དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྲོག་དབང་བཀའ་གཏད་ཟབ་མོའི་ལས་རིམ།
དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྲོག་དབང་བཀའ་གཏད་ཟབ་མོའི་ལས་རིམ་བཞུགས་སོ།
ན་མོ་གུ་རུ་མ་ཧཱ་ཀཱ་ལ་ཨ་དྭཱ་ཡ་བྷྱཿ སྙིང་རྗེའི་རླབས་གཡོས་གདུག་པ་འདུལ་སླད་དུ། །མི་ཟད་ཁྲོ་ཚུལ་འབར་བའི་ཕྲིན་ལས་ཀྱིས། །གདུལ་དཀའ་འདུལ་མཛད་རྡོ་རྗེ་ཐོད་ཕྲེང་རྩལ། །ཞབས་པད་སྤྱི་བོའི་རྒྱན་དུ་རྟག་བྱའོ། །དེ་ལ་འདིར་དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་སྒྲུབ་སྐོར་གཏེར་ཁ་སྔ་ཕྱི་མང་པོ་ཞིག་མཆིས་པའི་ནང་ནས། རིག་འཛིན་ཆེན་པོ་ཧཱུྃ་ནག་མེ་འབར་གྱིས་དབུ་རུ་ཞྭའི་ལྷ་ཁང་གི་ཉེ་ཆར་གཏེར་གནས་པ་ཞེས་པའི་མ་ནིང་ནག་པོའི་ཆོས་སྐོར་ལས་བྱུང་བའི་སྲོག་དབང་བཀའ་གཏད་ཆེན་པོ་ཇི་ལྟར་བྱ་བའི་ལས་རིམ་གོ་བདེར་སྟོན་པར་བྱ་སྟེ། དེ་ཡང་། འདི་ལྟ་བུ་
བསྐུར་བར་བྱེད་པའི་སློབ་དཔོན་ནི་གང་ཡིན་གྱིས་རུང་བ་མ་ཡིན་ཏེ། ལྟ་བའི་གདེངས་ཀྱིས་སྣང་སྲིད་སེམས་སུ་ཤེས་པ། སྒོམ་པའི་ཉམས་ཀྱིས་ལྷ་དང་སྒོ་གསུམ་འདྲེས་པ། སྤྱོད་པའི་རྩལ་གྱིས་དྲེག་པ་ཟིལ་ནོན་པ་དང་། མ་མཐའ་ནའང་ཡི་དམ་ཕྱག་རྡོར་རྟ་མགྲིན་སོགས་ལ་བསྙེན་པ་ཚད་འཁྱོལ་དང་། ཁྱད་པར་དུ་སྒྲུབ་པ་བཀའ་བརྒྱད་ལ་བསྙེན་པ་བདུན་འབུམ་ཡན་དང་། མགོན་པོ་ཉིད་ཀྱི་རྩ་བསྙེན་བྱེ་བ་མ་ཐེམས་པར་འདིའི་དབང་གི་སློབ་དཔོན་རུང་བར་མ་བཤད་ལ། བསྐུར་ཡུལ་གྱི་སློབ་མ་ཡང་སྤྱིར་དང་དགས་དམ་ཚིག་གི་རུས་ཐུབ་ཅིང་ཡི་དམ་གང་རུང་ལ་གོང་བཞིན་ཚུལ་བཞིན་ཐེམ་པ། ཁྱད་པར་འདི་ཉིད་ཀྱི་བཀའ་གཏད་ཐོབ་ཕྱིན་ཆད་བསྙེན་སྒྲུབ་བསྐངས་གསོ་
མཆོད་གཏོར་ལ་བརྩོན་ངེས་ཤིག་ལ་མ་གཏོགས་གཞན་ལ་བསྐུར་ན་བདག་ངན་ལ་ཁྱི་བཟང་བཙོང་པའམ། རྟ་རྒོད་ལ་བུ་ཆུང་སྐྱོན་པའི་དཔེ་ལྟར། ཕན་པ་ལས་གནོད་གྱོང་ཆེ་བར་འགྱུར་བས་ན་དེ་ལྟ་བུའི་ཁེ་ཉེན་དང་བླང་དོར་ཤེས་དགོས་སོ། །ཇི་ལྟར་བྱ་བའི་ཚུལ་ནི་གནས་དབེན་ཞིང་ཡིད་དང་མཐུན་པར། རབ་ལ་བཀའ་བརྒྱད་ཀྱི་སྒྲུབ་པ་ཆེན་མོའམ། དེ་མ་འཛོམ་ཡང་བཀའ་བརྒྱད་དངོས་གྲུབ་སྙིང་པོའི་དཀྱིལ་འཁོར་ཞལ་ཕྱེས་ནས། དེའི་ཟུར་ཞིག་ཏུ་འདི་ཉིད་ཀྱི་དབང་རྫས་རྣམས་བཤམས་པས་རུང་ལ། དེ་ལྟར་མ་གྲུབ་པར་འདི་ཁོ་ནའི་དཀྱིལ་འཁོར་བྱེད་ན། སྟེགས་བུ་མདའ་གང་སོགས་ཀྱི་རིགས་ཀྱི་ཁར་དཀྱིལ་འཁོར་སྒོ་རྫོགས་འཁོར་ཡུག་དུར་ཁྲོད་དཔལ་རྡོར་མི་རི་སོགས་ཀྱི་མཐུན་གྱི་ལྟེ་བར་གྲུ་གསུམ་མཐིང་ནག་ཟླ་གམ་གསུམ་དམར་པོའི་མཐའ་སྐོར་གྱི་མུ་འཁྱུད་ཐོད་རའི་ཕྱི་རིམ་འཁོར་ལོ་སེར་པོ་རྩིབས་བརྒྱད་རྩིབས་མཆན་སྔོན་པོ་ཅན་དུ་བྲིས། གལ་ཏེ་རྡུལ་ཚོན་མ་འབྱོར་བའམ་སྤྲོད་མེད་དུ་བྱེད་ན་ནས་ནག་ལ་གུ་གུལ་གྱི་ཆུས་སྦགས་པའི་འབྲུ་ཚོམ་དབུས་སུ་གཙོ་འཁོར་གསུམ་དང་། མཐའ་སྐོར་དུ་མགོན་པོ་འཁོར་ལྔ། དེ་ལྟར་ཡང་འཁོར་སྡེ་བརྒྱད་མཚོན་
པའི་གྲངས་མཉམ་དགོད། དབང་རྫས་ནི། བུམ་པ་མཚན་ལྡན་མགུལ་ཆིངས་མཐིང་ག་ཅན་ཁ་རྒྱན་གཟུངས་ཐག་སོགས་ཚུལ་མཐུན་བུམ་རྫས་ཚང་བར་བྱས་ལ་དཀྱིལ་འཁོར་དབུས་སུ་བཀོད་པའི་མཐའ་སྐོར་རྣམས་སུ། ཙནྡ་གྱི་བེང་དང་སྐུ་རྟེན་ཙཀྐ་ལི། རྒྱུད་སྒྲུབ་ཐབས་ཀྱི་གླེགས་བམ་དང་ཐོད་པ་བདུད་རྩིས་གང་བ། ཕྱག་མཚན་གྲི་གུག་ཧཱུྃ་གིས་མཚན་པ་དར་ནག་ལ་མགོན་པོའི་ཞལ་བྲིས་པ། དེ་མ་འབྱོར་ན་ཨོཾ་ཧཱུྃ་རམ་རྣམས་བྲིས་པས་ཀྱང་རུང་། ལྕགས་སེ་སེང་ཕུར། དཔལ་གཏོར་རྒྱན་ལྡན་དར་ནག་གི་གདུགས་ཕུབ་ཅིང་གཟི་བརྗིད་དང་ལྡན་པར་བྱས་པ་རྣམས་བཤམས་པའི་མཐའ་སྐོར་དུ་ཕྱི་ནང་གི་མཆོད་པ་སྨན་རག་གཏོར་ཚོགས་སྤྱན་གཟིགས་རྣམས་ཀྱང་རྒྱ་ཆེར་བཤམས་ཞིང་ལིང་ག ཐུན་རྫས་སོགས་ཀྱང་སྒྲུབ་གཞུང་ལྟར་ཚགས་སུ་ཆུད་པ་སྟ་གོན་བྱས་ལ་དཀྱིལ་འཁོར་གྱི་འོག་ཏུ་འབག་རྩོགས་མ་སོང་བར་བཞག་པ་བྱའོ།། ༈ །།དེ་ལྟར་ཡོ་བྱད་བཤམས་དགོད་ཀྱི་ལས་རིམ་ཐམས་ཅད་ལེགས་པར་གྲུབ་ནས། ཆོ་གའི་གཞུང་གསང་བ་གི་དཔལ་མགོན་འདི་ཉིད་ངོ་བོ་ཆེ་མཆོག་ཧེ་རུ་ཀ་ཡིན་པའི་གནད་ཀྱིས་བདག་སྐྱེད་
ནི་སྒྲུབ་པ་བཀའ་བརྒྱད་ཀྱི་ལས་གཞུང་གང་རིགས་ཤིག་མེད་ཐབས་མ་མཆིས་ཚེ། གཏོར་སྙིང་གང་འོས་སམ་དངོས་གྲུབ་སྙིང་པོའི་ལས་གཞུང་བསྲང་ནས་འཛབ་ཀྱི་སྐབས་ལ་བབས་པ་ན་བཀའ་བརྒྱད་ཀྱི་ལྷ་ཚོགས་སྤྱི་དང་ཁྱད་པར་ཆེ་མཆོག་གི་སྙིང་པོ་ཅི་འགྲུབ་བཟླས་ཏེ་བསྙེན་པ་ཁ་གསོ་ཞིང་ཐན་མཚམས་མཆོད་བསྟོད་ཀྱང་བྱ། དེ་ནས་མགོན་པོ་འཁོར་བཅས་ཀྱི་ལས་བྱང་ཆེན་མོ་རྒྱས་པར་བྱ་ཞིང་མདུན་སྐྱེད་བསྒྲུབ་སྟེ། དཀྱིལ་འཁོར་བུམ་པ་དང་བཅས་པ་དུར་ཁྲོད་རབ་ཏུ་འཇིགས་པའི་ཕོ་བྲང་དུ་མགོན་པོ་འཁོར་བཅས་དམ་ཚིག་པ་གསལ་ཞིང་སྤྱན་འདྲེན་གྱི་ཚེ་ཡེ་ཤེས་པ་བསྟིམ་ནས་མཆོད་བསྟོད་རྣམས་ཕུལ་ལ། དཔལ་མགོན་གྱི་ཐུགས་ཀར་ཉི་མའི་སྟེང་དུ་ཧཱུྃ་ལ་རྩ་སྔགས་མཐིང་ཞུན་གྱི་ཁ་མདོག་ལྟ་བུས་འཁོར་བར་དམིགས་ནས་བཟླ་ཞིང་བདག་ཉིད་ཆེ་མཆོག་གི་ཐུགས་ཀའི་སྔགས་ཕྲེང་ལས་འོད་འཕྲོས་མགོན་པོའི་ཐུགས་སྲོག་ལ་ཐིམ་པས་མགོན་པོ་ཉིད་མཐུ་སྟོབས་གཟི་མདངས་ཆེས་ཆེར་རྒྱས་ཤིང་ཕྲིན་ལས་ཐོག་མེད་བསྒྲུབ་པའི་བཀའ་ཉན་གསུང་སྒྲུབ་མཛད་པར་མོས་ལ་བསྙེན་པ་ལོང་ཁྱབ་དང་བསྟུན་ནས་ཅི་ཙམ་འགྲུབ་འགྲུབ་ཏུ་བྱ་བ་དང་། ཚོགས་མཆོད་བསྐང་གསོའི་རིམ་པ་སོགས་ཐམས་ཅད་ནན་ཏན་དུ་
འབད་དོ། །ལར་ཡང་དཔོན་སློབ་གཉིས་ཀ་ལོང་ཁྱབ་གཏན་ནས་མེད་པར་ནི་ཚུལ་འདི་དག་བརྩམ་པར་ཡང་མི་བྱ་ལ། ཅི་སྟེ་བརྩམས་ནས་ནི་འཇིག་རྟེན་གྱི་བྱ་བྱེད་རྣམས་ལོང་ཡོད་ལ་འདི་དག་ལོང་མེད་དུ་བྱེད་པ་ནི་རིགས་པ་མ་ཡིན་པས། བྱ་བྲེལ་གཞན་མཐའ་དག་བཤོལ་ཏེ་འདི་ལྟ་བུ་གང་བྱེད་རྣམས་ལ་གནད་དུ་བསྣུན་དགོས་པར་ཡང་ཕྱི་རབས་ཀྱི་གང་ཟག་དག་གི་དགོངས་པ་འཚལ། དེ་ལྟར་སློབ་དཔོན་གྱིས་བྱ་བའི་ལས་རིམ་ཐམས་ཅད་ལེགས་པར་གྲུབ་པ་དང་། སྣོད་ལྡན་གྱི་སློབ་མ་བསྟན་པའི་རྒྱུན་དང་ཆོས་ཀྱི་སྲོལ་འཛིན་པར་ནུས་པ་གཅིག་གཉིས་སུ་གསུམ་ལ་མི་མང་བ་རྣམས་ལ་རྡོ་རྗེ་རྣམ་པར་འཇོམས་པའི་གཟུངས་ཆུས་ཁྲུས་བྱས་ནས། གུས་ཕྱག་དགུ་ཕྲུགས་མཎྜལ་དང་བཅས་པ་སྔོན་དུ་བཏང་སྟེ་མདུན་དུ་གུས་པས་འཁོད་པ་ལ་སློབ་དཔོན་གྱི་ལོ་རྒྱུས་འདི་བཞིན་འཆད་པར་བྱའོ། །གང་དག་སྐྱེ་བའི་ཕྲེང་རྒྱུད་དུ་མར་ལེགས་བྱས་བསོད་ནམས་མངོན་པར་འདུ་བགྱིས་པ་མང་པོ་ཉེ་བར་བསྟེན་པའི་འབྲས་བུས་འབྱོར་བའི་སྐལ་བཟང་ཁྱེད་ཅག །དེང་འདིར་ཟབ་མོ་གསང་སྔགས་
ཀྱི་འཇུག་སྒོ་དོན་དུ་གཉེར་བ་ནི་ཤིན་ཏུ་ལེགས་ཀྱི། དེ་ལྟ་ན་བསམ་པའི་ཁྱད་པར་རྨད་དུ་བྱུང་བ་རྒྱུད་ལ་བསྐྱེད་དགོས་པས་ན། འདི་ལྟར་འཁོར་བའི་ཁམས་གཏིང་མཐའ་མེད་པར་ཐོག་མཐའ་བར་མེད་དུ་འཁྱམས་པའི་འགྲོ་བ་ནམ་མཁའི་མཐས་ཀླས་པ་མ་ལུས་ཐར་པ་དམ་པའི་བདེ་ཆེན་ལ་དགོད་པའི་ཕྱིར་དང་། དེའི་རྒྱུ་རྐྱེན་སངས་རྒྱས་ཀྱི་བསྟན་པ་རིན་པོ་ཆེ་བསྲུང་ཞིང་དཔལ་དང་སྐྱོང་བའི་འཕྲིན་ལས་བསྒྲུབ་ཕྱིར་དང་། བསྟན་པ་དེ་འཛིན་པར་བྱེད་པའི་གང་ཟག་དམ་པ་རྣམས་ལ་བར་ཆད་ལོག་སྒྲུབ་རྩོམ་པའི་མ་རུངས་གདུག་པ་ཅན་རྣམས་མངོན་སྤྱོད་དྲག་པོའི་སྟོབས་ཀྱིས་གཞོམ་པར་བྱ་བའི་སླད་དུ། དཔལ་ལྡན་མ་ཧཱ་ཀཱ་ལ་ལེགས་ལྡན་མ་ནིང་ནག་པོའི་དབང་ཟབ་མོ་ཞུ་སྙམ་པའི་འདུན་པ་མ་ཡེངས་པ་དང་ལྡན་པས་གསན་འཚལ། དེ་ལྟར་དོན་དུ་གཉེར་ནས་བསྒྲུབ་བྱའི་མགོན་པོ་དེ་ཉིད་ངོ་བོ་ནི་
ཇི་ལྟ་བུ་ཞིག་ཡིན། རྣམ་པ་ནི་ཅི་ལྟ་བུ་ཡོད་སྙམ་ན། དེ་ལ་གཉིས་ཏེ། ཀུན་ཁྱབ་རྒྱུའི་མགོན་པོ་དང་། རྣམ་འཕྲུལ་རྟགས་ཀྱི་མགོན་པོ་གཉིས་ཡིན་ཏེ། མཚོན་བྱའི་དོན་དང་མཚོན་བྱེད་ཀྱི་དཔེ་གཉིས་ལ་འཇུག་ཅིང་། དེ་ལས་ཀུན་ཁྱབ་རྒྱུའི་མགོན་པོ་ནི་ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱུད་ལ་ཡེ་ནས་གནས་པའི་ཀུན་གཞི་སྟེ། འདིའི་རང་ངོ་རང་གིས་ཤེས་ཤིང་རྟོགས་ནས་བདེར་གཤེགས་སྙིང་པོ་གདོད་མའི་སངས་རྒྱས་ཀུན་ཏུ་བཟང་པོ་ཅེས་བྱ་ཞིང་ཡེ་ཤེས་ཐུགས་རྗེ་ཡོན་ཏན་མ་ལུས་པའི་འབྱུང་གནས་སམ་བདག་ཉིད་དུ་གྱུར་པས་འཁོར་འདས་ཐམས་ཅད་ཀྱི་དཔལ་དང་མགོན་དུ་གྱུར་ཕྱིར། དཔལ་ཡེ་ཤེས་ཀྱི་མགོན་པོ་ཞེས་བྱ་ལ། འདི་ཉིད་རང་ངོ་རང་གིས་མ་རིག་པར་ང་དང་བདག་ཏུ་བཟུང་བས་འཁྲུལ་པའི་རྒྱུ་རྐྱེན་གྱི་རྩ་བར་གྱུར་ཅིང་དེ་ལས་དུག་གསུམ་ཉོན་མོངས་རྟོག་ཚོགས་ཀྱི་ཡལ་འདབ་གྱེས་
ཏེ་ཁམས་གསུམ་རིས་དྲུག་སྡུག་བསྔལ་གྱི་འབྲས་བུ་སྨིན་པ་ལ་ནི་ངར་འཛིན་རུ་དྲའི་རྒྱལ་པོ་ཅེས་བྱ་སྟེ། བདུད་བགེགས་ལོག་འདྲེན་ཐམས་ཅད་ཀྱི་འབྱུང་ཁུངས་ཡིན་པས། དེས་ན་རང་སེམས་འདི་ཉིད་གཅིག་པུ་གྲོལ་འཁྲུལ་གྱི་ཁྱད་པར་ལས་སངས་རྒྱས་དང་སེམས་ཅན། འཁོར་བ་དང་མྱང་འདས། ལྷ་དང་འདྲེ། དཔལ་མགོན་དང་རུ་དྲ། དངོས་གྲུབ་དང་བར་ཆད་ལ་སོགས་བཟང་ངན་དང་ཕན་གནོད་དུ་བཏགས་པའི་མིང་གི་གདགས་གཞི་མ་ལུས་འདི་ཁོ་ན་ལས་གཞན་དུ་མ་མཆིས་པ་ནི་ཀུན་ཁྱབ་རྒྱུའི་མགོན་པོའམ། མཚོན་བྱ་དོན་གྱི་མགོན་པོའི་ངོ་བོ་ཡིན་ཏེ། རྒྱུད་ལས་ངོ་བོ་ཀུན་ཁྱབ་བྱང་ཆུབ་སེམས། རྟོགས་ན་ཀུན་བཟང་ཧེ་རུ་ཀ མ་རྟོགས་བདག་འཛིན་རུ་དྲའི་རྒྱུའོ། །ཞེས་གསུངས་པ་ལྟར་ཡིན་ནོ།། ༈ །།གཉིས་པ་ངོ་བོ་དེ་ཉིད་མཚོན་པར་བྱེད་པའི་དཔེའམ། །རྣམ་འཕྲུལ་རྟགས་ཀྱི་མགོན་པོའི་སྣང་ཚུལ་ནི་འདི་ལྟར་སྟེ་
སྲིད་ཞི་འཁོར་འདས་བརྟན་གཡོ་མ་ལུས་པའི་ཁྱབ་བདག་དཔལ། ཀུན་ཏུ་བཟང་པོ་ཆོས་དབྱིངས་མཉམ་ཆེན་པོའི་ངང་ལས་རོལ་རྩལ་འགག་མེད་ཀྱི་གཟུགས་སྐུ་ཆེ་མཆོག་ཧེ་རུ་ཀ་ཁྲོ་བོ་ཐམས་ཅད་ཀྱི་རྗེ་བཙུན་དང་དཀྱིལ་འཁོར་མ་ལུས་པའི་མངའ་བདག་ཏུ་བཞེངས་ཏེ། དེ་ཉིད་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྣམ་རོལ་ལས་གསང་སྔགས་རྒྱུད་སྡེ་རྒྱ་མཚོའི་ལྷ་ཚོགས་ཇི་རྙེད་པར་སྤྲུལ་ཞིང་རང་སྐབས་ཀྱི་གདུལ་བྱེད་གདུལ་ཐབས་བསམ་གྱིས་མི་ཁྱབ་པའི་ཐུགས་རྗེའི་ཟློས་གར་བསྒྱུར་བ་ལས། དུས་རི་ཤིག་གི་ཚེ་ན། འཇིག་རྟེན་གྱི་ཁམས་འདིར་མ་རིག་འཁྲུལ་པའི་སྐྱེ་འགྲོ་རྣམས་ཉོན་མོངས་དུག་ལྔའི་བག་ཆགས་མཐུ་བརྟས་པའི་རང་གཟུགས་ཀྱི་དྲེགས་པ་རུ་དྲའི་སྡེ་ཚོགས་མང་པོ་འབྱུང་བར་གྱུར་ཏེ། ཞེ་སྡང་མེ་ལྟར་འབར་བ་ཨཱརྴ་རུ་དྲ་དང་། འདོད་ཆགས་ཆུ་ལྟར་འཁྲུག་པ་ཁ་ཏྲྃ་ཀ་
རུ་དྲ་དང་། གཏི་མུག་མུན་ལྟར་འཐིབས་པ་མ་ཏྲཾ་ཀ་རུ་དྲ་དང་། ང་རྒྱལ་རི་་ལྟར་སྤུངས་པ་ཕོ་རྒྱུད་རུ་དྲའི་སྡེ་དང་། ཕྲག་དོག་རླུང་ལྟར་འཚུབས་པ་མོ་རྒྱུད་རུ་དྲའི་སྡེ་ཚོགས་དཔག་ཏུ་མེད་པ་བྱུང་ཞིང་། དེ་དག་ལས་འཕྲོས་པའི་འཁོར་དང་ཡང་འཁོར་གྱི་བྱེ་བྲག་བདུད་བཙན། ཀླུ། སྲིན་པོ། གནོད་སྦྱིན། གཟའ། རྒྱལ་འགོང་། མ་སངས། ཐེའུ་བྲང་། མུ་སྟེགས་དམ་སྲི་ལ་སོགས་པ་བསམ་གྱིས་མི་ཁྱབ་པ་རྣམས་ཀྱིས། ཐར་པ་དམ་པའི་ཆོས་བསྒྲུབ་པའི་གེགས་སུ་བྱེད་ཅིང་འགྲོ་བ་རྣམས་ཀྱི་མངོན་མཐོའི་ངེས་ལེགས་འཛོམས་པའི་བདུད་ཚོགས་དེ་དག་འདུལ་བའི་གཉེན་པོར། དཔལ་ཆེན་པོ་ཧེ་རུ་ཀའི་ཐུགས་རྗེ་ལས་སྤྲུལ་པའི་ཡེ་ཤེས་ཀྱི་མགོན་པོ་མ་ཧཱ་ཀཱ་ལ་ལེགས་ལྡན་ནག་པོ་ཆོལ་པའི་ཁྲོ་རྒྱལ་མ་ནིང་ནག་པོ་མངོན་པར་སྤྲུལ་ལོ། །དེ་ལ་མ་ནིང་ཞེས་པའི་མཚན་དུ་བརྗོད་པའི་ངེས་
ཚིག་ཅི་ཡིན་སྙམ་ན། ཕོ་རྒྱུད་དང་མོ་རྒྱུད་ཀྱི་རིགས་དང་ལྡན་པ་གང་ཡང་འདིས་མི་འཐུལ་བའམ་གཉེན་་པོར་མ་གྱུར་པ་གཅིག་ཀྱང་མེད་ཅིང་ཐབས་ཤེས་གཉིས་སུ་མེད་པའི་ཡེ་ཤེས་ཀྱི་སྐུ་ཡིན་པས་ན་མ་ནིང་གི་མཚན་དུ་བཏགས་པ་ཡིན་ལ་སྐུའི་ཆ་ལུགས་རྣམ་འགྱུར་ཅི་ལྟ་བུ་ཞེ་ན། ཆོས་ཉིད་འགྱུར་བ་མེད་པའི་རྟགས་སུ་སྐུ་མདོག་མཐིང་ནག་ཏུ་འབར་བ། ཆོས་སྐུ་ཐིག་ལེ་ཉག་གཅིག་དང་ཐབས་ཤེས་ཟུང་དུ་འཇུག་པའི་རྟགས་སུ་ཞལ་གཅིག་ཕྱག་གཉིས་པ། །སྐུ་གསུམ་ལྷུན་གྱིས་གྲུབ་པའི་སྤྱན་གསུམ་གྱེན་ཐུར་ཐད་ཀ་གསུམ་དུ་གཟིགས་པ། འཁོར་བ་དོང་ནས་སྤྲུག་ཅིང་སྐྱེ་ཤིང་རྩ་བ་གཅོད་ཕྱིར་ཞལ་གདངས་ལྗགས་འདྲིལ་མཆེ་བ་གཙིགས་པ་བདག་ཏུ་འཛིན་པའི་རུ་ཏྲ་ཚར་གཅོད་པའི་རྟགས་སུ་ཁྲོ་གཉེར་སྨིན་མཚམས་སུ་བསྡུས་ཤིང་གཏམ་རྔམས་འཇིགས་སུ་རུང་བའི་ཚུལ་
ཅན་གྱི་ཕྱག་གཡས་པས་ནི་འཁོར་བའི་གཡུལ་ལས་རྒྱལ་བའི་རུ་མཚོན་མདུང་རིང་དར་ནག་གི་ལྷུན་གྲུབ་ཆེན་པོ་མེ་ལྕེ་འབར་བ་ནམ་མཁར་འཕར་བ། གཡོན་པའི་ཕྱག་གིས་ནི་ངར་འཛིན་རྩད་གཅོད་ཁུངས་སྟོངས་དྲུང་ནས་ཕྱུང་བའི་སྙིང་དང་ཞགས་པ་བསྣམས་པ། དུག་གསུམ་ལམ་དུ་ལྷོངས་ཕྱིར་དབུ་སྐྲ་རལ་པ་སྦྲུལ་ནག་གི་རང་བཞིན་དུ་སྟིབས་པས་ས་བཞི་ཁེབས་པ། རྟོག་མེད་ཡེ་ཤེས་ལྔ་ལྡན་མངོན་པར་བྱང་ཆུབ་མཚོན་པའི་ཐོད་སྐམ་རིགས་ལྔ་རིན་ཆེན་རྩེ་བྲན་དར་དབྱངས་འཕུར་བས་དབུ་བརྒྱན་པ། དམ་ཚིག་ལྡན་པའི་སྒྲུབ་པ་པོ་ལ་དངོས་གྲུབ་རྒྱུན་ཆད་མེད་པ་རྩོལ་བའི་རྡར་ནོར་བུའི་སྙན་ཆ་མགུར་མཆུ་གསེར་སྐ་རིན་ཆེན་རྣམས་ཀྱིས་མཛེས་པར་སྤྲས་པ། གདུག་པ་ཅན་རྣམས་མཐུ་སྟོབས་དྲག་པོས་འདུལ་བའི་རྟགས་སུ་ཞིང་ལྤགས་ཀྱི་སྐེད་དཀྲིས་དང་སྟག་ལྤགས་ཀྱི་ཤམ་ཐབས་བྱས་པ། ཁམས་གསུམ་
ཐུགས་རྗེས་ཁྱབ་ཅིང་ཆེ་བའི་ཡོན་ཏན་རྫོགས་པས་དར་ནག་བེར་ཆེན་རྡོ་རྗེའི་གསང་གོས་སྐུ་ལ་གསོལ་བ། བསྟན་པའི་རུ་དྲ་བསྒྲལ་བའི་སྙིང་དང་མགོ་བོའི་ཕྲེང་བ་ག་ཤར་བྱས་པ་སྟོང་གསུམ་སྐད་ཅིག་ལ་འཁོར་བའི་ རྫུ་འཕྲུལ་གྱིས་ཞབས་གཉིས་སག་ལྷམ་ནོར་བུའི་ཕྲ་ཅན་གསོལ་ནས་གྱད་ཀྱི་དོར་སྟབས་སུ་འགྱིངས་པ། སྤྲུལ་པའི་ལྷ་དམག་གྲངས་མེད་འགྱེད་པས་མ་རུངས་བདུད་ཀྱི་གཡུལ་ངོ་བཟློག་ཕྱིར་ཙནྡ་གྱི་བེང་ཆེན་སྐེད་ལ་བཙུགས་པ། རབ་ཏུ་འཇིགས་པ་ཤིན་ཏུ་རྔམས་པ། ཆེ་ལ་བརྗེད་པ། དྲག་པོར་ཁྲོས་པས་སྣང་སྲིད་ཐམས་ཅད་ཡོམ་ཡོམ་ཤིག་ཤིག་ཏུ་བྱེད་པའི་རྫུ་འཕྲུལ་གྱི་བཀོད་པ་གློག་ལྟར་འཁྱུག་ཅིང་ཉི་མ་འབུམ་གྱི་གཟི་འོད་ལྟར་འབར་བའི་སྐུ་བཞེངས་ནས། མ་ལ་ཡ་གནམ་ལྕགས་འབར་བའི་རྩེ་མོར་དུར་ཁྲོད་ཐོད་མཁར་མེ་རླུང་འཁྲུག་པའི་ཕོ་བྲང་ན་སྲིད་གསུམ་དྲེགས་པ་འདུལ་
བའི་གཤེད་དང་གཉེན་པོར་བཞུགས་ཅིང་། རུ་དྲའི་སྡེ་ཚོགས་མཐའ་དག་རྡུལ་དུ་རློག་པར་མཛད་པ་སྟེ། དེ་ལྟ་བུའི་དཔལ་མགོན་མ་ཧཱ་ཀཱ་ལ་ངོ་བོ་གཅིག་གི་རོལ་པའི་སྒྱུ་འཕྲུལ་གྱི་བྱེ་བྲག་ནི་མཐའ་ཡས་ཏེ། མགོན་པོ་ཕྱག་བཞི་པ། ཕྱག་དྲུག་པ། ཞལ་བཞི་པ་ལ་སོགས་སྐུའི་རྣམ་འགྱུར་ལས་མཚན་དུ་བཏགས་པ་དང་། སེང་གདོང་། ཕག་གདོང་། བྱ་རོག་གདོང་སོགས་དབུ་དང་ཞལ་གྱི་ཁྱད་པར་དང་། བེང་དང་གྲི་གུག་བདུད་ཀྱི་སྤུ་གྲི་ལ་སོགས་ཕྱག་མཚན་ལས་བཏགས་པ་དང་། བེར་ནག་ཅན་དང་བེར་དམར་ཅན་སོགས་ན་བཟའ་ལས་བཏགས་པ་དང་། སྟག་ཞོན་སེང་ཞོན་རྟ་ཞོན་སོགས་གཞོན་པ་ལས་མཚན་དུ་བཏགས་པ་ལ་སོགས་ཀྱི་དབྱེ་བ་དང་རྣམ་གྲངས་ཇི་སྙེད་མཆིས་པའི་མགོན་པོ་མ་ལུས་པའི་རྩ་བ་ནི་ལེགས་ལྡན་མ་ནིང་ནག་པོ་འདི་ཁོ་ན་ཉིད་ལ་འདུས་པའོ། །དེ་ནས་ཡང་དུས་རེ་ཤིག་གི་ཚེ། མི་ཡུལ་
གྱི་འཇིག་རྟེན་ན་དཀར་པོའི་དགེ་ལ་སྤྱོད་པ་ཉུང་བར་གྱུར་པའི་མཐུ་འབྲས་ཀྱིས། ལྷ་ཡུལ་སུམ་ཅུ་རྩ་གསུམ་དུ་ལྷ་མ་ཡིན་གྱི་དམག་དཔུངས་ལྷག་ནས་ལྷ་རྣམས་ཉམས་ཉེས་པར་གྱུར་པའི་ཚེ། བརྒྱ་བྱིན་ལྷའི་དབང་པོས་མངོན་པར་ཤེས་པས་བརྟག་པ་ན། མིའི་འཇིག་རྟེན་ན་སྡིག་སྤྱོད་ཉུང་ཞིང་དགེ་སྤྱོད་མང་ན་འདིར་ཡང་ལྷ་མིན་རྣམས་མཐུ་ཆུང་ཞིང་ལྷ་རྣམས་སྟོབས་ཆེ་བས་གཡུལ་ལས་རྒྱལ་བར་གྱུར་ལ། དཀར་པོའི་ཕྱོགས་རྣམ་པར་རྒྱལ་བའི་མཐུ་བྱིན་གྱིས་མིའི་འཇིག་རྟེན་དག་ཀྱང་བདེ་བར་འགྱུར་བ་ཡིན་ནའང་། དེང་གི་དུས་འདིར་ནི་དེ་ལས་ལོག་སྟེ་མི་རྣམས་སྡིག་སྤྱོད་མང་བའི་རྒྱུ་རྐྱེན་ལས་བདག་ཅག་ལྷའི་ཚོགས་མཐུ་ཆུང་ཞིང་། ནག་པོའི་ཕྱོགས་རྣམས་སྟོབས་འཕེལ་བ་འདི་ལ་ནི་འཐབ་ཀྱང་མི་ཐུབ་ཚེ། ལེགས་ལྡན་མ་ཧཱ་ཀཱ་ལ་དེ་ཉིད་བདུད་རིགས་
ཀྱི་གཉེན་པོར་གྱུར་དེ་ཉིད་དཔུངས་ཚོགས་ཀྱི་དཔོན་དུ་སྤྱན་དྲངས་ན་བདུད་དམག་བཟློག་པར་འགྱུར་རོ་སྙམ་དུ་དགོངས་ནས། ལྷ་མོ་དུང་སྐྱོང་མའམ་ཨུ་མ་དེ་ཝི་སྤྱན་འདྲེན་དུ་མངགས་སྟེ་མ་ལ་ཡའི་ཕོ་བྲང་ནས་ལེགས་ལྡན་གྱི་རྒྱལ་པོ་མ་ཧཱ་ཀཱ་ལ་གདན་དྲངས་ཤིང་སུམ་ཅུ་རྩ་གསུམ་གྱི་གནས་ཀྱི་ལྷོ་ནུབ་ཆོས་བཟང་ལྷའི་བདུན་པར་ལྷའི་ཚོགས་རྣམས་ཀྱི་བསུ་བའི་བཀོད་པ་རྒྱ་ཆེན་པོས་བསུས་ཤིང་། ཨ་མོ་ལི་ཀའི་སྟེང་དུ་མཆོད་ཅིང་བསྙེལ་གསོས། རྣམ་པར་རྒྱལ་བའི་ཁང་བཟང་སུ་བརྒྱ་བྱིན་ལྷའི་དབང་པོ་དང་བཀའི་བགྲོ་བ་མཛད། ལྗོན་ཤིང་ཡོངས་འདུ་ས་བརྡོལ་གྱི་དྲུང་ན་ལྷའི་བུ་མོ་བྱེ་བ་མང་པོས་གླུ་གར་འདོད་ཡོན་གྱི་མཆོད་པ་བྱས། ཤར་ཤིང་རྟ་སྣ་ཚོགས་ཀྱི་སྐྱེད་མོས་ཚལ་དུ་ལྷའི་སྡེ་དཔོན་ཆེན་པོ་ཉེར་བརྒྱད་ཀྱིས་མཆོད་ཅིང་གཙང་རིས་ཀྱི་དཔལ་མགོན་བདུན་ཅུ་རྩ་
ལྔས་བྲན་དུ་ཁས་བླངས། བྱང་ཕྱོགས་དགའ་བའི་ཚལ་དུ་ཡུམ་མཆོག་ཨུ་མ་དེ་ཝི་དང་མ་ཆགས་ཐབས་ཀྱི་རོལ་པ་མཛད་པ་ལས་སྤྲུལ་པའི་སྲས་ལྷ་ཆེན་ཚོགས་ཀྱི་བདག་པོ་དང་ལྷ་མོ་རེ་མ་ཏི་གཉིས་བྱུང་སྟེ་བསྟན་སྲུང་མ་མགོན་ལྕམ་དྲལ་དུ་བཀོས། ནུབ་ཕྱོགས་འདྲེས་ཚལ་བཟང་པོར་ལྷའི་ལོངས་སྤྱོད་སྣ་ཚོགས་ཀྱི་དགའ་སྟོན་རྒྱ་ཆེར་བྱས། དེ་ནས་ལྷོ་ཕྱོགས་རྩུབ་འགྱུར་གྱི་ཚལ་དུ་ལྷའི་དམག་དཔོན་དུ་མངའ་གསོལ་ཞིང་། དཔའ་བའི་ངར་བསྐྱེད། བསྲ་བའི་གོ་བགོས། རྣོ་བའི་མཚོན་འཐོགས་ཏེ་དམག་ཆས་སུ་ཞུགས་པ་དེའི་ཚེ། དཔལ་མགོན་ཉིད་མ་ནིང་སྲོག་བདུད་ཆེན་པོའི་ཆ་ལུགས་སུ་བཞེངས་ཏེ། བྲང་གི་དབུས་ནས་སྤྱན་གསུམ་དང་ཕྱག་ཞབས་ཀྱི་ལྟ་བུ་ཚིག་ཞི་ལ་སྤྱན་ཞིས་མཚན་པ་ལས་བདུད་བཙན་ཀླུ་གཤིན་རྗེའི་དམག་དཔོན་བཞི་སྤྲུལ་ནས་
ཕོ་ཉར་བཀྱེས། སྤྱན་ནས་ཁྲག་འཛག་པས་ནད་ཀྱི་བུ་ཡུག་ནི་འཚུབས། ཞལ་ནས་མེ་འབར་བ་ལས་ཐོག་དང་མཚོན་ཆའི་ཚ་ཚ་ནི་འཕྲོ། ཕྱག་གཡས་གྲི་གུག་འབར་བས་དྲག་སྲོག་གཅོད་ཅིང་གཡོན་པ་ལྕགས་ཀྱི་པར་བུ་བསྣམས་པ་ལས་ལྷ་དམག་གྲངས་མེད་པའི་དཔུང་ཚོགས་འགྱེད་པ། མཆན་ཁུངས་དུ་ཁ་ཊྭཱྃ་འཁྲོས་ཤིང་དྲག་པོའི་རྐན་སྒྲ་བརྡེབས་པས་སྣང་སྲིད་ཀྱི་ཕོ་རྒྱུད་ཐམས་ཅད་ཕོ་ཉར་འགྱེད་པ་ལྟག་ཁུང་ནས་ཁྲོ་བོའི་སྤྱན་གཅིག་གཟིར་བས་སྲིད་པ་མོ་རྒྱུད་ཐམས་ཅད་དབང་དུ་བསྡུད་ཅིང་བྲན་དུ་འཁོལ་བ། བདུད་མདའ་དྲག་པོ་ཐོག་ལྟར་འཕེན་པས་དགྲའི་སྙིང་ལ་གཟེར་དུ་འདེབས་ཅིང་། བཏགས་རལ་དང་གཟིགས་ཤུབས་གློ་ལ་བཏགས་ནས་བདུད་རྟ་ནག་པོ་རྟིང་དཀར་རླུང་གཤོག་ཅན་ལ་ཆིབས་ཏེ་གཡུལ་དུ་ཞུགས་པའི་འཁོར་དུ། གནོད་སྦྱིན་ཆེན་པོ་བརྒྱད་ནི་ལྕགས་ཀྱི་བྱ་ཁྲར་སྤྲུལ་ནས་ཀླད་ལ་ལྡིང་
གཤིན་རྗེ་བརྒྱད་སྟག་གཟིག་དོམ་དྲེད་དུ་སྤྲུལ་ནས་རོལ་དུ་ཁྲིད། ཀླུ་ཆེན་བརྒྱད་ནི་དྲུག་སྦྲུལ་ནག་པོ་ལྕེ་བརྒྱ་པར་བྱས་ནས་གློ་ནས་འཁྱུག །ལྷ་ཆེན་བརྒྱད་ནི་ཁྲོ་ཆུང་མཚོན་ཐོགས་སུ་སྤྲུལ་ནས་དབུ་སྐྲའི་སེབ་ནས་སྐར་མདའ་ལྟར་རྒྱུགས། ཕྱོགས་སྐྱོང་བཅུ་དང་རྒྱལ་ཆེན་བཞི་ནི་བཀའི་བློན་པོར་བྱས་ནས་ཅི་བཅོལ་གྱི་ལས་མཛད་ཅིང་། ལྷའི་དཔུངས་ཚོགས་བྱེ་བ་དུང་ཕྱུར་གྱིས་བསྐོར་ཏེ་འཆས་པས། ལྷ་མིན་བདུད་སྡེ་དམག་ཚོགས་ཐམས་ཅད་ལ་ལ་ནི་བསད། ལ་ལ་ནི་སྐྲག་ཅིང་བརྒྱལ། ཐམས་ཅད་ཀྱང་ན་བུན་རླུང་གི་བརྡབ་པ་ལྟར་བྱེར་ཞིང་འཐོར་བ་དང་། ལྷ་མ་ཡིན་གྱི་གྲོང་ཁྱེར་གསུམ་རྩིགས་རྣམས་ཀྱང་དཔལ་མགོན་གྱི་ཞལ་ནས་མེ་འབར་བས་བསྲེག་སྟེ་སྟོངས་པར་མཛད་ཅིང་། བདུད་སྡེ་དཔུངས་ཚོགས་མཐའ་དག་རྡུལ་དུ་རླག་པར་གྱུར་ཏོ། །
དེའི་ཚེ་ལྷའི་དབང་པོ་འཁོར་དང་བཅས་པས་དཔལ་ལྡན་མགོན་པོ་ལ་བཏང་རག་གི་མཆོད་པ་རྒྱ་ཆེན་པོས་མཆོད་ཅིང་བསྟོད། ཕྱོགས་བཅུའི་སངས་རྒྱས་བྱང་སེམས་རྣམས་ཀྱིས་ཀྱང་ནག་ཕྱོགས་ཀྱི་བདུད་དཔུངས་བཏུལ་བ་ལ་རྗེས་སུ་བསྔགས་ཅིང་ལེགས་སོའི་གནང་བ་སྩལ་ཏེ། སླད་དུ་ཡང་སངས་རྒྱས་ཀྱི་བསྟན་པ་བསྲུང་བ་དང་། དམ་ཚིག་ལྡན་པའི་ཆོས་སྤྱོད་སྐྱོང་ཞིང་ལེགས་ཉེས་ཀྱི་སྟངས་གཅོད་པའི་ཆོས་སྐྱོང་ཀུན་གྱི་གཙོ་བོར་མངའ་གསོལ་ནས་བསྟན་པའི་གཉེར་གཏད་པར་མཛད་དོ། །དེ་ལྟ་བུའི་མཐུ་སྟོབས་ནུས་རྩལ་རྨད་དུ་བྱུང་བའི་དཔལ་ལྡན་ཡེ་ཤེས་ཀྱི་མགོན་པོ་ཉིད་ཀྱིས་སློབ་དཔོན་རིན་པོ་ཆེ་པདྨ་འབྱུང་གནས་བསིལ་བ་འཚལ་གྱི་དུར་ཁྲོད་དུ་བརྟུལ་ཞུགས་ཀྱི་སྤྱོད་པ་སྐྱོང་ཞིང་བཞུགས་པ་ལ་ཞལ་མངོན་སུམ་དུ་བསྟན་ཏེ་ཕྲིན་ལས་བསྒྲུབ་པར་ཞལ་གྱིས་བཞེས་ནས་
མགོན་པོ་ཉིད་ཀྱི་རྒྱུད་སྒྲུབ་ཐབས་ལས་ཚོགས་མན་ངག་མཐའ་དག་པ་ཕུལ་ཏེ་ཕྱི་རབས་ཀྱི་གང་ཟག་སྣོད་ལྡན་ལ་བརྒྱུད་ནས་བསྟན་པ་བསྲུང་བའི་ཆ་རྐྱེན་དང་། དེ་དག་ཚུལ་དང་མཐུན་པར་གང་གིས་སྤྱོད་པ་ལ་དཔལ་མགོན་འཁོར་བཅས་ལུས་དང་གྲིབ་ལྟར་འཁོར་ནས་སྲུང་སྐྱོབ་བྱེད་པར་ཁས་བླངས་དམ་ཚིག་གི་བྲོ་བོར་ཏེ་མགོན་པོའི་འཁོར་གྱི་ལྷ་མ་སྲིན་སྡེ་བརྒྱད་ཀུན་གྱིས་ཀྱང་སློབ་དཔོན་གྱི་སྤྱན་སྔར་རང་རང་སྲོག་གི་སྙིང་པོ་མདོང་གསོལ་ཕུལ་ལོ། །དེ་ནས་སློབ་དཔོན་ཉིད་བོད་ཡུལ་དུ་འགྲོ་བའི་དོན་མཛད་པའི་དུས་དཔལ་མགོན་གྱི་རྒྱུད་དང་སྒྲུབ་བསྐོར་རྣམས་ཚར་མངར་ཞིག་གཏེར་ཤོག་ལ་བཀོད་ནས་ཟབ་གཏེར་ཐ་དད་དུ་སྦས་ཤིང་། དུས་ལ་ནམ་བབས་གཏེར་བཏོན་སོ་སོས་གདན་དྲངས་ཏེ་བསྟན་པའི་བཙས་དང་ཆ་རྐྱེན་དུ་གྱུར་པ་ལས།། ༈ །།སྐབས་འདིར་
བབས་པ་ནི་མྱང་བན་ཏིང་འཛིན་བཟང་པོའི་ཆོས་སྐལ་དུ་རྩལ་བའི་བླ་མ་སྐུ་བཞིའི་སྒྲུབ་ཐབས་ཟབ་མོ་རྣམས་ཀྱི་སྤྱིའི་བཀའ་སྲུང་དུ་དཔལ་མགོན་གྱི་ཆོས་བསྐོར་ཤིན་ཏུ་ཟབ་ཅིང་རྒྱས་པ་ཆ་ལག་ཚང་བར་གཏེར་རྫས་ཁྱད་པར་ཅན་མང་པོ་དང་ལྷན་ཏུ་དབུ་རུ་ཞྭའི་ལྷ་ཁང་དང་ཉེ་བར་ཕ་བོང་བྱ་རོག་ནག་པོའི་ལྟོ་བ་ན་གཏེར་དུ་སྦས་པ་ལས་སླད་དུ་མྱང་བན་གྱི་སྐྱེ་མཐའ་རིག་འཛིན་ཆེན་པོ་ཧཱུྃ་ནག་མེ་འབར་གྱིས་གཏེར་ནས་གདན་དྲངས་པའི་བྱིན་རླབས་ཀྱི་དྲོད་མ་ཡལ་བ་ཡིད་ཆེས་ཁུངས་བཙུན་གྱི་གནས་སུ་གྱུར་པ་ལགས།། ༈ །།འདི་ལྟ་བུ་བཀའ་སྲུང་དྲག་རྩལ་ཅན་གྱི་སྲོག་དབང་བཀའ་གཏད་ཞུ་བར་བྱེད་པ་ལ་སློབ་མ་སྔོན་ནས་ཡི་དམ་གྱི་སྐྱེད་རིམ་གདེངས་སུ་གྱུར་པ་དང་སྣང་སྲིད་ཆོས་སྐུའི་རོལ་པར་ཤེས་པ་གཅིག་མེད་ན་ལྷ་འདྲེའི་
ཞུད་མི་ཐུབ། སྲུང་མ་དམ་ལ་མི་འདུ། དྲེགས་པ་ཟིལ་གྱིས་མི་ནོན་ལ། ཁྱད་པར་དབང་ངེས་པར་ཐོབ་པར་བྱེད་པ་ལ་སྒོ་གསུམ་ཐ་མལ་གྱི་སྣང་ཞེན་མ་ཞུགས་གཅིག་ནན་ལྟར་གལ་ཆེ་སྟེ། ཐ་མལ་འཁྲུལ་རྟོག་རང་ག་མ་ལ་ནི་བྱིན་རླབས་ཡེ་ཤེས་འཇུག་པའི་ཡུལ་མ་ཡིན་པའི་ཕྱིར། དེས་ན་ཁྱེད་རང་རྣམས་སྐད་ཅིག་དྲན་རྫོགས་ཆུ་ལས་ཉ་འཕར་བ་ལྟར་སྒོ་གསུམ་གྱི་དངོས་པོ་འདི་ཉིད་དཔལ་ཆེན་ཆེ་མཆོག་ཧེ་རུ་ཀ་ཡབ་ཡུམ་གྱི་སྐུ་གསུང་ཐུགས་སུ་གནས་འགྱུར་ཏེ། དབུ་གསུམ་ཕྱག་དྲུག་ཞབས་བཞི་པ། གཡས་དཀར་གཡོན་དམར་དབུས་མཐིང་གི་ཞལ་གསུམ་རབ་ཏུ་ཁྲོས་པ། གཡས་ཀྱི་ཕྱག་གསུམ་གྱིས་རྡོ་རྗེ་དང་། གཡོན་པ་གསུམ་གྱིས་ཐོད་ཁྲག་བསྣམས་པ། ཞབས་བཞི་བརྐྱང་བསྐུམ་
དོར་སྟབས་ཀྱིས་བཞེངས་ཏེ་ཡུམ་ཆེན་གནམ་ཞལ་དབྱིངས་ཕྱུག་ཁ་ཊྃྭཱ་ཐོད་ཁྲག་འཛིན་པ་གཉིས་མེད་དུ་འཁྲིལ་བ། རྡོ་རྗེ་རིན་པོ་ཆེ་གཤོག་པ་གདེང་ཞིང་དཔལ་གྱི་ཆས་བརྒྱད་ཡོངས་སུ་རྫོགས་པ། པད་ཉི་བདུད་བཞི་བརྫིས་པའི་གདན་སྟེང་མེ་སྤུངས་རབ་ཏུ་འབར་བའི་ཀློང་ན་གར་དགུའི་ཉམས་ལྡན་གྱི་སྐུར་གསལ་བའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག་ལ་སྔགས་ཀྱི་ཕྲེང་བ་སྔོ་ཧྲཾ་མེད་གཡས་སུ་འཁོར་བ་ལ་འདུན་པ་གཏད་དེ་རྩ་སྔགས་འདི་ཉིད་བཟླ་བར་མཛོད་ཅིག །ཨཱོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ ཅེས་དཔོན་སློབ་གཉིས་ཀས་བརྒྱ་སྟོང་སོགས་ཅི་འགྲུབ་བཟླའོ། །དེ་ནས་ཡང་། དཔལ་མགོན་དང་ཆེ་མཆོག་གཉིས་ངོ་བོ་ཐ་མི་དད་པའི་ཕྱིར་ཆེ་མཆོག་གི་སྔགས་ཕྲེང་གི་ཕྱི་སྐོར་དུ་མགོན་པོའི་
སྲོག་སྔགས་འདི་ཉིད་མགར་གྱི་ཚ་ཚ་ལྟར་མེ་སྟག་ཕྲོཾ་མེ་གཡས་སྐོར་དུ་འཁོར་བར་དམིགས་ཏེ་བཟླ་བར་མཛོད་ཅིག །ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཧཱུྃ་ཛཿཅེས་གང་འགྲུབ་བཟླས་ལ། དེ་ནས་སློབ་མའི་མགོ་ལ་རིགས་ལྔའི་དབུ་རྒྱན་བསྐོན་པའམ་མོས་པས་ཀྱང་རུང་ཞིང་། བླ་མས་དབང་བུམ་གདན་དྲངས་ལ། དེ་ལྟར་སློབ་མའི་སྒོ་གསུམ་ལྷའི་སྐུ་གསུང་ཐུགས་ཀྱི་ངོ་བོར་བསྒྲུབ་པས་དབང་གིས་སྣོད་རུང་དུ་བྱས་ནས། སླར་ཡང་དེ་ལས་མི་འདའ་བའི་ཆེད་དུ་བུམ་པས་དབང་གི་རྒྱས་བཏབ་སྟེ་ཇི་ལྟར་ལྕགས་ལ་གསེར་འགྱུར་གྱི་རྩིས་ཐེབས་པ་བཞིན་བགྱི་བ་ཡིན་པས། བུམ་པ་གཞལ་ཡས་ཁང་གི་ནང་དུ་དཔལ་ཆེན་པོ་ཧེ་རུ་ཀ་དང་ཡེ་ཤེས་མགོན་པོ་ཐ་མི་དད་པར་བཞུགས་པ་འོད་དུ་ཞུ་ནས་ཁྱེད་ཀྱི་སྒོ་གསུམ་ལ་ཐིམ་ནས་གཉིས་མེད་དུ་གྱུར་པར་སྒོམ་མཛོད་ཅིག །ཧཱུྃ། དཔལ་ཆེན་
། ཐུགས་ཀར་བུམ་ནང་དུ། མ་ནིང་འཁོར་བཅས་འདོད་དུ་འཁྱིལ། སློབ་མའི་མགོར་བཞག་གཉིས་མེད་ཐིམ། གསང་བ་སྒྲུབ་ཆེན་བུམ་དབང་བསྐུར། དཔལ་དགུའི་སྙིང་པོ་ཚང་བར་བརྗོད་པའམ། བསྡུ་ན། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ། མ་ཧཱ་ཀྲོ་དྷི་ཤྭ་རི་སྟཾྭ། ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཨ་བྷི་ཥཱིཉྩ་ཧཱུྃ། ཨོཾ་ཨཱཿཧཱུྃ་ཧོཿ ཞེས་པས་སྤྱིར་བསྐུར་ཞིང་བུམ་ཆུ་ཡང་བླུད་དོ། །དེ་ལྟར་དཔལ་ཆེན་པོ་དང་མ་ནིང་དབྱེར་མེད་ཀྱི་བུམ་དབང་བསྐུར་བས་དཔལ་མགོན་འཁོར་བཅས་སོགས་སྲུང་མ་དྲེགས་པ་ཅན་གྱིས་འཁུ་ལྡོག་མི་ནུས་ཤིང་བྲན་དུ་འཁོལ་ནུས་པའི་རྟེན་འབྲེལ་ཟབ་མོ་ཁྱོད་ཀྱི་རྒྱུད་ལ་བསྒྲིགས་པ་ཡིན་ནོ། །དེ་ནས་ཡེ་ཤེས་ཀྱི་མགོན་པོ་འཁོར་བཅས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒྲུབ་རྫས་ཀྱི་དབང་བསྐུར། སྔགས་ཀྱི་བྱིན་རླབས་བདེན་སྟོབས་ཀྱི་སྨོན་ལམ་གདབ་པ་དང་བཅས་པའི་ཚིག་དོན་དང་
རྗེས་སུ་མཐུན་པར་ཐོབ་པའི་ངེས་ཤེས་བརྡན་པོ་ཡེངས་མེད་དུ་མཛད་པར་འཚལ་ལོ། །སྐུ་དྲིན་ཙཀྐ་ལི་དང་ཙནྡ་བེང་ཆེན་སྤྱི་བོར་བཞག་སྟེ། ཨོཾ་ཨཱཿཧཱུྃ་སྭཱ་ཧཱ། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊཿ མ་ཧཱ་ཀྲོ་དྷི་ཤྭ་རི་སྟཾྭ། ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཀཱ་ཡ་ཨ་བྷི་ཥཱིཉྩ་ཨོཾ། དཔལ་ཆེན་པོ་བྱིན་རླབས་ཀྱིས། ཡེ་ཤེས་མགོན་པོའི་སྐུ་མི་ཟད་རྒྱན་གྱི་འཁོར་ལོ་དང་གཉིས་མེད་པར་གྱུར་ཅིག །ཅེས་བསྐུར་ཞིང་མེ་ཏོག་ཀྱང་འཐོར་རོ།། ༈ །།གསུང་རྟེན་གླེགས་བམ་དང་ཐོད་པ་མགྲིན་པར་བཏུག་ཅིང་། ཆེ་མཆོག་ཡབ་ཡུམ་དང་དཔལ་མགོན་གྱི་རྩ་སྔགས་གོང་ལྟར་བརྗོད་པའི་འཇུག་ཏུ། ཝཱཀ་ཨ་བྷི་ཥཱིཉྩ་ཨཱཿདཔལ་ཆེན་པོའི་བྱིན་རླབས་ཀྱིས། ཡེ་ཤེས་མགོན་པོའི་གསུང་མི་ཟད་རྒྱན་གྱི་འཁོར་དང་གཉིས་སུ་མེད་པར་གྱུར་ཅིག །ཅེས། མེ་ཏོག་འཐོར་ཞིང་། བདུད་རྩི་ཡང་སྦྱིན་ནོ། །ཐུགས་རྟེན་གྲི་གུག་སྙིང་གར་བཞག་ལ། གོང་གི་རྩ་སྔགས་མཐར། ཙིཏྟ
ཨ་བྷི་ཥཱིཉྩ་ཧཱུྃ། དཔོན་པོའི་བྱིན་གྱིས་རླབས་ཀྱིས། ཡེ་ཤེས་མགོན་པོའི་ཐུགས་མི་ཟད་རྒྱན་གྱི། ཅེས་མེ་ཏོག་འཐོར། ཡོན་ཏན་གྱི་རྟེན་དར་ནག་ཞལ་བྲིས་སློབ་བུའི་ལག་པ་གཡས་སུ་གཏད་ཅིང་། གོང་གི་རྩ་སྔགས་ཀྱི་མཐར། གུ་ཎ་ཧྲི་ད་ཨ་བྷི་ཥཱིཉྩ་སྭཱ། དཔལ་ཆེན་པོའི༴ ཡོན་ཏན་མི་ཟད་རྒྱན༴ ཅེས་མེ་ཏོག་འཐོར། ཕྲིན་ལས་ཀྱི་རྟེན་ལྕགས་གཡོན་དུ་གཏད་ལ། རྩ་སྔགས་ཤམ་དུ། བཛྲ་ཀཱི་ལི་ཀཱི་ལ་ཡ། ཀརྨ་མ་ཧཱ་ཨ་བྷི་ཥཱིཉྩ་ཧཱ། དཔོན་པོའི༴ ཕྲིན་ལས་མི་ཟད༴ ཅེས་བསྐུར་ཞིང་མེ་ཏོག་འཐོར་རོ། །དེ་ནས་སྦྱོར་སྒྲོལ་གྱི་བརྟུལ་ཞུགས་ནུས་པའི་དབང་བསྐུར་བ་ཐོག་མར་དྲག་པོ་སྒྲོལ་དབང་ནི། གོང་ནས་སྟ་གོན་བྱས་པའི་ལིངྒ་འབྲུབ་ཁུང་ངམ་ཐོད་ངན་ལྕགས་སྡོང་སོགས་གང་རིགས་སུ་བཅུག་ཅིང་ཁྲག་གིས་ལྤགས་པ་སློབ་མའི་མདུན་དུ་བཤམ། ཕུར་བུ་དང་རལ་གྲི་གྲི་གུག་སོགས་ཀྱི་ཕྱག་མཚན་མཚོན་ཆ། ཐུན་རྫས་དང་བཅས་པ་མདུན་དུ་གསར་ནས། དཔོན་སློབ་གཉིས་ཀ་ཆེ་མཆོག་དང་མགོན་པོ་ཐ་མི་དད་པར་གསལ་བའི་ངང་ནས་སྤྲོ་ན་འདི་ཉིད་ཀྱི་གདབ་ལས་ནས་བྱུང་བའི་ལས་རིམ་རྒྱས་པར་བྱ་བའམ། བསྡུ་ན།
ལས་བྱང་གི་ཚོགས་ལས་ནས་བྱུང་བའི་འགུགས་འདྲེན་ནི། ན་མོ། རྩ་རྒྱུད་བླ་མ་ཡི་དམ་ལྷ་ཚོགས་དང་། །དཀོན་མཆོག་གསུམ་གྱི་བཀའ་ཡི་བདེན་སྟོབས་དང་། །རྩ་གསུམ་ལྷ་ཚོགས་ཆོས་སྐྱོང་སྲུང་མ་དང་། །ཁྱད་པར་དཔལ་མགོན་མ་ནིང་ནག་པོ་ཡི། །བདེན་པའི་བྱིན་རླབས་མཐུ་རྩལ་རྟེན་འབྲེལ་གྱིས། །ཕྱོགས་བཞི་མཚམས་བརྒྱད་དགྲ་གེགས་འབྱུང་པོའི་ཚོགས། །གནམ་པའི་གོ་བར་གར་ཡོད་གར་གནས་ཀྱང་། །རང་དབང་མེད་པར་གཟུགས་ལིང་འདི་ལ་ཁུག །ཨཾ་གུ་ཤ་ཛཿ པཱ་ཤ་ཧཱུྃ། སྥ་ཊ་བཾ། ཨཱ་ཝ་ཤ་ཡ་ཧོཿ ཞེས་པས་བཀུག་ལ། ཧཱུྃ། དཀྱིལ་འཁོར་ལྷ་ཚོགས་དུས་ལ་བབ། །དཔལ་མགོན་འཁོར་བཅས་དུས་ལ་བབ། །བྱང་ཆུབ་བསྒྲུབ་ལ་གནོད་བྱེད་འདིར། །བསྲུང་སྐྱོབས་བྱེད་པའི་ལྷ་དང་ཕྲོལ། །ཕོབ་ཅིག་རྣམ་པར་གཟིར་བར་གྱིས། །བཟུང་ཞིག་རྒྱོབ་ཅིག་རྣམ་པར་ཆིངས། །གྲོགས་དང་འཕྲོས་ལ་སྨྱོ་རུ་ཆུག །ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་
ཤ་ཏྲུཾ་ཨ་མུ་ཀ མཱ་ར་ཡ་རྦད། དེ་ནས་དྲག་པོའི་མཐུན་རྫས་སློབ་མའི་ལག་ཏུ་གཏད་ལ། ཁྱེད་རང་དཔལ་མགོན་སྲོག་བདུད་ནག་པོའི་ང་རྒྱལ་གྱིས་དྲག་པོའི་ཐུན་དང་མཚོན་ཆའི་ཆར་པ་གདོན་བྱེད་ཀྱི་གཟུགས་ལ་ཕབ་པས་ལས་ངན་རྣམ་སྨིན་གྱི་ཕུང་པོ་རྡུལ་ཕྲན་ཕྱེ་མར་གྱུར་ཞིང་། རྣམ་པར་ཤེས་པའི་ངོ་བོ་ཡི་གེ་ཨཿཡི་ཚུལ་དུ་ཆེ་མཆོག་ཡབ་ཡུམ་གྱི་སྦྱོར་མཚམས་སུ་ཐིམ་སྟེ་བྱང་ཆུབ་ཀྱི་གོ་འཕངས་ལ་འཁོད་པའི་དམིགས་པ་མཛོད་ཅིག །ཅེས་བརྗོད་ནས་ལིངྒ་ལ་ཐུན་དབབ་ཏུ་གཞུག་ཅིང་། ཨོཾ་ཤྲཱི་མ་ཧཱ་ཀཱ་ལ་རུ་དྲ་ནག་པོ་དགྲ་བོའི་སྙིང་ལ་སུ་ཏྲི། ཙིཏྟ་རྦད། ཅེས་དྲག་ཏུ་བཟླས་ལ་སླར་ཕྱག་མཚན་གྱི་མཚོན་ཆས་ལིངྒ་གདུམ་བུར་གཏུབ་ཏུ་གཞུག་སྟེ། ཨོཾ་ཕཊཿམཱ་ར་ཡ་ཏེ་ཧཱུྃ་ཨཿསྥ་ར་ཎ་ཕཊཿ དེ་ནས་ལིང་རོ་རྣམས་མེ་ནང་དུ་དཔལ་མགོན་འཁོར་བཅས་གསལ་བ་ལ་འབུལ་ཞིང་། ཧཱུྃ། དམ་ཉམས་དགྲ་གེགས་འབྱུང་པོ་ཐམས་ཅད་ཀྱི། །ཕྱི་ཡི་དབང་པོ་སྒོ་ལྔ་མཆོད་པར་བཞེས། །ནང་གི་དོན་སྙིང་
རྣམ་ལྔ་མཆོད་པར་བཞེས། །གསང་བའི་བླ་སྲོག་རྣམ་ཤེས་མཆོད་པར་བཞེས། །དེ་བཞིན་ཕུང་པོ་རྣམ་ལྔ་མཆོད་པར་བཞེས། །སངས་རྒྱས་བསྟན་པ་བསྲུང་ཕྱིར་བཞེས་སུ་གསོལ། །ཡཀྵ་ཀྲོ་དྷ་བ་ལིངྒ་ཡ་ཁཱ་ཧི། དེ་ལྟར་དྲག་པོ་སྒྲོལ་བའི་དབང་བསྐུར་ནས། གཉིས་པ་ཐབས་ཤེས་སྦྱོར་བའི་དབང་ནི་འདི་སྐབས་ཀྱི་གསང་དབང་གི་མཚོན་བྱེད་ཀྱང་ཡིན་པས། ཐོད་པའི་རཀྟ་སློབ་མའི་ལྕེ་ཐོག་ཏུ་བླུགས་ལ། ཁྱེད་རང་ཆེ་མཆོག་དཔལ་མགོན་དབྱེར་མེད་ཀྱི་ཡ་རྐན་ཁྲོ་བོ་ཡབ་དང་མ་རྐན་ཁྲོ་མོ་ཡུམ་གྱི་རང་བཞིན་ཐབས་ཤེས་མཉམ་སྦྱོར་གྱི་རོལ་པ་མཛད་པའི་བྱང་སེམས་དཀར་དམར་གྱིས་ལུས་ནང་རྩ་ཐམས་ཅད་ཁེངས་ཤིང་བདེ་སྟོང་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་བར་སྒོམ་མཛོད་ཅིག །ཨོཾ་ཤྲཱི་མ་ཧཱ་ཀཱ་ལ་ཀི་ཀྲོ་དྷི་ས་མ་སྟཾྭ། བདེ་སྟོང་ཟུང་འཇུག་གི་ཉམས་དང་མི་འབྲལ་བར་གྱུར་ཅིག །ཅེས་མེ་ཏོག་འཐོར་རོ། །དེ་ནས་ཡོངས་རྫོགས་གཏོར་མའི་དབང་གིས་བྱིན་རླབས་རྩལ་
ཡུགས་སུ་དབབ་པ་ནི་དཔལ་གཏོར་རྒྱན་ལྡན་གཟི་བརྗིད་ཅན་སློབ་དཔོན་གྱི་བཏེགས་ཅིང་། ཚིལ་ཆེན་དང་གུ་གུལ་བསྲེག །རོལ་མོའི་སྒྲ་དང་བཅས་པས་བྱིན་འབེབ་བྱ་སྟེ། ཧཱུྃ་ཧཱུྃ་ཧཱུྃ། འོག་མིན་གནས་མཆོག་དམ་པ་ནས། །ཞི་ཁྲོ་ཡོངས་རྫོགས་སྐུ་བཞེངས་ཤིག །གསང་བའི་དཀྱིལ་འཁོར་ཆེན་པོ་འདིར། །སྤྱན་འདྲེན་བཞུགས་གསོལ་མཆོད་པ་འབུལ། །བདག་དང་མོས་པའི་བུ་རྣམས་ལ། །དབང་བསྐུར་བྱིན་གྱིས་བརླབ་ཏུ་གསོལ། །བགེགས་དང་ལོག་འདྲེན་བར་ཆད་གསོལ། །ཕྱི་ནང་གསང་བའི་དབང་རྣམས་བསྐུར། །མཆོག་དང་ཐུན་མོང་དངོས་གྲུབ་སྩོལ། ཧཱུྃ། སྟེང་ཕྱོགས་དགའ་ལྡན་ལྷ་གནས་ནས། །ལྷ་ཆེན་དཔལ་འབར་བྱིན་ཕོབ་ཅིག །མོས་པའི་བུ་ལ་དབང་ཞིག་བསྐུར། ཧཱུྃ། ཨུ་ཙ་ལ་ཡི་དུར་ཁྲོད་ནས། །མ་ནིང་ནག་པོས་བྱིན་ཕོབ་ཅིག །གཞན་ཡང་མགོན་པོའི་ཚོགས་རྣམས་ཀྱིས། །དད་ལྡན་རིགས་ཀྱི་བུ་འདི་ལ་དངོས་གྲུབ་རྣམ་གཉིས་སྩལ་དུ་གསོལ།
ནད་གདོན་བར་ཆད་ཞི་བ་དང་། །ཚེ་དང་བསོད་ནམས་རྒྱས་པ་དང་། །དགྲ་གེགས་འགུགས་ཅིང་སྒྲོལ་བ་དང་། །དྲག་པོ་མཐུ་ཡི་དབང་ཞིག་བསྐུར། །ད་ལྟ་ཉིད་དུ་བྱིན་གྱིས་རླབས། །ཨོཾ་ཤྲཱི་མ་ཧཱ་ཀཱ་ལ་བ་ལིནྟ་ས་མ་ཡ་ཨ་བྷི་ཥཱིཉྩ་ཧཱུྃ། ཞེས་སློབ་མའི་སྤྱི་བོར་གཏོར་མས་དབང་བསྐུར་བ་དང་ལྷན་གཅིག་ཏུ་སྒྲུབ་སྐོར་གྱི་པུསྟི་སྐུ་དང་བླ་རྡོ་སྒྲུབ་རྫས་སོགས་ལག་ཏུ་གཏད་ཅིང་བཀའ་བསྒོ་སྨོན་ལམ་སོགས་ནན་ཏན་བྱས་ལ། དེ་ལྟར་དབང་བསྐུར་བས་དཔལ་མགོན་གྱི་ལྷ་ཚོགས་ཐམས་ཅད་ཁྱེད་ཀྱི་ལུས་ངག་ཡིད་གསུམ་ལ་དབྱེར་མེད་དུ་ཐིམ་ནས་བྱིན་རླབས་མཐུ་སྟོབས་ནུས་རྩལ་བསམ་གྱིས་མི་ཁྱབ་པ་ལ་དབང་འབྱོར་ཐོབ་པའི་ངེས་ཤེས་བསྐྱེད་མཛོད། དེ་དབང་བསྐུར་བ་དེ་ཐམས་ཅད་ཀྱི་རྩ་བ་དབང་དོན་རྒྱུད་ལ་གོ་ཞིང་རྟོགས་དགོས་ཏེ། དེ་མ་རྟོགས་ན་མཚན་བཅས་རྫས་ཀྱི་དབང་ཇི་ཙམ་བསྐུར་ཡང་ཐོབ་པར་མི་འགྱུར་ལ། དབང་དོན་ནམ་རྟོགས་
པ་དང་དབང་ཚུལ་བཞིན་ཐོབ་པ་ཡིན་པས་འདི་བཞིན་ཡིད་ལ་ཞོག་ཅིག །ཧཱུྃ། རིགས་ཀྱི་བུ་ཁྱོད་སྐལ་བ་བཟང་། །ཚུར་ཤོག་གསང་བའི་དཀྱིལ་འཁོར་འདིར། །དབང་དོན་འདི་རྣམས་གོ་བར་གྱིས། །བུམ་པ་ཕྱི་ཡི་དབང་བསྐུར་ཡིན། །ཐོད་པ་ནང་གི་དབང་བསྐུར་ཡིན། །བདུད་རྩི་གསང་བའི་དབང་བསྐུར་ཡིན། །ཙཀྐ་ལི་ནི་སྐུ་ཡི་དབང་། །སྒྲུབ་ཐབས་ཡིག་འབྲུ་གསུང་གི་དབང་། །རྡོ་རྗེ་གྲི་གུག་ཐུགས་ཀྱི་དབང་། །ཡོན་ཏན་ཕྲིན་ལས་དར་ཕུར་དབང་། །དྲེགས་པ་སྦྱོར་སྒྲོལ་ཐོད་ཁྲག་དབང་། །གཏོར་དབང་ཐུན་མོང་སྤྱི་ཡི་དབང་། །དེ་ལྟར་ཤེས་ན་དབང་མཆོག་ཐོབ། །ཅེས་པ་དེ་ལྟ་བུས་ཐུན་མོང་དབང་བསྐུར་བ་ལེགས་པར་ཐོབ་ནས། ད་ནི་ཁྱད་པར་དྲེགས་པའི་སྲོག་གི་དབང་དོན་དམ་པའི་སྙིང་པོར་ཇི་ལྟར་བསྐུར་ཞིང་ཐོབ་པའི་ཚུལ་ནི་འདི་ཡིན་ཏེ། །ཧོ། ཉོན་ཞིག་སྐལ་ལྡན་རིགས་ཀྱི་བུ། །ཁྱད་པར་དྲེགས་པའི་སྲོག་དབང་ནི། །གཞན་ན་ཡོད་པ་མ་ཡིན་ཏེ། །
རང་གི་སེམས་ཉིད་རིན་པོ་ཆེ། །ཞི་བར་ཆོས་སྐུ་ཀུན་ཏུ་བཟང་། །ཁྲོ་བོར་ཆེ་མཆོག་ཧེ་རུ་ཀ །རིག་ན་སངས་རྒྱས་ཀུན་དངོས་ཡིན། །མ་རིག་དམྱལ་བ་རང་སེམས་ཡིན། །འཁོར་འདས་ཀུན་གྱི་རྩ་བ་སྟེ། །སྟོང་ལ་ཐེར་ཟུག་མ་འགག་པ། །ངར་འཛིན་རྣམ་རྟོག་མ་ནིང་སྐུ། །གཞན་ན་མེད་དོ་རང་རིག་དངོས། །དེ་ལྟར་རྟོགས་ན་སྲོག་དབང་ཐོབ། །ཀུན་བཟང་ཆེ་མཆོག་མ་ནིང་གསུམ། །ལོགས་ན་མེད་དོ་རང་སེམས་ཉིད། །མ་ནིང་རང་སེམས་ངོ་ཤེས་ན། །དྲེགས་པ་ཀུན་གྱི་སྟོང་སྲོག་ཐོབ། །ཡ་གི་ཀུན་ཏུ་བཟང་པོ་ནས། །མ་གི་ཐེའུ་བྲང་ཡན་ཆད་དུ། །ཀུན་སྲོག་སེམས་ཉིད་གཅིག་པུར་འདུས། །དཔེར་ན་ནམ་མཁའ་ཁྱབ་འཇུག་གིས། །ནམ་མཁའི་ཉི་ཟླ་ཟིན་པའི་དུས། །ཆུ་བྲན་ཀུན་གྱི་ཉི་ཟླ་ཟིན། །དེ་བཞིན་སྟོང་སྲོག་གཅིག་ལ་འདུད། །དེ་དོན་རྟོགས་ན་སྲོག་དབང་ཐོབ། །རང་རྩལ་མཐུ་སྟོབས་དབང་བསྐུར་རོ།
ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་ཧྱ་རཾ་སིདྡྷི་ཧཱུྃ་ཛཿ ཨེ་ཧུར་ཐུཾ་ཛཿརྦད་ཨ་བྷི་ཥཱིཉྩ་ཨཿ ཞེས་ཕྲེང་བའི་སྣ་རེ་དཔོན་སློབ་གཉིས་ཀྱིས་བཟུང་ནས་སྔགས་ཀྱི་རྗེས་སུ་གནང་བ་བྱས་ལ། སླར་ཡང་འདི་ཉིད་ཀྱི་སྲོག་དབང་བསྡུས་པ་ནས་གསུངས་པའི་ཞལ་གདམས་གཏད་རྒྱ་འདི་ཡང་བྱ་སྟེ། ཧོ། ད་ཡང་བུ་ཁྱོད་ཚུར་ཉོན་ཞིག །དཔལ་མགོན་མ་ནིང་ནག་པོ་ཡང་། །དཔལ་ཆེན་དངོས་ཀྱི་སྤྲུལ་པ་སྟེ། །དགོངས་པ་མྱ་ངན་འདས་མོད་ཀྱང་། །ཕྲིན་ལས་འཇིག་རྟེན་ཚུལ་དུ་མཛད། །མཆོད་བསྟོད་གུས་པས་བསྟེན་ཞིང་བསྒྲུབ། །ལས་མགོན་དང་ནི་སྡེ་བརྒྱད་སོགས། །མ་རུངས་ནག་པོའི་འཁོར་ཚོགས་རྣམས། །ད་རུང་འཇིག་རྟེན་བྱ་མ་བཏང་། །དགེ་བའི་ལས་ལ་མོས་ན་ཡང་། །དམ་ལ་མ་ཐོགས་ལས་ངན་པའི། །ས་བོན་རྩུབ་པས་ཕན་གནོད་ཆེ། །འགའ་ཞིག་བདེར་གཤེགས་ཞལ་མ་མཐོང་། །ཆོས་ལ་མི་དད་ནག་པོའི་ཕྱོགས། །རིང་ཐུང་ཆད་འབེབས་
ལེགས་ཉེས་སྟོན། །གནས་མེད་ཟས་སུ་ཕུད་གཏོར་མྱུལ། །དེ་འདྲའི་དྲེགས་པ་མ་རུངས་པ། །གདོལ་བ་རྒོད་ཀྱི་རིགས་མང་བས། །ཨེ་མ་རྣལ་འབྱོར་བུ་ཁྱོད་ཀྱང་། །ལྟ་སྒོམ་བསྙེན་སྒྲུབ་ལ་སོགས་པ། །དྲོད་ཚོགས་རིམ་གྱིས་མ་ཐོབ་བར། །མངལ་གྱི་ལུས་ལ་བརྟེན་པ་ཡིས། །དཔའ་སྙེམས་བརྟུལ་ཞུགས་ང་རྒྱལ་གྱིས། །ལྷ་སྲིན་དྲེགས་པ་འདུལ་མི་བྱ། །བསོད་ནམས་རླུང་རྟ་གུས་དུས་སུ། །ཁོས་ཀྱང་ཡལ་བར་ཅི་ལ་འདོར། །རབ་འཇིགས་དྲེགས་པ་འདི་དག་ཀྱང་། །ཕལ་དུ་སྤྱི་མཐུན་རིགས་མ་འདས། །འཇིག་རྟེན་མཆོད་ཅིང་བསྟེན་བསྒྲུབ་ཕྱིར། །འདོད་ཡོན་གཏོར་རྫས་འཛོམ་ན་འགྲུབ། །སྒྲུབ་ལ་ཐེ་ཚོམ་སྐྱེས་པ་ན། །ལས་མི་འགྲུབ་པས་ཐེ་ཚོམ་སྤོང་། ལྷ་མ་བསྙེན་པར་འདྲེ་མི་བསྒྲུབ། །རང་རྒྱུད་འགྲོགས་ཀྱང་མི་བདེ་བས། །སྐྱོན་ཡང་ཤིན་ཏུ་མང་བར་གསུངས། །ཐམས་ཅད་ཆོས་སྐུའི་རང་རྩལ་དུ། །
ཤེས་ན་ཕྲིན་ལས་ཀུན་འགྲུབ་སོ། །ཨེ་མ་བུ་ཁྱོད་ཁྱད་པར་དུ། །གཅེས་པའི་དབང་སྲོག་དམ་ཚིག་བསྲུང་། །འདས་དང་མ་འོངས་དངོས་གྲུབ་ཀུན། །བླ་མའི་ཐུགས་རྒྱུད་མཉེས་ན་འགྲུབ། །དེས་ན་འདི་ཞུས་བླ་མ་ལ། །རྩ་བ་སྐུ་གསུང་ཐུགས་དམ་བསྲུང་། །བཀའ་སྩལ་ཟུགས་ཡང་བཅག་མི་རུང་། །དངོས་པོ་ཀུན་ལ་མི་འབག་ཅིང་། །ལུས་སྲོག་ལོངས་སྤྱོད་དབུལ་བར་བྱ། །དབང་བསྐུར་སྒྲུབ་ཐབས་ཚང་བར་ཞུ། །ཉམས་ན་མགོན་པོས་རང་སྲོག་གཅོད། །དམ་གཙང་མ་ནིང་དངོས་སུ་འཁོལ། །བླ་མ་ཡི་དམ་ཆོས་སྐྱོང་རྣམས། །གཉིས་མེད་གཅིག་ཡིན་བརྙས་མི་བྱ། །དེས་ན་བླ་མ་སངས་རྒྱས་སྒོམས། །ཅི་མཉེས་བསྒྲུབ་ཅིང་འབངས་སུ་མཆི། །དེས་ནི་ཅི་བསམ་ཐམས་ཅད་འགྲུབ། །མཆོག་ཏུ་དམ་ཚིག་གཙོར་བཟུང་ཞིག །ཅེས། དམ་ཚིག་གི་བཀའ་རྒྱ་ནན་ཏན་དུ་གདབ་ཅིང་། སློབ་མས་ཀྱང་དེ་དང་མཐུན་པའི་དམ་བཅའ་ཞེས་བཅད་དྲག་པོ་བྱས་ལ་དེ་ལས་ནམ་ཡང་མི་འདའ་བ་
ལ་འབད་པ་མཐར་འདོན་ནོ། །གཞན་ཡང་བཀའ་སྲུང་ཆོས་སྐྱོང་གི་དབང་དང་བཀའ་གཏད་ཐོབ་པའི་གང་ཟག་རྣམས་བསྐང་གསོ་རྒྱུན་གཏོར་དུས་གཏོར་ཐུན་གཏོར་སོགས་ལ་རྟག་ཏུ་འབད་དགོས་པ་ཡང་གལ་པོ་ཆེའི་དམ་ཚིག་གོ། །དེ་ལྟར་དབང་བསྐུར་བའི་མཐར། དབང་གི་ཡེ་ཤེས་བརྟན་པར་རབ་ཏུ་གནས་ཕྱིར་བཀྲ་ཤིས་ཀྱི་ཚིགས་སུ་བཅད་པ་རྒྱས་པར་བྱ་ཞིང་རྟེན་འབྲེལ་སྙིང་པོའི་མེ་ཏོག་གི་ཆར་ཕབ། བླ་མ་ལ་བཞེད་པ་མི་མངའ་ཡང་སློབ་མའི་བསོད་ནམས་སྤེལ་ཕྱིར་དངོས་པོ་དག་པ་དང་ལྷག་པར་དྲག་པོའི་ཕྲིན་ལས་འགྲུབ་པའི་རྟེན་འབྲེལ་གནད་དུ། མཚོན་ཆ་བཟང་པོའི་རིགས་ཀྱི་ཕྱག་རྟེན་འབུལ་བར་གསུངས། རྗེས་ལ་ཚོགས་ཀྱི་དགའ་སྟོན་དང་། བཀའ་སྲུང་རྣམས་ལ་བཏང་རག་གི་གཏོར་མ་ཡང་རྒྱ་ཆེར་འབུལ་ཞིང་། ཉེས་བྱས་བཤགས་པ་དང་དངོས་གྲུབ་བླང་བ། བསྔོ་སྨོན་ཤིས་བརྗོད་གཤེགས་གསོལ་བསྡུ་ཆོག་སོགས་ཐམས་ཅད་སྤྱི་དང་མཐུན་པར་བྱའོ། །དེ་ལྟར་དཔལ་མགོན་མ་ནིང་ནག་པོའི་དབང་བསྐུར་བཀའ་གཏད་ཀྱི་ལས་རིམ་ལྟས་ཆོག་འདི་ཉིད་ཀྱང་། སྙིགས་དུས་འགྲོ་བའི་སྐྱབས་གཅིག་མཆོག་གི་སྤྲུལ་པའི་སྐུ་རིན་པོ་ཆེ་འཇིགས་མེད་
དགའ་བའི་རྡོ་རྗེ་ཕྱོགས་ཐམས་ཅད་ལས་རྣམ་པར་རྒྱལ་བའི་ཞལ་སྔ་ནས་བཀའ་སྩལ་པ་ལྟར་སྣ་ཚོགས་རང་གྲོལ་གྱིས་བཀོད་པའི་དགེ་བས། བསྟན་པ་དམ་པའི་ཆོས་ཀྱི་འགལ་རྐྱེན་མཐའ་དག་ཉེ་བར་ཞི་བར་གྱུར་ཅིག །མངྒ་ལཾ། གཅིག་ཞུས།