རྡོ་རྗེ་གྲོ་ལོད་ཀྱི་རྣལ་འབྱོར་རྒྱུན་ཁྱེར་གནམ་ལྕགས་ཐོག་གི་ཚྭ་ཚྭ །

གུ་རུའི་ཐུགས་སྒྲུབ་པད་ཕྲེང་ལས༔ རྡོ་རྗེ་གྲོ་ལོད་ཀྱི་རྣལ་འབྱོར་རྒྱུན་ཁྱེར་གནམ་ལྕགས་ཐོག་གི་ཚྭ་ཚྭ་ཞེས་བྱ་བ་བཞུགས༔

བདག་ཏུ་ལྟ་བའི་རུ་ཏྲ་ཀུན༔ བདག་མེད་སྟོང་པའི་ཀློང་དུ་བསྒྲལ༔ དཔའ་རྟགས་རྔམ་པའི་ང་རོ་ཅན༔ དཔལ་ཆེན་ཁྲོ་བོའི་རྒྱལ་ལ་འདུད༔ མ་ཧཱ་གུ་རུ་ཐོད་ཕྲེང་གི༔ མཚན་བརྒྱད་བསྒྲུབ་པའི་ཆ་ལག་ཏུ༔ རྡོ་རྗེ་ཁྲོ་བོའི་སྒྲུབ་པ་བརྩམས༔ མཚོ་རྒྱལ་དགོངས་པའི་གཏེར་དུ་སྦོས༔ ལས་ཅན་བུ་ལ་སྨོན་ལམ་ཐོབ༔ ལས་འཕྲོ་ཅན་གྱི་དཔལ་དུ་ཤོག༔ ས་མ་ཡཱ༔ འདི་ལ་སྦྱོར་དངོས་རྗེས་དང་གསུམ༔ དབེན་པར་འཁོར་བས་རབ་སུན་ནས༔ བདེ་བའི་སྟན་ལ་བག་ཕབ་སྟེ༔ དཀོན་མཆོག་ཀུན་འདུས་པད་འབྱུང་ལ༔ ཁྱེད་ཤེས་བློ་ཡིས་སྐྱབས་འགྲོ་ནི༔ ཧཱུྃ་ཧཱུྃ་ཧཱུྃ༔ དཀོན་མཆོག་རྩ་གསུམ་སྐུ་གསུམ་སོགས༔ ཀུན་འདུས་པདྨ་ཐོད་ཕྲེང་ལ༔ ཁྱེད་ཤེས་བློ་ཡིས་སྐྱབས་སུ་མཆི༔ འགྲོ་དོན་སངས་རྒྱས་འཐོབ་བྱའི་ཕྱིར༔ བསྟན་དང་འགྲོ་ལ་འཚེ་བ་ཡི༔ དམ་སྲི་སྒྲོལ་བར་སེམས་བསྐྱེད་དོ༔ ལྟ་བ་རང་ཞལ་མཇལ་བའི་ཕྱག༔ སྒོམ་པ་ཡེང་མེད་མཆོད་སྤྲིན་འབུལ༔ དངོས་འཛིན་མཚན་མའི་སྒྲིབ་སོགས་བཤགས༔ མ་ཡེང་དྲན་པའི་ཆོས་འཁོར་བསྐོར༔ དམིགས་མེད་ངང་དུ་རྗེས་ཡི་རང་༔ རྩོལ་མེད་འགྲོ་མགོན་བཞུགས་གསོལ་འདེབས༔ འཁོར་གསུམ་དམིགས་མེད་དགེ་ཚོགས་བསྔོ༔ དེ་ཡིས་སྔོན་འགྲོའི་ཆོས་གསུམ་རྫོགས༔ དངོས་གཞི་སྒོ་གསུམ་ལྷ་སྔགས་དང་༔ རྒྱས་གདབ་བསྐྱེད་པའི་རིམ་པ་ནི༔ ཧཱུྃ་ཧཱུྃ་ཧཱུྃ༔ འཁོར་འདས་དམིགས་མེད་སྟོང་པའི་ངང་༔ མ་རྟོགས་འགྲོ་ལ་སྙིང་རྗེའི་གདངས༔ ཟུང་འཇུག་རང་རིག་ཡི་གེ་ཧཱུྃ༔ དེ་ལས་འོད་འཕྲོས་ཕྱི་སྣོད་ཞིང་༔ རྔ་ཡབ་ཟངས་མདོག་དཔལ་གྱི་རི༔ འཇིགས་རུང་སྲིན་པོའི་ཕོ་བྲང་དབུས༔ པད་ཉི་སྡེ་བརྒྱད་དམ་སྲིའི་སྟེང་༔ རྩལ་ལྡན་སྟག་མོ་རྔམ་ཞིང་བརྗིད༔ དེ་སྟེང་ཧཱུྃ་ཡིག་ཡོངས་གྱུར་ལས༔ རྩ་གསུམ་ཀུན་འདུས་པདྨ་འབྱུང་༔ ཁྲོ་བོ་ཆེ་བཙན་གྲོ་བོ་ལོད༔ སྨུག་ནག་རྔམ་བརྗིད་སྲིན་པོའི་གཟུགས༔ སྡང་མིག་གློག་འཁྱུགས་ཨམ་གཙིགས་བསྡམས༔ རལ་པ་དམར་སེར་ཐོད་སྐམ་སྤྲས༔ མགོ་རློན་དོ་ཤལ་སྦྲུལ་ཆུན་བརྒྱན༔ བེར་མཐིང་བླ་གོས་མཐང་ཤམ་དམར༔ ཕྱག་གཡས་གསེར་རྡོར་རྩེ་ལྔ་ཕྱར༔ རྒྱལ་འགོང་བདུད་བཞིའི་ཀླད་པ་དཀྲུགས༔ གཡོན་པས་གནམ་ལྕགས་ཕུར་བུ་བསྒྲིལ༔ ལོག་འདྲེན་དམ་སྲིའི་སྙིང་ལ་བསྡིག༔ སྡིགས་མཛུབ་རྩེ་ལས་ལྕགས་སྡིག་འཕྲོ༔ བཟོད་དཀའ་བསྐལ་མེ་འབར་བའི་ཀློང་༔ ཡང་སྤྲུལ་ཁྲོ་ཚོགས་སྤྲིན་ལྟར་གཏིབས༔ ཕྱོགས་བཞིར་དཀར་སེར་དམར་ལྗང་གིང་༔ ཐོད་དབྱུག་སྡིགས་མཛུབ་མེ་སྟག་འཕྲོ༔ སྣང་སྟོང་དབྱེར་མེད་ཆུ་ཟླའི་གར༔ གསལ་སྟོང་བདེ་བ་ཆེན་པོའི་ངང་༔ གནས་གསུམ་ཡི་གེའི་འོད་ཟེར་གྱིས༔ རྔ་ཡབ་གླིང་ནས་རང་འདྲ་བ༔ ཆར་ལྟར་བབས་ནས་ཐིམ་པར་བསམ༔ ཧཱུྃ་ཧཱུྃ་ཧཱུྃ༔ འཇིགས་རུང་དབང་དྲག་རོལ་པའི་ཞིང་༔ ལང་ག་མགྲིན་བཅུ་སྲིན་པོའི་ཡུལ༔ ཟངས་མདོག་དཔལ་རི་སྤྲུལ་པའི་གནས༔ པདྨ་འོད་ཀྱི་ཕོ་བྲང་ནས༔ ཁྲོ་བོ་ཡོངས་ཀྱི་ཆེ་བཙན་མཆོག༔ གུ་རུ་རྡོ་རྗེ་གྲོ་བོ་ལོད༔ ཁྲོ་ཚོགས་སྤྲུལ་པ་སྐར་ལྟར་འཁྲིགས༔ གིང་ཆེན་མཁའ་འགྲོ་རྡུལ་ལྟར་འཚུབས༔ སྔོན་ནས་ཁྱོད་དང་འབྲེལ་བའི་ཕྱིར༔ རྩེ་གཅིག་གདུང་བས་སྤྱན་འདྲེན་ན༔ དམ་ཚིག་དབང་གིས་འདིར་གཤེགས་ལ༔ སྒོ་གསུམ་རྟེན་དང་དབྱེར་མེད་བཞུགས༔ འདུ་འབྲལ་མེད་པར་ཏིཥྛ་ལྷན༔ སྒོ་གསུམ་སྐུ་གསུང་ཐུགས་ཀྱི་ངང་༔ ཐ་མི་དད་པས་བརྡ་ཕྱག་འཚལ༔ ཕྱི་ལྟར་ཞིང་བཅུ་འདུལ་བའི་ཆེད༔ དགྲ་བགེགས་དམ་སྲི་བསྒྲལ་བ་ཡི༔ ཁྲག་གི་མཆོད་ཡོན་ཆུ་རྒྱུན་སྦྲེང་༔ དབང་པོའི་མེ་ཏོག་གསར་དུ་བཞད༔ ཚིལ་ཆེན་བསྲེགས་པའི་དུད་སྤྲིན་འཁྲིགས༔ ཞུན་ཆེན་མར་མེ་ཉི་ལྟར་འབར༔ ཁྲག་མཁྲིས་དྲི་ཆབ་སྦྱར་བའི་ཆབ༔ ཤ་ཁྲག་རུས་པའི་ཞལ་ཟས་དང་༔ ཐོད་རྔ་རྐང་གླིང་རོལ་མོའི་སྒྲ༔ ནང་ལྟར་རང་རྒྱུད་ཉོན་མོངས་ལྔ༔ གཏི་མུག་ཤ་དང་འདོད་ཆགས་ཁྲག༔ ཞེ་སྡང་རུས་པ་ང་རྒྱལ་ཚིལ༔ ཕྲག་དོག་མཁྲིས་ཆེན་ཉོན་མོངས་ལྔ༔ མ་སྤངས་མི་ཞེན་རང་བབས་གཤིས༔ རྣམ་དག་མཆོད་པ་ཆེན་པོ་བཞེས༔ གསང་བ་གང་སྣང་ཡུལ་དྲུག་ཀུན༔ བླང་དོར་གཉིས་མེད་མཉམ་པའི་ངང་༔ ཟག་མེད་བདུད་རྩི་ཨ་མྲྀ་ཏ༔ བདེ་གསལ་མི་རྟོག་ཞེན་བྲལ་ཁྲག༔ སྣང་སྲིད་སྣོད་བཅུད་བྷ་ལིང་ཏ༔ དབྱིངས་རིག་འབྲལ་མེད་དབྱིངས་སུ་སྦྱོར༔ ཞིང་བཅུ་ཚད་མེད་སྙིང་རྗེས་སྒྲོལ༔ འཁོར་གསུམ་དམིགས་མེད་མཆོད་པ་བཞེས༔ སྐུ་གསུམ་མངོན་གྱུར་དངོས་གྲུབ་སྩོལ༔ མ་ཧཱ་ཤ་མ་ཤ་ན་སརྦ་པཱུ་ཙ་ཨ་མྲྀ་ཏ་རཀྟ་བྷ་ལིང་ཏ་ཁཱ་ཧི༔ སརྦ་ཨརྠ་སིདྡྷི་ས་མ་ཡཱ་ཧཱུྃ་ཧཱུྃ་ཧཱུྃ༔ ཧཱུྃ༔ ཆེ་མཆོག་པདྨ་ཐོད་ཕྲེང་རྩལ༔ ཁྲོ་བོ་འཆོལ་བ་གྲོ་བོ་ལོད༔ སྐུ་ནི་སྨུག་ནག་གར་དགུའི་ཉམས༔ མི་ཟན་སྟག་མོ་དྲུས་མའི་སྟེང་༔ དཔའ་ཞིང་གཏུམ་པའི་བརྟུལ་ཤུགས་ཅན༔ ལོག་འདྲེན་གཤེད་དུ་རྔམ་ལ་བསྟོད༔ གསུང་ནི་དྲག་སྔགས་ཧཱུྃ་གི་སྒྲས༔ བསྟན་པའི་དམ་སྲིའི་ཀླད་པ་འགེམས༔ གྲག་སྟོང་རྡོ་རྗེའི་སྒྲ་དབྱངས་སྒྲོག༔ རྡོ་རྗེའི་གད་མོ་བཞད་ལ་བསྟོད༔ གང་ཐུགས་སྤྲོས་བྲལ་ཆོས་སྐུའི་ཀློང་༔ དམིགས་མེད་སྙིང་རྗེ་ཆེན་པོའི་རྩལ༔ ཞེ་སྡང་ཅན་ལ་ཁྲོ་ཚུལ་སྟོན༔ འཁྲུལ་མེད་དབྱིངས་སུ་སྦྱོར་ལ་བསྟོད༔ རབ་འབྱམས་རྒྱལ་བ་ཐམས་ཅད་དང་༔ དབྱེར་མེད་གཅིག་པའི་སྒྱུ་འཕྲུལ་གར༔ ཞི་དང་ཁྲོ་བོ་ཆགས་པའི་ཉམས༔ མ་འདྲེས་ཡོན་ཏན་རྫོགས་ལ་བསྟོད༔ ཁྱོད་མཚན་ཡིད་ལ་དྲན་པས་ཀྱང་༔ བདུད་དང་ལོག་འདྲེན་མ་ལུས་པ༔ སྤ་བཀོང་ཟིལ་གནོན་བྲན་དུ་འཁོལ༔ དྲག་པོའི་ཕྲིན་ལས་རྫོགས་ལ་བསྟོད༔ སྔགས་ཀྱི་བཟླས་པ་བྱ་བ་ནི༔ རང་གི་ཐུགས་ཀར་ཉི་མའི་སྟེང་༔ ཡེ་ཤེས་སེམས་དཔའ་ཧཱུྃ་སྨུག་ནག༔ མཐའ་བསྐོར་སྔགས་ཀྱི་ཕྲེང་བ་ནི༔ གཡས་སུ་འཁོར་ཞིང་རང་སྒྲ་སྒྲོག༔ མེ་སྟག་ལྕགས་སྡིག་ཚྭ་ཚྭ་འཕྲོས༔ རྒྱལ་བསེན་དམ་སྲི་འབྱུང་པོའི་ཚོགས༔ བསྐྲད་བཅོམ་རྨིང་མེད་བརླག་པར་བསམ༔ སྟོང་ཉིད་ལྟ་བའི་གདེང་ལྡན་པས༔ ཡེངས་མེད་ངང་ནས་སྔགས་འདི་བཟླ༔ ཨོཾ་ཨཱཿཧཱུྃ་མ་ཧཱ་གུ་རུ་གྲོ་བོ་ལོད་སརྦ་སིདྡྷི་ཕ་ལ་ཧཱུྃ༔ བསྙེན་ཚད་འབྲུ་འབུམ་དག་ཏུ་བཟླ༔ སྐབས་སུ་ལས་ལ་སྦྱོར་བའི་སྔགས༔ ཨོཾ་ཨཱཿཧཱུྃ་མ་ཧཱ་གུ་རུ་བཛྲ་ཀྲོ་ཏ་སརྦ་དུཥྚན་ཨ་ཡ་མ་དུ་རུ་ཙ་ཤ་ན་དམ་སྲི་འབྱུང་པོའི་སྙིང་ལ་མཱ་ར་ཡ་ཧཱུྃ་ཕཊ༔བྷྱོ་ཟློག༔ སླར་ཡང་སྔགས་ལས་འོད་ཟེར་འཕྲོས༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ ཐོ་བ་དགྲ་སྟྭ་རལ་གྲི་མེ༔ ཕྱག་མཚན་སྣ་ཚོགས་ཐོགས་པ་ཡི༔ སྟོབས་ལྡན་ཤུགས་དྲག་ལས་མཁན་ཚོགས༔ གློག་ལྟར་འཁྱུག་ཅིང་ཐོག་ལྟར་འབེབས༔ གང་དམིགས་དགྲ་འདྲེ་དམ་སྲིའི་ཚོགས༔ ལྕགས་ཀྱུས་སྙིང་བཟུང་ཞགས་པས་བསྡམས༔ ལྕགས་སྒྲོག་གིས་བཅིངས་དྲིལ་བུས་མྱོས༔ ཐོ་བས་བསྣུན་ཅིང་དགྲ་སྟྭས་གཤགས༔ རལ་གྲིས་གཏུབས་ནས་མེ་ལ་བསྲེགས༔ དམིགས་པ་བརྟན་པོས་བཟླ་བར་བྱ༔ གྲངས་ནི་ཁྲི་ཚོ་གསུམ་ཡིན་ནོ༔ གནོད་ཚབས་ཆེ་ཆུང་དག་དང་བསྟུན༔ མཐར་ནི་གནོད་བྱ་གནོད་ཡུལ་ཀུན༔ སྤྲོས་བྲལ་སྟོང་པའི་ངང་མདངས་བསྐྱངས༔ ཁྱད་པར་དྲག་སྔགས་སོ་ལྔ་པ༔ དྲག་པོ་སྤྱི་དྲིལ་སྔགས་ཡིན་པས༔ རྣོ་སོ་གདགས་ཕྱིར་བརྒྱ་སྟོང་གྲངས༔ ལོང་སྐབས་དག་དང་བསྟུན་ཏེ་བཟླ༔ གང་ཟག་དབང་པོའི་ཁྱད་པར་ལས༔ རབ་འབྲིང་ཐ་མའི་རྟགས་རྣམས་འབྱུང་༔ ཐེ་ཚོམ་མེད་པ་གནད་དུ་ཆེ༔ ལོག་ལྟ་ཅན་གྱི་སྤྱོད་ཡུལ་མིན༔ ས་མ་ཡཱ༔ འདི་ལ་ལས་སྦྱོར་གྲངས་མང་ཡང་༔ ཉེ་བར་མཁོ་ཕྱིར་གསུམ་དུ་བསྡུས༔ སེར་བ་གཅོད་དང་དགྲ་གདོན་འདུལ༔ ལྟས་ངན་ཟློག་པའི་སྔགས་དམིགས་གསུམ༔ དང་པོ་ཐོ་རངས་སྔ་བར་ལངས༔ སྐྱབས་གནས་ཀུན་འདུས་པད་འབྱུང་ལ༔ ཚིག་བདུན་གསོལ་འདེབས་བརྒྱ་རྩའི་མཐར༔ འདི་ཉིད་རྒྱུན་འཁྱེར་དང་འབྲེལ་བའི༔ བསྙེན་སྔགས་དམིགས་པ་གནད་དུ་བསྣུན༔ སེར་སྤྲིན་འདུག་པ་དེ་ཡི་དཀྱིལ༔ ཧཱུྃ་སྨུག་ཡོངས་གྱུར་གྲོ་བོ་ལོད༔ མེ་ཡི་ཚྭ་ཚྭ་འཕྲོ་བ་ཡིས༔ སེར་སྤྲིན་གཏོར་ནས་སེར་བདག་བརླགས༔ དམིགས་མེད་སྟོང་ཉིད་ངང་གྱུར་བསམ༔ ཡེངས་བྲལ་ངང་ནས་སྔགས་འདི་བཟླ༔ ཨ་ཡ་མ་དུ་རུ་ཙ་ཤ་ན་དྷེ་ཝ་ལྷ་ཡི་སེར་བ་བྷྱོ་ཟློག༔ ཡ་མ་གཤིན་རྗེའི་སེར་བ་བྷྱོ་ཟློག༔ མ་མ་རུ་ལུ་མ་མོའི་སེར་བ་བྷྱོ་ཟློག༔ དུ་ན་དུན་བདུད་ཀྱི་སེར་བ་བྷྱོ་ཟློག༔ རུ་རཀྴ་གཟའ་ཡི་སེར་བ་བྷྱོ་ཟློག༔ ཙ་ཡང་དྲི་བཙན་གྱི་སེར་བ་བྷྱོ་ཟློག༔ ཤ་ཤྭ་ན་ཐེའུ་བྲང་གི་སེར་བ་བྷྱོ་ཟློག༔ ན་ནཱ་ག་ཀླུ་ཡི་སེར་བ་བྷྱོ་ཟློག༔ སྡེ་བརྒྱད་སྤྱི་དང་བྱེ་བྲག་གི་སེར་བ་ཐམས་ཅད་བྷྱོ་ཟློག༔ ཅེས་པ་རྩ་བའི་སྔགས་ཤམ་དུ༔ སྦྲེལ་ཏེ་བརྒྱ་འམ་ཉེར་གཅིག་བཟླ༔ ཡུངས་ཐུན་ལ་བཏབ་བརྡེག་ཚུལ་བྱ༔ དར་དམར་ལ་ཡང་སྔགས་དེ་བྲིས༔ སེར་བ་འོང་བའི་ཕྱོགས་སུ་གཡུགས༔ སྡེ་བརྒྱད་འདུས་པའི་སེར་བ་ཡང་༔ བཟློག་པར་འགྱུར་བ་གདོན་མི་ཟ༔ ལས་འགྲུབ་བསང་བརྔན་སྡེ་བརྒྱད་མཆོད༔ སྲུང་སྐྱོབ་བྱེད་པར་བཀའ་ཡང་བསྒོ༔ གང་བསྲུང་འབྲུ་དྲུག་ལོ་ཏོག་ཀུན༔ ལྕགས་སྲེག་ངར་མའི་ས་གཞི་ལ༔ གནམ་ལྕགས་སྡིག་པ་ཤིག་ཤིག་ཟིང༔ མེ་འབར་ལོག་འདྲེན་ཀུན་བསྲེགས་བསམ༔ རྗེས་ལ་སྟོང་ཉིད་ངང་མདངས་བསྐྱངས༔ ས་མ་ཡཱ༔ དགྲ་གདོན་གང་ཡིན་ལིང་ག་འབྲི༔ ལས་སྦྱོར་སྔགས་ཀྱི་ཤམ་བུ་རུ༔ དགྲ་འམ་གདོན་བགེགས་ཆྒཻ་འདི༔ ཁུག་ཅིག་སོད་ཅིག་ཤ་རུས་གཏུབས༔ རྣམ་ཤེས་སྐྱེ་མེད་དབྱིངས་སུ་སྤོར༔ འཁོར་བར་ལྡོག་མེད་རྒྱ་ཡིས་ཐོབ༔ ཅེས་སོགས་དམོད་ཚིག་མཐའ་ལ་བསྐོར༔ སྙིང་ཁར་ནྲྀ་ཏྲི་ཛ་ཁྲམ་དང་༔ གནས་ཡིག་ལ་སོགས་གཞན་དང་བསྟུན༔ ཧོམ་དུ་གཞུག་ཅིང་བདེན་པ་བདར༔ ལྷ་དང་དབྱེ་ནས་གསལ་གསུམ་གྱིས༔ ཕུར་བུས་གདབ་ནས་རྣམ་ཤེས་སྤར༔ སྙིགས་མའི་ཕུང་པོ་མཚོན་གྱིས་བསྒྲལ༔ དཀྱིལ་འཁོར་ལྷ་ཚོགས་ཞལ་དུ་བསྟབས༔ ཡང་ན་སྤྲོས་མེད་དམིགས་པ་ནི༔ དགྲ་འདྲེ་གང་ཡིན་དངོས་སུ་བསམ༔ རང་ཉིད་ཁྲོ་བོའི་ང་རྒྱལ་གྱིས༔ ཕྱོགས་བཅུའི་སྡེ་བརྒྱད་བྲན་དུ་བཀོལ༔ དམིགས་པའི་དགྲ་བགེགས་དེ་ཉིད་ལ༔ ཉེས་ཅན་བཙོན་དུ་ཁྲིད་པ་རྣམས༔ རྒྱལ་པོའི་ཕོ་ཉས་བརྡུང་བརྡེག་ལྟར༔ ལ་ལས་འགུག་འཆིང་སྡོམ་མྱོས་དང་༔ བསྒྲལ་ནས་ཤ་ཁྲག་དོན་སྙིང་ལ༔ དཔའ་བས་རྔམ་ཟས་བྱེད་པར་བསམ༔ རྩ་བའི་སྔགས་དང་ལས་སྦྱོར་སྔགས༔ སྐབས་སུ་དགྲ་བགེགས་མིང་སྤེལ་བཅུག༔ སྔགས་དང་དམིགས་པ་ཟུང་འབྲེལ་ན༔ སྲེད་མེད་བུ་ཡི་སྟོབས་ལྡན་ཡང༔ སྒྲོལ་བར་མི་འགྱུར་གང་ཡང་མེད༔ འདི་ནི་ཤིན་ཏུ་གཉན་པའི་ཕྱིར༔ རབ་ཏུ་བསྒྲིམས་ཏེ་བག་ཡོད་བྱོས༔ ས་མ་ཡཱ༔ རྒྱ་རྒྱ་རྒྱ༔ ལྟས་ངན་བཟློག་པའི་སྔགས་དམིགས་ནི༔ གྲོ་ག་འམ་ནི་རས་དམར་ལ༔ ཁྱུང་སྐུའི་གནས་གསུམ་ཨོཾ་ཨཱཿཧཱུྃ༔ གཡས་ཀྱི་གཤོག་ཟུར་དང་པོ་ལ༔ མཁའ་ལྡིང་བྱ་ལས་བྱུང་བའི་ལྟས་ངན་ཐམས་ཅད་བྷྱོ་ཟློག༔ གཉིས་པར༔ མཁའ་ནས་གནམ་ལྕགས་འབེབ་པའི་ལྟས་ངན་ཐམས་ཅད་བྷྱོ་ཟློག༔ གསུམ་པར༔ ལྟ་བ་རྟག་ཆད་ཀྱི་མཐའ་ལ་ལྷུང་བའི་ལྟས་ངན་ཐམས་ཅད་བྷྱོ་ཟློག༔ བཞི་པར༔ མཁའ་ལ་རྒྱུ་བའི་གཟའ་དང་རྒྱུ་སྐར་གྱི་ལྟས་ངན་ཐམས་ཅད་བྷྱོ་ཟློག༔ ལྔ་པར༔ ཁྱབ་བྱེད་ཀྱི་འཁོར་ལོར་མཁའ་རྒྱུའི་གདོན་གྱིས་བརླམས་པའི་ལྟས་ངན་ཐམས་ཅད་བྷྱོ་ཟློག༔ གཡོན་གྱི་གཤོག་ཟུར་དང་པོ་ལ༔ ས་གཞི་ལ་རྒྱུ་བའི་སྡེར་ཆགས་གཅན་གཟན་ཡོངས་ཀྱི་ལྟས་ངན་ཐམས་ཅད་བྷྱོ་ཟློག༔ གཉིས་པར༔ ས་གཞིའི་སྟེང་དུ་བདག་པོས་བཟུང་བའི་རྨིག་ཅན་ཡོངས་ཀྱི་ལྟས་ངན་ཐམས་ཅད་བྷྱོ་ཟློག༔ གསུམ་པར༔ ས་བདག་རྒྱལ་པོས་སྡང་བའི་ཐན་དང་ལྟས་ངན་ཐམས་ཅད་བྷྱོ་ཟློག༔ བཞི་པར༔ མེ་ཆུ་རླུང་ལ་སོགས་པའི་འཇིགས་བརྒྱད་གཡོས་པའི་ལྟས་ངན་ཐམས་ཅད་བྷྱོ་ཟློག༔ ལྔ་པར༔ མི་དང་མི་མ་ཡིན་པས་རྟག་ཏུ་དམོད་ཅིང་འཚེ་བའི་ལྟས་ངན་ཐམས་ཅད་བྷྱོ་ཟློག༔ རྭ་གཉིས་ལ༔ རྭ་ཅན་སྤྱི་དང་བྱེ་བྲག་ལས་བྱུང་བའི་ལྟས་ངན་ཐམས་ཅད་བྷྱོ་ཟློག༔ མཆུ་ལ༔ བན་སྔགས་བོན་པོ་སྐྱེས་པ་བུད་མེད་ཡོངས་ཀྱི་དམོད་ངན་མི་ཁའི་ཐན་ལྟས་གང་བྱུང་ཐམས་ཅད་བྷྱོ་ཟློག༔ གདོང་པ་ལ༔ གདོང་ཅན་ཡོངས་ཀྱི་ཐན་དང་ལྟས་ངན་ཐམས་ཅད་བྷྱོ་ཟློག༔ སྡེར་མོ་གཉིས་ལ༔ མི་དང་དུད་འགྲོའི་ཡན་ལག་ལ་ཆད་ལྷག་བྱུང་བའི་ལྟས་ངན་ཐམས་ཅད་བྷྱོ་ཟློག༔ གཙུག་གི་ནོར་བུའི་ལྟོ་བར༔ གསེར་གཡུ་མུ་ཏིག་ལ་སོགས་ནོར་བུ་དབྱིག་ལས་བྱུང་བའི་ལྟས་ངན་ཐམས་ཅད་བྷྱོ་ཟློག༔ སྦྲུལ་གཟུགས་གཉིས་ལ༔ ལྟོ་འགྲོའི་འཚེ་བ་དང་མཛེ་རིགས་བཅོ་བརྒྱད་ལས་བྱུང་བའི་ལྟས་ངན་ཐམས་ཅད་བྷྱོ་ཟློག༔ གཟུགས་ཀྱི་མཐའ་ལ་བཟློག་པའི་ཚིག༔ གང་ཤེས་འབྲི་ཞིང་ཁྱུང་གི་སྔགས༔ བརྒྱ་རྩ་བརྒྱད་ཀྱིས་རབ་གནས་བྱ༔ ལྕུག་ཕྲན་རྩེར་བཏགས་དམིགས་པ་ནི༔ རང་ཉིད་རྡོ་རྗེ་གྲོ་བོ་ལོད༔ སྤྱི་བོར་ཡེ་ཤེས་ཁྱུང་ཆེན་བསྒོམ༔ དེ་ལས་འོད་ཟེར་རབ་འཕྲོས་པས༔ ཡེ་ཤེས་ཁྲོ་བོ་ཁྲོ་མོ་ཡི༔ ནུས་མཐུ་ཐམས་ཅད་རང་ལ་བསྡུས༔ བ་སྤུའི་བུ་ག་ཐམས་ཅད་ཀྱང་༔ སྤྲུལ་པའི་ཁྱུང་གིས་རབ་ཏུ་གཏམས༔ གཞན་གྱི་བྱད་ཕུར་རྦོད་གཏོང་དང་༔ སྔོན་ལས་འཕྲལ་རྐྱེན་ལས་བྱུང་བའི༔ ཐན་དང་ལྟས་ངན་ཐམས་ཅད་ཀུན༔ ཆོས་དབྱིངས་ཀློང་དུ་བཟློག་པར་བསམ༔ རྩ་སྔགས་ལས་སྦྱོར་དང་བཅས་བཟླ༔ ཤམ་དུ་ བཀའ་ཡི་ལྷ་སྲིན་སྡེ་བརྒྱད་དང་༔ གཞན་གྱི་བྱད་ཕུར་ལས་བྱུང་བའི༔ ཐན་དང་ལྟས་ངན་ཐམས་ཅད་ཀུན༔ དམིགས་པ་མེད་པའི་ཀློང་དུ་ཟློག༔ ཅེས་བརྗོད་ཁྱུང་སྐུ་ལག་ཏུ་ཐོགས༔ ལྟས་ངན་གང་བྱུང་ཕྱོགས་སུ་གཡབ༔ ཟབ་གནད་སྔགས་དམིགས་འདི་ལྡན་ན༔ མི་ཟློག་ལྟས་ངན་ཡོད་རེ་ཀན༔ རྗེས་ལ་ལྷར་སྣང་སྟོང་དབྱིངས་བསྡུ༔ ཨཱཿ ཕྱི་སྣོད་ནང་བཅུད་ཐམས་ཅད་ཀུན། །རིམ་བཞིན་གཙོ་བོའི་ཐུགས་སྲོག་བསྡུ། །སེམས་ཉིད་སྟོང་གསལ་ངང་དུ་བཞག །སླར་ཡང་མ་འགགས་འཇའ་ཚོན་བཞིན། །སྣང་སྟོང་སྒྱུ་མའི་ལྷ་སྐུར་ལྡང་། །གནས་གསུམ་ཡི་གེའི་མཚན་པས་བསྲུང་། །བཛྲ་རཀྵ་རཀྵ་ཧཱུྃ༔ རྟག་ཆད་མཐའ་བསལ་དགེ་རྩ་ནི༔ གཞན་ཕན་བློ་ཡིས་ཚིག་འདིས་བསྔོ༔ ཨེ་མ་ཧོ༔ སྔོན་འདས་དུས་ནས་བྱང་ཆུབ་བར༔ སྒོ་གསུམ་ལས་ལ་བརྟེན་པ་ཡི༔ ཟག་བཅས་ཟག་མེད་དགེ་རྩ་ཀུན༔ གཞན་དོན་རྫོགས་བྱང་ཐོབ་ཕྱིར་བསྔོ༔ མེ་ཏོག་འཐོར་ཞིང་ཤིས་བརྗོད་ནི༔ ཧཱུྃ༔ཧཱུྃ༔ཧཱུྃ༔ གཞི་དབྱིངས་རིག་སྟོང་ཁྲོ་བོའི་རྒྱལ༔ ལམ་སྣང་སྤྲུལ་པའི་འཁོར་ལོར་ཤར༔ འབྲས་བུ་གདོད་མའི་ཧེ་རུ་ཀས༔ ལོག་འདྲེན་ཚར་གཅོད་ཤིས་པ་སྩོལ༔ ས་མ་ཡཱ༔ དེ་ལྟར་བདེ་གཤེགས་ཀུན་འདུས་པ༔ པདྨ་དྲག་པོའི་སྒྲུབ་པ་འདིས༔ བྱང་ཆུབ་སྒྲུབ་པའི་སྐལ་ལྡན་གྱི༔ བར་ཆད་སེལ་བར་ཐེ་ཚོམ་མེད༔ བཅོས་མིན་ཚིག་གིས་བསླད་མིན་པའི༔ འགྱུར་མེད་ཟབ་གསང་ཌཀྐཱིའི་བརྡའ༔ ལས་འཕྲོ་ལྡན་པའི་སྤྱོད་ཡུལ་ཡིན༔ གུ་ཧྱ༔ ཞེས་རིག་འཛིན་ལུང་རིག་གླིང་པས་རིག་སྟོང་སྤྲོས་པ་ཀུན་བྲལ་འགྱུར་མེད་བདེ་ཆེན་འབར་བའི་སྒྲོམ་ནས་བཏོན་ཏེ་བརྡ་ཚིག་ཐོགས་མེད་དུ་བྲིས་པའི་དགེ་བས་འབྲེལ་ཚད་པདྨ་འོད་དུ་གྲོལ་ཞིང་། བདག་རྟོག་འཛིན་པའི་དགྲ་བགེགས་བདག་མེད་སྟོང་ཆེན་དབྱིངས་ཀྱི་བྷ་གར་འཚང་རྒྱ་བའི་རྒྱུར་གྱུར་ཅིག ཤུ་བྷཾ༔ སརྦ་མངྒ་ལམ༔