ཚེ་སྒྲུབ་བསྐང་བ་མཆོད་སྤྲིན་ཆར་འབེབས།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཚེ་སྒྲུབ་བསྐང་བ་མཆོད་སྤྲིན་ཆར་འབེབས་བཞུགས༔
རྣལ་འབྱོར་ཚེ་ཡི་གེགས་སེལ་ཅིང་༔ མཆོག་ཐུན་དངོས་གྲུབ་ཐོབ་འདོད་པས༔ ཡར་མར་ཚེས་བཅུ་བརྒྱད་སྟོང་ངམ༔ ལྷ་དང་བླ་མ་དྲན་པའི་དུས༔ མཐུན་རྐྱེན་ཡོ་བྱད་ཚོགས་པར་བྱས༔ བཟའ་བཏུང་ཚོགས་ཕུད་ལྷ་ཚོགས་ལ༔ འབུལ་ཞིང་མཆོད་རྫས་བྱིན་བརླབ་ཕྱིར༔ ནམ་མཁའ་མཛོད་ཀྱི་སྔགས་བརྗོད་ཅིང་༔ ཀུན་བཟང་མཆོད་པའི་སྤྲིན་ལྟ་བུར༔ གུ་རུའི་གཙོར་བཅས་རྩ་གསུམ་ལྷ༔ སངས་རྒྱས་བྱང་སེམས་མ་ལུས་པ༔ མཆོད་ཅིང་ཐུགས་དམ་བསྐང་བསམས་ཤིང་༔ རོལ་མོ་སྙན་པའི་གདུང་དབྱངས་ཀྱིས༔ ཨོཾ་ཨཱཿཧཱུྃ༔ སྐུ་གསུམ་འདུ་འབྲལ་མེད་པ་ཆོས་སྐུའི་དབྱིངས༔ རང་བཞིན་ལྷུན་གྲུབ་ཀུན་ཁྱབ་འདུས་མ་བྱས༔ འོག་མིན་བདེ་ཆེན་པདྨ་བཀོད་པ་ནས༔ རིགས་བདག་མགོན་པོ་བཅོམ་ལྡན་ཚེ་དཔག་མེད༔ ཐུགས་རྗེའི་རང་རྩལ་རྟ་མཆོག་དབང་གི་ལྷ༔ རྩ་གསུམ་ཀུན་འདུས་པདྨ་ཐོད་ཕྲེང་རྩལ༔ བཀའ་བབ་མི་དགུ་ལྷ་དང་རིག་འཛིན་ཚོགས༔ མ་ལུས་འཁོར་བཅས་གདུང་བས་གསོལ་འདེབས་ན༔ བརྩེ་ཆེན་ཐུགས་ཀྱིས་བསྐང་བའི་གནས་འདིར་གཤེགས༔ བསོད་ནམས་ཤུགས་ཀྱིས་གྲུབ་པའི་རིན་ཆེན་ཁྲི༔ ཆགས་བྲལ་པདྨ་ཉི་ཟླའི་གདན་ལ་བཞུགས༔ བདག་ལུས་ཞིང་རྡུལ་གྲངས་མཉམ་གུས་ཕྱག་འཚལ༔ དངོས་བཤམས་ཡིད་སྤྲུལ་བླ་མེད་མཆོད་པའི་སྤྲིན༔ ཡིད་བཞིན་འདོད་རྒུའི་ཆར་ཆེན་འབེབས་པས་མཆོད༔ སྐུ་གསུང་ཐུགས་དང་ཡོན་ཏན་ཕྲིན་ལས་ལ༔ དད་དང་གུས་པ་ཆེན་པོས་བསྟོད་པར་བགྱི༔ ཧཱུྃ་ཧྲཱིཿ དུས་གསུམ་འཕོ་འགྱུར་མི་དམིགས་ཆོས་ཀྱི་སྐུ༔ ཆོས་སྐུ་སྣང་བ་མཐའ་ཡས་ཐུགས་དམ་བསྐང་༔ རང་བཞིན་གསལ་དག་མཚན་དཔེའི་གཟི་བརྗིད་འབར༔ ལོངས་སྐུ་ཚེ་དཔག་མེད་མགོན་ཐུགས་དམ་བསྐང་༔ རྒྱུ་རྐྱེན་མ་གྲུབ་རང་བྱུང་སྤྲུལ་སྐུར་སྣང་༔ གུ་རུ་པདྨ་ཐོད་ཕྲེང་ཐུགས་དམ་བསྐང་༔ ཚེ་བདུད་རུ་ཏྲའི་སྡེ་ཚོགས་ཆམ་ལ་འབེབས༔ དབང་ཆེན་རྟ་མགྲིན་རྒྱལ་པོའི་ཐུགས་དམ་བསྐང་༔ ཤེས་རབ་སྟོང་དབྱིངས་སྤྲུལ་པའི་ཌཱཀྐིར་ཤར༔ ལྷ་ལྕམ་མནྡྷ་ར་བའི་ཐུགས་དམ་བསྐང་༔ ཚེ་ལ་མངའ་བརྙེས་པཎ་གྲུབ་རྒྱ་མཚོའི་གཙོ༔ པཎ་ཆེན་དྲི་མེད་བཤེས་གཉེན་ཐུགས་དམ་བསྐང་༔ འཆི་མེད་གྲུབ་བརྙེས་ཐུབ་བསྟན་བོད་དུ་དྲངས༔ མཁན་ཆེན་ཤནྟ་རཀྵིའི་ཐུགས་དམ་བསྐང་༔ བོད་ཡུལ་ཆོས་ཀྱི་སྣང་བས་ཁྱབ་མཛད་པ༔ ཆོས་རྒྱལ་ཁྲི་སྲོང་ལྡེའུ་བཙན་ཐུགས་དམ་བསྐང་༔ ལྷོ་བྲག་མཁར་ཆུར་ཡང་དག་གྲུབ་པ་བརྙེས༔ ཐུགས་མཆོག་ནམ་མཁའི་སྙིང་པོའི་ཐུགས་དམ་བསྐང༔ མཆིམས་ཕུ་དབེན་རྩར་རྟ་མཆོག་དངོས་སུ་གྲུབ༔ གསུང་མཆོག་རྒྱལ་བ་མཆོག་དབྱངས་ཐུགས་དམ་བསྐང་༔ སྒྲགས་ཀྱི་ཡང་རྫོང་གཤིན་རྗེ་གཤེད་པོ་གྲུབ༔ སྐུ་མཆོག་སངས་རྒྱས་ཡེ་ཤེས་ཐུགས་དམ་བསྐང་༔ སེང་གེ་རྫོངས་སུ་ཕུར་པ་ཕྲིན་ལས་གྲུབ༔ མཁར་ཆེན་ཡེ་ཤེས་མཚོ་རྒྱལ་ཐུགས་དམ་བསྐང་༔ ཤམ་པོའི་གངས་རིར་མ་མོ་བྲན་དུ་ཁོལ༔ འབྲོག་མི་ཛྙཱ་ན་ཤྲིའི་ཐུགས་དམ་བསྐང་༔ གཡའ་མ་ལུང་དུ་བདུད་རྩིས་དུག་གསུམ་སེལ༔ ཡོན་ཏན་ཛྙཱ་ན་ཀུ་མའི་ཐུགས་དམ་བསྐང་༔ སྟག་ཚང་ཕུག་ཏུ་འཇིག་རྟེན་དྲེགས་པ་བཏུལ༔ རིག་འཛིན་དཔལ་གྱི་སེང་གེའི་ཐུགས་དམ་བསྐང་༔ ལི་ཡུལ་ལྕང་རར་དཔལ་ཆེན་དངོས་དང་མཇལ༔ གྲུབ་དབང་རྣམ་སྣང་ལོ་ཙཱའི་ཐུགས་དམ་བསྐང་༔ བདུད་བཞིའི་གདུག་པ་འདུལ་ཕྱིར་ཁྲོ་ཞིང་སྒེག༔ སྒོ་སྲུང་ཕྱག་རྒྱའི་ལྷ་མོའི་ཐུགས་དམ་བསྐང་༔ ཚེ་འདིར་ཕྱག་རྒྱ་ཆེན་པོའི་རང་ངོ་སྤྲོད༔ བརྒྱུད་ལྡན་དྲིན་ཆེན་བླ་མའི་ཐུགས་དམ་བསྐང་༔ བྱང་ཆུབ་བར་དུ་འབྲལ་མེད་དངོས་གྲུབ་སྩོལ༔ ཡི་དམ་ལྷག་པའི་ལྷ་ཡི་ཐུགས་དམ་བསྐང་༔ བར་ཆད་ཀུན་སེལ་ཕྲིན་ལས་རྣམ་བཞི་སྒྲུབ༔ མཁའ་འགྲོ་དམ་ཅན་སྲུང་མའི་ཐུགས་དམ་བསྐང་༔ རྟག་ཏུ་ཕན་དང་བདེ་བའི་གྲོགས་མཛད་པའི༔ འགོ་བའི་ལྷ་དང་སྲུང་མའི་ཐུགས་དམ་བསྐང་༔ ཧཱུྃ་ཧྲཱིཿ དེ་ལྟར་མཆོད་འོས་དཀྱིལ་འཁོར་ལྷ་རྣམས་ཀྱི༔ སྐུ་གསུང་ཐུགས་ལ་སྲིད་པའི་འདོད་ཡོན་ལྔ༔ ཉེ་བར་ལེན་པའི་བག་ཆགས་མི་མངའ་ཡང་༔ བདག་ཅག་བསོད་ནམས་ཡེ་ཤེས་ཚོགས་བསག་ཕྱིར༔ མཆོད་རྫས་ཡོ་བྱད་རྣམས་ཀྱིས་ཐུགས་དམ་བསྐང་༔ ཕྱི་རྒྱུད་གསུམ་ལས་གསུངས་པའི་མཆོད་པའི་རྫས༔ ཁང་བཟང་སྐྱེད་ཚལ་ལྗོན་ཤིང་ཁྲུས་ཀྱི་རྫིང་༔ བཀོད་ལེགས་ཁྲི་རྒྱན་མཆོད་ཡོན་ཞབས་བསིལ་ཆུ༔ མེ་ཏོག་སྣ་ཚོགས་བདུག་སྤོས་སྣང་གསལ་སྒྲོན༔ ཞལ་སྐྱེམས་ཞིམ་མངར་དཀར་གསུམ་བདུད་རྩིའི་ཟས༔ སྲབ་འཇམ་གོས་སོགས་འཁོར་ལོས་སྒྱུར་རྒྱལ་དང་༔ ཆགས་བྲལ་ཚངས་སྤྱོད་ཡོ་བྱད་སྣ་ཚོགས་པས༔ བསྐང་ངོ་མཆོད་དོ་ཐུགས་དམ་གཉན་པོ་བསྐང་༔ གསང་ཆེན་ནང་གི་རྒྱུད་ལས་བྱུང་བ་ཡི༔ གཙང་རྨེའི་འཛིན་པ་ཀུན་བྲལ་ཨ་མྲི་ཏ༔ ཆགས་བྲལ་དབང་གི་རྫས་མཆོག་རཀྟ་དམར༔ མི་རྟ་ཁྱི་དང་གླང་པོ་མཁའ་ལྡིང་སོགས༔ སྲོག་ཆགས་སྣ་ཚོགས་ལས་ཀྱིས་ཤི་བའི་ཤ༔ ནད་ལྔ་སེལ་ལ་རབ་ཏུ་བསྔགས་པ་དང་༔ རིགས་ལྔ་སྒྲུབ་པའི་དམ་ཚིག་ཁྱད་པར་ཅན༔ དྲི་ཆེན་དྲི་ཆུ་རཀྟ་རྡོ་རྗེའི་ཟིལ༔ མཁའ་དབྱིངས་ཁྲག་སོགས་ཤ་ལྔ་བདུད་རྩི་ལྔ༔ རྩི་བཅུད་སྨན་སྤོས་སྦྱར་བའི་བྷ་ལིང་ཏ༔ ངོ་མཚར་སྨན་དང་རཀྟ་གཏོར་ཆེན་པོས༔ བསྐང་ངོ་མཆོད་དོ་ཐུགས་དམ་གཉན་པོ་བསྐང་༔ འཇིགས་མཛད་ཁྲོ་བོའི་ལྷ་ཚོགས་དགྱེས་སྐྱེད་རྫས༔ སྐམ་རློན་བམ་རོའི་གདན་དང་མགོ་ཕྲེང་རྔམ༔ མི་གླང་སྟག་གཟིག་པགས་པའི་སྟོད་སྨད་གོས༔ སྦྲུལ་དང་རྒྱུ་མའི་དོ་ཤལ་དམར་ཆེན་སྐྱེམས༔ དབང་ལྔའི་མེ་ཏོག་ཚིལ་ཆེན་བདུག་པའི་དྲི༔ མི་ཚིལ་བཞུས་པའི་སྒྲོན་མ་མཁྲིས་པའི་ཆབ༔ ཤ་རུས་བཟའ་བ་ཀླད་རྐང་ལྡག་གཞིབ་ཟས༔ ཐོད་རྔ་གསང་བའི་རྔེའུ་ཆུང་མི་ལྤགས་འཕན༔ དུར་ཁྲོད་ནང་གི་མཆོད་རྫས་སྣ་ཚོགས་པས༔ བསྐང་ངོ་མཆོད་དོ་ཐུགས་དམ་གཉན་པོ་བསྐང་༔ གཞན་ཡང་འཁོར་ལོས་སྒྱུར་བའི་རིན་ཆེན་བདུན༔ ཉེ་བའི་རིན་པོ་ཆེ་དང་བཀྲ་ཤིས་རྟགས༔ རྫས་མཆོག་བརྒྱད་སོགས་ཁྱད་པར་འཕགས་པའི་རིགས༔ བཅུ་དྲུག་ལང་ཚོས་སྒེག་པའི་ཕྱག་རྒྱ་གར༔ ངོ་མཚར་གླུ་གར་གཡོ་བའི་ཕྱི་ནང་གསང་༔ རྡོ་རྗེའི་ལྷ་མོ་བཅུ་དྲུག་ལ་སོགས་པ༔ དབང་པོ་དྲུག་ལ་ཟག་མེད་བདེ་སྐྱེད་པའི༔ སྲིད་དང་ཞི་བའི་མཆོད་རྫས་བསམ་འདས་པས༔ རྩ་བརྒྱུད་རིག་འཛིན་བླ་མའི་ཐུགས་དམ་བསྐང་༔ ཡི་དམ་ཞི་ཁྲོའི་ལྷ་ཚོགས་ཐུགས་དམ་བསྐང་༔ ཡེ་ཤེས་འཇིག་རྟེན་ཌཀྐིའི་ཐུགས་དམ་བསྐང་༔ བརྒྱུད་གསུམ་བཀའ་གཏེར་སྲུང་མའི་ཐུགས་དམ་བསྐང་༔ འགོ་བའི་ལྷ་དང་དམ་ཅན་རྒྱ་མཚོ་སོགས༔ རེ་ལྟོས་ཡུལ་དུ་གྱུར་རྣམས་ཐུགས་དམ་བསྐང་༔ ཧྲཱིཿ དེ་ལྟར་ཐུགས་དམ་བསྐང་བའི་བྱིན་རླབས་ཀྱིས༔ བདག་ཅག་དཔོན་སློབ་ཡོན་གྱི་བདག་པོར་བཅས༔ སྤྱི་དགོས་ཉེ་བའི་ལྕམ་དྲལ་མི་ནོར་གྱི༔ སྔོན་ལས་འཕྲལ་རྐྱེན་ངན་པ་ལས་བྱུང་བའི༔ ནད་གདོན་འཇིགས་བརྒྱད་བར་ཆད་ཞི་བ་དང་༔ ཚེ་བསོད་དཔལ་འབྱོར་བུ་ནོར་ཡོན་ཏན་རྒྱས༔ ལྷ་འདྲེ་མི་གསུམ་ཟིལ་གནོན་དབང་དུ་འདུས༔ བསྟན་དང་འགྲོ་བ་རྣལ་འབྱོར་ལ་སྡང་བའི༔ དགྲ་བགེགས་མ་ལུས་རྡུལ་དུ་བརླག་པ་སོགས༔ རབ་འབྱམས་ཕྲིན་ལས་མ་ལུས་འགྲུབ་པ་དང་༔ ཁྱད་པར་སོ་བྱང་སྔགས་ཀྱི་ཉམས་ཆག་ཀུན༔ དམིགས་མེད་ཆོས་ཀྱི་དབྱིངས་སུ་བྱང་ཞིང་དག༔ མཐོང་ཐོས་དྲན་རེག་འབྲེལ་ཚད་འགྲོ་བ་ཀུན༔ སྤངས་རྟོགས་མཐར་ཕྱིན་རྫོགས་པའི་སངས་རྒྱས་ཀྱི༔ གོ་འཕང་མྱུར་དུ་འཐོབ་པའི་དགེ་ལེགས་སྩོལ༔ ཅེས་བརྗོད་གཞན་ཡང་ཡི་གེ་བརྒྱ་པ་སོགས༔ བཤགས་ཚིག་ཅི་རིགས་པ་ཡིས་ཉམས་ཆག་བསྐང་༔ དེས་ནི་ཚེ་འདིར་མི་མཐུན་ཀུན་ཞི་ཞིང་༔ ལེགས་ཚོགས་གོང་འཕེལ་འགྱུར་བར་གདོན་མི་ཟ༔ ས་མ་ཡཱ༔ གུ་ཧྱ༔ ལུང་རིག་གླིང་པས་སྤེལ་བའོ།།