བསྐང་བ་ཤིན་ཏུ་བསྡུས་པ།
༄༅།། བསྐང་བ་ཤིན་ཏུ་བསྡུས་པ་བཞུགས། ཨེ་མ་ཧོ། སྟོང་ཉིད་དབྱིངས་ལས་ཏིང་འཛིན་སྒྱུ་མའི་འཕྲུལ། །དངོས་བཤམས་ཡིད་སྤྲུལ་བསྐང་རྫས་ཡོ་བྱད་ཚོགས། །ཀུན་བཟང་མཆོད་པའི་སྤྲིན་དུ་བྱིན་བརླབས་ནས། །རྩ་གསུམ་བདེ་གཤེགས་ཡོངས་རྫོགས་ཐུགས་དམ་བསྐང་།། ཧཱུྃ་ཧྲཱིཿ སྐུ་བཞིའི་བདག་ཉིད་སྟོན་པ་བླ་ན་མེད། །རྫོགས་པའི་སངས་རྒྱས་རྣམས་ཀྱི་ཐུགས་དམ་བསྐང་། །ལམ་དང་འགོག་བདེན་སྐྱོབ་པ་བླ་ན་མེད། །བདེན་གཉིས་དམ་ཆོས་རྣམས་ཀྱི་ཐུགས་དམ་བསྐང་། །ཚོགས་ཀྱི་ཞིང་མཆོག་འདྲེན་པ་བླ་ན་མེད། །ཐེག་གསུམ་དགེ་འདུན་རྣམས་ཀྱི་ཐུགས་དམ་བསྐང་། །བྱིན་རླབས་རྩ་བ་མ་ནོར་ཐར་ལམ་སྟོན། །རྩ་བརྒྱུད་བླ་མ་རྣམས་ཀྱི་ཐུགས་དམ་བསྐང་། །དངོས་གྲུབ་རྩ་བ་གང་འདུལ་གཟུགས་སྐུར་སྟོན། །ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་། །ཕྲིན་ལས་རྩ་བ་སྒྲུབ་མཆོག་བུ་བཞིན་སྐྱོང་། །མ་མོ་མཁའ་འགྲོ་རྣམས་ཀྱི་ཐུགས་དམ་བསྐང་། །རྒྱལ་ཀུན་སྤྱི་གཟུགས་རབ་འབྱམས་དཀྱིལ་འཁོར་གཙོ། །པདྨ་ཐོད་ཕྲེང་རྩལ་གྱི་ཐུགས་དམ་བསྐང་། །སྒྲུབ་སྡེ་བརྒྱད་དང་དབྱེར་མེད་ལྷག་པའི་ལྷ། །སྤྲུལ་པའི་གུ་རུ་མཚན་བརྒྱད་ཐུགས་དམ་བསྐང་། །བཀའ་བརྒྱད་བཀའ་བབ་གྲུབ་པའི་རིག་པ་འཛིན། །ལས་ཅན་ཐུགས་ཀྱི་བུ་དགུའི་ཐུགས་དམ་བསྐང་། །གསང་སྔགས་གྲུབ་བརྙེས་གཞན་སྣང་ཟིལ་གྱིས་གནོན། །ཐུགས་སྲས་རྗེ་འབངས་ཉེར་ལྔའི་ཐུགས་དམ་བསྐང་། །སྨིན་གྲོལ་བསྐྱེད་རྫོགས་ལམ་ཀུན་མཐའ་རུ་ཕྱིན། །རྒྱ་བོད་མཁས་གྲུབ་ཡོངས་ཀྱི་ཐུགས་དམ་བསྐང་། །བར་ཆད་སེལ་ཞིང་མཐུན་རྐྱེན་ཆར་འབེབས་པའི། །དམ་ཅན་ནོར་ལྷ་རྒྱ་མཚོའི་ཐུགས་དམ་བསྐང་། །དེ་ལྟར་ཐུགས་དམ་བསྐངས་པའི་བྱིན་རླབས་ཀྱིས། །འདིར་འདུས་བདག་ཅག་ཉམས་ཆག་དབྱིངས་སུ་བསྐངས། །མཆོག་ཐུན་དངོས་གྲུབ་ཚེ་འདིར་ཐོབ་པ་དང་། །གཞན་དོན་ཡིད་བཞིན་འགྲུབ་པའི་དགེ་ལེགས་སྩོལ། །ཅེས་དང་ཡི་གེ་བརྒྱ་པས་ལྷག་ཆད་བསྐང་ངོ་། །རྒྱ་སྤྲུལ་འདུ་ཤེས་གསུམ་པས་སུག་བྲིས་བགྱིས་པའོ།།