ཚེ་སྒྲུབ་མི་ཤིགས་དྭངས་མ།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཚེ་སྒྲུབ་མི་ཤིགས་
དྭངས་མ་བཞུགས༔
སྐུ་གསུང་ཐུགས་ཀྱི་རྒྱ་ཡོད་དོ༔ འཆི་མེད་ཚེ་ཡི་ལྷ་ལ་འདུད༔ སྐལ་ལྡན་ཚེ་ཡི་རིག་འཛིན་མཆོག༔ སྒྲུབ་པར་འདོད་པའི་གང་ཟག་གིས༔ དབེན་པར་སྒྲུབ་རྫས་ཡོ་བྱད་བསྐྱུངས༔ ས་མ་ཡཱ༔ དེ་ལ་སྦྱོར་དངོས་རྗེས་གསུམ་སྟེ༔ དང་པོ་སྐྱབས་སེམས་ཚོགས་བསག་ནི༔ མདུན་མཁར་པདྨ་ཟླ་གདན་ལ༔ ཚེ་དཔག་མེད་མགོན་ལོངས་སྐུའི་ཚུལ༔ རྩ་གསུམ་སྲུང་མའི་ཚོགས་ཀྱིས་བསྐོར༔ ཁྱེད་ཤེས་དད་པའི་སྐྱབས་འགྲོ་ནི༔ ན་མོ༔ བླ་མ་སངས་རྒྱས་ཚེ་དཔག་མེད༔ དཀོན་མཆོག་ཀུན་འདུས་སྐྱབས་ཀྱི་མཆོག༔ འདི་བཟུང་བྱང་ཆུབ་མ་ཐོབ་བར༔ ཁྱེད་ཤེས་དད་པས་སྐྱབས་སུ་མཆི༔ བྱང་ཆུབ་མཆོག་ཏུ་སེམས་བསྐྱེད་ནི༔ འགྲོ་ཀུན་བརྒལ་དཀའི་སྲིད་མཚོ་ལས༔ བསྒྲལ་ཏེ་སངས་རྒྱས་ལ་དགོད་ཕྱིར༔ གསང་གསུམ་མི་ཤིགས་དྭངས་མ་རུ༔ མྱུར་དུ་སྒྲུབ་པར་དམ་བཅའ་འོ༔ ཚོགས་བསག་ཡན་ལག་བདུན་པ་ནི༔ ཧྲཱིཿ རྡུལ་བྲལ་དྭངས་པའི་ནམ་མཁའ་ལ༔ བཞུགས་པའི་རྩ་གསུམ་ལྷ་ཚོགས་དྲུང་༔ རྡུལ་སྙེད་ལུས་སྤྲུལ་གུས་ཕྱག་འཚལ༔ ལུས་དང་ལོངས་སྤྱོད་མཆོད་སྤྲིན་འབུལ༔ སྒོ་གསུམ་བདག་འཛིན་ཉེས་སྒྲིབ་བཤགས༔ སྐྱེ་འཕགས་དགེ་ལ་རྗེས་ཡི་རང་༔ འཆི་མེད་ཆོས་འཁོར་བསྐོར་བར་བསྐུལ༔ འགྲོ་ངོར་རྟག་པར་བཞུགས་གསོལ་འདེབས༔ དགེ་རྩ་བྱང་ཆུབ་ཆེན་པོར་བསྔོ༔ དེ་ཡིས་སྔོན་འགྲོའི་ཆོས་རྣམས་རྫོགས༔ ཚོགས་ཞིང་བསྡུས་ཏེ་རང་ལ་བསྟིམ༔ དངོས་གཞི་ལྷ་བསྐྱེད་བཟླས་པ་དང་༔ དམིགས་པའི་སྤྲོ་བསྡུ་བྱ་བ་འོ༔ དང་པོ་ལྷ་ཡི་ཏིང་འཛིན་ནི༔ ཧྲཱིཿ སྣང་བའི་ཆོས་ཀུན་སྟོང་པའི་ངང་༔ སྟོང་པ་སེམས་ཀྱི་རང་རྩལ་ལས༔ ཕྱི་སྣོད་ཡོན་ཏན་དཔག་མེད་ཞིང་༔ བདེ་ཆེན་ཕོ་བྲང་མཚན་ཉིད་རྫོགས༔ རྨ་བྱས་བཏེགས་པའི་རིན་ཆེན་ཁྲིར༔ པད་ཉི་ཟླ་བའི་གདན་སྟེང་དུ༔ རང་སེམས་ཧྲཱིཿདམར་ཡོངས་གྱུར་ལས༔ ཚེ་དཔག་མེད་མགོན་བཅོམ་ལྡན་འདས༔ པདྨ་རཱ་གའི་མདོག་ལྟར་དམར༔ ཞལ་གཅིག་མཛེས་འཛུམ་མཚན་དཔེས་སྤྲས༔ ཕྱག་གཉིས་མཉམ་བཞག་ཚེ་བུམ་འཛིན༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ དར་ཆས་ལྔ་ཡི་ན་བཟའ་གསོལ༔ རིན་ཆེན་རྒྱན་ཆ་བརྒྱད་ཀྱིས་མཛེས༔ འོད་ཟེར་དཔག་མེད་འཕྲོ་བར་བསྒོམ༔ འཁོར་དུ་ཚེ་ཡི་ལྷ་མོ་བརྒྱད༔ ན་ཆུང་མདའ་དར་ཚེ་བུམ་ནང་༔ འབྱུང་ལྔའི་བཅུད་ཀྱི་བདུད་རྩིས་གཏམས༔ གར་སྟབས་དར་དང་རིན་ཆེན་རྒྱན༔ གཞན་ཡང་ལྷ་དང་རིག་འཛིན་ཚོགས༔ ཀུན་ཀྱང་འཆི་མེད་དངོས་གྲུབ་མཆོག༔ ཡིད་ལ་གང་འདོད་སྩོལ་བར་བསམ༔ ལྷ་རྣམས་གནས་གསུམ་འབྲུ་གསུམ་ལས༔ འོད་འཕྲོས་སྐུ་གསུམ་ཞིང་ཁམས་ནས༔ སྤྱན་དྲངས་བསྐྱེད་པའི་ལྷ་ལ་ཐིམ༔ གཉིས་མེད་ངང་དུ་བརྟན་པར་བཞུགས༔ སྤྲུལ་པའི་ལྷ་མོས་བརྡ་ཕྱག་འཚལ༔ ཡུལ་དྲུག་མཆོད་པའི་ཕྱག་རྒྱར་འབུལ༔ འཆི་མེད་གཉུག་མའི་ལྷ་ལ་བསྟོད༔ བདག་རྟོག་ཉམས་ཆག་སྟོང་དབྱིངས་བཤགས༔ གཉིས་པ་བཟླས་པ་བྱ་བ་ནི༔ བདག་བསྐྱེད་ཐུགས་ཀར་ཉི་ཟླ་ཡི༔ ག་འུ་ཁ་སྦྱོར་ལྟེ་བ་ལ༔ ཧྲཱིཿདམར་སྔགས་ཕྲེང་འོད་ལྔའི་མདངས༔ གཡས་སུ་འཁོར་ལ་སེམས་གཏད་དེ༔ ཡེངས་མེད་ངང་ནས་བཟླས་པ་བྱ༔ ཨོཾ་ཨ་མ་ར་ཎ་ཛི་བནྟི་ཡེ་སྭཱ་ཧཱ༔ འབྲུ་འབུམ་བཟླ་བ་ལས་རུང་ངོ་༔ གསུམ་པ་དམིགས་པའི་འཕྲོ་འདུ་ནི༔ འོད་ཟེར་ཡར་འཕྲོས་རྒྱལ་ཀུན་མཆོད༔ སྐུ་གསུང་ཐུགས་ཀྱི་ཚེ་བཅུད་བསྡུས༔ མར་འཕྲོས་འགྲོ་ཀུན་བར་ཆད་བསལ༔ ཀུན་ཀྱང་འཆི་མེད་མགོན་པོ་ཡི༔ གསང་བ་གསུམ་དང་དབྱེར་མེད་ངང་༔ བདག་གི་ཚེ་ཡི་གསོས་བྱས་ནས༔ ཆད་པ་མཐུད་ལ་ཡར་བ་ཁུག༔ གས་པ་སྦྱོར་ལ་ཉམས་པ་འཕེལ༔ ཞེས་བསམ་ཚེ་གཟུངས་འབུམ་དུ་བཟླ༔ རྗེས་ཀྱི་རིམ་པ་ལའང་གསུམ༔ བསྟོད་ཅིང་བསྡུ་རིམ་ཤིས་བརྗོད་དོ༔ དང་པོ་བསྟོད་པས་ཅི་རིགས་བསྟོད༔ གཉིས་པ་བསྡུ་རིམ་འདི་ལྟར་བྱ༔ ཧྲཱིཿ ཀུན་བརྟགས་བསྐྱེད་པ་རྒྱུ་ཡི་ལྷ༔ གཞན་དབང་དམིགས་མེད་སྟོང་པར་བསྡུ༔ དོན་དམ་ཡོངས་གྲུབ་འབྲས་བུའི་ལྷར༔ མི་དམིགས་མཉམ་པར་ཨེ་མ་ཧོ༔ གསུམ་པ་ཤིས་བརྗོད་བྱ་བ་ནི༔ ཧྲཱིཿ སྐྱེ་འཆིར་བཏགས་པ་འཁོར་བའི་ཆོས༔ གང་ཡང་གྲུབ་པ་མ་མཆིས་པ༔ འཆི་མེད་ཡེ་ཤེས་སྐུ་བཞིའི་ལྷར༔ ཚེ་འདིར་མངོན་གྱུར་བཀྲ་ཤིས་ཤོག༔ ས་མ་ཡཱཿ དེ་ལྟར་ཚེ་སྒྲུབ་ཟབ་མོ་འདི༔ བཀའ་གཏེར་ཟུང་འཇུག་དགོངས་པའི་བཅུད༔ གང་གིས་ཉམས་བླངས་ཚེ་གེགས་སེལ༔ བསླུ་མེད་མཚོ་རྒྱལ་ཐུགས་ཐིག་གོ༔ འདི་རིང་མོ་ནས་དག་སྣང་དུ་བབས་ཀྱང་སྤེལ་བའི་དུས་ལ་མ་བབས་པས་མི་ལོ་བཅོ་ལྔར་སྙིང་སྒྲོམ་དུ་སྦས་པ་སླར་ལས་སྐལ་དང་ལྡན་པས་བསྐུལ་ངོར་པདྨའི་ཆོས་མཛོད་ལ་ཅུང་ཟད་དབང་བའི་དགེ་སྦྱོང་བྷུ་སུ་ཀུ་ལུང་རིག་གླིང་པས་སྤེལ་བ་ཛ་ཡནྟུ༔ མངྒ་ལཾ། དགེའོ།།