བསྐང་བ་ཡིད་བཞིན་འདོད་འཇོ།
ཡང་ཟབ་གུ་རུའི་ཐུགས་སྒྲུབ་ལས༔ བསྐང་བ་ཡིད་བཞིན་འདོད་འཇོ་བཞུགས༔
རིག་འཛིན་གཙོ་ལ་ཕྱག་འཚལ་འདུད༔ བྱིན་རླབས་རྩ་བའི་བླ་མ་སྟེ༔ ཀུན་འདུས་རང་བྱུང་པདྨ་འབྱུང་༔ མཚན་བརྒྱད་སྒྲུབ་པ་ཉམས་ལེན་ཚེ༔ ཉམས་ཆག་བཤགས་དང་བར་ཆད་སེལ༔ དུས་འཁྲུག་བཟློག་དང་འདོད་དོན་འགྲུབ༔ བསོད་ནམས་ཚོགས་གཉིས་སྤེལ་བའི་ཐབས༔ བསྙེན་དང་སྒྲུབ་པ་གཞུང་བཞིན་བརྩམ༔ ཚོགས་ཀྱི་ཡོ་བྱད་བྱིན་བརླབས་ཤིང་༔ ཚོགས་ཞིང་སྤྱན་དྲངས་ཚོགས་ཕུད་འབུལ༔ སྣང་སྲིད་ཀུན་བཟང་མཆོད་པའི་སྤྲིན༔ བསྐང་བའི་རྫས་སུ་བྱིན་གྱིས་བརླབས༔ སྔགས་དང་ཕྱག་རྒྱས་སྤེལ་ཞིང་བསྒྱུར༔ སྤོས་བདུག་རོལ་མོའི་སྒྲ་དང་བཅས༔ ཧཱུྃ་ཧྲཱིཿ རང་བཞིན་རྣམ་དག་རང་སྣང་སྤྲུལ་པའི་ཞིང་༔ ཚོགས་ཁང་པདྨ་འོད་ཀྱི་ཕོ་བྲང་འདིར༔ དངོས་སུ་བཤམས་པའི་ཚོགས་ཀྱི་ཡོ་བྱད་རྫས༔ ཏིང་འཛིན་དམིགས་པས་ཀུན་བཟང་མཆོད་སྤྲིན་ལྟར༔ ས་གསུམ་གང་ཞིང་འཁོར་བ་མ་སྟོང་བར༔ རྡུལ་སྙེད་རིག་འཛིན་སངས་རྒྱས་བྱང་ཆུབ་སེམས༔ ཚོགས་ཞིང་སྐྱབས་ཀྱི་དམ་པ་ཐམས་ཅད་ཀྱི༔ ཟག་མེད་གསང་གསུམ་དགྱེས་པའི་ཡོ་བྱད་དུ༔ འཛད་མེད་ཡིད་བཞིན་བདུད་རྩིར་བྱིན་གྱིས་བརླབས༔ དད་མོས་གུས་པས་གདུང་བའི་དབྱངས་དང་བཅས༔ འབུལ་ཞིང་ཐུགས་དམ་བསྐང་ངོ་བཞེས་སུ་གསོལ༔ ཧཱུྃ་ཧྲཱིཿ དུས་གསུམ་སངས་རྒྱས་ཐམས་ཅད་འདུས་པའི་སྐུ༔ ཁམས་གསུམ་འགྲོ་བ་ཡོངས་ཀྱི་མགོན་གཅིག་པུ༔ རང་བྱུང་པདྨའི་སྡོང་པོར་སྐུ་འཁྲུངས་པ༔ རྡོ་རྗེ་ཐོད་ཕྲེང་རྩལ་གྱི་ཐུགས་དམ་བསྐང་༔ སྒྲིབ་གཉིས་ཡོངས་དག་སྐྱེ་མེད་དབྱིངས་ཉིད་ལས༔ རྒྱལ་ཀུན་ཐུགས་ཀྱི་བདག་ཉིད་མཚན་དཔེར་ཤར༔ ཐབས་ཤེས་དབྱེར་མེད་ཡང་དག་རིག་འཛིན་མཆོག༔ པདྨ་འབྱུང་གནས་ཡབ་ཡུམ་ཐུགས་དམ་བསྐང་༔ མཁྱེན་རབ་མཐར་ཕྱིན་ཤེས་བྱ་ཐམས་ཅད་གཟིགས༔ སྐལ་ལྡན་བློ་གྲོས་གསལ་བྱེད་ལྷག་པའི་ལྷ༔ སྐུ་ཡི་བདག་ཉིད་འཇམ་དཔལ་རིག་འཛིན་མཆོག༔ མཁས་པ་བློ་ལྡན་མཆོག་སྲེད་ཐུགས་དམ་བསྐང་༔ ཆགས་མེད་སྐྱོན་སྤངས་ཁམས་གསུམ་དབང་དུ་སྡུད༔ སྣང་སྲིད་ཆོས་ཀུན་བདེན་མེད་ཟིལ་གྱིས་གནོན༔ གསུང་གི་དབང་ཕྱུག་རྟ་མཆོག་རིག་པ་འཛིན༔ གུ་རུ་པདྨ་རྒྱལ་པོའི་ཐུགས་དམ་བསྐང་༔ ངོ་བོ་གཅིག་ལས་རྣམ་འཕྲུལ་དུ་མར་འགྱེད༔ བདུད་དང་མུ་སྟེགས་ལོག་འདྲེན་འདུལ་བའི་གཤེད༔ ཕྲིན་ལས་མངའ་བདག་ཕུར་པའི་རིག་འཛིན་མཆོག༔ ཁྲོ་རྒྱལ་རྡོ་རྗེ་གྲོ་ལོད་ཐུགས་དམ་བསྐང་༔ བདག་མེད་ཆོས་ཀྱི་ང་རོས་རྒོལ་ངན་འཇོམས༔ མཐུ་རྩལ་ཐོགས་མེད་སངས་རྒྱས་བསྟན་པ་སྲུང་༔ མ་མོའི་ཚོགས་རྗེ་རྦོད་གཏོང་རིག་འཛིན་མཆོག༔ དཔའ་བོ་སེང་གེ་སྒྲ་སྒྲོག་ཐུགས་དམ་བསྐང་༔ ཕུང་པོ་ལྔ་སོགས་ཕྱི་ནང་སྣོད་བཅུད་ཆོས༔ དག་མཉམ་བདུད་རྩིར་རྟོགས་པའི་དགོངས་པ་ཅན༔ ཀུན་འདུས་ཆེ་མཆོག་རིག་འཛིན་སྤྲུལ་པའི་སྐུ༔ དགེ་སློང་པདྨ་སཾ་བྷའི་ཐུགས་དམ་བསྐང་༔ ཆོས་ཉིད་ཞི་ལས་གཡོས་པ་མེད་བཞིན་དུ༔ གདུལ་བྱའི་སྣང་ངོར་དེར་མཐུན་གཟུགས་སུ་སྣང་༔ མཁའ་འགྲོའི་དབང་ཕྱུག་མཆོད་བསྟོད་རིག་པ་འཛིན༔ གུ་རུ་ཤཱཀྱ་སེང་གེའི་ཐུགས་དམ་བསྐང་༔ མི་བསྲུན་འབྱུང་པོས་བསྟན་འགྲོའི་དཔལ་ཕྲོག་པའི༔ སྲོག་གི་གཤེད་དབབ་སྡེ་བརྒྱད་བྲན་དུ་ཁོལ༔ དུར་ཁྲོད་གནས་བཞུགས་དྲག་སྔགས་རིག་པ་འཛིན༔ རྣལ་འབྱོར་ཉི་མ་འོད་ཟེར་ཐུགས་དམ་བསྐང་༔ ཧཱུྃ་ཧྲཱིཿ གངས་ཅན་བོད་དུ་པདྨ་རྒྱལ་པོ་ཡིས༔ སྒྲུབ་སྡེ་ཆེན་པོ་བརྒྱད་ཀྱི་དཀྱིལ་འཁོར་དུ༔ དབང་བསྐུར་ལུང་བསྟན་བསྙེན་སྒྲུབ་རྟགས་ཐོན་པའི༔ སྤྲུལ་པའི་རྗེ་འབངས་ཉེར་ལྔའི་ཐུགས་དམ་བསྐང་༔ ཁྱད་པར་བཀའ་བབས་སྙིང་གི་མི་དགུ་ཞེས༔ ཡང་དག་ཐུགས་ཀྱི་བཀའ་བབས་ཉི་ཟེར་ཆིབས༔ གནུབས་བན་ནམ་མཁའི་སྙིང་པོའི་ཐུགས་དམ་བསྐང་༔ འཇམ་དཔལ་གཤིན་རྗེའི་བཀའ་བབས་གྲུབ་པ་ཐོབ༔ སྒྲགས་ཀྱི་ཡང་རྫོང་བྲག་ལ་ཕུར་པ་ཐེབས༔ རོང་སྟོན་སངས་རྒྱས་ཡེ་ཤེས་ཐུགས་དམ་བསྐང་༔ ངན་ལམ་རིགས་འཁྲུངས་དབང་ཆེན་བཀའ་བབས་པས༔ བསྙེན་སྒྲུབ་མཐར་ཕྱིན་རྟ་སྐད་གཙུག་ནས་འཚེར༔ སྔགས་འཆང་རྒྱལ་བ་མཆོག་དབྱངས་ཐུགས་དམ་བསྐང་༔ མཁར་ཆེན་རྒྱུད་འཁྲུངས་བྱང་ཆུབ་སེམས་དང་ལྡན༔ ཕུར་པའི་བཀའ་བབས་ཕ་མེས་ཕུང་སྲི་བཏུལ༔ རྫུ་འཕྲུལ་གཡུལ་ལས་བསད་པའི་མི་རོ་སློང་༔ མཁའ་འགྲོ་ཡེ་ཤེས་མཚོ་རྒྱལ་ཐུགས་དམ་བསྐང་༔ མ་མོའི་བཀའ་བབས་རྩ་རླུང་ལས་སུ་རུང་༔ མཁའ་འགྲོ་དབང་བསྡུས་མཁའ་ལ་བྱ་ལྟར་ལྡིང་༔ འབྲོག་མི་དཔལ་གྱི་ཡེ་ཤེས་ཐུགས་དམ་བསྐང་༔ གཉགས་ཀྱི་རིགས་འཁྲུངས་ཆེ་མཆོག་བཀའ་བབས་པས༔ ཡོན་ཏན་མངོན་གྲུབ་བྲག་ལས་བདུད་རྩི་འབྱིན༔ མཁས་མཆོག་ཡེ་ཤེས་གཞོན་ནུའི་ཐུགས་དམ་བསྐང་༔ མཆོད་བསྟོད་བཀའ་བབ་སྟག་ཚང་སེང་ཕུག་ཏུ༔ དྲེགས་པ་ཀུན་འདུལ་ཞལ་མཐོང་དངོས་གྲུབ་ཐོབ༔ མཐུ་ནུས་ཐོགས་མེད་ལྷ་སྲིན་བྲན་དུ་འཁོལ༔ རླངས་ཆེན་དཔལ་གྱི་སེང་གེའི་ཐུགས་དམ་བསྐང་༔ དྲག་སྔགས་བཀའ་བབ་སྟོབས་ལྡན་དངོས་སུ་གྲུབ༔ རྫོགས་ཆེན་སྡེ་གསུམ་བསྟན་པའི་སྲོག་ཤིང་འཛིན༔ ཡེ་ཤེས་སྤྱན་མངའ་དམོད་པས་གདུག་ཅན་སྒྲོལ༔ པ་གོར་བཻ་རོ་ཙ་ནའི་ཐུགས་དམ་བསྐང་༔ བདེ་གཤེགས་འདུས་པའི་བཀའ་བབས་ཆོས་ཀྱི་བདག༔ རྒྱལ་བས་ལུང་བསྟན་སྣང་སྲིད་ཟིལ་གྱིས་གནོན༔ གངས་ཅན་བོད་དུ་རྒྱལ་བསྟན་དར་རྒྱས་མཛད༔ ཆོས་རྒྱལ་ཁྲི་སྲོང་ལྡེའུ་བཙན་ཐུགས་དམ་བསྐང་༔ གཞན་ཡང་རྩ་གསུམ་ཡོངས་རྫོགས་དཀྱིལ་འཁོར་དུ༔ སྨིན་ཅིང་གྲོལ་ནས་བསྙེན་སྒྲུབ་མཐར་ཕྱིན་པས༔ གྲུབ་པའི་དབང་ཕྱུག་དུས་གསུམ་བྱོན་པ་ཡི༔ རྩ་བརྒྱུད་བླ་མ་རྣམས་ཀྱི་ཐུགས་དམ་བསྐང་༔ གཉུག་མའི་ཡེ་ཤེས་སྒྲིབ་བྲལ་རང་ཞལ་སྟོན༔ དམ་ཚིག་དབང་གི་སློབ་དཔོན་ཐུགས་དམ་བསྐང་༔ གཞི་ལམ་འབྲས་བུའི་རྒྱུད་དོན་རྣ་བར་སྒྲོག༔ ཤེས་རབ་རྒྱུད་ཀྱི་སློབ་དཔོན་ཐུགས་དམ་བསྐང་༔ ལྟ་སྤྱོད་ཟུང་འབྲེལ་ཉམས་ལེན་གནད་ལ་བརྡེག༔ མན་ངག་ལུང་གི་སློབ་དཔོན་ཐུགས་དམ་བསྐང་༔ ཉམས་ཆག་བཤགས་ཚུལ་ཇི་བཞིན་རྒྱུད་ལ་སྦྱོར༔ ཉམས་ཆག་སྐོང་བའི་སློབ་དཔོན་ཐུགས་དམ་བསྐང་༔ ཐ་མལ་གཟུགས་ལ་སེམས་ཉིད་ལྷ་སྐུར་སྨིན༔ རྣམ་པར་སྨིན་པའི་རིག་འཛིན་ཐུགས་དམ་བསྐང་༔ བགྲེས་རྒུད་མེད་པར་རྡོ་རྗེའི་ཆོས་དང་ལྡན༔ ཚེ་ལ་དབང་བའི་རིག་འཛིན་ཐུགས་དམ་བསྐང་༔ སྒོམ་ལམ་མཐར་ཕྱིན་སྣང་སེམས་འདོད་རྒུར་བསྒྱུར༔ ཕྱག་རྒྱ་ཆེན་པོའི་རིག་འཛིན་ཐུགས་དམ་བསྐང་༔ མི་སློབ་ཡེ་ཤེས་འགྲོ་དོན་འབད་མེད་འབྱུང་༔ ལྷུན་གྱིས་གྲུབ་པའི་རིག་འཛིན་ཐུགས་དམ་བསྐང་༔ དབང་དང་དམ་ཚིག་མར་མེས་རྒྱུད་གཅིག་འབྲེལ༔ རྡོ་རྗེའི་མཆེད་ལྕམ་རྣམས་ཀྱི་ཐུགས་དམ་བསྐང་༔ ལྷན་སྐྱེས་ཡེ་ཤེས་བདེ་ཆེན་ངོ་བོར་སྟོན༔ ཤེས་རབ་གཟུངས་མ་རྣམས་ཀྱི་ཐུགས་དམ་བསྐང་༔ དཔག་བསམ་ཤིང་ལྟར་གང་འདོད་དངོས་གྲུབ་སྟེར༔ ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་༔ ཆོས་མཛད་རྣལ་འབྱོར་བརྩེ་བས་བུ་བཞིན་སྐྱོང་༔ གནས་གསུམ་མཁའ་འགྲོ་རྣམས་ཀྱི་ཐུགས་དམ་བསྐང་༔ བྱང་ཆུབ་སྒྲུབ་པའི་གེགས་སེལ་མཐུན་རྐྱེན་སྒྲུབ༔ ཆོས་སྐྱོང་སྲུང་མ་རྣམས་ཀྱི་ཐུགས་དམ་བསྐང་༔ གཏེར་རིགས་བཅོ་བརྒྱད་ཆོས་ཀྱི་གྲོགས་མཛད་པའི༔ ཟབ་གཏེར་སྲུང་མ་རྣམས་ཀྱི་ཐུགས་དམ་བསྐང་༔ ནོར་དང་ལོངས་སྤྱོད་བསམ་པའི་རེ་འདོད་སྐོང་༔ གནོད་སྦྱིན་ནོར་ལྷའི་ཚོགས་ཀྱི་ཐུགས་དམ་བསྐང་༔ ཕ་མེས་མི་རབས་ཆོས་རྒྱུད་ལ་འགོ་བའི༔ བརྒྱུད་གསུམ་སྲུང་མ་རྣམས་ཀྱི་ཐུགས་དམ་བསྐང་༔ རྟག་ཏུ་ཕན་པ་ལྷུར་ལེན་གནོད་པ་ཟློག༔ འགོ་བའི་ལྷ་ལྔ་རྣམས་ཀྱི་ཐུགས་དམ་བསྐང་༔ ཧཱུྃ་ཧྲཱིཿ ཐུགས་དམ་གཉན་པོ་བསྐང་བའི་དམ་རྫས་ནི༔ ཕྱི་སྣོད་རི་རབ་གླིང་བཞི་ཉི་ཟླ་དང་༔ རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད༔ སྒེག་སོགས་མཆོད་པའི་ལྷ་མོས་གར་སྟབས་བསྒྱུར༔ རིན་ཆེན་རི་བོ་མ་རྨོས་ལོ་ཏོག་དང་༔ ཁྲུས་ཀྱི་རྫིང་བུ་སྐྱེད་ཚལ་འདོད་འཇོའི་བ༔ ཡིད་བཞིན་ལྗོན་ཤིང་ཟས་གོས་དཀོར་ཆ་སོགས༔ སྲིད་ཞིའི་ཡོ་བྱད་སྣ་རྒུས་ཐུགས་དམ་བསྐང་༔ འགྲོས་མགྱོགས་བཞོན་པ་ཤིང་རྟ་གཏེར་གྱི་བུམ༔ འདབ་ཆགས་ཆུ་གནས་སྟག་སེང་སྲོག་ཆགས་རིགས༔ རང་རང་ཡོན་ཏན་གཞོན་དར་ལང་ཚོ་ངོམ༔ མཐུ་རྩལ་སྟོབས་ལྡན་རྣམས་ཀྱིས་ཐུགས་དམ་བསྐང་༔ ཕྱི་མཆོད་མེ་ཏོག་བདུག་སྤོས་མེ་མར་དྲི༔ ཞལ་ཟས་སྒྲ་སྙན་རོལ་མོས་ཐུགས་དམ་བསྐང་༔ ནང་མཆོད་རྩ་བརྒྱད་སྟོང་སྦྱར་སྨན་མཆོག་དང་༔ དམར་ཆེན་བྷ་ལིང་གཏོར་མས་ཐུགས་དམ་བསྐང་༔ གསང་མཆོད་ཞིང་བཅུ་ལས་རླུང་ཀུན་རྟོག་ཚོགས༔ སྐྱེ་མེད་དབྱིངས་སུ་སྒྲོལ་བས་ཐུགས་དམ་བསྐང་༔ ལས་ཆོས་དམ་ཚིག་ཕྱག་རྒྱ་རྣམ་གསུམ་ལ༔ ཟག་མེད་ཀློང་དུ་སྦྱོར་བས་ཐུགས་དམ་བསྐང་༔ བསྐང་བྱ་སྐོང་བྱེད་བསྐང་རྫས་སྒྱུ་མའི་འཕྲུལ༔ རིག་སྟོང་བརྗོད་མེད་ལྟ་བས་ཐུགས་དམ་བསྐང་༔ ཡེང་འཁྲུལ་གཉིས་མེད་སྒོམ་པས་ཐུགས་དམ་བསྐང་༔ ཞེན་མེད་རང་བབས་སྤྱོད་པས་ཐུགས་དམ་བསྐང་༔ དག་མཉམ་ཐོབ་མེད་འབྲས་བུས་ཐུགས་དམ་བསྐང་༔ དེ་ལྟར་ཐུགས་དམ་བསྐངས་པའི་བྱིན་རླབས་ཀྱིས༔ སྔོན་ལས་ངན་པས་མནར་བའི་བདག་དང་འགྲོ༔ ཚེ་རབས་སྡིག་སྒྲིབ་ཉམས་ཆག་དབྱིངས་སུ་དག༔ ས་ལམ་ཡོན་ཏན་ཡར་ངོའི་ཟླ་བ་ལྟར༔ མི་ཉམས་གོང་དུ་འཕེལ་བའི་དངོས་གྲུབ་སྩོལ༔ ཕན་བདེའི་འབྱུང་གནས་རྒྱལ་བསྟན་དར་ཞིང་རྒྱས༔ བསྟན་འཛིན་སྐྱེས་བུའི་སྐུ་ཚེ་བརྟན་པ་དང་༔ ཡངས་པའི་རྒྱལ་ཁམས་བདེ་སྐྱིད་ཆོས་ལ་སྤྱོད༔ རྟག་ཏུ་དགེ་ཞིང་འཕེལ་བར་མཛད་དུ་གསོལ༔ གནས་སྐབས་རྒྱལ་བའི་བསྟན་ལ་ཞུགས་སོ་ཅོག༔ ཚེ་རིང་ནད་མེད་དམ་གཙང་སེམས་བསྐྱེད་འབྱོངས༔ སྨིན་གྲོལ་ལམ་གྱིས་རྒྱུད་སྦྱངས་ཚེ་འདི་རུ༔ རྡོ་རྗེ་འཆང་དབང་འགྲུབ་པར་མཛད་དུ་གསོལ༔ ཧཱུྃ་ཧྲཱིཿ དང་པོ་གཞི་ཐོག་ནས་འཁྲུལ་ད་ལྟའི་བར༔ མི་དགེའི་ལས་ངན་སྤྱི་དང་ཁྱད་པར་དུ༔ གསང་ཆེན་སྒོར་ཞུགས་ཤེས་བཞིན་མི་ལྡན་པས༔ བླ་མ་ལ་ཁྲོས་མཆེད་དང་ལྕམ་དྲལ་བརྙས༔ བསྐྱེད་རིམ་མ་གསལ་རྫོགས་རིམ་གནད་མ་རྟོགས༔ ཕ་མ་མཁན་སློབ་ཡུལ་ལ་དགྲར་བལྟས་པས༔ དམ་ཚིག་འགལ་ཉམས་འདས་རལ་ཅི་མཆིས་པ༔ རྩ་གསུམ་ཡོངས་རྫོགས་སྤྱན་སྔར་བཤགས་ལགས་ན༔ ཉམས་ཤིང་ཉེས་པ་ཐམས་ཅད་བསྐང་བ་དང་༔ བྱང་ཞིང་དག་ནས་ཚངས་པར་མཛད་དུ་གསོལ༔ ཅེས་དང་གཞན་ཡང་ཡི་གེ་བརྒྱ༔ བཤགས་པའི་རིམ་པ་ཅི་རིགས་བརྗོད༔ འདི་ནི་ཉམས་པ་སྐོང་བའི་ཐབས༔ བར་ཆད་སེལ་ཞིང་ཚོགས་ཆེན་འགྲུབ༔ རྗེས་ལ་རྣམ་པར་མི་རྟོག་པའི༔ ངང་ལ་འཇོག་པ་བསྐང་བའི་མཆོག༔ ས་མ་ཡཱ༔ གུ་ཧྱ༔