གུ་རུ་དྲག་སྒྲུབ་ཀྱི་ཉམས་ལེན་རྒྱུན་ཁྱེར་ཟིན་བྲིས།
གུ་རུ་དྲག་སྒྲུབ་ཀྱི་ཉམས་ལེན་རྒྱུན་ཁྱེར་ཟིན་བྲིས་བཞུགས་སོ། །
ན་མོ་མ་ཧཱ་གུ་རུ་སརྦ་སིདྡྷི་ཧཱུྃ། །མཁའ་མཉམ་འགྲོ་བ་དྲིན་ཅན་ཕ་མ་རྣམས། །ལམ་ལོག་སྐྱོབས་ཕྱིར་རིགས་འདུས་བླ་མ་བསྒྲུབ། །མྱུར་དུ་དེ་ཡི་གོ་འཕངས་ཐོབ་པར་བྱ། །སྣང་སྲིད་ཐམས་ཅད་མི་དམིགས་སྟོང་པའི་ངང་། །སྣོད་ཀྱི་འཇིག་རྟེན་གཞལ་ཡས་ཁང་གི་དབུས། །པདྨ་ཉི་ཟླ་བདུད་བཞི་བསྣོལ་བའི་སྟེང་། །རང་རིག་ཧཱུྃ་དམར་མེ་ཡི་མདོག་ཅན་ལས། །འོད་འཕྲོས་རྒྱལ་བ་མཆོད་ཅིང་འགྲོ་སྒྲིབ་སྦྱང་། །གདུག་པ་ཅན་བཏུལ་ཚུར་འདུས་ཡོངས་གྱུར་ལས། །རང་ཉིད་ཆེ་མཆོག་པདྨ་དྲག་པོ་
རྩལ། །དམར་ནག་རབ་ཁྲོས་ཞལ་གཅིག་ཕྱག་གཉིས་པ། །ཞལ་གདངས་ལྗགས་འདྲིལ་མཆེ་གཙིགས་སྤྱན་གསུམ་བསྒྲད། །ཐོད་སྐམ་རིན་ཆེན་དབུ་བརྒྱན་ཐོད་རློན་ཕྲེང་། །གླང་ཆེན་ཐོད་རློན་སྟག་ཤམ་སྦྲུལ་ཆུན་དང་། །མི་ལྤགས་རིན་ཆེན་དར་སོགས་དུ་མས་བརྒྱན། །ཕྱག་གཡས་གསེར་གྱི་རྡོ་རྗེ་རྩེ་དགུ་གདེངས། །གཡོན་པ་ལྕགས་སྡིག་རྒྱལ་འགོང་སྙིང་རྩ་འཇིབས། །མེ་སྤུངས་ཀློང་ན་གཡས་བསྐུམ་གཡོན་བརྐྱང་བཞུགས། །སྤྱི་གཙུག་པད་སྟེང་རྗེ་བཙུན་ཐོད་ཕྲེང་རྩལ། །ཞེ་འཛུམ་པད་ཞྭ་བེར་ཕོད་ཆོས་
གོས་གསོལ། །རྡོ་རྗེ་ཐོད་པ་དང་བཅས་ཡུམ་དང་འཁྲིལ། །ཡུམ་ཆེན་མཚོ་རྒྱལ་དཀར་མོ་གྲི་ཐོད་འཛིན། །གུ་རུའི་དབུ་གཙུག་ཁྱུང་ནག་མེ་གཤོག་ཅན། །ཀྲི༚་ཀྱིང་སྒྲ་སྒྲོག་ཀླུ་གདོན་ཞལ་དུ་གསོལ། །དེའི་སྤྱི་བོར་རིགས་བདག་སྣང་མཐའ་ཡས། །དམར་གསལ་ལྷུང་བཟོད་འཛིན་ཅིང་ཆོས་གོས་གསོལ། །མཚན་དཔེས་བརྒྱན་ཅིང་གཟི་འོད་འབར་བར་བཞུགས། །བདག་ཉིད་དྲག་པོའི་དཔྲལ་བར་འཇམ་དཔལ་སེར། །རལ་གྲི་སྡིགས་འཛུབ་དང་བཅས་འཁོར་ལོ་འཛིན། །མགྲིན་པར་རྟ་མགྲིན་དམར་པོ་ཁྲོ་གཏུམ་ཚུལ། །གྲི་གུག་ཐོད་ཁྲག་དུར་ཁྲོད་ཆས་ཅན་གསོལ། །ཐུགས་ཀར་གསེར་གྱི་མཆོད་རྟེན་བུམ་པའི་ནང་། །གསང་བདག་མཐིང་ནག་རྡོ་རྗེ་དྲིལ་བུ་འཛིན། །ལྟེ་བར་ཕག་མོ་མཐིང་ནག་ཁྲོ་འཛུམ་ཞལ། །གྲི་གུག་ཐོད་ཁྲག་མཆན་གཡོན་ཁ་ཊྃྭ་འཛིན། །རིན་ཆེན་རུས་བརྒྱན་མགོ་འཕྲེང་ལ་སོགས་བརྒྱན། །གསང་བར་ཡཀྴ་མེ་དབལ་སྨུག་
ནག་འབར། །ཕྱག་གཡས་རྡོ་རྗེ་གཡོན་པས་ཐོ་བ་དང་། །ཞགས་པ་འཛིན་ཅིང་རབ་ཏུ་ཁྲོས་པར་བསྐྱེད། །རང་གི་ཕྱི་རིམ་རང་མདངས་འཁོར་གྱི་ཚོགས། །ཧེ་རུ་ཡབ་ཡུམ་བཞི་དང་དྲག་པོ་བཞི། །ཕུར་པ་བཞི་དང་ཁྲོ་བཅུ་ལ་སོགས་པ། །སྤྲུལ་འཁོར་ཚོགས་ཀྱང་སྐད་ཅིག་དྲན་རྫོགས་སུ། །སྐུ་མདོག་ཕྱག་མཚན་རྣམ་འགྱུར་སྣ་ཚོགས་པ། །ཅིར་སྣང་མ་འགགས་རྒྱན་གྱི་རོལ་པར་གསལ། །དེ་ལྟར་ལྷ་ཚོགས་རྣམས་ཀྱི་གནས་གསུམ་དུ། །འབྲུ་འབུམ་དག་ལས་འོད་འཕྲོས་རྔ་ཡབ་ནས། །གུ་རུ་ཡབ་ཡུམ་རིག་འཛིན་མཁའ་འགྲོའི་ཚོགས། །སྤྱན་དྲངས་དམ་ཚིག་པ་དང་གཉིས་མེད་བསྟིམ། །རིགས་འདུས་རྒྱལ་བའི་སྤྱི་དཔལ་ཡིན་པའི་ཕྱིར། །དབང་བསྐུར་རྒྱས་གདབ་སྤྲོས་པ་ཀུན་ལས་འདས། །ཕྱི་ནང་སྣོད་བཅུད་དངོས་པོ་མ་ལུས་ཀུན། །མཆོད་པའི་དངོས་པོར་ཡེ་ནས་ལྷུན་གྱིས་གྲུབ། །རང་རིགས་རང་གསལ་བསྟོད་པའི་རྒྱལ་པོ་ཉིད། །ཀུན་རྫོབ་ཚིག་གིས་བསྟོད་ལས་ཁྱད་པར་འཕགས།།
༈ །།དེ་ནས་ཞི་བར་བསྙེན་དང་ཁྲོ་བོར་བསྒྲུབ། །གཉིས་ལས་དང་པོ་ཞི་བསྙེན་རིམ་པ་ནི། །སྤྱི་གཙུག་གུ་རུའི་ཐུགས་ཀར་ཧཱུྃ་དམར་ལས། །འོད་འཕྲོས་རྒྱལ་ཀུན་བྱིན་རླབས་ནུས་མཐུ་བསྡུས། །གུ་རུ་ཉིད་ལ་ཐིམ་པས་འོད་དུ་ཞུ། །བདག་གི་ཐུགས་ཀའི་ཧཱུྃ་དང་དབྱེར་མེད་བསམ། །ཧཱུྃ་མཐར་སྔགས་ཕྲེང་མར་མེའི་ཕྲེང་བ་ལྟར། །བསྐོར་ཞིང་ཞི་བའི་འཛབ་འདི་འབྲུ་འབུམ་མམ། །བདུན་འབུམ་གསུམ་འབུམ་གང་འོས་བཟླས་བྱས་ན། །འཁུ་ལྡོག་བར་ཆད་མི་འབྱུང་མན་ངག་ཡིན། ཨོཾ་ཨཱཿཧཱུྃ་བཛྲ་གུ་རུ་དེ་ཝ་ཌཱཀྐི་ནི་ཧཱུྃ། །ཐུན་མཚམས་ཧཱུྃ་ལ་ཐམས་ཅད་བསྡུས་ནས་ནི། །སྟོང་ཉིད་ངང་ནས་སྨོན་ལམ་རྒྱ་ཆེར་གདབ། །རྗེས་ཐོབ་ལྷ་ཡི་ཏིང་འཛིན་སྤྱི་ལྟར་བྱ། །དངོས་གཞི་ཁྲོ་བོ་བསྒྲུབ་པའི་རིམ་པ་ནི། །གཏོར་མ་རིན་ཆེན་འབར་བ་སྨན་རག་དང་། །མཆོད་སོགས་བཤམས་ཞིང་སྐྱབས་སེམས་སྔོན་བཏང་ནས། །བདག་དང་གོ་
ཆའི་ལྷ་ཚོགས་གོང་ལྟར་གསལ། །ལྷ་ཚོགས་རྣམས་ཀྱི་གནས་གསུམ་འོད་ཟེར་གྱིས། །ཕྱོགས་བཅུའི་སངས་རྒྱས་རྩ་གསུམ་ལྷ་བླ་མ། །མཁའ་འགྲོ་ཆོས་སྐྱོང་སྤྱན་དྲངས་མདུན་གྱི་མཁར། །བཞུགས་པའི་ཐུགས་དམ་རྒྱུད་བསྐུལ་འོད་ཟེར་འཕྲོས། །བདག་ལ་ཐིམ་ཞིང་བདག་གིས་བ་སྤུའི་ཁུངས། །ཀུན་ནས་འོད་འཕྲོས་དེ་ལས་བསྲུང་བའི་གུར། །གསེར་གྱི་འཁོར་ལོ་རྩིབས་སྟོང་སྟེང་ནས་ཕུབས། །རྩིབས་ཀྱི་རྩེ་ནས་ལྕགས་སྡིག་ཚ་ཚ་འཕྲོ། །འོག་ནས་ལྕགས་ཀྱི་འཁོར་ལོ་སྤུ་གྲིའི་རྩིབས། །སྟོང་ལྡན་གྱེན་དུ་ཁ་བསྟན་རབ་འཁོར་ཞིང་། །དེ་གཉིས་བར་དུ་མེ་ཡི་འཁོར་ལོ་འབར། །སྟེང་འོག་འཁོར་ལོ་གཡས་གཡོན་བསྣོལ་བའི་བར། །རྒྱལ་བསེན་མགོ་ལུས་ཕྱེ་མར་བཏུབ་ནས་ཀྱང་། །མེ་ཡི་འཁོར་ལོས་གཞོབ་ཏུ་བསྲེག་པར་བསམ། །སླར་ཡང་བདག་གི་ཐུགས་ཀའི་ཧཱུྃ་ཡིག་ལས། །ཁྲོ་རྒྱལ་ཡཀྴ་
མེ་དབལ་གྲངས་མེད་འཕྲོས། །འཇིག་རྟེན་ཁམས་གང་གནོད་བྱེད་ཚོགས་ཀུན་བཅོམ། །བདག་ཉིད་དྲག་པོའི་ཞལ་ནས་སྔགས་ཀྱི་འོད། །མེ་ཡི་སྤུ་གྲི་རབ་འབར་ཕར་འཕྲོས་ཤིང་། །མེ་དབལ་རྣམས་ཀྱི་ཞལ་ནས་ཚུར་ཡང་འཕྲོས། །དེ་གཉིས་བར་དུ་རྒྱལ་བསེན་འབྱུང་པོའི་ཚོགས། །གཞོབ་ཏུ་བསྲེག་ཅིང་རྡུལ་དུ་བརླག་པར་བསམ། །སྟོང་གསལ་རིག་པའི་ངར་ལྡན་སྔགས་འདི་བཟླས། །ཨོཾ་ཨཱཿཧཱུྃ། ཨར་ཙིག་ནིར་ཙིག་ན་མོ་བྷ་ག་ཝ་ཏེ་ཧཱུྃ་ཨཱཿཧཱུྃ་ཧཱུྃ་ཕཊཿ ཨ་ཡ་མ་དུ་རུ་ཙ་ཤ་ན། ས་མ་ཡ་ཧཱུྃ་ཕཊཿཨོཾ་བཛྲ་ཧཱུྃ། ཡཀྴ་ཧཱུྃ། རཀྴ་ཧཱུྃ། རཱ་ཛཱ་གནོད་བྱེད་སྙིང་ལ་མ་ར་ཡ་ཧཱུྃ་ཕཊཿབདུན་འབུམ་བཟླས་པས་མཆོག་དངོས་འགྲུབ་པར་གསུངས། རཱ་ཛཱ་སྙིང་པོ་རྒྱལ་པོ་ཡིན། རཱ་ཛཱ་ཐུང་ངུ་རྡུལ་ལ་འཇུག །ཐུན་མཚམས་གཏོར་མཆོད་བསྐང་གསོའི་ལས་ལ་འབད། །སྐབས་སུ་གོ་ཆའི་ལྷ་
རྣམས་སོ་སོ་ཡི། །ཐུགས་ཀར་རང་རང་སྲོག་སྙིང་སྔགས་ཕྲེང་ཀྱང་། །སོ་སོར་འཁོར་དམིགས་ནུས་པ་ལྷག་པར་ཆེ། །སྣང་མཐའི་ཐུགས་ཀར་ཨཱཿདམར་མཐའ་བསྐོར་དུ། །ཨོཾ་ཨ་མྲྀ་དེ་ཝཱ་ཨཱ་ཡུཿསིདྡྷི་ཧཱུྃ། ཁྱུང་ཆེན་ཐུགས་ཀར་ཁྲོམ་གྱི་མཐའ་སྐོར་དུ། །ཨོཾ་བཛྲ་ཁྲོམ་ག་རུ་ཌ། ཙ་ལེ་ཙ་ལེ་ཧཱུྃ་ཕཊཿའཇམ་དཔལ་གཤིན་རྗེའི་ཐུགས་ཀར་ཨོཾ་སེར་མཐར། ཨོཾ་བཛྲ་ཤྲཱི་ཡ་མནྟ་ཀ་ཧཱུྃ་ཕཊཿརྟ་མགྲིན་ཐུགས་ཀར་ཧྲཱིཿདམར་མཐའ་བསྐོར་དུ། །ཨོཾ་པདྨ་ཏ་ཀྲིད་མ་ཧཱ་ཀྲོ་དྷ་ཧྱ་གྲྀ་ཝ་ཧུ་ལུ་ཧུ་ལུ་ཧཱུྃ་ཕཊ། །ཕྱག་རྡོར་ཐུགས་ཀར་ཧཱུྃ་མཐིང་མཐའ་མ་རུ། ཨོཾ་བཛྲ་པཱ་ཎི་ནཱི་ལཾ་དྷཱ་ར་མ་ཧཱ་ཀྲོ་དྷ་ཧཱུྃ་ཕཊཿ ལྟེ་བའི་ཕག་མོའི་ཐུགས་ཀར་བྃ་ཡིག་མཐར། ཨོཾ་བུདྡྷ་ཌཱཀྐི་ནི་ཧྲཱིཿམ་ཧཱ་རི་ནི་ས་ཧཱུྃ་ཛཿམེ་དབལ་ཐུགས་ཀའི་ཧཱུྃ་ནག་མཐའ་སྐོར་དུ། ཨོཾ་བཛྲ་
ཧཱུྃ། ཡཀྴ་ཧཱུྃ། རཀྴ་ཧཱུྃ་ཕཊཿ སྔགས་རྣམས་སོ་སོའི་སྐུ་མདོག་དང་མཚུངས་བསྒོམ། །བསྙེན་གྲངས་ཐེམ་ནས་དྲག་སྔགས་སྤྱི་དྲིལ་འདི། །ལྔ་སྟོང་བཟླས་ན་གནམ་ལྕགས་ཐོགས་ཀྱང་བཟློག ཨོཾ་བཛྲ་མ་ཧཱ་ཀྲོ་དྷ་མ་ཧཱ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལི་ལ་ཡ་མ་ཧཱ་ཡཀྴ་ཀཱ་མ་རཱུ་པ་ཀརྨ་རྃ་རྃ་ཛྭ་ལ་རྃ་ཧཱུྃ། །གནོད་བྱེད་འབྱུང་པོ་ཧུར་ཐུམ་མ་ར་ཡ་ཧཱུྃ་ཕཊཿ འདི་ལྟར་རྒྱལ་བ་ཀུན་འདུས་གུ་རུ་ཡི། །ཐུགས་སྲོག་སྙིང་པོ་གཅིག་ཏུ་དྲིལ་བ་འདི། །ཇི་ཙམ་བཟླས་པ་དེ་མཚུངས་ནུས་པར་ལྡན། །ཐུན་མཚམས་ཐམས་ཅད་ཐུགས་ཀའི་ཧཱུྃ་ལ་བདུད། །ཧཱུྃ་ཉིད་ནམ་མཁའི་དབྱིངས་སུ་འཇའ་ཡལ་བཞིན། །མི་དམིགས་སྟོང་པའི་ཀློང་དུ་བཞག་ནས་ཀྱང་། །དེ་ཡི་དགེ་བས་འགྲོ་བ་ཡོངས་ལ་བསྔོ། །སླར་ཡང་ལྷ་ཡི་ང་རྒྱལ་དང་ལྡན་པས། །སྤྱོད་ལམ་ཆོས་དང་མཐུན་པ་དུས་འདའ་བྱ།།
༈ །།དེ་ལྟར་སྙིགས་དུས་མ་རུངས་འདྲེ་སྲིན་ཚོགས། །ཆོས་བྱེད་ཀུན་ལ་འཚེ་དེའི་གཉེན་པོ་མཆོག །དཀྱིལ་འཁོར་ཀུན་གཙོ་ཧེ་རུ་ཀ་དཔལ་ཆེ། །འདི་གྲུབ་རྒྱལ་བ་ཀུན་དང་མཐུ་རྩལ་མཉམ། །སྐྱེད་རྫོགས་ཉམས་ལེན་བསྙེན་བསྒྲུབ་མཐའ་དག་ལ། །དོན་དམ་ཡེ་ཤེས་སྤྲོས་བྲལ་གནད་རིག་ཅིང་། །ཀུན་རྫོབ་རྩལ་སྣང་འགྲོ་ལ་སྙིང་རྗེ་བསྒོམ། །སྔགས་དང་ཏིང་འཛིན་དྲག་ལས་སྦྱོར་བ་ཀུན། །ཞི་བས་མི་ཐུལ་རྒྱལ་འགོང་དམ་སྲི་ལ། །གང་འདུལ་རོལ་པའི་སྙིང་རྗེས་ཁྲོ་ཚུལ་ལས། །གདུག་ཅིང་སྡང་བའི་སེམས་ཀྱིས་བྱ་བ་མིན། །དྲག་པོའི་ནད་ལ་སྨན་དཔྱད་དྲག་བསྟེན་བཞིན། །གཞན་ཕན་ལམ་ལ་དགོད་ཕྱིར་ཁོ་ནས་འབད། །འདི་ལྟར་མ་ནོར་བརྩོན་པས་ཉམས་བླངས་ན། །རྫོགས་སངས་རྒྱས་ལ་བཀའ་བའི་ཚོགས་མ་མཆིས། །འདི་བྲིས་དགེ་བས་མཁའ་མཉམ་འགྲོ་
ཀུན་ཀྱང་། །རིགས་འདུས་བླ་མའི་གོ་འཕང་མྱུར་ཐོབ་ཤོག །གཏེར་སྟོན་པདྨ་རིག་འཛིན་རྩལ་གྱིས་གདན་དྲངས་པའི་ཟབ་ཆོས་བླ་མ་ནོར་བུ་པད་འཕྲེང་གི་དྲག་སྒྲུབ་ཀྱི་ཉམས་ལེན་རྒྱུན་ཁྱེར་སྙིང་པོར་དྲིལ་བ་འདི་ཡང་རྣལ་འབྱོར་ཚུལ་ཁྲིམས་བཟང་པོའི་དོན་དུ་བཀོད་པ་དགེ་ལེགས་འཕེལ། །བཀྲ་ཤིས། གཅིག་ཞུད།