ཉི་མ་འོད་ཟེར་གྱི་སྒྲུབ་ཐབས་འོད་ཟེར་སྟོང་འབར།
མཚན་བརྒྱད་ཐུགས་སྒྲུབ་པད་ཕྲེང་ལས༔ ཉི་མ་འོད་ཟེར་གྱི་སྒྲུབ་ཐབས་འོད་ཟེར་སྟོང་འབར་བཞུགས་སོ༔
པདྨ་འབྱུང་གནས་རང་ཉིད་ཀྱི༔ ཐུགས་སྒྲུབ་ཉི་མ་འོད་ཟེར་བསྟན༔ དཀྱིལ་འཁོར་རང་ལུས་གཞལ་ཡས་ཁང་༔ དུར་ཁྲོད་མེ་རི་རྡོར་ཕྲེང་དང་༔ དུར་བདག་གྲུབ་ཐོབ་མེ་མཚོ་ཤིང་༔ ཡོངས་རྫོགས་དབུས་སུ་པད་ཉི་དང་༔ ཟླ་སྟེང་རང་སེམས་ཧཱུྃ་གསེར་མདོག༔ ཡོངས་གྱུར་སྐད་ཅིག་དྲན་རྫོགས་སུ༔ པད་འབྱུང་ཉི་མ་འོད་ཟེར་ནི༔ དམར་སེར་ཁྲོ་འཛུམ་བཞད་པའི་ཞལ༔ ཧེ་རུ་ཀ་པ་རུས་རྒྱན་ཅན༔ དར་ལྗང་སྟོད་གཡོགས་ཁ་ཊཱཾ་ཀ༔ གཡས་པའི་དཀུར་བརྟེན་སྡིགས་མཛུབ་གཡོན༔ ཉི་མའི་ཟེར་ཕྲེང་པུས་སྟེང་འཛིན༔ སྟག་ཤམ་གཡས་བསྐུམ་གཡོན་བརྐྱང་བའི༔ ཕྱེད་དཀྱིལ་ཚུལ་གྱིས་གདན་ལ་རོལ༔ དབུ་སྐྲ་ཐོར་ཚུགས་ཐོད་སྐམ་གྱིས༔ དབུ་བརྒྱན་རྡོ་རྗེ་ཕྱེད་པས་བརྒྱན༔ འོད་དང་འོད་ཟེར་སྟོང་དུ་འབར༔ འགྲོ་བའི་མ་རིག་སྨག་རུམ་སེལ༔ འཁོར་དུ་དཔའ་བོ་མཁའ་འགྲོས་བསྐོར༔ ཡེ་ནས་རང་སེམས་པདྨ་འབྱུང་༔ དབྱིངས་ནས་གཤེགས་བཞུད་མེད་པའི་ལྷ༔ རྔ་ཡབ་གླིང་ནས་ཐུགས་དམ་བསྐུལ༔ འདིར་གཤེགས་སྒོ་གསུམ་ལྷ་སྔགས་དང་༔ ཡེ་ཤེས་ཆེན་པོའི་རོལ་པར་བཞུགས༔ འདུ་འབྲལ་མེད་པའི་བརྡ་ཕྱག་འཚལ༔ དབང་པོ་ཡུལ་དང་མཉམ་སྦྱོར་བའི༔ བདེ་བ་ཆེན་པོའི་མཆོད་པ་འབུལ༔ བཟང་ངན་གཉིས་མེད་སྟོང་ཉིད་ངང་༔ རང་རྩལ་རང་ཤར་ངང་དུ་བཞེས༔ མཐོང་བའི་འཁྲུལ་སྣང་མུན་པ་སེལ༔ ཐོས་པས་རྟག་ཆད་མཐའ་ལས་སྒྲོལ༔ དྲན་པས་དངོས་གྲུབ་རྩོལ་མེད་འབྱུང་༔ ཉི་མ་འོད་ཟེར་སྐུ་ལ་བསྟོད༔ རང་ཉིད་ཉི་མ་འོད་ཟེར་གྱི༔ ཐུགས་ཀར་པདྨ་ཉི་གདན་ལ༔ གསེར་གྱི་འཁོར་ལོ་རྩིབས་བརྒྱད་པ༔ ལྟེ་བར་གསེར་མདོག་ཧཱུྃ་གི་མཐར༔ རྩིབས་སྟེང་སྔགས་འབྲུ་གཡས་སུ་འཁོར༔ འོད་འཕྲོས་འགྲོ་ཀུན་ལས་སྒྲིབ་སྦྱངས༔ ཀུན་ཀྱང་པད་འབྱུང་གསང་གསུམ་དང་༔ དབྱེར་མེད་དག་པ་རབ་འབྱམས་ངང་༔ ཨོཾ་ཨཱཿཧཱུྃ་མ་ཧཱ་གུ་རུ་སུརྱ་རསྨི་དྷརྨ་དྷརྟུ་སརྦ་སིདྡྷི་ཧཱུྃ༔ ཞེས་པ་བརྒྱ་སྟོང་ཁྲི་རུ་བཟླ༔ ཐུན་སྐབས་ཚིག་བདུན་གསོལ་འདེབས་ལ༔ ཐུན་བཟུང་རང་རིག་གང་ཤར་ངང་༔ སྤང་བླང་རྣམ་རྟོག་རིས་མི་གཅོད༔ ཉམས་ལེན་བརྩོན་ལ་རྫོགས་རིམ་གནད༔ གུ་ཧྱ༔ ས་མ་ཡཱ༔ པད་འབྱུང་ཉི་མ་འོད་ཟེར་གྱི༔ ཆོས་སྐོར་ལས་ཚོགས་རྣམ་གསུམ་ནི༔ སྐུ་གཟུགས་མཐོང་དང་གཟུངས་སྔགས་བཟླ༔ དམིགས་པའི་གྲོལ་བ་རྣམ་པ་གསུམ༔ དང་པོ་གསོ་སྦྱོང་དང་འབྲེལ་ན༔ པད་འབྱུང་གསོལ་འདེབས་དད་པའི་བློས༔ སྐུ་གཟུགས་ཚད་དང་ལྡན་པ་འབྲི༔ རབ་ཏུ་གནས་ཤིང་སྒྲུབ་རྟེན་བྱ༔ ས་མ་ཡཱ༔ ཚེས་བཅུར་ཚོགས་ཀྱི་རྟེན་མཆོག་ཡུལ༔ དངོས་སུ་བསྒོམས་ཤིང་གསོལ་བ་བཏབ༔ འགྲོ་བ་ཕོ་མོའི་མིག་ལམ་སྟོན༔ སྤྱི་བོར་བཞག་ནས་སྨོན་ལམ་ནི༔ ཨེ་མ་ཧོ༔ རྒྱལ་བ་ཀུན་འདུས་པདྨ་འབྱུང་༔ གྲུབ་རྟགས་ཉི་མ་ཕྱག་གིས་བཟུང་༔ ཟེར་ལ་ཆིབས་ནས་གཤེགས་བཞུད་མཛད༔ རྫོགས་ཆེན་སྣང་བཞི་མཐའ་རུ་ཕྱིན༔ རིག་འཛིན་ཉི་མ་འོད་ཟེར་གྲགས༔ གསོལ་བ་འདེབས་སོ་བྱིན་གྱིས་རློབས༔ ཁྱོད་ཀྱི་སྐུ་གཟུགས་སུས་མཐོང་བ༔ ངན་སོང་ལས་ངན་རྒྱུན་བཅད་ནས༔ ཚེ་འདིར་སྣང་བཞི་མཐར་ཕྱིན་ནས༔ ཁྱེད་དང་དགོངས་པ་མཉམ་པར་ཤོག༔ ཅེས་བརྗོད་རྟེན་དང་བརྟེན་པ་གསུམ༔ པདྨའི་གསང་གསུམ་དབྱེར་མེད་བསམ༔ དེས་ནི་མཐོང་ཚད་གྲོལ་བར་ངེས༔ ས་མ་ཡཱ༔ གཟུངས་སྔགས་གསེར་དངུལ་མཚལ་གྱིས་བྲིས༔ རང་སྔགས་སྟོང་རྩས་རབ་གནས་བྱ༔ ཚེས་བཅུར་ཀུན་གྱིས་ཐོས་པར་སྒྲོགས༔ གང་ཐོས་པདྨའི་གསུང་ཉིད་དུ༔ གྲོལ་ནས་ལས་སྒྲིབ་བྱང་བར་བསམ༔ དེ་བཞིན་རོལ་མོར་པད་འབྱུང་བསྒོམ༔ རབ་གནས་བྱས་ཤིང་ཚེས་བཅུར་སྒྲོགས༔ ཐོས་ཚད་པདྨ་འོད་ཉིད་དུ༔ གྲོལ་བའི་ངེས་ཤེས་གཏིང་ནས་བསྐྱེད༔ དེས་ནི་ཐོས་ཚད་གྲོལ་བར་ངེས༔ ས་མ་ཡཱ༔ རང་གི་ལུས་ངག་ཡིད་གསུམ་དང་༔ སྣང་གྲགས་རིག་གསུམ་ཐམས་ཅད་ཀུན༔ ཨོ་རྒྱན་ཉི་མ་འོད་ཟེར་བསྒོམ༔ ཚེས་བཅུར་ཡིད་ལ་གང་ཤར་ཀུན༔ ཐ་མལ་མི་བལྟ་པད་འབྱུང་ཐུགས༔ སྟོང་ཉིད་སྙིང་རྗེའི་སྙིང་པོར་བསྒོམ༔ ཡིད་ལ་གང་དྲན་ཏིང་འཛིན་གྱི༔ སྲོག་ཆགས་སྲིན་བུ་པད་མ་ཡན༔ ཉི་མ་འོད་ཟེར་གསང་གསུམ་དང་༔ དབྱེར་མེད་དག་སྣང་རྩལ་སྦྱང་བྱ༔ དེས་ནི་གང་དྲན་འགྲོ་བ་གྲོལ༔ ས་མ་ཡཱ༔ གུ་རུ་ཉི་མ་འོད་ཟེར་གྱི་སྒྲུབ་ཐབས་འདི་སྔོན་ནས་པད་འབྱུང་ཉི་མ་འོད་ཟེར་གྱིས་རྗེས་སུ་བཟུང་བའི་མཐུས་དགོངས་གཏེར་དུ་བབས་ནས་ལོ་བརྒྱད་སོང་བའི་བྱ་ལོའི་རྒྱལ་ཟླ་དགའ་བ་གསུམ་པར་སྐལ་ལྡན་ཆོས་ཀྱི་བདག་པོ་ལ་ཡི་གེར་བྲིས་ཏེ་ཕུལ་བ་ལུང་རིག་མིང་གིས་སོ༔