སྦས་ཡུལ་གྱི་ལམ་ཡིག་པདྨ་དཀར་པོ་ལས་གསུངས་པའི་གུ་རུ་རྡོ་རྗེ་གྲོ་ལོད་ཀྱི་དབང་ཆོག
སྦས་ཡུལ་གྱི་ལམ་ཡིག་པདྨ་དཀར་པོ་ལས་གསུངས་པའི་གུ་རུ་རྡོ་རྗེ་གྲོ་ལོད་ཀྱི་དབང་ཆོག་བཞུགས་སོ།
གུ་རུ་པདྨ་སིདྡྷི་ཧཱུྃ སྤྲོས་བྲལ་ཆོས་སྐུའི་མཁའ་ཀློང་ལས། །ལྷུན་གྲུབ་གཟུགས་སྐུའི་ཚ་ཟེར་སྤྲོ། །ལོག་རྟོགས་མུན་ཆེན་འཇོམས་མཛད་པའི། །པདྨ་དྲག་པོས་བྱིན་གྱིས་རློབས། གང་ཞིག་ཚེ་འདིའི་བྱ་བ་ལ་ཁོ་ཐག་གཏིང་ཆོད་ཀྱི་དཔའ་གདེངས་ལྡན་པའི་སྐལ་ལྡན་དག་སྦས་པའི་གནས་ཆེན་རྣམས་སུ་ཚེ་དང་སྒྲུབ་པ་མཉམ་པར་བགྲོད་ནུས་པའི་གང་ཟག་གམ། དེ་ལས་གཞན་ཡང་དམ་ལྡན་སྒྲུབ་བརྩོན་གྱི་སྐལ་བཟང་རྣམས་ལ། རྒྱལ་བའི་ཁྱབ་བདག་པདྨ་དྲག་པོ་རྡོ་རྗེ་གྲོ་ལོད་རྩལ་གྱི་བྱིན་རླབས་དབང་བསྐུར་ཟབ་མོ་བྱེད་པར་འདོད་ན། རང་བཞིན་རྫོགས་པ་ཆེན་པོའི་དོན་ལ་དབང་འབྱོར་བའི་སློབ་དཔོན་གྱིས། བཀྲ་ཤིས་བྱིན་ཆགས་པའི་གནས་སུ་
དུས་ཀྱི་རྒྱལ་པོ་ཚེས་བཅུ་ལ་བབས་པའི་ཚེ། ཅོག་རྩེ་སོགས་སྟེགས་བཟང་པོའི་ཁར་མེ་ཏོག་གི་ཚོམ་བུ་ཆེ་བ་གཅིག་ལ་ཆུང་བ་བཞིས་བསྐོར་བ་དགོད་པ་ནི་གུ་རུ་མཁའ་འགྲོ་སྡེ་བཞི་མཚོན་པའི་དཀྱིལ་འཁོར་རོ། །དེའི་དབུས་སུ་མན་ཛི་སོགས་ཀྱི་སྟེང་དུ་དཔལ་གཏོར་ཟུར་གསུམ་མེ་རིས་མཚན་པ་རིན་ཆེན་འབར་བའི་དབྱིབ་ཅན་ཞབས་སུ་པད་འདབ་ཀྱིས་མཛེས་པའི་རྩེ་མོར་རྡོ་རྗེ་གྲོ་ལོད་ཀྱི་སྐུ་རྟེན་ཙཀྐ་ལི་གཟུག་ཅིང་དར་ཟབ་ཀྱི་གདུགས་ཆུང་དང་འཕན་ཕྲན་སོགས་ཀྱིས་བརྒྱན་པ་བཞག །དེའི་མཐའ་སྐོར་གྱི་གཡས་སུ་དབང་བུམ་རྒྱན་ལྡན་སྤྱི་མཐུན་དང་། གཡོན་དུ་རྡོར་སེམས་བསྐྱེད་བཟླས་བྱས་པའི་ལས་བུམ། མདུན་དུ་ཧཱུྃ་ཡིག་ཁ་དོག་ལྔ་ཙཀླི་ཐ་དད་རེ་ལ་བྲིས་པ་དང་། རྒྱབ་ཏུ་སྣ་ཚོགས་རྡོ་རྗེ། གཡས་
ཟུར་དུ་རྡོ་རྗེ་རྩེ་དགུ་པ། གཡོན་ཟུར་དུ་ལྕགས་ཕུར། ཧཱུྃ་ཡིག་གི་མདུན་དུ་རཀྴའམ་ཐོད་ཕྲེང་གང་རུང་དང་བཅས་པའི་དབང་རྫས་རྣམས་བཤམས་ཤིང་། མཆོད་པའི་ཡོ་བྱད་ཅི་ལྟར་འབྱོར་པ་ཚོགས་ཀྱི་འཁོར་ལོ་དང་བཅས་པ་ཡང་རྒྱས་པར་བཤམ་པ་དེ་བཅའ་གཞིའི་རིམ་པའོ། །དེ་ནས་ལས་གཞུང་ཆོ་གའི་བྱ་བ་ནི། ཆོས་བཀའ་གཞན་ལྟར་བདག་མདུན་བུམ་སོགས་སྐྱེད་ཆོག་སྤྲོས་བཅས་ཀྱི་ལས་རིམ་བྱ་བའི་སྐབས་མ་ཡིན་ཏེ། འདི་ནི་རང་བཞིན་རྫོགས་པ་ཆེན་པོ་གསལ་སྟོང་ཟུང་འཇུག་ཁྱབ་གདལ་ཡེ་རྫོགས་ཆེན་པོའི་ཏིང་ངེ་འཛིན་གྱིས་བྱིན་གྱིས་རློབས་པའི་སྐབས་དོན་ཡིན་པས་ན། སློབ་དཔོན་ཉིད་མ་བཅོས་བཟོ་མེད་ཀྱི་གནས་ལུགས་གདོད་མའི་ཀ་དག་ཆེན་པོའི་ངང་ནས་ཨོཾ་ཨཱཿཧཱུྃ་ཞེས་བརྗོད་པ་ཙམ་གྱིས། ཕྱི་སྣོད་ནང་བཅུད་བདག་དང་དཀྱིལ་འཁོར་རྫས་དང་ཡོ་བྱད་སོགས་ཀུན་རྫོབ་ཀྱི་སྣང་བ་ཨ་འཐས་འདི་རང་སར་ཕྱམ་གྱི་བསྐུར་བའི་རང་ངོར། འགག་མེད་རིག་རྩལ་ནི་ཨོཾ། ཡེ་སྟོང་མཐའ་བྲལ་ནི་ཨཱཿ ཟུང་འཇུག་བློ་འདས་ནི་ཧཱུྃ་སྟེ། འབྲུ་གསུམ་གྱིས་དགོས་པའི་གནད་དོན་དྲན་པ་ནི་བསངས་སྦྱངས་བྱིན་རླབས་སོགས་སྔོན་འགྲོའི་ལས་རིམ་མཐའ་དག་གི་དོད་པོ་ཡིན་ལ། དངོས་གཞི་ནི། དེའི་
ངང་ནས་རང་ཉིད་སྐད་ཅིག་གིས་གུ་རུ་རྡོ་རྗེ་གྲོ་ལོད་རྩལ་གྱི་ཆ་བྱད་དུ་ལམ་གྱི་གསལ་ནས་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་རིག་པའི་ངོ་བོ་ཧཱུྃ་དམར་མེའི་འོད་མདངས་ཅན་ལས་རང་གདངས་ཀྱི་ཧཱུྃ་དམར་གྲངས་མེད་པ་རྒྱུན་མི་ཆད་དུ་འཕྲོས་པས། མཐོང་ཐོས་ཀྱི་སྣང་སྲིད་ཐམས་ཅད་ངོ་བོ་རང་རིག་རྡོ་རྗེ་གྲོ་ལོད་ཡིན་པ་ལ་རྣམ་པ་ཧཱུྃ་ཡིག་རང་སྒྲ་སྒྲོག་པའི་ཚུལ་གྱིས་མེར་གྱི་གང་ནས། འཁོར་འདས་ཀྱི་དངོས་པོ་མ་ལུས་པ་སྐུ་རྡོ་རྗེ་གྲོ་ལོད། གསུང་གྲགས་སྟོང་ཧཱུྃ་སྒྲ། ཐུགས་མ་བཅོས་ཁྱབ་གདལ་གསུམ་གྱི་རང་བཞིན་འབའ་ཤིག་ཏུ་ཡེ་རྫོགས་ལྷུན་གྲུབ་ཆེན་པོར་བློ་ཐག་རྦད་ཀྱི་བཅད། ལེངས་ཀྱི་བསྐུར། ལྷོད་ཀྱི་གློད་པའི་ངང་ནས་ཧཱུྃ་ཧཱུྃ་ཧཱུྃ་ཞེས་ཤུགས་འབྱུང་དུ་བཟླ་བ་ནི་འདི་སྐབས་ཀྱི་བདག་མདུན་བུམ་གསུམ་དཀྱིལ་འཁོར་སྒྲུབ་མཆོད་འཛབ་བསྙེན་སྤྲོ་བསྡུ་བདག་འཇུག་བླང་བ་སོགས་མཐའ་དག་པའི་ལས་དང་བྱ་བའི་རིམ་པ་ཀུན་གཅིག་འཆར་དུ་འགྲུབ་པ་སྟེ། ཐེག་པའི་རྩེ་རྒྱལ་རྫོགས་པ་ཆེན་པོའི་སྙིང་པོའི་ཟབ་གནད་འདི་ལྟ་བུའི་ཁྱད་དོན་བློའི་ར་བར་མི་ཤོམ་པའི་གང་ཟག་དག་ནི་འདི་སྐབས་ཀྱི་ཡུལ་དུ་གྱུར་པའི་དཔོན་སློབ་མ་ཡིན་པ་ཤེས་
པར་བྱའོ། །དེ་ལྟར་དབང་གི་སྒྲུབ་པ་ཁྱད་པར་སྨད་དུ་བྱུང་བ་སྔོན་དུ་བཏང་ནས། དངོས་གཞི་དབང་བསྐུར་གྱི་ས་ལ་ནམ་བབས་པ་ན། དབང་རབ་སྣོད་ལྡན་གྱི་སློབ་མ་གང་ཡོད་རྣམས་ལས་བུམ་གྱི་ཁྲུས་ནས་དབྱུང་ཞིང་ཡིག་བརྒྱ་བཟླས་ལ་ཉམས་ཆགས་བཤགས། གཉིས་འཛིན་གྱི་བགེགས་རིགས་མ་ལུས་རང་འཆོང་རྫུན་ཁུངས་སྡོང་ཞིང་། སླན་ཆད་འབྱུང་བ་མེད་པར་རྟོགས་པའི་སྲུང་བའི་འཁོར་ལོ་དང་ལྡན་པས། སྒོ་གསུམ་གཏན་འདུན་དང་བཅས་པ་མཎྜལ་དུ་ཕུལ་བའི་མཐར་བླ་མས་འདི་སྐད་བརྗོད་དེ། འོ། རིགས་ཀྱི་བུ་རྣམས་སྐལ་བ་དང་ལྡན་པས་གསང་མཆོག་ཐེག་པའི་ཡང་རྩེ་ལ་མོས་པ་ལམ་དུ་བྱེད་པ་ནི་ཁྱེད་ཅག་ཚེ་རབས་དཔག་ཏུ་མེད་པ་ནས་བསོད་ནམས་ཀྱི་ཚོགས་བསགས་ཤིང་སྨོན་ལམ་རྣམ་དག་གིས་མཚམས་སྦྱར་བ་ཡིན་པར་གདོན་མི་ཟ་ཞིང་། དེ་ལྟར་མ་ཡིན་ན་ཟབ་མོའི་ལམ་མཆོག་དང་ཕྲད་པར་མི་འགྱུར་ལ། གལ་ཏེ་ཕྲད་ཀྱང་དེ་ལ་དད་པར་ཡང་མི་འགྱུར་ཞིང་མ་དད་པ་ལ་བྱིན་རླབས་འཇུག་པ་མི་སྲིད་པ་སྟེ། དེས་ན་འདི་ལྟ་བུ་
དང་ཕྲད་ཅིང་དད་ལ་བྱིན་རླབས་ཀྱི་ཡུལ་དང་སྣོད་དུ་གྱུར་པའི་ཕུན་ཚོགས་ལེགས་དགུ་འཛོམ་དུས་འདིར་དོན་ཆེན་སྙིང་པོ་སྒྲུབ་པ་ལ་འབད་དགོས་པ་དང་། དེ་སྒྲུབ་པར་བྱེད་པ་ཡང་མཚན་ལྡན་བླ་མའི་དྲིན་ལ་ལྟོས་དགོས་ཏེ། ཇི་ལྟར་འཇིག་རྟེན་ན་དགོས་འདོད་འབྱུང་བའི་ནོར་བུ་ལོན་པར་འདོད་པ་རྣམས་རྒྱ་མཚོའི་དེད་དཔོན་ལ་ལྟོས་དགོས་པ་དང་། འབྱུང་འདུས་གདོས་བཅས་ཀྱི་ལུས་ལ་འདུ་བའི་ནད་ཀྱི་ཉེན་པ་ན་སྨན་པ་མཁས་པ་ལ་བརྟེན་དགོས་པའི་དཔེ་དང་མཚུངས་ཕྱིར། འདིར་ཡང་འཁོར་བའི་གཅོང་ནད་སེལ་བ་དང་། སྨིན་གྲོལ་གྱི་ནོར་བུ་ལོན་པར་བྱེད་པ་ལ་བླ་མ་རྡོ་རྗེའི་སློབ་དཔོན་ལ་མ་བརྟེན་པར་ཐབས་གཞན་གང་གིས་ཀྱང་དེ་ལྟར་མི་འགྲུབ་པས་ན། བླ་མ་ལ་ཐ་མལ་མི་རུ་བཟུང་བའི་འདུ་ཤེས་སྤངས་ནས་སངས་རྒྱས་ཐམས་ཅད་གཅིག་བསྡུས་ཀྱི་ངོ་བོར་ཐག་ཆོད་པའི་
དད་མོས་ཀྱིས་ཀུན་ནས་བླངས་ཏེ་གསོལ་བ་གདབ་པ་ནི་དང་པོར་གཅེས་པའི་ཐབས་གནད་ཡིན་ཕྱིར་དེ་ལྟར་ཡི་ལ་ངེས་པའི་སྒོ་ནས་གསོལ་གདབ་ཀྱི་ཚིག་འདིའི་རྗེས་ཟློས་མཛད་པར་ཞུ། ཧོ། བླ་མ་བདེར་གཤེགས་ཐམས་ཅད་ཀྱི། །ངོ་བོ་པདྨ་ཐོད་ཕྲེང་རྩལ། །བདག་ཅག་འདིར་འདུས་དད་ལྡན་ལ། །སིད་དྷི་དངོས་གྲུབ་རྣམ་གཉིས་སྩོལ། ཞེས་ལན་གསུམ་ཞུས་ལ། དེ་ལྟར་ཁྱོད་ཀྱིས་གུས་པས་གསོལ་བ་བཏབ་པས་ནི་བླ་མས་རྗེས་སུ་བཟུང་བར་རུང་བའི་སྣོད་དུ་གྱུར་པ་ཡིན་ནོ། ཧོ། སྐལ་ལྡན་སྐྱེས་བུ་ཁྱོད་རྣམས་ཀུན། །དལ་འབྱོར་ཐོབ་པ་གྲངས་མང་ཡང་། གསང་སྔགས་ཟབ་མོའི་སྒོར་ཞུགས་དཀོན། །དེང་ཉིད་བསོད་ནམས་ཚོགས་ལས་བྱུང་། །སླར་ཡང་ཟབ་མོའི་གདམས་ངག་ཉོན། དེ་ཡང་། གང་ཞིག་འཁོར་བའི་སེམས་ཅན་མཐའ་ཡས་ཤིང་མུ་མེད་པ་རྣམས་ཀྱི་ནང་ནས་ངེས་པར་འབྱུང་བའི་ཡིད་དང་
མཐར་པ་འདོད་པའི་བློ་ལྡན་ནི་རེ་ཤིག་ཙམ་ལས་མི་འབྱུང་། ཐར་འདོད་ཀྱི་གང་ཟག་ཇི་ཙམ་པའི་ཁྲོད་ནས་ཀྱང་བླ་མེད་ངེས་གསང་ཟབ་མོའི་སྣོད་ལྡན་ནི་སྲིད་པ་ཙམ་དུ་ཟད་ལ། དེ་ལ་ཡང་ལོག་པའི་བཤེས་གཉེན་དང་གྲོགས་ངན་རྐྱེན་ངན་ནི་མང་ལ། ཡང་དག་པའི་མགོན་དང་བཤེས་དང་བཟང་པོའི་རྐྱེན་ནི་དཀོན་པས་ན། ངེས་པར་ལེགས་པའི་ལམ་ལ་འཇུག་པ་མཐར་སོན་པའི་ཐབས་ལ་ཆིག་དྲིལ་བུ་འབད་པའི་དུས་ནི་ད་རེས་ཁོ་ན་ཡིན་པས། ལས་ངན་འཁོར་བའི་གདོས་ཐག་བཅད་དེ་ཚེ་གཅིག་སངས་རྒྱས་ཀྱི་གོ་འཕངས་ལ་ཅི་སྙེགས་ཅི་འགྲུབ་ལ་རེམས་དགོས། རང་ཉིད་འབའ་ཤིག་དེ་ལྟར་ཐར་པ་གཅིག་པུས་ཀྱང་ཆོག་པ་མ་ཡིན་ཏེ། ཁམས་གསུམ་གྱི་འགྲོ་བ་ཐམས་ཅད་བདག་ཅག་གི་དྲིན་ཅན་ཕ་མར་མ་གྱུར་པ་ནི་གཅིག་ཀྱང་མེད་ཅིང་། དེ་
དག་ཐོག་མཐའ་བར་མེད་དུ་སྲིད་པའི་སྡུག་བསྔལ་སྣ་ཚོགས་པས་གདུང་བ་དར་དྲག་ལ་ཡུན་རིང་ཞིང་བཟོད་པར་དཀའ་བ་འདི་དག་སྒྲོལ་ཞིང་འདོན་པའི་གཉེར་དང་དེད་དཔོན་ནི་འོ་སྐོལ་ཐེག་ཆེན་གྱི་སྒོར་ཞུགས་པ་རྣམས་ལ་བབས་པ་ཡིན། བབས་བཞིན་མི་བརྩོན་པར་འདོར་ན་ནི་ཐེག་ཆེན་བྱང་སེམས་ཀྱི་ཚུལ་ལས་ཉམས་པར་འགྱུར་ཕྱིར་དེ་བས་ན་བྱང་ཆེན་གྱི་སྤྱོད་པ་ལ་ནན་གྱིས་སློབ་ཅིང་རང་གཞན་གྱི་དོན་གཉིས་ལུས་ཐོབ་འདི་ལ་བསྒྲུབ་པར་བྱ་བ་དང་། དེ་འགྲུབ་པ་ལ་གེགས་སུ་གྱུར་པའི་འཁོར་བ་ཐོག་མེད་ནས་བསགས་པའི་ལས་ཉོན་བག་ཆགས་ཀྱི་སྒྲིབ་ཚོགས་ཅི་མཆིས་པ་ཐམས་ཅད་དེང་འདིར་ལྷ་དང་བླ་མ་དབྱེར་མེད་ཀྱི་སྤྱན་སྔར་སྙིང་ནས་མཐོལ་ཞིང་བཤགས་ལ། དེང་ཕྱིན་ཆད་འདི་ནས་བྱང་ཆུབ་ཀྱི་འབྲས་མཆོག་མ་ཐོབ་བར་དུ་སྒོ་གསུམ་གཏན་གྱི་མདུན་མ་དང་བཅས་པ་བླ་མའི་སྤྱན་སྔར་ལྟོས་
མེད་དུ་འབུལ་བའི་འདུན་པ་རྩེ་གཅིག་མཛོད་ལ་ཚིག་འདི་བཞིན་རྗེས་ཟློས་ཀྱང་མཛད་པར་ཞུ། ན་མོ། བདེར་གཤེགས་རིགས་འདུས་སྤྱན་སྔ་རུ། སྔོན་ཆད་བག་མེད་ལས་ཉོན་སྒྲིབ། །མཐོལ་བཤགས་བྱང་བར་མཛད་དུ་གསོལ། །ཕྱིན་ཆད་སྒོ་གསུམ་ཉིད་ལ་འབུལ། །ལེགས་ཉེས་ཐམས་ཅད་ཁྱེད་རང་ཤེས། ཞེས་ཞུས་ལ། འོ། དེ་ཡན་ཆད་ཀྱིས་ཁྱེད་ཅག་གི་རྒྱུད་དག་པར་བསྒྲུབ་པ་ཡིན། ད་ནི་ཐེག་མཆོག་བླ་མེད་སྨིན་གྲོལ་གྱི་སྒོ་རུ་གཞུག་པར་བྱ་བའི་ཐབས་ཀྱི་བྱེ་བྲག་ནི་རབ་ཏུ་མང་མོད་ཀྱི། ཀུན་ལ་གཅེས་ཤིང་མེད་དུ་མི་རུང་བ་སྒོ་གསུམ་དཀྱིལ་འཁོར་གསུམ་ལྡན་དུ་བསྒྲུབ་ནས་ཡེ་ཤེས་རྡོ་རྗེ་མི་ཟད་རྒྱན་གྱི་འཁོར་བཅས་སྐུ་གསུམ་དབྱེར་མེད་ཀྱི་གོ་འཕངས་མངོན་དུ་བྱ་བ་ཉིད་མཆོག་ཏུ་ཟབ་པའི་ལམ་ཡིན་པས་ན། ད་ལམ་སྐབས་སུ་བབས་པའི་དོན་གྱི་སྙིང་པོར་ལུས་ལྷའི་
དཀྱིལ་འཁོར་ནི་བླ་མ་ཡི་དམ་མཁའ་འགྲོ་ཆོས་སྐྱོངས་ཐམས་ཅད་གཅིག་བསྡུས་ཀྱི་བདག་ཉིད་རིགས་འདུས་རྡོ་རྗེ་གྲོ་ལོད་རྩལ་དུ་སྒྲུབ། ངག་སྔགས་ཀྱི་དཀྱིལ་འཁོར་ནི། རྒྱལ་བ་ཀུན་གྱི་བྱིན་རླབས་ཡེ་ཤེས་སྙིང་པོ་འབྲུ་གཅིག་ཧཱུྃ་གི་བཟླས་བརྗོད་ལ་དྲིལ། སེམས་ཆོས་ཉིད་ཀྱི་དཀྱིལ་འཁོར་ཐེག་པ་མཐའ་དག་གི་ཡང་བཅུད་རྫོགས་པ་ཆེན་པོ་རྩོལ་བྲལ་ཡེ་ཤེས་ཟང་ཐལ་དུ་ལམ་ཁྱེར་རྒྱུན་མི་ཆད་པའི་ཏིང་ངེ་འཛིན་ལ་སློབ་པར་བྱ་བ་ཡིན་ཞིང་། དེ་ལས་དང་པོར་སྙན་དུ་གསོལ་རྒྱུའི་དོན་སོར། རྡོ་རྗེ་གྲོ་ལོད་དུ་མཚན་གསོལ་བའི་ལོ་རྒྱུས་དང་གཏན་ཚིག་ཇི་ལྟ་བུ་ཡིན་ཞེ་ན། དེ་ཡང་ཕྱོགས་བཅུ་དུས་བཞིའི་རྒྱལ་བ་མ་ལུས་པའི་ཐུགས་རྗེ་ནུས་མཐུ་མཛད་ཕྲིན་ཡོན་ཏན་ཐམས་ཅད་གཅིག་བསྡུས་སུ་བྱིན་གྱིས་བརླབས་ནས་འགྲོ་བའི་འདྲེན་པར་མངག་པའི་སློབ་དཔོན་ཆེན་པོ་པདྨ་འབྱུང་གནས་ཉིད་ལ་བཅོམ་ལྡན་འདས་ཀྱིས་ལུང་བསྟན་ཚུལ་ནི། མྱང་འདས་ཀྱི་མདོ་རྒྱས་པར། ང་ནི་མྱ་
ངན་འདས་འོག་ཏུ། ལོ་ནི་བཅུ་གཉིས་ལོན་པའི་ཚེ། ཨཽ་རྒྱན་ཡུལ་གྱི་ནུབ་བྱང་མཚམས། དྲི་མེད་ཀོ་ཤའི་མཚོ་གླིང་དུ། །གེ་སར་པདྨའི་སྙིང་པོ་ལས། ཀུན་ལས་ལྷག་པའི་སྐྱེས་བུ་འབྱུང་། །ཁྱེད་རྣམས་མྱ་ངན་མ་བྱེད་ཅིག །ནོར་བུའི་ནང་ནས་ཡིད་བཞིན་ལྟར། །མཐའ་ཡས་དབང་པོ་པདྨ་འབྱུང་། །འཇིག་རྟེན་མུན་པ་དེས་སེལ་འགྱུར། །ཞེས་གསུངས་ཚེ་ཀུན་ལས་ལྷག་པར་འབྱུང་བའི་ཚུལ་ལ་འཁོར་རྣམས་ཐེ་ཚོམ་སྐྱེས་པ་གཟིགས་ནས་སླར་གསུངས་པ། ཀྱེ་ཧོ། འཁོར་རྣམས་རྩེ་གཅིག་ཡིད་ཀྱིས་ཉོན། །ང་ཡི་སྤྲུལ་པ་དེ་ཉིད་ནི། །དུས་གསུམ་སྤྲུལ་པ་གཞན་ལས་འཕགས། །བགྲེས་རྒུད་མི་མངའ་གཞོན་ནུའི་ཚུལ། །སྐུ་མཆོག་སྤྲུལ་པ་གཞན་ལས་འཕགས། །བདུད་བཞི་ཐོག་མེད་ཉིད་ནས་བཅོམ། །དྲག་རྩལ་སྤྲུལ་པ་གཞན་ལས་འཕགས། །ཚེ་གཅིག་སངས་རྒྱས་ཐེག་ཆེན་སྟོན། །
དགོངས་པ་སྤྲུལ་པ་གཞན་ལས་འཕགས། །འཛམ་གླིང་མཐའ་དབུས་ཀུན་འདུལ་སྟེ། །འགྲོ་དོན་སྤྲུལ་པ་གཞན་ལས་འཕགས། །བསྐལ་བཟང་འདི་ལ་འདས་གྲོངས་མེད། །སྐུ་ཚེ་སྤྲུལ་པ་གཞན་ལས་འཕགས། །ཅི་ཕྱིར་འོད་དཔག་མེད་ཉིད་དོ། །ཞེས་གསུངས་པ་དང་། དབུས་འགྱུར་ལུང་བསྟན་མདོ་ཕྱི་མར། །རྒྱལ་བ་རྣམས་ཀྱི་རབ་བསྔགས་པའི། །ང་ལས་ལྷག་པའི་སྐྱེས་བུ་འབྱུང་། །བདུད་དང་མུ་སྟེགས་ལ་སོགས་པ། །རྒོལ་བ་ངན་པ་དེ་ཡིས་འདུལ། །རྒྱ་གར་ཤར་ནུབ་ཐམས་ཅད་དུ། །སངས་རྒྱས་བསྟན་པ་དེ་ཡིས་འཛིན། །མ་འོངས་ཐ་མར་གྱུར་པ་ནི། །སྟོན་པའི་བཀའ་དང་དམ་ཆོས་རྣམས། །རྡོ་རྗེ་གདན་གྱི་བྱང་ཕྱོགས་ངོས། །རི་བོ་ནག་པོ་བཅུ་གསུམ་འདས། ཁ་བ་ཅན་གྱི་རྒྱལ་ཁམས་སུ། །བསྟན་པ་དར་ཞིང་རྒྱས་པར་བྱེད། །ཅེས་གསུངས་ཇི་བཞིན་དུ་སངས་རྒྱས་ཐམས་ཅད་ཀྱི་བྱིན་རླབས་ཀྱི་མཐུ་དང་འོད་དཔག་མེད་ཀྱི་ཐུགས་རྗེའི་འོད་ཟེར་ལས་སྤྲུལ་ཏེ་དྷ་ན་ཀོ་ཤའི་མཚོ་
དབུས་པད་སྡོང་ལས་སྐུ་བལྟམས་ནས། རྒྱལ་པོ་ཨིནྡྲ་བྷུ་དྷི་འཁོར་བཅས་ཀྱི་གདན་དྲངས་པའི་དུས་སུ་སྤྲུལ་པའི་སྐུ་མཚན་དཔེས་བརྒྱན་པ་དེ་ཉིད་པད་སྡོང་གི་རྩེ་ནས་བླངས་ཏེ་གར་བཞག་ཏུ་མེ་ཏོག་པདྨ་རེ་དེ་འཕྲལ་ལ་སྐྱེས་པའི་སྟེང་དུ་བཞུགས་པ་བྱུང་སྟེ། །ཁྱིའུ་འདི་ནི་པདྨའི་འབྱུང་གནས་སུ་འདུག་གོ་ཅེས་གླེང་བ་དང་། པདྨ་ལས་སྐུ་འཁྲུངས་པ་གཉིས་ཀའི་རྒྱུ་མཚན་ལས་པདྨ་འབྱུང་གནས་སུ་མཚན་ཐོགས། དེ་ནས་ཕོ་བྲང་ཆེན་པོ་མཐོ་ལྕོག་དགུ་ལྡན་དུ་རྒྱལ་པོའི་སྲས་ཀྱི་སྐལ་བ་མཛད་པར་གསོལ་བ་བཏབ་ནས་ཨུ་རྒྱན་གྱི་རྒྱལ་ཁམས་གྲོང་ཁྱེར་འབུམ་ཕྲག་བཅུ་གཉིས་ཀྱི་རྒྱལ་པོར་མངའ་གསོལ་བས་མཚན་ཡང་པདྨ་རྒྱལ་པོར་གྲགས། སླར་ཡང་རྒྱལ་སྲིད་སྤངས་ནས་དུར་ཁྲོད་བསིལ་བ་ཚལ་ལ་སོགས་པར་མཁའ་འགྲོའི་ཚོགས་དཔོན་མཛད་ཅིང་པཎ་ཆེན་གྲུབ་ཐོབ་ཀུན་དང་ཆོས་ཀྱི་བགྲོ་
མཛད་པའི་ཚེ་པཎྜི་ཏའི་ཆ་བྱད་དུ་སྤྲུལ་བས་མཚན་ཡང་པདྨ་སམྦྷ་ཝ་ཞེས་གྲགས་ཏེ། བོད་སྐད་དུ་པདྨ་ལས་སྐྱེས་ཞེས་འཁྲུངས་པ་ལས་བཏགས་པ་དང་། འཕགས་པ་ཀུན་དགའ་བོ་ལས་རབ་ཏུ་བྱུང་བའི་ཚུལ་མཛད་དུས་མཚན་ཤཱཀྱ་སེང་གེར་གསོལ་ཞིང་། སླད་དུ་སངས་རྒྱས་ཀྱི་བསྟན་ལ་འཕེལ་འགྲིབ་བྱུང་སྐབས་རྡོ་རྗེ་གདན་དུ་སྟོན་པའི་རྒྱལ་ཚབ་མཛད་ནས་ཆོས་ཀྱི་འཁོར་ལོ་བསྐོར་ཚེ་ཐུབ་པའི་སྐུ་དངོས་སུ་བསྟན་ནས་བསྟན་པ་གཞིར་བཞེངས་སུ་མཛད་པས་མཚན་ཡང་བསྟན་པའི་མངའ་བདག་ཤཱཀྱ་སེང་གེར་གྲགས། བྲམ་ཟེའི་ཁྱིའུ་སྤྲུལ་ནས་རིག་པའི་གནས་ལྔས་གཞན་ཕན་མཛད་པ་དང་། མ་ར་ཏི་ཀ་ཟླ་གམ་དབང་གི་ཕུག་ཏུ་ཚེའི་རིག་འཛིན་བསྒྲུབ་པའི་སྐབས་སོགས་སུ་སྔགས་འཆང་ལོངས་སྤྱོད་རྫོགས་པའི་ཆ་བྱད་དུ་བསྟན་པས་བློ་ལྡན་མཆོག་སྲེད་དུ་མཚན་གྲགས་པོ་པ་གླིང་དང་ཧ་ན་རྒོད་པ་ལ་
སོགས་དུར་ཁྲོད་ཆེན་པོ་རྣམས་སུ་ཧེ་རུ་ཀ་རྣལ་འབྱོར་བརྟུལ་ཤུགས་སྤྱོད་པའི་ཆ་ལུགས་ཀྱིས་གཤེགས་ཅིང་མཁའ་འགྲོ་དང་ཞིང་སྐྱོང་གི་དཔའ་བོ་དང་དཔའ་མོ་ལྷ་སྲིན་དྲེགས་པ་ཅན་རྣམས་དབང་དུ་བསྡུས། ངེས་མེད་ཀྱི་ཡུལ་ཁམས་རྣམས་སུ་ཆུ་བོ་གྱེན་ལ་བཟློག་པ་དང་ཉི་མ་སྟོད་ལ་མནན་པ་སོགས་རྫུ་འཕྲུལ་དུ་མས་འགྲོ་དོན་མཛད་པས་ཉི་བ་འོད་ཟེར་རྩལ་དུ་མཚན་གྲགས། ལྷོ་ཕྱོགས་མཐར་སྐྱེས་ཀྱི་གྲོང་ཁྱེར་ལ་སོགས་པར་མུ་སྟེགས་ཀྱི་རྒྱལ་པོ་བླ་མཆོད་སྟོན་པ་ལྔ་བརྒྱ་དང་བཅས་པས་སངས་རྒྱས་ཀྱི་བསྟན་པ་ལ་གནོད་པ་ཆེར་བྱས་པའི་ཚེ། སྒྲ་ཚད་ལུང་རིགས་ཀྱི་ཆོས་སྒྲ་སེང་གེའི་ང་རོ་ལྟར་བསྒྲགས་པས་མུ་སྟེགས་ཀྱི་རྩོད་པ་བཟློག་ཅིང་ཕམ་པར་མཛད་པ་ལས། མུ་སྟེགས་གདུག་པའི་ངན་སྔགས་སྣ་ཚོགས་ཀྱི་བར་ཆད་རྩོམ་དུ་བྱུང་བ་རྣམས་ལ། མི་འཇིགས་དཔའ་བའི་རྟགས་སུ་
སེང་གེའི་གཡང་གཞི་གསོལ་བའི་ཁྲོ་བོ་མཐིང་ནག་འཇིགས་རུང་གི་སྐུར་བཞེངས་ཏེ། སྡིག་མཛུབ་ཀྱི་རྩེ་ལས་གནམ་ལྕགས་ཀྱི་ཐོག་ཆར་ཕབ་པས་མུ་སྟེགས་ཀྱི་ཡོན་མཆོད་བདུད་སྡེ་དཔུངས་བཅས་ཐམས་ཅད་རྡུལ་དུ་བརླག་ཅིང་སངས་རྒྱས་ཀྱི་བསྟན་པ་ཟླ་བ་སྒྲ་གཅན་ལས་གྲོལ་བ་བཞིན་མཛད་པའི་མཚན་ཡང་སེང་གེ་སྒྲ་སྒྲོག་ཏུ་གྲགས། སླད་དུ་འོ་སྐོལ་བོད་ཡུལ་མཐའ་ཁོབ་མུན་པའི་གླིང་དུ་ཆོས་ཀྱི་སྣང་བས་དབེན་ཞིང་ལྷ་མ་སྲིན་གདུག་པ་ཅན་གྱིས་དབང་བྱས་པའི་ཡུལ་ཕྱོགས་འདིར་སངས་རྒྱས་ཀྱི་བསྟན་པ་འཛུག་པར་སྨོན་ལམ་བཏབ་པའི་ཆོས་རྒྱལ་ཁྲི་སྲོང་ལྡེ་བཙན་གྱི་ཐུགས་དམ་དཔལ་གྱི་བསམ་ཡས་བཞེངས་པར་བརྩམས་པ་ལ་བོད་ཀྱི་ལྷ་སྲིན་གདུག་པ་ཆེས་པས་ཅི་ལྟར་བྱས་ཀྱང་བརྩིགས་ཏུ་མི་སྟེར་ཞིང་། བྱང་སེམས་ཐུགས་རྗེའི་མངའ་བདག་མཁན་པོ་ཞི་བ་འཚོ་ལྟ་བུས་ཀྱང་མ་
། ཐུལ་བ་ལ། སློབ་དཔོན་རིན་པོ་ཆེ་པདྨ་འབྱུང་གནས་སྤྱན་དྲངས་ནས་ཐོག་མར་ཧས་པོ་རིའི་རྩེ་མོར་བྱོན་ཏེ་ཆབ་གཏོར་གཟི་ཕོར་གང་ལ་སྣང་སྲིད་ཀྱི་ལྷ་འདྲེ་ཐམས་ཅད་ཚིམ་པའི་ལོངས་སྤྱོད་དུ་བྱིན་བརླབས་ནས་བསྔོས་ཤིང་ལྷ་འདྲེ་ཟིལ་གནོན་རྡོ་རྗེའི་འགུར་གྱིས་ཟིལ་གྱིས་མནན་ཞིང་བཀའ་འོག་ཏུ་བསྡུས། འགའ་ཞིག་བཀའ་ལ་མི་ཉན་པ་རྣམས་དྲག་པོའི་སྦྱིན་བསྲེག་ལན་གཉིས་སུ་མཛད་ནས་ཚར་བཅད། དེ་ནས་སླར་ཡང་བསམ་ཡས་ཀྱི་རྨང་འདིང་བའི་ཚེ་སློབ་དཔོན་ཉིད་མདོ་སྔགས་ཟུང་འཇུག་གི་ཆ་ལུགས་ཀྱི་རིག་འཛིན་དྲག་པོ་ཁྲོས་པའི་རྣམ་འགྱུར་རྡོ་རྗེ་གྲོ་ལོད་རྩལ་གྱི་སྐུར་བཞེངས་ནས་ཧཱུྃ་གི་གླུ་བླངས་ཤིང་རྡོ་རྗེའི་གར་མཛད་དེ། སྟེང་གི་ནམ་མཁའ་ལ་རྡོ་རྗེའི་འགྲོས་མཛད་པའི་གྲིབ་ཡོར་གང་བྱུང་དུ་གཙུག་ལག་ཁང་གི་ལྕགས་རིའི་རྨང་བཏིང་བ་ལས་ལྕགས་རི་ཟུར་མང་འཁོར་ལོ་རྩིབས་སྟོང་
གི་དབྱིབས་སུ་བྱུང་། རྫུ་འཕྲུལ་ནུས་སྟོབས་དེ་ལྟ་བུས་སྣང་སྲིད་ཀྱི་ལྷ་སྲིན་ཐམས་ཅད་དབང་དུ་བསྡུས་ཤིང་ལས་ལ་བཀོལ་བས་ཐུགས་དམ་གཙུག་ལག་གེགས་མེད་དུ་འགྲུབ་ནས་དགེ་འདུན་གྱི་སྡེ་དང་བཤད་སྒྲུབ་ཀྱི་ཆོས་གྲྭ་བཙུགས། དེ་ནས་ཡང་རེ་ཤིག་གི་དུས་ན། མཁན་སློབ་ཆོས་གསུམ་གྱི་སྐུ་དྲིན་ལས་བོད་ཡུལ་དུ་སངས་རྒྱས་ཀྱི་བསྟན་པ་དར་ཞིང་རྒྱལ་ཁྲིམས་ཀྱི་དམ་རྒྱ་བཙན་པ་དེ་ལ་སྡིག་བློན་ནག་པོ་མ་རུངས་གདུག་པ་ཅན་གྱི་སྐྱེ་བོ་རྣམས་ཤིན་ཏུ་མ་ཟོད་པར། རྒྱལ་པོའི་སྙན་དུ་ཕྲ་མའི་ཞུ་བ་དུ་མར་ཕུལ་ཡང་རྒྱལ་པོ་ཐུགས་མ་གཡོས་པས་དེར་ཁོང་རྣམས་ཀྱི་གཞན་ཐབས་མ་སྙེད་པར། ལོ་པཎ་རྣམས་ཉིན་ཞག་རེ་ལ་དབུ་རྩེའི་བར་ཁང་ཆེན་མོར་ཚ་དྲོ་དང་ཆོས་ཀྱི་ཐུན་ལ་ལན་བཞི་རེ་ཚོགས་པའི་དུས་སུ་སྡིག་བློན་རྣམས་ཀྱིས་དམག་གིས་སྒོ་མནན་སྟེ་ལོ་པཎ་ཐམས་ཅད་དུས་གཅིག་ཏུ་སྐུ་དཀྲོང་བར་གྲོས་ངན་
བཤམས་ཤིང་གཤེད་མ་བཀོས་པ་རྒྱལ་པོས་གསན་ཡང་སྡིག་བློན་དབང་བཙན་ཕྱིར་ཅི་བྱ་ཏོལ་མེད་དུ་གྱུར་པས། རིངས་སྟབས་སུ་སློབ་དཔོན་གྱི་དྲུང་དུ་ཚུལ་དེ་ཞུས་པ་ན། སློབ་དཔོན་ཆེན་པོའི་ཞལ་ནས། སངས་རྒྱས་ཀྱི་བསྟན་པ་དང་དམ་པའི་ཆོས་གང་དུ་དར་བར་བདུད་ཀྱི་བར་ཆད་ཀྱང་མང་བ་འདི་ནི་ཆོས་ཉིད་ཡིན་ཏེ། འོན་ཀྱང་རྒྱལ་པོ་ཆེན་པོ་ཐུགས་མ་བདེ་མི་འཚལ། ཁོ་བོ་པདྨ་འབྱུང་གནས་བདུད་དང་ལོག་འདྲེན་འདུལ་བའི་གཉེན་པོར་རྒྱལ་བ་ཀུན་གྱིས་མངགས་པ་ཡིན་པས་སྡིག་བློན་རྣམས་ཀྱི་བར་ཆད་བདག་གིས་བཟློག་པར་རྔོ་མ་ཐོགས་ལགས་ཀྱི། རྒྱལ་པོ་ཐུགས་རབ་མི་འཚལ་བས་ཅི་བདེ་བར་བཞུགས་ཤིག་ཅེས་གསུངས་སོ། །དེ་ནས་ནང་པར་ཉི་མ་ཤར་བ་ན་ལོ་པཎ་རྣམས་བར་ཁང་དུ་ཚ་བ་གསོལ་བར་ཚོགས་པ་དང་སྡིག་བློན་རྣམས་དམག་དཔུངས་གོ་མཚོན་སྤྱད་
དེ་རྒྱུག་པ་ལ་སློབ་དཔོན་གྱིས་ཞི་བའི་ཕྲིན་ལས་ཀྱི་ཏིང་ངེ་འཛིན་མཛད་པས་ལོ་པཎ་ཐམས་ཅད་ཐུགས་རྗེ་ཆེན་པོའི་སྐུ་འབའ་ཤིག་ཏུ་གྱུར་པར་སྡིག་བློན་རྣམས་ཀྱིས་མཐོང་བས་ཅི་བྱའི་གླག་མ་རྙེད་པར་ལོག་ནས་སོང་། དེ་ནས་ཉིན་གུང་གི་དྲོ་བཞེས་ལ་ཚོགས་པའི་སྐབས་སུ་བདུད་དམག་རྣམས་རྒྱུག་པ་ལ། སློབ་དཔོན་གྱིས་རྒྱས་པའི་ཕྲིན་ལས་ཀྱི་ཏིང་ངེ་འཛིན་ལ་བཞུགས་པས། ལོ་པཎ་ཐམས་ཅད་ནོར་བུ་རིན་པོ་ཆེ་འོད་འབར་བ་ཤ་སྟག་ཏུ་གྱུར་ནས་ནང་ཐམས་ཅད་འོད་ཀྱིས་གང་བ་མཐོང་ནས་ཁོང་རྣམས་འདི་བྱེད་མ་བྱུང་བར་ལོག །སླར་ཕྱི་དྲོའི་ཆོས་ཐུན་ལ་ཚོགས་སྐབས་ཁོང་རྣམས་རྒྱུག་པ་ན། སློབ་དཔོན་དབང་གི་ཕྲིན་ལས་ཀྱི་དགོངས་པ་ལ་བཞུགས་པས། ལོ་པཎ་ཐམས་ཅད་ལྷའི་བུ་བུ་མོ་ལྟ་བས་ཆོག་མི་ཤེས་པ་གླུ་དང་གར་བྱེད་པ་ཁོ་ནར་གྱུར་པས་ནང་ཐམས་ཅད་གང་ཞིང་ཟིང་ལོང་དུ་གྱུར་པ་མཐོང་བས་ཁོང་རྣམས་མཚོན་ཆ་བསྐྱུར་ཞིང་ལྟད་
མོ་ལ་ཡུན་རིང་ཡེངས་ཏེ་སྐྱེས་ནས་ལོག དེ་ནས་སྲོད་ཀྱི་ཐུགས་དམ་ལ་ཚོགས་པའི་དུས་སུ་ཁོང་རྣམས་ཀྱང་གྲོས་ངན་གྱི་མནའ་དམ་ཞིབ་ཏུ་བྱས་ནས་ཞེ་སྡང་གི་དཔའ་ངར་སྐྱེད་དེ་རྒྱུགས་པ་ལ། སློབ་དཔོན་ཉིད་བདུད་འདུལ་དྲག་པོ་གྲོ་ལོད་རྩལ་གྱི་སྐུར་བཞེངས་ཏེ། ཞལ་ནས་ཧཱུྃ་གི་ང་རོ་འབྲུག་ལྟར་སྒྲག་ཅིང་སྐུ་ལས་ཡེ་ཤེས་ཀྱི་མེ་དང་ཁྲོ་ཚོགས་ཀྱི་སྤྲུལ་པ་གྲངས་མེད་སྤྲོས་པས་བདུད་དམག་རྣམས་བྱ་སྤུ་རླུང་གི་གཏོར་བ་བཞིན་དེད་ནས། ཧས་པོ་རིའི་མར་ཟུར་གྱི་བྱེ་ཐང་རྣམས་སུ་བྲོས་ཏེ་འགྱེལ་ཞིང་བརྒྱལ་ནས་དབུགས་ཀྱི་འགྲོ་འོང་ཆད་དེ་རོ་ལྟར་གྱུར་པས་དེ་ནུབ་དེར་ལུས། ནང་པར་སློབ་དཔོན་གྱི་ཞལ་ནས། གདུག་པ་ཅན་དེ་དག་སྐྲག་ཅིང་དཔའ་བསྐོང་བའི་སླད་དུ་དེ་ལྟར་བགྱིས་པ་མ་གཏོགས་བསད་ན་འོ་སྐོལ་ལ་སྡིག་ཆེ་བས་མི་རུང་གསུངས་ནས་
ཡུངས་དཀར་སྤར་བ་གང་ལ་རྫོགས་ཆབ་བཏབས་ནས་བསྐུར་ཏེ་དེ་རྣམས་ལ་འཐོར་ཞིག་གསུངས་པ་ལྟར་བྱས་པས། དམག་མི་དེ་དག་རིམ་པས་དབུགས་དང་དྲན་པ་གསོར་ཆུད་ཅིང་དལ་བུས་ཁྱར་ཁྱོར་དུ་ལངས་བྱུང་སྟེ། དེ་ཕྱིན་ཆད་བདུད་བློན་རྣམས་ཀྱི་བར་ཆད་རྩོམ་མ་ནུས་པར་གྱུར་ཏོ། །སླད་དུ་སློབ་དཔོན་ཉིད་ལྷོ་ནུབ་རྔ་ཡབ་གླིང་དུ་གཤེགས་ཁར་སྤ་དྲོ་སྟག་ཚང་སེང་ཕུག་གི་གནས་སུ་ཇོ་མོ་མཚོ་རྒྱལ་ལ་བཀའ་སྩལ་ཏེ། ཁོ་བོ་བོད་དུ་བསྟན་པ་དང་སེམས་ཅན་ལ་ཕན་པ་ཚེ་རབ་ཏུ་གྱུར་མོད་ཚེ། འོན་ཀྱང་བོད་འབངས་བསོད་ནམས་དམན་ཞིང་རྒྱལ་པོ་བློ་ཆུང་བའི་རྒྱུ་རྐྱེན་གྱིས། ཀླུ་མལ་གྲོ་གཟི་ཅན་དམ་ལ་མི་འདོགས་པར་ཞུས་པ་དང་། སྦྱིན་བསྲེག་ལན་གསུམ་པ་བགྱིད་དུ་མ་བཅུག་པ་སོགས་རྟེན་འབྲེལ་འགའ་ཞིག་འཆུག་པའི་མཐུས། མ་འོངས་པ་ན་
སྐྱེ་འགྲོ་རྣམས་ལ་གཟའ་ཀླུ་རྒྱལ་པོའི་གནོད་པ་མང་བ་ཙམ་འབྱུང་སྟེ། འོན་ཀྱང་ཁོ་བོའི་རྗེས་སུ་འཇུག་ཅིང་བློ་འགེལ་བ་དང་། ཁྱད་པར་བདག་ཉིད་པདྨ་དྲག་པོ་རྡོ་རྗེ་གྲོ་ལོད་ཡི་དམ་དུ་བྱེད་པ་རྣམས་ལ་བདུད་རིགས་ཀྱིས་བར་ཆད་མི་ནུས་ལ། གནས་འདི་ཡང་དེ་ཉིད་སྒྲུབ་པའི་གནས་སུ་ཤིས་པར་གདའ་བས། ཁོ་བོས་དེང་འདིར་ལྷ་སྲིན་དྲེགས་པ་འདུལ་བའི་རྟེན་འབྲེལ་ཞིག་བྱའི། མཚོ་རྒྱལ་ཁྱོད་ཀྱིས་ཚོགས་འཁོར་བཤོམས་ལ་གསོལ་བ་ཐོབ་ཅིག་གསུངས་ནས། སློབ་དཔོན་ཉིད་རྡོ་རྗེ་གྲོ་ལོད་དྲག་པོའི་སྐུ་གནས་དེའི་རྒྱབ་རི་དང་ཆེ་ཆུང་མཉམ་པ་ཞིག་ཏུ་སྤྲུལ་ཏེ་ཧཱུྃ་སྒྲ་དྲག་པོར་སྒྲགས་པ་ཙམ་གྱིས། མོན་བོད་ཀྱི་ལྷ་འདྲེའི་རིགས་སུ་གྱུར་པ་མཐའ་དག་སྐད་ཅིག་ལ་ཁྲོམ་དུ་ཚོགས་པར་གྱུར་པ་རྣམས་ལ། སློབ་དཔོན་གྱི་ཞི་བས་བདེན་ཚིག་གི་ཆོས་གསུངས། རྒྱས་པས་
འདོད་ཡོན་གྱི་ཆར་ཕབས། དབང་གིས་རང་རང་སྲོག་གི་སྙིང་པོ་བླངས། དྲག་པོའི་རྫུ་འཕྲུལ་སྐུ་དང་ཞལ་ནས་མེ་དཔུང་འབར་བས་ས་དང་བར་སྣང་ཁེངས་ཤིང་འུར་ཆོམ་གྱིས་སྒྲས་སྣང་སྲིད་གཡོ་བར་མཛད་པས། གདུག་པ་ཅན་གྱི་ལྷ་འདྲེ་ཐམས་ཅད་སྐྲག །དངངས། འདར། འགྱེལ། བརྒྱལ་བ་ལ་ཐུག་ཅིང་། དཔའ་བོ་ཆེན་པོའི་བཀའ་དང་དམ་ལས་འདའ་བར་མི་བགྱིད་དོ། །ཅེས་ཁས་བླངས་དམ་བཅས་མནའ་དོར་མཐའ་ཚིག་སྒྲགས་ཅིང་བཏུལ་ནས། མཐར་རྡོ་རྗེ་གྲོ་ལོད་ཉིད་གནས་དེའི་བྲག་རི་དེ་ལ་ཐིམ་པའི་ཚུལ་བསྟན་པས་རི་དེ་གྲོ་ལོད་ཀྱི་སྐུའི་དབྱིབས་ཤིན་ཏུ་གསལ་བར་གྱུར་པ་ད་ལྟ་ཀུན་གྱི་མཇལ་དུ་ཡོད་ལ། མདོར་ན་སློབ་དཔོན་རིན་པོ་ཆེ་རྒྱལ་བ་ཐམས་ཅད་ཀྱི་ཐུགས་རྗེ་ཡོངས་འདུས་ལ་རྫུ་འཕྲུལ་གྱི་རྣམ་འགྱུར་གཅིག་ཏུ་མ་ངེས་མོད་ཀྱང་། བོད་ཡུལ་འདིར་མི་དང་མི་མིན་གདུག་པ་ཅན་བཏུལ་
བའི་སྐུའི་སྣང་བརྙན་ནི་འདི་ཁོ་ན་བསྟན་པར་མཛད་པ་ཤས་ཆེ་སྟེ། གང་འདུལ་གྱི་གཉེན་པོའི་རྟེན་འབྲེལ་གནད་དུ་ཆེ་བ་ཞིག་ཡིན་པར་སྣང་བ་དང་། མཚན་གྱི་ངེས་ཚིག་ཀྱང་སྒྲ་དོན་གཉིས་ལས། སྒྲའི་དབང་དུ་བགྱི་ན། ལེགས་སྦྱར་སྐད་དུ། ཀྲོ་དྷ་ལོ་ཀརྟོ་ར་ཞེས་པ་བོད་ཀྱི་སྐད་དུ་ཁྲོ་བོ་འཇིག་རྟེན་འདས་པ། ཅེས་བྱ་བ་ཡིན་པ་དང་། དེ་ཉིད་ཚིག་བསྡུད་དུ་བྱས་པས་གྲོ་ལོད་ཅེས་པར་འགྱུར་བས། དེ་ཡང་སྒྲ་ཟུར་ཉམས་ཏེ་གྲོ་ལོད་དང་། གྲོ་བོ་ལོད་སོགས་སུ་གྱུར་པ་ཡིན། །དོན་འགྱུར་གྱི་དབང་དུ་བྱ་ན། གྲོ་ལོད་ཅེས་པ་ནི་ཁྲོ་བོ་འཆོལ་བ་ལ་འཇུག་ཕྱིར་ཆོལ་པ་ནི་ངེས་པ་མེད་པའི་དོན་ཡིན་པས། ཁྲོ་བོ་འདི་ཉིད་ཀྱི་སྐུ་མདོག་ཕྱག་མཚན་ཆ་ལུགས་རྣམ་འགྱུར་ཅིར་ཡང་ངེས་མེད་ཀྱི་སྤྲུལ་སྒྱུར་མཛད་པར་མཚོན་པ་ལགས། དེ་ལྟ་བུ་བདུད་འདུལ་པདྨ་དྲག་
པོ་རྡོ་རྗེ་གྲོ་ལོད་རྩལ་གྱི་སྒྲུབ་སྐོར་ཟབ་མོ་རྒྱས་བསྡུས་ཅི་རིགས་པ་གཏེར་ཁ་ཐ་དད་ལས་འབྱུང་ནའང་། འདི་ནི་སྦས་པའི་གནས་པདྨ་བཀོད་ཀྱི་ཞིང་སོགས་བགྲོད་པ་ལ་བར་ཆད་སེལ་བའི་ཆ་རྐྱེན་དུ་དགོངས་ནས། གནས་ཀྱི་ལམ་ཡིག་ལུང་བསྟན། གུ་རུའི་སྐུ་ཚབ་པདྨ་བཤེས་གཉེན། མྱོང་གྲོལ་སྐྱེ་བདུན་གྱི་ཤ་སོགས་དང་ལྷན་ཅིག་ཏུ་གུ་རུའི་སྒྲུབ་གནས་ཀོག་རོང་ཕུག་ཏུ་གཏེར་དུ་བཞུགས་པ་རིགས་འཛིན་ཆེན་པོ་འཇའ་ཚོན་སྙིང་པོས་གདན་དྲངས་པའི་སྐལ་ལྡན་གདུལ་བྱའི་བསོད་ནམས་ཀྱི་རྫིང་བུ་ཡོངས་སུ་གང་བའི་དགའ་སྟོན་རྨད་དུ་བྱུང་བ་འདི་ཉིད་ཀྱི་དབུ་མར་བ་ལེགས་པར་ཐོབ་ཕྱིར་སྣང་སྲིད་བླ་མའི་དཀྱིལ་འཁོར་ཡེ་གདོད་མ་ནས་ཡིན་ཀྱང་ཡིན་པར་མ་ཤེས་པའི་རྟོགས་སྒྲིབ་སྦྱོང་ཕྱིར་དུ་ཁྱེད་རང་རྣམས་ཀྱི་མོས་པའི་འདུན་གཏགས་འདི་ལྟར་མཛད་པར་ཞུ། ཨོཾ་ཨཱཿཧཱུྃ། ཞེས་བརྗོད་པའི་རྟེན་འབྲེལ་
སྒྱུ་འཕྲུལ་ལས། བདག་རྡོ་རྗེའི་སློབ་དཔོན་ནི་རྗེ་བཙུན་པདྨ་ཐོད་ཕྲེང་ཧེ་རུ་ཀའི་ཆ་བྱད་རུས་རྒྱན་ཐོར་ཚུགས་ཅན། སྟག་ཤམ་དང་རས་ཀྱི་ན་བཟའ་གསོལ་ཞིང་རྡོ་རྗེ་ཐོད་པ་ཁ་ཊྭྃ་བསྣམས་ནས་སྣང་སྲིད་ཟིལ་གནོན་གྱི་ལྟ་སྟངས་མཛད་པར་མོས་པ་གནང་། ཁྱེད་རང་རྣམས་ཀྱང་སྐད་ཅིག་དྲན་རྫོགས་སུ་བདུད་འདུལ་དྲག་པོ་རྡོ་རྗེ་གྲོ་ལོད་རྩལ་སྐུ་མདོག་དམར་སྨུག་ཨམ་ཙིག་ཨག་ཚོམ་ཅན། སྤྱན་གསུམ་ཁྲོ་བོའི་གདངས་མིག་ཕྱོགས་བཅུར་གཟིགས་པ། དབུ་སྐྲ་ཁམ་སེར་གྱེན་དུ་འཁྱིལ་ཞིང་སྨིན་མ་ཨག་ཚོམ་ལས་མེ་འབར་བ། སྙན་ལ་དུང་གི་ཝང་མིག་དང་སྐུ་ལ་རུས་པའི་རྒྱན་དྲུག་གིས་སྤྲས་པ། དར་ངུར་སྨྲིག་གི་ཤམ་ཐབས་དང་དར་དམར་གྱི་ཆོས་གོས་གསེར་གྱི་པ་ཊ་རིས་ཅན་ལྷབ་ལྷུབ་ཏུ་གསོལ་བ། ཕྱག་གཡས་རྡོ་རྗེ་རྩེ་དགུ་དང་གཡོན་པ་ལྕགས་ཕུར་མེའི་
ཚྭ་ཚ་འཕྲོ་བ་བསྣམས་ནས་གནོད་བྱེད་བདུད་ཀྱི་སྙིང་ལ་གཟིར་ཞིང་། སྐུ་གར་སྟབས་སུ་ལིང་ངེ་། འགྱིང་ཐབས་སུ་ལོག་གེ། མཆོངས་སྟབས་སུ་ལྡེམ་མེ་བའི་ཞལ་ནས་ཧཱུྃ་གི་སྒྲ་དབྱངས་སྒྲོག་ཅིང་རབ་འཇིགས་བསྐལ་པའི་མེ་སྤུང་གི་ཀློང་ནས་གཟི་བརྗིད་ཀྱི་དཔལ་དུ་འབར་བར་གསལ་བའི་ཐུགས་ཀར་ཧཱུྃ་ཡིག་དམར་གསལ་ལས་འོད་འཕྲོས་པས། ལྷོ་ནུབ་རྔ་ཡབ་ཟངས་མདོག་དཔལ་རི་པདྨ་འོད་ཀྱི་ཕོ་བྲང་དུ་རང་བྱུང་པདྨའི་རྒྱལ་པོའི་ཐུགས་དམ་གྱི་རྒྱུད་བསྐུལ་བས་སྐལ་ལྡན་བྱིན་གྱིས་རློབས་པའི་ཕྲིན་ལས་དུས་ལ་བབས་པར་གཟིགས་ནས། བསྒོམས་པ་ཇི་ལྟ་བའི་ཆ་བྱད་ཅན་དཔའ་བོ་མཁའ་འགྲོ་གྲངས་མེད་པའི་འཁོར་གྱིས་བསྐོར་བ་ནམ་མཁའི་ལམ་ལས་བྱ་རྒོད་ཟས་ལ་བབས་པ་བཞིན་བྱོན་ཏེ། ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །ཅེས་དམིགས་པ་སྤྲད་ལ། ཚིག་བདུན་གསོལ་འདེབས་དང་བཛྲ་གུ་རུའི་འཛབ་དབྱངས། སྤོས་དང་རོལ་མོ་
སོགས་ཀྱིས་ཡེ་ཤེས་ཕབ་ཅིང་བསྟིམ་ནས་རབ་ཏུ་གནས་པར་བྱའོ། །དེ་ནས་དབང་བུམ་འཐོགས་ཏེ། ཀྱཻ། རིགས་ཀྱི་བུ་རྣམས་ལེགས་པར་ཉོན་ཞིག །དབང་ཞེས་བྱ་བའི་དོན་ནི་ཁྱེད་རང་དམ་ཚིག་སེམས་དཔའི་སྐུར་གསལ་བཏབ་པ་ལ་ཡེ་ཤེས་སེམས་དཔའ་སྤྱན་དྲངས་ནས་བསྟིམ་ཏེ། སྒོ་གསུམ་ལྷའི་སྐུ་གསུང་ཐུགས་དང་གཉིས་མེད་དུ་བསྲེ་བ་འདི་ཉིད་ཁོ་ན་ཡིན་ཀྱང་། སླར་ཡང་དེ་ལས་མི་འགྱུར་ཞིང་མི་འདའ་བའི་རྒྱས་འདེབས་ཀྱི་ཚུལ་དུ་དབང་རྫས་ཐ་དད་ཀྱིས་རིམ་པ་བཞིན་བསྐུར་བ་ཡིན་ཏེ་དེ་ལས་ཐོག་མར་བུམ་པའི་ནང་དུ་གུ་རུ་པདྨ་ཐོད་ཕྲེང་ཧེ་རུ་ཀའི་ཆ་བྱད་སྟོང་གསལ་འོད་སྐུར་བཞུགས་པའི་སྐུ་གསུང་ཐུགས་ལས་འོད་ཟེར་དཀར་དམར་མཐིང་གསུམ་འཕྲོས་ནས་ཁྱེད་ཀྱི་གནས་གསུམ་དུ་ཐིམ་པའི་དམིགས་པ་མཛོད་ཅིག །ཧཱུྃ། བརྡ་དབང་བུམ་པའི་དཀྱིལ་འཁོར་འདིས། རིགས་ཀྱི་བུ་ལ་དབང་བསྐུར་བས། སྒོ་གསུམ་དྲི་མ་བག་ཆགས་
དག །ཐོད་ཕྲེང་རྩལ་དང་དབྱེར་མེད་ཤོག །གུ་རུ་པདྨ་སིདྡྷི་ཧཱུྃ། ཞེས་གནས་གསུམ་དུ་བཏུག་ཅིང་བུམ་ཆུ་ཡང་སྦྱིན་ནོ། །འདི་སྐབས་ཀྱི་དབང་བསྐུར་བའི་སྟབས་ཐམས་ཅད་ལ་ཧཱུྃ་སྒྲ་གསུམ་དྲིལ་བདུན་དྲིལ་གྱི་འཛབ་དབྱངས་ངེས་པར་མཛད་པ་རིག་འཛིན་འཇའ་ཚོན་པ་དེ་ཉིད་ཀྱི་ཕྱག་བཞེས་ལགས་སོ། །དེ་ལྟ་བུ་བུམ་དབང་བསྐུར་བ་དེས་ནི་འདི་སྐབས་ཀྱི་གུ་རུ་ཞི་བའི་དབང་དང་བྱིན་རླབས་ཡོངས་རྫོགས་སུ་ཐོབ་པ་ཡིན་པས། ཐོད་ཕྲེང་རྩལ་གྱི་བསྙེན་སྒྲུབ་ལས་སྦྱོར་གང་བྱེད་ཀྱང་བར་ཆད་མེད་ཅིང་འགྲུབ་མྱུར་བའི་དགོས་པ་ཡོད་པས་དེ་ལྟར་ཐུགས་ལ་ངེས་འཚལ། དེ་ནས་གྲོ་ལོད་རྩལ་གྱི་གཏོར་མ་སྐུ་རྟེན་དང་བཅས་པ་གདན་དྲངས་ནས། འོ། སྐལ་བ་དང་ལྡན་པའི་བུ་རྣམས། རིགས་འདུས་པདྨ་དྲག་པོ་རྡོ་རྗེ་ཁྲོ་ལོད་རྩལ་གྱི་སྐུ་དང་སྒྲུབ་གཏོར་འདི་སྤྱི་བོར་བཞག་པའི་དུས་སུ། སྐུ་འདི་ལས་རང་འདྲའི་སྐུ་གཉིས་པ་འོད་ཀྱི་རང་བཞིན་ཅན་རེ་བྱུང་ནས་ཁྱེད་རང་རྣམས་ལ་ཐིམ་པའི་མོས་པ་མཛོད་ཅིག །
ཧཱུྃ། སྒྱུ་འཕྲུལ་སྐུ་གཟུགས་ལ་བ་ལི༚་དབང་། །རིགས་ཀྱི་བུ་ལ་བྱིན་འབེབས་ན། །སྣང་སྟོང་རྡོ་རྗེའི་སྐུ་འགྲུབ་ནས། །ཀུན་ཁྱབ་ཀུན་བྱེད་དབང་ཐོབ་ཤོག གུ་རུ་པདྨ་སིདྡྷི་ཧཱུྃ། ཞེས་སྤྱི་བོར་བསྐུར་ཞིང་ཧཱུྃ་འཛབ་གོང་བཞིན་བྱའོ།། ༈ །།བགྲང་ཕྲེང་འཐོགས་ཏེ། རིགས་ཀྱི་བུ་རྣམས་ལ་ཕྲེང་བ་ལག་ཏུ་གཏད་པ་དང་དུས་མཚུངས་པར། བདག་སློབ་དཔོན་གྱི་ལྗགས་ལས་ཧཱུྃ་ཡིག་གི་ཕྲེང་རྒྱུད་བྱུང་སྟེ་ཁྱེད་ཀྱི་ངག་ལ་ཐིམ་པའི་མོས་པ་མཛོད། ཧཱུྃ། བརྗོད་བྱའི་ཚིག་དབང་ཧཱུྃ་འདི་ཡིན། །བདེར་གཤེགས་ཀུན་གྱི་ཡང་སྙིང་སྟེ། །རིགས་ཀྱི་བུ་ལ་ཧཱུྃ་བསྟིམ་པས། །གྲགས་སྟོང་ཚངས་དབྱངས་དབང་ཐོབ་ཤོག །གུ་རུ་པདྨ་སིདྡྷི་ཧཱུྃ། ཧཱུྃ་འཛབ་སྔར་བཞིན་བྱ་ཞིང་ཕྲེང་བ་འདྲེན་དུ་གཞུག་གོ།། ༈ །།རྡོ་རྗེ་རྒྱ་གྲམ་སྙིང་ཁར་བཞག་ལ། རིགས་ཀྱི་བུ་རྣམས་ལ་ཐུགས་ཀྱི་རྟེན་སྣ་ཚོགས་རྡོ་རྗེ་སྙིང་གར་བཞག་པ་ཙམ་གྱིས། རིགས་འདུས་པདྨ་དྲག་པོ་གྲོ་ལོད་རྩལ་གྱི་ཐུགས་མཆོག་དྲི་བྲལ་གདོད་མའི་ཡེ་ཤེས་ཀྱི་དོན་
མངོན་དུ་གྱུར་པའི་མོས་པ་མཛོད། ཧཱུྃ། ཕྲིན་ལས་བཞི་སྒྲུབ་རྒྱ་གྲམ་དབང་། །རིགས་ཀྱི་བུ་ལ་འདི་བསྐུར་བས། །རིག་པའི་རྩལ་དབང་ཐོབ་གྱུར་ནས། །ཐོད་ཕྲེང་རྩལ་དང་དབྱེར་མེད་ཤོག །གུ་རུ་པདྨ་སིདྡྷི་ཧཱུྃ། ཞེས་བསྐུར་ཞིང་ཧཱུྃ་འཛབ་བྱའོ། །དེ་ལྟ་བུའི་དབང་གིས་ཁྱེད་ཀྱི་སྒོ་གསུམ་གུ་རུའི་སྐུ་གསུང་ཐུགས་ཀྱི་ངོ་བོར་བྱིན་རླབས་ནས། ཕྱག་མཚན་འདི་བཞིན་གཏད་པས། །སྐྱེས་བུ་དཔའ་བོ་ལ་གོ་མཚོན་སྤྲད་པ་ལྟར། ཆེ་བའི་ཡོན་ཏན་རྫོགས་ཤིང་ཕྲིན་ལས་ཐོག་མེད་འགྲུབ་པར་གྱུར་བའི་མོས་པ་མཛོད་ཅིག །རྡོ་རྗེ་ལག་པ་གཡས་སུ་བཞག་ལ། ཧཱུྃ། གསེར་གྱི་རྡོ་རྗེ་རྩེ་དགུ་འདི། །ནམ་ཡང་འབྲལ་མེད་འཆང་བར་བྱ། །དོན་ལ་རང་རིག་རང་གསལ་བརྡ། །ཐབས་ཤེས་དབྱེར་མེད་དབང་ཐོབ་ཤོག །གུ་རུ་པདྨ་སིདྡིྷ་ཧཱུྃ། ལྕགས་ཕུར་གཡོན་དུ་གཏད་ལ། ཧཱུྃ། སྐུ་གསུམ་རང་བཞིན་ལྕགས་ཕུར་ཡིན། །རིགས་ཀྱི་བུ་ལ་འདི་གཏད་པས། །ཕྱི་ནང་བར་ཆད་རྡུལ་དུ་རློག །དུག་གསུམ་སྒྲོལ་བའི་དབང་
ཐོབ་ཤོག །གུ་རུ་པདྨ་སིདྡྷི་ཧཱུྃ། དེ་ལྟར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་བསྐུར་ནས། ད་ནི་རྒྱལ་བ་ཀུན་གྱི་ཡེ་ཤེས་གཅིག་བསྡུས་སྙིང་པོ་ཧཱུྃ་གི་དབང་བསྐུར་བ་ཡིན་པས། ཁྱེད་རང་རྣམས་གུ་རུ་པདྨ་དྲག་པོ་གྲོ་ལོད་རྩལ་དུ་གསལ་བཞིན་པའི་སྤྱི་བོའི་གཙུག་ཏུ་སངས་རྒྱས་ཀུན་གྱི་སྐུ་རྡོ་རྗེའི་རང་བཞིན་ཧཱུྃ་དཀར་འོད་ཟེར་འབར་བ་ཞིག་བསྒོམ་པ་ལ། སློབ་དཔོན་གྱི་སྤྱི་གཙུག་ནས་ཧཱུྃ་དཀར་པོ་ཞིག་བྱུང་བ་ཁྱེད་ཀྱི་སྤྱི་བོའི་ཧཱུྃ་ལ་ཐིམ་པས། དེ་ལས་ཧཱུྃ་དཀར་གྲངས་མེད་འཕྲོས་ནས་སྣང་སྲིད་ཐམས་ཅད་ཧཱུྃ་དཀར་འབའ་ཤིག་གིས་མེར་གྱིས་གང་བའི་ཏིང་འཛིན་མཛད་པར་ཞུ། ཧཱུྃ་དཀར་གྱི་ཙཀླི་སྤྱི་བོར་བཞག་ལ། །དེ་ནས་སྤྱི་བོར་ཡི་གེ་ཧཱུྃ། དཀར་པོ་ཤེལ་ལྟར་གསལ་འཚེར་ཅན། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་དཀར་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་
སྒྲ་སྒྲོག །ཅེས། ཧཱུྃ་དཀར་སྤྱི་བོར་བསྟིམ་ཞིང་ཧཱུྃ་ཉེར་གཅིག་པའི་འཛབ་དབྱངས་བྱའོ། །དེ་བཞིན་དུ་ཧཱུྃ་དམར་གྱི་ཙཀླི་འཐོགས་ནས། ཁྱེད་རང་གི་མགྲིན་པར་སངས་རྒྱས་ཐམས་ཅད་ཀྱི་སྐུ་གསུང་རྡོ་རྗེ་ཧཱུྃ་ཡིག་དམར་པོ་གསལ་བ་ལ། བདག་ཉིད་སློབ་དཔོན་གྱི་མགྲིན་པ་ནས་ཧཱུྃ་དམར་འཕྲོས་ནས་ཐིམ་པ་ཙམ་གྱིས་དེ་ལས་ཧཱུྃ་དམར་དཔག་མེད་འཕྲོས་ཏེ་སྣང་སྲིད་གང་བར་བསྒོམ་མཛོད། དེ་ནས་མགྲིན་པར་ཡི་གེ་ཧཱུྃ། །དམར་པོ་བྱུ་རུའི་མདོག་ལྟར་འཚེར། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་དམར་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས། ཧཱུྃ་དམར་མགྲིན་པར་བསྟིམ་ཞིང་ཧཱུྃ་དབྱངས་བྱའོ། །ཁྱེད་རང་གི་སྙིང་གར་སངས་རྒྱས་ཀུན་གྱི་ཐུགས་རྡོ་རྗེའི་ངོ་བོ་ཧཱུྃ་མཐིང་གསལ་བ་ལས་བླ་མའི་ཐུགས་ཀའི་ཧཱུྃ་མཐིང་ཐིམ་ཞིང་དེ་ལས་ཧཱུྃ་མཐིང་འཕྲོས་པས་སྣང་སྲིད་ཁེངས་པར་བསྒོམ་མཛོད། །དེ་ནས་སྙིང་གར་ཡི་གེ་
ཧཱུྃ། སྔོན་པོ་ནམ་མཁའི་མདོག་ལྟ་བུ། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་སྔོན་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས། ཧཱུྃ་མཐིང་སྙིང་ཁར་བཞག་ཅིང་ཧཱུྃ་དབྱངས་བྱའོ། །དེ་ནས་ཡང་ཁྱེད་རང་གི་ལྟེ་བར་སངས་རྒྱས་ཀུན་གྱི་ཡོན་ཏན་གྱི་སྙིང་པོ་ཧཱུྃ་ཡིག་གསེར་མདོག་ལ་བླ་མའི་ལྟེ་བ་ནས་ཧཱུྃ་སེར་བྱུང་བ་ཐིམ་ཞིང་། སླར་ཧཱུྃ་སེར་གྱིས་སྟོང་ཁམས་གང་བ་འཕྲོ་བར་བསྒོམ་མཛོད། དེ་ནས་ལྟེ་བར་ཡི་གེ་ཧཱུྃ། སེར་པོ་གསེར་ལྟར་གསལ་འཚེར་ཅན། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་སེར་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས། ཧཱུྃ་སེར་ལྟེ་བར་བསྟིམ་ཞིང་ཧཱུྃ་དབྱངས་བྱའོ། །ཁྱེད་རང་གི་གསང་བའི་གནས་སུ་རྒྱལ་ཀུན་ཕྲིན་ལས་འདུས་པའི་ཡི་གེ་ཧཱུྃ་ལྗང་གུ་ལ་བླ་མའི་གསང་གནས་ཀྱི་ཧཱུྃ་ལྗང་ཐིམ་ཞིང་དེ་ལས་འཕྲོས་པའི་ཧཱུྃ་ལྗང་གིས་སྣང་སྲིད་གང་བར་
བསྒོམ་མཛོད། དེ་ནས་གསང་བར་ཡི་གེ་ཧཱུྃ། །ལྗང་ཁུ་མར་གད་གསལ་འཚེར་ཅན། །དེ་བཞིན་སྣང་སྲིད་ཡིད་ཡུལ་ཀུན། །ཧཱུྃ་ལྗང་དྲི་མེད་འོད་ཟེར་འབར། །ཧཱུྃ་ལས་ཧཱུྃ་འཕྲོས་ཧཱུྃ་སྒྲ་སྒྲོག །ཅེས་པས་ཧཱུྃ་ལྗང་གསང་བར་བསྟིམ་ཞིང་ཧཱུྃ་དབྱངས་བྱའོ། །དེ་ལྟར་ཧཱུྃ་ཡིག་ལྔ་ལྡན་གྱིས་འཇིག་རྟེན་ནམ་མཁའ་ཐམས་ཅད་མེར་གྱིས་གང་ནས། ཕྱོགས་དུས་ཀྱི་རྒྱལ་བ་སྲས་བཅས་ཐམས་ཅད་ལ་མཉེས་པའི་མཆོད་པ་ཕུལ་ཞིང་ཀུན་ཀྱང་ཧཱུྃ་ཡིག་གེ་རྣམ་པའི་སྐུར་གྱུར། ཁམས་གསུམ་གྱི་སེམས་ཅན་ཀུན་གྱི་ལས་ཉོན་སྡིག་སྒྲིབ་སྡུག་བསྔལ་སྦྱངས་ཏེ་ཐམས་ཅད་ཡིག་གེ་ཧཱུྃ་གི་རང་བཞིན་དུ་གྱུར། བདུད་རིགས་འབྱུང་པོའི་བར་ཆད་ནད་གདོན་གནོད་པ་ཐམས་ཅད་ཞི་ཞིང་ཀུན་ཀྱང་ཧཱུྃ་གི་རང་བཞིན་ཁོ་ནར་གྱུར་པས། སྣང་སྲིད་སྣོད་བཅུད་ཀྱི་གཟུགས་སྣང་ཐམས་ཅད་ཧཱུྃ་ཡིག །སྒྲ་སྐད་མཐའ་དག་ཧཱུྃ་སྒྲ། རྟོགས་ཚོགས་ཐམས་ཅད་ཧཱུྃ་གི་འཕྲོ་འདུ་འབའ་ཤིག་ཏུ་གྱུར་པའི་ངང་ནས་ཧཱུྃ་སྒྲ་སྒྲོག་སྟེ། གཞན་ཡང་ཡིད་ལ་
ཅི་འདོད་པ། །ཡི་གེ་ཧཱུྃ་གི་འཕྲོ་འདུ་བྱ། །ཧཱུྃ་ཡིག་གྲངས་མེད་ཕྱོགས་བཅུར་སྤྲོ། །ཅི་འདོད་འབྲས་བུ་འཕྲལ་དུ་འགྲུབ། །ཅེས་གསུངས་པའི་དགོངས་པ་ཡིན་ལ། གཞན་ཡང་འདིའི་ཕན་ཡོན་དང་བྱིན་རླབས་ནི་བསམ་གྱིས་མི་ཁྱབ་སྟེ། གུ་རུ་རིན་པོ་ཆེ་ཉིད་ཀྱི་ཞལ་ལུང་ལས། །ཧཱུྃ་གི་འཛབ་དབྱངས་རྒྱུན་དུ་བགྲངས་པ་ཡིས། །སྣང་སྲིད་སྣོད་བཅུད་ཐམས་ཅད་གཡོ་བྱེད་ན། །ལས་ཕྲན་སྐྱེ་འགྲོ་ཕལ་ལ་སྨོས་ཅི་དགོས། །དངོས་གྲུབ་འགྲུབ་རྟགས་རྨིས་ལྟས་བརྗོད་ལས་འདས། །མངོན་སུམ་དུ་ཡང་སེམས་ཉིད་གསལ་སྟོང་རྟོགས། །ཆོས་ཉིད་རང་བྱུང་རང་གསལ་རྒྱུད་ལ་འཆར། །དུག་གསུམ་ཉོན་མོངས་དགྲ་གེགས་ཚོགས་རྣམས་འཇོམས། །བར་ཆད་གདུག་པ་ཐམས་ཅད་ཞོར་ལ་ཞི། །ཚེ་ཡི་རིག་འཛིན་ལ་སོགས་ཐུན་མོང་དང་། །ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། ཅེས་པ་དེ་ལྟ་བུའི་ཕན་ཡོན་དང་ལྡན་
པ་ལགས། ཅེས་བརྗོད་ཅིང་། འདི་ཉིད་ཀྱི་གཏེར་གཞུང་ལས། འདི་ལ་དམིགས་པའི་འཕྲུལ་འཁོར་དང་། གར་དབྱངས་ཕྱག་རྒྱའི་ཆོས་སྐོར་རྣམས། །གཏེར་སྒྲུབ་དུས་སུ་ཌཱ་ཀིིས་སྟོན། ཞེས་གསུངས་ཕྱིར་གཏེར་བཏོན་ཆེན་པོ་ཉིད་ལ་དེ་ལྟར་བྱུང་བ་ནི་གོར་མ་ཆགས་ལ། ཐུན་མོང་གི་སྣང་ངོར་ནི་དབང་འདི་གཞན་གང་ལ་ཡང་མ་གནང་བའི་ཐོག་མར། ཀང་ལུང་ཤུའི་ཡུལ་དུ་དུས་བཟང་ཚེས་བཅུ་ཞིག་ལ་རིགས་བཟང་སྐལ་ལྡན་གྱི་དཔའ་བོ་དཔའ་མོ་འགའ་ཡང་ཚོགས་ཤིང་དད་ལྡན་མང་པོས་དབང་ཟབ་པ་ཅིག་གནང་བར་གསོལ་བ་བཏབ་ཅིང་ཚོགས་འཁོར་བཤམས་པས། རྗེ་དེ་ཉིད་ཀྱང་དེའི་ཉིན་ཐུགས་ཉམས་འབར་བའི་རྣམ་པ་དང་བཅས་ཏེ་དབང་བཀའ་འདི་ཉིད་གནང་བས། འཇའ་འོད་དང་མེ་ཏོག་གི་ཆར་ཡང་བྱུང་ཞིང་། ཧཱུྃ་གི་འཛབ་དབྱངས་ཀྱི་རྟ་ཡང་ཐུགས་ལ་རང་ཤར་དུ་བྱུང་སྟེ་སྐུ་གར་སྟབས་ལིང་ངེ་བའི་ངང་ནས་མཛད་པས་བྱིན་རླབས་ཀྱི་བབས་བཟང་ཞིང་། སླད་དུའང་དབང་འདི་ནམ་མཛད་ལ་ཐུགས་ཉམས་འབར་བ་ཡང་ངེས་པར་འོང་གི་འདུག་གསུངས་ཤིང་། དབྱངས་ནི། ཐོག་མར་ཧཱུྃ་རིགས་གཅིག་དང་། དེ་ནས་ཧཱུྃ་གསུམ་སྒྲིག་ལན་གཉིས་
དང་། སླར་ཧཱུྃ་བདུན་སྒྲིག་ལན་གཉིས་རྣམས་བསྡོམ་པས་ཧཱུྃ་ཉེར་གཅིག་ཏེ་འགྲོ་བ་སྟེ། གཙོ་བོར་སློབ་དཔོན་གྱི་གསུངས་ལས་བླངས་བར་བྱའོ། །དེ་ལྟར་སྐལ་ལྡན་གྱི་བུ་རྣམས་ལ་ལུས་སྣང་སྟོང་ལྷའི་དཀྱིལ་འཁོར་རིགས་འདུས་རྡོ་རྗེ་གྲོ་ལོད་ཀྱི་ངོ་བོར་དབང་བསྐུར་ཞིང་བྱིན་གྱིས་རླབས། ངག་སྔགས་ཀྱི་འཁོར་ལོ་འབྲུ་གཅིག་ཧཱུྃ་གི་སྙིང་པོ་གྲགས་སྟོང་གཞོམ་མེད་རྡོ་རྗེའི་དབྱངས་ཀྱིས་འཁོར་འདས་ཀུན་གྱི་ཡེ་ཤེས་ཀྱི་ཕྱག་རྒྱས་བཏབས་ནས། ད་ནི་སེམས་ཆོས་ཉིད་ཀྱི་དཀྱིལ་འཁོར་རིགས་སྟོང་རྫོགས་པ་ཆེན་པོ་ཡེ་གྲོལ་བློ་འདས་སུ་བཟློ་བའི་རིག་པ་རྩལ་གྱི་དབང་བསྐུར་བར་བྱ་སྟེ། དེ་ཡང་གོང་དུ་སྨོས་པའི་སྣང་གྲགས་ཀྱི་དངོས་པོ་མ་ལུས་ཧཱུྃ་དུ་གྱུར་པ་དེ་ཐམས་ཅད་རྡོ་ཁལ་ལེན་ལ་ལྕགས་འདུ་བ་ལྟར་ཁྱེད་རང་རྣམས་ལ་འདུས་ཤིང་ཐིམ། ཁྱེད་རང་གི་ལུས་ལྷ་སྐུར་གསལ་བ་དེ་ཡང་ལྦུ་བ་ཆུ་ལ་ཐིམ་པ་ལྟར་འོད་དུ་ཞུ་ཞིང་ཡལ་ཏེ། རིག་པའི་
ངོ་བོ་ཧཱུྃ་ཡིག་གེ་རྣམ་པ་ཞིག་ནམ་མཁར་ཡེར་རེ་ཡོད་པར་བསམ། དེ་ཡང་ཧཱུྃ་ཡིག་བསྒོམ་མཁན་གྱི་སེམས་དང་བསྒོམ་པའི་ཧཱུྃ་གཉིས་སུ་མ་གྲུབ་པའི་རང་ངོ་ལ་རྗེན་ནེ་ཧྲིག་གེ་ཡེར་རེ་གསལ་ལེ་བར་བཞག་པས། བཞག་མཁན་དང་བཞག་རྒྱུ་དངོས་པོར་མ་གྲུབ་ཀྱང་ཅང་མེད་སྟོང་པ་ཆད་མཐར་མ་ལྟུང་བའི། རིག་སྟོང་བློ་བྲལ་གྱི་ཡེ་ཤེས་ཀ་དག་གདོད་མའི་གནས་ལུགས་རང་ལ་རང་བྱུང་དུ་འཆར་བར་འགྱུར་གྱི། དེ་ཉིད་རང་ངོ་ཤེས་པ་ནི། དབང་ཐམས་ཅད་ཀྱི་ཡང་རྩེ་རིག་པ་རྩལ་གྱི་དབང་ཡང་ཡིན་ལ། ལྷ་ཐམས་ཅད་ཀྱི་ཁྱབ་བདག་རིགས་འདུས་པདྨ་དྲག་པོ་གྲོ་ལོད་རྩལ་ཡང་དེ་ཡིན་ཞིང་ཆོས་ཐམས་ཅད་ཀྱི་ཡང་བཅུད་ཨ་ཏི་རྫོགས་པ་ཆེན་པོ་ཡང་འདི་ཡིན་པ་དང་། གདམ་ངག་ཉམས་ལེན་མཐའ་དག་གི་རྩ་བ་ཟབ་པའི་མཐར་ཐུག་ཀྱང་འདི་ལས་མེད་ཀྱི། དེ་ལྟར་ཤེས་པར་གྱིས་ཤིག །དེ་ལྟར་ཡིན་པར་ཡང་གཞུང་
ཉིད་ལས། རང་སེམས་ཧཱུྃ་དང་དབྱེར་མེད་བསྲེ། །སྐྱེས་རྫོགས་གཉིས་མེད་ཀློང་ཡངས་དང་། །མ་བཅོས་ལྷུག་པའི་ཡིག་གེ་ཧཱུྃ། །འདི་ཉིད་ཁོ་ན་བསྙེན་སྒྲུབ་མཆོག གུ་རུའི་གསང་སྒྲུབ་ཡང་སྙིང་ཧཱུྃ། །འབྲུ་གཅིག་ཨ་ཏིའི་ཁྱད་ཆོས་ཡིན། །ཞེས་པ་དང་། ཧཱུྃ་སྒྲུབ་ཞལ་གདམས་ལས། །ཀུན་གཞིའི་རང་བཞིན་ཆོས་ཉིད་དཀྱིལ་འཁོར་ནི། །མངོན་སུམ་བརྗོད་བྲལ་མཁའ་དབྱིངས་རྣམ་པར་དག །རང་བྱུང་རང་གསལ་ཉིད་དབྱིངས་འཛིན་མེད་ངང་། །སྐྱེ་མེད་ཀ་དག་ཟང་ཐལ་གནས་ལུགས་ལ། །གཟུགས་འཛིན་ཞེན་ཆག་ཕྲེང་ཐག་རྦད་ཀྱི་བཅད། །དེ་ལྟར་ཤེས་ན་ཀུན་གྱི་སྲོག་རྩ་ཡིན། །མ་སྒྲིབ་རྗེན་པ་ཧཱུྃ་དུ་གསལ་བ་ཡང་། །སྣང་བ་མ་འགགས་སྐྱེད་རིམ་རྩ་བ་ཡིན། །དེ་ཉིད་འཛིན་བྲལ་ངང་དུ་གནས་པ་ནི། །སྟོང་པའི་རང་མདངས་རྫོགས་རིམ་ངོ་བོ་སྟེ། །སྐྱེད་རྫོགས་གཉིས་མེད་སྲོག་གནད་གཅིག་
པའི་ཀློང་། །འདི་དོན་མ་ནོར་གཏན་ལ་ཕེབས་པ་ན། །དུས་གསུམ་རིག་འཛིན་རྒྱལ་བའི་དགོངས་པ་ལོན། །གསང་སྔགས་སྲོག་རྩ་ཡོངས་ཀྱི་སྙིང་པོ་ཡིན། །དུས་གསུམ་རྒྱལ་བའི་ཐུགས་ཀྱི་ཡང་སྙིང་འདི། །བཟླས་པ་ཙམ་གྱི་ཆོས་སྙིང་རང་བྱུང་རྟོགས། །དམིགས་མེད་ཡུལ་བྲལ་རྒྱལ་བའི་དགོངས་པ་བརྙེས། །རྣམ་སྨིན་སྒྱུ་ལུས་འབྱུང་བཞིའི་ནད་དང་བྲལ། །རིག་འཛིན་ཚེ་དབང་མཆོག་དང་ཐུན་མོང་ཐོབ། །ཅེས་དང་། རིགས་སྔགས་གསང་སྔགས་སྒྲུབ་ཐབས་དཔག་ཡས་ཀྱང་། ལྷ་བསྒོམ་སྔགས་བཟླའི་ཉམས་ལེན་གཅིག་ལ་འདུས། །ཀུན་འདུས་སྙིང་པོ་ཡི་གེ་ཧཱུྃ་ལ་རྫོགས། །རྒྱལ་བའི་སྐུ་རྣམས་བླ་མ་ཉིད་ལ་འདུ། །གཅིག་བསྒོམ་ཡོངས་རྫོགས་དཀར་པོ་གཅིག་ཐུབ་ཡིན། །དེ་ལ་ཐམས་ཅད་མ་འདུས་གང་ཡང་མེད། །སྐུ་ཡི་རང་བཞིན་རྡོ་རྗེ་སློབ་དཔོན་ནི། །དུས་གསུམ་རྒྱལ་བ་མ་ལུས་ཐམས་ཅད་ཀྱིས། །དབང་བསྐུར་རྗེས་གནང་རྡོ་རྗེ་དྲག་པོ་རྩལ། །པདྨ་འབྱུང་གནས་དང་ཉིད་
བསྒོམ་པ་ན། །བླ་མ་ཡི་དམ་མཁའ་འགྲོ་ཐམས་ཅད་འགྲུབ། །གསུང་གི་སྙིང་པོ་ཡི་གེ་ཧཱུྃ་བརྗོད་པས། །གསང་སྔགས་ཕྱི་ནང་སྙིང་པོ་འདི་ལ་རྫོགས། །འདི་ཉིད་ཟུང་སྦྲེལ་སྐྱེད་རྫོགས་མ་བུ་འབྲེལ། །སྐུ་གསུམ་ཞིང་ཁམས་གཅིག་ཅར་འབད་མེད་བགྲོད། ཅེས་སོགས་ཕན་ཡོན་རྒྱ་ཆེར་གསུངས་པ་བཞིན་དུ། སྒོ་གསུམ་དཀྱིལ་འཁོར་གསུམ་ལས་མི་འདའ་བའི་ངང་ནས་རང་གཞན་མཁའ་མཉམ་བླ་མེད་བྱང་ཆུབ་ཆེན་པོར་འཁོད་པའི་ཐབས་ལ་འབད་པར་ཞུ་ལགས། ཞེས། རྗེས་སུ་གདམས་ཤིང་བཀྲ་ཤིས་པའི་ཚིགས་སུ་བཅད་པ་རྒྱས་པར་བྱའོ། །རྗེས་ཀྱི་བྱ་བ་སྤྱི་དང་མཐུན་པ་ལས་ཁྱད་པར་འདི་ནི་རང་བཞིན་རྫོགས་པ་ཆེན་པོ་སྤྲོས་མེད་ཁྱབ་གདལ་གྱི་ངང་ལ་མཉམ་པར་བཞག་ཅིང་། དེ་ལྟར་མ་རྟོགས་པའི་འགྲོ་ལ་སྙིང་རྗེས་སྨོན་ལམ་གདབ་པ་ཙམ་ལས་གཞན་པའི་ཟར་ཟིར་མང་པོ་བྱ་བའི་སྐབས་མ་ཡིན་པ་ཡང་ཤེས་པར་བྱའོ། །དེ་ལྟར་གུ་རུ་
རྡོ་རྗེ་གྲོ་ལོད་ཀྱི་དབང་གི་ཕྱག་བཞེས་ལ་ཉེ་བར་འཁོ་བ་འདི་ཡང་། མཆོག་གི་སྤྲུལ་པའི་སྐུ་སྙིགས་དུས་འགྲོ་བའི་མགོན་གྱུར་གཅིག་པུ་པ་འགྱུར་མེད་རྡོ་རྗེ་རྒྱལ་མཚན་གྱི་དགོངས་པ་ཉེ་བར་བསྐངས་ཕྱིར། མཁས་མཆོག་པདྨ་ལེགས་སྒྲུབ་རྩལ་གྱིས་ལྷག་བསམ་རྣམ་དག་གིས་སྒོ་ནས་ཡི་གེར་བཀོད་པ་ཤུ་བྷཾ། གཅིག་ཞུས་ཁུལ་ལགས།