སྨིན་གྲོལ་མན་ངག་གི་བླ་མ་བརྒྱུད་པའི་རིམ་པ་བསྟན་པ།
༈ གསུམ་པ་སྨིན་གྲོལ་མན་ངག་གི་བླ་མ་བརྒྱུད་པའི་རིམ་པ་ནི། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། རིག་འཛིན་ལུང་རིག་གླིང་པ། འགྱུར་མེད་བློ་གྲོས་མཐའ་ཡས། ཀེ་འཕན་བླ་མ་ཁྱེའུ་ཐར། གཡུ་རོང་བླ་མ་རིག་འཛིན་རྒྱ་མཚོ། གར་དབང་རྒྱལ་མཆོག་གླིང་པའམ་སྟོབས་ལྡན་རྟ་ཁྱུང་རོལ་པའི་རྡོ་རྗེ། མཆོག་སྤྲུལ་རྟ་ཁྱུང་རིན་པོ་ཆེས་རིམ་པ་བཞིན་ཡ་ཆེན་ཨོ་རྒྱན་བསམ་གཏན་ཆོས་གླིང་། གཡུ་མཁར་ཐེག་ཆེན་ཆོས་འཁོར་གླིང་། གཡུ་རོང་བསྐོས་ལེགས་དགོན་ཚོགས་གཉིས་གོང་འཕེལ་གླིང་རྣམས་སུ་འདུས་པའི་སྡེ་དུ་མར་གཏེར་ཆོས་ཡོངས་རྫོགས་ཀྱི་དབང་ལུང་མན་ངག་ཐེངས་གསུམ་དུ་སྤེལ་བར་མཛད་དོ།། སླར་སྨྲས་པ། ཡེ་ཤེས་རྡོ་རྗེའི་སྐུ་ཡིས་བྱིན་གྱིས་བརླབས། །ནམ་མཁའི་རྡོ་རྗེའི་གསུང་གི་ལུང་བསྟན་ཐོབ། །བྱང་ཆུབ་རྡོ་རྗེའི་ཐུགས་ཀྱིས་རྗེས་སུ་བཟུང་། །སྤྲུལ་པའི་གཏེར་སྟོན་ཆེན་པོ་སླར་ཡང་དྲན། །མདོ་ཁམས་གཡུ་ལུང་ས་ཡི་ཐིག་ལེ་རུ། །མགོན་ཁྱོད་མཚན་དཔེའི་མེ་ཏོག་བཞད་དང་ལྷན། །ངེས་གསང་སྙིང་པོའི་བསྟན་པ་ཆེར་རྒྱས་པའི། །གྲགས་པའི་དུང་སྒྲ་ད་དུང་སྲིད་ན་སྙན། །གང་སྐུ་ཞི་བར་གཟིམ་པའི་ཚུལ་བསྟན་ཀྱང་། །དགོངས་གཏེར་ཆོས་མཛོད་ཐང་མར་བརྡལ་བ་ཡི། །ཕྲིན་ལས་སྣང་བས་ནོར་འཛིན་མཛེས་བྱས་པའི། །གཞལ་དུ་མེད་པའི་བཀའ་དྲིན་སྙིང་ལ་ལྕི། །གྲགས་ཕྱིར་མ་ཡིན་རྙེད་པ་འཐོབ་ཕྱིར་མིན། །གཞན་ལ་ཕན་པའི་བསམ་པ་ཡོད་མིན་ཀྱང་། །དགོངས་གཏེར་ཟབ་མོ་ཕྱོགས་གཅིག་བསྡུ་བའི་ཁུར། །ལས་དང་སྨོན་ལམ་དབང་གིས་བདག་ལ་ཐོབ། །སྲིད་པའི་གཡུལ་ངོ་བཟློག་པའི་དུས་བབ་ཆོས། །ཉེ་བརྒྱུད་གཏེར་ཀྱི་བྱིན་ནུས་བླ་ན་མེད། །སྤྲིན་བྲལ་ཉི་མ་བྱེ་བའི་གཟི་དཔལ་ཅན། །མི་ནུབ་སྲིད་མཐའི་བར་དུ་གསལ་གྱུར་ཅིག །
འདིར་འབད་རྣམ་པར་དཀར་བའི་དགེ་བས་མཚོན། །དུས་གསུམ་བསགས་པའི་ལེགས་བྱས་ཉལ་འགྲོའི་རྒྱུན། །དམིགས་བྲལ་འཁོར་གསུམ་དག་པའི་རྒྱས་གདབ་ནས། །ཆོས་དབྱིངས་གདོད་མའི་རྒྱ་མཚོར་ཀུན་ནས་བསྡོམས། །ཟབ་ཆོས་འདི་ཉིད་ཕྱོགས་གཅིག་བསྡུས་པའི་དགེས། །རྒྱལ་བསྟན་དར་རྒྱས་བསྟན་འཛིན་ཞབས་པད་བརྟན། །སྐྱེ་དགུ་བདེ་ཞིང་ནད་མུག་མཚོན་འཁྲུག་ཞི། །རྫོགས་ལྡན་གསར་བའི་དགའ་སྟོན་མངོན་གྱུར་ཅིག །བརྒྱུད་གསུམ་བླ་མའི་བྱིན་རླབས་སྤྲིན་ཕུང་འཁྲིགས། །ཡི་དམ་ཌཱཀྐིས་དངོས་གྲུབ་སྦྲང་ཆར་འབེབས། །ཆོས་སྐྱོང་སྲུང་མས་ཐོགས་མེད་ཕྲིན་ལས་བསྒྲུབ། །ཟབ་གཏེར་བསྟན་པ་དར་ཞིང་རྒྱས་གྱུར་ཅིག །ཞེས་རིག་འཛིན་ལུང་རིག་གླིང་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཆེན་པོའི་དཀར་ཆག་ཨུཏྤལ་ཕྲེང་བ་ཞེས་བྱ་བ་འདི་ནི་གཡུ་ཁོག་ཡི་དམ་རྡོ་རྗེར་འབོད་པས་གཏེར་ཆོས་ཡོངས་རྫོགས་རྩིས་འཕྲུལ་དུ་ཕབ་བསྡུ་ཞུ་དག་བཅས་གཅིག་ལྕོགས་སུ་བགྱི་བའི་ཞོར་དུ་བྲིས་ནས་ལྕགས་བྱི་ས་ག་ཟླ་བའི་དཀར་ཕྱོགས་དགའ་བ་དང་པོའི་ཉིན་མཇུག་གྲུབ་པར་བགྱིས་པ་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག ། དགེའོ།། དགེའོ༎ དགེའོ༎