ཚེ་འགུགས་སྣང་བ་དབང་སྡུད།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཚེ་འགུགས་སྣང་བ་

དབང་སྡུད་བཞུགས་སོ༔

ཡི་དམ་ལྷག་པའི་ལྷ་ལ་འདུད༔ རིག་འཛིན་ཐུགས་བཅུད་ཚེ་སྒྲུབ་ལས༔ ཟུར་རྒྱན་ཚེ་འགུགས་བྱ་བ་ནི༔ བསྙེན་ཅིང་སྒྲུབ་པའི་རྣལ་འབྱོར་པས༔ དམིགས་གནད་ལྡན་པས་འཛབ་བཟླས་ཤིང་༔ མཆོད་བསྟོད་བྱས་ཤིང་བདག་མདུན་ལྷའི༔ སྐུ་ལས་འོད་ཟེར་ཁ་དོག་ལྔ༔ འཕྲོས་པས་སྐུ་གསུམ་རྒྱལ་བ་སོགས༔ སངས་རྒྱས་བྱང་སེམས་ཐམས་ཅད་ཀྱི༔ མཁྱེན་བརྩེ་ནུས་མཐུས་ཚེ་གཡང་དང་༔ འཁོར་བ་རྟེན་དང་བརྟེན་པ་ཡི༔ འབྱུང་བ་ལྔ་དང་ལྷ་དང་མིའི༔ ཚེ་བཅུད་མ་ལུས་ཨ་རྣྲི་ཧཱུྃ༔ བཀྲག་མདངས་ལྡན་པར་འུབ་ཀྱིས་བསྡུས༔ རང་ལ་ཐིམ་པས་ཚེ་བསོད་ཀུན༔ ཡར་ངོའི་ཟླ་ལྟར་རྒྱས་པར་བསམ༔ ལག་ཏུ་མདའ་དར་སྣ་ལྔ་ཐོགས༔ ཕྱོགས་བཅུར་གཡབ་ཅིང་འདི་བཞིན་བརྗོད༔ ཧཱུྃ་ཧྲཱིཿ རབ་འབྱམས་ཕྱོགས་བཅུའི་ཞིང་གི་རྒྱལ་བ་ཡི༔ རིགས་ཀྱི་བདག་པོ་བཅོམ་ལྡན་སྣང་མཐའ་ཡས༔ གཉུག་མ་མི་ཤིགས་ཚེ་ཡི་གཞལ་ཡས་ནས༔ འགགས་མེད་མཁྱེན་བརྩེ་ནུས་མཐུས་རྩལ་ཕྱུང་སྟེ༔ རིག་འཛིན་བདག་ལ་ཚེ་ཡི་དངོས་གྲུབ་སྩོལ༔ ཕྱི་སྣོད་འབྱུང་བ་བཞི་ཡི་དྭངས་མ་དང་༔ ནང་བཅུད་སྐྱེ་འགྲོའི་ཚོགས་ཀྱི་ཚེ་བཅུད་དཔལ༔ ཀུན་རྫོབ་སྣང་ཆ་དགེ་བའི་རྟེན་འབྲེལ་ཀུན༔ རྩོལ་མེད་ཐུགས་རྗེ་ཆེན་པོས་འདིར་ཁུག་ཅིག༔ ཡོན་ཏན་དཔག་མེད་བརྒྱན་པའི་ཞིང་ཁམས་ནས༔ འཆི་མེད་མགོན་པོ་རིག་འཛིན་ཚེ་ཡི་ལྷ༔ ལྔ་ལྡན་ལོངས་སྐུའི་ཞིང་ནས་སྐུར་བཞེངས་ལ༔ རྣལ་འབྱོར་བདག་ལ་འགྱུར་མེད་ཚེ་གཡང་སྩོལ༔ ཕྱི་སྣོད་ནང་བཅུད་སྐྱེ་འགྲོ་ཐམས་ཅད་ཀྱི༔ ཚེ་བསོད་དཔལ་འབྱོར་ཚེ་གཡང་འདིར་ཁུག་ཅིག༔ མཁའ་སྤྱོད་གནས་མཆོག་ཟངས་མདོག་དཔལ་རི་ནས༔ རིག་འཛིན་གྲུབ་བརྒྱའི་གཙོ་བོ་པདྨ་འབྱུང་༔ རང་བཞིན་དབྱིངས་ཀྱི་ཀློང་ནས་སྐུར་བཞེངས་ལ༔ རྣལ་འབྱོར་བདག་ལ་ཚེ་ཡི་དྭངས་བཅུད་སྩོལ༔ རིག་འཛིན་རྣམ་བཞིའི་གྲུབ་འབྲས་ཡོན་ཏན་དང་༔ འཁོར་འདས་ལམ་གསུམ་ཚེ་གཡང་འདིར་ཁུག་ཅིག༔ འཕོ་ཆེན་རྡོ་རྗེའི་སྐུ་བརྙེས་བཱི་མ་ལ༔ འགྱུར་མེད་ཀ་དག་ཀློང་ནས་སྐུར་བཞེངས་ལ༔ རང་བཞིན་ལྷུན་གྲུབ་ཚེ་ཡི་དྭངས་མ་ཀུན༔ དེང་འདིར་སྒྲུབ་པོའི་རྣལ་འབྱོར་བདག་ལ་སྩོལ༔ གངས་ཅན་བསྟན་པའི་སྲོག་ཤིང་ཞི་བ་འཚོ༔ ཕན་བདེའི་རྩ་ལག་ཆོས་རྒྱལ་སྤྲུལ་བའི་སྐུ༔ དཀྱིལ་འཁོར་གཙོ་མཆོག་དབང་ཆེན་ཡབ་དང་ཡུམ༔ ཡེ་ཤེས་དབྱིངས་ལས་སྤྲུལ་པའི་སྒྱུ་འཕྲུལ་གྱིས༔ བསྐལ་པར་གནས་པའི་ལྷ་དང་དྲང་སྲོང་གི༔ འཕོ་མེད་ཚེ་ཡི་དྭངས་བཅུད་འདིར་ཁུག་ཅིག༔ ཧཱུྃ་ཧྲཱིཿ ཡང་དག་ཐུགས་ཀྱི་གྲུབ་བརྙེས་རིག་པ་འཛིན༔ ཤར་ཕྱོགས་དྲི་ཟ་ཕོ་མོའི་ཚེ་བཅུད་དང་༔ ཞེ་སྡང་རྒྱལ་པོས་བརྐུས་པའི་བླ་དང་སྲོག༔ གནས་འདིར་ཁུག་ལ་ཚེ་གཡང་བཅུད་དུ་སྩོལ༔ འཇམ་དཔལ་སྐུ་ཡི་གྲུབ་བརྙེས་རིག་པ་འཛིན༔ ལྷོ་ཕྱོགས་གཤིན་རྗེ་ཕོ་མོའི་ཚེ་བཅུད་དང་༔ ང་རྒྱལ་རྦོད་གཏོང་གིས་ཕྲོག་བླ་དང་སྲོག༔ དྲག་ཤུལ་ནུས་པའི་སྟོབས་ཀྱིས་འདིར་ཁུག་ལ༔ ཟད་དང་འཐོར་དང་ཉམས་པའི་གསོས་སུ་སྩོལ༔ པདྨ་གསུང་གི་གྲུབ་བརྙེས་རིག་པ་འཛིན༔ ནུབ་ཕྱོགས་ཀླུ་དབང་ཕོ་མོའི་ཚེ་བཅུད་དང་༔ འདོད་ཆགས་བསེན་མོས་བརྐུས་པའི་བཀྲག་དང་མདངས༔ གནས་འདིར་ཁུག་ལ་ཕུང་ཁམས་བཅུད་དུ་སྩོལ༔ ཕུར་པ་ཕྲིན་ལས་གྲུབ་བརྙེས་རིག་པ་འཛིན༔ བྱང་ཕྱོགས་གནོད་སྦྱིན་ཕོ་མོའི་ཚེ་བཅུད་དང་༔ ཕྲག་དོག་བདུད་ཀྱིས་བརྐུས་པའི་སྟོབས་དང་རྩལ༔ གནས་འདིར་ཁུག་ལ་ཚེ་ཡི་དཔལ་དུ་སྩོལ༔ མ་མོ་རྦོད་གཏོང་གྲུབ་བརྙེས་རིག་པ་འཛིན༔ ཤར་ལྷོ་མེ་ལྷ་ཕོ་མོའི་ཚེ་བཅུད་དང་༔ བན་བོན་བྱད་མས་ཕྲོག་པའི་བླ་དང་སྲོག༔ གནས་འདིར་ཁུག་ལ་ཚེ་གཡང་དཔལ་དུ་སྩོལ༔ ཡོན་ཏན་བདུད་རྩིའི་གྲུབ་བརྙེས་རིག་པ་འཛིན༔ ལྷོ་ནུབ་སྲིན་པོ་ཕོ་མོའི་ཚེ་གཡང་དང་༔ མི་གཙང་གྲིབ་ཀྱིས་ཉམས་པའི་ཚེ་དང་སྲོག༔ གནས་འདིར་ཁུག་ལ་དུག་སེལ་སྨན་དུ་སྩོལ༔ འཇིག་རྟེན་མཆོད་བསྟོད་གྲུབ་བརྙེས་རིག་པ་འཛིན༔ ནུབ་བྱང་རླུང་ལྷ་ཕོ་མོའི་ཚེ་བཅུད་དང་༔ སྡེ་བརྒྱད་ཡོངས་ཀྱིས་ཕྲོག་པའི་ཚེ་བསོད་དཔལ༔ གནས་འདིར་ཁུག་ལ་ནུས་མཐུས་སྟོབས་རྩལ་བསྐྱེད༔ དམོད་པ་དྲག་སྔགས་གྲུབ་བརྙེས་རིག་པ་འཛིན༔ བྱང་ཤར་དབང་ལྡན་ཕོ་མོའི་ཚེ་དང་གཡང་༔ སྒོ་གསུམ་ཉམས་ཆག་མཐུས་ཉམས་བླ་དང་སྲོག༔ དེང་འདིར་ཁུག་ལ་ཚེ་བསོད་རྒྱས་པར་མཛོད༔ ཧཱུྃ་ཧྲཱིཿ ཤར་ཕྱོགས་དཀར་མོ་མགྱོགས་མ་ཚེ་ཡི་བདག༔ རྡོ་རྗེ་རིགས་ཀྱི་ཚེ་ལྷའི་ཐུགས་རྒྱུད་བསྐུལ༔ ཤར་ཕྱོགས་ལུས་འཕགས་གླིང་གི་ཚེ་གཡང་སྡུས༔ བདག་དང་བསྲུང་བྱར་ཚེ་ཡི་གསོས་སུ་སྩོལ༔ ལྷོ་ཕྱོགས་སྔོན་མོ་མགྱོགས་མ་ཚེ་ཡི་བདག༔ རིན་ཆེན་རིགས་ཀྱི་ཚེ་ལྷའི་ཐུགས་རྒྱུད་བསྐུལ༔ ལྷོ་ཕྱོགས་འཛམ་བུའི་གླིང་གི་ཚེ་གཡང་སྡུས༔ བདག་དང་བསྲུང་བྱར་ཚེ་ཡི་གསོས་སུ་སྩོལ༔ ནུབ་ཕྱོགས་དམར་མོ་མགྱོགས་མ་ཚེ་ཡི་བདག༔ པདྨ་རིགས་ཀྱི་ཚེ་ལྷའི་ཐུགས་རྒྱུད་བསྐུལ༔ ནུབ་ཕྱོགས་བ་གླང་སྤྱོད་ཀྱི་ཚེ་གཡང་བསྡུས༔ བདག་དང་བསྲུང་བྱར་ཚེ་ཡི་གསོས་སུ་སྩོལ༔ བྱང་ཕྱོགས་ལྗང་མོ་མགྱོགས་མ་ཚེ་ཡི་བདག༔ ཀརྨ་རིགས་ཀྱི་ཚེ་ལྷའི་ཐུགས་རྒྱུད་བསྐུལ༔ བྱང་ཕྱོགས་སྒྲ་མི་སྙན་པའི་ཚེ་གཡང་སྡུས༔ བདག་དང་བསྲུང་བྱར་ཚེ་ཡི་གསོས་སུ་སྩོལ༔ སྲ་མཁྲེགས་མི་ཤིགས་འབྱུང་བ་ས་ཡི་བཅུད༔ འོད་ཟེར་སེར་པོའི་རྣམ་པར་འདིར་ཁུག་ལ༔ ཤ་ཡི་ཁམས་ནས་ཡར་བའི་བླ་ཚེ་གསོས༔ ཡུམ་ཆེན་སངས་རྒྱས་སྤྱན་མའི་ཀློང་དུ་བསྐྱིལ༔ མཉེན་ལྕུག་བསིལ་འཇམ་འབྱུང་བ་ཆུ་ཡི་བཅུད༔ འོད་ཟེར་དཀར་པོའི་རྣམ་པར་འདིར་ཁུག་ལ༔ ཁྲག་གི་ཁམས་ནས་ཉམས་པའི་བླ་ཚེ་གསོས༔ རིན་ཆེན་རིགས་ཀྱི་དཔའ་མོའི་དབྱིངས་སུ་བསྐྱིལ༔ དྲོད་གསལ་ཚ་ངད་འབྱུང་བ་མེ་ཡི་བཅུད༔ འོད་ཟེར་དམར་པོའི་རྣམ་པར་འདིར་ཁུག་ལ༔ དྲོད་ཀྱི་ཁམས་ནས་ཡར་བའི་བླ་དང་ཚེ༔ གོས་དཀར་ལྷ་མོའི་ནུས་མཐུས་དབྱིངས་སུ་སྤེལ༔ ཡངས་ཤིང་གཡོ་བ་འབྱུང་བ་རླུང་གི་བཅུད༔ འོད་ཟེར་ལྗང་གུའི་རྣམ་པར་འདིར་ཁུག་ལ༔ དབུགས་ཀྱི་ཁམས་ནས་ཉམས་པའི་བླ་ཚེ་གསོས༔ དམ་ཚིག་སྒྲོལ་མའི་ཀློང་དུ་རྒྱས་ཐོབ་ཅིག༔ དྭངས་གསལ་གོ་འབྱེད་འབྱུང་བ་ནམ་མཁའི་བཅུད༔ འོད་ཟེར་མཐིང་གའི་རྣམ་པར་འདིར་ཁུག་ལ༔ ཀུན་གཞི་སེམས་ཀྱི་ཚེ་གཡང་ཉམས་པ་གསོས༔ དབྱིངས་ཕྱུག་ཀུན་ཏུ་བཟང་མོའི་ཀློང་དུ་བསྐྱིལ༔ ཧཱུྃ་ཧྲཱིཿ སྐུ་གསུམ་རྒྱལ་བའི་ཐུགས་རྗེའི་སྒྱུ་འཕྲུལ་ལས༔ འགག་མེད་ཤར་བའི་ལྷ་དང་དྲང་སྲོང་ཆེ༔ ནུས་སྟོབས་གྲུབ་པའི་ཚེ་ཡི་རིག་པ་འཛིན༔ ཞིང་གི་རྡུལ་སྙེད་གྲངས་མཉམ་བྱིན་ནུས་ཀྱིས༔ དེང་འདིར་རིག་འཛིན་རྣལ་འབྱོར་བདག་ཅག་གི༔ ཀུན་རྫོབ་སྣང་ཆར་བརྟེན་པའི་སྒོ་གསུམ་གྱི༔ བཀྲག་དང་གཟི་མདངས་བླ་ཚེ་སྲོག་དབུགས་རྣམས༔ སྔོན་ལས་འཕྲལ་རྐྱེན་ངན་པས་ཟད་པ་དང་༔ འཇིག་རྟེན་ལྷ་འདྲེས་བརྐུས་པས་འཐོར་དང་ཡར༔ རྩ་གསུམ་དམ་ཚིག་ཉམས་པས་ཆད་དང་གས༔ མདོར་ན་ཉམས་ཆག་ཞིག་རལ་གང་མཆིས་པ༔ ཁྱེད་རྣམས་ཐུགས་རྗེ་ནུས་མཐུས་སོར་ཆུད་ནས༔ འགྱུར་མེད་སྐུ་ཡི་ཚེ་གཡང་བསྩལ་དུ་གསོལ༔ འགག་མེད་གསུང་གི་དངོས་གྲུབ་བསྩལ་དུ་གསོལ༔ འཁྲུལ་མེད་ཐུགས་ཀྱི་དངོས་གྲུབ་བསྩལ་དུ་གསོལ༔ ཡོན་ཏན་མི་ཟད་དངོས་གྲུབ་བསྩལ་དུ་གསོལ༔ ཕྲིན་ལས་འགྲོ་འདུལ་ཚེ་ཡི་དངོས་གྲུབ་བསྩལ་དུ་གསོལ༔ ལུས་ལ་བཀྲག་དང་གཟི་མདངས་བསྐྱེད་དུ་གསོལ༔ ངག་ལ་སྔགས་ཀྱི་ནུས་མཐུ་བསྐྱེད་དུ་གསོལ༔ སེམས་ལ་ཉམས་རྟོགས་ཏིང་འཛིན་སྤར་དུ་གསོལ༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་ཐོད་ཕྲེང་རྩལ་ཨ་ཡུརྫྙཱ་ན་པུརྞྱེ་ཚེ་བྷྲུཾ་ནྲྀ་ཛ་སརྦ་སིདྡྷི་ཕ་ལ་ཧཱུྃ༔ རྩ་སྔགས་ཤམ་བུར་ཚེ་གཟུངས་དང་༔ མ་མ་སརྦ་སིདྡྷི་ཧཱུྃ༔ དེ་ནས་ཚེ་རྒྱས་གདབ་པ་ནི༔ མདའ་དར་སྤྱི་བོར་རྒྱ་གྲམ་བཞག༔ ཨོཾ་ཧཱུྃ་ཏྲཱཾ་ཧྲཱིཿཨཱཿ སེམས་ཀྱི་ཁམས་ནས་ཉམས་པའི་ཚེ་ཁུག་ལ༔ འཁྲུལ་མེད་ཐུགས་ཀྱི་རྡོ་རྗེའི་རྒྱས་ཐོབ་ཅིག༔ ངག་གི་ཁམས་ནས་ཉམས་པའི་ཚེ་ཁུག་ལ༔ འགག་མེད་གསུང་གི་པདྨས་རྒྱས་ཐོབ་ཅིག༔ ལུས་ཀྱི་ཁམས་ནས་ཉམས་པའི་ཚེ་ཁུག་ལ༔ འགྱུར་མེད་སྐུ་ཡི་འཁོར་ལོས་རྒྱས་ཐོབ་ཅིག༔ ཀུན་གཞིའི་ཁམས་ནས་ཉམས་པའི་ཚེ་ཁུག་ལ༔ ཡོན་ཏན་མི་ཟད་ནོར་བུས་རྒྱས་ཐོབ་ཅིག༔ སྒོ་གསུམ་བྱ་བྱེད་ཉམས་པའི་ཚེ་ཁུག་ལ༔ ཕྲིན་ལས་མི་ཤིགས་རྒྱ་གྲམ་རྒྱས་ཐོབ་ཅིག༔ སྐུ་ལྔའི་དབྱིངས་སུ་སྦས་པའི་ཚེ་དང་སྲོག༔ དུག་ལྔའི་གདོན་གྱིས་ནམ་ཡང་གླགས་མི་རྙེད༔ བུདྡྷ་བཛྲ་རཏྣ་པདྨ་ཀརྨ་རཀྵ་རཀྵ་ཧཱུྃ༔ ཞེས་བརྗོད་མི་དམིགས་ངང་ལ་བཞག༔ དེས་ནི་དུས་ཟད་པ་ཡི་ཚེ༔ མི་ཟད་འཕེལ་ཞིང་རྒྱས་པ་དང་༔ བྱད་ཕུར་ལྷ་འདྲེའི་གནོད་པ་ཡི༔ གློ་བུར་རྐྱེན་ལས་ཐར་བར་ངེས༔ ས་མ་ཡཱ༔ གུ་ཧྱ༔