བཀའ་སྲུང་སྨན་བཙུན་མཆེད་ལྔའི་གཏོར་འབུལ་ཡིད་བཞིན་ལྷུན་གྲུབ།
རྣལ་འབྱོར་དབང་ཕྱུག་སྐུ་ལ་འདུད༔ གང་གི་བཀའ་ཉན་ཌཱཀྐི་མ༔ མཆོད་ཐབས་རྒྱུན་ཁྱེར་འདི་བཞིན་ཏེ༔ མཎྜལ་དབུས་སུ་རང་བྱུང་ཤེལ༔ གཏོར་མ་དཀར་ཟླུམ་གཙོ་འཁོར་ལྔ༔ སྐྱུ་གུ་རིལ་བུ་ཅི་མང་དང་༔ ཉི་ཟླ་ནོར་བུ་དར་གྱིས་བརྒྱན༔ དཀར་མངར་རྫས་དང་ཕྱེ་མར་སྤོས༔ གསེར་སྐྱེམས་འོ་ཕུད་བསང་དུད་སོགས༔ བཀོད་ལེགས་རྒྱུ་གཙང་གཙང་མར་བཤམས༔ རང་ཉིད་བླ་མའི་སྐུ་རུ་བསྒོམ༔ རོལ་མོ་འཁྲོལ་ཞིང་འདི་སྐད་དོ༔ ཨེ་མ་ཧོ༔ ངོ་མཚར་ཡིད་འོང་གངས་ཅན་བོད་ཀྱི་ལྗོངས༔ རི་མཐོ་ས་གཙང་གངས་ཀྱི་ལྷུན་པོ་བརྗིད༔ སྨན་དང་མེ་ཏོག་ནེའུ་གསིང་སྐྱེད་མོས་ཚལ༔ ནགས་ཚལ་བྲག་རིའི་བ་གམ་ལྷུན་ཆགས་པ༔ གང་ལ་བརྟེན་བཅས་པདྨའི་བཀའ་ཉན་གཙོ༔ ཡེ་ཤེས་གྲུབ་ཀྱང་འཁོར་བའི་ཆ་ལུགས་ཅན༔ འཇིག་རྟེན་མིག་བསྒྱུར་སྨན་བཙུན་ཌཱཀྐི་མ༔ ཚེ་རིང་མཆེད་ལྔ་གཙོ་འཁོར་སྤྲུལ་པར་བཅས༔ མ་ངེས་སྣ་ཚོགས་སྒྱུ་འཕྲུལ་ངོམ་བཞིན་དུ༔ རྣལ་འབྱོར་གདུང་བའི་འབོད་པ་འདིར་གསོན་ལ༔ ཐོགས་པ་མེད་པར་གནས་འདིར་གཤེགས་སུ་གསོལ༔ དམ་ཚིག་དབང་གིས་དགྱེས་ཤིང་བརྟན་པར་བཞུགས༔ རྒྱལ་བའི་བསྟན་སྲུང་དབང་མོ་གཙོ་འཁོར་ལ༔ གསང་གསུམ་ཡོན་ཏན་དྲན་པས་གུས་ཕྱག་འཚལ༔ ལྷ་ཀླུ་མི་ཡི་འཇིག་རྟེན་ཐམས་ཅད་ན༔ མཛེས་ཤིང་ཡིད་འོང་མཆོད་པའི་བྱེ་བྲག་རྣམས༔ བློ་ཡིས་བླངས་ཏེ་སྨན་བཙུན་མཆེད་ལྔ་ལ༔ གུས་པས་འབུལ་ལོ་བརྩེ་བའི་ཐུགས་ཀྱིས་བཞེས༔ ཁྱད་པར་མེ་ཏོག་སྤོས་དང་སྣང་གསལ་མེ༔ བཟང་པོ་དྲི་ཆབ་རོ་ལྡན་ལྷ་ཡི་ཟས༔ སྙན་འཇེབས་ཡིད་འོང་གླུ་གར་རོལ་མོའི་སྒྲ༔ རྒྱལ་སྲིད་རིན་ཆེན་བདུན་དང་དཔག་བསམ་ཤིང༔ རྨད་བྱུང་གཏེར་གྱི་བུམ་པ་འདོད་འཇོའི་བ༔ སྐྱེད་ཚལ་ཟས་གོས་དཀོར་ནོར་བསྐང་རྟེན་རྫས༔ ཡིད་འོང་རྨ་བྱ་སྤུ་སྡུག་ནེའུ་ཙོ་སྒེག༔ འདབ་ཆགས་བྱ་རིགས་མཁའ་ལ་འཇའ་ལྟར་འཁྲིགས༔ ཤ་རྐྱང་རི་དྭགས་སྣ་ཚོགས་རྡུལ་ལྟར་འཁྲིགས༔ སྲོག་ཆགས་གཅན་གཟན་ཆེ་དགུ་རྔམས་ཤིང་རོལ༔ སྨན་གཏོར་རཀྟ་དམ་རྫས་ལྷུན་པོར་སྤུངས༔ གསེར་སྐྱེམས་ཇ་ཆང་འོ་ཞོ་མཚོ་ལྟར་བསྐྱིལ༔ བདུད་རྩི་ཤིང་ལྔའི་དུད་པ་སྤྲིན་ལྟར་གཏིབས༔ གང་ཡང་མ་ཚང་མེད་པའི་མཆོད་རྫས་འདིས༔ ཇོ་མོ་བཀྲ་ཤིས་ཚེ་རིང་ཐུགས་དམ་བསྐང༔ སྨན་བཙུན་མཐིང་གི་ཞལ་བཟང་ཐུགས་དམ་བསྐང༔ ནོར་སྟེར་ཅོད་པཎ་མགྲིན་བཟང་ཐུགས་དམ་བསྐང༔ འདོད་འབྱུང་མི་གཡོ་བློ་བཟང་ཐུགས་དམ་བསྐང༔ ནོར་སྲུང་གཏལ་དཀར་འགྲོ་བཟང་ཐུགས་དམ་བསྐང༔ གཞན་ཡང་འཁོར་ཚོགས་སྤྲུལ་པ་ཡང་སྤྲུལ་བཅས༔ དམ་ལྡན་སྐྱོང་ཞིང་དམ་མེད་སྒྲོལ་མཛད་པ༔ རིག་འཛིན་རྣལ་འབྱོར་ཀུན་གྱི་བཀའ་ཉན་མ༔ མཆོད་དོ་བསྟོད་དོ་བསྐང་ངོ་མངའ་གསོལ་ལོ༔ བདག་ཅག་མི་མཁས་ལས་ཉོན་དབང་གྱུར་པས༔ རྩ་གསུམ་སྲུང་མའི་ཐུགས་དང་འགལ་བའི་ལས༔ དམ་ཚིག་ཉམས་ཆག་ལྟ་སྒོམ་ཏིང་འཛིན་གཡེལ༔ སྙིང་ནས་བཤགས་སོ་བཟོད་གསོལ་དང་དུ་བཞེས༔ ཞི་བ་ཆོས་སྐུའི་ཀློང་ལས་མ་གཡོས་ཀྱང༔ གང་འདུལ་གཟུགས་སྐུའི་རྣམ་རོལ་ཅིར་ཡང་སྟོན༔ རྣམ་བཞིའི་ཕྲིན་ལས་སྒྲུབ་པའི་གར་མཁན་མ༔ སྨན་བཙུན་མཆེད་ལྔ་འཁོར་དང་བཅས་ལ་བསྟོད༔ ཁྱེད་ལ་འདོད་དོན་ཕྲིན་ལས་བཅོལ་བ་ནི༔ རྒྱལ་བསྟན་སྤྱི་དང་ཕྱག་རྫོགས་དབུ་མ་ཆེ༔ མཁའ་བཞིན་རྟག་བརྟན་ཉི་ལྟར་ཡོངས་ལ་ཁྱབ༔ བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་རྣམས༔ ཡར་ངོའི་ཟླ་ལྟར་འཕེལ་བའི་ཕྲིན་ལས་མཛོད༔ རྒྱལ་ཁམས་ཀུན་ཏུ་མི་ཕྱུགས་ནད་རིམས་ཞི༔ ལོ་ཉེས་སད་སེར་བཙའ་ཐན་རྒུད་པ་སོལ༔ ཚེ་བསོད་དཔལ་འབྱོར་བུ་ནོར་ལོངས་སྤྱོད་སྤེལ༔ སྣང་སྲིད་ཟས་ནོར་སྐྱེ་འགྲོ་དབང་དུ་སྡུས༔ སྡང་དགྲ་གཟུགས་མེད་གནོད་བྱེད་བགེགས་ཀྱི་སྡེ༔ ཐམས་ཅད་མིང་ཙམ་མེད་པར་རྡུལ་དུ་རློགས༔ མདོར་ན་བསམ་པའི་དོན་དང་བཅོལ་བའི་ལས༔ འབད་མེད་ལྷུན་གྱིས་གྲུབ་པའི་ཕྲིན་ལས་མཛོད༔ ས་མ་ཡཱ༔ འདི་ནི་དམ་ལྡན་རྣལ་འབྱོར་ཀུན༔ རྟག་ཏུ་སྐྱོང་བའི་མ་མ་སྟེ༔ དགྲ་བགེགས་སྲོག་གཅོད་ཤན་པ་མོ༔ རིག་འཛིན་སྒྲུབ་པའི་བཀའ་ཉན་ཅིང་༔ ཁྱད་པར་རྗེ་བཙུན་མི་ལ་ཡི༔ ཟབ་ལམ་སྒྲུབ་པའི་མཛའ་ན་མོ༔ མཆོད་བསྟོད་ཡིད་ལ་དྲན་པས་ཀྱང༔ འདོད་དོན་འགྲུབ་པར་ཐེ་མི་ཚོམ༔ དེ་ཕྱིར་སྙིང་ནས་བརྟེན་པ་གཅེས༔ གུ་ཧྱ༔ ཞེས་པའང་ཡང་ཟབ་ཆོས་ཀྱི་ཆ་ལག་ཏུ་དག་སྣང་བཅོས་བསླད་མེད་པར་སྐལ་ལྡན་ལུང་རིག་མིང་གིས་སྨྲས་ཤིང་ལུང་ཟིན་སྐྱེས་བུས་ཡི་གེར་སྤེལ་བ་ཛ་ཡནྟུ། །