གཅོད་ཡུལ་ཤེས་རབ་རལ་གྲིའི་ཉམས་ལེན་སྙིང་པོར་དྲིལ་བ།
གཅོད་ཡུལ་ཤེས་རབ་རལ་གྲིའི་ཉམས་ལེན་སྙིང་པོར་དྲིལ་བ་བཞུགས་སོ། །
མཚུངས་པ་མེད་པའི་སྐྱབས་མཆོག་དྲིན་ཅན་བླ་མའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །རིག་འཛིན་ཆེན་པོ་བསྟན་གཉིས་གླིང་པའི་གཏེར་མ་གཅོད་ཡུལ་ཤེས་རབ་རལ་གྲི་རྒྱུན་ཁྱེར་དུ་ཉམས་སུ་ལེན་པར་འདོད་པའི་གང་ཟག་གིས། །གཞུང་འདི་ཉིད་ནས་གསུངས་པའི་གཉན་པའམ། རང་གི་མས་ས་ཉིད་དུ་ལུས་ངག་ཡིད་གསུམ་ཟོ་གློད་པའི་ངང་ནས་འདི་ལྟར་ཚིག་དོན་མཐུན་པ་ཉམས་སུ་བླང་བར་བྱའོ། །ཕཊཿ མ་མཁའ་མཉམ་འགྲོ་ཀུན་བསྒྲལ་བྱའི་ཕྱིར། །བདག་ལམ་ཟབ་ཉམས་ལེན་འབད་པར་བྱ། །སྟེང་སྤྱི་གཙུག་པད་ཟླའི་གདན་ཉིད་ལ། །སྐྱབས་མཚུངས་བླ་མ་རྡོ་རྗེ་འཆང་།
དོན་རྒྱལ་བ་ཀུན་འདུས་བཞུགས་པ་ལ། །བདག་ལུས་སྲོག་ལོངས་སྤྱོད་སྣང་སྲིད་ཀུན། །དུས་རྟག་ཏུ་མཆོད་འབུལ་ཐུགས་རྗེས་བཞེས། །སྡིག་ཉེས་ཀུན་དག་ཅིང་དབང་བཞི་ཐོབ། །དཔེ་མཚོན་བྱེད་བླ་མ་བསྒོམས་པའི་མཐུས། །དོན་མཚོན་བྱའི་བླ་མ་མཆོག་འགྲུབ་ཤོག །ཕཊཿ བདག་རིག་པའི་ངོ་བོ་ཕག་མོའི་སྐུ། །རྩ་དབུ་མའི་ལམ་བརྒྱུད་ཚངས་བུག་འཐོན། །ལུས་འདོད་ཡོན་ཕུང་པོ་རི་རབ་ཙམ། །ཡུལ་སྟོང་གསུམ་གང་བའི་ངོ་བོར་གྱུར། ཕཊཿ ཡིད་རང་བྱུང་ཕག་མོའི་རྫུ་འཕྲུལ་གྱིས། །ལུས་ལྤགས་པ་བཤུས་ནས་ས་
སྟེང་ཁྱབ། །གཟུགས་སིལ་བུར་བཏུབ་པས་འཇིག་རྟེན་ཁེངས། །མགྲོན་མཆོག་དམན་མཐའ་དག་འདུས་པར་གྱུར། ཕཊཿ བདག་གཅེས་སྤྲས་བྱས་པའི་སྒྱུ་ལུས་འདི། །དེང་མཆོད་སྦྱིན་དངོས་པོར་གྱུར་པ་ལེགས། །མགྲོན་སོ་སོར་གང་ལ་ཅི་འདོད་པའི། །རྫས་ཟད་མེད་ལོངས་སྤྱོད་ཚིམ་པར་གྱུར། ཕཊཿ། སེམས་འཁྲུལ་རྟོག་བག་ཆགས་ལུ་གུ་རྒྱུད། །ང་བདག་གིར་འཛིན་པའི་ཞེན་པ་ཅན། །ཁྱོད་རང་ལས་གཞན་པའི་ལྷ་འདྲེ་ཞེས། །ཕན་གནོད་པར་གཟུང་རྒྱུ་གང་དུ་རྙེད། །སྣོད་དག་པ་རབ་འབྱམས་རྒྱལ་བའི་ཞིང་། །བཅུད་འགྲོ་བ་རིགས་དྲུག་བླ་མའི་འཁྲུལ། །དོན་ཐམས་ཅད་ཆོས་སྐུ་རིག་སྟོང་རྩལ། །འཇིགས་པ་དང་སུ་ཡི་གང་ལ་བྱེད། །གཞི་སངས་རྒྱས་རང་ཆས་རང་རིག་ནི། །གདངས་བཟང་ངན་རྟོགས་ཚོགས་ཅི་ཤར་ཀུན། །གནད་དགག་བསྒྲུབ་སྤོང་ལེན་མི་བྱེད་པར། །བབས་རང་ལུགས་རིག་པས་གཞན་ཅི་ཞིག །རྒྱུ་ཚོགས་གསོགས་སྒྲིབ་སྦྱོངས་དགེ་བའི་ལས། །ལམ་
སྤྲོས་བཅས་སྤྲོས་དང་བྲལ་བའི་རིགས། །ཀུན་བསྔོ་བྱ་སྔོ་བྱེད་སྔོ་མཁན་སོགས། །དོན་སྤྲོས་མེད་ཆོས་དབྱིངས་ཀློང་དུ་ཕཊཿཞེས་པ་འདི་ནི་གཙང་གི་རྣལ་འབྱོར་པ་ལྷུན་གྲུབ་གདན་ཁྱབ་ཀྱིས་བསྐུལ་ངོར་བཀོད་པ་ཡིན་ཅིང་ཚུལ་འདི་ནི་གདམས་པ་འདི་དག་གི་ཟབ་ཁྲིད་ཞིབ་རྒྱས་ཚུལ་ལྡན་དུ་ཐོབ་པ་དག་གིས་རྒྱུན་ཁྱེར་ཉམས་ལེན་དུ་བྱ་བ་མ་གཏོགས། །གཞན་དག་གིས་ཁ་ཁྱེར་དུ་བྱར་བཏུང་བ་ནི་མ་ཡིན་ནོ། །ཨྀིྠཿ གཅིག་ཞུད།