ཉམས་མགུར་སྐལ་ལྡན་ཡིད་འཕྲོག

རྗེ་བཙུན་སྒྲུབ་པའི་ཟབ་ཏིག་ལས༔ ཉམས་མགུར་སྐལ་ལྡན་ཡིད་འཕྲོག་བཞུགས༔ ཀྱེ་ཧོ་གསོན་དང་སྐལ་ལྡན་ཀུན༔ ཐོག་མར་ཆོས་སྒོར་འཇུག་པ་ལ༔ ལས་ཉོན་འཁོར་བའི་རྒྱ་མཚོ་ལས༔ ཞེན་ལོག་ངེས་འབྱུང་སྙིང་ནས་དགོས༔ བར་དུ་ཉམས་ལེན་བྱེད་པ་ལ༔ ལུས་ངག་སྡིག་པའི་གཡོག་པོ་འདི༔ དྲན་ཤེས་ཁྱིམ་གྱི་བྲན་དུ་ཁོལ༔ ཡེངས་མེད་སྙིང་ནས་བརྩོན་པ་དགོས༔ མ་དག་ལས་ཀྱི་རྩ་དང་རླུང་༔ ཐབས་གྲོལ་ལམ་གྱི་མན་ངག་གིས༔ ཡན་པར་མ་གཏོང་གནད་དུ་སྣུན༔ སྣང་སེམས་དབང་དུ་འདུས་པ་དགོས༔ རིགས་དྲུག་རྟོག་པའི་སྐྱོན་ལས་བྱུང་༔ གང་དུ་བཙལ་ཀྱང་རང་བཞིན་མེད༔ དཔེར་ན་མཁའ་དང་སྤྲིན་ཕུང་བཞིན༔ རང་གི་རྩལ་དུ་ཤེས་པ་དགོས༔ རང་བྱུང་ཕྱག་རྒྱ་ཆེན་པོ་ནི༔ གཞན་གྱི་རྐྱེན་ལ་ལྟོས་པ་མིན༔ རྒྱུ་འབྲས་བྱ་རྩོལ་བྲལ་བ་དགོས༔ སྣང་བ་ཐམས་ཅད་སེམས་ཀྱི་རྩལ༔ སེམས་ཉིད་སྟོང་པའི་རང་བཞིན་ཏེ༔ སྟོང་པ་ཆོས་སྐུའི་རང་བཞིན་ཅན༔ རང་ངོ་ཤེས་པའི་ཉམས་ལེན་གཅེས༔ ལྟ་བ་བློ་ལས་འདས་པ་དང་༔ སྒོམ་པ་མ་ཡེངས་མི་སྒོམ་དང་༔ སྤྱོད་པ་སྤང་བླང་གཉིས་མེད་དང་༔ འབྲས་བུ་རེ་དོགས་བྲལ་བ་དགོས༔ ལུས་ལ་ཞེན་འཛིན་བྱུང་བ་ན༔ སྣང་སྟོང་ལྷ་སྐུ་ལམ་དུ་ཁྱེར༔ ངག་ལ་འཛིན་རྟོག་བྱུང་བ་ན༔ གྲགས་སྟོང་སྔགས་སུ་ལམ་ཁྱེར་དགོས༔ སེམས་ཀྱི་འཛིན་རྟོག་གང་ཤར་ཀུན༔ རང་ངོ་ཤེས་པས་རང་སར་གྲོལ༔ མདོར་ན་ལུས་ངག་ཡིད་གསུམ་པོ༔ སྐུ་གསུང་ཐུགས་སུ་ལམ་ཁྱེར་དགོས༔ ཕ་རོལ་དགྲ་གཉེན་སྣ་ཚོགས་ཀུན༔ རྨི་ལམ་ཡུལ་གྱི་སྐྱེ་བོ་བཞིན༔ གང་ཡང་བདེན་པར་མ་གྲུབ་པས༔ བདེན་མེད་སྒྱུ་མའི་ལམ་ཁྱེར་དགོས༔ འཇིག་རྟེན་ནོར་རྫས་མཁོ་དགུ་ཀུན༔ བསགས་བསྲུང་སྤེལ་བའི་སྡུག་བསྔལ་ལས༔ རང་ལ་དགོས་ཚེ་ཕན་པ་ཆུང་༔ དེ་ཕྱིར་སྙིང་ནས་ཞེན་ལོག་དགོས༔ མདོར་ན་སྲིད་དང་ཞི་བའི་ཆོས༔ ཐམས་ཅད་བསླུ་བའི་ཆོས་ཅན་ཏེ༔ བསླུ་མེད་རིག་པའི་བཙན་ས་ཟུངས༔ གནད་ཀུན་འདུས་པའི་མན་ངག་གོ༔ མནྡྲ་གུ་ཧྱ༔ རྫོགས་ཆེན་པ་ལུང་རིག་གླིང་པས་སོ༔

དག་སྣང་མཚོ་རྒྱལ་དགོངས་པའི་གསང་མཛོད་ལས༔ རྗེ་བཙུན་སྒྲུབ་པའི་བཀའ་སྲུང་སྨན་བཙུན་མཆེད་ལྔའི་གཏོར་འབུལ་ཡིད་བཞིན་ལྷུན་གྲུབ་བཞུགས༔