བླ་མ་གུ་རུ་པདྨ་མཚན་བརྒྱད་ཀྱི་སྒྲུབ་ཐབས་པད་དཀར་ཕྲེང་མཛེས།

དམ་ཆོས་ཡང་ཟབ་པདྨའི་ཐུགས་ཐིག་ལསཿ བླ་མ་གུ་རུ་པདྨ་མཚན་བརྒྱད་ཀྱི་སྒྲུབ་ཐབས་པད་དཀར་ཕྲེང་མཛེས་བཞུགས༔

གུ་རུ་པདྨ་ཀཱ་ར་ན་མསྫ་ཡ་སིདྡྷི་ཧཱུྃ༔ རང་བྱུང་པདྨའི་སྡོང་པོར་ལེགས་འཁྲུངས་ཤིང་༔ རྒྱུ་རྐྱེན་ཀུན་བྲལ་མི་ཤིགས་རྡོ་རྗེའི་སྐུ༔ དུས་གསུམ་རྒྱལ་བ་ཀུན་དང་དབྱེར་མེད་པ༔ བླ་མ་མཚུངས་མེད་ཐོད་ཕྲེང་རྩལ་ལ་འདུད༔ བདག་འདྲ་བུད་མེད་མཁར་ཆེན་མཚོ་རྒྱལ་གྱིས༔ བླ་མ་ཀུན་འདུས་ཨོ་རྒྱན་སྒྲུབ་ཐབས་གཅིག༔ མ་འོངས་སྐལ་ལྡན་དོན་དུ་ལེགས་པར་སྤེལ༔ ཉམས་སུ་ལོངས་དང་འདི་ཕྱིའི་དོན་ཀུན་འགྲུབ༔ ས་མ་ཡཱ༔ རྒྱ་རྒྱ་རྒྱ༔ མཐུན་རྐྱེན་ཚང་ལ་འགལ་རྐྱེན་མེད་པའི་གནས༔ ཡོ་བྱད་འཛོམས་ཤིང་དུས་ཚེས་དགེ་བ་རུ༔ དཀྱིལ་འཁོར་བློ་དང་བསྟུན་པར་རྡུལ་ཚོན་ནམ༔ རས་བྲིས་ཚོམ་བུ་གང་འདོད་རིག་པས་དཔྱད༔ དབུས་སུ་ཨོ་རྒྱན་སྐུ་འབག་ཡིད་བཞིན་ནོར༔ ལེགས་པར་བཀྲམ་མདུན་བུམ་པ་ཉེར་ལྔས་བཀང་༔ ཁ་རྒྱན་མགུལ་ཆིངས་གཟུངས་ཐག་ལྡན་པ་བཤམས༔ ཤར་དུ་བླ་མའི་གཏོར་མ་འདབ་བརྒྱད་པ༔ དར་ཟབ་འཕན་དང་དཀར་མངར་རྒྱན་དང་བཅས༔ ལྷོ་རུ་ཨོ་རྒྱན་རྣམ་ཐར་རྒྱས་བསྡུས་ཀྱི༔ གླེགས་བམ་ནུབ་ཏུ་རྡོ་རྗེ་བྱང་དྲིལ་བུ༔ སྨན་རཀ་ཉེར་སྤྱོད་བཅས་བཤམས་བག་ཕབ་ནས༔ བདེ་བའི་གདན་ལ་སྐྱིལ་ཀྲུང་དད་མོས་དང་༔ ངེས་འབྱུང་གཞན་ཕན་བློ་དང་མ་བྲལ་བས༔ མདུན་མཁར་ཨོ་རྒྱན་བླ་མ་རྩ་གསུམ་ལྷ༔ ཚོགས་ཀྱི་ཞིང་དུ་དམིགས་ལ་སྦྱོར་བའི་ཆོས༔ བརྒྱད་ལས་དང་པོ་སྐྱབས་སུ་འགྲོ་བ་ནི༔ ཧྲཱིཿ དུས་གསུམ་བདེ་གཤེགས་ཀུན་འདུས་གུ་རུའི་ཐུགས༔ ཐེག་གསུམ་དམ་ཆོས་ཀུན་འདུས་གུ་རུའི་གསུང་༔ བསླབ་གསུམ་དགེ་འདུན་ཀུན་འདུས་གུ་རུའི་སྐུ༔ མཆོག་གསུམ་ཀུན་འདུས་བླ་མར་སྐྱབས་སུ་མཆི༔ གཉིས་པ་སེམས་བསྐྱེད་པ་ནི༔ ཧྲཱིཿ དེང་བཟུང་བྱང་ཆུབ་སྙིང་པོ་མ་ཐོབ་བར༔ འགྲོ་ཀུན་དོན་དུ་བྱང་ཆུབ་སེམས་གཉིས་བསྐྱེད༔ བསླབ་བྱ་ཚད་མེད་བཞི་དང་ཕར་ཕྱིན་དྲུག༔ གོང་ནས་གོང་དུ་སྤེལ་བར་དམ་བཅའ་འོ༔ གསུམ་པ་ཚོགས་བསགས་ཡན་ལག་བཅུ་པ་ནི༔ ཧྲཱིཿ མཆོག་གསུམ་ཀུན་འདུས་ཨོ་རྒྱན་པདྨ་ལ༔ སྒོ་གསུམ་གུས་པས་ཕྱག་འཚལ་སྐྱབས་སུ་མཆི༔ ལུས་ངག་ཡིད་གསུམ་ཕྱི་ནང་མཆོད་པ་འབུལ༔ དུག་གསུམ་དབང་གྱུར་ཉམས་ཆག་ཉེས་ལྟུང་བཤགས༔ སྐྱེ་འཕགས་དགེ་ལ་སྙིང་ནས་ཡི་རང་ངོ་༔ ཐེག་གསུམ་ཟབ་རྒྱས་ཆོས་འཁོར་བསྐོར་བར་བསྐུལ༔ ཁམས་གསུམ་འདྲེན་ཕྱིར་མྱ་ངན་མི་འདའ་བཞུགས༔ དུས་གསུམ་དགེ་ཚོགས་བྱང་ཆུབ་ཆེན་པོར་བསྔོ༔ དེ་ནས་ཚོགས་ཞིང་རང་ལ་བསྡུ་བྱ་ཞིང་༔ བཞི་པ་བགེགས་ལ་བཀའ་བསྒོ་བ༔ ཧཱུྃ་ཧྲཱིཿ དང་པོ་མ་རིག་དབང་གིས་གཉིས་སུ་བཟུང་༔ བར་དུ་ཁམས་གསུམ་འཁོར་བར་འཁྱམས་ཤིང་བརྒྱུད༔ ཐ་མ་རང་བྱུང་ཆོས་སྐུའི་རང་ཞལ་སྒྲིབ༔ དེ་དག་རྒྱུ་རྐྱེན་སེམས་དང་སེམས་བྱུང་འདྲེ༔ ཡེ་དག་གྲོལ་གཞི་གདོད་མའི་དབྱིངས་སུ་དེངས༔ ཧཱུྃ་བཞིའི་སྔགས་བརྗོད་ཡུངས་ཐུན་བྲབ༔ ལྔ་པ་མཚམས་གཅོད་ནི༔ ཧྲཱིཿ ཕྱི་མཚམས་མི་ཤིགས་རྡོ་རྗེ་བསྲུང་བའི་གུར༔ ནང་མཚམས་རང་བྱུང་རིག་སྟོང་འདུས་མ་བྱས༔ གསང་མཚམས་འཁོར་འདས་མཉམ་ཉིད་ལྟ་བའི་ངང་༔ འཁྲུལ་རྟོག་འབྱུང་པོས་ནམ་ཡང་གླགས་མི་རྙེད༔ བཛྲ་རཀྵ་རཀྵ་བྷྲུཾ༔ དྲུག་པ་མཆོད་རྫས་བྱིན་བརླབ་ནི༔ ཧཱུྃ་ཧྲཱིཿ དངོས་བཤམས་སྨན་གཏོར་རཀྟ་ཉེར་སྤྱོད་ལྔ༔ མཁའ་ལས་རང་བྱུང་རཾ་ཡཾ་ཁཾ་གསུམ་སྤྲོས༔ བསྲེགས་གཏོར་སྦྱངས་བཀྲུས་ཡོངས་དྭངས་ཨོཾ་ཨཱཿཧཱུྃ༔ དཀར་དམར་མཐིང་གསུམ་བདུད་རྩིའི་རྣམ་པར་གྱུར༔ རཾ་ཡཾ་ཁཾ༔ ཨོཾ་ཨཱཿཧཱུྃ་ཨརྒྷཾ་སོགས་ནས་ཤཔྟ་ཨ་མྲྀ་ཏ་མ་ཧཱ་རཀྟ་བྷ་ལིང་པཱུ་ཛ་ཨཱཿཧཱུྃ༔ བདུན་པ་བྱིན་འབེབས་ནི༔ ཧྲཱིཿ ཆོས་དབྱིངས་སྤྲོས་བྲལ་གདོད་མའི་ཕོ་བྲང་ནས༔ ཀུན་བཟང་ཆོས་སྐུའི་བླ་མས་བྱིན་ཕོབ་ཅིག༔ མ་འགགས་ངེས་པ་ལྔ་ལྡན་གཞལ་ཡས་ནས༔ ལོངས་སྤྱོད་རྫོགས་སྐུ་རིགས་ལྔས་བྱིན་ཕོབ་ཅིག༔ དཔལ་རི་པདྨ་འོད་ཀྱི་ཕོ་བྲང་ནས༔ སྤྲུལ་སྐུ་པདྨ་འབྱུང་གནས་བྱིན་ཕོབ་ཅིག༔ བཅུ་དྲུག་དགའ་བཞི་བདེ་སྟོང་ཕོ་བྲང་ནས༔ རྒྱལ་ཡུམ་མནྡྷ་ར་བས་བྱིན་ཕོབ་ཅིག༔ ཐུགས་ཀྱི་རིག་འཛིན་བཛྲ་ཐོད་ཕྲེང་རྩལ༔ གུ་རུ་པདྨ་འབྱུང་གནས་བྱིན་ཕོབ་ཅིག༔ ཡོན་ཏན་རིག་འཛིན་རཏྣ་ཐོད་ཕྲེང་རྩལ༔ གུ་རུ་ཉི་མ་འོད་ཟེར་བྱིན་ཕོབ་ཅིག༔ གསུང་གི་རིག་འཛིན་པདྨ་ཐོད་ཕྲེང་རྩལ༔ གུ་རུ་པདྨ་རྒྱལ་པོས་བྱིན་ཕོབ་ཅིག༔ ཕྲིན་ལས་རིག་འཛིན་ཀརྨ་ཧེ་རུ་ཀ༔ གུ་རུ་སེང་ཧ་གནྚེས་བྱིན་ཕོབ་ཅིག༔ བླ་མེད་རིག་འཛིན་དྷ་ན་སཾ་ཀྲྀ་ཏ༔ གུ་རུ་པདྨ་སམྦྷས་བྱིན་ཕོབ་ཅིག༔ ཡོན་ཏན་རིག་འཛིན་དྲི་མེད་བཤེས་གཉེན་དངོས༔ གུ་རུ་བློ་ལྡན་མཆོག་སྲེད་བྱིན་ཕོབ་ཅིག༔ མཆོད་བསྟོད་རིག་འཛིན་ཟླ་གསང་ཐིག་ལེ་རྩལ༔ གུ་རུ་ཤཱཀྱ་སེང་གེས་བྱིན་ཕོབ་ཅིག༔ དྲག་སྔགས་རིག་འཛིན་ཤནྟིཾ་གརྦྷ་རྩལ༔ གུ་རུ་རྡོ་རྗེ་གྲོ་ལོད་བྱིན་ཕོབ་ཅིག༔ གཞན་ཡང་རྩ་གསུམ་དམ་ཅན་རྒྱ་མཚོའི་ཚོགས༔ སྐུ་གསུང་ཐུགས་ཀྱི་བྱིན་ཆེན་དབབ་ཏུ་གསོལ༔ ཡེ་ཤེས་ལྔ་ཡི་དབང་ཆེན་བསྐུར་དུ་གསོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡཱ་ཨ་བེ་ཤ་ཡ་ཨ་ཨཱཿ བརྒྱད་པ་བཤགས་པ་ནི༔ ཧྲཱིཿ བདག་ཅག་མ་རིག་ལུས་ངག་ཡིད་གསུམ་དང་༔ དུག་གསུམ་རྒྱུ་ལས་བསྐྱེད་པའི་ཉེས་ལྟུང་ཚོགས༔ རྩ་གསུམ་ལྷ་ཚོགས་སྤྱན་སྔར་མཐོལ་ལོ་བཤགས༔ ཉམས་ཆག་དག་ནས་ཚངས་པའི་དངོས་གྲུབ་སྩོལ༔ བཛྲ་ས་མ་ཡཱ་ཤུདྡྷེ་ཨཱ༔ དངོས་གཞི་བརྒྱད་ལས་དང་པོ་ལྷ་བསྐྱེད་ནི༔ ཧཱུྃ་ཧྲཱིཿ ཆོས་རྣམས་ཐམས་ཅད་གདོད་ནས་སྤྲོས་དང་བྲལ༔ མ་རྟོགས་འགྲོ་ལ་བརྩེ་བའི་སྙིང་རྗེ་ཤར༔ ཟུང་འཇུག་རིག་པ་ཧྲཱིཿཡིག་དཀར་དམར་མདངས༔ དེ་ལས་རཾ་ཡཾ་ཁཾ་འཕྲོས་དངོས་འཛིན་སྦྱངས༔ སླར་ཡང་ཨེ་ཡཾ་བཾ་ལཾ་བྷྲུཾ་འཕྲོས་པས༔ རྒྱ་ཁྱོན་མཐའ་ཡས་ནམ་མཁའི་དཀྱིལ་འཁོར་ལ༔ རླུང་དཀྱིལ་སྲ་བརྟན་དྭངས་བསིལ་གསལ་དག་མཚོ༔ རིན་ཆེན་གསེར་གྱི་ས་གཞི་མཉམ་པར་བརྡལ༔ རིན་ཆེན་སྣ་ལྔའི་རི་རབ་ལྷུན་པོར་བརྗིད༔ དེ་སྟེང་རྡོ་རྗེ་རྒྱ་གྲམ་འོག་གཞིར་བརྟན༔ ནོར་བུ་སྣ་ཚོགས་འཇའ་ཚོན་འོད་དུ་འབར༔ ཕོ་བྲང་པདྨ་འོད་ཀྱི་གཞལ་ཡས་ཁང་༔ ཤར་ཕྱོགས་དུང་ལ་ལྷོ་ཕྱོགས་བཻཌཱུརྱ༔ ནུབ་ཕྱོགས་ཤེལ་དམར་བྱང་ཕྱོགས་མརྒད་ལྗང་༔ གྲུ་བཞི་སྒོ་བཞི་རྟ་བབས་བརྒྱད་དང་ལྡན༔ ཕྱི་ནང་ཁྱམས་དང་གྲུ་ཆད་གློ་འབུར་མཛེས༔ འདོད་སྣམ་ཕ་གུ་དྲ་བ་དྲྭ་ཕྱེད་སོགས༔ བརྡ་དོན་རྟགས་གསུམ་རྫོགས་པའི་དབུས་ཉིད་དུ༔ པདྨ་འདབ་བརྒྱད་ལྟེ་བ་མུ་ཁྱུད་ཟླུམ༔ ཁྱམས་དང་སྒོ་བཞིར་སྣ་ཚོགས་རཏྣའི་ཁྲི༔ དབུས་སུ་སེང་ཁྲི་ཉི་ཟླའི་གདན་སྟེང་དུ༔ རང་རིག་ཡི་གེ་སྤྲོ་བསྡུ་བསྒྱུར་བ་ལས༔ རྩ་གསུམ་ཀུན་འདུས་པདྨ་ཐོད་ཕྲེང་རྩལ༔ དཀར་དམར་མདངས་ལྡན་ཞི་འཛུམ་མཚན་དཔེ་རྫོགས༔ ཞལ་གཅིག་ཕྱག་གཉིས་གསང་གོས་ཟབ་བེར་ལྗང་༔ དར་དམར་ཆོས་གོས་ཞབས་གཉིས་བརྐྱང་བསྐུམ་མཛད༔ ཕྱག་གཡས་གསེར་རྡོར་རྩེ་ལྔ་ཐུགས་ཀར་བསྣམས༔ གཡོན་པས་སྤྲུལ་འཁོར་ཐད་ཀར་མཉམ་བཞག་ཚུལ༔ རྟོག་མེད་བྷནྡྷ་འཆི་མེད་ཚེ་བུམ་ནང་༔ ཟག་མེད་བདུད་རྩི་སྨན་གྱིས་གང་བ་བསྣམས༔ མཆན་གཡོན་གསང་ཡུམ་ཤེས་རབ་མནྡྷ་ར༔ སྦས་པའི་ཚུལ་གྱིས་ཁ་ཊཱཾ་རྩེ་གསུམ་བརྟེན༔ དབུ་ལ་པད་ཞྭ་རྒོད་སྒྲོ་དར་སྣས་སྤྲས༔ རྒྱལ་ཀུན་མཁྱེན་བརྩེ་ནུས་པའི་ཡོན་ཏན་རྫོགས༔ འཇའ་ཚོན་སྣ་ལྔ་འཁྱིལ་བའི་ཀློང་དུ་བཞུགས༔ ཧཱུྃ་ཧྲཱིཿ དེ་ཡི་ཕྱི་རིམ་སྣ་ཚོགས་འདབ་བརྒྱད་ལ༔ ཤར་དུ་པདྨ་འབྱུང་གནས་སྐུ་མདོག་མཐིང་༔ ལྷ་ལྕམ་དཀར་མོ་གསང་བའི་ཡུམ་ལ་འཁྱུད༔ ལོངས་སྐུའི་ཆས་རྫོགས་རྡོ་རྗེ་སྡིགས་མཛུབ་མཛད༔ གྲི་ཐོད་ཕྱག་གཡས་ཡབ་དང་མཉམ་པར་སྦྱོར༔ ལྷོ་རུ་ཉི་མ་འོད་ཟེར་སྐུ་མདོག་སེར༔ རུས་རྒྱན་དར་དཔྱངས་སྟག་ཤམ་སྒོམ་ཐག་དམར༔ ཕྱེད་སྐྱིལ་ཁ་ཊཱཾ་ཉི་ཟེར་ཞགས་པ་བསྣམས༔ ནུབ་ཏུ་པདྨ་རྒྱལ་པོ་སྐུ་མདོག་དམར༔ ཁྲོ་འཛུམ་དར་དམར་བེར་དང་ནོར་བུའི་རྒྱན༔ པྲོག་ཞུས་དབུ་བརྒྱན་ཕྱག་གཡས་ཌཱ་མ་རུ༔ གཡོན་པས་མེ་ལོང་ཞབས་གཉིས་སྐྱིལ་ཀྲུང་མཛད༔ བྱང་དུ་སེང་གེ་སྒྲ་སྒྲོག་ལྗང་ནག་ཁྲོ༔ རུས་རྒྱན་སྟག་ཤམ་སེང་གེའི་གཡང་གཞི་བཀླུབས༔ གཡས་པས་རྡོ་རྗེ་གཡོན་པས་ཁྱུང་ཁྲ་འགྱེད༔ ཞབས་གཉིས་དོར་སྟབས་མུ་སྟེགས་གདན་ལ་འགྱིང་༔ ཧཱུྃ་ཧྲཱིཿ མཚམས་བཞིའི་ཤར་ལྷོ་པདྨ་སཾ་བྷ་ཝ༔ རབ་བྱུང་ཆས་ཅན་དཀར་དམར་ཞི་བའི་ཚུལ༔ ཕྱག་གཡས་བྷནྡྷ་གཡོན་པས་བདུད་རྩི་འཐོར༔ དབུ་ལ་པཎ་ཞྭ་ཞབས་གཉིས་སྐྱིལ་མོ་ཀྲུང་༔ ལྷོ་ནུབ་བློ་ལྡན་མཆོག་སྲེད་དཀར་དམར་མདངས༔ དར་དཀར་ན་བཟའ་དར་ཐོད་པྲོག་ཞུ་མཛེས༔ གཡས་པས་ཌཱ་རུ་གཡོན་པས་བསེ་ཕོར་ནང་༔ རིན་ཆེན་སྣ་ཚོགས་ནོར་བུས་བཀང་བ་བསྣམས༔ ནུབ་བྱང་ཤཱཀྱ་སེང་གེ་གསེར་གྱི་མདངས༔ དབུ་ལ་གཙུག་ཏོར་ཆོས་གོས་རྣམ་གསུམ་གསོལ༔ ས་གནོན་མཉམ་བཞག་བདུད་བཞི་ཟིལ་གྱིས་གནོན༔ བྱང་ཤར་རྡོ་རྗེ་གྲོ་ལོད་སྨུག་ནག་རྔམ༔ སྤྱན་གསུམ་ཁྲོ་འཛུམ་རྡོ་རྗེ་ཕུར་པ་གདེངས༔ སག་ལྷྭམ་འདོར་སྟབས་སྟག་ཆེན་རྔམ་པ་ཆིབས༔ བེར་སྔོན་ཆོས་གོས་ཐོད་སྐམ་མགོ་ཕྲེང་བརྗིད༔ ཧཱུྃ་ཧྲཱིཿ ཁྱམས་ལ་བཀའ་བབ་རྗེ་འབངས་ཉི་ཤུ་ལྔ༔ རྒྱ་བོད་རིག་འཛིན་རྩ་གསུམ་རྒྱ་མཚོའི་ཚོགས༔ སྐུ་མདོག་ཕྱག་མཚན་མ་ངེས་སྣ་ཚོགས་སྟོན༔ སྒོ་བཞིར་རྒྱལ་ཆེན་སྡེ་བཞི་ལས་བཞིའི་མདོག༔ རང་རྟགས་ཕྱག་མཚན་བརྐྱང་བསྐུམ་གར་གྱིས་བཞུགས༔ གཙོ་འཁོར་ཀུན་གྱི་གནས་གསུམ་འབྲུ་གསུམ་ལས༔ འོད་འཕྲོས་སྐུ་གསུམ་དག་པའི་ཕོ་བྲང་ནས༔ ཡེ་ཤེས་ལྷ་ཚོགས་ཏིལ་གོང་ཁ་ཕྱེ་ལྟར༔ མ་འདྲེས་ཡོངས་རྫོགས་སྤྱན་འདྲེན་ས་མ་ཛ༔ གཉིས་པ་སྤྱན་འདྲེན་སྤོས་རོལ་བཅས༔ གདུང་བའི་དབྱངས་ཀྱིས་འདི་སྐད་དོ༔ ཧཱུྃ་ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཕྱིར༔ བྱིན་གྱིས་བརླབ་ཕྱིར་གཤེགས་སུ་གསོལ༔ དུར་ཁྲོད་བརྒྱད་དུ་སྒྲུབ་པ་མཛད༔ དཔལ་ཆེན་བཀའ་བརྒྱད་གཙོ་བོ་དང་༔ གཉིས་སུ་མེད་པའི་དངོས་གྲུབ་བརྙེས༔ མཚན་ཡང་བརྒྱད་དུ་སོ་སོར་གྲགས༔ ཁྱེད་ཀྱི་རྗེས་སུ་བདག་སྒྲུབ་ན༔ བརྩེ་བའི་ཐུགས་ཀྱིས་གཤེགས་སུ་གསོལ༔ བཀའ་བབས་མི་དགུ་རྗེ་དང་འབངས༔ རྒྱ་བོད་མཁས་གྲུབ་མ་ལུས་དང་༔ གཞན་ཡང་རྩ་གསུམ་སྲུང་མར་བཅས༔ ཀུན་ཀྱང་གཙོ་བོའི་ཆོ་འཕྲུལ་ལས༔ ཐ་མི་དད་པར་ངེས་རྙེད་མཐུས༔ ཁྱེད་དང་དབྱེར་མེད་སྒྲུབ་ལགས་ན༔ མཁྱེན་པའི་ཐུགས་ཀྱིས་རབ་དགོངས་ནས༔ བརྩེ་བའི་སྤྱན་གྱིས་དགྱེས་པར་གཟིགས༔ མཐུ་སྟོབས་ནུས་པའི་དཔུང་བསྐྱེད་དེ༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་ཌཱཀྐི་ནི་པདྨ་ཐོད་ཕྲེང་རྩལ་བཛྲ་ས་མ་ཡཱ་ཛཿསིདྡྷི་ཕ་ལ་ཧཱུྃ༔ གསུམ་པ་བཞུགས་གསོལ་ནི༔ ཧཱུྃ་ཧྲཱིཿ ཆགས་མེད་སྐྱོན་བྲལ་པདྨ་གེ་སར་ལ༔ མི་འཇིགས་སེང་ཁྲི་ཐབས་ཤེས་ཉི་ཟླའི་གདན༔ རིན་ཐང་གཞལ་མེད་ཕོ་བྲང་དམ་པ་འདིར༔ དགྱེས་ཤིང་མི་གཡོ་བརྟན་པར་བཞུགས་སུ་གསོལ༔ རྣམ་ཤེས་གནས་དག་སྣ་ཚོགས་འདབ་བརྒྱད་ལ༔ སྤྲུལ་པའི་གུ་རུ་མཚན་བརྒྱད་བཞུགས་སུ་གསོལ༔ དད་མོས་ཡོངས་དག་གུས་པའི་གདན་ཁྲི་ལ༔ རྩ་གསུམ་སྲུང་མར་བཅས་པ་བཞུགས་སུ་གསོལ༔ བཛྲ་ས་མ་ཡཱ་ཏིཥྛ་ལྷན༔ བཞི་པ་ཕྱག་འཚལ་བ་ནི༔ ཧཱུྃ་ཧྲཱིཿ ཐ་མལ་སྒོ་གསུམ་རྒྱལ་བའི་གསང་གསུམ་དུ༔ གནས་སུ་དག་ནས་ཕྱི་ནང་གཞན་གསུམ་ཆོས༔ ཀུན་ཀྱང་བདེ་གཤེགས་སྙིང་པོའི་རང་བཞིན་དུ༔ རང་ཞལ་མཇལ་ལ་གུས་འདུད་ཡོངས་བྲལ་ཀྱང་༔ མ་རྟོགས་འཁྲུལ་སྣང་གློ་བུར་ཤར་བ་ཡིས༔ རང་དང་གཞན་དུ་བལྟས་ནས་བདག་དང་ལྷར༔ བཟང་ངན་སྤང་བླང་མ་ལུས་དག་བྱའི་ཕྱིར༔ དཀྱིལ་འཁོར་ལྷ་ལ་གུས་པས་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏིཙྪ་ཧོ༔ ལྔ་པ་མཆོད་པའི་བྱེ་བྲག་འབུལ་བ་ལ༔ ཕྱི་ནང་གསང་དང་དེ་ཉིད་རྣམ་བཞི་ལས༔ དང་པོ་ཕྱི་མཆོད་ནི༔ ཧཱུྃ་ཧྲཱིཿ དྭངས་བསིལ་ཡན་ལག་བརྒྱད་ལྡན་མཆོད་ཡོན་སྦྲེངས༔ ཡིད་འོང་འདབ་ལྡན་སྣ་ཚོགས་ཚར་དུ་དངར༔ ལྷན་སྐྱེས་སྦྱར་བྱུང་དྲི་ཞིམ་སྤྲིན་ཕུང་འཐིབས༔ ཉི་ཟླ་རིན་ཆེན་འོད་འབར་སྣང་སྲིད་གསལ༔ ག་བུར་གུར་གུམ་དྲི་ལྡན་རྙོག་མེད་ཆབ༔ རོ་བྲོ་བདེ་བ་སྟེར་བྱེད་འཆི་མེད་ཟས༔ འབུད་དཀྲོལ་སྙན་འཇེབས་རོལ་མོའི་སྒྲ་སྙན་སྒྲོག༔ ཏིང་འཛིན་ནམ་མཁའ་མཛོད་ཀྱིས་སྤེལ་ཞིང་བསྒྱུར༔ དཀྱིལ་འཁོར་ལྷ་ལ་བདག་གཞན་ཚོགས་རྫོགས་ཕྱིར༔ གུས་པས་འབུལ་ལོ་དགྱེས་པར་བཞེས་སུ་གསོལ༔ ཨོཾ་བཛྲ་ཨརྒྷཾ་སོགས་ནས་ཤཔྟ་པཱུ་ཛ་ཨཱཿཧཱུྃ༔ གཉིས་པ་ནང་མཆོད་ནི༔ ཧཱུྃ་ཧྲཱིཿ གཟུགས་མཛེས་སྣ་ཚོགས་སྒྲིབ་མེད་སྤྱན་ལ་འབུལ༔ སྒྲ་དབྱངས་བསྟོད་པ་མི་འཁྲུགས་སྙན་ལ་འབུལ༔ དྲི་ཞིམ་བདུག་པ་རྙོག་བྲལ་ཤངས་ལ་འབུལ༔ རོ་ལྡན་ཞལ་ཟས་རྟོག་མེད་ལྗགས་ལ་འབུལ༔ རེག་འཇམ་བདེ་བ་སྟོང་གསལ་སྐུ་ལ་འབུལ༔ ཆོས་ཁམས་སྣ་ཚོགས་འཛིན་བྲལ་ཐུགས་ལ་འབུལ༔ བཞེས་ནས་བདག་གཞན་ཡུལ་དྲུག་ཞེན་པའི་ཚོགས༔ གནས་དག་ཡེ་ཤེས་དྲུག་ལྡན་དངོས་གྲུབ་སྩོལ༔ བཛྲ་རཱུ་པ་ཤཔྟ་གནྡྷེ་ར་ས་སྤཪྴེ་པྲ་ཏིཙྪ་ཨཱཿཧཱུྃ༔ གསུམ་པ་གསང་བའི་མཆོད་པ་ནི༔ ཧྲཱིཿ ཡིད་འོང་འཇོ་སྒེག་ངོམས་པའི་ཕྱག་རྒྱ་མར༔ དགྱེས་སྦྱོར་བདེ་བས་ཟག་མེད་ཡེ་ཤེས་རྒྱས༔ ཡུལ་དྲུག་སྣང་བ་སྟོང་ཉིད་དབྱིངས་སུ་དག༔ ཀུན་བརྟགས་དགྲ་བགེགས་ཡོངས་གྲུབ་ཀློང་དུ་བསྒྲལ༔ བཞི་པ་དེ་ཁོ་ན་ཉིད་ཀྱི་མཆོད་པ་ནི༔ ཨཱཿ གང་ལ་མཆོད་བྱ་རང་བྱུང་རིག་པའི་ལྷ༔ གང་གིས་མཆོད་བྱེད་རིག་རྩལ་སྒྱུ་མའི་འཕྲུལ༔ གཅིག་དང་ཐ་དད་ལས་འདས་ཡེ་བབ་གཤིས༔ མ་བཅོས་མ་བསླད་དེ་ཉིད་ཁོ་ན་འོ༔ དྷརྨ་དྷརྟུ་སྭ་བྷ་ཝ་པཱུ་ཛ་ཧོ༔ དྲུག་པ་སྐུ་གསུང་ཐུགས་དང་འཁོར་ལ་བསྟོད་པ་ནི༔ ཨོཾ་མཚན་དཔེ་ཡོངས་རྫོགས་འཆི་མེད་རྡོ་རྗེའི་སྐུ༔ གྲགས་སྟོང་འགགས་མེད་ཡན་ལག་དྲུག་ཅུའི་གསུང་༔ སྨྲ་བསམ་བརྗོད་བྲལ་ཚད་མེད་མཁྱེན་བརྩེའི་ཐུགས༔ པད་འབྱུང་སྐུ་གསུང་ཐུགས་ལ་ཕྱག་འཚལ་བསྟོད༔ དུས་གསུམ་འགྲོ་བ་སྡུག་བསྔལ་ལས་སྒྲོལ་ཕྱིར༔ སྐུ་གསུམ་རིག་འཛིན་གུ་རུ་རིན་པོ་ཆེ༔ དུག་གསུམ་དབྱིངས་སྒྲོལ་པདྨ་མཚན་བརྒྱད་སྤྲུལ༔ སྒོ་གསུམ་གུས་པ་ཆེན་པོས་ཕྱག་འཚལ་བསྟོད༔ དུག་ལྔའི་རྣམ་རྟོག་མ་ལུས་ཞི་མཛད་པ༔ པདྨ་འབྱུང་གནས་ཡབ་ཡུམ་ནམ་མཁའི་མདངས༔ ཚེ་བསོད་དཔལ་འབྱོར་ཡོན་ཏན་རྒྱས་མཛད་ལྷ༔ ཉི་མ་འོད་ཟེར་གསེར་མདོག་ཞི་འཛུམ་མཛེས༔ ཁམས་གསུམ་སྲིད་གསུམ་སྣང་བ་དབང་སྡུད་དཔལ༔ པདྨ་རྒྱལ་པོ་དམར་གསལ་སྣུམ་འོད་ཆགས༔ སེང་གེ་སྒྲ་སྒྲོག་ཕས་རྒོལ་འཇོམས་མཛད་པ༔ ལྗང་གསལ་ཁྲོ་བོ་རབ་ཏུ་ཁྲོས་པའི་ཚུལ༔ སྐྱེ་མེད་རང་བྱུང་དག་པའི་དོན་མཚོན་ཕྱིར༔ པདྨ་སཾ་བྷ་དུང་དང་ཟླ་བའི་མདོག༔ ཤེས་བྱའི་ཆོས་ཀུན་མ་འདྲེས་མཁྱེན་པ་ཡི༔ བློ་ལྡན་མཆོག་སྲེད་དཀར་དམར་མི་ཤ་ཁ༔ བདུད་བཞིའི་དཔུང་བཅོམ་བསྟན་པའི་བདག་པོ་མཛད༔ ཤཱཀྱ་སེང་གེ་གསེར་མདོག་རབ་བྱུང་ཆས༔ དམ་སྲི་ལོག་འདྲེན་མ་ལུས་ཚར་གཅོད་པ༔ རྡོ་རྗེ་གྲོ་ལོད་དམར་ནག་སྟག་ལ་བཅིབས༔ ཕྱི་རོལ་དཔའ་བོ་མཁའ་འགྲོ་ཆོས་སྐྱོང་དང་༔ སྒོ་བཞི་སྲུང་མཛད་དཀྱིལ་འཁོར་ལྷ་ཡི་ཚོགས༔ བདག་གིས་སྒོ་གསུམ་གུས་པས་བསྟོད་པར་བགྱི༔ མཆོག་དང་ཐུན་མོང་དངོས་གྲུབ་ཐོབ་པར་མཛོད༔ བདུན་པ་བཤགས་པ་བྱ་བ་ནི༔ ཨོཾ་ཐ་མལ་འཛིན་པས་རྒྱལ་བའི་སྐུ་ལ་སྒྲིབ༔ བདག་ལུས་ཞེན་རྟོག་སྣང་སྟོང་ལྷ་སྐུར་བཤགས༔ ལོང་གཏམ་འཁྲུལ་ངག་བཟླས་བརྗོད་སྔགས་ལ་སྒྲིབ༔ ངག་གི་སྒྲ་ཚིག་གྲག་སྟོང་སྔགས་སུ་བཤགས༔ སེམས་དང་སེམས་བྱུང་བརྗོད་བྲལ་གཤིས་ལ་སྒྲིབ༔ རྟོག་ཚོགས་རང་གྲོལ་ཆོས་སྐུའི་ཀློང་དུ་བཤགས༔ ཡེ་ནས་རང་རིག་པདྨ་རྒྱལ་པོ་དང་༔ འདུ་འབྲལ་མེད་ཀྱང་རང་རིག་ངོ་མ་ཤེས༔ གཞན་ནས་སྒྲུབ་ཏུ་མེད་དེ་རང་གི་གདངས༔ བསྐང་དང་བཤགས་པར་བྱ་བ་མིང་དུ་ཟད༔ འོན་ཀྱང་དེ་ལྟར་མ་རྟོགས་གློ་བུར་གྱི༔ འཁྲུལ་རྟོག་མ་ལུས་རྟེན་འབྲེལ་བདེན་པའི་གཤིས༔ ལྷ་སྔགས་ཆོས་ཉིད་ཀློང་དུ་བཤགས་བགྱི་ན༔ འདི་ཕྱིར་མི་སྒྲིབ་ཚངས་པའི་དངོས་གྲུབ་སྩོལ༔ ཡི་གེ་བརྒྱ་པ་ཅི་མང་བཟླས་པས་སྦྱངས༔ བརྒྱད་པ་འཛབ་ཀྱི་དམིགས་པ་འདི་ལྟ་སྟེ༔ རང་ཉིད་རྩ་གསུམ་ཀུན་འདུས་ཨོ་རྒྱན་རྗེའི༔ ཐུགས་མཆོག་འོད་ལྔ་མི་ཤིགས་ཐིག་ལེའི་ཀློང་༔ པད་དཀར་འདབ་བརྒྱད་ཟླ་བའི་དཀྱིལ་འཁོར་སྟེང་༔ གསེར་རྡོར་རྩེ་ལྔའི་ལྟེ་བར་ཧྲཱིཿདམར་མཚན༔ རྩ་བའི་སྔགས་འབྲུ་གཡས་བསྐོར་འོད་ལྔའི་མདངས༔ གསལ་འཚེར་བཀྲག་མདངས་ལྡན་ལ་དམིགས་པ་གཏད༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ བསྙེན་པའི་དུས་སུ་གཙོ་ལ་སེམས་འཛིན་ཅིང་༔ སྒྲུབ་པའི་དུས་སུ་འཁོར་ལ་སེམས་རབ་འཛིན༔ ཀུན་གྱི་ཐུགས་ཀར་ཟླ་གདན་ཧཱུྃ་ཡིག་ནི༔ རང་མདོག་མཐའ་མར་སྔགས་ཕྲེང་འོད་ཟེར་ལྔ༔ བཀྲག་དང་གཟི་མདངས་བལྟར་མི་བཟོད་པ་ལ༔ རྩེ་གཅིག་ཡིད་ཀྱིས་ཁམས་གསུམ་འགྲོ་བ་ཀུན༔ པདྨ་མཚན་བརྒྱད་སྐུ་རུ་གྱུར་པར་བསམ༔ ཨོཾ་ཨཱཿམ་ཧཱ་གུ་རུ་པདྨ་འབྱུང་གནས་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་སུརྱ་རསྨི་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་པདྨ་རཱ་ཛ་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་སེང་ཧ་གནྚེ་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་པདྨ་སཾ་བྷ་ཝ་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་པྲཛྙཱ་བུདྡྷ་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་ཤཱཀྱ་སེང་གེ་སརྦ་སིདྡྷི་ཧཱུྃ༔ ཨོཾ་ཨཱཿམ་ཧཱ་གུ་རུ་བཛྲ་ཀྲོ་ཏ་སརྦ་སིདྡྷི་ཧཱུྃ༔ ལས་སྦྱོར་དུས་སུ་གཙོ་འཁོར་ཡོངས་རྫོགས་ཀྱི༔ ཐུགས་ཀའི་སྔགས་ལས་འོད་ཟེར་སྣ་ཚོགས་པའི༔ རྩེ་མོར་མཆོད་པའི་ལྷ་མོས་འཕགས་པ་མཆོད༔ གསང་གསུམ་བྱིན་རླབས་འབྲུ་གསུམ་རྣམ་པར་བསྡུས༔ བདག་ཐིམ་འཁོར་འདས་སྤྱི་དཔལ་ཆེན་པོར་གྱུར༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡཱ་ཛ༔ སིདྡྷི་ཕ་ལ་ཧཱུྃ་ཨཱ༔ ཞེས་པ་བཟླ་ཞིང་སླར་ཡང་དམིགས་པ་གཏད༔ འོད་ཟེར་མར་འཕྲོས་འགྲོ་དྲུག་ལས་སྒྲིབ་སྦྱངས༔ སྣང་སྲིད་དག་པ་རབ་འབྱམས་ཞིང་དུ་གྱུར༔ ཀུན་ཀྱང་ལྷ་སྔགས་ཏིང་འཛིན་བདེ་བ་ཆེ༔ དམིགས་བྲལ་ཡང་དག་ལྟ་བའི་ངང་མདངས་བསྐྱངས༔ ཐོད་ཕྲེང་རྩལ་དང་ཧྲི་མ་ཧ་རི་སོགས༔ རིག་འཛིན་མཁའ་འགྲོའི་བསྙེན་སྔགས་གནད་སྨིན་བཟླ༔ དུས་གྲངས་མཚན་མའི་བསྙེན་པ་རྟགས་མཐོང་བྱ༔ དེ་ལྟར་ཐེ་ཚོམ་མེད་པར་ཉམས་བླངས་ན༔ ཚེ་འདིར་ཚེ་ཆོས་སྲིད་ནོར་མཐུ་དབང་ཐོབ༔ ཕྱི་མ་རིག་འཛིན་དཔའ་བོ་མཁའ་འགྲོའི་གྲལ༔ རྔ་ཡབ་དཔལ་རིར་བགྲོད་ནས་ས་བཅུ་ཡི༔ ལམ་རྟགས་ཡོན་ཏན་མངོན་དུ་ཐོབ་པར་འགྱུར༔ ས་མ་ཡཱ༔ རྒྱ་རྒྱ་རྒྱ༔ རྗེས་ཀྱི་རིམ་པ་བཅུ་གསུམ་གྲངས་ཀྱིས་བསྟན༔ དང་པོ་ཚོགས་རྫས་ཤ་ཆང་དཀར་མངར་ཟས༔ འབྱོར་ཚད་བཤམས་ལ་རང་ཉིད་གུ་རུའི་སྐུར༔ གསལ་ནས་བསངས་སྦྱངས་རིམ་པ་ཚིག་འདིས་བྱ༔ རཾ་ཡཾ་ཁཾ༔ གསུམ། ཚོགས་ཀྱི་ཡོ་བྱད་མ་དག་དངོས་པོ་རྣམས༔ བདག་ཉིད་ཐུགས་ལས་རཾ་འཕྲོས་དངོས་འཛིན་བསྲེགས༔ ཡཾ་གིས་གཏོར་ཞིང་ཁཾ་བརྗོད་དག་པར་བཀྲུས༔ ཨོཾ་ཨཱཿཧཱུྃ་ཧྲཱིཿ གསུམ། རང་ཉིད་ཐུགས་ལས་ཨོཾ་དཀར་ཨཱཿདམར་དང་༔ ཧཱུྃ་མཐིང་ཧྲཱིཿལྗང་བཞི་འཕྲོས་ཚོགས་ཀྱི་རྫས༔ ངོ་བོ་ཟག་མེད་བདེ་བ་ཆེན་པོ་ལ༔ རྣམ་པ་བདུད་རྩི་དཀར་དམར་མཐིང་ལྗང་བཞི༔ རིན་ཆེན་བྷནྡྷ་ཡངས་པའི་སྣོད་བཟང་པོར༔ རོ་བརྒྱ་ནུས་ལྡན་ཕུན་སུམ་ཚོགས་པར་གྱུར༔ སརྦ་པཉྩ་ཨ་མྲྀ་ཏ་ཧ་ཧོ་ཧྲཱིཿ གཉིས་པ་ཚོགས་ཞིང་ལྷ་ཚོགས་སྤྱན་འདྲེན་ནི༔ ཧཱུྃ་ཧྲཱིཿ འོག་མིན་བདེ་ཆེན་རི་བོ་པོ་ཊ་ལ༔ རྔ་ཡབ་པདྨ་འོད་ཀྱི་ཕོ་བྲང་ནས༔ ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་པདྨ་ཐོད་ཕྲེང་འཁོར་དང་བཅས༔ འདོད་ཡོན་ཚོགས་ཀྱི་མཆོད་པ་བཞེས་ཕྱིར་གཤེགས༔ རང་བྱུང་རང་ཤར་དུར་ཁྲོད་གནས་བརྒྱད་ནས༔ རྣམ་ཤེས་གནས་དག་སྤྲུལ་པའི་མཚན་བརྒྱད་དང་༔ སྒྲུབ་སྡེ་བརྒྱད་དང་དཔའ་བོ་མཁའ་འགྲོའི་ཚོགས༔ ཚོགས་ཀྱི་མཆོད་པ་བཞེས་ཕྱིར་གཤེགས་སུ་གསོལ༔ གནས་བཟང་སྤྲུལ་པའི་ཕོ་བྲང་ཉམས་རེ་དགའ༔ སྐལ་ལྡན་སྒྲུབ་པའི་རྣལ་འབྱོར་དམ་རེ་གཙང་༔ སྒྲུབ་རྫས་ཡོ་བྱད་བཀྲག་དང་མདངས་རེ་བཟང་༔ གནས་འདིར་བྱིན་ཕོབ་མཆོག་ཐུན་དངོས་གྲུབ་སྩོལ༔ ཨོཾ་ཨཱཿཧཱུྃ་མ་ཧཱ་གུ་རུ་བཛྲ་ས་མ་ཡཱ་ཛ་ཛཿ གསུམ་པ་ཚོགས་ཕུད་གུས་པས་འབུལ་བ་ནི༔ ཧཱུྃ་ཧྲཱིཿ འདོད་ཡོན་ལྔ་ལྡན་ལོངས་སྤྱོད་ཚོགས་ཀྱི་རྫས༔ ཀུན་བཟང་མཆོད་པའི་སྤྲིན་ལྟར་སྤྲུལ་བ་ཡིས༔ དབང་པོ་དྲུག་ལ་ཟག་མེད་བདེ་སྟེར་བ༔ རྩ་གསུམ་དཀྱིལ་འཁོར་ལྷ་ལ་མཆོད་པ་འབུལ༔ མ་ཧཱ་གྷ་ན་ཙཀྲ་པཱུ་ཛ་ཁཱ་ཧི༔ བཞི་པ་ཉེས་ཚོགས་བཤགས་པ་བྱ་བ་ནི༔ ཧཱུྃ་ཧྲཱིཿ དང་པོ་གཞི་ཐོག་འཁྲུལ་བ་ནས་བཟུང་སྟེ༔ ཐ་མ་ལུས་འདི་བླངས་པ་ཡན་ཆད་དུ༔ བཅས་དང་རང་བཞིན་ཉེས་པའི་ཚོགས་རྣམས་ཀུན༔ ཚོགས་ཀྱི་མཆོད་པས་མཐོལ་བཤགས་དག་གྱུར་ཅིག༔ བཛྲ་ས་མ་ཡཱ་ཤུདྡྷེ་ཨཱ༔ ཞེས་དང་ཡི་གེ་བརྒྱ་པ་ལན་གསུམ་བརྗོད༔ ལྔ་པ་དགྲ་བགེགས་བསྒྲལ་མཆོད་བྱ་བ་ནི༔ ཧཱུྃ་ཧྲཱིཿ དུག་གསུམ་རྒྱུ་ལས་བྱུང་བའི་དགྲ་དང་བགེགས༔ དམིགས་རྟེན་རྫས་འདིར་མྱུར་དུ་ཁུག་ཅིག་ཛཿ བདག་ཉིད་པདྨ་ཐོད་ཕྲེང་སྤྲུལ་པ་ཡི༔ ཁྲོ་ཚོགས་མང་པོས་ལུས་ངག་རྡུལ་དུ་བརླགས༔ རྣམ་ཤེས་སྐྱེ་མེད་ཆོས་ཀྱི་དབྱིངས་སུ་སྤར༔ གཟུགས་ཕུང་དཀྱིལ་འཁོར་ལྷ་ཚོགས་ཞལ་དུ་བསྟབས༔ རུ་ཏྲ་སརྦ་ཧ་ལ་པཉྩ་ཁཱ་ཧི༔ དྲུག་པ་ཚོགས་ལ་རོལ་རྗེས་ལྷག་མ་ནི༔ འབྲུ་གསུམ་སྔགས་ཀྱིས་བདུད་རྩིར་བྱིན་བརླབས་ལ༔ ཧཱུྃ་ཧྲཱིཿ རྩ་གསུམ་དཀྱིལ་འཁོར་མཐའ་གྲལ་ལ་གནས་པའི༔ གིང་དང་ལིང་ག་དུར་ཁྲོད་གནས་ཉུལ་བདག༔ རྣལ་འབྱོར་སྒྲུབ་པོའི་ས་ལམ་བར་ཆད་སྲུངས༔ ཚོགས་ལྷག་བཞེས་ལ་ལས་བཞིའི་ཕྲིན་ལས་མཛོད༔ ཨོཾ་ཨུཙྪིཥྚ་བྷ་ལིང་ཏ་ཁཱ་ཧི༔ ཞེས་བརྗོད་ལྷག་གཏོར་གཙང་མའི་ས་རུ་གཤེགས༔ བདུན་པ་ཆད་ཐོའི་ཐ་ཚིག་བསྒྲག་པའི་ཕྱིར༔ གཏོར་མར་སྨན་རཀ་སྦྲན་ཅིང་དཔལ་འབར་གཟུགས༔ འབྲུ་གསུམ་སྔགས་ཀྱིས་གང་འདོད་བདུད་རྩིར་སྦྱར༔ ཧཱུྃ་ཧྲཱིཿ སྔོན་ཚེ་འདས་དུས་བསྐལ་པའི་དང་པོ་ལ༔ རང་བྱུང་སྤྲུལ་པའི་འོག་མིན་ཉམས་དགའ་བར༔ འཁོར་འདས་གཞི་གྲོལ་པདྨ་ཧེ་རུ་ཀས༔ དུས་གསུམ་རྒྱལ་སྲས་སར་གནས་སེམས་དཔའ་ལ༔ རྩ་གསུམ་རྒྱུད་དང་སྒྲུབ་ཐབས་བསྟན་པའི་ཚེ༔ འགྲོ་དྲུག་སེམས་ཅན་བདེ་ལ་དབུགས་དབྱུང་ཞིང་༔ དམན་རྣམས་ཐེག་པ་མཆོག་ལ་འགོད་དོ་ཞེས༔ ཇི་ལྟར་ཁས་བླངས་དམ་བཅའ་མཛད་པ་ལྟར༔ ཟག་མེད་ཡེ་ཤེས་གཏོར་མ་འདི་བཞེས་ལ༔ ངན་སོང་འཁོར་བའི་ལས་སྣང་སྟོངས་པ་དང་༔ ཐེག་མཆོག་བསྟན་པ་དར་ཞིང་རྒྱས་པ་ཡིས༔ གདུལ་བྱའི་ཚོགས་རྣམས་སྨིན་ཅིང་གྲོལ་བར་མཛོད༔ ཧཱུྃ་ཧྲཱིཿ དེ་འོག་བར་གྱི་བསྐལ་པ་བར་མ་ལ༔ སྤྲུལ་པའི་ཕོ་བྲང་དབུ་རྩེ་རིགས་གསུམ་དུ༔ རྩ་གསུམ་ཀུན་འདུས་པདྨ་ཐོད་ཕྲེང་གིས༔ བདག་ཉིད་དབྱངས་ཅན་སྤྲུལ་པ་མཚོ་རྒྱལ་དང་༔ མངའ་བདག་རྗེ་འབངས་རིག་པ་འཛིན་རྣམས་ལ༔ སྒྲུབ་སྡེ་བརྒྱད་སོགས་རབ་འབྱམས་ལྷག་པའི་ལྷ༔ དཔག་མེད་སྒྲུབ་ཐབས་ཇི་སྙེད་བཀའ་བསྩལ་ཅིང་༔ དཀྱིལ་འཁོར་རྒྱ་མཚོ་སྨིན་ཅིང་གྲོལ་མཛད་ཚེ༔ བརྒྱུད་གསུམ་དྲེགས་པ་དམ་ཅན་རྒྱ་མཚོ་ཡིས༔ སངས་རྒྱས་བསྟན་བསྲུང་རྣལ་འབྱོར་ཚེ་སྲོག་བསྲིང་༔ ལོག་འདྲེན་བགེགས་འདུལ་མཐའ་དམག་བཟློག་གོ་ཞེས༔ ཇི་ལྟར་ཁས་བླངས་དམ་བཅས་དེ་བཞིན་དུ༔ མི་འདའ་དམ་ཚིག་གཏོར་མ་འདི་བཞེས་ལ༔ ཁས་བླངས་དམ་བཅའ་བཞིན་དུ་ཕྲིན་ལས་མཛོད༔ ཧཱུྃ་ཧྲཱིཿ དེ་འོག་རྩོད་ལྡན་སྙིགས་མའི་ཡང་མཐའ་འདིར༔ རང་སྣང་རྣམ་དག་ཟངས་མདོག་དཔལ་རི་དང་༔ སྤྲུལ་པའི་ཞིང་ཁམས་གཡུ་ལོ་བཀོད་པ་རུ༔ ཨོ་རྒྱན་སློབ་དཔོན་པདྨ་འབྱུང་གནས་དང་༔ དུས་གསུམ་རྒྱལ་བའི་ཡུམ་མཆོག་རྗེ་བཙུན་མས༔སྐལ་ལྡན་སློབ་མ་ལུང་རིག་གླིང་པ་སོགས༔ རིག་འཛིན་འདུས་པའི་ལྕམ་དྲལ་རྒྱ་མཚོ་ལ༔ རྩ་བ་གསུམ་གྱི་དཀྱིལ་འཁོར་ཞལ་ཕྱེས་ཚེ༔ དབྱིངས་ཀྱི་མ་མོ་ཨེ་ཀ་ཛ་ཊཱི་དང་༔ བཀའ་སྡོད་སྲུང་མ་དཔལ་ལྡན་རེ་མ་ཏིས༔ བསྟན་པ་སྲུང་ཞིང་རྣལ་འབྱོར་བར་ཆད་བསལ༔ མཆོག་ཐུན་དངོས་གྲུབ་དུས་འདིར་སྩོལ་བ་སོགས༔ ཇི་ལྟར་ཞལ་བཞེས་དམ་བཅའ་མ་གཡེལ་བར༔ རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད༔ བརྒྱད་པ་བསྟན་མའི་གཏོར་མ་བསངས་སྦྱངས་ལ༔ ཧཱུྃ་ཧྲཱིཿ སྔོན་ཚེ་སློབ་དཔོན་པདྨ་ཀཱ་ར་ཡིས༔ བོད་ཁམས་མུ་སྟེགས་འཇིགས་ལས་སྲུང་བ་སོགས༔ བསྟན་པའི་བྱ་རར་བསྐོས་ཤིང་དམ་བཞག་ལྟར༔ བསྟན་མ་བཅུ་གཉིས་འཁོར་དང་བཅས་རྣམས་ཀྱིས༔ ཚོགས་ལྷག་བཤལ་ཆུའི་གཏོར་མ་འདི་ལོངས་ལ༔ ལྟ་བ་རྟག་ཆད་འཁྲུལ་སྣང་དབུ་མར་ཟློག༔ སྒོམ་པ་བྱིང་རྒོད་ཡེངས་མེད་ཀློང་དུ་ཟློག༔ སྤྱོད་པ་བཅོས་མེད་གང་བབ་ངང་དུ་ཟློག༔ འབྲས་བུ་རེ་དོགས་ཐོབ་ཤོར་མེད་པར་ཟློག༔ རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད༔ དགུ་པ་དམ་སྲི་གཏོར་གཞོང་འོག་ཏུ་བྲུབ༔ འགུག་གཞུག་བྱས་ལ་ནམ་ཡང་ལྡང་མེད་བསམ༔ ཧཱུྃ་ཧྲཱིཿ རིག་འཛིན་རོལ་པ་གསང་བའི་དུར་ཁྲོད་འདིར༔ སྒྲུབ་ལ་བར་གཅོད་སྒབ་འདྲེ་དམ་སྲིའི་རིགས༔ ནམ་ཡང་ལྡང་མེད་རི་རབ་འོག་ཏུ་མནན༔ བྱང་སེམས་མ་སྐྱེས་བར་དུ་བཏང་མི་བྱ༔ སུམྦྷ་ནི་དང་ཨོཾ་ལཾ་ཨཱ་ལཾ་དང་༔ ཧཱུྃ་ལཾ་སྟྭཾ་བྷ་ཡ་ནན༔ ཞེས་ཀྱང་བརྗོད༔ བཅུ་པ་མཆོད་བསྟོད་བྱ་ཞིང་ནོངས་བཤགས་ནི༔ ཧཱུྃ་ཧྲཱིཿ རང་རིག་གློ་བུར་འཁྲུལ་བས་བསླུས་པ་ལས༔ སོ་བྱང་སྔགས་ཀྱི་དམ་ལས་འགལ་བ་སོགས༔ མནར་མེད་ངན་སོང་འཁོར་བའི་རྒྱུ་བསགས་པ༔ སྙིང་ནས་བཤགས་སོ་ཚངས་པར་བསྩལ་དུ་གསོལ༔ སྐུ་གསུང་ཐུགས་ཀྱི་སྔགས་བཏགས་ཡི་གེ་བརྒྱ༔ ཉེར་གཅིག་བདུན་སོགས་འབད་ཅིང་སྐྱེ་མེད་དོན༔ ཉམས་དགའ་ལྟ་བའི་ཀློང་བཤགས་ཨེ་མ་ཧོ༔ བཅུ་གཅིག་ལྷར་སྣང་འོད་གསལ་ངང་དུ་བསྡུ༔ ཧཱུྃ་ཧྲཱིཿ གཞལ་ཡས་འོད་ཞུ་འཁོར་རྣམས་གཙོ་ལ་ཐིམ༔ གཙོ་བོ་ཐུགས་སྲོག་ཧྲཱིཿཡིག་ནཱ་དར་ཡལ༔ དམིགས་བསམ་བརྗོད་བྲལ་ཆོས་དབྱིངས་སྟོང་པའི་ངང་༔ སླར་ཡང་རིག་གདངས་པདྨའི་སྐུ་རུ་གསལ༔ བཅུ་གཉིས་རྗེས་ཐོབ་བསྔོ་སྨོན་རྒྱས་གདབ་ནི༔ ཧཱུྃ་ཧྲཱིཿ སྔོན་འདས་དུས་ནས་བྱང་ཆུབ་མ་ཐོབ་བར༔ དགེ་ཚོགས་རང་གཞན་རྣམ་མཁྱེན་འཐོབ་ཕྱིར་བསྔོ༔ མཁའ་ཁྱབ་འགྲོ་ཀུན་ཆོས་དབྱིངས་གདོད་མའི་ངང་༔ རང་རིག་པདྨ་རྒྱལ་པོ་མངོན་གྱུར་ཤོག༔ བཅུ་གསུམ་བཀྲ་ཤིས་ལེགས་པར་བརྗོད་པ་ནི༔ ཧཱུྃ་ཧྲཱིཿ གཞི་སྣང་མ་བཅོས་ཆོས་སྐུ་སྟོང་པའི་གཤིས༔ རིགས་བདག་སྣང་བ་མཐའ་ཡས་བཀྲ་ཤིས་ཤོག༔ ལྷུན་གྲུབ་འགག་མེད་མཁྱེན་བརྩེ་རོལ་པའི་གར༔ ལོངས་སྐུ་སྤྱན་རས་གཟིགས་དབང་བཀྲ་ཤིས་ཤོག༔ ཐུགས་རྗེ་ནུས་པས་འགྲོ་དྲུག་སྡུག་བསྔལ་སེལ༔ སྤྲུལ་སྐུ་པདྨ་འབྱུང་གནས་བཀྲ་ཤིས་ཤོག༔ གསང་སྔགས་བཀའ་ཡི་སྡུད་པོ་ཤེས་རབ་ཡུམ༔ ཡེ་ཤེས་མཁའ་འགྲོ་མཚོ་རྒྱལ་བཀྲ་ཤིས་ཤོག༔ སྒྲུབ་སྡེ་བརྒྱད་དང་དབྱེར་མེད་ཡི་དམ་ལྷ༔ གྲུབ་ཆེན་གུ་རུ་མཚན་བརྒྱད་བཀྲ་ཤིས་ཤོག༔ སྒྲུབ་པོའི་རེ་སྐོང་ས་ལམ་བར་ཆད་སེལ༔ ཆོས་སྐྱོང་དམ་ཅན་རྒྱ་མཚོའི་བཀྲ་ཤིས་ཤོག༔ ཅེས་པས་ཤིས་པ་བརྗོད་ཅིང་མེ་ཏོག་འཐོར༔ དགའ་སྟོན་རྡོ་རྗེའི་གླུ་དང་གར་ལ་རོལ༔ ས་མ་ཡཱ༔ དེ་ལྟར་རང་གི་སྒྲུབ་ཐབས་རང་གིས་བརྩམས༔ མ་འོངས་སྙིགས་མའི་འགྲོ་ལ་ཕན་ཐོགས་ཕྱིར༔ མ་ཧཱ་པཎྚི་ཏ་ཡི་ཚུལ་འཛིན་པ༔ བརྫུས་སྐྱེས་སྤྲུལ་སྐུ་པདྨ་སཾ་བྷས་བསྩལ༔ དབྱིངས་ཀྱི་བརྡ་ལས་མཚོ་རྒྱལ་སྙིང་སྒྲོམ་སྦོས༔ དུས་བབ་ལས་འཕྲོ་ལྡན་པས་ཉམས་སུ་ལོངས༔ རིམ་གྱིས་སྤེལ་མཁས་གཞན་ལ་ཕན་པར་བྱོས༔ བཀའ་ཡི་སྲུང་མ་ཨེ་ཀ་ཛ་ཊི་དང་༔ དེ་ཡི་བྲན་མོ་རེ་ཏིས་སྲུངས་ཤིག་རྒྱ༔ དམ་མེད་ལོག་ལྟ་ཅན་ལ་ཨ་ཐཾ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་སྐལ་ལྡན་ལུང་རིག་གླིང་པ་ལ། །པདྨའི་བཀའ་དྲིན་ཡོད་དོ་ཆོས་འདིར་ཕྲད། །ཉམས་སུ་བླངས་པས་བདག་གཞན་དོན་གཉིས་འགྲུབ། །མཐོང་ཐོས་དྲན་རེག་འཁོར་མཚོ་ལས་སྒྲོལ་ཤོག །