ཕྱག་རྡོར་དྲེགས་འདུལ་གྱི་རྩ་བསྙེན་དམིགས་རིམ་མདོར་བསྡུས།
ཕྱག་རྡོར་དྲེགས་འདུལ་གྱི་རྩ་བསྙེན་དམིགས་རིམ་མདོར་བསྡུས་བཞུགས་སོ། །ནམ་མཁས་གར་ཁྱབ་ཕ་མ་སེམས་ཅན་རྣམས། །བླ་མེད་བྱང་ཆུབ་གོ་འཕང་ལ་འགོད་ཕྱིར། །རྒྱལ་བ་ཀུན་གྱི་གསང་འཛིན་མཐུ་སྟོབས་བདག །དཔལ་ལྡན་རྡོ་རྗེ་འཛིན་དབང་བསྒྲུབ་པར་བྱ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྔགས་ཀྱི་ནུས་པ་མ་དག་སྣོད་བཅུད་སྦྱངས། །འཁོར་འདས་མུས་གདོད་ནས་དག་པ་ཡི། །སྟོང་པའི་ངང་ལས་སྣ་ཚོགས་པདྨ་དང་། །ཉི་མ་བརྩེགས་པའི་གདན་ལ་རང་རིག་འདི། །ཧཱུྃ་ཡིག་མཐིང་ནག་འོད་དུ་འབར་བར་གྱུར། །འོད་ཟེར་ཡར་འཕྲོས་རྒྱལ་བ་ཐམས་ཅད་མཆོད། །མར་འཕྲོས་འགྲོ་བ་ཀུན་གྱི་སྡིག་སྒྲིབ་སྦྱངས། །འོད་ཟེར་ཚུར་འདུས་ཧཱུྃ་ལ་ཐིམ་པ་ཡིས། །ཧཱུྃ་དེ་ཕྱག་ན་རྡོ་རྗེའི་སྐུར་གྱུར་ཏེ། །སྐུ་མདོག་མཐིང་ནག་ཞལ་གཅིག་ཕྱག་གཉིས་པ། །ཤིན་ཏུ་ཁྲོ་ཞིང་གཏུམ་ལ་འཇིགས་པའི་སྐུ། །ཞལ་གདངས་ལྗགས་
འདྲིལ་མཆེ་གཙིགས་སྤྱན་གསུམ་བགྲད། །སྨིན་མ་ཨག་ཚོམ་རལ་པ་མེ་ལྟར་འབར། །ཕྱག་གཡས་གནམ་ལྕགས་རྡོ་རྗེ་རྩི་ལྔ་གདེངས། །གཡོན་པ་ཐུགས་ཀར་སྡིག་མཛུབ་ཕྱག་རྒྱ་གཟིར། །ཞབས་གཉིས་གཡས་བསྐུམ་གཡོན་བརྐྱང་དོར་ཐབས་བཞེངས། །དབུ་ལ་ཐོད་སྐམ་རིགས་ལྔ་དར་དབྱངས་མཛེས། །སྙན་དང་མགུལ་དང་ཕྱག་ཞབས་ཐམས་ཅད་ལ། །རིན་ཆེན་རྒྱན་དང་སྦྲུལ་གྱིས་ཆུན་བུས་བརྒྱན། །སྐུ་སྟོད་གླང་ཆེན་ཀོ་རློན་སྨད་སྟག་ཤམ། །ཁྲོ་བོའི་རྒྱན་དང་ཆ་ལུགས་ཐམས་ཅད་རྫོགས། །ཡེ་ཤེས་མེ་སྤུངས་འབར་བའི་ཀློང་ན་འགྱིངས། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །ཐུགས་ཀར་ཉི་མའི་དཀྱིལ་འཁོར་ཆུང་ངུའི་སྟེང་། །རྡོ་རྗེ་མཐིང་ནག་ནས་ཙམ་གྱེན་དུ་ལངས། །དེ་ཡི་ལྟེ་བར་ཐུགས་སྲོག་ས་བོན་ནི། །ཧཱུྃ་ཡིག་མཐིང་ནག་ཕྲ་ཞིང་གསལ་བས་མཚན། །གནས་གསུམ་ཨོཾ་ཨཱཿཧཱུྃ་གི་འོད་ཟེར་ནི། །ཁ་
དོག་སྣ་ཚོགས་ཕྱོགས་བཅུར་འཕྲོས་པ་ཡིས། །སངས་རྒྱས་བྱང་སེམས་བླ་མ་ཡི་དམ་ལྷ། །ཐམས་ཅད་ཕྱག་ན་རྡོ་རྗེའི་ཆ་ལུགས་སུ། །བྱོན་ནས་བདག་ལ་གཉིས་སུ་མེད་པར་ཐིམ། །སླར་ཡང་གནས་གསུམ་འབྲུ་འབུམ་འོད་འཕྲོས་པས། །རྒྱལ་བ་རིགས་ལྔ་ལ་སོགས་དབང་གི་ལྷ། །འཁོར་འདས་མདུན་གྱི་ནམ་མཁར་བྱོན་ནས་ཀྱང་། །རིན་ཆེན་བུམ་པས་བདག་ལ་དབུ་མར་ཞིང་། །བདུད་རྩི་བུམ་ཆུ་ཚངས་བུག་ནས་བབས་ཏེ། །ལུས་ནང་གང་ཞིང་དབང་བཞི་ཡོངས་རྫོགས་ཐོབ། །དབང་ལྷ་ཐམས་ཅད་མི་སྐྱོད་པ་ལ་ཐིམ། །རིགས་ཀྱི་བདག་པོ་སངས་རྒྱས་མི་སྐྱོད་པ། །རང་གི་རྩ་བའི་བླ་མ་ཐ་མི་དད། །སྤྱི་བོའི་གཙུག་ཏུ་འབྲལ་མེད་བཞུགས་པར་གྱུར། །དེ་ནས་རང་གི་ཐུགས་ཀའི་རྡོ་རྗེ་དེའི། །ལྟེ་བའི་ན་ན་ཧཱུྃ་གི་མཐའ་སྐོར་དུ། །རྩ་བའི་སྔགས་ཀྱི་ཡིག་འབྲུ་མཐིང་གའི་མདོག །གཡས་སུ་སྐོར་བ་བྱེད་ལྟར་འཁོར་ཞིང་འཁྱིལ། །
དེ་ལས་འོད་འཕྲོས་སངས་རྒྱས་ཐམས་ཅད་ཀྱི། །ཐུགས་རྗེ་བྱིན་རླབས་བསྡུས་ནས་རང་ལ་ཐིམ། །གནོད་བྱེད་གཟའ་ཀླུ་གདུག་པ་ཅན་རྣམས་ཀྱིང་། །ཚར་བཅད་དབང་དུ་བསྡུས་ཤིང་བཀའ་ཉན་གྱུར། །སྐྱེ་འགྲོ་ཐམས་ཅད་ཕྱག་རྡོར་སྐུར་གྱུར་ནས། །སྔགས་ཀྱིས་རང་སྒྲས་སྟོང་ཁམས་གང་བར་གྱུར། །ཨོཾ་བཛྲ་ཙཎྜ་མ་ཧཱ་རོ་ཥ་་ཧཱུྃ་ཕཊཿཞེས་རྩ་བའི་སྙིང་པོ་འདི་ཉིད་ལ་རྩེ་གཅིག་ཏུ་འབད་དེ་བཟླ་ཞིང་།། ༈ །།ཐུན་མཚམས་འཇོག་པའི་སྐབས་སུ། །བདག་ཉིད་ལྷའི་སྐུ་དང་ཐུགས་ཀའི་རྡོ་རྗེ་སྔགས་དང་བཅས་པ་ཐམས་ཅད་ཐུགས་སྲོག་ཧཱུྃ་ཉིད་ལས་འདུས་ཤིང་ཐིམ། ཧཱུྃ་ཡང་ནམ་མཁའ་ལ་འཇའ་ཡལ་བ་ལྟར་དངོས་མེད་དུ་གྱུར་པར་བསམ་ལ། རང་སེམས་གསལ་སྟོང་ཟུང་འཇུག་བཅོས་སླད་མེད་པའི་ངང་ལ་མཉམ་པར་བཞག་ལ། སླར་ཡང་རང་ལུས་ཕྱག་རྡོར་ཀྱི་རྣམ་པར་ལམ་མེ་ཡོད་པའི་མོས་པ་དང་ལྡན་པའི་པའི་ངང་ནས། །བསོད་ནམས་འདི་ཡིས་གསང་བའི་བདག་པོ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ཏེ། །སྐྱེ་རྒ་ན་འཆིའི་རྦ་ཀློང་
འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་དགེ་བ་བསྔོ་བར་བྱའོ། །དེ་ལྟར་འདི་ནི་ གསང་བདག་ཕྱག་རྡོར ་དྲེགས་པ་ཀུན་འདུལ་གྱི་རྩ་བའི་བསྙེན་པ་རྒྱུན་ཁྱེར་དབང་དུ་བྱས་པ་ཡིན་ལ། གཞན་སྒྲུབ་པ་དང་ལས་སྦྱོར་སོགས་བྱེད་ན་དམིགས་པ་ཁ་བསྒྱུར་དང་། ཁྱུང་ཤམ་འདོགས་ལུགས་སོགས་གཞུང་ཉིད་དང་སློབ་དཔོན་གྱི་ཞལ་རྒྱུན་སོགས་ལས་ཞིབ་པར་ཤེས་དགོས་པ་ཉིད་དོ། །འདི་ནི་གང་ཟག་གསར་བུ་བ་གཞན་ལ་ཕན་ཕྱིར་དོན་གཉེར་རེ་ཤིག་གིས་བསྐུལ་ངོར་བྲིས་པ་དགེའོ། །གཅིག་ཞུད། །