི་ཁྱབ་ལ་འཕྲལ་ཡུན་གྱི་སྐུ་དྲིན་ནི་སྲོང་བཙན་སྒམ་པོ་དང་སློབ་དཔོན་པདྨ་གཉིས་ལས་ཆེ་བ་སུ་ཡང་མ་བྱུང་རུང་། དེ་ལྟར་གོ་མཁན་མི་སྣང་བས་ཡིད་སྐྱོ་བ་དང་། ཕྱིས་བྱུང་གི་གང་ཟག་འགའ་ཙམ་ལ་ཕན་དུ་རེ་ནས་བཀོད་པ་མ་གཏོགས་རྙིང་མའི་ཕྱོགས་འཐེན་བྱས་པ་ནི་མ་ཡིན་ནོ། ཡང་རེ་ཤིག་གི་ཚེ། རང་ཉིད་ཀྱི་བཀའ་ཕེབས་སུ། ཆོ་ག་ཆོས་སྤྱོད་གསུང་རབ་སྒྲོགས་སོགས་ཀྱི་ཆེད་དུ་སེམས་ཅན་གྱི་སྲོག་གཅོད་པའི་རིགས་ལ། སེམས་ཅན་དེ་དག་ལུས་སྲོག་དགེ་བ་དེ་འདྲའི་ཆེད་དུ་སོང་
བ་དེས་ཁོ་རང་ལ་ཕན་པ་ཡོད་མེད་ཀྱི་དྲི་བ་གནང་བའི་ཆར། སྤྱིར། འདི་འདྲའི་རྒྱུ་མཚན་མདོ་རྒྱུད་དཔང་བཞག་གི་དྲང་གཏམ་བཤད་པ་ལ་དིང་སང་གི་ཆོས་པ་རྣམས་དགའ་པོ་མི་བྱེད་པ་གདའ་ཚེ། རྒྱུ་འབྲས་ཀྱི་ཡིན་ལུགས་ཇི་བཞིན་པ་ཞིག་བཤད་སྟབས་དཀའ་བར་སྣང་བ་མ་གཏོགས། གཞུང་དང་མཐུན་པར་བརྗོད་ན། དེ་ཡང་སངས་རྒྱས་ཉིད་ཀྱི་འཇིག་རྟེན་སྐྱེ་བོ་ཐ་མལ་པ་ཀུན་ལ་ཡང་སྲོག་བཅད་པའི་ཉེས་དམིགས་དང་། དེ་སྤངས་པས་དགེ་སྟོབས་འབྱུང་ཚུལ་ཀྱི་ཆོས་རྣམ་གྲངས་དེ་ཙམ་ཞིག་བསྟན་པར་མཛད་ན། དགེ་བ་བྱེད་པའི་སླད་དུ་སྲོག་གཅོད་བྱེད་པ་ནི་ནམ་དུའང་རུང་བའི་སྐབས་ག་ལ་མཆིས་པ་དང་། ཁྱད་པར་ཆོས་སྒོར་ཞུགས་པ་རྣམས་ཀྱི་ནི་སྤང་བྱ་ཡིན་བཞིན་དུ་དང་དུ་བླང་བར་བྱེད་ན་དེ་ལས་ཉེས་སྐྱོན་ཆེ་བ་ཞིག་ཅི་ལྟར་བྱེད་དེ། འདི་ལྟ་བུ་ནི་ཡོན་མཆོད་གཉིས་ཀའི་ངོས་ནས་མིང་དགེ་བར་བཏགས་རུང་
དོན་ལ་སྲོག་གཅོད་ཀྱི་སྡིག་པ་བྱས་པ་དེས་སེམས་ཅན་དེ་དག་ལ་ཕན་ན་དགེ་སྡིག་གི་འབྲས་བུ་གོ་ལོག་ཏུ་འགྱུར་ཕྱིར་ལས་རྒྱུ་འབྲས་མི་བདེན་པར་འགྲོ་ལ། ཡང་། མདོ་ལས་གསུངས་པའི་སྔོན་སྟོན་པ་ཉིད་བྱང་ཆུབ་ཀྱི་སྤྱད་པ་སྤྱོད་པའི་ཚེ། སྲོག་ཆགས་དེས་པ་དང་གླང་པོ་ཆེའི་སྐྱེས་རབ་སོགས་ལ། དེའི་ཤ་ཟོས་པས་གཞན་ལ་ཕན་པ་རླབས་པོ་ཆེར་གྱུར་ཞིང་། སྲོག་ཆགས་རང་ཉིད་ཀྱང་བྱང་ཆུབ་ཀྱི་ཉེ་གྱུར་གྱུར་ཚུལ་དེ་དག་དང་འདི་ནི་མཚུངས་པའི་སྐབས་མེད་དེ། སྐྱེས་རབས་དེ་རྣམས་ནི་བྱང་ཆུབ་སེམས་དཔའ་ནི་འགྲོ་བ་གཞན་གྱི་སྲོག་སྐྱབས་ཕྱིར་རང་ཉིད་ཀྱི་སྲོག་བཏང་ནས་བླ་མེད་བྱང་ཆུབ་ཏུ་སེམས་བསྐྱེད་སྨོན་ལམ་མཛད་པ་ཡིན་ལ། ད་ལྟ་ཤའི་ཕྱིར་གསོད་པ་འདི་ནི་དེ་མ་ཡིན་པའི་ཕྱིར་དང་། སེམས་ཅན་དེ་དག་ཀྱང་གསོད་པ་པོ་དེ་ལ་ཞེ་སྡང་དང་རང་ཉིད་འཆི་བའི་སྡུག་བསྔལ་འཇིགས་སྐྲག་སོགས་ཅི་ཙམ་ཡོད་པར་བྱེད། དེ་བཞིན་དུ་གསོད་པར་བྱེད་པ་པོ་དང་། བྱེད་དུ་འཇུག་མཁན་
སོགས་ཀུན་ལ་སྲོག་ལན་དང་བཅས་པ་དང་། ཤ་ཟ་བ་པོ་སོགས་ཐམས་ཅད་ཀྱི་སྡིག་པ་ཚན་པོ་ཆེ་དེས་སེམས་ཅན་དེ་དག་ལ་ཡང་གནོད་པ་མ་གཏོགས་ཕན་པ་ག་ལ་ཡོད་དེ། རྒྱུ་རྐྱེན་གཅིག་ལ་གཅིག་རྟེན་གྱི་མི་དགེ་བ་ཡིན་པའི་ཕྱིར་རོ། །གཞན་ཡང་། གལ་ཏེ་སེམས་ཅན་དེ་དག་ཡིད་ལ་འདི་སྙམ་དུ། བདག་ནི་ཁོང་རྣམས་ཀྱི་བསད་ནའང་བདག་གི་ཤ་ཁྲག་འདི་དག་དགེ་འདུན་གྱི་ཟས་དང་། ཆོ་ག་ཆོས་སྤྱོད་ཀྱི་དོན་ལ་སོང་བ་ཡིན་པས་ལེགས་སོ་སྙམ་པ་ལྟ་བུ་ཞིག་ཡིན་ན་སེམས་ཅན་ཁོ་རང་གི་ངོས་ནས་དགེ་ཚོགས་སུ་འགྱུར་ཤས་ཆེ་ཡང་། དུས་འགྲོ་དེ་དག་ལ་དེ་འདྲའི་བག་ཆགས་ནི་མེད་ཚེ་ནམ་ཀྱང་ཕན་ཐབས་མ་མཆིས།། ༈ །།ཡང་། ཆོ་ག་ཆོས་འདོན་སོགས་བྱེད་མཁན་གྱི་གང་ཟག་དེ་དག་རང་དོན་གྱི་བཙན་ས་ཟིན་ཞིང་ཏིང་ངེ་འཛིན་རྫུ་འཕྲུལ་གྱི་ནུས་པ་མངོན་དུ་གྱུར་ཏེ་བཟང་ངན་འབྲེལ་ཚད་ཐམས་ཅད་
འདྲེན་ནུས་པ་ཞིག་ཡིན་ན། ཤ་ཟོས་པའི་སེམས་ཅན་དེ་དག་ཀྱང་འབྲེལ་བ་ཐོགས་པས་འཚེངས་པ་ཞིག་འབྱུང་མོད་ཀྱང་། དེ་ལྟ་བུའི་ནུས་ལྡན་ནི་དིང་སང་གང་དུའང་མི་རྙེད། ཡང་། ལ་ལའི་བསམ་ཡུལ་དུ། ཆོས་སྤྱི་དང་རྒྱུ་འབྲས་ཀྱི་གནས་ཚུལ་དེ་ལྟར་ཡིན་ནའང་། གསང་སྔགས་རྡོ་རྗེ་ཐེག་པའི་དཀྱིལ་འཁོར་གྱི་ཆོ་ག་ཟབ་མོའི་ཚོགས་གཏོར་གྱི་ཡོ་བྱད་ལ་སོང་བས་སེམས་ཅན་དེ་དག་ལ་ཕན་པར་འགྲོའོ་སྙམ་ན་དེ་ཡང་མ་ཡིན་ཏེ། བསྒྲལ་མཆོད་སོགས་ཀྱི་སྐབས་དོན་དང་ནི་འདི་མི་མཚུངས་ལ། བསྒྲལ་ལས་ཉིད་ལའང་རྟོགས་པས་བདག་ ཆོས་ཀྱི་བདག་དང་གང་ཟག་གི་བདག་གཉིས་པོ་ཆོས་དབྱིངས་སུ་ བསྒྲལ་ནས་ཐུགས་རྗེས་གཞན་སྒྲོལ་ གསལ་བ་གསུམ་ལྡན་གྱི་གནས་སྤོར་བ་ བ་མ་གཏོགས་སུ་ཡིན་ཡིན་གྱིས་བྱར་ག་ལ་རུང་ཞིང་། གནས་སྐབས་ལྟར་སྣང་མཚོན་ རྫོགས་འཕྲང་སྲོག་གསུམ་ བྱེད་ཙམ་གྱི་ཟན་ལིང་བསྒྲལ་བ་སོགས་དང་ ཡང་འདི་མི་མཚུངས་པའི་ཕྱིར་རོ། །
འདི་སྐབས་ཚོགས་འཁོར་གྱི་རྒྱུ་ཡང་རྒྱ་གར་གྱི་གྲུབ་ཐོབ་རྣམས་ནི་བསིལ་ཚལ་ལ་སོགས་པའི་དུར་ཁྲོད་དང་གནས་ཆེན་དག་ཏུ་སྐྱེ་བ་བདུན་པའི་སྐྱེས་བ་བུད་མེད་རིགས་བཟང་མཚན་ལྡན་གྱི་བམ་ལ་ཚོགས་འཁོར་མཛད་པ་ཡིན་མོད་ལ། དེ་ཙམ་མི་ནུས་པའི་རྣལ་འབྱོར་རྣམས་ཀྱིས་ནི་རང་བཞིན་ལས་ཀྱི་ཤི་བའི་ཤ་དང་། མ་རྙེད་ན་ཚོང་འདུས་ནས་ཉོས་ཏེ་བྱ་བར་གསུངས་པ་མ་གཏོགས། ཚོགས་རྫས་ཀྱི་ཆེད་དུ་སེམས་ཅན་བསད་པ་སོགས་བྱར་མི་རུང་བར་ནི་གསར་རྙིང་རྒྱུད་སྡེ་གང་ལས་ཀྱང་མ་གསུངས་མོད་ཅིང་། ལར་ཡང་། དེ་བཞིན་གཤེགས་པའི་དམ་པའི་ཆོས་ནི་ཐོག་མར་དགེ་བ་བར་དུ་དགེ་བ་མཐའ་མར་དགེ་བ་ཉིད་ཡིན་ཕྱིར། སྡིག་པ་མི་དགེ་བ་སྲོག་གཅོད་སོགས་དང་འབྲེལ་བ་དེ་ནི་ནམ་དུའང་དགེ་བའི་ཕྱོགས་གང་དུ་ཡང་མི་འགྱུར་བ་དང་། རྒྱལ་བ་རྣམས་ནི་ཁམས་གསུམ་སེམས་ཅན་ཀུན་ལ་བུ་གཅིག་པ་ལས་ལྷག་པའི་བརྩེ་ཆེན་གྱིས་གཟིགས་པ་ཡིན་ཚེ། སེམས་ཅན་
བསད་ནས་སངས་རྒྱས་ལ་མཆོད་པར་ཕུལ་ཡང་། དཔེར་ན་བུ་བསད་པའི་ཤ་དེ་ཉིད་མ་ལ་བྱིན་རུང་དགའ་བར་འགྱུར་བའི་གོ་སྐབས་མ་མཆིས་པ་བཞིན་ནོ། །གཞན་ཡང་། ལུང་ལས། གང་ཞིག་ཤ་ཁྲག་ལོངས་སྤྱོད་ནི། ཁམས་གསུམ་ཕུང་བར་བྱེད་པའི་ཟས། །ཐར་པའི་ལམ་རྩ་གཅོད་པའི་མཚོན། །བྱང་ཆུབ་ས་བོན་བསྲེག་པའི་མེ། །དལ་འབྱོར་མཐོ་རིས་འཇིག་པའི་ཐོག །སུས་ཀྱང་ཟ་བར་མི་རུང་ན། །རྒྱལ་བའི་བསྟན་ལ་རབ་བཞུགས་པའི། །སྐྱབས་གསུམ་འཛིན་པའི་དགེ་བསྙེན་ནས། །དགེ་ཚུལ་དགེ་སློང་ཁྲིམས་ལྡན་པས། །བཟའ་བར་ནམ་ཡང་མ་གནང་ངོ་། །བྱང་ཆུབ་སེམས་དཔའི་ལམ་ཞུགས་ནས། །ཕ་མར་གྱུར་པའི་སེམས་ཅན་ཤ །ཟོས་པའི་ཉེས་དམིགས་རྒྱ་ཆེར་འགྱུར། །གསང་བ་སྔགས་ཀྱི་ལམ་དུ་ཡང་། །ལྟ་དང་ཡེ་ཤེས་མི་ལྡན་པར། །ཤ་ལ་ཟོས་གང་དམ་ཚིག་ལས། །ཉམས་པར་རྒྱུད་སྡེ་ཀུན་ལས་གསུངས། །ཚེ་འཕོས་བསྐལ་ཆེན་གཅིག་གི་
བར། །ཁྲོ་ཆུ་ཁོལ་མར་ལྷུང་ཞིང་འཚོད། །ཅེས་དང་། གཞན་གྱིས་བསད་པ་བརྒྱ་ལས་ནི། །རང་གིས་བསད་དམ་བསད་བཅུག་པའི། །ཤ་ནི་ཉེས་པ་བརྒྱ་འགྱུར་ལྕི། སོགས་དང་། །དེ་ལྟར་དུག་གསུམ་འཕེལ་བྱེད་པའི། །ཤ་ཁྲག་ཆང་ལ་བག་མེད་དུ། །ལོངས་སྤྱོད་བྱེད་པའི་ཆོས་པ་ནི། །ནམ་ཡང་བྱང་ཆུབ་ལམ་ཉིད་དང་། །གཞན་ཕན་འགྲུབ་པའི་རེ་ཐག་ཆོད། །དཔེར་ན་ཧ་ལའི་དུག་ཆེན་དེ། །ཁོང་དུ་སོང་ན་འཆི་བ་ལས། །གསོན་པ་ཡོང་ཡེ་མི་སྲིད་བཞིན། །སྙིགས་མ་ལྔ་བདོར་གྱུར་པའི་དུས། །གསང་སྔགས་དམ་རྫས་ཤ་ཆང་ལ། །སྤྱོད་དུ་རུང་བའི་ཁུངས་སྨོས་ཏེ། །ཏིང་འཛིན་ཉམས་ཀྱི་དྲོད་མེད་པར། །ཤ་ཁྲག་ཆང་ལ་ཐམས་ཅད་སྦྱོར། །འདི་སྤངས་དམ་ཚིག་མེད་དོ་ཅེས། །ཆོས་བཞིན་སྤྱོད་རྣམས་ཐབས་ཀྱི་སྨོད། །དེ་འདྲ་བསྟན་པའི་མཐའ་རུ་འབྱུང་། །ཀྱེ་མ་ཀྱི་ཧུད་དམྱལ་བ་ལས། །འགྲོ་ས་མེད་དོ་སྙིང་རེ་རྗེ། །ཞེས་སོགས་རྒྱ་
ཆེར་གསུངས་སོ།། ༈ །།སྦྱིན་བདག་གི་ངོས་ནས་ཀྱང་། སྲོག་ཆགས་བསད་ནས་མཆོད་སྦྱིན་བྱེད་པ་དེ་ནི་ནམ་ཡང་མི་རུང་བའི་ཚུལ། མདོ་ལས་རྒྱལ་པོ་མཆོད་སྦྱིན་བྱེད་ཀྱི་སྐྱེས་རབས་སོགས་ལས་མང་དུ་གསུངས་ལ། རྒྱ་གར་དུ་མུ་སྟེགས་ཀྱི་ཡུལ་ཁམས་རྣམས་སུ་དབང་ཕྱུག་གི་རྟེན་ལ་རྭ་དང་མ་ཧེ་སོགས་བསད་པའི་ཤ་ཁྲག་གིས་མཆོད་སྦྱིན་བྱེད་པའི་སྲོལ་ཡོད་པ་ཀུན་ཏུ། སློབ་དཔོན་པདྨ། ཏེ་ལོ། ནཱ་ནོ། བིར་ཝ་པ། མི་ཏྲ་ཛོ་གི་སོགས་གྲུབ་ཐོབ་རྣམས་ཀྱིས་རྫུ་འཕྲུལ་སྣ་ཚོགས་པས་བཏུལ་ནས་སྲོག་གཅོད་ཀྱི་རྒྱུན་ཆད་པར་མཛད་ལུགས་སོ་སོའི་རྣམ་ཐར་ལས་བྱུང་མོད་ཅིང་། མདོ་དྲན་པ་ཉེར་བཞག་སོགས་ལས་ཀྱང་། ཤ་དང་ཆང་གི་སྦྱིན་པ་དང་། དུག་དང་མཚོན་ཆའི་སྦྱིན་པ་ལ་སོགས་དངོས་དང་བརྒྱུད་ནས་མི་དགེ་བར་འགྱུར་ཚུལ་དང་ཁྱད་པར་དུ་རབ་ཏུ་བྱུང་བའི་ ཆང་ཚུལ་སོགས་ དགེ་སྦྱོང་ལ་ཤ་ཆང་བྱིན་པའི་འབྲས་བུས་ནི་དམྱལ་བ་ངུ་འབོད་ཅེས་བྱ་བ་ཁྲོ་ཆུ་ཁོལ་མ་
ཁར་བླུགས་ཅིང་ཁོང་ནས་མེ་འབར་བའི་སྡུག་བསྔལ་མྱོང་དགོས་པར་གསུངས་པས་ན། དེའི་ཕྱིར་གང་ནས་གཞག་ཡང་དགེ་བའི་ཆེད་དུ་བསྙད་ནས་སེམས་ཅན་བསད་པ་དེས་ནི་གང་ལའང་ཕན་པའི་སྐབས་མི་སྲིད་པ་ལགས། ཡང་འདིའི་འཕྲོས་ཞར་དུ། དིང་སང་གི་བསོད་སྙོམས་པ་རྣམས་ཀྱིས་བསོད་སྙོམ་སློང་པར་ཐུབ་དབང་གི་སྐུ་སོགས་གདན་དྲངས་ནས་གསེར་སྐུ་ཕྱག་ནས་སུ་གྲགས་པ་ཞིག་བསྡུ་བའི་སྲོལ་སྣང་བ་འདི་དཀོན་མཆོག་གི་སྐུ་བླུད་དུ་འགྲོའམ་མི་འགྲོ་གསུངས་པ། དེ་ནི་ལོས་ཀྱང་འགྲོ་སྟེ། དཀོན་མཆོག་གི་དཀོར་དང་ལོག་འཚོའི་ཉེས་པ་གཉིས་ཀ་འགྱུར་བར་འགྱུར་ཏེ། དེ་ཡང་སྤྱིར་འཕགས་ཡུལ་སོགས་སུ་ནི་རབ་བྱུང་དང་རྣལ་འབྱོར་པ་ཐམས་ཅད་ཐབ་ཁ་མི་བཟུང་ཞིང་དངོས་པོ་གང་ཡང་བདག་ཏུ་མི་འཛིན་ཚེ། ཉིན་རེའི་འཚོ་བ་བསོད་སྙོམས་ཁོ་ན་ལ་བརྟེན་ཞིང་། སྦྱིན་བདག་རྣམས་ཀྱིས་ཀྱང་འབྲས་ཆན་ཚོད་མ་ཅུང་ཟད་རེ་ཕུལ་
བ་དེས་ཞག་རེའི་འཚོ་བ་མཛད་པར་གདའ་མོད་ཀྱི། འོ་སྐོལ་བོད་ཀྱི་ཆོས་པ་རྣམས་ཞིང་དང་རྐང་བཞི་ནོར་རྫས་ཁང་ཁྱིམ་ཡོ་བྱད་སོགས། མང་པོ་བདག་ཏུ་འཛིན་ཞིང་ཚོང་དང་བསོད་ནམས་གསོག་འཇོག་སོགས་ཁྱིམ་པ་རྣམས་དང་ཁྱད་མེད་དུ་བྱེད་པའི་སྲོལ་ངན་འདི་ལྟ་བུ་དར་བ་དང་། བསོད་སྙོམས་སུ་མིང་བཏགས་པ་འདི་ལ་ཡང་ཆོག་ཤེས་མེད་པར་ཐོབ་ཀྱིས་འཇལ་བའི་དབང་ཡོད་འཕྲོག་ཐེན་ནན་འཚིར་སྣ་ཚོགས་བྱེད་པའི་རྐྱེན་གྱིས། ཁྱིམ་པ་རྣམས་ཀྱང་བསོད་སྙོམས་པ་མཐོང་བ་ཙམ་གྱིས་སྔངས་སྐྲག་བྱེའུས་ཁྲ་མཐོང་བ་བཞིན་དུ་གྱུར་ཕྱིར། དཀོར་སྡིག་ལྷག་པར་ཆེ་བ་ཞིག་ནི་འབྱུང་བར་གོར་མ་ཆགས་ལ། ཁྱད་པར་གསེར་སྐུ་ལ་སྙད་ནས་སླར་ཟུར་དུ་སློང་བ་དེ། སྦྱིན་པ་པོ་རྣམས་རྟེན་དེ་ཉིད་ལ་དད་པས་ཕུལ་བ་ཡིན་ན་ནི། དེ་འོ་སྐོལ་གྱི་བཟས་ན་དཀོག་གི་དཀོར་ལ་འབགས་པར་འགྱུར་བ་སྟེ། དཀོན་གཉེར་བ་དག་གིས་མར་མེ་དང་ཞལ་ཟས་ཀྱི་
རྒྱུ་ཟློས་པ་དང་ཉེས་ཁྱད་མ་མཆིས་ལ། གལ་ཏེ་རྟེན་ལ་ཕུལ་བ་མ་ཡིན་པར་རྟེན་དེའི་སྐུ་ངོ་ལྟ་བུས་རང་རེ་ལ་སྦྱིན་པ་ཡིན་ནའང་། ལོག་འཚོ་ལྔའི་ནང་ནས་ཁ་གསག་དང་གཞོགས་སློང་གཉིས་ཀ་རུ་མི་འགྲོ་བའི་ཐབས་མི་འབྱུང་ཕྱིར་ནམ་ཀྱང་འདྲ་སྟེ། རྟེན་དེ་གདན་དྲངས་བའི་དོན་ནི་རང་ལ་ནས་ཀྱི་ཡོང་སྒོ་འབའ་ཤིག་དོན་དུ་གཉེར་བའི་ངན་གཡོ་མ་གཏོགས་བསམ་པ་དང་དགོས་པ་གཞན་མ་ཡིན་པའི་ཕྱིར་རོ། །དེ་བས་ན་ད་ལྟའི་གང་ཟག་མཆོག་དམན་སུ་ཡང་དཀོར་དང་ལོག་འཚོ་ལ་ཉམས་ང་བ་སྐྲའི་ཉག་མ་བརྒྱར་བཤགས་པའི་ཆ་ཙམ་ཡང་མི་བྱེད་ཅིང་། སྟོན་པའི་བཀའ་ལ་བྲག་ཆའི་སྒྲ་ཙམ་དུ་ཡང་བརྩི་བའི་སྲོལ་མེད་པའི་དུས་འདི་འདྲར། མི་རྒན་བདག་ཁ་འདྲས་བསམ་པ་བཟང་ཁུས་ཀྱི་ཅི་ཙམ་བཤད་ཀྱང་གཞན་ལ་ཕན་པའི་དོན་དུ་འགྱུར་བའི་ནུས་པ་མེད་པར་མངོན་སུམ་ཚད་གྲུབ་ཏུ་གདའ་
ལགས་ཚེ། ཚེ་རབས་གཞན་དུ་ངག་གི་བདེན་ཚིག་གྲུབ་ནས་ཅི་སྨྲས་གཞན་ལ་ཕན་ནུས་པར་སྨོན་ལམ་འདེབས་པ་ལས་ཐབས་གཞན་མ་མཆིས་ལགས།། ༈ །།ཡང་དྲིས་ལན་གྱི་སྐོར་རེ་ཤིག་འབུལ་འོས་བདག་གི་ནད་ཁམས་དང་གཡེང་རྐྱེན་གྱིས་འབུལ་མ་ཐུབ་པ་ཕྱིས་སུ་ཕུལ་བ་ནི། དེ་ཡང་ཉིད་ཀྱི་བཀའ་ཕེབས་སུ། དགེ་བའི་བཤེས་གཉེན་སྐྱེས་བུ་དམ་པ་ཚུལ་ལྡན་དང་བདུད་སྤྲུལ་ཚུལ་འཆོས་མཁན་གཉིས་དབྱེ་བ་ཕྱེས་བཀའ་ཞིང་། མཁས་ཚུལ་གྲུབ་ཚུལ་སོགས་ཡང་དག་ཡིན་མིན་དཔྱད་དཀའ་བས་མཚན་ལྡན་གྱི་རྣམ་འདྲེན་བརྟེན་རུང་གང་ཡིན་ཤེས་དཀའ་བ་སོགས་ཀྱི་འཕྲོས་དོན་ཞིབ་རྒྱས་སྩལ་བའི་ཆ་ལ། དེ་ལ་སྤྱིར་ཐོས་པ་ཆེ་བ་ཙམ་ལ་ནི་དམ་པའི་རྟགས་སུ་མ་ངེས་པ། ལེགས་སྐར་དང་། སྡེ་སྣོད་གསུམ་པའི་གཏམ་རྒྱུད་སོགས་མང་ཞིང་མུ་སྟེགས་རིག་པའི་གནས་མཐའ་དག་ལ་མཁས་ཤིང་རྫུ་འཕྲུལ་གྲུབ་པ་ཡང་ཆེས་མང་མོད་ཀྱི། ཡང་དག་པའི་མཁས་
པ་ནི་ཆོས་དོན་ཇི་ལྟ་བར་རྟོགས་ནས་དེ་དག་རང་རྒྱུད་ལ་འཁོལ་བ་ཞིག་ལ་བརྗོད་དགོས་ཀྱི། ཐ་སྙད་ཚིག་གི་ཐོས་པ་མང་བ་ཙམ་ལ་ནི་མ་ཡིན་ཏེ། ལང་དཀར་གཤེགས་པའི་མདོ་ལས། བློ་གྲོས་ཆེན་པོ། མང་དུ་ཐོས་པ་ཅེས་བྱ་བ་ནི་ཐོབ་པ་ལ་བྱའི་ཚིག་ཐོས་པ་ལ་ནི་མི་བྱའོ། །ཞེས་གསུངས་པ་ལྟར་དང་། གང་ཐོས་པ་དེ་ཡང་རང་གི་རྒྱུད་ལ་འབྱོར་ཞིང་ལག་ལེན་ལ་འཁེལ་བའམ། རང་སྤྱོད་དང་མཐུན་པ་ཞིག་ལ་མཁས་པར་འཇོག་དགོས་ལ། བཙུན་པ་དང་བཟང་བའི་མཚན་ཉིད་ཀྱང་དེ་དང་མཚུངས་ཤིང་། གྲུབ་རྟགས་རྫུ་འཕྲུལ་འོད་དང་ཕྱག་ཞབས་ཀྱི་རྗེས་མངོན་མཁྱེན་སོགས་ཐམས་ཅད་ཀྱང་གང་ཟག་དེ་ཀའི་ལྟ་སྤྱོད་དང་། གྲུབ་རྟགས་མཐུན་པ་ཞིག་ལ་ཡིད་བརྟན་འཆའ་བ་ལས། དེ་མ་མཐུན་པའི་གྲུབ་རྟགས་རྫུ་འཕྲུལ་ནི་མི་མ་ཡིན་གྱིས་རློམས་པའམ། རྫས་འཕྲུལ་ལམ། ཟོག་གི་བྱེ་བྲག་ཞིག་ལས་མ་འདས་
ཏེ། རྗེ་དུས་གསུམ་མཁྱེན་པའི་ཞལ་ནས། གྲུབ་ཐོབ་མང་སྟེ་རྟོགས་ལྡན་ཉུང་། །རྟོགས་པ་མེད་པའི་གྲུབ་ཐོབ་དེ། །གྲུབ་རྟགས་མང་ཡང་འཁོར་བའི་རྒྱུ། །ཞེས་གསུངས་པ་ལྟར་ཡིན་ཕྱིར། གྲུབ་རྟགས་ཉམས་རྟོགས་དང་འབྲེལ་བ་ཞིག་གལ་ཆེ་ཞིང་། ཐོན་མོང་ཐེག་པ་ནས་གསུངས་པའི་ཤིན་སྦྱང་ཐོབ་རྟགས་དང་། གསང་སྔགས་ཀྱི་གྲུབ་རྟགས་གཉིས་ཀ་རང་པའི་ཉམས་རྟོགས་དང་མཐུན་དགོས་ལ། ལར། གྲུབ་རྟགས་ཡང་དག་པ་ནི་བདག་གིས་སྐལ་བཟང་དགའ་བྱེད་ཀྱི་མཇུག་བསྡུར་བཤད་པ་ལྟ་བུ་ལ་ངོས་འཛིན་ནོ།། ༈ །།སྐྱེས་ཆེན་དམ་པ་དང་འདྲ་མིན་གྱི་དབྱེ་བའང་། སྤྱིར་ནི་ལྐོག་གྱུར་གཟིགས་པ་དག་གི་སྤྱོད་ཡུལ་ལས། རང་ཅག་སོ་སྐྱེས་ག་ལ་ཤེས་ཏེ། བཅོམ་ལྡན་འདས་ཀྱིས་ཀྱང་། འོད་སྲུངས། ངའམ་ང་དང་འདྲ་བས་གང་ཟག་དང་ཆོས་ཀྱི་ཚད་བཟུང་བར་བྱའི་གང་ཟག་གིས་གང་ཟག་དང་ཆོས་ཀྱི་ཚད་བཟུང་བར་མི་བྱ་སྟེ། ལྟུང་བར་འགྱུར་བའི་ཕྱིར་རོ། །ཞེས་གསུངས་ནའང་། ཕྱིས་ཀྱི་མཁས་རློམ་རྣམས་ཆོས་
དང་གྲུབ་མཐའ་ལ་ཡིན་མིན་གྱི་དགག་རྩོད་མང་པོ་མཛད་སྲོལ་དར་བ་འདི་དག་ཡ་ང་བར་ཟད་ལ། རྒྱལ་སྲས་ཐོག་མེད་པས་གྲུབ་མཐའ་ལ་ཡིན་མིན་ཁ་ཚོན་མི་མཛད་པའི་དམ་བཅའ་ལ་ནི་སྐྱབས་སུ་མཆི་བར་གདའོ། །ཁྱད་པར་དུའང་སྐྱེས་ཆེན་དམ་པ་ཚུལ་མཐུན་ཡིན་མིན་ཡང་གོང་དུ་སྨོས་པ་ལྟར། མཛད་པ་རྣམ་པར་རྒྱལ་བའི་བཀའ་དང་མཐུན་པ། དེ་ཡང་ངོ་ལྐོག་དང་ཚུལ་འཆོས་སོགས་བཅོས་མ་མ་ཡིན་པ་ལ་རང་གཞན་སྦྱོར་བ་ཞིག་ཡིན་ན་དམ་པ་དང་། དེ་ལས་ཟློག་པ་ནི་དམ་པ་མ་ཡིན་པར་ངེས་ཤིང་། ཡང་། ཡེ་ཤེས་ཀྱི་གཟིགས་པ་འཁྲུལ་མེད་མངའ་བདག་གི་ལུང་ལ་ཡིད་བརྟན་དུ་རུང་ཕྱིར། རྙིང་ལུགས་པ་རྣམས་ནི། སྐྱེས་ཆེན་དང་བདུད་སྤྲུལ་ཇི་ལྟར་འབྱུང་ཚུལ་གུ་རུའི་ལུང་བསྟན་ཟོལ་མེད་ལ་ཡིད་གཏོད་པ་ལགས།། ༈ །།ཡང་ཉིད་ཀྱི་ཕེབས་སྒོར། ཐུབ་པའི་བསྟན་པ་ནི་ངེས་
འབྱུང་དང་ཞེན་ལོག་ཁོ་ནས་ཁྱད་པར་དུ་འཕགས་པར་བཤད་ན། གངས་ཅན་འདིར་བསྟན་འཛིན་ཆེན་པོ་རྣམས་རང་ཕྱོགས་ཁོ་ན་ལ་སྟོབས་འབྱོར་མངའ་ཐང་སྒྲུབ་ཅི་ཐུབ་ཀྱི་སྒོ་ནས་འཕྲལ་ཡུན་བསྐྱངས་སྲོལ་འདི་གང་ཡིན་ནམ། གསུང་བ། དེ་ནི་སྤྱིར་ཡང་འཁོར་བར་འཁྱམས་པའི་རྒྱུ་དང་རྩ་བ་ནི་བདག་འཛིན་ཡིན་ཕྱིར། རྒྱལ་བས་མདོ་རྒྱུད་ཐམས་ཅད་དུ་བདག་མེད་ཀྱི་དོན་འབའ་ཤིག་སྟོན་པར་མཛད་ན། གྲུབ་མཐའ་དང་ཆོས་ལུགས་ཐ་དད་པའི་རུ་འཛིན་དང་ཆགས་སྡང་བྱེད་པ་ནི་སོ་སྐྱེའི་མཚན་ཉིད་དང་སྙིགས་དུས་ཀྱི་རྣམ་འགྱུར་ལས་མ་འདས་ལ། འོན་ཀྱང་བོད་ཡུལ་གཅིག་པུར་མ་ཟད་འཕགས་ཡུལ་ཉིད་དུ་ཉན་ཐོས་སྡེ་པ་བཅོ་བརྒྱད་དགྱེས་པ་སོགས་ཀྱང་། སྔོན་རྒྱལ་པོ་ཀྲྀ་ཀཱིའི་རྨི་ལམ་གྱི་རས་ཡུག་གིས་ལུང་སྟོན་པར་མཛད་ཅིང་། ཤཱཀ་ཐུབ་ཉིད་ཀྱི་ཕྲིན་ལས་ཀྱི་རྟེན་འབྲེལ་དུ་གསུང་མོད་ཀྱི། བསྟན་པ་འཛིན་པའི་གང་ཟག་རྣམས་ཞེན་ལོག་ངེས་འབྱུང་སོགས་
སྦྱང་ཡོན་ལས་ཕྱིན་ཅི་ལོག་ཏུ་སྤྱོད་པར་འགྱུར་བ་ནི་ཐུབ་པ་ཉིད་ཀྱིས་ཀྱང་ལུང་དུ་བསྟན་མོད་དེ། ཏིང་འཛིན་རྒྱལ་པོའི་མདོར། ཕྱི་མའི་དུས་ན་དགེ་སྦྱོང་མང་པོ་དག བཟའ་བཏུང་གླུ་གར་ཉོ་ཚོང་རྟག་ཏུ་བསྟེན། །ནོར་དང་འབྲུ་ལ་སྙིང་པོར་འདུ་ཤེས་བྱེད། །ཅེས་པ་ནས། བྱིས་པ་དེ་དག་རྟག་ཏུ་ཐ་མལ་གནས། ཞེས་སོགས་གསུངས་པ་ཉིད་ཇི་ལྟ་བར་ཐོག་ཏུ་བབས་པ་དང་། བླ་མ་མཁན་སློབ་རྣམས་ཀྱང་རང་ཕྱོགས་ཀྱི་སྡེ་དང་ཆོས་བྲིད་འབྱོར་པ་ཅི་འཕེལ་ཅི་རྒྱས་ཡུན་དུ་ཅི་གནས་མ་གཏོགས་བསྟན་པ་སྤྱི་ལ་རྩིས་སུ་མི་བྱེད་པ་ཡང་དག་འཛིན་གྱི་ནུས་མཐུ་དང་། དེ་ལ་བརྟེན་ནས་འཇིག་རྟེན་གྱི་རྒྱལ་པོ་དག་གི་ལད་མོ་བྱས་ཏེ། ཁྲི་གདན། གཞོན་པ། བེར་གོས། གཟི་བརྗིད། ལོངས་སྤྱོད། འཁོར་འདུ་སོགས་ནན་གྱིས་སྒྲུབ་ཅིང་། དེ་དག་བཟང་ངན་གྱི་རྗེས་སུ་འབྲང་བས་བླ་མ་བཟང་ངན་ནམ། གདན་ས་མཐོ་དམན་ཡིན་པ་སྐད་ཀྱིས། ཕན་ཚུན་ཕྱག་དང་བཀུར་བསྟི་
ཕྲ་མོ་ཙམ་གྱི་དོན་ལ་ཡང་ང་ཆེ་དང་འགྲན་རྩོད་ཤི་ལ་ཐུག་ཐུག་བྱེད་པ་འདི་ལྟ་བུ་དག་ནི་དགའ་རབ་དབང་ཕྱུག་གི་བྱིན་རླབས་དང་། བློན་པོ་གཡེང་བྱེད་འཁྲུག་བྱེད་སོགས་ཀྱི་མཐུ་ལས་འོས་ཅི་ཞིག་ཡོད་དེ། སྙིགས་མ་ལྔ་བདོའི་རང་ཚུལ་འབའ་ཤིག་ལགས་མོད་ཀྱི། དེ་ལྟར་མིན་ན་ཐུབ་པ་ཉིད་ཀྱང་ཟས་གཙང་གི་རྒྱལ་ས་སྤོང་ག་དགོས་ཤིང་། ཞབས་ཐང་དུ་ལྷུང་བཟེད་གསིལ་བྱེད་བསྣམས་ནས་བསོད་སྙོམ་དུ་གཤེགས་པ་ལས། རྟ་དང་གླང་པོ་ཤིང་རྟའི་བཞོན་པ་བྱེ་བ་ཕྲག་དང་། ཁང་བཟང་ཕོ་བྲང་གི་དཔལ་འབྱོར་ལོངས་སྤྱོད་ལ་བརྟེན་ནས་འགྲོ་དོན་མཛད་ཆོག་མོད་ཅིང་། གཞན་ཡང་གདན་ས་མཐོ་དམན་ཁོ་ན་ལ་ལྟོས་དགོས་པ་ཞིག་ཡིན་ན་རྡོ་རྗེ་གདན་དང་བྱ་རྒོད་སྤུངས་རི་སོགས་སུ་དིང་སང་སུ་འདུག་པ་དེས་འཛམ་གླིང་ཁ་ལོ་བསྒྱུར་བར་འོས་མོད་ཀྱི། དེ་ལྟ་ཡང་། མ་ཡིན་པའི་ཕྱིར། དེས་ན་འདི་ཐམས་ཅད་བསྐལ་པ་སྙིགས་མའི་རང་ཚུལ་ལས་གཞན་མ་ལགས་མོད། མདོ་རྒྱུད་དག་ལས་ནི་བསླབ་པ་རྒས་རིམ་དང་
ཡེ་ཤེས་ཀྱིས་རྒན་པོ་སོགས་གོང་དུ་བསྐུར་བར་གསུངས་པ་ལས་གཞན་མི་འབྱུང་ལ། སྐུ་ཆེ་ཆུང་ངམ། གདན་ས་མཐོ་དམན་སོགས་འགྲན་རྩོད་བྱེད་པ་འདི་དག་ནི་འཇིག་རྟེན་གྱི་དཔེ་ཆོས་ལ་བཀབ་པར་ཟད་དོ། །གལ་ཏེ་གདུལ་བར་བྱ་བའི་ཡུལ་དེ་དག་ཚུལ་དང་ཐབས་དེ་ལྟ་བུས་འདུལ་དགོས་པའི་དུས་དང་སྐབས་དང་ཚོད་དང་དགོས་པ་ཇི་ལྟ་བར་མཁྱེན་པ་ཞིག་ཡིན་ན་ནི། སྔོན་སྟོན་པ་ཉིད་གྲོང་ཁྱེར་བུ་རམ་ཤིང་འཕེལ་དུ་གཤེགས་ཚེ་དགྲ་བཅོམ་རྣམས་ཆ་བྱད་སྣ་ཚོགས་པའི་རྫུ་འཕྲུལ་གྱི་བཀོད་པས་ཡུལ་ཁམས་དེ་ཆོས་ལ་བཀོད་པར་མཛད་པ་དེ་ལྟ་བུ་ཞིག་ཡིན་དགོས་སོ། །ད་ལྟ་ནི་དེ་ཡང་མ་ཡིན་པར་རབ་བྱུང་སོ་སྐྱེའི་བླ་མ་མཁན་སློབ་རྫུ་འཕྲུལ་ཐོབ་པ་ལྟ་ཞོག་རྒྱུན་བཞུགས་ཀྱི་ཡོན་ཏན་ཙམ་ཡང་མེད་པ་ཐམས་ཅད་ཀྱིས་ཆེ་འགྱིང་གཟི་བརྗིད་སྟོབས་གང་འཛོམ་ཅི་སྙེད་སྒྲུབ་དོན་གཉེར་བ་འདི་དག་ནི་ཡང་དག་པའི་བསྟན་
དང་བསྟན་འཛིན་གྱི་མཚན་ཉིད་དུ་མི་འགྱུར་ཏེ། དེ་ཅིའི་ཕྱིར་ན་རྒྱལ་བའི་བཀའ་དང་མ་མཐུན་པས་སོ། །ཡང་། གལ་ཏེ་སྔོན་རྒྱལ་བུ་རྒྱལ་བྱེད་དང་མགོན་མེད་ཟས་བྱིན་གཉིས་ཀྱི་རྒྱལ་བྱེད་ཚལ་ཕུལ་ནས་གཙུག་ལག་ཁང་བཞེངས་ཚེ་མུ་སྟེགས་རྣམས་ཀྱི་མཐུ་དང་རྫུ་འཕྲུལ་སྣ་ཚོགས་པས་བར་ཆད་བྱས་པ་ན། སྟོན་པས་ཤཱ་རིའི་བུ་ལ་བཀའ་བསྒོ་དང་བྱིན་རླབས་མཛད་དེ། མུ་སྟེགས་པས་རྫུ་འཕྲུལ་གང་བསྟན་གྱི་གཉེན་པོར་ཤཱ་རིའི་བུས་ཀྱང་། མེ་ལ་ཆུ། དུག་སྦྲུལ་ལ་ཕག་རྒོད། ཐོག་སེར་ལ་རྡོ་རྗེའི་གུར་སོགས་ཀྱིས་བཏུལ་བར་མཛད་པ་དེ་ལྟ་བུ་དིང་སང་གི་བསྟན་པར་མིང་བཏགས་པའི་གྲུབ་མཐའི་ཕྱོགས་འཛིན་དགག་སྒྲུབ་འཐབ་རྩོད་བཤིག་བཅོམ་བྱེད་པ་འདི་དག་ནམ་ཡང་མཚུངས་པའི་གནས་མེད་དོ། །དེ་བས་ན་བསྟན་པའི་དོན་དངོས་སུ་འགྲོ་མི་འགྲོ་ནི་རྒྱལ་བའི་བཀའ་དང་མཐུན་མི་མཐུན། དམ་པའི་ཆོས་རྣམ་དག་བྱེད་མི་བྱེད་ལ་བསྟན་
པ་ཡིན་མིན་དུ་དབྱེ་བ་ལས། ཆོས་བརྒྱུད་དང་གྲུབ་མཐའ་རང་ཕྱོགས་གཞན་ཕྱོགས་ཀྱི་ཐང་འཐེན་བྱེད་པ་ལ་བསྟན་དོན་དུ་མི་བརྗོད་དེ། དཔལ་གཙུག་ལག་འཕྲེང་བས། ཆོས་ལུགས་ལ་བཟང་ངན་མ་མཆིས་ཏེ། །ཆོས་མིན་ཞིག་འདུག་ན་གར་ཡང་ཕུང་། །ཞེས་གསུངས་པ་ཉིད་ལགས་སོ།། ༈ །།ཡང་ཉིད་ཀྱིས། རང་རང་གི་ཆོས་ལུགས་སོགས་རང་ཕྱོགས་ཁོ་ནའི་བསྟན་པ་འཛིན་སྐྱོངས་སྲུང་སྤེལ་མཛད་པ་དེ་བདུད་ཀྱི་མཐུ་ཡིན་ན། བསྟན་འཛིན་གྱི་སྐྱེས་ཆེན་དམ་པ་རྣམས་གྲངས་མེད་བསྐལ་མང་གི་གོང་ནས་ཐུགས་བསྐྱེད་སྨོན་ལམ་མཛད་པ་ཡང་དགོས་མེད་དུ་ཐལ་བ་འདྲ་སྙམ་པའི་རྣམ་རྟོགས་ཐེ་ཚོམ་བྱུང་གསུང་བ།། ༈ །།དེ་ལ་སྐྱེས་ཆེན་དམ་པ་ཡིན་ངེས་ཤེས་དག་ལ་ནི་དོན་དམ་པར་རང་གཞན་ཕྱོགས་ལྷུངས་ཆགས་སྡང་སོགས་ཀྱི་དྲི་མའི་ཆ་ཙམ་ཡང་ག་ལ་མཆིས་ཤིང་། ཐུགས་བསྐྱེད་སྨོན་ལམ་གྱི་འབྲས་བུ་མི་བསླུ་
བས་གདུལ་བྱ་འདུལ་བའི་ཕྲིན་ལས་ཅན་དུ་གྱུར་པ་ཡིན་མོད་ཀྱི། འོན་ཀྱང་གནས་སྐབས་ལྟར་སྣང་ཙམ་དུ་གདུལ་བྱའི་ཡུལ་དང་རིས་མཐུན་ལྟ་བུར་བསྟན་པས་གདུལ་བར་མཛད་པ་ནི་གདུལ་ཡུལ་རང་གི་ངོ་སྐལ་གྱི་ནུས་པར་ཟད་དེ། ཇི་ལྟར་ནོར་བུ་བཻ་ཌཱུརྱའམ། མན་ཤེལ་ཤིན་ཏུ་དྭངས་པ་དག་རང་ཉིད་ལ་ཁ་དོག་ཐ་དད་དུ་གྲུབ་པ་མེད་ཀྱང་། ཆུ་དངས་པའམ་དར་ཁ་དོག་ཐ་དད་པའི་སྟེང་དུ་བཞག་ན་དེའི་ཁ་དོག་ཏུ་འགྱུར་ཡང་རང་ངོ་ལ་གོས་པ་མེད་པའི་དཔེ་བཞིན། སངས་རྒྱས་ལ་འཁྲུལ་པ་མི་མངའ་ཡང་སེམས་ཅན་གྱི་ཁམས་དང་མཐུན་པར་སྤྱོད་པས་འདུལ་བ་ནི་ངོ་མཚར་གྱི་མཛད་པ་ཡིན་ལ། སྐྱེས་བུ་དམ་པ་མ་ཡིན་པ་རང་ལ་སྨིན་པར་གཞན་གྱི་འདྲེན་པར་རློམས་ཞིང་གྲུབ་མཐའི་ཞེན་ཕྱོགས་དང་ཆགས་སྡང་ཀུན་སློང་སྤེལ་བ་དག་ནི་བདུད་ཀྱིས་ནུས་པ་ལས་འབྱུང་བར་གོར་མ་ཆགས་ཏེ། བསྟན་པའི་སེལ་དུ་འགྱུར་ཞིང་རྗེས་
འཇུག་ལོག་ལམ་དུ་ཁྲིད་པའི་ཕྱིར་རོ། །ཡང་ཉིད་ཀྱིས། ངེས་དོན་དུ་འཁོར་འདས་ཀྱི་ཆོས་ཐམས་ཅད་སེམས་ཉིད་ཁོ་ནའི་བྱེད་ལས་ཡིན་པར་གསུངས་ན། དབོན་སྟོན་སྐྱེར་སྒང་པའི་བྲུལ་གཏོར་གྱི་ལོ་རྒྱུས་སུ། སྦྱིན་བདག་ཞིག་གི་སར་ཕེབས་པས་ཐུགས་དམ་གྱི་རྩལ་དང་ཉམས་རྟོགས་ཐམས་ཅད་འགྲིབ་ཅིང་། དངོས་ཉམས་རྨི་ལམ་ཉེས་ལྟུང་སྡིག་སྒྲིབ་ཀྱི་རྟགས་མཚན་མི་ཟད་པ་མང་པོ་བྱུང་བ། སྤྱན་རས་གཟིགས་ལ་གསོལ་བ་བཏབ་ཅིང་ཞུས་པས། ཁྱེད་ཀྱི་སྦྱིན་བདག་གི་སར་ཕྱིན་དུས་ཀྱི་ཞབས་ཏོག་ཆ་རྐྱེན་རྣམས་གསུང་རབ་བཙོངས་པའི་དཀོར་ཡིན་པས་དེའི་ཉེས་པས་ཕོག་པའི་སྐྱོན་དུ་འདུག་པས་ན། དེ་སྦྱོང་བའི་ཐབས་སུ་བྲུལ་གཏོར་འདི་ལ་བརྩོན་པར་གྱིས་ཤིག་གསུངས་ནས་གནང་བའི་ལོ་རྒྱུས་ལྟར་ན། གསུང་རབ་བཙོངས་པའི་དཀོར་བླུད་ཟའོ་སྙམ་པའི་བག་ཆགས་ཙམ་ཡང་ཐུགས་ལ་མེད་པ་ལ་ཉེས་པ་དེ་འོང་མི་
ཐང་ནའང་དེ་ལྟར་བྱུང་འདུག་པ་ལ་དཔག་ན་སེམས་ཀྱི་བྱེད་ལས་གཅིག་པུ་མ་ཡིན་པ་འདྲ་སྙམ་པའི་ཐེ་ཚོམ་བྱུང་གསུང་བ།། ༈ །།དེ་ནི་སྤྱིར་ངེས་དོན་མ་ཡིན་དྲང་དོན་ཡིན་ཏེ། དོན་དམ་པར་ནི་སྐྱེར་སྒང་པ་ཁོ་རང་སྤྱན་རས་གཟིགས་དངོས་ཡིན་ཕྱིར། སྙིགས་དུས་ཀྱི་གང་ཟག་དཀོན་མཆོག་གི་དཀོར་ལ་མི་འཛེམ་པ་རྣམས་བག་མེད་པའི་སྤྱོད་པ་ལས་བཟློག་ཕྱིར་དེ་ལྟར་བསྟན་མོད་ཀྱི་ཡང་། ངེས་དོན་ལྟར་ན་ཐམས་ཅད་སེམས་ཀྱི་བྱེད་ལས་ཁོ་ན་ཡིན་པའི་དཔེ་ཡང་། མཉམ་མེད་སྒམ་པོ་པ་ཞལ་བཞུགས་སྐབས་སུ་རྒྱ་སྒོམ་ཆོས་གྲགས་ཀྱིས་ཤེར་ཕྱིན་བརྒྱད་སྟོང་པ་བཙོངས་པའི་རིན་གྱི་ཇ་བཏུང་པས་ཕྱག་རྒྱ་ཆེན་པོའི་ཉམས་རྟོགས་དང་ལམ་རྟགས་ཀྱི་ཡོན་ཏན་ཐམས་ཅད་འགྲིབ་ནས་དེའི་ཚུལ་མཉམ་མེད་རིན་པོ་ཆེ་ལ་ཞུས་པས། ཁྱོད་ཀྱི་དཀོན་མཆོག་གི་དཀོར་ལ་མ་འབགས་སམ་གསུངས། གོང་གི་ཇའི་ལོ་རྒྱུས་ཞུས་ཚེ། འོ་ན་སྐྱོན་ཆེ། ད་ཁྱོད་ཀྱིས་དེའི་སྒྲིབ་སྦྱོངས་ལ་བརྒྱད་སྟོང་གླེགས་བམ་དེ་ལས་མི་ཞན་
པ་ཅིག་བཞེངས་ཤིག་གསུངས་ནས། ཁོས་དེའི་གྲབས་ཡུལ་བྱེད་པའི་བར་སྐབས་ཕྱག་ཆེན་བསྒོམ་པའི་དྲན་སྣང་ཞིག་ལས། སྣང་སྲིད་འཁོར་འདས་ཐམས་ཅད་རང་སེམས་ལས་ནི་འདའ་པ་མི་འདུག །སེམས་ཀྱི་གནས་ལུགས་ཕྱག་རྒྱ་ཆེན་པོ་ལ་ནི་སྒྲིབ་པ་གསོག་རྒྱུ་བསག་མཁན་སྦྱང་རྒྱུ་སོགས་གདོད་ནས་མ་གྲུབ་པར་གདའ་སྙམ་ནས། དྲུང་དུ་ཕྱིན་ནས་དེ་ལྟར་ཞུས་པས། ད་འོ་ན་ཁྱེད་རང་གླེགས་བམ་བཞེངས་རྒྱུའི་གྲབ་ཡུལ་བཤོམ་ལ་ཕྱག་ཆེན་དེ་ཀ་སྒོམ་ཤིག་གསུངས་ནས། གང་ཞིག་འགྱོད་ཚང་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་མཐོང་ན་རྣམ་པར་གྲོལ། །དེ་ནི་འགྱོད་ཚང་མཆོག་ཡིན་ནོ། །ཞེས། མ་སྐྱེས་དགུའི་འགྱོད་བསམ་གྱི་མདོའི་ལུང་འདྲེན་ཡང་གནང་ནས་བསྒོམ་པས་ཁོ་གྲོལ་བ་ཐོབ་པ་བཞིན་ཏེ། དྲང་ངེས་ཀྱི་སྐབས་ཐོབ་ཐ་དད་པའི་རྒྱུ་མཚན་དེ་ལྟར་ལགས།། ༈ །།གཞན་ཡང་
ཉིད་ཀྱིས། དགེ་སྡིག་ཐམས་ཅད་སེམས་ཀྱི་བྱེད་ལས་གཅིག་པུ་ཡིན་པར་སོང་ན། སྔ་སོར་བརྟན་བཞུགས་ཀྱི་འཕྲོས་དོན་ལ་བྱུང་བ་བཞིན། གསར་རྙིང་གཉིས་ཀའི་ཆོག་ཞུང་དག་གི་མཇུག་ཏུ་གཏོར་མནན་ལ་གཏོར་གཞོང་ཁ་སྤུབས་པའི་འོག་ཏུ་ཡི་གེ་ཧཱུྃ་བྲིས་པའི་ཁར་རྟ་བྲོ་བྱེད་པར་བཤད་པ་དེ་འགོང་གཡུག་ཏུ་འགྲོའམ་མི་འགྲོ་དང་། དེ་བཞིན་དུ། མནན་པ་བྱེད་པ་རྣམས་ཀྱང་འགོང་གཡུག་ཏུ་འགྱུར་མི་འགྱུར་དང་། མངོན་སྤྱོད་ཀྱི་ལས་མཐའི་གཞུང་འགའ་ཞིག་ལས། དགྲ་ལ་ཅིས་ཀྱང་མཐུ་རྟགས་མ་འཐོན་ན་ཁོའི་འགྲིམ་ལམ་གྱི་འོག་ཏུ་དཀོན་མཆོག་གི་རྟེན་གསུམ་སྦས་ན་ཁོའི་བསོད་ནམས་འཕྲལ་དུ་ཟད་ནས་ཐོན་པར་བཤད་སྣང་བ། སེམས་ཀྱི་བྱེད་ལས་ཡིན་ན་ཕ་རོལ་པོ་དེ་ལ་རྟེན་གསུམ་དེར་ཡོད་པའི་སྣང་བ་གང་ཡང་མེད་ཚེ། འགོངས་པའི་ཉེས་པ་ཡང་འོང་མི་ཐང་ལ། སྣང་བ་མེད་ཀྱང་འགོངས་པའི་ཉེས་པ་ཡོད་ན་ནི་སེམས་ཀྱི་
བྱེད་ལས་མ་ཡིན་པར་ཐལ་ཞིང་། ལར་ནས་བསྟན་པའི་སྒོར་ཞུགས་ཕྱིན་ཆད་སྐྱབ་སྡོམ་ནས་བཟུང་སྟེ་དཀོན་མཆོག་གསུམ་གྱི་རྟེན་ཚལ་བུའམ་ཆག་དུམ་ཙམ་ལའང་འགོང་གཡུག་སོགས་མ་གུས་པ་སྤངས་ཤིང་ཕྱག་མཆོད་བཀུར་བསྟི་བྱ་དམ་ཚིག་གསུངས་ན། མངོན་སྤྱོད་ཀྱི་དགོངས་པ་བསྟན་དགྲ་སྒྲོལ་བ་ལ་དགོངས་པ་ལོས་ཡིན་ལ། བྱེད་པ་པོ་ཡང་ཐེག་ཆེན་བྱང་སེམས་དང་གསུམ་ལྡན་རྡོ་རྗེ་འཛིན་པ་ཅིག་དགོས་མོད་ཀྱི། བསྟན་པའི་སྙིང་པོ་ནི་དཀོན་མཆོག་གསུམ་ཡིན་ཕྱིར། དེའི་ཆེད་དུ་དཀོན་མཆོག་ས་འོག་ཏུ་སྦེད་པ་དེ་ནི་ཕ་མའི་དོན་དུ་ཕ་མ་ཉིད་གསོད་པ་དང་མཚུངས་ཤིང་། མུ་སྟེགས་པ་དཀོན་མཆོག་ལ་དགྲ་རུ་བལྟ་བས་ཀྱང་དཀོན་མཆོག་གི་རྟེན་ལ་དེ་ལས་ལྷག་པའི་གནོད་པ་ཞིག་བྱེད་མི་སྲིད་པ་དང་། མངོན་སྤྱོད་བྱེད་པོ་དེ་ཡང་སྐྱབས་སྡོམ་ཡན་གྱི་དམ་སྡོམ་ཐམས་ཅད་མིང་གི་ལྷག་མར་བྱས་པར་ཟད་ཕྱིར། དེས་ན་
འདི་སྐོར་རྣམས་ལ་ཐེ་ཚོམ་གྱི་རྟོག་པ་མུ་མེད་པ་ཞིག་བྱུང་གསུངས་པ་ལ། ལན་དུ་ཕུལ་བ། དེ་ལ་སྤྱིར་ཐམས་ཅད་སེམས་ཀྱི་བྱེད་ལས་དང་། སེམས་སྟོང་པ་ཉིད་ཡིན་ཚུལ་གྱི་སྒྲོས་སོགས་ནི་ངེས་དོན་འབའ་ཤིག་དང་། མངོན་སྤྱོད་སོགས་སྤྲོས་བཅས་མཐའ་དག་ནི་དྲང་དོན་ཁོ་ན་ཡིན་ཕྱིར་དྲང་ངེས་རྣམས་དབྱེ་ཕྱེད་དགོས་ལ། བསྟན་པ་བསྲུང་ཕྱིར་མངོན་སྤྱོད་གསུངས་ཤིང་བྱེད་པ་པོ་ཡང་ཐེག་ཆེན་བྱང་སེམས་དགོས་མོད་ཀྱང་། ངེས་དོན་ཕྱག་རྫོགས་འབའ་ཤིག་སྒོམ་མཁན་གྱིས་ནི་མངོན་སྤྱོད་བྱ་དོན་ཡང་མ་མཆིས་ལ། དྲང་དོན་ཉིད་ལའང་ཐམས་ཅད་སེམས་ཀྱི་བྱེད་ལས་ཡིན་པའི་གནད་ཀྱིས་ལས་ཚོགས་གང་དང་གང་བྱེད་ཀྱང་དམིགས་པས་ཁ་བསྒྱུར་བར་བཤད་པ་དང་། དེའི་དབང་གིས། གཏོར་མནན་སྐབས་ཀྱི་ཧཱུྃ་ལ་ནི་བདག་ཉིད་ལྷའི་རྣལ་འབྱོར་དང་ལྡན་ཕྱིར་འགོང་གཡུག་གི་ཉེས་པ་མི་ཕོག་ཅིང་། མནན་པའི་སྐབས་སུ་ཡང་འབྱུང་བ་རིམ་
བརྩེགས་ཀྱི་བཀབ་པས་འགོངས་གཡུག་ཐུབ་པ་དང་། དེས་མི་ཐུབ་ན་རྟེན་གསུམ་བཞུགས་པའི་ཐོག་ཁར་འགྲོ་ཐབས་མི་འབྱུང་མོད་དེ། དེ་ལྟར་མ་ཡིན་པར་འབྱུང་བ་ས་རླུང་ནམ་མཁས་ཆོད་པས་ཉེས་པ་མི་འབྱུང་བ་ཡིན་ལ། དགྲའི་བསོད་ནམས་ཟད་བྱེད་ཀྱི་ཐབས་དེ་ལ་ནི་རྟེན་གསུམ་ས་འོག་ཏུ་མནན་པ་དངོས་ཀྱི་ལུགས་ལྟར་བྱ་བ་མ་ཡིན་པར་སྒོའི་ཐེམ་འོག་ལྟ་བུ་ཁོས་འགོངས་གཡུག་ཏུ་འགྲོ་ངེས་ཤིག་ཏུ་སྦ་བ་ཡིན་པར་གདའ་ཞིང་། བྱེད་པ་པོ་རང་ཉིད་ཀྱང་རང་དོན་གྱི་ཞེན་འཁྲིས་སོགས་དང་སྤུ་ཙམ་ཡང་མ་འདྲེས་པར་བསྟན་པ་བསྲུང་བའི་ཆེད་ཁོ་ནའི་ལྷག་བསམ་ཞེ་ཐག་པ་ནས་དགོས་ལ། དེ་དང་ལྡན་ན་རེ་ཤིག་གནོད་བྱེད་དེའི་ལས་ངན་རྒྱུན་གཅོད་ཕྱིར་རྟེན་གསུམ་དེར་སྦས་ནས། དགོས་དོན་ནམ་གྲུབ་པ་དང་རྟེན་རྣམས་བཏོན་ཞིང་བཤགས་པ་ཁྲུས་གསོལ་རབ་གནས་སོགས་བྱ་བ་དེ་ནི། ཇི་
ལྟར་སྔོན་གང་ཞིག་ལྷག་བསམ་གྱིས་ཐུབ་པའི་དབུ་ལ་ལྷམ་ཧྲུལ་བཀབས་པ་དང་། བསལ་བ་གཉིས་ཀ་ཞབས་ཏོགས་སུ་གྱུར་པའི་བསོད་ནམས་ཐོབ་པའི་ལོ་རྒྱུས་ཀྱི་དཔེ་ལྟར་དང་། བྱེད་པ་པོ་ལ་རང་འཁྲིས་མ་ཞུགས་ན་དེད་དཔོན་སྙིང་རྗེ་ཆེན་པོས་མི་ནག་མདུང་ཐུང་ཅན་བསྒྲལ་བས་བསྐལ་པ་མང་པོའི་ཚོགས་བཟླུམ་པའི་དཔེ་དང་མཚུངས་ཕྱིར། ཐེག་ཆེན་སྡོམ་ལྡན་ཡིད་བཞིན་དུ་ཡོན་ཏན་ཡར་འཕེལ་དུ་འགྱུར་བ་སྟེ། དཀོན་མཆོག་ལ་ནི་ཐ་མལ་གྱི་རྟོག་པ་མི་མངའ་ཕྱིར་དགྱེས་མི་དགྱེས་ཀྱི་འཛིན་པ་མི་མཛད་ལ། དགེ་སྡིག་སོ་སོར་འགྱུར་བ་ནི་བྱེད་པ་པོ་རང་གི་སྣང་བ་ཉིད་ཡིན་ཕྱིར། བསྟན་དོན་འབའ་ཤིག་གི་བསམ་པས་བྱས་ན། ཕ་མའི་དོན་དུ་ཕ་མ་བསད་པ་དང་དབྱིབས་ཕྱོགས་ཙམ་ཡང་མཚུངས་པ་མ་ལགས་སོ། །དེས་ན་འཁོར་འདས་དགེ་སྡིག་སོགས་ཐམས་ཅད་སེམས་ཁོ་ནས་བསྒྱུར་བ་ཡིན་ཚུལ་ནི་མདོ་རྒྱུད་བཀའ་བསྟན་མཐའ་དག་དགོངས་པ་མཐུན་
མོད་ཀྱི། དྲང་ངེས་གཉིས་ཀྱི་ཤན་འབྱེད་དང་། ངེས་དོན་མངོན་གྱུར་གདེངས་ཐོབ་ཏུ་མ་གྱུར་རིང་དྲང་དོན་རྒྱུ་འབྲས་ལ་བརྙས་པ་སྟོང་ལྟ་ཁ་ཁྱེར་ལ་མ་སོང་བར། དྲང་ངེས་ཐབས་ཤེས་ཟུང་དུ་འབྲེལ་བའི་ལག་ལེན་རྒྱུད་ལ་འཁེལ་དགོས་པ་ནི་ཆོས་ཐམས་ཅད་ཀྱི་མདོ་འགགས་ལགས་པ་ཡང་ཕྱི་རབས་རྣམས་ཀྱི་དགོངས་འཚལ་ལོ།། ༈ །།གསང་སྔགས་ཀྱི་བཟླས་པའི་སྐབས་ཀྱི་སྔགས་འཕྲེང་འགལ་མེ་བསྐོར་བ་ལྟ་བུ་ཞེས་པའི་སྐབས་དོན་གྱི་ཕེབས་ཆར། སྤྱིར། སྔགས་འཕྲེང་བསྐོར་ཚུལ་གྱི་སྐབས་དོན་ཐ་དད་པ་ལས། འདི་ནི་ནང་སྒྲུབ་གསང་སྒྲུབ་སོགས་ཁྱད་པར་བའི་སྐབས་དོན་དང་། བསྙེན་སྒྲུབ་ཡན་ལག་བཞིར་དབྱེ་བའི་ནང་མཚན་ལས་ཀྱང་། སྒྲུབ་པ་དང་སྒྲུབ་པ་ཆེན་པོའི་སྐབས་སོགས་ལ་ཤས་ཆེར་འབྱུང་བ་མ་གཏོགས། བསྙེན་པའི་ཕྱི་སྒྲུབ་ཀྱི་རིགས་རྣམས་ལ་ནི་ཟླ་བ་སྐར་འཕྲེང་གི་ཚུལ་དུ་གྲགས་པའི་ཐུགས་སྲོག་
ལ་སྔགས་ཕྲེང་གི་བསྐོར་བ་ཉིད་འབྱུང་ཤས་ཆེ་མོད་ལ།། ༈ །ཁྱད་པར་བའི་སྐབས་ཀྱི་འགལ་མེ་བསྐོར་འདྲ་ཞེས་པ་འདི་ཉིད་ནི། དཔེར་ན། མཚན་མོའི་མུན་ནང་དུ་འགལ་དུམ་མམ། སྤོས་རེང་ལྟ་བུ་ཞིག་བར་སྣང་ལ་དྲག་ཏུ་བསྐོར་ན། མེའི་དབྱིབ་བར་མ་ཆད་པ་གསེར་གྱིས་ཨ་ལོང་ལྟ་བུར་མཐོང་བར་འགྱུར་བ་དཔེར་མཛད་ནས། འགལ་མེ་བསྐོར་འདྲའི་སྔགས་ཕྲེང་དུ་མིང་བཏགས་པ་མ་གཏོགས། སྔགས་འབྲུ་མེའི་རྣམ་པའི་ཡིག་འབྲུ་ལས་མེ་འབར་བར་སྒོམ་རྒྱུ་མ་ལགས་ཏེ། འདི་ཉིད་ལ་འགལ་མེ་ལྟ་བུར་ཐ་སྙད་མཛད་པའི་རྒྱུ་མཚན་ནི། སྐབས་འདིར་ཡབ་ཡུམ་ཞལ་སྦྱོར་གྱི་རིགས་ཁོ་ནའི་སྒོམ་རིམ་ཡིན་ཚེ། སྔགས་འཕྲེང་དཀྱུས་མ་ཟླ་བ་སྐར་ཕྲེང་ལྟར་ཕྲེད་དུ་སྐོར་བ་མ་ཡིན་པར། འགལ་མེ་སྟེང་འོག་དཀྲོང་ཐབས་སུ་བསྐོར་བ་ལྟར། ཐུགས་ཀའི་སྔགས་ཕྲེང་ཡིག་འབྲུ་གཅིག་གི་ཞབས་སུ་གཅིག་གི་དབུ་འཐུད་པ་ལུ་གུ་རྒྱུད་ཀྱི་ཚུལ་དུ་ཡབ་ཀྱི་ཐུགས་ཀ་ནས་གྱེན་
ལ་ཡར་བྱུང་ནས་ཞལ་ལས་འཐོན་པ་ཡུམ་གྱི་ཞལ་དུ་ཞུགས་ཤིང་ཐུར་དུ་བརྒྱུད་དེ་གསང་བའི་པདྨ་ལས་བྱུང་བ་ཡབ་ཀྱི་གསང་རྡོར་བུ་གར་ཞུགས་ཏེ་གྱེན་དུ་སྐུའི་དབྱིབས་རྒྱུད་ནས་ཞལ་དུ་ཐོན་པ་ཡུམ་གྱི་ཞལ་དུ་ཞུགས་ཚུལ་སྔར་བཞིན་བྱས་པ། དེ་ལྟར་འཕྲོ་མ་ཆད་པ་ཉིད་ལ་འགལ་མེ་བསྐོར་འདྲར་བཏགས་པ་ཡིན་ལ། ཡང་ན། ཡབ་ཀྱི་ཐུགས་ཀ་ནས་ཐུར་དུ་སོང་བ་གསང་རྡོར་ནས་བྱུང་བ་ཡུམ་གྱི་པདྨར་ཤིང་གྱེན་དུ་བརྒྱུད་དེ་ཞལ་དུ་འབྱུང་ཚུལ་གོང་བཞིན་བྱ་བ་སྟེ། སྔ་མ་དང་འདི་གཉིས་ནི་གཡས་སྐོར་གཡོན་སྐོར་གྱི་ཁྱད་ལྟ་བུ་ཡིན་ཕྱིར། ལྷ་སོ་སོའི་སྒྲུབ་ཐབས་ཉིད་ལས་བསྐོར་ཚུལ་གང་བྱེད་ཀྱི་ཁ་གསལ་འབྱུང་མེད་ལ། ཁ་དོག་ཀྱང་མེའི་མདོག་ལྟར་དགོས་པ་ནི། མ་ལག་ཏེ། ལྷ་གང་ཡིན་གྱི་སྐུ་མདོག་དང་སྔགས་ཕྲེང་ཁ་དོག་མཐུན་པར་དགོས་པ་ཤས་ཆེ་བ་ལགས།། ༈ །།དགོངས་འདུས་ཀྱི་
བདག་བསྐྱེད་བཟླས་པའི་སྐབས་སུ་རླུང་བྱིན་འཇུག་ནས་གསུམ་པོ་རྒྱལ་བའི་སྐུ་གསུང་ཐུགས་ཀྱི་ཡང་སྙིང་འབྲུ་གསུམ་ཡེ་གདོད་མ་ནས་ལྷུན་གྲུབ་ཡིན་ལ། ཡིན་པར་ཤེས་པའི་ངེས་ཤེས་ཀྱི་ངང་ནས་རང་རིག་རང་གསལ་དུ་མཉམ་པར་འཇོག་པ་འདི་ལ་སྐྱེ་མེད་རྡོ་རྗེའི་བཟླས་པ་ཅེས། གསར་རྙིང་དགོངས་པ་མཐུན་པ་ཉིད་མ་གཏོགས། འབྲུ་གསུམ་གྱི་དབྱིབས་ཁ་དོག་གསལ་བའམ། རྩོལ་བས་བརྗོད་པ་སོགས་དགོས་པ་མ་ལགས་སྟེ། འོན་ཀྱང་ད་ལྟ་ཕྱག་བཞེས་དཀྱུས་མར། གང་ཟག་ལས་དང་པོ་པ་གྲྭ་ཚོགས་ཕལ་པ་རྣམས་ཀྱིས་ཟབ་དོན་འདི་དག་རྒྱུད་ལ་མི་འབྱོར་ཚེ། ལྷ་ཚོགས་ཀྱི་ཐུགས་སྲོག་ལ་སྔགས་འཕྲེང་འཁོར་བའི་མོས་པས། རྩ་གསུམ་སྤྱིར་དྲིལ་གྱི་བཟླས་པ་ཅི་འགྲུབ་བྱེད་པ་ལགས་སོ། །བུམ་སྐྱེད་ལ། ལས་བུམ་གྱི་ཆུ་གཙོ་བུམ་རྣམས་སུ་བླུག་པའི་དགོས་པ་ནི། སྔགས། དུང་ཆོས་ཀྱི་གསུང་གླེང་ལྟར། བདུད་རྩི་འཁྱིལ་པས་ལྷ་ཚོགས་
ཐམས་ཅད་ཀྱི་ཐུགས་དམ་བརྒྱུད་བསྐུལ་ནས་ཕྲིན་ལས་གང་ཡིན་འགྲུབ་པར་འགྱུར་བ། ཆན་ལ་ཕབས་ཀྱི་དཔེ་ལྟར་ལགས། མདུན་བསྐྱེད་ཀྱི་འཛབ་དགོངས་ལ། རྡོ་རྗེའི་ཁོང་སེང་ལ་འོད་དཔག་མེད་བཞུགས་པ་ནི། སྤྱིར་ཡང་། དགོངས་འདུས་རྩ་བའི་རྒྱུད་དྲུག །སྦས་པ་མན་ངག་གི་རྒྱུད་གསུམ་དང་བཅས་པ་ཐམས་ཅད་ཀྱི་སྟོན་པ་ནི་ཀུན་བཟང་རྡོ་རྗེ་འཆང་ཉིད་འོད་དཔག་མེད་དུ་བཞེངས་ནས་རང་གི་སྤྲུལ་པའི་འཁོར་ཚོགས་ལ་བསྟན་པ་ཡིན་པ་དང་། ཁྱད་པར་འདིའི་དཀྱིལ་འཁོར་གྱི་གཙོ་བོ་ནི་བཛྨ་བཛྲ་རྩལ་ཞེས་གུ་རུ་རིན་པོ་ཆེ་ཧེ་རུ་ཀར་སྤྲུལ་བ་དང་། ཡུམ་ཡང་། ལྷ་ལྕམ་མནྡ་ར་བ་ཉིད་ཡིན་ལ། གུ་རུ་ཉིད་ནི་འོད་དཔག་མེད་ཀྱི་ཐུགས་ཀའི་འོད་ཟེར་གསེར་གྱི་རྡོ་རྗེ་ཧྲཱིཿཡིག་ཅན་རྡ་ན་ཀོ་ཥའི་པད་སྡོང་ལ། ཐིམ་པ་ལས་སྐུ་བལྟམས་པ་ཡིན་ཕྱིར། དོན་དམ་པའི་མཐར་ཐུག་ནི་དཀྱིལ་འཁོར་འདི་ཉིད་ཀྱི་བྱེད་པ་པོའི་བདག་པོ་ནི་འོད་དཔག་མེད་ཡིན་པས།
ནང་གི་ཡེ་ཤེས་སེམས་དཔའ་དང་རིགས་བདག་གི་གཙོ་བོ་འོད་དཔག་མེད་དུ་འབྱུང་བ་ལགས། འདི་དག་ལ་གོ་ཆའི་ལྷ་མི་འདུག་པ་གསར་རྙིང་གི་ཁྱད་ཡིན་ནམ་གསུང་བ་དེ་ནི་མ་ལགས་སྟེ། གསར་རྙིང་གཉིས་ཀའི་དཀྱིལ་འཁོར་ཐ་དད་པ་རྣམས་སུ་གོ་ཆའི་ལྷ་ཡོད་མེད་གང་ཡང་འབྱུང་ཚུལ་མཚུངས་མོད་ཀྱི། འདི་སྐབས་ནི་དགོས་པར་མ་གསུངས་ལ། གང་ལྟར་གནས་གསུམ་འབྲུ་གསུམ་འགོད་པ་འདི་ཉིད། དོན་གྱི་དབང་དུ་ནི་རྒྱལ་བའི་སྐུ་གསུང་ཐུགས་ཀྱི་ཡེ་ཤེས་གསུམ་མཚོན་ལ། བརྡའི་དབང་དུ་ནི་སྙིང་པོ་འབྲུ་གསུམ་མམ། འཁོར་ལོ་པདྨ་རྡོ་རྗེ་སྟེ་ཕྱག་མཚན་གསུམ་དུ་འགྱུར་ལ། རྟགས་ཀྱི་དབང་དུ་ནི། སྐུ་རྡོ་རྗེ་དཀར་པོ་འཁོར་ལོ་དྲིལ་བུ་འཛིན་པ། གསུང་རྡོ་རྗེ་དམར་པོ་པདྨ་དྲིལ་བུ། ཐུགས་རྡོ་རྗེ་མཐིང་ག་རྡོར་དྲིལ་འཛིན་པར་བསྟན་ཞིང་། གོ་ཆའི་ལྷ་ཐམས་ཅད་ཀྱི་རྩ་བ་འདི་གསུམ་ལ་འདུ་བའི་ཕྱིར། གཏེར་བུམ་གྱི་སྐབས་སུ། རྣལ་འབྱོར་ཆེན་པོའི་ལྷ་ཚོགས་ཅེས་པ་ནི་ལེགས་སྦྱར་
སྐད་ལ་མ་ཧཱ་ཡོ་ག་ཞེས་པ་སྟེ། བདེ་དགྱེས་དུས་གསང་སོགས་གསར་རྙིང་ཐུན་མོང་གི་རྒྱུད་སྡེའི་ལྷ་ཚོགས་ཡིན་ལ། རྗེས་སུ་རྣལ་འབྱོར་ཞེས་པ་ནི་ཨ་ནུ་ཡོ་གའི་རྒྱུད་སྡེ་དང་། ཤིན་ཏུ་རྣལ་འབྱོར་ཞེས་པ་ནི་ཨ་ཏི་ཡོ་ག་སྟེ། ཨ་ནུ་ཨ་ཏི་གཉིས་པོ་འདི་རྙིང་མའི་ཁྱད་ཆོས་ཡིན་ཚེ། ཐེག་པ་རིམ་དགུར་དབྱེ་བ་དང་། རྒྱུད་སྡེ་དྲུག་ཏུ་དབྱེ་བ་སོགས་ཏེ། གསར་མའི་མཁས་པ་རྣམས་ཀྱི་ཐུགས་ལ་མ་ཤོང་བ་དང་། ས་པཎ་གྱིས་ཀྱང་། ཨ་ཏི་ཡོ་ག་ཡེ་ཤེས་ཡིན་པ་ལ་ཐེག་པའི་མིང་བཏགས་པ་འཁྲུལ་ཞེས་སོགས་བཀའ་བཀྱོན་མཛད་པའི་རྩ་བ་དེ་འདི་གཉིས་ལ་བརྟེན་ནས་བྱུང་བ་ལགས། གང་ལྟར་ཡོ་ག་གསུམ་གྱི་དབྱེ་བསྡུ་ནི་སྔར་གྱི་དྲིས་ལན་རྣམས་སུ་ཡང་ཡོད་པ་ལྟར་ལགས་སོ།། ༈ །།སྦྱིན་བསྲེག་རྫས་ཀྱི་སྐབས་ཆོས་སྨན་ཞེས་པ་ནི་བདུད་རྩི་སྨན་སྒྲུབ་བྱས་པའི་ཨ་མྲྀ་ཏ་འདི་ཉིད་ལགས་
སྟེ། གསོ་རིགས་སྐབས་སུ་ཡང་ཆོས་སྨན་འགྲོས་སྒོ་ཆེ་བར་སྣང་བ་ལ། རྒྱུད་བཞིའི་འགྲེལ་པ་མཛད་པོ་རྙིང་མ་ལ་མ་དད་པ་ལ་ལས་ཆོས་སྨན་ནི་དགེ་སློང་གཙང་མའི་དྲི་ཆེན་ལ་ངོས་འཛིན་པར་སྣང་ཡང་། གསོ་རིག་བདག་པོ་སློབ་དཔོན་ཀླུ་སྒྲུབ། དཔའ་བོ། གཡུ་ཐོག་ཞབས་སོགས་དང་། རྗེ་བཙུན་ཟུར་མཁར་བ་དང་བཅས་པ་ཐམས་ཅད་ཨ་མྲྀ་ཏ་ལ་ངོས་འཛིན་པ་གསལ་པོར་གསུངས་ཤིང་། རྙིང་མའི་སྨན་སྒྲུབ་ལ། ཡིད་མི་ཆེས་པའི་ཚེ་ནའང་། གསར་མའི་བདུད་རྩི་རིལ་བུ་དང་། རྙིང་མའི་ཨ་མྲྀ་ཏ་གཉིས་རིལ་བུ་སྒྲིལ་མ་སྒྲིལ་མ་གཏོགས་ཁྱད་མེད་ཡིན་ཚེ། ཅི་ཞུ་ན། སྦྱིན་བསྲེག་རྫས་ཀྱི་ཆོས་སྨན་ཡང་དེ་ཀ་ལགས། ཆུ་གཏོར་སོགས་ལ་ཡོད་པའི་ཤ་ཁོན་ཞེས་པ་དེ་ནི། སྐྱེ་བ་སྔ་མ་སོགས་ཚེ་རབས་གཞན་ལ་རང་དང་འཐབ་འཁོན་འགྲས་བྱས་ནས་མ་འཆམ་པའི་ངང་ལ་ཤི་བ་དང་། ཁྱད་པར་བདག་གིས་ཕར་ལ་
བསད་བཅད་བརྡུང་འཚོག་བྱས་པ་ལ་སོགས་པའི་རིགས་ལ་ལན་ཆགས་ཤ་འཁོན་དེ་མ་འཁོར་གྱི་རིང་ལ་སྐྱེ་བ་ཐམས་ཅད་དུ་རང་ལ་གནོད་པར་འགྱུར་བ་སྟེ། དཔེར་ན། སྔོན་རྒྱལ་བ་འབྲོམ་སྟོན་པས་མི་ཕྱུགས་པོ་གཅེས་པ་ཞིག་ན་བའི་སྔས་བསྲུང་ལ་བྱོན་པས། ནད་པ་དེ་ལ་གནོད་པའི་གདོན་དེ་ཉིད་མི་རྒན་མགོ་སེར་གཅིག་ཏུ་སྤྲུལ་ནས་འབྲོམ་ལ་འདི་སྐད་ཟེར་ཏེ། ད་རེས་ནད་པ་འདིའི་སྔས་བསྲུང་ཁྱེད་ཀྱི་མཛད་འདུག་བ། བདག་གིས་སྔར་ཁྱེད་གཏོར་མ་ལ་ངས་ཀྱང་ལོངས་སྤྱད་པ་ལགས་པས། ད་ལན་རེ་ཤིག་ཁྱེད་ཀྱི་ངོ་ལ་ངས་ནད་པ་འདི་བཏང་བར་བྱ་ཡི། ཁྱེད་བྱོན་སོང་ཤུལ་ནམ་ཀྱང་ནད་པ་འདི་བཏང་ཐབས་མེད་དེ། ངེད་གཉིས་ཚེ་རབས་ནས་ལན་ཆགས་ཤ་ཁོན་ཆེན་པོ་ཆགས་ཡོད་པ་ཡིན། ཟེར་ནས་གདོན་དེ་སྤྱང་གུ་གཅིག་ཏུ་སྤྲུལ་ནས་ཐོན་
སོང་བ་དང་ནད་པ་ཡང་སོས། དེ་ནས་ཁོང་རྣམས་ལ་འབྲོམ་གྱིས་ཁྱེད་ལ་ལན་ཆགས་ཤ་ཁོན་གྱི་གདོན་དེ་ལྟ་བུ་འདུག་པས་དེ་ལ་དམིགས་ནས་ལན་ཆགས་སྦྱོང་བའི་གཏོར་མ་གང་མང་ཐོང་། གཞན་ཡང་དགེ་བ་ལ་འབད་ཅི་ནུས་དགོས་པར་གདའོ་གསུངས་ནས་བྱོན་པའི་ཤུལ་དུ་ཁོང་རྣམས་ཀྱི་དེ་དག་གང་ཡང་མ་བྱས་པར། ནད་པ་སོས་པའི་དགའ་སྟོན་ཆང་འཐུང་རྟ་རྒྱུག་སོགས་བྱས་པས་སྔར་གྱི་ནད་པ་དེ་རྟ་བརྡབས་ཀྱི་ཤི་སྐད་དོ། །དཔེ་དེ་བཞིན་དུ་ད་ལྟ་ཡང་སྤྱིར་སུ་གང་ལའང་ཁོན་འགྲས་མེད་པར་བྱ་ཞིང་། སྔར་ཡོད་ནའང་རང་ཉིད་ཕམ་ལེན་གྱི་མཐོལ་བཤགས་བྱས་ལ་སྦྱང་ཏེ་ཚེ་ཕྱི་མར་འབྲང་མི་དགོས་པར་བྱེད་པ་དང་། ཁྱད་པར་འཆི་ཁར་བླ་མ་མཆེད་གྲོགས་གང་ལའང་ཅི་འབྱོར་གྱི་འབུལ་བ་བྱས་ལ་དམ་ཚིག་ཉམ་ཆགས་སོགས་ཚོར་མ་ཚོར་གང་ཡང་སྙིང་ཐག་པ་ནས་བཤགས་པར་བྱ་ལ། བླ་མ་མཆེད་གྲོགས་སོགས་གཞན་འཆི་
བའི་དུས་སུ་ཡང་རང་གིས་དེ་ལྟར་ཅི་ནུས་བྱས་ཏེ་ཉམ་ཆགས་དང་ཤ་ཁོན་ཕྱི་མར་འབྲེང་མི་དགོས་པར་ནན་ཏན་མ་བྱས་ན། གནས་སྐབས་ཙམ་དུ་མ་ཟད། མཐར་ཐུག་བྱང་ཆུབ་ཐོབ་པ་ལ་གེགས་སུ་འགྱུར་བས་ན། ཤ་ཁོན་མེད་པར་བྱ་ཞིང་། ཚེ་འདས་ཀྱི་གནས་འདྲེན་ཆོ་ག་རྣམས་ལ་ཡང་ཞི་དྲག་ཕྱེད་གསུམ་གྱིས་སྦྱང་བ་སོགས་ཀྱི་དགོས་པ་ཡང་འདི་ལགས་མོད།། ༈ །།གཏོར་མའི་སྐབས་སུ་ཏིང་ཤག་ངེས་པར་འཐོགས་པའི་མཐའ་ཚིགས་ཅི་ཡིན་གསུང་བ། འདིའི་དགོས་པ་ནི་རོལ་མོའི་མཆོད་པ་ཉིད་ཡིན་ནའང་། རོལ་མོ་གཞན་གང་འཁྲོལ་ཡང་རུང་མོད་སྙམ་ན། སྤྱིར་ནི་དེ་ལྟར་བདེན་མོད་དེ་རོལ་མོ་གཞན་མེད་ཀྱང་སེ་གོལ་གྱི་སྒྲ་ཁོ་ནས་ཀྱང་རོལ་མོ་མཆོག་ཏུ་འགྱུར་བར་མདོ་རྒྱུད་ནས་གསུངས་ལ། དམིགས་གསལ་བརྗོད་ན། ཆུ་གཏོར་འདི་སྤྱི་ཙམ་དུ་ཐེག་པ་ཐུན་མོང་དང་མདོ་ལུགས་ཡིན་ཕྱིར། གསང་སྔགས་
ནས་བཤད་པའི་རྡོར་དྲིལ་སོགས་ནི་འདིར་མི་འོས་པ་དང་། དེ་དང་མཚུངས་པར་ཌ་མ་རུ་དང་རྐང་གླིང་སོགས་གསང་སྔགས་མཆོག་གི་དམ་རྫས་རྣམས་ནི་འདིར་མི་རུང་ཚེ། ཏིང་ཤག་ཙམ་ལ་བརྟེན་པ་ཡིན་པ་དང་། འོན་ཀྱང་། རྒྱ་གར་དུ་ཏིང་ཤག་ཞེས་པ་ད་ལྟའི་འདི་ཁོ་ན་ཡང་མ་ལགས་སྟེ། དིང་སང་གཡེར་ཁ་ཞེས་གྲགས་པ་བྲོ་པ་རྣམས་ཀྱི་འཐོགས་པ་དེ་དང་། དྲིལ་བུ་ཡང་མགོ་རྡོར་དང་ལྷའི་ས་བོན་ཕྱག་མཚན་སོགས་མེད་པའི་དྲིལ་ཆུང་རྟ་དྲེལ་ཀྱི་མཇིང་རྒྱན་ལ་འདོགས་པ་འདི་འདྲའི་རིགས་ལའང་ཏིང་ཤག་གི་མིང་དུ་བཏགས་ཏེ་གར་འོས་འཁྱེར་བའི་སྲོལ་ཡོད་པར་སྣང་བ་དང་། རྗེ་མར་པའི་ཚོགས་མགུར་དུ། གཡས་པ་ཌ་མ་རུ་དང་གཡོན་པས་ཏིང་ཏིང་ཤག་བསྣམས་ཚུལ་དེ་ཡང་གཡེར་ཁའི་རིགས་དེ་དག་ཡིན་པར་གདའ་བས། དེས་ན་འོ་སྐོལ་བོད་འདིར་གསང་སྔགས་འཆལ་བའི་དབང་གིས་ཐ་སྙད་མེད་པ་མ་གཏོགས། རྡོར་དྲིལ་ཚད་ལྡན་ནི་ནམ་ཡིན་དུ་ཁྱེར་བདེ་དང་གང་བྱུང་བྱུང་བྱར་
མི་རུང་བར་གསུངས་འདུག་ཕྱིར། ཐུན་མོང་བའི་རོལ་མོ་ལ་ཏིང་ཤག་ལྟ་བུ་འགབ་པ་ཡིན་པར་གདའ་ལགས། འཕྲོས་དོན་དུ། རྡོར་དྲིལ་ཉིད་ལའང་གསང་སྔགས་ཕྱི་ནང་སོ་སོ་དང་མཐུན་པར་ཕྱི་དྲིལ་དང་ནང་དྲིལ་གྱི་ཐ་སྙད་གཞུང་འགྲེལ་དག་ལས་གསུངས་པ་བཞིན། རྒྱ་དྲིལ་མ་འཆུག་པ་རྣམས་ལ་ངེས་དག་ཡོངས་འདུག་པ། དེ་ཡང་ཀརྨ་གན་དྲིལ་རྣམས་ལ་ནི། ཡོ་ག་རྡོ་རྗེ་རྩེ་མོའི་རྒྱུད་ཀྱི་དགོངས་དོན་དང་བསྟུན་ནས། སྟེང་གི་པད་འདབ་བརྒྱད་ཀྱི་ཤར་དུ་སངས་རྒྱས་སྤྱན་མའི་ས་བོན་ལམ་དང་། དེའི་ཐད་ཀྱི་འོག་གི་དྲ་བ་དྲ་ཕྱེད་ཀྱི་དཀྱིལ་དུ་ཕྱག་མཚན་འཁོར་ལོ་ཡོད་པ་འདི་རིགས་ནི་ཕྱི་དྲིལ་དུ་བཤད་ལ། ཡང་། ཐེག་ཆེན་གན་དྲིལ་རྣམས་ཀྱི་ཤར་གྱི་པད་འདབ་ལ་སྒྲོལ་མའི་ས་བོན་ཏཱཾ་དང་འོག་ཏུ་ཕྱག་མཚན་འཁོར་ལོ་གཉིས་སྤྲོད་པ་འདི་རྒྱུད་སམྦཱུ་ཊིའི་དགོངས་པ་ལྟར་ཡིན་ཕྱིར།
ནང་དྲིལ་དུ་བཞེད་པ་དང་། ཕྱི་དྲིལ་ལ་རྭ་རྣམས་ཀྱང་བརྒྱད་གཞོགས་དང་། ནང་དྲིལ་ལ་རྭ་གྲུ་བཞི་ཟུར་ཅན་དུ་དགོས་ཚུལ་བསྟན་བཅོས་དཔལ་འབྱོར་རྒྱ་མཚོ་སོགས་ལས་བཤད་པ་དང་མཐུན་པར་རྒྱ་དྲིལ་རིགས་གཉིས་པོ་འདི་ལ་ཡོང་སྣང་མོད་ཀྱི། འོན་ཀྱང་། ཀར་དྲིལ་རྩེ་ལྔ་པའི་སྡེ་ཚན་ལ་ནི་ལོག་ཀྱི་དྲ་བ་དྲ་ཕྱེད་ཕྱག་མཚན་དང་བཅས་པ་རྣམས་ཀྱི་དོད་དུ་འཁོར་ལོའི་རྣམ་པ་རེ་འཕྱང་བ་ཡོང་གི་འདུག་མོད། གང་ལྟར། གསང་སྔགས་ཀྱི་ལུགས་ཅི་ལྟ་བ་ཚུལ་མཐུན་བྱེད་པའི་དབང་དུ་བགྱི་ན། རྒྱུད་སྡེ་འོག་མའི་ཆོ་ག་དང་དབང་སོགས་ལ་ཕྱི་དྲིལ་དང་། བླ་མེད་ཀྱི་སྐབས་རྣམས་སུ་ནང་དྲིལ་འཐོགས་དགོས་རྒྱུ་ལྟ་བུར་གདའ་ཡང་། དིང་སང་ནི་དེ་འདྲའི་རྣམ་དབྱེ་མཛད་མཁན་ཡོད་པར་མ་ཐོས་ཤིང་། ལར་དིང་སང་གི་ཆོས་པ་རྣམས་ཀྱི་ཁ་ནས་བཤད་རྒྱུ་ཡོད་མེད་གཉིས་ཀའི་ལག་ལེན་ལ་ཐ་སྙད་མི་འདུག་པས་ན་རྡོར་དྲིལ་
དང་རོལ་མོ་སོགས་གང་སའི་ཐོབ་ཆ་རྣམ་དབྱེ་ཐེག་པ་དང་རྒྱུད་སྡེའི་སྐབས་ཐོབ་སོགས་ལྟ་ཅི་སྨོས་ཏེ། ཟང་ཟིང་འཚོལ་ཐབས་ཀྱི་ཆེད་དུ། དཀྲོལ་ན་ཨེ་དྲག །བརྡུང་ན་ཨེ་དྲག །འབུད་ན་ཨེ་དྲག །གྱེར་ན་ཨེ་དྲག་སྙམ་པ་མ་གཏོགས་གསང་སྔགས་ཀྱི་དམ་ཚིག་སོགས་བསམ་མནོ་གཏོང་མཁན་ཅི་ལ་སྙེད་ལྟ་བུར་སྣང་མོད་ལགས།། ༈ །།མཆོད་པའི་སྐབས་དག་ཏུ་ཉེར་མཆོད་ལྔར་གྲགས་ཀྱང་རྣམ་གྲངས་དྲུག་ཏུ་འདུག་པ་ཅི་ཡིན་གསུངས་པ། ཉེར་མཆོད་ལྔ་ནི། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས་དང་ལྔ་ཡིན་ལ། རོལ་མོ་ནི་མཐའ་རྟེན་གྱི་མཆོད་པའམ། མཚམས་སྦྱོར་གྱི་མཆོད་པ་ཡང་ཟེར། རྗེས་འགྲོའི་མཆོད་པ་ཅེས་བྱ་སྟེ། སྤྱན་འདྲེན། ཁྲུས་གསོལ། མཆོད་འབུལ། བསྟོད་པ། ཐུགས་དམ་བརྒྱུད་བསྐུལ། ཤིས་བརྗོད་སོགས་ཐམས་ཅད་ཀྱི་སྐབས་ལ་ཉེ་བར་སྦྱོར་བའི་
ཡོ་བྱད་ཡིན་པར་བཤད་དོ། མཆོད་པའི་སྔོན་འགྲོར། ཆུ་བཞི་དང་། གསུམ་དང་། གཉིས་དང་། ཡོན་ཆབ་བམ། མཆོད་ཡོན་གཅིག་བུར་བསྡུ་བ་སོགས་ནི་གཞུང་སོ་སོའི་རྒྱས་བསྡུས་ཀྱི་བྱེ་བྲག་ཏུ་སྣང་ཞིང་། དེ་རྣམས་སོ་སོའི་དགོས་པའི་བྱེད་ལས་ནི། ཨརྒྷཾ་ཞེས་མཆོད་ཡོན་ནི། བདུད་རྩི་ཡན་ལག་བརྒྱད་ལྡན་གྱི་རྫིང་བུ་ཡིད་དུ་འོང་བར་དམིགས་ནས་འབུལ་ཏེ། ཞལ་དུ་བཞེས་པ་དང་སྐུ་ཁྲུས་གསོལ་བ་གཉིས་ཀའི་ཡོ་བྱད་དུ་རུང་བ་དང་། ཨཉྫ་མཱ་ནམ་ཞེས། ཞབས་བསིལ་ནི་འདུལ་བ་ནས་ཆབ་ལེན་པ་དང་མཚུངས་པའི་རྒྱུ་དང་། པཱདྱཾ་ནི་ཞབས་བསིལ་ཏེ། སྟན་ལ་བཞུགས་ཁར་ཞབས་བཀྲུ་བའི་ཡོ་བྱད་དང་། པྲོ་ཀྵ་ཎཱཾ་ཞེས་པ་ཉེ་རེག་དང་འཐོར་འཐུང་ཞེས་བྱ་བ་ལ། ཆོ་ག་གཞུང་ལ་ལར་པྲ་ཝ་ར་སརྐཱ་ར་ཞེས། བོད་སྐད་དུ། རབ་མཆོག་དམ་པར་བྱེད་པ། ཅེས་པ་ཡང་འབྱུང་སྟེ། འདི་གཉིས་ཀྱི་བྱེད་ལས་ནི། རྒྱ་གར་དུ་ཚད་
གདུངས་ཆེས་པའི་ཕྱིར། དྲི་བཟང་ཅན་གྱི་ཆུ་བསིལ་གཙང་མས་གདོང་གི་དཔྲལ་བ་ཁུར་ཚོས་ཁ་འགྲམ་ལྐོག་མ་མཆན་ཁུང་སོགས་ལུས་ཀྱི་གནས་རྣམས་སུ་མཐེབ་སྲིན་གྱིས་འཐོར་ཞིང་། ཁར་ཡང་ཅུང་ཟད་འཐུང་བ་སོགས་བྱེད་པ་ནི་ཚ་ཞི་ནས་བསིལ་ཞིང་། ཁམས་དངས་པར་བྱ་ཕྱིར་དེ་ལྟར་བྱེད་པའི་སྲོལ་ཡོད་པ་དང་སྒོ་བསྟུན་པའི་མཆོད་པའི་བྱེ་བྲག་ཡིན་པ་དང་། གྷནེྡྷའམ་དྲི་ཆབ་ནི། ཙནྡ་ག་པུར་གུར་ཀུམ་སིཧྱ་སོགས་ཆུ་གཙང་དང་སྦྱར་ནས། ཁྲུས་ཐམས་ཅད་ཚར་བའི་རྗེས་སུ་ལུས་ཀྱི་གནས་རྣམས་སུ་བྱུགས་ཤིང་། ཁྱད་པར་སྙིང་ཁར་བྱུང་བར་བྱེད་པ་ཡང་ཚད་གདུང་གི་ནད་གཞི་སོགས་སྐྱེད་པར་འགྱུར་བ་ལས་སྐྱོབ་ཕྱིར་བསིལ་ངད་ལྡན་པའི་དྲི་བཟང་གི་བྱུག་རྫས་ཏེ། མདོར་ན་འདི་ཐམས་ཅད་ཀྱི་དགོས་ཆེད་ནི། འོ་སྐོལ་བོད་གངས་ཅན་བསིལ་བའི་ཡུལ་དང་མི་འདྲ་བར། རྒྱ་གར་ནག་རྣམས་སུ་ཚ་བའི་གདུངས་
པའི་སྡུག་བསྔལ་ཡོད་པ་སེལ་ཐབས་དང་སྒོ་བསྟུན་པ་འབའ་ཤིག་ཏུ་གདའ་ལགས།། ༈ །།མཆོད་སྔགས་ཀྱི་སྐབས་སུ། སྤྱིར་མཆོད་རྫས་སོ་སོའི་དངོས་མིང་ལ། ཨརྒྷཾ། པཱདྱ། པུཥྤ། དྷཱུ་པ། ཨ་ལོ་ཀ །གྷནྡྷ། ནེ་ཝི་ཏ། ཅེས་སོགས་ཡིན་པ་ལ། མཆོད་པ་འབུལ་བའི་དོན་གྱི་ཕྱིར་རྣམ་དབྱེ་གཉིས་པ་ལས་སུ་བྱ་བའི་ཚིག་ཨཾ་བྱིན་ནས་མཚམས་སྦྱར་བས། ཨརྒྷཾ། པདྱཾ། པུཥྤེ། དྷཱུ་པཾ་སོགས་རྗེས་སུ་ང་རོ་བྱུང་བ་ཡིན་ནོ། །ཡང་། རྗེས་སུ་ང་རོ་མ་བྱས་པར། གོང་གི་དངོས་མིང་དེ་རྣམས་ལ། མོའི་ཡི་གེ་རྐྱེན་དུ་བྱིན་ཏེ། པུཥྤེ། དྷཱུ་པེ། ཨ་ལོ་ཀེ། གྷནྡྷེ། ནེ་ཝི་དྱཱ་ཞེས་འགྲེང་བུ་ཅན་དུ་བསྒྱུར་བའི་དགོས་པ་ནི། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཞལ་ཟས་མ། ཞེས་མཆོད་པའི་ལྷ་མོ་དང་སྦྲགས་ནས་འབུལ་བའི་སྒྲ་ཡིན་པ་སྟེ། དེས་ན་སོ་སོའི་མིང་ཙམ་ལ་ཀླད་ཀོར་འགྲེང་བུ་གཉིས་ཀ་མི་དགོས་པ་དང་། མཆོད་པ་འབུལ་
བའི་རྣམ་དབྱེ་སྦྱར་བ་ལ་ཀླད་ཀོར་ཅན་དང་། འབུལ་མཁན་གྱི་ལྷ་མོ་སོ་སོ་དང་སྦྱར་བས་འགྲེང་བུ་ཅན་དུ་བསྒྱུར་བ་སྟེ། སྒྲ་སྒྲུབ་ཚུལ་གྱི་ཁྱད་པར་དེ་ལྟར་ལགས་ཤིང་། འོན་ཀྱང་ཉེར་མཆོད་ལྔ་པོར་མ་གཏོགས། ཆུ་བཞི་སོགས་ལ་འབུལ་མཁན་གྱི་ལྷ་མོ་མི་དགོས་ཕྱིར་ཀླད་ཀོར་ཅན་མ་གཏོགས་འགྲེང་བུ་མི་སྦྱོར་བ་ཡིན་ནོ། །ལྷ་མོ་མཚོན་ཕྱིར་མིང་གི་མཐར་མོའི་སྒྲ་ཐོབ་ཚུལ་འདི་བཞིན་གཞན་ཡང་ཡོད་དེ་གླིང་བུ་མ། རྫ་རྔ་མ་ཞེས་སོགས་ལ་ཝཾ་སེ། མུ་རཉྫེ། ཞེས་སོགས་འགྲེང་བུ་ཅན་དང་། ཡང་། མོའི་རྟགས་གཞན་དུ་རྣམ་དབྱེ་ཨི་སྦྱར་བ་ཡང་འབྱུང་སྟེ། དཔེར་ན། མཁའ་འགྲོ་ཞེས་པ་ལ་ཌཱ་ཀ་ཡིན་ཀྱང་། མཁའ་འགྲོ་མ་ཞེས་པའི་སྐབས་སུ་ཌཱ་ཀི་དང་ཌཱ་ཀི་ནི་ཞེས་སོགས་དང་། གླུ་མ། གར་མ། ཞེས་པ་ལ། གཱིརྟི། ནཱིརྟི། ཞེས་སོགས་ལྟ་བུ་འབྱུང་བ་ལགས།། ༈ །།སྔ་སོར་གྱི་བཀའ་ཕེབས་
ལྟར། མཚམས་དང་བསྙེན་སྒྲུབས་ཀྱི་བཅད་རྒྱ་ཇི་ལྟར་བྱ་ཚུལ་ལ་ཉེ་བར་མཁོ་བའི་སྐབས་དོན་འབུལ་རྒྱུ་དངོས་ནི། བདེར་གཤེགས་ཡོངས་རྫོགས་འདུས་པའི་ཞལ་གདམས་ཤོག་ལྡེབ་ལ་བྲིས་པ་དེ་ལྟར་དང་། འདིར་མཚམས་ཐོ་འཛུག་པའི་སྐབས་དོན་ལ་ཅི་ཞུ་ན། དིང་སང་ཐ་མལ་པ་ཀུན་གྱི་བསམ་ཡུལ་དུ། མཚམས་ཐོ་འདི་མི་གསར་པ་འོང་ས་མེད་པར་བྱེད་པའི་བརྡ་ཁོ་ན་ཡིན་བསམ་མཁན་འབའ་ཤིག་གདའ་ནའང་། དེ་གཅིག་པུ་ནི་མ་ཡིན་ཏེ། འདིའི་དགོས་ཆེད་ནི་གཙོ་བོ་ནི་སྒྲུབ་པའི་བར་ཆད་ཀྱི་རིགས་མཐའ་དག་བསྲུང་ཕྱིར་སྒོ་བསྲུང་ལྟ་བུ་སྟེ། སྒྲུབ་པ་པོ་རང་ཉིད་གཅིག་པུར་ལུང་སྟོངས་ལྟ་བུར་སྡོད་ཀྱང་མཚམས་ཐོ་ངེས་པར་འཛུག་དགོས་པ་དང་། དེ་ཡང་གསང་སྔགས་རྙིང་མའི་དབང་སྒྲུབ་ཆེན་མོ་སོགས་ཀྱི་སྐབས་སུ་ནི། ཕྱི་སྡེ་སྣོད་གསུམ་གྱི་ཆོས་སྒོར་ཞུགས་མཁན་གྱི་རིགས་ཅན་གང་
ཞིག་དེ་དག་གི་སྲུང་མཚམས་ལས་ཉམས་ཏེ་དམ་སྲིར་སྐྱེས་ནས་བར་ཆད་བྱེད་པ་རྣམས་བསྲུང་ཕྱིར། ཕྱི་མཚམས་རྒྱལ་ཆེན་བཞིའི་ཐོ་འཛུག་ཅིང་མངའ་གསོལ་གཉེར་གཏད་བྱ་བ་དང་། ༢ ནང་གསང་སྔགས་བྱ་སྤྱོད་རྣལ་འབྱོར་གསུམ་གྱི་སྒོར་ཞུགས་ནས་དམ་ལས་ལོག་པའི་སྲི་ཅན་གྱི་བར་ཆད་བསྲུང་ཕྱིར་དམ་སྲི་སྒོ་ཐེམ་གྱི་འོག་ཏུ་མནན་ཞིང་སྒོའི་ཡ་ཐེམ་ཕྱི་ནང་གཉིས་སུ་ཁྲོ་བོ་གཤིན་རྗེའི་གཤེད་དང་བདུད་རྩི་འཁྱིལ་པ་གཉིས་ཀྱི་སྒོ་བྱང་གདག་ཅིང་གཉེར་གཏད་བྱ་བ་དང་། ༣ གསང་བ་བླ་མེད་ཐེག་པ་ཡོ་ག་རྣམ་པ་གསུམ་གྱི་སྒོར་ཞུགས་ནས་དེ་དག་གི་དམ་ལས་ལོག་པའི་སྲི་ཅན་གྱི་བར་ཆད་བསྲུང་ཕྱིར་ཁྲོ་བོ་བཅུའི་མཚམས་ཕུར་གདབ་ཅིང་དཀྱིལ་འཁོར་གྱི་འོག་ཏུ་མ་ཏྲམ་རུ་ཏྲ་མནན་ཐབས་སོགས། སྒྲུབ་གཞུང་ཆེ་བའི་རིགས་ཐམས་ཅད་ལས་འབྱུང་ཞིང་ད་ལྟ་ཕྱག་ལེན་དུའང་མཛད་མོས་ལ། དེ་དག་གི་རྒྱུ་མཚན་
ལོ་རྒྱུས་དགོས་ཆེད་ཕན་ཡོན་སོགས་ཞིབ་རྒྱས་སུ། གཟི་ལྡན་འབར་བ་མཚམས་ཀྱི་རྒྱུད་སོགས་རྙིང་མའི་རྒྱུད་འབུམ་རྣམས་ལས་འབྱུང་ནའང་། ད་ལྟ་ཐུགས་དམ་ལ་བཞུགས་པའི་སྒྲུབ་པ་པོ་དཀྱུས་མ་རྣམས་ནི་དེ་ཙམ་གྱི་སྤྲོས་པ་ཆེ་བ་རང་མི་འཚལ་མོད་ཀྱི། སྒྲུབ་ཁང་གི་དྲུང་དུ་ཐོ་དཀར་པོ་བརྩིགས་དགོས་ཚུལ་དང་། གདན་གྱི་འོག་ཏུ་གཡུང་དྲུང་བྲི་དགོས་པ་སོགས་རྟེན་འབྲེལ་གྱི་བཅའ་ཐབས་དུ་མ་ནི་ཡང་དགོན་རི་ཆོས་ལས་ཀྱང་རྒྱས་པར་གསུངས་ཤིང་།། ༈ །།གུ་རུ་རིན་པོ་ཆེས་དགོངས་འདུས་ཀྱི་སྒྲུབ་ཁོག་ཆེན་མོར་གསུངས་པའི་ཚིག་འདི་དག་ཤིང་ལེབ་འམ། ཤོག་བྱང་ལ་བྲིས་ཏེ། ཤུག་པ་སོགས་རྩེ་མོར་ལོ་འདབ་ཚང་བའི་དབྱུག་པ་ལ་བཏགས་ནས་ཐོ་དཀར་པོ་དེ་རྩར་བཙུག་པར་གསུངས་པའི་ཚིག་ནི་འདི་ཡིན་ཏེ། ཧཱུྃ། གསང་བ་མཆོག་གི་ཕོ་བྲང་ནས། །ལས་ཀྱི་གཤིན་རྗེའི་བདག་པོ་ལ། །བཅོམ་ལྡན་འདས་ཀྱི་བཀའ་སྩལ་
ལྟར། །དེ་བཞིན་རིག་འཛིན་བདག་གིས་ཀྱང་། །བཀའ་གསང་སྒྲུབ་མཆོག་བགྱིད་པས། །ཡང་དག་བླ་ན་མེད་པ་ཡི། །དོན་མཆོག་འབྲས་བུ་མ་ཐོབ་བར། །འདི་ལ་གནོད་བྱེད་བར་ཆད་དང་། །ལྷ་སྲིན་སྡེ་བརྒྱད་འབྱུང་པོ་ཀུན། །ཁྱེད་ཀྱི་འཁོར་དང་བྲན་ལགས་པས། །ལས་ཀྱི་རྣམ་སྨིན་ཆོས་བཤོད་ལ། །ས་འདི་ཚུན་ལ་བགེགས་མ་བཏང་། །ཕྱི་འཁོར་མུ་རན་ཚུན་ཆོད་དུ། །གསང་བ་མཆོག་གི་རྣལ་འབྱོར་པས། །བླ་མེད་འབྲས་བུ་མ་ཐོབ་བར། །བགེགས་དང་བར་ཆད་འབྱུང་པོ་ཀུན། །ཁྲོ་རྒྱལ་ཁྱེད་ཀྱིས་ཐུབ་པར་སྲུངས། ཨོཾ་བཛྲ་ཀྲོ་དྷ་ཡ་མ་རཱ་ཛཱ་ས་མ་ཡ་སྟྭྃ། རཀྵྱཾ་རཀྵྱཾ། ཞེས་གཏད་པར་གསུངས་སོ། ༢ །གཞན་ཡང་། སྔོན་གྱིས་སྐྱེས་ཆེན་མང་པོས་རང་ཉིད་ལ་བསྐུལ་འདེབས་དང་དམ་བཅའི་ཐོ་ཡིག་ནི། ལོ་ཆེན་རིན་བཟང་གིས་སྒྲུབ་ཁང་སྒོ་རིམ་
པ་གསུམ་ལ་ཕྱི་ནས་རིམ་བཞིན་སྒོ་འདི་ཚུན་དུ་ཆོས་མིན་གྱི་རྟོག་པ་དང་། ༡ རང་དོན་ཡིད་བྱེད་ཀྱི་རྟོག་པ་དང་། ༢ ཐ་མལ་གྱི་འཁྲུལ་རྟོག་སྐྱེས་པ་བཀའ་སྲུང་རྣམས་ཀྱིས་བདག་གིས་མགོ་བོ་ཁོས་ཤོག ༣ །ཅེས་སོགས་ཀྱི་ཐོ་མིག་མཛད་ཚུལ། ཁ་རག་སྒོམ་ཆུང་གི་ཐོ་ཡིག་སོགས་འདི་དག་ནི་ཡ་མཚན་བསམ་གྱིས་མི་ཁྱབ་པའི་མཛད་པར་གདའ་བ། འོ་སྐོལ་དུས་མཐའི་སྒྲུབ་པ་པོ་དག་གི་སྤྱོད་ཡུལ་དུ་འགྱུར་བ་བཀའ་མོད། གཞན་ཡང་། རྒྱལ་བ་རྒོད་ཚང་པའི་གསུང་ལས། ཕྱི་མཚམས་རི་ཁྲོད་དུ་སྡོད་ཚུགས་པ། །ནང་མཚམས་སྤྱིལ་བུར་སྡོད་ཚུགས་པ། །གསང་མཚམས་མལ་དུ་སྡོད་ཚུགས་པ། །དགོས་པར་གསུང་ འདི་དག་ཀྱང་དགོས་པ་ཆེ་བར་གདའ་བ་དང་། ཡང་། །མི་དང་གདོང་མ་འཕྲད་པར་དགོས་པ་ལ། སྙིགས་དུས་ཀྱི་གང་ཟག་སྐྱ་སེར་ཐམས་ཅད་བྱ་སྤྱོད་ངན་ཞིང་ཚུལ་དང་མི་མཐུན་པ་ཤ་སྟག་ཡིན་
ཚེ་གང་ཟག་དང་ཕྲད་ཅིང་ཁ་ལག་འདྲེས་ཀྱང་། ལྷ་དང་མཁའ་འགྲོ་དམ་ཅན་བསྲུང་མ་ཁྲོལ་ཞིང་གྲིབ་དང་བར་ཆད་འབྱུང་བའི་ཕྱིར་གཞན་དང་གདོང་མི་ཕྲད་པར་བྱ་བ་དང་། སྨྲ་བཅད་མ་བྱས་པར་བསྙེན་སྒྲུབ་མི་རུང་ཚུལ་སོགས་རྒྱུ་མཚན་ནི་སྔར་བསྙེན་ཚད་དྲིས་ལན་གྱི་སྐབས་སུ་ཕུལ་བ་ལྟར་ལགས། ཡང་། གང་ཞིག་རྣལ་འབྱོར་པ་ཉམས་ལེན་གོམས་པ་མངོན་གྱུར་དག་ལ་ནི། ལུས་ཚོངས་འདུས་ན་གནས་ཀྱང་སེམས་དབེན་པར་འགྱུར་ཚུལ་སོགས་ཀྱི་སྐབས་དོན་ལ་ནི་ཚད་བཟུང་མ་མཆིས་ཏེ། མདོ་བསྡུས་པར། གང་ཞིག་དཔག་ཚད་ལྔ་བརྒྱ་འདས་པའི་རི་སུལ། ཞེས་སོགས་ཐར་བརྒྱན་དང་བསྟན་བཅོས་ཆེ་བ་མང་པོར་ལུང་སུ་དྲངས་པ་དེ་ལྟ་བུའི་རྒྱུ་མཚན་ཡང་རྟོགས་དགོས་པར་གདའ་ཞིང་།། ༈ །།ལར། རི་ཆོས་རྒྱས་པ་རྣམས་སུ་སྒྲུབས་གནས་ཀྱི་མཚན་ཉིད། ཕྱི་ནང་པ་དགྲ་བཅོས་ཐབས། རྟེན་འབྲེལ་སྒྲིགས་ལུགས་མང་པོ་ཞིག་གང་
ཟག་ཐུན་མོང་བ་རྣམས་ལ་ཐུགས་རྗེས་དགོངས་ཏེ། རྙིང་ལུགས། བཀའ་གདམས་བཀའ་བརྒྱུད་ལུགས་སོགས་མཐའ་ཡས་པར་སྣང་མོད་ཀྱང་། རང་གི་འདོད་བློ་དང་མཐུན་པ་ནི། དཔལ་མཁའ་སྤྱོད་པའི་རི་ཆོས་གཅིག་ཤེས་ཀུན་གྲོལ་ཞེས་པ་དེ་ཁོ་ན་ལ་མོས་པ་འགྲོ་བར་འབྱུང་ལགས།། ༈ །།སྔོན་རྒྱལ་བ་ཡང་དགོན་པ་སྐུ་མཚམས་ཀྱི་སྐབས་ཤིག་ཏུ། མི་མེད་པའི་རི་ལ་སྐྱོ་སེང་ལ་གཤེགས་པས། ཐུགས་དམ་འོད་གསལ་གྱི་གཟིགས་སྣང་འགྲིབ་ཅིང་། རྡོ་རྗེ་རྣལ་འབྱོར་མ་ཞལ་མཐོང་རུང་ཡོད་པ་ལ་ཡང་དུ་བ་ལྟ་བུས་བསྒྲིབ་པ་སོགས་བྱུང་ཚུལ་གྱི་ལོ་རྒྱུས་ལྟར། མགོ་ནག་མིའི་རྒྱུ་འགྲུལ་མེད་པའི་ས་ཡིན་ཀྱང་རང་གི་མཚམས་ལས་མི་འདའ་བར་བྱ་དགོས་པར་གསུངས་པ་དང་། བུག་སྒོ་དང་ཡོལ་བ་ཕྱི་ནང་སོགས་བྱེད་པ་དེ་ཡང་། ཕྱེད་མཚམས་ཞེས་བྱ་བར་འགྱུར་བ་མ་གཏོགས། མཚམས་དངོས་གཞིར་མི་འགྲོ་བར་གསུངས་ན་དིང་སང་འགའ་ཞིག་གདོང་ལ་རས་བཀབ་པ་དང་། འཕྱིང་
སྣམ་སོགས་ཀྱི་འབག་གྱོན་ནས་རྒྱལ་ཁམས་ཀུན་ཏུ་འགྲོ་བཞིན་དུ་མཚམས་གཅོད་པར་འདོད་མཁན་ཡོད་པར་ཐོས་པས། དེ་འདྲ་ནི་རྒྱལ་བའི་བཀའ་མདོ་རྒྱུད་གང་ནས་ཀྱང་བཤད་པ་མ་ཚོར་རོ།། ༈ །།ངག་མཚམས་ཀྱང་སོ་བསྡམས་ནས་ཕ་རོལ་པོས་གོ་ཐུབ་ཙམ་དུ་ལབ་པའི་ཕྱག་སྲོལ་དིང་སང་ཕལ་ཆེར་གྱིས་བྱེད་འདུག་ནའང་ཕྱེད་མཚམས་ལྟ་བུར་འགྲོ་ཤས་ནི་ཆེ། གཞན་ལན་ཅིག་སྨྲ་བཅད་བྱེད་ཕྱིན་ཆད། དགོས་ཆེད་རྣམས་ཡི་གེ་འདྲིའམ། ལུས་ཀྱི་བརྡ་དང་རྣམ་འགྱུར་ཙམ་མ་གཏོགས། ངག་གི་གཏམ་བརྗོད་ཀྱི་རིགས་ཙམ་ཡང་མི་བྱེད་པར་གསུང་གདའ་བས། བདག་སོགས་ནི་སྔར་གྲྭ་ཚང་དུ་ལོ་གསུམ་དང་། སླད་མར་ཡང་ངག་མཚམས་ནམ་བྱེད་ནའང་དེ་ལྟར་བྱས་པ་ལགས། དེས་ན་འདི་འདྲའི་རིགས་ཐམས་ཅད་དང་པོ་ནས་ཐུབ་མི་ཐུབ་རང་གིས་རང་ལ་ལེགས་པར་བསམ་ཞིང་གཞིག་ལ་རང་དབང་མི་འདུས་ཤིང་མི་ཐུབ་པའི་རིགས་ནི་ལར་ནས་མི་
བརྩམ། ཅིས་ཀྱང་འགྲུབ་ཐུབ་པའི་རིགས་རྣམས་ལན་གཅིག་བྱེད་ཟིན་ནས་མཐར་མ་ཕྱིན་གྱི་རིང་ལ་སྙིང་སྟོབ་དང་ཞེ་བཅད་ཀྱི་གོ་ཆ་རྐྱེན་གང་གིས་འཕྲོག་པར་མི་ནུས་པའི་དམ་བཅའ་མཐའ་རུ་འཁྱོལ་བ་ཞིག་བྱ་བ་ནི་ཆོས་ཀྱི་སྲོག་ཤིང་དུ་གྱུར་བ་ལགས།། ༈ །།བསྡུ་བའི་དངོས་པོ་བཞི་ནི། སྙན་པར་སྨྲ་བ་གཅིག །མཁོ་བ་སྦྱིན་པ།༢ དོན་མཐུན་པ།༣ དོན་སྤྱོད་པ་སྟེ། ༤ དེ་ལས་དང་པོ་ནི་གཞན་ལ་ཚིག་རྩུབ་མི་སྨྲ་བར་སོ་སོའི་ཡིད་ལ་འབབས་པ་བརྗོད་ནས་རིམ་པས་ཆོས་ལ་བློ་བསྒྱུར། གཉིས་པ་ནི། ཟས་སྐོམ་མམ་གོས་དང་ཡོ་བྱད་སོགས་མདོར་ན་ཕ་རོལ་པོ་ལ་ཅི་མཁོ་གང་ཕན་སྦྱིན་ནས་སྡིག་ལས་བཟློག གསུམ་པ་ནི་སོ་སོའི་སྐལ་བའམ་དབང་པོའི་རིམ་པ་དང་བསྟན། བཞི་པ་ནི་རང་ཉིད་ཀྱང་དེ་དང་མཐུན་པར་ཉམས་སུ་བླངས་ཤིང་ཁོའི་མོས་པ་མི་ལོག་པའི་སྤྱོད་པའམ་རྣམ་ཐར་བཟང་པོས་དང་བ་འདྲེན་པར་བྱ་བ་ནི། རྒོད་ཚང་པས་གདམས་ངག་རྣམ་ཐར་གྱི་སྒོ་ནས་བསྟན་པ། ཞེས་པ་དང་དོན་གཅིག་པ་སྟེ། དེས་ན་གཞན་དོན་བྱེད་ཐབས་ཀྱི་གཙོ་བོར་བསྡུ་བའི་དངོས་པོ་བཞི་འདི་དགོས་པར་གསུངས་སོ།། ༈ །།མཐོ་རིས་ཀྱི་ཡོན་ཏན་བདུན་ནི་
ཚེ་རིང་བ། ནད་མེད་པ། གཟུགས་བཟང་བ། སྐལ་བ་དང་ལྡན་པ། རིགས་བཟང་བ། ཤེས་རབ་ཆེ་བ། ལོངས་སྤྱོད་ཆེ་བ་དང་བདུན་ནོ། །སྔ་སོར་གྱི་འཕྲོས་དོན་ལ། དགོངས་འདུས་དཀྱིལ་འཁོར་གྱི་གཙོ་བོ་གུ་རུ་རིན་པོ་ཆེ་ཉིད་ཧེ་རུ་ཀ་པདྨ་བཛྲ་རྩལ་དུ་བཞེངས་ནས། སླར། ལྷོའི་དཀྱིལ་འཁོར་གྱི་ཁྲོད་ན་ཡང་གུ་རུ་ཉིད་བཞུགས་པའི་རྒྱུ་མཚན་གང་ཡིན་གསུངས་པ། འདི་ལ་རྒྱས་པར་བཤད་ན་ཚིག་ཚོགས་ཆེ་མོད་ཀྱི། མདོར་བསྡུ་ན། གསང་སྔགས་ཀྱི་དཀྱིལ་འཁོར་ལྷ་ཚོགས་མང་ཉུང་ཅི་འདྲར་བསྟན་ཡང་དོན་དམ་པར་གཙོ་བོ་དེ་ཉིད་ཀྱི་རྣམ་རོལ་ཁོ་ན་མ་གཏོགས། གང་ཟག་ཕལ་པའི་དཔོན་གཡོག་བཞིན་དྲག་ཞན་ཐ་དད་ཚོགས་ཤིང་འདུས་པ་ལྟ་བུ་ནི་མ་ཡིན་ཏེ། ཐམས་ཅད་གཙོ་བོ་ཉིད་ཀྱི་སྐུའི་བཀོད་པ་ཡིན་པར་ནི་གསར་རྙིང་གི་རྒྱུད་ཐམས་ཅད་དགོངས་པ་མཐུན་པ་ལགས་མོད་ཀྱི། འོན་ཀྱང་། གདུལ་བྱའི་ཐུན་མོང་བ་ལ་དྲང་དོན་དུ་དཔེ་དང་བརྡ་ཡིས་
འདུལ་ཐབས་སུ། བདེ་མཆོག་སོགས་ཀྱི་གླེང་གཞིར་རུ་དྲ་དྲག་པོ་འཇིག་བྱེད་བཏུལ་ནས། འཁོར་ཚོགས་ཐམས་ཅད་རང་གི་འཁོར་ཚོགས་སུ་བསྡུ་བར་མཛད་ཚུལ་བསྟན་པ་སོགས་ནི་བརྡ་དང་ཐབས་ཀྱི་ཆོ་འཕྲུལ་འབའ་ཤིག་ལགས་ཤིང་། ནང་ལྟར་སྦས་དོན་དུ། ཡུལ་ཉེར་བཞི་སོགས་དང་། དེ་དག་གི་བདག་པོ་བདག་མོ་ཐམས་ཅད་རྣལ་འབྱོར་པའི་རྩ་ཐིག་ལ་སྦྱར་བ་དང་། གསང་བ་མཐར་ཐུག་གི་དོན་དུ་ཐམས་ཅད་སེམས་ཉིད་ཀྱི་རྣམ་རོལ་ལས་གཞན་མ་ཡིན་པ་སོགས་དགོངས་ཆོད་ལྟར་ལགས་ཚེ།། ༈ །།དེས་ན་དགོངས་འདུས་ཀྱི་ལྷ་ཚོགས་ཀྱང་དེ་དང་མཚུངས་ཏེ། མངོན་རྟོགས་རྒྱས་པ་འདི་དག་ནི་རྒྱུད་མ་ཧཱ་ཡོ་ག་སྐྱེད་རིམ་གཙོར་སྟོན་གྱི་སྐབས་ཡིན་ལ། ནང་ལྟར་ན། ལུང་ཨ་ནུ་ཡོ་ག་རྫོགས་རིམ་གཙོར་སྟོན་ལུས་དཀྱིལ་རྩ་རླུང་ཐིག་གསུམ་གྱི་དཀྱིལ་འཁོར་དང་། གསང་བར་ཨ་ཏི་ཡོ་ག་རྫོགས་པ་ཆེན་པོ་གཙོ་བོར་སྟོན་པ་སེམས་དཀྱིལ་ལྟར་སྒྲུབ་ལུགས་སོགས་རྒྱ་ཆེར་ཡོད་མོད་ལ།། ༈ །།གནས་སྐབས་ལྟར་སྣང་ཙམ་
དུ་ལྷོ་ཕྱོགས་ཀྱི་ཤར་འདབ་ལ་གུ་རུ་ཉིད་བཞུགས་པར་མ་ཟད། འདབ་མ་གཞན་བདུན་པོའི་མཚན་བརྒྱད་ཐམས་ཅད་ཀྱང་གུ་རུ་ཉིད་ཡིད་མོད་ཀྱི། འདི་འདྲ་བ་ནི་གསར་མ་ལ་ཡང་མང་མོད་ཏེ། འཆད་པ་པོ་ང་ཆོས་ཀྱང་ང་། །ཞེས་པའི་དགོངས་པ་ལྟར་བདེ་མཆོག་འཁོར་ལོ་བསྒྱུར་དྲུག་གི་དཀྱིལ་འཁོར་གྱི་ལྷ་དྲུག་ཀ་བདེ་མཆོག་ཉིད་ཡིན་པ་དང་། བདག་མེད་ལྷ་མོ་བཅོ་ལྔ་ཐམས་ཅད་བདག་མེད་མ་འབའ་ཤིག་ཡིན་པ་ལྟ་བུ་དང་། གཞན་ཡང་། དུས་འཁོར་སོགས་ཀྱི་སྐུ་དཀྱིལ་གསུང་དཀྱིལ་ཐུགས་དཀྱིལ་གྱི་ལྷ་ཐམས་ཅད་དང་པོའི་སངས་རྒྱས་ཉིད་ཀྱི་སྐུ་གསུང་ཐུགས་སོ་སོའི་བཀོད་པ་ཡིན་པའི་དཔེ་བཞིན་དཀྱིལ་འཁོར་གྱི་རིགས་ཐམས་ཅད་དེ་དང་མཚུངས་པ་ལགས་མོད།། ༈ །།སྐབས་འདིར་བསྒྲལ་བའི་ཞིང་བཅུ་འདྲེན་ཚུལ་གང་ཡིན་གསུང་བ། འདི་ནི་གཤིན་རྗེ་གཤེད་སྐོར་དང་མ་མགོན་གྱི་རྒྱུད་སོགས་ལ་འདྲེན་ཚུལ་མང་ཞིང་། ད་ལྟ་འཕྲལ་མར་གོ་བདེ་བ་
ནི་གཙུག་ལག་ཕྲེང་བས་མཛད་པའི་ཕག་མོ་རྣམ་བཤད་ཆེན་མོའི་ཕྱག་དཔེ་གཟིགས་ལོས་ཡོད་ཅིང་། དེར། རྙིང་མའི་དམ་ཚིག་གསལ་བཀྲ་ནས་གསུངས་པ་བཞིན་དྲང་བར་མཛད་པ། དཀོན་མཆོག་གི་སྐུ་དགྲ། ༡ བླ་མ་དམ་པའི་སྐུ་དགྲ། ༢ དམ་ཚིག་མཐའ་དག་དང་འགལ་བ། ༣ རྒྱུ་འབྲས་མི་བདེན་པར་ལྟ་བའི་ལོག་ལྟ་ཅན། ༤ ཕ་མ་དང་སློབ་དཔོན་སོགས་ལ་འཁུ་ཞིང་གནོད་པར་བྱེད་པ། ༥ གསང་སྔགས་ཀྱི་ཚོགས་གྲལ་དུ་འདུ་བར་མི་འོས་ཀྱང་དགག་པའམ་སྐྲོད་པར་མ་ནུས་པ། ༦ སེམས་ཅན་ཡོངས་ལ་གནོད་ཅིང་འཚེ་བར་བྱེད་པ། ༧ དམྱལ་བ། ༨ ཡི་དྭགས། ༩ བདུད་འགྲོ་ ༡༠ དང་བཅས་པ་རྣམས་ཡིན་པར་བཤད་པའི་ལུགས་དང་། ཡང་འདྲེན་ཚུལ་གཅིག་ནི། མགོན་པོའི་རྒྱུད་ལས། བླ་མ་ལ་སྡང་སྔགས་ལ་དམོད། བསྟན་ལ་སྡང་༣ ཞིང་སེམས་ཅན་འཚེ།༤ དཀོན་མཆོག་དམོད་༥ དང་སྒྲུབ་ལ་སྡང་༦ དམ་ཉམས་༧ པ་དང་དམྱལ་བ་༨དང་། ཡི་དྭགས་༩
བདུད་འགྲོ་ཞིང་བཅུའོ། །ཞེས་གསུངས་སོ། །འདི་དག་གཞན་བདུན་པོ་ནི་དྲག་པོ་མངོན་སྤྱོད་ཀྱི་བསྒྲལ་བའི་ཞིང་དང་། ངན་སོང་གསུམ་པོ་ནི་གནས་དེ་ལས་མཐར་ཐབས་ཞི་ཞིང་ཕན་པའི་སྒོ་ནས་སྒྲོལ་བའམ། གནས་སྤར་བའི་ཡུལ་ཡིན་པར་བཤད་དེ། ཚུལ་འདི་དག་ཞིབ་པར་ནི་རྩ་ལྟུང་བཅུ་བཞིའི་འགྲེལ་པ་སོགས་དང་། དམ་ཚིག་གསལ་བཀྲའི་འགྲེལ་པ་སོགས་ལས་གསུངས་ཤིང་། ཕག་མོ་རྣམ་བཤད་ཉིད་ལས་ཀྱང་ལེགས་པར་གསུངས་སོ། །གོང་གི་འཕྲོར། མགོན་པོའི་ལོ་རྒྱུད་ལ་ལར་ནི། བདུད་མ་ཏྲམ་རུ་དྲ་དེ་ཉིད་དཔལ་ཧེ་རུ་ཀས་བསྒྲལ་བའི་ཁོག་པ་ཆ་བརྒྱད་དུ་བགོས་ནས་འཇིག་རྟེན་ཁམས་སུ་བསྐྱུར་བ་ས་གཞིར་གྱུར་པ་ནི་དུར་ཁྲོད་ཆེན་པོ་བརྒྱད་དུ་གྱུར་ཏེ། མཆོག་གི་དངོས་གྲུབ་སྒྲུབ་པའི་གནས་སུ་བྱིན་གྱིས་རླབས། རུ་དྲའི་རྣམ་ཤེས་ཀྱི་ངོ་བོ་དེ་ཉིད་དཔལ་ལྡན་མགོན་པོར་སྤྲུལ་བས། སངས་རྒྱས་སྟོང་
གི་བསྟན་པ་གནས་རིང་བསྲུང་མར་མཛད་ཅིང་། མཐར། ཐལ་བས་རྒྱན་པའི་ཞིང་ཁམས་ཅེས་བྱ་བར་དེ་བཞིན་གཤེགས་པ་ཐལ་བའི་དབང་པོར་འཚང་རྒྱ་བར་གསུངས་སོ།། ༈ །།བཀའ་ཕེབས་ལྟར། ལས་མཐའམ་དྲག་ལས་ཐམས་ཅད་ཀྱི་སྙིང་པོ་ནི་རང་རྒྱུད་འཐུལ་བ་ཁོ་ན་དང་། དགྲའི་གཙོ་བོ་ནི་ངར་འཛིན་འགོང་པོ། བགེགས་ཀྱི་རྩ་བ་ནི་བདག་གཅེས་པར་འཛིན་པ་འདི་ཁོ་ན་དང་། ཉོན་མོངས་རང་ག་མའི་རྟོགས་པ་ཁ་རྒྱས་པ་ནི་བདུད་ཐམས་ཅད་ཀྱི་མཐར་ཐུག་ཡིན་ཚེ། འདི་དག་འདུལ་ཐབས་འབའ་ཤིག་ལ་བརྩོན་དགོས་པ་ནི་གལ་པོ་ཆེའི་གནད་དང་། བསྒྲལ་ལས་བྱེད་པ་ལ། རྙིང་ལུགས་ལྟར་ན་རྫོང་འཕྲང་སྲོག་གསུམ་འཛོམ་པ་དགོས་ཤིང་། དེ་གསུམ་མེད་པར་བསྒྲལ་ན་ཤན་པ་དང་ཁྱད་མེད་ཕྱིར། བཅས་རང་གི་མི་དགེ་ཚང་ཞིང་ཐེག་པ་གསུམ་གའི་རྩ་ལྟུང་ཕོག་པར་འགྱུར་བ་ཉིད་དེ། གསུམ་པོ་ནི།
བསྒྲལ་བྱའི་ཡུལ། སྒྲོལ་བྱེད་ཀྱི་མཁན་པོ། བསྒྲལ་ཐབས་ཀྱི་བྱ་བ་དང་གསུམ་ག་ཆོས་ཉིད་སྐྱེ་མེད་དུ་རོ་གཅིག་པའི་གནད་དོན་རྟོགས་པ་ནི་རྫོགས་ཡིན། ༡བདག་ཉིད་ལྷར་གསལ་བ། དམིགས་ཡུལ་ཞིང་བཅུར་གྱུར་བ་གང་ཡིན་དངོས་སུ་གསལ་བ། ལག་ལེན་ཇི་ལྟར་བྱ་བ་རྣམས་རྒྱལ་བའི་ཕྲིན་ལས་དང་། ལག་ཆ་ཕུར་པ་སོགས་ལས་ཀྱི་ཁྲོ་བོར་གསལ་བ་སྟེ། དེ་ལྟར་གསལ་བ་གསུམ་དང་ལྡན་པ་ནི་སྒོམ་པའི་འཕྲང་ཞེས་བྱ། ༢ དེ་དག་ཀྱང་ཨ་འཐས་མ་ཡིན་པར་ཡེ་ཤེས་སྒྱུ་མའི་རྣམ་རོལ་གྱིས་བསྒྲལ་ཞིང་། གཟུགས་ཕུང་ཚོགས་སུ་འབུལ། རྣམ་ཤེས་ཆོས་དབྱིངས་སུ་སྤར་བས་རྒྱུ་བསོད་ནམས་དང་། འབྲས་བུ་བྱང་ཆུབ་ཀྱི་ཚོགས་གཉིས་ཀ་རྫོགས་པར་བྱེད་པ་ནི་སྤྱོད་པའི་སྲོག་སྟེ། ༣ དེ་ལྟར་རྫོང་འཕྲང་སྲོག་གསུམ་མི་ལྡན་པར་མངོན་སྤྱོད་བྱེད་པ་རྣམས་སུ་མུ་སྟེགས་ངན་སྔགས་མཁན་དང་མཚུངས་པར་མནར་མེད་ཀྱི་ཉེ་རྒྱུ་ཁོ་ནར་
ཟད་ཀྱང་གོ་མཁན་དཀོན་མཆི།། ༈ །།ཅི་ཞུ་ན། བདག་ནི་སྤྱིར་ཡང་སྒོམ་ཕྱོགས་ཁོ་ནར་མོས་པ་ཅིག་མ་རྟོགས། ལས་ཚོགས་དྲག་སྤྱོད་ཀྱི་རིགས་ལ་བློ་འཇུག་མཁན་ཞིག་ལར་ནས་མིན་པ་དང་། ཁྱད་པར་འདི་ཚོར་ཡང་རྒྱུན་གྱི་བསྐངས་གསོ་གཏོར་བསྔོ་སོགས་བྱེད་པ་ལ། ས་ཆ་ཀློ་རོང་དུ་སོང་བའི་གཤིས་ཀྱི། གཏོར་མ་བཞིན་ཞག་ཁ་གཅིག་བཞག་ན་འབུ་སྲིན་གྱི་གོང་བུར་གྱུར་ནས་ཅི་ཡང་བྱ་ཐབས་མི་འདུག་ཚེ། རྒྱུན་དུ་ཉམས་ལེན་ནི་བླ་མ་སྒྲུབ་པའི་གསོལ་འདེབས་སྨོན་ལམ་ལ་དྲིལ་ཚེས་བཅུ་ནམ་ཡིན་དུས། གཏོར་མཆོད་ཚོགས་རྫས་ཅི་འབྱོར་པ་རྩལ་སྤྲུགས་སུ་གཤམ་ནས་ཆོ་ག་གང་རྒྱས་གང་ཤེས་ཐམས་ཅད་གཏོང་ཞིང་། འཇུག་ཏུ་གཏོར་མ་འབུལ་བའི་འདོད་གསོལ་དུ།། ༈ །།སངས་རྒྱས་ཀྱི་བསྟན་པ་དར་བ་དང་། སེམས་ཅན་ལ་བདེ་སྐྱིད་འབྱུང་བ་དང་། ཁྱད་པར་བདག་སོགས་དཔོན་སློབ་ཡོན་མཆོད་འཁོར་འདས་
འབྲེལ་ཐོགས་ལྟོས་བཅས་སུ་གྱུར་བ་ཀུན་གྱི་མཐུན་རྐྱེན་བསམ་པ་ཆོས་མཐུན་དུ་འགྲུབ་པ་དང་། དམ་པའི་ཆོས་བསྒྲུབ་པའི་འགལ་རྐྱེན་བར་ཆད་མ་ལུས་ཞི་བ་དང་། རང་གཞན་དོན་གཉིས་འགྲུབ་ཅིང་འགྲོ་བ་སེམས་ཅན་ཐམས་ཅད་སྨིན་གྲོལ་ལ་འཁོད་པའི་ཕྲིན་ལས་སྡོང་གྲོགས་རྒྱ་ཆེན་པོར་མཛད་དུ་གསོལ་ལོ། །ཞེས། འདི་ཁོ་ན་མ་གཏོགས་གཞན་གང་ཡང་བྱེད་མེད་པས།། ༈ །།སྐུ་ཉིད་ཀྱང་བཀའ་བསྲུངས་ཆོས་སྐྱོངས་ལ་ཕྲིན་ལས་བཅོལ་ཚུལ་འདི་བཞིན་མཛད་པར་ཞུ། ཞེས་ཐུགས་ནང་གཙང་མའི་འཕྲོས་དོན་དུ་གསོལ་བ་ལགས། གཅིག་ཞུས།