བསྐང་བསྡུས་བཅུད་དྲིལ་ནོར་བུའི་བུམ་བཟང་།
༄༅།། གུ་རུ་མཚན་བརྒྱད་ཀྱི་ཆོ་གའི་བསྐང་བསྡུས་བཅུད་དྲིལ་ནོར་བུའི་བུམ་བཟང་བཞུགས།
༄༅།། ན་མོ་གུ་རུ། ཆོ་གའི་ཚོགས་ཀྱི་སྐབས་བསྐང་བ་རྒྱས་པ་གཞུང་ལྟར་མི་ནུས་ན་ཅུང་ཟད་བསྡུས་པ་འདི་བཞིན་ནོ། །ནམ་མཁའ་མཛོད་ཀྱི་སྔགས་ཀྱིས་བྱིན་བརླབས་སྔོན་དུ་འགྲོ་བས། ཧཱུྃ་ཧྲཱིཿ མ་སྐྱེས་ཆོས་དབྱིངས་སྟོང་པའི་ངང་ཉིད་ལས། །ཏིང་འཛིན་བདེན་མེད་སྒྱུ་མའི་ཆོ་འཕྲུལ་འགྱེད། །དངོས་བཤམས་ཡིད་སྤྲུལ་བསྐང་རྟེན་སྒྲུབ་པའི་རྫས། །ཀུན་བཟང་མཆོད་པའི་སྤྲིན་དུ་བྱིན་བརླབས་ནས། །སྐྱབས་གནས་མཆོག་གསུམ་རྩ་གསུམ་སྲུང་མར་བཅས། །ཟག་མེད་སྒོ་གསུམ་དགྱེས་ཕྱིར་གུས་པས་འབུལ། །བརྩེ་ཆེན་ཐུགས་ཀྱིས་བཞེས་ཤིང་བྱིན་གྱིས་རློབས། །ཧཱུྃ་ཧྲཱིཿ ངོ་བོ་ཀ་དག་རང་བཞིན་ལྷུན་གྱིས་གྲུབ། །སྐུ་གསུམ་བརྒྱུད་པའི་བླ་མའི་ཐུགས་དམ་བསྐང་། །རྒྱལ་བ་ཀུན་དངོས་འགྲོ་བ་ཡོངས་ཀྱི་མགོན། །གུ་རུ་མཚོ་སྐྱེས་རྡོ་རྗེའི་ཐུགས་དམ་བསྐང་། །ཐབས་ཤེས་ཟུང་འཇུག་ཐུགས་ཀྱི་རིག་འཛིན་མཆོག །གུ་རུ་པད་འབྱུང་ཡབ་ཡུམ་ཐུགས་དམ་བསྐང་། །མཁྱེན་རབ་དབང་ཕྱུག་སྐུ་ཡི་རིག་པ་འཛིན། །གུ་རུ་བློ་ལྡན་མཆོག་སྲེད་ཐུགས་དམ་བསྐང་། །ཆགས་བྲལ་དབང་ཆེན་གསུང་གི་རིག་འཛིན་མཆོག །གུ་རུ་པདྨ་རྒྱལ་པོའི་ཐུགས་དམ་བསྐང་། །བདུད་སྡེ་ཚར་གཅོད་ཕྲིན་ལས་རིག་འཛིན་མཆོག །གུ་རུ་རྡོ་རྗེ་གྲོ་ལོད་ཐུགས་དམ་བསྐང་། །སྡེ་སྣོད་གསུམ་ལྡན་བདུད་རྩིའི་རིག་པ་འཛིན། །གུ་རུ་པདྨ་སཾ་བྷའི་ཐུགས་དམ་བསྐང་། །བདག་རྟོག་འདུལ་མཛད་མ་མོའི་རིག་པ་འཛིན། །གུ་རུ་སེང་གེ་སྒྲ་སྒྲོག་ཐུགས་དམ་བསྐང་། །དྲེགས་པ་ཟིལ་གནོན་མཆོད་བསྟོད་རིག་འཛིན་མཆོག །གུ་རུ་ཤཱཀྱ་སེང་གེའི་ཐུགས་དམ་བསྐང་། །ཉི་ཟླ་གདན་བཏིང་དྲག་སྔགས་རིག་པ་འཛིན། །གུ་རུ་ཉི་མ་འོད་ཟེར་ཐུགས་དམ་བསྐང་། །འཕགས་ཡུལ་གསང་སྔགས་གྲུབ་བརྙེས་རྫུ་འཕྲུལ་བསྟན། །གྲུབ་ཆེན་བརྒྱད་ཅུ་རྩ་བཞིའི་ཐུགས་དམ་བསྐང་། །པད་འབྱུང་སློབ་མ་མཆོག་གི་སར་གཤེགས་པའི། །རིག་འཛིན་རྗེ་འབངས་ཉེར་ལྔའི་ཐུགས་དམ་བསྐང་། །ཡང་དག་བཀའ་བབ་ཉི་མའི་ཟེར་ལ་ཆིབས། །གནུབས་བན་ནམ་མཁའི་སྙིང་པོའི་ཐུགས་དམ་བསྐང་། །གཤིན་རྗེའི་བཀའ་བབ་བྲག་ལ་ཕུར་པ་ཐེབས། །གནུབས་སྟོན་སངས་རྒྱས་ཡེ་ཤེས་ཐུགས་དམ་བསྐང་། །དབང་ཆེན་བཀའ་བབས་རྟ་སྐད་གཙུག་ནས་འཚེར། །ངན་ལམ་རྒྱལ་བ་མཆོག་དབྱངས་ཐུགས་དམ་བསྐང་། །ཕུར་པའི་བཀའ་བབས་ཕུར་པ་མཁའ་ལ་ལྡིང་། །མཁར་ཆེན་ཡེ་ཤེས་མཚོ་རྒྱལ་ཐུགས་དམ་བསྐང་། །མ་མོའི་བཀའ་བབས་ནམ་མཁར་བྱ་ལྟར་འཕུར། །འབྲོག་མི་དཔལ་གྱི་ཡེ་ཤེས་ཐུགས་དམ་བསྐང་། །མཆོད་བསྟོད་བཀའ་བབས་སྡེ་བརྒྱད་བྲན་དུ་འཁོལ། །རླངས་ཆེན་དཔལ་གྱི་སེང་གེའི་ཐུགས་དམ་བསྐང་། །དྲག་སྔགས་བཀའ་བབས་དམོད་པས་དགྲ་བགེགས་སྒྲོལ། །པ་གོར་བཻ་རོ་ཙ་ནའི་ཐུགས་དམ་བསྐང་། །ཡོངས་རྫོགས་བཀའ་བབ་གངས་ལྗོངས་རྒྱལ་བསྟན་སྤེལ། །ལྷ་ཅིག་ཚངས་པའི་མེ་ཏོག་ཐུགས་དམ་བསྐང་། །དབང་བསྐུར་རྒྱུད་བཤད་ལུང་འབོག་ཉམས་ཆག་སྐོང་། །རྡོ་རྗེ་སློབ་དཔོན་རྣམ་བཞིའི་ཐུགས་དམ་བསྐང་། །རྣམ་སྨིན་ཚེ་དབང་ཕྱག་ཆེན་ལྷུན་གྱིས་གྲུབ། །རིག་འཛིན་རྣམ་པ་བཞི་ཡི་ཐུགས་དམ་བསྐང་། །དགོངས་བརྡ་སྙན་བརྒྱུད་མཁའ་འགྲོ་གཏད་རྒྱ་དང་། །སྨོན་ལམ་དབང་བསྐུར་དག་སྣང་བྱིན་རླབས་འཕོས། །ཉམས་རྟོགས་གོང་འཕེལ་ཐུགས་རྗེའི་རྩལ་རྒྱས་པའི། །རྩ་བརྒྱུད་དྲིན་ཆེན་བླ་མའི་ཐུགས་དམ་བསྐང་། །གང་བསམ་མ་ལུས་ལྷུན་གྱིས་གྲུབ་མཛད་པའི། །ཡི་དམ་སྒྲུབ་ཆེན་བཀའ་བརྒྱད་ཐུགས་དམ་བསྐང་། །བར་ཆད་སེལ་ཞིང་མ་ཡིས་བུ་བཞིན་སྐྱོང་། །གནས་གསུམ་དཔའ་བོ་ཌཱཀྐིའི་ཐུགས་དམ་བསྐང་། །ཚེ་དང་ནོར་དང་ལོངས་སྤྱོད་དངོས་གྲུབ་སྟེར། །ནོར་ལྷ་གཏེར་བདག་རྣམས་ཀྱི་ཐུགས་དམ་བསྐང་། །ཆོས་དང་མཐུན་ལ་མི་འབྲལ་སྡོང་གྲོགས་མཛོད། །ཆོས་སྐྱོང་བཀའ་གཏེར་སྲུང་མའི་ཐུགས་དམ་བསྐང་། །མི་རབས་ཆོས་རྒྱུད་ཚེ་རབས་སྲུང་མ་སྟེ། །འགོ་ཞིང་སྐྱོབ་པའི་ལྷ་སྲུང་ཐུགས་དམ་བསྐང་། །ཤར་ལྷོ་ནུབ་བྱང་ཕྱོགས་མཚམས་བར་ཆད་སྲུང་། །སྒོ་སྲུང་རྒྱལ་ཆེན་སྡེ་བཞིའི་ཐུགས་དམ་བསྐང་། །ཧཱུྃ་ཧྲཱིཿ ཐུགས་དམ་གཉན་པོ་བསྐང་བའི་དམ་རྫས་ནི། །རི་རབ་གླིང་བཞི་ཕྱི་སྣོད་འཇིག་རྟེན་དང་། །ནང་བཅུད་ལྷ་མིའི་འདོད་ཡོན་འབྱོར་པའི་ཚོགས། །གང་ཡང་མ་ཚང་མེད་པས་ཐུགས་དམ་བསྐང་། །ཕྱི་ནང་གསང་མཆོད་དེ་བཞིན་ཉིད་ཀྱི་དབྱིངས། །ལྟ་སྒོམ་སྤྱོད་འབྲས་བཞི་ཡིས་ཐུགས་དམ་བསྐང་། །དེ་ལྟར་ཐུགས་དམ་བསྐངས་བའི་བྱིན་རླབས་ཀྱིས། །རྒྱལ་ཁམས་བདེ་ཞིང་སངས་རྒྱས་བསྟན་པ་དར། །བདག་དང་འདིར་འཚོགས་མཆེད་ལྕམ་ཐམས་ཅད་ཀྱི། །སྔོན་ལས་བྱང་ཞིང་འཕྲལ་རྐྱེན་བར་ཆད་ཟློག །ཚེ་རིང་ནད་མེད་ཆོས་མཐུན་བསམ་པ་འགྲུབ། །ཉམས་ཆག་སྡིག་ལྟུང་ཆོས་ཉིད་དབྱིངས་སུ་དག །ཚངས་པ་མཆོག་གི་དངོས་གྲུབ་སྩལ་དུ་གསོལ།། ཡི་གེ་བརྒྱ་པ་བཟླ་ཞིང་མི་དམིགས་པའི་ངང་དུ་བཞག་གོ། ཞེས་པའང་ཚོགས་གྲངས་བསོགས་པའི་ཚེ་ཉེ་བར་མཁོ་བའི་ཕྱིར་ལྡན་གྲོལ་ཡོན་ཏན་མངའ་བའི་དམ་པ་གཞན་ཕན་གྱི་ཐུགས་བཞེད་ལྟར་རྒྱ་སྤྲུལ་རྒན་པོས་བྲིས་པ་དུས་ཀུན་ཏུ་དགེ་བར་གྱུར་ཅིག་ཛ་ཡནྟུ།།