སྲིད་ཞིའི་མ་ལུས་པའི་ཁྱབ་བདག་དཔལ་ལྡན་བླ་མ་དམ་པ་མཚུངས་མེད་སྣ་ཚོགས་རང་གྲོལ་གྱི་རྣམ་པར་ཐར་པའི་སྒོ་ནས་གསོལ་བ་གདབ་པ་ཡོན་ཏན་མི་ཟད་རྒྱན་གྱི་ཟློས་གར།
སྲིད་ཞིའི་མ་ལུས་པའི་ཁྱབ་བདག་དཔལ་ལྡན་བླ་མ་དམ་པ་མཚུངས་མེད་སྣ་ཚོགས་རང་གྲོལ་གྱི་རྣམ་པར་ཐར་པའི་སྒོ་ནས་གསོལ་བ་གདབ་པ་ཡོན་ཏན་མི་ཟད་རྒྱན་གྱི་ཟློས་གར་ཞེས་བྱ་བ་བཞུགས་ལགས།
བསྔགས་འོས་ཡོན་ཏན་རྒྱ་མཚོའི་གཏེར་གྱུར་པ། །རྒྱལ་བ་ཀུན་གྱི་ཐུགས་རྗེའི་སྒྱུ་འཕྲུལ་གྱི། །ཟློས་གར་བསྒྱུར་ལ་ཟླ་མེད་རྗེ་བླ་མ། །གང་གི་ཞབས་རྡུལ་གཙུག་གི་ནོར་བུས་མཆོད། །སྐྱེ་དགུ་ཀུན་གྱི་མ་འདྲིས་མཛའ་བའི་བཤེས། །བླ་མེད་བླ་མ་ཁྱོད་ཀྱི་རྣམ་ཐར་ལ། །བདག་བློ་མི་ཕྱེད་དད་པས་སྐྱབས་མཆི་ན། །ཁྱོད་ཀྱི་མཛད་པ་བཟང་པོས་བདག་སྐྱོངས་ཤིག །མགོན་ཁྱོད་རྒྱལ་ཀུན་སྤྱི་གཟུགས་ལྷུན་གྲུབ་ཀྱང་། །སོ་སྐྱེའི་སྣང་ངོར་སྐྱེ་སྤྲུལ་མཛད་པའི་གར། །སྟོན་ལ་ཐབས་མཁས་
ཐུགས་རྗེ་ཆེ་བརྙེས་པས། །མདོར་བསྡུས་གདུང་བའི་དབྱངས་ཀྱི་བསྟོད་པར་བགྱི། །ཐུབ་དབང་སྤྱན་སྔར་འཕགས་པ་ཀུན་དགའ་བོ། །གངས་རིའི་ཁྲོད་འདིར་འཇམ་དབྱངས་ཐོན་མི་སོགས། །སྐྱེས་ཆེན་མང་པོའི་ཕྲེང་བ་ཡོངས་བཟུང་ནས། །བསྟན་པ་རྒྱས་པར་མཛད་ལ་གསོལ་བ་འདེབས། །ཁྱད་པར་སློབ་དཔོན་ཆེན་པོས་བཻ་རོ་ཡི། སྤྲུལ་པ་ལུང་བསྟན་རྟ་མགྲིན་གསུང་དབྱངས་ཐོས། །ཨ་ཏིའི་དོན་རྟོགས་སྔ་འགྱུར་བསྟན་པའི་བདག །མཚུངས་མེད་བསྟན་འཛིན་རྡོ་རྗེར་གསོལ་བ་འདེབས། །འགྲོ་ཀུན་འཁོར་བའི་མཚོ་
ལས་བསྒྲལ་བའི་ཕྱིར། །རྒྱལ་སྲས་ཆེན་པོའི་བསྟན་པ་ཇི་ལྟ་བར། །བསམ་བཞིན་སྐྱེ་བ་བཞེས་པའི་བཀའ་དྲིན་ཅན། །བརྟན་གཡོའི་ཁྱབ་བདག་ཁྱོད་ལ༴ གསང་བ་གསུམ་གྱི་སྣང་བརྙན་ངོ་བོ་ཉིད། །གདོད་མའི་སེམས་དང་དབྱེར་མེད་རོ་གཅིག་པའི། །ཆོས་སྐུའི་མངའ་བདག་བླ་མ་རིན་པོ་ཆེ། །སྣ་ཚོགས་རང་གྲོལ་ཞབས་ལ༴ དྲི་བྲལ་ཤེལ་ལ་ཚོན་རིས་བཀྲ་བ་བཞིན། །དག་པའི་གཤིས་ལ་འགགས་ཅིར་ཡང་འཆར། །ལོངས་སྐུའི་མངའ་བདག་བླ་མ་རིན་པོ་ཆེ། །པདྨ་ལེགས་གྲུབ་སྩལ་ལ༴ ཡིད་བཞིན་ནོར་བུས་འདོད་དགུ་སྩོལ་བ་ལྟར། །མཆོག་གིས་སྤྲུལ་པས་འགྲོ་བའི་རེ་འདོད་བསྐོངས། །སྤྲུལ་སྐུའི་མངའ་བདག་བླ་མ་རིན་པོ་ཆེ། །རིག་འཛིན་རྣམ་པ་གསུམ་ལ༴ ཉི་མའི་འོད་དང་དཀྱིལ་འཁོར་དབྱེར་མེད་ལྟར། བདེ་གསལ་མི་རྟོག་ལྷུན་གྲུབ་གཉུག་མའི་ངང་། །སྐུ་གསུམ་མངའ་བདག་བླ་མ་རིན་པོ་ཆེ། །ཀུན་འདུས་རྒྱལ་པོ་
ཁྱོད་ལ་གསོལ༴ དགོངས་འདུས་རྩ་བའི་རྒྱུད་དྲུག་སྦས་པའི་གནས། །མཐོ་རིས་དགའ་ཚལ་ལྟ་བུ་ཡུལ་ལྗོངས་སུ། །ས་སྤྲེལ་སྟོན་འབྲིང་ཚེས་བཅུའི་ཉི་ཤར་དུས། རྡོ་རྗེའི་སྐུ། གླ་དཀར་དུང་གི་སྒོ་མོ་དང་ཉེ་བར་ བལྟམས་མཛད་ལ༴ མངའ་གྱི་ཉེས། དུས་མེ་ལྷ་གཤོངས་ཞེས་གྲགས་པར་ པས་མ་གོས་ལྟ་སྟངས་སོགས། །དམ་པའི་ངང་ཚུལ་ལས་གཞན་ཉེས་སྤྱོད་ཀུན། །རིང་སྤངས་སྙིང་རྗེ་ཆེན་པོའི་གོ་ཆ་ཡིས། གཞན་ཕན་རླབས་ཆེན་མཛད་ལ་གསོལ༴ ཡིན་མིན་བརྟག་པའི་གྱ་གྱུ་མི་དགོས་ཀྱང་། ཡིན་ལ་ཡིན་པར་ཤེས་པའི་གདེངས་འགོད་ཕྱིར། །དད་ལྡན་འགའ་ཡིས་རྣམ་གཡེ་ཞུས་པའི་ཚེ། །སྒྲིབ་མེད་ཐེ་ཚོམ་བཅད་ལ༴ ཁྱིམ་གྱི་ཉེས་པས་ཐུགས་ཕྱུངས་སྔོན་གྱི་གནས། །རྗེས་དྲན་གདན་པར་འཕེབས་ལ་ཤིན་ཏུ་དུངས། །འདུས་པ་རྒྱ་
མཚོས་བསུས་ཏེ་རྡོ་རྗེའི་ཁྲིར། །མཚན་དཔེའི་སྣང་བརྙན་བཀོད་ལ༴ སྲིད་ལས་གྲོལ་ཡང་སྲིད་ལ་ངེས་འབྱུང་གི། །བརྡུལ་ཞུགས་ཆེན་པོས་བསྟན་ལ་རབ་ཏུ་བྱུང་། །ལྷར་བཅས་སྐྱེ་དགུའི་མཆོད་སྡོང་གཅིག་པུ་པ། ཕན་བདེའི་རྩ་ལག་ཁྱོད་ལ་གསོལ༴ ཐམས་ཅད་མཁྱེན་ནས་བསྐལ་མང་འདས་གྱུར་ཀྱང་། །ཚུར་མཐོང་གདུལ་བྱའི་ཡིད་རབ་དྲངས་བའི་ཕྱིར། །དང་པོའི་ཤེས་བྱ་ཀུན་ལ་ཐོགས་མེད་ཀྱི། །མི་འཇིགས་སྤོབས་པ་སྦྱིན་ལ༴ རྣམ་གཡེང་སྲེད་པའི་འདམ་དུ་མ་བྱིང་བར། །རྟག་པར་དགེ་བའི་བཤེས་གཉེན་བསྟེན་བཟོད་པའི། །བརྩོན་འགྲུས་ཆེན་པོས་མཁས་གྲུབ་དུ་མ་ལ། །གསན་པ་ངོམས་མེད་མཛད་ལ༴ རྣམ་དཔྱོད་དྲིས་དབེན་ལྟར་སྣང་ཐོས་པའི་ཚོགས། །ལྷུར་ལེན་ཚིག་གི་ལྦུ་བས་མ་བྲིད་པར། །ཐོས་དོན་རྒྱུད་ལ་སྨིན་པའི་ཤེས་རབ་ཀྱིས། །བློ་གྲོས་དོན་ལྡན་མཛད་ལ་གསོལ༴ བསྟེན་འོས་ཡོངས་
འཛིན་འགའ་དང་རྡོ་རྗེ་འཆང་། །རྗེ་བཙུན་བསོད་ནམས་དབང་པོའི་ཞབས་པད་འཕྲེང་། །མཉེས་པ་གསུམ་གྱིས་བསྙེན་ནས་སྨིན་གྲོལ་གྱི། །བདུད་རྩིའི་རྒྱ་མཚོར་རོལ་ལ་གསོལ༴ ཆོས་ཀུན་སྒྱུ་མར་འཆར་བའི་རོལ་རྩེད་ཀྱི། །དག་པའི་གཤིས་ལ་ཨོ་རྒྱན་སྤྲུལ་པའི་ཞིང་། །བཀོད་པ་དུ་མར་གཟིགས་པའི་རྫུ་འཕྲུལ་ཐོབ། །ས་བཅུའི་དབང་ཕྱུག་ཁྱད་ལ༴ རིགས་བདག་ལས་འཕྲོ་གླིང་པས་རྗེས་བཟུང་སྟེ། ཆོས་ཚུལ་སྤྱི་དང་ཁྱད་པར་ཟབ་གཏེར་གྱི། །བདག་པོར་དབང་བསྐུར་ལུང་བསྟན་མངའ་གསོལ་མཛད། །དཀྱིལ་འཁོར་གཅིག་ཏུ་འདྲེས་ལ་གསོལ༴ །རྡོ་རྗེ་ལྟ་བུའི་ཏིང་འཛིན་གཡོ་མེད་ཀྱང་། །ཟབ་ལམ་ཐབས་ཀྱི་ཡན་ལག་སྤྲོས་པའི་ཚོགས། །གཡེལ་མེད་རྒྱུན་མི་ཆད་པའི་ཕྲིན་ལས་ལ། །དབང་བསྒྱུར་རིག་འཛིན་མཆོག་ལ༴ ཕུན་ཚོགས་ལྔ་ལྡན་མངོན་གྱུར་ལ་གཟིགས་ཏེ། །དགྱེས་མཛད་ ལྷོ་བྲག་སྲས་མཁར་ རྡོ་རྗེའི་ཕོ་བྲང་ཆེན་
པོ་རུ། །བསྟན་རྩ་པོ་ཐར་བྱང་སེམས་ལ་སོགས་པ། །ཉེས་མེད་ཕུན་ཚོགས་ནོས་ལ་གསོལ༴ ཚུལ་ཁྲིམས་རྣམ་དག་བསླབ་གསུམ་ལྡན་པ་ཁྱོད། །དཔལ་གཙུག་ལག་རྒྱ་མཚོའི་དྲུང་དུ། །བཅས་རང་ཉེས་ལྟུང་ས་བོན་དུངས་འབྱིན་པའི། །སྒོ་གསུམ་བག་ཡོད་སྤྱོད་པ་རྣམ་པར་མཛེས། །དྲི་མེད་སྡོམ་བརྩོན་གྱུར་ལ༴ །རང་ཉིད་ཞི་བདེ་འདོད་པའི་ཐུགས་སྤངས་ནས། །ཐེག་ཆེན་ལམ་གྱི་རྩ་བ་བྱང་སེམས་ཀྱིས། །རྟག་ཏུ་གཞན་དོན་འབའ་ཤིག་སྒྲུབ་མཛད་པའི། །སེམས་དཔའ་ཆེན་པོ་ཁྱོད་ལ༴ ཆོས་དབང་མངའ་བདག་སངས་རྒྱས་གླིང་སོགས་ཀྱིས། གདུང་རིགས་རྙིང་བསྟན་འཛིན་ལས་ཆོས་ཀྱི་བཅུད། །བླངས་ཏེ་རྟགས་དང་ཡོན་ཏན་མངོན་སུམ་དུ། །གྲུབ་པའི་དབང་པོ་ཁྱོད་ལ༴ ནོར་བཟང་རྟག་ཏུ་ངུ་ཡི་རྣམ་ཐར་བཞིན། །བཤེས་གཉེན་དམ་པ་བསྟན་ལ་སྐྱེ་མེད་པར། །སྔ་འགྱུར་བསྟན་པ་འཛིན་པའི་མིག་གཅིག་པུ། གཞན་ཕན་ གུ་རུ་ མྱང་ གཅོང་རོང་གོང་ར་ལོ་ཆེན།
རྡོ་རྗེར་གཏུད་ལ་གསོལ་བ་འདེབས། །གང་གི་བློ་གྲོས་རབ་ཡངས་པདྨོའི་ཚལ། །ཐ་སྙད་རིག་པའི་གཞུང་ལུགས་ཉིན་བྱེད་ཀྱིས། །ཕྱེ་བས་ལེགས་པར་བཤད་པའི་ཟིལ་དངར་དང་། །རྣམ་དཔྱོད་དྲི་བསྲུང་སྤྲོ་ལ༴ ས་གནས་སེམས་དཔའ་བསྟན་འགྲོའི་དོན་མཛད་གར། སྒྲ་སྙན་ངག་སོགས་ མཛད་གར། །སྨིན་གྲོལ་བཅུད་ཀྱི་མེ་ཏོག་ཅི་ཡང་འཐོར། །དག་སྣང་ཡིད་ཆེས་ཕན་ཚུན་འགྲན་པ་བཞིན། །ཕྲིན་ལས་ཀུན་ཏུ་སྤེལ་ལ༴ གསུང་སྤྲུལ་རིན་པོ་ཆེ་དང་ཀ་ཐོག་ཆོས་རྗེ་ལ་སོགས། །གྲུབ་ཆེན་མང་པོའི་དཀྱིལ་འཁོར་ཞལ་ཕྱེས་ནས། །དབང་བཞིའི་རིམ་པས་སྐལ་ལྡན་བདེ་ཆེན་གྱི། །གོ་འཕང་ལ་བཀོད་མཐོང་ཐོས་དྲན་རེག་ལའང་། །སྨིན་གྲོལ་སྐྱེད་རྫོགས་གླིང་དང་དུར་ཁྲོད་མགོ་དགུ་བདེ་ཆེན་དགོན་སོགས་སུ། །ཐར་པའི་ས་བོན་བསྐྲུན་ལ་གསོལ་བ་འདེབས། །དེ་ཉིད་བཅུ་སོགས་རྡོ་རྗེ་སློབ་དཔོན་གྱི། །ལས་རིམ་རབ་འབྱམས་ཀུན་ལ་ཐོག་མེད་ཀྱི། །མཐུ་སྟོབས་གསང་བའི་
བདག་པོ་ལྟར་གྱུར་ཀྱང་། །མི་བསྙེངས་དུལ་བ་ཁྱོད་ལ་གསོལ༴ །རིགས་གསུམ་གདུལ་བྱའི་བསམ་པ་སྣ་ཚོགས་ལ། །ཆོས་དང་ཟང་ཟིང་མི་འཇིགས་བྱམས་པའི་མཐུས། །རང་རང་བསམ་པ་ཐམས་ཅད་སྐོངས་མཛད་པའི། །ཡིད་བཞིན་ཁྱོད་ལ༴ འཕགས་ཡུལ་གངས་ཅན་ལྗོངས་འདིར་ཡོངས་གྲགས་ཀྱི། །མཁས་གྲུབ་དུ་མའི་རྣམ་པར་ཐར་པ་ཡང་། །ཁྱོད་ཀྱི་སྔོན་བྱུང་གཏམ་ལས་གཞན་ཅི་ཞིག །ཡོངས་གྲགས་དོན་མཐུན་ཁྱེད་ལ༴ ཐོབ་ཀའི་དལ་བ་སླར་ཡང་དོན་ཡོད་ཕྱིར། །དཔལ་གྱི་རི་ལ་འཕགས་པ་ཀླུ་སྒྲུབ་འམ། །ནཻ་རཉྫ་ནའི་འགྲམ་དུ་ཐུབ་དབང་ལྟར། །དཔལ་རིའི་གངས་འདབས་བཞུགས་ལ་གསོལ༴ སེམས་དཔའ་ཆེན་པོའི་སྙིང་སྟོབས་ཇི་བཞིན་དུ། །རང་ཉིད་གཅེས་པར་འཛིན་པ་ཁྱད་དུ་བསད། བསྟན་ལ། །མི་ལོ་ཉེར་བཞི་དབེན་མཚམས་ལ་དགེ་གཅིག་ཏུ། །སྟོན་པ་གཉིས་པའི་རྣམ་
ཐར་བཞིན། །སྟོན་མཛད་དྲང་སྲོང་ཁྱོད་ལ༴ བདག་འཛིན་ཕྱོགས་ལྷུང་གདོན་གྱིས་མ་སླད་པར། །དག་སྣང་ཕྱོགས་མེད་འབྱོངས་པའི་དགེ་མཚན་གྱིས། །བསྟན་པ་ཡོངས་ཀྱི་གཙུག་ཏུ་མངོན་འཕགས་པ། །གཞན་བློའི་དྲེགས་སྙིལ་ཁྱོད་ལ༴ རྙེད་བཀུར་དོར་ཀྱང་སྲིད་ཞིའི་དཔལ་ལ་རོལ། །གྲགས་པ་སྤངས་ཀྱང་སྙན་པས་སྲིད་གསུམ་ཁྱབ། །སྙིང་རྗེའི་ཞགས་པས་ཁམས་གསུམ་སེམས་ཅན་འཆང་། །སྐྱེ་དགུའི་མཆོད་སྡོང་ཁྱོད་ལ༴ མཐའ་ཡས་ཡོན་ཏན་མི་ཟད་གཏེར་ཆེན་པོ། །ཁོང་དུ་ཆུད་ཀྱང་སྦས་པའི་ཚུལ་མཛད་ཅིང་། །རྣམ་གྲོལ་ཆོས་དབྱིངས་ངང་ལས་མི་གཡེལ་བའི། །ཟླ་བྲལ་དགེ་བའི་བཤེས་ལ་གསོལ༴ རྒྱ་ཡན་སྣང་བའི་བློ་ལ་བདེ་ཆེན་གཤིས། །ཚོགས་གཉིས་ཟུང་འཇུག་ཆེན་པོའི་རྩེར་སོན་པས། མདོ་སྔགས་བསྟན་པའི་རྒྱལ་མཚན་འཛིན་པའི་དཔལ། །ཆོས་ཀྱི་གཏེར་མཛོད་འཆང་
ལ་གསོལ་བ་འདེབས། །ཡན་ལག་དྲུག་དང་རྡོ་རྗེ་རྣམ་གསུམ་སོགས། །རིམ་པ་དང་པོའི་རྣམ་གཞག་ཇི་སྙེད་པ། །ཐ་མལ་སྣང་ཞེན་མ་ལུས་ཀུན་བཅད་པའི། །སྐྱེད་རིམ་མཐའ་ཕྱིན་མཛད་ལ༴ རྩ་ཚོགས་བདུན་ཅུ་རྩ་གཉིས་དགྲ་བཅོམ་ཞིང་། །ལས་རླུང་མ་ལུས་དབུ་མའི་དབྱིངས་སུ་བསྡུས། །མི་ཤིག་བདེ་ཆེན་ཐིག་ལེ་མངོན་དུ་མཛད། །རྫོགས་རིམ་མངོན་དུ་གྱུར་ལ་གསོལ༴ གསང་ཆེན་ལམ་གྱི་བགྲོད་པ་མཐའ་ཕྱིན་ནས། །ཟག་མེད་བདེ་ཆེན་ལྷན་ཅིག་སྐྱེས་པའི་དོན། །གཡོ་མེད་མཆོག་ཏུ་མི་འགྱུར་བསྟན་པའི་བདག །འཁོར་ལོའི་དབང་ཕྱུག་ཁྱོད་ལ་གསོལ༴ ཐ་སྙད་སྤྲོས་པའི་ཚོགས་ལ་མ་ལྟོས་པར། །ཐེ་ཚོམ་སྒྲོ་འདོགས་ཐམས་ཅད་ནང་ནས་ཆོད། །སྣང་སྲིད་དཔེ་དང་སློབ་དཔོན་དུ་འཆར་བའི། གཅིག་ཤེས་ཀུན་གྲོལ་ཁྱོད་ལ༴ །ཆུ་འཛིན་ནམ་མཁའི་དབྱིངས་སུ་དག་པ་བཞིན། །ཉོན་མོངས་རྣམ་རྟོག་ར་རི་ཇི་སྙེད་པ། མི་རྟོག་ཆོས་ཉིད་ཀློང་དུ་
ཉེར་ཞི་ནས། །འོད་གསལ་མངོན་དུ་གྱུར་ལ་གསོལ༴ སྐྱེ་མེད་ངང་ལས་ཆོས་རྣམས་ཐམས་ཅད་སྐྱེ། །གང་དག་སྐྱེས་ཙམ་ཉིད་ནས་སྐྱེ་མེད་པས། །རང་བཞིན་ནམ་ཡང་གཡོ་བ་མི་མངའ་བའི། །རང་ཤར་རང་གྲོལ་ཁྱོད་ལ༴ ཁྱོད་ཐུགས་མཁྱེན་བརྩེ་ནུས་པའི་ཡེ་ཤེས་ནི། །སྨྲ་བསམ་བརྗོད་པའི་ཡུལ་བྲལ་རྟོག་དཀའ་བའི། །བསམ་གྱིས་མི་ཁྱབ་ཟབ་མོ་རྡོ་རྗེའི་གནད། །ཇི་བཞིན་མངོན་དུ་མཛད་ལ༴ བརྟན་དང་གཡོ་བའི་དངོས་པོ་ཇི་སྙེད་པ། །ཆོས་དབྱིངས་རྒྱ་མཚོའི་རོལ་པ་ལས་ཤར་བའི། །ཟུང་འཇུག་བློ་འདས་ཁྱབ་གདལ་ཆེན་པོའི་དོན། །བྱར་མེད་མངོན་དུ་མཛད་ལ་གསོལ༴ དཔག་ཡས་ཆོས་ཀྱི་ཕུང་པོའི་དགའ་སྟོན་ནི། །མན་ངག་ཕྱག་རྫོགས་སྙིང་པོར་ལེགས་བསྡུས་ནས། །སྐལ་ལྡན་འགྲོ་ལ་བདེ་བླག་གཅིག་ཅར་དུ། །སྩོལ་མཛད་
བླ་མ་ཁྱོད་ལ་གསོལ༴ མཉམ་བཞག་ཆུ་བོ་རྒྱུན་གྱི་རྣལ་འབྱོར་ལ། །རྒྱུན་ཆད་མེད་པར་གོམས་པའི་བརྟུལ་ཞུགས་ཀྱི། །ཚོགས་དྲུག་ཆོས་ཉིད་ངང་དུ་རོ་གཅིག་པའི། །ཆོས་སྐུའི་རྒྱལ་ས་ཟིན་ལ༴ དངོས་དང་དངོས་པོ་མེད་པ་ལས་གྲོལ་ཞིང་། །ཀུན་རྫོབ་དོན་ལ་མཚན་མ་དང་བྲལ་བའི། །རྟེན་ཅིང་འབྲེལ་བར་འབྱུང་བའི་ལམ་མཐའ་དག །ཁོང་དུ་ཆུད་པར་མཛད་ལ་གསོལ༴ །ཟབ་མོའི་ལམ་བཟང་དཔག་པར་དཀའ་བ་ཡི། །གནད་རྣམས་མ་ལུས་ཇི་བཞིན་ལེགས་གཟིགས་ནས། །ཚིག་དང་དོན་ལ་འཁྲུལ་པ་མི་མངའ་བའི། །བདེན་པར་གསུང་བ་ཁྱོད་ལ་གསོལ༴ སྐད་ཅིག་མངོན་པར་ཤེས་པ་རྒྱུ་འབྲས་དང་། །དམིགས་མེད་ཐུགས་རྗེ་སྐྱེས་པ་སྙིང་རྗེ་དང་། །སྣོད་བཅུད་ལྷར་གསལ་ཞིང་ཁམས་འབྱོངས་པ་ཡི། །རྟོགས་པ་གསུམ་ལྡན་ཁྱོད་ལ༴ ཚེ་འདིར་ལྟོས་མེད་སྒྲུབ་པའི་ཚན་ཁ་བསྐྱེད། །ཆོས་བརྒྱད་འདོད་དོན་
བདུད་ཀྱིས་མ་བྲིད་པར། །སྟོང་ཉིད་སྙིང་རྗེའི་སྐུ་ལ་རྒྱུ་འབྲས་ཀྱི། །དཔྱད་པ་གསལ་མཛད་ཁྱོད་ལ༴ དགེ་སྡིག་ཕྲ་མོའི་འདོར་ལེན་མངོན་བྱེད་པའི། །རྟགས་དང་རྟེན་འདྲེལ་ཀུན་ཤེས་གཞན་སྣང་སོགས། །དབང་འདུས་སྒྱུ་མའི་ངོ་བོ་གཅིག་ཏུ་རྫོགས། །ཐམས་ཅད་མཁྱེན་གཟིགས་མཁྱེན་པ་གསོལ༴ བྱར་མེད་ངང་ནས་བརྩོན་འགྲུས་ཆེན་པོ་རྩམས། །འདུས་མ་བྱས་ཀྱང་འདུས་བྱས་ཆེན་པོ་མཛད། །རང་རྒྱུད་ལས་རུང་ཞེན་ལོག་དྲག་པོ་ཡིས། འཁོར་བའི་གཡུལ་ལས་རྒྱལ་ལ་གསོལ༴ སྒྲུབ་པ་ལ་ རྟེན་བཞེངས་སོགས་ སྣང་སྲིད་སེམས་སུ་ཤེས་པའི་ལྟ་བ་ཡིས། དཀོར་ཟས་སྤངས་ཏེ། དམ་བཅའ་མང་པོ། །གཞན་དོན་ལེགས་ཚོགས་སྒྲིག་པའི་རྟེན་འབྲེལ་དང་། །རང་སྣང་སྒྱུ་མར་བརྟན་པ་ཐོབ་པ་ཡི། །གྲུབ་པའི་ཁྱུ་མཆོག་ཁྱོད་ལ༴ སྐྱེ་བའི་ཕྲེང་བར་རྫོགས་སྨིན་སྦྱངས་མཐར་སོན། །འདིར་ཡང་དམ་པ་
རྣམས་ཀྱིས་བྱིན་རླབས་པས། །གཞོན་ནུའི་སྣང་ཚུལ་སྟོན་པའི་དུས་ཉིད་ནས། །ངོ་མཚར་གཏེར་མངའ་ཁྱོད་ལ༴ ཡི་གེའི་འདུ་བྱེད་དཀའ་གནས་མ་ལུས་ཀུན། །རྔ་ཡབ་གླིང་ནས་གུ་རུས་མཚན་ལམ་དུ། །སྤྲུལ་པའི་གཟུགས་བསྟན་གནད་ཀྱི་ཕྱག་ཁྲིད་མཛད། སྐུ་གཞོན་ནུའི་དུས་ ཇི་བཞིན་མངོན་གྱུར་ཁྱོད་ལ༴ ཡེ་ཤེས་ཌཱ་ཀི་གྲིབ་ལྟར་འགྲོགས་པའི་མཐུས། །བགྲོད་དཀའི་ནགས་ཁྲོད་བྲག་ཡང་གཤེགས་པའི་ཚེ། །གཟུགས་མེད་ལག་པས་ཞབས་ནས་མངོན་སུམ་བཏེགས། །འཇིགས་བྲལ་དཔའ་བོ་ཁྱོད་ལ༴ ཆིབས་རྟ་འགྱེལ་ཚེ་སྟེང་ནས་བྱ་ལྟར་འཕུར། །གསོལ་དཀར་འཕངས་པ་ཆག་གྲུམ་གཏན་མེད་དང་། །གྲུ་ཁའི་རྦ་ཆེན་ཕྱག་ནས་འཐོར་བས་ཞི། །རྫུ་འཕྲུལ་སྟོབས་མངའ་ཁྱོད་ལ༴ སྐྱེ་བདུན་གྲུབ་ཚེ་འཕགས་མཆོག་ཞལ་གཟིགས་ཤིང་། བཅུ་གཅིག་ཞལ་གྱི་ །དབུ་ཡི་གཙུག་ཏུ་ནས་དཀར་ཚར་དུ་བབས། །ཁྱད་པར་འཕགས་པའི་
སྤོས་རེང་རང་བྱུང་འབར། །དངོས་གྲུབ་མཆོག་བརྙེད་ཁྱོད་ལ༴ དགུ་ཞག་སྒང་ལ་བདུད་རྩི་སྨན་གྲུབ་མཛད། །ས་ཆུ་ཀུན་དྲོས་འཇའ་འོད་གུར་ཁང་ཕུབས། །སྨན་གྱི་དྲི་བཟང་ཚ་ལམ་འགྲུལ་པས་ཚོར། །བྱིན་རླབས་ལྷུན་གྲུབ་ཁྱོད་ལ༴ ཐེན་པས་ཉེན་ཚེ་བདེན་ཚིག་གྲུ་ཆར་ཕབས། །སྲུང་མདུད་ཐོགས་ལ་མཚོན་གྱི་མ་ཚུགས་དང་། །གསང་ཆབ་བཏུང་པས་གཟའ་ནད་ལྐུག་ལས་གྲོལ། །ཐུགས་རྗེའི་འདོད་འཇོ་ཁྱོད་ལ༴ །ལོངས་ཡུལ་གཉགས་འཕྲང་རྦ་འདྲེ་དམ་ལ་བཏགས། །མཁར་སྤེལ་རྫོང་དུ་རྒྱལ་འགོང་གདུགས་པ་བཏུལ། །སྤུ་བོའི་ཡུལ་དུ་བཙན་གསར་ཆོས་ལ་བཀོད། །ནུས་ལྡན་རྡོ་རྗེ་ཁྱོད་ལ༴ གཡོར་པོའི་གཞུང་དུ་པ་ལ་མ་རེག་བྱོན། །གཙང་རོང་མཐིལ་དུ་བར་ཆད་སྲི་ཆེན་བཟློག །ཏིང་འཛིན་
གཏད་པས་སྨྱོན་པ་གདོན་ལས་གྲོལ། །ཡ་མཚན་རྨད་བྱུང་ཁྱོད་ལ༴ སྐུ་ལ་ལོག་པར་ལྟ་བྱེད་ཡུལ་གྲོང་ལ། །བྱམས་བརྩེས་གཟིགས་ཀྱང་ལོ་གསུམ་མ་འགྱངས་པར། །མི་གྲངས་ལྔ་བཅུ་སྲུངས་མས་སྲོག་དབུགས་བསྡུས། །སྒྲིབ་སྦྱོངས་གནས་ལ་མཛད་ལ་གསོལ༴ བྲག་ལོང་མཚམས་སུ་སྐུ་ཆས་སྟོར་བ་ནི། །སྦེད་པོའི་སྣོད་ལ་མེ་སྟག་འཕྲོ་ཞིང་འབར། །མཐའ་མར་མི་ནོར་ཁྱིམ་བཅས་རྡུལ་དུ་བརླག །མཐུ་རྩལ་རང་བྱུང་ཁྱོད་ལ༴ མཆིམས་ཡུལ་ཡོན་བདག་དངུལ་སྐུ་འདྲེ་རྩ་ལ། བཀའ་བསྒོའི་ཆབ་ཤོག་རྩལ་བ་སློབ་ཉེའི་ཚེ། བེམ་པོའི་གཟུགས་སྐུས་དངོས་སུ་འབྲོས་ཚུལ་བསྟ། ཅོ་ཁར་དུ་ ཕྱིན་ཆད་གདོན་བྲལ་མཛད་ལ་གསོལ༴ དམ་ཉམས་ཤིག་ལ་གཏོར་མ་འཕངས་བའི་ཚེ། །གཏེར་བདག་སྤུན་བདུན་གཏོར་མས་
མངོན་སུམ་རྒྱུག །བཀའ་ལས་འགལ་བྱེད་མྱུར་དུ་ཕ་རོལ་སོང་། །བཀའ་སྲུང་བྲན་བཀོལ་ཁྱོད་ལ་གསོལ༴ དྲི་ལྷའི་གངས་ཉིལ་གཙང་ཆབ་ཞག་དྲུག་འགགས། །ཀོང་ཡུལ་ཆུ་ཡིས་འཇིག་ཉེར་བདེན་སྟོབས་དང་། །ཕྱག་ནས་སློབ་པས་སྐད་ཅིག་ཙམ་ལ་ཞི། །འབྱུང་བ་དབང་བསྒྱུར་ཁྱོད་ལ་གསོལ༴ སྨིན་གྲོལ་སྐྱེད་རྫོགས་གླིང་དང་རྩ་གོང་གནས། །རྒྱ་ལའི་ལྷ་ཁང་ལ་སོགས་རབ་གནས་ཀྱི། །དུས་ཚེས་བསྒྲིག་མཐུན་མེ་ཏོག་དངོས་སུ་བབས། །ཡེ་ཤེས་བརྟན་ཐོབ་ཁྱོད་ལ༴ དེ་སོགས་མཆོག་ཐུན་གྲུབ་པའི་མཚན་མ་ནི། །ཡང་དག་མངའ་ཡང་ལོག་རྟོག་དགག་པའི་ཕྱིར། །ཡོན་ཏན་སྦེད་པའི་བརྟུལ་ཞུགས་འབའ་ཞིག་མཛད། ས་བདག་ཁ་གནོན་གྱི་ །སྦས་པའི་རྣལ་འབྱོར་ཁྱོད་ལ་གསོལ༴ ལྟར་སྣང་ཟང་ཟིང་ལ་སོགས་
འདིར་སྣང་གིས། །གཟིར་བའི་འགྲོ་དོན་བསྟན་པའི་ཆོམ་རྐུན་གྱི། །རྒྱུ་སྐར་ཁྲོད་དུ་མ་འདྲེས་ཡང་དག་པའི། །འགྲོ་དོན་འོད་དཀར་འཛིན་ལ་གསོལ༴ སོ་སྐྱེའི་སྣང་ངོར་ལོག་པར་ལྟ་བའི་ཆ། །སྐད་ཅིག་ཙམ་ཡང་འཆར་བར་མི་ནུས་ཤིང་། །སྔོན་བྱོན་མཁས་གྲུབ་རྣམས་ཀྱི་རྣམ་པར་ཐར། །རྩོད་དུས་དཔེར་སྟོན་མཛད་ལ་གསོལ་བ་འདེབས།། ༈ །།མདོར་ན་ཁྱོད་ཀྱི་ཡོན་ཏན་བྱེ་བའི་གཏེར། །ངག་དང་བསམ་པའི་སྤྱོད་ཡུལ་ལས་འདས་ཀྱང་། །ཚུར་མཐོང་སྐྱེ་བོའི་དད་པ་རྒྱ་མཚོ་ཡིས། །མངོན་པར་བསྔགས་འདིས་ཁྱོད་བཞིན་འགྱུར་བར་སྨོན། །མཐའ་ཡས་འགྲོ་ཀུན་རིས་མེད་མ་རྒན་རྣམས། །བྱང་ཆུབ་རྗེས་སུ་སློབ་ཅིང་མཐའ་ཕྱིན་སླད། རྣམ་པར་ཐར་པ་ཡོན་ཏན་ཕུང་པོ་འདིར། །མི་ཕྱེད་སྒོ་གསུམ་གུས་པས་ཕྱག་བགྱིའོ། །བདེ་སྟོང་སྙིང་རྗེ་ཆེན་པོའི་མཆོད་པ་འབུལ། །
ལྷན་སྐྱེས་དྲི་མས་ནོང་གང་མཐོལ་ལོ་བཤགས། །བསྔགས་འོས་ཚུལ་བཞིན་བསྔགས་ལ་རྗེས་ཡི་རངས། །སླར་ཡང་རྣམ་ཐར་ཆོས་དབྱངས་སྒྲོག་པར་བསྐུལ། །བསྟོད་ཡུལ་བསྟོད་ཚིག་མི་ནུབ་བསྐལ་བརྒྱའི་བར། །རྟག་ཏུ་མི་འགྱུར་འགྱུར་བ་མེད་པའི་དགེ། །རྒྱལ་བསྟན་སྒྲོན་མེ་གསལ་ཞིང་བླ་མ་ཡི། །གོ་འཕང་མྱུར་དུ་ཐོབ་པའི་ཆེད་དུ་བསྔོ། །དེང་ནས་བརྩམས་ཏེ་བྱང་ཆུབ་སྙིང་་པོའི་བར། །ཁྱེད་ཀྱི་བརྩེ་བའི་ལྕགས་ཀྱུས་རྗེས་འཛིན་ཅིང་། །དམ་ཆོས་བདུད་རྩིའི་མཚོ་ལ་རྣམ་ཀུན་ཏུ། །སྤྱོད་པས་རྡོ་རྗེའི་ས་ལ་འགོད་པར་ཤོག །རྨི་ལམ་སྒྱུ་ཐབས་མཁས་འདྲའི་ཚེ་འདིར་ཡང་། །རི་སུལ་གངས་སོགས་དབེན་པའི་གནས་ཆེན་དུ། །ཁྱོད་ཀྱི་དམ་པའི་སྙིང་པོས་བདག་གིས་རྒྱུད། །ཡོངས་སུ་གྲོལ་བར་བྱིན་གྱིས་བརླབས་ཏུ་གསོལ། །ཚེ་རབས་ཀུན་ཏུ་བླ་མ་ཁྱོད་ཀྱི་ཞབས། །བདག་གཙུག་རིགས་ཀྱི་བདག་པོར་བསྟེན་བྱེད་ཅིང་། །རྒྱལ་བ་དགྱེས་པའི་སྤྱོད་
ཚུལ་འབའ་ཤིག་གིས། །རྣམ་པ་ཀུན་ཏུ་ཡོངས་སུ་འཚོ་བར་ཤོག །ངོ་བོ་ཀ་དག་རང་བཞིན་ལྷུན་གྱིས་གྲུབ། །ཐུགས་རྗེ་ཀུན་ཁྱབ་རིག་པའི་ཡེ་ཤེས་ཏེ། །ཁྲེག་ཆོད་རིག་སྟོང་ཐོད་རྒལ་སྣང་སྟོང་གི། །ལེགས་རྟོགས་སྐུ་དང་ཡེ་ཤེས་འགྲུབ་པར་ཤོག །བསམ་གྱིས་མི་ཁྱབ་འོད་གསལ་ཕྱག་རྒྱ་ཆེའི། །གནས་ལུགས་ཐ་མལ་ཤེས་པ་མངོན་གྱུར་ཏེ། །ཁྱབ་བདག་དཔལ་ལྡན་བླ་མའི་དཀྱིལ་འཁོར་དུ། །འགྲོ་ཀུན་མཉམ་ཉིད་ཆེན་པོར་སྒྲོལ་བར་ཤོག །དེ་ལྟར། སྐྱེ་དགུ་མཐའ་དག་གི་སྐྱབས་དང་དཔུང་གཉེན་དུ་གྱུར་པ་ནི་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་ཁོ་ན་ཡིན་ལ། དེ་ཉིད་འགྲོ་བ་ཐ་དད་ཀྱི་སྣང་ངོར་གང་ལ་གང་འདུལ་གྱི་སྤྲུལ་པའི་རྣམ་རོལ་བསམ་གྱིས་མི་ཁྱབ་པར་སྟོན་ཀྱང་། །རྒྱལ་ཚབ་ཏུ་བསྔགས་ཤིང་དབང་བསྐུར་བ་ནི། རིག་འཛིན་པདྨ་ཀ་ར་དང་། མཉམ་མེད་ཟླ་འོད་གཞོན་ནུ་གཉིས་ལས་གཞན་དུ་མ་མཆིས་ཤིང་། དེ་དག་གི་བསྟན་པ་རིན་པོ་ཆེ་ཇི་ལྟ་བར་འཛིན་པའི་སྐྱེས་བུ་དམ་པ། སྐྱོན་མ་ལུས་པ་སྤངས་
ཤིང་། །ཡོན་ཏན་བྱེ་བའི་གཏེར་གྱི་གཏམས་པ། མཁས་ཤིང་གྲུབ་པའི་དབང་པོ་རྗེ་བཙུན་སྣ་ཚོགས་རང་གྲོལ་ལམ། མཁས་མཆོག་པདྨ་ལེགས་གྲུབ་སྩལ་བཞེས་གྲགས་པའི་རྣམ་པར་ཐར་པ་ངོ་མཚར་གྱི་རིན་ཆེན་འབྱུང་གནས་ལས། བདག་ཅག་ཚུར་མཐོང་གི་དད་པས་ཀུ་ཤའི་རྩེ་མོའི་ཆ་ཤས་ཙམ་བསྟོད་པའི་བསྐལ་བཟང་དུ་བགྱིས་པ་འདི།། ༈ །།རྗེ་དེ་ཉིད་ལ་མི་ཕྱེད་པའི་དད་པ་རབ་ཏུ་བརྟན་པ། །སྙི་སྒོམ་ཆེན་པོའི་རིགས་དབོན། རྒྱལ་སྲས་རིག་འཛིན་ཆོས་ཉིད་ཀློང་གྲོལ་གྱི་བཀས་བསྐུལ་བ་ལྟར། སྒམ་པོ་ཤཱཀྱའི་བཙུན་པ་བཟང་པོའི་མིང་ཅན་ནམ། དགའ་བའི་རྡོ་རྗེར་བོད་པ་དེས་གུས་པའི་ཡིད་རྩེ་གཅིག་ཏུ་བགྱིས་ནས་བཀོད་པ་ཡིན་ལ། དེ་ཡང་། གསོལ་བ་འདེབས་སོ་ནི་དད་མོས་ཀྱི་གཞི་ཚུགས་ཤིང་། ལས་འབྲས་གོ་བ་དང་། དམ་ཚིག་སོགས་ལ་གནས་པ་ཞིག་གིས་མཚན་ལྡན་གྱི་བླ་མར་སྐྱབས་སུ་འཛིན་ཅིང་གསོལ་བ་གདབ་པར་འོས་ལ། གསོལ་བ་འདེབས་ཡུལ་གྱི་བླ་མ་དེ་ཡང་རྒྱལ་བའི་བསྟན་པ་དང་ལྟ་སྤྱོད་ཀུན་མཐུན་པ་ཞིག་སྟེ། ཇི་ལྟ་བུ་ཡིན་ན། རྗེ་བཙུན་བླ་མ་དེ་ཉིད་ལྟ་བུ་སྟེ། རྒྱལ་
བསྟན་རྣམ་དག་གི་ལྟ་སྒོམ་སྤྱོད་གསུམ་ཁོ་ནས་ཐོས་བསམ་སྒོམ་གསུམ་འཆད་རྩོད་བརྩོམས་གསུམ་སོགས། མདོར་ན་བསྟན་པའི་ཡང་སྙིང་སྒྲུབ་པས་ཉམས་སུ་ལེན་ཅིང་། བསྟན་འགྲོའི་དོན་ཡང་སྒྲུབ་པའི་སྒོ་ནས་མཛད་པ་འདི་གཞན་ལས་ཆེད་ཁྱད་པར་དུ་འཕགས་ལ། འགྲོ་དོན་གྱི་ཡང་རྩེར་གྱུར་པ་ཡིན་ཀྱང་། །འདི་དག་གི་མཚན་ཉིད་ག་དོན་རྟོགས་ཤིང་ངེས་པ་བརྙེད་པའི་གང་ཟག་གི་ནི། །དེང་དུས་ཉིན་མོའི་སྐར་མ་ལྟར་གྱུར་མོད་ཀྱི། དེའི་དབང་གིས། ཆོས་བཞིན་གྱི་སྐྱེས་བུ་དམ་པ་ལས། བླུན་པོ་ཆོས་བརྒྱད་ཀྱི་འཁོར་ལོ་བསྐོར་ཞིང་ལས་འབྲས་ཁྱད་དུ་བསད་ནས་རང་འདོད་འབའ་ཞིག་སྒྲུབ་པའི་གང་ཟག་དག་ལ་དགའ་ཞིང་དད་ལ་སྐྱབས་གནས་སུ་འཛིན་པ་དང་། །དེ་དག་གི་ས་སྟེགས་གང་བ་འདི་འདྲར་གྱུར་ཚེ། ཆོས་བཞིན་གྱི་གཏམ་དང་ཚད་ལྡན་གྱི་རྣམ་ཐར་དྲང་པོར་བརྗོད་པ་ལ་དགོས་པས་དབེན་ཞིག །མ་དག་པའི་སྐྱེ་བོ་དག་གིས་སླར་ཡང་ལས་སོགས་པའི་རྒྱུར་གདའ་བ་ལ་ཐེ་ཚོམ་མ་མཆིས་ཀྱང་། གཟུར་གནས་སྐལ་བ་དང་ལྡན་པ་དག་མཆིས་ཚེ། རང་རྒྱུད་ལ་ཆོས་ཀྱི་ས་བོན་འཇོག་པ་དང་ལྷན་ཅིག་རྒྱུ་མཚན་འདི་ཡང་སྙན་དུ་གསོལ་བ། སྔོན་གྱི་མཁས་
གྲུབ་མང་པོའི་གསུང་ལས། རང་དོན་ཆོས་སྐུའི་ལག་ལེན་གང་ལ་ཡང་བདག་པོ་མེད་པ་ལག་ལེན་བྱེད་གཞན་དོན་གཟུགས་སྐུའི་ལག་ལེན་སྙིང་རྗེས་སྤྲུལ་པ་བསམ་གྱིས་མི་ཁྱབ་པས་འགྲོ་དོན་བྱེད། རང་དོན་དུ་འཇིག་རྟེན་གྱི་བྱ་བ་བློས་བཏང་། སྒྲུབ་པའི་མཚན་ཁ་སྐྱེས་ནས། སངས་རྒྱས་རྩ་ན་འགྲོ་དོན་བྱེད་པ་ཡིན། རང་འདོད་ཀྱི་འགྲོ་དོན་བྱས་ན་འཁོར་བར་འཁྱམས། གདམས་ངག་ཚིག་ཏུ་བཤད་པ་དང་། །སྟོང་ཉིད་ཕྱོགས་རེ་བ་སྟོན་པའི་བླ་མས་ཅེས་མི་རུང་། །སྒྲུབ་པ་ལས་འགྲོ་དོན་ཆེ་བ་མེད། དངོས་ཀྱི་འབྲེལ་པ་ནི་གནས་ལུགས་ཕྱག་རྒྱ་ཆེན་པོའི་ངང་ནས་བདག་གཞན་འདྲེས་ཚར། འགྲོ་དོན་བྱ་བའི་ཡུལ་ངང་ཡུལ་ཅན་ཟད། འོན་ཀྱང་ནམ་མཁའ་དང་མཉམ་པའི་སེམས་ཅན་ལ་སྙིང་རྗེ་ཆེན་པོ་སྐྱེ་ན། སྙིང་རྗེ་དེ་ཉིད་སེམས་ཅན་གྱི་སྣང་ངོར་གང་ལ་གང་འདུལ་གྱི་སྤྲུལ་པའི་སྐུ་རེར་སྣང་བས། འགྲོ་དོན་དེ་ལ་ཟེར་བ་ཡིན། དེ་མིན་སྙིགས་མའི་དུས་སུ་འགྲོ་དོན་བྱས་པས། སློབ་དཔོན་གཙོ་རྒན་དུ་འགྲོ། སློབ་མ་འཕྲུག་དཔོན་དུ་འཆོར་བསྟན་པ་སློབ་དཔོན་གྱིས་བཤིག་པ་ལ་ཚེག་མེད། གསུངས་
པ་ལྟར། དེས་ན་དམ་པ་འདི་ནི་རྒྱལ་བའི་བཀའ་དང་བླ་མའི་ལུང་ཇི་བཞིན་དང་མཐུན་པར་ཉམས་བཞེས་ཕྱག་ལེན་དུ་བསྟར་བས། དེང་དུས་ཀྱི་བསྟན་པའི་བདག་པོ་གཅིག་པུ་བར་གྱུར་པ་ལ་ཁོམ་ནི་ཡིད་གཉིས་མ་མཆིས་ཤིང་། མ་མཆིས་པ་དེ་དག་སླར་ཡང་གོང་འཕེལ་དུ་འགྱུར་བའི་མཚན་མར། རྗེ་བཙུན་ནི་འཕགས་པའི་གནས་བརྟན་ཡན་ལག་འབྱུང་གི་རྣམ་པར་སྤྲུལ་པ་ཡིན་ཞེས་ལུང་བསྟན་ཐོས་པས། སྐྱེ་བ་དང་ཚེ་རབས་ཀྱི་བར་དུ་རྡོ་རྗེའི་སློབ་དཔོན་དུ་མི་འགྲལ་ཞིང་འབྲལ་བ་མེད་པར་སྨོན་ལམ་གདབ་པ་ཡིན་ཚེ་བསྟན་པ་རྣམ་དག་དང་མཐུན་པའི་སྒོ་ནས་འདི་ཉིད་ཀྱི་བསྔགས་པ་བརྗོད་རྒྱུ་ནི་སྨྲ་བསམ་གྱི་ར་བ་ལས་འགོངས་ཀྱང་། གང་ཟག་ཆོས་ཀྱི་སྤྱན་ལྡན་མཆིས་ན་ནི། བདག་བླུན་པོས། གློག་ལ་མུན་པའི་གསལ་འདེབས་ག་ལ་དགོས་ལྟ་བུར་གྱུར་ལ། བླུན་པོ་དཀོར་ཁྲེབ་ཅན་ལོག་པའི་ལམ་དུ་འཕྱར་ཞིང་འཕྱན་པར་འགྱུར་བ་བདག་ལ་མཉམ་མེད་རྫོགས་པའི་སངས་རྒྱས་དངོས་སུ་བྱོན་ཀྱང་རང་སྣང་མ་དག་པའི་ངོར་ནི། དེ་དག་ལས་ཆང་བུམ་འཐོགས་ཤིང་
བླུད་པའི་སྐྱེ་བོའམ། སྡིག་ཅན་བཤན་པ་ལྟ་བུ་མཐོང་ན་དགའ་ཞིང་འགུ་ལ་རངས་སར་བྱེད་ཚེ། འདི་རིགས་བརྗོད་པའི་དོན་མ་མཆིས་ཤིང་རང་ཉིད་ངལ་བའི་རྒྱུར་ཟད་མོད། སྐལ་ལྡན་རང་དང་སྐལ་མཉམ་ཞིག་མཆིས་ཚེ། འདི་དག་ལ་མོས་གུས་ལྟེམ་ཀྱང་མེད་པར་ཡོན་ཏན་དྲན་བཞིན་དུ་ངེས་ཤེས་ཀྱི་གསོལ་བ་འདེབས་པར་མཛོད་དོ། །གཏན་གྱི་བདེ་ལེགས་ཆེན་པོར་ཚེ་འདི་ཉིད་ལ་འགྲུབ་པར་གདོན་མི་ཟའོ། །ཞེས་ནན་ཏན་དུ་གསོལ་བ་དང་། གསོལ་བའི་དགེ་འབྲས་གང་མཆིས་མཁའ་མཉམ་འགྲོ་བ་མཐའ་དག་དཔལ་ལྡན་བླ་མའི་གོ་འཕང་ཐོབ་པའི་རྒྱུར་བསྔོའོ། །ཤུ་བྷམ།། ༈ །།སྣ་ཚོགས་རང་གྲོལ་གྱི་རྣམ་ཐར་གསོལ་འདེབས་འདི་ཉིད། སྒམ་པོ་ནས་ཞབས་དྲུང་གདུང་རྒྱུད་རིན་པོ་ཆེས་ཞུ་བ་པོ་མཛད་ཅིང་མཆོག་གི་སྤྲུལ་པའི་སྐུ་རིན་པོ་ཆེ་ཉིད་ཀྱིས་གསུང་བརྩོམས་སུ་གནང་བ་ལགས་སོ། །བཀྲ་ཤིས། གཅིག་ཞུས་ཁུལ་ལགས།