གུ་རུའི་ཚེ་སྒྲུབ་དྭངས་བཅུད་ཡོངས་དྲིལ།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ གུ་རུའི་ཚེ་སྒྲུབ་དྭངས་བཅུད་ཡོངས་དྲིལ་བཞུགས༔
གུ་རུ་པདྨ་སརྦ་སིདྡྷི་ཧཱུྃ༔ མཁའ་ཁྱབ་རྒྱལ་བ་ཀུན་གྱི་ངོ་བོ་ཉིད༔ མཐའ་ཡས་འགྲོ་བ་ཡོངས་ལ་བཀའ་དྲིན་ཅན༔ རིག་འཛིན་ཡོངས་འདུས་པདྨ་ཐོད་ཕྲེང་རྩལ༔ བྱང་ཆུབ་བར་དུ་གུས་པས་སྤྱི་བོས་མཆོད༔ དེ་ཡི་ཟབ་ཆོས་དག་སྣང་དགོངས་གཏེར་ལས༔ མཁའ་འགྲོའི་གཙོ་མོའི་བཀའ་ཡིས་རྗེས་གནང་ལྟར༔ བརྒྱུད་འཛིན་གང་ཟག་ཚེ་ཡི་དངོས་གྲུབ་ལ༔ ལོངས་སུ་སྤྱོད་ཕྱིར་ཟོལ་མེད་ཐུགས་བཅུད་སྤེལ༔ དེ་ལ་སྦྱོར་དངོས་རྗེས་དང་གསུམ་ཡིན་ཏེ༔ དང་པོ་དབེན་ཅིང་ཡིད་དུ་འོང་བའི་སར༔ དཀྱིལ་འཁོར་བཀོད་ལེགས་གྲུ་བཞི་ཚོམ་བུའི་ཁར༔ གུ་རུའི་སྐུ་གསུང་ཐུགས་རྟེན་དེ་ཡི་མདུན༔ སྒྲུབ་རྫས་བླ་མའི་གཏོར་མ་པད་འདབ་བཞི༔ ལྷ་གྲངས་བཤོས་བུས་ལེགས་པར་མཐའ་བསྐོར་ནས༔ གཡས་གཡོན་སྨན་དང་བདུད་རྩི་རཀྟ་བཤམས༔ མཆོད་ཡོན་སྔོན་འགྲོའི་ཉེར་སྤྱོད་རྣམ་པ་བདུན༔ ཚེ་ཡི་རིལ་བུ་ཚེ་ཆང་མདའ་དར་ལྔ༔ དུས་ཚེས་བཟང་པོར་དབུ་འཛུགས་འཆུག་མེད་བྱ༔ ས་མ་ཡཱ༔ གཉིས་པ་དངོས་གཞི་ལག་ཏུ་བླང་བ་ལ༔ རྣལ་འབྱོར་བདེ་བའི་སྟན་ལ་བག་ཕབ་སྟེ༔ མ་དག་འཁྲུལ་བའི་རླུང་རོ་དགུ་སྤྲུགས་བྱ༔ དེ་ནས་རང་གི་རྩ་བའི་བླ་མ་དང་༔ ཡི་དམ་མཁའ་འགྲོ་ཆོས་སྐྱོང་མཐའ་བསྐོར་དུ༔ སྐྱབས་འོས་མ་ལུས་ཁྲོམ་ཚོགས་ཇི་བཞིན་གསལ༔ ཨེ་མ་ཧོ༔ བདག་དང་མཁའ་ཁྱབ་འགྲོ་བ་སེམས་ཅན་ཀུན༔ འཇིགས་རུང་སྐྱེ་རྒ་ན་འཆིའི་ཆུ་བོ་ལས༔ བསྒྲལ་ནས་ཚེ་ཡི་རིག་འཛིན་མཆོག་ཐོབ་ཕྱིར༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ དེ་བཞིན་འགྲོ་ཀུན་ཚེ་དཔག་མེད་མགོན་གྱི༔ གོ་འཕང་མཆོག་ལ་འགོད་འདོད་རྩེ་གཅིག་པས༔ ཨེ་མ་ངོ་མཚར་རྨད་བྱུང་འཁོར་འདས་ཆོས༔ སྐྱེ་འགག་བྲལ་བའི་རང་བཞིན་མ་རྟོགས་པས༔ སྡུག་བསྔལ་རྦ་ལ་གཡེང་བའི་སེམས་ཅན་རྣམས༔ འཆི་མེད་རིགས་བདག་གོ་འཕང་མྱུར་ཐོབ་བྱ༔ ཡན་ལག་བདུན་གྱིས་ཚོགས་གཉིས་བསགས་པ་ནི༔ ཧོ༔ བདག་གཞན་སྒྲིབ་པ་མ་ལུས་སྦྱང་བའི་ཕྱིར༔ ཚོགས་ཞིང་ལྷ་ལ་ཕྱག་འཚལ་མཆོད་པ་འབུལ༔ མི་དགེའི་སྡིག་བཤགས་དུས་གསུམ་དགེ་ལ་སྤྲོ༔ ཟབ་རྒྱས་ཆོས་བསྐུལ་རྟག་ཏུ་བརྟན་བཞུགས་གསོལ༔ དགེ་འདིས་འགྲོ་ཀུན་ཕྱམ་གཅིག་གྲོལ་ཕྱིར་བསྔོ༔ འབྲུ་གསུམ་སྔགས་ཀྱིས་བགེགས་གཏོར་བྱིན་བརླབས་ཏེ༔ ཚིམ་པར་བསྔོས་ནས་བཀའ་བསྒོའི་ཚིག་འདི་བརྗོད༔ ཧཱུྃ་ཧྲཱིཿ མ་རིག་རྒྱུ་ལས་བྱུང་བའི་གདོན་དང་བགེགས༔ རང་བྱུང་སྐྱེ་མེད་ཐོག་མའི་གྲོལ་གཞིར་དེངས༔ བཀའ་ལས་འདས་ན་ལྷ་སྔགས་ཏིང་འཛིན་མཐུས༔ མིང་གི་ལྷག་མར་བྱེད་པར་གདོན་མི་ཟ༔ ཧཱུྃ་བཞིའི་སྔགས་བརྗོད་ཡུངས་ཐུན་དང་བཅས་བསྐྲད༔ ཏིང་འཛིན་བསྲུང་བའི་འཁོར་ལོས་རྒྱས་འདེབས་ནི༔ ཧཱུྃ་ཧྲཱིཿ ཡང་ཟབ་གསང་ཆེན་བསྒྲུབ་པའི་དཀྱིལ་འཁོར་འདིར༔ ཀུན་བརྟགས་གློ་བུར་འབྱུང་པོ་མཚམས་གཅོད་ཕྱིར༔ སྟེང་འོག་ཕྱོགས་མཚམས་ཁྲོ་མཚོན་རྡོ་རྗེའི་གུར༔ ནམ་ཡང་གཞོམ་མེད་སྲུང་བས་རྒྱས་གདབ་བོ༔ བཛྲ་རཀྵ་རཀྵ་ཧཱུྃ༔ བྱིན་འབེབས་སྤོས་བསྲེགས་རོལ་མོ་དབྱངས་དང་བཅས༔ ཨེ་མ་ཧོ༔ རྣམ་དག་འགྱུར་མེད་སྐུ་གསུམ་ཕོ་བྲང་ནས༔ ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས༔ སྤྲུལ་སྐུ་པད་འབྱུང་འཆི་མེད་ཚེ་ཡི་ལྷ༔ བཱི་མ་མི་ཏྲ་བཀའ་བབ་མི་དགུ་དང་༔ ཁྲོ་རྒྱལ་རྟ་མཆོག་ཚེ་ཡི་སྒོ་མའི་ཚོགས༔ རྣལ་འབྱོར་བདག་གི་ལུས་ངག་ཡིད་གསུམ་ལ༔ ཟག་མེད་སྐུ་གསུང་ཐུགས་ཀྱི་བྱིན་ཆེན་ཕོབ༔ མི་ཤིགས་རྡོ་རྗེ་གསུམ་གྱི་ཚེ་སྩོལ་ལ༔ སྒྲུབ་རྫས་དཀྱིལ་འཁོར་མདངས་ཕྱུངས་བདུད་རྩིར་བསྒྱུར༔ མ་ཧཱ་གུ་རུ་དྷེ་ཝ་ཌཱཀྐི་ནི་བིདྱཱ་དྷ་ར་ཨ་ཡུརྫྙཱ་ན་ཨ་བེ་ཤ་ཡ་ཕེཾ་ཕེཾ༔ ཟག་མེད་བདུད་རྩིའི་མཆོད་རྫས་བྱིན་བརླབ་ནི༔ རཾ་ཡཾ་ཁཾ༔ མཆོད་རྫས་དངོས་འཛིན་ཡེ་ཤེས་མེ་རླུང་ཆུས༔ བསྲེགས་གཏོར་བཀྲུས་ཏེ་ཟག་མེད་བདུད་རྩི་ཆེས༔ སྣང་སྲིད་རྒྱལ་བའི་དཀྱིལ་འཁོར་མ་ལུས་པ༔ སྐུ་གསུང་ཐུགས་གསུམ་མཉེས་པའི་རྫས་སུ་གྱུར༔ ཕྱི་ནང་གསང་བའི་མཆོད་རྫས་སྔགས་རྣམས་ཀུན༔ ཨོཾ་ཨཱཿཧཱུྃ༔གིས་སྤེལ་ཏེ་ལན་གསུམ་བརྗོད༔ ཏིང་འཛིན་གསུམ་གྱིས་སྣང་སྲིད་སྣོད་བཅུད་ཀུན༔ མ་དག་དངོས་འཛིན་སྦྱང་བའི་བསྐྱེད་རིམ་ནི༔ ཨོཾ་ཨཱཿཧཱུྃ༔ འཁོར་འདས་ཆོས་ཀུན་སྟོང་ཉིད་བློ་ལས་འདས༔ བརྗོད་མེད་དོན་གྱི་ཆོས་སྐུ་མ་རྟོགས་པར༔ བདག་ཏུ་བཟུང་བས་སྲིད་པར་འཁྱམས་པའི་འགྲོ༔ ཚད་མེད་སྙིང་རྗེས་རྗེས་སུ་བཟུང་བའི་ཕྱིར༔ ཐབས་ཤེས་ཟུང་འཇུག་རང་རིག་ཡི་གེ་ཧྲཱིཿ དཀར་དམར་མདངས་ལྡན་འོད་ཀྱིས་སྣང་སྲིད་ཀུན༔ དག་པ་རབ་འབྱམས་རྒྱལ་བའི་ཞིང་དུ་གྱུར༔ གནས་ཁང་ཐ་མལ་མ་ཡིན་པདྨ་འོད༔ ཟངས་མདོག་དཔལ་རིའི་ཕོ་བྲང་ལྟ་ན་སྡུག༔ ཤར་ཤེལ་ལྷོ་ཕྱོགས་རིན་ཆེན་བཻཌཱུརྱ༔ ནུབ་ཕྱོགས་པད་རག་བྱང་ཕྱོགས་དབང་སྔོན་མདངས༔ ཚད་མེད་བཞི་ལྡན་གྲུ་བཞི་སྒོ་བཞི་པ༔ འདོད་སྣམ་ཕ་གུ་དྲྭ་ཕྱེད་ཤར་བུ་དང་༔ ཆོས་འཁོར་གདུགས་ཏོག་རྒྱལ་མཚན་དྲིལ་གཡེར་ཕྲེང་༔ ལྷ་དང་དྲང་སྲོང་མཆོད་པའི་ལྷ་མོས་གང་༔ ཕོ་བྲང་ལྟེ་བར་པདྨ་འདབ་བཞི་དང་༔ དེ་ཕྱིར་བརྒྱད་དང་སྒོ་བཞིར་པད་ཟླའི་གདན༔ དབུས་སུ་ཐབས་ཤེས་ཉི་ཟླ་དར་ཟབ་ཁྲིར༔ རང་རིག་ཧྲཱིཿཡིག་གདན་ལ་འཁོད་པ་ལས༔ འོད་ཟེར་ཡར་འཕྲོས་རྒྱལ་བ་སྲས་བཅས་མཆོད༔ སྐུ་གསུང་ཐུགས་ཀྱི་ཚེ་བཅུད་རང་ལ་བསྡུས༔ མར་འཕྲོས་འགྲོ་བ་དྲུག་གི་ལས་ཉོན་སྦྱངས༔ ཁྱད་པར་ཚེ་ལ་བར་དུ་གཅོད་པའི་བགེགས༔ ཐམས་ཅད་ཀུན་གྱི་སྡང་སེམས་ཕྲག་དོག་ཞི༔ མ་ལུས་ཚེ་མཐའ་ཡས་པའི་གོ་འཕང་ལ༔ མྱུར་དུ་འགོད་པའི་སྣོད་དང་ལྡན་པར་བྱས༔ དེ་ཉིད་ཡོངས་གྱུར་ཨོ་རྒྱན་ཚེ་དཔག་མེད༔ སྟོང་ཉིད་སྙིང་རྗེ་ཟུང་འཇུག་དཀར་དམར་མདངས༔ ཐེག་པ་གསུམ་མཚོན་གསང་གོས་དཀར་པོ་དང་༔ སྔགས་ཀྱི་བེར་སྔོན་ཆོས་གོས་པ་ཏྲ་རིས༔ དབང་མདོག་ཕྱི་ནས་ཟ་བེར་སྨུག་པོས་བཀླུབས༔ དབུ་ལ་པད་ཞྭ་དམར་པོ་འདབ་མ་ལྔ༔ ཐབས་ཤེས་ཉི་ཟླ་དབྱིངས་རིག་རྨ་བྱའི་སྒྲོ༔ མི་ཤིགས་རྡོ་རྗེ་སྣ་ཚོགས་དར་དཔྱངས་ཅན༔ ཕྱག་གཡས་གཞན་སྣང་ཟིལ་གནོན་བདེ་བ་ཆེའི༔ གསེར་གྱི་རྡོ་རྗེ་རྩེ་ལྔ་ཐུགས་ཀར་འཛིན༔ གཡོན་པས་མཉམ་བཞག་ཟག་མེད་སྟོང་ཉིད་ངང་༔ ཤེས་རབ་ཐོད་བུམ་ཡེ་ཤེས་བདུད་རྩིས་བཀང་༔ ཞབས་གཉིས་སྲིད་ཞིར་མི་གནས་སྐྱིལ་ཀྲུང་བཞུགས༔ འཁོར་འདས་ཆོས་ཀུན་ཕྱག་རྒྱ་ཆེན་པོ་རུ༔ རྒྱས་འདེབས་ཤེས་རབ་ཡུམ་མཆོག་མནྡྷ་ར༔ སྦས་པའི་ཚུལ་གྱིས་དུག་གསུམ་རྩད་གཅོད་བརྡར༔ ཁ་ཊཱཾ་རྩེ་གསུམ་མཆན་དུ་འཁྱུད་ཚུལ་མཛད༔ དེ་ཡི་རང་གདངས་ཐུགས་རྗེའི་རང་རྩལ་ལས༔ མདུན་དུ་བཱི་མ་མི་ཏྲ་སྐུ་མདོག་དཀར༔ པཎ་ཞུ་དམར་པོ་ཆོས་གོས་རྣམ་གསུམ་བཀླུབས༔ ཞབས་གཉིས་སྐྱིལ་ཀྲུང་མཉམ་བཞག་ཚེ་བུམ་བསྣམས༔ གཡས་སུ་བོ་དྷི་ས་ཏྭ་དཀར་དམར་མདངས༔ རབ་བྱུང་ཆ་ལུགས་ཕྱག་གཡས་ཆོས་འཆད་རྒྱས༔ པདྨ་དཀར་པོ་ཚེ་བུམ་མཚན་པ་བསྣམས༔ ཕྱག་གཡོན་མཉམ་བཞག་ཐེག་གསུམ་གླེགས་བམ་འཛིན༔ ཞབས་གཉིས་ཕྱེད་དཀྱིལ་དབུ་ལ་པཎ་ཞྭ་དམར༔ གཡོན་དུ་སྒྲུབ་སྡེ་བརྒྱད་ཀྱི་བཀའ་བབ་པ༔ གངས་ཅན་གསལ་བྱེད་ཆོས་རྒྱལ་ཁྲི་སྲོང་རྗེ༔ རྒྱལ་པོའི་ཆ་ལུགས་དཀར་དམར་ལང་ཚོས་སྒེག༔ དར་དཀར་ལ་ཐོད་ནོར་བུའི་པྲོག་ཞུ་དང་༔ བེར་ཕྱམ་སྨུག་པོ་མཉམ་བཞག་ཆོས་འཁོར་བསྣམས༔ རྒྱལ་པོ་རོལ་སྟབས་འགྲོ་ཁམས་ཟིལ་གྱིས་གནོན༔ རྒྱབ་ཏུ་ཚེ་བདུད་བར་ཆད་སེལ་བའི་ལྷ༔ རྟ་མགྲིན་དམར་པོ་ཕག་མོ་ཡུམ་དང་འཁྱུད༔ གྲི་ཐོད་ཕྱག་རྒྱ་ཁྲོ་བོའི་ཆ་ལུགས་རྫོགས༔ རྟ་སྐད་ཕག་ཞལ་ངུར་སྒྲས་སྲིད་གསུམ་གཡོ༔ ཀུན་ཀྱང་ཐུགས་ནི་སྤྲོས་བྲལ་ཆོས་སྐུའི་ངང་༔ གཉུག་མ་མི་ཤིགས་ཚེ་ཡི་དྭངས་བཅུད་འདྲེན༔ གསུང་ནི་ལས་རླུང་གནས་དག་རྡོ་རྗེའི་སྒྲ༔ གྲགས་སྟོང་བརྗོད་མེད་ཚེ་ཡི་སྙིང་པོ་བགྲང་༔ སྐུ་ནི་གསལ་འཚེར་ལྷུན་སྡུག་ཞི་ཁྲོའི་ཉམས༔ མི་འགྱུར་རྡོ་རྗེའི་ཆོས་བདུན་ཡང་དག་ལྡན༔ དེ་དག་རྩོལ་མེད་སྤྲུལ་པའི་རང་རྩལ་ལས༔ ཕྱི་རོལ་འདབ་བརྒྱད་པད་ཉི་ཟླ་གདན་ལ༔ མདུན་ནས་གཡས་བསྐོར་ཐུགས་སྲོག་ཧྲཱིཿཡིག་ལས༔ ཤར་དུ་ཡང་དག་ཐུགས་ཀྱི་རིག་པ་འཛིན༔ ནམ་མཁའི་སྙིང་པོ་དཀར་དམར་རབ་བྱུང་ཆས༔ པཎ་ཞྭ་ཆོས་གོས་ཕྱག་གཡས་མདའ་དར་དང་༔ སྣང་སྲིད་གསལ་བྱེད་ཉི་ཟེར་ཞགས་པ་བསྣམས༔ ཞབས་གཉིས་ཕྱེད་སྐྱིལ་ཟག་མེད་ཏིང་འཛིན་ངང་༔ ཤར་ལྷོར་མ་མོ་རྦོད་གཏོང་བཀའ་བབ་པ༔ དཔལ་གྱི་ཡེ་ཤེས་སྔགས་བཙུན་གཞོན་ནུའི་ཆས༔ དར་བེར་སྨུག་པོ་དབུ་སྐྲ་ཕྱམ་བརྡལ་ཅན༔ གཡས་པས་མདའ་དར་ཚེ་ཡི་དྭངས་བཅུད་སྡུད༔ ཞབས་གཉིས་སག་ལྷྭམ་སྣང་སྲིད་མ་མོ་གནོན༔ ལྷོ་རུ་འཇམ་དཔལ་སྐུ་ཡི་བཀའ་བབ་པ༔ སངས་རྒྱས་ཡེ་ཤེས་སྔགས་པ་ཁྲོས་པའི་ཉམས༔ གཡས་པས་མདའ་དར་རང་རྟགས་ཕུར་པ་བསྣམས༔ འཆི་བདག་ཟིལ་གནོན་དམར་སྨུག་བེར་ཕྱམ་དང་༔ སག་ལྷྭམ་གསོལ་ཞིང་སྡེ་བརྒྱད་བྲན་དུ་བཀོལ༔ ལྷོ་ནུབ་ཆེ་མཆོག་ཡོན་ཏན་བཀའ་བབ་པ༔ གཉགས་ཆེན་ཡེ་ཤེས་གཞོན་ནུ་དཀར་དམར་མདངས༔ གཡས་པས་ཚེ་ཡི་མདའ་དར་ཕྱོགས་བཅུར་གཡུགས༔ རབ་བྱུང་ཆ་ལུགས་པཎ་ཞུ་དབང་གི་མདོག༔ ཞབས་གཉིས་ཕྱེད་སྐྱིལ་སྣང་སྲིད་བདུད་རྩིར་ཤར༔ ནུབ་ཏུ་པདྨ་གསུང་གི་བཀའ་བབ་པ༔ རྒྱལ་བ་མཆོག་དབྱངས་དཀར་དམར་རབ་བྱུང་ཆས༔ དབུ་གཙུག་རྟ་མགོ་རྟ་སྐད་སྟོང་གསུམ་སྒྲོག༔ གཡས་པས་མདའ་དར་རང་རྟགས་པདྨ་དམར༔ ཕྱེད་སྐྱིལ་དབང་གི་ཕྲིན་ལས་ཐོགས་པ་མེད༔ ནུབ་བྱང་འཇིག་རྟེན་མཆོད་བསྟོད་བཀའ་བབ་པ༔ དཔལ་གྱི་སེང་གེ་སྔགས་པ་དཀར་ཆས་ཅན༔ ལྕང་ལོ་ཕྱམ་བརྡལ་ཕྱག་གཡས་མདའ་དར་དང་༔ ལྷ་སྲིན་ཟིལ་གནོན་ཞབས་གཉིས་འདོར་སྟབས་བསྒྲད༔ བྱང་དུ་ཕུར་པ་ཕྲིན་ལས་བཀའ་བབ་པ༔ ཡེ་ཤེས་མཚོ་རྒྱལ་བོད་ཀྱི་བུ་མོའི་ཚུལ༔ དཀར་དམར་མཛེས་འཛུམ་མུ་ཏིག་སྟོད་གཡོགས་དང་༔ གཙུག་གཡུ་འོད་འབར་རིན་ཆེན་རྒྱན་མང་སྤྲས༔ ཕྱག་གཡས་ཕུར་བུ་མདའ་དར་ཚེ་གཡང་སྡུད༔ ཞབས་གཉིས་བཞེངས་སྟབས་དགའ་བཞིའི་དབྱིངས་ནས་སྒེག༔ བྱང་ཤར་དམོད་པ་དྲག་སྔགས་བཀའ་བབ་པ༔ རྣམ་སྣང་ལོ་ཙཱ་དམར་སྨུག་རབ་བྱུང་ཆས༔ དཔྲལ་བར་ཨ་ཡིས་མཚན་པའི་ཡེ་ཤེས་མིག༔ མཉམ་བཞག་སྐྱིལ་ཀྲུང་འཁོར་འདས་གཞི་ལ་རྫོགས༔ ཀུན་ཀྱང་ཕྱག་གཡོན་ཚེ་ཡི་བུམ་པ་དང་༔ ཚེ་སྲོག་ཆད་ཉམས་གསོ་བའི་དགོངས་པ་ཅན༔ སྒོ་བཞིར་ཛཿཧཱུྃ་བཾ་ཧོ་ཡོངས་གྱུར་ལས༔ དཀར་སེར་དམར་ལྗང་ཚེ་ཡི་མགྱོགས་མ་བཞི༔ གཡས་རྣམས་ཕྱོགས་མདོག་མདའ་དར་གཡོན་ཚེ་བུམ༔ རིན་ཆེན་སྣ་བཞིའི་རང་བཞིན་བདུད་རྩིས་བཀང་༔ ཀུན་ཀྱང་དྲི་ཟ་གཤིན་རྗེ་ཀླུ་དབང་དང་༔ གནོད་སྦྱིན་རྣམས་ཀྱི་ལག་ནས་ཚེ་གཡང་འགུགས༔ གཙོ་བོའི་སྤྱི་བོར་རིགས་བདག་འོད་དཔག་མེད༔ བྱུ་རུའི་མདོག་ཅན་མཉམ་བཞག་ལྷུང་བཟེད་འཛིན༔ མཚན་དཔེ་ཡོངས་རྫོགས་ཆོས་གོས་རྣམ་གསུམ་གསོལ༔ རྡོ་རྗེ་སྐྱིལ་ཀྲུང་གཡོ་མེད་ངང་དུ་བཞུགས༔ གཙོ་འཁོར་ཀུན་གྱི་གནས་གསུམ་འབྲུ་གསུམ་ལས༔ འོད་འཕྲོས་འོག་མིན་སྐུ་གསུམ་ཞིང་ཁམས་ནས༔ རབ་འབྱམས་རྒྱལ་བའི་ངོ་བོ་ཨོ་རྒྱན་རྗེ༔ བཀའ་བབ་མི་དགུ་རིག་འཛིན་ཚེ་ཡི་ལྷ༔ རྩ་གསུམ་བསྲུང་མ་སྐྱབས་གྱུར་མ་ལུས་པ༔ མཁའ་ལ་ཆར་སྤྲིན་འཁྲིགས་ལྟར་བྱོན་པར་གྱུར༔ ཡེ་ཤེས་སྤྱན་འདྲེན་རྩེ་གཅིག་མོས་པའི་བློས༔ སྤོས་བསྲེག་རོལ་མོ་འཁྲོལ་ཞིང་དབྱངས་དང་བཅས༔ ཧཱུྃ་ཧྲཱིཿ ལྷོ་ནུབ་རྔ་ཡབ་སྤྲུལ་པའི་ཕོ་བྲང་ནས༔ མཁའ་ཁྱབ་རྒྱལ་བའི་སྤྱི་གཟུགས་པདྨ་འབྱུང་༔ སྐྱེ་འཆིའི་འཇིགས་མེད་རིག་འཛིན་ཚེ་ཡི་ལྷ༔ རྩེ་གཅིག་མོས་པས་གནས་འདིར་སྤྱན་འདྲེན་ན༔ ཐུགས་རྗེའི་དབང་གིས་དགྱེས་བཞིན་གཤེགས་སུ་གསོལ༔ ཡི་དམ་སྒྲུབ་སྡེ་བརྒྱད་ཀྱི་བཀའ་བབ་པ༔ ཡེ་ཤེས་ཀློང་དགུའི་སྒྱུ་འཕྲུལ་རིག་པ་འཛིན༔ མི་ཤིགས་གཞོམ་བྲལ་ཚེ་ལ་མངའ་བརྙེས་པ༔ གནས་འདིར་འཆི་མེད་ཚེ་ཡི་དངོས་གྲུབ་མཆོག༔ སྐལ་ལྡན་བདག་ལ་སྩོལ་ཕྱིར་སྤྱན་འདྲེན་ན༔ བྱིན་རླབས་ནུས་མཐུའི་ཤུགས་ཀྱིས་གཤེགས་སུ་གསོལ༔ འཕོ་ཆེན་འཆི་མེད་རྡོ་རྗེའི་སྐུ་བརྙེས་པ༔ ཚེ་ཡི་རིག་འཛིན་པཎ་ཆེན་བཱི་མ་ལ༔ མཁན་ཆེན་ཆོས་རྒྱལ་འཁོར་འདས་དབང་བསྒྱུར་བ༔ དབང་ཆེན་ཡབ་ཡུམ་ཚེ་ཡི་སྒོ་མར་བཅས༔ དེང་འདིར་རྣལ་འབྱོར་གདུང་བས་སྤྱན་འདྲེན་ན༔ ཚེ་ཡི་བར་ཆད་སེལ་ཕྱིར་གཤེགས་སུ་གསོལ༔ བདེ་སྟོང་ཉམས་རྟོགས་སྤེལ་ཕྱིར་གཤེགས་སུ་གསོལ༔ ཚེ་བདུད་དབྱིངས་སུ་བསྒྲལ་ཕྱིར་གཤེགས་སུ་གསོལ༔ གཞན་ཕན་ཕྲིན་ལས་སྒྲུབ་ཕྱིར་གཤེགས་སུ་གསོལ༔ ཨོཾ་ཨཱཿཧཱུྃ་བཛྲ་མ་ཧཱ་གུ་རུ་པདྨ་ཐོད་ཕྲེང་རྩལ་བིདྱཱ་དྷ་ར་དྷེ་ཝ་ཌཱཀྐཱི་ནི་དྷརྨ་པ་ལ་ཨ་ཡུརྫྙཱ་ན་བཛྲ་ས་མ་ཡཱ་ཛ་ཛ༔ དེ་ནས་དམ་ཚིག་ཡེ་ཤེས་ལྷ་ཡི་ཚོགས༔ དབྱེར་མེད་གཅིག་ཏུ་བརྟན་པར་བཞུགས་གསོལ་ནི༔ ཧཱུྃ་ཧྲཱིཿ རང་བྱུང་རིག་པའི་དབྱིངས་ནས་སྤྱན་དྲངས་པའི༔ འཕོ་མེད་དོན་དམ་རིག་འཛིན་ཚེ་ཡི་ལྷ༔ ཀུན་རྫོབ་བློ་ཡིས་བསྐྱེད་པའི་སྒོ་གསུམ་ལྷར༔ ཆུ་ལ་ཆུ་བཞག་ཇི་བཞིན་བརྟན་བཞུགས་གསོལ༔ བཛྲ་ས་མ་ཡཱ་ཏིཥྛ་ལྷན༔ འཕྲུལ་དགའི་ཚུལ་གྱིས་བརྡ་ཕྱག་འཚལ་བ་ནི༔ ཧོ༔ རང་ལས་སྤྲུལ་པའི་ཕྱག་རྒྱ་གར་མཁན་མས༔ སྐུ་གསུམ་འདུ་འབྲལ་མེད་པའི་བརྡ་ཕྱག་གིས༔ བདག་མདུན་དཀྱིལ་འཁོར་ལྷ་ཚོགས་གསང་གསུམ་གྱི༔ ཡོན་ཏན་རྗེས་སུ་དྲན་པས་གུས་ཕྱག་འཚལ༔ ཨ་ཏི་པཱུ་ཧོ༔ པྲ་ཏིཥྩ་ཧོ༔ མཆོད་པ་ལ་ཡང་ཕྱི་ནང་གསང་གསུམ་སྟེ༔ དང་པོ་ཕྱི་ཡི་ཉེར་སྤྱོད་འབུལ་བ་ནི༔ ཧཱུྃ་ཧྲཱིཿ མཆོད་ཡོན་ཁྲུས་ཀྱི་ལྷ་མོ་སྐུ་མདོག་མཐིང་༔ ཁྲུས་བུམ་ཡན་ལག་བརྒྱད་ལྡན་རྙོག་མེད་ཆུས༔ དཀྱིལ་འཁོར་ལྷ་ཚོགས་སྐུ་ལ་ཁྲུས་ཆབ་གསོལ༔ བདག་གཞན་ཉོན་མོངས་སྒྲིབ་པ་གནས་དག་ཤོག༔ མཛེས་སྡུག་གཟུགས་ཀྱི་ལྷ་མོ་དཀར་གསལ་འཛུམ༔ འདབ་ལྡན་ཁ་དོག་སྣ་ཚོགས་སྤྱན་ལ་འབུལ༔ ལྷ་མིག་རྣམ་དག་གཟུགས་འཛིན་སྐྱོན་བྲལ་ཡང་༔ འགྲོ་ཀུན་འཁྲུལ་བའི་མིག་ཤེས་གནས་དག་ཤོག༔ སྙན་འཇེབས་སྒྲ་ཡི་ལྷ་མོ་སྐུ་མདོག་སྔོ༔ ཕྱག་གཉིས་རྒྱུད་མང་བསྟོད་དབྱངས་མི་ཟད་སྒྲོག༔ རྟོག་བྲལ་སྙན་ལ་ཉེར་ལེན་མི་མངའ་ཡང་༔ འགྲོ་རྣམས་གྲགས་སྟོང་ཆོས་ཀྱི་དོན་རྟོགས་ཤོག༔ ཡིད་འོང་དྲི་ཡི་ལྷ་མོ་སྐུ་མདོག་སེར༔ ཕྱག་གཉིས་སྤོས་ཕོར་ཟག་མེད་དྲི་བསུང་འཐུལ༔ བཟང་ངན་དྲིར་འཛིན་ཤེས་པ་རང་གྲོལ་ཀྱང་༔ འགྲོ་རྣམས་ཚུལ་ཁྲིམས་དྲི་ཡིས་ཚིམ་པར་ཤོག༔ ཞིམ་མངར་རོ་ཡི་ལྷ་མོ་ལེ་བརྒན་མདོག༔ རོ་བརྒྱ་ལྡན་པའི་ཞལ་ཟས་ལྗགས་ལ་འབུལ༔ འཇིག་རྟེན་ཟས་ལ་ཞེན་པ་མི་མངའ་ཡང་༔ འགྲོ་རྣམས་སྲེད་ལེན་ཞེན་པ་རང་གྲོལ་ཤོག༔ སྲབ་འཇམ་རེག་བྱའི་ལྷ་མོ་ལྗང་གསལ་མདངས༔ པཉྩ་ལི་ཀའི་ན་བཟའ་སྐུ་ལ་སྒྲོན༔ ལྷ་རྣམས་སྐུ་ལ་ཚ་གྲང་མི་མངའ་ཡང་༔ འགྲོ་རྣམས་སྐྱེ་མེད་བཟོད་པའི་གོས་ཐོབ་ཤོག༔ སྟོང་གསལ་དབྱིངས་ཀྱི་ལྷ་མོ་སྣ་ལྔའི་མདངས༔ བདེ་སྟོང་ཕྱག་རྒྱའི་གར་བསྒྱུར་ཐུགས་ལ་ཐིམ༔ རྣམ་ཀུན་མཆོག་ལྡན་དེར་འཛིན་མི་མངའ་ཡང་༔ འགྲོ་རྣམས་དབྱིངས་རིག་འབྲལ་མེད་དོན་རྟོགས་ཤོག༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནཱི་ས་པཱ་རི་ཝ་ར་བཛྲ་ཨརྒྷཾ་སོགས་ནས་ཤཔྟ་པཱུ་ཙ་མེ་གྷ་ས་མུ་ཏྲ་སྥ་ར་ཎ་ས་མ་ཡཱ་ཨཱཿཧཱུྃ༔ གཉིས་པ་ནང་གི་མཆོད་པ་འབུལ་བ་ལ༔ རྣམ་པ་གསུམ་ལས་དང་པོ་སྨན་མཆོད་ནི༔ ཨོཾ་ཨཱཿཧཱུྃ༔ རང་བྱུང་མཚན་ལྡན་དུམ་གཅིག་ཀ་པཱ་ལར༔ ཕྱི་ནང་གསང་བའི་རྩ་བརྒྱད་སྟོང་སྦྱར་སྨན༔ དུག་ལྔའི་ནད་འཇོམས་རིགས་ལྔ་བསྒྲུབ་པའི་རྫས༔ སྐུ་ལྔ་ཡེ་ཤེས་ལྔ་ཡི་དམ་རྫས་སུ༔ རང་བཞིན་ཤེས་ཤིང་རྟོགས་པས་བྱིན་བརླབས་ནས༔ འཆི་མེད་ཚེ་ཡི་དཀྱིལ་འཁོར་ལྷ་ལ་འབུལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སྤྲོ་ན་བརྒྱུད་པའི་མཚན་དོན་སྦྱར་ལ་འབུལ༔ གཉིས་པ་ཆགས་བྲལ་རཀྟ་འབུལ་བ་ནི༔ ཧཱུྃ་ཧྲཱིཿ འཁོར་བའི་རྩ་བ་ཆགས་པ་ཆེན་པོ་ལས༔ རྣམ་གྲོལ་སོ་སོར་རྟོག་པའི་ཡེ་ཤེས་ལ༔ མངའ་དབང་བསྒྱུར་ཕྱིར་རྒྱུ་རྐྱེན་སྣ་ཚོགས་ཁྲག༔ རང་བྱུང་འཆི་མེད་ཚེ་ཡི་ལྷ་ལ་འབུལ༔ ཨོཾ་ཨཱཿཧཱུྃ་མ་ཧཱ་རཀྟ་ལ་ཁ་རཾ་ཁཱ་ཧི༔ གསུམ་པ་དམ་རྫས་གཏོར་མའི་མཆོད་པ་ནི༔ ཧོ༔ སྣ་ཚོགས་རིན་ཆེན་འདུས་པའི་གཏོར་གཞོང་དུ༔ འབྲུ་སྨན་རྩི་བཅུད་སྦྱར་བའི་གཏོར་ཆེན་པོ༔ མཆོག་ཐུན་དངོས་གྲུབ་མ་ལུས་བསྒྲུབ་པའི་རྫས༔ འགྱུར་མེད་གཉུག་མ་ཚེ་ཡི་ལྷ་ལ་འབུལ༔ ཨོཾ་ཨཱཿཧཱུྃ་མ་ཧཱ་བྷ་ལིང་ཏ་ཁ་རཾ་ཁཱ་ཧི༔ གསང་བ་སྦྱོར་སྒྲོལ་མཆོད་པ་འབུལ་བ་ནི༔ ཨེ་མ་ཧོ༔ ཕྱི་རོལ་ཡུལ་དྲུག་སྟོང་པའི་ཤེས་རབ་མར༔ ནང་གི་དབང་ཤེས་ཐབས་ཀྱི་སེམས་དཔའ་ཆེས༔ ཟག་མེད་བདེ་བ་སྦྱོར་བའི་མཆོད་པ་དང་༔ གཉིས་འཛིན་ལོག་རྟོག་བསྒྲལ་མཆོད་ཆེན་པོ་འབུལ༔ མ་ཧཱ་ཏ་ན་ག་ན་པཱུ་ཛ་ཧོ༔ དེ་ནས་གཙོ་འཁོར་རྣམ་པར་ཤར་བ་ཡི༔ ལྷ་ཚོགས་གསང་གསུམ་ཡོན་ཏན་བསྟོད་པ་ནི༔ ཨེ་མ་ཧོ༔ ངོ་བོ་འགྱུར་མེད་ཆོས་སྐུ་སྣང་མཐའ་ཡས༔ རང་བཞིན་འགགས་མེད་ལོངས་སྐུ་འཆི་མེད་མགོན༔ ཐུགས་རྗེ་རྩོལ་མེད་སྤྲུལ་སྐུ་པདྨ་འབྱུང་༔ སྐུ་གསུམ་དབྱེར་མེད་ཚེ་ཡི་ལྷ་ལ་བསྟོད༔ ཟག་མེད་རྡོ་རྗེའི་སྐུ་བརྙེས་བཱི་མ་ལ༔ ཚེ་ཡི་རིག་འཛིན་མཆོག་གྲུབ་ཞི་བ་འཚོ༔ སྣང་སྲིད་ཟིལ་གནོན་ཆོས་རྒྱལ་ཁྲི་སྲོང་རྗེ༔ རིག་འཛིན་ཡོངས་འདུས་དབྱིངས་ཀྱི་ལྷ་ལ་བསྟོད༔ འཁོར་འདས་དབང་བསྒྱུར་རྟ་མཆོག་ཧེ་རུ་ཀ༔ ཤེས་རབ་སྟོང་དབྱིངས་རྡོ་རྗེ་རྣལ་འབྱོར་ཡུམ༔ ཟུང་འཇུག་སྤྲུལ་པ་ཡི་དམ་དཀྱིལ་འཁོར་ལྷ༔ མཆོག་ཐུན་ཚེ་ཡི་དངོས་གྲུབ་སྩོལ་ལ་བསྟོད༔ གསང་ཆེན་སྲོག་ཤིང་སྒྲུབ་སྡེ་བརྒྱད་ཀྱི་ལྷ༔ སོ་སོའི་བཀའ་བབ་བསྒྲུབ་པས་དངོས་སུ་གྲུབ༔ རྫུ་འཕྲུལ་སྣ་ཚོགས་ཚེ་ཡི་དངོས་གྲུབ་བརྙེས༔ དྲན་པས་འདོད་དགུའི་དཔལ་ཀུན་སྩོལ་ལ་བསྟོད༔ ཤར་ལྷོ་ནུབ་བྱང་གླིང་བཞིའི་ཚེ་གཡང་འགུགས༔ དྲི་ཟ་གཤིན་རྗེ་ཀླུ་དང་གནོད་སྦྱིན་འདུལ༔ ལས་བཞིའི་ཕྲིན་ལས་སྒྲུབ་པའི་མཐུ་མངའ་བ༔ བཀའ་ཉན་སྤྲུལ་པའི་སྒོ་མ་བཞི་ལ་བསྟོད༔ གཞན་ཡང་སྐྱབས་འོས་ལྷ་དང་དྲང་སྲོང་དང་༔ གནས་ཡུལ་ཞིང་སྐྱོང་མཁའ་འགྲོ་ཆོས་སྐྱོང་སོགས༔ དུས་གསུམ་ཀུན་ཏུ་ཕན་བདེ་སྤེལ་བའི་གྲོགས༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ འཛབ་དགོངས་ལའང་རྣམ་པ་གསུམ་ཡིན་ཏེ༔ བསྙེན་དང་སྒྲུབ་པ་ལས་ལ་སྦྱོར་བའོ༔ རང་གི་ཐུགས་ཀར་པད་དཀར་འདབ་བརྒྱད་དབུས༔ ཐབས་ཤེས་དབྱེར་མེད་ཉི་ཟླའི་གདན་གྱི་སྟེང་༔ ཡེ་ཤེས་སེམས་དཔའ་མགོན་པོ་ཚེ་དཔག་མེད༔ སྐུ་མདོག་དམར་པོ་བྱུ་རུའི་ལྷུན་པོ་ལ༔ ཉི་འོད་འཁྱུད་བཞིན་བཀྲག་མདངས་གཟི་འོད་འབར༔ ལོངས་སྤྱོད་རྫོགས་སྐུ་ཚེ་ཡི་བུམ་པ་འཛིན༔ རྡོ་རྗེ་སྐྱིལ་ཀྲུང་གཡོ་མེད་བརྟན་པར་བཞུགས༔ ཐུགས་ཀར་ཉི་ཟླའི་གའུའི་དབུས་སུ་ཧྲཱིཿ དེ་མཐར་རྩ་བའི་སྔགས་ཀྱིས་བསྐོར་བར་དམིགས༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་ཐོད་ཕྲེང་རྩལ་ཨ་ཡུརྫྙཱ་ན་པུརྞྱེ་ཚེ་བྷྲུཾ་རྣྲི་ཛ་སརྦ་སིདྡྷི་ཕ་ལ་ཧཱུྃ༔ གཙོ་དང་ཡེ་ཤེས་སེམས་ལ་དམིགས་པ་གཏད༔ གྲངས་ཀྱི་བསྙེན་པ་འབུམ་ཕྲག་ལྔ་ཡིན་ལ༔ དུས་བསྙེན་ཟླ་བ་དྲུག་དང་མཚན་མའི་བསྙེན༔ ཞལ་མཐོང་གསུང་ཐོས་ཐ་ན་རྨི་ལམ་དུ༔ ཉི་ཟླ་ཤར་དང་རང་ཉིད་དགྲ་ལས་རྒྱལ༔ གཞན་གྱིས་བཀུར་སོགས་ཚེ་འཕེལ་རྟགས་འབྱུང་ངོ་༔ སྒྲུབ་པའི་དམིགས་པ་ཏིང་འཛིན་འདི་ལྟར་རོ༔ རང་གི་ཐུགས་ཀའི་ཡེ་ཤེས་སེམས་དཔའ་དང་༔ འཁོར་རྣམས་ཀུན་གྱི་ཐུགས་ཀར་ཉི་ཟླའི་སྟེང་༔ འཁོར་འདས་ཚེ་ཡི་དྭངས་བཅུད་ཡི་གེ་ཧྲཱིཿ དམར་གསལ་བྱུ་རུ་ཕྱིས་འདྲའི་བཀྲག་མདངས་འབར༔ དེ་མཐར་སྔགས་ཕྲེང་འོད་ལྔའི་ཁ་དོག་ཅན༔ གཡས་སུ་འཁོར་ལས་འོད་ཟེར་ཕྱོགས་བཅུར་འཕྲོས༔ ཕྱི་སྣོད་ས་ཆུ་མེ་རླུང་འབྱུང་བ་བཞིའི༔ དྭངས་བཅུད་འོད་ཟེར་གསེར་དངུལ་པད་རག་དང་༔ མརྒད་ལྗང་གུ་ལྟ་བུའི་ཚུལ་དུ་བསྡུས༔ ནང་བཅུད་བསྐལ་པར་གནས་པའི་དྲང་སྲོང་དང་༔ ཚངས་པ་བརྒྱ་བྱིན་ཁྱབ་འཇུག་འཁོར་ལོས་སྒྱུར༔ སྔོན་བསགས་བསོད་ནམས་འབྱོར་བའི་ཚོགས་ཀུན་གྱི༔ བླ་ཚེ་དྭངས་བཅུད་ཨ་རྣྲི་ཧཱུྃ་གསུམ་གྱི༔ རྣམ་པར་ཚུར་བསྡུས་ཐུགས་སྲོག་སྔགས་ཕྲེང་ལ༔ ཐིམ་པས་རང་གི་ལུས་ཀྱི་ཕྱི་ནང་ཀུན༔ ཨོ་རྒྱན་ཚེ་དཔག་མེད་པའི་སྐུ་ཕྲ་མོས༔ ཐེམ་མེར་གང་ཞིང་སྔགས་སྒྲ་དིར་དིར་སྒྲོག༔ འཆི་མེད་རྡོ་རྗེ་ལྟ་བུའི་སྲོག་འགྲུབ་བསམ༔ ཨོཾ་ཨཱཿཧཱུྃ་བཛྲ་མ་ཧཱ་གུ་རུ་པདྨ་ཐོད་ཕྲེང་རྩལ་བིདྱཱ་དྷ་ར་ས་མུ་ཏྲ་ཨ་ཡུརྫྙཱ་ན་པུཎྱེ་མ་མ་སརྦ་སིདྡྷི་ཕ་ལ་ཧཱུྃ༔ ཏིང་འཛིན་མེ་ལ་བཟླས་བརྗོད་རླུང་ཡིན་ཏེ༔ ཡེང་མེད་ངང་ནས་འབུམ་ཕྲག་གཅིག་བཟླས་ན༔ དུས་མིན་འཆི་བའི་ཚེ་གེགས་ལས་ཐར་ཞིང་༔ རིག་འཛིན་རྒྱ་མཚོས་ཚེ་ཡི་དངོས་གྲུབ་སྟེར༔ ཚེ་བདུད་བགེགས་རིགས་དཔག་ཚད་རྒྱང་གྲགས་བྲོས༔ ཕན་པའི་ཡོན་ཏན་བརྗོད་ཀྱི་མི་ལང་ངོ་༔ ས་མ་ཡཱ༔ གསུམ་པ་བསྒྲུབ་པའི་རིམ་པ་འདི་བཞིན་ཏེ༔ གཙོ་འཁོར་ཀུན་གྱི་ཐུགས་ཀའི་སྔགས་ཕྲེང་ལས༔ འོད་ཟེར་སྣ་ལྔ་མཆོད་པའི་ཚུལ་དུ་འཕྲོས༔ ཕྱོགས་བཅུའི་ཞིང་གི་སངས་རྒྱས་བྱང་སེམས་དང་༔ ཁྱད་པར་སློབ་དཔོན་པད་འབྱུང་ཡབ་ཡུམ་དང་༔ རྒྱ་བོད་ཚེ་ཡི་རིག་པ་འཛིན་རྣམས་ལ༔ མཉེས་པའི་མཆོད་པ་དཔག་ཏུ་མེད་པ་ཕུལ༔ སྐུ་གསུང་ཐུགས་ཡོན་ཕྲིན་ལས་རྣམ་པ་ལྔའི༔ འགྱུར་མེད་ཚེ་ཡི་དངོས་གྲུབ་སྐྱེས་སུ་སྩོལ༔ རང་ལ་ཐིམ་པས་འགྱུར་བ་མེད་པའི་སྲོག༔ འཆི་མེད་ཚེ་དང་རྒུད་མེད་ལང་ཚོ་ལ༔ མངའ་དབང་འབྱོར་པས་བསྟན་འགྲོའི་དཔལ་དུ་གྱུར༔ ཅེས་བསམ་སྤྲོ་ན་ཚེ་ཡི་མདོ་བརྗོད་ཅིང་༔ མི་ནུས་ཚེ་གཟུངས་གྲངས་བཟུང་བརྒྱ་སྟོང་བཟླ༔ སྐབས་སུ་མཆོད་བསྟོད་ཚིག་འདིས་དངོས་གྲུབ་བསྐུལ༔ ཨེ་མ་ཧོ༔ ནུབ་ཕྱོགས་བདེ་ཆེན་དག་པའི་ཕོ་བྲང་ནས༔ རྒྱལ་ཀུན་སྤྱི་མྱེས་མགོན་པོ་ཚེ་དཔག་མེད༔ གང་འདིར་སྤྲུལ་པའི་ཁྲོ་རྒྱལ་རྟ་མཆོག་དཔལ༔ འཆི་མེད་རིག་འཛིན་སྤྲུལ་སྐུ་པདྨ་འབྱུང་༔ འཕོ་ཆེན་སར་བཞུགས་པཎ་ཆེན་བཱི་མ་ལ༔ ཚེ་ཡི་གྲུབ་བརྙེས་བཀའ་བབ་མི་དགུ་སོགས༔ མ་གཡེལ་སྔོན་གྱི་ཐུགས་དམ་དུས་ལ་བབ༔ མི་སྡུག་དུས་ཀྱི་ཁྲོ་གཉེར་འཇིགས་པ་ལས༔ མངོན་པར་སྐྲག་སྟེ་སྒོ་གསུམ་ཚེ་ཡི་ལྷར༔ ངེས་པར་སྒྲུབ་པའི་རྣལ་འབྱོར་བདག་ཅག་ལ༔ འགྱུར་མེད་སྐུ་ཡི་ཚེ་མཆོག་བསྩལ་དུ་གསོལ༔ འགག་མེད་གསུང་གི་རྡོ་རྗེའི་སྒྲ་དབྱངས་སྩོལ༔ འཕོ་མེད་ཐུགས་ཀྱི་གཉུག་མའི་ཚེ་བཅུད་སྩོལ༔ རང་དོན་ཆོས་སྐུ་ཚེ་ཡི་མཆོག་ཐོབ་ནས༔ གཞན་དོན་གཟུགས་སྐུའི་བསྐལ་པ་མ་སྟོངས་བར༔ མི་ཤིགས་རྟག་པའི་ཚེ་ལ་མངའ་བརྙེས་ནས༔ དཔག་བསམ་ཤིང་དང་ཡིད་བཞིན་ནོར་བུ་ལྟར༔ སྐྱེ་དགུ་ཀུན་གྱི་ཕན་བདེའི་འབྱུང་གནས་མཆོག༔ རྩོལ་མེད་ལྷུན་གྱིས་འགྲུབ་པའི་དངོས་གྲུབ་སྩོལ༔ རྩ་སྔགས་ཤམ་དུ་འདི་ཉིད་གདགས་པར་བྱ༔ ཀཱ་ཡ་ཝཀྐ་ཙིཏྟ་གུ་ཎ་ཀརྨ་སིདྡྷི་ཕ་ལ་ཧཱུྃ༔ ས་མ་ཡཱ༔ རྒྱ་རྒྱ་རྒྱ༔ རྗེས་ལ་དགའ་སྟོན་ཚོགས་ཀྱི་འཁོར་ལོ་ནི༔ སྲིད་པའི་འདོད་ཡོན་དཀར་གསུམ་མངར་གསུམ་དང་༔ ཤ་ཆང་ལ་སོགས་བཟའ་བཏུང་ཅི་འབྱོར་བཤམས༔ ཡེ་ནས་ཚོགས་ཀྱི་འཁོར་ལོའི་རང་བཞིན་ལ༔ ཡིན་པར་ཤེས་ཏེ་ཚིག་འདིས་གསལ་ཡང་གདབ༔ ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་པས་བདུད་རྩིའི་ཟེགས་མ་རབ་འཐོར་ཏེ༔ ཕྱི་ལྟར་སྣང་སྲིད་ཚོགས་ཀྱི་རང་བཞིན་ལ༔ ནང་ལྟར་ཕུང་ཁམས་སྐྱེ་མཆེད་ཚོགས་ཀྱི་རྫས༔ རིག་འཛིན་ཚེ་ཡི་ལྷ་ཚོགས་དགྱེས་པའི་ཕྱིར༔ ཀུན་བཟང་མཆོད་སྤྲིན་ཟག་མེད་བདུད་རྩིར་གྱུར༔ ཨོཾ་ཨཱཿཧཱུྃ༔ ཚོགས་ཞིང་ལྷ་ཚོགས་སྤྱན་འདྲེན་བྱ་བ་ནི༔ སྤོས་བསྲེག་རོལ་མོ་འཁྲོལ་ཏེ་གདུང་དབྱངས་ཀྱིས༔ ཨེ་མ་ཧོ༔ རྨད་བྱུང་སྐུ་གསུམ་དག་པའི་ཕོ་བྲང་ནས༔ ཆོས་ལོངས་སྤྲུལ་གསུམ་རིག་འཛིན་ཚེ་ཡི་ལྷ༔ རྩ་གསུམ་སྲུང་མ་དམ་ཅན་རྒྱ་མཚོའི་ཚོགས༔ དགའ་སྟོན་མཆོད་པ་བཞེས་ཕྱིར་གཤེགས་སུ་གསོལ༔ གུ་རུ་དྷེ་ཝ་ཌཱཀྐི་ནི་ཨ་ཡུརྫྙཱ་ན་བཛྲ་ས་མ་ཡཱ་ཛ་ཛ༔ དེ་ནས་ཚོགས་ཕུད་རིམ་པ་གསུམ་དུ་སྤྲོས༔ དང་པོ་དཀྱིལ་འཁོར་ལྷ་ལ་འདི་བཞིན་འབུལ༔ ཧྲཱིཿ རྩ་གསུམ་ཡོངས་འདུས་འཆི་མེད་ཚེ་ཡི་ལྷ༔ ཨོ་རྒྱན་ཚེ་དཔག་མེད་མགོན་སྤྲུལ་འཁོར་ལ༔ སྣང་སྲིད་འདོད་ཡོན་ཚོགས་ཀྱི་མཆོད་པ་འབུལ༔ བཞེས་ནས་ཚེ་ལ་དབང་བའི་དངོས་གྲུབ་སྩོལ༔ མ་ཧཱ་ག་ན་ཙཀྲ་པཱུ་ཛ་ཧོ༔ གཉིས་པ་ཉེས་ལྟུང་བཤགས་ཕྱིར་འདི་བཞིན་འབུལ༔ ཧོཿ སྐུ་གསུང་ཐུགས་གསུམ་རྩ་བ་ཡན་ལག་གི༔ དམ་ཚིག་ཉམས་ཆག་ཚེ་ལ་བར་ཆད་རྒྱུ༔ བླ་མ་ཡི་དམ་མཁའ་འགྲོ་ཆོས་སྐྱོང་ལ༔ གནོང་འགྱོད་དྲག་པོས་མཐོལ་བཤགས་ཚོགས་མཆོད་འབུལ༔ སརྦ་ས་མ་ཡཱ་པ་པཾ་ཤུདྡྷེ་ཨ༔ དམིགས་རྟེན་རྫས་ལ་ཚེ་བདུད་འགུག་བསྟིམ་བྱ༔ སྤྲུལ་བའི་ཕོ་ཉས་བསྒྲལ་ཏེ་འདི་བཞིན་འབུལ༔ ཧཱུྃ་ཧྲཱིཿ ཚེ་ཡི་བར་ཆད་སྒྲོལ་མཛད་ལས་ཀྱི་ལྷ༔ དབང་ཆེན་ཁྲོས་པ་པདྨ་ཀཱི་ལ་ཡས༔ ཚེ་བདུད་བསྒྲལ་ཏེ་རྣམ་ཤེས་དག་ཞིང་སྤོར༔ གཟུགས་ཕུང་བདུད་རྩི་དཀྱིལ་འཁོར་ལྷ་ལ་བསྟབ༔ ཧ་ལ་པཉྩ་ཁ་རཾ་ཁཱ་ཧི༔ དེ་ནས་རྣལ་འབྱོར་ཚོགས་ཀྱི་རྫས་ལ་རོལ༔ དབང་བཞིའི་དམ་ཚིག་ཐ་མལ་འདུ་ཤེས་སྤངས༔ མར་གནས་ཚོགས་ཀྱི་ལྷག་མ་བསྔོ་བ་ནི༔ བདུད་རྩིས་ཁ་ཕྲུ་བཏབ་སྟེ་འདི་བཞིན་བསྔོ༔ ཨོཾ་ཨཱཿཧཱུྃ་ཧ་ཧོ་ཧྲཱིཿཕེཾ་ཕེཾ༔ ཧྲཱིཿ ཚེ་ཡི་དཀྱིལ་འཁོར་བཀའ་སྡོད་མུ་རན་སྐྱོང་༔ དབང་ཕྱུག་གིང་ལིང་ཤ་ཟ་རྣལ་འབྱོར་མ༔ གནས་ཡུལ་དུར་ཁྲོད་སྐྱོང་རྣམས་ལྷག་གཏོར་བཞེས༔ ཚེ་གེགས་དབྱིངས་སུ་ཞི་བའི་ཕྲིན་ལས་མཛོད༔ ཨུཥྩི་ཊ་བྷ་ལིང་ཏ་ཁཱ་ཧི༔ ལྷ་ཚོགས་ཐུགས་དམ་དབྱིངས་ནས་བཞེངས་བསྐུལ་ནི༔ ཧཱུྃ་ཧྲཱིཿ ཀ་དག་ཡེ་ནས་འཕོ་འགྱུར་མེད་པའི་གདངས༔ ལྷུན་གྲུབ་རང་རྩལ་ཡེ་ཤེས་འཇིག་རྟེན་ལྷ༔ རྣལ་འབྱོར་ཚེ་ཡི་བར་ཆད་སེལ་བའི་ཕྱིར༔ ཐུགས་དམ་དབྱིངས་ནས་བསྐུལ་ལོ་ཕྲིན་ལས་མཛོད༔ ཁྱད་པར་རྒྱལ་ཀུན་ངོ་བོ་མཚོ་སྐྱེས་རྗེ༔ གཉིས་མེད་ཡུམ་མཆོག་ལྷ་ལྕམ་མནྡྷ་ར༔ བཀའ་བབ་མི་དགུ་ལྷ་དང་དྲང་སྲོང་ཚོགས༔ དེང་འདིར་ཚེ་ཡི་རིག་འཛིན་སྒྲུབ་པ་པོའི༔ ཚེ་བདུད་བར་ཆད་དབྱིངས་སུ་སྒྲོལ་བའི་ཕྱིར༔ སྐྱེ་མེད་ཀློང་ནས་འགག་མེད་རང་གདངས་ཀྱི༔ རྩོལ་མེད་ཞི་དང་ཁྲོ་བོའི་གར་བསྒྱུར་ཏེ༔ བར་ཆད་བདུད་བཞིའི་གཡུལ་ངོ་དབྱིངས་སུ་ཟློག༔ གླགས་ལྟ་འབྱུང་པོའི་ཚོགས་རྣམས་རྡུལ་དུ་རློགས༔ ཉམས་ལེན་མཚན་འཛིན་བག་ཆགས་དྲུང་ནས་ཕྱུངས༔ ལྟ་སྒོམ་ཡེང་འཁྲུལ་འཕྲལ་རྐྱེན་མ་ལུས་སོལ༔ ཚེ་འཕྲང་བར་ཆད་བསུན་མའི་བསླུ་བྲིད་ཟློག༔ རང་རིག་འཆི་མེད་ཚེ་ལྷའི་རང་ཞལ་སྟོན༔ རང་དབང་སྟོབས་བཅུའི་ཡོན་ཏན་རྫོགས་པར་མཛོད༔ དེ་ནས་ཐ་ཚིག་གཏོར་མར་སྨན་རཀ་བྲན༔ སྔོན་གྱི་དམ་ཚིག་བསྒྲགས་པ་འདི་བཞིན་ནོ༔ ཧཱུྃ་ཧྲཱིཿ ནུབ་ཕྱོགས་བདེ་ཆེན་པདྨོ་བཀོད་ཞིང་དུ༔ རིགས་བདག་ཚེ་དཔག་མེད་མགོན་ཡབ་ཡུམ་གྱིས༔ འཆི་མེད་གཉུག་མའི་དཀྱིལ་འཁོར་ཞལ་ཕྱེས་ཚེ༔ རང་རྩལ་ཀུན་རྟོག་ཚེ་བདུད་དབྱིངས་སུ་གྲོལ༔ རང་བབས་གཤིས་ཀྱི་ཚེ་ལ་དབང་བསྒྱུར་ལྟར༔ རང་སྣང་ཐ་ཚིག་གཏོར་མ་འདི་བཞེས་ལ༔ རང་གྲོལ་བྱང་ཆུབ་སེམས་ཀྱི་རང་ཞལ་སྟོན༔ དེ་ཉིད་གདུལ་བྱའི་དོན་དུ་ཨོ་རྒྱན་ཡུལ༔ རང་བྱུང་པདྨའི་སྡོང་པོར་སྐུ་འཁྲུངས་ནས༔ སྤྲུལ་པའི་གནས་མཆོག་མ་རཱ་ཏི་ཀ་རུ༔ ཐབས་ཤེས་སྤྱོད་པའི་ཉེ་རྒྱུ་ལ་བརྟེན་ནས༔ མཁའ་བཞིན་རྟག་བརྟན་ཚེ་ཡི་རིག་འཛིན་ལ༔ མངའ་དབང་འབྱོར་ཚེ་དམ་ཅན་རྒྱ་མཚོ་ཡིས༔ སྒྲུབ་པོའི་རྣལ་འབྱོར་ཚེ་འཕྲང་བསལ་བ་དང་༔ ཐ་ཚིག་གཏོར་མ་ལེན་པར་ཞལ་བཞེས་ལྟར༔ གང་བཅོལ་ཕྲིན་ལས་འགྲུབ་པའི་སྡོང་གྲོགས་མཛོད༔ ཅེས་བརྗོད་ཐ་ཚིག་གཏོར་མ་གཙང་སར་འབུལ༔ དེ་ནས་གཏོར་མའི་བཤལ་ཆུ་བསྟན་སྐྱོང་ལ༔ འབྲུ་གསུམ་བདུད་རྩིས་བྱིན་བརླབས་ཚིག་འདིས་བསྔོ༔ ཧཱུྃ་ཧྲཱིཿ འཁོར་འདས་མཚན་འཛིན་རྟེན་འབྲེལ་བཅུ་གཉིས་དང་༔ ལམ་དུས་རླུང་གི་འཕོ་བ་གནས་དག་པའི༔ རྩལ་སྣང་ཕྱིར་ཤར་བརྟན་མ་བཅུ་གཉིས་པོ༔ རིག་འཛིན་སློབ་དཔོན་པདྨའི་བཀའ་བཞིན་དུ༔ དམ་རྫས་བཤལ་ཆུའི་གཏོར་མ་འདི་བཞེས་ལ༔ རྟག་ཆད་སྟོན་པའི་ཆོས་ལོག་སུན་འབྱིན་ཅིང་༔ དགེ་འདུན་སྡེ་གཉིས་བསྟན་པ་དར་བར་མཛོད༔ མ་མ་ཧྲིང་ཧྲིང་བྷ་ལིང་ཏ་ཁཱ་ཧི༔ གཏོར་གཞོང་འོག་ཏུ་དམ་སྲི་འགུགས་མནན་བྱ༔ ཧཱུྃ་ཧྲཱིཿ རྒྱུ་དྲུག་རྐྱེན་བཞིས་བདེ་གཤེགས་སྙིང་པོ་ལས༔ གློ་བུར་སྒྲིབ་བྱེད་མ་རིག་རྣམ་གསུམ་དང་༔ ཉེ་བར་འབྲེལ་བའི་ལས་ཉོན་སྡུག་བསྔལ་གྱིས༔ རྣམ་པར་གདུང་བྱེད་ཆོས་སྲིད་དམ་སྲིའི་རིགས༔ སྣང་སྲིད་རི་རབ་གླིང་བཞིའི་འོག་ཏུ་གནོན༔ ཡང་དག་རིགས་སད་སེམས་མཆོག་མ་སྐྱེས་བར༔ ནམ་ཡང་ལྡང་བའི་གོ་སྐབས་མེད་པར་གྱུར༔ ཨོཾ་ལཾ་ཨཱཿལཾ་ཧཱུྃ་ལཾ་སྟྭཾ་བྷ་ཡ་ནན༔ སླར་ཡང་གཏོར་གཞོང་སྨན་འབྲུས་དགང་བྱ་ཞིང་༔ ཀུན་བརྟགས་བསྐྱེད་པའི་ལྷ་རྣམས་དོན་དམ་གྱི༔ རྫོགས་རིམ་དམིགས་མེད་ཀློང་དུ་བསྡུ་བ་ནི༔ ཧཱུྃ་ཧྲཱིཿ མ་དག་འཁོར་བར་སྣང་བའི་བདེན་ཞེན་ལས༔ ལྡོག་ཕྱིར་ཀུན་ཏུ་བསྐྱེད་པའི་གཟུགས་བརྙན་ལྷ༔ རྣམ་པར་མི་རྟོག་སེམས་ཉིད་འོད་གསལ་གྱི༔ སྟོང་ཆེན་གཉུག་མ་སྤྲོས་བྲལ་ཀློང་དུ་བསྡུ༔ བརྗོད་བྲལ་ཀློང་དུ་དར་ཅིག་མཉམ་པར་བཞག༔ རྣམ་དཀར་དགེ་ཚོགས་འགྲོ་ལ་བསྔོ་བ་ནི༔ ཧོ༔ དགེ་བ་འདི་ཡིས་བདག་གཞན་སེམས་ཅན་ཀུན༔ སྐྱེ་རྒ་ན་འཆི་བདུད་བཞིའི་གཡུལ་ངོ་ལས༔ རྣམ་པར་རྒྱལ་བའི་ཚེ་མཐའ་ཡས་པ་ལྟར༔ དོན་གཉིས་ལྷུན་གྱིས་འགྲུབ་པའིརྒྱུར་གྱུར་ཅིག༔ དེ་མ་ཐོབ་པའི་ཚེ་རབས་ཀུན་ཏུ་ཡང་༔ ཡང་དག་དགེ་བའི་བཤེས་དང་ལེགས་འཕྲད་ནས༔ རྒྱལ་སྲས་སྤྱོད་པ་ཆུ་བོའི་རྒྱུན་བཞིན་དུ༔ འགྲོ་ལ་ཕན་བདེ་འབྱུང་བའི་རྒྱུ་རུ་བསྔོ༔ དུས་ཀུན་དགེ་བའི་ཤིས་བརྗོད་བྱ་བ་ནི༔ ཨེ་མ་ཧོ༔ འཆི་མེད་གཉུག་མ་རིག་པའི་རང་ཞལ་སྟོན༔ རིག་འཛིན་རྩ་བརྒྱུད་བླ་མའི་བཀྲ་ཤིས་ཤོག༔ གནས་སྐབས་མཐར་ཐུག་ཚེ་ཡི་དངོས་གྲུབ་སྩོལ༔ འབྲལ་མེད་ཡི་དམ་ལྷ་ཡི་བཀྲ་ཤིས་ཤོག༔ སྒྲུབ་པའི་གེགས་སེལ་མཐུན་རྐྱེན་འདོད་པ་འཇོ༔ གནས་གསུམ་མཁའ་འགྲོའི་ཚོགས་ཀྱི་བཀྲ་ཤིས་ཤོག༔ ལས་བཞིའི་ཕྲིན་ལས་གདུལ་བྱའི་རེ་བ་སྐོང་༔ བསྟན་སྲུང་དམ་ཅན་རྒྱ་མཚོའི་བཀྲ་ཤིས་ཤོག༔ ཨེ་མ་རྒྱལ་དབང་པདྨའི་བྱིན་རླབས་དང་༔ རིགས་བདག་གྲུབ་དབང་བླ་མས་རྗེས་བཟུང་མཐུས༔ བཀྲ་ཤིས་མཚུངས་མེད་ཌཱཀྐི་ས་མུ་ཏྲའི༔ ཐུགས་རྗེའི་མཐུ་ལས་རང་རིག་སྙིང་པོའི་གཏེར༔ ཀུན་གྱི་སྤྱོད་ཡུལ་མ་ཡིན་རང་གིས་རྙེད༔ དེ་ཕྱིར་ཚེ་ཡི་སྒྲུབ་པ་ཟབ་མོ་འདི༔ ཐེ་ཚོམ་རྟོག་གེ་ཅན་གྱི་ཡུལ་མིན་ཡང་༔ དད་ལྡན་ལས་ཅན་ཟུང་གི་ཆོས་སྐལ་ཡིན༔ སྔོན་དུས་ལས་དང་སྨོན་ལམ་མཐུན་པ་ལས༔ ཟོལ་མེད་ཆོས་འདིས་ཚེ་འཕྲང་བར་ཆད་སེལ༔ ཚེ་ཡི་གསོས་སུ་འགྱུར་རོ་ས་མ་ཡཱཿ གུ་ཧྱ༔ རྒྱལ་དབང་པདྨའི་ཆོས་མཛོད་ལ་ཅུང་ཟད་དབང་བའི་དགེ་སྦྱོང་ལུང་རིག་གླིང་པས་སྤེལ་བ་ཛ་ཡནྟུ༔ མངྒ་ལཾ། དགེའོ།།