པདྨ་རྒྱལ་པོའི་ཕྲིན་ལས་ཁམས་གསུམ་ཡིད་འགུགས།
གུ་རུའི་ཐུགས་སྒྲུབ་པད་ཕྲེང་ལས༔ པདྨ་རྒྱལ་པོའི་ཕྲིན་ལས་ཁམས་གསུམ་ཡིད་འགུགས་བཞུགས༔
པདྨ་རཱ་ཛ་དྷ་ར་ན་མོ༔ བདག་ཉིད་ཆེན་པོ་ཨོ་རྒྱན་རྗེའི༔ ཐུགས་སྒྲུབ་ཁམས་གསུམ་ཡིད་འགུགས་ལ༔ དབེན་པར་རང་རྒྱུད་སྔོན་འགྲོས་སྦྱངས༔ རྫས་དང་དཀྱིལ་འཁོར་སྤྲོས་པ་དོར༔ སྐྱབས་སུ་འགྲོ་ཞིང་སེམས་བསྐྱེད་ནི༔ དཀོན་མཆོག་ཀུན་འདུས་ཨོ་རྒྱན་རྗེ༔ གུ་རུ་པདྨ་རྒྱལ་པོ་ལ༔ བྱང་ཆུབ་བར་དུ་སྐྱབས་སུ་མཆི༔ སྨོན་འཇུག་དོན་དམ་སེམས་བསྐྱེད་དོ༔ ཡན་ལག་བཅུ་ཡི་ཚོགས་བསག་ནི༔ རྩ་གསུམ་ལྷ་ཚོགས་གནས་འདིར་གཤེགས༔ མཁའ་དབྱིངས་པད་ཟླའི་གདན་ལ་བཞུགས༔ ཁྱེད་རྣམས་སྒྲུབ་པར་དམ་བཅའ་འོ༔ དཔག་མེད་ལུས་སྤྲུལ་གུས་ཕྱག་འཚལ༔ ཕྱི་ནང་གསང་བའི་མཎྜལ་འབུལ༔ གསང་སྔགས་དམ་ཚིག་ཉམས་པ་བཤགས༔ རྒྱལ་བའི་མཛད་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་བར་བསྐུལ༔ རྟག་པར་འགྲོ་དོན་བཞུགས་གསོལ་འདེབས༔ དགེ་རྩ་ཆོས་དབྱིངས་ཆེན་པོར་བསྔོ༔ པདྨ་རྒྱལ་པོའི་གསང་གསུམ་དང་༔ དབྱེར་མེད་གཅིག་ཏུ་འཚང་རྒྱ་ཤོག༔ དངོས་གཞི་ལྷ་ཡི་རྣལ་འབྱོར་ནི༔ ཧཱུྃ་ཧྲཱིཿ ཕྱི་སྣོད་མི་དམིགས་སྟོང་པའི་ངང་༔ དཔལ་རི་པདྨ་འོད་ཀྱི་ཞིང༔ དྭངས་གསལ་སྒྲིབ་བྲལ་གཞལ་ཡས་ཁང་༔ པདྨ་དམར་མོའི་ཕོ་བྲང་ནི༔ རྒྱན་བཀོད་བློ་ཡི་ཡུལ་ལས་འདས༔ དེ་དབུས་ཆགས་བྲལ་པད་ཉི་ཟླར༔ རང་སེམས་ཧྲཱིཿདམར་ཡོངས་གྱུར་ལས༔ རང་ཉིད་གུ་རུ་པདྨ་རྒྱལ༔ པདྨ་རཱ་གའི་གཟི་འོད་འབར༔ ཞལ་གཅིག་སྤྱན་གསུམ་ཆགས་པའི་ཉམས༔ ཕྱག་གཡས་སེང་ལྡིང་ཌཱ་མ་རུ༔ དབང་གི་སྒྲ་ཡིས་སྲིད་གསུམ་འགུགས༔ ཕྱག་གཡོན་ཁམས་གསུམ་ཀུན་གསལ་བའི༔ མེ་ལོང་ལྕགས་སྒྲོག་ཡུམ་ལ་འཁྱུད༔ ཞབས་གཉིས་བརྐྱང་བསྐུམ་རོལ་པའི་སྟབས༔ རཏྣའི་པྲོག་ཞུ་དར་ཐོད་དང་༔ དར་དམར་གསེར་རིས་བེར་ཕྱམ་ལ༔ གསེར་རྐེད་ནོར་བུའི་ཕྲ་ཚོམ་སྤྲས༔ སག་ལྷྭམ་རིན་ཆེན་རྒྱན་ཅན་མནབས༔ པང་དུ་གསང་བ་ཡེ་ཤེས་ཡུམ༔ མཚོ་རྒྱལ་དབང་གི་ལྷ་མོ་དམར༔ ཕྱག་གཡས་པད་ཕྲེང་ཡབ་མགུལ་འཁྱུད༔ གཡོན་པས་བདུད་རྩི་གཙོ་ལ་སྟོབ༔ འཛུམ་པའི་ཞལ་ལ་ཆགས་པའི་ཉམས༔ ཞབས་གཉིས་དགྱེས་སྦྱོར་ཡབ་ལ་འཁྲིལ༔ བཅུ་དྲུག་གཞོན་ཚུལ་ལང་ཚོས་སྒེག༔ རུས་པ་དང་ནི་རཏྣའི་རྒྱན༔ ཨུཏྤལ་དམར་པོའི་དོ་ཤལ་འཕྱངས༔ གནག་སྣུམ་དབུ་སྐྲའི་ལྕང་ལོ་ལ༔ སྣ་ཚོགས་དར་གྱི་ཅོད་པཎ་འཕུར༔ གཙོ་བོའི་སྤྱི་གཙུག་པད་ཟླའི་སྟེང་༔ རིགས་བདག་བཅོམ་ལྡན་སྣང་མཐའ་ཡས༔ ཚངས་པར་སྤྱོད་པའི་ཆ་ལུགས་ཅན༔ མཚན་དཔེ་གཟི་འོད་རྒྱས་པར་བསྒོམ༔ རང་གི་ཐུགས་དབུས་པདྨ་དམར༔ འདབ་མ་བཅུ་དྲུག་ལྡན་པའི་དབུས༔ བྱི་རུའི་རྡོ་རྗེ་རྩེ་ལྔ་བའི༔ ལྟེ་བ་ཁོང་སེང་པད་ཉིའི་སྟེང་༔ རྒྱལ་བ་ཀུན་གྱི་ཐུགས་སྲོག་ཧྲཱིཿ མཐའ་མར་རྩ་སྔགས་གཡས་སུ་འཁོར༔ ལྔ་ལྡན་འོད་དང་རང་སྒྲ་བཅས༔ རྒྱལ་བ་ཀུན་གྱི་བྱིན་རླབས་བསྡུས༔ ཁམས་གསུམ་འགྲོ་བའི་ལས་ཉོན་སྦྱངས༔ སྣང་གྲགས་ལྷ་སྔགས་ཆོས་ཉིད་ངང་༔ འཁོར་འདས་སྣོད་བཅུད་ཐམས་ཅད་ཀུན༔ གུ་རུ་པདྨ་རྒྱལ་པོ་ཡི༔ སྐུ་གསུང་ཐུགས་ཀྱི་རོལ་པར་བསམ༔ མ་ཡེངས་མི་བསྒོམ་འཛིན་པ་བྲལ༔ གསང་སྔགས་རྒྱལ་པོ་འདི་ཉིད་བཟླ༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་རཱ་ཛ་སརྦ་སིདྡྷི་ཧཱུྃ༔ གྲངས་ཀྱི་བསྙེན་པ་འབྲུ་འབུམ་ལ༔ རྟགས་ནི་རབ་འབྲིང་ཐ་མ་གསུམ༔ རབ་ཀྱིས་ལྷ་ཞལ་མངོན་དུ་མཇལ༔ ལྟ་བའི་གདེང་ཐོབ་འཕོ་འགྱུར་མེད༔ འབྲིང་ལ་བདེ་གསལ་མི་རྟོག་ཉམས༔ རང་བྱུང་སྒོམ་པའི་ཀློང་ཆེན་རྡོལ༔ མ་བསླབ་ཆོས་ཀྱི་ཚིག་དོན་ཤེས༔ ཐ་མ་རྨི་ལམ་དགེ་བའི་ངང་༔ དད་དང་སྐྱོ་ཤས་འབའ་ཞིག་ལ༔ མཐུན་རྐྱེན་ཟས་ནོར་ཆར་ལྟར་འབེབས༔ དེ་ནི་དེ་ཡི་ལས་སྦྱོར་ལ༔ ཚེ་ཆོས་སྲིད་ནོར་དབང་སྡུད་དེ༔ དང་པོ་ཚེ་སྒྲུབ་དམིགས་པ་ནི༔ བདག་ཉིད་གཙོ་བོ་ཡབ་ཡུམ་དང་༔ རིགས་བདག་སྣང་མཐའི་ཐུགས་ཀ་རུ༔ པད་ཟླ་ཉི་མའི་གདན་གྱི་སྟེང་༔ ཚེ་བུམ་འཆི་མེད་བདུད་རྩིས་གང་༔ དབུས་སུ་ཡི་གེ་ཧྲཱིཿདམར་མཐར༔ གཡས་སུ་ཨ་དཀར་གཡོན་དུ་རྣྲི༔ ལྗང་གུ་བཀྲག་མདངས་ལྡན་པ་ཡི༔ མཐའ་མར་སྔགས་ཀྱི་ཕྲེང་བ་ནི༔ མུ་ཏིག་དམར་པོའི་ཕྲེང་མཛེས་ལྟར༔ གཡས་སུ་འཁོར་བའི་འོད་ཟེར་གྱིས༔ མགོན་པོ་ཚེ་དཔག་མེད་པ་སོགས༔ རྒྱལ་བ་སྲས་བཅས་བྱིན་རླབས་ཀུན༔ དཀར་དམར་འོད་ཀྱི་རྣམ་པར་བསྡུས༔ ཐུགས་སྲོག་ཧྲཱིཿདང་བླ་ཚེ་ཡི༔ ངོ་བོ་ཨ་རྣྲི་གཉིས་ལ་ཐིམ༔ འཆི་མེད་རྡོ་རྗེ་ལྟ་བུའི་སྲོག༔ ཐོབ་པར་བསམ་ལ་སྔགས་འདི་བཟླ༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་རཱ་ཛ་ཨ་མི་ཏ་བྷ་ཨ་ཡུ་ཥེ་སརྦ་སིདྡྷི་ཕ་ལ་ཧཱུྃ༔ སླར་ཡང་འོད་ཟེར་ཁ་དོག་ལྔ༔ འཕྲོས་པས་འགྲོ་བའི་ལས་ཉོན་སྦྱངས༔ ཀུན་གྱི་ཚེ་སྲོག་ཆད་ཉམས་གསོས༔ རང་གཞན་འགྲོ་བ་མ་ལུས་པ༔ འཆི་མེད་མགོན་པོའི་གསང་གསུམ་དང་༔ དབྱེར་མེད་གཅིག་ཏུ་འདྲེས་པར་བསམ༔ བསྙེན་པ་འབུམ་གྱི་གྲངས་ཐེམས་ན༔ དུས་ཚེ་ཟད་པའི་མི་ཡིན་ཀྱང་༔ ཚེ་ཡི་རིག་འཛིན་ཐོབ་པར་འགྱུར༔ ས་མ་ཡཱ༔ གཉིས་པ་ཆོས་ལ་དབང་བའི་ཕྱིར༔ ལས་སྦྱོར་དམིགས་པ་འདི་ལྟ་སྟེ༔ བདག་ཉིད་ཡབ་ཀྱི་ཐུགས་ཀ་རུ༔ པདྨ་ཟླ་བའི་གདན་གྱི་སྟེང་༔ མཁྱེན་རབ་མགོན་པོ་འཇམ་པའི་དབྱངས༔ དམར་སེར་གུར་གུམ་གཞོན་ནུའི་མདོག༔ ལོངས་སྤྱོད་རྫོགས་སྐུའི་མཚན་དཔེ་འབར༔ རལ་གྲི་པོ་ཏིའི་ཕྱག་རྒྱ་དང་༔ རྡོ་རྗེ་སྐྱིལ་ཀྲུང་བཞུགས་པ་ཡི༔ སྙིང་དབུས་ཨུཏྤལ་དམར་པོ་ལ༔ དྷི་ཡིག་དམར་སེར་བཀྲག་མདངས་འབར༔ མཐའ་ལ་སྔགས་ཀྱི་ཕྲེང་བ་ནི༔ གཡས་སུ་འཁོར་བའི་འོད་ཟེར་གྱིས༔ རབ་འབྱམས་ཞིང་གི་རྒྱལ་བ་མཆོད༔ མཁྱེན་བརྩེའི་ནུས་པའི་ཡོན་ཏན་ཀུན༔ ཤེས་རབ་ལྷ་ཡི་གསང་གསུམ་གྱི༔ རྣམ་པར་བསྡུས་ནས་རང་ལ་བསྟིམ༔ གཏི་མུག་མུན་པ་དབྱིངས་དག་ནས༔ ཇི་སྙེད་ཤེས་བྱ་མཁྱེན་པ་ཡི༔ སྤོབས་པའི་གཏེར་ཆེན་རྡོལ་བར་བསམ༔ སྔགས་འདི་ཡེངས་མེད་འབུམ་ཕྲག་བཟླ༔ ཨོཾ་ཨཱཿཧཱུྃ༔མ་ཧཱ་གུ་རུ་པདྨ་རཱ་ཛ་ཝཀྐཱི་ཤྭ་རི་པྲཛྙཱ་སརྦ་སིདྡྷི་ཧཱུྃ༔ ཐོས་པ་འཛིན་ཅིང་མི་བརྗེད་གཟུངས༔ ངག་བདེ་དབྱངས་སྙན་སེམས་རིག་གསལ༔ ཤེས་རབ་རྒྱས་པའི་རྟགས་ཐོབ་འགྱུར༔ ས་མ་ཡཱ༔ གསུམ་པ་སྲིད་འགུགས་དམིགས་པ་ནི༔ བདག་ཉིད་ཡབ་ཡུམ་སྦྱོར་མཚམས་ནས༔ ལྔ་ལྡན་འོད་ཀྱི་འཕྲོ་འདུ་ཡིས༔ འཕགས་མ་སོ་སོར་འབྲང་མ་སོགས༔ རྒྱལ་དང་རྒྱལ་ཡུམ་རྒྱལ་སྲས་ཀྱི༔ བྱིན་རླབས་མ་ལུས་ཐམས་ཅད་བསྡུས༔ ཐུགས་ཀའི་སྔགས་ཕྲེང་ས་བོན་ལ༔ བྱང་སེམས་དཀར་དམར་རྣམ་པ་རུ༔ ཡབ་ཀྱི་གསང་བ་ནས་བརྒྱུད་དེ༔ ཡུམ་མཁར་པདྨའི་ཟེའུ་འབྲུ་ནས༔ གྱེན་དུ་དྲངས་ཏེ་ཐིམ་པ་ཡིས༔ སྲིད་ཞིའི་ལེགས་ཚོགས་ཀུན་འབྱུང་བའི༔ པུ་ཏྲ་རིགས་ཀྱི་དངོས་གྲུབ་ཀྱིས༔ བདག་དང་མོས་པའི་སྐལ་ལྡན་ལ༔ ཡིད་བཞིན་འདོད་དགུ་སྟེར་བར་དམིགས༔ དངོས་གྲུབ་འབྱུང་བའི་སྔགས་འདི་ཉིད༔ བརྒྱ་སྟོང་ཁྲི་འབུམ་རྟགས་ཐོན་བཟླ༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་རཱ་ཛ་ཛྙཱ་ན་ཌཱཀྐི་མ་ཎི་པུ་ཏྲ་སརྦ་སིདྡྷི་ཧཱུྃ༔ སྐབས་སྐབས་སོ་སོར་འབྲང་མ་ཡི༔ གཟུངས་དང་སྲིད་འགུག་ཁ་ཚར་གདགས༔ རྨི་ལམ་མྱུ་གུ་འཁྲུངས་པ་དང༔ མདའ་འཕང་རྙེད་དང་ཉི་ཟླ་ཤར༔ རིན་ཆེན་གཏེར་ལ་དབང་སོགས་འབྱུང༔ ས་མ་ཡཱ༔ བཞི་པ་ནོར་སྒྲུབ་རིམ་པ་ལ༔ ཟས་གོས་རྐང་ཕྲན་རིན་པོ་ཆེ༔ རྟ་དང་གླང་པོ་འདོད་འཇོའི་བ༔ ལྷ་ཀླུའི་ནོར་དབྱིག་ལ་སོགས་པ༔ གང་འདོད་དབང་སྡུད་དམིགས་པ་ནི༔ བདག་ཉིད་པད་རྒྱལ་ཡབ་ཡུམ་གྱི༔ ཐུགས་ཀར་པད་ཉི་ཟླ་གདན་ལ༔ པད་རག་རྡོ་རྗེ་རྩེ་ལྔ་བ༔ གྱེན་འགྲེང་སྦུབ་སྟོང་ལྟེ་བ་རུ༔ ཉི་ཟླ་ཁ་སྦྱོར་ཡངས་པའི་དབུས༔ ཐུགས་སྲོག་ཡི་གེ་ཧྲཱིཿདམར་པོ༔ དེ་མཐར་སྔགས་ཕྲེང་གཡོན་དུ་འཁོར༔ འོད་དམར་གློག་ཞགས་ལྟར་འཕྲོས་པས༔ སྟོང་གསུམ་སྟོང་གི་འཇིག་རྟེན་གྱི༔ ནོར་ལྷ་གཏེར་བདག་ཐུགས་རྒྱུད་བསྐུལ༔ ཟས་ནོར་གོས་དང་རིན་པོ་ཆེ༔ སྦུར་མ་རླུང་གིས་དེད་པ་ལྟར༔ འུབ་འུབ་བསྡུས་ནས་རང་ཉིད་དང་༔ སྦྱིན་བདག་གནས་ཁང་བང་མཛོད་སོགས༔ ཕྱུར་བུར་གང་བའི་དམིགས་འདུན་གྱིས༔ འཛིན་ཕུར་རྟོད་ལ་སྔགས་འདི་བཟླ༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་རཱ་ཛ་ན་ན་ཁ་དྷེ་ཝཥྚ་མ་ཎི་རཏྣ་པ་ཤཾ་ཀུ་རུ་བྷྲུཾ་བྷྲུཾ་ཧཱུྃ༔ བརྒྱ་སྟོང་ཁྲི་འབུམ་བྱེ་བ་སོགས༔ ཞག་གྲངས་གསུམ་ལྔ་བདུན་སོགས་ལ༔ འབད་པས་བསྒྲུབ་ན་འགྲུབ་པའི་རྟགས༔ ལོ་ཏོག་ལེགས་དང་ཟས་གོས་རྙེད༔ གཞན་གྱིས་བཀུར་དང་ཆས་གོས་བཟང་༔ སྒྲ་སྙན་རོལ་མོ་འཁྲོལ་བ་སོགས༔ ཉམས་དགའ་བག་དྲོ་དེ་ཚེ་འགྲུབ༔ ས་མ་ཡཱ༔ ལྔ་པ་སྐྱེས་པ་བུད་མེད་དང་༔ རབ་བྱུང་མཁན་སློབ་སློབ་དཔོན་སོགས༔ དབང་སྡུད་དམིགས་པ་འདི་བཞིན་བྱ༔ འཁོར་འདས་ཀུན་ལ་དབང་བསྒྱུར་བའི༔ སྣང་སྲིད་ཟིལ་གནོན་པདྨ་རྒྱལ༔ ཡབ་ཡུམ་མཉམ་སྦྱོར་ཐུགས་ཀ་རུ༔ ཡེ་ཤེས་སེམས་དཔའ་རྟ་མགྲིན་དམར༔ ཞལ་གཅིག་སྤྱན་གསུམ་ཁྲོ་འཛུམ་བཞད༔ ཕྱག་གཡས་བེ་ཅོན་མཁའ་ལ་ཕྱར༔ གཡོན་པས་པདྨའི་ཞགས་པ་བསྣམས༔ ཁྲོ་ཆས་ཡོངས་རྫོགས་པད་ཉིའི་སྟེང༔ འགྱིང་བག་རལ་ཁྲོད་རྟ་སྐད་འཚེར༔ ཐུགས་ཀར་ཉི་ཟླའི་ག་འུའི་ནང་༔ པད་སྟེང་ཧྲཱིཿདམར་སྔགས་ཀྱིས་བསྐོར༔ འོད་དམར་ལྕགས་ཀྱུའི་དབྱིབས་ཅན་གྱིས༔ ཕྱོགས་བཅུའི་སྐྱེ་འགྲོ་ཕོ་རྒྱུད་ཀྱི༔ ཁྱབ་བྱེད་འཁོར་ལོའི་རྩ་ལ་ཞུགས༔ རང་དབང་མེད་པའི་མོས་འདུན་གྱིས༔ རང་གི་བཀའ་ཉན་གསུང་སྡོད་ཅིང་༔ གང་འདོད་ལས་ཀུན་བྱེད་པར་དམིགས༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་རཱ་ཛ་ན་ར་པུ་རུ་ཥ་པ་ཤཾ་ཀུ་རུ་བྲེང་བྲེང་དུང་དུང་ཁུག་ཁུག་ཛ་སིདྡྷི་ཕ་ལ་ཧཱུྃ༔ དེ་བཞིན་མོ་རྒྱུད་དབང་སྡུད་ལ༔ འཛམ་གླིང་སྐྱེ་འགྲོ་མོ་རྒྱུད་ཀྱི༔ བདེ་སྐྱོང་འཁོར་ལོའི་རྩ་ལ་ཞུགས༔ རོ་རྐྱང་རླུང་གི་འགྲོ་འོང་གིས༔ ཉི་མའི་རྡུལ་གྱི་བཅུད་གཡོས་ཏེ༔ རང་དབང་བརྟན་པ་དང་བྲལ་ནས༔ བཀའ་ཉན་གསུང་སྡོད་བྲན་དུ་བཀོལ༔ རྗེས་ཆགས་སེམས་ཀྱིས་བདག་ཉིད་ཀྱི༔ གང་འདོད་ལས་ཀུན་བྱེད་པར་བསམ༔ བསྙེན་པ་སྔར་ལྟར་ཁ་བསྒྱུར་ལ༔ ན་རི་ཀུ་མ་རཱིའི་ཤམ༔ ར་ག་ར་གི་ཛ་ཛ་ཛུ་ཛུ་པ་ཤཾ་ཀུ་རུ་ཧྲཱིཿསརྦ་སིདྡྷི་ཧཱུྃ༔ དེ་བཞིན་མཁན་སློབ་དགེ་འདུན་ལ༔ སྔགས་ཀྱི་འོད་ཟེར་རལ་གྲི་དང་༔ གླེགས་བམ་རྣམ་པས་སྙིིང་ཁར་ཞུགས༔ བུང་བས་མེ་ཏོག་བཅུད་འཐུང་ལྟར༔ མོས་ཤིང་གུས་པའི་བློ་སྐྱེས་ཏེ༔ བདག་ཉིད་བླ་མ་མཁན་སློབ་ཏུ༔ མཐོང་ནས་ཐལ་སྦྱར་འདུད་ཚུལ་གྱིས༔ བཀའ་བཞིན་བསྟན་ལ་ཞབས་ཏོག་སོགས༔ ཕན་བདེའི་ལས་ཀུན་སྒྲུབ་པར་དམིགས༔ སྔགས་ཀྱི་ཤམ་བུ་འདི་བཞིན་བསྒྱུར༔ སངྒ་མེ་དྷ་ན་པ་ཤཾ་ཀུ་རུ་པ་ར་མི་ཏ་ཛྙཱ་ན་དྷ་ར་སརྦ་སིདྡྷི་ཕ་ལ་ཧཱུྃ༔ སྔགས་རྣམས་བརྒྱ་སྟོང་ཁྲི་འབུམ་སོགས༔ སྨྲ་བཅད་བར་མ་ཆད་པར་བཟླ༔ གཞན་ལ་གསང་ཞིང་རང་ཉམས་ལོངས༔ ལག་ཏུ་བླངས་པས་ཡིད་ཆེས་འགྱུར༔ ས་མ་ཡཱ༔ རྗེས་ལ་མཆོད་པའི་རིམ་པ་ནི༔ ཧོཿ སྣ་ཚོགས་སྣང་བ་སེམས་ཀྱི་རྩལ༔ ཡུལ་དྲུག་མཆོད་པའི་ལྷ་མོ་ཡིས༔ བདེ་སྟོང་འཛིན་ཞེན་བྲལ་བའི་ངང་༔ རང་བྱུང་ལྷ་ལ་མཆོད་པ་འབུལ༔ མ་ཧཱ་སུ་ཁ་དྷརྨ་དྷརྟུ་པཱུ་ཙ་ཧོ༔ དེ་ནས་བསྟོད་པ་བྱ་བ་ནི༔ ཨེ་མ་ཧོ༔ སྐྱེ་མེད་ཆོས་སྐུའི་ཀློང་ལས་ཤར༔ རང་བྱུང་པད་སྡོང་རྩེ་ལས་འཁྲུངས༔ སྣང་སྲིད་ཟིལ་གནོན་དབང་གི་རྒྱལ༔ པདྨ་འབྱུང་གནས་ཡབ་ཡུམ་ལ༔ རྗེས་ཆགས་སེམས་ཀྱིས་གུས་པས་བསྟོད༔ དེ་ནས་དངོས་གྲུབ་འདོད་གསོལ་ནི༔ ཧོཿ དབང་གི་ལྷ་མཆོག་པདྨ་རྒྱལ༔ གསང་བ་ཡེ་ཤེས་བདེ་སྟེར་ཡུམ༔ རིགས་བདག་ཆགས་བྲལ་ཆོས་ཀྱི་སྐུ༔ སྐུ་རུ་བསྒོམས་ཤིང་སྔགས་སུ་བཟླས༔ ཡིད་ལ་དམིགས་ཤིང་བློ་ལ་བཅངས༔ རྩེ་གཅིག་མོས་པས་ཁྱོད་བསྒྲུབ་ན༔ ཡིད་བཞིན་ནོར་ལྟར་རྟོག་མེད་ངང་༔ དཔག་བསམ་ཤིང་ལས་དགོས་འདོད་ལྟར༔ གནས་སྐབས་ཆོས་ནོར་སྲིད་མཐུ་དབང་༔ གང་འདོད་འབད་མེད་འབྱུང་བ་དང་༔ མཐར་ཐུག་རང་རིག་དོན་གྱི་ལྷ༔ གུ་རུ་པདྨ་རྒྱལ་པོ་ཡི༔ གསང་གསུམ་མངོན་གྱུར་དངོས་གྲུབ་སྩོལ༔ རྩ་སྔགས་ཤམ་བུར་འདི་ཉིད་བཏགས༔ ཀཱ་ཡ་ཝཀྐཱ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཡི་གེ་བརྒྱ་པས་ནོངས་པ་བཤགས༔ རྗེས་ལ་རྫོགས་པའི་རིམ་པ་ནི༔ ཧྲཱིཿ སྣང་སྲིད་སྣོད་བཅུད་འོད་དུ་ཞུ༔ གཞལ་ཡས་ཡབ་ཡུམ་ལྷ་ལ་ཐིམ༔ རིམ་ཡལ་རིགས་བདག་ཐུགས་ཀའི་ཧྲཱིཿ འོད་དམར་རྣམ་པས་མཁའ་ལ་ཡལ༔ སྟོང་ཆེན་གཏད་མེད་རིག་པའི་གཤིས༔ གང་དུ་འང་མ་གྲུབ་ཨེ་མ་ཧོ༔ རྗེས་ཐོབ་གཉུག་མའི་ལྷ་སྐུར་གསལ༔ དགེ་བ་འགྲོ་ལ་ཕངས་མེད་བསྔོ༔ ཨེ་མ་ཧོ༔ བདག་གིས་དུས་གསུམ་ལུས་ངག་ཡིད༔ ལྷ་སྔགས་ཏིང་འཛིན་དགེ་བའི་ལས༔ ཟག་བཅས་ཟག་མེད་ཅི་བསགས་པ༔ མཁའ་ཁྱབ་ཕ་མ་འགྲོ་ལ་བསྔོ༔ ཀུན་ཀྱང་གློ་བུར་སྒྲིབ་དག་ནས༔ སྐྱེ་མེད་ཆོས་སྐུའི་ཀློང་དུ་གྲོལ༔ འགགས་མེད་གཟུགས་སྐུ་རྟག་པར་བཞུགས༔ ཕྲིན་ལས་སྲིད་མཐར་ཁྱབ་པར་ཤོག༔ ཤིས་པ་བརྗོད་པས་མཐའ་བརྒྱན་ནི༔ ཨེ་མ་ཧོ༔ རྒྱལ་པོའི་སྲས་མཛད་རྒྱལ་སྲིད་བསྐྱངས༔ མཐོང་ཐོས་དྲན་རེག་ཐར་ལམ་འགོད༔ སྲིད་ཞིའི་དཔལ་ཀུན་དབང་དུ་བསྡུས༔ པདྨ་རྒྱལ་པོའི་བཀྲ་ཤིས་ཤོག༔ སྡུག་བསྔལ་བདེ་བ་ཆེན་པོར་སྦྱོར༔ ཤེས་རབ་ཡུམ་གྱི་བཀྲ་ཤིས་ཤོག༔ སྐུ་གསུམ་ཀུན་འདུས་རིགས་ཀྱི་བདག༔ ཆགས་བྲལ་ཚེ་ལྷའི་བཀྲ་ཤིས་ཤོག༔ གང་འབྲེལ་དོན་དང་ལྡན་པའི་ཆོས༔ ཉམས་སུ་བླངས་པའི་སྐལ་ལྡན་ཀུན༔ པད་འབྱུང་རྗེ་དང་དབྱེར་མེད་ནས༔ དོན་གཉིས་འགྲུབ་པའི་བཀྲ་ཤིས་ཤོག༔ ཨེ་མ་ཡང་ཟབ་སྒྲུབ་ཐབས་འདི༔ ཕྱི་སྣོད་འབྱུང་བའི་བཅུད་མིན་ཀྱང་༔ རང་བྱུང་རིག་པའི་སྒྲོམ་ནས་བཏོན༔ དགོངས་གཏེར་མཁའ་འགྲོའི་བརྡ་ཚིག་གོ༔ བཀའ་ཡི་སྲུང་མས་བྱ་ར་གྱིས༔ སྐལ་མེད་རྣམས་ལ་གུ་ཧྱ་རྒྱ༔ སརྦ་མངྒ་ལམ༔ དགེའོ༔