ངེས་དོན་ཕྱག་རྒྱ་ཆེན་པོའི་ཕྱོགས་ནས་དྲི་བ་ལ་ལན་དུ་བགྱིས་པ་ཡིད་བཞིན་ནོར་བུའི་དོ་ཤལ།
ངེས་དོན་ཕྱག་རྒྱ་ཆེན་པོའི་ཕྱོགས་ནས་དྲི་བ་ལ་ལན་དུ་བགྱིས་པ་ཡིད་བཞིན་ནོར་བུའི་དོ་ཤལ་ཞེས་བྱ་བ་བཞུགས་སོ། །
ན་མསྶཱ་ཙིཏྟ་དི་བུདྡྷ་ཡ། གདོད་ནས་དག་པའི་ཡེ་ཤེས་ཆོས་ཀྱི་སྐུ་མཆོག་དྲི་བྲལ་སངས་རྒྱས་དངོས། རང་བྱུང་རང་། རང་སེམས་གདོད་མའི་སངས་རྒྱས་ལ་ཕྱག་འཚལ་ལོ། །ཞལ་རང་ལ་གསལ་མཛད་དོན་རྒྱུད་བྱིན་རླབས་གཏེར་མངའ་བའི། མཉམ་མེད་དྲིན་ཅན་བླ་མ་མཆོག་ཉིད་རང་རིག་དབྱེར་མེད་རྟག་བཞུགས་ལ་འདུ་འབྲལ་མེད་པའི་ཕྱག་གིས་མཆོད་དོ་མཆོག་དངོས་བདེ་བླགས་གྲུབ་མཛད་གསོལ། ཞེས་མཆོད་པར་བརྗོད་པ་སྔོན་དུ་བཏང་ནས། སྐབས་འདིར། སེང་གཏམ་རྒྱལ་བའི་ཡང་དབེན་གྱི་སྒྲུབ་གྲྭ་ཆེན་པོ་ནས་
ལུང་རྟོགས་ཡོན་ཏན་མཐའ་དག་གིས་འབྱོར་པ་མི་དམན་པའི་སྟོན་སྒོམ་སྨོན་ལམ་པའི་མཚན་འཆང་བ་གང་དེས། ཆོས་ཀུན་སྙིང་པོའི་མཐར་ཐུག་ངེས་དོན་ཕྱག་རྒྱ་ཆེན་པོའི་ཕྱོགས་ནས་དྲི་བའི་ཡི་གེ་རྣམ་དཔྱོད་ཀྱི་དཔལ་དུ་འབར་བ་ལྷ་རྫས་ཀྱི་རྟེན་དང་བཅས་ཏེ། རྒོད་ཚང་གི་དབེན་གནས་སུ་གནང་བར་མཛད་པ་ནི་ངོ་མཚར་ཆེ་མོད་ཀྱང་། སྤྱིར་རྒྱལ་བའི་བཀའི་དགོངས་དོན་ཇི་བཞིན་པ་དང་། ཁྱད་པར་ངེས་དོན་ཟབ་མོའི་ལེགས་བཤད་དྲི་མ་མེད་པ་ནི་དགེ་བའི་བཤེས་གཉེན་ཆེན་པོ་མཁས་ཤིང་གྲུབ་པ་བརྙེས་པ་
རྣམས་ཀྱི་ཞལ་ལས་འབྱུང་ཕྱིར། དེ་ལྟ་བུ་རྣམས་ལ་འདྲི་བར་མཛད་པར་འོས་མོད་ཀྱི། བདག་འདྲ་བའི་རིགས་ནི་ཐོག་མ་ནས་སྐྱེས་ཐོབ་ཀྱི་ཤེས་རབ་དང་ནི་མ་ལྡན་ཅིང་ཐོས་བསམ་སྒོམ་པའི་སྦྱངས་འབྲས་ཀྱིས་འཕོངས་བ་དང་། ཆོས་ཀྱི་བསོད་ནམས་དམན་པའི་ལས་འབྲས་ཀྱི་རང་གཟུགས་ཞིག་ལ་གྲྭ་འཁོར་དག་གིས་སྐུ་སྐྱེའམ་བླ་མར་མིང་དུ་བཏགས་ནས། བསྔོ་བ་དང་ཟ་ཆོག་ཙམ་གྱི་སློབ་གཉེར་ལ་ཆོག་པར་བཟུང་ཞིང་དད་ཟས་གཤིན་དཀོར་གྱི་རིན་དུ་སྤྲོད་རྒྱུའི་བླ་གཟུགས་ལྟར་བཅོས་པའི་ངང་ལ་དལ་འབྱོར་གྱི་ལང་ཚོ་ཆེར་འདས་ཤིང་། དིང་སང་ཀྱང་སྣོད་བཅུད་དང་གཞན་གྱི་ངང་ཚུལ་ལ་ཡིད་སྐྱོ་བ་ཙམ་གྱི་རྐྱེན་ལ་བརྟེན་ནས་དབེན་ཁྲོད་འདི་དག་ཏུ་མཆིས་ཤིང་བདེ་དལ་དུ་གནས་པ་ཙམ་ལས། ཉམས་རྟོགས་ཡོན་ཏན་གྱི་ནོར་དང་མི་ལྡན་ཕྱིར་དྲི་བའི་ལན་ཚུལ་བཞིན་དུ་འབུལ་བའི་ནུས་སྟོབས་ནི་ཅུང་ཟད་ཀྱང་ག་ལ་མཆིས་ཏེ། འོན་ཀྱང་རྣམ་འདྲེན་དམ་
ལྔ་ཕྲག་གསུམ་ཙམ་གྱི་ཐུགས་རྗེས་བསྐྱངས་པའི་གསུང་རྒྱུན་དག་ཇི་ལྟར་ཐོས་པ་དང་དྲན་པའི་ཆ་ཤས་ཙམ་ལ་བརྟེན་པའི་ལན་གྱི་རྣམ་པ་ས་བོན་ཙམ་ཞིག་འབུལ་བར་བགྱི་ན། དེ་ལ་ཐོག་མར་ཉིད་ཀྱི་དྲི་ཡིག་གི་ནང་ཚན་དུ། ཞི་གནས་ཀྱི་སྐབས་སུ། འཇིག་རྟེན་དང་འཇིག་རྟེན་ལས་འདས་པའི་གཞི་གནས་གཉིས་སུ་ཕྱེ་བ་ཇི་ལྟར་ཡིན། ཅེས་གསུང་འདུག་པར། དེ་ལ་སྤྱིར་འཁོར་བ་དང་མྱང་འདས་གང་དུ་ཡང་མ་ཕྱེ་བའི་སྔོན་རོལ་ན། སྣང་སྲིད་ཀྱིས་བསྡུས་པའི་ཤེས་བྱ་ལ་སྲིད་ཚད་ཀྱི་ཆོས་ཐམས་ཅད་རང་གི་ངོ་བོས་སྟོང་ཞིང་མ་སྐྱེས་མི་འགགས་སྤྲོས་པ་ཐམས་ཅད་ལས་འདས་པའི་དབྱིངས་དོན་དམ་པའི་གནས་ལུགས་སམ། བཞུགས་ཚུལ་ལམ། ཡིན་ཚུལ་ཇི་བཞིན་པའི་སྟོང་པ་ཉིད་ཀྱི་རང་བཞིན་གཞིའི་གནས་ལུགས་དེ་ལ་བློ་བུར་གྱི་འཁྲུལ་པའི་ལྷན་སྐྱེས་ཀྱི་མ་རིག་པ་མ་ཤར་བར་རང་རིག་ཡིན་ལུགས་ཀྱི་ཐོག་ཏུ་
རང་ངོ་ཤེས་པ་ལ་ནི། གསང་སྔགས་སྙིགས་མའི་སྐབས་ཚོར། ངོ་བོ་ཀ་ནས་དག་པའམ། ཀུན་ཏུ་བཟང་པོ་ཞིག་ཐོག་ཏུ་གྲོལ་བ་ཞེས་ཟེར་ལ། ཕྱག་རྒྱ་ཆེན་པོའི་རང་སྐབས་སུ་ནི། གནས་ལུགས་ཕྱག་ཆེན་དུ་མིང་བཏགས་མོད་ལགས་ཤིང་། དེའི་རང་བཞིན་མ་རྟོགས་པར་རང་གི་གྲིབ་མས་རང་ཉིད་བསྒྲིབ་པ་ལྟར། ལྷན་སྐྱེས་ཀྱི་མ་རིག་པ་གསེར་ལ་གཡའ་སྐྱེས་པ་བཞིན་དུ་བྱུང་སྟེ་འཁྲུལ་ཞིང་འཁོར་བའི་ས་བོན་རིམ་ཅན་དུ་འཕེལ་བའི་དབང་གིས་སེམས་ཅན་རྣམས་འཁོར་བར་འཁྱམས་ཤིང་། དེ་ལྟར་འཁྲུལ་འཁྱམས་གྱུར་པའི་སྐབས་ན་ཡང་གཞིའི་ངོ་བོ་ལ་འགྱུར་བ་མེད་པའི་དབང་གིས་འཁྲུལ་པ་ལྡོག་ཏུ་བཏུབ་ཅིང་། བླ་མ་དང་གདམས་ངག་བརྩོན་འགྲུས་གསུམ་འཛོམས་ན་གྲོལ་བའི་སྐལ་བ་དང་ལྡན་པའི་ཕྱིར། དཔལ་འཕྲོང་གི་མདོར། བདེ་གཤེགས་སྙིང་པོ་འགྲོ་ཀུན་ཡོངས་ལ་ཁྱབ། ཅེས་སོགས་དང་། རྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད།
འོན་ཀྱང་བློ་བུར་དྲི་མས་བསྒྲིབས། ཅེས་དང་། རྒྱུད་བླ་མར། སངས་རྒྱས་སད་ངན་སོགས་ཀྱི་དཔེ་དགུ་གསུངས་པ་དང་། གཞན་ཡང་མདོ་རྒྱུད་བསྟན་བཅོས་རྣམས་ནས་ལུང་དཔག་མེད་མཆིས་ཤིང་། འདི་ལ་རྫོགས་ཆེན་དུ་ནི་རང་བཞིན་ལྷུན་གྲུབ་དང་ཐུགས་རྗེ་ཀུན་ཁྱབ་སོགས་ཀྱི་རྒྱས་བཤད་དང་། ཕྱག་ཆེན་རང་ལས་ནི་འཁྲུལ་ལུགས་ཕྱག་རྒྱ་ཆེན་པོ་སོགས་མིང་དུ་བཏགས་པ་མཛད་ཕྱིར། མདོར་ན་གཞི་ལམ་འབྲས་གསུམ་གཏན་ལ་འབེབས་ཚུལ་ནི་ཆོས་ལུགས་ཐམས་ཅད་མཐུན་ཅིང་། གཞི་འབྲས་མངོན་དུ་བྱེད་པ་ལམ་གལ་ཆེ་བ་དང་། ལམ་ཉིད་ལའང་ཐེག་པའི་བྱེ་བྲག་མཐའ་ཡས་ཀྱང་མདོར་བསྡུས་ཚེ་མདོ་སྔགས་གཉིས་དང་། དེ་ལ་ཡང་མྱུར་ཟབ་སོགས་ཁྱད་ཆོས་མང་པོའི་སྒོ་ནས་སྔགས་ཁོ་ན་དང་། སྔགས་ཉིད་ལའང་འཇུག་སྒོ་སྨིན་གྲོལ་གཉིས་ལས། སྨིན་བྱེད་རྒྱས་བསྡུས་ཅི་རིགས་པའི་སྒོ་ནས་དབང་དོན་ངོ་འཕྲོད་པ་གལ་ཆེ་བ་དང་། དབང་གི་
ཡེ་ཤེས་དེ་ཀ་ནན་ཆགས་སུ་བྱ་བའི་གྲོལ་བྱེད་ལ་ཡང་བསྐྱེད་རྫོགས་གཉིས་ལས། མཆོག་ཏུ་གཅེས་པའི་རྫོགས་རིམ་གྱི་རྣམ་གྲངས་མཐའ་ཡས་པའི་ནང་ནས་རྒྱལ་མཚན་གྱི་ཏོག་ལྟ་བུར་གྱུར་པ། གྲུབ་ཐོབ་ཐམས་ཅད་ཀྱི་གཞུང་ལམ་བླ་ན་མེད་པའི་དངོས་གཞི་ཕྱག་རྒྱ་ཆེན་པོའི་སྐབས་འདིར། ཞི་ལྷག་གཉིས་ཀྱི་སྒོ་ནས་གང་ཟག་རིམ་གྱིས་ས་གཙོ་བོར་འཇུག་ཐབས་བསྟན་པ་དང་། སྦྱངས་པ་མངོན་གྱུར་དང་གཅིག་ཅར་བའི་རིགས་ཅན་འགའ་ཞིག་ནི་མཐུན་མོངས་ཀྱི་སྔོན་འགྲོ་དང་ཞི་གནས་སོགས་ལ་མ་བརྟེན་པར་རྟོགས་གྲོལ་དུས་མཉམ་གྱུར་མོད་ཀྱི། གཞན་ཕལ་མོ་ཆེ་ལ་ནི་རིམ་ཅན་དུ་དཀྲི་དགོས་ཏེ། སྐྱོབས་པ་རིན་པོ་ཆེས་ཀྱང་། ཆོས་དང་དངོས་གཞི་ཀྱང་སྔོན་འགྲོ་ཟབ། ཅེས་གསུང་པ་བཞིན། སྔོན་འགྲོའི་བྱེ་བྲག་རྣམས། དལ་ནན་ཆགས་རྟགས་ཐོན་དུ་གལ་ཆེ་བ་དང་། ཁྱད་པར་ཞི་གནས་ཀྱི་སྐབས་
འདིར་འཇིག་རྟེན་ལས་འདས་ཞི་གནས་གཉིས་སུ་ལོས་ཀྱང་ཕྱེ་སྟེ། ཅིའི་ཕྱིར་ན། སངས་རྒྱས་ཀྱི་ལམ་དུ་འགྲོ་བ་དང་མི་འགྲོ་བའི་ཁྱད་པར་ཡོད་པས་སོ། །དེ་ནས་ཞི་གནས་ཙམ་དུ་མིང་གཅིག་ཀྱང་དོན་ལ་ཁྱད་པར་ཆེ་སྟེ། འཇིག་རྟེན་པའི་ཞི་གནས་སྲིད་རྩེ་བསྒྲུབས་པའི་ཏིང་ངེ་འཛིན་གྱི་རིགས་ནི་མུ་སྟེགས་པ་རྣམས་ལ་ཡང་ཤིན་ཏུ་བརྟན་པར་ཡོད་ཅིང་། དེ་ལ་བརྟེན་ནས་ལྟར་སྣང་གི་རྫུ་འཕྲུལ་མངོན་ཤེས་སོགས་ཕུལ་དུ་ཕྱིན་པ་མཆིས་ཀྱང་། བྱང་ཆུབ་ཀྱི་རྒྱུར་ཏིལ་འབྲུ་ཙམ་ཡང་ག་ལ་འགྲོ་ཞིང་། ལྷ་རྣམས་ལའང་སྐྱེ་མཆེད་མུ་བཞི་མན་ཆད་ཐམས་ཅད་ལ་སོ་སོར་བསམ་གཏན་ཏིང་ངེ་འཛིན་ལ་བརྟན་པ་ཐོབ་ནའང་། ཡིད་དཔྱོད་ཀྱི་བསམ་གཏན་དང་བདེ་གསལ་མི་རྟོག་གསུམ་གང་རུང་ལ་ཞེན་འཛིན་དང་བཅས་ཕྱིར་ཏིང་ངེ་འཛིན་ལ་བསྐལ་པ་མང་པོར་གནས་ཀྱང་། ཉོན་མོངས་བག་ལ་ཉལ་གྱི་རྩ་བ་མ་སྤོངས་ཕྱིར་སླར་
རྣམ་དཀར་གྱི་ལས་འབྲས་ཟད་པ་དང་ལྟུང་བར་འགྱུར་ལ། དེ་དག་ལས་ཅུང་ཟད་འཕགས་པའི་ཉན་རང་གི་བདག་མེད་བསྒོམ་པ་སོགས་ཀྱང་མཐར་འཛིན་ནམ་ཡིད་དཔྱོད་དང་ལུང་མ་བསྟན་དུ་འགོག་པའི་རིག་སོགས་ཀྱི་སྒྲིབ་ཅིང་ཕྱོགས་རེ་རྟོགས་པ་ཙམ་སོགས་མདོར་ན་སྔགས་ཕྱི་ས་མན་ཆད་རང་རང་གི་གྲུབ་མཐའི་ཕྱོགས་རེའི་ལྟ་བ་ཁོ་ནས་བཅིངས་པས། ལྷན་སྐྱེས་བཅོས་མིན་གྱི་ཡེ་ཤེས་དངོས་མ་རྟོགས་པས་ལམ་རིང་བ་དང་། སྔགས་ནང་པའམ་ཁྱད་པར་ཕྱག་ཆེན་གྱི་སྐབས་འདིར་འཇིག་རྟེན་ལས་འདས་པའི་ཞི་གནས་སམ་མཆོག་གི་ཞི་གནས་ཁོ་ན་མ་གཏོགས་གཞན་གྱིས་མི་རུང་བར་གསུངས་མོད། དེ་ཅི་ཞེ་ན། འཇིག་རྟེན་པའམ་དམན་པའི་ཞི་གནས་ཀྱིས་ནི་འཁོར་བའམ་མངོན་མཐོ་ཙམ་འགྲུབ་པའི་ཐབས་ཡིན་ལ། དེ་བསྒྲུབས་པས་ནི་མྱང་འདས་དང་ངེས་ལེགས་མི་འགྲུབ་པའི་ཕྱིར་ན། འདིར་འཇིག་རྟེན་ལས་
འདས་པའི་ཞི་གནས་སམ་མཆོག་གི་ཞི་གནས་ཁོ་ན་བསྒྲུབ་དགོས་པ་དང་། དེ་ཉིད་ཀྱང་ལྷག་མཐོང་གི་མ་ཟིན་ན་ཞི་གནས་ཀྱི་སྒོམ་ཇི་ལྟར་བཟང་ཀྱང་ཕྱག་རྒྱ་ཆེན་པོའི་སྒོམ་དངོས་གཞིར་གོ་མི་ཆོད་པ་ནི་སྐྱེས་ཆེན་ཐམས་ཅད་གཞེད་པ་མཐུན་མོད་ཅིང་། དེ་ལ་མཚན་བཅས་ཀྱི་ཞི་གནས་རྣམས་ཀྱི་ཐོག་མར་སེམས་འཛིན་ཐབས་དང་། དེ་ནས་མཚན་མེད་ཀྱི་གཞི་གནས་དངོས་ལ་འཇུག་ཅིང་བསྒོམ་མེད་ཡེངས་མེད་ཀྱི་ངང་ལ་མཉམ་པར་བཞག་ཚེ། སོ་སོའི་བློ་ཁྱད་དང་མོས་གུས་ཆེ་ཆུང་ལས་སྒྲིབ་སྲབ་འཐུག་བརྩོན་པ་ཆེ་ཆུང་དང་མཐུན་པའི་ཉམས་རྟགས་འཆར་ལུགས་ཐ་དད་འབྱུང་མོད་ཀྱི། སྤྱི་ཁྱབ་ཏུ་ནི་གནས་པ་དང་པོ་རྣམ་རྟོག་གང་སྐྱེད་ངོས་ཟིན་པ་རེ་གཟར་གྱི་འབབ་ཆུ་ལྟ་བུ་དང་། དེ་ནས་རྣམ་རྟོག་རག་པ་མགོ་ནོན་ཞིང་རྐྱེན་སྣང་ཕྲ་མོས་མི་གནོད་
པའི་གནས་པ་ཉམས་བར་མ་ཆུ་བོ་དལ་འབབ་ལྟ་བུ་དང་། དེ་ནས་ཤིན་ཏུ་བརྟན་ཅིང་ཉིན་མཚན་དང་སྐྱིད་སྡུག་ལེགས་ཉེས་སོགས་ཀྱི་བར་དུ་ཆོད་མི་དགོས་པར་གནས་ཉམས་ཁོར་ཡུག་ཏུ་འགྲོ་བ་རྒྱ་མཚོ་གཡོ་མེད་ལྟ་བུའི་ཞི་གནས་རྣམས་འཆར་ཞིང་། དེ་ཙ་ན་ཟག་བཅས་ཀྱི་མངོན་པར་ཤེས་པ་སོགས་ཡོན་ཏན་ལྟར་སྣང་བའི་རིགས་ཀྱང་མང་དུ་འབྱུང་བར་གསུང་མོད་ཀྱི། སྙིང་རུས་དང་མོས་གུས་ཞེན་ལོག་སོགས་མི་ལྡན་པར་ཞུ་ལོ་དང་སྒོམ་ལོ་ཙམ་གྱི་གང་ཟག་ལ་ནི་ལམ་རྟགས་རྣམས་ཚུལ་བཞིན་འཆར་བ་ནམ་ཀྱང་མི་འབྱུང་ལགས་མོད།། ༈ །།ཡང་། ཉིད་ཀྱི་དྲི་ཡིག་ཏུ་ལུང་འདྲེན་དང་བཅས་པ་མཛད་ནས། དངོས་གཞི་དྲན་པ་འདི་ལ་རྩོལ་བྱས་ཀྱི་དྲན་པ་དང་རྩོལ་མེད་ཀྱི་དྲན་པ་གཉིས་སུ་ཕྱེ་བ་ཇི་ལྟར་ཡིན། གསུང་འདུག་པར། དེ་ནི་ཉམས་ལེན་གོམས་སྟོབས་ཆེ་ཆུང་གི་ཁྱད་པར་ཡིན་མོད་ཀྱི། དེ་ཡང་ཉམས་ལེན་གྱི་སྐབས་སུ་
གོང་དུ་བརྗོད་པ་ལྟར། སེམས་གནས་ཆ་གཙོ་བོར་བཏོན་པའི་དྲན་པ་བསྐྱངས་ཐབས་ལ་ཞི་གནས་དང་། གནས་དང་འགྱུ་འཕྲོ་གང་བྱུང་ཅིར་སྣང་ལམ་དུ་སློང་ཐབས་ཀྱི་དྲན་པ་ལ་ལྷག་མཐོང་དུ་བཏགས་ཤིང་། འདི་སྐབས་རྙིང་ལུགས་རྫོགས་ཆེན་སོགས་སུ་ཉམས་ལེན་བསྐྱངས་ཐབས་རིགས་དུ་མ་ཞིག་མཆིས་ཀྱང་། དིང་སང་གསར་མའི་དགེ་བའི་བཤེས་གཉེན་ཕལ་མོ་ཆེ་བའི་དགོངས་པར་ལྡན་པ་དཀའ་བར་གྱུར་པའི་གཤིས་ཀྱིས་འདིར་མ་བརྗོད་ལ། ཕྱག་རྫོགས་དབྱེར་མེད་ཀྱི་དགོངས་པ་མངོན་དུ་མཛད་པ་ཀུན་མཁྱེན་རང་བྱུང་ཞབས་དང་། དཔལ་མཁའ་སྤྱོད་པ་སོགས་ཀྱི་བཀའ་འབུམ་ན་གཟིགས་པས་མཐུས་ཤིང་། སྐབས་འདིར་ཕྱག་ཆེན་རང་གཞུང་ལྟར། སྒོམ་གྱི་དངོས་གཞི་དྲན་པ་ཁོ་ན་ལ་མཛད་པའི་ཚུལ་ལྟར་བརྗོད་ན། སྤྱིར་དྲན་པ་ཞེས་པའི་མིང་ཙམ་
བཏགས་པ་ལ་ནི་རྣམ་པ་མང་ཀྱང་། འདི་སྐབས་སུ་ནི་རང་རིག་གི་དྲན་པའམ། ཡང་དག་གི་དྲན་པ་ཁོ་ན་དགོས་ལ། དེ་ལའང་ལས་དང་པོ་པས་ནི་མཉམ་གཞག་གི་ཚེ་དམིགས་བཅས་ཀྱི་བསྒོམ་རྒྱུའམ་བསྒྲུབ་རྒྱུ་གང་ཡང་མེད་པར་སེམས་འཕྲོ་གནས་བདེ་བསལ་མི་རྟོག་སོགས་ཅི་དང་ཅི་ལྟར་འཆར་བ་དང་། སྣང་བ་སྣ་ཚོགས་དང་ཚོགས་དྲུག་གི་བྱེ་བྲག་གང་སྣང་ཅི་ཤར་ཐམས་ཅད་ལ་དེའི་རྗེས་སུ་ཡང་མི་འབྲེང་། དགག་ཀྱང་མི་འགག་བརྟག་དཔྱད་ཀྱང་མི་བྱ་བར་རང་རིག་རང་གསལ་འཛིན་མེད་ཀྱི་དང་དུ་གློད་ཅིང་། ཚོར་བ་འགགས་པའམ་ལུང་མ་བསྟན་དུ་མི་འབྱམས་པར་གང་བར་ངོ་ཤེས་སུ་བྱེད་པ་ལ་དྲན་པ་ཞེས་བཏགས་ལ། དེ་ཉིད་རྗེས་ཐོབ་ཏུ་ཡང་ལམ་དུ་འཁྱེར་ཞིང་། མདོར་ན་བསྒོམ་རྒྱུ་སྤུ་ཙམ་ཡང་མི་བྱ་ལ། ཐ་མལ་འཁྲུལ་འཛིན་ཞེན་རྟོག་གི་དབང་དུ་སྐད་ཅིག་ཀྱང་མ་སོང་བར་བྱེད་པ་ལ་ཕྱག་རྒྱ་ཆེན་པོ་བསྒོམ་པ་ཞེས་བཏགས་མོད་ཀྱི།
གང་ཤར་ལ་དྲན་རིག་གིས་ངོས་ཟིན་པའི་ཉམས་ལེན་འདི་ནི་ཕྱག་ཆེན་གཅིག་པུར་མ་ཟད་ཆོས་ལུགས་ཐམས་ཅད་ཀྱི་རྫོགས་རིམ་དྲི་མ་མེད་པ་ཀུན་དགོངས་གཞེད་གཅིག་ཏུ་མཐུན་པ་ལགས་ཤིང་། དྲན་རིག་དེ་ལས་ལྷག་པའི་སྒོམ་བཟང་བཟང་བ་ཞིག་འདོད་པ་ཐམས་ཅད་ནི་བཅོལ་མ་དང་ཞེ་འདོད་ཡིད་བྱེད་བློས་བྱས་ཀྱི་སྒོམ་ཁོ་ན་ཡིན་ཕྱིར་ཕྱག་ཆེན་དུ་མི་འགྲོ་སྟེ། ཇི་སྐད་དུ། ལྷ་མོ་བཞིས་ཞུས་པའི་མདོ་ལས། ཐུབ་པ་ཆེན་པོའི་ཆོས་རྣམས་ཀྱི། །ཕུང་པོ་བརྒྱད་ཁྲི་བཞི་སྟོང་ལ། །གང་གི་དེ་ཉིད་མི་ཤེས་ན། །དེ་དག་ཐམས་ཅད་འབྲས་བུ་མེད། ཅེས་དང་། ཞི་བ་ལྷས། སེམས་ཀྱི་གསང་འདི་མ་རིག་ན། །བདེ་འདོད་སྡུག་བསྔལ་བྲལ་འདོད་ཀྱང་། །བདེ་བ་འདོད་པ་ཙམ་གྱི་ལས། །དེ་ནི་ངལ་བ་ཁོ་ནར་ཟད། །ཅེས་གསུངས་པ་ལྟར། གང་ཤར་དྲན་པས་རིག་པ་ཙམ་ལས་ལྷག་པ་
མི་དགོས་པ་དང་། དེ་ཉིད་ཆོས་ཐམས་ཅད་ཀྱི་སྙིང་པོ་ཡིན་པའི་ཚུལ་ཡང་། །རྗེ་རང་བྱུང་པས། ཡིད་བྱེད་བྲལ་བ་འདི་ནི་ཕྱག་རྒྱ་ཆེ། །མཐའ་དང་བྲལ་བས་དབུ་མ་ཆེན་པོ་ཡིན། །འདི་ནི་ཀུན་འདུས་རྫོགས་ཆེན་ཞེས་ཀྱང་བྱ། །གཅིག་ཤེས་ཀུན་དོན་རྟོག་པའི་གདེངས་ཐོབ་ཤོག །ཅེས་གསུངས་སོ། །དེ་ན་ལས་དང་པོ་པས་གང་ཤར་ཐམས་ཅད་ལ་འཛིན་མེད་དྲན་པས་སྐྱོང་བ་ཁོ་ན་ལ་སྒོམ་གྱི་མཐིལ་དུ་བྱ་ཞིང་། འདི་ཉིད་རེ་ཞིག་ལ་རྩོལ་བྱས་ཀྱི་དྲན་པ་ལྟ་བུ་ཡིན་རུང་། གཞན་གྱི་ཞེ་འདོད་དང་བཅོས་མས་མ་སླད་པར་ཉམས་སུ་བླངས་ན། མྱུར་དུ་སྩོལ་མེད་ཀྱི་དྲན་པར་འགྱུར་བར་གསུངས་པས། དེས་ན་དར་གཅིག་ལ་སྒོམ་ཡོད་མེད་ནི་དྲན་པ་ཡོད་མེད་ཁོ་ན་ལ་བྱ་དགོས་ཏེ། ཅིའི་ཕྱིར་ན། དྲན་མེད་ཀྱི་གནས་ཆའི་ཏིང་ངེ་འཛིན་ནི་ཆད་མཐའམ་འགོག་པར་འགྱུར་ལ། དྲན་མེད་ཀྱི་རྣམ་རྟོག་རང་ཁ་མ་ནི་འཇིག་རྟེན་ཐ་
མལ་པ་དང་ཁྱད་མེད་ཡིན་ཕྱིར། དེ་གཉིས་གང་ཡང་ཕྱག་རྒྱ་ཆེན་པོའི་ལམ་དུ་མི་འགྲོ་བའི་ཕྱིར་རོ། །འོ་ན་དྲན་པས་བསྐྱང་བ་དེ་ཀ་བཅོས་མ་རུ་མི་འགྲོའམ་ཞེ་ན། དེ་ནི་སེམས་ཀྱི་གནས་ཚུལ་ལམ་བབས་ཚུལ་གང་སྣང་དེ་ཉིད་ལ་རང་ངོ་ཤེས་པར་བྱེད་པ་ཙམ་མ་གཏོགས་དགག་བསྒྲུབ་གཞན་བྱ་བ་མ་ཡིན་པའི་ཕྱིར་ན་བཅོས་མའི་སྐྱོན་དུ་མི་འགྱུར་ཏེ། དྲན་རིག་གིས་ཟིན་ཕྱིན་ཆད་ཅིར་ཤར་ཐམས་ཅད་ཆོས་སྐུའི་རང་བཞིན་དུ་མ་གྱུར་པ་རྡུལ་ཙམ་ཡང་མེད་དེ། ཇི་སྐད་དུ། སེམས་ཉིད་ངལ་གསོ་ལས། །གང་སྐྱེས་གཉུག་མ་ཉིད་ཡིན་ཕྱིར། །གང་ཤར་དྲན་པས་མ་བརྗེད་ན། །དེ་ཤར་སྟོང་པ་ཉིད་དག་ཏུ། །རྣལ་འབྱོར་དབང་ཕྱུག་གདོན་མི་ཟ། ཅེས་འདི་ལྟ་བུའི་གནད་ཀྱིས་ཟིན་ན་སྒོམ་དུ་
མ་གྱུར་པའི་ཆོས་མེད་ཚེ། དགག་བསྒྲུབ་སྤང་བླངས་འཆིང་གྲོལ་ལས་འདས་པའི་དོན་མཐོང་བ་སྟེ། ཟླ་བ་སྒྲོན་མའི་མདོ་ལས་རིགས་ཀྱི་བུ། ཆོས་གཅིག་ཤེས་པས། ཡོན་ཏན་གྱི་ཆོས་ཐམས་ཅད་ཡོངས་སུ་རྫོགས་པར་འགྱུར་ཏེ། གཅིག་གང་ཞེ་ན། གང་གི་དེ་ཁོ་ན་ཉིད་ཡོངས་སུ་ཤེས་པའོ། །ཅེས་དང་། རིག་འཛིན་དགའ་རབ་རྡོ་རྗེ་ཟག་མེད་འོད་ཕུང་དུ་གཤེགས་པའི་ཞལ་ཆེམས་ལས། ཡིན་པར་གྲུབ་པ་མེད་པ་འདི། རང་མདངས་འཆར་ཚུལ་ཅིར་ཡང་མ་འགགས་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། ཤར་བ་དེ་ཉིད་རང་གི་ཐོག་ཏུ་གྲོལ། ཅེས་དང་། རྗེ་སྒམ་པོ་པས། རྣམ་རྟོག་སྒོམ་དུ་མ་ཤར་ན། །གང་བྱས་འཁོར་བའི་རྒྱུ་འབྲས་ཡིན། །སྒོམ་ཆེན་སྒོམ་གྱིས་མ་བཅིངས་ན། །གཞན་གྱིས་འཆིང་བར་མི་ནུས་པས། གོ་བའི་ལྟ་བ་རྒྱབ་ཏུ་བོར།
བསྒོམ་པའི་ཉམས་མྱོང་རྨང་ནས་བཤིག །ཅེས་དང་། གྲུབ་ཐོབ་ཨོ་རྒྱན་པས། ཐ་མལ་ཤེས་པ་རང་ག་ནི། །མ་བསྒོམ་ཆོས་ཀྱི་སྐུ་རུ་ཤར། །སངས་རྒྱས་རང་གི་སེམས་ལས་བརྙེད། །འཁོར་འདས་རེ་དོགས་སུ་དགའ་གྱིས། ཅེས་དང་། ཁྲོ་ཕུ་ལོ་ཙས་ཉོན་མོངས་བཀག་པས་མ་ཁེག་ཚེ། །གདམས་ངག་རྒྱལ་པོ་སོར་གཞག་བྱུང་། །ངང་ལ་བཞགས་པས་དབྱིངས་སུ་ཡལ། །བླངས་དོར་བྱ་བའི་མིང་ཡང་མེད། ཅེས་སོགས་གསུངས་པ་ལྟར་གང་ཤར་དྲན་པས་སྐྱོང་བའམ་མ་བཅོས་བཟོ་མོད་དུ་གློད་པ་ལ་གོམས་ཚེ་རྩོལ་མེད་ཀྱི་དྲན་པ་ལ་དཀའ་ལས་མེད་དོ། །ཅིའི་ཕྱིར་ན། དྲན་པ་སྐྱོང་མཁན་དང་སྐྱོང་བ་གཉིས་སུ་མ་གྲུབ་པའི་ཕྱིར་རོ། །སྤྱིར་ཕྱག་ཆེན་རང་ལ་ཡང་བླ་མ་སོ་སོའི་གཞེད་ཚུལ་མང་བ་དང་། དབྱེ་བསྡུ་མཛད་ཚུལ་མི་འདྲ་བའི་དབང་གིས། འདིར་བཤད་མ་ཐག་པའི་ལུང་འདྲེན་འདི་
དག་དང་། དྲན་པ་བསྐྱང་མཁན་དང་སྐྱོང་རྒྱུ་གཉིས་སུ་མེད་པ་སོགས་ཀྱི་ཆོས་སྐད་འདི་དག །རྣལ་འབྱོར་བཞིའི་སྐབས་ལྟར་ན་རོ་གཅིག་གི་ཆོས་སྐད་འདྲ་བར་སྣང་ཚེ། ལས་དང་པའི་ཉམས་ལེན་སྐྱོང་ཚུལ་བཤད་པའི་འཕྲོ་འདིར་མི་འགབ་བམ་སྙམ་ན། དེ་མ་ཡིན་ཏེ། དོན་དམ་ཉམས་ལེན་དངོས་རང་ཅིག་སྐྱོང་ཤེས་པའི་གང་ཟག་གསར་བུ་དང་། སངས་རྒྱས་ཀྱི་དགོངས་པ་དངོས་གཉིས་ལ་བརྟན་པ་ཐོབ་མ་ཐོབ་མ་གཏོགས་གཞན་གཅིག་སྟེ། དེ་ལྟར་མ་ཡིན་ན་ད་ལྟ་ཉམས་ལེན་བྱས་པའི་དོན་མེད་པར་འགྱུར་ཏེ། སངས་རྒྱས་ཀྱི་དགོངས་པ་མ་ཡིན་པ་ལ། ཉམས་སུ་བླངས་པ་ནི་སངས་རྒྱས་ཀྱི་རྒྱུར་འགྲོ་མི་སྲིད་པའི་ཕྱིར་རོ། །དེས་ན་འགག་ཏུ་ཧྲིལ་གྱི་དྲིལ་ན། མཚན་ཉིད་དང་ལྡན་པའི་བླ་མ་སངས་རྒྱས་ཞིག་ལ་མོས་གུས་དྲག་པོ་དང་མཉེས་པ་གསུམ་གྱིས་བརྟེན་ཅིང་གདམས་ངག་ཟབ་མོ་ཐོབ་རྗེས་ཚིག་ཚོགས་ཀྱི་རྣམ་གྲངས་ལ་མི་འབྱམས་
པར། ཆིག་དྲིལ་གྱི་སྙིང་པོ་དང་དུ་ལེན་ནུས་ན་བྱིན་རླབས་ཀྱི་ཚན་ཁས་རང་གྲོལ་དུ་འགྲོ་བར་འདུག་རུང་། དེང་སང་རྙིགས་མའི་མཐའ་ལ་ཐུག་པའི་རང་ཚུལ་འདི་ལྟ་བུར། བླ་མ་དང་སློབ་མ་གཉིས་ཀའི་རྟེན་འབྲེལ་ཚད་ལྡན་ཞིག་ནི་ཨུ་དུམ་ཝ་ར་ལྟར་དཀོན་ཚེ། ཉམས་མྱོང་དང་རྟོག་པ་གཤའ་མར་འབྱུང་བ་རང་ནི་ཉིན་སྐར་དང་འདྲ་བར་སེམས་སོ།། ༈ །།ཡང་། ཉིད་ཀྱི་དྲི་ཡིག་ཏུ་ཕྱག་ཆེན་རྣལ་འབྱོར་བཞིའི་དང་པོ་རྩེ་གཅིག་ཆུང་ངུ་ལ་སྒོམ་གྱི་སྣ་ཟིན་ནམ་མ་ཟིན། གསུངས་འདུག་པར། སྤྱིར་གང་ཟག་གི་བློ་རིགས་དང་དབང་རིམ་ལ་བསམ་གྱིས་མི་ཁྱབ་པ་འབྱུང་ཀྱང་མདོར་བསྡུ་ན། གཅིག་ཅར་རིམ་གྱིས་ཐོད་རྒལ་བ་དང་གསུམ་དུ་འདུས་པས། དེ་དག་སོ་སོར་འཆར་ཚུལ་མི་འདྲ་བ་མཐའ་ཡས་ཕྱིར་ཕྱོགས་གཅིག་ཏུ་ངེས་བཟུང་ག་ལ་ནུས་ཤིང་། སྤྱི་ཁྱབ་ཏུ་ནི། རྩེ་གཅིག་སོགས་རྣལ་འབྱོར་བཞི་
རིམ་ཅན་དུ་འཆར་བའི་དབང་དུ་དགྱི་ན། རྩེ་གཅིག་ཆུང་ངུ་ལ་སྒོམ་གྱི་སྣ་ལོས་ཀྱང་ཟིན་ཏེ། ཅིའི་ཕྱིར་ན། ལེགས་སྦྱར་གྱི་སྐད་དུ། ཡོ་ག་དང་། བོད་སྐད་དུ་རྣལ་འབྱོར་ཞེས་པའི་ངེས་ཚིག་ལྟར་ན། སེམས་ཉིད་མ་བཅོས་རྣལ་མའི་དོན་ལ་རང་དབང་འབྱོར་པ་ལ་རྣལ་འབྱོར་དུ་བརྗོད་པ་ཡིན་ཚེ། སྒོམ་གྱི་སྣ་ཙམ་ཡང་མ་ཟིན་པར་རྣལ་འབྱོར་གྱི་དོན་ཇི་ལྟར་བརྗོད། སྤྱིར་ཡང་སྒོམ་ཞེས་བྱ་བའི་མིང་ཙམ་འཇུག་པ་ནི་མང་མོད་ཀྱང་། འདི་སྐབས་སུ་ནི་ཆེད་དུ་སྒོམ་རྒྱུ་མེད་རུང་ཐ་མལ་དུ་སྐད་ཅིག་ཀྱང་མི་ཡེངས་པ་ལ་སྒོམ་སྐྱོང་བ་ཞེས་མིང་དུ་བཏགས་ཕྱིར་ཞི་གནས་ལའང་སྒོམ་པའི་མིང་ཙམ་ནི་བཏགས་མོད་ཀྱི། སྒོམ་དངོས་གཞི་ནི་ལྷག་མཐོང་གི་དོན་ངོ་འཕྲོད་པ་ལ་བྱ་དགོས་ཤིང་། ལྷག་མཐོང་རྟོགས་ཕྱིན་ཆད་རྩེ་གཅིག་གི་སྣ་ཟིན་པ་ཡང་ཡིན་ལ་སྣ་ངེས་པར་ཟིན་པ་ཡིན་པ་དང་། སྣ་ཟིན་ཙམ་གྱིས་
ཆོག་པ་ནི་མ་ཡིན་པའི་ཕྱིར། ཤོར་ས་བཞི་དང་གོལ་ས་གསུམ་སོགས་འདྲ་མིན་རྣམས་སུ་མ་ཤོར་མཐར། འོ་ན་དགོས་པ་ནི་གོར་མ་ཆགས་པའོ།། ༈ །།ཡང་ཉིད་ཀྱི། ཞང་རིན་པོ་ཆེས་གསུངས་པ་ལུང་དུ་དྲང་བར་མཛད་དེ། རྩེ་གཅིག་དུས་སུ་ངོ་བོ་རྟོག་པ་དང་། རྩེ་གཅིག་མུན་པའི་དཀྱིལ་ན་འབྱམས་པ་སོགས་ཀྱི་དབྱེ་བ་གང་གིས་བྱེད་གསུངས་པ་ནི། དེ་ཡང་ཞི་ལྷག་ཟུང་འཇུག་གི་ཉམས་ལེན་སྐྱོན་མེད་གཅིག་ངོ་འཕྲོད་ནས། མཉམ་གཞག་གི་དུས་ན་མཚན་ཉིད་བཞི་ལྡན་དགོས་པར་གསུངས་ཏེ། བཞི་གང་ཞེ་ན། ཡུལ་མེད་དུ་རང་ངོ་ཤེས་པས་གསལ་བ་ཡིད་གཉིས་ཀྱི་འགྱུ་བ་ཆད་དངས་པ། བློའི་སྙོམ་བྱེད་དང་བྲལ་བས་ཕྲ་བ། གནས་ལུགས་གཞི་རྩ་མཆོད་པས་མི་རྟོག་པ་དང་བཞི་པོ། ཚང་བར་ཉམས་སུ་བླངས་ཚེ། ངོ་བོ་སྟོང་ལ་རྟོག་པ་མེད་པའི་རང་བཞིན་བདེ་གསལ་འགགས་མེད་ཞེན་
བྲལ་དུ་ཡི་གེར་རྗེན་ནེ་ཧྲིག་གེ་བར་གནས་པ་དེ་ཉིད་གནས་ལུགས་ཀྱི་ངོ་བོ་རྟོགས་པ་ཡིན་མོད་ཅིང་། དེ་ཉིད་ཀྱང་རེས་ཡོང་རེས་མི་ཡོང་བར་མཐོ་དམན་ནམ་སྐྱེ་འབྲི་ལྟ་བུར་སྣང་བ་དང་། རྗེས་ལའང་གང་ཟག་གི་བློ་རིགས་ཀྱི་ཁྱད་པར་ལས། གཞན་ཞིག་ལ་བདེན་མེད་དུ་བུན་ནེ་ཕྱམ་མེ་བར་འགྲོ་ན་མཉམ་གཞག་གནད་དུ་སོང་བའི་སྐད་ཡིན་ལ། རྗེས་ཨ་འཐས་ཤས་ཆེ་ན་གནད་དུ་ཅུང་མང་སོང་བའི་རྟགས་ཡིན་པ་དང་། མདོར་ན་འདི་སྐབས་ཀྱི་མཉམ་གཞག་ལ་རྩེ་གཅིག་ཆུང་ངུར་བཞེད་པ་ལགས་ཤིང་། རྩེ་གཅིག་མུན་པར་འབྱམས་པ་ནི་ཞི་གནས་སྟེང་པོ་བ་ལྟ་བུ་ལ་གསུངས་ཕྱིར། དེ་ནི་གནས་ཆ་རྐྱང་པ་མ་ཤོར་སྟེ་ལྷག་མཐོང་གིས་མ་ཟིན་པས་རྩེ་གཅིག་མཚན་ཉིད་པར་མི་འགྲོ་ཞིང་། སྒོམ་སྐྱོན་ཅན་གྱི་རྣམ་གྲངས་ལགས་མོད།། ༈ །།ཡང་ཉིད་ཀྱིས། སྐབས་འདིར་ཉམས་ལེན་འདི་མཐར་འདོན་
པའི་ཐབས་གང་གཙོ། ཅེས་གསུངས་བར། སྤྱིར་ཡང་ཆོས་ལམ་དུ་འགྲོ་བ་དང་མཐའ་ཕྱིན་པར་བྱེད་པའི་ཐབས་ནི། ངེས་འབྱུང་དག་སྣང་མོས་གུས་སྙིང་རྗེ་ཞེན་ལོག་བརྩོན་འགྲུས་སོགས་དགོས་ཚུལ་ནི་ཆོས་ཐམས་ཅད་མཐུན་མོད་ཅིང་། ཁྱད་པར་འདི་སྐབས་ཚོར་ཡང་ཚེ་འདིའི་བྱ་བྱེད་དང་རྣམ་གཡེང་དགྲ་ལྟར་སྤངས་ནས། བླ་མའི་རྣལ་འབྱོར་གསོལ་འདེབས་དབང་བཞི་བླངས་བ་སོགས་ཁ་ཚིག་ཙམ་མ་ཡིན་པར་སྙིང་ཐག་པ་ནས་བྱས་ཏེ་བྱིན་རླབས་འཇུག་ངེས་པའི་ཐབས་དང་། མཉམ་གཞག་ལ་ཆིག་དྲིལ་དུ་འབད་ཅིང་། རྗེས་ཐོབ་ཀྱང་དྲན་པ་རྩིས་སུ་བྱས་ལ། ཚེ་འདིར་སྣང་གི་བསམ་སྤྱོད་ཀྱི་བར་དུ་མ་ཆོད་པར་བྱ་བ་ཁོ་ན་མཆོག་ཏུ་གཅེས་པར་གསུངས་མོད་ཀྱི། དེང་སང་གི་སྒོམ་ཆེན་པར་མིང་བཏགས་ནས་ལོངས་སྤྱོད་དང་སྐྱིད་འདོད་ཀྱི་ཞེན་པ་བློ་ཕུགས་སུ་བཅངས་པ་རྣམས་ལ་ནི། རྩེ་གཅིག་ཆུང་ངུ་ཙམ་དུ་མ་
ཟད་འཆི་བ་མི་རྟགས་བསྒོམ་པ་ཙམ་ཡང་བློ་ཡུལ་ལ་འཁོར་བའང་དཀའ་བར་སེམས་སོ།། ༈ །།ཡང་། ཉིད་ཀྱིས། རྩེ་གཅིག་སྐབས་སུ་ངོ་བོ་རྟོགས་པ་དེ་ལས་ལྷག་པ་རྟོགས་རྒྱུ་ཡོད་དམ་མེད། གསུངས་པ་ལ། ངོ་བོ་མཐོང་བའམ་གནས་ལུགས་རྟོགས་པ་ཙམ་ནི་དང་པོ་སེམས་ངོ་འཕྲོད་པའི་སྐབས་ནས་ཕལ་ཆེར་ལ་འབྱུང་ཡང་། ཚུལ་བཞིན་ཉམས་སུ་ལེན་ཅིང་བླ་མས་བྱིན་རླབས་ཞུགས་པ་རྣམས་ལ་རིམ་བཞིན་གོང་ནས་གོང་དུ་འབོགས་འདོན་རྒྱུ་དང་རྩལ་རྫོགས་རྒྱུ་ངེས་ཤེས་རྙེད་རྒྱུ་སོགས་དང་། དེ་ལ་བརྟེན་པའི་ཡོན་ཏན་གྱི་རྣམ་གྲངས་མང་དུ་འཆར་རྒྱུ་ནི་ལོས་ཀྱང་ཡོང་ལ། ངོ་བོ་རྟོགས་རྒྱུ་ལྷགས་སུ་ཡོད་མེད་ནི་གོང་དུ་བཤད་པ་ལྟར་གཙོ་བོར་གང་ཟག་གི་རིགས་ལ་རག་ལས་ཕྱིར་མཐའ་གཅིག་ཏུ་བརྗོད་པར་དཀའ་ཞིང་། རྒྱལ་སྲས་སྤོམ་བྲག་པ་དང་། དཔའ་བོ་ཆོས་དབང་ལྷུན་གྲུབ་སོགས་ལ་ནི་སྐུ་བུ་ཆུང་གི་རྣམ་པར་བཞུགས་སྐབས་ནས་
ཏིང་ངེ་འཛིན་བཟང་པོ་རྩོལ་མེད་དུ་ཤར་ཞིང་། རྗེས་ནས་ཐུགས་དམ་དངོས་གསན་པའི་ཚེ་སྔར་གྱི་དེ་ལས་ལྷག་པའི་བོགས་འདོན་རྒྱུ་ཆེར་མ་བྱུང་བའི་ཚུལ་དང་།། ༈ །།རྗེ་སྒམ་པོ་པའི་སློབ་མ་ར་རྫི་རས་པ་དང་།། ༈ །།རྗེ་མཆོག་ཆོས་རྗེ་སོགས་ནི་བླ་མའི་གདན་ས་ཐོག་མར་མཐོང་བ་སོགས་ལས་རོ་གཅིག་གི་རྟོགས་པ་འཁྲུངས་ཚུལ་སོགས་ཀྱི་དཔེ་ལྟར། སོ་སོའི་སྐལ་བ་དང་བློ་ཁྱད་བྱིན་རླབས་ཞུགས་མ་ཞུགས་ཀྱི་སོ་མཚམས་སོགས་ལ་རག་ལས་པ་མ་ལགས་སམ། དོན་དུ་ནི་ངོ་བོ་ཙམ་རྟོགས་པ་ལ་ཁྱད་མེད་རུང་། ཉིད་ཀྱི་ཤུན་པའམ་ཞེན་འཛིན་སེམས་དག་མ་དག་གི་ཁྱད་པར་ནི་ཤིན་ཏུ་ཡང་ཆེ་བར་གསལ་ཞིང་། འདིར་འོག་མའི་མཉམ་གཞག་གོང་མའི་རྗེས་ཐོབ་ཏུ་འགྱུར་བར་ཡང་བཤད་ལ། ཁྱད་པར་མེད་ན་རྣལ་འབྱོར་བཞི་རིམ་ཅན་དུ་བཤད་པ་ཡང་དགོས་པ་
མེད་པར་འགྱུར་བས་སོ། །ལར་ཡང་། སེམས་ཀྱི་ངོ་བོ་རྗེན་པར་མཐོང་བ་ཙམ་ནི་སླར་ཡང་། ཉམས་ལེན་ལ་བརྩོན་འགྲུས་ཞན་པས། རྣལ་འབྱོར་བཞི་རྫོགས་པར་འཆར་བའམ་ངོ་བོ་བྱེ་བྲག་ཏུ་རྟོགས་པ་ནི་དཀོན་པར་སྣང་མོད་ཀྱང་། དེ་དག་སོ་སོའི་ཐ་དད་དུ་རྟོགས་ཐུབ་ན། རྗེ་གྲུབ་ཐོབ་གོང་མ་རྣམས་ཀྱི་གདན་ས་བསྙེགས་པར་ནུས་མོད་ཀྱང་། ཚིག་དང་ཡི་གེའི་ཁ་ཁྱེར་ཙམ་མ་གཏོགས་བསྒོམས་པའི་ཉམས་མྱོང་ནང་ནས་ཤར་བའི་རྟོགས་ལྡན་གཤའ་མ་ཞིག་རང་གང་དུ་བཙལ་ཀྱང་རེ་ཞིག་དཀོན་པ་འདྲ་ལགས།།༈ །།ཡང་། ཉིད་ཀྱིས་འགྲོ་བའི་མགོན་པོ་ཞང་རིན་པོ་ཆེས་གསུངས་པ་བཞིན། སྤྲོས་བྲལ་དཔྱིད་རྟ་སྒལ་ཆད་ཀྱི་དཔེ་དྲངས་པའི་སྐྱོན་གྱི་བྱེ་བྲག་པ་ཆོས་སྐུ་དང་། རང་བཞིན་དང་། སྟོང་པར་རྟོགས་པ་སོགས་ཡོན་ཏན་གྱི་བྱེ་བྲག་རྣམས་ཀྱི་དབྱེ་བ་ཇི་ལྟར་འབྱེད། གསུངས་པ་དང་། སྤྲོས་བྲལ་དུས་གསུམ་
འཁོར་འདས་དང་ཉམས་རྟོགས་སོགས་ཀྱི་སོ་མཚམས་ཇི་ལྟར་དབྱེ་དང་། རྣལ་འབྱོར་གོང་མ་གཉིས་ལའང་དེ་བཞིན་དུ་དབྱེ་བསྡུ་དང་སྐྱོན་ཡོན་སོགས་ཀྱི་རྒྱས་བཤད་ཀྱིས་ཅེས་གསུངས་འདུག་པ། དེ་ལྟ་བུའི་རྣལ་འབྱོར་བཞི་པོ་ཐམས་ཅད་ཀྱི་དབྱེ་བསྡུ་དང་དགོངས་དོན་གནད་འགག་སྐྱོན་སོགས་ཐམས་ཅད་ཚུལ་བཞིན་དུ་བརྗོད་ནུས་པ་ནི་སངས་རྒྱས་ཉིད་དམ། དེ་དང་མཚུངས་པའི་སྐྱེས་ཆེན་དཀར་འབྲུག་འབྲི་སྟག་ཚལ་ཐེལ་སོགས་ཀྱི་གྲུབ་ཐོབ་གོང་མ་རྣམས་དང་། རྒྱལ་བ་ཡབ་སྲས་ལྟ་བུ་རྣམས་མ་གཏོགས། གང་ཟག་ཐ་མལ་པ་དག་གིས་བརྗོད་པར་དཀའ་མོད་ཀྱང་། ཁྱད་པར་བདག་དང་བདག་འདྲའི་རིགས་ཅན་དག་གིས་ནི་སྨྲ་བར་ཅི་ཞིག་ནུས་ཏེ། ཅིའི་ཕྱིར་ན། དེ་དག་གི་གནད་དོན་ཚུལ་བཞིན་བརྗོད་པར་བྱེད་པ་ལ་རང་ཉིད་ཉམས་རྟོགས་ཀྱི་ས་མཚམས་དེ་ཐམས་ཅད་བསྒྲོད་ཅིང་མངོན་དུ་གྱུར་པ་ཞིག་དགོས་ལ། དེ་ལྟར་མ། གྱུར་བཞིན་ཁ་ཁྱེར་དུ་
བཤད་པས་ནི་དོན་ལ་མི་འབབ་སྟེ། དཔེ་ཅི་དང་འདྲ་ན། རྡོ་རྗེ་གདན་དུ་མ་ཕྱིན་པས་དེའི་བཀོད་པ་བཤད་པའམ། གསོ་རིགས་མི་ཤེས་པར་སྨན་པ་བྱེད་པ་ལྟར་མཁས་གྲུབ་རྣམས་ཀྱིས་འཁྲེལ་བའི་རྒྱུ་ལས་མ་མཆིས་མོད། འོན་ཀྱང་རྣལ་འབྱོར་བཞིའི་མཚན་ཉིད་བརྡའ་མཚོན་ཙམ་ཞིག་བརྗོད་ན། དེ་ཡང་གནས་པའི་ཏིང་ངེ་འཛིན་ཇི་ལྟ་བ་ངོ་འཕྲོད་ཅིང་སྐྱོང་ཤེས་ལ་ཅུང་ཟད་མ་གོམས་པའི་དབང་གིས་སྐྱེ་འབྲིའམ་གསལ་འགྲིབ་ངེས་མེད་ལྟ་བུ་ནི་སྔར་བཤད་པ་ལྟར་རྩེ་གཅིག་ཆུང་ངུ། དེ་ལ་གོམས་ནས་ཇི་ཙམ་བསྒོམ་བསྒོམ་འོང་བ་རྩེ་གཅིག་འབྲིང་པོ། དེ་ཉིན་མཚན་འཁོར་ཡུག་ཏུ་འོང་བ་རྩེ་གཅིག་ཆེན་པོ། དེ་ནས་རྩེ་གཅིག་གི་ཉམས་ཀྱི་ཤུན་པ་བུད་ནས་སྟོང་ཉིད་བློ་བྲལ་རང་བཞིན་མེད་པར་རྟོགས་ཤིང་འཁོར་འདས་སོ་མཚམས་ཕྱེད་པ་ནི་སྤྲོས་བྲལ་ཆུང་ངུ་། ཉམས་རྟོགས་ཀྱི་
ཤན་རང་བཞིན་དུ་ཆོད་ཅིང་འཁོར་འདས་ཀྱིས་བསྡུས་པའི་ཆོས་ཐམས་ཅད་གསལ་སྟོང་ཟུང་འཇུག་གི་ཀློང་དུ་ཐག་ཆོད་པ་ནི་སྤྲོས་བྲལ་འབྲིང་པོ། འདི་ཡན་ཆད་ནས་རྩ་བའི་དམ་ཚིག་མ་ཉམས་ན་བར་དོ་ཆོད་ཚར་བར་བཤད། དེ་ནས་རྣམ་རྟོག་ཕྲ་མོ་སྐྱེས་ཀྱང་སྐྱེ་གྲོལ་དུས་མཉམ་དུ་འགྲོ་ཞིང་བསྒོམ་པའི་རྩོལ་བ་ལས་འདས་པ་སྤྲོས་བྲལ་ཆེན་པོ། དེ་ནས་གཟུངས་འཛིན་སེམས་སུ་ཡལ། སྣང་སེམས་དངོས་སུ་འདྲེས་པས་རྫུ་འཕྲུལ་ཅུང་ཟད་ཀྱང་སྟོན་པར་ནུས་ལ། ཕྱི་ནང་གི་རྒྱུ་རྐྱེན་འབྲས་གསུམ་སོགས་རྟེན་འབྲེལ་རག་པ་བརྩི་ཤེས་པ་རོ་གཅིག་ཆུང་ངུ་། དེ་ནས་སེམས་ལ་རང་དབང་ཐོབ་ཅིང་སྣང་བ་ལ་རང་བྱན་ཚུད་པས་དྲན་ཀྱང་སྒོམ་ལ་མ་དྲན་ཀྱང་སྒོམ་ཁོ་ནར་སོང་བ་རོ་གཅིག་འབྲིང་པོ། དེ་ནས་རྟོགས་པ་མངོན་དུ་གྱུར་ཅིང་སྣང་ཆའི་རྟེན་འབྲེལ་
རྩལ་རྫོགས་སུ་བསྒྲིགས་ཤེས་པས་རྫུ་འཕྲུལ་ལ་རང་དབང་ཐོབ་པ་རོ་གཅིག་ཆེན་པོ། དེ་ནས་ཤེས་བྱའི་སྒྲིབ་པའམ་རང་ངོ་ཤེས་པའི་རང་གྲིབ་ལྟ་བུ་ཞིག་མ་གཏོགས་ལས་ཉོན་གྱི་གྲིབ་པའམ་བག་ཆགས་ཐམས་ཅད་ཟད་ཅིང་མཉམ་རྗེས་ཐུན་མཚམས་ལས་འདས་པ་ནི་སྒོམ་མེད་ཆུང་ངུ་། ཕྱི་ནང་བ་དང་ནང་འཛིན་པའི་འགྱུ་དྲན་གྱི་ཆ་ཤས་ཙམ་ཀྱང་དག་ཅིང་ངོ་ཤེས་ཀྱི་དྲན་པ་ཡང་རང་སར་དག་ནས་འོད་གསལ་མ་བུ་འདྲེས་པ་ནི་སྒོམ་མེད་འབྲིང་པོ། དེ་ནས་དྲན་རིག་གི་ངོ་བོ་ཉིད་ཀྱང་བློ་འདས་སུ་གྲོལ་ཏེ་ང་བདག་གི་འཛིན་ཡུལ་དང་བྱེད་པོའི་མིང་ཙམ་ཡང་མེད་པར་ཆོས་ཟད་བློ་འདས་ཆེན་པོར་གྲོལ་བ་ལ་སྒོམ་མེད་ཆེན་པོར་བརྗོད་དོ། །དེ་ཡང་ཇི་སྐད་དུ། རྩེ་གཅིག་གནས་པ་བསྒོམ་དུ་བྱེད། །སྤྲོས་བྲལ་སྟོང་པས་ཁ་དོག་ཁྱེར། །རོ་གཅིག་བསྒོམ་པའི་བློ་ཙམ་ཡོད། །སྒོམ་མེད་བློ་ཟད་ཆོས་ཟད་ཡིན། ཅེས་གསུང་ལ། དེ་དག་མདོར་
བསྡུས་པའི་ངོས་འཛིན་ལུགས་ནི། རྣམ་རྟོག་ལ་གཉེན་པོས་འཇུག་དགོས་ན་རྩེ་གཅིག །དྲན་ཙམ་ལ་ངོ་བོ་རྙེད་ན་སྤྲོས་བྲལ། སྣང་ཐོག་ཏུ་གྲོལ་ཐུབ་ན་རོ་གཅིག །བསྒོམ་བྱ་བསྒོམ་བྱེད་ཟད་པ་སྒོམ་མེད་དུ་གཞེད་དོ། །བོགས་འདོན་ནི། རྩེ་གཅིག་གི་བོགས་བརྩོན་འགྲུས་ཀྱིས་འདོན། །སྤྲོས་བྲལ་གྱི་བོགས་མོས་གུས་ཀྱིས་འདོན། །རོ་གཅིག་གི་བོགས་སྙིང་རྗེས་འདོན། །སྒོམ་མེད་ལ་བོགས་འདོན་རྒྱུ་དང་བྲལ་བའོ། །གེགས་སེལ་ནི། རྩེ་གཅིག་གི་གེགས་གཞག་ཐབས་ཀྱིས་བསེལ། །སྤྲོས་བྲལ་གྱི་གེགས་སྒོམ་ཉིད་ཀྱིས་བསེལ། རོ་གཅིག་སྒོམ་མེད་གཉིས་གེགས་ཀྱི་ཡུལ་ལས་འདས་པའོ། །ཅེས་གསུངས་སོ། །དེ་ལྟར་འདི་དག་ནི་བརྡའ་མཚོན་ཙམ་དུ་ལགས་ཤིང་། འདིར། ཀུན་མཁྱེན་རང་བྱུང་ཞབས་ཀྱིས་ནི་ཉམས་ཀྱིས་རྣལ་འབྱོར་བཞི་དང་རྟོགས་པའི་རྣལ་འབྱོར་བཞི་དབྱེ་བར་མཛད་ཅིང་། གཞན་ཡང་འདི་དག་གིས་རྒྱས་
བཤད་ལྟར་ན།། ༈ །།རྗེ་སྒོམ་ཆུང་ཞབས་ཀྱི་ནི། ངོས་འཛིན་ལུགས་བཞི། རྟོགས་ཚུལ་བཞི། འཁོར་ས་བཞི། སྐྱེད་ཚུལ་བཞི། དྲི་མ་བཞི། དག་ཚུལ་བཞི། ས་མཚམས་བཞི། མཁྱེན་ཚུལ་བཞི་ལ་སོགས་པའི་ཕྲ་ཞིབ་དང་།། ༈ །།ཕག་མོས་གྲུབ་པས་རྣམ་གྲངས་བཞི་གསུམ་བཅུ་གཉིས་དང་།། ༈ །།རྗེ་འབྲུག་པས་ནི། ངོ་བོ་མཐོང་མ་མཐོང་། རྩལ་རྫོགས་མ་རྫོགས། རྣམ་རྟོག་སྒོམ་དུ་ཤར་མ་ཤར། ཡོན་ཏན་སྐྱེས་མ་སྐྱེས། ཀུན་རྫོབ་རྒྱུ་འབྲས་རྟེན་འབྲེལ་མ་བྱན་ཚུད་མ་ཚུད། གཞན་དོན་གཟུགས་སྐུ་དང་འགྲོ་དོན་གྱི་ས་ཐེབས་མ་ཐེབས་སོགས་ཀྱི་མུ་དབྱེ་དང་། ཕྱིས་ནས་སྒམ་པོ་པ་བཀྲ་ཤིས་རྣམ་པར་རྒྱལ་བས་ཀྱང་དེ་དང་མཚུངས་པ་དབྱེ་བར་མཛད་སྣང་ཕྱིར། ཕྲ་ཞིབ་ཀྱི་དབྱེ་བ་དང་དོག་གཅོད་ཐམས་ཅད་དེ་དག་ཏུ་མཛད་འཚལ་ཞིང་། ཁྱད་པར་སྙིང་པོ་དོན་གྱི་གཏེར་མཛོད་སོགས་ལ་ཁྱེད་རང་གི་གཟིགས་རྟོགས་གནང་ཡོད་འདུག་པས།། ༈ །།
རྡོ་རྗེ་འཆང་དངོས་བཀའ་རྒྱུད་རིན་པོ་ཆེ་དེ་དག་གིས་གསུངས་པ་ལས་ལྷག་པ་ཞིག་དིང་སང་བདག་ལྟ་བུས་བཤད་ཤེས་ཀྱང་མི་ཤེས། དགོས་ཀྱང་མི་དགོས་པ་ལྟ་བུ་ལགས་པས་དེ་དག་རྣམས་སུ་སྒྲོ་འདོགས་གཅོད་པ་ཞུ་ཞིང་། འགགས་དོན་གྱི་མཆོག་ཏུ་ནི། ཉིད་མདོ་རྒྱུད་མན་ངག་མང་པོ་ལ་ཐོས་བསམ་མཛད་པ་ཞིག་ནི་གཞིར་བྱས་ལ། ཁྱད་པར་བླ་མ་མཆོག་ལ་བསྟན་ནས་ཟབ་མོའི་གདམ་ངག་ལ་སྒྲོ་འདོགས་ཆོད་པ་དང་། དིང་སང་ཀྱང་ཕྱག་རྒྱ་ཆེན་པོའི་ཟབ་བཞེས་དྲི་མ་མེད་པར་སྐྱོང་བ་གནང་ལོས་ཡོད་ཚེ། རང་རིག་ཆོས་སྐུའི་རང་ཞལ་མཇལ་བ་ལས་ལྷག་པའི་ཉམས་ལེན་གྱི་བོགས་འདོན་གཞན་ལ་རེ་བའི་ཡུལ་གྱིས་དབེན་པ་དང་། ཚིག་དང་ཡི་གེའི་སྤྲོས་པས་དགོས་པ་མེད་ཚེ། ལམ་རང་བྱུང་སྙིང་པོའི་རང་འགྲོས་ལ་འཇུག་པ་ནི་གནད་ཀྱི་གདམས་པ་ཡང་དག་པ་མ་ལགས་སམ། གཞན་ཡང་། ཉིད་ཀྱི་ཡི་གེར་
སྤྲོས་བྲལ་གསུམ་གྱི་སྐབས་ན། འདིའི་ངར་འདོན་ལ་ཐབས་ཤེས་གང་གཙོ་གསུངས་སྣང་བ། འདི་ནི་སྤྲོས་བྲལ་ཁོ་ནར་མ་ཟད་ཐོག་མཐའ་བར་གསུམ་གང་དུའང་ཐབས་ཤེས་གཉིས་ཡ་བྲལ་ལམ་རྐྱང་པར་མ་སོངབ་ཟུང་དུ་འབྲེལ་བ་ཞིག་ནི་སྤྱིར་ཡང་རྡོ་རྗེ་ཐེག་པའི་ལམ་འདིར་ནན་ལྟར་གལ་ཆེ་ལ། ཁྱད་པར་འདི་དག་གི་སྐབས་ཚོར་ནི། ཤེས་རབ་སྟོང་ཉིད་ལ་ཇི་ཙམ་བསྒོམ་ཀྱང་བོགས་མ་འཐོན་ན། སྟོང་པ་མཐར་ལྟུང་ལ་ཉེ་བའི་རྟགས་ཡིན་ཚེ། ཐབས་ཀྱི་བྱེ་བྲག་སྣ་ཚོགས་ལ་ཁྱད་དུ་མི་གསད་པར་འབད་འབུངས་སྟོན་པས་བོགས་ངེས་པར་འབྱུང་བ་དང་།། ༈ །།ཡང་ཐབས་ལ་བོགས་མ་འཐོན་ཤེས་རབ་ཀྱི་རྩིས་མ་ཟིན་པར་ཐབས་བརྐྱང་ལ་ཤོར་བའི་རྟགས་ཡིན་པས། འདུས་བྱམས་རྩོལ་བྱས་ལ་ཨ་མ་འཐས་པར་ཆོས་དབྱིངས་སྟོང་པ་ཉིད་འཁོར་གསུམ་ཡོངས་དག་མ་བཅོས་ཀློང་ཡང་ཁྱབ་གདལ་འདུས་
མ་བྱས་ཀྱི་ངང་དུ་གློད་པས་བོགས་ངེས་པར་འཐོན་པར་གསུངས་ལ། དམིགས་བསལ་དུ་ནི། སྤྲོས་བྲལ་འབྲིང་ཙམ་མན་ཆད་དུ་ནི་ཐབས་ལ་ནན་ཆེར་བྱ་བ་དང་། དེ་ཡན་ཆད་དུ་ནི་སྟོང་པ་ཁ་ཁྱེར་གྱི་གོགས་ལ་མ་ཤོར་བའི་ངོས་ནས་ཤེས་རབ་ལ་གཙོར་བྱ་བ་གནད་ཟབ་པར་གསུངས་ཤིང་། གཞན་དུ་ན། སྔར་བཤད་པ་གང་ཟག་གི་དབང་རིམ་ལ་ཡང་ལྟོས་ཕྱིར་གཅིག་ཏུ་མ་ངེས་པ་དང་། གང་ལྟར་ནའང་ཐབས་ཤེས་ཡ་མ་བྲལ་བ་ནི་གཅིག་ཏུ་གཅེས་པར་གོ་སྟེ། དཔེར་ན། བྱ་ནམ་འཕངས་གཅོད་པ་ལ་ཡང་འདབ་གཤོག་ཐམས་ཅད་ཚང་དགོས་པ་བཞིན་ནོ། །ཡང་། ཐབས་ཀྱི་རིམ་པའི་རིགས་ནི་རྒྱུད་སྡེའམ་ཉམས་ལེན་གྱི་རིམ་པ་སོ་སོའི་རང་གཞུང་དང་། བླ་མའི་མན་ངག་ཕྱག་བཞེས་ཀྱི་རྣམ་གྲངས་མཐའ་ཡས་ཕྱིར་རང་རང་གི་ལུགས་དང་མཐུན་པར་འབད་དགོས་པ་ཉིད་དོ།། ༈ །།ཡང་ཉིད་ཀྱིས། ཆུང་
འབྲིང་གཉིས་ཀྱིས་བར་དོ་ཇི་ལྟར་བསྒྲོད། གསུངས་སྣང་བ་དེ་ཉིད་གོང་དུ་སྤྲོས་བྲལ་འབྲིང་པོ་ཡན་ལ་བར་དོ་མི་འབྱུང་བར་བཤད་པ་བཞིན་ཡིན་ལ།། ༈ །།ཡང་། བར་དོའི་སྒྲ་བཤད་དང་ཞིབ་དབྱེའི་དབང་དུ་བྱས་ན། རྙིང་ལུགས་ཀྱི་བར་དོ་ཐོས་གྲོལ་སོགས་དང་དགོངས་པ་མཐུན་པར་རྗེ་མི་ལས་བཀྲ་ཤིས་ཚེ་རིང་མ་ལ་གདམས་པའི་བར་དོ་འཕྲང་སྒྲོལ་གྱི་སྐབས་སོགས་སུ་ནི་འཁོར་འདས་ཀྱི་ཆོས་ཐམས་ཅད་བར་དོའི་རང་བཞིན་དུ་བསྟན་མོད་ཅིང་། དེ་དག་གི་རྒྱས་བཤད་ནི་འདིར་མ་བརྗོད་ལ། ཉིད་ཀྱིས་བྲིས་པ་ལྟར་གྱི་ཆོས་ཉིད་སྲིད་པའི་བར་དོའི་གྲོལ་ཚུལ་མདོར་བསྡུ་ན། རྣལ་འབྱོར་པ་བླ་མའི་དམ་ཚིག་དང་ཉམས་ལེན་ལ་ཞེ་ཐེག་པ་ནས་བརྩོན་འགྲུས་དང་ལྡན་པ་ཞིག་ལ་ནི། སྤྲོས་བྲལ་ཙམ་དུ་མ་སླེབ་རུང་རྩེ་གཅིག་ཆེན་པོ་སོགས་སུ་ཚེའི་དུས་བྱས་ཤིང་། མཚམས་སྦྱོར་ངན་པ་གཞན་གྱི་བར་དུ་མ་ཆོད་ན། གཞིའི་འོད་གསལ་རྒྱ་མཚོ་ལྟ་བུ་དང་མལ་གྱི་འོད་གསལ་
ཆུ་སྣ་ལྟ་བུ་གཉིས་འདྲེས་ནས་གྲོལ་བ་ཤས་ཆེ་སྟེ། རྩེ་གཅིག་ཆེན་པོ་ཉམས་ཀྱི་འཁོར་ཡུག་དེ་ཉིད་བར་དོར་གཞིའི་འོད་གསལ་ཤར་བ་དང་འཕྲད་ཚེ་རྟོགས་པ་ཡང་དག་ཏུ་གྱུར་ནས་གྲོལ་བར་བཤད་དོ། །དེ་ཉིད་གྲོལ་ཐུབ་མི་ཐུབ་ཀྱི་ཚད་ནི་ད་ལྟ་གཉིད་ཀྱི་སྐབས་སུ་དགེ་སྦྱོར་ཁོར་ཡུག་སོང་མ་སོང་ཁོ་ནས་ཤེས་ལ། ནམ་དུའང་དམ་ཚིག་ལ་ཉེས་ལྟུང་མེད་པ་ཞིག་ནི་གལ་ཆེ་བ་ཁོ་ནར་གསུངས་སོ།། ༈ །།ཡང་ཉིད་ཀྱིས། སྒྲིབ་པ་གསུམ་ནམ་གྱི་དུས་ནས་བསགས་ལ་མཐར་ནམ་དུ་དག །ཅེས་གསུང་པ་ལ། འདི་ལ་སྒྲིབ་པ་གསུམ་པོ་རང་ཡང་འདྲེན་མི་གཅིག་པ་མང་ཀྱང་། སྤྱི་ཙམ་དུ་ནི། གོང་དུ་འཁྲུལ་ལུགས་ཕྱག་ཆེན་བཤད་པའི་སྐབས་ལྟར་གཞི་ལ་འཁྲུལ་པའམ་སྒྲིབ་པ་མེད་ཀྱང་བློ་བུར་གྱི་དྲི་མ་ཡིན་པ་དང་། དེ་ཉིད་ཀྱང་ལྷན་ཅིག་སྐྱེས་ཀྱི་མ་རིག་པ་ཤར་བ་ནས་བརྩམས་ཏེ་ལས་ཉོན་གྱི་
སྒྲིབ་པ་བསགས་ཤིང་འཁོར་བ་འཁྱམས་ལ། འཁྱམས་བཞིན་དུ་བག་ཆགས་ལུ་གུ་རྒྱུད་དུ་མཚམས་སྦྱར་ནས་རྟེན་འབྲེལ་བཅུ་གཉིས་ཀྱི་འཁོར་ལོ་བསྐྱོད་པ་ལགས་མོད། མཐར་ནམ་གྱི་ཚེ་དག་ན། ཉམས་ལེན་ཟབ་མོའི་ལམ་འདིར་མི་འཇུག་པ་རྣམས་ལ་ནི་སླར་ཡང་ནས་ཡང་ནས་ཡང་དུ་ལམ་སྒྲིབ་མང་དུ་བསྣོན་ཅིང་འཁོར་བ་མཐའ་མེད་དུ་འགྱུར་བ་ལས་འོས་མ་མཆིས་ལ། འགའ་ཞིག་ལམ་ལ་མ་ཞུགས་ཀྱང་རྒྱལ་བའི་ཐུགས་རྗེ་དང་། རྣམ་དཀར་གྱི་འབྲས་བུ་དག་གིས་རྒྱུ་རྐྱེན་བྱས་ཏེ་གོང་དུ་འཕགས་པ་ཡང་འབྱུང་ཞིང་། བྱང་ཆུབ་ཀྱི་ཉེ་རྒྱུ་དངོས་ནི་ལམ་ཟབ་འདི་ལྟ་བུ་ལ་མ་བརྟེན་པའི་ཐབས་མེད་པ་དང་། འདི་སྐབས་ཀྱི་བརྗོད་དོན་དངོས་ནི། རྩེ་གཅིག་སྐབས་ཅི་རིགས་པ་མན་ཆད་ནས་ལས་ཉོན་གྱི་སྒྲིབ་པ་དག་པ་དང་། རོ་གཅིག་མན་ཆད་ནས་བག་ཆགས་ཀྱི་སྒྲིབ་པ་དག་པ་དང་། སྒོམ་མེད་ཆུང་འབྲིང་ཡན་ཆད་ནས་ཤེས་བྱའི་སྒྲིབ་པའམ་མཆོག་
འཛིན་དང་ངེས་ཤེས་ལྟ་བུའི་དྲི་མ་མཐའ་དག་ཀྱང་དབྱིངས་སུ་ནུས་པས་བསྒོམ་མེད་ཆེན་པོ་མཐའ་ཕྱིན་པར་བརྗོད་ལ། དེ་ནས་གཞན་པའི་ཕྲ་ཞིབ་ཀྱི་དབྱེ་བ་དང་ས་མཚམས་མཚན་ཉིད་ཐེག་པ་ནས་གསུངས་པའི་ས་བཅུ་ལམ་ལྔ་དང་། འདིའི་རྣལ་འབྱོར་བཞི་གསུམ་བཅུ་གཉིས་སྦྱར་བའི་བཤད་པ་སོགས་ནི་བཀའ་བརྒྱུད་གོང་མའི་གསུང་སྒྲོས་རྣམས་ལས་འབྱུང་ཕྱིར། བློ་དམན་བདག་འདྲས་ཡང་སྐྱོར་དུ་བཤད་པས་ཅི་ཞིག་བྱ། མདོར་ན་དེ་དག་གི་སྐབས་ཚོར་བླ་མ་ལ་ལས་ནི་ས་བཅུ་ལམ་ལྔ་དང་རྣལ་འབྱོར་བཞི་སྦྱར་བ་སྐབས་སུ་མི་འབབ་པར་བཞེད། ལ་ལས་ནི་ཤིན་ཏུ་འབྱོར་པའི་ཚུལ་གསུངས་པ་སོགས་སྣ་ཚོགས་པར་སྣང་མོད་ཀྱང་། དོན་དམ་པར་ནི། གསང་བའི་མྱུར་ལམ་ཟབ་མོ་འདི་ལྟ་བུའི་འབྲས་བུ་མཐའ་ཕྱིན་ཚེ། ས་ལམ་གྱི་ཡོན་ཏན་མཐའ་དག་རང་བཞིན་ལྷུན་རྫོགས་སུ་གྱུར་པ་ཡིན་ཕྱིར་ཐེག་པ་
འོག་མའི་ལམ་རིམ་དག་བསྒྲོད་ཀྱང་རུང་། མ་བསྒྲོད་ཀྱང་རུང་སྟེ། དོན་དུ་ཐམས་ཅད་རང་སྣང་ཡིན་པའི་ཕྱིར་དང་། འབྲས་བུ་མངོན་དུ་གྱུར་པའི་དུས་ན་ལམ་གྱི་བྱ་རྩོལ་ལས་འདས་པའི་ཕྱིར་རོ།། ༈ །།ཡང་ཉིད་ཀྱིས། སྣང་བའི་འོད་གསལ་དང་སྣང་མེད་ཀྱི་འོད་གསལ་གཉིས་སོ་སོར་གང་ནས་འཆར་ཞིང་ཇི་ལྟར་ངོས་འཛིན། གསུངས་པ་ལས། སྤྱིར་འོད་གསལ་གྱི་སྒྲ་ཙམ་འཇུག་པ་ནི་མང་མོད་ཀྱང་། ངེས་དོན་གྱི་སྐབས་འདི་དངས་པའམ། གསལ་བའམ། སྒྲིབ་གཡོག་མེད་པའམ། འཆར་སྒོ་འགགས་པ་སོགས་ལ་འཇུག་མེད་ཅིང་། དེ་ལ་སྣང་མེད་ཀྱི་འོད་གསལ་དང་སྣང་བའི་འོད་གསལ་གཉིས་སུ་ཕྱེ་བ་འདི་དག །ཆོས་དྲུག་གི་སྐབས་སོགས་སུ་བཤད་པའི་ཉམས་ཀྱི་འོད་གསལ་དང་རྟོགས་པའི་འོད་གསལ་རྣམས་དང་དོན་གཅིག་པར་གཞེད་ལ། དེ་ནས་འོད་གསལ་གྱི་མཆོག་ནི་གཞིའི་འོད་གསལ་ཡིན་ཞིང་། དེ་ལ་སྣང་མེད་ཀྱི་འོད་གསལ་དང་། སྟོང་ཉིད་ཀྱི་འོད་གསལ་
དང་། དོན་དམ་པའི་འོད་གསལ་སོགས་སུ་བརྗོད་ལ། མདོ་ནས་ཀྱང་། སེམས་ཀྱི་རང་བཞིན་འོད་གསལ་བའོ། །ཅེས་གསུང་པ་འདི་ནི་འགྲོ་བ་ཀུན་ལ་ཡེ་ཁྱབ་ཏུ་གནས་མོད་ཀྱང་དེ་དང་ངོ་མ་ཤེས་པ་ཉིད་བླ་མའི་གདམ་ངག་གིས་ངོ་སྤྲད་པ་ལ་ལམ་གྱི་འོད་གསལ་དུ་བརྗོད་ཅིང་། རྟོགས་པའི་འོད་གསལ་ཀྱང་འདི་ཀ་ཡིན་པ་དང་། འདི་ནི་རྩེ་གཅིག་ནས་བཟུང་སྟེ་རང་ལ་རང་གསལ་དུ་འཆར་ནས། སྒོམ་མེད་ལ་མངོན་དུ་འགྱུར་བ་ལགས་མོད། འོད་གསལ་འདིའི་གདངས་སམ་གསལ་སྣང་ལྟ་བུའི་བྱེ་བྲག་ལ་ནི་དཔེ་དོན་རྟགས་གསུམ་གྱི་སྒོ་ནས་ངོ་སྤྲོད་ཅིང་ཉམས་སུ་བླངས་ཐབས་ཁྱད་པར་བ་བདག་ཉིད་རྙིང་མའི་རྫོགས་ཆེན་རྣམས་སུ་མཆིས་པ་དང་། དེར་མ་ཟད། སྤྱི་ལྟར་ནའང་ཕྱི་རོལ་འབྱུང་བ་ལྔ་སོགས་སྣོད་བཅུད་ཀྱི་རང་ཚུལ་དབྱིབས་དང་ཁ་དོག་སྣ་ཚོགས་པའི་འཆར་ཚུལ་འདི་ཐམས་ཅད་ཀྱང་། དོན་དུ་རང་སྣང་ལས་ལོགས་སུ་གྲུབ་
པ་མེད་པས་ངོ་བོས་སྟོང་ཞིང་། རྣམ་པ་འགགས་མེད་ཅིར་ཡང་འཆར་བས་ན་སྣང་བའི་འོད་གསལ་ཡིན་པ་དང་། ནང་ལྟར་ན་རྩ་རླུང་ཁམས་ཀྱི་བྱེད་བཅིངས་དང་རྟེན་འབྲེལ་ལས་བྱུང་བའི་དུད་སོགས་རྟགས་བཅུའམ། དེ་ཙམ་དུ་ཡང་མ་ཟད་པར་དབང་པོ་དྲུག་གི་སྤྱོད་ཡུལ་དུ་གྱུར་ཚད་དང་། དག་པ་ལྷ་དང་ཞིང་ཁམས་ཀྱི་འཆར་སྒོ། མ་དག་འདྲེ་གདོན་འཁྲུལ་སྣང་གི་འཆར་སྒོ་སོགས་མཐའ་དག་ཀྱང་སྣང་བའི་འོད་གསལ་དུ་མ་གྱུར་པ་རྡུལ་ཙམ་ཡང་མེད་ལ། འདི་ཐམས་ཅད་གང་ཟག་ཐ་མལ་པ་རྣམས་ཀྱིས་ནི་དེའི་རང་བཞིན་མ་ཤེས་པས་མི་བདེན་པ་ལ་བདེན་པར་བཟུང་ཞིང་འཁྲུལ་པ་ཨ་འཐས་ཉིང་མཚམས་སྦྱར་བས་ཕན་གནོད་ཀྱི་རྒྱུ་ལྟར་བྱེད་ལ། ལམ་པའི་རྣལ་འབྱོར་རྣམས་ཀྱིས་ནི་དེ་དག་གི་ཡིན་ཚུལ་ཤེས་པའི་སྒོ་ནས་སྐབས་སོ་སོའི་གནད་ཀྱི་གདམས་པས་ཟིན་ཚེ་ཉམས་ལེན་གྱི་རྒྱུའམ་གྲོགས་སུ་ཤར་བ་དང་། འབྲས་བུ་མངོན་
གྱུར་རྣམས་ལ་ནི་སྣང་མི་སྣང་། འཆར་མི་འཆར། འོད་གསལ་མི་གསལ་སོགས་ཀྱི་མིང་དང་ཐ་སྙད་ཀྱི་གདགས་གཞི་ཟད་ཅིང་། འཛིན་པའི་བཏོད་ཕུར་བུད་ཚེ་སྣང་སྲིད་འཁོར་འདས་ཀྱི་ཆོས་སོ་ཅོག་ཆོས་ཉིད་འདུས་མ་བྱས་པའི་ཀློང་དུ་རྒྱ་འབྱམས་པས་འོད་གསལ་ཡང་དག་གི་དོན་མཐར་ཕྱིན་པ་ཉིད་དོ། །དེས་ན་སྐབས་འདིར་རྣལ་འབྱོར་བཞི་ཚུལ་བཞིན་དུ་རྟོགས་པའི་གང་ཟག་དག་ལ་ནི་འོད་གསལ་གཉིས་པོ་ཟུང་འཇུག་ཁོ་ནར་རྟག་ཏུ་གནས་ཚེ། འདི་ཙམ་ནས་འཆར་དང་འདི་ལྟར་ངོས་བཟུང་ཞེས་པའི་ཟུར་གསལ་མི་དགོས་པར་གོ་ཞིང་། ཕྲ་ཞིབ་ཀྱི་གནད་རྣམས་ཅིས་ཀྱང་ཤེས་པར་འདོད་ན་བར་དོ་འཕྲང་སྒྲོལ་གྱི་འགྲེལ་པ་སོགས་སུ་བལྟ་བར་བྱའོ།། ༈ །།འགགས་དོན་གྱི་སྙིང་པོར་གསོལ་ན། རྣལ་འབྱོར་པ་གང་ཞིག་ཚེ་འདི་བློ་ཡིས་ཐོངས་ཤིང་སངས་རྒྱས་དོན་དུ་གཉེར་བ་ཁོ་ན་ཡིན་ཕྱིན་ཆད། བླ་མ་
མཚན་ལྡན་གྱི་དྲུང་དུ་གནད་ཀྱི་གདར་ཤ་ལེགས་པར་གཅད་ལ། མི་མེད་ཀྱི་ལུང་སྟོངས་འགྲིམ་ཞིང་ལྟོ་དགོས་གཏམ་གསུམ་སོགས་ཆོས་བརྒྱད་ཀྱི་ཞེན་པ་གཏིང་ནས་བཏང་བས་ཚེ་དང་སྒྲུབ་པ་མཉམ་པ་ཞིག་ལ་ནི་གེགས་དང་བར་ཆོད་ཀྱི་ཡུལ་ལས་འདས་ཤིང་། རྣལ་འབྱོར་བཞི་སོགས་ཉམས་རྟོགས་དྲོད་རྟགས་ཇི་བཞིན་པ་མི་འཆར་བའི་ཐབས་ཀྱང་མ་མཆིས་ལ། བྱིན་རླབས་གཤའ་མ་ཞིག་ཞུ་ཤིང་རྟོགས་པ་ཚུལ་བཞིན་ཤར་ན་ཐུན་མོང་གི་དྲོད་རྟགས་ཡོན་ཏན་མངོན་ཤེས་རྫུ་འཕྲུལ་སོགས་ནི་མི་འདོད་ཀྱང་ཤུགས་ལ་འབྱུང་བ་དང་། ཡོན་ཏན་མངོན་དུ་གྱུར་ཚེ་སྒོམ་བྱུང་གི་ཤེས་རབ་ནང་ནས་ཤར་བ་ཞིང་ཆོས་ཀྱི་མཇེད་རང་ལ་བརྡོལ་བས་ཕྱི་རོལ་གྱི་ཚིག་དང་ཡི་གེ་ལ་རག་མ་ལུས་པ་དང་། ས་ལམ་གྱི་རིམ་པ་རྣམས་ཀྱང་བསྒྲོད་མ་བསྒྲོད་སླེབ་མ་སླེབས་སོགས་ཀྱི་གཉིས་འཛིན་དང་། རེ་དོགས་ཞེ་འདོད་མཐའ་དག་གཏན་ཟད་དུ་
གྱུར་པ་དེ་འདྲ་ཞིག་ལ་བློ་ཕུག་མ་གཏད་ན། འོ་སྐོལ་གྱི་སྙིགས་མའི་སེམས་ཅན་ལས་ངན་བག་ཆགས་ཀྱི་ཕུང་པོར་གྱུར་ཚེ། མ་བསླབ་པར་ཤེས་འདོད། མ་སྒོམ་པར་ཉམས་རྟོགས་འབྱུང་འདོད། ཟླ་ཤས་ལོ་ཤས་ཙམ་ལ་གྲུབ་རྟགས་འཐོན་འདོད། སྙན་གྲགས་གདུལ་བྱ་འགྲོ་དོན་སོགས་གཞན་ལས་ལྷག་པ་ཞིག་འདོད་པའི་བདག་འཛིན་གྱིས་གོ་འཕངས་གང་ལས་ཀྱང་མཐོ་བ་ཞིག་བྱས་ནས་ཆོས་པའམ་རྟོགས་ལྡན་དུ་བརློམས་པ་ཁོ་ན་མང་ཚེ། འདི་ལྟ་བུའི་དུས་ལ་རྣལ་འབྱོར་བཞི་སོགས་པ་ལམ་གྱི་ཡོན་ཏན་དང་། མིང་སྙན་སྙན་རྣམས་བཤད་རུང་ངལ་བ་དོན་མེད་དང་། ཡི་གེའི་འཁྲེས་པོ་ལས་མི་འོང་བར་སེམས་པས། འདི་ཙམ་ལས་རྒྱས་པ་འབུལ་བར་མ་སྤོབས་ལགས་ཚེ། དགོངས་དབྱིངས་ཟབ་མོ་འཁྲེལ་འཁྲུངས་མེད་པ་ཡང་མཁྱེན་མཁྱེན་ལགས། ཨེ་མ། ཐུབ་བསྟན་ལྷ་ལམ་ཡངས་པའི་དབྱིངས་རུམ་ན། །སྒྲུབ་རྒྱུད་
སྐར་ཚོགས་འབུམ་ཕྲག་བཀྲ་པའི་དབུས། །རབ་གསལ་དྭགས་རྒྱུད་ཟླ་སྣང་ཆེས་འབར་ཞིང་། །གདུལ་བྱའི་ཆུ་སྣོད་གང་འཚམས་དེར་འཕོ་བའི། །སྐད་ལྡན་ཀུན་དན་བཞད་མཛད་ཕྱག་ཆེན་འོད། །འགྲོ་བློའི་ཡིད་མུན་བསེལ་བའི་སྒྲོན་མཆོག་གང་། །སྙིགས་མཐའི་དམར་ཕྱོགས་ཚེས་ལོངས་སྤྱོད་བབས་དང་། །དུས་མེད་ལི་ཁྲིའི་སྤྲིན་བསྒྲིབས་ཀྱེ་མ་ཧུད། །རྣམ་འདྲེན་མུ་སྟེགས་དོ་ཤལ་རབ་འཐོར་ཞིང་། །སྒྲུབ་ཚོགས་ལོ་ཀའི་ཤ་ར་བྷ་རིར་འཛེགས། །འདི་སྣང་ལོངས་སྤྱོད་རྒྱགས་མཛེས་བསྒྱིངས་པ་ཡིས། །ཞེན་པ་ཕྱི་ནང་བསྒྱུར་ལོག་མ་གྱུར་གྲངས། །གཞུང་ལུགས་ཆུ་ཀླུང་ལྔ་བརྒྱས་ངོམ་ན་ཡང་། །གནས་ལུགས་ཀཻ་ལ་ཤ་རྩེ་མ་གཟིགས་པས། །སྲིད་འབྱོར་ཨ་ཝ་ལོས་བཏམས་མ་དྲོད་ཆེར། །རྟག་བརྟན་གདེང་ཅན་མང་པོས་པ་འདིས་བརྒྱན། །བཞད་པ་རྡོ་རྗེ་དཱུ་ཀུ་ལའི། །གོ་ཆས་མཛེས་མཐོང་འདྲན་པ་བཞིན། །བསྲ་བརྟན་བོགས་
མཚོན་རབ་འཆང་བའི། །ཚོགས་འདིས་སྒྲུབ་རྒྱུད་ཆོས་དབྱིངས་གཤེགས། །ཕྱག་རྒྱ་ཆེར་གྲགས་ཁ་བའི་རྡུལ། །མངོན་བརྩེགས་ལ་གནས་གདོང་ལྔའི་ཚོགས། །རྟོགས་པའི་གཡུ་རལ་ལན་གཅིག་ཙམ། །སྤུག་ལོག་སྡེ་གཞོམ་ཅིས་མི་མཛད། །མ་ཧཱ་པ་ནའི་དཔལ་ལྡན་རྣམས། །ཐོག་རྩེའི་རལ་གྲི་མི་འཕྱར་ན། །བས་མཐའི་ཡུ་མོ་ཟུང་ནན་ལྟར། །བརྡུང་བའི་རྩོལ་བ་ངལ་བར་ཟ། །དལ་འབྱོར་རྐང་འཐུང་ཐོས་བསམ་ཡལ་འདབ་ནི། །མ་རྒྱས་གཉིས་སྐྱེས་འདུ་བའི་རྣམ་གཡེང་ལ། །མ་རང་ཚང་ཚིང་འཁྲིག་པའི་ནགས་ལྗོངས་སུ། །ཡིབ་ལ་རྣལ་འབྱོར་བཞི་ཡི་དྲིས་མ་གོས། །རིག་ལུང་སྨྲ་བའི་འཁུར་གྱི་མ་ནན་ཅིང་། །སྣ་ཚོགས་ཤེས་བྱའི་གསེར་འདྲས་ཡང་མ་གཡོག །མཁས་གྲུབ་གྲགས་སྐམ་མཆེ་དྲུག་མ་ལྡན་པའི། །ནགས་ཀྱི་གཉིས་ཐུང་སུ་ཞིག་ཅི་ཕྱིར་མགུ། སྨྲ་བའི་རྒྱུ་
མེད་སྨྲ་བའི་སྤོབ་པའང་བྲལ། །སྨྲ་ལ་དགའ་མིན་སྨྲས་ཀྱང་ངལ་བར་ཟད། །དེ་ཕྱིར་དྲི་ལན་འདོན་པའི་འཁུར་བཞེས་ཅན། །གཞན་ལ་བྱཱཉྫའི་དྲི་གསུངས་སྤྲོ་བར་འོས། རྙིང་ལུགས་སྔགས་འཆང་གོག་པོའི་ཁྱུར་གནས་ཀྱང་། །བསྲུང་ཟློག་སད་གསུམ་ལམ་ལ་འཁྱོག་མ་མྱོང་། །ཉམས་རྟོགས་ལྦུ་འཕྲེང་དཀར་པོ་འཁྲིག་མིན་ཚེ། །བཤགས་ཚོགས་དཔའ་བརླབས་འཕྱོ་བའི་ནུས་རྩལ་དབེན། །སངས་རྒྱས་མངོན་སུམ་འགའ་གྲིབ་བསིལ་བབས་མཐུས། །མ་ཧཱ་པནྟིའི་རྫིང་བུ་ཉམས་དགའ་བར། །བཟོད་མེད་མལ་དུ་ཞེ་འདོད་ཅ་ཅོའི་བརྩོམ། །རབ་བསྐྱུང་གུ་ཡང་འཁྱིལ་ལས་གཞན་དུ་མིན། །བློས་བཅོས་བདེ་གསལ་མི་རྟོག་ལམ་རྟགས་ཀྱི། །ཡོན་ཏན་ལྟར་སྣང་བསླུ་མཁས་ལུས་ཕྲ་མ། །འབུམ་ལའང་སྨོན་པའི་འགྲམ་ཆུ་མི་ལྡང་ན། །རྣལ་འབྱོར་བང་རིམ་ལྷན་ལྷུན་བསྒྲོད་སེམས་བྲལ།
གང་ཤར་ཅིར་སྣང་རིག་པའི་རྣམ་རོལ་ལ། །ཞེན་འཛིན་གསེར་གྱི་ལུག་རྒྱུད་མ་བརྐྱང་ཚེ། །བདེ་སྡུག་སྐྱེ་འཆི་འཁོར་འདས་ཅིར་བཏགས་ཀུན། །ཀུན་བཟང་ཡངས་པ་ཆེན་པོར་ཨེ་མ་ཧོ། །གདོད་ནས་དག་པའི་ཞིང་ཁམས་ཡངས་དོག་དང་། མཐའ་དབུས་ལས་འདས་འདུས་མ་བྱས་དབྱིངས་སུ། །རིག་སྟོང་བླ་མ་ཆོས་སྐུའི་རང་ཞལ་དངོས། །མཐོང་བྱ་མཐོང་བྱེད་མཚན་མའི་སྤྲོས་བྲལ་མཐོང་། །ལམ་འདིར་འཇུག་པའི་སྐལ་ལྡན་མིང་ཡང་མེད། །བདག་གི་ལྷག་བསམ་བདེན་པའི་མཐུ་ནུས་དང་། །རྨད་བྱུང་རྒྱལ་བའི་ཐུགས་རྗེ་སྟོབས་ལྡན་མཐུས། །སྒྲུབ་རྒྱུད་སྙིང་པོའི་བསྟན་མཆོག་རྒྱས་པར་སྨོན། །ཚུལ་བཞིན་དྲིས་ལ་དོན་མཐུན་ལན་ལྡོན་པའི། །ཆོས་སྤོབས་བྲལ་ཡང་རྣམ་དཀར་བསམ་པས་འདིར། །གནས་ལུགས་ཇི་བཞིན་བཤད་པའི་དགེ་འབྲས་ཀྱིས། །འགྲོ་
ཀུན་ཡེ་ཤེས་ཕྱག་རྒྱ་ཆེ་འགྲུབ་ཤོག །དེ་ལྟར་ཆོས་ཐམས་ཅད་ཀྱི་སྙིང་པོའི་ཡང་ཞུན་མཆོག་ཏུ་གྱུར་པ་ངེས་དོན་ཕྱག་རྒྱ་ཆེན་པོ་ཞེས་ཉི་ཟླ་ལྟར་གྲགས་པའི་དགོངས་དོན་ལེགས་པར་རྟོགས་པའི་རྣལ་འབྱོར་པ་སྨོན་ལམ་གྱི་མཚན་ཅན་གང་དེས་དྲི་ཡིག་གནང་བ་ལ་བརྟེན་ནས། སྣ་ཚོགས་རང་གྲོལ་གྱིས་རང་ཉིད་ལ་འདི་དག་གི་དགོངས་དོན་རྟོགས་པའི་ཆ་ཤས་ཙམ་ཡང་མེད་རུང་། བཀའ་རྒྱུད་གོང་མའི་གསུང་རྒྱུན་དག་ལ་བརྟེན་དེ། ཚུལ་འདི་ཤར་ཕྱོགས་དཔལ་རི་གངས་ཀྱི་སྙེ་ངོག་གནས་ཆེན་རྒོད་ཚང་ཕུག་མཁའ་འགྲོས་འདུ་བའི་ཡང་དབེན་གྱིས་མཚམས་མལ་ནས། དགེ་སྦྱོར་གྱི་ཐུན་མཚམས་དག་ཏུ་བྲིས་པའི་དགེ་བས་འགྲོ་བ་ཐམས་ཅད་སྐུ་ཞི་དབྱེར་མེད་ངོ་བོ་ཉིད་ཀྱི་གོ་འཕང་མྱུར་དུ་ཐོབ་པར་གྱུར་ཅིག། བཀྲ་ཤིས། གཅིག་ཞུས་ལགས།