དཀོན་མཆོག་གི་དྲུང་དུ་མཆོད་པ་འབུལ་བ་ལ་ཉེ་བར་འཁོར་བ།
དཀོན་མཆོག་གི་དྲུང་དུ་མཆོད་པ་འབུལ་བ་ལ་ཉེ་བར་འཁོར་བ་བཞུགས་སོ། །
ན་མོ། དཀོན་མཆོག་གསུམ་གྱི་བདེན་པའི་བྱིན་གྱིས་བརླབས་དང་། །སངས་རྒྱས་དང་བྱང་ཆུབ་སེམས་དཔའ་བདེན་པའི་སྟོབས་མངའ་བ་རྣམས་ཀྱི་ཐུགས་རྗེ་ནུས་མཐུ་དང་། །བདག་གི་དད་མོས་ལྷག་བསམ་དག་པའི་མཐུ་སྟོབས་དང་། །ཆོས་ཉིད་རྣམ་པར་དག་པའི་བདེན་པའི་བྱིན་རླབས་ཀྱིས། མཆོད་པའི་ཡོ་བྱད་ཇི་ལྟར་བཤམས་ཤིང་ཕུལ་བ་འདི་དག་མཚོན་བྱེད་དུ་བྱས་ཏེ། ཕྱོགས་བཅུ་རབ་འབྱམས་ཀྱིས་སངས་རྒྱས་བྱང་སེམས་ཞིང་ཁམས་ནམ་མཁའི་མཐས་བཏུགས་སུ་ཁྱབ་པའི་སྐྱབས་གནས་དཀོན་མཆོག་གསུམ་གྱི་སྤྱན་སྔར། ་མཆོད་ཡོན་མེ་ཏོག་བདུག་སྤོས་
མར་མེ་དྲི་ཆབ་ཞལ་ཟས་རོལ་མོ་ལ་སོགས་པའི་མཆོད་པའི་སྤྲིན་ཕུང་རྒྱ་ཆེ་ཞིང་རྒྱུན་མི་ཆད་པ། ཀུན་ཏུ་བཟང་པོའི་ཏིང་འཛིན་སྨོན་ལམ་ལས་བྱུང་བའི་མཆོད་སྤྲིན་དང་མཉམ་པ་འབྱུང་བར་གྱུར་ཅིག །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ། བཛྲ་པཱ་ར་པྲ་མ་དྷ་ནེ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། དྱཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མནོྟྲ་ས་སམ་པྲ་མ་་བཛྲེ། སརྦ་ཀརྨ་ཨ་ཝ་ར་་བི་ཤོ་དྷ་ན་བཛྲེ་སྭཱ་ཧཱ།
ན་མསྶརྦ་ཏ་ཐཱ་ག་ཏ་ས་པ་རི་ཝཱ་ར། བཛྲ་ཨརྒྷཾ། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་རྒྱ། ཤསྟ་པྲ་ཏཱིཙྪ་ཨཱཿཧཱུྃ། སྐྱབས་གནས་བླ་མ་དཀོན་མཆོག་ཡི་དམ་ལྷ། །མཁའ་འགྲོ་ཆོས་སྐྱོང་བཀའ་སྲུང་ཐམས་ཅད་ཀྱི། །སྤྱན་སྔར་མཆོད་པའི་སྤྲིན་ཕུང་འདི་ཕུལ་བབ། །དགྱེས་པར་བཞེས་ནས་བྱིན་གྱིས་བརླབ་ཏུ་གསོལ། །སྟོང་གསུམ་འཇིག་རྟེན་བྱེ་བ་ཕྲག་བརྒྱ་ཡི། །སྣོད་བཅུད་མཆོད་པའི་ངོ་བོ་ཇི་སྙེད་དང་། །བདག་ལུས་ལོངས་སྤྱོད་གཏན་གྱི་འདུན་མར་བཅས། །མཆོད་པའི་མཎྜལ་ཉིད་དུ་འབུལ་ལགས་ན། །བདག་སོགས་ནམ་མཁའ་མཉམ་པའི་སེམས་ཅན་ཀུན། །བསོད་ནམས་ཡེ་ཤེས་ཚོགས་གཉིས་རྫོགས་པ་དང་། །ལས་ཉོན་སྡིག་སྒྲིབ་མ་ལུས་བྱང་གྱུར་ནས། །ཐར་ལམ་བྱང་ཆུབ་དམ་པ་ཐོབ་པར་ཤོག །འདི་ལྟར་མཆོད་པ་ཕུལ་བའི་དགེ་འབྲས་ཀྱིས། །རྒྱལ་ཁམས་བདེ་ཞིང་ནད་མུག་འཁྲུག་རྩོད་མེད། །སངས་རྒྱས་བསྟན་དར་བསྟན་པ་འཛིན་
ཀུན་མཐུན། །ཐམས་ཅད་དམ་པའི་ཆོས་ལ་སྤྱོད་གྱུར་ཅིག །དཀོན་མཆོག་བདེན་པའི་མཐུ་སྟོབས་རྨད་བྱུང་དང་། །བདག་གི་དད་པས་མཆོད་ཅིང་གསོལ་བཏབ་པའི། །དགེ་བས་ཅི་བསམ་འགྲུབ་ཅིང་བར་ཆད་ཞི། །མཆོག་མཐུན་དངོས་གྲུབ་ཚེ་འདིར་ཐོབ་པར་ཤོག །དེ་ཡང་དཀོན་མཆོག་གི་དྲུང་དུ་མཆོད་པ་འབུལ་བའི་མཆོད་རྫས་བྱིན་རླབས་ཀྱི་རིམ་པ་ཆོ་གའི་གཞུང་སོགས་ལ་ནི་ཐ་དད་ལ་ཞིབ་རྒྱས་འབྱུང་མོད་ཀྱང་། ཆོ་ག་སོགས་དང་མ་འབྲེལ་བར་གཙུག་ལག་ཁང་དང་མཆོད་བཤོམས་ཀྱི་དྲུང་སོགས་སུ་མཆོད་པ་འབུལ་ཚེ་བྱིན་རླབས་མེད་ནི་མི་རུང་ལ། བདག་སྐྱེད་སོགས་མེད་ཕྱིར་བྱིན་གྱིས་རློབས་པའི་ནུས་པ་ཡང་མི་འབྱུང་བ་དང་། དེ་ལྟ་བུ་ལ་འདི་ནི་དཀོན་མཆོག་གི་བདེན་པའི་སྟོབས་ཀྱི་སྒོ་ནས་བྱིན་རླབས་བྱ་ཐབས་ཡིན་པས་ན། །གཙུག་ལག་གི་དཀོར་གཉེར་ལ་སོགས་ལ་ལྷག་པར་གལ་ཆེ་བར་ཡོད་པ་དང་གོང་གི་མཆོད་པ་སྤྲིན་གྱི་གཟུངས་དེ་ལན་གཅིག་བརྗོད་པས་ཀྱང་མཆོད་པ་ཐམས་ཅད་བརྒྱ་སྟོང་དུ་འགྱུར་བར་གསུངས་ཏེ། དཔེར་ན་མར་མེ་གཅིག་ཕུལ་ནས་ལྷག་བསམ་དག་པས་
གཟུངས་འདི་བརྗོད་ན་མར་མེ་བརྒྱ་སྟོང་མང་པོ་ཕུལ་བར་འགྱུར་ཞིང་། མཆོད་པ་གཞན་ཐམས་ཅད་ལ་ཡང་དེས་མཚོན་པས་ཤེས་པར་བྱའོ། །མཆོད་པ་ཕུལ་བ་ལ་མེད་རུང་ཞིང་ཉེ་བར་འཁོ་བ་འདི་ནི། མཐའ་འཁོབ་ཀླ་ཀློའི་དཔོན་པོ་པདྨ་ཚེ་དབང་གི་བསྐུལ་ངོར། སྣ་ཚོགས་རང་གྲོལ་གྱི་རྒོད་ཕུག་བྲག་ཏུ་བཀོད་པ་དགེའོ། །གཅིག་ཞུད།