དགོངས་འདུས་ཀྱི་སྒྱུ་ལུས་མཆོད་སྦྱིན།
དགོངས་འདུས་ཀྱི་སྒྱུ་ལུས་མཆོད་སྦྱིན་བཞུགས་སོ། །
ཕཊཿ རང་གི་སྤྱི་གཙུག་སྟེང་དུ། །དྲིན་ཅན་རྩ་བའི་བླ་མ། །འབྲལ་མེད་རྟག་ཏུ་བཞུགས་ལ། །སྣང་སྲིད་བདག་ལུས་ལོངས་སྤྱོད། །མ་ལུས་མཆོད་པར་འབུལ་གྱི། །བཞེས་ནས་བྱིན་གྱིས་རློབས་ཤིག །ཕཊཿ ན་མོ། །ཕྱོགས་དུས་རྒྱལ་བ་ཀུན་དང་། །དབྱེར་མེད་རྡོ་རྗེ་སློབ་དཔོན། །དྲིན་ཅན་བླ་མ་མཆོག་ལ། །རྩེ་གཅིག་གསོལ་བ་འདེབས་སོ། །བདག་སོགས་ཁམས་གསུམ་སེམས་ཅན། །ཀུན་ལ་ཐུགས་རྗེས་གཟིགས་ནས། །འཁོར་བའི་རྒྱ་མཚོ་སྐེམ་ཞིང་། །ཁྱེད་དང་དབྱེར་མེད་གྱུར་ཅིག །ཕཊཿ དེ་ནས་རང་སེམས་
འདི་ཉིད། །བླ་མའི་ཐུགས་ཀར་འདྲེས་ཤིང་། །བླ་མ་རང་ལ་ཐིམ་པས། །རང་ལུས་བདུད་རྩིར་ཞུ་ནས། །འབྲེལ་ཚད་དོན་ལྡན་ཉིད་གྱུར། ཕཊཿ དེ་ནས་འོད་ཀྱི་རླངས་པ། །ཡར་འཕྲོས་རྒྱལ་བ་ཀུན་ལ། །མཆོད་པའི་སྤྲིན་གྱིས་མཆོད་ཅིང་། །ཐུགས་རྗེ་བྱིན་རླབས་ཚུར་བསྡུས། །བདུད་རྩིའི་རྒྱ་མཚོར་ཐིམ་པས། །མི་ཟད་གཏེར་དུ་གྱུར་ཅིག །ཕཊཿ སྲིད་པའི་རྩེ་མོ་མན་ཆད། །ན་རག་དམྱལ་ཁམས་ཡན་གྱི། །སྣང་སྲིད་སྐྱེ་འགྲོ་ཀུན་ལ། །ཅི་འདོད་ཆར་ལྟར་ཕབ་པས། །ཕཾ་རྒྱལ་འཐབ་རྩོད་མེད་པར། །གང་
ལ་ཅི་འདོད་གྱུར་ཅིང་། ཁམས་གསུམ་འགྲོ་བ་ཐམས་ཅད། །སྡུག་བསྔལ་ཀུན་དང་བྲལ་ནས། །སངས་རྒྱས་ཐོབ་པར་གྱུར་ཅིག །ཕཊཿ བསྔོ་བ་སྔོ་བྱེད་ཀུན་ཀྱང་། །ཆོས་དབྱིངས་ཀློང་དུ་གཅིག་པས། །ཐམས་ཅད་མཉམ་ཉིད་ངང་དུ། །སྤྲོས་བྲལ་རང་རིག་ཉིད་དོ། ཕཊཿ ༈ །།བླ་མ་དགོངས་པ་འདུས་པའི་ཟབ་མོ་བདུད་ཀྱི་གཅོད་ཡུལ་གྱི་ནང་ནས། སྒྱུ་ལུས་མཆོད་སྦྱིན་བདུད་རྩི་ཀུན་ཁྱབ་འདི་ཉིད་ལ་ངག་གི་བརྗོད་བྱ་ལ་མ་ལྟོས་པར་དམིགས་པ་ཁོ་ན་ཉམས་སུ་བླང་བར་གསུང་ནའང་། དམིགས་པའི་གསལ་འདེབས་ལ་ཕན་པའི་བརྗོད་བྱ་ཉུང་ངུར་བསྡུས་པ་འདི་ལྟ་བུ་ཞིག་དགོས་ཞེས་བསྐུལ་བ་པོ་བྱུང་བ་དང་། ཉམས་ལེན་གྱི་གྲོགས་སུ་འགྱུར་ན་འདི་ཙམ་ཅིག་ངག་ཏུ་བརྗོད་པ་ལ་འགལ་བ་རང་མི་ཡོང་ངམ་བསམ་སྟེ། གནས་ཆེན་ཆུ་བོ་གཡས་འཁྱིལ་གྱི་དུར་ཁྲོད་དུ་བཀོད་པའོ། །དགེའོ། །གཅིག་ཞུད།