---

^{[མ་དཔེ་གཟིགས་ན་འདིར་གནོན།]}

ཐེག་ཆེན་ཤིང་རྟའི་སྲོལ་གཉིས་ལས་ཇི་ལྟར་བྱུང་བའི་བྱང་ཆུབ་སེམས་སྐྱེད་འབོགས་ཆོག་ཐར་པའི་གྲུ་གཟིངས་བཞུགས་སོ། །

---

^{[མ་དཔེ་གཟིགས་ན་འདིར་གནོན།]}

ན་མསྶརྦ་བུདྡྷ་བོ་དྷི་སཏྭ་བྷྱཿ གང་གི་ཐུགས་བསྐྱེད་སྨོན་ལམ་མཐུ་ཡིས་ཁམས་གསུམ་འགྲོ་བ་མ་ལུས་རྣམས། སྲིད་དང་ཞི་བའི་མཐའ་ལས་སྐྱོབས་ཅིང་བླ་ན་མེད་པའི་བྱང་ཆུབ་ཆེར། འགོད་མཛད་སྟོན་པ་ཐུགས་རྗེའི་བདག་དང་དེ་སྲས་པར་བཞུགས་འཕགས་མཆོག་ཚོགས། བདག་དང་མཐའ་ཡས་ཕ་མར་གྱུར་ཀུན་ཕྱག་འཚལ་སྐྱབས་སུ་ཉེ་བར་མཆི། །ལམ་དམན་ལམ་ལོག་ལམ་གོལ་གྱི། །ཉེ་ཞོ་

---

^{[མ་དཔེ་གཟིགས་ན་འདིར་གནོན།]}

ལས་བཟློག་ཡང་དག་ལམ། །རྒྱལ་རྣམས་བགྲོད་པ་གཅིག་པའི་མཆོག །བྱང་སེམས་རིན་ཆེན་བསྐྱེད་བྱེད་བཤད། །ཕྱོགས་བཅུ་དུས་བཞིར་བྱོན་བཞུགས་རྒྱལ་བ་ཀུན། །རིན་ཆེན་བྱང་ཆུབ་སེམས་ཀྱི་ལམ་བཟང་ལ། །བརྟེན་ནས་གོ་འཕང་མཆོག་རབ་བརྙེས་མཛད་ན། །ཐར་འདོད་སྐལ་བཟང་འདི་ལ་ཉེར་བརྩོན་རིགས། གང་ཞིག་སྐལ་བ་དང་བསོད་ནམས་ཀྱིས་མངོན་པར་མཐོ་བ་ཐེག་ཆེན་གྱི་རིགས་ངེས་པའི་དད་ལྡན་བྱང་ཆུབ་ཀྱི་མཆོག་ཏུ་སེམས་

---

^{[མ་དཔེ་གཟིགས་ན་འདིར་གནོན།]}

བསྐྱེད་པ་དོན་དུ་གཉེར་བ་དག་འོངས་པར་གྱུར་བ་ན། དེ་དག་བླ་མེད་བྱང་ཆུབ་ཀྱི་ལམ་ལ་དཀྲི་བའི་ཕྱིར། ཐེག་པ་ཆེན་པོའི་རྣམ་འདྲེན་དུ་འོས་པའི་དགེ་བའི་བཤེས་གཉེན་དེས། གནས་ཁང་གཙང་མར་དཀོན་མཆོག་གི་རྟེན་ཇི་ཙམ་འཛོམ་ཞིང་བཟང་བ་དང་། མཐར་ཡང་བཅོམ་ལྡན་འདས་ལ་ཉེ་བའི་སྲས་ཀྱིས་བསྐོར་བའི་བྲིས་སྐུ་ཙམ་ནི་མེད་མི་རུང་ཞིང་། དེའི་སྤྱན་སྔར་མཆོད་པའི་ཡོ་བྱད་ཀྱང་བཟང་ཞིང་རྒྱས་པར་གཤམས་ཏེ། དེ་ནི་བྱང་ཆུབ་ཀྱི་སེམས་རིན་པོ་ཆེ་སྐྱེ་བའི་རྒྱུ་རྐྱེན་རྟེན་འབྲེལ་ཡིན་ཕྱིར། སྔོན་ཇོ་བོ་རྗེ་དཔལ་ལྡན་ཨ་ཏི་ཤ་ལ་བོད་སྟོན་མང་པོས་སེམས་བསྐྱེད་ཞུས་པ་ན། དེ་ལྟར་བྱའི་མཆོད་པ་བཤོམ་ཞིག་གསུང་བ་ལ། ཁོང་རྣམས་ཀྱི་མཆོད་པ་ལ་ཇོ་བོ་ཐུགས་མ་

---

^{[མ་དཔེ་གཟིགས་ན་འདིར་གནོན།]}

མཉེས་པར། མཆོད་པ་ངན་པ་འདི་འདྲས་བྱང་སེམས་རྒྱུད་ལ་མི་སྐྱེ་གསུངས་ཏེ། ལན་གསུམ་གྱི་བར་དུ་མཆོད་པ་དཔངས་བསྟོད་དགོས་པ་བྱུང་བའི་ལོ་རྒྱུས་བཞིན། མཆོད་རྫས་བཟང་ཞིང་བཀོད་པའི་ཁྱད་པར་ཕུན་སུམ་ཚོགས་པར་བྱ། བྱང་སྡོམ་གྱི་ཆོ་གའི་ཕྱག་བཞེས་ལ་ལར་འདི་སྐབས་སུ་བར་ཆད་ཞི་ཞིང་ཚོགས་རྫོགས་ཕྱིར་གཏོར་མ་ཡང་ཅི་འབྱོར་བཤམ་དང་འབུལ་བའི་ཚུལ་གསུང་པ་ཡོད་མོད་ཀྱི། དེ་ལྟར་བྱ་བར་སྤྲོ་ནའང་དེ་ཀའི་ལུགས་བཞིན་བྱར་རུང་མོད་ཀྱང་། འདིར་ནི་ཤིང་རྟའི་སྲོལ་གཉིས་ཀ་མདོ་ལུགས་ཡིན་ཕྱིར་གཏོར་མ་མེད་པའི་ལུགས་ལྟར་བྱས་པ་ཡིན་ཞིང་། གང་ལྟར་ཡང་། སློབ་དཔོན་དུ་འོས་པའི་དགེ་བའི་བཤེས་གཉེན་དེ་ཉིད་ཆོས་ཀྱི་ཁྲི་སྟན་བཟང་པོ་

---

^{[མ་དཔེ་གཟིགས་ན་འདིར་གནོན།]}

ལ་འཁོད་པའི་དྲུང་ན། སེམས་བསྐྱེད་པར་འདོད་པའི་སློབ་མ་རྣམས་གུས་ཕྱག་དགུ་ཕྲུགས་སྔོན་དུ་བཏང་ལ་དངོས་པོ་དག་པའི་མེ་ཏོག་དང་བྱང་ཆུབ་ལ་ཉེ་བར་དམིགས་པའི་དད་པ་དང་བཅས་པའི་མདུན་དུ་པུས་བཙུག་ཐལ་སྦྱར་གྱིས་འདུག་པ་ལ། དགེ་བའི་བཤེས་གཉེན་མཆོག་དེས་འཇམ་ཞིང་བརྡ་འཕྲོད་པའི་ངག་གིས་འདི་སྐད་འདོམས་པར་བྱའོ།། ༈ །།ཨེ་མ། སྐལ་བ་བཟང་པོ་དང་ལྡན་པའི་རིགས་ཀྱི་བུ་དང་བུ་མོ་རྣམས། བྱང་ཆུབ་ཀྱི་མཆོག་ཏུ་སེམས་བསྐྱེད་པར་འདོད་པ་ནི་ཤིན་ཏུ་ཡང་ངོ་མཚར་གྱི་མཆོག་དང་རབ་དང་ཕུལ་དུ་གྱུར་པ་ཉིད་ཡིན་ཏེ། དེ་ཅིའི་ཕྱིར་ཞེ་ན། གནས་སྐབས་སུ་འཇིག་རྟེན་དང་འཇིག་རྟེན་ལས་འདས་པའི་བདེ་ལེགས་ཀྱི་ཡོན་ཏན་མཐའ་དག་བྱང་ཆུབ་ཀྱི་

---

^{[མ་དཔེ་གཟིགས་ན་འདིར་གནོན།]}

སེམས་རིན་པོ་ཆེ་ལས་འབྱུང་བ་དང་། མཐར་ཐུག་བླ་ན་མེད་པ་རྫོགས་སངས་རྒྱས་ཀྱི་གོ་འཕངས་ཐོབ་པ་ཡང་འདི་ཁོ་ན་ལ་རག་ལས་པའི་ཕྱིར་ན། མངོན་པར་མཐོ་བ་དང་ངེས་པར་ལེགས་པའི་ཡོན་ཏན་མཐའ་དག་བྱང་ཆུབ་ཀྱི་སེམས་རིན་པོ་ཆེའི་ནུས་པ་དང་ཕན་ཡོན་ལས་བྱུང་བ་སྟེ། ཇི་ལྟར་འཇིག་རྟེན་གྱི་ཁམས་གསུམ་འཁོར་ལོས་བསྒྱུར་བའི་རྒྱལ་པོ་རྒྱལ་སྲིད་རིན་པོ་ཆེ་སྣ་བདུན་དང་ལྡན་ཞིང་སྟོངས་ཁམས་ཁ་ལོ་བསྒྱུར་ནུས་པ་དང་། ལྷའི་རྒྱལ་པོ་ཚངས་པ་བརྒྱ་བྱིན། ཀླུའི་དབང་པོ་འཇིག་རྟེན་བདེ་བར་སྐྱོང་བ་ཐམས་ཅད་དང་། མིའི་ནང་ན་རྒྱལ་རིགས་ཆེ་ཞིང་མཐོ་བ་དག་དང་། བྲམ་ཟེའི་རིགས་ཤིང་པཱ་ལ་ཆེན་པོ་ལྟ་བུ་དང་། ཁྱིམ་བདག་བསོད་ནམས་དང་

---

^{[མ་དཔེ་གཟིགས་ན་འདིར་གནོན།]}

འབྱོར་པས་མངོན་པར་མཐོ་བ་ཐམས་ཅད་བྱང་ཆུབ་ཀྱི་སེམས་རིན་པོ་ཆེའི་ཕན་ཡོན་ལས་བྱུང་བ་འབའ་ཤིག་ཡིན་པ་དང་། གཞན་ཡང་ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་། བདུད་རྩིའི་ཆུ། རིན་པོ་ཆེའི་གཏོར་ཁུངས་མ་རྨོས་པའི་ལོ་ཏོག །ནད་སེལ་བའི་སྨན་མཆོག་ལ་སོགས་འཇིག་རྟེན་གྱི་དཔལ་ཡོན་ཇི་སྙེད་པ་ཡང་རྒྱལ་བ་སྲས་བཅས་རྣམས་ཀྱི་བྱང་ཆུབ་ཀྱིས་སེམས་མཆོག་བསྐྱེད་པའི་མཐུ་བྱིན་ལས་བྱུང་བ་ཡིན་ཏེ། རྒྱལ་ཡུམ་ཤེར་ཕྱིན་གྱི་མདོ་ལས། བྱང་ཆུབ་སེམས་དཔའ་འཇིག་རྟེན་ན་ཡོད་ན་ལྷ་དང་མིའི་འཇིག་རྟེན་ཡོད་དོ། །རྒྱལ་རིགས་ཆེ་ཞིང་མཐོ་བ་དང་། བྲམ་ཟེ་དང་ཁྱིམ་བདག་ཆེ་ཞིང་མཐོ་བ་རྣམས་འཇིག་རྟེན་ན་ཡོད་དོ། །གསེར་དང་དངུལ་དང་།

---

^{[མ་དཔེ་གཟིགས་ན་འདིར་གནོན།]}

བཻཌཱུརྱ་ལ་སོགས་པ་རིན་པོ་ཆེ་ཐམས་ཅད་འཇིག་རྟེན་ན་ཡོད་དོ། །ཅེས་གསུང་པ་བཞིན་དང་། བྱང་ཆུབ་སེམས་དཔའ་གཅིག་ཁོ་ན་བཞུགས་པའི་ཡུལ་ཁམས་གང་ན་བ་དེར་ནད་དང་མཚོན་དང་མུ་གེ་སོགས་ཀྱི་ཉེས་པ་མི་འབྱུང་ཞིང་། འབྱུང་པོ་ཤ་ཟ་མི་མ་ཡིན་གྱི་འཚོ་བ་ཡང་མི་འབྱུང་བ་ཉིད་དེ། འོ་སྐོལ་གྱི་སྟོན་པ་འདི་རྒྱལ་པོ་བྱམས་པའི་སྟོབས་སུ་སྐྱེ་བ་བཞེས་ནས་བཞུགས་པའི་ཡུལ་ཁམས་སུ་གནོད་སྦྱིན་ཤ་ཟ་སྤུན་ལྔས་འཚེ་བར་མ་ནུས་པའི་སྐྱེས་རབས་རྣམ་ཐར་ལྟ་བུའི་ཡོན་ཏན་འབྱུང་བ་ལགས་པ་དང་། ཐུན་མོང་མ་ཡིན་པ་ངེས་པར་ལེགས་པའི་སངས་རྒྱས་ཀྱི་རྒྱུ་དང་ས་བོན་ནི་འདི་ཁོ་ན་ལས་གཞན་པ་གང་གིས་

---

^{[མ་དཔེ་གཟིགས་ན་འདིར་གནོན།]}

ཀྱང་མི་འགྲུབ་སྟེ། སྤྱོད་འཇུག་ལས། །དགེ་བ་བདག་གཞན་ཀུན་ཆུ་ཤིང་པོ་བཞིན། །འབྲས་བུ་བསྐྱེད་ནས་ཟད་པར་འགྱུར་མོད་ཀྱི། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པ་མི་ཟད་འཕེལ་བར་འགྱུར། །ཞེས་སོགས་དང་། སྡོང་པོ་བཀོད་པར་ཡང་། རིགས་ཀྱི་བུ། །བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་བསྐྱེད་པའི་ས་བོན་ལྟ་བུའོ། །ཞེས་སོགས་མཐའ་ཡས་པར་གསུངས་ཕྱིར། ཁྱེད་ཅག་ལ་འདི་ལྟ་བུ་བསྐྱེད་པར་འདོད་པའི་བློ་ཡོད་པ་ཡང་སྔོན་གྱི་ཚེ་རབས་མང་པོ་ནས་ཚོགས་གཉིས་བསགས་པའི་འབྲས་བུ་ཡིན་ལ། དེ་ལྟར་མ་ཡིན་ན་བྱང་ཆུབ་ཀྱི་སྒྲ་དང་མིང་ཙམ་ཐོས་པར་ཡང་ཤིན་ཏུ་དཀའ་བར་གསུངས་ནས། ཁྱེད་རྣམས་

---

^{[མ་དཔེ་གཟིགས་ན་འདིར་གནོན།]}

བསོད་ནམས་ཀྱི་མཐུ་དང་སྐལ་བ་བཟང་བར་གདོན་མི་ཟ་བ་ཉིད་དང་། བྱང་ཆུབ་ཀྱི་སེམས་དེ་ཡང་རྒྱུ་མེད་པ་ལས་མི་སྐྱེ་བས་ན་རྒྱུ་ཚོགས་ཚང་དགོས་ཏེ། རྒྱུ་ནི་བཀའ་བསྟན་བཅོས་རྣམས་ལས་གསུངས་ཚུལ་དུ་མ་མཆིས་ཏེ། དེ་ཡང་འཕགས་པ་ཆོས་བཅུ་པའི་མདོ་ནས་རྒྱུ་བཞིར་གསུངས་པ་སྟེ། སེམས་བསྐྱེད་པའི་ཕན་ཡོན་མཐོང་བ་དང་། དཀོན་མཆོག་ལ་དད་པ་དང་། སེམས་ཅན་གྱི་སྡུག་བསྔལ་མཐོང་བས་སྙིང་རྗེ་བསྐྱེད་པ་དང་། དགེ་བའི་བཤེས་གཉེན་གྱིས་ཡང་དག་པར་བསྐུལ་བ་དང་བཞིར་གསུངས། མགོན་པོ་བྱམས་པས་ནི། རིགས་ཕུན་སུམ་ཚོགས་པ། དགེ་བའི་བཤེས་ཀྱིས་ཟིན་པ། སེམས་ཅན་ལ་སྙིང་བརྩེ་བ། གཞན་དོན་

---

^{[མ་དཔེ་གཟིགས་ན་འདིར་གནོན།]}

སྤྱོད་པ་ན་འཁོར་བའི་སྡུག་བསྔལ་སོགས་ཀྱི་དཀའ་བ་བཟོད་པ་དང་བཞིར་ཡང་གསུངས། སློབ་དཔོན་ཆེན་པོ་ཞི་ལྷས་ནི། རྒྱལ་བའི་བྱིན་རླབས་ཀྱི་མཐུས་བྱང་ཆུབ་ཀྱི་རིགས་སད་པ་དང་། དད་པ་དང་སྙིང་རྗེའི་སྟོབས་ཕུན་སུམ་ཚོགས་པ་དང་ལྡན་པ་ལ་བཞེད། སློབ་དཔོན་ཐོག་མེད་ཀྱིས་ནི་བྱང་ཆུབ་སེམས་དཔའི་སར་བཤད་པ་བཞིན། བྱང་ཆུབ་ཀྱི་རིགས་སུ་ངེས་པ་དགེ་བའི་བཤེས་ཀྱིས་ཟིན་པ། སྙིང་རྗེ་ཆེ་བ། སྡུག་བསྔལ་གྱི་དཀའ་བས་མི་འཇིགས་པ་སྟེ་རྒྱུ་བཞི་དང་། བདེར་གཤེགས་ཀྱི་ཡོན་ཏན་ལ་མོས་པ། ཐེག་ཆེན་གྱི་ཆོས་ཐོས་པ། དམ་པའི་ཆོས་ནུབ་པར་ཉེ་བར་མཐོང་བ། སེམས་ཅན་གྱི་ཉོན་མོངས་པ་མཐོང་བ་སྟེ་རྐྱེན་བཞི་དང་། རང་དང་གཞན་གྱི་བསམ་པ་དང་རྒྱུ་དང་སྦྱོར་བའི་སྟོབས་དང་བཞི་སྟེ་

---

^{[མ་དཔེ་གཟིགས་ན་འདིར་གནོན།]}

བཅུ་གཉིས་ལ་བཞེད། ཇོ་བོ་ཆེན་པོ་ནི། རིགས་ཀྱི་ནུས་པ་སད་པ། དགེ་བའི་བཤེས་གཉེན་ལ་བརྟེན་ཅིང་དེ་ལ་སངས་རྒྱས་ཀྱི་འདུ་ཤེས་སྐྱེས་པ། བསོད་ནམས་ཀྱི་ཚོགས་རྒྱ་ཆེར་བསགས་པ། སྙིང་རྗེ་ཚད་མེད་དང་ལྡན་པ། །དད་པ་ཁྱད་པར་ཅན་གྱི་སྟོབས་དང་ལྡན་པ། །ཐེག་ཆེན་གྱི་སྐྱབས་འགྲོའི་སྡོམ་པ་དང་ལྡན་པ་སྟེ། །དེ་ལྟར་རྒྱུ་དྲུག་ཚང་དགོས་པར་བཞེད་ཅིང་། །དེ་ཐམས་ཅད་ཉེ་བར་བསྡུས་ན། །བླ་མ་དང་དཀོན་མཆོག་ལ་དད་པ། ཁམས་གསུམ་སེམས་ཅན་ལ་སྙིང་རྗེ། བྱང་ཆུབ་སྒྲུབ་ནུས་པའི་ཤེས་རབ་དང་གསུམ་པོ་ཚང་དགོས་པར་གསུངས་པའི་ཕྱིར། རྒྱུ་དེ་དག་ཕལ་ཆེར་ཁྱེད་ཅག་ལ་ཚང་བར་གཞི་གྲུབ་ལ། རྐྱེན་དགེ་བའི་བཤེས་གཉེན་གྱིས་བྱས་

---

^{[མ་དཔེ་གཟིགས་ན་འདིར་གནོན།]}

ནས་སེམས་བསྐྱེད་ཐོབ་དགོས་པ་ཡང་བདག་གིས་བགྱིས་པས་ཚང་བར་རུང་ལགས། དེ་ལྟ་བུའི་བྱང་ཆུབ་ཀྱི་སེམས་རིན་པོ་ཆེ་དེ་ཉིད་བསྐྱེད་པའི་ཐབས་ལ་མདོ་དོན་རྣམ་པ་དྲུག་གི་སྒོ་ནས་སྟོན་པ་ཡིན་ཏེ། གང་ཞེ་ན། །གང་གིས་བླང་བའི་རྟེན་གྱི་གང་ཟག །གང་ལས་བླང་བའི་ཡུལ་གྱི་ཁྱད་པར། །གང་བླང་བའི་བྱང་ཆུབ་སེམས་ཀྱི་ངོ་བོ། །ཇི་ལྟར་ལེན་པའི་ཆོ་གའི་རིམ་པ། །བླངས་པ་དེ་མི་ཉམས་པར་བསྲུང་ཞིང་སྤྱོད་ཐབས། དེ་ལྟར་ཐོབ་ཅིང་བསྒྲུབས་པའི་ཡོན་ཏན་བསྟན་པ་དང་དྲུག་གི་སྒོ་སྟོན་པར་བགྱིད་དེ། དེ་ལས་དང་པོར། སེམས་བསྐྱེད་པའི་རྟེན་གྱི་གང་ཟག་ལ་ཐུན་མོང་དང་ཁྱད་པར་གཉིས་ལས། ཐུན་མོང་ནི་གོང་དུ་བརྗོད་པའི་རྒྱུའི་མཚན་ཉིད་ཅི་རིགས་ཚང་བ་དང་། ཁྱད་པར་གྱི་རྟེན་ལ་དེ་ཡང་བྱང་

---

^{[མ་དཔེ་གཟིགས་ན་འདིར་གནོན།]}

སེམས་ཀྱི་ངོ་བོ་ལ་ཁྱད་མེད་རུང་རྣམ་པ་ལྟར་ན། འཕགས་ཡུལ་ཟབ་མོ་ལྟ་བའི་རྒྱུད་པ་དང་། རྒྱ་ཆེན་སྤྱོད་པའི་རྒྱུད་པ་ཅེས། རྒྱལ་བའི་བཀའི་དགོངས་པ་འགྲེལ་ཚུལ་གྱི་ཤིང་རྟའི་སྲོལ་ཆེན་གཉིས་སུ་གྲགས་པའི། འཇམ་དབྱངས་ཀླུ་སྒྲུབ་དང་བྱམས་མགོན་ཐོག་མེད་གཉིས་ཀྱི་བཞེད་གཞུང་ལས་བྱུང་བའི་ཁྱད་པར་ལ། དིང་སང་བོད་འདིར་སེམས་བསྐྱེད་ལ་ཡང་དབུ་མ་ལུགས་དང་སེམས་ཙམ་ལུགས་ཞེས་ཐ་དད་དུ་འབོད་པའི་སྲོལ་དར་མོད་ཀྱང་། ལྟ་བ་དབུ་སེམས་ཐ་དད་དུ་གྲགས་པ་ལས། སེམས་བསྐྱེད་ལ་དབུ་སེམས་སོ་སོར་ཡོད་པར་བཀའ་བསྟན་བཅོས་ཁུངས་མ་དག་ལས་ཀྱང་མི་འབྱུང་ཡང་། རྒྱུད་པའི་བཀའ་སྲོལ་གཉིས་པ་ལ་ཕྱག་བཞེས་རྒྱས་བསྡུས་ཅུང་ཟད་མི་འདྲ་བས་དབུ་སེམས་བསྐྱེད་དུ་མིང་ཐོགས་པ་

---

^{[མ་དཔེ་གཟིགས་ན་འདིར་གནོན།]}

ལགས་ཤིང་། །དེས་ན་འཕགས་པ་འཇམ་དབྱངས་ནས། ཀླུ་སྒྲུབ་དང་ཞི་བ་ལྷ་སོགས་ཟབ་མོ་ལྟ་རྒྱུད་ཀྱི་བཞེད་གཞུང་ལས་ནི། ལྷ་ཀླུ་སོགས་མི་མ་ཡིན་དང་། མིའི་འགྲོ་བ་བརྡ་ཤེས་ཤིང་དོན་གོ་བ་དད་དང་སྙིང་རྗེར་ལྡན་ན་ལུས་རྟེན་གང་ལྟ་བུ་ལ་ཡང་བྱང་ཆུབ་སེམས་ཀྱི་རྟེན་དང་སྣོད་དུ་རུང་བར་བཞེད་དེ། སྔོན་སྟོན་པ་ཉིད་ཞལ་བཞུགས་པའི་སྤྱན་སྔར་སེམས་བསྐྱེད་པའི་ལྷ་ཀླུ་མིའི་བྱང་སེམས་གྲངས་མེད་མཆིས་མོད་ལ། ཡང་། དེ་དག་སངས་རྒྱས་ཀྱི་མཐུ་བྱིན་ཡིན་གྱི། གཞན་གྱིས་དེ་ལྟར་མི་ནུས་སམ་སྙམ་ན། རྒྱ་བོད་ཀྱི་སྐྱེས་ཆེན་མང་པོས་མ་ཡིན་པའི་འགྲོ་བ་དུ་མ་ལ་སེམས་བསྐྱེད་གནང་ཚུལ་གྱི་ལོ་རྒྱུས་མཐའ་ཡས་པ་བཞུགས་པ་དང་། དཀོན་མཆོག་གསུམ་ལ་སྐྱབས་སུ་སོང་བ་གང་ཡིན་པ་དེ་དག་ལ་བྱང་ཆུབ་སེམས་བསྐྱེད་ཀྱང་ངེས་པར་སྐྱེ་བར་

---

^{[མ་དཔེ་གཟིགས་ན་འདིར་གནོན།]}

བཞེད་ཅིང་། སེམས་བསྐྱེད་ཀྱི་ཆོ་ག་ཡང་སྤྲོས་པ་ཉེར་བསྡུས་ཀྱི་སྒོ་ནས་མཛད།། ༈ །།འཕགས་པ་བྱམས་མགོན་ནས་ཐོགས་མེད་སྐུ་མཆེད་སོགས་རྒྱ་ཆེན་སྤྱོད་རྒྱུད་པའི་བཞེད་སྲོལ་ལ་ནི། ལྷ་དང་སྒྲ་མི་སྙན་པ་སོགས་ལ་ངེས་འབྱུང་དང་ཐར་པ་འདོད་པའི་ལྷག་བསམ་མེད་པས་ན། སེམས་བསྐྱེད་ཀྱི་རྟེན་ནི་གླིང་གསུམ་གྱི་དལ་འབྱོར་ཚང་བ་དག་དང་། དེ་ལ་ཡང་སོ་ཐར་རིས་བདུན་གང་རུང་གི་སྡོམ་ལྡན་དགོས་པར་བཞེད་ཅིང་། དེ་དང་མཐུན་པར་ཇོ་བོས་ཀྱང་བྱང་ཆུབ་ལམ་སྒྲོན་དུ་དེ་ལྟར་གསུངས་པ་ནི། དེ་དུས་བོད་ཡུལ་འདིར་མདོ་སྔགས་གང་དང་མི་མཐུན་པའི་སྤྱོད་རྩིངས་པ་མང་པོས་བསྟན་པ་ལ་རྨ་འབྱིན་པ་དེ་དག་ལ་དགོངས་པའི་དགོས་པ་ཁྱད་པར་ཅན་ལ་གཟིགས་ཤིང་བསྟན་པའི་ཞབས་

---

^{[མ་དཔེ་གཟིགས་ན་འདིར་གནོན།]}

འདེགས་ལ་དགོངས་པར་གསལ་ཏེ། མདོར་ན་རྒྱ་ཆེན་སྤྱོད་རྒྱུད་པའི་ཕྱག་བཞེད་ལ་སེམས་བསྐྱེད་ཀྱི་ཆོ་གའི་ལས་རིམ་ཡང་རྒྱས་པར་མཛད་པ་དང་། དེ་ལྟར་ཤིང་རྟའི་སྲོལ་ལུགས་གཉིས་པོ་གང་ལས་ཐོབ་ཀྱང་གང་ཟག་དེའི་རྒྱུད་ལ་བྱང་ཆུབ་ཀྱི་སེམས་རིན་པོ་ཆེ་བསྐྲུན་པ་ལ་ཁྱད་པར་མ་མཆིས་མོད་ཀྱི། སྡོམ་རྟེན་གྱི་བཞེད་ཚུལ་སོགས་ཀྱི་ཁྱད་པར་ལ་དཔག་ནས། སེམས་བསྐྱེད་ཞུ་བའི་གང་ཟག་ཁྱིམ་པ་ཕོ་མོ་སོགས་ལྟ་བུ་ལ་ཟབ་མོ་རྒྱུད་ཀྱི་ལུགས་དང་། གང་ཟག་སོ་ཐར་གྱི་སྡོམ་ལྡན་དག་གིས་ནི་རྒྱ་ཆེན་སྤྱོད་རྒྱུད་ལྟར་གྱི་སེམས་བསྐྱེད་ལེན་པ་སྐབས་སུ་བབས་པ་ལགས།། ༈ །།གཉིས་པ་གང་ལས་བླང་བའི་ཡུལ་གྱི་ཁྱད་པར་ནི། སློབ་དཔོན་ཙནྡྲ་གོ་མིས། །བླ་མ་སྡོམ་པ་ལ་གནས་ཤིང་། །ནུས་དང་ལྡན་ལས་བླང་བར་བྱ། ཞེས་གསུངས་པ་

---

^{[མ་དཔེ་གཟིགས་ན་འདིར་གནོན།]}

བཞིན་ལ། བླ་མའི་མཚན་ཉིད་ཀྱང་། །སློབ་དཔོན་ཞི་བ་ལྷས་ནི། ཐེག་ཆེན་དོན་ལ་མཁས་ཤིང་། བྱང་སེམས་ཀྱི་སྡོམ་པ་སྲོག་གི་ཕྱིར་ཡང་མི་གཏོང་བ་ཞིག་ལ་བཞེད། འཕགས་པ་ཐོག་མེད་ནི། ཆོས་དང་མཐུན་པ། བྱང་སྡོམ་དང་ལྡན་པ། ཐེག་ཆེན་ལ་མཁས་པ། ངག་གི་རྣམ་པར་རིག་བྱེད་ཀྱི་དོན་འཛིན་ཅིང་གོ་བར་བྱེད་ནུས་པ། མ་དད་པ་མེད་པ། སྙིང་རྗེ་དང་ལྡན་པ་སྟེ། མཚན་ཉིད་དྲུག་ལྡན་ལ་བཞེད། ཇོ་བོ་ཆེན་པོ་ནི། ཐེག་ཆེན་གྱི་དོན་དང་བསླབ་པའི་གནས་མཐའ་དག་སྟོན་པ་ལ་མཁས་པ། རང་ཉིད་བྱང་སེམས་ཀྱི་སྡོམ་པ་ཐོབ་ལ་མ་ཉམས་པར། སློབ་མ་ལ་སྡོམ་པ་འབོགས་པར་བྱེད་པ་ལ་སྐྱོ་དུབ་མེད་ཀྱང་དཀའ་བ་བཟོད་པ། ཟང་ཟིང་སོགས་ལ་མི་ལྟ་བའི་སྙིང་རྗེས་སློབ་མ་

---

^{[མ་དཔེ་གཟིགས་ན་འདིར་གནོན།]}

རྗེས་སུ་འཛིན་ནུས་པ་སྟེ། མཚན་ཉིད་བཞི་ལྡན་དགོས་པར་གསུངས་ཏེ། བཞེད་ཚུལ་དེ་ཐམས་ཅད་དོན་གྱི་དགོངས་པ་གཅིག་ཏུ་འབབ་ཕྱིར། ཡོན་ཏན་དེ་དག་དང་ལྡན་པ་ལས་བླངས་བར་བྱ་ལ། གལ་ཏེ་བཤེས་གཉེན་དེ་ལྟ་བུ་མ་བཞུགས་པའམ། བཞུགས་ཀྱང་དེའི་སྤྱན་སྔར་འགྲོ་བ་མ་ལུས་སྲོག་དང་ཚངས་སྤྱོད་སོགས་ལ་བར་ཆད་དུ་འགྱུར་བའི་འཇིགས་པ་དང་བཅས་པ་ཞིག་ཡིན་ན། དཀོན་མཆོག་གི་རྟེན་གྱི་དྲུང་དུ་མཆོད་པའི་ཡོ་བྱད་བཟང་པོ་དང་བཅས་པས་རང་ཉིད་ཀྱིས་བླང་དུ་རུང་ཞིང་། གལ་ཏེ་ཡུལ་མཐའ་འཁོབ་ཀྱི་དབང་དུ་གྱུར་བ་ལྟ་བུས་དཀོན་མཆོག་གི་རྟེན་དག་ཀྱང་མ་འཛོམས་པར་གྱུར་ན་ནི་མདུན་གྱི་ནམ་མཁར་དཀོན་མཆོག་བསྐྱེད་པ་ལས་ཀྱང་བླ་བར་གསུང་མོད་ཀྱི། བརྙེད་ཅིང་འཛོམ་ན་ནི་དགེ་བའི་བཤེས་གཉེན་ཁོ་ན་ལས་ལེན་པར་

---

^{[མ་དཔེ་གཟིགས་ན་འདིར་གནོན།]}

བྱ་སྟེ། དེས་སྤང་བླང་གི་གནས་མཐའ་དག་སྟོན་ཅིང་ལུང་འབོགས་པར་བྱེད་པ་དང་། ཐེ་ཚོམ་གྱི་གནས་སེལ་ཞིང་སྡོམ་པའི་དཔང་པོ་དང་ངོ་ཚ་ཁྲེལ་ཡོད་ཀྱི་རྟེན་དུ་འགྱུར་བ་སོགས་དགོས་པ་དུ་མ་དང་ལྡན་པ་ལགས།། ༈ །།གསུམ་པ་གང་བླང་བའི་བྱང་བའི་བྱང་ཆུབ་སེམས་ཀྱི་ངོ་བོ་དེ་ཇི་ལྟ་བུ་ཞིག་ཡིན་སྙམ་ན། མངོན་རྟོགས་རྒྱན་ལས། །སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་པར་འདོད་པའི་བསམ་པ་རྒྱ་ཆེ་བ་ཞིག་ཡིན་ལ། དེ་ལྟར་བྱེད་པ་ལ་རང་ཉིད་སྐྱོན་མ་དག །ཡོན་ཏན་མ་རྫོགས། ཉོན་མོངས་་པའི་འཆིང་བ་བརྒྱ་ཕྲག་གིས་བཅིངས་

---

^{[མ་དཔེ་གཟིགས་ན་འདིར་གནོན།]}

བཞིན་པ་འདི་ལྟ་བུས་ན་མཁའ་མཉམ་དུ་མ་ཟད་སེམས་ཅན་གཅིག་ཙམ་ཡང་བྱང་ཆུབ་ལ་འགོད་པའི་ནུས་སྟོབས་མ་མཆིས་མོད་ཀྱི། དེ་ལྟ་བུའི་ནུས་པ་ནི་རྣམ་པ་ཐམས་ཅད་མཁྱེན་པའི་སངས་རྒྱས་འབའ་ཞིག་ལས་གཞན་གང་ལ་ཡང་མི་མངའ་བས་ན། སངས་རྒྱས་ཐོབ་དགོས་ལ། གང་ཞིག་འཕགས་པ་ཉན་ཐོས་དང་རང་སངས་རྒྱས་རྣམས་ཀྱང་རང་ཉིད་འབའ་ཞིག་འཁོར་བའི་སྡུག་བསྔལ་ལ་སྐྲག་ཅིང་དེ་ལས་ཐར་བའི་བྱང་ཆུབ་འདོད་ཀྱང་། རང་དོན་ཞི་བདེའི་བསམ་པས་སངས་རྒྱས་ཀྱི་རྒྱུར་མ་གྱུར་པས་ན། འདིར་སེམས་ཅན་ཐམས་ཅད་སངས་རྒྱས་ལ་འགོད་ཕྱིར་ཐོག་མར་རང་ཉིད་བྱང་ཆུབ་ཀྱི་རྒྱུ་ལ་བཞུགས་ནས་འབད་པས་སྒྲུབས་པ་ནི་སེམས་བསྐྱེད་སྤྱིའི་དོན་ཡིན་ལ། དེའི་བྱེ་བྲག་ཏུ་གང་ཟག་བློ་ཆུང་འབྲིང་ཆེ་བའི་ཁྱད་པར་གྱིས། རང་ཉིད་སྔོན་ལ་བྱང་ཆུབ་ཀྱི་གོ་འཕང་གྲུབ་ནས་

---

^{[མ་དཔེ་གཟིགས་ན་འདིར་གནོན།]}

འགྲོ་བ་གཞན་སྒྲོལ་བ་རྒྱལ་པོའམ་དེད་དཔོན་ལྟ་བུའི་སེམས་བསྐྱེད། རང་དང་སེམས་ཅན་ལྷན་ཅིག་ཏུ་ཐར་བར་འདོད་པ་གཉན་པ་ལྟ་བུའི་སེམས་བསྐྱེད། སེམས་ཅན་ཐམས་ཅད་བྱང་ཆུབ་ལ་མ་འཁོད་ཀྱི་བར་དུ་རང་ཉིད་ཐར་བའི་འདོད་པ་མི་བྱེད་པ་རྫི་བོ་ལྟ་བུའི་སེམས་བསྐྱེད་སོགས་ཀྱི་རྣམས་གྲངས་ཀྱང་ཡོད་ལ། གཞན་ཡང་སེམས་བསྐྱེད་ཀྱི་དབྱེ་བ་ལ། རང་གི་ངོ་བོས་དབྱེ་ན་ཀུན་རྫོབ་བྱང་སེམས་དང་དོན་དམ་བྱང་སེམས། ཉམས་སུ་བླངས་ཚུལ་གྱིས་དབྱེ་བ་སྨོན་པ་བྱང་སེམས་དང་འཇུག་པ་བྱང་སེམས། རྒྱུད་ལ་སྐྱེ་ཚུལ་གྱིས་དབྱེ་ན་བརྡ་ལས་ཐོས་པ་དང་ཆོས་ཉིད་ཀྱིས་ཐོས་པ་གཉིས། གང་ཟག་གི་ས་མཚམས་ཀྱི་དབྱེ་ན། ལས་དང་པོ་པ་ནས་མོས་སྤྱོད་ཀྱི་ས་ལ་གནས་རིང་ནི་མོས་པས་ཐོབ་པ་ལས་བྱུང་བའི་

---

^{[མ་དཔེ་གཟིགས་ན་འདིར་གནོན།]}

སེམས་སྐྱེད། ས་དང་པོ་ནས་བདུན་པའི་བར་དུ་ལྷག་བསམ་དག་པའི་སེམས་སྐྱེད། དག་པ་གསུམ་ལ་རྣམ་པར་སྨིན་པའི་སེམས་སྐྱེད། སངས་རྒྱས་ཀྱི་སར་སྒྲིབ་པ་སྤངས་བའི་སེམས་སྐྱེད་སོགས་ཁྱད་པར་གྱི་དབྱེ་བ་དང་། སྡོང་པོ་བཀོད་པའི་མདོ་སོགས་ནས་དཔེ་དང་གྲོགས་ཀྱིས་ཕྱེས་པས་ཉེར་གཉིས་དང་བརྒྱད་ཅུ་སོགས་ཀྱི་དབྱེ་བ་ཕྲ་ཞིབ་མཐའ་ཡས་པ་གསུངས་ནའང་། དོན་གྱི་སྙིང་པོ་ནི་གཞན་དོན་དུ་སངས་རྒྱས་སྒྲུབ་པ་ཉིད་ལ་འདུ་བ་ལགས།། ༈ །།དེ་ལས་ད་ལྟ་ལག་ལེན་དུ་གདབ་པར་བྱ་རྒྱུའི་དངོས་དོན་སྨོན་པ་བྱང་ཆུབ་ཀྱི་སེམས་དང་འཇུག་པ་བྱང་ཆུབ་ཀྱི་སེམས་གཉིས་བརྡ་དང་ཆོ་ག་ལས་ཐོབ་པ་དང་། དོན་དམ་བྱང་ཆུབ་ཀྱི་སེམས་ནི་ཆོས་ཉིད་ཀྱི་ཐོབ་ཅིང་སྒོམ་སྟོབས་ཀྱི་སྐྱེ་བར་བཞེད་པ་ཡིན་ལ།། ༈ །།སྨོན་འཇུག་གཉིས་

---

^{[མ་དཔེ་གཟིགས་ན་འདིར་གནོན།]}

པོའི་མཚན་ཉིད་ལ། སློབ་དཔོན་ཞི་བ་ལྷས་ནི། འགྲོ་བར་འདོད་དང་འགྲོ་བ་གཉིས་ཀྱི་དཔེ་དོན་སྤྱོད་འཇུག་ཏུ་གསུངས་ཤིང་། བསླབ་བཏུས་སུ། སྤྱོད་པ་དང་མི་ལྡན་པ་ནི་སྨོན་པ་དང་སྤྱོད་པ་དང་ལྡན་པ་ནི་འཇུག་པར་བཞེད། སློབ་དཔོན་ཐོགས་མེད་ནི། བྱང་ཆུབ་ལ་སྨོན་ཅིང་དེ་འདོད་པ་སྟེ་འབྲས་བུ་ལ་དམིགས་པ་ནི་སྨོན་པ་དང་། བྱང་ཆུབ་ཀྱི་སྤྱོད་ལ་ཞུགས་ཏེ་ལམ་ལ་དམིགས་པ་ནི་འཇུག་པ་བྱང་སེམས་སུ་གསུངས་པ་དང་། དེ་དང་མཐུན་པར་ཇོ་བོས་ཀྱང་། སྨོན་པ་བྱང་སེམས་ནི་འབྲས་བུ་ལ་དམ་འཆའ་བ་དང་། འཇུག་པ་ནི་རྒྱུ་ལ་དམ་འཆའ་བ་ཡིན་ཞེས་གསུངས། །སློབ་དཔོན་ཀ་མ་ལ་ཤཱི་ལས། སྡོམ་པས་མ་བསྡུས་པ་སྨོན་པ་དང་སྡོམ་པས་བསྡུས་པ་ནི་འཇུག་པར་

---

^{[མ་དཔེ་གཟིགས་ན་འདིར་གནོན།]}

གསུངས་པ་སོགས། ཚིག་གི་བརྗོད་ཚུལ་སྣ་ཚོགས་ཀྱང་དོན་གྱི་དགོངས་བཞེད་ལ་ཁྱད་པར་མ་མཆིས་པ་ཉིད་ལགས་ཤིང་། ངེས་ཚིག་དང་འབྲེལ་པ་ཁྱེད་ཅག་གིས་གོ་བདེ་བའི་ཕལ་སྐད་ལྟ་བུའི་དབང་དུ་བགྱིས་ན། ཅིའི་ཕྱིར་སྨོན་པ་དང་འཇུག་པའི་མིང་དུ་བཏགས་ཅེ་ན། སངས་རྒྱས་ཀྱི་ཡོན་ཏན་མཐོང་བ་ལ་དད་པ་དང་དང་བ་སྐྱེས་ནས། བདག་དང་སེམས་ཅན་རྣམས་ཀྱང་དེ་ལྟ་བུ་ཐོབ་ན་ཅི་མ་རུང་། ཐོབ་པར་ཤོག་ཅིག་སྙམ་པའི་སྨོན་འདུན་དྲག་པོ་སྐྱེས་པ་དེ་ལ་སྨོན་པ་བྱང་སེམས་ཞེས་བྱ་སྟེ། དཔེར་ན། འོ་སྐོལ་གྱི་སྟོན་པ་འདི་ཉིད་རྫ་མཁན་ཡངས་པའི་མིག་ཅེས་བྱ་བར་སྐྱེ་བ་བཞེས་པའི་ཚེ། བདེར་གཤེགས་ཤཱཀ་ཐུབ་ཆེན་པོ་གྲོང་ཁྱེར་ལ་བསོད་སྙོམས་སུ་བྱོན་པ་དང་མཇལ་མ་ཐག་དང་བ་ཁྱད་པར་ཅན་སྐྱེས་ཏེ་

---

^{[མ་དཔེ་གཟིགས་ན་འདིར་གནོན།]}

རང་ཉིད་དལ་འབྱོར་པ་དམན་པས། །རྩྭ་ལས་བྱས་པའི་གདུགས་ཅིག་དང་། རྫའི་བུམ་པ། མཆིལ་ལྷམ་ཟུང་། ཀརྴ་པཱ་ཎ་ལྔ་དང་བཅས་པ་ཕུལ་ཏེ། །དེ་བཞིན་གཤེགས་པ་ཁྱེད་སྐུ་ཅི་འདྲ་དང་། ཞེས་སོགས་ཀྱིས་སྨོན་པ་བྱང་ཆུབ་ཏུ་ཐུགས་བསྐྱེད་པ་ལ་བརྟེན་ནས། སྟོན་པ་འདི་ཉིད་སངས་རྒྱས་པའི་ཚེ་མཚན་དཔེའི་སྐུ་དང་འཁོར༴ འདུས་པ་དང་སྐུ་ཚེ་སོགས་ཤཱཀྱ་ཐུབ་ཆེན་པོ་དེ་ཅི་འདྲ་བར་གྱུར་བ་ལྟ་བུ་ལགས། དེ་བཞིན་དུ། འཇུག་པའི་སེམས་བསྐྱེད༴ ཅེས་བྱ་བ་ཡང་ཇི་ལྟར་སྨོན་པའི་དོན་དེ་ཉིད་ཡིད་སྨོན་ཙམ་ལ་མི་འཇོག་པར་དེ་སྒྲུབ་པར་བྱེད་པ་ལ་གཡེལ་བ་མེད་པའི་བརྩོན་པ་དང་སྐྱོ་ངལ་མེད་པའི་སྤྲོ་བ་དང་དཀའ་བ་བཟོད་པའི་སྙིང་སྟོབས་སོགས་ཀྱིས་འབད་པ་མཐར་སོན་པ་ལ་

---

^{[མ་དཔེ་གཟིགས་ན་འདིར་གནོན།]}

པའི་ཕྱིར། འཇུག་པའི་མིང་གིས་བརྗོད་པ་སྟེ། དེ་ལྟ་བུ་ཡང་འོ་སྐོལ་གྱི་སྟོན་པ་བྱང་ཆུབ་ཀྱི་སྤྱད་པ་སྤྱོད་པའི་ཚེ། འཁོར་ལོ་བསྒྱུར་བའི་རྒྱལ་པོ་རྩིབས་ཀྱི་མུ་འཁྱུད་ཅེས་བྱ་བའི་མདུན་ན་འདོན་བྲམ་ཟེ་རྒྱ་མཚོའི་རྡུལ་དུ་སྐྱེ་བ་ཞེས་པའི་ཚེ། དེ་བཞིན་གཤེགས་པ་རིན་ཆེན་སྙིང་པོ་འཁོར་གྱི་དཀྱིལ་འཁོར་རྒྱ་མཚོ་དང་བཅས་པ་ལོ་ཁྲི་ཕྲག་མང་པོའི་བར་དུ་མཆོད་པའི་ཡོ་བྱད་མཐའ་ཡས་པས་མཆོད་ཅིང་བསྙེན་བཀུར་བའི་མཐར། དགེ་བའི་རྩ་བ་རྣམས་རྒྱལ་པོ་ཉིད་ནི་འཇིག་རྟེན་གྱི་མངོན་པར་མཐོ་བའི་རྒྱུར་བསྔོ་བར་འདོད་པ་ལ། དེ་བཞིན་གཤེགས་པའི་བཀུས་བསྐུལ་ཞིང་བྲམ་ཟེ་རྒྱ་མཚོའི་རྡུལ་གྱིས་ངེས་ལེགས་བྱང་ཆུབ་ཀྱི་རྒྱུ་ཁོ་ནར་ནན་གྱིས་བསྔོར་བཅུག་ཅིང་། དེ་ཚེ་སངས་རྒྱས་ཀྱིས་མཐུས་

---

^{[མ་དཔེ་གཟིགས་ན་འདིར་གནོན།]}

ཕྱོགས་བཅུའི་ཞིང་ཁམས་མཐའ་དག་རྒྱལ་བློན་བཙུན་མོ་འཁོར་བཅས་ཀྱིས་སྒྲིབ་མེད་དུ་མཐོང་བར་བྱིན་གྱིས་བརླབས་ཏེ་རང་རང་མངོན་པར་འཚང་རྒྱ་བའི་ཞིང་ཁམས་གང་ལ་མོས་པར་བྱང་ཆུབ་པའི་སྨོན་ལམ་འདེབས་སུ་བཅུག་པ་ན། རྒྱལ་པོ་རྩིབས་ཀྱི་མུ་འཁྱུད་ནི་པདྨོ་བདེ་བ་ཅན་གྱི་ཞིང་ཁམས་སུ་འཚང་རྒྱས་ཏེ་མཁའ་ཁྱབ་འགྲོ་བ་འདྲེན་པར་སེམས་བསྐྱེད་ཅིང་། དེ་བཞིན་གཤེགས་པས་ཀྱང་། རྒྱལ་པོ་ཆེན་པོ་ཁྱེད་དེང་འདིར་བདག་ཅག་རྣམས་ལོ་གྲངས་འདི་སྙེད་དུ་མཆོད་ཅིང་བྱང་ཆུབ་ཏུ་སེམས་བསྐྱེད་པའི་མཐུས། མ་འོངས་པ་ན་བདེ་བ་ཅན་གྱི་ཞིང་དུ་རྒྱལ་པོ་ཁྱོད་ཉིད་སངས་རྒྱས་འོད་དཔག་ཏུ་མེད་པར་འཚང་རྒྱ་བར་འགྱུར་རོ། །ཞེས་ལུང་བསྟན་པ་བཞིན་དུ་གྱུར་བ་དང་། སྲས་དང་བཙུན་མོ་བློན་འབངས་གཞན་ཐམས་ཅད་ཀྱིས་

---

^{[མ་དཔེ་གཟིགས་ན་འདིར་གནོན།]}

ཀྱང་རང་རང་གང་ལ་མོས་པའི་ཞིང་ཁམས་དེ་དང་དེར་འཚང་རྒྱ་བར་སྨོན་ལམ་བཏབ་པ་དང་མཐུན་པར་དེ་བཞིན་གཤེགས་པས་ཀྱང་ལུང་སྟོན་པར་མཛད་པར་གྱུར་ཀྱང་། འོ་སྐོལ་མི་མཇེད་ཀྱི་ཞིང་འདི་ནི་ཞིང་ཁམས་གཞན་གང་ལས་ཀྱང་ངན་ཞིང་ཡིད་དུ་མི་འོང་བ། ངམ་གྲོག་དང་གཅོང་རོང་གཡང་ས་དང་རྡོ་སེག་དང་ཚེར་མ་སོགས་ཀྱིས་བཏམས་པས་མི་བདེ་བ། སྨན་ཤིང་ལོ་འབྲས་མེ་ཏོག་སོགས་ཉུང་ཞིང་མཐུ་ཞན་པ། མི་རྣམས་ཀྱང་ཚེ་དང་གཟུགས་སྟོབས་ལོངས་སྤྱོད་དམན་ལ་ཉོན་མོངས་པའི་རྦ་གློང་རབ་ཏུ་འཁྲུག་པས་འདུལ་བར་དཀའ་བའི་ཞིང་འདི་བདག་གིར་མཛད་པ་དང་འདུལ་སྤྲོ་བ་སུ་ཡང་མ་བྱུང་བ་ན། མདུན་ན་འདོན་རྒྱ་མཚོའི་རྡུལ་དེ་ཉིད་སྙིང་རྗེ་དང་བརྩོན་འགྲུས་དང་བཟོད་སྟོབས་སོགས་གཞན་ལས་རྨད་དུ་བྱུང་བའི་མཐུས། མི་མཇེད་ཀྱི་

---

^{[མ་དཔེ་གཟིགས་ན་འདིར་གནོན།]}

ཞིང་ཁམས་འདི་འདུལ་བའི་སྐྱབས་མགོན་དུ་དམ་བཅས་པ་ལ་དེ་བཞིན་གཤེགས་པ་རིན་ཆེན་སྙིང་པོས་ཀྱང་བྲམ་ཟེ་ཆེན་པོ་ལེགས་སོ་ལེགས་སོ། །ཁྱོད་མ་འོངས་པའི་དུས་ན་མི་མཇེད་ཀྱི་ཞིང་དེར་དེ་བཞིན་གཤེགས་པ་ཤཱཀྱའི་དབང་པར་སངས་རྒྱས་ནས་རྒྱལ་བ་གཞན་གྱིས་དོར་བའི་རྨུ་རྒོད་ཀྱི་གདུལ་བྱ་རྣམས་ཚད་མེད་པའི་ཐུགས་རྗེས་འདུལ་བར་གྱུར་གྱི། དེ་ལྟ་བུའི་སེམས་བསྐྱེད་ཀྱི་དམ་བཅའ་ཟུང་ཞིག །ཅེས་བསྔགས་ཤིང་ལུང་བསྟན་པ་ལྟར། བྲམ་ཟེས་ཀྱང་གཞན་ལས་ཁྱད་པར་དུ་བྱུང་བའི་སྨོན་ལམ་ཆེན་པོ་ལྔ་བརྒྱ་བཏབས་ཤིང་འཇུག་པ་བྱང་ཆུབ་ཏུ་ཐུགས་བསྐྱེད་པའི་མཐུས། འོ་སྐོལ་གྱི་སྟོན་པ་འདི་སངས་རྒྱས་གཞན་ལས་ལྷག་པའི་ཐུགས་རྗེ་དང་འཕྲིན་ལས་མཆོག་ཏུ་གྱུར་པ་ལགས་ཏེ་

---

^{[མ་དཔེ་གཟིགས་ན་འདིར་གནོན།]}

འཇུག་པ་བྱང་ཆུབ་ཀྱི་སེམས་ཞེས་པའི་ཕན་ཡོན་དང་སྒྲ་དོན་དེ་ལྟ་བུ་མཆིས་པ་ཡང་ཐུགས་ལ་ངེས་འཚལ་ཞིང་། དེ་ལྟར་འདི་ཡན་ཆད་རྣམས་ནི་སྐལ་བ་བཟང་པོ་དང་ལྡན་པ་ཁྱེད་ཅག་རྣམས་བྱང་ཆུབ་ལ་བློ་ངེས་པའི་རྒྱུ་རྐྱེན་དུ་འགྱུར་ཕྱིར་ཟབ་མོའི་གཏམ་ཆེ་ཙམ་ཞིག་སྙན་དུ་གསོལ་བ་ལགས།། ༈ །།བཞི་པ་བྱང་ཆུབ་ཀྱི་སེམས་དེ་ཉིད་ཇི་ལྟར་བླང་བའི་ཆོ་ག་དངོས་ལ། ཤིང་རྟའི་གསོལ་གཉིས་པོ་གང་ལས་བླང་ཡང་ཆོག་པ་དང་། བརྒྱུད་པའི་ཆུ་བོ་གཉིས་གཅིག་ཏུ་བསྡོམས་ནས་འབོགས་པར་མཛད་པའི་ཕྱག་བཞེད་ཀྱང་ཡོད་མོད་ཀྱི། འོན་ཀྱང་དིང་སང་གྲུབ་མཐའ་ཆོས་རྒྱུད་ཕལ་མོ་ཆེ་རྣམས་སྲོལ་གཉིས་པོ་ཐ་དད་དུ་མཛད་པ་མང་ཞིང་། སྡོམ་རྟེན་གྱི་ཁྱད་པར་སོགས་འབྱེད་བདེ་བར་སྣང་བ་དང་བཅས་པས། འདི་ཡང་

---

^{[མ་དཔེ་གཟིགས་ན་འདིར་གནོན།]}

སྦྱོར་རྗེས་མཐུན་པའི་སྐབས་རྣམས་གཅིག་དྲིལ་དང་། དངོས་གཞིའི་ཆོ་ག་ལུགས་སོ་སོ་ལས་ཇི་ལྟར་བྱུང་བ་བཞིན་བསྟོན་པ་ལ།། ༈ །།ཐོག་མར་སྦྱོར་བའི་ཆོ་ག་ལ་གསུམ་སྟེ། སྲིད་དང་ཞི་བའི་མཐའ་སྤོང་ཞིང་ཡང་དག་བྱང་ཆུབ་དོན་དུ་གཉེར་བས་དགེ་བའི་བཤེས་གཉེན་ལ་གསོལ་བ་གདབ་པ་དང་། བྱང་ཆུབ་སྒྲུབ་པའི་བར་ཆད་བསྲུང་ཞིང་དཀོན་མཆོག་གསུམ་ལ་གུས་པས་སྐྱབས་སུ་འགྲོ་བ་དང་། བྱང་ཆུབ་ཀྱི་རྒྱུ་ཚོགས་ཉེ་བར་སྒྲུབ་ཕྱིར་ཡན་ལག་བདུན་གྱི་སྒོ་ནས་བསོད་ནམས་མངོན་པར་འདུ་བྱ་བ་དང་གསུམ་ལས། དང་པོ་ནི། འོ་སྐོལ་རྣམས་དལ་འབྱོར་གྱི་མི་ལུས་ཙམ་ཐོབ་ཀྱང་ནམ་འཆི་ཆ་མེད་ཀྱི་ཆོས་ཅན་ཏེ། སྐྱེས་ཟིན་པ་ནས་ནམ་ཀྱང་འཆི་བ་ལ་རྟོག་སྣ་

---

^{[མ་དཔེ་གཟིགས་ན་འདིར་གནོན།]}

གཏད་ཟིན་པ་ཁོ་ན་དང་། འཆི་བ་གཅིག་པུ་ཙམ་དུ་མ་ཟད་དེ་ཁ་ཁམས་གསུམ་འཁོར་བ་ཟོ་ཆུའི་འཁྱུད་མོ་བཞིན་སྐྱེ་འཆིའི་འཁྲུལ་འཁོར་གྱི་རྒྱུན་ལ་ཆོད་པའི་དུས་ནི་མེད། གང་དང་གང་དུ་སྐྱེས་ཀྱང་འཁོར་བའི་རང་བཞིན་ནི་སྡུག་བསྔལ་འབའ་ཞིག་ལས་བདེ་བའི་གོ་སྐབས་སྐྲ་རྩེའི་ཁྱོན་ཙམ་ཡང་མེད་དོ། །ངན་སོང་གསུམ་དུ་སྐྱེས་ན་ནི་སྡུག་བསྔལ་གྱི་སྡུག་བསྔལ་ཏེ་བཟོད་པའི་གླགས་མེད། མཐོ་རིས་སུ་སྐྱེས་པ་རྣམས་ཀྱང་འགྱུར་བའི་སྡུག་བསྔལ་གྱི་གྲབས་སུ་ཆུད་ཆུད་པ། ཁམས་གོང་མའི་ལྷར་སྐྱེས་ན་ནི་འདུ་བྱེད་ཀྱི་སྡུག་བསྔལ་ས་བོན་དུ་ཐེབས་ཐེབས་པའི་ཆོས་ཉིད་ཡིན་ཕྱིར་ནམ་དུའང་ཁམས་གསུམ་མཐའ་དག་སྡུག་བསྔལ་གྱི་རྒྱུ་དང་གནས་དང་རྟེན་དང་འབྱུང་ཁུངས་ལས་མ་འདས་པ་ན། དེ་ལྟར་མ་རིག་པར་སྡུག་བསྔལ་བ་ལ་བདེ་བར་འཁྲུལ། མི་རྟག་པ་ལ་

---

^{[མ་དཔེ་གཟིགས་ན་འདིར་གནོན།]}

རྟག་པར་རེ། མི་བདེན་པ་ལ་བདེན་པར་འཛིན་ཏེ། ད་དུང་འཁོར་བའི་སྡུག་བསྔལ་སྒྲུབ་མ་ཐུབ་ཀྱི་དོགས་པ་ལྟ་བུས་རང་ཕུང་རང་གིས་བསྒྲུབ་པ་འདི་ཁམས་གསུམ་སེམས་ཅན་ཀུན་གྱི་མཚན་ཉིད་དུ་གདའ་བ་འདི་ལ་ཞེན་ཆགས་ཀྱི་བློ་གཏན་ནས་སྤོང་བ་གལ་ཆེ་སྟེ། ཡབ་སྲས་མཇལ་བའི་མདོར། འཁོར་བའི་སྡུག་བསྔལ་མཐོང་བ་ན། །སྐྱོ་བའི་སེམས་ནི་རབ་ཏུ་བསྐྱེད། ཁམས་གསུམ་བརྩོན་རར་འཇིགས་པ་དང་། །བརྩོན་པའི་སེམས་ནི་སྤོང་བར་བྱ། །ཞེས་པ་བཞིན་འབད་དགོས་པ་དང་། ཡང་། སྲིད་པའི་སྡུག་བསྔལ་ལས་ཐར་རུང་ཞི་བ་མྱང་འདས་ཕྱོགས་གཅིག་པར་ཞེན་དུ་མི་རུང་སྟེ། སྲིད་པའི་སྡུག་བསྔལ་མཐོང་བ་ལ་སྐྱོ་སྟེ་རང་ཉིད་འབའ་ཤིག་ཐར་བ་ཙམ་ཞིག་དོན་དུ་

---

^{[མ་དཔེ་གཟིགས་ན་འདིར་གནོན།]}

གཉེར་བས་ནི་ཉན་རང་གི་བྱང་ཆུབ་འགྲུབ་ཀྱང་བླ་ན་མེད་པའི་བྱང་ཆུབ་ཀྱི་གོ་འཕང་ལ་མི་ཉེ་སྟེ། སློབ་དཔོན་ཨཱརྱ་དེ་ཝས། །བསམ་གཏན་ནགས་མེས་ཡང་དང་ཡང་དུ་ནི། །ཉོན་མོངས་ཚང་ཚིང་བསྲེགས་པར་གྱུར་ན་ཡང་། །བདག་ལྟའི་རྩ་བ་བརྟན་པོ་མ་སྤོངས་པས། ཆར་གྱིས་བརླན་བཞིན་མདོ་ལ་རབ་ཏུ་སྐྱེ། ཞེས་པ་བཞིན་འགྱུར་བ་དང་། ཁྱད་པར་དུ་ནམ་མཁའ་གར་ཁྱབ་ཀྱི་འགྲོ་བ་མཐའ་དག་པ་རྣམས་བདག་ཉིད་ཀྱི་ཕ་མ་དྲིན་ཅན་མ་བྱས་པ་ནི་སུ་ཡང་མེད། དེ་ཡང་ལན་གྲངས་གཅིག་ཙམ་འགའ་ཙམ་བྱས་པ་ལྟ་བུ་མ་ཡིན་ཏེ། འཁོར་བ་ཐོག་མེད་ནས་ད་ལྟ་ཡན་ཆད་དུ་རྒྱུན་མ་ཆད་པར་བྱས་པའི་གྲངས་ནི་མཐའ་ཡས་པ་འདི་དག་བྱང་ཆུབ་ཀྱི་གོ་འཕང་

---

^{[མ་དཔེ་གཟིགས་ན་འདིར་གནོན།]}

མཆོག་ལ་འགོད་པ་ལས་གཞན་པ་ཐབས་གང་གིས་ཀྱང་དྲིན་ལན་འཁོར་མི་ནུས་ཤིང་། འདོར་དུ་ཡང་རུང་བ་མ་ཡིན་ཏེ། སློབ་སྤྲིངས་ལས། །ཉེ་དུ་འཁོར་བའི་རྒྱ་མཚོའི་ཁོངས་སུ་ཆུད་གྱུར་པ། །གློང་གི་ནང་དུ་ལྷུང་བ་ལྟ་བུར་སྣང་བཞིན་དུ། །སྐྱེ་ཤི་འཕོས་པས་ངོ་མ་ཤེས་པ་དེ་བོར་ནས། །གལ་ཏེ་གཅིག་ཐར་བྱེད་ན་དེ་ལས་ཁྲེལ་བོར་མེད། ཅེས་གསུངས་པ་བཞིན། གྲངས་ཅིང་མཐའ་ཡས་པའི་ཕ་མ་སེམས་ཅན་འདི་དག་བདག་ཅག་གིས་འདྲེན་པའི་གཉེར་བབས་པ་ལགས་ཤིང་། དེ་ལྟར་བྱ་བ་ལ་རང་ཉིད་སྲིད་དང་ཞི་བའི་མཐའ་ལ་མི་གནས་པའི་མྱང་འདས་དམ་པ་ཐོབ་དགོས་ལ། དེ་ཐོབ་པའི་རྒྱུ་དང་ཐབས་ཀྱི་གཙོ་བོ་ནི་བྱང་ཆུབ་

---

^{[མ་དཔེ་གཟིགས་ན་འདིར་གནོན།]}

ཀྱི་སེམས་རིན་པོ་ཆེ་འདི་ཁོ་ན་ཡིན་ཏེ། རྣམ་སྣང་མངོན་བྱང་ལས། རྣམ་པ་ཐམས་ཅད་མཁྱེན་པའི་སངས་རྒྱས་ནི་སྙིང་རྗེའི་རྩ་བ་ཅན། བྱང་ཆུབ་སེམས་ཀྱི་རྒྱུ་ལས་བྱུང་བ། ཐབས་ཀྱི་མཐར་ཕྱིན་པར་བྱས་པའོ། །ཞེས་པ་ཉིད་འབད་པས་བསྒྲུབ་དགོས་ཕྱིར་དེ་ལྟ་བུའི་བསམ་པ་ཁྱད་པར་ཅན་དང་ལྡན་པར་མཛད་ནས་བྱང་ཆུབ་ཀྱི་སེམས་དེ་ཉིད་ཁྱོད་ཀྱི་རྒྱུད་ལ་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མ་སྨིན་པ་སྨིན་པར་བྱ་བའི་ཕྱིར་སློབ་དཔོན་ལ་གསོལ་བ་གདབ་དགོས་ཏེ། བདག་པོའི་རྐྱེན་ནི་འདི་ལ་རག་ལས་པའི་ཕྱིར་རོ། ཇི་སྐད་དུ། སྡོང་པའི་བཀོད་པའི་མདོར། ནོར་བཟང་ལ་འཇམ་དཔལ་གྱི་བཀའ་སྩལ་བ། བྱང་ཆུབ་སེམས་དཔའ་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཐབས་ཡང་དག་པའི་དགེ་བའི་བཤེས་གཉེན་

---

^{[མ་དཔེ་གཟིགས་ན་འདིར་གནོན།]}

ལས་གདོན་མི་ཟ་བར་རྟོགས་པར་གྱིས་ཤིག །ཅེས་སོགས་རྒྱ་ཆེར་གསུངས་ལ། དེ་ལྟར་བྱ་བའི་ཕྱིར་དགེ་བའི་བཤེས་གཉེན་ལ་ཐ་མལ་པའི་འདུ་ཤེས་ཀྱིས་ནི་བྱང་ཆུབ་ཀྱི་སེམས་རྒྱུད་ལ་མི་སྐྱེ་བས་ན། སངས་རྒྱས་དངོས་ཀྱི་འདུ་ཤེས་བསྐྱེད་དགོས་པར་ནི། ཇི་སྐད་དུ། །ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། ཅེས་སོགས་དང་། །གང་ལ་མོས་པའི་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། ཅེས་པ་ལྟར་ཡིན་པས་ན། བདག་སློབ་དཔོན་ལ་སྟོན་པ་སངས་རྒྱས་དངོས་ཡིན་སྙམ་དུ་མོས་པ་ཐུན་མོང་མ་ཡིན་པ་མཛད་ནས། ཁྱེད་ཅག་རང་རང་སོ་སོའི་ལུས་ལོངས་སྤྱོད་གཏན་འདུན་ཐམས་ཅད་མཆོད་པའི་མཎྜལ་དུ་འབུལ་བའི་འདུན་པ་དང་བཅས་པས། ཕྱག་ཐལ་མོ་

---

^{[མ་དཔེ་གཟིགས་ན་འདིར་གནོན།]}

སྦྱར་བའི་བར་དུ་མེ་ཏོག་སིལ་མ་ཐོགས་ནས་གསོལ་བ་གདབ་པའི་ཚིག་འདི་རྗེས་བཟློས་སུ་མཛད་པར་ཞུ།། ༈ །།སློབ་དཔོན་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས། དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ། བདག་མིང་འདི་རང་རང་གི་མིང་བརྗོད་དེ་ཞེས་བགྱི་བ་ཡང་། སློབ་དཔོན་གྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་མཛད་དུ་གསོལ། དེ་ལྟར་གསོལ་བ་གདབ་པ་ལན་གསུམ་པའི་མཐར་ཕྱག་ཏུ་བསྣམས་པའི་མེ་ཏོག་སིལ་མ་རྣམས་སློབ་དཔོན་གྱི་ཕྱོགས་སུ་འཐོར་བར་མཛད་དེ། སྔོན་འོ་སྐོལ་གྱི་སྟོན་པ་

---

^{[མ་དཔེ་གཟིགས་ན་འདིར་གནོན།]}

ཉིད་བྲམ་ཟེའི་ཁྱིའུ་སྤྲིན་དུ་སྐྱེ་བ་བཞེས་ཚེ་རྒྱལ་མཆོག་མར་མེ་མཛད་ཀྱི་སྤྱན་སྔར་བྱང་ཆུབ་མཆོག་ཏུ་ཐུགས་བསྐྱེད་པ་ན། མེ་ཏོག་ཨུཏྤ་ལ་ལྔ་ཞིག་དད་པའི་སེམས་ཀྱིས་གཏོར་བ་ལས་ཨུཏྤ་ལ་དཔག་ཏུ་མེད་པར་གྱུར་པ་རྣམས་རྒྱལ་བའི་དབུའི་སྟེང་དུ་ཨུཏྤ་ལའི་ཁང་རྩེགས་ཆེན་པོར་གྱུར་ཏེ། བྲམ་ཟེའི་བསོད་ནམས་ཀྱི་ཚོགས་མངོན་པར་འཕེལ་ཞིང་བྱང་ཆུབ་ཏུ་ལུང་སྟོན་པ་དེ་བཞིན་དུ་གྱུར་པའི་མོས་པ་མཛད་པར་ཞུ།། ༈ །།གཉིས་པ་བྱང་ཆུབ་ལ་བར་དུ་གཅོད་པ་བསྲུང་ཞིང་སྐྱབས་སུ་འགྲོ་བ་ནི། དེ་ཡང་སྤྱིར་བར་དུ་གཅོད་པ་པོ་ནི་མི་དང་མི་མ་ཡིན་པའི་བདུད་ཀྱི་བྱེ་བྲག་ལ་བཏགས་མོད་ཀྱང་། སྐབས་འདིར་ནི་མཁའ་མཉམ་གྱི་འགྲོ་བ་ཐམས་ཅད་ཕ་མའི་རང་བཞིན་དུ་གྱུར་བདུད་དང་བདུད་ཀྱི་བར་ཆད་

---

^{[མ་དཔེ་གཟིགས་ན་འདིར་གནོན།]}

དུ་འཛིན་རྒྱུའི་དངོས་པོས་དབེན་ལ། སྲུང་བ་ཐམས་ཅད་ཀྱི་ནང་ནས་བྱང་ཆུབ་སེམས་ཀྱི་གོ་ཆ་ནི་སྲུང་བའི་མཆོག་ཡིན་ཕྱིར་གཞན་ལ་དགོས་ལ། འོན་ཀྱང་བྱང་ཆུབ་ལས་ཕྱིར་ལྡོག་པའི་བློ་མ་རུངས་པ་སྐྱེས་ན་བྱང་ཆུབ་ཀྱི་གེགས་སུ་བྱེད་པས། དེ་བསྲུང་བ་ལ་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཉིད་ཆེད་དུ་མངགས་པ་ནི་དེ་ཉིད་ཀྱི་སྨོན་ལམ་གྱི་མཐུ་ཡིན་ཕྱིར། དེས་ན་འོ་སྐོལ་རྣམས་གནས་པའི་སྣང་ཡུལ་འདི་ཐམས་ཅད་འཕགས་པ་སྤྱན་རས་གཟིགས་ཀྱི་སྐུ་ནམ་མཁའི་ཁམས་ཁྱབ་པ་གཅིག་གི་ནང་ཁོངས་སུ་ཆུད་པར་བསམ་པ་མཛད་འཚལ་ཏེ། སྤྱན་རས་གཟིགས་དབང་ཕྱུག་ལ་བརྟེན་པ་ནི་ཐ་ན་བ་བུའི་ཁུངས་བུ་གཅིག་ལ་བརྟེན་པ་ཡང་བདུད་དང་བདུད་ཀྱི་རིགས་སུ་གཏོགས་པ་བྱེ་བ་དུང་ཕྱུར་གྱིས་ཀྱང་གཡོ་བར་

---

^{[མ་དཔེ་གཟིགས་ན་འདིར་གནོན།]}

མི་ནུས་སོ། །ཞེས་ཐུགས་རྗེ་ཆེན་པོ་པད་མ་ཅོད་པཎ་གྱི་རྒྱུད་དང་པུནྡྷ་རཱི་ཀའི་མདོ་སོགས་ལས་གསུངས་པས་ན་སྲུང་འཁོར་གྱི་མཆོག་ཏུ་གྱུར་བ་ལགས།། ༈ །།དེ་ནས་སྐྱབས་སུ་འགྲོ་བ་ལ་སྤྱི་དང་ཁྱད་པར་གཉིས་ལས། སྤྱིར་ནི་ཕྱི་པ་མུ་སྟེགས་པ་དང་ནང་པ་སངས་རྒྱས་པ་གཉིས་པོ་སྐྱབས་འགྲོ་ཁོ་ནས་ཀྱང་བྱང་ཆུབ་ཀྱི་ལམ་དུ་འགྲོ་མི་འགྲོའི་ཁྱད་པར་གྱུར་བ་དང་། ནང་པ་སངས་རྒྱས་པ་ལའང་ཐེག་པ་གསུམ་ག་སྐྱབས་འགྲོ་ལ་བརྟེན་དགོས་པར་ནི། །མགོན་པོ་བྱམས་པས་རྒྱུད་བླ་མར། །སྟོན་པ་བསྟན་པ་སློབ་དཔོན་གྱི། །ཐེག་པ་གསུམ་དང་བྱེད་པ་གསུམ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། ཞེས་གསུངས་པ་བཞིན། སྟོན་པ་སངས་རྒྱས། བསྟན་པ་དམ་ཆོས་

---

^{[མ་དཔེ་གཟིགས་ན་འདིར་གནོན།]}

སློབ་མ་དགེ་འདུན་ཏེ། དཀོན་མཆོག་གསུམ་ལ་མོས་པས་སྐྱབས་གནས་སུ་བྱེད་པ་ནི་ཉན་རང་བྱང་སེམས་ཀྱི་ཐེག་པ་གསུམ་པོ་སྤྱིར་མཐུན་ཡང་། བྱེ་བྲག་ཏུ་ཐེག་པ་ཆེ་ཆུང་ལ་སྐྱབས་འགྲོའི་ཡུལ་དང་དུས་དང་བསམ་པའི་ཁྱད་པར་ཐ་དད་པ་སྟེ་ཐེག་དམན་པ་གཉིས་པོ་ཡུལ་ནི་སངས་རྒྱས་མཆོག་གི་སྤྲུལ་པ་སྐུ། ཆོས་ཐུན་མོང་གི་ལུང་རྟོགས། དགེ་འདུན་ཉན་རང་གི་དགྲ་བཅོམ་པ་རྣམས་ལ་འདོད་ཀྱང་། ཐེག་ཆེན་དུ་དེ་ཐམས་ཅད་འདུས་བྱས་ཀྱི་མཚན་ཉིད་ཅན་ཏེ། གཏན་གྱི་སྐྱབས་གནས་མ་ཡིན་པ་དང་། བསམ་པ་ཡང་ཉན་རང་གཉིས་པོ་རང་ཉིད་ཞི་བདེ་དོན་གཉེར་དང་། དུས་ཀྱང་ཇི་སྲིད་འཚོ་བར་ལས་མེད་ཚེ་བྱང་ཆུབ་ཀྱི་རྒྱུ་དང་། སེམས་ཅན་གྱི་དོན་མ་ཡིན་པས་འདིར་མི་བཞེད་ལ་ཐེག་པ་ཆེན་པོ་འདི་ནི་བླ་མེད་བྱང་ཆུབ་ཏུ་འགྲོ་ཀུན་སྒྲོལ་བའི་ཤིང་རྟ་

---

^{[མ་དཔེ་གཟིགས་ན་འདིར་གནོན།]}

ཆེན་པོ་ཡིན་ཕྱིར། ཤེར་ཕྱིན་སྡུད་པ་ལས་ཀྱང་། དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག་ཅེས་གསུངས་པ་ཉིད་ཡིན་པས་ན་སྐྱབས་འགྲོ་ཡང་ཐུན་མོང་མ་ཡིན་པ་ཁྱད་པར་ཅན་གྱི་དོན་དང་ལྡན་པ་ལགས་ཏེ། དེ་ཡང་། །ཡུལ་ནི་སངས་རྒྱས་སྐུ་གསུམ་གྱི་བདག་ཉིད། ཆོས་ཐེག་ཆེན་གྱི་ལུང་རྟོགས། དགེ་འདུན་པ་ཆེན་པོ་ལ་བཞུགས་པའི་བྱང་སེམས་འཕགས་ཚོགས་རྣམས་ལ། དུས་བྱང་ཆུབ་སྙིང་པོའི་བར་དུ། བསམ་པ་མཁའ་ཁྱབ་ཀྱི་སེམས་ཅན་ཡོད་དོ་ཅོག་སངས་རྒྱས་ཀྱི་གོ་འཕང་ལ་འགོད་ཕྱིར་དུ་སྐྱབས་སུ་འགྲོ་བ་ཡིན་པས་ཁྱད་པར་དུ་འཕགས་པ་སྟེ། དེ་ལྟ་བུའི་ཁྱད་དོན་རྣམས་ཁྱེད་ཅག་སོ་སོའི་

---

^{[མ་དཔེ་གཟིགས་ན་འདིར་གནོན།]}

ཐུགས་ལ་ངེས་པར་མཛད་ནས། འོ་སྐོལ་གྱི་མདུན་འདིར་སྐུ་གསུང་ཐུགས་རྟེན་དངོས་སུ་བཤམས་པ་འདི་དག་མཚོན་བྱེད་དུ་བགྱིས་ནས། ནམ་མཁའི་ཁམས་འདིར་པདྨ་ཉི་ཟླའི་གདན་ཡངས་ཤིང་རྒྱ་ཆེ་བའི་སྟེང་ན་ཁྱད་པར་གྱི་སྐྱབས་ཡུལ་ཐེག་ཆེན་གྱི་དཀོན་མཆོག་མ་ལུས་པ་སྤྲིན་ཕུང་འཁྲིག་པ་ལྟར་ཁྲ་ལམ་མེ་མངོན་སུམ་དུ་བཞུགས་པར་མོས་པ་དང་། བདག་སློབ་དཔོན་ལ་ཡང་ཐ་མལ་པའི་སྣང་བ་མ་མཛད་པར། སྐུ་བྱང་སེམས་ཀྱི་དགེ་འདུན། གསུང་ཐེག་ཆེན་གྱི་དམ་ཆོས། ཐུགས་སངས་རྒྱས་ཆོས་ཀྱི་སྐུའི་ངོ་བོར་མོས་པའི་ངང་ནས། རང་གཞན་མཁའ་ཁྱབ་ཀྱི་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་རིན་པོ་ཆེ་ཐོབ་ཕྱིར་ཁ་ཙམ་ཚིག་ཙམ་མ་ཡིན་པར་སྙིང་ཐག་པ་ནས་སྐྱབས་སུ་མཆིའོ། །བྱང་ཆུབ་མ་ཐོབ་ཀྱི་བར་དུ་

---

^{[མ་དཔེ་གཟིགས་ན་འདིར་གནོན།]}

ཐུགས་རྗེས་བཟུང་ཞིག་སྙམ་པའི་དད་གུས་ཀྱི་གདུངས་བགས་བསྐྱེད་དེ་ཐལ་མོ་སྦྱར་ནས་སྐྱབས་འགྲོའི་ཚིག་འདི་དག་གི་རྗེས་ཟློས་མཛད་པར་ཞུ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་སྐུ་གསུམ་གྱི་བདག་ཉིད་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཞི་བ་མྱ་ངན་ལས་འདས་པ་དོན་དམ་པའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་འཕགས་པ་བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་རྣམས་ལ་སྐྱབས་སུ་

---

^{[མ་དཔེ་གཟིགས་ན་འདིར་གནོན།]}

མཆིའོ། ཞེས་ལན་གསུམ་བརྗོད་ཅིང་མེ་ཏོག་འཐོར་དུ་བཞུག་གོ།། ༈ །།དེ་ལྟར་སྐྱབས་སུ་འགྲོ་བའི་སྡོམ་པ་འདི་ལྟ་བུ་བླངས་ཤིང་ཐོབ་པའི་ཕན་ཡོན་དཔག་ཏུ་མེད་དེ། དེ་ཐམས་ཅད་ཇོ་བོས་དོན་བརྒྱད་དུ་བསྡུས་ནས་གསུངས་པ་རྣམས་གོ་བདེ་བའི་ཕྱིར་བརྗོད་ན། དཀོན་མཆོག་གསུམ་སྐྱབས་སུ་སོང་བ་ཙམ་གྱིས་ནང་པ་སངས་རྒྱས་པ་ཁྱུར་ཆུད་པས་དཀོན་མཆོག་གིས་ཐུགས་རྗེས་ཟིན་པ་དང་། བསླབ་སྡོམ་མཐའ་དག་གི་གཞི་རྟེན་དུ་འགྱུར་བ་དང་། མི་དང་མི་མ་ཡིན་གྱི་གནོད་འཚེ་མཐའ་དག་ལས་སྐྱོབས་ཅིང་བསྲུང་བ་དང་། ཐོག་མེད་ནས་བསགས་པའི་སྡིག་སྒྲིབ་ཐམས་ཅད་ཟད་པར་བྱེད་པ་དང་། བསོད་ནམས་ཀྱི་ཚོགས་རྒྱ་ཆེར་འཕེལ་བ་དང་། ཚེ་འཕོས་པ་ན་ངན་འགྲོ་ངན་སོང་ལོག་པར་ལྟུང་བར་མི་འགྱུར་བ་དང་། ལམ་གྱི་ཡོན་ཏན་ཁྱད་པར་ཅན་རྒྱུད་ལ་སྐྱེ་བ་དང་། བླ་ན་མེད་པའི་བྱང་ཆུབ་ཏུ་ཚང་རྒྱ་

---

^{[མ་དཔེ་གཟིགས་ན་འདིར་གནོན།]}

བར་འགྱུར་བ་སྟེ། སྐྱབས་འགྲོ་ཁྱད་པར་ཅན་གྱི་ཕན་ཡོན་ནི་དེ་ལྟ་བུ་འབྱུང་བ་ལགས།། ༈ །།དེ་ལྟར་སྐྱབས་སུ་འགྲོ་བའི་སྡོམ་པ་ཐོབ་ནས། དེའི་བསླབ་བྱ་དང་བསྲུང་བྱའི་གནས་རྣམས་ལ་སློབ་དགོས་ཏེ། དེ་ལ་མཆོག་གསུམ་སོ་སོའི་བསླབ་བྱ་དྲུག་དང་། ཐུན་མོང་གི་ལྔ་ཡོད་པ་རྣམས་ཐུགས་རྒྱུད་ལ་ངེས་པར་བྱས་ནས་སྤང་བླང་ཚུལ་བཞིན་སྒྲུབ་འཚལ་ཏེ། དེ་དག་གང་ཞེ་ན། དེ་ཡང་སངས་རྒྱས་ལ་སྐྱབས་སུ་སོང་ནས་ནི་འཇིག་རྟེན་གསུམ་ན་དེ་ལས་ལྷག་པའི་སྐྱབས་གནས་གང་ཡང་མ་མཆིས་པའི་ཕྱིར། འཇིག་རྟེན་གྱི་ལྷ་ཚངས་པ་བརྒྱ་བྱིན་ཕྱྭ་དང་དབང་ཕྱུག་སོགས་ནས། རང་རང་གི་ཕོ་ལྷ་དགྲ་ལྷ་ཡུལ་ལྷ་སོགས་གང་ལ་ཡང་སྐྱབས་གནས་མི་རེ། ཆོས་ལ་སྐྱབས་སུ་སོང་ནས་དམ་པའི་ཆོས་ནི་ཐོག་མཐའ་བར་དུ་

---

^{[མ་དཔེ་གཟིགས་ན་འདིར་གནོན།]}

དགེ་བའི་རང་བཞིན་ཡིན་པས་དེ་ལས་སྐྱབས་སུ་བྱས་ནས་ནི་སེམས་ཅན་ལ་གནོད་འཚེ་བྱེད་ན་སྡིག་པ་ཆེན་པོ་ཆེར་འགྱུར་བས་གཏན་ནས་སྤང་། དགེ་འདུན་ལ་སྐྱབས་སུ་སོང་ནས་གྲོགས་ཚང་པ་མཚུངས་པར་སྤྱོད་པའམ། ལྟ་བ་མཐུན་པ། སྤྱོད་པ་མཐུན་པ། སྐྱབས་གནས་མཐུན་པ་དང་འགྲོགས་དགོས་ཀྱི། དཀོན་མཆོག་ལ་སྐྱབས་སུ་མི་འཛིན་པ། ལྟ་བ་ལོག་པ། སྒྱུ་འབྲས་ལ་མི་བརྩི་བ་སྡིག་པ་སྤྱོད་པའི་གྲོགས་ལ་བསྟེན་པར་མི་བྱའོ། །དེ་ལྟར་དགག་པའི་བསླབ་བྱ་གསུམ་བསྟན་ནས། །གཉིས་པ་བསྒྲུབ་པའི་བསླབ་བྱ་ནི། སངས་རྒྱས་ལ་སྐྱབས་སུ་སོང་ཕྱིན་ཆད་ནས་བདེ་བར་གཤེགས་པའི་སྐུ་གཟུགས་མཆོད་རྟེན་གྱི་རིགས་བྲིས་འབུར་ཆེ་ཆུང་ལེགས་མི་ལེགས་ཅི་ལྟ་བུ་ཞིག་སྣང་ཡང་ཕྱག་མཆོད་བཀུར་བསྟི་

---

^{[མ་དཔེ་གཟིགས་ན་འདིར་གནོན།]}

ཞབས་གཏོགས་སུ་གང་འགྱུར་ལ་འབད་པ་མ་གཏོགས། བཤིག་བཅོ་བཅག་གྲུག་བརྡེག་བསྐྱུར་འགོགས་གཡུག་སོགས་མི་བྱ། བཙོངས་པའི་རིན་མི་ཟ། བུ་ལོན་གྱི་གཏའ་མར་བྱེད་པ་དང་རྩེ་མོའི་ཡོ་བྱད་དུ་བཀོལ་བ་སོགས་དཀོན་མཆོག་ལ་བརྙས་པར་འགྲོ་བའི་རིགས་སྤུ་ཙམ་མི་བྱ་བར་གུས་པར་བྱ། ཆོས་ལ་སྐྱབས་སུ་སོང་ནས་དམ་པའི་ཆོས་ཀྱི་རྟེན་ཡི་གེ་འབྲུ་གཅིག་ཡན་ཆོད་ལ་སྒྲིབ་པ་མི་གསོག་ཅིང་ཕྱག་མཆོད་བཀུར་སྟི་བྱ་ཚུལ་གོང་བཞིན་དང་། ཐེག་པ་དང་གྲུབ་མཐའ་ཆོས་ལུགས་གང་ལའང་སྐུར་པ་མི་གདབ་ཅིང་དག་སྣང་སྦྱང་། དགེ་འདུན་ལ་སྐྱབས་སུ་སོང་ནས་ངུར་སྨྲིག་གི་རྟགས་ཙམ་འཆང་བ་ཡན་ཆོད་ལ་འཕགས་པའི་དགེ་འདུན་དཀོན་མཆོག་ཏུ་འདུ་ཤེས་བསྐྱེད་ནས་གུས་པས་བཀུར་སྟི་བྱ་

---

^{[མ་དཔེ་གཟིགས་ན་འདིར་གནོན།]}

ཞིང་། བསྟན་པའི་སྒོར་བཞུགས་སོ་འཚལ་ལ་ལོག་བལྟ་ཆགས་སྡང་ཀུན་སློང་སྤང་ནས་ཅི་ནུས་ཀྱི་ཞབས་ཏོག་སྒྲུབས། ཁྱད་པར་དུ་བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་ནི་ཁྱིམ་པའམ་རབ་ཏུ་བྱུང་བ་རྟགས་དང་ཆ་ལུགས་ཇི་ལྟ་བུར་སྣང་ནའང་ཐེག་པ་ཆེན་པོའི་དགེ་འདུན་དཀོན་མཆོག་དངོས་ཀྱི་འདུ་ཤེས་བསྐྱེད་ཅིང་གུས་པར་བྱའོ།། ༈ །།དེ་ལྟར་དཀོན་མཆོག་སོ་སོའི་བསླབ་བྱ་བསྟན་ནས། དེ་རྣམས་ཐུན་མོང་གི་བསླབ་བྱ་ལྔ་ནི། །དཀོན་མཆོག་གསུམ་ལ་སྐྱབས་སུ་སོང་བ་རྣམས། རྣམ་པ་ཐམས་ཅད་དུ་ནོར་གྱི་བྱ་དགའ་ཆེན་པོའི་ལུས་དང་སྲོག་གི་ཕྱིར་ཡང་དཀོན་མཆོག་གསུམ་གྱི་སྤང་། དགོས་དོན་གལ་པོ་ཆེ་ཅི་ལྟ་བུ་ལ་ཐུགས་ཀྱང་དཀོན་མཆོག་ལ་གདབ་པ་ལས་ཐབས་གཞན་མི་བཙལ། ཕྱོགས་གང་དུ་འགྲོ་ཡང་ཕྱོགས་དེར་བཞུགས་པའི་སངས་རྒྱས་ཀྱི་ཞིང་ཁམས་ལ་

---

^{[མ་དཔེ་གཟིགས་ན་འདིར་གནོན།]}

ཕྱག་བྱ་ཞིང་སྐྱབས་འགྲོ་དང་གསོལ་བ་གདབ་སྟེ། ཕྱོགས་བཅུ་ཐམས་ཅད་སངས་རྒྱས་ཀྱི་ཞིང་གི་མ་ཁྱབ་པའི་ཕྱིར་རོ། །དུས་དང་དུས་ཀྱི་མཆོད་པ་ཅི་ནུས་དང་། ཅི་ཟ་ཅི་འཐུང་གི་ཕུད་ཀྱིས་དཀོན་མཆོག་མཆོད་ཅིང་། ནང་ནུབ་ཐམས་ཅད་དུ་སྐྱབས་སུ་འགྲོ་བའི་ཉམས་ལེན་སྤེལ་སྦྱང་ལ་འབད་རྩོལ་དུ་བྱ་བ་སྟེ། དེ་ལྟར་སྐྱབས་འགྲོའི་བསླབ་བྱ་དང་དམ་ཚིག་དེ་དག་བློ་ངེས་ཤིང་ལག་ལེན་དུ་ཐེབས་པར་མཛད་དགོས་པ་ལགས།། ༈ །།སྦྱོར་བའི་ཆོས་གསུམ་པ་བསོད་ནམས་ཀྱི་ཚོགས་བསགས་པའི་རིམ་པ་ནི། དེ་ཡང་ཁྱེད་ཅག་སྔོན་གྱི་ཚེ་རབས་མང་པོའི་གོང་ནས་ཀྱང་བསོད་ནམས་བསགས་པའི་འབྲས་བུས་ད་ལྟ་བྱང་ཆུབ་ཀྱི་རྒྱུ་དང་ལམ་ལ་མོས་ཤིང་ཞུགས་པའི་སྐལ་བ་ཅན་དུ་གྱུར་མོད་ལ། དེང་ཡང་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་

---

^{[མ་དཔེ་གཟིགས་ན་འདིར་གནོན།]}

སྐྱེ་བར་བྱེད་པ་ཡང་བསོད་ནམས་མངོན་པར་འདུ་བྱ་བ་ཉིད་གལ་ཆེ་བས་ན། ཡན་ལག་བདུན་གྱི་སྒོ་ནས་ཚོགས་བསགས་པར་བྱ་སྟེ། དེ་ལ་བསོད་ནམས་མ་ཡིན་པའི་ལས་གང་བགྱིས་པའི་གཉེན་པོར་བསོད་ནམས་ཀྱི་ཡན་ལག་སོ་སོ་ལ་འབད་པ་སྟེ། ཉོན་མོངས་པ་ང་རྒྱལ་གྱི་དབང་གིས་ཡུལ་ཁྱད་པར་ཅན་ལ་མ་གུས་པའི་གཉེན་པོར་ཕྱག་འཚལ་བ་དང་། འདོད་པ་དང་སེར་སྣའི་སྐྱོན་གྱིས་མཆོད་འོས་ལ་བསྙེན་ཅིང་བཀུར་བར་མ་བྱས་པའི་གཉེན་པོར་མཆོད་པ་འབུལ་བ་དང་། ཐོགས་མེད་ནས་བག་ཆགས་ངན་གོམས་གྱི་སྐྱོན་ལས། བྱ་བར་མི་རུང་བའི་ལས་ངན་བགྱིས་པའི་གཉེན་པོར་སྡིག་པ་བཤགས་པ་དང་། །ཕྲ་དོག་གི་མཐུས་གཞན་གྱི་ཡོན་ཏན་ལ་སྨོད་ཅིང་དགེ་བ་ལ་བར་ཆོད་བྱས་པའི་གཉེན་པོར་རྗེས་སུ་ཡི་རངས་

---

^{[མ་དཔེ་གཟིགས་ན་འདིར་གནོན།]}

སྒོམ་པ་གཏི་མུག་གི་དབང་གིས་དམ་པའི་ཆོས་སྤངས་པའི་གཉེན་པོར་ཆོས་འཁོར་བསྐུལ་བ་དང་། ཞེ་སྡང་དང་གནོད་སེམས་ཀྱི་སྐྱོན་གྱིས་སྐྱེས་བུ་དམ་པ་ལ་བསམ་སྦྱོར་ལོག་པ་བྱས་པའི་གཉེན་པོར་མྱ་ངན་ལས་མི་འདའ་བར་གསོལ་བ་གདབ་པ། དགེ་རྩ་ལ་ཡིད་མི་ཆེས་པ་དང་། ལོག་མིན་དུ་བསྔོས་པའི་གཉེན་པོར་དགེ་བ་བྱང་ཆུབ་ཆེན་པོར་བསྔོ་བ་སྟེ། བདུན་པོ་འདི་བསོད་ནམས་གསོག་པའི་ཐབས་མ་ལུས་པ་འདུ་ཞིང་བྱང་ཆུབ་དུ་སེམས་བསྐྱེད་པའི་མཐུན་རྐྱེན་མཆོག་ཏུ་གྱུར་པ་ལགས་པས། དེས་ན་ཚོགས་ཀྱི་ཞིང་དང་རྟེན་དུ་གྱུར་པ་ནི་དངོས་སུ་བཤམས་པའི་དཀོན་མཆོག་གི་རྟེན་ཁྱད་པར་ཅན་རྣམས་དང་། ཡིད་ཀྱིས་གསལ་བའི་རྟེན་མདུན་གྱི་ནམ་མཁར་དཀོན་མཆོག་

---

^{[མ་དཔེ་གཟིགས་ན་འདིར་གནོན།]}

རིན་པོ་ཆེ་རྣམས་དང་གཞན་ཡང་བླ་མ་སངས་རྒྱས་བྱང་སེམས་ཡི་དམ་མཁའ་འགྲོ་ཆོས་སྲུང་གི་ཚོགས་མ་ཚང་བ་མེད་པར་བཞུགས་པའི་མོས་པ་མཛད། དེ་ཙམ་དུ་མ་ཟད་དེ་ཕྱོགས་བཅུ་མཐའ་ཡས་པའི་སངས་རྒྱས་ཀྱི་ཞིང་གངྒའི་ཀླུང་གི་བྱེ་མ་སྙེད་ཀྱི་རྡུལ་ཕྲ་རབ་རེ་རེའི་ཁྱོན་ལ་ཡང་སངས་རྒྱས་ཀྱི་ཞིང་གྲངས་མེད་པ་བཞུགས་པའི་ཚུལ་ནི་འོ་སྐོལ་པོ་སྐྱེའི་བློས་དཔག་ཅིང་གཞལ་བའི་ཡུལ་དུ་མ་གྱུར་ལ། ཞིང་ཁམས་དེ་ཐམས་ཅད་ཀྱི་རྒྱལ་བ་སྲས་བཅས་ཀུན་གྱིས་མི་མཁྱེན་མི་གཟིགས་པ་ནི་སྐྲ་རྩེ་བརྒྱར་བཤག་པའི་ཆ་ཙམ་ཡང་མི་སྲིད་པ་ན། དེ་ཐམས་ཅད་ལ་ཕྱག་མཆོད་དང་ཡན་ལག་བདུན་པ་འབུལ་བའི་ཡུལ་དུ་ཉེ་བར་དམིགས་པ་དང་།། ༈ །།ཇི་ལྟར་འབུལ་བའི་ཐབས་ཀྱི་དང་པོར། ཁྱེད་ཅག་རང་རང་གི་ལུས་

---

^{[མ་དཔེ་གཟིགས་ན་འདིར་གནོན།]}

འདི་གཅིག་པུ་མ་ཡིན་པར་རང་ཉིད་ཅི་ལྟ་བུའི་ཕྱག་འཚལ་བ་སོ་བྱེ་བ་གྲངས་མང་པོ་ཡིད་ཀྱིས་སྤྲུལ་པ་དང་། མཁའ་མཉམ་གྱི་སེམས་ཅན་ཀུན་ཀྱང་ལྷན་གཅིག་གུས་པས་ཕྱག་འཚལ་བར་དམིགས་ལ། འདི་སྐབས་ཡན་ལག་བདུན་གྱི་འདོན་ཆ་ནི་དིང་སང་ཕལ་ཆེར་སྤྱོད་འཇུག་གི་གཞུང་བཞིན་མཛད་སྲོལ་མང་ནའང་། འདིར་ནི་རྒྱལ་བ་གྲངས་མེད་པའི་སྐུ་དང་ཞིང་ཁམས་ཀྱི་ཡོན་ཏན་གང་གིས་བ་སྤུའི་ཁུངས་གཅིག་ལ་རྫོགས་པའི་གོ་འཕང་བརྙེས་ཀྱང་སེམས་དོན་དུ་བྱང་སེམས་ཀྱི་ཚུལ་བསྟན་ནས་སྨོན་ལམ་བདེན་པ་ལ་མངའ་མཛད་པ་འཕགས་པ་ཀུན་ཏུ་བཟང་པོས་གསུངས་པ་བཞིན་བྱ་སྟེ། བླ་མ་དང་དཀོན་མཆོག་རིན་པོ་ཆེ་ཕྱོགས་བཅུའི་ཞིང་ཁམས་ནམ་མཁས་གང་ཁྱབ་ན་བཞུགས་པའི་རྒྱལ་བ་སྲས་བཅས་ཐམས་ཅད་ལ་

---

^{[མ་དཔེ་གཟིགས་ན་འདིར་གནོན།]}

བདག་ལུས་གྲངས་མེད་དུ་སྤྲུལ་བ་དེ་རྣམས་དང་སྐྱེ་འགྲོ་མཐའ་དག་གུས་ཕྱག་འཚལ་བར་མོས་པ་མཛད་ནས་ཚིག་འདི་རྗེས་བཟློས་མཛད་པར་ཞུ།། ༈ །།ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབ་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་མཛད་པ། །རིན་ཆེན་བྱང་ཆུབ་སེམས་ལ་ཕྱག་འཚལ་ལོ།། ༈ །།དེ་ལྟར་ཕྱག་འཚལ་བ་སྔོན་དུ་སོང་ནས། གཉིས་པ་

---

^{[མ་དཔེ་གཟིགས་ན་འདིར་གནོན།]}

མཆོད་པ་འབུལ་བའི་དང་པོར་བསྟོད་དབྱངས་ཀྱིས་མཆོད་པ་ནི། སྔོན་དེ་བཞིན་གཤེགས་པ་དུས་མཁྱེན་རྒྱལ་པོ་སྙན་དང་ངག་མཁན་དུ་གྱུར་ཚེ་བདེར་གཤེགས་རྩྭ་མཆོག་ལ་ཚིགས་སུ་བཅད་པའི་དབྱངས་ཀྱིས་བསྟོད་ནས། བྱང་ཆུབ་ཏུ་ཐུགས་བསྐྱེད་པའི་ལོ་རྒྱུས་ལྟ་བུ་ལྷག་བསམ་གྱིས་བསྟོད་དབྱངས་ཕུལ་བ་ནི་མཆོད་པའི་རབ་ཏུ་འགྱུར་ཞིང་། རྒྱལ་བ་རྣམས་ལ་བསྟོད་པས་མཉེས་པ་དང་སྨད་པས་མི་དགྱེས་པ་ལྟ་བུའི་འཛིན་རྟོག་ལས་འདས་ཀྱང་། རང་ཉིད་བསྟོད་པའི་བསོད་ནམས་ཚད་མེད་ཐོབ་པ་ནི་རྒྱུ་འབྲས་ཀྱི་རྟེན་འབྲེལ་ཡིན་ཕྱིར། ཕྱོགས་བཅུའི་འཇིག་རྟེན་རེ་རེའི་རྡུལ་ཕྲ་རབ་ཀྱི་ཁྱོན་རེ་ལ་ཞིང་ཁམས་གྲངས་མེད་པར་བཞུགས་པའི་བདེར་གཤེགས་སྲས་བཅས་ཐམས་ཅད་ལ་དབྱངས་ཀྱི་ཡན་ལག་མཐའ་ཡས་པས་རྒྱལ་བའི་ཡོན་ཏན་ལ་མངོན་

---

^{[མ་དཔེ་གཟིགས་ན་འདིར་གནོན།]}

པར་བསྔགས་པ་བདག་ཉིད་ཀྱི་སྤྲུལ་ཚོགས་དང་འགྲོ་ཀུན་ལྷན་ཅིག་པས་བསྟོད་པ་བྱེད་པར་མོས་ལ་འདི་བཞིན་རྗེས་ཟློས་མཛོད།། ༈ །།རྡུལ་གཅིག་སྟེང་ན་རྡུལ་རྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་བདག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱི། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །དེ་ནས་མཆོད་པ་འབུལ་བའི་ཡན་ལག་དངོས་ལ། ད་ལྟ་འདིར་དངོས་སུ་བཤམས་པའི་མཆོད་རྫས་འདི་དག་དམིགས་རྟེན་མཚོན་བྱེད་ཙམ་སྟེ། དོན་ལ་འདི་དག་རེ་རེ་ལས་ཀྱང་མཆོད་པའི་དངོས་པོ་བསམ་གྱིས་མི་ཁྱབ་པ་འདོད་པའི་ཡོན་ཏན་གང་ལ་ཅི་དགོས་ཟད་མེད་དུ་

---

^{[མ་དཔེ་གཟིགས་ན་འདིར་གནོན།]}

འབྱུང་བར་དམིགས་ཤིང་། གཞན་ཡང་གླིང་བཞི་བྱེ་བ་ཕྲག་བརྒྱའི་ཞིང་ན་འདོད་པའི་ཡོན་ཏན་ཕུན་སུམ་ཚོགས་པའི་བྱེ་བྲག་ཅི་ཡོད་པ་ཐམས་ཅད་ཀྱང་། འོ་སྐོལ་རྣམས་ལྟ་བུའི་རྨོངས་པ་བློ་ཆུང་གི་སེམས་ཁོག་ཏུ་ཆུད་པ་དཀའ་ནའང་། བྱང་ཆུབ་སེམས་དཔའ་ཆེན་པོ་འཕགས་པ་ཀུན་ཏུ་བཟང་པོའི་སྨོན་ལམ་གྱི་སྟོབས་ཚད་མེད་པའི་བདེན་པས་བྱིན་གྱིས་རླབས་ཀྱིས་སངས་རྒྱས་སྲས་བཅས་མ་ལུས་པའི་སྤྱན་སྔར་མཆོད་སྤྲིན་ནམ་མཁའི་མཛོད་དུ་གྱུར་བར་དམིགས་ཤིང་། རང་ཉིད་ཀྱི་ལུས་ལོངས་སྤྱོད་གཏན་འདུན་ཐམས་ཅད་ཀྱང་ལྟོས་མེད་དུ་འབུལ་བའི་མོས་པ་དང་བཅས་པས་རྗེས་ཟློས་འདི་བཞིན་མཛད་པར་ཞུ། །མེ་ཏོག་དམ་པ་འཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་བདུག་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །

---

^{[མ་དཔེ་གཟིགས་ན་འདིར་གནོན།]}

རྒྱལ་བ་དེ་དག་ལ་ཡང་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པས་ཁྱད་པར་འཕགས་པའི་ཚོགས་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །རྒྱལ་དང་དེ་སྲས་རྣམས་ལ་རྟག་ཏུ་ནི། །བདག་གི་ལུས་ཀུན་གཏན་དུ་འབུལ་བར་གྱིས། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱོད་ཀྱིས་འབངས་སུ་མཆི་བར་བགྱི།། ༈ །།གསུམ་པ་བླ་མེད་བྱང་ཆུབ་ལ་བགེགས་སུ་བྱེད་པ་ནི་དུག་གསུམ་གྱིས་ཀུན་ནས་བླངས་པའི་མི་དགེ་བ་རྣམས་ཡིན་ཏེ། །འདོད་ཆགས་ཞེ་སྡང་གཏི་མུག་

---

^{[མ་དཔེ་གཟིགས་ན་འདིར་གནོན།]}

གསུམ། །དེས་བསྐྱེད་ལས་ནི་མི་དགེ་བ། །ཞེས་པ་དེ་སྦྱང་ཞིང་དག་པར་བྱེད་པའི་ཐབས་ལ། རང་གཞན་མཁའ་ཁྱབ་ཀྱི་སེམས་ཅན་ཐམས་ཅད་ཀྱིས་འཁོར་བ་ཐོག་མེད་ནས་ད་ལྟ་ཡན་གྱི་མི་དགེ་སྡིག་པའི་ལས་རང་གིས་བགྱིས་པ་དང་གཞན་ལ་དགྱིད་དུ་བཅུག་པ་དང་སྡིག་པ་ལ་རྗེས་སུ་ཡི་རངས་པའི་ལས་ངན་མཐའ་དག་ལ་དུག་འཐུང་བ་ལྟ་བུའི་འགྱོད་པ་དྲག་པོ་བསྐྱེད་པ་ནི་རྣམ་པར་སུན་འབྱིན་པའི་སྟོབས་ཡིན་ལ། །དེའི་གཉེན་པོར་ཚོགས་བསགས་སྒྲིབ་སྦྱོང་གི་ལས་ལ་བརྩོན་པ་ནི་གཉེན་པོ་ཀུན་ཏུ་སྤྱོད་པའི་སྟོབས་དང་། ཕྱིན་ཆད་སྡིག་པ་སྲོག་ལ་བབས་ཀྱང་མི་དགྱིད་པའི་དམ་བཅའ་བཟུང་བ་ནི་ཉེས་པ་ལས་བཟློག་པའི་སྟོབས་དང་། བླ་མ་དང་དཀོན་མཆོག་གི་དྲུང་དུ་སྡིག་བཤགས་སྐྱབས་འགྲོ་སེམས་བསྐྱེད་ལ་འབད་པ་ནི་རྟེན་གྱི་སྟོབས་

---

^{[མ་དཔེ་གཟིགས་ན་འདིར་གནོན།]}

ཏེ། དེ་ལྟར་སྟོབས་བཞིའི་སྒོ་ནས་བཤགས་ན་སྡིག་པ་ཚན་པོ་ཆེ་ཇི་ལྟ་བུ་ཡང་སྦྱོང་བར་ནུས་ཏེ། སྔོན་རྒྱལ་པོ་མ་སྐྱེས་དགྲ་འཚམ་མེད་པ་ལྔ་ཚང་བར་བྱས་པའི་སྡིག་པོ་ཆེ་ཡང་། རང་དང་མཁའ་ཁྱབ་ཀྱི་སེམས་ཅན་ལྷན་ཅིག་པའི་སྡིག་པ་བཤགས་པས་སྐད་ཅིག་ཙམ་ལ་དག་པར་གྱུར་པའི་མོས་པ་བཞིན། ཁྱེད་ཅག་རང་རང་གི་སྡིག་སྒྲིབ་གང་ཅི་ཡོད་པ་རྣམས་དང་སེམས་ཅན་ཐམས་ཅད་ཀྱི་སྡིག་པ་ཡང་བྱང་བར་དམིགས་པ་དང་། སླན་ཆད་སྡིག་པར་གྱུར་པ་གཏན་མི་དགྱིད་པའི་དམ་བཅའ་དང་ལྡན་པའི་ངང་ནས་རྗེས་ཟློས་འདི་བཞིན་མཛད་འཚལ། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གི་སོ་སོར་བཤགས། །བདག་ནི་ཁྱོད་ཀྱིས་ཡོངས་སུ་བཟུང་བས་ན། །

---

^{[མ་དཔེ་གཟིགས་ན་འདིར་གནོན།]}

སྲིད་ན་མི་འཇིགས་སེམས་ཅན་ཕན་པར་དགྱིད། །སྔོན་གྱི་སྡིག་ལས་ཡང་དག་འདའ་དགྱིད་ཅིང་། །སྡིག་པ་གཞན་ཡང་སླན་ཆད་མི་དགྱིད་དོ།། ༈ །།བཞི་པ་གཞན་གྱི་དགེ་བ་ལ་ཡི་རང་ཞིང་དག་སྣང་དང་དགའ་བ་སྒོམ་པ་ནི་རང་ཉིད་ཀྱིས་དགེ་རྩ་བགྱིད་པ་དང་ཁྱད་མེད་པའི་བསོད་ནམས་ཐོབ་སྟེ། སྔོན་རྒྱལ་པོ་གསལ་རྒྱལ་གྱིས་དེ་བཞིན་པ་ཉན་ཐོས་ཀྱི་དགེ་འདུན་རྒྱ་མཚོའི་ཚོགས་དང་བཅས་པ་ལ་ཞག་བདུན་གྱི་བར་དུ་མཆོད་པའི་ཡོ་བྱད་རྒྱ་ཆེན་པོས་བསྙེན་ཅིང་བསྐུར་བ་དེ་དབུལ་པོ་དེས་པ་སོགས་སྤྲང་པོ་ལྔ་བརྒྱའི་ཚོགས་ཀྱིས་མཐོང་བས། བདག་ཅག་བསོད་ནམས་དམན་པས་སངས་རྒྱས་མཆོད་པར་རྔོ་མ་ཐོབ་མོད་ཀྱི། རྒྱལ་པོས་འདི་ལྟ་བུ་མཆོད་པ་ནི་ངོ་མཚར་ཆེའོ་སྙམ་པའི་ཡི་རངས་བྱས་པ་དེ་སངས་རྒྱས་ཀྱི་མཁྱེན་ཕྱིར་

---

^{[མ་དཔེ་གཟིགས་ན་འདིར་གནོན།]}

ཉིན་དྲུག་གི་བར་དུ་དགེ་བ་བསྔོ་བ་ནི་སྤྲང་པོ་ཡི་རངས་སྒོམས་མཁན་རྣམས་ལ་དམིགས་ནས་མཛད་པའི་ལོ་རྒྱུས་ལྟར། རྗེས་སུ་ཡི་རངས་གིས་བསོད་ནམས་དཔག་ཏུ་མེད་པས། ཁྱེད་ཅག་གིས་ཀྱང་ཕྱོགས་བཅུའི་འཇིག་རྟེན་གྱི་ཁམས་ཀུན་ན་རྒྱལ་བ་སྲས་བཅས་རྣམས་ཀྱིས་ཟག་མེད་ཡེ་ཤེས་ཀྱི་ཚོགས་ཆེན་རྒྱུན་ཆད་མེད་པ་དང་། གཞན་ཡང་ཉན་རང་སོ་སྐྱེ་མཆོག་དམན་བར་མ་ཀུན་གྱིས། འདུས་བྱས་འདུས་མ་བྱས་པ་བསོད་ནམས་དང་ཡེ་ཤེས་ཀྱི་ཚོགས་ཅི་ལྟ་བུ་བསགས་པ་མཐའ་དག་ལ་རྗེས་སུ་ཡི་རངས་ཤིང་། དེ་ཐམས་ཅད་བར་ཆད་མེད་པར་འགྲུབ་པར་གྱུར་ཅིག་སྙམ་པའི་ངང་ནས་རྗེས་ཟློས་མཛད་པར་ཞུ།། ༈ །།ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་

---

^{[མ་དཔེ་གཟིགས་ན་འདིར་གནོན།]}

རྗེས་སུ་བདག་ཡི་རང་།། ༈ །།ལྔ་པ་གཏི་མུག་གི་གཉེན་པོར་ཆོས་འཁོར་བསྐུལ་བ་ནི། སངས་རྒྱས་རྣམས་འཇིག་རྟེན་དུ་བྱོན་པ་དེ་དམ་པའི་ཆོས་བསྟན་པས་སེམས་ཅན་སྨིན་གྲོལ་དུ་མཛད་པ་ལས་གཞན་པའི་དོན་མ་མཆིས་རུང་། དམ་པའི་ཆོས་ནི་འབྱུང་བ་དཀོན་ལ་དེ་ཡང་སོ་སོའི་སྐལ་བ་དང་གསོལ་བ་འདེབས་སོ་ལ་ལྟོས་པ་ལས་ནམ་ཡིན་གསུང་བ་མི་སྲིད་ཅིང་། བསྐལ་བ་བཟང་པོའི་སངས་རྒྱས་སྟོང་ལ་ཡང་ཚངས་པས་གསོལ་བ་མ་བཏབ་བར་དུ་ཆོས་འཁོར་མི་བསྐོར་བ་ཡིན་ཕྱིར་ཁྱེད་ཅག་རྣམས་ཀྱི་དད་པ་དང་ལྷག་བསམ་གྱི་མཐུ་ལས་སྤྲུལ་པའི་ཚངས་པ་གདོང་བཞི་པ་གསེར་གྱི་འཁོར་ལོ་རྩིབས་སྟོང་དང་ལྡན་པ་རེ་འཐོགས་པ་གྲངས་མེད་པར་སྤྲུལ་ནས་ཕྱོགས་

---

^{[མ་དཔེ་གཟིགས་ན་འདིར་གནོན།]}

བཅུ་མཐའ་ཡས་ན་བཞུགས་པའི་རྒྱལ་བ་རེ་རེའི་དྲུང་དུ་ཚངས་པ་རེ་སོང་སྟེ། འཁོར་ལོ་ཕུལ་ཞིང་ཆོས་གསུང་བར་གསོལ་བ་འདེབས་པར་མོས་པས་རྗེས་ཟློས་མཛད་པར་ཞུ།། ༈ །།གང་ན་ཕྱོགས་བཅུའི་འཇིག་རྟེན་སྒྲོལ་མ་རྣམས། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གི་ཐམས་ཅད་ལ། །འཁོར་ལོ་བླ་ན་མེད་པར་བསྐོར་བར་བསྐུལ།། ༈ །།དྲུག་པ་གསོལ་བ་འདེབས་པའི་ཡན་ལག་ནི། །འོ་སྐོལ་འཇིག་རྟེན་གྱི་ཁམས་འདིར་སྒྲོན་མའི་བསྐལ་བ་དང་མུན་པའི་སྐལ་པ་གཉིས་ལས། སངས་རྒྱས་བྱོན་ཏེ་ཆོས་གསུངས་ཏེ་བསྟན་པ་གནས་པ་ནི་སྒྲོན་བསྐལ་དང་། སངས་རྒྱས་མྱ་ངན་ལས་འདས་ནས་ཆོས་ནུབ་པ་ནི་མུན་བསྐལ་ཏེ། མུན་བསྐལ་ཁྲི་ཕྲག་མང་པོའི་བར་མཚམས་སུ་སྒྲོན་

---

^{[མ་དཔེ་གཟིགས་ན་འདིར་གནོན།]}

བསྐལ་རེ་རེ་ཙམ་ལས་མི་འབྱུང་བས་སངས་རྒྱས་འབྱུང་བ་ནི་དཀོན་ཞིང་། །སངས་རྒྱས་ཟག་མེད་ཡེས་ཀྱི་སྐུ་ལ་སྐྱེ་འཆིའི་མཚན་མ་ལས་འདས་ཀྱང་། གདུལ་བྱའི་རྟག་འཛིན་གཞིག་ཕྱིར་ཞི་བའི་དབྱིངས་སུ་མྱ་ངན་ལས་འདས་འདའ་ཚུལ་སྟོན་པར་མཛད་པ་རྣམས་ལ་གསོལ་བཏབ་ན། གང་རྫུ་འཕྲུལ་གྱི་རྐང་པ་ལ་དབང་ཐོབ་པས་བསྐལ་བའམ་བསྐལ་བ་ལས་ལྷག་པར་ཡང་བཞུགས་པར་འགྱུར་རོ། །ཞེས་སངས་རྒྱས་ཉིད་ཀྱི་གསུངས་པས་ན། ཁྱེད་ཅག་རང་རང་བྱང་ཆུབ་སེམས་དཔའམ་མོས་པ་དང་སྨོན་ལམ་ལ་དབང་ཐོབ་པ་ལག་ན་འཆི་མེད་ཀྱི་བདུད་རྩི་འཐོགས་པ་གྲངས་མེད་པར་གྱུར་ཏེ། ཕྱོགས་བཅུའི་རྒྱལ་བ་མྱ་ངན་ལས་འདའ་བཞེད་པ་གང་མཆིས་ཀྱི་སྤྱན་སྔར་རང་ཉིད་རེ་རེ་

---

^{[མ་དཔེ་གཟིགས་ན་འདིར་གནོན།]}

འཁོད་ནས་འཆི་བ་མེད་པའི་བདུད་རྩི་ཕུལ་ཞིང་ཐལ་མོ་སྦྱར་བས། ཇི་སྲིད་འགྲོ་བ་ཐམས་ཅད་བྱང་གྲོལ་ལ་མ་འཁོད་ཀྱི་བར་དུ་མྱ་ངན་ལས་འདའ་ཚུལ་མི་སྟོན་པར་གསོལ་བ་འདེབས་པར་དམིགས་ནས་རྗེས་ཟློས་མཛད་པར་ཞུ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་རྙེད་བཞུགས་པར་ཡང་། །བདག་གི་ཐལ་མོ་རབ་སྦྱར་གསོལ་བར་དགྱིད།། ༈ །།བདུན་པ་བསྔོ་བ་ནི། དེ་ཡང་དགེ་བའི་རྩ་བ་ཅི་ལྟར་བསགས་པ་ཐམས་ཅད་ལ་བསྔོ་བའི་རྒྱས་མ་ཐེབས་ན་གོང་དུ་མི་འཕེལ་བར་ཟད་པར་འགྱུར་ལ། གནས་མིན་དུ་བསྔོས་ན་བྱང་ཆུབ་ཀྱི་རྒྱུར་མི་འགྱུར་གྱི་ཁར་བགེགས་སུ་འགྱུར་ཕྱིར། དགེ་བ་ཆེ་ཆུང་གང་ཡང་སེམས་ཅན་ཐམས་ཅད་བྱང་ཆུབ་ཐོབ་པའི་རྒྱུར་བསྔོ་དགོས་པ་ཉིད་དེ། ཡུམ་ཤེར་

---

^{[མ་དཔེ་གཟིགས་ན་འདིར་གནོན།]}

ཕྱིན་ལས། དགེ་བའི་རྩ་བ་ཐམས་ཅད་ཀྱང་རྣམ་པ་ཐམས་ཅད་མཁྱེན་པ་ཉིད་མ་གཏོགས་པ་ཉན་ཐོས་ཀྱི་སའམ་རང་སངས་རྒྱས་ཀྱི་སར་བསྔོ་བར་མི་བྱའོ། །ཞེས་གསུངས་པ་བཞིན་དང་། བྱང་ཆུབ་ཏུ་བསྔོ་བའི་ཐབས་དང་ཚུལ་ཇི་ལྟ་བ་རང་ཅག་སོ་སྐྱེས་ཤེས་པར་མ་གྱུར་ནའང་། བྱང་ཆུབ་སེམས་དཔའ་འཇམ་དཔལ་དང་ཀུན་བཟང་སོགས་ཀྱིས་ཇི་ལྟར་བསྔོས་པ་བཞིན་བདག་གིས་ཀྱང་ཡོངས་སུ་བསྔོ་བར་བགྱིའོ། །ཞེས་པས་ཀྱང་ཟབ་མོའི་བསྔོ་བར་འགྱུར་ཏེ། ཅིའི་ཕྱིར་ན། བདག་དང་འགྲོ་ཀུན་གྱི་དགེ་རྩ་རྣམས་བྱང་ཆུབ་ཀྱི་རྒྱུ་རུ་དམིགས་པ་དེ་ནི་མཚན་བཅས་སམ་དམིགས་བཅས་ཀྱི་བསྔོ་བ་ཡིན་ལ། དོན་དམ་པའི་བསྔོ་བ་ནི་དམིགས་མཚན་གྱིས་མ་བསླད་པའི་འཁོར་གསུམ་ཡོངས་དག་ཉིད་ཡིན་མོད་ཀྱི། དེའི་ཚུལ་ཇི་ལྟ་བ་ནི་འོ་སྐོལ་

---

^{[མ་དཔེ་གཟིགས་ན་འདིར་གནོན།]}

ལས་དང་པོ་པས་རྟོགས་པར་དཀའ་ཕྱིར་འཕགས་པ་རྣམས་ཀྱི་རྗེས་སུ་འབྲང་ནས་བསྔོ་བར་བྱ་བ་ཡིན་པས་འདི་བཞིན་རྗེས་ཟློས་མཛད་པར་ཞུ།། ༈ །།ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རངས་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གཞན་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ།། ༈ །།དེ་ལྟར་འདི་ཡན་ཆད་ཀྱིས་སེམས་བསྐྱེད་པའི་སྔོན་དུ་འགྲོ་བའི་ལས་རིམ་རྣམས་ལེགས་པར་གྲུབ་པ་ལགས།། ༈ །།དངོས་གཞིའི་ཆོ་ག་ལ་ཡང་དང་པོར་སེམས་བསྐྱེད་པའི་དགེ་བའི་བཤེས་གཉེན་ལ་སངས་རྒྱས་དངོས་ཀྱི་འདུ་ཤེས་དང་། སེམས་བསྐྱེད་ཀྱི་ཡོན་ཅི་འབྱོར་

---

^{[མ་དཔེ་གཟིགས་ན་འདིར་གནོན།]}

འབུལ་བར་གསུངས་ཏེ། སྔོན་གྱི་རྒྱལ་བ་རྣམས་ཀྱང་བྱང་ཆུབ་ཀྱི་སྤྱོད་པའི་སྐབས་སུ་འབྱོར་པའི་ཁྱད་པར་སྣ་ཚོགས་བྱུང་སྟེ། དེ་བཞིན་གཤེགས་པ་གྲགས་སྦྱིན་འཁོར་ལོ་བསྒྱུར་བའི་རྒྱལ་པོར་གྱུར་ཚེ་བདེར་གཤེགས་ཟླ་བའི་ཏོག་ལ་གཙུག་ལག་ཁང་བྱེ་བ་ཕྲག་ཕུལ་ནས་བྱང་ཆུབ་ཏུ་ཐུགས་བསྐྱེད་པ་དང་། བདེར་གཤེགས་བཀོད་པའི་རྒྱལ་པོ་འཁོར་བསྒྱུར་གྱི་ཚེ་དེ་བཞིན་གཤེགས་པ་སྣང་བའི་འོད་ལ་བཻཌཱུརྱའི་ཁང་བཟང་ཕུལ་ནས་ཐུགས་བསྐྱེད་ཚུལ་སོགས་དང་། འབྱོར་པ་ཆུང་བས་ནི་ཆུང་ངུ་ཕུལ་བས་ཀྱང་འགྲུབ་སྟེ། བདེར་གཤེགས་འོད་འཕྲོ་གྲོང་ཁྱེར་གྱིས་འཚོ་བ་སར་གྱུར་ཚེ། དེ་བཞིན་གཤེགས་པ་འོད་མཐའ་ཡས་ལ་རྩྭའི་སྒྲོན་མེ་ཞིག་ཕུལ་ནས་ཐུགས་བསྐྱེད་པ་དང་། བདེར་གཤེགས་སེང་གེ་

---

^{[མ་དཔེ་གཟིགས་ན་འདིར་གནོན།]}

ཚེམ་བུ་སར་གྱུར་བ་ན་དེ་བཞིན་གཤེགས་པ་ང་རོ་སྙན་པ་ལ་ཕྱག་བདར་ཁྲོད་ཀྱི་ལྷན་པ་ཐལ་མོ་ཙམ་ཞིག་ཕུལ་ནས། ཐུགས་བསྐྱེད་པ་དང་། བདེར་གཤེགས་ཡོན་ཏན་འཕྲེང་ལྡན་དབུལ་པར་གྱུར་ཚེ། དེ་བཞིན་གཤེགས་པ་འགྱིངས་ལྡན་བཞུད་ལ་ཐལ་མོ་སྦྱར་བས་ཕྱག་ལེན་གསུམ་བཙལ་ནས་ཐུགས་བསྐྱེད་ཚུལ་སོགས་མཐའ་ཡས་པ་མཆིས་པས་ན། །ཁྱེད་ཅག་གིས་ཀྱང་བདག་སློབ་དཔོན་ལ་སེམས་བསྐྱེད་ཀྱི་ཡོན་དུ་མཎྜལ་ཞིག་འབུལ་བ་ཞུ།། ༈ །།དེ་ནས་སྨོན་འཇུག་གི་ཆོ་ག་དངོས་ནི་གོང་དུ་སྨོས་པ་བཞིན་ཤིང་རྟའི་སྲོལ་གཉིས་པོ་གང་ལས་བླངས་ཡང་ཆོག་པ་ལས། རྟེན་ཁྱིམ་པ་ཕོ་མོ་ལྟ་བུ་མཐུན་མོང་བའི་སློབ་མ་ལ་འབོགས་ན། འཇམ་དབྱངས་དང་ཀླུ་སྒྲུབ་སོགས་ལས་བརྒྱུད་པའི་ཕྱག་བཞེས་ལྟར་འབོགས་པའི་ཐབས་ལ་སྨོན་འཇུག་གཉིས་ཀྱི་དང་པོར་བློ་སྦྱང་བ་ནི།། ༈ །།ད་ནི་ཁྱེད་རང་རྣམས་བླ་ན་མེད་པའི་བྱང་ཆུབ་

---

^{[མ་དཔེ་གཟིགས་ན་འདིར་གནོན།]}

ཀྱི་སེམས་བསྐྱེད་རྒྱུའི་ངོ་བོ་དེ་གང་ལྟ་བུ་ཞིག་ཡིན་སྙམ་ན། ནམ་མཁས་གར་ཁྱབ་ཀྱི་འཇིག་རྟེན་ཐམས་ཅད་ནི་སྐྱེ་འགྲོ་སེམས་ཅན་གྱིས་མ་ཁྱབ་པ་མེད། སེམས་ཅན་གྱིས་གར་ཁྱབ་ལས་དང་ཉོན་མོང་པས་ཁྱབ། དེས་གར་ཁྱབ་སྡུག་བསྔལ་གྱིས་ཁྱབ་པ་ཡིན་ཚེ། སྐྱེ་འགྲོ་མཐའ་དག་སྡུག་བསྔལ་བཟོད་པར་དཀའ་བ་སྣ་ཚོགས་ཀྱིས་རྟག་ཏུ་གཟིར་ཞིང་མནར་བ་ཡིན་ནའང་། སྡུག་བསྔལ་ལ་སྡུག་བསྔལ་དུ་མ་ཤེས་པས་ད་དུང་འཁོར་བ་གཏན་འཁྱམས་དུ་བྱེད་པའི་རྒྱུ་ཐབས་འབའ་ཤིག་སྒྲུབ་པ་འདི་ཐམས་ཅད་ནི། རང་གི་ཚེ་རབས་ཐོག་མེད་ཀྱི་དྲིན་ཅན་ཕ་མ་ཤ་སྟག་ཏུ་གྱུར་བ་རྣམས་ལ་ཕྲལ་དང་ཡུན་གྱི་བདེ་བ་སྒྲུབ་ཕྱིར། རང་ཉིད་ཀྱི་སྒོ་གསུམ་གཏན་འདུན་དང་བཅས་པ་འགྲོ་བ་ཀུན་གྱི་ཆེད་དུ་གཏོང་བ་ལ་བསླབ་དགོས་ཏེ། སྔོན་གྱི་རྒྱལ་བ་ཐམས་ཅད་བྱང་ཆུབ་ཀྱི་

---

^{[མ་དཔེ་གཟིགས་ན་འདིར་གནོན།]}

སྤྱད་པ་སྤྱོད་ཚེ་རྒྱལ་སྲིད་བུ་དང་ཆུང་མ་བང་མཛོད་མ་ལུས་བཏང་བ་ལྟ་ཅི་སྨོས་ཏེ། རང་གི་མིག་དང་མགོ་དང་ཡན་ལག་ཤ་ཁྲག་ཐམས་ཅད་སེམས་ཅན་ལ་ལྟོས་མེད་དུ་བཏང་བས་བྱང་ཆུབ་བརྙེས་པ་ཡིན་ནའང་། འོ་སྐོལ་རྣམས་རང་ཉིད་ཁོ་ན་ལ་གཅེས་པར་བཟུང་སྟེ། ཕྱི་ནས་གོས་དང་རྒྱན་གྱི་ནི་སྤུངས། ནང་ནས་ཟས་དང་སྐོམ་གྱིས་ནི་བརྒྱངས། ཟས་གོས་ཙམ་སྒྲུབ་པའི་དོན་ལའང་སྡིག་པ་མི་དགེ་དང་གཡོ་རྒྱུ་ཟོལ་ཟོག་སྣ་ཚོགས་ཤིག་བྱེད་ཅིང་། ནམ་གཞག་གཏན་དོན་བྱང་ཆུབ་སྒྲུབ་པའི་འདུན་པ་ཏིལ་འབྲུ་ཙམ་ཡང་ཡིད་ལ་མི་འཁོར་བར་འདི་འདྲ་བས་མི་ཚེ་ཡུད་ཀྱི་འདའ་ཏེ། ཡང་ཡང་སྐྱེ་ཤི་འབྱུང་འཇུག་གི་འཁོར་ལོས་འཁོར་བར་གཏན་འཁྱམས་སུ་གྱུར་ཚུལ་འདི་ལ་ལེགས་པར་བསམ་ནས། ད་ཕྱིན་ཆད་ནས་རང་ལུས་ལོངས་སྤྱོད་བདེ་དགེ་བསོད་ནམས་ཅི་དང་ཅི་ཡོད་པ་མཐའ་དག་ཕ་

---

^{[མ་དཔེ་གཟིགས་ན་འདིར་གནོན།]}

མ་མཁའ་མཉམ་གྱི་སེམས་ཅན་ལ་ཕན་པ་དང་བདེ་བའི་དོན་ཁོ་ནའི་ཆེད་དུ་བཏང་བར་བྱའོ་སྙམ་པའི་སེམས་བརྟན་ཞིང་སྙིང་སྟོབས་ཀྱི་གོ་ཆ་སྐྱེད་དེ། ཚིག་འདི་རྗེས་ཟློས་མཛད་པར་ཞུ། །དེ་ལྟར་འདི་དག་ཀུན་བྱས་པའི། །དགེ་བ་བདག་གིས་བསགས་པ་གང་། །དེས་ནི་མཁའ་མཉམ་སེམས་ཅན་གྱི། །སྡུག་བསྔལ་ཐམས་ཅད་སེལ་བར་ཤོག །ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་བ་ཐམས་ཅད་ཀྱང་། །སེམས་ཅན་ཀུན་གྱི་དོན་གྱི་ཕྱིར། །ཕངས་པ་མེད་པར་གཏང་བར་བྱ། །ཐམས་ཅད་བཏང་བས་མྱ་ངན་འདའ། །བདག་བློ་མྱ་ངན་འདས་པ་སྒྲུབས། །ཐམས་ཅད་གཏོང་བ་ཆབ་གཅིག་ལ། །སེམས་ཅན་རྣམས་ལ་གཏོང་བ་མཆོག །བདག་གིས་ལུས་ཅན་ཐམས་ཅད་ལ། །ལུས་འདི་ཅི་བདེར་བྱིན་ཟིན་གྱི། །རྟག་ཏུ་གསོད་

---

^{[མ་དཔེ་གཟིགས་ན་འདིར་གནོན།]}

དང་སྨོད་པའམ། །བརྡོག་སོགས་ཅི་དགར་བྱེད་ལ་རག །བདག་གི་ལུས་ལ་འཚེ་བྱེད་དམ། །ཅོ་འདྲི་ག་ཤའི་རྒྱུ་བྱེད་ཀྱང་། །བདག་གི་ལུས་འདི་བྱིན་ཟིན་གྱི། །འདི་ཡི་ཁ་དས་ཅི་ཞིག་བྱ། །དེ་ལ་གནོད་པ་མི་འགྱུར་བའི། །ལས་གང་ཡིན་པ་བྱེད་དུ་ཆུག །བདག་ལ་དམིགས་ནས་ནམ་དུ་ཡང་། །འགའ་ཡང་དོན་མེད་མ་གྱུར་ཅིག །བདག་ལ་དམིགས་ནས་གང་དག་གིས། །ཁྲོ་འམ་དད་པའི་སེམས་བྱུང་བ། །དེ་ཉིད་རྟག་ཏུ་དེ་དག་གི། །དོན་ཀུན་འགྲུབ་པའི་རྒྱུར་གྱུར་གཅིག །གང་དག་བདག་ལ་ཁ་ཟེར་རམ། །གཞན་དག་གནོད་པ་བྱེད་པའམ། །དེ་བཞིན་འཕྱར་ཁ་གཏོང་ཡང་རུང་། །ཐམས་ཅད་བྱང་ཆུབ་སྐལ་ལྡན་གྱུར། །བདག་ནི་མགོན་མེད་རྣམས་ཀྱི་མགོན། །ལམ་ཞུགས་རྣམས་ཀྱི་དེད་དཔོན་དང་། །བརྒལ་འདོད་རྣམས་ཀྱི་གྲུ་དང་ནི། །གཟིངས་དང་ཟམ་པ་ཉིད་གྱུར་ཅིག །

---

^{[མ་དཔེ་གཟིགས་ན་འདིར་གནོན།]}

གླིང་དོན་གཉེར་ལ་གླིང་དང་ནི། །གནས་མལ་འདོད་ལ་གནས་མལ་དང་། །བདག་ནི་ལུས་ཅན་བྲན་འདོད་པ། །ཀུན་གྱི་བྲན་དུ་འགྱུར་བར་ཤོག །ཡིད་བཞིན་ནོར་བུ་བུམ་པ་བཟང་། །རིག་སྔགས་གྲུབ་དང་སྨན་མཆོག་དང་། །དཔག་བསམ་གྱི་ནི་ཤིང་དག་དང་། །ལུས་ཅན་རྣམས་ལ་འདོད་འཇོར་ཤོག །ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་དང་། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུག་པའི། །སེམས་ཅན་ཁམས་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་རྒྱུར་ཡང་ཤོག། ༈ །།དེས་ནི་བྱང་ཆུབ་སེམས་དཔའི་སྤྱོད་པ་དང་སྙིང་སྟོབས་ཁྱད་པར་ཅན་ལ་བློ་སྦྱང་བ་ཡིན་ཏེ། ཚུལ་འདི་ལ་བློ་

---

^{[མ་དཔེ་གཟིགས་ན་འདིར་གནོན།]}

མ་འབྱོངས་བ་ནི་བྱང་བསྡོམ་ལེན་པའི་ཐབས་ནམ་ཀྱང་མི་འབྱུང་བའི་ཕྱིར། དང་པོར་འདི་ལྟ་བུ་ལ་བློ་ངེས་པར་བྱ་དགོས་ལ། དེ་ནས་བྱང་ཆུབ་ཀྱི་སེམས་དངོས་ནི། དེ་ཡང་འཁོར་འདས་ཀྱི་ཆོས་ཐམས་ཅད་དོན་དམ་པར་སྤྲོས་པའི་མཐའ་ཐམས་ཅད་དང་བྲལ་བའི་རང་བཞིན་སྟོང་པ་ཉིད་ལས་མ་འདས་ཀྱང་། ཀུན་རྫོབ་ཀྱི་འཆར་སྒོ་འགགས་མེད་ལས་འཁོར་འདས་བདག་གཞན་བདེ་སྡུག་སོགས་དུ་མར་སྣང་ཞིང་། ཇི་ལྟར་སྣང་ཡང་དོན་ལ་བདེན་པར་གྲུབ་པ་རྡུལ་ཕྲ་རབ་ཙམ་ཡང་མེད་ཅིང་། མེད་བཞིན་སྣང་ལ་སྣང་བཞིན་བདེན་པར་མ་གྲུབ་པ་ནི་ཆོས་ཐམས་ཅད་ཀྱི་མཚན་ཉིད་ཡིན་ཀྱང་། སེམས་ཅན་རྣམས་ཀྱིས་དེ་ལྟ་བུའི་ཚུལ་མ་རྟོགས་པས་མེད་སྣང་འཁྲུལ་པའི་བག་ཆགས་ལ་བདེན་ཞེན་ཨ་འཐས་ཏེ། འཁོར་བའི་སྡུག་བསྔལ་མཐའ་མེད་པས་རྟག་ཏུ་ཉམས་ཐག་པ་འདི་ཐམས་ཅད་དྲིན་ཅན་ཕ་མ་འབའ་

---

^{[མ་དཔེ་གཟིགས་ན་འདིར་གནོན།]}

ཤིག་ཡིན་ཚེ་བདག་གིས་བདེ་ལ་འགོད་དགོས། བཀོད་པར་བྱེད་པ་ལ་རང་ཉིད་ལ་དེའི་ནུས་པ་མ་མཆིས་པས་ན། བྱང་ཆུབ་ཀྱི་གོ་འཕང་ཐོབ་པར་མྱུར་དུ་འབད་པའི་སེམས་སྔར་མ་སྐྱེས་པ་དེ་ད་ལྟ་རྟེན་འབྲེལ་རྒྱུ་རྐྱེན་ཚང་བ་ལ་བརྟེན་ནས་བསྐྱེད་པ་ལགས་ཤིང་། དེ་ལྟ་བུ་སེམས་ཅན་གྱི་དོན་དུ་སངས་རྒྱས་ཐོབ་པར་བྱའོ་སྙམ་པ་ཞེ་ཐག་པ་ནས་སྐྱེས་པ་དེ་སྨོན་པ་བྱང་ཆུབ་ཀྱི་སེམས་ཡིན། དེ་ལྟར་སྨོན་པ་ཙམ་ལ་བཞག་པས་མི་ཆོག་སྟེ། དཔེར་ན་ཆུའི་ཕ་རོལ་ཏུ་སྒྲོལ་བར་འདོད་པས་གྲུ་གཟིངས་ཀྱི་ནང་དུ་ཞུགས་ཀྱང་། སྐྱ་བས་གཡབ་པའི་རྩོལ་བ་མ་བྱས་པར་ཕ་རོལ་དུ་སྒྲོལ་བར་མི་འགྱུར་བ་བཞིན། །འཇུག་པ་བྱང་ཆུབ་ཀྱི་སེམས་

---

^{[མ་དཔེ་གཟིགས་ན་འདིར་གནོན།]}

བླངས་ནས་ཕ་རོལ་དུ་ཕྱིན་པ་དྲུག་ལ་སོགས་པས་སངས་རྒྱས་སྒྲུབ་པའི་ཐབས་ལ་ཉེ་བར་བརྩོན་པ་ལ་རག་ལས་པ་དེ་ལྟ་བུའི་གནད་དོན་ཐུགས་ལ་འབྱོར་དགོས་པས་ན་སེམས་བསྐྱེད་བླངས་ནས་སེམས་ཅན་ཐམས་ཅད་བྱང་ཆུབ་ལ་འགོད་པར་བྱ་སྙམ་པ་སྨོན་སེམས་ཀྱི་དངོས་དོན་ཡིན་མོད་ཀྱི། སྐབས་འདིར་ཟབ་མོ་ལྟ་རྒྱུད་ལུགས་ཀྱི་ཕྱག་བཞེས་གང་ཟག་དབང་པོ་རབ་ཀྱི་དབང་དུ་མཛད་ནས་སྨོན་འཇུག་གཉིས་ཀ་སྟབས་གཅིག་ཏུ་ལེན་པ་ལགས་ཕྱིར། བླ་མ་དཀོན་མཆོག་ལ་མི་ཕྱེད་པའི་དད་པ་དང་། སེམས་ཅན་སྡུག་བསྔལ་ལས་བསྒྲལ་བར་འདོད་པའི་སྙིང་རྗེ་དང་། དེའི་ཕྱིར་བླ་ན་མེད་པའི་བྱང་ཆུབ་ཐོབ་འདོད་ཀྱི་འདུན་པ་གསུམ་རྩེ་གཅིག་ཏུ་བསྐྱེད་དེ། ཕྱག་ཐལ་མོ་སྦྱར་ཞིང་ཡིད་གཞན་དུ་མ་ཡེངས་པའི་ངང་ནས་སྡོམ་པ་ལེན་པའི་

---

^{[མ་དཔེ་གཟིགས་ན་འདིར་གནོན།]}

ཚིག་འདི་རྗེས་ཟློས་མཛད་པར་ཞུ།། ༈ །།ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །སློབ་དཔོན་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བས། །དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། །ཇི་ལྟར་སྔོན་གྱི་བདེར་གཤེགས་ཀྱི། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ན་བསླབ་པ་ལ། །རིམ་པ་བཞིན་དུ་སློབ་པར་བགྱིའོ།། ༈ །།དེས་ཁྱེད་རང་རྣམས་ཀྱི་རྒྱུད་ལ་བྱང་ཆུབ་སེམས་དཔའི་སྨོན་འཇུག་གི་སྡོམ་

---

^{[མ་དཔེ་གཟིགས་ན་འདིར་གནོན།]}

པའི་ཆ་ཤས་ཚེས་གསུམ་གྱི་ཟླ་བ་ཙམ་ཞིག་རྒྱུད་ལ་སྐྱེས་པ་ཡིན་པས་དེ་ལྟར་ངེས་ཤེས་བསྐྱེད་ཅིང་། ཡང་ཇི་ལྟར་སྔོན་གྱི་སངས་རྒྱས་བྱང་སེམས་དེ་དག་གིས་སེམས་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱའོ་སྙམ་པའི་སྨོན་སེམས་དང་། འཇུག་པ་བྱང་ཆུབ་སེམས་དཔའི་ཚུལ་ཁྲིམས་གསུམ་ལ་རིམ་པས་སློབ་པར་མཛད་པ་དེ་བཞིན་དུ་བདག་གི་ཀྱང་སྨོན་འཇུག་གཉིས་ལ་བསླབ་པར་བྱའོ་སྙམ་པ་སྙིང་ཐག་པ་ནས་བསམ་པ་དང་བཅས་པས་ལན་གཉིས་པའི་རྗེས་ཟློས་མཛོད། ཞེས་བརྗོད་ནས་གོང་གི་དེ་ཀ་རྗེས་ཟློས་བྱར་བཞུག། ༈ །།དེས་ཁྱེད་ཀྱི་རྒྱུད་ལ་བྱང་ཆུབ་སེམས་དཔའི་སྡོམ་པའི་ཆ་ཤས་ཚེས་བརྒྱད་ཀྱི་ཟླ་བ་ཙམ་ཞིག་སྐྱེས་པའི་ངེས་ཤེས་མཛད་འཚལ། ཡང་། བླ་མ་དཀོན་མཆོག་ལ་

---

^{[མ་དཔེ་གཟིགས་ན་འདིར་གནོན།]}

མོས་གུས་དང་། །ཕ་མ་སེམས་ཅན་ལ་སྙིང་རྗེ། །སངས་རྒྱས་ཐོབ་འདོད་ཀྱི་འདུན་པ་རྣམས་ཆེར་བསྐྱེད་དེ། སྔོན་གྱི་སངས་རྒྱས་བྱང་སེམས་ཐམས་ཅད་ཀྱི་སྨོན་འཇུག་གི་ཐུགས་བསྐྱེད་ནས་བྱང་ཆུབ་སེམས་དཔའི་བསླབ་པ་གསུམ་ལ་གནས་པར་མཛད་པ་དེ་བཞིན་དུ། བདག་གི་ཀྱང་ཅི་ནས་ཅི་ལ་ཐུགས་ཀྱང་སྨོན་འཇུག་གི་སྡོམ་པ་བླངས་ཤིང་བྱང་ཆུབ་སེམས་དཔའི་བསླབ་པ་གསུམ་དང་ཕར་ཕྱིན་དྲུག་ལ་བརྩོན་ནས་མྱུར་དུ་སངས་རྒྱས་ཐོབ་པ་དང་སེམས་ཅན་ཐམས་ཅད་བྱང་ཆུབ་ལ་འགོད་པར་བྱའོ་སྙམ་པས་རྗེས་ཟློས་གསུམ་པ་མཛད་པར་ཞུ། །ཞེས་པས་སྔ་མ་ལྟར་རྗེས་ཟློས་བྱར་གཞུག་སྟེ། དེས་ཁྱེད་ཅག་ལ་བྱང་ཆུབ་སེམས་དཔའི་སྡོམ་པ་ཡོངས་སུ་རྫོགས་པ་ཚེས་བཅོ་ལྔའི་ཟླ་

---

^{[མ་དཔེ་གཟིགས་ན་འདིར་གནོན།]}

བ་ལྟ་བུར་རྒྱུད་ལ་སྐྱེ་ཞིང་ཐོབ་པ་ཡིན་པས་དེ་ལྟར་ཐོབ་པར་ངེས་ཤེས་སྐྱེད་དགོས་ཏེ། ཅིའི་ཕྱིར་ན། ངེད་ཀྱི་བསྡོམ་པ་ལེགས་པར་ཕོགས་རུང་ཁྱེད་ལ་ཐོབ་སེམས་ཀྱི་ངེས་ཤེས་མ་བརྙེད་ན་ཐོབ་པར་མི་འགྱུར་བ་ལགས། འོ་ན་དེ་ལྟ་བུའི་སྡོམ་པ་ཐོབ་པའི་གཏན་ཚིགས་ཅི་ཡིན་སྙམ་ན། ཆོས་ཐམས་ཅད་རྟེན་ཅིང་འབྲེལ་འབྱུང་གི་རང་བཞིན་ཡིན་པ་དང་། ཁྱེད་ཀྱི་རྒྱུད་ལ་བདེ་བར་གཤེགས་པའི་སྙིང་པོ་བྱང་ཆུབ་ཀྱི་སེམས་འདུས་མ་བྱས་པ་གཟོད་ནས་ལྷུན་གྲུབ་ཏུ་ཡོད་པ་དེ་གནས་སྐབས་རྒྱུ་རྐྱེན་ཕུན་སུམ་ཚོགས་པས་མཚམས་སྦྱར་ནས། རྣམ་པར་ཤེས་པའི་ངོ་བོ་བྱང་ཆུབ་ཀྱི་སེམས་རིན་པོ་ཆེར་བསྒྲུབ་པ་འདིའི་རྟེན་འབྲེལ་གྱིས། །དགེ་བའི་བྱ་བ་ཆེ་ཆུང་

---

^{[མ་དཔེ་གཟིགས་ན་འདིར་གནོན།]}

མཐའ་དག་ལ་བྱང་ཆུབ་སེམས་ཀྱིས་རྩིས་ཟིན་པས་ཚོགས་རླབས་པོ་ཆེ་འཕེལ་ཞིང་སྒྲིབ་པ་བྱང་། བསམ་པ་དག་པས་ལུས་བྱིན་གྱིས་རློབས། ལུས་ཀྱི་སྣང་བ་བྱིན་གྱིས་བརླབས་ཏེ། ཕྱི་ནང་ཐམས་ཅད་བྱང་ཆུབ་སེམས་ཀྱི་འཁོར་ལོར་གྲུབ་པས་གཞན་དོན་འབད་མེད་དུ་འབྱུང་ཞིང་། ཚེ་རབས་ཀུན་ཏུ་བྱང་ཆུབ་ཀྱི་སེམས་མི་བརྗེད་པའི་རྒྱུན་གྱིས་སངས་རྒྱས་ཀྱི་ས་བོན་ཐེབས་པ་ལགས།། ༈ །།དེས་སེམས་བསྐྱེད་དངོས་གཞིའི་ཆོ་ག་ལེགས་པར་གྲུབ་ནས། །གསུམ་པ་མཇུག་གི་ཆོ་ག་ལ། དགའ་བ་སྒོམ་པ། བསླབ་བྱ་བསྟན་པ། བཀའ་དྲིན་བཏང་རག་དང་བྱང་སེམས་མི་བརྗིད་གོང་འཕེལ་གྱི་སྨོན་ལམ་གདབ་པ་དང་གསུམ་ཡོད་པའི་

---

^{[མ་དཔེ་གཟིགས་ན་འདིར་གནོན།]}

དང་པོ་ནི། འདི་བཞིན་ཐུགས་ལ་བསམ་འཚལ་ཏེ། བདག་འཁོར་བ་ཐོག་མ་མེད་ནས་ད་ལྟ་ཡན་དུ་ལུས་དེ་ཙམ་ཞིག་བླངས་ཤིང་ལས་དེ་ཙམ་ཞིག་བྱས་པ་ཐམས་ཅད་དོན་མེད་འཁྲུལ་འཁོར་འབའ་ཤིག་ལས་སངས་རྒྱས་ཀྱི་རྒྱུད་དུ་གང་ཡང་མ་སོང་བ་ལ། ད་རེས་འདི་ལྟ་བུའི་བྱང་ཆུབ་ཀྱི་སེམས་རིན་པོ་ཆེ་ཕན་བདེ་ཐམས་ཅད་ཀྱི་འབྱུང་གནས་ཡིད་བཞིན་གྱི་ནོར་བུ་ལྟ་བུ་འདི་བརྙེད་པ་རེ་དགའ། རེ་འཚེངས། སྙམ་པའི་དགའ་བ་དང་སྤྲོ་བ་བསྐྱེད་ཅིང་། ད་ནི་འདི་འདྲ་བའི་རྙེད་པ་ལེགས་པར་བརྙེད་པ་འདི་དོན་མེད་དུ་མ་སོང་བའི་རིགས་དང་མཐུན་པའི་ལས་ལ་བརྩོན་དགོས་སྙམ་དུ་དམ་འཆའ་སྟེ། །རིགས་གང་ཡིན་ན་སངས་རྒྱས་ཀྱི་རིགས་ཏེ། རིགས་བདེར་གྱུར་ནས་དེའི་ལས་བྱང་ཆུབ་ཀྱི་སྤྱོད་པ་མི་བརྩལ་དུ་

---

^{[མ་དཔེ་གཟིགས་ན་འདིར་གནོན།]}

མི་རུང་བའི་ཕྱིར་ན། ངེས་པར་བྱང་ཆུབ་སེམས་དཔའི་སྤྱོད་པ་ལ་བརྩོན་པར་བྱ་ཞིང་། དེ་ལྟར་བརྩོན་ནང་འགྲུབ་པར་འགྱུར་བའི་རྒྱུད་དང་གཏན་ཚིགས་ནི། སྤྱོད་འཇུག་ལས། ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་བརྙེད་པ་ལྟར། །དེ་བཞིན་ཇི་ཞིག་ལྟར་སྟེངས་ནས། །བདག་ལ་བྱང་ཆུབ་སེམས་འདི་སྐྱེས། །འགྲོ་བའི་འཆི་བདག་འཇོམས་བྱེད་པའི། །བདུད་རྩིའི་མཆོག་ཀྱང་འདི་ཡིན་ནོ། །སྟབས་ལེགས་པའམ་ཁར་རྗེ་ཆེ་བ་ལྟ་བུའི་བརྡ་ཡིན། །འགྲོ་བའི་དབུལ་བ་སེལ་བྱེད་པའི། །མི་ཟད་གཏེར་ཡང་འདི་ཡིན་ནོ། །འགྲོ་བའི་ནད་རབ་ཞི་བྱེད་པའི། །སྨན་གྱི་མཆོག་ཀྱང་འདི་ཡིན་ནོ། །སྲིད་ལམ་འཁྱམས་ཞིང་དུབ་པ་ཡི། །འགྲོ་བ་ངལ་གསོའི་

---

^{[མ་དཔེ་གཟིགས་ན་འདིར་གནོན།]}

ལྗོན་ཤིང་ཡིན། །འགྲོ་བ་ཐམས་ཅད་ངན་འགྲོ་ལས། །སྐྱོབས་པར་བྱེད་པའི་སྤྱི་བསྟེགས་ཡིན། །འགྲོ་བའི་ཉོན་མོང་གདུང་སེལ་བའི། །སེམས་ཀྱི་ཟླ་བ་ཤར་བ་ཡིན། །འགྲོ་བའི་མི་ཤེས་རབ་རིབ་དག །དཔྱིད་འབྱིན་ཉི་མ་ཆེན་པོ་ཡིན། །དམ་ཆོས་འོ་མ་བསྲུབ་པ་ལས། །མར་གྱི་ཉིང་ཁུ་ཕྱུངས་པ་ཡིན། ཞེས་པ་དེ་ལྟ་བུའི་བྱང་ཆུབ་ཀྱི་སེམས་ཡོད་པས་ཅིའི་ཕྱིར་འགྲོ་བའི་དོན་མི་འགྲུབ་སྙིང་སྟོབས་དང་དགའ་སྤྲོ་བསྐྱེད་ནས་འདིའི་རྗེས་ཟློས་མཛད་འཚལ།། ༈ །།དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ད་ནི་བདག་གི་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །

---

^{[མ་དཔེ་གཟིགས་ན་འདིར་གནོན།]}

སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ།། ༈ །།ཞེས་པ་དེ་ལྟ་བུའི་དགའ་བ་བསྒོམ་པ་ལ་དགོས་པ་ཅི་ལྟ་བུ་ཡོད་ཅེ་ན། བྱང་ཆུབ་སེམས་ཀྱི་ཡོན་ཏན་ལ་ངེས་པ་བརྙེད་ནས་བྱང་སེམས་མི་ཉམས་པར་བསྲུང་བ་དང་དག་པ་སྤེལ་བ་དང་མཐར་ཕྱིན་པས་དགོས་པ་ཡོད། རང་ཉིད་ལ་དེ་ལྟ་བུའི་སྐལ་བཟང་ཐོབ་པས་འགྲོ་བ་གཞན་རྣམས་ཀྱང་ལམ་མཁན་གྱི་དེད་དཔོན་ནམ། དམུས་ལོང་ལ་དམིགས་ལོང་ཁྲིད་བུ་མུན་འཁྱམས་ལ་སྒྲོན་མེ། ནད་པ་ལ་སྨན་པ་བརྙེད་པ་ལྟ་བུར་བདག་གི་གནས་སྐབས་དང་མཐར་ཐུག་ཐམས་ཅད་ལ་ཕན་བདེ་སྒྲུབ་པས་ཁྱེད་ཅག་དགའ་བ་དང་སྤྲོ་བར་གྱིས་བར་གཟེངས་བསྟོད་པ་འདིའི་རྗེས་ཟློས་མཛོད།།༈ །།བདག་གིས་

---

^{[མ་དཔེ་གཟིགས་ན་འདིར་གནོན།]}

དེ་རིང་སྐྱབས་པ་ཐམས་ཅད་ཀྱི། །སྤྱན་སྔར་འགྲོ་ལ་བདེར་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། །འགྲོ་བའི་འགྲོན་པ་སྲིད་པའི་ལམ་འཁྱམས་ཤིང་། །བདེ་བའི་ལོངས་སྤྱོད་སྤྱད་པར་འདོད་པ་ལ། །འདིས་ནི་བདེ་བའི་མཆོག་ཏུ་ཉེར་གནས་ནས། །སེམས་ཅན་འགྲོན་ཆེན་ཚིམ་པར་བྱེད་པ་ཡིན།། ༈ །།གཞན་ཡང་རིགས་ཀྱི་བུ་རྣམས་ཤེས་པར་གྱིས་ཤིག །འདི་ལྟ་བུའི་བྱང་ཆུབ་ཀྱི་སེམས་རིན་པོ་ཆེ་བསྐྱེད་མ་ཐག་སངས་རྒྱས་ཀྱི་སྲས་སུ་གྱུར་པ་ཡིན་ཏེ། སྤྱོད་འཇུག་ལས། །བྱང་ཆུབ་སེམས་བསྐྱེད་གྱུར་ནས་སྐད་ཅིག་གིས། །བདེར་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་

---

^{[མ་དཔེ་གཟིགས་ན་འདིར་གནོན།]}

འགྱུར། ཞེས་གསུངས། སྔོན་གྱི་སྡིག་པ་ཚན་པོ་ཆེ་ཐམས་ཅད་ཀྱང་འདིས་བྱང་བར་འགྱུར་ཏེ། །དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་ཙམ་གྱིས་ངེས་པར་སྲེག་པར་བྱེད། ཅེས་གསུངས། བསོད་ནམས་དཔག་ཏུ་མེད་པ་ཐོབ་སྟེ། དཔལ་བྱིན་གྱི་མདོར། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀངས་ནས། །དེ་ནི་དེ་ལས་ཆོས་ལྷག་འགྱུར། །ཞེས་གསུངས། སངས་རྒྱས་ཐམས་ཅད་ལ་མཆོད་པའི་མཆོག་ཏུ་ཡང་འགྱུར། །སྒྱུ་མ་ལྟ་བུའི་ཏིང་འཛིན་གྱི་མདོ་ལས། །ལུས་ཅན་ཀུན་ལ་ཕན་པའི་ཕྱིར། །བྱང་ཆུབ་ཀུ་ནི་སེམས་བསྐྱེད་ནས། མཚན་མཆོག་སུམ་ཅུ་གཉིས་ལྡན་པའི། །སངས་རྒྱས་ཐམས་ཅད་མཆོད་

---

^{[མ་དཔེ་གཟིགས་ན་འདིར་གནོན།]}

པར་འགྱུར། ཞེས་གསུངས། །སེམས་ཅན་ཐམས་ཅད་ལ་ཕན་པའི་མཆོག་ཡིན་ཏེ། ཞི་བ་ལྷས། །འགྲོ་བའི་དེད་དཔོན་ཆེན་པོ་གཅིག་པུ་ཚད་མེད་བློས། །ལེགས་པར་ཡོངས་སུ་བརྟག་ན་རིན་ཆེན་ཆེ་བ། །འགྲོ་བའི་སྡུག་བསྔལ་བྲལ་བར་འདོད་པ་ན། །རིན་ཆེན་བྱང་ཆུབ་སེམས་ལེགས་བརྟན་པར་བཟུང་། ཞེས་གསུངས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྩ་བ་ཚུགས་ཏེ་མྱུར་དུ་རྫོགས་སངས་རྒྱ་བར་འགྱུར་བ་ནི། བྱང་ཆུབ་སེམས་པའི་ས་ལས། སེམས་བསྐྱེད་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྩ་བ་ཡིན་ནོ། སེམས་བསྐྱེད་ན་མཐའ་གཉིས་ལ་མི་གནས་པའི་ཕྱིར་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །ཞེས་པ་ལ་སོགས་བྱང་ཆུབ་ཏུ་སེམས་བསྐྱེད་པའི་ཕན་ཡོན་ནི་བསམ་གྱིས་མི་ཁྱབ་ཅིང་བརྗོད་པས་

---

^{[མ་དཔེ་གཟིགས་ན་འདིར་གནོན།]}

མི་ལང་བ་ལ་གསལ་ཡང་ཐུགས་ལ་ངེས་འཚལ།། ༈ །།དེ་ལྟར་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་ལེགས་པར་ཐོབ་ནས། མཇུག་དོན་གཉིས་པ་སྤང་བླང་གནས་ཉེ་བར་སྟོན་པའི་བསླབ་བྱ་བརྗོད་པ་འདི་ལ་ཐུགས་མ་ཡེངས་པས་ལེགས་པར་གསན་འཚལ་ཏེ། དེ་ཡང་ཟབ་མོ་ལྟ་རྒྱུད་ལུགས་ཀྱི་སྨོན་འཇུག་གཉིས་ལས་དང་པོ་སྨོན་པའི་བསླབ་བྱ་ནི། ཇི་སྐད་དུ། །སེམས་ཅན་གཅིག་ཡང་བློས་མི་སྤང་། །རྟག་པར་སེམས་དེའི་ཕན་ཡོན་བསམ། །ཚོགས་གཉིས་གསག་ལ་བརྩོན་པར་བྱ། །ཡང་ཡང་བྱང་ཆུབ་སེམས་གཉིས་སྦྱངས། །ནག་པོའི་ཆོས་བཞི་སྤངས་ནས་ནི། །དཀར་པོའི་ཆོས་བཞི་བསྟེན་པར་བྱ། །ཞེས་གསུངས་པ་རྣམས་ཡིན་ཏེ། །དེ་ཡང་། ནམ་

---

^{[མ་དཔེ་གཟིགས་ན་འདིར་གནོན།]}

མཁས་གར་ཁྱབ་ཀྱི་སེམས་ཅན་ཐམས་ཅད་ལ་ཕན་པ་སྒྲུབ་པར་དམ་བཅས་པ་ཡིན་ཕྱིར། རང་དང་མ་མཐུན་པའམ་མི་དགའ་བ་གཅིག་ཙམ་ཞིག་བློས་སྤངས་ཏེ་ཁོང་ཁྲོ་དང་དགྲར་འཛིན་བྱས་ན་བྱང་ཆུབ་སྨོན་སེམས་ཉམས་པ་ཡིན་ཕྱིར་དེ་ལྟ་བུ་སུ་ལ་ཡང་མི་བྱ་བ་འདི་ནི་བྱང་སྡོམ་གྱི་གཞི་མའོ།། ༈ །།༡ རྟག་ཏུ་བྱང་ཆུབ་སེམས་ཀྱི་ཕན་ཡོན་ལ་བསམ་ཞིང་དྲན་གསོ་བར་བྱ། ༢ དགེ་བའི་བྱ་བ་གང་བྱེད་ཀྱང་སེམས་བསྐྱེད་ཀྱིས་ཟིན་པ་དང་འཁོར་གསུམ་ཡོངས་དག་གི་རྒྱས་ཐེབས་པའི་ཚོགས་གཉིས་ཟུང་འཇུག་ལ་བསླབ། ༣ བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱང་ཞིང་ཉིན་མཚན་གྱི་ཐུན་དུ་སེམས་བསྐྱེད་བླང་བ་དང་གཞན་གྱི་སྡིག་སྡུག་རང་ལ་ལེན་ཅིང་རང་གི་དགེ་བདེ་གཞན་ལ་སྦྱིན་པའི་ཉམས་ལེན་ནི་འདིའི་དོན་

---

^{[མ་དཔེ་གཟིགས་ན་འདིར་གནོན།]}

གྱི་དངོས་གཞིའོ། ༤ །ནག་པོའི་ཆོས་བཞི་ནི། བླ་མའམ་དཀོན་མཆོག་ཏུ་གཏོགས་པ་དང་མཆེད་གྲོགས་སོགས་ལ་རྫུན་དང་ངན་གཡོས་བསླུ་བ་དང་། ༡ གཞན་གྱིས་དགེ་བ་བྱས་པ་སོགས་འགྱོད་པའི་གནས་མ་ཡིན་པ་ལ་འགྱོད་དུ་བཅུག་པ་དང་། ༢ སེམས་བསྐྱེད་ལྡན་པའི་གང་ཟག་གཞན་ལ་སྐུར་བ་འདེབས་ཤིང་མ་གུས་པ་དང་། ༣ སྐྱེ་འགྲོ་སེམས་ཅན་མཆོག་དམན་གང་དང་གང་ལ་གཡོ་སྒྱུ་ཟོལ་རྫུན་གྱི་རིགས་དང་ཐབས་འཕྲུལ་ཅི་ལྟ་བུས་བསླུས་པ་དང་བཞི་པོ་ནི་ནག་པོའི་ཆོས་བཞི་ཡིན་ལ། དེ་དག་སྤངས་ཏེ། དུས་ནམ་དུའང་སྲོག་ལ་བབ་ཀྱང་རྫུན་མི་སྨྲ་བ། ༡ གཞན་གྱི་དགེ་བ་ལ་ཡིད་རངས་དང་མཐུན་རྐྱེན་སྒྲུབ་ཅིང་འབྲེལ་ཚད་དགེ་ལ་འགོད་ཅི་ནུས་བྱ་བ་དང་།

---

^{[མ་དཔེ་གཟིགས་ན་འདིར་གནོན།]}

༢ སྤྱིར་ཆོས་པ་དང་ཁྱད་པར་ཐེག་ཆེན་སེམས་སྐྱེད་དང་ལྡན་པའི་གང་ཟག་ལ་སངས་རྒྱས་དངོས་སུ་ལྟ་བའི་དད་གུས་ཞབས་ཏོགས་སྒྲུབ་པ་དང་། ༣ སེམས་ཅན་ཐམས་ཅད་ཕ་མར་ཤེས་པས་ཟོལ་མེད་ཀྱི་ལྷག་བསམ་རྣམ་དག་གིས་ཅི་ཕན་ལ་འབད་པ་སྟེ། ༤ དཀར་པོའི་ཆོས་བཞི་པོ་འདི་དལ་རྟག་ཏུ་བརྩོན་པར་བྱ་བ་འདི་དག་ནི་སྨོན་པ་བྱང་སེམས་ཀྱི་ཉམས་ལེན་ལག་པས་ཕྱག་ལེན་དུ་ཐེབས་པར་མཛད་དགོས། མདོར་བསྡུ་ན། ཀླུའི་རྒྱལ་པོ་མ་དྲོས་པས་ཞུས་པའི་མདོར། བྱང་ཆུབ་སེམས་དཔའ་ཆོས་གཅིག་དང་ལྡན་ན་རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་ཆོས་ཐམས་ཅད་ཡོངས་སུ་འཛིན་ཏེ། ཆོས་གཅིག་པུ་གང་ཞེ་ན་སེམས་ཅན་བློས་ཡོངས་སུ་མི་གཏོང་བའོ། །ཞེས་གསུངས་པ་ལྟར། བདག་ལས་གཞན་གཅེས་ཀྱི་བྱང་སེམས་ཟོལ་མེད་ལ་འདུ་

---

^{[མ་དཔེ་གཟིགས་ན་འདིར་གནོན།]}

བའོ། །དེ་ནས་ཡང་། འཇུག་པ་བྱང་སེམས་ཀྱི་བསླབ་བྱ་ལ། གཞུང་སོ་སོར་འདྲེན་ལུགས་མི་གཅིག་པ་དག་ལ་མཆིས་རུང་། ཟབ་མོ་ལྟ་རྒྱུད་ཀྱི་སྐབས་འདིར་ནི་ནམ་མཁའ་སྙིང་པོའི་མདོའི་རྗེས་སུ་འབྲང་སྟེ་སློབ་དཔོན་ཞི་བ་ལྷས་བསླབ་ཏུས་སུ་གསུངས་པ་ནི། དཀོན་མཆོག་གི་དཀོར་འཕྲོག་པ། ༡ དམ་པའི་ཆོས་སྤངས་བ། ༢ རབ་ཏུ་བྱུང་བའི་རྟགས་ཅན་ལ་ཆད་པས་གཅོད་པའམ། བཙོན་དུ་འཇུག་གམ་དམག་དང་འུ་ལག་སོགས་ལས་མིན་ལ་བཀོལ་བ་དང་། ༣ འཚམ་མེད་པ་ལྔ་གང་རུང་བྱེད་པ། ༤ དགེ་སྡིག་ཁྱད་དུ་གསོད་པའི་ཆད་པར་ལྟ་བ་འཛིན་པ་སྟེ། བྱང་སེམས་རྒྱལ་པོའི་རྩ་ལྟུང་ལྔ། དེ་རྣམས་ཀྱི་ཁར། གྲོང་དང་གྲོང་ཁྱེར་གྲོང་རྡལ་ཡུལ་འཁོར་སོགས་འཇོམས་པའམ་གནོད་འཚེ་བྱེད་པ། ཆད་ལྟ་འཛིན་པ་དང་གྲོང་ཁྱེར་འཇོམས་པ་འདི་གཉིས་བརྗེས་ཏེ།

---

^{[མ་དཔེ་གཟིགས་ན་འདིར་གནོན།]}

ནི་བྱང་སེམས་བློན་པོའི་རྩ་ལྟུང་ཞེས་བྱ་ལ། སྲོག་གཅོད་མ་བྱིན་ལེན་མི་ཚངས་སྤྱོད་རྫུན་སྨྲ་སྟེ་རྩ་བ་བཞི་པོ་ལས་འགལ་བ་དང་། ༡ སྣོད་མ་ཡིན་པ་ལ་སྟོང་ཉིད་སྟོན་པ་དང་། ༢ ཐེག་ཆེན་ལ་མོས་པའི་དད་ཅན་ཕྱིར་བཟློག་པ་དང་། ༣ སོ་ཐར་སྤངས་ནས་ཐེག་ཆེན་ལ་དཀྲི་བ་དང་། ༤ སློབ་མའི་མོས་པ་དང་མི་མཐུན་པ་སྟོན་པ་དང་། ༥ རྙེད་དང་བཀུར་སྟི་འདོད་ནས་བདག་བསྟོད་གཞན་སྨོད་དང་། ༦ མི་ཤེས་བཞིན་ཤེས་བརྫུ་མ་རྟོགས་པར་རྟོགས་བརྫུ་མ་ཐོབ་པར་བརྫུ་སོགས་མི་ཆོས་བླ་མའི་ཟོལ་དང་། ༧ སྒྲུབ་གྲའི་ཡོ་བྱད་བཤད་སྒྲ་ལ་སྦྱར་བའམ་སྦྱོར་དུ་འཇུག་ཅིང་། དཀོན་མཆོག་གི་དཀོར་རྒྱལ་པོའམ་ཉེ་དུ་སོགས་ལ་སྦྱིན་པར་བྱེད་པ་སྟེ། ༨ དེ་ལྟར་རྒྱལ་བློན་གྱི་རྩ་ལྟུང་བཅུ་དང་ལས་དང་པོ་པའི་ལྟུང་།

---

^{[མ་དཔེ་གཟིགས་ན་འདིར་གནོན།]}

བ་བརྒྱད་རྣམས་ཐམས་ཅད་འཛོམ་ཞིང་སྤོང་བར་བྱ་བ་ལ་བསླབ་དགོས་པས་ན། འདི་རྣམས་ཀྱི་སྤང་བླང་གི་གནས་ཇི་ལྟ་བ་ཤེས་པར་བྱ་ཞིང་། འདི་དག་ལས་གཞན་པའི་ཡན་ལག་གི་ལྟུང་བྱེད་བརྒྱད་ཅུ་སོགས་ཕྲ་ཞིབ་དག་ནི་ཁྱེད་ཅག་གི་སྣོད་དང་འཚལ་པའམ་ཤེས་པ་དང་བསྒྲུབ་པར་ཡང་དཀའ་ལ། མདོ་དོན་ཕལ་ཆེར་གོང་དུ་སྨོས་པ་རྣམས་ལ་འདུ་བ་དང་། གལ་ཏེ་ཅིས་ཀྱང་རྟོགས་པར་ནུས་ཤིང་སྤྲོ་ན་བསླབ་བཏུས་སོགས་བྱང་སེམས་ཀྱི་མདོ་བསྟན་བཅོས་རྣམས་ལས་ཤེས་པར་བྱ་ལ། ཁྱད་པར་དུ། སྐྱབས་དང་སྨོན་སེམས་གཏོང་བ། ལོག་པར་ལྟ་དང་ཉན་རང་གི་ཡིད་བྱེད་སྐྱེས་པ། བསླབ་པ་ཕུལ་དང་སེམས་ཅན་བློས་མ་སྤང་བ་རྣམས་ནི་བྱང་སྡོམ་རྩ་བ་ནས་གཏོང་ཞིང་འཇིག་པའི་རྒྱུ་ཡིན་

---

^{[མ་དཔེ་གཟིགས་ན་འདིར་གནོན།]}

ཕྱིར། སྡོམ་བྱའི་གཙོ་བོ་ཡིན་པར་ཤེས་དགོས། ལྟུང་བ་ཆེར་བྱུང་ན་སྡོམ་པ་སླར་བླང་བ་དང་། འབྲིང་དུ་བྱུང་ན་བཤགས་པ་དང་ཕྲ་བ་རྣམས་མཐུན་གྱི་བཤགས་བསྡམ་གྱིས་སོར་ཆུད་པར་འགྱུར་བར་གསུངས། སྤང་བྱའི་དགག་པའི་བསླབ་བྱ་དེ་ལྟར་བསྟན་ནས། བསྒྲུབ་པར་བྱ་བ་ནི། དགེ་བ་བཅུ་དང་ཆོས་སྤྱོད་བཅུ། ཕ་རོལ་ཕྱིན་དྲུག་སོགས་ལ་བརྩོན་པ་དང་། མདོར་བསྡུ་ན། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་སྟེ། ཚུལ་ཁྲིམས་རྣམ་པ་གསུམ་ལ་ཡང་དག་པར་གནས་པ་ནི་བྱང་ཆུབ་སེམས་དཔའི་བསླབ་པ་ཐམས་ཅད་དེ་ལ་ཡོངས་སུ་རྫོགས་པ་ལག་པས་དེ་དག་ལ་ནན་ཏན་ཏུ་མཛད་འཚལ།། ༈ །།མཇུག་གི་ལས་རིམ་གསུམ་པ་བཏང་རག་གི་མཆོད་པ་ནི། དེ་ལྟ་བུའི་བྱང་ཆུབ་ཀྱི་སེམས་རིན་པོ་ཆེ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་གཤེགས་

---

^{[མ་དཔེ་གཟིགས་ན་འདིར་གནོན།]}

སྡུག་བསྔལ་དམ་པ་འདི་ལྟ་བུར་ཆུད་པ་ནི་བླ་མ་དང་དཀོན་མཆོག་གི་སྐུ་དྲིན་ལས་བྱུང་བ་ཡིན་པས་ན། ཁྱེད་ཅག་རང་རང་གི་ལུས་ལོངས་སྤྱོད་ཅི་ཡོད་ཐམས་ཅད་མཆོད་པའི་མཎྜལ་དུ་འབུལ་བའི་འདུན་པས་ཕྱག་དང་མཎྜལ་འབུལ་བར་ཞུ་ཞིང་། བྱང་ཆུབ་ཀྱི་སེམས་རིན་པོ་ཆེ་ཚེ་རབས་ཀུན་ཏུ་མི་བརྗེད་ཅིང་མཁའ་ཁྱབ་ཀྱི་དོན་རྒྱ་ཆེན་འགྲུབ་པའི་བསྔོ་སྨོན་བཟང་པོ་འདི་བཞིན་རྗེས་ཟློས་མཛད་འཚལ།། ༈ །།བྱང་ཆུབ་སེམས་མཆོག་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིང་། །སྐྱེས་པ་ཉམས་པ་མེད་པར་ཡང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱི་ཡོངས་བཟུང་སྟེ། །བདུད་ཀྱི་

---

^{[མ་དཔེ་གཟིགས་ན་འདིར་གནོན།]}

ལས་ཀྱང་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱི་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་བདེ་འབྱོར་ཤོག །ཅེས་དང་ཤེས་པ་ཡང་བརྗོད་པར་བྱའོ། །འདི་ནི་ཟབ་མོ་ལྟ་རྒྱུད་ཀྱི་ལུགས་སོར་བཞག་ཡིན་ཕྱིར། ཁྱིམ་པ་ཕོ་མོ་ལ་སོགས་རྟེན་ངེས་མེད་ལ་སྐྱབས་བསྡོམ་གྱི་གཞི་བྱས་ནས་འབོགས་པར་རུང་བར་གསུང་ཤིང་། བླ་མ་མ་འཛོམས་ན་རྟེན་གྱི་དྲུང་དུའང་ལེན་པར་རུང་བར་གསུང་པའོ། །རྒྱལ་བ་བྱམས་པ་ནས་འཕགས་པ་ཐོགས་མེད་ལས་བརྒྱུད་པའི་རྒྱ་ཆེན་སྤྱོད་རྒྱུད་ལུགས་ཀྱི་བྱང་སྡོམ་བླང་བ་ལ། རྟེན་གྱི་གང་ཟག་ནི་སྤྱིར་གོང་དང་མཐུན་ཡང་། ཁྱད་པར་དུ་སོ་ཐར་རིས་བདུན་གང་རུང་དགོས་པར་གསུངས་ཕྱིར་དགེ་སྦྱོང་ལ་བསྔགས་ཤིང་། གལ་ཏེ་ཁྱིམ་པ་ལྟ་བུ་ལ་ཅིས་ཀྱང་འབོགས་དགོས་ནའང་རང་རང་གི་ཇི་ལྟར་ནུས་པ་དང་སྦྱར་

---

^{[མ་དཔེ་གཟིགས་ན་འདིར་གནོན།]}

བའི་དགེ་བསྙེན་དུ་སྒྲུབ་ནས་དེ་རྗེས་བྱང་སྡོམ་འབོགས་པར་གསུངས་ཞིང་། འདི་ལའང་སྦྱོར་བ་དངོས་གཞི་རྗེས་དང་གསུམ་གྱི། སྦྱོར་བའི་ཆོ་ག་གསོལ་བ་གདབ་པ་སྐྱབས་འགྲོ་ཁྱད་པར་ཅན་དང་ཡན་ལག་བདུན་གྱི་ཚོགས་བསགས་པ་གསུམ་པོ་གོང་དུ་བསྟན་པ་ལྟར་བྱས་ལ། འདི་སྐབས་ཕྱག་བཞེས་ལ་ལར་ཕྱག་མཆོད་ཙམ་ལས་གཞན་མི་མཛད་པ་ཡང་ཡོད་མེད་ཀྱི། བསྡུས་པ་ལ་དེ་ལྟར་རུང་ཡང་འདིར་ནི་ཡན་ལག་བདུན་ཚང་བར་བྱ་སྟེ། བྱང་སེམས་རྒྱུད་ལ་སྐྱེ་བ་ནི་ཚོགས་བསགས་པ་ལ་རག་ལས་པར་གསུངས་པའི་ཕྱིར་རོ། །གལ་ཏེ་དུས་གཅིག་ལ་སེམས་སྡོམ་རྒྱུད་ལུགས་གཉིས་ཀ་སྦྲེལ་ནས་འབོགས་དགོས་པ་ལྟ་བུའི་ཚེ་ན་སྦྱོར་ཆོས་གསུམ་པོ་འདི་གཉིས་ཀའི་ཐུན་མོང་དུ་ཚར་གཅིག་གིས་ཆོག་པ་ཉིད་དོ། །དངོས་གཞི་ལ་དེ་ཡང་ཟབ་མོ་ལྟ་རྒྱུད་ལ་ནི་སྨོན་འཇུག་སྟབས་གཅིག་ཏུ་བླངས་རུང་ཡང་། འདིར་ནི་ངེས་པར་

---

^{[མ་དཔེ་གཟིགས་ན་འདིར་གནོན།]}

ཐ་དད་དུ་ལེན་པ་ཕྱག་བཞེས་ཡིན་ཕྱིར། སློབ་མ་རྣམས་ལ་ཡན་ལག་བདུན་གྱི་བསྔོ་བ་ཡན་རྣམས་ལེགས་པར་གྲུབ་ནས། དངོས་གཞི་ལ་བབས་པའི་ཚེ་འདི་ལྟར་བརྗོད་པར་བྱ་སྟེ།། ༈ །།དེ་ནས་དངོས་གཞི་བྱང་ཆུབ་ཀྱི་སེམས་རིན་པོ་ཆེ་བསྐྱེད་པར་བྱེད་པའི་གཞུང་ལུགས་གཉིས་ཀྱི། འདིར་ནི་བྱམས་མགོན་ཐོགས་མེད་སོགས་ལས་ལེགས་པར་བརྒྱུད་ཅིང་ཇོ་བོ་རྗེ་དཔལ་ལྡན་ཨ་ཏི་ཤའི་རིང་ལུགས་ལས་བྱུང་བའི་ཕྱག་བཞེས་ལ། སྨོན་པ་བྱང་ཆུབ་ཏུ་སེམས་བསྐྱེད་པ་དང་། འཇུག་པ་བྱང་ཆུབ་སེམས་ཀྱི་སྡོམ་པ་བླངས་བ་དང་གཉིས་ཡོད་དེ། དང་པོ་སྨོན་པ་བྱང་ཆུབ་ཀྱི་སེམས་ནི། སེམས་ཅན་ཐམས་ཅད་ཕ་མར་ཤེས་པའི་བྱམས་པ་དང་། དེ་དག་འཁོར་བའི་སྡུག་བསྔལ་གྱིས་མནར་བ་ལ་མི་བཟོད་པའི་སྙིང་རྗེ་དང་། དེ་དག་སྡུག་བསྔལ་ལས་སྐྱབས་ཕྱིར་རྫོགས་པའི་སངས་རྒྱས་ཐོབ་པར་འདོད་

---

^{[མ་དཔེ་གཟིགས་ན་འདིར་གནོན།]}

པའི་བྱང་ཆུབ་ཀྱི་སེམས་དང་གསུམ་དགོས་པ་སྟེ། དེ་ཡང་སེམས་ཅན་གྱི་རིགས་སུ་གྱུར་པ་སྟོང་འཁོར་བསྒྱུར་གྱི་རྒྱལ་པོ་ནས་འཇག་མིག་གི་སྲིན་བུ་ཡན་ཆད་སྔོན་འཁོར་བ་ཐོག་མ་མེད་པ་ནས། ད་ལྟ་ཡན་ཆད་དུ་རང་ཉིད་ཀྱི་ཕ་མ་བྱས་པའི་གྲངས་དང་ཚད་ནི་སངས་རྒྱས་ཀྱིས་ཀྱང་བརྗོད་དུ་མེད་ལ། ད་དུང་སངས་རྒྱས་མ་ཐོབ་ཀྱི་བར་དུ་དེ་ལས་མ་འདས། འོ་སྐོལ་རྣམས་སྐྱེ་བ་འདིའི་མ་ལ་འདི་ནི་བདག་གི་དྲིན་ཅན་གྱི་མའོ་ཞེས་དྲིན་དུ་བཟོ་བ་ཅུང་ཟད་ཙམ་བྱེད་པ་ལས་མི་བྱེད་པ་ཆེས་མང་ཞིང་། དྲིན་དུ་བཟོ་བར་རློམ་པ་རྣམས་ཀྱང་ཟས་གོས་བྱིན་ཞིང་གཡོག་ཏུ་བགྱི་བ་ཕྲན་ཚེག་བྱས་ན་དྲིན་ཡུལ་ཕར་འདྲེན་པར་བྱེད་པ་ལས་མེད། མ་འདིས་ནི་རང་གི་སྡུག་བསྔལ་མཐའ་དག་

---

^{[མ་དཔེ་གཟིགས་ན་འདིར་གནོན།]}

ཁྱད་དུ་བསད་དེ་བདག་ལ་ལུས་སྲོག་ལོངས་སྤྱོད་མ་ལུས་བྱིན་པའི་དྲིན་ལན་སུ་ཞིག་གི་འཁོར་ལ། དེ་ཡང་ཚེ་འདི་གཅིག་པུར་བྱས་པ་ཙམ་མ་ཡིན་ཏེ་འཁོར་བ་ཐོག་མེད་ད་ལྟའི་བར་དུ་བྱས་པ་དང་། འོ་ན་དེ་ལྟ་བུའི་དྲིན་ཆེ་བ་ཏེ་ཚེ་འདིའི་མ་འདི་ཉིད་ཁོ་ན་ཡིན་ནམ་ཞེ་ན་མ་ཡིན་ཏེ། ཁམས་གསུམ་རིས་དྲུག་གི་སེམས་ཅན་ཐམས་ཅད་རེ་མོས་ཀྱི་ཕ་མ་བྱས་པའི་དྲིན་ཅན་ཤ་སྟག་ཡིན་པས་ན། དེ་ཐམས་ཅད་ལ་ཁྱད་མེད་དུ་དྲི་ལན་ཞལ་དགོས་པས། བྱམས་པའི་སེམས་ཚད་མེད་པར་བསྐྱེད་པར་བྱ་བ་ནི་བྱང་ཆུབ་སེམས་ཀྱི་ས་བོན་ནམ་རྒྱུའི་དངོས་པོ་ཡིན་ཏེ། སྤྱོད་འཇུག་ལས། བྱང་ཆུབ་སེམས་དཔའ་སེམས་ཅན་ལ། །བུ་གཅིག་མ་ཡི་བྱ་བ་བཞིན། །རྐང་གིས་ཁོངས་ནས་བྱམས་པ་ཆེ། །དེ་ལྟར་རྟག་

---

^{[མ་དཔེ་གཟིགས་ན་འདིར་གནོན།]}

ཕན་བྱ་བར་འདོད། ཞེས་པ་ལྟར་དགོས་ཤིང་། དེ་ལྟ་བུ་བྱམས་པ་ཡོད་པ་གཅིག་པུས་མི་ཆོག་སྟེ། སེམས་ཅན་དེ་དག་གི་གནས་ཚུལ་ཅི་ལྟ་བུ་ཞེ་ན། རྒྱུ་བདེར་གཤེགས་པའི་སྙིང་པོས་ཁྱབ་ཀྱང་རྐྱེན་དགེ་བའི་བཤེས་ཀྱིས་ནི་མ་ཟིན། ཐོབ་དམ་པའི་ཆོས་དང་ནི་མ་ཕྲད། །ལས་དཀར་པོ་དགེ་བ་ནི་མི་སྒྲུབ་པར། མ་རིག་འཁྲུལ་པའི་བག་ཆགས་ངན་གོམས་ནི་ཚན་ཆེ། ཉོན་མོངས་ལས་ངན་གྱི་ཆུ་ཀླུང་ཆེན་པོ་ནི་ཤུགས་དྲག །གཏན་བདེ་ཐར་པ་བྱང་ཆུབ་ཀྱི་འདུན་མ་ནི་བསྟན་ཡང་མི་མཐོང་། བཤད་ཀྱང་མི་གོ། ཁྲིད་ཀྱང་མི་འགྲོ་བར་འཁོར་བ་ངན་སོང་གི་རྒྱུ་ཐབས་སྒྲུབ་པ་ལ་ནི་ཕྱེ་མ་ལེབ་མར་མེ་ལ་འཇུག་པ་ལྟར་བཀག་ཀྱང་མི་ཁེགས་

---

^{[མ་དཔེ་གཟིགས་ན་འདིར་གནོན།]}

བསྲུང་ཡང་མི་ཐུབ་པར་འཁོར་བ་སྡུག་བསྔལ་གྱི་སྒོ་བཤོམ་དང་འདུན་ཐབས་འབའ་ཞིག་སྒྲུབ་པར་བྱེད་དེ། ཇི་སྐད་དུ། །སྡུག་བསྔལ་འདོར་འདོས་བློ་ཡོད་ཀྱང་། །སྡུག་བསྔལ་ཉིད་ལ་མངོན་པར་རྒྱུགས། །བདེ་བ་འདོད་ཀྱང་གཏི་མུག་པས། །རང་གི་བདེ་བ་དགྲ་ལྟར་འཇོམས། ཞེས་པ་དེ་ལྟ་བུའི་མ་རྒན་རྣམས་ལ་སྙིང་རྗེ་དྲག་པོ་བསྐྱེད་དགོས། དེ་ཡང་ངན་སོང་གི་སྡུག་བསྔལ་མི་བཟད་པ་ཉམས་སུ་མྱོང་བ་རྣམས་ལྟ་བུ་སྙིང་རྗེའི་ཡུལ་དུ་གྱུར་མོད་ཀྱི། དེ་ལས་ཀྱང་ད་ལྟ་སྡིག་པ་ཚད་མེད་པར་སྤྱོད་པ་ལ་ཉམ་ང་སྤུ་ཙམ་མེད་པའི་རྒྱལ་པོའམ། ཤན་པ་ལྟ་བུ་དག་སྙིང་བརྩེ་བའི་ཡུལ་ཡིན་ཏེ། དེ་དག་ད་ལྟ་སྡུག་བསྔལ་མཐའ་མེད་ཀྱི་རྒྱུ་སྒྲུབ་པ་ལ་འབད་པའི་ཕྱིར་རོ། །དེ་བས་ན་མཁའ་ཁྱབ་ཀྱི་

---

^{[མ་དཔེ་གཟིགས་ན་འདིར་གནོན།]}

མ་རྒན་སྨྱོན་པ་དང་འདྲ་བ་སྤང་བླང་གོ་ལོག་མཁན་འདི་དག་སྡུག་བསྔལ་རྒྱུ་འབྲས་ལས་བཟློག་ཅིང་སྐྱོབ་ཐུབ་ན་ཅི་མ་རུང་སྙམ་པའི་སྙིང་རྗེ་བསྐྱེད་པར་བྱ་སྟེ། ཆོས་ཡང་དག་པར་བསྡུས་པའི་མདོ་ལས། །འདི་ལྟ་སྟེ། འཁོར་ལོ་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །དེ་བཞིན་དུ་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིའོ། །ཞེས་དང་། ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན་ནོ། །ཞེས་སོགས་རྒྱ་ཆེར་གསུངས་ཤིང་། དེ་ལྟར་དུ་སྙིང་རྗེ་བའི་སེམས་ཅན་དེ་ཐམས་ཅད་བླ་མེད་བྱང་ཆུབ་ཀྱི་གོ་འཕང་ལ་བཀོད་ན་གཞན་གང་གིས་ཀྱང་མི་ལྡན་ལ། དེ་ལ་ནི་ཐོག་མར་རང་

---

^{[མ་དཔེ་གཟིགས་ན་འདིར་གནོན།]}

ཉིད་ལ་མཁྱེན་བརྩེ་ནུས་གསུམ་དང་སྤང་དང་རྟོགས་པའི་ཡོན་ཏན་དང་མ་ལྡན་པར་གཞན་སྒྲོལ་བར་མི་ནུས་ཏེ། ལྡོངས་པས་གཞན་གྱི་ལམ་མཁན་མི་ནུས་པ་བཞིན་ནོ། །དེའི་ཕྱིར་རང་ཉིད་བླ་ན་མེད་པའི་བྱང་ཆུབ་ཅི་ནས་ཀྱང་མྱུར་དུ་ཐོབ་པར་བྱས་ལ། མཁའ་ཁྱབ་ཀྱི་ཕ་མ་འདི་དག་སངས་རྒྱས་ཀྱི་སར་ངེས་པ་ཁོ་ནར་འགོད་པར་བྱའོ་སྙམ་པའི་འདུན་པ་དྲག་པོས། བླ་མ་དཀོན་མཆོག་རྣམས་ལ་དད་པའི་ཤུགས་བསྐྱེད་ཅིང་། ཐལ་མོ་ཐར་ནས་སྨོན་སེམས་བླང་བའི་ཚིག་འདིའི་རྗེས་ཟློས་མཛད་པར་ཞུ།། ༈ །།ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ། །སྐྱེ་བ་འདི་

---

^{[མ་དཔེ་གཟིགས་ན་འདིར་གནོན།]}

དང་སྐྱེ་བ་གཞན་དང་གཞན་དག་ཏུ། སྦྱིན་པའི་རང་བཞིན་དང་ཚུལ་ཁྲིམས་ཀྱི་རང་བཞིན་དང་སྒོམ་པའི་རང་བཞིན་གྱི་དགེ་བའི་རྩ་བ་ཅི་བགྱིས་པ་དང་། དགྱིད་དུ་སྩལ་བ་དང་། དགྱིད་པ་ལ་རྗེས་སུ་ཡི་རངས་བའི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་

---

^{[མ་དཔེ་གཟིགས་ན་འདིར་གནོན།]}

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་དགྱིའོ། །སེམས་ཅན་མ་རྒལ་བ་རྣམས་བསྒྲལ་བར་དགྱིའོ། །མ་གྲོལ་བ་རྣམས་འགྲོལ་བར་དགྱིའོ། །དབུགས་མ་ཕྱིན་པ་རྣམས། ངན་སོང་གསུམ་གྱི་སེམས་ཅན་སྡུག་བསྔལ་གྱི་རྒྱ་མཚོ་ལས། མཐོ་རིས་ཀྱི་འགྲོ་བ་ཉོན་མོངས་པའི་འཆིང་བ་ལས། ཉན་རང་གི་ཚོགས་ཐེག་པ་ཆེན་པོར། དབྱུགས་དབྱུང་བར་དགྱིའོ། །ཡོངས་སུ་མྱ་ངན་ལས་འདས་མ་འདས་པ་རྣམས་ཡོངས་སུ་མྱ་ངན་ལས་ཟློ་བར་དགྱིའོ། ཞེས་ལན་གསུམ་དུ་བསྐྱར་ནས་བླངས་ཏེ།། ༈ །།བྱང་ཆུབ་སེམས་དཔའ་སངས་རྒྱས་ཀྱི་སར།། ྃ །།དེས་སྨོན་པ་བྱང་ཆུབ་ཀྱི་སེམས་ཁྱེད་ཅག་རྣམས་ཀྱིས་ལེགས་པར་ཐོབ་པ་ཡིན་པས་དེ་ལྟ་བུའི་ངེས་ཤེས་སྐྱེས་པ་གལ་ཆེ། ཇི་ལྟར་འཇིག་རྟེན་ན་རྒྱལ་པོའི་སྲས་རྒྱལ་སྲིད་ལ་དབང་བསྐུར་མ་ཐག་རྒྱལ་པོར་བརྗོད་པ་དང་། རབ་ཏུ་བླང་

---

^{[མ་དཔེ་གཟིགས་ན་འདིར་གནོན།]}

མ་ཐག་དགེ་སྦྱོང་དུ་མིང་འཕོ་བ་བཞིན། བྱང་ཆུབ་མཆོག་ཏུ་སེམས་བསྐྱེད་མ་ཐག་བྱང་ཆུབ་སེམས་དཔའ་ཞེས་བྱ་བར་འགྱུར་བ་དང་། ཉན་རང་མན་ཆད་ཀྱི་འགྲོ་བ་ཐམས་ཅད་ཀྱི་ཕྱག་གི་གནས་སུ་གྱུར་པ་ལགས། བྱང་ཆུབ་ཀྱི་སེམས་དེ་རྒྱུད་ལ་སྐྱེ་བའི་ཚུལ་ཡང་། བློ་གྲོས་མི་ཟད་པའི་མདོར། བྱང་ཆུབ་སེམས་དཔའ་རྣམས་ཀྱི་སེམས་དང་པོ་སྐྱེས་པ་དེ་ཡང་མི་ཟད་པའོ། །དེ་ཅིའི་ཕྱིར་ཞེ་ན། མ་འདྲོས་པའི་ཕྱིར་བྱང་ཆུབ་ཀྱི་སེམས་དེ་ནི་ཉོན་མོངས་པ་ཐམས་ཅད་དང་མ་འདྲེས་པར་སྐྱེའོ། །ཐེག་པ་གཞན་ལས་འདོད་པ་མེད་པས་སེམས་དེ་ནི་མ་འབྲེལ་བར་སྐྱེའོ། བདུད་ཐམས་ཅད་ཀྱིས་མི་ཕྱེད་པས་སེམས་དེ་ནི་སྲ་བར་སྐྱེའོ། །དགེ་བའི་རྩ་བ་ཐམས་ཅད་ཡང་དག་པར་བསྒྲུབས་པས་སེམས་དེ་ནི་བརྟན་པར་སྐྱེའོ། །

---

^{[མ་དཔེ་གཟིགས་ན་འདིར་གནོན།]}

འདུས་བྱས་མི་རྟགས་ཤིན་ཏུ་རིག་པས་སེམས་དེ་ནི་རྟག་པར་སྐྱེའོ། །སེམས་ཅན་གོ་འབྱེད་པས་སེམས་དེ་ནི་རྒྱ་ཆེ་བར་སྐྱེའོ། །ཞེས་པ་ལ་སོགས་རྒྱ་ཆེར་གསུངས་ཤིང་། འདི་ལྟ་བུའི་བྱང་ཆུབ་ཀྱི་སེམས་རིན་པོ་ཆེ་སངས་རྒྱས་ཐམས་ཅད་ཐུགས། སེམས་ཅན་ཐམས་ཅད་ཀྱི་མགོན། གནས་སྐབས་མཐར་ཐུག་མ་ལུས་པའི་གཏན་འདུན་གྱི་གཞི་མ། ཐར་པ་དང་ཐམས་ཅད་མཁྱེན་པའི་ཡོན་ཏན་མཐའ་དག་གི་འབྱུང་ཁུངས་འདི་ཉིད་རྒྱུད་ལ་དང་པོར་སྐྱེས་མ་ཐག །བསྟན་པ་ལ་དགའ་བའི་ལྷ་རྣམས་ཀྱིས་བྱང་ཆུབ་སེམས་དཔའ་དེ་སྲུང་ཞིང་སྐྱོབས་པར་བྱེད་པ་དང་། འགྲོ་བ་ཐམས་ཅད་ཀྱི་མཐོང་ན་དགའ་བ་དང་། དགེ་བའི་རྩ་བ་ཐམས་ཅད་མི་ཟད་ཅིང་འཕེལ་བ་དང་། རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་ས་བོན་ཐོབ་པ་ལ་སོགས། སེམས་

---

^{[མ་དཔེ་གཟིགས་ན་འདིར་གནོན།]}

དང་པོ་སྐྱེས་པ་ཙམ་གྱི་ཕན་ཡོན་གཞལ་དུ་མེད་པར་གསུངས་ན། རྒྱུན་ཆགས་སུ་ལག་ལེན་དུ་འདེབས་ན་ལྟ་ཅི་སྨོས་ཏེ། །འགྲོ་བ་ཀུན་གྱི་དགའ་བའི་རྒྱུ། །སེམས་ཅན་སྡུག་བསྔལ་རྩིར་གྱུར་བ། །རིན་ཆེན་སེམས་ཀྱི་བསོད་ནམས་གང་། །དེ་ལ་ཇི་ལྟར་གཞལ་གྱིས་ལང་། ཞེས་གསུངས་པ་ལྟར་གྱི་ཡོན་ཏན་དྲན་ཞིང་ངེས་ཤེས་བསྐྱེད་པར་མཛད་ནས། དེའི་བསླབ་བྱ་རྣམས་ལ་སློབ་དགོས་པ་ཡིན་པས་འདི་བཞིན་ཐུགས་ལ་ངེས་འཚལ་ཏེ། བསླབ་པར་བྱ་བའི་གནས་གང་ཞེ་ན། བྱང་ཆུབ་སེམས་ཀྱི་ཕན་ཡོན་མཐོང་ཞི་རྗེས་སུ་དྲན་པར་བྱ་བ་དང་། དེ་ཉིད་ཉིན་མཚན་དུས་ཀུན་ཏུ་བསྒོམ་ཞིང་སྤེལ་སྦྱང་ལ་སློབ་པ་དང་། ཚོགས་གཉིས་རྒྱ་ཆེར་

---

^{[མ་དཔེ་གཟིགས་ན་འདིར་གནོན།]}

གསོག་པ་ལ་ངལ་དུབ་དང་རློམ་སེམས་མེད་པར་བརྩོན་པ་དང་། སེམས་ཅན་གཅིག་ཙམ་ཡང་བློས་མི་སྤང་བར་སྐྱབས་ཁོངས་སུ་བཅུག་པ་དང་། ནག་པོའི་ཆོས་བཞི་སྤངས་ནས་དཀར་པོའི་ཆོས་བཞི་ལ་བརྩོན་པ་རྣམས་ཕྱག་ལེན་དུ་ཐེབས་པར་མཛད་འཚལ། དེ་ལ་ནག་པོའི་ཆོས་བཞི་ནི། བླ་མ་དང་མཁན་སློབ་སོགས་བརྫུན་གྱིས་བསླུ་བ་དང་། བྱང་ཆུབ་སེམས་དཔའ་སོགས་ཆོས་སྤྱོད་པ་གཞན་ལ་བསྐུར་བ་འདེབས་པ་དང་། གཞན་གྱི་དགེ་བ་ལ་འགྱོད་པ་བསྐྱེད་པ་དང་། གཡོ་སྒྱུས་སེམས་ཅན་བསླུ་ཞིང་ལོག་འཚོ་སྒྲུབས་པ་རྣམས་ཡིན་པས། དེ་དག་ལས་བཟློག་པའི་དཀར་པོའི་ཆོས་བཞི་སྒྲུབ་པ་ནི། སྲོག་ལ་བབས་ཀྱང་རྫུན་མི་སྨྲ་བ་དང་། གཞན་ལ་སྐུར་འདེབས་མི་བྱེད་པ་དང་།

---

^{[མ་དཔེ་གཟིགས་ན་འདིར་གནོན།]}

ཕ་རོལ་གྱི་དགེ་བ་ལ་མཐུན་འགྱུར་བྱེད་པ་དང་། སུ་ལ་ཡང་གཡོ་སྒྱུ་ཟོལ་ཟོག་མི་བྱ་བ་སྟེ། དེ་ལྟར་སྨོན་པ་བྱང་སེམས་ཀྱི་བསླབ་བྱ་འདི་རྣམས་ལས་སྐད་ཅིག་ཀྱང་མི་འདའ་བར་མཛད་པར། ད་ནི་འཇུག་པ་སེམས་བསྐྱེད་ཀྱི་ལས་རིམ་ལ་ཡང་སྦྱོར་དངོས་རྗེས་གསུམ་གྱི་སྒོ་ནས་སྟོན་པ་ལས། །སྦྱོར་བའི་ཆོས་ལ་ལྔ་ཡོད་དེ། གསོལ་བ་གདབ་པ། བསམ་པ་བརྟག་པ། མྱུར་དུ་སྦྱིན་པར་བསྐུལ་བ། བར་ཆད་དྲི་བ། བསླབ་པའི་གནས་གོ་བར་བྱས་ནས་སྤྲོ་བ་དྲི་བ་དང་ལྔ་ཡོད་པའི། དང་པོ་ནི། གོང་དུ་སྨོན་པ་བྱང་ཆུབ་ཀྱི་སེམས་ལེགས་པར་ཐོབ་པས་བྱང་ཆུབ་ཀྱི་རྒྱུ་དང་ས་བོན་ཉེ་བར་ཐོབ་ཀྱང་། དེ་མྱུར་དུ་སྒྲུབ་པར་བྱེད་པ་ལ་འཇུག་པ་

---

^{[མ་དཔེ་གཟིགས་ན་འདིར་གནོན།]}

བྱང་ཆུབ་ཀྱི་སེམས་མེད་ན་འགྲུབ་པར་དཀའ་སྟེ། ཇི་ལྟར་འཇིག་རྟེན་ན་ཞིང་པ་དག་ས་བོན་བཟང་པོ་བསྐྲུན་དུ་ཟིན་ཡང་ཆུ་ལུད་སོགས་སྐྱེད་སྲུང་གི་ལས་ལ་འབད་དགོས་པ་ལྟ་བུ་སྟེ། ཇོ་བོ་ཆེན་པོས། འཇུག་སེམས་བདག་ཉིད་སྡོམ་པ་མ་གཏོགས་པ། །ཡང་དག་སྨོན་པས་འཕེལ་བར་འགྱུར་མ་ཡིན། །རྫོགས་པའི་བྱང་ཆུབ་སྡོམ་པ་སྤེལ་འདོད་པས། །དེ་ཕྱིར་དེ་ནི་འབད་པས་ངེས་པར་བླངས། ཞེས་གསུངས་པ་དེ་ཉིད་ལེན་པའི་རྟེན་དུ་སོ་ཐར་རིས་བདུན་གྱི་བསླབ་པ་དང་ལྡན་ཞིང་སྨོན་སེམས་ལེགས་པར་སྐྱེས་པ་གཅིག་དགོས་པར་ལུགས་འདིའི་བཞེད་པ་ཡིན་པས། དེའི་རྒྱུད་ཁྱེད་ཅག་ལ་ཚང་བ་དང་། ལེན་པའི་ཡུལ་དགེ་བའི་བཤེས་གཉེན་

---

^{[མ་དཔེ་གཟིགས་ན་འདིར་གནོན།]}

ལ་སངས་རྒྱས་ཀྱི་འདུ་ཤེས་དང་ལྡན་པ་དགོས་ཀྱི། །ངེད་ལ་དེ་ལྟ་བུའི་ཡོན་ཏན་གྱི་ཆ་ཤས་ཙམ་ཡང་མེད་ནའང་། ཁྱེད་ཅག་གིས་སངས་རྒྱས་དངོས་སུ་མོས་པ་མཛད་ན་དད་པའི་རྒྱུ་དང་བདག་གི་བྱང་ཆུབ་ཀྱི་སེམས་གཉིས་པོ་འཛོམས་པའི་རྟེན་འབྲེལ་གྱི་མཐུས་ཁྱེད་ཀྱི་རྒྱུད་ལ་འཇུག་པ་བྱང་ཆུབ་ཀྱི་སེམས་སྐྱེས། དེའི་མཐུ་འབྲས་ཀྱིས་ནམ་ཞིག་བདག་སློབ་དཔོན་པ་དང་པོའི་བདེན་པ་མཐོང་བའི་ཚེ། ད་ལྟ་ཁྱེད་སེམས་སྐྱེད་ཞུས་པ་རྣམས་ཀྱི་ལས་བཟང་བ་དག་ནི་ལྟ་ཅི་སྨོས་ཀྱི། འགའ་ཞིག་ལས་ངན་གྱི་ལྟུང་བ་ཕོག་ནས་ངན་སོང་གི་གནས་ན་མཆིས་པའི་ཚེ་ནའང་། བདག་བསམ་བཞིན་དེའི་དོན་དུ་སྐྱེ་བ་བླངས་ཏེ་རྗེས་སུ་འཛིན་པ་དང་། བདག་མངོན་པར་རྫོགས་པར་སངས་རྒྱས་

---

^{[མ་དཔེ་གཟིགས་ན་འདིར་གནོན།]}

པ་ན་ཁྱེད་འབྲེལ་པ་ཐོགས་པ་ཚུན་ཆད་ལ་ཐུགས་རྗེའི་གཟིགས་པ་འཇུག་ཅིང་། ཁམས་གསུམ་གང་ན་གནས་ཀྱང་བདག་གི་སྐུའི་འོད་ཟེར་བྱེ་བ་ཕྲག་དྲུག་ཅུས་འཁོར་གྱི་དཀྱིལ་འཁོར་དུ་བསྡུས་ནས་སྨིན་ཅིང་གྲོལ་བར་བྱེད་པར་འགྱུར་བ་སྟེ། བྱང་ཆུབ་སེམས་ཀྱི་དཀྱིལ་འཁོར་ཆོས་ཀྱི་དབྱིངས་སུ་རོ་གཅིག་པའི་བདེན་པའི་བྱིན་རླབས་ལགས། དེའི་ཕྱིར་ན་ད་ལྟ་ཡང་དག་ལ་སངས་རྒྱས་དངོས་ཀྱི་མོས་པ་མཛད་ནས་ལུས་ལོངས་སྤྱོད་གཏན་སྲིད་མཐའ་དག་མཆོད་པར་འབུལ་བའི་ཐུགས་འདུན་གྱིས་མཎྜལ་འབུལ་བར་ཞུ།། ༈ །།དེ་ནས་ཕྱག་ཐལ་མོ་སྦྱར་ཏེ་གུས་པས་གསོལ་བ་གདབ་པ་འདིའི་རྗེས་ཟློས་མཛད་འཚལ།། ༈ །།སློབ་དཔོན་དགོངས་སུ་གསོལ། སློབ་དཔོན་

---

^{[མ་དཔེ་གཟིགས་ན་འདིར་གནོན།]}

ཁྱེད་ལས་བདག་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པ་བླངས་བ་ལེན་པར་འཚལ་གྱི་དེ་ལ་གནད་པ་མ་མཆིས་ན་བདག་ལ་ཐུགས་བརྩེ་བའི་སླད་དུ་ཅུང་ཟད་ཅིག་གསན་ཅིང་སྩལ་བའི་རིགས་སོ། །ཞེས་ལན་གསུམ་གྱིས་གསོལ་བ་གདབ་སོ།། ༈ །།གཉིས་པ་བསམ་པ་བརྟག་པ་ལ་གསུམ་ཡོད་པའི་དང་པོ་སྙིང་སྟོབས་ལ་བརྟག་པ་ནི། རིགས་ཀྱི་བུ་རྣམས་བྱང་ཆུབ་སེམས་དཔའི་སྡོམ་པ་ལེན་པར་འདོད་པ་ནི་ཤིན་ཏུ་ལེགས་ཤིང་ངོ་མཚར་ཆེ་ནའང་། འདི་ལྟར་བྱང་ཆུབ་སེམས་དཔའ་ནི་སེམས་ཅན་ཐམས་ཅད་སྨིན་པར་བྱེད་དགོས་ཞེས་ན། དེའི་བསླབ་པ་གྲངས་མེད་པ་ལ་སློབ་དགོས་ཀྱི། རིགས་ཀྱི་བུ་རྣམས་སེམས་ཅན་ཐམས་ཅད་སྨིན་པར་བྱེད་པའི།

---

^{[མ་དཔེ་གཟིགས་ན་འདིར་གནོན།]}

མཁས་བླངས་ངོ་། །བསླབ་པ་རྣམས་ལ་སློབ་ནུས་སམ། ཞེས་འདྲི་ཞིང་། སློབ་མ་རྣམས་ཀྱིས་ཀྱང་། ནུས་ལགས། བྱང་ཆུབ་སེམས་དཔའ་ནི་ཞིང་ཁམས་གྲངས་མེད་པ་སྦྱོང་བ་དང་། སངས་རྒྱས་གྲངས་མེད་པ་མཉེས་པར་བྱ་དགོས་ན། རིགས་ཀྱི་བུ་རྣམས་ཞིང་ཁམས་གྲངས་མེད་པ་སྦྱོང་བ་དང་། སངས་རྒྱས་གྲངས་མེད་མཉེས་པ་ལ་སློབ་ནུས་སམ། སློབ་མས་ཀྱང་ནུས་ལགས། །ཞེས་བྱ། བྱང་སེམས་ཀྱི་སྡོམ་པ་དེ་ཉམས་ན་སེམས་ཅན་ཐམས་ཅད་ཕན་བདེ་ལ་འགོད་པར་དམ་བཅས་པའི་ཕྱིར་དེ་དག་ཐམས་ཅད་བསླུས་པར་འགྱུར་ཏེ། ཇི་སྐད་དུ། །དངོས་པོ་ཕལ་པ་ཅུང་ཟད་ཀྱང་། །ཡིད་ཀྱི་སྦྱིན་པར་བསམ་བྱས་ནས། །མི་གང་སྦྱིན་པར་མི་བྱེད་པར། །དེ་དག་ཡི་དྭགས་རྒྱུར་གསུངས་ནས། །བླ་ན་མེད་པའི་བདེ་བ་ལ། །བསམ་པ་ཐག་པས་མགྲོན་

---

^{[མ་དཔེ་གཟིགས་ན་འདིར་གནོན།]}

གཉེར་ནས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཅི་ལྟར་འགྲོ་འགྱུར་རམ། །ཞེས་པ་ལྟར་སེམས་ཅན་བསླུས་པའི་རྣམ་སྨིན་གྱིས་དམྱལ་བ་སོགས་སུ་སྐྱེ་བར་འགྱུར་བའི་ཉེས་དམིགས་ཤིན་ཏུ་ཆེ་བར་མཆིས་ན། དེ་ལྟ་བུ་ལ་མི་འཇིགས་སམ།། ༈ །།མི་འཇིགས་ལགས། ཞེས་བརྗོད། མི་འཇིགས་པ་དེ་ཡང་རྒྱུ་འབྲས་ཁྱད་དུ་བསོད་པས་ངན་སོང་ལ་མི་འཇིགས་པ་ལྟ་བུ་མ་ཡིན་གྱི། ངན་སོང་དེ་དག་ཏུ་ལྟུང་མི་དགོས་པའི་རྒྱུ་བསླབ་པ་མ་ཉམས་པར་བྱེད་ནུས་པའི་སྙིང་སྟོབས་དགོས་པ་ལགས། ཡང་དེ་ཉིད་མ་ཉམས་པར་བྱང་ཆུབ་སེམས་དཔའི་བསླབ་བྱ་ལ་ཚུལ་བཞིན་སློབ་ན་བསོད་ནམས་ཀྱི་ཚོགས་ཟད་མི་ཤེས་པའི་གཏེར་དང་ཡོན་ཏན་ཐམས་ཅད་ཀྱི་འབྱུང་གནས་སུ་གྱུར་པ་དང་། བླ་ན་མེད་པ་རྫོགས་

---

^{[མ་དཔེ་གཟིགས་ན་འདིར་གནོན།]}

པའི་བྱང་ཆུབ་ཀྱི་གོ་འཕང་དམ་པ་ཐོབ་པར་འགྱུར་བས་ན། བསོད་ནམས་ཀྱི་ཁྱད་པར་དེ་ལྟ་བུ་ཐོབ་པར་ནུས་པའི་བསླབ་པ་ལ་སློབ་པར་སྤྲོའམ་ཞེས་པའི་ལན་དུ་སྤྲོ་ལགས།། ༈ །།གཉིས་པ་ཤེས་རབ་ལ་བརྟག་པ་ནི། ཚེ་དང་ལྡན་པ་མིང་འདི་ཞེས་བྱ་བ་ཁྱོད་རྣམས་བྱང་ཆུབ་སེམས་དཔའི་སྡེ་སྣོད་ཀྱི་མ་མོ་དག་ལེགས་པར་ཐོས་སམ། ཞེས་དྲིས་ལ་ཅུང་ཟད་ཐོས་ལགས། ཞེས་དང་། སྡེ་སྣོད་དེ་དག་གི་དོན་གྱི་ཚུལ་ཟབ་མོ་རྣམས་ཁྱོད་ཀྱིས་ཤེས་སམ། ཅུང་ཟད་ཤེས་ལགས། དེ་དག་གི་གནས་ལ་དད་དམ། ཤིན་ཏུ་དད་ལགས། དེ་དག་གི་བསྲུང་བྱ་རྣམས་བསྲུང་བར་ནུས་སམ། ནུས་ལགས། ཞེས་དྲི་བ་དང་ལན་བྱའོ།། ༈ །།གསུམ་པ་འདུན་པ་ལ་བརྟག་པ་ནི། འགྲོ་བ་གང་དག་གཅིག་གམ་འགའ་ཙམ་མ་ཡིན་པར་མཆོག་དམན་

---

^{[མ་དཔེ་གཟིགས་ན་འདིར་གནོན།]}

འབྲིང་དང་ནམ་མཁས་གར་ཁྱབ་ཐམས་ཅད་བྱང་ཆུབ་ལ་འགོད་པའི་འདུན་པ་དང་ལྡན་དགོས་ཕྱིར། རིགས་ཀྱི་བུ་རྣམས་འདི་ལྟ་སྟེ། ཁྱོད་ཀྱིས་བླ་ན་མེད་པའི་བྱང་ཆུབ་ཀྱི་གོ་འཕང་སྒྲུབ་ནས། སེམས་ཅན་མ་རྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་འགྲོལ་བ་དང་། །དབུགས་མ་ཕྱིན་པ་རྣམས་དབུགས་དབྱུང་དང་། ཡོངས་སུ་མྱ་ངན་ལས་མ་འདས་པ་རྣམས་མྱ་ངན་ལས་ཟློ་བ་དང་། སངས་རྒྱས་ཀྱི་གདུང་རྒྱུན་མི་ཆད་པར་བྱ་བའི་འདུན་པ་དང་ལྡན་པ་ཡིན་ནམ་ཞེས་དྲི་ཞིང་། དེ་ལྟ་བུ་དང་ལྡན་པ་ལགས་སོ། །ཞེས་ལན་གདབ་ཅིང་། དེ་ལ་ཁྱེད་ཀྱིས་སེམས་བསྐྱེད་པ་བརྟན་པ་དང་། ཡི་དམ་བརྟན་པར་བྱ་དགོས་སོ། །གཞན་ཡང་རིགས་ཀྱི་བུ་ཁྱེད་ཅག་གིས་སེམས་བསྐྱེད་པ་འདི་གཞན་ལ་འགྲན་པའི་ཆེད་དུ་མ་ཡིན་ནམ། གཞན་དག་གིས་

---

^{[མ་དཔེ་གཟིགས་ན་འདིར་གནོན།]}

ནན་གྱི་ལེན་དུ་བཅུག་པ་མ་ཡིན་ནམ། ཞེས་དྲི་ཞིང་། མ་ཡིན་ལགས། ཞེས་ལན་གདབ་ཏུ་གཞུག་གོ།། ༈ །།གསུམ་པ་མྱུར་དུ་སྦྱིན་པར་བསྐུལ་ཞིང་གསོལ་བ་གདབ་པ་ནི། དེ་ནས་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆེ་བའི་ཡོན་ཏན་འདྲན་པའི་དད་གུས་དང་། བདག་སློབ་དཔོན་ལ་ཡང་བཀའ་དྲིན་གྱི་སྒོ་ནས་སངས་རྒྱས་དངོས་སུ་ཤེས་པའི་དག་སྣང་དང་བཅས་པས། སྣང་སྲིད་སྣོད་བཅུད་ཀྱི་དངོས་པོ་བདག་ལུས་ལོངས་སྤྱོད་མཐའ་དག་མཆོད་པའི་མཎྜལ་དུ་འབུལ་བའི་འདུན་པ་རྩེ་གཅིག་པས་རྗེས་ཟློས་མཛད་པར་ཞུ།། ༈ །།དངོས་སུ་བཤམས་དང་ཡིད་ཀྱིས་སྤྲུལ། །བདག་པོས་ཡོངས་སུ་མ་བཟུང་དང་། །བླ་ན་མེད་པའི་མཆོད་པའི་ཚོགས། །མ་ལུས་བློ་ཡིས་བླངས་ཏེ་འབུལ། །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བའི་དངོས་པོ་ཀུན།

---

^{[མ་དཔེ་གཟིགས་ན་འདིར་གནོན།]}

།མ་ལུས་དཀོན་མཆོག་སྤྱན་སྔར་འབུལ། །འགྲོ་བའི་སྐྱབས་གྱུར་འཚང་རྒྱ་ཤོག། ༈ །།དེ་ནས་སེམས་སྐྱེད་ཀྱི་སྡོམ་པ་ཐོབ་པར་འདོད་པའི་དུང་པ་ཆེས་ཆེར་འཕེལ་ཞིང་དཀོན་མཆོག་ལ་མི་ཕྱེད་པའི་དད་པ་བསྐྱེད་དེ་ཐལ་མོ་སྦྱར་བས་རྗེས་ཟློས་འདི་བཞིན་མཛོད། སློབ་དཔོན་དགོངས་སུ་གསོལ། སློབ་དཔོན་ཁྱེད་ཀྱིས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་བདག་ལ་མྱུར་དུ་སྩལ་དུ་གསོལ། ཞེས་ལན་གསུམ་གྱིས་གསོལ་བ་གདབ་ཏུ་གཞུག་གོ།། ༈ །།བཞི་པ་བར་ཆད་དྲི་བ་ནི། དེ་ཡང་འདི་ལྟར་བྱང་ཆུབ་འཇུག་པའི་སེམས་བསྐྱེད་ཟབ་མོ་ཡང་དག་པར་ལེན་པ་པོ་ནི་ཐོག་མར་སྨོན་པ་བྱང་ཆུབ་ཏུ་སེམས་ལེགས་པར་བསྐྱེད་པའི་བྱང་ཆུབ་སེམས་དཔའ་ཞིག་དགོས་ན། རིགས་

---

^{[མ་དཔེ་གཟིགས་ན་འདིར་གནོན།]}

ཀྱི་བུ་ཁྱེད་ཅག་སྨོན་སེམས་ཡང་དག་པར་བསྐྱེད་ལ་མ་ཉམས་པའི་བྱང་ཆུབ་སེམས་དཔའ་ཡིན་ནམ། ཞེས་དྲི་ཞིང་སློབ་མས་ཡིན་ལགས། ཞེས་བྱ། མཁའ་མཉམ་སེམས་ཅན་ལ་འགོད་ཕྱིར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་སྨོན་ལམ་རླབས་པོ་ཆེ་བཏབས་པ་གཅིག་དགོས་ན། རིགས་ཀྱི་བུ་རྣམས་བྱང་ཆུབ་ཏུ་སྨོན་ལམ་ལེགས་པར་བཏབ་བམ། ཞེས་དྲིས་པའི་ལན་དུ། དེ་ལྟར་བཏབས་ལགས་སོ། །ཅེས་བྱའོ། །ལྔ་པ་བསླབ་པའི་གནས་གོ་བར་བྱས་ནས་སྤྲོ་བ་དྲི་ཞིང་སྡོམ་པ་སྦྱིན་པ་ནི། རིགས་ཀྱི་བུ་རྣམས། ད་ནི་ཡོན་ཏན་མི་ཟད་པ་དཔག་ཏུ་མེད་པ་བླ་ན་མ་མཆིས་པའི་བསོད་ནམས་ཀྱི་གཏེར། སངས་རྒྱས་ཡོན་ཏན་མཐའ་དག་རང་གི་རྒྱུད་ལ་བགེགས་མེད་དུ་སྐྱེ་བར་བྱེད་པའི་བྱང་ཆུབ་སེམས་དཔའི་སྡོམ་པ་མྱུར་དུ་ཐོབ་པར་འགྱུར་གྱི། དེའི་སྙིང་པོ་ནི། སྒོ་གསུམ་

---

^{[མ་དཔེ་གཟིགས་ན་འདིར་གནོན།]}

གྱི་མི་དགེ་བ་མཐའ་དག་སྤོངས་བའི་སེམས་ནི་ཉེས་སྤྱོད་སྡོམ་པའི་ཚུལ་ཁྲིམས་ཕ་རོལ་དུ་ཕྱིན་པ་དྲུག་ལ་སོགས་པ་རྒྱལ་བ་སྲས་བཅས་ཀྱི་རྣམ་ཐར་ལ་སློབ་ཅིང་སྒྲུབ་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས། རང་ཉིད་ཞི་བདེ་སྒྲུབ་པ་མ་ཡིན་པར་སེམས་ཅན་ཐམས་ཅད་ཀྱི་དོན་ངལ་བ་མེད་པར་ཅི་ནུས་ཀྱི་སྤྱོད་པ་ནི་སེམས་ཅན་དོན་བྱེད་ཀྱི་ཚུལ་ཁྲིམས་ཏེ། ཚུལ་ཁྲིམས་རྣམ་པ་གསུམ་པོ་འདི་ལ་བྱང་ཆུབ་སེམས་དཔའ་བསླབ་པའི་གནས་མཐའ་དག་འདུ་ཞིང་རྫོགས་པ་ཡིན་ཕྱིར། རིགས་ཀྱི་བུ་རྣམས། བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པའི་ཚུལ་ཁྲིམས་དེ་དག་བདག་ལས་ལེན་པར་འདོད་དམ། ཞེས་དྲི་ཞིང་། ཤིན་ཏུ་ལེན་པར་འཚལ་ལགས། ཞེས་སློབ་མས་བརྗོད་དོ།།

---

^{[མ་དཔེ་གཟིགས་ན་འདིར་གནོན།]}

༈ །།དེ་ནས་འཇུག་སྡོམ་དངོས་འབོགས་ཕྱིར་གོ་དོན་སྤྲད་དེ། དེ་ནས་རིགས་ཀྱི་བུ་ཚེ་དང་ལྡན་པ་རྣམས་མ་ཡེེངས་པར་དགོངས་འཚལ། འདི་ལྟར་འཁོར་འདས་ཀྱི་ཆོས་ཐམས་ཅད་དོན་དམ་པར་ཡོད་མེད་རྟག་ཆད་ལ་སོགས་ཀྱི་དམིགས་མཚན་གང་ཡང་མ་གྲུབ་པར་སྤྲོས་པའི་མཐའ་ལས་འདས་པ་ཅིག་ཡིན་ཀྱང་། ཀུན་རྫོབ་ཏུ་འགག་མེད་ཀྱི་སྣང་བ་སྣ་ཚོགས་པར་ཤར་ཞིང་ཇི་ལྟར་སྣང་ཡང་དོན་ལ་མི་གནས་པ་རྨི་ལམ་སྒྱུ་མ་ལྟ་བུ་སྟེ། ཏིང་འཛིན་རྒྱལ་པོའི་མདོར། །སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་བདེན་པ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། ཞེས་སོགས་གསུངས་པ་ལྟར་ཡིན་ནའང་། སེམས་ཅན་ཀུན་གྱིས་དེ་ལྟར་མ་ཤེས་པས་མི་བདེན་པ་ལ་

---

^{[མ་དཔེ་གཟིགས་ན་འདིར་གནོན།]}

བདེན་པར་བཟུང་བ་ཀུན་རྫོབ་རྫུན་སྣང་ལ་ཨ་འཐས་ཀྱི་ཞེན་འཁྲུལ་འབའ་ཤིག་གོམས་པ་ཆེས་པས་འཁོར་བ་མཐའ་མེད་དུ་གཏན་འཁྱམས་སུ་གནས་པའི་དྲིན་ཅན་ཕ་མའི་ཚོགས་འདི་རྣམས་གཏན་བདེ་བྱང་ཆུབ་ཀྱི་གོ་འཕང་ལ་འགོད་ཕྱིར་དང་། དེ་ལྟར་འགོད་པའི་ནུས་པ་ནི་རྫོགས་པའི་སངས་རྒྱས་ཉིད་ལས་གཞན་ལ་མ་མཆིས་མོད་ཀྱི། སངས་རྒྱས་དེ་ཐོབ་པར་བྱེད་པའི་རྒྱུ་དང་ཐབས་ནི་བྱང་ཆུབ་ཀྱི་སེམས་རིན་པོ་ཆེ་བསྐྱེད་ཅིང་དེའི་བསླབ་པའི་གནས་ཐམས་ཅད་ལ་སྤྱོད་དགོས་པས་ན། ཁྱེད་ཅག་རྣམས་དུས་འདི་ནས་བཟུང་སྟེ་ཇི་སྲིད་བྱང་ཆུབ་ཀྱི་སྙིང་པོ་མ་ཐོབ་ཀྱི་བར་དུ་བྱང་ཆུབ་སེམས་དཔའི་ཚུལ་ཁྲིམས་རྣམ་པ་གསུམ་བླང་ཞིང་བསྲུང་བ་དང་། རྒྱལ་སྲས་བྱང་སེམས་ཀྱི་སྤྱོད་པ་

---

^{[མ་དཔེ་གཟིགས་ན་འདིར་གནོན།]}

ལ་དུས་འདི་ནས་འཇུག་པར་བྱའོ་སྙམ་པའི་བསམ་པ་གསལ་ཐོབ་ཅིག །ཅེས་བརྗོད་ལ། སྐབས་འདིར་སློབ་དཔོན་ཉིད་ཀྱི་རྒྱུད་ལ་སྨོན་འཇུག་གི་ཉམས་རྟོགས་ཇི་ཙམ་ཡོད་པ་གསལ་བཏབ་ཅིང་། དེ་དང་སློབ་མར་སྣང་བའི་རྟོགས་པ་སྒྱུ་མ་ལྟ་བུ་གཉིས་དབྱེར་མེད་དུ་མཉམ་པར་གཞག་པའི་ངང་ནས་འདི་སྐད་བརྗོད་པས་སྡོམ་པ་བྱིན་པར་བྱ་སྟེ།། ༈ །།བྱང་ཆུབ་མཆོག་ཏུ་སེམས་བསྐྱེད་པའི་སྐལ་བ་བཟང་པོ་ཅན་རིགས་ཀྱི་བུ་ཚེ་དང་ལྡན་པ་ཁྱེད་རྣམས། བདག་བྱང་ཆུབ་སེམས་མིང་འདི་ཞེས་བགྱི་བ་ལས། འདས་པའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་བ་གང་ཡིན་པ་དང་། མ་བྱོན་པའི་བྱང་ཆུབ་སེམས་དཔའ་རྣམས་ཀྱི་བསླབ་པའི་གཞིར་འགྱུར་བ་གང་ཡིན་པ་དང་། ཕྱོགས་བཅུ་དག་ན་ད་ལྟར་བྱུང་དང་བཞུགས་པའི་བྱང་ཆུབ་སེམས་དཔའ་རྣམས་ཀྱིས་ཇི་ལྟར་སློབ་པར་མཛད་པའི་བསླབ་པའི་

---

^{[མ་དཔེ་གཟིགས་ན་འདིར་གནོན།]}

གཞི་གང་ཡིན་པ་རྣམས་དང་། བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་དེ། སྡོམ་པའི་ཚུལ་ཁྲིམས་དང་། དགེ་བའི་ཆོས་སྡུད་པ་དང་། སེམས་ཅན་གྱི་དོན་བྱེད་པའི་ཚུལ་ཁྲིམས་ཏེ། བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞི་དག་ཐམས་ཅད་བདག་ལས་ཐོབ་པར་འདོད་དམ། ཞེས་པ་དང་། སློབ་མས་ཀྱང་། ཤིན་ཏུ་འདོད་ལགས། ཞེས་དང་། ཚུལ་བཞིན་དུ་ནོད་དམ། ཞེས་པའི་ལན་དུ། ཚུལ་བཞིན་དུ་ནོད་པར་བགྱི་ལགས་སོ། །ཞེས་སློབ་མས་ཁས་བླངས་བར་བྱའོ། །ཡང་། གོང་བཞིན་དུ་བྱང་ཆུབ་ཀྱི་སེམས་གསལ་ཐོབ་ལ་ཡིད་གཞན་དུ་མ་ཡེངས་ཤིག །ཅེས་བརྗོད་ནས།། ༈ །།རིགས་ཀྱི་བུ་རྣམས། བདག་བྱང་ཆུབ་སེམས་དཔའ་མིང་འདི་ཞེས་བྱ་བ་ལས། འདས་པའི་བྱང་ཆུབ་སེམས་དཔའ་ཞེས་སོགས་ནས། ཐོབ་པར་འདོད་དམ། ཞེས་སོགས་དང་།

---

^{[མ་དཔེ་གཟིགས་ན་འདིར་གནོན།]}

ཚུལ་བཞིན་དུ་ནོད་པར་བགྱི་ལགས་སོ། །ཞེས་པའི་བར་དུ་ལན་གཉིས་པ་དང་། ལན་གསུམ་པའི་བརྗོད་པ་རྫོགས་པའི་ཚེ་བྱང་སྡོམ་ཡོངས་རྫོགས་ཐོབ་པར་དཔོན་སློབ་གཉིས་ཀས་ངེས་ཤེས་བྱའོ། །དེ་ཚེ་བླ་མས་མེ་ཏོག་འཐོར་ཞིང་། །བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པར་ཡང་། །གོང་ནས་གོང་དུ་འཕེལ་བར་ཤོག །ཅེས་སྨོན་ལམ་ཡང་བྱའོ།། ༈ །།མཇུག་གི་ཆོ་ག་ལ་ཡང་ལྔ་ཡོད་དེ། མཁྱེན་པར་གསོལ་བ། ཕན་ཡོན་བརྗོད་པ། གསང་བར་གདམས་པར། བསླབ་བྱ་བསྟན་པ། གཏང་རག་འབུལ་བ་དང་ལྔའི། དང་པོ་མཁྱེན་པར་གསོལ་བ་ནི། སློབ་མ་རྣམས་ཐལ་སྦྱར་ཙོག་པུར་འདུག་ཅིང་། སློབ་དཔོན་གྱིས་ཤར་ནས་བཟུང་སྟེ་ཕྱོགས་བཅུར་རིམ་པ་བཞིན་ཕྱག་གསུམ་བྱ་བ་དང་། ཤར་ཕྱོགས་ཀྱི་ཞིང་ཁམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའི་ཐམས་ཅད་ལ་གུས་པ་ཆེན་པོས་ཕྱག་འཚལ་ལོ། །ཞེས་སོགས་

---

^{[མ་དཔེ་གཟིགས་ན་འདིར་གནོན།]}

ཕྱོགས་མཚམས་ཀུན་ལ་འགྲེ་ཞིང་། སྟེང་འོག་གཉིས་ཀྱི་ཕྱག་ཤར་ནུབ་གཉིས་ལ་བྱ་བ་ཡིན་ལ། གལ་ཏེ་གནས་ཁང་ཁྱོན་དོན་ཅིང་སློབ་མའི་ཚོགས་མང་བ་ལྟ་བུས་དེ་ལྟར་མ་བདེ་ན་ནི་རྟེན་མཆོད་ཀྱི་ཕྱོགས་སུ་འཚམ་བ་ཡང་རུང་སྟེ། ཕྱོགས་དེ་དང་དེར་མོས་པ་བྱ་ཞིང་ཚིག་ཐ་དད་བརྗོད་པས་འཚལ་བར་བྱའོ། །དེ་ནས་སླར་བདུག་སྤོས་མཆོག་ཏུ་བཟང་བ་དང་བཅས་ཏེ། སློབ་དཔོན་གྱི་སྙིམ་པར་མེ་ཏོག་འཐོག་ལ་ཐལ་སྦྱར་པུས་བཙུགས་ཀྱི་ཤར་ཕྱོགས་སམ་རྟེན་མཆོད་ཀྱི་ཕྱོགས་སུ་བལྟས་ནས་འདི་སྐད་བརྗོད་པར་བྱའོ།། ༈ །།དེང་འདིར། བྱང་ཆུབ་སེམས་དཔའམ་མིང་འདི་ཞེས་བྱ་བ་ལ་སོགས་པས། བདག་བྱང་ཆུབ་སེམས་དཔས་མིང་འདི་ཞེས་བྱ་བ་ལས་བྱང་ཆུབ་སེམས་དཔའི་ཚུལ་ཁྲིམས། སློབ་མའི་མིང་བརྗོད་ཅིང་། སློབ་མ་མང་ན་དེ་དག་གི་གཙོ་བའི་མིང་བརྗོད་ཀྱི་སྡོམ་པ་ཡང་དག་སློབ་དཔོན་རང་ཉིད་ཀྱི་སར་བླང་བ་ལ་ལན་

---

^{[མ་དཔེ་གཟིགས་ན་འདིར་གནོན།]}

གསུམ་གྱི་བར་དུ་ལེགས་པར་ནོས་པ་ལགས། བྱང་ཆུབ་སེམས་དཔའ་མིང་འདི་ཞེས་བགྱི་བ་འདིས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་བ་ལ་བདག་བྱང་ཆུབ་སེམས་དཔའམ་མིང་འདི་ཞེས་བགྱི་བ་དཔང་དུ་གྱུར་པར། འཕགས་པའི་མཆོག་ལྐོག་ཏུ་གྱུར་ཀྱང་། ཕྱོགས་བཅུའི་འཇིགས་རྟེན་གྱི་ཁམས་མཐས་གཏུགས་པའི་ཆོས་ཐམས་ཅད་ལྐོག་ཏུ་མ་གྱུར་པའི་ཐུགས་མངའ་བ་ཐམས་ཅད་ལ་མཁྱེན་པར་གསོལ་ལོ། །ཞེས་ལན་གསུམ་གྱི་བར་དུ་བརྗོད་པའི་མཐར་སློབ་དཔོན་གཉིས་ཀས་ཕྱག་བྱ་ཞིང་། པུས་མོ་ས་ལ་བཙུགས་པའི་དུས་སུ་ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་ཞབས་ལ་སྤྱི་བོས་གཏུགས་པར་མོས་ཤིང་། ལངས་པའི་དུས་སུ་བདག་དང་སེམས་ཅན་ཐམས་ཅད་འཁོར་བ་ནས་ལྡང་བར་བསམ་ལ་ཐལ་མོ་སྤྱི་བོར་སྦྱར་བར་བྱའོ།། ༈ །།གཉིས་པ་ཕན་ཡོན་བསྟན་པ་ནི། དཔོན་སློབ་གཉིས་ཀ་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་

---

^{[མ་དཔེ་གཟིགས་ན་འདིར་གནོན།]}

སློབ་མ་ཐལ་སྦྱར་དང་སློབ་དཔོན་ཆོས་འཆད་ཀྱི་ཕྱག་རྒྱས་འདི་ལྟར་བརྗོད་དོ།། ༈ །།བྱང་ཆུབ་སེམས་དཔའ་མིང་འདི་ཞེས་བྱ་བ་ཁྱོད་རྣམས་ཉོན་ཅིག །འདི་ནི་ཆོས་ཉིད་ཡིན་ཏེ། གང་གི་ཚེ་བྱང་ཆུབ་སེམས་དཔའི་སྡོམ་པ་ཡང་དག་པར་ལེན་པའི་ལས་བརྗོད་པ་རྫོགས་པའི་དེའི་ཚེ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་བྱང་ཆུབ་སེམས་དཔའ་རྣམས་ལ་འདི་ལྟ་བུའི་ལྟས་འབྱུང་བར་འགྱུར་ཏེ། ས་གཡོ་བར་འགྱུར། ལྷའི་རྔའོ་ཆེ་གྲགས་པར་འགྱུར། མེ་ཏོག་གི་འཆར་འབབ་པར་འགྱུར་ཏེ། སངས་རྒྱས་དང་བྱང་ཆུབ་སེམས་དཔའ་དེ་དག་གིས། འདི་ལྟར་སངས་རྒྱས་ཀྱི་ཞིང་ག་གེ་མོ་ཞིག་ན་བྱང་ཆུབ་སེམས་དཔའ་མིང་འདི་ཞེས་བྱ་བ་ལས། བྱང་ཆུབ་སེམས་དཔའམ་འདི་དང་འདི་ཞེས་བགྱི་བ་དག་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་ནོས། སློབ་དཔོན་ སློབ་མ་ མི་འཇེད་ཀྱི་ཞིང་ལ་སོགས་ཀྱི་མིང་

---

^{[མ་དཔེ་གཟིགས་ན་འདིར་གནོན།]}

སོ་ཞེས་ཡང་དག་པར་མཁྱེན་པར་འགྱུར་རོ། །དེ་ལ་སངས་རྒྱས་བཅོམ་ལྡན་འདས་དེ་དག་དང་བྱང་ཆུབ་སེམས་དཔའ་ཆེན་པོ་དེ་དག་གི་ཆོས་ཀྱི་བརྩེ་བས་བུ་དང་སྤུན་ཟླར་དགོངས་པར་མཛད་ལ། དེ་ལྟར་དགོངས་པར་མཛད་པས་བྱང་ཆུབ་སེམས་དཔའ་འོ་སྐོལ་རྣམས་ཀྱི་བསོད་ནམས་དང་ཡེ་ཤེས་ཀྱི་ཚོགས་རབ་ཏུ་འཕེལ་བར་འགྱུར་རོ། ཞེས་བརྗོད་ནས་དཔོན་སློབ་གཉིས་ཀ་འདུག་གོ།། ༈ །།གསུམ་པ་གསང་བར་གདམས་པ་ནི། འདིའི་དགོས་པ་ནི་འཕགས་ཡུལ་སོགས་སུ་ཐེག་དམན་གྱི་གྲུབ་མཐའ་འཛིན་པ་ཆེས་མང་བའི་ཐེག་ཆེན་བློར་མི་ཤོང་ཞིང་སྨོད་པ་རྣམས་ལ་དགོངས་ཀྱི། བོད་ཡུལ་མཐའ་འཁོབ་ཀྱི་མི་ཕལ་མོ་ཆེ་ནི་འཕགས་པ་སྤྱན་རས་གཟིགས་ཀྱི་ཐུགས་རྗེའི་མཐུས་ཐེག་ཆེན་ལ་མོས་པ་ཤས་ཆེ་ཡང་། འགའ་ཞིག་རང་སྐལ་གྱི་སྐྱོན་ཅན་སྲིད་པ་ན། དེའི་ཕྱིར་སློབ་དཔོན་གྱི་འདི་ལྟར་གདམས་སྟེ།། ༈ །།བྱང་ཆུབ་སེམས་དཔའ་མིང་འདི་ཞེས་བྱ་བ་

---

^{[མ་དཔེ་གཟིགས་ན་འདིར་གནོན།]}

ཁྱེད་རྣམས་ཉོན་ཅིག །བྱང་ཆུབ་སེམས་དཔའི་སྡོམ་པ་ཡང་དག་པར་བླངས་བ་འདི་དད་པ་མེད་པ་རྣམས་ཀྱི་མདུན་དུ་སྨྲ་བར་མི་བྱ་སྟེ། གང་གི་ཕྱིར་དད་པ་མེད་པ་རྣམས་ལ་བྱང་ཆུབ་སེམས་དཔའི་སྡོམ་པ་རབ་ཏུ་བསྟན་ན་དད་པ་མེད་པའི་སེམས་ཅན་དེ་དག་གིས་བྱང་ཆུབ་སེམས་དཔའི་སྡོམ་པ་ལ་མ་དད་པས་སྤོང་བར་བྱེད་དེ། དེ་ཡང་ཇི་སྙེད་བྱང་ཆུབ་སེམས་དཔའི་སྡོམ་པ་ལ་གནས་པའི་བསོད་ནམས་ཀྱི་ཕུང་པོ་དང་ལྡན་པར་གྱུར་པ་དེ་སྙེད་ཀྱི་བསོད་ནམས་མ་ཡིན་པའི་ཕུང་པོ་དད་པ་མེད་པ་དེ་ལ་ལྡན་པར་འགྱུར་རོ། །གང་གི་ཕྱིར་བྱང་ཆུབ་སེམས་དཔའ་སེམས་ཅན་སྡུག་བསྔལ་ལས་ཡོངས་སུ་བསྲུང་བར་བྱ་བ་ཡིན་པས་སྡིག་པ་ལས་ལྡོག་པར་བྱ་སྟེ། དེའི་ཕྱིར་མཆོག་ཏུ་དགེ་བའི་བྱང་ཆུབ་ཀྱི་སེམས་གསང་བར་

---

^{[མ་དཔེ་གཟིགས་ན་འདིར་གནོན།]}

བྱ་བ་ཡིན་ནོ། །ཞེས་བརྗོད་དོ།། ༈ །།བཞི་པ་བསླབ་བྱ་བསྟན་པའི་རིམ་པ་ནི། རྒྱ་ཆེན་སྤྱོད་རྒྱུད་ཀྱི་ལུགས་འདི་ལ་བྱང་ཆུབ་སེམས་དཔའི་ས་ནས་གསུངས་པ་བཞིན་བཤད་དེ།། ༈ །།རིགས་ཀྱི་བུ་བྱང་ཆུབ་སེམས་དཔའ་ཁྱེད་རྣམས་ཀྱིས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ལེགས་པར་ཐོབ་པ་དེ་མ་ཉམས་པར་བསྲུང་བར་བྱ་བའི་ཕྱིར་དགག་པའི་བསླབ་བྱ་དང་། ཡོན་ཏན་གོང་དུ་སྤེལ་བར་བྱ་བའི་ཕྱིར་སྒྲུབ་པའི་བསླབ་བྱ་དང་གཉིས་ཡོད་པའི་དང་པོ་ལ། ཕམ་པ་དང་འདྲ་བའི་ཆོས་བཞི་དང་། ཉེས་བྱས་བཞི་བཅུ་རྩ་བཞི་རྣམས་སྤོང་དགོས་པའི། སྤང་བྱའི་རྩ་བ་བཞི་ནི། རྙེད་བཀུར་འདོད་ནས་རང་གི་ཡོན་ཏན་བརྗོད་ཅིང་། གཞན་ལ་སྐུར་འདེབས་བྱེད་པ་དང་། ༡ སྡུག་བསྔལ་ཞིང་མགོན་མེད་པའི་སེམས་ཅན་སྐྱོབས་པར་ནུས་བཞིན་མི་སྐྱོབས་པའམ། སེར་སྣས་ནོར་དང་ཆོས་སོགས་

---

^{[མ་དཔེ་གཟིགས་ན་འདིར་གནོན།]}

སྦྱིན་འོས་མི་སྦྱིན་པ་དང་། ༢ གཞན་གྱིས་ཉེས་པ་བྱས་པ་ལ་འགྱོད་པས་བཤགས་ཀྱང་རང་ཉིད་མི་ཉན་པར་ཁྲོ་ཞིང་ཀོ་ལོང་བྱེད་པ་དང་། ༣ ཐེག་པ་ཆེན་པོ་སྤོང་ཞིང་དམ་པའི་ཆོས་འདྲར་སྣང་དང་ཟོག་ཆོས་ཀྱིས་གཞན་བསླུ་བར་བྱེད་པ་དང་བཞི་སྡེ་༤འདི་དག་ཉོན་མོངས་ཀུན་དཀྲིས་ཆེན་པོས་སྤྱད་ན་བྱང་སྡོམ་རྩ་བ་ནས་འཇིག་པར་འགྱུར་ལ། ཀུན་དཀྲིས་འབྲིང་དང་ཆུང་དུས་སྤྱད་ན་བཤགས་བྱའི་ཉེས་པར་འགྱུར་བའོ།། ༈ །།ཡན་ལག་གི་ཉེས་བྱས་བཞི་བཅུ་རྩ་བཞིའམ་རྩ་དྲུག་ཏུ་བཤད་པའི་དོན་དངོས་གཞི་ཕལ་ཆེར་གོང་མ་འདིར་འདུ་ཡང་རྣམ་གྲངས་ཙམ་དུ་བྱང་པ་ལས་གསུངས་པ་ནི། ཇི་སྐད་དུ། དཀོན་མཆོག་གསུམ་ལ་གསུམ་མི་མཆོད། །འདོད་པའི་སེམས་ཀྱི་རྗེས་སུ་

---

^{[མ་དཔེ་གཟིགས་ན་འདིར་གནོན།]}

འཇུག །རྒན་པ་རྣམས་ལ་གུས་མི་བྱེད། །དྲིས་པ་ལ་ནི་ལན་མི་འདེབས། །མགྲོན་བོས་བདག་གིར་མི་བྱེད་ཅིང་། །གསེར་ལ་སོགས་པ་ལན་མི་བྱེད། །ཆོས་འདོད་པ་ལ་དེ་མི་བྱིན། །ཚུལ་ཁྲིམས་འཆལ་རྣམས་ཡལ་བར་འདོར། །ཕ་རོལ་དད་ཕྱིར་སློབ་མི་བྱེད། །སེམས་ཅན་དོན་ལ་བྱ་བ་ཆུང་། །སྙིང་བརྩེར་བཅས་ན་མི་དགེ་མེད། །འཚོ་བ་ལོག་པ་དང་དུ་ལེན། །འཕྱར་ཞིང་རབ་ཏུ་རྒོད་པ་སོགས། །འཁོར་བ་གཅིག་པུར་བགྲོད་པ་སེམས། །གྲགས་པ་མ་ཡིན་མི་སྤོང་བ། །ཉོན་མོངས་བཅས་ཀྱང་འཆོས་མི་བྱེད། །གཤེ་ལ་ལན་དུ་གཤེ་བ་སོགས། །ཁྲོས་པ་རྣམས་ནི་ཡལ་བར་འདོར། །ཕ་རོལ་ཤད་ཀྱི་ཆགས་པ་སྤོང་། །ཁྲོས་པའི་སེམས་ཀྱི་རྗེས་སུ་འཇུག །རྙེད་བཀུར་འདོད་ཕྱིར་འཁོར་རྣམས་སྡུད། །

---

^{[མ་དཔེ་གཟིགས་ན་འདིར་གནོན།]}

ལེ་ལོ་ལ་སོགས་སེལ་མི་བྱེད། །ཆགས་པས་བྲེ་མོའི་གཏམ་ལ་བསྟེན། །ཏིང་ངེ་འཛིན་གྱི་དོན་མི་ཚོལ། །བསམ་གཏན་སྒྲིབ་པ་སྤོང་མི་བྱེད། །བསམ་གཏན་རོ་ལ་ཡོན་ཏན་བལྟ། །ཉན་ཐོས་ཐེག་པ་སྤོང་བར་བྱེད། །རང་ཚུལ་ཡོད་བཞིན་དེ་ལ་བརྩོན། །བརྩོན་མིན་ཕྱི་རོལ་བསྟན་བཅོས་བརྩོན། །བརྩོན་པར་བྱས་ཀྱང་དེ་ལ་དགའ། །ཐེག་པ་ཆེན་པོ་སྤོང་བྱེད་དང་། །བདག་ལ་བསྟོད་ཅིང་གཞན་ལ་སྨོད། །ཆོས་ཀྱི་དོན་དུ་འགྲོ་མི་བྱེད། །དགེ་ལ་སྨོད་དང་མི་དགེར་བསྟེན། །དགོས་པའི་གྲོགས་སུ་འགྲོ་མི་བྱེད། །ནད་པའི་རིམ་འགྲོ་བྱ་བ་སྤོང་། །སྡུག་བསྔལ་སེལ་བར་མི་བྱེད་དང་། །བག་མེད་ལ་ཡང་རིགས་མི་སྟོན། །བྱས་ལ་ལན་དུ་ཕན་མི་འདོགས། །གཞན་གྱི་མྱ་

---

^{[མ་དཔེ་གཟིགས་ན་འདིར་གནོན།]}

ངན་སེལ་མི་བྱེད། །འཁོར་རྣམས་ཀྱི་ནི་དོན་མི་བྱེད། །གཞན་གྱི་བློ་དང་མཐུན་མི་འཇུག །ཡོན་ཏན་བསྔགས་པ་སྨ་མི་བྱེད། །རྐྱེན་དང་འཚལ་པ་ཚར་མི་གཅོད། །རྫུ་འཕྲུལ་བསྡིགས་ལ་སོགས་མི་བྱེད། །སྙིང་བརྩེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། ཅེས་གསུངས་པ་འདི་དག་ནི་སོ་ཐར་ལ་དགེ་སློང་གི་ཉེས་བྱས་ཀྱི་སྡེ་ཚན་ལྟ་བུ་དང་། འགའ་ཞིག་ནི་བྱང་ཆུབ་སེམས་དཔའ་ནུས་པ་ཅན་ཅུང་ཟད་ལྡན་ཞིང་རྒྱུད་ཚོད་མཐོ་བའི་རིགས་ལ་དགོངས་པ་དག་ཀྱང་ཡོད་ལ། དེ་ལྟར་དགག་པའི་བསླབ་བྱ་རྣམས་ཀྱི་དྲི་མས་མ་གོས་པར་བྱའོ།། ༈ །།གཉིས་པ་སྒྲུབ་པའི་བསླབ་བྱ་ནི། སྤྱིར་ཕ་རོལ་དུ་ཕྱིན་པ་དྲུག་ལ་སློབ་ཅིང་། ཁྱད་པར་དུ་ཚུལ་ཁྲིམས་རྣམ་པ་གསུམ་

---

^{[མ་དཔེ་གཟིགས་ན་འདིར་གནོན།]}

ལ་འབད་པ་ནི་བྱང་ཆུབ་སེམས་དཔའི་བསླབ་པ་ཐམས་ཅད་ཀྱི་སྙིང་པོ་ཡིན་ཏེ། དེ་ཡང་མི་དགེ་བ་བཅུ་དང་འཚམ་མེད་པ་ལྔ་ལ་སོགས་པ་རང་བཞིན་གྱི་མི་དགེ་བ་རྣམས་དང་། དེའི་སྟེང་དུ་རང་ཉིད་སོ་ཐར་རིས་བདུན་གང་ལ་གནས་པ་དེའི་སྤང་བྱའི་བསླབ་པའི་གཞི་ཐམས་ཅད་དང་། འདི་སྐབས་སྨོན་འཇུག་གཉིས་ཀྱི་སྤང་བྱའི་རྣམ་གྲངས་མཐའ་དག་གི་ཉེས་པས་མ་གོས་པ་ནི་ཉེས་སྤྱོད་སྡོམ་པའི་ཚུལ་ཁྲིམས། ཕ་རོལ་དུ་ཕྱིན་པ་དྲུག་གི་མི་མཐུན་ཕྱོགས་དང་མ་འདྲེས་ཤིང་མཐུན་ཕྱོགས་རྣམས་ལ་འབད་པ་དང་། ཆོས་སྤྱོད་རྣམ་པ་བཅུ་དང་། ཡི་གེ་འབྲི། མཆོད། སྦྱིན། ཉན། ཀློག །འཛིན། འཆད། ཁ་བཏོན་བྱེད། དོན་སེམས། སྒོམ། ཚོགས་གཉིས་ལ་ངོམས་པ་མེད་པར་འབད་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས། རང་ཉིད་ཀྱི་ནུས་པ་དང་མཐུན་

---

^{[མ་དཔེ་གཟིགས་ན་འདིར་གནོན།]}

པ་དང་བཅུའོ། པའི་སེམས་ཅན་གྱི་དོན་ལ་ངལ་བ་དང་ཞུམ་པ་མེད་པར་བརྩོན་པ་ནི་སེམས་ཅན་དོན་བྱེད་ཀྱི་ཚུལ་ཁྲིམས་ཏེ། བྱང་ཆུབ་སེམས་དཔའི་ཚུལ་ཁྲིམས་རྣམ་པ་གསུམ་ལ་དུས་ད་ནས་བཟུང་སྟེ་མཐར་ཐུག་བྱང་ཆུབ་ཀྱི་སྙིང་པོ་མ་ཐོབ་ཀྱི་བར་དུ་ཡང་དག་པར་བཟུང་ཞིང་བསྲུང་བ་དང་བླང་དོར་གྱི་གནས་ལ་རབ་ཏུ་བརྩོན་པར་བྱ་ཞིང་། དེ་ཡང་བྱང་ཆུབ་སེམས་དཔའ་ལས་དང་པོ་པས་ནི་རང་གཞན་གྱི་ཉེས་པ་ཐམས་ཅད་སྤོང་བ་ཉེས་སྤྱོད་སྡོམ་པའི་ཚུལ་ཁྲིམས་ལ་གཙོ་བོར་ཉམས་སུ་ལེན་དགོས་ཏེ། རང་རྒྱུད་ཉོན་མོངས་པ་ཤས་ཆེ་བའི་དུས་ཡིན་པའི་ཕྱིར་དང་། མོས་སྤྱོད་ཀྱི་སྐབས་རྣམས་སུ་ནི་སངས་རྒྱས་ཀྱི་ཡོན་ཏན་ཐམས་ཅད་བདག་དང་གཞན་ལ་སྒྲུབ་པའི་དུས་ཡིན་པས་དགེ་བ་ཆོས་སྡུད་ཀྱི་ཚུལ་གཙོ་བོར་ཉམས་སུ་བླངས། ས་ཐོབ་ནས་བཟུང་སྟེ་རང་རྒྱུད་ཀྱི་

---

^{[མ་དཔེ་གཟིགས་ན་འདིར་གནོན།]}

སྐྱོན་དག་ཅིང་ཡོན་ཏན་འཕེལ་བའི་ནུས་པས་དངོས་དང་བརྒྱུད་ནས་སེམས་ཅན་གྱི་དོན་རང་ཤུགས་ཀྱིས་འགྲུབ་པའི་དུས་ཡིན་ཚེ་སེམས་ཅན་དོན་བྱེད་ཀྱི་ཚུལ་ཁྲིམས་གཙོ་ཆེ་བར་སྤྱོད་པའི་དུས་ཡིན་པར་གསུངས་ཤིང་། མདོར་བསྡུ་ན། དུས་ད་ནས་བཟུང་སྟེ་ལུས་ངག་ཡིད་གསུམ་གྱི་མི་དགེ་བའི་རིགས་སུ་གྱུར་ཚད་ཅི་ནུས་ཀྱི་སྤོང་བ་དང་། རྣམ་དཀར་དགེ་བའི་རིགས་གྱུར་ཕྲ་ཞིང་ཕྲ་བ་ཚུན་ཆད་ཅི་ནུས་ཅི་ལྕོགས་ཀྱི་སྒྲུབས་པ་དང་། གང་དང་གང་སྒྲུབ་པ་དེ་ཐམས་ཅད་འཇིག་རྟེན་ཆོས་བརྒྱད་དམ་ཉན་རང་ཞི་བདེའི་བསམ་པ་དང་མ་འདྲེས་པར་མཁའ་མཉམ་འགྲོ་བ་རྫོགས་བྱང་ལ་འགོད་ཕྱིར་གྱི་བྱང་ཆུབ་ཀྱི་སེམས་དང་མི་འབྲལ་བ་ཉིད་འདིའི་ཉམས་ལེན་གྱི་རྩ་བ་

---

^{[མ་དཔེ་གཟིགས་ན་འདིར་གནོན།]}

དང་ཡང་སྙིང་ཡིན་པས་ལག་ལེན་དུ་ཐེབས་པར་བྱས་ན། དེ་རིང་ཕན་ཆད་ནས་ཁྱེད་ཀྱི་རྒྱུད་ལ་བསོད་ནམས་ཀྱི་ཕུང་པོ་ནམ་མཁའ་དང་མཉམ་པ་རྒྱུན་ཆད་མེད་པར་འཕེལ་བ་ལགས་ཏེ། འདི་ལྟ་སྟེ། དཔེར་ན་ལྕགས་ཀྱི་ཕུང་པོ་ཇི་ཙམ་པ་ཡང་གསེར་འགྱུར་གྱི་རྩི་ཡིས་རེག་མ་ཐག་ཐམས་ཅད་གསེར་གྱི་དངོས་པོ་འབའ་ཞིག་ཏུ་འགྱུར་ཏེ་དེ་ལས་ནམ་ཡང་འགྱུར་བ་ཉམས་པ་དང་ལྡོག་པའི་སྐབས་མི་སྲིད་པ་ལྟ་བུ་སྟེ། བྱང་ཆུབ་ཀྱི་སེམས་རིན་པོ་ཆེའི་རྩི་ཡིས་ཟིན་པའི་བྱ་བྱེད་མཐའ་དག་སངས་རྒྱས་ཀྱི་རྒྱུ་ཁོ་ན་ལས་གཞན་དུ་སྲིད་པ་མ་ཡིན་ཏེ། དེ་ལྟར་ཡང་སྤྱོད་འཇུག་ལས། །གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་བསྒྲལ་བའི་ཕྱིར། །མི་ལྡོག་པ་ཡི་སེམས་ཀྱིས་ནི། །སེམས་དེ་ཡང་དག་བླངས་

---

^{[མ་དཔེ་གཟིགས་ན་འདིར་གནོན།]}

གྱུར་པ། །དེང་ནས་བཟུང་སྟེ་གཉིད་ལོག་གི། །བག་མེད་གྱུར་ཀྱང་བསོད་ནམས་ཕུང་། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང་། །ཞེས་གསུངས་པ་ལྟར། བྱང་ཆུབ་སེམས་དཔའི་ཚུལ་ཁྲིམས་དང་ལྡན་པ་དེ་ཁམས་གསུམ་ཀུན་གྱིས་བཀུར་བའི་ཞིང་མཆོག་དམ་པར་གྱུར་པ་སྟེ། སྲེད་མེད་ཀྱི་བུས་ཞུས་པའི་མདོ་ལས། ཚུལ་ཁྲིམས་ཀྱི་ཕུང་པོ་ལ་གནས་པའི་བྱང་ཆུབ་སེམས་དཔའ་ལ་ལྷ་རྣམས་ཀྱིས་རྟག་ཏུ་ཕྱག་བྱས་པ་ཡིན། ཀླུ་རྣམས་ཀྱི་རྟག་ཏུ་བསྔགས་པ་ཡིན། གནོད་སྦྱིན་རྣམས་ཀྱིས་རྟག་ཏུ་བསྟོན་པ་ཡིན། དྲི་ཟ་ཐམས་ཅད་ཀྱིས་རྟག་ཏུ་མཆོད་པ་ཡིན། བྲམ་ཟེ་དང་རྒྱལ་རིགས་དང་ཚོང་དཔོན་དང་ཁྱིམ་བདག་རྣམས་ཀྱིས་རྟག་ཏུ་གསོལ་བ་ཡིན། སངས་རྒྱས་རྣམས་ཀྱི་རྟག་ཏུ་དགོངས་པ་ཡིན།

---

^{[མ་དཔེ་གཟིགས་ན་འདིར་གནོན།]}

ལྷ་དང་བཅས་པའི་འཇིག་རྟེན་གྱིས་རྟག་ཏུ་བསྐུར་བ་ཡིན། ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་པས་འཚང་རྒྱ་བ་ཡིན་ནོ། །ཞེས་གསུངས་པ་བཞིན། གནས་སྐབས་མངོན་པར་མཐོ་བ་དང་མཐར་ཐུག་ངེས་པར་ལེགས་པའི་ཡོན་ཏན་མ་ལུས་པ་འདི་ལས་འབྱུང་བར་ཤེས་པས་བྱང་ཆུབ་ཀྱི་སྤྱོད་པ་ལ་བསླབ་པར་བྱོས་ཤིག །ཡང་གལ་ཏེ་བྱང་ཆུབ་སེམས་དཔའི་ཚུལ་ཁྲིམས་རིན་པོ་ཆེ་དེ་ལས་ཉམས་ན་སོ་ཐར་ཙམ་ཉམས་པ་དང་ཡང་མི་མཚུངས་ཏེ་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ཀྱིས་ཁྲོལ་ཞིང་། མཁའ་མཉམ་གྱི་སེམས་ཅན་མཐའ་དག་བསླུས་པར་གྱུར་པས། བསྐལ་པ་གྲངས་མེད་པར་ངན་སོང་དུ་མནར་བར་འགྱུར་བ་དང་། བྱང་ཆུབ་ཀྱི་མྱུ་གུ་སྐོམ་པར་འགྱུར་བས་ན། ཅི་ནས་ཀྱང་

---

^{[མ་དཔེ་གཟིགས་ན་འདིར་གནོན།]}

མ་ཉམས་པར་འབད་དགོས་ཏེ། སྤྱོད་འཇུག་ལས། སེམས་མཆོག་དེ་ལས་ཉམས་གྱུར་ན། །རྒྱལ་ཀུན་མི་མཉེས་འགྲོ་ཀུན་བསླུས། །རང་གཞན་དོན་ཉམས་ངན་འགྲོར་འགྲོ། །དེ་བས་འབད་དེ་སེམས་འདི་བསྲུང་། ཞེས་པ་དེ་ལྟ་བུའི་སྤང་བླངས་མ་ནོར་བ་ལ་བརྩོན་དགོས་པ་ལགས།། ༈ །།ལྔ་པ་བཏང་རག་འབུལ་བ་ནི། དེ་ལྟར་ཁྱེད་ཀྱི་རྒྱུད་ལ་བླ་ན་མེད་པའི་བྱང་ཆུབ་ཀྱི་ས་བོན་ལེགས་པར་བསྐྲུན་ཏེ། མི་ལས་ལྷར་བསྒྱུར། རྒྱལ་བུ་རྒྱས་པར་བཀོད། དབུལ་པོ་ལ་རིན་སྦྱིན། ལྕགས་གསེར་དུ་བསྒྱུར་བ་ལྟ་བུས། ཁ་སང་ཕན་ཆད་སོ་སོ་སྐྱེ་བོ་ལ་དེ་རིང་ཚུན་ཆད་ནས་བྱང་ཆུབ་སེམས་དཔར་ཀྲོངས་ཀྱི་གྱུར་ནས། སྒོ་གསུམ་གྱི་མི་དགེ་བ་ཐམས་ཅད་ཟད་པར་བྱས། ལུང་མ་བསྟན་གྱི་བྱ་

---

^{[མ་དཔེ་གཟིགས་ན་འདིར་གནོན།]}

བ་རྣམས་དགེ་བར་བསྒྱུར། དགེ་བ་ཐམས་ཅད་བླ་ན་མེད་པའི་བྱང་ཆུབ་ཀྱི་ཉེ་རྒྱུར་བསྒྲུབ་ནས་སངས་རྒྱས་ཀྱི་ལམ་ལ་གོལ་ཆུགས་མེད་པར་བཙུད་པ་འདི་ནི་དཀོན་མཆོག་དང་བླ་མའི་བཀའ་དྲིན་ཁོ་ན་ཡིན་པ་ཤེས་པར་མཛོད་ལ། སྐུ་དྲིན་གསོ་ཕྱིར་རང་གི་ལུས་ལོངས་སྤྱོད་གཏན་མདུན་མཐའ་དག་འབུལ་བའི་མོས་པ་དང་ལྡན་པས་རྗེས་ཟློས་འདི་བཞིན་མཛད་འཚལ།། ༈ །།དེང་ནས་བྱང་ཆུབ་སྙིང་པོའི་བར། །བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བའི་དངོས་པོ་རྣམས། །གུས་པས་ཁྱེད་ལ་འབུལ་བར་བགྱི། །ཀུན་ནས་གཟིགས་པའི་སྤྱན་ལྡན་པ། །ཡོན་གནས་དམ་པ་ཁྱེད་རྣམས་ཀྱིས། །བདག་ལ་བརྩེ་བས་ཉེར་དགོངས་ནས། །བདག་གི་འདི་བདག་བཞེས་སུ་གསོལ། །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་

---

^{[མ་དཔེ་གཟིགས་ན་འདིར་གནོན།]}

ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་སྟེ། །བདུད་ཀྱི་ལས་ཀྱང་ཡོང་བར་ཤོག །བདག་གི་བསོད་ནམས་ཅི་བསགས་པ། །ཐམས་ཅད་བྱང་ཆུབ་རྒྱུར་གྱུར་ནས། །རིང་པོར་མི་ཐོགས་འགྲོ་བ་ཀུན། །བྱང་ཆུབ་ཉིད་ལ་འགོད་བྱེད་ཤོག །ཅེས་བརྗོད་དེ་ཕྱག་བྱ་ཞིང་། སློབ་དཔོན་གྱིས་ཀྱང་དཀོན་མཆོག་གསུམ་གྱི་བཀྲ་ཤིས་དང་མདོ་ནས་འབྱུང་བའི་གང་ལ་སེར་སྣ་མ་སོགས་ཀྱི་ཤིས་བརྗོད་ཀྱང་རྒྱས་པར་བྱའོ། །སྨོན་འཇུག་གཉིས་ཀྱི་སྡོམ་པའི་ཆོ་ག་གྲུབ་པའོ།། ༈ །།དོན་དམ་བྱང་ཆུབ་ཏུ་སེམས་བསྐྱེད་པའི་ཚུལ་ལ། སྤྱིར་ཐེག་ཆེན་གྱི་ཆོས་ཐམས་ཅད་བདེན་གཉིས་དང་ཐབས་ཤེས་ཀྱི་སྒྲོམ་ནས་ཐོན་དགོས་ཕྱིར་སེམས་བསྐྱེད་ཀྱི་སྐབས་འདིར་ཡང་ཀུན་རྫོབ་དོན་དམ་གྱི་བྱང་སེམས་ཟུང་དུ་འབྲེལ་བ་དང་། སྔགས་ཀྱི་སྐབས་སུ་དེ་གཉིས་པོ་རྟེན་དང་བརྟེན་པ་ཟླ་བ་རྡོ་རྗེའི་བརྡ་དོན་གྱི་ཚུལ་སོགས་འབྱུང་བ་ལ་ཆོས་ལུགས་ཐམས་ཅད་ཐུན་མོད་ཀྱང་། བྱང་སྡོམ་གྱི་སྐབས་

---

^{[མ་དཔེ་གཟིགས་ན་འདིར་གནོན།]}

འདིར་དོན་དམ་སེམས་བསྐྱེད་ཆོ་གས་ཐོབ་མི་ཐོབ་ཀྱི་དགག་སྒྲུབ་མཛད་སྲོལ་བྱུང་མོད་ཀྱི། འདིར་ནི་དགག་སྒྲུབ་ཀྱི་ཚིག་ཚོགས་སྨྲ་བའི་སྐབས་མ་ཡིན་པ་དང་། དོན་དམ་བྱང་སེམས་དེ་ཉིད་བསྒོམ་སྟོབས་ཀྱི་སྐྱེ་བ་ལས། ཆོ་གས་འབོགས་རུང་མི་རུང་གི་རྩོད་གཞི་དུ་མ་སྣང་བ་རྣམས་བཏང་སྙོམས་སུ་བཞག་ཅིང་། ཆོ་གར་མིང་འདོགས་གང་ལྟར་མཛད་རུང་བསྒོམ་སྟོབས་ཀྱི་སྐྱེ་རྒྱུ་དེ་ཉིད་བླ་མས་ངོ་སྤྲད་པར་བསྒོམ་རྒྱུ་གང་ཡིན་ཤེས་པར་ཡང་དཀའ་ཞིང་། སྔགས་ཀྱི་དབང་བཞི་པའི་ཐབས་གནད་དང་མཚུངས་ཕྱིར། དེས་ན་འདི་སྐབས་ཀྱི་གཞུང་སྤང་སྐོང་ཕྱག་རྒྱའི་མདོའི་དགོངས་པ་ཇི་ལྟ་བར་མགོན་པོ་ཀླུ་སྒྲུབ་ཞབས་ཀྱིས་སྒྲིགས་ཆགས་སུ་མཛད་པ་བཞིན་བརྗོད་པར་བྱ་ཞིང་། འདི་ལ་སེམས་སྐྱེད་ཞུ་བའི་གང་ཟག་བཞེད་ལུགས་འདི་ལ་མོས་པ་དང་བློར་ཤོང་བ་དག་ལ་འབོགས་པར་བྱའི། ལུགས་འདི་ལ་མི་མོས་པའི་རིགས་ལ་ནི་ཕོགས་ཀྱང་མི་སྐྱེ་ལ། སློབ་དཔོན་ལ་ཡང་སྣོད་དང་མི་མཐུན་པའི་གདམས་པ་བསྟན་པའི་ཉེས་ལྟུང་འབྱུང་

---

^{[མ་དཔེ་གཟིགས་ན་འདིར་གནོན།]}

བས་ན་སྣོད་དང་གནས་སྐབས་ཤེས་དགོས་པ་ཉིད་དོ། །དེ་བས་ན་འདི་ཉིད་ཀྱི་སྣོད་དང་སྐལ་བར་གྱུར་བ་དག་ལ་དོན་དམ་བྱང་ཆུབ་ཏུ་སེམས་བསྐྱེད་པའི་ཐབས་ནི། མཆོད་པ་བཟང་པོ་གསར་དུ་བཤམས་པའི་ཁ་གསོ་བ་གང་རིགས་དང་། བླ་མ་དང་དཀོན་མཆོག་ལ་གུས་ཕྱག་དགུ་ཕྲུགས་མཎྜལ་དང་བཅས་པ་ཕུལ་ལ་ཐལ་མོ་སྦྱར་ཏེ་གུས་པས་འཁོད་པ་ལ་སློབ་དཔོན་གྱིས་འདི་ལྟར་བརྗོད་དོ།། ༈ །།དེ་ལྟར་སྐལ་བཟང་ཁྱེད་ཅག་གི་རྒྱུད་ལ་ཀུན་རྫོབ་བྱང་སེམས་སྨོན་པ་དང་འཇུག་པའི་རིམ་པ་ལེགས་པར་བསྐྲུན་པས་རྫོགས་པའི་བྱང་ཆུབ་ཀྱི་སྐལ་བ་ཅན་དུ་བསྒྲུབ་ནས། ད་ནི་དོན་དམ་པའི་བྱང་ཆུབ་ཀྱི་སེམས་རིན་པོ་ཆེ། ཐམས་ཅད་ཀྱི་མདོ་དོན། སངས་རྒྱས་ཐམས་ཅད་ཀྱི་སྙིང་པོ། ངེས་དོན་ཐམས་ཅད་ཀྱི་མཐར་ཐུག་འདི་ཉིད་སྟོན་པར་བྱེད་པ་ལ། ངོ་བོ་ངོས་བཟུང་བ་དང་། རྣམ་

---

^{[མ་དཔེ་གཟིགས་ན་འདིར་གནོན།]}

པ་ལག་ཏུ་བླང་བ་གཉིས་ཀྱི་དང་པོ་ངོ་བོ་ནི། རང་གི་སེམས་ཡེ་གདོད་མ་ནས་སྤྲོས་པའི་མཚན་མས་དབེན་ཞིང་སྐྱེ་འགག་གནས་གསུམ་འགྲོ་འོང་གི་དངོས་པོའམ་ཡོད་མེད་རྟག་ཆད་ཀྱི་མཐའ་དང་བྲལ་བའི་སྟོང་པ་ཉིད་ཀྱི་རང་བཞིན་གང་ཡིན་པ་དེ་ལ་དོན་དམ་བྱང་ཆུབ་ཀྱི་སེམས་ཞེས་བྱ་ལ། ཁམས་བདེ་བར་གཤེགས་པའི་སྙིང་པོ་ཅེས་ཀྱང་བྱ་བ་དང་། ཀུན་གཞི་བྱང་ཆུབ་ཀྱི་སེམས་སུ་ཡང་བརྗོད་པ་སྟེ། གནས་ལུགས་དོན་གྱི་ཡེ་ཤེས་འདུས་མ་བྱས་པའི་རང་ཉིད་དེ། །གསང་བ་འདུས་པའི་རྩ་རྒྱུད་ལས། །དངོས་པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་པར་སྤངས། །ཆོས་བདག་མེད་པས་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་གསུངས་པ་བཞིན་ཡིན་

---

^{[མ་དཔེ་གཟིགས་ན་འདིར་གནོན།]}

ལ། འོ་ན་དེ་ལྟ་བུའི་སྟོང་ཉིད་ཡིན་ན་སེམས་བསྐྱེད་མ་བསྐྱེད་ཀྱི་ཐ་སྙད་ཇི་ལྟར་ག་ག་སྙམ་ན། སེམས་དེའི་ངོ་བོ་ལ་བསྐྱེད་རྒྱུ་བསྐྱེད་མཁན་བསྐྱེད་བྱ་སོགས་ཀྱི་སྤྲོས་མཚན་མ་དམིགས་ཀྱང་། རང་གི་མཚན་ཉིད་ཇི་ལྟ་བར་རྟོགས་པ་ཅིག་མེད་ན། དབུལ་པོའི་ཁྱིམ་གྱི་གཏེར་དང་གྱད་ཀྱི་དཔྲལ་བའི་ནོར་བུའི་དཔེ་བཞིན་ཏེ། སེམས་ཅན་ཐམས་ཅད་ལ་དེ་ཉིད་ཀྱི་མ་ཁྱབ་པ་གང་ཡང་མེད་པས་ཐོག་མ་མེད་ནས་རང་ལ་ཡོད་ཀྱང་རང་ངོ་མ་ཤེས་པས་ཕན་མ་ཐོགས། དོན་མ་གྲུབ། མངོན་དུ་མ་གྱུར་པས་འཁོར་བ་མུ་མཐའ་མེད་པར་འཁྱམས། འཁྲུལ། མནར། མ་རིག་ལས་ཉོན་གྱི་ཤུགས་དྲག་པོས་བསྐྱེད་པ་འདི་བཞིན་ལགས་མོད་ཀྱི། དུས་ད་རེས་དགེ་བའི་བཤེས་གཉེན་གྱི་

---

^{[མ་དཔེ་གཟིགས་ན་འདིར་གནོན།]}

བཀའ་དྲིན་གྱིས་མཚམས་སྦྱར་ཏེ། རང་ལ་ཡོད་པ་རང་ངོ་མ་སྤྲད། རྒྱལ་བུ་དམངས་སུ་འཁྱམས་པ་རྒྱས་པར་བཀོད་པ་ལྟར་བྱེད་པ་ལ་དོན་དམ་བྱང་ཆུབ་ཏུ་སེམས་བསྐྱེད་པ་ཅེས་བགྱི་བ་ལགས།། ༈ །།དེ་ལྟར་ངོ་བོ་ངོས་བཟུང་ནས། །རྣམ་པ་ལག་ཏུ་བླང་བ་ལ། སྤང་སྐོང་ཕྱག་རྒྱའི་མདོའི་དགོངས་པ་བཞིན་མགོན་པོ་ཀླུ་སྒྲུབ་ཀྱི་ཞལ་སྔ་ནས་མཛད་པའི་ཀུན་རྫོབ་དོན་དམ་ཟུང་འཇུག་གི་སེམས་སྐྱེད་ལ། སྦྱོར་བ་ཚོགས་བསགས་ཅིང་དོན་དམ་གྱི་སྐྱབས་སུ་འགྲོ་བ། དངོས་གཞི་སེམས་བསྐྱེད་ཚིག་གིས་གསལ་གདབ་ཅིང་དོན་གྱིས་དམ་འཆའ་བ། རྗེས་ཉམས་ལེན་གྱིས་ལམ་དུ་འཁྱེར་ཞིང་སྨོན་ལམ་གྱི་རྒྱས་གདབ་པ་དང་བཅས་པ་འདི་དག་གི་ཚིག་སོ་སོའི་སྐབས་དང་མཐུན་པའི་དོན་ཡིད་ལ་ལེགས་པར་བསམ་ལ་

---

^{[མ་དཔེ་གཟིགས་ན་འདིར་གནོན།]}

རྗེས་ཟློས་འདི་བཞིན་མཛད་པར་ཞུ།། ༈ །།ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། དམ་པའི་ཆོས་དང་བྱང་ཆུབ་སེམས་དཔའི་དགེ་འདུན་ཆེན་པོ་དང་བཅས་པ་ཐམས་ཅད་ལ་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་ཐོག་མ་དང་མཐའ་མ་མ་མཆིས་པའི་འཁོར་བ་ན་འཁོར་བའི་ཚེ། ལུས་དང་ངག་དང་ཡིད་ཀྱིས། སངས་རྒྱས་དང་ཆོས་དང་དགེ་འདུན་དང་ཕ་མ་དང་སེམས་ཅན་གང་དག་ལ། སྡིག་པ་མི་དགེ་བའི་ལས་བགྱིས་པ་དང་དགྱིད་དུ་སྩལ་བ་དང་བགྱིས་པ་ལ་རྗེས་སུ་ཡི་

---

^{[མ་དཔེ་གཟིགས་ན་འདིར་གནོན།]}

རང་བ་ཅི་མཆིས་པ་དེ་དག་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་བླ་ན་མེད་པའི་སོ་སོར་བཤགས་པས་སོ་སོར་འཆགས་སོ། མི་འཆབ་བོ། །སླན་ཆད་འདི་ལྟ་བུ་མི་དགྱིད་དོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་བསོད་ནམས་ཀྱི་རྗེས་སུ་ཡི་རང་བ་བླ་ན་མེད་པ་ཐུགས་སུ་ཆུད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་སངས་རྒྱས་དང་བྱང་ཆུབ་སེམས་དཔའ་དང་རང་སངས་རྒྱས་དང་འཕགས་པ་ཉན་ཐོས་རྣམས་དང་འགྲོ་བ་མ་ལུས་པའི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་།། ༈ །།སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས། སངས་རྒྱས་ཀྱི་གདུང་རྒྱུན་མི་ཆད་པར་བྱ་བའི་སླད་དུ་དུས་འདི་ནས་བཟུང་སྟེ་བྱང་ཆུབ་ཀྱི་

---

^{[མ་དཔེ་གཟིགས་ན་འདིར་གནོན།]}

སྙིང་པོ་ལ་མཆིས་ཀྱི་བར་དུ། ཡང་དག་པར་རྫོགས་པའི་སངས་རྒྱས་རྐང་གཉིས་གཙོ་ལ་སྐྱབས་སུ་མཆི་སྟེ། ཐུགས་རྗེ་ཆེན་པོ་དང་ལྡན་པ་ཐམས་ཅད་མཁྱེན་པ་ཐམས་ཅད་གཟིགས་པ་ཐམས་ཅད་དང་བྲལ་བ་སྐྱེས་བུ་ཆེན་པོ་སྐྱེས་བུ་ཁྱུ་མཆོག་བསམ་གྱིས་མི་ཁྱབ་པའི་སྐུ་བླ་ན་མེད་པའི་སྐུ་ཆོས་ཀྱི་སྐུ་མངའ་བ་ལ་སྐྱབས་སུ་མཆིའོ། །ཆོས་འདོད་ཆགས་དང་བྲལ་བའི་མཆོག་ལ་སྐྱབས་སུ་མཆི་སྟེ། བླ་ན་མེད་པ་དེ་བཞིན་གཤེགས་པ་ལ་མངའ་བ་ཞི་བ་ཆོས་ཀྱི་སྐུ་སོ་སོ་རང་གིས་རིག་པ་ལ་སྐྱབས་སུ་མཆིའོ། །དགེ་འདུན་དུལ་བའི་ཚོགས་ཀྱི་མཆོག་ལ་སྐྱབས་སུ་མཆི་སྟེ། ཕྱོགས་བཅུའི་འཕགས་པ་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོའི་དགེ་འདུན་ལ་

---

^{[མ་དཔེ་གཟིགས་ན་འདིར་གནོན།]}

སྐྱབས་སུ་མཆིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་གནས་ཀྱི་བར་དུ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དུས་ཇི་ལྟ་བ་དང་སྟོབས་ཅི་མཆིས་པ་བཞིན་དུ་བདག་དབུལ་ཞིང་མཆི་ན་མགོན་པོ་ཐུགས་རྗེ་ཆེན་པོ་དང་ལྡན་དག་གིས་བདག་བཞེས་སུ་གསོལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག །སྔོན་དུ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་ཐམས་ཅད་སྒྲོལ་བ་དང་སེམས་ཅན་ཐམས་ཅད་འགྲོལ་བ་དང་སེམས་ཅན་ཐམས་ཅད་དབྱུགས་དབྱུང་བ་དང་སེམས་ཅན་མྱ་ངན་ལས་ཟློ་བ་དང་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་འགོད་

---

^{[མ་དཔེ་གཟིགས་ན་འདིར་གནོན།]}

པའི་སླད་དུ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། སེམས་ཅན་ཐམས་ཅད་སྒྲོལ་བ་དང་སེམས་ཅན་ཐམས་ཅད་འགྲོལ་བ་དང་སེམས་ཅན་ཐམས་ཅད་དབྱུག་དབྱུང་བ་སེམས་ཅན་ཐམས་ཅད་ཡོངས་སུ་མྱ་ངན་ལས་ཟློ་བ་དང་སེམས་ཅན་ཐམས་ཅད་ཐམས་ཅད་མཁྱེན་པའི་ཡེ་ཤེས་ལ་འགོད་པའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཇི་ལྟར་སྔོན་གྱི་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་ཆེན་པོ་དེ་དག་གིས། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་བ། ཆོས་བདག་མེད་པ་མཉམ་

---

^{[མ་དཔེ་གཟིགས་ན་འདིར་གནོན།]}

པ་ཉིད་ཀྱི་རང་གི་སེམས་གདོད་མ་ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་ཀྱི་སེམས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་བ། ཆོས་བདག་མེད་པ་མཉམ་པ་ཉིད་ཀྱི་རང་གི་སེམས་གདོད་མ་ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་ཀྱི་བྱང་ཆུབ་ཀྱི་སེམས་བསྐྱེད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་བ། ཆོས་བདག་མེད་པ་མཉམ་པ་ཉིད་

---

^{[མ་དཔེ་གཟིགས་ན་འདིར་གནོན།]}

ཀྱི་རང་གི་སེམས་གདོད་མ་ནས་མ་སྐྱེས་པ་སྟོང་པ་ཉིད་ཀྱི་བྱང་ཆུབ་ཀྱི་སེམས་བསྐྱེད་པར་དགྱིའོ། །ཞེས་པ་འདི་དོན་དམ་སེམས་བསྐྱེད་དངོས་དེ་འདི་ཉིད་ཡིན་ནོ། །སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས། བདུད་དཔུང་དང་བཅས་པ་མཐའ་དག་ཕམ་པར་མཛད་དེ་ཉིད་མངོན་པར་རྫོགས་པ་སངས་རྒྱས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་བདུད་དཔུངས་དང་བཅས་པ་ཕམ་པར་བགྱིས་ཏེ་བདག་མངོན་པར་རྫོགས་པར་འཚང་རྒྱ་བར་དགྱིའོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་དེ་དག་གིས་ཉིད་མངོན་པར་སངས་རྒྱས་ནས་ཆོས་ཀྱི་འཁོར་ལོ་བསྐོར་བར་མཛད་པ་དེ་བཞིན་

---

^{[མ་དཔེ་གཟིགས་ན་འདིར་གནོན།]}

དུ། བདག་མིང་འདི་ཞེས་བགྱི་བས་ཀྱང་བདག་ཉིད་མངོན་པར་རྫོགས་པར་འཚང་རྒྱས་ནས་ཆོས་ཀྱི་འཁོར་ལོ་བསྐོར་བར་བགྱིའོ། །ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་ཉིད་མངོན་པར་སངས་རྒྱས་ནས་ཚོགས་ཡོངས་སུ་བསྡུས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། བདག་མངོན་པར་རྫོགས་པར་འཚང་རྒྱས་ནས་ཚོགས་ཡོངས་སུ་བསྡུ་བར་བགྱིའོ།། ༈ །།བྱང་ཆུབ་མཆོག་ཏུ་སེམས་ནི་བསྐྱེད་པར་དགྱི། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡི་འོངས་སྤྱད་པར་དགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག ༢ །བདག་གིས་བྱང་ཆུབ་ཏུ་སེམས་བསྐྱེད་པའི་དགེ་བའི་རྩ་བ་འདི་དང་། གཞན་ཡང་བདག་གི་

---

^{[མ་དཔེ་གཟིགས་ན་འདིར་གནོན།]}

བསོད་ནམས་ཅུང་ཟད་བགྱིས་པ་དང་དགྱི་བར་འགྱུར་བའི་དགེ་རྩ་དེ་དག་ཐམས་ཅད་ཕ་མ་ལ་སོགས་པའི་སེམས་ཅན་ཐམས་ཅད་དང་། བདག་གི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོའོ། །བདག་གི་བསོད་ནམས་འདིས་ཕ་མ་ལ་སོགས་པའི་སེམས་ཅན་མ་རྒལ་བ་རྣམས་བདག་གི་བསྒྲལ་ལོ། །མ་གྲོལ་བ་རྣམས་བདག་གི་འགྲོལ་ལོ། །དབུགས་མ་ཕྱིན་པ་རྣམས་བདག་གི་དབྱུགས་དབྱུང་ངོ་། །ཡོངས་སུ་མྱ་ངན་ལས་མ་འདས་པ་རྣམས་ནི་ཡོངས་སུ་མྱ་ངན་ལས་ཟླའོ། །མངོན་པར་རྫོགས་པར་སངས་མ་རྒྱས་པ་རྣམས་མངོན་པར་འཚང་རྒྱ་བར་བགྱིའོ། །སྐྱབས་མ་མཆིས་པ་དང་། གནས་མ་མཆིས་པ་དང་དཔུང་གཉེན་མ་མཆིས་པའི་འཇིག་རྟེན་གྱི་སྐྱབས་དང་གནས་དང་དཔུང་གཉེན་དུ་གྱུར་ཅིག །

---

^{[མ་དཔེ་གཟིགས་ན་འདིར་གནོན།]}

དེང་ནས་བདག་སྦྱིན་པ་སྩོལ་བ་དང་ཚུལ་ཁྲིམས་བསྲུང་བ་དང་བཟོད་པ་སྒོམ་པ་དང་བརྩོན་འགྲུས་རྩོམ་པ་དང་བསམ་གཏན་ལ་མཉམ་པར་གཞག་པ་དང་ཤེས་རབ་རྣམ་པར་དཔྱོད་པ་དང་ཐབས་མཁས་པ་ལ་སློབ་པ་གང་ཅི་ཡང་རུང་སྟེ། དེ་དག་ཐམས་ཅད་སེམས་ཅན་ཐམས་ཅད་ཀྱི་དོན་དང་ཕན་པ་དང་བདེ་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྩམས་ཏེ། འདས་པ་དང་མ་འོངས་པ་དང་ད་ལྟར་བྱུང་བའི་བྱང་ཆུབ་སེམས་དཔའ་ཆེན་པོ་དང་ལྡན་པ་ཐེག་པ་ཆེན་པོ་ལ་ཡང་དག་པར་ཞུགས་པ་ས་ཆེན་པོ་ལ་ཡང་དག་པར་གནས་པ་རྣམས་ཀྱི་རྗེས་སུ་མཐུན་པར་འཇུག་གོ།། ༈ །།འཕགས་པ། བདག་བྱང་ཆུབ་སེམས་དཔའ་ལགས་ཀྱི། བྱང་ཆུབ་སེམས་དཔའ་ལགས་པར་བཟུང་དུ་གསོལ།། ༈ །།ས་དང་ཆུ་དང་མེ་དང་རླུང་། རྩི་དང་ནགས་ཀྱི་ཤིང་

---

^{[མ་དཔེ་གཟིགས་ན་འདིར་གནོན།]}

ལྟ་བུར། །རྟག་ཏུ་སྲོག་ཆགས་ཐམས་ཅད་ཀྱི། །འདོད་དགུ་དཔག་མེད་སྤྱོད་པར་ཤོག །མཐོང་བ་དང་ནི་རེག་པ་དང་། །ཐོས་པ་དང་ནི་དྲན་པས་ཀྱང་། །བདག་ནི་སེམས་ཅན་ཐམས་ཅད་ཀྱི། །ནད་རྣམས་གསོ་བ་ཉིད་གྱུར་ཅིག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོང་པར་ཤོག །བྱང་ཆུབ་སེམས་དཔའི་གང་དག་པར་བཞུགས་པ། །དེ་དག་ཀུན་གྱི་སྨོན་ལམ་བདག་འགྲུབ་ཤོག། ༈ །།དེ་དག་གིས་ཁྱོད་ཀྱི་རྒྱུད་ལ་དོན་དམ་བྱང་ཆུབ་ཀྱི་སེམས་གཟོད་མ་ནས་རང་ལ་ཡོད་ཀྱང་ངོ་མ་ཤེས་པ་དེ་ལ་དགེ་བའི་བཤེས་གཉེན་གྱི་དྲིན་དང་དཀོན་མཆོག་རིན་པོ་ཆེའི་ཐུགས་རྗེའི་བྱིན་རླབས་ལས་ལེགས་པར་སྐྱེས་ཤིང་རང་ངོ་ཕྲོད་པ་དེ་ལ་ཆོས་ཉིད་ཀྱིས་ཐོབ་པ་ཅེས་པའི་ཐ་སྙད་དུ་གྲགས་ཀྱང་། རྟེན་འབྲེལ་ཚོགས་

---

^{[མ་དཔེ་གཟིགས་ན་འདིར་གནོན།]}

པའི་མཐུ་ལས་བྱུང་བ་ལགས་ཤིང་། ད་ནི་དེ་ཉིད་ཉམས་ལེན་གྱིས་གོང་དུ་འཕེལ་ཞིང་གོམས་པ་དང་བརྟན་པ་ཐོབ་པར་བྱ་བ་ལ། ད་ལྟའི་སེམས་གང་ལྟར་ཤར་བའི་རང་ངོ་ལ་ཅེར་གྱི་བལྟས་ལ། སྔར་འདས་ཀྱི་རྣམ་རྟོག་གི་རྗེས་འབྲེང་མི་བྱ། མ་འོངས་པའི་རྟོག་པའི་སྔུན་མི་བསུ། ད་ལྟའི་སེམས་ལ་མཚན་འཛིན་བཅོས་སླད་དགག་སྒྲུབ་གང་ཡང་མི་བྱ་བར། སེམས་ཀྱི་འདུག་ཚུལ་ཡིན་གྱི་ཐོག་ཏུ་ལྷོད་ཀྱི་འཇོག་པ་དེ་ལ་དོན་དམ་བྱང་ཆུབ་ཀྱི་སེམས་སྒོམ་པ་ཟེར་བ་ལགས། དེ་ལྟར་བཟོ་བཅོས་མེད་པར་རང་ངོ་རང་གིས་རིག་པ་དེ་ནི་སངས་རྒྱས་ཐམས་ཅད་ཀྱི་ཐུགས་ཡེ་ཤེས་ཆོས་ཀྱི་སྐུ་ཉིད་རང་སེམས་དང་ཐ་དད་མེད་པར་གདོད་མ་ནས་ལྷུན་གྱིས་གྲུབ་པ་དེ་ཉིད་ཇི་ལྟ་བར་རྟོགས་པ་ཡིན་ཏེ། སྔར་ཀུན་རྫོབ་བྱང་སེམས་ཀྱིས་སངས་རྒྱས་

---

^{[མ་དཔེ་གཟིགས་ན་འདིར་གནོན།]}

ཀྱི་རིགས་ངེས་པར་བྱས་ཤིང་། འདིར་དོན་དམ་བྱང་སེམས་ཀྱིས་སངས་རྒྱས་ཀྱི་ངོ་བོ་ཉིད་དུ་བྱས་པ་ཡིན་ཏེ། ཡོན་ཏན་རིན་པོ་ཆེ་བསྡུས་པའི་མདོ་ལས། མཁས་པ་འཇིག་རྟེན་གནས་པའི་མྱ་ངན་འདས་ཀྱང་རུང་། ཆོས་ཉིད་སྐྱོན་མེད་ཆོས་རྣམས་སྟོང་པ་འདིར་གནས་ཏེ། བྱང་ཆུབ་སེམས་དཔའ་གང་གིས་ཆོས་འདི་རྗེས་སུ་རྟོགས། དེ་ཕྱིར་དེ་བཞིན་གཤེགས་ཅེས་སངས་རྒྱས་མཚན་གསོལ་ཏེ། ཅེས་གསུངས་པས་ན། མ་རིགས་འཁྲུལ་པ་ལུ་གུ་རྒྱུད་ཀྱི་རྗེས་འབྲང་མི་བྱ་བར་དོན་དམ་བྱང་ཆུབ་ཀྱི་སེམས་གདོད་མའི་གནས་ལུགས་རང་ངོ་ཤེས་པའི་ཉམས་ལེན་གྱི་ངང་ནས། དེ་ལྟར་མ་རྟོགས་པའི་སེམས་ཅན་མཐའ་ཡས་པ་རྣམས་ལ་སྟོང་ཉིད་ཀྱི་རྩལ་མདངས་སྙིང་རྗེར་ཤར་བའི་ཀུན་རྫོབ་བྱང་སེམས་སྨོན་འཇུག་གི་ཕྲིན་ལས་རྒྱུན་

---

^{[མ་དཔེ་གཟིགས་ན་འདིར་གནོན།]}

ཆད་མེད་པས་བྱང་ཆུབ་ཀྱི་སྤྱོད་པ་ཡང་དག་པར་སྤྱད་པ་ལ་འབད་འཚལ།། ༈ །།རྗེས་སྨོན་ལམ་གྱི་རྒྱས་གདབ་པ་གོང་དུ་སོང་ནས། ཉམས་ལེན་ལམ་དུ་འཁྱེར་ཚུལ་ནི་བཤད་མ་ཐག་པ་འདི་ཉིད་ལགས་ཤིང་།། ༈ །།དེ་ལྟ་བུའི་བྱང་ཆུབ་ཀྱི་སེམས་གསུམ་བསྐྱེད་པའི་ཕན་ཡོན་གྱི་རིམ་པ་ནི་གོང་དུ་ཞར་བྱུང་དུ་ཡང་ཡང་བརྗོད་པ་བཞིན་འདི་སྐབས་ཀྱང་མདོ་ཙམ་སྨོས་ན། སྤྱིར་ཡང་བྱང་ཆུབ་ཀྱི་སེམས་ནི་ཆོས་མཐའ་དག་པའི་གཞིར་གྱུར་ཚེ་དེའི་ཕན་ཡོན་གྱི་མཐའ་དང་ཚད་ནི་དེ་བཞིན་གཤེགས་པས་ཀྱང་བརྗོད་པར་མི་ལང་ན་སོ་སོ་སྐྱེ་བོས་ལྟ་ག་ལ་ཞིག་སྟེ་བསམ་གྱིས་མི་ཁྱབ་པའི་གནས་སུ་གྱུར་ལ། འོན་ཀྱང་བརྡ་ཙམ་མཚོན་བྱེད་ཙམ་དུ་འཕགས་པ་སྡོང་པོ་བཀོད་པའི་མདོར། རྒྱལ་བ་མ་ཕམ་

---

^{[མ་དཔེ་གཟིགས་ན་འདིར་གནོན།]}

པས་བྱང་ཆུབ་སེམས་དཔའ་ནོར་བཟང་ལ་གསུང་པ་ཁོ་ན་ལ་མཚོན་ན། རིགས་ཀྱི་བུ། བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་དཀར་པོའི་ལོ་ཏོག་འཕེལ་བས་ཞིང་ལྟ་བུ། །འཇིག་རྟེན་ཐམས་ཅད་བརྟེན་པས་ས་ལྟ་བུ། དབུལ་བ་ཐམས་ཅད་གཅོད་པ་རྣམ་ཐོས་ཀྱི་བུ་ལྟ་བུ། དོན་ཐམས་ཅད་ཡང་དག་པར་སྒྲུབ་པ་ཡིད་བཞིན་གྱི་ནོར་བུའི་རྒྱལ་པོ་ལྟ་བུ། བསམ་པ་ཐམས་ཅད་ཡོངས་སུ་རྫོགས་པར་བྱེད་པས་བུམ་པ་བཟང་པོ་ལྟ་བུ། བྱང་ཆུབ་སེམས་དཔའ་ཐམས་ཅད་ཡོངས་སུ་བསྲུང་བས་ཕ་ལྟ་བུ། དོན་མ་གྲུབ་པ་ཕྱིར་མི་ལྡོག་པ་ཁྱབ་འཇུག་གི་མདུང་ལྟ་བུ། ཉོན་མོངས་པའི་མགོ་ལྟུང་བར་བྱེད་པས་རལ་གྲི་ལྟ་བུ། འཁོར་བའི་ཆུ་བོ་ན་གནས་པ་རྣམས་

---

^{[མ་དཔེ་གཟིགས་ན་འདིར་གནོན།]}

སྟེང་དུ་འབྱིན་པ་མཆིལ་པ་ལྟ་བུ། ཉ་འཛིན་པའི་ལྕགས་ཀྱུ། སྒྲིབ་པ་དང་ཁེབས་པའི་རྩ་བ་ཐམས་ཅད་རྣམ་པར་འབྱིན་པས་རླུང་གི་དཀྱིལ་འཁོར་ལྟ་བུ། ཉོན་མོངས་པའི་གཉིད་ལས་སད་པར་བྱེད་པ་ཐོ་རེངས་ཀྱི་རྔ་ལྟ་བུ། ཆོས་ཐམས་ཅད་ཀྱི་གཟུགས་བརྙན་གསལ་བར་བྱེད་པས་མེ་ལོང་ལྟ་བུ། དགེ་བའི་ཆོས་ཡོངས་སུ་འཛིན་པས་སྣོད་ལྟ་བུ། གང་ས་ཡོད་པ་སྙིང་དགའ་བར་བྱེད་པས་དབྱིག་ ནོར་བུ་ ལྟ་བུ། ཆོས་ཀྱི་དགའ་བ་དང་མོས་པ་ཉམས་སུ་མྱོང་བར་བྱེད་པ་བཟའ་ཤིང་གི་ར་བ་ལྟ་བུ། རང་གི་ངོ་བོ་ལ་ཉེས་པ་ཐམས་ཅད་དང་བྲལ་བས་གསེར་ལྟ་བུ་རྨོངས་པའི་ནད་ཐམས་ཅད་སེལ་བ་སྨན་ལྟ་བུ། འགྲོ་བ་ཐམས་ཅད་ཀྱི་ཡིད་ཚིམ་པར་བྱེད་པ་གླུ་དབྱངས་སྙན་པོ་ལྟ་བུ། དགེ་བའི་རྩ་བ་གཞན་ཟིལ་གྱིས་གནོན་པ་རྡོ་རྗེ་ནོར་བུ་རིན་པོ་ཆེ་ལྟ་བུ། ལྷ་དང་མི་དང་ལྷ་མ་ཡིན་དང་བཅས་

---

^{[མ་དཔེ་གཟིགས་ན་འདིར་གནོན།]}

པའི་འཇིག་རྟེན་ན་མཆོད་པ་ལྟ་བུའོ། །བྱང་ཆུབ་སེམས་དཔའི་སྤྱོད་པ་དང་སྨོན་ལམ་ཐམས་ཅད་བསྡུས་པས་མདོར་བསྟན་པ་ལྟ་བུའོ། །རིགས་ཀྱི་བུ། བྱང་ཆུབ་ཀྱི་སེམས་ཀྱི་ཡོན་ཏན་དེ་དག་དང་། ཡོན་ཏན་གྱི་བྱེ་བྲག་ཚད་མེད་པ་གཞན་དང་ཡང་ལྡན་ནོ། །ཞེས་སོགས་ཆེ་བའི་ཡོན་ཏན་གྱི་དཔེ་ཉིས་བརྒྱ་ལྷག་པར་གསུངས་པ་རྣམས་སྐབས་འདིར་སྨོས་ན་ཧ་ཅང་ཚིག་ཚོགས་ཆེས་བར་འགྱུར་ཕྱིར་མ་བརྗོད་ཀྱང་དོན་གྱི་འགགས་འདི་དག་ཏུ་འདུ་ཞིང་གོ་བར་འགྱུར་མོད་ཀྱི། མདོར་ན་གནས་སྐབས་མཐར་ཐུག་གི་ལེགས་པའི་ཡོན་ཏན་མ་ལུས་པའི་འབྱུང་གནས་དམ་པ། བླ་མེད་རྫོགས་པའི་བྱང་ཆུབ་ཀྱི་གཞི་དང་ལམ་དང་ཐབས་དང་ཉེ་རྒྱུའི་སྙིང་པོར་གྱུར་པ་སེམས་

---

^{[མ་དཔེ་གཟིགས་ན་འདིར་གནོན།]}

གསུམ་རིན་པོ་ཆེའི་སྒོ་ནས་རང་གཞན་གྱི་དོན་ནམ་མཁའ་མཉམ་པར་མཛད་པའི་གོ་ཆ་དང་མི་འབྲལ་བའི་ངང་ནས། བླ་མ་དང་དཀོན་མཆོག་ལ་སྐུ་དྲིན་གསོ་བའི་མཎྜལ་དང་། བྱང་ཆུབ་ཀྱི་སེམས་མ་ཉམས་ཤིང་མི་བརྗོད་པའི་སྨོན་ལམ་བཟང་པོ་དང་བཅས་པས་ཕྱག་ཅི་མང་མཛད་པར་ཞུ། །ཞེས་བརྗོད་ཅིང་། སློབ་མ་རྣམས་ཀྱི་ཀྱང་དེ་བཞིན་ཅི་ནུས་དང་། བླ་མས་ཀྱང་ཤེས་བརྗོད་དང་། དཀོན་མཆོག་གི་དྲུང་དུ་གཏང་རག་གི་མཆོད་པ་སོགས་ཀྱང་བྱའོ། །དེ་ལྟར་ཐེག་གྱི་ཤིང་རྟའི་སྲོལ་སྣམ་པ་གཉིས་ལས་བྱུང་བའི་བྱང་སྡོམ་ཆོ་གའི་ལས་རིམ་རྒྱས་བསྡུས་སྣ་ཚོགས་ཤིང་མཐའ་ཡས་པ་ཅིག གྲུབ་མཐའ་ཆོས་རྒྱུད་སོ་སོའི་ཡིག་ཆ་ལས་འབྱུང་མོད་ཀྱི། དེ་དག་རང་རང་གི་དགོངས་བཞེད་མཐུན་པ་དང་མི་མཐུན་པ་ལྟར་སྣང་བའི་ཚུལ་དུ་ལ་ནི། ཇི་ལྟར་ཀ་ར་བུ་རམ་སྦྲང་རྩི་འོ་མ་སོགས་ཀྱི་མངར་བའི་རེ་གཅིག་བུའི་

---

^{[མ་དཔེ་གཟིགས་ན་འདིར་གནོན།]}

བྱེ་བྲག་ལ་གང་ཟག་སོ་སོའི་འདོད་པ་དང་མཐུན་པར་སྤྱོད་པས་ཚིམ་མོད་ཀྱི། འདི་ནི་མངར་བ་ཡིན་ལ་འདི་ནི་མ་ཡིན་ནོ་ཞེས་བསྐོན་པའི་དགོས་པ་ཅི་ཞིག་མཆིས་པ་དེ་བཞིན་དུ། དམ་པའི་ཆོས་ཐོག་ཐ་བར་དུ་དགེ་བའི་རང་བཞིན་འབའ་ཞིག་ལ། བདག་ཅག་གི་ལུགས་འདི་ཡིན་གྱི་ཁྱེད་ཅག་གི་ལུགས་དེ་མ་ཡིན་ནོ་ཞེས་བརྒལ་ཞིང་བརྩད་པས་ནི་བྱང་ཆུབ་ཀྱི་སེམས་འབྱོང་བར་ནམ་ཡང་མི་འགྱུར་བས་ན། རྩོད་པ་མེད་པའི་བཀའ་བསྟན་བཅོས་ལས་ཇི་ལྟར་བྱུང་བ་བཞིན་བདག་གི་འདིར་བྲིས་ཀྱིས། བདག་འདྲ་བློན་པོས་རང་བཟོར་བགྱིས་པ་འགའ་ཡང་མ་མཆིས་སོ། །འོ་ན་བཀའ་བསྟན་བཅོས་རྣམས་ལ་བཞུགས་བཞིན་དུ་ཁྱོད་ཀྱི་འདིར་ཡང་སྐྱར་དུ་བྲིས་པས་ཅི་ཞིག་བྱ་ཞེ་ན། དེ་ལྟ་མོད་ཀྱི་འདི་ནི་གང་ཅན་སྒྲུབ་རྒྱུད་མཐའ་དག་གི་འབྱུང་ཁུངས་ཤཱིནྟཾ་དཔལ་གྱི་རི་བོར་ཆོས་ཀྱིས་མཐོང་བའི་སེང་གེའི་ཁྲི་ལ་ཞབས་པད་མངོན་པར་བརྗིད་ཆགས་པའི་

---

^{[མ་དཔེ་གཟིགས་ན་འདིར་གནོན།]}

མཉམ་མེད་མཆོག་གི་སྤྲུལ་པའི་སྐུ་ཐུབ་བསྟན་རིན་ཆེན་བཟང་པོའི་དཔལ་ཕྱོགས་ཐམས་ཅད་ལས་རྣམ་པར་རྒྱལ་བའི་ཞལ་སྔ་ནས་བཀའ་མཆེད་མུ་ཏིག་གི་ཆུན་བུ་ཡང་དག་པར་སྩལ་བ་ཉིད་བདེ་ཆེན་འཁོར་ལོའི་རྒྱན་དུ་བགྱིས་ནས། ཐོས་བསམ་གྱི་སྦྱང་སྟོབས་དང་མི་ལྡན་ཡང་བྱང་ཆུབ་ཀྱི་སེམས་རིན་པོ་ཆེ་ལ་ཉམས་ལེན་གྱི་མཐིལ་ཕུར་དུ་བགྱིས་པའི་ཀུ་སཱ་ལི་རང་གྲོལ་གྱི་མིང་འཛིན་པས། ཆུ་རླུང་རྟ་མཆོག་ཁ་འབབ་གཡས་སུ་དུང་ལྟར་འཁྱིལ་བའི་ངོགས། རི་བྲན་སེང་གེ་རྣམ་པར་འགྱིངས་འདྲའི་སྤོ་ལ་ཀུན་སྣང་དང་བའི་བསམ་གཏན་གྱི་ཁང་བུ་བརྩེགས་པའི་ཡང་དབེན་དུ་བྲིས་པའི་དགེ་བ་ལྷག་བསམ་མཆོག་ཏུ་དཀར་བའི་འོད་མདངས་ཀྱིས། ཁམས་གསུམ་གྱི་འགྲོ་བ་དྲིན་ཅན་ཕ་མའི་རང་བཞིན་འབའ་ཤིག་པ་ལས་ཉོན་འཁྲུམ་པའི་མུན་གླིང་མཐའ་མེད་པར་བཟོད་དཀའི་སྡུག་བསྔལ་སྣ་ཚོགས་རབ་ཏུ་མྱོང་བ་སྙིང་རྗེའི་ཡུལ་གྱུར་རྣམས་ཐར་པ་དང་ཐམས་ཅད་མཁྱེན་

---

^{[མ་དཔེ་གཟིགས་ན་འདིར་གནོན།]}

པའི་གོ་འཕང་ལ་མྱུར་དུ་འཁོད་པའི་རྒྱུ་རྐྱེན་དུ་གྱུར་ནས། མཐའ་ཡས་པའི་འགྲོ་བ་ཐམས་ཅད་ཕྱིར་མི་ལྡོག་པ། རབ་ཏུ་ཕན་པ། མཆོག་ཏུ་བདེ་བ། འགྱུར་བ་མེད་པའི་གཏན་སྲིད་བླ་ན་མེད་པ་རྫོགས་པའི་བྱང་ཆུབ་ལ་འགོད་པར་ཤོག་ཅིག །ཤུ་བྷམ་སྟུ་སརྦ་ཛ་ག་ཏཱཾ། གཅིག་ཞུས་ཁུལ་ལགས།