ཕྱག་རྡོར་སྟོབས་པོ་ཆེའི་ཉམས་ལེན་རྒྱུན་ཁྱེར་ཟིན་བྲིས།
ཕྱག་རྡོར་སྟོབས་པོ་ཆེའི་ཉམས་ལེན་རྒྱུན་ཁྱེར་ཟིན་བྲིས་བཞུགས་སོ། །
ན་མོ་གུ་རུ་ས་མཱ་དྲ་ན་ཡེ། །ལྷ་དང་བླ་མ་དབྱེར་མེད་ལ་བཏུད་ནས། །དེ་ཉིད་བསྒྲུབ་ཐབས་སྙིང་པོར་བསྡུས་ཏེ་བྲི། །དབེན་པའི་གནས་སུ་སྐྱབས་སེམས་ཆོས་སྤྱོད་རིགས། །སྔོན་དུ་བཏང་ནས་སྣོད་བཅུད་སྟོངས་པར་སྦྱངས། །དེ་ནས་རང་གི་གནས་དེ་གནམ་ལྕགས་ཀྱི། །རྡོ་རྗེ་རྩེ་ལྔ་རི་བོ་མཆོག་རབ་ཙམ། །སྟེང་དང་འོག་ནས་གནམ་ལྕགས་འཁོར་ལོ་ནི། ཁ་སྦྱོར་ཕུབས་པ་གཡས་གཡོན་བསྣོལ་འཁོར་ཞིང་། །ཕྱི་རོལ་པདྨ་རྡོ་རྗེ་མེ་རི་ཡི། །བསྲུང་བའི་གུར་གྱིས་བར་ཆད་ཀུན་སྐྱོབས་
བསམ། །རྡོ་རྗེའི་ལྟེ་བ་གཞལ་ཡས་ཁང་གི་ནང་། །འཁོར་ལོ་རྩིབས་བཞིའི་གདན་དབུས་པད་ཉིའི་སྟེང་། །རང་རིག་རྡོ་རྗེ་རྩེ་དགུ་ཧཱུྃ་གིས་མཚན། །དེ་ལས་འོད་འཕྲོས་རྒྱལ་བ་ཀུན་མཆོད་ཅིང་། །འགྲོ་བའི་སྒྲིབ་སྦྱངས་གདུགས་པ་ཅན་རྣམས་བཏུལ། །འོད་ཟེར་ཚུར་འདུས་ཡོངས་གྱུར་སྐད་ཅིག་གིས། །བདག་ཉིད་ཕྱག་རྡོར་གཏུམ་རྔམ་མཐིང་ནག་མདོག །ཞལ་གཅིག་ཕྱག་གཉིས་སྤྱན་གསུམ་གདངས་མི་གཟིགས། །ཕྱག་གཡས་རྡོ་རྗེ་འཕྱར་ཞིང་གཡོན་པ་ནི། །ལྕགས་ཀྱུ་ཞགས་པ་དང་བཅས་སྡིག་འཛུབ་
མཛད། །དར་སྔོན་སྟོད་གཡོགས་སྟག་ལྤགས་ཤམ་ཐབས་དང་། །ཕྱག་ཞབས་སྦྲུལ་དང་རིན་ཆེན་གདུབ་བུས་བརྒྱན། །ཐོད་སྐམ་རིགས་ལྔས་དབུ་བརྒྱན་རལ་པ་འབར། །གཡས་བསྐུམ་གཡོན་བརྐྱང་མེ་དཔུངས་ཀློང་བཞུགས་པའི། །ཕྱོགས་བཞིའི་རྩིབས་ལ་ཕྱག་རྡོར་རིགས་བཞི་ནི། །དཀར་སེར་དམར་ལྗང་ཆ་ལུགས་གཙོ་དང་མཐུན། །སྒོ་བཞི་རྟ་ཕག་སེང་སྦྲུལ་གདོང་ཅན་ཀྱང་། །ཕྱོགས་མདོག་ལྕགས་ཀྱུ་ཞགས་པ་ལྕགས་སྒྲོག་དྲིལ། །དེ་ལྟར་འཁོར་ཚོགས་རྣམས་ཀྱང་རང་རིག་གི། །རྩལ་མདངས་ཉི་དང་ཟེར་བཞིན་ཤུགས་འབྱུང་བསྐྱེད། །གཙོ་བོའི་སྤྱི་བོར་ཟླ་སྟེང་ཨོཾ་དཀར་དང་། །མགྲིན་པར་པདྨའི་སྟེང་དུ་ཨཱཿདམར་པོ། །ཐུགས་ཀར་ཉི་མའི་སྟེང་དུ་ཧཱུྃ་མཐིང་ནག །ཧཱུྃ་གི་མཐའ་སྐོར་སྔགས་ཕྲེང་བསྐོར་བ་ལས། །འོད་འཕྲོས་ཡེ་ཤེས་སེམས་དཔའ་སྤྱན་དྲངས་བསྟིམ། །སླར་ཡང་འོད་འཕྲོས་བདེ་གཤེགས་དབང་གི་ལྷ། །རིགས་ལྔ་སྤྱན་དྲངས་བུམ་པས་དབང་བསྐུར་ཞིང་། །ཆུ་ལྷག་ཡར་
ལུད་མི་སྐྱོད་པས་མཚན་གྱུར། །ཐུགས་ཁར་ས་བོན་སྔགས་ཕྲེང་འཁོར་བ་ལ། །འདུན་པ་གཏད་ཅིང་གསལ་སྟོང་ངང་ཉིད་ལས། །ཨོཾ་བཛྲ་ཙནྜ་མ་ཧཱ་རོ་ཥ་ཎ་ཧཱུྃ་ཕཊཿ བསྙེན་པའི་སྔགས་འདི་འབྲུ་འབུམ་བཟླ་བྱ་ཞིང་། །ས་བོན་སྔགས་ཕྲེང་རྣམས་ལས་འོད་ཟེར་ཚོགས། །ཡར་འཕྲོས་རྒྱལ་བ་ཀུན་མཆོད་ནུས་བྱིན་རྣམས། །བདག་ལ་ཐིམ་ཞིང་མར་འཕྲོས་འགྲོ་དྲུག་གི། །སྡིག་སྒྲིབ་སྦྱངས་ནས་བདེ་ལ་བཀོད་པར་དམིགས། །ཐུན་མཚམས་མཆོད་བསྟོད་བྱ་ཞིང་སྣོད་བཅུད་ཀུན། །ཐུགས་ཀའི་ཧཱུྃ་ལ་ཐིམ་ཞིང་ཧཱུྃ་ཉིད་ཀྱང་། །མི་དམིགས་སྟོང་པའི་རྒྱས་གདབ་དགེ་བ་བསྔོ། །སླར་ཡང་རང་ལུས་ལྷ་ཡི་ང་རྒྱལ་གྱིས། །ཅིར་སྣང་སྒྱུ་མར་རོལ་བ་སྤྱོད་ལམ་བྱ། །འདི་ལྟར་འབད་པས་དངོས་ཉམས་རྨི་ལམ་གྱི། །རྟག་ཐང་ཚེ་ན་བསྒྲུབ་དང་ལས་སྦྱོར་སྔགས། །གཅིག་ཏུ་དྲིལ་བ་འདི་ཉིད་གསུམ་འབུམ་བཟླ། །ཨོཾ་བཛྲ་ཙནྜ་མ་ཧཱ་རོ་ཥ་
ཎ་ཧཱུྃ་ཕཊཿ །ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། །འདི་དུས་དམིགས་པ་བདག་ལུས་གནས་རྣམས་དང་། །བ་སྤུའི་བུ་ག་ཀུན་ལས་ཁྲོ་བོའི་ཚོགས། །དཔག་མེད་ཚ་ཚ་ལྟ་བུར་འཕྲོས་པ་ཡིས། །གནོད་བྱེད་ཚོགས་རྣམས་རྡུལ་དུ་བརླག་པར་བསམ། །དམིགས་པ་གཞན་རྣམས་གོང་དང་མཚུངས་པ་ཉིད།། ༈ །།འདི་ལས་རྒྱས་པ་སྒྲུབ་པ་དངོས་བྱེད་ན། །དཀྱིལ་འཁོར་ཡོངས་རྫོགས་བྲིའམ་ཚོམ་བུ་ནི། །དབུས་སུ་གཅིག་དང་མཐའ་བསྐོར་བཞི་བཀོད་ཅིང་། །དེ་རྒྱབ་བཞི་བཀོད་དེ་དབུས་བུམ་པ་བཤམས། །གཡས་སུ་སྐུ་གཟུགས་གཡོན་དུ་གཏོར་མ་དང་། །མདུན་དུ་ཕུར་བུ་མཐའ་སྐོར་སྨན་རག་གཏོར། །མཆོད་པས་བསྐོར་བཤམས་དམིགས་པའི་རིམ་པ་ནི། །བདག་བསྐྱེད་གོང་བཞིན་བུམ་པ་དཀྱིལ་འཁོར་བཅས། །གཞལ་ཡས་ཡོངས་རྫོགས་ཉིད་བསྒོམ་ལྷ་ཚོགས་རྣམས། །བདག་སྐྱེད་ཇི་བཞིན་བྱ་ཞིང་ཡེ་ཤེས་པ། །སྤྱན་
དྲངས་བསྟིམ་དང་དབང་བསྐུར་རྒྱས་གདབ་སོགས། །བདག་བསྐྱེད་དང་མཐུན་ཡེ་ཤེས་སེམས་དཔའ་བསྟིམ། །བདག་ཉིད་ཐུགས་ལས་འོད་ཟེར་ཕར་འཕྲོས་པས། །མདུན་སྐྱེད་བུམ་སྐྱེད་གཙོ་འཁོར་ཐུགས་རྒྱུད་བསྐུལ། །དེ་དག་རྣམས་ལས་འོད་འཕྲོས་རྒྱལ་བ་མཆོད། །བྱིན་རླབས་ནུས་མཐུ་བསྡུས་ནས་བདག་མདུན་གྱི། །གནས་གསུམ་ཐིམ་པས་གཟི་བྱིན་འབར་བསམ་ལ། །རྩ་བའི་སྔགས་དང་ཤམ་བུ་འདོགས་ཚུལ་སོགས། །བསྙེན་དུས་དང་མཚུངས་རྟགས་འཐོན་བར་དུ་བསྒྲུབ། །སྒྲུབ་པ་ཐོན་ཚེ་སྐུ་དང་བུམ་གཏེར་རྣམས། །རང་གི་གནས་གསུམ་བཏུགས་ལ་དངོས་གྲུབ་བླངས། །ཡེ་ཤེས་སེམས་དཔའ་རང་གནས་གཤེགས་པའམ། །ཡང་ན་སྐུ་གཟུགས་དེ་ལ་བསྟིམ་པར་བྱ། །དམ་ཚིག་པ་རྣམས་རང་གི་ཐུགས་ཁར་བསྡུ། །སྐུ་དང་སེང་ཕུར་རང་དང་འབྲལ་མི་བྱ། །འདིས་ནི་དབང་དང་ལས་མཐའ་ལ་སོགས་པ།
གཞན་དོན་ཇི་ལྟར་འདོད་པ་འགྲུབ་པ་འགྱུར། །དེ་ལྟར་བདག་མདུན་བསྙེན་བསྒྲུབ་གང་དང་གང་། །ཀུན་ལ་རང་རིགས་སྟོང་ཉིད་དོན་རྟོགས་པའི། །གསལ་སྣང་གདངས་ཉིད་ལྷ་སྔགས་གསལ་བ་ལས། །ཨ་འཐས་འཛིན་པས་བཅིང་བ་མ་ཡིན་པར། །གསལ་སྟོང་ཟུང་འཇུག་ངང་ནས་ཡེངས་མེད་སྤྱད། །གནས་སྐབས་ཕན་གནོད་ལས་ཚོགས་ཙམ་ཕྱིར་དུ། །བསྒྲུབས་ཀྱང་རེ་དོག་གཟེབ་ལས་ཡ་གྲོལ་བས། །ང་བདག་འགོང་པོ་ཕུགས་ནས་མ་འཐོན་ན། །ཚེ་གཅིག་སངས་རྒྱས་ཐོབ་ནས་ཉེ་བར་དཀའ། །སྐྱེད་རྫོགས་དབྱེར་མེད་ཁྱབ་བདག་ཀློང་ཡངས་ནས། །བསྒོམ་མེད་ཡེངས་མེད་དོན་གྱི་བསྙེན་བསྒྲུབ་མཆོག །མཐའ་མཁྱེན་སྙིང་པོའི་གོ་འཕངས་ལ་རེག་ཚེ། །མཐུན་མོངས་དངོས་གྲུབ་མི་འདོད་འཆར་བཞིན་འབབ། །དེ་ཕྱིར་གདམས་པའི་གནད་འདི་ལྷག་པར་གཅེས། །འདི་བྲིས་དགེ་བ་དཔག་ཡས་གོང་འཕེལ་
བའི། །མཐུ་ཡིས་འགྲོ་ཀུན་རྡོ་རྗེ་འཛིན་ཐོབ་ཤོག །རིག་འཛིན་ཆེན་པོ་གར་གྱི་དབང་ཕྱུག་གིས། ། ཡེར་པ་རྡོ་རྗེའི་བྲག ་ནས་གདན་དྲངས་པའི། ཕྱག་ན་རྡོ་རྗེ་སྟོབས་པོ་ཆེའི་བསྙེན་བསྒྲུབ་ཞལ་གདམས་སྙན་རྒྱུད་མ་འདི་ནི་མཚུངས་མེད་སོག་ཟློག་པ་བློ་གྲོས་རྒྱལ་མཚན་གྱིས་མཛད་པ་ལས། སླར་སྟུང་བསྡུས་གོ་བདེར་བྱས་པ་ཞིག་དགོས་ཞེས། འཚོ་མཛད་འགྲོ་ཕན་སོགས་འགའ་ཞིག་གི་བསྐུལ་བའི་ངོར་སྨིན་གྲོལ་སྐྱེད་རྫོགས་གླིང་དུ་བཀོད་པ་དགེའོ། །མངྒ་ལཾ། གཅིག་ཞུད། །