དབང་ཆོག་བདུད་རྩིའི་བུམ་བཟང་།
གུ་རུའི་ཐུགས་ཀྱི་སྒྲུབ་པ་ལས༔ དབང་ཆོག་བདུད་རྩིའི་བུམ་བཟང་བཞུགས༔
ན་མོ་བིདྱཱ་དྷ་ར་པདྨ་ཀཱ་ར་ཡེ༔ སྐུ་གསུམ་སྟོན་པ་ཀུན་འདུས་པའི༔ རིགས་ཀུན་བདག་ཉིད་པད་འབྱུང་མཆོག༔ སྒྲུབ་ཐབས་ཟབ་མོ་ཉམས་ལེན་པའི༔ རྩ་བ་དབང་མཆོག་འདི་ལ་རག༔ སྔོན་འགྲོ་དངོས་གཞི་རྗེས་དང་གསུམ༔ དང་པོ་དབེན་ཞིང་ཉམས་དགའི་སར༔ མཎྜལ་བློ་རིམ་དག་དང་བསྟུན༔ ཚོན་ནམ་ཡང་ན་ཚོམ་བུ་བཀོད༔ དབང་གི་སྒྲུབ་རྫས་འདི་ལྟ་སྟེ༔ བུམ་པ་བཅུད་ལྡན་ཁ་རྒྱན་ཅན༔ འབུར་རམ་རས་བྲིས་སྐུ་གཟུགས་དང་༔ སེལ་མེད་དམ་རྫས་བྱང་ཆུབ་སེམས༔ བདེ་བསྐྱེད་སྣོད་དུ་ལེགས་པར་བརྩལ༔ སྒྲུབ་པའི་ཡི་གེ་སྔགས་བྱང་དང་༔ མན་ཤེལ་རྡོ་རྗེ་རྩེ་ལྔ་པ༔ ཁ་ཊཱཾ་ལྷ་ཡི་གྲངས་ལྡན་པའི༔ གཏོར་མ་སྐུ་གཟུགས་ལེགས་བཀོད་དེ༔ གཉུག་མར་གནས་ལ་གཏོར་མ་དབུལ༔ ནག་ཕྱོགས་འདྲེ་རིགས་སྔགས་ཀྱིས་བསྐྲད༔ བསྲུང་བའི་འཁོར་ལོས་མཚམས་ཡང་གཅོད༔ སྐྱབས་སེམས་སྒྲུབ་པའི་གཞུང་བསྲངས་ཏེ༔ བསྙེན་སྒྲུབ་རང་གཞུང་ལྟར་དུ་བྱ༔ བུམ་པ་སྒྲུབ་ཅིང་དབང་བཞི་ལེན༔ མོས་གུས་དད་དང་ལྡན་པ་ཡི༔ སློབ་མ་མདུན་དུ་འཁོད་པ་ལ༔ ཁྲུས་བྱས་བགེགས་བསྐྲད་བསྲུང་འཁོར་བསྒོམ༔ མི་རྟག་བྱང་སེམས་བློ་སྦྱོང་ཚེ༔ གདམས་པར་ཡིད་ཆེས་ཁུངས་བཙུན་པའི༔ ལོ་རྒྱུས་བརྗོད་ཅིང་སློབ་མ་ཡིས༔ རིན་ཆེན་ལྔ་དང་སྨན་ལྔ་སོགས༔ མཎྜལ་དབུལ་ཞིང་བླ་མ་ལ༔ གསོལ་བ་འདེབས་པའི་ཚིག་འདི་བརྗོད༔ རྣམ་པ་ཀུན་གྱི་མཆོག་ལྡན་པའི༔ བདེ་གཤེགས་སྙིང་པོའི་རང་ཞལ་ནི༔ དག་པ་གཟུགས་སྐུའི་རྣམ་པ་རུ༔ ཡོངས་ཤར་དྲིན་ཆེན་བླ་མ་རྗེ༔ རྩ་གསུམ་ཀུན་འདུས་གུ་རུ་ཡི༔ སྨིན་བྱེད་དབང་བསྐུར་བདག་ལ་སྩོལ༔ ཅེས་པས་ལན་གསུམ་གསོལ་བ་འདེབས༔ དེ་ནས་བླ་མས་ལན་སྦྱིན་པ༔ ཡང་དག་ངེས་པའི་དོན་འདོད་ཅིང་༔ ཚེ་འདིར་སངས་རྒྱས་བསྒྲུབ་པ་ལ༔ གསང་ཆེན་ཉེ་ལམ་སྨིན་གྲོལ་གཉིས༔ ཐབས་མཆོག་འདི་ལ་མ་བརྟེན་པར༔ དམན་པའི་ལམ་གྱིས་གྲོལ་མིན་པས༔ བསྐྱེད་རྫོགས་དབང་མཆོག་འདིར་བརྟེན་ན༔ དམ་ཚིག་སྡོམ་པ་བསྲུང་ནུས་སམ༔ ཞེས་དྲིས་ལན་དུ་འདི་བཞིན་ཞུ༔ ཧོ༔ སྔོན་ནས་བདག་ཅག་ལས་འཕྲོ་ལྡན༔ དམ་ཚིག་སྡོམ་པའི་གནས་རྣམས་ཀུན༔ བསྐྱེད་རྫོགས་གཉིས་ལ་ལེགས་བསྡུས་ཏེ༔ མི་ཉམས་སེམས་ཀྱིས་བསྲུང་བར་བྱ༔ ཞེས་བརྗོད་ཚོགས་གཉིས་རྫོགས་པའི་ཕྱིར༔ སྐྱབས་སུ་འགྲོ་ཞིང་སེམས་ཀྱང་བསྐྱེད༔ ཡན་ལག་བདུན་པས་རྒྱུད་སྦྱངས་ནས༔ དབང་དོན་ཡེ་ཤེས་ངོ་སྤྲོད་ཕྱིར༔ ལྷ་ཡི་བསྐྱེད་རྫོགས་ཟབ་མོའི་ངང་༔ དབྱིངས་ནས་སྤྱན་དྲངས་བྱིན་ཡང་དབབ༔ དམ་ཚིག་ཡེ་ཤེས་དབྱེར་མེད་བསྲེས༔ ཁ་དོག་ལྔ་ལྡན་མེ་ཏོག་ནི༔ དཀྱིལ་འཁོར་ལྷ་ལ་འདི་བཞིན་དབུལ༔ ཧོ༔ བདག་ཅག་ཚེ་རབས་སྔོན་དུས་ནས༔ འབྲེལ་བའི་ཡི་དམ་ལྷ་ཡི་མཆོག༔ སྤྲུལ་པའི་གུ་རུ་མཚན་བརྒྱད་དང་༔ དབྱེར་མེད་སྒྲུབ་པའི་ད་ལ་འདིར༔ རིག་པའི་མེ་ཏོག་འདི་འབུལ་ན༔ རིགས་བདག་ལྷ་ཡིས་བཞེས་སུ་གསོལ༔ པུཥྤེ་པྲ་ཏི་ཙ་ཧོ༔ དཀྱིལ་འཁོར་དབུས་སུ་ལྟོས་མེད་དོར༔ མཆོག་དང་ཞི་རྒྱས་དབང་དྲག་སོགས༔ ལས་དང་སྒྲུབ་པའི་རྟེན་འབྲེལ་བརྟག༔ དབུས་སུ་གསང་མཚན་འདི་ཉིད་གདགས༔ པདྨ་ཐོད་ཕྲེང་རྩལ་ཞེས་དང་༔ ཤར་ལྷོ་ནུབ་བྱང་ཕྱོགས་བཞི་རུ༔ རྡོ་རྗེ་རིན་ཆེན་པདྨ་ལས༔ མཚམས་བཞིར་དཔའ་བོ་རིག་འཛིན་ཞེས༔ མཚམས་བརྒྱད་གསང་བའི་རིགས་མིང་གདགས༔ པྲ་ཏི་གྷྲི་ཧ་ཎ་ཨེ་མཾ་ས་ཏྭ་མ་ཧཱ་བྷ་ལ༔ མེ་ཏོག་འཐོར་ཞིང་ཤིས་པ་བརྗོད༔ སློབ་མ་མིག་དར་དམར་པོས་བཀབ༔ གསེར་གྱི་ཐུར་མས་བསལ་བཞིན་དུ༔ ཀྱཻ་ཧོ་སྐལ་ལྡན་རིགས་ཀྱི་བུ༔ བདེ་གཤེགས་སྙིང་པོ་ཆོས་སྐུའི་ཞལ༔ ལྟ་བྱེད་ཡེ་ཤེས་རང་གནས་མིག༔ གློ་བུར་དྲི་མས་བསྒྲིབས་པ་ལ༔ ཤེས་རབ་རྣམ་གསུམ་གསེར་ཐུར་གྱིས༔ དེ་རིང་བདག་གིས་དབྱེ་བར་བྱ༔ མིག་རས་བསལ་ཞིང་དཀྱིལ་འཁོར་གྱི༔ མཐོང་བ་བསྟན་པ་འདི་བཞིན་བྱ༔ ཨེ་མ་ཧོ༔ ཆོས་དབྱིངས་གཞོན་ནུ་བུམ་སྐུའི་ཀློང་༔ འཁྲུལ་གྲོལ་ལས་འདས་རང་རིག་གཤིས༔ ལྷུན་གྲུབ་རྡོ་རྗེ་ཕུང་པོའི་གྲོང་༔ རྟེན་དང་བརྟེན་པར་བཅས་པ་ཀུན༔ མཚོན་བྱེད་རྫས་ཀྱི་དཀྱིལ་འཁོར་འདིར༔ དད་པའི་མིག་གིས་ཡང་ཡང་ལྟོས༔ ཕྱི་སྣོད་འབྱུང་བ་ཆེན་པོ་བཞིའི༔ དབྱིངས་ནི་ནམ་མཁའ་སྟོང་པའི་ངང་༔ སྐྱེ་མེད་སྐྱེ་བའི་ཆོ་འཕྲུལ་གྱི༔ དཀྱིལ་འཁོར་གྲུ་བཞི་སྒོ་བཞི་པ༔ མཐའ་བཞི་དང་བྲལ་ཚད་མེད་བཞི༔ སྒོ་བཞི་ལུས་ངག་ཡིད་ཀྱི་རྒྱུད༔ ཀུན་གཞི་ཆོས་ཀྱི་དབྱིངས་དང་འབྲེལ༔ ཙིཏྟ་ཟངས་མདོག་དཔལ་གྱི་རི༔ རང་རིག་པདྨ་ཐོད་ཕྲེང་རྩལ༔ ཚོགས་བརྒྱད་གུ་རུ་སྒྲུབ་སྡེ་བརྒྱད༔ ཉེ་ཉོན་དཔའ་བོ་མཁའ་འགྲོའི་ཚོགས༔ རང་ལས་གཞན་ན་མེད་པའི་དོན༔ རང་བྱུང་དཀྱིལ་འཁོར་ཆེན་པོ་འདིར༔ ཡང་དག་ལྟོས་ལ་ཤེས་པར་གྱིས༔ ཞེས་བརྡ་དོན་བཀྲོལ་ཏེ་བཤད༔ མཎྜལ་འབུལ་ཞིང་གསོལ་འདེབས་ནི༔ ཀྱཻ་ཧོ་བླ་མ་སྤྲུལ་པའི་སྐུ༔ བསྐྱེད་རིམ་ལྷ་ཡི་ཏིང་འཛིན་གྱིས༔ ཐ་མལ་སྣང་ཞེན་འགོག་པའི་ཕྱིར༔ བུམ་པའི་དབང་མཆོག་བསྐུར་དུ་གསོལ༔ བུམ་པ་སློབ་མའི་སྤྱི་བོར་བཞག༔ བུམ་ཆུ་མགྲིན་པར་ལེགས་བསྩལ་ཏེ༔ ཧཱུྃ་ཧྲཱིཿ བུམ་པ་ཁམས་གསུམ་གནས་སུ་དག༔ བུམ་བཅུད་སྐུ་གསུམ་ལྷུན་གྱིས་གྲུབ༔ པདྨ་ཐོད་ཕྲེང་སྐུ་ཡི་དབང་༔ སྐལ་ལྡན་ལུས་ལ་ཐོབ་པ་དང་༔ བསྐྱེད་རིམ་ལྷ་སྣང་གོམས་པའི་མཐུས༔ ཐ་མལ་སྣང་ཞེན་གནས་དག་ཤོག༔ རྩ་སྔགས་ཤམ་དུ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བསྙེན་སྒྲུབ་མོས་ལྡན་ལ༔ ལྷ་གྲངས་དབང་ནི་འདི་ལྟར་བསྐུར༔ དང་པོ་གཙོ་བོའི་སྐུ་ཐོགས་ཏེ༔ ཧྲཱིཿ རྒྱལ་བ་སྲས་བཅས་མ་ལུས་ཀུན༔ ཐུགས་རྗེའི་གཟུགས་སྐུར་ལེགས་གྲུབ་པ༔ རིགས་བདག་པདྨ་ཐོད་ཕྲེང་གི༔ སྐུ་གསུང་ཐུགས་ཀྱི་དབང་ཐོབ་ཤོག༔ རྩ་སྔགས་ཤམ་དུ་ཀཱ་ཡ་བརྗོད༔ འཆི་མེད་སྣང་མཐའི་སྐུ་ཐོགས་ཏེ༔ ཧྲཱིཿ སྐྱེ་འཆི་མཚན་མའི་སྐྱོན་དང་བྲལ༔ ཐུགས་རྗེའི་འོད་ཟེར་མཐའ་ཡས་པ༔ བདེ་གཤེགས་གསུང་གི་བདག་པོ་ཡི༔ དབང་མཆོག་ཁྱོད་ཀྱིས་ཐོབ་པར་ཤོག༔ ཨ་མི་ཏ་བྷ་ཨ་ཀཱ་ཡ་ཨ་བྷི་ཥིཉྩ་ཧཱུྃ༔ པདྨ་འབྱུང་གནས་ཀྱི་སྐུ་ཐོགས་ཏེ༔ ཧྲཱིཿ རང་བྱུང་པདྨའི་སྡོང་པོ་ལ༔ རང་ཤར་སྤྲུལ་པའི་སྐུར་སྣང་བ༔ པདྨ་འབྱུང་གནས་དབང་བསྐུར་བས༔ སྣང་སྲིད་ཟིལ་གྱིས་གནོན་པར་ཤོག༔ ཨོཾ་མ་ཧཱ་གུ་རུ་པདྨ་ཀཱ་ར་ཨ་བྷི་ཥིཉྩ་ཧཱུྃ༔ བློ་ལྡན་མཆོག་སྲེད་ཀྱི་སྐུ་ཐོགས་ཏེ༔ ཧྲཱིཿ ཤེས་བྱ་མཁྱེན་པའི་ཡེ་ཤེས་ཀྱིས༔ གཏི་མུག་རྨོངས་པ་སེལ་མཛད་པ༔ བློ་གྲོས་མཆོག་གི་དབང་བསྐུར་བས༔ བདག་ལྟའི་སྲེད་པ་འཇོམས་པར་ཤོག༔ པྲཛྙཱ་བྷུདྡྷི་ཨ་བྷི་ཥིཉྩ་ཧཱུྃ༔ ཉི་མ་འོད་ཟེར་གྱི་སྐུ་ཐོགས་ཏེ༔ ཧྲཱིཿ རང་བྱུང་ཐུགས་རྗེའི་འོད་སྟོང་གིས༔ རྟོགས་པའི་གཏེར་ལ་དབང་བསྒྱུར་བ༔ མཁྱེན་བརྩེ་ཉིན་མོར་བྱེད་པ་ཡི༔ དབང་ཐོབ་སྲིད་པ་གདུང་སེལ་ཤོག༔ སུརྱ་རསྨི་པྲ་བྷ་ཨ་བྷི་ཥིཉྩ་ཧཱུྃ༔ སེང་གེ་སྒྲ་ཡི་སྐུ་ཐོགས་ཏེ༔ ཧྲཱིཿ བདག་མེད་སེང་གེའི་ང་རོ་ཡིས༔ ལོག་རྟོག་ཀླད་པ་འགེམ་མཛད་པའི༔ ཁྲོ་བོ་མཆོག་གི་དབང་བསྐུར་བས༔ ལོག་འདྲེན་དཔུང་ཚོགས་འཇོམས་པར་ཤོག༔ སིང་ཧ་གྷནྚེ་ཨ་བྷི་ཥིཉྩ་ཧཱུྃ༔ པདྨ་རྒྱལ་པོའི་སྐུ་ཐོགས་ཏེ༔ ཧྲཱིཿ བརྟན་གཡོ་སྣང་སྲིད་མ་ལུས་ཀུན༔ ཐུགས་རྗེའི་ནུས་མཐུས་དབང་བསྡུས་ཤིང་༔ ཟིལ་གནོན་པདྨ་རྒྱལ་པོ་ཡི༔ དབང་ཐོབ་བདེ་ལེགས་ཀུན་འབྱུང་ཤོག༔ པདྨ་རཱ་ཛ་ཨ་བྷི་ཥིཉྩ་ཧཱུྃ༔ རྡོ་རྗེ་གྲོ་ལོད་ཀྱི་སྐུ་ཐོགས་ཏེ༔ ཧྲཱིཿ བདུད་དང་མུ་སྟེགས་དམ་སྲིའི་རིགས༔ གདུག་པ་ཅན་ཀུན་ཚར་གཅོད་པའི༔ རྡོ་རྗེ་གྲོ་ལོད་དབང་བསྐུར་བས༔ བདུད་བཞིའི་གཡུལ་ལས་རྣམ་རྒྱལ་ཤོག༔ བཛྲ་ཀྲོ་ཏ་ཨ་བྷི་ཥིཉྩ་ཧཱུྃ༔ པདྨ་སམ་བྷའི་སྐུ་ཐོགས་ཏེ༔ ཧྲཱིཿ མཁྱེན་པའི་ཡེ་ཤེས་རབ་རྒྱས་ཤིང་༔ འཆད་རྩོད་རྩོམ་པའི་ཆོས་སྒྲ་སྒྲོག༔ པདྨ་སམ་བྷའི་དབང་བསྐུར་བས༔ ཐེག་གསུམ་གསུང་ལ་དབང་འབྱོར་ཤོག༔ པདྨ་སམ་བྷ་ཝ་ཨ་བྷི་ཥིཉྩ་ཧཱུྃ༔ ཤཱཀྱ་སེང་གེའི་སྐུ་ཐོགས་ཏེ༔ ཧྲཱིཿ མཚན་དང་དཔེ་བྱད་འབར་བའི་སྐུ༔ རྒྱལ་བའི་མཛད་པ་མཐར་ཕྱིན་པ༔ ཤཱཀྱ་སེང་གེའི་དབང་བསྐུར་བས༔ རྒྱལ་བསྟན་ཉམས་པ་གསོ་ནུས་ཤོག༔ ཤཱཀྱ་སེང་གེ་ཨ་བྷི་ཥིཉྩ་ཧཱུྃ༔ ཞེས་པས་གཙོ་བོའི་དབང་རྣམས་བསྐུར༔ དེ་ནས་འཁོར་གྱི་ལྷ་རྣམས་ཀྱི༔ དབང་ལ་ཐོག་མར་རིག་འཛིན་བརྒྱད༔ བཀའ་བབ་བུ་དགུ་རྗེ་དང་འབངས༔ དང་པོ་རིག་འཛིན་རྣམ་བརྒྱད་ཀྱི༔ ཐུགས་ཀྱི་རིག་འཛིན་སྐུ་ཐོགས་ཏེ༔ ཧཱུྃ་ཧྲཱིཿ མཐའ་བརྒྱད་སྤྲོས་པ་བྲལ་བའི་ངང་༔ ཡང་དག་ཐུགས་ཀྱི་རིག་པ་འཛིན༔ ཧཱུྃ་ཆེན་ཀཱ་རའི་དབང་བསྐུར་བས༔ སེམས་ཉིད་སྐྱོན་བྲལ་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་ཧཱུྃ་ཀཱ་ར་ཨ་བྷི་ཥིཉྩ་ཧཱུྃ༔ སྐུ་ཡི་རིག་འཛིན་སྐུ་ཐོགས་ཏེ༔ ཧཱུྃ་ཧྲཱིཿ ཐ་མལ་རྩ་རླུང་འཁྲུལ་བའི་ལུས༔ གནས་དག་མཚན་དཔེའི་དཔལ་འབར་བ༔ འཇམ་དཔལ་བཤེས་གཉེན་དབང་བསྐུར་བས༔ ལུས་སྒྲིབ་དབྱིངས་དག་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་མཉྫུ་མི་ཏྲ་ཨ་བྷི་ཥིཉྩ་ཧཱུྃ༔ གསུང་གི་རིག་འཛིན་སྐུ་ཐོགས་ལ༔ ཧཱུྃ་ཧྲཱིཿ མི་ཤིགས་ནཱ་ད་ཆོས་ཀྱི་དབྱིངས༔ འགག་མེད་གསུང་གི་རིག་པ་འཛིན༔ ཀླུ་སྒྲུབ་སྙིང་པོའི་དབང་བསྐུར་བས༔ རྣམ་གྲོལ་གསུང་གི་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་ནཱ་གརྫུ་ན་ཨ་བྷི་ཥིཉྩ་ཧཱུྃ༔ ཕྲིན་ལས་རིག་འཛིན་སྐུ་ཐོགས་ལ༔ ཧཱུྃ་ཧྲཱིཿ ཁམས་གསུམ་འཁོར་བའི་སེམས་ཅན་ཀུན༔ དབྱིངས་སྒྲོལ་ཕྲིན་ལས་རིག་པ་འཛིན༔ པྲ་བྷ་ཧསྟིའི་དབང་བསྐུར་བས༔ གཉིས་སྣང་འཇོམས་པའི་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་པྲ་བྷ་ཧསྟི་ཨ་བྷི་ཥིཉྩ་ཧཱུྃ༔ རྦོད་གཏོང་རིག་འཛིན་སྐུ་ཐོགས་ལ༔ ཧཱུྃ་ཧྲཱིཿ བདེ་བ་ཆེན་པོའི་ཡེ་ཤེས་ཀྱི༔ བདེ་སྟོང་གཉིས་མེད་རིག་པ་འཛིན༔ དྷ་ན་སངྐྲིའི་དབང་བསྐུར་བས༔ མཁའ་འགྲོ་བྲན་བཀོལ་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་དྷ་ན་སངྐྲི་ཨ་བྷི་ཥིཉྩ་ཧཱུྃ༔ ཡོན་ཏན་རིག་འཛིན་སྐུ་ཐོགས་ལ༔ ཧཱུྃ་ཧྲཱིཿ ཆེ་མཆོག་བདུད་རྩིའི་ཏིང་འཛིན་གྱི༔ འཆི་མེད་ཡོན་ཏན་རིག་པ་འཛིན༔ བཱི་མ་མི་ཏྲའི་དབང་བསྐུར་བས༔ གཉུག་མ་གཞོམ་བྲལ་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་བཱི་མ་མི་ཏྲ་ཨ་བྷི་ཥིཉྩ་ཧཱུྃ༔ མཆོད་བསྟོད་རིག་འཛིན་སྐུ་ཐོགས་ལ༔ ཧཱུྃ་ཧྲཱིཿ ལྔ་ལྡན་ཡེ་ཤེས་ཆེན་པོ་ཡི༔ ཕུང་ལྔའི་བདུད་བཅོམ་རིག་པ་འཛིན༔ ཟླ་གསང་ཐིག་ལེའི་དབང་བསྐུར་བས༔ དྲེགས་ཚོགས་ཀུན་ལ་དབང་བསྒྱུར་ཤོག༔ ཨོཾ་ཨཱཿམ་ཧཱ་གུ་རུ་རོམ་བུ་གུ་ཧྱ་ཨ་བྷི་ཥིཉྩ་ཧཱུྃ༔ དྲག་སྔགས་རིག་འཛིན་སྐུ་ཐོགས་ལ༔ ཧཱུྃ་ཧྲཱིཿ སྐྱེ་མེད་དབྱིངས་སུ་འཁོར་འདས་ཆོས༔ ཡོངས་གྲོལ་དྲག་སྔགས་རིག་པ་འཛིན༔ ཞི་བའི་སྙིང་པོའི་དབང་བསྐུར་བས༔ བདུད་འཇོམས་དྲག་པོའི་དབང་ཐོབ་ཤོག༔ ཨོཾ་ཨཱཿམ་ཧཱ་གུ་རུ་ཤནྟིཾ་གྷརྦྷ་ཨ་བྷི་ཥིཉྩ་ཧཱུྃ༔ དེ་ནས་རྗེ་འབངས་ཉེར་ལྔའི་ཐོག་མར་བཀའ་བབ་ཐུགས་ཀྱི་བུ་དགུའི་དབང་ལས༔ ཡང་དག་བཀའ་བབ་ནམ་མཁའི་སྙིང་པོའི་སྐུ་ཐོགས་ཏེ༔ ཧཱུྃ༔ གཡོ་མེད་ཏིང་འཛིན་མཆོག་འགྲུབ་ནས༔ ནམ་མཁའི་ཉི་ཟླ་གདན་དུ་བཏིང་༔ གསང་སྔགས་གྲུབ་བརྙེས་རིག་པ་འཛིན༔ ནམ་མཁའི་སྙིང་པོའི་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་ཨ་ཀ་ཤ་གྷར་བྷ་ཨ་བྷི་ཥིཉྩ་ཧཱུྃ༔ འཇམ་དཔལ་བཀའ་བབ་སངས་རྒྱས་ཡེ་ཤེས་ཀྱི་སྐུ་ཐོགས་ལ༔ ཧཱུྃ༔ རྨད་བྱུང་དཀའ་སྤྱད་ཏིང་འཛིན་གྱི༔ གཤིན་རྗེ་གཤེད་གྲུབ་རིག་པ་འཛིན༔ འཁྲུལ་སྣང་བྲག་ལ་ཕུར་པ་ཐེབས༔ སངས་རྒྱས་ཡེ་ཤེས་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་བུདྡྷ་ཛྙཱ་ན་ཨ་བྷི་ཥིཉྩ་ཧཱུྃ༔ གསུང་གི་བཀའ་བབ་རྒྱལ་བ་མཆོག་དབྱངས་ཀྱི་སྐུ་ཐོགས་ཏེ༔ ཧཱུྃ༔ སྐྱེ་འགག་གཉིས་མེད་ཏིང་འཛིན་མཐུས༔ གསུང་དབྱངས་རྟ་སྐད་གཙུག་ན་འཚེར༔ ཁམས་གསུམ་དབང་སྡུད་རིག་པ་འཛིན༔ རྒྱལ་མཆོག་དབྱངས་ཀྱི་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་ཛྙཱ་ན་སྭ་ར་ཨ་བྷི་ཥིཉྩ་ཧཱུྃ༔ ཕྲིན་ལས་བཀའ་བབ་མཚོ་རྒྱལ་གྱི་སྐུ་ཐོགས་ཏེ༔ ཧཱུྃ༔ རང་བྱུང་པདྨ་རྒྱལ་པོ་ཡིས༔ བྱིན་རླབས་བསད་པའི་མི་རོ་སློང་༔ ཕུར་པ་ཕྲིན་ལས་རིག་པ་འཛིན༔ ཡེ་ཤེས་མཚོ་རྒྱལ་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་ཛྙཱ་ན་ས་ག་ར་ཨ་བྷི་ཥིཉྩ་ཧཱུྃ༔ རྦོད་གཏོང་བཀའ་བབ་དཔལ་གྱི་ཡེ་ཤེས་སྐུ་ཐོགས་ཏེ༔ ཧཱུྃ༔ སྣོད་བཅུད་ལྷ་ཡི་ཏིང་འཛིན་གྱིས༔ མ་མོ་བྲན་བཀོལ་རིག་པ་འཛིན༔ གནས་གསུམ་མཁའ་འགྲོའི་སྲོག་གི་བདག༔ དཔལ་གྱི་ཡེ་ཤེས་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་ཤྲཱི་ཛྙཱ་ན་ཨ་བྷི་ཥིཉྩ་ཧཱུྃ༔ མཆོད་བསྟོད་བཀའ་བབ་དཔལ་གྱི་སེང་གེའི་སྐུ་ཐོགས་ཏེ༔ ཧཱུྃ༔ གྲོང་ཁྱེར་གསུམ་ཀྱི་བསྡུས་པའི་འགྲོ༔ སྐུ་གསུམ་དབྱིངས་གྲོལ་རིག་པ་འཛིན༔ ལྷ་སྲིན་དྲེགས་པ་ཚར་གཅོད་པའི༔ རླངས་རིགས་དཔལ་སེང་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་ཤྲཱི་སིང་ཧ་ཨ་བྷི་ཥིཉྩ་ཧཱུྃ༔ ཡོན་ཏན་བཀའ་བབ་ཡེ་ཤེས་གཞོན་ནུའི་སྐུ་ཐོགས་ཏེ༔ ཧཱུྃ༔ གཉིས་འཛིན་གཙང་རྨེས་བསྡུས་པའི་ཆོས༔ ཟག་མེད་སྨན་དུ་བྱིན་བརླབས་པས༔ སྲ་བའི་བྲག་ལས་བདུད་རྩི་འབྱིན༔ གཉགས་ཆེན་ཡེ་ཤེས་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་ཛྙཱ་ན་ཀུ་མཱ་ར་ཨ་བྷི་ཥིཉྩ་ཧཱུྃ༔ དྲག་སྔགས་བཀའ་བབ་རྣམ་སྣང་ལོ་ཙཱའི་སྐུ་ཐོགས་ཏེ༔ ཧཱུྃ༔ འཕགས་ཡུལ་མཁས་དང་གྲུབ་རྣམས་ཀྱི༔ ཡང་དག་ཐུགས་ཀྱི་གདམས་ངག་མཐུས༔ དྲག་སྔགས་བཀའ་བབ་རིག་པ་འཛིན༔ རྣམ་པར་སྣང་མཛད་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་བཻ་རོ་ཙ་ན་ཨ་བྷི་ཥིཉྩ་ཧཱུྃ༔ གསང་ཆེན་ཡོངས་རྫོགས་ཀྱི་བཀའ་བབ་ཆོས་རྒྱལ་ཆེན་པོའི་སྐུ་ཐོགས་ཏེ༔ ཧཱུྃ༔ སྒྲུབ་ཆེན་བརྒྱད་ཀྱི་དཀྱིལ་འཁོར་དུ༔ ཡི་དམ་ལྷ་ཡིས་རྗེས་བཟུང་མཐུས༔ ཁམས་གསུམ་ཟིལ་གནོན་རིག་པ་འཛིན༔ ཚངས་པའི་མེ་ཏོག་དབང་བསྐུར་རོ༔ ཨོཾ་ཨཱཿབིདྱཱ་དྷ་ར་མ་ཧཱ་རཱ་ཛ་པྲ་ཧྨ་ཎ་པུཥྤེ་ཨ་བྷི་ཥིཉྩ་ཧཱུྃ༔ དེ་ནས་འབངས་རིགས་གཞན་རྣམས་ལ༔ ཚིག་ཕྲད་སྦྱར་ཏེ་དབང་བསྐུར་སྦྱིན༔ དེ་ནས་ལྷ་ཡི་དབང་ཐོབ་པས༔ ལས་སྐལ་ལྡན་པའི་གང་ཟག་ལ༔ དངོས་ཉམས་རྨི་ལམ་གང་རུང་དུ༔ ལྷ་ཡི་ཞལ་མཇལ་ལུང་སྟོན་དང་༔ དགེ་བའི་ལྟས་ཀྱང་ངེས་པར་འབྱུང་༔ ལུས་ཀྱི་སྒྲིབ་པ་འདག་པ་དང་༔ བསྐྱེད་རིམ་སྤྲུལ་པའི་སྐུ་འགྲུབ་གྱུར༔ ས་མ་ཡཱ༔ དེ་ནས་གསུང་གི་དབང་མཆོག་ལ༔ གསུམ་ལས་དང་པོ་བདུད་རྩི་སྦྱིན་པ་ནི༔ ཧཱུྃ་ཧྲཱིཿ རང་བྱུང་མཚན་ལྡན་ཀ་པཱ་ལར༔ ཟག་མེད་བདེ་བའི་བདུད་རྩིས་གཏམས༔ སྐལ་ལྡན་ངག་ལ་དབང་བསྐུར་བས༔ ངག་གི་སྒྲིབ་པ་ཀུན་དག་ནས༔ སྒྲ་གྲགས་གསུང་ལ་དབང་བསྒྱུར་བས༔ འགག་མེད་ལོངས་སྐུར་སྨིན་པར་ཤོག༔ རྩ་སྔགས་ཤམ་བུར་ཝཀྐ་བརྗོད༔ གཉིས་པ་བཟླས་ལུང་སྦྱིན་པ་ནི༔ དཔོན་སློབ་གཉིས་ཀ་དྲན་རྫོགས་སུ༔ པདྨ་ཐོད་ཕྲེང་སྐུ་རུ་བསྒོམ༔ ཐུགས་ཀར་ཟླ་བའི་དཀྱིལ་འཁོར་ལ༔ ཧཱུྃ་མཐར་སྔགས་ཕྲེང་གཡས་བསྐོར་དུ༔ འཁོར་བས་འཕགས་མཆོད་འགྲོ་སྒྲིབ་སྦྱངས༔ ཡེངས་མེད་དམིགས་པའི་འཛིན་སྟངས་ཀྱིས༔ རྩ་སྔགས་ལན་གསུམ་རྗེས་ཟློས་དང་༔ འཁོར་སྔགས་རྣམས་ཀྱང་དེ་བཞིན་ནོ༔ དབྱངས་གསལ་བརྗོད་ཅིང་མེ་ཏོག་འཐོར༔ ཚིག་འདི་སློབ་དཔོན་བྱིན་བརླབ་བྱ༔ ཧཱུྃ༔ ཐུགས་རྗེའི་བདག་ཉིད་གུ་རུ་རྗེའི༔ གསུང་གི་བྱིན་རླབས་མ་ལུས་པ༔ སློབ་བུའི་རྒྱུད་ལ་ལེགས་ཞུགས་ནས༔ བསྙེན་སྒྲུབ་ལས་སྦྱོར་མཐའ་རུ་ཕྱིན༔ གང་བརྩམས་ཐོགས་མེད་འགྲུབ་པ་ཡི༔ དངོས་གྲུབ་མཆོག་ལ་དབང་འབྱོར་ཤོག༔ རྩ་སྔགས་རྗེས་སུ་འདི་བཞིན་བརྗོད༔ མནྚ་གུ་ཧྱ་སརྦ་སིདྡྷི་ཨ་བྷི་ཥིཉྩ་ཧཱུྃ༔ གསུམ་པ་གླེགས་བམ་བཀའ་གཏད་ནི༔ བཀའ་སྲུང་གཏོར་མ་སྨན་རཀ་བྲན༔ ཆོས་བརྒྱུད་འཛིན་པའི་སློབ་བུ་ལ༔ འགོ་ཞིང་སྡོང་གྲོགས་མཛོད་ཅིག་ཅེས༔ བདེན་པའི་ཚིག་གིས་བཀའ་ཡང་བསྒོས༔ བརྒྱུད་པའི་གསོལ་འདེབས་འདི་བཞིན་བྱ༔ ཧོ༔ ཐོག་མའི་མགོན་པོ་སྣང་མཐའ་ཡས༔ ལོངས་སྤྱོད་རྫོགས་སྐུ་སྤྱན་རས་གཟིགས༔ སྤྲུལ་པའི་རིག་འཛིན་ཐོད་ཕྲེང་རྩལ༔ བཀའ་བབ་མི་དགུ་རྗེ་དང་འབངས༔ ལུང་བསྟན་སྐལ་ལྡན་ཆོས་ཀྱི་བདག༔ ཡི་དམ་དཀྱིལ་འཁོར་ལྷག་པའི་ལྷ༔ གནས་གསུམ་མཁའ་འགྲོ་དམ་ཅན་དང་༔ ནོར་ལྷ་གཏེར་བདག་རྒྱ་མཚོའི་མཐུས༔ རིག་འཛིན་འདུས་པའི་དབང་མཆོག་འདི༔ ཐོབ་པའི་སྐལ་ལྡན་སློབ་བུ་ལ༔ སྨིན་ཅིང་གྲོལ་བར་མཛད་དུ་གསོལ༔ ཅེས་དང་གཞན་ཡང་འདོད་གསོལ་སྦྱར༔ དེ་ནས་གསུང་གི་དབང་ཐོབ་ནས༔ ངག་སྒྲིབ་དག་ཅིང་གང་སྨྲས་ཚིག༔ ཆོས་སུ་འགྱུར་བའི་རྟེན་འབྲེལ་འགྲིགས༔ ལྷག་པ་ལྷའི་བཟླས་ལ་ཡང་དབང་༔ བཟླས་བརྗོད་བརྩོན་པ་མ་གཡེལ་ན༔ སྒྲ་གྲགས་ལོངས་སྐུར་འགྲུབ་པར་འགྱུར༔ དེ་ནས་ཐུགས་ཀྱི་དབང་མཆོག་ལ༔ རིམ་པ་གསུམ་ལས་དང་པོ་ནི༔ རྡོ་རྗེ་རྩེ་ལྔ་དར་མཐིང་བཅས༔ སྙིང་གར་གཏུག་ཅིང་འདི་སྐད་དོ༔ ཧོ༔ དུག་ལྔའི་རྟོག་པ་གང་ཤར་བ༔ སྟོང་ཉིད་ཡེ་ཤེས་རྒྱས་ཐེབ་པས༔ རིགས་ལྔའི་ལྷ་དང་གཉིས་སུ་མེད༔ པད་འབྱུང་ཐུགས་ཀྱི་དབང་ཐོབ་ཤོག༔ རྩ་སྔགས་ཤམ་བུར་ཙིཏྟ་བརྗོད༔ གཉིས་པ་ཤེལ་དང་མེ་ལོང་ཐོགས༔ སློབ་བུའི་སྙིང་གར་གཏུགས་བྱས་ཏེ༔ བརྡ་དོན་ཚིག་གི་ངོ་སྤྲོད་ནི༔ ཨེ་མ་ཧོ༔ རང་སེམས་ངོ་བོ་ཀ་ནས་དག༔ མེ་ལོང་དག་པའི་ངོ་ལྟ་བུ༔ སྣ་ཚོགས་རྩལ་སྣང་འགགས་མེད་པ༔ ཅིར་ཡང་འཆར་བའི་གཟུགས་བརྙན་ལྟར༔ སྐྱེ་བ་མེད་ལས་སྐྱེ་བར་སྣང་༔ དེ་ཕྱིར་འཁྲུལ་བའི་ཡུལ་རྣམས་ལ༔ བདེན་འཛིན་འཁོར་བའི་བློ་སྤོངས་ལ༔ བདེན་མེད་ཆོས་སྐུའི་རང་ཞལ་ལྟོས༔ ཞེས་དང་སླར་ཡང་ཚིག་འདི་བརྗོད༔ ཧོ༔ སྔོན་དུས་རྡོ་རྗེ་འཆང་ཆེན་གྱི༔ ཟག་མེད་ཐུགས་ཀྱིས་བྱིན་བརླབས་པ༔ དྲི་བྲལ་རང་བྱུང་ཤེལ་དཀར་འདིས༔ སྐལ་ལྡན་ཁྱོད་ལ་དབང་བསྐུར་བས༔ གུ་རུའི་ཐུགས་ཀྱི་དབང་མཆོག་ཐོབ༔ སྣང་སྲིད་སེམས་ཀྱི་རོལ་པར་ཤེས༔ སེམས་ཉིད་ཆོས་སྐུའི་རང་ཞལ་མཐོང་༔ དོན་དམ་རྟོགས་པའི་དབང་ཐོབ་ཤོག༔ རྩ་སྔགས་ཤམ་བུར༔ ཙིཏྟ་ཛྙཱ་ན་ཨ་བྷི་ཥིཉྩ་ཧཱུྃ༔ གསུམ་པ་སྤྲོས་མེད་ཚིག་གི་དབང་༔ སློབ་བུས་ལུས་གནད་དྲང་པོར་བསྲང་༔ ཆོས་བདུན་ལྡན་པའི་འདུག་སྟངས་དང་༔ རྩ་རླུང་རང་སར་ཁོད་སྙོམས་ཏེ༔ རྟོག་མེད་ངང་ལ་ཤེས་པ་གཅིག༔ ཝལ་གྱི་ཤར་བ་དེ་ཀར་བཞག༔ བླ་མས་ཚིག་གིས་འདི་ངོ་སྤྲོད་བྱ༔ ཧོ༔ སེམས་ནི་སྣ་ཚོགས་ཡུལ་ལ་འཕྲོ༔ འགྲོ་བ་མེད་དེ་རང་གི་གཤིས༔ སེམས་ནི་གང་དུ་བཞག་སར་སྡོད༔ གནས་པ་མེད་དེ་ངོ་བོས་སྟོང་༔ རྣམ་རྟོག་སྣ་ཚོགས་ཅི་ཤར་ཡང་༔ བཟང་ངན་མེད་དེ་རིག་པའི་རྩལ༔ དེ་ཕྱིར་རྟོག་འཛིན་བློ་སྤངས་ཏེ༔ སྤྲོས་བྲལ་པདྨ་འབྱུང་གནས་ཐུགས༔ འདི་ལས་ལོགས་ན་བཙལ་དུ་མེད༔ དེ་ཕྱིར་གཉུག་མའི་ངང་དུ་ཞོག༔ ཅེས་པས་འདི་ཡི་དོན་ལ་བལྟ༔ བལྟ་བྱ་ལྟ་བྱེད་གཉིས་མེད་པའི༔ པད་འབྱུང་ཐུགས་ཀྱི་དབང་ཡིན་ནོ༔ གུ་ཧྱ༔ ཡོན་ཏན་གཏོར་མའི་དབང་བསྐུར་ནི༔ ཨེ་མ་ཧོ༔ གཏོར་སྣོད་བྷནྡྷ་ཡངས་པ་ཆོས་ཀྱི་དབྱིངས༔ གཏོར་རྫས་ཤ་ལྔ་བདུད་རྩི་ལོངས་སྤྱོད་རྫོགས༔ གཏོར་རྒྱན་སྣ་ཚོགས་སྣང་བ་སྤྲུལ་པའི་སྐུ༔ སྒྲུབ་པའི་དུས་སུ་ལྷ་དང་གཉིས་སུ་མེད༔ སྐལ་ལྡན་སློབ་བུའི་གནས་བཞིར་དབང་བསྐུར་བས༔ ལུས་ངག་ཡིད་གསུམ་ཀུན་གཞིའི་བག་ཆགས་བཅས༔ སྒྲིབ་པ་བཞི་དག་སྐུ་བཞིའི་ཡེ་ཤེས་ཐོབ༔ པདྨ་འབྱུང་གནས་སྐུ་གསུང་ཐུགས་མཆོག་དང་༔ དབྱེར་མེད་ཚེ་འདིར་འགྲུབ་པར་བྱིན་གྱིས་རློབས༔ རྩ་སྔགས་ཤམ་དུ་གུ་ཎ་བརྗོད༔ དེ་ནས་ཕྲིན་ལས་ཕྱག་མཚན་ནི༔ སློབ་བུའི་ལག་པ་གཡས་གཡོན་དུ༔ རྡོ་རྗེ་བྷནྡྷ་ཚེ་བུམ་གཏད༔ ཁ་ཊཱཾ་ཕྱག་རྒྱ་མཆན་དུ་བཞག༔ ཧཱུྃ༔ ཏིང་འཛིན་གཡོ་མེད་རྡོ་རྗེ་དང་༔གཉིས་སྣང་དབྱིངས་གྲོལ་ཨ་མྲྀ་ཏ༔ དུག་གསུམ་རྩད་གཅོད་ཁ་ཊཱཾ་ཀ༔ འཆི་བདག་བདུད་འཇོམས་ཚེ་ཡི་བུམ༔ ཕྱག་མཚན་ཡོངས་རྫོགས་དབང་བསྐུར་བས༔ གསང་སྔགས་ལས་ཀུན་འགྲུབ་པར་ཤོག༔ རྩ་སྔགས་ཤམ་བུར་ཀརྨ་ཨ་བྷི་ཥིཉྩ་ཧཱུྃ༔ དེ་ནས་ཚེ་ཡི་དབང་བསྐུར་ནི༔ ཚེ་རིལ་བདུད་རྩི་མགྲིན་པར་སྦྱིན༔ ༈ ཚེ་རྫས་རྣམས་ཀྱང་ཡེ་ཤེས་ཀྱི་བདུད་རྩི་འཐུང་མྱོང་རེག་པ་ཙམ་གྱིས་ཚེའི་དངོས་གྲུབ་སྟེར་ནུས་པའི་མོས་པ་གྱིས་ཤིག༔ ཧཱུྃ་ཧྲཱིཿ བཅོམ་ལྡན་མགོན་པོ་ཚེ་དཔག་མེད༔ སྒྲུབ་རྫས་བདུད་རྩིར་བྱིན་རླབས་ཞུགས༔ སྐལ་ལྡན་ཁྱོད་ལ་སྦྱིན་པ་ཡིས༔ འཆི་མེད་རྡོ་རྗེ་ལྟ་བུའི་སྲོག༔ རྒས་མེད་ལང་ཚོ་ལྡན་པའི་ཚེ༔ བསྟན་འགྲོའི་དོན་གཉིས་ལྷུན་གྱིས་གྲུབ༔ རིགས་བདག་ལྷ་དང་གཉིས་མེད་ཤོག༔ ཨ་ཡུར་ཛྙཱ་ན་ཨ་བྷི་ཥིཉྩ་ཧཱུྃ༔ མཐའ་རྟེན་དབང་ཆོག་སྤྱི་ལྟར་བསྐུར༔ དམ་ཚིག་ཁས་བླང་མཎྜལ་ཕུལ༔ ཤིས་པ་བརྗོད་ཅིང་དགེ་བ་བསྔོ༔ སྨིན་བྱེད་གདམས་པའི་ཉམས་ལེན་དུ༔ དབང་བཞིའི་སྤྱོད་ལམ་དམ་ཚིག་བསྲུང་༔ མོས་གུས་ལྡན་ཅིང་ཐེ་ཚོམ་མེད༔ གཞན་དུ་ལོག་སྲེད་ཅན་ལ་གསང་༔ ས་མ་ཡཱ༔ སྤྲུལ་མིང་ལུང་རིག་གླིང་པས་སོ༔