བློ་ལྡན་མཆོག་སྲེད་སྒྲུབ་ཐབས་ཤེས་རབ་འབྲུག་སྒྲ།

མཚན་བརྒྱད་ཐུགས་ཀྱི་སྒྲུབ་པ་ལས༔ བློ་ལྡན་མཆོག་སྲེད་སྒྲུབ་ཐབས་ཤེས་རབ་འབྲུག་སྒྲ་བཞུགས༔

རབ་འབྱམས་རྒྱལ་ཀུན་མཁྱེན་པའི་དཔྱིད༔ མགོན་པོ་འཇམ་དཔལ་དབྱངས་ཉིད་ཀྱི༔ སྒྲུབ་ཐབས་ཤེས་རབ་འབྲུག་སྒྲ་ཞེས༔ བློ་ལྡན་མཆོག་སྲེད་ཐུགས་སྒྲུབ་བསྟན༔ ས་མ་ཡཱ༔ ཤིན་ཏུ་དབེན་ཅིང་ཉམས་དགའི་སར༔ དུས་ཚེས་གཟའ་སྐར་འཕྲོད་སྦྱོར་ལེགས༔ བདེ་བའི་སྟན་ལ་བག་ཕབ་ནས༔ རང་རྒྱུད་སྦྱོང་ཕྱིར་བློ་སྦྱོང་དང་༔ དགེ་བའི་དཔུང་བསྐྱེད་སྒྲུབ་པའི་དལ༔ བཀོད་ལེགས་སྟེང་དུ་འབྲུ་ཚོམ་ཁར༔ སྐུ་དང་སྔགས་བྱང་ཌཱ་མ་རུ༔ རིན་ཆེན་འབར་བའི་སྒྲུབ་གཏོར་དང་༔ སམ་ཏྲ་སྨྱུ་གུ་ཐིག་སྐུད་རྣམས༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྟེན་དུ་བཀོད་དེ་ཉམས་སུ་ལོངས༔ འདི་ལ་སྦྱོར་དངོས་རྗེས་དང་གསུམ༔ སྦྱོར་བ་སྐྱབས་འགྲོ་སེམས་བསྐྱེད་དང་༔ ཡན་ལག་བདུན་གྱི་ཚོགས་བསགས་ནི༔ མདུན་མཁར་ཚོགས་ཞིང་པདྨ་འབྱུང་༔ གུ་རུ་བློ་ལྡན་མཆོག་སྲེད་ལ༔ རྩ་གསུམ་ཆོས་སྐྱོང་སྤྲིན་གཏིབས་པར༔ ཁྱེད་ཤེས་དད་པས་བློ་བཀལ་སྟེ༔ ན་མོ༔ སྲིད་ཞིའི་ཁམས་ཀྱི་ཤེས་བྱའི་ཆོས༔ ཀུན་མཁྱེན་གུ་རུ་འཇམ་པའི་དབྱངས༔ བློ་ལྡན་མཆོག་སྲེད་རྩ་གསུམ་ལྷར༔ བྱང་ཆུབ་བར་དུ་གུས་སྐྱབས་མཆི༔ བདག་གིས་འགྲོ་བ་ཀུན་དོན་དུ༔ བློ་ལྡན་མཆོག་སྲེད་སྒྲུབ་བགྱི་ཞིང་༔ གང་འདུལ་རིག་གནས་སྒོ་ཕྱེ་ནས༔ རྣམ་མཁྱེན་སྒྲུབ་པར་སེམས་བསྐྱེད་དོ༔ སྒྲིབ་གཉིས་སྦྱང་ཕྱིར་གུས་ཕྱག་འཚལ༔ ཚོགས་གཉིས་རྫོགས་ཕྱིར་མཆོད་སྤྲིན་འབུལ༔ ཉེས་ལྟུང་མི་འཆབ་སྡིག་སྒྲིབ་བཤགས༔ གཞན་ལ་ཕན་ཕྱིར་རྗེས་ཡི་རང་༔ འགྲོ་དོན་ཆོས་འཁོར་བསྐོར་གསོལ་འདེབས༔ བདུད་སྡེའི་གཉེན་པོར་བཞུགས་པར་ཞུ༔ དགེ་ཚོགས་མཁའ་ཁྱབ་དོན་ཕྱིར་བསྔོ༔ དངོས་གཞི་སྤྲོས་བྲལ་སྟོང་པའི་མདངས༔ བསྐྱེད་རིམ་ལྷ་རུ་འདི་བཞིན་སྒོམས༔ ཧྲཱིཿ ཤེས་བྱའི་ཡུལ་གྱུར་ཕྱི་སྣོད་ཞིང༔ ཡུམ་ལྔའི་མཁའ་ཀློང་རྣམ་པར་དག༔ སྤྲུལ་སྐུའི་ཞིང་ཁམས་པདྨ་འོད༔ གསེར་གྱི་ས་གཞི་ཁོད་སྙོམས་དབུས༔ ལྗོན་ཤིང་ཡན་ལག་བརྒྱད་ལྡན་ཆུ༔ པད་མཚོ་ནོར་བུའི་རྫིིང་བུར་འཁྱིལ༔ མེ་ཏོག་དྲི་བསུང་ངད་ལྡང་བར༔ སྤྲུལ་པའི་བྱ་དང་བྷྲ་མ་རས༔ ཐེག་གསུམ་ཆོས་དང་རིག་པའི་གནས༔ མ་འདྲེས་སོ་སོར་གླུ་དབྱངས་སྒྲོག༔ ཕོ་བྲང་ངོ་མཚར་ཡོན་ཏན་བརྩེགས༔ ཤེས་རབ་རང་བཞིན་རིག་འཛིན་དང་༔ མཆོད་པའི་ལྷ་མོ་སྤྲིན་བཞིན་འཐིབས༔ ལྟེ་བར་སེང་ཁྲི་པད་ཟླའི་ཁར༔ རང་སེམས་དྷཱིཿལས་འཇམ་པའི་དབྱངས༔ གུ་རུ་བློ་ལྡན་མཆོག་སྲེད་རྩལ༔ གུར་གུམ་མེ་ཏོག་གཞོན་ནུའི་མདངས༔ ཞི་ཞལ་འཛུམ་མདངས་ལྷམ་མེ་བ༔ དར་ཐོད་རིན་ཆེན་པྲོག་ཞུས་སྤྲས༔ དར་དཀར་གསེར་རིས་བེར་ཕྱམ་དང་༔ གསེར་མདངས་སྐེད་ཆིངས་ནོར་བུས་སྤྲས༔ སག་ལྷྭམ་འཇའ་ཚོན་ཆ་ག་ཅན༔ ཕྱག་གཡས་སེང་ལྡིང་ཌཱ་མ་རུ༔ སྙན་པའི་སྒྲ་ཡིས་འགྲོ་ཁམས་སྡུད༔ ཕྱག་གཡོན་ལི་ཡི་པད་ཕོར་ནང་༔ འབྲས་དཀར་སིལ་མས་བཀང་བ་བསྣམས༔ སྙན་ཆ་མགུལ་རྒྱན་ཕྲེང་བ་དང་༔ ཕྱག་ཞབས་གདུ་བུ་ཕྲ་ཚོམ་ངོམ༔ དབུ་གཙུག་རྗེ་བཙུན་འཇམ་པའི་དབྱངས༔ ལོངས་སྐུའི་ཆས་ཅན་རལ་གྲི་པོད༔ ཕྱེད་དཀྱིལ་ཤེས་རབ་མཆོག་སྟེར་ལྷ༔ ཕྱོགས་བཞིར་པད་ཟླར་དབྱངས་ཅན་མ༔ དཀར་སེར་དམར་ལྗང་བཞེངས་སྟབས་ཅན༔ རྒྱུད་མང་སྒྲ་ལས་བཅུ་ཕྲག་རིག༔ ཆོས་སྒྲས་གདུལ་བྱའི་བློ་མུན་སེལ༔ སྟེང་མཁར་རྩ་བརྒྱུད་བླ་མ་དང་༔ བར་གྱི་ཆ་ལ་ཡི་དམ་ལྷ༔ འོག་ཏུ་མཁའ་འགྲོ་ཆོས་སྐྱོང་སོགས༔ སྐྱབས་གྱུར་མ་ལུས་སྤྲིན་བཞིན་འཁྲིགས༔ ཀུན་གྱི་གནས་གསུམ་འབྲུ་གསུམ་ལས༔ འོད་ཟེར་དབང་གཞུ་ལྟར་འཕྲོས་པས༔ སྐུ་གསུམ་ཞིང་ནས་པདྨ་འབྱུང་༔ སྤྱན་དྲངས་མོས་འདུན་གདུང་བའི་བློས༔ གནས་འདིར་གློག་འོད་འཁྱུག་བཞིན་སྤྱོན༔ དེ་ནས་སྤོས་དང་རོལ་མོའི་སྒྲས༔ སྔུན་ནས་བསུས་ཏེ་དབྱངས་སྙན་པོས༔ ཚིག་བདུན་གསོལ་འདེབས་འདི་བཞིན་བྱ༔ ཧཱུྃ་ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ དེ་ཉིད་ར་ག་ར་ཏཱིའི་གནས༔ ཐམས་ཅད་མཁྱེན་པའི་ཤེས་རབ་ལྷ༔ གུ་རུ་བློ་ལྡན་མཆོག་སྲེད་ཅེས༔ འཁོར་དུ་རྩ་གསུམ་སྤྲིན་ལྟར་འཐིབས༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡཱ་ཛཿསིདྡྷི་ཕ་ལ་ཧཱུྃ༔ བཞུགས་སུ་གསོལ་བ་འདི་བཞིན་ནོ༔ ཧཱུྃཿ རང་སྣང་དབྱིངས་ལས་ཤར་བའི་ལྷ༔ རྩ་གསུམ་ཀུན་འདུས་ཨོ་རྒྱན་རྗེ༔ ཤེས་རབ་སྣང་བྱེད་བློ་གྲོས་མཆོག༔ རང་དང་འདུ་འབྲལ་མེད་པར་བཞུགས༔ བཛྲ་ས་མ་ཡཱ་ཏིཥྛ་ལྷན༔ གུས་པའི་སྒོ་ནས་ཕྱག་འཚལ་ནི༔ ཧོ༔ མ་རིག་བདག་ཉིད་སེམས་ཅན་གྱི༔ བདག་ལྟའི་ང་རྒྱལ་རྩད་གཅོད་ཕྱིར༔ རང་ལས་གཞན་མིན་འཕྲུལ་དགའི་ལྷས༔ སྤྲུལ་བསྒྱུར་ཇི་བཞིན་གུས་ཕྱག་འཚལ༔ ན་མོ་ན་མ༔ ཕྱི་ནང་གསང་བའི་མཆོད་འབུལ་ནི༔ ཨོཾ་ཨཱཿཧཱུྃ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོ་ཕྱི་མཆོད་འབུལ༔ གཟུགས་སྒྲ་དྲི་རོ་རེག་བྱ་ཆོས༔ བདེ་སྟོང་རྣམ་རོལ་ནང་མཆོད་འབུལ༔ སྨན་གཏོར་རཀྟ་དགའ་བ་བཞི༔ སྦྱོར་སྒྲོལ་གསང་བའི་མཆོད་པ་འབུལ༔ གཉིས་མེད་རང་བྱུང་རང་རིག་ངང་༔ དོན་དམ་རྟོགས་པའི་མཆོད་པ་འབུལ༔ མ་ཧཱ་པཱུ་ཛ་སརྦ་བོ་དྷི་ཙིཏྟ་ཧོ༔ ཡོན་ཏན་རྗེས་དྲན་བསྟོད་པ་ནི༔ ཨེ་མ་ཧོ༔ ངོ་མཚར་པདྨའི་སྦུབས་སུ་འཁྲུངས༔ རྒྱལ་ཀུན་འདུས་པའི་མཚན་དཔེའི་སྐུ༔ མཁའ་ཁྱབ་འགྲོ་བློའི་རྗེས་སུ་འཇུག༔ བློ་ལྡན་མཆོག་སྲེད་སྐུ་ལ་བསྟོད༔ ཕྱི་ནང་རིག་གནས་ཐེག་གསུམ་ཆོས༔ དབྱངས་ཀྱི་ཡན་ལག་དྲུག་ཅུའི་གསུང་༔ གདུལ་བྱ་རང་རང་སྐད་དུ་སྟོན༔ བློ་ལྡན་མཆོག་སྲེད་གསུང་ལ་བསྟོད༔ ཤེས་བྱའི་ཆོས་ཀུན་ཐོགས་མེད་མཁྱེན༔ དམིགས་མེད་ཐུགས་བརྩེས་འགྲོ་ཀུན་སྐྱོང་༔ སྟོང་ཉིད་མི་ཕྱེད་རྡོ་རྗེའི་ངང་༔ བློ་ལྡན་མཆོག་སྲེད་ཐུགས་ལ་བསྟོད༔ ཡུལ་སྣང་གཉིས་འཛིན་རྟོག་པ་བྲལ༔ འགྲོ་ལ་མཆོག་ཐུན་དངོས་གྲུབ་ཀུན༔ དཔག་བསམ་ཤིང་བཞིན་རྩོལ་མེད་འབྱུང་༔ བློ་ལྡན་མཆོག་སྲེད་ཡོན་ཏན་བསྟོད༔ ནད་གདོན་ཞི་ཕྱིར་མཛེས་ཚུལ་སྟོན༔ ཚེ་བསོད་རྒྱས་ཕྱིར་སྒེག་པའི་ཉམས༔ དབང་དུ་སྡུད་ཕྱིར་ཆགས་པའི་གཟུགས༔ དགྲ་བགེགས་ཚར་གཅོད་དྲག་པོར་རྔམས༔ རྒྱལ་ཀུན་མཛད་པ་གཅིག་བསྡུས་དཔལ༔ བློ་ལྡན་མཆོག་སྲེད་ཕྲིན་ལས་བསྟོད༔ འཛབ་བཟླས་ལའང་རྣམ་པ་གསུམ༔ དང་པོ་བསྙེན་པའི་རིམ་པ་ནི༔ རང་ཉིད་བློ་ལྡན་མཆོག་སྲེད་ཀྱི༔ ཐུགས་དབུས་པད་དཀར་འདབ་བརྒྱད་པའི༔ ལྟེ་བར་ཟླ་སྟེང་དྷཱིཿདམར་སེར༔ དེ་མཐར་རྩ་སྔགས་འོད་ལྔའི་མདངས༔ གཡས་སུ་འཁོར་ལ་སེམས་གཏད་དེ༔ ཤུབ་བུས་བཟླས་སྐྱོན་སྤངས་ཏེ་འབད༔ ཨོཾ་ཨཱཿམ་ཧཱ་གུ་རུ་པྲཛྙཱ་བྷུདྡྷི་སརྦ་སིདྡྷི་ཧཱུྃ༔ འབྲུ་འབུམ་རྟགས་ཐོན་བཟླ་བར་བྱ༔ གཉིས་པ་སྒྲུབ་པའི་རིམ་པ་ནི༔ ཐུགས་ཀར་དྷཱིཿམཐར་སྔགས་གཡས་བསྐོར༔ སྤྱི་བོའི་རིགས་བདག་འཇམ་དབྱངས་ཀྱི༔ ཐུགས་དབུས་ཟླ་སྟེང་ཤེས་རབ་སྲོག༔ རལ་གྲི་སོར་བཞི་ལྟེ་བར་ཧྲཱིཿ དམར་སེར་བཀྲག་མདངས་ལྡན་པ་ལ༔ སྒྲུབ་སྔགས་དམར་སེར་གཡས་བསྐོར་ལས༔ འོད་འཕྲོས་འཕགས་མཆོད་ཐུགས་རྗེ་དང་༔མཁྱེན་རབ་དངོས་གྲུབ་ཚུལ་དུ་བསྡུས༔ རང་ལ་ཐིམ་པས་ཤེས་བྱའི་ཆོས༔ སྤྱི་དང་བྱེ་བྲག་མ་འདྲེས་པར༔ མཁྱེན་རབ་བདག་པོ་འཇམ་དཔལ་དང་༔ རང་ཉིད་ནུས་པ་མཉམ་པར་བསམ༔ ཨོཾ་ཝ་ཀྱེ་ཏཾ་ན་མཿཔྲཛྙཱ་སརྦ་སིདྡྷི་ཧཱུྃ༔ གསུམ་པ་ལས་ལ་སྦྱོར་བ་ནི༔ རང་དང་རིགས་བདག་ཡུམ་བཞི་ལས༔ འོད་ཟེར་སྤོས་རེང་དུད་པ་ལྟར༔ ཕྲ་ལ་འདྲིལ་བ་ཁ་དོག་ལྔ༔ ཕྱོགས་བཅུར་འཕྲོས་པས་རྒྱལ་རྣམས་དང་༔ རིག་གནས་མཁན་དང་པཎྜི་ཏ༔ འབྱུང་བཞིའི་བཅུད་དང་བཀའ་བསྟན་དང་༔ ལྷ་ཀླུའི་ནོར་བུ་ཉི་ཟླ་དང་༔ འཁོར་འདས་ཀུན་གྱི་བཅུད་བསྡུས་ཏེ༔ རང་ལ་ཐིམ་པས་ཁམས་གསུམ་གྱི༔ མཁས་པའི་དབང་པོར་བདག་གྱུར་ནས༔ འཆད་པས་སྐལ་ལྡན་ཐར་ལམ་བཀོད༔ རྩོད་པས་མུ་སྟེགས་རྒོལ་ངན་བཅོམ༔ རྩོམ་པས་རྒྱལ་བའི་དགོངས་པ་ཁྲོལ༔ བསྟན་འགྲོའི་ཕན་བདེའི་རྩ་ལག་ཏུ༔ མཁས་མཆོག་བློ་ལྡན་མཆོག་སྲེད་དང༔ བདག་ཉིད་ནུས་པ་མཉམ་པར་བསམ༔ ཨོཾ་ཨཱཿམ་ཧཱ་གུ་རུ་མཉྫུ་ཤྲཱི་མ་ཏི་པྲཛྙཱ་བྷུདྡྷི་ཀརྨ་བི་ཤྭ་སརྦ་སིདྡྷི་ཕ་ལ་ཧཱུྃ༔ ཞེས་པ་སྟོང་རྩ་བསྙེན་གྲངས་ཡིན༔ ཞལ་མཇལ་གསུང་ཐོས་རྨི་ལམ་དུ༔ ཉི་ཟླ་ཤར་དང་གླེགས་བམ་རྙེད༔ རལ་གྲི་མིད་དང་མཚལ་སྣག་འཐུང་༔ ཁྲི་ལ་འདུག་དང་ཁྲོམ་འདུས་སོགས༔ ཤེས་རབ་འཕེལ་བའི་རྟགས་ཡིན་ནོ༔ ས་མ་ཡཱ༔ རྗེས་ལ་དངོས་གྲུབ་ལེན་པ་ནི༔ ཨེ་མ་ཧོ༔ མཁས་པ་བློ་གྲོས་མཆོག་ལྡན་གྱིས༔ བདག་ལ་འཆད་རྩོད་རྩོམ་གསུམ་གྱི༔ དངོས་གྲུབ་དམ་པ་བསྩལ་ནས་ཀྱང་༔ ཕྱོགས་ལས་རྣམ་རྒྱལ་སིདྡྷི་ཧཱུྃ༔ རྩ་སྔགས་ཤམ་བུར་ཀཱ་ཡ་ཝཀྐ་ཙིཏྟ་སརྦ་སིདྡྷི་ཧཱུྃ༔ མཆོད་བསྟོད་ནོངས་བཤགས་སྤྱི་ལྟར་ལ༔ བསྡུ་རིམ་ལྷར་ལྡང་བསྔོ་སྨོན་ནི༔ རང་སེམས་སྟོང་པའི་རྩལ་བསྐྱེད་པའི༔ ལྷར་སྣང་མི་དམིགས་ཀློང་དུ་བསྡུ༔ རྗེས་ལ་སྒྱུ་མའི་སྐུ་རུ་ཤར༔ གནས་གསུམ་འབྲུ་གསུམ་མཚན་པས་བསྲུང་༔ ཨོཾ་ཨཱཿཧཱུྃ༔ མེ་ཏོག་འཐོར་ཞིང་ཤིས་བརྗོད་ནི༔ ཨེ་མ་ཧོ༔ ཤེས་བྱ་ཀུན་མཁྱེན་ལྷ་ཡི་ལྷ༔ འཇམ་དབྱངས་བློ་ལྡན་མཆོག་སྲེད་ཀྱི༔ གསང་གསུམ་ཟླ་ཟེར་བདུད་རྩིའི་ཆར༔ མཁའ་ཁྱབ་འགྲོ་བློར་སྣང་བ་དང་༔ ཆབས་ཅིག་མཁས་པའི་འོད་སྣང་གིས༔ གཏི་མུག་མུན་སེལ་བཀྲ་ཤིས་ཤོག༔ གུ་ཧྱ༔ ཞེས་རིག་འཛིན་ལུང་རིག་གླིང་པས་རིག་སྟོང་སྤྲོས་པ་ཀུན་བྲལ་འགྱུར་མེད་བདེ་ཆེན་འབར་བའི་སྒྲོམ་ནས་བཏོན་པའོ། ཤུ་བྷཾ༔