བླ་མ་དགོངས་པ་འདུས་པའི་རྫོགས་རིམ་ཟབ་མོ་བདུད་ཀྱི་གཅོད་ཡུལ་རྒྱུན་ཁྱེར་ངག་འདོན་ཉམས་སུ་བླང་བའི་རིམ་པ།
བླ་མ་དགོངས་པ་འདུས་པའི་རྫོགས་རིམ་ཟབ་མོ་བདུད་ཀྱི་གཅོད་ཡུལ་རྒྱུན་ཁྱེར་ངག་འདོན་ཉམས་སུ་བླང་བའི་རིམ་པ་བཞུགས་སོ། །
སྐྱབས་གནས་བླ་ན་མ་མཆིས་པ་བླ་མ་ཡི་དམ་མཁའ་འགྲོའི་ཚོགས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བླ་མ་དགོངས་པ་འདུས་པའི་ལམ་ཟབ་བདུད་ཀྱི་གཅོད་ཡུལ་རྒྱུན་ཁྱེར་ངག་འདོན་དུ་ཉམས་སུ་བླང་བའི་རིམ་པ་མདོར་བསྡུས་ཤིག་བྲི་བར་བྱ་སྟེ། དེ་ཡང་། ཕྱག་རྫོགས་སོགས་ཀྱི་ཉམས་ལེན་གྱི་གནད་རྣམས་གདར་ཤ་ཆོད་པ་ནི་མཆོག་ཏུ་གལ་ཆེ་བའི་ཕྱིར། །བླ་མ་མཚན་ལྡན་གྱི་དྲུང་དུ་ཞུན་ཐར་བཅད་ལ། བོག་འདོན་དུ་འདི་ཉིད་ཉམས་སུ་བླང་བར་བྱ་སྟེ། དུར་ཁྲོད་དང་ལུང་སྟོངས་ལ་སོགས་གཞུང་ཉིད་ནས་གསུངས་པའི་གནས་སམ། །རང་གི་མལ་ས་ཉིད་དུ་ལུས་ངག་ཡིད་གསུམ་ཟོ་གློད་ནས། འཇིག་རྟེན་གྱི་བྱ་བ་ལ་སོགས་དང་མ་འདྲེས་པའི་ངང་ནས་འདི་ལྟར་ཉམས་སུ་བླང་བར་བྱའོ། །དེ་ལ་
སྔོན་འགྲོ་དངོས་གཞི་རྗེས་གསུམ་ལ་ས་བཅད་ཉེར་བདུན་གྱིས་སྟོན་ཏེ། །དང་པོ་མཐུན་མོང་གི་སྔོན་འགྲོ་ནི། ཕཊཿ མ་མཁའ་མཉམ་འགྲོ་བ་བསྒྲོལ་སླད་དུ། །བདག་ཉམས་ལེན་མཆོག་ལ་འཇུག་པར་བྱ། །ལུས་དལ་འབྱོར་ཕུན་ཚོགས་ལེགས་ཐོབ་ཀྱང་། །ཚེ་མི་རྟག་འཆི་བའི་རང་བཞིན་ཅན། །གནས་གར་སྐྱེས ་དལ་འབྱོར་རྙེད་དཀའ་བསམ་པ་ འཁོར་བའི་འཁྲུལ་འཁོར་ཏེ། །དུས་ད་ལྟ་མི་རྟགས་བསམ་པ་ནས་རྟག་འཛིན ་འཁོར་བའི་སྡུག་བསྔལ་དྲན་པ་ཞེང་པ་སྤོངས། ཕཊཿཟིལ་གནོན་གསུམ་གྱི་དང་པོ་ལྷ་འདྲེ་ཟིལ་གྱིས་གནོན་པ་ནི། དེང་བདག་དང་ཁམས་གསུམ་སེམས་ཅན་ལ་
ལས་གནོད་ཅིང་སྣང་བྱེད་གདུག་པ་ཅན། །ལྷ་འདྲེ་སྲིན་མི་མ་ཡིན་གྱི་རིགས། །ཀུན་བླ་མེད་བྱང་ཆུབ་མ་ཐོབ་བར། །བདག་ས་ཕྱོགས་འདི་ནས་ཅི་ཕྱིར་འགྲོ། །ལུས་རབ་འབྱམས་རྒྱལ་བའི་དཀྱིལ་འཁོར་གྱི། །སྣ་གཡོན་ནས་བྱང་ཆུབ་སེམས་ཀྱི་རླུང་། །དབྱིབས་ལྕགས་ཀྱུའི་རྣམ་པས་བགེགས་ཀུན་བཀུག །ཁྲོམ་ཚོགས་པ་ལྟ་བུ་བདག་དྲུང་འཁོད། །ཕྱི་སྟེང་འོག་ཕྱོགས་མཚམས་ཐམས་ཅད་ནས། །སྐྱབས་མཆོག་གསུམ་རྒྱལ་བ་སྤྲིན་ལྟར་བསྟིབས། །འོད་མེ་སྤུངས་འབར་བའི་གུར་གྱིས་ཕུབ། །གདོན་བགེགས་ཚོགས་སངས་རྒྱས་མ་ཐོབ་བར། །ཕྱིར་འགྲོ་བའི་གོ་སྐབས་མེད་པར་གྱུར། ཕཊཿ གཉིས་པ་གནས་ཟིལ་གྱིས་གནོན་པ་ནི། །ལུས་རྒྱལ་བའི་དཀྱིལ་འཁོར་ལྷུན་གྲུབ་འདི། །དབྱིབས་གསེར་གྱི་མཆོད་རྟེན་རི་རབ་ཙམ། །འོད་སྟོང་གསུམ་གང་བས་ས་ཕྱོགས་ཀུན། །ཡོངས་ཁྱབ་པས་ཆིར་གྱི་ནོན་པར་གྱུར། ཕཊཿ གསུམ་པ་བདག་ཟིལ་གྱིས་
གནོན་པ་ནི། །སེམས་ཡེ་སྟོང་སྤྲོས་བྲལ་ནམ་མཁའ་བཞིན། །དབྱིངས་གདོད་མའི་ངང་ལས་མ་གཡོས་ཀྱང་། །འཕྲལ་རྣམ་རྟོག་འཁྲུལ་པའི་ཟང་ཟིང་ཀུན། །དོན་བློ་འདས་ངང་དུ་ཕྱམས་ཀྱི་གློད། །ཕཊཿ ལུས་བྱ་བྱེད་སྤྱོད་ལམ་རྣམ་པ་གསུམ་གྱི་དང་པོ་སྟངས་སྟབས་བཅུ་ནི། །བདག་རྡོ་རྗེའི་རྣལ་འབྱོར་བརྟུལ་ཞུགས་ཀྱིས། །གནས་ཕྱོགས་བཞི་མཚམས་བརྒྱད་སྟེང་འོག་བཅུར། །གར་སྟངས་སྟབས་སྣ་ཚོགས་རོལ་པ་ཡིས། །གདོན་ཕྱོགས་བཅུའི་བགེགས་ཚོགས་འདུལ་བར་བྱ། ཕཊ། ཕཊ། ཕཊ། ཕཊ། ཕཊ། ཕཊ། ཕཊ། ཕཊ། ཕཊ། ཕཊཿ གཉིས་པ་རྣམ་སྣང་ཆོས་བདུན་ལ་གནས་པ་ནི། །ལུས་རྣམ་འགྱུར་སྟངས་སྟབས་དེ་དག་ཀུན། །རྩལ་འགགས་མེད་རོལ་པའི་སྒྱུ་འཕྲུལ་སྟེ། །སླར་རྣམ་སྣང་ཆོས་བདུན་ལྟ་སྟངས་ཀྱི། །གནས་མི་འགྱུར་རི་བོ་ལྟར་བརྟན་བྱ། ཕཊཿ གསུམ་པ་ལུས་ཀྱི་འདུ་ཤེས་བཤིག་པ་ནི། །དོན་བློ་འདས་སྐྱེ་མེད་མ་རྟོགས་
ན། །ལུས་རྩོལ་བཅས་སྤྱོད་པ་རྣམ་གཡེང་རྒྱུ། །སེམས་འཛིན་པས་བཅིང་བ་ཡོངས་སྤངས་ནས། །ཅི་བདེ་བར་བསྒྱུར་ཞིང་གང་གར་ཞོག །ཕཊཿ ངག་བརྗོད་བྱའི་འདོན་ཟློས་གསུམ་གྱི་དང་པོ་སྐྱབས་སེམས་ཡན་ལག་བདུན་པ་ནི། །རང་ཐ་མལ་བདུན་གྱི་བར་སྣང་དུ། །གདན་རིན་ཆེན་པདྨ་ཉི་ཟླའི་སྟེང་། །སྐྱབས་བླ་ན་མེད་པའི་དཀོན་མཆོག་རྣམས། །ཞལ་མངོན་སུམ་སྤྲིན་ཕུང་ལྟར་བཞུགས་གྱུར། །བདག་ཁམས་གསུམ་འགྲོ་བ་མ་ལུས་ཀུན། །ཁྱེད་ཐུགས་རྗེས་ནུས་པས་སྐྱབས་ཏུ་གསོལ། །ལུས་དུམ་བུ་སྟོང་དུ་གྱུར་ཀྱང་སླའི། །མ་འགྲོ་ཕན་ཅི་འགྲུབ་བདག་གིས་བགྱི། །ཡིད་གུས་པས་ཕྱག་འཚལ་མཆོད་བགྱི་ཞིང་། །ལས་སྡིག་སྒྲིབ་ཅི་མཆིས་སྙིང་ནས་བཤགས། །སེམས་དང་བས་ཡི་རང་ཆོས་འཁོར་བསྐུལ། །ཡོངས་འཁོར་བ་མ་སྟོང་དེ་སྲིད་དུ། །མགོན་མྱ་ངན་མི་འདའ་འགྲོ་བ་སྐྱོབས། །ཚོགས་རྣམ་གཉིས་འགྲོ་ལ་
ཕན་ཕྱིར་བསྔོ། །སྐྱབས་དཀོན་མཆོག་མ་ལུས་གཅིག་འདུས་ནས། །བདག་སྤྱི་བོར་ཐིམ་པས་དབྱེར་མེད་གྱུར། ཕཊཿ གཉིས་པ་བླ་མའི་རྣལ་འབྱོར་དང་མཎྜལ་གྱི་རིམ་པ་ནི། །སྟེང་སྤྱི་གཙུག་སེང་ཁྲི་པད་ཟླའི་ཁར། །ཕ་དྲན་མཆོག་རྩ་བའི་བླ་མ་ཉིད། །སྐུ་ལོངས་སྤྱོད་རྫོགས་ཚུལ་ཌ*ཌཱ་དྲི*་བསྣམས། །འཁོར་རྒྱུད་པའི་བླ་མ་སྤྲིན་ལྟར་བསྟིབས། །འོད་གཟི་མདངས་འབར་བར་བཞུགས་པའི་དྲུང་། །ཕྱི་རིན་ཆེན་སྟོང་གསུམ་མཎྜལ་ལ། །ཡུལ་གླིང་བཞི་རི་རབ་ཚོམ་བུར་བཀོད། དང་གདལ་ཁྱབ་ལྤགས་པའི་མཎྜལ་ལ། །ལུས་ཕྱི་ནང་ཤ་ཁྲག་ཚོམ་བུར་བཀོད། །གཞི་སྟོང་ཉིད་དབྱིངས་ཀྱི་མཎྜལ་ལ། །རྩལ་འགག་མེད་རོལ་པའི་ཚོམ་བུར་བཀོད། ཀུན་མཆོད་པ་འབུལ་གྱི་བཞེས་ནས་ཀྱང་། །མཆོག་ཚེ་འདིར་འགྲུབ་པའི་དངོས་གྲུབ་སྩོལ། ཕཊཿ ན་མོ་གུ་རུ། །ཐུགས་སྐྱེ་མེད་ཆོས་སྐུའི་རོལ་པ་ལས། །གསུང་འགགས་མེད་ལོངས་སྐུའི་རང་མདངས་ཤར། །སྐུ་གང་འདུལ་སྤྲུལ་པའི་འགྲོ་དོན་མཛད། །བདག་གསོལ་བ་འདེབས་སོ་ཐུགས་རྗེས་གཟིགས། །དོན་ཟབ་མོ་རྒྱལ་དགོངས་ དགོངས་བརྒྱུད་
གཅིག་བསྡུས་པའི། །གནད་ངོ་མཚར་བརྡ་དང་ཐབས་ཀྱི་གྲོལ། །ཚིག་གདམ་ངག་སྙན་རྒྱུད་འགྲོ་ལ་སྟོན། །བདག་གསོལ་བ་འདེབས་སོ་ཐུགས་རྗེས་གཟིགས། །ཀུན་གཅིག་བསྡུས་རྩ་བའི་བླ་མ་རྗེ། །བརྡ་རྒྱུད། ཁྱེད་ཐུགས་རྗེ་ནུས་པའི་དཔུང་བསྐྱེད་ལ། །གང་ཟག་སྙན་རྒྱུད་ །བདག་དུག་ལྔའི་ནད་ཀྱིས་གཟིར་བའི་ཚོགས། །སྐྱབས་རེ་ས་ཁྱེད་ལས་གཞན་མ་མཆིས། །དཔལ་ཐུགས་རྗེས་གཟིགས་ཤིང་རྗེ་བཙུན་མགོན།། ༈ །།ཅེས་གསོལ་བ་བཏབ་པས་བླ་མའི་སྐུ། །གནས་གསུམ་ལས་འོད་འཕྲོས་བདག་ལ་ཐིམ། །སྒོ་གསུམ་གྱི་སྒྲིབ་སྦྱངས་དབང་བཞི་ཐོབ། །མཐར་བླ་མ་འོད་ཞུ་རང་ལ་ཐིམ། །གསུམ་པ་ཡིག་བརྒྱའི་རྣལ་འབྱོར་ནི། །བདག་རྡོ་རྗེ་སེམས་དཔའ་ཞི་འཛུམ་ཅན། །སྐུ་ནམ་མཁའི་ཁམས་གང་ཐུགས་ཀའི་དབུས། །ཧཱུྃ་དཀར་པོ་རི་རབ་ཙམ་གྱི་མཐར། །མ་འགྲོ་དྲུག་སྣང་སྲིད་ལྷ་འདྲེ་རྣམས། །ལུས་སྐོར་བ་བྱེད་ཅིང་ཡིག་བརྒྱའི་རྒྱུན། །སྒྲ་སྟོང་ཁམས་ཁྱབ་པ་བཟླས་པར་གྱུར། །ཨོཾ་བཛྲ་སཏྭ་ས་མ་ཡ། སོགས། ཧཱུྃ། དེ་
ལས་འོད་འཕྲོས་འགྲོ་སྒྲིབ་སྦྱངས། །ཀུན་རྡོ་རྗེ་སེམས་དཔའི་སྐུར་གྱུར་ཅིང་། །མཐར་ཐམས་ཅད་ཧཱུྃ་ཡིག་ལ་ཐིམ་སྟེ། ཧཱུྃ། བདག་ལུས་དང་བཅས་མཁའ་ལ་ཡལ། །དབྱིངས་སྟོང་ཉིད་ངང་དུ་མཉམ་པར་བཞག །ཕཊཿ འདི་ཡན་ཆད་སྔོན་འགྲོའི་རིམ་པའོ། །དེ་ནས་དངོས་གཞི་ལ་ཡང་དགུ་ལས་དང་པོ་གནད་འཁོར་བ་རྣམ་པ་གསུམ་གྱི་ཐོག་མར་བདག་ཉིད་གནད་ལ་བོར་བ་ནི། །བདག་འཛིན་པས་བཅིངས་པའི་ལུས་ངག་ཡིད། །ཚེ་ཐོག་མེད་དུས་ནས་བག་ཆགས་ཤུགས། །བློ་འཁྲུལ་རྟོག་ཆགས་སྡང་ངར་འཛིན་ཅན། །ཀུན་སྙིང་པོ་མེད་པར་ཁོ་ཐག་ཆོད། ཕཊཿ གཉིས་པ་ལྷ་འདྲེ་གནད་ལ་བོར་བ་ནི། །ཕྱི་ཕན་བྱེད་ལྷ་དང་གནོད་བྱེད་འདྲེ། །འདི་རྨི་ལམ་ནང་གི་དགྲ་གཉེན་ལྟར། །ཡིད་འཁྲུལ་པའི་རང་མདངས་ཤར་བ་ལས། །གཞན་གུད་ན་མེད་པར་ཁོ་ཐག་ཆོད། ཕཊཿ གསུམ་པ་གཉིས་མེད་དུ་གནད་ལ་བོར་བ་ནི། །ཡོངས་བདག་དང་གཞན་དུ་གཉིས་སྣང་བ། །མིག་རབ་
རིབ་ཅན་གྱི་འཁྲུལ་སྣང་བཞིན། །དོན་རང་ངོ་ཤེས་ན་གཉིས་སུ་མེད། །དེ་སོ་སོར་འཛིན་པ་རྩད་ནས་ཆོད། ཕཊཿ ཚོགས་བསགས་པ་རྣམ་པ་གསུམ་ལས། །དང་པོ་ཡུལ་གོང་མ་ལ་མཆོད་པར་འབུལ་བ་ནི། །ལུས་སྙིང་པོ་མེད་པའི་གཟུགས་ཕུང་འདི། །མཐར་མི་རྟགས་འདོར་བའི་ཆོས་ཅན་དེ། །དུས་ད་ལྟ་བཏང་ན་དོན་ཆེན་འགྲུབ། །བདག་དེ་ཕྱིར་སྒྱུ་ལུས་མཆོད་སྦྱིན་བྱ། ཕཊཿ སེམས་རིག་པའི་སྙིང་པོ་འོད་གོང་ཚུལ། །སྒོ་ཚང་བུག་ནས་འཐོན་ཆོས་དབྱིངས་ཁྱབ། །ལུས་རྩ་ཁམས་རྒྱལ་བའི་དཀྱིལ་འཁོར་ལྷ། །གནས་ཟག་མེད་རང་བཞིན་དབྱིངས་སུ་གཤེགས། །ཕྲལ་འབྱུང་འདུས་གདོས་བཅས་ཕུང་པོ་འདི། །ཀུན་རེ་སྐོང་ཡིད་བཞིན་གཏེར་མཚུངས་གྱུར། ཕཊཿ དབྱིངས་སྟོང་ཉིད་རོལ་པའི་ཆོ་འཕྲུལ་ལས། །རི་ལྷུན་པོ་ཙམ་གྱི་ཐོད་སྒྱེད་སྟེང་། །བདག་སྒྱུ་མའི་ལུས་ཀྱི་ཐོད་པ་དེ། །ཁྱོན་སྟོང་གསུམ་ཙམ་གྱུར་གཙུག་པའི་ནང་། །ལུས་གཟུགས་ཕུང་བསིལ་མར་བཏུབ་
པས་བཀང་། །བཅུད་ཤ་ལྔ་བདུད་རྩི་ལྔར་གྱུར་པའི། །སྟེང་ཟླ་གདན་དཔའ་བོ་འབྲུ་ལྔས་མཚན། །ཨོཾ་ཧཱུྃ་ཏྲྃ་ཧྲཱིཿཨཱཿ འོག་ཡེ་ཤེས་རླུང་གཡོས་མེ་སྦར་བས། །རྫས་ཁོལ་བའི་རླངས་པ་འབྲུ་ལྔར་ཕོག །འོག་ཕྱོགས་བཅུར་འཕྲོས་པས་ཞིང་ཀུན་ནས། །དོན་ཡེ་ཤེས་བདུད་རྩིར་ཆར་ཕབ་པས། །རྫས་ཀུན་རྫོབ་བདུད་རྩི་དབྱེར་མེད་འདྲེས། །སྟེང་ཟླ་བ་ཡིག་འབྲུར་བཅས་པ་ཞུ། །བཅུད་ཟག་མེད་བདུད་རྩིར་རོ་གཅིག་གྱུར། ཕཊཿ དཔལ་དུས་གསུམ་རྒྱལ་བ་སྲས་བཅས་དང་། །མགོན་བླ་མ་ཡི་དམ་དཀྱིལ་འཁོར་ལྷ། །མ་མཁའ་འགྲོ་ཆོས་སྐྱོང་བསྲུང་མའི་ཚོགས། །དབྱིངས་ནམ་མཁའ་གང་བར་བྱོན་བཞུགས་ནས། །ལྗགས་འོད་ཟེར་སྦུ་གུའི་ཚུལ་ཅན་གྱིས། །ལུས་བདུད་རྩིར་ཞུ་བ་རབ་གསོལ་ཞིང་། །ཐུགས་དགྱེས་པའི་བྱིན་རླབས་གནས་གསུམ་ནས། །འོད་འབྲུ་གསུམ་དང་བཅས་འཕྲོས་པ་ཡིས། །བདག་ཁམས་གསུམ་སེམས་ཅན་རྣམས་ལ་ཕོག །ལས་ཉོན་མོངས་
སྒྲིབ་བྱང་སྐུ་གསུམ་གྱི། །མཆོག་མཐུན་མོངས་དངོས་གྲུབ་ཀུན་ཐོབ་གྱུར། ཕཊཿ གཉིས་པ་ཡུལ་འགོ་མ་ལ་སྦྱིན་པར་བཏང་བ་ནི། །སླར་མི་ཟད་གཟུགས་ཀྱི་ཕུང་པོ་ནི། །གནས་སྟོང་གསུམ་གང་བ་མཆིས་པ་ལ། །ཨོཾ་ཨཱཿཧཱུྃ་རང་བྱུང་སྒྲ་གྲགས་པས། །འོད་ལྟེམ་གྱི་བདུད་རྩིར་ཞུ་བ་ལས། །ཟས་བཏུང་བ་གོས་རྒྱན་ཁང་ཁྱིམ་ནོར། །སུ་གང་ལ་ཅི་འདོད་ལོངས་སྤྱོད་ཚོགས། །རྒྱ་ནམ་མཁའི་ཁམས་ཀུན་ཡོངས་གང་ཞིང་། །རྒྱུན་འཁོར་བ་མ་སྟོང་དེ་སྲིད་དུ། །གང་ཅི་འདོད་སྤྱོད་ཀྱང་ཟད་མེད་གྱུར། ཕཊཿ ཚེ་འཁོར་བ་ཐོག་མེད་ད་བར་དུ། །དྲིན་ཁོར་མེད་རིས་དྲུག་ཕ་མའི་ཚོགས། །བདག་དྲིན་ལན་གཞལ་ཕྱིར་སྒྱུ་མའི་ལུས། །གང་ཅི་འདོད་དངོས་པོར་བྱིན་བརླབས་ནས། །སེམས་ཉེ་རིང་མེད་པར་ཚོགས་སུ་བསྔོ། །ཀུན་ཇི་ལྟར་འདོད་པ་ལོངས་སྤྱད་ནས། །ལམ་བླ་མེད་བྱང་ཆུབ་མངོན་གྱུར་ཤོག ཕཊཿ གསུམ་པ་ཡུལ་བར་མ་ལ་མགྲོན་དུ་བཀྱེ་པ་ནི། དོན་ཡེ་སྟོང་རྩ་བྲལ་ངང་ཉིད་ལས་
ཅལ་ཀུན་རྟོག་འཁྲུལ་པའི་རང་གཟུགས་འཕྲུལ། །མིང་ལྷ་འདྲེར་བཏགས་པའི་རྣམ་འགྱུར་ཚོགས། །གཟུགས་མ་ངེས་སྣ་ཚོགས་ཡ་མ་ཟུང་། །དབྱིབས་ཁ་དོག་ཆ་ལུགས་དུ་མར་ལྡན། །ལས་གཞན་ལ་འཚེ་བའི་གདུག་སེམས་ཅན། །མཐོ་སྲིད་རྩེའི་གནས་ནས་དམྱལ་ཁམས་བར། །ཁྱེད་མི་མིན་ཤ་ཟ་འབྱུང་པོའི་རིགས། །ཀུན་ཡུད་ཙམ་ཅིག་གིས་འདིར་འདུས་ཤིག །ཕཊཿ ཁྱོད་སྣ་ཚོགས་ཆོ་འཕྲུལ་དུ་མ་ཡིས། །བདག་གསོད་གཅོད་བརྡེག་བརྡུང་ཅིར་བསྟན་ཀྱང་། །སེམས་སྟོང་པ་ཉིད་ལ་ཇི་ལྟར་བྱེད། །ལུས་མི་གཙང་དུ་མའི་ཕུང་པོ་འདི། །ཁྱེད་འདོད་ན་ཅི་ཕྱིར་བདག་མི་སྦྱིན། །ཕྲལ་འཚོ་སྐྱོང་དཀའ་ལ་གནོད་ཚེ་མང་། །ཕུགས་སྙིང་པོ་མེད་པའི་གཟུགས་ཕུང་འདི། །དུས་ད་ལྟ་སྦྱིན་པའི་ཡོ་བྱད་དུ། །གྱུར་ནུས་པ་ཁྱེད་རྣམས་དྲིན་རེ་ཆེ། །མགོ་ཡན་ལག་ཁོག་སྟོད་ཁོག་སྨད་དང་། །ཁྲག་ཤ་ལྤགས་དོན་སྙིང་ནང་རོལ་རྩ།
སྐྲ་སེན་མོ་བ་སྤུའི་མཐར་ཐུག་བར། །མགྲོན་ལྷ་འདྲེའི་ཚོགས་ལ་གང་འདོད་སྦྱིན། །སུ་ཇི་ལྟར་དགྱེས་པ་ལོངས་སྤྱད་ནས། །ཡིད་ཚིམ་པས་གཞན་ལ་གནོད་སྤོང་ཞིང་། །ཀུན་སངས་རྒྱས་ས་ལ་མྱུར་འཁོད་ཤོག། ཕཊཿ བདག་སྦྱིན་པར་བྱེད་པའི་མཁན་པོ་དང་། །ཡུལ་གོང་བར་གསུམ་མགྲོན་གྱི་རིགས། །རྫས་སྦྱིན་རྒྱུའི་ཕུང་པོར་བཅས་པ་ཀུན། །དོན་མཐར་ཐུག་ཆོས་སྐུར་རོ་གཅིག་ཉིད། ངོ་ཤེས་ཞིང་ཐག་ཆོད་པས། འཁོར་གསུམ་ཡོངས་དག་ནི། གསུམ་གྱི་དང་པོ་རང་ངོ་རང་གི་ཤེས་པར་བྱ་བ་ནི། ཕཊཿ རང་རིག་པ་བྱང་ཆུབ་སེམས་ཉིད་ལ། །དབྱིབས་ཁ་དོག་དངོས་པོའི་ཡུལ་བྲལ་ཞིང་། །གསལ་རིག་པ་འགགས་མེད་སྟོང་མཐའ་བྲལ། །འདི་སངས་རྒྱས་ཉིད་དུ་བློ་ཐག་ཆོད། ཕཊཿ གཉིས་པ་ཡུལ་སྣང་རང་རྩལ་དུ་ཤེས་པ་ནི། །ཕྱི་གཟུང་བའི་ཡུལ་སྣང་སྣ་ཚོགས་ཀྱང་། །ནང་འཛིན་པས་བཅོས་ཤིང་བཏགས་པ་ལས། །དོན་བདེན་པས་གྲུབ་པ་ལོགས་ན་མེད། །སེམས་གཅིག་
པུའི་རྩལ་དུ་བློ་ཐག་ཆོད། ཕཊཿ གསུམ་པ་འཁོར་འདས་ཀྱི་ཆོས་དེ་དེ་བཀའ་ཤེས་རབ་ཕར་ཕྱིན་འདིར་འདུས་པའི་ཚུལ་ནི། །ཚིག་ཆོས་སྒོ་བརྒྱད་ཁྲི་བཞི་སྟོང་ཡང་། །དོན་ཤེས་རབ་ཕར་ཕྱིན་རྟོག་པའི་ཐབས། །གནས་རྩ་བ་རང་རིག་སྟོང་པ་ཉིད། །གཞན་གུད་ན་མེད་པར་བློ་ཐག་ཆོད། ཕཊཿ དེ་ཡན་ཆད་རྣམས་དངོས་གཞིའི་རིམ་པའོ། །རྗེས་ཀྱི་རིམ་པ་ལ་ཡང་དགུ་ལས། །དང་པོ་བསྐྱུར་ཚུལ་གསུམ་གྱི་ཐོག་མར་ལུས་ཞེན་མེད་དུ་བསྐྱུར་ཚུལ་ནི། །ལུས་སྒྱུ་མ་ལྟ་བུའི་ཁང་རུལ་འདི། །ཕྲལ་གཅེས་སྤྲས་དུ་མས་བསྐྱངས་ན་ཡང་། །ཕུགས་སྙིང་པོ་མེད་ཕྱིར་ནམ་ཀྱང་འཇིག །དོན་དེ་ཕྱིར་གཅེས་འཛིན་ཞེན་པ་བསྐྱུར། ཕཊཿ གཉིས་པ་ངག་བརྗོད་མེད་དུ་བསྐྱུར་ཚུལ་ནི། །ངག་བྲག་ཆ་ལྟ་བུའི་ལྡང་ལྷང་པོ། །འདི་ཇི་ཙམ་བརྗོད་ཀྱང་ཟད་མཐའ་བྲལ། །སྙན་མི་སྙན་བཟང་ངན་འཛིན་པས་བཅིངས། །འདི་བརྗོད་མེད་བརྗོད་བྲལ་ངང་དུ་བསྐྱུར། ཕཊཿ །གསུམ་པ་སེམས་
བློ་བྲལ་དུ་བསྐྱུར་ཚུལ་ནི། །སེམས་ཀུན་རྟོགས་སྣ་ཚོགས་འཕྲོ་འཕྲོ་བ། །འདི་ཇི་ལྟར་བཅོས་ཀྱང་འཁོར་བའི་རྒྱུ། །ད་གང་ལྟར་འཆར་བ་དེ་ཉིད་ངང་། །བབས་གང་ཤར་བཟོ་མེད་ངང་དུ་བསྐྱུར། ཕཊཿ བཞག་ཐབས་གསུམ་གྱི་དང་པོ་ཕྱི་འཇིག་རྟེན་འཁྲུལ་པའི་བྱ་བྱེད་བཞག་པ་ནི། །ཚེ་འདི་སྣང་ཡུད་ཙམ་རྨི་ལམ་འདྲ། །ཡུན་དེ་སྲིད་འཁྲུལ་པའི་བྱ་བ་ལ། །བློ་བསུན་པ་མེད་པར་འབད་བྱས་ཀྱང་། །དོན་སྙིང་པོ་མེད་པས་ཙམ་གྱི་ཞོག །ཕཊཿ གཉིས་པ་བྱང་ཆུབ་བསྒྲུབ་པའི་རློམ་པ་དང་ཞེན་འཁྲིས་ཐམས་ཅད་བཞག་ཚུལ་ནི། །ནང་བླ་མེད་བྱང་ཆུབ་བསྒྲུབ་འདོད་ཀྱང་། །ཡིད་རེ་དོག་གཟེབ་ལས་མ་གྲོལ་ན། །ཆོས་ལམ་དུ་འགྲོ་བའི་ཐབས་བྲལ་ཕྱིར། །སེམས་ཞེན་འཁྲིས་མེད་པར་ལྷོད་ཀྱི་ཞོག །ཕཊཿ གསུམ་པ་འཇིག་རྟེན་ལས་འདས་པའི་སྤྱོད་པ་རྣམས་ཀྱང་མངོན་ཞེན་བྲལ་བར་བཞག་ཚུལ་ནི། །ཡོངས་འཇིག་རྟེན་འདས་པའི་སྤྱོད་པ་ཡང་། །བློ་ང་ཡིར་འཛིན་དང་མ་བྲལ་ན། །དོན་ཆོས་ཉིད་རྗེན་པ་མི་མཐོང་བས། །ཚུལ་ཅིར་
སྣང་རང་གྲོལ་ངང་དུ་བཞོག ཕཊཿ ཁྱེར་པོ་གསུམ་གྱི་དང་པོ་དད་པས་རྩ་བ་གསུམ་ལམ་དུ་ཁྱེར་བ་ནི། །གཞི་རང་སེམས་སངས་རྒྱས་རྟོགས་གྱུར་ཀྱང་། །ལྷ་བླ་མའི་མོས་གུས་མི་སྤང་ཞིང་། །དེ་རེས་འཇོག་ཅན་དུ་མ་ཡིན་པར། །ཡིད་གུས་པས་འབྲལ་མེད་ལམ་དུ་ཁྱེར། ཕཊཿ གཉིས་པ་བྱམས་དང་སྙིང་རྗེས་རིས་དྲུག་ལམ་དུ་ཁྱེར་བ་ནི། །དོན་སྟོང་པ་ཉིད་ལ་དབང་ཐོབ་ཀྱང་། །ལས་རྒྱུ་འབྲས་བག་ཡོད་དང་ལྡན་ཞིང་། །མ་ཁམས་གསུམ་འགྲོ་ལ་ཅི་ཕན་བློས། །བྱམས་སྙིང་རྗེ་བྱང་སེམས་ལམ་དུ་ཁྱེར། ཕཊཿ གསུམ་པ་ཐེ་ཚོམ་གཉིས་འཛིན་བྲལ་བས་ལྷ་འདྲེ་ལམ་དུ་ཁྱེར་བ་ནི། །སེམས་གཤིས་ཀྱི་འདུག་ཚུལ་འཚང་རིག་ཀྱང་། །ཕྱི་ལྷ་འདྲེའི་སྣང་ཚུལ་ཁྱད་མེད་སད། །དོན་གཉིས་སུ་འཛིན་པ་དང་བྲལ་བས། །ཀུན་ཆོས་དབྱིངས་ངོ་བོར་ལམ་དུ་ཁྱེར། ཕཊཿ མཐར་བསྔོ་བ་ནི། །དོན་འདི་ལྟར་མ་རྟོགས་འགྲོ་ཀུན་ཀྱང་། །གནད་མ་ནོར་མངོན་གྱུར་
སངས་རྒྱས་ཤིང་། །དེ་བསྔོ་བྱ་སྔོ་བྱེད་སྔོ་མཁན་སོགས། །དབྱིངས་སྐྱེ་བ་མེད་པའི་ཀློང་དུ་ཕཊཿ དེ་ལྟར་བླ་མ་དགོངས་པ་འདུས་པའི་ཟབ་མོ་བདུད་ཀྱི་གཅོད་ཡུལ་གཉིས་འཛིན་མངོན་ཞེན་འཁྲི་བ་གཅོད་པའི་གདམས་པ་འདི་ཉིད་ཁྲིད་གཞུང་ནས་ཇི་ལྟར་གསུངས་པ་ལྟར་ངག་འདོན་དུ་བགྱིས་ཆོག་པ་ཞིག་དགོས་ཞེས་དད་ལྡན་མང་པོས་ཡང་ཡང་བསྐུལ་ནའང་། གཏེར་གཞུང་གི་རྡོ་རྗེའི་ཚིག་སྦྲམ་ཆེ་བ་རྣམས་བློ་དམན་བདག་འདྲས་དགོངས་པ་ལོན་པའི་ནུས་པ་མ་མཆིས་པ་དང་། རྒྱལ་བའི་བཀའ་ལ་རས་ཆོད་དུ་འགྱུར་དགོས་ནའང་། བསྐུལ་བ་པོ་རྣམས་ཀྱི་གསུང་མི་བཅོག་ཕྱིར། རིག་འཛིན་ཆེན་པོ་པདྨ་ཐོད་ཕྲེང་ཉིད་ལ་གསོལ་བ་བཏབ་ནས་བཀོད་པ་ཡིན་ཞིང་། འདི་ཉིད་ཀྱི་གཅོད་ཁྲིད་ཚུལ་བཞིན་མ་ཐོབ་པ་རྣམས་ཀྱིས་ནི་འདི་ཉིད་གཅིག་པུ་ཚིག་ཁྱེར་དུ་བྱ་བའི་ཡུལ་མ་ཡིན་པས་དེ་ལྟ་བུའི་ཚུལ་རིག་པར་བྱའོ། །འདིས་ཀྱང་གསང་སྔགས་རྡོ་རྗེ་ཐེག་པའི་བསྟན་པ་རིན་པོ་ཆེ་ཕྱོགས་ཐམས་ཅད་དུ་དར་ཞིང་རྒྱས་པའི་ཆ་རྐྱེན་དུ་གྱུར་ཅིག །བཀྲ་ཤིས་སྩོལ། གཅིག་ཞུད།