མངའ་བདག་མྱང་གི་གཏེར་ཁའི་གུ་རུ་དྲག་པོ་བདེར་གཤེགས་འདུས་པའི་ལས་བྱངསྒྲིགས་ཆགས་ལྟས་ཆོག
མངའ་བདག་མྱང་གི་གཏེར་ཁའི་གུ་རུ་དྲག་པོ་བདེར་གཤེགས་འདུས་པའི་ལས་བྱངསྒྲིགས་ཆགས་ལྟས་ཆོག་བཞུགས་སོ། །
ཕྱོགས་དུས་རྒྱལ་བའི་ཐུགས་རྗེ་གཅིག་བསྡུས་པའི། །ཕྲིན་ལས་གདུག་པ་འདུལ་བར་རབ་མངག་པ། །བདུད་འདུལ་རྒྱལ་པོ་པདྨ་ཐོད་འཕྲེང་ཞབས། །བཏུད་ནས་དེ་ཡི་ཆོ་གའི་ལས་རིམ་བྲི། དེ་ལ་འདིར་འགྲོ་བའི་མགོན་པོ་མངའ་བདག་མྱང་རིན་པོ་ཆེའི་གཏེར་ཁ་ལས་བྱོན་པའི་གུ་རུ་དྲག་པོ་བདེར་གཤེགས་འདུས་པའི་ལས་བྱང་ཕྲིན་ལས་ཀྱི་རིམ་པ་ཇི་ལྟར་བྱ་བ་ལ། ཐོག་མར་དམ་ཚིག་དང་ལྡན་པའི་གང་ཟག་གིས། གནས་ཡིད་དང་མཐུན་པར་བྱི་དོར་ལེགས་པར་བྱས་ལ་ས་རྒྱན་གནམ་རྒྱན་སོགས་བཀོད་པའི་ཁྱད་པར་བག་དྲོ་བར་བྱས་ཏེ། གུ་རུ་ཞི་དྲག་གི་སྐུ་རྟེན་བྱིན་
རླབས་ཅན་གྱི་རིགས་བྲིས་འབུར་ཅི་རིགས་བཤམས་པའི་དྲུང་དུ། དཔལ་གཏོར་ཟུར་གསུམ་རིན་ཆེན་འབར་བའི་དབྱིབས་ཅན་རྡོ་རྗེ་དང་མེ་རིས་མཚན་ཞིང་ཞབས་སུ་པདྨ་འདབ་བཞི་ཅན་རྒྱན་དཀར་དམར་གྱིས་མཛེས་ཤིང་བརྗིད་པར་བྱས་པའི་གཡས་གཡོན་དུ་བདུད་རྩི་སྨན་རག་དང་། བླ་མ་ཡི་དམ་མཁའ་འགྲོ་ཆོས་སྐྱོང་སྤྱིའི་གཏོར་མ་ཅི་རིགས་ཚོགས་ཀྱི་ཡོ་བྱད། ཕྱི་ནང་གསང་བའི་མཆོད་རྫས་མ་ཚང་བ་མེད་པར་བཤམས་ནས། སྤོས་དང་རོལ་མོ་སོགས་འཛོམ་པའི་ངང་ནས་སྒྲུབ་པ་པོ་རྣམས་བདེ་བའི་སྟན་ལ་འཁོད་དེ་རོལ་མོས་བྱིན་ཕབ་ནས། གུ་རུ་རིན་པོ་ཆེ་ལ་སྐྱབས་གནས་དཀོན་མཆོག་མ་ལུས་པས་བསྐོར་ནས་མདུན་གྱི་ནམ་མཁར་སྤྲིན་གཏིབས་པ་ལྟ་བུར་
སྐྱབས་ཡུལ་ཚོགས་གསོག་གི་ཞིང་དུ་བཞུགས་པ་མོས་པ་རྩེ་གཅིག་གིས་སྐྱབས་སུ་འགྲོ་ཞིང་བྱང་ཆུབ་ཏུ་སེམས་བསྐྱེད་པ་ནི། ན་མོ། སྐྱབས་གནས་དཀོན་མཆོག་མ་ལུས་འདུས་པའི་སྐུ། །རིགས་ཀུན་ཁྱབ་བདག་པདྨ་དྲག་པོ་རྩལ། །ཡུལ་འཁོར་བཅས་ལ་བདག་སོགས་སེམས་ཅན་རྣམས། །འདི་བཟུང་བྱང་ཆུབ་བར་དུ་སྐྱབས་སུ་མཆིའོ། །སྲིད་ཞི་མཉམ་ཉིད་ཡེ་སངས་རྒྱས་པའི་དོན། །མ་རྟོགས་ཨ་འཐས་འཁྲུལ་པས་འཁོར་བར་འཁྱམས། །ད་ནི་རང་རིག་རང་ངོ་ཤེས་པ་ཡིས། །དོན་དམ་བྱང་ཆུབ་སེམས་མཆོག་བསྐྱེད་པར་བགྱིའོ། །ཞེས་ཚིག་དོན་མཐུན་པར་ལན་གསུམ་བྱ། དེ་ནས་ཡན་ལག་དགུ་པའི་སྒོ་ནས་ཚོགས་བསགས་པ་ནི། ཧཱུྃ། དུར་ཁྲོད་མེ་རི་འབར་བའི་ཕོ་བྲང་ནས། །འཇིགས་བྱེད་ཆོན་པོ་བཛྲ་ཧེ་རུ་ཀ །དབང་དྲག་པདྨ་བཀའ་ཡི་འཁོར་དང་བཅས། །མཆོད་པའི་གནས་འདིར་སྤྱན་འདྲེན་གཤེགས་སུ་གསོལ། བཛྲ་ས་མཱ་ཛཿ ཧཱུྃ། དུར་ཁྲོད་འཇིགས་སུ་རུང་བའི་ཕོ་བྲང་དུ། །དྲེགས་པ་ཕོ་མོ་
ཉི་ཟླའི་གདན་སྟེངས་སུ། །དབང་དྲག་པདྨ་འཁོར་དང་བཅས་པ་རྣམས། །རྔམས་བརྗིད་དགྱེས་པའི་ཚུལ་གྱིས་བཞུགས་སུ་གསོལ། ས་མ་ཡ་ཏིཥྛ་ལྷན། ཧཱུྃ། སྐྱེ་འཆི་གཉིས་སྤངས་རྡོ་རྗེའི་རང་བཞིན་ལས། །ཕྲིན་ལས་ལྷུན་གྲུབ་སྡེ་བརྒྱད་དམ་ལ་འདོགས། །སྐུ་གསུམ་དབྱེར་མེད་སྐྱེ་འགྲོ་ཡོངས་ཀྱི་མགོན། །དབང་དྲག་པདྨའི་སྐུ་ལ་ཕྱག་འཚལ་ལོ། །ན་མོ་སུ་རུ་ཤ་ཡ་ཧོཿ ཧཱུྃ། ཁམས་གསུམ་སྐུ་གསུམ་དབྱིངས་སུ་བསྒྱུར་བའི་དཔྱིད། །དུག་གསུམ་དབང་གྱུར་དགྲ་གེགས་འབྱུང་པོ་རྣམས། །དྲག་པོས་བསྒྲལ་བའི་ཤ་ཁྲག་རུས་པའི་ཚོགས། །དབང་དྲག་པདྨའི་ལྷ་ལ་མཆོད་པར་འབུལ། །མ་ཧཱ་པུ་ཛཿཧོཿ ཧཱུྃ། བདག་ནི་མ་རིག་འཕྲུལ་པའི་དབང་སོགས་སྟེ། །དུག་གསུམ་ཉེས་པས་འགལ་བར་གྱུར་པ་དང་། ལུས་ངག་ཡིད་ཀྱིས་སྡོག་པ་ཅི་བགྱིས་པ། །དབང་དྲག་པདྨའི་སྐུ་ལ་བཟོད་པར་གསོལ། ཧཱུྃ། ཁམས་གསུམ་སྲིད་པ་གསུམ་ལ་དབང་བསྒྱུར་
བའི། །དྲག་པོ་གཟི་བརྗིད་འབར་བའི་སྐུ་མཆོག་གིས། །འཁོར་བ་གཏིང་ནས་སྐམ་ལ་འདོན་པའི་ཕྱིར། །དུག་གསུམ་ཞལ་དུ་གསོལ་ལ་ཡི་རང་ངོ་། ཧཱུྃ། སྔོན་གྱི་ཐུགས་དམ་ཞལ་བཞེས་ཡིན་པའི་ཕྱིར། །པདྨ་དྲག་པོ་རྡོ་རྗེ་ཐོད་འཕྲེང་རྩལ། འགྲོ་རྣམས་ཇི་སྲིད་རྫོགས་སངས་རྒྱས་ཀྱི་བར། །མྱ་ངན་མི་འདའ་བདག་སོགས་ཐུགས་རྗེས་གཟིགས། ཧཱུྃ། རྣལ་འབྱོར་བདག་ཅག་འཁོར་བའི་སེམས་ཅན་རྣམས། །བྱང་ཆུབ་ལམ་གྱི་བར་ཆད་བསྒྲལ་བ་དང་། །དངོས་གྲུབ་མ་ལུས་མྱུར་དུ་ཐོབ་པའི་ཕྱིར། །ཐེག་ཆེན་ཆོས་ཀྱི་འཁོར་ལོ་བསྐོར་དུ་གསོལ། ཧཱུྃ། བདག་གིས་མོས་གུས་དད་པས་ཁྱེད་སྒྲུབས་ནས། །ཐུགས་རྗེ་མ་ཆུང་སྔོན་གྱི་ཐུགས་དམ་དགོངས། །སྨོན་ལམ་འབྲེལ་པ་བཟང་པོས་མཚམས་སྦྱར་ནས། །བདག་དང་འགྲོ་ཀུན་བྱང་ཆུབ་ཐོབ་ཕྱིར་བསྔོའོ། ཞེས་པ་དེ་ཡན་གྱིས་ཐོག་མར་བདག་ཉིད་རྒྱུད་དག་པར་བྱ་ཕྱིར་སྐྱབས་སེམས་ཚོགས་བསགས་གི་ལས་རིམ་སྔོན་དུ་བཏང་ནས། མདུན་གྱི་ནམ་མཁར་བཞུགས་པའི་ཚོགས་ཡུལ་དེ་རྣམས་སྐར་མདའ་རྒྱུགས་པ་
བཞིན་ཚུར་བྱོན་ནས་རང་ཉིད་ཀྱི་སྤྱི་བོར་ཐིམ་པ་ཙམ་གྱིས་སྐད་ཅིག་ལ་བདག་ཉིད་དབང་དྲག་འབར་བའི་སྐུ་རི་རབ་ཙམ་དུ་གྱུར་པའི་ཐུགས་ཀའི་ཧཱུྃ་དམར་ལས་ཡེ་ཤེས་ཀྱི་མེ་དང་མཚོན་ཆའི་ཚ་ཚ་སྐར་ལྟར་འཁྲུག་པ་འཕྲོས་པས། བར་ཆད་གདོན་བགེགས་འབྱུང་པོའི་རིགས་ཐམས་ཅད་ཚར་བཅད་རྡུལ་དུ་བརླག་ཅིང་མེ་དང་མཚོན་ཆའི་བསྲུང་གུར་ཕུབ་པའི་ཕྱོགས་བཅུར་བདག་གི་ཐུགས་ཀའི་ཧཱུྃ་ལས་ཧཱུྃ་ཡིག་མཐིང་ནག་བཅུ་འཕྲོས་པ་སྤྲུལ་པ་ཁྲོ་བོ་བཅུར་གྱུར་པས་ཕྱོགས་བཅུའི་བར་ཆད་ཐམས་ཅད་བསྲུང་བའི་ཕྲིན་ལས་མཛད་པར་མོས་ལ། ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ། ཧཱུྃ། བདག་ཉིད་དྲག་པོའི་ཐུགས་སྲོག་ལས། །འབྱུང་བ་ལྔ་དང་མཚོན་ཆའི་གུར། །ཕྱོགས་མཚམས་སྟེང་འོག་ཀུན་ནས་ཕུབས། །བསྲུང་འཁོར་གནམ་ས་ཁ་སྦྱོར་ནང་། །མཐིང་ནག་ཧཱུྃ་ལས་གནས་གྱུར་པ། །སྤྲུལ་པ་ཁྲོ་ཆེན་འབར་བ་བཅུ། །མཐིང་ནག་རྔམ་བརྗིད་ཁྲོས་པའི་སྐུ། །གཡས་པ་རྡོ་རྗེ་ཐོ་བ་དང་། །གཡོན་པ་ལྕགས་ཀྱུ་འབར་བ་བསྣམས། །
དུར་ཁྲོད་ཆས་ཀྱི་སྐུ་ལ་བརྒྱན། །བརྐྱང་བསྐུམ་ཞབས་ཀྱིས་དྲེགས་པ་གནོན། ཧཱུྃ་ཧཱུྃ་ཕཊ་ཕཊ་ང་རོ་སྒྲོག །མེ་དཔུང་ཀློངས་ན་འགྱིང་ཞིང་བརྗིད། །རང་འདྲའི་སྤྲུལ་འཁོར་གྲངས་མེད་བཅས། །ཕྱོགས་བཅུའི་གདོན་ཚོགས་འདུལ་བ་དང་། །མཚམས་གཅོད་བསྲུང་འཁོར་མཛད་པར་གྱུར། ཧཱུྃ། ང་ནི་དབང་དྲག་པདྨའི་སྐུ། །ཆེ་བའི་ལྷ་རྣམས་ང་ཡི་འཁོར། །འཇིག་རྟེན་དྲེགས་པ་འདུལ་བའི་ཕྱིར། །ཕྱོགས་བཅུར་ཁྲོ་བོའི་སྤྲུལ་པ་འགྱེད། །སྟེང་ཕྱོགས་འཁོར་ལོའི་རྩིབས་སྟེང་ན། །ལྷ་གདོན་བསྣོལ་བའི་ཁྲི་སྟེངས་སུ། །ཁྲོ་བོའི་རྒྱལ་པོ་ཧཱུྃ་ཀ་ར། །ལྷ་གདོན་འདུལ་ལ་ཕྱག་འཚལ་བསྟོད། །བར་སྣང་གདོན་ཚོགས་མཚམས་ཆོད་ཅིག །ཤར་ཕྱོགས་འཁོར་ལོའི་རྩིབ་སྟེང་ན། །དྲི་ཟ་བསྣོལ་བའི་ཁྲི་སྟེངས་སུ། །ཁྲོ་བོའི་རྒྱལ་པོ་རྣམ་པར་རྒྱལ། །དྲི་ཟ་འདུལ་ལ་ཤར་གྱི་གདོན་ཚོགས། །ལྷོ་ཕྱོགས་འཁོར་ལོའི་རྩིབས༴ གཤིན་རྗེ་བསྣོལ་བའི༴ ཁྲོ་བོའི་རྒྱལ་པོ་གཤིན་རྗེའི་གཤེད། །གྲུལ་བུམ་འདུལ་ལ་ཕྱག་འཚལ་ལྟོད།
ལྷོ་ཡི་གདོན་ཚོགས་མཚམས༴ ནུབ་ཕྱོགས་འཁོར་ལོའི་རྩིབས༴ ཀླུ་རྒྱལ་བསྣོལ༴ ཁྲོ་བོའི་རྒྱལ་པོ་རྟ་མགྲིན་དཔལ༴ ཀླུ་གདོན་འདུལ༴ ནུབ་ཀྱི་གདོན༴ བྱང་ཕྱོགས་འཁོར་ལོའི་རྩིབས༴ གནོད་སྦྱིན་བསྣོལ༴ ཁྲོ་བོའི་རྒྱལ་པོ་བདུད་རྩི་འཁྱིལ། གནོད་སྦྱིན༴ བྱང་གི་གདོན༴ ཤར་ལྷོ་འཁོར་ལོའི༴ མེ་ལྷ་བསྣོལ། ཁྲོ་བོའི་རྒྱལ་པོ་དབྱུག་སྔོན་ཅན། མེ་ལྷ་འདུལ༴ ཤར་ལྷོའི༴ ལྷོ་ནུབ༴ སྲིན་པོ༴ ཁྲོ་བོའི་རྒྱལ་པོ་མི་གཡོ་མགོན། སྲིན་པོ་འདུལ༴ ལྷོ་ནུབ་གདོན༴ ནུབ་བྱང་འཁོར་ལོའི་རྩིབ༴ རླུང་ལྷ་བསྣོལ༴ ཁྲོ་བོའི་རྒྱལ་པོ་གཞན་མི་ཐུབ། རླུང་ལྷ༴ ནུབ་བྱང་༴ བྱང་ཤར་འཁོར་ལོའི༴ འབྱུང་པོ་བསྣོལ༴ ཁྲོ་བོའི་རྒྱལ་པོ་ཁམས་གསུམ་རྒྱལ། དབང་ལྡན་འདུལ༴ བྱང་ཤར་གདོན༴ འོག་ཕྱོགས་འཁོར་ལོའི༴ ས་བདག་བསྣོལ༴ ཁྲོ་བོའི་རྒྱལ་པོ་སྟོབས་པོ་ཆེ། ས་བདག་འདུལ་ལ་འཚལ་ལྟོད། འོག་ཕྱོགས་གདོན་ཚོགས་མཚམས། ཆོད་ཅིག །ཨོཾ་བཛྲ་
མ་ཧཱ་ཀྲོ་དྷ་སརྦ་རཀྵ་ཧཱུྃ། ཞེས་པས་མཚམས་གཅོད་བསྲུང་འཁོར་བསྒོམ་ཞིང་། ཡང་དག་དོན་གྱི་སྲུང་མཚམས་ནི། འཁོར་བ་མྱང་འདས་ཀྱིས་བསྡུས་པའི་ཆོས་ཐམས་ཅད་གདོད་ནས་དག་པ་ཆེན་པོར་ལྷུན་གྱིས་གྲུབ་པའི་རང་བཞིན་ལ་བསྲུང་བྱ། སྲུང་བྱེད་ཀྱི་སྤྲོས་པ་མཐའ་དག་ལས་འདས་པའི་དོན་དྲན་པར་བྱ་བ་ནི་སྲུང་འཁོར་གྱི་དམ་པའོ། །དེ་ནས་གཏོར་མཆོད་བྱིན་གྱིས་བརླབས་པ་ནི། བདག་ཉིད་དྲག་པོའི་ཐུགས་ཀའི་ཧཱུྃ་ལས་ཡི་གེ་རྃ་ཡྃ་ཁྃ་འཕྲོས་པས་འབགས་རྩོགས་བསང་ཞིང་སྦྱངས། ཨོཾ་ཨཱཿཧཱུྃ་གིས་བྱིན་གྱིས་བརླབས་པའི་དོན་དྲན་པའི་ངང་ནས། བདག་གི་ཐུགས་ཀའི་ཧཱུྃ་ལས་རྃ་ཡྃ་ཁྃ། འཕྲོས་པས་ཡེ་ཤེས་མེ་ཡིས་ཉེས་སྐྱོན་བསྲེག །ཡེ་ཤེས་རླུང་གི་མཚན་འཛིན་བག་ཆགས་གཏོར་ཡེ་ཤེས་ཆུ་ཡི་ཀུན་རྟོག་དྲི་མ་བཀྲུས། ཨོཾ་ཨཱཿའཕྲོས་མཆོད་པའི་རྫས་ལ་ཐིམ། དག་པ་ཆེན་པོར་བྱིན་རླབས་སྤེལ་སྦྱང་བསྒྱུར། །ཕྱི་ནང་གསང་བ་དེ་བཞིན་ཉིད་ཀྱི་འཕྲུལ། །ཀུན་བཟང་མཆོད་སྤྲིན་ཆོས་དབྱིངས་ཁྱབ་པར་གྱུར། ཨོཾ་བཛྲ་ཨརྒྷཾ།
པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝེ་དྱཱ། ཤབྟ་པཱུ་ཛ་ཨཱཿཧཱུྃ། རཱུ་པ་ཤབྟ། གྷནྡྷ། རཱ་ས། སྤརྴེ་ཨཱཿཧཱུྃ། བོ་དྷི་ཙིཏྟ་མ་ཧཱ་སུ་ཁ་པཱུ་ཛ་ཨཱཿཧཱུྃ། ཨོཾ་ཨཱཿཧཱུྃ་སརྦ་པཉྕ་ཨ་མྲྀ་ཏ་ཧཱུྃ་ཧྲཱི་ཐཱ། ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཕཊཿ ཨོཾ་ཨཱཿཧཱུྃ་མ་ཧཱ་བ་ལིངྟ་ཏེ་ཛོ་བ་ལིནྟ་བ་ལ་བྷ་ཏེ་གུ་ཧྱ་ས་མ་ཡེ་སྭཱ་ཧཱ། དེ་ལྟར་འདི་ཡན་ཆད་སྔོན་འགྲོའི་ལས་རིམ་ཡིན་ནོ།། ༈ །།གཉིས་པ་དངོས་གཞིའི་ཐོག་མར་ཏིང་འཛིན་རྣམ་པ་གསུམ་ཚིག་དོན་མཐུན་པར་སྒོམ་སྟེ། ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཏྨ་ཀོ྅ཧཾཿ སྣང་ཞིང་སྲིད་པས་བསྡུས་པའི་ཆོས་ཐམས་ཅད། །ཡེ་སྟོང་རྩ་བྲལ་གདོད་ནས་ཡང་དག་པ། ཀུན་བཟང་ཡངས་པ་ཆེན་པོར་ལྷུན་གྲུབ་པའི། །དེ་བཞིན་ཉིད་ཀྱི་ཏིང་འཛིན་བློ་འདས་དང་། །དེ་ལྟར་མ་རྟོགས་འཁྲུལ་པའི་འགྲོ་བ་རྣམས། །རང་ངོ་མ་རིག་གཉིས་འཛིན་འཁོར་བར་འཁྱམས།
འགག་མེད་རྩལ་མདངས་སྙིང་རྗེར་ཤར་བ་ཡི། །ཀུན་ཏུ་སྣང་བའི་ཏིང་འཛིན་རིས་མེད་ཁྱབ། །རྒྱུ་འབྲས་གཉིས་སུ་འཛིན་མི་དམིགས་ཀྱང་། །རྟེན་ཅིང་འབྲེལ་པར་འབྱུང་བ་མི་འགོག་ཕྱིར། །ལུས་མེད་རིག་པའི་ངོ་བོ་ཡི་གེ་ཧཱུྃ། །དམར་གསལ་ནམ་མཁའི་མཐོངས་སུ་སྐར་ཆེན་བཞིན། དེ་ལྟར་ཏིང་འཛིན་གསུམ་གྱི་སྙིང་པོ་རྒྱུའི་ཡི་གེ་ལས་བྱུང་རིམ་གཞལ་ཡས་གདན་དང་བཅས་པ་བསྒོམ་པ་ནི། ཧཱུྃ་ལས་ཨེ་ཡྃ་རྃ། སུྃ་ཀེ༚་རྃ་བྷྲུྃ། ཡིག་འབྲུ་འཕྲོས་པ་གནས་འགྱུར་འབྱུང་རིམ་རྩེགས། ཨེ་ལས་ཆོས་དབྱིངས་ནམ་མཁའ་མཐའ་དབུས་བྲལ། ཡྃ་ལས་རླུང་གི་རྡོ་རྗེ་རྒྱ་གྲམ་སྟེང་། །ར་ལས་རཀྟའི་རྒྱ་མཚོ་རྦ་ཀློང་འཁྲུག །སུྃ་ལས་ཞིང་ཆེན་ས་གཞི་ཁྱབ་གདལ་དབུས། །ཀེ༚་ལས་རུས་པའི་རིབ་ཟུར་གསུམ་སྟེང་། །རྃ་ལས་བསྐལ་པའི་མེ་ཆེན་སྨུག་ནག་འབར། །བྷྲུྃ་ལས་དུར་ཁྲོད་ཆེན་པོའི་གཞལ་ཡས་ཁང་། །ཐོད་པའི་རྩིགས་པ་ཞིང་
ཆེན་ཀ་གདུང་བྱས། །ཞིང་ཆུང་དྲལ་དྲབ་མི་ལྤགས་གཡང་གཞིའི་ཐོག །རྒྱུ་མའི་ལྡ་ལྡི་ཙིཏྟའི་ཕོ་ལོང་འཕྱང་། །མི་རོའི་རྒྱན་མཚན་སྐྲ་ཡི་བ་དན་འཕྱར། །གསུར་དུད་སྤྲིན་འཁྲིག་ཁྲག་ཆེན་ཞལ་ཆུར་འབབ། །རབ་ཏུ་འཇིགས་པའི་ཕོ་བྲང་ཆེན་པོའི་དབུས། །འཁོར་ལོ་རྩིབས་བཞི་ལྟེ་བ་ཆོས་འབྱུང་མཐིང་། །པདྨ་འདབ་སྟོང་ཟླ་བ་ཉི་མ་དང་། །དྲེགས་པ་རྒྱལ་བསེན་འབུམ་ཕྲག་བསྒྱེལ་བའི་སྟེང་། །བདག་གི་རིག་པའི་ངོ་བོ་ཧཱུྃ་དེ་བབས། །ཧཱུྃ་ལས་འོད་ཟེར་ཕྱོགས་བཅུའི་ཞིང་དུ་འཕྲོས། །རྒྱལ་བ་ཀུན་མཆོད་བྱིན་རླབས་ཧཱུྃ་ལ་འདུས། །འོད་འཕྲོས་ཁམས་གསུམ་སྐྱེ་འགྲོའི་ལས་ཉོན་སྦྱང་། །རྒྱལ་འགོང་དམ་སྲི་འབྱུང་པོ་རྡུལ་དུ་བརླག །ཐེའུ་རང་འབྱུང་པོའི་རྣམ་ཤེས་གཞོབ་ཏུ་བསྲེག །འོད་ཟེར་ཚུར་འདུས་ཧཱུྃ་ལ་ཐིམ་པ་ཡིས། །བདག་ཉིད་དབང་
དབང་དྲག་པདྨ་ཐོད་ཕྲེང་སྐུ། །རི་རབ་ལྟ་བུའི་སྐུ་ཆེ་ཡན་ལག་རག །སྐུ་མདོག་མགར་གྱི་ལྕགས་བསྲེག་འབར་བ་འདྲ། །ཞལ་གཅིག་ཕྱག་གཉིས་ཞབས་ནི་དོར་སྟབས་བཞེངས། །སྤྱན་གསུམ་གདངས་མིག་ཉི་ཟླའི་འོད་བཞིན་འབར། །ཞལ་བགྲད་ལྗགས་འདྲིལ་མཆེ་བ་གངས་རི་འདྲ། །དབུ་སྐྲ་ཁམ་ནག་ནམ་མཁའི་དབྱིངས་སུ་འཕྱོ། །ཐོད་སྐམ་རིན་ཆེན་རྩེ་བྲན་དར་དཔྱང་བཅིངས། །སྙན་རྒྱན་མགུར་ཆུ་ཕྱག་ཞབས་སྐུ་ལུས་ཀུན། །རིན་ཆེན་རུས་རྒྱན་སྦྲུལ་ཆུན་སྤེལ་བས་བརྒྱན། །ཀོ་རློན་གཡང་གཞི་སྟག་ཤམ་མགོ་འཕྲེང་དང་། །ཐལ་ཞག་ཁྲག་གིས་བྱུགས་ཤིང་ཁྲོ་ཆས་རྫོགས། །གཡས་པའི་ཕྱག་གིས་གསེར་རྡོར་རྩེ་དགུ་འཕྱར། །དེ་ལས་གནམ་ལྕགས་ཐོག་གི་ཚ་ཚ་འཕྲོ། །ཕྱག་གཡོན་སྡིག་མཛུབ་ལྕགས་སྡིག་མགོ་དགུ་འགྱོད། །དེ་ལས་སྤྲུལ་པའི་ལྕགས་སྡིག་གྲངས་མེད་འཕྲོ། །རྔམས་འཇིགས་ཁྲོ་གཏུམ་
པདྨ་དྲག་པོ་ཡི། །དབུ་གཙུག་ཁྱུང་ནག་མེ་ཡི་གཤོག་རླབས་ལྡིང་། །རྭ་བར་ནོར་བུ་འབར་བའི་འོད་འཁྱིལ་དུ། །རིགས་བདག་སྣང་མཐའ་ཚེ་དཔག་མེད་པ་བཞུགས། །བདག་གི་དུང་ཁང་སྐུ་ཡི་ལྷ་མཆོག་ནི། །འཇམ་དཔལ་སེར་ནག་རལ་གྲི་སྡིགས་མཛུབ་ཅན། །མགྲིན་པར་གསུང་གི་དབང་ཕྱུག་རྟ་མགྲིན་དམར། །དབྱིག་ཐོ་སྡིག་མཛུབ་སྤྱི་བོར་རྟ་མགོས་མཚན། །ཐུགས་ཀར་ གསང་བདག་མཐིང་ནག་ཕྱག་གཡས་ཀྱིས། །ལྕགས་རྡོར 
་གདེངས་ཤིང་གཡོན་པ་སྡིགས་མཛུབ་བསྒྲེང་། །ལྟེ་བར་མཁའ་འགྲོ་དམར་མོ་གྲི་ཐོད་བསྣམས། ཁ་ཊྭཱྃ་རུས་རྒྱན་རིགས་བཞི་མཁའ་འགྲོས་བསྐོར། །གསང་གནས་ཡཀྴ་མེ་དབལ་སྐུ་མདོག་ནག །གཡས་གཡོན་རྡོ་རྗེའི་ཐོ་བ་མེ་ཞགས་འཛིན། །ཀུན་ཀྱང་ཁྲོ་ཆས་ཡོངས་རྫོགས་དོར་སྟབས་འགྱིང་། །གཞན་ཡང་མཐའ་སྐོར་ཕྱི་རིམ་ཐམས་ཅད་དུ། །རྒྱུད་སྡེ་བཞི་དྲུག་
དཀྱིལ་འཁོར་ལྷ་ཚོགས་དང་། །ཡི་དམ་མཁའ་འགྲོ་ཆོས་སྐྱོང་རྒྱ་མཚོའི་ཚོགས། །ཉི་མ་དང་ནི་འོད་ཟེར་ཇི་བཞིན་བཞུགས། །སྟེང་གི་ནམ་མཁར་པདྨ་འབྱུང་གནས་དང་། །རྩ་རྒྱུད་བླ་མ་སྤྲིན་བཞིན་གཏིབས་ནས་བཞུགས། །དེ་ལྟར་རང་རིག་རོལ་རྩལ་ལྷ་ཚོགས་ཀུན། །སྣང་ལ་རང་བཞིན་མེད་པར་ཆུ་ཟླའི་གར། །ཡེ་ཤེས་སྒྱུ་མའི་རོལ་པ་ཆེན་པོ་ཡིཿ གནས་གསུམ་འབྲུ་གསུམ་དག་ལས་འོད་འཕྲོས་པས། །ཡེ་ཤེས་སེམས་དཔའི་ཐུགས་དམ་རྒྱུད་བསྐུལ་གྱུར། དེ་ལྟ་བུའི་ལྷ་རྣམས་ཡེ་ནས་རང་སེམས་དང་ཐ་དད་མེད་ཀྱང་གནས་སྐབས་གཉིས་འཛིན་གྱི་བག་ཆགས་སྦྱོང་ཕྱིར་དབྱིངས་ནས་སྤྱན་དྲངས་པ་ནི། ཚིལ་ཆེན་གུ་གུལ་སྦྱར་བའི་སྤོས་དུད་རྐང་གླིང་ཐོད་རྔ་ལ་སོགས་རོལ་མོའི་སྒྲ་དང་། །མོས་གུས་གདུང་ཤུགས་དྲག་པོ་བ་སྤུ་གཡོ་ཞིང་མཆི་མ་འཁྲུགས་ནུས་པ་བསྐྱེད་དེ་སྙན་པའི་དབྱངས་ཀྱིས། ཧཱུྃ། དུར་ཁྲོད་མེ་རི་སྨུག་ནག་འབར་བའི་ཀློང་དཀྱིལ་ནས། །སྟོང་གསུམ་དྲེགས་པ་འདུལ་མཛད་པདྨ་ཐོད་འཕྲེང་སྐུ། །བཞེངས་ཅིག་བཞེངས་ཅིག་ཆོས་ཀྱི་དབྱིངས་
ནས་བཞེངས། །འགྲོ་བ་རྣམས་ཀྱི་དོན་ལ་སྐུ་བཞེངས་འཚལ། །འདོད་ཆགས་ཁྲག་གི་རྒྱ་མཚོའི་ཀློང་ནས་བཞེངས། །ཞེ་སྡང་ཀེང་རུས་གྲམ་ལྟར་ཁྲོལ་བའི་དབུས་ནས་བཞེངས། །གཏི་མུག་ཤ་ཆེན་རི་ལྟར་སྤུངས་པའི་དཀྱིལ་ནས་བཞེངས། །ང་རྒྱལ་མེ་ལྟར་འབར་བའི་ཀློང་ནས་བཞེངས། །ཕྲག་དོག་རླུང་ལྟར་འཚུབ་པའི་ཀློང་ནས་བཞེངས། །བསྐལ་པ་མེ་རླུང་འཚུབ་མའི་དཀྱིལ་ནས་བཞེངས། །དྲག་པོའི་ལས་ལ་གནས་པའི་སྤྱན་འདྲེན་ན། །དགྲ་གེགས་འབྱུང་པོ་འདུལ་ཕྱིར་གཤེགས་སུ་གསོལ། རཀྴ་སྲིན་པོ་འདུལ༴ ཕྱིར༴ འཆི་བདག་གཤིན་རྗེ་འདུལ༴ འཇིག་རྟེན་དྲེགས་པ་འདུལ༴ ལྷ་སྲིན་སྡེ་བརྒྱད་འདུལ༴ ས་བདག་ཀླུ་གཉན་འདུལ༴ རྒྱལ་འགོང་བསེན་མོ་འདུལ༴ བདུད་དང་མུ་སྟེགས་འདུལ་ཕྱིར་གཤེགས་སུ་གསོལ། ཁེས་སྤྱན་དྲངས་པས། ལྷོ་ནུབ་རྔ་ཡབ་གླིང་ནས་གུ་རུ་པདྨ་ཐོད་ཕྲེང་དཔའ་བོ་མཁའ་འགྲོའི་ཚོགས་དཔག་ཏུ་མེད་པ་དང་བཅས་
རེ་བྱ་རྒོད་ཁྱུ་ལྡིང་བཞིན་བྱོན་པར་དམིགས་ལ། ཧཱུྃ། །དུར་ཁྲོད་མེ་རི་སྨུག་ནག་འབར་བའི་ཕོ་བྲང་ན། །འཇིགས་བྱེད་ཆེ་མཆོག་པདྨ་འབྱུང་གནས་སྐུ། །དགྲ་གེགས་སྲིན་པོ་བསྣོལ་བའི་ཁྲི་སྟེངས་སུ། །ཉི་ཟླ་པདྨ་བརྩེགས་པའི་གདན་སྟེང་འདིར། །བདག་དང་གཉིས་སུ་མེད་པར་བཞུགས་སུ་གསོལ། །ཞེས་པ་དམ་ཡེ་གཉིས་མེད་དུ་འདྲེས་པར་བསམ། ཧཱུྃ། རང་བྱུང་ལྷུན་གྲུབ་པདྨ་འབྱུང་གནས་སྐུ། །དུས་གསུམ་སངས་རྒྱས་སྐུ་གསུང་ཐུགས་ལས་སྤྲུལ། །མཐུ་འཚལ་རྨད་བྱུང་པདྨ་ཧེ་རུ་ཀ །ལྷ་སྲིན་དྲེགས་པ་འདུལ་བའི་མཐུ་མངའ་བ། །དབང་དྲག་པདྨའི་སྐུ་ལ་ཕྱག་འཚལ་ལོ། །ཞེས་པས་རང་ལས་སྤྲུལ་པའི་ལྷ་མོ་གྲངས་མེད་པས་ཕྱག་འཚལ་ཞིང་། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་འབུལ་བ་དམིགས་ལ། ཧཱུྃ། སྣང་སྲིད་སྣོད་བཅུད་དངོས་པོར་གྱུར་ཚད་ཀུན། །ཀུན་ཏུ་བཟང་པོའི་མཆོད་སྤྲིན་བླ་ན་མེད། །མེ་ཏོག་བདུག་སྤོས་མར་མེ་ཞལ་ཟས་དྲི། །རོལ་མོ་གཟུགས་སྒྲ་དྲི་རོ་རེག་བྱ་ཆོས། །ཡབ་ཡུམ་ཐབས་ཤེས་ལྷན་སྐྱེས་བདེ་བའི་མཆོག །རྩ་
བརྒྱད་སྟོང་སྦྱར་བདུད་རྩི་ཨ་མྲྀ་ཏ། །འཁོར་བ་རྒྱུ་རྐྱེན་རྩད་གཅོད་རཀྟ་དང་། །དམ་རྫས་རྒྱན་གྱི་གཏོར་མ་བརྗིད་ལྡན་བཅས། །དངོས་འབྱོར་ཡིད་སྤྲུལ་མཆོད་པའི་བྱེ་བྲག་ཀུན། །དབང་དྲག་ལྷ་ཚོགས་འཁོར་དང་བཅས་ལ་འབུལ། །མཆོད་ཡུལ་མཆོད་བྱ་མཆོད་བྱེད་རོ་མཉམ་པར། །འཁོར་འདས་མཉམ་ཉིད་ཆེན་པོར་བཞེས་སུ་གསོལ། །མ་ཧཱ་སརྦ་པཱུ་ཛ་པྲ་ཏཱིཙྪ་ཧཱུྃ། ཧཱུྃ། རྣལ་འབྱོར་བདག་ཅག་འཁོར་དང་བཅས་པ་རྣམས། །བྱང་ཆུབ་སྒྲུབ་ལ་བར་ཆད་བྱེད་པའི་རིགས། །གཟུགས་ཅན་དགྲ་དང་གཟུགས་མེད་བགེགས་ལ་སོགས། །དྲག་པོས་བསྒྲལ་བའི་ཤ་ཁྲག་རུས་པའི་ཚོགས། །དབང་དྲག་པདྨའི་ལྷ་ལ་མཆོད་པར་འབུལ། མ་ཧཱ་མཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། དབང་པོ་ལྔ་ལ་ཁ་རམ་ཁཱ་ཧི། དེ་ནས་གུ་རུ་པདྨ་དྲག་པོའི་ལྷ་ཚོགས་རྣམས་ལ་ཆེ་བའི་ཡོན་ཏན་
ལ་བསམ་ཞིང་དང་བའི་ཡིད་ཀྱིས་བསྟོད་པ་བྱ་སྟེ། ཧཱུྃ། ཁམས་གསུམ་གནས་ན་སྟོབས་ལྡན་རྫུ་འཕྲུལ་ཅན། །ནུབ་ཕྱོགས་བདེ་བ་ཅན་གྱི་ཞིང་ཁམས་ན། །སྣང་བ་མཐའ་ཡས་སྐུ་གསུང་ཐུགས་ལས་སྤྲུལ། །ངོ་མཚར་རྨད་བྱུང་པདྨ་ཧེ་རུ་ཀ །མཐུ་ཆེན་པདྨ་དབང་ཕྱུག་གཟི་མདངས་ཅན། །དུར་ཁྲོད་ཆས་བརྒྱད་སྐུ་ཡི་རྒྱན་དུ་ཁྲོལ། །སྐུ་མདོག་དམར་པོ་མེ་ཡི་མདོག་འདྲ་བ། །སྤྱན་གསུམ་ཁྲོ་གཉེར་སྡང་མིག་ཕྱོགས་བཅུར་གཟིགས། །ཞལ་བགྲད་མཆེ་གཙིགས་དྲག་པོའི་རྐན་སྒྲ་སྡེབས། །ཨག་ཚོམ་དམར་སེར་བསྐལ་པའི་མེ་ལྟར་འབར། །དབུ་སྐྲ་གྱེན་བརྫེས་ཐོད་སྐམ་ལྔ་ཡིས་བརྒྱན། །འཇིགས་བྱེད་ཁྲོ་རྒྱལ་རྡོ་རྗེ་ཐོད་ཕྲེང་རྩལ། །དྲག་པོ་པདྨའི་སྐུ་ལ་ཕྱག་འཚལ་བསྟོད། །ཕྱག་གཡས་གསེར་གྱི་རྡོ་རྗེ་རྩེ་དགུ་ལ། །ཧཱུྃ་རྃ་ཕཊ་གསུམ་རྒྱུ་ཡི་རྡོ་རྗེའི་མཚན། །དབང་སྡུད་བསྲེག་དང་གཏོར་བའི་ཕྲིན་ལས་ལྡན། །ཡེ་ཤེས་ལྔ་ཡི་མེ་དཔུང་འུར་འུར་འབར། །རི་རབ་ལྷུན་པོ་ཀུན་ཀྱང་
ཐང་ལ་བསྙིལ། །གནམ་ཐོལ་དཀར་པོ་རྣམས་ཀྱི་ཀླད་པ་འཇོམས། །པེ་ཧར་སྲོག་བདག་རྒྱལ་པོ་རྡུལ་དུ་རློག །ཕྱག་གཡོན་ལྕགས་ཀྱི་སྡིག་པ་འགྱེད་ཚུལ་བསྣམས། །རྐན་སྒྲ་རྡེབ་ཅིང་ཤུག་ཀླུ་ཀྱུ་རུ་རུ། །རྔམས་བརྗིད་སྟོབས་ལྡན་ཁ་དགུ་མིག་དགུ་བགྲད། །ཚ་ཚ་འཕྲོ་ཞིང་མི་སྡུག་གཟུགས་ཅན་མ། །ཡེ་ཤེས་ལྔ་ཡི་མེ་སྤྲུངས་འཚུབས་ཅིང་འབར། །དགྲ་གེགས་ཞལ་དུ་བརྫངས་ནས་ལྟེ་བའི་དཀྱིལ་དུ་གཟིར། །ཆོས་ཉིད་ཐུགས་སུ་ཆུད་པས་རང་ལུགས་གཟི་བརྗིད་འབར། །བྱང་ཆུབ་ལམ་ལ་བར་ཆད་བྱེད་རྣམས་རྡུལ་དུ་རློག །ཕྲིན་ལས་ལྷུན་གྲུབ་པདྨ་ཐོད་ཕྲེང་རྩལ། །དབང་དྲག་པདྨའི་སྐུ་ལ་ཕྱག་འཚལ་བསྟོད། ཧཱུྃ། །གཏི་མུག་འཇོམས་ཕྱིར་གླང་ཆེན་སྟོད་གཡོགས་མཛད། །འདོད་ཆགས་འཇོམས་ཕྱིར་ཞིང་ལྤགས་རྐེད་ལ་དཀྲིས། །ཕྲག་དོག་འཇོམས་ཕྱིར་གནས་གསུམ་བྱུགས་པས་མཚན། །ང་རྒྱལ་དབང་བསྡུད་སྟག་གི་ཤམ་ཐབས་ཅན།
ཞེ་སྡང་གཞོམ་ཕྱིར་སྦྲུལ་གྱི་ཡན་ལག་དཀྲིས། །དྲེགས་པ་འདུལ་ཕྱིར་ཐོད་ཕྲེང་དོ་ཤལ་མཛད། །འདོད་དོན་རྣམ་གཞག་རིན་ཆེན་དུ་མས་བརྒྱན། །ཞབས་གཉིས་བརྐྱང་བསྐུམ་དྲེགས་པའི་གདན་ལ་འགྱིང་། རྔམས་བརྗིད་པདྨའི་སྐུ་ལ་ཕྱག་འཚལ་བསྟོད། ཧཱུྃ། དྲག་པོ་པདྨ་རྡོ་རྗེ་ཐོད་ཕྲེང་རྩལ། །སྐུ་མཆོག་འགྱུར་ལྷུན་གྲུབ་བྱའི་ཕྱིར། །ཡ་མནྟ་ཀ་དུང་ཁང་ནང་ན་བཞུགས། །ཞལ་གཅིག་ཕྱག་གཉིས་ཁྲོ་ཚུལ་འགྱིང་བག་ལྡན། །སྐུ་མདོག་དམར་སེར་རལ་པའི་ཅོད་པཎ་ཅན། །ལོག་ལྟ་རྩ་གཅོད་ཕྱག་གཡས་རལ་གྲི་བསྣམས། །ཐམས་ཅད་ཟིལ་གནོན་ཕྱག་གཡོན་སྡིག་མཛུབ་མཛད། །ཞབས་གཉིས་བརྐྱང་བསྐུམ་སེམས་དཔའི་སྐྱིལ་ཀྲུང་བཞུགས། །དབུ་རྒྱན་སྙན་ཆ་རིན་ཆེན་འབར་བས་བརྒྱན། །སྐུ་ཡི་ལྷ་མཆོག་སྲིད་གསུམ་ཟིལ་གྱིས་གནོན། །ཡ་མཱནྟ་ཀའི་སྐུ་ལ་ཕྱག་འཚལ་བསྟོད། ཧཱུྃ། དྲག་པོ་པདྨ་རྡོ་རྗེ་ཐོད་ཕྲེང་རྩལ། །གསུང་མཆོག་འགགས་མེད་ལྷུན་གྱིས་གྲུབ་བྱའི་ཕྱིར། །མགྲིན་པར་
དབང་ཆེན་རྟ་མགྲིན་རྒྱལ་པོ་བཞུགས། །ཞལ་གཅིག་ཕྱག་གཉིས་སྐུ་མདོག་དམར་བའི་མདངས། །སྤྱི་གཙུག་དབང་གི་རྟ་སྐད་འཚེར་བ་ཡིས། །དྲེགས་པ་ལྷ་སྲིན་སྡེ་བརྒྱད་ཟིལ་གྱིས་གནོན། །ཕྱག་གཡས་རྡོ་རྗེའི་དབྱུག་པས་དགྲ་གེགས་འདུལ། །ཐམས་ཅད་ཟིལ་གནོན་ཕྱག་གཡོན་སྡིགས་མཛུབ་མཛད། །བརྐྱང་བསྐུམ་དོར་སྟབས་ཞིང་ལྤགས་གཡང་གཞི་ཅན། །སྟག་གི་ཤམ་ཐབས་སྦྲུལ་གྱིས་ཡན་ལག་བརྒྱན། །པདྨ་ཧེ་རུ་ཀ་ལ་ཕྱག་འཚལ་བསྟོད། ཧཱུྃ། །དྲག་པོ་པདྨ་རྡོ་རྗེ་ཐོད་ཕྲེང་རྩལ། །ཐུགས་མཆོག་སྐྱེ་མེད་ལྷུན་གྱིས་གྲུབ་བྱའི་ཕྱིར། །གསང་བའི་བདག་པོ་ཐུགས་ཀྱི་དཀྱིལ་ན་བཞུགས། །སྐུ་མདོག་མཐིང་ནག་ཞལ་གཅིག་ཕྱག་གཉིས་པ། །གཡས་པས་རྡོ་རྗེ་རྩེ་ལྔ་སྟངས་སྟབས་མཛད། །ཐམས་ཅད་ཟིལ་གནོན་ཕྱག་གཡོན་སྡིགས་མཛུབ་མཛད། །སྟག་ལྤགས་ཤམ་ཐབས་རིན་ཆེན་སྦྲུལ་གྱིས་བརྒྱན། །ཞབས་གཉིས་བརྐྱང་བསྐུམ་སྟངས་སྟབས་
འགྱིང་བག་ཅན། མཐུ་སྟོབས་རྡོ་རྗེ་འཛིན་ལ་ཕྱག་འཚལ་བསྟོད། ཧཱུྃ། དྲག་པོ་པདྨ་རྡོ་རྗེ་ཐོད་ཕྲེང་རྩལ། ཡོན་ཏན་འདོད་པའི་དོན་རྣམས་ལྷུན་གྲུབ་ཕྱིར། །མཁའ་འགྲོ་སྡེ་ལྔའི་དཀྱིལ་འཁོར་ལྟེ་བར་བཞུགས། །སྐུ་མདོག་དམར་མོ་ཞལ་གཅིག་ཕྱག་གཉིས་པ། །གཡས་པ་གྲི་གུག་གཡོན་པ་ཐོད་ཁྲག་བསྣམས། །རྡོ་རྗེ་ཁ་ཊྭཱཾ་རྩེ་གསུམ་མཆན་ཁུང་བརྟེན། །རིན་ཆེན་རུས་པའི་རྒྱན་ལྔ་རབ་ཏུ་འཁྲོལ། །ཐམས་ཅད་དབང་སྡུད་རིགས་བཞི་མཁའ་འགྲོས་བསྐོར། །ཡེ་ཤེས་མཁའ་འགྲོ་མ་ལ་ཕྱག་འཚལ་བསྟོད། ཧཱུྃ། །དྲག་པོ་པདྨ་རྡོ་རྗེ་ཐོད་ཕྲེང་རྩལ། །ཕྲིན་ལས་ལྷུན་གྲུབ་མཐའ་ཡས་ཁྲོས་པའི་ཁྱུང་། །སྤྱི་བོའི་གཙུག་ན་ལྷ་འདྲེ་གཉེན་པོར་ལྡིང་། །བྱ་ཁྱུང་མཐིང་ནག་མེ་ཡི་གཤོག་པ་ཅན། །ཁྲོ་གཉེར་སྤྱནགསུམ་རྡོ་རྗེའི་མཆུ་སྡེར་གྱིས། །ཞེ་སྡང་གདུག་པའི་ཀླུ་རྣམས་ཞལ་དུ་གསོལ། །གནམ་ལྕགས་རལ་པ་དྲག་པོའི་ཚ་ཚ་འཕྲོ། །རིགས་ཀྱི་བདག་པོས་དབུ་ཡི་གཙུག་ཏུ་བརྒྱན། །མི་འགྱུར་རྡོ་རྗེ་འབར་བའི་བ་སྤུ་ལས། །སྤྲུལ་
པ་ཡང་སྤྲུལ་བྱ་ཁྱུང་མང་པོ་འགྱེད། །རལ་གྲི་འབར་བའི་གཤོག་པ་གཡས་གཡོན་ལས། །ཡེ་ཤེས་སྦལ་གྱི་མེ་སྒྲ་འབྲུག་སྟོང་ལྡིར། །མཐའ་ཡས་ཁྲོས་པའི་ཁྱུང་ལ་ཕྱག་འཚལ་བསྟོད། ཧཱུྃ། །དྲག་པོ་པདྨ་རྡོ་རྗེ་ཐོད་ཕྲེང་རྩལ། །དབང་དྲག་སྟོབས་ཀྱིས་དགྲ་གེགས་འདུལ་བའི་ཕྱིར། །སྐུ་ཡི་སྤྲུལ་པ་ཡཀྴ་མེ་དབལ་འགྱེད། །ཞལ་གཅིག་ཕྱག་གཉིས་འཇིགས་ཚུལ་ཁྲོ་བོའི་སྐུ། །སྐུ་མདོག་མཐིང་ནག་འཇིགས་པའི་འགྱིང་བག་ཅན། དཔའ་བོ་ལྟག་གི་ཤམ་ཐབས་སྐུ་སྨད་དཀྲིས། །སྐུ་ལས་བསྐལ་པའི་མེ་རི་སྨུག་ནག་འབར། །ཀླུ་རྣམས་འདུལ་ཕྱིར་སྦྲུལ་གྱིས་ཡན་ལག་བརྒྱན། །དབུ་སྐྲ་རལ་པ་དམར་སེར་གྱེན་དུ་བརྫེས། །གཅེར་བུ་སྟངས་སྟབས་ཁྲོ་གཉེར་གློག་སྟོང་འགྱུ། །ཕྱག་གཡས་རྡོ་རྗེ་ཐོ་བ་བསྣམས་པ་ཡིས། །དགྲ་གེགས་འབྱུང་པོ་རྣམས་ཀྱི་གཤེད་དུ་ཚེ། །གཡོན་པ་རྫུ་འཕྲུལ་མེ་ཡི་ཞགས་པ་ཡིས། །དམ་ཉམས་འབྱུང་
པོ་རྡུལ་དུ་རླག་པར་བྱེད། །ཡཀྴ་མེ་དབལ་སྐུ་ལ་ཕྱག་འཚལ་བསྟོད། །པདྨ་འབྱུང་གནས་འགྲོ་བའི་སྐྱབས་མགོན་མཆོག །བླ་མ་ཡི་དམ་མཁའ་འགྲོ་ཆོས་སྐྱོང་བཅས། །ལྷ་ཚོགས་ཀུན་ལ་གུས་པས་བསྟོད་བགྱིས་ན། །བདག་སོགས་ཁྱེད་ཀྱིས་གོ་འཕང་མྱུར་འགྲུབ་ཤོག །དེ་ནས་འཛབ་བསྙེན་བྱ་བ་ནི། །དྲག་པོ་ཕྱི་ནང་གསང་བའི་སྒྲུབ་པ་ལས་ཁ་ཚར་གྱི་བྱེ་བྲག་སོགས་ནི་སྒྲུབ་གཞུང་ཉིད་ནས་འབྱུང་མོད་ཀྱི། །འདིར་ལས་གཞུང་རྒྱུན་ཁྱེར་གྱི་རྩ་སྔགས་བཟླ་བ་ནི། །བདག་ཉིད་པདྨ་དྲག་པོར་གསལ་བ་ཡིས། །ཐུགས་ཀྱི་ལྷ་མཆོག་
གསང་བདག་ཕྱག་རྡོར ་གྱི། །ཐུགས་ཀར་གསེར་གྱི་མཆོད་རྟེན་བུམ་པའི་དབུས། །འཁོར་ལོ་རྩིབས་བཞིའི་ལྟེ་བར་ཧཱུྃ་དམར་ལ། སྔགས་ཕྲེང་མེ་ཡི་མདོག་འདྲ་གཡས་སུ་འཁོར། །འོད་འཕྲོས་རྒྱལ་བ་ཀུན་མཆོད་དངོས་གྲུབ་བསྡུས། །སེམས་ཅན་རྣམས་ཀྱི་སྡིག་སྒྲིབ་སྡུག་བསྔལ་གསལ། །སྡེ་བརྒྱད་དམ་སྲི་འབྱུང་པོ་རྒྱལ་
བསེན་ཚོགས། ལུས་སྲོག་རྡུལ་བརླག་ལས་ངན་རྒྱུན་བཅད་ཅིང་། །རྣམ་ཤེས་ཆོས་ཀྱི་དབྱིངས་སུ་ཐེམ་པར་གྱུར། ཨོཾ་ཨཱཿཧཱུྃ་ཧྲཱིཿ ཨར་ཙིག་ནིར་ཙིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊཿ ཨོཾ་ཨཱཿཧཱུྃ་པདྨ་སིདྡྷི་ཧཱུྃ་ཧཱུྃ་ཕཊཿ ཨ་ཡ་མ་དུ་རུ་ཙ་ཤ་ན། ས་མ་ཡ་ཧཱུྃ་ཕཊཿ ཨོཾ་བཛྲ་ཡཀྴ་ཧཱུྃ། རཀྴ་ཧཱུྃ་ཕཊཿ རཱ་ཛཱ་གནོད་བྱེད་ཀྱི་སྙིང་ལ་མ་ར་ཡ་ཧཱུྃ་ཕཊཿ ཅེས་ལོང་སྐབས་དང་བསྟུན་ཏེ་ཅི་ནུས་བཟླས་པའི་མཐར། །ལྷག་པའི་ལྷ་མཆོག་པདྨ་དྲག་པོ་རྩལ། །འཇབ་བསྙེན་མཆོད་པ་ཕུལ་བའི་བྱིན་རླབས་ཀྱིས། །ལུས་ངག་ཡིད་ཀྱི་སྒྲིབ་པ་ཀུན་བྱང་སྟེ། །ལྷ་དང་གཉིས་སུ་མེད་པར་བདག་འགྲུབ་ཤོག །དེ་ཡན་ཆད་ཀྱི་དངོས་གཞིའི་རིམ་པ་གྲུབ་ནས། གསུམ་པ་རྗེས་ཀྱི་ལས་རིམ་རྣམས་ཀྱི་དང་པོར་ཚོགས་ཀྱི་མཆོད་པ་བྱ་བ་ནི། །རིན་ཆེན་གྱི་སྣོད་དུ་བཤོས་ཆེན་རྒྱན་ལྡན་བཟའ་བཏུང་འདོད་ཡོན་གྱི་ལོངས་སྤྱོད་རྒྱ་ཆེར་འཛོམ་པ་
སྟག་ལྤགས་སོགས་ཀྱི་གདན་སྟེངས་སུ་བཤམས་ལ་བདུད་རྩིའི་ཟེར་ལས་ཁྱབ་པར་མཐོར་སྟེ། ཧཱུྃ། ཆོས་སྐུ་རྣམ་དག་སྐྱེ་བ་མེད་པ་ལས། །ལོངས་སྐུ་འགག་མེད་འོད་དཔག་མེད་དུ་ཤར། །སྣ་ཚོགས་སྤྲུལ་སྐུ་མ་ཧཱ་གུ་རུའི་སྐུ། །དབང་དྲག་པདྨ་དཔལ་གྱི་ཐུགས་ཀ་ནས། །རྃ་ཡྃ་ཁྃ་གསུམ་ཡིག་འབྲུའི་འཕྲོ་འདུ་ལས། །ཚོགས་ཀྱི་ཞལ་ཟས་འདོད་ཡོན་ལོངས་རྣམས། །མི་གཙང་དྲི་མ་ཉེས་པའི་སྐྱོན་རྣམས་ཀུན། །བསྲེག་གཏོར་བཀྲུ་ཞིང་བག་ཆགས་སྦྱང་བར་བྱ། བཛྲ་ཛྭ་ལ་རྃ། ཡྃ་སྥ་ར་ཎ་ཕཊཿ ཁྃ་ཤུདྡྷོ྅ཧཾ། རང་གི་ཐུགས་ཀའི་ས་བོན་ལས་བྱུང་བའི། །རྃ་ཡྃ་ཀེ༚་དང་ཨཱཿཡིག་འཕྲོ་འདུ་ལས། མེ་རླུང་ཐོད་སྐྱེད་བནྡྷའི་སྣོད་ནང་དུ། །ཨོཾ་ཨཱཿཧཱུྃ་གི་ཡིག་འབྲུའི་འཕྲོ་འདུ་ལས། །ཚོགས་ཀྱི་ཞལ་ཟས་ཤ་ལྔ་བདུད་རྩི་ལྔ། །ཟག་མེད་ཡེ་ཤེས་བདུད་རྩི་རྒྱ་མཚོ་ལས། །འདོད་པའི་ཡོན་ཏན་ལྔ་དང་ལྡན་པ་རུ། །རྒྱལ་བའི་
། ཐུགས་དམ་བསྐང་ཕྱིར་བྱིན་གྱིས་བརླབས། ཨོཾ་ཨཱཿཧཱུྃ། །མཧཱ་ག་ཎ་ཙཀྲ་སརྦ་སཉྩ་ཨ་མྲྀ་ཧཱུྃ་ཧྲཱིཿཐཱ།། །རླུང་གཡོས་མེ་སྦར་ཐོད་པའི་བདུད་རྩི་ཁོལ། །རླངས་པའི་འོད་ཀྱི་རབ་འབྱམས་རྒྱལ་བ་མཆོད། །ཡེ་ཤེས་བདུད་རྩི་བཀུག་ནས་ཐོད་པར་ཐིམ། །དམ་ཡེ་དབྱེར་མེད་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་པས་ཚོགས་རྫས་བྱིན་གྱིས་བརླབས་ན། ཚོགས་མགྲོན་སྤྱན་དྲངས་པ་ནི། རོལ་མོའི་དབྱངས་དང་བཅས་པས། ཧཱུྃ་ཧཱུྃ། ནུབ་ཕྱོགས་ཨུ་རྒྱན་ཡུལ་གྱི་དུར་ཁྲོད་ནས། །གནས་གསུམ་མཁའ་འགྲོ་སྤྲིན་ཕུང་འདུས་པའི་དབུས། །ཆགས་བྲལ་པད་ཉི་རོ་ཡི་གདན་སྟེང་ན། །རྔམས་འཇིགས་སྟོབས་ལྡན་པདྨ་ཐོད་ཕྲེང་སྐུ། །དུས་ངན་སྙིགས་མའི་འགྲོ་བ་འདུལ་བ་དང་། །བདག་ཅག་རྗེས་འཇུག་ཐུགས་རྗེས་བཟུང་སླད་དུ། །ཞལ་ཟས་འདོད་ཡོན་ཚོགས་ལ་སྤྱན་འདྲེན་ན། །ཐུགས་རྗེ་རྫུ་འཕྲུལ་ལྡན་
པའི་སྐུ་བསྐྱོད་ལ། །བྱིན་རླབས་དངོས་གྲུབ་འབེབས་ཅིང་གཤེགས་སུ་གསོལ། །དགའ་བདེ་ཡེ་ཤེས་རྒྱུད་ལ་སྤར་བའི་ཕྱིར། །ཕག་མོ་ཡུམ་དང་བཅས་ཏེ་གཤེགས་སུ་གསོལ། །ཞི་བས་འཇིགས་པ་བརྒྱད་ལས་སྐྱོབས་པའི་ཕྱིར། །རྡོ་རྗེ་མཁའ་འགྲོའི་ཚོགས་དང་གཤེགས་སུ་གསོལ། །རྒྱས་པས་འབྱོར་པ་དྲུག་དང་ལྡན་པའི་ཕྱིར། །རིན་ཆེན་མཁའ་འགྲོའི་ཚོགས་དང་། །དབང་མཆོག་མོས་པ་བཞི་དང་ལྡན་པའི་ཕྱིར། །པདྨ་མཁའ་འགྲོའི་ཚོགས་དང་། དྲག་པོ་མངོན་སྤྱོད་ལས་རྣམས་གྲུབ་པའི་ཕྱིར། །ལས་ཀྱི་མཁའ་འགྲོའི༴ ཕྲིན་ལས་སྣ་ཚོགས་མ་ལུས་གྲུབ་པའི་ཕྱིར། །དཔའ་བོ་མཁའ་འགྲོའི་ཚོགས༴ བསྟན་པ་བསྲུང་ཞིང་བར་ཆད་བསལ་བའི་ཕྱིར། །བཀའ་སྲུང་ཆོས་སྐྱོང་ཚོགས་དང་གཤེགས་སུ་གསོལ། །གུ་རུ་པདྨ་སརྦ་ཌཱ་ཀི་ནཱི། །ཨེ་པཱ་ར་ལི་ཕེ༚་ཕེ༚། ཧཱུྃ། །ཚོགས་ཁང་དུར་ཁྲོད་འབར་བའི་གཞལ་ཡས་འདིར། །ཉི་ཟླ་པདྨ་བཾ་ཆེན་གདན་དུ་གཏིང་། །འཕན་གདུགས་བླ་བྲེས་གྲིབ་ཡོལ་
རྒྱན་གྱིས་སྤྲས། །ཞལ་ཟས་ཚོགས་ཁང་འབར་བའི་ཕྲོང་འདིར། །དབང་དྲག་པདྨ་མཁའ་འགྲོའི་ཚོགས་དང་བཅས། །རྔམས་དགྱེས་པའི་ཚུལ་གྱིས་བཞུགས་སུ་གསོལ། །བཛྲ་ས་མ་ཡ་ཏིཥྛ་ལྷན། ཧཱུྃ། །མཐའ་ཡས་སྤྲུལ་པ་སྐྱེ་འགྲོ་ཡོངས་ཀྱི་མགོན། །ཕྱོགས་བཅུ་དུས་གསུམ་སངས་རྒྱས་ཐམས་ཅད་ཀྱིས། །བྱིན་གྱིས་བརླབས་པ་པདྨ་ཐོད་ཕྲེང་རྩལ། །ཡོན་ཏན་འགྲན་མེད་ཆེ་མཆོག་ཧེ་རུ་ཀ །དབང་དྲག་པདྨའི་སྐུ་ལ་ཕྱག་འཚལ་ལོ། ཨ་ཏི་པཱུ་ཧོ། པྲ་ཏི་ཛ་ཧོཿཨ་ལ་ལ་ཧོཿདེ་ནས་ཚོགས་ཕུད་རིམ་གསུམ་སྣོད་སོ་སོར་བཅུག་ནས་བཤམས་པའི་དང་པོ་ནི། ཧཱུྃ། །དབང་དྲག་པདྨ་འཁོར་དང་བཅས་པ་ལ། །འདོད་ཡོན་ཚོགས་ཀྱི་མཆོད་པ་འབུལ་བ་ནི། །གཟུགས་ཀྱི་ལྷ་མོ་མཛེས་པ་མེ་ལོང་བསྣམས། །བརྒྱན་གྱི་མཆོད་པར་འབུལ་ལོ་བཞེས་སུ་གསོལ། །སྒྲ་ཡི་ལྷ་མོ་སྙན་པའི་རོལ་མོ་འཐོགས། །སྙན་ལ་མཆོད་པར་འབུལ་ལོ་བཞེས་སུ་གསོལ། །དྲི་ཡི་ལྷ་
མོ་དྲི་ཞིམ་བདུག་སྤོས་ཐོགས། །ཤངས་ཀྱི་མཆོད་པར་འབུལ་ལོ༴ རོ་ཡི་ལྷ་མོ་ཟས་མཆོག་ཞོང་པ་ཐོགས། ལྗགས་ལ་མཆོད་པར༴ རེག་བྱའི་ལྷ་མོ་གཉན་འཇམ་ན་བཟའ་འཐོགས། སྐུ་ལ་མཆོད༴ ཆོས་ཀྱི་ལྷ་མོ་བདེ་སྟོང་ཆོས་འབྱུང་འཛིན། ཐུགས་ལ་མཆོད་པར་འབུལ་ལོ༴ ཨོཾ་ག་ཎ་ཙཀྲ་རཱུ་པ། ཤཔྟ། གནྡྷ། རཱ་ས། སྤརྴེ། དྷརྨ་པཱུ་ཛ་མེ་གྷ་ཨཱཿཧཱུྃ། ཞེས་པས་ཚོགས་ཕུད་དང་པོ་གཏོར་མའི་ནང་དུའམ་དེའི་དྲུང་དུ་ཕུལ་ལོ། །ཚོགས་པར་བས་ཉམ་ཆགས་བཤགས་པ་ནི། ཧཱུྃ། དབང་དྲག་པདྨའི་ལྷ་ཚོགས་དགོངས་སུ་གསོལ། །བདག་ཅག་རྣལ་འབྱོར་དབང་ཕྱུག་རྡོ་རྗེ་འཛིན། །བསྐལ་པ་ཐོག་མ་མེད་པའི་སྔོན་རོལ་ནས། །མཐའ་མ་ལུས་འདི་བླངས་པ་ཡན་ཆོད་དུ། །མ་རིག་ཉོན་མོངས་འཁྲུལ་པའི་དབང་གྱུར་པས། །ལུས་ངག་ཡིད་གསུམ་མི་དགེའི་ལས་བགྱིས་ཏེ། །རྒྱལ་བའི་སྐུ་གསུང་ཐུགས་དང་འགལ་གྱུར་པ། །ཞལ་ཟས་ཚོགས་ཀྱི་
མཆོད་པ་ལ་བརྟེན་ནས། །གནོང་ཞོང་འགྱོད་པའི་སེམས་ཀྱིས་བཤགས་པར་བགྱི། །ཐུགས་རྗེ་བརྩེ་བས་ཚངས་པར་ཡར་བཞེས་ནས། །ཡེ་ཤེས་དོན་གྱི་དངོས་གྲུབ་སྩལ་དུ་གསོལ། ས་མ་ཡ་ཨ་ཨ། ཞེས་པས་ཚོགས་བར་པ་འབུལ། དེ་ནས་ཚོགས་ཐ་མ་ལ་གནོད་བྱེད་བསྟིམ་ཞིང་བསྒྲལ་སྟབ་བྱ་བ་ནི། ན་མོ། དཀོན་མཆོག་གསུམ་དང་བླ་མ་ཡི་དམ་མཁའ་འགྲོ་ཆོས་སྲུང་རྣམས་ཀྱི་བྱིན་རླབས་ནུས་པའི་མཐུ་སྟོབས་དང་། ཆོས་ཉིད་རྣམ་པར་དག་པའི་བདེན་པ་ཆེན་པོས། དེང་འདིར་བསྟན་པ་ལ་གནོད་ཅིང་སེམས་ཅན་ལ་འཚེ་བར་བྱེད་པ་དང་། རྣལ་འབྱོར་བདག་ཅག་དམ་པའི་ཆོས་སྒྲུབ་པ་ལ་བར་དུ་གཅོད་པའི་དགྲ་གེགས་འབྱུང་པོ་གང་ཡིན་པ་དེ་དག་སྐད་ཅིག་གིས་ཚོགས་ཐ་མ་འདི་ལ་ཁུག་ཛཿ ཧཱུྃ། དབང་དྲག་པདྨ་ཐོད་ཕྲེང་རྩལ། །རྔམས་དྲག་གཏུམ་པའི་རང་བཞིན་ལས། ཡཀྴ་མེ་དབལ་སྐར་ལྟར་འཁྲུག །ལས་བྱེད་ཕོ་ཉས་སྟོང་གསུམ་
གང་། །སྒྲོལ་བྱེད་མཚོན་ཆའི་ཆར་ཆེན་འབེབས། །གནོད་བྱེད་གཟུགས་ཕུང་དུམ་བུར་གཏུབ། །ལྔ་ཕུང་ལྷ་ཡི་ཞལ་དུ་སྟབ། །རྣམ་ཤེས་ཆོས་ཀྱི་དབྱིངས་སུ་ཕཊ། །གནོད་བྱེད་འབྱུང་པོ་མ་ར་ཡ་རྦད་རྦད། ཅེས་ཚོགས་ཐ་མ་དེ་དུམ་བུར་གཏུབ་ལ་དགྲ་གེགས་ཀྱི་ཤ་ཁྲག་ཏུ་དམིགས་ནས་གཏོར་མར་འབུལ་ཞིང་། ཧཱུྃ། དབང་དྲག་པདྨའི་ལྷ་ཚོགས་སྐུར་བཞེངས་ལ། །རྔམས་བརྗིད་རབ་ཏུ་འཇིགས་པའི་ཞལ་ཕྱེ་ཅིག །གྲུ་གསུམ་དམར་ནག་འབར་བའི་སྣོད་ནང་དུ། །དགྲ་གེགས་འབྱུང་པོ་བསྒྲལ་བའི་ཤ་ཁྲག་འདི། །དབང་དྲག་པདྨའི་ལྷ་ཚོགས་ཞལ་དུ་སྟབ། །དགྱེས་པར་རོལ་ཅིག་བཛྲ་ཨ་ར་ལི། །གཏི་མུག་ཤ་ལ་ཆེམ་ཆེམ་དགྱེས་པར་རོལ། །འདོདཆགས་ཁྲག་ལ་རྫིབ་རྫིབ་དགྱེས་པར་རོལ། ཞེ་སྡང་རུས་ལ་ཀྲུམ་ཀྲུམ་དགྱེས་པར་རོལ། །དངོས་གྲུབ་བར་ཆོད་བྱེད་པའི་དགྲ་དང་བགེགས། །དུག་གསུམ་ཤ་ཁྲག་རུས་པའི་མཆོད་པ་འདི། །དབང་དྲག་
པདྨ་ཁྱེད་ཀྱིས་བཞེས་ནས་ཀྱང་། །བྱང་ཆུབ་བསྒྲུབ་ལ་བར་ཆད་མེད་པར་མཛོད། མ་ཧཱ་མཱཾ་ས༴ རཀྟ༴ ཀེ༚་ནི་རི་ཏི། མ་ཧཱ་ཙིཏྟ། གོ་རོ་ཙ་ན། བ་སུ་ཏ་ཁཱ་ཧིཿ དེ་ནས་སྒྲུབ་པ་པོ་དཔོན་སློབ་མཆེད་ལྕམ་རྣམས་ལ་ཚོགས་དྲངས་ཤིང་དངོས་གྲུབ་བླང་བ་ནི། ཧཱུྃ། དབང་དྲག་པདྨའི་ལྷ་ཚོགས་དགོངས་སུ་གསོལ། །སྙིགས་མ་རྩོད་ལྡན་དུས་ཀྱི་མཐའ་མ་འདིར། །འཁོར་བའི་རྒྱ་མཚོར་བྱིང་བའི་འགྲོ་བ་བདག །ཁྱོད་ལ་སྐྱབས་གསོལ་ཡུན་དུ་མཆོད་བགྱི་ན། །ཡེ་ཤེས་ཐུགས་རྗེའི་སྤྱན་གྱིས་གཟིགས་ནས་ཀྱང་། །ཁྱེད་ཀྱི་སྐུ་གསུང་ཐུགས་ཀྱི་བྱིན་རླབས་དང་། །མཆོག་དང་ཐུན་མོང་དངོས་གྲུབ་ཐམས་ཅད་ཀུན། །ཞལ་ཟས་ཚོགས་མཆོད་འདི་ལ་ཆར་ལྟར་ཕོབས། །དུས་འདི་ཉིད་ལ་བདག་ལ་སྩལ་དུ་གསོལ། །འགྱུར་མེད་སྐུ་ཡི་དངོས་གྲུབ༴ འགག་མེད་གསུང་༴ འཁྲུལ་མེད་ཐུགས༴ ཡོན་ཏན་ལྷུན་གྱིས་གྲུབ་པའི༴ ཕྲིན་ལས་ཐོགས་པ་མེད་པའི་དངོས་གྲུབ་སྩོལ།
ཀཱ་ཡ་སིདྡྷི་ཧཱུྃ། ཝཱཀ་སིདྡྷི་ཨཱཿཙིཏྟ་སིདྡྷི་ཧཱུྃ། གུ་ཎ་སིདྡྷི་སྭཱ། ཀརྨ་སིདྡྷི་ཧཱ། ཞེས་པས་ཚོགས་ལ་རང་ཉིད་ལྷའི་རྣལ་འབྱོར་གྱི་ངང་ནས་རོལ་ཞིང་། དེ་ལྟར་ལྷ་ལ་ཕུལ་ཞིང་རྣལ་འབྱོར་པ་རྣམས་ལ་དྲངས་པའི་ཚོགས་ཀྱི་ལྷག་མ་གང་ཡོད་ཐམས་ཅད་སྣོད་ཆེ་བ་གཅིག་ཏུ་སྤུངས་ཏེ་དཀྱིལ་འཁོར་གྱི་མཐའ་ཟུར་ཅིག་ཏུ་བཞག་ནས་སྨན་རག་སྦྲན་པ་ལ། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས་པས། བཀའ་སྡོད་སྲུང་མ་ལྷག་མའི་མགྲོན་རྣམས་ཇི་ལྟར་དགྱེས་པའི་ལོངས་སྤྱོད་ཕུན་ཚོགས་སུ་དམིགས་ལ། ཧཱུྃ། དབང་དྲག་པདྨའི་འཁོར་དུ་གནས་པ་ཡི། །ཕྱི་འཁོར་སྐྱོང་བའི་སྲུང་མ་ཐམས་ཅད་དང་། །དབང་ཕྱུག་མཁའ་འགྲོ་གང་གི་དང་ལངྐ་དང་། །ཕྲ་མན་ཤུགས་འགྲོ་གཤིན་རྗེ་སྲིན་པོའི་ཚོགས། །འཇིགས་པའི་ལུས་ལ་རྔམས་པའི་ཆ་བྱད་ཅན། །ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་། །རྫུ་འཕྲུལ་ཐོགས་མེད་དཔལ་གྱི་ཕམ་ཕབ་བསྡུད། །ཏིང་འཛིན་དྲོད་མྱུལ་རྣལ་འབྱོར་ཚོགས་ཁང་འགྲིམ། །རང་རང་སྤྲུལ་པ་འཁོར་
དང་བཅས་པ་རྣམས། །ཞལ་ཟས་ཚོགས་ཀྱི་ལྷག་མ་འདི་བཞེས་ལ། ཇི་ལྟར་དབང་བའི་ཕྲིན་ལས་སོ་སོར་མཛོད། ཨོཾ་ཨུ་ཙིཥྚ། སརྦ་ཌཱཀི་ནཱི། བ་ལིནྟ་ཁཱ་ཧི། ཞེས་ནམ་མཁའ་མཐོང་བའི་གཙང་སར་བསྐྱལ་ཞིང་སྣོད་དེ་ཉིད་བཤལ་བའི་བཤལ་ཆུ་ཡང་དེ་ཕྱོགས་སུ་གཏོར་རོ། དེ་ལྟར་རྒྱུན་གྱི་བསྐང་གསོ་ལས་གཞུང་ནི་འདི་ཀས་ཆོག་ཚེ། འདིའི་མཇུག་ཏུ་བསྔོ་སྨོན་ཤིས་བརྗོད་སོགས་བྱ་ཞིང་།། ༈ །།གལ་ཏེ་ཚེས་བཅུ་སོགས་དུས་བཟང་གི་གཏོར་ཆོག་རྒྱས་པར་བྱ་བའམ། བར་ཆད་སེལ་བའི་རིམ་འགྲོ་ལྟ་བུ་གལ་ཅན་གྱི་སྐབས་སུ་གཏོར་མཆོད་ཀྱང་ཆེར་བཤམས་ཞིང་། ཐུགས་དམ་གནད་ནས་བསྐུལ་ཏེ་ཕྲིན་ལས་གཞོལ་བ་ནི་ཚོགས་ལྡན་གྲུབ་པའི་སྐབས་འདིར། གཏོར་མ་རྣམས་བསྐུལ་ཞིང་སྨན་རག་བྲན། བསུར་དུད་རྔ་གླིང་རོལ་མོའི་སྒྲ་དང་བཅས་པས་སྒྲུབ་པ་པོ་དད་གུས་གདུང་ཤུགས་དྲག་པོ་བསྐྱེད་དེ་དབྱངས་ཀྱི་ང་རོས་འདི་ལྟར་བསྐུལ་བར་བྱའོ། །ཧཱུྃ། དུར་ཁྲོད་འཇིགས་སུ་རུང་བའི་ཕོ་བྲང་ནས། རྔམས་བརྗིད་སྟོབས་ལྡན་པདྨ་ཐོད་ཕྲེང་རྩལ། །ཐམས་ཅད་ཟིལ་གནོན༴
སྲིན་པོའི་གདན་ལ་བཞེངས། །ཆགས་པའི་སྐྱོན་བྲལ་པདྨའི་ལྟ་བ་ལ། །ཐུགས་རྗེ་རྨད་བྱུང་ཟླ་བའི་དཀྱིལ་འཁོར་སྟོང་། །ཉོན་མོངས་འདམ་སྐམ་ཉི་མའི་དཀྱིལ་འཁོར་འབར། །མ་བཅོས་རང་བྱུང་ཧཱུྃ་གི་འཕྲོ་འདུ་ལས། །བདེན་པའི་སྟོབས་རྒྱས་བྱིན་རླབས་ཚ་ཚ་ཁོལ། །འཇིག་རྟེན་དྲེགས་པའི་ཚོགས་རྣམས་ཚར་གཅད་ནས། །གསུང་གི་དབང་ཕྱུག་ཧེ་རུ་ཀ་ཡི་སྐུ། །དཔའ་ལ་སྒེག་པའི་ཆ་ལུགས་གསལ་བར་ལྡན། །རྔམས་ལ་བརྗིད་པའི་ཁོ་བོ་གཡུལ་ལས་རྒྱལ། །གཏུམ་ལ་འཇིགས་པའི་ཁྲག་འཐུང་ཧེ་རུ་ཀ །བདུད་ཀྱི་དཔུང་རྣམས་འཇོམས་པའི་མཐུ་སྟོབས་ཅན། །ཆེ་མཆོག་བགེགས་འདུལ་པདྨ་ཐོད་ཕྲེང་རྩལ། །ཐུགས་ཉིད་ཀློང་ཡངས་འཇིག་རྟེན་ལྟོ་བར་བཅུག །དམ་ལས་འགལ་བའི་དགྲ་གེགས་འབྱུང་པོ་རྣམས། །རང་དབང་མེད་པར་དབང་དུ་བསྡུས་ནས་ཀྱང་། །བསད་བཅད་གཏུབ་ནས་ཤ་ཁྲག་རུས་པ་འཆའ། །ཁྱོད་ནི་དུས་ངན་བསྟན་པའི་རྒྱལ་ལན་
ཏེ། །བསྟན་ལ་སྡང་བ་ཐམས་ཅད་ཕུང་བར་མཛོད། །བགེགས་འདུལ་པདྨའི་ཐུགས་དམ་དབྱིངས་ནས་བསྐུལ། །དུག་གསུམ་ཤ་ཁྲག་མཆོད་པ་འདི་བཞེས་ལ། །ཐུགས་དམ་དུས་ལ་བབ་པོ་ས་མ་ཡ། ཧཱུྃ། །དྲག་པོ་པདྨ་རྡོ་རྗེ་ཐོད་ཕྲེང་རྩལ། །སྐུ་མཆོག་ནམ་མཁའི་ཁམས་གང་འཇིགས་པ་ལ། །ལྟ་བས་ཆོག་མི་ཤེས་པའི་མཚན་དཔེར་ལྡན། །སྐུ་མདོག་དམར་པོ་བསྐལ་པའི་མེ་ལྟར་འབར། །དབུ་སྐྲ་ཁམས་ནག་རལ་པ་གྱེན་དུ་འཁྱིལ། །སྤྱན་རྩ་དམར་པོ་གདངས་མིག་ཕྱོགས་བཅུར་བགྲད། །བར་སྣང་ཁམས་གྱི་གདོན་ཚོགས་རླགས་པར་བྱེད། །ཞལ་བགྲད་མཆེ་གཙིགས་དྲག་པོའི་རྐན་སྒྲ་རྡེབ། །གཟི་བརྗིད་འོད་ཀྱི་སྟོང་ཁམས་མ་ལུས་བསྲེག །ཁྲོས་པའི་རྐན་རྡེབ་རི་རབ་ཐང་ལ་བསྙིལ། །རྔམས་པའི་སྟོབས་ཀྱིས་རྒྱ་མཚོ་ཧུབ་ཀྱིས་འདེབས། །ཐུགས་རྗེའི་ཤུགས་ཀྱིས་འགྲོ་དྲུག་ཞལ་དུ་གསོལ། །རྔམས་བརྗིད་པདྨའི་ཐུགས་དམ་དབྱིངས་ནས་བསྐུལ། དུག་གསུམ་ཤ་ཁྲག་
མཆོད་པ་འདི་བཞིས་ལ། །ཐུགས་དམ་དུས་ལ་བབ་པོ་ས་མ་ཡ། ཧཱུྃ། དྲག་པོ་པདྨ་རྡོ་རྗེ་ཐོད་ཕྲེང་རྩལ། །ཆོས་ཉིད་མི་འགྱུར་ཕྱག་གཡས་རྡོ་རྗེ་བསྣམས། །འདྲེ་གདོན་འདུལ་ཕྱིར་ཕྱག་གཡོན་སྡིག་པ་བསྣམས། །གླང་ཆེན་མི་ལྤགས་སྟག་ཤམ་སྦྲུལ་གྱིས་བརྒྱན། །ཐོད་རློན་དོ་ཤལ་རིན་ཆེན་རུས་རྒྱན་དང་། །དུར་ཁྲོད་ཆས་ལྡན་གནས་གསུམ་བྱུགས་པས་མཚན། །ཉོན་མོངས་བསྲེག་བྱེད་མེ་དཔུང་ཀློང་ན་བགྱིང་། །ཆས་ལྡན་པདྨའི་ཐམས་དམ་དབྱིངས་ནས་བསྐུལ། །དུག་གསུམ་ཤ་ཁྲག༴ ཐུགས་དམ་དུས་ལ༴ ཧཱུྃ། །དྲག་པོ་པདྨ་རྡོ་རྗེ༴ སྐུ་དབང་རྫོགས་ཕྱིར་འཇམ་དཔལ་དབུ་ལ་བཞུགས། །གསུང་དབང་རྫོགས་ཕྱིར་རྟ་མགྲིན་མགྲིན་པར་བཞུགས། །ཐུགས་དབང་རྫོགས་ཕྱིར་ཕྱག་རྡོར་ཐུགས་ཀར་བཞུགས། །ཡོན་ཏན་འདོད་པའི་དོན་རྣམས་ལྷུན་གྲུབ་ཕྱིར། །མཁའ་འགྲོ་སྡེ་ལྔའི་དཀྱིལ་འཁོར་ལྟེ་བར་བཞུགས། །ཕྲིན་ལས་རྫུ་འཕྲུལ་ཐོགས་པ་མེད་པའི་ཕྱིར། །སྤྱི་བོའི་སྟེང་ན་ལྕགས་ཀྱི་བྱ་ཁྱུང་ལྡིང་། །ལོག་འདྲེན་བགེགས་ཀྱི་ཚོགས་རྣམས་ཚར་བཅད་ཕྱིར། །སྐུ་ཡི་
སྤྲུལ་པ་ཡཀྴ་མེ་དབལ་འགྱེད། རྣམ་དག་པདྨའི་ཐུགས་དམ་རྒྱུད་ནས་བསྐུལ། །དུག་གསུམ་ཤ་ཁྲག༴ ཐུགས་དམ་དུས་ལ༴ ཧཱུྃ། དྲག་པོ་པདྨ༴ སྐུ་ཡི་གཟི་བརྗིད་འབར་བའི་འོད་ཟེར་གྱིས། །སྲིད་པ་གསུམ་ཡང་ཟིལ་གྱིས་གནོན་པར་བྱེད། །གསུང་གི་ང་རོ་རྔམས་པའི་གདངས་སྐད་ཀྱིས། ཁམས་གསུམ་མ་ལུས་དབང་དུ་སྡུད་པར་བྱེད། །ཐུགས་ཉིད་བྱམས་པའི་ཐུགས་རྗེ་ཚད་མེད་ཀྱིས། །འགྲོ་དྲུག་མ་ལུས་འཁོར་བའི་གནས་ནས་འདྲེན། །ཨ་ར་ལི་ཡི་སྒྲ་ཆེན་སྒྲོག་པ་ཡིས། །མ་མོ་མཁའ་འགྲོ་ཐམས་ཅད་དབང་དུ་སྡུད། ཧཱུྃ་དང་ཕཊ་ཀྱི་སྒྲ་ཆེན་སྒྲོག་པ་ཡིས། །དྲེགས་པ་ལྷ་སྲིན་སྡེ་བརྒྱད་དམ་ལ་འདུ། །སྟོབས་ལྡན་པདྨའི་ཐུགས་དམ་དབྱིངས་ནས་བསྐུལ། །དུག་གསུམ་ཤ་ཁག ཐུགས་དམ་དུས་ལ༴ ཧཱུྃ། དྲག་པོ་པདྨ་རྡོ་རྗེ༴ སྤྱི་བོའི་གཙུག་ནས་ཁྱུང་ཆེན་སྤྲུལ་པ་འགྱེད། ཡང་སྤྲུལ་ཁྱུང་གིས་སྟོང་གསུམ་འཇིག་རྟེན་འགྱེངས། ག་རུ་ཌ་ཡིས་ཐུགས་དམ་དབྱིངས་ནས་
བསྐུལ། དུག་གསུམ༴ ཐུགས་དམ་དུས༴ ཧཱུྃ། དྲག་པོ་པདྨ་རྡོ་རྗེ༴ དུང་ཁང་ནང་ནས་འཇམ་དཔལ་སྤྲུལ་པ་འགྱེད། ཡང་སྤྲུལ་ཁྲོ་བོས་སྟོང་གསུམ་འཇིག་རྟེན་འགེངས། ཡ་མནྟ་ཀའི་ཐུགས་དམ་དབྱིངས་ནས་བསྐུལ། དུག་གསུམ༴ ཐུགས་དམ་དུས༴ ཧཱུྃ། དྲག་པོ་པདྨ༴ མགྲིན་པའི་གནས་ནས་རྟ་མགྲིན་སྤྲུལ་པ་འགྱེད། ཡང་སྤྲུལ་ཁྲོ་བོས་སྟོང་གསུམ་འཇིག་རྟེན་འགེངས། ཧ་ཡ་གྲཱྀ་བའི་ཐུགས་དམ། དུག་གསུམ༴ ཐུགས་དམ༴ ཧཱུྃ། དྲག་པོ་པདྨ༴ ཐུགས་ཀྱི་སྤྲུལ་ནས་ཕྱག་རྡོར་སྤྲུལ་པ་འགྱེད། ཡང་སྤྲུལ་ཁྲོ་བོས༴ བཛྲ་པཱ་ཎིའི་ཐུགས་དམ་དབྱིངས་ནས་བསྐུལ། དུག་གསུམ༴ ཐུགས་དམ་དུས༴ ཧཱུྃ། དྲག་པོ་པདྨ༴ ལྟེ་བའི་གནས་ནས་མཁའ་འགྲོའི་སྤྲུལ་པ་འགྱེད། །ཡང་སྤྲུལ་མཁའ་འགྲོས་སྟོང་གསུམ་འཇིག་རྟེན་ཁེངས། །དཔའ་བོ་དཔའ་མོའི་ཐུགས་དམ་དབྱིངས་ནས་བསྐུལ། །དུག་གསུམ༴ ཐུགས་དམ༴ ཧཱུྃ། དྲག་པོ་པདྨ༴ སྐུ་གསུང་ཐུགས་ལས་མེ་དབལ་སྤྲུལ་པ་འགྱེད། །ཡང་སྤྲུལ་ཁྲོ་བོས༴ ཡཀྴ།
མེ་དབལ་ཐུགས་དམ༴ དུག་གསུམ་ཤ་ཁྲག༴ ཐུགས་དམ་དུས་ལ༴ ཧཱུྃ། དྲག་པོ་པདྨ་རྡོ་རྗེ་ཐོད་ཕྲེང་རྩལ། །འགྲོ་ལ་མགོན་དང་སྐྱབས་ཀྱི་མཆོག་གྱུར་པ། །བདག་གི་སྒོ་གསུམ་དད་པས་ཁྱོད་བསྒྲུབ་ན། །དཀའ་བ་དང་བླངས་ལྗི་བ་ཁུར་དུ་འཁུར། །ལུས་སྲོག་འབེན་བཙུགས་ཤ་ཁྲག་བཟས་ལ་བོར། །མོས་གུས་གཏིང་ནས་ཁྱེད་ལ་སྐྱབས་གསོལ་ན། །ཐུགས་རྗེ་མ་ཆུང་སྔོན་གྱི་ཐུགས་དམ་དགོངས། །དུས་ངན་སྙིགས་མའི་དུས་འདིར་བདག་བསྐྱེད་ན། །ཁྱེད་ཀྱིས་ཐུགས་རྗེས་བདག་ལ་བྱིན་གྱིས་རློབས། །བདག་ནི་བླ་མེད་བྱང་ཆུབ་བསྒྲུབ་པ་ལ། །ལམ་ལ་བར་དུ་གཅོད་པའི་དགྲ་གེགས་རྣམས། །དབང་དྲག་པདྨ་འཁོར་དང་བཅས་པ་ཡིས། །ཐུགས་རྗེ་དྲག་པོའི་སྟོབས་ཀྱིས་བསྒྲལ་ནས་ཀྱང་། །གྲུ་གསུམ་མཐིང་ནག་འབར་བའི་ཞལ་དུ་སྦྱོང་། །གསུང་དབྱངས་དྲུག་ཅུར་ལྡན་པའི་མགུར་དུ་དྲིལ། །དོན་དམ་སྐྱེ་མེད་ཆོས་ཀྱི་དབྱིངས་སུ་བསྟིམ། །རྣལ་འབྱོར་བདག་གི་
འདོད་པའི་དོན་རྣམས་ནི། །དབང་དྲག་པདྨ་འཁོར་དང་བཅས་པ་ཡིས། །གྲུབ་པར་མཛོད་ཅིག་བཛྲ་ས་མ་ཡཱཿ ཞེས་བསྐུལ་ནས་གཏོར་མ་འབུལ་བའམ་ཟོར་དུ་འཕང་བ་གང་འོས་བྱ། དེ་ནས་གཏོར་གཞོང་ཆང་ཕུད་ཀྱིས་བཤལ་བར་འབྲུ་སྣ་ཅུང་ཟད་བླུག་པ་ཨོཾ་ཨཱཿཧཱུྃ་གིས་བྱིན་གྱིས་བརླབས་ཐོགས་ནས་སྔོན་གྱི་དམ་ཚིག་གི་ཆད་མོད་དང་བསྟན་སྐྱོང་བྱ་བ་ནི། ཧཱུྃ། །དུས་གསུམ་ཀུན་མཁྱེན་པདྨ་ཐོད་ཕྲེང་རྩལ། །ཡེ་ཤེས་རྩལ་གྱིས་ཁམས་གསུམ་དབང་དུ་བསྡུད། །རྫུ་འཕྲུལ་མཐུ་ཡིས་ལྷ་སྲིན་བཅུད་ལ་བོར། །གཙུག་ལག་ཁང་གི་བགེགས་ཚོགས་དམ་ལ་བཏགས། །ལྷ་སྲིན་སྡེ་བརྒྱད་ཆོས་སྐྱོང་ཆོས་སྐྱོང་སྲུང་མར་བཀོད། །མྱ་ངན་མི་འདའ་ཀུན་གྱི་གཉེན་གཅིག་པུ། །མི་མངོན་དབྱིངས་ནས་བདག་ལ་བྱིན་གྱིས་རློབས། །ཕྲིན་ལས་དགྲ་གེགས་འདུལ་བའི་དུས་ལ་བབས། །ཐུགས་དམ་ཐུགས་རྗེས་ཁམས་གསུམ་དབང་དུ་བསྡུས། ཧཱུྃ། །སྔོན་གྱི་བསྐལ་པའི་དང་པོ་ལ། །སློབ་དཔོན་པདྨ་
འབྱུང་གནས་ཀྱིས། །དམ་ལ་བཏགས་པའི་ལྷ་འདྲེ་རྣམས། །ཆོས་ཉིད་བདེན་པའི་བཀའ་ལ་ཉོན། །སློབ་དཔོན་པདྨ་ཕར་གཤེགས་པས། །མང་ཡུལ་བྱེ་མའི་རབ་ཁ་དོར། །ལྷ་སྲིན་སྡེ་བརྒྱད་དམ་ལ་བཏགས། །ང་ནི་སློབ་དཔོན་རྒྱུད་འཛིན་ཡིན། །ཁྱེད་ནི་ལྷ་འདྲེ་དམ་ཅན་ཡིན། །སྔོན་ཚེ་ཁས་བླངས་བཀའ་མ་བཅག །ད་ལྟ་རིག་འཛིན་དམ་ལ་འདའ། །རྒྱན་གྱི་གཏོར་མ་འདི་བཞེས་ལ། །བཀའ་དང་དམ་ལས་མ་འདའ་ཅིག །གཙང་གི་གན་ས་ཆུ་མིག་ཏུ། །དགེ་བསྙེན་ཐམས་ཅད་དམ་ལ་བཏགས། །ང་ནི་སློབ་དཔོན་རྒྱུད་འཛིན་ཡིན། །ཁྱོད་ནི་ལྷ་འདྲེ་དམ་ཅན་ཡིན། །སྔོན་ཚེ་ཁས་བླངས་བཀའ་མ་བཅག །ད་ལྟ་རིག་འཛིན་དམ་ལ་འདའ། །རྒྱན་གྱི་གཏོར་མ་འདི་བཞེས་ལ། །བཀའ་དང་དམ་ལས་མ་འདའ་ཞིག །གནུབས་ཀྱི་རུ་ཐོག་བྲག་དམར་དུ། །དྲི་ཟ་ཕོ་མོ་དམ་ལ་བཏགས། ང་ནི་སློབ་དཔོན༴ ཁྱོད་ནི༴ སྔོན་ཚེ༴ ད་ལྟ༴ རྒྱན་གྱི༴
བཀའ་དང་། གཡུ་མཚོ་ཕྱུག་མོའི་ནང་ཤེད་ན། ཕོ་རྒྱུད་ཐམས་ཅད་དམ་ལ་བཏགས། ང་ནི༴ བྱང་འབྲོག་གྲ་ཡི་རྫ་མགོ་དེར། ལྷ་བཙན་ཕོ་མོ་དམ༴ མལ་གྲོ་ཀུན་གྱི་རྒྱ་མཚོ་དེར། ཀླུ་རིགས་ཐམས་ཅད་དམ་པ་བཏགས། རོང་མདོ་ལུང་པ་ནག་པོ་དེར། སྲིན་པོ་ཕོ་མོ༴ རོ་ཧ་ལུང་པ་ཁྲ་མོ་དེར། མ་ཡམ་ཐམས་ཅད༴ སིལ་མ་གཙང་གི་གངས་དཀར་དེར། སྨན་དང་ལྷ་སྨན་དམ༴ ཁ་རི་གངས་ཀྱི་ལྷོ་བྲག་ཏུ། བསྟན་མ་བཅུ་གཉིས་དམ༴ གཙང་གི་ཁ་རག་གཡའ་མིག་ཏུ། འབྲོག་མོ་ཐམས་ཅད་དམ༴ བསམ་ཡས་དབུ་རྩེ་རིས་གསུམ་དུ། རྒྱལ་པོ་ཐམས་ཅད་དམ་ལ་བཏགས། ཁམས་ཀྱི་གླ་བ་རྐང་གཅིག་ཏུ། །ཐེའུ་རང་ཐོད་དམ་ལ་བཏགས། ང་ནི་སློབ་དཔོན༴ ཁྱོད་ནི་ལྷ་འདྲེ། སྔོན་ཚེ༴ ད་ལྟ་རིག་འཛིན། རྒྱན་གྱི༴ བཀའ་དང་དམ་ལས༴ རྣལ་འབྱོར་བསམ་པ་སྒྲུབ་ཏུ་གསོལ།
ཅེས། བཤལ་ཆུ་དེ་ལ་སྨན་རག་འཐོར་ནས་ནམ་མཁར་གཏོར། སླར་ཡང་གཏོར་གཞོང་ཁ་སྤུབ་པའི་འོག་ཏུ་དམ་སྲེ་བཀུག་ཅིང་རྟ་བྲོས་མནན་པ་ནི། གཏོར་མ་འབུལ་བའི་སྐབས་གཏོར་མནན་འདི་ཡི་དགོས་ཀྱང་། གཏོར་མ་ཟོར་དུ་འཕང་བ་ཡིན་ན། ཚུར་ལམ་སྒོ་ཁང་འོག་གམ། ལམ་རྒྱ་གྲམ་ལྟ་བུར་གཏོར་གཞོང་གང་ཡོད་རྣམས་ཁ་སྤུབ་ཏུ་བརྩེགས་པའི་འོག་ཏུ་ཨེ་གྲུ་གསུམ་ནག་པོ་གཏིང་གཏིང་རིང་མཐའ་མེད་དུ་གནོད་བྱེད་དམ་སྲི་ཐམས་ཅད་བཅུག་པར་བསམ་ཞིང་། ན་མོ། དཀོན་མཆོག་གསུམ་གྱི་བཀའ་བདེན་པ་ཆེན་པོའི་ནུས་སྟོབས་ཀྱིས། བདག་གིས་དམ་པའི་ཆོས་སྒྲུབ་པ་ལ་བར་དུ་གཅོད་པའི་དམ་སྲི་འབྱུང་པོ་གང་ཡིན་པ་དེ་དག་ཐམས་ཅད་གཏོར་གཞོང་རི་རབ་ཆེན་པོའི་འོག་ཏུ་ཁུག་ཛཿདེ་ནས་རང་ཉིད་ཁྲོ་རྒྱལ་ཡཀྴ་མེ་དབལ་མཐིང་ནག་རབ་འཇིགས་ཁྲོ་ཚོགས་སྤྲུལ་པ་བུ་ཡུག་འཚུབ་པ་ལྟ་བུར་གསལ་བའི་གཡས་རྒྱ་གྲམ་གཡོན་རི་རབ་བསྣམས་པས་དམ་སྲི་འབྱུང་པོའི་ཚོགས་རྣམས་གྲུ་གསུམ་མཐིང་ནག་དྲག་པོའི་བཙོན་ཁང་དེར་བཅུག་པའི་ཁ་རྡོ་རྗེ་རྒྱ་གྲམ་གྱིས་བཅད་ཅིང་རི་རབ་གྱིས་
མནན་པའི་སྟེང་ན་ཁྲོ་ཚོགས་རྣམས་རྡོ་རྗེའི་བྲོ་བརྡུང་བར་དམིགས་ཅིང་། ཧཱུྃ། གྲུ་གསུམ་མཐིང་ནག་དཀྱིལ་འཁོར་དུ། །དགྲ་གེགས་བསྒྲལ་བའི་ཚོགས་བརྒྱད་ལ། །ཁྲོ་བོ་ཆེན་པོས་བྲོ་བརྡུངས་སྟེ། །དམ་སྲི་འབྱུང་པོ་ཕྱེ་མར་རླག །སྐུ་མདོག་མཐིང་ནག་ཡ་ལ་ལ། །གཏི་མུག་མུན་པ་སེལ་བའི་རྟགས། །སྟག་གི་ཤམ་ཐབས་ང་རྒྱལ་འདུལ། །སྦྲུལ་གྱི་ཆུན་པོས་ཞེ་སྡང་འདུལ། །གཡས་བརྐྱང་གཡོན་བསྐུམ་དྲག་པོས་གཟིར། །མཆེ་གཙིགས་སྣང་སྲིད་ལྷ་འདྲེ་འདུལ། །རྐང་པ་གཡས་པས་བྲོ་བརྡུངས་པས། །རྣལ་འབྱོར་ཕོ་སྲི་འདུལ་བའི་བྲོ། །རྐང་པ་གཡོན་པས་བྲོ་བརྡུངས་པས། །རྣལ་འབྱོར་མོ་སྲི་འདུལ་བའི་བྲོ། །རྐང་གཉིས་ཐབས་སྲི་བྲོ་བརྡུངས་པས། །ཆེ་སྲི་ཆུང་སྲི་འདུལ་བའི་བྲོ། །དཔའ་བོའི་བྲོ་བརྡུངས་ཁྲིགས་སེ་ཁྲིག །དཔའ་མོས་གླུ་ལེན་ཀྱུ་རུ་རུ། །སྟབས་ཀྱི་གར་བྱེད་ཁྱུགས་སེ་ཁྱུག །སྡང་བའི་དགྲ་དང་གནོད་པའི་བགེགས། །མནན་ནོ་དེ་ནི་མ་ལྡང་
ཅིག །བཅིང་ངོ་དེ་ནི་མ་གྲོལ་ཅིག །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །གནོད་བྱེད་ཐམས་ཅད་རྡུལ་དུ་རློག །ཨོཾ་སུམྦྷ་ནི་སུམྦྷ་ཧཱུྃ། གྲྀ་ཧྣ་གྲྀ་ཧྣ་ཧཱུྃ། གྲྀ་ཧྣ་པ་ཡ་གྲྀ་ཧྣ་པ་ཡ་ཧཱུྃ། ཨ་ན་ཡ་ཧོཿ བྷ་ག་ཝཱན། བཛྲ་བི་དྱཱ་རཱ་ཛ་ཡ་ཧཱུྃ་ཕཊཿ དེ་ནས་གཏོར་གཞོང་རྣམས་ཡར་ལ་ཁ་ཕྱེས་པས་སྒྲུབ་པ་པོའི་ཚེ་བསོད་དཔལ་འབྱོར་ཐམས་ཅད་ཟླ་བ་ཡར་གྱི་ངོ་བཞིན་འཕེལ་བར་བསམ་མོ། །དེ་ནས་དཀྱིལ་འཁོར་གྱི་ལྷ་ཚོགས་ལ་ཉེས་བྱས་བཤགས་ཅིང་བསྔོ་སྨོན་ཤིས་བརྗོད་བསྡུ་ཆོག་བྱ་བའི་ལས་རིམ་ནི། ཧཱུྃ། །གུ་རུའི་ཐུགས་རྗེའི་བདག་ཉིད་དགོངས་སུ་གསོལ། །བདག་ཅག་དུས་མཐའི་སེམས་ཅན་རྨོངས་པའི་བུ། །ཆོ་ག་ལྷག་ཆད་འགལ་འཁྲུལ་ཉེས་ཚོགས་ཀུན། །བཟོད་བཞེས་ཚངས་པར་རྩལ་ཞིང་བྱིན་གྱིས་རློབས། ཡིག་བརྒྱ་བརྗོད། ཧཱུྃ། བདག་གིས་པདྨ་དྲག་པོ་སྒྲུབ་པ་ཡི། །དགེ་བ་འདིས་མཚོན་འཁོར་འདས་ལམ་
གསུམ་གྱི། །དགེ་རྩས་མཁའ་མཉམ་འགྲོ་བ་མ་ལུས་པ། །བླ་མ་དྲག་པོའི་གོ་འཕང་ཐོབ་ཕྱིར་བསྔོ། །བདག་ཀྱང་འཁོར་བའི་མཐའ་མཉམ་དེ་སྲིད་དུ། །རྣམ་འཕྲུལ་རྒྱ་མཚོས་འགྲོ་བ་འདྲེན་བྱེད་ཅིང་། །བསྟན་ལ་གནོད་པའི་བདུད་སྡེ་དཔུང་བཅས་ཀུན། །རྡུལ་དུ་རློག་པའི་ཕྲིན་ལས་མངའ་བརྙེས་ཤོག ཧཱུྃ། །བླ་མ་རྒྱལ་བ་རྒྱ་མཚོ་མ་ལུས་པའི། །ཐུགས་རྗེའི་ནུས་སྟོབས་གཅིག་ཏུ་བསྡུས་པའི་སྐུ། ཁམས་གསུམ་ཟིལ་གནོན་པདྨ་དྲག་པོ་རྩལ། །བྱིན་རླབས་བཀྲ་ཤིས་ཆར་རྒྱུན་གནས་འདིར་སྩོལ། །གུ་རུའི་སྐུ་གསུང་ཐུགས་ཡོན་ཕྲིན་ལས་སྤྲུལ། །འཇམ་དཔལ་རྟ་མཆོག་གསང་བདག་མཁའ་འགྲོ་ལྔ། །མེ་དབལ་ཁྱུང་ཆེན་ལྕགས་སྡིག་ཁྲོ་ཚོགས་ཀྱི། །དངོས་གྲུབ་བཀྲ་ཤིས་ཆར་རྒྱུན་གནས་འདིར་སྩོལ། །ཡང་སྤྲུལ་ཁྲོ་ཚོགས་དཔའ་བོ་མཁའ་འགྲོ་དང་། །ཆོས་སྲུང་བཀའ་སྡོད་དམ་ཅན་རྒྱ་མཚོ་རྣམས། །དམ་མེད་ཚར་གཅོད་དམ་ལྡན་བུ་བཞིན་སྐྱོངས།
ཕྲིན་ལས་བཀྲ་ཤིས་ཆར་རྒྱུན་གནས་འདིར་སྩོལ། ཞེས་དང་། །གཞན་ཡང་བཀྲ་ཤིས་ཀྱི་ཚིགས་སུ་བཅད་པ་རྒྱས་པར་བརྗོད། །ཆོས་དབྱིངས་སྐྱེ་མེད་ཀློང་མ་འགག་མེད་གདངས། །ཡེ་ཤེས་སྒྱུ་མར་སྣང་བའི་ལྷ་ཚོགས་རྣམས། །སླར་ཡང་ཆོས་དབྱིངས་ཐིག་ལེ་ཉག་གཅིག་དང་། །ཁྱབ་གདལ་ཀུན་བཟང་ཆོས་སྐུར་ཨེ་མ་ཧོ། ཞེས་པས། སྣོད་བཅུད་གཞལ་ཡས་ལྷ་དང་བཅས་པའི་བཀོད་སྤྲུལ་ཐམས་ཅད་བདག་ཉིད་ཀྱི་ཐུགས་སྲོག་ཧཱུྃ་ལ་བསྡུ་ཞིང་ཧཱུྃ་ཡང་གྱེན་རྫོགས་སུ་ཐིག་ལེ་ནཱ་དའི་བར་དུ་སྤྲིན་ནམ་མཁར་ཡལ་བ་བཞིན་དམར་པོར་གྱུར་ནས། སྣང་སྲིད་ཐམས་ཅད་འོད་དམར་པོར་ཆམ་གདལ་བའི་ངང་དུ་འདས་མ་འོངས་ད་ལྟར་གྱི་རྟོགས་པ་མཐའ་དག་གཉིད་སད་པའི་རྨི་ལམ་བཞིན་ཡེ་གྲོལ་བློ་འདས་ཆེན་པོར་གློད་ཅིང་། སླར་ཡང་འོད་དམར་གྱི་ཀློང་ནས་བདག་ཉིད་པདྨ་དྲག་པོའི་སྐུར་ལམ་གྱི་ཤར་བར་མོས་ལ་སྤྱོད་ལམ་ཐམས་ཅད་པདྨ་དྲག་པོའི་དཀྱིལ་འཁོར་གསུམ་དང་མ་བྲལ་བར་བྱའོ།། ༈ །།རྒྱལ་བའི་དཀྱིལ་འཁོར་རབ་འབྱམས་མཐའ་ཡས་ཀུན། །རིགས་འདུས་བླ་མ་ཁོ་ནའི་རོལ་པ་ཉིད། །གང་གིས་བླ་མ་བསྒྲུབ་ལ་རབ་བརྩོན་ན།
དེ་ཡིས་རྒྱལ་བའི་དཀྱིལ་འཁོར་ཀུན་འགྲུབ་འགྱུར། །བླ་མའི་བླ་མ་ཁྱབ་བདག་ཐོད་ཕྲེང་རྩལ། །འདི་ནི་སངས་རྒྱས་ཀུན་གྱི་ཕྲིན་ལས་པ། །དེ་སྒྲུབ་བསྙེན་ཅིང་མཆོད་བསྟོད་གསོལ་འདེབས་དང་། །དད་ཅིང་མོས་པ་ཙམ་ལའང་བྱིན་རླབས་འཇུག །སྙིགས་དུས་བདུད་དང་འབྱུང་པོ་མ་རུངས་པས། །དམ་ཆོས་དགེ་བ་བསྒྲུབ་ལ་བར་དུ་གཅོད། །དེ་ཉིད་གཉེན་པོའི་ལྷ་མཆོག་འདི་ཉིད་ལ། །ཡིད་གཉིས་སོམ་ཉི་སྤངས་ནས་སུས་བསྒྲུབས་པ། །བར་ཆད་ཀུན་ཞི་བསམ་པའི་དོན་རྣམས་འབྱུང་། །གདུག་པ་ཟིལ་ནོན་ལྷ་སྲིན་བྲན་ལྟར་ཉན། །མཆོག་གི་གོ་འཕང་བདེ་བླག་འགྲུབ་གྱུར་ན། །ཐུན་མོང་དངོས་གྲུབ་འབད་མེད་སྨོས་ཅི་དགོས། །དེ་ཕྱིར་གཏན་འདུན་དོན་གཉེར་སྐལ་བཟང་དག །ལྷ་དང་བླ་མ་དབྱེར་མེད་འདི་བསྒྲུབ་ནས། །གནས་སྐབས་ལས་ཚོགས་ཕྲ་མོ་མ་ཡིན་པར། །ཚེ་གཅིག་བྱང་ཆུབ་མཆོག་དོན་སྒྲུབ་འཚལ་ལོ།། ༈ །།གུ་རུ་པདྨ་དྲག་པོ་རྩལ་གྱི་བསྒྲུབ་བསྐོར་གཏེར་ཁ་གོང་འོག་ཐམས་ཅད་ནས་རྒྱས་བསྡུས་ཇི་སྙེད་བསམ་གྱིས་མི་ཁྱབ་པ་ཞིག་མཆིས་མོད་ཀྱང་། འདིར་མངའ་བདག་རིན་པོ་ཆེའི་གཏེར་ཁ་ལས་བྱོན་པའི་དྲག་པོ་བདེར་གཤེགས་
འདུས་བ་ལ་ཕྲིན་ལས་ལས་བྱང་གི་རིམ་པ་དྲིན་ཆགས་སུ་བགྱིས་གཞིག་མི་འདུག་པས། རྒྱུན་ཁྱེར་ལྟས་ཆོག་མ་ཞིག་ཡི་གེར་འཁོད་པ་གྱིས་ཤིག་ཅེས། མདོ་ཁམས་རྒྱ་སྟོན་གྱི་ཕྱོགས་སུ་གསང་སྔགས་ཀྱི་བསྟན་པ་དྲི་མ་མེད་པ་འཛིན་སྐྱོང་སྤེལ་བའི་བདག་པོ་མཚུངས་པ་མེད་པའི་ཆོས་ཀྱི་རྒྱལ་པོ་ཆོས་ཀྱི་རྗེ་ཆོས་ཀྱི་སྤྱན་ལྡན་ངག་དབང་བསྟན་སྐྱོང་དཔལ་བཟང་པོའི་མཚན་གྱི་གྲགས་དཀར་སྲིད་རྩེར་ཁྱབ་པ་གང་གི་བཀས་རིང་མོ་ཞིག་ནས་བསྐུལ་བར་མཛད་པ་བཞིན། བརྒྱལ་དབང་པདྨའི་གུ་ལ་བྱར་གཏོགས་པའི་བཙུན་པ་མཁས་མཆོག་པདྨ་ལེགས་གྲུབ་རྩལ། མིང་གཞན་སྣ་ཚོགས་རང་གྲོལ་དུ་བོད་པ་དེས་ཆུ་བོ་གསེར་ལྡན་གཡས་སུ་འཁྱིལ་བའི་ངོགས་ཀྱི་སྒྲུབ་གྲ་ཀུན་བཟང་ཆོས་གླིང་གི་ཡང་དབེན་འཚམས་མལ་དུ་བཀོད་པ་ཕྱོགས་དུས་ཀུན་ཏུ་དགེ་བར་གྱུར་ཅིག །བཀྲ་ཤིས། གཅིག་ཞུད།