རྗེ་བཙུན་མི་ལའི་དབང་ཆོག་གྲུབ་གཉིས་འདོད་འཇོའི་དགའ་སྟོན།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ རྗེ་བཙུན་མི་ལའི་དབང་ཆོག་གྲུབ་གཉིས་འདོད་འཇོའི་དགའ་སྟོན་བཞུགས༔

བློ་འདས་ཆོས་སྐུའི་དབང་མཆོག་གིས༔ བློ་བྲལ་འདོད་མའི་རྒྱལ་ས་རུ༔ དོན་གཉིས་ལྷུན་གྲུབ་ཆོས་ཀྱི་རྒྱལ༔ རྗེ་བཙུན་བཞད་པ་རྡོ་རྗེ་ཡི༔ དབང་ཆོག་གྲུབ་གཉིས་འདོད་འཇོའི་གཏེར༔ ལས་སྐལ་ལྡན་པས་ཉམས་སུ་ལོངས༔ འདི་ལ་སྦྱོར་དངོས་རྗེས་དང་གསུམ༔ དང་པོ་སྦྱོར་བ་ཡོ་བྱད་ཀྱི༔ བཤམས་བཀོད་རིམ་པ་འདི་བཞིན་བྱ༔ འདབ་བཞི་འབྲུ་ཚོམ་མུ་ཁྱུད་ཟླུམ༔ དབུས་སུ་བུམ་པ་བླ་མེད་ཀྱི༔ བུམ་བཅུད་སོ་ལྔས་གཏམས་པ་ལ༔ དྲི་བཟང་ཆུ་ཡིས་སུམ་ཆ་བཀང་༔ ཁ་རྒྱན་ཤིང་དང་རྨ་བྱའི་སྒྲོ༔ སྐུ་ཙཀ་དང་བཅས་དབུས་སུ་བཀོད༔ གཡས་སུ་བྷནྡྷ་བདུད་རྩིས་བཀང་༔ གཡོན་དུ་རྡོ་རྗེ་དར་མཐིང་བརྒྱན༔ མདུན་དུ་གཏོར་མ་སྨན་རཀ་བཤམས༔ རྒྱབ་ཏུ་མདའ་དར་མེ་ལོང་ཅན༔ ཉེར་སྤྱོད་མཆོད་པས་མཐའ་ནས་བསྐོར༔ ཚོགས་ཀྱི་ཡོ་བྱད་ཤ་ཆང་སོགས༔ མ་ཚང་མེད་པར་འདུ་བྱས་ལ༔ ཆོ་ག་གཞུང་མཐུན་བསྙེན་པ་བསྐྱར༔ བྷྲུཾ་ལས་རིན་ཆེན་བུམ་པ་ནི༔ མཚན་ཉིད་ཀུན་ལྡན་མངོན་དགའི་ཞིང་༔ ལྟ་ན་སྡུག་པའི་ཕོ་བྲང་དབུས༔ པད་ཉི་ཟླ་བ་སུམ་བརྩེགས་ཁྲིར༔ ཁྱབ་བདག་སྟོན་པ་རྡོ་རྗེ་སེམས༔ གྲུབ་བརྒྱའི་རྒྱལ་པོ་རྗེ་བཙུན་ཉིད༔ དཀར་དམར་མདངས་ལྡན་ཞི་འཛུམ་བཞད༔ ཐུགས་ཀར་པདྨ་ཟླ་བའི་སྟེང་༔ འོད་ལྔའི་ཐིག་ལེ་ལྔ་ཚོམ་དབུས༔ ཨོཾ་ཧཱུྃ་ཏྲཱཾ་ཧྲཱིཿཨཱཿཡིས་མཚན༔ མཐའ་བསྐོར་མཚན་སྔགས་གཡས་སུ་འཁོར༔ འོད་ཟེར་སྣ་ལྔ་ཕྱོགས་བཅུར་འཕྲོས༔ མཁའ་ཁྱབ་རྒྱལ་བའི་ཐུགས་རྒྱུད་བསྐུལ༔ ཚུར་འདུས་སྐུ་དང་སྔགས་འཁོར་ལ༔ ཐིམ་པས་བདུད་རྩིའི་ཆུ་རྒྱུན་བབས༔ བུམ་ནང་ལྟེམ་གྱིས་གང་བར་དམིགས༔ རྩ་སྔགས་ཤམ་བུར་ཁྲུས་སྔགས་བཏགས༔ གཟུངས་ཐག་བརྐྱང་ཞིང་དམིགས་པ་གཟིར༔ སླར་ཡང་བདག་གི་ཐུགས་ཀ་ནས༔ འོད་འཕྲོས་བུམ་ལྷའི་ཐུགས་རྒྱུད་བསྐུལ༔ རྗེས་ཆགས་ཐུགས་རྗེའི་འོད་དུ་ཞུ༔ བུམ་པའི་བདུད་རྩིར་རོ་གཅིག་འདྲེས༔ དེ་བཞིན་དབང་རྫས་གཞན་རྣམས་ཀྱང་༔ ལྷར་བསྐྱེད་སྤྱན་དྲངས་འོད་དུ་ཞུ༔ བྱིན་བརླབས་རྫས་ཀྱི་རྣམ་པར་གྱུར༔ མཆོད་བསྟོད་བདག་དབང་བླང་བ་ནི༔ རང་གི་རྣམ་ཤེས་ཚོགས་བརྒྱད་དང་༔ རྟེན་ཡུལ་ཕུང་ཁམས་སྐྱེ་མཆེད་རྣམས༔ སློབ་བུའི་ཚུལ་དུ་འདུན་པས་བསྒྱུར༔ རིག་པ་བདེ་གཤེགས་སྙིང་པོ་ནི༔ རིགས་བདག་བླ་མའི་ངོ་བོ་སྟེ༔ དེ་བཞིན་སྒྲུབ་རྫས་ཡོ་བྱད་ཀུན༔ སྤྲུལ་པའི་ལྷ་ཡི་ངོ་བོར་བསྒོམ༔ མེ་ཏོག་དོར་ཞིང་འདི་སྐད་བརྗོད༔ ཨེ་མ་ཧོ༔ རིགས་ཀུན་ཁྱབ་བདག་དྲིན་ཆེན་བླ་མ་དང༔ རིག་པ་བདེ་གཤེགས་སྙིང་པོ་དབྱེར་མ་མཆིས༔ ལྟ་བ་རང་ཞལ་མཇལ་བའི་མེ་ཏོག་འབུལ༔ མ་དག་ཕུང་ཁམས་སྐྱེ་མཆེད་སློབ་བུ་ཡི༔ གཉིས་འཛིན་ལས་ཉོན་བག་ཆགས་གཏོར་བ་དང༔ ཡེ་བབ་སྐུ་བཞིའི་ཡེ་ཤེས་རྒྱུན་བླུགས་ནས༔ འཕོ་མེད་དོན་གྱི་དབང་མཆོག་བསྐུར་དུ་གསོལ༔ ཨོཾ་བཛྲ་ས་མ་ཡཱ་ཨོཾ༔ ཨཱཿབཛྲ་ས་མ་ཡཱ་ཨ༔ ཧཱུྃ་བཛྲ་ས་མ་ཡཱ་ཧཱུྃ༔ སྭ་བཛྲ་ས་མ་ཡཱ་སྭ༔ ཧཱ་བཛྲ་ས་མ་ཡཱ་ཧཱ༔ ཞེས་བརྗོད་སྒྲུབ་རྫས་གནས་ལྔ་རུ༔ སོ་སོར་གཏུགས་ཤིང་བདག་འཇུག་ལེན༔ བདག་དང་དཀྱིལ་འཁོར་ལྷ་ཚོགས་རྣམས༔ དབྱེར་མེད་རོ་གཅིག་འདྲེས་པར་བསྒོམ༔ ས་མ་ཡཱ༔ དེ་ནས་སློབ་མ་གྲལ་ལ་འཁོད༔ ཁྲུས་བྱས་བགེགས་བསྐྲད་སྲུང་འཁོར་བསྒོམ༔ ཐུན་མོང་ཆོས་བཤད་སྔོན་སོང་ནས༔ སྐབས་དོན་ལོ་རྒྱུས་འདི་བཞིན་བརྗོད༔ དེ་ཡང་སྔོན་བསྐལ་པ་དཔག་ཏུ་མེད་པའི་དུས་ནས་རྫོགས་པའི་སངས་རྒྱས་རྡོ་རྗེ་སེམས་དཔའ་ཞེས་བྱ་བར་གྱུར་ནའང་། ཐུགས་བསྐྱེད་སྨོན་ལམ་གྱི་དབང་གིས་སླར་ཡང་རུས་མི་ལ་ཞེས་པར་སྲིད་བཟུང་ནས་ཆུང་ངུའི་དུས་སུ་འཁོར་བ་ལ་བློ་སུན་པའི་ཕྱིར། གཉེན་དང་བྲལ་ཞིང་སྡུག་བསྔལ་གྱི་ཚོར་བ་དུ་མས་ཐུགས་དབྱུང་བར་མཛད་པའི་ཚུལ་བསྟན་པ་དང་། དེ་བཞིན་དུ་ཕ་ཁུ་དགྲ་རུ་ལངས་ནས་མངོན་སྤྱོད་ཀྱི་ལས་ལ་བརྟེན་ཏེ་དགྲ་སྡེ་ཐལ་བར་བརླགས་པས་རེ་ཞིག་སྡིག་པའི་ལས་སྤྱོད་པར་མཛད་ཚུལ་བསྟན་པ་ནི་ཀུན་འབྱུང་རྒྱུ་འབྲས་ཆ་དང་བཅས་པ་སྤང་བྱར་སྟོན་པའི་བརྡ་དང་། དེ་ལྟ་བུའི་རྒྱུ་དང་འབྲས་བུ་ལ་ངེས་པར་འབྱུང་ནས་དཀའ་སྤྱད་སྙིང་རུས་དུ་མའི་སྒོ་ནས་མར་སྟོན་ཆོས་ཀྱི་བློ་གྲོས་ལས་ནཱ་རོའི་ཟབ་ལམ་ཆོས་དྲུག་གི་གདམས་པ་གསན་ཅིང་དེ་དག་གི་དོན་རི་ཁྲོད་དབེན་པར་རྩེ་གཅིག་ཏུ་བསྒྲུབས་པས་གྲུབ་འབྲས་མངོན་དུ་གྱུར་ཏེ་ཚེ་དེར་རྒྱལ་བ་རྡོ་རྗེ་འཆང་གི་རྒྱལ་སྲིད་ལ་དབང་བསྒྱུར་བ་ནི། ལམ་དང་དེ་ལ་བསྟེན་ཏེ་འགོག་པ་མངོན་དུ་བྱེད་དགོས་པའི་བརྡའོ། །དེ་ལྟ་བུའི་ཁམས་གསུམ་ཆོས་ཀྱི་རྒྱལ་པོ་རྗེ་བཙུན་མི་ལ་རས་པ་དེ་ཉིད་ཀྱི་སྒྲུབ་ཐབས་དབང་དང་འབྲེལ་བའི་གདམས་པ་ཟབ་མོ་འདི་ཉིད་བཀའ་གཏེར་དག་སྣང་གི་སྲོལ་འགའ་ཞིག་ཏུ་འདུག་ནའང་རྗེ་བཙུན་དེ་ཉིད་ལ་མི་ཕྱེད་པའི་དད་པ་དང་ལྡན་པའི་གང་ཟག་དམན་པའི་ཚུལ་ཅན་སྐལ་ལྡན་ལུང་རིག་གླིང་པར་གྲགས་པ་བདག་ལ་ཨོ་རྒྱན་གྱི་མཁན་པོ་པདྨ་སམ་བྷ་ཝ་དང་། རྒྱལ་ཡུམ་མཁར་ཆེན་མཚོ་རྒྱལ། གྲུབ་དབང་བྱང་ཆུབ་རྡོ་རྗེ། རྒྱལ་ཡུམ་འཕགས་མ་སྒྲོལ་མ་སོགས་ཀྱི་ཞལ་མཐོང་ལུང་ཟིན་ཅུང་ཟད་ཀྱི་དགེ་མཚན་མཐོང་བ་དང་། དེ་སྐབས་སུ་མཁས་དང་གྲུབ་པའི་དབང་པོ་བླ་མ་ཨོ་རྒྱན་ལྷུན་གྲུབ་ཀྱིས་སྔོན་སྨོན་དུས་བབས་རྟེན་འབྲེལ་ཟབ་མོས་ཐུགས་རྒྱུད་བསྐུལ་ནས་མངོན་པར་དྭངས་པའི་རི་མོའི་ལམ་ནས་གྲུབ་བརྒྱའི་རྒྱལ་པོ་བཞད་པ་རྡོ་རྗེའི་སྒྲུབ་ཐབས་དགོངས་གཏེར་དུ་ཡོད་ན་དགོས་ཚུལ་གསུངས་པ་ལ་བརྟེན་ནས། རྗེ་བཙུན་བླ་མ་དེ་ཉིད་ལ་གསོལ་བ་ཡང་ཡང་བཏབ་པས། ཉིན་གཅིག་མདུན་མཁར་རྗེ་བཙུན་མི་ལ་རས་པ་དེ་ཉིད་དངོས་སུ་བྱོན་ནས་དབང་བསྐུར་བྱིན་གྱིས་བརླབས་པའི་སྣང་བ་བྱུང་ཞིང་། སྒྲུབ་ཐབས་དབང་དང་བཅས་པ་བློ་ངོར་རང་རིག་ཐོགས་པ་མེད་པར་ཤར་ནའང་ལེ་ལོའི་དབང་གིས་རེ་ཞིག་ཕྱི་བཤོལ་དུ་ལུས་སོང་བ། སླར་ཡང་སྙིགས་དུས་ཀྱི་འགྲོ་བའི་དེད་དཔོན་ཆེན་པོ་བྷུདྡྷའི་མཚན་ཅན་གྱིས་བཀས་བསྐུལ་བ་དང་། དམ་པ་དེ་ཉིད་ཀྱང་ཆོས་ཀྱི་བདག་པོ་རང་གི་དྲུང་དུ་སླེབས་ཏེ་རྟེན་འབྲེལ་ཟབ་མོའི་མཚམས་སྦྱོར་དང་བཅས་ཡི་གེའི་ལམ་དུ་བཀོད་པ་འདི་ཉིད་བྱིན་རླབས་ཀྱི་བརྒྱུད་ཐག་ཉེ་ཞིང་ཟོལ་ཟོག་དང་རང་འདོད་ཀྱི་འཁྲི་བས་མ་བཅིངས་པར་བརྒྱུད་པ་དྲུག་ལྡན་དང་ཡིད་ཆེས་པའི་གནས་སུ་བཟུང་བར་འོས་པ་དེ་ཡི་སྒོ་ནས་བྱིན་རླབས་དབང་བསྐུར་གྱི་རིམ་པ་སྒྲུབ་པར་བྱེད་པ་ལ་སློབ་མ་རྣམས་ཀྱིས་སྒོ་གསུམ་དད་པ་གཅིག་དྲིལ་དང་ལྡན་པའི་སྒོ་ནས་མཎྜལ་ཕུལ་བར་མཛོད། མཎྜལ་འབུལ་ཞིང་གསོལ་གདབ་ནི༔ མདུན་མཁར་ཚོགས་ཞིང་ལྷར་གསལ་ཏེ༔ དེ་ཉིད་བླ་མ་དབྱེར་མེད་བསྒོམ༔ སྐྱབས་འགྲོ་སེམས་བསྐྱེད་ཚོགས་བསག་བྱ༔ སླར་ཡང་གསོལ་བ་འདི་བཞིན་གདབ༔ ཨེ་མ་རྗེ་བཙུན་བླ་མ་སྤྲུལ་པའི་སྐུ༔ བདག་གི་ཐ་མལ་སྒོ་གསུམ་ལས་ཉོན་བཅས༔ སྐད་ཅིག་གནས་འགྱུར་སྐུ་བཞི་མངོན་གྱུར་ཕྱིར༔ བླ་མའི་སྐུ་གསུང་ཐུགས་ཀྱི་དབང་བསྐུར་སྩོལ༔ ཅེས་པས་ལན་གསུམ་གསོལ་བ་གདབ༔ དེ་ནས་བླ་མས་ལན་འདི་སྦྱིན༔ ཁྱོད་རྣམས་ཡང་དག་སངས་རྒྱས་སྒྲུབ་འདོད་ཅིང་༔ ཆོས་ཕྱིར་དཀའ་སྤྱད་སྙིང་རུས་མཛད་ནུས་ན༔ རྗེ་བཙུན་བླ་མའི་བྱིན་རླབས་དབང་བསྐུར་སྦྱིན༔ དེ་ཕྱིར་དད་དང་གུས་པས་དང་དུ་ལོངས༔ དེ་ནས་བུམ་པ་སྐུ་ཡི་དབང་༔ སློབ་བུའི་ལུས་ལ་བསྐུར་བའི་ཕྱིར༔ ཐོག་མར་བྱིན་ཆེན་དབབ་པ་ནི༔ སློབ་བུ་ལྷ་རུ་འདི་བཞིན་བསྐྱེད༔ ཨོཾ་མ་ཧཱ་ཤུ་ནྱ་ཏ་སོགས། སྟོང་པ་ཆོས་སྐུ་ལྷ་ཡི་རྩལ༔ འགག་མེད་གཟུགས་སྐུའི་རོལ་པ་ནི༔ སློབ་མ་སྐད་ཅིག་གནས་འགྱུར་ཏེ༔ རྗེ་བཙུན་རྒྱལ་པོ་བཞད་པ་རྡོར༔ སྨུག་ནག་ཁྲོ་འཛུམ་རྔམ་པའི་ཞལ༔ ཁམ་འབོལ་དབུ་སྐྲའི་འཕྱང་འཕྲུལ་དང་༔ དུང་གི་ཝ་མིག་སྙན་རྒྱན་འཁྲོལ༔ གཡས་པས་འགྲམ་བཏེགས་གཡོན་ཐོད་པ༔ ཟག་མེད་བདུད་རྩིས་བཀང་བ་བསྣམས༔ ཞབས་གཉིས་ཕྱེད་སྐྱིལ་རོལ་པའི་སྟབས༔ དབང་མདོག་སྒོམ་ཐག་བླ་གོས་དཀར༔ སྨད་དཀྲིས་སྔོན་པོ་དར་དཔྱང་འཕྱང་༔ དེ་ལྟར་གསལ་བའི་གནས་གསུམ་དུ༔ ཡིག་འབྲུས་མཚན་པའི་འོད་ཟེར་གྱིས༔ སྐུ་གསུམ་རྒྱལ་བ་སྤྱན་དྲངས་ཏེ༔ སློབ་མའི་ལུས་ལ་ཐིམ་པར་བསམ༔ རོལ་མོ་འཁྲོལ་ཞིང་དྲི་ཞིམ་བདུག༔ ཨེ་མ་ཧོ༔ སྐུ་གསུམ་དག་པའི་ཞིང་བཞུགས་པའི༔ རྒྱལ་བ་སྲས་དང་སློབ་མར་བཅས༔ རྗེ་བཙུན་བཞད་པ་རྡོ་རྗེ་དང༔ ཐ་མི་དད་པའི་ངེས་ཤེས་མཐུས༔ སྐུ་དང་ཡིག་འབྲུ་ཕྱག་མཚན་རྣམས༔ ཁ་བ་བུ་ཡུག་འཚུབས་ལྟར་བྱོན༔ སློབ་བུའི་ལུས་ལ་བྱིན་ཆེན་ཕོབ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཧ་ས་བཛྲ་ཛྙཱ་ན་ཨ་ཝེ་ཤ་ཡ་ཕེཾ་ཕེཾ༔ ལུས་ངག་ཡིད་ལ་བྱིན་དབབ་རྟགས༔ དབང་པོའི་རིམ་པ་བཞིན་དུ་འབྱུང་༔ བརྟན་པར་བྱ་བའི་སྔགས་འདི་བརྗོད༔ ཏིཥྛ་བཛྲ་སིདྡྷི་ཧཱུྃ༔ དེ་ནས་བུམ་པ་སྤྱི་བོར་བཞག༔ ཨོཾ་བདེ་གཤེགས་ཀུན་གྱི་སྐུ་ཡི་དབང༔ སློབ་བུའི་ལུས་ལ་བསྐུར་བ་ཡིས༔ མི་དགེ་རྒྱུ་འབྲས་གནས་དག་ནས༔ འགྱུར་མེད་སྐུ་ཡི་དབང་ཐོབ་ཤོག༔ ཨོཾ་ཨཱཿཧཱུྃ་མ་ཧཱ་གུ་རུ་རཏྣ་ཡོ་ག་ཧ་ས་བཛྲ་སརྦ་སིདྡྷི་ཧཱུྃ༔ རྩ་སྔགས་ཤམ་བུར་འདི་ཉིད་གདགས༔ ཀཱ་ཡ་ཨ་བྷི་ཥིཉྩ་ཨོཾ༔ བུམ་ཆུ་བླུད་ཅིང་དག་འབྲས་བཤད༔ ཐོད་པ་བདུད་རྩི་མགྲིན་པར་བཞག༔ ཨཱཿ བདེ་གཤེགས་ཀུན་གྱི་གསུང་གི་དབང༔ སློབ་བུའི་ངག་ལ་བསྐུར་བ་ཡིས༔ མ་དག་ངག་སྒྲིབ་གནས་གྱུར་ནས༔ ཡང་དག་གསུང་གི་དབང་ཐོབ་ཤོག༔ རྩ་སྔགས་ཝཱཀྐ་ཨ་བྷི་ཥིཉྩ་ཨཱ༔ རྡོ་རྗེ་རྩེ་ལྔ་སྙིང་ཁར་བཞག༔ ཧཱུྃ་བདེ་གཤེགས་ཀུན་གྱི་ཐུགས་ཀྱི་དབང༔ སྐལ་ལྡན་སེམས་ལ་བསྐུར་བ་ཡིས༔ ཡིད་འཛིན་རྟོག་པ་གནས་གྱུར་ནས༔ འཕོ་མེད་ཆོས་སྐུའི་དབང་ཐོབ་ཤོག༔ རྩ་སྔགས་ཙིཏྟ་ཨ་བྷི་ཥིཉྩ་ཧཱུྃ༔ གཏོར་མ་སློབ་བུའི་གནས་བཞིར་གཏུགས༔ ཧཱུྃ་རྗེ་བཙུན་བཞད་པ་རྡོ་རྗེ་ཡི༔ ཡོན་ཏན་ནོར་བུའི་བང་མཛོད་ནས༔ ལྷ་སྔགས་ཏིང་འཛིན་དབང་བསྐུར་བས༔ སློབ་བུའི་སྒོ་གསུམ་སྨིན་པར་ཤོག༔ རྩ་སྔགས་གུ་ཎ་ཨ་བྷི་ཥིཉྩ་ཏྲཾ༔ སྣ་ཚོགས་མདའ་དར་སྤྱི་བོར་བཞག༔ ཧོ༔ ལས་བཞིའི་ཕྲིན་ལས་རབ་འབྱམས་ཀྱི༔ བདུད་དང་ལོག་འདྲེན་ཚར་གཅོད་པ༔ མཐུ་སྟོབས་ནུས་པའི་དབང་བསྐུར་བས༔ རྒྱལ་བའི་ཕྲིན་ལས་ཀུན་སྒྲུབ་ཤོག༔ རྩ་སྔགས་ཀརྨ་བྷི་ཤྭ་ཨ་བྷི་ཥིཉྩ་ཧཱ༔ དེ་ནས་སྒྲུབ་ཡིག་སྤྱི་བོར་བཞག༔ བཀའ་གཏད་སྨོན་ལམ་འདི་བཞིན་བྱ༔ ཨེ་མ་ཧོ༔ ཆོས་སྐུའི་སྟོན་པ་ཀུན་ཏུ་བཟང་༔ ལོངས་སྤྱོད་རྫོགས་སྐུ་རྡོ་རྗེ་སེམས༔ གང་འདུལ་སྤྲུལ་སྐུ་མི་ལ་རྗེའི༔ སྐུ་གསུང་ཐུགས་ཀྱི་བྱིན་རླབས་ཀུན༔ སློབ་བུའི་རྒྱུད་ལ་རབ་འཕོས་ནས༔ སྨིན་ཅིང་གྲོལ་བར་མཛད་དུ་གསོལ༔ ལུས་ལ་ལྷ་དབང་བསྐུར་དུ་གསོལ༔ ངག་ལ་སྔགས་དབང་བསྐུར་དུ་གསོལ༔ ཡིད་ལ་ཐུགས་དབང་བསྐུར་དུ་གསོལ༔ སྒྱུ་མའི་ལུས་འདི་མ་དོར་བར༔ ལྕགས་ཁམས་གསེར་འགྱུར་རྩིས་ཐེབས་བཞིན༔ རིག་འཛིན་གྲུབ་པའི་སྤྱི་གཟུགས་ཀྱི༔ གསང་གསུམ་མངོན་དུ་འགྱུར་བར་ཤོག༔ གཞན་ཡང་བླ་མའི་མཚན་སྔགས་དང་༔ ཡི་དམ་མཁའ་འགྲོ་ཆོས་སྐྱོང་གི༔ སྔགས་བསྒྲགས་རོལ་མོའི་སྒྲ་ཡང་འཁྲོལ༔ སྤྲོ་ན་རྒྱལ་སྲིད་སྣ་བདུན་སྦྱིན༔ དམ་ཚིག་ཁས་བླངས་མཎྜལ་ཕུལ༔ བསྔོ་སྨོན་ཤིས་བརྗོད་མཐའ་རྒྱས་བྱ༔ ས་མ་ཡཱ༔ ཞེས་རྗེ་བཙུན་མི་ལ་རས་པའི་དབང་ཆོག་འདི་ཉིད་སྐལ་ལྡན་གྱི་སློབ་མའི་ཐུགས་བཞེད་ལྟར། སྐལ་ལྡན་ལུང་རིག་གླིང་པས་དགོངས་གསང་མཁའ་འགྲོའི་གན་མཛོད་ནས་བྱུང་སྟེ་ཚིག་གི་ལམ་དུ་བརྗོད་པ་བསྐུལ་བ་པོ་དམ་པ་དེ་ཉིད་ཀྱིས་ཀུན་རྫོབ་ཡི་གེའི་གཟུགས་སུ་བྲིས་པ་དུས་གསུམ་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག། དགེའོ། །དགེའོ། །དགེའོ།།