གུ་རུ་པདྨ་རྒྱལ་པོའི་དབང་གི་མཚམས་སྦྱོེར།
༄༅།། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པའི་སངས་རྒྱས་ཀྱི་གོ་འཕང་ལ་འགོད་པར་བྱའོ། །དེའི་ཆེད་དུ་གསང་སྔགས་རྡོ་རྗེ་ཐེག་པའི་དབང་བསྐུར་ཟབ་མོ་གསན་ནས་ཚུལ་བཞིན་ཉམས་སུ་ལེན་པར་བྱའོ་སྙམ་པའི་བསམ་པ་བཟང་པོ་སྔོན་དུ་བཏང་ནས་ལེགས་པར་ཆོས་ལ་འཇུག་པའི་ཀུན་སློང་དང་ཀུན་སྤྱོད་ཀྱི་རིམ་པ་རྣམས་ཚུལ་བཞིན་བགྱི་བའི་ངང་ནས་གསན་འཚལ། གང་གསན་པར་བྱ་བའི་ཆོས་ལའང་རིང་རྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་མ་སྟེ་སྤྱིར་གཏེར་རིགས་བཅོ་བརྒྱད་དུ་ཡོད་པའི་ཀུན་གྱི་མཆོག་ཏུ་གྱུར་པ་ཟབ་མོ་དགོངས་པའི་གཏེར་ཏེ། དེ་ཡང་དངོས་ཉམས་རྨི་ལམ་སྟེ་རབ་འབྲིང་ཐ་གསུམ་གྱི་ཚུལ་དུ་འབྱུང་བ་ལས། འདི་ནི་རྒྱལ་དབང་པདྨའི་ཐུགས་རྗེའི་བསྐུལ་ཏེ་འཕུར་འགྲོའི་གཙོ་མོ་ཛྙཱ་ན་ས་ག་ར་མིའི་སྐྱེ་སྲིད་བཟུང་ནས་བསྟན་འགྲོའི་བསོད་ནམས་ཀྱིས་དཔལ་དུ་བྱོན་པ་རིག་འཛིན་འགྲོ་འདུལ་ལུང་རིག་གླིང་པ་རྩལ་དུ་གྲགས་པ་དུས་ནམ་ཞིག་གི་ཚེ་ན་ཀུན་གཞི་ཆོས་སྐུར་སངས་ཏེ་གསལ་ལ་རྟོག་པ་མེད་པ་སྟོང་པའི་འོད་གསལ་གྱི་ངང་དུ་འབྱམས་ཀླས་པ་ལས། མཆེད་པ་ཕྱིར་གསལ་དུ་གཡོས་ཏེ་སྣང་བའི་འོད་གསལ་གྱི་རིག་གདངས་སུ་ཟངས་མདོག་དཔལ་གྱི་རི་བོ་སོགས་དག་པའི་ཞིང་ཁམས་དུ་མ་མཇལ་བའི་སྐབས་སུ་ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་ཡེ་ཤེས་ཀྱི་བརྡ་རིས་མངོན་དུ་སྤྲད་པ་ལས་བབས་པའི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་དམ་ཆོས་ཡང་ཟབ་པདྨའི་ཐུགས་ཐིག་གི་ཆ་ལག་ལས་གུ་རུ་པདྨ་རྒྱལ་པོའི་༼སྐབས་ཐོབ་སྦྱར། མཆན།༽རྗེས་གནང་ཟབ་མོ་བསྐུར་བ་ལ། སྔ་འགྱུར་དབང་གི་ཆུ་བོ་བཞི་ལྡན་གྱི་རྒྱུད་སྡེ་རྒྱ་མཚོའི་མན་ངག་ཕྱུང་ནས་ཟབ་གནད་གཅིག་ཏུ་དྲིལ་བའི་བཀའ་གཏེར་ཟུང་འཇུག་གི་གདམས་པ། མན་ངག་སྣ་རེས་གང་ཟག་རེ་རེ་ཆོ་ག་གཞན་ལ་མི་ལྟོས་པར་སངས་རྒྱས་པའི་ཟབ་ཆོས་ཁྱད་འཕགས་འཇིག་རྟེན་ན་འབྱུང་བར་དཀའ་བའི་ཡིད་བཞིན་གྱི་ནོར་བུ་རིན་ཆེན་ལྟ་བུ་འདི་ཉིད་ཀྱི་དབང་ཟབ་མོ་ཞུ་སོགས། ༈ དེ་ནས་བྱིན་དབབ་པའི་སླད་དུ་དམིགས་པ་འདི་བཞིན་དུ་མཛོད་ཅིག ཨོཾ་མ་ཧཱ་ཤུ་ནྱ་ཏ་སོགས་ཀོ྅་ཧཾ། སྟོང་པའི་ངང་ལས་པད་སྡོང་ཉི་ཟླ་བརྩེགས་པའི་སྟེང་དུ་ཁྱེད་རང་གི་རིག་པ་ཆུ་ལས་ཉ་ལྡང་བའི་ཚུལ་དུ་སྐད་ཅིག་གིས་རྩ་གསུམ་ཀུན་འདུས་པདྨ་ཐོད་ཕྲེང་རྩལ་སྐུ་མདོག་དཀར་ལ་དམར་བའི་མདངས་ཆགས་པ་མཚན་དང་དཔེ་བྱད་ཡོངས་སུ་རྫོགས་པ། ཞལ་གཅིག་ཞི་ཞིང་འཛུམ་པའི་ལང་ཚོའི་དཔལ་ཡོན་རྒྱས་པ། ཕྱག་གཉིས་གཡས་གསེར་གྱི་རྡོ་རྗེ་རྩེ་ལྔ་ཐུགས་ཀར་འཛིན་ཅིང་། གཡོན་པ་སྤྲུལ་འཁོར་གྱི་ཐད་ཀར་མཉམ་བཞག་གི་སྟེང་དུ་ཀ་པཱ་ལ་དུམ་བུ་གཅིག་པ་འཆི་མེད་ཡེ་ཤེས་ཀྱི་བདུད་རྩིས་བཀང་བ་བསྣམས་པ། ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པ། དབུ་ལ་པད་ཞྭ་རྒོད་སྒྲོ་དང་དར་སྣས་སྤྲས་ཤིང་། སྐུ་ལ་གསང་གོས་དང་ཆོས་གོས་ཟ་བེར་གསོལ་བ་གཟི་བརྗིད་དང་ལྡན་པ་དེའི་ཕྱོགས་མཚམས་བརྒྱད་འཇའ་འོད་ཀྱི་གུར་ཁྱིམ་དུ་སྤྲུལ་པའི་གུ་རུ་མཚན་བརྒྱད་རང་རྟགས་ཕྱག་མཚན་སོགས་ཀྱིས་སྤྲས་པ་འཁོར་དུ་རྩ་གསུམ་རྒྱལ་བ་རབ་འབྱམས་ཀྱིས་བསྐོར་བར་གསལ་བ་རྣམས་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་ཟངས་མདོག་དཔལ་གྱི་རི་བོ་པདྨ་འོད་ཀྱི་གཞལ་ཡས་ཨོ་རྒྱན་གྱི་གུ་རུ་པདྨ་འབྱུང་གནས་ལ་འཁོར་རྒྱལ་བ་རབ་འབྱམས་ཀྱིས་བསྐོར་བ་ཏིལ་གྱི་གོང་བུ་ཁ་ཕྱེ་བ་ལྟར་དཔག་ཏུ་མེད་པ་སྤྱན་དྲངས་ནས་ཁྱེད་རང་ལྷར་གསལ་བ་ལ་སིབ་སིབ་ཐིམ་པའི་མོས་པ་རྩེ་གཅིག་ཏུ་གྱིས་ཤིག།