ཚོགས་མཆོད་ཤིན་ཏུ་བསྡུས་པ།
ཚོགས་མཆོད་ཤིན་ཏུ་བསྡུས་པ་བཞུགས་སོ། །
གང་ཞིག་གསང་སྔགས་ཀྱི་ཆོ་ག་སོགས་དང་མ་འབྲེལ་བར་ཚོགས་མཆོད་མདོར་བསྡུས་བྱ་བར་འདོད་ན། ཚོགས་ཀྱི་དངོས་པོ་གང་ཡོད་རྣམས་བཤམས་ལ་ཆུ་གཙང་འཐོར་ནས། ཨོཾ་ཨཱཿཧཱུྃ། སྣང་སྲིད་སྣོད་བཅུད་བདག་ལུས་ཕུང་པོ་ཁམས། །སྐྱེ་མཆེད་ཐམས་ཅད་ཡེ་ནས་ཆོས་ཀྱི་དབྱིངས། །གསལ་སྟོང་ཟུང་འཇུག་རྒྱལ་བ་ཞི་ཁྲོ་ཡི། །དཀྱིལ་འཁོར་ཆེན་པོར་གདོད་ནས་ལྷུན་གྲུབ་པའི། །ཐུགས་རྗེའི་འོད་ཟེར་རྃ་ཡྃ་ཁྃ་གསུམ་འཕྲོས། །ཚོགས་ཀྱི་དངོས་པོའི་འབགས་རྩོགས་དྲི་མ་ཀུན། །བསྲེག་གཏོར་སྦྱངས་བཀྲུས་དག་ཅིང་གཙང་བར་གྱུར། །བདག་ཉིད་ལྷ་ཡི་གནས་གསུམ་འབྲུ་གསུམ་ལས།
འོད་ཟེར་འཕྲོས་པས་ཚོགས་ཀྱི་ཡོ་བྱད་རྣམས། །ངོ་བོ་ཟག་མེད་ཡེ་ཤེས་བདུད་རྩི་ལ། །རྣམ་པ་གང་ལ་གང་འདོད་ལོངས་སྤྱོད་རྫས། །འཇིག་རྟེན་ཁམས་ཀུན་ཡོངས་སུ་གང་བར་གྱུར། །ཨོཾ་ཨཱཿཧཱུྃ།། ༈ །།ཕྱོགས་བཅུ་ནམ་མཁས་གར་ཁྱབ་ཞིང་ཀུན་ནས། །སངས་རྒྱས་བྱང་སེམས་བླ་མ་ཡི་དམ་ལྷ། །དཔའ་བོ་མཁའ་འགྲོ་ཆོས་སྐྱོང་སྲུང་མ་དང་། །ཡུལ་ལྷ་གཞི་བདག་རིག་དྲུག་སེམས་ཅན་སོགས། །ཐམས་ཅད་ཚོགས་ཀྱི་མགྲོན་དུ་གཤེགས་ནས་ཀྱང་། །འདོད་ཡོན་ཚོགས་རྫས་འདི་ལ་བྱིན་གྱིས་རློབས། །བདག་ཅག་དད་ལྡན་རྣམས་ལ་དབང་ཅིག་
བསྐུར། །མཆོག་དང་ཐུན་མོང་དངོས་གྲུབ་ཆར་ཆེན་ཕོབ། བཛྲ་ས་མཱ་ཛཿ སིདྡྷི་ཕ་ལ་ཧཱུྃ།། ༈ །།དེ་ནས་ཚོགས་ཀྱི་ཡོ་བྱད་རྣམས་ཐམས་ཅད་ཀྱི་ཕུད་ནམ་མཁར་འཐོར་ཞིང་། ཧཱུྃ། །བླ་མ་ཡི་དམ་མཁའ་འགྲོ་ཆོས་སྐྱོང་སོགས། །མཆོད་འོས་ཀུན་ལ་ཚོགས་ཀྱི་མཆོད་པ་འབུལ། །བདག་སོགས་འགྲོ་བའི་ཚོགས་རྫོགས་སྒྲིབ་བྱང་ཞིང་། །སྐུ་གསུང་ཐུགས་ཀྱི་བྱིན་གྱིས་བརླབ་ཏུ་གསོལ། །དཀར་ཕྱོགས་གཞི་བདག་ལྷ་ཀླུ་སྡེ་བརྒྱད་ཚོགས། །སྣང་ཞིང་སྲིད་པའི་སྐྱེ་འགྲོ་མ་ལུས་ཀྱང་། །ཚོགས་མཆོད་བཞེས་ལ་རྒྱལ་ཁམས་བདེ་བ་དང་། །བདག་སོགས་ཅི་བསམ་འགྲུབ་པའི་ཕྲིན་ལས་མཛོད། །ག་ཎ་ཙཀྲ་པཱུ་ཛ་ཁཱ་ཧི། ཚོགས་ལྷག་བཤལ་ཆུ་དང་བཅས་ཏེ་གཙང་སར་ཕུལ་ཞིང་། ཨོཾ་ཨཱཿཧཱུྃ། །ཚོགས་ཀྱི་ལྷག་མའི་མགྲོན་རིགས་ཐམས་ཅད་ལ། །དགྲ་གེགས་བསྒྲལ་བའི་ཤ་ཁྲག་རུས་པ་སོགས། །རང་རང་ཅི་འདོད་ལོངས་སྤྱོད་ཕུལ་བ་ཡིས། །མཉེས་ཤིང་ཕྲིན་ལས་རྣམ་བཞི་སྒྲུབ་པར་མཛོད། །ཨུ་ཙིཊྚ་བ་ལིནྟ་ཁཱ་ཧི།། ༈ །།དེ་ནས་
ཚོགས་རྣམས་དངོས་གྲུབ་ཏུ་བླང་ཞིང་། ཧོཿ ཚོགས་ཀྱི་མཆོད་པ་རྒྱ་ཆེན་པོ་ཕུལ་བ་ལ་བརྟེན་ནས་བདག་སོགས་ཡོན་མཆོད་འཁོར་དང་བཅས་པ་ཐམས་ཅད་ཀྱི་འགལ་རྐྱེན་བར་ཆད་ཐམས་ཅད་ཞི་ཞིང་། མཐུན་རྐྱེན་ཆོས་དང་མཐུན་པའི་དགེ་ལེགས་ཡོན་ཏན་ཐམས་ཅད་འཕེལ་ཞིང་རྒྱས་པ་དང་། ཕྱོགས་དུས་གནས་སྐབས་ཐམས་ཅད་དུ་སངས་རྒྱས་ཀྱི་བསྟན་པ་དར་བ་དང་། །སེམས་ཅན་ལ་བདེ་སྐྱིད་འབྱུང་བ་དང་། བདག་སོགས་མཁའ་ཁྱབ་ཀྱི་སེམས་ཅན་ཐམས་ཅད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གོ་འཕང་དམ་པ་ཐོབ་པར་འགྱུར་བའི་བཀྲ་ཤིས་དགེ་ལེགས་ཀྱི་ཆར་ཆེན་པོ་ཡོངས་སུ་འབབ་པར་གྱུར་ཅིག །ཚོགས་མཆོད་མདོར་བསྡུས་འདི་ནི། རང་གི་སྲིང་མོ་ཆོས་ཉིད་བཟང་མོས་བསྐུལ་ངོར་བྲིས་པ་དགེ། གཅིག་ཞུད།